JKCL-KABUM-02-KHA-059

Previous Text"KHA" is not a number. Back to Volume Page"KHA" is not a number.Next Text "KHA" is not a number.

Wylie title
Location	chos kyi blo gros bka' 'bum Volume , Text 59, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"KHA" is not a number.

<ul><li>":Property:textsubnumber|textsubnumber" can not be assigned to a declared number type with value 1.</li> <!--br--><li>"KHA" is not a number.</li></ul>

Tibetan Text

Wylie

[edit]

ཀུན་མཁྱེན་ཆེན་པོ་ལ་བསྟོད་པ་རབ་དགའི་དབྱངས་སྙན་ཞེས་བྱ་བ་བཞུགས་སོ། །རྒྱ་གར་སྐད་དུ། སརྦ་ཛྙཱ་བི་མ་ལ་ར་སྨི་པྲཱ་ནནྡ་སྭ་ར་སྱེ་སྟུ་ཏི་ན་མ། བོད་སྐད་དུ། ཀུན་མཁྱེན་དྲི་མེད་འོད་ཟེར་ལ་བསྟོད་པ་རབ་དགའི་དབྱངས་སྙན་ཞེས་བྱ་བ། གང་གི་རང་བཞིན་མཁའ་ལྟར་ཟབ་པ་ལས། །དམིགས་མེད་སྙིང་རྗེའི་འོད་ཟེར་ཞགས་པ་ཡིས། །མཐའ་ཡས་འགྲོ་རྣམས་ཉེར་ཞིར་འཁྲིད་མཛད་པ། །ཀུན་མཁྱེན་ཆོས་ཀྱི་རྒྱལ་པོ་ལ་ཕྱག་འཚལ། །ཐོག་མའི་མགོན་པོ་འཁོར་འདས་སྤྱི་དཔལ་ཆེ། །སངས་རྒྱས་ཀུན་གྱི་མེས་པོ་འོད་མི་འགྱུར། །མི་གཡོ་མི་འཕོ་མཚན་མཚོན་བརྗོད་འདས་ཀྱང་། །ངོ་མཚར་སྤྲུལ་པའི་གཟུགས་སྐུ་ཞིང་འདིར་འཕོས། །ངག་གི་དབང་ཕྱུག་རྡོ་རྗེ་རྣོན་པོ་ཡི། །མཁྱེན་རབ་གོང་བུ་ཐབས་ཤེས་བཅུད་སྨིན་པས། །རྟ་མཆོག་གྲུབ་པའི་རིགས་ཀྱི་ཐིག་ལེ་ཆེར། །བརྟན་པའི་འཁོར་ལོ་གཞོན་ནུའི་རྣམ་པར་རོལ། །སྐྱེ་བ་སྐྱེ་བར་སྦྱངས་པའི་མཐུ་བརྟས་པས། །ཆོས་ཀུན་གཟིགས་པ་དེ་ཡི་དེ་མ་ཐག །རང་གི་མཚན་ཉིད་མ་ལུས་དཔྱིས་ཕྱིན་པ། །ཐུགས་གསང་དཔལ་བེའི་ལྟོ་བར་རབ་ཏུ་བསྐྱིལ། །ཚུལ་ཁྲིམས་གསེར་རིའི་ལྷུན་པོ་མཐོ་ཞིང་བརྟན། །ཏིང་འཛིན་བང་རིམ་བཞི་ཡིས་མངོན་པར་མཛེས། །ཤེས་རབ་ཉི་ཟླས་མགུལ་པར་རབ་འཁྱུད་པའི། །འོད་ཀྱིས་གླིང་བཞིའི་མུན་པ་སེལ་བར་བྱས། །བློ་གྲོས་རྣམ་རྒྱལ་བ་གམ་བཀོད་མཛེས་པར། །སྒྲ་སྙན་སྡེབས་སྦྱོར་སྐར་རྩིས་ཟློས་གར་དང་། །བཟོ་དང་གསོ་བ་ལོག་སྨྲ་ཚར་གཅོད་པའི། །གཏན་ཚིགས་རིག་པའི་ཉེ་དབང་རྣམས་ཀྱིས་བསྐོར། །མདོ་སྔགས་བསམ་ཡས་ཆོས་ཚུལ་རབ་འབྱམས་རྣམས། །རྒྱལ་གསུང་བཀའ་དང་འཛམ་གླིང་ཤིང་རྟ་ཆེའི། །རིང་ལུགས་ཇི་བཞིན་བཀྲལ་ལ་རྣམ་དཔྱོད་ཀྱི། །སྤོབས་པ་མི་འཕྲོག་འཇིགས་མེད་སྤྱན་སྟོང་བཀྲ། །ཁྱད་པར་ཟབ་མོ་ནང་རྒྱུད་སྡེ་གསུམ་ཞེས། །རྒྱལ་བ་རིག་འཛིན་ཀུན་གྱི་ཐུགས་ཀྱི་བཅུད། །ཆེས་གསང་རྒྱུད་ལུང་མན་ངག་འཛིན་པ་ལ། །གསང་བདག་དཔའ་བོ་རྡོ་རྗེ་ཆོས་སུ་སྣང་། །མཆོག་གསང་རྡོ་རྗེ་རྩེ་མོའི་དགོངས་པའི་མཛོད། །ཀུན་བཟང་རྡོར་སེམས་དགའ་རབ་དཔའ་བོ་ཡིས། །རིལ་པོར་བྱས་ནས་གང་ཐུགས་དབྱིངས་སུ་བསྟིམ། །ཀློང་ཆེན་དགོངས་པའི་རྩལ་གྱི་གནམ་འཕང་གཅོད། །རབ་འབྱམས་བཀའ་ཡི་གཤོག་ཡངས་དཀར་པོར་བསྐྱོད། །སྣ་ཚོགས་ཆོས་ཀུན་རོ་མཉམ་ཆེན་པོར་བརྡལ། །ཐོགས་མེད་རང་གྲོལ་ཤུགས་འཆང་མཁའ་ལྡིང་དབང་། །སྲིད་གསུམ་འགྲན་ཟླ་སྤངས་པའི་ཆོས་ཀྱི་རྗེ། །ཐེག་མཆོག་བསྟན་པ་ནོར་བུའི་དབྱིག་ལྡན་པའི། །འཛམ་བུའི་གསེར་གྱི་ཤིང་རྟ་དྲངས་པ་ལ། །ཁྱོད་འདྲ་འཇིག་རྟེན་གསུམ་ན་གཞན་མ་མཆིས། །དྲི་མེད་བཤེས་གཉེན་དགེ་བའི་བཤེས་སུ་སྟོན། །རྣམ་དག་ལུང་དང་རིགས་པའི་འོད་ཟེར་གྱི། །སྣང་བ་བརྒྱ་ཕྲག་འབྱེད་པའི་སྐབས་ཕྱེས་པས། །གངས་ཅན་མཁས་པ་ཀུན་གྱི་གཙུག་ན་མཐོ། །གྲགས་པ་དོན་ལྡན་ཀུན་མཁྱེན་བླ་མ་རྒྱལ། །ཕྱོགས་ལས་རྣམ་རྒྱལ་སྨྲ་བའི་སེང་གེ་ཡི། །གསུང་གི་སྣང་བས་བློ་གྲོས་པད་ཚལ་འབྱེད། །མཁས་གྲུབ་བུང་བ་འདུ་བའི་ཚལ་ཆེན་པོ། །གངས་ཅན་མཁས་དང་གྲུབ་པའི་མདུན་སར་མཛེས། །སྔར་ཡང་ཁྱོད་ཀྱི་དྲིན་ལས་ལུང་རིགས་ཀྱི། །དགའ་བའི་དཔལ་གྱིས་བརྒྱན་པ་མང་དུ་བྱུང་། །ད་དུང་རྣམ་འདྲེན་བསྟན་པ་མ་རྫོགས་བར། །ཁྱོད་ཀྱི་ལེགས་གསུང་མཐུ་ལས་སྨྲ་མཁས་འགྱུར། །ཚིག་གི་སྤུན་པ་མིན་པའི་དོན་གྱི་བཅུད། །འཆི་མེད་ལྷ་ཡི་བདུད་རྩི་བཞིན་དུ་ལྕི། །བློ་ལྡན་གང་གི་མྱོང་བས་གྲུབ་གཉིས་ཀྱི། །ངོ་མཚར་ནོར་བུའི་གཏེར་ལ་སྤྱོད་པས་འཕགས། །དེ་ཕྱིར་ཀུན་མཁྱེན་མགོན་པོའི་གསང་གསུམ་གྱི། །ཡོན་ཏན་སངས་རྒྱས་ཀུན་དང་མཉམ་པའི་ཕྱིར། །བདག་གི་བརྗོད་པའི་ངལ་བ་འདིས་ཅི་བྱ། །འོན་ཀྱང་བྱིན་རླབས་ཤས་ཙམ་འཇུག་པའི་ཕྱིར། །བསྟོད་པའི་དགེ་བས་བདག་གཞན་སེམས་ཅན་ཀུན། །རྒྱལ་བ་གཉིས་པའི་གོ་འཕང་ཐོབ་ཕྱིར་དུ། །ཀུན་ཏུ་བཟང་པོའི་ཡོངས་བསྔོའི་རྗེས་འགྲོ་ཞིང་། །རླབས་ཆེན་རྒྱལ་སྲས་སྤྱོད་པར་འཇུག་གྱུར་ཅིག །གདོད་ནས་ཡེ་སངས་རྒྱས་ཀྱང་ཕྱི་མའི་མཐར། །བདེ་བར་གཤེགས་ཀྱི་གོ་འཕང་བརྙེས་པའི་ཚེ། །རི་རབ་མར་མེའི་རྒྱལ་མཚན་ཞལ་མཐོང་ཞིང་། །ཆོས་ཀྱི་འཁོར་ལོ་རྫོགས་པར་ལོངས་སྤྱོད་ཤོག །ཐུབ་བསྟན་སྤྱི་དང་སྔ་འགྱུར་རྡོ་རྗེའི་ཐེག །འཕགས་པའི་ལམ་གྱི་རྗེས་འགྲོ་ངེས་གསང་ཆོས། །རྟོག་གེའི་དུག་ཆུས་བསླད་པ་དང་བྲལ་བ། །ཇི་བཞིན་བཤད་དང་སྒྲུབ་པས་ཁྱབ་གྱུར་ཅིག །ཅེས་པའང་ཤིང་བྱ་ལོ་རྒྱལ་ཟླའི་དུས་དྲན་མཆོད་པའི་ཉིན་སྣང་གསལ་ངོགས་སུ་བློ་གྲོས་རྒྱ་མཚོའི་སྤྲིན་གྱིས་དད་མོས་ཆེན་པོས་བྲིས་པ་དགེའོ། ། །།

[edit]

kun mkhyen chen po la bstod pa rab dga'i dbyangs snyan zhes bya ba bzhugs so/____/rgya gar skad du/__sarba dz+nyA bi ma la ra smi prA nan+da swa ra s+ye stu ti na ma/__bod skad du/__kun mkhyen dri med 'od zer la bstod pa rab dga'i dbyangs snyan zhes bya ba/__gang gi rang bzhin mkha' ltar zab pa las/____/dmigs med snying rje'i 'od zer zhags pa yis/____/mtha' yas 'gro rnams nyer zhir 'khrid mdzad pa/____/kun mkhyen chos kyi rgyal po la phyag 'tshal/____/thog ma'i mgon po 'khor 'das spyi dpal che/____/sangs rgyas kun gyi mes po 'od mi 'gyur/____/mi g.yo mi 'pho mtshan mtshon brjod 'das kyang /____/ngo mtshar sprul pa'i gzugs sku zhing 'dir 'phos/____/ngag gi dbang phyug rdo rje rnon po yi/____/mkhyen rab gong bu thabs shes bcud smin pas/____/rta mchog grub pa'i rigs kyi thig le cher/____/brtan pa'i 'khor lo gzhon nu'i rnam par rol/____/skye ba skye bar sbyangs pa'i mthu brtas pas/____/chos kun gzigs pa de yi de ma thag__/rang gi mtshan nyid ma lus dpyis phyin pa/____/thugs gsang dpal be'i lto bar rab tu bskyil/____/tshul khrims gser ri'i lhun po mtho zhing brtan/____/ting 'dzin bang rim bzhi yis mngon par mdzes/____/shes rab nyi zlas mgul par rab 'khyud pa'i/____/'od kyis gling bzhi'i mun pa sel bar byas/____/blo gros rnam rgyal ba gam bkod mdzes par/____/sgra snyan sdebs sbyor skar rtsis zlos gar dang /____/bzo dang gso ba log smra tshar gcod pa'i/____/gtan tshigs rig pa'i nye dbang rnams kyis bskor/____/mdo sngags bsam yas chos tshul rab 'byams rnams/____/rgyal gsung bka' dang 'dzam gling shing rta che'i/____/ring lugs ji bzhin bkral la rnam dpyod kyi/____/spobs pa mi 'phrog 'jigs med spyan stong bkra/____/khyad par zab mo nang rgyud sde gsum zhes/____/rgyal ba rig 'dzin kun gyi thugs kyi bcud/____/ches gsang rgyud lung man ngag 'dzin pa la/____/gsang bdag dpa' bo rdo rje chos su snang /____/mchog gsang rdo rje rtse mo'i dgongs pa'i mdzod/____/kun bzang rdor sems dga' rab dpa' bo yis/____/ril por byas nas gang thugs dbyings su bstim/____/klong chen dgongs pa'i rtsal gyi gnam 'phang gcod/____/rab 'byams bka' yi gshog yangs dkar por bskyod/____/sna tshogs chos kun ro mnyam chen por brdal/____/thogs med rang grol shugs 'chang mkha' lding dbang /____/srid gsum 'gran zla spangs pa'i chos kyi rje/____/theg mchog bstan pa nor bu'i dbyig ldan pa'i/____/'dzam bu'i gser gyi shing rta drangs pa la/____/khyod 'dra 'jig rten gsum na gzhan ma mchis/____/dri med bshes gnyen dge ba'i bshes su ston/____/rnam dag lung dang rigs pa'i 'od zer gyi/____/snang ba brgya phrag 'byed pa'i skabs phyes pas/____/gangs can mkhas pa kun gyi gtsug na mtho/____/grags pa don ldan kun mkhyen bla ma rgyal/____/phyogs las rnam rgyal smra ba'i seng ge yi/____/gsung gi snang bas blo gros pad tshal 'byed/____/mkhas grub bung ba 'du ba'i tshal chen po/____/gangs can mkhas dang grub pa'i mdun sar mdzes/____/sngar yang khyod kyi drin las lung rigs kyi/____/dga' ba'i dpal gyis brgyan pa mang du byung /____/da dung rnam 'dren bstan pa ma rdzogs bar/____/khyod kyi legs gsung mthu las smra mkhas 'gyur/____/tshig gi spun pa min pa'i don gyi bcud/____/'chi med lha yi bdud rtsi bzhin du lci/____/blo ldan gang gi myong bas grub gnyis kyi/____/ngo mtshar nor bu'i gter la spyod pas 'phags/____/de phyir kun mkhyen mgon po'i gsang gsum gyi/____/yon tan sangs rgyas kun dang mnyam pa'i phyir/____/bdag gi brjod pa'i ngal ba 'dis ci bya/____/'on kyang byin rlabs shas tsam 'jug pa'i phyir/____/bstod pa'i dge bas bdag gzhan sems can kun/____/rgyal ba gnyis pa'i go 'phang thob phyir du/____/kun tu bzang po'i yongs bsngo'i rjes 'gro zhing /____/rlabs chen rgyal sras spyod par 'jug gyur cig__/gdod nas ye sangs rgyas kyang phyi ma'i mthar/____/bde bar gshegs kyi go 'phang brnyes pa'i tshe/____/ri rab mar me'i rgyal mtshan zhal mthong zhing /____/chos kyi 'khor lo rdzogs par longs spyod shog__/thub bstan spyi dang snga 'gyur rdo rje'i theg__/'phags pa'i lam gyi rjes 'gro nges gsang chos/____/rtog ge'i dug chus bslad pa dang bral ba/____/ji bzhin bshad dang sgrub pas khyab gyur cig__/ces pa'ang shing bya lo rgyal zla'i dus dran mchod pa'i nyin snang gsal ngogs su blo gros rgya mtsho'i sprin gyis dad mos chen pos bris pa dge'o/__/____//_