JKCL-KABUM-10-THA-047

Previous Text Back to Volume PageNext Text

Wylie title
Location	chos kyi blo gros bka' 'bum Volume 10, Text 47, Pages (Folios 1a to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: . Bir, H.P.: Khyentse Labrang, 2012.
Genre	Pilgrimage Guides - gnas yig  ·  Place or Sacred Site Guides - gnas bshad - skor tshad

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྒྱལ་པོའི་ཁབ་ཀྱི་གནས། བྱ་རྒོད་སྤུངས་རི་ན་ལེནྡྲ་སོགས་ལ་བསྟོད་པ་རབ་དགའི་དབྱངས་ཞེས་བྱ་བ། མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གཉིས་སྣང་སྒྲིབ་ཚོགས་མུན་པ་གཏན་ནས་བཅོམ། །ཀུན་མཁྱེན་ཡེ་ཤེས་གསལ་བའི་འོད་པོ་ཆེ། །འཇིག་རྟེན་གསུམ་ན་གདུགས་ཟླ་མེད་པ་ཡི། །ལྷར་བཅས་འགྲོ་བའི་བླ་མ་ལ་ཕྱག་འཚལ། །བྱང་ཆུབ་ཤིང་དྲུང་ག་ལ་བར་གཤེགས་ནས། །བདུད་བརྟུལ་མངོན་འཚང་རྒྱ་ཞིང་ཆོས་འཁོར་བསྐོར། །འདུལ་བ་རྣམ་བཞི་དཔག་མེད་རབ་བསྟན་ནས། །རྩྭ་མཆོག་གྲོང་དུ་མྱ་ངན་འདས་ཕྱག་འཚལ། །མཛད་པ་བརྒྱ་ཕྲག་དེ་ལས་ཁྱད་པར་དུ། །གཉིས་སྐྱེས་རྒོད་དཀར་གྱེན་རྒྱུག་སྤུངས་པ་ལྟའི། །རྡོ་རྗེའི་རི་བོ་དབྱིབས་ལེགས་ལྗོན་ཤིང་གི། འབྲས་བུ་སྣ་ཚོགས་སྤུད་པ་ལ༴ །བཻཌཱུཪྻ་ནི་དཀར་སེར་སྔོ་དང་ལྗང་། །དུ་བས་སྤྲས་པའི་བྲག་རི་མཐོང་བས་དགའ། །ཟླ་བ་ཆུ་ཤེལ་བཞུས་པས་ཞལ་ཞལ་བྱས། །བ་གམ་བཀོད་ལེགས་རྣམ་མང་ལ༴ །རིན་ཆེན་ཁྲི་རྐང་སེང་གླང་པདྨས་བརྒྱན། །འཁོར་ཡུག་མུ་ཁྱུད་ལྕགས་རིས་མཛེས་པ་དེར། །བཅོམ་ལྡན་ལྷ་ཡི་ལྷ་ཁྱོད་རབ་བཞུགས་ཚེ། །ཕྱོགས་བཅུའི་ཞིང་ནས་འཁོར་ཚོགས་འདུས༴ །དམ་ཆོས་རྒྱ་མཚོ་བསྲུབས་པའི་སྙིང་པོ་ནི། །དུས་གསུམ་རྒྱལ་བའི་ཡུམ་གྱུར་ཆེན་མོའི་མདོ། །གསུང་གཅིག་ཉིད་ཀྱིས་སོར་སོར་སྟོན༴ །དགྲ་བཅོམ་གནས་བརྟན་ལམ་ཕྲན་ཆེན་པོ་དང་། །རི་རྒྱལ་ངོས་ཡངས་བཀྲ་ཤིས་བཟང་པོའི་རིར། །ཀླུའི་སྡེ་འཁོར་ཚོགས་རྟག་བཞུགས་ལ༴ །ཡན་ལག་བརྒྱད་ལྡན་ཆུ་ཀླུང་ལྟེངས་ཀ་དང་། །ཁྲུས་ཀྱི་རྫིང་བུ་དབྱངས་ཅན་རོལ་པའི་མཚོ། །སྤང་ལྗོངས་ནེའུ་གསེང་འོད་མའི་ཚལ་ལ་སོགས། །ཟས་གཙང་སྲས་པོའི་དགའ་ཚལ་ལ༴ །བསོད་ནམས་བྱེ་བ་བརྒྱ་ཕྲག་གིས་ཐོབ་པའི། །ཆོས་ཀྱི་རྒྱལ་པོ་གཟུགས་ཅན་སྙིང་པོ་ཞེས། །དེ་བཞིན་གཤེགས་པ་བསྙེན་བཀུར་བྱེད་པའི་ཕུལ། །མི་དབང་ལྷ་ཡི་ལྷ་དེར་ཕྱག་འཚལ་ལོ། །དང་པོར་གནག་པས་བསོད་ནམས་མིན་སྤྱོད་ཀྱང་། །བློ་གྲོས་ཆེ་རྣམས་བདུད་ཀྱིས་འཐིབ་མི་ནུས། །བཅོམ་ལྡན་སེང་གེའི་ཞབས་ལ་རབ་བཏུད་ནས། །བདེན་མཐོང་ས་ཡི་རྗེ་བོ་ལ༴ །སངས་རྒྱས་གསུང་རབ་དགྲ་བཅོམ་ཐུགས་མངའ་རྣམས། །རྒྱལ་ཚབ་འོད་སྲུང་ཆེན་པོ་གཙོར་མཛད་པས། །བཀའ་ཡི་བསྡུ་བ་དང་པོ་མཛད་པ་ཡི། །སྙན་པས་སྲིད་རྩེར་ཁྱབ་པ་ལ༴ །དེ་ལྟར་རཱ་ཛ་དགྱེས་པའི་དགའ་ཚལ་ནས། །གནོད་སྦྱིན་ཕྱོགས་སུ་ཉེ་བར་ཕྱིན་པ་ན། །ཤྲཱི་ནཱ་ལེནྡྲ་ཞེས་བྱ་བ་ཡི། །སྤྲུལ་པའི་ཆོས་སྡེ་ཆེན་པོ་ལ༴ །རྒྱ་ཁྱོན་འཁོར་ཡུག་དཔག་ཚད་ཀྱིས་གཞལ་བར། །སངས་རྒྱས་བྱང་སེམས་བཞུགས་པའི་གཙུག་ལག་ཁང་། །ཁྱམས་དང་ཀུན་དགའ་ར་བ་ཆོས་ཁྲི་སོགས། །ངོ་མཚར་བསམ་པའི་བློ་ལས་འདས༴ །འཛམ་གླིང་མཛེས་པར་བྱེད་པའི་རྒྱན་རྣམས་དང་། །རྨད་བྱུང་སློབ་དཔོན་ལ་སོགས་པཎྜི་ཏ། །མདའ་བསྣུན་ཞབས་སོགས་གྲུབ་པ་ཆེ་རྣམས་ཀྱིས། །ཡོངས་སུ་བསྟེན་པའི་གནས་དེ་ལ༴ །སྤྲུལ་པའི་ཉན་ཐོས་ཉི་ཟླ་ཟུང་མཆོག་ནི། །བལྟམས་པའི་གནས་དེ་ཉེ་བར་འཛིན་པ་ལས། །སངས་རྒྱས་བསྟན་པའི་རྨིང་གཞི་ཆོས་འཁོར་ཆེ། །འཛམ་གླིང་འགྲན་ཟླས་དབེན་པ་ལ༴ །ད་ལྟ་ཐ་མལ་སྣང་ངོར་སྒྱུ་མ་ཡི། །ངང་ཚུལ་ལྟ་བུར་སྣང་ཡང་ངེས་པའི་དོན། །འཇིག་པ་མི་མངའ་མངོན་དགའི་ཞིང་ཁམས་ཆེར། །ཆོས་སྟོན་མཛད་བཞིན་བཞུགས་པ་ལ༴ དེ་ལྟར་འཕགས་ཡུལ་མ་གྷ་དྷ་ཡི་ཆར། །བདེ་བཤེགས་བཞུགས་དང་འཆག་དང་ཕྲིན་ལས་རྒྱུན། །མངོན་པར་བསྐྱངས་པའི་གནས་ཀྱི་བཀོད་པ་ལ། །ཆ་ཤས་ཙམ་ཞིག་བསྟོད་པའི་དགེ་བའི་མཐུས། །བསོད་ནམས་གྲུབ་པ་རིན་ཆེན་ལྷུན་པོ་འདི། །བསྟན་དང་འགྲོ་ལ་བདེ་སྐྱིད་རྒྱས་ཕྱིར་སྦྱིན། །བདག་ཀྱང་སྐྱེ་བའི་ཕྲེང་བ་ཐམས་ཅད་དུ། །བླ་མ་ཐུབ་དབང་དེ་དང་མི་འབྲལ་ཤོག །ཅེས་དད་པའི་ཤུགས་ཀྱིས་དྲངས་པའི་རྨོངས་རྩོམ་ཚིགས་བཅད་ཀྱི་ཕྲེང་བ་འདིའང་འཇམ་དབྱངས་བློ་གྲོས་རྒྱ་མཚོས་གྷ་ཡའི་ཀྲི་སིང་གི་ཁང་བཟང་དུ་སྦྱར་བ་མངྒ་ལཾ། །དགེའོ།། །།

[edit]

rgyal po'i khab kyi gnas/__bya rgod spungs ri na len+d+ra sogs la bstod pa rab dga'i dbyangs zhes bya ba/__mgon po 'jam pa'i dbyangs la phyag 'tshal lo/__/gnyis snang sgrib tshogs mun pa gtan nas bcom/__/kun mkhyen ye shes gsal ba'i 'od po che/__/'jig rten gsum na gdugs zla med pa yi/__/lhar bcas 'gro ba'i bla ma la phyag 'tshal/__/byang chub shing drung ga la bar gshegs nas/__/bdud brtul mngon 'tshang rgya zhing chos 'khor bskor/__/'dul ba rnam bzhi dpag med rab bstan nas/__/rtswa mchog grong du mya ngan 'das phyag 'tshal/__/mdzad pa brgya phrag de las khyad par du/__/gnyis skyes rgod dkar gyen rgyug spungs pa lta'i/__/rdo rje'i ri bo dbyibs legs ljon shing gi/__'bras bu sna tshogs spud pa la=__/baiDUR+Ya ni dkar ser sngo dang ljang /__/du bas spras pa'i brag ri mthong bas dga'/__/zla ba chu shel bzhus pas zhal zhal byas/__/ba gam bkod legs rnam mang la=__/rin chen khri rkang seng glang pad+mas brgyan/__/'khor yug mu khyud lcags ris mdzes pa der/__/bcom ldan lha yi lha khyod rab bzhugs tshe/__/phyogs bcu'i zhing nas 'khor tshogs 'dus=__/dam chos rgya mtsho bsrubs pa'i snying po ni/__/dus gsum rgyal ba'i yum gyur chen mo'i mdo/__/gsung gcig nyid kyis sor sor ston=__/dgra bcom gnas brtan lam phran chen po dang /__/ri rgyal ngos yangs bkra shis bzang po'i rir/__/klu'i sde 'khor tshogs rtag bzhugs la=__/yan lag brgyad ldan chu klung ltengs ka dang /__/khrus kyi rdzing bu dbyangs can rol pa'i mtsho/__/spang ljongs ne'u gseng 'od ma'i tshal la sogs/__/zas gtsang sras po'i dga' tshal la=__/bsod nams bye ba brgya phrag gis thob pa'i/__/chos kyi rgyal po gzugs can snying po zhes/__/de bzhin gshegs pa bsnyen bkur byed pa'i phul/__/mi dbang lha yi lha der phyag 'tshal lo/__/dang por gnag pas bsod nams min spyod kyang /__/blo gros che rnams bdud kyis 'thib mi nus/__/bcom ldan seng ge'i zhabs la rab btud nas/__/bden mthong sa yi rje bo la=__/sangs rgyas gsung rab dgra bcom thugs mnga' rnams/__/rgyal tshab 'od srung chen po gtsor mdzad pas/__/bka' yi bsdu ba dang po mdzad pa yi/__/snyan pas srid rtser khyab pa la=__/de ltar rA dza dgyes pa'i dga' tshal nas/__/gnod sbyin phyogs su nye bar phyin pa na/__/shrI nA len+d+ra zhes bya ba yi/__/sprul pa'i chos sde chen po la=__/rgya khyon 'khor yug dpag tshad kyis gzhal bar/__/sangs rgyas byang sems bzhugs pa'i gtsug lag khang /__/khyams dang kun dga' ra ba chos khri sogs/__/ngo mtshar bsam pa'i blo las 'das=__/'dzam gling mdzes par byed pa'i rgyan rnams dang /__/rmad byung slob dpon la sogs paN+Di ta/__/mda' bsnun zhabs sogs grub pa che rnams kyis/__/yongs su bsten pa'i gnas de la=__/sprul pa'i nyan thos nyi zla zung mchog ni/__/bltams pa'i gnas de nye bar 'dzin pa las/__/sangs rgyas bstan pa'i rming gzhi chos 'khor che/__/'dzam gling 'gran zlas dben pa la=__/da lta tha mal snang ngor sgyu ma yi/__/ngang tshul lta bur snang yang nges pa'i don/__/'jig pa mi mnga' mngon dga'i zhing khams cher/__/chos ston mdzad bzhin bzhugs pa la=__de ltar 'phags yul ma g+ha d+ha yi char/__/bde bshegs bzhugs dang 'chag dang phrin las rgyun/__/mngon par bskyangs pa'i gnas kyi bkod pa la/__/cha shas tsam zhig bstod pa'i dge ba'i mthus/__/bsod nams grub pa rin chen lhun po 'di/__/bstan dang 'gro la bde skyid rgyas phyir sbyin/__/bdag kyang skye ba'i phreng ba thams cad du/__/bla ma thub dbang de dang mi 'bral shog__/ces dad pa'i shugs kyis drangs pa'i rmongs rtsom tshigs bcad kyi phreng ba 'di'ang 'jam dbyangs blo gros rgya mtshos g+ha ya'i kri sing gi khang bzang du sbyar ba mang+ga laM/__/dge'o//___//