JKW-KABAB-02-KHA-036

🚧 This website is under continued development. We appreciate your patience!

Previous Text"KHA" is not a number. Back to Volume Page"KHA" is not a number.Next Text "KHA" is not a number.

Wylie title
Location	mkhyen brtse'i bka' babs Volume , Text 36, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation
Genre	Revelations - gter ma
Karchag page	JKW-KABAB-Volume-02-KHA-Karchag"KHA" is not a number.

"KHA" is not a number.

Tibetan Text

Wylie

[edit]

༄༅། །ན་ཚ་ལམ་ཁྱེར་གྱི་རྡོ་རྗེའི་ཐོལ་གླུ་ཆོས་ཉིད་གྲུབ་པའི་བདུད་རྩི་ཞེས་བྱ་བ།།ཨ་ཧོ། འཁོར་འདས་ཀྱི་ཆོས་རྣམས་ཐམས་ཅད་ཀུན། །འོད་གསལ་བའི་དབྱིངས་སུ་ཟད་ནས་སླར། །འཕོ་ཆེན་གྱི་གཟུགས་སྐུར་ཡོངས་བཞེངས་པ། །དཔལ་འཆི་མེད་པདྨ་ཀཱ་རར་འདུད། །ཕྱི་འབྱུང་བཞི་འདུས་པའི་ཕུང་པོ་ལ། །གློ་བུར་བྲོ་ནད་ཀྱིས་ཐེབས་པའི་ཚེ། །ནང་རིག་སྟོང་གཉུག་མའི་ཁྱེའུ་ཡིས། །སྣང་བ་ལམ་ཁྱེར་གྱི་གླུ་འདི་བླངས། །གནས་འཁོར་བ་མཐོ་དམན་གར་སྐྱེས་ཀྱང༌། །ཚུལ་འདི་ལྟའི་སྡུག་བསྔལ་འབའ་ཞིག་ལས། །གཏན་བདེ་བའི་གོ་སྐབས་བྲལ་བར་མཐོང༌། །འདི་ངེས་འབྱུང་ལམ་ཁྱེར་གྱི་གནད་གཅིག་ལགས། །དོན་དེ་སླད་མ་གྱུར་འགྲོ་བ་ཡི། །སྡུག་བསྔལ་བདག་ལ་ལེན་པ་དང༌། །བདག་ཉིད་ཀྱི་བདེ་བ་གཞན་ལ་གཏོང༌། །འདི་སྙིང་རྗེ་ལམ་ཁྱེར་གྱི་གནད་གཅིག་ལགས། །ཚེ་རབས་ནས་བསགས་པའི་སྡིག་ལྟུང་ཚོགས། །རྐྱེན་ངན་ལ་བསྟེན་ནས་སྦྱང་བའི་ཕྱིར། །ཕ་བླ་མའི་ཐུགས་རྗེར་སྙིང་ནས་དད། །འདི་མོས་གུས་ལམ་ཁྱེར་གྱི་གནད་གཅིག་ལགས། །ནད་ཟུག་རྔུའི་ངོ་བོར་བལྟས་པའི་ཚེ། །སྤང་གཉེན་གྱི་གཟུང་འཛིན་དབྱིངས་སུ་ཡལ། །བདེ་སྟོང་གི་ཉམས་ཞིག་དེ་རུ་འཆར། །འདི་ཕྱག་ཆེན་ལམ་ཁྱེར་གྱི་གནད་གཅིག་ལགས། །ནང་བདག་གཞན་གཉིས་ཀ་རྒྱུ་མེད་པས། །སྐྱེ་བ་དང་འགགས་པ་མ་མཆིས་ཕྱིར། །སྟོང་པ་དང་རྟེན་འབྱུང་འགལ་མེད་རྟོགས། །འདི་དབུ་མ་ལམ་ཁྱེར་གྱི་གནད་གཅིག་ལགས། །སྡུག་བསྔལ་གྱི་ཟུག་རྔུ་མྱོང་བའི་སེམས། །རང་རིག་པའི་དཔའ་འོས་ཟིལ་མནན་པས། །ཅེར་གྲོལ་གྱི་ཡེ་ཤེས་དེ་རུ་མཇལ། །འདི་རྫོགས་ཆེན་ལམ་ཁྱེར་གྱི་གནད་གཅིག་ལགས། །གཤིས་གདོད་ནས་དག་པའི་ཆོས་ཉིད་ལ། །གློ་བུར་གྱི་རྟོག་པ་རང་སར་གྲོལ། །དོན་དེ་ཕྱིར་སྨྲ་བསམ་བརྗོད་ལས་འདས། །འདི་ལྟ་བ་ལམ་ཁྱེར་གྱི་གནད་གཅིག་ལགས། །སེམས་ཐོག་ཏུ་ནད་ཟུག་མ་བླངས་པར། །ནད་ཐོག་ཏུ་རིག་སྟོང་རྗེན་པར་བཞག །ཡེངས་མེད་ལ་འཛིན་མེད་ཀྱི་དྲན་པས་སྐྱོང༌། །འདི་སྒོམ་པ་ལམ་ཁྱེར་གྱི་གནད་གཅིག་ལགས། །ཀུན་རྫོབ་ཏུ་གཟུགས་ཕུང་ཚོགས་སུ་ཕུལ། །དོན་དམ་དུ་དབྱིངས་རིག་དབྱེར་མེད་བསྲེས། །དུས་ཀུན་ཏུ་འཁོར་གསུམ་སྒྱུ་མར་བལྟས། །འདི་སྤྱོད་པ་ལམ་ཁྱེར་གྱི་གནད་གཅིག་ལགས། །བཟོད་མེད་ཀྱི་ནད་ཟུག་གཡོ་འཕྲུལ་པོ། །ད་ལྟ་ཡི་ཤེས་པ་རྗེན་པའི་ཀློང༌། །སྐྱེ་འགགས་དང་གནས་གསུམ་བྲལ་བར་ཐིམ། །འདི་ཆོས་སྐུ་ལམ་ཁྱེར་གྱི་གནད་གཅིག་ལགས། །དབྱིངས་བླཽ་འདས་རྣམ་ཀུན་མཆོག་ལྡན་པས། །རྩལ་སྣང་སྟོང་ཆུ་ཟླ་ལྟ་བུར་ཤར། །ཤར་ཙམ་ནས་རང་གི་ངོ་བོར་གྲོལ། །འདི་ལོངས་སྐུ་ལམ་ཁྱེར་གྱི་གནད་གཅིག་ལགས། །རྐྱེན་གང་བྱུང་ངོ་བོའི་ཐུགས་རྗེ་ལ། །རོ་སྙོམས་ཀྱི་བརྟུལ་ཞུགས་ལམ་ལོངས་པས། །རེ་དོགས་ཀྱི་བླང་དོར་ཐད་ཀར་བཅད། །འདི་སྤྲུལ་སྐུ་ལམ་ཁྱེར་གྱི་གནད་གཅིག་ལགས། །ཚིག་དེ་སྐད་གསལ་འདེབས་ཉམས་ཀྱི་གླུ། །གནས་ལྷོ་མོན་ནགས་མའི་ལྗོངས་ཀྱི་མགོ། །དཔལ་སྐུ་ལྷ་མཁའ་རིའི་ཉེ་ཞོལ་དུ། །སྤྲང་གཏད་མེད་པདྨ་དགྱེས་པས་བྲིས།། །།

[edit]

@#/__/na tsha lam khyer gyi rdo rje'i thol glu chos nyid grub pa'i bdud rtsi zhes bya ba//a ho/__'khor 'das kyi chos rnams thams cad kun/__/'od gsal ba'i dbyings su zad nas slar/__/'pho chen gyi gzugs skur yongs bzhengs pa/__/dpal 'chi med pad+ma kA rar 'dud/__/phyi 'byung bzhi 'dus pa'i phung po la/__/glo bur bro nad kyis thebs pa'i tshe/__/nang rig stong gnyug ma'i khye'u yis/__/snang ba lam khyer gyi glu 'di blangs/__/gnas 'khor ba mtho dman gar skyes kyang*/__/tshul 'di lta'i sdug bsngal 'ba' zhig las/__/gtan bde ba'i go skabs bral bar mthong*/__/'di nges 'byung lam khyer gyi gnad gcig lags/__/don de slad ma gyur 'gro ba yi/__/sdug bsngal bdag la len pa dang*/__/bdag nyid kyi bde ba gzhan la gtong*/__/'di snying rje lam khyer gyi gnad gcig lags/__/tshe rabs nas bsags pa'i sdig ltung tshogs/__/rkyen ngan la bsten nas sbyang ba'i phyir/__/pha bla ma'i thugs rjer snying nas dad/__/'di mos gus lam khyer gyi gnad gcig lags/__/nad zug rngu'i ngo bor bltas pa'i tshe/__/spang gnyen gyi gzung 'dzin dbyings su yal/__/bde stong gi nyams zhig de ru 'char/__/'di phyag chen lam khyer gyi gnad gcig lags/__/nang bdag gzhan gnyis ka rgyu med pas/__/skye ba dang 'gags pa ma mchis phyir/__/stong pa dang rten 'byung 'gal med rtogs/__/'di dbu ma lam khyer gyi gnad gcig lags/__/sdug bsngal gyi zug rngu myong ba'i sems/__/rang rig pa'i dpa' 'os zil mnan pas/__/cer grol gyi ye shes de ru mjal/__/'di rdzogs chen lam khyer gyi gnad gcig lags/__/gshis gdod nas dag pa'i chos nyid la/__/glo bur gyi rtog pa rang sar grol/__/don de phyir smra bsam brjod las 'das/__/'di lta ba lam khyer gyi gnad gcig lags/__/sems thog tu nad zug ma blangs par/__/nad thog tu rig stong rjen par bzhag__/yengs med la 'dzin med kyi dran pas skyong*/__/'di sgom pa lam khyer gyi gnad gcig lags/__/kun rdzob tu gzugs phung tshogs su phul/__/don dam du dbyings rig dbyer med bsres/__/dus kun tu 'khor gsum sgyu mar bltas/__/'di spyod pa lam khyer gyi gnad gcig lags/__/bzod med kyi nad zug g.yo 'phrul po/__/da lta yi shes pa rjen pa'i klong*/__/skye 'gags dang gnas gsum bral bar thim/__/'di chos sku lam khyer gyi gnad gcig lags/__/dbyings blau 'das rnam kun mchog ldan pas/__/rtsal snang stong chu zla lta bur shar/__/shar tsam nas rang gi ngo bor grol/__/'di longs sku lam khyer gyi gnad gcig lags/__/rkyen gang byung ngo bo'i thugs rje la/__/ro snyoms kyi brtul zhugs lam longs pas/__/re dogs kyi blang dor thad kar bcad/__/'di sprul sku lam khyer gyi gnad gcig lags/__/tshig de skad gsal 'debs nyams kyi glu/__/gnas lho mon nags ma'i ljongs kyi mgo/__/dpal sku lha mkha' ri'i nye zhol du/__/sprang gtad med pad+ma dgyes pas bris//__//