ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོ་ལ་བསྟོད་པ་ལྷའི་སིལ་སྙན།

🚧 This website is under continued development. We appreciate your patience!

Previous Text Back to Volume PageNext Text

Wylie title	lha dang bcas pa'i ston pa mnyam med thub pa'i dbang po la bstod pa lha'i sil snyan
Location	chos kyi blo gros bka' 'bum Volume 2, Text 5, Pages 323-327 (Folios 1a1 to 3a4)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Associated People	ཤཱཀྱ་ཐུབ་པ་ (Śākyamuni)
Citation	'jam dbyangs mkhyen brtse chos kyi blo gros. lha dang bcas pa'i ston pa mnyam med thub pa'i dbang po la bstod pa lha'i sil snyan. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 2: 323-327. Bir, H.P.: Khyentse Labrang, 2012.
Genre	Verses of Praise - bstod pa
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/merry-sea-buddha-guru-yoga
Colophon	།ཅེས་པའང་མེ་སྤྲེལ་སྨིན་ཟླའི་ཚེས་བཅོ་ལྔ་ལ་འཇམ་དབྱངས་ཆོས་ཀྱི་བློ་གྲོས་པས་མ་ག་དྷ་རྡོ་རྗེ་གདན་གྱི་གནྡྷོ་ལའི་བྱང་ཆུབ་ཆེན་པོའི་སྤྱན་སྔར་བྲིས་ཏེ་གསོལ་བ་བཏབ་པ་བཞིན་འགྲུབ་པར་གྱུར་ཅིག
	ces pa'ang me sprel smin zla'i tshes bco lnga la 'jam dbyangs chos kyi blo gros pas ma ga d+ha rdo rje gdan gyi gan+d+ho la'i byang chub chen po'i spyan sngar bris te gsol ba btab pa bzhin 'grub par gyur cig

1 Texts in this Section (sde tshan or chos tshan)

323-327	ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོ་ལ་བསྟོད་པ་ལྷའི་སིལ་སྙན། lha dang bcas pa'i ston pa mnyam med thub pa'i dbang po la bstod pa lha'i sil snyan Verses of Praise - bstod pa	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ལྷ་དང་བཅས་པའི་སྟོན་པ་མཉམ་མེད་ཐུབ་པའི་དབང་པོ་ལ་བསྟོད་པ་ལྷའི་སིལ་སྙན་ཞེས་བྱ་བ་བཞུགས་སོ། །ན་མོ་ཤཱཀྱ་མུ་ནེ་ཡེ། སྲིད་དང་ཞི་བའི་ཁམས་ན་མཚུངས་པ་མེད། །ལྷ་དང་བཅས་པའི་འཇིག་རྟེན་མཐའ་དག་གིས། །ཞབས་སེན་རྡུལ་འོད་དམར་པོར་གུས་མཆོད་པ། །ཐུབ་དབང་ཉི་མའི་ཞབས་ཀྱི་པད་མོར་འདུད། །རྒྱལ་བ་ཀུན་གྱི་ནང་ནས་རབ་བསྔགས་པ། །རྩོད་དུས་སྨོན་ལམ་ལྔ་བརྒྱ་བཏབ་པ་ལས། །ཐུགས་བསྐྱེད་པད་མ་དཀར་པོ་ལྟར་གྱུར་པ། །ཐུབ་དབང་ལྷ་ཡི་ལྷ་ཁྱོད་རྒྱལ་གྱུར་ཅིག །གསེར་གྱི་རི་བོ་ལྟ་བུར་བརྗིད་པའི་སྐུ། །མཚན་དང་དཔེ་བྱད་བཟང་པོའི་མེ་ཏོག་བཀྲ། །བསོད་ནམས་ཕུང་པོའི་སྐུ་ཡི་དཀྱིལ་འཁོར་མཛེས། །བལྟ་བས་ངོམས་པ་མེད་ལ་ཕྱག་འཚལ་ལོ། །སྐུ་ཡི་ཚད་ནི་གཞལ་བྱའི་ཡུལ་ལས་འདས། །གཙུག་ཏོར་ཆ་དང་མཛོད་སྤུའི་འོད་ཟེར་སོགས། །ཞིང་ཁམས་རབ་འབྱམས་གྲངས་མེད་བརྒལ་གྱུར་ཀྱང་། །རྫུ་འཕྲུལ་ཆེ་ཐོབ་རྣམས་ཀྱང་ཐུགས་ལས་ཆུང་། །གསུང་གི་གདངས་སྐད་ཡན་ལག་དྲུག་ཅུར་ལྡན། །གསུང་གཅིག་ཉིད་ཀྱིས་དུ་མ་སོ་སོར་གོ། ཉེ་རིང་ཆེ་ཆུང་སྐྱོན་ཀུན་སྤངས་པ་ཡིས། །གསང་བ་བསམ་གྱིས་མི་ཁྱབ་གསུང་ལ་བསྟོད། །གདུལ་བྱའི་ཁམས་དང་དབང་པོ་འཚམས་པར་སྟོན། །སངས་རྒྱས་གསུང་དབྱངས་ཟད་མི་ཤེས་པ་ཉིད། །ཞིང་ཁམས་ཀུན་ན་རབ་ཏུ་འཇུག་པ་ཡི། །དེ་བཞིན་གཤེགས་པ་རྣམས་དང་གསུང་གཅིག་ཉིད། །ཟབ་ཞི་སྤྲོས་པ་ཀུན་བྲལ་ཆོས་ཀྱི་དབྱིངས། །ཡེ་ཤེས་རྒྱ་མཚོ་གཏིང་དཔག་དཀའ་བ་ཉིད། །ཀུན་ཏུ་ཁྱབ་ཅིང་འོད་གསལ་འདུས་མ་བྱས། །ཐུགས་ཀྱི་གསང་བ་བསམ་མི་ཁྱབ་ལ་བསྟོད། །ནམ་མཁའ་ལྟ་བུ་ཆོས་དབྱིངས་ཡངས་པ་ཆེ། །རང་བྱུང་ཡེ་ཤེས་ལྷུན་གྲུབ་ཉི་མ་ཤར། །ཐུགས་རྗེའི་ཟེར་ཆེན་སྲིད་པ་གསུམ་ན་འཕྲོ། །ཐམས་ཅད་མཁྱེན་པ་རྣམ་པར་བརྟག་པ་བྲལ། །བྲལ་དང་སྨིན་པའི་འབྲས་ཆོས་རྒྱ་མཚོ་ནི། །གངྒཱའི་ཀླུང་གི་རྡུལ་གྱིས་གཞལ་མི་ནུས། །རྒྱ་ཆེའི་ནམ་མཁའ་སྣོད་དུ་བྱས་གྱུར་ཀྱང་། །ཤོང་བར་མི་ནུས་བརྗོད་པའི་ཡུལ་ལས་འདས། །བྱང་ཆུབ་ཕྱོགས་ཆོས་བཅུ་ཕྲག་གསུམ་དང་ནི། །བདུན་གྱིས་ལྷག་པ་ཡོངས་སུ་རྫོགས་པ་ལས། །སྐུ་གསུམ་རང་བཞིན་ཐུབ་མཆོག་ཉིད་ཀྱིས་མཁྱེན། །ཡོན་ཏན་གསང་བ་བསམ་མི་ཁྱབ་ལ་བསྟོད། །ཇི་ལྟར་ནོར་བུ་བུམ་བཟང་དཔག་བསམ་རྣམས། །རྟོག་པ་མེད་ཀྱང་འགྲོ་བའི་དབུལ་སེལ་བཞིན། །ཐུབ་པའི་ཕྲིན་ལས་འབད་རྩོལ་དང་བྲལ་བ། །ལྷུན་གྱིས་གྲུབ་པའི་ཕྲིན་ལས་ནམ་མཁའ་མཛོད། །འགྲོ་དང་མི་འགྲོ་ཀུན་ལ་རབ་ཁྱབ་ཅིང་། །སེམས་ཅན་ཉེར་འཚོའི་གཞིར་གྱུར་ཇི་སྙེད་པ། །ཡོད་དོ་ཅོག་རྣམས་རྒྱལ་བའི་ཕྲིན་ལས་མཐུ། །འདི་ལ་རྒྱུན་མཐའི་སེམས་དཔས་གཞལ་མི་ནུས། །སྣ་ཚོགས་གཟུགས་དང་སྣ་ཚོགས་ཕྲིན་ལས་ཀྱིས། །སྣ་ཚོགས་གདུལ་བྱར་སྣ་ཚོགས་ཆོས་ཀྱང་སྟོན། །སྣ་ཚོགས་མཁས་རྣམས་གྲོལ་བར་མཛད་པ་ཡི། །ཕྲིན་ལས་སྣ་ཚོགས་བསམ་མི་ཁྱབ་ལ་བསྟོད། །མདོར་ན་ཆོས་ཀྱི་སྐུ་ནི་བསམ་མི་ཁྱབ། །ལོངས་སྤྱོད་ཡོངས་རྫོགས་ཞིང་ཁམས་སྐུ་ལ་རྫོགས། །སྐུ་ཡིས་ཕྱོགས་བཅུའི་ཞིང་རྣམས་ཡོངས་ལ་ཁྱབ། །སྤྲུལ་པའི་ངོ་མཚར་ཕ་མཐའ་ཡས་པར་སྟོན། །གཅིག་ཏུ་མ་ངེས་དུ་མའི་གར་གྱིས་རྩེན། །ལྷན་སྐྱེས་ཡེ་ཤེས་མཆོག་ཏུ་མི་འགྱུར་བདག །བདག་མེད་སྤྲོས་བྲལ་དམིགས་མེད་སྙིང་རྗེས་གང་། ཁ་སྦྱོར་བདེ་ཆེན་བདུད་རྩིའི་རོས་མྱོས་པ། །སྲིད་པ་ཇི་སྲིད་གནས་ཀྱི་བར་དག་ཏུ། །རྒྱན་གྱི་འཁོར་ལོ་ལྔ་ཕྲག་རྒྱུན་མི་ཆད། །ནམ་ཡང་འགོག་པ་མེད་པའི་རང་བཞིན་ཅན། །ཁྱབ་བདག་དཔལ་ལྡན་དང་པོའི་སངས་རྒྱས་བསྟོད། །སྐུ་ཡི་ཟེར་གྱི་ཕྲ་མོ་ཙམ་དང་ནི། །གསུང་གི་གདངས་སྐད་ཆ་ཡི་ཤས་ཙམ་དང་། །མཁྱེན་བརྩེའི་འོད་ཟེར་གློག་འགྱུ་ཙམ་སྟོན་ཡང་། །སྲིད་པ་ཧྲུལ་པོར་བྱེད་པའི་མཐུ་དང་ལྡན། །ཚངས་དང་མིག་སྟོང་ལྡན་དང་སྲེད་མེད་བུ། །ཁྱབ་འཇུག་དབང་ཕྱུག་ལ་སོགས་དྲེགས་བྱེད་ཚོགས། །ཉན་ཐོས་རང་རྒྱལ་བྱང་སེམས་ལ་སོགས་པ། །སྲིད་དང་ཞི་བ་ཐམས་ཅད་ཟིལ་གྱིས་གནོན། །འཇིག་རྟེན་འདས་དང་མ་འདས་ཐམས་ཅད་དབུས། །འགྲན་ཟླ་མེད་པ་ཀུན་ནས་ལྷམ་མེ་བ། །རྐང་གཉིས་ཁྱུ་མཆོག་ཐུབ་དབང་དོན་ཀུན་གྲུབ། །གཉིས་མེད་མཁྱེན་ཅན་ཞབས་ལ་བསྟོད་པར་བགྱི། །དེ་ལྟར་བསྟོད་པས་བྱང་ཆུབ་སྙིང་པོའི་བར། །བླ་མ་ཐུབ་དབང་མཆོག་དང་མི་འབྲལ་ཞིང་། །ངེས་འབྱུང་ཚུལ་ཁྲིམས་བྱང་ཆུབ་སེམས་མཆོག་འབྱོང་། །ཡང་དག་ལྟ་བ་རྟོགས་པར་བྱིན་གྱིས་རློབས། །ཚོགས་སྦྱོར་མཐོང་སྒོམ་མི་སློབ་ལམ་ལྔའི་བར། །རིམ་གྱིས་བགྲོད་ནས་རྫོགས་སྨིན་སྦྱངས་མཐར་ཕྱིན། །སྒྲིབ་གཉིས་བྱང་ཞིང་ཚོགས་གཉིས་རབ་རྫོགས་ནས། །ཀུན་ཏུ་འོད་ཀྱི་ས་ལ་ཕྱིན་པར་ཤོག །ཁྱད་པར་ཟབ་མོ་སྔགས་ཀྱི་ཐེག་པ་ལ། །ཞུགས་ནས་རྡོ་རྗེའི་སློབ་དཔོན་མཚན་ལྡན་ལས། །དབང་ནོས་རྒྱུད་སྨིན་དམ་ཚིག་རྣམ་པར་དག །རིམ་གཉིས་ལམ་གྱི་བགྲོད་པ་མཐར་ཕྱིན་ཤོག །ལམ་གྱི་སྙིང་པོ་ཟབ་མོ་བླ་མའི་ལམ། །ཐུབ་དབང་རྡོ་རྗེ་འཆང་ཆེན་རྣལ་འབྱོར་ལ། །བརྟེན་ནས་ཅིར་སྣང་བླ་མར་ཤར་བ་ཡི། །མོས་གུས་ལམ་མཆོག་རྒྱུད་ལ་སྐྱེ་བར་ཤོག །མྱུར་ལམ་ཟབ་མོ་གསང་བ་སྔགས་ཀྱི་ལམ། །རྒྱུད་ལ་བརྟེན་པས་སྒྲིབ་གསུམ་དབྱིངས་སུ་དག །འགྲོས་བཞི་ཐིམ་ནས་བཅུ་གསུམ་རྡོ་རྗེ་འཛིན། །དང་པོའི་སངས་རྒྱས་མངོན་དུ་འགྱུར་བར་ཤོག །སྤངས་རྟོགས་མཐར་ཕྱིན་འབྲས་བུའི་རྒྱལ་པོ་ཡི། །གོ་འཕང་བརྙེས་ནས་ཞིང་ཁམས་རབ་འབྱམས་སུ། །གཟུགས་སྐུ་མཆོག་དང་ཕལ་པའི་ཚུལ་བསྟན་ནས། །མཁའ་དང་མཉམ་པའི་འགྲོ་བ་སྒྲོལ་བར་ཤོག །ཀུན་མཁྱེན་རྒྱལ་བསྟན་ཕྱོགས་མེད་དར་ཞིང་རྒྱས། །བསྟན་འཛིན་སྐྱེས་རྣམས་ཞབས་པད་ཡུན་དུ་བརྟན། །དགེ་འདུན་སྡེ་རྣམས་ཐུགས་མཐུན་ཁྲིམས་གཙང་འཕེལ། །འཇིག་རྟེན་བདེ་ཞིང་དགེ་ལེགས་རབ་འཕེལ་ཤོག །ཅེས་པའང་མེ་སྤྲེལ་སྨིན་ཟླའི་ཚེས་བཅོ་ལྔ་ལ་འཇམ་དབྱངས་ཆོས་ཀྱི་བློ་གྲོས་པས་མ་ག་དྷ་རྡོ་རྗེ་གདན་གྱི་གནྡྷོ་ལའི་བྱང་ཆུབ་ཆེན་པོའི་སྤྱན་སྔར་བྲིས་ཏེ་གསོལ་བ་བཏབ་པ་བཞིན་འགྲུབ་པར་གྱུར་ཅིག ། །།

[edit]

lha dang bcas pa'i ston pa mnyam med thub pa'i dbang po la bstod pa lha'i sil snyan zhes bya ba bzhugs so/____/na mo shAkya mu ne ye/__srid dang zhi ba'i khams na mtshungs pa med/____/lha dang bcas pa'i 'jig rten mtha' dag gis/____/zhabs sen rdul 'od dmar por gus mchod pa/____/thub dbang nyi ma'i zhabs kyi pad mor 'dud/____/rgyal ba kun gyi nang nas rab bsngags pa/____/rtsod dus smon lam lnga brgya btab pa las/____/thugs bskyed pad ma dkar po ltar gyur pa/____/thub dbang lha yi lha khyod rgyal gyur cig__/gser gyi ri bo lta bur brjid pa'i sku/____/mtshan dang dpe byad bzang po'i me tog bkra/____/bsod nams phung po'i sku yi dkyil 'khor mdzes/____/blta bas ngoms pa med la phyag 'tshal lo/____/sku yi tshad ni gzhal bya'i yul las 'das/____/gtsug tor cha dang mdzod spu'i 'od zer sogs/____/zhing khams rab 'byams grangs med brgal gyur kyang /____/rdzu 'phrul che thob rnams kyang thugs las chung /____/gsung gi gdangs skad yan lag drug cur ldan/____/gsung gcig nyid kyis du ma so sor go/__nye ring che chung skyon kun spangs pa yis/____/gsang ba bsam gyis mi khyab gsung la bstod/____/gdul bya'i khams dang dbang po 'tshams par ston/____/sangs rgyas gsung dbyangs zad mi shes pa nyid/____/zhing khams kun na rab tu 'jug pa yi/____/de bzhin gshegs pa rnams dang gsung gcig nyid/____/zab zhi spros pa kun bral chos kyi dbyings/____/ye shes rgya mtsho gting dpag dka' ba nyid/____/kun tu khyab cing 'od gsal 'dus ma byas/____/thugs kyi gsang ba bsam mi khyab la bstod/____/nam mkha' lta bu chos dbyings yangs pa che/____/rang byung ye shes lhun grub nyi ma shar/____/thugs rje'i zer chen srid pa gsum na 'phro/____/thams cad mkhyen pa rnam par brtag pa bral/____/bral dang smin pa'i 'bras chos rgya mtsho ni/____/gang+gA'i klung gi rdul gyis gzhal mi nus/____/rgya che'i nam mkha' snod du byas gyur kyang /____/shong bar mi nus brjod pa'i yul las 'das/____/byang chub phyogs chos bcu phrag gsum dang ni/____/bdun gyis lhag pa yongs su rdzogs pa las/____/sku gsum rang bzhin thub mchog nyid kyis mkhyen/____/yon tan gsang ba bsam mi khyab la bstod/____/ji ltar nor bu bum bzang dpag bsam rnams/____/rtog pa med kyang 'gro ba'i dbul sel bzhin/____/thub pa'i phrin las 'bad rtsol dang bral ba/____/lhun gyis grub pa'i phrin las nam mkha' mdzod/____/'gro dang mi 'gro kun la rab khyab cing /____/sems can nyer 'tsho'i gzhir gyur ji snyed pa/____/yod do cog rnams rgyal ba'i phrin las mthu/____/'di la rgyun mtha'i sems dpas gzhal mi nus/____/sna tshogs gzugs dang sna tshogs phrin las kyis/____/sna tshogs gdul byar sna tshogs chos kyang ston/____/sna tshogs mkhas rnams grol bar mdzad pa yi/____/phrin las sna tshogs bsam mi khyab la bstod/____/mdor na chos kyi sku ni bsam mi khyab/____/longs spyod yongs rdzogs zhing khams sku la rdzogs/____/sku yis phyogs bcu'i zhing rnams yongs la khyab/____/sprul pa'i ngo mtshar pha mtha' yas par ston/____/gcig tu ma nges du ma'i gar gyis rtsen/____/lhan skyes ye shes mchog tu mi 'gyur bdag__/bdag med spros bral dmigs med snying rjes gang /__kha sbyor bde chen bdud rtsi'i ros myos pa/____/srid pa ji srid gnas kyi bar dag tu/____/rgyan gyi 'khor lo lnga phrag rgyun mi chad/____/nam yang 'gog pa med pa'i rang bzhin can/____/khyab bdag dpal ldan dang po'i sangs rgyas bstod/____/sku yi zer gyi phra mo tsam dang ni/____/gsung gi gdangs skad cha yi shas tsam dang /____/mkhyen brtse'i 'od zer glog 'gyu tsam ston yang /____/srid pa hrul por byed pa'i mthu dang ldan/____/tshangs dang mig stong ldan dang sred med bu/____/khyab 'jug dbang phyug la sogs dregs byed tshogs/____/nyan thos rang rgyal byang sems la sogs pa/____/srid dang zhi ba thams cad zil gyis gnon/____/'jig rten 'das dang ma 'das thams cad dbus/____/'gran zla med pa kun nas lham me ba/____/rkang gnyis khyu mchog thub dbang don kun grub/____/gnyis med mkhyen can zhabs la bstod par bgyi/____/de ltar bstod pas byang chub snying po'i bar/____/bla ma thub dbang mchog dang mi 'bral zhing /____/nges 'byung tshul khrims byang chub sems mchog 'byong /____/yang dag lta ba rtogs par byin gyis rlobs/____/tshogs sbyor mthong sgom mi slob lam lnga'i bar/____/rim gyis bgrod nas rdzogs smin sbyangs mthar phyin/____/sgrib gnyis byang zhing tshogs gnyis rab rdzogs nas/____/kun tu 'od kyi sa la phyin par shog__/khyad par zab mo sngags kyi theg pa la/____/zhugs nas rdo rje'i slob dpon mtshan ldan las/____/dbang nos rgyud smin dam tshig rnam par dag__/rim gnyis lam gyi bgrod pa mthar phyin shog__/lam gyi snying po zab mo bla ma'i lam/____/thub dbang rdo rje 'chang chen rnal 'byor la/____/brten nas cir snang bla mar shar ba yi/____/mos gus lam mchog rgyud la skye bar shog__/myur lam zab mo gsang ba sngags kyi lam/____/rgyud la brten pas sgrib gsum dbyings su dag__/'gros bzhi thim nas bcu gsum rdo rje 'dzin/____/dang po'i sangs rgyas mngon du 'gyur bar shog__/spangs rtogs mthar phyin 'bras bu'i rgyal po yi/____/go 'phang brnyes nas zhing khams rab 'byams su/____/gzugs sku mchog dang phal pa'i tshul bstan nas/____/mkha' dang mnyam pa'i 'gro ba sgrol bar shog__/kun mkhyen rgyal bstan phyogs med dar zhing rgyas/____/bstan 'dzin skyes rnams zhabs pad yun du brtan/____/dge 'dun sde rnams thugs mthun khrims gtsang 'phel/____/'jig rten bde zhing dge legs rab 'phel shog__/ces pa'ang me sprel smin zla'i tshes bco lnga la 'jam dbyangs chos kyi blo gros pas ma ga d+ha rdo rje gdan gyi gan+d+ho la'i byang chub chen po'i spyan sngar bris te gsol ba btab pa bzhin 'grub par gyur cig__/__//_