JKCL-KABUM-10-THA-066

Previous Text Back to Volume PageNext Text

བཅའ་ཡིག་ཕན་བདེའི་ས་བོན།

Wylie title	bca' yig phan bde'i sa bon
Location	chos kyi blo gros bka' 'bum Volume 10, Text 66, Pages 547-553 (Folios 1a to 4a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. bca' yig phan bde'i sa bon. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 547-553. Bir, H.P.: Khyentse Labrang, 2012.
Genre	Monastics Regulations - bca' yig
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/seed-of-benefit-and-happiness
Colophon	།ཅེས་དམ་པ་གོང་མ་རྣམས་ཀྱི་གསུང་དང་མཐུན་པར་དགེ་འདུན་འདུས་པའི་སྡེ་ལ་བསླབ་བྱའི་བཅའ་ཡིག་འདི་ཡང་འཇམ་དབྱངས་མཁྱེན་བརྩེའི་སྤྲུལ་མིང་གི་བསྙད་པ་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་དཔལ་བཟང་པོས་སྤེལ་བ་དགེ་ལེགས་སུ་གྱུར་ཅིག །སརྦ་མངྒ་ལཾ། ཤུ་བྷཾ།།
	/ces dam pa gong ma rnams kyi gsung dang mthun par dge 'dun 'dus pa'i sde la bslab bya'i bca' yig 'di yang 'jam dbyangs mkhyen brtse'i sprul ming gi bsnyad pa 'jam dbyangs chos kyi blo gros ris med bstan pa'i rgyal mtshan dpal bzang pos spel ba dge legs su gyur cig__/sarba mang+ga laM/__shu b+haM//

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

༄༅། །བཅའ་ཡིག་ཕན་བདེའི་ས་བོན་ཅེས་བྱ་བ་བཞུགས་སོ། ། ཨོཾ་སྭསྟི། མཆོག་གསུམ་ཉི་མ་བརྒྱ་པའི་སྣང་བ་ཡི། །སྒྲིབ་གཉིས་མུན་པ་མ་ལུས་ཀུན་བཅོམ་སྟེ། །རྣམ་གྲོལ་ཐར་པ་དམ་པའི་སྣང་བ་ནི། །སྦྱིན་མཛད་སྟོན་པ་མཆོག་དེས་ཤིས་པ་སྩོལ། །དེ་ཡང་ཕུན་སུམ་ཚོགས་པའི་དགེ་འདུན་པ་འགྲོ་བ་ལྷ་མིར་བཅས་པ་རྣམས་ཀྱི་ཕྱག་བྱ་བའི་འོས་སུ་གྱུར་ཅིང་། བསོད་ནམས་ཀྱི་དཔལ་དམ་པར་བཞུགས་པས་བསྟན་འགྲོའི་རྒུད་པ་ཞི་ཞིང་། ཕན་བདེའི་ལེགས་ཚོགས་གོང་འཕེལ་དུ་གྱུར་པའི་རྩ་ལག་དམ་པ་ཡིན་པས་ཚུལ་དང་མཐུན་པའི་མཛད་འཕྲིན་བཟང་པོས་བསྟན་པ་རིན་པོ་ཆེའི་རྗེས་སུ་བསླབ་པ་ལ། སློབ་དཔོན་དབྱིག་གཉེན་གྱིས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཅེས་གསུངས་པ་ལྟར་གཞི་ཚུལ་ཁྲིམས་རྣམ་པར་དག་པ་ལ་བརྟེན་དགོས་ཤིང་། དེའང་དགེ་བསྙེན་དང་། དགེ་ཚུལ་གྱི་སྡོམ་པ་ལོ་བཅོ་ལྔ་མན་ཆད་ལ་ངེས་པར་ཐོབ་ནས་ཆེ་བ་དང་ཡོན་ཏན་ཀུན་གྱི་རྩ་བ་ཡིག་གེའི་ཕྱི་མོ་སློབ་པ་ནས་བཟུང་ཆོས་སྤྱོད་སོགས་བློ་འཛིན་དང་། དཀྱིལ་འཁོར་གྱི་ལས་རིམ་ཐིག་རྡུལ་ཚོན། གཏོར་བཟོ་གར་འཆམས། འབུད་བརྡུང་བཀྲོལ་གསུམ་སོགས་རང་རང་ལ་དགོས་པའི་ཡོན་ཏན་རྣམས་སྦྱངས་བརྡར་རྒྱུས་ཐོན་དང་། བློ་མཆོག་ཏུ་གྱུར་པ་རྣམས་ཀྱིས་ཕྱི་ནང་གི་རིག་གནས་ལ་བསླབ་སྦྱང་བྱ་ཞིང་། མ་མཐའ་ཡང་སྤྱོད་འཇུག་སྡོམ་གསུམ་ཙམ་མི་ཤེས་ཀ་མེད་དང་། ལོ་ཉི་ཤུ་ལོན་ནས་སྡོམ་པའི་མཆོག་བསྙེན་པར་རྫོགས་པ་དགེ་སློང་གི་དངོས་པོ་ལེགས་པར་བསྒྲུབ་ནས་བསླབ་བྱའི་རྩ་བ་ཕམ་ལྷག་གི་མ་གོས་པ་དང་། ཁྱད་པར་དགེ་ཚུལ་སློང་ཡིན་ཕྱིན་ཕམ་པ་བཞི་ཆང་དང་ལྔ་པོ་ལ་བསྲུང་བསྡོམ་བྱ་བ་ཁྲིམས་ཀྱི་རྩ་བ་ཡིན་པས། རྒྱུན་དུ་མོ་ཁྲིམས་དང་ཆང་ཁྲིམས། དུད་འགྲོ་གསོད་པ་དང་། བཤས་ཚོང་བྱེད་པ་རྣམས་ལེགས་པར་ཁྲིམས་སུ་བཅའ་བ་དང་། འགལ་བ་བྱུང་ན་ཉེས་ཆད་ལུགས་གཉིས་ཀྱི་ཚུལ་དང་མཐུན་པ་གནང་འོས་དང་། དེའང་ཇི་སྐད་དུ། གལ་ཏེ་ཐོས་པ་མང་གྱུར་ཀྱང་། །ཚུལ་ཁྲིམས་ལེགས་པར་མི་བསྡམ་ན། །དེ་ནི་ཚུལ་ཁྲིམས་ཕྱིར་སྨད་ཅིང་། །དེ་ཡི་ཐོས་པ་ཕུན་ཚོགས་མིན། །ཅེས་དང་། །ཚུལ་ཁྲིམས་འཆལ་བ་དེ་ནི་ངན་འགྲོར་འགྲོ། །དེ་ལ་ཐོས་པ་མང་པོས་སྐྱོབ་མི་ནུས། །ཞེས་གསུངས་པ་ལྟར་རོ། །དུས་དང་རྒྱུན་དུ་བག་ཡོད་དང་ཁྲེལ་ངོ་ཚའི་རྟེན་གཟན་ཤམ་དང་མི་འབྲལ་བ་དང་། དྲན་ཤེས་བག་ཡོད་ཀྱིས་རང་ལས་རྒན་པ་ལ་བསྐུར་བསྟི་དང་། འོག་མ་ལ་བྱམས་བརྩེ། མཉམ་པ་ལ་འགྲན་སེམས་དང་ཕྲག་དོག་སོགས་སྤངས་ནས་སེམས་ཞི་དུལ་དང་ལྡན་པས་དགེ་སྦྱོང་གི་ཆོས་བཞི་དང་མི་འབྲལ་ཞིང་། ཀུན་ལ་དག་སྣང་སྦྱངས་བ་གལ་ཆེ་བ་དང་། བསྟན་པའི་གཞི་མའམ་སྙིང་པོ་ནི་གསོ་སྦྱོང་། དབྱར་གནས། དགག་དབྱེ་སྟེ་འདུལ་བ་རྒྱ་མཚོའི་སྙིང་པོ་གཞི་གསུམ་པོ་འདི་ཡིན་པས་རྒྱུན་ལྡན་དུ་ཡོད་ན། སྟོན་པ་རིན་པོ་ཆེ་བཀའ་དྲིན་རྗེས་སུ་བསམས་པ་དང་། རང་གི་ཁས་བླངས་པའི་ཉེས་ལྟུང་ཐམས་ཅད་འགོགས་པ་དང་། བསླབ་པ་གསུམ་གོང་ནས་གོང་དུ་འཕེལ། བག་མེད་པའི་གནས་ལས་ལྡོག་ཅིང་སེམས་ཅན་རྣམས་གནོད་འཚེ་ལས་སྐྱོབས། དཀར་ཕྱོགས་ཀྱི་ལྷ་རྣམས་དགྱེས་པ་དང་། ས་ཕྱོགས་ཀུན་ཏུ་བཀྲ་ཤིས་ཀྱི་དཔལ་འཕེལ་བར་འགྱུར་བ་སོགས་ཕན་ཡོན་དང་དགོས་པ་བསམ་གྱིས་མི་ཁྱབ་པས་བརྩོན་པ་དགུ་འགྱུར་དུ་བསྐྱེད་དེ་གཞི་གསུམ་ཕྱག་ལེན་ཚད་ལྡན་དང་། དབྱར་གནས་ཀྱི་སྐབས་སུ་སོར་མདོའམ། སྡོམ་གསུམ་ལྟ་བུའི་ཆོས་འཆད་ཉན་གྱི་བྱ་བས་དུས་འདའ་བ་གལ་ཆེ། དུས་དང་རྒྱུན་དུ་ཚུལ་མིན་གྱི་སྤྱོད་པ་སྤྱི་དང་ཁྱད་པར་དམག་ཇག་གི་གཏམ། སྒྲུང་གླུ་བཞད་དང་། ཀུ་ཅོ་འཆོང་རྒྱུགས་སོགས་གཏན་ནས་སྤངས་ཤིང་། ཆོས་སྤྱོད་ཁ་ཏོན་དང་བསླབ་སྦྱང་བཟླས་བརྗོད་ལ་བརྩོན་པ་དང་། ཁྱད་པར་དུ་སོ་སོར་ཐར་པ་ལས། །དགེ་འདུན་མཐུན་པ་བདེ་བ་སྟེ། །མཐུན་པ་རྣམས་ཀྱི་དཀའ་ཐུབ་བདེ། །ཞེས་དང་། ཞི་བ་ལྷས། རྟག་ཏུ་དགེ་འདུན་མཐུན་པ་དང་། །དགེ་འདུན་དོན་ཡང་འགྲུབ་པར་ཤོག །ཅེས་སྨོན་ལམ་མཛད་པ་ལྟར། དགེ་འདུན་རྣམས་སྤྱོད་ལམ་ཀུན་ནས་གཅིག་སེམས་གཅིག་གིས་འཛིན་ཏེ། ཐུགས་མཐུན་ཁོ་ནས་སྙིགས་དུས་འདིར་ཤིན་ཏུ་གཅེས་པའི་ཁྲིམས་གལ་པོ་ཆེ་དང་། མདོར་ན་གསོན་གཤིན་གྱི་དཀོར་ལ་ལོངས་སྤྱོད་པ་རྣམས་ཀྱིས་སེམས་རྒྱུད་ཡང་དག་པར་སྡམ་པར་མ་བྱས་ན་ཉམས་ཉེས་པར་འགྱུར་ཏེ། ལུང་རྣམ་འབྱེད་ལས། ལྕགས་གོང་མེ་ལྕེ་འབར་བ་དག །ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་བསྡམ་པ། །ཡུལ་འཁོར་བསོད་སྙོམས་ཟ་བ་མིན། །ཅེས་པ་ལྟར། ཚུལ་ཁྲིམས་མི་ཉམས་པ་དང་། ཆོས་སྤྱོད་བཅུ་ལ་རྟག་ཏུ་བརྩོན་པར་བྱ་བ་ནི་སྟོན་པའི་རྗེས་སུ་ཞུགས་རྣམས་ཀྱི་ཉམས་ལེན་གྱི་མཐིལ་ཡིན་ཏེ། མ་ཕམ་པས། ཡི་གེ་འབྲི་མཆོད་སྤྱིན་པ་དང་། །ཉན་དང་ཀློག་དང་ལེན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ཀྱི། །བསོད་ནམས་ཕུང་པོ་དཔག་ཏུ་མེད། །ཅེས་པ་ལྟར། ཀློག་པ་ཐོས་བསམ་དང་སྤངས་བ་བསམ་གཏན་གོང་ནས་གོང་དུ་འཕེལ་བའི་ཐབས་ལ་འབད་པས་སྟོན་པའི་བསྟན་པ་འཛིན་པར་འགྱུར་བ་ཡིན་པས། བསླབ་པའི་གནས་ལ་བག་ཡོད་པར་སྒྲུབ་པའི་སེམས་དང་ལྡན་པས་རང་གཞན་གྱི་དོན་གཉིས་མཐར་ཕྱིན་པ་བྱ་བ་གཅེས་སོ། །སླར་སྨྲས་པ། ལྷག་པའི་ཚུལ་ཁྲིམས་གཙང་མའི་ནོར་གྱིས་ཕྱུག །བྱང་ཆུབ་སེམས་ཀྱི་བདུད་རྩིའི་ལུས་སྟོབས་རྒྱས། །རིམ་གཉིས་ཏིང་འཛིན་ཟབ་མོར་ལེགས་གནས་པའི། །འདུས་པའི་ཚོགས་ཀྱི་ས་སྟེང་ཀུན་ཁྱབ་ཤོག །ཅེས་དམ་པ་གོང་མ་རྣམས་ཀྱི་གསུང་དང་མཐུན་པར་དགེ་འདུན་འདུས་པའི་སྡེ་ལ་བསླབ་བྱའི་བཅའ་ཡིག་འདི་ཡང་འཇམ་དབྱངས་མཁྱེན་བརྩེའི་སྤྲུལ་མིང་གི་བསྙད་པ་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་དཔལ་བཟང་པོས་སྤེལ་བ་དགེ་ལེགས་སུ་གྱུར་ཅིག །སརྦ་མངྒ་ལཾ། ཤུ་བྷཾ།། །།

[edit]

@#/__/bca' yig phan bde'i sa bon ces bya ba bzhugs so/__/ oM swasti/__mchog gsum nyi ma brgya pa'i snang ba yi/__/sgrib gnyis mun pa ma lus kun bcom ste/__/rnam grol thar pa dam pa'i snang ba ni/__/sbyin mdzad ston pa mchog des shis pa stsol/__/de yang phun sum tshogs pa'i dge 'dun pa 'gro ba lha mir bcas pa rnams kyi phyag bya ba'i 'os su gyur cing /__bsod nams kyi dpal dam par bzhugs pas bstan 'gro'i rgud pa zhi zhing /__phan bde'i legs tshogs gong 'phel du gyur pa'i rtsa lag dam pa yin pas tshul dang mthun pa'i mdzad 'phrin bzang pos bstan pa rin po che'i rjes su bslab pa la/__slob dpon dbyig gnyen gyis/__tshul gnas thos dang bsam ldan pas/__/bsgom pa la ni rab tu sbyor/__/ces gsungs pa ltar gzhi tshul khrims rnam par dag pa la brten dgos shing /__de'ang dge bsnyen dang /__dge tshul gyi sdom pa lo bco lnga man chad la nges par thob nas che ba dang yon tan kun gyi rtsa ba yig ge'i phyi mo slob pa nas bzung chos spyod sogs blo 'dzin dang /__dkyil 'khor gyi las rim thig rdul tshon/__gtor bzo gar 'chams/__'bud brdung bkrol gsum sogs rang rang la dgos pa'i yon tan rnams sbyangs brdar rgyus thon dang /__blo mchog tu gyur pa rnams kyis phyi nang gi rig gnas la bslab sbyang bya zhing /__ma mtha' yang spyod 'jug sdom gsum tsam mi shes ka med dang /__lo nyi shu lon nas sdom pa'i mchog bsnyen par rdzogs pa dge slong gi dngos po legs par bsgrub nas bslab bya'i rtsa ba pham lhag gi ma gos pa dang /__khyad par dge tshul slong yin phyin pham pa bzhi chang dang lnga po la bsrung bsdom bya ba khrims kyi rtsa ba yin pas/__rgyun du mo khrims dang chang khrims/__dud 'gro gsod pa dang /__bshas tshong byed pa rnams legs par khrims su bca' ba dang /__'gal ba byung na nyes chad lugs gnyis kyi tshul dang mthun pa gnang 'os dang /__de'ang ji skad du/__gal te thos pa mang gyur kyang /__/tshul khrims legs par mi bsdam na/__/de ni tshul khrims phyir smad cing /__/de yi thos pa phun tshogs min/__/ces dang /__/tshul khrims 'chal ba de ni ngan 'gror 'gro/__/de la thos pa mang pos skyob mi nus/__/zhes gsungs pa ltar ro/__/dus dang rgyun du bag yod dang khrel ngo tsha'i rten gzan sham dang mi 'bral ba dang /__dran shes bag yod kyis rang las rgan pa la bskur bsti dang /__'og ma la byams brtse/__mnyam pa la 'gran sems dang phrag dog sogs spangs nas sems zhi dul dang ldan pas dge sbyong gi chos bzhi dang mi 'bral zhing /__kun la dag snang sbyangs ba gal che ba dang /__bstan pa'i gzhi ma'am snying po ni gso sbyong /__dbyar gnas/__dgag dbye ste 'dul ba rgya mtsho'i snying po gzhi gsum po 'di yin pas rgyun ldan du yod na/__ston pa rin po che bka' drin rjes su bsams pa dang /__rang gi khas blangs pa'i nyes ltung thams cad 'gogs pa dang /__bslab pa gsum gong nas gong du 'phel/__bag med pa'i gnas las ldog cing sems can rnams gnod 'tshe las skyobs/__dkar phyogs kyi lha rnams dgyes pa dang /__sa phyogs kun tu bkra shis kyi dpal 'phel bar 'gyur ba sogs phan yon dang dgos pa bsam gyis mi khyab pas brtson pa dgu 'gyur du bskyed de gzhi gsum phyag len tshad ldan dang /__dbyar gnas kyi skabs su sor mdo'am/__sdom gsum lta bu'i chos 'chad nyan gyi bya bas dus 'da' ba gal che/__dus dang rgyun du tshul min gyi spyod pa spyi dang khyad par dmag jag gi gtam/__sgrung glu bzhad dang /__ku co 'chong rgyugs sogs gtan nas spangs shing /__chos spyod kha ton dang bslab sbyang bzlas brjod la brtson pa dang /__khyad par du so sor thar pa las/__/dge 'dun mthun pa bde ba ste/__/mthun pa rnams kyi dka' thub bde/__/zhes dang /__zhi ba lhas/__rtag tu dge 'dun mthun pa dang /__/dge 'dun don yang 'grub par shog__/ces smon lam mdzad pa ltar/__dge 'dun rnams spyod lam kun nas gcig sems gcig gis 'dzin te/__thugs mthun kho nas snyigs dus 'dir shin tu gces pa'i khrims gal po che dang /__mdor na gson gshin gyi dkor la longs spyod pa rnams kyis sems rgyud yang dag par sdam par ma byas na nyams nyes par 'gyur te/__lung rnam 'byed las/__lcags gong me lce 'bar ba dag__/zos par gyur pa mchog yin gyi/__/tshul 'chal yang dag mi bsdam pa/__/yul 'khor bsod snyoms za ba min/__/ces pa ltar/__tshul khrims mi nyams pa dang /__chos spyod bcu la rtag tu brtson par bya ba ni ston pa'i rjes su zhugs rnams kyi nyams len gyi mthil yin te/__ma pham pas/__yi ge 'bri mchod spyin pa dang /__/nyan dang klog dang len pa dang /__/'chad dang kha ton byed pa dang /__/de sems pa dang sgom pa ste/__/spyod pa 'di bcu'i bdag nyid kyi/__/bsod nams phung po dpag tu med/__/ces pa ltar/__klog pa thos bsam dang spangs ba bsam gtan gong nas gong du 'phel ba'i thabs la 'bad pas ston pa'i bstan pa 'dzin par 'gyur ba yin pas/__bslab pa'i gnas la bag yod par sgrub pa'i sems dang ldan pas rang gzhan gyi don gnyis mthar phyin pa bya ba gces so/__/slar smras pa/__lhag pa'i tshul khrims gtsang ma'i nor gyis phyug__/byang chub sems kyi bdud rtsi'i lus stobs rgyas/__/rim gnyis ting 'dzin zab mor legs gnas pa'i/__/'dus pa'i tshogs kyi sa steng kun khyab shog__/ces dam pa gong ma rnams kyi gsung dang mthun par dge 'dun 'dus pa'i sde la bslab bya'i bca' yig 'di yang 'jam dbyangs mkhyen brtse'i sprul ming gi bsnyad pa 'jam dbyangs chos kyi blo gros ris med bstan pa'i rgyal mtshan dpal bzang pos spel ba dge legs su gyur cig__/sarba mang+ga laM/__shu b+haM//___//