བོ་དོང་དབྱངས་ཅན་དམར་མོའི་གསང་སྒྲུབ་ལྷ་ལྔའི་སྒྲུབ་རྗེས་འཇིགས་བྲལ་དགྱེས་པའི་ལམ་སྲོལ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bo dong dbyangs can dmar mo'i gsang sgrub lha lnga'i sgrub rjes 'jigs bral dgyes pa'i lam srol
Location	mkhyen brtse'i bka' 'bum Volume 10, sde tshan 4, Text 27, Pages 361-369 (Folios 90a5 to 94a5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	བོ་དོང་པཎ་ཆེན་ཕྱོགས་ལས་རྣམ་རྒྱལ་ (bo dong paN chen phyogs las rnam rgyal)
Citation	'jam dbyangs mkhyen brtse'i dbang po. bo dong dbyangs can dmar mo'i gsang sgrub lha lnga'i sgrub rjes 'jigs bral dgyes pa'i lam srol. In 'jam dbyangs mkhyen brtse'i dbang po'i bka' 'bum, Vol. 10: 361-369. Khams sde dge rdzong sar dgon: Rdzong sar blo gros phun tshogs, 2020.
Genre	Activity Manual - las byang  ·  Permission to Invoke (anujñā) - rjes gnang  ·  Sadhanas - Evocation Ritual - sgrub thabs
Deity	dbyangs can ma dmar mo
Colophon	།ཅེས་པའང་གྲུབ་ཆེན་པདྨ་གར་དབང་གིས་མཛད་པའི་སྒྲུབ་རྗེས་དང་། ལས་ཚོགས་ཡིག་རྙིང་ཐོར་བུ་ལས་བཤད་པ་ལྟར་ཆོ་གའི་ཆིངས་སྦྱོར་ཚུལ་སོགས་བླ་མ་དམ་པའི་ཕྱག་བཞེས་ཇི་ལྟ་བར་འཇམ་དབྱངས་མཁྱེན་བརྩེའི་དབང་པོས་ཉུང་གསལ་སྙིང་པོར་དྲིལ་བའི་ཚུལ་གྱིས་ཤར་མར་སྤེལ་བ་སརྦ་ས་ཏྭ་བཱ་གཱི་ཤྭ་ར་སིདྡྷི་རསྟུ།།
	ces pa'ang grub chen pad+ma gar dbang gis mdzad pa'i sgrub rjes dang /__las tshogs yig rnying thor bu las bshad pa ltar cho ga'i chings sbyor tshul sogs bla ma dam pa'i phyag bzhes ji lta bar 'jam dbyangs mkhyen brtse'i dbang pos nyung gsal snying por dril ba'i tshul gyis shar mar spel ba sarba sa twa bA gI shwa ra sid+d+hi rastu

1 Texts in this Section (sde tshan or chos tshan)

27 361-369	བོ་དོང་དབྱངས་ཅན་དམར་མོའི་གསང་སྒྲུབ་ལྷ་ལྔའི་སྒྲུབ་རྗེས་འཇིགས་བྲལ་དགྱེས་པའི་ལམ་སྲོལ། bo dong dbyangs can dmar mo'i gsang sgrub lha lnga'i sgrub rjes 'jigs bral dgyes pa'i lam srol Activity Manual - las byang   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs	Text page View PDF
	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)

Tibetan Text

Wylie

[edit]

༄༅། །བོ་དོང་ལུགས་ཀྱི་དབྱངས་ཅན་མ་དམར་མོ་གསང་སྒྲུབ་ལྷ་ལྔའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་འཇིགས་བྲལ་དགྱེས་པའི་ལམ་སྲོལ་ཞེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། སྲས་བཅས་རྒྱལ་ཀུན་སྐྱེད་པའི་ཡུམ། །རྡོ་རྗེ་སྒྲ་དབྱངས་ལྷ་མོ་དང་། །དབྱེར་མེད་བླ་མ་ལ་བཏུད་ནས། །ཟབ་མོའི་གདམས་པ་ཅུང་ཟད་དབྱེ། འདི་ལ་གསུམ། སྒྲུབ་པའི་ཐབས། རྗེས་གནང་གི་ཆོ་ག །ལས་སྦྱོར་གྱི་རིམ་པའོ། །དང་པོ་ནི། སྐྱབས་སེམས་ཚོགས་བསགས་སྔོན་དུ་འགྲོ་བས། ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། སྟོང་པའི་ངང་ལས་རྡོ་རྗེ་སྲུང་བའི་གུར་ཁང་ཡངས་ཤིང་རྒྱ་ཆེ་བའི་ནང་དུ་བྷྲཱུྃ་ལས་རིན་པོ་ཆེ་སྣ་ཚོགས་ལས་གྲུབ་པའི་ཐར་པ་ཆེན་པོའི་གཞལ་ཡས་ཁང་། གྲུ་བཞི་སྒོ་བཞི་རྒྱན་རྟ་བབས་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། བདུད་རྩི་འོ་མའི་རྒྱ་མཚོ་ཆེན་པོ་ཀུན་ནས་འཁྱིལ་ཞིང་ནོར་བུ་སྣ་ཚོགས་ཀྱིས་བལྟམས་པའི་དབུས་ན། དཔག་བསམ་གྱི་སྡོང་པོ་ཡལ་ག་ལོ་འདབ་མེ་ཏོག་འབྲས་བུ་གཡུར་ཟ་ལྡེམ་པའི་ལྟེ་བར་པྃ་ལས་པདྨ་དམར་པོ་འདབ་མ་བརྒྱད་པ་དམར་ལ་དཀར་བའི་མདངས་ཆགས་པ་ཟེའུ་འབྲུ་དམར་སེར་དྲི་ངད་ཕྱོགས་བཅུར་འཕྲོ་བ། དེའི་སྟེང་དུ་ཨ་ལས་ཟླ་བའི་དཀྱིལ་འཁོར་ཤིན་ཏུ་གསལ་ཞིང་དྭངས་པའི་གདན་ལ། ཧྲཱིཾཿཡིག་དམར་པོ་རིང་ཆ་ཚེག་དྲག་དང་བཅས་པ་ལ་ཨོཾ་ཨཱཿཧཱུྃ་དཀར་དམར་མཐིང་གསུམ་གྱིས་མཚན་པ། དེ་ལས་འོད་ཟེར་ཚད་མེད་གཞལ་དུ་མེད་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཧྲཱིཾཿཡིག་འབྲུ་གསུམ་དང་བཅས་པ་ལ་ཐིམ། དེ་ཡོངས་སུ་གྱུར་པ་ལས། རང་སྐད་ཅིག་གིས་རྡོ་རྗེ་ལྷ་མོ་ངག་གི་དབང་ཕྱུག་རྗེ་བཙུན་དབྱངས་ཅན་མ་སྐུ་མདོག་དམར་མོ། ཞལ་གཅིག་ཕྱག་བཞིའི་རྩ་ཕྱག་དང་པོ་གཉིས་ཀྱིས་ཡབ་ལ་འཁྱུད་པ། ལྷག་མ་གཉིས་ཀྱི་གཡོན་ན་རིན་པོ་ཆེའི་རྒྱུད་མངས་དཀུ་གཡོན་དུ་བརྟེན་ནས་འཛིན་པ་ལ། གཡས་པའི་སོར་མོས་དལ་གྱིས་རྡུང་ཞིང་སྒྱུར་བས་སངས་རྒྱས་ཐམས་ཅད་ཀུན་ནས་མཉེས་ཏེ་གསུང་དབྱངས་ཡན་ལག་རྒྱ་མཚོའི་སྒྲ་སྙན་འབྱུང་བ། ཞབས་གཉིས་པདྨའི་སྐྱིལ་མོ་ཀྲུང་གིས་བཞུགས་པ། དེའི་པང་ན་ཡབ་བཅོམ་ལྡན་འདས་རྗེ་བཙུན་འཇམ་པའི་དབྱངས་སྐུ་མདོག་དམར་སེར་ཞལ་གཅིག་ཕྱག་བཞིའི་རྩ་ཕྱག་དང་པོ་གཉིས་ཀྱིས་ཡུམ་ལ་འཁྱུད་པ། ལྷག་མ་གཉིས་ཀྱི་གཡས་ན་རལ་གྲི་འོད་ཟེར་དཔག་ཏུ་མེད་པ་འབར་བ་དང་། གཡོན་ན་ཨུཏྤལ་སྔོན་པོ་ཤིན་ཏུ་གསལ་བའི་སྟེང་ན་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་འཛིན་པ། གཉིས་ཀའང་སྐུ་བལྟ་བས་ཆོག་མི་ཤེས་པ་ལ་དར་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། འོད་ཟེར་ཀུན་ཏུ་སྣང་བ་འཁྲུགས་པའི་དབུས་ན་བཞུགས་པ། དེའི་ཤར་གྱི་འདབ་མ་ལ་ཤེས་རབ་མ། ལྷོར་བློ་གྲོས་མ། ནུབ་ཏུ་དྲན་པ་མ། བྱང་དུ་ཡིད་གཞུང་མ་སྟེ་དེ་རྣམས་ཐམས་ཅད་སྐུ་མདོག་དཀར་པོ་ཞལ་གཅིག་ཕྱག་གཉིས་ཀྱི་གཡས་རལ་གྲི་དང་། གཡོན་པད་དཀར་འཛིན་པ། དར་དང་རིན་པོ་ཆེའི་རྒྱན་སྣ་ཚོགས་ཀྱིས་ཀུན་ནས་སྤྲས་ཤིང་ཡིད་དུ་འོང་བ། ཞབས་གཉིས་མཉམ་པའི་སྟབས་ཀྱིས་བཞེངས་པ། གཙོ་འཁོར་དེ་ཐམས་ཅད་ཀྱི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ། ཐུགས་ཀའི་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ དམ་ཚིག་པ་ལ་གཉིས་སུ་མེད་པར་ཐིམ། སླར་ཡང་འོད་འཕྲོས་དབང་ལྷ་སྤྱན་དྲངས། དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་གཙོ་འཁོར་ཐམས་ཅད་ལ་འོད་དཔག་མེད་ཀྱིས་དབུར་བརྒྱན་པར་གྱུར། ཨོཾ་བཛྲ་སྭ་ར་སྭ་ཏཱི་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། །རྒྱལ་བ་ཀུན་གྱི་ཡེ་ཤེས་ནི། །ཤེས་རབ་ལྷ་མོའི་སྐུར་སྟོན་མ། །དྲན་པས་བློ་གྲོས་མཆོག་སྩོལ་བའི། །རྡོ་རྗེ་དབྱངས་ཅན་མ་ལ་འདུད། །ཅེས་བསྟོད། གཙོ་འཁོར་ཐམས་ཅད་ཀྱི་ཐུགས་ཀར་ཟླ་བ་ལ་ཧྲཱིཾཿཡིག་དཀར་ལ་དམར་བའི་མདངས་ཆགས་པ། དེའི་མཐར་སྔགས་ཕྲེང་ཁ་དོག་སྣ་ཚོགས་པ་གཡས་སུ་འཁོར་བ་ལས་འོད་ཟེར་འཕྲོས། འཕགས་པ་མཆོད། སེམས་ཅན་ཐམས་ཅད་རྡོ་རྗེ་དབྱངས་ཅན་མའི་གོ་འཕང་ལ་བཀོད། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཁྱེན་བརྩེ་ནུས་པའི་ཡེ་ཤེས་དང་། བརྟན་གཡོའི་དྭངས་བཅུད་ཐམས་ཅད་འོད་ཟེར་དང་། ཧྲཱིཾཿཡིག་དཀར་དམར་མཐིང་གསུམ་གྱི་རྣམ་པར་སྤྱན་དྲངས། རང་གི་གནས་གསུམ་དུ་ཐིམ་པས་སྒོ་གསུམ་གྱི་སྡིག་སྒྲིབ་བག་ཆགས་དང་བཅས་པ་དང་། མི་ཤེས་པའི་མུན་པ་ཐམས་ཅད་བསལ། ཤེས་བྱ་ཐམས་ཅད་ལ་ཐོགས་པ་མེད་པའི་བློ་གྲོས་ཀྱི་སྣང་བ་རྒྱས། རྡོ་རྗེ་གསུམ་གྱི་བྱིན་རླབས་རྒྱུད་ལ་ཞུགས་པར་གྱུར། ཨོཾ་ཨཱཿཧྲཱིཾཿཧཱུྃ་སྭཱ་ཧཱ། ཞེས་གཙོ་བོར་བཟླ། ཐུན་མཐར། ཨོཾ་པི་ཙུ་པི་ཙུ་པྲཛྙཱ་ཝརྡྡྷཱ་ནི། ཛྭ་ལ་ཛྭ་ལ་མེ་དྷཱ་ཝརྡྡྷཱ་ནི། དྷི་རི་དྷི་རི་བུདྡྷི་བརྡྷཱ་ནི་སྭཱ་ཧཱ། ཞེས་པའང་ཅུང་ཟད་བཟླས་ལ་མཆོད་ཅིང་བསྟོད། འདོད་པའི་དོན་ལ་གསོལ་བ་གདབ། གཏོར་མ་འབུལ་བར་འདོད་ན་དབྱངས་ཅན་མ་དཀར་མོའི་སྒྲུབ་ཐབས་སུ་བཤད་པ་ལྟར་འབུལ། ཡི་གེ་བརྒྱ་པ་དང་། ཨོཾ་བཛྲ་ས་ཏྭ་ཧཱུྃ། ཞེས་མང་དུ་བཟླས་ལ་ནོངས་པ་བཟོད་པར་གསོལ། གནས་གསུམ་བསྲུང་། བསྔོ་སྨོན་ཤིས་བརྗོད་བྱའོ། །བསྙེན་པ་བྱེད་ན་རྩ་བའི་སྔག་འབུམ་ཕྲག་བདུན་དང་། ལས་སྦྱོར་གྱི་སྔགས་དེའི་བཅུ་ཆ་ཙམ་བཟླ། འདི་ཉིད་བླ་མེད་ཀྱི་ཕྱོགས་སུ་གཏོགས་ཀྱང་ཀུན་སྤྱོད་རྒྱུད་སྡེ་འོག་མ་ལྟར་ཁྲུས་དང་གཙང་སྦྲ་ལ་གནས་པར་བྱ་ཞིང་། ཐུན་མཚམས་ཀྱི་རྣལ་འབྱོར་སོགས་ཀྱང་དབྱངས་ཅན་མ་དཀར་མོའི་སྐབས་སུ་བཤད་པ་ལྟར་སྦྱར་ལ་ཉམས་སུ་བླང་ངོ་།། །།

གཉིས་པ་རྗེས་གནང་ནི། སྦྱོར་བའི་སྐབས་མཎྜལ་གྱི་འཁོར་ལོའི་སྟེང་དུ་འབྲས་དཀར་གྱི་ཕྱེ་མའི་ཚབ་སིནྡྷཱུ་རའི་ཕྱེ་མ་དར་ཚགས་ལ་དྲངས་པས་མནན་ཏེ་འཁོར་ལོའི་རི་མོ་དམར་སེར་གསལ་བར་བྱ། གཏོར་མའང་དམར་པོ་མཛད་པ་ཕྱག་ལེན་དུ་སྣང་། གཞན་འདྲ། དངོས་གཞི་བདག་མདུན་སྒྲུབ་ཚུལ་ལྷ་སྔགས་ཀྱི་ཁྱད་པར་མ་གཏོགས་ཆོ་གའི་ཆིངས་དབྱངས་ཅན་མ་དཀར་མོའི་སྐབས་ཇི་ལྟ་བ་དང་། རྗེས་གནང་གི་ཚེ་རས་དཀར་པོའི་སྟོད་གཡོགས་སོགས་ཆས་ཞུགས་མི་དགོས། གསུང་གི་རྗེས་གནང་ལ་བཟླས་ལུང་སྤྱི་འགྲེ་ལྟར་མཛད། གཞན་ལྷ་སྔགས་བརྗེ་བ་མ་གཏོགས་འདྲའོ།། །། གསུམ་པ་ལས་སྦྱོར་ལ་གསུམ། རྫས་ཀྱི་སྦྱོར་བ་དང་། འཕྲུལ་འཁོར་དང་། བུམ་པའི་ཆོ་གའོ། །དང་པོ་ནི། རྒྱལ་ཕུར་འགྲུབ་སྦྱོར་སོགས་གཟའ་སྐར་ཤིས་པའི་ཉིན་སིནྡྷཱུ་ར། ཤུ་དག་དཀར་པོ། ཡུང་བ། གི་ཧཾ། ཤིང་མངར་རྣམས་སོ་སོར་ཞིབ་ཏུ་བཏགས་པའི་ཕྱེ་མ་རིན་པོ་ཆེའི་སྣོད་དུ་དབུས་དང་ཕྱོགས་བཞིར་ཚོམ་བུ་བྱས་ལ་སྤུངས། དེ་རྣམས་ཀྱི་སྟེང་དུ་རྡོ་རྗེ་དབྱངས་ཅན་མ་གཙོ་འཁོར་སོ་སོར་གསལ་བའི་སྐུ་ལས་བདུད་རྩིའི་རྒྱུན་བབས་པས་སྨན་གྱི་ཉེས་སྐྱོན་ཐམས་ཅད་སྦྱངས། ནུས་པ་མཆོག་ཏུ་བསྐྱེད་པར་བསམས་ལ་རྩ་སྔགས་ཅི་ནུས་བཟླ། མཐར་ལྷ་རྣམས་འོད་དུ་ཞུ་བ་སྨན་སོ་སོ་ལ་བསྟིམས་ནས་གཅིག་ཏུ་བསྲེས་ལ་སྦྲང་རྩི་དང་། བ་དམར་མོ་དང་། ར་དཀར་མོའི་འོ་མ་བཅས་སྦྱར་བས་རིལ་བུར་དྲིལ། སླར་ཡང་རིལ་བུ་ཉིད་ལྷར་བསྐྱེད་བསྟིམ་བཟླས་པ་བྱ་བ་དང་། དབྱངས་ཅན་མ་དཀར་མོའི་སྐབས་སུ་བཤད་པའི་རིལ་བུའི་སྔགས་རྣམས་ཀྱང་ཇི་ལྟར་རིགས་པ་བཟླས་ལ་ཚུལ་བཞིན་དུ་བསྒྲུབས་པ་ཉིད་ཐོ་རངས་ཀྱི་དུས་སུ་བསྟེན་པས་བཅུད་ལེན་གྱི་མཆོག་ཏུ་འགྱུར་པ་དང་། ཐོས་པ་འཛིན་པ་དང་། སྨྲ་མཁས་ཤིང་དབྱངས་སྙན་པ་སོགས་བློ་དང་ངག་གི་དངོས་གྲུབ་ལ་དབང་འབྱོར་པར་འགྱུར་རོ།། །། གཉིས་པ་རིག་པའི་འཕྲུལ་འཁོར་ནི། རང་ཉིད་ལྷའི་རྣལ་འབྱོར་དང་ལྡན་པས་གྲོ་གའམ་ཤོག་བུ་གཙང་མ་ལ་གུར་གུམ་དང་། གི་ཧཾ་སྦྱར་བའི་སྣག་ཚས་འཁོར་ལོ་མུ་ཁྱུད་རིམ་པ་ལྔ་ལྟེ་བ་དང་བཅས་པའི་དབུས་སུ་ཧྲཱིཾཿ དེའི་མཐར་རྩ་སྔགས་དང་ལས་སྔགས་ཀྱི་གཤམ་དུ། མ་མ་པྲཛྙཱ་ཛྙཱ་ན་པུཥྟིཾ་ཀུ་རུ་ཨོཾ་ཞེས་བྲི། མུ་ཁྱུད་དང་པོ་ལ་པདྨ་འདབ་མ་བཞི་པའི་དབུས་སུ་ཧྲཱིཾཿ མཐར་ཤར་དུ། ཨོཾ་པྲཛྙཱ་སྭཱ་ཧཱ། ལྷོར། ཨོཾ་མ་ཏཱི་སྭཱ་ཧཱ། ནུབ་ཏུ། ཨོཾ་སྨྲྀ་ཏཱི་སྭཱ་ཧཱ། བྱང་དུ། ཨོཾ་མེ་ངྷཱ་སྭཱ་ཧཱ། ཞེས་སོ་སོའི་མཐར་སྤེལ་ཚིག་སྦྱར་བས་བསྐོར། གཉིས་པ་ལ་དབྱངས། གསུམ་པ་ལ་གསལ་བྱེད། བཞི་པ་ལ་རྟེན་སྙིང་རྣམས་ཀྱི་མཐར་སྤེལ་ཚིག་སྦྱར་བ་སྟེ། ཐམས་ཅད་གཡས་སྐོར་དུ་བཀོད། ལྔ་པ་ལ་རྡོ་རྗེའི་ཕྲེང་བ་དང་། ཕྱི་རོལ་དུ་མེ་འབར་བས་ཁྱབ་པར་འབྲིའོ། །དེ་ནས་སྔགས་བཏབ་པའི་སིནྡྷཱུ་ར། གུར་གུམ། གི་ཧཾ་རྣམས་ཀྱིས་ཁྱབ་པར་བྱུགས། ཡིག་འབྲུ་རྣམས་ལྷ་མོ་འཁོར་བཅས་དང་། མིང་སྤེལ་བསྒྲུབ་བྱར་གསལ་གདབ་ལ་རབ་གནས་སྤྱི་ལྟར་བྱས་མཐར་ལྷ་རྣམས་ཡིག་འབྲུ་དང་། བསྒྲུབ་བྱའི་མིང་སྤེལ་དུ་བསྒྱུར་ལ་ཤིས་པ་བརྗོད། གྲུ་བཞིར་ལྟེ་བ་མཉམས་པར་བལྟ་བ། ཚོན་སྐུད་སྣ་ལྔས་དཀྲིས་ལ་མགུལ་ལམ་དཔུང་པར་བཏགས་ན་རིག་པའི་ལྷ་མོས་དུས་རྟག་ཏུ་བྱིན་གྱིས་རློབ་ཅིང་། ནད་དང་གནོད་པ་ལས་སྲུང་བ་དང་། ཕས་རྒོལ་གྱི་ཕྱོགས་ལས་རྣམ་པར་རྒྱལ་བའི་ཤེས་རབ་ཐོབ་པར་འགྱུར་རོ།། །།

གསུམ་པ་བུམ་པ་སྒྲུབ་པའི་ཆོ་ག་ནི། བུམ་རྫས་ཉེར་ལྔ། བཟང་པོ་དྲུག །སིནྡྷཱུ་ར་རྣམས་སྦྱར་བའི་དྲི་ཞིམ་པོའི་ཆུས་བུམ་པ་དགང་ལ་མཎྜལ་གྱི་དབུས་སུ་བཞག །གཞན་ཡང་མཆོད་གཏོར་སོགས་ཚོགས་པར་བྱ། བདག་གི་རྣལ་འབྱོར་སྔོན་དུ་འགྲོ་བས། བུམ་ནང་ལྷ་མོ་གཙོ་འཁོར་ལྔ་བསྐྱེད་ལ་ཆོ་ག་སྤྱི་དང་མཐུན་པས་ཞག་བདུན་སོགས་སུ་ཐུན་དུ་བཅད་ལ་བསྒྲུབ། མཐར་ཡེ་ཤེས་པ་གཤེགས། དམ་ཚིག་པ་འོད་དུ་ཞུ་བའི་ཆུ་བདུད་རྩིར་བསམས་ལ་རང་གཞན་གྱི་དོན་བྱས་པས། ཤེས་རབ་འགྲིབ་བའི་གེགས་སེལ་དང་། རྣོ་མྱུར་ཟབ་ཅིང་རྒྱ་ཆེ་བའི་ཤེས་རབ་འཕེལ་བའི་བོགས་འདོན་དུ་འགྱུར་བར་གསུངས་ཤིང་། གཞན་ཡང་སྦྱིན་སྲེག་དང་། གེགས་སེལ་སྤོགས་ཆོག་སོགས་ཀྱང་དབྱངས་ཅན་མ་དཀར་མོའི་སྐབས་སུ་བཤད་པ་རྣམས་འདིར་ཡང་སྦྱར་དུ་རུང་བར་གསུངས་སོ། །རྡོ༷་རྗེ༷་དབྱང༷ས་ཅ༷ན་སྒྲུབ༷་པའི་ཐབ༷ས། །འཇིག༷ས་བྲལ༷་སློབ་དཔོན་རབ་དགྱེས་པ༷འི། །ལ༷མ་སྲོལ༷་བདུད་རྩིའི་ཟླ་སྣང་གིས། །ས་གསུམ་ཤིས་པ་སྦྱིན་གྱུར་ཅིག །ཅེས་པའང་གྲུབ་ཆེན་པདྨ་གར་དབང་གིས་མཛད་པའི་སྒྲུབ་རྗེས་དང་། ལས་ཚོགས་ཡིག་རྙིང་ཐོར་བུ་ལས་བཤད་པ་ལྟར་ཆོ་གའི་ཆིངས་སྦྱོར་ཚུལ་སོགས་བླ་མ་དམ་པའི་ཕྱག་བཞེས་ཇི་ལྟ་བར་འཇམ་དབྱངས་མཁྱེན་བརྩེའི་དབང་པོས་ཉུང་གསལ་སྙིང་པོར་དྲིལ་བའི་ཚུལ་གྱིས་ཤར་མར་སྤེལ་བ་སརྦ་ས་ཏྭ་བཱ་གཱི་ཤྭ་ར་སིདྡྷི་རསྟུ།། །། ༈

[edit]

bo dong dbyangs can dmar mo'i gsang sgrub lha lnga'i sgrub rjes 'jigs bral dgyes pa'i lam srol/ @#/_/bo dong lugs kyi dbyangs can ma dmar mo gsang sgrub lha lnga'i sgrub thabs rjes gnang las tshogs dang bcas pa 'jigs bral dgyes pa'i lam srol zhes bya ba bzhugs so/__/oM swasti sid+d+haM/__sras bcas rgyal kun skyed pa'i yum/__/rdo rje sgra dbyangs lha mo dang /__/dbyer med bla ma la btud nas/__/zab mo'i gdams pa cung zad dbye/__'di la gsum/__sgrub pa'i thabs/__rjes gnang gi cho ga__/las sbyor gyi rim pa'o/__/dang po ni/__skyabs sems tshogs bsags sngon du 'gro bas/__oM swa b+hA ba shud+d+haHsarba d+harmAHswa b+hA ba shud+d+ho\u0f85haM/__stong pa'i ngang las rdo rje srung ba'i gur khang yangs shing rgya che ba'i nang du b+h+rU~M las rin po che sna tshogs las grub pa'i thar pa chen po'i gzhal yas khang /__gru bzhi sgo bzhi rgyan rta babs mtshan nyid thams cad yongs su rdzogs pa'i dbus su/__bdud rtsi 'o ma'i rgya mtsho chen po kun nas 'khyil zhing nor bu sna tshogs kyis bltams pa'i dbus na/__dpag bsam gyi sdong po yal ga lo 'dab me tog 'bras bu g.yur za ldem pa'i lte bar pa~M las pad+ma dmar po 'dab ma brgyad pa dmar la dkar ba'i mdangs chags pa ze'u 'bru dmar ser dri ngad phyogs bcur 'phro ba/__de'i steng du a las zla ba'i dkyil 'khor shin tu gsal zhing dwangs pa'i gdan la/__hrIMHyig dmar po ring cha tsheg drag dang bcas pa la oM AHhU~M dkar dmar mthing gsum gyis mtshan pa/__de las 'od zer tshad med gzhal du med pa 'phros/__'phags pa mchod/__sems can gyi don byas/__tshur 'dus hrIMHyig 'bru gsum dang bcas pa la thim/__de yongs su gyur pa las/__rang skad cig gis rdo rje lha mo ngag gi dbang phyug rje btsun dbyangs can ma sku mdog dmar mo/__zhal gcig phyag bzhi'i rtsa phyag dang po gnyis kyis yab la 'khyud pa/__lhag ma gnyis kyi g.yon na rin po che'i rgyud mangs dku g.yon du brten nas 'dzin pa la/__g.yas pa'i sor mos dal gyis rdung zhing sgyur bas sangs rgyas thams cad kun nas mnyes te gsung dbyangs yan lag rgya mtsho'i sgra snyan 'byung ba/__zhabs gnyis pad+ma'i skyil mo krung gis bzhugs pa/__de'i pang na yab bcom ldan 'das rje btsun 'jam pa'i dbyangs sku mdog dmar ser zhal gcig phyag bzhi'i rtsa phyag dang po gnyis kyis yum la 'khyud pa/__lhag ma gnyis kyi g.yas na ral gri 'od zer dpag tu med pa 'bar ba dang /__g.yon na ut+pal sngon po shin tu gsal ba'i steng na shes rab kyi pha rol tu phyin pa'i pusti 'dzin pa/__gnyis ka'ang sku blta bas chog mi shes pa la dar dang rin po che'i rgyan sna tshogs kyis brgyan pa/__'od zer kun tu snang ba 'khrugs pa'i dbus na bzhugs pa/__de'i shar gyi 'dab ma la shes rab ma/__lhor blo gros ma/__nub tu dran pa ma/__byang du yid gzhung ma ste de rnams thams cad sku mdog dkar po zhal gcig phyag gnyis kyi g.yas ral gri dang /__g.yon pad dkar 'dzin pa/__dar dang rin po che'i rgyan sna tshogs kyis kun nas spras shing yid du 'ong ba/__zhabs gnyis mnyam pa'i stabs kyis bzhengs pa/__gtso 'khor de thams cad kyi dpral bar oM/__mgrin par AH__thugs kar hU~M/__thugs ka'i hU~M las 'od zer 'phros pas rang bzhin gyi gnas nas bsgoms pa dang 'dra ba'i ye shes pa oM badz+ra sa mA dzaH__dzaHhU~M ba~M hoH__dam tshig pa la gnyis su med par thim/__slar yang 'od 'phros dbang lha spyan drangs/__dbang bskur/__sku gang /__dri ma dag__/chu'i lhag ma yar lud pa las gtso 'khor thams cad la 'od dpag med kyis dbur brgyan par gyur/__oM badz+ra swa ra swa tI sa pa ri wA ra ar+g+haM nas/__shab+da'i bar gyis mchod/__/rgyal ba kun gyi ye shes ni/__/shes rab lha mo'i skur ston ma/__/dran pas blo gros mchog stsol ba'i/__/rdo rje dbyangs can ma la 'dud/__/ces bstod/__gtso 'khor thams cad kyi thugs kar zla ba la hrIMHyig dkar la dmar ba'i mdangs chags pa/__de'i mthar sngags phreng kha dog sna tshogs pa g.yas su 'khor ba las 'od zer 'phros/__'phags pa mchod/__sems can thams cad rdo rje dbyangs can ma'i go 'phang la bkod/__sangs rgyas dang byang chub sems dpa' rnams kyi mkhyen brtse nus pa'i ye shes dang /__brtan g.yo'i dwangs bcud thams cad 'od zer dang /__hrIMHyig dkar dmar mthing gsum gyi rnam par spyan drangs/__rang gi gnas gsum du thim pas sgo gsum gyi sdig sgrib bag chags dang bcas pa dang /__mi shes pa'i mun pa thams cad bsal/__shes bya thams cad la thogs pa med pa'i blo gros kyi snang ba rgyas/__rdo rje gsum gyi byin rlabs rgyud la zhugs par gyur/__oM AHhrIMHhU~M swA hA/__zhes gtso bor bzla/__thun mthar/__oM pi tsu pi tsu pradz+nyA war+d+d+hA ni/__dz+wa la dz+wa la me d+hA war+d+d+hA ni/__d+hi ri d+hi ri bud+d+hi bar+d+hA ni swA hA/__zhes pa'ang cung zad bzlas la mchod cing bstod/__'dod pa'i don la gsol ba gdab/__gtor ma 'bul bar 'dod na dbyangs can ma dkar mo'i sgrub thabs su bshad pa ltar 'bul/__yi ge brgya pa dang /__oM badz+ra sa twa hU~M/__zhes mang du bzlas la nongs pa bzod par gsol/__gnas gsum bsrung /__bsngo smon shis brjod bya'o/__/bsnyen pa byed na rtsa ba'i sngag 'bum phrag bdun dang /__las sbyor gyi sngags de'i bcu cha tsam bzla/__'di nyid bla med kyi phyogs su gtogs kyang kun spyod rgyud sde 'og ma ltar khrus dang gtsang sbra la gnas par bya zhing /__thun mtshams kyi rnal 'byor sogs kyang dbyangs can ma dkar mo'i skabs su bshad pa ltar sbyar la nyams su blang ngo //__// gnyis pa rjes gnang ni/__sbyor ba'i skabs maN+Dal gyi 'khor lo'i steng du 'bras dkar gyi phye ma'i tshab sin+d+hU ra'i phye ma dar tshags la drangs pas mnan te 'khor lo'i ri mo dmar ser gsal bar bya/__gtor ma'ang dmar po mdzad pa phyag len du snang /__gzhan 'dra/__dngos gzhi bdag mdun sgrub tshul lha sngags kyi khyad par ma gtogs cho ga'i chings dbyangs can ma dkar mo'i skabs ji lta ba dang /__rjes gnang gi tshe ras dkar po'i stod g.yogs sogs chas zhugs mi dgos/__gsung gi rjes gnang la bzlas lung spyi 'gre ltar mdzad/__gzhan lha sngags brje ba ma gtogs 'dra'o//__// gsum pa las sbyor la gsum/__rdzas kyi sbyor ba dang /__'phrul 'khor dang /__bum pa'i cho ga'o/__/dang po ni/__rgyal phur 'grub sbyor sogs gza' skar shis pa'i nyin sin+d+hU ra/__shu dag dkar po/__yung ba/__gi haM/__shing mngar rnams so sor zhib tu btags pa'i phye ma rin po che'i snod du dbus dang phyogs bzhir tshom bu byas la spungs/__de rnams kyi steng du rdo rje dbyangs can ma gtso 'khor so sor gsal ba'i sku las bdud rtsi'i rgyun babs pas sman gyi nyes skyon thams cad sbyangs/__nus pa mchog tu bskyed par bsams la rtsa sngags ci nus bzla/__mthar lha rnams 'od du zhu ba sman so so la bstims nas gcig tu bsres la sbrang rtsi dang /__ba dmar mo dang /__ra dkar mo'i 'o ma bcas sbyar bas ril bur dril/__slar yang ril bu nyid lhar bskyed bstim bzlas pa bya ba dang /__dbyangs can ma dkar mo'i skabs su bshad pa'i ril bu'i sngags rnams kyang ji ltar rigs pa bzlas la tshul bzhin du bsgrubs pa nyid tho rangs kyi dus su bsten pas bcud len gyi mchog tu 'gyur pa dang /__thos pa 'dzin pa dang /__smra mkhas shing dbyangs snyan pa sogs blo dang ngag gi dngos grub la dbang 'byor par 'gyur ro//__// gnyis pa rig pa'i 'phrul 'khor ni/__rang nyid lha'i rnal 'byor dang ldan pas gro ga'am shog bu gtsang ma la gur gum dang /__gi haM sbyar ba'i snag tshas 'khor lo mu khyud rim pa lnga lte ba dang bcas pa'i dbus su hrIMH__de'i mthar rtsa sngags dang las sngags kyi gsham du/__ma ma pradz+nyA dz+nyA na puSh+tiM ku ru oM zhes bri/__mu khyud dang po la pad+ma 'dab ma bzhi pa'i dbus su hrIMH__mthar shar du/__oM pradz+nyA swA hA/__lhor/__oM ma tI swA hA/__nub tu/__oM smr-i tI swA hA/__byang du/__oM me ng+hA swA hA/__zhes so so'i mthar spel tshig sbyar bas bskor/__gnyis pa la dbyangs/__gsum pa la gsal byed/__bzhi pa la rten snying rnams kyi mthar spel tshig sbyar ba ste/__thams cad g.yas skor du bkod/__lnga pa la rdo rje'i phreng ba dang /__phyi rol du me 'bar bas khyab par 'bri'o/__/de nas sngags btab pa'i sin+d+hU ra/__gur gum/__gi haM rnams kyis khyab par byugs/__yig 'bru rnams lha mo 'khor bcas dang /__ming spel bsgrub byar gsal gdab la rab gnas spyi ltar byas mthar lha rnams yig 'bru dang /__bsgrub bya'i ming spel du bsgyur la shis pa brjod/__gru bzhir lte ba mnyams par blta ba/__tshon skud sna lngas dkris la mgul lam dpung par btags na rig pa'i lha mos dus rtag tu byin gyis rlob cing /__nad dang gnod pa las srung ba dang /__phas rgol gyi phyogs las rnam par rgyal ba'i shes rab thob par 'gyur ro//__// gsum pa bum pa sgrub pa'i cho ga ni/__bum rdzas nyer lnga/__bzang po drug__/sin+d+hU ra rnams sbyar ba'i dri zhim po'i chus bum pa dgang la maN+Dal gyi dbus su bzhag__/gzhan yang mchod gtor sogs tshogs par bya/__bdag gi rnal 'byor sngon du 'gro bas/__bum nang lha mo gtso 'khor lnga bskyed la cho ga spyi dang mthun pas zhag bdun sogs su thun du bcad la bsgrub/__mthar ye shes pa gshegs/__dam tshig pa 'od du zhu ba'i chu bdud rtsir bsams la rang gzhan gyi don byas pas/__shes rab 'grib ba'i gegs sel dang /__rno myur zab cing rgya che ba'i shes rab 'phel ba'i bogs 'don du 'gyur bar gsungs shing /__gzhan yang sbyin sreg dang /__gegs sel spogs chog sogs kyang dbyangs can ma dkar mo'i skabs su bshad pa rnams 'dir yang sbyar du rung bar gsungs so/__/rdoX rjeX dbyangaXs caXn sgrubaX pa'i thabaXs/__/'jigaXs bralaX slob dpon rab dgyes paX'i/__/laXm srolaX bdud rtsi'i zla snang gis/__/sa gsum shis pa sbyin gyur cig__/ces pa'ang grub chen pad+ma gar dbang gis mdzad pa'i sgrub rjes dang /__las tshogs yig rnying thor bu las bshad pa ltar cho ga'i chings sbyor tshul sogs bla ma dam pa'i phyag bzhes ji lta bar 'jam dbyangs mkhyen brtse'i dbang pos nyung gsal snying por dril ba'i tshul gyis shar mar spel ba sarba sa twa bA gI shwa ra sid+d+hi rastu//____//__!_