ཐུགས་དམ་སྒོམ་ཕྱོགས་སྐོར།

Previous Text Back to Volume Page Next Text

Wylie title	thugs dam sgom phyogs skor
Location	mdo mkhyen brtse bka' 'bum Volume 8, Text 2, Pages (Folios to )
Author	མདོ་མཁྱེན་བརྩེ་
Less details More details
Citation
Genre	Advice - zhal gdams · Spiritual Instructions - gdams ngag
Colophon	།སྙིང་གཏམ་ཚིག་གསུམ་པ་ཞེས་བྱ་བ་འདི་ཡང་རྡོ་བོད་མཚམས་མོག་པ་ལྷ་རྩེའི་ནགས་ཁྲོད་དུ་རྫོགས་ཆེན་པ་པདྨ་དབང་ཆེན་ཡེ་ཤེས་རོལ་བའི་རྡོ་རྗེས་སྨྲས་པའོ།། །།
Colophon	/snying gtam tshig gsum pa zhes bya ba 'di yang rdo bod mtshams mog pa lha rtse'i nags khrod du rdzogs chen pa pad+ma dbang chen ye shes rol ba'i rdo rjes smras pa'o//_//

[edit]

༄༅། །ཐུགས་དམ་སྒོམ་ཕྱོགས་སྐོར། ཇི་སྐད་གསུངས་པ་བཞིན། རིག་པ་བཅོས་མེད་ལས་ལྷག་པ་མེད། ཤེས་པ་ལས་རླུང་གིས་བསྐྱོད་པ་ལས་རྣམ་རྟོག་ཤར་བ་ཡིན་ཚེ། ཤར་ཕྲལ་ཉིད་དུ་ངོས་གཟུང་མེད་པར་ཡལ་ན་དེ་ཀ་རང་གིས་ཆོག་པ་ཡིན། ལར་གནས་པ་ལ་དགའ་བ་དང་མ་གནས་པ་ལ་སྡུག་པ་བྱས་ན་ནོར་མི་བཏུབ། རིག་པ་རང་བབ་ཏུ་བཞག་པའི་ཐོག་ནས་གནས་འགྱུ་ཐམས་ཅད་འོག་འབྱམས་ལུང་མ་བསྟན་དུ་མ་སོང་བར་ཁོ་རང་གིས་ཁོ་རང་ངོ་ཤེས་པ་ལྟ་བུ་ཞིག་འདུག་ན་དེས་ཆོག་འདི་གནས་འགྱུ་ལ་དྲན་པ་གཞུང་པོས་བརྟག་དཔྱད་བྱེད་པ་དང་མ་ནོར་བ་ཞིག་དགོས། ཞེས་ལྗགས་རྩེ་མ་ཎི་བྷ་དྲ་ལའོ། ། ༈ ཨ་ད་ལྟའི་ཤེས་པ་བཟོ་མེད་འདི། །ངེས་པ་དོན་གྱི་ཀུན་ཏུ་བཟང༌། །སྒོམ་དུ་མེད་ལ་ཡེངས་སུ་ཕངས། །རང་སོར་ཞོག་ཅིག་སྙིང་གི་བུ། །ཉམས་དང་རིག་པ་ཤན་ཕྱེད་པའི། །དྭངས་གསལ་དྲན་པ་བརྗོད་མེད་འདི། །ཀ་དག་དོན་གྱི་གནས་ལུགས་ཡིན། །ཞེ་འདོད་སྤོངས་ཤིག་སྙིང་གི་བུ། །གཏམ་དང་སྙན་གྲགས་མཐུ་རྩལ་སོགས། །བྱང་ཆུབ་སྒྲུབ་པའི་བདུད་གཅོད་ཡིན། །རི་སུལ་མི་མེད་ལུང་སྟོངས་སུ། །འཇའ་ལུས་སྒྲུབས་ཤིག་སྙིང་གི་བུ། །སྙིང་གཏམ་ཚིག་གསུམ་པ་ཞེས་བྱ་བ་འདི་ཡང་རྡོ་བོད་མཚམས་མོག་པ་ལྷ་རྩེའི་ནགས་ཁྲོད་དུ་རྫོགས་ཆེན་པ་པདྨ་དབང་ཆེན་ཡེ་ཤེས་རོལ་བའི་རྡོ་རྗེས་སྨྲས་པའོ།། །།