གནས་བྱང་།

🚧 This website is under continued development. We appreciate your patience!

Previous Text Back to Volume PageNext Text

Wylie title	gnas byang
Location	chos kyi blo gros bka' 'bum Volume 10, Text 39, Pages 339-341 (Folios 1a1 to 2a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. gnas byang. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 339-341. Bir, H.P.: Khyentse Labrang, 2012.
Genre	Place or Sacred Site Guides - gnas bshad - skor tshad  ·  Verses of Praise - bstod pa

1 Texts in this Section (sde tshan or chos tshan)

339-341	གནས་བྱང་། gnas byang Place or Sacred Site Guides - gnas bshad - skor tshad   ·   Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

གནས་བྱང་། ཨ་མ་ཧོཿ ཡུལ་གྱི་ཁྱད་འཕགས་མཁའ་སྤྱོད་ཌཱ་ཀིའི་ཞིང་། །སྦས་ཡུལ་རྒྱལ་པོ་འབྲས་མོ་ལྗོངས་གི་སར། །ནུབ་བྱང་མཚམས་ཀྱི་རི་བོའི་ངོས་ཀྱི་ཆར། །དགའ་བ་ལུང་ངམ་རྡོ་རྗེ་སྨན་གྱི་ལུང་། །རྫ་དང་གཡའ་བྲག་སྤང་ལྗོངས་ནགས་ཀྱི་ཚལ། །ཨོ་རྒྱན་བདག་དང་བི་རུ་ས་ར་ཧ། །ཌོམྦྷི་ལ་སོགས་འཕགས་ཡུལ་པཎ་གྲུབ་དང་། །བོད་ཀྱི་མཚོ་རྒྱལ་འབྲོག་བན་བདུད་འཇོམས་དང་། །ཀླུ་དབང་སྲུང་དང་མི་ལ་ཐང་སྟོང་སོགས། །གྲུབ་པའི་རིག་འཛིན་རྣམས་ཀྱིས་སྒྲུབ་པའི་གནས། །བྲག་ཕུག་བརྒྱད་དང་ཐུགས་མགོན་གྲི་གུག་ཅན། །དགྱེས་པར་རོལ་པའི་དཔལ་གྱི་དེའུ་དང་། །ཚེ་དཔག་མེད་དང་རིག་བྱེད་སྒྲོལ་མ་སོགས། །སངས་རྒྱས་བྱང་སེམས་རྣམས་ཀྱི་བྱིན་བརླབ་པའི། །ཕྱག་ཞབས་རྗེས་དང་སྐུ་གསུང་ཐུགས་ཀྱི་རྟེན། །ངོ་མཚར་བཀོད་པ་བགྲངས་ལས་འདས་པ་དང་། །གསེར་མཚོ་འོ་མཚོ་རཀྟའི་མཚོ་ཆེན་སོགས། །འཆི་མེད་ལྷ་ཡི་བདུད་རྩིའི་ཚེ་ཆུ་དང་། །ལྗོན་ཤིང་བཟང་པོ་ཌཱ་ཀི་མཆེད་ལྔ་བརྟེན། །སྤངས་ལྗོངས་འབུར་མོ་མེ་ལོང་ལྟར་འཇམ་པ། །ཅུང་ཟད་མཐོ་བར་ལྷ་ཁང་རྟེན་གསུམ་བཞེངས། །དེས་ནི་ལྷ་མིན་གདུག་པའི་ཚ་ངར་ཞི། །རྣལ་འབྱོར་རིག་འཛིན་གྲུབ་པའི་གནས་བཅས་ནས། །ཚེ་ཡི་འཕྲང་སྒྲོལ་ཕྲིན་ལས་མཐའ་རུ་ཕྱིན། །གསང་སྔགས་བསྟན་པ་ཕྱོགས་བཅུར་རྒྱས་པར་འགྱུར། །ཤིན་ཏུ་གསང་བའི་ཟབ་གཏེར་རྙེད་པའང་སྲིད། །མཁའ་སྤྱོད་དགའ་བའི་ལུང་གི་མདོ་བྱང་ནི། །ཤིན་ཏུ་ཉུང་ངུར་ཁྲི་སྲོང་སྐལ་བར་གདམས། །ས་མ་ཡཿདེ་ལས་ཡང་གསར་གུད་དུ་སྦས། །དེ་ལྟའི་གནས་དེའི་ཉེ་ལོགས་སུ། །སྦས་པའི་ཡུལ་ནི་རིན་ཆེན་སྡེངས། །བྲག་རིའི་བསྐོང་བའི་ནང་དག་ཏུ། །ཐང་ཆེན་སྨན་འབྲས་མེ་ཏོག་རིགས། །བཟང་ཤིང་སྣ་ཚོགས་འདྲེས་པའི་ཚལ། །མཚོ་རྫིང་ཟུར་ཅིག་དག་ལ་ནི། །སྒྲོལ་མ་དཀར་སྔོན་དགྱེས་པར་གནས། །ཤིན་ཏུ་ཡིད་འོང་རི་དྭགས་མཛེས། །བྱ་བྱེའུ་གསུང་སྙན་སྒྲོག་པ་དེར། །འཆི་མེད་རྡོ་རྗེའི་ཀེའུ་ཚང་། །མ་རཱ་ཏི་ཀ་གཉིས་པ་ཡོད། །མཁའ་འགྲོ་གསང་བའི་ཕུག་པ་དང་། །ཡི་དམ་སྒྲུབ་པ་སྡེ་དགུ་ཡི། །དཔལ་ཆེན་དགྱེས་པའི་ཕུག་པ་སོགས། །ཕུག་དང་བྱ་སྐྱིབས་ཉམས་དགའ་བར། །གནས་དེར་ཕྱིན་པ་ཙམ་གྱིས་ཀྱང་། །རླུང་རིག་དྭངས་ཤིང་བདེ་དགའ་འབར། །ཚུལ་བཞིན་སྒྲུབ་དང་ཚོགས་མཆོད་སོགས། །བྱས་ན་འཕྲལ་གེགས་ཐམས་ཅད་ཞི། །ཕྱི་མ་རྔ་ཡབ་དཔལ་རིར་སྐྱེ། །དེ་ལྟ་བུ་ཡི་གནས་མཆོག་དེར། །སྙིང་ནས་དམ་ཆོས་སྒྲུབ་འདོད་རྣམས། །ཕྱིན་ན་མཐའ་དམག་འཇིགས་ལས་སྐྱོབས། །ཚེ་རིང་ནད་མེད་བདེ་ལྡན་ཞིང་། །བཀྲ་ཤིས་ཕུན་སུམ་ཚོགས་བར་འགྱུར། །ས་མ་ཡ། གུ་ཧྱ།། །།

[edit]

gnas byang /__a ma hoHyul gyi khyad 'phags mkha' spyod DA ki'i zhing /__/sbas yul rgyal po 'bras mo ljongs gi sar/__/nub byang mtshams kyi ri bo'i ngos kyi char/__/dga' ba lung ngam rdo rje sman gyi lung /__/rdza dang g.ya' brag spang ljongs nags kyi tshal/__/o rgyan bdag dang bi ru sa ra ha/__/Dom+b+hi la sogs 'phags yul paN grub dang /__/bod kyi mtsho rgyal 'brog ban bdud 'joms dang /__/klu dbang srung dang mi la thang stong sogs/__/grub pa'i rig 'dzin rnams kyis sgrub pa'i gnas/__/brag phug brgyad dang thugs mgon gri gug can/__/dgyes par rol pa'i dpal gyi de'u dang /__/tshe dpag med dang rig byed sgrol ma sogs/__/sangs rgyas byang sems rnams kyi byin brlab pa'i/__/phyag zhabs rjes dang sku gsung thugs kyi rten/__/ngo mtshar bkod pa bgrangs las 'das pa dang /__/gser mtsho 'o mtsho rak+ta'i mtsho chen sogs/__/'chi med lha yi bdud rtsi'i tshe chu dang /__/ljon shing bzang po DA ki mched lnga brten/__/spangs ljongs 'bur mo me long ltar 'jam pa/__/cung zad mtho bar lha khang rten gsum bzhengs/__/des ni lha min gdug pa'i tsha ngar zhi/__/rnal 'byor rig 'dzin grub pa'i gnas bcas nas/__/tshe yi 'phrang sgrol phrin las mtha' ru phyin/__/gsang sngags bstan pa phyogs bcur rgyas par 'gyur/__/shin tu gsang ba'i zab gter rnyed pa'ang srid/__/mkha' spyod dga' ba'i lung gi mdo byang ni/__/shin tu nyung ngur khri srong skal bar gdams/__/sa ma yaHde las yang gsar gud du sbas/__/de lta'i gnas de'i nye logs su/__/sbas pa'i yul ni rin chen sdengs/__/brag ri'i bskong ba'i nang dag tu/__/thang chen sman 'bras me tog rigs/__/bzang shing sna tshogs 'dres pa'i tshal/__/mtsho rdzing zur cig dag la ni/__/sgrol ma dkar sngon dgyes par gnas/__/shin tu yid 'ong ri dwags mdzes/__/bya bye'u gsung snyan sgrog pa der/__/'chi med rdo rje'i ke'u tshang /__/ma rA ti ka gnyis pa yod/__/mkha' 'gro gsang ba'i phug pa dang /__/yi dam sgrub pa sde dgu yi/__/dpal chen dgyes pa'i phug pa sogs/__/phug dang bya skyibs nyams dga' bar/__/gnas der phyin pa tsam gyis kyang /__/rlung rig dwangs shing bde dga' 'bar/__/tshul bzhin sgrub dang tshogs mchod sogs/__/byas na 'phral gegs thams cad zhi/__/phyi ma rnga yab dpal rir skye/__/de lta bu yi gnas mchog der/__/snying nas dam chos sgrub 'dod rnams/__/phyin na mtha' dmag 'jigs las skyobs/__/tshe ring nad med bde ldan zhing /__/bkra shis phun sum tshogs bar 'gyur/__/sa ma ya/__gu h+ya//___//