JKCL-KABUM-03-GA-012

Previous Text Back to Volume PageNext Text

Wylie title
Location	chos kyi blo gros bka' 'bum Volume 3, Text 12, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 3: . Bir, H.P.: Khyentse Labrang, 2012.
Genre	Supplications - gsol 'debs

":Property:textsubnumber|textsubnumber" can not be assigned to a declared number type with value 1.

Tibetan Text

Wylie

[edit]

རྩ་གསུམ་ཀུན་འདུས་ཨོ་རྒྱན་རྡོ་རྗེ་འཆང་ལ་གསོལ་བ་འདེབས་པ་བྱིན་རླབས་ཀྱི་རོལ་མཚོ་ཞེས་བྱ་བ་བཞུགས་སོ། །གུ་རུ་པདྨ་སིདྡྷི་ཧཱུྃ་ཧྲཱིཿཕྱོགས་བཅུ་དུས་གསུམ་རྒྱལ་བ་སྲས་བཅས་ཀྱི། །ཡེ་ཤེས་གཅིག་ཏུ་བསྡུས་པའི་རང་གཟུགས་མཆོག །སྲིད་ཞིའི་ཁྱབ་བདག་མ་ཧཱ་གུ་རུ་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །རབ་འབྱམས་ཞིང་ན་མཚན་གྱི་བྱེ་བྲག་གི། རྣམ་མང་ངོ་མཚར་སྒྱུ་མའི་ཆོ་འཕྲུལ་བརྒྱད། །མིག་འཛུམ་ཙམ་གྱི་ཡུལ་ལ་སྟོན་མཛད་པ། །པདྨ་རྒྱལ་ལ་གུས་པས་གསོལ་བ༴ །མཐའ་བྲལ་ཆོས་དབྱིངས་བརྡལ་ཁྱབ་ཆེན་པོའི་ཀློང་། །ཞལ་ཕྱག་མཚན་མའི་སྤྲོས་པ་ལས་འདས་ཤིང་། །ཡེ་ཤེས་ནང་གསལ་གཞོན་ནུ་བུམ་པའི་སྐུ། །པདྨ་འོད་མི་འགྱུར་ལ༴ །རང་བཞིན་འོད་གསལ་ལྔ་ལྡན་ཞིང་ཆེན་པོར། །ལོངས་སྤྱོད་ཡོངས་རྫོགས་གངས་ཆེན་རིག་ལྔའི་མཚོ། །ཡོན་ཏན་བཀོད་པ་བསམ་ཡས་སྒྱུ་འཕྲུལ་གཙོ། །ཡེ་ཤེས་ལྔ་བདག་ཁྱེད་ལ༴ །ཐུགས་རྗེ་འགག་མེད་རོལ་པའི་རྩལ་སྣང་ལས། །གང་འདུལ་སྤྲུལ་པ་ཆུ་ཟླའི་རོལ་གར་བཞིན། །བྱེ་བ་ཕྲག་བརྒྱ་སྐད་ཅིག་ཉིད་ལ་སྟོན། །པདྨ་འབྱུང་གནས་ཞབས་ལ༴ །འཛམ་གླིང་ཨོ་རྒྱན་སིནྡྷུའི་རྒྱ་མཚོར་ཆེར། །དྲི་བྲལ་པདྨ་སྟོང་ལྡན་དཀྱིལ་འཁོར་སྟེ། །དཀར་གསལ་མཛེས་འཛུམ་མཚན་དཔེའི་འོད་ཕུང་འབར། །ཨོ་རྒྱན་རིན་པོ་ཆེ་ལ༴ །རབ་འབྱམས་ཤེས་བྱ་མཐའ་དག་ཐུགས་སུ་ཆུབ། །སོ་སོར་ཡང་དག་རིགས་བཞིའི་གཏེར་ལ་དབང་། །མཁྱེན་གཉིས་ཡེ་ཤེས་རྩལ་ཆེན་རྫོགས་པའི་སྐུ། །བློ་ལྡན་མཆོག་སྲེད་ཞབས་ལ༴ །རྡོ་རྗེ་གདན་དུ་རྒྱུ་འབྲས་ཐེག་པ་བཤད། །སངས་རྒྱས་བསྟན་པའི་རྒྱལ་མཚན་ཕྱོགས་བརྒྱར་བསྒྲེངས། །ལུང་རྟོག་བཤད་དང་སྒྲུབ་པས་རྒྱས་མཛད་པ། །ཤཱཀྱ་སེང་གེའི་ཞབས་ལ༴ །བརྟུལ་ཞུགས་སྤྱོད་པས་རྡོ་རྗེའི་གནས་ཡུལ་དང་། །རབ་འཇིགས་དུར་ཁྲོད་ཀུན་ན་ཕྱོགས་བཅུར་རྒྱུ། །དཔའ་བོ་ཌ་ཀིའི་ཚོགས་དང་དགྱེས་རྒུར་སྤྱོད། །ཉི་མ་འོད་ཟེར་ཞབས་ལ༴ །འཁོར་བའི་ཆོས་ཀྱི་མ་ཆགས་སྐྱོན་བྲལ་ཞིང་། །ཁམས་གསུམ་མ་ལུས་རིག་པས་དབང་དུ་སྡུད། །གཞན་སྣང་ཟིལ་གནོན་རང་གྲོལ་སྤྱོད་པའི་རྗེ། །པདྨ་རྒྱལ་པོའི་ཞབས་ལ༴ །མེ་དཔུང་མཚོར་བསྒྱུར་ཟ་ཧོར་རྒྱལ་ཁམས་འདུལ། །མུ་སྟེག་ངན་པའི་དུག་གིས་བཀྲོངས་མ་ནུས། །བདེ་ཆེན་རྡོ་རྗེ་སེམས་དཔའི་ལང་ཚོ་རྒྱས། །མཚོ་སྐྱེས་རྡོ་རྗེའི་ཞབས་ལ༴ །འཕགས་ཡུལ་ཐུབ་དབང་ཆོས་ཀྱི་སྒྲོན་མེ་སྦར། །ཡང་དག་རིག་པའི་རྒྱལ་རྔ་ཕྱོགས་བརྒྱར་བརྡུང་། རྟག་ཆད་སྡེ་དཔུང་རྫུ་འཕྲུལ་ཆེན་པོས་འདུལ། །སེངྒེ་སྒྲ་སྒྲོག་ཞབས་ལ༴ །གངས་ཅན་ཡུལ་བྱོན་ལྷ་སྲིན་དམ་ལ་བཏགས། །གཙུག་ལག་ཁང་བཞེངས་མདོ་སྔགས་དམ་ཆོས་བསྒྱུར། །ཐུགས་སྲས་རྡོ་རྗེའི་རིག་འཛིན་རྒྱ་མཚོ་བསྐྲུན། །རྡོ་རྗེ་གྲོ་ལོད་རྩལ་ལ༴ །ཆོས་ནོར་གཏེར་ཁ་དཔག་ཏུ་མེད་པ་སྦས། །ལས་ཅན་སྐྱེས་བུ་རིམ་པར་ལུང་བསྟན་ཅིང་། །གུ་རུ་ཉིད་དང་དངོས་མཚུངས་སྐུ་ཚབ་ཀྱིས། །དད་ལྡན་འགྲོ་བ་འདུལ་ལ༴ །འགྲོ་ལྡིང་ཡུལ་དུ་ཕྲ་མེན་དམ་ལ་འདོག །རྡོ་རྗེ་ཐེག་པའི་འདུལ་ཞིང་རྒྱས་པར་མཛད། །ད་ལྟ་རྔ་ཡབ་སྲིན་པོར་ཆོས་སྟོན་པ། །རཀྵ་ཐོད་ཕྲེང་རྒྱལ་ལ༴ །བླ་མ་ཀུན་འདུས་ཡི་དམ་ཞི་ཁྲོའི་བདག །མཁའ་འགྲོའི་ཚོགས་དཔོན་ཆོས་སྐྱོངས་ཡོངས་ཀྱི་རྗེ། །ནོར་ལྷ་ཀུན་འདུས་མཆོག་གསུམ་འདུས་པའི་སྐུ། །ཨོ་རྒྱན་རྡོ་རྗེ་འཆང་ལ་གསོལ་བ་འདེབས། །ཐུགས་རྗེས་གཟིགས་པས་བོད་ལ་ལྷག་བར་དགོངས། །ཚེས་བཅུ་བྱུང་རེས་དངོས་སུ་བྱོན་པར་བཞེས། །ཐུགས་དམ་མི་གཡེལ་བརྩེ་བས་དགོངས་མཛད་ལ། །གསང་བ་གསུམ་གྱི་བྱིན་བརླབ་དུས་འདིར་རྩོལ། །ཉམས་རྟོག་རིག་པའི་རྩལ་ཆེན་སྦར་བ་དང་། །བསྟན་འགྲོའི་དོན་ཆེན་འབད་མེད་ལྷུན་གྱིས་གྲུབ། །བྱང་ཆུབ་སྒྲུབ་ལ་བར་དུ་གཅོད་པ་ཀུན། །རྩྭ་སྦུར་མེ་བཞིན་མིང་ཙམ་མེད་པར་མཛོད། །ཚུལ་ཁྲིམས་དག་པའི་གཟི་འོད་རབ་འབར་ཞིང་། །ཐོས་བསམ་བསྒོམ་པའི་དགའ་སྟོན་རབ་རྒྱས་ཤིང་། །བྱང་ཆུབ་སེམས་གཉིས་མི་ཉམས་གོང་དུ་འཕེལ། །གྲུབ་གཉིས་བདུད་རྩིའི་དཔལ་ལ་སྤྱོད་པར་ཤོག །འཇིག་རྟེན་ཀུན་ཏུ་ནད་མུག་མཚོན་འཁྲུག་ཞི། །ལོ་ཕྱུག་འཕེལ་རྒྱས་དགེ་བཅུའི་ཆོས་ལ་སྤྱོད། །བོད་ཁམས་བསྟན་འགྲོར་འཚེ་བའི་མཐའ་དམག་ཚོགས། །རབ་ཁྲོས་རྡོ་རྗེའི་ཤུགས་ཀྱིས་འཇོམས་པར་མཛོད། །སྐྱེ་བ་ཀུན་ཏུ་བླ་མ་ཨོ་རྒྱན་རྗེ། །མི་འབྲལ་སྙིང་དབུས་པདྨོར་རྟག་ཏུ་མཆོད། །དེ་ཡི་བྱིན་བརླབ་སྒོ་གསུམ་ལ་ཞུགས་པས། །པདྨ་རྒྱལ་དང་རྣམ་དབྱེར་མེད་པར་ཤོག །བཀྲ་ཤིས་འཆི་མེད་ཚེ་དབང་རིག་འཛིན་གྱི། །བྱིན་བརླབ་བཀྲ་ཤིས་ཆར་དུ་བསྙིལ་བ་དང་། །འཆི་བདག་བདུད་ཀྱི་དཔུང་ཚོགས་ཀུན་ཞི་ནས། །སྐྱེ་འཆི་ཀུན་བྲལ་རྡོ་རྗེའི་བཀྲ་ཤིས་ཤོག །ཅེས་པའང་ཤིང་ཕག་ཆོ་འཕྲུལ་ཟླ་བའི་ཚེས་གཅིག་ཟླ་བ་གྲོ་བཞིན་གྱི་འགྲུབ་སྦྱོར་བཟང་པོར་པདྨའི་བྲན་དུ་འཁོད་པ་འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་པ་འདིས་ཀྱང་ཡེ་ཤེས་ཆེན་པོའི་བྱིན་བརླབ་ལྷག་པར་སྨིན་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་སུ་ཤྲི་ཡོ་བྷ་ཝ་ཏུ།། །།

[edit]

rtsa gsum kun 'dus o rgyan rdo rje 'chang la gsol ba 'debs pa byin rlabs kyi rol mtsho zhes bya ba bzhugs so/____/gu ru pad+ma sid+d+hi hU~M hrIHphyogs bcu dus gsum rgyal ba sras bcas kyi/____/ye shes gcig tu bsdus pa'i rang gzugs mchog__/srid zhi'i khyab bdag ma hA gu ru la/____/mi phyed snying nas gus pas gsol ba 'debs/____/rab 'byams zhing na mtshan gyi bye brag gi/__rnam mang ngo mtshar sgyu ma'i cho 'phrul brgyad/____/mig 'dzum tsam gyi yul la ston mdzad pa/____/pad+ma rgyal la gus pas gsol ba=____/mtha' bral chos dbyings brdal khyab chen po'i klong /____/zhal phyag mtshan ma'i spros pa las 'das shing /____/ye shes nang gsal gzhon nu bum pa'i sku/____/pad+ma 'od mi 'gyur la=____/rang bzhin 'od gsal lnga ldan zhing chen por/____/longs spyod yongs rdzogs gangs chen rig lnga'i mtsho/____/yon tan bkod pa bsam yas sgyu 'phrul gtso/____/ye shes lnga bdag khyed la=____/thugs rje 'gag med rol pa'i rtsal snang las/____/gang 'dul sprul pa chu zla'i rol gar bzhin/____/bye ba phrag brgya skad cig nyid la ston/____/pad+ma 'byung gnas zhabs la=____/'dzam gling o rgyan sin+d+hu'i rgya mtshor cher/____/dri bral pad+ma stong ldan dkyil 'khor ste/____/dkar gsal mdzes 'dzum mtshan dpe'i 'od phung 'bar/____/o rgyan rin po che la=____/rab 'byams shes bya mtha' dag thugs su chub/____/so sor yang dag rigs bzhi'i gter la dbang /____/mkhyen gnyis ye shes rtsal chen rdzogs pa'i sku/____/blo ldan mchog sred zhabs la=____/rdo rje gdan du rgyu 'bras theg pa bshad/____/sangs rgyas bstan pa'i rgyal mtshan phyogs brgyar bsgrengs/____/lung rtog bshad dang sgrub pas rgyas mdzad pa/____/shAkya seng ge'i zhabs la=____/brtul zhugs spyod pas rdo rje'i gnas yul dang /____/rab 'jigs dur khrod kun na phyogs bcur rgyu/____/dpa' bo Da ki'i tshogs dang dgyes rgur spyod/____/nyi ma 'od zer zhabs la=____/'khor ba'i chos kyi ma chags skyon bral zhing /____/khams gsum ma lus rig pas dbang du sdud/____/gzhan snang zil gnon rang grol spyod pa'i rje/____/pad+ma rgyal po'i zhabs la=____/me dpung mtshor bsgyur za hor rgyal khams 'dul/____/mu steg ngan pa'i dug gis bkrongs ma nus/____/bde chen rdo rje sems dpa'i lang tsho rgyas/____/mtsho skyes rdo rje'i zhabs la=____/'phags yul thub dbang chos kyi sgron me sbar/____/yang dag rig pa'i rgyal rnga phyogs brgyar brdung /__rtag chad sde dpung rdzu 'phrul chen pos 'dul/____/seng+ge sgra sgrog zhabs la=____/gangs can yul byon lha srin dam la btags/____/gtsug lag khang bzhengs mdo sngags dam chos bsgyur/____/thugs sras rdo rje'i rig 'dzin rgya mtsho bskrun/____/rdo rje gro lod rtsal la=____/chos nor gter kha dpag tu med pa sbas/____/las can skyes bu rim par lung bstan cing /____/gu ru nyid dang dngos mtshungs sku tshab kyis/____/dad ldan 'gro ba 'dul la=____/'gro lding yul du phra men dam la 'dog__/rdo rje theg pa'i 'dul zhing rgyas par mdzad/____/da lta rnga yab srin por chos ston pa/____/rak+Sha thod phreng rgyal la=____/bla ma kun 'dus yi dam zhi khro'i bdag__/mkha' 'gro'i tshogs dpon chos skyongs yongs kyi rje/____/nor lha kun 'dus mchog gsum 'dus pa'i sku/____/o rgyan rdo rje 'chang la gsol ba 'debs/____/thugs rjes gzigs pas bod la lhag bar dgongs/____/tshes bcu byung res dngos su byon par bzhes/____/thugs dam mi g.yel brtse bas dgongs mdzad la/____/gsang ba gsum gyi byin brlab dus 'dir rtsol/____/nyams rtog rig pa'i rtsal chen sbar ba dang /____/bstan 'gro'i don chen 'bad med lhun gyis grub/____/byang chub sgrub la bar du gcod pa kun/____/rtswa sbur me bzhin ming tsam med par mdzod/____/tshul khrims dag pa'i gzi 'od rab 'bar zhing /____/thos bsam bsgom pa'i dga' ston rab rgyas shing /____/byang chub sems gnyis mi nyams gong du 'phel/____/grub gnyis bdud rtsi'i dpal la spyod par shog__/'jig rten kun tu nad mug mtshon 'khrug zhi/____/lo phyug 'phel rgyas dge bcu'i chos la spyod/____/bod khams bstan 'gror 'tshe ba'i mtha' dmag tshogs/____/rab khros rdo rje'i shugs kyis 'joms par mdzod/____/skye ba kun tu bla ma o rgyan rje/____/mi 'bral snying dbus pad+mor rtag tu mchod/____/de yi byin brlab sgo gsum la zhugs pas/____/pad+ma rgyal dang rnam dbyer med par shog__/bkra shis 'chi med tshe dbang rig 'dzin gyi/____/byin brlab bkra shis char du bsnyil ba dang /____/'chi bdag bdud kyi dpung tshogs kun zhi nas/____/skye 'chi kun bral rdo rje'i bkra shis shog__/ces pa'ang shing phag cho 'phrul zla ba'i tshes gcig zla ba gro bzhin gyi 'grub sbyor bzang por pad+ma'i bran du 'khod pa 'jam dbyangs chos kyi blo gros pas gsol ba btab pa 'dis kyang ye shes chen po'i byin brlab lhag par smin pa'i rgyur gyur cig__/sarba dA ka l+yA NaM su shri yo b+ha wa tu//____//_