འཇིག་རྟེན་དབང་ཕྱུག་སེང་གེ་སྒྲའི་གདམས་པ་ཟབ་མོའི་གསལ་བྱེད་གཞན་ཕན་བདུད་རྩིའི་ཟིལ་དངར།

🚧 This website is under continued development. We appreciate your patience!

Previous Text Back to Volume PageNext Text

Wylie title	'jig rten dbang phyug seng ge sgra'i gdams pa zab mo'i gsal byed gzhan phan bdud rtsi'i zil dngar
Location	mkhyen brtse'i bka' 'bum Volume 12, sde tshan 1, Text 14, Pages 123-146 (Folios 62a3 to 73b3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	བསོད་ནམས་རྩེ་མོ་ (bsod nams rtse mo)
Citation	'jam dbyangs mkhyen brtse'i dbang po. 'jig rten dbang phyug seng ge sgra'i gdams pa zab mo'i gsal byed gzhan phan bdud rtsi'i zil dngar. In 'jam dbyangs mkhyen brtse'i dbang po'i bka' 'bum, Vol. 12: 123-146. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Spiritual Instructions - gdams ngag
Deity	'jig rten dbang phyug seng ge sgra
Colophon	།ཅེས་པའང་སྙིགས་མའི་དུས་ཀྱི་གཞན་དབང་དུ་གྱུར་པས་གདམས་ངག་ཉི་ཚེ་བ་ལ་བློ་གཏོད་ཅིང་། གདུག་པའི་འབྱུང་པོ་སྐྱབས་སུ་བསྙེན་པ་ལས། འདི་ལྟ་བུའི་ཚད་ལྡན་གྱི་གཞུང་ལ་བློ་གྲོས་འཇུག་པའི་བསོད་ནམས་ཅན་དཀོན་པའི་དངོས་པོར་གྱུར་ཀྱང་། རང་ཉིད་ཁོ་ནའི་མོས་པའི་དབང་དུ་བྱས་ཏེ། བྱ་བྲལ་སྤོང་བ་པ་འཇམ་དབྱངས་མཁྱེན་བརྩེས་སློབ་དཔོན་རིན་པོ་ཆེ་བསོད་ནམས་རྩེ་མོའི་གསུང་རབ་དང་། དཀར་སྟོན་ཤཱཀྱ་གྲགས། དམར་ཆོས་ཀྱི་རྒྱལ་པོ། ཀུན་མཁྱེན་རཏྣ་ཤྲཱི་སོགས་ཀྱི་གཞུང་གསལ་བྱེད་དང་བཅས་པ་ལས་ཉེར་མཁོའི་ཟིན་བྲིས་ཁྱུགས་ཙམ་སྤེལ་བ་དགེ་ལེགས་མཆོག་ཏུ་གྱུར་ཅིག
	ces pa'ang snyigs ma'i dus kyi gzhan dbang du gyur pas gdams ngag nyi tshe ba la blo gtod cing /__gdug pa'i 'byung po skyabs su bsnyen pa las/__'di lta bu'i tshad ldan gyi gzhung la blo gros 'jug pa'i bsod nams can dkon pa'i dngos por gyur kyang /__rang nyid kho na'i mos pa'i dbang du byas te/__bya bral spong ba pa 'jam dbyangs mkhyen brtses slob dpon rin po che bsod nams rtse mo'i gsung rab dang /__dkar ston shAkya grags/__dmar chos kyi rgyal po/__kun mkhyen rat+na shrI sogs kyi gzhung gsal byed dang bcas pa las nyer mkho'i zin bris khyugs tsam spel ba dge legs mchog tu gyur cig

1 Texts in this Section (sde tshan or chos tshan)

14 123-146	འཇིག་རྟེན་དབང་ཕྱུག་སེང་གེ་སྒྲའི་གདམས་པ་ཟབ་མོའི་གསལ་བྱེད་གཞན་ཕན་བདུད་རྩིའི་ཟིལ་དངར། 'jig rten dbang phyug seng ge sgra'i gdams pa zab mo'i gsal byed gzhan phan bdud rtsi'i zil dngar Activity Manual - las byang   ·   Spiritual Instructions - gdams ngag	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །འཇིག་རྟེན་དབང་ཕྱུག་སེང་གེ་སྒྲའི་གདམས་པ་ཟབ་མོའི་གསལ་བྱེད་གཞན་ཕན་བདུད་རྩིའི་ཟིལ་དངར་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། ཐུགས་རྗེའི་བདུད་རྩིས་ཁམས་གསུམ་ཀུན། །དབུགས་འབྱིན་འཕགས་པའི་ཟླ་བ་ནི། །དད་པའི་ཡིད་མཚོར་རྟག་བསྙེན་ནས། །གདམས་ཟབ་ཟིལ་དངར་ཅུང་ཟད་སྤེལ། །འཇིག་རྟེན་དབང་ཕྱུག་སེང་གེ་སྒྲའི་རྣལ་འབྱོར་ལ་བརྟེན་ནས་རང་གཞན་གྱི་དོན་གཉིས་བསྒྲུབ་པར་འདོད་པས་འདི་ལྟར་ཤེས་པར་བྱ་སྟེ། སྔོན་ཏུ་བསྙེན་པའི་ཆོ་ག་དང་། གཟུངས་སྒྲུབ་པའི་ཆོ་ག་དང་། གདོན་ལས་འགྲོལ་བའི་ཆོ་གའོ། །དང་པོ་ལ་གསུམ། །ལྷ་བསྒོམ་པ། སྔགས་བཟླ་བ། ཐུན་མཚམས་ཀྱི་བྱ་བའོ། །དང་པོ་ལ་གཉིས། སྔོན་འགྲོ་ཚོགས་གཉིས་བསགས་པ་དང་། དངོས་གཞི་ལྷ་བསྒོམ་པའོ། །དང་པོ་ནི། གནས་དབེན་ཞིང་ཡིད་དང་མཐུན་པར་ཁྲུས་དང་གཙང་སྦྲ་ལ་གནས་པས། མདུན་ཏུ་བྲིས་སྐུ་ཡོད་ན་དགྲམ་པའི་སྤྱན་སྔར་མཆོད་གཏོར་བཤམ། སྐྱབས་འགྲོ་སེམས་བསྐྱེད་སྔོན་ཏུ་འགྲོ་བས་རང་སྐད་ཅིག་གིས་སེང་གེ་སྒྲར་གསལ་བའི་སྙིང་གའི་འོད་ཀྱིས་ཚོགས་ཞིང་སྤྱན་དྲང་། ཕྱག་འཚལ་ཞིང་མཆོད་པ་འབུལ་བ་དང་། སྡིག་པ་བཤགས་པ་ལ་སོགས་པའི་ཡན་ལག་བདུན་པའི་རྗེས། ཨོཾ་བཛྲ་མུཿས་ཚོགས་ཞིང་མི་དམིགས་པར་གཤེགས་སུ་གསོལ། ཚད་མེད་པ་བཞིས་རྒྱུད་སྦྱོང་བ་དང་བཅས་པ་ནི་བསོད་ནམས་ཀྱི་ཚོགས་དང་། ཤཱུནྱ་ཏཱའི་སྔགས་དོན་དྲན་པས་འོད་གསལ་སྟོང་པ་ཉིད་ཀྱི་དབྱིངས་སུ་མཉམ་པར་འཇོག་པ་ནི་ཡེ་ཤེས་ཀྱི་ཚོགས་བསགས་པའོ། །གཉིས་པ་ནི། ཚོགས་གཉིས་ཀྱི་རང་འབྲས་ཆོས་དང་གཟུགས་ཀྱི་སྐུ་ཟུང་དུ་འཇུག་པའི་ཡི་དམ་གྱི་ལྷ་ཡན་ལག་བཞི་རྫོགས་སུ་བསྐྱེད་ཅིང་། གསལ་སྣང་ལ་རྩེ་གཅིག་ཏུ་སེམས་འཛིན་པས་ལྷའི་སྐུ་སྒྱུ་མ་ལྟ་བུ་གསལ་ཞིང་བརྟན་པར་མ་གྱུར་གྱི་བར་དེ་སྲིད་དུ་བསྒོམ་པའོ། །གཉིས་པ་སྔགས་བཟླ་བ་ནི། དེས་སྐྱོ་ན་ཐུགས་ཀར་སྔགས་ཕྲེང་བཀོད་དེ། ཇི་སྐད་བཤད་པའི་འོད་ཟེར་སྤྲོ་བསྡུའི་སྦྱོར་བ་དང་བཅས་ཏེ་སྙིང་པོ་དང་། གཟུངས་རིང་ཇི་ལྟར་རིགས་པ་བཟླ། ཐུན་ལས་ལྡང་བར་འདོད་ན། བདག་བསྐྱེད་ཀྱི་ཡེ་ཤེས་པ་མདུན་མཁར་བྱོན་པ་ལ་མཆོད་ཅིང་བཟོད་པར་གསོལ། རང་བཞིན་གྱི་གནས་སུ་གཤེགས་ལ་གནས་གསུམ་བསྲུང་། བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ །མདོར་ན་འདི་ཡན་གྱི་ཉམས་ལེན་ནི། རྗེ་བཙུན་ཐམས་ཅད་མཁྱེན་པ་དཀོན་མཆོག་ལྷུན་གྲུབ་ཀྱི་གསུང་རབ་ལྟར་ཉམས་སུ་བླངས་པས་དོན་གྲུབ་པ་ཉིད་དོ། །གསུམ་པ་ཐུན་མཚམས་ཀྱི་བྱ་བ་ལ་ལྔ། སྤྱོད་ལམ། གཏོར་མ། ཁ་ཟས། ཉལ་བ། ལྡང་བའོ། །དང་པོ་ནི། ཕྱག་དང་བསྐོར་བ་ལ་སོགས་པ་འགྲོ་འདུག་འགྲེང་འཆག་གི་སྤྱོད་ལམ་ཐམས་ཅད་རང་བཅོམ་ལྡན་འདས་སེང་གེ་སྒྲ་དམ་ཚིག་པའི་ང་རྒྱལ་གྱིས་བྱའོ། །གཉིས་པ་ནི། མཁྱེན་རབ་ཀྱི་དབང་ཕྱུག་དཔལ་ལྡན་དོན་གྲུབ་ཀྱི་བསྙེན་ཐབས་ལས་འབྱུང་བ་ལྟར་འདས་པའི་གཏོར་མ་དང་། འཇིག་རྟེན་པ་ལ་ཆ་གསུམ་གྱི་གཏོར་མ་སྤྱི་ལྟར་བཏང་བའམ། མི་ནུས་ན་འདས་གཏོར་གྱི་ལྷག་མ་ཨ་ཀཱ་རོ་ལན་གསུམ་གྱིས་བསྔོས་ལ། འཇིག་རྟེན་པ་ཡི་འབྱུང་པོ་རྣམས། །མཆོད་སྦྱིན་གཏོར་མ་འདི་བཞེས་ལ། །ཆོས་དོན་བདེན་པ་ལ་གནས་ཏེ། །ཞི་ཞིང་དགེ་བའི་ལས་རྣམས་མཛོད། །བདག་ཀྱང་བྱང་ཆུབ་མ་ཐོབ་པར། །བགེགས་དང་བར་ཆད་མེད་པ་དང་། །དམ་ཚིག་གནས་ལ་གནས་མཛོད་ལ། །བྱང་ཆུབ་ཐོབ་པའི་གྲོགས་ཀྱང་མཛོད། །ཅེས་པའི་མཐར་བཟོད་པར་གསོལ་ལ་གཤེགས་སུ་གསོལ་བས་ཀྱང་རུང་ངོ་། །གསུམ་པ་ནི། ཁ་ཟས་ཀྱི་དུས་སུ་ཁ་ཟས་བདུད་རྩིར་བསམས་ལ་ལྷ་མཆོད་པའི་བསམ་པས་ལོངས་སྤྱད་དོ། །བཞི་པ་དང་ལྔ་པ། ནུབ་མོ་ཉལ་བའི་ཚེ་སྟོང་པའི་ངང་ལ་ཉལ། ནངས་པར་སྟོང་པའི་ངང་ནས་ལྷའི་སྐུར་ལངས་ལ། ཁྲུས་དང་གཙང་སྦྲ་སྔོན་ཏུ་འགྲོ་བས་སྔར་བཞིན་ཉམས་སུ་བླང་བར་བྱའོ། །དེ་ལྟ་བུའི་ཚུལ་གྱིས་ཐུན་གསུམ་མམ་བཞིའི་རིམ་པས་བསྙེན་པ་འབུམ་ཕྲག་བཞིའམ། ཡི་གེའི་གྲངས་ཀྱི་འབུམ་ལས་བཞི་འགྱུར་རམ་བརྒྱད་འགྱུར་དུ་བཟླས་པས་ལས་རྣམས་འགྲུབ་པར་ནུས་པར་གསུངས་པས་འབུམ་ཕྲག་སོ་དྲུག་གམ། བདུན་ཅུ་རྩ་གཉིས་སམ། སྤྱིར་བཏང་འབུམ་ཕྲག་དགུ་ཁ་སྐོང་དང་བཅས་པ་བཟླ་ཞིང་། བྱང་ཆུབ་སྒྲུབ་པ་ལ་ཚད་མེད་དོ། །དེ་ནས་གཉིས་པ་གཟུངས་སྒྲུབ་བྱ་བར་འདོད་ན། གནས་ཁང་གཙང་ལ་ཉམས་དགའ་བར་རྗེ་བཙུན་སེང་གེ་སྒྲ་ལ་སོགས་པའི་དཀོན་མཆོག་གི་རྟེན་བཞུགས་པའི་སྤྱན་སྔ་ལ་སོགས་པར། བ་བྱུང་ལྔ་དང་། དྲི་བཟང་པོས་མཎྜལ་ཁྲུ་གང་བར་བྱུགས་པ་ལ་མེ་ཏོག་གི་ཚོམ་བུ་དྲུག་དགོད། དེའི་མདུན་དུ་བ་བྱུང་དང་། དྲི་བཟང་གིས་དཀྱུས་སུ་ཁྲུ་དོ། །ཞེང་ཁྲུ་གང་གི་མཎྜལ་བྱས་ལ། གཡས་སུ་མེ་ཏོག་དཀར་པོ་དང་། གཏོར་མ་དང་། བ་སེར་སྐྱའི་ལྕི་བ་ས་ལ་མ་ལྷུངས་པ་རས་ཀྱི་ཚགས་མས་བཙགས་པ་དྲི་ཞིམ་པོ་དང་སྦྱར་ལ་བཞག །གཡོན་ཏུ་ཆུ་གཉིས་སྔོན་ཏུ་འགྲོ་བའི་མཆོད་པ་ལྔ་བཤམ། རང་ཉིད་ཁྲུས་བྱས་གོས་གཙང་མ་གྱོན། སྟན་བདེ་བ་ལ་འདུག་ལ། མཆོད་པ་བྱིན་རླབས་སྔོན་དུ་འགྲོ་བས་བདག་བསྐྱེད་བཟླས་པ་དང་བཅས་པ་གྲུབ་རྗེས། ཡེ་ཤེས་པ་གཤེགས། རང་དམ་ཚིག་པའི་ང་རྒྱལ་གྱིས་ཚོམ་བུ་ཨ་མྲྀ་ཏས་བསང་། སྭ་བྷཱ་བས་སྦྱང་། སྟོང་པའི་ངང་ལས་པྃ་ལས་པདྨ་དམར་པོ་སོགས་ནས། སྟབས་ཀྱིས་བཞུགས་པ་ཞེས་པའི་བར་བདག་བསྐྱེད་ལྟར་ལ་རང་ཉིད་ཅེས་པའི་ཚིག་དོར། དེའི་སྟེང་དུ་ཨོཾ་ལས་རྣམ་པར་སྣང་མཛད་སྐུ་མདོག་དཀར་པོ་ཞལ་གཅིག་ཕྱག་གཉིས་པ་བྱང་ཆུབ་མཆོག་གི་ཕྱག་རྒྱ་ཅན། འདབ་མ་བརྒྱད་ཀྱི་ཤར་དུ་ཧཱུྃ་ལས་མི་བསྐྱོད་པ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་ས་གནོན། གཡོན་མཉམ་གཞག་གི་ཕྱག་རྒྱ་ཅན། ལྷོར་ཏྲཱྃ་ལས་རིན་ཆེན་འབྱུང་ལྡན་སྐུ་མདོག་སེར་པོ་ཞལ་གཅིག་ཕྱག་གཉིས་པ་གཡས་མཆོག་སྦྱིན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ནུབ་ཏུ་ཧྲཱིཿལས་འོད་དཔག་ཏུ་མེད་པ་སྐུ་མདོག་དམར་པོ་ཞལ་གཅིག་ཕྱག་གཉིས་པ་ཏིང་ངེ་འཛིན་གྱི་ཕྱག་རྒྱ་ཅན། བྱང་དུ་ཨ་ལས་དོན་ཡོད་གྲུབ་པ་སྐུ་མདོག་ལྗང་གུ་ཞལ་གཅིག་ཕྱག་གཉིས་པ་གཡས་སྐྱབས་སྦྱིན། གཡོན་ཏིང་ངེ་འཛིན་གྱི་ཕྱག་རྒྱ་ཅན། ཐམས་ཅད་ཀྱང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་། དར་གྱི་ན་བཟའ་ཅན། སེམས་དཔའི་སྐྱིལ་མོ་ཀྲུང་གིས་བཞུགས་པའོ། །དེ་ཐམས་ཅད་ཀྱི་དཔྲལ་བར་སོགས་ནས། ཧཱུྃ་སྔོན་པོ། རང་གི་ཐུགས་ཀའི་ཧྲཱིཿལས་འོད་ཟེར་འཕྲོས་པས། རང་བཞིན་གྱི་གནས་ནས་རྗེ་བཙུན་སེང་གེ་སྒྲ་དང་། རིགས་ལྔ་ལ་སངས་རྒྱས་དང་སོགས་ནས། ཆུ་ལྷག་མ་ཡར་ལུད་པ་ལས་གཙོ་བོ་ལ་འོད་དཔག་མེད་དང་། རིགས་ལྔ་ལ་རིགས་སོ་སོས་དབུར་བརྒྱན་ཅེས་སྦྱར་བ་དང་། བདག་ལ་ཞེས་པའི་ཚབ་ཏུ་འདི་ལ་ཞེས་བསྒྱུར་བ་མ་གཏོགས་བདག་བསྐྱེད་ལྟར་བྱ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བསྐོར་བར་བསམས་ལ། མཆོད་བསྟོད་གསོལ་བ་གདབ། དེ་ནས་མེ་ཏོག་དཀར་པོ་ནས་བླངས་ཏེ། ཨོཾ་ཨཱཿཧྲཱིཿསིཾ་ཧ་ནཱ་ད་ཧཱུྃ་ཕཊ། ཅེས་པས་མེ་ཏོག་ལན་རེ་ལ་སྔགས་ལན་རེ་བཟླས་ཏེ། རང་གི་གཡོན་ནས་ཚར་དུ་དངར་བར་བཤམས་པའི་མཎྜལ་བརྒྱད་ཀྱི་སར་མེ་ཏོག་གི་ཚོམ་བུ་རེ་རེ་བཞག་ལ་བྱིན་གྱིས་བརླབ། ཐུན་གཉིས་པ་མན་ཆད་ལ་ལྕི་བ་ཡོད་ན་མེ་ཏོག་གིས་བྱིན་གྱིས་བརླབ། ལྕི་བ་མེད་ན་མེ་ཏོག་གིས་བྱིན་གྱིས་བརླབ་མི་དགོས་གསུངས་སོ། །དེ་ནས་ལྕི་བ་བླངས་ཏེ། ན་མོ་རཏྣ་ཏྲ་ཡཱ་ཡ། ན་མ་ཨཱཪྻ་ཨ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་ཨཱ་ཀ་ཊེ། བི་ཀ་ཊེ། ནི་ཀ་ཊེ། ཀཊཾ་ཀ་ཊེ། ཀ་རོ་ཊེ། ཀ་རོ་ཊེ། བིདྱེ་སྭཱ་ཧཱ། ཞེས་བཟླས་ཏེ་རང་གི་གཡོན་ནས་ཚར་དུ་དངར་བའི་མཎྜལ་བརྒྱད་པ་ཞིང་། མཎྜལ་རེ་རེ་ལ་གཟུངས་ལན་བཅུ་གསུམ་བཅུ་གསུམ་བཟླས་ཤིང་མེ་ཏོག་བསལ་ལ་ལན་གསུམ་བྱུག །མེ་ཏོག་གི་ཚོམ་བུ་རེ་དགོད། ལྕི་བ་ལྷག་མ་ལག་པ་ལ་གོས་པ་ལ་མཆིལ་མས་སྔགས་ཤིང་ནད་པ་ལ་བྱུགས་ན་ནད་ཐམས་ཅད་ཉེ་བར་ཞི་བར་འགྱུར་རོ།། ནད་པ་མེད་ན་སྣོད་གཙང་མར་བླུགས་ནས་བཟུང་སྟེ་སྡུག་བསྔལ་ཅན་གཞན་ལ་སྦྱིན་ཏེ། དེ་ལྟར་ན་མེ་ཏོག་དང་ལྕི་བ་ལྷག་མ་ལ་གཅེས་སྤྲས་སུ་བྱའོ། །དེ་ནས་མཆོད་པ་དབུལ། གཏོར་མ་གཏང་། ཡེ་ཤེས་པ་གཤེགས་སུ་གསོལ། གནས་གསུམ་བསྲུང་། དགེ་བ་བྱང་ཆུབ་ཏུ་བསྔོ། ཤིས་བརྗོད་རྒྱས་པར་བྱས་ལ། མཎྜལར་རས་དཀར་པོས་གཡོགས་ལ་བཞག་གོ། །དེ་ལྟ་བུ་ཉི་མ་བདུན་ནམ། བཅུ་གསུམ་མམ། ཉེར་གཅིག་གིས་འགྲུབ་བར་གསུངས་སོ། །དེ་ལྟར་བསྙེན་པ་དང་། གཟུངས་སྒྲུབ་སྔོན་ཏུ་སོང་ནས། གསུམ་པ་གདོན་འགྲོལ་གྱི་ལས་སྦྱོར་ལ་གསུམ། སྔོན་ཏུ་འགྲོ་བའི་ཆོ་ག །དངོས་གཞི་གདོན་འགྲོལ་བྱ་བ། མཇུག་ཕྱིར་མི་ལྡོག་པའི་ཕྱིར་འཁོར་ལོ་གདགས་པའོ། །དང་པོ་ལ་གསུམ། རྨི་ལམ་བརྟག་པ། དུག་ངོས་བཟུང་ཞིང་གཞོམ་པ། ཀླུ་དང་རྒྱལ་པོ་དབྱེ་བའོ། །དང་པོ་ནི། གནས་ཁང་གཙང་མར་སེང་གེ་སྒྲའི་རྟེན་བྲིས་འབུར་གང་ཡང་རུང་བའི་སྤྱན་སྔར་བ་བྱུང་གིས་བྱུགས་པའི་མཎྜལ་ལ་མེ་ཏོག་གི་ཚོམ་བུ་དྲུག་དགོད། དེའི་མདུན་དུ་མཆོད་གཏོར་བཤམ། རང་གི་མདུན་དུ་བུམ་པ་བཅུད་ལྡན་སྤྱི་ལྟར་བཅའ། དེ་ནས་རང་ཉིད་ཁྲུས་བྱས་སྤོས་ཀྱིས་བདུག །གོས་གཙང་མ་གྱོན་ལ། སྟན་བདེ་བ་ལ་འདུག་སྟེ་བདག་བསྐྱེད་སྔོན་དུ་འགྲོ་བས། མདུན་གྱི་ཚོམ་བུ་བསངས་སྦྱངས་ནས་མཆོད་བསྟོད་ཡན་གཟུངས་སྒྲུབ་ལྟར་བྱས་ལ་ཐུགས་རྒྱུད་བསྐུལ་བའི་ཕྱིར་བཟླས་བ་ཅུང་ཟད་བྱ། བུམ་པ་བསང་སྦྱང་། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་ཤིང་། ནང་ཆུ་དང་བཅུད་སྣ་ཚོགས་ཀྱིས་གང་བའི་དབུས་སུ་པྃ་ལས་པདྨ་དམར་པོ་སོགས་མདུན་བསྐྱེད་ལྟར་གསལ་བཏབ་ལ། མཆོད་ཅིང་བསྟོད། བཅོམ་ལྡན་འདས་བདག་གི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པ་དང་། ཇི་ལྟར་བསམ་པའི་དོན་ཐམས་ཅད་རྨི་ལམ་དུ་མཐོང་བར་བྱིན་གྱིས་བརླབ་ཏུ་གསོལ། །ཞེས་པ་ལྟ་བུས་འདོད་པའི་དོན་ལ་གསོལ་བ་བཏབ། གཟུངས་ཐག་ནས་བཟུང་སྟེ་རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ཏེ་སོང་། བུམ་ནང་གི་ལྷའི་ཐུགས་རྒྱུད་བསྐུལ། ཐུགས་ཀ་ནས་ཡེ་ཤེས་ཀྱི་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ། སེང་གེ་སྒྲའི་སྙིང་པོ་བརྒྱ་བརྒྱད་དང་། ཨོཾ་མུ་ཙི་ལི་སྭཱ་ཧཱ། མོ་ཧ་ནི་སྭཱ་ཧཱ། དནྟི་ལི་སྭཱ་ཧཱ། ཞེས་བརྒྱ་རྩ་བརྒྱད་བཟླས། སླར་ཡང་མདུན་བུམ་ཐུན་མོང་དུ་མཆོད་བསྟོད། གཏོར་མ་ཕུལ། གསོལ་བ་གདབ། བུམ་ནང་གི་ཡེ་ཤེས་པ་ལ་ནོངས་པ་བཟོད་པར་གསོལ་ནས་གཤེགས། དམ་ཚིག་པ་འོད་དུ་ཞུ་བ་ལས་བུམ་པའི་ཆུ་ནུས་པ་དང་ལྡན་པར་བསམས་ལ་དེས་རང་གི་གདོང་ལ་སོགས་པ་དག་པར་བཀྲུས་ཏེ། ལྷའི་ང་རྒྱལ་དང་ལྡན་པས། མདུན་བསྐྱེད་ཀྱི་འཕགས་པ་གཙོ་འཁོར་རྣམས་མངོན་སུམ་དུ་གསལ་བའི་སྤྱན་སྔར། འཇིགས་པ་དང་བག་ཚ་བ་མེད་པར་གློ་གཡས་པ་འོག་ཏུ་ཕབས་ནས་ཅང་མི་སྨྲ་བར་སེང་གེའི་ཉལ་སྟབས་ཀྱིས་ཉལ། ཡིད་ཀྱིས་རང་ངམ་གཞན་གྱི་ནད་ལ་སོགས་པ་གང་རྟོགས་པར་འདོད་པའི་དངོས་པོ་དེ་ཉིད་སྔོན་གྱི་ལས་སམ་འཕྲལ་གྱི་རྐྱེན་གང་ལས་བྱུང་། འབྱུང་བའི་སྟོབས་སམ། མི་མ་ཡིན་གྱི་གནོད་པ་ལས་གྱུར། ཅི་བྱས་ན་ཕན། རིང་དུ་འགོར་རམ་མྱུར་དུ་འཚོ་ཞེས་པས་མཚོན་ཏེ་ཇི་ལྟར་རྟོགས་པར་འདོད་པའི་དོན་འདི་རྣམས་འཕགས་པས་བདག་ལ་ལུང་བསྟན་དུ་གསོལ་སྙམ་པ་རྩེ་གཅིག་ཏུ་ཡིད་ལ་བྱས་ཏེ་གཉིད་ཀྱིས་ལོག་ན་ཇི་ལྟར་བསམ་པའི་དོན་ཐམས་ཅད་རྨི་ལམ་དུ་མཐོང་བར་འགྱུར་རོ། །གལ་ཏེ་མ་མཐོང་ན་ལན་ཇི་ལྟར་རིགས་པ་བསྐྱར། གང་ལྟར་ཡང་ནངས་པར་ལྡང་པའི་ཚེ་མདུན་གྱི་ལྷ་ལ་མཆོད་ཅིང་བསྟོད། ནོངས་པ་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྡུ། གནས་བསྲུང་། བསྔོ་སྨོན་ཤིས་བརྗོད་བྱ། བསྐྱར་དགོས་ན་སླར་ཡང་ཆོ་ག་སྔ་མ་བཞིན་དུ་བྱའོ། །འདི་ནི་ནད་གདོན་ངོས་བཟུང་བ་ཙམ་དུ་མ་ཟད། འདོད་པའི་དོན་གང་བརྟག་པ་ལའང་སྦྱར་དུ་རུང་ཞིང་། ཁྱད་པར་བླ་མ་བ་རི་པའི་ཞལ་ནས། ཡི་དམ་གྱི་ལྷ་ལ་ཐུགས་རྗེ་ཆེ་ཆུང་མེད་ཀྱང་། རང་གི་ལས་འཕྲོ་ཡོད་མེད་ཀྱིས། སྔོན་ནས་བསྒྲུབས་པའི་ལས་འཕྲོ་མེད་པའི་ཡི་དམ་ལོ་གཅིག་ཏུ་སྒྲུབ་པ་བས། ལས་འཕྲོ་ཡོད་པ་ཞག་གཅིག་སྒྲུབ་པས་འགྲུབ་སླ། གལ་ཏེ་ལས་འཕྲོ་མེད་པའི་ཡི་དམ་བསྒྲུབས་པས་འགྲུབ་དཀའ་བ་བྱུང་ན། ལྷ་དང་གདམས་ངག་ལ་ཡིད་མི་ཆེས་པ་དང་ལོག་ལྟ་སྐྱེ། དེས་ཡི་དམ་གཞན་གང་བསྒྲུབས་ཀྱང་འགྲུབ་མི་སྲིད་པས། དེས་ན་ཡི་དམ་སྒྲུབ་པའི་ཐོག་མར་འདི་ལྟ་བུའི་གདམས་ངག་གི་སྒོ་ནས་ལས་འཕྲོ་ཡོད་མེད་བརྟགས་ལ་བྱ་བ་གལ་ཤིན་ཏུ་ཆེ་ཞེས་གསུངས་སོ། །གཉིས་པ་དུག་ངོས་བཟུང་ལ་གཞོམ་པ་ནི། ཀླུ་ཆེན་བརྒྱད་པོ་རིགས་བཞི་འབྱུང་བཞིའི་དུག་ལ་དབང་བྱེད་པ་ཡིན་ཏེ། ནོར་རྒྱས་དང་དུང་སྐྱོང་གཉིས་ནི་རྒྱལ་རིགས་ཡིན་པས་ལྕི་ཞིང་འཐིབས་པ་སའི་དུག་ལ་དབང་། དགའ་བོ་རིགས་ལྡན་གཉིས་ནི་བྲམ་ཟེའི་རིགས་ཡིན་པས་ཡང་ཞིང་བསིལ་བ་ཆུའི་དུག་ལ་དབང་། པདྨ་དང་འཇོག་པོ་གཉིས་ནི་རྗེ་རིགས་ཡིན་ཏེ་ཚ་ཞིང་སྲེག་པ་མེའི་དུག་ལ་དབང་། པདྨ་ཆེན་པོ་དང་སྟོབས་ཀྱི་རྒྱུ་གཉིས་ནི་དམངས་རིགས་ཡིན་ཏེ་ཡང་ཞིང་གཡོ་བ་རླུང་གི་དུག་ལ་དབང་། དེས་ན་དུག་གསལ་བར་ངོས་ཟིན་ན། དེ་དང་དེའི་གཉེན་པོར་སྔགས་བཟླས་ཏེ། ས་དུག་གིས་ཟིན་ན་མེའི་སྔགས་བཟླས་པ་ནི། བདག་བསྐྱེད་དཀྱུས་ལྟར་ལ། རང་སེང་གེ་སྒྲར་གསལ་བའི་ཏྲི་ཤཱུ་ལ་ལ་སྦྲུལ་དམར་པོ་གཉིས་ཁ་སྤྲོད་དུ་བསམ། སེང་གེ་སྒྲའི་སྙིང་པོ་དང་། ཨོཾ་པདྨཱ་ཡ། ཏཀྵ་ཀཱ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ཞེས་བཟླས། དེ་བཞིན་དུ་ཆུ་དུག་གིས་ཟིན་པ་ལ། ཏྲི་ཤཱུ་ལ་ལ་སྦྲུལ་སྔོན་པོ་ཁ་སྤྲོད་དང་། སྔགས་ཀྱི་ཐོག་མཐའ་འདྲ་བར་བྱས་ལ། མ་ཧཱ་པདྨཱ་ཡ་ཀརྐོ་ཊཱ་ཡ། མེ་དུག་ལ་སྦྲུལ་དཀར་པོ་གཉིས་ཁ་སྤྲོད་དང་། ཨ་ནནྟ་ཡ་ཀུ་ལི་ཀཱ་ཡ། རླུང་དུག་ལ་སྦྲུལ་སེར་པོ་ཁ་སྤྲོད་དང་། བཱ་སུ་ཀཱ་ཡ་ཤི་ཁ་བཱ་ལཱ་ཡ། ཞེས་སོ་སོར་བཟླས། དུག་ངོས་མ་ཟིན་ན། དེ་རྣམས་ཀུན་ཀྱང་འཇོམས་བྱེད་པ། །གཙོ་བོར་གྱུར་བ་ཆུ་ལྷ་སྟེ། །འབྱུང་བ་ནམ་མཁའི་རང་བཞིན་ཅན། །དེ་བས་འདི་ཉིད་འབད་དེ་བཟླས། །ཞེས་གསུངས་པས་ཏྲི་ཤཱུ་ལ་ལ་སྦྲུལ་དཀར་པོ་དམིགས་ཏེ། བཅོམ་ལྡན་འདས་ཀྱི་སྙིང་པོའི་མཐར། ཨོཾ་ཕུཿབ་རུ་ཎཱ་ཡ་ནཱ་ག་རཱ་ཛ་ཕུཿཧཱུྃ་ཕཊ་སྭཱ་ཧཱ། ཞེས་འབུམ་ཕྲག་བཞི་བཟླས་པས། དུག་གསལ་བར་ངོས་ཟིན་པར་འགྱུར་རོ། །སྐབས་སུ་སངས་རྒྱས་ལ་མཆོད་པ་འབུལ། ཀླུའི་རྒྱལ་པོ་དང་ཕྱོགས་སྐྱོང་ལ་གཏོར་མ་གཏང་། ནད་སོས་ནས་སྲུང་འཁོར་གདགས་སོ། །དེས་མ་སོས་ཤིང་སྙིང་མི་དགའ་ན་ཀླུ་དང་རྒྱལ་པོ་དང་བསྡོངས་ཤིང་མ་ཁྲོལ་བའི་སྐྱོན་ཡིན་པས། །གསུམ་པ་དེ་གཉིས་དབྱེ་བ་ནི། བག་ཟན་ནམ། ནས་ཟན་ལ། ཀླུ་ཕལ་བའི་གཟུགས་སྣ་ཚོགས་བྱ། མི་ལྤགས་སམ་ཤོག་བུ་ལ་རྒྱལ་པོའི་གཟུགས་བརྙན་རིད་ཅིང་སྐྲ་འཛིངས་པ་བྲི། དེའི་སྙིང་ཁར་བཅོམ་ལྡན་འདས་དང་ཆུ་བདག་གི་སྙིང་པོའི་མཐར་གནོད་བྱེད་འབྱུང་པོ་མཱ་ར་ཡ་ཕཊ། ཅེས་པ་བྲི། འབྱུང་པོའི་བླ་ཤིང་གླང་མ་མགོ་རྩམ་ལོག་པར་བྱས་ལ། རྩ་བའི་ངོས་ལ་མི་ཚིལ་དུམ་བུ་གཅིག་བསྐུས། རྩེ་མོ་བཀས་པའི་བར་དུ་རྒྱལ་པོའི་གཟུགས་བརྙན་མགོ་མཐུར་དུ་བསྟན་པ་གཟུགས་སོ། །དེ་ནས་མཁན་པ་དམར་པོའི་ཁུ་བ་དང་། སྲོ་ལོ་དམར་པོ་དང་། ཡུངས་ཀར་དང་། གླ་རྩི་ལ་སོགས་པ་ཀླུ་དང་མི་མཐུན་པའི་རྫས་རྣམས་བསགས་ལ། མར་ངོའི་ཉི་མ་དང་པོ་ནས་བཟུང་ནས། ཉི་མ་གཅིག་གམ་གསུམ་མམ། ལྔའམ། བདུན་ཏུ་ཐུན་གསུམ་མམ་བཞིར་རང་སེང་གེ་སྒྲ་ནག་པོའི་རྣལ་འབྱོར་ལ་གནས་པས་ཀླུ་དང་འབྱུང་པོའི་དགུག་གཞུག་དྲག་ཏུ་བྱ། ཞེས་འབྱུང་བས། བདག་བསྐྱེད་དཀྱུས་ལྟར་ལ། མི་འདྲ་བའི་ཁྱད་པར། ཨཿལས་སེང་གེ་སྔོན་པོ་ཞེས་དང་། ཧྲཱིཿནག་པོ་དང་། སེང་གེ་སྒྲ་སྐུ་མདོག་ནག་པོ་ཞེས་བསྒྱུར་བ་མ་གཏོགས་འདྲ། བཟླས་པ་ཅི་ནུས་མཐར། མདུན་གྱི་རྟེན་རྒྱལ་པོ་དངོས་སུ་བསམས་ལ། ལྕགས་ཀྱུའི་ཕྱག་རྒྱ་བཅིངས་ཏེ། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། འཇིག་རྟེན་དབང་ཕྱུག་སེང་གེ་སྒྲའི་བདེན་པ་དང་། ཀླུའི་རྒྱལ་པོ་འཁོར་དང་བཅས་པའི་བདེན་པ་དང་། བདེན་པ་ཆེན་པོའི་བྱིན་རླབས་དང་། བདག་ཅག་གི་བསམ་པ་རྣམ་པར་དག་པའི་བདེན་པ་དང་། བདེན་པ་དེའི་མཐུས། སྦྱིན་པའི་བདག་པོ་ལ་གནོད་ཅིང་ཤ་གཉེར་བའི་རྒྱལ་པོ་གདུག་པ་ཅན་དང་ཀླུ་དང་ས་བདག་ཕལ་པའི་རིགས་འཁོར་དང་བཅས་པ་ཐམས་ཅད་དམིགས་པའི་རྟེན་འདི་ལ་མཆིས་པར་གྱུར་ཅིག །ཅེས་དང་། ཨོཾ་ཨཱཿཧཱུྃ་སོགས་སེང་གེ་སྒྲ་དང་། ཨོཾ་ཕུཿབ་རུ་ཎ་སོགས་ཆུ་བདག་གི་སྙིང་པོའི་མཐར། གནོད་བྱེད་འབྱུང་པོ་ཨཱ་ཀཪྵཱ་ཡ་ཛཿ ཞེས་དགུག་ཅིང་ཛཿཧཱུྃ་བྃ་ཧོཿས་བསྟིམ། སེང་གེ་སྒྲ་དང་ཆུ་བདག་གི་སྙིང་པོ་གཉིས་ཀྱི་མཐར། ཨོཾ་ནཱ་མ་ནཱ་ག་ནན། ནཱ་ག་ནི་ནན། ནཱ་ག་ཀུ་མཱ་ར་ནན། ནཱ་ག་ཀུ་མཱ་ར་ནི་ནན། རཱ་ཛ་དུཥྟཱན་བེ་དེ་ཤ་ཡ་བི་དེ་ཤ་ཡ་ཞེས་བཟླས་ཏེ། ཐུན་རྫས་ཀྱིས་ཀླུའི་གཟུགས་བརྙན་ལ་བསྐོར་ཞིང་རྒྱལ་པོའི་གཟུགས་བརྙན་ལ་བྲབ། གཞན་ཡང་སྙིང་པོ་གཉིས་ཀྱི་མཐར། རྡོ་རྗེ་ནག་པོ་ཆེན་པོ་ལ་སོགས་པའི་དྲག་སྔགས་བཟླས་ཏེ་བཏབ་ལ་རྒྱལ་པོའི་གཟུགས་བརྙན་ལ་བྲབ། ཐུན་ཐ་མར་ཕུར་བུ་ཡེ་ཤེས་ཀྱི་མེ་འབར་བར་བསམས་ལ། སྙིང་པོ་གཉིས་དང་ནག་པོ་ཆེན་པོའི་དྲག་སྔགས་བཟླས་པས་རྒྱལ་པོའི་གཟུགས་བརྙན་ལ་བཏབ་ཅིང་ལིང་རོ་དུམ་བུར་གཏུབས་ལ་མཆོད་རྟེན་གྱི་འོག་གམ། ལམ་གྱི་བཞི་མདོར་མནན། ཀླུའི་རྟེན་ནི་ཀླུ་གནས་པའི་སར་བསྐྱལ། བདག་གི་ཡེ་ཤེས་པ་གཤེགས་གསོལ་ནས་བསྔོ་སྨོན་བཀྲ་ཤིས་ཀྱི་བར་བྱའོ། །གཞན་ཡང་རྒྱལ་པོའི་གཟུགས་བརྙན་ལ་བརྟེན་ཏེ་དྲག་པོའི་སྦྱིན་སྲེག་གིས་ཚར་བཅད་པ་ནི། རོ་བསྲེག་པའི་རྡོའི་སྒྱེད་པུ་གཟུགས། ཚེར་མ་ཅན་གྱི་ཤིང་བརྩིག །དེའི་སྟེང་དུ་སླ་ང་བཞག །གཡས་སུ་གཏོར་མ། གཡོན་ཏུ་མཆོད་པ། མདུན་དུ་སྔར་གྱི་ལིངྒ་དང་། ཁྲག་དང་། དུག་དང་། སྐེ་ཚེ་དང་། ཡུངས་ཀར་དང་། ཡུངས་མར་དང་། ལན་ཚྭ་དང་། གུ་གུལ་ལ་སོགས་པ་གདུག་པ་ཅན་གྱི་རྫས་བཤམ། སྲོད་ཀྱི་དུས་སུ་སེང་གེ་སྒྲ་ནག་པོའི་རྣལ་འབྱོར་ལ་གནས་པས་བཟླས་པ་དྲག་ཏུ་བྱ། ནམ་ཕྱེད་ན། མཆོད་པ་བྱིན་གྱིས་བརླབ་པ་སྔོན་དུ་འགྲོ་བས། རང་གི་སྙིང་གའི་ཧྲཱི༔ལས་སྤྲུལ་པ་དཔག་ཏུ་མེད་པ་སྤྲོས་སྟེ། ལ་ལས་ལྕགས་ཀྱུས་སྙིང་ཕུག །ལ་ལས་ཞགས་པས་མགྲིན་པ་བཅིངས། ལ་ལས་ཐོ་བས་རྒྱབ་ནས་རྡེག་ཅིང་། རང་དབང་མེད་པར་དགུག་པར་བསམས་ལ། བདེན་སྟོབས་གོང་ལྟར་བརྗོད་པའི་མཐར། སྦྱིན་པའི་བདག་པོ་ལ་གནོད་ཅིང་འཚེ་བའི་རྒྱལ་པོ་གདུག་པ་ཅན་ཐམས་ཅད་དམིགས་པའི་རྟེན་འདི་ལ་མཆིས་པར་གྱུར་ཅིག །ཅེས་དང་། སེང་གེ་སྒྲ་དང་ཆུ་བདག་གི་སྙིང་པོའི་མཐར། གནོད་བྱེད་འབྱུང་པོ་ཨཱ་ཀཪྵཱ་ཡ་ཛཿ ཞེས་བརྗོད་ཅིང་ལྕགས་ཀྱུ་ལ་སོགས་པའི་ཕྱག་རྒྱ་བཅས་ལ་ལིངྒ་ལ་དགུག་གཞུག་བྱ། སྙིང་པོ་གཉིས་ཀྱི་མཐར། རཱ་ཛ་དུཥྚ་ཎྀ་མཱ་ར་ཡ་ཕཊ། ཅེས་བཟླས་ཤིང་མཚོན་རྣོན་པོས་ལིངྒ་གཏུབས་ལ་ཐུན་རྫས་དང་བསྲེའོ། །དེ་ནས་སླ་ངའི་ནང་དུ་མེ་སྦར་ལ་བསང་སྦྱང་། སྟོང་པའི་ངང་ལས་ཡེ་ཤེས་ཀྱི་མེ་རབ་ཏུ་འབར་ཞིང་འཁྲུགས་པའི་དབུས་སུ། པདྨ་དམར་པོ་འདབ་མ་བརྒྱད་པ་དང་། སེང་གེ་སྔོན་པོའི་སྟེང་དུ་ཟླ་བའི་དཀྱིལ་འཁོར། དེའི་དབུས་སུ་སྐད་ཅིག་གིས་རྗེ་བཙུན་སེང་གེ་སྒྲ་སྐུ་མདོག་ནག་པོ་ཞལ་གཅིག་ཕྱག་གཉིས། སོགས་ནས། རོལ་པའི་སྟབས་ཀྱིས་བཞུགས་པ། གཡས་སུ་པད་ཟླའི་གདན་ལ་ཆུ་བདག་བ་རུ་ཎ་ནག་པོ་སྟོད་མིའི་རྣམ་པ་ཅན་ཐལ་མོ་སྦྱར་བ། སྦྲུལ་མགོའི་གདེངས་ཀ་བདུན་དང་ལྡན་པའི་སྤྱི་བོར་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོས་བརྒྱན་པ། དར་དང་རིན་པོ་ཆེས་སྤྲས་པ། སྨད་སྦྲུལ་མཇུག་འཁྱིལ་བ། གཡོན་དུ་པད་ཉིའི་གདན་ལ་རྡོ་རྗེ་ནག་པོ་ཆེན་པོ་སྐུ་མདོག་མཐིང་ནག་ཆེར་འབར་བ། ཞལ་གཅིག་ཕྱག་གཉིས་པ། གཡས་གྲི་གུག་དང་། གཡོན་ཐོད་པ་ཁྲག་གིས་གང་བ་ཐུགས་ཀར་སྟེང་འོག་ཏུ་འཛིན་པ། ཕྱག་གཉིས་ཆར་གྱི་དབུས་ན་རྣམ་འཕྲུལ་གྱི་གཎྜི་བསྣམས་པ། སྤྱན་གསུམ་དང་ལྡན་པ། ཞལ་མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫིས་པ། མི་མགོ་སྐམ་པོ་ལྔའི་དབུ་རྒྱན་དང་རློན་པ་ཁྲག་འཛག་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་དང་སྦྲུལ་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། དར་སྣ་ཚོགས་ཀྱི་ཅོད་པན་དང་ལྷབ་ལྷུབ་ཀྱིས་བཀླུབས་པ། མིའུ་ཐུང་གེལ་པའི་འདུག་སྟངས་ཀྱིས་རོའི་སྟེང་ན་བཞུགས་པ། དེའི་གཡས་ན་བྱ་ནག །གཡོན་ན་ཁྱི་ནག །རྒྱབ་ན་ཅེ་སྤྱང་། མདུན་ན་མི་ནག །སྟེང་ན་ནམ་མཁའ་ལྡིང་གི་སྤྲུལ་པའི་ཕོ་ཉ་འཕྲོ་བ། མི་བསྐྱོད་པའི་ཅོད་པན་ཅན། ཡེ་ཤེས་ཀྱི་མེ་འབར་བའི་དབུས་ན་དམ་ཚིག་དང་ཡེ་ཤེས་དབྱེར་མེད་དུ་བཞུགས་པར་བསམས་ལ། ཨོཾ་བྷཊྚཱ་ར་ཀ་སིཾཧ་ནཱ་ད་ས་པ་རི་ཝཱ་ར་ཨརྒྷཾ་སོགས་ནས། ཤཔྡའི་བར་གྱིས་མཆོད། བརྩེ་བས་ཐུགས་རྗེའི་དབང་ཕྱུག་ཉིད་ཀྱི་སྐུ། །དྲང་སྲོང་ཆེན་པོའི་ཚུལ་དུ་བཞུགས་ནས་ཀྱང་། །འགྲོ་བའི་གདུང་བ་ཐམས་ཅད་སེལ་མཛད་པའི། །བཅོམ་ལྡན་སེང་གེ་སྒྲ་ལ་ཕྱག་འཚལ་ལོ། །གདེངས་ཀ་ནོར་བུ་འབར་བའི་འོད་ཀྱིས་ནི། །ས་འོག་མུན་པའི་ཚོགས་རྣམས་འཇོམས་མཛད་པ། །བསྟན་ལ་རབ་དགའ་མཐུ་སྟོབས་བསམ་མི་ཁྱབ། །ཀླུ་རྒྱལ་འཁོར་དང་བཅས་ལ་ཕྱག་འཚལ་ལོ། །གང་གི་འཕྲུལ་དང་མངོན་པར་ཤེས་པའི་དཔལ། །ཉེ་བར་དགོངས་ནས་ཐུབ་པའི་བཀའ་བཞིན་དུ། །བསྟན་པ་རིན་ཆེན་བང་མཛོད་ལེགས་སྐྱོང་བའི། །རྡོ་རྗེ་ནག་པོ་ཆེ་ལ་ཕྱག་འཚལ་ལོ། །ཞེས་བསྟོད། འཇིག་རྟེན་དབང་ཕྱུག་སེང་གེ་སྒྲ་འཁོར་དང་བཅས་པས་གདུག་པ་ཅན་ཚར་བཅད་པར་མཛད་དུ་གསོལ། །ཞེས་འདོད་དོན་ལ་གསོལ་བ་བཏབ་པས་ཐམས་ཅད་ཞལ་གཡས་སུ་གདངས་པར་བསམས་ལ་སེང་གེ་སྒྲའི་སྙིང་པོ་དང་། ཆུ་བདག་གི་སྔགས་དང་། ནག་པོ་ཆེན་པོའི་གཟུངས་ཤཱ་ས་ནའི་ཤམ་དུ་རཱ་ཛ་དུཥྚ་ན་མཱ་ར་ཡ་ཕཊ། ཅེས་མང་དུ་བཟླས་ཤིང་ལིངྒ་སྲེག་སྔགས་དེ་ཉིད་ཀྱིས་ཐུན་རྫས་རྣམས་ཀྱང་བསྲེག །དེ་བཞིན་དུ་ལིངྒ་དང་ཐུན་རྫས་རྣམས་སྤེལ་ཞིང་བསྲེགས་ལ་རྒྱལ་པོའི་ཤ་ཁྲག་རུས་པ་བདུད་རྩིར་བསམས་ཏེ་ཕུལ་བས་ལྷག་མ་མ་ལུས་པར་གསོལ་བར་བསམ་ཞིང་བསྲེག་རྫས་རྣམས་མ་ཟད་ཀྱི་བར་དུ་བསྲེག །མཐར་གོང་བཞིན་མཆོད་ཅིང་བསྟོད་ལ། གཏོར་མ་ཨོཾ་ཨཱཿཧཱུྃ་གིས་བྱིན་གྱིས་བརླབ། ཨོཾ་བྷཊྚཱ་ར་ཀ་སིཾ་ཧ་ནཱ་ད་ས་པ་རི་ཝཱ་ར་ཨོཾ་ཨ་ཀཱ་རོ་སོགས་བཏགས་པ་ལན་གསུམ་གྱིས་ཕུལ། མཆོད་བསྟོད་དང་། འཇིག་རྟེན་དབང་ཕྱུག་འཁོར་བཅས་རྣམས་དང་། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་ཕྲིན་ལས་བཅོལ། ཡི་གེ་བརྒྱ་པའི་མཐར། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ། ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །སོགས་ཀྱི་མཐར། ཨོཾ་བཛྲ་མུཿས་དམ་ཡེ་དབྱེར་མེད་ཀྱི་ཡེ་ཤེས་པ་གཤེགས། ཛཿཧཱུྃ་བྃ་ཧོཿས་དམ་ཚིག་པ་རང་ལ་བསྟིམ། བདག་གི་ཡེ་ཤེས་པ་མདུན་གྱི་ནམ་མཁར་བྱོན་པར་བསམས་ལ་མཆོད་བསྟོད་སོགས་ནས་གཤེགས་གསོལ་བར་སྒྲུབ་ཐབས་ལྟར་བྱ། གནས་གསུམ་ཡི་གེ་གསུམ་གྱིས་བསྲུང་། དེ་ནས་རང་སྐད་ཅིག་གིས་སེང་གེ་སྒྲ་སྐུ་མདོག་དཀར་པོར་འགྱུར། བསྔོ་སྨོན་ཤིས་བརྗོད་བྱ། ཐལ་སོ་ལ་སོགས་རང་ཡུལ་དུ་མི་ལྡོག་པའི་འབབ་ཆུ་དྲག་པོར་བསྐྱལ་ལ་ལས་ཀྱི་རྗེས་མི་མངོན་པར་བྱ་ཞིང་དགའ་སྟོན་ལ་ལོངས་སྤྱོད་དོ། །གཉིས་པ་དངོས་གཞི་གདོན་འགྲོལ་བའི་ཆོ་ག་ལའང་གསུམ། སྦྱོར་བ། དངོས་གཞི། རྗེས་སོ། །དེ་ལ་སློབ་དཔོན་རིན་པོ་ཆེའི་བསྡུས་དོན་ལས་ཆོ་ག་རྣམ་པ་བཅུ་དྲུག་གིས་བསྡུས་པར་གསུངས་པ་ལྟར་རམ། ལག་ཏུ་བླང་པའི་ཚེ། སྦྱོར་བ་དཀྱིལ་༡འཁོར་རྟེན་༢དང་ནི། །བུམ་༣པ་མཆོད་༤གཏོར་༥བཤམ་པ་ལྔ། །དངོས་གཞི་བདག་༦བསྐྱེད་༧ལྷ་ཀླུ་༨གདོན། །བསྒྲུབ་༡༠བྱར་ཇི་ལྟར་བྱ་བ་ལྔ། །རྗེས་སུ་མཆོད་༡༡བཤགས་༡༢གཤེགས་སུ་༡༣གསོལ། །བདག་སྲུང་༡༤དགེ་༡༥བ་བསྔོ་སོགས་ལྔ། །ཞེས་སོ་སོར་དོན་ཚན་ལྔ་ལྔས་བསྟན་པ་ལྟར་ཡིན་ཀྱང་། །འདིར་ཡི་གེ་ཉུང་ངུས་མི་མཚོན་པས། ཐར་རྩེ་པཎྜིཏ་ཆེན་པོ་ནམ་མཁའ་དཔལ་བཟང་གིས་མཛད་པའི་གདོན་འགྲོལ་གྱི་ཆོ་ག་རིན་ཆེན་ཕྲེང་མཛེས་དང་། དེ་ཉིད་ངག་འདོན་བཀླག་པས་གྲུབ་པར་འཇམ་པའི་དབྱངས་ངག་དབང་ལེགས་གྲུབ་ཀྱིས་བསྡེབས་པའི་གསུང་རབ་ཀྱི་དགོངས་དོན་ལྟར་བླ་མ་བརྒྱུད་པའི་ཕྱག་བཞེས་ཀྱིས་བརྒྱན་ཏེ་ཤེས་པར་བྱ་དགོས་སོ། །གསུམ་པ་མི་ལྡོག་པའི་ཕྱིར་འཁོར་ལོ་གདགས་པ་ནི། གནས་གཙང་མར་ཟླ་བ་ཡར་ངོའི་དུས་ཚེས་ཤིས་པའི་སྔ་དྲོའི་ཆར། དང་པོ་འབྲི་བ་ནི། རང་ལྷའི་ང་རྒྱལ་དང་ལྡན་པས་རས་སམ་ཤོག་བུ་ལ། སྐྱེས་པ་སྲུང་ན་དེ་ཉིད་ཀྱི་སྲིན་ལག་གི་ཁྲག་དང་གི་ཝཾ། བུད་མེད་སྲུང་ན་དེ་ཉིད་ཀྱི་སྲིན་ལག་གི་ཁྲག་དང་རྒྱ་སྐྱེགས་ཀྱིས་འཁོར་ལོ་རྩིབས་བརྒྱད་པ་ལྟེ་བ་མུ་ཁྱུད་གཉིས་དང་བཅས་པའི་དབུས་སུ་ཧྲཱིཿ དེའི་མཐར། ཆེ་གེ་མོའི་ནད་དང་གདོན་ལ་སོགས་པ་མི་མཐུན་པའི་ཕྱོགས་ཐམས་ཅད་ཤཱིཾནྟ་ཀུ་རུ་སྭཱ་ཧཱ། ཚེ་བསོད་དཔལ་འབྱོར་ལ་སོགས་པ་མཐུན་རྐྱེན་ཐམས་ཅད་པུཥྚིཾ་ཀུ་རུ་སྭཱ་ཧྭཱ། ནད་གདོན་སོགས་ཉེ་བར་འཚེ་བ་ཐམས་ཅད་ལས་རཀྵཾ་ཀུ་རུ་སྭཱ་ཧཱ། རྩིབས་བརྒྱད་ལ་ཤར་ནས་རིམ་པ་བཞིན། ཨོཾ། ཨཱཿ སི། ཧ། ནཱ། ད། ཧཱུྃ། ཕཊ་ཅེས་པའི་ཡིག་འབྲུ་རེ་རེས་མཚན་པ། མུ་ཁྱུད་ནང་མ་ལ་གཟུངས་རིང་། ཕྱི་མ་ལ་ཨཱ་ལི་གཡས་སྐོར་དང་། ཀཱ་ལི་གཡོན་དུ་བསྐོར་འདི་ལ་སློབ་དཔོན་རིན་པོ་ཆེའི་ཡིག་ཆར་འབྲི་བའི་སྐབས་མུ་ཁྱུད་ནང་མ་ལ་དབྱངས་གསལ་དང་། ཕྱི་མ་ལ་གཟུངས་སྔགས་འབྲི་བར་གསུངས། རབ་གནས་ཀྱི་སྐབས་དང་། དཀར་དང་དམར་གྱི་ཡིག་ཆ་སོགས་ལ་གོང་དུ་སྨོས་པ་ལྟར་སྣང་ངོ་། །བ་བྲི། རབ་གནས་ནི། བྲིས་ཟིན་པ་དང་འཁོར་ལོ་སྟེགས་ཀྱི་དབུས་སུ་བཞག །མཆོད་པ་དང་གཏོར་མ་གསུམ་བཤམ། བདག་བསྐྱེད་བཟླས་པ་བཅས་གྲུབ་རྗེས་འཁོར་ལོ་བསང་སྦྱང་། སྟོང་པའི་ངང་ལས་འཁོར་ལོ་རྩིབས་བརྒྱད་པ་སོགས་ནས། གཡོན་དུ་བསྐོར་བ་ཞེས་པའི་བར་གོང་བཞིན་བརྗོད་པས་གསལ་བཏབ། རང་གི་སྙིང་གའི་ཧྲཱིཿདང་འཁོར་ལོའི་ཡི་གེའི་ཚོགས་ལས་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་འཁོར་ལོ་ཨོཾ་བཛྲ་ས་མཱ་ཛཿས་སྤྱན་དྲང་། ཛཿཧཱུྃ་བྃ་ཧོཿས་བསྟིམ། ཨོཾ་བཛྲ་པུཥྤེ་སོགས་ཀྱིས་མཆོད། གཏོར་མ་གཅིག་ཕྱོགས་སྐྱོང་ལ་ཆ་གསུམ་ལྟར་ཕུལ་ལ་སྲུང་བའི་ཕྲིན་ལས་བཅོལ། རང་གི་སྙིང་གའི་ས་བོན་དང་འཁོར་ལོའི་ཡི་གེའི་ཚོགས་ལས་འོད་ཟེར་འཕྲོས། བསྲུང་བྱའི་རྣམ་པར་ཤེས་པ་འོད་ཀྱི་རྣམ་པར་བཀུག་སྟེ་སྙིང་པོ་དང་གཟུངས་སྔགས་ལ་ཐིམ། སླར་ཡང་དེའི་ལུས་རང་འདྲ་བ་དཔག་ཏུ་མེད་པ་བཀུག་སྟེ་ཨཱ་ལི་དང་ཀཱ་ལི་ལ་ཐིམ། ལྷ་སྔགས་དང་དབྱེར་མེད་པར་བྱིན་གྱིས་བརླབས་པས་སྒོ་གསུམ་སྐུ་གསུང་ཐུགས་ཀྱི་རང་བཞིན་དུ་གྱུར་པར་བསམས་ལ། པུཥྤེ་སོགས་ཀྱིས་མཆོད། གཏོར་མ་གཅིག་འབྱུང་པོ་ལ་ཆ་གསུམ་ལྟར་བྱིན་ནས་བར་ཆད་མ་བྱེད་ཅིག་ཅེས་བསྒོ། དེ་ནས་འཁོར་ལོ་ལག་གཡས་སུ་བཟུང་བའམ་བཟུང་བར་མོས་ཏེ་མཆོག་སྦྱིན་གྱི་ཕྱག་རྒྱས་རེག་པའི་ཚུལ་དང་བཅས། སྙིང་པོ། གཟུངས་རིང་། ཨཱ་ལི་ཀཱ་ལི། ན་མོ་རཏྣ་ཏྲ་ཡཱ་ཡ། ཨོཾ་ཡེདྷརྨ་སོགས་དང་། ཨོཾ་སི་ཧ་ནཱ་ད་ས་མ་ཡ། མ་ནུ་པཱ་ལ་སོགས་སེང་གེ་སྒྲའི་ཡི་གེ་བརྒྱ་པ་རྣམས་སོ་སོའི་མཐར་སྤེལ་ཚིག་སྦྱར་བ་དང་བཅས་པ་བརྒྱ་རྩ་བརྒྱད་རེ་བཟླས་པས་བྱིན་རླབས་ཀྱི་རྒྱུན་བརྟན་པར་བྱའོ། །གདགས་པ་ནི། དེ་ནས་འཁོར་ལོ་ཚུལ་བཞིན་དུ་བལྟ་བ། ཚོན་སྐུད་ཀྱིས་དཀྲི། ཟངས་ལ་སོགས་པའི་སྣོད་དུ་བཅུག་ལ། བསྒྲུབ་བྱ་མདུན་དུ་འཁོད་པར་གཏོར་མ་གཅིག་བགེགས་ལ་བྱིན་ནས་སྦྱོང་བ་གསུམ་སྤྱི་ལྟར་བྱས་པས་གདོན་བགེགས་ཐམས་ཅད་རྒྱང་རིང་དུ་བསྐྲད་ལ་མཚམས་བཅད། དེ་ནས་སྙིང་པོ་དང་གཟུངས་སྔགས་བཟླ་བཞིན་པས་མགུལ་ལམ་དཔུང་པ་གཡོན་པར་གདགས། ཡི་གེ་བརྒྱ་པ་ལན་གསུམ་གྱིས་བརྟན་པར་བྱ་ཞིང་ཤིས་པ་བརྗོད། ཕྱིས་འཇིགས་པ་དང་ཡ་ང་བ་སོགས་བྱུང་ན་བསྒྲུབ་བྱ་རང་གི་ལག་པས་འཁོར་ལོ་ལ་འཇུས། མགོན་སྐྱབས་ཞུ་བར་དམིགས་ཏེ་སྔགས་རྣམས་སྔར་བཞིན་དུ་བཟླ། གལ་ཏེ་གདོན་འགྲོལ་དང་འབྲེལ་བར་སྲུང་འཁོར་གདགས་ན། སྲུང་བ་ཟིན་པའི་རྗེས་འཁོར་ལོ་གདགས་ལ་ཤིས་བརྗོད་སོགས་དཀྱུས་ལྟར་བྱའོ། །དེ་ལྟར་གདགས་པའི་ཕན་ཡོན་ཀྱང་རྒྱ་གཞུང་ལས། ཚེ་རིང་བསོད་ནམས་ཆེ་བ་དང་། །སྡིག་པ་ཐམས་ཅད་བྱང་བ་དང་། །བགེགས་ཀྱི་ཚོགས་རྣམས་ཀུན་སྐྱོབ་ཅིང་། །དོན་རྣམས་ཐམས་ཅད་འགྲུབ་པར་འགྱུར། །ཞེས་གསུངས་སོ། །དེའང་སྤྱིར་སེང་གེ་སྒྲའི་བསྙེན་པ་ཐེམས་པ་ཙམ་གྱིས། ཚེ་རབས་སུ་བསགས་པའི་ལས་ཀྱི་སྒྲིབ་པ་ཐམས་ཅད་བྱང་བ་དང་། ནད་རྙིང་པ་ཞི་ཞིང་གསར་པ་མི་འབྱུང་བ་དང་། ལུས་ཀྱི་མདངས་དང་སྟོབས་རྒྱས་པ་དང་། དབང་པོ་གསལ་བ་དང་། འདོད་དགུའི་དཔལ་གྱིས་འབྱོར་པ་སོགས་ཕན་ཡོན་དཔག་ཏུ་མེད་པར་གསུངས་ཤིང་། བྱེ་བྲག་ཏུ་ཀླུ་གདོན་གྱིས་ཟིན་པ་ལ་འབུམ་ཕྲག་བཞི་སོགས་བསྙེན་པས་ནད་གདོན་ལས་གྲོལ་བར་འགྱུར་ལ། དེས་མ་གྲོལ་ན་གཟུངས་སྒྲུབ་དང་། །བསྙེན་པའི་མཐར་ཆུ་བདག་གི་སྙིང་པོ་བཏགས་པའི་ལས་སྦྱོར་གྱི་བསྙེན་པ་དང་། དུག་སོ་སོར་ངོས་ཟིན་ན་སོ་སོའི་གཉེན་པོའི་སྔགས་དང་སྦྲེལ་བའི་བསྙེན་པ་དང་། ཀླུ་དང་རྒྱལ་པོ་དབྱེ་བ་རྣམས་རིམ་བཞིན་ཏུ་བྱ་སྟེ། དེ་ཐམས་ཅད་ཀྱི་མཇུག་ཏུ་གདོན་འགྲོལ་གྱི་ཆོ་ག་དང་། སྲུང་བའི་འཁོར་ལོ་གདགས་པས་ཕན་བདེའི་དངོས་པོ་འཕྲལ་དུ་སྟེར་བ་ནི་ངེས་པའོ། །འཇིག་རྟེན་དབང་ཕྱུག་སེང་གེ་སྒྲའི། །རིག་སྔགས་བདུད་རྩིའི་སྤྲིན་ཆེན་ལས། །བྱིན་རླབས་ཟིལ་དངར་རྟག་འབབ་པས། །ས་གསུམ་ཉེར་འཚོའི་སླད་གྱུར་ཅིག །ཅེས་པའང་སྙིགས་མའི་དུས་ཀྱི་གཞན་དབང་དུ་གྱུར་པས་གདམས་ངག་ཉི་ཚེ་བ་ལ་བློ་གཏོད་ཅིང་། གདུག་པའི་འབྱུང་པོ་སྐྱབས་སུ་བསྙེན་པ་ལས། འདི་ལྟ་བུའི་ཚད་ལྡན་གྱི་གཞུང་ལ་བློ་གྲོས་འཇུག་པའི་བསོད་ནམས་ཅན་དཀོན་པའི་དངོས་པོར་གྱུར་ཀྱང་། རང་ཉིད་ཁོ་ནའི་མོས་པའི་དབང་དུ་བྱས་ཏེ། བྱ་བྲལ་སྤོང་བ་པ་འཇམ་དབྱངས་མཁྱེན་བརྩེས་སློབ་དཔོན་རིན་པོ་ཆེ་བསོད་ནམས་རྩེ་མོའི་གསུང་རབ་དང་། དཀར་སྟོན་ཤཱཀྱ་གྲགས། དམར་ཆོས་ཀྱི་རྒྱལ་པོ། ཀུན་མཁྱེན་རཏྣ་ཤྲཱི་སོགས་ཀྱི་གཞུང་གསལ་བྱེད་དང་བཅས་པ་ལས་ཉེར་མཁོའི་ཟིན་བྲིས་ཁྱུགས་ཙམ་སྤེལ་བ་དགེ་ལེགས་མཆོག་ཏུ་གྱུར་ཅིག ། ༈

[edit]

'jig rten dbang phyug seng ge sgra'i gdams pa zab mo'i gsal byed gzhan phan bdud rtsi'i zil dngar/ @#/_/'jig rten dbang phyug seng ge sgra'i gdams pa zab mo'i gsal byed gzhan phan bdud rtsi'i zil dngar zhes bya ba bzhugs so/__/oM swa sti sid+d+haM/__thugs rje'i bdud rtsis khams gsum kun/__/dbugs 'byin 'phags pa'i zla ba ni/__/dad pa'i yid mtshor rtag bsnyen nas/__/gdams zab zil dngar cung zad spel/__/'jig rten dbang phyug seng ge sgra'i rnal 'byor la brten nas rang gzhan gyi don gnyis bsgrub par 'dod pas 'di ltar shes par bya ste/__sngon tu bsnyen pa'i cho ga dang /__gzungs sgrub pa'i cho ga dang /__gdon las 'grol ba'i cho ga'o/__/dang po la gsum/__/lha bsgom pa/__sngags bzla ba/__thun mtshams kyi bya ba'o/__/dang po la gnyis/__sngon 'gro tshogs gnyis bsags pa dang /__dngos gzhi lha bsgom pa'o/__/dang po ni/__gnas dben zhing yid dang mthun par khrus dang gtsang sbra la gnas pas/__mdun tu bris sku yod na dgram pa'i spyan sngar mchod gtor bsham/__skyabs 'gro sems bskyed sngon tu 'gro bas rang skad cig gis seng ge sgrar gsal ba'i snying ga'i 'od kyis tshogs zhing spyan drang /__phyag 'tshal zhing mchod pa 'bul ba dang /__sdig pa bshags pa la sogs pa'i yan lag bdun pa'i rjes/__oM badz+ra muHsa tshogs zhing mi dmigs par gshegs su gsol/__tshad med pa bzhis rgyud sbyong ba dang bcas pa ni bsod nams kyi tshogs dang /__shUn+ya tA'i sngags don dran pas 'od gsal stong pa nyid kyi dbyings su mnyam par 'jog pa ni ye shes kyi tshogs bsags pa'o/__/gnyis pa ni/__tshogs gnyis kyi rang 'bras chos dang gzugs kyi sku zung du 'jug pa'i yi dam gyi lha yan lag bzhi rdzogs su bskyed cing /__gsal snang la rtse gcig tu sems 'dzin pas lha'i sku sgyu ma lta bu gsal zhing brtan par ma gyur gyi bar de srid du bsgom pa'o/__/gnyis pa sngags bzla ba ni/__des skyo na thugs kar sngags phreng bkod de/__ji skad bshad pa'i 'od zer spro bsdu'i sbyor ba dang bcas te snying po dang /__gzungs ring ji ltar rigs pa bzla/__thun las ldang bar 'dod na/__bdag bskyed kyi ye shes pa mdun mkhar byon pa la mchod cing bzod par gsol/__rang bzhin gyi gnas su gshegs la gnas gsum bsrung /__bsngo smon gyis mtshams sbyar te spyod lam la 'jug go__/mdor na 'di yan gyi nyams len ni/__rje btsun thams cad mkhyen pa dkon mchog lhun grub kyi gsung rab ltar nyams su blangs pas don grub pa nyid do/__/gsum pa thun mtshams kyi bya ba la lnga/__spyod lam/__gtor ma/__kha zas/__nyal ba/__ldang ba'o/__/dang po ni/__phyag dang bskor ba la sogs pa 'gro 'dug 'greng 'chag gi spyod lam thams cad rang bcom ldan 'das seng ge sgra dam tshig pa'i nga rgyal gyis bya'o/__/gnyis pa ni/__mkhyen rab kyi dbang phyug dpal ldan don grub kyi bsnyen thabs las 'byung ba ltar 'das pa'i gtor ma dang /__'jig rten pa la cha gsum gyi gtor ma spyi ltar btang ba'am/__mi nus na 'das gtor gyi lhag ma a kA ro lan gsum gyis bsngos la/__'jig rten pa yi 'byung po rnams/__/mchod sbyin gtor ma 'di bzhes la/__/chos don bden pa la gnas te/__/zhi zhing dge ba'i las rnams mdzod/__/bdag kyang byang chub ma thob par/__/bgegs dang bar chad med pa dang /__/dam tshig gnas la gnas mdzod la/__/byang chub thob pa'i grogs kyang mdzod/__/ces pa'i mthar bzod par gsol la gshegs su gsol bas kyang rung ngo /__/gsum pa ni/__kha zas kyi dus su kha zas bdud rtsir bsams la lha mchod pa'i bsam pas longs spyad do/__/bzhi pa dang lnga pa/__nub mo nyal ba'i tshe stong pa'i ngang la nyal/__nangs par stong pa'i ngang nas lha'i skur langs la/__khrus dang gtsang sbra sngon tu 'gro bas sngar bzhin nyams su blang bar bya'o/__/de lta bu'i tshul gyis thun gsum mam bzhi'i rim pas bsnyen pa 'bum phrag bzhi'am/__yi ge'i grangs kyi 'bum las bzhi 'gyur ram brgyad 'gyur du bzlas pas las rnams 'grub par nus par gsungs pas 'bum phrag so drug gam/__bdun cu rtsa gnyis sam/__spyir btang 'bum phrag dgu kha skong dang bcas pa bzla zhing /__byang chub sgrub pa la tshad med do/__/de nas gnyis pa gzungs sgrub bya bar 'dod na/__gnas khang gtsang la nyams dga' bar rje btsun seng ge sgra la sogs pa'i dkon mchog gi rten bzhugs pa'i spyan snga la sogs par/__ba byung lnga dang /__dri bzang pos maN+Dal khru gang bar byugs pa la me tog gi tshom bu drug dgod/__de'i mdun du ba byung dang /__dri bzang gis dkyus su khru do/__/zheng khru gang gi maN+Dal byas la/__g.yas su me tog dkar po dang /__gtor ma dang /__ba ser skya'i lci ba sa la ma lhungs pa ras kyi tshags mas btsags pa dri zhim po dang sbyar la bzhag__/g.yon tu chu gnyis sngon tu 'gro ba'i mchod pa lnga bsham/__rang nyid khrus byas gos gtsang ma gyon/__stan bde ba la 'dug la/__mchod pa byin rlabs sngon du 'gro bas bdag bskyed bzlas pa dang bcas pa grub rjes/__ye shes pa gshegs/__rang dam tshig pa'i nga rgyal gyis tshom bu a mr-i tas bsang /__swa b+hA bas sbyang /__stong pa'i ngang las pa~M las pad+ma dmar po sogs nas/__stabs kyis bzhugs pa zhes pa'i bar bdag bskyed ltar la rang nyid ces pa'i tshig dor/__de'i steng du oM las rnam par snang mdzad sku mdog dkar po zhal gcig phyag gnyis pa byang chub mchog gi phyag rgya can/__'dab ma brgyad kyi shar du hU~M las mi bskyod pa sku mdog sngon po zhal gcig phyag gnyis pa g.yas sa gnon/__g.yon mnyam gzhag gi phyag rgya can/__lhor trA~M las rin chen 'byung ldan sku mdog ser po zhal gcig phyag gnyis pa g.yas mchog sbyin/__g.yon ting nge 'dzin gyi phyag rgya can/__nub tu hrIHlas 'od dpag tu med pa sku mdog dmar po zhal gcig phyag gnyis pa ting nge 'dzin gyi phyag rgya can/__byang du a las don yod grub pa sku mdog ljang gu zhal gcig phyag gnyis pa g.yas skyabs sbyin/__g.yon ting nge 'dzin gyi phyag rgya can/__thams cad kyang rin po che'i rgyan sna tshogs kyis brgyan cing /__dar gyi na bza' can/__sems dpa'i skyil mo krung gis bzhugs pa'o/__/de thams cad kyi dpral bar sogs nas/__hU~M sngon po/__rang gi thugs ka'i hrIHlas 'od zer 'phros pas/__rang bzhin gyi gnas nas rje btsun seng ge sgra dang /__rigs lnga la sangs rgyas dang sogs nas/__chu lhag ma yar lud pa las gtso bo la 'od dpag med dang /__rigs lnga la rigs so sos dbur brgyan ces sbyar ba dang /__bdag la zhes pa'i tshab tu 'di la zhes bsgyur ba ma gtogs bdag bskyed ltar bya/__sangs rgyas dang byang chub sems dpa' thams cad kyis bskor bar bsams la/__mchod bstod gsol ba gdab/__de nas me tog dkar po nas blangs te/__oM AHhrIHsiM ha nA da hU~M phaT/__ces pas me tog lan re la sngags lan re bzlas te/__rang gi g.yon nas tshar du dngar bar bshams pa'i maN+Dal brgyad kyi sar me tog gi tshom bu re re bzhag la byin gyis brlab/__thun gnyis pa man chad la lci ba yod na me tog gis byin gyis brlab/__lci ba med na me tog gis byin gyis brlab mi dgos gsungs so/__/de nas lci ba blangs te/__na mo rat+na tra yA ya/__na ma AR+Ya a ba lo ki te shwa rA ya/__bo d+hi satwA ya/__ma hA sa twA ya/__ma hA kA ru Ni kA ya/__tad+ya thA/__oM A ka Te/__bi ka Te/__ni ka Te/__kaTaM ka Te/__ka ro Te/__ka ro Te/__bid+ye swA hA/__zhes bzlas te rang gi g.yon nas tshar du dngar ba'i maN+Dal brgyad pa zhing /__maN+Dal re re la gzungs lan bcu gsum bcu gsum bzlas shing me tog bsal la lan gsum byug__/me tog gi tshom bu re dgod/__lci ba lhag ma lag pa la gos pa la mchil mas sngags shing nad pa la byugs na nad thams cad nye bar zhi bar 'gyur ro//_nad pa med na snod gtsang mar blugs nas bzung ste sdug bsngal can gzhan la sbyin te/__de ltar na me tog dang lci ba lhag ma la gces spras su bya'o/__/de nas mchod pa dbul/__gtor ma gtang /__ye shes pa gshegs su gsol/__gnas gsum bsrung /__dge ba byang chub tu bsngo/__shis brjod rgyas par byas la/__maN+Dalar ras dkar pos g.yogs la bzhag go/__/de lta bu nyi ma bdun nam/__bcu gsum mam/__nyer gcig gis 'grub bar gsungs so/__/de ltar bsnyen pa dang /__gzungs sgrub sngon tu song nas/__gsum pa gdon 'grol gyi las sbyor la gsum/__sngon tu 'gro ba'i cho ga__/dngos gzhi gdon 'grol bya ba/__mjug phyir mi ldog pa'i phyir 'khor lo gdags pa'o/__/dang po la gsum/__rmi lam brtag pa/__dug ngos bzung zhing gzhom pa/__klu dang rgyal po dbye ba'o/__/dang po ni/__gnas khang gtsang mar seng ge sgra'i rten bris 'bur gang yang rung ba'i spyan sngar ba byung gis byugs pa'i maN+Dal la me tog gi tshom bu drug dgod/__de'i mdun du mchod gtor bsham/__rang gi mdun du bum pa bcud ldan spyi ltar bca'/__de nas rang nyid khrus byas spos kyis bdug__/gos gtsang ma gyon la/__stan bde ba la 'dug ste bdag bskyed sngon du 'gro bas/__mdun gyi tshom bu bsangs sbyangs nas mchod bstod yan gzungs sgrub ltar byas la thugs rgyud bskul ba'i phyir bzlas ba cung zad bya/__bum pa bsang sbyang /__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa mtshan nyid thams cad yongs su rdzogs shing /__nang chu dang bcud sna tshogs kyis gang ba'i dbus su pa~M las pad+ma dmar po sogs mdun bskyed ltar gsal btab la/__mchod cing bstod/__bcom ldan 'das bdag gi sdig pa dang sgrib pa thams cad byang zhing dag pa dang /__ji ltar bsam pa'i don thams cad rmi lam du mthong bar byin gyis brlab tu gsol/__/zhes pa lta bus 'dod pa'i don la gsol ba btab/__gzungs thag nas bzung ste rang gi snying ga nas sngags kyi phreng ba gzungs thag la brten te song /__bum nang gi lha'i thugs rgyud bskul/__thugs ka nas ye shes kyi bdud rtsi'i rgyun babs pas bum pa gang bar bsams la/__seng ge sgra'i snying po brgya brgyad dang /__oM mu tsi li swA hA/__mo ha ni swA hA/__dan+ti li swA hA/__zhes brgya rtsa brgyad bzlas/__slar yang mdun bum thun mong du mchod bstod/__gtor ma phul/__gsol ba gdab/__bum nang gi ye shes pa la nongs pa bzod par gsol nas gshegs/__dam tshig pa 'od du zhu ba las bum pa'i chu nus pa dang ldan par bsams la des rang gi gdong la sogs pa dag par bkrus te/__lha'i nga rgyal dang ldan pas/__mdun bskyed kyi 'phags pa gtso 'khor rnams mngon sum du gsal ba'i spyan sngar/__'jigs pa dang bag tsha ba med par glo g.yas pa 'og tu phabs nas cang mi smra bar seng ge'i nyal stabs kyis nyal/__yid kyis rang ngam gzhan gyi nad la sogs pa gang rtogs par 'dod pa'i dngos po de nyid sngon gyi las sam 'phral gyi rkyen gang las byung /__'byung ba'i stobs sam/__mi ma yin gyi gnod pa las gyur/__ci byas na phan/__ring du 'gor ram myur du 'tsho zhes pas mtshon te ji ltar rtogs par 'dod pa'i don 'di rnams 'phags pas bdag la lung bstan du gsol snyam pa rtse gcig tu yid la byas te gnyid kyis log na ji ltar bsam pa'i don thams cad rmi lam du mthong bar 'gyur ro/__/gal te ma mthong na lan ji ltar rigs pa bskyar/__gang ltar yang nangs par ldang pa'i tshe mdun gyi lha la mchod cing bstod/__nongs pa bshags/__ye shes pa gshegs/__dam tshig pa rang la bsdu/__gnas bsrung /__bsngo smon shis brjod bya/__bskyar dgos na slar yang cho ga snga ma bzhin du bya'o/__/'di ni nad gdon ngos bzung ba tsam du ma zad/__'dod pa'i don gang brtag pa la'ang sbyar du rung zhing /__khyad par bla ma ba ri pa'i zhal nas/__yi dam gyi lha la thugs rje che chung med kyang /__rang gi las 'phro yod med kyis/__sngon nas bsgrubs pa'i las 'phro med pa'i yi dam lo gcig tu sgrub pa bas/__las 'phro yod pa zhag gcig sgrub pas 'grub sla/__gal te las 'phro med pa'i yi dam bsgrubs pas 'grub dka' ba byung na/__lha dang gdams ngag la yid mi ches pa dang log lta skye/__des yi dam gzhan gang bsgrubs kyang 'grub mi srid pas/__des na yi dam sgrub pa'i thog mar 'di lta bu'i gdams ngag gi sgo nas las 'phro yod med brtags la bya ba gal shin tu che zhes gsungs so/__/gnyis pa dug ngos bzung la gzhom pa ni/__klu chen brgyad po rigs bzhi 'byung bzhi'i dug la dbang byed pa yin te/__nor rgyas dang dung skyong gnyis ni rgyal rigs yin pas lci zhing 'thibs pa sa'i dug la dbang /__dga' bo rigs ldan gnyis ni bram ze'i rigs yin pas yang zhing bsil ba chu'i dug la dbang /__pad+ma dang 'jog po gnyis ni rje rigs yin te tsha zhing sreg pa me'i dug la dbang /__pad+ma chen po dang stobs kyi rgyu gnyis ni dmangs rigs yin te yang zhing g.yo ba rlung gi dug la dbang /__des na dug gsal bar ngos zin na/__de dang de'i gnyen por sngags bzlas te/__sa dug gis zin na me'i sngags bzlas pa ni/__bdag bskyed dkyus ltar la/__rang seng ge sgrar gsal ba'i tri shU la la sbrul dmar po gnyis kha sprod du bsam/__seng ge sgra'i snying po dang /__oM pad+mA ya/__tak+Sha kA ya nA ga rA dza phuHhU~M phaT swA hA/__zhes bzlas/__de bzhin du chu dug gis zin pa la/__tri shU la la sbrul sngon po kha sprod dang /__sngags kyi thog mtha' 'dra bar byas la/__ma hA pad+mA ya karko TA ya/__me dug la sbrul dkar po gnyis kha sprod dang /__a nan+ta ya ku li kA ya/__rlung dug la sbrul ser po kha sprod dang /__bA su kA ya shi kha bA lA ya/__zhes so sor bzlas/__dug ngos ma zin na/__de rnams kun kyang 'joms byed pa/__/gtso bor gyur ba chu lha ste/__/'byung ba nam mkha'i rang bzhin can/__/de bas 'di nyid 'bad de bzlas/__/zhes gsungs pas tri shU la la sbrul dkar po dmigs te/__bcom ldan 'das kyi snying po'i mthar/__oM phuHba ru NA ya nA ga rA dza phuHhU~M phaT swA hA/__zhes 'bum phrag bzhi bzlas pas/__dug gsal bar ngos zin par 'gyur ro/__/skabs su sangs rgyas la mchod pa 'bul/__klu'i rgyal po dang phyogs skyong la gtor ma gtang /__nad sos nas srung 'khor gdags so/__/des ma sos shing snying mi dga' na klu dang rgyal po dang bsdongs shing ma khrol ba'i skyon yin pas/__/gsum pa de gnyis dbye ba ni/__bag zan nam/__nas zan la/__klu phal ba'i gzugs sna tshogs bya/__mi lpags sam shog bu la rgyal po'i gzugs brnyan rid cing skra 'dzings pa bri/__de'i snying khar bcom ldan 'das dang chu bdag gi snying po'i mthar gnod byed 'byung po mA ra ya phaT/__ces pa bri/__'byung po'i bla shing glang ma mgo rtsam log par byas la/__rtsa ba'i ngos la mi tshil dum bu gcig bskus/__rtse mo bkas pa'i bar du rgyal po'i gzugs brnyan mgo mthur du bstan pa gzugs so/__/de nas mkhan pa dmar po'i khu ba dang /__sro lo dmar po dang /__yungs kar dang /__gla rtsi la sogs pa klu dang mi mthun pa'i rdzas rnams bsags la/__mar ngo'i nyi ma dang po nas bzung nas/__nyi ma gcig gam gsum mam/__lnga'am/__bdun tu thun gsum mam bzhir rang seng ge sgra nag po'i rnal 'byor la gnas pas klu dang 'byung po'i dgug gzhug drag tu bya/__zhes 'byung bas/__bdag bskyed dkyus ltar la/__mi 'dra ba'i khyad par/__aHlas seng ge sngon po zhes dang /__hrIHnag po dang /__seng ge sgra sku mdog nag po zhes bsgyur ba ma gtogs 'dra/__bzlas pa ci nus mthar/__mdun gyi rten rgyal po dngos su bsams la/__lcags kyu'i phyag rgya bcings te/__na mo/__rje btsun rtsa ba dang brgyud par bcas pa'i dpal ldan bla ma dam pa rnams kyi bka' bden pa dang /__sangs rgyas kyi bden pa dang /__chos kyi bden pa dang /__dge 'dun gyi bden pa dang /__'jig rten dbang phyug seng ge sgra'i bden pa dang /__klu'i rgyal po 'khor dang bcas pa'i bden pa dang /__bden pa chen po'i byin rlabs dang /__bdag cag gi bsam pa rnam par dag pa'i bden pa dang /__bden pa de'i mthus/__sbyin pa'i bdag po la gnod cing sha gnyer ba'i rgyal po gdug pa can dang klu dang sa bdag phal pa'i rigs 'khor dang bcas pa thams cad dmigs pa'i rten 'di la mchis par gyur cig__/ces dang /__oM AHhU~M sogs seng ge sgra dang /__oM phuHba ru Na sogs chu bdag gi snying po'i mthar/__gnod byed 'byung po A kaR+ShA ya dzaH__zhes dgug cing dzaHhU~M ba~M hoHsa bstim/__seng ge sgra dang chu bdag gi snying po gnyis kyi mthar/__oM nA ma nA ga nan/__nA ga ni nan/__nA ga ku mA ra nan/__nA ga ku mA ra ni nan/__rA dza duSh+tAn be de sha ya bi de sha ya zhes bzlas te/__thun rdzas kyis klu'i gzugs brnyan la bskor zhing rgyal po'i gzugs brnyan la brab/__gzhan yang snying po gnyis kyi mthar/__rdo rje nag po chen po la sogs pa'i drag sngags bzlas te btab la rgyal po'i gzugs brnyan la brab/__thun tha mar phur bu ye shes kyi me 'bar bar bsams la/__snying po gnyis dang nag po chen po'i drag sngags bzlas pas rgyal po'i gzugs brnyan la btab cing ling ro dum bur gtubs la mchod rten gyi 'og gam/__lam gyi bzhi mdor mnan/__klu'i rten ni klu gnas pa'i sar bskyal/__bdag gi ye shes pa gshegs gsol nas bsngo smon bkra shis kyi bar bya'o/__/gzhan yang rgyal po'i gzugs brnyan la brten te drag po'i sbyin sreg gis tshar bcad pa ni/__ro bsreg pa'i rdo'i sgyed pu gzugs/__tsher ma can gyi shing brtsig__/de'i steng du sla nga bzhag__/g.yas su gtor ma/__g.yon tu mchod pa/__mdun du sngar gyi ling+ga dang /__khrag dang /__dug dang /__ske tshe dang /__yungs kar dang /__yungs mar dang /__lan tshwa dang /__gu gul la sogs pa gdug pa can gyi rdzas bsham/__srod kyi dus su seng ge sgra nag po'i rnal 'byor la gnas pas bzlas pa drag tu bya/__nam phyed na/__mchod pa byin gyis brlab pa sngon du 'gro bas/__rang gi snying ga'i hrI:las sprul pa dpag tu med pa spros ste/__la las lcags kyus snying phug__/la las zhags pas mgrin pa bcings/__la las tho bas rgyab nas rdeg cing /__rang dbang med par dgug par bsams la/__bden stobs gong ltar brjod pa'i mthar/__sbyin pa'i bdag po la gnod cing 'tshe ba'i rgyal po gdug pa can thams cad dmigs pa'i rten 'di la mchis par gyur cig__/ces dang /__seng ge sgra dang chu bdag gi snying po'i mthar/__gnod byed 'byung po A kaR+ShA ya dzaH__zhes brjod cing lcags kyu la sogs pa'i phyag rgya bcas la ling+ga la dgug gzhug bya/__snying po gnyis kyi mthar/__rA dza duSh+Ta N-i mA ra ya phaT/__ces bzlas shing mtshon rnon pos ling+ga gtubs la thun rdzas dang bsre'o/__/de nas sla nga'i nang du me sbar la bsang sbyang /__stong pa'i ngang las ye shes kyi me rab tu 'bar zhing 'khrugs pa'i dbus su/__pad+ma dmar po 'dab ma brgyad pa dang /__seng ge sngon po'i steng du zla ba'i dkyil 'khor/__de'i dbus su skad cig gis rje btsun seng ge sgra sku mdog nag po zhal gcig phyag gnyis/__sogs nas/__rol pa'i stabs kyis bzhugs pa/__g.yas su pad zla'i gdan la chu bdag ba ru Na nag po stod mi'i rnam pa can thal mo sbyar ba/__sbrul mgo'i gdengs ka bdun dang ldan pa'i spyi bor yid bzhin gyi nor bu rin po che dbang gi rgyal pos brgyan pa/__dar dang rin po ches spras pa/__smad sbrul mjug 'khyil ba/__g.yon du pad nyi'i gdan la rdo rje nag po chen po sku mdog mthing nag cher 'bar ba/__zhal gcig phyag gnyis pa/__g.yas gri gug dang /__g.yon thod pa khrag gis gang ba thugs kar steng 'og tu 'dzin pa/__phyag gnyis char gyi dbus na rnam 'phrul gyi gaN+Di bsnams pa/__spyan gsum dang ldan pa/__zhal mche ba gtsigs pa/__dbu skra ser po gyen du brdzis pa/__mi mgo skam po lnga'i dbu rgyan dang rlon pa khrag 'dzag pa lnga bcu'i do shal can/__rus pa'i rgyan drug dang sbrul gyis brgyan pa/__stag gi pags pa'i sham thabs can/__dar sna tshogs kyi cod pan dang lhab lhub kyis bklubs pa/__mi'u thung gel pa'i 'dug stangs kyis ro'i steng na bzhugs pa/__de'i g.yas na bya nag__/g.yon na khyi nag__/rgyab na ce spyang /__mdun na mi nag__/steng na nam mkha' lding gi sprul pa'i pho nya 'phro ba/__mi bskyod pa'i cod pan can/__ye shes kyi me 'bar ba'i dbus na dam tshig dang ye shes dbyer med du bzhugs par bsams la/__oM b+haT+TA ra ka siMha nA da sa pa ri wA ra ar+g+haM sogs nas/__shap+da'i bar gyis mchod/__brtse bas thugs rje'i dbang phyug nyid kyi sku/__/drang srong chen po'i tshul du bzhugs nas kyang /__/'gro ba'i gdung ba thams cad sel mdzad pa'i/__/bcom ldan seng ge sgra la phyag 'tshal lo/__/gdengs ka nor bu 'bar ba'i 'od kyis ni/__/sa 'og mun pa'i tshogs rnams 'joms mdzad pa/__/bstan la rab dga' mthu stobs bsam mi khyab/__/klu rgyal 'khor dang bcas la phyag 'tshal lo/__/gang gi 'phrul dang mngon par shes pa'i dpal/__/nye bar dgongs nas thub pa'i bka' bzhin du/__/bstan pa rin chen bang mdzod legs skyong ba'i/__/rdo rje nag po che la phyag 'tshal lo/__/zhes bstod/__'jig rten dbang phyug seng ge sgra 'khor dang bcas pas gdug pa can tshar bcad par mdzad du gsol/__/zhes 'dod don la gsol ba btab pas thams cad zhal g.yas su gdangs par bsams la seng ge sgra'i snying po dang /__chu bdag gi sngags dang /__nag po chen po'i gzungs shA sa na'i sham du rA dza duSh+Ta na mA ra ya phaT/__ces mang du bzlas shing ling+ga sreg sngags de nyid kyis thun rdzas rnams kyang bsreg__/de bzhin du ling+ga dang thun rdzas rnams spel zhing bsregs la rgyal po'i sha khrag rus pa bdud rtsir bsams te phul bas lhag ma ma lus par gsol bar bsam zhing bsreg rdzas rnams ma zad kyi bar du bsreg__/mthar gong bzhin mchod cing bstod la/__gtor ma oM AHhU~M gis byin gyis brlab/__oM b+haT+TA ra ka siM ha nA da sa pa ri wA ra oM a kA ro sogs btags pa lan gsum gyis phul/__mchod bstod dang /__'jig rten dbang phyug 'khor bcas rnams dang /__mchod sbyin gtor ma 'di bzhes la sogs kyis phrin las bcol/__yi ge brgya pa'i mthar/__ma 'byor pa dang sogs kyis nongs pa bzod par gsol/__oM/__khyed kyis sems can don kun mdzad/__/sogs kyi mthar/__oM badz+ra muHsa dam ye dbyer med kyi ye shes pa gshegs/__dzaHhU~M ba~M hoHsa dam tshig pa rang la bstim/__bdag gi ye shes pa mdun gyi nam mkhar byon par bsams la mchod bstod sogs nas gshegs gsol bar sgrub thabs ltar bya/__gnas gsum yi ge gsum gyis bsrung /__de nas rang skad cig gis seng ge sgra sku mdog dkar por 'gyur/__bsngo smon shis brjod bya/__thal so la sogs rang yul du mi ldog pa'i 'bab chu drag por bskyal la las kyi rjes mi mngon par bya zhing dga' ston la longs spyod do/__/gnyis pa dngos gzhi gdon 'grol ba'i cho ga la'ang gsum/__sbyor ba/__dngos gzhi/__rjes so/__/de la slob dpon rin po che'i bsdus don las cho ga rnam pa bcu drug gis bsdus par gsungs pa ltar ram/__lag tu blang pa'i tshe/__sbyor ba dkyil 1'khor rten 2dang ni/__/bum 3pa mchod 4gtor 5bsham pa lnga/__/dngos gzhi bdag 6bskyed 7lha klu 8gdon/__/bsgrub 10byar ji ltar bya ba lnga/__/rjes su mchod 11bshags 12gshegs su 13gsol/_/bdag srung 14dge 15ba bsngo sogs lnga/__/zhes so sor don tshan lnga lngas bstan pa ltar yin kyang /__/'dir yi ge nyung ngus mi mtshon pas/__thar rtse paN+Dita chen po nam mkha' dpal bzang gis mdzad pa'i gdon 'grol gyi cho ga rin chen phreng mdzes dang /__de nyid ngag 'don bklag pas grub par 'jam pa'i dbyangs ngag dbang legs grub kyis bsdebs pa'i gsung rab kyi dgongs don ltar bla ma brgyud pa'i phyag bzhes kyis brgyan te shes par bya dgos so/__/gsum pa mi ldog pa'i phyir 'khor lo gdags pa ni/__gnas gtsang mar zla ba yar ngo'i dus tshes shis pa'i snga dro'i char/__dang po 'bri ba ni/__rang lha'i nga rgyal dang ldan pas ras sam shog bu la/__skyes pa srung na de nyid kyi srin lag gi khrag dang gi waM/__bud med srung na de nyid kyi srin lag gi khrag dang rgya skyegs kyis 'khor lo rtsibs brgyad pa lte ba mu khyud gnyis dang bcas pa'i dbus su hrIH__de'i mthar/__che ge mo'i nad dang gdon la sogs pa mi mthun pa'i phyogs thams cad shIMn+ta ku ru swA hA/__tshe bsod dpal 'byor la sogs pa mthun rkyen thams cad puSh+TiM ku ru swA hwA/__nad gdon sogs nye bar 'tshe ba thams cad las rak+ShaM ku ru swA hA/__rtsibs brgyad la shar nas rim pa bzhin/__oM/__AH__si/__ha/__nA/__da/__hU~M/__phaT ces pa'i yig 'bru re res mtshan pa/__mu khyud nang ma la gzungs ring /__phyi ma la A li g.yas skor dang /__kA li g.yon du bskor 'di la slob dpon rin po che'i yig char 'bri ba'i skabs mu khyud nang ma la dbyangs gsal dang /__phyi ma la gzungs sngags 'bri bar gsungs/__rab gnas kyi skabs dang /__dkar dang dmar gyi yig cha sogs la gong du smos pa ltar snang ngo /__/ba bri/__rab gnas ni/__bris zin pa dang 'khor lo stegs kyi dbus su bzhag__/mchod pa dang gtor ma gsum bsham/__bdag bskyed bzlas pa bcas grub rjes 'khor lo bsang sbyang /__stong pa'i ngang las 'khor lo rtsibs brgyad pa sogs nas/__g.yon du bskor ba zhes pa'i bar gong bzhin brjod pas gsal btab/__rang gi snying ga'i hrIHdang 'khor lo'i yi ge'i tshogs las 'od zer 'phros pas phyogs bcu'i de bzhin gshegs pa thams cad kyi thugs ka nas ye shes kyi 'khor lo oM badz+ra sa mA dzaHsa spyan drang /__dzaHhU~M ba~M hoHsa bstim/__oM badz+ra puSh+pe sogs kyis mchod/__gtor ma gcig phyogs skyong la cha gsum ltar phul la srung ba'i phrin las bcol/__rang gi snying ga'i sa bon dang 'khor lo'i yi ge'i tshogs las 'od zer 'phros/__bsrung bya'i rnam par shes pa 'od kyi rnam par bkug ste snying po dang gzungs sngags la thim/__slar yang de'i lus rang 'dra ba dpag tu med pa bkug ste A li dang kA li la thim/__lha sngags dang dbyer med par byin gyis brlabs pas sgo gsum sku gsung thugs kyi rang bzhin du gyur par bsams la/__puSh+pe sogs kyis mchod/__gtor ma gcig 'byung po la cha gsum ltar byin nas bar chad ma byed cig ces bsgo/__de nas 'khor lo lag g.yas su bzung ba'am bzung bar mos te mchog sbyin gyi phyag rgyas reg pa'i tshul dang bcas/__snying po/__gzungs ring /__A li kA li/__na mo rat+na tra yA ya/__oM yed+harma sogs dang /__oM si ha nA da sa ma ya/__ma nu pA la sogs seng ge sgra'i yi ge brgya pa rnams so so'i mthar spel tshig sbyar ba dang bcas pa brgya rtsa brgyad re bzlas pas byin rlabs kyi rgyun brtan par bya'o/__/gdags pa ni/__de nas 'khor lo tshul bzhin du blta ba/__tshon skud kyis dkri/__zangs la sogs pa'i snod du bcug la/__bsgrub bya mdun du 'khod par gtor ma gcig bgegs la byin nas sbyong ba gsum spyi ltar byas pas gdon bgegs thams cad rgyang ring du bskrad la mtshams bcad/__de nas snying po dang gzungs sngags bzla bzhin pas mgul lam dpung pa g.yon par gdags/__yi ge brgya pa lan gsum gyis brtan par bya zhing shis pa brjod/__phyis 'jigs pa dang ya nga ba sogs byung na bsgrub bya rang gi lag pas 'khor lo la 'jus/__mgon skyabs zhu bar dmigs te sngags rnams sngar bzhin du bzla/__gal te gdon 'grol dang 'brel bar srung 'khor gdags na/__srung ba zin pa'i rjes 'khor lo gdags la shis brjod sogs dkyus ltar bya'o/__/de ltar gdags pa'i phan yon kyang rgya gzhung las/__tshe ring bsod nams che ba dang /__/sdig pa thams cad byang ba dang /__/bgegs kyi tshogs rnams kun skyob cing /__/don rnams thams cad 'grub par 'gyur/__/zhes gsungs so/__/de'ang spyir seng ge sgra'i bsnyen pa thems pa tsam gyis/__tshe rabs su bsags pa'i las kyi sgrib pa thams cad byang ba dang /__nad rnying pa zhi zhing gsar pa mi 'byung ba dang /__lus kyi mdangs dang stobs rgyas pa dang /__dbang po gsal ba dang /__'dod dgu'i dpal gyis 'byor pa sogs phan yon dpag tu med par gsungs shing /__bye brag tu klu gdon gyis zin pa la 'bum phrag bzhi sogs bsnyen pas nad gdon las grol bar 'gyur la/__des ma grol na gzungs sgrub dang /__/bsnyen pa'i mthar chu bdag gi snying po btags pa'i las sbyor gyi bsnyen pa dang /__dug so sor ngos zin na so so'i gnyen po'i sngags dang sbrel ba'i bsnyen pa dang /__klu dang rgyal po dbye ba rnams rim bzhin tu bya ste/__de thams cad kyi mjug tu gdon 'grol gyi cho ga dang /__srung ba'i 'khor lo gdags pas phan bde'i dngos po 'phral du ster ba ni nges pa'o/__/'jig rten dbang phyug seng ge sgra'i/__/rig sngags bdud rtsi'i sprin chen las/__/byin rlabs zil dngar rtag 'bab pas/__/sa gsum nyer 'tsho'i slad gyur cig__/ces pa'ang snyigs ma'i dus kyi gzhan dbang du gyur pas gdams ngag nyi tshe ba la blo gtod cing /__gdug pa'i 'byung po skyabs su bsnyen pa las/__'di lta bu'i tshad ldan gyi gzhung la blo gros 'jug pa'i bsod nams can dkon pa'i dngos por gyur kyang /__rang nyid kho na'i mos pa'i dbang du byas te/__bya bral spong ba pa 'jam dbyangs mkhyen brtses slob dpon rin po che bsod nams rtse mo'i gsung rab dang /__dkar ston shAkya grags/__dmar chos kyi rgyal po/__kun mkhyen rat+na shrI sogs kyi gzhung gsal byed dang bcas pa las nyer mkho'i zin bris khyugs tsam spel ba dge legs mchog tu gyur cig___/__!