ལྷ་བཙུན་དག་སྣང་རིག་འཛིན་སྲོག་སྒྲུབ་ཀྱི་སྒྲུབ་ཆེན་སྐབས་ལ་ཉེ་བར་མཁོ་བའི་སྟོང་ཐུན་ཉུང་ངུ་།

🚧 This website is under continued development. We appreciate your patience!

Previous Text Back to Volume PageNext Text

Wylie title	lha btsun dag snang rig 'dzin srog sgrub kyi sgrub chen skabs la nye bar mkho ba'i stong thun nyung ngu
Location	chos kyi blo gros bka' 'bum Volume 6, Text 23, Pages 333-342 (Folios 1a1 to 5b2)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	ལྷ་བཙུན་ནམ་མཁའ་འཇིགས་མེད་ (lha btsun nam mkha' 'jigs med)
Citation	'jam dbyangs mkhyen brtse chos kyi blo gros. lha btsun dag snang rig 'dzin srog sgrub kyi sgrub chen skabs la nye bar mkho ba'i stong thun nyung ngu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 6: 333-342. Bir, H.P.: Khyentse Labrang, 2012.
Genre
Cycle	རྩ་གསུམ་རིག་འཛིན་སྲོག་སྒྲུབ་ (rtsa gsum rig 'dzin srog sgrub)

1 Texts in this Section (sde tshan or chos tshan)

333-342	ལྷ་བཙུན་དག་སྣང་རིག་འཛིན་སྲོག་སྒྲུབ་ཀྱི་སྒྲུབ་ཆེན་སྐབས་ལ་ཉེ་བར་མཁོ་བའི་སྟོང་ཐུན་ཉུང་ངུ་། lha btsun dag snang rig 'dzin srog sgrub kyi sgrub chen skabs la nye bar mkho ba'i stong thun nyung ngu	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །ལྷ་བཙུན་དག་སྣང་རིག་འཛིན་སྲོག་སྒྲུབ་ཀྱི་སྒྲུབ་ཆེན་སྐབས་ལ་ཉེ་བར་མཁོ་བའི་སྟོང་ཐུན་ཉུང་ངུ་བཞུགས་སོ། ། འོ་ད་ལམ་བསྐྱེད་རྫོགས་རྫོགས་པ་ཆེན་པོ་གསུམ་གྱི་ཡང་བཅུད་ལྔ་བརྒྱའི་གཙུག་རྒྱན་བི་མ་ལའི་རྣམ་པར་འཕྲུལ་པ་ཧེ་རུ་ཀ་དཔལ་ཁྲག་འཐུང་ནམ་མཁའ་འཇིགས་མེད་ཀྱི་ཟབ་མོ་དག་སྣང་གི་གཏེར་བཅུད་བླ་མ་རིག་འཛིན་སྲོག་སྒྲུབ་ཀྱི་དཀྱིལ་འཁོར་ཆེན་པོ་བསྙེན་སྒྲུབ་ཡན་ལག་བཞི་ལྡན་གྱི་སྒོ་ནས་མཆོག་གི་ལས་སྦྱོར་བདུད་རྩི་ཆེན་པོ་སྒྲུབ་པ་དང་འབྲེལ་བའི་ཚོམ་བུ་ཚོགས་ཀྱི་སྒྲུབ་པ་སྟེ། དེའང་སྒྱུ་འཕྲུལ་ལམ་རིམ་ལས། དེ་ཡང་ཐོག་མར་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །སྒྲུབ་ཐབས་ཕུན་སུམ་ཚོགས་པ་ཡི། །གཞི་དང་སྦྱར་བས་གཞུང་རྫོགས་བྱ། །ཞེས་གསུངས་པ་ལྟར། གང་དུ་སྒྲུབ་པའི་གནས་ཕུན་སུམ་ཚོགས་པ་གདོད་ནས་གྲུབ་པའི་རྡོ་རྗེའི་གནས་མཆོག་ཨོ་རྒྱན་གྱི་སློབ་དཔོན་ཆེན་པོ་སོགས་རྡོ་རྗེའི་རིག་འཛིན་རྣམས་ཀྱི་བྱིན་གྱིས་བརླབས་ཤིང་། དཔའ་བོ་མཁའ་འགྲོ་བྱེ་བ་འབུམ་སྡེ་སྤྲིན་ལྟར་གཏིབས་པའི་སྦས་གནས་ཆེན་པོ་དཔལ་རི་པད་འོད་གཉིས་པ་བཀྲ་ཤིས་འབྲས་མོ་ལྗོངས་ཀྱི་ས་ཡི་ཆར་ལས་བཞིའི་དངོས་གྲུབ་སྒྲུབ་པའི་མཚན་ཉིད་ཚང་ཞིང་ཉམས་དགའ་བར། ཟ་ཧོར་རྒྱལ་པོ་གཙུག་ལག་འཛིན་གྱི་རིགས་བརྒྱུད་དྲི་མ་མེད་པའི་ཆོས་རྒྱལ་ཆེན་པོའི་ཕོ་བྲང་དང་འདབ་འབྱོར་བའི་གཙུག་ལག་ཁང་འོག་མིན་རྡོ་རྗེ་བཀོད་པའི་ཞིང་ཁམས་ཆེན་པོར། གང་གི་ཚེ་སྒྲུབ་པའི་དུས་ནི་འབྱུང་བ་སུམ་ལྡན་མེ་ཕོ་བྱ་ཡི་ལོ། བཀྲ་ཤིས་ནག་པ་ཟླ་བ་དཔལ་ལྡན་འབྲས་སྤུངས་སུ་རྒྱལ་བས་དུས་ཀྱི་འཁོར་ལོའི་རྒྱུད་གསུངས་པའི་དུས་ཆེན་གཟའ་སྐར་སྦྱོར་བ་ཕུན་སུམ་ཚོགས་པར་སྒྲུབ་པའི་རྫས། སྒྲུབ་རྟེན། མཆོད་པ། རྫས། འཚོ་བ། ནད་བཟློག་སྨན། རྐྱེན་བཟློག །ཐབས་ཀྱི་ཁྱད་པར་སོགས་སྤྱི་དང་ཁྱད་པར་གྱི་ཕུན་སུམ་ཚོགས་པའི་ཡོ་བྱད་ཐམས་ཅད་ལྷུན་གྱིས་གྲུབ་པར། སྒྲུབ་པ་པོ་དམ་པའི་མཛོད་གསུམ་འཛིན་ཅིང་ཡོན་ཏན་བརྒྱད་ལྡན་གྱི་སྟོན་པ་རྡོ་རྗེ་རྒྱལ་པོ། རྡོ་རྗེའི་གཟུངས་མ། རྒྱལ་ཐེབས་སོགས་སོ་སོའི་ལས་བསྐོས་ལ་མཁས་ཤིང་། སྣོད་ཀྱི་སྐྱོན་གསུམ་དག་ཅིང་ཡོན་ཏན་ལྔ་ལྡན་གྱི་འཁོར་ཚོམ་བུ་སྟེ། སྒྱུ་འཕྲུལ་ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། ཚོམ་བུ་གཅིག་གསུམ་ལྔ་པའོ། །ཞེས་རྟེན་དང་། གང་ཟག །ཡོ་བྱད་ཁྱད་པར་ཅན་འཚོགས་པའི་ཚོགས་ཆེན་པོ་འདུས་པའི་རྡོ་རྗེའི་མཆེད་ལྕམ་ཕོ་མོ་སྐལ་པ་བཟང་པོ་དང་ལྡན་པ་རྣམས་སོ། །ཇི་ལྟར་སྒྲུབ་པའི་ཐབས་ལ། བསྙེན་སྒྲུབ་ཡན་ལག་བཞི་ལྡན་གྱི་ཆོ་ག་ཉམས་པའི་རྒྱུ་རྣམས་སྤངས་ཤིང་། རིག་འཛིན་བརྒྱུད་པའི་ཕྱག་བཞེས་བཞིན་སྒྲུབ་པ་ལ། སྔོན་འགྲོ་ས་ཡི་ཆོ་ག་སྣང་བ་དང་མི་སྣང་བ་ལས་སློང་བ། དབང་དུ་བྱ་ཞིང་ཏིང་ངེ་འཛིན་གྱིས་སྦྱངས་བ། ཕྱི་ནང་གསང་བའི་དམ་བསྐངས་བཤགས་པ། ཕྱི་མཚམས་རྒྱལ་ཆེན་བཞི་ལ་གཉེར་གཏད། བར་མཚམས་སྔགས་ཀྱི་དམ་ཚིག་ཉམས་པའི་སྲི་རྐྱེན་མནན་པ། ནང་མཚམས་བདུད་རྩི་འཁྱིལ་པས་བསྲུང་བ། བགེགས་རྣམས་ཀྱི་བར་དུ་གཅོད་མི་ནུས་ཤིང་། སྣོད་བཅུད་པདྨ་དྲག་པོའི་དཀྱིལ་འཁོར་དུ་བྱིན་གྱིས་བརླབས་པའི་གཞི་མ་ཏྲཾ་དྲག་པོ་བསྒྲལ་ཞིང་རོལ་པའི་བྲོས་མནན་ཏེ་ཡན་ལག་དུར་ཁྲོད་བརྒྱད་དང་། ཁོག་པ་གཞལ་ཡས་ཁང་དུ་བྱིན་གྱི་བརླབ་པ། ལྷ་དང་ཉེ་བར་བསྙེན་པའི་སྟ་གོན་སོགས་ལེགས་པར་མཛད་ནས། བྱིན་རླབས་དང་ལྡན་པའི་དཀྱིལ་འཁོར་བཞེངས་ཏེ་སྒྲུབ་རྟེན་མཆོད་རྫས་རྒྱན་གྱི་བཀོད་པ་རྣམས་གྲུབ་པ་དང་། ཕྲིན་ལས་ལ་འཇུག་རུང་གི་བྱ་བ། སྒྲུབ་པ་པོ་མཆེད་ལྕམ་རྣམས་རང་གནས་སུ་འཁོད་ཅིང་། ལས་སུ་བྱ་བ་སོ་སོར་བསྐོས་གདབ་ཅིང་ཞི་ཁྲོའི་ཆས་གོས་རྣམས་ཀྱིས་མངའ་གསོལ་བ་རྣམས་བགྱི་བ་ལ་ཐུགས་འདུན་ཅིང་། ལས་སོ་སོར་བྱ་བ་ལ་སྤྲོ་དགའ་ཆེར་བསྐྱེད་པ་དང་། དག་པའི་སྣང་བ་རྒྱ་ཆེན་པོ་དང་བཅས་ཏེ་རྗེས་ཟློས་དབྱངས་ཀྱི་རྟ་ལ་དྲངས་ཏེ་གསུང་བར་ཞུ། ཆས་ཀྱི་མངའ་གསོལ་སྐབས། དེ་ཡང་སྔོན་ཚེ་སྟོན་པ་ཀུན་བཟང་ཆེ་མཆོག་ཧེ་རུ་ཀས་གསང་སྔགས་ཀྱི་དཀྱིལ་འཁོར་སྤྲུལ་བཤད་ཀྱི་ཚེ། རྒྱུད་འབྱུང་བའི་རྒྱུ་གླེང་གཞི་དབང་ཕྱུག །དྲག་པོ། མ་ཏྲྃ་རུ་ཏྲ་སོགས་དྲག་པོ་སྡེ་གསུམ་བཏུལ་ནས་དེ་དག་གི་ཆས་གོས་རྣམས་རྒྱལ་བྱེད་དཔའ་རྟགས་ཕྱི་ཚུལ་དུ་བཞེས་པའི་སྔོན་བྱུང་སྟོན་པའི་རྣམ་ཐར་རྗེས་འཇུག་ཉམས་ལེན་དུ་སྦྱར་ཏེ་ལག་ཏུ་བླང་བས་ཧེ་རུ་ཀ་དང་སྤྱོད་ཡུལ་མཉམ་ཞིང་། མ་མོ་མཁའ་འགྲོས་རང་རིགས་ཀྱི་སྡེ་ཚན་ཏུ་ཤེས་ཤིང་སྙིང་ཉེ་བ་དང་། བར་ཆད་ལས་རྒྱལ་བ་དང་། མཆོག་ཐུན་གྱི་དངོས་གྲུབ་འགྲུབ་པ་ལ་མྱུར་བ་སོགས་དགོས་པ་ཆེན་པོ་དང་ལྡན་པས་འདུས་པ་རྣམས་ལྷ་ཡི་གསལ་སྣང་དང་ལྡན་པས་དུར་ཁྲོད་དཔའ་ཆས་རྣམས་བགོ་བའི་ཚུལ་དང་། རྟགས་གདབ་པ་སོགས་དགོངས་པ་རྩེ་གཅིག་པས་མཛད་པར་ཞུ། ཞེས་མཚམས་སྦྱར་བར་བྱའོ། །༈འོ་ད་ལམ་པཎ་གྲུབ་ལྔ་བརྒྱའི་གཙུག་རྒྱན་བི་མ་ལའི་རྣམ་པར་འཕྲུལ་པ། རྩོད་པའི་དུས་འདིར་འགྲན་ཟླ་ཐམས་ཅད་དང་བྲལ་བའི་གྲུབ་ཐོབ་ཆེན་པོ་ཁྲག་འཐུང་ནམ་མཁའ་འཇིགས་མེད་ཀྱི་ཟབ་མོ་དག་སྣང་གི་ཆོས་སྡེ་བླ་མ་རིག་འཛིན་རྩ་གསུམ་སྲོག་སྒྲུབ་ཀྱི་དཀྱིལ་འཁོར་དུ་སྒྲུབ་ཆེན་ཚོམ་བུ་ཚོགས་སྒྲུབ་དང་འབྲེལ་བའི་སྒོ་ནས་གསང་ཆེན་མཆོག་གི་མྱུར་ལམ་ཟབ་མོ་མྱོང་གྲོལ་དམ་རྫས་བདུད་རྩི་སྒྲུབ་པ་མ་དང་མཁའ་འགྲོའི་ཞལ་ལུང་རིག་འཛིན་བརྒྱུད་པའི་ཕྱག་བཞེས་ལྟར་ལེགས་པར་གྲུབ་པ་སྟེ། དེའང་ལྟ་བཙུན་གྲུབ་པའི་འཁོར་ལོས་བསྒྱུར་བ་ཆེན་པོ་འདི་ཉིད་བླ་མ་དགོངས་འདུས་ལུང་བསྟན་ལས། ཀུན་བཟང་རྣམ་རྒྱལ་དགོངས་འདུས་མེ་རོ་སློང་། ཞེས་དང་། བདུད་འདུལ་རྡོ་རྗེའི་དམ་ཆོས་སྤྲུལ་སྐུ་སྙིང་ཐིག་ལས། བི་མ་ཏིང་འཛིན་མི་འགྱུར་བཟང་པོ་ཡིས༔ རིན་ཆེན་མཎྜལ་བླ་མའི་སྐུ་ལ་བབས༔ གསང་བའི་མཚན་ནི་འོད་གསལ་སྙིང་པོར་བཏགས༔ མ་འོངས་ལྷོ་རོང་ཕྱོགས་ནས་རིག་པ་འཛིན༔ བརྟུལ་ཞུགས་མཐར་ཕྱིན་ཀུན་བཟང་རྣམ་རྒྱལ་ཞེས༔ རྫོགས་ཆེན་དོན་སྟོན་དྲི་མེད་འོད་ཟེར་དངོས༔ སྔོན་བྱུང་རྗེས་དྲན་ཞྭ་ཡི་གཙུག་ལག་གསོ༔ དམ་ཆོས་རྫོགས་ཆེན་མེ་རོ་སློང་བྱེད་ཅིང་༔ གསང་སྔགས་ཟབ་དོན་དགོངས་པ་འགྲེལ་བར་བྱེད༔ དཔལ་གྱི་བསམ་ཡས་དག་ལ་འཇིགས་སྐྱོབས་ཚེ༔ ལྷ་མི་ཀུན་མཐོང་སངས་རྒྱས་རབ་བདུན་གྱི༔ འཕེལ་གདུང་སྦྲང་ཆར་བཞིན་དུ་འབེབས་པར་བྱེད༔ པཎ་ཆེན་བི་མ་དངོས་ལས་གཞན་མ་ཡིན༔ སྐྱེས་བུ་དེ་འདྲ་ས་སྟེང་འབྱུང་བ་དཀོན༔ མཚན་ཐོས་འགྲོ་ཀུན་ངན་སོང་སྒོ་ཁེག་ཅིང་༔ མ་འོངས་སངས་རྒྱས་སྤྱན་ལེགས་ཞེས་བྱར་འགྱུར༔ ཞེས་སོགས་དང་། གཞན་ཡང་གཏེར་ཁ་མང་པོ་ནས་ལུང་བསྟན་ཅིང་ཚད་མ་གསུམ་གྱིས་གྲུབ་པའི་སྐྱེས་བུ་ཆེན་པོ་དེ་ཉིད་ལ་དཔལ་རི་པདྨ་འོད་དང་རྣམ་དབྱེར་མེད་པ་ཨོ་རྒྱན་སངས་རྒྱས་གཉིས་པས་དབུ་བསྙུངས་བཞེས་པའི་གནས་མཆོག་ལྷོ་ནུབ་མཁའ་སྤྱོད་དཔལ་གྱི་འབྲས་མོ་ལྗོངས་ལྷ་རི་རྡོ་རྗེ་སྙིང་ཕུག་ཏུ་ཆུ་བོ་བཞི་འདུས་ཀྱི་དབང་གི་གསང་བཅུད་འཁོར་ལོ་ལྔ་བརྩེགས་ལྷུན་གྲུབ་རྡོ་རྗེ་ལུས་ཀྱི་སྦུབས། ནང་རྩ་ཐིག་རླུང་གི་འཛིན་མདངས་གསལ་སྟོང་འཇིགས་བྲལ་རྡོ་རྗེ་སྙིང་པོའི་ངོ་བོར་དབང་གི་ཆུ་བོ་བཞི་རྫོགས་སུ་བསྐུར་ཐོབ་བྲལ་བའི་ངང་དུ་རྫོགས་ཤིང་། ཡེ་ཤེས་ཌཱ་ཀི་པདྨ་མདངས་གསལ་རྩལ་གྱིས་ཡེ་ཤེས་ཀྱི་རྩ་སྒོ་འབྱེད་ཅིང་བྱང་ཕྱོགས་འོད་ཕུང་ཌཱ་ཀིའི་གླིང་དུ་རྡོ་རྗེ་ཕག་མོ་ལས་ཤེས་རབ་ཡེ་ཤེས་ཀྱི་དབང་དང་། ནུབ་ཕྱོགས་མཁའ་སྤྱོད་སྤྲུལ་པའི་གླིང་དུ་པདྨ་འབྱུང་གནས་ལས་བུམ་པའི་དབང་དང་། བྲག་དཀར་བཀྲ་ཤིས་ལྡིང་དུ་མཚོ་སྐྱེས་རྡོ་རྗེ། བི་མ་ལ། མཚོ་རྒྱལ་རྣམས་ཀྱིས་བར་སྣང་པོ་སྟི་གླེགས་བམ་གྱི་ཆར་ཕབས་ཤིང་བྱིན་གྱིས་བརླབས་པས་རིག་འཛིན་སྙིང་ཐིག་གི་ཚིག་དོན་ཐམས་ཅད་བཀྲ་ལམ་གྱིས་གསལ་ཞིང་། འཆད་རྩོད་རྩོམ་པ་ལ་དབང་ཐོབ་ཅིང་མི་བརྗེད་པའི་གཟུངས་དང་ལྡན་པར་གྱུར་པ་དེ་ལྟ་བུའི་བཀའ་བབ་ཁྱད་པར་འཕགས་པ་དང་ལྡན་པའི་ཟབ་ཆོས་འདི་ཉིད་སྒོམ་སྒྲུབ་ཉམས་སུ་བླངས་པའི་ཕན་ཡོན་ཀྱང་། ལུང་བསྟན་རྡོ་རྗེའི་སྲོག་སྙིང་ལས། རྩ་གསུམ་རིག་འཛིན་སྲོག་སྒྲུབ་འདི༔ ཆོས་བཀའ་ཕྱེ་བ་ཙམ་གྱིས་ཀྱང་༔ ནད་མུག་འཁྲུགས་རྩོད་བར་ཆད་ཞི༔ རྩ་གསུམ་དཔའ་བོ་ཌཱ་ཀི་འདུ༔ དངོས་ཉམས་རྨི་ལམ་ཐམས་ཅད་དུ༔ ཟག་མེད་ཏིང་འཛིན་བདེ་བ་འཕེལ༔ བྱིན་རླབས་ཚན་ཆེ་ཉམས་རྟོགས་འུར༔ ལྷ་འདྲེ་མི་གསུམ་རང་བཞིན་འདུ༔ བར་ཆད་བདུད་དཔུང་ཀུན་ལས་གྲོལ༔ ། འཆི་མེད་ཚེ་ཡི་རིག་འཛིན་འགྲུབ༔ འདི་ཉིད་རྩ་གསུམ་བླ་རྡོ་ཡིན༔ བཅངས་པས་ནད་གདོན་སྡིག་སྒྲིབ་ཞི༔ མཇལ་བས་བག་ཕེབས་ཤེས་རིག་འགྱུར༔ ཉམས་བླངས་ཕྱིར་མི་ལྡོག་པ་ཐོབ༔ ཞེས་དང་། འདི་ཉིད་གང་དུ་གནས་པའི་ཕྱོགསཿཔདྨ་འོད་དང་རྣམ་དབྱེར་མེད༔ འབྲེལ་ཐོབ་སྐྱེས་བུ་ལྔ་བརྒྱ་ཕྲག༔ སུམ་འབུམ་འདི་ཡིས་གྲོལ་བར་བྱེད༔ བསྟན་པའི་སྙིང་པོ་འདི་ཡིས་བསྲིངས༔ ཞེས་སོགས་ཨོ་རྒྱན་དུས་གསུམ་མཁྱེན་པས་རྒྱ་ཆེར་བཀའ་སྩལ་པ་ལ་ཡིད་ཆེས་ངེས་ཤེས་ཀྱི་དད་པ་དང་། དགའ་སྤྲོ་རྒྱ་ཆེན་པོ་བསྐྱེད་དེ་སྒྲུབ་པ་ཆེན་པོའི་དངོས་གྲུབ་བླངས་བ་སོགས་རྗེས་ཀྱི་རིམ་པ་མཐའ་རྒྱས་སུ་ཉམས་སུ་བླང་བའི་བྱེ་བྲག་མར་མེའི་སྨོན་ལམ་བགྱིད་པ་སྐབས་སུ་བབ་པ་སྟེ། དེའང་འདིར་འཚོགས་པའི་རྡོ་རྗེའི་རྣལ་འབྱོར་མཆེད་ལྕམ་རྣམས་གསང་ཆེན་རྡོ་རྗེའི་རིགས་གཅིག་ཏུ་འཚོགས་ཤིང་། བསྙེན་སྒྲུབ་ཡན་ལག་བཞི་ལྡན་གྱི་ཚོམ་བུ་ཚོགས་ཀྱི་སྒྲུབ་པའི་ཟག་བཅས་ཟག་མེད་ཀྱི་དགེ་ཚོགས་རྒྱ་མཚོའི་མཐུ་ལ་བརྟེན་ནས་དཀྱིལ་འཁོར་གཅིག་ཏུ་བསྒྲུབ་ཅིང་། སྣང་གསལ་མར་མེ་གཅིག་ལ་བལྟས་པ་རྣམས་རིག་འཛིན་རྣམ་པ་བཞིའི་ས་ལམ་བསྒྲོད་དེ། ས་མཆོག་འོད་གསལ་རྡོ་རྗེ་རྩེ་མོ་ཡེ་ཤེས་བླ་མའི་ས་ལ་སྟོན་འཁོར་དགོངས་པ་དབྱེར་མེད་དུ་མངོན་བྱང་ཆུབ་ཅིང་། ནམ་མཁའ་དང་མཉམ་པའི་རིགས་དྲུག་གི་འཁོར་བ་རྣམས་དོང་ནས་སྤྲུགས་པར་ནུས་པའི་ཐུགས་སྨོན་དང་བཅས་ཏེ་མར་མེའི་སྨོན་ལམ་ལ་ཐུགས་གཏད་པར་ཞུ།། །།

[edit]

@#/__/lha btsun dag snang rig 'dzin srog sgrub kyi sgrub chen skabs la nye bar mkho ba'i stong thun nyung ngu bzhugs so/__/ 'o da lam bskyed rdzogs rdzogs pa chen po gsum gyi yang bcud lnga brgya'i gtsug rgyan bi ma la'i rnam par 'phrul pa he ru ka dpal khrag 'thung nam mkha' 'jigs med kyi zab mo dag snang gi gter bcud bla ma rig 'dzin srog sgrub kyi dkyil 'khor chen po bsnyen sgrub yan lag bzhi ldan gyi sgo nas mchog gi las sbyor bdud rtsi chen po sgrub pa dang 'brel ba'i tshom bu tshogs kyi sgrub pa ste/__de'ang sgyu 'phrul lam rim las/__de yang thog mar gnas dang dus/__/yo byad ston 'khor sgrub pa po/__/sgrub thabs phun sum tshogs pa yi/__/gzhi dang sbyar bas gzhung rdzogs bya/__/zhes gsungs pa ltar/__gang du sgrub pa'i gnas phun sum tshogs pa gdod nas grub pa'i rdo rje'i gnas mchog o rgyan gyi slob dpon chen po sogs rdo rje'i rig 'dzin rnams kyi byin gyis brlabs shing /__dpa' bo mkha' 'gro bye ba 'bum sde sprin ltar gtibs pa'i sbas gnas chen po dpal ri pad 'od gnyis pa bkra shis 'bras mo ljongs kyi sa yi char las bzhi'i dngos grub sgrub pa'i mtshan nyid tshang zhing nyams dga' bar/__za hor rgyal po gtsug lag 'dzin gyi rigs brgyud dri ma med pa'i chos rgyal chen po'i pho brang dang 'dab 'byor ba'i gtsug lag khang 'og min rdo rje bkod pa'i zhing khams chen por/__gang gi tshe sgrub pa'i dus ni 'byung ba sum ldan me pho bya yi lo/__bkra shis nag pa zla ba dpal ldan 'bras spungs su rgyal bas dus kyi 'khor lo'i rgyud gsungs pa'i dus chen gza' skar sbyor ba phun sum tshogs par sgrub pa'i rdzas/__sgrub rten/__mchod pa/__rdzas/__'tsho ba/__nad bzlog sman/__rkyen bzlog__/thabs kyi khyad par sogs spyi dang khyad par gyi phun sum tshogs pa'i yo byad thams cad lhun gyis grub par/__sgrub pa po dam pa'i mdzod gsum 'dzin cing yon tan brgyad ldan gyi ston pa rdo rje rgyal po/__rdo rje'i gzungs ma/__rgyal thebs sogs so so'i las bskos la mkhas shing /__snod kyi skyon gsum dag cing yon tan lnga ldan gyi 'khor tshom bu ste/__sgyu 'phrul khog gzhung las/__tshogs ni 'byor pa rnam pa gsum/__tshom bu gcig gsum lnga pa'o/__/zhes rten dang /__gang zag__/yo byad khyad par can 'tshogs pa'i tshogs chen po 'dus pa'i rdo rje'i mched lcam pho mo skal pa bzang po dang ldan pa rnams so/__/ji ltar sgrub pa'i thabs la/__bsnyen sgrub yan lag bzhi ldan gyi cho ga nyams pa'i rgyu rnams spangs shing /__rig 'dzin brgyud pa'i phyag bzhes bzhin sgrub pa la/__sngon 'gro sa yi cho ga snang ba dang mi snang ba las slong ba/__dbang du bya zhing ting nge 'dzin gyis sbyangs ba/__phyi nang gsang ba'i dam bskangs bshags pa/__phyi mtshams rgyal chen bzhi la gnyer gtad/__bar mtshams sngags kyi dam tshig nyams pa'i sri rkyen mnan pa/__nang mtshams bdud rtsi 'khyil pas bsrung ba/__bgegs rnams kyi bar du gcod mi nus shing /__snod bcud pad+ma drag po'i dkyil 'khor du byin gyis brlabs pa'i gzhi ma traM drag po bsgral zhing rol pa'i bros mnan te yan lag dur khrod brgyad dang /__khog pa gzhal yas khang du byin gyi brlab pa/__lha dang nye bar bsnyen pa'i sta gon sogs legs par mdzad nas/__byin rlabs dang ldan pa'i dkyil 'khor bzhengs te sgrub rten mchod rdzas rgyan gyi bkod pa rnams grub pa dang /__phrin las la 'jug rung gi bya ba/__sgrub pa po mched lcam rnams rang gnas su 'khod cing /__las su bya ba so sor bskos gdab cing zhi khro'i chas gos rnams kyis mnga' gsol ba rnams bgyi ba la thugs 'dun cing /__las so sor bya ba la spro dga' cher bskyed pa dang /__dag pa'i snang ba rgya chen po dang bcas te rjes zlos dbyangs kyi rta la drangs te gsung bar zhu/__chas kyi mnga' gsol skabs/__de yang sngon tshe ston pa kun bzang che mchog he ru kas gsang sngags kyi dkyil 'khor sprul bshad kyi tshe/__rgyud 'byung ba'i rgyu gleng gzhi dbang phyug__/drag po/__ma tra~M ru tra sogs drag po sde gsum btul nas de dag gi chas gos rnams rgyal byed dpa' rtags phyi tshul du bzhes pa'i sngon byung ston pa'i rnam thar rjes 'jug nyams len du sbyar te lag tu blang bas he ru ka dang spyod yul mnyam zhing /__ma mo mkha' 'gros rang rigs kyi sde tshan tu shes shing snying nye ba dang /__bar chad las rgyal ba dang /__mchog thun gyi dngos grub 'grub pa la myur ba sogs dgos pa chen po dang ldan pas 'dus pa rnams lha yi gsal snang dang ldan pas dur khrod dpa' chas rnams bgo ba'i tshul dang /__rtags gdab pa sogs dgongs pa rtse gcig pas mdzad par zhu/__zhes mtshams sbyar bar bya'o/__/!'o da lam paN grub lnga brgya'i gtsug rgyan bi ma la'i rnam par 'phrul pa/__rtsod pa'i dus 'dir 'gran zla thams cad dang bral ba'i grub thob chen po khrag 'thung nam mkha' 'jigs med kyi zab mo dag snang gi chos sde bla ma rig 'dzin rtsa gsum srog sgrub kyi dkyil 'khor du sgrub chen tshom bu tshogs sgrub dang 'brel ba'i sgo nas gsang chen mchog gi myur lam zab mo myong grol dam rdzas bdud rtsi sgrub pa ma dang mkha' 'gro'i zhal lung rig 'dzin brgyud pa'i phyag bzhes ltar legs par grub pa ste/__de'ang lta btsun grub pa'i 'khor los bsgyur ba chen po 'di nyid bla ma dgongs 'dus lung bstan las/__kun bzang rnam rgyal dgongs 'dus me ro slong /__zhes dang /__bdud 'dul rdo rje'i dam chos sprul sku snying thig las/__bi ma ting 'dzin mi 'gyur bzang po yis:__rin chen maN+Dal bla ma'i sku la babs:__gsang ba'i mtshan ni 'od gsal snying por btags:__ma 'ongs lho rong phyogs nas rig pa 'dzin:__brtul zhugs mthar phyin kun bzang rnam rgyal zhes:__rdzogs chen don ston dri med 'od zer dngos:__sngon byung rjes dran zhwa yi gtsug lag gso:__dam chos rdzogs chen me ro slong byed cing :__gsang sngags zab don dgongs pa 'grel bar byed:__dpal gyi bsam yas dag la 'jigs skyobs tshe:__lha mi kun mthong sangs rgyas rab bdun gyi:__'phel gdung sbrang char bzhin du 'bebs par byed:__paN chen bi ma dngos las gzhan ma yin:__skyes bu de 'dra sa steng 'byung ba dkon:__mtshan thos 'gro kun ngan song sgo kheg cing :__ma 'ongs sangs rgyas spyan legs zhes byar 'gyur:__zhes sogs dang /__gzhan yang gter kha mang po nas lung bstan cing tshad ma gsum gyis grub pa'i skyes bu chen po de nyid la dpal ri pad+ma 'od dang rnam dbyer med pa o rgyan sangs rgyas gnyis pas dbu bsnyungs bzhes pa'i gnas mchog lho nub mkha' spyod dpal gyi 'bras mo ljongs lha ri rdo rje snying phug tu chu bo bzhi 'dus kyi dbang gi gsang bcud 'khor lo lnga brtsegs lhun grub rdo rje lus kyi sbubs/__nang rtsa thig rlung gi 'dzin mdangs gsal stong 'jigs bral rdo rje snying po'i ngo bor dbang gi chu bo bzhi rdzogs su bskur thob bral ba'i ngang du rdzogs shing /__ye shes DA ki pad+ma mdangs gsal rtsal gyis ye shes kyi rtsa sgo 'byed cing byang phyogs 'od phung DA ki'i gling du rdo rje phag mo las shes rab ye shes kyi dbang dang /__nub phyogs mkha' spyod sprul pa'i gling du pad+ma 'byung gnas las bum pa'i dbang dang /__brag dkar bkra shis lding du mtsho skyes rdo rje/__bi ma la/__mtsho rgyal rnams kyis bar snang po sti glegs bam gyi char phabs shing byin gyis brlabs pas rig 'dzin snying thig gi tshig don thams cad bkra lam gyis gsal zhing /__'chad rtsod rtsom pa la dbang thob cing mi brjed pa'i gzungs dang ldan par gyur pa de lta bu'i bka' bab khyad par 'phags pa dang ldan pa'i zab chos 'di nyid sgom sgrub nyams su blangs pa'i phan yon kyang /__lung bstan rdo rje'i srog snying las/__rtsa gsum rig 'dzin srog sgrub 'di:__chos bka' phye ba tsam gyis kyang :__nad mug 'khrugs rtsod bar chad zhi:__rtsa gsum dpa' bo DA ki 'du:__dngos nyams rmi lam thams cad du:__zag med ting 'dzin bde ba 'phel:__byin rlabs tshan che nyams rtogs 'ur:__lha 'dre mi gsum rang bzhin 'du:__bar chad bdud dpung kun las grol:__/__'chi med tshe yi rig 'dzin 'grub:__'di nyid rtsa gsum bla rdo yin:__bcangs pas nad gdon sdig sgrib zhi:__mjal bas bag phebs shes rig 'gyur:__nyams blangs phyir mi ldog pa thob:__zhes dang /__'di nyid gang du gnas pa'i phyogasaHpad+ma 'od dang rnam dbyer med:__'brel thob skyes bu lnga brgya phrag:__sum 'bum 'di yis grol bar byed:__bstan pa'i snying po 'di yis bsrings:__zhes sogs o rgyan dus gsum mkhyen pas rgya cher bka' stsal pa la yid ches nges shes kyi dad pa dang /__dga' spro rgya chen po bskyed de sgrub pa chen po'i dngos grub blangs ba sogs rjes kyi rim pa mtha' rgyas su nyams su blang ba'i bye brag mar me'i smon lam bgyid pa skabs su bab pa ste/__de'ang 'dir 'tshogs pa'i rdo rje'i rnal 'byor mched lcam rnams gsang chen rdo rje'i rigs gcig tu 'tshogs shing /__bsnyen sgrub yan lag bzhi ldan gyi tshom bu tshogs kyi sgrub pa'i zag bcas zag med kyi dge tshogs rgya mtsho'i mthu la brten nas dkyil 'khor gcig tu bsgrub cing /__snang gsal mar me gcig la bltas pa rnams rig 'dzin rnam pa bzhi'i sa lam bsgrod de/__sa mchog 'od gsal rdo rje rtse mo ye shes bla ma'i sa la ston 'khor dgongs pa dbyer med du mngon byang chub cing /__nam mkha' dang mnyam pa'i rigs drug gi 'khor ba rnams dong nas sprugs par nus pa'i thugs smon dang bcas te mar me'i smon lam la thugs gtad par zhu//___//