སྒྲོལ་མ་དབྱངས་ཅན་མའི་སྒྲུབ་ཐབས།

🚧 This website is under continued development. We appreciate your patience!

Previous Text Back to Volume PageNext Text

Wylie title	sgrol ma dbyangs can ma'i sgrub thabs
Location	dil mgo mkhyen brtse bka' 'bum Volume 6, Text 12, Pages 58-59 (Folios 1a1 to 2a3)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	འཇིགས་མེད་གླིང་པ་ ('jigs med gling pa)
Citation	Khyentse, Dilgo. Sgrol ma dbyangs can ma'i sgrub thabs. In Skyabs rje dil mgo mkhyen brtse rin po che'i bka' 'bum, Vol. 6: 58-59. Delhi: Shechen Publications, 1994.
Genre	Sadhanas - Evocation Ritual - sgrub thabs
Cycle	ཀློང་ཆེན་སྙིང་གི་ཐིག་ལེ་ (klong chen snying gi thig le)
Deity	dbyangs can ma
Lotsawa House Link	https://www.lotsawahouse.org/tibetan-masters/dilgo-khyentse/sarasvati-sadhana-nyingtik
Colophon	།ཞེས་པའང་འཕགས་མ་དངོས་ཀྱིས་རྗེས་སུ་བཟུང་བའི་སློབ་དཔོན་བཀའ་དྲིན་ཅན་དུ་མས་བྱིན་རླབས་ཐོབ་པས་ཀློང་སྙིང་ཡུམ་བཀའ་ནང་སྒྲུབ་བདག་བསྐྱེད་རྒྱུན་ཁྱེར་དུ་ཞལ་བསྒྱུར་བ་པོ་ཚངས་སྲས་དགྱེས་པའི་རྡོ་རྗེ་མངྒ་ལས་བྲིས་པ་འགྲོ་ཀུན་སོ་སོར་ཡང་དག་རིག་པའི་བློ་གྲོས་ལ་དབང་ཐོབ་པའི་དཔལ་དུ་གྱུར་ཅིག།
	/zhes pa'ang 'phags ma dngos kyis rjes su bzung ba'i slob dpon bka' drin can du mas byin rlabs thob pas klong snying yum bka' nang sgrub bdag bskyed rgyun khyer du zhal bsgyur ba po tshangs sras dgyes pa'i rdo rje mang+ga las bris pa 'gro kun so sor yang dag rig pa'i blo gros la dbang thob pa'i dpal du gyur cig/

Tibetan Text

Wylie

[edit]

༄༅། སྒྲོལ་མ་དབྱངས་ཅན་མའི་སྒྲུབ་ཐབས་ནི། སྐྱབས་སེམས་ནི། ན་མོ། བླ་མ་མཆོག་གསུམ་མྱུར་མ་དཔལ། །གུས་པས་སྐྱབས་མཆི་མཁའ་མཉམ་འགྲོ། །བླ་མེད་བྱང་ཆུབ་མཆོག་ཐོབ་ཕྱིར། །འཕགས་མ་དབྱངས་ཅན་བསྒྲུབ་པར་བགྱི། །ལན་གསུམ། ཨ། རང་ཉིད་སྐད་ཅིག་པད་ཟླའི་སྟེང༌། །དབྱངས་ཅན་མ་ནི་སྟོན་ཟླའི་ཞལ། །ཞབས་གཉིས་རྟ་བབས་སྐྱིལ་མོ་ཀྲུང༌། །ཕྱག་གཡས་མཆོག་སྦྱིན་གཡོན་པ་ནི། །དཀོན་མཆོག་གསུམ་མཚོན་སྐྱབས་སྦྱིན་རྒྱས། །མེ་ལོང་ཧྲཱིཾ་མཚན་ཨུཏྤལ་འཛིན། །འོད་ཟེར་འཕྲོས་པས་རྒྱལ་རྣམས་ཀྱི། །མཁྱེན་རབ་སོ་སོ་ཡང་དག་རིག །སྐར་མ་སྟོང་ཕྲག་ཚོགས་པ་ལྟའི། །བློ་གྲོས་གཏེར་ཁ་འབྱེད་པར་བསམ། །ཨོཾ་པདྨོ་ཡོ་གི་ནི་ཏཱ་རེ་ཏུཏྟཱ་རེ་ཏུ་རེ་པྲཛྙཱ་ཧྲཱིཾཿཧྲཱིཾཿསྭཱ་ཧཱ། ཞེས་གཙོ་བོར་བཟླ། བློ་རྣོ་བར་འདོད་ན། ཧྲཱིཾ་ཧྲཱིཾ་ཧྲཱིཾཿསུམ་སྦྲེལ་དང༌། ཐོ་རངས་ཆུ་གཙང་ཁྱོར་གང་ལ། ཏདྱ་ཐཱ། ཁ་ལི་ཁ་ལི་བ་ལི་ཏེ་སྭཱ་ཧཱ༔ ཞེས་བཏབ་པས་བཀྲུ་ཞིང་ཁོང་དུ་བཏུང་བས་བློ་གྲོས་མེ་ལྟར་དུ་འབར་བར་འགྱུར་རོ། །བློ་གྲོས་བརྟན་པར་འདོད་ན། ཏདྱ་ཐཱ༔ སྨྲྀ་ཏི་མ་ཏི་པྲཛྙཱ་ཧུ་རུ་མེ་སྭཱ་ཧཱ༔ ཞེས་མང་དུ་བཟླས་པ་ཐོ་རངས་ལ་རིལ་བུ་རེ་ཟོས་པས་བློ་གྲོས་ཤིན་ཏུ་བརྟན་པར་འགྱུར་རོ། བློ་གྲོས་ཟབ་པར་འདོད་ན། ཧྲཱིཿཡིག་དམར་པོ་མར་མེ་ལྟར་འབར་བ་ལ་སེམས་རྩེ་གཅིག་ཏུ་བཟུང་ལ་རང་སྔགས་བཟླ། སིནྡྷཱུ་ར་ལ། ཨོཾ་སྨྲྀ་ཏི་མ་ཏི་གམྦྷཱི་ར་ཧྲཱིཿསྭཱ་ཧཱ༔ ཞེས་མང་དུ་བསྔགས་པ་ཞུན་མར་དང་སྦྱར་ནས་ཟོས་པས་བློ་གྲོས་རྒྱ་མཚོའི་གཏེར་ལྟར་ཟབ་པར་འགྱུར་རོ༔ ཤེས་རབ་རྒྱ་ཆེ་བར་འདོད་ན། རྟག་ངུའི་བཅུད་ལེན་གྱི་རྫས་རྣམས་སྨན་མར་ལ་སྦྱར་ཏེ། ཨོཾ་མ་ཧཱ་མ་ཏི་པྲཛྙཱ་ཛྙཱ་ན་ཧུ་རུ་ཧུ་རུ་བརྡྷཱ་ནི་སྭཱ་ཧཱ༔ ཞེས་པའི་སྔགས་བཏབ་པ་ཐོ་རངས་སུ་བསྟེན། དེའི་ཚེ་ཤ་ཆང་སྒོག་ཙོང་ལན་ཚྭ་སོགས་གནོད་པའི་ཁ་ཟས་སྤངས་པས་བློ་གྲོས་ནམ་མཁའ་ལྟར་ཡངས་པར་འགྱུར་རོ། །དབྱངས་གསལ་རྟེན་སྙིང་ཡིག་བརྒྱ་བཅས་བརྗོད། མཆོད་པ་ནི། མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་ལ་སོགས་པ། །དངོས་འབྱོར་ཡིད་ཀྱིས་སྤྲུལ་ནས་འབུལ། །འཕགས་མའི་ཚོགས་ཀྱིས་བཞེས་སུ་གསོལ། །ཞིང་ཁམས་རྡོ་རྗེའི་ས་གཞི་ལ། །གླིང་བཞི་རི་རབ་མཆོད་པའི་སྤྲིན། །རབ་འབྱམས་བསམ་ཡས་རྒྱན་ཕྲེང་འབར། །སྒྲོལ་མ་རྒྱལ་བ་ཀུན་ཡུམ་མར། །མཆོག་ཏུ་དད་པས་བདག་གིས་འབུལ། །ཨརྻ་ཏཱ་རེ་ས་པ་རི་ཝཱ་ར་ཨརྒྷཾ་ནས་ཤབྡ་པྲ་ཏཱིཙྪ་སྭཱ་ཧཱས་མཆོད། བསྟོད་པ་ནི། ཕྱག་འཚལ་སྟོན་ཀའི་ཟླ་བ་ཀུན་ཏུ། །གང་བ་བརྒྱ་ནི་བརྩེགས་པའི་ཞལ་མ། །སྐར་མ་སྟོང་ཕྲག་ཚོགས་པ་རྣམས་ཀྱིས། །རབ་ཏུ་ཕྱེ་བའི་འོད་རབ་འབར་མ། །ཞེས་ཕྱག་འཚལ་ཚིག་བཞི་བརྒྱ་ཚར་རེ་དང་ཡིག་བརྒྱ་བཟླ། བསྡུ་ལྡང་དགོས་ན། སྣོད་བཅུད་འོད་ཞུ་རང་ལ་ཐིམ། །དེ་ཡང་མི་དམིགས་འོད་གསལ་ངང༌། །དཔའ་མོ་སྣང་སྟོང་ཆེན་པོར་ཤར། །མི་མཐུན་ཕྱོགས་ཀུན་སྲུང་བར་གྱུར། །བཛྲ་རཀྵ། བསྔོ་སྨོན་ནི། དགེ་བ་འདི་ཡིས་མྱུར་དུ་བདག །སྒྲ་དབྱངས་ལྷ་མོ་འགྲུབ་གྱུར་སོགས་བྱའོ། །ཞེས་པའང་འཕགས་མ་དངོས་ཀྱིས་རྗེས་སུ་བཟུང་བའི་སློབ་དཔོན་བཀའ་དྲིན་ཅན་དུ་མས་བྱིན་རླབས་ཐོབ་པས་ཀློང་སྙིང་ཡུམ་བཀའ་ནང་སྒྲུབ་བདག་བསྐྱེད་རྒྱུན་ཁྱེར་དུ་ཞལ་བསྒྱུར་བ་པོ་ཚངས་སྲས་དགྱེས་པའི་རྡོ་རྗེ་མངྒ་ལས་བྲིས་པ་འགྲོ་ཀུན་སོ་སོར་ཡང་དག་རིག་པའི་བློ་གྲོས་ལ་དབང་ཐོབ་པའི་དཔལ་དུ་གྱུར་ཅིག། །།

[edit]

@#/_sgrol ma dbyangs can ma'i sgrub thabs ni/_skyabs sems ni/_na mo/_bla ma mchog gsum myur ma dpal/_/gus pas skyabs mchi mkha' mnyam 'gro/_/bla med byang chub mchog thob phyir/_/'phags ma dbyangs can bsgrub par bgyi/_/lan gsum/_a/_rang nyid skad cig pad zla'i steng*/_/dbyangs can ma ni ston zla'i zhal/_/zhabs gnyis rta babs skyil mo krung*/_/phyag g.yas mchog sbyin g.yon pa ni/_/dkon mchog gsum mtshon skyabs sbyin rgyas/_/me long hrIM mtshan ut+pal 'dzin/_/'od zer 'phros pas rgyal rnams kyi/_/mkhyen rab so so yang dag rig_/skar ma stong phrag tshogs pa lta'i/_/blo gros gter kha 'byed par bsam/_/oM pad+mo yo gi ni tA re tut+tA re tu re pradz+nyA hrIMHhrIMHswA hA/_zhes gtso bor bzla/_blo rno bar 'dod na/_hrIM hrIM hrIMHsum sbrel dang*/_tho rangs chu gtsang khyor gang la/_tad+ya thA/_kha li kha li ba li te swA hA:_zhes btab pas bkru zhing khong du btung bas blo gros me ltar du 'bar bar 'gyur ro/__/blo gros brtan par 'dod na/_tad+ya thA:_smr-i ti ma ti pradz+nyA hu ru me swA hA:_zhes mang du bzlas pa tho rangs la ril bu re zos pas blo gros shin tu brtan par 'gyur ro/_blo gros zab par 'dod na/_hrIHyig dmar po mar me ltar 'bar ba la sems rtse gcig tu bzung la rang sngags bzla/_sin+d+hU ra la/_oM smr-i ti ma ti gam+b+hI ra hrIHswA hA:_zhes mang du bsngags pa zhun mar dang sbyar nas zos pas blo gros rgya mtsho'i gter ltar zab par 'gyur ro:_shes rab rgya che bar 'dod na/_rtag ngu'i bcud len gyi rdzas rnams sman mar la sbyar te/_oM ma hA ma ti pradz+nyA dz+nyA na hu ru hu ru bar+d+hA ni swA hA:_zhes pa'i sngags btab pa tho rangs su bsten/_de'i tshe sha chang sgog tsong lan tshwa sogs gnod pa'i kha zas spangs pas blo gros nam mkha' ltar yangs par 'gyur ro/__/dbyangs gsal rten snying yig brgya bcas brjod/_mchod pa ni/_me tog bdug spos mar me dri/_/zhal zas rol mo la sogs pa/_/dngos 'byor yid kyis sprul nas 'bul/_/'phags ma'i tshogs kyis bzhes su gsol/_/zhing khams rdo rje'i sa gzhi la/_/gling bzhi ri rab mchod pa'i sprin/_/rab 'byams bsam yas rgyan phreng 'bar/_/sgrol ma rgyal ba kun yum mar/_/mchog tu dad pas bdag gis 'bul/_/ar+Ya tA re sa pa ri wA ra ar+g+haM nas shab+da pra tIts+tsha swA hAs mchod/_bstod pa ni/_phyag 'tshal ston ka'i zla ba kun tu/_/gang ba brgya ni brtsegs pa'i zhal ma/_/skar ma stong phrag tshogs pa rnams kyis/_/rab tu phye ba'i 'od rab 'bar ma/_/zhes phyag 'tshal tshig bzhi brgya tshar re dang yig brgya bzla/_bsdu ldang dgos na/_snod bcud 'od zhu rang la thim/_/de yang mi dmigs 'od gsal ngang*/_/dpa' mo snang stong chen por shar/_/mi mthun phyogs kun srung bar gyur/_/badz+ra rak+Sha/_bsngo smon ni/_dge ba 'di yis myur du bdag_/sgra dbyangs lha mo 'grub gyur sogs bya'o/__/zhes pa'ang 'phags ma dngos kyis rjes su bzung ba'i slob dpon bka' drin can du mas byin rlabs thob pas klong snying yum bka' nang sgrub bdag bskyed rgyun khyer du zhal bsgyur ba po tshangs sras dgyes pa'i rdo rje mang+ga las bris pa 'gro kun so sor yang dag rig pa'i blo gros la dbang thob pa'i dpal du gyur cig/__//