ཟབ་མོ་བདུད་ཀྱི་བཅོད་ཡུལ་དང་འབྲེལ་བའི་བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	zab mo bdud kyi bcod yul dang 'brel ba'i brtul zhugs lam khyer gyi rdo rje'i thol glu 'khor 'das rang grol
Location	mkhyen brtse'i bka' babs Volume 2, Text 35, Pages 213-223 (Folios 1a to 6a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. zab mo bdud kyi bcod yul dang 'brel ba'i brtul zhugs lam khyer gyi rdo rje'i thol glu 'khor 'das rang grol. In Rdzong sar 'jam dbyangs mkhyen brtse'i dbang po'i bka' babs, Vol. 2: 213-223. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Severance Texts - gcod gzhung  ·  Pith Instructions - man ngag  ·  Vajra Songs - rdo rje'i glu
Karchag page	JKW-KABAB-Volume-02-KHA-Karchag
Colophon	།ཅེས་པའང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱད་པ་སྤྱོད་པར་འདོད་པའི་རང་གཞན་ཀུན་ལ་སྨན་པའི་ཕྱིར་གཏད་མེད་རྣལ་འབྱོར་གྱོན་པ་པདྨ་དགྱེས་པའི་སྡེས་སྦྱར་བ་སྟེ་ཐུན་མོང་མ་ཡིན་པའི་མན་ངག་གུ་ཧྱ།།
	ces pa'ang shes rab kyi pha rol tu phyin pa zab mo'i spyad pa spyod par 'dod pa'i rang gzhan kun la sman pa'i phyir gtad med rnal 'byor gyon pa pad+ma dgyes pa'i sdes sbyar ba ste thun mong ma yin pa'i man ngag gu h+ya

Tibetan Text

Wylie

[edit]

༄༅། །ཟབ་མོ་བདུད་ཀྱི་གཅོད་ཡུལ་དང་འབྲེལ་བའི་བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ་ཅེས་བྱ་བ།།ཨ་ཧོ། ཆོས་སྐུ་ཤེས་རབ་ཕ་རོལ་ཕྱིན། །ལོངས་སྤྱོད་རྫོགས་སྐུ་རྣལ་འབྱོར་མ། །ཟུང་འཇུག་སྤྲུལ་པའི་ཟློས་གར་ཅན། །ལབ་ཀྱི་སྒྲོལ་མར་ཕྱག་འཚལ་ལོ། །གང་དེས་ཉེ་བར་རྗེས་བསྟན་པ། །དམ་ཆོས་བདུད་ཀྱི་གཅོད་ཡུལ་ལས། །སྙིང་པོར་དྲིལ་བའི་རྡོ་རྗེའི་གླུ། །སྐལ་བཟང་རྣམས་ཀྱི་དོན་དུ་དབྱེ། །དེ་ཡང་ཐོག་མར་དལ་བའི་རྟེན། །འདི་ཉིད་ཤིན་ཏུ་རྙེད་པར་དཀའ། །རྙེད་ན་སྲིད་པའི་མཐར་འགྲོ་བའི། །དོན་གྱི་སྙིང་པོ་དང་ལྡན་ཀྱང༌། །ནམ་འཆི་ངེས་པ་མ་མཆིས་ཤིང༌། །དེ་ལ་ཅིས་ཀྱང་མི་སྟོངས་བར། །འཆི་ཚེ་དཀར་ནག་ལས་འབྲས་ཀྱི། །རྗེས་སུ་འབྲང་བའི་ཚུལ་བསམས་ནས། །འཁོར་བ་སྡུག་བསྔལ་ཅན་ཕུང་པོར། །ངེས་འབྱུང་བསམ་པས་ཡིད་དྲངས་ཏེ། །འདི་ནས་བྱང་ཆུབ་སྙིང་པོའི་བར། །བླ་མ་དཀོན་མཆོག་རྣམ་གསུམ་ལ། །སྐྱབས་ཀྱི་སྙིང་པོར་བཟུང་བ་དང༌། །གཞན་ཕྱིར་སངས་རྒྱས་ཐོབ་འདོད་བློས། །སྨོན་དང་འཇུག་པའི་བྱང་སེམས་བསྐྱེད། །ཁྱད་པར་ཐུན་མོང་ཐུན་མིན་གྱི། །ཡོན་ཏན་ཐམས་ཅད་འབྱུང་བའི་གཞི། །ཟབ་མོ་བླ་མའི་རྣལ་འབྱོར་བསྒོམས། །ཁྱེད་ཤེས་དད་པས་རྒྱུད་བསྐུལ་ཏེ། །དབང་བཞི་སྟན་ཐོག་གཅིག་ཏུ་བླང༌། །ལུས་དང་ལོངས་སྤྱོད་ཡོ་བྱད་ཀུན། །འཁོར་གསུམ་ཡོངས་དག་མཎྜལ་འབུལ། །རེ་དོག་ཐད་ཀར་ཆོད་པ་དང༌། །འཁོར་འདས་འཛིན་པ་རང་གྲོལ་ནས། །གནས་ལུགས་མ་བཅོས་གཉུག་མའི་ངང༌། །བཙན་ས་ཟིན་པར་གསོལ་བ་གདབ། །འདི་དག་ལམ་གྱི་སྔོན་འགྲོ་སྟེ། །ངེས་པར་རྒྱུད་ལ་མ་སྐྱེས་ན། །དངོས་གཞིའི་ཉམས་མྱོང་མི་འབྱུང་ཕྱིར། །ཁ་ཙམ་མ་ཡིན་གནད་དུ་བསྣུན། །བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ་ལས་སྦྱོར་བའི་ལམ་གྱི་རིམ་པར་ཕྱེ་བའི་ཚོམས་ཏེ་དང་པོའོ། །དངོས་གཞི་བཟོད་ནས་ལྷན་སྐྱེས་པའི། །རྒྱལ་བ་ཀུན་གྱི་ཡུམ་གྱུར་མ། །ཤེས་རབ་ཕ་རོལ་ཕྱིན་མ་ནི། །འགྲོ་ཀུན་སྙིང་ལ་ཡང་དག་གནས། །འོན་ཀྱང་གློ་བུར་འཁྲུལ་པའི་དྲིས། །བསྒྲིབས་ལས་ལྐོག་ཏུ་གྱུར་པ་ཉིད། །མངོན་སུམ་ཅར་ཕོག་ངོ་སྤྲོད་ཕྱིར། །སྔོན་དུ་འདི་ལྟར་བརྟག་པར་བྱ། །ལུས་གནད་རྣམ་སྣང་ཆོས་བདུན་ཏེ། །ངག་གནད་སྲོག་རྩོལ་རང་བབ་བཞག །སེམས་གནད་བྱུང་གནས་འགྲོ་གསུམ་དང༌། །དབྱིབས་དང་ཁ་དོག་དཔྱད་ཅིང་གཞིག །དེ་ཚེ་བཙལ་བས་མ་རྙེད་ཅིང༌། །གང་དུའང་གྲུབ་པ་མེད་མཐོང་བ། །གནས་ལུགས་ཉིད་ལ་འཕྲིགས་ཚུད་ཕྱིར། །མ་བཅོས་རང་བབ་ངང་དུ་བཞག །དེ་ནས་ནམ་མཁའ་སྒོ་འབྱེད་ལ། །བརྟེན་ནས་སྙིང་པོ་ཉམས་བླང་ཚུལ། །དོན་ཁྲིད་ཉིད་དུ་ངོ་སྤྲད་ཅིང༌། །ཆིག་ཁྲིད་དག་གིས་གཏན་ལ་དབབ། །ཉམས་ཁྲིད་སྒོ་ནས་བསྐྱང་བར་བྱ། །དང་པོ་མ་ཡེངས་རིག་པ་ནི། །རང་གསལ་ངང་དུ་ཧྲིལ་གྱིས་བསྒྲིལ། །བླཽ་འདས་དབྱིངས་སུ་ལྷོད་ཀྱིས་ཀློད། །དམིགས་གཏད་བྱ་རྩོལ་བྲལ་བའི་གཤིས། །བཅས་བཅོས་མེད་པར་ལྷུག་པར་འཇོག །དེ་ཉིད་མདོ་རྒྱུད་དགོངས་མཐུན་གྱི། །ཡིད་ཆེས་ལུང་གི་སློབ་དཔོན་ནི། །གཟུགས་རྣམས་མིང་མཐོང་ཚོར་བ་དང༌། །འདུ་ཤེས་འདུ་བྱེད་སེམས་པ་ཡང༌། །རྟོག་བྲལ་དོན་དམ་བདེན་པ་ནི། །ཤེས་རབ་ཕ་རོལ་ཕྱིན་ཞེས་མཐོང༌། །ཡོན་ཏན་རིན་ཆེན་སྡུད་པ་ལས། །ཇི་ལྟར་བཤད་པས་མཚོན་བྱས་ཏེ། །མཐའ་ཀླས་སྡེ་སྣོད་རྒྱ་མཚོས་བསྟན། །དེ་བཞིན་ཡེ་ཤེས་ཌཱ་ཀིས་ཀྱང༌། །གང་ཡང་ཡིད་ལ་མ་བྱས་ན། །བག་ཆགས་མི་འབྱུང་ས་ལམ་རྫོགས། །ཞེས་སོགས་གསུང་སྒྲོས་མན་ངག་གིས། །སློབ་དཔོན་གྱིས་ཀྱང་ངེས་ཤེས་བསྐྱེད། །དེ་ལྟར་ངོ་སྤྲད་ཇི་བཞིན་དུ། རང་རིག་བསམ་བརྗོད་བྲལ་བའི་དབྱིངས། །གཟོད་ནས་ལྷུན་གྲུབ་མཐོང་བ་ནི། །ཉམས་མྱོང་ཡིད་ཆེས་སློབ་དཔོན་ནོ། །ཚུལ་འདིས་ངེས་པར་རྟོགས་པའི་དོན། །བསྒོམ་པས་འབྲས་བུ་མཆོག་རྙེད་ཕྱིར། །འདུ་འཛི་བྲལ་བའི་དབེན་གནས་སུ། །མཉམ་བཞག་རྩེ་གཅིག་གཉུག་མ་བསྒོམ། །རྗེས་ཐོབ་སྣང་ཆ་སྒྱུ་མར་བལྟ། །དུས་ཀུན་རང་རིག་བློ་འདས་རྩལ། །འགགས་མེད་ཤར་ཡང་དངོས་པོས་དབེན། །དེ་ཕྱིར་མཉམ་རྗེས་དབྱེར་མེད་པ། ཟུང་འཇུག་ཆེན་པོར་ལ་བཟླའོ། །དེ་ཚེ་དགའ་བྲོད་སྙེམ་བྱེད་དང༌། །ཐོག་བཅས་ཐོག་མེད་བདུད་བཞི་པོ། །ཐོལ་གྱིས་ཤར་བའི་དེ་མ་ཐག །ཕཊ་ཅེས་འཛིན་མེད་དབྱིངས་སུ་གཅོད། །བརྟུལ་ཞུགས་ལམ་ཁྱེར་གྱི་རྡོ་རྗེའི་ཐོལ་གླུ་འཁོར་འདས་རང་གྲོལ་ལས། དངོས་གཞིའི་ཉམས་སུ་བླང་བའི་རིམ་པར་ཕྱེ་བའི་ཚོམས་ཏེ་གཉིས་པའོ། །དེ་ནས་རྐྱེན་ངན་ཐོག་བརྫིས་ཀྱིས། །རོ་སྙོམས་ལམ་དུ་ཁྱེར་བ་ཡིས། ཉམས་རྟོགས་བཙན་ཐབས་སྐྱེ་བྱེད་པ། །བོགས་འདོན་གསང་བའི་སྤྱོད་པ་ནི། །ལུང་སྟོང་ལྷ་ཁང་དུར་ཁྲོད་སོགས། །འཇིགས་ཤིང་སྐྱི་གཡའི་གནས་ཉིད་དུ། །མཚན་མོ་ལྷ་འདྲེ་འདུ་བའི་དུས། །གནས་གདོན་ལུས་གདོན་འཁྱམས་པོ་དང༌། ས་བདག་ཀླུ་གཉན་བཅས་པ་ཀུན། །དབང་དུ་བསྡུས་ནས་གང་དམིགས་སར། །འདེད་ཅིང་རང་གི་ལུས་ལ་བསྟིམ། །ལྟ་སྟངས་ཕྱག་རྒྱས་གཟིར་བ་སྟེ། །འགྲོ་ལུགས་རྣམ་བཞིའི་་་་་་་་་དཔའ་བོའི་སྟག་འགྲོས། མཁའ་འགྲོའི་གར་འགྲོས། སྦྲུལ་ནག་འཁྱོགས་འགྲོས། །རྣལ་འབྱོར་ལྡིང་འགྲོས་སོ། མཆན། ཚུལ་གྱིས་འགྲོ། །དངོས་གཞི་གནས་དང་ལྷ་འདྲེ་དང༌། །བདག་ཉིད་ཟིལ་གནོན་དམིགས་པ་ནི། །དང་པོར་དབྱིངས་རིག་བསྲེས་པའི་ངང༌། །བདག་ལུས་ཕྱོགས་དེ་ཀུན་ཁྱབ་པར། །གསལ་བཏབ་འཁོར་བ་མ་སྟོང་བར། །གཞན་དུ་གཡོ་མེད་གནས་པར་དམིགས། །གཉིས་པ་སེམས་བསྐྱེད་སྔོན་འགྲོ་བས། །གནོད་བྱེད་གཙོར་གྱུར་ལྷ་འདྲེ་ལ། །སྙིང་རྗེའི་ཡིད་ཀྱིས་རླུང་ཕྱིར་བུས། །ཁོར་ཡུག་ཐམས་ཅད་ཡོངས་བཀང་སྟེ། །དེ་དག་དབང་དུ་འདུས་པའི་ངང༌། །ནང་དུ་རྔུབ་པས་རང་ཉིད་ཀྱི། །མལ་གྱི་འོག་ཏུ་ཧྲིལ་བཅུག་ནས། །ཕྱོགས་མཚམས་རྩ་གསུམ་ཆོས་སྲུང་གིས། །བསྲུངས་བའི་གུར་གྱིས་བཅད་པ་ཡིས། །ནམ་ཡང་འདའ་བ་མེད་པར་དམིགས། །གསུམ་པ་རང་སེམས་རང་བཞིན་གྱིས། །རྣམ་པར་དག་པ་ཉིད་ཡིན་ཡང༌། །དེ་ལྟར་མ་རྟོགས་ལྷ་འདྲེ་རྣམས། །འཁྲུལ་པར་སྤྱོད་པ་ཐང་རེ་ཆད། །སྙམ་དུ་ཕཊ་ཅེས་བརྗོད་པའི་རྗེས། །མ་ཡེངས་བློ་བྲལ་གཉུག་མའི་ངང༌། །སྤྲོ་བསྡུ་མེད་པར་ཆམ་མེར་བཞག །དེ་ལྟར་འབད་པས་ལྷོངས་ཚད་ནི། །ཕྱི་རོལ་ཡུལ་གྱི་འཇིགས་སྣང་དང༌། །ནང་དུ་ལུས་ལ་ན་ཚ་དང༌། །གསང་བ་སེམས་ལ་རེ་དོགས་ཀྱི། །རྣམ་པར་རྟོག་པ་སྣ་ཚོགས་འབྱུང༌། །དེ་ཚེ་རིག་པའི་ཆོ་འཕྲུལ་དུ། །ངོ་ཤེས་ཐག་ཆོད་གདིང་ཐོབ་པས། །ཕཊ་ཅེས་སྣང་བ་ཐད་ཀར་བཅད། །དབྱིངས་རིགས་བསྲེས་ལ་ཅི་བདེར་བཞག །རྗེས་སུ་ཕུང་པོ་གཟན་བསྐྱུར་ནི། །ལུས་གནད་ཆོས་བདུན་ལྡན་པའི་ངང༌། །མིག་གནད་བར་སྣང་ཧ་རེར་གཏད། །སེམས་ཉིད་ཐིག་ལེའི་རྣམ་པ་རུ། །ཕཊ་ཀྱིས་རིམ་སྤར་ནམ་མཁར་བསྲེ། །ནམ་མཁས་གར་ཁྱབ་རིག་སྟོང་གིས། །ཁྱབ་པའི་བརྗོད་བྲལ་འོད་གསལ་ངང༌། །སྤང་བླང་མེད་པར་ལྷུག་པར་འཇོག །གལ་ཏེ་རྣམ་རྟོག་འཕྲོ་གྱུར་ན། །རང་རིག་རྡོ་རྗེ་རྣལ་འབྱོར་མར། །གསལ་བའི་ཕྱག་གཡས་གྲི་གུག་གིས། །བེམས་པོའི་མགོ་བོ་བྲེགས་ནས་ཀྱང༌། །ཕུང་ཁམས་དཀར་འགྱེད་བདུད་རྩི་ཡིས། །མཆོད་སྦྱིན་མགྲོན་རྣམས་ཐམས་ཅད་མཆོད། །ཁྲ་འགྱེད་འདོད་རྒུའི་ཕུང་པོ་ནི། །ནམ་མཁའ་མཛོད་ཀྱི་སྒོ་འཕར་དབྱེ། །དམར་འགྱེད་ཤ་ཁྲག་རུས་པའི་དངོས། །སྟོང་གསུམ་ཁྱབ་པས་གདོན་བགེགས་ཚིམས། །ནག་འགྱེད་རང་གི་སྡིག་ལྟུང་ཀུན། །བསྡུས་ཏེ་ལྷ་འདྲེའི་ཚོགས་ལ་སྦྱིན། །མཐར་གྱི་ནམ་མཁར་འཇའ་ཐིམ་ལྟར། །དབྱིངས་རིག་ཟུང་འཇུག་ངང་དུ་བཞག །དེ་རྣམས་ཐོ་རངས་ཉི་དྲོས་དང། །ཉི་ནུབ་སྲོད་དུས་གཙོ་བོར་སྤྱད། །དུས་དེར་ཆགས་སྡང་འཇིགས་སྐྲག་སོགས། །བདུད་བཞིའི་རྣམ་འགྱུར་ཅི་བྱུང་ཡང༌། །ལུས་ནི་ཚོགས་སུ་བྱིན་ཟིན་ཅིང༌། །སེམས་ནི་སྐྱེ་འགགས་སྤྲོས་བྲལ་ཕྱིར། །རེ་དོགས་མེད་པར་ལ་བཟླའོ། །རྗེས་ལ་འཁོར་གསུམ་མི་དམིགས་ངང༌། །ཕཊ་ཅེས་བརྗོད་ལ་དབྱིངས་རིག་བསྲེ། །བདེ་སྡུག་གཏོང་ལེན་དམིགས་པ་ཡིས། །དགེ་རྩ་བྱང་ཆུབ་ཆེན་པོར་བསྔོ། །དེ་ལྟར་རྩེ་གཅིག་འབད་པ་ཡིས། །དུས་ཀྱི་ཚར་ཚད་ཞག་གསུམ་དང༌། །བདུན་དགུ་བཅུ་གཅིག་ལ་སོགས་ཏེ། །རྟགས་ནི་དངོས་ཉམས་རྨི་ལམ་དུ། །ཐུན་མོང་ཁྲོམ་ཚོགས་འདུ་བ་ཡིས། །རང་ལ་བསྙེན་བཀུར་བྱེད་པ་དང༌། །ཉམ་ངའི་གནས་བརྒལ་སེང་གླང་ཞོན། །ལུས་ལས་འོད་ཟེར་འཕྲོ་སོགས་སྣང༌། །ཁྱད་པར་ཉོན་མོངས་འབྲེལ་རྒྱུན་ཆོད། །ཉམས་དང་རྟོགས་པའི་མཛོད་ཀློང་རྡོལ། །མངོན་ཤེས་རྫུ་འཕྲུལ་སྣ་ཚོགས་འབྱུང༌། །དེ་ལྟར་ན་ཡང་དགའ་བྲོད་ཀྱིས། མ་བཅིངས་གང་ཤར་ངང་དུ་བཞག །གཞན་ཡང་འདི་ལ་མུ་བཞི་སྟེ། །ཚར་ཚད་འདྲ་བའི་ལྷོངས་ཚད་ནི། །གོས་དམར་གྱོན་དང་ཤ་ཁྲག་ཟ། །མ་གུས་ཕྱག་འཚལ་སྐད་མེད་པའི། །རོལ་ཆ་བརྡུང་བ་ལ་སོགས་ཏེ། །ལྷོངས་ཚད་འདྲ་བའི་ཚར་ཚད་ནི། །དུད་འགྲོ་རྭ་ཅན་རྣམ་པ་ཡིས། །བརྡུངས་དང་མི་གཙང་རྣག་ཁྲག་འབབས། །རང་གི་ཡན་ལག་གཏུབས་སོགས་འབྱུང༌། །གཉིས་ཀ་འདྲ་བའི་འདྲེས་མ་ནི། །ནམ་སྟོད་ཚར་ཚད་རྟགས་མཐོང་ལ། །ནམ་སྨད་དེ་ལས་ལྡོག་པ་སོགས། །མ་ངེས་འཆོལ་བར་སྟོན་པ་དང༌། །འདྲེས་མ་འདྲ་བའི་བག་ཆགས་ནི། །རང་ཉིད་ཉོན་མོངས་གང་ཞིག་ལ། །གོམས་པ་བརྟས་པ་དེ་དང་དེར། །ལྷག་པར་ཞེན་པའི་རྟོག་པ་སྐྱེ། །དེ་སོགས་བཟང་ངན་ཅིར་སྣང་ཡང༌། །རེ་དོགས་བླང་དོར་དབྱིངས་སུ་ཀློད། །ཇི་ལྟར་བརྩོན་ཀྱང་ལྷོངས་ཚད་ལས། །ཚར་ཚད་བྱུང་བར་མ་གྱུར་ན། །ཕྱི་རོལ་གནས་དང་ནང་ཕུང་པོ། །གསང་བ་བདག་འཛིན་མཐའ་གཏད་ནི། །ཤིན་ཏུ་འཇིགས་པའི་གཉན་ཁྲོད་དུ། །ཕྱིན་ལ་ཉམས་ལེན་དཔའ་གདིང་བསྐྱེད། །སེམས་ཀྱིས་ཚེ་རབས་དུ་མ་རུ། །ཕུང་པོ་འདི་འདྲ་དོན་མེད་འདོར། །ལྷ་འདྲེར་སྦྱིན་ལ་སྤྲོ་བ་བསྐྱེད། །གཏོང་མ་ནུས་ན་བདག་ཞན་ཅིང༌། །ཟ་མ་ནུས་ན་ཁྱོད་ཞནཕྱིར། །སྐད་ཅིག་ཙམ་ཡང་མ་བཞག་པར། །ལྷག་མ་མེད་པར་རོལ་པ་དང༌། །གཞན་ཡང་བདག་གི་སྒོ་གསུམ་ལ། །འགལ་རྐྱེན་ཅི་ནུས་ཐོང་སྙམ་པ། །བཅོས་མིན་རྒྱུད་ལ་སྐྱེས་པའི་ཚེ། །བདུད་ཚོགས་ཀུན་གྱིས་གླགས་མི་རྙེད། །དེ་ལྟར་འབད་ཀྱང་བོགས་མེད་ན། །གདམས་ངག་སྟོན་པའི་བླ་མ་ལ། །སངས་རྒྱས་དངོས་ཀྱི་མོས་གུས་དང༌། །མར་གྱུར་འགྲོ་བ་ཐམས་ཅད་ལ། །བཟོད་དུ་མེད་པའི་སྙིང་རྗེ་དང༌། །འགལ་རྐྱེན་སྡུག་བསྔལ་ཅི་བྱུང་ཡང༌། །ཐོག་བརྫིས་ནུས་པའི་བརྟུལ་ཞུགས་ཏེ། །དེ་གསུམ་གཅིག་ཏུ་དྲིལ་བྱས་ལ། །ཉམས་སུ་བླངས་པས་བོགས་ཆེན་འབྱིན། །རྗེས་ཐོག་གནས་གཞན་འགྲོ་བའི་ཚེ། །ཟིལ་གནོན་དམིགས་པའི་འཁྲུལ་འཁོར་ཀློད། །ཤུལ་དུ་ཐོ་དཀར་བརྩིགས་པ་ཉིད། །ཐུགས་རྗེ་ཆེན་པོར་བསྐྱེད་པ་ཡི། །སྐུ་ལས་བདུད་རྩིའི་རྒྱུན་བབས་ཏེ། །གཉན་ཁྲོད་དེ་ཡིས་གཞི་བདག་དང༌། །གནོད་བྱེད་གཙོར་བྱས་ལྷ་འདྲེ་ཀུན། །ཟག་མེད་བདེ་བས་ཚིམ་པར་བསམ། །རྣམ་དག་བསྔོ་སྨོན་རྒྱ་ཆེར་གདབ། །གཞན་ཡང་ཕྲ་མོའི་དམ་ཚིག་ནི། །རྐང་རྗེན་དག་གིས་མི་བགྲོད་ཅིང༌། །མཚན་མོར་མེ་འོད་སྤངས་པ་དང༌། །གཤང་གཅི་ཕྱོགས་གཅིག་དག་ཏུ་འདོར། །གནས་གཅིག་ནམ་ཡང་འགྲོ་མི་བྱ། །ཚར་ཚད་རྫོགས་ནས་མི་སྡོད་ཅིང༌། །དེ་བར་གཞན་དུ་མི་འཕོའོ། །མདོར་ན་ཕྱི་ལྟར་ཕྱོགས་མེད་ཀྱི། །གཉན་ས་རི་ཁྲོད་ཀུན་ཏུ་རྒྱུ། །ནང་ལྟར་ཕུང་པོ་གཟན་བསྐྱུར་གྱིས། །ཚོགས་གཉིས་མྱུར་དུ་འདུམས་པར་བྱ། །གསང་བ་འཁོར་འདས་རང་གི་སེམས། །ཐིག་ལེ་ཉག་གཅིག་ཆེན་པོར་གཅོད། །ལྟ་བ་ཡུམ་དོན་ངོ་འཕྲོད་ཅིང༌། །སྒོམ་པ་མཉམ་རྗེས་ཟུང་འཇུག་ངང༌། །སྤྱོད་པ་རོ་སྙོམས་ལམ་ལོངས་ནས། །འབྲས་བུ་གདོད་མའི་བཙན་ས་ཟིན། བརྟུལ་ཞུགས་ལམ་ཁྱེར་རྡོ་རྗེའི་ཐོལ་གླུ་འཁོར་འདས་རང་གྲོལ་ལས། རྗེས་ཐོབ་བོགས་འདོན་སྤྱོད་པའི་རིམ་པར་ཕྱེ་བའི་ཚོམས་ཏེ་གསུམ་པའོ། །ཚུལ་འདི་མ་གཅིག་ཡེ་ཤེས་ཀྱི། །མཁའ་འགྲོས་བྱིན་གྱིས་བརླབས་པའི་གནས། །ཟངས་རི་མཁར་དམར་གསང་ཕུག་ཏུ། །ཚོགས་ཀྱི་འདུ་བ་བགྱིས་པའི་ཚེ། །ཇི་ལྟར་ཤར་བའི་རྟོགས་པ་དང༌། །ཟབ་ལམ་མན་ངག་ཟུང་སྦྲེལ་ཏེ། །རྡོ་རྗེའི་གླུ་རུ་བླངས་པའི་དགེས། །འགྲོ་ཀུན་རང་གྲོལ་ས་བརྙེས་ཤོག །ཅེས་པའང་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱད་པ་སྤྱོད་པར་འདོད་པའི་རང་གཞན་ཀུན་ལ་སྨན་པའི་ཕྱིར་གཏད་མེད་རྣལ་འབྱོར་གྱོན་པ་པདྨ་དགྱེས་པའི་སྡེས་སྦྱར་བ་སྟེ་ཐུན་མོང་མ་ཡིན་པའི་མན་ངག་གུ་ཧྱ།། །།

[edit]

@#/__/zab mo bdud kyi gcod yul dang 'brel ba'i brtul zhugs lam khyer gyi rdo rje'i thol glu 'khor 'das rang grol ces bya ba//a ho/__chos sku shes rab pha rol phyin/__/longs spyod rdzogs sku rnal 'byor ma/__/zung 'jug sprul pa'i zlos gar can/__/lab kyi sgrol mar phyag 'tshal lo/__/gang des nye bar rjes bstan pa/__/dam chos bdud kyi gcod yul las/__/snying por dril ba'i rdo rje'i glu/__/skal bzang rnams kyi don du dbye/__/de yang thog mar dal ba'i rten/__/'di nyid shin tu rnyed par dka'/__/rnyed na srid pa'i mthar 'gro ba'i/__/don gyi snying po dang ldan kyang*/__/nam 'chi nges pa ma mchis shing*/__/de la cis kyang mi stongs bar/__/'chi tshe dkar nag las 'bras kyi/__/rjes su 'brang ba'i tshul bsams nas/__/'khor ba sdug bsngal can phung por/__/nges 'byung bsam pas yid drangs te/__/'di nas byang chub snying po'i bar/__/bla ma dkon mchog rnam gsum la/__/skyabs kyi snying por bzung ba dang*/__/gzhan phyir sangs rgyas thob 'dod blos/__/smon dang 'jug pa'i byang sems bskyed/__/khyad par thun mong thun min gyi/__/yon tan thams cad 'byung ba'i gzhi/__/zab mo bla ma'i rnal 'byor bsgoms/__/khyed shes dad pas rgyud bskul te/__/dbang bzhi stan thog gcig tu blang*/__/lus dang longs spyod yo byad kun/__/'khor gsum yongs dag maN+Dal 'bul/__/re dog thad kar chod pa dang*/__/'khor 'das 'dzin pa rang grol nas/__/gnas lugs ma bcos gnyug ma'i ngang*/__/btsan sa zin par gsol ba gdab/__/'di dag lam gyi sngon 'gro ste/__/nges par rgyud la ma skyes na/__/dngos gzhi'i nyams myong mi 'byung phyir/__/kha tsam ma yin gnad du bsnun/__/brtul zhugs lam khyer gyi rdo rje'i thol glu 'khor 'das rang grol las sbyor ba'i lam gyi rim par phye ba'i tshoms te dang po'o/__/dngos gzhi bzod nas lhan skyes pa'i/__/rgyal ba kun gyi yum gyur ma/__/shes rab pha rol phyin ma ni/__/'gro kun snying la yang dag gnas/__/'on kyang glo bur 'khrul pa'i dris/__/bsgribs las lkog tu gyur pa nyid/__/mngon sum car phog ngo sprod phyir/__/sngon du 'di ltar brtag par bya/__/lus gnad rnam snang chos bdun te/__/ngag gnad srog rtsol rang bab bzhag__/sems gnad byung gnas 'gro gsum dang*/__/dbyibs dang kha dog dpyad cing gzhig__/de tshe btsal bas ma rnyed cing*/__/gang du'ang grub pa med mthong ba/__/gnas lugs nyid la 'phrigs tshud phyir/__/ma bcos rang bab ngang du bzhag__/de nas nam mkha' sgo 'byed la/__/brten nas snying po nyams blang tshul/__/don khrid nyid du ngo sprad cing*/__/chig khrid dag gis gtan la dbab/__/nyams khrid sgo nas bskyang bar bya/__/dang po ma yengs rig pa ni/__/rang gsal ngang du hril gyis bsgril/__/blau 'das dbyings su lhod kyis klod/__/dmigs gtad bya rtsol bral ba'i gshis/__/bcas bcos med par lhug par 'jog__/de nyid mdo rgyud dgongs mthun gyi/__/yid ches lung gi slob dpon ni/__/gzugs rnams ming mthong tshor ba dang*/__/'du shes 'du byed sems pa yang*/__/rtog bral don dam bden pa ni/__/shes rab pha rol phyin zhes mthong*/__/yon tan rin chen sdud pa las/__/ji ltar bshad pas mtshon byas te/__/mtha' klas sde snod rgya mtshos bstan/__/de bzhin ye shes DA kis kyang*/__/gang yang yid la ma byas na/__/bag chags mi 'byung sa lam rdzogs/__/zhes sogs gsung sgros man ngag gis/__/slob dpon gyis kyang nges shes bskyed/__/de ltar ngo sprad ji bzhin du/__rang rig bsam brjod bral ba'i dbyings/__/gzod nas lhun grub mthong ba ni/__/nyams myong yid ches slob dpon no/__/tshul 'dis nges par rtogs pa'i don/__/bsgom pas 'bras bu mchog rnyed phyir/__/'du 'dzi bral ba'i dben gnas su/__/mnyam bzhag rtse gcig gnyug ma bsgom/__/rjes thob snang cha sgyu mar blta/__/dus kun rang rig blo 'das rtsal/__/'gags med shar yang dngos pos dben/__/de phyir mnyam rjes dbyer med pa/__zung 'jug chen por la bzla'o/__/de tshe dga' brod snyem byed dang*/__/thog bcas thog med bdud bzhi po/__/thol gyis shar ba'i de ma thag__/phaT ces 'dzin med dbyings su gcod/__/brtul zhugs lam khyer gyi rdo rje'i thol glu 'khor 'das rang grol las/__dngos gzhi'i nyams su blang ba'i rim par phye ba'i tshoms te gnyis pa'o/__/de nas rkyen ngan thog brdzis kyis/__/ro snyoms lam du khyer ba yis/__nyams rtogs btsan thabs skye byed pa/__/bogs 'don gsang ba'i spyod pa ni/__/lung stong lha khang dur khrod sogs/__/'jigs shing skyi g.ya'i gnas nyid du/__/mtshan mo lha 'dre 'du ba'i dus/__/gnas gdon lus gdon 'khyams po dang*/__sa bdag klu gnyan bcas pa kun/__/dbang du bsdus nas gang dmigs sar/__/'ded cing rang gi lus la bstim/__/lta stangs phyag rgyas gzir ba ste/__/'gro lugs rnam bzhi'i dpa' bo'i stag 'gros/__mkha' 'gro'i gar 'gros/__sbrul nag 'khyogs 'gros/__/rnal 'byor lding 'gros so/__mchan/__tshul gyis 'gro/__/dngos gzhi gnas dang lha 'dre dang*/__/bdag nyid zil gnon dmigs pa ni/__/dang por dbyings rig bsres pa'i ngang*/__/bdag lus phyogs de kun khyab par/__/gsal btab 'khor ba ma stong bar/__/gzhan du g.yo med gnas par dmigs/__/gnyis pa sems bskyed sngon 'gro bas/__/gnod byed gtsor gyur lha 'dre la/__/snying rje'i yid kyis rlung phyir bus/__/khor yug thams cad yongs bkang ste/__/de dag dbang du 'dus pa'i ngang*/__/nang du rngub pas rang nyid kyi/__/mal gyi 'og tu hril bcug nas/__/phyogs mtshams rtsa gsum chos srung gis/__/bsrungs ba'i gur gyis bcad pa yis/__/nam yang 'da' ba med par dmigs/__/gsum pa rang sems rang bzhin gyis/__/rnam par dag pa nyid yin yang*/__/de ltar ma rtogs lha 'dre rnams/__/'khrul par spyod pa thang re chad/__/snyam du phaT ces brjod pa'i rjes/__/ma yengs blo bral gnyug ma'i ngang*/__/spro bsdu med par cham mer bzhag__/de ltar 'bad pas lhongs tshad ni/__/phyi rol yul gyi 'jigs snang dang*/__/nang du lus la na tsha dang*/__/gsang ba sems la re dogs kyi/__/rnam par rtog pa sna tshogs 'byung*/__/de tshe rig pa'i cho 'phrul du/__/ngo shes thag chod gding thob pas/__/phaT ces snang ba thad kar bcad/__/dbyings rigs bsres la ci bder bzhag__/rjes su phung po gzan bskyur ni/__/lus gnad chos bdun ldan pa'i ngang*/__/mig gnad bar snang ha rer gtad/__/sems nyid thig le'i rnam pa ru/__/phaT kyis rim spar nam mkhar bsre/__/nam mkhas gar khyab rig stong gis/__/khyab pa'i brjod bral 'od gsal ngang*/__/spang blang med par lhug par 'jog__/gal te rnam rtog 'phro gyur na/__/rang rig rdo rje rnal 'byor mar/__/gsal ba'i phyag g.yas gri gug gis/__/bems po'i mgo bo bregs nas kyang*/__/phung khams dkar 'gyed bdud rtsi yis/__/mchod sbyin mgron rnams thams cad mchod/__/khra 'gyed 'dod rgu'i phung po ni/__/nam mkha' mdzod kyi sgo 'phar dbye/__/dmar 'gyed sha khrag rus pa'i dngos/__/stong gsum khyab pas gdon bgegs tshims/__/nag 'gyed rang gi sdig ltung kun/__/bsdus te lha 'dre'i tshogs la sbyin/__/mthar gyi nam mkhar 'ja' thim ltar/__/dbyings rig zung 'jug ngang du bzhag__/de rnams tho rangs nyi dros dang/__/nyi nub srod dus gtso bor spyad/__/dus der chags sdang 'jigs skrag sogs/__/bdud bzhi'i rnam 'gyur ci byung yang*/__/lus ni tshogs su byin zin cing*/__/sems ni skye 'gags spros bral phyir/__/re dogs med par la bzla'o/__/rjes la 'khor gsum mi dmigs ngang*/__/phaT ces brjod la dbyings rig bsre/__/bde sdug gtong len dmigs pa yis/__/dge rtsa byang chub chen por bsngo/__/de ltar rtse gcig 'bad pa yis/__/dus kyi tshar tshad zhag gsum dang*/__/bdun dgu bcu gcig la sogs te/__/rtags ni dngos nyams rmi lam du/__/thun mong khrom tshogs 'du ba yis/__/rang la bsnyen bkur byed pa dang*/__/nyam nga'i gnas brgal seng glang zhon/__/lus las 'od zer 'phro sogs snang*/__/khyad par nyon mongs 'brel rgyun chod/__/nyams dang rtogs pa'i mdzod klong rdol/__/mngon shes rdzu 'phrul sna tshogs 'byung*/__/de ltar na yang dga' brod kyis/__ma bcings gang shar ngang du bzhag__/gzhan yang 'di la mu bzhi ste/__/tshar tshad 'dra ba'i lhongs tshad ni/__/gos dmar gyon dang sha khrag za/__/ma gus phyag 'tshal skad med pa'i/__/rol cha brdung ba la sogs te/__/lhongs tshad 'dra ba'i tshar tshad ni/__/dud 'gro rwa can rnam pa yis/__/brdungs dang mi gtsang rnag khrag 'babs/__/rang gi yan lag gtubs sogs 'byung*/__/gnyis ka 'dra ba'i 'dres ma ni/__/nam stod tshar tshad rtags mthong la/__/nam smad de las ldog pa sogs/__/ma nges 'chol bar ston pa dang*/__/'dres ma 'dra ba'i bag chags ni/__/rang nyid nyon mongs gang zhig la/__/goms pa brtas pa de dang der/__/lhag par zhen pa'i rtog pa skye/__/de sogs bzang ngan cir snang yang*/__/re dogs blang dor dbyings su klod/__/ji ltar brtson kyang lhongs tshad las/__/tshar tshad byung bar ma gyur na/__/phyi rol gnas dang nang phung po/__/gsang ba bdag 'dzin mtha' gtad ni/__/shin tu 'jigs pa'i gnyan khrod du/__/phyin la nyams len dpa' gding bskyed/__/sems kyis tshe rabs du ma ru/__/phung po 'di 'dra don med 'dor/__/lha 'drer sbyin la spro ba bskyed/__/gtong ma nus na bdag zhan cing*/__/za ma nus na khyod zhanaphyir/__/skad cig tsam yang ma bzhag par/__/lhag ma med par rol pa dang*/__/gzhan yang bdag gi sgo gsum la/__/'gal rkyen ci nus thong snyam pa/__/bcos min rgyud la skyes pa'i tshe/__/bdud tshogs kun gyis glags mi rnyed/__/de ltar 'bad kyang bogs med na/__/gdams ngag ston pa'i bla ma la/__/sangs rgyas dngos kyi mos gus dang*/__/mar gyur 'gro ba thams cad la/__/bzod du med pa'i snying rje dang*/__/'gal rkyen sdug bsngal ci byung yang*/__/thog brdzis nus pa'i brtul zhugs te/__/de gsum gcig tu dril byas la/__/nyams su blangs pas bogs chen 'byin/__/rjes thog gnas gzhan 'gro ba'i tshe/__/zil gnon dmigs pa'i 'khrul 'khor klod/__/shul du tho dkar brtsigs pa nyid/__/thugs rje chen por bskyed pa yi/__/sku las bdud rtsi'i rgyun babs te/__/gnyan khrod de yis gzhi bdag dang*/__/gnod byed gtsor byas lha 'dre kun/__/zag med bde bas tshim par bsam/__/rnam dag bsngo smon rgya cher gdab/__/gzhan yang phra mo'i dam tshig ni/__/rkang rjen dag gis mi bgrod cing*/__/mtshan mor me 'od spangs pa dang*/__/gshang gci phyogs gcig dag tu 'dor/__/gnas gcig nam yang 'gro mi bya/__/tshar tshad rdzogs nas mi sdod cing*/__/de bar gzhan du mi 'pho'o/__/mdor na phyi ltar phyogs med kyi/__/gnyan sa ri khrod kun tu rgyu/__/nang ltar phung po gzan bskyur gyis/__/tshogs gnyis myur du 'dums par bya/__/gsang ba 'khor 'das rang gi sems/__/thig le nyag gcig chen por gcod/__/lta ba yum don ngo 'phrod cing*/__/sgom pa mnyam rjes zung 'jug ngang*/__/spyod pa ro snyoms lam longs nas/__/'bras bu gdod ma'i btsan sa zin/__brtul zhugs lam khyer rdo rje'i thol glu 'khor 'das rang grol las/__rjes thob bogs 'don spyod pa'i rim par phye ba'i tshoms te gsum pa'o/__/tshul 'di ma gcig ye shes kyi/__/mkha' 'gros byin gyis brlabs pa'i gnas/__/zangs ri mkhar dmar gsang phug tu/__/tshogs kyi 'du ba bgyis pa'i tshe/__/ji ltar shar ba'i rtogs pa dang*/__/zab lam man ngag zung sbrel te/__/rdo rje'i glu ru blangs pa'i dges/__/'gro kun rang grol sa brnyes shog__/ces pa'ang shes rab kyi pha rol tu phyin pa zab mo'i spyad pa spyod par 'dod pa'i rang gzhan kun la sman pa'i phyir gtad med rnal 'byor gyon pa pad+ma dgyes pa'i sdes sbyar ba ste thun mong ma yin pa'i man ngag gu h+ya//__//