དུས་ཀྱི་རྒུད་པ་ཞི་བའི་སྨོན་ལམ་བཀྲ་ཤིས་ལྷ་ཡི་རྔ་ཆེན།

🚧 This website is under continued development. We appreciate your patience!

Previous Text Back to Volume PageNext Text

Wylie title	dus kyi rgud pa zhi ba'i smon lam bkra shis lha yi rnga chen
Location	dil mgo mkhyen brtse bka' 'bum Volume 23, Text 7, Pages 247-262 (Folios 1a1 to 8b3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Dus kyi rgud pa zhi ba'i smon lam bkra shis lha yi rnga chen. In Skyabs rje dil mgo mkhyen brtse rin po che'i bka' 'bum, Vol. 23: 247-262. Delhi: Shechen Publications, 1994.
Genre	Prayers - smon lam
Colophon	།ཅེས་པའང་ལྷག་བསམ་འོ་མའི་ཆུ་གཏེར་མཚོ་སྐྱེས་བདུད་རྩིའི་རེག་པས་རྟག་ཏུ་སྐྱོང་བའི་རྒྱལ་ཁམས་པ་པདྨ་གར་དབང་མདོ་སྔགས་གླིང་པས་ཨོ་རྒྱན་དྷརྨ་གཉྫིའི་གྲོང་ཁྱེར་གཡོ་རུ་ཁྲ་འབྲུག་གི་གཙུག་ལག་ཁང་དུ་བཀའ་འདུས་ཆོས་ཀྱི་རྒྱ་མཚོའི་ཚོགས་མཆོད་འབུམ་ཕྲག་ཕུལ་སྐབས་ས་ཟླའི་དཀར་ཕྱོགས་ཀྱི་འཕེལ་ཚེས་བཅོ་ལྔའི་ཉིན་བྲིས་ཤིང་སྨོན་ལམ་དུ་བྱས་པ་དགེ་ལེགས་རྒྱ་ཆེར་འཕེལ།།
	/ces pa'ang lhag bsam 'o ma'i chu gter mtsho skyes bdud rtsi'i reg pas rtag tu skyong ba'i rgyal khams pa pad+ma gar dbang mdo sngags gling pas o rgyan d+harma gany+dzi'i grong khyer g.yo ru khra 'brug gi gtsug lag khang du bka' 'dus chos kyi rgya mtsho'i tshogs mchod 'bum phrag phul skabs sa zla'i dkar phyogs kyi 'phel tshes bco lnga'i nyin bris shing smon lam du byas pa dge legs rgya cher 'phel//

Tibetan Text

Wylie

[edit]

དུས་ཀྱི་རྒུད་པ་ཞི་བའི་སྨོན་ལམ་བཀྲ་ཤིས་ལྷ་ཡི་རྔ་ཆེན་ཞེས་བྱ་བ་བཞུགས། ཨོཾ་སྭ་སྟི། གྲངས་མེད་བསྐལ་པར་གོམས་པའི་ཐུགས་བསྐྱེད་ཀྱིས། །ལྔ་བདོའི་འགྲོ་ལ་ཡོངས་བཟུང་ཤཱཀྱའི་ཏོག །རྨད་བྱུང་པད་དཀར་ལྟར་བསྔགས་ཐུགས་རྗེ་ཡི། །བྱམས་པའི་ཕྱག་གིས་འཛིན་པའི་དུས་ལ་བབ། །མགོན་པོ་ཁྱེད་ཀྱི་བརྩེ་བའི་དམ་བཅའ་ཡི། །ཡུལ་དུ་གྱུར་པའི་རྗེས་འཇུག་སྡུག་བསྔལ་ལ། །ཡབ་གཅིག་བཀའ་དྲིན་ཅན་གྱི་ཕྲིན་ལས་ཤུགས། །དེང་འདིར་མངོན་གསུམ་སྩོལ་ཅིག་ཟས་གཙང་སྲས། །དཔའ་བོའི་རྣམ་ཐར་བདུད་རྩིའི་སྤྲིན་ཕྲེང་མཐུ། །འདྲེན་དང་སྤེལ་བར་ཞལ་བཞེས་སྙིང་རྗེའི་བདག །རིགས་གསུམ་མགོན་པོ་ཉེ་བའི་སྲས་མཆོག་གི །ཐུགས་དམ་རྩལ་སྤྲུགས་མཛད་པའི་དུས་ལ་བབ། །སྐད་ཅིག་མི་བསྙེལ་སྡུག་བསྔལ་ཅན་གྱི་འགྲོ། །རྟག་ཏུ་དགོངས་པའི་ཐུགས་བསྐྱེད་དམ་བཅའི་མཐུ། །རྩོད་དུས་འགྲོ་བས་དངོས་སུ་ལོངས་སྤྱད་ནས། །ཕན་བདེའི་དབུགས་དབྱུང་སྩོལ་ཅིག་རྒྱལ་སྲས་ཚོགས། །ཐུབ་པ་མཆོག་གི་རིང་ལུགས་རྗེས་འཇུག་བཅས། །སྐྱོང་ཞིང་བཤད་དང་སྒྲུབ་པའི་དགའ་སྟོན་སྒོ། །སྤེལ་ལ་མཚུངས་མེད་གནས་བརྟན་གཏད་རབས་སོགས། །མཐུ་ལྡན་འཕགས་ཚོགས་ཞལ་བཞེས་དུས་ལ་བབ། །སྡུག་བསྔལ་གསུམ་གྱི་ཟུག་རྔུ་འབུམ་ཕྲག་གིས། །ཐར་པའི་སྲོག་རྩ་ཆད་ཉེ་རྗེས་འཇུག་ཀུན། །དབུགས་འབྱིན་ཕྱག་གིས་བསླབ་གསུམ་ངལ་སྟེགས་སུ། །སྦྱོར་བའི་སྐལ་བཟང་སྩོལ་ཅིག་འཕགས་པའི་ཚོགས། །མི་སློབ་འབྲས་བུའི་གསང་བར་དགྱེས་སྤྱོད་ཀྱང༌། །རྣམ་པར་འདྲེན་མཆོག་སྤྲུལ་པའི་སྐྱེས་བུའི་ཚུལ། །ཛམ་གླིང་རྒྱན་མཆོག་རྒྱུད་སྡེ་རྣམ་པ་བཞིའི། །གྲུབ་བརྙེས་རྒྱ་མཚོའི་ཐུགས་བསྐྱེད་དུས་ལ་བབ། །ཡང་དག་རྒྱལ་བསྟན་ཉིན་བྱེད་ནུབ་རིར་ཕྱོགས། །སྤང་ཀློག་སྣང་བ་ཀུན་གསལ་དབྱིངས་སུ་སྡུད། །མི་ཤེས་བླུན་པོའི་ཅ་ཅོ་འདི་གཟིགས་ལ། །ཕྱི་མའི་འགྲོ་ལ་དགོངས་ཤིག་ཤིང་རྟ་ཆེ། །ཁྱད་པར་གངས་ཅན་སྙིགས་མར་གྱུར་པའི་སྐྱབས། །རབ་འབྱམས་རྒྱལ་བའི་སྤྱི་མེས་ཨོ་རྒྱན་རྗེ། །དཔག་ཡས་སྒྱུ་འཕྲུལ་རྒྱ་མཚོའི་ཁྱབ་བདག་ཆེ། །མཚོ་སྐྱེས་རྡོ་རྗེའི་ཐུགས་དམ་དུས་ལ་བབ། །ཐོགས་མེད་མཁྱེན་བརྩེ་ནུས་སྟོབས་གློག་ལས་མྱུར། །གདུལ་དཀའ་རྗེས་འཛིན་བྱིན་རླབས་བདེན་པའི་ཚིག །ཕ་ཡི་ཞལ་ཆེམས་བུ་ལ་དགོས་དུས་བབ། །དབུགས་འབྱིན་མྱུར་དུ་སྩོལ་ཅིག་བཀའ་དྲིན་ཅན། །མཐའ་ཁོབ་མུན་པའི་གླིང་དུ་སངས་རྒྱས་ཀྱི། །བསྟན་མཆོག་སྣང་བས་ཐར་པར་དབུགས་འབྱིན་མཐུས། །སངས་རྒྱས་ལས་ལྷག་དྲིན་ཅན་མཁན་སློབ་ཆོས། །ཐ་མའི་གདུལ་བྱ་རྗེས་འཛིན་དུས་ལ་བབ། །ལས་ཉོན་འདམ་བྱིང་ངན་སྤྱོད་དྲི་ངས་གདུང༌། །ཐར་པའི་དུས་མེད་སྡུག་བསྔལ་ཚོར་བ་རགས། །རང་བྱས་འབྲས་བུས་རང་ཕུང་དུས་གཟིགས་ནས། །ཡལ་བར་མ་དོར་རིགས་གསུམ་སྤྲུལ་པའི་སྐུ། །ལུས་སྲོག་ལྟོས་མེད་དཀའ་བས་དམ་ཆོས་བརྩལ། །ལོག་སྒྲུབ་སྐྱོ་ངལ་བཟོད་ལྡན་མཆོག་བསྟན་སྤེལ། །གངས་ཅན་ཕན་བདེའི་སྒོ་འབྱེད་ལོ་པཎ་ཚོགས། །རྗེ་འབངས་འདུས་པའི་ཐུགས་དམ་དུས་ལ་བབ། །ཟབ་རྒྱས་ཆོས་ཀྱི་རིན་ཐང་ཡལ་བར་དོར། །ཚེ་འདིའི་འདོད་པས་མི་ཚེ་ཕལ་ཆེར་གྲོན། །འཁྲུལ་ལས་ཡང་འཁྲུལ་ཉམ་ཐག་འདི་ལ་གཟིགས། །ལས་ངན་འཆིང་བ་བཀྲོལ་མཛོད་མཁས་གྲུབ་ཚོགས། །སྨོན་ལམ་གཏད་རྒྱས་མཁའ་འགྲོའི་གསང་མཛོད་འབྱེད། །ཐུགས་བསྐྱེད་དུས་བབ་ཕྲིན་ལས་ནུས་རྩལ་མྱུར། །གངས་ཅན་མགོན་གྱུར་ཟབ་གཏེར་འཁོར་ལོས་བསྒྱུར། །སྤྲུལ་པའི་གཏེར་འབྱིན་རྒྱ་མཚོའི་དུས་ལ་བབ། །གང་འདུལ་ཕྲིན་ལས་ཟབ་མོའི་རྩལ་དང་ལྡན། །བསྟན་འགྲོའི་རྒུད་སེལ་སྨོན་ལམ་མཐུ་བཙན་པས། །བོད་ཡུལ་དབུགས་འབྱིན་ཐུགས་བསྐྱེད་བདེན་པའི་འབྲས། །མངོན་གྱུར་སྣང་བར་མཛོད་ཅིག་རིག་འཛིན་ཚོགས། །གཟོད་ནས་རབ་ཞི་བདུད་རྩིའི་མཆོག་བརྙེས་ཀྱང༌། །འགྲོ་ཕྱིར་སྲིད་པར་སྒྱུ་མའི་གར་རྩེན་པས། །ཐུབ་བསྟན་སྙིང་པོ་བཤད་དང་སྒྲུབ་པ་ཡིས། །སྣང་མཛད་ཤིང་རྟ་བཅོ་བརྒྱད་དུས་ལ་བབ། །སྲིད་ཞིའི་དགེ་ལེགས་འབྱུང་གནས་རྒྱལ་བའི་བསྟན། །ཉིན་རེ་བཞིན་ཡང་ཉམས་ཞིང་རྒུད་པ་ལ། །བཟོད་མེད་རྡོ་རྗེའི་གོ་ཆ་རྩལ་སྤྲུགས་ནས། །ལུང་རྟོགས་འཕེལ་རྒྱས་བརྟན་མཛོད་པཎ་གྲུབ་ཚོགས། །མཚན་དང་རིག་པའི་གསང་སྔགས་འཛིན་ཙམ་གྱིས། །ལས་ཉོན་རྒུད་སྐྱོབས་ཕན་བདེའི་དཔལ་གཏེར་མཛད། །རིམ་དགུའི་ཐེག་པའི་རྒྱུད་སྡེ་ཡི་དམ་ལྷ། །སྒྱུ་ཕྲུལ་དྲྭ་བའི་ཐུགས་དམ་དུས་ལ་བབ། །མི་ཤེས་མུན་ཀློང་སྡུག་བསྔལ་ཚེར་མའི་ནགས། །བྱིངས་ཏེ་སྐྱབས་བྲལ་ངན་འགྲོའི་འབབ་སྟེགས་ཅན། །ཤིན་ཏུ་རྒུད་པའི་གནས་སོན་ཡིད་ཅན་ལ། །གཟིགས་ནས་ཐུགས་རྗེས་ཟུངས་ཤིག་དཀྱིལ་འཁོར་ལྷ། །ཁྱད་པར་སྒྱུ་ཕྲུལ་དྲྭ་བ་རྡོ་རྗེ་དབྱིངས། །ཞི་ཁྲོའི་འཁོར་ལོ་བདེ་གཤེགས་སྒྲུབ་སྡེ་བརྒྱད། །བཀའ་འདུས་ཚོམ་བུ་ཉེར་གཅིག་མདོ་ཚོགས་ཆེན། །རབ་འབྱམས་དཀྱིལ་འཁོར་ཐུགས་དམ་དུས་ལ་བབ། །བདེ་ཆེན་ཉམས་བརྒྱས་སྒེག་པའི་ཡེ་ཤེས་སྟོབས། གདུལ་དཀའི་གཡུལ་ངོར་ལྷག་པར་དཔའ་བའི་སྟོབས། །ཟོལ་མེད་བསྙེན་ཅིང་སྒྲུབ་པས་བསྐུལ་ལགས་ན། །ཐུགས་རྗེས་སྐྱོབ་པར་མཛོད་ཅིག་ཡི་དམ་ཚོགས། །སྒྱུ་འཕྲུལ་ཆེན་པོའི་བདེ་མཆོག་གར་གྱི་རྩེན། །ཕྲིན་ལས་རོལ་པས་གྲུབ་གཉིས་གློག་ལྟར་སྩོལ། །བསྟན་དང་རྣལ་འབྱོར་དགྱེས་སྐྱོང་མ་མ་ཆེ། །འབུམ་ཕྲག་ཡངས་པའི་ཌཱ་ཀིའི་དུས་ལ་བབ། །ཕྱི་ནང་གཞན་གསུམ་གཉིས་མེད་རྟེན་འབྲེལ་ཆོས། །མི་མཐུན་ལོག་པས་སྣོད་བཅུད་ཉམས་ཉེས་ཚེ། །བདེ་སྟོང་ཀློང་ལྔའི་ནུས་པའི་མཐུ་སྟོབས་ཀྱིས། །ལེགས་དགུའི་དཔལ་ཡོན་སྩོལ་ཅིག་མཁའ་འགྲོའི་ཚོགས། །གཏུམ་ཆེན་རབ་འབར་མི་སྡུག་དྲག་ཤུལ་མཐུ། །སྡིག་ཅན་སྙིང་རྗེས་སྒྲོལ་བའི་ཐུགས་དམ་ཅན། །ཉམས་པའི་གཤེད་གྱུར་རྒྱུད་གསུམ་དྲེགས་པའི་གཙོ། །དམ་ཅན་རྒྱ་མཚོའི་ཡལ་གམ་དུས་ལ་བབ། །རིག་འཛིན་མཁའ་འགྲོ་ཡོངས་ཀྱི་སྲོག་གི་སྙིང༌། །ས་གསུམ་དཔལ་འབྱོར་ལས་ལྷག་རྒྱལ་བའི་བསྟན། །དེ་འཛིན་བཅས་པའི་དབུ་འཕང་སྨད་པའི་དུས། །སྙིགས་མའི་རང་གཟུགས་གཟིགས་ཤིག་ཆོས་སྐྱོང་རྣམས། །རྒྱལ་ཀུན་ཞལ་སྐྱིན་གྲུབ་པས་བཀའ་བསྒོས་ཤིང༌། །ཟབ་མོའི་བསྟན་དང་བསྟན་འཛིན་མེལ་ཚེས་སྐྱོང༌། །རབ་འབྱམ་དཀྱིལ་འཁོར་རྒྱ་མཚོའི་བཀའ་སྡོད་ཆེ། །མཐུ་ཆེན་གཏེར་གཞིའི་གཉེར་འཛིན་དུས་ལ་བབ། །རྡོ་རྗེའི་ལམ་སྲོལ་སྟོན་པ་རྗེས་འཇུག་གིས། །རིན་ཐང་མི་ཤེས་བླུན་པོའི་གཡམ་ལ་རྒྱུག །ཟབ་མོའི་ཆོས་ཀྱི་མངའ་ཐང་སྨད་འདི་གཟིགས། །ཚར་གཅོད་རྗེས་འཛིན་མཛོད་ཅིག་མཐུ་རྩལ་ཅན། །མཁྱེན་བརྩེ་ནུས་པའི་མཐུ་སྟོབས་ན་ཕྲ་ཞིང༌། །ཕུལ་བྱུང་སྤང་རྟོགས་ཡོན་ཏན་ནོར་དབུལ་ཡང༌། །ལྷག་བསམ་དད་པའི་གདུང་བས་སྐྱབས་མཆོག་རྣམས། །རྡོ་རྗེའི་ཐུགས་དམ་བསྐུལ་ལ་མ་གཡེལ་དགོངས། །སྲིད་ཞིའི་ལེགས་ཚོགས་ཐུབ་བསྟན་མཆོག་ལ་རག །དེ་ཉིད་འཛིན་སྤེལ་སྐྱེས་ཆེན་ཁོ་ནའི་མཐུ། །ཡིན་ཀྱང་མི་ཤེས་དཀོན་མཆོག་དབུ་འཕང་སྨད། །ལས་ངན་ཁུར་དུ་ཐོགས་པའི་འགྲོ་འདི་གཟིགས། །བློ་གྲོས་ཆུང་བས་ཚེ་འདིའི་འདོད་པས་གདུང༌། །སྒྲིབས་ཚོགས་ཤུགས་དྲག་ཉོན་མོང་ཆུ་ཀླུང་བརྡོལ། །རང་བྱས་ལས་ངན་རང་གཤེད་འབེབས་པ་ཡི། །དུས་ངན་འགྲོ་འདིའི་གནས་ལ་ད་གཟིགས་ཤིག །སྡིག་སྡུག་མཐོར་རླུང་གཡོ་བས་རང་སྲོག་རྒོལ། །ཡང་དག་ལམ་དང་སྟོན་པ་ཚད་མ་སྤང༌། །སྐྱབས་བྲལ་ཡིད་ཆད་ངན་འགྲོའི་གཡང་གཞོལ་ཏེ། །གདུང་བའི་འོ་འདོད་འབོད་པ་ཅང་གསན་ནམ། །ཆོས་ཉིད་གཞི་ཀློང་མཚན་མའི་རྟོགས་བྲལ་ཡང༌། །ཆོས་ཅན་སློབ་པ་ལམ་གྱི་ཐུགས་བསྐྱེད་ཀྱིས། །རྗེས་འཇུག་སྐྱོང་བའི་རྡོ་རྗེའི་ཞལ་བཞེས་རྣམས། །རས་སུ་མ་བོར་དགོས་པའི་དུས་འདིར་དགོངས། །མགོན་པོ་ཁྱེད་རྣམས་གྲངས་མེད་བསྐལ་པ་རུ། །སྐུ་དང་སྲོག་གི་རིན་ཐང་གིས་བསྒྲུབས་པའི། །བསགས་པའི་གཅེས་ནོར་རྡུལ་ཁྲོད་འདོར་དུ་ཆས། །མ་བཟོད་ཉམ་ཐག་སྨྲེ་ངག་འབོད་འདི་གསོན། །གང་དུ་སྡུག་བསྔལ་ཁུར་དུ་བརྩེགས་པའི་འགྲོ། །བསྟན་མཆོག་རྒུད་ཚེ་ལྷག་པར་བདེན་པའི་འབྲས། །ལེགས་བྲིས་ཚལ་ན་ལྷ་ཡི་རྔ་གསང་བཞིན། །མངོན་སུམ་མཐོང་བར་མཛོད་ཅིག་རིན་པོ་ཆེ། །བསྐལ་བཟང་རྣམ་འདྲེན་སྟོང་དང་ཁྱད་པར་དུ། །རྩོད་དུས་མགོན་གྱུར་ཤཱཀྱའི་དབང་པོ་དེའི། །ཐུགས་བསྐྱེད་སྨོན་ལམ་ལྔ་བརྒྱས་བཟུང་བ་ཡི། །མི་མཇེད་ཞིང་འདིར་གཟིགས་པའི་དུས་ལ་བབ། །པད་དཀར་འཆང་བས་བརྩེ་ཆེན་ཕྱག་གིས་འཁྱུད། །རྗེ་བཙུན་སྒྲོལ་མས་འཇིགས་པ་ཀུན་སྐྱོབ་ཅིང༌། །ཞིང་འདི་ཕྱག་མཚན་བཞེས་པའི་ཐུགས་བསྐྱེད་ཀྱིས། །སྙིགས་མའི་སྐལ་ངན་བཟློག་ལ་དབུགས་འབྱིན་སྩོལ། །སྨོན་ལམ་རྒྱ་ཆེན་བདེ་བར་གཤེགས་པ་བརྒྱད། །མི་འཁྲུགས་མགོན་དང་འོད་དཔག་མེད་སོགས་ཀྱིས། །ཐུགས་བསྐྱེད་བདེན་མཐུས་ལས་ངན་ཕོངས་རྒུད་བྱང༌། །མངོན་མཐོ་ངེས་ལེགས་བདེ་དགས་འབྱོར་བར་མཛོད། །འཇམ་མགོན་མཁྱེན་རབ་གསང་བདག་ནུས་པའི་སྟོབས། །ཀུན་བཟང་སྨོན་ལམ་བྱམས་མགོན་ཚུལ་ཁྲིམས་སོགས། །རྒྱལ་སྲས་སེམས་དཔའི་རྣམ་ཐར་ཡིད་ཅན་གྱིས། །མངོན་སུམ་སྤྱོད་པས་གདུལ་དཀའ་ཀུན་འདུལ་ཤོག །སངས་རྒྱས་ལས་ཀྱང་བཀའ་དྲིན་རྨད་བྱུང་བ། །མཁན་སློབ་ཆོས་ཀྱི་རྒྱལ་པོ་མེས་དབོན་གསུམ། །པཎ་གྲུབ་ལོ་ཙཱའི་རྣམ་ཐར་རྗེས་སློབ་པས། །དྲིན་བཟོ་བཤད་སྒྲུབ་ལས་གསུམ་སྤེལ་ནུས་ཤོག །ཤིན་ཏུ་རྙེད་དཀའི་ཐུབ་བསྟན་ཡིད་བཞིན་ནོར། །རིན་ཐང་ཤེས་པས་སྙིང་དང་མིག་ལས་ཀྱང༌། །གཅེས་པར་འཛིན་པས་མཆོད་ཅིང་སྤེལ་བ་ལ། །ལུས་སྲོག་ཡལ་བར་དོར་ནུས་བྱིན་གྱིས་རློབས། །ཐུགས་བསྐྱེད་ཡོན་ཏན་འཕགས་ཤིང་སྤང་རྟོགས་ཕྱུག །མཛད་པ་ཕྲིན་ལས་རྨད་བྱུང་ཀུན་ཕན་པའི། །བསྟན་འཛིན་ཇི་སྙེད་བར་ཆད་གཡུལ་ལས་རྒྱལ། །མཐའ་དག་བསྟན་ལ་སྨན་ནུས་རྟག་འབྱོར་ཤོག །ངེས་འབྱུང་བདུད་རྩིའི་སྙིང་གི་པདྨོ་སིམ། །གཞན་ཕན་གེ་སར་ཚོགས་གཉིས་སྦྲང་རྩིའི་མཛེས། །ཐབས་མཆོག་རྫི་ཕྱོགས་དྲི་ཡིས་དངོས་གྲུབ་བཅུད། །འགུགས་པས་ཀུན་ཀྱང་སྡོམ་གསུམ་དག་པར་མཛོད། །ཐོས་པས་རྒྱུད་གྲོལ་ཕྱོགས་རིས་ལོག་ལྟ་སྤངས། །ངེས་དོན་གནས་རྟོགས་རང་ལྟ་མཆོག་འཛིན་དག །ས་ལམ་མྱུར་རྫོགས་སྒོམ་པའི་ཡོན་ཏན་གྱིས། །བསླབ་གསུམ་དྲི་མེད་འཕེལ་རྒྱས་བརྟན་པར་མཛོད། །མཁས་དང་གྲུབ་པའི་རྣམ་ཐར་ནོར་བུའི་རྒྱན། །ཐུགས་བསྐྱེད་སྐྱེས་སྦྱང་སྟོབས་ཀྱིས་བདག་གིར་མཛད། །མ་ལུས་སྐྱེ་དགུའི་མགོན་གྱུར་དུ་མ་ཡིས། །རྒྱལ་བསྟན་འཛིན་སྐྱོང་སྤེལ་ཞིང་སྲུང་བར་མཛོད། །རྒྱ་ཆེའི་བསོད་ནམས་ཤེ་མོང་ཆེས་དར་བས། །མཆོག་གསུམ་རིན་ཆེན་ཁུར་ལྕི་འདེགས་ལ་བརྩོན། །བློ་གྲོས་ཅང་ཤེས་འབྱོར་ལྡན་སྦྱིན་བདག་གིས། །བསྟན་པའི་མངའ་ཐང་སྤེལ་ཞིང་སྲུང་བར་མཛོད། །རི་ཡི་ངོགས་ཀུན་བསམ་གཏན་སྒོམ་པས་ཁེངས། །ཀླུང་རྣམས་ཀློག་པ་ཐོས་བསམ་འཛིན་གྲྭ་རྒྱས། །ཀུན་གྱི་ལྟ་སྤྱོད་རྒྱལ་བ་དགྱེས་པའི་ལམ། །ཞུགས་པས་རྣམ་དཀར་སྣང་བ་འཕེལ་རྒྱས་མཛོད། །སྐྱེ་དགུ་ཀུན་ཀྱང་སྒོ་གསུམ་དགེ་ལ་བརྩོན། །མཐའ་དག་དཀོན་མཆོག་གསུམ་ལ་བླ་མར་བསྐུར། །བསོད་ནམས་དཔལ་ལྡན་ཡིད་མཐུན་ཉོན་མོངས་མེད། །རྫོགས་ལྡན་དགའ་སྟོན་མཐུན་པས་སྤྱོད་པར་མཛོད། །འཇིག་རྟེན་ཁམས་ཀུན་འཐབ་རྩོད་ཕུང་དཀྲོལ་བྲལ། །ངན་སོང་གནས་སྟོང་མཐོ་རིས་བདེ་བས་དར། །ནད་མུག་མཚོན་གྱི་བསྐལ་ངན་རྒྱུན་ཆད་དེ། །ཀུན་ཀྱང་རྣམ་གྲོལ་དཔལ་ལ་སྤྱོད་པར་མཛོད། །ཁྱད་པར་གངས་རིའི་ལྗོངས་ཀྱི་ཁྱོན་མཐའ་དག །ནད་མུག་མཚོན་འཁྲུགས་དུས་ཀྱི་རྒུད་པ་ཞི། །མཐའ་མི་འབྱུང་པོས་གླག་ལྟ་མི་ནུས་པར། །ཆོས་རྒྱལ་མེས་དབོན་དུས་བཞིན་བདེ་བར་མཛོད། གངས་ཅན་ལྟེ་བ་ར་ས་འཕྲུལ་སྣང་ཞིང༌། །ལུགས་གསུམ་མི་འགྱུར་ཟབ་ཡངས་ཆོས་འཁོར་ཆེ། །ཁྲ་འབྲུག་བྱམས་སྙོམས་ལ་སོགས་འཕགས་པའི་ཚོགས། །དངོས་བཞུགས་ཆོས་འཁོར་གཙུག་ལག་རྒྱས་བརྟན་མཛོད། །དེ་ཡང་ལྷ་དང་བཅས་པའི་སྐྱེ་དགུ་ཡིས། །མཆོད་དང་བཀུར་སྟིས་ཚོགས་གཉིས་དཔལ་འབྱོར་སྡུད། །ཞི་དུལ་ངུར་སྨྲིག་འཛིན་པས་ལེགས་ཁེངས་ཏེ། །ལོག་འཚོ་བྲལ་བའི་རྙེད་བཀུར་རྒྱས་པར་མཛོད། །ཡེར་པ་མཆིམས་ཕུ་བསམ་གྲུབ་ཤེལ་བྲག་སོགས། །གྲུབ་བརྙེས་རིག་པ་འཛིན་པའི་དབེན་གནས་ཀུན། །ཏིང་འཛིན་དཀའ་ཐུབ་ལྷུར་བཞེས་སྤོང་བ་པས། །ལེགས་བསྙེན་དངོས་གྲུབ་བརྙེས་པས་བརྟེན་པར་མཛོད། །ཕྱོགས་ཀུན་རིས་མེད་དགེ་འདུན་སྡེ་རྒྱས་ཤིང༌། །ཀུན་ཀྱང་ངེས་འབྱུང་བསླབ་གསུམ་དོན་དུ་གཉེར། །རིས་མེད་རྒྱལ་བསྟན་འཛིན་སྐྱོང་སྤེལ་གསུམ་གྱིས། །ཕྱོགས་རིས་སྡེ་འཁྲུག་ཞི་བས་མཛེས་པར་མཛོད། །རྒྱལ་བློན་ཁྱིམ་བདག་གཉུག་མར་གནས་ཀུན་ཀྱང༌། །ལེགས་བྱས་རྣམ་དཀར་འབའ་ཞིག་བརྩོན་པས་སྒྲུབ། །དཀོན་མཆོག་མཆོད་དང་དགེ་བཅུའི་ཁྲིམས་གནས་པས། །སྡུག་བསྔལ་འཐབ་རྩོད་ཞི་ཞིང་འབྱོར་བར་མཛོད། །སྨོན་ལམ་ལོག་པའི་བོད་ཕུང་དམ་སྲི་དང༌། །ནག་པོའི་ཕྱོགས་གྱུར་གདུག་པའི་ཀླ་ཀློ་ཡིས། །བསམ་སྦྱོར་ངན་པས་ནམ་ཡང་མི་བརྫི་བར། །ཆོས་སྲིད་ཉི་ཟླའི་སྣང་བས་མཛེས་པར་མཛོད། །རིགས་གསུམ་མགོན་སོགས་རྒྱལ་དང་དེ་སྲས་ཀྱི། །སྤྲུལ་པའི་སྐྱེས་བུ་ངོ་མཚར་ཅན་དུ་མས། །བོད་ཡུལ་བསྟན་དང་ཆབ་སྲིད་ལེགས་བསྐྱངས་ནས། །མངོན་མཐོ་ངེས་ལེགས་དཔལ་གྱིས་དར་བར་མཛོད། །བོད་ཁམས་གཉེར་གཏད་བརྟན་མ་བཅུ་གཉིས་དང༌། །མགུར་ལྷ་དགེ་བསྙེན་དཀར་ཕྱོགས་སྐྱོང་རྣམས་ཀྱིས། །གུ་རུའི་རྡོ་རྗེའི་ཐ་ཚིག་ཇི་བཞིན་དུ། །གངས་ཅན་བསྟན་དང་ལུས་ཅན་སྐྱོངས་མཛོད་ཀྱཻ། །མདོར་ན་བསྟན་དང་འགྲོ་ལ་ཕན་པའི་སྒོ། །མཐའ་དག་མ་འབད་པར་ཡང་ངང་གི་འདུ། །གནོད་པའི་ཕྱོགས་ཀུན་མིང་ཡང་མི་གྲགས་པས། །བཀྲ་ཤིས་དགེ་ལེགས་སྣང་བ་རྟག་འཆར་མཛོད། །ཅེས་པའང་སྙིགས་དུས་བསྐལ་ངན་གྱི་མུན་རུམ་ཆེས་ཆེར་ཤུགས་བདོ་བའི་ཚེ་སྦྱོར་བའི་ནུས་སྟོབས་ནམ་མཁའི་ཨུཏྤལ་ལའི་རྗེས་སུ་སྙེགས་ཀྱང་ལྷག་བསམ་གྱི་འཇུག་པ་ཡངས་ཤིང་དཀར་བའི་རྒྱལ་ཁམས་ཀྱི་ཀུ་སཱ་ལི་རྒན་པོ་འགྱུར་མེད་ཐེག་མཆོག་བསྟན་པའི་རྒྱལ་མཚན་པདྨ་འོད་གསལ་མདོ་སྔགས་གླིང་པར་ཡང་འབོད་པ་གང་དབུས་གཙང་ལོངས་སྤྱོད་རྫོགས་པའི་རྡོ་རྗེའི་གནས་རྟེན་རྣམས་དད་པའི་འདྲེན་བྱེད་ཀྱི་སྤྱོད་ཡུལ་དུ་གྱུར་པའི་སྐབས་བདེན་བརྗོད་འདི་ལྟར་བགྱིས་པའི་ཚེ་དད་སློབ་མཚུངས་མེད་ངག་དབང་བསྟན་འཛིན་ནས་རིན་པོ་ཆེའི་སྐྱེས་དང་བཅས་ཏེ་ཆེད་དུ་བསྐུལ་བ་བཞིན་གངས་ཅན་བོད་ཀྱི་རྡོ་རྗེ་གདན་སྟོན་མཆོག་དོན་ཀུན་གྲུབ་པའི་ཡེ་ཤེས་ཀྱི་ཕྱག་རྒྱ་དངོས་སུ་བཞུགས་པའི་སྤྱན་སྔར་མེ་བྱ་གནམ་ལོ་གསར་ཚེས་ཀྱི་ཆོ་འཕྲུལ་ཆེན་མོའི་མཆོད་པའི་སྐབས་བསག་སྦྱང་ཅུང་ཟད་བགྱིས་པའི་ཚེ་རྩེ་གཅིག་གུས་པས་བྲིས་ཤིང་སྨོན་པ་འདིས་ཀྱང་རྩོད་དུས་ཀྱི་བསྟན་འགྲོ་ལ་དབུགས་དབྱུང་མཐོང་བའི་ཆོས་སུ་ངེས་པར་ཐོབ་པའི་རྒྱུ་ཁོ་ནར་གྱུར་ཅིག ༈ དུས་ཀྱི་རྒུད་མུན་ཞི་བའི་སྨོན་ལམ་ཟླ་བའི་བདུད་རྩིའི་ཟིལ་དངར་བཞུགས། ཨོཾ་སྭསྟི། རབ་འབྱམས་རྒྱལ་བ་ཀུན་གྱི་ཡེ་ཤེས་སྐུ། །འཆི་མེད་རིག་འཛིན་པདྨ་ཀུན་ཏུ་འཆང༌། བཀའ་འདུས་ཆོས་ཀྱི་རྒྱ་མཚོའི་སྟོན་པ་ཆེའི། །ཐུགས་བསྐྱེད་མཐུ་ཡིས་ལྔ་བརྒྱའི་འགྲོ་འདི་སྐྱོབས། །དགོངས་ཀློང་ཧེ་རུ་ཀ་དང་གཉིས་སུ་མེད། །རྣམ་འཕྲུལ་བཀའ་འདུས་རྒྱ་བོད་རིག་འཛིན་ཚུལ། །མཁྱེན་བརྩེ་ནུས་པ་བསམ་མི་ཁྱབ་པའི་མཐུས། །སྙིགས་མའི་བསྟན་འགྲོ་མྱུར་དུ་སྐྱོབ་པར་མཛོད། །ངོ་བོ་བདེ་ཆེན་ཐིག་ལེ་གཅིག་ཏུ་བཟླུམ། །བྱང་ཆུབ་ཉེར་གཅིག་སྒྱུ་འཕྲུལ་རྡོ་རྗེའི་གར། །བཀའ་འདུས་དཀྱིལ་འཁོར་ཉེར་གཅིག་ཡི་དམ་ལྷ། །སྡུག་བསྔལ་ལྔ་བརྒྱའི་འགྲོ་ལ་སྨན་པར་མཛོད། །ཆོས་ཉིད་རྣམ་ཀུན་མཆོག་ལྡན་ཀློང་ཞི་ཡང༌། །ཆོས་ཅན་ཕྲིན་ལས་མྱུར་མགྱོགས་གློག་ལྟར་འཁྱུགས། བཀའ་འདུས་མཁའ་འགྲོ་ཡུམ་མཆོག་ཉེར་གཅིག་གིས། རྩོད་པའི་དུས་ཀྱི་འཁྲུག་པ་ཞི་བར་མཛོད། །དུས་གསུམ་བདེ་གསལ་མི་རྟོག་ཡེ་ཤེས་ཤར། །བཀའ་འདུས་ཆོས་སྲུང་མ་མགོན་འདུས་པའི་ཚོགས། །རྡོ་རྗེའི་ཆོས་སྲུང་གཉན་པོས་བསྟན་འགྲོ་ལ། །མེལ་ཚེས་ནག་ཕྱོགས་འབྱུང་པོ་ཆམ་ལ་ཕོབ། །ཧེ་རུ་ཀ་ཡི་གསང་མཛོད་དབང་བསྒྱུར་བའི། །རྡོ་རྗེའི་རིགས་ཅན་ཆོས་ཀྱི་རྒྱལ་པོ་ཆེ། །བཀའ་འདུས་ལས་ལྡན་མངའ་བདག་ཁུ་དབོན་གྱི། །སྨོན་ལམ་མཐུ་ཡིས་བོད་ཡུལ་མཐའ་དབུས་སྐྱོབས། །ཐུགས་བསྐྱེད་དུས་བབ་ངོ་མཚར་སྤྲུལ་པའི་སྐུ། །བཀའ་འདུས་ཟབ་གཏེར་གངས་ཅན་འཛིན་མ་རུ། །སྤེལ་མཛད་ཨོ་རྒྱན་གླིང་དང་མདོ་སྔགས་གླིང༌། །རྟེན་འབྲེལ་བདེན་པས་དུས་ཀྱི་རྒུད་པ་སོལ། །གུ་རུའི་ཐུགས་དམ་གངས་ཅན་སྐྱོབ་པའི་བཙས། །བཀའ་འདུས་ཆོས་ཀྱི་རྒྱ་མཚོ་འདི་གཅིག་ཅེས། །རྡོ་རྗེའི་ལུང་གིས་བསྔགས་པའི་བདེན་དོན་གང༌། །དེང་དུས་འགྲོ་བས་མངོན་སུམ་སྤྱོད་པར་མཛོད། །རབ་འབྱམས་རྒྱུད་སྡེའི་སྙིང་པོ་འདི་ཉིད་ཀྱི། །བསྙེན་སྒྲུབ་ནུས་པས་ལུང་རྟོགས་བསྟན་པ་འཕེལ། །བསྟན་འཛིན་ཞབས་བརྟན་ཕྱི་ནང་བར་ཆད་སོལ། བསྟན་གཉིས་ཉི་ཟླའི་སྣང་བ་འཆར་བར་མཛོད། །ཐུབ་བསྟན་ཡོངས་རྫོགས་ཆོས་ཀྱི་རྒྱལ་མཚན་འདི། །ཞལ་ཕྱེས་ཙམ་གྱིས་ནད་མུག་འཁྲུག་རྩོད་ཞི། །ལྷ་མིན་མཐར་བྱས་དཀར་ཕྱོགས་རུ་མཚོན་གྱིས། །ཕན་བདེའི་རྒྱལ་ཁབ་མཛེས་ཤིང་བརྟན་གྱུར་ཅིག །བཀའ་འདུས་གྲུབ་པའི་རིག་འཛིན་བར་མ་ཆད། །ཚར་གཅོད་རྗེས་འཛིན་ཕྲིན་ལས་ཐོགས་མེད་མཐུས། །གུ་རུའི་གདུལ་བྱ་མཐའ་དག་དབུགས་དབྱུང་བའི། །རྫོགས་ལྡན་གསར་པའི་དགའ་སྟོན་དར་བར་མཛོད། །བཀའ་འདུས་སྨིན་གྲོལ་ཐང་མལ་བརྡལ་བའི་ཞིང༌། །བཀའ་འདུས་དཀྱིལ་འཁོར་གྲུབ་པའི་སྨོན་ལམ་དུ། །བཀའ་གསང་རྡོ་རྗེ་རྒྱ་ཡིས་ཉེར་བསྐུལ་ནས། །བཀའ་གཏེར་བསྟན་པ་རྟག་ཁྱབ་ལྷུན་གྲུབ་ཤོག །ཅེས་པའང་ལྷག་བསམ་འོ་མའི་ཆུ་གཏེར་མཚོ་སྐྱེས་བདུད་རྩིའི་རེག་པས་རྟག་ཏུ་སྐྱོང་བའི་རྒྱལ་ཁམས་པ་པདྨ་གར་དབང་མདོ་སྔགས་གླིང་པས་ཨོ་རྒྱན་དྷརྨ་གཉྫིའི་གྲོང་ཁྱེར་གཡོ་རུ་ཁྲ་འབྲུག་གི་གཙུག་ལག་ཁང་དུ་བཀའ་འདུས་ཆོས་ཀྱི་རྒྱ་མཚོའི་ཚོགས་མཆོད་འབུམ་ཕྲག་ཕུལ་སྐབས་ས་ཟླའི་དཀར་ཕྱོགས་ཀྱི་འཕེལ་ཚེས་བཅོ་ལྔའི་ཉིན་བྲིས་ཤིང་སྨོན་ལམ་དུ་བྱས་པ་དགེ་ལེགས་རྒྱ་ཆེར་འཕེལ།། །།

[edit]

dus kyi rgud pa zhi ba'i smon lam bkra shis lha yi rnga chen zhes bya ba bzhugs/__oM swa sti/_grangs med bskal par goms pa'i thugs bskyed kyis/_/lnga bdo'i 'gro la yongs bzung shAkya'i tog_/rmad byung pad dkar ltar bsngags thugs rje yi/_/byams pa'i phyag gis 'dzin pa'i dus la bab/_/mgon po khyed kyi brtse ba'i dam bca' yi/_/yul du gyur pa'i rjes 'jug sdug bsngal la/_/yab gcig bka' drin can gyi phrin las shugs/_/deng 'dir mngon gsum stsol cig zas gtsang sras/_/dpa' bo'i rnam thar bdud rtsi'i sprin phreng mthu/_/'dren dang spel bar zhal bzhes snying rje'i bdag_/rigs gsum mgon po nye ba'i sras mchog gi_/thugs dam rtsal sprugs mdzad pa'i dus la bab/_/skad cig mi bsnyel sdug bsngal can gyi 'gro/_/rtag tu dgongs pa'i thugs bskyed dam bca'i mthu/_/rtsod dus 'gro bas dngos su longs spyad nas/_/phan bde'i dbugs dbyung stsol cig rgyal sras tshogs/_/thub pa mchog gi ring lugs rjes 'jug bcas/_/skyong zhing bshad dang sgrub pa'i dga' ston sgo/_/spel la mtshungs med gnas brtan gtad rabs sogs/_/mthu ldan 'phags tshogs zhal bzhes dus la bab/_/sdug bsngal gsum gyi zug rngu 'bum phrag gis/_/thar pa'i srog rtsa chad nye rjes 'jug kun/_/dbugs 'byin phyag gis bslab gsum ngal stegs su/_/sbyor ba'i skal bzang stsol cig 'phags pa'i tshogs/_/mi slob 'bras bu'i gsang bar dgyes spyod kyang*/_/rnam par 'dren mchog sprul pa'i skyes bu'i tshul/_/dzam gling rgyan mchog rgyud sde rnam pa bzhi'i/_/grub brnyes rgya mtsho'i thugs bskyed dus la bab/_/yang dag rgyal bstan nyin byed nub rir phyogs/_/spang klog snang ba kun gsal dbyings su sdud/_/mi shes blun po'i ca co 'di gzigs la/_/phyi ma'i 'gro la dgongs shig shing rta che/_/khyad par gangs can snyigs mar gyur pa'i skyabs/_/rab 'byams rgyal ba'i spyi mes o rgyan rje/_/dpag yas sgyu 'phrul rgya mtsho'i khyab bdag che/_/mtsho skyes rdo rje'i thugs dam dus la bab/_/thogs med mkhyen brtse nus stobs glog las myur/_/gdul dka' rjes 'dzin byin rlabs bden pa'i tshig_/pha yi zhal chems bu la dgos dus bab/_/dbugs 'byin myur du stsol cig bka' drin can/_/mtha' khob mun pa'i gling du sangs rgyas kyi/_/bstan mchog snang bas thar par dbugs 'byin mthus/_/sangs rgyas las lhag drin can mkhan slob chos/_/tha ma'i gdul bya rjes 'dzin dus la bab/_/las nyon 'dam bying ngan spyod dri ngas gdung*/_/thar pa'i dus med sdug bsngal tshor ba rags/_/rang byas 'bras bus rang phung dus gzigs nas/_/yal bar ma dor rigs gsum sprul pa'i sku/_/lus srog ltos med dka' bas dam chos brtsal/_/log sgrub skyo ngal bzod ldan mchog bstan spel/_/gangs can phan bde'i sgo 'byed lo paN tshogs/_/rje 'bangs 'dus pa'i thugs dam dus la bab/_/zab rgyas chos kyi rin thang yal bar dor/_/tshe 'di'i 'dod pas mi tshe phal cher gron/_/'khrul las yang 'khrul nyam thag 'di la gzigs/_/las ngan 'ching ba bkrol mdzod mkhas grub tshogs/_/smon lam gtad rgyas mkha' 'gro'i gsang mdzod 'byed/_/thugs bskyed dus bab phrin las nus rtsal myur/_/gangs can mgon gyur zab gter 'khor los bsgyur/_/sprul pa'i gter 'byin rgya mtsho'i dus la bab/_/gang 'dul phrin las zab mo'i rtsal dang ldan/_/bstan 'gro'i rgud sel smon lam mthu btsan pas/_/bod yul dbugs 'byin thugs bskyed bden pa'i 'bras/_/mngon gyur snang bar mdzod cig rig 'dzin tshogs/_/gzod nas rab zhi bdud rtsi'i mchog brnyes kyang*/_/'gro phyir srid par sgyu ma'i gar rtsen pas/_/thub bstan snying po bshad dang sgrub pa yis/_/snang mdzad shing rta bco brgyad dus la bab/_/srid zhi'i dge legs 'byung gnas rgyal ba'i bstan/_/nyin re bzhin yang nyams zhing rgud pa la/_/bzod med rdo rje'i go cha rtsal sprugs nas/_/lung rtogs 'phel rgyas brtan mdzod paN grub tshogs/_/mtshan dang rig pa'i gsang sngags 'dzin tsam gyis/_/las nyon rgud skyobs phan bde'i dpal gter mdzad/_/rim dgu'i theg pa'i rgyud sde yi dam lha/_/sgyu phrul drwa ba'i thugs dam dus la bab/_/mi shes mun klong sdug bsngal tsher ma'i nags/_/byings te skyabs bral ngan 'gro'i 'bab stegs can/_/shin tu rgud pa'i gnas son yid can la/_/gzigs nas thugs rjes zungs shig dkyil 'khor lha/_/khyad par sgyu phrul drwa ba rdo rje dbyings/_/zhi khro'i 'khor lo bde gshegs sgrub sde brgyad/_/bka' 'dus tshom bu nyer gcig mdo tshogs chen/_/rab 'byams dkyil 'khor thugs dam dus la bab/_/bde chen nyams brgyas sgeg pa'i ye shes stobs/_gdul dka'i g.yul ngor lhag par dpa' ba'i stobs/_/zol med bsnyen cing sgrub pas bskul lags na/_/thugs rjes skyob par mdzod cig yi dam tshogs/_/sgyu 'phrul chen po'i bde mchog gar gyi rtsen/_/phrin las rol pas grub gnyis glog ltar stsol/_/bstan dang rnal 'byor dgyes skyong ma ma che/_/'bum phrag yangs pa'i DA ki'i dus la bab/_/phyi nang gzhan gsum gnyis med rten 'brel chos/_/mi mthun log pas snod bcud nyams nyes tshe/_/bde stong klong lnga'i nus pa'i mthu stobs kyis/_/legs dgu'i dpal yon stsol cig mkha' 'gro'i tshogs/_/gtum chen rab 'bar mi sdug drag shul mthu/_/sdig can snying rjes sgrol ba'i thugs dam can/_/nyams pa'i gshed gyur rgyud gsum dregs pa'i gtso/_/dam can rgya mtsho'i yal gam dus la bab/_/rig 'dzin mkha' 'gro yongs kyi srog gi snying*/_/sa gsum dpal 'byor las lhag rgyal ba'i bstan/_/de 'dzin bcas pa'i dbu 'phang smad pa'i dus/_/snyigs ma'i rang gzugs gzigs shig chos skyong rnams/_/rgyal kun zhal skyin grub pas bka' bsgos shing*/_/zab mo'i bstan dang bstan 'dzin mel tshes skyong*/_/rab 'byam dkyil 'khor rgya mtsho'i bka' sdod che/_/mthu chen gter gzhi'i gnyer 'dzin dus la bab/_/rdo rje'i lam srol ston pa rjes 'jug gis/_/rin thang mi shes blun po'i g.yam la rgyug_/zab mo'i chos kyi mnga' thang smad 'di gzigs/_/tshar gcod rjes 'dzin mdzod cig mthu rtsal can/_/mkhyen brtse nus pa'i mthu stobs na phra zhing*/_/phul byung spang rtogs yon tan nor dbul yang*/_/lhag bsam dad pa'i gdung bas skyabs mchog rnams/_/rdo rje'i thugs dam bskul la ma g.yel dgongs/_/srid zhi'i legs tshogs thub bstan mchog la rag_/de nyid 'dzin spel skyes chen kho na'i mthu/_/yin kyang mi shes dkon mchog dbu 'phang smad/_/las ngan khur du thogs pa'i 'gro 'di gzigs/_/blo gros chung bas tshe 'di'i 'dod pas gdung*/_/sgribs tshogs shugs drag nyon mong chu klung brdol/_/rang byas las ngan rang gshed 'bebs pa yi/_/dus ngan 'gro 'di'i gnas la da gzigs shig_/sdig sdug mthor rlung g.yo bas rang srog rgol/_/yang dag lam dang ston pa tshad ma spang*/_/skyabs bral yid chad ngan 'gro'i g.yang gzhol te/_/gdung ba'i 'o 'dod 'bod pa cang gsan nam/_/chos nyid gzhi klong mtshan ma'i rtogs bral yang*/_/chos can slob pa lam gyi thugs bskyed kyis/_/rjes 'jug skyong ba'i rdo rje'i zhal bzhes rnams/_/ras su ma bor dgos pa'i dus 'dir dgongs/_/mgon po khyed rnams grangs med bskal pa ru/_/sku dang srog gi rin thang gis bsgrubs pa'i/_/bsags pa'i gces nor rdul khrod 'dor du chas/_/ma bzod nyam thag smre ngag 'bod 'di gson/_/gang du sdug bsngal khur du brtsegs pa'i 'gro/_/bstan mchog rgud tshe lhag par bden pa'i 'bras/_/legs bris tshal na lha yi rnga gsang bzhin/_/mngon sum mthong bar mdzod cig rin po che/_/bskal bzang rnam 'dren stong dang khyad par du/_/rtsod dus mgon gyur shAkya'i dbang po de'i/_/thugs bskyed smon lam lnga brgyas bzung ba yi/_/mi mjed zhing 'dir gzigs pa'i dus la bab/_/pad dkar 'chang bas brtse chen phyag gis 'khyud/_/rje btsun sgrol mas 'jigs pa kun skyob cing*/_/zhing 'di phyag mtshan bzhes pa'i thugs bskyed kyis/_/snyigs ma'i skal ngan bzlog la dbugs 'byin stsol/_/smon lam rgya chen bde bar gshegs pa brgyad/_/mi 'khrugs mgon dang 'od dpag med sogs kyis/_/thugs bskyed bden mthus las ngan phongs rgud byang*/_/mngon mtho nges legs bde dgas 'byor bar mdzod/_/'jam mgon mkhyen rab gsang bdag nus pa'i stobs/_/kun bzang smon lam byams mgon tshul khrims sogs/_/rgyal sras sems dpa'i rnam thar yid can gyis/_/mngon sum spyod pas gdul dka' kun 'dul shog_/sangs rgyas las kyang bka' drin rmad byung ba/_/mkhan slob chos kyi rgyal po mes dbon gsum/_/paN grub lo tsA'i rnam thar rjes slob pas/_/drin bzo bshad sgrub las gsum spel nus shog_/shin tu rnyed dka'i thub bstan yid bzhin nor/_/rin thang shes pas snying dang mig las kyang*/_/gces par 'dzin pas mchod cing spel ba la/_/lus srog yal bar dor nus byin gyis rlobs/_/thugs bskyed yon tan 'phags shing spang rtogs phyug_/mdzad pa phrin las rmad byung kun phan pa'i/_/bstan 'dzin ji snyed bar chad g.yul las rgyal/_/mtha' dag bstan la sman nus rtag 'byor shog_/nges 'byung bdud rtsi'i snying gi pad+mo sim/_/gzhan phan ge sar tshogs gnyis sbrang rtsi'i mdzes/_/thabs mchog rdzi phyogs dri yis dngos grub bcud/_/'gugs pas kun kyang sdom gsum dag par mdzod/_/thos pas rgyud grol phyogs ris log lta spangs/_/nges don gnas rtogs rang lta mchog 'dzin dag_/sa lam myur rdzogs sgom pa'i yon tan gyis/_/bslab gsum dri med 'phel rgyas brtan par mdzod/_/mkhas dang grub pa'i rnam thar nor bu'i rgyan/_/thugs bskyed skyes sbyang stobs kyis bdag gir mdzad/_/ma lus skye dgu'i mgon gyur du ma yis/_/rgyal bstan 'dzin skyong spel zhing srung bar mdzod/_/rgya che'i bsod nams she mong ches dar bas/_/mchog gsum rin chen khur lci 'degs la brtson/_/blo gros cang shes 'byor ldan sbyin bdag gis/_/bstan pa'i mnga' thang spel zhing srung bar mdzod/_/ri yi ngogs kun bsam gtan sgom pas khengs/_/klung rnams klog pa thos bsam 'dzin grwa rgyas/_/kun gyi lta spyod rgyal ba dgyes pa'i lam/_/zhugs pas rnam dkar snang ba 'phel rgyas mdzod/_/skye dgu kun kyang sgo gsum dge la brtson/_/mtha' dag dkon mchog gsum la bla mar bskur/_/bsod nams dpal ldan yid mthun nyon mongs med/_/rdzogs ldan dga' ston mthun pas spyod par mdzod/_/'jig rten khams kun 'thab rtsod phung dkrol bral/_/ngan song gnas stong mtho ris bde bas dar/_/nad mug mtshon gyi bskal ngan rgyun chad de/_/kun kyang rnam grol dpal la spyod par mdzod/_/khyad par gangs ri'i ljongs kyi khyon mtha' dag_/nad mug mtshon 'khrugs dus kyi rgud pa zhi/_/mtha' mi 'byung pos glag lta mi nus par/_/chos rgyal mes dbon dus bzhin bde bar mdzod/_gangs can lte ba ra sa 'phrul snang zhing*/_/lugs gsum mi 'gyur zab yangs chos 'khor che/_/khra 'brug byams snyoms la sogs 'phags pa'i tshogs/_/dngos bzhugs chos 'khor gtsug lag rgyas brtan mdzod/_/de yang lha dang bcas pa'i skye dgu yis/_/mchod dang bkur stis tshogs gnyis dpal 'byor sdud/_/zhi dul ngur smrig 'dzin pas legs khengs te/_/log 'tsho bral ba'i rnyed bkur rgyas par mdzod/_/yer pa mchims phu bsam grub shel brag sogs/_/grub brnyes rig pa 'dzin pa'i dben gnas kun/_/ting 'dzin dka' thub lhur bzhes spong ba pas/_/legs bsnyen dngos grub brnyes pas brten par mdzod/_/phyogs kun ris med dge 'dun sde rgyas shing*/_/kun kyang nges 'byung bslab gsum don du gnyer/_/ris med rgyal bstan 'dzin skyong spel gsum gyis/_/phyogs ris sde 'khrug zhi bas mdzes par mdzod/_/rgyal blon khyim bdag gnyug mar gnas kun kyang*/_/legs byas rnam dkar 'ba' zhig brtson pas sgrub/_/dkon mchog mchod dang dge bcu'i khrims gnas pas/_/sdug bsngal 'thab rtsod zhi zhing 'byor bar mdzod/_/smon lam log pa'i bod phung dam sri dang*/_/nag po'i phyogs gyur gdug pa'i kla klo yis/_/bsam sbyor ngan pas nam yang mi brdzi bar/_/chos srid nyi zla'i snang bas mdzes par mdzod/_/rigs gsum mgon sogs rgyal dang de sras kyi/_/sprul pa'i skyes bu ngo mtshar can du mas/_/bod yul bstan dang chab srid legs bskyangs nas/_/mngon mtho nges legs dpal gyis dar bar mdzod/_/bod khams gnyer gtad brtan ma bcu gnyis dang*/_/mgur lha dge bsnyen dkar phyogs skyong rnams kyis/_/gu ru'i rdo rje'i tha tshig ji bzhin du/_/gangs can bstan dang lus can skyongs mdzod kyai/_/mdor na bstan dang 'gro la phan pa'i sgo/_/mtha' dag ma 'bad par yang ngang gi 'du/_/gnod pa'i phyogs kun ming yang mi grags pas/_/bkra shis dge legs snang ba rtag 'char mdzod/_/ces pa'ang snyigs dus bskal ngan gyi mun rum ches cher shugs bdo ba'i tshe sbyor ba'i nus stobs nam mkha'i ut+pal la'i rjes su snyegs kyang lhag bsam gyi 'jug pa yangs shing dkar ba'i rgyal khams kyi ku sA li rgan po 'gyur med theg mchog bstan pa'i rgyal mtshan pad+ma 'od gsal mdo sngags gling par yang 'bod pa gang dbus gtsang longs spyod rdzogs pa'i rdo rje'i gnas rten rnams dad pa'i 'dren byed kyi spyod yul du gyur pa'i skabs bden brjod 'di ltar bgyis pa'i tshe dad slob mtshungs med ngag dbang bstan 'dzin nas rin po che'i skyes dang bcas te ched du bskul ba bzhin gangs can bod kyi rdo rje gdan ston mchog don kun grub pa'i ye shes kyi phyag rgya dngos su bzhugs pa'i spyan sngar me bya gnam lo gsar tshes kyi cho 'phrul chen mo'i mchod pa'i skabs bsag sbyang cung zad bgyis pa'i tshe rtse gcig gus pas bris shing smon pa 'dis kyang rtsod dus kyi bstan 'gro la dbugs dbyung mthong ba'i chos su nges par thob pa'i rgyu kho nar gyur cig__!__dus kyi rgud mun zhi ba'i smon lam zla ba'i bdud rtsi'i zil dngar bzhugs/_oM swasti/_rab 'byams rgyal ba kun gyi ye shes sku/_/'chi med rig 'dzin pad+ma kun tu 'chang*/_bka' 'dus chos kyi rgya mtsho'i ston pa che'i/_/thugs bskyed mthu yis lnga brgya'i 'gro 'di skyobs/_/dgongs klong he ru ka dang gnyis su med/_/rnam 'phrul bka' 'dus rgya bod rig 'dzin tshul/_/mkhyen brtse nus pa bsam mi khyab pa'i mthus/_/snyigs ma'i bstan 'gro myur du skyob par mdzod/_/ngo bo bde chen thig le gcig tu bzlum/_/byang chub nyer gcig sgyu 'phrul rdo rje'i gar/_/bka' 'dus dkyil 'khor nyer gcig yi dam lha/_/sdug bsngal lnga brgya'i 'gro la sman par mdzod/_/chos nyid rnam kun mchog ldan klong zhi yang*/_/chos can phrin las myur mgyogs glog ltar 'khyugs/_bka' 'dus mkha' 'gro yum mchog nyer gcig gis/_rtsod pa'i dus kyi 'khrug pa zhi bar mdzod/_/dus gsum bde gsal mi rtog ye shes shar/_/bka' 'dus chos srung ma mgon 'dus pa'i tshogs/_/rdo rje'i chos srung gnyan pos bstan 'gro la/_/mel tshes nag phyogs 'byung po cham la phob/_/he ru ka yi gsang mdzod dbang bsgyur ba'i/_/rdo rje'i rigs can chos kyi rgyal po che/_/bka' 'dus las ldan mnga' bdag khu dbon gyi/_/smon lam mthu yis bod yul mtha' dbus skyobs/_/thugs bskyed dus bab ngo mtshar sprul pa'i sku/_/bka' 'dus zab gter gangs can 'dzin ma ru/_/spel mdzad o rgyan gling dang mdo sngags gling*/_/rten 'brel bden pas dus kyi rgud pa sol/_/gu ru'i thugs dam gangs can skyob pa'i btsas/_/bka' 'dus chos kyi rgya mtsho 'di gcig ces/_/rdo rje'i lung gis bsngags pa'i bden don gang*/_/deng dus 'gro bas mngon sum spyod par mdzod/_/rab 'byams rgyud sde'i snying po 'di nyid kyi/_/bsnyen sgrub nus pas lung rtogs bstan pa 'phel/_/bstan 'dzin zhabs brtan phyi nang bar chad sol/_bstan gnyis nyi zla'i snang ba 'char bar mdzod/_/thub bstan yongs rdzogs chos kyi rgyal mtshan 'di/_/zhal phyes tsam gyis nad mug 'khrug rtsod zhi/_/lha min mthar byas dkar phyogs ru mtshon gyis/_/phan bde'i rgyal khab mdzes shing brtan gyur cig_/bka' 'dus grub pa'i rig 'dzin bar ma chad/_/tshar gcod rjes 'dzin phrin las thogs med mthus/_/gu ru'i gdul bya mtha' dag dbugs dbyung ba'i/_/rdzogs ldan gsar pa'i dga' ston dar bar mdzod/_/bka' 'dus smin grol thang mal brdal ba'i zhing*/_/bka' 'dus dkyil 'khor grub pa'i smon lam du/_/bka' gsang rdo rje rgya yis nyer bskul nas/_/bka' gter bstan pa rtag khyab lhun grub shog_/ces pa'ang lhag bsam 'o ma'i chu gter mtsho skyes bdud rtsi'i reg pas rtag tu skyong ba'i rgyal khams pa pad+ma gar dbang mdo sngags gling pas o rgyan d+harma gany+dzi'i grong khyer g.yo ru khra 'brug gi gtsug lag khang du bka' 'dus chos kyi rgya mtsho'i tshogs mchod 'bum phrag phul skabs sa zla'i dkar phyogs kyi 'phel tshes bco lnga'i nyin bris shing smon lam du byas pa dge legs rgya cher 'phel//__//