ཀུན་མཁྱེན་བླ་མའི་ཞལ་ལུང་སངས་རྒྱས་ལག་འཆང་།

🚧 This website is under continued development. We appreciate your patience!

First text in volume. Back to Volume Page Next Text

Wylie title	kun mkhyen bla ma'i zhal lung sangs rgyas lag 'chang
Location	mdo mkhyen brtse bka' 'bum Volume 8, Text 1, Pages (Folios to )
Author	མདོ་མཁྱེན་བརྩེ་
Less details More details
Citation
Genre	Advice - zhal gdams · Spiritual Instructions - gdams ngag
Colophon	ས་པའང་གཞོན་ནུ་བློ་གྲོས་ཀྱིས་ཤར་མར་སྤེལ་བའི་ཡི་གེ་པ་ནི་རྡོ་རྗེའི་མཆེད་པོ་འོད་ཟེར་དཔལ་འབར་གྱིས་བགྱིས་པ་དགེའོ། །དགེའོ། །དགེའོ། །བཀྲ་ཤིས། མངྒ་ལཾ།། །།
Colophon	sa pa'ang gzhon nu blo gros kyis shar mar spel ba'i yi ge pa ni rdo rje'i mched po 'od zer dpal 'bar gyis bgyis pa dge'o/_/dge'o/_/dge'o/_/bkra shis/_mang+ga laM//_//

[edit]

༄༅། །ཀུན་མཁྱེན་བླ་མའི་ཞལ་ལུང་སངས་རྒྱས་ལག་འཆང་བཞུགས། །

༄༅། །བླ་མ་ལ་ཕྱག་འཚལ་ལོ། །ཡང་ལན་གཅིག་གི་ཚེ་མནལ་བའི་རྨི་ལམ་ན་ལྷ་སྲས་དཔོན་སློབ་ཟུང་དང་མཇལ་བ་རྗེ་ཡི་ཞལ་ནས་ཁྱེད་ལ་བླ་མའི་ཞལ་གདམས་འདྲ་ཅང་ཡོད་ན་ཡི་གེ་བྲིས་ནས་གཏོད་ཅིག་གསུངས་པ་ཞིག་བྱུང་བར། དེ་ལ་འདི་འདྲ་ཞིག་བྲིས་ནས་ཕུལ་བ་ལགས། ལགས་རིན་པོ་ཆེ། སྐྱབས་རྗེ་བླ་མས་ཚེ་གཅིག་གི་སངས་རྒྱས་ཐོབ་པར་འདོད་པས་ཉམས་སུ་ལེན་ལུགས་ལ། གཙོ་ཆེ་བ་བདུན་ཡོད་ཀྱང༌། འགག་བསྡུ་ས་གཅིག་ལས་མེད། བརྒྱད་པོ་འདི་ཤེས་ན་ཆོས་པ་གཤའ་མ་ཞིག་འོང་བ་ཡིན་གསུངས། དེ་ལ་གཙོ་ཆེ་བ་བདུན་ནི། དང་པོ་གཏན་གྱི་འདུན་མ་མ་ནོར་བ་ཆོས་སྒོར་ཞུགས་པ་འདི་གཙོ་ཆེ། དེ་ནས་དད་གཏོང་མོས་གུས་ཀྱིས་དགེ་བའི་བཤེས་གཉེན་དེའི་ཐུགས་ཟིན་པ་གཙོ་ཆེ། དེ་ནས་གང་ཉམས་སུ་ལེན་བྱའི་ཆོས་དེའི་དོན་མ་ཤེས་བར་དུ་བླ་མའི་དྲུང་ནས་ཐེ་ཚོམ་འདྲི་བ་གཙོ་ཆེ། དེ་ནས་གདམས་ངག་གང་ཐོབ་པ་དེ་ལ་ཡིད་ཆེས་པ་གཙོ་ཆེ། དེ་ནས་དམ་ཚིག་དང་སྡོམ་པ་གཙང་མ་བསྲུང་བ་གཙོ་ཆེ། དེ་ནས་དེ་དག་གི་དོན་གཅིག་ཏུ་དྲིལ་ནས་སྙིང་རུས་ཀྱིས་སྒོམ་སྒྲུབ་བྱེད་པ་ཁོ་ན་གཙོ་ཆེ་དེ་ནས་ཟབ་དགུའི་གདམས་པ་ནོར་ཕྱིར་མི་འཚོང་བ་ཡང་གཙོ་ཆེ། གཙོ་ཆེ་བ་བདུན་པོ་འདི་རྣལ་འབྱོར་པའི་ཚེ་གཅིག་གི་བྱུང་བ་སྒྲུབ་པའི་ཆིངས་ཡིན། དེ་དག་གི་འགག་བསྡུ་ས་གཅིག་པུ་ནི་དོན་དམ་མ་སྐྱེས་པའི་གནས་ལུགས་ཏེ། ས་ལམ་ལ་སྦྱངས་བགྲོད་མེད་པའི་ཡིན་ལུགས། ལྟ་སྒོམ་སྤྱོད་པ་འབྲས་བུ་སྟེ་རྣལ་འབྱོར་བཞིའི་རིམ་པའང་དོན་ལ་སོ་སོར་དབྱེ་རྒྱུ་དང་རིམ་པ་ཅན་མ་ཡིན་པའི་ཁོ་ཐག་རིམ་པ་སྐད་གཅིག་མའི་གཤིས་སུ་ཆོད་ཅིང༌། རྟེན་མེད། གནས་མེད། གཏད་མེད། ཡེངས་མེད། བལྟར་མེད། བསྒོམ་མེད། འཕོ་མེད། འགྱུར་མེད། ཡོད་མེད་ཀྱི་རྟོག་དཔྱོད་དང༌། ཐེ་ཚོམ་གྱི་རྒྱུ་མེད། ངེས་ཤེས་ཀྱི་དྲི་མས་མ་གོས། སྤང་བྱའི་བློ་ཟད། ཐོབ་བྱའི་ཆོས་བོར་བ་འདི་ལས་གཞན་པ་ཞིག །མཐོང་དུ་མི་བཏུབ་ཅིང༌། རྙེད་དུ་མི་འོང་བས་ན། བྱ་རྩོལ་ལས་འདས་པ་དེ་གའི་ངང་སྐྱོངས་དང་ནམ་ཞིག་གཏན་གྱི་འདུན་མ་འགྲུབ་པར་ཐེ་ཚོམ་མེད་དོ་གསུངས། ༈ ཡང་སྐྱབས་རྗེ་བླ་མས། ཚེ་གཅིག་གི་སངས་རྒྱས་སྒྲུབ་པར་འདོད་ན་ལམ་ལྔ་དང་འབྲེལ་དགོས། དེ་ཡང་བླ་མ་སངས་རྒྱས་སུ་མཐོང་ཞིང་ཅི་གསུངས་ཚད་མར་བཟུང་ནས་ལུས་ལོངས་སྤྱོད་ཕངས་པ་མེད་པར་འབུལ་བ་ཚོགས་ལམ༵། བླ་མ་ཐུགས་རྗེ་ཅན་དེ་ཉིད་ཀྱིས་བརྡ་དང་ཐབས་སྣ་ཚོགས་པའི་སྒོ་ནས་གནས་ལུགས་བསམ་གྱིས་མི་ཁྱབ་པའི་ཡེ་ཤེས་རང་རྒྱུད་ལ་སྦྱོར་བ་སྦྱོར་ལམ༵། ཐབས་ལ་མཁས་པའི་རྐྱེན་དེས་ཁམས་གསུམ་ལས་འདས་པའི་ཡེ་ཤེས་ངོ་བོ་དབྱེར་མི་ཕྱེད་པ་དབྱེར་མེད་པའི་དུས་ནས་དབྱེ་ཡོད་པའམ་མེད་ཅེས་བྱ་བའི་བློས་མཐའ་དང་ཚིག་གི་ཆ་ཕྲ་བ་ཙམ་ཡང་མེད་ཅིང༌། མེད་པའང་མ་གྲུབ་པའི་དོན་མཐོང་བ་ནི་མཐོང་ལམ༵། དེ་ལ་ཡང་ནས་ཡང་དུ་གོམས་ཤིང་འདྲིས་པར་བྱ་བའི་ཐབས་སྐྱེ་འགག་གནས་གསུམ་དང་བྲལ་བའི་ངང་སྐྱོང་བ་ནི་སྒོམ་ལམ༵། དེ་ལྟར་སྒོམ་པ་ཡུན་བསྲིང་ནས། བློ་བྲལ་གྱི་རྟོགས་པ་ཆོས་ཉིད་མ་ཐོག་དུ་ཕྱིན་པས་དུས་གསུམ་གྱི་སྤྲོས་པའི་མཚན་མ་དབྱིངས་སུ་ནུབ་ནས་མི་གནས་དོན་གྱི་ཡེ་ཤེས་གནས་ལུགས་བསམ་གྱིས་མི་ཁྱབ་པའི་ཀློང་དུ་གཉིས་སུ་མེད་ཅིང༌། གཉིས་སུ་བྱར་མེད་པ། རྐྱེན་མེད་པའི་སྣང་བ་ངོ་བོ་རང་བཞིན་ཐུགས་རྗེ་གསུམ་གྱི་བདག་ཉིད་ཅན་ནི་མཐར་ཕྱིན་པའི་ལ༵མ་ཏེ་གྲངས་མེད་གསུམ་ལ་མ་ལྟོས་པར་ཚེ་གཅིག་གི་མྱུར་ལམ་ཟབ་མོ་འདི་ཤེས་ན་གདོད་མའི་མགོན་པོའི་གོ་འཕང་འཐོབ་པ་ལ་དཀའ་ཚེགས་མེད་པ་ཡིན། ལར་ཐེག་པའི་ཡིན་ལུགས་བཤད་ན། མེད་པར་འཛིན་པ་ཆད་ལྟ་དང༌། ཡོད་པར་འཛིན་པ་རྟག་ལྟ་སོང་ཕྱིར་རོལ་པ། བདག་མེད་ཕྱེད་དང་གཉིས་རྟོགས་པ་ཉན་རང་སྐོར། རང་རིག་རང་གསལ་འཛིན་མེད་དང༌། ཕྱོགས་གཅིག་མི་རྟོག་པར་འཛིན་པ་ཐུན་མོང་གི་དབུ་སེམས། སྟོང་ཉིད་བདེན་གྲུབ་ཏུ་འདོད་པ་དུས་ཕྱིས་ཀྱི་གཞན་སྟོང༌། ཁས་ལེན་མི་འདུག་སྙམ་པ་གསར་བྱུང་གི་ཐལ་འགྱུར། ལྟ་སྤྱོད་སོ་སོར་འཛིན་པ་ཀྲི་ཡོག་གཉིས་དང་ཟུང་འཇུག་བདེན་པར་འཛིན་པ་ཨུ་པ། སྣང་སྟོང་གཉིས་སུ་མེད་པ་ཕྱག་ཆེན། ཡུལ་མེད་སྨྲ་བསམ་བརྗོད་ལས་འདས་པ་ཤེར་ཕྱིན་སོགས་རང་ས་ན་གྲུབ་མཐའ་སྨྲ་བ་དེ་དག་གི་མཆོག་འཛིན་གྱི་གྲུབ་མཐའ་ཆེས་ཕྲ་བ་ཙམ་ཡང་མ་གྲུབ་པའི་གནས་ལུགས་གཟུང་འཛིན་དང་བྲལ་བའི་རིག་པ་རྗེན་སངས་བློ་བྲལ་ཆོས་སྐུའི་ངང་དུ་མཉམ་པར་འཇོག་པ་ལ་འཛིན་པ་རྩེ་གཅིག་པའི་ཏིང་ངེ་འཛིན་ཞེས་རྫོགས་པ་ཆེན་པོའི་སྒོ་དང་པོ་མཐོང་བ་རྣམས་ཀྱི་སྤྱོད་ཡུལ་ཏེ་གཅིག་པུའི་དམ་ཚིག་གོ །ཐེག་པ་མཐའ་དག་གི་ཏིང་ངེ་འཛིན་རྣམས། བསམ་གྱིས་མི་ཁྱབ་པའི་དབྱིངས་སུ་རྫོགས་པའི་སེམས་ཉིད་བདེ་གཤེགས་སྙིང་པོ་བདེ་གསལ་སྣང་སྟོང་ལས་འདས་པ་ངོ་བོ་དབྱེར་མི་ཕྱེད་པ་ལ་རྟོག་དཔྱོད་ཀྱི་བློ་དང་མཆོག་འཛིན་གྱི་ངེས་ཤེས་སོགས་གདོད་མ་ནས་གྲུབ་པས་ཀུན་ཁྱབ། ཁྱབ་བྱ་ཁྱབ་བྱེད་ལས་འདས་པའི་ཆོས་སྐུ་མངོན་དུ་གྱུར་པ་ནི་ཁྱབ་པ་མཐའ་དང་བྲལ་བའི་ཏིང་ངེ་འཛིན་ཞེས་སྔ་མ་ལ་བརྟན་པ་ཐོབ་པ་སྟེ་ཕྱལ༵་བའི་དམ་ཚིག །མཐའ་བྲལ་བྱ་རྩོལ་ལས་འདས་པའི་གཉུག་མ་དོན་གྱི་ཆོས་སྐུ་དེ་ལ་མཐར་ཕྱིན་སྐུ་དང་ཡེ་ཤེས་ཀྱི་ཚོགས་ལྷུན་གྱིས་གྲུབ་པ་ནི་གཉུག་མ་ལྷུན་གྱིས་གྲུབ་པའི་ཏིང་ངེ་འཛིན་ཞེས་སྔ་མ་སྔ་མར་བརྟན་པ་ཇེ་ཐོབ་ལ་སོང་བའི་ཡེ་ཤེས་ཚད་ལ་ཕེབས་པ་སྟེ་ལྷུན་གྲུབ༵་ཀྱི་དམ་ཚིག་དང༌། དོན་དེ་ལ་བློས་རྣམ་པ་ཕྲ་བ་ཙམ་ཡང་མེད། མེད་ཅེས་བྱ་བའང་མ་གྲུབ་མ་གྲུབ་པ་ཡང་སྟོར། སྟོར་བྱའི་ཆོས་མེད། ངག་གི་བརྗོད་དུ་མེད། ཚིག་གིས་མི་མཚོན། ནམ་ཡང་གཞན་དུ་མི་འགྱུར་ཞིང༌། བྱར་མེད་དམིགས་བསམ་ལས་འདས་པའི་ཆོས་སྐུའི་བཙན་ས་ཟིན་པ་ནི་རང་བཞིན་རྣམ་པར་དག་པའི་ཏིང་ངེ་འཛིན་ཞེས་གདོད་མའི་གྲོལ་བ་ཆེན་པོ་སྟེ་མེད༵་པའི་དམ་ཚིག་གོ །ཚུལ་འདི་དག་ནི་ངེས་གསང་རྫོགས་པ་ཆེན་པོའི་རྣལ་འབྱོར་ལ་མེད་དུ་མི་རུང་བའི་ཆིངས་ཏེ། ཀུན་མཁྱེན་གྱིས། ངོ་བོའི་བཞུགས་ཚུལ་དམ་ཚིག་ཆིངས་ཀྱིས་བཅིངས། ཞེས་གསུངས་པའི་དོན་ཏིང་ངེ་འཛིན་བཞི་པོ་འདིས་གསལ་བ་ཡིན། དོན་དུ་ན་ལྟ་བ་རྣམ་དག་དང་ལྟར་སྣང༌། ཡིད་ལ་བྱར་ཡོད་དང་བྱར་མེད་ཀྱི་ཁྱད་པར་ཁོ་ནས་འབྱེད་པ་སྟེ། རྣམ་གྲོལ་རྣམ་པས་བཅིངས་བ་ཡི། །སྙིང་པོ་དེ་ཡང་གདོད་ནས་མེད། །ཅེས་གསུངས་པ་ལྟར་ཁས་ལེན་དང་ཉམས་མྱོང་མ་བྲལ་གྱི་བར་ལྟ་བ་རྣལ་མ་མིན། དཀའ་བས་ཉམས་ལེན་ལ་རྩ་གདར་ཆོད་པ་ཞིག་མ་བྱུང་བར་དུ་གོ་ལོ་ཐོས་ལོ་ཙམ་གྱིས་ཆོག་པར་འཛིན་རུང་བ་མ་ཡིན་ནོ། །ཞེས་པའང་ཡབ་རྗེ་འགྲོ་བའི་མགོན་པོ་དེ་ཉིད་ཀྱིས་གདམས་པ་ཡིན། ༈ དེ་ལྟར་གོང་དུ་སྨོས་པའི་གནས་ལུགས་དེ་རང་གི་ཉམས་སུ་ལེན་པའི་ཚེ་ལྟ་སྒོམ་སྤྱོད་འབྲས་བཞིར་འདུས་པ་ཡིན། དེ་ཡང་རིག་པ་སྐད་ཅིག་མའི་སྟེང་དུ་རྫོགས་པ་སྟེ། ལྟ་བ་བློ་བྲལ་རང་གསལ་ཡིན། །སྒོམ་པ་མ་གཏད་མ་ཡེངས་ཡིན། །སྤྱོད་པ་སྣང་ལ་འཛིན་མེད་ཡིན། །འབྲས་བུ་ཀ་དག་དབྱིངས་གྲོལ་ཡིན། །ཞེས་གསུངས་སོ། ༈ ཡང་ལས་དང་པོ་རྣམས་ཀྱིས་དོན་དུ་གཉེར་བྱ་ནི། དེ་ཡང་སྐྱབས་རྗེ་བླ་མས། ལྟ་སྒོམ་སྤྱོད་གསུམ་མདོར་བསྡུས་ཏེ་བཤད་ན། སེམས་དེ་དང་པོ་གང་ནས་བྱུང༌། བར་དུ་གར་གནས་ཐ་མ་གར་འགྲོ་བཙལ་བས། བྱུང་ས་དང༌། འགྲོ་ས། གནས་ས་མ་རྙེད་ཀྱང༌། བཙལ་མཁན་གྱི་སེམས་ཞིག་ཡོད་སྙམ་པའི་གཟུང་འཛིན་དེ་ག་ལྟ་བའི་གོལ་སྒྲིབ་ཡིན། དེ་ཉིད་ངོས་ཟིན་ཚེ་དངོས་པོ་མཚན་མ་ལ་སོགས་གཞན་ལས་མ་སྐྱེས་པས་སྐྱེ་མེད། སྐྱེ་མེད་དེས་ནི་འཁོར་འདས་གཉིས་ཀ་ལ་ཁྱབ་པས་འགག་མེད། ཡོད་མེད་ཡིན་མིན་རྟག་ཆད་སོགས་ཀྱིས་མཐར་མ་ལྷུང་ཞིང༌། ཡེ་ནས་ཡོད་མ་མྱོང་བ་ངོ་བོ་སྟོང་པ། མེད་མ་མྱོང་བས་རང་བཞིན་གསལ་བ། རྩལ་སྣང་རྒྱུན་ཆད་མེད་པས་ཐུགས་རྗེ་ཀུན་ཁྱབ། དེ་དག་སོ་སོར་ཡང་མ་ཡིན། གཅིག་ཏུ་ཡང་མ་གྲུབ་གྲུབ་མ་གྲུབ་ཀྱི་ཁས་ལེན་དང་བྲལ་བའི་ཚེ་ལྟ་བ་གཏན་ལ་ཕབ་པ་ཡིན། དེ་ཉིད་མ་ཡེངས་པར་རང་བབ་ཏུ་བཞག་ཀྱང་སྒོམ་དུ་མེད་དེ་དམིགས་པ་དང་བྲལ་བའི་ཕྱིར། ཡེངས་བ་མ་ཡིན་ལུང་མ་བསྟན་ལ་མ་ལུས་པའི་ཕྱིར། དཔེར་ན་རང་ཉིད་ཀྱི་མིག་གིས་ཡུལ་གཟུགས་ཀྱི་རྣམ་པ་ཐམས་ཅད་མཐོང་ཡང་མིག་རང་གི་ངོ་བོ་ལ་དམིགས་པ་གང་ཡང་མེད་ཅིང༌། མིག་རང་གིས་རང་ཉིད་མི་མཐོང་བ་བཞིན་གནས་པ་ནི་སྒོམ་དངོས་གཞི། དེའི་ངང་ལ་ཟ་ཉལ་འགྲོ་འཆག་སོགས་སྤྱོད་ལམ་གང་བྱས་ཀྱི་སྐབས་སུ་བསྒོམ་པ་དེ་ཉིད་ལམ་དུ་ཁྱེར་ནུས་པ་ལ་རྗེས་ཐོབ། དེའི་སྐབས་སུ་དྲན་དང་ཤེས་བཞིན་གྱི་བྱ་ར་བྱེད་པ་ལ་རྗེས་ཤེས། སྣང་ཆ་མ་འགག་ཡང་ཆེད་དུ་མི་འཛིན་པ་ལ་རྗེས་སྣང་སོགས་བཏགས་པ་ཡིན། དེ་ཡང་རྗེས་ཤེས་རྗེས་སྣང་གཉིས་ཀ་རྗེས་ཐོབ་དུ་འདུ། རྗེས་ཐོབ་ལ་དགག་སྒྲུབ་མེད་པའི་ཆ་ནས་སྤྱོད་པ་ཟེར་བ་ཡིན། མདོར་དྲིལ་ན་མཉམ་བཞག་གི་ཡིན་ལུགས་ཤེས་པ་ལ་ལྟ་བ། མཉམ་བཞག་དེའི་ངང་དུ་བརྐྱངས་པ་ལ་བསྒོམ་པ། མཉམ་བཞག་གི་ཡིན་ལུགས་དེ་རྗེས་ཤེས་ཀྱི་དྲན་པས་རྗེས་སྣང་ཡུལ་དང་བསྲེས་ནས་རྗེས་ཐོབ་སྒྱུ་མ་ལྟ་བུའི་རེ་དོགས་སྤངས་བླངས་ཀྱི་གཟུང་འཛིན་བློ་ཡུལ་ལས་འདས་པ་ལ་སྤྱོད་པ་ཟེར་བ་ཡིན། དེ་ཡང་ཕྱག་ཆེན་པས་རྣམ་རྟོག་གི་འགྲོ་འོང་གཏན་ལ་ཕབ་ན་སྐྱེ་འགགས་གནས་གསུམ་དང་བྲལ་བར་རྟོགས་ཚེ་ལྟ་བ། དེའི་ངང་དུ་རྣམ་རྟོག་ཁ་ཡན་དུ་མི་གཏོང་བར་འབད་རྩོལ་གྱིས་སྐྱོང་བ་ལ་སྒོམ་པ། དེ་ཉིད་དྲན་དང་ཤེས་བཞིན་གྱི་ལམ་དུ་ཁྱེར་བ་ལ་སྤྱོད་པ་ཞེས་བཏགས་ཀྱང༌། དོན་རང་གི་ཉམས་མྱོང་དང་བསྡུར་ན་དེ་དག་ཐམས་ཅད་ལྟ་མཁན་གཅིག་པུའི་སྟེང་དུ་རྫོགས། ཅིག་པུ་ཡང་རྨི་ལམ་སད་པ་བཞིན་ཡལ་ཚེ་བསྒོམ་བྱའི་ཡུལ། སྒོམ་བྱེད་ཀྱི་མཁན་པོ་གང་ཡང་མེད་པ་རང་ཁ་ཐ་མལ་དུ་ལུས་པ་ལྟ་བུ་དེ་ལ་མིང་ཐ་མལ་གྱི་ཤེས་པ་ཟེར་བ་ཡིན། ལར་ངེས་དོན་མཐར་ཐུག་གི་དགོངས་པས་གཞལ་ན། ཕྱག་རྫོགས་དབུ་མ་སྤྱིར་བཏང་གི་ལྟ་སྒོམ་སྤྱོད་པའི་ཆ་གང་ལ་འཛིན་པའི་སྐྱོན་ཅུང་ཟད་མཆིས་སམ་སྙམ། དེ་ལྟ་ན་ཐེ་ཚོམ་དང་ཉམ་མྱོང་ཡིད་དཔྱོད་ཀྱི་ཆ་ཕྲ་ཞིང་ཕྲ་བ་ཡང་བྲལ་བར་གསུངས་ཏེ། ཇི་སྲིད་ཡིད་ཀྱི་གཡོ་བ་ཡོད་ཀྱི་བར། །རྫོགས་པའི་རིམ་པ་མ་ཡིན་བསྐྱེད་རིམ་ཡིན། །ཞེས་དང༌། བསམ་པའི་ཡུལ་མེད་ཀྱི་གཡོ་བ་བྲལ། སྐྱོབ་པ་བླ་མེད་རྡོ་རྗེ་སེམས་དཔས་གསུངས་ཞེས་གསུངས་སོ། །འདིར་རང་ལུགས་འོད་གསལ་རྡོ་རྗེའི་སྙིང་པོའི་རིང་ལུགས་ལ་ལས་དང་པོ་པས། ལྟ་མཁན་མ་གཏོགས་པའི་ལྟ་བ། །སྒོམ་མཁན་མ་གཏོགས་པའི་སྒོམ་པ། །སྤྱོད་མཁན་མ་གཏོགས་པའི་སྤྱོད་པ། །སོ་སོར་མ་གྲུབ་པའི་རོ་གཅིག་དེ་ཡང་གཟུང་འཛིན་གྱིས་བསྒྲུབ་པའི་ལྟ་སྒོམ་དམིགས་པ་ཅན་ཞིག་མ་ཡིན་པར། སྤྲོས་བྲལ་རྟོག་མེད་བློ་ལས་འདས་པར་གདར་ཤ་ཆོད་ཚེ། ལྟ་བས་ཨེ་རྙེད་བལྟས་པས་ལྟ་བ་ཟད། བསྒོམ་པས་ཨེ་རྙེད་བལྟས་པས་བསྒོམ་པ་ཟད། སྤྱོད་པ་ཡང་དེ་ལྟར་དུ་གྱུར་ཚེ། བྱ་བྱེད་ཐམས་ཅད་སྤྲིན་དང་འཇའ་ཚོན་ཡལ་བའི་ཤུལ་སྟོང་པ་ལྟ་བུ་ལ་དང་པོ་བསླབ། བར་དུ་གོམས། མཐར་ཀློང་དུ་གྱུར་པ་སྟེ། དམ་པའི་ལྷ་ཆོས་བྱེད་པ་ལ། །ཆོས་ལྟ་སྒོམ་སྤྱོད་པ་གསུམ་དུ་གདའ། ལྟ་བ་ཞེས་མིང་དུ་བཏགས་པ་ཏེ། །བལྟ་རུ་འདུག་ན་ལྟ་བ་མིན། །ལྟ་བ་མིན་པའི་དོན་ལ་བལྟ། །ཆོས་ཉིད་བདེན་མེད་ལམ་དུ་ཁྱེར། །ཞེས་པ་ལྟར། ལྟ་སྒོམ་སྤྱོད་འབྲས་གང་ཡང་བློས་མ་བཅིངས། འཛིན་པས་མ་བསླད། ཉམས་མྱོང་དང་བྲལ་བ་ཡིད་བྱེད་ལས་འདས་པ་ཞིག་དགོས་པ་ཡིན། ཞེས་གསུངས་སོ། ། ༈ སྤྱིར་དེང་སང་དུས་ཀྱི་དབང་གིས་རྣལ་འབྱོར་དུ་རློམས་པ་ཀུན་ཀྱི་ཁ་ན་ལྟ་བ་ཁ་འབྱམས་རེ་ནི་འདུག་ཀྱང༌། རྟགས་སྤྱོད་པས་སྟོན། ཚད་རྨི་ལམ་གྱིས་འཛིན་གསུངས། དེས་གཞལ་ན། ཉོན་མོངས་པའི་རྣམ་རྟོག་དང༌། དགའ་སྡུག་སྤུ་ཙམ་གྱི་རྐྱེན་མི་ཐེག་པ་འདི་སྤྱིར་སྙིགས་མའི་མངོན་རྟོགས་ཀྱང་ལོས་ཡིན་ཏེ། དགོས་ལྟ་བ་གོ་ཡུལ་ཙམ་ལས། མངོན་སུམ་ཚད་མ་ཞིག་མ་རྟོགས་པའི་སྐྱོན་དང༌། ལམ་རྟགས་གཉིས་ཀར་མཐོང༌། ལ་ལ་དག་ཁོ་བོ་ནི་རྫོགས་པ་ཆེན་པོའོ། །སྟོང་ཉིད་སྟོངས་སོ། བྱ་རྩོལ་ལས་འདས་སོ་ཞེས་སྟོང་འུད་ཀྱིས་རྒྱུ་འབྲས་ཁྱད་དུ་གསོད་པ་དག་ཀྱང་མཆིས་ཏེ། སྐྱབས་རྗེའི་ཞལ་གསུངས་གོང་དུ་ཞུས་པ་ལྟར་ཀུན་རྫོབ་སྟོང་ཉིད་དུ་ཤར་བའི་གནས་ལུགས་བསམ་གྱིས་མི་ཁྱབ་པ་མངོན་དུ་གྱུར་ཀྱང༌། སྟོང་ཉིད་རྒྱུ་འབྲས་སུ་ཤར་བའི་ཚོགས་གཉིས་རྒྱུ་མ་ལྟར་བདེན་ཞེན་མེད་པར་གསོག་པ་ལས། རྒྱུ་འབྲས་ཁྱད་དུ་གསོད་པའི་ལྟ་སྒོམ་ནི་ནང་པ་སངས་རྒྱས་ཀྱི་གྲུབ་མཐའ་སྨྲ་བ་སུས་ཀྱང་འཆད་ག་ལ་རུང༌། དེ་རྙིང་ལུགས་ལ་ཡོད་དམ་སུས་བསྟན་ཞེ་ན། སྔོན་སློབ་དཔོན་རྣམ་སྣང་ལོ་ཙཱ་བ་ཚ་བ་རོང་དུ་ཕེབས་ཁར་རྒྱལ་པོ་ལ་ཞལ་ཆེམས་སུ་ཡི་གེ་བཞག་པའི་འབྲུ་དོན། རྒྱལ་པོ་ཁྱོད་ཀྱིས་ཡར་སངས་རྒྱས་ལ་རེ་བ་མེད་པར་རྟོགས་ཀྱང་སྤྱི་བོར་བླ་མ་སྒོམས་ཤིག །མར་འཁོར་བ་ལ་འཁྱམ་དུ་མེད་པར་རྟོགས་ཀྱང་རྒྱུ་འབྲས་ཀྱི་རྣམ་སྨིན་འཛེམས་ཤིག །ཆོས་ཉིད་བསམ་དུ་མེད་པའི་དོན་ལ་ལོངས་སྤྱོད་ཀྱང་འདུས་བྱས་ཀྱི་དགེ་བའི་རྩ་བ་ལ་ཆགས་འཕྲི་མེད་པར་མཛོད་ཅིག །ཅེས་གསུངས་པ་ལྟར་སྐྱབས་རྗེ་བླ་མས་རང་ཉིད་ལ་ཞལ་གདམས་སྙིང་གི་བསླབ་བྱ་གནང་བ་ཡང་འདི་ལྟ་སྟེ། བསླབ་པར་བྱ་བ་ནི་ཨོ་རྒྱན་ཆེན་པོ་སྲིན་ཡུལ་དུ་བྱོན་ཁར། རྒྱལ་པོ་ཆེན་པོ། ལྟ་བའི་ཕྱོགས་སུ་སྤྱོད་པ་མི་ཤོར་བ་དང༌། སྤྱོད་པའི་ཕྱོགས་སུ་ལྟ་བ་མི་ཤོར་བར་མཛོད། ཅེས་དང༌། ལྟ་བའི་ཕྱོགས་སུ་སྤྱོད་པ་ཤོར་ན་དགེ་སྟོང་སྡིག་སྟོང་ནག་པོ་ཁ་འབྱམས་བདུད་ཀྱི་ལྟ་བ་འབྱུང་ཉེན་དང༌། སྤྱོད་པའི་ཕྱོགས་སུ་ལྟ་བ་ཤོར་ན་དངོས་པོ་དང་མཚན་མས་བཅིངས་ནས་གྲོལ་བའི་དུས་མེད་པར་གསུངས་པའི་དོན་ནི། ལྟ་བ་གཏན་ལ་ཕབ་ཚེ་འཁོར་འདས་ཀྱི་ཆོས་ཐམས་ཅད་རང་བཞིན་མེད་པར་སྟོངས་ཤིང་རྨི་ལམ་གྱི་ཡོ་བྱད་དང་རྨི་ལམ་གྱི་ཤེས་པ་གཉིད་སད་དུས་སོ་སོར་མ་གྲུབ་ཅིང༌། གཅིག་ཏུའང་མི་གནས་པ་ལྟ་བུའམ། ཆུ་དང་རླབས་སོ་སོར་འབྱེད་དུ་མེད་པ་ལྟར་སྣང་ཚད་ཆབ་རོམ་ཆུ་རུ་ཞུ་བའི་དཔེ་བཞིན། དགེ་བའི་ཕན་ཡོན་ལ་བྲོད་པ་དང༌། སྡིག་པའི་ཉེས་དམིགས་ལ་འཇིགས་སེམས་མི་སྐྱེ་ཞིང་སྣང་སྲིད་འཁོར་འདས་ཀྱི་ཆོས་ཐམས་ཅད་རྫུན་པའི་རང་བཞིན་དུ་གོ་དགོས་ཀྱང༌། ཐལ་ཆེ་ན་དགེ་སྒྲུབ་སྡིག་སྤང་དང་བླང་དོར་ལག་ལེན་ལ་གཡེལ་སྐྱོན་གྱི་རྒྱུ་འབྲས་ཁྱད་གསོད་བྱེད་པ་དག་འབྱུང་དོགས་པ་དང༌། སྤྱོད་པ་སྤྱད་ཚེ་ཆོས་རྣམས་རང་བཞིན་མེད་པར་མ་ཤེས་པའི་སྐྱོན་གྱིས་རྒྱུ་འབྲས་ལ་བདེན་པར་ཞེན་ཐལ་བས་ལྟ་སྒོམ་ཁྱད་གསོད་ཀྱིས་རྒྱུ་འབྲས་ངོ་བོ་ཁྱེར་ནས་སྟོང་ཉིད་ལ་སྐུར་འདེབས་བྱེད་པར་དགོངས་པ་གཉིས་ཀྱིས་སྟོང་པ་དང་རྒྱུ་འབྲས་ཟུང་འཇུག་གིས་ཕྱོགས་ལྷུང་སྤང་བར་གདམས་པའོ། །དེ་ཉིད་ལག་ཏུ་ཇི་ལྟར་བླང་ཚུལ་ནི་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྣང་བཞིན་དུ་སྟོང་སྟེ། དཔེ་ནམ་མཁའ་དང་འཇའ་ཚོན་བཞིན། ཕར་ཕྱིན་དྲུག་གིས་བསྡུས་པའི་ཆོས་ཐམས་ཅད་ཀུན་རྫོབ་རང་གི་ངོ་བོས་སྟོང་པས་རང་བཞིན་མ་གྲུབ་ནའང༌། སྟོང་པ་ཕྱལ་ཆད་ཀྱང་མ་ཡིན་ཏེ། རྩལ་སྣང་རྨི་ལམ་དང་སྒྱུ་མའི་ཚུལ་གྱིས་བདེན་རྫུན་གཉིས་ཀའི་མཐའ་མ་ཐུག་པར་ཉམས་སུ་ལེན་དགོས་པའོ། །མདོར་ན་ཐབས་སྤྱོད་པའི་ཕྱོགས་ཐམས་ཅད་སྣང་ལ་རང་བཞིན་མེད་པའི་ཚུལ་གྱིས་ཅི་ནུས་སུ་སྒྲུབ་པ་དང༌། ཀུན་རྫོབ་རང་གིས་སྟོང་ཞིང་དོན་དམ་གཞན་གྱིས་སྟོང་པའི་ཤེས་རབ་ཀྱི་ངོ་བོ་སྟོང་མི་སྟོང་གཉིས་ཀ་གྲི་ཟད་གདར་ཟད་དུ་སོང་ཚེ། ལྟ་བས་ལྟ་རུ་མེད་པའི་དོན་དང་མཇལ་ཞིང༌། སྒོམ་པས་བསྒོམ་དུ་མེད་པ་ཇི་ལྟ་བ་ཞིག་ཤེས་ཀྱང༌། དབང་པོ་ཡང་རབ་གཅིག་ཅར་བའི་རིགས་ཁ་ཤས་ཙམ་མ་གཏོགས། གཞན་མས་ད་དུང་གོ་བ་ཙམ་ལས་གནས་ལུགས་ཀྱི་བཞུགས་ཚུལ་ཇི་བཞིན་མ་མཇལ་སྐྱོན་གྱིས་སྟོང་པར་འཛིན་པའི་བློ་བག་ལ་ཉལ་དྲི་ལྡན་གྱིས་རྫས་དེར་ཡང་སྣོད་ཀྱི་དྲི་མ་མི་འདོར་བཞིན། གློ་བུར་དུ་ནད་རོ་ལངས་པ་ལྟར་འཕར་ནས། ཆགས་པའི་གནས་ལ་ཆགས་ཤིང༌། སྡང་བའི་ཡུལ་ལ་ཁྲོ་བ། ལམ་འོག་མ་ལྟར་སྤང་གཉེན་གྱིས་ཕྱེ་བའི་བླང་དོར་ཡང་མ་ཡིན། སྒྱུ་མ་ལྟ་བུའི་ལམ་ཁྱེར་བྱས་པས་ཐེག་པ་ཆེན་པོའི་སྡེ་སྣོད་ཀྱི་དགོངས་པ་ཡང་མ་ཡིན། ཐེག་རྩེ་ཤིན་ཏུ་རྣལ་འབྱོར་ལུགས་ཀྱི་ཉོན་མོངས་རང་ངོར་གྲོལ་བ་ཡང་མ་ཡིན། ངེས་གསང་རྡོ་རྗེ་སྙིང་པོའི་རྣམ་རྟོག་ཕན་གནོད་མེད་པ་ནི་ཕྱོགས་ཙམ་ཡང་ག་ལ་ཡིན། ཅི་ཡིན་འདི་ཡིན་མེད་པའི་གནས་ལུགས་བློ་ཡུལ་དུ་ལུས་པ་ཞིག་འབྱུང་སྲིད་པས། འདི་ངོས་མ་ཟིན་ན་རྣམ་དཀར་སྒྲིབ་པའི་གེགས་རྐྱེན་བྱེད་ངེས་པ་སྐྱོན་འདི་ཤེས་པར་བྱས་ན། གདོད་སྟོང་ཉིད་ཏུ་འབྲས་བུ་ཤར་བའི་དོན་ཇི་བཞིན་རྟོགས་ཤིང༌། དགེ་སྒྲུབ་སྡིག་སྤོང་སོགས་ཁྱད་དུ་མི་གསོད་པར་ལུས་ངག་གི་དགེ་སྦྱོར་ལ་བརྩོན་བཞིན་བཟང་ངན་གཙང་གཙོག་འདི་ཕྱི་ལྷ་འདྲེ་དགའ་སྡུག་རེ་དོགས་སོགས་གཉིས་སུ་འཛིན་པའི་ཆ་ཐམས་ཅད་རྫུན་དུ་ཤེས་ཀྱང༌། ཤེས་བཞིན་ཡལ་བར་མི་འདོར་བར་སྒྱུ་མའི་སྐྱེས་བུས་སྒྱུ་མ་ལ་བདེན་ཞེན་མེད་པས་སྒྱུ་མས་མི་འཆིངས་བ་ལྟ་བུ་ཞིག་འོང་བ་ཡིན། དེ་ཕྱིར་ལྟ་བ་མཁའ་ལྟར་མཐོ་ཡང་སྤྱོད་པ་བག་ཕྱེ་ལས་ཞིབ་དགོས་ཚུལ་སློབ་དཔོན་པདྨའི་ཞབས་དང་ཀུན་མཁྱེན་དྲི་མེད་འོད་ཟེར་ཡབ་སྲས་ཀྱི་གསུང་བཞིན་རྒྱུན་ཆགས་སུ་དྲན་པ་གལ་ཆེ། ཞེས་ཕྲན་རང་ཉིད་ལ་ལྟ་བའི་དོགས་སེལ་དུ་གསུངས་པ་ཡིན། རྨི་ལམ་འཁྲུལ་ངོར་ཆོས་རྒྱལ་རྗེས། །བཀའ་ཡིས་བསྐུལ་བ་ལ་བརྟེན་ནས། །གྲུབ་ཆེན་བླ་མའི་གསང་ཚིག་སྐོར། །ཅུང་ཟད་བྲིས་ཤིང་ཕུལ་བའི་དགེས། །ཆོས་རྣམས་ཀུན་གྱི་དེ་བཞིན་ཉིད། །རྟོགས་ནས་མཁའ་ཁྱབ་སེམས་ཅན་ཁམས། །གཉིས་སྟོང་ཡེ་ཤེས་རྡོ་རྗེའི་གཞིར། །གནས་འགྱུར་འཁོར་བ་དོང་སྤྲུག་ཤོག །«ཅེས་པའང་གཞོན་ནུ་བློ་གྲོས་ཀྱིས་ཤར་མར་སྤེལ་བའི་ཡི་གེ་པ་ནི་རྡོ་རྗེའི་མཆེད་པོ་འོད་ཟེར་དཔལ་འབར་གྱིས་བགྱིས་པ་དགེའོ། །དགེའོ། །དགེའོ། །བཀྲ་ཤིས། མངྒ་ལཾ།། །།