JKW-KABUM-12-NA-001-015

Previous Text Back to Volume PageLast text in section.

རི་ཁྲོད་མའི་མན་ངག་ཉེར་མཁོ་དགེ་ལེགས་སྣང་གཏེར།

Wylie title	ri khrod ma'i man ngag nyer mkho dge legs snang gter
Location	mkhyen brtse'i bka' 'bum Volume 12, sde tshan 1, Text 15, Pages 146-150 (Folios 73b3 to 75b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Source Author(s)	འཇིམས་པ་གློ་ཆེན་སངས་རྒྱས་སྲས་, འབྲི་གུང་ལོ་ཙཱ་བ་མ་ཎི་ཀ་ཤྲཱི་ ('jims pa glo chen sangs rgyas sras, 'bri gung lo tsA ba ma Ni ka shrI)
Citation	'jam dbyangs mkhyen brtse'i dbang po. ri khrod ma'i man ngag nyer mkho dge legs snang gter. In 'jam dbyangs mkhyen brtse'i dbang po'i bka' 'bum, Vol. 12: 146-150. Khams sde dge rdzong sar dgon: Rdzong sar blo gros phun tshogs, 2020.
Genre	Pith Instructions - man ngag
Deity	lha mo ri khrod ma
Colophon	ཞེས་པའང་བློ་ཆེན་སངས་རྒྱས་སྲས་དང་། ལོ་ཙཱ་བ་མ་ཎི་ཀ་སོགས་ཀྱི་གཞུང་ལས་ཉེར་མཁོ་འགའ་ཞིག་ཟིན་བྲིས་སུ་བགྱིས་པ་སརྦ་ཛཱ་ག་ཏཱྃ་ཛ་ཡནྟུ།། །།ཞེས་པ་འདི་ནི་རྗེ་བླ་མ་མཁྱེན་བརྩེའི་དབང་པོ་ཉིད་ཀྱིས་མཛད་པའོ།
	zhes pa'ang blo chen sangs rgyas sras dang /__lo tsA ba ma Ni ka sogs kyi gzhung las nyer mkho 'ga' zhig zin bris su bgyis pa sarba dzA ga tA~M dza yan+tu// zhes pa 'di ni rje bla ma mkhyen brtse'i dbang po nyid kyis mdzad pa'o/

Tibetan Text

Wylie

[edit]

༄༅། །རྗེ་བཙུན་རི་ཁྲོད་མའི་མན་ངག་ཉེར་མཁོ་དགེ་ལེགས་སྣང་གཏེར་ཞེས་བྱ་བ་བཞུགས་སོ། །ཨོཾ་སྭ་སྟི། གང་ཞིག་མི་ཕྱུགས་ལ་ནད་ཡམས་ཀྱི་གནོད་པ་མཐའ་དག་སྲུང་ཞིང་ཞི་བ་ལ་སོགས་པའི་ཆེད་དུ་རྗེ་བཙུན་རི་ཁྲོད་མའི་རྣལ་འབྱོར་བསྒོམ་པར་བྱ་སྟེ། དེ་ལའང་རྒྱུད་སྡེ་གོང་འོག་དང་རྗེས་སུ་འབྲེལ་བའི་སྒྲུབ་པའི་ཐབས་ཇི་ལྟར་རིགས་པ་ལ་སྦྱར་དུ་རུང་བའི་བཟླས་དམིགས་ནི། རྣམ་སྣང་སྒྱུ་འཕྲུལ་དྲྭ་བའི་རྒྱུད་ལས། །དཀྱིལ་འཁོར་དམར་པོ་ཆེར་འབར་བས། །ཁྲོ་བོའི་སྤྲིན་འཕྲོ་སྡུད་མཛད་ཅིང་། །གདོན་གང་སྐྱེ་རྒུའི་ནང་གནས་པ། །དེ་དག་ཁྲོ་བོའི་མེས་ཀྱང་བསྲེག །ཕྱིར་ཡང་བསྲེགས་ནས་སངས་རྒྱས་ཀྱིས། །ཁ་དོག་བདུད་རྩིའི་ཆར་འབེབས་མཛད། །དེ་འདྲའི་རྣལ་འབྱོར་གྱིས་བསྒོམས་ན། །མི་ངས་ཐམས་ཅད་ཞི་བར་མཛད། །ཅེས་དང་། །ནམ་མཁར་ཀུན་ནས་རིག་སྔགས་ཀྱི། །རྒྱལ་མོས་ལེགས་པར་བཀང་ནས་སུ། །བདུད་རྩིའི་ཆར་འབེབས་བསམས་ན་ནི། །མོད་ལ་གནོད་པ་ཞི་བར་འགྱུར། །ཅེས་གསུངས་པའི་དོན། རང་ཉིད་རི་ཁྲོད་ལོ་མ་ཅན་མར་གསལ་བའི་ཐུགས་ཀའི་ས་བོན་སྔགས་ཕྲེང་དང་བཅས་པ་དང་། སྐུའི་ཆ་ཐམས་ཅད་ནས་འོད་ཟེར་བསྐལ་བའི་མེ་ལྟ་བུ་ཕྱོགས་བཅུར་འབར་བའི་རྩེ་ལས་རང་འདྲ་བའི་ལྷ་མོ་རིག་པའི་ཁྲོ་བོ་དང་ཁྲོ་མོའི་ཚོགས་བསམ་གྱིས་མི་ཁྱབ་པས་བསྐོར་བ་ཉི་ཟེར་གྱི་རྡུལ་ལྟར་འཕྲོས། སྣོད་བཅུད་ཐམས་ཅད་དང་། ཆེད་དུ་དམིགས་པ་ཡོད་ན་དེ་ཉིད་ཀྱི་ཕྱོགས་ཀུན་ཏུ་ཁྱབ། ནད་རིམས་དང་། གདོན་བགེགས་ཐམས་ཅད་བསྲེགས་ཤིང་སྦྱངས། སླར་ཡང་ནམ་མཁའ་གང་བའི་རྗེ་བཙུན་མའི་སྐུ་ལས་རིག་སྔགས་ཀྱི་རང་བཞིན་བདུད་རྩིའི་ཆར་ཆེན་པོ་བབས་པས་ཐལ་བ་ཡང་མ་ལུས་པར་བཀྲུས་ཏེ་དག་པར་བྱས། བདུད་རྩིའི་རྒྱུན་དེ་ཉིད་བརྟན་གཡོ་ཐམས་ཅད་ལ་ཁྱབ་པར་ཞུགས་པས་ཕུན་སུམ་ཚོགས་པའི་དཔལ་དང་། སྟོབས་དང་། ནུས་པ་བསྐྱེད། འབར་བའི་མེ་ལྕེའི་ཕྲེང་བས་ཕྱོགས་མཚམས་སྟེང་འོག་ཀུན་ཏུ་འཁྲིགས་པ་ལ་བརྟེན་ནས་བསྐལ་པའི་བར་དུ་ནད་གདོན་གྱིས་གླགས་མི་རྙེད་པར་བསྲུང་བའི་ལས་མཛད་པར་བསམས་ལ་བཟླས་པ་བྱ་བ་ནི་ཁྱད་པར་གྱི་དམིགས་པའོ། །བསྙེན་པ་ལས་སུ་རུང་བས་མི་ནད་དང་། ཕྱུགས་ནད་ཞི་བར་བྱ་བའི་ཕྱིར་ལས་ཀྱི་སྦྱོར་བ་ནི་མི་ནད་ལ་བུམ་པའི་ཆོ་ག་རྒྱས་བསྡུས་གང་ཡང་རུང་བས་ནུས་ལྡན་དུ་བསྒྲུབས་པའི་བདུད་རྩིའི་ཆུས་བཀྲུ་བྱབ་སྲུང་གསུམ་ཆོ་ག་དང་འབྲེལ་བའམ། མ་འབྲེལ་ཡང་བཀྲུ་ཞིང་བཏུང་བ་དང་། མཚམས་བཅད་པའི་ཕྱིར་གནས་ཁང་དང་གྲོང་ཁྱེར་གྱི་ཁོར་ཡུག་ཏུ་འཐོར་བ་སོགས་བགྱིས་པས་སྔར་བྱུང་བ་ཞི་ཞིང་། སླར་བསྲུང་བར་འགྱུར་རོ། །ཕྱུགས་ནད་བྱུང་བའི་དུས་སུ་ནད་ཡོད་མེད་ཞིབ་ཏུ་བརྟགས་ལ་སོ་སོར་ཕྱེ། ནད་མེད་པ་རྣམས་ཀྱི་མཐའ་སྐོར་བྱེ་མ་ལ་རི་ཁྲོད་པའི་སྔགས་བཏབ་པས་གཏོར། ཁོར་ཡུག་ཀུན་ཏུ་ཨོཾ་ཨཱཿཧཱུྃ་བྲིས་ལ་མཚམས་བཅད། གྲོ་གའམ་ཤོག་བུ་ལ་རི་ཁྲོད་ལོ་མ་ཅན་མའི་གཟུངས་རིང་ཐུང་གང་རིགས་རྒྱ་སྣག་གིས་བྲིས། དྲི་བཟང་པོས་བྱུགས། སྲེག་པའམ་སྐྱ་གའི་སྒྲོ་ཐུར་གྱིས་སྲོག་ཤིང་བྱས་ལ་དྲིལ། དེ་དང་ལྷན་ཅིག་ཏུ་རྨ་བྱའི་མདོངས། གུ་གུལ། ཤུ་དག །གླ་རྩི། གི་ཝང་། མུ་ཟི། ལྡོང་རོས། ཐར་ནུ། བཙན་དུག་བཅས་ཀྱི་རྫས་རྣམས་ཐུམ་པོ་བྱས་ལ་རབ་ཏུ་གནས་པ་རྟ་ཕྱུགས་སོགས་གང་བསྲུང་པའི་མགུལ་དུ་གདགས། དེ་དག་འགྲིམ་པའི་སྒོ་ཁང་གི་ཡ་ཐེམ་ལ་གཟུངས་སྔགས་བྲིས་ལ་གླན་པས་ཐུབ་བོ། །ན་བ་རྣམས་ཁང་སྟོང་ངམ། དབེན་པའི་རི་སུལ་སོགས་ཐག་རིང་བའི་སར་ཕྱེ་ལ། དེའི་དྲུང་དུ་ཕྱི་ནས་འོངས་པའི་མི་དང་། དུད་འགྲོ་གཞན་མི་བཏང་བར་མཚམས་བཅད་དེ་སྔགས་ཆུ་བླུད་ཅིང་། སྔགས་ཆུའི་ཁ་ཕྲུས་མགོ་ལུས་ཐམས་ཅད་ལ་ཁྱབ་པར་གདབ། གུ་གུལ། གླ་རྩི། ཤུ་དག །མུ་ཟི། ལྡོང་རོས། ག་བུར། གུར་གུམ། གི་ཝང་། སྒོག་སྐྱ། སུག་སྨེལ། གཞན་ཡང་ཧོང་ལེན་དང་། བོང་དཀར་སོགས་བསིལ་སྨན་གྱི་རིགས་སྔགས་ཆུ་དང་སྦྱར་བ་ཁོང་དུ་བཏང་། བླ་མ་དང་དཀོན་མཆོག་ལ་གསོལ་བ་གདབ། ཡི་དམ་དང་ཆོས་སྐྱོང་ལ་མཆོད་གཏོར་འབུལ། ཁྱད་པར་མ་མོ་མཁའ་འགྲོའི་ཚོགས་ལ་མཆོད་ཅིང་ཐུགས་དམ་སྐོང་བ་དང་བཤགས་པ་བྱས་ལ་ནད་རིམས་ཞི་བའི་ཕྲིན་ལས་བཅོལ། གཞི་བདག་བགེགས་རིགས་ལ་གཏོར་མ་བྱིན་ནས་བཀའ་བསྒོ་བྱ། དེ་ལྟར་བགྱིས་པས་ནད་ཀྱིས་ཟིན་པ་རྣམས་ཐར་བ་དང་། ནད་མེད་པ་རྣམས་ལ་སྲུང་བའི་མཆོག་ཏུ་འགྱུར་རོ། །ཡང་རིམས་ཀྱིས་ཤི་བའི་གོས་སྟན་སོགས་ཡོ་བྱད་ཀྱི་རིགས་བསྡུ་དགོས་པ་བྱུང་ན། རང་རི་ཁྲོད་མར་གསལ་བའི་སྐུ་ལས་ཡེ་ཤེས་ཀྱི་མེ་འབར་བས་ཡོ་བྱད་ཀྱི་དངོས་པོ་རྣམས་གཞོབ་ཐུལ་གྱིས་ཚིག་སྟེ་ཐལ་བར་གྱུར་པར་བསམས་ལ་ཉམ་ང་བ་དང་བག་ཚ་མེད་པར་ལོངས་སྤྱད། དེ་བཞིན་དུ་རིམས་ཀྱིས་བཏབ་པའི་སར་འགྲོ་དགོས་ན། སྒོ་རྩར་ཕྱིན་པ་དང་རང་རི་ཁྲོད་མར་གསལ་བའི་སྐུ་ལས་ཡེ་ཤེས་ཀྱི་མེ་འབར་བས་གནས་ཁང་ཕྱི་ནང་ཐམས་ཅད་དང་། ནད་ཀྱི་དངོས་པོ་ནད་བདག་དང་བཅས་པ་ཐམས་ཅད་ཐུལ་གྱིས་ཚིག་པར་བསམས་ལ་ནང་དུ་འཇུག །ཕྱིར་འོང་བ་དང་སྒོ་རྩ་ནས་ཕྱིར་འབྲེང་བཅད་པ་ནི། གོས་ཀྱི་ཐུ་བ་ལན་གསུམ་དུ་སྤྲུགས། གོམ་པ་བཞག་པའི་ཕྱིན་མེ་དམར་འུར་འུར་དུ་འབར་བས་ནད་ཐམས་ཅད་ཚིག་པར་བསམ། རང་གི་སྒོ་རྩར་ཕྱིན་པའི་དུས་སུ་བྱེ་མའམ་ཉུངས་ཀར་ལ་སྔགས་བཏབ་ལ་ཕྱིར་རྗེས་སུ་གཏོར་བས། ནད་གདོན་ཕྱིར་འབྲེང་གི་རིགས་ཐམས་ཅད་གཅོད་པར་འགྱུར་རོ། །ཞེས་པའང་བློ་ཆེན་སངས་རྒྱས་སྲས་དང་། ལོ་ཙཱ་བ་མ་ཎི་ཀ་སོགས་ཀྱི་གཞུང་ལས་ཉེར་མཁོ་འགའ་ཞིག་ཟིན་བྲིས་སུ་བགྱིས་པ་སརྦ་ཛཱ་ག་ཏཱྃ་ཛ་ཡནྟུ།། །།ཞེས་པ་འདི་ནི་རྗེ་བླ་མ་མཁྱེན་བརྩེའི་དབང་པོ་ཉིད་ཀྱིས་མཛད་པའོ། །

[edit]

ri khrod ma'i man ngag nyer mkho dge legs snang gter/ @#/_/rje btsun ri khrod ma'i man ngag nyer mkho dge legs snang gter zhes bya ba bzhugs so/_/oM swa sti/__gang zhig mi phyugs la nad yams kyi gnod pa mtha' dag srung zhing zhi ba la sogs pa'i ched du rje btsun ri khrod ma'i rnal 'byor bsgom par bya ste/__de la'ang rgyud sde gong 'og dang rjes su 'brel ba'i sgrub pa'i thabs ji ltar rigs pa la sbyar du rung ba'i bzlas dmigs ni/__rnam snang sgyu 'phrul drwa ba'i rgyud las/__/dkyil 'khor dmar po cher 'bar bas/__/khro bo'i sprin 'phro sdud mdzad cing /__/gdon gang skye rgu'i nang gnas pa/__/de dag khro bo'i mes kyang bsreg__/phyir yang bsregs nas sangs rgyas kyis/__/kha dog bdud rtsi'i char 'bebs mdzad/__/de 'dra'i rnal 'byor gyis bsgoms na/__/mi ngas thams cad zhi bar mdzad/__/ces dang /__/nam mkhar kun nas rig sngags kyi/__/rgyal mos legs par bkang nas su/__/bdud rtsi'i char 'bebs bsams na ni/__/mod la gnod pa zhi bar 'gyur/__/ces gsungs pa'i don/__rang nyid ri khrod lo ma can mar gsal ba'i thugs ka'i sa bon sngags phreng dang bcas pa dang /__sku'i cha thams cad nas 'od zer bskal ba'i me lta bu phyogs bcur 'bar ba'i rtse las rang 'dra ba'i lha mo rig pa'i khro bo dang khro mo'i tshogs bsam gyis mi khyab pas bskor ba nyi zer gyi rdul ltar 'phros/__snod bcud thams cad dang /__ched du dmigs pa yod na de nyid kyi phyogs kun tu khyab/__nad rims dang /__gdon bgegs thams cad bsregs shing sbyangs/__slar yang nam mkha' gang ba'i rje btsun ma'i sku las rig sngags kyi rang bzhin bdud rtsi'i char chen po babs pas thal ba yang ma lus par bkrus te dag par byas/__bdud rtsi'i rgyun de nyid brtan g.yo thams cad la khyab par zhugs pas phun sum tshogs pa'i dpal dang /__stobs dang /__nus pa bskyed/__'bar ba'i me lce'i phreng bas phyogs mtshams steng 'og kun tu 'khrigs pa la brten nas bskal pa'i bar du nad gdon gyis glags mi rnyed par bsrung ba'i las mdzad par bsams la bzlas pa bya ba ni khyad par gyi dmigs pa'o/__/bsnyen pa las su rung bas mi nad dang /__phyugs nad zhi bar bya ba'i phyir las kyi sbyor ba ni mi nad la bum pa'i cho ga rgyas bsdus gang yang rung bas nus ldan du bsgrubs pa'i bdud rtsi'i chus bkru byab srung gsum cho ga dang 'brel ba'am/__ma 'brel yang bkru zhing btung ba dang /__mtshams bcad pa'i phyir gnas khang dang grong khyer gyi khor yug tu 'thor ba sogs bgyis pas sngar byung ba zhi zhing /__slar bsrung bar 'gyur ro/__/phyugs nad byung ba'i dus su nad yod med zhib tu brtags la so sor phye/__nad med pa rnams kyi mtha' skor bye ma la ri khrod pa'i sngags btab pas gtor/__khor yug kun tu oM AHhU~M bris la mtshams bcad/__gro ga'am shog bu la ri khrod lo ma can ma'i gzungs ring thung gang rigs rgya snag gis bris/__dri bzang pos byugs/__sreg pa'am skya ga'i sgro thur gyis srog shing byas la dril/__de dang lhan cig tu rma bya'i mdongs/__gu gul/__shu dag__/gla rtsi/__gi wang /__mu zi/__ldong ros/__thar nu/__btsan dug bcas kyi rdzas rnams thum po byas la rab tu gnas pa rta phyugs sogs gang bsrung pa'i mgul du gdags/__de dag 'grim pa'i sgo khang gi ya them la gzungs sngags bris la glan pas thub bo/__/na ba rnams khang stong ngam/__dben pa'i ri sul sogs thag ring ba'i sar phye la/__de'i drung du phyi nas 'ongs pa'i mi dang /__dud 'gro gzhan mi btang bar mtshams bcad de sngags chu blud cing /__sngags chu'i kha phrus mgo lus thams cad la khyab par gdab/__gu gul/__gla rtsi/__shu dag__/mu zi/__ldong ros/__ga bur/__gur gum/__gi wang /__sgog skya/__sug smel/__gzhan yang hong len dang /__bong dkar sogs bsil sman gyi rigs sngags chu dang sbyar ba khong du btang /__bla ma dang dkon mchog la gsol ba gdab/__yi dam dang chos skyong la mchod gtor 'bul/__khyad par ma mo mkha' 'gro'i tshogs la mchod cing thugs dam skong ba dang bshags pa byas la nad rims zhi ba'i phrin las bcol/__gzhi bdag bgegs rigs la gtor ma byin nas bka' bsgo bya/__de ltar bgyis pas nad kyis zin pa rnams thar ba dang /__nad med pa rnams la srung ba'i mchog tu 'gyur ro/__/yang rims kyis shi ba'i gos stan sogs yo byad kyi rigs bsdu dgos pa byung na/__rang ri khrod mar gsal ba'i sku las ye shes kyi me 'bar bas yo byad kyi dngos po rnams gzhob thul gyis tshig ste thal bar gyur par bsams la nyam nga ba dang bag tsha med par longs spyad/__de bzhin du rims kyis btab pa'i sar 'gro dgos na/__sgo rtsar phyin pa dang rang ri khrod mar gsal ba'i sku las ye shes kyi me 'bar bas gnas khang phyi nang thams cad dang /__nad kyi dngos po nad bdag dang bcas pa thams cad thul gyis tshig par bsams la nang du 'jug__/phyir 'ong ba dang sgo rtsa nas phyir 'breng bcad pa ni/__gos kyi thu ba lan gsum du sprugs/__gom pa bzhag pa'i phyin me dmar 'ur 'ur du 'bar bas nad thams cad tshig par bsam/__rang gi sgo rtsar phyin pa'i dus su bye ma'am nyungs kar la sngags btab la phyir rjes su gtor bas/__nad gdon phyir 'breng gi rigs thams cad gcod par 'gyur ro/__/zhes pa'ang blo chen sangs rgyas sras dang /__lo tsA ba ma Ni ka sogs kyi gzhung las nyer mkho 'ga' zhig zin bris su bgyis pa sarba dzA ga tA~M dza yan+tu//__//zhes pa 'di ni rje bla ma mkhyen brtse'i dbang po nyid kyis mdzad pa'o/_/