དགེ་འདུན་འདུས་པའི་བཅའ་ཡིག་རབ་གསལ་མེ་ལོང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	dge 'dun 'dus pa'i bca' yig rab gsal me long
Location	chos kyi blo gros bka' 'bum Volume 10, Text 57, Pages 397-405 (Folios 1a to 5a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. dge 'dun 'dus pa'i bca' yig rab gsal me long. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 397-405. Bir, H.P.: Khyentse Labrang, 2012.
Genre	Monastics Regulations - bca' yig
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/pellucid-mirror-guidelines
Colophon	།ཅེས་པའི་བཅའ་ཡིག་འདིའང་སྡེ་དགེ་རྫོང་གསར་དགོན་ནས་འཇམ་དབྱངས་མཁྱེན་བརྩེའི་དབང་པོའི་སྤྲུལ་མིང་འཛིན་པ་ཆོས་སྨྲ་བ་འཇམ་དབྱངས་ཆོས་ཀྱི་བློ་གྲོས་པས་ས་སྟག་རྒྱ་ཟླའི་ཚེས་ལ་བྲིས་པ་དགེ་ལེགས་སུ་གྱུར་ཅིག །མངྒ་ལཾ།།
	/ces pa'i bca' yig 'di'ang sde dge rdzong gsar dgon nas 'jam dbyangs mkhyen brtse'i dbang po'i sprul ming 'dzin pa chos smra ba 'jam dbyangs chos kyi blo gros pas sa stag rgya zla'i tshes la bris pa dge legs su gyur cig__/mang+ga laM//

1 Texts in this Section (sde tshan or chos tshan)

397-405	དགེ་འདུན་འདུས་པའི་བཅའ་ཡིག་རབ་གསལ་མེ་ལོང་། dge 'dun 'dus pa'i bca' yig rab gsal me long Monastics Regulations - bca' yig	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །དགེ་འདུན་འདུས་པའི་བཅའ་ཡིག་རབ་གསལ་མེ་ལོང་ཞེས་བྱ་བ་བཞུགས་སོ། ། ཨོཾ་སྭསྟི། ཐུབ་རྣམས་སྤངས་རྟོགས་རྒྱ་མཚོའི་ཕ་མཐར་སོན། །དོན་གཉིས་ལྷུན་གྱིས་འགྲུབ་པའི་དཔལ་མངའ་ཞིང་། །འཁོར་བའི་ཉེས་འབྱིན་ཞི་བསིལ་དམ་པའི་ཆོས། །དེ་འཛིན་འཕགས་པའི་ཚོགས་དང་བཅས་ལ་འདུད། །གངས་རིའི་སྤོ་ན་སྨྲ་བ་ངན་འཇོམས་ཤིང་། །ཀུན་མཁྱེན་རྒྱལ་བའི་བསྟན་པ་འཛིན་པ་ལ། །ཟླ་མེད་མཁས་དང་གྲུབ་པའི་གཏམ་གྱིས་ལྗིད། །སྙན་པར་རབ་གྲགས་ས་སྐྱ་པ་ལ་འདུད། །ཁྱད་པར་ཐུབ་པའི་ལུང་གི་རབ་བསྔགས་པ། །ཀུན་དགའ་བཟང་པོ་སངས་རྒྱས་ཆོས་མཛོད་འཛིན། །རྣམ་ཐར་མཚུངས་མེད་པདྨ་དཀར་པོ་བཞིན། །ཀུན་མཁྱེན་ཨེ་ཝཾ་པ་དེར་གུས་པས་འདུད། །འཇམ་དབྱངས་བླ་མ་བརྒྱུད་པར་བཅས་པ་དང་། །གྲུབ་གཉིས་སྟེར་མཁས་ཡི་དམ་ཞི་དང་ཁྲོ། །རབ་འབར་འཇིགས་རུང་བསྟན་སྲུང་རྒྱ་མཚོ་ཡིས། །བཀྲ་ཤིས་མེ་ཏོག་ཕྱོགས་བཅུར་བཀྲམ་དུ་གསོལ། ཅེས་འདུད་ཅིང་ཤིས་པའི་ཚིག་གིས་དགེ་ལེགས་སུ་བྱ་སྟེ། མདོ་སྨད་བདེ་ཆེན་ལྗོངས་ཀྱི་བྱང་ཕྱོགས་ཨ་མདོའི་ཡུལ་རྗེ་ས་སྐྱ་བའི་རིང་ལུགས་འཛིན་པ་ས་སྒང་ཐུབ་བསྟན་དགེ་འཕེལ་གྱི་གཙུག་ལག་ཁང་ཆེན་པོར་བཞུགས་པའི་དགེ་འདུན་པ་རྣམས་ལ་ཁྲིམས་སུ་བྱ་བ་ནི། སློབ་དཔོན་དབྱིག་གི་གཉེན་པོས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཅེས་པའི་དོན་དང་མཐུན་པར་ཐུགས་ཉམས་སུ་བཞེས་དགོས་པ་ལ་དགོན་པ་ལ་རང་གི་གྲྭ་རིགས་ཀྱི་ཁོངས་སུ་གཏོགས་པ་རྣམས་འཛིན་བདག་གཞན་འཁྱར་མེད་པ་དང་། ཆོས་གྲལ་བཞུགས་པ་རྣམས་སྐྱབས་སྡོམ་དང་། དགེ་ཚུལ་རྣམས་སྒྲུབ་ནས་ཀློག་གི་སློབ་དཔོན་བསྟེན་ཏེ་ཀློག་བསླབ་པ་དང་། ཆོས་སྤྱོད། བསྐང་གསོ། ཆོ་ག་སོགས་བློ་ལ་བྱང་པར་དགོས་ཤིང་། སྒྲུབ་མཆོད་སོགས་ཀྱི་ཕྱག་ལེན། ཐིག་དང་རྡུལ་མཚོན། གཏོར་བཟོ། འབུད་བཀྲོལ་བརྡུང་གསུམ་སོགས་ལས་སྣེར་བརྐོས་པ་དང་། མ་བརྐོས་པ་རྣམས་ནས་ཀྱང་རང་རང་གི་བློ་དང་འཚོམས་པར་སྦྱོངས་རྒྱུ་དང་། བློ་ཆེན་རྣམས་ཀྱིས་མདོ་སྔགས་རིགས་གནས་ལ་སློབ་སྦྱོངས་དགོས་ཤིང་། ལོ་གྲངས་སོན་པ་ན་ས་ངོར་སོགས་ལ་འགྲོ་ཐུབ་ན་རབ། དེ་མིན་མཁན་སློབ་སྡོམ་ལྡན་ལས་བསྙེན་རྫོགས་སྒྲུབ་ཏེ་བསླབ་གཞི་ཉམས་པ་མེད་པར་བསྲུངས་དགོས་ཤིང་ཉམས་ན་ཉེས་དམིགས་ཆེན་པོ་ཐོབ་པར་འགྱུར་ཏེ། ཇི་སྐད་དུ། གང་ཞིག་སྟོན་པ་ཐུགས་རྗེའི་བསྟན་པ་ལ། །ཡང་བར་སེམས་ཤིང་ཅུང་ཟད་འདའ་བྱེད་པ། །དེ་ནས་དེ་ལས་སྡུག་བསྔལ་གཞན་དབང་ཐོབ། །སྨྱིག་ཚལ་བྲེག་པས་ཨ་མྲིའི་ཚལ་ཉམས་བཞིན། །ཅེས་པ་ལྟར་དགེ་སྦྱོང་གི་གནས་ལས་ཉམས་པར་འགྱུར་བས། རྩ་བཞི་ཆང་ལྔ་དང་། ལྷག་མ། སྤང་ལྷུང་སོགས། བཅས་པའི་ཁྲིམསལས་མི་འདའ་ཞིང་། དགེ་སྦྱོང་གི་ཆོས་བཞི་དང་ལྡན་པ་དང་། ཁྱད་པར་དགོན་ནང་དུ་བུད་མེད་རྒྱུ་འགྲུལ་ཞག་སྡོད་སོགས་དང་། ཆང་གཙོ་བཏུང་སོགས་མི་རུང་ཞིང་མོ་བཅའ་ཆང་ཁྲིམས་དམ་པར་བསྡམ་པ་དང་། དགོན་པའི་ཉེ་འཁོར་དུ་དྲག་ཞེན་སུས་ཀྱང་སེམས་ཅན་གྱི་སྲོག་གཅོད་པ་དང་། ཀི་སྒྲ་འབོད་སྒྲ་ཚོགས་པ་མིན་པའི་འབུད་དཀྲོལ་སོགས་སྤྱོད་ངན་གྱི་རིགས་མི་ཆོག་པ་དང་། བསླབ་སྐྱོན་བྱུང་ན་དགེ་འདུན་གྱི་གྲལ་ནས་གནས་དབྱུང་དགོས་པ་དང་། དུས་རྟག་ཏུ་གྲྭ་བ་རྣམས་གྲོང་དུ་འཁྱམ་པ་སྤངས་ནས་དགོན་ནང་དུ་སྡོད་ཚུག་པ་དང་། བསླབ་སྦྱོངས་དང་བསྙེན་སྒྲུབ་སོགས་ལ་འབད་པ་གལ་ཆེ་ཞིང་། དགོན་ནང་དུ་འཐབ་འཛིང་འཁྲུག་བསླངས་མི་བྱ་བ་དང་། ཆོ་ག་ཆོས་སྤྱོད་ཐམས་ཅད་མཐོང་བ་བརྒྱུད་པའི་ཕྱག་བཞེས་མ་ཉམས་ཤིང་། ཚོགས་བསྒྲིག་ཐམས་ཅད་གོང་འཕེལ་དུ་འབྱུང་དགོས་པ་དང་། དགོན་པ་གཞུང་གི་རྟེན་མཆོད། སྤྱི་ཐེབས་སོགས་ཉམས་འཁྱར་མི་ཆོག་ཅིང་དེ་འདྲ་བྱུང་ན་རྩིས་ཚབ་དགོས་པ་དང་། གྲུབ་མཐའ་ཆོས་ལུགས་གཞན་རྗེས་སུ་མི་རྒྱུགས་ཤིང་། དཔལ་ལྡན་ས་སྐྱའི་མདོ་སྔགས་ཀྱི་བལྟའ་སྲོལ་དྲི་མ་མེད་པའི་ལྟ་སྤྱོད་འཛིན་དགོས་ཤིང་། དབྱར་གནས་གསོ་སྦྱོངས་རང་ལུགས་འཇམ་མགོན་ངག་དབང་ལེགས་གྲུབ་ཀྱི་གཞི་གསུམ་ཆོ་ག་བཞིན་ཕྱག་བཞེས་མཛད་དགོས་པ་དང་། སྤྱི་དཀོར་ཆུད་ཟོས་སུ་མ་སོང་བར་དགེ་འདུན་པའི་ཕྱག་ཏུ་འབྱེད་པ་དང་། རྟེན་བཞེངས་བྱ་བ་སོགས་དགེ་འདུན་ཐུགས་ཡིད་ཆེས་པ་དགོས་རྒྱུ་རྣམས་གཙོ་བོར་སྨོས་ཤིང་ནང་ཁྲིམས་བཅའ་འོས་པ་རྣམས་དགེ་འདུན་སྤྱི་ཁྲིམས་གལ་ཆེ་རིགས་འདིར་ཚིག་ཟིན་ཡོད་མེད་ལ་མ་ལྟོས་པར་སྡོམ་དགོས་ཤིང་། མདོར་ན་ཀུན་མཁྱེན་ཤཱཀྱ་སེང་གེའི་བཀའ་དྲི་མ་མེད་པ་སོ་སོར་ཐར་པའི་མདོ་ནས་བཤད་པ་བཞིན་བསླབ་པ་ལ་གུས་པ་དང་། དྲན་ཤེས་བག་ཡོད་ཀྱི་སྒོ་གསུམ་བསྡོམ་པར་བྱ་བ་གལ་ཆེ་སྟེ། དེ་ཉིད་ལས། དགེ་སློང་དབང་དུལ་ཀུན་དབང་པོ། །སངས་རྒྱས་མི་འགྱུར་རབ་བྱུང་བ། །ངེས་པར་ཐར་པ་འདོད་རྣམས་ཀྱིས། །སོ་སོར་ཐར་པ་རྟག་ཏུ་སྲུང་། །རབ་ཏུ་བྱུང་བ་གཞན་ལ་གནོད་པ་དང་། །གཞན་ལ་འཚེ་བ་དགེ་སྦྱོང་མ་ཡིན་ནོ། །མིག་ལྡན་འགྲོ་བ་ཡོད་པ་ཡི། །ཉམ་ང་བ་དག་ཇི་བཞིན་དུ། །མཁས་པས་འཚོ་བའི་འཇིག་རྟེན་འདིར། །སྡིག་པ་དག་ནི་ཡོངས་སུ་སྤངས། །ཞེས་དང་། ལྷག་པའི་སེམས་ལ་ཡང་དག་སྦྱོར། །འདི་ནི་སངས་རྒྱས་བསྟན་པ་ཡིན། །ཅེས་གསུངས་པས། དལ་འབྱོར་གྱི་རྟེན་ལ་རྙེད་དཀའ་བའི་འདུ་ཤེས། རྒྱལ་བའི་བསྟན་པ་རིན་ཆེན་དང་འཕྲད་པར་དཀའ་བ། དལ་བའི་རྟེན་བཟང་ཡུན་རིང་དུ་མི་གནས་པ། བསྟན་པ་རིན་ཆེན་ཡུན་རིང་དུ་གནས་པའི་འདུ་ཤེས་བསྐྱེད་དེ་ལྷག་པའི་བསམ་པ་རྣམས་པར་དག་པ་བསྐྱེད་པ་གལ་ཆེ་ཞིང་། སྔོན་བསྐལ་པ་བཟང་བའི་དུས་ཁྲིམས་ཉིས་བརྒྱ་ལྔ་བཅུ་སྲུངས་བ་ཞིག་དང་། སྙིགས་དུས་འདིར་བསླབ་གཞི་སྣ་གཅིག་འཛིན་པ་གཉིས་ཕྱི་མ་བསོད་ནམས་ཆེ་བར་གསུང་སྟེ། ཏིང་འཛིན་རྒྱལ་པོ་ལས། གང་གི་དམ་ཆོས་རབ་ཏུ་འཇིགས་པ་དང་། །བདེ་གཤེགས་བསྟན་པ་འགགས་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་དེ་ནི་དེ་བས་ཁྱད་པར་འཕགས། །ཅེས་གསུངས་པ་ལ་བློ་བཞག་ནས་སྙིགས་མ་ལྔ་ཆོས་བདོ་ཞིང་སངས་རྒྱས་ཀྱི་བསྟན་པ་མར་མེ་འཆི་ག་མ་ལྟ་བུའི་སྐབས་འདིར་བསྟན་པ་འཛིན་པ་དགེ་འདུན་གྱི་སྡེ་ལ་རགས་ལས་པས་ཐུགས་མཐུན་ཁྲིམས་གཙང་གི་སྒོ་ནས་སྟོན་པ་མཉམས་མེད་ཐུགས་རྗེ་ཅན་གྱིས་བསྟན་པ་རིན་པོ་ཆེ་བསླབ་པ་གསུམ་གྱི་བང་མཛོད་ལ་ཀློག་པ་ཐོས་བསམ་དང་། སྤང་བ་བསམ་གཏན་གྱི་འཁོར་ལོར་ཤིན་ཏུ་འབད་པར་བྱ་དགོས་ཏེ། རྔ་སྒྲའི་ཚིག་བཅད་ལས། བདག་གི་ནོར་ནི་གཏོང་ལ་ལུས་བསྲུང་ངོ་། །ནོར་དང་ལུས་ཀྱང་གཏོང་ལ་སྲོག་བསྲུང་ངོ་། །ནོར་དང་ལུས་དང་དེ་བཞིན་སྲོག་རྣམས་ཀྱང་། །ཐམས་ཅད་གཏོང་ལ་འདིར་ནི་ཆོས་བསྲུང་ངོ་། །ཞེས་ཤིན་ཏུ་གཅེས་པའི་ལུས་སྲོག་དང་། ལྷ་དབང་གི་ལོངས་སྤྱོད་ལྟ་བུས་ཆ་ཙམ་མཚོན་དུ་མེད་ཅིང་དེ་ཐམས་ཅད་ཉམ་ན་སླ་ཡི་བསྟན་པ་དམ་པའི་ཆོས་འཇིག་ན་སྲིད་ཞིའི་དགེ་ལེགས་ཐམས་ཅད་སྟོར་བས་ཤིན་ཏུ་གཅེས་པར་སྲུང་དགོས་པ་དང་། མདོར་ན་སྒོ་གསུམ་བག་མེད་ཀྱི་ཁྱིམ་པ་སུན་འབྱིན་མ་དད་པའི་སྤྱོད་པ་ལས་ལྡོག་ནས་གཡོ་སྒྱུ་སྤངས་པའི་ལྟག་པའི་བསམ་པ་དང་ལྡན་པས་སྒོ་གསུམ་དྲང་པོར་བསྲང་ཞིང་བག་ཡོད་པ་ཁོ་ནས་སངས་རྒྱས་ཀྱི་ཆོས་རྣམས་རྫོགས་པར་འགྱུར་བ་དང་། རྟག་ཏུ་ལེགས་ཉེས་བརྟག་པའི་དྲན་ཤེས་བཞིན་དང་ལྡན་པ་གལ་ཆེ་སྟེ། ཞི་བ་ལྷས། སེམས་བསྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དག །སྲོག་ལ་བབས་ཀྱང་སྲུང་ཤིག་ཅེས། །བདག་གི་དེ་ལྟར་ཐལ་མོ་སྦྱར། །ཅེས་གསུངས་པ་ལྟར་སྤྱོད་ལམ་ཀུན་ཏུ་ཞི་དུལ་ལྷོད་གསུམ་ལྡན་པས་དགེ་འདུན་གྱི་བཅའ་བསྒྲིགས་ལས་མི་འདའ་བ་བྱས་ན་འཇིག་རྟེན་གྱི་ཁམས་སུ་དགེ་ལེགས་རྒྱ་ཆེན་པོ་འབྱུང་ཤིང་དགེ་འདུན་སྒྲིག་འོག་ནས་འཚང་རྒྱ་ཞེས་ངེས་པར་འབྱུང་བས་རང་བསྟན་རང་གཅེས་ཀྱི་ལྷ་མི་ཀུན་གྱི་བསོད་ནམས་ཀྱི་ཞིང་མཆོག་ཏུ་འགྱུར་བའི་ཐབས་ལ་འབད་པས་བརྩོན་པར་བྱ་བ་རིགས་སོ། །སླར་སྨྲས་པ། གང་ཞིག་འདུས་པའི་ཚོགས་ནི་ཤིན་ཏུ་འགྲོགས་ན་བདེ། །རྟག་པར་རབ་མཐུན་རྣམ་གསུམ་གཙང་མའི་གོས་ཀྱིས་བརྒྱན། །སྐྱེ་བོས་མཐོང་ན་རབ་དགའ་དད་པས་འབྲས་ཐོབ་ཅིང་། །ལྷ་མིའི་རྒྱན་གྱུར་ཟླ་མེད་དགེ་འདུན་བཀྲ་ཤིས་ཤོག །བསྟན་འཛིན་སྐྱེས་བུའི་ཞབས་བརྟན་ཅིང་། །བསྟན་པའི་སྦྱིན་བདག་དར་ཞིང་རྒྱས། །བསྟན་ལ་གུས་རྣམས་བདེ་སྐྱིད་འཕེལ། །བསྟན་ལ་གནོད་པ་ཞི་གྱུར་ཅིག །ཐུབ༷་པའི་བསྟན༷་པ་རིན་ཆེན་མཛོད་ཀྱི་གཞི། །བཀྲ༷་ཤིས༷་དགེ༷་འཕེ༷ལ་གླིང༷་གི་ཆོས་གྲྭ་ཆེ། །བཤད་དང་སྒྲུབ་པའི་བྱ་བར་མི་གཡེལ་ཞིང་། །བསྟན་པ་དར་རྒྱས་ཡུན་དུ་གནས་པར་ཤོག །ཅེས་པའི་བཅའ་ཡིག་འདིའང་སྡེ་དགེ་རྫོང་གསར་དགོན་ནས་འཇམ་དབྱངས་མཁྱེན་བརྩེའི་དབང་པོའི་སྤྲུལ་མིང་འཛིན་པ་ཆོས་སྨྲ་བ་འཇམ་དབྱངས་ཆོས་ཀྱི་བློ་གྲོས་པས་ས་སྟག་རྒྱ་ཟླའི་ཚེས་ལ་བྲིས་པ་དགེ་ལེགས་སུ་གྱུར་ཅིག །མངྒ་ལཾ།། །།

[edit]

@#/__/dge 'dun 'dus pa'i bca' yig rab gsal me long zhes bya ba bzhugs so/__/ oM swasti/__thub rnams spangs rtogs rgya mtsho'i pha mthar son/__/don gnyis lhun gyis 'grub pa'i dpal mnga' zhing /__/'khor ba'i nyes 'byin zhi bsil dam pa'i chos/__/de 'dzin 'phags pa'i tshogs dang bcas la 'dud/__/gangs ri'i spo na smra ba ngan 'joms shing /__/kun mkhyen rgyal ba'i bstan pa 'dzin pa la/__/zla med mkhas dang grub pa'i gtam gyis ljid/__/snyan par rab grags sa skya pa la 'dud/__/khyad par thub pa'i lung gi rab bsngags pa/__/kun dga' bzang po sangs rgyas chos mdzod 'dzin/__/rnam thar mtshungs med pad+ma dkar po bzhin/__/kun mkhyen e waM pa der gus pas 'dud/__/'jam dbyangs bla ma brgyud par bcas pa dang /__/grub gnyis ster mkhas yi dam zhi dang khro/__/rab 'bar 'jigs rung bstan srung rgya mtsho yis/__/bkra shis me tog phyogs bcur bkram du gsol/__ces 'dud cing shis pa'i tshig gis dge legs su bya ste/__mdo smad bde chen ljongs kyi byang phyogs a mdo'i yul rje sa skya ba'i ring lugs 'dzin pa sa sgang thub bstan dge 'phel gyi gtsug lag khang chen por bzhugs pa'i dge 'dun pa rnams la khrims su bya ba ni/__slob dpon dbyig gi gnyen pos/__tshul gnas thos dang bsam ldan pas/__/sgom pa la ni rab tu sbyor/__/ces pa'i don dang mthun par thugs nyams su bzhes dgos pa la dgon pa la rang gi grwa rigs kyi khongs su gtogs pa rnams 'dzin bdag gzhan 'khyar med pa dang /__chos gral bzhugs pa rnams skyabs sdom dang /__dge tshul rnams sgrub nas klog gi slob dpon bsten te klog bslab pa dang /__chos spyod/__bskang gso/__cho ga sogs blo la byang par dgos shing /__sgrub mchod sogs kyi phyag len/__thig dang rdul mtshon/__gtor bzo/__'bud bkrol brdung gsum sogs las sner brkos pa dang /__ma brkos pa rnams nas kyang rang rang gi blo dang 'tshoms par sbyongs rgyu dang /__blo chen rnams kyis mdo sngags rigs gnas la slob sbyongs dgos shing /__lo grangs son pa na sa ngor sogs la 'gro thub na rab/__de min mkhan slob sdom ldan las bsnyen rdzogs sgrub te bslab gzhi nyams pa med par bsrungs dgos shing nyams na nyes dmigs chen po thob par 'gyur te/__ji skad du/__gang zhig ston pa thugs rje'i bstan pa la/__/yang bar sems shing cung zad 'da' byed pa/__/de nas de las sdug bsngal gzhan dbang thob/__/smyig tshal breg pas a mri'i tshal nyams bzhin/__/ces pa ltar dge sbyong gi gnas las nyams par 'gyur bas/__rtsa bzhi chang lnga dang /__lhag ma/__spang lhung sogs/__bcas pa'i khrimasalas mi 'da' zhing /__dge sbyong gi chos bzhi dang ldan pa dang /__khyad par dgon nang du bud med rgyu 'grul zhag sdod sogs dang /__chang gtso btung sogs mi rung zhing mo bca' chang khrims dam par bsdam pa dang /__dgon pa'i nye 'khor du drag zhen sus kyang sems can gyi srog gcod pa dang /__ki sgra 'bod sgra tshogs pa min pa'i 'bud dkrol sogs spyod ngan gyi rigs mi chog pa dang /__bslab skyon byung na dge 'dun gyi gral nas gnas dbyung dgos pa dang /__dus rtag tu grwa ba rnams grong du 'khyam pa spangs nas dgon nang du sdod tshug pa dang /__bslab sbyongs dang bsnyen sgrub sogs la 'bad pa gal che zhing /__dgon nang du 'thab 'dzing 'khrug bslangs mi bya ba dang /__cho ga chos spyod thams cad mthong ba brgyud pa'i phyag bzhes ma nyams shing /__tshogs bsgrig thams cad gong 'phel du 'byung dgos pa dang /__dgon pa gzhung gi rten mchod/__spyi thebs sogs nyams 'khyar mi chog cing de 'dra byung na rtsis tshab dgos pa dang /__grub mtha' chos lugs gzhan rjes su mi rgyugs shing /__dpal ldan sa skya'i mdo sngags kyi blta' srol dri ma med pa'i lta spyod 'dzin dgos shing /__dbyar gnas gso sbyongs rang lugs 'jam mgon ngag dbang legs grub kyi gzhi gsum cho ga bzhin phyag bzhes mdzad dgos pa dang /__spyi dkor chud zos su ma song bar dge 'dun pa'i phyag tu 'byed pa dang /__rten bzhengs bya ba sogs dge 'dun thugs yid ches pa dgos rgyu rnams gtso bor smos shing nang khrims bca' 'os pa rnams dge 'dun spyi khrims gal che rigs 'dir tshig zin yod med la ma ltos par sdom dgos shing /__mdor na kun mkhyen shAkya seng ge'i bka' dri ma med pa so sor thar pa'i mdo nas bshad pa bzhin bslab pa la gus pa dang /__dran shes bag yod kyi sgo gsum bsdom par bya ba gal che ste/__de nyid las/__dge slong dbang dul kun dbang po/__/sangs rgyas mi 'gyur rab byung ba/__/nges par thar pa 'dod rnams kyis/__/so sor thar pa rtag tu srung /__/rab tu byung ba gzhan la gnod pa dang /__/gzhan la 'tshe ba dge sbyong ma yin no/__/mig ldan 'gro ba yod pa yi/__/nyam nga ba dag ji bzhin du/__/mkhas pas 'tsho ba'i 'jig rten 'dir/__/sdig pa dag ni yongs su spangs/__/zhes dang /__lhag pa'i sems la yang dag sbyor/__/'di ni sangs rgyas bstan pa yin/__/ces gsungs pas/__dal 'byor gyi rten la rnyed dka' ba'i 'du shes/__rgyal ba'i bstan pa rin chen dang 'phrad par dka' ba/__dal ba'i rten bzang yun ring du mi gnas pa/__bstan pa rin chen yun ring du gnas pa'i 'du shes bskyed de lhag pa'i bsam pa rnams par dag pa bskyed pa gal che zhing /__sngon bskal pa bzang ba'i dus khrims nyis brgya lnga bcu srungs ba zhig dang /__snyigs dus 'dir bslab gzhi sna gcig 'dzin pa gnyis phyi ma bsod nams che bar gsung ste/__ting 'dzin rgyal po las/__gang gi dam chos rab tu 'jigs pa dang /__/bde gshegs bstan pa 'gags par 'gyur ba'i tshe/__/nyin mtshan du ni bslab pa gcig spyod pa/__/bsod nams de ni de bas khyad par 'phags/__/ces gsungs pa la blo bzhag nas snyigs ma lnga chos bdo zhing sangs rgyas kyi bstan pa mar me 'chi ga ma lta bu'i skabs 'dir bstan pa 'dzin pa dge 'dun gyi sde la rags las pas thugs mthun khrims gtsang gi sgo nas ston pa mnyams med thugs rje can gyis bstan pa rin po che bslab pa gsum gyi bang mdzod la klog pa thos bsam dang /__spang ba bsam gtan gyi 'khor lor shin tu 'bad par bya dgos te/__rnga sgra'i tshig bcad las/__bdag gi nor ni gtong la lus bsrung ngo /__/nor dang lus kyang gtong la srog bsrung ngo /__/nor dang lus dang de bzhin srog rnams kyang /__/thams cad gtong la 'dir ni chos bsrung ngo /__/zhes shin tu gces pa'i lus srog dang /__lha dbang gi longs spyod lta bus cha tsam mtshon du med cing de thams cad nyam na sla yi bstan pa dam pa'i chos 'jig na srid zhi'i dge legs thams cad stor bas shin tu gces par srung dgos pa dang /__mdor na sgo gsum bag med kyi khyim pa sun 'byin ma dad pa'i spyod pa las ldog nas g.yo sgyu spangs pa'i ltag pa'i bsam pa dang ldan pas sgo gsum drang por bsrang zhing bag yod pa kho nas sangs rgyas kyi chos rnams rdzogs par 'gyur ba dang /__rtag tu legs nyes brtag pa'i dran shes bzhin dang ldan pa gal che ste/__zhi ba lhas/__sems bsrung 'dod pa rnams la ni/__/dran pa dang ni shes bzhin dag__/srog la babs kyang srung shig ces/__/bdag gi de ltar thal mo sbyar/__/ces gsungs pa ltar spyod lam kun tu zhi dul lhod gsum ldan pas dge 'dun gyi bca' bsgrigs las mi 'da' ba byas na 'jig rten gyi khams su dge legs rgya chen po 'byung shing dge 'dun sgrig 'og nas 'tshang rgya zhes nges par 'byung bas rang bstan rang gces kyi lha mi kun gyi bsod nams kyi zhing mchog tu 'gyur ba'i thabs la 'bad pas brtson par bya ba rigs so/__/slar smras pa/__gang zhig 'dus pa'i tshogs ni shin tu 'grogs na bde/__/rtag par rab mthun rnam gsum gtsang ma'i gos kyis brgyan/__/skye bos mthong na rab dga' dad pas 'bras thob cing /__/lha mi'i rgyan gyur zla med dge 'dun bkra shis shog__/bstan 'dzin skyes bu'i zhabs brtan cing /__/bstan pa'i sbyin bdag dar zhing rgyas/__/bstan la gus rnams bde skyid 'phel/__/bstan la gnod pa zhi gyur cig__/thubaX pa'i bstanaX pa rin chen mdzod kyi gzhi/__/bkraX shisaX dgeX 'pheXl glingaX gi chos grwa che/__/bshad dang sgrub pa'i bya bar mi g.yel zhing /__/bstan pa dar rgyas yun du gnas par shog__/ces pa'i bca' yig 'di'ang sde dge rdzong gsar dgon nas 'jam dbyangs mkhyen brtse'i dbang po'i sprul ming 'dzin pa chos smra ba 'jam dbyangs chos kyi blo gros pas sa stag rgya zla'i tshes la bris pa dge legs su gyur cig__/mang+ga laM//___//