བླ་མའི་ཐུགས་སྒྲུབ་རྡོ་རྗེ་དྲག་རྩལ་ལས། ཞལ་གདམས་ལམ་རིམ་ཡེ་ཤེས་སྙིང་པོའི་འགྲེལ་པ་ཡེ་ཤེས་སྣང་བ་རབ་ཏུ་རྒྱས་པ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i thugs sgrub rdo rje drag rtsal las zhal gdams lam rim ye shes snying po'i 'grel pa ye shes snang ba rab tu rgyas pa
Location	mkhyen brtse'i bka' babs Volume 21, Text 3, Pages 89-569 (Folios 1a to 241a1)
Author	འཇམ་མགོན་ཀོང་སྤྲུལ་
Less details More details
Tertön	མཆོག་གྱུར་གླིང་པ་, འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po, mchog gyur gling pa)
Citation	'jam mgon kong sprul. bla ma'i thugs sgrub rdo rje drag rtsal las zhal gdams lam rim ye shes snying po'i 'grel pa ye shes snang ba rab tu rgyas pa. In Rdzong sar 'jam dbyangs mkhyen brtse'i dbang po'i bka' babs, Vol. 21: 89-569. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Advice - zhal gdams  ·  Commentary Extensive - rgya cher 'grel pa  ·  Stages of the Path - lam rim
Cycle	ཞལ་གདམས་ལམ་རིམ་ཡེ་ཤེས་སྙིང་པོ་ (zhal gdams lam rim ye shes snying po)
Parent Cycle	བླ་མའི་ཐུགས་སྒྲུབ་རྡོ་རྗེ་དྲག་རྩལ་ (bla ma'i thugs sgrub rdo rje drag rtsal)
Karchag page	JKW-KABAB-Volume-21-ZHA-Karchag
RTZ	In the Rinchen Terdzö: https://rtz.tsadra.org/index.php/Terdzo-SO-002
Colophon	།ཅེས་ཐུགས་སྒྲུབ་རྣམ་པ་བཞིའི་རྒྱབ་ཆོས་ཞལ་གདམས་ལམ་རིམ་ཡེ་ཤེས་སྙིང་པོའི་འགྲེལ་པ་མདོར་བསྡུས་སུ་བྱས་པ་འདིའང༌། ཁྱབ་བདག་འཁོར་ལོའི་མགོན་པོ་གཏེར་ཆེན་རིག་འཛིན་བླ་མ་ལྷན་རྒྱས་ནས་བཀའ་ལུང་གི་རྗེས་སུ་གནང་བ་དང༌། རྒྱལ་དབང་ཐམས་ཅད་མཁྱེན་པ་བཅུ་བཞི་པའི་ཐུགས་སྲས་ཀཾ་ཚང་བསྟན་པའི་གསལ་བྱེད་མཚུར་ཕུ་རྗེ་དབོན་མཆོག་སྤྲུལ་རྣམ་པ་གཉིས་དང༌། མཁྱེན་ལྡན་ཌཱ་ཀི་བདེ་ཆེན་ཆོས་སྒྲོན་ནས་ཀྱང་གསེར་གྱི་མེ་ཏོག་བཅས་རིང་ནས་བསྐུལ་ཅིང་སླད་དུ་གཏེར་སྲས་རིག་འཛིན་ཚེ་དབང་གྲགས་པ་དང་ལྷན་ཅིག་གསུང་བསྐུལ་གནང་བ་དང༌། བྱང་སེམས་དགེ་བའི་བཤེས་གཉེན་ཚྭ་ཉག་བླ་མ་ཤེས་རབ་གཙོར་གྱུར་མོས་ལྡན་གཞན་དག་གིས་ཀྱང་ནན་བསྐྱར་མཛད་པ་ལ་བརྟེན། ཐམས་ཅད་མཁྱེན་གཟིགས་འཇམ་མགོན་བླ་མ་རིན་པོ་ཆེས་སྩལ་བའི་ས་བཅད་དང༌། ཞལ་གྱི་བདུད་རྩི་དངོས་སུ་ཐོབ་པ་ཡིད་ཡུལ་གང་མཆིས་གཙོར་བཟུང༌། འཐད་འོས་ཀྱི་ཆ་འགའ་ཞིག་མཁས་པ་གཞན་གྱི་ལེགས་བཤད་ལས་ཀྱང་བླངས་ཏེ་བླུན་སྒོམ་སྤོང་བ་པའི་གཟུགས་བརྙན་པདྨ་གར་དབང་བློ་གྲོས་མཐའ་ཡས་སམ། འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་ཤྲཱི་དེ་བཱི་ཀོ་ཊི་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་གོ་སླ་འདུས་གསལ་གྱི་ཚུལ་དུ་བགྱིས་པ་བསྟན་འགྲོར་ཕན་བདེའི་སྣང་བ་མི་ནུབ་དར་ཞིང་རྒྱས་པའི་རྒྱུར་གྱུར་ཅིག།
	ces thugs sgrub rnam pa bzhi'i rgyab chos zhal gdams lam rim ye shes snying po'i 'grel pa mdor bsdus su byas pa 'di'ang/__khyab bdag 'khor lo'i mgon po gter chen rig 'dzin bla ma lhan rgyas nas bka' lung gi rjes su gnang ba dang/__rgyal dbang thams cad mkhyen pa bcu bzhi pa'i thugs sras kaM tshang bstan pa'i gsal byed mtshur phu rje dbon mchog sprul rnam pa gnyis dang/__mkhyen ldan DA ki bde chen chos sgron nas kyang gser gyi me tog bcas ring nas bskul cing slad du gter sras rig 'dzin tshe dbang grags pa dang lhan cig gsung bskul gnang ba dang/__byang sems dge ba'i bshes gnyen tshwa nyag bla ma shes rab gtsor gyur mos ldan gzhan dag gis kyang nan bskyar mdzad pa la brten/__thams cad mkhyen gzigs 'jam mgon bla ma rin po ches stsal ba'i sa bcad dang/__zhal gyi bdud rtsi dngos su thob pa yid yul gang mchis gtsor bzung/__'thad 'os kyi cha 'ga' zhig mkhas pa gzhan gyi legs bshad las kyang blangs te blun sgom spong ba pa'i gzugs brnyan pad+ma gar dbang blo gros mtha' yas sam/__'chi med bstan gnyis g.yung drung gling pa rtsal gyis shrI de bI ko Ti dpal spungs yang khrod tsA 'dra rin chen brag gi sgrub gnas su go sla 'dus gsal gyi tshul du bgyis pa bstan 'gror phan bde'i snang ba mi nub dar zhing rgyas pa'i rgyur gyur cig

Tibetan Text

Wylie

[edit]

༅། གུ རོ ཤྩི ཏྟ སཱ དྷ ཀ བ ཛྲ ཀྲོ དྷཱ ཏྲ། སུ ཁོ པ དེ ཤ པ ཐཐཱ ཀྲ མ ཛྙཱ ན ག རྦྷ སྱ ཊཱི ཀ ཛྙཱ ན བྷ ས པྲ ཕུ ལླ ནཱ མ བི ཧ ར ཏི སྨྲ། །

༅། བླ་མའི་ཐུགས་སྒྲུབ་རྡོ་རྗེ་དྲག་རྩལ་ལས། ཞལ་གདམས་ལམ་རིམ་ཡེ་ཤེས་སྙིང་པོའི་འགྲེལ་པ་ཡེ་ཤེས་སྣང་བ་རབ་ཏུ་རྒྱས་པ་ཞེས་བྱ་བ་བཞུགས་སོ།།

༄༅༅། །བླ་མའི་ཐུགས་སྒྲུབ་རྡོ་རྗེ་དྲག་རྩལ་ལས། ཞལ་གདམས་ལམ་རིམ་ཡེ་ཤེས་སྙིང་པོའི་འགྲེལ་པ་ཡེ་ཤེས་སྣང་བ་རབ་ཏུ་རྒྱས་པ་ཞེས་བྱ་བ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་དཔལ་བདེ་བ་ཆེན་པོ་པདྨ་སཾ་བྷ་བའི་ཞབས་ལ་སྒོ་གསུམ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །དུས་དང་རྣམ་པ་ཐམས་ཅད་དུ་བརྩེ་བ་ཆེན་པོས་རྗེས་སུ་བཟུང་ཞིང་བྱིན་གྱིས་བརླབ་ཏུ་གསོལ། བསམ་གྱིས་མི་ཁྱབ་ནམ་མཁའི་རང་བཞིན་བསམ་ཡས་རྣམ་ཐར་འབྱུང་བའི་གནས། །འཆི་མེད་རྡོ་རྗེ་བདེ་ཆེན་རོལ་པས་ནམ་མཁའ་ཇི་སྲིད་གཞན་དོན་མཛད། བཀའ་དྲིན་ཟླ་མེད་གུ་རུ་ཡབ་ཡུམ་ལྷ་དང་ཌཱ་ཀི་ཆོས་སྐྱོང་བཅས། །ཡེ་ཤེས་གཅིག་ཉིད་དུ་མའི་ཚུལ་སྣང་རོ་མཉམ་ལྟ་བས་མཇལ་ཕྱག་འཚལ། །བྱང་ཆུབ་སྤྱོད་པ་མཐར་སོན་འབྲས་བུའི་ཆོས། །ལྷུན་རྫོགས་སྒྱུ་འཕྲུལ་དྲྭ་བའི་རོལ་གར་ནི། །བཀའ་བབས་བདུན་ལྡན་བསྟན་འགྲོའི་སྣང་ཆེན་སྤེལ། །པདྨ་འོད་གསལ་མདོ་སྔགས་གླིང་པར་འདུད། །ཨོ༷་བརྒྱན༷་རྒྱལ་བའི་ཕྲིན་ལས་ཤིང་རྟ་པ། །གཏེར་འབྱིན་ཀུན་གྱི་མཆོ༷ག་གྱུར༷་འགྱུར་མེད་ཀྱི། །བདེ༷་ཆེ༷ན་དགྱེས་རོལ་གླིང༷་པའི་མཚན་ཅན་གྱིས། །དུས་གསུམ་ཀུན་ཏུ་མི་འབྲལ་རྗེས་འཛིན་མཛོད། །སངས་རྒྱས་ཆོས་ཀུན་ལམ་གྱི་རིམ་པ་ཡི། །ཉམས་ལེན་ཁོ་ནར་འདུས་ཕྱིར་གསར་རྙིང་གི །གཞུང་ལུགས་ཆེ་ཕྲ་ཐུན་མོང་ཐུན་མིན་གྱི། །གླེགས་བམ་ཕྲེང་བས་གངས་ཅན་ཁོར་ཡུག་གཏམས། །ཀུན་མཐུན་ཀུན་ལས་ཁྱད་འཕགས་ཚེ་གཅིག་གིས། །གདོད་མའི་གྲུབ་མཐའ་མངོན་བྱེད་ཐེག་རྩེའི་ལམ། །ཚང་ལ་གསལ་སྟོན་སྔོན་མེད་ནོར་བུའི་མཛོད། །སྐལ་ལྡན་ཀུན་དགའི་དཔྱིད་དུ་འདིར་དབྱེའོ། །དེ་ལ་འདིར་གང་འཆད་པར་བྱ་བ་ནི། ཐོག་མཐའ་བར་དུ་དགེ་བས་ཤེས་བྱ་ཐམས་ཅད་ཀྱི་མཆོག་དང་ཕུལ་དུ་གྱུར་པ་ལེགས་གསུང་དམ་པའི་ཆོས་རྒྱུ་ལམ་དུ་བྱེད་པ་རྒྱ་ཆེ་བ་མཚན་ཉིད་ཀྱི་ཐེག་པ་ལས་ཁྱད་པར་བཞི་ལ་སོགས་པས་འཕགས་པ་འབྲས་བུ་ལམ་བྱེད་ཟབ་མོ་རྡོ་རྗེ་ཐེག་པ་ཕྱི་ནང་གཉིས་ལས་ནང་རྒྱུད་ཡོ་ག་སྡེ་གསུམ་གྱི་ཟབ་དོན་དང་འབྲེལ་བ་ཡིན་ལ། དེའང་གངས་ཅན་གྱི་ལྗོངས་སུ་སངས་རྒྱས་ཀྱི་ཕྲིན་ལས་ཐོག་མར་མཛད་པ་པོ་མཁན་སློབ་ཆོས་གསུམ་སྤྲུལ་པའི་ལོ་པཎ་བརྒྱ་རྩ་འཛོམས་ནས་བསྟན་པ་སྔ་དར་གྱི་དུས་སུ་འགྱུར་བའི་རྙིང་མ་ཞེས་གྲགས་པ་ལ། རྒྱ་ཆེ་བ་བཀའ་མ། ཟབ་མོ་གཏེར་མ། ཉེ་བརྒྱུད་དག་སྣང་གི་བབས་སོ་ཆེན་པོ་གསུམ་དུ་འཆིས་པ་ལས། འདིར་ཁྱད་པར་གསུམ་ལྡན་གཏེར་ལས་བྱོན་པའི་ཟབ་ཆོས། རྟོག་གེའི་རིག་པས་མ་བཅོས། ཕལ་ཚིག་གི་བསྲེ་བསླད་མ་ཞུགས། གཞན་ཟེར་གྱི་རྗེས་སུ་མ་ཟློས་པའི་རྡོ་རྗེའི་ཚིག་བྱིན་རླབས་ཀྱི་གཟི་བརྗིད་དང་ལྡན་པའི་གཞུང་ཡེ་ཤེས་སྙིང་པོ་འཆད། དོན་གང་ཞིག་བཤད་ན། སྤྱིར་འཁོར་ལོའི་མགོན་པོ་ལས་ཆོས་ཉིད་ཀྱི་རང་སྒྲར་ཤར་བའི་རྒྱུད་མཐའ་དྲུག་ཚུལ་བཞིའི་སྒྲོམ་དུ་བཞུགས་པ་རིན་པོ་ཆེའི་མཛོད་ལྟ་བུ་རྣམས་དང༌། དེའི་དགོངས་པ་ས་བཅུའི་དབང་ཕྱུག་རྣམས་ཀྱིས་བཀྲལ་བའི་ལུང་གསང་དོན་རྣམ་པར་འབྱེད་པ་མཛོད་ཀྱི་ལྡེའུ་མིག་ལྟ་བུར་གྱུར་པ་རྣམས་དང༌། དེ་དག་གི་གནད་ཀྱི་མན་ངག་གྲུབ་བརྙེས་རིག་འཛིན་རྣམས་ཀྱིས་སྐལ་ལྡན་ཉམས་ལེན་དུ་དྲིལ་བ་རང་སྐལ་ལག་བཅངས་སུ་སྤྲོད་པ་ལྟ་བུ་གསུམ་ལས། འདིར་གནད་གདམས་མན་ངག་གི་གཞུང༌། གཞི་ལམ་འབྲས་བུའི་རང་བཞིན་སྤྱི་དང་ཁྱད་པར་ལམ་གྱི་རིམ་པའི་ཉམས་ལེན་མཐའ་དག་མ་སྦས་གསལ་སྟོན་དུ་འཆད། ཇི་ལྟར་འཆད་པའི་ཚུལ་ལ། གསར་རྙིང་གི་རྒྱུད་དང་གདམས་པའི་བཀའ་སྲོལ་འཛིན་པའི་མཁས་གྲུབ་སྐྱེས་ཆེན་རྣམས་ཀྱི་བཞེད་ཚུལ་མང་དུ་མཆིས་པ་ལས། འདིར་གང་ཟག་སྤྲོས་མེད་ཉམས་ལེན་སྙིང་པོར་དྲིལ་བ་ལ་དགོངས་ཏེ་གསུངས་པའི་གཞུང་ཉིད་ཀྱི་བཞུགས་ཚུལ་གཞིར་བྱས། བཤད་པའི་ཚིག་དང་ལུང་རིག་གི་སྤྲོས་པ་བརྒལ་བརྟགས་ཀྱི་མཐའ་དཔྱོད་སོགས་རྟོག་གེའི་གཞུང་ལུགས་ཀྱི་རྗཻས་སུ་མ་འབྲངས་ཤིང༌། མཆོག་གི་རིག་འཛིན་ཁྱབ་བདག་བླ་མའི་ཞལ་ལུང་བདུད་རྩི་དངོས་སུ་ཐོབ་པའི་སྐལ་བ་བཟང་པོ་ཆུད་མ་ཟོས་པར་དཀྱུས་ཀྱི་ ས་གཅོད་པ་དང༌། གཞུང་དོན་འབྲུ་གཉེར་དུ་དགྲོལ་བ་ཙམ་གྱིས་ཁྱད་པར་འཕགས་པའི་གཞུང་གསང་བ་ཟབ་མོ་ཉིད་དད་ཅིང་མོས་པའི་བློ་ནུས་ཀྱིས་ཇི་ལྟར་དཔོག་པར་འཆད་པར་བྱའོ། །དེ་ལྟར་ན་དུས་གསུམ་ཀུན་མཁྱེན་པདྨ་སཾ་བྷ་བའི་སྙིང་ཏིག །བླ་སྒྲུབ་ཟབ་མོ་སྐོར་བཞིའི་རྒྱབ་ཆོས། ཡོ་ག་རྣམ་པ་གསུམ་གྱི་ལྟ་སྒོམ་སྤྱོད་པའི་རིམ་པ་ཡོངས་སུ་རྫོགས་པ་གསལ་བར་སྟོན་པ་སངས་རྒྱས་གཉིས་པ་ཨོ་རྒྱན་གྱི་སློབ་དཔོན་ཆེན་པོ་ཞལ་དངོས་སུ་བསྙེན་པ་དང་མཚུངས་པའི་ཞལ་གདམས་ལམ་གྱི་རིམ་པ་འདི་འཆད་པ་ལ་བཞི། གཞུང་ལ་བདེ་བླག་ཏུ་འཇུག་པའི་ཕྱིར་མཚན་བསྟན། ཁུངས་བཙུན་པའི་བརྡ་ཡིག་འགོད་ཅིང་ཡུལ་ཁྱད་པར་ཅན་ལ་ཕྱག་འཚལ། མཚན་དོན་དེ་ལྡན་གྱི་གཞུང་དངོས་ཉིད་བཤད། གཞུང་གྲུབ་པའི་ཚིག་གིས་མཇུག་བསྡུ་བའོ། །དང་པོ་ལ་གསུམ། མཚན་དངོས་བཀོད། དེའི་དོན་བཤད། མཚན་ལས་བརྩམས་པའི་མཐའ་དཔྱད་དོ།

།དང་པོ་ནི། བླ་མའི་ཐུགས་སྒྲུབ་རྡོ་རྗེ་དྲལ་རྩལ་ལས༔ ཞལ་གདམས་ལམ་རིམ་ཡེ་ཤེས་སྙིང་པོ་བཞུགས་སོ༔ །ཞེས་པའོ། །གཉིས་པ་ལ་གཉིས། ཡིག་དོན་སྤྱིར་བཤད། ཁྱད་པར་གྱི་མཚན་དོན་རྒྱས་པར་དབྱེ་བའོ། །དང་པོ་ནི། སྤྱིར་རྒྱུད་མན་ངག་གི་མཐའ་ཅན། མན་ངག་སྒྲུབ་ཐབས་ཀྱི་མཐའ་ཅན། སྒྲུབ་ཐབས་ལག་ལེན་གྱི་མཐའ་ཅན་དུ་གྲགས་པའི་ནང་ཚན་སྒྲུབ་པའི་ཐབས་ལའང་རྩ་བ་གསུམ་དང་འབྲེལ་བའི་སྒྲུབ་ཐབས་མཐའ་ཡས་ཤིང༌། རེ་རེ་ལའང་སྤྱི་དང་ཁྱད་པར། རྩ་བ་དང་ཡན་ལག །གནས་སྐབས་དང་མཐར་ཐུག་ལ་དགོངས་པའི་སྒྲུབ་ལུགས་མང་དུ་གསུངས་པ་ལས། འདིར་རིག་འཛིན་སྒྱུ་འཕྲུལ་དྲྭ་བ་རྩ་བཤད་མན་ངག་གི་རྒྱུད་རྣམས་དང༌། རིག་འཛིན་འདུས་པའི་རྩ་རྒྱུད་སོགས་ལས་མན་ངག་གནད་ཀྱི་ཉིང་ཁུར་ཕྱུང་བའི་བྱིན་རླབས་ཀྱི་རྩ་བ་བླ་མ་གཙོ་བོར་སྒྲུབ་པའི་ཐབས་ཕྱོགས་དུས་རྒྱལ་བའི་ཐུགས་དགོངས་གཅིག་བསྡུས། དུས་གསུམ་རིག་འཛིན་ཡོངས་ཀྱི་ཐུགས་དམ་སྙིང་པོ། གུ་རུ་རིན་པོ་ཆེའི་ཐུགས་ཀློང་ཡེ་ཤེས་ཐིག་ལེའི་བཅུད་ཕྱུངས་པ། ཡང་ཟབ་སྙིང་པོ་གནད་ཀྱི་སྒྲུབ་ཐབས་ཡིན་པའི་ཕྱིར། བླ་མའི་ཐུགས་སྒྲུབ་ཅེས་གསུངས་ཏེ། ཞལ་གདམས་སྙིང་བྱང་ལས། རང་བྱུང་པདྨ་བདག་ཉིད་ཀྱི༔ དགོངས་པའི་ཀློང་ནས་རང་ཤར་བ༔ ཡང་ཟབ་ཐུགས་ཀྱི་སྒྲུབ་པ་ནི༔ ཞེས་དང༌། ཨོ་རྒྱན་བདག་གིས་རྒྱུད་ལུང་དང༌། མན་ངག་གཞན་ལ་བརྟེན་ནས་ནི། འགྲེལ་བའི་ཚུལ་དུ་མ་བཀྲལ་བར༔ རྒྱུད་ལུང་མན་ངག་ངེས་པའི་དོན༔ སྙིང་པོ་ལས་ཀྱང་སྙིང་པོའི་བཅུད༔ ཐུགས་ཀྱི་ཐིག་ལེར་རབ་བཞུགས་པ༔ ཆོས་ཉིད་རང་སྒྲར་སྣང་བས་ན༔ རྒྱུད་དང་མི་འགལ་ལུང་དང་མཐུན༔ མན་ངག་མྱོང་བས་ཁྱད་འཕགས་པ༔ ཞེས་གསུངས་པ་ལྟར་རོ། །དེ་ལྟ་བུའི་ཐུགས་སྒྲུབ་ཟབ་མོ་སྐོར་བཞི་བཞུགས་པ་ལས་འདིར་བླ་མ་ཡང་གསང་ལྟར་སྒྲུབ་པའི་ཐབས་རྡོ་རྗེ་དྲག་པོ་རྩལ་གྱི་ཆོས་སྐོར་གྱི་བསྡེབས་སུ་བྱོན་པ། རྗེས་འཇུག་སྐལ་ལྡན་རྣམས་ལ་ཐུགས་བརྩེ་བས་དགོངས་ཏེ་ཞལ་གྱི་སྒོ་ནས་གདམས་པ་དང་རྗེས་སུ་གདམས་པའི་ཚུལ་དུ་གསུངས་ཤིང༌། ཚེ་གཅིག་གིས་ཟུང་འཇུག་གི་གོ་འཕང་སྒྲུབ་པའི་ལམ་གྱི་རིམ་པ་མཐའ་དག་ཚང་ཞིང་གསལ་ལ་མདོ་རྒྱས་འཚམས་པ། མཚན་ཡེ་ཤེས་སྙིང་པོ་ཞེས་བྱ་བ་འདིར་བཞུགས་སོ། །ཞེས་པའི་དོན་ཏོ།

།གཉིས་པ་ལ་གཉིས། ཚུལ་བཞིའི་སྒོ་ནས་བཤད་པ། གཞི་ལམ་འབྲས་གསུམ་གྱི་དོན་དུ་བཤད་པའོ། །དང་པོ་ནི། སྤྱི་ལས་བྱེ་བྲག་ཏུ་འབྱེད་པའི་མཚན་ཡེ་ཤེས་སྙིང་པོ་ཞེས་བྱ་བ་བཤད་པའི་གཞིར་བྱས། དེ་འཆད་པའི་ཚུལ་ལ། ཡི་གེའི་དོན་ལྟར་ན། སྤྱིར་ཡེ་ཤེས་ཞེས་པ་སྒྲ་ཡངས་པའི་དབང་དུ་བྱས་ན། ཛྙཱ་ཁོང་དུ་ཆུད་པའི་བྱིངས་དོན་ལས་ཡུལ་ཤེས་བྱ་དང་ཡུལ་ཅན་ཤེས་པ་གཉིས་ཀ་ལ་སྦྱོར་དུ་ཡོད་དེ། ཐབས་ཤེས་གྲུབ་པ་ལས། ཤེས་པས་ཤེས་བྱ་རབ་ཕྱེད་སྟེ། །སྦྱོར་བས་ཡོངས་སུ་བརྟགས་ནས་ནི། །ཆོས་རྣམས་རང་བཞིན་མེད་པ་ཉིད། །ཡེ་ཤེས་དེ་ཉིད་དུ་ནི་བརྗོད། །ཅེས་སོ། །འདིར་དྲི་མས་རྣམ་པར་སྤངས་པའི་མཁྱེན་པ་སངས་རྒྱས་ཀྱི་ཡེ་ཤེས་བསྟན་ལ། རྣམ་བྱང་གི་ཆོས་མཐའ་དག་རྒྱལ་བའི་ཡེ་ཤེས་རོལ་པ་ཁོ་ན་ལས་བྱུང་བ་སྟེ། རྒྱལ་ཚབ་བྱམས་པས། སངས་རྒྱས་ལས་ཆོས་ཆོས་ལས་འཕགས་པའི་ཚོགས། ཞེས་སོགས་གསུངས་པ་ལྟར་ཏེ། དེས་ན་སྒྲ་དེས་ཁྱད་གཞིའི་གཞུང་བསྟན། སྙིང་པོ་ནི་གརྦྷའི་སྒྲ་ལས་ཤུན་པ་དང་བྲལ་བའི་སྙིང་པོ་རྗེན་པར་ཕྱུངས་པའི་དོན་ཏེ། ཚིག་དང་སྤྲོས་པའི་ཤུན་པ་དང་བྲལ་བ། མདོ་སྔགས་ཆོས་ཚུལ་ཀུན་གྱི་ཟབ་དོན་སྙིང་པོར་ཕྱུང་པའི་དོན་ཡིན་པས་ཁྱད་ཆོས་བཞུགས་ཚུལ་བསྟན་པ་སྟེ། ཡེ་ཤེས་ཀྱི་ཕུལ་དུ་ཕྱིན་པའི་དམ་ཆོས་མཐའ་དག་གི་སྙིང་པོར་གྱུར་པའི་དོན་ཏོ། །སྤྱི་དོན་ལྟར་འཆད་བ་ལ། མདོ་དང་ཐུན་མོང་བ་ལྟར་ན། ཡེ་ཤེས་ནི་ཡེ་ནས་དྲི་མ་དང་བྲལ་བའི་ཤེས་རབ་གནས་ལུགས་སྟོང་པ་ཉིད་དང༌། སྙིང་པོ་ནི་ཧྲྀ་ད་ཡའི་སྒྲ་ལས། བཅུད་དམ་མཆོག་ལ་འཇུག་པས་སངས་རྒྱས་སྒྲུབ་པ་ལ་མེད་དུ་མི་རུང་བའི་ལམ་གྱི་མཆོག་སྙིང་རྗེ་སྟེ། འབུམ་ལྔ་ལས། སྟོང་ཉིད་དཔག་བསམ་ལྗོན་ཤིང་ལས། །དམིགས་མེད་སྙིང་རྗེའི་འབྲས་བུ་འབྱུང༌། །སངས་རྒྱས་ཀུན་གྱི་རྩ་བ་ནི། །འདི་ལས་འབྱུང་བར་ཐེ་ཚོམ་མེད། །ཅེས་སོ། །དེས་ན་སྟོང་ཉིད་སྙིང་རྗེའི་སྙིང་པོ་ཅན་གྱི་ལམ་ཕུལ་དུ་བྱུང་བ་འདིར་བསྟན་པའི་དོན་ཏོ། །སྔགས་ཀྱི་སྤྱི་དོན་ལྟར་ན། ཡེ་ཤེས་ནི་རྟེན་དཀྱིལ་འཁོར། སྙིང་པོ་ནི་བརྟེན་པ་འཁོར་ལོའི་ལྷ་རྣམས་ཏེ། བརྟག་གཉིས་ལས། དཀྱིལ་ནི་སྙིང་པོ་ཞེས་བརྗོད་དེ། །བྱང་ཆུབ་སེམས་ནི་བདེ་ཆེན་པོ། །ལེན་པར་བྱེད་པས་དཀྱིལ་འཁོར་ཉིད། །འདུས་པ་དཀྱིལ་འཁོར་ཉིད་དུ་བརྗོད། །ཅེས་པའི་དོན་བསྐྱེད་རིམ་གྱི་ལམ་འཁོར་དང་བཅས་པའང་འདིར་སྟོན་ཏོ། །སྦས་དོན་ལྟར་ན། ཡེ་ཤེས་ནི་རྟེན་གདོད་མའི་སྟོང་ཆེན་ཨེ་ཡིག །སྙིང་པོ་ནི་བརྟེན་པ་བདེ་བ་ཆེན་པོའི་ཝྃ་ཡིག་སྟེ། གསང་འདུས་བཤད་རྒྱུད་ལས། ཨེ་ཝྃ་ཡིག་གཉིས་སྒྱུ་མ་ལ། །ཐམས་ཅད་མཁྱེན་པ་འདིར་བཞུགས་པས། །དམ་ཆོས་བསྟན་པའི་ཐོག་མར་ནི། །ཨེ་ཝྃ་དེ་ཉིད་རབ་ཏུ་བཤད། །ཅེས་དང༌། རྡོ་རྗེ་ཕྲེང་བ་ལས། ཨེ་ནི་སྟོང་པ་ཉིད་དུ་གསུངས། །དེ་བཞིན་ཝྃ་ནི་སྙིང་རྗེ་དང༌། །ཐིག་ལེ་དེ་གཉིས་སྦྱོར་ལས་བྱུང༌། །དེ་སྦྱོར་བ་ནི་རྨད་བྱུང་མཆོག །ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་ཕྱག་རྒྱའོ། །ཞེས་སོགས་མཐའ་ཡས་པ་འབྱུང་བ་ལྟར། ཨེ་ཝྃ་གཉིས་ནི་མདོ་རྒྱུད་ཐམས་ཅད་ཀྱི་གླེང་གཞིར་གྱུར་པས་ཟབ་ཅིང་རྒྱ་ཆེ་བའི་དོན་སྤྲོར་ཡོད་ལ། འཕགས་ཞབས་ཀྱི་བཞེད་པ་ཀུན་རྫོབ་བདེན་སྦས་ལྟར་ན། སྒྱུ་ལུས་ཀྱི་རིམ་པ་མཐར་ཕྱིན་ནས་འོད་གསལ་གྱི་ཡེ་ཤེས་ལས་ཟུང་འཇུག་གི་སྐུ་སྙིང་པོའི་ཚུལ་དུ་ལྡང་བའི་དོན་དང༌། འདོད་ཆགས་ཆོས་སྦས་ལྟར་ན། སྒྱུ་འཕྲུལ་རྒྱ་མཚོ་སོགས་ལས་གསུངས་པ་ལྟར། རྩ་འཁོར་ཨེ་ཡིག་ཐིག་ལེ་ཝྃ་ཡིག་སྟེ་སྟེང་སྒོ་རྣམ་གྲོལ་དང་སྦྱར་བ་དང༌། ཡུམ་གྱི་ཆུ་སྐྱེས་ཨེ། ཡབ་ཀྱི་རྡོ་རྗེ་ཝྃ་སྟེ་གསང་བ་འོག་སྒོ་ལ་སྦྱར་ཏེ། དོན་དེ་དག་ཀྱང་གཞུང་འདིར་བསྟན་པའོ། །མཐར་ཐུག་གི་དོན་ལྟར་ན། ཡེ་ཤེས་ནི་ཀ་དག་གདོད་མའི་དབྱིངས། སྙིང་པོ་ནི་ལྷུན་གྲུབ་རིག་པ་རྡོ་རྗེ་ལུ་གུ་རྒྱུད་དེ་དབྱིངས་རིག་འདུ་འབྲལ་མེད་པ་གདོད་མའི་མགོན་པོའི་དགོངས་པ་མཐར་ཐུག་པའང་བསྟན་རིམ་འདི་ལས་རྟོགས་པའོ།

།གཉིས་པ་མཚན་དོན་གཞི་ལམ་འབྲས་གསུམ་ལྟར་བཤད་པ་ལ། དང་པོ་གཞི་ཐུན་མོང་ལྟར་སྦྱོར་ན། ཡེ་ཤེས་ནི་གཞིར་གནས་ཀྱི་ཆོས་སྐུ་དབྱིངས་དང་ཡེ་ཤེས་དབྱེར་མེད་པའི་དོན་དམ་ཆོས་ཐམས་ཅད་ལ་ནམ་མཁའ་ལྟར་ཁྱབ་པར་བཞུགས་པའི་དོན་ཏེ། འཕགས་པ་ཀླུས། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང༌། །དེ་བཞིན་དྲི་མ་མེད་པར་གནས། །ཞེས་དང༌། སམྦུ་ཊིར། རྟོག་པ་ཐམས་ཅད་རྣམ་སྤངས་པའི། །ཡེ་ཤེས་ཆེན་པོ་ལུས་ལ་གནས། །དངོས་པོ་ཀུན་ལ་ཁྱབ་པ་པོ། །ཞེས་སོ། །སྙིང་པོ་ནི། དགོངས་པ་ལུང་སྟོན་རྒྱུད་ལས། སྙིང་པོ་ཞེས་ནི་སངས་རྒྱས་ཀྱི། །ཆོས་ཉིད་དག་པ་འདི་ཡིན་ཞིང༌། །སྔགས་ཀྱི་སྤྱོད་དོན་སྤྱོད་རྣམས་ཀྱི། །བྱང་ཆུབ་སྤྱོད་པའི་མཆོག་འདི་ཡིན། །ཅེས་པ་ལྟར་དོན་དམ་པའི་ཡེ་ཤེས་དེ་ཉིད་འཁོར་འདས་ཐམས་ཅད་ལ་སྙིང་པོའི་ཆོས་སུ་བཞུགས་པའི་དོན་ཏེ། རྒྱལ་བ་བྱམས་པས། དེ་བཞིན་ཉིད་དེ་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་དང༌། སྒྲོན་གསལ་ལས། རྒྱལ་བ་ཀུན་གྱི་གནས་ནི་སེམས་ཅན་ཐམས་ཅད་དེ། །དེ་བཞིན་གཤེགས་པའི་སྙིང་པོ་ཡིན་པའི་ཕྱིར་རོ། །ཞེས་གསུངས་པ་ལྟར། ཡེ་ཤེས་ཀྱི་སྙིང་པོ་སྟེ་དྲི་མ་སྦྱོང་བའི་གཞི་བདེ་གཤེགས་སྙིང་པོའི་གནས་ལུགས་མཚོན་པའོ། །ཐུན་མིན་མ་ཧཱ་ལྟར་ན། བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་དང༌། ཨ་ནུ་ལྟར་ན། དབྱིངས་ཡེ་གཉིས་མེད་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་གདོད་ནས་རང་ཆས་སུ་བཞུགས་པའི་དོན་ཡིན་ཅིང༌། རྫོགས་པ་ཆེན་པོའི་ལུགས་ལྟར་ན། ཡེ་ཐོག་གཞིའི་ཀ་དག་སྨྲ་བསམ་བརྗོད་བྲལ་སྤྲོས་པའི་མཐའ་ལས་འདས་པ་ཡེ་ཤེས་གསུམ་ལྡན་འཁྲུལ་གྲོལ་གཉིས་ཀའི་སྤྱི་གཞིར་གྱུར་པ་དེ་ཉིད། དབྱིངས་ཀྱི་རྒྱ་རལ་ནས་ཕྱི་གསལ་གྱི་སྣང་བ་མཆེད་དེ་འཁོར་འདས་རྒྱབ་གྱེས་པའི་ཚེ་ནའང་སེམས་ཅན་རྣམས་ལ་སྙིང་པོའི་ཚུལ་དུ་གནས་སྐབས་ཀྱི་གཞིར་བཞུགས་པ་སྟེ། ཀློང་དྲུག་པ་ལས། སྤྲོས་བྲལ་ཆོས་ཉིད་ཀ་དག་ནི། །རང་ངོ་རྣམ་དག་སྙིང་པོའི་གཞི། །ཞེས་པ་ལྟར་ཀ་དག་གི་ཡེ་གཞི་མཚོན་པ་སྟེ། གཞིའི་གནས་ལུགས་དེ་དག་ཀྱང་གཞུང་འདིར་བསྟན་པའོ། ལམ་དང་སྦྱོར་ན། ཡེ་ཤེས་ནི་ཤེས་རབ། སྙིང་པོ་ནི་སཱ་རའི་སྒྲ་ལས། དུ་མ་འཕྲོ་བའི་རྩ་བའམ་གནས་ཏེ་ཐབས་བསོད་ནམས་ཀྱི་ཚོགས་ལ་སོགས་པ་ལས་གནས་སྐབས་དང་མཐར་ཐུག་གི་ལེགས་པའི་འབྲས་བུ་དུ་མ་འབྱུང་བས་ཏེ། ཐབས་ཤེས་གཉིས་ནི་ལམ་ཐུན་མོང་བ་ལྟར་ན་བསོད་ནམས་དང་ཡེ་ཤེས། ཐུན་མིན་ལྟར་ན་བསྐྱེད་རིམ་དང་རྫོགས་རིམ། ཁྱད་པར་ལྟར་ན་བདེ་བ་དང་སྟོང་པ། དབྱིངས་དང་རིག་པ་སོགས་ལམ་གྱི་གཉིས་ཆོས་ཀྱི་དོན་ཐམས་ཅད་དང་འབྲེལ་ཞིང༌། སངས་རྒྱས་སྒྲུབ་པ་ལ་དེ་གཉིས་ཀྱང་ཕྱོགས་རེ་མ་ཡིན་པར་ཟུང་དུ་འཇུག་དགོས་ཏེ། མདོ་སྡེའི་དོན་བསྡུས་བྱང་ཆུབ་ལམ་སྒྲོན་ལས། ཐབས་དང་བྲལ་བའི་ཤེས་རབ་དང༌། །ཤེས་རབ་བྲལ་བའི་ཐབས་དག་ཀྱང༌། །གང་ཕྱིར་འཆིང་བ་ཞེས་གསུངས་པས། །དེ་བས་གཉིས་ག་སྤང་མི་བྱ། །ཞེས་སོ། །དེ་ལྟར་ན་ཟུང་དུ་འཇུག་པའི་ལམ་རིམ་རྒྱས་པར་འདིར་བསྟན་པའི་ཕྱིར། གཞུང་ཉིད་ལས། ཀུན་གྱི་སྤྱི་འདྲིལ་ཡེ་ཤེས་སྙིང་པོའི་ལམ༔ ཞེས་གསུངས་སོ། །འབྲས་བུ་དང་སྦྱར་བ་ལའང༌། ཐུན་མོང་ལྟར་ན། མདོ་སྡེ་རྒྱན་ལས། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང༌། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པོའི་རྟེན་ཡིན་ནོ། །ཞེས་གསུངས་པ་ལྟར། ཁྱབ་བྱ་གཞན་དོན་དུ་ཡེ་ཤེས་ཀྱི་སྣང་བ་ལས་བརྡར་ཤར་བའི་གཟུགས་སྐུ། ཁྱབ་བྱེད་རང་དོན་དོན་དམ་སྙིང་པོའི་རང་བཞིན་ཆོས་ཀྱི་སྐུ་སྟེ་འཐོབ་བྱ་སྐུ་གཉིས་དང༌། དག་པ་གཉིས་ལྡན་གྱི་ཡེ་ཤེས་མངོན་དུ་གྱུར་པའི་རང་བཞིན་བྲལ་བའི་ཡོན་ཏན། རྒྱས་འགྱུར་གྱི་ནུས་པས་སྙིང་པོའི་ནུས་པ་གསལ་བ་རྣམ་པར་སྨིན་པའི་ཡོན་ཏན་ཏེ་བྲལ་སྨིན་གྱི་ཡོན་ཏན་གཉིས་དང༌། ཡེ་ཤེས་ནི་ཀུན་ལ་ཁྱབ་པའི་དོན་དང༌། སྙིང་པོ་ནི་མི་ཟད་ཅིང་མི་འགྱུར་བས་རྟག་པའི་དོན་ཏེ་རྟག་ཁྱབ་ཀྱི་ཕྲིན་ལས་བཅས་བསྟན། ཐུན་མིན་ལྟར་ན་ཡེ་ཤེས་དབྱིངས། སྙིང་པོ་རིག་པ་སྟེ་དབྱིངས་རིག་འདུ་འབྲལ་མེད་པར་བྱང་ཆུབ་པའམ། ཡེ་ཤེས་ཀྱི་སྙིང་པོ་ཅན་ཞེས་སྐུ་དང་ཡེ་ཤེས་ཟུང་འཇུག་གི་དོན་བསྟན་པ་སྟེ། རིག་པ་ཡེ་ནས་ཉི་མ་ལྟར་མཁྱེན་རིག་ཏུ་གསལ་བའི་ཆར་ལྷུན་གྲུབ་ཏུ་གནས་པ་ཉིད་རྟོགས་པ་མངོན་དུ་གྱུར་པས་གློ་བུར་སྒྲིབ་པའི་སྤྲིན་དང་བྲལ་ནས་ཤེས་རབ་དྲི་མ་མེད་པའི་དགོངས་པ་ཡོན་ཏན་མ་ལུས་པའི་དཀྱིལ་འཁོར་དུ་རྒྱས་ཏེ། སྐུ་རྣམས་ཀྱི་སྙིང་པོར་གནས་པས་སྐུ་དང་ཡེ་ཤེས་འདུ་འབྲལ་མེད་པ་སྟེ། རང་ཤར་ལས། ཐ་དད་རང་བཞིན་འགྱུར་བ་མེད། །དེ་ཕྱིར་སྐུ་ལྔའི་ཡེ་ཤེས་ཏེ། །སྐུ་དང་ཡེ་ཤེས་འདུ་འབྲལ་མེད། །དོན་ལ་དེ་བཞིན་གནས་པའོ། །ཞེས་སོ། །དེས་ན་རྟེན་སྐུ། བརྟེན་པ་ཡེ་ཤེས་བཅས་དངོས་སུ་བསྟན་པའི་ཤུགས་ལས་མཛད་པ་ཕྲིན་ལས་ཀྱང་བསྟན་པས་ན། གཞུང་ལས། ཡེ་ཤེས་སྙིང་པོ་ཚེ་འདིར་འགྲུབ་པར་ཤོག༔ ཅེས་འབྱུང་བ་ལྟར་རོ། །གསུམ་པ་མཐའ་ཅུང་ཟད་དཔྱད་ན། འདིར་ཞལ་གདམས་ཞེས་པའི་གདམས་ངག་ལ། ལས་དང་པོ་པ་བློ་ཆོས་ལ་སྐུལ་བ་དང༌། རྒྱ་ཆེ་བ་ཚིག་ཏུ་གདམས་པ། ཟབ་པ་དོན་དུ་གདམས་པ། ཉམས་ལེན་གནད་འདྲིལ་དུ་གདམས་པ། ངོ་སྤྲོད་ལག་བཅངས་སུ་གདམས་པ་སོགས་མང་དུ་མཆིས་པ་ལས། འདིར་ཟབ་རྒྱས་ཀྱི་ཉམས་ལེན་གནད་འདྲིལ་ལག་གཏོད་རྗེན་ཕྱུང་དུ་གདམས་པ་སྟེ། གཞུང་ལས། སྔོན་ཆད་ཟབ་ཅིང་རྒྱ་ཆེ་བའི༔ གདམས་ངག་བྱེ་བ་ཕྲག་བརྒྱའི་གཞུང་༔ ཇི་སྙེད་གསུངས་པའི་སྙིང་པོའི་ཕུལ༔ རྒྱུ་འབྲས་ལམ་མཆོག་ཡོངས་རྫོགས་པ༔ མ་བྱུང་འབྱུང་བར་དཀའ་བའི་བཅུད༔ ཅེས་སོགས་ཡང་ཡང་བསྔགས་པས་མཚོན་ནོ། །ལམ་གྱི་རིམ་པ་ལའང་དཔལ་ལྡན་ཨ་ཏི་ཤའི་བཀའ་སྲོལ་བྱང་ཆུབ་ལམ་གྱི་རིམ་པ། ཨ་རོ་དང་རོང་ཟོམ་པཎྜི་ཏའི་ཐེག་ཆེན་རྣལ་འབྱོར་སོགས་མདོ་དང་ཐུན་མོང་བ་རྣམས་དང༌། པདྨ་ལམ་རིམ་རིན་ཆེན་སྒྲོན་མེ་སོགས་བཀའ་གཏེར་ཐུན་མོང་མ་ཡིན་པ་མང་དུ་མཆིས་པ་ལས། འདིར་ཁྱད་པར་དུ་མས་འཕགས་པའི་ལམ་རིམ་ཡེ་ཤེས་སྙིང་པོ་ཞེས་བྱ་བ་སྟེ། མཚན་དེ་སུས་བཏགས་ན། གང་ཟག་གི་བློས་བཅོས་ནས་བཏགས་པ་མ་ཡིན་གྱི། ཀུན་བཟང་པདྨ་འབྱུང་གནས་ཉིད་ཀྱི་དགོངས་ཀློང་ཡེ་ཤེས་ཆེན་པོའི་གསང་མཛོད་ནས་རང་བྱུང་རྡོ་རྗེའི་རང་སྒྲར་ཤར་བ་སྟེ། གུ་ཧྱ་གརྦྷ་དང་ཧེ་བཛྲ་སོགས་རྒྱུད་ཀྱི་རྡོ་རྗེའི་ཚིག་རྣམས་དང་དབྱེ་བ་མེད་པའོ། །གང་ཟག་གི་བློས་བཅོས་ནས་བཏགས་པ་ལ། དཔེ་དང་དོན་དང་ཡུལ་དང་གནས་སྐབས་ཀྱི་སྒོ་ནས་མཚན་གྱི་འདོགས་ཚུལ་མང་དུ་འབྱུང་ཡང༌། འདིར་ནི་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དང་དེ་ལྡན་པས། །གཞུང་དང་ལམ་ལའང་དེ་སྒྲས་བསྟན། །ཅེས་གསུངས་པ་ལྟར་གཞུང་ལམ་འབྲེལ་བའི་ཡེ་ཤེས་ཀྱི་རང་སྒྲར་སྣང་བའོ། །མཚན་འབྱུང་བའི་དགོས་པ་ནི། དབང་པོ་རབ་ལ་མཚན་གྱི་ནང་དུ་གཞུང་དོན་ཚང་བས་དེ་ཙམ་གྱིས་དབུ་ཞབས་ཀྱི་དོན་ཐམས་ཅད་བདེ་བླག་ཏུ་རྟོགས་པར་བྱེད་པ་དང༌། འབྲིང་རྣམས་ཀྱིས་ཀྱང་གཞུང་གི་བཞུགས་ཚུལ་གྱི་དོན་སྤྱི་ལ་ངེས་པ་རྙེད་པར་འགྱུར་བ་དང༌། ཐ་མས་ཀྱང་མཚན་དོན་དེ་ལྡན་གྱི་གཞུང་ཉིད་ལ་མྱུར་དུ་འཇུག་པར་སྤྲོ་བར་འགྱུར་བའོ། །གཉིས་པ་བརྡ་དང་ཕྱག་བཤད་པ་ལ་གཉིས། བརྡ་ཡིག་གི་རྒྱུ་མཚན་དང༌། ཕྱག་གི་དོན་ནོ།

།དང་པོ་ནི། གསང་རྒྱུད་ལས། མཁའ་འགྲོ་བརྡ་ལ་བརྟེན་པ་སྟེ། །བརྡ་དང་བརྡ་ཡི་ལེན་ལ་མཁས། །དོན་གྱི་ངོ་བོ་བརྡ་ལ་སྦྱོར། །མཁའ་འགྲོ་བརྡ་ཡི་སྲོག་ཅན་ནོ། །ཞེས་གསུངས་པ་ལྟར། བརྡ་ལ་བརྟེན་པའི་མཁའ་འགྲོའི་ཡི་གེ་ནི་དེ་དང་སྐལ་མཉམ་གྱི་གང་ཟག་ལས་གཞན་གྱིས་ཁྲོལ་མི་སྲིད་པས། གཏེར་དུ་བཞུགས་པའི་ཟབ་ཆོས་ཕལ་མོ་ཆེ་བརྡའི་ཡི་གེས་བཅིངས་པ་སྟེ། ཆོས་དེ་རྣམས་མཁའ་འགྲོའི་གསང་མཛོད་ནས་ཕྱུངས་པས་འཕགས་བོད་ཀྱི་མཁས་གྲུབ་ཐུན་མོང་བ་རྣམས་ཀྱི་སྤྱོད་ཡུལ་དུ་མ་གྱུར་པའི་དོན་ཡིན་ལ། ཇི་སྐད་དུ། གཏེར་ཡིག་སྤྲུལ་པའི་སྐུ་ཡིན་ཏེ། །སྒྲ་ཚིག་གོ་བ་གསུང་ཡང་ཡིན། །ཞེས་འབྱུང་བ་ལྟར་གཏེར་ཡིག་སྤྲུལ་པའི་སྐུ་རྡོ་རྗེའི་གཟུགས་རྣམ་པ་ཐམས་ཅད་པ་དེ་ཉིད་ལས་འཕྲོ་དང་སྐལ་བ་ལྡན་པའི་གང་ཟག་གིས་གནས་དུས་སྨོན་ལམ་ཟབ་མོའི་རྟེན་འབྲེལ་གྱིས་བརྡའི་དོན་ཁྲོལ་ནས་ཇི་བཞིན་གཏན་ལ་ཕེབས་པ་མཚོན་པའི་ཕྱིར། གླེགས་བམ་གྱི་དབུར་བརྡའི་ཡི་གེ་འབྲུ་བདུན་བཀོད་པར་མཛད་དེ། དེ་ལ་དགོས་པ་གསུམ། ཨོ་རྒྱན་སངས་རྒྱས་གཉིས་པའི་བཀའ་རྟགས་ཕྱག་རྒྱའི་རི་མོ་དངོས་ལ་ཐུག་པས་གང་ཟག་ཕལ་པའི་བརྒྱུད་པས་བར་དུ་མ་ཆོད་ཅིང་ཁུངས་བཙུན་པར་སྟོན་པ་དང༌། བརྡ་མ་བཅོས། ཚིག་མ་འཁྲུལ། དོན་མ་ནོར་བར་མཁའ་འགྲོ་གསང་བའི་བརྡ་བསྒྱུར་བས་གཞུང་ཟབ་ཅིང་བྱིན་རླབས་ཆེ་བར་སྟོན་པ་དང༌། སྐལ་བ་དང་མི་ལྡན་པའི་གང་ཟག་བློ་ཇི་ལྟར་སྒྲིན་ཀྱང་དམུས་ལོང་གིས་གླང་ཆེན་དཔྱད་པ་ལྟར་ཕྱོགས་ཙམ་ཡང་བརྟག་མི་བཟོད་པས་གཏེར་བདག་སྐྱེས་བུ་ཉིད་ཕལ་པའི་སྤྱོད་ཡུལ་ལས་འདས་པར་ཡིད་ཆེས་པའོ། །གཉིས་པ་ནི། རྩ་གསུམ་ཀུན་འདུས་རྡོ་རྗེ་དྲག་པོ་རྩལ་ལ་ཕྱག་འཚལ་ལོ༔ ཞེས་འབྱུང་སྟེ། ཕྱག་གང་གིས་མཛད་ན། གསང་ཆེན་བཀའི་སྡུད་པ་མོ་ཡེ་ཤེས་མཁའ་འགྲོ་མཚོ་རྒྱལ་གྱིས་མཛད། ཡུལ་གང་ལ་མཛད་ན། བྱིན་རླབས་ཀྱི་རྩ་བ་བླ་མ། དངོས་གྲུབ་ཀྱི་རྩ་བ་ཡི་དམ། ཕྲིན་ལས་ཀྱི་རྩ་བ་མཁའ་འགྲོ་ཀུན་འདུས་པའི་བདག་ཉིད། དཀྱིལ་འཁོར་སྤྲུལ་བཤད་མཛད་པ་པོ་སློབ་དཔོན་པདྨཱ་ཀ་ར་ཐུགས་རྗེས་ཁྲོ་བའི་ཚུལ་བསྟན་པའི་གསང་མཚན་རྡོ་རྗེ་དྲག་པོ་རྩལ་དུ་གྲགས་པ་ལ་མཛད། དགོས་པ་གང་གི་ཕྱིར་ན། སྤྱིར་རྡོ་རྗེ་ཐེག་པའི་ལམ་ལ་ཞུགས་པ་ཐམས་ཅད་དངོས་གྲུབ་བླ་མ་ལ་རག་ལས་པས་ལས་དང་རྣལ་འབྱོར་ཐམས་ཅད་ལ་དེ་ཉིད་རྗེས་སུ་དྲན་དགོས་པ་དང༌། གནས་སྐབས་གཞུང་འགོད་པ་ལ་བར་ཆད་མི་འབྱུང་ཞིང་བྱིན་རླབས་འཇུག་པ་དང༌། རྗེས་འཇུག་འཆད་ཉན་སྒོམ་སྒྲུབ་བྱེད་པ་རྣམས་ལའང་དེའི་ཚུལ་ཞར་བྱུང་དུ་གདམས་པའོ། །ཇི་ལྟར་འཚལ་ན། དྲང་དོན་དུ་སྒོ་གསུམ་གུས་པ་ཆེན་པོས་བརྡའི་ཕྱག་དང༌། ངེས་དོན་དུ་ཐབས་ཤེས་དགོངས་པ་རོ་མཉམ་དོན་དམ་ལྟ་བ་མཇལ་བའི་ཚུལ་གྱིས་སོ། །འདིར་རྩ་བ་གསུམ་ཞེས་པའི་དོན་ཡང༌། དཔེར་ན་ལྗོན་ཤིང་དང་ལོ་ཏོག་རྣམས་འབྱུང་བའི་རྒྱུའམ་གཞི་ལ་རྩ་བར་གྲགས་པ་ལྟར། བྱིན་རླབས་སོགས་འབྱུང་བའི་རྒྱུའམ་རྩ་བ་བླ་མ་སོགས་ཡིན་ཏེ། གཏེར་གཞུང་རྣམས་ལས། བྱིན་རླབས་རྩ་བ་བླ་མ་རྗེ༔ དངོས་གྲུབ་འབྱུང་གནས་ཡི་དམ་ལྷ༔ ལེགས་པར་བྱིན་རློབ་མཁའ་འགྲོ་མ༔ ཞེས་འབྱུང་ངོ༌། །དེས་ན་རྡོ་རྗེ་ཐེག་པའི་དཀོན་མཆོག་ཁྱད་པར་དུ་འཕགས་པ་རྩ་བ་གསུམ་ཡིན་ཏེ། བླ་མའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས། ཡི་དམ་ཞི་ཆགས་ཁྲོ་བོའི་རྣམ་པ་ཇི་ལྟར་བསྟན་ཀྱང་སངས་རྒྱས་ལོངས་སྤྲུལ་གྱི་རང་བཞིན། དེའི་སྔགས་རྒྱུད་ནི་ཐུན་མོང་མིན་པའི་ཆོས། མཁའ་འགྲོ་ཆོས་སྐྱོང་ནི་ཁྱད་པར་གྱི་དགེ་འདུན་ཡིན་ལ། ཡི་དམ་མཁའ་འགྲོ་གཉིས་ཀའང་བླ་མའི་ཡེ་ཤེས་ཀྱི་རོལ་པ་ལས་བྱུང་བས་འཁོར་ལོའི་མགོན་པོ་ཞེས་པའི་མཚན་གྱིས་བརྗིད་པ་སྟེ། དགོངས་འདུས་སྐུ་རྒྱུད་ལས། ངོ་བོ་བླ་མ་ཆོས་སྐུ་ལ༔ རང་བཞིན་ཡི་དམ་ལོངས་སྤྱོད་རྫོགས༔ ཐུགས་རྗེ་སྤྲུལ་སྐུ་མཁའ་འགྲོ་མ༔ ཞེས་གསུངས་སོ། །དེ་ལྟར་མཚན་ཉིད་དང་ལྡན་པའི་བླ་མ་གང་ཡང་དཀོན་མཆོག་རྩ་གསུམ་ཀུན་འདུས་ཡིན་ཏེ། རྡོ་རྗེ་མེ་ལོང་གི་རྒྱུད་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་སོགས་ཡོངས་སུ་གྲགས་ལ། ཁྱད་པར་གུ་རུ་རིན་པོ་ཆེ་ནི་སངས་རྒྱས་ཐམས་ཅད་འདུས་པའི་རྡོ་རྗེའི་ཡེ་ཤེས་ཀྱི་རང་གཟུགས་ཡིན་ཏེ། རྡོ་རྗེའི་གསུངས་ལས། ང་སྒྲུབ་སངས་རྒྱས་ཐམས་ཅད་འགྲུབ༔ ང་མཐོང་སངས་རྒྱས་ཐམས་ཅད་མཐོང་༔ ང་ནི་བདེ་གཤེགས་འདུས་པ་ཡིན༔ ཞེས་སོགས་ལུང་མཐའ་ཡས་པ་འབྱུང་ངོ༌། མཚན་གྱི་དོན་ལས། རྡོ་རྗེ་ནི། མཉམ་སྦྱོར་ལས། རྡོ་རྗེ་སྟོང་པ་ཉིད་དུ་བཤད། །ཅེས་དང༌། སྒྱུ་འཕྲུལ་མེ་ལོང་ལས། ཐ་དད་མེད་པའི་རང་བཞིན་ཉིད། །རྡོ་རྗེ་ཞེས་ནི་བཤད་པ་ཡིན། །ཅེས་འབྱུང་བ་ལྟར་འཁོར་འདས་ཀྱི་ཆོས་ཐམས་ཅད་ཐ་དད་དུ་དབྱེ་བ་མེད་པ་སྟོང་ཉིད་ཀྱི་རང་བཞིན་ཡིན་ཅིང༌། གནས་ལུགས་དེ་དང་རྒྱལ་བ་རྣམས་ཀྱི་ཆོས་སྐུ་ལ་དབྱེ་བ་མེད་པས་འདིར་རྡོ་རྗེའི་སྒྲས་ངོ་བོ་ཆོས་སྐུ་བསྟན། དེ་ལ་སྒྲ་དེ་འཇུག་པའི་རྒྱུ་མཚན་ཡང་རྫས་ཀྱི་རྡོ་རྗེ་དང་ཆོས་མཚུངས་པས་ཏེ། རྩེ་མོར། སྲ་ཞིང་སྙིང་པོ་ཁོང་སྟོང་མེད། །བཅད་དང་གཞིག་པར་བྱ་བ་མེད། །བསྲེག་པར་བྱ་མིན་འཇིག་མེད་པས། །སྟོང་ཉིད་རྡོ་རྗེར་བརྗོད་པར་བྱ། །ཞེས་པ་ལྟར་རོ། །ཆོས་སྐུའི་ངང་ལས་གདུལ་བྱ་གདུག་པ་ཅན་ཞི་བས་མི་འདུལ་བ་རྣམས་ལ་སྙིང་རྗེ་ཆེན་པོས་དྲག་པོར་ཁྲོས་པའི་ཚུལ་གྱིས་སྐུར་བསྟན་པ་སྟེ། དགོངས་འདུས་ལས། ཤིན་ཏུ་གདུག་ཅིང་གཏུམ་པ་ལ། ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་སྦྱོར་བ་ཡིས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་སོ། །རྩལ་ཅེས་པའི་སྒྲ་མཐུ་སྟོབས་ནུས་པའི་ཤུགས་ལ་འཇུག་པས། གཞན་ལས་ཆེས་ཁྱད་པར་དུ་འཕགས་པའི་མཐུ་སྟོབས་ནུས་པའི་རྩལ་ཤུགས་དང་ལྡན་པའི་དོན་ཡིན་ནོ། །རྣམ་པ་གཅིག་ཏུ་ན། ལྷ་དབང་ལག་གི་རྡོ་རྗེ་རྩེ་མོ་བརྒྱ་པ་དེ་གདེངས་པ་ཙམ་གྱིས་ལྷ་མིན་དཔུང་ཚོགས་ཐལ་བར་བྱེད་པའི་ནུས་སྟོབས་ཆེན་པོ་ཡོད་པ་བཞིན་དུ། རྡོ་རྗེ་དྲག་པོ་རྩལ་ཅེས་པའི་སྒྲས་ཡེ་ཤེས་ལས་དང་འཇིག་རྟེན་གྱི་ཁྲོ་བོ་ཐམས་ཅད་ཀྱི་སྟོབས་རྩལ་གཅིག་ཏུ་བསྡུས་པའི་ཁྲོ་རྒྱལ་ཆེན་པོ་སུས་ཀྱང་འགྲན་དུ་མི་བཟོད་པར་བསྟན་པའང་ཡིན་ནོ། །གསུམ་པ་གཞུང་དངོས་བཤད་པ་ལ་ལྔ། མན་ངག་འབྱུང་བའི་རྒྱུ་གླེང་གཞི། རྐྱེན་གླེང་སློང་བ། འབྲས་བུ་ཡོངས་སུ་ཤེས་པར་བྱ་བ་མན་ངག་གི་དོན། མན་ངག་གི་དགོས་འབྲེལ། འཁོར་ལ་གདམས་ཤིང་བསྟན་པ་གཏད་པའོ། །དང་པོ་ལ་ལྔ། སྟོན་པ། འཁོར། གནས། ཆོས། དུས་ཕུན་སུམ་ཚོགས་པའོ།

།དང་པོ་ནི། དུས་གསུམ་སངས་རྒྱས་ཐམས་ཅད་ཀྱི་ངོ་བོ༔ རིག་འཛིན་རྩལ་འཆང་ཀུན་གྱི་གཙོ་མཆོག༔ ཡི་དམ་ཞི་ཁྲོ་རྒྱ་མཚོའི་ཁྱབ་བདག༔ དཔའ་བོ་མཁའ་འགྲོ་ཡོངས་ཀྱི་ཚོགས་རྗེ༔ རྡོ་རྗེའི་ཆོས་སྲུང་བ་དང་སྣང་སྲིད་དྲེགས་པ་ཅན་ཐམས་ཅད་ཟིལ་གྱིས་གནོན་པའི་བདག་ཉིད༔ མ་ཧཱ་གུ་རུ་པདྨ་སཾ་བྷ་བ་ཞེས་སྐུ་གསུམ་སྟོན་པའི་ཞིང་ཁམས་རབ་འབྱམས་ན་ཡོངས་སུ་གྲགས་པ་ཉིད༔ ཅེས་གསུངས་ཏེ། རྒྱལ་དབང་པདྨ་ཀ་ར་ཉིད་ལམ་ཞུགས་ཀྱི་གང་ཟག་མ་ཡིན་པར་སངས་རྒྱས་འོད་དཔག་མེད་དང་མཉམ་མེད་ཤཱཀྱའི་རྒྱལ་པོ་ཉིད་གདུལ་བྱ་གདུལ་དཀའ་བ་རྣམས་ཀྱི་དོན་དུ་རྡོ་རྗེ་སློབ་དཔོན་གྱི་སྐུར་བསྟན་པ་ཡིན་པས། འདས་པ་དང་མ་འོངས་པ་དང་ད་ལྟའི་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་ཐམས་ཅད་མཉམ་པ་ཉིད་གསུམ་གྱིས་མཉམ་པའི་ཕྱིར། ནམ་མཁའི་ངོ་བོ་ལ་དབྱེ་བ་མེད་པ་ལྟར་སངས་རྒྱས་ཐམས་ཅད་ཀྱི་ངོ་བོ་ལ་རྣམ་དབྱེར་མེད་པས་དེར་གྲུབ་པ་དང༌། གཞན་སྣང་སྤྲུལ་པའི་སྐུར་བསྟན་པ་ནའང་འཆི་མེད་ཚེའི་རིག་འཛིན་བརྙེས། སྒོམ་ལམ་ཕྱག་རྒྱའི་རིག་འཛིན་མཐར་ཕྱིན་ནས་མཐར་ལམ་ལྷུན་གྲུབ་ཀྱི་རིག་འཛིན་དྲུག་པའི་རྒྱལ་ཚབ་ཀྱི་ས་ལ་བཞུགས་པར་བསྟན་པའི་ཕྱིར། བཀའ་བབས་རིག་འཛིན་ཆེན་པོ་བརྒྱད་ཀྱིས་ཀྱང་ཞབས་ལ་བཏུད་པས་མཚོན། རིག་པ་འཛིན་པའི་ས་བརྙེས་ཤིང་ཡེ་ཤེས་ཀྱི་རྩལ་ཆེན་འཆང་བ་ཀུན་གྱི་གཙོ་བོ་མཆོག་གི་གནས་ལ་བཞུགས་པ་དང༌། རང་བཞིན་གྱིས་རྣམ་པར་དག་པའི་ཕུང་ཁམས་སྐྱེ་མཆེད་ལས་དབང་ཡུལ་དང་བཅས་པ་དབྱིངས་སྣང་ལྷུན་གྲུབ་ཆེན་པོའི་ལྷའི་འཁོར་ལོར་རང་ཤར་བས། ཡི་དམ་ཞི་བ་རྡོ་རྗེ་དབྱིངས་ཆེན་པོ་དང་ཁྲོ་བོ་ཚོགས་ཆེན་ཡོངས་སུ་འདུས་པའི་དཀྱིལ་དང་འཁོར་དུ་སྣང་བ་རབ་འབྱམས་སྤྲོ་བ་དང་བསྡུ་བའི་ཁྱབ་བདག་ཏུ་གྱུར་པ་དང༌། བཀོད་པ་རྩ་གཡོ་བ་རླུང་ཐིག་ལེ་བྱང་ཆུབ་ཀྱི་སེམས་རྣམས་འོད་གསལ་ཡེ་ཤེས་ཆེན་པོའི་སྦུབས་སུ་དག་པའི་ནང་གི་གནས་རྣམས་དབང་དུ་མཛད་པའི་སྟོབས་ལས། ཕྱི་རོལ་གྱི་གནས་ཡུལ་དུར་ཁྲོད་ཆེན་པོ་རྣམས་སུ་བརྟུལ་ཞུགས་སྤྱོད་པའི་དཔའ་བོ་དང་མཁའ་ལ་རྫུ་འཕྲུལ་གྱིས་འགྲོ་བའི་རྣལ་འབྱོར་མ་རྣམས་དང་ལྷན་ཅིག་ཚོགས་ཀྱི་འཁོར་ལོས་སྒྱུར་བའི་རྗེ་བཙན་ཆེན་པོར་གྱུར་པ་དང༌། རྩལ་སྣང་སྐུ་དང་ཡེ་ཤེས་ཆེན་པོའི་རོལ་པར་ཤར་བས་འབར་བ་ཆེན་པོ་ཧེ་རུ་ཀའི་ཕྱག་རྒྱ་གཉན་པོའི་གཟི་བརྗིད་ཀྱིས། རྡོ་རྗེའི་དམ་ཚིག་འཆང་བའི་ཡེ་ཤེས་ལས་དང་འཇིག་རྟེན་གྱི་ཚུལ་སྟོན་པའི་ཆོས་སྐྱོང་སྲུང་མ་རྒྱུད་གསུམ་གྱིས་བསྡུས་པ་རྣམས་དང༌། དཔལ་མགོན་དང་ཕྱོགས་སྐྱོང་བ་སོགས་སྣང་སྲིད་ཀྱི་འབྱུང་པོ་ཆེ་བའི་ང་རྒྱལ་གྱིས་དྲེགས་པ་ཐམས་ཅད་གདོང་ལྔའི་དབང་པོས་གཅན་གཟན་གནོན་པ་བཞིན་དུ་མཚན་ཙམ་གྱིས་ཀྱང་བཀའ་ལས་འདར་མི་བཟོད་པར་ཟིལ་གྱིས་གནོན་པར་ནུས་པའི་བདག་ཉིད་ཆེན་པོ། མཚན་གཅིག་གིས་ཕྱོགས་བཅུའི་ཞིང་ཁམས་ཀུན་ཏུ་ཁྱབ་པ་དང༌། ཞིང་གཅིག་ལའང་མཚན་གྱི་རྣམ་གྲངས་མཐའ་ཡས་པས་རྣམ་པར་རོལ་པ་ལས། སངས་རྒྱས་ཀྱི་ཞིང་འདིར། འཇམ་དཔལ་སྒྱུ་འཕྲུལ་དྲྭ་བ་ལས། དཔལ་ལྡན་སངས་རྒྱས་པདྨ་སྐྱེས། ཀུན་མཁྱེན་ཡེ་ཤེས་མཛོད་འཛིན་པ། །རྒྱལ་པོ་སྒྱུ་འཕྲུལ་སྣ་ཚོགས་འཆང༌། །ཆེ་བ་སངས་རྒྱས་རིགས་སྔགས་འཆང༌། །ཞེས་ཚིགས་རྐང་དང་པོས་དཔལ་ལྡན་ཐོག་མའི་མགོན་པོ་རྡོ་རྗེ་འཆང་དང་སངས་རྒྱས་འོད་དཔག་མེད་པ་ཤཱཀྱའི་རྒྱལ་པོ་རྣམས་དབྱེར་མེད་པར་བཞན་སྣང་དུ་པདྨའི་སྡོང་པོ་ལས་སྐྱེས་པའི་ཚུལ་བསྟན་པའི་མཚན་པདྨ་འབྱུང་གནས་སམ་པདྨ་སཾ་བྷ་བ། གཉིས་པས་ཆོས་ཀུན་མཁྱེན་པའི་ཡེ་ཤེས་ཀྱི་མཛོད་འཛིན་པས་བློ་ལྡན་མཆོག་སྲེད་དང༌། གསུམ་པས་པདྨ་རྒྱལ་པོ་དང་སྒྱུ་འཕྲུལ་གྱི་རོལ་པ་སྣ་ཚོགས་འཆང་བ་ཉི་མ་འོད་ཟེར། བཞི་པས་སྲིད་པ་གསུམ་ན་ཆེ་བའི་མཐུ་ལྡན་སེང་གེ་སྒྲ་སྒྲོག །སངས་རྒྱས་གཉིས་པའི་ཚུལ་ཅན་ཤཱཀྱ་སེང་གེ །རིག་སྔགས་ནུས་སྟོབས་ཀྱི་གཟི་བརྗིད་ཁྱད་པར་དུ་འབར་བ་རྡོ་རྗེ་གྲོ་ལོད་བཅས་གསལ་བར་ལུང་བསྟན་པ་ལྟར། བདག་ཅག་གི་སྟོན་པའི་རྒྱལ་ཚབ་ཏུ་དཀྱིལ་འཁོར་རྒྱ་མཚོའི་ཁྱབ་བདག་རིགས་འདུས་བླ་མ་ཆེན་པོའི་སྐུར་བསྟན་ཅིང༌། དེའང་གཙོ་བོར་གསུང་མཆོག་པདྨའི་རིགས་ལས་བྱུང་ཞིང་པདྨ་ལས་བརྫུས་ཏེ་འཁྲུངས་པའི་ཚུལ་བསྟན་པའི་ཕྱིར་མ་ཧཱ་གུ་རུ་པདྨ་སཾ་བྷ་བ་སྟེ་པདྨ་འབྱུང་གནས་སམ་པདྨ་ལས་འཁྲུངས་ཞེས་པའི་མཚན་སྐུ་གསུམ་སྟོན་པའི་ཞིང་ཁམས་རབ་འབྱམས་རྒྱ་མཚོ་ན་ཡོངས་སུ་གྲགས་པ་ཉིད་དེ། ཆོས་སྐུ་འོད་གསལ་རྡོ་རྗེ་སྙིང་པོའི་ཞིང་དུ་ཀ་དག་གི་གྲོལ་གཞིར་རང་རིག་མངོན་བྱང་ཆུབ་པ་ཐོག་མའི་མགོན་པོ་འོད་མི་འགྱུར་བ་ཞེས་བྱ་བ་དང༌། རང་སྣང་ལོངས་སྐུ་ཚངས་པ་རྔ་སྒྲའི་ཞིང་ན་ཡེ་ཤེས་རིགས་ལྔ་གངས་ཆེན་མཚོ་ངེས་པ་ལྔ་ལྡན་གྱི་བཀོད་པ་འབྱམས་ཀླས་སུ་སྣང་བ་ལས་ཕྱིར་གསལ་ཕྱེད་སྣང་རང་བཞིན་སྤྲུལ་པ་སྐུ་ཚངས་ཆེན་གྱི་ཞིང་ན་རིགས་ལྔའི་སངས་རྒྱས་ཞིང་དང་སྐུའི་བཀོད་པ་ཚད་མེད་པ་ས་བཅུའི་དབང་ཕྱུག་རྣམས་ལ་སྣང་བ་དེ་དག་ཀྱང་གུ་རུའི་ཡེ་ཤེས་ཀྱི་རོལ་མོ་ལས་མ་གཡོས་པས་པདྨ་ཀུན་ཏུ་འཆང་ཞེས་བྱ་བ་དང༌། དེ་དག་ལས་འགྲོ་འདུལ་སྤྲུལ་པ་སྐུའི་ཆོ་འཕྲུལ་ཕྱོགས་བཅུའི་ཞིང་ཁམས་ཚད་མེད་པ་རྣམས་དང༌། བྱེ་བྲག་མི་མཇེད་ཀྱི་ཞིང་འདི་ཁོ་ནར་མཚན་ངེས་པར་བསྟན་པ་མདོ་སྔགས་སྟོན་པ་བརྒྱ་རྩས་འཇིག་རྟེན་གྱི་ཁམས་ལྔ་བཅུའི་སྒྲོན་མེ་མཛད་ཅིང༌། དེ་རེ་རེའི་ཕྱོགས་མཚམ་ཀྱི་འཇིག་རྟེན་རྣམས་སུ་གུ་རུ་མཚན་བརྒྱད་རེ་རེར་སྤྲུལ་ནས་འགྲོ་བ་འདུལ་བར་གསུངས་པ་དང༌། ཁྱད་པར་ཡེ་ཤེས་མཁའ་འགྲོ་མཚོ་རྒྱལ་གྱིས་ཁྱད་པར་གྱི་བཀོད་པ་གཟིགས་པ་ལས། ཤར་དུ་གུ་རུ་རྡོ་རྗེ་གངས་ཆེན་མཚོའི་བ་སྤུའི་ཁུང་བུ་རེ་རེར་ཞིང་ཁམས་བྱེ་བ་ཕྲག་བརྒྱ་བརྒྱ། དེ་རེ་རེར་འཇིགས་རྟེན་གྱི་ཁམས་བྱེ་བ་ཕྲག་བརྒྱ་བརྒྱ། དེ་རེ་རེར་གུ་རུ་བྱེ་བ་ཕྲག་བརྒྱ་བརྒྱ། དེ་རེ་རེར་སྤྲུལ་པ་བྱེ་བ་ཕྲག་བརྒྱ་བརྒྱ། དེ་རེ་རེར་གདུལ་བྱ་བྱེ་བ་ཕྲག་བརྒྱ་བརྒྱ། དེ་བཞིན་དུ་དབུས་དང་ཕྱོགས་གཞན་རྣམས་སུ་རིགས་བཞིའི་བཀོད་པ་སོགས་ཚད་མེད་པར་གསུངས་པ་དང༌། ཛམྦུའི་གླིང་འདི་ཁོ་ནར་འགྲོ་འདུལ་སྤྲུལ་པ་སྐུའི་ཕྱོགས་གཅིག་བསྟན་པ་ལའང་གདུལ་བྱའི་སྐལ་བ་དང་དབང་པོའི་ཁྱད་པར་གྱིས་མཐོང་ཚུལ་ཐ་དད་པར་སྣང་སྟེ། གཏེར་གསར་རྣམ་ཐར་དཔག་བསམ་ལྗོན་ཤིང་ལས། དེ་ཡང་ཁ་ཅིག་སྣང་ངོར་ཨོ་རྒྱན་ཡུལ༔ དྷ་ན་ཀོ་ཥར་པད་སྡོང་རྩེ་ལས་སྤྲུལ༔ ཁ་ཅིག་སྣང་ངོར་ཨོ་རྒྱན་རྒྱལ་པོའི་སྲས༔ ཁ་ཅིག་སྣང་ངོར་གནམ་ལྕགས་ཡོད་པའི་རྩེར༔ ཐོག་བབས་ཚུལ་དུ་བྱུང་ཞེས་ཐ་དད་ཀྱང་༔ ཞེས་སོགས་གསུངས་པ་ལྟར་གཏེར་མའི་ཕྱོགས་ཕལ་མོ་ཆེར་རྫུས་སྐྱེས་ཀྱི་རྣམ་པར་ཐར་པ་ཤ་སྟག་འབྱུང་ཞིང༌། ཕུར་པ་བཀའ་མའི་ལོ་རྒྱུས་སོགས་དང་འཕགས་ཡུལ་ཕལ་ཆེར་དུའང་ཨོ་རྒྱན་རྒྱལ་པོའམ་བློན་པོའི་སྲས་སུ་འཁྲུངས་པར་བཤད་པ་དང༌། མ་ལ་ཡ་གནམ་ལྕགས་ཡོད་པའི་རི་རྩེར་ཐོག་བབས་ཀྱི་ཚུལ་དུ་བྱོན་པའི་ལོ་རྒྱུས་ཀྱང་ཡོད་པ་གོང་གི་ལུང་དེས་རྟོགས་ཤིང༌། དེ་རེ་རེ་ལའང་ངོ་མཚར་བའི་རྣམ་ཐར་མི་མཐུན་པ་མཐའ་ཡས་པ་མཆིས་པ་ནི། ཇི་སྐད་དུ། རྣམ་ཐར་སྟོང་ཕྲག་བཅུ་དང་བརྒྱ་ཕྲག་དགུ༔ མ་འོངས་དམ་ལྡན་དོན་དུ་བཀོད་ནས་སྦས༔ ཞེས་གསུངས་པས་མཚོན། སོ་སྐྱེའི་བློའི་སྤྱོད་ཡུལ་ལས་ཤིན་ཏུ་འདས་པ་སྟེ། འདིར་ཆེ་བའི་ཡོན་ཏན་དངོས་སུ་བསྟན་པ་རྣམས་ཀྱང་བྱིས་པའི་བློ་གྲོས་ལ་འཇུག་པར་འོས་པའི་ཕྱོགས་མཚོན་ཙམ་ཡིན་ལ། དེས་ནི་བསྟན་པའི་བདག་པོ་སློབ་དཔོན་ཁྱད་པར་འཕགས་པའི་དོན་བསྟན་པའོ།

།གཉིས་པ་ནི། ཆོས་སྐྱོང་བའི་རྒྱལ་པོ་འཇམ་དབྱངས་སྤྲུལ་པ་ཁྲི་སྲོང་ལྡེའུ་བཙན་གྱིས་སྤྱན་དྲངས་ཏེ༔ ཞེས་གསུངས་ཏེ། དེ་ལྟ་བུའི་སློབ་དཔོན་ཆེན་པོ་སངས་རྒྱས་སྤྲུལ་པའི་སྐུ་དེ་ཉིད་བོད་ཡུལ་དུ་སྐུ་དངོས་ཀྱིས་ཕེབས་པའི་བདག་པོའི་རྐྱེན་ནི་རྒྱལ་བས་འཇམ་དཔལ་རྩ་རྒྱུད་དུ་ལུང་བསྟན་པའི་བོད་སྐྱོང་མངའ་བདག་རིམ་པར་བྱོན་པ་ལས། ཀུན་བཟང་རྣམ་འཕྲུལ་ཐོ་རི་སྙན་ཤལ་གྱིས་དམ་པ་ཆོས་ཀྱི་དབུ་བརྙེས། སྤྱན་རས་གཟིགས་དངོས་སྲོང་བཙན་སྒམ་པོས་སྲོལ་བཏོད། ཆོས་སྐྱོང་བའི་རྒྱལ་པོ་ཆེན་པོ་འཕགས་པ་འཇམ་དཔལ་དབྱངས་ཀྱི་སྤྲུལ་པའི་སྐུ་ཁྲི་སྲོང་ལྡེའུ་བཙན་གྱིས་དར་ཞིང་རྒྱས་པར་མཛད་དོ་ཞེས་ཡོངས་སུ་གྲགས་པ་ལྟར། ཆོས་རྒྱལ་དེ་ཉིད་ཀྱིས་བོད་ལ་དམ་པའི་ཆོས་ཀྱི་བསྟན་པ་དར་བའི་ཆེད་དུ་འཕགས་པའི་ཡུལ་ནས་མཁན་ཆེན་ཞི་བ་མཚོ། རྡོ་རྗེའི་སྐུ་ཅན་བི་མ་ལ་མི་ཏྲ་སོགས་པཎ་ཆེན་བརྒྱ་རྩ་བརྒྱད་དང༌། ཁྱད་པར་འཆི་མེད་རིག་འཛིན་ཆེན་པོ་པདྨ་ཀ་ར་སྤྱན་དྲངས། འབངས་མི་དད་པ་ཅན་རབ་ཏུ་ཕྱུངས་ཏེ་ལོ་ཙཱ་བསླབས། གཙུག་ལག་ཁང་བཞེངས། དགེ་འདུན་གྱི་སྡེ་བཙུགས། དམ་པའི་ཆོས་བསྒྱུར་བཤད་ཉམས་ལེན་གྱི་སྲོལ་བཏོད་དེ། སངས་རྒྱས་ཀྱི་བསྟན་པ་ཐོག་མ་ཉིད་དུ་དར་རྒྱས་མཛད་པའི་ཕྱག་རིས་དང་སྙན་གྲགས་སྲིད་པའི་མཐའ་ཡང་ནུབ་ཏུ་མེད་པ་ནི་བསྟན་པའི་སྤྱིན་བདག་ཁྱད་པར་དུ་འཕགས་པའི་ཚུལ་བསྟན་པའོ། །གསུམ་པ་ནི། འཕགས་པ་ཐུགས་རྗེ་ཆེན་པོའི་ཞིང་ཁམས་གངས་ཅན་བོད་ཀྱི་ལྗོངས་འདིར་བྱོན༔ ཞེས་གསུངས་ཏེ། མཉམ་མེད་ཐུབ་པའི་དབང་པོས་འཕགས་པ་ཐུགས་རྗེ་ཆེན་པོ་ལ་གཉེར་དུ་གཏད་པ་བཞིན་འཕགས་པ་ཉིད་ཀྱིས་གདུལ་བྱའི་ཞིང་ཁམས་སུ་བདག་གིར་བཞེས་པའི་གངས་ཅན་བོད་ཀྱི་ཡུལ་ལྗོངས་འདིར་རྟེན་ཕྱི་སྣོད་བེམས་པོའི་དངོས་པོ་རྣམས་ཀྱང་རི་བོ་གྲུ་འཛིན་སོགས་དང་རྣམ་དབྱེར་མེད་པ་གྲོལ་བ་བཞི་ལྡན་དུ་བྱིན་གྱིས་བརླབས་པའི་བཀའ་རྟགས་རང་བྱོན་གྲངས་མེད་བཀོད། བརྟེན་པ་འགྲོ་བ་མིའི་ས་བོན་ཐོག་མར་བསྐྲུན། རིམ་གྱིས་རྒྱལ་བློན་ཁྱིམ་བདག་མཁས་གྲུབ་རྟོགས་ལྡན་དགེ་བའི་བཤེས་གཉེན་གྱིས་མཚོན། གང་འདུལ་སྤྲུལ་པའི་རོལ་གར་སྣ་ཚོགས་རྒྱུན་མི་འཆད་པར་སྤྲུལ་ཏེ་བྱིས་པ་སྨྲ་ཤེས་ཙམ་ནས་ཡི་གེ་དྲུག་པའི་སྒྲ་རྩོལ་མེད་དུ་འབྱུང་བར་བྱིན་གྱིས་བརླབས་ཤིང༌། གུ་རུ་ཉིད་ཀྱང་འཕགས་པའི་ཐུགས་རྗེ་ལས་སྣང་བའི་ཚུལ་གྱིས་བསིལ་ལྡན་སྐྱེ་རྒུའི་མགོན་སྐྱབས་གཅིག་པུ་པར་བྱོན། རྒྱལ་བས་བསྟན་པ་བྱང་ནས་བྱང་དུ་དར་བར་ལུང་བསྟན་པ་ལྟར། འཕགས་ཡུལ་ལུང་རྟོགས་ཀྱི་བསྟན་པ་རིན་པོ་ཆེའང་ཕྱིས་ནས་བོད་ཀྱི་ཡུལ་འདིར་འཕོས་པ་ལྟར་དེང་དུས་བར་ཉམས་པ་མེད་པར་བཞུགས་པ་དང༌། སངས་རྒྱས་ཀྱི་ཞལ་སྐྱིན་མཆེད་སོགས་སྐུ་གསུང་ཐུགས་རྟེན་ཁྱད་འཕགས་གྲངས་ལས་འདས་པས་གཏམས་ཤིང་གཙུག་ལང་ཁང་དང་དགེ་འདུན་གྱི་སྡེས་ནོར་འཛིན་གྱི་ཁྱོན་ཁེངས་པ་སོགས་སྒོ་དུ་མ་ནས་ངོ་མཚར་ཆེ་བ་བསྟན་པ་བཞུགས་པའི་ཡུལ་ཁྱད་པར་དུ་འཕགས་པའི་དོན་བསྟན་པའོ། །བཞི་པ་ནི། མ་རུངས་པའི་འབྱུང་པོ་རྣམས་བཀའ་རྟགས་ཕྱག་རྒྱའི་ཟིལ་འོག་ཏུ་བཅུག༔ ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་རྟེན་དང་བརྟེན་པར་བཅས་པ་བཞེངས་ཏེ་རབ་ཏུ་གནས་པའི་མེ་ཏོག་འཐོར༔ སངས་རྒྱས་ཀྱི་བསྟན་པ་ཡོངས་སུ་རྫོགས་པའི་བཤད་སྒྲུབ་ཀྱི་སྲོལ་ཆེན་པོ་བཙུག༔ ཁྱད་པར་རྡོ་རྗེ་ཐེག་པའི་རྒྱུད་ལུང་མན་ངག་གི་ཆོས་ཀྱི་འཁོར་ལོ་འབྱམས་ཀླས་པ་བསྐོར༔ གནས་ཆེན་གངས་བྲག་མཚོ་གསུམ་ཐམས་ཅད་ཞབས་ཀྱིས་བཅགས༔ བྱིན་གྱིས་བརླབས༔ ཟབ་མོའི་གཏེར་ཁ་མིང་ཅན་མིང་མེད་གྲངས་མེད་པར་སྦས་པས་མ་འོངས་ཕྱི་མ་ཕྱི་མའི་མཐར་ཐུག་པའི་བར་བོད་ཁམས་མཐའ་དབུས་ཐམས་ཅད་ལ་གཞལ་དུ་མེད་པའི་བཀའ་དྲིན་གྱིས་ཁྱབ་པར་མཛད་དོ༔ ས་མ་ཡ༔ ཞེས་གསུངས་ཏེ།

སྤྱིར་སངས་རྒྱས་རྣམས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་སྒོ་ནས་འདུལ་བ་བཞིའི་ཆོ་འཕྲུལ་ལ་མངའ་དབང་འབྱོར་བས་མཛད་པའི་ཚུལ་བསམ་གྱིས་མི་ཁྱབ་ཅིང༌། ཐམས་ཅད་ཀྱང་གཞན་ཕན་ཆོས་ཀྱི་འཁོར་ལོ་ཤ་སྟག་ཏུ་གྱུར་པས་དེ་བཞིན་གཤེགས་པའི་སྤྱོད་ཡུལ་ཁོ་ནར་ཟད་ཀྱང༌། འདིར་བོད་ཡུལ་གདུལ་བྱ་སྤྱི་མཐུན་ལ་ཇི་ལྟར་སྣང་བའི་དབང་དུ་བྱས་ཏེ། སློབ་དཔོན་སྤྲུལ་པའི་སྐུ་ཆེན་པོ་གངས་ཅན་ལྗོངས་སུ་ཕེབས་པའི་ཚེ། མཛད་པའི་ཆོས་སྒོ་དབྱེ་བའི་ཐོག་མར། བོད་ན་གཉུག་མར་གནས་ཤིང་རྒྱུད་མ་རུངས་པའི་འབྱུང་པོ་རང་རྒྱུད་པ་ཆོས་དང་དགེ་བའི་བྱ་བ་ལ་བར་དུ་གཅོད་པས་སྔོན་ཆད་སར་གནས་ཀྱི་བྱང་སེམས་ཞི་བ་འཚོ་ལྟ་བུས་ཀྱང་ཆོས་ཁྲིམས་བཙུགས་མ་ནུས་པའི་མི་མིན་གདུག་པ་ཅན་མངའ་རིས་ནས་མདོ་ཁམས་ཀྱི་བར་ལ་གང་མཆིས་པ་ཐམས་ཅད་བཀའ་རྟགས་ཕྱག་རྒྱ་གཉན་པོའི་ཟིལ་འོག་ཏུ་བཅུག་ནས་བཏུལ། ཕྱིན་ཆད་དམ་པའི་ཆོས་དང་ཆོས་སྒྲུབ་པ་པོའི་སྲུང་མར་བསྐོས་ཏེ་གཙིགས་ལ་ཕབ་ཅིང་ནམ་ཡང་འདར་མེད་པར་མཛད། མངའ་བདག་གི་བཞེད་པ་ལྟར་བཤད་སྒྲུབ་འབྱུང་བའི་གནས་བི་ཀྲ་མ་ལ་ཤཱི་ལ་ལ་དཔེ་བྱས་ཏེ་རི་རབ་གླིང་བཞི་ཉི་ཟླ་ལྕགས་རི་དང་བཅས་པའི་ཚུལ་དུ་ཡོད་པ་སྤྲུལ་པའི་ཆོས་འཁོར་ཆེན་མོའི་དབུ་རྩེ་རིམ་གསུམ་གྱི་འོག་ཁང་བོད། བར་ཁང་རྒྱ་ནག །སྟེང་ཁང་རྒྱ་གར་ཏེ་ལུགས་གསུམ་གྱི་ཚུལ་དུ། ས་སྟེང་ཉི་འོག་ན་འགྲན་ཟླ་བྲལ་བ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཕྱིའི་རྟེན་གཞལ་ཡས་ཁང༌། ནང་གི་བརྟེན་པ་སྐུ་གསུང་ཐུགས་ཀྱི་རྟེན་ངོ་མཚར་བསམ་གྱིས་མི་ཁྱབ་པ་རྣམས་དང་བཅས་པ་བཞེངས་ཏེ་རབ་ཏུ་གནས་པའི་མེ་ཏོག་ཕྱག་གིས་འཐོར། ཡེ་ཤེས་སེམས་དཔའ་དངོས་སུ་ཐིམ་པའི་ཆོ་འཕྲུལ་ཆེན་པོ་རྨད་དུ་བྱུང་བས་ལྷ་དང་བཅས་པའི་འཇིག་རྟེན་དད་པའི་གནས་ལ་བཀོད་ཅིང་བོད་ཡུལ་དུ་སངས་རྒྱས་ཀྱི་བསྟན་པ་རིན་པོ་ཆེ་ད་ལྟའི་བར་དུ་འཚོ་ཞིང་གཞེས་པ་དང༌། སྣོད་བཅུད་ལ་དགེ་མཚན་མི་ཉམས་པའི་བཀའ་དྲིན་མཛད། སངས་རྒྱས་ཀྱི་བསྟན་པ་རིན་པོ་ཆེ་ལུང་རྟོགས་གཉིས་ཀྱི་བདག་ཉིད་དུ་གནས་ཤིང༌། ལུང་གི་ཆོས་སྡེ་སྣོད་གསུམ། རྟོགས་པའི་དོན་བསླབ་པ་གསུམ་དུ་འདུ་བ་ལས། ཐོག་མར་ལུང་ཆོས་བོད་སྐད་དུ་སྒྱུར་བ་པོ་ལོ་ཙཱ་བ་ལུང་བསྟན་ཅིང་ཤེས་བྱ་ལ་བློ་སྦྱོང་དུ་སྩལ། རིམ་པར་ལོ་པཎ་བསྡེབས་ཏེ་འཕགས་ཡུལ་ན་ཡོངས་སུ་གྲགས་པའི་དམ་ཆོས་རྣམས་བོད་དུ་འགྱུར་བའི་བདག་པོའི་རྐྱེན་མཛད། མདོ་སྔགས་ལུང་རྟོགས་ཡོངས་སུ་རྫོགས་པའི་བཤད་ཉན་དང༌། བསླབ་པ་ཉམས་ལེན་སྒོམ་སྒྲུབ་ཀྱི་ཕྱག་སྲོལ་ཆེན་མོའི་རྒྱུན་འདི་ཐོག་མར་བཙུགས། མཚན་ཉིད་ཀྱི་ཐེག་པ་ལས་ཁྱད་པར་དུ་མས་འཕགས་པ་ཚེ་གཅིག་གིས་སངས་རྒྱས་སྟེར་བའི་གསང་སྔགས་རྡོ་རྗེ་ཐེག་པའི་སྨིན་གྲོལ་རྣམས་རྗེ་འབངས་སྐལ་བ་དང་ལྡན་པ་རྣམས་ལ་མནོག་ཆོས་སུ་སྩལ་ཏེ། རྒྱུད་མ་ཧཱ། ལུང་ཨ་ནུ། མན་ངག་ཨ་ཏི་སྟེ། ཡོ་ག་རྣམ་པ་གསུམ་དང༌། རེ་རེ་ལའང་རྒྱུད་ལུང་མན་ངག་གི་ཟབ་དོན་རིམ་པར་བཞུགས་པ་རྣམས་ཀྱི་ཆོས་ཀྱི་འཁོར་ལོ་འབྱམས་ཀླས་པར་བསྐོར་བས་བསྟན་པའི་སྙིང་པོ་འཕགས་ཡུལ་ལས་ཀྱང་ཆེས་ལྷག་པར་གསལ་བར་མཛད། སྐུ་གཅིག་ཞིང་ཁམས་རྒྱ་མཚོར་ཁྱབ་པའི་ཆོ་འཕྲུལ་ཆེན་པོས་སྤྲུལ་པའི་རྗེ་འབངས་གྲོགས་འཁོར་དང་ལྷན་ཅིག །བོད་ཀྱི་གནས་ཆེན་པོ་གངས་ཆེན་བཞི། བྲག་ཕུག་ཆེན་པོ་བརྒྱད། གྲགས་པའི་མཚོ་ཆེན་བཞི། ལུང་ལྔ། ལྗོངས་གསུམ། སྦས་ཡུལ་གླིང་ཆེན་རྣམས་གཙོར་བྱས། བོད་ཁམས་སྟོད་སྨད་བར་གསུམ་གྱི་ས་གཞིའི་ཁྱོན་རྟ་རྨིག་ཙམ་ཡང་མ་ལུས་པར་ཞབས་ཀྱིས་བཅགས། སྐད་ཅིག་བསྐལ་པར་བསྒྱུར་བའི་རྫུ་འཕྲུལ་གྱིས་དེ་དག་རེ་རེར་ཡང་ལོ་ཟླ་མང་པོར་ཚོགས་ཀྱི་སྒྲུབ་པ་དང་ཆོས་འཁོར་བསྐོར་བ་སོགས་ཀྱིས་གདོད་ནས་གྲུབ་པའི་གནས་ཆེན་རྣམས་དང་དབྱེ་བ་མེད་པར་བྱིན་གྱིས་བརླབས། དུས་སྐབས་དེའི་གདུལ་བྱར་གྱུར་པ་རྣམས་རྟོགས་གྲོལ་དུས་མཉམ་དུ་གྱུར་ཀྱང་སྐལ་དམན་ཞལ་མཐོང་ཙམ་གྱི་ས་བོན་བཞག་པ་དང༌། ཕྱི་རབས་ཀྱི་འགྲོ་བ་རྣམས་ལ་བརྩེ་བའི་ཐུགས་རྗེས་དགོངས་ནས། སྐུ་གཏེར་ཆོས་གཏེར་ནོར་གཏེར་རྫས་གཏེར་ལ་སོགས་པ་ཟབ་མོའི་གཏེར་ཁ་ཁ་བྱང་དང་བཅས་ཤིང་འདོན་པའི་སྐྱེས་བུ་ལུང་བསྟན་པ་མིང་ཅན་དང༌། ལས་ཅན་གང་རུང་ལ་དགོངས་པ་གཏད་ཅིང་ཁ་བྱང་དམིགས་སུུ་མ་གསལ་བའི་མིང་མེད་གྲངས་ལས་འདས་པ་སྦས་ཏེ་ས་སྟེང་ཆོས་ནོར་དམ་རྫས་ཀྱིས་བཀང་བས། མ་འོངས་ཕྱི་མ་ལས་ཀྱང་ཕྱི་མའི་མཐར་ཐུག་པ་ཐུབ་བསྟན་ནུབ་ནས་ཀྱང་བྱམས་མགོན་མ་བྱོན་གྱི་བར་དུ་སྐལ་ལྡན་རྣམས་ལ་གཏེར་གྱི་འགྲོ་དོན་མཛད་པར་གསུངས་པས་མཚོན། བོད་ཁམས་མཐའ་དང་དབུས་ཐམས་ཅད་ལ་བྱང་ཆུབ་བར་དུ་གཞལ་དུ་མེད་པའི་བཀའ་དྲིན་གྱིས་ཁྱབ་པར་མཛད་པ་ནི་དེང་གི་དུས་བློ་ལྡན་རྣམས་ཀྱི་སྤྱོད་ཡུལ་དུ་མངོན་སུམ་གྱུར་པ་འདི་ཉིད་དོ། །དེས་མཛད་པའི་ཆོས་སྒོ་ཁྱད་པར་དུ་འཕགས་པའི་ཚུལ་བསྟན་པའོ། །ལྔ་པ་ནི། བསམ་ཡས་ངོ་མཚར་གྱི་ཆོ་འཕྲུལ་ཆོས་སྒོ་ཆེན་པོ་དེ་དག་ནམ་བྱུང་བ་དེའི་ཚེ་སྐབས་ཏེ་ཤུགས་ལས་བསྟན་པའོ། །གཉིས་པ་རྐྱེན་གླེང་སློང་བ་ལ་གཉིས། གླེང་སློང་བའི་གཞི་འགོད་པ་དང༌། གླེང་སློང་བ་དངོས་སོ།

།དང་པོ་ནི། དེའི་ཚེ་དེའི་དུས་ན༔ ཚེ་རབས་དུ་མ་ནས་སྨོན་ལམ་ལོག་པར་བཏབ་པའི་འབྲས་བུ་དུས་སུ་སྨིན་པ་བདུད་བློན་གདུག་པ་ཅན་རྣམས་དང་༔ བཙུན་མོ་དམར་རྒྱན་མས་ལོག་པའི་བསམ་སྦྱོར་སྣ་ཚོགས་སུ་ཤར་ཏེ༔ མངའ་བདག་རྒྱལ་པོའི་སྤྱན་སྔར་གསོལ་བ༔ མཐའི་མོན་བུ་ངན་སྔགས་མཁན་འདིས་གཡོ་དང་༔ སྒྱུ་དང་༔ མིག་འཕྲུལ་སྣ་ཚོགས་པས་རྒྱལ་པོ་བསླུས་ཏེ༔ མཐར་གྱིས་ཆེ་སྟེ་སྐུ་སྲོག་དང་ཕྲལ༔ འབྲིང་སྟེ་མངའ་ཐང་འཕྲོག༔ ཐ་མའང་རྒྱལ་བློན་བཙུན་མོའི་བར་དུ་སྙན་ཕྲ་བཅུག་སྟེ་འབངས་ངོ་ལོག་པར་འགྱུར་ན༔ ཐམས་ཅད་ཀྱིས་མཐོང་བའི་ལམ་དུ་ཆབ་ལ་གསོལ་བར་འཚལ་ཞེས་ནན་ཏན་དུ་ཞུས་པས༔ རྒྱལ་པོ་ཐུགས་མ་བདེ་བར་གྱུར་ཏེ༔ དེ་ལྟར་གྱུར་པའི་རྒྱུ་མཚན་རྣམས་གུ་རུ་རིན་པོ་ཆེར་ཞིབ་ཏུ་གསོལ་ནས༔ འདི་ལ་ཐབས་ཇི་ལྟར་བགྱི་ཞེས་སྤྱན་ཆབ་གཡོ་ཞིང་གདུང་ཤུགས་དྲག་པོས་དར་ཅིག་བརྒྱལ་བར་གྱུར་ཏོ༔ ཅུང་ཟད་ལོན་པ་ན་བརྒྱལ་བ་ལས་སངས་པའི་ཚེ༔ གུ་རུ་ཆེན་པོ་ཆེས་ཞལ་འཛུམ་མདངས་སུ་བཞད་ཅིང་༔ གསུང་སེང་གེའི་སྒྲ་འཇིགས་པ་མེད་པའི་དབྱངས་ཀྱིས༔ རྒྱལ་པོ་ཆེན་པོ་དེ་ལྟ་བུ་ལ་ཐུགས་མི་བདེ་བ་ཅུང་ཟད་ཀྱང་མི་འཚལ་ཏེ༔ སྔོན་ཡང་དག་པར་རྫོགས་པའི་སངས་རྒྱས་ལ་བདུད་དང་མུ་སྟེགས་ཀྱིས་མཐོ་བཙམས་པ་ནའང་༔ སངས་རྒྱས་ཀྱི་ཆེ་བ་འདོན་པ་མ་གཏོགས་དཀོན་མཆོག་གསུམ་ལ་ཅུང་ཟད་ཙམ་ཡང་འཚེ་བར་མ་ནུས་པ་ལྟར༔ རིག་པ་རྩལ་གྱི་དབང་ཐོབ་པས་སྣང་སྲིད་འདོད་རྒུར་བསྒྱུར་ཞིང་༔ འཇའ་ལུས་རྡོ་རྗེའི་སྐུར་གྲུབ་པས་འབྱུང་བ་བཞིས་ཅིར་ཡང་བྱར་མེད་པ༔ དུས་གསུམ་གྱི་རྒྱལ་བ་དང་སེམས་དཔའ་ཐམས་ཅད་ཀྱི་གདུང་འཚོབ་པ་ཨོ་རྒྱན་གྱི་མཁན་པོ་བདག་ལ་ནི་ཁམས་གསུམ་ཐམས་ཅད་དགྲར་ལངས་ཀྱང་༔ རྫུ་འཕྲུལ་གྱི་ཆེ་བ་འདོན་པ་མ་གཏོགས་གླགས་རྙེད་པའི་སྐབས་ལྟ་ཅི༔ བ་སྤུའི་རྩེ་མོའང་གཡོ་བར་མི་འགྱུར་རོ༔ ཞེས་བཀའ་སྩལ་པ་ན༔ རྒྱལ་པོ་ཆེན་པོ་ཤིན་ཏུ་དད་ཅིང་རྗེས་སུ་ཡི་རངས་པས་ལྷ་ཕྱག་གྲངས་མེད་པ་བཙལ་ཏེ༔ ཨེ་མ་གུ་རུ་སྤྲུལ་པའི་སྐུ༔ ཁྱེད་ནི་བླ་མ་ཀུན་གྱི་དངོས༔ ཡི་དམ་རྒྱ་མཚོའི་ཁྱབ་བདག་ཆེ༔ མཁའ་འགྲོའི་ཚོགས་རྗེ་ཉིད་ལགས་ན༔ ཇི་ལྟར་རྡོ་རྗེའི་བཀའ་སྩལ་པ༔ ནམ་ཡང་བསླུ་བ་མེད་པའི་ཕྱིར༔ བདག་སོགས་དད་ལྡན་གདུལ་བྱ་རྣམས༔ ཡི་རངས་སྤྲོ་བ་བསྐྱེད་པ་དང་༔ སངས་རྒྱས་ཆོས་དང་དགེ་འདུན་གྱི༔ བསྟན་པ་རིན་ཆེན་འཕེལ་བའི་སླད༔ རྫུ་འཕྲུལ་རྣམ་པར་བརྩེ་བ་ཡིས༔ བདུད་བློན་ཚོགས་རྣམས་སྤ་བཀོང་གསོལ༔ ཅེས་གསོལ་བ་བཏབ་པས་དེ་དེ་བཞིན་དུ་བགྱིའོ་ཞེས་དགྱེས་པ་ཆེན་པོའི་ཞལ་གྱིས་བཞེས་ཏེ་བོད་ཁམས་གླིང་དགུའི་ལྟེ་བ༔ དཔལ་གྱི་བསམ་ཡས་དབུ་ཚལ་གསེར་ཁང་གླིང་གི་ཁྱམས་སུ་བདུད་ཚོགས་འདུལ་བའི་ཏིང་ངེ་འཛིན་ལ་སྙོམས་པར་ཞུགས་པ་ན༔ པཎྜི་ཏ་དང་༔ ལོ་ཙཱ་བ་དང་༔ རབ་བྱུང་དང་༔ སྔགས་པ་དང་༔ རྒྱལ་པོ་དང་༔ བློན་པོ་དང་༔ བཙུན་མོ་དང་༔ དམངས་ཕལ་པ་རྣམས་འདུས་པའི་འཁོར་གྱི་ཁྱམས་ཆེན་པོའི་གུང་དུ༔ གུ་རུ་ཉིད་བཞུགས་བཞིན་དུ་སྐུ་མི་སྣང་བ་དང་༔ མེ་འབར་བ་དང་༔ ས་གཡོ་བ་དང་༔ ཚོམ་བུ་དང་བཅས་པ་ཞི་བ་དང་༔ ཁྲོ་བོ་དང་༔ འབྲུག་སྟོང་ལྟ་བུའི་སྔགས་ཀྱི་སྒྲ་ནམ་མཁའ་གང་བ་སོགས་གང་ལ་གང་འདུལ་བའི་དཔག་པར་དཀའ་བའི་ཆོ་འཕྲུལ་བྱེ་བ་ཕྲག་བརྒྱ་མངོན་པར་འདུ་མཛད་པ་ན༔ བདུད་རིགས་རྣམས་ནི་སེམས་ཁོང་དུ་ཆུད་དེ་མཐོ་འཚམས་པའི་ནུས་པ་ཟད༔ བར་མའི་འགྲོ་བ་དང་མ་དད་པ་རྣམས་དད་པའི་དབང་པོ་ལྷག་པར་རྒྱས༔ དད་པ་རྣམས་གོང་ནས་གོང་དུ་འཕེལ་ཞིང་ཞལ་གྱི་བདུད་རྩི་འཐུང་བ་ལ་འདུན༔ རྒྱུད་སྨིན་པའི་གང་ཟག་རྣམས་གྲོལ་བ་མཆོག་གི་དངོས་གྲུབ་བརྙེས༔ གྲོལ་བ་རྣམས་གུ་རུ་རིན་པོ་ཆེ་ཉིད་དང་སྟོན་འཁོར་དགོངས་པ་དབྱེར་མེད་དུ་གྱུར་ཏོ༔ ཞེས་པས་བསྟན། གཉིས་པ་ནི། དེ་ལྟ་བུའི་ངོ་མཚར་བསམ་གྱིས་མི་ཁྱབ་པའི་མཛད་པ་ལ་བརྟེན་ནས་མངའ་བདག་རྒྱལ་པོ་ཉིད་ལྷག་པར་དད་ཅིང་འདུན་པ་དང་༔ ཁྱད་པར་མ་འོངས་སྙིགས་མའི་དུས་ཀྱི་གདུལ་བྱ་རྣམས་ལ་དགོངས་ཏེ༔ གུ་རུ་རིན་པོ་ཆེ་ཉིད་དཔལ་གྱི་བསམ་ཡས་བར་ཁང་གཡུ་ཞལ་འབར་བ་ན་བཞུགས་པའི་སྐབས༔ གསེར་གྱི་མཎྜལ་ལ་བླ་གཡུ་རིན་པོ་ཆེ་འོད་འབར་བའི་ཚོམ་བུ་སྐར་ཆེན་ཤར་བ་ལྟར་བཀྲམ་སྟེ༔ ཡབ་སྲས་ལྷན་ཅིག་ཏུ་ཕྱག་གྲངས་མེད་པ་བཙལ༔ སྤྲུལ་པའི་ལོ་ཙཱ་བ་བཻ་རོ་ཙ་ན་དང་༔ ཐུགས་ཀྱི་གཟུངས་མར་བཀས་གནང་བ་བདག་ཉིད་དང་བཅས་ཆབ་ཅིག་ཏུ་གསོལ་བ་བཏབ་པ་ནི༔ ཕྱོགས་བཅུ་དུས་བཞིའི་སངས་རྒྱས་སྲས་བཅས་ཀྱི༔ སྐུ་གསུང་ཐུགས་ཡོན་ཕྲིན་ལས་ཡོངས་རྫོགས་པ༔ མངལ་གྱིས་མ་གོས་མཚོ་སྐྱེས་རྡོ་རྗེའི་སྐུ༔ མ་ཧཱ་གུ་རུའི་ཞབས་ལ་ཕྱག་འཚལ་ལོ༔ མགོན་པོ་ཁྱེད་ནི་སངས་རྒྱས་ཀུན་དང་མཉམ༔ གངས་ཅན་འགྲོ་ལ་བཀའ་དྲིན་ལྷག་པར་ཆེ༔ བྱེ་བྲག་བདག་ཅག་རྗེ་འབངས་འདུས་པ་ཡི༔ གཙུག་གི་ནོར་བུ་གཉིས་པ་གཞན་མ་མཆིས༔ ཁྱད་པར་རྫུ་འཕྲུལ་ཆེན་པོའི་རྣམ་རོལ་གྱིས༔ མ་དག་བདུད་རིག་ཚོགས་རྣམས་སྤ་བཀོང་སྟེ༔ སངས་རྒྱས་བསྟན་པའི་རྒྱལ་མཚན་ཕྱོགས་བཅུར་བསྒྲེངས༔ ལས་ཅན་སྨིན་གྲོལ་བྱང་ཆུབ་ལམ་ལ་བཀོད༔ འབྲེལ་ཚད་དོན་ལྡན་ངོ་མཚར་བསམས་ལས་འདས༔ བདག་ཅག་བསགས་པ་རབ་ཏུ་གྱུར་ལགས་ཀྱང་༔ མ་འོངས་སྙིགས་མའི་དུས་ལ་བབས་པའི་ཚེ༔ དཀར་ཕྱོགས་མཐུ་ཆུང་ནག་ཕྱོགས་མགོ་འཕང་མཐོ༔ དམ་སྲི་མངོན་སུམ་འགྲོ་བའི་སྙིང་ཞུགས་ཏེ༔ སངས་རྒྱས་བསྟན་དང་བསྟན་པ་འཛིན་པ་དང་༔ སེམས་ཅན་བདེ་སྐྱིད་འཕྲོག་ཅིང་འཇོམས་པའི་ཕྱིར༔ ནད་མུག་མཚོན་འཁྲུགས་སྐལ་ངན་དུས་གཅིག་ལངས༔ བོད་ཁམས་སྡུག་བསྔལ་རྒྱ་མཚོ་བརྡོལ་བའི་ཚེ༔ གུ་རུ་ཉིད་ལས་སྐྱབས་གཞན་མ་མཆིས་པས༔ གནས་སྐབས་ཕྱི་ནང་བདུད་སྡེ་ཚར་བཅད་ཅིང་༔ ཕྲིན་ལས་རྣམ་བཞི་འབད་མེད་འགྲུབ་པ་དང་༔ མཐར་ཐུག་ལྔ་ལྡན་སྙིང་པོ་འོད་ཀྱི་ལུས༔ ཡེ་ཤེས་བླ་མའི་གོ་འཕང་འཐོབ་པའི་ཐབས༔ ཟབ་རྒྱས་གདམས་པ་ཀུན་གྱི་སྙིང་པོའི་བཅུད༔ བདག་ཅག་རྣམས་དང་མ་འོངས་གདུལ་བྱའི་དོན༔ ཐུགས་ཀྱིས་དགོངས་ཏེ་བཀའ་དྲིན་སྩལ་དུ་གསོལ༔ ཅེས་གསོལ་བ་བཏབ་པ་ན༔ གུ་རུ་རིན་པོ་ཆེ་ཉིད་སྐད་ཅིག་གིས་རིག་འཛིན་རྡོ་རྗེ་དྲག་པོ་རྩལ་གྱི་སྐུར་བཞེངས་ཏེ༔ དབང་དང་༔ གདམས་ངག་རྣམས་བསྟན་པའི་མཐར༔ བསྙེན་པ་ཕྱག་རྒྱ་གཅིག་པའི་ཧེ་རུ་ཀ་ལས༔ ཞལ་ཕྱག་གི་སྤྲོས་བཅས་ཉེ་བསྙེན་དང་༔ སྒྲུབ་པ་དང་༔ སྒྲུབ་པ་ཆེན་པོའི་ཚུལ་གྱི་གཙོ་འཁོར་མཐའ་ཡས་པ་སྐད་ཅིག་གིས་སྤྲོ་བ་དང་བསྡུ་བའི་ཆོ་འཕྲུལ་ཆོས་ཀྱི་དབྱིངས་རྒྱས་པར་བཀང་བའི་ཚུལ་དུ་བསྟན་ནས་བྱིན་རླབས་ཀྱི་ཟིལ་ཆེན་པོས་བོད་ཁམས་མཐའ་དབུས་ཐམས་ཅད་དུ་འཇའ་དང་༔ འོད་དང་༔ མེ་ཏོག་གི་ཆར་དང་༔ ས་གཡོ་བ་དང་༔ སྒྲ་དང་རོལ་མོ་རང་འཁྲོལ་བ་དང་༔ སྐལ་ལྡན་རྣམས་ལ་རྡོ་རྗེའི་ཡེ་ཤེས་མངོན་སུམ་ཕེབས་པའི་སྒྱུ་མ་ལྟ་བུའི་རྣམ་པར་འཕྲུལ་བ་འདུ་མཛད་དེ༔ སླར་ཡང་གུ་རུ་ཉིད་པདྨ་སཾ་བྷ་བ་སྐུ་འོད་ཀྱི་རང་བཞིན་ཅན་དུ་ལམ་མེར་སྣང་བའི་ཞལ་ནས་རྡོ་རྗེའི་གསུང་གི་མཐར་ཐུག་པ་ལམ་གྱི་རིམ་པ་སྙིང་པོར་དྲིལ་བ་འདི་ཆོས་ཉིད་རྡོ་རྗེའི་དབྱངས་ཀྱིས་བཀའ་སྩལ་ཏོ༔ ས་མ་ཡ༔ ཞེས་པས་བསྟན་ཏོ། །འདིར་སྤྱི་དོན་སྤྲོས་ན་ཡི་གེ་མང་དོགས་པས་མ་བྲིས་ཤིང་ཚིག་དོན་ནི་གོ་སླའོ། །གསུམ་པ་འབྲས་བུ་ཡོངས་ཤེས་མན་ངག་གི་དོན་བཤད་པ་ལ་གསུམ། བཤད་བྱ་དོན་གྱི་སྒོ་ནས་མདོར་བསྟན། འཆད་བྱེད་ཐུན་མིན་གླེང་གཞིས་གོ་ཕྱེ། ཇི་ལྟར་འཆད་པའི་ཚུལ་གྱིས་ཚིག་དོན་རྒྱས་པར་ཕྱེ་བའོ།

།དང་པོ་ནི། ཨོཾ་ཨཱཿཧཱུྃ་ཧོཿ ཞེས་འབྱུང་སྟེ། དེའི་དོན་འཆད་པ་ལ་གཉིས། འཕྲོ་གཞི་ཡི་གེའི་དེ་ཉིད་སྤྱིར་བཤད། དེ་ལས་འཕྲོས་པའི་འབྲུ་བཞིའི་དོན་ཁྱད་པར་དུ་བསྟན་པའོ། །དང་པོ་ལ་ལྔ། ངོ་བོ། །རང་བཞིན། ངེས་ཚིག །བྱེད་ལས། དབྱེ་བའོ། །དང་པོ་ལའང༌། ཐུན་མོང་ཐ་སྙད་ཀྱི་གནས་སྐབས་སུ་ཕུང་པོ་ལྔ་ལས་མི་ལྡན་པའི་འདུ་བྱེད་དུ་བཞག་པ་དང་ཆོས་ཀྱི་བརྡ་འམ་མཚན་མར་གྱུར་པའི་ཕྱིར་སངས་རྒྱས་རྣམས་ཀྱི་ཆོས་ཀྱི་ཕྱག་རྒྱར་བཞག་པ་དང༌། ལྷ་དང་སྔགས་ལ་ཐ་དད་མེད་པའི་ཕྱིར་རྣལ་འབྱོར་པ་རྣམས་ཀྱིས་ལྷར་བཞག་པ་དང༌། མཚན་མ་འདིས་འགྲོ་བའི་རྒྱུད་བྱིན་གྱིས་རློབ་ནུས་པའི་ཕྱིར་སངས་རྒྱས་སུ་བཞག་པ་དང༌། དེ་བཞིན་གཤེགས་པའི་བྱིན་རླབས་དང་རྣམ་པར་སྨིན་པའི་ཆོས་འདྲེས་པའི་ཕྱིར་སྣང་བར་བཞག་པ་དང༌། སངས་རྒྱས་ཀྱི་ཡེ་ཤེས་ཉིད་ཡི་གེར་བྱིན་གྱིས་བརླབས་པས་དེ་གཉིས་ཐ་དད་མེད་པར་བཞག་པ་སྟེ། གང་ཟག་དང་གནས་སྐབས་ཀྱི་ཁྱད་པར་ལས་བརྟགས་པ་རྣམ་པ་དྲུག་ཏུ་བཤད་དོ། །གཉིས་པ་ནི། སེམས་ཀྱི་རང་བཞིན་འོད་གསལ་བ་ཉིད་ཡི་གེ་འཁོར་ལོའི་སྤྲིན་དུ་རང་སྣང་བ་སྟེ། དེ་ལས་གཞན་དུ་དངོས་པོར་གྲུབ་པ་གང་ཡང་མེད་དེ། གསང་སྙིང་ལས། སེམས་ཀྱི་རང་བཞིན་ཡི་གེ་སྟེ། །ཡི་གེ་དངོས་པོར་ཡོད་མ་ཡིན། །ཞེས་དང༌། མདོ་ལས་ཀྱང༌། རབ་འབྱོར་ཡི་གེ་ནི་དོན་དམ་པར་མ་སྐྱེས་པ་སྟེ་ཨའི་ངོ་བོ་ཉིད་དོ། །ཨའི་ངོ་བོ་ཉིད་གང་ཡིན་པ་དེ་ནི་སེམས་ཀྱི་རང་བཞིན་ཏེ། དངོས་པོ་དང་དངོས་པོ་མེད་པ་ཐམས་ཅད་ལས་ཡང་དག་པར་འདས་པའོ། །ཞེས་གསུངས་སོ། །གསུམ་པ་ནི། ཡུལ་ཆོས་ཀྱི་དབྱིངས་ལ་ཡུལ་ཅན་རང་བྱུང་ཤེས་རབ་ཀྱིས་བྱ་རྩོལ་མེད་པར་བྲིས་པ་སྟེ། ཡེ་ནས་ལྷུན་གྱིས་གྲུབ་ཅིང་འགྱུར་བ་མེད་པས་ཨཀྵ་ར་དང༌། བརྗོད་བྱ་ཐམས་ཅད་གསལ་བར་བྱེད་པས་བྱཉྫ་ན་དང༌། དོན་མཚོན་པའི་ནུས་པ་དང་ལྡན་པས་ཝརྞ་ཞེས་པའི་མིང་གིས་བརྗོད་པ་སྟེ། གསང་སྙིང་ལས། དབྱིངས་ལ་དབྱིངས་ཀྱིས་བྲིས་པ་སྟེ། །ཡི་གེ་ཞེས་ནི་དེ་ཕྱིར་བརྗོད། །ཅེས་སོ། །བཞི་པ་ནི། དངོས་པོ་མེད་པའི་རང་བཞིན་ཡི་གེ་འཁོར་ལོའི་སྤྲིན་གྱི་རོལ་པ་སྣ་ཚོགས་སུ་སྣང་བས་དོན་གྱི་ངོ་བོ་ཙམ་སྟོན་པའི་མིང་དང༌། དོན་གྱི་ཁྱད་པར་སྟོན་པའི་ཚིག་རྣམས་འབྱུང་ཞིང༌། དེ་དག་འདུས་པ་ལས་གཞི་ལམ་འབྲས་བུས་བསྡུས་པའི་འཁོར་འདས་ཀྱི་བརྗོད་པ་ཇི་སྙེད་པ་སྟོན་པ་སངས་རྒྱས་ཀྱི་མཛད་པ་སྒྲུབ་པའི་ཕྲིན་ལས་དང་ལྡན་པ་སྟེ། ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །ཞེས་སོ། །ལྔ་པ་རྣམ་པར་དབྱེ་བའི་ཚུལ་ཡང༌། ཆོས་རྗེ་ཀུན་མཁྱེན་ཆེན་པོའི་བཞེད་པ་ལྟར་ན་བཞི་སྟེ། གནས་ལུགས་དོན་གྱི་ཡི་གེ་ནི། སྒྱུ་འཕྲུལ་ལས། སེམས་ཉིད་ཡི་གེའི་རང་བཞིན་ཏེ། །ཡི་གེ་ཡིད་བཞིན་རིན་ཆེན་སྤྲིན། །ཞེས་གསུངས་པ། སེམས་ཉིད་རང་བཞིན་གྱིས་འོད་གསལ་བ་རང་བྱུང་གི་ཡེ་ཤེས་རྟག་ཆད་འགྲོ་འོང་དང་བྲལ་བ་སྟེ་འཁོར་འདས་ཀྱི་ཡི་གེ་ཐམས་ཅད་འཕྲོ་བའི་གཞིར་གྱུར་པའོ། །ལུས་གནས་རྩའི་ཡི་གེ་ནི། ལུས་ཀྱི་རྩ་འཁོར་ལོ་བཞིའི་སྲོག་ཤིང་རོ་རྐྱང་དབུ་མ་གསུམ་གྱི་ནང་དུ་ཨོཾ་ཨཱཿཧཱུྃ་དཀར་དམར་མཐིང་གའི་ཚུལ་དུ་རང་བྱུང་དུ་གནས་པས། ཕྱི་རུ་ལུས་ངག་ཡིད་གསུམ། ནང་དུ་ཉོན་མོངས་དུག་གསུམ། གསང་བར་སྐུ་གསུང་ཐུགས་སུ་འཆར་བའི་རྟེན་བྱེད་ལ། དེའི་འོད་མདངས་ལས་འཁོར་ལོ་བཞིའི་རྩ་འདབ་རྣམས་སུ་ཐབས་ཤེས་དབྱངས་གསལ་གྱི་ཡི་གེ་རྐྱང་བརྩེགས་འདོགས་དང་ཡན་ལག་ཏུ་ཕྱེ་བའི་བརྒྱད་ཁྲི་བཞི་སྟོང་གནས་པས། ཕྱི་ཕུང་ཁམས་སྐྱེ་མཆེད་ཀྱི་རྟེན་དང་སྨྲ་བརྗོད་དེ་སྙེད་འབྱུང་བའི་རྒྱུ་བྱེད། ནང་ཉོན་མོངས་རྟོག་ཚོགས་ཀྱི་རྟེན་དང་ཉིན་མཚན་རྣམ་རྟོག་དེ་སྙེད་འབྱུང་བའི་རྟེན་བྱེད། གསང་བར་དེ་རྣམས་དག་དུས་ཆོས་སྒོ་དེ་སྙེད་འབྱུང་བའི་རྟེན་བྱེད་པའོ། །བརྗོད་པ་སྒྲའི་ཡི་གེ་ནི། ངག་གི་སྨྲ་བ་དང་བརྗོད་པ་རྣམས་ཡིན་ཏེ། རྒྱུ་རྩ་གནས་ཀྱི་ཡི་གེ་རླུང་གིས་བསྐྱོད། རྐྱེན་ལྕེ་རྐན་སོགས་ཀྱི་བྱེད་པ་ལ་བརྟེན་ནས་གནས་དང་རྩོལ་བ་འཕྲད་ནས་འབྱུང་བ་རྣམས་སོ། །མཐར་ཐུག་འབྲས་བུའི་ཡི་གེ་ནི། ལོངས་སྐུའི་རྩ་གནས་དག་པའི་ཡི་གེ་ལས་ཡི་གེའི་སྤྲིན་འཕྲོས་ཏེ་ནམ་མཁའ་ལ་ཆོས་ཀྱི་དབྱངས་སུ་གྲགས་པ་དང༌། ཡི་གེ་སྐུར་གྱུར་ནས་སེམས་ཅན་ཀྱི་དོན་མཛད་པ་དང༌། ལོངས་སྤྲུལ་གཉིས་ཀའི་རྩ་ཡིག་ཡེ་ཤེས་ལྔའི་སྣང་བས་བརྒྱན་པ་དང༌། གསུང་དབྱངས་ཡན་ལག་དྲུག་ཅུ་དང་ལྡན་པའི་ཆོས་སྒྲར་སྣང་བ་རྣམས་སོ། །དེའང་དབྱིངས་དོན་དམ་གྱི་ཡི་གེའི་རང་མདངས་ལས་ལུས་རྩའི་ཡི་གེ་བྱུང༌། དེའི་གདངས་བརྗོད་པ་སྒྲའི་ཡི་གེར་ཤར། དེ་སྒྲིབ་པ་ལས་གྲོལ་བས་འབྲས་བུའི་ཡི་གེར་གནས་འགྱུར་བ་ཡིན་པས་བཞི་ཀའང་ངོ་བོ་གཅིག་ཏུ་འདུས་པའོ། །གཉིས་པ་ནི། དེ་ལས་འདིར་མདོར་བསྟན་དུ་མཛད་པའི་ཡི་གེ་འདི་དག་རྟོག་གེ་དང་ཉན་ཐོས་སོགས་ཀྱི་བློས་མི་ཕྱེད་པས་གསང་བ་ཆེན་པོ་རྡོ་རྗེའི་ཡེ་གེའམ། ཇི་ལྟར་ཨེ་དང་ཝྃ་ཡིག་བཞིན་དུ་དེ་བཞིན་གཤེགས་པའི་བརྡར་གྱུར་པའི་ཡི་གེ་སྟེ། བརྡ་ལའང་དོན་དམ་ཉིད་བརྡའམ་རྟགས་སུ་ཤར་བ་དང༌། ཐ་སྙད་ཀྱིས་བརྡར་བཏགས་པ་གཉིས་ལས། འདི་ནི་བཅོས་ནས་ཐ་སྙད་དུ་སྦྱར་བ་མ་ཡིན་པ་དོན་དམ་པའི་གནས་ལུགས་བརྡའི་ཚུལ་དུ་རང་ཤར་བ་དེ་ཉིད་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་ནས་གསལ་བར་མཛད་པ་སྟེ། འཁོར་འདས་ལམ་གསུམ་གྱི་ཆོས་ཐམས་ཅད་ཀྱི་སྲོག་གམ་གནད་འདུས་པའི་ཕྱིར་དེ་དག་གང་ལས་འཕྲོ་བའི་གཞི་དང༌། བཤད་པའི་གཞི་དང༌། བཟླས་སྒོམ་གྱི་གནད་དང༌། མཐར་ཐུག་གི་སྐྱེལ་སོ་རྣམས་སུ་གྱུར་པའོ། །དེ་ལ་རྡོ་རྗེའི་ཡི་གེ་བཞིའི་དོན་ཅུང་ཟད་བཀྲོལ་བ་ལ་ལྔ། གང་ལས་བྱུང་བ། དེའི་རྒྱུ་མཚན། འབྲུ་བཞིའི་ངོ་བོ། །མཚོན་དོན་བྱེད་ལས། བཞི་ཆོས་རྣམས་བསྟན་པའི་ཚུལ་ལོ།

།དང་པོ་ནི། སྤྱིར་རང་བྱུང་འོད་གསལ་གཞོམ་དུ་མེད་པའི་སྒྲ་མི་ཤིགས་པའི་རླུང་དང་དབྱེར་མེད་པ་ལས་འོད་གསལ་གྱི་རླུང་བྱུང༌། དེ་ལས་སྣང་བའི་རླུང༌། དེ་ལས་རགས་པའི་རླུང་བཅུ་སོགས་བྱུང་ཞིང་བསྐུལ་བྱ་དེ་རྣམས། སྒྲ་དོན་འདྲེས་འཛིན་གྱི་རྣམ་པར་རྟོག་པ་སྐུལ་བྱེད་དུ་བྱས་ནས་ངག་ཏུ་བརྗོད་པའི་ཡི་གེ་རྣམས་བྱུང་བ་ཡིན་ཅིང༌། བྱེ་བྲག་ཏུ། དྲི་མེད་འོད་ལས། སྟོང་པ་ཆེན་པོ་ལྔ་ལས་སྐུ་རྡོ་རྗེ་ལ་སོགས་པ་སྔགས་རབ་ཏུ་བརྗོད་པའི་ཆོས་ཅན་རྣམས་འབྱུང་སྟེ། རྗེས་སུ་ང་རོ་དང༌། ཨ་ཡིག་གཉིས་དང༌། ཐིག་ལེ་གཉིས་དང༌། གཞོམ་དུ་མེད་པའི་ཧ་ཡིག་རྣམས་ལས་སྐུ་དང་གསུང་དང་ཐུགས་དང་ཡེ་ཤེས་རྡོ་རྗེ་རྣམས་ཡང་དག་པར་འབྱུང་བར་གསུངས་པ་བཞིན། ཨ་ཨུ་མ་གསུམ་འདུས་པ་ལས་ཨོཾ། ཨ་ཨ་ཧ་གསུམ་འདུས་པ་ལས་ཨཱཿ ཧ་ཨཱུ་མ་གསུམ་འདུས་པ་ལས་ཧཱུྃ། ཧ་ཨུ་ཧ་གསུམ་འདུས་པ་ལས་ཧོཿརྣམས་བྱུང་སྟེ་རེ་རེའང་ཡོན་ཏན་གསུམ་གསུམ་གྱི་བདག་ཉིད་ཅན་དུ་གྲུབ་པའོ། །གཉིས་པ་ནི། སྤྱིར་གསང་སྔགས་རིག་སྔགས་གཟུངས་སྔགས་ཐམས་ཅད་འབྱུང་བའི་གནས་ནི་ཨ་ལི་ཀཱ་ལི་ཡིན་ལ། དེ་རྣམས་ཀྱང་རང་བྱུང་འོད་གསལ་མི་ཤིགས་སྙིང་པོའི་ཐིག་ལེ་དང་དབྱེར་མེད་པ་ཨ་ཡིག་ཁོ་ནའི་རྣམ་འགྱུར་ལས་བྱུང་བ་ཡིན་ཏེ། འཇམ་དཔལ་སྒྱུ་དྲྭར། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོངས་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཅེས་དང༌། གསང་སྙིང་ལས། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །ཞེས་སོགས་འབྱུང་བ་ལྟར་རོ། །གསུམ་པ་ནི། གོང་དུ་བཤད་པའི་བརྟགས་པ་རྣམ་པ་དྲུག་ཀ་འཇུག་ཀྱང༌། འདིར་སྐུ་གཟུགས་སྣང་རྣམ་པ་ཐམས་ཅད་པ། གསུང་སྒྲ་བརྙན་རྣམ་པ་ཐམས་ཅད་པ། ཐུགས་སྟོང་ཉིད་རྣམ་པ་ཐམས་ཅད་པ། བདེ་བ་ཆེན་པོའི་ཡེ་ཤེས་རྣམ་པ་ཐམས་ཅད་པ་རྣམས་རིམ་བཞིན་ཨོཾ་སོགས་ཀྱི་ངོ་བོ་དང་རང་བཞིན་དབྱེར་མེད་པ་ཤེས་པར་བྱའོ། །བཞི་པ་ནི། དཔེར་ན་ཨ་ནི་ཡི་གེ་གཞན་ལས་གཟུགས་ཐ་དད་པས་གཅིག་པའང་མ་ཡིན་ལ། ཀུན་གྱི་ཁྱབ་བྱེད་དུ་འདྲེས་པས་ཐ་དད་པའང་མ་ཡིན་པ་བཞིན་དུ། རང་བཞིན་འོད་གསལ་བྱང་ཆུབ་ཀྱི་སེམས་ཡེ་ཤེས་ཀྱི་རླུང་དང་བཅས་པ་ཉིད། གཉིས་བསྡུས་ཀྱི་ཆོས་ཐམས་ཅད་དང་ངོ་བོ་ཐ་དད་པས་གཅིག་པའང་མ་ཡིན་ལ། འཁོར་འདས་ཀྱི་ཁྱབ་བྱེད་དུ་གྱུར་པས་ཐ་དད་པའང་མ་ཡིན་པར་མཚོན་ལ། ཁྱད་པར་གཟུགས་སྣང་གི་རང་བཞིན་དཀྱིལ་འཁོར་འཁོར་ལོ་སྣང་སྟོང་དུ་གདོད་ནས་གནས་པ་དེ་ཨོཾ་གྱིས་མཚོན། སྒྲ་བརྗོད་ངག་ཚིག་གི་རང་བཞིན་མི་ཤིགས་ནཱ་དའི་འཁོར་ལོ་གྲགས་སྟོང་དུ་ཡེ་ནས་གནས་པ་དེ་ཨཱཿས་མཚོན། རྟོག་ཚོགས་འགྱུ་དྲན་གྱི་རང་བཞིན་འོད་གསལ་སྙིང་པོ་དེ་བཞིན་ཉིད་ཀ་དག་ཀུན་ཁྱབ་ཏུ་བཞུགས་པ་དེ་ཧཱུྃ་གིས་མཚོན། སྲིད་རྩ་འཕོ་བའི་རང་བཞིན་བདེ་བ་ཆེན་པོ་ངོ་བོ་འགྱུར་མེད་དུ་གནས་པ་དེ་ཧོ༔ཡིག་གིས་མཚོན། འབྲུ་བཞི་པོ་རེ་རེར་ཡང་ཡོན་ཏན་གསུམ་གསུམ་སྟེ་རྣམ་པ་བཅུ་གཉིས་ཀྱི་བདག་ཉིད་དུ་གནས་པ་ནི་རྟེན་འབྲེལ་ལུགས་འབྱུང་ལྡོག་བཅུ་གཉིས་དང༌། རྡོ་རྗེ་བཞི་པོ་རེ་རེར་ཡང་སྐུ་གསུམ་གྱི་བདག་ཉིད་དུ་བཞུགས་པ་སོགས་མཚོན་ནོ། །ཡི་གེ་འདི་དག་གི་གདངས་ལུས་ངག་ཡིད་གསུམ་སྙོམས་འཇུག་གི་རྟོག་པ་དང་བཅས་པར་ཤར་བས་འཁོར་བའི་གཟུགས་སུ་གྲུབ་ལ། རྣལ་འབྱོར་གྱིས་ལམ་དུ་བྱས་པས་སྒྲིབ་པ་གཅོད་པའི་གཉེན་པོར་འགྱུར་བ་དང༌། གློ་བུར་གྱི་དྲི་མ་དག་པ་ལས་རྡོ་རྗེ་བཞི་པོ་མངོན་དུ་འགྱུར་བས་ན་གྲོལ་འཁྲུལ་གཉིས་ཀའི་བྱེད་པ་དང་ལྡན་པ་སྟེ། དྲི་མེད་འོད་ལས། གདེངས་ཅན་གྱི་གནས་ཨོཾ། མེའི་འཇིག་རྟེན་ཨཱཿ མཐོ་རིས་ཀྱི་གནས་ཧཱུྃ། སྒོ་གསུམ་ཆགས་རྟོག་བཅས་འབྲུ་བཞིར་སྦྱོར་བ་སོགས་དང༌། རྡོ་རྗེའི་བཟླས་པས་ལམ་དུ་བྱེད་ཚུལ་འདུས་པ་གཙོས་གསར་རྙིང་ཀུན་ལས་རྒྱ་ཆེར་འབྱུང་བ་དང༌། རྡོ་རྗེ་ཕྲེང་བར། སངས་རྒྱས་ཡི་གེ་ཧཱུྃ་དུ་བཤད། །གསུང་ནི་ཡི་གེ་ཨཱཿརུ་བརྗོད། །དགེ་འདུན་ཞེས་བྱ་ཡི་གེ་ཨོཾ། །ཞེས་དཀོན་མཆོག་གསུམ་ལ་སྦྱར་བ་དང༌། འདུས་པ་རྩ་རྒྱུད་ལས། བྱང་ཆུབ་ཐམས་ཅད་ཐོབ་བྱའི་ཕྱིར། །ཡེ་ཤེས་རྡོ་རྗེ་དག་གིས་བྱ། །ཨོཾ་ནི་ཡེ་ཤེས་སྙིང་པོ་སྟེ། །རྡོ་རྗེའི་སྐུ་ནི་ཐོབ་བྱེད་པའོ། །ཨཱཿནི་བྱང་ཆུབ་བདག་མེད་པས། །རྡོ་རྗེའི་གསུང་ནི་ཐོབ་བྱེད་པའོ། །ཧཱུྃ་ནི་སྐུ་གསུང་ཐུགས་ཉིད་དེ། །རྡོ་རྗེ་མི་ཕྱེད་གསུམ་ཐོབ་པའོ། །ཞེས་གསུངས་པས་མཚོན་ནོ། །ལྔ་པ་ནི། ཡི་གེ་འབྲུ་བཞིས་གཞི་ལམ་འབྲས་གསུམ་གྱི་བཞི་འགྲོས་ཀྱི་ཆོས་ཐམས་ཅད་བསྟན་པ་སྟེ། གཞི་དུས་ལྟར་ན། ཨོཾ་ཡིག་གིས་ཀུན་གཞི་དང་ལུས་རྩའི་ཁམས། ཨཱཿཡིག་གིས་ཉོན་ཡིད་དང་ངག་རླུང་གི་ཁམས། ཧཱུྃ་ཡིག་གིས་འཇུག་པའི་རྣམ་ཤེས་དང་ཡིད་ཐིག་ལེའི་ཁམས། ཧོཿཡིག་གིས་ཀུན་ཁྱབ་རིག་པ་དང་ཡེ་ཤེས་ཀྱི་ཁམས་རྣམས་བསྟན་པ་དང༌། ལམ་དུས་སུ་སྦྱང་བྱ་ལྟར་ན། ཨོཾ་སད་པའི་གནས་སྐབས་དང་ལུས་སྒྲིབ། ཨཱཿརྨི་ལམ་གནས་སྐབས་དང་ངག་སྒྲིབ། ཧཱུྃ་གཉིད་སྟུག་གནས་སྐབས་དང་ཡིད་སྒྲིབ། ཧོཿཆགས་རྟོག་གནས་སྐབས་དང་འཕོ་སྒྲིབ། སྦྱོང་བྱེད་ལྟར་ན། བུམ་པ། གསང་བ། ཤེས་རབ་ཡེ་ཤེས། ཚིག་གི་དབང་སྟེ་སྨིན་བྱེད་དབང་བཞི། མཚན་བཅས་བསྐྱེད་རིམ། ཀུན་རྫོབ་རང་བྱིན་རླབས། དཀྱིལ་འཁོར་འཁོར་ལོ། །དོན་དམ་རྫོགས་པ་ཆེན་པོ་སྟེ་གྲོལ་བྱེད་ལམ་མམ་རྣལ་འབྱོར་བཞི། བྱམས་པ། སྙིང་རྗེ་དགའ་བ་བཏང་སྙོམས་ཏེ་ཚད་མེད་བཞི། བསྙེན་པ་ཉེ་བསྙེན་སྒྲུབ་པ་སྒྲུབ་ཆེན་ཏེ་ཡན་ལག་བཞི། དགའ་བ་མཆོག་དགའ་དགའ་བྲལ་ལྷན་སྐྱེས་དགའ་བ་བཞི་ལ་སོགས་པ་རིམ་བཞིན་བསྟན་པ་དང༌། འབྲས་དུས་ལྟར་ན། ཨོཾ་ཡིག་སྐུ་རྡོ་རྗེ་སྤྲུལ་པའི་སྐུ་སྨོན་པ་མེད་པའི་རྣམ་ཐར་བྱ་གྲུབ་ཡེ་ཤེས། ཨཱཿཡིག་གསུང་རྡོ་རྗེ་ལོངས་སྤྱོད་རྫོགས་སྐུ་མཚན་མ་མེད་པའི་རྣམ་ཐར་མཉམ་ཉིད་དང་སོར་རྟོག་ཡེ་ཤེས། ཧཱུྃ་ཡིག་ཐུགས་རྡོ་རྗེ་ཆོས་ཀྱི་སྐུ་སྟོང་པ་ཉིད་ཀྱི་རྣམ་ཐར་མེ་ལོང་ཡེ་ཤེས། ཧོཿཡིག་ཡེ་ཤེས་རྡོ་རྗེ་ངོ་བོ་ཉིད་སྐུ་འདུ་མི་བྱེད་པའི་རྣམ་པར་ཐར་པ་སྟོང་པ་ཉིད་ཀྱི་ཡེ་ཤེས་རྣམས་ཀྱི་རང་བཞིན་དུ་གྱུར་པའོ། །གཉིས་པ་འཆད་བྱེད་ཐུན་མིན་གླེང་གཞིས་གོ་ཕྱེ་བ་ལ་གཉིས། སྤྱིར་སྐུ་གསུམ་སྟོན་པས་ཆོས་འཁོར་བསྐོར་ཚུལ། བྱེ་བྲག་མན་ངག་འདིར་བསྡུས་ཏེ་འཛིན་པར་གདམས་པའོ། །དང་པོ་ལ་ལྔ། སྟོན་པ། གནས། འཁོར། ཆོས། དུས་ཕུན་སུམ་ཚོགས་པའོ།

།དང་པོ་ནི། ཀ་དག་དབྱིངས་ཀྱི་ངོ་བོ་ཀུན་ཏུ་བཟང་༔ ལྷུན་གྲུབ་རིག་པ་པདྨ་སཾ་བྷ་བ༔ དབྱེར་མེད་ཟུང་འཇུག་རྡོ་རྗེ་དྲག་པོ་རྩལ༔ དཀྱིལ་འཁོར་ཀུན་གྱི་གཙོ་མཆོག་ཧེ་རུ་ཀས༔ ཞེས་གསུངས་ཏེ། སྤྱིར་གསང་བ་ཆེན་པོའི་ཆོས་ཐམས་ཅད་ཕུན་སུམ་ཚོགས་པ་ལྔ་ལྡན་གྱི་སྒོ་ནས་འབྱུང་ཞིང༌། དེ་ལའང་ཚིག་གི་རྒྱུད་དང་མན་ངག་འབྱུང་བར་མཚོན་པ་ཐུན་མོང་གི་གླེང་གཞི་དང༌། དོན་གྱི་རྒྱུད་དང་མན་ངག་འབྱུང་བར་མཚོན་པ་ཐུན་མོང་མ་ཡིན་པའི་གླེང་གཞི་གཉིས་ཏེ། ཉི་ཟླ་ཁ་སྦྱོར་གྱི་རྒྱུད་ལས། གསང་བ་ཆེན་པོའི་རྒྱུད་རྣམས་ནི། །ཕུན་སུམ་ཚོགས་པ་ལྔ་ལྡན་པས། །ཐུན་མོང་ཉིད་དང་ཐུན་མོང་མིན། །གླེང་གཞི་རྣམས་ཀྱི་ས་བོན་ནོ། །ཞེས་གསུངས། དེ་ལས་སྔ་མ་གོང་དུ་སོང༌། འདིར་ཕྱི་མ་སྟེ་དེའང་ཐལ་འགྱུར་རྩ་བའི་རྒྱུད་ལས། གཞི་ནི་རྣམ་པ་ལྔ་ཡིན་ཏེ། གནས་ནི་རྣམ་པ་གསུམ་དུ་འདོད། །ཅེས་སོགས་གསུངས་པ་ལྟར་ཕུན་སུམ་ཚོགས་ལྔ་རེ་རེ་ལའང་རྒྱལ་བ་སྐུ་གསུམ་གྱི་དབྱེ་བས་ཕྱེ་བ་སྟེ། དེ་ལ་སྟོན་པ་ཕུན་སུམ་ཚོགས་པ་ནི། ཀ་དག་གདོད་མའི་གནས་ལུགས་སྤྲོས་པ་ཐམས་ཅད་དང་བྲལ་བའི་དབྱིངས་ཀྱི་ངོ་བོ་ཆོས་སྐུའི་སྟོན་པ་ཀུན་ཏུ་བཟང་པོ་དང༌། ལྷུན་གྲུབ་རང་གསལ་གྱི་རིག་པ་གཞི་ཐོག་ཏུ་བྱ་རྩོལ་མེད་པར་གྲོལ་བ་རང་སྣང་ལོངས་སྐུའི་སྟོན་པ་པདྨ་སཾ་བྷ་བ་དང༌། ངོ་བོ་རང་བཞིན་དབྱེར་མེད་དབྱིངས་རིག་ཟུང་དུ་འཇུག་པའི་ཐུགས་རྗེའི་རང་རྩལ་སྤྲུལ་སྐུའི་སྟོན་པ་རྡོ་རྗེ་དྲག་པོ་རྩལ་ཏེ། ཞི་བ་དང་ཁྲོ་བོའི་དཀྱིལ་འཁོར་རབ་འབྱམས་སྤྲོ་བ་དང་སྡུད་པའི་བྱེད་པོར་གྱུར་པས་དཀྱིལ་འཁོར་ཀུན་གྱི་གཙོ་བོའི་མཆོག་གམ་ཕུལ་དུ་གྱུར་པའི་ཧེ་རུ་ཀ་ཆེན་པོས་སངས་རྒྱས་ཀྱི་མཛད་པ་འདི་ལྟར་བསྒྲུབས་པའོ། །ཞེས་སོ། །འདིར་ཧེ་རུ་ཀའི་དོན་ནི་རྒྱུད་ལས། ཧེ་ནི་རྒྱུ་སོགས་སྟོང་པ་ཉིད། །རུ་ནི་གནས་འཇིག་ཚོགས་དང་བྲལ། །ཀ་ནི་གང་དུ་མི་གནས་པའོ། །ཞེས་གསུངས་པ་ལྟར་རྣམ་ཐར་སྒོ་གསུམ་གྱི་དོན་མཚོན་པ་ཡིན་པས་སྐུ་གསུམ་ཀ་ལ་འཇུག་པ་ཡིན་ནོ། །གཉིས་པ་ནི། ཆོས་དབྱིངས་ཁྱབ་བརྡལ་ཐིག་ལེ་ཆེན་པོའི་ཞིང་༔ ལྔ་ལྡན་འོད་གསལ་ལོངས་སྐུའི་ཕོ་བྲང་དང་༔ མ་ངེས་འགྲོ་འདུལ་སྤྲུལ་སྐུའི་གནས་རྣམས་སུ༔ ཞེས་གསུངས་ཏེ། ཆོས་ཀྱི་དབྱིངས་འཁོར་འདས་ཐམས་ཅད་ལ་ཁྱབ་པར་བརྡལ་བ་རང་བྱུང་ཐིག་ལེ་ཆེན་པོ་ཆོས་སྐུའི་ཞིང་ཁམས་དང༌། ཡེ་ཤེས་ཀྱི་རང་འོད་ལྔ་དང་ལྡན་པ་དབྱིངས་སྣང་འོད་གསལ་གྱི་རྒྱན་སྟུག་པོ་བཀོད་པ་ལོངས་སྐུ་རིགས་ལྔའི་ཕོ་བྲང་དང་དག་པ་དང་མ་དག་པའི་ཞིང་དང་གནས་ཀྱི་བཀོད་པ་མ་ངེས་འགྲོ་འདུལ་སྤྲུལ་པ་སྐུའི་གནས་སྣ་ཚོགས་པ་རྣམས་སུ། ཞེས་པའོ། །གསུམ་པ་ནི། རིགས་ཅན་གདུལ་བྱའི་འཁོར་ཚོགས་རྒྱ་མཚོ་ལ༔ ཞེས་གསུངས་སྟེ། ཆོས་སྐུའི་འཁོར་རང་སྣང་ཡེ་ཤེས་རྒྱ་མཚོ། ལོངས་སྐུའི་འཁོར་གཤེགས་སེམས་ཁྲོ་བོའི་ཚོགས་མཁའ་ཁྱབ་ཀྱི་དཀྱིལ་འཁོར། སྤྲུལ་སྐུའི་འཁོར་འཇིག་རྟེན་ལས་འདས་པ་དང་འཇིག་རྟེན་པའི་སྐྱེ་བཽ་སྐལ་བ་དང་ལྡན་པ་སྟེ། མདོར་ན་རང་གི་སྐལ་བ་དང་མཐུན་པའི་རིགས་ཅན་རྣམས་དང་གདུལ་བར་བྱ་བའི་འཁོར་ཚོགས་བསམ་ཡས་བགྲང་བ་ལས་འདས་པས་རྒྱ་མཚོའི་བརྡས་བསྟན་པ་རྣམས་ལའོ། །བཞི་པ་ནི། སོ་སོའི་སྣོད་དང་དབང་པོའི་ཁྱད་པར་བཞིན༔ རྒྱུ་དང་འབྲས་བུའི་ཐེག་པ་བསམ་ཡས་ཀྱི༔ ཆོས་ཀྱི་འཁོར་ལོ༔ ཞེས་གསུངས་ཏེ། ཆོས་སྐུའི་བསྟན་པ་རང་བཞིན་འོད་གསལ་རྫོགས་པ་ཆེན་པོ། ལོངས་སྐུའི་བསྟན་པ་འབྲས་བུ་བླ་མེད་ཐེག་པ་ཆེན་པོ། སྤྲུལ་སྐུའི་བསྟན་པ་རྒྱུའི་ཐེག་པ་གསུམ་གཙོ་བོར་གྱུར་པ་སྟེ། མདོར་ན་གདུལ་བྱ་སོ་སོའི་སྐལ་བའི་སྣོད་དང་དབང་པོའི་ཁྱད་པར་བཞིན་དུ། སངས་རྒྱས་ཀྱི་རྒྱུ་དང་འབྲས་བུ་ལམ་དུ་བྱེད་པའི་ཐེག་པ་ཆེ་ཆུང་བསམ་ལས་འདས་པའི་ཆོས་ཀྱི་འཁོར་ལོ་ཚད་མེད་པ་བྱུང་བའོ། །ལྔ་པ་ནི། དུས་གསུམ་ཀུན་ཏུ་བསྐོར༔ ཅེས་པ་སྟེ། ཆོས་སྐུས་དུས་བཞི་མཉམ་པ་ཉིད་ཆོས་ཉིད་བརྗོད་པ་ལས་འདས་པའི་དུས་སུ་རྩོལ་བྲལ་དགོངས་པ་མཉམ་ཉིད་ཆེན་པོར་སྣང༌། ལོངས་སྐུས་ལྷུན་གྲུབ་ཀྱི་ཡེ་ཤེས་རང་སྣང་བའི་དུས་སུ་ཚིག་དང་ཡི་གེ་མེད་པར་བརྡའི་སྒོ་ནས་དོན་བསྟན། སྤྲུལ་སྐུས་གདུལ་བྱ་རྣམས་སྨིན་པ་གསུམ་དང་ལྡན་པའི་དུས་སུ་སྐལ་བའི་ཁྱད་པར་དང་མཐུན་པའི་ཆོས་སྣང་བའི་སྒོ་འབྱུང་བ་སྟེ། མདོར་ན་རྒྱལ་བ་སྐུ་གསུམ་ཕྲིན་ལས་ཁྱབ་པ་དང་རྟག་པའི་བདག་ཉིད་ཡིན་པས་གདུལ་བྱ་འདུལ་བའི་ཆོས་ཀྱི་འཁོར་ལོ་དུས་གསུམ་ཀུན་ཏུ་ཆད་པ་མེད་པར་བསྐོར་བའོ། །གཉིས་པ་ནི། དེ་རྣམས་ཀུན་གྱི་སྙིང་པོ་གཅིག་འདྲིལ་བ༔ ཐུགས་ཀྱི་ཐིག་ལེ་ཞལ་ཆེམས་མཐར་ཐུག་པ༔ གོ་སླ་ཁྱེར་བདེ་ལག་ལེན་དམར་ཁྲིད་དུ༔ ཤིན་ཏུ་ཉེ་བའི་འདུས་པ་རྣམས་ལ་བསྟན༔ ཡལ་བར་མ་དོར་རྩེ་གཅིག་ཉམས་སུ་ལོངས༔ ཞེས་གསུངས་ཏེ། རྒྱལ་བ་སྐུ་གསུམ་གྱི་ཆོས་འཁོར་རྒྱུ་འབྲས་ཐེག་པ་ཟབ་ཅིང་རྒྱ་ཆེ་བ་དེ་རྣམས་ཀུན་གྱི་ཚིག་དོན་སྙིང་པོ་ཕྱོགས་གཅིག་ཏུ་འདྲིལ་བ། སངས་རྒྱས་རྣམས་ཀྱི་ཐུགས་ཀྱི་ཐིག་ལེ། གུ་རུ་རིན་པོ་ཆེའི་ཞལ་ཆེམས་མཐར་ཐུག་པ། ཁ་གསལ་བས་དབང་པོ་རྣོ་རྟུལ་ཀུན་གྱིས་གོ་སླ་བ། རྒྱས་བསྡུས་འཚམས་པས་ཉམས་ལེན་དུ་ཁྱེར་བདེ་བ། ཚིག་གི་བཤད་ཡམ་ཙམ་མ་ཡིན་པ་ལག་ལེན་དམར་ཁྲིད་རྗེན་ཕྱུང་གི་ཚུལ་དུ། མཉེས་པ་གསུམ་གྱིས་བླ་མའི་ཐུགས་ཟིན་པས་ཤིན་ཏུ་ཉེ་བའི་ཐུགས་སྲས་སུ་གྱུར་པའི་འདུས་པ་རྗེ་འབངས་གྲོགས་ཀྱི་ཚོགས་རྣམས་ལ་བསྟན་པར་བྱའོ་ཞེས་གདམས་ངག་བསྟན་པར་ཞལ་གྱིས་བཞེས་ཏེ། ཟབ་ཅིང་དཀོན་ལ་བཅུད་དུ་འདྲིལ་བའི་གདམས་ངག་འདི་ལྟ་བུ་རྙེད་པར་དཀའ་བས་བཏང་སྙོམས་ཀྱིས་ཡལ་བར་མ་དོར་བར་ཐོས་པས་ཚིག་ཟུངས། བསམ་པས་དོན་དཔྱད། སྒོམ་པས་རྩེ་གཅིག་ཉམས་སུ་ལོངས་ལ་རང་གཞན་གྱི་དོན་གྲུབ་པར་གྱིས་ཤིག །ཅེས་གདམས་པར་མཛད་པའོ། །གསུམ་པ་ཇི་ལྟར་འཆད་པའི་ཚུལ་གྱིས་ཚིག་དོན་རྒྱས་པར་དབྱེ་བ་ལ་གཉིས། མདོར་བསྟན། རྒྱས་བཤད་དོ།

།དང་པོ་ནི། དེ་ལ་ཤེས་བྱ་རྟོགས་བྱེད་མཐར་ཕྱིན་འབྲས༔ རྣམ་པ་གསུམ་གྱིས་མཚོན་པར་བྱ་བ་སྟེ༔ ཞེས་གསུངས་ཏེ། བཤད་པར་ཞལ་གྱིས་བཞེས་པའི་གདམས་ངག་དེ་ལ་མདོ་ཆིངས་ཆེན་པོ་གསུམ་གྱིས་བསྡམས་ཏེ། གང་ཤེས་པར་བྱ་བའི་གཞི། གང་གིས་རྟོགས་པར་བྱེད་པའི་ལམ། གང་དུ་མཐར་ཕྱིན་པར་འགྱུར་བའི་འབྲས་བུ་བཅས་རྣམ་པ་གསུམ་གྱིས་མཚོན་པར་བྱ་བ་ཡིན་ཏེ། ཞེས་ལྷག་བཅས་ཀྱི་སྒྲས་རྒྱས་བཤད་ཀྱི་ཚིག་དྲངས་པར་མཛད་དོ། །གཉིས་པ་ལ་གསུམ། གཞི། ལམ། འབྲས་བུ་རྒྱས་པར་བཤད་པའོ། །དེའི་དང་པོ་ལ་གསུམ། གནས་ལུགས་ངོ་བོའི་གཞི་དང༌། འཁྲུལ་པ་བརྟགས་པའི་གཞི་བཤད། སྐབས་ཀྱི་དོན་བསྡུས་ཏེ་མཚམས་སྦྱར་བའོ། །དང་པོ་ནི། ཤེས་བྱའི་གཞི་ནི་ཀུན་ཁྱབ་བདེ་གཤེགས་སྙིང་༔ འདུས་མ་བྱས་པ་གསལ་སྟོང་རིག་པའི་བབས༔ འཁྲུལ་གྲོལ་ལས་འདས་མཁའ་ལྟར་རབ་ཏུ་ཞི༔ འཁོར་འདས་དབྱེ་བསྲི་མེད་པར་གནས་གྱུར་ཀྱང་༔ ཞེས་པས་བསྟན་ཏེ། རྒྱལ་བ་བྱམས་པས། ཐོས་པ་ལས་བྱུང་ཤེས་པ་ཡི། །སྣང་བ་རྒྱ་ཆེན་འདིས་བརྒྱན་པས། །བློ་ལྡན་མྱུར་དུ་སངས་རྒྱས་ཀྱི། །སྤྱོད་ཡུལ་ཀུན་ལ་འཇུག་པར་འགྱུར། །ཞེས་གསུངས་པ་ལྟར། སངས་རྒྱས་སྒྲུབ་པའི་ལམ་ལ་ཞུགས་པའི་ཐོག་མར་ཐོས་པའི་ཤེས་རབ་ཀྱིས་ཤེས་བྱ་གཏན་ལ་དབབ་དགོས་ཀྱང༌། འདིར་ཉམས་ལེན་དམར་ཁྲིད་ཀྱི་དབང་དུ་མཛད་ནས་མི་ཤེས་སུ་མི་རུང་བའི་གནད་མདོར་བསྡུས་ཏེ། ཤེས་བྱ་ཐམས་ཅད་ཀྱི་གཞིར་གྱུར་པ་ནི་སྣོད་བཅུད་ཀྱི་དངོས་པོ་ལ་ནམ་མཁས་ཁྱབ་པ་བཞིན་དུ་འཁོར་འདས་ཀུན་ལ་ཁྱབ་པའི་བདེ་གཤེགས་སྙིང་པོ་ཞེས་བྱ་བ་ཁྱད་པར་ལྔ་ལྡན་དུ་བཞུགས་པ་ཡིན་ཏེ། ངོ་བོ་འདུས་མ་བྱས་པ། བཞུགས་ཚུལ་གསལ་སྟོང་རིག་པའི་རང་བབས། དང་པོར་འཁྲུལ་མ་མྱོང་ཞིང་མཐར་གྲོལ་བ་ལས་འདས་པ། ནམ་མཁའ་ལྟར་སྐྱེ་འགག་སོགས་སྤྲོས་པའི་མཚན་མ་མེད་པས་རབ་ཏུ་ཞི་བ། འཁོར་བ་དང་མྱང་འདས་གཉིས་ལ་སྐྱོན་རྟོག་གིས་དབྱེ་ཞིང་རིང་བ་དང༌། ཡོན་ཏན་དུ་ཤེས་པས་བསྲི་བ་སྟེ་ཉེ་བར་གྱུར་པ་གང་ཡང་མེད་པར་བཞུགས་ཤིང་གནས་པར་གྱུར་ཏོ། །ཀྱང་ཞེས་པ་ནི་ཚིག་ཕྱི་མ་སྡུད་པའི་སྒྲའོ། །དེའི་དོན་ཅུང་ཟད་བཤད་ན། གཤེགས་སྙིང་ཤེས་བྱ་ཐམས་ཅད་ཀྱི་གཞི་ཡིན་པའི་རྒྱུ་མཚན་ནི། ཆོས་མངོན་པའི་མདོ་ལས། ཐོག་མ་མེད་དུས་ཅན་གྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ནི་འགྲོ་ཀུན་དང༌། །མྱ་ངན་འདས་པའང་ཐོབ་པ་ཡིན། །ཞེས་འབྱུང་སྟེ། ཐོག་མ་མེད་པའི་དུས་ཅན་གྱི་དབྱིངས་དེ་ཉིད་དག་མ་དག་མ་ཕྱེ་བར་རྣམ་པར་བཞག་པའི་དབང་དུ་བྱས་ཏེ་འཁོར་འདས་ཀྱི་ཆོས་ཀུན་གྱི་གནས་སམ་གཞི་ཡིན་ལ། ཕྱེ་ན་ཀུན་གཞིའི་རྣམ་ཤེས་ལ་བརྟེན་པའི་གློ་བུར་གྱི་དྲི་མ་ནི་ཟག་བཅས་འཁོར་བའི་རྒྱུ། ཀུན་གཞིའི་ངོ་བོ་གཤེགས་སྙིང་ནི་ཟག་མེད་མྱང་འདས་ཀྱི་རྒྱུ་ཡིན་ཏེ། འཕགས་པ་ཀླུས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བར་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཞེས་སོ། །དེ་གཉིས་ཀྱང་རྟེན་དང་བརྟེན་པའི་ཚུལ་དུ་གནས་པ་མགོན་པོ་བྱམས་པས། ས་ནི་ཆུ་ལ་ཆུ་རླུང་ལ། །སོགས་དཔེ་དང་བཅས་པས་བསྟན་ཅིང༌། དེ་གཉིས་ལ་གསུང་རབ་རྣམས་སུ་ཆོས་ཅན་དང་ཆོས་ཉིད། མཐའ་དང་དབུས། སྣང་བ་དང་སྟོང་པ། ཀུན་རྫོབ་དང་དོན་དམ་སོགས་ཐ་སྙད་དུ་མས་བསྟན་པ་ཡིན་ནོ། །དེ་ལྟར་ཁྱད་གཞི་དབྱིངས་ཀུན་ཁྱབ་བདེ་གཤེགས་སྙིང་པོ་དེ་ཉིད། ཁྱད་ཆོས་འདུས་མ་བྱས་པ་སོགས་ཀྱིས་གསལ་བར་མཛད་པ་སྟེ། དེའང་དབྱིངས་དེ་ཉིད་ཀུན་ལ་ཁྱབ་པའི་ཚུལ་ནི། རྒྱུད་བླར། ཇི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་ཏུ་རྗེས་སོང་ལྟར། །སེམས་ཀྱི་རང་བཞིན་དྲི་མེད་དབྱིངས། །དེ་བཞིན་ཀུན་ཏུ་འགྲོ་བ་ཉིད། །ཅེས་ནམ་མཁའི་སྤྱི་མཚན་མཆོག་དམན་བར་མའི་གཟུགས་ཐམས་ཅད་ལ་རང་བཞིན་གྱིས་ཁྱབ་པ་བཞིན་དུ་དབྱིངས་ཀྱི་མཚན་ཉིད་ཆོས་ཐམས་ཅད་ལ་རང་བཞིན་གྱིས་ཁྱབ་པར་གསུངས་ཤིང༌། དབྱིངས་དེ་འཇུག་ཚུལ་གྱི་སྒོ་ནས་མིང་གསུམ་གྱིས་བསྟན་ཏེ། གློ་བུར་གྱི་དྲི་མས་བསྒྲིབས་པའི་སེམས་ཅན་གྱི་སྐབས་སུ་རིགས། དྲི་མ་བྲལ་བའི་སངས་རྒྱས་ཀྱི་སྐབས་སུ་ཆོས་སྐུ། གཉིས་ཀའི་ངོ་བོར་ཁྱབ་ཅིང་འགྱུར་བ་མེད་པའི་ཆ་ནས་དེ་བཞིན་ཉིད་ཅེས་བྱ་སྟེ། འདི་ཡི་རང་བཞིན་ཆོས་སྐུ་དང༌། །དེ་བཞིན་ཉིད་དང་རིགས་ཀྱང་སྟེ། །ཞེས་སོ། །དབྱིངས་དེ་ལ་འཁོར་ལོ་བར་པའི་མདོ་རྣམས་ནས་སྟོང་པ་ཉིད་དང༌། དེ་བཞིན་ཉིད་ལ་སོགས་པའི་སྒྲས་བསྟན་ཏེ། སྡུད་པར། འདས་པའི་དེ་བཞིན་ཉིད་གང་མ་བྱོན་དེ་བཞིན་ཉིད། །ད་ལྟའི་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་སོགས་དང༌། རྩ་ཤེར། དེ་བཞིན་གཤེགས་པའི་རང་བཞིན་གང༌། །འགྲོ་བ་འདི་ཡི་རང་བཞིན་ཡིན། །ཅེས་སོགས་དངོས་པོའི་གནས་ལུགས་སྟོང་པ་ཉིད་ཀྱི་དོན་མཐའ་ཡས་པར་གསུངས་སོ། །འཁོར་ལོ་ཐ་མ་སོགས་སུ་བདེ་གཤེགས་སྙིང་པོ་ཞེས་རྒྱ་ཆེར་བསྟན་ཏེ། ཏིང་འཛིན་རྒྱལ་པོ་ལས། དག་པ་དྭངས་པ་འོད་གསལ་བ། །མི་འཁྲུགས་འདུས་མ་བྱས་པ་ཉིད། །བདེ་བར་གཤེགས་པའི་སྙིང་པོ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་སོགས་དང༌། གསང་སྔགས་ཀྱི་རྒྱུད་སྡེ་ཟབ་མོ་རྣམས་སུ་ཨེ་ཝྃ་དང་རྡོར་སེམས་དང༌། རྒྱུད་དང་ཐིག་ལེ་འགྱུར་མེད་འོད་གསལ་རང་བྱུང་ཡེ་ཤེས་སོགས་མཚན་གྱི་རྣམ་གྲངས་དུ་མས་བསྟན་ཏེ། ཧེ་བཛྲ་ལས། སངས་རྒྱས་ཀུན་གྱི་སྡོམ་པ་ནི། །ཨེ་ཝྃ་ཡི་གེར་རབ་ཏུ་གནས། །ཞེས་དང༌། སམྦུ་ཊིར། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་རྣམ་པར་སྤངས། །ལུས་གནས་ལུས་ལས་མ་སྐྱེས་པའོ། །ཞེས་དང༌། འདུས་པར། རིགས་ནི་རྒྱུད་ཅེས་བྱ་བར་བཤད། །རྒྱུད་ནི་ཐོག་མ་ཞེས་བརྗོད་དེ། །མི་འཇིག་སྐྱེ་བ་མེད་གང་ཡིན། །མགོན་པོ་དེ་ནི་ཡིན་པར་བཤད། །ཅེས་སོ།

།གཤེགས་སྙིང་སེམས་ཅན་ལ་བཞུགས་པར་ཡིད་ཆེས་པའི་ཐུན་མོང་གི་ལུང་ནི། མདོ་ལས། སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཞེས་དང༌། བདེ་གཤེགས་སྙིང་པོས་འགྲོ་ཀུན་ཡོངས་ལ་ཁྱབ། །འགྲོ་བ་འདི་དག་ཐམས་ཅད་སངས་རྒྱས་རྒྱུ། །ཞེས་དང༌། ཤཱ་རིའི་བུ། དོན་དམ་པ་ཞེས་བྱ་བ་ནི་སེམས་ཅན་གྱི་ཁམས་ཀྱི་ཚིག་བླ་དྭགས་སོ། །སེམས་ཅན་གྱི་ཁམས་ཞེས་བྱ་བ་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །དེ་བཞིན་གཤེགས་པའི་སྙིང་པོ་ཞེས་བྱ་བ་འདི་ནི་ཆོས་ཀྱི་སྐུའི་ཚིག་བླ་དྭགས་སོ། །ཞེས་སོགས་དང༌། ཁྱད་པར་གྱི་ལུང་ནི། ཧེ་བཛྲ་ལས། འདི་ཉིད་ཡེ་ཤེས་ཆེན་པོ་སྟེ། །ཐམས་ཅད་ལུས་ལ་རྟག་ཏུ་གནས། །དངོས་དང་དངོས་མེད་བདག་ཉིད་གཙོ། །གཉིས་དང་གཉིས་སུ་མེད་པའི་ཚུལ། །བརྟན་དང་གཡོ་བར་ཁྱབ་པར་གནས། །ཞེས་སོགས་དང༌། བླ་ན་མེད་པའི་ལུང་རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་དང༌། རང་ཤར་ལས། ཡང་དག་སངས་རྒྱས་དགོངས་པ་ནི། །སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་དུ་གནས། །ཞེས་སོགས་རྒྱ་ཆེར་འབྱུང་ཞིང༌། དེའི་སྒྲུབ་བྱེད་དུ་མགོན་པོ་བྱམས་པས་རྒྱུ་མཚན་གསུམ་བཀོད་དེ། རྫོགས་སངས་སྐུ་ནི་འཕྲོ་ཕྱིར་དང༌། །དེ་བཞིན་ཉིད་དབྱེར་མེད་ཕྱིར་དང༌། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཅེས་གསུངས་ཏེ། སེམས་ཅན་ཐམས་ཅད་ལ་སངས་རྒྱས་ཆོས་ཀྱི་སྐུ་འཕྲོ་བ་སྟེ་ཁྱབ་པ་དང༌། སེམས་ཅན་དང་སངས་རྒྱས་ཀྱི་དེ་བཞིན་ཉིད་ལ་རྫ་བུམ་དང་གསེར་བུམ་གྱི་ནམ་མཁའ་བཞིན་ཁྱད་པར་དུ་དབྱེ་བ་མེད་པ་དང༌། སེམས་ཅན་གྱི་རྒྱུད་ལ་སངས་རྒྱས་སྐུ་གསུམ་འབྱུང་རུང་གི་རིགས་གཉིས་ཡོད་པའི་ཕྱིར་རོ། །གཤེགས་སྙིང་ཡོད་པའི་རིག་པ་དཔེས་བསྟན་པ་ནི། སོར་ཕྲེང་གི་མདོ་ལས། འོ་མ་ལ་མར་ཡོད་པས་སྲུབ་ཀྱི་ཆུ་ལ་མི་སྲུབ་པ་དང༌། གསེར་འདོད་པ་བྲག་ལ་རྐོ་ཡི་ཤིང་ལ་མི་རྐོ་བ་བཞིན་དུ་སེམས་ཅན་ལ་སངས་རྒྱས་ཀྱི་ཁམས་ཡོད་པས་སངས་རྒྱས་སྒྲུབ་པ་ལ་དོན་ཡོད་ཀྱི་ཁམས་མེད་ན་སྒྲུབ་པ་དོན་མེད་དུ་འགྱུར་བའི་ཚུལ་རྒྱས་པར་གསུངས་པའི་དོན་བསྡུས། འཕགས་པ་ཀླུས། ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ཀྱང༌། །ཉོན་མོངས་འབའ་ཞིག་སྐྱེད་པར་ཟད། །ཅེས་སོ། །འཐད་པ་དཔལ་ཕྲེང་གི་མདོ་དོན་རྒྱུད་བླར་ལྡོག་ཕྱོགས་ཀྱིས་བསྟན་པ། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང༌། །མྱ་ངན་འདས་ལ་འདོད་པ་དང༌། །དོན་གཉེར་སྨོན་པའང་མེད་པར་འགྱུར། །ཅེས་དང༌། སྒྲུབ་ཕྱོགས་ཀྱིས་བསྟན་པ། སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་གི་ཕྱིར། །རིགས་མེད་དག་ལ་མེད་ཕྱིར་རོ། །ཞེས་སོ། །གཤེགས་སྙིང་ངོ་བོ་རྒྱུ་རྐྱེན་ལས་མ་བྱུང་བས་རྒྱུན་དང་སྐད་ཅིག་གིས་རྟག་མི་རྟག་ལ་སོགས་པ་བློའི་ཡུལ་ལས་འདས་པས་ནམ་ཡང་འཇིག་པ་མི་མངའ་ཞིང༌། དེའང་རྟག་པ་བརྟན་པ་ཞི་བ་འཕོ་འགྱུར་མེད་པའི་ཆོས་བཞི་དང་ལྡན་པས་འདུས་མ་བྱས་སུ་གསུངས་ཏེ། སེམས་ཀྱི་རང་བཞིན་ནམ་མཁའ་ཡི། །ཁམས་ལྟར་རྒྱུ་མེད་རྐྱེན་མེད་དེ། །ཚོགས་པ་མེད་ཅིང་སྐྱེ་བ་མེད། །འཇིག་དང་གནས་པའང་ཡོད་མ་ཡིན། །ཅེས་དང༌། གཏན་དུ་འཇིག་པ་མེད་པ་ཡི། །རང་བཞིན་ཡིན་ཕྱིར་འདུས་མ་བྱས། །འཇིག་མེད་ཉིད་ནི་བརྟན་པ་སྟེ། །བརྟན་སོགས་རྣམས་ཀྱིས་དེ་བཤད་དོ། །ཞེས་སོགས་གསུངས་སོ། །གཞུགས་ཚུལ་ངོ་བོ་མ་སྐྱེས་པས་སྟོང་པ་ནམ་མཁའ་ལྟ་བུ། རང་བཞིན་འགག་པ་མེད་པར་འོད་གསལ་བ། རྣམ་པ་ཟུང་འཇུག་རིག་པའི་གཤིས་ལུགས་སུ་གནས་པ་སྟེ། རང་ཤར་ལས། དབྱིངས་དེའི་ངོ་བོ་ནི་ནམ་མཁའ་ལྟ་བུའོ། །རང་བཞིན་ནི་རང་གིས་འོད་གསལ་བའོ། །ཐུགས་རྗེ་ནི་རིག་པའི་སྙིང་པོར་གནས་ཏེ་ཡོན་ཏན་ཐམས་ཅད་ཀྱི་འཆར་གཞིར་གྱུར་པའོ། །ཞེས་སོ། །དེ་ཉིད་འཁྲུལ་གྲོལ་ལྟར་སྣང་བ་ནི་སེམས་ཅན་གྱི་ངོས་ནས་བཏགས་པ་ཡིན་གྱི་དོན་ལ་འཁྲུལ་གྲོལ་གཉིས་ཀ་མི་དམིགས་ཏེ། ནམ་མཁའ་དང་ཉི་མ་སྤྲིན་གྱིས་བསྒྲིབས་པ་དང་མི་བསྒྲིབས་ཞེས་པ་ནི་ས་སྟེང་དུ་འཁོད་པའི་ལུས་ཅན་རྣམས་ཀྱིས་མཐོང་བ་ལོག་པའི་དབང་དུ་བྱས་ཀྱི་དེ་གཉིས་ལ་བསྒྲིབས་མ་བསྒྲིབས་མེད་པ་བཞིན་ཏེ། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཅེས་དང༌། གསང་སྙིང་ལས། རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་བོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་སོ། །དེའི་རྒྱུ་མཚན་ནམ་མཁའ་ལྟར་ཡོད་མེད་ཡིན་མིན་རྟག་ཆད་སྐྱེ་འགག་སོགས་སྤྲོས་པའི་མཐའ་ཐམས་ཅད་རབ་ཏུ་ཞི་ཞིང་གཉིས་སུ་མེད་པ་དབུ་མའི་བདག་ཉིད་ཅན་ཏེ། མྱང་འདས་ཆེན་པོར། སེམས་ཅན་ལ་བཞུགས་པའི་སངས་རྒྱས་ཀྱི་རང་བཞིན་ནི་ནམ་མཁའ་དང་འདྲ་སྟེ། ནམ་མཁའ་ནི་འདས་པ་དང་མ་འོངས་པ་དང་ད་ལྟ་བ་མ་ཡིན། ནང་དང་ཕྱི་རོལ་མ་ཡིན་ཏེ་གཟུགས་སྒྲ་དྲི་རོ་རེག་བྱས་མ་བསྡུས་པ་ལྟར་སངས་རྒྱས་ཀྱི་རང་བཞིན་ཀྱང་དེ་དང་འདྲའོ། །ཞེས་དང༌། རྡོ་རྗེ་གུར་ལས། ནམ་མཁའི་ཁམས་ནི་ཇི་སྙེད་དང༌། འཇིག་རྟེན་ཁམས་ནི་སྟོང་ཕྲག་ན། །བདེ་ཆེན་ཕུན་ཚོགས་ཕྱག་རྒྱ་ཆེ། །སངས་རྒྱས་ནམ་མཁའ་འདྲ་བར་བཞུགས། །ཞེས་སོ། །སྙིང་པོའི་རང་ངོ་ནས་འཁོར་བའི་སྐྱོན་སྤང་ཞིང་བསལ་བ་དང་མྱང་འདས་ཀྱི་ཡོན་ཏན་བཞག་ཅིང་བསྣན་དུ་མེད་པའི་རྒྱུ་མཚན་ཀྱང༌། རྒྱུད་བླར། ཉེས་པ་གློ་བུར་དང་ལྡན་ཕྱིར། ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་མཚན་ཉིད་དོ། །ཞེས་དང༌། དེ་དང་མངོན་རྒྱན་གཉིས་ཀར། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་སོ། །དེས་ན་འཁོར་འདས་གཉིས་ལ་བཟང་ངན་བླང་དོར་དུ་རྟོག་པ་མེད་པས་ཉེ་རིང་མི་མངའ་བར་ནམ་མཁའ་ལྟར་ཁྱབ་པ་སྟེ། རྒྱུད་བླར། ཇི་ལྟར་རྟོག་མེད་བདག་ཉིད་ཅན། །ནམ་མཁའ་ཀུན་ཏུ་རྗེས་སོང་ལྟར། །སེམས་ཀྱི་རང་བཞིན་དྲི་མེད་དབྱིངས། །དེ་བཞིན་ཀུན་ཏུ་འགྲོ་བ་ཉིད། །ཅེས་སོ།

།གཉིས་པ་ནི། ལྷན་སྐྱེས་ཀུན་བརྟགས་མ་རིག་གདོན་ཆེན་གྱིས༔ གཟུང་དང་འཛིན་པའི་བག་ཆགས་བརྟས་པ་ལས༔ སྣོད་དང་བཅུད་དང་འཛིན་པ་ཐ་དད་པའི༔ འགྲོ་བ་རིགས་དྲུག་རྨི་ལམ་བཞིན་དུ་སྣང་༔ ཞེས་གསུངས་ཏེ། སྙིང་པོ་རང་བཞིན་གྱིས་འོད་གསལ་བ་ནམ་མཁའ་ལྟ་བུ་དེ་ལ་སྒྲིབ་བྱེད་གློ་བུར་གྱི་སྒྲིབ་པ་སྤྲིན་ལྡངས་བ་ལྟར་བྱུང་སྟེ། དེའང་རང་བཞིན་རྣམ་དག་དང་དུས་སྔ་ཕྱི་མེད་པར་མཉམ་དུ་བྱུང་བ་ལྷན་ཅིག་སྐྱེས་པའི་མ་རིག་པ་གསེར་དང་གཡའ་ལྟ་བུ་དང༌། མེད་བཞིན་དུ་ཡོད་པར་བརྟགས་པ་གློ་བུར་བའི་འཁྲུལ་པ་ཡུལ་ཡུལ་ཅན་སྣང་བ་ཀུན་ཏུ་བརྟགས་པའི་མ་རིག་པ་སྟེ། འཁྲུལ་པ་ཐམས་ཅད་འབྱུང་བའི་གཞི་ཉེས་པ་མཐའ་དག་སྐྱེད་པའི་གདོན་ཆེན་པོ་དེ་གཉིས་ཀྱི་རང་ངོ་མ་ཤེས་པར་གཟུང་བ་ཡུལ་དང་འཛིན་པ་སེམས་ཞེས་གཉིས་སུ་རྟོག་པའི་བག་ཆགས་རིམ་གྱིས་རྒྱས་ཤིང་བརྟས་པར་གྱུར་པ་ལས། ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སེམས་ཅན་སོ་སོར་ཞེན་ཅིང་འཛིན་པ་གནས་ཡུལ་རིགས་གཟུགས་བྱེད་ལས་སྣ་ཚོགས་ཐ་དད་པའི་འགྲོ་བ་རིགས་དྲུག་པོ་གཉིད་ཀྱིས་བསླད་པའི་རྨི་ལམ་བཞིན་དོན་ལ་གཅིག་ཀྱང་མེད་རུང་འཁྲུལ་པའི་སྣང་བ་སྣ་ཚོགས་སུ་སྣང་བའོ། །དེའི་དོན་ཅུང་ཟད་བཤད་ན་ལྔ་སྟེ། དང་པོ་འཁྲུལ་པའི་གཞི་ནི། གཞི་ཡོད་པ་ལས་འཁྲུལ་པ་སྦྲུལ་ཡོད་པས་ཐག་ཁྲ་ལ་སྦྲུལ་འཛིན་གྱི་ཤེས་པ་ཞུགས་པ་ལྟ་བུ་དང༌། མེད་པ་ལས་འཁྲུལ་པ་རབ་རིབ་ཅན་གྱི་མིག་ཏུ་ནམ་མཁའ་ལ་སྐྲ་ཤད་མཐོང་བ་ལྟ་བུ་དང༌། དབྱེར་མེད་ལས་འཁྲུལ་པ་ག་བུར་གྱི་ངོ་བོ་ལ་ནུས་པ་གཉིས་ཡོད་པས་ཚད་ནད་ལ་སྨན་དང་རླུང་ནད་ལ་དུག་ཏུ་འགྱུར་བ་ལྟ་བུའོ། །གཉིས་པ་འཁྲུལ་པའི་རྒྱུ་ནི། གསང་སྙིང་ལས། སྲིད་རྩའི་ཉེས་དམིགས་བདག་ཏུ་རྟོག་ལས་འཕྲོས། །ཞེས་གསུངས་པ་ལྟར་འཁོར་བའི་ཆོས་ཐམས་ཅད་ཀྱི་སྤྱིའི་རྒྱུ་ནི་བདག་ཏུ་རྟོག་པ་ཉིད་ཡིན་ལ། བྱེ་བྲག་བརྒྱུད་པའི་རྒྱུ་ནི་ཆོས་ཉིད་བདེ་གཤེགས་སྙིང་པོ་རང་བཞིན་རྣམ་དག་རང་ངོ་མ་ཤེས་པའི་ཆ་ཙམ་གནས་པ་བདག་ཉིད་གཅིག་པའི་མ་རིག་པ་དང༌། མཚུངས་ལྡན་གྱི་རྒྱུ་ཆོས་ཉིད་དང་ལྷན་ཅིག་སྐྱེས་པའི་མ་རིག་པ་རྐྱེན་དང་འཕྲད་ན་འཁྲུལ་པ་འབྱུང་རུང་དུ་གནས་པ་དང༌། ལྷན་ཅིག་བྱེད་རྒྱུ་སེམས་ཉིད་རང་གིས་རང་ལ་ཡུལ་དང་ཡུལ་ཅན་གཟུང་བ་ཀུན་བརྟགས་ཀྱི་མ་རིག་པ་ཡིད་ཤེས་རྟོག་བཅས་དང༌། ཉེར་ལེན་གྱི་རྒྱུ་ལས་ཀྱི་བག་ཆགས་བསགས་པས་རང་འབྲས་འབྱིན་ངེས་ཀྱི་ནུས་པ་ཡོད་པའོ། །དེ་ལས་ཡིད་ཤེས་ལ་དབྱེ་ན། ཀུན་གཞི་ལ་ངའོ་སྙམ་དུ་འཛིན་ཅིང་རྣམ་ཤེས་ཉོན་མོངས་པར་བྱེད་པའི་ཉོན་ཡིད་དང༌། ཚོགས་དྲུག་གི་ཤེས་པ་སྐྱེ་འགག་གི་རྒྱུར་བྱེད་ཅིང་ལས་ཀྱི་ནུས་པ་ཀུན་གཞི་ལ་འཇོག་པ་དེ་མ་ཐག་ཡིད་ཅེས་གཉིས་སུ་ཡོད་ཅིང༌། ཡིད་དེ་གཉིས་ཀྱི་རྟེན་དུ་གྱུར་ཅིང་བག་ཆགས་དང་ས་བོན་ཐམས་ཅད་འཛིན་པ་ནི་འཁྲུལ་པ་བཏགས་པའི་གཞི་སྟེ། གཞུང་ལུགས་རྣམས་སུ་ཀུན་གཞིའི་རྣམ་ཤེས་ཞེས་བྱ་བར་རྣམ་པར་བཞག་གོ

།གསུམ་པ་རྐྱེན་ནི། མཐོ་རིས་ངན་འགྲོ་ཁམས་གོང་མ་རྣམས་སུ་སྐྱེ་བའི་རྐྱེན་བསོད་ནམས་དང་བསོད་ནམས་མ་ཡིན་པ་དང་མི་གཡོ་བའི་ལས་གསུམ། ལས་དེ་དག་ཀུན་ནས་སློང་བ་པོ་ཉོན་མོངས་པ་དུག་ལྔ་རྣམས་སོ། །རྒྱུ་རྐྱེན་དེ་དག་འཛོམ་པས་འཁོར་བའི་འཁོར་ལོ་ཆེན་པོ་འདི་བྱུང་བ་སྟེ། དེའང་བདེ་གཤེགས་སྙིང་པོའི་ངོ་བོ་སྟོང་ཆ་ལ་དྲི་མ་ནམ་ཡང་མེད་ཀྱང་གསལ་ཆ་ལ་རང་ངོ་མ་རིག་སྟེ་སྐད་ཅིག་མ་དང་པོ་ལ་འདུ་བྱེད་ཀྱི་ཡིད་གཡོས་པས་གཟུང་འཛིན་ཐ་དད་དུ་བརྟག །དེ་ལས་དོན་མཐོང་བའི་རྣམ་ཤེས། དེས་བླང་དོར་དུ་བརྟགས་པས་ཚོར་བ། དེ་ལས་ཡུལ་ལ་མཚན་མར་འཛིན་པའི་འདུ་ཤེས། དེའི་བག་ཆགས་བརྟས་པ་གཟུགས་བཅས་ཕུང་པོ་ལྔ་གྲུབ་སྟེ། དཔེ་ཕྱིའི་རྟེན་འབྲེལ་ས་བོན་ལས་མྱུ་གུ་སོགས་རྒྱུ་དང་འབྲེལ་པ་དྲུག་པོ་འབྱུང་བ་ལྔ་དུས་ཀྱི་སྦྱོར་བ་བཅས་རྐྱེན་དང་འབྲེལ་བ་དྲུག་གིས་ཁོར་མོ་ཡུག་ཏུ་བསྐྱེད་པ་ལྟར། ནང་གི་རྟེན་འབྲེལ་མ་རིག་པ་ལས་འདུ་བྱེད་སོགས་བཅུ་གཉིས་པོས་ཁམས་གསུམ་དུ་འཁོར་བ་ཡིན་ནོ། །བཞི་པ་བྱེད་པ་པོ་ནི། རིག་གསུམ་ལས། རྒྱུན་དང་བཅས་པའི་སྐད་ཅིག་མ། །ལས་ཀྱི་བྱེད་པ་པོར་བརྗོད་དོ། །ཞེས་པ་ལྟར་འཁོར་འདས་གཉིས་ཀའི་བྱེད་པ་པོ་མ་བཅོས་རྒྱུན་གྱི་སྐད་ཅིག་མ་ཡིན་ལ། ཁྱད་པར་འཁོར་བའི་བྱེད་པ་པོ་གཉིས་མེད་ལ་གཉིས་སུ་འཛིན་པའི་འཁྲུལ་རྟོག་རྒྱུན་གྱི་སྐད་ཅིག་མ་སྟེ། དེས་འཁྲུལ་ཤེས་ལུ་གུ་རྒྱུད་དུ་སྦྲེལ་ཏེ་ནུས་པ་ཇེ་རྒྱས་སུ་སོང་བས་མཐའ་མེད་པའི་འཁོར་བ་འདི་གྲུབ་བོ། །ལྔ་པ་འབྲས་བུ་ནི། ལས་ཉོན་གྱི་རྒྱུ་འབྲས་ཟོ་ཆུན་ལྟར་འཁོར་བ་ལས། སྣང་འགྱུར་ཐུན་མོང་བའི་ལས་ཀྱིས་སྣོད་ཀྱི་འཇིག་རྟེན་དང༌། མྱོང་འགྱུར་ཐུན་མོང་མ་ཡིན་པའི་ལས་ཀྱིས་བཅུད་ཀྱི་སེམས་ཅན་དུ་སྣང་ཞིང་རྣམ་པར་སྨིན་པ་མྱོང་བ་སྟེ། དེ་དག་རྣམས་ཀྱི་དོན་གསང་སྙིང་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །ཅེས་སོགས་གསུངས་པ་ལྟར་རོ། །འོད་གསལ་རྫོགས་པ་ཆེན་པོའི་དགོངས་པ་ལྟར་ན། ངོ་བོ་ཀ་དག་གི་གཞི་བདེ་གཤེགས་སྙིང་པོ་ལས་རང་བཞིན་ལྷུན་གྲུབ་ཀྱི་གཞི་སྣང་ཤར་བའི་སྐད་ཅིག་ལ་རང་ངོ་ཤེས་ཏེ་ཚོགས་བརྒྱད་ཀྱི་ཉེར་ལེན་དབྱིངས་སུ་དེངས་པ་ནི་ཀུན་ཏུ་བཟང་པོ་གདོད་མའི་གྲོལ་གཞིར་སངས་རྒྱས་པ་དང༌། གཞི་སྣང་དེ་ཉིད་ལྷན་སྐྱེས་མ་རིག་པས་བསྒྲིབས་ནས་གཟུང་འཛིན་ཀུན་ཏུ་བརྟགས་ཏེ་ལྷུན་གྲུབ་རིན་པོ་ཆེའི་སྦུབས་ལས་ཕྱིར་གསལ་སྣང་བའི་སྒོ་བརྒྱད་རྨི་ལམ་ལྟར་ཤར་ནས་འཁོར་བར་མེད་བཞིན་དུ་འཁྲུལ་པ་ལ་སེམས་ཅན་ཅེས་བཏགས་པར་གསུངས་སོ། །གསུམ་པ་ནི། དེ་ལྟ་ནའང་ངོ་བོའི་བཞུགས་ཚུལ་ལས༔ རྣམ་པར་མ་གཡོས་གཡོ་བར་མི་འགྱུར་ཕྱིར༔ གློ་བུར་དྲི་མ་སྦྱང་ལ་བརྩོན་པར་བྱ༔ ཞེས་གསུངས་ཏེ། ཐོག་མ་མེད་པ་ནས་འཁོར་འདས་གཉིས་སུ་བརྟགས་ཤིང་འཁྲུལ་པའི་ཚུལ་དེ་ལྟ་བུ་ཡིན་ནའང༌། སྤྲིན་གྱི་འདུ་འགོད་ཀྱིས་ནམ་མཁའ་ལ་ནམ་ཡང་གཡོ་བ་མེད་པ་བཞིན་དུ། ཐོག་མའི་ཀ་དག་བདེ་གཤེགས་སྙིང་པོ་རང་གི་ངོ་བོའི་བཞུགས་ཚུལ་དེ་ལས་གཞན་དུ་འགྱུར་བ་མི་སྲིད་པས། སྔོན་ཆད་འཁོར་འདས་གཉིས་ཀའི་ཆོས་སུ་རྣམ་པར་མ་གཡོས་ཤིང༌། ད་རུང་མུ་མཐའ་མེད་པའི་འཁོར་བར་འཁོར་ཀྱང་གཡོ་བར་མི་འགྱུར་བ་དེའི་ཕྱིར་ན། འཁྲུལ་པ་གློ་བུར་གྱི་དྲི་མ་ནམ་དག་པའི་ཚེ་རང་ངོ་མངོན་དུ་བྱས་ཏེ་འཚང་རྒྱ་བར་འགྱུར་བའི་ཕྱིར། དེ་ཉིད་སྦྱོང་པའི་ཐབས་ལ་འབད་བརྩོན་མི་གཡེལ་བར་བྱའོ། །དེ་ལྟར་ཡང་ལེ་ལག་ལས། འཁོར་བ་དང་ནི་མྱ་ངན་འདས། །གཉིས་ཀ་ཡོད་པ་མ་ཡིན་ཏེ། །འཁོར་བ་ཡོངས་སུ་ཤེས་པ་ན། །མྱ་ངན་འདས་ཞེས་དེ་ལ་བྱ། །ཞེས་དང༌། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་སོ། །ཞེས་སོ། །བློ་བུར་དྲི་མས་སྙིང་པོའི་རང་ངོ་ལ་ནམ་ཡང་མ་གོས་པས་སྦྱངས་ན་འབྲལ་དུ་རུང་བ་ནི། སྙིང་པོ་ལས། སུས་ཀྱང་མ་བཅིངས་བཅིངས་མེད་དོ། །བཅིང་བར་བྱ་བའང་ཡོད་མ་ཡིན། ཅེས་སོ། །སེམས་ཅན་སྤྱི་བཙན་དུ་འཁོར་བ་ལ་ཐོག་མཐའ་མེད་པར་གསུངས་ཀྱང་གང་ཟག་སྒོས་བཙན་དུ་མངོན་པའི་མདོ་ལས། ཐོག་མེད་གྱུར་ཀྱང་ཐ་མ་དང་ལྡན་པ། །ཞེས་འབྱུང་བ་བཞིན་དྲི་མ་ལམ་གྱིས་སྦྱངས་པས་མྱང་འདས་ལ་རེག་ཅིང༌། སྦྱངས་ཟིན་ནས་འབྲུམ་ནད་བྱང་བའི་སྐྱེས་བུ་ལྟར་འབྲས་བུ་རྒྱུ་རུ་མི་ལྡོག་པས་ལམ་ལ་བརྩོན་པ་ནི་འཐད་པ་དང་བཅས་པའོ། །གཉིས་པ་གང་གིས་རྟོགས་པར་བྱེད་པའི་ལམ་བཤད་པ་ལ་གཉིས། སྡོམ་གྱིས་མདོར་བསྟན། དེ་ཉིད་རྒྱས་པར་བཤད་པའོ། །དང་པོ་ནི། རྟོགས་བྱེད་ལམ་གྱི་རིམ་པ་བསམ་ཡས་ཀྱང་༔ རྒྱུད་སྦྱོང་ས་བོན་གདབ་དང་བསྐྱེད་བསྲིང་པ༔ གེགས་སེལ་དང་ནི་དེ་བཞིན་བོགས་འདོན་ཏེ༔ རྣམ་པ་ལྔ་ཡིས་ཡང་དག་ལམ་ལ་འཇུག༔ ཅེས་གསུངས་ཏེ། གཞི་འབྲས་དབྱེར་མེད་པ་དེ་ཉིད་རྟོགས་པར་བྱེད་པའི་ཐབས་སུ་མདོ་སྔགས་ལམ་གྱི་རིམ་པ་བསམ་པའི་མཐའ་ཡས་པར་གསུངས་ཀྱང༌། གནད་ཀྱི་སྙིང་པོ་གཅིག་ཏུ་དྲིལ་ན། བློ་རྒྱུད་སྦྱོང་བའི་ཚུལ་ཞིང་ཐ་རྒོད་བཏུལ་བ་ལྟ་བུ་དང༌། སྨིན་གྲོལ་གྱི་ས་བོན་གདབ་པའི་ཚུལ་འབྲུ་སྐྱོན་མེད་པ་འདེབས་པ་ལྟ་བུ་དང༌། དེ་ཉིད་སྐྱེད་བསྲིང་བའི་ཚུལ་ཆུ་ལུད་སོགས་སོ་ནམ་ལ་བརྩོན་པ་ལྟ་བུ་དང༌། ལམ་གྱི་གེགས་སེལ་བའི་ཐབས་སད་སེར་སོགས་སྲུང་བའི་ཐབས་ལ་འབད་པ་ལྟ་བུ་དང༌། ཡོན་ཏན་གྱི་བོགས་འདོན་པའི་ཐབས་ཆར་འབེབས་སོགས་གོང་འཕེལ་དུ་འགྱུར་བའི་ཐབས་བྱེད་པ་ལྟ་བུ་སྟེ་རྣམ་པ་ལྔ་ཡིས་ལམ་ལེགས་པར་སྦྱངས་པས། འབྲས་བུ་བཅུད་དུ་སྨིན་པ་ལྟར་རྣམ་གྲོལ་གྱི་འབྲས་བུ་མངོན་དུ་བྱེད་པར་འགྱུར་བས་ན་ཡང་དག་པའི་ལམ་ལ་རབ་ཏུ་འཇུག་པར་བྱའོ།

།གཉིས་པ་ལ་ལྔ། རྒྱུད་སྦྱོང་བ། ས་བོན་གདབ་པ། སྐྱེད་བསྲིང་བ། གེགས་སེལ་བ། བོགས་འདོན་པའི་རིམ་པའོ། །དང་པོ་ལ་གཉིས། ལམ་གྱི་རྩ་བ་བཤེས་གཉེན་བསྟེན་པའི་ཚུལ། བསྟེན་ནས་བློ་རྒྱུད་ཇི་ལྟར་སྦྱོང་བའི་རིམ་པའོ། །དེའི་དང་པོ་ལའང་བཞི། བསྟེན་བྱ་སློབ་དཔོན་གྱི་མཚན་ཉིད། ཇི་ལྟར་བསྟེན་པའི་ཐབས། སྟེན་བྱེད་སློབ་མའི་མཚན་ཉིད། བསྟེན་ནས་གདམས་པ་སྟོན་ཚུལ་ལོ། །དང་པོ་ནི། དེ་ལ་དང་པོ་བློ་རྒྱུད་སྦྱང་བའི་ཕྱིར༔ ལམ་གྱི་རྩ་བ་རྡོ་རྗེ་སློབ་དཔོན་ནི༔ དམ་ཚིག་སྡོམ་པའི་ཀུན་སྤྱཽད་རྣམ་པར་དག༔ ཐོས་པས་རབ་བརྒྱན་བསམ་པས་དེ་ཉིད་ཕྱེད༔ སྒོམ་པས་ཉམས་རྟོགས་ཡོན་ཏན་དྲོད་རྟགས་ལྡན༔ ཐུགས་རྗེའི་འཇུག་པས་སློབ་མ་རྗེས་འཛིན་པའི༔ མཚན་ཉིད་ཀུན་ལྡན༔ ཅེས་གསུངས་ཏེ། གཞི་ཤེས་ནས་གློ་བུར་དྲི་མ་སྦྱང་བའི་ཕྱིར་དུ་ལམ་གྱི་རིམ་པ་ལ་འཇུག་པའི་ཚུལ་དེ་ལའང་དང་པོ་ཉིད་དུ་རྟོག་འཁྲུལ་གྱི་བློ་ངན་གོམས་ཀྱི་དབང་དུ་ཤོར་བས་ལས་སུ་མི་རུང་བ་དེ་ཉིད་དུལ་བར་བྱ་བའི་ཆེད་དུ་རྒྱུད་ལེགས་པར་སྦྱང་དགོས་པས་དེའི་ཚུལ་འཆད་པར་བྱའོ། །དེའང་བྱིས་པའི་སྐྱེ་བོ་རྣམས་རང་གི་བློ་སྟོབས་ཀྱིས་ཡང་དག་པའི་ལམ་གྱི་ཕྱོགས་ཙམ་དུའང་བགྲོད་པར་མི་ནུས་པས་སྤྱིར་སངས་རྒྱས་ཀྱི་ཆོས་ཐམས་ཅད་དང་ཁྱད་པར་ལམ་ལ་ཚུལ་བཞིན་འཇུག་ཅིང་ལེགས་པར་བགྲོད་པར་བྱེད་པའི་རྩ་བ་རྡོ་རྗེ་སློབ་དཔོན་མཚན་ཉིད་དང་ལྡན་པ་ཐོག་མ་ཉིད་དུ་ལེགས་པར་བརྟགས་ནས་བསྟེན་དགོས་ཏེ། དཔེར་ན་རྒྱུས་མེད་པའི་ལམ་དུ་ཞུགས་པ་ལ་རྒྱུས་ཤེས་ཀྱི་ལམ་མཁན་དང༌། འཇིགས་སར་བགྲོད་པ་ལ་སྟོབས་ལྡན་གྱི་སྐྱེལ་མ་དང༌། ཆུའི་ཕ་རོལ་དུ་བགྲོད་པ་ལ་གྲུ་འཛིན་པའི་མཉེན་པ་ཉིད་མེད་ཐབས་མེད་པ་བཞིན་ནོ། །སློབ་དཔོན་གྱི་མཚན་ཉིད་མདོ་རྒྱུད་མན་ངག་རྣམས་ནས་རྒྱ་ཆེར་གསུངས་ཀྱང་མདོར་བསྡུ་ན། ཡོན་ཏན་ཐམས་ཅད་ཀྱི་གཞི་རྟེན་སྡོམ་པ་གསུམ་ཇི་ལྟར་བླངས་པའི་དམ་ཚིག་དང་སྡོམ་པའི་ཀུན་སྤྱོད་ལ་ཉེས་ལྟུང་གིས་མ་གོས་པས་རྒྱུད་རྣམ་པར་དག་ཅིང་ཁ་ན་མ་ཐོ་བ་སྤངས་པ། མདོ་སྔགས་ཀྱི་རྒྱུད་ལུང་མན་ངག་མང་དུ་ཐོས་པས་གང་ལའང་མ་རྨོངས་ཤིང་ཕྱོགས་ལྷུང་བྲལ་བའི་རྣམ་ཐར་གྱིས་རབ་ཏུ་བརྒྱན་པ། ཐོས་དོན་བསམ་པས་གཏན་ལ་ཕབ་པས་མཐའ་དྲུག་ཚུལ་བཞིའི་བྱེ་བྲག་ཕྱེད་པ། དེའི་དོན་སྒོམ་པས་རྒྱུད་ལ་སྦྱར་བས་ཉམས་དང་རྟོགས་པའི་ཡོན་ཏན་ཡར་ཟླ་ལྟར་རྒྱས་ཤིང་ས་ལམ་གོང་དུ་སྤོགས་པའི་དྲོད་རྟགས་དང་ལྡན་པ་སྟེ་ཐོས་བསམ་སྒོམ་གསུམ་གྱིས་རང་དོན་མཐར་ཕྱིན་པ། དེ་དག་ལས་བྱུང་བའི་དྲི་མ་མེད་པའི་མཁྱེན་རབ་ཀྱི་རྩལ་རྒྱས་པས་རྙེད་བཀུར་གྲགས་པ་ལ་མི་ལྟོས་པར་དམིགས་པ་མེད་པའི་ཐུགས་རྗེའི་འཇུག་པས་སྐལ་ལྡན་གྱི་སློབ་མ་རྗེས་སུ་འཛིན་པར་མཛད་པའི་བརྩེ་བ་ཅན། དེའང་ཚིག་གི་གདམས་པས་སྒྲོ་འདོགས་གཅོད་ནུས་པ། དོན་གྱི་ངོ་སྤྲོད་ཀྱིས་རྟོགས་པ་སྐྱེད་ནུས་པ། བྱིན་རླབས་སྟོབས་ཀྱིས་མ་དག་པའི་སྣང་བ་འགོག་ནུས་པ། ཉམས་ཀྱི་གེགས་སེལ་ཞིང་རྟོགས་པའི་བོགས་འབྱིན་ནུས་པ་སྟེ། མདོར་ན་མཁྱེན་བརྩེ་ནུས་པས་གཞན་དོན་ལྷུན་གྱིས་གྲུབ་པའི་མཚན་ཉིད་བཟང་པོ་ཀུན་དང་ལྡན་པའོ། །ཐོག་མར་དགེ་བའི་བཤེས་གཉེན་ལ་བསྟེན་དགོས་པའི་ལུང་ཡང་སྡོང་པོ་བཀོད་པ་ལས། ཐམས་ཅད་མཁྱེན་པ་ནི་དགེ་བའི་བཤེས་གཉེན་གྱི་གདམས་ངག་ལ་རག་ལས་སོ། །ཞེས་དང༌། སྡུད་པ་ལས། སངས་རྒྱས་ཆོས་རྣམས་དགེ་བའི་བཤེས་ལ་བསྟེན་ཏོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་དང༌། ཡུམ་ལས། བྱང་ཆུབ་སེམས་དཔའ་མངོན་པར་རྫོགས་པར་འཚང་རྒྱ་བར་འདོད་པས་ཐོག་མ་ཉིད་དུ་དགེ་བའི་བཤེས་གཉེན་དག་ལ་བསྙེན་པར་བྱ། བསྟེན་པར་བྱ། བསྙེན་བཀུར་བར་བྱའོ། །ཞེས་དང༌། ཇི་སྐད་དུ། གདོས་པ་འཛིན་པ་མེད་པར་ནི། །གྲུ་ཡིས་ཕ་རོལ་ཕྱིན་མི་འགྱུར། །ཡོན་ཏན་ཐམས་ཅད་རབ་རྫོགས་ཀྱང༌། །བླ་མ་མེད་ན་སྲིད་མཐར་མིན། །ཅེས་སོགས་ལུང་དང་རིག་པ་དང་དཔེ་མཐའ་ཡས་པ་གསུངས་སོ།

།གཉིས་པ་ནི། མཉེས་པ་གསུམ་གྱིས་བསྟེན༔ མི་མཉེས་བྱ་བ་སྐད་ཅིག་ཙམ་ཡང་སྤང་༔ དགོངས་སྤྱོད་ཚུལ་བཞིན་བསླབ་ལ་མཁས་པ་ཡིས༔ ཅི་གསུང་བཀའ་བཞིན་བསྒྲུབ་པའི་ཡལ་གམ་བླང་༔ ཞེས་གསུངས་ཏེ། མཚན་ཉིད་དང་དེ་ལྡན་གྱི་སློབ་དཔོན་རྙེད་ནས་ཇི་ལྟར་བསྟེན་པའི་ཚུལ་ཡང༌། མདོ་སྡེ་རྒྱན་ལས། རྙེད་པ་བཀུར་སྟི་དག་དང་རིམ་གྲོ་དག །སྒྲུབ་པའི་སྒོ་ནས་བླ་མ་བསྟེན་པར་བྱ། །ཞེས་པ་ལྟར་རབ་གདམས་ངག་གི་དོན་ཉམས་སུ་ལེན་ཅིང་བཀའ་བཞིན་བྱེད་པ་སྒྲུབ་པའི་ཞབས་ཏོག །འབྲིང་ལུས་ངག་ཡིད་གསུམ་གྱིས་སྲི་ཞུ་རིམ་གྲོ་ཇི་ལྟར་ལྕོགས་པ། ཐ་མ་ཟང་ཟིང་རྙེད་པ་རང་ལ་བདོག་རྒུ་ཐམས་ཅད་འབུལ་ཞིང་བཀུར་སྟི་བྱ་བ་སྟེ་མཉེས་པ་རྣམ་པ་གསུམ་གྱི་སྒོ་ནས། དགོས་འབྱུང་གི་ནོར་བུ། འཆི་གསོས་ཀྱི་སྨན་པ། ཁོང་པའི་དོན་སྙིང་དུ་འདུ་ཤེས་ནས་མོས་པ་དང་གུས་པ་ཚད་བཟུང་ཐང་ལྷོད་མེད་པར་བསྟེན། སྒོ་གསུམ་བྱ་བ་ཁ་ན་མ་ཐོ་བའམ་ལེགས་སུ་རེ་བའི་ཚོད་འཛིན་སོགས་ཐུགས་ལ་མི་མཉེས་པར་འགྱུར་བའི་བྱ་བ་སྐད་ཅིག་མ་ཙམ་ཡང་མི་བྱ་བར་སྤང༌། ཟབ་མོའི་ཆོས་དང་སྐྱེས་བུ་དམ་པའི་དགོངས་སྤྱོད་ཀྱི་གཏིང་དཔོག་པར་དཀའ་བས་བློ་སྒྲིན་ཅིང་ཐུགས་ཟིན་པས་གསང་བ་གསུམ་གྱི་རྣམ་པར་ཐར་པ་ཚུལ་བཞིན་དུ་བསླབ་པ་ལ་མཁས་པར་བྱ་བའི་སྒོ་ནས། ཅི་མཛད་ལེགས་པར་མཐོང་ཞིང་ཅི་གསུང་ཚད་མར་འཛིན་ཏེ་བཀའ་བཞིན་རྗེས་སུ་སྒྲུབ་པའི་ཡལ་གམ་མམ་དམ་བཅའ་བརྟན་པོ་རྐྱེན་གྱིས་མི་འཕྲོག་པ་ཡང་དང་ཡང་དུ་བླངས་ཏེ་ལག་ལེན་དུ་ཁེལ་བར་བྱའོ། །དེ་ལྟར་ཡང་འདུས་པ་ལས། རིགས་ཀྱི་བུ། སློབ་དཔོན་ནི་དེ་བཞིན་གཤེགས་པ་རྣམས་དང་བྱང་ཆུབ་སེམས་དཔའ་རྣམས་ཀྱིས་བྱང་ཆུབ་ཀྱི་སེམས་རྡོ་རྗེ་བཞིན་དུ་བལྟ་བར་བྱའོ། །ཞེས་དང༌། རང་ཤར་ལས། དེ་ལྟར་གསང་སྔགས་སློབ་དཔོན་ལ། །རང་ལུས་དང་ནི་རིན་ཆེན་རྫས། །ཤིན་ཏུ་དཀོན་པ་དག་གིས་བསྟེན། །ཅེས་དང༌། མདོ་ལས། དགེ་བའི་བཉེས་གཤེན་མགུ་བར་བྱས་ན་སངས་རྒྱས་ཐམས་ཅད་ཀྱི་བྱང་ཆུབ་ཐོབ་བོ། །ཞེས་སོ། །ཇི་སྐད་བཤད་པའི་མཚན་ཉིད་ཀུན་ལྡན་གྱི་སློབ་དཔོན་དུས་ཀྱི་དབང་གིས་རྙེད་པར་དཀའ་ཞིང༌། རྙེད་ཀྱང་རང་སྣང་མ་དག་པའི་སེམས་ཅན་གྱིས་གཞན་དག་སྐྱོན་ཅན་དུ་མཐོང་བས་ཡོན་ཏན་ཤས་ཆེ་བསྟན་པར་བྱ་དགོས་ཏེ། དོན་དམ་བསྙེན་པ་ལས། རྩོད་དུས་དབང་གིས་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པ་ཡང་ནི་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བསྟེན་པར་འགྱུར་བའོ། །ཞེས་འབྱུང་བ་བཞིན་ནོ། །གསུམ་པ་ནི། དེས་ཀྱང་དད་དང་ངེས་འབྱུང་སྙིང་རྗེ་དང་༔ དབང་རྣོན་བློ་ཆེ་བརྟུལ་ཞུགས་ལྡན་པ་ཡི༔ སློབ་མའི༔ ཞེས་གསུངས་ཏེ། མཚན་ལྡན་གྱི་སློབ་དཔོན་དེས་ཀྱང་སློབ་མ་ཇི་ལྟ་བུ་ལ་གདམས་པ་སྟོན་ཅེ་ན། དད་བརྩོན་བརྟུལ་ཞུགས་ལྡན་པ་སྣོད། །ཅེས་དང༌། གསང་སྙིང་ལས། སྣོད་ལྡན་ངང་ཚུལ་བཟང་ལ་བསྟན། །ལུས་དང་ལོངས་སྤྱོད་གཏོང་ལ་སྦྱིན། །ཅེས་འབྱུང་བ་ལྟར། ཆོས་དཀར་ཐམས་ཅད་ཀྱི་རྩ་བ་དྭང་བ་དང་འདོད་པ་དང་ཡིད་ཆེས་པའི་དད་པ་དང༌། འཁོར་བ་ལ་མེ་འོབས་སམ་བཙོན་ར་ལྟར་ཤེས་ནས་སྲིད་པ་ལས་ངེས་པར་འབྱུང་བའི་བློ་དང༌། སེམས་ཅན་ཕ་མར་ཤེས་པས་གཞན་དོན་སྤྲོ་བའི་སྙིང་རྗེ་དང༌། སྔོན་སྦྱངས་ཀྱིས་རིགས་སད་པས་ཐོས་པ་ཙམ་གྱིས་དོན་ཕྱིན་ཅི་མ་ལོགས་པར་རྟོགས་པའི་དབང་པོ་རྣོན་པོར་གྱུར་པ་དང༌། རྒྱ་ཆེ་བ་ཐེག་པ་ཆེན་པོ་དང་ཟབ་མོ་གསང་སྔགས་ཀྱི་ལྟ་སྤྱོད་ལ་ཐེ་ཚོམ་མེད་པར་ཡིད་ལ་ཤོང་བའི་བློ་ཆེ་བ་དང༌། གང་ལའང་མི་བསྙེངས་ཤིང་ཞུམ་པ་མེད་པར་འཇུག་ནུས་པའི་བརྟུལ་ཞུགས་དང་ལྡན་པ་སྟེ་དྲུག་པོ་དེ་ལ་ཡོན་ཏན་གྱི་མཚན་ཉིད་ཐམས་ཅད་འདུས་པས། མཚན་ཉིད་དེ་ལྡན་གྱི་སློབ་མ་རྗེས་སུ་བཟུང་བར་བྱའོ།

།བཞི་པ་ནི། རྒྱུད་དང་སྦྱར་ལ་གདམས་པར་བསྟན༔ སྣོད་དང་མི་འཚམས་གདམས་པ་སྦྱིན་མི་བྱ༔ ཞེས་གསུངས་ཏེ། དེ་ལྟར་བླ་སློབ་ཀྱི་རྟེན་འབྲེལ་ལེགས་པར་འགྲིགས་པ་ན། བླ་མས་སློབ་མའི་རྒྱུད་ཞིབ་མོར་བརྟགས་ཏེ་བློ་ཚོད་དང་སྦྱར་ལ་ཐེག་པ་ཆེ་ཆུང་གི་གདམས་པ་བསྟན་དགོས་ཀྱི་སོ་སོའི་བློ་དང་མི་འཚམས་པ་བློ་དམན་ལ་ཟབ་ཅིང་རྒྱ་ཆེ་བ་དང་བློ་ཆེན་ལ་ཐེག་དམན་གྱི་གདམས་པ་སྦྱིན་པ་སོགས་མི་བྱ་སྟེ། དེ་ལྟར་བྱས་ན་ཆོས་བསྟན་པའི་ཡུལ་ལ་མི་ཕན་ཅིང་སྟོན་པ་པོ་ཉིད་ཉེས་པ་དང་བཅས་པར་འགྱུར་བ་སྟེ། བློ་དམན་ཟབ་རྒྱས་ཀྱིས་དངས་སྐྲག་སྐྱེ་བས་ལམ་ལས་ཕྱིར་ལྡོག་པར་འགྱུར་བ་དང༌། བློ་ཆེན་ལྟ་སྤྱོད་ཀྱིས་མ་ཚིམས་པར་ལམ་སྟེགས་སྤོང་བའི་སྐྱོན་བསྐྱེད་པར་བྱེད་དོ། །དེ་ལྟར་ཡང་རྒྱུད་རྡོར་ཕྲེང་ལས། །ཇི་ལྟར་སེང་གེའི་འོ་མ་ནི། །ས་ཡི་སྣོད་དུ་བཞག་མི་བྱ། །དེ་བཞིན་རྣལ་འབྱོར་ཆེན་པོའི་རྒྱུད། །སྣོད་མིན་དག་ལ་སྦྱིན་མི་བྱ། །འདི་དང་ཕ་རོལ་ཏུ་ནི་ཕུང༌། །སྣོད་མིན་མན་ངག་རབ་བཤད་ན། །སློབ་དཔོན་དངོས་གྲུབ་ཉམས་པར་འགྱུར། །ཅེས་དང༌། སྤྱོད་འཇུག་ལས། རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་སོ། །སྣོད་དང་ཇི་ལྟར་སྦྱར་བའི་ཚུལ་ཡང༌། །དམན་ལ་ཆགས་བྲལ་སྤྱོད་པ་སྟེ། །རྒྱ་ཆེ་བ་ལ་ཕ་རོལ་ཕྱིན། །ཟབ་ལ་སྔགས་ཀྱི་ཐེག་པའོ། །ཞེས་དང༌། གུར་ལས། དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་རྒྱུད། །རྣལ་འབྱོར་བླ་མེད་དེ་ལྟག་ལའོ། །ཞེས་པ་ལྟར་རོ། །གཉིས་པ་བློ་སྦྱོང་བའི་ཚུལ་ལ་གཉིས། སྔོན་འགྲོ་དང༌། དངོས་གཞིའོ། །དང་པོ་ལ་གཉིས། ཐུན་གྱི་སྔོན་འགྲོ་དང༌། ཁྲིད་ཀྱི་སྔོན་འགྲོའོ། །དེའི་དང་པོ་ལའང་གཉིས། རིང་བ་དང༌། ཉེའི་སྔོན་འགྲོའོ། །དང་པོ་ནི། བློ་རིགས་མཐུན་པར་རིམ་གྱིས་དཀྲི་ཚུལ་ནི༔ དང་པོ་འདུ་འཛིའི་གནས་ལས་ཐག་བསྲིངས་ཏེ༔ དབེན་པར་སོང་ལ་འཇིག་རྟེན་བྱ་བ་བཏང་༔ ཞེས་གསུངས་ཏེ། བློའི་རིགས་སམ་རྒྱུད་ཚོད་དང་མཐུན་པར་གདམས་ངག་སྟོན་པའི་ཚུལ་དེའང་གཙོ་བོར་རིམ་གྱིས་དཀྲི་བའི་ཚུལ་ཤེས་ན་ཅིག་ཅར་དཀྲི་ཚུལ་ཞར་ལས་ཤེས་པར་འགྱུར་བ་དང༌། སྤྱི་ལམ་རིམ་པར་མ་འཛེགས་པར་ཐོད་རྒལ་གྱིས་གོང་མར་འཕར་བར་མི་ནུས་པ་དང༌། ལམ་གྱི་ཡོན་ཏན་འོག་མ་མ་སྐྱེས་པར་གོང་མ་ཐོབ་པར་མི་ནུས་པའི་ཕྱིར་རིམ་བགྲོད་ཀྱི་ཚུལ་གལ་ཆེ་སྟེ། མདོ་མྱང་འདས་ལས། ཇི་ལྟར་སྐས་ཀྱི་རིམ་པ་བཞིན། །ང་ཡི་བསྟན་པ་ཟབ་མོ་ཡང༌། །རིམ་གྱིས་བསླབ་ཅིང་ནན་ཏན་བྱ། །ཐོད་རྒལ་མ་ཡིན་མཐར་ཆགས་སོ། །ཇི་ལྟར་བྱིས་པ་ཆུང་ངུ་དག །རིམ་གྱིས་ལུས་ཤེད་རྫོགས་པ་ལྟར། །ཆོས་འདི་ཡང་ནི་དེ་དང་འདྲ། །དང་པོར་འཇུག་པའི་རིམ་པ་ནས། །ཡོངས་སུ་རྫོགས་པའི་བར་དུའོ། །ཞེས་སོ། །དེ་ནས་ལམ་རིམ་གྱིས་དཀྲི་བའི་ཚུལ་ནི། ལམ་ལ་འཇུག་པར་འདོད་པའི་གང་ཟག་དེས་དང་པོ་ཉིད་དུ་འཇིག་རྟེན་གྱི་ལུས་སེམས་རྣམ་པར་གཡེང་བའི་འདུ་འཛིའི་གནས་ལས་རིང་དུ་བྱོལ་ནས་ཐག་བསྲིངས་ཏེ། རྒྱལ་བས་བསྔགས་པའི་བས་མཐའི་དབེན་གནས་དམ་པར་སོང་ལ་དེར་ཡང་འཕྲལ་མཁོའི་ཡོ་བྱད་མ་ཐོགས་ཙམ་གྱིས་ཆོག་ཤེས་པར་བྱས་ཏེ། ལུས་ཀྱི་མི་དགེ་བ་དང་ལུང་མ་བསྟན་གྱི་བྱ་བ། ངག་དོན་མེད་ལོང་གཏམ། ཡིད་ཉོན་མོངས་འཁྲུལ་རྟོག་གི་རྗེས་སུ་འབྲེང་བ་སོགས་འཇིག་རྟེན་པ་དང་མཐུན་པའི་བྱ་བ་མཐའ་དག་བཏང་ནས་དམ་པའི་ཆོས་སྒྲུབ་པ་ལ་རྩེ་གཅིག་ཏུ་གཞོལ་བར་བྱའོ། །དེའང་འདུ་འཛིས་རྣམ་པར་གཡེང་བ་ལ་སྒོ་གསུམ་མ་བསྡམས་ཤིང་བདུད་རིས་ཀྱི་བར་དུ་གཅོད་པ་དང་བསམ་གཏན་དང་ཤེས་རབ་མི་སྐྱེ་བ་སོགས་ཉེས་པ་ཉི་ཤུ་ཡོད་པ་ལྷག་པའི་བསམ་པ་སྐུལ་བའི་མདོ་ལས་གསུངས་ཤིང༌། སངས་རྒྱས་རྣམས་ལ་མཆོད་པའི་བྱེ་བྲག་དུ་མས་བསྐལ་པར་མཆོད་པ་བས་ངེས་འབྱུང་གི་སེམས་ཀྱིས་དབེན་པར་གོམ་བདུན་བོར་བའི་བསོད་ནམས་ཆེ་བ་ཏིང་འཛིན་རྒྱལ་པོ་སོགས་ལས་གསུངས་པ་དང༌། གོང་གི་འདུ་འཛིའི་ཉེས་པ་ལས་ལྡོག་པའི་ཡོན་ཏན་རྣམས་ཐོབ་པར་འགྱུར་བ་དང༌། ཁྱད་པར་སེམས་ལ་བརྟན་པ་མ་ཐོབ་པའི་གང་ཟག་ལས་དང་པོ་པས་དབེན་པ་བསྟེན་པ་ཁོ་ན་གལ་ཆེ་སྟེ། དཀོན་མཆོག་གི་ཟ་མ་ཏོག་ལས། ལས་དང་པོ་པས་སེམས་ཉེ་བར་ཞི་བ་དང་རབ་ཏུ་དུལ་བར་བྱ་བའི་ཕྱིར་དབེན་པར་གནས་པར་བྱའོ། །ཞེས་སོ།

།གཉིས་པ་ནི། བདེ་བའི་སྟན་འདུག་ལུས་བསྲང་རླུང་རོ་བསལ༔ དཀོན་མཆོག་གསོལ་གདབ་བླ་མར་མོས་གུས་བསྐྱེད༔ དྲན་པ་མངོན་དུ་བཞག་ལ་འདི་ལྟར་བསམ༔ ཞེས་གསུངས་ཏེ། དབེན་གནས་བྲག་ཕུག་གམ་བསམ་གཏན་གྱི་ཁང་པར་བདེ་བའི་སྟན་འཇམ་ཞིང་སྙོམས་པ་ལ་འདུག་པས་ཡུན་རིང་སྡོད་ཚུགས། ལུས་གནད་དྲང་པོར་བསྲང་བས་རྩ་རླུང་རང་མལ་དུ་གནས་ཏེ་འཁྲུལ་རྟོག་ཉུང༌། རླུང་རོ་ལན་གསུམ་བསལ་བས་རྩ་ནང་ཉོན་མོངས་ཀྱི་སྙིགས་མ་དག །དཀོན་མཆོག་གསུམ་ལ་དམ་པའི་ཆོས་མཐར་ཕྱིན་པའི་གསོལ་བ་བཏབ་པས་བར་ཆད་མི་འབྱུང༌། བླ་མ་ལ་སངས་རྒྱས་སུ་མཐོང་བའི་མོས་གུས་བསྐྱེད་པས་སྒོ་གསུམ་ལ་བྱིན་རླབས་འཇུག །རྐྱེན་གྱིས་མི་འཕྲོག་པའི་དྲན་པ་རང་མལ་མངོན་དུ་བཞག་པས་སྒོམ་དོན་གསལ་ཐེབས་པར་འགྱུར་བས་ན། ཇི་སྐད་བཤད་པ་རྣམས་ཚུལ་བཞིན་བྱས་ལ་བློ་སྦྱོང་བའི་ཚུལ་འདི་ལྟར་བསམ་པར་བྱའོ། །གཉིས་པ་ཁྲིད་ཀྱི་སྔོན་འགྲོ་ལ་གསུམ། སྐྱེས་བུ་ཆུང་ངུ་དང་ཐུན་མོང་བ། འབྲིང་པོ་དང་ཐུན་མོང་བ། ཆེན་པོ་དང་ཐུན་མོང་བའི་ལམ་རིམ་མོ། །དང་པོ་ལ་གསུམ། དལ་འབྱོར་རྙེད་དཀའ། འཆི་བ་མི་རྟག །ལས་རྒྱུ་འབྲས་བསམ་པའོ། །དང་པོ་ནི། དལ་འབྱོར་ཕུན་སུམ་ཚོགས་པས་བརྒྱན་པའི་རྟེན༔ ཤིན་ཏུ་རྙེད་དཀའ་ཨུ་དུམྺ་ར་འདྲ༔ སྙིང་པོ་ལེན་པའི་ཐབས་ལ་རབ་མཁས་ན༔ རྙེད་པ་དོན་ཆེན་ཡིད་བཞིན་ནོར་ལས་ལྷག༔ དེ་ཕྱིར་དུས་དང་གནས་སྐབས་ཐམས་ཅད་དུ༔ དགེ་བའི་བཤེས་དང་དགེ་བའི་གྲོགས་པོ་བསྟེན༔ ཚེ་འདི་བློས་བཏང་ཕྱི་མའི་དོན་གྱི་ཕྱིར༔ མྱུར་དུ་སྙིང་པོ་ལེན་ལ་མ་འབད་ན༔ ཞེས་གསུངས་ཏེ། འདི་ལ་བཞི། རྟེན་གྱི་ངོ་བོ། དེ་རྙེད་པར་དཀའ་བའི་རྒྱུ་མཚན། རྙེད་པ་དོན་ཆེ་བའི་ཚུལ། དེ་ལས་སྙིང་པོ་ལེན་དགོས་པར་གདམས་པའོ། །དང་པོ་ནི། མི་ཁོམ་པ་བརྒྱད་ལས་ལོག་པའི་དལ་བ་ནི་རྟེན་གྱི་ངོ་བོ་ཡིན་ལ། རང་འབྱོར་གཟུགས་རྒྱན་ལེགས་པ་ལྟ་བུ་ལྔ་དང་གཞན་འབྱོར་སྣང་བའི་བྱེ་བྲག་གིས་གསལ་བ་ལྟ་བུ་ལྔ་ནི་དེའི་ཁྱད་པར་གྱི་ཆོས་ཏེ་ཕུན་སུམ་ཚོགས་པ་དེ་ལྟ་བུས་བརྒྱན་པའི་མི་ལུས་རིན་པོ་ཆེ་འདི་ནི་བྱང་ཆུབ་སྒྲུབ་པ་ལ་མེད་དུ་མི་རུང་བའི་རྟེན་ཡིན་ནོ། །དེ་ལ་མི་ཁོམ་པ་བརྒྱད་ནི། ཇི་སྐད་དུ། དམྱལ་བ་ཡི་དྭགས་དུད་འགྲོ་དང༌། །ཀླ་ཀློ་ཚེ་རིང་ལྷ་དང་ནི། །ལོག་ལྟ་སངས་རྒྱས་ཀྱིས་སྟོང་པ། །ལྐུགས་པ་འདི་དག་མི་ཁོམ་བརྒྱད། །ཅེས་དང༌། རང་འབྱོར་ལྔ་ནི། མི་ཉིད་དབུས་སྐྱེས་དབང་པོ་ཚང༌། །ལས་མཐའ་མ་ལོག་གནས་ལ་དད། །ཅེས་དང༌། གཞན་འབྱོར་ལྔ་ནི། སངས་རྒྱས་བྱོན་དང་དེས་ཆོས་གསུངས། །བསྟན་པ་གནས་དང་དེ་རྗེས་ཞུགས། །གཞན་ཕྱིར་སྙིང་ནི་བརྩེ་བའོ། །ཞེས་འབྱུང་བ་ལྟར་རོ། །གཉིས་པ་ལ་རྒྱུའི་སྒོ་ནས་རྙེད་པར་དཀའ་བ་ནི། ཚུལ་ཁྲིམས་ལ་སོགས་དགེ་བའི་ལས་རྒྱ་ཆེན་པོ་བསགས་ཤིང་སྨོན་ལམ་གྱིས་མཚམས་སྦྱར་ན་དལ་འབྱོར་ཐོབ་པར་འགྱུར་ནའང༌། ཞི་བ་ལྷས། བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་འཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །ཅེས་གསུངས་པ་བཞིན་དུ་བསོད་ནམས་གསོག་པ་དཀོན་པ་དང༌། དཔེའི་སྒོ་ནས་ཀྱང་རྙེད་པར་དཀའ་སྟེ། དལ་འབྱོར་གྱི་རྟེན་ནི་ཨུ་དུམྺརའི་མེ་ཏོག་དང་འདྲ་སྟེ། དེ་ནི་སངས་རྒྱས་འཇིག་རྟེན་དུ་བྱོན་པ་བརྒྱ་ལམ་ནའང་དཀོན་པ་དང་མཚུངས་པར་གྲགས་ཤིང༌། གཞན་ཡང༌། རྒྱ་མཚོ་ཆེར་གཡེང་གཉའ་ཤིང་གི །བུ་གར་རུས་སྦལ་མགྲིན་ཆུད་ལྟར། །མི་ཉིད་ཤིན་ཏུ་རྙེད་དཀར་གསུངས། །ཞེས་པ་ལྟར་རོ། །གྲངས་ལ་བསམ་ཡང་རྙེད་པར་དཀའ་སྟེ། དམྱལ་བ་ནི་ས་ཆེན་པོའི་རྡུལ། ཡི་དྭགས་ནི་ཁ་བ་བུ་ཡུག །དུད་འགྲོ་ཆང་གི་སྦང་མ། ལྷ་མི་གཉིས་སེན་མོའི་སྟེང་གི་རྡུལ་ཆགས་པ་ཙམ་ལས་མེད་པར་མདོ་ལས་གསུངས་པའི་ཕྱིར་རོ། །གསུམ་པ་ནི། མི་ཡི་གྲུུ་ལ་བརྟེན་ནས་ནི། སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་བས། །རྨོངས་པ་དུས་སུ་གཉིད་མ་ལོག །ཅེས་པ་ལྟར་མི་ལུས་གྱི་གྲུ་ལ་བརྟེན་ནས་འཁོར་བ་སྡུག་བསྔལ་གྱི་རྒྱ་མཚོ་ལས་བརྒལ་ཏེ་སྙིང་པོ་གཏན་འདུན་གྱི་ནོར་བུ་ལེན་པའི་ཐབས་ལ་རབ་ཏུ་མཁས་ཤིང་སྒྲིན་པར་གྱུར་ན། རྙེད་དཀའ་རྙེད་པ་དེ་ཉིད་ཤིན་ཏུ་དོན་ཆེ་བ་དབུལ་པོས་ཡིད་བཞིན་ནོར་བུ་རྙེད་པ་ལས་ཀྱང་ལྷག་སྟེ། ཙནྡྲ་གོ་མཱིས། གང་ཞིག་ཐོབ་ནས་སྐྱེ་བའི་རྒྱ་མཚོ་མཐར་འབྱིན་ཅིང༌། བྱང་ཆུབ་མཆོག་གི་ས་བོན་དགེ་བའང་འདེབས་བྱེད་ལ། །ཡིད་བཞིན་ནོར་བུ་བས་ཀྱང་ཡོན་ཏན་ཆེས་ལྷག་པའི། །མི་ཉིད་ཐོབ་ནས་སུ་ཞིག་འབྲས་བུ་མེད་པར་བྱེད། །ཅེས་སོ།

།བཞི་པ་ནི། རྙེད་དཀའ་ཞིང་རྙེད་ན་དོན་ཆེ་བ་ཉིད་རྙེད་པར་གྱུར་པ་དེའི་ཕྱིར། དུས་ཀྱི་རྒྱུན་དང་གནས་སྐབས་ཀྱི་བྱེ་བྲག་ཐམས་ཅད་དུ། དལ་འབྱོར་ལས་སྙིང་པོ་ལེན་པའི་ཐབས་ཡང་དག་པའི་ལམ་སྟོན་པ་པོ་དགེ་བའི་བཤེས་གཉེན་དང་དགེ་བའི་ལྟ་སྤྱོད་ཅན་གྱི་གྲོགས་པོ་བསྟེན་དགོས་ཏེ། བཤེས་སྤྲིང་ལས། དགེ་བའི་བཤེས་གཉེན་བསྟེན་པ་ཚངས་པར་སྤྱོད། །ཡོངས་སུ་རྫོགས་པ་ཐུབ་པས་གསུངས་དེའི་ཕྱིར། །དགེ་བའི་བཤེས་གཉེན་བསྟེན་བགྱི་བཤེས་གཉེན་ལ། །བསྟེན་ནས་རབ་ཏུ་མང་པོ་ཞི་བ་ཐོབ། །ཅེས་སོ། །དེ་ལས་ལོག་པ་རང་བློ་མི་དགེ་བའི་ལམ་དུ་འཁྲིད་དེ་དལ་འབྱོར་ཆུད་ཟོས་སུ་གཏོང་བར་བྱེད་པོའི་སྡིག་ཏོའི་བཤེས་གཉེན་དང་སྡིག་པའི་གྲོགས་པོ་སྤང་དགོས་ཏེ། དྲན་ཉེར་ལས། འདོད་ཆགས་དང་ཞེ་སྡང་དང་གཏི་མུག་ཐམས་ཅད་ཀྱི་རྒྱུར་གྱུར་པ་ནི་སྡིག་པའི་གྲོགས་པོ་སྟེ་དུག་གི་སྡོང་པོ་ལྟ་བུའོ། །ཞེས་དང༌། དཀོན་བརྩེགས་ལས། སྡིག་པའི་གྲོགས་པོ་གང་ཞེ་ན། དགེ་བ་འགྲིབ་ཅིང་མི་དགེ་བ་ལ་སྦྱོར་བ་གང་ཡིན་པ་སྟེ། དེ་བསྙེན་པར་མི་བྱ། བསྟེན་པར་མི་བྱ། མཐོང་བར་མི་བྱའོ། །ཞེས་སོ། །དེར་མ་ཟད་ཚེ་འདིར་ལྟོས་ཀྱི་སྣང་བ་ཐམས་ཅད་གཉིད་ཐུན་གཅིག་གི་རྨི་ལམ་བཟང་ངན་ལྟར་ཡུན་ཐུང་ལ་སྙིང་པོ་མེད་པས་བློས་ལིང་གིས་བཏང་ནས་ཚེ་ཕྱི་མ་ཕན་ཆད་ཀྱི་དོན་གཏན་གྱི་འདུན་མ་འགྲུབ་པའི་ཕྱིར། ད་ལྟ་མྱུར་བ་ཉིད་དུ་དལ་འབྱོར་སྙིང་པོ་ལེན་པའི་ཐབས་ལ་མ་འབད་ན་ཚེ་ལ་ངེས་པ་མེད་དེ། ཇི་སྐད་དུ། སང་དང་འཇིག་རྟེན་ཕྱི་མ་གཉིས། །སྔོན་ལ་གང་འོང་གཏོལ་མེད་པས། །སང་གི་ཚིས་ལ་མི་འབད་པར། །ཕྱི་མའི་དོན་དུ་འབད་པར་རིགས། །ཞེས་སོ། །གཉིས་པ་ནི། འདུས་བྱས་མི་རྟག་ཉི་ཟླའི་འཆར་ནུབ་འདྲ༔ ནམ་འཆི་ཆ་མེད་བར་སྣང་གློག་དང་མཚུངས༔ ཤི་ཚེ་ཆོས་མིན་ཅིས་ཀྱང་མི་ཕན་པས༔ དམ་པའི་ལྷ་ཆོས་ཚུལ་བཞིན་སྤྱོད་པར་བྱ༔ ཞེས་གསུངས་ཏེ། སྤྱིར་སྣོད་བཅུད་དུ་སྣང་བ་འདི་དག་ཐམས་ཅད་རྒྱུ་རྐྱེན་རྟེན་འབྲེལ་ཚོགས་ཏེ་འདུས་ཤིང་བྱས་པའི་ཆོས་ཡིན་པའི་ཕྱིར་གཅིག་ཀྱང་མི་རྟག་སྟེ། མདོ་ལས། དགེ་སློང་དག་འདུས་བྱས་ཐམས་ཅད་ནི་མི་རྟག་པའོ། །ཞེས་གསུངས། ཇི་ལྟར་མི་རྟག་ན་ཚོམས་ལས། བསགས་པ་ཀུན་གྱི་མཐའ་མཛད་ཅིང༌། །བསླངས་པའི་ཐ་མ་འགྱེལ་བར་འགྱུར། །འཕྲད་བའི་མཐའ་ནི་འབྲལ་བ་སྟེ། །གསོན་པའི་མཐའ་མ་འཆི་བར་འགྱུར། །ཅེས་པ་ལྟར་མི་རྟག་པའི་མཐའ་བཞི་ལས་མ་འདས་པས་རག་པ་སྣོད་བཅུད་ཆགས་འཇིག་ལོ་ཟླ་དུས་བཞིའི་འགྱུར་བ་དང་ཕྲ་བ་སྐད་ཅིག་རེ་རེ་བཞིན་རྙིངས་ཤིང་འཕོ་བ་ཉི་མ་དང་ཟླ་བའི་འཆར་ནུབ་སྐད་ཅིག་ཡུད་ཡུད་འགྲོ་བ་དང་འདྲ་ལ། བྱེ་བྲག་མི་ཚེ་ལ་ངེས་པ་མེད་པས་ནམ་འཆི་ཆ་མེད་ཅིང་འཆི་རྐྱེན་མང་བས་མྱུར་དུ་འཆི་ངེས་པ་བར་སྣང་གི་གློག་ཤར་བའི་མོད་ནས་ཡལ་བ་དང་མཚུངས་ཏེ། འདུལ་བ་ལུང་ལས། རི་གཟར་ཆུ་བོ་རྒྱ་མཚོར་འཇུག་པ་དང༌། །ཉི་མ་ཟླ་བ་ནུབ་རིར་ཕྱོགས་པ་དང༌། །ཉིན་མཚན་ཐང་ཅིག་ཡུད་ཙམ་ཤུགས་ཀྱིས་འགྲོ། །སྐྱེས་བུའི་ཚེ་འགྲོ་འདི་དག་མཚུངས་པར་ལྡན། ཅེས་སོ། །ཤི་བའི་ཚེ་དམ་པའི་ཆོས་མ་ཡིན་པ་བློ་སྟོབས་གཉེན་འཁོར་ལོངས་སྤྱོད་ཅིས་ཀྱང་མི་ཕན་པས། འཇིག་རྟེན་དང་ལྟར་སྣང་གི་ཆོས་མཆིལ་མའི་ཐལ་བ་ལྟར་རིང་དུ་བོར་ནས་དམ་པའི་ལྷ་ཆོས་རྣམ་པར་དག་པ་རྒྱལ་བ་སྲས་དང་བཅས་པས་ཇི་ལྟར་གདམས་པའི་ཚུལ་བཞིན་དུ་སྤྱད་པར་བྱའོ།

།གསུམ་པ་ནི། ལྷ་ཆོས་སྒྲུབ་པའི་རྩ་བ་ལས་འབྲས་ཏེ༔ སྡིག་པ་མི་དགེས་ངན་སོང་གསུམ་དུ་འགྲོ༔ དགེ་བ་བྱས་པས་མཐོ་རིས་ཐར་པ་ཐོབ༔ དེ་བས་སྡིག་པ་བཤགས་ཤིང་སྙིང་ནས་བསྡམ༔ དགེ་བའི་རྩ་བ་འབད་པས་དང་དུ་བླང་༔ ཕྱག་དང་བསྐོར་བས་ལུས་ཀྱི་སྡིག་པ་འདག༔ བཟླས་བརྗོད་བཀའ་བཀླག་ངག་གི་སྒྲིབ་པ་འབྱང་༔ དཀོན་མཆོག་གསོལ་གདབ་ཡིད་ཀྱི་ཉེས་པ་ཞི༔ རྟག་ཏུ་དྲན་ཤེས་བག་ཡོད་ཚུལ་བཞིན་བསླབ༔ ཅེས་གསུངས་ཏེ། ཐར་པ་དམ་པའི་ལྷ་ཆོས་སྒྲུབ་པའི་གཞིའམ་རྩ་བར་གྱུར་པ་ནི། སེམས་པ་ཡིད་དང་བྱས་པ་ལུས་ངག་གི་ལས་ཀྱི་འབྲས་བུ་རྣམ་པར་སྨིན་པ་བཅས་སངས་རྒྱས་ཀྱིས་བསྟན་པ་ལ་ཡིད་ཆེས་པས་དགེ་སྡིག་གི་བླང་དོར་ཚུལ་བཞིན་དུ་བྱ་བ་སྟེ། དེའང་རིན་ཆེན་ཕྲེང་བ་ལས། འདོད་ཆགས་ཞེ་སྡང་གཏི་མུག་དང༌། །དེས་བསྐྱེད་ལས་ནི་མི་དགེ་བ། །མི་དགེ་ལས་ནི་སྡུག་བསྔལ་དང༌། །དེ་བཞིན་ངན་འགྲོ་ཐམས་ཅད་དོ། །མ་ཆགས་མི་སྡང་གཏི་མུག་མེད། །དེས་བསྐྱེད་ལས་ནི་དགེ་བ་སྟེ། །དགེ་ལས་བདེ་འགྲོ་ཐམས་ཅད་དང༌། །སྐྱེ་བ་ཀུན་ཏུ་བདེ་བ་དང༌། །ཅེས་འབྱུང་བ་ལྟར་ཉོན་མོངས་པས་ཀུན་ནས་བསླངས་པའི་སྒོ་གསུམ་གྱི་ལས་སྡིག་པ་མི་དགེ་བ་བཅུ་ཆ་དང་བཅས་པ་ཆེན་པོས་དམྱལ་བ། འབྲིང་གིས་ཡི་དྭགས། ཆུང་ངུས་བྱོལ་སོང་སྟེ་ངན་སོང་གསུམ་དུ་འགྲོ་ཞིང་སྡུག་བསྔལ་དྲག་པོས་མནར་བར་བྱེད་ལ། བསོད་ནམས་ཆ་མཐུན་གྱི་ལས་དགེ་བ་བཅུའི་འཁོར་དང་བཅས་པས་མཐོ་རིས་སུ་སྐྱེས་ནས་བདེ་འབྲས་མྱོང་ཞིང༌། །ངེས་འབྱུང་དང་བྱང་སེམས་ཀྱིས་ཟིན་པའི་ཐར་པ་ཆ་མཐུན་གྱི་ལས་དགེ་བ་བྱས་པས་ཐར་པ་རྣམ་གསུམ་གང་རུང་ཐོབ་པར་འགྱུར་བ་ཡིན་ནོ། །དེའང་ཏིང་འཛིན་རྒྱལ་པོ་ལས། ལས་བསགས་པ་ནི་ནམ་ཡང་མེད་མི་འགྱུར། །འཁོར་བ་ན་ནི་དཀར་ནག་འབྲས་བུ་སྨིན་ཅེས་གསུངས་པ་ལྟར་ལས་ཀྱི་རྣམ་སྨིན་ནམ་ཡང་མི་བསླུ་ཞིང་དགེ་སྡིག་གི་འབྲས་བུ་མི་འཆོལ་བར་བྱེད་པ་པོ་རང་རང་ལ་སྨིན་པ་དང༌། ལས་རྣམས་འཕེལ་བ་འགྱུར་དང་བཅས་པས་རྒྱུ་ཆུང་ཡང་འབྲས་བུ་ཆེ་བ་དེ་བས་ན། འཕེན་རྫོགས་དང་བྱས་བསགས་ལ་བཞིར་ཕྱེས་པའི་སྔར་བྱས་ཀྱི་སྡིག་པ་ཆ་དང་བཅས་པ་ཡུལ་མཆོག་ལ་བཤགས་ཤིང་ཕྱིན་ཆད་མི་བྱ་བར་སྙིང་ཐག་པ་ནས་དམ་བཅས་པས་བསྡམ། དགེ་བའི་རྩ་བ་ཆ་བཅས་ཕྲ་མོ་ནས་ཀྱང་ཁྱད་དུ་མི་གསོད་པར་འབད་པ་ཆེན་པོས་དང་དུ་བླང་བར་བྱ་དགོས་ལ། དེའང་ཟག་བཅས་ཐུན་མོང་གི་དགེ་བ་དཀོན་མཆོག་གི་རྟེན་ལ་ཕྱག་དང་བསྐོར་བ་བྱས་པས་ལུས་ཀྱི་མི་དགེ་བ་གསུམ་གཙོ་བོར་གྱུར་པའི་སྡིག་པ་འདག །སྔགས་དང་སྙིང་པོ་བཟླས་བརྗོད་དང་རྒྱལ་བའི་བཀའ་མདོ་རྒྱུད་ཟབ་མོ་བཀླགས་པས་ངག་གི་མི་དགེ་བ་བཞི་གཙོ་བོར་གྱུར་པའི་སྒྲིབ་པ་བྱང༌། དྭང་བ་དང་འདོད་པ་དང་ཡིད་ཆེས་པའི་དད་པས་ཀུན་ནས་བསླངས་ཏེ་དཀོན་མཆོག་གསུམ་དང་རྩ་བ་གསུམ་ལ་གསོལ་བ་གདབ་པས་མཚོན་རྣམ་རྟོག་དགེ་བའི་ལས་ལམ་དུ་བསྒྱུར་བས་ཡིད་ཀྱི་མི་དགེ་བ་གསུམ་གཙོ་བོར་གྱུར་པའི་ཉེས་པ་རྣམ་ཞི་བར་འགྱུར། དགེ་སྡིག་གཉིས་ཀའང་རང་གི་སེམས་ཁོ་ནར་རག་ལས་པ་སྟེ། དཀོན་མཆོག་སྤྲིན་ལས། དགེ་བའམ་འོན་ཏེ་མི་དགེ་བའི། །ལས་ཀུན་སེམས་ཀྱིས་བསགས་པ་ཡིན། ཅེས་གསུངས་པས་དུས་རྟག་ཏུ་སེམས་བསྲུང་བ་ལ་འབད་པར་བྱ་སྟེ། དེའི་ཚུལ་ཡང་ཞི་བ་ལྷས། སེམས་སྲུང་འདོད་པ་རྣམས་ལ་ནི། །དྲན་པ་དང་ནི་ཤེས་བཞིན་དང༌། །ཐམས་ཅད་འབད་པས་སྲུངས་ཤིག་ཅེས། །བདག་ནི་དེ་ལྟར་ཐལ་མོ་སྦྱོར། །ཅེས་གསུངས་པ་ལྟར། དུས་རྟག་པར་སྲུང་སེམས་མི་བརྗེད་པའི་དྲན་པ་དང༌། རང་རྒྱུད་ལ་ཉེས་པ་བྱུང་མ་བྱུང་རྟོགས་པའི་ཤེས་བཞིན་དང༌། བྱ་བ་གང་ཡིན་གྱི་འཇུག་ལྡོག་གི་གནས་ལ་གཟོབ་པའི་བག་ཡོད་པ་རྣམས་ལ་ཚུལ་བཞིན་དུ་བསླབ་པོ། གཉིས་པ་སྐྱེས་བུ་འབྲིང་དང་ཐུན་མོང་བའི་ལམ་རིམ་ལ་གཉིས། བློ་སྦྱོང་བའི་ཚུལ། འབྱོངས་པའི་ཚད་དོ།

།དང་པོ་ནི། ཁྱད་པར་ཐར་པའི་གོ་འཕང་བསྒྲུབ་པ་ལ༔ འཁོར་བ་ཐམས་ཅད་མེ་འོབས་སྤུ་གྲིའི་ཚལ༔ རལ་གྲིའི་ནགས་ལྟར་ཤེས་ཤིང་དྲན་པ་ཡིས༔ སྡུག་བསྔལ་གསུམ་ལས་མྱུར་དུ་ཐར་འདོད་བློ༔ ཤུགས་དྲག་བཅོས་མ་མིན་པ་ཡང་ཡང་བསྐྱེད༔ ཅེས་གསུངས་ཏེ། སྐྱེས་བུ་ཆུང་ངུ་དང་ཐུན་མོང་བའི་འདུ་ཤེས་དེ་དག་ཡང་དག་པའི་ལྟ་བ་ཡིན་མོད་ཀྱི། དེ་ལས་ཁྱད་པར་དུ་གྱུར་པ་ཐར་པ་ཞི་བ་བླ་ན་མེད་པའི་གོ་འཕང་བསྒྲུབ་པ་ལ། འཁོར་བ་ཐམས་ཅད་ལས་ངེས་པར་འབྱུང་བའི་བསམ་པ་ཉིད་གལ་ཆེ་བ་སྟེ། དེ་ལ་འཁོར་བའི་མཚན་ཉིད་ནི། ལུང་རྣམ་འབྱེད་ལས། མི་གཙང་བ་ལ་དྲི་ཞིམ་མེད། །དེ་བཞིན་འགྲོ་དྲུག་བདེ་བ་མེད། །འབར་བའི་འོབས་ན་བསིལ་བ་མེད། །སྲྀད་པ་དག་ནའང་དགའ་བ་མེད། ཅེས་པ་ལྟར་སྲིད་པའི་གནས་རིས་མཐོ་དམན་གང་དུ་སྐྱེས་ཀྱང་མེ་མདག་གི་འོབས་ལ་ཤ་རྗེན་དུ་གནས་པ་དང༌། སྤུ་གྲི་རྣོན་པོའི་ཚལ་ལ་རྐང་རྗེན་དུ་རྒྱུ་བ་དང༌། རལ་གྲིའི་ནགས་ལ་གཅེར་བུར་འཛེགས་པ་ལྟར་སྡུག་བསྔལ་ཁོ་ནའི་རང་བཞིན་ཅན་ཡིན་ལ། འཁོར་བའི་རང་བཞིན་ནི། མདོ་ལས། སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། ཞེས་པ་ལྟར་ཐོག་མ་དང་ཐ་མ་མེད་པར་འཁོར་བས་དེའི་ཚུལ་དང་པོར་ཤེས་པར་བྱ་ཞིང༌། དེ་ནས་རྒྱུན་དུ་མི་འརྗེད་པའི་དྲན་པ་ཡིས་བསྐུལ་ལོ། །དེ་ལ་འཁོར་བའི་སྡུག་བསྔལ་མདོར་བསྡུ་ན་གསུམ་སྟེ། སྡུག་བསྔལ་གྱི་སྡུག་བསྔལ་ནི། སྤྱིར་ཉེ་བར་ལེན་པའི་ཕུང་པོ་ལྔ་བླང་བ་ཙམ་ནས་སྡུག་བསྔལ་བདེན་པར་གྲུབ་པའི་སྟེང་དུ་སྡུག་བསྔལ་ཆེན་པོ་མངོན་པར་མཛེ་ཐོག་ཏུ་ཕོལ་མིག་བྱུང་བ་ལྟ་བུ་སྟེ། མཚན་གཞིའི་གཙོ་བོ་དམྱལ་བ་ཚ་གྲང༌། ཡི་དྭགས་བཀྲེས་སྐོམ། དུད་འགྲོ་གླེན་ལྐུགས་རྣམས་ཡིན་ལ། མི་ལ་སྡུག་བསྔལ་བརྒྱད། ལྷ་དང་ལྷ་མིན་ལའང་འདོད་པས་མི་ངོམས་པ་དང་འཐབ་རྩོད་སོགས་ཀྱང་དེར་གཏོགས་པའོ། །འགྱུར་བའི་སྡུག་བསྔལ་ནི། འཁོར་བའི་བདེ་འབྱོར་ཐམས་ཅད་མི་རྟག་གཡོ་བའི་ཆོས་ཉིད་ཡིན་པས་བདེ་བར་སྡོད་འཕྲོ་ལ་ནད་དམ་དགྲས་གློ་བུར་དུ་བཅོམ་པ་ལྟ་བུ་སྟེ། ལྷ་མི་རྣམས་ལྟར་སྣང་བདེ་བར་གནས་ཀྱང་ཡུན་རིང་མི་བརྟན་པར་འགྱུར་ནས་འགྲོ་བའོ། །ཁྱབ་པ་འདུ་བྱེད་ཀྱི་སྡུག་བསྔལ་ནི། ཕུང་ལྔས་བསྡུས་པའི་འཁོར་བའི་ཆོས་ཐམས་ཅད་སྐད་ཅིག་གིས་སྐྱེ་འགག་བྱེད་པ་སོ་སྐྱེས་མི་རྟོགས་ཀྱང་འཕགས་པ་རྣམས་ཀྱི་གཟིགས་ངོར་རྟག་ཏུ་གཡོ་བའི་འདུ་བྱེད་ཅན་ཡིན་པས་སྡུག་བསྔལ་བ་སྟེ། མཛོད་ཊི་ཀ་ལས། ལག་མཐིལ་སྤུ་ཉག་གཅིག་འདུག་པ། །དེ་ནི་མིག་ཏུ་སོང་བ་ན། །མི་བདེ་བ་དང་སྡུག་བསྔལ་སྐྱེད། །བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རྟོགས། །འཕགས་པ་མིག་དང་འདྲ་བ་ཡིས། །འདུ་བྱེད་ལ་ནི་སྡུག་བསྔལ་གཟིགས། །ཞེས་སོ། །དེས་ན་ད་ལྟ་ནད་དང་དགྲ་སོགས་སྡུག་བསྔལ་ལྟར་སྣང་བ་ཡུད་ཙམ་རེའང་ལུས་སེམས་ཀྱིས་མི་བཟོད་ན། འཁོར་བའི་གནས་སུ་ཐོག་མཐའ་མེད་པར་སྡུག་བསྔལ་ཚབ་པོ་ཆེ་དེ་གསུམ་དང་རྟག་ཏུ་འགྲོགས་པ་ལ་བཟོད་པའི་བླགས་ག་ལ་ཡོད་པས་རྒྱུ་མཚན་ཞིབ་མོར་བསམས་ལ། དེ་དག་ལས་མྱུར་དུ་ཐར་བར་འདོད་པའི་བློ་ཤུགས་དྲག་པོ་འཕྲལ་རྐྱེན་གྱིས་བསྐུལ་བའི་བཅོས་མ་མ་ཡིན་པར་སྙིང་ཁོང་རུས་པའི་གཏིང་ནས་ཡང་དང་ཡང་དུ་བསྐྱེད་པར་བྱ་སྟེ། སྤྱོད་འཇུག་ལས། སེམས་ཅན་ཕན་པར་མཛད་པ་ཡི། །སངས་རྒྱས་གྲངས་མེད་འདས་གྱུར་ཀྱང༌། །བདག་ནི་རང་གི་ཉེས་པ་དེས། །གསོ་བའི་སྤྱོད་ཡུལ་མ་གྱུར་ཏོ། །ད་དུང་དེ་བཞིན་བདག་བྱེད་ན། །ཡང་དང་ཡང་དུ་དེ་བཞིན་ཏེ། ཞེས་དང༌། འདུལ་བ་ལུང་ལས། ངས་ནི་ཁྱེད་ལ་ཐར་པའི་ཐབས་བསྟན་གྱི། །ཐར་པ་རང་ལ་རག་ལས་བརྩོན་པར་གྱིས། །ཞེས་པའི་ཚུལ་བསམ་མོ། །གཉིས་པ་ནི། ནམ་ཞིག་སྲིད་པའི་འབྱོར་པ་མཐའ་དག་ཀུན༔ མི་རྟག་མི་བརྟན་བསླུ་བར་རྟོགས་པ་ཡིས༔ ཚངས་དང་བརྒྱ་བྱིན་དཔལ་ལའང་ཆགས་པའི་བློ༔ སྐད་ཅིག་ཙམ་ཡང་སྐྱེ་བའི་སྐབས་མེད་འགྱུར༔ ཞེས་གསུངས་ཏེ། དེ་ལྟར་འཁོར་བ་སྡུག་བསྔལ་གྱི་མཚན་ཉིད་གཏན་ལ་ཕེབས་ནས་སྐྱོ་ཤས་དང་ངེས་འབྱུང་དྲག་པོ་བསྐྱེད་པས་ནམ་ཞིག་སྲིད་པའི་རྩེ་མོ་མན་ཆད་ཀྱི་དཔལ་དང་འབྱོར་པ་ལེགས་ལེགས་ལྟར་སྣང་བ་མཐའ་དག་པ་འདི་ཀུན་འདུས་བྱས་ཡིན་པས་མི་རྟག་པ་སྒྱུ་མ་ལྟ་བུ། གཡོ་བའི་ཆོས་ཡིན་པས་མི་བརྟན་པ་སྟོན་ཀའི་སྤྲིན་ལྟ་བུ། སྙིང་པོ་མེད་པས་སླུ་བར་བྱེད་པ་ཆུ་བུར་རྟོགས་པར་འགྱུར་ལ། རྟོགས་རིས་དེ་ཡིས་འཁོར་བའི་གནས་སུ་ཆེ་བར་གྲགས་པ་ཆགས་བྲལ་གྱི་བདེ་བ་ཅན་ཚངས་པ་དང༌། ལྷ་རྣམས་ཀྱི་དབང་པོར་གྱུར་པ་བརྒྱ་བྱིན། མི་དབང་འཁོར་ལོས་སྒྱུར་རྒྱལ་ལྟ་བུའི་དཔལ་འབྱོར་ལའང་ཆགས་ཤིང་ཞེན་པའི་བློ་སྐད་ཅིག་ཙམ་ཡང་སྐྱེ་བའི་གོ་སྐབས་མེད་པར་འགྱུར་ཏེ། རྒྱལ་ཚབ་བྱམས་པས། ལྷ་ལ་འཆི་འཕོ་མི་ལ་ཡོངས་འཚོལ་སྡུག་བསྔལ་ཞེས་ནི་རྟོགས་པའི་ཕྱིར། །ཤེས་རབ་ལྡན་པ་ལྷ་མིའི་དབང་ཕྱུག་མཆོག་ལའང་མངོན་པར་འདོད་མེད་དེ། །ཤེས་རབ་དག་དང་དེ་བཞིན་གཤེགས་པའི་གསུང་རབ་དད་པའི་རྗེས་འབྲངས་ལ། །འདི་ནི་སྡུག་བསྔལ་འདི་རྒྱུ་འདི་འགོག་པ་ཞེས་ཤེས་པས་མཐོང་ཕྱིར་རོ། །ཞེས་སོ།

།གསུམ་པ་སྐྱེས་བུ་ཆེན་པོ་དང་ཐུན་མོང་བའི་ལམ་རིམ་བསྟན་པ་ལ་གཉིས། ལམ་གྱི་འཇུག་སྒོ་སྐྱབས་སུ་འགྲོ་བ། དངོས་གཞིའི་སེམས་བསྐྱེད་པའོ། །དང་པོ་ནི། དེ་ནས་དཀོན་མཆོག་རྩ་གསུམ་ཆོས་སྲུང་ཚོགས༔ བསླུ་མེད་གཏན་གྱི་སྐྱབས་སུ་ངེས་མཐོང་ནས༔ རང་གཞན་འཁོར་བའི་འཇིགས་ལས་བསྒྲལ་བའི་ཕྱིར༔ བྱང་ཆུབ་བར་དུ་གུས་པས་སྐྱབས་སུ་བཟུང་༔ ཞེས་གསུངས་ཏེ། ལམ་རིམ་དེ་རྣམས་ཀྱིས་དལ་འབྱོར་ཆུད་ཟོས་སུ་མི་བཏང་བར་མྱུར་བ་ཉིད་དུ་ཁམས་གསུམ་ལས་ཐར་བར་འདོད་པའི་ངེས་འབྱུང་གི་བློ་སྐྱེས་པ་དེ་ནས། རང་སྟོབས་ཁོ་ནས་ནི་འཁོར་བའི་འཇིགས་པ་ལྟ་ཅི་སྨོས་ཚེ་འདིའི་འཇིགས་སྐྲག་ཙམ་ལས་ཀྱང་བརྒལ་མི་ནུས་པ་ཚད་མས་གྲུབ་པས། དེ་ལས་སྐྱོབ་ནུས་པའི་སྐྱབས་གནས་ལ་སྐྱབས་སུ་འགྲོ་དགོས་པའི་ཕྱིར། ཡུལ་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ། བླ་མ་ཡི་དམ་མཁའ་འགྲོ་སྟེ་རྩ་བ་གསུམ་ཆོས་སྲུང་ཡེ་ཤེས་པའི་འཁོར་ཚོགས་དང་བཅས་པ་རྣམས། རང་ཉིད་ཉེས་པའི་སྐྱོན་ཐམས་ཅད་སྤངས་པས་སྲིད་པའི་འཆིང་བ་ལས་གྲོལ་ཞིང་ཚད་མེད་པའི་ཡོན་ཏན་དང་ལྡན་པས་གཞན་སྐྱོབ་པར་ནུས་པའི་ཕྱིར་ནམ་ཡང་བསླུ་བ་མེད་པར་གཏན་གྱི་སྐྱབས་སུ་གྱུར་པ་རྒྱུ་མཚན་ཤེས་པའི་ངེས་པས་མཐོང་ནས། བསམ་པ་རང་ཉིད་དང་གཞན་དག་མཁའ་ཁྱབ་ཀྱི་ཕ་མ་སེམས་ཅན་ཐམས་ཅད་འཁོར་བའི་འཇིགས་པ་ཆེན་པོ་ལས་མྱུར་བ་ཉིད་དུ་བརྒལ་ཞིང་བསྒྲལ་བའི་ཕྱིར། དུས་འདི་ནས་བཟུང་སྟེ་བྱང་ཆུབ་ཆེན་པོ་མ་ཐོབ་ཀྱི་བར་དུ། ཚུལ་ལུས་གུས་པ། ངག་གདུང་བ། ཡིད་དད་མོས་རྩེ་གཅིག་པས་སྐྱབས་སུ་འགྲོ་བར་བྱའོ། །འདིའི་དོན་ཅུང་ཟད་བཤད་ན་བདུན། དང་པོ་སྐྱབས་སུ་འགྲོ་དགོས་པའི་རྒྱུ་མཚན་ནི། ཇོ་བོ་རྗེས། སྡོམ་པ་ཀུན་ལ་ཡོད་མོད་ཀྱང༌། །སྐྱབས་སུ་མ་སོང་བ་ལ་མེད། ཅེས་གསུངས་པ་ལྟར་སངས་རྒྱས་པའི་སྡོམ་པ་ཐམས་ཅད་ཀྱི་གཞི་རྟེན་མེད་དུ་མི་རུང་བ་དང༌། ནང་པ་དང་ཕྱི་པའི་ཁྱད་པར་སྐྱབས་འགྲོ་ཡོད་མེད་ལས་འབྱེད་པ་དང༌། འདི་དག་གི་སྐྱབས་ལ་མ་བརྟེན་པར་འཁོར་བ་ལས་ཐར་པའི་ཐབས་མེད་པའོ། །གཉིས་པ་སྐྱབས་ཡུལ་ལ་རྒྱུ་འབྲས་གཉིས་ལས། རྒྱུའི་ཡུལ་ནི་གཞན་རྒྱུད་ཀྱིས་བསྡུས་པའི་དཀོན་མཆོག་རྩ་གསུམ་སྟེ་མཆོག་གསུམ་ལ་ཐེག་པ་ཆེ་ཆུང་གི་ངོས་འཛིན་མི་འདྲ་བ་ལས། ཐེག་ཆེན་བླ་ན་མེད་པའི་ལུགས་འདིར། སངས་རྒྱས་དག་པ་གཉིས་ལྡན་སྐུ་བཞི་ཡེ་ཤེས་ལྔའི་བདག་ཉིད་དོན་གཉིས་ཕུན་སུམ་ཚོགས་པ། ཆོས་བརྗོད་བྱ་འགོག་ལམ་གྱིས་བསྡུས་པའི་ཟག་མེད་རྣམ་བྱང་གི་བདེན་པ་དང་རྗོད་བྱེད་གསུང་རབ་མིང་ཚིག་ཡི་གེར་སྣང་བ་ལུང་རྟོགས་གཉིས། དགེ་འདུན་དངོས་རྒྱལ་སྲས་འཕགས་པའི་སར་བཞུགས་རིག་གྲོལ་གྱི་ཡོན་ཏན་དང་ལྡན་པ། རྗེས་མཐུན་ཚོགས་སྦྱོར་དང་ཉན་རང་འཕགས་པ་རྣམས་སོ། །སྔགས་ལ་དེ་སྟེང་ཁྱད་པར་གྱི་དཀོན་མཆོག་བྱིན་རླབས་ཞུ་བའི་ཡུལ་བླ་མ། དངོས་གྲུབ་ཡུལ་ཡི་དམ། ཕྲིན་ལས་སྒྲུབ་པའི་གྲོགས་མཁའ་འགྲོ་ཆོས་སྐྱོང་སྟེ། བླ་མ་དཀོན་མཆོག་ཀུན་འདུས། ཡི་དམ་སངས་རྒྱས། མཁའ་འགྲོ་ཆོས་སྐྱོང་དགེ་འདུན་ཡིན་ཀྱང་རྩལ་དུ་བཏོན་ནས་སྐྱབས་ཡུལ་དུ་བཟུང་བའོ། །འབྲས་བུའི་ཡུལ་རང་སེམས་སྟོང་གསལ་ཟུང་འཇུག་ངོ་བོ་རང་བཞིན་ཐུགས་རྗེའི་བདག་ཉིད་དུ་བཞུགས་པ་ཉིད་དཀོན་མཆོག་གསུམ་གྱི་རང་བཞིན་ཏེ། དེའང་འབྲས་བུ་འགྲུབ་པའི་ཆེད་དུ་སྐྱབས་གནས་སུ་ཁས་བླངས་ནས་སྐྱབས་སུ་འགྲོ་བ་ནི་རྒྱུའི་སྐྱབས་འགྲོ་དང༌། སེམས་ཉིད་སངས་རྒྱས་མངོན་དུ་འགྱུར་བའི་ཕྱིར་རྒྱུ་ལ་འཇུག་པའམ་གཙོ་བོར་རང་ལ་ལྷུན་གྲུབ་ཏུ་ཡོད་པས་གཞན་དུ་མི་བཙལ་བར་ངང་ལ་འཇོག་པ་ནི་འབྲས་བུའི་སྐྱབས་འགྲོ་སྟེ། ཡེ་ཤེས་གྲུབ་པ་ལས། དཀོན་མཆོག་གསུམ་གྱི་མངའ་བདག་ལ། །གཞན་དུ་ཕུན་ཚོགས་བདེ་འདོད་ནས། །གང་ཕྱིར་རྒྱུ་ལ་སྨོན་པ་དང༌། །འོད་གསལ་བ་ཡི་སེམས་ཉིད་ནི། །དཀྱིལ་འཁོར་གསུམ་གྱི་བདག་ཉིད་དུ། །རྟོགས་ནས་རྩེ་གཅིག་མཉམ་འཇོག་པ། །འབྲས་བུའི་མཆོག་ཏུ་ཡང་དག་བཤད། །ཅེས་སོ། །གསུམ་པ་སྐྱབས་སུ་འགྲོ་བའི་ཚུལ་ནི། དམིགས་པ་སྒོམ་ཁྲིད་སོ་སོར་འབྱུང་བ་ལྟར་ལ་བསམ་པ་དང་དུས་དང་བྱེད་ཚུལ་གཞུང་གིས་དངོས་སུ་བསྟན་པ་བཞིན་ནོ། །བཞི་པ་ཇི་ལྟར་སྐྱོབ་པའི་ཚུལ་ནི། སངས་རྒྱས་ལ་མཐར་ཐུག་གི་སྐྱབས་དང་སྟོན་པ། དེས་བསྟན་པའི་དོན་ཉམས་སུ་བླངས་པས་འཇིགས་པ་ལས་ཐར་པའི་ཕྱིར་ཆོས་ལ་ལམ། དགེ་འདུན་ལ་ལམ་སྣ་འདྲེན་པའི་ཟླ་གྲོགས་ཞུ་ཞིང་དེ་བཞིན་དུ་སྐྱོབ་པ་ཡིན་ལ། གསང་སྔགས་ཀྱི་བླ་མ་ནི་མཆོག་གསུམ་གྱི་ཕྲིན་ལས་དེ་གཅིག་པུས་མཛད་པས་དེ་ཐམས་ཅད་ཀུན་འདུས་ཡིན་ཏེ། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་སེམས། །ཞེས་སོ། །ལྔ་པ་སྐྱབས་སུ་སོང་བའི་ཚད་ནི། དཀོན་མཆོག་གསུམ་གྱི་ཡོན་ཏན་ཤེས་པ། རང་གཞན་གྱི་སྐྱབས་དང་དཀོན་མཆོག་ནང་ཕན་ཚུན་གྱི་ཁྱད་པར་ཤེས་པ། ཤེས་ནས་སྐྱབས་སུ་འགྲོ་བར་དམ་བཅས་པ། །དེ་ལས་སྲོག་གི་ཕྱིར་ཡང་སྐྱབས་གཞན་མི་ཚོལ་བ་སྟེ་ཁྱད་པར་བཞི་དང་ལྡན་པའོ། །དྲུག་པ་བསླབ་བྱ་ནི། དགག་སྒྲུབ་ཀྱི་ཕྱོགས་དྲུག་ཆ་མཐུན་དང་བཅས་པའོ། །བདུན་པ་ཕན་ཡོན་ནི། མདོ་རྒྱལ་མཚན་དམ་པ་ལས། འཚེ་བ་དག་ནི་ཐམས་ཅད་དང༌། །འཇིགས་དང་ཐེག་པ་དམན་དག་ལས། །སྐྱོབ་ཕྱིར་སྐྱབས་ཀྱི་དམ་པར་བཤད། །ཅེས་དང༌། གང་ཞིག་གསུམ་ལ་སྐྱབས་འགྲཽ་བ། །དེ་ཡིས་མྱུར་དུ་སངས་རྒྱས་ཐོབ། །ཅེས་སོགས་ལུང་མཐའ་ཡས་སོ། །གཉིས་པ་དངོས་གཞི་སེམས་བསྐྱེད་བཤད་པ་ལ་གཉིས། ཀུན་རྫོབ་དང༌། དོན་དམ་སེམས་བསྐྱེད་དོ། །དང་པོ་ལའང་གཉིས། སྨོན་པ་དང༌། འཇུག་པའི་སེམས་བསྐྱེད་དོ།

།དང་པོ་ནི། རང་ཉམས་ལ་དཔག་མ་གྱུར་འགྲོ་བ་རྣམས༔ བདེ་དང་ལྡན་ཞིང་སྡུག་བསྔལ་བྲལ་བའི་ཕྱིར༔ བྱམས་དང་སྙིང་རྗེ་དགའ་བ་བཏང་སྙོམས་ཏེ༔ ཚད་མེད་རྣམ་བཞིས་སྨོན་པའི་བྱང་སེམས་བསྐྱེད༔ ཅེས་གསུངས་ཏེ། ཇི་ལྟར་རང་ཉིད་རྣམ་པ་ཀུན་ཏུ་སྡུག་བསྔལ་མི་འདོད་ཅིང་བདེ་བ་རྒྱ་ཆེར་འདོད་པའི་ཉམས་མྱོང་ལས་རྗེས་སུ་དཔག་སྟེ་ཕ་མར་གྱུར་པའི་འགྲོ་བ་རིགས་དྲུག་པོ་རྣམས་ཀྱང་དེ་ལྟར་འདོད་པ་མཚུངས་ལྡན་ཡིན་པའི་ཕྱིར། དེ་དག་ལུས་སེམས་བདེ་བ་དང་བདེ་བའི་རྒྱུ་བསོད་ནམས་བྱེད་པ་དང་ལྡན་ཅིང་སྡུག་བསྔལ་དང་སྡུག་བསྔལ་གྱི་རྒྱུ་ལས་དང་ཉོན་མོངས་པ་རྣམས་བྲལ་བ་བདག་ཁོ་ནས་བྱ་དགོས་པའི་ཕྱིར། མར་ཤེས་པས་དང་དུ་ལེན་འདོད་ཀྱི་བྱམས་པ་དང༌། དེ་དག་སྲིད་ལམ་དུ་སྡུག་བསྔལ་བར་ཤེས་ནས་སྤང་དུ་མི་བཟོད་པའི་སྙིང་རྗེ་དང༌། ལྷ་དང་སངས་རྒྱས་ཀྱི་བདེ་བ་ཐོབ་པ་ལ་སྤྲོ་བའི་དགའ་བ་དང༌། ཉེ་རིང་ཆགས་སྡང་མེད་པའི་བཏང་སྙོམས་ཏེ། རྒྱུ་ལ་དམ་བཅའ་བ་དེ་བཞི་པོ་མཁའ་ཁྱབ་ཀྱི་འགྲོ་བ་དམིགས་ཡུལ་དུ་བྱས་པས་ཚད་མེད་པ་སྟེ། ཏིང་འཛིན་རྣམ་པ་བཞིའི་སྒོ་ནས། འབྲས་བུ་ལ་དམ་བཅའ་བ་ཐམས་ཅད་སངས་རྒྱས་ཀྱི་ས་ལ་བཀོད་པར་བྱ་བའི་བསམ་པས་སྨོན་པ་བྱང་ཆུབ་ཀྱི་སེམས་བསྐྱེད་དོ། །འདིའི་དོན་ཅུང་ཟད་བཤད་ན་བདུན། དང་པོ་སེམས་བསྐྱེད་ཀྱི་ངོ་བོ་ནི། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། ཅེས་པ་ལྟར། སེམས་ཅན་ཐམས་ཅད་སངས་རྒྱས་ཀྱི་ས་ལ་འགོད་པའི་ཆེད་དུ་རང་ཉིད་རྫོགས་པའི་བྱང་ཆུབ་ཐོབ་པར་འདོད་པ་སྟེ། དེའང་རྒྱུ་གྲོགས་སྟོབས་སོགས་བཞི་ལས་བྱུང་བ། གྲོགས་སེམས་ཅན་མ་ལུས་པའི་དོན་གྱི་ཁུར་ཆེན་རང་ཉིད་ཁོ་ནས་ཁྱེར་བའི་ལྷག་བསམ་གྱི་སྙིང་སྟོབས་དང་ལྡན་པ། ངོ་བོ་འགྲོ་ཀུན་སྒྲོལ་ནུས་པའི་རྫོགས་བྱང་ཐོབ་པར་འདོད་པའོ། །གཉིས་པ་དབྱེ་བ་ནི། སོ་སྐྱེ་མོས་སྤྱོད་ནས་སངས་རྒྱས་ཀྱི་བར་ས་མཚམས་ཀྱི་དབྱེ་བ་བཞི། དཔེས་བསྟན་པ་ཉེར་གཉིས་སོགས་ཡོད་ཀྱང༌། མཚན་ཉིད་ཀྱི་སྒོ་ནས་དབྱེ་བ་གཉིས་པོ་འདི་གོ་སླ་ཞིང་གྲགས་ཆེ་སྟེ། དེའང་འགྲོ་བར་འདོད་པ་དང་མཚུངས་པར་སངས་རྒྱས་ཐོབ་འདོད་ནི་སྨོན་པ་དང༌། འགྲོ་བཞིན་པ་ལྟར་སངས་རྒྱས་སྒྲུབ་པའི་ཐབས་བྱང་ཆུབ་ཀྱི་སེམས་རྣམ་པ་གཉིས་ལ་བརྩོན་པ་ནི་འཇུག་པའི་སེམས་ཏེ། སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་ཉིད་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་པས་ཤེས་པར་བྱ། །ཞེས་སོ། །གསུམ་པ་དམིགས་པ་ནི། བྱང་ས་ལས། སེམས་བསྐྱེད་པ་དེ་ནི་བྱང་ཆུབ་ལ་དམིགས་པ་དང༌། སེམས་ཅན་ལ་དམིགས་པའོ། །ཞེས་པ་ལྟར་ཐེག་པ་ཆེན་པོའི་ཡེ་ཤེས་ཚོལ་བར་དམིགས་པ་དང༌། ཚད་མེད་པ་བཞི་ལ་དམིགས་པའོ། །བཞི་པ་བསྐྱེད་ཚུལ་ནི། གཞུང་གི་དངོས་བསྟན་ཉིད་དེ། དེ་ལའང་ཚད་མེད་བཞིའི་ངོ་བོ་ནི། སེམས་ཅན་ཐམས་ཅད་སྔར་མེད་ཀྱི་བདེ་དགེ་གསར་པ་དང་འཕྲད་པར་འདོད་པ་ནི་བྱམས་པ། ད་ལྟར་ཡོད་པའི་སྡུག་བསྔལ་དང་བྲལ་ཞིང་ཕྱིན་ཆད་དེའི་རྒྱུ་འགོག་འདོད་ནི་སྙིང་རྗེ། དེ་ལྟར་འགྲོ་བ་རྣམས་བདེ་བ་དང་ལྡན་པར་དགའ་ཞིང་ཡི་རངས་པས་དྲངས་པ་ནི་དགའ་བ། དེ་གསུམ་གྱིས་དྲངས་པའི་ཞེ་སྡང་མེད་པ་དང་མཚུངས་ལྡན་གྱི་མ་ཆགས་པའི་སེམས་ཀྱི་ཁྱད་པར་ནི་བཏང་སྙོམས་ཏེ་རང་རང་གི་མི་མཐུན་ཕྱོགས་སྤངས་པའོ། །མིང་དོན་ནི། སེམས་ཅན་གྲངས་དང་རིས་སུ་ཆད་པ་མ་ཡིན་པར། ནམ་མཁས་ཇི་ཙམ་ཁྱབ་པ་དེ་ཙམ་འགྲོ་ཁམས་གྱིས་ཁྱབ་པ་དམིགས་ཡུལ་བྱས་པས་ཚད་མེད་པའོ། །དབྱེ་བ་ནི། སྙིང་པོ་མཆོག་གི་མདོ་ལས། བྱང་ཆུབ་ཏུ་སེམས་བསྐྱེད་པས་མ་ཟིན་པའི་བྱམས་སོགས་བཞིའི་སྲིད་བདེའི་རྒྱུ་ཙམ་ཡིན་པས་ཚངས་པའི་གནས་པ་བཞི་ཞེས་བྱ་ཞིང༌། དེ་བཞི་སེམས་བསྐྱེད་ཀྱིས་ཟིན་པ་ནི་མྱང་འདས་ཀྱི་རྒྱུ་བྱེད་པས་ཚད་མེད་བཞི་ཞེས་བཤད་དོ། །སྐྱེད་བྱེད་ནི་རྐྱེན་བཞི་སྟེ། རང་བཞིན་གནས་རིགས་རྒྱུའི་རྐྱེན། །དགེ་བའི་བཤེས་གཉེན་བདག་རྐྱེན། རང་རང་གི་ཡུལ་མངོན་གྱུར་དམིགས་རྐྱེན། ཕན་ཡོན་དང་ཉེས་དམིགས་མཐོང་བ་དེ་མ་ཐག་རྐྱེན་ནོ། །སྐྱེ་ཚུལ་ནི། སེམས་ཅན་ལ་བརྟེན་ནས་དམིགས་པ་དང་བཅས་པའི་ཚད་མེད་བཞི་སྐྱེ་ཞིང༌། ཆོས་ཉིད་ལ་བརྟེན་ནས་དེ་དག་གི་རང་བཞིན་མ་སྐྱེས་པར་རྟོགས་པ་དམིགས་པ་མེད་པར་བཞི་པོས་སྐྱེ་བ་ས་སྡེ་དང་མདོ་རྒྱན་ལས་བཤད་དོ། །གོ་རིམ་ནི། ཡུམ་བར་མ་ལས། དེ་ལ་བྱང་ཆུབ་སེམས་དཔའ་ཆེན་པོས། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། དགའ་བ་ཆེན་པོ་དང༌། བཏང་སྙོམས་ཆེན་པོ་བསྒོམ་པར་བྱའོ། །ཞེས་དང༌། བརྟག་གཉིས་ལས། དང་པོར་བྱམས་པ་བསྒོམ་པར་བྱ། །གཉིས་པར་སྙིང་རྗེ་རྣམ་བསྒོམ་ཞིང༌། །གསུམ་པར་དགའ་བ་བསྒོམ་པར་བྱ། །ཀུན་གྱི་མཐར་ནི་བཏང་སྙོམས་སོ། །ཞེས་མདོ་རྒྱུད་མཐུན་པར་གསུངས་སོ། །ལྔ་པ་ཆོ་ག་ནི། ཟབ་མོ་ལྟ་བརྒྱུད། རྒྱ་ཆེན་སྤྱོད་བརྒྱུད། ཁྱད་པར་སྔགས་ཀྱི་ཚུལ་ལས་བྱུང་བ་རྣམས་སོ། །དྲུག་པ་བསླབ་བྱ་ནི། སྤྱིར་ཉམས་སུ་བླང་བྱའི་ཆོས་ཐམས་ཅད་སེམས་བསྐྱེད་ཀྱི་བསླབ་བྱར་འགྲོ་ཡང༌། ཁྱད་པར་སྨོན་པའི་བསླབ་བྱ་ནི། བྱང་སེམས་ཀྱི་ཕན་ཡོན་དྲན་པས་སེམས་ཅན་བློས་མི་སྤོང་བ་དང༌། ཚོགས་བསགས་ཤིང་ཚད་མེད་བཞི་བསྒོམ་པ་དང༌། དཀར་ནག་ཆོས་བརྒྱད་བླང་དོར་དུ་བྱ་བའོ། །འཇུག་པའི་བསླབ་བྱ། བསླབ་པ་རྣམ་པ་གསུམ་གྱིས་བསྡུས་པའི་ཕར་ཕྱིན་དྲུག་དང་བསྡུ་དངོས་བཞི་ལ་སློབ་ཚུལ་རྒྱས་པ་འོག་ཏུ་འབྱུང་བ་ལྟར་རོ།

།བདུན་པ་ཕན་ཡོན་ནི། སངས་རྒྱས་མ་བསྒྲུབ་ན་ཕར་ཞོག །བསྒྲུབ་ཕྱིན་ཆད་ནམ་ཡང་མེད་ཐབས་མེད་པས་ཡོན་ཏན་ལ་ཚད་མེད་པར་ཐེག་པ་ཆེན་པོའི་བཀའ་དང་བསྟན་བཅོས་རྣམས་སུ་ཡང་ཡང་གསུངས་པ་ལྟར་ལ། མདོར་ན། བྱང་ཆུབ་སེམས་ཀྱི་བསོད་ནམས་གང༌། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། །ཞེས་མདོ་ལས་འབྱུང་བ་ལྟར་རོ། །གཉིས་པ་འཇུག་པ་ལ་གསུམ། རང་སྨིན་པར་བྱེད་པ་ཕར་ཕྱིན་དྲུག་ལ་བསླབ་པ། གཞན་སྨིན་པར་བྱེད་པ་བསྡུ་དངོས་བཞི་ལ་བསླབ་པ། དེ་གཉིས་ཀྱི་ཉམས་ལེན་སྙིང་པོར་དྲིལ་ཏེ་བློ་སྦྱོང་བའི་ཚུལ་ལོ། །དང་པོ་ནི། གཞན་ཕྱིར་རྫོགས་བྱང་ཁོ་ན་དོན་གཉེར་བློས༔ ལུས་དང་ལོངས་སྤྱོད་ཐམས་ཅད་རྩྭ་ལྟར་བཏང་༔ འཇིགས་པས་ཉེན་ལ་སྐྱབས་ཀྱི་དབུགས་འབྱིན་བྱ༔ རང་ཡང་ཆོས་སྤྱོད་གཞན་ཡང་དེ་ལ་དགོད༔ སྤོང་བའི་སེམས་པ་རབ་ཏུ་དྭང་བའི་བློས༔ སྒཽ་གསུམ་ཁ་ན་མ་ཐོའི་ཉེས་སྤྱོད་བསྡམ༔ ཟག་བཅས་ཟག་མེད་དགེ་ཚོགས་ཅི་ནུས་བསྒྲུབ༔ ཐམས་ཅད་སེམས་ཅན་དོན་དུ་འཕེན་པ་བཏང་༔ གནོད་པའི་ཡུལ་གྱིས་ནམ་ཡང་མི་བརྫི་ཕྱིར༔ ཁོང་ཁྲོའི་ཉེས་པ་དྲན་པས་བཟོད་པ་བསྒོམ༔ ཆོས་ཀྱི་ཕྱིར་དུ་དཀའ་བ་སྤྲོ་བཞིན་ལེན༔ སྟོང་ཉིད་ཟབ་མོར་སྐྲག་པ་མེད་པར་བྱ༔ སྙིང་སྟོབས་དགེ་བའི་ཕྱོགས་སུ་སད་པ་ཡིས༔ བྱང་ཆུབ་སྤྱོད་ལ་ཞུམ་མེད་གོ་ཆ་གྱོན༔ ཉིན་མཚན་ཀུན་ཏུ་ཡེངས་མེད་བརྩོན་འགྲུས་བརྩམ༔ གཞན་དོན་འགྲུབ་ན་སྐྱོ་ངལ་སྤང་བར་བྱ༔ ཡིད་ནི་ཞི་ལ་མངོན་པར་སེམས་པ་ཡིས༔ འཇིག་རྟེན་པ་ཡི་བསམ་གཏན་གཞིར་བཟུང་སྟེ༔ ལྷག་མཐོང་དང་བཅས་ཏིང་འཛིན་རབ་བསྒྲུབས་པས༔ དེ་བཞིན་གཤེགས་པའི་སྤྱོད་ཡུལ་ཉིད་ལ་ཞུགས༔ ཆོས་རབ་རྣམ་པར་འབྱེད་པའི་བློ་གྲོས་ཀྱིས༔ དང་པོར་ཐོས་པས་ཆོས་རྣམས་ཚིག་ལ་འཇུག༔ བར་དུ་བསམ་པས་དོན་གྱི་གོ་བ་བཙལ༔ ཐ་མར་སྒོམ་པས་དོན་ཉིད་མངོན་དུ་བྱ༔ ཞེས་གསུངས་ཏེ། བསམ་པ་མཁའ་ཁྱབ་ཀྱི་སེམས་ཅན་གཞན་དག་རྣམས་སངས་རྒྱས་ཀྱི་ས་ལ་འགོད་པར་བྱ་བའི་ཕྱིར་དུ་རང་ཉིད་མངོན་པར་རྫོགས་པར་འཚང་རྒྱ་བ་དོན་དུ་གཉེར་བའི་བློས། སྦྱོར་བ་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱ་སྟེ། དེའང་མདོ་ལས། ལག་བཟང༌། བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་མངོན་པར་རྫོགས་པར་བྱང་ཆུབ་བར་བྱ་བའི་ཕྱིར། ཕ་རོལ་ཏུ་ཕྱིན་པ་དྲུག་པོ་འདི་དག་ལ་རྟག་པར་རྒྱུན་དུ་བསླབ་པར་བྱའོ། །ཞེས་སོགས་རྒྱས་པར་གསུངས་པ་ལྟར་ཕྱིན་དྲུག་གི་དང་པོ་སྦྱིན་པའི་ངོ་བོ་ནི་མ་ཆགས་པའི་སེམས་ཀྱིས་བདོག་པ་ཡོངས་སུ་གཏོང་བ། ཀུན་སློང་བཤད་མ་ཐག་པ་གཞན་ཕྱིར་རྫོགས་བྱང་དོན་གཉེར་གྱི་བློ་དང་ལྡན་པས། གཏང་བྱ་སྦྱིན་པ་ལ་དབྱེ་ན་ཟང་ཟིང་དང་མི་འཇིགས་པ་དང་ཆོས་ཀྱི་སྦྱིན་པ་གསུམ་ལས། དང་པོ་ནི། བསམ་པ་དངོས་པོ་ཞིང་དང་ཐབས་ཏེ་མ་དག་པ་བཞི་དང་བྲལ་ལ་དག་པ་བཞི་དང་ལྡན་པས། ནང་གི་དངོས་པོ་རང་གི་ལུས་སུ་གཏོགས་པ་དང་ཕྱིའི་དངོས་པོ་རང་ལ་བདོག་པའི་འབྱོར་པ་ལོངས་སྤྱོད་ཇི་སྙེད་པ་ཐམས་ཅད་ཁྱད་པར་དུ་བྱས་པའི་ཞིང་བཞི་ལ་བསམ་སྦྱོར་ཕུན་སུམ་ཚོགས་པས་སེར་སྣ་མེད་པར་རྩྭ་ལྟར་ཡོངས་སུ་གཏོང་བ་དང༌། གཉིས་པ་ནི། རྒྱལ་པོ་དང་གཅན་གཟན་དང་དགྲ་དང་ཆོམ་རྐུན་མེ་ཆུ་ནད་གདོན་སོགས་འཇིགས་པས་ཉེན་པ་ལ་རང་གི་ནུས་པ་དང་སྦྱར་ཏེ་སོ་སོའི་གཉེན་པོ་གང་ལ་འོས་པའི་སྐྱབས་ཀྱི་ཐབས་སྦྱིན་པས་འཇིགས་པ་དེ་ལས་དབུགས་འབྱིན་པར་བྱེད་པ་དང༌། གསུམ་པ་ནི། གཞན་དད་ཅིང་རང་མི་ཉམས་པར་བྱ་བའི་ཕྱིར་རང་ཡང་སྒོ་གསུམ་གྱི་མ་དག་པ་སྤོང་ཞིང་དག་པ་གསུམ་ལྡན་གྱིས་དམ་པའི་ཆོས་ལ་སྤྱོད་པས་དགེ་བའི་བཤེས་གཉེན་གྱི་འོས་སུ་འགྱུར་ཞིང༌། དེ་ལས་གཞན་ཡང་གུས་ཤིང་སྣོད་བཅུད་ཀྱི་རྟེན་འབྲེལ་འཛོམ་པར་འགྱུར་བས། ཡུལ་ཆོས་འདོད་པ་ལ། བསམ་པ་ཟང་ཟིང་མེད་པའི་སེམས་ཀྱིས། ཐེག་པ་ཆེ་ཆུང་གི་ཆོས་སྣོད་དང་འཚམས་པ། ཆོས་སྟོན་པའི་ཐབས་དང་ལྡན་པས། རང་གིས་སློབ་པའི་ཆོས་དེ་ལ་འགོད་པར་བྱའོ། །གཉིས་པ་ཚུལ་ཁྲིམས་ཀྱི་ངོ་བོ་ནི། ལེན་པ་དང་སྲུང་བས་བསྡུས་པའི་ཡོན་ཏན་བཞི་ལྡན་གང་ཞིག་ཉེས་པ་སྤོང་བའི་སེམས་པ་མཚུངས་ལྡན་དང་བཅས་པ་དང༌། ངེས་པར་འབྱུང་བའི་བློས་བསླབ་པ་ལ་རབ་ཏུ་དྭང་ཞིང་མོས་པའི་བློ་དང་ལྡན་པས། བསླབ་བྱ་ལ་དབྱེ་ན། སྡོམ་པའི། དགེ་བ་ཆོས་སྡུད་ཀྱི། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ལས། དང་པོ་ནི། ཐུན་མོང་བ་སོ་ཐར་རིས་བདུན། ཐུན་མོང་མ་ཡིན་པ་ཤིང་རྟ་གཉིས་ཀྱི་བཀའ་སྲོལ་ལས་བྱུང་བའི་བྱང་སྡོམ་གྱི་བསླབ་བྱ་ཐམས་ཅད་ལེགས་པར་བསྲུངས་ཏེ་སྒོ་གསུམ་ལ་ཁ་ན་མ་ཐོ་བར་འགྱུར་བའི་ཉེས་སྤྱོད་ཀྱི་རྒྱུན་བཅད་དེ་ཕྱིན་ཆད་བསྡམ་པ་དང༌། གཉིས་པ་ནི། གཙོ་བོར་ལུས་ངག་གི་བྱ་བ་དང་འབྲེལ་ཞིང་ཤེས་རབ་ཀྱིས་མ་ཟིན་པ་ཟག་བཅས་ཀྱི་དགེ་བ་དང༌། གཙོ་བོར་སེམས་ཀྱི་ཏིང་ངེ་འཛིན་དང་འབྲེལ་ཞིང་ཤེས་རབ་ཀྱིས་ཟིན་པ་ཟག་མེད་ཀྱི་དགེ་བའི་ཚོགས་ཅི་ནུས་སུ་བསྒྲུབ་པ་དང༌། གསུམ་པ་ནི། བྱང་ས་ལས་བྱ་བ་དོན་ལྡན་གྱི་གྲོགས་བྱེད་པ་སོགས་རྣམ་པ་བཅུ་གཅིག་ཏུ་གསུངས་ཀྱང༌། མདོར་ན་སྒོ་གསུམ་གྱི་བྱ་བ་ཅི་བྱེད་པ་ཐམས་ཅད་སེམས་ཅན་གཞན་ཁོ་ནའི་དོན་དུ་བྱེད་པའི་ལྷག་བསམ་གྱི་འཕེན་པ་བཏང་ནས་དངོས་སུ་གཞན་ཕན་གྱི་བྱ་བ་ལག་ཏུ་ཅི་ལོན་བྱའོ།

།གསུམ་པ་བཟོད་པའི་ངོ་བོ་ནི། བཟང་ངན་ལ་དགག་སྒྲུབ་བྲལ་བའི་ཇི་མི་སྙམ་པ། དོན་ཆེད་མི་འོས་པའི་ལོག་སྒྲུབ་སོགས་གནོད་པའི་ཡུལ་གྱིས་རང་གི་ལྷག་པའི་བསམ་པ་ལ་ནམ་ཡང་མི་བརྫི་ཞིང་གཡོ་བ་མེད་པའི་ཕྱིར་བསྒོམ་པ་སྟེ། དེ་ལ་དབྱེ་ན། གནོད་པ་ལ་ཇི་མི་སྙམ་པ། སྡུག་བསྔལ་དང་ལེན། ཆོས་ལ་ངེས་སེམས་གསུམ་ལས། དང་པོ་ནི། བདག་དང་བདག་གི་བའི་ཕྱོགས་ལ་ཁྲོ་འཁྲུགས་བཅོམ་རྡེག་གཤེ་སྐུར་བྱེད་པ་སོགས་གནོད་པ་ལ་ཁོང་ཁྲོ་བྱུང་ན། བསྐལ་པ་སྟོང་དུ་བསགས་པ་ཡི། །སྦྱིན་དང་བདེ་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང༌། །ཁོང་ཁྲོ་གཅིག་གིས་འཇོམས་པར་འགྱུར། །ཅེས་སོགས་དེའི་ཉེས་པ་དྲན་ཅིང་གཞན་ཡང་འདུ་ཤེས་ལྔ་དང་བརྟག་པ་རྣམ་པ་དགུའི་སྒོ་ནས་གནོད་པ་དེ་དག་ལ་ཇི་མི་སྙམ་དུ་བཟོད་པ་དང༌། གཉིས་པ་ནི། བྱང་ཆུབ་སྒྲུབ་པའི་ཆོས་ཀྱི་ཕྱིར་དུ་རང་གི་སྒོ་གསུམ་ལ་བྱ་དཀའ་བའི་སྡུག་བསྔལ་ཆེན་པོ་ཅི་ཞིག་བྱུང་ཡང་སྤྲོ་བ་ཉམས་པ་མེད་པར་དགའ་བཞིན་དང་དུ་ལེན་པ་ནི། དཔེར་ན་ནད་དྲག་པོའི་སྡུག་བསྔལ་སེལ་སླད་དཔྱད་རྩུབ་མོ་བསྟེན་པ་བཞིན་འཁོར་བའི་གཡུལ་ངོ་ཟློག་ཅིང་ཉོན་མོངས་པའི་དགྲ་འཇོམས་པའི་དཔའ་བོ་ཆེན་པོ་ཡིན་པ་དང༌། གསུམ་པ་ནི། དཀོན་མཆོག་གི་ཡོན་ཏན་སོགས་བསམ་གྱིས་མི་ཁྱབ་པའི་གནས་རྣམས་ལ་མོས་པ་དང༌། ཁྱད་པར་ཡང་དག་པའི་དེ་ཁོ་ན་ཉིད་བདག་རྣམ་པ་གཉིས་ཀྱིས་སྟོང་པའི་གནས་ལུགས་སྤྲོས་བྲལ་སྟོང་པ་ཉིད་ཟབ་མོ་ལ་སྐྲག་པ་མེད་པ་དང་མོས་ཤིང་ཁོང་དུ་ཆུད་པར་བྱ་བའོ། །བཞི་པ་བརྩོན་འགྲུས་ཀྱི་ངོ་བོ་ནི། དགེ་བ་ལ་སྤྲོ་ཞིང་ལེ་ལོ་མེད་པ། རྒྱུ་སྔོན་གྱི་ལས་འཕྲཽ་བཟང་པོས་སྙིང་སྟོབས་རླབས་པོ་ཆེ་དཀར་པོ་དགེ་བའི་ཕྱོགས་སུ་སད་པ། དེ་ཡིས་བརྩོན་བྱ་ལ་དབྱེ་ན། གོ་ཆའི། སྦྱོར་བའི། དོན་བྱེད་ཀྱི་བརྩོན་འགྲུས་གསུམ་ལས། དང་པོ་ནི། དུས་འདི་ནས་བཟུང་སྟེ་སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་མ་བཀོད་ཀྱི་བར་དུ་བདག་གི་བྱང་ཆུབ་སྤྱོད་པ་སྐད་ཅིག་ཀྱང་མི་འདོར་སྙམ་དུ་དུས་རིང་བ་དང་བསྒྲུབ་དཀའ་བ་སོགས་ལ་སེམས་ཞུམ་པ་མེད་པའི་གོ་ཆ་གྱོན་པ་དང༌། གཉིས་པ་ནི། ཉོན་མོངས་སྤོང་བ་དང༌། དགེ་བ་སྒྲུབ་པ་དང༌། གཞན་དོན་བྱེད་པ་རྣམས་ལ་ཉིན་དང་མཚན་མོ་ཀུན་ཏུ་སྐད་ཅིག་ཀྱང་ཡེངས་པ་མེད་པར་རྟག་གུས་མི་གཡོ་མི་ལྡོག་ང་རྒྱལ་མེད་པའི་བརྩོན་འགྲུས་བརྩམ་པ་དང༌། གསུམ་པ་ནི། སེམས་ཅན་གཞན་ལ་དངོས་དང་བརྒྱུད་ནས་ཕན་པར་བྱེད་པའི་དོན་ཅུང་ཟད་རེ་འགྲུབ་ན་རང་ཉིད་བསྐལ་པར་ངན་འགྲོར་གནས་དགོས་ནའང་སྐྱོ་བ་དང་ངལ་བའི་སེམས་སྤང་བར་བྱས་ནས་དོན་དེ་ཐོག་མར་སྒྲུབ་པར་བྱེད་པའོ། །ལྔ་པ་བསམ་གཏན་གྱི་ངོ་བོ་ནི། སེམས་བྱུང་དགེ་བའི་ངོ་བོར་ནང་དུ་རྩེ་གཅིག་ཏུ་གནས་པ། སྦྱོར་བ་རང་གི་ཡིད་གཡོ་བ་དང་བཅས་པ་འདི་ནི་གནོད་པ་དང་སྡུག་བསྔལ་ཐམས་ཅད་ཀྱི་རྩ་བ་ཡིན་པས་རྣམ་པར་རྟོག་པ་ཞི་བའི་བདེ་བ་ལ་མངོན་པར་འདོད་པའི་སེམས་པས། ལུས་འདུ་འཛི། སེམས་རྣམ་རྟོག་ལས་བསྲིང་ཞིང་འདོད་ཆུང་ཆོག་ཤེས་སོགས་རྒྱུ་བསྒྲུབ་པ་དང༌། ཉེས་པ་ལྔ་སྤངས་པའི་འདུ་བྱེད་བརྒྱད་བསྟེན་པ་སོགས་སྔོན་དུ་སོང་ནས་དངོས་གཞིའི་བསམ་གཏན་ལ་དབྱེ་ན། མཐོང་ཆོས་བདེར་གནས། ཡོན་ཏན་སྒྲུབ་པ། སེམས་ཅན་དོན་བྱེད་གསུམ་ལས། དང་པོ་ནི། སེམས་གནས་པའི་ཐབས་དགུ་ལ་བརྟེན་ཏེ། རྣམ་རྟོག་ཀུན་དང་བྲལ་བའི་ལུས་སེམས་ཤིན་སྦྱང་གི་བདེ་བ་རོ་མྱོང་དང་རློམས་སེམས་མེད་པ་འཇིག་རྟེན་པའི་ལམ་དང་ཐུན་མོང་གྱུར་པའི་བསམ་གཏན་ཡིན་ལ། དེ་ཉིད་ཡོན་ཏན་ཐམས་ཅད་སྐྱེ་བའི་རྟེན་ཡིན་པས་གཞིར་བཟུང་བར་བྱ་དགོས་ཏེ། དེ་ལ་འང་བསམ་གཏན་དང་པོ་ནས་བཞི་པའི་བར་དུ་ཉེར་བསྡོགས་དང་དངོས་གཞི་རྣམས་ཀྱི་ཁྱད་པར་སོགས་ཡོད་དོ། །གཉིས་པ་ནི། བསམ་གཏན་དང་པོའི་དངོས་གཞི་ཡན་ཆད་ཐོབ་པར་བྱེད་པ་ལ་ཡིད་བྱེད་བདུན་གྱིས་འཇིག་རྟེན་པའི་ལྷག་མཐོང་བསྒྲུབ་དགོས་པས་མཉམ་གཞག་ཞི་གནས་དང་རྗེས་ཐོབ་ལྷག་མཐོང་གཙོར་བྱེད་པ་དང་བཅས། ཉན་ཐོས་དང་ཐུན་མོང་བ་ཟད་པར་བཅུ་དང་ཟིལ་གནོན་དང་རྣམ་ཐར་བརྒྱད་ལ་སོགས་པ་དང༌། ཐུན་མོང་མིན་པ་ཉན་རང་གི་སྤྱོད་ཡུལ་ལས་འདས་པའི་རྣམ་ཐར་དང་ཏིང་ངེ་འཛིན་གྱི་སྒོ་མཐའ་ཡས་པ་རབ་ཏུ་བསྒྲུབས་པས་ཚོགས་སྦྱོར་མཐར་ཕྱིན་པའོ།

།གསུམ་པ་ནི། དེ་ནས་མཐོང་ལམ་ཡན་ཆད་དུ་འཕགས་པའི་ཏིང་ངེ་འཛིན་ཐོབ་པ་ལ་ཟག་མེད་དམ་དེ་བཞིན་གཤེགས་དགའི་བསམ་གཏན་ཅེས་བྱ་སྟེ། དེའི་མཐུས་ལུས་ཀྱི་བཀོད་པ་མཐའ་ཡས་པ་སྤྲུལ་ཏེ་གཞན་དོན་བཅུ་གཅིག་སོགས་དེ་བཞིན་གཤེགས་པའི་སྤྱོད་ཡུལ་ཉིད་ལ་ཞུགས་པ་སྟེ། རྒྱུད་བླར། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་སངས་རྒྱས་ཐམས་ཅད་དང༌། །འགྲོ་བ་ཡང་དག་སྒྲོལ་བ་ལ། །འཇིག་རྟེན་ན་ནི་མཚུངས་པ་ཉིད། །ཅེས་སོགས་གསུངས་པ་ལྟར་རོ། །འདི་ཡན་ཆད་ཀྱི་ཕར་ཕྱིན་ཐམས་ཅད་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་ཅིང་ཞེན་པ་དང་རེ་བ་མེད་པ་དང་མཐར་མི་རྟོག་པའི་བསྔོ་བས་སྤེལ་ཞིང༌། སྟོང་ཉིད་དང་སྙིང་རྗེས་དག་པའི་ཐབས་དང་ལྡན་དགོས་སོ། །དྲུག་པ་ཤེས་རབ་ཀྱི་ངོ་བོ་ནི། ཆོས་ཐམས་ཅད་རབ་ཏུ་རྣམ་པར་འབྱེད་པའི་བློ་གྲོས་ཏེ་དངོས་སངས་རྒྱས་ཀྱིས་སས་བསྡུས་པ་ཡིན་ཀྱང༌། འདིར་དེའི་རྒྱུ་སོ་སོར་རྟོག་པའི་བློ་གྲོས་ཀྱིས་ཤེས་རབ་ཇི་ལྟར་བསྐྱེད་ན། ཀླུ་སྒྲུབ་ཀྱིས། ཤེས་རབ་རྒྱས་བྱེད་པ་ནི་ཐོས་པ་སྟེ། བསམས་པ་དང་ནི་གཉིས་པོ་ཡོད་གྱུར་ན། །དེ་ལས་སྒོམ་པ་ཡང་ནི་རབ་ཏུ་འབྱུང༌། །དེ་ལས་དངོས་གྲུབ་བླ་ན་མེད་པ་འཐོབ། །ཅེས་གསུངས་པ་ལྟར་ཐོས་བསམ་སྒོམ་པའི་ཤེས་རབ་གསུམ་རིམ་གྱིས་བསྐྱེད་པར་བྱ་བ་ལས། དང་པོར་ཐོས་པའི་ཤེས་རབ་ཀྱིས་ཤེས་བྱ་ཇི་སྙེད་པའི་ཆོས་རྣམས་ཀྱི་སྒྲ་ཚིག་མ་ལུས་པ་ཁོང་དུ་ཆུད་པར་བྱ་དགོས་ཏེ། དེའང་སྒྲ་ཚད་བཟོ་གསོ་ལ་སོགས་པ་འཇིག་རྟེན་པའི་ཤེས་རབ་དང༌། ལེགས་གསུང་བཀའ་དང་དགོངས་འགྲེལ་བསྟན་བཅོས་ཤེས་པ་ལ་འཇིག་རྟེན་ལས་འདས་པའི་ཤེས་རབ་ཅེས་འབྲས་མིང་རྒྱུ་ལ་བཏགས་པ་བཅས། མདོར་ན་ཤེས་བྱ་གང་ལའང་རྨོངས་པ་མེད་པའི་ཐོས་པ་ཕྱོགས་མེད་དུ་བྱ། གཉིས་པ་ནི། ཐོས་པ་དེའང་བླུན་པོ་དད་པའི་རྗེས་འབྲང་ཙམ་དུ་མ་བཞག་བར་བར་དུ་རྟོག་ཅིང་ཞིབ་མོར་དཔྱོད་པའི་བསམ་པས་དོན་སྤྱི་ཙམ་དུ་མ་ལུས་པར། ཚད་མའི་ལུང༌། དངོས་སྟོབས་ཀྱི་རིག་པ། འགལ་མེད་ཀྱི་སྒྲུབ་བྱེད་དང་ལྡན་པས་བདེན་གཉིས་དྲང་ངེས་ལ་སོགས་ཟབ་མོའི་དོན་གྱི་གོ་བ་ཚུལ་བཞིན་དུ་བཙལ། གསུམ་པ་ནི། ཐོས་བསམ་གྱིས་ངེས་པ་རྙེད་པའི་ཚུལ་དེ་ཉིད་ཐ་མར་བླང་དོར་གྱི་སྒོ་ནས་རང་གི་རྒྱུད་ལ་སྦྱོར་ཞིང་ཁྱད་པར་ལྟ་བའི་དོན་ཉིད་རྩེ་གཅིག་ཏུ་སྒོམ་པས་ཉམས་སུ་བླངས་ཏེ་ཚིག་དང་ཡིད་དཔྱོད་ཙམ་དུ་མ་སོང་བར་གནས་ལུགས་ཀྱི་དོན་ཡང་དག་པའི་མངོན་རྟོག་ཉིད་མངོན་དུ་ཐོབ་པར་བྱའོ། །འདི་དག་གི་དོན་རྒྱས་པ་མདོ་རྒྱན་སོགས་སུ་འབྱུང་བ་ལྟར་ལ། བསྡུ་ན་ཕྱིན་དྲུག་གི་མཚན་ཉིད་ནི། བྱང་སེམས་ཀྱིས་བསྒྲུབ་པའི་བསླབ་བྱ་གང་ཞིག །ཁྱད་ཆོས་བཞི་དང་ལྡན་པའི་སྦྱིན་སོགས་དྲུག་གིས་བསྡུས་པའི་དགེ་བ་མཐའ་དག་སྒྲུབ་པའི་སེམས་པ་མཚུངས་ལྡན་དང་བཅས་པའོ། །ཁྱད་ཆོས་བཞི་ནི། རང་རང་གི་མི་མཐུན་ཕྱོགས་དང་བྲལ་བ། གྲོགས་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བྱེད་ལས་གཞན་གྱི་འདོད་དོན་རྫོགས་པར་བྱེད་པ། དེ་ལྟར་བྱས་ནས་ཆོས་བསྟན་པས་གདུལ་བྱའི་རྒྱུད་བྱང་ཆུབ་གསུམ་གང་རུང་དུ་སྨིན་པར་བྱེད་པའོ།

།རབ་དབྱེ་ནི། སྦྱིན་པ་སོགས་དྲུག་པོ་རེ་རེ་ལའང་སྦྱིན་སོགས་དྲུག་རེར་དབྱེ་ན། གཞན་ཕ་རོལ་ཏུ་ཕྱིན་པ་དྲུག་ལ་འགོད་པ་སྦྱིན་པའི་སྦྱིན་པ་སོགས་སོ་སོའི་སྦྱིན་པ། དེ་བཞིན་དུ་རང་རང་གི་མི་མཐུན་ཕྱོགས་ཀྱིས་མ་གོས་པར་སྤྱོད་པ་སོ་སོའི་ཚུལ་ཁྲིམས། །རང་རང་གི་དཀའ་སྤྱད་བཟོད་པས་སྤྱོད་པ་སོ་སོའི་བཟོད་པ། དགའ་སྤྲོ་དང་བཅས་པས་སྤྱོད་པ་སོ་སོའི་བརྩོན་འགྲུས། དེ་ལྟར་བརྩོན་པས་སེམས་ཟིན་ཏེ་གཞན་དུ་མི་གཡེང་བས་སྤྱོད་པ་སོ་སོའི་བསམ་གཏན། འཁོར་གསུམ་མི་རྟོག་པའི་སྒོ་ནས་ཕྱིན་དྲུག་ལ་སྤྱོད་པ་སོ་སོའི་ཤེས་རབ་སྟེ་སུམ་ཅུ་རྩ་དྲུག་ཏུ་འགྱུར་བར་མངོན་རྒྱན་ལས་བཤད་ཅིང༌། དེར་མ་ཟད་མདོ་སྡེ་བསྐལ་བཟང་ལས་དབྱེ་བ་རྒྱ་ཆེར་འབྱུང་བ་སོགས་སོ། །གྲངས་ངེས་ནི། བྱང་སེམས་ཀྱི་བསྒྲུབ་པའི་ཆོས་ཐམས་ཅད་བསླབ་པ་གསུམ་དུ་འདུ་བ་ལ་ལྟོས་ནས་ཕ་རོལ་ཏུ་ཕྱིན་པ་དྲུག་ཏུ་གྲངས་ངེས་པ་ཡིན་ཏེ། སྤྱིན་པས་ལོངས་སྤྱོད་ལ་ཆགས་པ་དང་བྲལ་བ་ལས་ཚུལ་ཁྲིམས་ཕུན་སུམ་ཚོགས་པར་འགྱུར་ལ། དེ་ལས་དགེ་སྦྱོང་དུ་བྱེད་པའི་ཆོས་བཞི་དང་ལྡན་པར་འགྱུར་བས་བཟོད་པ་སྟེ། དེ་གསུམ་ནི་རྒྱུ་དང་ངོ་བོ་དང་ཁྱད་པར་གྱི་སྒོ་ནས་ལྷག་པ་ཚུལ་ཁྲིམས་ཀྱི་བསླབ་པར་བསྡུས་སོ། །བསམ་གཏན་ནི་ལྷག་པ་ཏིང་ངེ་འཛིན་གྱི་བསླབ་པ་དང༌། ཤེས་རབ་ནི་ལྷག་པའི་ཤེས་རབ་ཀྱི་བསླབ་པར་བསྡུས་ལ། བརྩོན་འགྲུས་ནི་དེ་ཐམས་ཅད་ཀྱི་གྲོགས་སུ་འགྱུར་བ་ཡིན་ནོ། །སྒྲུབ་ཚུལ་ནི་མདོ་རྒྱན་ལས། རེ་བ་མེད་པའི་སྦྱིན་པ་དང༌། །ཡང་སྲིད་མི་འདོད་ཚུལ་ཁྲིམས་དང༌། །ཐམས་ཅད་ལ་ནི་བཟོད་པ་དང༌། །ཡོན་ཏན་ཀུན་སྡུད་བརྩོན་འགྲུས་དང༌། །དེ་བཞིན་བསམ་གཏན་གཟུགས་མེད་མིན། །ཤེས་རབ་ཐབས་དང་ལྡན་པ་ཡིན། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱིས་ཡང་དག་སྦྱོར། །ཅེས་སོ། །དེ་ཐམས་ཅད་ཀྱང་དམ་པ་དྲུག་དང་ལྡན་པར་ཉམས་སུ་བླང་དགོས་ཏེ། རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཕྱོགས་རེ་མ་ཡིན་པར་གཞི་ཐམས་ཅད་ལ་འཇུག་པ། ཆེད་དུ་བྱ་བ་དམ་པ་སེམས་ཅན་ཐམས་ཅད་ཀྱི་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་བསྔོ་བ། རྣམ་དག་དམ་པ་སྒྲིབ་གཉིས་ཀྱི་དངོས་གཉེན་དུ་སྤྱོད་པ་རྣམས་སོ། །གཉིས་པ་གཞན་སྨིན་བྱེད་བསྡུ་དངོས་ལ་བསླབ་པའི་ཚུལ་ནི། རང་རྒྱུད་སྨིན་ནས་སྦྱིན་པས་འཁོར་བསྡུས་ལ༔ སྙན་པས་ཡིད་དྲངས་དོན་མཐུན་བག་ཕབས་ཏེ༔ དོན་སྤྱོད་གྲོས་གདབ་གནས་སྐབས་མཐར་ཐུག་ཏུ༔ ཕན་དང་བདེ་བའི་དཔལ་ལ་རབ་ཏུ་དགོད༔ ཅེས་གསུངས་ཏེ། དེ་ལྟར་འཇུག་པའི་སྤྱོད་པ་ལ་བསླབས་པས་རང་རྒྱུད་ཡོངས་སུ་སྨིན་པར་གྱུར་ནས་སེམས་ཅན་གཞན་དག་སྨིན་པར་བྱེད་དགོས་པས། དེའི་ཐབས་སམ་ལག་ལེན་ཐམས་ཅད་ཀྱི་གཙོ་བོར་གྱུར་པ་ནི་བསྡུ་བའི་དངོས་པོ་བཞི་ཡིན་ཏེ། མདོ་རྒྱན་ལས། སྦྱིན་མཚུངས་དེ་སྟོན་ལེན་འཇུག་དང༌། །བདག་ཉིད་རྗེས་སུ་འཇུག་རྣམས་ཀྱིས། །སྙན་པར་སྨྲ་དང་དོན་སྤྱོད་དང༌། །དོན་མཐུན་ཉིད་དུ་འདོད་པ་ཡིན། །ཞེས་གོ་རིམ་དང་རྣམ་གྲངས་བསྟན། ཕན་པར་བྱེད་པའི་ཐབས་དང་ནི། །འཛིན་པར་བྱེད་དང་འཇུག་བྱེད་དང༌། །དེ་བཞིན་རྗེས་སུ་འཇུག་བྱེད་པས། །བསྡུ་བའི་དངོས་པོ་བཞིར་ཤེས་བྱ། །ཞེས་དགོས་ཆེད་སྒྲ་དོན་སོགས་རྒྱས་པར་གསུངས་པ་དེ་མཚུངས་པདྨ་སྤུངས་པ་ལས། སྦྱིན་པའི་གཡབ་མོས་ལེགས་བོས་ཏེ། །སྙན་པར་སྨྲ་བའི་ཚིག་གིས་བསུ། །དོན་སྤྱོད་པ་ཡིས་བག་ཕབ་སྟེ། །དོན་མཐུན་གྲོས་ཆེན་གདབ་པར་བྱ། །ཞེས་ཇི་ལྟར་བྱ་བའི་ཚུལ་ཡང་བསྟན་པ་ལྟར། ཐོག་མར་གདུལ་བྱའི་སྣོད་ལྡན་འཁོར་དུ་མ་འདུས་པ་རྣམས་ལ་ཟང་ཟིང་གི་དངོས་པོ་ཇི་ལྟར་འོས་པ་སྦྱིན་པས་ལེགས་པར་བསྡུས་ལ། འདུས་ནས་ཕ་རོལ་པོའི་བློ་ལ་འཐད་ཅིང་ཡིད་ལ་འབབ་པའི་ཚིག་སྙན་པར་སྨྲ་བའི་གཏམ་སྨྲས་པས་ཡིད་ཐར་པ་དང་ཐམས་ཅད་མཁྱེན་པའི་ལམ་དུ་དྲང༌། དྲངས་པ་དེ་དག་སླར་མི་ལྡོག་པ་རང་གི་རྗེས་སུ་འཇུག་ཅིང་སྤྲོ་བ་སྐྱེད་པའི་ཕྱིར་རང་ཉིད་ཀྱང་གཞན་ལ་བཤད་བྱའི་ཆོས་དོན་དེ་དག་དང་མི་འགལ་ཞིང་མཐུན་པར་སྤྱོད་པ་ལ་སྐྱོ་དུབ་མེད་པར་བྱ་བས་བློ་བག་ཕབས་ཏེ། གདུལ་བྱའི་ཁམས་དང་དབང་པོ་དམན་འབྲིང་མཆོག་གི་ཁྱད་པར་དང་མཐུན་པར་ཐེག་པ་ཆེ་ཆུང་གི་ཆོས་སྒོ་སོ་སོར་བསྟན་ནས་དེའི་དོན་སྒྲུབ་ཅིང་སྤྱོད་དུ་འཇུག་པའི་གཏན་འདུན་གྱི་གྲོས་ཆེན་གདབ། བཞི་པོའང་བསྡུ་ན་ཟང་ཟིང་དང་ཆོས་ཀྱི་སྦྱིན་པ་གཉིས་སུ་འདུ་བ་ཡིན་ལ། དེ་གཉིས་པོས་གནས་སྐབས་དང་མཐར་ཐུག་དག་ཏུ་འཕྲལ་གྱི་ཕན་པ་དང་ཡུན་གྱི་བདེ་བའི་དཔལ་ལ་འགྲོ་བ་རྣམས་རབ་ཏུ་འགོད་པར་བྱའོ།

།གསུམ་པ་དེ་དག་གི་ཉམས་ལེན་སྙིང་པོར་དྲིལ་ཏེ་བློ་སྦྱོང་བའི་ཚུལ་ནི། གནད་ཀྱི་སྙིང་པོ་སེམས་ཅན་ཐམས་ཅད་ཀྱི༔ སྡུག་བསྔལ་མ་ལུས་བདག་གི་ཁུར་དུ་བླང་༔ བདག་གི་བདེ་དགེ་འགྲོ་དྲུག་ཀུན་ལ་སྦྱིན༔ རྐྱེན་གྱིས་མི་འཆོར་སྙིང་རྗེ་བྱང་སེམས་སྦྱང་༔ ཞེས་གསུངས་ཏེ། བྱང་ཆུབ་སེམས་དཔའི་ཉམས་ལེན་མ་ལུས་པའི་གནད་ཀྱི་སྙིང་པོར་དྲིལ་ན་གསུམ་སྟེ། རྒྱུ་ལ་སྦྱོང་བ་བྱམས་པ་དང་སྙིང་རྗེ་དྲག་ཏུ་བསྒོམ། སེམས་དངོས་ལ་སྦྱོང་བ་ཉིན་མཚན་དུས་དྲུག་ཏུ་སེམས་བསྐྱེད་བླང༌། སྤྱོད་པ་ལ་སྦྱོང་བ་དགེ་བ་གཞན་དོན་དུ་བསྔོ་ཞིང་བདེ་སྡུག་བཏང་ལེན་ལ་རྩེ་གཅིག་ཏུ་འབད་པར་བྱ་སྟེ། དེའང་ཞི་བ་ལྷས། གང་ཞིག་བདག་དང་གཞན་རྣམས་ནི། །མྱུར་དུ་བསྐྱབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་གསུངས་པ་ལྟར་བདག་གཞན་བརྗེ་བའི་བློ་སྦྱོང་ཟབ་མོ་ལ་བསླབ་པ་གལ་ཆེ་སྟེ། དེའི་རྒྱུ་མཚན་ཡང༌། འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང༌། །འཇིག་རྟེན་སྡུག་བསྔལ་ཇི་སྙེད་པ། དེ་ཀུན་རང་བདེ་འདོད་ལས་བྱུང༌། ཞེས་དང༌། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་ནི་མི་འགྲུབ་ཅིང༌། །འཁོར་བ་ན་ཡང་བདེ་བ་མེད། །ཅེས་རྣལ་མ་དང་ལྡོག་ཕྱོགས་ཀྱི་སྒོ་ནས་བསྟན་པ་ལྟར་ཡིན་ལ། དེའི་ཚུལ་ཡང༌། ཁེ་དང་རྒྱལ་ཁ་གཞན་ལ་སྦྱིན། །གྱོང་དང་བུབ་ཁ་རང་གིས་བླང༌། །ཞེས་པའི་དོན་ལྟར་ནམ་མཁས་ཁྱབ་པའི་མར་གྱུར་སེམས་ཅན་ཐམས་ཅད་ཀྱི་རྒྱུད་ལ་ཐོག་མ་མེད་པ་ནས་བསགས་པའི་རྒྱུ་ལས་དང་ཉོན་མོངས་པ། འབྲས་བུ་ལུས་སེམས་ལ་སྡུག་བསྔལ་གྱི་ཚོར་བ་ཇི་སྙེད་ཡོད་པ་ཐམས་ཅད་བདག་གི་ཁུར་དུ་ཐེ་ཚོམ་མེད་པར་དགའ་བཞིན་སྤྲོ་བཞིན་དུ་བླང་བའི་འདུན་པ་བྱ་བ་དང༌། བདག་གི་རྒྱུད་ལ་ཐོག་མ་མ་མཆིས་པ་ནས་བསགས་པའི་རྣམ་དཀར་གྱི་དགེ་བའི་རྩ་བ་དང༌། འབྲས་བུ་ལུས་སེམས་ལ་བདེ་བའི་ཚོར་བ་ཅི་ཡོད་པ་ཐམས་ཅད་འགྲོ་བ་རིགས་དྲུག་གི་སེམས་ཅན་ཀུན་ལ་རེ་རེ་ནས་ཚང་བར་སྦྱིན་པའི་འདུན་པ་བྱ་བ་སྟེ། དེ་དག་ཀྱང་བློ་སྦྱོང་དོན་བདུན་མ་ལས། གཏོང་ལེན་གཉིས་པོ་སྤེལ་མར་སྦྱང༌། །དེ་གཉིས་རླུང་ལ་བསྐྱོན་ཏེ་བྱ། །ཞེས་པ་ལྟར་ཉམས་སུ་ལེན་ཅིང༌། ཁམས་བཟང་ངན་སྐྱིད་སྡུག་མཐོ་དམན་ཇི་ལྟར་བྱུང་ཡང་རྐྱེན་ངན་གྱིས་མི་འཆོར་བའི་གོ་ཆ་ཆེན་པོ་བགོས་ལ་སྙིང་རྗེ་གཞིར་བྱས་པའི་ཀུན་རྫོབ་བྱང་ཆུབ་ཀྱི་སེམས་རྩེ་གཅིག་ཏུ་སྦྱངས་ལ་སྐྱེས་བརྟན་གོང་འཕེལ་དུ་བྱའོ།

།གཉིས་པ་དོན་དམ་སེམས་བསྐྱེད་བསྟན་པ་ལ་གསུམ། ལྟ་བས་ཐག་བཅད་པ། སྒོམ་པས་ཉམས་སུ་ལེན་པ། དེའི་འབྲས་བུ་བསྟན་ཏེ་མཚམས་སྦྱར་བའོ། །དང་པོ་ལའང་བཞི། ཕྱི་གཟུང་ཡུལ་རང་བཞིན་མེད་པར་གཏན་ལ་འབེབས་པ། ནང་འཛིན་པ་དང་གང་ཟག་གི་བདག་རང་བཞིན་མེད་པར་གཏན་ལ་འབེབས་པ། དཔྱོད་བྱེད་ཀྱི་བློ་རང་བཞིན་མེད་པར་གཏན་ལ་འབེབས་པ། སྐབས་ཀྱི་དོན་བསྡུ་བའོ། །དང་པོ་ནི། ཁྱད་པར་ཕྱི་རོལ་འཛིན་པས་གཟུང་བའི་ཡུལ༔ ཐམས་ཅད་བདེན་མིན་སྒྱུ་མ་ལྟ་བུར་སྣང་༔ རྟག་པ་མ་ཡིན་མི་རྟག་དོན་བྱེད་ནུས༔ གཅིག་པུ་མ་ཡིན་སྣ་ཚོགས་འབྱུང་ཞིང་འགྱུར༔ རང་དབང་མེད་དེ་ལས་ཀྱི་ཕྱི་བཞིན་འགྲོ༔ རྡུལ་ཕྲན་མ་ཡིན་ཆ་མེད་རྡུལ་མ་གྲུབ༔ གལ་ཏེ་གྲུབ་ན་རགས་པ་བརྩམ་མི་ནུས༔ ཆ་བཅས་ཡིན་ན་ཆ་མེད་དམ་བཅས་འགལ༔ དེས་ན་མེད་སྣང་རྫུན་སྣང་རྟེན་འབྲེལ་ཙམ༔ རྨི་ལམ་སྒྱུ་མ་ཆུ་ཡི་ཟླ་བ་འདྲ༔ དྲི་ཟའི་གྲོང་ཁྱེར་འཇའ་ཚོན་ལྟ་བུར་བལྟ༔ ཞེས་གསུངས་ཏེ། ཐབས་ཀུན་རྫོབ་བྱང་སེམས་ལས་ཁྱད་པར་དུ་གྱུར་པ་ཤེས་རབ་དོན་དམ་བྱང་ཆུབ་ཀྱི་སེམས་སྒོམ་པ་ལའང་ཐོག་མར་ཕྱི་རོལ་དུ་བདེན་བདེན་ལྟར་སྣང་བ་བདག་ཏུ་འཛིན་པས་གཟུང་བར་བྱ་བའི་ཡུལ་ཐམས་ཅད་ལུང་རིག་གིས་ལེགས་པར་བརྟགས་ན་གཅིག་ཀྱང་བདེན་པ་མ་ཡིན་པ་སྒྱུ་མ་མཁན་གྱིས་སྤྲུལ་པའི་སྒྱུ་མའི་དངོས་པོ་ལྟ་བུར་སྣང་བ་ཡིན་ནོ། །དེའང་གྲུབ་མཐས་བློ་མ་བསྒྱུར་བའི་འཇིག་རྟེན་ཕལ་པ་རྣམས་ཀྱིས་སྣང་དངོས་བདེན་རྟག་ཏུ་ཞེན་ཅིང༌། གྲུབ་མཐའ་ལོག་པར་ཞུགས་པའི་མུ་སྟེགས་པ་རྣམས་ཀྱིས་རྟག་པ། གཅིག་པུ། རང་དབང་ཅན་སོགས་སུ་འདོད་པ་ཡོད་ཀྱང་མ་རྟོགས་པ་དང་ལོག་པར་རྟོག་པ་ལ་ཞུགས་པ་ཡིན་ཏེ། འདི་ལྟར་སྣང་དངོས་རྣམས་ཆོས་ཅན། རྟག་པ་མ་ཡིན་པར་ཐལ། རྟག་ལ་བྱ་བ་མེད་ཕྱིར་རོ། །ཞེས་པ་ལྟར་ཏེ་ནམ་མཁའ་བཞིན་ནོ། །དེ་ཆོས་ཅན། མི་རྟག་པར་ཐལ། འཁྲུལ་ངོར་རྒྱུན་འཕོ་བས་དོན་བྱེད་ནུས་པའི་ཕྱིར། ས་བོན་དང་མྱུ་གུ་བཞིན་ནོ། །སྣང་བ་ཆོས་ཅན། གཅིག་པུ་མ་ཡིན་པར་ཐལ། དངོས་སྣང་སྣ་ཚོགས་སུ་འབྱུང་ཞིང་འགྱུར་བའི་ཕྱིར། ཆུའི་དངོས་པོ་གཅིག་ལ་རིགས་དྲུག་གི་མཐོང་ཚུལ་ཐ་དད་པ་བཞིན། དེ་ཆོས་ཅན། སྣ་ཚོགས་པའང་དོན་ལ་བདེན་པ་མེད་པར་ཐལ། རྐྱེན་ལས་བྱུང་བའི་ཕྱིར་འཇའ་ཚོན་བཞིན་ནོ། །ཁམས་གསུམ་པོ་ཆོས་ཅན། རང་དབང་དུ་འགྱུར་བ་མེད་པར་ཐལ། ལས་ཀྱི་ཕྱི་བཞིན་དུ་འགྲོ་བའི་ཕྱིར། འགྱུར་བའི་སྡུག་བསྔལ་བཞིན་ནོ། །ལས་ཆོས་ཅན། དོན་དམ་པར་མི་བདེན་པར་ཐལ། རྫས་དང་དུས་ཀྱི་དངོས་པོར་མ་གྲུབ་པའི་ཕྱིར། འདུས་མ་བྱས་པ་བཞིན་ནོ། །དེའང་གོ་སླ་བར་བརྗོད་ན། འདུས་བྱས་ཀྱི་དངོས་པོ་ཐམས་ཅད་ནི་རྟག་པ་མ་ཡིན་ཏེ། དེ་ཡིན་ན་རྟག་དངོས་གཞན་དུ་འགྱུར་མི་སྲིད་པས་ནམ་མཁའི་རང་བཞིན་གང་དུའང་མི་འགྱུར་བ་བཞིན་དོན་བྱེད་མི་ནུས་པའི་ཕྱིར། མི་རྟག་པ་ཡིན་ཏེ། སྐད་ཅིག་གཉིས་པར་རྒྱུན་འགྱུར་བས་ས་བོན་ལས་མྱུ་གུ་དང་མར་མེའི་རྒྱུན་བཞིན་ཀུན་རྫོབ་ཙམ་དུ་དོན་བྱེད་ནུས་པའི་ཕྱིར། འོ་ན་མི་རྟག་པར་གྲུབ་བམ་ཞེ་ན། དེའང་མ་གྲུབ་སྟེ་རྟག་མི་རྟག་གཅིག་ལ་གཅིག་ལྟོས་པའི་མིང་ཙམ་ཡིན་པས་ལྟཽས་ས་མ་གྲུབ་པའི་ལྟོས་ཆོས་ཀྱང་མི་བདེན་པའི་ཕྱིར། འཕགས་ཞབས་ཀྱིས། གལ་ཏེ་དངོས་པོ་གང་ལྟོས་འགྲུབ། །དེ་ཉིད་ལ་ཡང་ལྟོས་ནས་ནི། །ལྟོས་བྱ་གང་ཡིན་དེ་འགྲུབ་ན། །གང་ལ་ལྟོས་ནས་གང་ཞིག་འགྲུབ། །ཅེས་པ་ལྟར་རོ། །གཞི་གཅིག་པུ་ཉིད་དུ་ངེས་པའང་མ་ཡིན་ཏེ། ཡིན་ན་གཅིག་དང་དུ་མ་རྫས་འགལ་བས་སྣ་ཚོགས་སུ་འབྱུང་བར་མི་རིགས་པ་ལ། ཆུའི་དངོས་པོ་གཅིག་ལ་དམྱལ་བས་ཁྲོ་ཆུ། ཡི་དྭགས་ཀྱིས་རྣག་ཁྲག །དུད་འགྲོས་བཏུང་བ། མི་ཡིས་ཉེར་སྤྱད། ལྷ་ཡིས་བདུད་རྩི་སོགས་སུ་མཐོང་བ་ལྟར་ལས་སྣང་གི་རྗེས་སུ་འགྱུར་ཞིང་འགྲོ་བའི་ཕྱིར། སྣ་ཚོགས་ཉིད་ཀྱང་མི་བདེན་ཏེ་གཅིག་པུའི་གཞི་མ་གྲུབ་པས་དེའི་ཁྱད་ཆོས་མ་གྲུབ་སྟེ། ཁྱད་གཞི་མོ་གཤམ་གྱི་བུུ་མ་གྲུབ་པས་ཁྱད་ཆོས་མཛེས་པ་སོགས་མ་གྲུབ་པ་བཞིན་ཏེ། འཕགས་ཞབས་ཀྱིས། དངོས་རྣམས་ངོ་བོ་ཉིད་མེད་དེ། །གཞན་དུ་སྣང་བར་འགྱུར་ཕྱིར་རོ། །དངོས་པོ་ངོ་བོ་ཉིད་མེད་དེ། །གང་ཕྱིར་དངོས་རྣམས་སྟོང་པ་ཉིད། །ཅེས་སོ། །བྱེད་པ་པོར་གྲགས་པ་ཚངས་དབང་ཁྱབ་འཇུག་གིས་མཚོན་ཁམས་གསུམ་ན་རང་དབང་དུ་གྱུར་པ་འགའ་ཡང་མེད་དེ། ཡོད་ན་མྱང་འདས་བཞིན་ལྡོག་མི་སྲིད་པ་ལ་ཐམས་ཅད་ཀྱང་ལས་དཀར་ནག་གི་རྗེས་སུ་འབྲངས་ཏེ་ཁམས་གསུམ་ན་ཟག་པ་དང་བཅས་པའི་ཕྱིར་རོ། །འོ་ན་ལས་བདེན་པར་གྲུབ་བམ་ཞེ་ ན། དོན་དམ་པར་ལས་ཀྱང་བདེན་པར་གྲུབ་པ་མེད་དེ། འཕགས་པས། ཆོས་འདི་དག་ནི་ཆོས་ཉིད་ཀྱིས། །འོང་བ་མེད་ཅིང་འགྲོ་མེད་ན། །ལས་དང་ལས་ཀྱི་རྣམ་པར་སྨིན། །ཅི་ལྟ་བུར་ནི་འཐད་པར་འགྱུར། །དམ་པའི་དོན་དུའང་མེད་ཅིང༌། །གང་དུའང་འགྲོ་བ་ཡོད་མ་ཡིན། །ཀུན་རྫོབ་ཏུ་ནི་ལམ་འཇུག་ཅིང༌། །རྣམ་པར་སྨིན་པ་ཉེ་བར་སྟོན། །ཅེས་གསུངས་པ་ལྟར་རོ། །ནང་པའི་གྲུབ་མཐའ་འཛིན་པ་ལས་ཕྱོགས་རྟོགས་ཉན་ཐོས་བྱེ་བྲག་སྨྲ་བ་རྣམས། དངོས་སྣང་རྣམས་མི་བདེན་པས་ཀུན་རྫོབ་ཡིན་ཀྱང་དངོས་པོ་དང་དུས་རྩོམ་བྱེད་རགས་མཐའ་རྡུལ་ཕྲན་ཆ་མེད་ཐོ་བ་ལ་སོགས་པས་གཞིག་མི་ནུས་པ་དང༌། ཤེས་པའི་མཐའ་སྐད་ཅིག་ཆ་མེད་བློས་གཞིག་ཏུ་མི་རུང་བ་དོན་དམ་བདེན་པར་འདོད་དེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །དེའང་ལྟ་བའི་མུན་པས་ཁེབས་པ་སྟེ། རྡུལ་ཕྲན་དོན་དམ་པ་མ་ཡིན་ཏེ་ཆ་མེད་པའི་རྡུལ་མ་གྲུབ་པའི་ཕྱིར། གལ་ཏེ་གྲུབ་ན་ཆ་ཤས་མེད་པའི་ནམ་མཁའ་དང་ནམ་མཁའ་འདྲེས་པ་ལྟར་ཐམས་ཅད་གོ་ས་གཅིག་ཏུ་འདྲེ་བས་དངོས་པོ་རགས་པ་རྩོམ་མི་ནུས་ཏེ། ཉི་ཤུ་པ་ལས། དྲུག་གི་ཆར་ནི་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་གི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་སོ། །རྡུལ་ཕྲན་རྣམས་ཕྱོགས་སོ་སོར་ཡོད་ན་ཤར་ལ་སོགས་པའི་དབྱེ་བས་ཆ་དང་བཅས་པས་སྔར་ཆ་མེད་དུ་དམ་བཅས་པའི་རང་ཚིག་དང་འགལ་ལོ། །རྡུལ་ཕྲན་སིལ་བུ་རེག་ལ་མ་འབྱར་བར་གནས་པར་འདོད་པའང་འགལ་ཏེ། རེག་ལ་མ་འབྱར་བའི་བར་དུ་སྣང་མུན་གྱི་རྡུལ་གྱིས་མི་ཆོད་མི་སྲིད་པས་ཆོད་ན་དེ་དང་འབྱར་བས་བར་མེད་དུ་འགྱུར་ལ། མ་ཆོད་ན་བར་མེད་པས་ཁས་བླངས་དང་འགལ་ལོ། །སྐད་ཅིག་མའི་རྒྱུན་གྱིས་དུས་བརྩམས་པའང་འགལ་ཏེ། སྐད་ཅིག་མ་སྔ་ཕྱི་མ་འཕྲད་ན་ཤེས་པ་ཕྱི་མ་རྒྱུ་མེད་དུ་འགྱུར་བས་སྔ་མ་རྩོམ་བྱེད་དུ་མི་འགྲོ་ལ། འཕྲད་ནའང་སྐད་ཅིག་མ་གསུམ་དུས་གཅིག་ལ་འཕྲད་ན་ཐམས་ཅད་དུས་མཉམ་དུ་འགྱུར་བས་བསྐལ་པའང་སྐད་ཅིག་གཅིག་ཁོ་ནར་འགྱུར་ཞིང༌། རེས་མོས་སུ་འཕྲད་ན་སྐད་ཅིག་མ་གཅིག་གི་ཆ་སྔ་མ་འདས་པ། གཉིས་པ་ད་ལྟ་བ་སྟེ་ཆ་གཉིས་སུ་འགྱུར་བས་ཆ་མེད་ཀྱི་དམ་བཅའ་ཉམས་པའོ།

།འདིས་ནི་ཤེས་བྱ་རྫས་ཡོད་དུ་འདོད་པས་དོན་ལ་མཐར་ལྟ་ཁས་ལེན་པར་སོང་བའི་ཕྱིར་ནང་པའི་ལྟ་གྲུབ་དམན་ཤོས་ཡིན་པས་འདིར་མཚན་གཞི་ཙམ་དུ་དངོས་སུ་བསྟན་པར་སྣང་ལ། དེས་མཚོན་ནས་ཤུགས་བསྟན་མདོ་སྡེ་པས་རྩོམ་བྱེད་ལྐོག་ན་མོས་བརྩམས་པའི་ཤེས་བྱ་རྣམས་བཏགས་པ་ཙམ་དུ་འདོད་པ་དང༌། སེམས་ཙམ་པས་ཆོས་ཐམས་ཅད་སེམས་ཀྱི་སྣང་བ་ཙམ་དུ་བདེན་པར་འདོད་པ་རྣམས་ཀྱང་དངོས་པོར་སྨྲ་བའི་གྲུབ་མཐའ་ཡིན་པས་ལུང་རིག་གིས་སུན་ཕྱུངས་ལ་དབུ་མའི་ལམ་དུ་འཇུག་པར་བྱའོ། །རྒྱུ་མཚན་དེས་ན་དངོས་སྣང་ཐམས་ཅད་བདེན་པར་གྲུབ་པ་གཅིག་ཀྱང་མེད་པས་མེད་བཞིན་དུ་སྣང་བ། སྣང་ཡང་མི་བདེན་པར་རྫུན་པར་སྣང་བ། དེའང་རྟེན་ཅིང་འབྲེལ་བར་འབྱུང་བ་ཙམ་དུ་སྣང་བ་ཡིན་ཏེ་ཆོས་ཐམས་ཅད་རང་ངོས་ནས་བདེན་པར་གྲུབ་ན་དངོས་པོའི་རང་མཚན་མི་བཏང་བས་སྐྱེ་འཇིག་སོགས་གང་ཡང་མི་རུང་ལ། དེ་མ་གྲུབ་པའི་གནད་ཀྱིས་རྟེན་ཅིང་འབྲེལ་འབྱུང་གི་ཆོས་རྣམས་འགག་པ་མེད་པར་འཆར་དུ་རུང་བས་སྟོང་པ་ཉིད་ལ་སྣང་བ་མི་འགག་ཅིང་སྣང་བའང་སྟོང་ཉིད་ཀྱི་རྒྱ་ལས་མ་འདས་པ་སྟེ། འཕགས་ཞབས་ཀྱིས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ཏེ། །དེ་ཕྱིར་སྟོང་པ་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །དེ་ལྟ་བུའི་རྫུན་སྣང་རྟེན་འབྲེལ་ཙམ་དུ་ཤར་བ་དེ་སྒྱུ་མའི་རང་བཞིན་གྱི་དཔེ་རྣམས་དང་འདྲ་བ་ཡིན་ཏེ། སེམས་འཁྲུལ་པའི་སྣང་བ་ལས་ཕྱི་རོལ་དུ་མ་གྲུབ་པ་རྨི་ལམ་དང༌། རྒྱུ་དང་རྐྱེན་གྱི་རྟེན་འབྲེལ་ཚོགས་པས་སྣང་བ་སྣ་ཚོགས་སུ་འཁྲུལ་པ་སྒྱུ་མ་དང༌། རྐྱེན་ལ་བརྟེན་ནས་ཐམས་ཅད་དུ་ཁྱབ་པ་ཆུའི་ཟླ་བ་རྣམས་དང་འདྲ་ཞིང༌། ཡུལ་ངེས་པ་མེད་པར་སོ་སོར་སྣང་བ་དྲི་ཟའི་གྲོང་ཁྱེར། བདེན་དངོས་མེད་པའི་ཁ་དོག་སྣ་ཚོགས་སུ་སྣང་བ་བར་སྣང་གི་འཇའ་ཚོན་ལྟ་བུ་བལྟ་བར་བྱ་སྟེ། ཇི་སྐད་དུ། སྐར་མ་རབ་རིབ་མར་མེ་དང༌། །སྒྱུ་མ་ཟིལ་པ་ཆུ་བུར་དང༌། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་རྣམས་དེ་ལྟར་བལྟ། །ཞེས་གསུངས་པའི་ཕྱིར་རོ། །གཉིས་པ་ནི། ལྟ་མཁན་སེམས་ལའང་ང་དང་བདག་མེད་དེ༔ དེ་ནི་ཕུང་པོ་ལས་གཞན་ཐ་དད་དང་༔ ཕུང་པོ་ལྔ་དང་གཅིག་ཏུ་མ་དམིགས་ཕྱིར༔ དང་པོ་གྲུབ་ན་རྫས་གཞན་ཡོད་པར་འགྱུར༔ དེ་ལྟར་མ་ཡིན་གཉིས་པ་གྲུབ་ཙ་ན༔ ཕུང་པོ་མི་རྟག་བདག་ཉིད་རྟག་པ་འགལ༔ དེ་བས་ཕུང་པོ་ལྔ་ལ་བརྟེན་ནས་ཀྱང་༔ ངར་འཛིན་དབང་གིས་དེ་ལྟར་གདགས་པར་ཟད༔ ཅེས་གསུངས་ཏེ། ཕྱི་བལྟ་བྱའི་ཡུལ་བདེན་པར་མ་གྲུབ་ཀྱང་ནང་ལྟ་མཁན་སེམས་བདེན་པར་གྲུབ་བམ་ཞེ་ན་དེའང་མ་གྲུབ་སྟེ། སེམས་ནི་ཉེར་ལེན་གྱི་ཕུང་པོ་ལ་སྒྲོ་བཏགས་ནས་ངའོ་སྙམ་པའི་ངར་འཛིན་འདི་ལས་ལོགས་སུ་མེད་ཅིང་དེ་དང་བདག་གཉིས་ཀྱང་ཐ་དད་མེད་པས་ཡང་དག་པའི་ཤེས་རབ་ཀྱིས་བརྟག་ན་དེ་དག་ཏུ་གྲུབ་པ་མེད་དེ། ངའམ་བདག་ཏུ་འཛིན་པ་ཆོས་ཅན། དོན་དམ་པར་མ་གྲུབ་པར་ཐལ། ཕུང་པོ་ལྔ་ལས་ཐ་དད་པའམ་གཅིག་ཏུ་མེད་པའི་ཕྱིར། །དང་པོ་གྲུབ་སྟེ། ཐ་དད་དུ་ཡོད་ན་ཕུང་ལྔ་ལས་རྫས་གཞན་ཕུང་པོ་དྲུག་པར་འགྱུར་བ་ལ་དེ་འདྲ་ཤེས་བྱ་ལ་མི་སྲིད་པའི་ཕྱིར། མོ་གཤམ་གྱི་བུའི་མིང་བཞིན་ནོ། །གཅིག་ཏུ་ཡོད་ན་རྫས་གཅིག་པར་འགྱུར་བ་ལ་ཕུང་ལྔ་རྫས་ཡོད་དང་ངར་འཛིན་བཏགས་ཡོད་རྫས་འགལ་བའི་ཕྱིར། དངོས་པོ་དང་དངོས་མེད་བཞིན་ནོ། །དེའང་གོ་སླ་བར་བརྗོད་ན། བདག་དེ་ནི་ཕུང་པོ་ལྔའི་ཚོགས་པ་ལས་གཞན་ཐ་དད་པ་དང༌། ཕུང་པོ་ལྔ་དང་གཅིག་ཏུའང་མ་དམིགས་པའི་ཕྱིར་བདག་མ་གྲུབ་སྟེ། དང་པོ་ལྟར་བདག་ཕུང་ཐ་དད་དུ་གྲུབ་ན་གཞན་ཕུང་པོ་དྲུག་པ་ཡོད་པར་འགྱུར་བ་དང༌། ཕུང་པོ་ལས་གཞན་ལ་ངར་འཛིན་འཇུག་པ་མེད་པའི་ཕྱིར་དང༌། ཕུང་པོའི་མཚན་ཉིད་བྲལ་བས་དངོས་པོ་མེད་པར་འགྱུར་ཞིང་དངོས་མེད་ཀྱིས་དོན་བྱེད་མི་ནུས་པའི་ཕྱིར་ཐ་དད་དུ་མ་གྲུབ་བོ། དེ་ལྟར་ཐ་དད་དུ་གྲུབ་པ་མ་ཡིན་ཀྱང་གཉིས་པ་བདག་ཕུང་གཅིག་པར་གྲུབ་བམ་ཞེ་ན་དེའང་མ་གྲུབ་སྟེ། མཚན་ཉིད་མི་མཐུན་པའི་ཕྱིར་དེའང་ཕུང་པོ་རྣམས་འདུས་བྱས་ཡིན་པས་མི་རྟག་པར་གྲུབ་ཅིང་བདག་ནི་སྔར་མཐོང་བ་ཉིད་ད་ལྟར་ངོ་ཤེས་པར་རློམས་པ་སོགས་རྟག་པར་འཛིན་པས་དེ་གཉིས་འགལ་བའི་ཕྱིར་དང༌། ཕུང་པོ་གཟུགས་ཚོར་སོགས་ནང་གསེས་བཅས་དབྱེ་བ་དུ་མ་སྤུངས་པ་ཅན་ཡིན་ལ། བདག་ནི་ང་ཉིད་དོ་ཞེས་གཅིག་པུར་འཛིན་པའི་ཕྱིར་དང༌། ཕུང་པོ་སྐྱེ་འཇིག་གི་གཞན་དབང་ཅན་དུ་གྲུབ་ལ། བདག་ནི་ངའོ་སྙམ་དུ་རང་དབང་ཅན་དུ་འཛིན་པར་མྱོང་བས་གྲུབ་པའི་ཕྱིར་རོ། །དེ་ལྟར་ཡང་རྩ་ཤེར་ལས། གལ་ཏེ་ཕུང་པོ་བདག་ཡིན་ན། །སྐྱེ་དང་འཇིག་པ་ཅན་དུ་འགྱུར། །འོན་ཏེ་ཕུང་པོ་ལས་གཞན་ན། །ཕུང་པོའི་མཚན་ཉིད་མེད་པར་འགྱུར། །ཅེས་སོ། །བདག་མ་གྲུབ་ཀྱང་དེའི་རྒྱུན་རྟག་པས་དེ་གྲུབ་བོ་སྙམ་ན་དེའང་མ་ཡིན་ཏེ། བདེན་གཉིས་ལས། རྒྱུན་དང་སྐད་ཅིག་ཅེས་བྱ་བ། །ཕྲེང་བ་དམག་ལ་སོགས་བཞིན་རྫུན། །ཅེས་སོ། །དེ་བས་ཉེར་ལེན་གྱི་ཕུང་པོ་ལྔའི་ཚོགས་པ་ཙམ་ལ་བརྟེན་ནས་དོན་ལ་ཅུང་ཟད་མ་གྲུབ་ཀྱང་ངར་འཛིན་དབང་གིས་བདག་དང་གང་ཟག་སོགས་དེ་ལྟར་སྒྲོ་བཏགས་པར་ཟད་དེ། འཇུག་པ་ལས། དེ་ཕྱིར་ཕུང་པོ་ལས་གཞན་བདག་མེད་དེ། །ཕུང་པོ་མ་གཏོགས་དེ་འཛིན་མ་གྲུབ་ཕྱིར། །ཅེས་དང༌། ཕུང་པོ་བདག་ཅེས་བརྗོད་ཚེ་ཕུང་རྣམས་ཀྱི། །ཚོགས་པ་ཡིན་གྱི་ཕུང་པོའི་ངོ་བོ་མིན། །ཅེས་པ་ལྟར་རོ། །དེའང་དཔེར་ན་ཤིང་རྟའི་འཁོར་ལོ་དང་སྲོག་ཤིང་སོགས་ཡན་ལག་ཚོགས་པ་ལ་ཤིང་རྟ་ཞེས་གདགས་པར་ཟད་ཀྱི། དེ་དག་མ་ཡིན་པ་ཡན་ལག་ཅན་གྱི་ཤིང་རྟའི་མཚན་གཞི་མི་རྙེད་པ་ལྟར་ཕུང་པོའི་ཚོགས་པར་ངར་འཛིན་པ་ཙམ་ལས་བདག་ཅེས་བྱ་བ་གཞི་མ་གྲུབ་སྟེ། མདོ་ལས། ཇི་ལྟར་ཡན་ལག་ཚོགས་རྣམས་ལ། །ཤིང་རྟའི་མིང་དུ་བཤད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཅེས་བྱའོ། །ཞེས་སོ། །གསུམ་པ་ནི། འདོགས་མཁན་རྟོག་པ་འདས་པ་ཞིག་ནས་མེད༔ མ་འོངས་མ་སྐྱེས་ད་ལྟ་བརྟག་མི་བཏུབ༔ ཅེས་གསུངས་ཏེ། དེ་ལྟར་གཟུང་བའི་ཡུལ་དང་འཛིན་པའི་སེམས་གཉིས་བདེན་པར་མ་གྲུབ་ཀྱང༌། དེ་ལྟར་འདོགས་མཁན་གྱི་རྟོག་པ་ཉིད་བདེན་པར་གྲུབ་བམ་སྙམ་ན། །དེ་ལ་དུས་གསུམ་གྱི་ཆ་ཤས་ཡོད་དམ་མེད། །མེད་ན་སྐད་ཅིག་མ་དངོས་མེད་དུ་ཐལ་བས་རྟོག་པ་གང་ཡོད་དངོས་མེད་དུ་ཐལ་ལ། ཡོད་ན་སྔར་སྐྱེས་པའི་རྟོག་པ་འདས་པ་ནི་ཡལ་ཏེ་ཞིག་ནས་མེད་ལ། མ་འོངས་པ་ནི་ད་རུང་མ་སྐྱེས་པས་མ་གྲུབ་ལ། ད་ལྟ་བའི་རྟོག་པ་རང་གིས་རང་ལ་བརྟག་ཅིང་མཚོན་མི་བཏུབ་སྟེ་མིག་གིས་མིག་མི་མཐོང་ཞིང་རལ་གྲིའི་སོས་རང་ཉིད་གཅོད་མི་ནུས་པ་བཞིན་ནོ། །དེ་ལྟར་ཡང་རིན་ཆེན་ཕྲེང་བ་ལས། ཇི་ལྟར་སྐད་ཅིག་མཐའ་ཡོད་པ། །དེ་བཞིན་ཐོག་མ་དབུས་བརྟག་དགོས། །དེ་ལྟར་སྐད་ཅིག་གསུམ་བརྟག་ཕྱིར། །འཇིག་རྟེན་སྐད་ཅིག་ལ་མི་གནས། །ཞེས་སོ། །བཞི་པ་ནི། མདོར་ན་བདག་གཉིས་གཟུང་འཛིན་གཞི་དང་བཅས༔ མཁའ་ལྟར་རབ་ཞི་སྐྱེ་བ་མེད་ཤེས་ནས༔ སྐྱེ་མེད་ཉིད་ཀྱང་བླཽ་ཡི་ཡུལ་ལས་འདས༔ ཐམས་ཅད་མཁྱེན་པའང་ཚིག་གིས་དབུལ་བའི་ཕྱིར༔ སྤྲོས་པ་ཀུན་བྲལ་དབུ་མའི་ལམ་ཞེས་བྱ༔ ཞེས་གསུངས་ཏེ།

དེ་ལྟར་སྔར་བཤད་པའི་དོན་མདོར་བསྡུ་ན་ཆོས་དང་གང་ཟག་ཏུ་འཛིན་པའི་བདག་གཉིས་དང༌། ཡུལ་གཟུང་བ་དང་ཡུལ་ཅན་འཛིན་པ་གཉིས། དེ་དག་གང་ལ་བརྟེན་པའི་ཀུན་གཞི་དང་བཅས་པ་དེ་ཐམས་ཅད་བདེན་པ་མེད་པས་དངོས་མེད་དུ་གྲུབ་བམ་སྙམ་ན། སྔར་བདེན་དངོས་སུ་གྲུབ་པ་ཕྱིས་བདེན་མེད་དུ་སོང་ན་དེར་གདགས་སུ་རུང་ཡང༌། ཆོས་ཐམས་ཅད་གདོད་མ་ནས་རང་བཞིན་གྱིས་མ་གྲུབ་པས་ཡོད་མེད་གཉིས་ཀའི་མཐའ་ལས་འདས་པ་སྟེ། ས་ར་ཧས། དངོས་པོར་འཛིན་པ་ཕྱུགས་དང་འདྲ་བ་སྟེ། །དངོས་མེད་འཛིན་པ་དེ་བས་ཀྱང་ནི་བླུན། །ཅེས་དང༌། རྩ་ཤེར་ལས། དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་གསུངས་པ་ལྟར་ཡོད་མེད་སོགས་སྤྲོས་པའི་གཟེབ་ལས་གྲོལ་བ་ནམ་མཁའ་ལྟ་བུ། དངོས་དང་དངོས་མེད་དུ་འཛིན་པའི་བློའི་འཇུག་པ་རབ་ཏུ་ཞི། གདོད་མ་ནས་རང་བཞིན་གྱིས་སྐྱེ་བ་མེད་པར་ལུང་དང་རིག་པས་ཤེས་པར་བྱས་ནས། སྐྱེ་མེད་ཀྱི་གནས་ལུགས་དེ་ཉིད་ཀྱང་སྨྲ་བསམ་བརྗོད་པ་དང་བྲལ་བས་སྒྲ་རྟོག་དང་བློའི་ཡུལ་ལས་འདས་པར་རྟོགས་དགོས་ཏེ། སྤྱོད་འཇུག་ལས། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་སོ། །དེ་ལྟ་བུའི་གནས་ལུགས་དེ་བརྗོད་པས་མི་མཚོན་པས་ཤེས་བྱ་ཐམས་ཅད་མངོན་སུམ་དུ་མཁྱེན་ཅིང་གཟིགས་པ་སྨྲ་བའི་ཟླ་བ་རྣམས་ཀྱང་གནས་ལུགས་ཐད་ཀར་སྟོན་པ་ལ་བརྗོད་བྱེད་ཚིག་གིས་དབུལ་བ་ལྟར་སྣང་བའི་ཕྱིར། མཐའ་བརྒྱད་ཀྱིས་སྤྲོས་པ་ཀུན་དང་བྲལ་བའི་བརྗོད་མེད་དེ་ནི་ཐེག་ཆེན་གྱི་ལྟ་བའི་ཡང་རྩེ་དབུ་མ་ཆེན་པོ་སྟེ། དེ་ཉིད་ལམ་དུ་བྱེད་པས་དེའི་ལམ་ཞེས་བྱའོ། །གཉིས་པ་སྒོམ་པས་ཉམས་སུ་ལེན་ཚུལ་ནི། དེ་ལྟར་ཤེས་ནས་འཛིན་པ་བྲལ་བའི་ངང་༔ བློ་ཡིས་བྱར་མེད་མཉམ་པར་བཞག་པ་ལས༔ ཞེས་གསུངས་ཏེ། ལྟ་བ་སྤྲོས་བྲལ་གྱི་གནས་ལུགས་དེ་ལྟར་ལེགས་པར་ཤེས་ནས། དོན་དམ་དཔྱོད་བྱེད་ཀྱི་རིག་པས་སྤྲོས་པའི་མཚན་མ་ཅིའང་མ་རྙེད་པར་མཐར་འཛིན་གྱི་རྟོག་པ་ཐམས་ཅད་དང་བྲལ་ཞིང་གང་དུའང་མི་ཞེན་ལ་མཐའ་བྲལ་གྱི་དོན་ལ་ངེས་པ་གཏིང་ཚུགས་སུ་རྙེད་པའི་ཤེས་རབ་ཀྱི་རྒྱུན་དེ་ལ་བདེན་དངོས་བཀག་པའི་སྟོང་ཉིད་དུ་ཞེན་པ་སོགས་རིག་ཤེས་རྗེས་དཔག་གི་བློ་ཡིས་བཅས་བཅོས་ཅིའང་བྱར་མེད་པར་གཙུབས་ཤིང་དང་གཙུབས་གཏན་ལས་བྱུང་བའི་མེས་ཤིང་གཉིས་བསྲེགས་ཏེ་མེའང་རང་ཡལ་བ་ལྟར་རང་བཞིན་དུ་འཇོག་སྟེ། སྐྱེ་མེད་རིན་པོ་ཆེའི་མཛོད་ལས། གར་ཡང་མ་རྟོག་ཅིར་ཡང་མ་སེམས་ཤིག །མ་བཅོས་པ་དེ་སྐྱེ་མེད་རིན་ཆེན་མཛོད། །ཅེས་དང༌། བརྒྱད་སྟོང་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་འདི་ནི་ཆོས་གང་ཡང་མི་སྒོམ་པ་ལགས་སོ། །ཞེས་དང༌། མདོ་དང་རྒྱན་གཉིས་ཀ་མཐུན་པར། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པ་ལྟར་རྟག་ཏུ་མཉམ་པར་བཞག །རྗེས་ཐོབ་ཏུ། སྡུད་པ་ལས། བདག་ནི་མཉམ་པར་བཞག་ཅེའམ་ལངས་ཞེས་རློམས་སེམས་མེད། །ཅི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། །ཅེས་གསུངས་པ་ལྟར་ཆོས་ཐམས་ཅད་སྒྱུ་མ་ལྟ་བུར་ཤེས་པའི་བློས་བསོད་ནམས་ཀྱི་ཚོགས་ཅི་ནུས་བསགས་པ་ལས་གོམས་པ་རབ་ཀྱི་མཐར་ཕྱིན་པ་ན་ཏིང་ངེ་འཛིན་ལ་བརྟན་པ་ཐོབ་པར་འགྱུར་རོ། །གསུམ་པ་དེའི་འབྲས་བུ་བསྟན་ཅིང་མཚམས་སྦྱར་བ་ནི། རྣམ་རྟོག་ཞི་ཞིང་ངོ་བོའི་ཚུལ་རིག་པས༔ སྤྱན་དང་མངོན་ཤེས་གཟུངས་སོགས་ཡོན་ཏན་འགྲུབ༔ ལམ་དང་ས་རྣམས་རིམ་གྱིས་ཐོབ་པ་ནི༔ ཕ་རོལ་ཕྱིན་པ་རྒྱུ་ཡི་ཐེག་པ་སྟེ༔ འབྲས་བུའི་ལམ་ལའང་སྟོང་ཉིད་སྙིང་རྗེ་གཉིས༔ ཟུང་འབྲེལ་སྤྱོད་པ་ལམ་གྱི་གཞི་རུ་བཟུང་༔ ཞེས་གསུངས་ཏེ།

དེ་ལྟར་སྒོམ་པ་གོམས་པ་ལས་རྣམ་པར་རྟོག་པའི་འཚུབས་མ་མཐའ་དག་ཞི་ཞིང་གཤིས་ཀྱི་ཐོག་ཏུ་ཇི་ཙམ་འདོད་པ་དེ་སྲིད་དུ་གནས་པས་ལུས་སེམས་ལས་སུ་རུང༌། ཡང་དག་པའི་ཡེ་ཤེས་ཀྱི་ངོ་བོ་མཐོང་བ་མེད་པའི་ཚུལ་གྱིས་ལྷག་གེར་མཐོང་ཞིང་རིག་པར་འགྱུར་ཏེ། སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་སྟེ་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །ཅེས་དང༌། དབུ་མ་བདེན་ཆུང་ལས། །མ་མཐོང་བ་ཉིད་དེ་མཐོང་བར། །ཤིན་ཏུ་ཟབ་པའི་མདོ་ལས་གསུངས། །ཞེས་སོ། །ཐབས་ཤེས་ཟུང་འཇུག་གི་ལམ་དེས་སྒྲིབ་པ་གཉིས་པོ་དྲུངས་ནས་ཕྱུང་སྟེ། སྤྱན་ལྔ་དང༌། མངོན་པར་ཤེས་པ་དྲུག །མི་བརྗེད་པའི་གཟུངས༌། ཆགས་ཐོགས་མེད་པའི་སྤོབས་པ། རླུང་སེམས་ལ་དབང་འབྱོར་བའི་རྫུ་འཕྲུལ། ཆོས་ཀྱི་རྒྱུན་གྱི་ཏིང་ངེ་འཛིན་སོགས་གནས་སྐབས་དང་མཐར་ཐུག་གི་ཡོན་ཏན་རྣམས་རིམ་པ་བཞིན་འགྲུབ་པ་དང༌། ལམ་ལྔ་པོ་དང་ས་བཅུ་པོ་རྣམས་རིམ་གྱིས་བགྲོད་ཅིང་དེ་དག་གི་ཡོན་ཏན་ཐོབ་པར་འགྱུར་བ་སྟེ། དེའང་དང་པོར་བྱང་ཆུབ་ཏུ་སེམས་བསྐྱེད་ནས་ནམ་དྲོད་ཀྱི་ཡེ་ཤེས་མ་ཐོབ་བར་སྦྱིན་སོགས་ཚོགས་གཉིས་ལ་འབད་པ་ཐར་པ་ཆ་མཐུན་གྱི་དགེ་བའི་ཚོགས་གསོག་པ་ནི་ཚོགས་ལམ་སྟེ། དེ་ལ་གསུམ་ལས་ཚོགས་ལམ་ཆུང་ངུར་དྲན་པ་ཉེར་བཞག་བཞི། འབྲྀང་པོར་ཡང་དག་པར་སྤོང་བ་བཞི། ཆེན་པོར་རྫུ་འཕྲུལ་གྱི་རྐང་པ་བཞི་གཙོ་བོར་བསྒོམ་པའོ། །ཚོགས་ལམ་རབ་ཀྱི་མཐར་ཕྱིན་པ་ན་བདེན་པ་བཞི་རྟོགས་པ་དང་རྗེས་སུ་མཐུན་པ་སྒོམ་བྱུང་འཇིག་རྟེན་པའི་ཡེ་ཤེས་ངེས་འབྱེད་ཡན་ལག་རྣམ་བཞི་སྐྱེ་བ་སྟེ། བདེན་པ་མངོན་པར་རྟོགས་པ་ལ་སྦྱོར་བས་སྦྱོར་ལམ་མོ། །བཞི་ནི་བདེན་པ་མཐོང་བའི་སྔ་ལྟས་ཀྱི་དྲོད། འཇིག་རྟེན་པའི་ཏིང་ངེ་འཛིན་གྱི་རྩེ་མོ། ཟབ་མོའི་ཆོས་ལ་བཟོད་པ། འཇིག་རྟེན་པའི་ཆོས་ཀྱི་མཆོག་ཏུ་གྱུར་པའི་གནས་སྐབས་བཞི་སྟེ། སྔ་མ་གཉིས་ལ་དབང་པོ་ལྔ། ཕྱི་མ་གཉིས་ལ་སྟོབས་ལྔ་དང་ལྡན་པའོ། །བཞི་པོ་རེ་རེ་ལ་ཆུང་འབྲིང་ཆེན་པོ་གསུམ་དུ་དབྱེ་བས་ངེས་འབྱེད་བཅུ་གཉིས་སུ་གྲགས། ཆོས་མཆོག་གི་རྗེས་ཐོབ་ཏུ་བདེན་པ་བཞི་རེ་རེ་ཡང་ཆོས་རྗེས་ཤེས་བཟོད་ཀྱིས་དབྱེ་བའི་སྐད་ཅིག་མ་བཅུ་དྲུག་གི་བདག་ཉིད་ཅན་གྱི་ཡེ་ཤེས་སྐྱེས་ཏེ་ཁམས་གསུམ་གྱིས་བསྡུས་པའི་མཐོང་བས་སྤང་བྱ་རྣམས་སྤངས་ཏེ། འཇིག་རྟེན་ལས་འདས་པའི་ཤེས་རབ་ཀྱིས་སྔར་མ་མཐོང་བའི་དོན་འཕགས་པའི་བདེན་པ་དངོས་སུ་མཐོང་བས་མཐོང་ལམ་སྟེ། བྱང་ཆུབ་ཀྱི་ཡན་ལག་བདུན་དང་ལྡན་པའོ། །དེ་ནས་བརྩམ་སྔར་རྟོགས་པའི་དེ་ཁོ་ན་ཉིད་ཡང་དང་ཡང་དུ་གོམས་པར་བྱེད་པས་སྒོམ་ལམ་སྟེ། དེ་ལའང་ཆུང་འབྲིང་ཆེ་གསུམ་དུ་ཡོད་ཅིང་འཕགས་པའི་ལམ་ཡན་ལག་བརྒྱད་དང་ལྡན་པའོ། །དེ་ལྟར་སློབ་ལམ་གྱིས་བསྡུས་པའི་བྱང་ཕྱོགས་ཀྱི་ཆོས་སོ་བདུན་རྫོགས་ནས་སྒོམ་ལམ་མཐར་ཕྱིན་པའི་རྗེས་ལ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྤང་བྱ་ཕྲ་ཞིང་ཕྲ་བ་མ་ལུས་པ་སྤངས་ནས་རྟོགས་པའི་ཡེ་ཤེས་མཐར་ཐུག་པ་ནི་མི་སློབ་པའམ་མཐར་ཕྱིན་པའི་ལམ་སྟེ་མི་སློབ་པའི་ཆོས་བཅུ་མངོན་དུ་གྱུར་པའོ། །གནས་སྐབས་དེ་དག་གི་ཡོན་ཏན་གྱི་རྟེན་དང་གོང་མ་གོང་མ་སྐྱེད་པར་བྱེད་པའི་ཆ་ནས་ས་ཞེས་རྣམ་པར་བཞག་པའི་དབང་དུ་བྱས་ན་ཡོངས་སུ་སྦྱོང་བའི་ཁྱད་པར་གྱིས་ས་བཅུར་ངེས་ཏེ། མཐོང་ལམ་དུ་ས་དང་པོ་རབ་ཏུ་དགའ་བ་ཐོབ། འཇིགས་པ་ལྔ་དང་བྲལ། ཡོན་ཏན་བརྒྱ་ཕྲག་བཅུ་གཉིས་ཐོབ། སྒོམ་ལམ་གསུམ་དུ་ས་གཉིས་པ་ནས་བཅུ་པའི་བར་བགྲོད་དེ་སྤང་རྟོགས་ཡོན་ཏན་གྱི་ཁྱད་པར་གོང་ནས་གོང་དུ་བྱེ་བ་བརྒྱ་སྟོང་འགྱུར་དུ་འཕེལ་ཞིང༌། ས་བརྒྱད་བར་དབང་བཅུ། དགུ་པར་སོ་སོ་ཡང་དག་རིག་བཞི། བཅུ་པར་འོད་ཟེར་ཆེན་པོའི་དབང་བསྐུར་བ་བརྙེས་ཏེ་བཅུ་གཅིག་ཀུན་འོད་སངས་རྒྱས་ཀྱི་ས་ལ་གནས་པར་འགྱུར་རོ། །ས་དེ་དག་རེ་རེ་ལའང་ཁྱད་པར་དགུ་དགུས་བཤད་པ་སོགས་མདོ་སྡེ་རྒྱན་གྱིས་མཚོན་གཞུང་རྣམས་སུ་གསལ། ཚུལ་དེ་དག་གིས་ཕ་རོལ་ཏུ་ཕྱིན་པ་རྒྱུ་ལམ་དུ་བྱེད་པའི་ཐེག་པ་ལས་ཇི་ལྟར་གསུངས་པའི་དོན་མདོར་བསྡུས་ནས་བསྟན་པ་སྟེ། སྟོང་ཉིད་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་ཞེས་བྱ་བ་ནི་ཆོས་ཐམས་ཅད་ཀྱི་རྩ་བ་ཡིན་པས། འབྲས་བུ་ལམ་བྱེད་རྡོ་རྗེ་ཐེག་པ་ལའང་ཤེས་རབ་སྟོང་པ་ཉིད་དང་ཐབས་སྙིང་རྗེ་ཆེན་པོ་གཉིས་ཟུང་དུ་འབྲེལ་བར་སྤྱོད་པ་ལམ་གྱི་གཞིའམ་རྟེན་དུ་བཟུང་དགོས་པས་འདིར་ཐོག་མར་བཤད་པ་ཡིན་ཏེ། རིམ་ལྔ་ལས། ཤེས་རབ་སྙིང་རྗེ་གཅིག་པར་ནི། །འཇུག་པ་གང་གིས་ཤེས་གྱུར་པ། །ཟུང་འཇུག་ཅེས་བྱར་བཤད་པ་སྟེ། །རིམ་འདི་སངས་རྒྱས་སྤྱོད་ཡུལ་ལོ། །ཞེས་དང༌། རྡོ་རྗེ་གུར་ལས། སྟོང་ཉིད་སྙིང་རྗེ་དབྱེར་མེད་པ། །གང་དུ་སེམས་ནི་རབ་སྒོམ་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་དང༌། ལམ་སྒྲོན་ལས། ཐབས་དང་བྲལ་བའི་ཤེས་རབ་དང༌། །ཤེས་རབ་བྲལ་བའི་ཐབས་དག་ཀྱང༌། །གང་ཕྱིར་འཆིང་བ་ཞེས་གསུངས་པས། །དེ་བས་གཉིས་ཀ་སྤང་མི་བྱ། །ཞེས་འབྱུང་བ་ལྟར་རོ། །འདིར་རྒྱུ་འབྲས་ཀྱི་ཐེག་པ་ཞེས་པའི་དོན་ཡང༌། །མཐའ་གཉིས་སེལ་བ་ལས། རྒྱུ་ལ་སྦྱོར་བ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །འབྲས་བུ་ཐེག་པའི་ཉེ་ལམ་ནི། །ཞེས་གསུངས་པ་ལྟར། །སྤྱིར་འདིས་འདོང་བས་རྒྱུ་དང༌། འདིར་འདོང་བས་འབྲས་བུའི་ཐེག་པ་ཞེས་གྲགས་ཤིང༌། ཀུན་མཁྱེན་ཀློང་ཆེན་པས། ཁམས་བདེ་གཤེགས་སྙིང་པོ་ས་བོན་ཏུ་ཡོད་པ་ཙམ་རྐྱེན་ཚོགས་གཉིས་ཀྱིས་ཡོན་ཏན་གོང་དུ་འཕེལ་བ་ལས་སངས་རྒྱས་ཐོབ་པར་འདོད་པས་རྒྱུ་འབྲས་སྔ་ཕྱིར་ཁས་ལེན་པའི་ཕྱིར་རྒྱུའི་ཐེག་པ་དང༌། སྙིང་པོ་ཡོན་ཏན་བཅས་སེམས་ཅན་ལ་རང་ཆས་ལྷུན་གྲུབ་ཏུ་ཡོད་པ་སྦྱང་གཞི་ཉི་མ་འོད་ཟེར་ལྡན་པ་འདྲ་བ་ལ། སྦྱང་བྱ་ཚོགས་བརྒྱད་གློ་བུར་བའི་དྲི་མ་སྤྲིན་ལྟ་བུས་བསྒྲིབས་པ་ཉིད། སྦྱོང་བྱེད་སྨིན་གྲོལ་ལམ་གྱིས་སྦྱངས་པའི་འབྲས་བུ་གདོད་གནས་ཀྱི་རང་བཞིན་མངོན་དུ་གྱུར་པ་ལས་སྔ་ཕྱིར་བཟང་ངན་ཁྱད་པར་མེད་པར་འདོད་པས་འབྲས་བུའི་ཐེག་པ་ཞེས་བཏགས་པར་བཞེད་དེ། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་བློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་སོ། །ཞེས་པ་ལྟར་རོ།

།དེ་གཉིས་ཀྱི་ཁྱད་པར་ནི། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་ཕྱིར། །སྔགས་ཀྱི་ཐེག་པ་ཁྱད་པར་འཕགས། །ཞེས་འབྱུང་བ་ལྟར་རྒྱུ་འབྲས་ཀྱི་ཐེག་པ་དེ་གཉིས་མཐར་ཐུག་འབྲས་བུའི་དོན་གཅིག་ནའང་ལམ་བགྲོད་པ་ལ་གསང་སྔགས་ཚུལ་བཞིས་ཁྱད་པར་དུ་འཕགས་པ་སྟེ། སྔ་མས་ཕྱིའི་ཕར་ཕྱིན་ལ་འཇུག་པས་ཡུན་རིང་པོར་མཐར་མི་ཕྱིན་ཅིང་གེགས་དང་བཅས་པས་རྨོངས་ལ། སྔགས་པས་ནང་ཐབས་ཤེས་ཟུང་འཇུག་གི་ཏིང་ངེ་འཛིན་གྱིས་དེ་དག་མྱུར་དུ་རྫོགས་ནུས་པས་མ་རྨོངས་པ་དང༌། སྔ་མས་ཉོན་མོངས་གཅིག་སྦྱོང་ཞིང་འདོད་པ་གཅིག་སྒྲུབ་པ་ལའང་དཀའ་ཐུབ་སྡོམ་པ་སོགས་མི་ཟབ་པའི་ཐབས་ཕྱོགས་རེ་བ་ཡུན་ཏུ་བསྟེན་དགོས་ལ། སྔགས་པས་བསྐྱེད་རྫོགས་ཡན་ལག་དང་བཅས་པའི་རྣམ་གྲངས་མང་པོ་རེ་རེས་ཀྱང་དོན་བདེ་བླག་ཏུ་སྒྲུབ་ནུས་པའི་ཕྱིར་ཐབས་ཟབ་ལ་མང་བ་དང༌། སྔ་མས་སོ་སོའི་བློ་དང་མཐུན་པར་འབྲས་བུ་སྒྲུབ་པའི་ཐབས་དཀོན་པས་དཀའ་ཚེགས་ཆེན་པོས་བསྒྲུབ་དགོས་ལ། སྔགས་པས་ཡུལ་དུས་གནས་སྐབས་དབང་པོའི་ཁྱད་པར་དང་འཚམས་པའི་ཐབས་བདེ་ཞིང་འཆིང་བྱེད་ཀྱང་གྲོལ་བྱེད་དུ་སྒྱུར་བས་འབྲས་བུ་བདེ་བླག་ཏུ་བྱེད་ནུས་པའི་ཕྱིར་དཀའ་བ་མེད་པ་དང༌། ཐེག་དམན་པ་ཐབས་མི་ཤེས་པས་དབང་པོ་བརྟུལ་ཞིང་ཕར་ཕྱིན་པ་ཐབས་ལ་འཁྲུལ་པས་དབང་པོ་འབྲིང་ཡིན་ལ། སྔགས་པས་སྦྱང་ན་ངན་འགྲོར་འགྱུར་བའི་ལས་ཀྱང་ཐབས་ཀྱི་ཁྱད་པར་གྱིས་བྱང་ཆུབ་ཏུ་སྒྱུར་ནུས་པ་དང༌། སྔ་མས་གཉིས་རྟོག་བླང་དོར་ཁོ་ནར་སྤྱོད་ལ་སྔགས་པས་ལྷག་པའི་བདེན་པ་དབྱེར་མེད་སྣོད་བཅུད་དག་མཉམ་ཆེན་པོར་ཤེས་ནས་གཟུང་འཛིན་བླང་དོར་མེད་པར་ཅིར་སྣང་ལམ་དུ་སློང་ནུས་པའི་ཕྱིར་དབང་པོ་རྣོན་པོར་གྱུར་པས་འཕགས་སོ། །གཞན་ཡང་ཚུལ་དྲུག་དང་བདུན་དང་བཅུ་གཉིས་ལ་སོགས་པས་ཁྱད་པར་དུ་འཕགས་པའི་ཚུལ་མང་དུ་བཤད་དོ། །ལམ་འདིར་འཇུག་དགོས་པའི་རྒྱུ་མཚན་ཡང༌། རྒྱལ་བས་གཉེན་པོ་ལ་དགོངས་ཏེ་གསུངས་པའི་ཆོས་ཕུང་བརྒྱ་ཁྲི་བཞི་སྟོང༌། དེ་བསྡུ་ན་གསུང་རབ་ཡན་ལག་བཅུ་གཉིས། དེ་ཐེག་པ་རིམ་དགུ། དེ་ཡང་བསྡུ་ན་སྡེ་སྣོད་གསུམ་མམ་བཞིར་བསྡུ་བ་སོགས་ཇི་སྙེད་ཅིག་བསྟན་པ་དེ་ཐམས་ཅད་ཀྱང་རྣལ་འབྱོར་བླ་མེད་འདིར་འཇུག་པའི་ལམ་སྟེགས་ཙམ་དུ་གྱུར་པ་སྟེ། ཉན་རང་འབྲས་བུ་མཐར་ཕྱིན་པ་རྣམས་ཀྱང་ནམ་ཞིག་སངས་རྒྱས་ཀྱི་འོད་ཟེར་ཆེན་པོས་འགོག་པ་ལས་བསླངས་ནས་གདོད་ཐེག་ཆེན་འཇུག་དགོས་པ་དང༌། བྱང་སེམས་དང་སྔགས་ཕྱི་རྒྱུད་གསུམ་གྱིས་ས་བཅུ་པ་རྒྱལ་ཚབ་ཆེན་པོའི་གོ་འཕང་ལ་བགྲོད་པར་ནུས་ཀྱང༌། བྱང་ཆུབ་ཆེན་པོ་ཐོབ་པ་ལ་འཁོར་བར་འཆིང་བྱེད་ཀྱི་ཀུན་རྟོག་ཕྲ་བ་ཙམ་དུ་མ་ཟད་སྣང་གསུམ་མམ་འཕོ་བའི་བག་ཆགས་ཀྱང་རྩད་ནས་སྤང་དགོས་ཤིང༌། དེ་སྤོང་བྱེད་ཀྱི་གཉེན་པོ་དབང་བཞི་པའི་ལམ་ཟུང་འཇུག་མི་འགྱུར་བའི་བདེ་ཆེན་རང་རིག་པའི་ཡེ་ཤེས་ཉིད་ཡིན་པས་དེ་ནི་རྣལ་འབྱོར་བླ་མེད་ལས་གཞན་དུ་མ་གསུངས་པའི་ཕྱིར། ཐེག་པའི་སྒོ་གང་ནས་ཞུགས་ཀྱང་མཐར་རྣལ་འབྱོར་བླ་མེད་ཀྱི་ལམ་དུ་འཇུག་དགོས་པ་མ་ཟད་དེ། ཐེག་རིམ་སྔ་མ་སྔ་མའི་དོན་རྣམས་ཕྱི་མ་ཕྱི་མའི་ནང་དུ་འདུ་བས་ཐེག་པ་འདི་ཉིད་བསྟན་པ་དང་ཐེག་རིམ་ཐམས་ཅད་ཀྱི་མཆོག་དང་ཡང་རྩེར་གྱུར་པ་སྟེ། གསང་སྙིང་ལས། རང་བཞིན་གསང་བའི་སྙིང་པོ་འདི། །སྡེ་སྣོད་ཀུན་དང་རྒྱུད་ཀུན་གྱི། །འབྱུང་གནས་ངེས་པར་གཏན་ལ་འབེབས། །ཞེས་དང༌། བཤད་རྒྱུད་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབས་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་སོ། །གཉིས་པ་ས་བོན་གདབ་པ་ལ་གཉིས། མཚན་སྨོས་པའི་སྒོ་ནས་མདོར་བསྟན། དེའི་དོན་རྒྱས་པར་བཤད་པའོ། །དང་པོ་ནི། དེ་ནས་ས་བོན་གདབ་པའི་རིམ་པ་ནི༔ ཞེས་པ་སྟེ། ཐུན་མོང་བའི་ལམ་གྱིས་རྒྱུད་སྦྱངས་པ་སྔོན་དུ་སོང་བ་དེ་ནས་ཐུན་མོང་མ་ཡིན་པའི་ལམ་རིམ་ལ་འཇུག་པའི་ཐོག་མར་རང་རྒྱུད་ལ་སངས་རྒྱས་ཀྱི་ས་བོན་གདབ་པའི་རིམ་པ་ནི་འདི་ལྟ་སྟེ། ཞེས་པའོ། །གཉིས་པ་ལ་གཉིས། ས་བོན་གདབ་ཐབས་དངོས་དང༌། དེའི་སྲོག་དམ་ཚིག་བསྟན་པའོ། །དང་པོ་ལའང་གསུམ། གང་ལ་དབང་བསྐུར་བའི་ཡུལ། གང་བསྐུར་བའི་དབང༌། དེ་ཇི་ལྟར་སྐུར་བའི་ཚུལ་ལོ། །དང་པོ་ནི། ངེས་པར་འབྱུང་བས་རྒྱུད་བསྐུལ་ཐེག་ཆེན་རིགས༔ བྱང་ཆུབ་སེམས་གཉིས་ཚུལ་ལ་བློ་འབྱོངས་པས༔ མྱུར་དུ་སངས་རྒྱས་བསྒྲུབ་འདོད་སྐལ་བཟང་ལ༔ ཞེས་གསུངས་ཏེ། གང་ལ་ས་བོན་གདབ་པའི་ཡུལ་ནི་རྒྱན་ལས། ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་མི་གནས་པ། །ཞེས་པ་ལྟར་ཤེས་རབ་དང་སྙིང་རྗེས་སྲིད་པ་དང་ཞི་བའི་མཐའ་གཉིས་ལས་ངེས་པར་འབྱུང་བས་རྒྱུད་བསྐུལ་ཞིང་ཐེག་པ་ཆེན་པོའི་རིགས་དང་ལྡན་པ་སྟེ་དེའི་རྟགས་ནི། མདོ་རྒྱན་ལས། སྦྱོར་བའི་སྔོན་ཏུ་སྙིང་རྗེ་དང༌། མོས་པ་དང་ནི་བཟོད་པ་དང༌། །དགེ་བ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་པ་ལྟར། དེའང་ཐོས་པ་ལ་སོགས་པའི་རྐྱེན་གྱིས་སད་པར་གྱུར་པ། ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་རིན་ཆེན་པོ་ཆེ་རྣམ་པ་གཉིས་ཀྱི་ཚུལ་ལ་བློ་ལེགས་པར་འབྱོངས་པ་ལས། གྲངས་མེད་གསུམ་སོགས་ཡུན་དང་ཚེགས་ལ་མི་ལྟོས་པར་ཚེ་གཅིག་སོགས་དུས་མྱུར་བ་ཉིད་དུ་སེམས་ཅན་གྱི་དོན་ཏུ་སངས་རྒྱས་ཀྱི་གོ་འཕང་སྒྲུབ་ཅིང་ཐོབ་པར་འདོད་པའི་སྐལ་བ་བཟང་པོ་ཅན་དེ་ནི་སྨིན་བྱེད་ཀྱི་ས་བོན་གདབ་པའི་སྣོད་དུ་གྱུར་པ་ཡིན་ནོ།

།གཉིས་པ་ལ་གཉིས། མདོར་བསྟན་པ་དང༌། དེ་རྒྱས་པར་བཤད་པའོ། །དང་པོ་ནི། རང་རྒྱུད་སྐུ་གསུང་ཐུགས་དང་ཡེ་ཤེས་ཏེ༔ རྡོ་རྗེ་བཞི་ཡི་ངོ་བོར་གནས་པ་ཉིད༔ གསང་སྔགས་བླ་ན་མེད་པའི་ཐབས་མཁས་ཀྱིས༔ དབང་བསྐུར་རྣམ་བཞིའི་ས་བོན་གདབ་པར་བྱ༔ ཞེས་གསུངས་ཏེ། དེའང་དབང་སྐུར་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པར་ག་ལ་འགྱུར། བྲ་སྲན་འབྲས་སུ་དབང་བསྐུར་བས། །དེ་ལ་འབྲས་ཀྱི་དངོས་སྣང་མེད། །ཅེས་པ་ལྟར་སེམས་ཅན་རང་རང་གི་རྒྱུད་ལ་མཚུངས་ལྡན་གྱི་རྒྱུ་སྐུ་བཞིའི་རང་བཞིན་གདོད་མ་ནས་གནས་པ་དེ་ཉིད་ལྷན་ཅིག་བྱེད་པའྀ་རྐྱེན་སྔགས་ཀྱི་ཐབས་ཀྱིས་མངོན་དུ་འགྱུར་བར་བྱེད་པ་སྟེ། དེའང་རྩ་ཁམས་སྐུ་རྡོ་རྗེ། ངག་རླུང་གསུང་རྡོ་རྗེ། ཐིག་ལེ་ཐུགས་རྡོ་རྗེ། ཀུན་གཞི་ཡེ་ཤེས་རྡོ་རྗེ་སྟེ་རྡོ་རྗེ་བཞིའི་ངོ་བོར་ཡེ་ནས་ལྷུན་གྲུབ་ཏུ་གནས་ཀྱང་གློ་བུར་དྲི་མའི་སྦུབས་སུ་བག་ལ་ཉལ་བས་ནུས་པ་མི་གསལ་བ་དེ་ཉིད། ཕར་ཕྱིན་དང་གསང་སྔགས་ཀྱི་རྒྱུད་སྡེ་འོག་མ་རྣམས་སུ་མ་གྲགས་པ་རྡོ་རྗེ་ཐེག་པའི་ཡང་རྩེ་བླ་ན་མེད་པའི་རྒྱུད་དོན་ཐབས་ལ་མཁས་པའི་ཁྱད་པར་ཆོ་གའི་ལས་ཀྱིས། རྟེན་གྱི་དཀྱིལ་འཁོར་བཞིར་བཅུག་ནས་བུམ་པ་སོགས་དབང་བསྐུར་བ་རྣམ་པ་བཞིས་སྐུ་བཞིར་སྨིན་བྱེད་ཀྱི་ས་བོན་རྒྱུད་ལ་གདབ་པར་བྱའོ། །གཉིས་པ་ནི། ལུས་རྩ་དག་པར་བྱེད་པ་བུམ་པའི་དབང་༔ སྐུ་ཡི་རྡོ་རྗེ་སྤྲུལ་སྐུའི་ས་བོན་ཡིན༔ ངག་རླུང་དག་པར་བྱེད་པ་གསང་བའི་དབང་༔ གསུང་གི་རྡོ་རྗེ་ལོངས་སྐུའི་ས་བོན་ཡིན༔ ཡིད་དང་ཐིག་ལེ་དག་བྱེད་ཕོ་ཉའི་དབང་༔ ཐུགས་ཀྱི་རྡོ་རྗེ་ཆོས་སྐུའི་ས་བོན་ཡིན༔ ཀུན་གཞིའི་བག་ཆགས་དག་བྱེད་དོན་གྱི་དབང་༔ ཡེ་ཤེས་རྡོ་རྗེ་ཉིད་སྐུའི་ས་བོན་ཡིན༔ ཅེས་གསུངས་ཏེ། སྐལ་ལྡན་ལ་དབང་བཞིའི་ས་བོན་ཇི་ལྟར་འདེབས་ན། ཐལ་འགྱུར་རྩ་བའི་རྒྱུད་ལས། འགྲོ་བའི་ལུས་ངག་ཡིད་སེམས་བཞི། །རྣམ་པར་དག་པར་བྱ་བའི་ཕྱིར། །དབང་ནི་རྣམ་པ་བཞི་ཡིས་ཀྱང༌། །སྐལ་བ་ལྡན་པ་སྨིན་པར་བྱ། །ཞེས་གསུངས་པ་ལྟར་རྣལ་འབྱོར་བླ་མེད་ཀྱི་ཚུལ་འདིར་གཞི་ལམ་འབྲས་བུའི་འབྲེལ་གྱིས་དབང་བཞིར་ངེས་ལ་དེའི་རྟེན་ཀྱང་ཁམས་དྲུག་ལྡན་པའི་རྡོ་རྗེའི་ལུས་རྩ་རླུང་ཐིག་ལེ་ཡོངས་སུ་རྫོགས་པ་ཁོ་ན་ཡིན་པས་དེའི་དབང་དུ་བྱས་ཏེ། མཐོ་རིས་ཀྱི་རྟེན་མངལ་དུ་སྐྱེ་སྲིད་འཛིན་པའི་ཐོག་མར་མིག་དང་ལྟེ་བའི་རྩ་མདུད་ཆགས། དེ་ནས་འཁོར་ལོ་ལྔ་ནས་སྟོང་ཕྲག་བདུན་ཅུ་རྩ་གཉིས་ཀྱི་བར་དུ་རིམ་པར་ཆགས་ཏེ་ལུས་བསྐྱེད་པའི་ཕྱིར་གནས་པ་རྩ་ནི་ལུས་ཀྱི་སྦྱང་བྱའི་གཙོ་བོ་ཡིན་པ་དང༌། ལུས་ཀྱང་ངག་ཡིད་ཀྱི་རྟེན་དང་རགས་པའི་སྦྱང་བྱ་ཡིན་པས་ཐོག་མར་དེ་ཉིད་དག་པར་བྱེད་པའི་ཕྱིར་དུ། ལྷག་པ་གཟུགས་བརྙན་གྱི་དཀྱིལ་འཁོར་གསུམ་པོ་གང་རུང་དུ་ཕན་ནུས་གཉིས་ཀྱིས་བསྡུས་པའི་སྤྲོས་བཅས་བུམ་པའི་དབང་བསྐུར་བས། སད་པའི་གནས་སྐབས་དང་ལུས་རྩའི་དྲི་མ་དག །ཕུང་པོ་ལྔར་འཛིན་གྱི་རྟོག་པ་འགག །ཕུང་པོའི་བདུད་བཅོམ། ཕུང་ཁམས་སྐྱེ་མཆེད་གདན་གསུམ་ཚང་བའི་དཀྱིལ་འཁོར་དུ་ལྟ་བའི་བསྐྱེད་རིམ་དབྱིབས་ཀྱི་རྣལ་འབྱོར་བསྒོམ་པ་ལ་དབང༌། གནས་སྐབས་རྒྱུའི་ས་བརྒྱད་པ་དང་སྐལ་བ་མཉམ། མཐར་ཐུག་གི་འབྲས་བུ་སྐུ་རྡོ་རྗེ་སྣང་སྟོང་ཟུང་འཇུག་སྤྲུལ་པའི་སྐུ་མངོན་དུ་འགྱུར་བའི་ས་བོན་ཐེབས་པ་ཡིན་ནོ། །རྩ་དེ་དག་ལ་རྩ་བ་དང་ཡན་ལག་གི་རླུང་རྣམས་བརྟེན་ནས་ནང་དུ་འཁྲུལ་རྟོག་སྐྱེད་ཅིང་ཕྱི་རོལ་དུ་ངག་གི་བརྗོད་པ་སྣ་ཚོགས་སུ་འབྱུང་བས་གཡོ་བ་རླུང་ནི་ངག་གི་སྦྱང་བྱའི་གཙོ་བོ་ཡིན་ཅིང༌། ལུས་ལས་ངག་ཕྲ་བས་བུམ་དབང་གི་རྗེས་སུ་ངག་རླུང་དག་པར་བྱེད་པའི་ཕྱིར་དུ། བདག་གི་དེ་ཁོ་ན་ཉིད་ལུས་ཀྱི་དཀྱིལ་འཁོར་ཟབ་མོའི་དབང་གསུམ་ཀ་དང་འབྲེལ་པ་གཞིར་བཞག་སྟེ་འདིར་ཁྱད་པར་སྔགས་ཀྱི་དེ་ཁོ་ན་ཉིད་ཡི་གེ་བྷ་གའི་དཀྱིལ་འཁོར་དུ་སྐལ་མེད་ལ་བསྟན་དུ་མི་རུང་བ་བྱང་སེམས་དཀར་དམར་ལ་བརྟེན་ནས་གསང་བའི་དབང་བསྐུར་བས། རྨི་ལམ་གྱི་གནས་སྐབས་དང་ངག་རླུང་གི་དྲི་མ་དག །དབྱིབས་ལ་ལྷར་ཞེན་གྱི་རྟོག་པ་འགག །ཉོན་མོངས་པའི་བདུད་བཅོམ། རླུང་སྔགས་དབྱེར་མེད་དུ་ཤེས་པའི་རང་བྱིན་རླབས་མཚན་བཅས་རྫོགས་རིམ་གྱི་ལམ་བསྒོམ་པ་ལ་དབང༌། རྒྱུའི་ས་དགུ་པ་དང་སྐལ་བ་མཉམ། འབྲས་བུ་གསུང་རྡོ་རྗེ་གསལ་སྟོང་ཟུང་འཇུག་ལོངས་སྤྱོད་རྫོགས་སྐུ་མངོན་ཏུ་འགྲུབ་པའི་ས་བོན་ཐེབ་པ་ཡིན་ནོ། །རྩ་རླུང་དེ་དག་ལ་ཁམས་ཀྱི་དྭངས་མ་ཐིག་ལེ་བྱང་ཆུབ་སེམས་རྣམས་བརྟེན་ནས་གནས་ཏེ། རྩ་ཡུར་བ་ལྟ་བུའི་ནང་དུ་རླུང་གི་གཡོ་རྩོལ་ལ་བརྟེན་ནས་ཁམས་དཀར་དམར་ཆུ་རྒྱུན་ལྟ་བུ་འགྲོ་འོང་གི་རྐྱེན་གྱིས་ཡིད་གཟུང་འཛིན་གྱི་སྣང་བ་བསྐྱེད་པས་བཀོད་པ་ཐིག་ལེ་ནི་ཡིད་དང་འབྲེལ་བའི་སྦྱང་བྱ་ཡིན་པ་དང༌། ངག་ལས་ཡིད་ཕྲ་བས་གསང་དབང་གི་རྗེས་སུ་ཡིད་དང་ཐིག་ལེ་དག་པར་བྱེད་པའི་ཕྱིར་དུ། ལྷའི་དེ་ཁོ་ན་ཉིད་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་ཤེས་རབ་ཕོ་ཉ་མོ་ལ་བརྟེན་ནས་དཔེའི་ཡེ་ཤེས་མཚོན་པའི་དབང་བསྐུར་བས། གཉིད་འཐུག་གི་གནས་སྐབས་དང་ཡིད་ཐིག་ལེའི་དྲི་མ་དག །རང་བཞིན་བརྒྱད་ཅུའི་རྟོག་པ་འགག །འཆི་བདག་གི་བདུད་བཅོམ། ཕྱག་རྒྱ་གསུམ་གྱིས་དཔེའི་ཡེ་ཤེས་སྒྲུབ་པ་དཀྱིལ་འཁོར་འཁོར་ལོའི་ལམ་བསྒོམ་པ་ལ་དབང༌། རྒྱུའི་ས་བཅུ་པ་དང་སྐལ་བ་མཉམ། འབྲས་བུ་ཐུགས་རྡོ་རྗེ་བདེ་སྟོང་ཟུང་འཇུག་ཆོས་ཀྱི་སྐུ་མངོན་དུ་བྱེད་པའི་ས་བོན་ཐེབས་པ་ཡིན་ནོ། །རྩ་རླུང་ཐིག་ལེ་དེ་ཐམས་ཅད་ཀྱང་བག་ཆགས་སྣ་ཚོགས་པའི་ཀུན་གཞི་ལས་འདུ་བྱེད་ཀྱི་ཡིད་གཡོས་ཏེ་བཟུང་འཛིན་ཏུ་ཞེན་པའི་སྣང་བ་ལས་གཞན་དུ་མེད་པས་སྦྱང་བྱ་ཐམས་ཅད་ཀྱི་གཙོ་བོ། །སྔ་མ་རྣམས་ལས་ཆེས་ཤིན་ཏུ་ཕྲ་བ་ཀུན་གཞི་མ་རིག་པའི་བག་ཆགས་དང་བཅས་པ་དག་པར་བྱེད་པའི་ཕྱིར་དུ། ཡེ་ཤེས་ཀྱི་དེ་ཁོ་ན་ཉིད་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་རང་རིག་དོན་དམ་པ་མཚོན་བྱེད་བརྡ་དང་ཚིག་གི་དབང་བསྐུར་བས། སྙོམས་འཇུག་གི་གནས་སྐབས་འཛག་བདེའི་སྤྲོས་པ་དང་སྒོ་གསུམ་ཆ་མཉམ་འཕོ་བའི་སྒྲིབ་པ་བག་ཆགས་བཅས་དག །གཉིས་སྣང་བྱུང་ཚོར་གྱི་རྟོག་པ་འགག །ལྷའི་བུའི་བདུད་བཅོམ། རྫོགས་པ་ཆེན་པོ་ཡེ་ཤེས་སྤྱི་གཟུགས་ཀ་དག་ལྷུན་གྲུབ་ཀྱི་ལམ་བསྒོམ་པ་ལ་དབང༌། རྒྱུའི་ས་བཅུ་གཅིག་པ་དང་སྐལ་བ་མཉམ། འབྲས་བུ་ཡེ་ཤེས་རྡོ་རྗེ་རིག་སྟོང་ཟུང་འཇུག་ངོ་བོ་ཉིད་སྐུ་མངོན་དུ་བྱེད་པའི་ས་བོན་ནམ་ནུས་པ་རྒྱུད་ལ་བཞག་པ་ཡིན་ནོ།

།གསུམ་པ་ནི། དེ་རྣམས་ཀུན་ཀྱང་ཐུན་མོང་གང་ཟག་ལ༔ ལྷག་གནས་དང་བཅས་འཇུག་དང་སྨིན་པ་སྟེ༔ དབང་རྣོན་ཁ་ཅིག་བརྡ་ཐབས་ངོ་སྤྲོད་དང་༔ མཆོག་གཞན་ཏིང་འཛིན་ཁོ་ནས་གྲོལ་བར་འགྱུར༔ ཅེས་གསུངས་ཏེ། དབང་བཞི་པོ་དེ་རྣམས་ཆོ་གའི་བྱ་བ་ཇི་ལྟ་བུས་བསྐུར་ན། དབང་ཀུན་ཀྱང་སྐུར་བ་པོ་སློབ་དཔོན་དང་བསྐུར་ཡུལ་སློབ་མའི་དབང་པོའི་ཁྱད་པར་གྱིས་ཐུན་མོང་མ་ཡིན་པའི་སྐུར་ཚུལ་ཡང་མང་དུ་འགྱུར་བ་ལས། ཐུན་མོང་བའི་གང་ཟག་སྤྱི་ཙམ་གྱི་དབང་དུ་བྱས་ན་བྱ་བྱེད་ལས་གསུམ་གྱིས་བསྡུས་པ་སྟེ། བྱེད་པ་པོ་རྡོ་རྗེ་སློབ་དཔོན་ལྷ་དང་བདག་དང་གསང་སྔགས་དང་བཟླས་བརྗོད་དང་འཕྲོ་འདུའི་དེ་ཁོ་ན་ཉིད་དེ་སྔགས་ཀྱི་ཡན་ལག་ལྔ་ལ་རང་བྱན་ཆུད་པས། བྱ་བའི་ལས་བཅུད་བཟང་པོ་བླུགས་པ་ལ་སྣོད་གཙང་མར་བྱ་བ་བཞིན་དུ། སའི་ཆོ་ག་སྔོན་དུ་འགྲོ་བས་ལྷ་དང་བུམ་པ་དང་སློབ་མ་ལྷག་པར་གནས་པ་དང༌། ཐིག་ཚོན་རྒྱན་བཀོད་དཀྱིལ་འཁོར་སྒྲུབ་ཅིང་མཆོད་དེ་བདག་ཉིད་འཇུག་པའམ་རིག་པའི་མེ་ཏོག་དོར་ཅིང་གནང་བ་ནོད་པ་བཅས་བྱས་ནས། ཕྱི་མཚན་མ་དང་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པས་རྒྱུད་སྦྱངས་པའི་སློབ་མ་ལ། བྱེད་པ་རྫས་སྔགས་ཏིང་འཛིན་གསུམ་ཚོགས་པའི་ཆོ་ག་ཁྱད་པར་ཅན་གྱིས་དབང་བསྐུར་བས། བྱ་བ་སློབ་མའི་སྒོ་གསུམ་ཕྲ་རགས་གདོད་ནས་གདན་གསུམ་ཚང་བའི་ལྷར་དག་པ་ཉིད་ངོ་འཕྲོད་པར་བྱས་པ་ལས་རང་སྐལ་གྱི་སྦྱང་བྱའི་དྲི་མ་ཅི་རིགས་དག་པའམ་ཉམས་སྨད་པར་བྱས་ཤིང༌། ཐོབ་བྱ་རང་གནས་ཀྱི་ཡེ་ཤེས་ཅི་རིགས་གསོས་ཐེབས་པའི་མཐུས་ལམ་རིམ་པ་གཉིས་ཀྱི་ཡེ་ཤེས་མངོན་དུ་སྐྱེས་སམ། ཆུ་ལུད་དྲོད་གཤེར་འཛོམ་པ་ལ་ས་བོན་ཐེབས་པ་ལྟར་སྐྱེ་ངེས་ཀྱི་ནུས་རུང་དུ་སྨིན་པར་བྱས་པས་རྒྱུར་འགྱུར་བའི་ཁྱད་པར་ནི་དབང་ཐོབ་པ་སྟེ། ཧེ་རུ་ཀ་འདུས་པ་ལས། གང་གིས་གང་ལ་དབང་བསྐུར་བ། །རྒྱུད་དག་ནུས་པ་ཐོབ་ཕྱིར་དབང༌། །ཞེས་སོ། །ཐུན་མོང་མ་ཡིན་པའི་གང་ཟག་སྔོན་ནས་སྦྱངས་པའི་ལས་འཕྲོ་ཅན་རང་བཞིན་གྱིས་དབང་པོ་རྣོན་པོ་ཁ་ཅིག་ཆོ་གའི་ལས་རིམ་རྒྱས་པ་ལ་མ་ལྟོས་པར་བརྡ་ཐབས་དང༌། དེའི་དོན་ངོ་སྤྲོད་པ་ཙམ་ལ་བརྟེན་ནས་རྒྱུད་སྨིན་བྱེད་ཀྱི་དབང་བཞི་ཡོངས་སུ་རྫོགས་པར་འགྱུར་ཏེ། དཔེར་ན། རིག་འཛིན་འདུས་པ་རྩ་བའི་རྒྱུད་ལས། རྡུལ་ཚོན་མེ་ལོང་བུམ་པ་དང༌། །གཏོར་མ་ལ་སོགས་རྫས་དག་ལ། །བརྟེན་ནས་མཚན་ཉིད་ཀུན་ལྡན་པའི། །བླ་མའི་བྱིན་རླབས་དབང་བསྐུར་ན། །དཀྱིལ་འཁོར་ཀུན་གྱི་སྙིང་པོ་མཆོག །བཞི་པའི་དེ་ཉིད་དབང་བཞི་ཐོབ། །ཅེས་གསུངས་པའི་དོན་གསང་སྔགས་སྔ་འགྱུར་བ་རྣམས་ཀྱིས་བླ་མའི་ཟླུམ་པོ་བཞི་དབང་སོགས་དང༌། ཕྱི་འགྱུར་བ་རྣམས་ཀྱིས་རྡོ་རྗེ་རྣལ་འབྱོར་མའི་བྱིན་རླབས་ཀྱི་རིམ་པ་སོགས་ཟབ་དབང་མཐའ་ཡས་པ་འབྱུང་བ་བཞིན་ནོ། །དེ་ལས་ཀྱང་སྐལ་བ་མཆོག་ཏུ་གྱུར་པའི་གང་ཟག་གཞན་པ་འགའ་ཞིག་ནི་མཚན་ལྡན་བླ་མའི་ཏིང་ངེ་འཛིན་དང་བྱིན་རླབས་ཀྱི་མཐུ་ཁོ་ནས་རྒྱུད་སྨིན་ཅིང་གྲོལ་བར་འགྱུར་ཏེ། སྣོད་བཅུད་ཀྱི་རྟེན་འབྲེལ་འཛོམ་པ་ལ་ཡེ་ཤེས་བཙན་ཐབས་སུ་སྐྱེ་ཞིང་དེ་ཉིད་དབང་སྐུར་ཐམས་ཅད་ཀྱི་རྒྱལ་པོ་རྡོ་རྗེ་ཡེ་ཤེས་ཀྱི་དབང་ཡིན་པའི་ཕྱིར། དཔེར་ན་འཕགས་ཡུལ་གྲུབ་པའི་སློབ་དཔོན་མང་པོ་དང་བོད་ཀྱི་སྔོན་བྱོན་གྲུབ་ཐོབ་བརྒྱུད་པའི་རྣམ་པར་ཐར་པ་བཞིན་ནོ། །འདིར་འཕྲོས་དོན་ཅུང་ཟད་སྨོས་ན། དབང་གི་ངོ་བོ། །ངེས་ཚིག །དབྱེ་བ། ཇི་ལྟར་སྐུར་བའི་ཚུལ། །མ་ཐོབ་པའི་ཉེས་དམིགས། ཐོབ་པའི་ཕན་ཡོན་ཏེ་དྲུག་ལས། དང་པོ་ནི། ཐོབ་བྱ་རང་གནས་ཀྱི་ཡེ་ཤེས་མངོན་དུ་སྐྱེས་སམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པའོ། །གཉིས་པ་ནི། ཨ་བྷི་ཥིཉྩའི་སྒྲ་ལས་མངོན་པར་གཏོར་བའམ་བླུགས་པས་ན་དབང་སྟེ། སྦྱང་བྱའི་དྲི་མ་འཁྲུ་བའམ་གཏོར་ཞིང༌། །ལམ་སྒོམ་རུང་དང་འབྲས་བུ་ཐོབ་རུང་གི་ནུས་པ་ཁྱད་པར་ཅན་འཇོག་པའི་ཕྱིར་ཏེ། དགྱེས་རྡོར་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་སོ།

།གསུམ་པ་ལ་རྒྱུ་ལམ་འབྲས་བུའི་དབང་གསུམ་ལས། །རྒྱུ་དུས་ཀྱི་དབང་ནི། དང་པོར་བླ་མ་ལས་བླང་དགོས་ཏེ། སྨིན་བྱེད་གང་ཞིག །དེ་ཡིན་ན་སྔགས་ཀྱི་ལམ་སོ་སོ་ཉན་སྒོམ་གྱི་སྔོན་དུ་ཐོབ་དགོས་པའི་ཕྱིར། ལམ་དུས་ཀྱི་དབང་ནི། ཕྱིས་བླ་མ་ལས་སམ་སྡོམ་ལྡན་རང་ཉིད་ཀྱིས་བླངས་ཀྱང་རུང་སྟེ། སྔར་རྒྱུད་སྨིན་ཟིན་གྱི་དབང་རྒྱུན་དེ་གོང་འཕེལ་དུ་བྱེད་པའི་དབང་ཡིན་པའི་ཕྱིར། འབྲས་དུས་ཀྱི་དབང་ནི། སློབ་ལམ་རྫོགས་པའི་རྒྱུན་མཐའི་དུས་སུ་བསྐུར་ཏེ། དེ་མཐར་ཐུག་གི་འབྲས་བུར་སྦྱོར་བྱེད་ཀྱི་དབང་ཡིན་པའི་ཕྱིར་རོ། །བཞི་པ་ནི། དབང་བསྐུར་བ་དེའང་དཀྱིལ་འཁོར་སྔོན་དུ་འགྲོ་བ་ཅན་ཏེ། དྲིལ་བུ་པས། དབང་བསྐུར་དཀྱིལ་འཁོར་སྔོན་འགྲོ་བར། །རྡོ་རྗེ་འཆང་གིས་གསུངས་པ་སྟེ། །ཞེས་སོ། །དེ་ལ་རང་བཞིན་ཡེ་ཤེས་ཀྱི་དཀྱིལ་འཁོར་དང༌། ལྷག་པ་ཏིང་ངེ་འཛིན་ནམ་སྤྲུལ་པའི་དཀྱིལ་འཁོར་དང༌། རིག་པ་ཉམས་ཀྱི་དཀྱིལ་འཁོར་གསུམ་ནི་རིམ་པ་ཇི་ལྟ་བར་སློབ་དཔོན་རྫོགས་པའི་སངས་རྒྱས་དང༌། མཐར་ལམ་པ་དང༌། མཐོང་སྒོམ་ལ་གནས་པ་སྟེ་འཕགས་པ་རྣམས་ཀྱི་སྤྱོད་ཡུལ་ཡིན་ལ། ཏིང་ངེ་འཛིན་ལ་བརྟན་པ་རྗེས་མཐུན་ཙམ་ཐོབ་པ་ལ་སོགས་པའི་སློབ་དཔོན་གྱིས་ནི་གདུལ་བྱའི་དབྱེ་བས་སྐལ་དམན་འཇུག་པ་ལ་རྡུལ་ཚོན། འབྲིང་རས་རིས། རབ་ཚོམ་བུ་ལྟ་བུ་དམིགས་རྟེན་ཅུང་ཟད་ཙམ་དང༌། དེ་ལས་ཀྱང་བློ་ཆེ་བ་སྐལ་ལྡན་ཡང་རབ་ལ་བླ་མའི་ལུས་དཀྱིལ་ལ་བརྟེན་ནས་བསྐུར་བར་གསུངས་སོ། །དཀྱིལ་འཁོར་དེར་བསྐུར་བྱའི་དབང་ནི། སྤྱིར་རྣལ་འབྱོར་བླ་ན་མེད་པའི་རྒྱུ་དུས་ཀྱི་དབང་ཐམས་ཅད་བཞིར་ངེས་པ་ཡིན་ཏེ། སྦྱང་བྱ་དྲི་མ་བཞི་དང་སྦྱོང་བྱེད་བསྐྱེད་རྫོགས་ཀྱི་ལམ་བཞི་དང༌། སྦྱངས་འབྲས་སྐུ་བཞིར་ངེས་པའི་ཕྱིར་དེ་ལྟར་ཡང་སྙིང་པོའི་རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང༌། །དེ་མ་ཐག་པ་བཞི་པ་སྟེ། རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་དང༌། འདུས་པ་ལས། བུམ་པའི་དབང་ནི་དང་པོ་སྟེ། །གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡང་དེ་བཞིན་ནོ། །ཞེས་སོགས་གསར་རྙིང་རྒྱུད་སྡེ་ཀུན་མཐུན་པར་འབྱུང་ངོ༌། །བྱེ་བྲག་སྔ་འགྱུར་རང་ལུགས་རྒྱུད་ལུང་མན་ངག་གསུམ་གྱི་དབྱེ་བས་རྒྱུད་སྒྱུ་འཕྲུལ་དྲྭ་བ་ལྟར་ན། སློབ་བུ་དད་པ་ཅན་ལ་ཕྱི་ཕན་པའི་དབང་བཅུ། བདག་དང་གཞན་དང་གཉིས་ཀའི་དོན་ནུས་པའི་བརྩོན་འགྲུས་ཅན་ལ་ནང་ནུས་པའི་དབང་ལྔ། སྤྱོད་རིགས་མཉམ་པའི་བརྟུལ་ཞུགས་ཅན་ལ་གསང་བ་ཟབ་མོའི་དབང་གསུམ་བསྐུར་བར་གསུངས་པ་དང༌། ལུང་འདུས་མདོ་ལྟར་ན། རང་བཞིན་གྱིས་སྣོདདུ་གྱུར་པ་ཟབ་མོའི་དོན་ལ་མོས་པའི་སློབ་མ་ཁྱད་པར་ཅན་ལ་མདོ་རྩ་བའི་དཀྱིལ་འཁོར་དུ་རྒྱུད་ཀྱི་དངོས་བསྟན་ལྟར་ཆུ་བོ་བཞི་རྫོགས་ཀྱི་དབང་སུམ་ཅུ་རྩ་དྲུག་བསྐུར་བ་དང༌། སྦྱངས་པས་སྣོད་དུ་གྱུར་པ་རྒྱ་ཆེ་བ་ལ་མོས་པའི་སློབ་མ་ཐུན་མོང་བ་ལ་མདོ་ཡོངས་རྫོགས་ཡན་ལག་དང་བཅས་པའི་དཀྱིལ་འཁོར་སོ་སོར་ཕྱེ་ནས་དབང་རྩ་བ་སོ་དྲུག་ལ་ཡན་ལག་གི་རགས་པར་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་བ་སྟེ། རྒྱུད་མན་ངག་གི་ལུགས་གཉིས་ཀའང་ཕྱི་ནང་སྒྲུབ་གསང་གི་དབང་བཞིས་བསྡུས་པ་དང༌། མན་ངག་ཨ་ཏི་ཡོ་ག་ལ་རིག་པ་རྩལ་གྱི་དབང་རྩལ་དུ་བཏོན་ནས་སྐུར་བའི་ཚུལ་རྫོགས་ཆེན་སྡེ་གསུམ་གྱི་ལུགས་སོ་སོར་འབྱུང་བ་ལས། མན་ངག་སྡེ་པ་ལྟར་ན། སྤྲོས་བཅས་དབང་གིས་སྒོ་གསུམ་དང་ཤེས་བྱ་ལ་རྨོངས་པའི་དྲི་མ་སྦྱོང༌། སྤྲོས་མེད་ཀྱིས་སྐུ་གསུང་ཐུགས་དང་རང་བྱུང་འོད་གསལ་གྱི་ནུས་པ་འཇུག །ཤིན་ཏུ་སྤྲོས་མེད་ཀྱིས་སེམས་ཉིད་གཞི་མེད་རྩ་བྲལ་དུ་ངོ་སྤྲད་ཅིང་ཀ་དག་གི་ཡེ་ཤེས་དང༌། རབ་ཏུ་སྤྲོས་མེད་ཀྱིས་ལྷུན་གྲུབ་འོད་གསལ་མངོན་སུམ་གྱི་དོན་ཉམས་སུ་ལེན་པ་ལ་དབང་བར་བྱེད་དོ། །སྒྲུབ་སྡེ་ལྟར་ན་སྤྱི་བཀའ་བདེ་གཤེགས་འདུས་པ་ལས། གདུལ་བྱ་ཞེ་སྡང་ཅན་སྒྲོལ་བ་ལམ་དུ་ཁྱེར་བའི་ཕྱིར་ཕྱི་དབང་བུམ་པ་སོགས་ཕྱི་ནང་གི་རྫས་བརྒྱ་རྩ་བརྒྱད་ལ་བརྟེན་ནས་བསྐུར་བ། ང་རྒྱལ་ཅན་ལྷ་ལམ་དུ་ཁྱེར་བའི་ཕྱིར་ནང་དབང་ལུས་ལ་བརྟེན་ནས་བསྐུར་བ། འདོད་ཆགས་ཅན་སྦྱོར་བ་ལམ་དུ་ཁྱེར་བའི་ཕྱིར་གསང་དབང་ཡུམ་ལ་བརྟེན་ནས་བསྐུར་བ། གཏི་མུག་ཅན་རྣམ་རྟོག་ལམ་དུ་ཁྱེར་བའི་ཕྱིར་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་དང་བཞིར་བཤད་དོ། །ལྔ་པ་ནི། སངས་རྒྱས་ཐོད་པའི་རྒྱུད་ལས། དཔེར་ན་པི་ཝང་སྦྱོར་ཀུན་འཚོགས། །རྒྱུད་དང་བྲལ་ན་བརྡུང་མི་རུང༌། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །ཅེས་སོ། །དྲུག་པ་ནི། རྔམ་གློག་ལས། །གསང་བ་མཆོག་གི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང༌། །དབང་བསྐུར་བ་ཡི་ལས་རྣམས་བྱ། །དེས་ནི་ཚེ་འདི་ཉིད་ལ་ཡང༌། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ཞེས་སོགས་ལུང་རིགས་མཐའ་ཡས་པ་འབྱུང་ངོ༌།

།གཉིས་པ་སྲོག་དམ་ཚིག་བསྟན་པ་ནི། དབང་གི་སྲོག་ནི་དམ་ཚིག་སྡོམ་པ་སྟེ༔ སྔགས་ཀྱི་འདུལ་བ་མི་འདའི་ཡལ་གམ་ཅན༔ སྤྱི་དང་ཁྱད་པར་ལྷག་པས་བསྡུས་པ་རྣམས༔ ཕྱི་ནང་གསང་བའི་ཚུལ་དུ་དག་པར་བྱ༔ ཞེས་གསུངས་ཏེ། དབང་གིས་རྒྱུད་སྨིན་ཀྱང་དེའི་དོན་རྒྱུད་ལ་བསྟེན་པའི་སྲོག་ནི་དམ་ཚིག་སྟེ། དེའང་དབང་བསྐུར་བ་ཉིད་ཀྱིས་དམ་ཚིག་དང་སྡོམ་པ་ཐོབ་པ་ཡིན་པས་དེ་ཉིད་ལེགས་པར་བསྐྱང་དགོས་ཏེ། ཀུན་འདུས་ལས། དབང་རྣམས་ལེགས་པར་རྫོགས་གྱུར་པས། །རྩ་བ་ཡན་ལག་དམ་ཚིག་ཀུན། །མ་ཉམས་རབ་ཏུ་བསྲུང་བར་བྱ། །དེས་ནི་དངོས་གྲུབ་མཆོག་ཐོབ་འགྱུར། །ཞེས་སོ། །དེ་ལ་དམ་ཚིག་གི་ངོ་བོ་ནི། བསྲུང་བྱའི་དོན་ཁྱད་པར་ཅན་ལས་མི་འདའ་བའི་སེམས་པ་ས་བོན་དང་བཅས་པ་སྟེ། སྙིང་པོའི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང༌། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་གསུངས་པ་ལྟར། སངས་རྒྱས་ཀུན་གྱི་རྡོ་རྗེའི་གསང་བ་གསུམ་འཛིན་ཅིང་མི་ཉམས་པར་སྲུང་བའི་ཆ་ནས་དམ་ཚིག །རང་རྒྱུད་སྡོམ་པའི་ཆ་ནས་སྡོམ་པ་ཡིན་པས་ངོ་བོ་གཅིག་ལ་ཁྱད་པར་དང་སྤྱི་ལྡོག་གིས་ཕྱེ་བའོ། །ངེས་ཚིག་ནི། སྔགས་ཀྱི་སྒོར་ཞུགས་ནས་དེ་ཉིད་ཀྱི་བརྟུལ་ཞུགས་སྲུང་ཞིང་བསྒྲུབས་པས་རང་རྒྱུད་ཀྱི་ཉོན་མོངས་པ་འདུལ་བར་བྱེད་པས་སྔགས་ཀྱི་འདུལ་བ་ཞེས་བྱ་ཞིང༌། ས་མ་ཡའི་སྒྲ་ལས་དམ་བཅས་པའི་ཐ་ཚིག་དང་མནའ་དང་སྡོམ་པ་སོགས་ལ་འཇུག་པས་ཇི་ལྟར་དམ་བཅས་པ་ལས་འདའ་བར་བྱ་བ་མ་ཡིན་པས་རྡོ་རྗེའི་ཡལ་གམ་མམ་དམ་ཚིག་སྟེ། བསྲུངས་ན་སྔགས་ཀྱི་བསླབ་པ་ཐམས་ཅད་ཀྱི་གཞི་རྟེན་དུ་འགྱུར་ཞིང༌། མ་བསྲུངས་ན་བསླབ་པ་ཐམས་ཅད་དོན་མེད་དུ་འགྱུར་བས་ཁེ་ཉེན་དང་བཅས་པའི་ཕྱིར། དེ་ལྟར་ཡང་ཧེ་རུ་ཀ་འདུས་པའི་རྒྱུད་ལས། མི་འདའ་དམ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། ཅེས་སོ། །དེ་ལ་དབྱེ་ན། བདེ་འདུས་ཞི་རྒྱུད་ལས། །སྤྱི་དང་ཁྱད་པར་ལྷག་པ་ཡི། །རྣམ་པར་དབྱེ་བས་བཟུང་བྱ་སྟེ། ཞེས་པས་སྤྱིའི་དམ་ཚིག །ཁྱད་པར་གྱི་དམ་ཚིག །ལྷག་པའི་དམ་ཚིག་སྟེ་གསུམ་དུ་བསྡུས་པ་ཡིན་ལ། དེ་རྣམས་རིམ་པ་བཞིན་དུ་ཕྱི་སྙིང༌། ནང་སྙིང་ཁྲག །གསང་བ་སྲོག་གི་ཚུལ་དུ་བསྲུང་ཞིང་རྣམ་པར་དག་པར་བྱའོ། །དེ་དག་གི་དོན་ཅུང་ཟད་སྨོས་ན། སྤྱིའི་དམ་ཚིག་ནི། སོ་ཐར། བྱང་སེམས། ཕྱི་རྒྱུད་གསུམ་གྱི་བསྲུང་མཚམས་སུ་གྲགས་པ་རྣམས་ཏེ། དང་པོ་ལ་སོ་ཐར་རིས་བརྒྱད་ཀྱི་སྤང་བླང༌། གཉིས་པ་ལ་ཤིང་རྟ་གཉིས་ཀྱི་བཀའ་སྲོལ་ནས་བྱུང་བའི་བསླབ་བྱ། གསུམ་པ་ལ་བྱ་སྤྱོད་རྣལ་འབྱོར་གྱི་རྒྱུད་རྣམས་ལ་འབྱུང་བའི་དམ་ཚིག་ཐུན་མོང་དང་ཐུན་མོང་མ་ཡིན་པ་རྣམས་སོ། །ཁྱད་པར་གྱི་དམ་ཚིག་ནི། སྔགས་བླ་མེད་ནས་གསུངས་པའི་རིགས་ལྔ་སྤྱིའི་དམ་ཚིག་དང༌། རྩ་བ་དང་ཡན་ལག་གིས་བསྡུས་པའི་དམ་ཚིག་ཁྱད་པར་བ་རྣམས་ཏེ། དེ་ལ་རིགས་ལྔའི་དམ་ཚིག་ནི། ཕྱི་སྨོན་སེམས་དང་འཇུག་སེམས་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་དང༌། དཀོན་མཆོག་གསུམ་འཛིན་ཅིང༌། སྦས་དོན་བདེ་སྟོང་དབྱེར་མེད་ཀྱི་བྱང་སེམས་དང་སེམས་ཉིད་དཀོན་མཆོག་གསུམ་གྱི་རང་བཞིན་ཅན་དུ་བཟུང་བ་སྟེ་དེ་བཞིན་རིགས་ཀྱི་དམ་ཚིག །ཕྱི་རྫས་ཀྱི་རྡོར་དྲིལ་དང་ལྷ་སྐུ་ཕྱག་རྒྱ། ནང་ཡབ་ཡུམ་གཉིས་ཀྱི་མཁའ་གསང་ཕན་ཚུན་རྒྱས་བཏབ་སྟེ་སྦྱོར་བ། གསང་བ་ཁམས་དཀར་དམར་གཉིས་འབར་འཛག་གི་རྒྱས་ཟུང་དུ་འབྲེལ་བ། དེ་ཁོ་ན་ཉིད་བདེ་སྟོང་གཉིས་ཟུང་འཇུག་གི་རྒྱས་འཆིང་བ་སྟེ། དེ་ལྟར་ཕྱི་ནང་ལ་སོགས་པའི་རྡོ་རྗེ་དང༌། དྲིལ་བུ་དང༌། ཕྱག་རྒྱ་གསུམ་འཛིན་ཅིང༌། དེ་དག་སྟོན་པའི་བླ་མ་ལ་གུས་པས་བསྟེན་པ་སྟེ་རྡོ་རྗེའི་རིགས་ཀྱི་དམ་ཚིག །ཕྱི་ཆོས་སྐྱོབ་ཟང་ཟིང་དང་དེའི་རྩ་བ་བྱམས་པའི་སྦྱིན་པ་སྟེ་བཞི་སྟེར་ཞིང༌། སྦས་དོན་རྗེས་ཆགས་ཀྱི་མེས་བྱང་སེམས་དབབ་ལྡོག་གི་དགའ་བཞིའི་ཡེ་ཤེས་སྦྱིན་པ་ནི་རིན་ཆེན་རིགས་ཀྱི་དམ་ཚིག །ཕྱི་ཉན་རང༌། ནང་བྱང་སེམས། གསང་བ་བྱ་བ་སྤྱོད་པ་རྣལ་འབྱོར་ཕྱི་ནང་སྟེ་ཐེག་པ་གསུམ་འཛིན་ཅིང༌། སྦས་དོན་རླུང་དབུ་མར་བཅིངས་པས་གཞོམ་མེད་ཀྱི་གསུང་སྒྲུབ་པ་ནི་པདྨ་རིགས་ཀྱི་དམ་ཚིག །སྔར་གྱི་སྡོམ་པ་དེ་ཐམས་ཅད་དང་མཆོད་པའི་ལས་ཀྱང་ཅི་ནུས་སུ་སྒྲུབ་ཅིང༌། འཇུག་པར་གཏོགས་པའི་སེམས་ཅན་མ་བསྒྲལ་བ་རྣམས་སྒྲོལ་བ་དང༌། མ་གྲོལ་བ་རྣམས་དགྲོལ་བ་དང༌། དབུགས་མ་ཕྱིན་པ་རྣམས་དབྱུང་བ་དང༌། ཡོངས་སུ་མྱ་ངན་ལས་མ་འདས་པ་རྣམས་ཟློ་བ་ལ་འགོད་ཅིང༌། སྦས་དོན་དུ་ཐམས་ཅད་ཟུང་འཇུག་ཨེ་ཝཾ་གྱི་སྡོམ་པས་རྒྱས་འདེབས་པ་དང༌། ཞུ་བདེས་ཕུང་ཁམས་དབང་ཡུལ་གྱི་ལྷ་རྣམས་ཚིམ་པར་མཆོད་ཅིང་ཕྲ་རགས་ཀྱི་སྒོ་གསུམ་ཤིན་ཏུ་ཕྲ་བ་རྡོ་རྗེ་གསུམ་གྱི་རང་བཞིན་གཞི་རྫོགས་ཡེ་གྲོལ་ཆེན་པོར་སྒྲོལ་དགྲོལ་དབྱུང་ཞིང་ཟློ་བར་བྱེད་པ་ནི་ལས་ཀྱི་རིགས་ཀྱི་དམ་ཚིག་གོ །རྩ་བའི་དམ་ཚིག་ནི། སྤྱིར་སྒོ་གསུམ་མི་དགེ་བ་ལས་ལྡོག་ཅིང་ལྷ་སྔགས་ཏིང་ངེ་འཛིན་ལས་མི་འདའ་བ་ནི། སྐུ་གསུང་ཐུགས་ཀྱི་དམ་ཚིག་ཡིན་ལ། ཁྱད་པར་དུ་སྒོ་གསུམ་གཡོ་ཟོལ་མེད་པས་ཅི་མཉེས་ཀྱིས་བླ་མ་བསྐུར་བ་དང༌། མཆེད་ལྕམ་ལ་རྟག་ཏུ་མི་འབྲལ་ཞིང་ཕན་འདོགས་པའི་བསམ་པས་བརྩེ་གདུང་རྒྱུན་མི་ཆད་པའི་བྱམས་པས་བྱ་བ་གཉིས་ནི་རྡོ་རྗེའི་སྐུའི་དམ་ཚིག །སྔགས་དང་ཕྱག་རྒྱ་བརྩོན་པ་རབ་འབྲིང་གི་དབང་ལས་ཉིན་མཚན་དུས་དྲུག་གམ་ཟླ་ཞག་ལོ་དུས་རྣམས་ལས་མི་འདའ་བར་བྱེད་པ་ནི་རྡོ་རྗེ་གསུང་གི་དམ་ཚིག །གསང་བའི་དོན་གཞན་དུ་མི་སྨྲ་བ་དང༌། བླ་ན་མེད་པའི་བྱང་ཆུབ་ཀྱི་སེམས་ཟུང་འཇུག་གྱི་ཕྱག་རྒྱ་ལས་མི་འདའ་བ་གཉིས་ནི་རྡོ་རྗེ་ཐུགས་ཀྱི་དམ་ཚིག་གོ །ཁྱད་པར་དུའང་འགྲོ་བ་མཐའ་དག་ཡེ་ནས་རང་བཞིན་རྣམ་དག་ཡིན་པས་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་མཉམ་པར་སྦྱོར་བ་ནི་མཉམ་པ་ཆེན་པོའི་དམ་ཚིག་སྟེ། དེ་ཉིད་ཤེས་རབ་དང་ཏིང་ངེ་འཛིན་གྱིས་རྟོགས་ཤིང་གོམས་པར་བྱས་པ་ལས་དངོས་གྲུབ་ཐམས་ཅད་འབྱུང་བའི་ཕྱིར་བརྩོན་པར་བྱའོ།

།ཡན་ལག་གི་དམ་ཚིག་ནི། ལྔ་ཚན་ལྔ་ལས། ཤེས་པར་བྱ་བ་ལྔ་ནི། ཕུང་ཁམས་སོགས་ལྔ་ཚན་གྱི་རྟོག་ཚོགས་རྣམས་ཡེ་ནས་རིགས་ལྔ་ཡབ་ཡུམ་སོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་རྟོགས་པར་བྱེད་པ་སྟེ་ལྟ་བའི་དམ་ཚིག་གོ །མི་སྤང་བ་ལྔ་ནི། དུག་ལྔ་ཐབས་གྱིས་ཟིན་ན་ལམ་གྱི་གྲོགས་སུ་འགྱུར་བས་མི་སྤོང་ཞིང༌། སྦས་དོན་ཆོས་ཐམས་ཅད་མཉམ་པ་ཉིད་དུ་རྫོགས་པས་ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་འབྱེད་པ་མེད་པའི་གཏི་མུག །མི་དམིགས་པའི་སྙིང་རྗེ་ཆེན་པོའི་འདོད་ཆགས། རང་རིག་པའི་ཡེ་ཤེས་རྟོག་པ་འཇོམས་པའི་ཞེ་སྡང༌། ཟུང་འཇུག་ལྟ་བའི་རྒྱལ་པོ་གཤོངས་སུ་མི་འབེབས་པའི་ང་རྒྱལ། གཉིས་འཛིན་གྱི་ཞེན་རྟོག་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་སྟེ་རྟོགས་གོམས་ཀྱི་སྦྱོར་བས་མི་སྤོང་བའོ། །སྤྱད་པར་བྱ་བ་ལྔ་ནི། སྲོག་གཅོད། མ་བྱིན་ལེན། མི་ཚངས་སྤྱོད། རྫུན་དང༌། བརླང་ཚིག་སྨྲ་བ་རྣམས་ཞིང་བཅུ་སྒྲོལ་བ་ལ་སོགས་ཏེ་གཞན་དོན་དུ་འགྱུར་ན་སྤྱད་པར་བྱ་ཞིང༌། སྦས་དོན་དུ་སྲོག་ནི་རླུང་སྟེ་བུམ་ཅན་ལ་སོགས་པའི་ཐབས་ཀྱིས་དགག་པའམ་གཟུང་འཛིན་རྟོག་པའི་སྲོག་རང་རིག་པའི་ཡེ་ཤེས་ཀྱིས་གཅོད་པ། བཙུན་མོའི་ཤུ་ཀྲའམ་བདེ་ཆེན་གྱི་ཡེ་ཤེས་སུས་ཀྱང་སྦྱིན་པ་མེད་པར་དེ་བླང་བ་དང༌། རང་རིག་ཉིད་ཡུལ་ཕྱག་རྒྱ་ཆེན་པོ་དང་ཁ་སྦྱོར་ལ་བརྟེན་ནས་ཞུ་བདེ་འགྱུར་མེད་སྒྲུབ་པ་ནི་འདོད་པ་སྤྱོད་པ་དང༌། འཁོར་བ་མེད་སྣང་ལས་འགྲོ་བ་སྒྲོལ་བའི་རྫུན་དང༌། སྒྲ་ཐམས་ཅད་བརྗོད་མེད་དུ་རྟོགས་པས་གབ་སྦས་མེད་པར་བརྡ་སྤྲོད་པ་ལ་སོགས་པའི་བརླང་ཚིག་རྣམས་སོ། །དང་དུ་བླང་བ་ལྔ་ནི། བྱང་སེམས་དཀར་དམར། དྲི་ཆེན། དྲི་ཆུ། ཤ་ཆེན་གྱི་དྭངས་མ་རྣམས་གཙང་དམེའི་རྟོག་པ་སྦྱོང་བ་ལ་སོགས་པའི་དགོས་པས་བརྟེན་ཅིང༌། སྦས་དོན་དུ་ཕུང་ལྔའི་དྭངས་མ་འཛག་མེད་དུ་འཆིང་བས་དང་དུ་བླང་བའོ། །བསྒྲུབ་པར་བྱ་བ་ལྔ་ནི། ཤེས་པར་བྱ་བའི་དམ་ཚིག་ལྔ་པོ་དེ་ཉིད་རྟོགས་གོམས་ཀྱིས་སྦྱོར་བས་རང་རྒྱུད་ལ་ཚུལ་བཞིན་དུ་སྒྲུབ་པར་བྱེད་པ་སྟེ་སྒོམ་པའི་དམ་ཚིག་དང༌། བར་མ་གསུམ་པོ་ཕྱི་ལྟར་ན་སྤྱོད་པའི་དམ་ཚིག་གཙོ་ཆེའོ། །རྩ་བའི་དམ་ཚིག་གསུམ་དང་ཡན་ལག་ཉེར་ལྔ་བསྡམས་པས་དམ་ཚིག་ཉེར་བརྒྱད་ཅེས་མ་ཧཱའི་སྤྱི་སྐད་དུ་གྲགས་སོ། །ལྷག་པའི་དམ་ཚིག་ནི། སྤྱི་དང་ཁྱད་པར་གྱི་དམ་ཚིག་ལ་གནས་པའི་གང་ཟག་གིས་སྒྲུབ་པ་ལ་སོགས་པའི་སྐབས་སུ་བསྲུང་བར་བྱ་བ་ལྷག་པར་བསྟེན་པའི་དམ་ཚིག །གཅན་གཟན་གྱི་རྒྱལ་པོའི་ཁྲི་མི་བཤིག་པ་ལ་སོགས་ཉི་ཤུ་སྟེ། བརྡས་བསྟན་པའི་དོན་གོ་བདེ་བར་བཀྲོལ་ན། རྡོ་རྗེ་སློབ་དཔོན་གྱི་སྐུུ་ལ་མི་འཚེ་ཞིང་བཀའ་མི་གཅོག །བླ་མའི་ཡུམ་ལ་མི་སྤྱོད། དད་ཅན་ཚོགས་མི་གཅོག །དཀོན་ཅོག་དང་མཁས་པའི་དཀོར་ལ་མི་འབག་ཅིང་ཆང་མྱོས་པར་མི་འཐུང༌། རྡོ་རྗེ་སྤུན་གྱི་ཡུམ་ལ་མི་སྤྱོད། མཚན་ངན་གྱི་གཟུངས་མ་མི་བསྟེན། མཚན་ཉིད་དང་མི་ལྡན་པའི་དམ་རྫས་མི་བསྟེན། མཁས་པའི་ཡོན་ཏན་ལ་མི་གཤེ །སྣོད་མིན་ལ་གསང་ཆོས་མི་སྟོན། མཚན་ལྡན་གྱི་གཟུངས་མ་དང༌། སྣོད་ལྡན་གྱི་སློབ་མ་མི་སྤང༌། དོན་བདེ་སྟོང་དང་རྟགས་ཡབ་ཡུམ་དང་མི་འབྲལ། མཆེད་ལ་ཀྱལ་ཀ་ཙམ་དུའང་ནང་འཐབ་མི་བྱེད། གཞན་གྱིས་སྤྱད་པའི་ལྷག་མི་སྤྱོད། བླ་མའི་གདན་ས་མི་རློམ། རང་གཞན་གྱི་མཚམས་མི་འདྲལ། ཏིང་འཛིན་བྱིང་རྒོད་ཀྱི་དབང་དུ་མི་གཏོང་བཟླས་པ་དང་ཆོ་ག་མི་ཚིག་གིས་བར་མི་གཅོད། དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗེད། རྣལ་འབྱོར་པའི་དཀྱིལ་འཁོར་མི་དཀྲུགས་ཤིང་སྐྱེ་བོའི་མཐུ་ཟློག་མི་བྱེད། སློབ་དཔོན་གཙུག་ཏུ་ཁུར་བ་ལས་ཉམས་པར་མི་བྱ་བ་རྣམས་སོ། །དེ་དག་སྲུང་བའི་ཐབས་ནི། གནང་བཀག་གི་གནས་རྣམས་མི་བརྗེད་པའི་དྲན་པ་དང༌། དམ་ཚིག་ལས་འདས་མ་འདས་རྟོག་དཔྱོད་བྱེད་པའི་ཤེས་བཞིན་དང༌། གཟོབ་པ་ལྷུར་ལེན་པའི་བག་ཡོད་དང༌། ཉམས་ན་བདག་ཉིད་ངན་སྙམ་དུ་རང་ལ་བརྟེན་ནས་འཛེམ་པའི་ངོ་ཚ་ཤེས་པ་དང༌། ཡུལ་གཞན་ལ་བརྟེན་ནས་འཛེམ་པའི་ཁྲེལ་ཡོད་པ་དང༌། ཉམས་པའི་ཉེས་དམིགས་མཐོང་བས་འཇིགས་པ་དང༌། ཕན་ཡོན་ལ་བྲོད་པས་གུས་པ་སྟེ་དེ་དག་གི་སྒོ་ནས་འབད་པས་བསྲུང་བའོ། །དེ་ཡང་སྡོམ་འབྱུང་ལས། ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླའི། །རྟག་ཏུ་དམ་ཚིག་བསྲུང་བར་བྱ། །ཞེས་སོ། །ཉམས་ན་ཕྱིར་བཅོས་པ་ནི། ཡུལ་གང་ཟག་ལས་ཉམས་པ་རྣམས་དེ་དག་གི་དྲུང་དུ་བཤགས་ཤིང༌། གཞན་རྣམས་འགྱོད་སྡོམ་གྱི་སྒོ་ནས་ཇི་ལྟར་རིགས་པས་བཤགས་པར་བྱ་ལ། ཉམས་པ་ཆེན་པོ་ནི། ཡུལ་གང་ལ་བརྟེན་ནས་ཉམས་ཀྱང་རུང་སྟེ། ཐོག་མར་སོ་སོའི་ལུགས་བཞིན་བཤགས་ནས་སླར་དབང་དང་དམ་ཚིག་ནོད་པར་བྱ་བ་ཡིན་ནོ། །སྔགས་པས་རྩ་བའི་དམ་ཚིག་ལས་འགལ་ན་རྡོ་རྗེའི་དམྱལ་བར་ཟང་ཐལ་དུ་འགྲོ་བས་མཚོན་ཉམས་པའི་ཉེས་དམིགས་དང༌། དམ་ཚིག་ཚུལ་བཞིན་ཏུ་བསྲུང་ན་རབ་ཚེ་གཅིག །འབྲིང་དང་ཐ་མས་སྐྱེ་བ་བདུན་ནམ་བཅུ་དྲུག་ཚུན་ལ་མཆོག་འགྲུབ་པ་སོགས་གནས་སྐབས་དང་མཐར་ཐུག་གི་ཕན་ཡོན་དཔག་ཏུ་མེད་པར་གསུངས་སོ།

།གསུམ་པ་སྐྱེད་བསྲིང་བ་ལ་གཉིས། ཚིག་གོང་མ་དང་མཚམས་སྦྱོར་བའི་ཚུལ་གྱིས་མིང་བསྟན་པ་དང༌། དེའི་དོན་རྒྱས་པར་བཤད་པའོ། །དང་པོ་ནི། དེ་ལྟར་རྒྱུད་སྨིན་དག་པའི་གང་ཟག་གིས༔ ས་བོན་སྐྱེད་བྱེད་ལམ་གྱི་རིམ་པ་ནི༔ ཞེས་གསུངས་ཏེ། དེ་ལྟར་དབང་བཞིས་རྒྱུད་སྨིན་ཅིང་དམ་ཚིག་མ་ཉམས་པས་སྒོ་གསུམ་རྣམ་པར་དག་པའི་གང་ཟག་སྔགས་ཀྱི་ལམ་ལས་དངོས་གྲུབ་མྱུར་དུ་སྒྲུབ་པར་འདོད་པ་དག་གིས་ས་བོན་བཏབ་པ་དེ་ཉིད་བྱང་ཆུབ་ཀྱི་ལམ་དུ་སྐྱེད་བསྲིང་བར་བྱེད་པའི་ཐབས་ཟབ་མོ་ལམ་གྱི་རིམ་པ་ནི་འདི་ལྟར་རོ། །ཞེས་སོ། །དེའང་རྡོ་རྗེ་ཐེག་པའི་ལམ་རིམ་དངོས་ནི་བསྐྱེད་རྫོགས་གཉིས་ཡིན་ལ་དེ་གཉིས་ཀྱི་སྤྱི་དོན་ཅུང་ཟད་བཤད་ན། རིམ་གཉིས་སོ་སོའི་ངོ་བོ། །ངེས་ཚིག །དབྱེ་བ། གོ་རིམ། དགོས་པ་སྟེ་ལྔ་ལས། དང་པོ་བསྐྱེད་རིམ་གྱི་ངོ་བོ་ནི། རྗེས་དཔག་གི་ལྷའི་རྣལ་འབྱོར་ཏེ། མཚན་ཉིད་ཞུ་བདེ་དང་མཚུངས་ལྡན་དུ་གྱུར་པ་བཅོས་ཤིང་བརྟགས་པ་ལས་བྱུང་བའི་ལྷ་སྐུ་སྣང་སྟོང༌། དེ་ཡང་ཁྱད་གཞི་རྣམ་རྟོག་གིས་བརྟགས་པའི་ལྷ་སྐུ་ལ། ཁྱད་ཆོས་ཆོ་གའི་ཁྱད་པར་རྒྱལ་བས་སྔགས་རྒྱུད་ལས་གསུངས་པའི་བསྐྱེད་ཆོག་གི་རིམ་པ་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ། ངོ་བོའི་ཁྱད་པར་ཐུན་མོང་མ་ཡིན་པའི་ཞུ་བདེའི་ཆ་ཤས་དང་སྟོང་ཉིད་ཀྱིས་རྒྱས་བཏབ་པ། བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བ་སྟེ་ཁྱད་ཆོས་བཞི་ལྡན་ནོ། །རྫོགས་རིམ་གྱི་ངོ་བོ་ནི། མངོན་སུམ་པའི་ལྷའི་རྣལ་འབྱོར་ཏེ། མཚན་ཉིད་ཞུ་བདེ་དང་མཚུངས་ལྡན་དུ་གྱུར་པའི་བཅོས་མིན་གྱི་ལྷ་སྐུ་སྣང་སྟོང་མི་བརྟན་པ་རྒྱུའི་རྫོགས་རིམ་དང༌། དེ་བརྟན་པ་འབྲས་བུའི་རྫོགས་རིམ་གྱི་མཚན་ཉིད། དེ་ཡང་ཁྱད་གཞི་རྣམ་པར་མི་རྟོག་པའི་ཡེ་ཤེས་ལ། ཁྱད་ཆོས་རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་བྱེད། རྣམ་པའི་ཁྱད་པར་བདེ་བ་ཆེན་པོ་དང་སྟོང་གཟུགས་ལྷན་ཅིག་པ་སྟེ་ཁྱད་པར་གསུམ་ལྡན་ནོ། །གཉིས་པ་ནི། བསྐྱེད་རིམ་གྱི་སྐད་དོད་ཨུཏྤཏྟི་ཀྲ་མ་ཞེས་པའི་ཨུཏྤཏྟི་ནི་བཅོས་པའམ་བཏགས་པ་སོགས་ལ་འཇུག་པས་རྣམ་པར་རྟོག་པས་གསར་དུ་བཅོས་པའམ་བཏགས་པའི་དོན་ཏེ་བསྐྱེད་པ་ཡིན་ལ་གང་ལས་བཅོས་ཤིང་གདགས་པའི་གཞི་ནི་རྫོགས་པའི་རིམ་པ་སྟེ། དེ་ཉིད་ཀྱི་སྐད་དོད་ནིཥྤནྣ་ཀྲ་མ་ཞེས་པའི་ནིཥྤནྣ་ནི་མ་བཅོས་པ། གྲུབ་པ། རྫོགས་པ་སོགས་ལ་འཇུག་པས་བཅོས་མེད་ཤུགས་འབྱུང་གི་དོན་ནོ། །དེ་གཉིས་ཀའི་ཀྲ་མ་ནི་རིམ་པ་སྟེ་ཐབས་སམ་ལམ་གྱི་གོ་རིམ་གྱི་དོན་དུ་འགྱུར་རོ། །གསུམ་པ་ནི། ངོ་བོའི་སྒོ་ནས་དབྱེ་ན། བཅོས་ཤིང་བཏགས་པ་རྗེས་སུ་དཔག་པའི་ལྷའི་རྣལ་འབྱོར་གྱི་ལམ་འཁོར་བཅས་ལ་བསྐྱེད་རིམ་དང༌། བཅོས་མ་དང་བྲལ་བ་མངོན་སུམ་པའི་ལྷའི་རྣལ་འབྱོར་གྱི་ལམ་འཁོར་བཅས་ལ་རྫོགས་རིམ་སྟེ་གཉིས། སྦྱང་བྱ་སྦྱོང་བྱེད་ལ་ལྟོས་ན། ཀུན་རྫོབ་འཇིག་རྟེན་སྐྱེ་བའི་རིམ་པ་དང་སྦྱར་ཏེ་བསྐྱེད་རིམ་ཀུན་རྫོབ་བདེན་པའི་རྣལ་འབྱོར་དང༌། དོན་དམ་འཇིག་རྟེན་འགག་པའི་རིམ་པ་དང་སྦྱར་ཏེ་རྫོགས་རིམ་དོན་དམ་བདེན་པའི་རྣལ་འབྱོར་ཞེས་པ་གཉིས། སྒོམ་ཚུལ་གྱི་སྒོ་ནས། སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ནས་བསྐྱེད་རིམ་སྒོམ་ཚུལ་བཞི་སྟེ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་སོ། །རྫོགས་རིམ་ནི། ཀུན་རྫོབ་རང་བྱིན་རླབས་པའྀ་རིམ་པ་རྩ་རླུང་ཐིག་ལེའི་རྣལ་འབྱོར་དང༌། གཞན་ལུས་ལ་བརྟེན་པ་དཀྱིལ་འཁོར་འཁོར་ལོ། དེ་དག་རྣམས་ཀྱི་རྒྱས་འདེབས་སུ་གྱུར་པ་དོན་དམ་འོད་གསལ་ཆེན་པོ་བརྗོད་མེད་ལྷན་ཅིག་སྐྱེས་པའི་རིམ་པ་སྤྱི་དང༌། ཁྱད་པར་རྫོགས་པ་ཆེན་པོ་སེམས་ཀློང་མན་ངག་གི་སྡེ་རྣམས་སོ། །བཞི་པ་ནི། གནས་ལུགས་ཀྱི་ལམ་ལ་འཇུག་པའི་སྔོན་དུ་རྒྱུད་སྦྱོང་བའི་ཕྱིར་བསྐྱེད་རིམ་ལམ་གྱི་སྔོན་འགྲོར་སྦྱར་ཞིང༌། རྒྱུད་བྱང་ནས་གནས་ལུགས་དངོས་བསྒོམ་པའི་ཕྱིར་རྫོགས་རིམ་ལམ་གྱི་དངོས་གཞི་ཡིན་པའི་རིམ་པའམ། ཡེ་ཤེས་ཀྱི་ཚོགས་ཀྱི་གཞི་འདིང་བ་བསོད་ནམས་ཀྱི་ཚོགས་དང༌། ཡེ་ཤེས་ཀྱི་ཚོགས་ཁྱད་པར་ཅན་རྣམ་པ་ཐམས་ཅད་པའི་ཡེ་ཤེས་སྐྱེ་བའི་གེགས་བསལ་བའི་རྒྱུར་ཡང་བསོད་ནམས་ཀྱི་ཚོགས་བསྐྱེད་པའི་རིམ་པ་བསྒོམ་པ་སྔོན་དུ་འགྲོ་དགོས་པའི་ཕྱིར་ཏེ། རྡོ་རྗེ་སྙིང་འགྲེལ་ལས། རྣམ་རྟོག་བག་ཆགས་ཀྱིས་བཅིངས་པ། །ཐོག་མར་རྟོག་པའི་ཆོ་ག་བསྟན། །རྣམ་རྟོག་རང་བཞིན་ཤེས་པ་ན། །མི་རྟོག་པ་ལ་འཇུག་པར་བྱ། །ཞེས་དང༌། རིམ་ལྔ་ལས་ཀྱང༌། བསྐྱེད་པའི་རིམ་ལ་ལེགས་གནས་ཤིང༌། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་འབྱུང་སྟེ་མདོར་ན་སྦྱང་བྱ་འཁྲུལ་པ་ཀུན་བརྟགས་དང་ས་བོན་གྱི་ཆ་གཉིས་སྦྱོང་བྱེད་རྟེན་དང་བརྟེན་པ། གྲུབ་འབྲས་ཐུན་མོང་དང་མཆོག་གི་གོ་རིམ་སོགས་ལ་ལྟོས་པའོ། །ལྔ་པ་ནི། སྣོད་བཅུད་ཐ་མལ་དུ་འཛིན་པ་སྤོང་ཞིང༌། ལམ་མ་དག་ས་བདུན་དང༌། འབྲས་བུ་གཟུགས་སྐུའི་རྟེན་འབྲེལ་སྒྲིག་པའི་ཕྱིར་དང༌། ཁྱད་པར་རང་གི་དངོས་འབྲས་འཇིག་རྟེན་པའི་དངོས་གྲུབ་འགྲུབ་པ་ནི་བསྐྱེད་རིམ་དང༌། འཕོ་བའི་བག་ཆགས་ཀྱི་དྲི་མ་སྤོང་ཞིང༌། ལམ་དག་པ་ས་གསུམ་དང་འབྲས་བུ་ལྷན་ཅིག་སྐྱེས་སྐུའི་རྟེན་འབྲེལ་སྒྲིག་པའི་ཕྱིར་དང༌། ཁྱད་པར་རང་གི་དངོས་འབྲས་ཕྱག་རྒྱ་ཆེན་པོ་མཆོག་གི་དངོས་གྲུབ་འགྲུབ་པ་ནི་རྫོགས་རིམ་གྱི་དགོས་པ་སྟེ། སྙིང་པོའི་རྒྱུད་ཕྱི་མ་ལས། འཇིག་རྟེན་པ་ཡི་དངོས་གྲུབ་ནི། །བསྐྱེད་པའི་རིམ་པའི་སྦྱོར་བས་ཐོབ། །འཇིག་རྟེན་འདས་པའི་དངོས་གྲུབ་ནི། །རྫོགས་པའི་རིམ་པའི་སྦྱོར་བས་སོ། །ཞེས་པ་ལྟར་རོ། །གཉིས་པ་ལ་བཞི། བུམ་དབང་དང་རྗེས་སུ་འབྲེལ་བའི་བསྐྱེད་རིམ་སྣང་སྟོང་ཟུང་འཇུག་བསྒོམ་པ། གསང་དབང་དང་རྗེས་སུ་འབྲེལ་བའི་ཟབ་ལམ་གསལ་སྟོང་ཟུང་འཇུག་བསྒོམ་པ། དབང་གསུམ་པ་དང་རྗེས་སུ་འབྲེལ་བའི་ཕོ་ཉའི་ལམ་བདེ་སྟོང་ཟུང་འཇུག་བསྒོམ་པ། དབང་བཞི་པ་དང་རྗེས་སུ་འབྲེལ་བའི་རྫོགས་ཆེན་རིག་སྟོང་ཟུང་འཇུག་ཏུ་བསྒོམ་པའོ། །དང་པོ་ལ་གསུམ། བསྐྱེད་རིམ་གྱི་དགོས་པ་བསྟན་པ། བསྐྱེད་རིམ་དངོས། དེའི་དོན་བསྡུ་བའོ། །དང་པོ་ནི། དང་པོ་བུམ་པའི་དབང་དང་རྗེས་འབྲེལ་བ༔ སྣོད་བཅུད་ཐལ་མལ་སྣང་ཞེན་སྦྱང་བའི་ཕྱིར༔ ཐུན་མོང་ཁྱད་པར་བསྐྱེད་རིམ་དག་ལ་བསླབ༔ ཅེས་གསུངས་ཏེ། ལམ་གྱི་རིམ་པ་དེ་ལའང་དབང་བཞི་སོ་སོ་དང་རྗེས་སུ་འབྲེལ་བའི་ལམ་བཞི་ཡོད་པ་ལས། དང་པོ་བུམ་པའི་དབང་དང་རྗེས་སུ་འབྲེལ་བའི་ལམ་ནི། བརྟན་པ་སྣོད་དང་གཡོ་བ་བཅུད་ཀྱི་འཇིག་རྟེན་ཐ་མལ་གྱི་དངོས་པོར་སྣང་བ་ལ་དེ་དང་དེར་ཞེན་པའི་ཀུན་ཏུ་རྟོག་པ་འདི་ཉིད་སྦྱང་བར་བྱ་བའི་ཕྱིར་དུ། ཐུན་མོང་བ་མ་ཧཱ་དང་ཁྱད་པར་བ་ཡོ་ག་གོང་མ་གཉིས་ཀྱི་ཚུལ་དང་མཐུན་པའི་བསྐྱེད་རིམ་དག་ལ་བསླབ་པར་བྱའོ། །གཉིས་པ་ལ་གཉིས། སྡོམ་གྱི་སྒོ་ནས་མདོར་བསྟན། དེའི་དོན་རྒྱས་པར་བཤད་པའོ།

།དང་པོ་ནི། དེ་ལ་བསྒྲུབ་བྱའི་ལྷ་དང་སྒྲུབ་བྱེད་ཐབས༔ ཇི་ལྟར་བསྒྲུབ་པའི་ལམ་དང་འབྲས་བུར་བཅས༔ ཞེས་གསུངས་ཏེ། དེའང་དཔེར་ན་ཚོང་དོན་དུ་གཉེར་བ་ལ། བསྒྲུབ་བྱ་རིན་ཐང་ཆེ་བའི་ནོར། སྒྲུབ་བྱེད་རིན་ཐང་དཔོག་པའི་ཟོང༌། སྒྲུབ་ཚུལ་ཚོང་གི་ཐབས་ལ་མཁས་པས། གྲུབ་འབྲས་འདོད་པའི་ནོར་བདེ་བླག་ཏུ་ཐོབ་པ་བཞིན། བསྐྱེད་རིམ་གྱི་ལམ་དེ་ལའང་བསྒྲུབ་བྱ་ཆོས་དབྱིངས་རང་བཞིན་གྱིས་རྣམ་པར་དག་པའི་ལྷ་དང༌། ཡེ་ཤེས་ཀྱི་བདག་ཉིད་ཀྱི་ལྷ་དང༌། དེ་དག་གི་བྱིན་རླབས་མཚན་མའི་ལྷར་གྲགས་པ་སྟེ་གསུམ། སྒྲུབ་བྱེད་ཀྱི་ཐབས་སྔོན་འགྲོ་དངོས་གཞི་རྗེས་ཀྱིས་བསྡུས་པ་རྣམས་དང༌། ཇི་ལྟར་སྒྲུབ་པའི་ཚུལ་ཕྱག་རྒྱ་གཅིག་སྤྲོས་ཚོམ་བུ་ཚོགས་ཀྱི་སྒྲུབ་པ་རྣམས་དང༌། བསྒྲུབས་པའི་འབྲས་བུ་རིག་འཛིན་བཞིར་གྲུབ་པའི་ཚུལ་དང་བཅས་ལྟོས་ནས་འབྲེལ་བའི་ཚུལ་གྱིས་རིམ་པར་བསྟན་པར་བྱའོ། །གཉིས་པ་ལ་བཞི། གང་བསྒྲུབ་བྱའི་ལྷ། གང་གིས་སྒྲུབ་པའི་ཐབས། ཇི་ལྟར་སྒྲུབ་པའི་ལམ། དེ་ལྟར་བསྒྲུབས་པའི་འབྲས་བུའོ། །དང་པོ་ནི། བསྒྲུབ་བྱ་བླ་མ་ཡི་དམ་མཁའ་འགྲོའི་ཚོགས༔ ཞི་དང་ཁྲོ་བོའི་བྱེ་བྲག་བསམས་འདས་ཀྱང་༔ བྱིན་རླབས་དངོས་གྲུབ་ཁྱད་པར་མྱུར་འདོད་ན༔ རྩ་གསུམ་ཀུན་འདུས་པདྨ་ང་ཉིད་བསྒོམ༔ དེ་ཡང་ཕྱི་ལྟར་བར་ཆད་ཀུན་སེལ་ཕྱིར༔ སྣང་སྲིད་ཟིལ་གནོན་སྐུ་གསུམ་པདྨ་འབྱུང་༔ རིག་འཛིན་རྩལ་འཆང་རྣམ་འཕྲུལ་བཅུ་གཉིས་བཅས༔ སྤྱྀ་དང་བྱེ་བྲག་ཚུལ་དུ་བསྙེན་པར་བྱ༔ ནང་ལྟར་མཆོག་ཐུན་བསམ་པ་ལྷུན་གྲུབ་ཕྱིར༔ བདེ་བ་ཆེན་པོ་པདྨ་སཾ་བྷ་བ༔ ཡིད་བཞིན་ནོར་བུ་གུ་རུ་བཅུ་གསུམ་བཅས༔ བསྐྱེད་རྫོགས་ཐབས་དང་གྲོལ་བ་ཉེ་བར་བསྙེན༔ གསང་བ་དབྱིངས་དང་རིག་པ་དབྱེར་མེད་པ༔ ཕྱག་རྒྱའི་གཟུགས་ཤར་མཚོ་སྐྱེས་རྡོ་རྗེ་འཆང་༔ རྩ་གསུམ་ཀུན་འདྲིལ་སྙིང་པོའི་རྣལ་འབྱོར་གྱིས༔ མི་འགྱུར་ལྷན་ཅིག་སྐྱེས་པའི་ཡེ་ཤེས་བསྒྲུབ༔ ཡང་གསང་རིག་འཛིན་རྡོ་རྗེ་དྲག་པོ་རྩལ༔ བདེ་གཤེགས་ཀུན་འདུས་ཁྲག་འཐུང་ཡོངས་རྫོགས་ལྷ༔ སྒྲུབ་པ་ཆེན་པོ་ཉེ་རྒྱུའི་སྤྱོད་པ་ཡིས༔ མཐར་ཐུག་སྐུ་དང་ཡེ་ཤེས་མངོན་དུ་བྱ༔ ཞེས་གསུངས་ཏེ། དེ་ལ་དང་པོ་བསྒྲུབ་པར་བྱ་བའི་ལྷ་ནི་སྤྱིར་གོང་དུ་སྨོས་པ་ལྟར་གསུམ་ལས། དང་པོ་ནི། འོད་གསལ་བྱང་ཆུབ་ཀྱི་སེམས་སྟོང་གསལ་འགག་པ་མེད་པའི་གནས་ལུགས་ཡེ་ཤེས་གསུམ་ལྡན་ཏེ། ངོ་བོ་རང་བཞིན་ཐུགས་རྗེ་གསུམ་དུ་འགྲོ་བ་ཀུན་ལ་ཁྱད་པར་མེད་པར་གདོད་ནས་བཞུགས་པ་ནི་དམ་ཚིག་སེམས་དཔའ་དང༌། གཉིས་པ་ནི། འཁོར་འདས་ཐམས་ཅད་ལ་ཁྱབ་པ་སངས་རྒྱས་ཐམས་ཅད་ཀྱི་ཆོས་ཀྱི་སྐུ་ཡེ་ཤེས་སེམས་དཔའ་སྟེ། དེ་གཉིས་གདོད་མ་ནས་དབྱེར་མི་ཕྱེད་པའི་རང་བཞིན་ཅན་དུ་བཞུགས་པ་ནི་དམ་ཡེ་གཉིས་མེད་ཀྱི་དོན་ཏེ། དྲི་མ་སྦྱང་བའི་གཞི་ནོར་བུ་རིན་པོ་ཆེ་ལྟ་བུའོ། དེ་ལ་རྒྱུའི་ཐེག་པར་རིགས་དང་ཁམས་དང་བདེ་བར་གཤེགས་པའི་སྙིང་པོ་སོགས་ཀྱིས་བསྟན་ལ། སྔགས་ཀྲི་ཡ་བས་བདག་གི་དེ་ཁོ་ན་ཉིད་དང༌། ཨུ་བྷ་ཡས་བྱང་ཆུབ་ཀྱི་སེམས། །ཡོ་གས་ཐོག་མཐའ་མེད་པའི་བྱང་ཆུབ་ཀྱི་སེམས་སམ་བྱང་ཆུབ་ཀྱི་སེམས་ཀུན་ཏུ་བཟང་པོ་དང༌། མ་ཧཱ་ཡོ་ག་བས་རང་རིག་པ་བྱང་ཆུབ་ཀྱི་སེམས་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བའམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ། ཨ་ནུས་དབྱིངས་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་བཏགས་ཤིང༌། མན་ངག་སྡེ་པས། ལུས་ཅན་རྣམས་ཀྱི་སྙིང་དབུས་ན་དྭངས་མ་ལྔ་འདུས་ལ་བརྟེན་པའི་སེམས་ཉིད་འོད་གསལ་བའི་ཆོས་སྐུ་བྱང་ཆུབ་ཀྱི་སེམས་བཞུགས་པར་གསུངས་པ་དང༌། གཞན་དུ་མ་དག་པའི་ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་འདི་དག་གི་སྣང་གཞི་གཉུག་མའི་ཕུང་སོགས་སམ་ཕུང་ཁམས་སྐྱེ་མཆེད་གཞན་ཞེས་གྲགས་པ་ཡེ་ནས་གདན་གསུམ་ཚང་བའི་ལྷའི་དཀྱིལ་འཁོར་དུ་རྣམ་པར་དག་པ་དང༌། ཤིན་ཏུ་ཕྲ་བའི་སྒོ་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་གྱི་ལྷའི་བདག་ཉིད་དུ་གནས་པར་བཤད་པ་རྣམས་ཀྱང་དོན་གཅིག་ཏུ་འབབ་བོ། །དེ་ལྟར་ཡིན་ཀྱང་རང་ངོ་མ་ཤེས་པས་ཐ་དད་དུ་བཟུང་བས་འཁྲུལ་ཏེ་མ་རྟོགས་པ་ནི་སྦྱང་བྱའི་དྲི་མ་འདམ་རྫབ་ལྟ་བུ་སྟེ། དཔེར་ན་ནོར་བུ་ཉིད་འདམ་ཀྱི་དྲི་མ་ལས་མ་གྲོལ་བར་རང་གི་བྱ་བ་བྱེད་མི་ནུས་པ་ལྟར་གཉིས་མེད་ཀྱི་དོན་དེ་ཡང་མ་རྟོགས་ན་ཡིན་པ་ཙམ་གྱིས་ཕན་མི་ཐོགས་པས་དྲི་མ་སྦྱང་དགོས་ལ། དེ་སྦྱོང་བྱེད་ཀྱི་ཐབས་ནི་འཁྲུལ་པ་གློ་བུར་བ་ཀུན་བརྟགས་ཀྱི་ཆ་རྣམས་བསྐྱེད་རིམ་གྱིས་དང༌། ས་བོན་གྱི་ཆ་ནི་རྫོགས་རིམ་གྱིས་སྦྱོང་བ་ཡིན་ཅིང༌། ཇི་ལྟར་སྦྱཽང་ན། འཁྲུལ་པའི་ཆོས་ལས་ཉོན་སྡུག་བསྔལ་གྱི་རྣམ་པར་ཤར་བའི་རིགས་རྒྱུན་དེ་ཉིད་ལམ་བདེ་བ་ཆེན་པོར་སྒྱུར་བར་བྱེད་པ་ལ། སྒྱུར་ཚུལ་དེའི་རང་ངོ་ལ་བསལ་བཞག་མེད་པར་བཞག་པས་གང་ཤར་གྱི་རང་བཞིན་དག་སྣང་དུ་འཆར་བའི་གནད་ཀྱིས་ཏེ། རྒྱུ་མཚན་དེས་གསང་སྔགས་ཀྱི་ཐེག་པ་འདིར་ཀུན་འབྱུང་བདེན་པའི་རང་བཞིན་ལམ་བདེན་དང་སྡུག་བསྔལ་བདེན་པའི་རང་བཞིན་འགོག་བདེན་དུ་སྣང་བས་འབྲས་བུ་ལམ་བྱེད་ཀྱི་དོན་ཡང་དེ་ཡིན་པའི་ཕྱིར་ན་མཚན་ཉིད་ཐེག་པ་བས་གཞི་སྤོང་བགེགས་སྦྱོང་བའི་ལམ་ལས་ཁྱད་པར་དུ་འཕགས་པའོ།

།དེ་ལྟར་བསྒྲུབ་གཞི་དམ་ཡེ་དབྱེར་མེད་དངོས་ཟིན་ནས་སྐབས་ཀྱི་བསྒྲུབ་བྱ་དངོས། དེ་དག་གི་བྱིན་རླབས་སམ་རྩལ་ལས་ཤར་བའི་མཚན་མའི་ལྷ་སྟེ། དེའང་ངོ་བོ་བརྒྱུད་གསུམ་གྱི་བླ་མ་རིག་འཛིན། །ཐེག་རིམ་དགུའི་ཡི་དམ། གནས་གསུམ་མཁའ་འགྲོའི་ཚོགས་ཏེ་རྩ་བ་གསུམ། རྣམ་པ་ཞི་བ་དང་ཁྲོ་བོ། ཆགས་བྲལ་དང་ཆགས་བཅས། འཁོར་ལོའི་དབང་ཕྱུག་དང་འཁོར་ཀྱི་ཚུལ་དུ་བསྟན་པའི་བྱེ་བྲག་བསམ་ལས་འདས་པ་ཡོད་ཀྱང༌། བྱིན་རླབས་དང་དངོས་གྲུབ་རྣམ་པ་གཉིས་གཞན་ལས་ཁྱད་པར་དུ་མས་འཕགས་པ་མྱུར་དུ་ཐོབ་པར་འདོད་ན་རྩ་བ་གསུམ་པོ་དེ་ཀུན་གྱི་གསང་གསུམ་ཡོན་ཏན་ཕྲིན་ལས་དང་བཅས་པ་གཅིག་ཏུ་འདུས་པ་པདྨ་ཐོད་ཕྲེང་རྩལ་ང་ཉིད་བསྒོམ་པར་བྱའོ། །དེ་ལྟར་ཡང་ཐུགས་སྒྲུབ་གསང་འདུས་གནད་ཡིག་ལས། ང་སྒྲུབ་སངས་རྒྱས་ཐམས་ཅད་འགྲུབ༔ ང་མཐོང་སངས་རྒྱས་ཐམས་ཅད་མཐོང་༔ ང་ནི་བདེ་གཤེགས་འདུས་པ་ཡིན༔ ཅེས་དང༌། བྱང་གཏེར་ལས། དུས་གསུམ་སངས་རྒྱས་མ་ལུས་ཐམས་ཅད་ཀྱིས༔ དབང་བསྐུར་རྗེས་གནང་རྡོ་རྗེ་དྲག་པོ་རྩལ༔ པདྨ་འབྱུང་གནས་ང་ཉིད་སྒོམ་པ་ཡིས༔ ཞི་ཁྲོ་རབ་འབྱམས་ཐམས་ཅད་རྫོགས་པར་འགྱུར༔ ཅེས་སོགས་འབྱུང་བ་ལྟར་རོ། །དེ་ལྟར་བདེ་གཤེགས་ཀུན་འདུས་གུ་རུ་པདྨ་སྒྲུབ་པའི་ཚུལ་གཏེར་ཁ་རེ་རེར་ཡང་སྤྱི་དང་ཁྱད་པར་མཐའ་ཡས་པ་ཞིག་མཆིས་པ་ལས། འདིར་སྙིགས་མའི་རྒུད་པ་མཐར་ཐུག་པ་སྐྱོབ་པའི་དཔལ་མགོན་གཅིག་པུ་པ་གཏེར་འབྱིན་རིག་འཛིན་གྲུབ་པའི་རྒྱལ་པོ་རྣམ་པ་གཉིས་ཀྱི་ཟབ་གཏེར་དང་འབྲེལ་བའི་དབང་དུ་བྱས་ནས། ཕྱི་ལྟར་བྱང་ཆུབ་སྒྲུབ་པའི་ལམ་ལ་འཕྲལ་དང་ཡུན་ཏུ་ཕྱི་ནང་གསང་བའི་གེགས་དང་བར་ཆད་ཀུན་སེལ་བའི་ཕྱིར་དུ། སྣང་སྲིད་ཟིལ་གྱིས་གནོན་པའི་དཀྱིལ་འཁོར་གཙོ་བོ་རྒྱལ་བ་སྐུ་གསུམ་གྱི་རྣམ་པར་ཤར་བ་གུ་རུ་པདྨ་འབྱུང་གནས་ལ། འཁོར་གུ་རུ་རྒྱལ་བའི་གདུང་འཛིན་སོགས་རིག་འཛིན་རྩལ་འཆང་ཆེན་པོ་རྣམ་འཕྲུལ་བཅུ་གཉིས། སྒོ་སྲུང་དཔའ་བོ་ཡབ་ཡུམ་གྱིས་བསྐོར་བ་བཅས་དཀྱིལ་འཁོར་ཡོངས་རྫོགས་སྤྱི་དང༌། བྱེ་བྲག་ཆོས་སྐུ་ཚེ་དཔག་མེད་ལྷ་བཅུ་གསུམ་པ་སྒེར་དུ་ཕྱུང་བས་མཚོན་སོ་སོའི་ཚུལ་དུ་བསྙེན་པར་བྱ་སྟེ་རྒྱལ་པོ་ཆེན་པོ་ལ་སྙན་གསན་འབེབས་པ་ལྟ་བུའོ། །ནང་ལྟར་མཆོག་དང་ཐུན་མོང་གི་དངོས་གྲུབ་ཡིད་ལ་གང་བསམ་པ་ཐམས་ཅད་ལྷུན་གྱིས་གྲུབ་པའི་ཕྱིར་དུ། གཙོ་བོ་ཁྱབ་བདག་བདེ་བ་ཆེན་པོ་གུ་རུ་ཡིད་བཞིན་ནོར་བུ་ལ། འཁོར་གུ་རུ་ཆེ་བའི་ཆེ་མཆོག་སོགས་རྣམ་འཕྲུལ་བཅུ་གསུམ་སྒོ་སྲུང་བཞི་དང་བཅས་པ། བསྐྱེད་པ་དང་རྫོགས་པའི་རིམ་པ་གཉིས་ལ་བརྟེན་ནས་ཐབས་ལམ་དང་གྲོལ་བའི་ལམ་ལ་ཞུགས་ནས་ཉེ་བར་བསྙེན་པར་བྱ་སྟེ་རྒྱལ་པོ་ལ་འབྲེལ་བཏགས་པ་ལྟ་བུའོ། །གསང་བ་དོན་རང་སེམས་ཆོས་ཐམས་ཅད་གྱི་གནས་ལུགས་དབྱིངས་ཀ་དག་དང་ལྷུན་གྲུབ་རིག་པ་དབྱེར་མེད་ཟུང་དུ་འཇུག་པ་ཉིད་རྟགས་ཕྱག་རྒྱའི་གཟུགས་སུ་ཤར་བ་མཚོ་སྐྱེས་རྡོ་རྗེ་འཆང་ཆེན་པོ། རྩ་བ་གསུམ་པོ་ཀུན་ཁ་གཅིག་ཏུ་འདྲིལ་བ་རང་བྱུང་བདེ་ཆེན་རོལ་པའི་འཁོར་ལོ་ཉིད། །བསྐྱེད་རྫོགས་དབྱེར་མེད་ལམ་ཟབ་སྙིང་པོའི་རྣལ་འབྱོར་གྱིས་ཉམས་སུ་བླངས་ནས་མི་འགྱུར་ལྷན་ཅིག་སྐྱེས་པའི་ཡེ་ཤེས་བསྒྲུབ་པར་བྱ་སྟེ་རྒྱལ་པོ་མཉེས་ནས་འདོད་དོན་སྒྲུབ་པ་ལྟ་བུའོ། །ཡང་གསང་རིག་འཛིན་གཙོ་མཆོག་རྡོ་རྗེ་དྲག་པོ་རྩལ་ཕྱོགས་དུས་ཀྱི་བདེ་བར་གཤེགས་པ་ཀུན་འདུས་ཤིང་འབར་བ་ཆེན་པོ་ཁྲག་འཐུང་རོལ་པའི་དཀྱིལ་འཁོར་རབ་འབྱམས་ཡོངས་སུ་རྫོགས་པའི་ཡི་དམ་གྱི་ལྷ་གསང་བ་གཅིག་འགྲུབ་ཉིད། སྒྲུབ་པ་ཆེན་པོ་དང་འབྲེལ་བའི་ཉེ་རྒྱུའི་སྤྱོད་པའི་བརྟུལ་ཞུགས་ལ་བརྟེན་ནས་མཐར་ཐུག་གི་འབྲས་བུ་སྐུ་དང་ཡེ་ཤེས་ལྔ་མངོན་དུ་བྱ་སྟེ། རྒྱལ་པོའི་གོ་སར་རང་ཉིད་འཁོད་ནས་དབང་བསྒྱུར་བ་བཞིན་ནོ། །གཉིས་པ་གང་གིས་སྒྲུབ་པའི་ཐབས་བསྟན་པ་ལ་གཉིས། མདོར་བསྟན། རྒྱས་བཤད་དོ།

།དང་པོ་ནི། གང་ཡང་སྒྲུབ་བྱེད་ཐབས་ཀྱི་རིམ་པ་ནི༔ སྔོན་འགྲོ་དངོས་གཞི་རྗེས་ཀྱི་བྱ་བས་འཇུག༔ ཅེས་གསུངས་ཏེ། དེ་ལྟར་བསྒྲུབ་བྱ་བླ་མ་ཕྱི་ནང་གསང་བ་ཡང་གསང་དེ་དག་གང་ལའང་སྒྲུབ་བྱེད་ཐབས་ཀྱི་རིམ་པ་ནི། ཐོག་མར་སྔོན་དུ་འགྲོ་བ་བསགས་སྦྱོང་འགལ་སྤོང་མཐུན་སྒྲུབ་ཀྱི་རིམ་པ་དང༌། བར་དུ་དངོས་གཞི་བསྐྱེད་པའི་རྣལ་འབྱོར་ཡན་ལག་དང་བཅས་པ་དང༌། མཐར་ཕྲིན་ལས་ཀྱི་ཁ་སྐོང་བ་རྗེས་ཀྱི་བྱ་བ་སྟེ་རྣམ་པ་གསུམ་གྱིས་ཉམས་ལེན་ལ་འཇུག་པར་བྱའོ། །གཉིས་པ་ལ་གཉིས། རྩ་བའི་དཀྱིལ་འཁོར་སྒྲུབ་པའི་ཐབས་དང༌། དེ་ལ་བརྟེན་པའི་ཕྲིན་ལས་རབ་འབྱམས་སྒྲུབ་པའི་ཐབས་སོ། །དང་པོ་ལ་གསུམ། སྔོན་འགྲོ། དངོས་གཞི། རྗེས་ཀྱི་བྱ་བའོ། །དང་པོ་ལའང་གཉིས། ཁྲིད་ཀྱི་སྔོན་འགྲོ་དང༌། ཆོ་གའི་སྔོན་འགྲོའོ། །དང་པོ་ཁྲིད་ཀྱི་སྔོན་འགྲོ་ལའང་བཞི། ལམ་གྱི་རྩ་བ་སྐྱབས་སེམས། འགལ་རྐྱེན་སྡིག་སྒྲིབ་སྦྱོང་བ་རྡོར་སེམས་བསྒོམ་བཟླས། མཐུན་རྐྱེན་ཚོགས་བསགས་པ་མཎྜལ་གྱི་རིམ་པ། བྱིན་རླབས་མྱུར་དུ་འཇུག་པ་བླ་མའི་རྣལ་འབྱོར་རོ། །དང་པོ་ནི། དེ་ལ་སྐྱབས་སོང་བྱང་ཆུབ་སེམས་བསྐྱེད་ནས༔ ཞེས་པ་སྟེ། སྒྲུབ་བྱེད་ཀྱི་ཐབས་དེ་ལའང་ཐོག་མར་ཡུལ་ཁྱད་པར་ཅན་ལ་སྐྱབས་སུ་སོང་ཞིང༌། ལྷག་པའི་བསམ་པས་བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་བཏང་ནས་ཉམས་ལེན་རྣམས་ལ་རིམ་གྱིས་འཇུག་པར་བྱ་དགོས་ཏེ། སངས་རྒྱས་ཀྱི་ཆོས་ཐམས་ཅད་ཀྱི་གཞིའམ་རྩ་བ་ཡིན་པའི་ཕྱིར། དེ་དག་གི་དོན་རྒྱས་པར་གོང་དུ་བསྟན་ཟིན་ཅིང་མདོར་བསྡུ་ན། སྐྱབས་འགྲོའི་རྒྱུ་ངེས་འབྱུང་དང་གཞན་ཕན་གྱི་བསམ་པ། ཡུལ་ཚངས་སོགས་ལོག་པའི་སྟོན་པ་དང་རྟག་ཆད་ཀྱི་ལམ་དང་དེ་འཛིན་གང་ཟག་བཅས་སྤངས་ནས། དེ་དག་ལས་ཁྱད་པར་དུ་མས་འཕགས་པ་ཐུན་མོང་དཀོན་མཆོག་གསུམ། ཁྱད་པར་རྩ་བ་གསུམ། ཀུན་འདུས་རྡོ་རྗེ་སློབ་དཔོན་ལ། གང་ཟག་རང་གིས་ཐོག་དྲངས་མར་གྱུར་མཁའ་ཁྱབ་གྱི་འགྲོ་བས། དུས་བྱང་ཆུབ་མ་ཐོབ་ཀྱི་བར་དུ། ཚུལ་ཅི་མཛད་ཁྱེད་ཤེས་ཀྱི་གུས་པ་ཆེན་པོས། དམིགས་འདོན་ཕྲིན་ལས་སོ་སོའི་གཞུང་ལས་གསུང་པ་ལྟར་བྱེད་པ་ནི༌། ཡུལ་དང་བྱེད་པོ་གཉིས་སུ་འཛིན་པས་ཀུན་རྫོབ་རྒྱུའི་སྐྱབས་འགྲོ་དང༌། སེམས་ཉིད་ཡེ་ནས་རང་བཞིན་རྣམ་དག་ཡེ་ཤེས་སུམ་ལྡན་དཀོན་མཆོག་རྩ་གསུམ་དུ་ལྷུན་གྱིས་གྲུབ་པ་ལ་དེ་ལྟར་ཤེས་པས་ཡུལ་དང་བྱེད་པོ་གཉིས་མེད་དུ་རྟོགས་པ་ནི་དོན་དམ་འབྲས་བུའི་སྐྱབས་འགྲོ་སྟེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་སོ། །སེམས་བསྐྱེད་ཀྱང་མདོར་ན་རྟེན་སྙིང་རྗེ་དང༌། བརྟེན་པ་བྱང་ཆུབ་ཀྱི་སེམས་ཟུང་དུ་འབྲེལ་བས་ཀུན་རྫོབ་སྨོན་འཇུག་དང༌། དོན་དམ་སྤྲོས་པ་ཐམས་ཅད་དང་བྲལ་བའི་གནས་ལུགས་འོད་གསལ་བའི་དབྱིངས་སུ་མཉམ་པར་འཇོག་པ་ལ་གནད་ཐམས་ཅད་ཚང་སྟེ། མྱང་འདས་ལས། ཀུན་རྫོབ་དོན་དམ་དབྱེ་བ་ཡིས། །བྱང་ཆུབ་སེམས་དེ་རྣམ་པ་གཉིས། །ཞེས་སོ།

།གཉིས་པ་ནི། ཉམས་རྟོགས་ཡོན་ཏན་སྐྱེ་བའི་གེགས་གཅིག་པུ༔ སྡིག་ལྟུང་ལ་འགྱོད་བླ་མ་རྡོ་རྗེ་སེམས༔ སྐྱབས་སུ་བཟུང་ཞིང་ལྷ་བསྒོམ་སྔགས་བཟླས་ཏེ༔ བཤགས་སྡོམ་དྲག་པོས་རང་རྒྱུད་ལེགས་པར་སྦྱང་༔ ཞེས་གསུངས་ཏེ། སྤྱིར་སོ་སོ་སྐྱེ་བོའི་རྒྱུད་ལ་ཐོག་མེད་ནས་བསགས་པའི་སྒྲིབ་གཉིས་བག་ཆགས་དང་བཅས་པ་ཚན་པོ་ཆེ་ཡོད་པས་ཐར་པ་དང་རྣམ་མཁྱེན་ལ་བར་དུ་གཅོད་ཅིང༌། ཁྱད་པར་ལམ་གྱི་དངོས་གཞིའི་ཉམས་མྱོང་དང་རྟོགས་པའི་ཡེ་ཤེས་ཚུལ་བཞིན་དུ་མི་སྐྱེ་བའི་གེགས་གཅིག་པུ་ནི། སྔར་བསགས་ཀྱི་སྡིག་པ་དང་བཅས་པ་ལས་འགལ་བའི་ལྟུང་བ་རྣམས་ཡིན་པས་དེ་དག་ལ་གནོང་ཞིང་འགྱོད་པ་ཆེན་པོས་དེ་སྦྱོང་བྱེད་ཀྱི་གཉེན་པོ་ཁྱད་པར་དུ་འཕགས་པ། བླ་མ་དང་དབྱེར་མེད་པའི་བཅོམ་ལྡན་འདས་རྡོ་རྗེ་སེམས་དཔའ་སྐྱབས་སུ་རྩེ་གཅིག་པར་བཟུང་ཞིང༌། ཕྱི་ནང་གསང་བའི་རྣལ་འབྱོར་གང་རུང་དང་འབྲེལ་བར་སྐུ་ལྷའི་རྣམ་པ་བསྒོམ། སྙིང་པོའི་གསང་སྔགས་ཡི་གེ་བརྒྱ་པ་བདུད་རྩི་འབེབས་སྦྱོང་སོགས་དམིགས་པའི་འཕྲོ་འདུ་དང་བཅས་ཏེ་བཟླ། སྡིག་ལྟུང་སྔར་བྱས་བཤགས་ཤིང་ཕྱིན་ཆད་མི་བྱ་བའི་སྡོམ་སེམས་དྲག་པོས་རང་གི་རྒྱུད་ལེགས་པར་སྦྱངས་ནས་རྣམ་པར་དག་པར་བྱའོ། །དེའང་ཆོས་བཞི་བསྟན་པའི་མདོ་ལས། བྱམས་པ། བྱང་ཆུབ་སེམས་དཔའ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་ནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང༌། གཉེན་པོ་ཀུན་ཏུ་སྤྱོད་པ་དང༌། སོར་ཆུད་པའི་སྟོབས་དང༌། རྟེན་གྱི་སྟོབས་སོ། །ཞེས་གསུངས་པ་ལྟར་སྡིག་པ་བཤགས་པ་ལ་སྟོབས་བཞི་ཚང་དགོས་ཤིང་དེ་ཚང་ན་སྡིག་པའི་ཕུང་པོ་རི་རབ་ཙམ་ཡང་བཤགས་པ་ཚད་ལྡན་ལན་གཅིག་གིས་བྱང་བར་འགྱུར་ཏེ། མདོ་ལས། གང་གིས་བསྐལ་པ་དུ་མ་རུ། །སྡིག་པ་ཤིན་ཏུ་མི་བཟད་བགྱིས། །ལན་ཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །ཅེས་སོ། །དེ་ལ་སྐབས་འདིར་རྟེན་གྱི་སྟོབས་ནི། བཤགས་ཡུལ་ཀྱི་རྟེན་བླ་མ་རྡོ་རྗེ་སེམས་དཔའ། རང་རྒྱུད་ཀྱི་རྟེན་དེ་ལ་རྩེ་གཅིག་གུས་པས་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་མི་གཏོང་བ་ཡིན་ལ། དེའང་འདིར་བདག་གཞན་གྱི་སྡིག་སྒྲིབ་དག་པར་མཛད་དུ་གསོལ་སྙམ་པ་དང༌། སྔགས་དོན་བསམ་པ་ལ་ཚང༌། སྔགས་དོན་ནི། རྡོ་རྗེ་སེམས་དཔའ་དམ་ཚིག་རྗེས་སུ་སྐྱོང༌། ཞེས་སོགས་གསོལ་འདེབས་ཐུགས་རྒྱུད་བསྐུལ་བའི་ཚིག་ཡིན། གཉེན་པོ་ཀུན་ཏུ་སྤྱོད་པའི་སྟོབས་ནི་མི་དགེ་བའི་གཉེན་པོར་དགེ་བ་ལ་སྤྱོད་པ་སྟེ་འདིར་ལྷ་སྒོམ་སྔགས་བཟླ་སྡིག་སྒྲིབ་བཀྲུ་བའི་དམིགས་གནད་སོགས་ཡིན། སུན་འབྱིན་པའི་སྟོབས་སྔར་བྱས་ལ་འགྱོད་པ་དང༌། སོར་ཆུད་པའམ་སླར་ལྡོག་པའི་སྟོབས་ཕྱིན་ཆད་སྡོམ་པའི་སེམས་ཡིན་པས། སྟོབས་གཉིས་པོ་དེ་བཟླས་པའི་འཇུག་ཏུ་བདག་ནི་མི་ཤེས་སོགས་ཚིགས་བཅད་ལྷུག་གི་བཤགས་པ་བཏོན་ན་དེ་ལ་ཚང་ཞིང༌། གལ་ཏེ་མི་འདོན་ནའང་གནོང་འགྱོད་མེད་ན་བཤགས་པའི་བློ་མི་སྐྱེ་ཞིང༌། འགྱོད་པ་གཤའ་མ་ཞིག་སྐྱེས་ཕྱིན་ཆད་ཉེས་དམིགས་ཤེས་པས་སྡོམ་སེམས་ཤུགས་ལ་འབྱུང་བ་ཆོས་ཉིད་དོ། །འདི་ཉིད་གསང་སྔགས་བླ་མེད་ཀྱི་ནང་གི་ཁྲུས་ཡིན་པས་ཐོག་མར་སྦྱོར་བའང་ཤིན་ཏུ་འབྲེལ་ཆགས་པ་ཡིན་ཅིང༌། སྤྱིར་བསྒོམ་བཟླས་འདིའི་ཕན་ཡོན་ཚད་མེད་པར་གསུངས་ཏེ། དགོངས་པ་ཚིག་གསུམ་པའི་རྒྱུད་ལས། རྡོ་རྗེ་སེམས་དཔའ་བསྒོམས་ནས་ནི། །སྔགས་ཀྱང་རབ་ཏུ་བཟླ་བྱེད་པ། །དེ་ཡི་སྡིག་ཀུན་བྱང་ནས་ནི། །རྡོ་རྗེ་སེམས་དཔའ་འདྲ་བར་འགྱུར། ཞེས་དང༌། རྡོ་རྗེ་སེམས་དཔའ་གླུའི་རྒྱུད་ལས། རང་བྱུང་ཐིག་ལེ་ཡི་གེ་བརྒྱ། །སངས་རྒྱས་ཀུན་གྱི་ས་བོན་ཏེ། །ཉམས་ཆགས་ཐམས་ཅད་འཇོམས་པར་བྱེད། ཅེས་དང༌། དྲི་མེད་བཤགས་པའི་རྒྱུད་ལས། འདི་དག་དུས་གཅིག་ལ་བརྒྱ་རྩ་བརྒྱད་བཟླས་ན། ཉམས་ཆགས་ཐམས་ཅད་བསྐངས་ཏེ། ངན་སོང་གསུམ་ལས་ཐར་བར་འགྱུར་རོ། །ཞེས་སོགས་རྒྱ་ཆེར་གསུངས་སོ།

།གསུམ་པ་ནི། ཡེ་ཤེས་བསོད་ནམས་ཚོགས་ལ་རག་ལས་ཕྱིར༔ རྩ་གསུམ་རྒྱ་མཚོར་ཕྱི་ནང་སྣོད་བཅུད་དང་༔ ཕུང་ཁམས་སྐྱེ་མཆེད་རང་བྱུང་བྱང་ཆུབ་སེམས༔ མཁའ་ཁྱབ་མཆོད་སྤྲིན་ནམ་མཁའི་མཛོད་དུ་འབུལ༔ ཞེས་གསུངས་ཏེ། འཕགས་པ་ཀླུ་སྒྲུབ་ཀྱིས། དེ་འདྲའི་ས་བོན་ཐམས་ཅད་ལས། །རྒྱུ་དང་འདྲ་བའི་འབྲས་བུ་འབྱུང༌། །ས་བོན་མེད་པར་འབྲས་ཡོད་པ། །ཤེས་ལྡན་གང་གིས་སྒྲུབ་པར་ནུས། །ཞེས་པ་ལྟར་ཆོས་ཐམས་ཅད་རྒྱུ་འབྲས་འབྲེལ་བ་ཅན་ཏུ་གྲུབ་པས། བདེན་གཉིས་དབྱེར་མེད་ཀྱི་ལྟ་བས་གཞི་བཟུང༌། ཚོགས་གཉིས་ཟུང་འབྲེལ་དུ་རྫོགས་པས་རྒྱུ་བྱས། ཆོས་སྐུ་དང་གཟུགས་སྐུའི་འབྲས་བུ་འབྱུང་བ་ཡིན་ཅིང༌། དེའང་རིན་ཆེན་ཕྲེང་བ་ལས། །གཟུགས་ཀྱི་སྐུ་དེ་མདོར་བསྡུ་ན། །བསོད་ནམས་ཚོགས་ལས་འབྱུང་བ་སྟེ། །ཆོས་ཀྱི་སྐུ་དེ་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུངས་པ་ལྟར་འབྲས་བུའི་མཐར་ཐུག་ཆོས་སྐུ་ཐོབ་པའི་རྒྱུ་མཐུན་ཞི་ལྷག་གིས་བསྡུས་པའི་ཡེ་ཤེས་ཀྱི་ཚོགས་ཡིན་ལ། དེའང་བསོད་ནམས་ཀྱི་ཚོགས་བསགས་པ་ལ་རགས་ལས་ཤིང་སྦྱིན་སོགས་ཕར་ཕྱིན་གྱིས་བསྡུས་པའི་བསོད་ནམས་བསགས་ཐབས་མཐའ་ཡས་པ་ཞིག་མཆིས་ཀྱང༌། བྱ་སླ་ལ་དོན་ཆེ་བ་མཎྜལ་ཕུལ་བ་ལས་ལྷག་པ་གང་ཡང་མེད་པས་དེ་ལ་འབད་དགོས་པ་ཡིན་པས། དེའང་གང་ལ་འབུལ་བའི་ཡུལ་སྒྲུབ་པའི་མཎྜལ་རྩ་གསུམ་རབ་འབྱམས་རྒྱ་མཚོ་མཁའ་ཁྱབ་ཀྱི་འཁོར་ལོར་མངོན་སུམ་བཞིན་ཏུ་བཞུགས་པར་མོས་པ་ལ། འབུལ་བྱའི་དངོས་པོ་མཆོད་པའི་མཎྜལ་གཙང་ཞིང་དག་པ་གྱ་ནོམ་པ་ལག་ལེན་མཐོང་བརྒྱུད་ལྟར་བཀོད་པས་དམིགས་རྟེན་དུ་བྱས་ཏེ། ཕྱི་ལྟར་ན་དབང་ཆེན་གསེར་གྱི་ས་གཞི་ལ་བརྟེན་པའི་རི་རབ་གླིང་བཞི་ཉི་ཟླ་སོགས་སྣོད་ཀྱི་འཇིག་རྟེན་ལྷ་མིའི་འབྱོར་ཚོགས་བསམ་གྱིས་མི་ཁྱབ་པའི་བཅུད་ཀྱིས་ཡོངས་སུ་གཏམས་པ་དང༌། ནང་ལྟར་ན། རང་ལུས་ཕུང་པོ་ལྔ་ཁམས་ལྔ་སྐྱེ་མཆེད་དྲུག་གིས་བསྡུས་པ་དཀྱིལ་འཁོར་དུ་ལྷུན་གྱིས་གྲུབ་པ་སྟེ། པགས་པ་གསེར་གྱི་ས་གཞི། ཁྲག་བྱུག་པ། སྒལ་ཚིགས་རི་རབ། ཡན་ལག་བཞི་གླིང་བཞི། རྩ་རོ་རྐྱང་ཉི་ཟླ། བྱང་ཆུབ་ཀྱི་སེམས་ལྷ་མའི་འབྱོར་ཚོགས་སོགས་རང་ལུས་སྣོད་བཅུད་ཀྱི་འཇིག་རྟེན་རིན་པོ་ཆེའི་འབྱུང་གནས་སུ་དམིགས་པ་དང༌། གསང་བ་ལྟར་ན། འཁོར་འདས་ཀྱི་རྒྱུར་གྱུར་པའི་ཀུན་གཞི་གསེར་གྱི་ས་གཞི་དེ་ཉིད་སྙིང་རྗེ་བྱང་ཆུབ་ཀྱི་སེམས་དང་མ་བྲལ་བ་དྲིའི་བྱུག་པ། རང་རིག་པ་རང་བྱུང་འོད་གསལ་བྱང་ཆུབ་ཀྱི་སེམས་རིན་པོ་ཆེའི་རི་རབ། དེ་ལས་ཚད་མེད་བཞི་དང་དགའ་བ་བཞི་དང་ཡེ་ཤེས་བཞི་སོགས་འབྱུང་བ་གླིང་བཞི་ཐབས་ཤེས་ཟུང་དུ་འབྲེལ་བ་ཉི་ཟླ་ལ་སོགས་པར་ལྷུན་གྱིས་གྲུབ་པ་སྟེ། མདོར་ན་ཡུལ་ཆོས་ཀྱི་དབྱིངས་གཟོད་མ་ནས་རང་བཞིན་གྱིས་རྣམ་པར་དག་པ་མེ་ལོང་ཤིན་ཏུ་དྭངས་པ་ལྟ་བུའི་ངོས་ལ། རང་རིག་པ་རང་བྱུང་གི་ཡེ་ཤེས་མི་འགྱུར་བའི་བདེ་བ་ཆེན་པོའི་རོལ་པ་ཅིར་ཡང་མ་འགགས་པའི་རྩལ་སྣང་གཟུགས་བརྙན་ལྟ་བུ་ནམ་མཁའི་མཐས་གཏུགས་པར་ཁྱབ་པའི་མཆོད་པའི་སྤྲིན་ཆེན་བྱང་ཆུབ་སེམས་དཔའ་ནམ་མཁའ་མཛོད་ཀྱི་སྨོན་ལམ་གྱི་སྟོབས་ལས་རྣམ་པར་འཕྲུལ་པ་ལྟར་མོས་ཤིང་འཁོར་གསུམ་ཡོངས་དག་གི་ངང་དུ་འབུལ་ལོ། །དེ་ལྟར་ཕྱི་ནང་གསང་བ་ཐམས་ཅད་མཆོད་སྤྲིན་སྟོབས་པའི་ལྡོག་ཆ་ནས་བསོད་ནམས་དང༌། མི་དམིགས་པའི་ཤེས་རབ་ཀྱིས་ཟིན་པའི་ལྡོག་ཆ་ནས་ཡེ་ཤེས་ཀྱི་ཚོགས་སུ་འགྱུར་བ་ཡིན་ལ། མཎྜལ་འདི་ཉིད་དངོས་པོ་ཆུང་ཡང་དམིགས་པ་དང་བསམ་པའི་ཐབས་ཁྱད་པར་ཅན་གྱིས་སྤེལ་བས་བསོད་ནམས་མཐའ་ཡས་པ་ཐོབ་པར་འགྱུར་ཏེ། ཇི་སྐད་དུ། ཕ་རོལ་ཕྱིན་པ་འདི་རྣམས་ཉིད། །ཐུབ་པས་མཎྜལ་བྱས་པས་ཐོབ། །བདེ་གཤེགས་ཕོ་བྲང་དམ་པ་འདི། །ལུས་ཀྱིས་ལས་རྣམས་བྱས་པ་ནི། །གསེར་གྱི་ཁ་དོག་དང་ལྡན་ཞིང༌། །ནད་ཀུན་ལས་ནི་གྲོལ་བ་དང༌། །ཟླ་བ་ལྟར་གསལ་ཡིད་འོང་བའི། །ལྷ་མི་ཁྱད་པར་འཕགས་པ་དང༌། །ནོར་དང་གསེར་ནི་ཕུན་ཚོགས་པས། །རྒྱལ་པོའི་རིགས་སུ་སྐྱེ་བར་འགྱུར། །ཞེས་དང༌། ཀ་མ་ལ་ཤཱི་ལས། གླིང་བཞི་ཕུལ་བའི་བསོད་ནམས་ཀྱིས། །བདུད་བཞི་མ་ལུས་ཞི་བར་འགྱུར། །གླིང་ཕྲན་ཕུལ་བའི་བསོད་ནམས་ཀྱིས། །ཚད་མེད་བཞི་དང་ལྡན་པར་འགྱུར། །རིན་ཆེན་སྣ་བདུན་ཕུལ་བ་ཡིས། །འཕགས་པའི་ནོར་བདུན་ཐོབ་པར་འགྱུར། །གཏེར་ཆེན་ཕུལ་བའི་བསོད་ནམས་ཀྱིས། །མི་ཟད་ལོངས་སྤྱོད་འཕེལ་བར་འགྱུར། །ཉི་ཟླ་ཕུལ་བའི་བསོད་ནམས་ཀྱིས། །ལྟ་སྒོམ་སེམས་ལ་གསལ་བར་འགྱུར། །རིན་ཆེན་ཕུལ་བའི་བསོད་ནམས་ཀྱིས། །རང་བྱུང་ཡེ་ཤེས་ཐོབ་པར་འགྱུར། །མཎྜལ་གཅིག་ཕུལ་དྲུག་དང་ལྡན། །བསོད་ནམས་ཚོགས་ནི་བསམ་མི་ཁྱབ། །དེས་ན་དེ་ལ་བརྩོན་པར་བྱ། ཞེས་སོ།

།བཞི་པ་ནི། ཁྱད་པར་བྱིན་རླབས་དངོས་གྲུབ་ཀུན་གྱི་གཞི༔ བླ་མའི་རྣལ་འབྱོར་མོས་གུས་གནད་དུ་བསྣུན༔ ཚོགས་བསགས་གསོལ་གདབ་དབང་བཞིའི་ཡེ་ཤེས་བླང་༔ ཐུགས་ཡིད་གཅིག་བསྲེས་དགོངས་པའི་རང་ངོ་བསྐྱང་༔ ཞེས་གསུངས་ཏེ། བསགས་སྦྱང་དེ་དག་ཀུན་ལས་ཀྱང་སྔགས་ཀྱི་ལམ་འདིར་ཁྱད་པར་དུ་གལ་ཆེ་བ་ནི། རང་རྒྱུད་ལ་བྱིན་རླབས་མྱུར་དུ་འཇུག་པ་དང་ཐུན་མོང་དང་མཆོག་གི་དངོས་གྲུབ་ཀུན་གྱི་གཞི་རྟེན་དུ་གྱུར་པ་ནི་བཀའ་དྲིན་སུམ་ལྡན་གྱི་རྩ་བའི་བླ་མ་ཁོ་ན་ཡིན་པས་དེ་ཉིད་ཕྱོགས་དུས་དཀོན་མཆོག་ཀུན་འདུས་སུ་ངེས་པའི་ཤེས་པ་བརྟན་པོས་རྣལ་འབྱོར་དུ་བྱེད་པ་ལ་འབད་ཅིང༌། དེའང་ཐོག་མར་ཚད་མེད་པའི་བཀའ་དྲིན་དྲན་ཏེ་ཅི་མཛད་ལེགས་པར་མཐོང་བའི་སྒོ་ནས་མོས་གུས་ལ་གནད་དུ་བསྣུན། གོམས་ནས་བཅོས་མིན་གྱི་མོས་གུས་དྲག་པོས་ཐ་མལ་གྱི་སྣང་བ་བཙན་ཐབས་སུ་སྒྱུར་ནུས་པ་ལ་བསླབ། དེའང་ཐོག་མར་ཁྲིད་རིམ་སོ་སོ་ལྟར་ཡུལ་ལམ་རྟེན་གསལ་གདབ། སྤྱི་འགྲོའི་ཡན་ལག་བདུན་པའམ་ཁྱད་པར་རྒྱུན་བཤགས་ཡན་ལག་བརྒྱད་པ་དང་བཅུ་པ་གང་རུང་གིས་ཚོགས་བསག །དད་གུས་དྲག་པོས་རྩ་བརྒྱུད་བླ་མ་ལ་གསོལ་བ་ཡང་ཡང་གདབ། མཐར་བྱིན་རླབས་དབང་བཞིའི་ཡེ་ཤེས་ལམ་དུས་འོད་ཟེར་སྤྲོས་ཐིམ་གྱི་ཚུལ་དུ་བླང༌། མོས་གུས་ཤུགས་ཀྱིས་འོད་དུ་ཞུ་ནས་རང་ལ་བསྟིམ། བླ་མའི་ཐུགས་རྣམ་པར་དག་པའི་ཡེ་ཤེས་དང་རང་གི་ཡིད་ཆུ་ལ་ཆུ་བཞག་པ་ལྟར་དབྱེར་མེད་གཅིག་ཏུ་བསྲེས་ལ་རང་སྣང་རིས་མེད་ཆེན་པོའི་དགོངས་པའི་རང་ངོ་རྩོལ་བྲལ་ལྷུག་པར་བསྐྱངས་ལ་མཉམ་པར་བཞག་གོ །དེའི་དོན་ཅུང་ཟད་སྨོས་ན། སློབ་དཔོན་བྷ་བི་ལྷས། གང་ཕྱིར་རྡོ་རྗེ་འཛིན་པ་ཡི། །དངོས་གྲུབ་སློབ་དཔོན་རྗེས་འབྲངས་གསུངས། །ཞེས་པ་ལྟར། རྡོ་རྗེ་ཐེག་པའི་དངོས་གྲུབ་ཐམས་ཅད་བླ་མ་དམ་པའི་རྗེས་སུ་འབྲངས་བ་ལས་གཞན་ཅིས་ཀྱང་ཚུལ་བཞིན་གྲུབ་པ་མ་ཡིན་པས་བླ་མའི་རྣལ་འབྱོར་གྱི་ལམ་ལ་འཇུག་དགོས། དེའང་རྡོ་རྗེ་མེ་ལོང་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་པས་རྩ་བའི་བླ་མ་དེ་ཉིད་སོ་སྐྱེ་འམ་འཕགས་པ་གང་ཡིན་ཀྱང་རུང༌། སངས་རྒྱས་དངོས་སུ་བལྟ་དགོས་ཤིང༌། དོན་ལ་དེ་བཞིན་གཤེགས་པ་གཅིག་ལ་གསོལ་བ་བཏབ་པས་ཐམས་ཅད་ལ་བཏབ་པར་འགྱུར་ནའང༌། རང་ཉིད་ཀྱི་བསམ་པའི་ཁྱེར་སོས་མོས་པ་འཇུག་ཚུལ་གྱི་ཁྱད་པར་ལས་ཕན་ཡོན་རྒྱ་ཆེ་ཆུང་འབྱུང་བས་ན་ཕྱོགས་བཅུའི་དཀོན་མཆོག་ཀུན་འདུས་སུ་བལྟ་དགོས་པ་དང༌། དེར་མ་ཟད་བདག་ཅག་གི་སྣང་ངོར་སངས་རྒྱས་ཐམས་ཅད་ལས་ཀྱང་བཀའ་དྲིན་ཆེ་ཞིང་ཆེས་ལྷག་སྟེ། ཅིའི་ཕྱིར་ཞེ་ན་བདག་ཅག་ལ་སངས་རྒྱས་གཟུགས་ཀྱི་སྐུ་དངོས་ཀྱི་ཞལ་བལྟ་བ་དང་གསུང་ཐོས་པའི་སྐལ་བས་ཕོངས་པའི་སྐབས་འདིར་རང་རྒྱུད་ལ་སངས་རྒྱས་ཀྱི་ཕྲིན་ལས་འཇོག་པའི་བདག་རྐྱེན་མཛད་པས་སངས་རྒྱས་ཆོས་ཀྱི་སྐུའི་ཞལ་བལྟ་བ་ལ་སྦྱོར་བའི་བཀའ་དྲིན་ནི་བསམ་གྱིས་མི་ཁྱབ་ཅིང་སངས་རྒྱས་ཀུན་ལས་ལྷག་པར་ངེས་པས་སོ། །དེ་ལྟར་ཡང་ནམ་མཁའ་དྲི་མ་མེད་པའི་མདོ་ལས། །ཀུན་དགའ་བོ། །དེ་བཞིན་གཤེགས་པ་རྣམས་ནི་སེམས་ཅན་ཐམས་ཅད་ལ་སྣང་བའང་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང༌། །ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཟུང་ཞིག །ཅེས་དང༌། ཁྱད་པར་སྔགས་ཀྱི་ཐེག་པ་འདིར་རྡོ་རྗེ་སློབ་དཔོན་གྱི་སྐུ་གསུང་ཐུགས་ལ་དཀྱིལ་འཁོར་གྱི་ལྷ་ཐམས་ཅད་རྗེས་སུ་ཞུགས་པའི་ཚུལ་གྱིས་འགྲོ་དོན་མཛད་པ་ཡིན་པས། རྡོ་རྗེ་སློབ་དཔོན་ལ་བརྙས་པའམ་མཆོད་ན་དཀྱིལ་འཁོར་གྱི་འཁོར་ལོ་ཐམས་ཅད་ལ་དེ་ལྟར་བྱས་པར་འགྱུར་བས་ཁེ་ཉེན་གཉིས་ཀ་གཞན་ལས་ཆེས་ཆེ་བ་ཡིན་ཅིང༌། གསོལ་འདེབས་ཀྱི་ཡུལ་གསལ་གདབ་པ་ལའང༌། ཡེ་ཤེས་པ་ལྟར་གཞན་ནས་སྤྱན་འདྲེན་པ་དང༌། སྔར་ཡོད་གསལ་འདེབས་ཀྱི་ཚུལ་དུ་སྒོམ་པ་གཉིས་དོན་ལ་ཁྱད་པར་མེད་དེ། མདོ་ལས། གང་ཞིག་རྒྱལ་བ་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་པར་བྱེད། །ཅེས་སོ། །ཚོགས་བསགས་ཡན་ལག་བདུན་པ་མདོ་སྡེ་རྣམས་ལས་རྒྱས་བསྡུས་ཅི་རིགས་པ་ཕན་ཡོན་བཅས་ཡང་ཡང་གསུངས་ཤིང༌། དཔལ་སྦས་ཀྱིས་ཞུས་པའི་མདོ་ལས། གང་ཞིག་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ཏེ། །ཕྱག་འཚལ་དེ་བཞིན་མཆོད་བྱེད་དམ། །བསོད་ནམས་དག་ལ་ཡི་རང་ཞིང༌། །སྡིག་པ་དག་ཀྱང་འཆགས་པར་བགྱིད། །བསྐུལ་དང་གསོལ་བ་འདེབས་གྱུར་པ། །དེ་ཡི་བསོད་ནམས་ཕུང་པོ་ནི། །ནམ་མཁའ་གང་བར་རྟག་ཏུ་འབྱུང༌། །ཞེས་གསུངས།

ཡན་ལག་བརྒྱད་པ་ནི། སངས་རྒྱས་གསང་བའི་ལམ་རིམ་དུ། །ཡན་ལན་བརྒྱད་པའི་ཚུལ་བཟུང་ལ། ཞེས་པའི་དོན་སྒེག་པ་རྡོ་རྗེའི་རྒྱུན་བཤགས་རྩ་བར། རྒྱལ་བ་འཁོར་བཅས་སྤྱན་དྲངས་ཏེ། བླ་མ་སྙིང་པོར་བཞུགས་པ་ལ། །ཕྱག་སྐྱབས་མཆོད་དང་བཤགས་པ་དང༌། །ཡི་རང་སེམས་བསྐྱེད་ལུས་དབུལ་དང༌། །བྱང་ཆུབ་ཆེན་པོར་ཡོངས་སུ་བསྔོ། །ཞེས་དང༌། དེ་ཡི་ལས་བྱང་དུ། རྡོ་རྗེ་སློབ་དཔོན་སངས་རྒྱས་དཔལ། །ཅེས་སོགས་འབྱུང་བ་འདིའི་སྐབས་སུ་མྱ་ངན་ལས་མི་འདའ་བར་གསོལ་བ་འདེབས་པ་དང༌། ཆོས་འཁོར་བསྐོར་བ་གཉིས་མི་འབྱུང་བ་ནི་སྔགས་ཀྱི་སྟོན་པ་ངེས་པ་ལྔ་ལྡན་ཡིན་ཕྱིར་མྱ་ངན་ལས་འདའ་བར་མི་སྟོན་པ་དང༌། དེ་བཞིན་དུ་ཆོས་དུས་གསུམ་དུས་མེད་དུ་སྟོན་པ་ལས་བསྐུལ་བ་ལ་མི་སྟཽས་པས། ཐུན་མོང་མ་ཡིན་པའི་སྐབས་འདིར་དེ་གཉིས་མི་དགོས་པར་བཞེད་ཅིང༌། གཉིས་པོའི་ཚབ་ཏུ་སྐྱབས་སེམས་ལུས་དབུལ་བ་སྣན་པས་ཡན་ལག་བརྒྱད་དང༌། བཅུ་པ་ནི་བཀའ་བརྒྱད་ཡོངས་རྫོགས་དང་གཏེར་རྙིང་ཐུགས་སྒྲུབ་འགའ་ཞིག་ལས་ཀྱང་འབྱུང་ཞིང་སྤྱི་མཐུན་དྲུག་པོའི་སྟེང་དུ་སྤྱན་འདྲེན་བཞུགས་གསོལ། བསྔོ་བ་དང་སྨོན་ལམ་ཁྱད་པར་ཕྱེ་བས་བཅུར་བརྩི། དེ་དག་གི་དམིགས་པ་ནི་འདིར་ཡིག་ཚོགས་ལ་འཇིགས་པས་མ་སྤྲོས་སོ། །གསོལ་བ་གང་ལ་འདེབས་པའི་ཡུལ་ཡང་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་གསུམ་གྱི་སྟེང་དུ་གཏེར་མའི་ཕྱོགས་འདིར་ཐུགས་རྗེ་བྱིན་རླབས། མཁའ་འགྲོ་གཏད་རྒྱ། སྨོན་ལམ་དབང་བསྐུར་གསུམ་གྱི་ཆུ་བོ་ཡང་སྤྲུལ་སྐུ་གཏེར་སྟོན་ཉིད་ལ་ཚང་བས་བརྒྱུད་པ་དྲུག་ལྡན་གྱི་རྩ་བརྒྱུད་རིག་འཛིན་བླ་མ་རྣམས་ཕྱོགས་དུས་དཀོན་མཆོག་རྩ་གསུམ་མ་ལུས་པའི་ངོ་བོར་ཤེས་པ་དང༌། གང་གིས་འདེབས་པ་པོ་མཁའ་མཉམ་འགྲོ་བ་ཀུན་གྱི་བྱང་རང་གིས་དྲངས་པས་དང༌། ཇི་ལྟར་འདེབས་ན་རྩ་བརྒྱུད་བླ་མ་དེ་རྣམས་སྐྱོན་ཀུན་ཟད་ཡོན་ཏན་ཀུན་རྫོགས་དགོས་འདོད་ཀུན་འབྱུང་དུ་བློ་ཐག་བཅད་ནས་རེ་ལྟོས་ལིངས་བསྐྱུར་གྱི་གདུང་ཤུགས་དྲག་པོས་དང༌། གང་གི་ཕྱིར་ན། རིམ་གཉིས་སྒོམ་པའི་བར་ཆད་ཞི་ཞིང་དངོས་གྲུབ་སྤྱི་དང་ཁྱད་པར་ཡེ་ཤེས་ཆེན་པོའི་བྱིན་རླབས་རྒྱུད་ལ་ཞུགས་ནས་མཆོག་གི་དངོས་གྲུབ་མྱུར་དུ་འགྲུབ་པའི་སླད་དུའོ། །བླ་མའི་རྣལ་འབྱོར་སྒོམ་པའི་ཕན་ཡོན་ནི། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམ་པ་བས། །བླ་མ་ཅུང་ཟད་དྲན་པ་མཆོག །བསོད་ནམས་འདི་ནི་ཕ་མཐའ་ཡས། །ཞེས་སོགས་གསར་རྙིང་རྒྱུད་གཞུང་ཀུན་ལས་མཐའ་ཡས་པ་གསུངས་སོ། །གཉིས་པ་ཆོ་གའི་སྔོན་འགྲོ་ལ་གཉིས། འགལ་རྐྱེན་བསལ་བ་དང༌། མཐུན་རྐྱེན་བསྒྲུབ་པའོ། །དང་པོ་ལ་གཉིས། བགེགས་བསྐྲད་པ་དང༌། སྲུང་བའི་འཁོར་ལོ་བསྒོམ་པའོ། །དང་པོ་ནི། རང་བཞིན་མ་གྲུབ་ལྟར་སྣང་བགེགས་ཀྱི་ཚོགས༔ གཏོར་མ་བྱིན་ལ་བཀའ་བསྒོ་དྲག་ཏུ་བསྐྲད༔ ཅེས་གསུངས་ཏེ། ཇི་སྐད་དུ། རྣམ་པར་རྟོག་པ་བགེགས་ཡིན་ཏེ། །བགེགས་ནི་རང་གི་སེམས་ལས་བྱུང༌། ཞེས་པ་ལྟར། གདོད་ནས་རང་བཞིན་གྱིས་དངོས་མཚན་ཏུ་མ་གྲུབ་ཀྱང་རང་གི་ཉོན་མོངས་པའི་རྟོག་ཚོགས་ཕྱི་རོལ་དུ་ཤར་བས་མཚན་མ་ལྟར་སྣང་བ། བདག་འཁོར་ཡོ་བྱད་རྣལ་འབྱོར་རྣམས་ལ་འཚེ་ཞིང་གླགས་ལྟ་བའི་བགེགས་ཀྱི་ཚོགས་སྟོང་ཕྲག་བརྒྱད་ཅུ་ལ་སོགས་པ་ལ། བདག་ཉིད་ཧེ་རུ་ཀའི་ང་རྒྱལ་དང་ལྡན་པས་བཤམས་པའི་གཏོར་མ་སྔགས་དང་ཕྱག་རྒྱས་འདོད་པའི་ལོངས་སྤྱོད་ཟད་མི་ཤེས་པར་བརླབས་ཏེ་བརྔན་པར་བྱིན་ལ། བདེན་པའི་ཚིག་གིས་གནོད་འཚེ་མེད་པར་གཞན་ཏུ་སོང་ཞིག་པའི་བཀའ་བསྒོ། བརྔན་ཀྱང་མི་ཚིམས་ཤིང་ཞི་བའི་ཚིག་ལ་མི་ཉན་པའི་གདུག་པ་ཅན་མཐའ་དག་དྲག་པོའི་སྔགས་དང་མེ་མཚོན་ཁྲོ་ཆུང་འབར་བའི་ཆར་དབབ་པས་སྡིགས་བསྐྲད་གཟིར་ཏེ་དཔག་ཚད་མང་པོའི་ཕ་རོལ་ཏུ་བསྐྲད་པར་བྱའོ།

།གཉིས་པ་ནི། རྡོ་རྗེའི་རྒྱལ་ཐབས་ཕྱག་མཚན་མེ་ཕུང་དང་༔ སྒོ་གསུམ་ལྷ་སྔགས་གཉུག་མས་བར་ཆད་བསྲུང་༔ ཞེས་གསུངས་ཏེ། རྐུན་མ་བསྐྲད་ནས་སྒོ་གཅོད་པའི་དཔེ་ལྟར་བར་གཅོད་ཀྱི་བགེགས་བསྐྲད་ནས་ཕྱིན་ཆད་མི་འཇུག་པའི་སླད་དུ་སྲུང་བའི་འཁོར་ལོ་བསྒོམ་པ་ལ་ལྔ་སྟེ། དང་པོ་ནི། བདག་ཉིད་ཞེ་སྡང་རྡོ་རྗེ་ལས་འཕྲོས་པའི་འོད་ཟེར་གྱིས། འོག་རྡོ་རྗེའི་ས་གཞི། བར་རྡོ་རྗེའི་རྭ་བ། སྟེང་རྡོ་རྗེའི་གུར་དང་བླ་བྲེ། ར་གུར་གྱི་ཕྱི་རོལ་དུ་རྡོ་རྗེའི་དྲྭ་བས་གཏམས་པའི་གུར་ཁང་རྒྱལ་ཐབས་ཏེ་རྒྱལ་པོའི་ཕོ་བྲང་གི་ལྕགས་རི་བཙན་པོ་ལྟ་བུ་མི་ཕྱེད་མི་ཤིགས་པ། གཉིས་པ་ནི། དེའི་ཕྱི་རོལ་དུ་འཁོར་ལོ་རྡོ་རྗེ་རིན་ཆེན་པདྨ་རལ་གྲི་སྟེ་རིགས་བསྡུས་པའི་ཕྱག་མཚན་ལྔ་པོ་རེ་རེ་བཞིན་འབར་ཞིང་བརྟན་པ་གྲངས་མེད་པའི་གུར་ཁྱིམ་ཟླུམ་པོ་ཕྱི་ནང་ལྔ་སྦྲགས་ཀྱིས་སྟེང་འོག་ཕྱོགས་མཚམས་ཀུན་ཏུ་གཏམས་པ། གསུམ་པ་ནི། དེ་དག་ལས་སྐྱེས་པའི་མེ་ཡེ་ཤེས་ལྔ་ལྡན་གྱི་ཁ་དོག་ཅན་བསྐལ་པ་འཇིག་པའི་མེ་ཕུང་ལྟ་བུ་རབ་ཏུ་འབར་བས་མགར་གྱི་ཞུན་མེ་ལ་སྦྲང་བུ་བཞིན་ཏུ་བར་དུ་གཅོད་པས་ཕྱོགས་སུའང་ཉེ་མི་ནུས་པར་དམིགས་པའོ། །བཞི་པ་ནི། རང་གཞན་གྱི་སྒོ་གསུམ་ལྷ་སྔགས་གཉུག་མའི་ཡེ་ཤེས་སུ་གདོད་ནས་ཡིན་པ་ལ་ཡིན་པར་ཤེས་པ་ནི་རང་བཞིན་ལྷུན་གྲུབ་ཀྱི་སྲུང་འཁོར་ཆེན་པོ་སྟེ། བདེ་འདུས་ལས། ཐམས་ཅད་སྐུ་དང་ཡེ་ཤེས་ངང་༔ བགེགས་སུ་རྟོག་པ་གང་ཡང་མེད༔ བསྲུང་བར་བྱ་དང་སྲུང་བྱེད་མེད༔ ཅེས་སོ། །ལྔ་པ་ནི། གསང་འགྲེལ་ལས། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་མནན་པར་བྱ། །ཞེས་པ་ལྟར་ཐམས་ཅད་ཀྱང་དེ་ཁོ་ན་ཉིད་ཀྱི་ལྟ་བས་ཟིན་པ་སྟེ། བར་དུ་བཅད་བྱ་གཅོད་བྱེད་བར་ཆད་གསུམ་ཀའང་རང་བཞིན་གྱིས་མི་དམིགས་པ་ཀ་དག་མཉམ་ཡངས་ཆེན་པོར་ཤེས་ན་སྟོང་པ་ཉིད་ལ་སྟོང་པ་ཉིད་ཀྱིས་གླགས་མི་རྙེད་པས་སྲུང་བ་རྣམས་ཀྱི་མཆོག་ཡིན་ཏེ། སློབ་དཔོན་ཆེན་པོས། རྟོག་སེམས་བློ་ཡི་དྲི་མ་དག༔ བགེགས་ཞེས་བྱ་བའི་མིང་ཡང་མེད༔ ཅེས་གསུངས་སོ། །དེ་དག་གི་དགོས་པའང་གལ་ཕྲེང་ལས། །ངོ་བོ་བདག་གཞན་གཉིས་མེད་ཀྱང༌། །དང་པོའི་ལས་ཅན་རྣལ་འབྱོར་པའི། །ཏིང་འཛིན་ཉམས་ལེན་བར་གཅོད་དག །ངེས་པར་བསལ་ཕྱིར་མཚམས་གཅོད་བྱ། ཞེས་སོ། །གཉིས་པ་མཐུན་རྐྱེན་སྒྲུབ་པ་ལའང་གཉིས། བྱིན་དབབ་པ། མཆོད་རྫས་བྱིན་བརླབ་བོ།

།དང་པོ་ནི། ཡེ་ཤེས་གཟི་བྱིན་བདག་གནས་ཡོ་བྱད་ལ༔ ལྷག་པར་དབབ་པས་མཚན་མའི་རྟོག་པ་བསལ༔ ཅེས་གསུངས་ཏེ། རྣལ་འབྱོར་གྱི་འགལ་རྐྱེན་བསལ་ནས་མཐུན་རྐྱེན་གཙོ་བོ་སྣོད་བཅུད་ཡེ་ཤེས་ཀྱི་འཁོར་ལོར་བྱིན་གྱིས་བརླབ་པ་ལ། དབབ་བྱ་ཡེ་ཤེས་ལྷའི་འབྲས་ཆོས་རྣམ་ལྔའི་གཟི་བརྗིད་བྱིན་རླབས་ཆེན་པོ། དབབ་པའི་ཡུལ་བདག་སྒྲུབ་པ་པོ་དང་གནས་ཁང་སྒྲུབ་པའི་ཡོ་བྱད་དང་བཅས་པ་རྣམས་ལ། འབེབས་པའི་ཚུལ་དད་མོས་གདུང་ཤུགས་སྔགས་དང་ཏིང་འཛིན་ཁྱད་པར་གྱི་སྦྱར་སྤོས་ཡི་དྭགས་ཀྱི་མེར་བསྲེགས་པ་དང་ཅང་ཏེའུ་དྲིལ་བུ་སོགས་ཀྱི་སྒྲས་བསྐུལ་ཏེ། ཏིལ་གྱི་གང་བུ་ཁ་ཕྱེ་བ་ལྟར་མཁའ་ཁྱབ་ཏུ་སད་པའི་ལྷ་ཚོགས་ཐམས་ཅད་བདག་གནས་ཡོ་བྱད་ལ་ལྷག་པར་བསྟིམ་ཞིང་དབབ་པས། མ་དག་གཉིས་སྣང་མཚན་མའི་རྟོག་པ་ཐམས་ཅད་དག་པ་རབ་འབྱམས་ཡེ་ཤེས་ཀྱི་རོལ་པ་ཆེན་པོར་ཤར་བ་སྟེ། གལ་ཕྲེང་ལས། སྔགས་བརྗོད་འོད་བསྡུའི་ཕྱག་རྒྱ་ཡིས། །འབྲས་བུ་རྣམ་ལྔའི་བྱིན་རླབས་དབབ། །ཅེས་སོ། །གཉིས་པ་ནི། ཕྱི་ནང་གསང་མཆོད་ཏིང་འཛིན་རོལ་མོ་དང་༔ སྔགས་དང་ཕྱག་རྒྱས་བདེ་ཆེན་འདོད་རྒུར་སྤེལ༔ ཅེས་གསུངས་ཏེ། བྱིན་དབབ་པའི་རྗེས་སུ་གལ་པོ་ལས། མི་དམིགས་ཆོས་ལ་བློ་བཏགས་ཤིང༌། །ཡེ་ཤེས་ཅན་གྱིས་སྦྱིན་སྟོབས་ཀྱིས། །ཐམས་ཅད་ཚུལ་བཞིན་བྱིན་གྱིས་བརླབ། ཅེས་འབྱུང་བ་ལྟར་མཆོད་རྫས་བྱིན་གྱིས་བརླབ་པའི་ཐོག་མར་ཡེ་ཤེས་རང་རྩལ་མེ་རླུང་ཆུར་ཤར་བས་མ་དག་གཉིས་འཛིན་གྱི་ཉེས་སྐྱོན་ཐམས་ཅད་བསྲེགས་གཏོར་བཀྲུས་ཏེ་བསང༌། ཐ་མལ་དུ་ཞེན་པའི་དངོས་པོ་རྣམས་སྤྲོས་བྲལ་སྟོང་ཉིད་དུ་སྦྱངས་ནས། ཕྱི་མཆོད་ལྷ་རྫས་ཀྱི་མེ་ཏོག་སོགས་ཉེར་སྤྱོད་ལྔ་དབང་ལྔའི་པུཥྤེ་སོགས་རང་བྱུང་གི་དམ་རྫས་ལྔ། རྡོ་རྗེའི་གཟུགས་སོགས་འདོད་པའི་ཡོན་ཏན་ལྔ་པོ་རྣམས་སོ་སོའི་མིང་གི་ཐོག་མ་ལས་དེ་དང་དེའི་འདོད་ཡོན་གྱི་རྣམ་པ་མ་ཚང་བ་མེད་པ་མཆོད་པའི་རྡུལ་རེ་རེ་ལས་ཀྱང་མཆོད་རྫས་སོ་སོ་ཐོགས་པའི་ལྷ་མོ་རྡུལ་སྙེད་དུ་འཕྲོ་བའི་མཆོད་སྤྲིན་རབ་འབྱམས་ཀྱིས་ནམ་མཁའི་ཁམས་གང་བར་བསམ་པ་དང༌། ནང་མཆོད་སྨན་གཏོར་རཀྟ་གསུམ་སོ་སོར་མེ་རླུང་ཆུའི་ས་བོན་སོགས་ཀྱིས་སྦྱོང་བས་མཚན་འཛིན་རང་ག་མའི་རྟོག་པ་སྦྱང༌། དམ་ཡེ་གཉིས་མེད་ཀྱི་བདུད་རྩི་དང་ཟག་མེད་འདོད་ཡོན་གྱི་ཕུང་པོ་དང་ཆགས་མེད་དམར་ཆེན་གྱི་རྒྱ་མཚོར་རྟོག །ཆེས་ཆེར་འཕེལ་བས་མཆོད་སྤྲིན་མཁའ་ཁྱབ་ཏུ་སྦར་བ་དང༌། གསང་མཆོད་གཉིས་སྣང་ལོག་རྟོག་གཉིས་མེད་ཆོས་དབྱིངས་སུ་བསྒྲལ་བ་དང༌། ཡུལ་དབང་ཤེས་གསུམ་ཐབས་ཤེས་ཟུང་འཇུག་ཏུ་སྦྱོར་བ་དང༌། ལྷག་པ་ཏིང་ངེ་འཛིན་གྱི་མཆོད་པ་སྣོད་དག་པའི་ཞིང་བཅུད་ལྷ་དང་ལྷ་མོ་སྟེ་སྣང་སྤྱོད་ཐམས་ཅད་མཆོད་པའི་ཕྱག་རྒྱ་ལས་འདའ་བ་མེད་པ་དང༌། མཆོད་པའི་ཡོ་བྱད་ཇི་སྙེད་པའང་སེམས་ཉིད་ཡེ་ཤེས་ཆེན་པོའི་རོལ་པར་སྡུད་པ་རོལ་པ་ཡེ་ཤེས་ཀྱི་མཆོད་པ་སྟེ། ཐམས་ཅད་ཀྱང་མཆོད་རྫས་དམ་ཚིག་གི་ཕྱག་རྒྱ་ལ་སོ་སོའི་རང་སྔགས་བརྗོད་པ་ཆོས་རྒྱ། བཅའ་བ་ལས་རྒྱ། བསྒོམ་པ་ཡེ་རྒྱ། ཀུན་ཀྱང་ཆོས་ཉིད་ཀྱི་རྩལ་ཅིར་ཡང་སྣང་བ་ཡེ་ཤེས་སྒྱུ་མའི་རོལ་པར་ཤེས་པ་ཕྱག་རྒྱ་ཆེན་པོ་རྣམས་དང་ལྡན་པས་བདེ་བ་ཆེན་པོའི་རང་བཞིན་གྱི་མཆོད་པའི་སྤྲིན་ཕུང་དཀྱིལ་འཁོར་པ་རྣམས་ཀྱི་དབང་པོའི་སྤྱོད་ཡུལ་དུ་འདོད་རྒུར་འབྱུང་བར་སྤེལ་ཏེ་བྱིན་གྱིས་བརླབ་བོ། །སྔོན་འགྲོ་དེ་རྣམས་ལ་དག་རྫོགས་སྨིན་གསུམ་སྦྱོར་ན། སྦྱང་བྱ་འཁོར་བའི་དུས་སུ་ཇི་ལྟར་འདོད་པའི་སྲིད་པར་འཇུག་པ་ལ་སྐྱེ་གནས་ཀྱི་སྐྱོན་དང་ཕྱི་མའི་གནས་ལུས་ལོངས་སྤྱོད་ཀྱི་འགལ་རྐྱེན་རྣམས་སྦྱང་ཞིང་བསྲུང་བ་དང༌། མཐུན་རྐྱེན་བསོད་ནམས་ཆ་མཐུན་གྱི་ལས་གསོག་པ་རྣམས་དག་པར་བྱེད། སྦྱངས་འབྲས་དངོས་གཞི་སངས་རྒྱས་ཀྱི་མཛད་པ་ལ་བར་དུ་གཅོད་པའི་བདུད་བཞི་བཅོམ་པ་དང་ཚོགས་གཉིས་གསོག་ཅིང༌། འོད་ཟེར་ཆེན་པོས་དབང་བསྐུར་བ་དང་སངས་རྒྱས་ཀྱི་ཞིང་ཡོངས་སུ་སྦྱོང་བའི་ཏིང་ངེ་འཛིན་མངོན་དུ་བྱེད་པ་ལ་སོགས་པ་དང་མཐུན་པས་འབྲས་བུ་རྫོགས་པར་བྱེད། སྦྱོང་བྱེད་སྔོན་འགྲོ་འདི་དག་གིས་རྩ་རླུང་ཐིག་ལེའི་གེགས་དང་གོལ་ས་ཆོད་ཅིང་ཉམས་རྟོགས་ཀྱི་རྩལ་ཁ་སྐྱེད་པའི་ཐབས་རྨད་དུ་བྱུང་དུ་འགྱུར་བས་རྫོགས་རིམ་གྱི་སྨིན་བྱེད་དུ་འགྲོ་བར་བཤད་དོ།

།རྩ་བའི་ས་བཅད་གཉིས་པ་དངོས་གཞི་ལ་གཉིས། རྩ་བའི་རྣལ་འབྱོར་དང༌། དེའི་ཡན་ལག་བྱེ་བྲག་ཏུ་བཤད་པའོ། །དང་པོ་ལ་བཞི། རྒྱུ་ཏིང་ངེ་འཛིན་གསུམ་གྱི་ཁོག་དབུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ། གསལ་བརྟན་དག་གསུམ་བཤད་པ། སྲོག་སྡོམ་བཟེར་བཞིའི་མན་ངག་བཤད་པའོ། །དང་པོ་ལའང་གཉིས། དག་པ་དང་བཅས་ཏེ་མདོར་བསྟན་པ། དེ་རྒྱས་པར་བཤད་པའོ། །དང་པོ་ནི། དངོས་གཞི་འཆི་དང་བར་དོ་སྐྱེ་བའི་ཚུལ༔ སྦྱོང་བྱེད་ཟབ་དང་རྒྱ་ཆེའི་ཏིང་འཛིན་ནི༔ ཞེས་གསུངས་ཏེ། སྒྲུབ་ཐབས་ཀྱི་དངོས་གཞི་རྟེན་བརྟེན་པའི་དཀྱིལ་འཁོར་བསྐྱེད་པའི་ཐོག་མར། སྦྱང་བྱ་སེམས་ཅན་རྣམས་ཀྱི་འཆི་སྲིད་དང་བར་དོའི་སྲིད་པ་དང་སྐྱེ་བའི་སྲིད་པའི་ཚུལ་རིམ་པར་འབྱུང་བ་དང་མཐུན་པར། སྦྱོང་བྱེད་ཟབ་པ་དང་རྒྱ་ཆེ་བ་དེ་བཞིན་ཉིད། ཀུན་ཏུ་སྣང༌། རྒྱུའི་ཏིང་ངེ་འཛིན་གསུམ་བསྒོམ་པར་བྱ་སྟེ། དེས་ནི་སྦྱངས་འབྲས་སྐུ་གསུམ་འགྲུབ་རུང་གི་རྟེན་འབྲེལ་འགྲིགས་པ་སྟེ། སངས་རྒྱས་གསང་བའི་ལམ་རིམ་ལས། སྲིད་པའི་རིམ་པ་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོན། ཅེས་སོ། །གཉིས་པ་ལ་གསུམ། དེ་བཞིན་ཉིད། ཀུན་སྣང༌། རྒྱུའི་ཏིང་ངེ་འཛིན་ནོ། །དང་པོ་ནི། སྟོང་ཆེན་དེ་བཞིན་ཉིད་དབྱིངས་མཁའ་ལྟར་དག༔ བདེན་གཉིས་དབྱེར་མེད་དབྱིངས་སུ་མཉམ་པར་བཞག༔ ཅེས་གསུངས་ཏེ། དེ་བཞིན་ཉིད་སྟོང་པ་ཆེན་པོའི་ཏིང་ངེ་འཛིན་ནི། སྦྱང་བྱ་འགྲོ་བ་རྣམས་འཆི་བའི་ཚེ་ཕྱི་ནང་གི་ཐིམ་རིམ་རྣམས་རྫོགས་པའི་མཐར་འཆི་སྲིད་ཆོས་སྐུའི་འོད་གསལ་ཞེས་ངོ་མ་ཤེས་ན་ལྡོག་པ་ཅན་གྱི་སྒྲིབ་བྲལ་གསལ་སྟོང་རྣམ་པར་མི་རྟོག་པའི་ངང་དུ་དར་གཅིག་གནས་པ་དེ་ཡིན་ལ། སྦྱོང་བྱེད་འཁོར་འདས་ཀྱིས་བསྡུས་པའི་ཆོས་ཐམས་ཅད་སེམས་ལས་གཞན་དུ་མེད་ཅིང་སེམས་ཀྱང་རང་གི་ངོ་བོས་མ་གྲུབ་པས་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་གདོད་མ་ནས་སྤྲོས་པའི་མཐའ་ཐམས་ཅད་དང་བྲལ་བས་ནམ་མཁའ་ལྟར་དག་པ། ཀུན་རྫོབ་དང་དོན་དམ་དུ་འཛིན་པའི་བཟང་ངན་དབྱེ་བ་བྱར་མེད་པས་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་རང་བཞིན་གྱིས་འོད་གསལ་བའི་དབྱིངས་སུ་མ་བཅོས་པར་མཉམ་པར་བཞག །དེ་ལམ་དུ་ཇི་ལྟར་འགྱུར་ན། རྣམ་པར་མི་རྟོག་པའི་སྟོང་ཉིད་དེ་འཆི་བ་འོད་གསལ་དང༌། འབྲས་བུ་ཆོས་སྐུ་གཉིས་ཀ་དང་རྣམ་པ་མཐུན་ཞིང་དེ་ལྟར་བསྒོམས་པའི་རྗེས་ཐོག་ཉིད་དུ་འཆི་བ་དག་པ་ཆོས་སྐུའོ་སྙམ་པའི་གཞི་འབྲས་སྦྲེལ་བའི་ང་རྒྱལ་བྱ་ཞིང་དེ་ལྟར་བསྒོམས་པས་མར་འཁོར་བའི་དྲི་མ་འཆི་སྲིད་སྦྱོང་ཞིང་རྟག་པར་ལྟ་བ་དང༌། གཟུགས་མེད་ཀྱི་ཁམས་དག་པར་བྱེད། ཡར་སྤྲོས་པ་དང་བྲལ་བའི་ཡེ་ཤེས་ཆོས་སྐུ་མངོན་ཏུ་བྱེད་པའི་རིགས་ཀྱི་ས་བོན་གསོས་འདེབས་པས་འབྲས་བུ་རྫོགས་པར་བྱེད། བར་དུ་དོན་གྱི་འོད་གསལ་རྒྱུད་ལ་སྐྱེ་བའི་གཞི་བཏིང་བས་ན་ལམ་གོང་མའི་རྫོགས་རིམ་གྱི་སྨིན་བྱེད་དུ་འགྱུར་རོ།

།གཉིས་པ་ནི། སྙིང་རྗེ་སྒྱུ་མ་ཀུན་སྣང་རིག་པའི་སྤྲིན༔ གསལ་ལ་འཛིན་མེད་མཁའ་ཁྱབ་ཀུན་ཏུ་སྤྲོ༔ ཞེས་གསུངས་ཏེ། སྙིང་རྗེ་སྒྱུ་མ་ཀུན་ཏུ་སྣང་བའི་ཏིང་ངེ་འཛིན་ནི། སྦྱང་བྱ་འཆི་སྲིད་ཀྱི་སྐད་ཅིག་བཞི་པའི་རྗེས་དེ་ཉིད་ལ་ལྷུན་གྲུབ་ལོངས་སྐུའི་འོད་གསལ་ནམ་མཁའ་སྤྲིན་དང་བྲལ་བ་ལྟ་བུ་ལ་ཡེ་ཤེས་ལྔའི་རང་སྣང་འོད་དང་ཐིག་ལེ་ཚོམ་བུའི་རྣམ་པ་སྒྱུ་མ་ལྟ་བུར་ཤར་ཡང་ངོ་མ་ཤེས་པས་ལས་རླུང་གི་རྐྱེན་ལས་སེམས་སྣང་གསུམ་ལུགས་ལྡོག་གི་རིམ་པ་ཤིན་ཏུ་ཕྲ་ཞིང་དྭངས་པའི་བར་དོའི་ལུས་དབང་པོ་ཀུན་ཚང་བར་གྲུབ་པ་རྨི་ལམ་ལྟར་ཡད་ཡུད་ཕྱད་ཕྱོད་དུ་སྣང་བ་དེ་ཉིད་ཡིན་ལ། སྦྱོང་བྱེད་དེ་ཁོ་ན་ཉིད་མ་རྟོགས་པའི་འགྲོ་བ་ཀུན་ལ་རང་རིག་པའི་རང་རྩལ་སྙིང་རྗེ་སྒྱུ་མ་ལྟ་བུའི་སྤྲིན་སྤྲོ་བ་སྟེ། དེའང་ནམ་མཁའ་དག་པ་ལས་སྤྲིན་དང་འཇའ་ཚོན་གསལ་བར་སྣང་ཡང་ནམ་མཁའི་ཆོ་འཕྲུལ་ཙམ་ལས་བདེན་པར་མ་གྲུབ་པ་བཞིན་ཏུ་སྙིང་རྗེ་དེའང་རྣམ་པ་གསལ་ལ་ངོ་བོ་འཛིན་པ་མེད་པ་མཁའ་ལྟར་ཁྱབ་པར་བརྡལ་ཞིང་རིས་སུ་མ་ཆད་པ་ཀུན་ཏུ་སྤྲོ། དེ་ལམ་དུ་ཇི་ལྟར་འགྱུར་ན། དེ་ཉིད་སྒྱུ་མ་ལྟར་སྣང་བའི་ཆ་ནས་བར་དོ་དང་འབྲས་བུ་ལོངས་སྐུ་གཉིས་ཀ་དང་རྣམ་པ་མཐུན་པ་དང༌། རྗེས་ཐོབ་ཏུ་བར་དོ་དག་པ་ལོངས་སྤྱོད་རྫོགས་པའི་སྐུའོ། །ཞེས་དག་རྫོགས་ཀྱི་ང་རྒྱལ་བྱེད་ཅིང་དེ་ལྟར་བསྒོམས་པས་བར་དོའི་སྲིད་པ་སྦྱོང༌། ཆད་པར་ལྟ་བ་དང་གཟུགས་ཀྱི་ཁམས་དག་པར་བྱེད། ལོངས་སྐུ་སྒྱུ་མ་ལྟ་བུ་མཚན་དཔེས་སྤྲས་པ་མངོན་ཏུ་འགྱུར་བའི་རིགས་ཀྱི་ས་བོན་གསོས་འདེབས་པས་འབྲས་བུ་རྫོགས་པར་བྱེད། འོད་གསལ་དེ་ཉིད་ཡེ་ཤེས་ཀྱི་སྐུར་ལྡང་བའི་རྒྱུ་སྙིང་རྗེ་ཆེན་པོ་རྒྱུད་ལ་སྐྱེ་བའི་གཞི་བཏིང་པས་རྫོགས་རིམ་གྱི་སྨིན་བྱེད་དུ་འགྱུར་རོ། །གསུམ་པ་ནི། ཕྱག་རྒྱ་གཅིག་པ་ཕྲ་མོ་ཡིག་འབྲུའི་ཚུལ༔ ཐམས་ཅད་སྐྱེད་བྱེད་རྒྱུ་ཡི་ས་བོན་ནི༔ མི་འགྱུར་ཡེ་ཤེས་སྙིང་པོ་མཁའ་ལ་ཤར༔ རྩེ་གཅིག་སེམས་བཟུང་གསལ་སྣང་ཚད་དུ་འདོན༔ ཅེས་གསུངས་ཏེ། རྒྱུའི་ཏིང་ངེ་འཛིན་ནི། སྦྱང་བྱ་བར་སྲིད་དེ་ཕྱི་མའི་སྲིད་པ་ལེན་པ་ལ་མངོན་དུ་ཕྱོགས་པ་ན་གང་དུ་སྐྱེ་བར་འགྱུར་བའི་གནས་ལ་སྲིད་པ་སྐྱེ་བའི་རྐྱེན་གྱིས་དེར་འཇུག་ལ་ཁད་ཀྱི་བར་དོའི་རླུང་སེམས་དེ་ཡིན་ལ། སྦྱོང་བྱེད་ནི་ལྷ་སྐུ་ཕྱག་རྒྱ་གཅིག་པ་དང་ཕྲ་མོ་ཡིག་འབྲུའི་ཚུལ་གྱིས་དཀྱིལ་འཁོར་ཐམས་ཅད་སྐྱེད་ཅིང་སྤྲུལ་པར་བྱེད་པ་དང༌། དེ་ཉིད་བདེ་གསལ་སྟོང་པ་ཉིད་ཀྱི་རང་བཞིན་ཅན་དུ་བསྒོམས་ནས་དཀྱིལ་འཁོར་ཐམས་ཅད་ཀྱང་བདེ་གསལ་གྱི་རྣམ་པར་འཕྲུལ་པའི་སྟོང་པ་ཉིད་ཀྱི་རང་བཞིན་ཅན་དུ་འཆར་བའི་རྒྱུ་བྱེད་པའི་ཕྱིར་སྟོང་ཉིད་སྙིང་རྗེ་ཟུང་འཇུག་གི་རང་རྩལ་རྒྱུའི་ས་བོན་ནི། རང་རིག་ལས་གཞན་དུ་མི་འགྱུར་བའི་ཡེ་ཤེས་ཀྱི་སྙིང་པོ་ཧྲཱིཿདང་ཧཱུྃ་ལ་སོགས་པ་གཟུང་འཛིན་གཉིས་སྟོང་གི་ནམ་མཁའ་ལ་སྐད་ཅིག་གིས་ཤར་བར་བསྒོམས་ནས་ཡིད་གཞན་ཏུ་མ་ཡེངས་པར་རྩེ་གཅིག་ཏུ་སེམས་བཟུང་ལ་གསལ་སྣང་ཚད་དུ་ཕྱིན་པར་འདོན་པར་བྱ་སྟེ། དེའང་ས་ལེ། སིང་ངེ༌། ལྷག་གེ །ལྷང་ངེ་བ་སྟེ་གསལ་བའི་ཚད་བཞི་དང༌། མི་གཡོ། མི་འགྱུར། མངོན་པར་མི་འགྱུར། ཅིར་ཡང་བསྒྱུར་དུ་བཏུབ་པ་སྟེ་བརྟན་པའི་ཚད་བཞི་བཅས་ཚད་བརྒྱད་གྱད་དུ་གྱུར་པ་ལ་བསླབ། དེ་ལམ་དུ་ཇི་ལྟར་འགྱུར་ན། དེ་ཉིད་དཀྱིལ་འཁོར་ཐམས་ཅད་སྐྱེད་པའི་རྒྱུར་འགྱུར་བ་ལྟར་འཁོར་བའི་སྐྱེ་གནས་སུ་འཇུག་ཀའི་བར་དོའི་རླུང་སེམས་དེ་ཉིད་ཀྱིས་སྲིད་པ་ཕྱི་མའི་རྒྱུ་བྱེད་པ་བཞིན་དུ་སངས་རྒྱས་སྤྲུལ་པའི་སྐུས་ཀྱང་གདུལ་བྱའི་ཆེད་དུ་གཟུགས་སྐུའི་རྣམ་པར་འཕྲུལ་པ་སྣ་ཚོགས་པར་སྟོན་པའི་ཆ་ནས་དེ་གསུམ་རྣམ་པ་མཐུན་པས་ན་སྐྱེ་བ་གནས་སུ་དག་པ་སྤྲུལ་པའི་སྐུའོ་ཞེས་ང་རྒྱལ་བྱ། དེ་ལྟར་བསྒོམས་པས་སྐྱེ་གནས་སུ་འཇུག་པའི་སྲིད་པ་སྦྱོང་ཞིང་འདོད་པའི་ཁམས་དག་པར་བྱེད། གདུལ་བྱ་གང་འདུལ་དུ་སྣང་བའི་སྤྲུལ་སྐུ་མངོན་དུ་བྱེད་རུང་གི་ཐར་པའི་ས་བོན་གསོས་འདེབས་པས་འབྲས་བུ་རྫོགས་པར་བྱེད། བདེ་བ་དང་རླུང་སེམས་ལས་བྱུང་བའི་ཡེ་ཤེས་ཀྱི་ལྷ་སྐུར་མངོན་དུ་ལྡང་ནུས་པའི་གཞི་བཏིང་བས་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །དེ་རྣམས་ཀྱང་ལམ་རིམ་ལས། སྟོང་པས་རྣམ་ཀུན་མཚན་མ་མེད། །བདག་ཏུ་འཛིན་པའི་ཞེན་པ་གྲོལ། །དེ་ཕྱིར་མཐོང་རྗེས་དེ་བཞིན་ཉིད། །སྙིང་རྗེ་འབྱུང་བའི་གཞི་རུ་བཞག །གོ་རིམ་འགྱུར་བའང་དེ་བཞིན་ངེས། །ཞེས་སོགས་ཀྱིས་བསྟན་པ་ལྟར་རོ། །གཉིས་པ་དཀྱིལ་འཁོར་བསྐྱེད་པ་ལ་གཉིས། རྟེན་གཞལ་ཡས་ཁང་དང༌། བརྟེན་པ་ལྷར་བསྐྱེད་པའོ།

།དང་པོ་ནི། དེ་ལས་འབར་བའི་འོད་སྤྲོས་དངོས་འཛིན་སྦྱང་༔ འབྱུང་བ་རིམ་བརྩེགས་ཡུམ་ལྔའི་མཁའ་ཀློང་དུ༔ ཧེ་རུ་ཀ་དཔལ་དགྱེས་པའི་ཕོ་བྲང་དང་༔ རྡོ་རྗེའི་སྲུང་འཁོར་དུར་ཁྲོད་བཀོད་པར་བཅས༔ པདྨ་ཉི་ཟླ་དྲེགས་པའི་གདན་ལ་སོགས༔ ཕྱི་སྣོད་ཞི་ཁྲོའི་ཞིང་ཁམས་ཆེན་པོར་གསལ༔ ཅེས་གསུངས་ཏེ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ་ལ་སྤྱིའི་གོ་རིམ་ནི། སྣོད་ཆགས་པའི་རྗེས་སུ་བཅུད་རིམ་པར་ཆགས་པའི་ཞེན་པ་སྦྱོང་བ་དང༌། དེ་བཞིན་གཤེགས་པ་རྣམས་གང་དུ་འཚང་རྒྱ་བའི་ཞིང་སྒྲིབ་པ་ཐམས་ཅད་བྲལ་བའི་རང་སྣང་གི་ཞིང་ཁམས་ཚད་མེད་པ་དེར་འཚང་རྒྱ་བ་དང༌། ལམ་གོང་མའི་དུས་སུ་ཐོག་མར་རགས་པ་ལུས་རྩའི་ཁམས་སྦྱངས་ནས་ཕྲ་བ་ངག་རླུང་དང་ཡིད་ཐིག་ལེ་རིམ་པར་འཆིང་ཞིང་དག་པར་བྱེད་དགོས་པས་རྟེན་དང་བརྟེན་པའི་གོ་རིམ་ངེས་པ་ཡིན་ལ། དེའི་ཕྱིར་དང་པོ་རྟེན་གྱི་དཀྱིལ་འཁོར་བསྒོམ་དགོས་ཤིང་དེའང་མ་དག་པའི་གནས་སྐབས་འཇིག་རྟེན་ཆགས་རིམ་དང་བསྟུན་ནས་སྒོམ་པར་བྱེད་པ་སྟེ། གལ་ཕྲེང་ལས། སྣོད་ཀྱི་རིམ་པ་འབྱུང་ཚུལ་གྱིས། །རིམ་བརྩེགས་གཞལ་ཡས་གཞུང་བཞིན་བསྐྱེད། ཅེས་སོ། །དེ་ཇི་ལྟར་བསྒོམ་ན། ནམ་མཁར་གནས་པའི་རྒྱུའི་ས་བོན་དེ་ལས་འབར་བ་ཆེན་པོའི་འོད་ཟེར་མེ་རླུང་ཆུའི་རྣམ་པར་སྤྲོས། སྣོད་བཅུད་དངོས་པོར་འཛིན་པ་ཐམས་ཅད་སྦྱངས་ནས་སྟོང་ཉིད་དུ་གྱུར་པར་མོས། སྔར་དེ་ཏིང་སྐབས་སྟོང་པར་བསྒོམ་པ་ནི་ནང་འཛིན་རྟོག་སྦྱོང་བ་ཡིན་ལ། འདིར་ནི་གཟུང་ཡུལ་སྦྱོང་བའི་དགོས་པ་ཐ་དད་ཡིན་པས་བལྡབས་པར་མི་འགྲོའོ། །དེ་ནས་སྦྱང་བྱ་སེམས་ཅན་རྣམས་གང་དུ་སྐྱེ་བའི་སྣོད་ཀྱི་འཇིག་རྟེན་ཆགས་པའི་གཞིར་གྱུར་པ་ནམ་མཁའི་ཁམས་དང་ཆགས་པར་འགྱུར་བའི་རྒྱུའི་གཙོ་བོ་ཀུན་བྱེད་སེམས་ཉིད་དང་བྱེ་བྲག་འགྲོ་བའི་ལས་སྤྱི་མཐུན་པར་བསགས་པའི་བག་ཆགས་སེམས་ལ་ཞེན་པས་ཡུལ་སྣང་གྱུར་ཐུན་མོང་དུ་སྨིན་པའི་འབྱུང་བཞིའི་དཀྱིལ་འཁོར་རི་རབ་དང་བཅས་པ་གྲུབ་པ་དེ་ཡིན་ལ། སྦྱོང་བྱེད་རྒྱུའི་ཡི་གེ་ལས་རིམ་པར་ཆད་པའི་ས་བོན་རྣམས་ལས་ཆོས་འབྱུང་ནམ་མཁའི་ཁོངས་སུ་རླུང་མེ་ཆུུ་ས་སྟེ་འབྱུང་བ་བཞི་རི་རབ་དང་བཅས་རིམ་པར་བརྩེགས་པར་བསྒོམ་སྟེ། དེ་དག་ཀྱང་སྒྱུ་འཕྲུལ་རོལ་པ་ལས། ཕྱི་རོལ་འབྱུང་སོགས་ཡུམ་རྣམས་ཀུན། །ཐབས་དང་ཤེས་རབ་གཉིས་མེད་པའི། །སྲ་བརྟན་རྡོ་རྗེ་སྤྱན་མ་སྟེ། །གཤེར་བ་ལྷ་མོ་མཱ་མ་ཀི །སྨིན་བྱེད་སྲེག་མཛད་གོས་དཀར་མོ། །ཡང་ཞིང་གཡོ་བ་སྒྲོལ་མའི་མཁའ། །སྟོང་གསལ་ནམ་མཁའ་ཀུན་བཟང་མོ། །ཞེས་པ་ལྟར་འབྱུང་ལྔ་དག་པ་ཡུམ་ལྔའོ་ཞེས་ང་རྒྱལ་བཟུང་བས། སྦྱངས་འབྲས་སངས་རྒྱས་རྣམས་གང་དུ་འཚང་རྒྱ་བའི་ཞིང་ཆོས་ཀྱི་དབྱིངས་དང་དེའི་ཕྱག་རྒྱ་ཡུམ་ལྔར་རྣམ་པར་དག་པར་འགྱུར་རོ། །དེ་ལྟར་འབྱུང་ལྔ་ཡུལ་ལྔའི་རང་བཞིན་གྱི་མཁའ་ཀློང་དུ་གཞལ་ཡས་ཁང་གསལ་གདབ་སྟེ། དེའི་སྦྱང་བྱ་སེམས་ཅན་རྣམས་རང་གི་ཚེ་དང་རྗེས་སུ་འབྲེལ་བའི་ལོངས་སྤྱོད་ཀྱི་ཡུལ་དུ་གྱུར་པ་ཡུལ་ཕྱོགས་དང་ཁང་ཁྱིམ་དང་ཡོ་བྱད་ལ་སོགས་པའི་ཞེན་རྟོག་ཡིན་ལ། སྦྱོང་བྱེད་རྣམ་སྣང་གི་ངོ་བོ་བྷྲཱུྃ་ཡིག་ལས་ཞི་བ་ཐར་པ་ཆེན་པོའི་གཞལ་མེད་ཁང་ངམ། དྲག་པོ་ལ་ཧེ་རུ་ཀ་དཔལ་ཆེན་པོ་རབ་ཏུ་དགྱེས་པས་རོལ་པའི་དུར་ཁྲོད་གསང་བ་མཆོག་གི་ཕོ་བྲང་གི་རྣམ་པ་ལམ་དུ་བྱེད་པ། འོག་གཞི་འཁོར་ཡུག་ལོགས། ཐོག་དབུབ། སྒོ། རྟ་བབས། རྒྱན་གྱི་ཁྱད་པར་སོགས་དང་ལྡན་པའི་ཕྱི་རོལ་དུ་རྡོ་རྗེའི་སྲུང་བའི་འཁོར་ལོ་རང་བྱུང་གི་དུར་ཁྲོད་ཆེན་པོ་བརྒྱད་ཀྱི་བཀོད་པ་བཅས་བསྒོམས་ནས་འབྲས་དུས་ཀྱི་ཞིང་དང་གཞལ་ཡས་ཁང་དུ་མོས་པའི་ང་རྒྱལ་བྱས་པས། སྦྱངས་འབྲས་སངས་རྒྱས་ཀྱི་གནས་ཆོས་དབྱིངས་སྤྲོས་བྲལ་གྱི་རང་བཞིན་རྡོ་རྗེ་བཙུན་མོ་ལྔའི་བྷ་ག་གསང་བ་དགྱེས་པ་ཆེན་པོ་མངོན་ཏུ་བྱེད་པའོ། །ལམ་དུས་སུ་འབྱུང་བ་རིམ་བརྩེགས་རི་རབ་དང་བཅས་པ་རྩ་འཁོར་ལོ་ལྔ་དང་དབུ་མའོ། །གཞལ་ཡས་ཁང་གི་འོག་གཞི་སྣ་ཚོགས་རྡོ་རྗེ་པད་ཉི་རྣམས་ནི་རྩ་འཁོར་རྣམས་ཀྱི་ལྟེ་བར་གནས་པའི་རླུང་དང་ཁམས་རྣམས་སོ། །དེ་རྣམས་དང་རོ་གཅིག་ཏུ་འདྲེས་པའི་སེམས་གསལ་སྟོང་བདེ་བའི་ཆ་ནི་གཞལ་ཡས་ཁང་སྟེ་དེ་ཉིད་ལེགས་པར་བསྒོམས་པས་རྩ་རླུང་ཐིག་ལེ་རྣམས་མཉེན་ཅིང་དུལ་ནས་ཡེ་ཤེས་ཁྱད་པར་ཅན་གྱི་གཞི་འདིང་བས་ལམ་གོང་མའི་སྨིན་བྱེད་དུ་འགྲོའོ། །དེའི་ནང་དུ་སྦྱང་བྱ་སེམས་ཅན་རྣམས་གང་དུ་སྐྱེ་བར་འགྱུར་བའི་གནས་མའི་པདྨ་དང༌། ཕ་མའི་ཁུ་ཁྲག་དྲོད་གཤེར་ལ་སོགས་པའི་རྟོག་པ་སྦྱོང་བྱེད་ཞི་བ་ལ་པདྨ་ཉི་ཟླ། ཁྲོ་བོ་ལ་པད་ཉི་དྲེགས་པ་ཅན་བྱོལ་སོང་གི་གདན་ལ་སོགས་པ་བསྒོམས་པས། སྦྱངས་འབྲས་མ་ཆགས་པ་དང་འོད་གསལ་བ་སོགས་གདན་དེ་དག་གི་མཚོན་དོན་མཐུན་པར་སངས་རྒྱས་ཀྱི་གཟུགས་སྐུའི་ཡོན་ཏན་འཆར་བ་ཡིན་ལ། ལམ་དུས་སུ་པདྨ་ནི་རྩ་འཁོར། ཉི་མ་ནི་གཏུམ་མོའི་མེ། ཟླ་བ་ནི་སྤྱི་བོའི་ཧཾ་ཡིག་སྟེ། འབར་འཛག་གི་ཞུ་བདེ་དང་ཡང་ན་ཤེས་རབ་མའི་པདྨའི་ལྟེ་བར་ཉི་མ་བྱང་ཆུབ་ཀྱི་སེམས་གནས་པ་ཡབ་ཀྱི་ཀུནྡ་བརྟན་པའི་རིམ་པ་ཇི་ལྟ་བ་བཞིན་པད་ཉི་ཟླ་བའོ། །དེ་ལྟར་བསྒོམས་པས་རྫོགས་རིམ་གྱི་དུས་སུ་གཏུམ་མོ་དང༌། ཕྱག་རྒྱའི་ལུས་ལ་བརྟེན་ནས་མི་འགྱུར་བའི་བདེ་བ་ཆེན་པོ་ཐོབ་པའི་གཞི་བཏིང་བས་ན་སྨིན་བྱེད་དུ་འགྲོའོ། །མདོར་ན་སྦྱང་བྱ་ཕྱི་སྣོད་ཀྱིས་བསྡུས་པའི་འཇིག་རྟེན་ཐ་མལ་དུ་སྣང་བ་འདི་ཉིད། སྦྱོང་བྱེད་རྒྱ་དང་ཚད་ལས་འདས་པས་ཞི་བ་དང་ཁྲོ་བོའི་ཞིང་ཁམས་ཆེན་པོ་རྒྱན་སྟུག་པོ་བཀོད་པར་གསལ་བཏབ་པས། སྦྱངས་འབྲས་སངས་རྒྱས་རང་སྣང་གི་ཞིང་ཁམས་མཐའ་དང་དབུས་མེད་པ་ལ་དབང་འབྱོར་ཐོབ་པར་འགྱུར་རོ། །གཉིས་པ་ལ་གསུམ། མདོར་བསྟན། རྒྱས་བཤད། མཇུག་བསྡུ་བའོ།

།དང་པོ་ནི། ནང་བཅུད་སྐྱེ་བ་བཞིས་བསྡུས་བག་ཆགས་ཀུན༔ སྣང་སྟོང་ཕྱག་རྒྱར་བསྒྲུབ་པའི་རིམ་པ་ནི༔ ཞེས་གསུངས་ཏེ། དེ་ལྟར་རྟེན་གཞལ་ཡས་ཁང་བསྐྱེད་པའི་རྗེས་སུ་བརྟེན་པ་ལྷའི་འཁོར་ལོ་བསྒོམ་པ་ནི། སྤྱིར་ཡེ་ཤེས་རྡོ་རྗེ་ཀུན་ལས་བཏུས་པར། སྐྱེ་བ་ཀུན་རྫོབ་བདེན་པ་ཞེས་བྱ་སྟེ། །འཆི་བ་ཡང་ནི་དོན་དམ་བདེན་པ་ཡིན། །བདེན་གཉིས་འདི་ལ་རྣམ་པར་ངེས་བྱས་ནས། །རིམ་པ་གཉིས་ཀྱི་དབྱེ་བ་གསུངས་པ་ཡིན། ཅེས་པ་ལྟར་རིམ་པ་དང་པོ་ནི་སྐྱེ་སྲིད་སྦྱོང་བྱེད་ཡིན་པས་སྲིད་པར་སྐྱེ་བའི་རིམ་པ་དང་མཐུན་པར་བསྒོམ་པ་ཡིན་ལ། དེའང་སྦྱང་བྱ་ནང་བཅུད་ཀྱི་སེམས་ཅན་མངལ་སོགས་སྐྱེ་བའི་གནས་རྣམ་པ་བཞིས་བསྡུས་པའི་ལུས་ཀྱི་བག་ཆགས་རགས་པ་ཀུན་ཡིན་ལ། སྦྱོང་བྱེད་སྣང་ལ་རང་བཞིན་མ་གྲུབ་པ་སྟོང་པའི་གཟུགས་བརྙན་ཆུ་ཟླ་འཇའ་ཚོན་མེ་ལོང་གི་གཟུགས་ལྟ་བུའི་ལྷའི་ཕྱག་རྒྱར་བསྒོམས་པས། སྦྱངས་འབྲས་སངས་རྒྱས་ཀྱི་གཟུགས་སྐུ་རྣམ་གཉིས་འགྲུབ་པའི་ཉེར་ལེན་ཏུ་འགྱུར་བ་སྟེ། དེ་ལྟ་བུའི་ལམ་བསྒྲུབ་པའི་རིམ་པ་དང་པོ་ནི་འདི་ལྟ་སྟེ། གཉིས་པ་ནི། རྒྱུ་ལས་འབྲས་བུར་བཞེངས་པས་སྒཽང་སྐྱེས་སྦྱོང་༔ ཡེ་ཤེས་མངོན་བྱང་ལྔ་ཡིས་མངལ་སྐྱེས་སྦྱོང་༔ སྐད་ཅིག་སྔགས་ལས་གྲུབ་པས་དྲོད་སྐྱེས་སྦྱོང་༔ སེམས་ཙམ་རྫོགས་པའི་ལྷ་ཡིས་རྫུས་སྐྱེས་སྦྱོང་༔ ཞེས་གསུངས་ཏེ། འདི་ལ་བཞི། དབང་རྟུལ་ལས་དང་པོ་པ་སྤྲོས་བཅས་རྣམས་ལ་སྒོང་སྐྱེས་དང་མཐུན་པར་རྒྱས་པ་ཆེན་པོའི་བསྐྱེད་རིམ་དང༌། དབང་འབྲིང་སྤྲོས་པ་ཆུང་བ་ལ་མངལ་སྐྱེས་དང་མཐུན་པར་མངོན་བྱང་གི་བསྐྱེད་ཆོག་དང༌། དབང་རྣོན་སྤྲོས་མེད་ཀྱི་གང་ཟག་ལ་དྲོད་གཤེར་སྐྱེས་དང་མཐུན་པར་སྔགས་ཙམ་གྱིས་བསྐྱེད་པ་དང༌། ཡང་རབ་ཤིན་ཏུ་སྤྲོས་མེད་ལ་རྫུས་སྐྱེས་དང་མཐུན་པར་སྐད་ཅིག་དྲན་རྫོགས་སུ་བསྐྱེད་པ་སྟེ་སྐྱེད་ཆོག་རྣམ་པ་བཞི་ཡོད་པ་ལས། དང་པོ་ནི། གཉིས་སྐྱེས་རྣམས་ཐོག་མར་མའི་མངལ་དང་དེ་ནས་སྒོ་ང་སྟེ་ལན་གཉིས་སུ་སྐྱེ་བ་སྟེ། གསར་སྙིང་སྤྱི་ཁྱབ་ལྟར་ན་ཐོག་མར་རྒྱུའི་ས་བོན་ལས་རྒྱུ་རྡོ་རྗེ་འཛིན་པ་ལྷན་སྐྱེས་ཀྱི་སྐུར་བསྒོམ། དེ་ཉིད་རྗེས་ཆགས་ཀྱི་ཐིག་ལེར་ཞུ་བ་གླུས་བསྐུལ་བའི་རྐྱེན་ལས་འབྲས་བུ་རྡོ་རྗེ་འཛིན་པ་ཞལ་ཕྱག་ཡོངས་སུ་རྫོགས་པའི་སྐུར་བཞེངས་པའམ། སྔ་འགྱུར་རང་སྐད་བདག་སྲས་གཞན་སྲས་སུ་བྱ་བའི་ཆོ་ག་ལྟར་ན། ཡེ་ཤེས་རྩེ་མོ་ལས། སྲས་དང་བཙུན་མོར་བཅས་པ་ནི། །འཁོར་བའི་ཆོས་ལས་སྐྱེས་པ་སྟེ། །སེམས་ཅན་གྱིས་ནི་སྲས་སུ་བྱ། །ཞེས་དང༌། ཇི་ལྟར་སངས་རྒྱས་མཐུ་ལས་བྱུང༌། །ལྷུན་གྱིས་གྲུབ་པའི་ཆོ་ག་དང༌། །ཆོ་གའི་ཡན་ལག་རྫོགས་པ་ལ། །མཁས་པ་སངས་རྒྱས་སྲས་ཡིན་ནོ། །ཞེས་གསུངས་ཏེ།

དེ་ལའང་མན་ངག་སྒྲུབ་སྡེའི་ལུགས་ལྟར་ན། བདེ་འདུས་ལས། བདག་གི་སྲས་སུ་གཞན་བྱ་བ་ལ་ལྔ་སྟེ་རྒྱུའི་ས་བོན་ལས་གཙོ་བོ་ཡབ་ཡུམ་བསྐྱེད་པ། ཕྱོགས་བཅུའི་བདེ་བར་གཤེགས་པ་རྣམས་བཀུག་ནས་མཁའ་རུ་བསྟིམ་པ་དང༌། སེམས་ཅན་རྣམས་བཀུག་ནས་སྒྲིབ་པ་སྦྱང་བ་དང༌། གཉིས་སུ་མེད་པ་ལ་ཆེ་བ་བརྗོད་པ་དང༌། མཁའ་ནས་བཏོན་ལ་དཀྱིལ་འཁོར་དུ་འགོད་པའོ། །ཞེས་དང༌། གཞན་གྱི་སྲས་སུ་བདག་བྱ་བ་ལ་བརྒྱད་དེ་གཙོ་བོ་ཡབ་ཡུམ་ཞུ་སྟེ་རྒྱུའི་ས་བོན་དུ་བྱུང་བ་དང༌། དེ་ལས་ཡབ་ཡུམ་དུ་བསྐྱེད་པ་དང༌། ཡབ་ཀྱི་རྟོག་ཚོགས་ལས་ཡི་གེ་བསྐྱེད་པ་དང༌། ཡུམ་ལས་འོད་འཕྲོ་ཞིང་ལྷ་ལ་གསོལ་བ་གདབ་པ་དང༌། དཀྱིལ་འཁོར་ཐམས་ཅད་བདག་ཡབ་ཡུམ་ལ་བསྟིམས་པས་ཡེ་ཤེས་པར་ང་རྒྱལ་བསྐྱེད་པ་དང༌། ཡབ་ཡུམ་སྦྱོར་བ་བྱ་ཞིང་མཁའ་རུ་དཀྱིལ་འཁོར་བསྐྱེད་པ་དང༌། བདག་གི་རྟོག་པ་ཞེ་གཉིས་ལྷར་བསྐྱེད་དེ་ཕྱིར་འདོན་པ་དང༌། སྤྱན་དྲངས་པ་ལ་རྒྱས་གདབ་པའོ། །ཞེས་པ་ལྟར་རོ། །རྒྱུད་སྡེ་སྒྱུ་འཕྲུལ་ལྟར་ན་གཙོ་བོ་ཡབ་ཡུམ་ལྷར་བསྐྱེད་ནས་སྙོམས་པར་འཇུག་ཅིང་ངོ་མཚར་རྫས་ཀྱི་དཀྱིལ་འཁོར་ཡི་གེའི་སྤྲིན་སྤྲོ་བ་བདག་གི་སྲས་སུ་གཞན་བྱ་བ་དང༌། ཐུགས་དམ་བསྐུལ་ཞིང་བྱིན་རླབས་རྗེས་གནང་གི་རྐྱེན་གྱིས་གོང་བུ་ཡི་གེ་ཕྱག་མཚན་སྐུ་ཡོངས་རྫོགས་སུ་བྱེད་པས་སྣང་ཕྱོགས་དང་སྟོང་ཕྱོགས་ཀྱི་ཞེན་པ་སྦྱོང་བ་གཞན་གྱི་སྲས་སུ་བདག་བྱ་བ་སྟེ། དེ་དག་གིས་སྒོང་སྐྱེས་ཀྱི་བག་ཆགས་སྦྱོང་བར་བྱེད་དོ། །གཉིས་པ་ནི། འདི་ལའང་དགོས་དོན་ཚང་ཚུལ་མཚུངས་པ་ལ་ཆོ་ག་རྒྱས་འབྲིང་བསྡུས་གསུམ་དུ་འབྱུང་བའི་རྒྱས་པ་མ་རྒྱུད་རྣམས་ཀྱི་དགོངས་པ་མངོན་བྱང་ལྔ་བསྐྱེད་ལ་ཐོག་མར་མངལ་ཞུགས་ཀྱི་རིམ་པ་དང་སྦྱོར་ན། ཀློང་གསལ་ལས། མངལ་ཞུགས་བྱང་ཆུབ་རྣམ་ལྔ་སྟེ། །ཟླ་བ་བཅུ་ནི་ས་བཅུའི་ཚུལ། །སྐྱེས་པ་རང་བཞིན་སྤྲུལ་པའི་སྐུ། །ལྷུན་གྲུབ་སྐུ་གསུམ་བདག་ཉིད་དོ། །ཞེས་བར་དོ་ནས་ལུས་འཚོལ་བ་ཚོགས་ལམ། མངལ་དུ་ལུས་ལེན་པ་དངོས་ལ་སྦྱོར་བས་སྦྱོར་ལམ། མངལ་དུ་ཞུགས་པ་ནས་བཟུང་བྱང་ཆུབ་ལྔའི་རིམ་པ་མཐོང་སྒོམ་གྱི་ལམ་དུ་བཞག་སྟེ། ཟླ་བ་བཅུའི་ངོས་བཅུས་ས་བཅུར་མཚོན་ནས་མི་སློབ་པའི་ཟུང་འཇུག་རང་བཞིན་སྤྲུལ་པའི་སྐུར་གྲུབ་པ་ནི་སྐྱེ་བ་སྤྲུལ་པའི་སྐུ་སྟེ། གཞི་ལམ་འབྲས་བུའི་འབྲེལ་དུ་བབས་ཀྱིས་གྲུབ་པའོ། །སྦྱང་གཞི་དེ་ལ་བརྟེན་པའི་སྦྱོང་བྱེད་མངོན་བྱང་དང་པོ་ཟླ་བའི་དཀྱིལ་འཁོར་བསྒོམ་པ་ནི། སྦྱང་གཞི་གཟུགས་ཀྱི་ཕུང་པོ་ནམ་མཁའི་ཁམས། ལུས་ཀུན་གཞིའི་རྣམ་ཤེས། ཉོན་མོངས་པ་གཏི་མུག །ཕའི་ཁམས་དཀར་ཆ་སོགས་སྦྱོང་ཞིང་དག་པར་བྱེད་ལ། རྫོགས་རིམ་གྱི་དུས་དགའ་བ་བཅུ་དྲུག་ཡས་བབས་ཐབས་ཀྱི་རང་བཞིན་དུ་ཤར་བའི་ཡེ་ཤེས་དང་པོ་སེམས་སོ་སོར་རྟོག་པའི་ངོ་བོར་རྫོགས་པའི་རྣམ་པ་ལམ་བྱེད་ཟླ་བའི་དཀྱིལ་འཁོར་དུ་བསྒྱུར་ནས་བསྒོམས་པས། འབྲས་བུའི་དུས་ན་མཚན་བཟང་པོ་སུམ་ཅུ་རྩ་གཉིས་སུ་སྨིན་ཞིང་མེ་ལོང་ལྟ་བུའི་ཡེ་ཤེས་སུ་མངོན་པར་བྱང་ཆུབ་བོ། །མངོན་བྱང་གཉིས་པ་ཉི་མའི་དཀྱིལ་འཁོར་ནི། སྦྱང་གཞི་ཚོར་བའི་ཕུང་པོ་སའི་ཁམས། ཉོན་མོངས་པ་ཅན་གྱི་ཡིད་དེ་སེར་སྣ་ང་རྒྱལ། མའི་ཁམས་དམར་ཆ་སོགས་སྦྱོང་ཞིང་དག་པར་བྱེད་ལ། རྫོགས་རིམ་གྱི་དུས་ཁུ་རྡུལ་གཉིས་རྣམ་པར་བྱང་བའི་བདེ་སྟོང་ལྷན་ཅིག་སྐྱེས་པའི་ངོ་བོ་མས་བརྟན་ཤེས་རབ་ཀྱི་རང་བཞིན་གཟུགས་ལ་སོགས་པའི་ཕུང་པོ་ལྔ། འབྱུང་བཞིས་ཕྱེ་བའི་ཁམས་ཉི་ཤུ་པོ་ཆོས་ཀྱི་དབྱིངས་ལ་སོགས་པའི་ཡེ་ཤེས་ལྔ་ཚད་མེད་བཞིས་ཕྱེ་བའི་ལམ་སྟོང་པ་ཉིད་ཉི་ཤུར་ཤར་བའི་ཡེ་ཤེས་གཉིས་པ་བྱང་ཆུབ་ཀྱི་སེམས་སུ་རྫོགས་པའི་རྣམ་པ་ལམ་བྱེད་ཉི་མའི་དཀྱིལ་འཁོར་དུ་བསྒྱུར་ནས་བསྒོམས་པས་འབྲས་བུའི་དུས་ན་དཔེ་བྱད་བཟང་པོ་བརྒྱད་ཅུའི་རང་བཞིན་དུ་སྨིན་ཞིང་མཉམ་པ་ཉིད་ཀྱི་ཡེ་ཤེས་སུ་མངོན་པར་བྱང་ཆུབ་པའོ།

།མངོན་བྱང་གསུམ་པ་ས་བོན་ཕྱག་མཚན་དང་བཅས་པ་ནི། ཁུ་རྡུལ་གཉིས་ཀྱི་བར་དུ་དྲི་ཟ་ཉེ་བར་ལེན་པའི་སེམས་བར་དོའི་རྣམ་ཤེས་ཞུགས་པ་དང༌། འདུ་ཤེས་ཀྱི་ཕུང་པོ་མེའི་ཁམས། ངག་ཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། བར་དོའི་རྣམ་ཤེས་རྣམ་སྦྱོང་ཞིང་དག་པར་བྱེད་ལ། རྫོགས་རིམ་གྱི་དུས་ཁུ་རྡུལ་གཉིས་ལུགས་ལྡོག་ཏུ་དག་པའི་རྗེས་སུ་ལས་རླུང་དུས་སྦྱོར་དང་བཅས་པ་འགགས་པས་ཡེ་ཤེས་གསུམ་པ་བརྟན་པའི་རྡོ་རྗེར་རྫོགས་པའི་རྣམ་པ་ལམ་བྱེད་ས་བོན་ཕྱག་མཚན་གྱི་ཚུལ་དུ་བསྒྱུར་ནས་བསྒོམས་པས། འབྲས་བུའི་དུས་ན་ཆོས་ཐམས་ཅད་མ་འདྲེས་པར་རྟོགས་པའི་རང་བཞིན་དུ་སྨིན་ཅིང་སོ་སོར་རྟོག་པའི་ཡེ་ཤེས་སུ་མངོན་པར་བྱང་ཆུབ་པའོ། །མངོན་བྱང་བཞི་པ་ས་བོན་ཕྱག་མཚན་དང་བཅས་པ་རོ་གཅིག་ཏུ་འདྲེས་པ་ནི་ཁུ་རྡུལ་སེམས་གསུམ་རོ་གཅིག་ཏུ་འདྲེས་པ་དང༌། འདུ་བྱེད་ཀྱི་ཕུང་པོ་རླུང་གི་ཁམས། བྱ་བ་སྒོ་ལྔའི་རྣམ་ཤེས། ཉོན་མོངས་པ་ཕྲག་དོག །བར་དོའི་རྣམ་ཤེས་དང་ཁུ་ཁྲག་འདྲེས་པ་སོགས་སྦྱོང་ཞིང་དག་པར་བྱེད་ལ། རྫོགས་རིམ་གྱི་དུས་ཁུ་རྡུལ་རླུང་གསུམ་གྱི་བྱེད་ལས་རྣམ་པར་དག་པ་རྒྱུ་རྡོ་རྗེ་འཛིན་པའི་ངོ་བོ་དང༌། ཇི་སྙེད་པའི་ཡེ་ཤེས་བཞི་པ་ཤེས་བྱ་ཀུན་ལ་ཁྱབ་པ་རྡོ་རྗེའི་བདག་ཉིད་དུ་རྫོགས་པའི་རྣམ་པ་ལམ་བྱེད་འདྲེས་པའི་ངོ་བོ་འོད་ཀྱི་ཐིག་ལེའམ་གོང་བུ་གཅིག་ཏུ་བསྒྱུར་ནས་བསྒོམས་པས། འབྲས་བུའི་དུས་ན་སངས་རྒྱས་ཐམས་ཅད་ཀྱི་མཛད་པ་རོ་གཅིག་ཏུ་འདྲེས་པའི་བདག་ཉིད་དུ་སྨིན་ཅིང་བྱ་བ་གྲུབ་པའི་ཡེ་ཤེས་སུ་མངོན་པར་བྱང་ཆུབ་པའོ། །མངོན་བྱང་ལྔ་པ་དེ་ལས་སྐུ་ཡོངས་སུ་རྫོགས་པ་ནི། མངལ་གྱི་གནས་སྐབས་ཡོངས་སུ་རྫོགས་ནས་ཕྱིར་བཙས་པ་དང༌། རྣམ་ཤེས་ཀྱི་ཕུང་པོ་ཆུའི་ཁམས། ཡིད་ཀྱི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་པ་ཞེ་སྡང༌། སྐྱཻ་བ་ལེན་པའི་ལུས་ཀྱི་སྐྱེ་མཆེད་རྫོགས་པའི་གནས་སྐབས་རང་བཞིན་སྤྲུལ་པའི་སྐུར་སྦྱོང་ཞིང་དག་པར་བྱེད་ལ། རྫོགས་རིམ་གྱི་སྨིན་བྱེད་དུ་འགྲོ་ཚུལ་ཁུ་རྡུལ་རླུང་གསུམ་སེམས་དང་བཅས་ཤིན་ཏུ་རྣམ་པར་དག་པའི་ངོ་བོ་འབྲས་བུའི་རྡོ་རྗེ་འཛིན་པ་དང༌། རང་བཞིན་སངས་རྒྱས་རྣམས་ཀྱི་ཇི་ལྟ་བའི་ཡེ་ཤེས་རྣམ་པར་གྲོལ་བའི་འབྲས་བུ་ལྔ་པ་དེ་བཞིན་གཤེགས་པའི་བདག་ཉིད་རང་རྒྱུད་ལ་རྫོགས་པའི་རྣམ་པ་ལམ་བྱེད་ལྷའི་སྐུ་རྒྱན་དང་ཆ་ལུགས་རྫོགས་པར་བསྒོམས་པས་འབྲས་བུའི་དུས་ན་སྒྲིབ་པ་ཐམས་ཅད་དང་བྲལ་བའི་ཡེ་ཤེས་དབྱིངས་དང་རང་བཞིན་དབྱེར་མེད་པའི་བདག་ཉིད་དུ་སྨིན་ཅིང་ཆོས་ཀྱི་དབྱིངས་ཀྱི་ཡེ་ཤེས་སུ་མངོན་པར་བྱང་ཆུབ་པ་སྟེ། རྒྱུད་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། ཞེས་སོ། །འབྲིང་པོ་མངོན་བྱང་བཞི་བསྐྱེད་པ་ནི། གལ་པོ་ལས། དང་པོ་སྟོང་ཉིད་བྱང་ཆུབ་སེམས། །གཉིས་པ་ས་བོན་འབྱུང་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡི་གེ་འགོད། ཅེས་པས་སྟོང་པ་ཉིད་ཀྱིས་འཆི་སྲིད་བར་དོ་དང་བཅས་པ་སྦྱོང༌། ལྷའི་ས་བོན་བསྒོམས་པས་སྐྱེ་སྲིད་ཀྱི་ཉེར་ལེན་དྲི་ཟའི་རྣམ་ཤེས་ཁུ་ཁྲག་གི་དབུས་སུ་ཞུགས་པ་སྦྱོང༌། ལྷ་སྐུ་རྫོགས་པར་བསྒོམས་པས་རླུང་བཅུས་རིམ་གྱིས་བསྐྱེད་ནས་ལུས་གྲུབ་པ་སྦྱོང༌། གནས་གསུམ་ལ་སོགས་པར་ཡི་གེ་བཀོད་པས་བཙས་ནས་དབང་པོ་ཡུལ་ལ་སྲེད་པའི་གནས་སྐབས་སྦྱོང་བ་སྟེ་རྡོ་རྗེ་བཞིའི་ཆོ་གས་བསྐྱེད་པ་འདི་དང་འདྲ་བར། འདུས་པའི་རྒྱུད་ཕྱི་མ་ལས་ཀྱང་གསུངས་སོ། །བསྡུས་པ་ཕ་རྒྱུད་ལྟར་ཆོ་ག་གསུམ་བསྐྱེད་ནི། གདན་གྱི་ཉི་མས་མའི་རྡུལ། ཟླ་བས་ཕའི་ཁུ་བ། ས་བོན་ཡི་གེ་གདན་སྟེང་དུ་བབས་པས་ནི་བར་དོའི་རྣམ་ཤེས་ཏེ་སྦྱོང་བྱེད་གསུམ་པོ་དེས་དཀར་དམར་ཚོགས་ཟིན་པ་ལ་རྣམ་ཤེས་འཇུག་པར་ཉེ་བ་ཉིད་སྦྱོང་བ་ཡིན་ལ། དེ་ཕྱག་མཚན་དུ་བསྒྱུར་བས་ནི་ཕ་མའི་འདུ་འཕྲོད་ཀྱིས་འགྱུར་བའི་གནས་སྐབས་ལྔའི་རིམ་པ། དེ་ལ་ཡི་གེས་མཚན་པ་ལས་འོད་ཟེར་སྤྲོ་བསྡུ་བྱས་པས་ནི་མངལ་དུ་ལུས་ཆགས་པ་དེ་ཉིད་འབྱུང་བ་ལྔས་འཕེལ་སྡུད་སྨིན་བརྟན་གོ་ཕྱེས་ཏེ་ཕུང་ཁམས་སྐྱེ་མཆེད་རིམ་པ་བཞིན་གྲུབ་པ་དེ་སྦྱོང༌། སྐུ་ཡོངས་སུ་རྫོགས་པས་ནི་དབང་པོ་རྣམས་རྫོགས་ནས་ཕྱི་རོལ་དུ་བཙས་པ་སྦྱོང་བར་བྱེད་དོ། །དེ་གསུམ་གྱི་དངོས་བསྟན་ནི་ཕྱག་མཚན་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེའི་ངོ་བོ། །ཡིག་འབྲུ་གསུང་རྡོ་རྗེ་ལྷའི་རྣམ་པ་ཡོངས་སུ་རྫོགས་པ་སྐུའི་རྡོ་རྗེར་དག་པར་བྱེད་པའོ། །སྦྱངས་འབྲས་དེ་བཞིན་གཤེགས་པ་རྣམས་གང་འདུལ་གྱི་སྤྲུལ་པའི་སྐུར་བཞེངས་ནས་རྡོ་རྗེ་བཙུན་མོའི་བྷ་ག་ལ་སོགས་པར་ལྷུམས་སུ་ཞུགས་པ་དང་བལྟམས་པའི་མཛད་པ་སྟོན་པའི་རྟེན་འབྲེལ་བསྒྲིགས་པ་ཡིན་ནོ། །དེ་ལྟར་ཡེ་ཤེས་ལྔའི་རང་བཞིན་མངོན་བྱང་ལྔའི་ཆོ་གས་མངལ་སྐྱེས་ཀྱི་བག་ཆགས་སྦྱོང་བར་བྱེད་དོ། །དེའང་སྦྱང་བྱའི་གཙོ་བོར་བསྟན་པ་ཙམ་ལས་སྒོང་སྐྱེས་སོགས་སྐྱེ་གནས་གཞན་གྱི་བག་ཆགས་སྦྱོང་བྱེད་དུ་འགྲོ་བའང་ཤེས་པར་བྱའོ།

།གསུམ་པ་ནི། སྲིན་བུ་སོགས་དྲོད་དང་གཤེར་ཙམ་ལ་གནས་ལུས་ཀྱི་སྲེད་ལེན་ཞུགས་ནས་ཕུང་པོར་གྲུབ་པ་དང་མཐུན་པར་ལུང་ཨ་ནུ་ཡོ་གའི་དགོངས་པ་སྤྲོས་མེད་ཀྱི་བསྐྱེད་རིམ་ལའང་གཉིས་ཏེ། རང་ཤར་ལས། གཅིག་ཅར་འཇུག་པ་གང་ཞེ་ན། ལྷ་རྣམས་མ་བསྐྱེད་སྙིང་པོ་དྲན་པས་རྫོགས། རིམ་གྱིས་འཇུག་པ་གང་ཞེ་ན། དབྱིངས་དང་ཡེ་ཤེས་རིམ་གྱིས་འཇུག་ནས་ནི། ཞེས་འབྱུང་བ་ལྟར་ན། རིམ་གྱིས་འཇུག་པས། ཤེས་རབ་ཀྱི་དབྱིངས་སྟོང་ཆེན་ཀུན་ཏུ་བཟང་མོའི་ཀློང་དུ་ཀུན་རྫོབ་ཀྱི་སྣང་ཆ་ཐམས་ཅད་ལྷའི་ཕྱག་རྒྱར་རང་བཞིན་གྱིས་ཤར་བ་གཉིས་མེད་ཟུང་འཇུག་སྒྱུ་མ་ལྟ་བུའི་ལྷ་སྐུར་སྐད་ཅིག་གིས་བཞེངས་པ་དང༌། གཅིག་ཅར་དུ་འཇུག་པས་ལྷ་རྣམས་ཚིག་གིས་མ་བསྐྱེད་ཀྱང་སྔགས་དྲན་པ་ཙམ་ལས་དཀྱིལ་འཁོར་འཁོར་ལོར་གསལ་བར་གྲུབ་པ་སྟེ། འཁྲུལ་ལྡེ་ལས། ཨ་ནུ་ཡོ་གའི་ཐེག་པ་ནི། སྙིང་པོ་ཙམ་ཞིག་བརྗོད་བྱས་པས། །མ་སྐྱེས་རྫོགས་པའི་ལྷ་རུ་བསྒོམ། ཞེས་སོ། །དེ་དག་གིས་གཙོ་བོར་དྲོད་གཤེར་སྐྱེས་ཀྱི་བག་ཆགས་སྦྱོང་བར་བྱེད་དོ། །བཞི་པ་ནི། རྫུས་སྐྱེས་རྣམ་སེམས་ཙམ་ལ་བརྟེན་ནས་སྐད་ཅིག་གིས་ལུས་སུ་གྲུབ་པ་དང་མཐུན་པར་མན་ངག་ཨ་ཏི་ཡོ་ག་ཤིན་ཏུ་སྤྲོས་མེད་ཀྱི་བསྐྱེད་ཚུལ་ཆོ་ག་དང་ཚིག་ལ་མ་ལྟོས་པར་ཡིད་ཆོས་གདོད་ནས་ལྷའི་འཁོར་ལོ་ཡེ་ཤེས་སྒྱུ་མའི་ཕྱག་རྒྱར་གནས་པ་ཉིད་དྲན་པས་གསལ་འདེབས་ཙམ་གྱིས་ཡོངས་སུ་རྫོགས་པ་མེ་ལོང་ལ་གཟུགས་བརྙན་བཙན་ཐབས་སུ་ཤར་བ་ལྟར་བསྐྱེད་རྫོགས་དབྱེར་མེད་དུ་བསྒོམ་པ་སྟེ། རྨད་བྱུང་རྒྱལ་པོ་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལས། །ཐ་དད་བློ་ཡི་རིམ་པ་ཡིས། །སྤྱན་དྲངས་གཤེགས་གསོལ་འདིར་མི་དགོས། །ཞེས་སོ། །དེ་ལྟར་བསྐྱེད་ཆོག་རྣམ་པ་བཞི་པོ་དེ་གཙོ་བོར་སྐྱེ་བ་གང་གིས་བསྡུས་པ་དེས་དེ་དང་མཐུན་པར་བསྒོམ་ལ། ཐོག་མེད་ཀྱི་བག་ཆགས་སྦྱང་ཕྱིར་སྐྱེ་བ་རེ་རེས་ཀྱང་ཐམས་ཅད་བསྒོམ་པ་དང༌། ཁྱད་པར་ལས་དང་པོ་པ། སེམས་ཅུང་ཟད་བརྟན་པ། བརྟན་པ་ཆེར་ཐོབ་པ། ཤིན་ཏུ་ཐོབ་པའི་གོ་རིམ་དང་སྦྱར་ཏེ་བསྒོམ་པ་ཀུན་མཁྱེན་ཀློང་ཆེན་པས་གསུངས་སོ། །དེའང་རྟེན་དང་བརྟེན་པའི་དཀྱིལ་འཁོར་པ་ཐམས་ཅད་གཅིག་ཅར་དུ་གསལ་མི་ནུས་ལ་རིམ་གྱིས་མ་འདྲེས་པར་ཅི་འདོད་དུ་གསལ་ནུས་པ་ཚུན་ཆད་ནི་ལས་དང་པོ་པ་ཡིན་ལ། རགས་པའི་དཀྱིལ་འཁོར་གཅིག་ཆར་གསལ་ཐེབས་ཤིང་སྐྱེ་མཆེད་ཀྱི་ལྷ་ལ་སོགས་པ་གཅིག་ཆར་གསལ་མི་ཐེབས་པ་ནི་གཉིས་པ་དང༌། སྐྱེ་མཆེད་ཀྱི་ལྷ་རྣམས་ཀྱང་གཅིག་ཆར་གསལ་ཐེབས་པ་ནི་གསུམ་པ་སྟེ་དེ་ཡན་ཆད་བསྐྱེད་རིམ་ཁོ་ནས་འབྱུང་ལ། དེ་ནས་རྫོགས་རིམ་དང་སྒྲགས་ཏེ་བསྒོམས་པས་ཕྲ་ཐིག་གི་དབུས་སུ་དཀྱིལ་འཁོར་སྤྲོ་བསྡུ་ནུས་ཤིང་ཐུན་དང་ཐུན་མཚམས་ཉིན་མཚན་དབྱེ་བ་མེད་ཅིང་བསམ་གཏན་གྱི་ལས་ཚོགས་ཐོགས་མེད་དུ་འགྲུབ་པར་འགྱུར་ལ། །བཞི་པ་སྐད་ཅིག་གཅིག་ལ་ཏིང་ངེ་འཛིན་གྱི་གསལ་སྣང་ཟད་མི་ཤེས་པར་འབྱུང་ཞིང་ཡིད་ལ་བསམ་པ་ཙམ་གྱིས་སེམས་ཅན་གྱི་དོན་མང་པོ་སྒྲུབ་ནུས་པས་གྲུབ་པའི་སྐྱེས་བུ་ཞེས་བྱ་སྟེ། དེ་དག་ལ་རིམ་བཞིན་ལས་དང་པོ་པ། ཡེ་ཤེས་ཕེབ་པ། ཡེ་ཤེས་ལ་ཅུང་ཟད་དབང་བ། ཆེར་དབང་བ་ཞེས་མཉམ་སྦྱོར་རྒྱུད་སོགས་ཀྱི་དགོངས་པ་ཡེ་ཤེས་ཞབས་རྗེས་འབྲངས་དང་བཅས་པས་རྩལ་དུ་འདོན་པར་མཛད་དོ། །གསུམ་པ་ནི། གང་ཡང་ཕྱག་རྒྱ་གཅིག་སྤྲོས་ཚོགས་སྒྲུབ་ཀྱིས༔ སྐྱེ་བའི་རིམ་པ་གསུམ་པོ་སྦྱོང་བར་བྱེད༔ ཅེས་གསུངས་ཏེ། སྐྱེད་ཐབས་ཀྱི་ཆོ་ག་བཞི་པོ་དེ་དག་གང་ལའང་ལས་དང་པོ་པས་རྩ་བའི་ལྷ་ཕྱག་རྒྱ་གཅིག་པ་བསྒོམས་པས་ལུས་ཅན་རྣམས་དང་པོར་སྐྱེས་ནས་བྱིས་པར་གྱུར་པའི་གནས་སྐབས་དང༌། དེ་ལ་གསལ་སྣང་ཐོབ་ནས་ཕྱག་རྒྱ་སྤྲོས་བཅས་ཀྱིས་ལང་ཚོ་དར་ལ་བབས་པའི་གནས་སྐབས་དང༌། དེ་ལ་བརྟེན་པ་ཐོབ་ནས་ཚོམ་བུ་ཚོགས་ཀྱི་སྒྲུབ་པས་ན་ཚོད་ཡོལ་ནས་རྒན་པོའི་གནས་སྐབས་ཏེ་སྐྱེ་བའི་སྲིད་པའི་རིམ་པ་གསུམ་པོ་དེ་སྦྱོང་བར་བྱེད་པ་ཡིན་ལ། དེའི་རྒྱུ་མཚན་གང་ཟག་གཅིག་གི་རྒྱུད་ལའང་རིམ་གྱིས་གོམས་པ་བརྟན་པའི་དབང་གིས་དབང་པོ་བརྟུལ་འབྲིང་རྣོན་པོ་གསུམ་དུ་ན་འཕོ་བའི་ཕྱིར་རོ། །གསུམ་པ་གསལ་བརྟན་དག་གསུམ་ལ་བསླབ་པ་ནི། སྦྱོང་བྱེད་ཁྱད་པར་ལྷ་ཡི་གསལ་སྣང་ནི༔ མངོན་སུམ་གོམས་པ་བརྟན་པོས་གཟུགས་སྣང་སྦྱོང་༔ ང་རྒྱལ་དྲག་པོས་ཞེན་པའི་སེམས་སྦྱོང་སྟེ༔ དག་པ་དྲན་པས་ཐམས་ཅད་ལྷ་རུ་སྦྱོང་༔ ཅེས་གསུངས་ཏེ། སྐྱེད་པའི་ཚུལ་དེ་ཉིད་སྦྱོང་བར་བྱེད་པའི་ཐབས་ཀྱི་ཁྱད་པར་ནི། སྒྲུབ་ཐབས་ཀུན་བཟང་ལས། ཐ་མལ་རྣམ་རྟོག་རྒྱུན་ལས་གཞན་པ་ཡི། །སྲིད་པའི་སྡུག་བསྔལ་གཞན་ཅིའང་ཡོད་མ་ཡིན། །དེ་དང་རྣམ་པ་འགལ་བར་གྱུར་པའི་སེམས། །འདི་ནི་མངོན་སུམ་དུ་ནི་རྟོགས་པར་འགྱུར། །ཟབ་ཅིང་རྒྱ་ཆེ་བ་ཡི་བདག་ཉིད་ཅན། །གང་ཡིན་དེ་ནི་ཀུན་རྟོག་སྣང་མི་འགྱུར། ཅེས་གསུངས་པ་བཞིན་ཐ་མལ་བདག་དང་བདག་གི་བའི་དངོས་པོར་ཞེན་པ་དང་འཛིན་སྟངས་འགལ་བའི་ཏིང་ངེ་འཛིན་ལྷག་པར་ལམ་དུ་བྱེད་དགོས་ཤིང༌། དེ་ལ་གསུམ། དང་པོ་རྣམ་པ་གསལ་བ་ཞེས་ལྷའི་གསལ་སྣང་སྒྲུབ་པ་ནི་ལས་དང་པོ་པས་དཀྱིལ་འཁོར་ལ་གསལ་སྣང་ཐོན་དཀའ་ཡང་ལྷག་པར་མོས་པས་བསྒོམས་པས་རྒྱུད་སྨིན་བྱེད་ཀྱི་སྟོབས་ཆེ་བ་དང༌། ཕྱག་རྒྱ་གཅིག་པ་ལྟ་བུར་གང་སེམས་བཟུང་སླ་ས་ནས་བརྩམས་གོ་རིམ་སོགས་མ་ངེས་པར་ཞལ་དང་སྐུ་དང་ཕྱག་མཚན་རྒྱན་ཆའི་ཆ་ཤས་རྣམས་རེ་རེ་ལ་སེམས་ཟིན་པས་སོ་སོའི་གསལ་སྣང་སྐྱེས་པ་དང་གཅིག་ཆར་དུ་གསལ་འདེབས། མཐར་རྙོགས་པ་མེད་པའི་རྫིང་བུ་མི་གཡོ་བ་གསལ་དྭངས་ཀྱི་ནང་དུ་གཟུགས་བརྙན་གསལ་བཀྲ་མ་འདྲེས་པར་སྣང་བ་ལྟར་ཡུལ་གསུམ་ལ་མངོན་སུམ་བཞིན་དུ་སྣང་བའི་གོམས་པ་བརྟན་པོར་གྱུར་པས་ནི་ཕྱི་རོལ་གཟུགས་ཕུང་དུ་སྣང་བ་རྣམས་སྦྱོང་བར་བྱེད་དོ། །གཉིས་པ་ང་རྒྱལ་བརྟན་པ་ནི། ལྷའི་གསལ་སྣང་ཐོབ་མ་ཐོབ་གང་ལྟར་ལྷ་དེར་ཤེས་པ་ཙམ་གྱི་ང་རྒྱལ་ཉི་ཚེ་བ་མིན་པར་འབྲས་དུས་ཀྱི་སངས་རྒྱས་སྐྱོན་ཐམས་ཅད་ཟད་ཅིང་ཡོན་ཏན་མཐའ་དག་རྫོགས་པ་དེ་ཉིད་དངོས་སུ་མོས་པའི་ང་རྒྱལ་བརྟན་པོ་དང༌། གསལ་སྣང་ཐོབ་ནས་དེ་ཉིད་ཡེ་ཤེས་ཀྱི་སྐུར་དངོས་སུ་ངེས་པའི་ཤེས་པ་དྲག་པོས་རང་ཉིད་སེམས་ཐ་མལ་དུ་ཞེན་པའི་འཛིན་སེམས་སྦྱོང་བར་བྱེད་པ་ཡིན་ནོ།

།གསུམ་པ་དག་པ་དྲན་པ་ནི། རྒྱས་པར་ཞི་ཁྲོའི་དཀྱིལ་འཁོར་གང་དང་གང་བསྒོམ་པ་དེའི་ཞལ་ཕྱག་སྐུ་མདོག་རྒྱན་ཆས་སོགས་རྟེན་དང་བརྟེན་པར་བཅས་པ་སངས་རྒྱས་ཀྱི་ཡེ་ཤེས་དེ་ཉིད་དེ་དང་དེའི་རྣམ་པར་ཤར་བའི་བརྡ་དོན་རྟགས་གསུམ་རེ་རེ་ནས་དྲན་པར་བྱ་དགོས་ཀྱང༌། མདོར་ན་གཉུག་མ་ཆོས་ཉིད་ཀྱི་སྟེང་ན་འབྲས་བུ་རྣམ་བྱང་གི་ཡོན་ཏན་རྣམས་རང་བཞིན་ལྷུན་གྲུབ་ཏུ་བཞུགས་པ་ལས་ཡོན་ཏན་གང་དང་གང་ཞིག་ལྷའི་རྣམ་པ་དེ་དང་དེའི་ངོ་བོར་གདོད་ནས་དག་པར་བཞུགས་པ་ལ་ཏིང་ངེ་འཛིན་གྱིས་བསྒོམ་པའི་ལྷ་དེ་ཡང་དེ་ལས་གཞན་དུ་མ་གྱུར་པར་རྣམ་པར་དག་པར་མོས་པས་སྣང་ཞེན་ཐམས་ཅད་ཀྱང་གདོད་ནས་རྣམ་པར་དག་པའི་ལྷ་ཡེ་ཤེས་ཀྱི་འཁོར་ལོ་རུ་སྦྱོང་བར་བྱེད་དོ། །བཞི་པ་སྲོག་སྡོམ་གཟེར་བཞི་བཤད་པ་ལ་བཞི། ཏིང་ངེ་འཛིན་གྱི་གཟེར། སྙིང་པོ་སྔགས་ཀྱི་གཟེར། འཕྲོ་འདུ་ཕྲིན་ལས་ཀྱི་གཟེར། དགོངས་པ་མི་འགྱུར་བའི་གཟེར་བཤད་པའོ། །དང་པོ་ལ་གཉིས། ཏིང་ངེ་འཛིན་གྱི་རྩལ་སྦྱང་བ་དང༌། འབྱོངས་པའི་ཚད་འབྲས་བུ་དང་བཅས་པའོ། །ཀུན་ཀྱང་སེམས་འཛིན་རྩེ་གཅིག་བསམ་གཏན་གྱིས༔ རང་གི་སེམས་ཉིད་ལྷ་སྐུར་རྫོགས་པའི་ཕྱིར༔ ཕྱག་རྒྱ་ཕྲ་རགས་གཟུགས་སུ་འདུ་བྱས་པ༔ དམིགས་པའི་རྟེན་དུ་མཁས་པས་བཞག་ནས་ཀྱང་༔ ལུས་བསྲང་རླུང་རོ་བསལ་ཞིང་ཡིད་མིག་རླུང་༔ རྩེ་གཅིག་གཏད་དེ་ཡུན་ཐུང་གྲངས་མང་བསྒོམ༔ རིམ་གྱིས་གཡོ་ཐོབ་གོམས་བརྟན་མཐར་ཕྱིན་བར༔ ལེགས་པར་བསླབ་ཕྱིར་ཐུན་ཚོད་བསྲིངས་ཏེ་བྱ༔ བྱིང་རྒོད་ལ་སོགས་ཏིང་འཛིན་སྐྱོན་ཀུན་བསལ༔ སྐབས་སུ་མི་རྟོག་གཉུག་མའི་ངང་དུ་ཀློང་༔ རེས་འགའ་ལྷ་སྐུའི་རྩལ་སྦྱོང་ལམ་དུ་སློང་༔ ལྷ་དང་རང་སེམས་དབྱེར་མེད་དོན་ལ་བལྟ༔ སྤྱོད་ཡུལ་ཐམས་ཅད་ཡེ་ཤེས་རོལ་པར་ཁྱེར༔ ཅེས་གསུངས་ཏེ། བསྐྱེད་པའི་ཆོ་ག་དེ་དག་ཀུན་གང་ལ་བརྟེན་ཀྱང་བདེ་གཤེགས་ཞི་ཁྲོའི་སྐུ་གསུང་ཐུགས་དང་རང་གི་སྒོ་གསུམ་རོ་མཉམ་ཆེན་པོར་བརྟན་པར་བསྒྲུབ་པའི་ཕྱིར་སྲོག་སྡོམ་གཟེར་བཞིའི་མན་ངག་དང་ལྡན་པར་གཅེས་ཏེ། གསང་རྫོགས་རྒྱུད་ལས། ཡེ་ཤེས་འཇིག་རྟེན་གང་ལ་ཡང༌། །སྲོག་སྡོམ་གཟེར་བཞི་མ་ཐེབས་ན། །ནམ་ཡང་དོན་མེད་ཡུག་པ་རྐྱང༌། །ཡོངས་རྫོགས་དཔལ་གྱི་སྲོག་འཕྲོག་ཐབས། །གཅིག་ཤེས་པས་ནི་ཀུན་སྲོག་ཐོབ། །དཔེར་ན་སྒྲ་གཅན་འཛིན་གྱི་ཁས། །ནམ་མཁའི་ཉི་མ་གཅིག་ཟིན་པས། །ཆུ་བྲན་སྟོང་གི་ཉི་མ་ཀུན། །མ་བཟུང་པར་ཡང་སྟོང་སྲོག་ཐོབ། །དེ་ཕྱིར་སྲོག་སྡོམ་གཟེར་བཞི་གཅེས། ཞེས་གསུངས་པ་ལྟར་ལས་དང་པོ་པས། ལྷ་སྐུའི་རྣམ་པར་སེམས་འཛིན་པ་ལས་གཞན་དུ་མི་གཡོ་བའི་ཡིད་རྩེ་གཅིག་ཏུ་གནས་པའི་བསམ་གཏན་གྱིས། རང་གི་སེམས་ཉིད་རྣམ་ཤེས་ཚོགས་བརྒྱད་དང་ལྷའི་སྐུ་དང་ཡེ་ཤེས་སུ་རྫོགས་པའི་ཕྱིར་ཏིང་ངེ་འཛིན་གྱི་གཟེར་གདབ་པར་བྱ་སྟེ། དེའང༌། ཏིང་འཛིན་གཟེར་ནི་ཐོད་སྐུ་ལ། །རྩེ་གཅིག་སེམས་བཟུང་ཡེངས་མི་བྱ། ཞེས་པ་ལྟར། ཐོག་མར་ལྷ་ཕྱག་རྒྱ་གཅིག་པ་ལ་ཕྲ་བ་ས་བོན་ཨ་དཀར་པོའམ་ཧཱུཾ་སྔོན་པོ་ལ་སོགས་པ་ཁྲུ་གང་པ་གསལ་བར་བྲིས་པ་དང༌། རགས་པ་ལྷའི་གཟུགས་མཚན་ཉིད་དང་ལྡན་པ་ཐོད་པར་བྲིས་པ་སོགས་འདུ་བྱས་ལ། རང་མདུན་ཁད་ཉེ་བར་དམིགས་པ་གཏོད་པའི་རྟེན་དུ་བསྐྱེད་པའི་ཚུལ་ལ་མཁས་པའི་སྒྲུབ་པ་པོས་བཞག་པར་བྱ། དེ་ལྟར་བྱས་ནས་ཀྱང་བདེ་བའི་སྟན་ལ་ལུས་གནད་བསྲང༌། རླུང་རོ་ལན་གསུམ་བསལ་ཞིང་ཡིད་ཀྱི་འཛིན་སྟངས་མིག་གི་ལྟ་སྟངས་རླུང་གི་འགྲོ་ལྡོག་གསུམ་ཡུལ་སོ་སོ་ལ་ཡ་བྲལ་དུ་མ་སོང་བར་ཕྱོགས་མཉམ་པོར་དམིགས་རྟེན་ལ་རྩེ་གཅིག་ཏུ་བཏད་དེ་ཡུན་ཐུང་ལ་གྲངས་མང་བར་བསྒོམས་པས་ཉམས་ལྔ་རིམ་པར་འཆར་བར་འགྱུར་ཏེ། དེའང་དམིགས་རྟེན་ལ་སེམས་མི་གནས་པར་འདུ་བྱེད་ཀྱི་རྟོག་པ་མང་པོ་བན་བུན་ལང་ལོང་དུ་འགྱུ་བ་ནི་གཡོ་བའི་ཉམས་རི་གཟར་ཀྱི་ཆུ་ལྟ་བུ། དེ་ནས་རྣམ་རྟོག་ཅུང་ཟད་ཞི་ནས་ཕལ་ཆེར་དམིགས་རྟེན་ལ་སེམས་གནས་ཤིང་དེའི་རྣམ་འགྱུར་གྱི་བག་ཆགས་བརྟས་པས་མིག་བཙུམ་ཡང་ཡིད་ཡུལ་དུ་ཝལ་གྱིས་འཆར་བ་ནི་ཐོབ་པའི་ཉམས་གཅོང་རོང་གི་ཀླུང་ལྟ་བུ། དམིགས་རྟེན་ལ་སྒོམ་པ་ཇི་ལྟ་བར་རང་ཉིད་དེ་དང་དེར་གསལ་ཐེབས་ཤིང་དེའང་ཆེ་ཆུང་རྣམ་འགྱུར་མ་ངེས་པ་ཅི་འདོད་བསྒྱུར་དུ་བཏུབས་ཤིང་དེ་ལས་རྟོག་པ་གཞན་ཏུ་མི་གཡོ་བ་ནི་གོམས་པའི་ཉམས་ཆུ་ཆེན་དལ་འབབ་ལྟ་བུ། ལྷའི་རྣམ་པ་དེའང་རང་སེམས་དང་དབྱེར་མེད་དུ་བསྲེས་ནས་བསྒོམས་པས་རྟོག་པ་གང་གིས་ཀྱང་བར་དུ་མི་ཆོད་པར་སྐུ་ཡོངས་རྫོགས་ལ་སེམས་ཇི་ཙམ་གནས་འདོད་པ་དེ་སྲིད་དུ་སྡོད་པ་ནི་གཡོ་བའི་ཉམས་མཚོ་ཆུང་རླུང་གིས་བསྐྱོད་པ་ལྟ་བུ། དེ་ལས་ཀྱང་སྤྱན་གྱི་དཀར་ནག་བ་སྤུའི་བུ་ག་ཚུན་ཆད་གསལ་ནུས་ཤིང་ཉིན་མཚན་རྟག་ཏུ་ཡུལ་རྐྱེན་གང་གིས་ཀྱང་མི་འཕྲོག་པར་གསལ་བརྟན་ཚད་བརྒྱད་གྱད་དུ་གྱུར་པ་ནི་མཐར་ཕྱིན་པའི་ཉམས་རྒྱ་མཚོ་ཆེན་པོ་རླབས་དང་བྲལ་བ་ལྟ་བུ་སྟེ། དེ་ལྟར་མ་གྱུར་གྱི་བར་དུ་ལེགས་པར་བསླབ་ཅིང་དང་པོ་ནས་མི་སུན་པར་བྱ་བའི་ཕྱིར་གོམས་རིམ་གྱིས་ཐུན་ཚོད་ཀྱི་ཡུན་རིམ་པར་བསྲིངས་ཏེ་བསྒོམ་པར་བྱ་དགོས་ལ། དེའི་ཚེ་སེམས་མི་གསལ་བའི་བྱིང་བ་དང༌། འགྱུ་བ་སྤུན་པོར་གྱུར་པའི་རྒོད་པ་དང༌། ལ་སོགས་པའི་ཁོང་ནས་རྨུགས་འཐིབས་དང༌། འཐོར་ཡས་སོགས་ཏིང་ངེ་འཛིན་གྱི་སྐྱོན་བྱུང་ན་ངོ་ཤེས་ཤིང་བཏང་སྙོམས་སུ་མ་ཤོར་བར་ཀུན་ལ་སོ་སོའི་གཉེན་པོ་བརྟེན་ཏེ་བསལ་ལོ། །དེ་ཉིད་རྩལ་སྦྱོང་ཞིང་བོགས་འབྱིན་པའི་ཐབས་ཉང་གཏེར་མཚོ་རྒྱལ་ཞུས་ལན་དང༌། བླ་མ་དགོངས་འདུས་ལས་ལྷ་ལམ་དུ་སློང་བ་སོགས་རྣམ་པ་དྲུག་ཏུ་གསུངས་པ་ལྟར་གནད་བསྡུ་ན། སྐབས་སུ་སེམས་རྣམ་པར་མི་རྟོག་པ་གཉུག་མའི་ངང་དུ་རང་བབས་སུ་ལྷོད་ཀྱིས་ཀློད་ལ་ངལ་གསོ། རེས་འགར་ལྷ་སྐུ་དེ་ཉིད་ཆེ་བ་རི་རབ་ནས་ཆུང་བ་ཏིལ་འབྲུ་ཙམ་སོགས་ཆེ་ཆུང་མདོག་དབྱིབས་སྤྱོད་ལམ་ཉེ་རིང་བཞུགས་གནས་མ་ངེས་པར་བསྒོམས་པས་རྩལ་སྦྱོང་ཞིང་ལམ་དུ་སློང༌། སྐབས་རེར་ལྷའི་རྣམ་པ་དང་རང་སེམས་དབྱེར་མེད་དུ་བསྲེས་ཏེ་བསྒོམ་བྱ་སྒོམ་བྱེད་ཀྱི་གཉིས་འཛིན་སྤངས་ལ་སྒོམ་མཁན་རང་ངོ་རིག་པའི་ཚུལ་གྱིས་གནས་ལུགས་ཀྱི་དོན་ལ་བལྟ་བ་རྣམས་ཀྱིས་མཉམ་བཞག་གི་རྣལ་འབྱོར་བསྐྱང༌། རྗེས་ཐོབ་སྣང་གྲགས་རྟོག་ཚོགས་ལྷ་སྔགས་ཡེ་ཤེས་ཀྱི་འཁོར་ལོ། །བགོ་བ་ཞི་ཁྲོའི་ཆས། བཟའ་བཏུང་ཚོགས་འཁོར། འགྲོ་འདུག་རྡོ་རྗེའི་གར་སོགས་མདོར་ན་སྤྱོད་ཡུལ་ཅི་དང་ཅིར་སྣང་བ་ཐམས་ཅད་ལྷ་ཡེ་ཤེས་པའི་རོལ་པ་འབའ་ཞིག་པར་ལམ་དུ་ཁྱེར་བར་བྱའོ། །གཉིས་པ་ནི། དེ་ལྟར་ཏིང་འཛིན་གཟེར་ལ་བརྟེན་ནས་ཀྱང་༔ ཡིད་ཀྱི་ཡུལ་དུ་མ་འདྲེས་གསལ་སྣང་རྫོགས༔ དབང་པོའི་ཡུལ་དུ་ཕྱག་རྒྱ་མངོན་སུམ་ཤར༔ ལུས་ཀྱི་ཡུལ་དུ་ཤིན་སྦྱང་ཐོབ་པའི་ལྟས༔ གཞན་སྣང་དབང་བསྒྱུར་ཆོ་འཕྲུལ་ཅིར་ཡང་འཆར༔ ཧེ་རུ་ཀ་དཔལ་སྐུ་ཡི་དངོས་གྲུབ་ཐོབ༔ ཅེས་གསུངས་ཏེ། དེ་ལྟར་ཇི་སྐད་བསྟན་པའི་མན་ངག་གི་རྩ་བ་ཏིང་ངེ་འཛིན་གྱི་གཟེར་ཁོ་ན་ལ་བརྟེན་ནས་ཀྱང་ཡུལ་གསུམ་གྱད་དུ་གྱུར་ཏེ་ལུས་ཐ་མལ་དུ་འཛིན་པའི་མངོན་ཞེན་ལྷའི་སྐུར་རྫོགས་པར་འགྱུར་ཏེ། དང་པོ་རང་གི་ཡིད་ཀྱི་ཡུལ་དུ་གང་བསྒོམ་པའི་ལྷ་སྐུ་ཕྱག་མཚན་རྒྱན་ཆ་ལུགས་དང་བཅས་པ་གསལ་ལ་མ་འདྲེས་པ་མེ་ལོང་གི་གཟུགས་བརྙན་ལྟར་འཆར་བའི་གསལ་སྣང་རྫོགས། གཉིས་པ་སེམས་ཤིན་ཏུ་སྦྱངས་པའི་མཐུ་ལས་ཡིད་དཔྱོད་མ་ཡིན་པར་མིག་སོགས་དབང་པོའི་སྤྱོད་ཡུལ་དུ་ལྷའི་ཕྱག་རྒྱ་མངོན་སུམ་དུ་ཤར། གསུམ་པ་སེམས་ཀྱིས་ལུས་འབྱོངས་ཏེ་ལྷ་ཉིད་རེག་པ་ལུས་ཀྱི་ཡུལ་དུ་གསལ་བས་ལུས་ཤིན་ཏུ་སྦྱངས་པ་ཐོབ་པའི་ལྟས་གཞན་གྱི་སྣང་བ་ཟིལ་གྱིས་གནོན་ཅིང་རང་དབང་དུ་སྒྱུར་བ་དང༌། ལས་དང་དངོས་གྲུབ་ཐོགས་མེད་དུ་སྒྲུབ་ནུས་པ་སོགས་ཏིང་ངེ་འཛིན་གྱི་སྤྱོད་ཡུལ་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོ་ཅིར་ཡང་འཆར་ཞིང་སྐུའི་སྲོག་འཕྲོག་པས་མཐར་ཐུག་ཧེ་རུ་ཀ་དཔལ་ཆེན་པོའི་སྐུ་མི་ཟད་པ་རྒྱན་གྱི་འཁོར་ལོ་དང་དབྱེར་མེད་པའི་དངོས་གྲུབ་ཐོབ་པར་འགྱུར་རོ། །གཉིས་པ་ནི། སྔགས་ཀྱི་གཟེར་ནི་མི་འགྱུར་ཐུགས་སྲོག་དང་༔ ཡི་གེའི་ཕྲེང་བ་གསལ་བཀོད་བསྙེན་པ་སྟེ༔ ཡབ་ཡུམ་ཞལ་ནས་ཞལ་དང་གསང་བ་ནས༔ འགལ་མེ་ལྟ་བུར་འཁོར་བ་ཉེ་བསྙེན་ཡིན༔ ཧེ་རུ་ཀ་དཔལ་གསུང་གི་དངོས་གྲུབ་ཐོབ༔ ཅེས་གསུངས་ཏེ། ངག་ལ་སྙིང་པོ་སྔགས་ཀྱི་གཟེར་གདབ་པ་ནི། ལྷ་སོ་སོའི་རིགས་མི་འགྱུར་བའི་རང་བཞིན་ཐུགས་སྲོག་ས་བོན་གང་ཡིན་པ་དང༌། དེའི་མཐར་རྩ་སྔགས་སམ་སྙིང་པོའི་ཡི་གེ་གསལ་བར་བཀོད་པ་ལ་སེམས་གཏད་པ་ནི་བསྙེན་པའི་ཡན་ལག་སྟེ་ཟླ་བ་སྐར་ཕྲེང་ལྟ་བུའི་དགོངས་པ་དང༌། ཐུགས་སྲོག་ལས་སྔགས་ཕྲེང་བྱུང༌། ཡབ་ཀྱི་ཞལ་ནས་ཡུམ་གྱི་ཞལ་དང་དེ་ནས་ཐུགས་ཀར་བརྒྱུད་ཡུམ་གྱི་གསང་བ་ནས་ཡབ་ཀྱི་གསང་བར་ཞུགས་ཏེ་ཐུགས་ཀར་ཐིམ། སླར་ཡང་དེ་ལྟར་བར་མ་ཆད་པ་འགལ་མེ་ལྟ་བུར་འཁོར་བ་ནི་ཉེ་བསྙེན་གྱི་ཡན་ལག་སྟེ་འགལ་མེ་ཀླད་ཀོར་གྱི་དགོངས་པ་ཡིན་ལ། དེ་དག་གིས་སྔགས་རླུང་དབྱེར་མེད་དུ་དག་ནས་གསུང་གི་སྲོག་འཕྲོག་པས་མཐར་ཐུག་ཧེ་རུ་ཀ་དཔལ་ཆེན་པོའི་གསུང་མི་ཟད་པ་རྒྱན་གྱི་འཁོར་ལོ་དང་དབྱེར་མེད་པའི་དངོས་གྲུབ་ཐོབ་པར་འགྱུར་རོ།

།གསུམ་པ་ནི། འཕྲོ་འདུའི་གཟེར་གྱིས་དོན་གཉིས་མཛད་པ་དང་༔ དངོས་གྲུབ་དབང་དུ་བྱ་བ་སྒྲུབ་པ་སྟེ༔ སྣོད་བཅུད་སྣང་གྲགས་རྟོག་ཚོགས་ལྷ་སྔགས་དང་༔ ཡེ་ཤེས་ཆེན་པོར་འཆར་བ་སྒྲུབ་པ་ཆེས༔ ཡོན་ཏན་ཕྲིན་ལས་ཀུན་ལ་དབང་འབྱོར་ཞིང་༔ ཞེས་གསུངས་ཏེ། གང་འདོད་ཕྲིན་ལས་ཀྱི་ཁ་སྒྱུར་བ་འཕྲོ་འདུའི་གཟེར་ནི། ཐུགས་སྲོག་སྔགས་ཕྲེང་ལས་འཕྲོས་པའི་འོད་ཟེར་གྱིས་རྒྱལ་བ་མཆོད་ཅིང་བྱིན་རླབས་བསྡུས་ཏེ་རང་དོན་བསྒྲུབ། འགྲོ་བའི་སྒྲིབ་གཉིས་སྦྱངས་ནས་སངས་རྒྱས་ཀྱི་ས་ལ་བཀོད་པས་གཞན་དོན་འགྲུབ་པ་སྟེ་དོན་གཉིས་མཛད་པ་དང༌། སླར་ཡང་འོད་ཟེར་སྤྲོ་བསྡུས་ཐུན་མོང་དང་མཆོག་གི་དངོས་གྲུབ་བདག་ཉིད་ཀྱི་དབང་དུ་བྱ་བ་ནི་སྒྲུབ་པའི་ཡན་ལག་སྟེ་རྒྱལ་པོའི་ཕོ་ཉ་འགྱེད་པ་ལྟ་བུའི་དགོངས་པ་ཡིན་ལ། མཐར་དེ་ལྟར་བསྒྲུབས་པའི་གྲུབ་མཐའ་སྣོད་བཅུད་ཀྱི་གཟུགས་སྣང༌། གྲགས་པའི་སྒྲ་སྐད། ཡིད་ཀྱི་རྟོག་ཚོགས་ཇི་སྙེད་པ་ཐམས་ཅད་སྣང་སྟོང་ལྷའི་སྐུ། གྲགས་སྟོང་སྔགས་ཀྱི་སྒྲ་དང་རིག་སྟོང་ཡེ་ཤེས་ཆེན་པོའི་འཁོར་ལོར་འཆར་བ་སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་གི་དགོངས་པ་སྟེ། དེ་དག་གིས་ཡེ་ཤེས་ཀྱི་རྩལ་འབྱོངས་ཤིང་ཕྲིན་ལས་སྣ་ཚོགས་ལ་རང་དབང་བརྙེས་པས་མཐར་ཐུག་སངས་རྒྱས་རྣམས་ཀྱི་ཡོན་ཏན་དང་ཕྲིན་ལས་མི་ཟད་པ་རྒྱན་གྱི་འཁོར་ལོ་ཀུན་ལ་དབང་འབྱོར་ཆེན་པོ་ཐོབ་པར་འགྱུར་རོ། །ཞིང་ཞེས་པའི་ཚིག་ཕྲད་ནི་ལྷག་མ་འདྲེན་པའི་སྒྲའོ། །བཞི་པ་ནི། དགོངས་པ་མི་འགྱུར་ལྷ་ཚོགས་ཇི་སྙེད་ཀུན༔ རང་རིག་རྩལ་དུ་རྟོགས་ཤིང་གོམས་པ་ལས༔ རླུང་སེམས་ལྷ་སྐུ་དབྱེར་མེད་རོ་མཉམ་པའི༔ ཧེ་རུ་ཀ་དཔལ་ཐུགས་ཀྱི་དངོས་གྲུབ་ཐོབ༔ ཅེས་གསུངས་ཏེ། དེ་དག་སྤྱིའི་རྒྱས་འདེབས་གལ་པོ་ཆེ་དགོངས་པ་མི་འགྱུར་བའི་གཟེར་ནི། ཞི་བ་དང་ཁྲོ་བོའི་ལྷ་ཚོགས་ཇི་སྙེད་པ་ཀུན་ཀྱང་ཤེལ་ལས་འཇའ་ཚོན་བཞིན་རང་གི་རིག་པའི་རང་རྩལ་ལས་གཞན་ཏུ་མ་གྲུབ་པར་རྟོགས་ཤིང་དེའི་རྒྱུན་ལ་གོམས་པ་ཆེར་བརྟས་པ་ལས། བག་ཆགས་ཀྱི་བཞོན་པ་རླུང་དང་དེའི་ཁ་ལོ་སྒྱུར་བ་པོ་སེམས་དང་བྱིན་གྱིས་རློབ་པ་པོ་ཡེ་ཤེས་ཀྱི་ལྷ་སྐུ་གསུམ་ཀའང་སེམས་ཉིད་ཀྱི་ངང་དུ་དབྱེར་མེད་རོ་མཉམ་དུ་སྨིན་པའི་མཐུ་ལས་དགོངས་པའི་རྩལ་རྫོགས་ཏེ་སྟོང་སྲོག་གཅིག་ཅར་དུ་འཕྲོག་པ་ཐོབ། མཐར་ཐུག་ཧེ་རུ་ཀ་དཔལ་ཆེན་པོའི་ཐུགས་མི་ཟད་པ་རྒྱན་གྱི་འཁོར་ལོ་དང་དབྱེར་མེད་པའི་དངོས་གྲུབ་ཐོབ་པར་འགྱུར་རོ། །གཉིས་པ་རྣལ་འབྱོར་གྱི་ཡན་ལག་བྱེ་བྲག་ཏུ་བཤད་པ་ལ། དམ་ཚིག་པ་བསྐྱེད་པ། ཡེ་ཤེས་པ་བསྟིམ་པ་སོགས་དཀྱུས་གཅིག་ཏུ་བསྟན་པ་ནི། རྣལ་འབྱོར་ཡན་ལག་དམ་ཚིག་ཕྱག་རྒྱའི་སྐུ༔ རྡོ་རྗེ་གསུམ་གྱི་ངོ་བོར་བྱིན་བརླབས་ཤིང་༔ ཡེ་ཤེས་དབང་བསྐུར་སྒྲིབ་པའི་དྲི་སྦྱངས་ཏེ༔ རིགས་དང་རིགས་བདག་མ་འཆོལ་ཕྱག་རྒྱས་གདབ༔ གཉིས་སྣང་བསལ་ཕྱིར་དབྱིངས་ལས་ཡེ་ཤེས་པ༔ སྤྱན་དྲངས་རོ་མཉམ་ལྷུན་གྱིས་གྲུབ་པར་བལྟ༔ རྡོ་རྗེའི་ཕྱག་དང་ཞབས་ནི་བསིལ་ནས་ཀྱང་༔ དགྱེས་པའི་གདན་ལ་བརྟན་པར་བཞུགས་སུ་གསོལ༔ རང་ལས་རྣམ་སྤྲུལ་རིག་པའི་ལྷ་མོ་ཡིས༔ བརྡའ་ཡི་ཕྱག་འཚལ་དོན་གྱི་ཕྱག་ལེན་བཏབ༔ ཕྱི་ནང་གསང་བའི་དབང་པོར་དགྱེས་རྒུའི་ཡུལ༔ ཉེར་སྤྱོད་འདོད་ཡོན་སྨན་གཏོར་རཀྟ་དང་༔ སྦྱོར་སྒྲོལ་ཟུང་འཇུག་མཆོད་པའི་སྤྲིན་ཆེན་པོས༔ བདེ་བ་ཆེན་པོའི་ལོངས་སྤྱོད་ལྷག་པར་སྤེལ༔ ཆེ་བའི་ཡོན་ཏན་བསྔགས་པ་རྡོ་རྗེའི་གླུས༔ སྐུ་དང་ཡེ་ཤེས་ཕྲིན་ལས་ང་རྒྱལ་བསྐྱེད༔ ཅེས་གསུངས་ཏེ། སྔར་བཤད་པ་དེ་རྣམས་རིམ་པ་དང་པོའི་རྣལ་འབྱོར་དངོས་གཞི་ཡིན་ལ། དེ་ཉིད་རྫོགས་པར་བྱེད་པའི་ཡན་ལག་གི་རྣལ་འབྱོར་རྣམས་གང་ལ་འབྱུང་བའི་གཞི་དང་པོ་ལྷ་དམ་ཚིག་པའི་སྐུར་བསྐྱེད་པ་དེ་ལའང་ཕྱག་རྒྱ་གཅིག་སྤྲོས་ཚོགས་སྒྲུབ་ཀྱི་དབྱེ་བས་བསྟན་པ་གང་ཡང་གཙོ་བོའི་སྐུ་རྫོགས་པར་བསྒོམ་པ། ཡུམ་གྱི་ས་བོན་བསྐྱེད་པ། དེ་ལས་ཡུམ་བསྒོམ་པ། སེམས་དཔའ་སུམ་བརྩེགས་བསྒོམ་པ། རིགས་བདག་གི་རྒྱས་འདེབས་པ་དང་ལྔ་རིམ་པ་ཇི་ལྟ་བར་གཞི་དུས་སུ། བྱིས་པ་བཙས་པ། ནར་སོན་ནས་འདོད་པའི་ཚོར་བས་གདུངས་ཏེ། དེ་དོན་དུ་གཉེར་བ། ཆུང་མ་ལེན་པ། སྒོ་གསུམ་གྱི་ནུས་པ་རིམ་གྱིས་འཕེལ་བ། རང་རིགས་ཀྱི་བྱ་བ་ལ་དབང་སྒྱུར་བ་རྣམས་སྦྱོང་ཞིང་འབྲས་དུས་སུ་སངས་རྒྱས་སྤྲུལ་པའི་སྐུ་བལྟམས་པ་དང༌། བྱང་ཆུབ་དོན་དུ་གཉེར་བས་རབ་ཏུ་བྱུང་ནས་དཀའ་ཐུབ་མཛད་པ་དང༌། དེ་ལས་བཞེངས་ཏེ་བྱང་ཆུབ་སྙིང་པོར་གཤེགས་པ་དང༌། བདུད་བཏུལ་ཏེ་བསམ་གཏན་བསྐྱེད་པ་དང༌། རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་པ་རྣམས་ཡིན་ལ། ལམ་གོང་མའི་ཚེ་ན་བདེ་སྟོང་ཡེ་ཤེས་ཀྱི་ལྷ་སྐུར་གྲུབ་པར་བྱ་བའི་ཕྱིར། བདེ་རླུང་སེམས་ལ་ལྷ་སྐུར་ལྡང་བ་དང༌། དེ་ནས་མཆོག་གི་དངོས་གྲུབ་ལ་མྱུར་དུ་སྦྱོར་བའི་གཞི་འདིང་པས་ན་སྨིན་བྱེད་དུ་འགྲོ་བ་ཡིན་ནོ། །ཡན་ལག་རྣལ་འབྱོར་དངོས་ལ་བདུན་ཡོད་པའི་དང་པོ་བྱིན་གྱིས་བརླབ་པ་ནི། སྦྱང་བྱ་བྱིས་པ་དེ་ཉིད་ཀྱི་ལུས་ངག་ཡིད་གསུམ་གྱི་ནུས་པའི་རྩལ་ནར་སོན་པར་སྦྱོང་བར་བྱེད། སྦྱངས་འབྲས་ནི་སངས་རྒྱས་པ་ན་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ་ལ་མངའ་བརྙེས་པ་ཉིད་ཡིན་ཅིང༌། སྦྱོང་བྱེད་ནི། དམ་ཚིག་པའི་འཁོར་ལོ་བསྐྱེད་ཟིན་པ་ན་དེ་ཐམས་ཅད་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ་གསལ་ཞིང་འབར་བའམ། ཡང་ན་རྣམ་སྣང་འོད་དཔག་མེད་མི་བསྐྱོད་པ་བསྒོམས་ནས་དམ་ཚིག་པའི་སྐུ་གསུང་ཐུགས་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་ངོ་བོ་དང་དབྱེར་མེད་པར་བྱིན་གྱིས་བརླབས་ཤིང་སྒོ་གསུམ་རྣམ་པར་དག་པ་སངས་རྒྱས་ཀུན་གྱི་སྐུ་གསུང་ཐུགས་སུ་མོས་པའི་ང་རྒྱལ་བྱས་པས། ལམ་གོང་མའི་དུས་ན། ཁུ་རྡུལ་རླུང་གི་ཁམས་གསུམ་སྐུ་གསུང་ཐུགས་ཏེ། དེ་རྣམས་ཀྱི་སྙིགས་མ་ཟད་ནས་དྭངས་མ་འཕེལ་བ་ལས་བྱུང་བའི་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །གཉིས་པ་དབང་བསྐུར་བ་ལ། སྦྱང་བྱ་ནི། བྱིས་པ་དེ་རྩ་ཁམས་འཕེལ་བས་ཉོན་མོངས་པ་དུག་ལྔའི་རྣམ་རྟོག་རགས་པར་གྱུར་པ་དེ་སྦྱོང་བར་བྱེད། སྦྱངས་འབྲས་ནི་སངས་རྒྱས་པ་ན་དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ཁམས་གསུམ་ཆོས་ཀྱི་རྒྱལ་པོར་དབང་བསྐུར་བ་དེ་ཡིན་ཅིང༌། སྦྱོང་བྱེད་ནི། བྱིན་རླབས་ཀྱི་རྗེས་སུ་ལྷ་ཚོགས་རྣམས་ཀྱི་མགོ་བོའི་གནས་ལྔར་རིགས་བདག་གཙོ་བོར་གྱུར་པའི་དེ་བཞིན་གཤེགས་པ་ལྔ་རང་རང་གི་ཡུམ་དང་མཉམ་པར་སྦྱོར་བའི་རྗེས་ཆགས་ཀྱི་མེས་བྱང་ཆུབ་ཀྱི་སེམས་ཡེ་ཤེས་རྣམ་པ་ལྔའི་རང་བཞིན་གྱི་བདུད་རྩི་ལྔར་ཞུ་བའི་ཆུ་བོའི་རྒྱུན་བབས་པས་དབང་བསྐུར། སྐུ་ལུས་ཀྱི་ནང་གང༌། ཉོན་མོངས་པ་ལྔའི་སྒྲིབ་པའི་དྲི་མ་བག་ཆགས་དང་བཅས་པ་སྦྱངས། ཆུའི་ལྷག་མ་ཡར་ལུད་པ་ལས་རྡོ་རྗེའི་རིགས་ལ་མི་བསྐྱོད་པས་མཚོན། ལྷ་སོ་སོའི་རིགས་དང་མཐུན་པའི་རིགས་ཀྱི་བདག་པོ་རིགས་གཞན་དུ་མ་འཆོལ་བའི་ཕྱག་རྒྱས་གདབ་སྟེ་ཐོབ་བྱ་རང་གནས་ཀྱི་ཡེ་ཤེས་མངོན་ཏུ་གྱུར་པའི་ང་རྒྱལ་བཟུང་བས། རྫོགས་རིམ་གྱི་སྐབས་དགའ་བཞི་ལུགས་འབྱུང་ལྡོག་གི་རིམ་པས་དུག་ལྔ་ཡེ་ཤེས་ལྔར་དབང་བསྐུར་ཞིང་རླུང་སེམས་གཙུག་ཏོར་དུ་ཐིམ་པའི་རྒྱུ་བྱེད་པས་ལམ་གོང་མའི་སྨིན་བྱེད་དུ་འགྲོ་བ་ཡིན་ནོ།

།གསུམ་པ་བསྒྲུབ་བྱ་དང་སྒྲུབ་བྱེད་གཉིས་སུ་སྣང་བའི་རྟོག་པ་བསལ་བའི་ཕྱིར་དུ་ཡེ་ཤེས་ཀྱི་འཁོར་ལོ་སྒྲུབ་པ་ནི། སྦྱང་བྱ་བྱིས་པ་དེ་རང་དང་རིས་མཐུན་གྱི་འགྲོ་བ་སྔ་མ་རྣམས་དང་བློ་གྲོས་ཀྱི་ནུས་པ་མཉམ་པར་གྱུར་པ་དེ་སྦྱོང་བར་བྱེད། སྦྱང་འབྲས་ནི་སངས་རྒྱས་པའི་ཚེ་ན་དེ་བཞིན་གཤེགས་པ་ཐམས་ཅད་ཡེ་ཤེས་གཅིག་ཏུ་གྱུར་པས་དགོངས་པ་གཉིས་སུ་མེད་པར་རོ་མཉམ་པ་ཉིད་ཡིན་ཅིང༌། སྦྱོང་བྱེད་ནི། དམ་ཚིག་པའི་ཐུགས་སྲོག་ལས་བྱུང་བའི་འོད་ཟེར་གྱིས་རང་བཞིན་གྱི་དབྱིངས་ན་བཞུགས་པའི་ཡེ་ཤེས་པ་རྣམས་ཀྱི་ཐུགས་རྒྱུད་བསྐུལ་བས་དེ་དག་ཆོས་ཀྱི་སྐུ་ལས་མ་གཡོས་བཞིན་དུ་གཟུགས་ཀྱི་སྐུ་བསྒོམས་པ་དང་འདྲ་བའི་ལྷ་ཚོགས་ཀྱི་རྣམ་པར་བཞེངས་པ་རྣམས་སྐད་ཅིག་གིས་སྤྱན་དྲངས་ཏེ་དམ་ཚིག་པའི་འཁོར་ལོ་དང་རོ་མཉམ་དུ་འདྲེས། གདོད་ནས་ལུས་དམ་ཚིག །སེམས་ཡེ་ཤེས་སེམས་དཔར་ལྷུན་གྱིས་གྲུབ་པར་བལྟ། དེས་དམ་ཡེ་ལ་མཆོག་དམན་ཐ་དད་དུ་འཛིན་པའི་ཞེན་རྟོག་སྤོང་བ་དང༌། ཡེ་ཤེས་ཀྱི་འཁོར་ལོ་དེ་ཉིད་རང་གི་སེམས་དང་དབྱེར་མེད་དུ་ཤེས་པ་དང༌། སངས་རྒྱས་ཐམས་ཅད་ཀྱི་བྱིན་རླབས་བདག་ཉིད་ལ་འཇུག་པ་སོགས་ཀྱི་དགོས་པ་ཡོད་ཅིང་ལམ་གོང་མའི་ཚེ་དཔེའི་འོད་གསལ་གྱིས་དོན་གྱི་ཡེ་ཤེས་མཚོན་པར་བྱེད་པ་དང༌། འཁོར་འདས་གཉིས་མེད་ཀྱི་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །བཞི་པ་བཞུགས་སུ་གསོལ་བ་ནི། དེ་ནས་ཡན་ལག་བརྒྱད་ལྡན་གྱི་ཆུ་བཻ་ཌཱུརྻའི་བྱ་མ་བུམ་ནས་སྦྲེང་བའི་མཆོད་ཡོན་དང༌། འདག་ཆལ་དང་ལྡན་པའི་ཆུ་གཙང་གིས་ལྷ་རྣམས་ཀྱི་རྡོ་རྗེའི་ཕྱག་དང་ཞབས་དག་ནི་བཀྲུས་ཏེ་དྲི་མ་བསིལ་བར་བྱས་ནས་ཀྱང༌། ཁྲི་རྐང་པད་ཉི་ཟླ་བ་སོགས་གཙོ་འཁོར་སོ་སོ་དང་འཚམས་པས་ཐུགས་དགྱེས་པའི་གདན་བརྗིད་ཅིང་མཛེས་པ་ལ་དམ་ཡེ་དབྱེར་མེད་ཆུ་ལ་ཆུ་བཞག་པ་ལྟར་དངོས་གྲུབ་ཀྱི་འབྲས་བུ་མ་ཐོབ་པ་དེ་སྲིད་དུ་བརྟན་ཅིང་གཡོ་བ་མེད་པར་བཞུགས་སུ་གསོལ་ལོ། །ལྔ་པ་ཕྱག་བྱ་བ་ནི། འདི་དང་མཆོད་བསྟོད་རྣམས་ཀྱི་སྦྱང་བྱ་ནི། བྱིས་པ་དེ་བཟའ་བཏུང་གོས་རྒྱན་གནས་ཁང་སོགས་ལ་ཅི་དགར་སྤྱོད་ཅིང༌། ཡུལ་ནོར་གྱི་བཅད་རིས་དང་ཁེ་གྲགས་སྒྲུབ་པ་རྣམས་སྦྱོང༌། སྦྱངས་འབྲས་ནི་སངས་རྒྱས་པའི་ཚེ་ན་དེ་ཉིད་དུ་མཆོད་པའི་བཀོད་པ་མཐའ་ཡས་པའི་སྤྲིན་རྟག་ཏུ་འབྱུང་བ་དང་ཕྱག་གི་གནས་མཆོད་པའི་ཞིང་བླ་ན་མེད་པར་གྱུར་པ་ཉིད་ཡིན་ཅིང༌། སྦྱོང་བྱེད་ནི་ཕྱག་མཆོད་བསྟོད་པའི་ལས་རིམ་རྣམས་ཏེ། དེས་ལམ་གོང་མའི་ཚེ་རིག་པ་བརྟུལ་ཞུགས་ཀྱི་རོལ་རྩེད་ལ་ཅི་དགར་སྤྱོད་པའི་གཞི་འདིང་བས་སྨིན་བྱེད་དུ་འགྲོའོ། །དེ་ལ་དབྱིངས་དང་ཡེ་ཤེས་གཉིས་སུ་མེད་པའི་ངང་དུ་དབྱེར་མེད་པའི་ལྷར་རྟོགས་པ་ཉིད་འདྲེས་པ་ནན་ཏན་གྱི་ཕྱག་ཅེས་བྱ་བ་རྣལ་འབྱོར་མཆོག་གི་ཕྱག་ཡིན་ལ། འཇིག་རྟེན་སྲི་ཞུའི་ཚུལ་དུ་སྔགས་ཕྱི་བ་དང་སྒོ་བསྟུན་ཏེ་ཕྱག་མཆོད་ཕུལ་བ་ལ་འཕྲུལ་དགའི་ལྷ་རྣམས་རང་གིས་སྤྲུལ་པའི་ལོངས་སྤྱོད་ལ་རྩེ་བ་བཞིན་རང་གི་སྙིང་ག་སོགས་ལས་རྣམ་པར་སྤྲུལ་པ་རང་གི་རིག་པའི་རང་བཞིན་ལས་གཞན་དུ་མ་གཡོས་པའི་ལྷ་མོ་དཔག་ཏུ་མེད་པས་ཤིན་ཏུ་གུས་པའི་ཚུལ་གྱིས། ཨ་ཏི་བྷུ་ཧོཿཞེས་བརྡའི་ཕྱག་མཚལ་བས་ལྷ་རྣམས་མཉེས་ཏེ་པྲ་ཏི་བྷུ་ཧོཿཞེས་དོན་གྱི་ཕྱག་གི་ལན་བཏབ་པར་མོས། དྲུག་པ་མཆོད་པ་ནི། ལྷ་རྣམས་ཀྱི་སྤྱན་སོགས་གཟུགས་ཅན་དྭངས་པ་ཕྱིའི་དབང་པོ་ལྔ། དེ་ལ་བརྟེན་པའི་རྣམ་ཤེས་ནང་གི་དབང་པོ་ལྔ། དེ་ཉིད་ཡེ་ཤེས་རྣམ་པ་ཐམས་ཅད་པར་བཞུགས་པ་གསང་བའི་དབང་པོ་སྟེ་ལོངས་སྤྱོད་པའི་ཡུལ་ཅན་སོ་སོར་དགྱེས་རྒུར་སྐྱེད་པ། ལོངས་སྤྱོད་བྱའི་ཡུལ་ཕྱི་མཆོད་ཞི་བ་ལ་ཐང་སྐྱེས་ཆུ་སྐྱེས་མཛེས་པའི་མེ་ཏོག་སོགས་དང་དྲག་པོ་ལ་དབང་ལྔའི་པུཥྤེ་སོགས་རང་བྱུང་དུར་ཁྲོད་ཀྱི་རྫས་ཏེ་དབང་ཤེས་ཀྱི་ཉེ་བར་སྤྱོད་པ་ལྔ། ནང་མཆོད་ཡིད་དུ་འོང་བའི་གཟུགས་སོགས་བརྡ་དང༌། སྙོམས་འཇུག་ལས་བྱུང་བ་དོན་ཏེ་དབང་ཤེས་ཀྱི་སྒོ་ལྔའི་འདོད་པ་ཚིམ་བྱེད་ཀྱི་ཡོན་ཏན་ལྔ། ནང་མཆོད་ཁྱད་པར་བ་དུག་ལྔ་རྣམ་དག་རྩ་བརྒྱད་སྟོང་སྦྱར་བདུད་རྩི་སྨན་མཆོད། འདོད་ཡོན་ཟག་མེད་ཀྱི་བདེ་བས་ཡེ་ཤེས་ཀྱི་སྟོབས་སྐྱེད་པའི་གཏོར་མ། རྒྱུད་དྲུག་ཁམས་གསུམ་གྱི་རྩ་བ་ཆགས་མེད་དམར་ཆེན་གྱི་དྭངས་མར་བསྐྱིལ་བའི་རཀྟ་རྣམས་དང༌། གསང་མཆོད་དོན་དབྱིངས་དང་ཡེ་ཤེས་རྟགས་ལྷ་ཚོགས་ཡབ་ཡུམ་མཉམ་པར་སྦྱོར་བའི་ཞུ་བདེ་ཁྱད་པར་ཅན་གྱིས་ཡས་བབས་དང་མས་བརྟན་གྱི་དགའ་བཞིའི་རིམ་པ་ལས་སྐྱེས་པའི་བདེ་བ་ཆེན་པོ་མཆོག་ཏུ་མི་འགྱུར་བའི་ཡེ་ཤེས་ཀྱིས་ཚིམས་པར་སྦྱོར་མཆོད་དང༌། ཐོག་མར་རང་གི་གཉིས་འཛིན་གྱི་རྟོག་ཚོགས་གཉིས་མེད་ཤེས་རབ་ཟབ་མོས་ཆོས་ཀྱི་དབྱིངས་སུ་བཅོམ་ནས། དེ་ལས་དམིགས་མེད་ཀྱི་སྙིང་རྗེ་ཆེན་པོས་བདག་ལྟའི་ཉེར་ལེན་ལ་བརྟེན་ནས་ལོག་པར་ཞུགས་པའི་དགྲ་བགེགས་མཐའ་དག་སྒྱུ་མ་ལྟ་བུའི་ཏིང་ངེ་འཛིན་གྱི་འཁྲུལ་འཁོར་གྱིས་འཁོར་འདས་རོ་མཉམ་ཀློང་དུ་བསྒྲལ་བའི་མཆོད་པ་དང༌། དེ་ཁོ་ན་ཉིད་ཀྱི་མཆོད་པ་བྱ་བྱེད་ལས་གསུམ་གདོད་མ་ནས་རྣམ་པར་དག་པས་སྣང་ཤེས་ཐམས་ཅད་སྐུ་དང་ཡེ་ཤེས་ཆེན་པོར་ཟུང་དུ་འཇུག་པར་ཤེས་པར་སྟེ། དེ་ལྟར་ན་དངོས་བཤམས་དང་ཡིད་བྱུང་ཏིང་ངེ་འཛིན་གྱི་རོལ་པས་སྤེལ་བའི་མཆོད་པའི་སྤྲིན་ཆེན་པོས་ཆོས་ཀྱི་དབྱིངས་རྒྱས་པར་བཀང་སྟེ་ལྷ་རྣམས་ཀྱི་དབང་པོའི་ཡུལ་དུ་ཕུལ་བས་བདེ་བ་ཆེན་པོའི་ལོངས་སྤྱོད་ལྷག་པར་སྤེལ་བར་བྱའོ། །བདུན་པ་བསྟོད་པ་ནི། ཆོས་ཀྱི་སྐུ་ལས་གཟུགས་སྐུ་ལོངས་སྤྱོད་རྫོགས་པ་ཞི་ཆགས་ཁྲོ་བོའི་རྣམ་པར་ཤར་བ་དང༌། དེ་ལས་གང་འདུལ་སྤྲུལ་པའི་སྐུར་བསྟན་པ་རྣམས་ཀྱི་སྐུ་གསུང་ཐུགས་ཀྱི་ཆེ་བའི་ཡོན་ཏན་རྗེས་སུ་དྲན་པས་བསྔགས་པ་བརྗོད་པ་ཟབ་ཅིང་རྒྱ་ཆེ་བའི་རྡོ་རྗེའི་གླུ་རབ་ཏུ་སྒྲོག་ཅིང་བསྟོད་པས། སྐུ་དང་ཡེ་ཤེས་རྟག་ཅིང་ཁྱབ་པའི་ཕྲིན་ལས་དང་བཅས་པའི་གཟི་བྱིན་ལྷག་པར་འཕེལ་བར་མོས་པ་ཉོན་མོངས་པ་དང་བྲལ་བ་ཆེ་བའི་ང་རྒྱལ་བསྐྱེད་པར་བྱའོ། །ལམ་རིམ་ཉམས་སུ་ལེན་པའི་སྐབས་བསྐྱེད་པའི་རྣལ་འབྱོར་ཡན་ལག་དང་བཅས་པའི་ཞར་བྱུང་དུ་བཟླས་པའི་རྣལ་འབྱོར་འབྱུང་བས། དེའི་སྦྱང་བྱ་ནི། འཁོར་བར་མིང་ཚིག་ཡི་གེའི་ངག་གི་བརྗོད་པ་དུ་མ་དང་སྒྲ་དོན་འདྲེས་འཛིན་གྱི་རྟོག་པ་རྣམས་སྦྱོང་ཞིང༌། སྦྱངས་འབྲས་ནི་སངས་རྒྱས་ནས་གདུལ་བྱ་ལ་ཆོས་འཁོར་བསྐོར་བ་སོགས་གསུང་རྡོ་རྗེའི་ཕྲིན་ལས་ཀྱིས་དོན་མཛད་པའི་རྟེན་འབྲེལ་སྒྲིག །ལམ་གོང་མའི་སྐབས་སུ་རྩ་རླུང་དབྱངས་གསལ་གྱི་ཡི་གེར་སྨིན་པ་དང༌། སྲོག་ཐུར་འདྲེས་ཤིང་བདེ་གསལ་མི་རྟོག་པར་འཆར་བའི་སྨིན་བྱེད་དུ་འགྲོ། སྦྱོང་བྱེད་ནི་ངག་བཟླས་ཡིད་བཟླས་རྡོར་བཟླས་མཁའ་ཁྱབ་ཀྱི་བཟླས་པ་སོགས་དང་འབྲེལ་བའི་ཏིང་ངེ་འཛིན་ཇི་སྙེད་པ་རྣམས་སོ།

།རྩ་བའི་ས་བཅད་གསུམ་པ་སྒྲུབ་ཐབས་རྗེས་ཀྱི་བྱ་བ་རྣམས་དཀྱུས་གཅིག་ཏུ་བཤད་པ་ནི། ཏིང་འཛིན་བསྒོམ་པའི་རྗེས་ཀྱི་བྱ་བ་ནི༔ བར་ཆད་བསལ་ཞིང་དངོས་གྲུབ་སྤེལ་བའི་ཕྱིར༔ ཐུན་མཚམས་ཀུན་ཏུ་གཏོར་མའི་མཆོད་པ་འབུལ༔ ཐབས་ཤེས་དབྱེར་མེད་ཀུན་སྤྱོད་ཁྱད་པར་ཅན༔ བདེ་ཆེན་ཚོགས་ཀྱི་འཁོར་ལོས་ཉོན་མོངས་གཅོད༔ སྐལ་ལྡན་མི་དང་དགྱེས་ལྡན་ཡོ་བྱད་མཆོག༔ དངོས་གྲུབ་ལྷ་དང་བསོད་ནམས་ཡེ་ཤེས་ཚོགས༔ ཕྱི་ནང་གསང་བ་བླ་ན་མེད་པ་ཡིས༔ བསྒྲུབ་བྱ་མཉེས་ཤིང་སྒྲུབ་པའི་ཉམས་ཆགས་སྐོང་༔ སྒྲོལ་བ་ལམ་ལོངས་སྦྱོར་བ་ཚད་དུ་ཕྱིན༔ ཧེ་རུ་ཀ་དང་སྤྱོད་ཡུལ་མཉམ་པར་འགྱུར༔ ཡེ་ཤེས་ལྷ་ལ་བསྙེན་བསྲིངས་མི་མངའ་ཡང་༔ འགྲོ་བའི་དོན་ཕྱིར་ཐུགས་དམ་གནད་ནས་བསྐུལ༔ འཇིག་རྟེན་ཚུལ་སྟོན་རྒྱུད་གསུམ་བཀའ་ཉན་རྣམས༔ ཐ་ཚིག་བསྒྲགས་ཤིང་ལས་ཀྱི་གཉེར་བྱང་གཏད༔ ཁྱད་པར་བོད་ཁམས་སོ་ཁ་སྲུང་བའི་ཕྱིར༔ ཆེ་ཞེ་འཁོར་བཅས་བཤལ་ཆུའི་བདུད་རྩིས་བརྔན༔ ལས་རྣམས་གསོར་མི་རུང་བའི་མཐའ་སྡུད་ནི༔ རྣམ་བཞིའི་དལ་དུ་རྡཽ་རྗེའི་རྟ་བྲོ་བརྡུང་༔ བསྒྲུབ་བྱའི་ལྷ་ལ་ཐུན་མོང་མཆོག་ཉིད་ཀྱི༔ དངོས་གྲུབ་རྒྱུན་དང་དུས་སུ་ལྷག་པར་བླང་༔ དམིགས་མེད་ཐུགས་རྗེའི་བཀའ་དྲིན་གསོབ་པའི་ཕྱིར༔ མཆོད་ཅིང་བསྟོད་པས་གཏང་རག་དག་ཀྱང་དབུལ༔ ཆོ་ག་ཡོ་བྱད་ལྷག་ཆད་ཉམས་པ་རྣམས༔ གནོང་ཞིང་འགྱོད་པའི་ཚུལ་གྱིས་རབ་ཏུ་བཤགས༔ རྟག་མཐའ་སྦྱང་ཕྱིར་སྣོད་བཅུད་ལྷར་སྣང་ཀུན༔ འོད་གསལ་སྟོང་ཉིད་ཐིག་ལེ་ཆེན་པོར་བསྡུ༔ ཆད་མཐའ་བསལ་སླད་ཟུང་འཇུག་སྒྱུ་མའི་སྐུས༔ སྣང་གྲགས་རྟོག་ཚོགས་ལྷ་སྔགས་ཆོས་སྐུར་སྦྱོང་༔ དགེ་ཚོགས་མི་ཟད་འཕེལ་ཞིང་མཐར་དབྱུང་བ༔ ཡོངས་སུ་བསྔོ་དང་སྨོན་ལམ་ཟབ་མོ་གདབ༔ ཤིས་བརྗོད་གླུ་དང་མེ་ཏོག་ཆར་འབེས་པས༔ ཕྱོགས་དུས་གནས་སྐབས་ཀུན་ཏུ་དགེ་ལེགས་སྤེལ༔ ཅེས་གསུངས་ཏེ། དེ་ལྟར་བསྐྱེད་རིམ་གྱི་ཏིང་ངེ་འཛིན་དེ་དག་བསྒོམས་ཟིན་པའི་རྗེས་ཀྱི་བྱ་བ་ཡང་ནི་བཅུ་གསུམ་སྟེ། དང་པོ་གཏོར་མ་འབུལ་བ་ནི། དགོས་པ་ནི། གཟུགས་ཅན་གཟུགས་མེད་ཀྱི་བར་གཅོད་ཐམས་ཅད་བསལ་ཞིང་ཚོགས་རྣམ་པ་གཉིས་རྫོགས་པ་ལས་དངོས་གྲུབ་རྣམ་པ་གཉིས་ཀྱི་སྟོབས་སྤེལ་བར་བྱེད་དེ། བརྟག་གཉིས་ལས། སེམས་ཅན་ཀུན་གྱི་སྲོག་བསྲུང་ཕྱིར། །རྡོ་རྗེ་སེམས་དཔས་གཏོར་མ་བསྟན། །ཅེས་པས་མཚོན་གསར་རྙིང་གི་རྒྱུད་དང་མན་ངག་ལས་མང་དུ་གསུངས་པའི་ཕྱིར། དུས་རྣལ་འབྱོར་ལས་ལྡང་བའི་ཐུན་མཚམས་ཀུན་ཏུ་བཏང་བར་བྱ་ཞིང་ཁྱད་པར་བླ་མེད་ནང་གི་གཏོར་མ་ནི་སྲོད་ཀྱི་དུས་སུ་ལྷག་པར་བསྔགས་སོ། །གཏོར་མའི་ངོ་བོ་ནི། ཇི་སྐད་དུ། གཏོར་ནི་ཆོས་ཀྱི་དབྱིངས་ཡིན་ཏེ། །མ་ནི་རིག་པའི་ཡེ་ཤེས་ཡིན། ཅེས་པ་ལྟར་དབྱིངས་ཡེ་གཉིས་སུ་མེད་པའོ། །ངེས་ཚིག་ནི། བ་ལའི་སྒྲ་ལས་ཕུང་པོ་ལྔ་དང་འབྱུང་བ་བཞི་རྣམས་ཀྱི་སྟོབས་སྐྱེད་པའོ། །དབྱེ་བ་ནི། ཕྱི་རྫས། ནང་ཕུང་པོ། གསང་བ་བྱང་སེམས། ཡང་གསང་དེ་ཁོ་ན་ཉིད་ཀྱི་གཏོར་མ་བཞི། དེ་རེ་རེ་ལའང་རྣམ་དབྱེ་མང་བ་ལས་འདིར་ཕྱིའི་གཏོར་མ་གཙོ་བོར་བསྟན། དེ་ལའང་རྟེན་གཏོར་རྟག་གཏོར་འཛིན་གཏོར་རྒྱུན་གཏོར་འཕྲལ་གཏོར་སོགས་ཡོད་པ་ལས། འདིར་ཐུན་མཚམས་སུ་འཕྲལ་དུ་བཏང་བའི་གཏོར་མའི་མཆོད་པ་སྟེ། གཏོར་རྫས་རིན་པོ་ཆེ་དང་པདྨ་བྷཉྫའི་སྣོད་དུ་ཁ་ཟས་བཟང་རྒུ་སྤུངས་པའམ་ཡུལ་ལུགས་བཤམས་པའི་དབྱིབས་འདས་མ་འདས་ཚན་ཏུ་བཅོས་པ་ལ་བཟའ་བཏུང་དང་བཅས་པ། ཡུལ་འཇིག་རྟེན་ལས་འདས་པ་རྩ་གསུམ་དམ་ཅན་རྣམས་དང་འཇིག་རྟེན་པ་སྲིད་གསུམ་འབྱུང་པོའི་ཚོགས་རྣམས་ལ་འབུལ་བའོ།

།གཉིས་པ་ཚོགས་ཀྱི་འཁོར་ལོས་མཆོད་པ་ལ། ངོ་བོ་ནི། ཐབས་ཤེས་དབྱེར་མེད་ཀྱི་ཀུན་སྤྱོད་ཁྱད་པར་ཅན་ཡིན་ལ། ངེས་ཚིག་ག་ཎ་ཙཀྲའི་སྒྲ་ལས། བདེ་བ་ཆེན་པོའི་ཚོགས་ཆེན་འདུས་པའི་འཁོར་ལོས་ཉོན་མོངས་པའི་དྲྭ་བ་གཅོད་པར་བྱེད་པའོ། །དབྱེ་ན། སྐལ་ལྡན་མིའི་ཚོགས། དགྱེས་ལྡན་ཡོ་བྱད་མཆོག་གི་ཚོགས། དངོས་གྲུབ་ལྷའི་ཚོགས་དང༌། ཚོགས་ཆེན་པོ་བསོད་ནམས་ཡེ་ཤེས་དང་བཅས་བཞིར་གསུངས་ལ། དེ་དག་ཀྱང་རིམ་བཞིན་ཐབས་ཤེས་ཟུང་དུ་འབྲེལ་བའི་སྐྱེ་བོ་དམ་པ་འདུས་པ་དང༌། ཁྱད་པར་ཡོ་བྱད་ལྔ་ལ་སོགས་པ་ཚང་བ་དང༌། དངོས་གྲུབ་ཀྱི་རྟེན་ཏུ་གཟུགས་བརྙན་བཀོད་ཅིང་ཡེ་ཤེས་ཀྱི་དཀྱིལ་འཁོར་རྟེན་དང་བརྟེན་པ་སྲུང་མ་བཅས་བསྒོམ་པ་དང༌། སྣང་ལ་མ་འགགས་པར་སྤྱད་པས་བསོད་ནམས་དང་སྤྱོད་བཞིན་དུ་མི་དམིགས་པའི་ཤེས་རབ་ཀྱིས་ཟིན་པས་ཡེ་ཤེས་ཀྱི་ཚོགས་རྫོགས་པ་སྟེ། སྒྱུ་འཕྲུལ་བཤད་རྒྱུད་རྡོ་རྗེ་ལས། སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་པའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་ཚོགས་སུ་བཤད། །ལྷ་དང་དམ་ཅན་ཀུན་འདུས་པ། །འདུས་པ་ཆེན་པོའི་ཚོགས་སུ་བཤད། །ཐམས་ཅད་སྤྱོད་ལ་མི་འཛིན་པས། །ཚོགས་གཉིས་རྒྱུན་དུ་རྫོགས་བྱེད་པ། །ཚོགས་ཆེན་པོ་རུ་ངེས་པར་བཤད། ཅེས་སོ། །དེ་དག་གི་ལས་ཀྱི་རིམ་པ་ནི། སྤྱིར་ལས་རྒྱ་ལ་བརྟེན་པའི་ཚོགས་འཁོར་མཚན་ཉིད་པ་ལ་གང་དུ་འཚོགས་པའི་གནས་དུར་ཁྲོད་སོགས་དབེན་པའི་གནས་སུ་སྐོར་ཁང་རིམ་པ་གསུམ་པ་བརྩེགས་ལ། གང་གི་ཚེ་འཚོགས་པའི་དུས་སྤྱི་དང་ཁྱད་པར་བ་རྣམས་དང༌། ཇི་ལྟར་བྱ་བའི་ཁྱད་པར་བརྡ་དང་བརྡའི་ལན་བྱ་བ་སོགས་ཕྲིན་ལས་ཀྱི་ཁ་སྐོང་བའི་ཚོགས་མཆོད་ཉི་ཚེ་བ་ཙམ་ལ་མི་འགྲུབ་པས་མ་སྨོས་ཤིང་གང་ལའང་རྣལ་འབྱོར་ཕོ་མོ་ལྷའི་ཏིང་ངེ་འཛིན་ལ་གནས་པས་ཐབས་ཤེས་ཀྱི་རྫས་རྣམས་དམ་ཡེ་གཉིས་མེད་ཀྱི་བདུད་རྩིར་བྱིན་བརླབ། དམ་ཚིག་གི་རྫས་རྣམས་ལས་ཕྱི་ཉེར་སྤྱོད་ནང་འདོད་ཡོན་གསང་བ་རིག་མའི་ཚོགས་དཔག་ཏུ་མེད་པར་སྤྲུལ་པ་དང༌། ཐམས་ཅད་ཀྱང་ཀ་དག་རྩོལ་བྲལ་གདོད་མའི་གཞི་ལ་ངང་གིས་རྫོགས་པ་བླ་ན་མེད་པའི་མཆོད་པ་རྣམས་ཀྱིས་ཕྱི་ལྟར་དཀྱིལ་འཁོར་པ་རྣམས་མཆོད་པས་བསྒྲུབ་བྱའི་ལྷ་མཉེས་ཤིང་སྒྲུབ་པ་པོའི་དམ་ཚིག་ཉམས་ཆགས་ཐམས་ཅད་སྐོང་བར་བྱེད། ཚོགས་གྲལ་དུ་འཐབ་རྩོད་ཀུ་ཅོ་ཐ་མལ་གྱི་བདེན་ཞེན་སྤངས་ཏེ་བདུད་རྩིའི་མཆོད་རྫས་གཏུམ་མོའི་མེས་བཞུ་བའི་དྭངས་མས་ལུས་ནང་གི་ལྷ་ཚོགས་ཐམས་ཅད་མཆོད་པར་བསམས་པས་ནང་ལྟར་རྣལ་འབྱོར་པའི་ཕུང་ཁམས་སྐྱེ་མཆེད་ཀྱི་ལྷ་རྣམས་མཆོད། སྨིན་སློབ་སྤྲོས་བཅས་ལ་ནུབ་ཐ་མའི་ནམ་གུང་གི་དུས་སུ་ཏ་ནའི་མཛད་སྤྱོད་རྨད་དུ་བྱུང་བ་ལ་སྦྱོར་ཏེ། དེའང་བསྒྲལ་བྱའི་ཞིང་རྟོགས་པས་བསྒྲལ་བྱ་གཉིས་འཛིན་གྱི་ཞེན་རྟོག་དང་སྙིང་རྗེས་བསྒྲལ་བྱ་ཞིང་བཅུ། སྒྲོལ་བྱེད་སློབ་དཔོན་ཡང་རང་བཞིན་གྱིས་སྒྲོལ་བའི་ལྟ་བ། ཏིང་ངེ་འཛིན་གྱིས་སྒྲོལ་བའི་ཉམས། དབང་པོ་ཡུལ་དུས་ཀྱིས་སྒྲོལ་བའི་སྤྱོད་པ། ཐབས་ཆེན་པོས་སྒྲོལ་བའི་སྔོན་བྱུང་གི་རྗེས་སུ་འཇུག་པའི་གདམས་ངག །མངོན་དུ་ཕྱུང་བས་སྒྲོལ་བའི་མཛད་སྤྱོད་ལ་མཁས་པ་དང༌། བསྒྲལ་བྱ་འཛིན་པ། སྒྲོལ་བ། སྟོབ་པ་ལ་མཁས་པའི་ཀིང་ཀ་ར་གསུམ་ཚོགས་པ་རྣམས་ཀྱིས་སྒྲོལ་བ་ལམ་དུ་ལོངས། རྣལ་འབྱོར་ཕོ་མོ་འཁྲིག་པའི་ཀུན་སྤྱོད་ཀྱིས་སྙོམས་པར་ཞུགས་པས་སྔར་གྱི་ཚོགས་ཞིང་གི་ལྷ་རྣམས་ཀྱང་འདོད་ཆགས་ཆེན་པོས་བྱང་ཆུབ་སེམས་ཀྱི་ངོ་བོར་ཞུ་ནས་རང་ལ་རོ་གཅིག་ཏུ་ཐིམ་ཞིང༌། རེག་པའི་བདེ་བ་ས་དང༌། གཤེར་བ་ཆུ་སོགས་ལུགས་ལྡོག་གི་འབྱུང་ལྔའི་རིམ་པས་རིན་ཆེན་མཁའ་འགྲོ་ལ་སོགས་པ་རིགས་ལྔའི་བདེ་བ་སྐྱེད་ཅིང༌། ལུགས་འབྱུང་གི་དགའ་བཞི་མྱོང་བའི་མཐར་རླུང་སྦྱོར་གྱིས་ཁམས་འཛག་མེད་དུ་བཟུང་བ་ལྡོག་ཁྱབ་བསྲེ་བའི་སྦྱོར་བས་ལུགས་ལྡོག་གི་དགའ་བཞིའི་ཡེ་ཤེས་ཉམས་སུ་མྱོང་བའི་མཚོན་རིམ་གྱིས་དཔེ་དོན་གྱི་ལྷན་ཅིག་སྐྱེས་པའི་ཡེ་ཤེས་ཀྱི་རོ་མཉམ་པ་ལ་ཡང་དག་པར་སྦྱར་བས་རྩ་ཁམས་ཀྱི་དཔའ་བོ་མཁའ་འགྲོ་ཐམས་ཅད་གསང་བའི་སྲེགས་བླུགས་ཀྱིས་མཉེས་པར་བསམས་པས་གསང་བ་རྩ་ཁམས་ཀྱི་ལྷ་རྣམས་མཉེས་ཏེ་སྦྱོར་བ་ཚད་དུ་ཕྱིན། ཡུལ་སྟོང་པ་ཉིད་དང༌། ཡུལ་ཅན་རང་རིག་ཟུང་དུ་འཇུག་པས་འཁོར་འདས་གདོད་ནས་དཀྱིལ་འཁོར་དུ་གྲུབ་པ་ཉིད་འཁོར་གསུམ་མི་དམིགས་བདེ་བ་ཆེན་པོ་དེ་ཁོ་ན་ཉིད་ཀྱིས་མཆོད་པར་བསམས་པས་ཡང་གསང་མཆོག་གི་ཚོགས་འཁོར་མཐར་ཕྱིན་ནོ། །མོས་སློབ་འདྲ་འབག་གི་ཚེ་གལ་པོ་ལས། །དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིས་བཤགས། །གསུམ་པ་དགྲ་བགེགས་གཟུགས་ཕུང་སྟོབ། །ཅེས་པ་ལྟར་ཚོགས་ཕུད་ཆ་གསུམ་དུ་སྤྲོས་ནས། དང་པོ་འདོད་ཡོན་གྱི་ལྷ་མོ་ནམ་མཁའ་གང་བར་སྤྲོས་ཏེ་མཆོད། །བར་པ་བདུད་རྩིར་བརླབས་ལ་བཤགས། ཐ་མར་གསང་བ་ལ་འཁུ་བའི་དགྲ་བགེགས་འགུགས་བསྒྲལ་བསྟབས་ནས་ཚོགས་རྫས་ནང་གི་སྲེགས་བླུགས་སུ་ལོངས་སྤྱད་ལ་སློབ་དཔོན་གྱིས་གནང་བ་ཐོབ་ན་རྡོ་རྗེའི་གླུ་དང་གར་ལ་སོགས་པའང་བྱ། ལྷག་མ་རྣམས་གསོག་འཇོག་མེད་པར་བསྡུས་པའི་དམེ་གཏོར་མཆོད་པའི་རས་མ་དང་བཅས་པའི་སྟེང་དུ་ཕུད་ཆ་གསུམ་པའང་བསྣན་ཏེ་བདུད་རྩིར་སྦར་བས་མར་གྱི་གནས་བདུན་སོགས་ལྷག་མའི་དམ་ཚིག་ཏུ་གཏོགས་པ་རྣམས་ལ་བསྔོས་ཏེ། སྒྲུབ་ཁང་ནས་གོམ་པ་བདུན་ཅུ་བོར་བ་ནི་སྲིན་མོའི་ཟ་ལམ་ཡིན་པས་དེར་བསྐྱལ་ལོ། །དེ་ལྟ་བུའི་ཚོགས་ཀྱི་འཁོར་ལོ་དེར་འདུས་པ་ཐམས་ཅད་དཔལ་ཧེ་རུ་ཀ་དང་སྤྱོད་ཡུལ་མཉམ་པའི་དངོས་གྲུབ་ཆེན་པོ་དུས་དེ་ཉིད་དུ་འཐོབ་པར་འགྱུར་ལ། རྗེས་མཐུན་པས་ཀྱང་རིམ་གྱིས་དེ་ལྟར་འཐོབ་པའི་སྐལ་བ་ཅན་དུ་འགྱུར་བ་སོགས་ཕན་ཡོན་ཆེ་སྟེ། རྡོ་རྗེ་དྲྭ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང༌། །བགེགས་དང་བར་ཆད་ཞི་བ་དང༌། །ཕྱི་མ་རིག་འཛིན་རྒྱལ་བའི་ཞིང༌། །ཀུན་ཏུ་བཟང་པོ་འཐོབ་པར་འགྱུར། །ཅེས་སོ།

།གསུམ་པ་ཐུགས་དམ་བསྐུལ་བ་ནི། བརྟན་གཡོ་ཀུན་ཏུ་ཁྱབ་པའི་ཡེ་ཤེས་ཀྱི་ལྷ་ལ་བསྐུལ་དང་མ་བསྐུལ་བས་བསྙེན་བསྲིང་སྟེ་ཉེ་རིང་མི་མངའ་ཡང༌། འཁོར་བར་སྡུག་བསྔལ་གྱིས་མནར་བའི་འགྲོ་བ་རྣམས་ཀྱི་དོན་མཛད་པའི་ཕྱིར་དུ་སྔོན་ཇི་ལྟར་ཐུགས་དམ་བཅས་པའི་ཐ་ཚིག་གི་གནད་ནས་སྨོས་ཏེ་གདུང་ཤུགས་དྲག་པོ་དང་གསང་བའི་རྔེའུ་ཆུང་སོགས་ཀྱི་སྒྲས་བསྐུལ་ལོ། །བཞི་པ་ཆད་ཐོ་བསྒྲགས་པ་ནི། འཇིག་རྟེན་རང་རྒྱུད་པའི་ཚུལ་དུ་སྟོན་ཅིང་སྟོན་པའི་བསྟན་པ་དང་ཁྱད་པར་བླ་མེད་རྡོ་རྗེ་ཐེག་པ་སྲུང་བའི་གཉེར་ཁ་དང་ལྡན་པ་ཕོ་རྒྱུད་མོ་རྒྱུད་མ་ནིང་སྟེ་རྒྱུད་གསུམ་གྱིས་བསྡུས་པའི་ཆོས་སྐྱོང་དམ་ཚིག་ཅན་ཅི་བསྒོ་བའི་བཀའ་ཉན་པ་རྣམས་ལ་གཏོར་མ་འདོད་ཡོན་གྱི་ཕུང་པོར་བསྔོས་ཏེ། སྔོན་བརྒྱུད་གསུམ་རིག་འཛིན་བླ་མ་རྣམས་ཀྱིས་ཇི་ལྟར་བསྒོས་པ་ལས་མི་གཡེལ་བའི་ཐ་ཚིག་བསྒྲག་ཅིང་ཕྲིན་ལས་བཞི་སོགས་ཇི་ལྟར་འདོད་པའི་ལས་ཀྱི་གཉེར་བྱང་བཅོལ་དམ་དུ་གཏད་པར་བྱའོ། །ལྔ་པ་བརྟན་མ་སྐྱོང་བ་ནི། དགོས་པ་ཁྱད་པར་ཅན་དུ་གྱུར་པ་སྔོན་ཨོ་རྒྱན་གྱི་སློབ་དཔོན་ཆེན་པོས་བོད་ཁམས་ལ་མཐའ་དམག་ཆོས་མིན་གྱི་ཉེར་འཚེ་མི་འབྱུང་བའི་སླད་དུ་ཕྱོགས་བཞིའི་སོ་ཁ་སྲུང་བར་བཀའ་བསྒོས་པའི་ཕྲིན་ལས་རྟག་ཏུ་མཛད་པའི་ཕྱིར། ཆེ་ཞེ་སྟེ་མ་སྲིང་གི་ཚུལ་དུ་བརྩེ་ཞིང་གདུང་བའི་སེམས་ལྡན་བདུད་མོ་གནོད་སྦྱིན་སྨན་མོའི་རིགས་ཅན་བརྟན་མ་བཅུ་གཉིས་འཁོར་དང་བཅས་པ་སྲུང་མའི་གཏོར་གཞོང་བཤལ་བའི་ཆུ་བདུད་རྩིར་བརླབས་པ་ལས་ཀྱི་བརྔན་པར་སྦྱིན། དྲུག་པ་རོལ་པའི་བྲོ་བརྡུང་བ་ནི། ཕྲིན་ལས་རྣམ་པ་བཞིའི་བྱ་བ་བསྒྲུབས་ཟིན་པ་དེ་རྣམས་ཞི་བ་ལ་མ་ཞི་བ་སོགས་ལྡོག་ཕྱོགས་སུ་གསོར་མི་རུང་བར་བྱེད་པའི་མཐའ་སྡུད་ཀྱི་ཕྲིན་ལས་ནི། ཞི་རྒྱས་དབང་དྲག་རྣམ་པ་བཞི་ལ་རིམ་བཞིན་སྣང་སྲིད་ཐམས་ཅད་བཛྲ་རཏྣ་པདྨ་ཀརྨ་ཧེ་རུ་ཀའི་དལ་དུ་གསལ་ནས་ལས་བཞིའི་དབྱིབས་དང་མཐུན་པའི་བྲོ་ར་བསྐོར་ཏེ་རྡོ་རྗེའི་རྟ་སྐད་ཀྱི་དགོངས་པ་ལྡན་པས་བྲོ་བརྡུང་ངོ༌། །བདུན་པ་དངོས་གྲུབ་བསྐུལ་བ་ནི། བསྒྲུབ་བྱ་ཡེ་ཤེས་ལྷའི་དཀྱིལ་འཁོར་ལ་མཚན་ལྡན་གྱི་ཐོད་པར་ཛ་གད་དང་གསོལ་བྱང་བཅུག་པ་སོགས་བཀྲ་ཤིས་པའི་རྫས་ལ་བརྟེན་ཏེ་ཐུན་མོང་ཕྲིན་ལས་བཞི་དང་གྲུབ་པ་ཆེན་པོ་བརྒྱད། ཐུན་མིན་སྐུ་དང་ཡེ་ཤེས་མཆོག་ཉིད་ཀྱི་དངོས་གྲུབ་མྱུར་བ་ཉིད་དུ་སྩོལ་བའི་གསོལ་བ་ཁྱད་པར་དུ་གདབ་སྟེ། དེའང་སྒྲུབ་པའི་སྐབས་སུ་ལྟས་བཟང་བྱུང་ན་དེ་མ་ཐག་ཏུ་དངོས་གྲུབ་མ་བླངས་ན་ཡལ་བའི་ཉན་ཡོད་པས་དེ་ལྟར་ལེན་པ་ལ་རྒྱུན་གྱི་དངོས་གྲུབ་བླང་བ་ཞེས་གྲགས་པ་དང༌། སྒྲུབ་པ་མཐར་ཕྱིན་པའི་ཐོ་རངས་སྐྱ་རེངས་ཤར་བའི་དུས་སུ་ལྷག་པར་ཏེ་ངེས་པ་ཁོ་ནར་དངོས་གྲུབ་བླང་བའི་ཆོ་ག་བྱའོ། །བརྒྱད་པ་གཏང་རག་འབུལ་བ་ནི། བསྒྲུབ་བྱའི་དཀྱིལ་འཁོར་པ་རྣམས་ཀྱིས་དམིགས་པ་མེད་པའི་ཐུགས་རྗེའི་ཤུགས་ཀྱིས་དགོངས་ཏེ་བདག་ཅག་གི་དང་པོར་བསྙེན་པ་དང་ཉེ་བསྙེན་གྱི་དུས་ན་ཐུགས་ཉེ་བར་མཛད། སྒྲུབ་པ་དང་སྒྲུབ་ཆེན་གྱི་དུས་སུ་ཇི་ལྟར་འདོད་པའི་དོན་ཐམས་ཅད་བསྒྲུབས་པར་མཛད་པའི་བཀའ་དྲིན་རྗེས་སུ་གསོབ་པའི་ཕྱིར་དུ་ཕྱི་ནང་གི་མཆོད་པ་ཇི་སྙེད་པས་མཆོད་ཅིང་ཆེ་བའི་ཡོན་ཏན་ལ་གུས་པ་ཆེན་པོས་བསྔགས་ཤིང་བསྟོད་པས་ལས་སྒྲུབ་པའི་གཏང་རག་དག་ཀྱང་དབུལ་ལོ། །དགུ་པ་ནོངས་བཤགས་ནི། བསྙེན་སྒྲུབ་ཀྱི་དུས་སུ་ཆོ་ག་ཏིང་ངེ་འཛིན་གྱི་རིམ་པས་རྟེན་སྒྲུབ་མཆོད་པའི་རྫས་སོགས་དགོས་པའི་ཡོ་བྱད་རྣམས་ལ་གཞུང་ལས་མ་གསུངས་པའི་ལྷག་པ་དང་གཞུང་མཐུན་མ་ཚང་བས་ཆད་པ་དང་ཆོ་གའི་ཡན་ལག་བཟླས་བརྗོད་ཀྱི་ཚུལ་སོགས་གཞུང་དང་མི་མཐུན་ཅིང་ཡོ་བྱད་མ་དག་པས་ཉམས་པ་སྟེ། མདོར་ན་ཉེས་པའི་རྒྱུ་བཞིས་ནོངས་པར་གྱུར་པ་རྣམས་ཀྱིས་འཕྲལ་ཡུན་གྱི་དངོས་གྲུབ་ལ་སྒྲིབ་པར་བྱེད་པས། སེམས་གནོང་ཞིང་འགྱོད་པའི་ངང་ཚུལ་ལུས་ཀྱིས་ཕྱག་དང་ངག་གིས་གསོང་པོར་སྨྲ་བས་མཐོལ་བའི་སྨྲེ་སྔགས་དང་རྡོར་སེམས་ཡིག་བརྒྱ་བཟླས་ལ་རབ་ཏུ་བཤགས་ཏེ་སོར་ཆུད་པར་བྱའོ། །བཅུ་པ་བསྡུ་རིམ་ནི། དགོས་ཆེད་སེམས་ཅན་རྣམས་ཀྱི་རྒྱུད་ལ་འཁྲུལ་སྣང་རྟག་པར་ལྟ་བའི་མཐའ་ལ་ཞེན་པ་ཡོད་པས་དེ་སྦྱོང་བའི་ཕྱིར་ཡིན་ལ། སྡུད་ཚུལ་སྔར་བསྒོམས་པའི་ཕྱི་སྣོད་གཞལ་ཡས་ཁང་དང་ནང་བཅུད་ལྷའི་འཁོར་ལོར་སྣང་བ་ཀུན་གཙོ་བོའི་ཐུགས་ཀའི་འོད་ཟེར་གྱིས་རིམ་པར་བསྡུས་ཏེ། མཐར་ས་བོན་དང་ནཱ་ད་ཤིན་ཏུ་ཕྲ་བའི་བར་དང་དེའང་འོད་གསལ་སྟོང་པ་ཉིད་གདོད་ནས་རང་བྱུང་གི་ཐིག་ལེ་ཆེན་པོ་སྤྲོས་པ་མཐའ་དག་བྲལ་བའི་དབྱིངས་སུ་བསྡུས་ལ་ཅི་གནས་སུ་མཉམ་པར་བཞག་གོ །བཅུ་གཅིག་པ་ཐུན་མཚམས་ཀྱི་ལྷར་ལྡང་བ་ནི། སྟོང་ཉིད་ཁོ་ནར་སྙོམས་པར་འཇུག་པ་ནི། ཆད་པའི་མཐའ་ཡིན་པས་དེ་བསལ་བའི་སླད་དུ་སླར་ཡང་སྟོང་ཉིད་ཀྱི་ངང་ལས་སྙིང་རྗེའི་རང་རྩལ་སྣང་སྟོང་ཟུང་འཇུག་སྒྱུ་མ་ལྟ་བུའི་ལྷའི་སྐུ་རང་བྱུང་གཉུག་མའི་ཚུལ་ཅན་དུ་ལམ་གྱིས་གསལ་བའི་གནས་གསུམ་རྡོ་རྗེ་གསུམ་གྱི་རྒྱས་གདབ་ཅིང༌། གཟུགས་སྣང་སྒྲ་གྲགས་སེམས་ཀྱི་རྟོག་ཚོགས་ཐམས་ཅད་ཡི་དམ་གྱི་ལྷ་དང་དེའི་སྔགས་ཀྱི་སྒྲ་དང་གནས་ལུགས་ཆོས་ཀྱི་སྐུར་ཤེས་པས་སྤྱོད་ལམ་ལ་འཇུག་གོ །འདི་དག་གི་སྦྱང་བྱ་ནི། བྱིས་པ་དེ་ཉིད་ལང་ཚོ་རྫོགས་ནས་འཆི་བ་སླར་ཡང་འབྱུང་བ་མཚོན་པ་སྟེ། སྣོད་བཅུད་སྲུང་འཁོར་ལ་བསྡུ་བ་ནི་གཟུགས་སོགས་སྣང་བ་ཐིམ་པ་དང༌། སྲུང་འཁོར་ནས་སྙིང་པོའི་ཕོ་བྲང་གི་ལྟེ་བའི་བར་བསྡུ་བ་ནི་ས་ཆུ་ལ་ཐིམ་པ་སོགས་རགས་པ་ཐིམ་པ། འཁོར་རྣམས་རིམ་པར་གཙོ་བོ་ལ་ཐིམ་པར་སྣང་བ། ཡུམ་ཡབ་དང་དེ་ཡེ་ཤེས་སེམས་དཔའ་ལ་ཐིམ་པ་མཆེད་པ། ཡེ་ཤེས་སེམས་དཔའ་ས་བོན་ལ་ཐིམ་པ་ཐོབ་པ། དེ་གྱེན་རྫོགས་ཀྱིས་ནཱའ་དའང་བསྡུས་པ་ཉེར་ཐོབ་སྟེ་འཆི་བའི་འོད་གསལ་དང༌། དེ་ལས་ལྷར་ལྡང་བ་བར་དོ་སྦྱོང་ཞིང༌། སྦྱངས་འབྲས་ནི། སངས་རྒྱས་གཟུགས་ཀྱི་སྐུའི་སྣང་བ་ནི་ཆོས་སྐུའི་ཕྲིན་ལས་ཡིན་ཅིང༌། ཆོས་ཀྱི་སྐུའི་ཡེ་ཤེས་ཀྱང་དབྱིངས་ཀྱི་ངོ་བོ་ཡིན་པས་དེར་ཐིམ་པ་དང༌། དེ་ལས་གཟུགས་སྐུའི་སྣང་བ་རྒྱུན་མི་ཆད་པས་ན་དེ་ལས་ལྡང་བ་མཚོན་ནོ། །ལམ་གོང་མའི་དུས་སུ་དབང་བཞི་པའི་ཉམས་ལེན་སྣོད་བཅུད་འོད་གསལ་དུ་བཅུག་ནས་སླར་ཡང་ཟུང་འཇུག་གི་སྐུར་ལྡང་ནུས་སུ་སྒྲུབ་པའི་རྒྱུར་འགྲོ་བས་སྨིན་བྱེད་དོ། །བཅུ་གཉིས་པ་བསྔོ་སྨོན་ནི། དེ་ལྟར་ཕར་ཕྱིན་ཐེག་པ་ལས་ཁྱད་པར་དུ་མས་འཕགས་པ་བླ་ན་མེད་པའི་དགེ་བ་ཚོགས་གཉིས་ཟུང་འབྲེལ་དུ་བསྒྲུབས་པས་མཚོན། དུས་གསུམ་གྱི་དགེ་རྩ་ཐམས་ཅད་འགྱོད་པ་སོགས་ཀྱིས་ནམ་ཡང་མི་ཟད་པར་ཉིན་རེ་བཞིན་གོང་ནས་གོང་དུ་འགྱུར་ཁྱད་ཆེན་པོས་འཕེལ་བ་དང༌། སེམས་དང་པོར་བསྐྱེད་པ་ནས་བརྩམས་ལམ་སྒྲུབ་པ་ཐམས་ཅད་ཀྱི་འབྲས་བུ་རྒྱ་ཆེར་སྨིན་ཅིང་མཐར་དབྱུང་བ་ལ་མཆོག་ཏུ་བསྔགས་པ། འཁོར་གསུམ་ཡོངས་སུ་དག་པའི་བསྔོ་བ་དངོས་སམ་རྗེས་མཐུན་པས་རྒྱས་བཏབ་ཅིང་ཐེག་པ་ཆེན་པོ་སྤྱི་དང་ཁྱད་པར་གྱི་ཚུལ་ལས་འབྱུང་བའི་སྨོན་ལམ་ཟབ་ཅིང་རྒྱ་ཆེ་བ་རྣམས་ཀྱང་གདབ་པས་ལས་བྱས་པ་དོན་ཆེན་པོ་དང་ལྡན་པར་འགྱུར་རོ། །བཅུ་གསུམ་པ་ཤིས་བརྗོད་ནི། དེ་དག་གི་མཐར་ཕྱོགས་དུས་རྒྱལ་བ་སྲས་བཅས་དཀྱིལ་འཁོར་པའི་ལྷ་ཚོགས་རྣམས་ཀྱིས་བཀྲ་ཤིས་པའི་བདེན་ཚིག་བརྗོད། རྡོ་རྗེའི་གླུ་དབྱངས་ལེན། མེ་ཏོག་མནྡ་ར་བའི་ཆར་ཆེན་འབེབས་པར་བསམས་ལ་རང་ཉིད་ཀྱང་དེ་དང་མཐུན་པའི་ཤིས་བརྗོད་དབྱངས་རོལ་མེ་ཏོག་འཐོར་བ་སོགས་བྱ་སྟེ། ཕྱོགས་བཅུ་དུས་བཞི་གནས་སྐབས་ཇི་ལྟ་བུར་སྤྱོད་ཀྱང་ཀུན་ཏུ་མི་མཐུན་པའི་མིང་ཡང་མི་གྲགས་ཤིང་བསམ་དོན་ཡིད་བཞིན་ཏུ་འགྲུབ་པའི་དགེ་མཚན་དང་ལེགས་པའི་དཔལ་འབྱོར་གོང་འཕེལ་དུ་སྤེལ་བར་བྱའོ། །ཕྲིན་ལས་ཀྱི་རིམ་པ་དེ་དག་ཀྱང་གསང་སྔགས་ལུང་གི་སྒོ་བཞི་དང་འབྲེལ་དགོས་ཏེ། ཇི་སྐད་དུ། དོན་དམ་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་གྱི་སྒོ། །མཚོན་པ་བརྡར་བཏགས་ཕྱག་རྒྱ་གར་གྱི་སྒོ། །ཞེས་པ་ལས་སྔགས་ཚིག་ཏིང་ངེ་འཛིན་གསུམ་ནི་ཐམས་ཅད་དུ་འབྲེལ་དགོས་ཤིང་མཆོད་པ་སོགས་ལ་ཕྱག་རྒྱའང་དགོས་པ་ཡིན་ནོ། །གཉིས་པ་དེ་ལ་བརྟེན་པའི་ཕྲིན་ལས་རབ་འབྱམས་སྒྲུབ་པ་ལ་གཉིས། གང་གིས་སྒྲུབ་པའི་གང་ཟག་ཐུན་མོང་དུ་བཤད་པ། གང་སྒྲུབ་པའི་ཕྲིན་ལས་སོ་སོར་ཕྱེ་སྟེ་བཤད་པའོ།

།དང་པོ་ནི། གཞན་ཡང་ལམ་གྱི་དྲོད་ཐོབ་རྣལ་འབྱོར་པས༔ ཅེས་གསུངས་ཏེ། རྩ་བའི་སྒྲུབ་ཐབས་བསྟན་ཟིན་ནས་ཉེ་བར་མཁོ་བའི་ཕྲིན་ལས་རབ་འབྱམས་ཀྱི་ནང་ནས་རྡོ་རྗེ་སློབ་དཔོན་ཀྱི་བྱ་བའི་གཙོ་བོར་གྱུར་པ། གཞན་ཡང་ཇི་ལྟར་སྒྲུབ་པའི་ཚུལ་བསྟན་པར་བྱ་སྟེ། ལས་དེ་དག་གང་ཟག་གང་གིས་སྒྲུབ་ན་སྤྱིར་དེ་ཉིད་བཅུ་དང་ལྡན་པས་རྡོ་རྗེ་སློབ་དཔོན་གྱི་མཚན་ཉིད་ཚང་བ་དང་ཁྱད་པར་རིམ་པ་གཉིས་ཀྱི་ལམ་ཚུལ་བཞིན་ཉམས་སུ་བླངས་པས་ཕྱི་ནང་གསང་བའི་དྲོད་དང་རྟགས་ཚད་ཐོབ་པའི་རྣལ་འབྱོར་པས་བསྒྲུབ་པར་བྱ་བ་ཡིན་ཏེ། རྒྱུད་ལས། སློབ་དཔོན་དེ་ཉིད་བཅུ་ཤེས་ཤིང༌། །མཚན་ཉིད་ཀུན་དང་ཡང་དག་ལྡན། །ཕྱག་རྒྱ་སྔགས་དང་ཆོ་ག་ཤེས། །ལས་རྣམས་ཀུན་ལ་མཁས་པའོ། །ཞེས་པ་ལྟར་རོ། །གཉིས་པ་ལ་བདུན། རབ་གནས། སྦྱིན་སྲེག །བཅུད་ལེན། གནས་ལུང༌། རྗེས་བཟུང་དང་ཚར་གཅོད་ཀྱི་ཕྲིན་ལས། བམ་སྒྲུབ། བདུད་རྩིའི་སྒྲུབ་པའོ། །དང་པོ་ལ་གཉིས། དགོས་པ་བསྟན་ཏེ་མཚམས་སྦྱར་བ། རབ་ཏུ་གནས་པའི་ཆོ་ག་དངོས་སོ། །དང་པོ་ནི། འཇིག་རྟེན་ཀུན་ཏུ་ཕན་བདེ་འབྱུང་བའི་ཕྱིར༔ དམ་ཚིག་རྟེན་ལ་ཡེ་ཤེས་སེམས་དཔའི་ཚོགས༔ དབྱེར་མེད་ལྷག་པར་རབ་ཏུ་གནས་པ་ནི༔ ཞེས་གསུངས་ཏེ། དེའང་རྟེན་ལ་རབ་གནས་བྱེད་པའི་དགོས་པ་ནི། རྟེན་རབ་གནས་མ་བྱས་པ་དང༌། ཆོ་ག་དམན་པས་བྱས་ན་མི་ཤིས་ཤིང་བསོད་ནམས་ཀྱི་ཞིང་དུ་མི་འགྱུར་ལ་དེ་དག་ཚུལ་བཞིན་བྱས་ན་རྟེན་དེ་ལ་མཆོད་པས་དཀོན་མཆོག་གསུམ་དངོས་ལ་མཆོད་པའི་བསོད་ནམས་ཐོབ་ཅིང་གཞན་རྒྱུད་བྱིན་གྱིས་རློབ་ནུས་པར་འགྱུར་ཏེ། གསང་སྙིང་ལས། ས་ལ་སོགས་ལས་ཕྱག་རྒྱར་བྱས། །རྣམ་གྲོལ་རིམ་པར་ཐོབ་འགྱུར་ན། །དག་པའི་ཡེ་ཤེས་ཀྱིས་སྦྱངས་བས། །སྨོས་ཅི་དགོས་ཏེ་དེ་ཉིད་ཡིན། ཅེས་སོ། དེ་ཡི་མཐུ་ལས་འཇིག་རྟེན་གྱི་ཁམས་ཀུན་ཏུ་ཕན་པ་དང་བདེ་བ་རྒྱ་ཆེན་པོ་འབྱུང་བར་འགྱུར་ཏེ། རྔམ་གློག་ལས། རབ་གནས་ཆོ་ག་ཡང་དག་བྱ། །བཀྲ་ཤིས་དཔལ་དང་བདེ་ལེགས་བྱེད། །ཅེས་པས་མཚོན་རྒྱུད་ལུང་རྣམས་སུ་རྒྱ་ཆེར་གསུངས་པའི་ཕྱིར་རོ། །ངོ་བོ་ནི། རྒྱལ་བའི་ཕྲིན་ལས་སྤྲུལ་པའི་གཟུགས་བརྙན་དམ་ཚིག་རྟེན་ལ་ཡེ་ཤེས་སེམས་དཔའི་ལྷ་ཚོགས་ཀྱི་གསང་གསུམ་ཡོན་ཏན་མཐའ་དག་བསྟིམ་ཞིང་དབྱེར་མེད་པར་དགེ་ཞིང་བཀྲ་ཤིས་པའི་རང་བཞིན་ཏུ་བྱེད་པ་སྟེ། གལ་པོ་ལས། སྐུ་གསུང་ཐུགས་ཀྱི་རྟེན་རྣམས་ལ། ཡེ་ཤེས་གཞུག་པའི་བྱིན་རླབས་ཅན། །འཁོར་བ་འབྱུང་བ་ལྔའི་གནས། །སྐུ་དང་གསུང་དང་ཐུགས་ཉིད་ཡིན། ཞེས་སོ། །ངེས་ཚིག་ནི། སུ་པྲ་ཏིཥྛའི་སྒྲ་ལས། རྟེན་ཉིད་ལྷག་པར་ཡེ་ཤེས་པའི་ངོ་བོར་ཡུན་རིང་པོར་རབ་ཏུ་གནས་པར་བྱེད་པའི་ཆོ་ག་སྟེ་དེའི་ཚུལ་ནི་འདི་ལྟར་རོ། །གཉིས་པ་ལ་གསུམ། གང་ལ་རབ་ཏུ་གནས་པའི་ཡུལ། གང་གིས་རབ་ཏུ་གནས་པའི་ཚུལ། ཇི་ལྟར་རབ་ཏུ་གནས་པའི་བྱ་བའོ།

།དང་པོ་ནི། མཚན་ཉིད་རྫོགས་ཤིང་བྱ་བ་མཐར་ཕྱིན་རྟེན༔ ཞེས་གསུངས་ཏེ། རབ་ཏུ་གནས་བྱའི་རྟེན་རྒྱུད་དང་མཁས་པས་བཤད་པའི་ཆ་ཚད་དང་ལྷ་སོ་སོའི་རྒྱན་དང་རྣམ་འགྱུར་ཚུལ་བཞིན་ལྡན་པ་དང༌། དམ་ཚིག་གི་གླེགས་བམ་རྒྱུད་བཞིན་བྲིས་པ་སོགས་སོ་སོའི་མཚན་ཉིད་ཚུལ་བཞིན་རྫོགས་ཤིང་བཟོ་འཕྲོ་ལུས་པ་མ་ཡིན་པ་བྱ་བ་མཐར་ཕྱིན་པའི་སྐུ་གསུང་ཐུགས་ཀྱི་རྟེན་གཙོ་བོར་གྱུར་པ་རྣམས་ནི། ཇི་སྐད་དུ་སྐུ་གཟུགས་མཚན་ཉིད་ལྡན་པ་སྟེ། །ཞི་བ་ལ་སོགས་ཉམས་དང་ལྡན། ཚད་ཀྱི་ཚད་ལ་ཕབ་ཅིང་བཟང༌། དེ་འདྲ་རབ་ཏུ་གནས་པར་བྱ། །ཞེས་གསུངས་པ་བཞིན་ནོ། །གཉིས་པ་ནི། གནས་དུས་ཡོ་བྱད་སྟོན་འཁོར་ཕུན་ཚོགས་པས༔ ཞེས་གསུངས་ཏེ། གང་དུ་བྱ་བའི་གནས་ནི། ཕྱོགས་དང་ཁ་དོག་ལ་སོགས་པའི་སྒོ་ནས་ཞི་རྒྱས་ཀྱི་གནས་སུ་བསྔགས་པ་དང༌། ཁྱད་པར་བཀྲ་ཤིས་ཤིང་ཉམས་དགའ་བ་སྟེ། གལ་པོར། བཀྲ་ཤིས་དག་པ་ཆེན་པོའི་གནས། །ཡིད་འོང་ཉམས་ནི་རྣམ་པར་དགའ། །ཞེས་སོ། །དུས་ནི་དགུན་ཟླ་ཐ་ཆུང་ནས་དབྱར་ཟླ་འབྲིང་པོའི་བར་ཉི་མ་བྱང་བགྲོད་ཀྱི་དཀར་ཕྱོགས་གཟའ་སྐར་འཕྲོད་སྦྱོར་བཟང་ཞིང་བཀྲ་ཤིས་པ་ལ་བྱ་སྟེ། སྒྱུ་འཕྲུལ་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །ཞེས་སོ། །ཡོ་བྱད་དཀྱིལ་འཁོར་སྒྲུབ་མཆོད་ལ་དགོས་པ་རྣམས་དང་རྫས་སུམ་ཅུ་སོགས་དང་ལྡན་པའི་ཁྲུས་བུམ་འདག་ཆལ་གོས་ཟུང་མངའ་དབུལ་སྤྱི་དང་བྱེ་བྲག་གཟུང་བུམ་མེ་ཏོག་བཟང་པོ་ལ་སོགས་པ། བྱེད་པ་པོ་སྟོན་པ་རྡོ་རྗེ་སློབ་དཔོན་དེ་ཉིད་བཅུ་ལྡན། འཁོར་དམ་ཚིག་དང་སྡོམ་པས་རྒྱུད་དག་ཅིང་ཆོ་གའི་བྱ་བ་སོ་སོ་ལ་མཁས་པ་སྟེ་ཕུན་སུམ་ཚོགས་པ་ལྔ་དང་ལྡན་པས་རབ་ཏུ་གནས་པའི་ཆོ་ག་བརྩམ་པར་བྱའོ། །གསུམ་པ་ནི། བགེགས་དང་དྲི་སྦྱང་བྱང་ཆུབ་སེམས་མཆོག་བཟུང་༔ བསྐྱེད་ཅིང་དགུག་བསྟིམ་དབང་བསྐུར་ཕྱག་རྒྱས་གདབ༔ མོས་པ་བཞིན་དུ་ཞལ་བསྒྱུར་མངལ་དབུལ་ལ༔ མཆོད་པའི་གཉེར་གཏད་བཀྲ་ཤིས་བདེན་ཚིག་བརྗོད༔ ཅེས་གསུངས་ཏེ། ཐོག་མར་གང་ལ་བརྟེན་པའི་བདག་གི་རྣལ་འབྱོར་དཀྱིལ་འཁོར་སྒྲུབ་མཆོད་ལྷ་བུམ་ཁྲུས་བུམ་བསྒྲུབ་པ་སོགས་བྱས་ནས། རབ་གནས་དངོས་ལ་དོན་ཚན་བཅུ་གཅིག་ཡོད་པའི་དང་པོ་བར་གཅོད་ཀྱི་བགེགས་རྣམས་ལ་གཏོར་མ་སྦྱིན་ཏེ་ཞི་བས་སྦྱང་བ་དང༌། རྫས་ཞི་བ་དང་སྔགས་དྲག་པོ་སྟེ་ཕྱེད་མས་སྦྱང་བ་དང༌། རྡོ་རྗེའི་ཁྲོ་བོའི་སྙེམས་པས་སྤྲུལ་པའི་ཕོ་ཉ་དང་བཅས་པས་བསྡིགས་ཤིང་ཚར་གཅོད་པ་དྲག་པོའི་སྒོ་ནས་སྦྱངས་ཏེ་བསལ་བའི་རྗེས་འབྲེལ་དུ་ཟན་ཆང་སོགས་རྫས་བཞི་སྔགས་དང་བཅས་པས་མི་ཤིས་པ་སྦྱང་བ་དང༌། ཏིལ་དང་མེ་ཆུའི་སྦྱོར་བས་སྡིག་པ་སྦྱང༌། སྦྱང་གཞི་རྟེན་དེ་ལ་སྦྱང་བྱ་བཟོ་བོ་ལ་སོགས་པའི་མི་གཙང་བའི་དྲི་མ་སྦྱོང་བྱེད་བུམ་ཆུ་བདུད་རྩིར་བསྒྲུབས་པ་དང༌། སྦྱོང་པ་པོ་སློབ་དཔོན་རྗེས་འབྲང་དང་བཅས་པས། སྦྱངས་འབྲས་རྟེན་ཡེ་ཤེས་སེམས་དཔའི་ངོ་བོར་བསྒྲུབ་རུང་དུ་བྱེད་པ་ནི་ཉེས་ཚོགས་བསལ་བའི་ཆོ་གའོ།

།གཉིས་པ་མཁའ་མཉམ་ཕ་མ་སེམས་ཅན་མ་བརྒལ་བ་རྣམས་བསྒྲལ་ཞིང་མ་གྲོལ་བ་དགྲོལ་བའི་སླད་དུ་བཟང་པོ་སྤྱོད་པར་དམ་བཅའ་བའི་གོ་ཆ་བརྟན་པོ་བགོ་སྟེ་བྱང་ཆུབ་སེམས་མཆོག་རྣམ་པ་གཉིས་ལྷག་པར་བསྐྱེད་ཅིང་བཟུང་བས་རང་གནས་ཀྱི་རྒྱུ་རྐྱེན་ནུས་ལྡན་དུ་བསྒྲུབ། གསུམ་པ་རྟེན་སོ་སོ་དང་མཐུན་པའི་ལྷའམ། རིགས་ཐམས་ཅད་ཁྱབ་བདག་རྡོ་རྗེ་སེམས་དཔའ་ཁོ་ནར་བསྐྱེད་ཀྱང་ཆོག་ལ། ཡང་ན་གལ་པོ་ལས། གཟུགས་སྐུའི་རྟེན་གྱི་སྐུ་གསུང་ཐུགས། །ལུག་མ་རི་མོ་ལ་སོགས་པ། །སྤྱིར་ན་རྣམ་པར་སྣང་མཛད་གཞི། །ཡང་ན་རིགས་བདག་གང་ཡིན་ལྷ། །པུསྟི་གླེགས་བམ་ལ་སོགས་གསུང༌། །མཐའ་ཡས་མཆོག་ཏུ་བསྒོམས་པར་བྱ། །ཡང་ན་ཡི་དམ་རིགས་གང་ཡིན། རྡོ་རྗེ་དྲིལ་བུ་ལ་སོགས་ཀུན། །མི་བསྐྱོད་རྡོ་རྗེ་འཛིན་པའམ། །སྐུ་གསུང་ཐུགས་དང་རིགས་ལྔར་འདུས། ཞེས་གསུངས་པ་ལྟར་སངས་རྒྱལ་རིག་ལྔས་བསྡུས་པའི་དམ་ཚིག་པ་བསྐྱེད་ཅིང༌། བཞི་པ་བདག་དང་དམ་ཚིག་པའི་ཐུགས་ཀའི་འོད་ཟེར་གྱིས་རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཤིང་དགུག་སྟེ་མདུན་མཁར་བཞུགས་པ་ལ་མཆོད། དེ་ཉིད་དམ་ཚིག་པ་ལ་འགུག་གཞུག་བཅིང་མཉེས་ཀྱི་ཕྱག་རྒྱ་བཞིས་ཆུ་དང་འོ་མ་ལྟར་དབྱེར་མེད་དུ་བསྟིམ། ལྔ་པ་དེ་ལ་ཆོ་ག་རྒྱས་བསྡུས་གང་ཡང་རུང་བས་དབང་བསྐུར་ཏེ། དེའང་སྦྱང་གཞི་ལྷའི་རྒྱུད་ཉེས་པས་རྙོག་པ་ཅན་དུ་བྱས་པའི་དྲི་མ་སྦྱོང་བྱེད་ལྷ་རྣམས་ཆགས་པ་ཆེན་པོས་ཞུ་བའི་བྱང་སེམས་ཡེ་ཤེས་ཀྱི་ཆུ་རྒྱུན། སྦྱོང་བ་པོ་ནམ་མཁར་སྤྱན་དྲངས་པའི་གདན་གསུམ་ཚང་བའི་ལྷ་རྣམས། སྦྱངས་འབྲས་དམིགས་མེད་ཀྱི་རྒྱུད་དག་པས་ཡེ་ཤེས་ལྷའི་ངོ་བོ་ཁྱད་པར་ཅན་དུ་སྒྲུབ་པ་དབང་བསྐུར་བའི་བྱེད་པ་ཅན་ཏེ། ངེས་ཚིག་དྲི་མ་བཀྲུ་བ་དང་ནུས་པ་འཇོག་པས་འབྲེལ་བས་སོ། །བདུན་པ་དབང་བསྐུར་བའི་ཆུ་ཞབས་ཀྱི་སྤྱི་བོར་རིགས་ཀྱི་བདག་པོའི་ཕྱག་རྒྱ་དང་གནས་གསུམ་དུ་རྡོ་རྗེ་གསུམ་གྱི་རྒྱས་གདབ་པའང་བྱ་སྟེ། ཀུན་མཁྱེན་འཇིགས་བྲལ་ཆེན་པོས། མི་ལ་དབང་བསྐུར་བ་དང་ལྷ་ལ་རབ་ཏུ་གནས་པ་དོན་གཅིག་ཡིན་པར་གསུངས་སོ། །དེས་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསུམ་དང་རྟེན་གྱི་སྐུ་གསུང་ཐུགས་གཉིས་སུ་མེད་པའི་ངོ་བོར་རྒྱས་བཏབ་པ་ལས་འདའ་བར་མི་སྐྱོད་པས་རབ་ཏུ་གནས་པའི་དོན་གྱི་སྙིང་པོ་གྲུབ་པར་བྱས་པ་ཡིན་ནོ། །བརྒྱད་པ་སྔར་རྟེན་བསྐྱེད་ཀྱི་སྐབས་རིགས་ལྔ་གང་དུ་བསྒོམས་པ་དེ་སྐབས་འདིར་ཇི་ལྟར་གནས་བྱའི་སྐུ་གཟུགས་དང་གླེགས་བམ་དང་མཆོད་རྟེན་ལ་སོགས་པ་སོ་སོའི་རྣམ་པ་གང་ཡིན་པ་དེ་དང་དེའི་ཕྲིན་ལས་གདུལ་བྱའི་མོས་པའི་ཡུལ་ལ་ཇི་ལྟར་འཇུག་པ་བཞིན་དུ་ཞལ་བསྒྱུར་ཅིང་གོང་འོག་ཇི་ལྟར་རིགས་པར་ཡུལ་ཅན་ཡེ་ཤེས་ཀྱི་གཟིགས་པ་ཡུལ་འདོད་ཡོན་ལ་སྤྱོད་ཡུལ་མཚུངས་པར་བྱ་བའི་ཕྱིར་སྤྱན་དབྱེ་བ་སོགས་དབང་པོའི་སྒོ་བསལ་བ་རྣམས་ནི་ཡོན་ཏན་མངོན་པར་སྒྲུབ་པའི་ཆོ་གའོ། །དགུ་པ་འཇིག་རྟེན་ན་རྒྱལ་བུ་རྒྱལ་སར་དབང་བསྐུར་བ་དེ་ལ་འཁོར་འབངས་རྣམས་ཀྱིས་ཕུན་སུམ་ཚོགས་པའི་ཡོ་བྱད་ཀྱིས་མངའ་གསོལ་བ་བཞིན་དུ་འདིར་ཡང་གོ་འཕང་གི་ཆོས་ལ་དབང་ཐོབ་པར་གྱུར་པའི་རྟེན་དེ་ལ། སྤྱིར་ཆུ་གཉིས་ཉེར་སྤྱོད་རོལ་མོ། །རིན་ཆེན་བདུན། འདོད་ཡོན་ལྔ་སོགས་ཀྱིས་མཆོད་ཅིང་བསྟོད་པ་དང༌། ཁྱད་པར་སྐུ་གསུང་ཐུགས་ཀྱི་རྟེན་སོ་སོ་དང་འབྲེལ་བ་ཉེ་བར་མཁོ་བའི་ཡོ་བྱད་དང༌། སྦྱིན་སྲེག་གམ་ཙཱ་རུའི་བཟའ་བ་ཞེས་པ་ལྷའི་ཟས་སུ་གྲགས་པ་དང༌། རབ་གནས་ཀྱི་སྔགས་དང་བཀྲ་ཤིས་ཀྱི་མངའ་དབུལ་བ་རྣམས་ལ་མངའ་དབུལ་རྣམ་པ་བཞིར་གྲགས་པས་མངའ་གསོལ་ཞིང༌། རང་གི་དམ་ཚིག་བཞིན་ཏུ་འཁོར་བ་ཇི་སྲིད་བར་རྟེན་དེ་ལ་བཞུགས་སུ་གསོལ་བས་རབ་ཏུ་གནས་པ་དངོས་གཞི་སྟེ་དེ་དག་ནི་ཕུན་ཚོགས་སྤེལ་བར་བྱེད་པའི་ཆོ་གའོ། །བཅུ་པ་རྟེན་ཡེ་ཤེས་པའི་ངོ་བོར་བསྒྲུབས་པ་དེ་ཉིད་ལྷ་དང་བཅས་པའི་འགྲོ་བ་ཐམས་ཅད་ཀྱི་ཕྱག་གི་གནས། མཆོད་པའི་ཡུལ་བསོད་ནམས་ཀྱི་ཞིང་དུ་གྱུར་པའི་ཕྱིར། སྲུང་ཞིང་མཆོད་པ་པོ་མི་སྣང་བ་ལྷ་ལ་གཏོད་པ་རྡོ་རྗེའི་ཆོས་སྐྱོང་བ་རྣམས་ལ་མཆོད་གཏོར་ཕུལ་ཏེ་དམ་ཚིག་བསྒྲགས་ཤིང་གཉེར་གཏད་པ་དང༌། སྣང་བ་མི་ལ་གཏོད་པ་ཡོན་བདག་བསྒོ་ཞིང་ཞལ་བསྲོ་བའི་མཆོད་པ་ཕུལ། བཅུ་གཅིག་པ་སྦྱིན་བདག་ལྷར་བསྐྱེད་ཅིང་བགེགས་བསལ་ནས། བཀྲ་ཤིས་པའི་རྫས་བརྒྱད་གཏོད་པ་སྔོན་དུ་འགྲོ་བས་ཞལ་ནས་གསུངས་པའི་ཚིགས་བཅད་ཀྱིས་ཐོག་དྲངས་བཀྲ་ཤིས་པའི་བདེན་ཚིག་བརྗོད། དེས་ཀྱང་སློབ་དཔོན་ལ་གཏང་རག་གི་ཡོན་འབུལ་ཞིང་སློབ་དཔོན་གྱིས་དགེ་བ་རྫོགས་བྱང་དུ་བསྔོ་བ་དང་དཀྱིལ་འཁོར་གྱི་རྗེས་ཆོག་རྣམས་བྱས་པས་རྒྱུད་ཀྱི་དགོངས་པ་གྲུབ་པའི་མན་ངག་གིས་བཀྲལ་བའི་ཆོ་ག་རྒྱས་པར་གྲུབ་པ་ཡིན་ནོ། །གཉིས་པ་སྦྱིན་སྲེག་བཤད་པ་ལ་གསུམ། དགོས་པ། ཆོ་ག་དངོས། དེའི་འབྲས་བུའོ། །དང་པོ་ནི། ལྷ་རྣམས་ཚིམ་བྱེད་མཆོད་སྦྱིན་སྲེག་པའི་ལས༔ ཅེས་གསུངས་ཏེ། སམྦུ་ཊི་ལས། སྦྱིན་སྲེག་གིས་ནི་ལྷ་རྣམས་ཚིམས། །ཚིམས་པར་གྱུར་ལས་དངོས་གྲུབ་སྩོལ། །ཞེས་སོགས་རྒྱུད་རྣམས་ནས་རྒྱ་ཆེར་བསྔགས་པ་ལྟར་བསྒྲུབ་བྱའི་ལྷ་རྣམས་ཚིམས་ཤིང་དེ་ལས་གང་འདོད་པའི་དོན་ཐོགས་མེད་མྱུར་དུ་འགྲུབ་པར་བྱེད་པའི་ཕྲིན་ལས་ནི་མཆོད་སྦྱིན་གྱི་ཁྱད་པར་སྲེག་པ་མེའི་སྦྱོར་བ་ཡིན་ཏེ། དེའི་རྒྱུ་མཚན་དང་ཇི་ལྟར་བྱ་བའང་སྙིང་པོ་ལས། དབྱིབས་དང་ཁ་དོག་མཚན་ལྡན་པར། །ཞལ་དུ་གྱུར་པའི་མེ་བོས་ལ། །བཟའ་བཏུང་བྲོ་བའི་ཚོགས་རྣམས་ཀྱིས། །ལས་བཞིའི་མཆོད་པ་རབ་ཏུ་སྦྱིན། །ཅེས་པ་ལྟར་རོ།

།གཉིས་པ་ནི། དབྱིབས་དང་ཁ་དོག་ཚད་ལྡན་ཡོ་བྱད་བཤམ༔ འདུག་སྟངས་ཆས་གོས་བསམ་པ་རྩེ་གཅིག་པས༔ ལས་མཐུན་མེ་སྦར་སྲིད་ཞིའི་མེ་ལྷ་བསྐྱེད༔ མཉེས་བྱེད་འབུལ་ཞིང་ཏིང་འཛིན་སྤྲོ་བསྡུ་བཅས༔ ཞེས་གསུངས་ཏེ། དགོས་པ་དེ་ལྡན་གྱི་སྦྱིན་སྲེག་བྱ་བའི་ཡུལ་ནི་སྤྱིར་སེམས་ཅན་ཐམས་ཅད་དང༌། བྱེ་བྲག་གུད་དུ་ཕྱེ་ན། གནོད་སྡིག་ཅན་དང༌། དབུལ་ཕོངས་ཅན་དང༌། ལོག་ལྟ་ཅན་དང༌། གདུག་པ་ཅན་དང༌། སྒྲིབ་གཉིས་བག་ཆགས་རྣམས་སོ། །བྱེད་པའི་དུས་ནི། སྤྱིར་བསྙེན་སྒྲུབ་གྲུབ་པའི་རྗེས་དང་ས་ཆོག་སྐབས་པྲ་ངན་ན་ཞི་བ། རབ་གནས་ལ་རྒྱས་པ། དབང་སྐུར་བའི་གོང་དུ་དབང༌། སློབ་མ་སྟ་གོན་གྱི་རྨི་ལམ་ངན་པ་ལ་དྲག་པོ། མཆོད་བཤགས་སོགས་ལ་ལྷུན་གྲུབ་བྱ་བར་རྡོ་རྗེ་ལས་རིམ་སོགས་ལས་བཤད། བྱེ་བྲག་ཞི་རྒྱས་ལ་དཀར་ཕྱོགས་དང་སྲོད་སྔ་དྲོ། དབང་དྲག་ལ་དམར་ཕྱོགས་དང་དགོངས་མོ་གུང་གཉིས་སུ་བྱ་བར་གསུང༌། བྱ་བའི་ཕྲིན་ལས་ནི། ཐུན་མོང་ཞི་སོགས་ལས་བཞི་དང༌། ཐུན་མོང་མ་ཡིན་པ་མཆོག་སྒྲུབ་ལྷུན་གྲུབ་ཀྱི་ལས་སོ། །བྱ་བའི་ཐབས་ལ། ཕྱི་ནང་གསང་བ། ཡང་གསང་བཞི་ལས་དང་པོ་ལའང་སྦྱོར་དངོས་རྗེས་གསུམ་ཡོད་པའི་དང་པོ་སྦྱོར་བ་ནི། སའི་ཆོ་ག་རྒྱས་བསྡུས་ཇི་ལྟར་རིགས་པས་སྦྱངས་པའི་གཞིར། ལས་སོ་སོའི་དབྱིབས་དང་མཐུན་པའི་བརྐོས་ཐབ་བརྩིགས་ཐབ་བྲི་ཐབ་གང་ཡང་རུང་བ་ཞི་བ་ལ་དཀར་ཟླུམ་རྒྱར་ཁྲུ་གང་པ་རྡོ་རྗེས་མཚན་པ། རྒྱས་པ་ལ་སེར་པོ་གྲུ་བཞི་ཁྲུ་དོ་པ་རིན་ཆེན། དབང་ལ་དམར་པོ་ཟླ་གམ་མཛུབ་གང་བ་ལྕགས་ཀྱུ། དྲག་པོ་ལ་གྲུ་གསུམ་ནག་པོ་སོར་ཉི་ཤུ་པ་རལ་གྲི། ལྷུན་གྲུབ་ལ་ཞི་བ་དང་འདྲ་བ་ལས་འཁོར་ལོས་མཚན་པ་སྟེ། ཐམས་ཅད་ཀྱང་དཔངས་སུ་རང་གི་ཕྱེད་ཚད་དང་སོར་བཞི་པའི་ཁ་ཁྱེར་མུ་རན་དང་བཅས་པས་བསྐོར་བ། བསྲེག་རྫས་ནི་ཞི་བ་ལ་ཏིལ་ཡུངས། རྒྱས་པར་དཱུརྦ་ནས་འབྲས། དབང་ལ་མྱོས་བྱེད་ཟས་མཆོག་གཙོར་གྱུར་པའི་རྫས་ཆེན་བཅུ་གཅིག་ཏུ་གྲགས་པ་དང༌། དྲག་པོར་དུག་ཁྲག་ལིངྒ་ལན་ཚ་ཐུན་རྫས་ལ་སོགས་པ་མཆོག་ལ་ཞི་རྒྱས་ཀྱི་རྫས་ཀུན་འཚོགས་པ། དེ་དག་གི་ཁ་དོག་དཀར་སེར་དམར་ནག་ལས་མཐུན་བསྒྱུར་ཅིང༌། སྣོད་ཀྱང་དངུལ་ཤེལ་དུང་སོགས་དཀར་པོ་ལས་གྲུབ་པའི་ཟླུམ་པོས་མཚོན་སོ་སོ་བ་དང༌། དགངས་བླུགས་ཚད་ལྡན་སོགས་ཡོ་བྱད་མ་ཚང་བ་མེད་པ་ཕྱག་ལེན་ལྟར་བཤམ། དངོས་གཞི་སློབ་དཔོན་མཐུན་པའི་སྟན་ལ་ཞི་བ་ལ་པདྨའི་སྟབས། རྒྱས་པ་ལ་བཟང་པོའི་སྟབས། དབང་ལ་སྐྱིལ་ཀྲུང༌། དྲག་པོ་ལ་ཙོག་པུའི་འདུག་སྟངས་ཀྱིས་ཞི་བ་ལ་ཤར། རྒྱས་པར་བྱང༌། དབང་ལ་ནུབ། དྲག་པོར་ལྷོར་བལྟས་ཏེ་འཁོད། ཞི་བར་གོས་དཀར་པོ་གྱོན་ཅིང་དུང་ཤེལ་གྱི་རྒྱན་གདགས་པ་སོགས་ལས་དང་རྗེས་སུ་མཐུན་པའི་ཆས་གོས་བསྟར། བསམ་པའམ་གཙོ་སེམས་ལ་གཉིས་ཀྱི། དོན་གྱི་སེམས་ནི། དེ་ཁོ་ན་ཉིད་རྟོགས་པའི་ཤེས་རབ་དང༌། བྱང་ཆུབ་ཀྱི་སེམས་ཀྱིས་ཟིན་པ་ནི་ལས་ཐམས་ཅད་ལ་ཁྱབ་བྱེད་དུ་དགོས་པ་རྒྱུའི་སེམས་སོ། །སྟངས་ཀྱི་སེམས་ནི། ལས་བཞིས་ཀུན་ནས་སློང་བའི་བསམ་པ་སྟེ། ཞི་བ་ལ་ཞི་ཞིང་དྭངས་པ། རྒྱས་པ་ལ་སྤྲོ་ཞིང་དགའ་བ། དབང་ལ་ཆགས་ཤིང་ཞེན་པ། དྲག་པོ་ལ་ཞེ་སྡང་ཁྲོས་པའི་སེམས་ཀྱིས་ཏེ། ལས་སོ་སོའི་མཐུན་པའི་གྲོགས་བྱེད་པས་ན་རྐྱེན་གྱི་སེམས་ཞེས་ཀྱང་ཟེར་ཏེ་དེ་དག་གི་སེམས་རྩེ་གཅིག་པས་འཇུག

།ཆོ་གའི་རིམ་པ་བདག་གི་རྣལ་འབྱོར་བཟླས་པ་བསྡུ་ལྡངས་བཅས་གྲུབ་ནས་མཆོད་སྲེག་གི་རྫས་བྱིན་བརླབ། ལས་མཐུན་གྱི་ཐབ་ཁུང་བསྐྱེད་ནས་ཞི་བ་ལ་བཙུབ་ཤིང་གི་མེ། རྒྱས་པ་ལ་རཏྣ་ལས་བྱུང་བ། དབང་ལ་སྨད་འཚོང་མའི། དྲག་པོ་ལ་གདོལ་ཤན་ནམ་རོ་བསྲེགས་པའི་མེ་དུ་བ་མེད་པས་སྦར་བའི་འཇིག་རྟེན་སྲིད་པའི་མེ་ལྷ་བསྐྱེད་བསྟིམས་ཕྱག་མཆོད་བྱས་ནས། དགང་བླུག་ཡམ་ཤིང་བསྲེག་རྫས་ཕུལ་བས་མེའི་ལས་ཀྱིས་མེ་ལྷ་ཚིམས་པས་དེས་དཀྱིལ་འཁོར་གྱི་ལྷ་རྣམས་ཚིམས་པའི་དགོས་པ་ཡོད་དེ། ལྷ་རྣམས་ཞལ་ནི་མེ་ཡིན་ཏེ། །སྦྱིན་སྲེག་དེ་ནི་མེ་ལ་གནས། ཞེས་པ་ལྟར་ཏེ། དཔེར་ན་ཟས་ཟོས་པས་ལུས་ཀྱི་ལང་ཚོ་བརྟ་བར་བྱེད་ཅིང༌། དེའི་མཐུས་དེ་ལ་བརྟེན་པའི་སྐྱེ་མཆེད་རྣམས་རྒྱས་པར་བྱེད་པ་བཞིན་ནོ། །དེ་ནས་ཞི་བ་འཇིག་རྟེན་ལས་འདས་པའི་མེ་ལྷ་ནི། གཞུང་སོ་སོའི་དགོངས་པས་མེ་ལྷའི་ལྟོ་བར་བསྐྱེད་པ་དང༌། སྙིང་གར་བསྐྱེད་པ་དང༌། རང་བཞིན་མེ་ལྷ་ཐབ་ཀྱི་ཤར་ལྷོར་བཞག་སྟེ། དམ་ཚིག་པ་མེར་བསྒྱུར་བའམ། དམ་ཡེ་དབྱེར་མེད་དུ་འབར་བའི་རྣམ་པར་བསྒྱུར་བའི་དབུས་སུ་བསྐྱེད་པ་སྟེ་ལུགས་བཞི་ཡོད་པས་རང་རང་གི་ལུགས་ལྟར་བྱས་ལ་དམ་ཚིག་གི་དཀྱིལ་འཁོར་བསྐྱེད་ཅིང་གནས་གསུམ་བྱིན་གྱིས་བརླབས་ཏེ། ཡེ་ཤེས་པ་སྤྱན་དྲངས་ནས་གཉིས་སུ་མེད་པར་གྱུར་པ་ལ་མཆོད་ཅིང་བསྟོད་དེ་ལྗགས་དང་གཟར་བུ་བྱིན་གྱིས་བརླབ། དགང་བླུགས་ཡམ་ཤིང་མར་ཁུ་བསྲེག་རྫས་སྤྱི་དང་ཁྱད་པར་མཉེས་བྱེད་དུ་གྱུར་པ་རྣམས་རྩ་སྔགས་ལ་སྤེལ་ཚིག་མཐར་ལས་སྐུལ་བའི་ས་བོན་སོ་སོ་བཏགས་པས་འབུལ་ཞིང་ཡེ་ཤེས་ཀྱི་བདུད་རྩི་ལས་བཞི་གང་ཡིན་གྱི་ཁ་དོག་ཅན་གྱི་ངོ་བོར་དྭངས་པ་གསོལ་བར་བསམས་ལ་ཕྲིན་ལས་བཅོལ། མཆོད་བསྟོད་འདོད་དོན་གསོལ་བས་ལྷ་རྣམས་ཀྱི་སྐུ་ལས་འཕྲོས་པའི་འོད་ཀྱིས་ལས་གང་ཡིན་སྒྲུབ་པར་མོས་པའི་ཏིང་ངེ་འཛིན་གྱི་སྤྲོ་བསྡུའང་བྱ་སྟེ། ཞི་བ་ལ་འོད་ཟླ་ཟེར་ལྟ་བུ་འཕྲོས་པས་ནད་གདོན་སྡིག་སྒྲིབ་རྣམས་སྦྱངས། རྒྱས་པ་ལ་འོད་ཟེར་གསེར་མདོག་ཉི་ཟེར་ལྟ་བུའི་རྩེ་ལས་རིན་པོ་ཆེ་འཆར་བབས་པས་དབུལ་བ་བསལ། དབང་ལ་འོད་ཟེར་དམར་པོ་ལྕགས་ཀྱུ་ལྟ་བུས་བསྒྲུབ་བྱའི་སྙིང་ནས་དྲངས་ཏེ་བདག་ལ་འདུད་ཅིང་དབང་དུ་གྱུར། དྲག་པོ་ལ་མེ་ལྕེའམ་འོད་ཟེར་མཚོན་ཆ་ལྟ་བུའི་རྩེ་ལས་མཚོན་ཆའི་ཆར་བབས་པས་དགྲ་བགེགས་རྣམས་བརླག་པར་བྱེད། ལྷུན་གྲུབ་ལ་འོད་ཟེར་སྣ་ལྔའི་རྩེ་ལས་བདུད་རྩིའི་བུམ་པ་ཐོགས་པའི་སངས་རྒྱས་ཚད་མེད་པས་དབང་བསྐུར་ཞིང་བྱིན་གྱིས་བརླབས་པར་བསམ། ནོངས་པ་བཤགས་ཏེ། རླུང་ནང་དུ་འཇུག་པ་དང་ལྷན་ཅིག་ལྷ་ཚོགས་རྣམས་མི་ཤིགས་པའི་ཐིག་ལེར་བསྡུ། སླར་བླུགས་གཟར་ཕུལ་བས་མེ་ལྷ་གསལ་བཏབ་སྟེ་མཆོད་སྲེག་གི་རྫས་ཕུལ། བསྟོད་པ་གཏོར་འབུལ་ཕྲིན་བཅོལ་གཤེགས་གསོལ་སྨོན་ལམ་ཤིས་བརྗོད་དང་བཅས་པ་བྱ། རྗེས་ནི་མེ་རྣམས་རང་ཞིའམ། ཡང་ན་ཞི་བ་འོ་མ། རྒྱས་པ་དྲི་སེར་པོའི་ཆུ། དབང་ཆང༌། དྲག་པོ་དུག་ཆུ། མཆོག་དྲི་དང་འོ་མ་རྣམས་ཀྱིས་གཞིལ་ཏེ། ཐལ་སོལ་རྣམས་རིམ་བཞིན་འབབ་ཆུར་སྐྱེལ་བ་དང༌། བང་མཛོད་དུ་སྦ་བ་དང༌། རི་རྩེའམ་ཆུར་སྦྱང་བ་དང༌། གཞི་མདོར་གནོན་པ་དང༌། མཆོག་ནི་ཆ་གཅིག་འབབ་ཆུར་གཤེགས་ཤིང་ཆ་གཅིག་གཏེར་དུ་སྦའོ། །ཞར་བྱུང་ནང་གི་སྦྱིན་སྲེག་ནི། རང་ལུས་ལྷར་གསལ་བའི་སྐུའི་ནང་དུ་དཔའ་བོ་དང་མཁའ་འགྲོ་ཏིལ་གྱི་གོང་བུ་ལྟར་བཞུགས་པ་ལ་ཁ་ཟས་བདུད་རྩིར་སྦར་བ་ལྟེ་བའི་ཐབ་ཁུང་དུ་ལག་པའི་དགང་བླུགས་ཀྱིས་ཕུལ་བ་ཉིད་གཏུམ་མོའི་མེས་ཞུ་བའི་དྭངས་མས་ལྷ་རྣམས་ཚིམ་ཞིང་སྙིགས་མ་ཐལ་བར་སྦྱངས་པར་བསམ་སྟེ་རླུང་ཁ་སྦྱོར་དུ་འཆིང་བའོ། །གསང་བའི་སྦྱིན་སྲེག་ནི། རང་ལྷར་གསལ་བའི་སྐུ་ལ་རྩ་གསུམ་འཁོར་ལོ་བཞི་གསལ་བཏབ་པའི་འཁོར་ལོ་དང་རྩ་ཁམས་ཐམས་ཅད་ལ་རྒྱལ་བ་ཏིལ་གྱི་གང་བུ་ལྟར་བཞུགས་པར་མོས་ཏེ། བདེ་བ་བསྐུལ་ནུས་པའི་རླུང་གིས་གཏུམ་མོ་སྦར་བས་སྤྱི་བོའི་ཧཾ་བཞུ་བའི་བདུད་རྩིའི་དྭངས་མས་ལྷ་ཐམས་ཅད་ཚིམ་པར་བསམ་ཞིང༌། ཞུ་བདེས་དྲངས་པའི་བདེ་སྟོང་གི་ངང་མདངས་བསྐྱངས་བའོ། །ཡང་གསང་མཆོག་གི་སྦྱིན་སྲེག་ནི། བདག་མེད་རྟོགས་པའི་ཡེ་ཤེས་ཀྱི་མེས་མ་རིག་བག་ཆགས་ཀྱིས་བསྡུས་པའི་རྟོག་ཚོགས་ཐམས་ཅད་བསྲེགས་པའི་ཟུང་འཇུག་བདེ་ཆེན་གྱི་བདུད་རྩིས་འཁོར་འདས་རོ་མཉམ་དཀྱིལ་འཁོར་གྱི་འཁོར་ལོར་དག་པ་ཉིད་འཁོར་གསུམ་མི་དམིགས་པའི་དབྱིངས་སུ་མཆོད་པའོ། །གསུམ་པ་ནི། རྣོ་ལ་ངར་གྱིས་གདགས་པ་ཇི་བཞིན་དུ༔ སྔགས་ཀྱི་ལྷག་ཆད་སྐོང་ཞིང་དངོས་གྲུབ་སྟེར༔ ལས་བཞིའི་བྱེ་བྲག་འབད་པ་མེད་པར་འགྲུབ༔ ཅེས་གསུངས་ཏེ། དེ་ལྟར་བྱས་པའི་ཡོན་ཏན་ནི། མཚོན་རྣོན་པོ་ལ་སླར་ཡང་ངར་གྱིས་གདགས་པ་ཇི་ལྟ་བ་བཞིན་དུ་སྤྱིར་བསྙེན་སྒྲུབ་སྐབས་སུ་སྔགས་བཟླས་པ་རྣམས་ཀྱི་ལྷག་ཆད་ཁ་སྐོང་ཞིང་ཡིད་ལ་འདོད་པའི་དངོས་གྲུབ་མྱུར་དུ་སྟེར་བར་བྱེད་པ་དང༌། ནད་གདོན་ཞི་ཞིང་ཚེ་བསོད་འཕེལ་བ་སོགས་ཕྲིན་ལས་བཞིའི་དགོས་པ་བྱེ་བྲག་པ་རྣམས་ཀྱང་འབད་པ་དང་དཀའ་བ་མེད་པར་འགྲུབ་སྟེ། དཔལ་ཁ་སྦྱོར་ལས། གང་ཞིག་སྔགས་ཀྱི་ལྷག་ཆད་དང༌། །དེ་ཀུན་སྦྱིན་སྲེག་གིས་ནི་དགང༌། །ཞེས་དང༌། ཕྱག་ཆེན་ཐིག་ལེར། གང་ཞིག་ཡིད་ལ་ཅི་བསམ་པ། །དངོས་གྲུབ་ཆེན་པོ་མཐའ་ཡས་སྟེར། །རེ་བ་ཐམས་ཅད་འགྲུབ་བྱེད་པ། །དེ་ལྟའི་སྦྱིན་སྲེག་བདག་གིས་གསུངས། །ཞེས་སོ།

།གསུམ་པ་བཅུད་ལེན་ལ་གཉིས། དགོས་པ་བསྟན། བཅུད་ལེན་དངོས་བཤད་པའོ། །དང་པོ་ནི། རྡོ་རྗེའི་རྟེན་མཆོག་ཡུན་དུ་གནས་པའི་ཐབས༔ ཚེ་དང་ལུས་ཀྱི་བཅུད་ལེན་སྒྲུབ་པ་ནི༔ ཞེས་གསུངས་ཏེ། ཛམ་གླིང་ལས་ཀྱི་ས་པར་སྐྱེས་ཤིང་ཁམས་དྲུག་དང་ལྡན་པའི་རྡོ་རྗེའི་ལུས་ཚེ་གཅིག་གིས་སངས་རྒྱས་སྒྲུབ་པར་ནུས་པའི་དལ་རྟེན་མཆོག་འདི་ཡུན་རིང་དུ་འཚོ་ཞིང་གནས་པར་བྱེད་པའི་ཐབས་ལ་འབད་དགོས་པ་ནི། པཎ་ཆེན་ངག་དབང་གྲགས་པས། འཚོ་བ་ལས་གཞན་སྙིང་པོ་ནི། །འཁོར་བར་ཅུད་ཟད་མ་མཐོང་ངོ༌། །དེ་ཕྱིར་མྱུར་དུ་ཐབས་མང་པོས། །འཆི་བ་བསླུ་བར་བརྩམ་པར་བྱ། །ཞེས་གསུངས། དེས་ན་འཆི་བ་མེད་པའི་ཚེ་དང་རྒ་བ་མེད་པའི་ལུས་ཀྱི་བཅུད་ལེན་སྒྲུབ་པའི་ཐབས་ནི་འདི་ལྟ་སྟེ། གཉིས་པ་ལ་གསུམ། གང་ལ་བཅུད་དུ་ལེན་པའི་ཡུལ། གང་བཅུད་དུ་ལེན་པའི་དངོས་པོ། ཇི་ལྟར་ལེན་པའི་ཐབས་སོ། །དང་པོ་ནི། ཉམས་ཤིང་འཕོ་བའི་ཐིག་ལེ་བརྟེན་པར་བཅས༔ ཞེས་གསུངས་ཏེ། གསོ་བྱའི་ཚེ་ལ་རྣམ་གྲངས་མང་དུ་བཤད་པ་ལས་སྐབས་འདིར་བཅུད་ལེན་བྱ་བའི་ཡུལ་གཙོ་བོ་ནི་ཡུལ་སེམས་འདོད་པའི་ཚོར་བས་ཉམས་ཤིང་གཅིག་ཏུ་མི་བརྟན་པར་འཕོ་བའི་རྟེན་ཐིག་ལེ་དཀར་དམར་གྱིས་བསྡུས་པ་དང༌། དེ་ལ་བརྟེན་པའི་རླུང་སེམས་བཅས་ཉམས་ཤིང་འགྱུར་བ་ལས་ན་རྒ་འཆི་བའི་གནས་སྐབས་འབྱུང་བར་འགྱུར་བས་དེ་དག་བཅུད་ལེན་སོགས་ཀྱིས་རྒྱས་ཤིང་བརྟན་པར་བྱ་བའོ། །གཉིས་པ་ནི། འཁོར་འདས་བཅུད་ཀྱིས༔ ཞེས་གསུངས་ཏེ། གང་ཞིག་བཅུད་དུ་ལེན་པའི་དངོས་པོ་ལ་གཉིས་ཏེ་འཁོར་བའི་བཅུད་རྫས་ལ་བརྟེན་པ་དང༌། མྱང་འདས་ཀྱི་བཅུད་རླུང་རིག་ལ་གཙོ་བོར་བརྟེན་པའོ། །དང་པོ་ལ་ཕྱི་འབྱུང་བ་ལྔ། སྨན་དང་རྩི་ཤིང༌། གྲུབ་པའི་དངུལ་ཆུ། ནང་རང་བྱུང་གི་བདུད་རྩི་གཉིས་སོགས་བཅུད་ལེན་གདམས་པ་བརྒྱ་རྩར་གྲགས་པས་མཚོན་རྒྱུད་དང་གྲུབ་པའི་མན་ངག་ལས་མཐའ་ཡས་པ་འབྱུང་བ་རྣམས་ཏེ། རྟག་ངུའི་བཅུད་ལེན་ཁོ་ན་ལའང་ཉང་གཏེར་བདུད་རྩི་ཡེ་ཤེས་འོད་ལྡན་གྱི་རྒྱུད་ལས་རྒྱ་ཆེར་བཤད་པས་མཚོན་ནོ། །གཉིས་པ་ལ། སྲིད་ལས་འདས་པའི་བཅུད་མཆོག་བསོད་ནམས་ཀུན་གྱི་སྔོན་འགྲོ་དད་པ་རྣམ་གསུམ་བརྟན་པ་དང་བྱང་ཆུབ་ཀྱི་སེམས་རྣམ་པ་གཉིས་ལ་ནན་ཏུ་བྱ་བ་གཙོར་གསུངས་པ་དང༌། རྡོ་རྗེ་ཐེག་པའི་ལམ་ལས་ལྷག་པའི་ལྷའི་བསྐྱེད་བཟླས། མཚན་བཅས་རྫོགས་རིམ་རྩ་རླུང་ཐིག་ལེའི་རྣལ་འབྱོར་གྱིས་སྟེང་འོག་གི་སྒོ་ལ་བརྟེན་པའི་བཅུད་ལན་ཁྱད་པར་བ་རྣམས་དང་རྗེས་འབྲེལ་རྡོ་རྗེའི་བཟླས་པ། བྷྲཱུ་རླུང་གི་སྦྱོར་བ། ལྕེ་རྩེ་རྐན་སྦྱར། བདུད་རྩི་སྡུད་པ། ནམ་མཁར་བ་འཇོའི་བསམ་གཏན་ལ་སོགས་པ་རྣམས་དང༌། མཚན་མེད་རྫོགས་རིམ་རྣམ་པར་མི་རྟོག་པ་དང་ཟུང་འཇུག་འོད་གསལ་མངོན་སུམ་ལམ་དུ་བྱེད་པའི་བཅུད་ལེན་གྱིས་ཡེ་ཤེས་ཀྱི་ལང་ཚོ་བརྟས་པས་འཆི་བདག་གི་བདུད་བཅོམ་པར་འགྱུར་ཏེ། སློབ་དཔོན་ཆེན་པོ་ངག་དབང་གྲགས་པས། རྣམ་པ་ཀུན་གྱི་མཆོག་ལྡན་པའི། །སྟོང་ཉིད་འཛིན་པ་རྣམ་པར་སྤང༌། །སྟོང་པ་ཉིད་ནི་རྟག་བསྒོམས་པ། །འཆི་བ་ཡིས་ནི་མཐོང་མི་འགྱུར། ཅེས་སོ།

།གསུམ་པ་ནི། སྐྱེད་བསྲིང་མི་འགྱུར་སླད༔ ཏིང་འཛིན་གསལ་ཞིང་ཕོ་ཉ་བཏང་ལ་དགུག༔ མི་ཤིག་ཐིག་ལེར་རྒྱས་གདབ་བརྟན་པར་བྱ༔ ཞེས་གསུངས་ཏེ། བཤད་མ་ཐག་པའི་ཕྱི་སྲིད་པ་དང་འབྲེལ་བའི་བཅུད་ལེན་དེ་དག་སློབ་དཔོན་མཁས་པའི་ཕྱག་རྒྱུན་བཞིན་བསྟེན། ནང་ཞི་བའི་བཅུད་རྣམས་བླ་མའི་ཞལ་ལས་བླངས་ཏེ་ཉམས་སུ་བླངས་པས་ལུས་ཟུངས་ཀྱི་ལང་ཚོ་དང་ཚེ་སྲོག་གི་མྱུ་གུ་རིམ་པར་བསྐྱེད་བསྲིང་ཞིང་རྒྱས་པར་འགྱུར་ལ། དེ་ཉིད་བརྟན་ཅིང་མི་འགྱུར་བར་བྱ་བའི་སླད་དུ་ཐབས་མང་དཀའ་བ་མེད་པ་རྡོ་རྗེ་ཐེག་པའི་ཁྱད་ཆོས་འཆི་མེད་ཚེ་སྒྲུབ་ཀྱི་རྣལ་འབྱོར་ལ་འཇུག་པར་བྱ་སྟེ། དེའང་བདུད་རྩིའི་འཁྱིལ་བ་འཆི་མེད་ཚེའི་རྒྱུད་ལ་བརྟེན་པ་དང༌། རྒྱུད་ལུང་མན་ངག་གི་ཆོ་ག་སྤྱི་དང་ཁྱད་པར་ཟབ་གཏེར་མཁའ་འགྲོའི་ཁ་རླངས་མ་ཡལ་བའི་གདམས་ཟབ་ལ་བརྟེན་ཏེ་དཀྱིལ་འཁོར་བཞེངས་ཤིང་ཚེའི་རྟེན་བཅའ། བདག་མདུན་ཚེ་ལྷའི་ཏིང་ངེ་འཛིན་གསལ་ཞིང་ཚེ་འཛབ་བཟླས་པའི་མཐར་ཚེ་འགུགས་ཀྱི་ཕོ་ཉ་བཏང་ལ་བརྟན་གཡོའི་དྭངས་མ་བཅུ་བཞི་བསྒྲུབ་རྫས་དང་བསྒྲུབ་བྱར་དགུག་ཅིང་བསྟིམ། ཆོས་ཉིད་འོད་གསལ་བྱང་ཆུབ་ཀྱི་སེམས་མི་ཤིགས་པའི་ཐིག་ལེ་ཆེན་པོ་གདོད་ནས་སྐྱེ་འཆི་བྲལ་བའི་དབྱིངས་སུ་རྒྱས་གདབ་ལ་ནམ་ཡང་མི་འགྱུར་བར་རྟག་ཅིང་བརྟན་པར་བྱའོ། །འདིར་འཕྲོས་དོན་ཅུང་ཟད་སྨོས་པ་ལ་དྲུག །ལུས་སེམས་ཀྱི་ངོ་བོ། སྒྲ་དོན། མཚན་ཉིད། དབྱེ་བ། དེའི་དོན། བསྒྲུབ་བྱ། སྒྲུབ་བྱེད་ཀྱི་འབྲེལ་བསྟན་པའོ། །དང་པོ་ནི། ཚེ་སྲོག་གི་ངོ་བོ་རྣམ་ཤེས་དྲོད་དང་བཅས་པ་རྒྱུན་ཆགས་སུ་གནས་པའི་རྟེན་མི་ལྡན་པའི་འདུ་བྱེད། ལུས་ཀྱི་ངོ་བོ་འབྱུང་ལྔ་བདེ་བ་བཅས་ཁམས་དྲུག་འདུས་པ་རགས་པའི་གཟུགས་ཅན་ནོ། །གཉིས་པ་ནི། ཨཱ་ཡུཿའི་སྒྲ་འགྲོ་བའི་དུས་སྐབས་ལ་འཇུག་པས་ལས་ཀྱིས་འཕངས་པའི་འཚཽ་བའི་དུས་ཇི་སྲིད་དུ་འགྲོ་བས་ཚེ་དང༌། པྲཱ་ཎའི་སྒྲ་རབ་ཏུ་འགྲོ་བའི་དོན་ལས་གསོན་པའི་དུས་དེ་སྲིད་དུ་རྗེས་སུ་འགྲོ་བས་སྲོག་སྟེ། དེ་གཉིས་ངོ་བོའི་ཆ་ནས་དབྱེ་བ་བྱར་མེད་ཀྱང་རྟེན་དང་བརྟེན་པར་འབྲེལ་བའི་ལྡོག་ཆའི་རྣམ་པ་ཙམ་ལས་བཏགས་པའོ། །ཀཱ་ཡའི་སྒྲ་བསགས་པ་ཕུང་པོ་གནས་སོགས་ལ་འཇུག་པས་འབྱུང་བ་བསགས་པའི་ཕུང་པོ་ངག་ཡིད་ཀྱི་གནས་སུ་གྱུར་པས་ལུས་སོ། །གསུམ་པ་ཚེ་སྲོག་གི་མཚན་ཉིད་ནི། ལས་ཀྱི་རྣམ་པར་སྨིན་པས་ཇི་སྲིད་འཕངས་པ་དེ་སྲིད་དུ་གནས་པའི་དུས་སྐབས་ལ་སྤྱོད་པ། ལུས་ཀྱི་མཚན་ཉིད་སེམས་ཡིད་རྣམ་ཤེས་གསུམ་རྟེན་པའི་བྱ་བ་ཅན་ནོ། །བཞི་པ་ནི། རྒྱུད་ལས། མི་འགྱུར་རྟག་པ་གཉུག་མའི་ཚེ། །ཉམས་ཤིང་འཕོ་བ་ཐིག་ལེའི་ཚེ། གློ་བུར་ལྟར་སྣང་སྲོག་གི་ཚེ། །ཞེས་དབྱེ་བ་གསུམ་དུ་གསུངས་ཤིང༌། ལུས་ནི་ཁམས་གསུམ་དང་རིགས་དྲུག་གི་རྟེན་སོ་སོ་བ་རྣམས་སོ། །ལྔ་པ་ནི། དྲངས་མ་ཐག་པའི་ལུང་དོན་དང་པོ་ནི། སེམས་ཅན་ཀུན་གྱི་རྒྱུད་ལ་དུས་གསུམ་དུ་མི་འགྱུར་བ་རྟག་གཙང་བདེ་བ་བདག་དམ་པའི་རང་བཞིན་ཏུ་གཤིས་སམ་གཉུག་མར་བཞུགས་པ་ཆོས་ཉིད་མི་ཤིགས་པའི་ཐིག་ལེ་ནི་འཆི་མེད་རྟག་པའི་ཚེ་སྒྲུབ་པའི་གཞིར་གྱུར་པ་དང༌། དེའི་རང་མདངས་དབུ་མའི་ཡར་མར་དུ་གནས་པའི་དཔྱིད་ཐིག་གཉིས་དང་རྗེས་འབྲེལ་འཁོར་ལོ་དྲུག་གི་ཐིག་ལེ་བདག་པོར་གྱུར་པའི་དྭངས་མ་བཅུ་གཉིས་དང་སྙིགས་མ་ཉེར་བཞི་སོགས་འབབ་ཅིང༌། དེ་དག་ཀྱང་ཡེ་ཤེས་དང་རྗེས་སུ་འབྲེལ་བར་འཁོར་ལོ་བཞིར་དགའ་བཞིའི་འགྲོས་ཀྱིས་འཕོ་བ་དང༌། རྣམ་ཤེས་དང་རྗེས་སུ་འབྲེལ་བར་ལུས་ལ་ཟུངས་སམ་གནད་ཀྱི་ངོ་བོ་ཉིད་དུ་འཕོ་བ་བླ་གནས་ཞེས་གྲགས་པ་སྟེ། དེ་དག་ཇི་སྲིད་རང་གནས་ལས་མི་གཡོ་ཞིང་སྟོབས་མ་ཉམས་པ་དེ་སྲིད་དུ་འཚོ་བ་བརྟན་པོར་འགྱུར་བས་ཐིག་ལེའི་ཚེ་ནི་བསྒྲུབ་བྱའི་གཙོ་བོ་དང༌། ཐོག་མར་ལུས་རྟེན་རྩའི་གཙོ་མོ་ཆགས་པའི་ཚེ་གློ་བུར་རྟེན་ཅིང་འབྲེལ་བ་ལྟར་སྣང་ཞིང་གདོས་བཅས་རགས་པ་དབང་རྟེན་ཁོག་པ་དང་བཅས་པ་རྣམ་པར་ཤེས་པས་ཡོངས་སུ་བཟུང་བ་མི་འབྲལ་བའི་ཟུངས་སུ་གྱུར་པས་སྔ་མ་རྟེན་དང་བརྟེན་པར་འབྲེལ་བ་སྲོག་གི་དབང་པོའི་ཚེ་ནི་ཁྱད་པར་གྱི་བསྒྲུབ་བྱ་ཡིན་ནོ། །དྲུག་པ་ལ། དང་པོའི་སྒྲུབ་བྱེད་ཀྱི་འབྲེལ་ནི། ཆོས་ཉིད་ཀྱི་རང་བཞིན་གདོད་ནས་འགྱུར་མེད་དུ་གྲུབ་པ་ལི། འགྱུར་བ་ལྟར་སྣང་གློ་བུར་འཕོ་བའི་དྲི་མ་གསལ་བས་གནས་ལུགས་མངོན་ཏུ་འགྱུར་བའི་ཕྱིར། སྒྲུབ་བྱེད་འཇིག་རྟེན་ལས་འདས་པ་ཡེ་ཤེས་ཆེན་པོའི་བཅུད་ལེན་རྣམ་ཐར་སྒོ་གསུམ་དང་རྗེས་སུ་འབྲེལ་བའི་ཏིང་ངེ་འཛིན་ལ་གནས་དགོས་པ་དང༌། བར་པ་ལ་འཕོ་བའི་བྱེད་པ་རླུང་སེམས་ཡིན་པས་ཐབས་ལམ་ཟབ་མོས་དེ་དག་གི་བྱེད་པ་འཛག་མེད་དུ་བཅིང་ཞིང་གནས་སྐབས་ཐབས་ཀྱི་ཁྱད་པར་རྫས་ཀྱི་བཅུད་ལེན་མན་ངག་ལྟར་བརྟེན་པས་རྟེན་ཀུན་རྫོབ་ཀྱི་དྭངས་མ་རྒྱས། དེས་བརྟེན་པ་བདེ་ཆེན་གྱི་ཡེ་ཤེས་འཕེལ་བར་འགྱུར་བ་དང་གསུམ་པ་གཙོ་བོར་ད་ལྟའི་ལས་ཀྱི་རྗེས་སུ་འགྲོ་ལྡོག་བྱེད་པར་བཤད་པས་སྲོག་གཅོད་སྤང་ཞིང་སྲོག་བསླུ་བས་མཚོན་བསོད་ནམས་མ་ཡིན་པ་སྤང་ཞིང་བསོད་ནམས་ཅི་ནུས་བསགས་པ་དང༌། སྔགས་ཀྱི་ཐབས་མཁས་རྡོ་རྗེ་ཚེ་སྒྲུབ་པའི་ཆོ་ག་རྣམས་ཀྱིས་སྲོག་གི་ཀ་བ་བརྟན་ཅིང་དེ་ལ་བརྟེན་པའི་ཚེ་ཡུན་རིང་དུ་གནས་པར་བྱེད་དོ། །བཞི་པ་གནས་ལུང་ལ་གཉིས། དགོས་པ་བསྟན། གནས་ལུང་དངོས་བཤད་པའོ།

།དང་པོ་ནི། སྙིང་རྗེའི་ཡུལ་གྱུར་སྲིད་པ་བར་མའི་འགྲོ༔ ངོ་མཚར་ཐུགས་རྗེས་ངན་འགྲོ་ཐར་པའི་ཐབས༔ གནས་ནས་སྤར་ཞིང་ལམ་ལྔ་རྫོགས་པའི་ལུང་༔ ཞེས་གསུངས་ཏེ། ཚེ་འདིའི་སྣང་བ་ནུབ་ནས་གདོས་བཅས་ཀྱི་རྟེན་དང་བྲལ། རྣམ་པར་ཤེས་པ་ལས་ཀྱི་རླུང་གིས་བདས་ཏེ་འཇིགས་པའི་སྒྲ་བཞི་ཡ་ང་བའི་གཡང་ས་གསུམ་སོགས་ལོག་པའི་འཁྲུལ་སྣང་དུ་མ་དང་བཅས་སྐྱབས་བྲལ་གཏད་མེད་དུ་འཁྱམས་པས་སྙིང་རྗེའི་ཡུལ་དུ་གྱུར་པ། མ་ངེས་པའི་རྟགས་དྲུག་དང་ལྡན་པའི་སྲིད་པ་བར་མ་དོའི་འགྲོ་བ་རྣམས་རྟ་ཁ་སྲབ་ཀྱིས་བསྒྱུར་བ་ལྟར་ཁ་ལོ་སྒྱུར་སླ་བ་ཡིན་པས། སངས་རྒྱས་རྣམས་ཀྱི་ངོ་མཚར་གསང་བའི་མཛོད་ཁང་ལས་བྱུང་བ་ཆོ་ག་དང་ཏིང་འཛིན་ཟབ་མོའི་ཐུགས་རྗེས་ངན་འགྲོའི་སྐྱེ་གནས་ལས་སྐྱོབ་ཅིང་མྱུར་དུ་ཐར་པ་ཞི་བ་ཐོབ་པའི་ཐབས་མཁས། རིགས་དྲུག་གི་གནས་ནས་རིམ་པར་དྲངས་ཏེ་སྦར་ཞིང་ལམ་ལྔ་གདན་ཐོག་གཅིག་ཏུ་རྫོགས་པར་བྱེད་པའི་གནས་ལུང་ཐུགས་རྗེའི་དཔྱང་ཐག་ནི་འདི་ལྟ་སྟེ། ཞེས་སོ། །འདིར་ཡང་འཕྲོས་དོན་ཅུང་ཟད་སྨོས་ན། བར་དོ་སྤྱིའི་ངོ་བོ་ནི། གཞི་དབྱིངས་ཀ་དག་གི་སྦུབས་ལས་ལྷུན་གྲུབ་སྣང་བའི་སྒོར་ཤར་བ་ཉིད་འཆར་གཞིའི་དབྱིངས་སུ་མ་རྫོགས་བར་གྱི་སེམས་པ་ས་བོན་དང་བཅས་པ་ཡིན་ལ། དེའང་གཞི་སྣང་ཡེ་ཤེས་སུ་ཤར་བའི་ཆ་ནི་དག་པ་ཆོས་ཉིད་ཀྱི་བར་དོ་དང༌། འཁྲུལ་སྣང་འགྲོ་དྲུག་གིས་བསྡུས་པའི་ཆོས་རྣམས་ནི་མ་དག་འཁྲུལ་པའི་བར་དོ་ཞེས་བཏགས་པར་བཤད་དོ། །བྱེ་བྲག་སྲིད་པ་བར་དོ་ནི། ལྷུན་གྲུབ་ཀྱི་སྣང་བ་ཐིམ་ནས་ཕྱི་མའི་སྐྱེ་སྲིད་མ་གྲུབ་པ་ཚུན་ཏུ་བག་ཆགས་ལས་རྫུས་སྐྱེས་ཀྱི་ལུས་རྟེན་རྨི་ལམ་ལྟ་བུར་སྣང་བའོ། །ངེས་ཚིག་ནི། སྤྱིར་འཁྲུལ་གྲོལ་གྱི་བར་ན་གནས་པ་དང༌། བྱེ་བྲག་ཆོས་ཉིད་ཀྱི་སྣང་བ་ནུབ་ནས་རིགས་དྲུག་གི་ལུས་དངོས་མ་བླངས་པའི་བར་གྱི་སྣང་བ་ལ་གནས་པ་དང༌། འཁྲུལ་གྲོལ་དང་རྟེན་མཐོ་དམན་ཅིར་ཡང་འགྱུར་སྲིད་པས་བར་སྲིད་ཅེས་བྱའོ། །དབྱེ་བ་ནི། ཐལ་འགྱུར་ལས་སྐྱེ་འཆིའམ་རང་བཞིན་གྱི་བར་དོ། །འཆི་ཁའི་བར་དོ། །ཆོས་ཉིད་ཀྱི་བར་དོ། །སྲིད་པའི་བར་དོ་བཞིར་གསུངས་པ་ལས་འདིར་གནས་ལུང་བྱ་བའི་ཡུལ་སྲིད་པ་བར་དོའོ། །དེའི་མཚན་ཉིད་ནི། མཛོད་ལས། སྔོན་བྱུང་སྲིད་པའི་ཤ་ཚུགས་ཅན། །དབང་པོ་ཀུན་ཚང་ཐོགས་མེད་རྒྱུ། །ལས་ཀྱི་རྫུ་འཕྲུལ་ཤུགས་དང་ལྡན། །མི་ལྡོག་དེ་ནི་དྲི་ཟའོ། །ཞེས་དང༌། རྒྱུད་ཆེན་ཉི་ཟླ་ཁ་སྦྱོར་ལས་རྒྱ་ཆེར་གསུངས་པ་ལྟར་ཏེ། རིང་མཐའ་ཞག་ཞེ་དགུ། ཐུང་མཐའ་བདུན་ནམ་ཡུད་ཙམ་གནས་པའོ། །འདིའི་དུས་གཡུལ་ངོར་རྟ་ལས་ལྷུང་བ་འཛེགས་པ་ལ་རིང་བ་ལྟར་སྲིད་པ་ཕྱི་མ་ལ་རིང་ཞིང་ཕྱོགས་པས་དགེ་བའི་སྡོང་གདབ་པ་ལ་མྱུར་དུ་འབད་དགོས་པ་ཡིན་ནོ། །གཉིས་པ་གནས་ལུང་དངོས་ལ་གཉིས། མདོར་བསྟན། རྒྱས་བཤད་དོ།

།དང་པོ་ནི། ཡུལ་དང་ཐབས་དང་མཐར་ཕྱིན་བྱ་བ་སྟེ༔ ཞེས་གསུངས་ཏེ། གནས་ལུང་བྱ་བའི་ཡུལ་གསལ་གདབ་པ་དང༌། དེའི་སྡིག་སྒྲིབ་སྦྱོང་ཞིང་ཡོན་ཏན་ཡར་ལྡན་ཏུ་འཕེལ་བས་ལམ་ལྔ་བདེ་བླག་ཏུ་བགྲོད་པའི་ཐབས་དང༌། གནས་ལུང་མཐར་ཕྱིན་པའི་རྗེས་ཀྱི་བྱ་བ་སྟེ་གསུམ་གྱིས་བསྡུས་སོ། །གཉིས་པ་ལ་གསུམ། ཡུལ་གསལ་གདབ། སྒྲིབ་སྦྱོང་གནས་སྦར་གྱི་ཐབས། རྗེས་ཀྱི་བྱ་བའོ། །དང་པོ་ནི། རྟེན་བསྐྱེད་དགུག་བསྟིམ༔ ཞེས་པས་བསྟན་ཏེ། སློབ་དཔོན་གྱིས་ལྷ་གང་ལ་བརྟེན་པའི་བདག་མདུན་བུམ་པ་སྒྲུབ་པ་སོགས་རྒྱས་བསྡུས་ཅི་རིགས་པ་སོང་ནས། འཕགས་ཡུལ་བའི་ཡུལ་ཆོས་དང་མཐུན་པར་དཀྱིལ་འཁོར་ལྷོ་སྒོར་ཚེ་འདས་ཀྱི་དྲི་རྟེན་བཅས་པ་ལ་དམིགས་རྟེན་བྱས་ནས་གསོན་པོའི་གནས་སྐབས་ཇི་ལྟ་བར་བསྐྱེད་ཅིང་གསལ་གདབ། ཐུགས་ཀའི་འོད་ཟེར་གྱིས་བར་དོར་འཁྱམས་པའི་རྣམ་ཤེས་སྡིག་པ་དང་བཅས་པ་བཀུག་ནས་ཕྱག་རྒྱ་བཞིས་དབྱེར་མེད་དུ་བསྟིམས་ལ་མི་གཡོ་བར་བྱའོ། །གཉིས་པ་ནི། རྟེན་བསྐྱེད་དགུག་བསྟིམ་བར་ཆད་བགེགས་ཚོགས་སྦྱང་༔ རིགས་དྲུག་འཁོར་བའི་བག་ཆགས་ལ་བརྟེན་པའི༔ སྡིག་སྒྲིབ་ཐམས་ཅད་བསྲེག་གཏོར་ལྷག་མེད་བཀྲུ༔ རིག་འཛིན་གྲལ་དུ་རྡོ་རྗེའི་དབང་བསྐུར་ཞིང་༔ འདོད་ཡོན་རྒྱ་མཚོ་བདེ་ཆེན་སྤྲིན་དུ་སྤེལ༔ ཟབ་མོའི་ཆོས་བཤད་དག་པའི་ཞིང་ཁམས་སུ༔ དབུགས་དབྱུང་ལམ་ལྔ་ཡོངས་སུ་རྫོགས་པའི་ཕྱིར༔ ཀུན་ཏུ་འཆང་བ་ཆེན་པོའི་སྲས་སུ་བསྐྲུན༔ ཅེས་གསུངས་ཏེ། མཐོ་རིས་དང་ཐར་ལམ་གྱི་བར་ཆད་གསོན་པོའི་བདུད་དང་གཤིན་གྱི་ལྕགས་སུ་བྱེད་པའི་བགེགས་ཀྱི་ཚོགས་ལ་ཞི་བས་གཏོར་གླུད་སྦྱིན། ཞི་དྲག་ཕྱེད་མས་བཀའ་བསྒོ། མི་ཉན་པ་རྣམས་དྲག་པོའི་ཚམ་རྔམས་ཀྱིས་རྒྱང་རིང་པོར་བསྐྲད་ཅིང་ལྷག་མེད་དུ་སྦྱངས་ལ་སྲུང་བའི་གོ་བསྒོ་བ་ནི་ཚོགས་ཀྱི་ལམ་མོ། །ཐོག་མ་མེད་ནས་རིགས་དྲུག་གི་གནས་སུ་འཁོར་བ་ཁ་བརྒྱུད་པའི་ཚེ་མ་རིག་པའི་བག་ཆགས་ཚན་པོ་ཆེ་ལ་བརྟེན་ནས་ཡང་དང་ཡང་དུ་བསགས་པའི་སྡིག་ལྟུང་གི་ཕུང་པོ་ལས་ཀྱི་སྒྲིབ་པ་ལུས་དང་གྲིབ་མ་ལྟར་འགྲོགས་པས་འཁོར་བ་དང་ངན་སོང་གི་རྒྱུ་བྱེད་པའི་ཕྱིར་དེ་ཐམས་ཅད་སྤང་དགོས་ལ། སྦྱོང་བྱེད་སྔགས་རྒྱ། ཕྱིར་ཟློག །བུམ་ཁྲུས། བདེན་སྟོབས་སོགས་ཀྱིས་འབྲལ་བའི་ཐབས་མང་དུ་གསུངས་པ་ལས་གཙོ་བོར་ཀུན་འདུས་རིག་པའི་མདོ་སོགས་ལས་རྒྱ་ཆེར་བསྔགས་པའི་སྤྱི་ཁྲུས་ཏིང་འཛིན་རིག་རྩལ་གྱི་ཐབས་མཆོག །དམིགས་བྱའི་ལུས་ཀྱི་གནས་དྲུག་ཏུ་སྦྱང་བྱ་རིགས་དྲུག་གི་ས་བོན་རྩ་ཡིག་རང་ཆས་སུ་ཡོད་པ་དང་སྦྱོང་བྱེད་འབྲུ་གསུམ་ལྷན་ཅིག་པ་ཉིད་ཐུགས་ཀའི་འོད་ཀྱིས་སྦྱོང་བྱེད་བསྐུལ་བས་དེ་ལས་ཡེ་ཤེས་ཀྱི་རང་རྩལ་མེ་འབར་བས་སྦྱང་བྱ་བསྲེགས། རླུང་གཡོས་པས་ཐལ་བ་གཏོར། ཆུ་བྱུང་བས་དྲི་མའི་རྗེས་ཤུལ་ལྷག་མེད་དུ་བཀྲུ་བར་བྱེད་པ་ནི་སྦྱོར་ལམ་མོ། །རྒྱུད་རྣམ་པར་དག་པ་དེ་ཉིད་སར་གནས་རིག་འཛིན་གྱི་གྲལ་དུ་འགོད་པའི་ཕྱིར་ལྷ་དམ་ཚིག་པར་གསལ་བ་ལ་བུམ་པ་སོགས་དབང་བཞི་རྒྱས་པའམ་བསྡུས་པ་སྐུ་གསུང་ཐུགས་དབང་གིས་མཚོན་རྡོ་རྗེའི་གཏོར་བླུག་གི་ཆོ་གས་དབང་བསྐུར་ཞིང་རྒྱས་གདབ་པ་ནི་མཐོང་ལམ་མོ། །དེ་ལ་ཞལ་བསྲོ་བ་དང་བག་ཆགས་ཀྱི་ཞེན་འཁྲིས་བཅད་པའི་ཕྱིར་བཟའ་བཏུང་དངོས་སུ་བཤམས་པ་ལ་རྟེན་བྱས་ཏེ་རྣམ་པ་འདོད་པའི་ཡོན་ཏན་ལྔ་པོ་ཟད་མི་ཤེས་པའི་རྒྱ་མཚོ། ངོ་བོ་ཟག་མེད་བདེ་བ་ཆེན་པོའི་སྤྲིན་ཕུང་དུ་སྔགས་དང་ཕྱག་རྒྱས་སྤེལ་ནས་བསྔོ། འཁོར་བར་ཕྱིར་མི་ལྡོག་པའི་སླད་དུ་དེའི་ཉེས་སྐྱོན་དང་ཐར་པའི་ཡོན་ཏན་བསྔགས་པ་ལས་བརྩམ་ཟབ་མོའི་ཆོས་བཤད་ལ་རིགས་ལྔའི་གནས་སོགས་དག་པའི་ཞིང་ཁམས་སུ་ལམ་བསྟན་ཅིང་དབུགས་དབྱུང་བ་ནི་སྒོམ་པའི་ལམ་མོ། །ལམ་ལྔ་ཡོངས་སུ་རྫོགས་ཤིང་མཐར་ཕྱིན་པར་བྱ་བའི་ཕྱིར་རྣམ་པར་ཤེས་པ་དཀྱིལ་འཁོར་གྱི་གཙོ་བོ་ཀུན་ཏུ་འཆང་བ་ཆེན་པོ་ཡབ་ཡུམ་གྱི་ཐུགས་དང་དབྱེར་མེད་དུ་བྱས་ལ། དེས་ཀྱང་སྦྱོར་མཚམས་ནས་རྒྱལ་བའི་སྲས་སུ་བསྐྲུན་ཏེ་སངས་རྒྱས་ཀྱི་མཛད་པ་སྒྲུབ་པར་མོས་པ་ནི་མི་སློབ་པའི་ལམ་མཚོན་པའོ། །གསུམ་པ་ནི། སྙིགས་མ་ཡེ་ཤེས་མེས་སྦྱང་སྐུ་གདུང་གདབ༔ འགྲོ་དོན་ཕྲིན་ལས་རྒྱུན་མི་འཆད་པར་བྱ༔ ཞེས་གསུངས་ཏེ། དྭངས་མའི་རྣམ་ཤེས་གནས་སྤར་བའི་སྙིགས་མ་ཕུང་པོ་བག་ཆགས་ཀྱི་རྟེན་ཤུལ་དུ་ལུས་པ་དེ་ཉིད་དཀྱིལ་འཁོར་བའི་ཐུགས་ལས་སྤྲོས་པའི་ཡེ་ཤེས་ཀྱི་མེས་བསྲེགས་ཤིང་སྦྱངས་པས་ལྷག་མེད་དུ་བྱེད་པ་ནི་རང་དོན་ཆོས་སྐུ་བརྙེས་པ་དང༌། བྱང་ཐལ་དྲི་

བཟང་ཆུ་འཇིམ་པ་དང་བསྲེས་པས་སྐུ་གདུང་སཱཙྪ་ཆོ་ག་བཞིན་གདབ་པ་ནི་གཞན་དོན་གཟུགས་སྐུ་འབྱུང་བའི་རྟེན་འབྲེལ་ཡིན་ལ། དེ་ལྟར་ན་ལམ་ལྔ་ཡོངས་སུ་རྫོགས་ཤིང་དོན་གཉིས་ལྷུན་གྱིས་གྲུབ་པའི་གོ་འཕང་བརྙེས་པས། འགྲོ་བའི་དོན་ནམ་མཁའ་དང་མཉམ་པར་མཛད་པའི་ཕྲིན་ལས་རྒྱུན་མི་འཆད་པར་འབྱུང་བའི་ཐབས་ཟབ་མོ་རྒྱུད་དང་མན་ངག་གི་ངེས་པ་ལས་འབྱུང་བ་བཞིན་ལྷག་ཆད་མེད་པར་བྱའོ། །ལྔ་པ་ཕྲིན་ལས་ལ་གཉིས། དགོས་པ་དང་བཅས་ཏེ་མདོར་བསྟན་པ་དང༌། དེ་ཉིད་རྒྱས་པར་བཤད་པའོ། །དང་པོ་ནི། ཐུན་མོང་དེ་བཞིན་གཤེགས་པའི་སྤྱཽད་ཡུལ་གྱིས༔ བསམ་ཀུན་རྫོགས་པར་བྱེད་པའི་ཕྲིན་ལས་ནི༔ སྒོ་གསུམ་བྱ་བས་ཕན་བདེ་སྒྲུབ་པ་སྟེ༔ རྗེས་སུ་བཟུང་དང་ཚར་བཅད་རྣམ་པ་གཉིས༔ ཞེས་གསུངས་ཏེ། རང་གཞན་ཐུན་མོང་ལ་གལ་ཆེ་བ་དེ་བཞིན་གཤེགས་པ་རྣམས་ཀྱི་ཐབས་ལ་མཁས་པའི་སྤྱོད་ཡུལ་བསམ་གྱིས་མི་ཁྱབ་པ་ལས་བྱུང་བ། ཇི་ལྟར་བསམ་པའི་དོན་ཀུན་ཡོངས་སུ་རྫོགས་པར་བྱེད་པ་རོལ་པ་ཕྲིན་ལས་ཀྱི་རིམ་པ་ནི། སྒོ་གསུམ་གྱི་ལས་སམ་བྱ་བའི་སྒོ་ནས་ཀུན་ལ་ཕན་པ་དང་བདེ་བ་སྒྲུབ་པ་སྟེ། ཁོག་གཞུང་ལས། བདག་གཞན་དོན་སྒྲུབ་ཕྲིན་ལས་ཏེ། །ཞེས་སོ། །དེ་ལ་ནང་གསེས་ཀྱི་རྣམ་གྲངས་མང་ཡང་མདོར་བསྡུ་ན་རང་གཞན་ལ་ཕན་གདགས་ཤིང་དོན་གཉེར་རྗེས་སུ་བཟུང་བ་དང༌། སྡང་ཞིང་གདུག་པ་ཅན་ཚར་གཅོད་པའི་ཕྲིན་ལས་ཏེ་རྣམ་པ་གཉིས་སུ་འདུའོ། །དེ་ལ་ཕྲིན་ལས་ཀྱི་ངོ་བོ་ནི། བསམ་དོན་སྒྲུབ་བྱེད་ཐབས་མཁས་ཀྱི་བྱ་བ་སྙིང་རྗེའི་རྒྱུ་ལས་བྱུང་ཞིང་ཤེས་རབ་ཟབ་མོས་ཟིན་པའོ། །ངེས་ཚིག་ཀརྨའི་སྒྲ་ལས་ཕྲིན་ལས་ཏེ་སྒོ་གསུམ་གྱི་ལས་སུ་གྱུར་པའོ། །རྣམ་གྲངས་ནི་ལས་བཞི་སྒྲུབ་པའི་ཐབས་ཀྱི་ཁྱད་པར་འོག་ནས་འབྱུང་བ་ལ་སོགས་པ་སྟེ། དེའང་བྱ་བའི་ཡུལ་སྤྱིར་ཁམས་གསུམ་གྱི་འགྲོ་བ། བྱེ་བྲག་ཞི་སོགས་ལ་རིམ་བཞིན་གནོད་སྡིག་དབུལ་ཕོངས་ལོག་ལྟ་གདུག་པ་ཅན་རྣམས། བྱེད་པའི་ཕྲིན་ལས་བཞི་དང་ལྷུན་གྲུབ་རྣམས་ལ་སོ་སོའི་འདུག་སྟངས་སྔགས་ཀྱི་བཟླ་ཚུལ་དབྱངས་ཀྱི་འགྱུར་བ་སྟངས་ཀྱི་སེམས་སོགས་ཀྱི་ཁྱད་པར་དང་ལྡན་པ། བྱེད་ཚུལ་ལམ་གྱི་རྒྱུད་ཚོད་དང་མཐུན་པའི་གཞི་ཏིང་ངེ་འཛིན་ཐབས་སྤྲོས་མེད་ལ་བརྟེན་པ། བྱ་བའི་དུས་ལས་སོ་སོ་དགོས་པའི་ཡུལ་ཉེ་བར་གནས་པ་སྟེ། བྱས་པའི་དགོས་པ་ཞི་བས་ཕྱི་ནད་གདོན་ནང་མཚན་རྟོག་འཇོམས། རྒྱས་པས་ཕྱི་འཁོར་དང་ལོངས་སྤྱོད་ནང་ཚེ་བསོད་ཉམས་རྟོགས་སྤེལ། དབང་གིས་ཕྱི་འདོད་པའི་ཡུལ་ནང་རླུང་སེམས་ལ་དབང་ཐོབ། དྲག་པོས་ཕྱི་དགྲ་བགེགས་ནང་དུག་ལྔའི་རྟོག་པ་བཅོམ་པར་བྱེད་དོ། །གཉིས་པ་ལ་གཉིས། རྗེས་བཟུང༌། ཚར་བཅད་དོ། །དང་པོ་ནི། སྲུང་དང་ཞི་དང་རྒྱས་དང་དབང་བསྒྱུར་བ༔ ཏིང་འཛིན་སྔགས་དང་ཕྱག་རྒྱས་གཞི་བཟུང་སྟེ༔ མཆོད་རྟེན་ཁྲུས་དང་མེ་དང་འཁོར་ལོ་དང་༔ ཕུར་བུ་བྲོ་གར་རྟེན་འབྲེལ་རྫས་ཀྱིས་བསྒྲུབ༔ ཅེས་གསུངས་ཏེ། དེ་ལ་རྗེས་སུ་བཟུང་བའི་ཕྲིན་ལས་ནི། བསྒྲུབ་བྱ་ནད་གདོན་བར་ཆད་སོགས་མི་མཐུན་པའི་ཕྱོགས་མི་འབྱུང་བར་སྲུང་བ་དང་འཇིགས་པ་བཅུ་དྲུག་ཞི་བ་དང་འབྱོར་པ་དྲུག་རྒྱས་པ་དང་ཡིད་ལ་འདོད་པ་མོས་པ་བཞིས་དབང་དུ་སྒྱུར་བ་རྣམས་ཡིན་ལ། སྒྲུབ་བྱེད་ཀྱི་གཙོ་བོ་གསལ་སྣང་ཐོབ་པའི་ཏིང་ངེ་འཛིན་དང་སྔགས་ཀྱི་བཟླས་པ་ཚད་དུ་འཁྱོལ་བ་དང་འཆིང་འགྲོལ་གྱི་ཕྱག་རྒྱས་གཞི་བཟུང་སྟེ། ཕལ་པའི་ལས་མཆོད་རྟེན་ནམ་སཱཙྪས་ལས་དངོས་དང་འབྱུང་བ་གཞན་ལས་ཡིད་ཀྱིས་སྤྲུལ་ཏེ་སོ་སོ་ལ་ཤིས་པའི་དབྱིབས་མདོག་ཅན་གཟུངས་སྔགས་དང་ལྡན་པར་ལས་མཐུན་གྱི་ལྷར་གསལ་བའི་འོད་ཀྱིས་བསྒྲུབ་བྱ་བཀུག་ཅིང་འོག་ཏུ་མནན་པ་ལ་འོད་ཀྱིས་གདུང་བས་ལས་འགྲུབ་པར་མོས་པ་དང༌། སྡིག་སྒྲིབ་ནད་གདོན་གྲིབ་དང་མི་གཙང་བ་སེལ་བ་ལ་དེ་དང་དེའི་གཉེན་པོར་བསྔགས་པའི་ལྷ་རྣམས་བུམ་པ་བཅུད་ལྡན་དུ་བསྐྱེད་བཟླས་འོད་ཞུ་བྱས་པའི་ཁྲུས་ཀྱི་ཆོ་གས་བཀྲུ་བ་དང༌། རྣལ་འབྱོར་པའི་བློ་ཁྱད་དང་བསྟུན་པའི་ཕྱི་ནང་གསང་བའི་མེའི་སྲེག་བླུགས་ཀྱི་སྦྱོར་བས་ཇི་ལྟར་འདོད་པའི་ལས་སྒྲུབ་པ་དང༌། བསྒོམ་པ་ཡིད་དང་བཀོད་པ་བྲིས་པའི་འཁོར་ལོ་མན་ངག་ལས་འབྱུང་བ་ལྟར་སྒོམ་སྒྲུབ་ཚུལ་བཞིན་བསྟེན་པས་ལས་གང་ཡིན་སྒྲུབ་པ་དང༌། ལས་བཞིའི་སོ་སོའི་རྒྱུ་དབྱིབས་ཚད་མདོག་ཅན་གྱི་ཕུར་བུ་བསྙེན་ཅིང་བསྒྲུབས་པ་ཡུལ་སོ་སོའི་ཕྱོགས་སུ་འདེབས་པ་དང༌། བྲོ་ར་ལས་བཞིའི་དབྱིབས་དང་མཐུན་པར་བཅོས་པ་ལ་ལྷ་སོ་སོའི་ང་རྒྱལ་གྱིས་རྐང་པས་རྡོ་རྗེའི་བྲོ་བརྡུང་ཞིང་ལག་པས་གར་སྟབས་བསྒྱུར་ཏེ་ལུ་གུ་རྒྱུད་ཀྱི་ལས་བྱ་བ་དང༌། འཁྱུད་དཔྱད་སོགས་ལས་འབྱུང་བ་ལྟར་བྱ་སླ་བའི་ཐབས་ཀྱི་འཁྲུལ་འཁོར་རྟེན་འབྲེལ་སྣ་ཚོགས་པ་བྱ་བ་དང༌། གུ་གུལ་དུད་པས་འདྲེ་གདོན་བསྐྲད་པས་མཚོན་རྫས་གཅིག་རྐྱང་ངམ་མང་དུ་སྦྱར་བའི་ནུས་པ་ཁོ་ནས་ཀྱང་ནད་ཞི་བར་བྱེད་པ་ལ་སོགས་ཏེ། ཐབས་དེ་རྣམས་ཀྱིས་འདོད་པའི་ལས་ཐམས་ཅད་འགྲུབ་པར་བྱའོ། །གཉིས་པ་ནི། ཁྱད་པར་ཚར་གཅོད་ནན་ཏུར་བྱ་བའི་ཚུལ༔ རང་ཉིད་སྲུང་དང་འགལ་རྐྱེན་ཟློག་པ་དང་༔ རྫོང་འཕྲང་སྲོག་དང་འབྲས་བུའི་གནད་ལྡན་པས༔ ཁ་སྦྱོར་དབྱེ་བ་གསད་པའི་ཆོ་ག་སྟེ༔ ལས་ཀྱི་མཐའ་ནི་མནན་འཕང་སྲེག་པས་བསྡུ༔ ཞེས་གསུངས་ཏེ།

ཁྱད་པར་བསྒྲལ་བའི་ཞིང་བཅུར་གྱུར་པ་སོགས་ཞི་བས་མི་འདུལ་ཞིང་ཚར་གཅོད་པར་འོས་པ་རྣམས་ལ་ནན་ཏུར་གྱི་ལས་བྱ་བའི་ཚུལ་ཡང་ཕྱོགས་ཙམ་བསྟན་པར་བྱ་སྟེ། དེའི་ཚུལ་མདོར་བསྡུ་ན་དྲག་སྔགས་རྡོ་རྗེ་གཙུག་ལག་གི་རྒྱུད་ལས་གཟིར་བ་པོ། གཟིར་བྱ། གཟིར་བྱེད་གསུམ་དུ་གསུངས་པའི། དང་པོ་ནི། སྒེག་རྡོར་དམ་ཚིག་གསལ་བཀྲ་ལས། ལྟ་སྤྱོད་ཏིང་འཛིན་འབྲེལ་གོམས་པས། ཞེས་འབྱུང་བའི་དོན། ལུས་ལྷ་སྐུ། ངག་བརྗོད་བྲལ། སེམས་སྐྱེ་མེད་དུ་དཔའ་བ་སྟེ་དཔའ་བ་གསུམ། ལྟ་བ་མཐའ་བྲལ། སྒོམ་པ་བློ་འདས། སྤྱོད་པ་ཤུགས་འབྱུང་གི་གདིང་སྟེ་གདིང་གསུམ། རིག་པ་མདུང་ལས་རྣོ་བས་ཕྱིའི་དྲེགས་པ་འབིགས་པ། རིག་པ་གསེག་བདར་ལྟ་བུས་ནང་གི་ཉོན་མོངས་གཅོད་པ། རིག་པ་རླུང་ཤུགས་ལྟ་བུས་རྣམ་རྟོག་སྤྲིན་ཕུང་གཏོར་བའི་ངར་དང་ལྡན་པས་ངར་གསུམ་སྟེ་དཔའ་གདིང་ངར་བ་དགུ་དང་ལྡན་པ་ཞིག་དགོས་ལ། གཟིར་བྱ་དགྲ་བགེགས་གཉིས་ལས་དགྲ་ནི་ཞིང་བཅུར་གྱུར་པ་སྟེ། གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང༌། འདུ་བར་འཚེ་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་འདི། རྣལ་འབྱོར་ཀུན་གྱིས་དང་དུ་བླང༌། ཞེས་དང་རྒྱུད་ལས་མི་དགེ་བཅུ་དང་མཚམས་མེད་ལྔ་སྤྱོད་ལ་བཤད་དོ། །བགེགས་ལ་གྲངས་ངེས་པ་སོགས་གོ་རིམ་དྲུག་གིས་བསྟན། གཟིར་བྱེད་རྫས་སྔགས་ཏིང་ངེ་འཛིན་གསུམ། རྫས་ལ་མཆོད་རྫས་རྟེན་རྫས་གཟིར་རྫས་གསུམ། སྔ་མ་གཉིས་ལ་སྤྱི་དང་ཁྱད་པར། ཕྱི་མ་ལ་གནས་བྲུབ་ཁུང་ལིངྒ་བླ་རྡོ་དབྱེ་གཟིར་ཐུན་རྫས་ནང་གསེས་དང་བཅས་པས་བསྡུས། སྔགས་ལ་མཚན་ཉིད་འགོད་ཐབས་བཟླས་སྔགས་གསུམ། ཏིང་ངེ་འཛིན་ལ་ལྷ་དང་སྔགས་དང་རྫས་ཀྱི་ཏིང་འཛིན་གསུམ་པོ་རྣམས་མ་འདྲེས་མ་ནོར་མ་ཚང་མེད་པ་གཅེས་ཏེ། རྒྱུད་དེ་ལས། སྔགས་ནི་དུག་གི་མཚོན་ཆ་ལ། །ཏིང་འཛིན་གསལ་བས་གནས་སུ་སྐྱེལ། །རྫས་ནི་སྦྱོར་བ་ཐབས་ཀྱི་གྲོགས། །དེ་གསུམ་ལྡན་ན་ལྷ་དབང་ཡང༌། །དངོས་སུ་སྒྲོལ་བར་ཐེ་ཚོམ་མེད། །ཅེས་སོ། །སྤྱིར་མངོན་སྤྱོད་ཀྱི་ཕྱོགས་ལ་རྣམ་གྲངས་བཅུར་གསུངས་ཏེ། སད་སེར། ཐོག་དང་ལྟས་ངན། སྲུང་ཟློག །བསད་མནན། འཕང་སྲེག་བཅས་ཐམས་ཅད་ལའང་ལོག་རྡུགས་འབྱམས་གསུམ་གྱི་སྐྱོན་སྤངས་པ་དང༌། ཕན་གནོད་ཀྱི་ཕྲིན་ལས་ཀུན་ལ་གྲོགས་རྣམ་པ་ལྔ་བསྟན། དུག་རྣམ་པ་ལྔ་སྤང༌། རྒྱན་རྣམ་པ་ལྔ་གདགས་པ་བཅས་རབ་ཏུ་གཅེས་པར་གསུངས་སོ། །དེ་ལས་འདིར་བཤད་བྱ་ནན་ཏུར་ཕྲིན་ལས་ཀྱི་གཙོ་བོ་ཐོག་མར་རང་ཉིད་སྲུང་བ་རྡོ་རྗེའི་རྫོང་མཁར་དུ་ཞུགས་ནས་སྒོ་གསུམ་ལོངས་སྤྱོད་བཅས་ཅིས་ཀྱང་མི་ཤིགས་པར་བྱ་བ་དང༌། འགལ་རྐྱེན་བར་ཆད་ཟློག་པའི་རྡོ་རྗེའི་དཔུང་བཤམས་ཏེ་ཕས་རྒོལ་གྱི་བྱད་སྟེམས་ནུས་པ་རང་གཤེད་དུ་དབབ་པ་དང༌། ལྟ་བ་ཆོས་ཉིད་ཀྱི་རྫོང༌། སྒོམ་པ་ཏིང་ངེ་འཛིན་གྱི་འཕྲང༌། སྤྱོད་པ་སྙིང་རྗེ་ཆེན་པོའི་སྲོག་དང་ལྡན་པ་ལ་གཞི་བཅས་ནས། མི་ལྡོག་པའི་གནད་རང་ཉིད་དཔལ་ཧེ་རུ་ཀར་གསལ། མི་རྡུགས་པའི་ཕྱིར་ཕུར་བུ་སྲས་མཆོག་ཏུ་གསལ། མི་འབྱམས་པའི་ཕྱིར་ལིངྒ་གཟས་པ་པོ་དངོས་སུ་གསལ་བ་ལ་ཚེ་ལུང་གསུམ་དང་ཁྲུས་ལུང་གསུམ་གྱི་དགོངས་པ་དང་ལྡན་པས་གདབ་པ་དང་བསྒྲལ་བ་དང་བསྟབ་པའི་ལས་བྱས་པས་ཚེ་བཅུད་ཀྱིས་བདག །རྣམ་ཤེས་སྤར་བས་དགྲ། ཤ་ཁྲག་བསྟབས་པས་ལྷ་སྟེ་འཚིང་བ་གསུམ་གྱིས་བསྒྲལ་བའི་འབྲས་བུའི་གནད་ལ་སྦྱོར་བ་དང་ལྡན་པས། ལྷ་རྟཻན། ལུས་སེམས། ཤ་རུས་ཏེ་ཁ་སྦྱོར་གསུམ་པོ་དབྱེ་བ་ནི་བསད་པའི་ལས་ཀྱི་ཆོ་ག་སྟེ། དེ་ལྟར་མངོན་སྤྱོད་ཕྲིན་ལས་ཀྱི་གཙོ་བོ་སྲུང་ཟློག་བསད་པ་གསུམ་ཡིན་ལ་དེ་གསུམ་གྱི་མཐར་ནི། སྲུང་བ་ལ་མནན་པ། ཟློག་པ་ལ་འཕང་བ། བསད་པ་སྲེག་པས་བསྡུ་བར་བྱ་སྟེ། དེ་དག་གི་འཐད་པའང་སྲུང་བས་བར་གཅོད་མི་མཐུན་པའི་ཕྱོགས་ལས་སྐྱོབ། མནན་པས་ཕས་རྒོལ་གྱི་སྟོབས་ནུས་ཐམས་ཅད་འཆིང་བར་བྱེད་པས་འབྲེལ་ཏེ། དཔེར་ན་རྫོང་ལ་ལྕགས་རིས་བསྐོར་བ་དང་ཕས་རྒོལ་གྱི་ཆོམ་རྐུན་བཙོན་ཏུ་བཅུག་པ་གཉིས་ཀ་རང་ཕྱོགས་སྲུང་བའི་ཉེར་ལེན་ཏུ་དོན་མཚུངས་པ་ལྟ་བུ་དང༌། ཟློག་པས་འགལ་རྐྱེན་ཉེར་འཚེ་ཐམས་ཅད་ཉེ་མི་ནུས་པར་རིང་དུ་བྱེད། འཕང་བ་ཟོར་གྱིས་དེ་དག་རྨིངས་མེད་དུ་བརླག་པར་བྱེད་པས་འབྲེལ་ཏེ། དཔེར་ན་དགྲ་དཔུང་གིས་འཚེ་བ་ལ་ཐོག་མར་དམག་གི་དཔུང་བཤམ། མཐར་གཡུལ་སྤྲད་པས་རྒོལ་བ་བཅོམ་པ་ལྟ་བུ་དང༌། བསད་པས་བསྒྲལ་བྱའི་རྣམ་ཤེས་སྤར་ཏེ་གཟུགས་ཕུང་ཚོགས་སུ་བསྒྲལ་བ་བ་དེ་ཉིད། ལྷ་རྣམས་ཀྱི་ཞལ་མེ་ལ་བསྟབས་པས་ཤིན་ཏུ་མཉེས་པར་འགྱུར་བ་དང་སྤྱིར་ལས་ཀྱི་ནུས་པ་ཐམས་ཅད་སྲེག་བླུགས་ཀྱིས་མྱུར་དུ་འབྱིན་པ་སྟེ་རྣོ་ལ་ངར་གྱིས་གདགས་པ་ལྟ་བུའོ། །མངོན་སྤྱོད་ཀྱི་དགོས་པའང་རྒྱུད་ལས། ལོག་ལྟ་ཅན་བཅུ་བསྒྲལ་བར་བྱ། །མ་བསྒྲལ་འཁོར་བར་འཁྱམས་པ་ལ། །བསྒྲལ་ཏེ་གནས་སྤར་བདེ་བ་ཐོབ། །བདག་གཞན་གཉིས་ཀ་མངོན་འཚང་རྒྱ། །འཁོར་བའི་ཆུ་ལས་བསྒྲལ་བའོ། །ཞེས་དང༌། གསལ་བཀྲ་ལས། བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་ལ་དམ་སྐོང་ཞིང༌། ལས་ངན་བག་ཆགས་སྡུག་ཡུན་བསྟུངས། །རང་གི་བསམ་མེད་ངན་སོང་ལས། །བདེ་ལམ་འདི་ལས་གཞན་མེད་དོ། །ཞེས་སོ། །དྲུག་པ་བམ་ཆེན་མཆོག་སྒྲུབ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། མཆོག་གི་ཕྲིན་ལས་བླ་ན་མེད་པའི་ཕུལ༔ ཉམས་ཆགས་ཞི་བ་བམ་གྱི་སྒྲུབ་པ་ནི༔ ཞེས་གསུངས་ཏེ། སྒྲུབ་པ་པོ་ལ་མཆོག་གི་དངོས་གྲུབ་བདེ་བླག་ཏུ་སྒྲུབ་པར་བྱེད་པའི་ཕྲིན་ལས་ཏེ་ལས་སུ་བྱ་བ་ཀུན་ལས་ཁྱད་པར་དུ་འཕགས་པས་བླ་ན་མེད་པའི་ཕུལ་དུ་གྱུར་པ་ནི། སློབ་དཔོན་ཆེན་པོས། སྒྲུབ་པ་ཆེན་པོ་འདི་ཉིད་ནི། །སྒྲུབ་པ་མང་པོའི་རྩ་བ་སྟེ། དཔེར་ན་ཆུ་བོ་ཆེན་པོ་ལས། །ཆུ་ཕྲན་ཐམས་ཅད་གྱེས་དང་མཚུངས། གསང་སྔགས་བླ་ན་མེད་པ་ཡི། །སྒྲུབ་པ་རྣམས་ཀྱི་ཡང་སྙིང་ནི། དངོས་གྲུབ་བམ་གྱི་སྒྲུབ་པའོ། །ཞེས་གསུངས་པ་དང༌། ཁྱད་པར་དམ་ཚིག་ཉམས་ཆགས་ཞི་བ་ལ་ལྷག་པར་བསྔགས་ཤིང༌། གལ་པོ་ལས། དངོས་གྲུབ་ཆེན་པོ་བླང་བ་ནི། །ལས་ལས་གྲུབ་པའི་དངོས་གྲུབ་ཅན། །ཞེས་བམ་ཆེན་ལ་ལས་ལས་གྲུབ་པའི་དངོས་གྲུབ་ཡོད་པས་ཡོན་ཏན་མཐའ་ཡས་པར་བསྔགས་པའི་བམ་གྱི་སྒྲུབ་པ་མཆོག་ནི་འདི་ལྟ་སྟེ། གཉིས་པ་ནི། མཚན་ཉིད་ལེགས་བརྟགས་བཀྲ་ཤིས་གཙང་མའི་བམ༔ བརྟུལ་ཞུགས་ལྡན་པས་རྡོ་རྗེའི་འགྲོས་ཀྱིས་བླང་༔ དཀྱིལ་འཁོར་དབུས་བཞག་ལྷར་གསལ་བསྙེན་ཅིང་བསྒྲུབ༔ འོད་དང་སྒྲ་དང་དྲི་སོགས་རྟགས་བྱུང་ནས༔ ལྷ་ཉིད་འོད་ཞུ་ལྷ་ལ་ལྷ་ཐིམ་ཚུལ༔ ཡུལ་དང་ཡུལ་ཅན་དབྱེར་མེད་བདེ་བ་ཆེའི༔ རྡོ་རྗེའི་ལོངས་སྤྱཽད་དགྱེས་རྒུར་སྤྲོ་བས་བསྐང་༔ ཞེས་གསུངས་ཏེ།

དེའང་སྒྲུབ་པ་པོ་རབ་ལྟ་བའི་གདིང་ཐོབ་པ། འབྲིང་བསྙེན་སྒྲུབ་གྱི་དྲོད་རྟགས་དང་ལྡན་པ། ཐ་མ་རྟོག་པ་ཆུང་ཞིང་རོ་སྙོམས་པས། དུས་དབྱར་ཚ་བ་དང་དགུན་གྲང་བའི་སྒང་རུལ་ཁེངས་ཀྱི་སྐྱོན་འབྱུང་བ་མ་ཡིན་པའི་སྐབས་སུ་བསྒྲུབ་བྱ་རྒྱུད་དང་མན་ངག་ལས་འབྱུང་བ་ལྟར་མཚན་ཉིད་ལེགས་པར་བརྟགས་ནས་བླང་ཏེ། དེའང་སྐྱེས་ནས་ལོ་མ་འཁོར་བ་དང་ལྔ་བཅུ་ཡན་ཆད་རྒན་པ། དབང་ཐོབ་སྔགས་པ་དང་རིགས་ངན། གཅོང་ནད་རིམས་དུག་སོགས་ཀྱིས་ཤི་བ་མ་ཡིན་པ། རབ་སྐྱེ་བ་བདུན་པ། འབྲིང་རྒྱལ་རིགས་རྗེའུ་རིགས། ཐ་མ་སྐྱེས་དར་མ་གྲིར་ཤི་ནས་ཞག་གསུམ་མམ་བདུན་ནམ་དགུ་ལས་མ་ལོན་པ་བཀྲ་ཤིས་ཤིང་བྱ་གཅན་གྱིས་མ་བསྣད་པས་གཙང་མར་གྱུར་པའི་བམ་རོ་དེ་ཉིད། རྣལ་འབྱོར་པ་ལྟ་སྒོམ་གྱི་བརྟུལ་ཞུགས་དང་ལྡན་པས་སྔགས་དང་ཏིང་འཛིན་སྟངས་སྟབས་ཀྱིས་འདུལ་ཞིང་ཁྲོ་བོ་རོལ་པ་དང་ཕྲ་མེན་འགྱིང་ཚུལ་གྱིས་བཙལ་ལ་ཞི་བ་དང་ཁྲོ་བོའི་རྡོ་རྗེའི་འགྲོས་ཀྱིས་བླང༌། དེ་ནས་ཤེས་པ་བདུན་ལྡན་གྱིས་སྦྱང་ཞིང་བསྒྲུབ་སྟེ། མི་གཙང་བར་ཤེས་པས་ཁྲུས་ཀྱིས་བཀྲུ། སེམས་ཅན་ཏུ་ཤེས་པས་སྡུག་བསྔལ་ཕྲལ། སློབ་མར་ཤེས་པས་དབང་བསྐུར། རིག་པའི་མེ་ཏོག་ཏུ་ཤེས་པས་དཀྱིལ་འཁོར་གྱི་དབུས་སུ་བཞག །ལྷར་ཤེས་པས་ཐོག་མར་བམ་ཧྲིལ་པོར་དཀྱིལ་འཁོར་པ་བསྐྱེད་ལ་བསྙེན། བར་དུ་ལུས་ཀྱི་རྒྱ་བཀྲལ་ནས་དོན་སྣོད་ཡན་ལག་རྣམས་ལྷ་གནས་སོ་སོར་བཀོད་ལ་དམ་ཡེ་དབྱེར་མེད་ཀྱི་བདུད་རྩིར་བསྒྲུབ། སྐབས་སུ་མཆོད་རྫས་སུ་ཤེས་པས་ཕུང་པོ་ཚོགས་སུ་འབུལ། མཐར་འཇའ་འོད་དང་སྔགས་སྒྲ་དང་དྲི་བཟང་དང་བདུད་རྩིའི་རྒྱུན་འཛག་ཅིང་བག་དྲོ་ཉམས་དགའ་བ་སོགས་གྲུབ་པའི་རྟགས་བྱུང་བ་དང༌། ཐིག་ལེ་ཉག་གཅིག་ཏུ་ཤེས་པ་ནི་བམ་ལ་བསྐྱེད་པའི་ལྷ་ཉིད་འོད་དུ་ཞུ་ནས་རང་བྱུང་ཕུང་པོ་དམ་ཚིག་པའི་ལྷ་ལ་བསྐྱེད་ཅིང་སྤྱན་དྲངས་པ་ཡེ་ཤེས་ཀྱི་ལྷ་གཉིས་མེད་དུ་ཐིམ་པར་མོས་ལ་འཁོར་འདས་རོ་མཉམ་གནས་ལུགས་ཀྱི་ཚུལ་ལ་མཉམ་པར་བཞག་སྟེ་དུས་ཀྱི་དངོས་གྲུབ་ཆེན་པོ་བླང༌། དེའང་རབ་ཡུལ་བམ་གྱི་རྫས་དང་ཡུལ་ཅན་རང་གི་དབང་པོ་དབྱེར་མེད་བདེ་བ་ཆེན་པོ་རྡོ་རྗེའི་བདུད་རྩི་ཟག་པ་མེད་པར་ཤེས་པས་དངོས་སུ་ལོངས་སྤྱོད། འབྲིང་རྫས་དང་སྤེལ་བ་དང་ཐ་མས་ཀྱང་དམིགས་པས་རོལ། བནྡྷ་དང་སྙིང་དངོས་གྲུབ་ཀྱི་རྟེན་དུ་བཟུང་བ་སོགས་ཡོ་བྱད་དུ་སྤེལ་བ་དང༌། རྫས་དང་བསྲེས་པའི་རིལ་བུ་སླར་ཡང་བསྒྲུབས་ནས་འགྲོ་བ་ཀུན་ལ་སྤེལ་བ་དང༌། ས་ཆུ་མེ་རླུང་ལས་མཁའ་ཁྱབ་ཏུ་སྤེལ་བ་སྟེ་སྤེལ་བ་དྲུག་ལྡན་གྱི་སྒོ་ནས་རྣལ་འབྱོར་པའི་དགྱེས་རྒུར་སྤྲོ་བས་རང་གཞན་ཉམས་ཆགས་བསྐང་ཞིང་འབྲེལ་ཚད་དོན་དང་ལྡན་པར་བྱའོ། །དེའི་ཡོན་ཏན་གུ་རུའི་གསུང་ལས། གང་ཞིག་རྣལ་འབྱོར་སྒྲུབ་པ་པོ། །དངོས་གྲུབ་རྣམ་གཉིས་འདོད་པ་ན། །གཞན་གང་ནོར་བུའི་འཆིང་བུ་ལྟར། །ཕྲན་ཚེགས་ཡིན་གྱི་འདི་ཉིད་ནི། །རིན་ཆེན་དབང་གི་རྒྱལ་པོ་ལྟར། །མཆོག་དང་ཐུན་མོང་ལ་སོགས་པ། །ཅི་འདོད་འབྱུང་ཕྱིར་འདི་ལ་འབད། །ཅེས་སོགས་རྒྱ་ཆེར་གསུངས་སོ། །བདུན་པ་བདུད་རྩི་སྨན་གྱི་སྒྲུབ་པ་ལ་དགོས་པ་དང་བཅས་ཏེ་མདོར་བསྟན། དེའི་ཚུལ་རྒྱས་པར་བཤད་པའོ། །དང་པོ་ནི། ཡེ་ཤེས་རྒྱས་བྱེད་བདུད་རྩིའི་སྒྲུབ་པ་ནི༔ ཞེས་གསུངས་ཏེ། དང་བླང་དམ་ཚིག་གི་རྫས་ཤ་ལྔས་དུག་ལྔ་སེལ་ཞིང་བདུད་རྩི་ལྔས་ཡེ་ཤེས་ལྔའི་རྟོགས་པ་རྒྱུད་ལ་སྐྱེད་པའི་མཐུ་ལས་བདུད་བཞི་བཅོམ་ཞིང་དབང་བཞིའི་ཡེ་ཤེས་ལམ་དུ་བསླངས་ཏེ་གོང་ནས་གོང་དུ་རྒྱས་པར་བྱེད་པའི་ཐབས་མཆོག་བདུད་རྩི་སྨན་གྱི་སྒྲུབ་པ་ནི་དངོས་གྲུབ་རྣམ་པ་གཉིས་ཀྱི་གཏེར་དུ་གྱུར་པ་སྟེ། བདུད་རྩིའི་རྒྱུད་ལས། ར་སཱ་ཡ་ན་སྨན་ཆེན་པོ། །ཟོས་པས་མཆོག་ཐུན་དངོས་གྲུབ་འགྲུབ། །ཅེས་སོ། །གཉིས་པ་ལ་གཉིས། ཇི་ལྟར་སྒྲུབ་པའི་ཚུལ། དེ་ལྟར་བསྒྲུབས་པའི་འབྲས་བུའོ། །དང་པོ་ནི། སྣོད་བཅུད་ཡེ་ནས་བདུད་རྩི་ཆེན་པོར་དག༔ དེ་ཉིད་རྟོགས་པས་འཆི་མེད་བཅུད་ཀྱིས་ལེན༔ མཆོག་དང་ཐུན་མོང་རྫས་བཙལ་ལེགས་པར་སྦྱར༔ ཁྲོལ་བུ་སྦྱང་ཞིང་ཕྱེ་མ་ཚུལ་བཞིན་བསྒྲུབ༔ ཞི་ཁྲོ་ཡབ་ཡུམ་དགྱེས་པ་ཆེན་པོའི་ལྷ༔ སྦྱོར་ཐབས་དུ་མས་བྱང་ཆུབ་སེམས་སྤྲིན་དབབ༔ གསང་སྒོ་དབྱེ་ཞིང་ཐིག་ལེ་གཅིག་ཏུ་བསྐྱིལ༔ དངོས་གྲུབ་གསོལ་ནས་སྐལ་བར་ལྡན་པའི་ཚོགས༔ བདེ་ཆེན་རྡོ་རྗེའི་རིགས་སུ་མཉམ་སྦྱར་བས༔ ཞེས་གསུངས་ཏེ།

དེ་ལ་བདུད་རྩིའི་ངོ་བོ། །སྲིད་གསུམ་སྣོད་ཀྱིས་བསྡུས་པའི་འབྱུང་བ་ཕུང་པོ་འདོད་ཡོན་ཉོན་མོངས་པ་ལྔར་སྣང་བ་ཡེ་ནས་རང་བྱུང་གི་བདུད་རྩི་ཆེན་པོ་ལྔར་རྣམ་པར་དག་པས་རྐྱེན་གྱིས་བཅོས་མ་དགོས་པ་གདོད་ནས་འཁོར་འདས་ཐམས་ཅད་བདུད་རྩིའི་ངོ་བོར་གནས་པ་སྟེ། བདུད་རྩི་བམ་བརྒྱད་ལས། སྲིད་གསུམ་ཡེ་ནས་བདུད་རྩི་ལྔ། །མ་བཅོས་ལྷུན་གྲུབ་རྫོགས་སངས་རྒྱས། །ཞེས་སོ། །ངེས་ཚིག་ཨ་མྲྀ་ཏའི་སྒྲ་ལས་འཆི་བ་མེད་པ་སྟེ་འཆི་བའི་འཇིགས་པ་བཅོམ་པའི་གསོས་སྨན་ཡིན་པའི་ངེས་པ་ལས་བདུད་རྩིར་གྲགས་པ་སྟེ། གསང་བ་འཁོར་ལོའི་རྒྱུད་ལས། །འཁོར་བ་བདུད་དང་འདྲ་བ་ལ། །ཆོས་ཉིད་བདེན་པའི་རྩི་བཏང་ནས། །བདུད་རྩི་ཞེས་ནི་དེ་ལ་བྱ། ཞེས་སོ། །བྱེད་ལས་ནི། དོན་གྱི་བདུད་རྩི་ལྔར་བཤད་པ་དེ་ཉིད་སྒོམ་པའི་ཉམས་མྱོང་གི་རྟོགས་པས་སྐྱེ་འཆི་མེད་པའི་ཡེ་ཤེས་ཀྱི་བཅུད་ཀྱིས་བྱང་ཆུབ་རྡོ་རྗེ་ཉེ་བར་ལེན་པར་བྱེད་པ་སྟེ། བདུད་རྩི་མཆོག་ལུང་ལས། །ཐམས་ཅད་མ་ལུས་སངས་རྒྱས་ལྔ། །ལུས་པ་མེད་པ་ཡེ་ཤེས་ལྔ། །མ་བཅོས་ཡེ་ནས་དེ་ཉིད་དོ། །དེ་ཕྱིར་སྨན་ཆེན་བཅུད་ཀྱི་མཆོག །ཅེས་སོ། །རྟགས་ལུས་གནས་བདུད་རྩིར་དྭངས་མར་གྱུར་ན་འཆི་བ་མེད་པ་འགྲུབ་ཅིང༌། དེའི་རིགས་གཏོགས་ཕྱི་རོལ་གྱི་རྫས་ལའང་ནུས་པ་ཆ་མཐུན་ཡོད་པས་སྦྱང་རྟོགས་སྦར་གསུམ་གྱིས་བརླབས་ཏེ་བསྟེན་ན་ལུས་ཁམས་བདུད་རྩི་དྭངས་མའི་བཅུད་ཀྱིས་རྒྱས་ཤིང་འཆི་བ་མེད་པའི་ཚེ་དབང་ཉེ་བར་ལེན་པའི་གྲོགས་བྱེད་དེ། བམ་བརྒྱད་ལས། བཞི་བརྒྱ་རྩ་བཞིའི་ནད་སེལ་ཞིང༌། །བདུད་བཞི་ངེས་པར་འཇོམས་པར་བྱེད། །སྨན་གྱི་རྒྱལ་པོ་བཅུད་ཀྱི་མཆོག །ཅེས་སོ། །བསྒྲུབ་པའི་རྫས་ནི། བདུད་རྩིའི་རྒྱུད་ལས། གཙོ་བོའི་དམ་རྫས་བདུད་རྩི་ལྔ། །རྩ་བ་བརྒྱད་ལ་ཡན་ལག་སྟོང༌། །དམ་རྫས་རྩི་བཅུད་སྨན་ཏུ་སྦྱར། །ཅེས་གསུངས་པའི་གཙོ་བོ་མཆོག་གི་དམ་རྫས་རང་བྱུང་བདུད་རྩི་ལྔ་དང༌། ཐུན་མོང་གི་རྫས་རྩ་བ་བརྒྱད་ལ་སྔོན་བྱུང་དང་ཕྱི་ནང་གསང་གསུམ་སྒྲུབ་པ་ལག་ལེན་གྱི་རྩ་བ་སྟེ་བརྒྱད་ཚན་ལྔར་བཤད་པའི་ཕྱི་མ་སྦྱར་བྱ་དངོས་ལ། སྙིང་པོ་ལྔ། འབྲས་བུ་ལྔ། ཡོན་ཏན་ལྔ། སྡུད་པ་ལྔ། དུལ་བ་ལྔ་དང་གཙོ་བོ་ལྔ་བཅས་པ་ལ་རིགས་མཐུན་གྱི་རྩི་བཅུད་སྨན་ཏུ་གྱུར་ཚད་སྦྱར་བས་ཡན་ལག་སྟོང་དུ་གྲུབ་པ་ཡིན་ལ། དགོས་དོན་ལྔ་དང་དགོས་ཆས་ལྔ་རྣམས་ཀྱང་ཚོགས་པར་བྱས་ནས་ཐོག་མར་ཚོལ་བ་ལ་མཁས་པས་བཙལ། བར་དུ་བསྲེལ་བ་ལ་མཁས་པས་ལེགས་པར་སྦྱར་རོ། །སྒྲུབ་པའི་དུས་ནི་སྟོན་དཔྱིད་བསིལ་དྲོད་སྙོམས་པའི་ཡར་གྱི་ཚེས་བརྒྱད་ལ་བྱ་བར་བཤད། ཇི་ལྟར་སྒྲུབ་པའི་ཚུལ་ནི། སྔོན་འགྲོ་བསྙེན་པ་གསོ་ཞིང་སྒྲུབ་པའི་གཞི་བཟུང་བ། ཕྱི་བཤགས་དང་ས་ཆོག །ཁྱད་པར་གྱི་ཡོ་བྱད་དང་རྟེན་གྱི་དཀྱིལ་འཁོར་འདུ་བྱས་ཏེ་དམ་རྫས་ཀྱི་རིགས་དང་ཁ་དོག་གི་དབྱེ་བས་བཀོད། དངོས་གཞིའི་ཐོག་མར་ཁྲོལ་བུར་སྦྱོང་བ་ནི། རྡོ་རྗེ་བཀོད་པ་ལས། དམ་པ་དེ་ཉིད་གསང་ཆེན་གྱི། །རིགས་བརྒྱ་རིགས་ལྔ་རིགས་གཅིག་གིས། །ཐམས་ཅད་སྦྱོང་བའི་མཆོག་ཏུ་བྱ། །ཞེས་པ་ལྟར། འཁྲུལ་སྣང་གཉིས་ཆོས་དུ་མར་བདེན་པར་ཞེན་པའི་རྟོག་ཚོགས་དམ་པ་རིགས་བརྒྱ་སྐུའི་འཁོར་ལོར་སྦྱང་བ་དང༌། རིགས་མང་པོ་བཟང་ངན་དུ་བལྟ་བའི་རྟོག་པ་ལྡོག་ཕྱིར་དེ་ཉིད་རིགས་ལྔ་གསུང་གི་དབྱིངས་སུ་སྦྱོང་བ་དང༌། རིགས་ཐ་དད་དུ་འཛིན་པའི་ཞེན་པ་བསལ་ཕྱིར་གསང་ཆེན་རིགས་གཅིག་ཐུགས་ཀྱི་ཐིག་ལེར་བསྡུས་ཏེ་མཆོད་ཅིང་བསྟོད་ལ་དངོས་གྲུབ་ཀྱི་དབྱིག་བསྡུ། སྐབས་སུ་སྨན་གྱི་དངོས་གྲུབ་མྱུར་བའི་གྲོགས་རིག་འཛིན་རྣམས་བསྐུལ་ཞིང་གཙང་སྦྲ་ལ་གནས་པ་དེ་དག་གཉིས་འཛིན་གྱི་རྟོག་པ་བསལ་བ་ཐམས་ཅད་བཟང་ངན་བླང་དོར་བྲལ་བའི་དམ་ཚིག་ལ་གནས་པར་བྱ། སྦྱོར་སྒྲོལ་གཉིས་མེད་ཀྱི་དགོངས་པས་བཏགས་ཤིང་བཙགས་ལ་སྤོལ། ཚད་གཞལ་ལ་རྒྱས་བཏབ་སྟེ་དཀྱིལ་འཁོར་དུ་བཀོད། དེ་ནས་ཕྱེ་མ་ཚུལ་བཞིན་བསྒྲུབ་པར་བྱ་སྟེ། དེའང་དང་པོ་འཇུ་འདུལ་གྱི་དགོངས་པ་ཞི་བའམ་ཁྲོ་བོ་ཧེ་རུ་ཀ་ཡབ་ཡུམ་དགའ་བཞིའི་རོས་དགྱེས་པ་ཆེན་པོའི་ཉམས་དང་ལྡན་པའི་ལྷའི་དཀྱིལ་འཁོར་སུམ་ལྡན་ནམ་བརྒྱད་ལྡན་དུ་བསྒོམས་ལ། ཡེ་ཤེས་རྫས་དང་ཐབས་ཤེས་སོགས་སྦྱོར་བ་བརྒྱད་ལྡན་གྱིས་མཚོན་གཞུང་སོ་སོ་ལས་བཤད་པའི་སྦྱོར་ཐབས་དུ་མས་བདུད་རྩི་བྱང་ཆུབ་སེམས་ཀྱི་སྤྲིན་མཁའ་ཁྱབ་ཏུ་སྤྲོས་ཏེ་དོན་གཉིས་བྱས། ཚུར་འདུས་སྐུའི་དབྱིབས་བརྒྱུད་ཡུམ་གྱི་མཁའ་དང་བདུད་རྩིར་དབབ། བམ་བརྒྱད་ལས། རྟགས་དང་མཚན་མ་བདུན་གྱིས་འབྱུང༌། །འོད་དང་དུ་བ་སྒྲ་དང་དྲི། །ལྷ་མོའི་གཟུགས་ཀྱང་སྟོན་པར་བྱེད། །མང་དུ་འཕེལ་བ་གྲུབ་རྟགས་ཡིན། །ཅེས་པ་ལྟར་གྲུབ་པའི་རྟགས་མཐོང་ནས་ཡབ་ཡུམ་མཁའ་གསང་གི་སྒོ་དབྱེ་ཞིང་འཁོར་འདས་དྭངས་བཅུད་ཐིག་ལེ་གཅིག་ཏུ་བསྐྱིལ་ནས་སྨན་གྱི་ཕོ་བྲང་དུ་དབབ། དབང་དུ་བྱ་བ་དང་གནད་ལ་དབབ་པ་སོགས་ཕྲིན་ལས་ཀྱི་བྱ་བ་རྣམས་གྲུབ་ནས། རྗེས་ཀྱི་རིམ་པ་ནི། ཉེ་སྙིང་ལས། འདུས་པའི་རྣལ་འབྱོར་རབ་གུས་པས། །དངོས་གྲུབ་ཐོབ་ཕྱིར་གསོལ་བ་གདབ། །ཅེས་པ་ལྟར་བྱས་ཏེ་གུ་ཧྱ་ལག་གི་ཕྱག་རྒྱས་བླངས་ལ་དབང་ནོད། དད་མོས་སྐལ་བ་ལྡན་པའི་འདུས་ཚོགས་གཞན་ལའང་དབང་དང་དངོས་གྲུབ་ཀྱི་བགོ་སྐལ་སྦྱིན་ཏེ་འབྲེལ་པར་བཅས་པ་ཐམས་ཅད་བདེ་བ་ཆེན་པོ་རྡོ་རྗེའི་རིགས་གཅིག་ཏུ་མཉམ་པར་སྦྱར་བས། རྒྱུད་དང་ལུང་ལ་ཇི་སྐད་གསུངས་པའི་ཕན་ཡོན་རྣམས་འཐོབ་པར་འགྱུར་རོ། །གཉིས་པ་ནི། ཚེ་དང་སྐོང་དང་ཡིད་འོང་ནད་སེལ་སོགས༔ ཡོན་ཏན་ཁྱད་པར་བརྒྱ་རྩ་བརྒྱད་འགྲུབ་ཅིང་༔ སྣོད་བཅུད་ཐམས་ཅད་ཧེ་རུ་ཀ་ཡི་ཞིང་༔ ཚོམ་བུ་དང་བཅས་གྲོལ་བ་མཆོག་ལ་སྦྱོར༔ ཞེས་གསུངས་ཏེ། དེ་ལྟར་བསྒྲུབས་པའི་ཡོན་ཏན་ཀྱང་གནས་སྐབས་སུ་འཆི་མེད་ཚེ་དང་ཉམས་ཆགས་སྐོང་བ་དང་འགྲོ་བ་ཀུན་གྱི་ཡིད་དུ་འོང་བ་དང་ནད་གདོན་སྡིག་སྒྲིབ་སེལ་བ་སོགས་མདོར་ན་ཡོན་ཏན་གྱི་ཁྱད་པར་བརྒྱ་རྩ་བརྒྱད་འགྲུབ་ཅིང༌། གང་དུ་སྒྲུབ་པའི་སྣོད་བཅུད་ཐམས་ཅད་ཀྱང་དཔལ་ཧེ་རུ་ཀའི་ཞིང་དང་སྐུའི་རང་བཞིན་ཏུ་བྱིན་གྱིས་བརླབས་ཏེ་མཐར་ཐུག་འདུས་པའི་ཚོམ་བུ་འཁོར་དང་བཅས་པ་སྟན་ཐོག་གཅིག་ཏུ་གདོད་མའི་སར་རྣམ་པར་གྲོལ་བ་མཆོག་ལ་སྦྱོར་བར་བྱེད་དེ། དེ་དག་གི་ཚུལ་ཡང་བདུད་རྩིའི་ལུང་བམ་པོ་བརྒྱད་པ་སོགས་ལས་རྒྱ་ཆེར་གསུངས་སོ། །གསུམ་པ་ཇི་ལྟར་སྒྲུབ་པའི་ལམ་བཤད་པ་ལ་གཉིས། མཚམས་སྦྱར་བའི་ཚུལ་གྱིས་མདོར་བསྟན། དེའི་དོན་རྒྱས་པར་བཤད་པའོ། །དང་པོ་ནི། དེ་ལྟར་མཆོག་དང་ཐུན་མོང་དངོས་གྲུབ་ཀུན༔ ཚུལ་བཞིན་སྒྲུབ་པ་ཡོངས་རྫོགས་ལམ་རིམ་ནི༔ ཞེས་གསུངས་ཏེ། བཤད་ཟིན་པ་དེ་ལྟར་བསྐྱེད་རིམ་དང་འབྲེལ་བར་མཆོག་སྒྲུབ་གཙོར་གྱུར་པ་དང་ཐུན་མོང་གི་ཕྲིན་ལས་གཙོར་བསྟན་པ་སྟེ་དངོས་གྲུབ་རྣམ་པ་གཉིས་ཀྱིས་བསྡུས་པ་ཀུན་ཀྱང་རྒྱུད་ལུང་མན་ངག་གི་ཟབ་དོན་ལྟར་ཚུལ་བཞིན་ཏུ་སྒྲུབ་པ་ལ་ལུས་ཡོངས་སུ་རྫོགས་པའི་ལམ་ལ་བསྟེན་དགོས་པས་དེའི་རིམ་པ་ནི་འདི་ལྟ་སྟེ། གཉིས་པ་ལ་གཉིས། སྟོང་ཆེན་སོགས་རྣལ་འབྱོར་སྔ་མ་བཞི་མདོ་ཙམ་བཤད་པ་དང༌། ཚོམ་བུ་ཚོགས་ཀྱི་སྒྲུབ་པ་རྒྱས་པར་བཤད་པའོ། །དང་པོ་ནི། སྟོང་ཆེན་སྙིང་རྗེ་སྒྱུ་མའི་བསྙེན་པ་དང་༔ ཕྲ་རགས་ཕྱག་རྒྱ་གཅིག་པའི་གསལ་སྣང་བརྟན༔ ཕྱག་རྒྱ་སྤྲོས་བཅས་ཉེ་བར་བསྙེན་པའམ༔ དེ་རྣམས་བསྙེན་དང་ཉེ་བསྙེན་སྒྲུབ་པ་ཡིས༔ དྲོད་དང་རྟགས་དང་མཚན་མ་མངོན་གྱུར་ནས༔ ཞེས་གསུངས་ཏེ།

དེ་བཞིན་ཉིད་སྟོང་པ་ཆེན་པོ་དང་ཀུན་སྣང་སྙིང་རྗེ་སྒྱུ་མའི་ཏིང་ངེ་འཛིན་གྱིས་བསྐྱེད་པ་ལ་བསྙེན་པ་དང༌། ཕྲ་བ་ཡིག་འབྲུ་དང་རགས་པ་ལྷ་སྐུ་ཕྱག་རྒྱ་གཅིག་པའི་གསལ་སྣང་བརྟན་པོར་གྲུབ་ནས། ཕྱག་རྒྱ་སྤྲོས་བཅས་ཀྱི་དཀྱིལ་འཁོར་བསྒོམས་ཏེ་ཉེ་བར་བསྙེན་པའམ། ཡང་ན་དེ་རྣམས་ལས་དེ་ཏིང་གི་བསྙེན་པ་དང་ཀུན་ཏིང་གིས་ཉེ་བསྙེན་རྒྱུ་ཏིང་ཕྱག་རྒྱ་གཅིག་སྤྲོས་སྒྲུབ་པའི་ཚུལ་དུ་ཉམས་སུ་བླངས་པས་གནས་སྐབས་ཀྱི་འབྲས་བུ་གོང་བཤད་ཉམས་ལྔ་མཐར་ཕྱིན་པའི་དྲོད་ཚད་ཕྱི་ནང་གསང་བ་དང་རྟགས་ཀྱི་རིམ་པ་དང་དངོས་གྲུབ་ཀྱི་མཚན་མ་ཅི་རིགས་པ་མངོན་དུ་གྱུར་ནས་སྒྲུབ་པ་ཆེན་པོ་ལ་འཇུག་པར་བྱའོ། །དེ་ལ་དྲོད་ནི་སྒྱུ་འཕྲུལ་ལམ་རིམ་ལས། དེ་ལྟར་བྱ་བྱེད་མེད་བསྲིངས་ན། །ལུས་ངག་སེམས་ལ་དྲོད་འབྱུང་སྟེ། ཞེས་པ་ལྟར་ཕྱིའི་དྲོད་ལུས་ཡང་བ་སྙམ་བྱེད་པ་དང༌། ནང་གི་དྲོད་དབུགས་རྒྱུ་བ་མི་ཚོར་བ་དང༌། གསང་བའི་དྲོད་དོན་ཐོག་ཏུ་ཤིན་ཏུ་ཕེབས་པ་སྟེ། ལུས་བདེ། ངག་གསལ། སེམས་མི་རྟོག་པའི་དྲོད་གསུམ་མོ། །རྟགས་ནི་མིག་སྒྲོན་འགྲེལ་པར། ངེས་པར་དྲོད་གསུམ་མྱོང་ནས་ནི། རྟགས་ཀྱི་རྣམ་པ་ཅིར་ཡང་སྣང༌། །ཞེས་པ་ལྟར་དྲོད་བརྙེས་པའི་རྟགས་ཀྱང་ཕྱི་རྟགས་སུ་དངོས་པོ་ཐམས་ཅད་ལྷའི་སྐུ་གསུང་ཐུགས་ཀྱི་མཚན་མ་ཕྲ་མོས་སྤྱོད་ཡུལ་གང་བར་མཐོང་བ་དང༌། གཞན་ཡང་དུ་བ་ལྟ་བུ་ལ་སོགས་པ་དང༌། ས་ཆུ་མེ་རླུང་ནམ་མཁའ་སྟེ་ཁ་དོག་ལྔའི་ཟད་པར་གྱི་སྐྱེ་མཆེད་དང༌། ནམ་མཁའ་ལས་པདྨ་ཆེན་པོའི་འོད་དང་རྡུལ་ཕྲན་དང༌། སྐར་མ་དང༌། ཟླ་ཚེས་སོགས་མཐོང་བ་དང༌། ནང་རྟགས་སུ་ལུས་ངག་ལ་བཟོད་པ་ཐོབ་པ་དང༌། ཉོན་མོངས་པ་ལྔའི་སེམས་རྒྱུན་བགས་ཀྱིས་ཆུང་ངུ་འགྲོ་བས་ཆོས་བརྒྱད་འགོ་སྙོམས་པ་སོགས་འབྱུང་བ་དང༌། གསང་རྟགས་རླུང་ལ་ཅུང་ཟད་དབང་ཐོབ་ཅིང་མངོན་ཤེས་ཕྲ་མོ་འཆར་བ་དང༌། རྨི་ལམ་དུ་སྡིག་སྒྲིབ་དག་པ་དང་ས་ཐོབ་པ་དང་ཐུན་མོང་དང་མཆོག་གི་དངོས་གྲུབ་འགྲུབ་པའི་ལྟས་ཡང་ནས་ཡང་དུ་འབྱུང་བའོ། །དངོས་གྲུབ་ཀྱི་མཚན་མ་ཐུན་མོང་གི་ལས་དང་གྲུབ་པ་ཆེན་པོ་རྣམས་ཏེ། སྒྱུ་འཕྲུལ་རྩ་རྒྱུད་དུ། ཡོན་ཏན་འབྱུང་བའི་དངོས་གྲུབ་དྲུག །འབྱུང་ལྔའི་དངོས་གྲུབ་ལྔ། ལས་ཕྲན་ཚེགས་ཀྱི་དངོས་གྲུབ་བརྒྱད་དང་དེར་མ་ཟད་བཤད་རྒྱུད་རྣམས་སུ་མང་དུ་གསུངས་པ་སོགས་མཐའ་ཡས་ཏེ། དཀོན་མཆོག་བརྩེགས་པ་ལས། ཏིང་ངེ་འཛིན་གྲུབ་པའི་སེམས་ཀྱི་སྤྱོད་ཡུལ་དང་རྫུ་འཕྲུལ་ཡང་བསམ་གྱིས་མི་ཁྱབ། རྫས་དང་སྨན་དང་སྔགས་དང་ནོར་བུ་རྣམས་ཀྱི་ཡོན་ཏན་ཡང་བསམ་གྱིས་མི་ཁྱབ། ཅེས་གསུངས་པ་ལྟར་རོ། །གཉིས་པ་ལའང་མདོར་བསྟན་པ་དང༌། རྒྱས་པར་བཤད་པ་ལ་གཉིས། དང་པོ་ནི། ཚོམ་བུ་ཚོགས་ཀྱི་སྒྲུབ་དང་སྒྲུབ་ཆེན་ལ༔ བརྟེན་ནས་རིག་འཛིན་གོ་འཕང་མཐར་ཕྱིན་སླད༔ ཅེས་གསུངས་ཏེ། བཤད་མ་ཐག་པའི་བསྙེན་པ་ཉེ་བསྙེན་སྒྲུབ་པ་གསུམ་གྱིས་དྲོད་རྟགས་མཚན་མ་མངོན་ཏུ་གྱུར་ནས་ཚོམ་བུ་ཚོགས་ཀྱི་སྒྲུབ་པ་དངོས་གཞི་དང་སྒྲུབ་པ་ཆེན་པོའི་ལས་སྦྱོར་ལ་བརྟེན་ནས་ལམ་གྱུར་གྱི་འབྲས་བུ་རིག་འཛིན་རྣམ་བཞིའི་གོ་འཕང་མཐར་ཕྱིན་པའི་སླད་དུ་ཚུལ་འདི་ལ་འཇུག་པར་བྱའོ། །ཚོམ་བུ་ཚོགས་སྒྲུབ་ཅེས་པའི་དོན་ཡང་ཁོག་གཞུང་ལས། ཚོགས་ནི་འབྱོར་པ་རྣམ་པ་གསུམ། ཚོམ་བུ་གཅིག་གསུམ་ལྔ་པའོ། །ཞེས་འདུས་པ་ཆུང་ངུའི་ཚེ་ཚོམ་བུ་གཅིག་གསུམ་ལྔ་པའི་གཙོ་བོ་ཡབ་ཡུམ་ཙམ་འཚོགས་པ་སྟེ་གཉིས་པ་དང་དྲུག་དང་བཅུ་ཚང་བ། འབྲིང་ལ་དཀྱིལ་འཁོར་གྱི་གྲངས། ཆེན་པོ་དེ་ཡན་ཆད་རབ་ཏུ་མང་པོ་འདུས་པ་དང༌། རེ་རེའང་སྐབས་ཀྱིས་གསུམ་གསུམ་སྟེ། སྐལ་ལྡན་མི་དང་དགྱེས་ལྡན་ལྷ། །འབྱོར་ལྡན་ཡོ་བྱད་ལྔ་པོས་སོ། །ཞེས་གསུངས་ཏེ་སྟེང་དུ་ཚོགས་ཆེན་པོ་བསྣན་པ་བཅས་མདོར་ན་རྟེན་དང་གང་ཟག་ཡོ་བྱད་ཁྱད་པར་ཅན་ཚོགས་ནས་སྒྲུབ་པའི་དོན་ནོ། །གཉིས་པ་ལ་གཉིས། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་བསྒྲུབ་ཡན་ལག་བཞི་བྱེ་བྲག་དང་བཅས་པས་སྒྲུབ་པའི་གཞུང་བསྲང་བའོ།

།དང་པོ་ནི། དབེན་ཞིང་བྱིན་རླབས་ཟིལ་ལྡན་གནས་མཆོག་ཏུ༔ གཟའ་སྐར་ཚེས་བཟང་ཡ་མཚན་ཆེན་པོའི་དུས༔ ཕུན་སུམ་ཚོགས་པའི་ཡོ་བྱད་དང་བཅས་ཏེ༔ སྟོན་འཁོར་མཚན་ཉིད་ཚང་པའི་ཚོམ་བུ་ཡིས༔ ཏིང་འཛིན་གསལ་ཞིང་ཆོ་ག་རྣམ་དག་པས༔ ཞེས་གསུངས་ཏེ། དེའང་སྒྲུབ་པ་ཆེན་པོ་བརྩམ་པ་ལ་ཕུན་སུམ་ཚོགས་པ་ལྔ་ཚོགས་དགོས་ཏེ། ལས་རིམ་ལས། དེ་ཡང་ཐོག་མར་གནས་དང་དུས། །ཡོ་བྱད་སྟོན་འཁོར་སྒྲུབ་པ་པོ། །སྒྲུབ་ཐབས་ཕུན་སུམ་ཚོགས་པ་ཡི། །གཞི་དང་སྦྱར་བས་གཞུང་རྫོགས་བྱ། །ཞེས་པས་གང་དུ་སྒྲུབ་པའི་གནས་ནི། བསམ་གཏན་གཡེང་བའི་རྐྱེན་སྤྱི་དང་བྱེ་བྲག་དགྲ་རྐུན་གཅན་གཟན་གཏུམ་པོ་སོགས་གཟུགས་ཅན་དང་འབྱུང་པོ་གདུག་པ་ཅན་གྱི་གནས་རྟེན་མེད་པས་འཚེ་དོགས་ཀྱིས་དབེན་ཅིང་ལས་བཞིའི་དངོས་གྲུབ་སྒྲུབ་པའི་མཚན་ཉིད་ཚང་བས་ཉམས་དགའ་བ་དང་ཁྱད་པར་རྒྱལ་བ་རིག་འཛིན་གོང་མས་ཞབས་གཅགས་པས་བྱིན་རླབས་ཀྱི་ཟིལ་དང་ལྡན་ལ་བཀྲ་ཤིས་པའི་གནས་ཕུན་སུམ་ཚོགས་པ་དག་ཏུའོ། །གང་གི་ཚེ་སྒྲུབ་པའི་དུས་ནི། བྱང་བགྲོད་ལྷའི་ཉིན་མོ་དང་ར་བ་བཞིའི་ཡར་ངོའམ་མདོ་སྔགས་ཀྱི་སྟོན་པས་བྱིན་གྱིས་བརླབས་པའི་དུས་ཆེན་ཁྱད་པར་གཟའ་ཆེན་ལྷའི་བླ་མ་རྒྱུ་སྐར་རྒྱལ་དཀར་ཕྱོགས་ཀྱི་ཚེས་བརྒྱད་སུམ་འཛོམ་དངོས་གྲུབ་སྦྱོར་བ་ལྟ་བུ་རྒྱུད་དང་གཙུག་ལག་གི་གཞུང་ལས་ཀྱང་ཡ་མཚན་ཆེན་པོར་བསྔགས་པའི་དུས་ཕུན་སུམ་ཚོགས་པར་རོ། །གང་ལ་བརྟེན་ནས་སྒྲུབ་པའི་རྫས་ནི། སྒྲུབ་པ་རྟེན་མཆོད་པ་རྫས་འཚོ་བ་ཟས་ནད་ཟློག་སྨན་རྐྱེན་ཟློག་ཐབས་ཀྱི་ཁྱད་པར་སོགས་སྤྱི་དང་ཁྱད་པར་དུ་བཤད་པ་ཕུན་སུམ་ཚོགས་པའི་ཡོ་བྱད་དང་བཅས་ཏེའོ། །གང་གིས་སྒྲུབ་པ་པོ་ནི། བསྐྱེད་རྫོགས་དམ་པའི་མཛོད་གསུམ་འཛིན་པ་སོགས་ཡོན་ཏན་བརྒྱད་ལྡན་གྱི་སྟོན་པ་རྡོ་རྗེ་སློབ་དཔོན་དང༌། རྡོ་རྗེའི་གཟུངས་མ་རྒྱལ་ཚབ་རིགས་བཞིའི་རྒྱལ་ཐེབས་ནས་ཕྱག་ཚང་རྡུལ་ཕྱག་ཀྱི་བར་སོ་སོའི་ལས་བསྐོས་ལ་མཁས་ཤིང་སྣོད་ཀྱི་སྐྱོན་གསུམ་བྲལ་ལ་ཡོན་ཏན་ལྔ་དང་ལྡན་པའི་འཁོར་ཕུན་སུམ་ཚོགས་པ་སྟེ་མཚན་ཉིད་ཚང་བའི་སྒྲུབ་པ་པོ་ཚོམ་བུ་ཆེ་འབྲིང་ཆུང་ངུ་གང་རུང་འདུས་པ་དེ་ཡིས་སོ། །ཇི་ལྟར་སྒྲུབ་པའི་ཐབས་ནི། རྣལ་འབྱོར་པ་རིམ་གཉིས་ཀྱི་ཏིང་འཛིན་གསལ་ཞིང་བརྟན་ལ་གཞུང་ནས་ཇི་སྐད་བཤད་པ་ལྟར་བསྙེན་སྒྲུབ་ཡན་ལག་བཞི་ལྡན་གྱི་ཆོ་ག་རྣམས་ལ་ཉམས་པའི་རྒྱུ་བཞི་དང་སླ་ཐལ་བས་མ་ལྷག་པ་དང་དཀའ་བས་མ་ཆད་པར་རྣམ་པར་དག་པའི་སྒྲུབ་ཐབས་ཕུན་སུམ་ཚོགས་པས་འདིར་འཇུག་པར་བྱའོ། །གཉིས་པ་ནི། ས་གཞི་བསླང་ཞིང་དབང་བྱས་སྦྱོང་དང་སྲུང་༔ ཕྱི་ནང་གསང་བའི་རྒྱུད་སྦྱང་མཚམས་བཅད་ཅིང་༔ མ་ཏྲཾ་བསྒྲལ་མནན་རྡོ་རྗེའི་ཞིང་ཁམས་སུ༔ ལྷག་པར་གནས་པའི་སྟ་གོན་ཚུལ་བཞིན་བྱ༔ དཀྱིལ་འཁོར་བཞེངས་ཏེ་རྫས་དང་སྒྲུབ་པོ་དགོད༔ བསྙེན་པའི་ཆོ་གས་སྣོད་སྦྱངས་སྒྲིབ་པ་བསལ༔ ཉེ་བར་བསྙེན་པས་བཅུད་སྦྱངས་དངོས་གྲུབ་བསྡུ༔ སྒྲུབ་པས་རྒྱུད་སྦྱངས་དངོས་གྲུབ་དབང་དུ་བྱ༔ དུས་དྲུག་ཚོགས་ཀྱི་མཆོད་པས་དགྱེས་པ་བསྐང་༔ ལྟ་ཉན་འབྱུང་པོ་ཚར་གཅོད་བྱིན་ཆེན་དབབ༔ ལྷ་སྔགས་ཏིང་འཛིན་འཕྲོ་འདུ་རྒྱུན་མི་བཅད༔ ཡིད་གཡེངས་སྤངས་ཏེ་རྩེ་གཅིག་བསྒྲུབ་པ་ལས༔ བྲིས་སྐུ་བཞད་ཅིང་བདུད་རྩི་སྒྲར་བཅས་ཁོལ༔ མར་མེ་རང་འབར་སྒྲུབ་རྫས་ཞག་དུ་འཁྱིལ༔ རྟོགས་པའི་རྩལ་འབར་ཡེ་ཤེས་དབབ་པ་སོགས༔ ངེས་པའི་རྟགས་བྱུང་སྒྲུབ་པ་ཆེན་པོ་ཡིས༔ སྲོད་ལ་ལྷ་དང་ནམ་གུང་སྒྲོལ་བ་དང་༔ ཐོ་རངས་སྦྱོར་བ་ལམ་བྱས་དངོས་གྲུབ་བླང་༔ ཞེས་གསུངས་ཏེ།

སྒྲུབ་པའི་སྔོན་འགྲོ་ས་གཞི་ལེགས་པར་བརྟགས་ནས་རུང་བར་གྱུར་པ་དེ་སྣང་བ་གཟུགས་ཅན་གྱིས་བདག་ན་རིན་དང་བདེན་པས་བསླང༌། མི་སྣང་བ་ས་ལྷ་གཞི་གནས་ཀྱི་བདག་པོ་ལ་གཏོར་མ་གསེར་སྐྱེམས་ཀྱིས་བརྔན་ནས་བསླང་ཞིང་རྫས་དང་དམིགས་པས་བདག་གི་དབང་དུ་བྱས་ཏེ་སྔགས་རྒྱ་ཏིང་ངེ་འཛིན་གྱིས་སྦྱང་བ་དང་ཁྲོ་བཅུའི་ཕུར་བུ་གདབ་ཅིང་འབར་བའི་སྟངས་སྟབས་རྣམས་ཀྱིས་སྲུང༌། ཕྱི་བཤགས་མཆོད་སྦྱིན་གསུང་རབ་ཀློག་པ་སོགས་སྒྲིབ་སྦྱོང་ཚོགས་གསོག་གི་རིམ་པ་སྤྱི་དང༌། ནང་རུ་ཆེན་བཞིའི་བཤགས་པ། གསང་བ་ན་རཀ་དོང་སྤྲུགས་ཀྱི་ཆོ་ག་རྣམས་ཀྱིས་རྒྱུད་སྦྱང༌། ཕྱི་མཚམས་རྒྱལ་ཆེན་བཞི་ལ་གཉེར་གཏད། བར་མཚམས་སྔགས་ཀྱི་དམ་ཚིག་ཉམས་ནས་སྲི་རྐྱེན་ཏུ་སྐྱེས་པ་རྣམས་ནུས་པའི་སྟོབས་ཀྱིས་མནན། ནང་མཚམས་གལྤོ་ལས། ཆོས་ཀྱི་རྒྱལ་པོ་བདུད་རྩི་ཡི། །ཕྱི་ནང་སྒོ་བྱང་གདགས་པར་བྱ། །ཞེས་པ་ལྟར་ལས་གཤིན་འཁྱིལ་པ་སྒོ་ཕྱི་ནང་གི་སྲུང་མར་བཅོལ། གསང་མཚམས་མཚོན་ཆ་ལྔ་དང་ཁྲོ་བོ་འཆོལ་བ་སོགས་ཀྱི་སྲུང་འཁོར་དང་དེ་བཞིན་ཉིད་ལྟ་བའི་མཚམས་བཅད་བཅས་བྱ་ཞིང༌། བགེགས་ཕྲན་རྣམས་ཀྱིས་བར་དུ་གཅོད་མི་ནུས་པའི་ཕྱིར་དུ་བགེགས་ཀྱི་རྒྱལ་པོ་མ་ཏྲཾ་རུ་དྲ་དྲག་པོའི་སྟབས་ཀྱིས་བསྒྲལ་ཞིང་སྤར་ཏེ་རོལ་པའི་བྲོས་མནན་ལ་ཡན་ལག་སོགས་དུར་ཁྲོད་བརྒྱད་དང་ཁོག་པ་གཞལ་ཡས་ཁང་པ་སྟེ་རྡོ་རྗེའི་ཞིང་ཁམས་སུ་བྱིན་གྱིས་བརླབ། དཀྱིལ་འཁོར་བྲི་བར་གནང་བ་ཞུ་བའི་དོན་དུ་ལྷ་དང་དབང་བསྐུར་བའི་དོན་དུ་བུམ་པ་དང་སློབ་མ་རྣམས་ལྷག་པར་གནས་པའི་སྟ་གོན་གྱི་རིམ་པ་ཚུལ་བཞིན་དུ་བྱ། དེ་ནས་རྟེན་གྱི་དཀྱིལ་འཁོར་བཅའ་བ་ལ་ཐོག་མར་དྲི་དང་བདུད་རྩི་ལྔ་ལ་སོགས་པའི་ཆག་ཆག་གདབ། བྱིན་རླབས་ཀྱི་ཆོ་ག་དང་ལྡན་པས་ལས་དང་ཡེ་ཤེས་ཀྱི་ཐིག་བཏབ་ལ་རབ་འབྲིང་ཐ་མའི་རྡུལ་ཚོན་གྱིས་དཀྱིལ་འཁོར་མཚན་ཉིད་དང་ལྡན་པ་བཞེངས་ལ་སྒྲུབ་རྟེན་དབང་ཆས་དངོས་གྲུབ་དང་མཆོད་རྫས་རྒྱན་གྱི་བྱཻ་བྲག་རྣམས་ལེགས་པར་བཀོད། ཕྲིན་ལས་ལ་འཇུག་རུང་གི་བྱ་བ་སྒྲུབ་པ་པོ་མཆེད་ལྕམ་རྣམས་རང་གནས་སུ་འགོད་ཅིང་ཞི་ཁྲོའི་ཆས་ཀྱིས་མངའ་གསོལ་མ་མོ་མཁའ་འགྲོས་རང་གི་སྡེ་ཚན་དུ་ཤེས་པའི་ཕྱིར་དཔལ་གྱི་རྟགས་གསུམ་གདབ། མཆེད་གསར་བུ་བ་བསྲེ་བསྣན་གྱི་ཆོ་གས་སྣོད་རུང་དུ་བྱའོ། །དེ་ནས་དངོས་གཞི་སྒྲུབ་དུས་ཀྱི་བསྙེན་བསྒྲུབ་ཡན་ལག་བཞིས་གཞུང་སྲོང་བ་སྟེ། ཏིང་འཛིན་རྣམ་པ་གསུམ་གྱིས་གཞི་བཟུང་རྣལ་འབྱོར་ཕོ་མོ་དང་ལྷ་ཡབ་ཡུམ་གྲངས་སྦྱར་ནས་སྒོམ་པའམ། མོས་སློབ་ལ་རྣལ་འབྱོར་པ་སྤྱིས་དཀྱིལ་འཁོར་སྤྱི་བསྒོམས་ལ་བདག་དམ་ཚིག་པ་ལྷ་ཡེ་ཤེས་པ་བར་གྱི་འཕྲོ་འདུ་སྟེ་གསལ་བ་གསུམ་ལྡན་གྱི་སྒོ་ནས་ཕྲིན་ལས་ཚུལ་བཞིན་ཏུ་བཏང༌། སྒྲུབ་པ་ཇི་ཙམ་བྱེད་པའི་སུམ་ཆ་དང་པོར་བསྙེན་པའི་ཆོ་གས་སྣོད་གཞལ་ཡས་ཁང་དུ་སྦྱངས་ཏེ་རྟོག་ཚོགས་ཀྱི་སྒྲིབ་པ་བསལ། སུམ་ཆ་གཉིས་པར་ཉེ་བར་བསྙེན་པས་བཅུད་སྣང་སྟོང་ལྷའི་འཁོར་ལོར་སྦྱངས་ཏེ་དངོས་གྲུབ་ཀྱི་དབྱིག་བསྡུ། ཆ་གསུམ་པར་སྒྲུབ་པའི་དགོངས་པས་སེམས་ཀྱི་རྒྱུད་རང་བྱུང་ཡེ་ཤེས་ཆེན་པོར་སྦྱངས་ཏེ་དངོས་གྲུབ་གཉིས་ལ་རང་གི་དབང་དུ་གྱུར་པར་བྱ། དེ་དག་གི་སྐབས་ཉིན་མཚན་དུས་དྲུག་ཏུ་ཚོགས་ཀྱི་མཆོད་པས་ལྷ་དང་དམ་ཅན་དགྱེས་པ་བསྐྱེད་ཅིང་ཉམས་ཆགས་བསྐང༌། དུས་ཚོད་བཅུ་གཉིས་སུ་ལྟ་ཉན་གྱིས་ཉུལ་ཞིང་སྒྲུབ་པ་ལ་བར་གཅོད་བྱེད་པའི་འབྱུང་པོ་རྣམས་ཕུར་ཐུན་གྱིས་གཟིར་ཅིང་དཔལ་གྱི་ཕོ་ཉ་བཅུ་གཉིས་ཚར་གཅོད་དུ་བསྐུལ། དུས་དེར་དངོས་གྲུབ་སྦྱིན་པའི་ལྷ་རེའང་འབྱུང་བས་རྒྱན་གོས་སོགས་ཀྱིས་གཟི་བྱིན་བསྐྱེད་ལ་བདག་གནས་སྒྲུབ་པའི་རྟེན་རྣམས་ལ་བྱིན་ཆེན་དབབ། སྒྲུབ་པ་དབུ་བཙུགས་ནས་མཐར་མ་སོན་གྱི་བར་དུ་སྣང་བ་ལྷའི་དཀྱིལ་འཁོར་གྲགས་པ་སྔགས་ཀྱི་རང་སྒྲ་དྲན་རྟོག་ཆོས་ཉིད་ཀྱི་ངང་ལས་མ་གཡོས་པར་བཟླས་པ་གསུང་མི་འཆད་དུ་བྱ་བ་དང་ཏིང་ངེ་འཛིན་གྱི་འཕྲོ་འདུ་རྒྱུན་མི་བཅད་པར་གཉིད་རྨུགས་ལེ་ལོ་ཆགས་སྡང་སོགས་ཀྱིས་ཡིད་རྣམ་པར་གཡེང་བ་སྤངས་ཏེ་རྩེ་གཅིག་ཏུ་བསྒྲུབ་པར་བྱས་པ་ལས། གྲུབ་པའི་རྟགས་རབ་དངོས་འབྲིང་ཉམས་ཐ་མ་རྨི་ལམ་དུ་སྒྲུབ་རྟེན་དམ་ཚིག་གི་བྲིས་སྐུ་བཞད་ཅིང་ནང་མཆོད་བདུད་རྩི་སོལ་སྒྲ་བཅས་ཁོལ་ནས་རླངས་པ་ཕྱུར་བ་དང༌། མར་མེ་རང་བཞིན་གྱིས་འབར་ཞིང་གཏོར་མ་ལ་བདུད་རྩི་འབབས་པ་སོགས་སྒྲུབ་རྫས་ཞག་ཏུ་འཁྱིལ་བ་དང༌། ལྷའི་ཞལ་མཐོང་ཞིང་མཁའ་འགྲོས་ལུང་བསྟན་པ་དང༌། འོད་དང་སྒྲ་དང་དྲི་བཟང་འཐུལ་བ་སོགས་སྤྱི་དང༌། ཁྱད་པར་གྱི་རྟགས་ཉམས་དང་རྟོགས་པའི་རྩལ་ཆེན་ཕྱོགས་མེད་དུ་འབར་ཞིང་ཡང་དག་པའི་ཡེ་ཤེས་ལ་རང་དབང་ཐོབ་པས་འདོད་རྒུར་སྒྱུར་བ་སོགས་ངེས་པའི་རྟགས་རྫོགས་པར་བྱུང་བ་དང༌། རྗེས་ཀྱི་ལས་རིམ་ནུབ་ཐ་མར་སྒྲུབ་པ་ཆེན་པོའི་ལས་ལ་སྦྱར་བར་བྱ་སྟེ། དེའང་ནམ་གྱི་སྲོད་ལ་མཱཾ་ས་ཟླ་རྒྱས་ཚེ་གལ་མ་ད་ན་སོགས་བཀྲ་ཤིས་པའི་རྫས་ལ་རྟེན་བྱས་ཐུགས་དམ་གནད་ནས་བསྐུལ་ཏེ་ལྷ་ལས་དངོས་གྲུབ་བླང་བ་དང༌། ནམ་གུང་དུ་འཁོར་ཁང་བར་མར་བསྒྲལ་བྱ་མཆོག་ཆེན་མཆོག་ཕྲན། སྒྲོལ་བྱེད་འཛིན་སྒྲོལ་སྟོབ་པའི་ཀིངྐ་ར། སྒྲོལ་བའི་ཐབས་ངོ་མཚར་བདུན་ལྡན་གྱི་ཆོ་ག་སོགས་ཀྱིས་སྒྲོལ་བ་ལམ་དུ་བྱས་ནས་དངོས་གྲུབ་བླང་བ་དང༌། ཐོ་རངས་དུས་སུ་རྣལ་འབྱོར་པའི་ནུས་པ་དང་མཐུན་པའི་གཟུངས་མ་ལྷ་ཀླུ་མི་མོ་རིགས་ཅན་ལྔ་སོགས་ཁྲུས་ནས་དབྱུང་ཞིང་རྒྱན་བཏགས་སྣོད་རུང་དུ་བྱས་ཏེ་འཁོར་ཁང་ནང་མར་འདོད་པའི་བསྟན་བཅོས་ཀྱིས་བདེ་བ་བསྐྱེད་པ་བསྙེན་པ། འདུ་ཤེས་གསུམ་ལྡན་གྱིས་སྦྱོར་བའི་བརྡས་བསྐུལ་བ་ཉེ་བསྙེན། ཕྱག་རྒྱ་བཞིས་སྙོམས་པར་ཞུགས་ཏེ་ཡས་བབ་ཀྱི་དགའ་བཞི་ངོས་བཟུང་བ་སྒྲུབ་པ། མཁའ་ལས་བྱང་ཆུབ་སེམས་རྡོ་རྗེའི་ལྕེས་འཇིབ་སྟེ་ལྡོག་དགྲམ་གྱི་སྦྱོར་བས་མས་བརྟན་གྱི་དགའ་བཞི་མཐར་སྐྱེལ་བསྒྲུབ་ཆེན་ཏེ་སྦྱོར་དུས་གྱི་བསྙེན་སྒྲུབ་ཡན་ལག་བཞི་དང་ལྡན་པས་སྦྱོར་བ་ལམ་དུ་བྱས་ལ་དངོས་གྲུབ་བླང༌། མོས་སློབ་ཙམ་ལ་ལྷ་ལས་དངོས་སུ་བླང༌། གཞན་དག་ཏིང་ངེ་འཛིན་གྱིས་བསྒྲུབ་པ་སོགས་བྱས་ནས་གཞན་དག་ལ་སྒྲུབ་པའི་དབང་སྦྱིན། ལྷག་མའི་ཆོ་ག་དང་ཕྱི་རོལ་དུ་གཏོར་མ་བཏང༌། དགོས་པ་དང་འབྲེལ་ན་དྲག་གཏོར་ཟོར་དུ་བསྐུལ། བཟོད་པར་གསོལ་ལ་དཀྱིལ་འཁོར་བསྡུ། སྤྱོད་ལམ་རྒྱུན་ཏིང་ལ་འཇུག་ཅིང་བསྔོ་སྨོན་གྱིས་རྒྱས་གདབ། ཕྱི་མཚམས་བཀྲོལ་ཞིང་གནས་སྲུང་བ་སོགས་སྒྲུབ་ཆེན་གྱི་ཁོག་གཞུང་རྣམས་ལས་འབྱུང་བ་བཞིན་ཤེས་པར་བྱའོ།

།བཞི་པ་དེ་ལྟར་བསྒྲུབ་པའི་འབྲས་བུ་རིག་འཛིན་འགྲུབ་པའི་དུས་བསྟན་པ་ནི། དེ་ལྟར་ཟླ་དྲུག་བཅུ་གཉིས་བཅོ་བརྒྱད་ནས༔ ཕྱི་ནང་བསྐྱེད་རྫོགས་སེམས་ལ་དབང་ཐོབ་པས༔ རླུང་རིག་ལས་རུང་འོད་གསལ་མངོན་དུ་འགྱུར༔ རྣམ་སྨིན་ལུས་ལ་སེམས་ཉིད་ལྷ་སྐུར་སྨིན༔ ཟག་པ་གསུམ་ཟད་ཚེ་ལ་དབང་བ་ཐོབ༔ རིགས་ལྔའི་གདུང་འཛིན་ཕྱག་རྒྱ་ཆེན་པོའི་སྐུས༔ རྒྱལ་ཚབ་ཆེན་པོའི་ས་ལ་ལྷུན་གྱིས་གྲུབ༔ ཅེས་གསུངས་ཏེ། ཟག་བཅས་ལམ་གྱི་རྣལ་འབྱོར་སྟོང་ཆེན་སྙིང་རྗེ་ཕྱག་རྒྱ་གཅིག་སྤྲོས་ཏེ་ཚོགས་ལམ་གྱི་རྣལ་འབྱོར་བཞི་དང༌། ཚོགས་སྒྲུབ་སྦྱོར་ལམ་བར་ཆད་མེད་པའི་ལམ་དུ་ཇི་སྐད་བཤད་པ་དེ་ལྟར་སྨིན་པར་སློབ་པས་དབང་པོ་རབ་ཟླ་བ་དྲུག་འབྲིང་བཅུ་གཉིས་ཐ་མས་ཀྱང་ཟླ་བ་བཅོ་བརྒྱད་སོང་ནས། ཕྱི་བསྐྱེད་རིམ་གྱི་གསལ་སྣང་མཐར་ཕྱིན། ནང་རྫོགས་རིམ་གྱི་ཏིང་ངེ་འཛིན་བརྟན་ནས་སེམས་ལ་རང་དབང་ཐོབ་པས་རླུང་དང་རིག་པ་ལས་སུ་རུང༌། དེ་ལས་དོན་དམ་འོད་གསལ་གྱི་ཡེ་ཤེས་མངོན་ཏུ་འགྱུར་བས་ཟག་མེད་ཀྱི་མཐོང་སྒོམས་མཐར་ལམ་གསུམ་གྱིས་བསྡུས་པའི་རིག་འཛིན་བཞིའི་འབྲས་བུ་ལ་སྦྱོར་ཏེ། གསང་སྙིང་ལས། ལེ་ལོ་སྒྱིད་སྙོམ་མེད་པ་ཡིས། །ཐེ་ཚོམ་མེད་པར་བསྒྲུབས་བྱས་ན། །དཀྱིལ་འཁོར་ཐམས་ཅད་འགྲུབ་པར་འགྱུར། །རྡོ་རྗེ་གསང་མཆོག་དམ་པ་ཐོབ། ཅེས་སོ། །དེ་ལ་དང་པོ་རྣམ་སྨིན་གྱི་རིག་འཛིན་གྱི་རྒྱུ་དབང་བརྟུལ་གཅིག་སྤྲོས་ལ་བརྟན་པ་ཐོབ་ནས་ཚོགས་ཀྱི་སྒྲུབ་པས་ཆོས་ཉིད་ཀྱི་བདེན་པ་མཐོང་ཡང་བློའི་ནུས་པ་དང་ཉེ་རྒྱུའི་སྤྱོད་སྟོབས་ཆུང་བས། ངོ་བོ་གདོས་བཅས་ཀྱི་ཕུང་པོ་དང་མ་བྲལ་བ་རྣམ་པར་སྨིན་པའི་ལུས་ལ། སེམས་ཉིད་བསྒྲུབ་བྱའི་ལྷ་སྐུར་སྨིན་པ། ལུས་རྒྱ་བྲལ་མ་ཐག་ཕྱག་རྒྱའི་རིག་འཛིན་ལ་སྦྱོར་བ་མཚན་ཉིད་སུམ་ལྡན་ལྷག་མེད་མྱང་འདས། དགོངས་པ་རྒྱུའི་ཐེག་པའི་མཐོང་ལམ་རབ་དགའ་ལ་གནས་པའི་བྱང་སེམས་འཕགས་པ་དང་མཉམ་པ། སྤྱོད་པ་བདག་དོན་བཀོད་པ་དཀྱིལ་འཁོར་བྱ་བས་ཚོགས་གཉིས་རྫོགས་པར་བྱེད་ཅིང་ལྷའི་སྤྱན་སོགས་གྱིས་ཕྲིན་ལས་བཞིའི་སྒོ་ནས་གླིང་བཞིའི་འགྲོ་བའི་དོན་སྒྲུབ་བོ། །གཉིས་པ་ཚེ་དབང་རིག་འཛིན་གྱི་རྒྱུ་དབང་རྣོན་ཤེས་རབ་གསུམ་གྱི་ལྟ་བ་ཏིང་ངེ་འཛིན་ལ་རྟོགས་གོམས་ཁྱད་པར་ཅན་དུ་གྱུར་ནས་བློ་ནུས་དང་སྤྱོད་སྟོབས་ཆེ་བས། ངོ་བོ་ལུས་སྙིགས་མའི་ཟག་པ་ཁམས་འཕོ་བའི་ཟག་པ་སེམས་སྐྱེ་གནས་ལེན་པའི་ཟག་པ་གསུམ་ཟད་ནས་མཐོང་བའི་ལམ་དུ་སྐྱེ་འཇིག་མེད་པ་རྡོ་རྗེའི་ལུས་སུ་གྱུར་ཏེ་ཚེ་ལ་དབང་བ་ཐོབ་ནས་ཇི་ལྟར་འདོད་པ་བཞིན་དུ་བཞུགས་པ་ལྷག་བཅས་མྱང་འདས། དགོངས་པ་རྒྱུའི་ས་བརྒྱད་པའི་འཕགས་པ་དང་མཉམ་ཞིང༌། སྤྱོད་པ་བདག་དོན་ལྟ་སྒོམ་ལ་རིག་རྩལ་སྦྱོང་ཞིང་ལྟ་བ་ཆེད་འཛིན་ཀུན་འགྲོའི་དྲི་མ་བསལ། མངོན་ཤེས་དྲུག་ལ་སོགས་པ་དང་ཆོ་འཕྲུལ་བཞིས་གཞན་དོན་མཛད་པའོ། །གསུམ་པ་ཕྱག་རྒྱའི་རིག་འཛིན་གྱི་རྒྱུ་གཅིག་སྤྲོས་ཀྱི་ཏིང་ངེ་འཛིན་ལ་གོམས་པའི་རྒྱུན་དང་ཀུན་འགྲོའི་སྒྲིབ་པ་དག་པ་ལས། ངོ་བོ་བསྒོམ་བྱ་མངོན་དུ་གྱུར་པས་མི་གཡོ་བའི་ཏིང་ངེ་འཛིན་གྱིས་ལྷན་ཅིག་གནས་པའི་དྲི་མ་སྦྱོང་བ་ལ་ཞུགས་པ། ཡེ་ཤེས་སྒྱུ་མའི་སྐུས་སྤྲུལ་པ་ཅིར་ཡང་སྟོན་ཅིང་སྒོམ་ལམ་ས་དགུ་བགྲོད་པ། དགོངས་པ་རྒྱུའི་ས་དགུ་པའི་འཕགས་པ་དང་མཉམ་ལ། སྤྱོད་པ་བདག་དོན་ཏུ་ལྷན་ཅིག་གནས་པའི་དྲི་མ་སྦྱོང་ཞིང་དབང་ཤེས་ཉེར་ལྔའི་ཡོན་ཏན་དང་ལྡན་པས་དགོངས་པ་མི་གཡོ་བའི་ངང་ནས་དག་མ་དག་གི་ཞིང་རྣམས་སུ་སྤྲུལ་པ་སྣ་ཚོགས་པས་གཞན་དོན་མཛད་པ་སྟེ། དེ་ལ་ནང་གསེས་སུ་ས་གཉིས་པ་ནས་ལྔ་པའི་བར་རྡོ་རྗེ། དྲུག་པ་དང་བདུན་པར་འཁོར་ལོ། བརྒྱད་པར་རིན་ཆེན། དགུ་པར་པདྨ། བཅུ་པར་རལ་གྲིའི་རིག་འཛིན་ཏེ་རིགས་ལྔའི་གདུང་འཛིན་པའི་ཕྱག་རྒྱ་ཆེན་པོ་ཡེ་ཤེས་ལྷ་སྐུས་མཐར་ལམ་ལ་སྦྱོར་བའོ། །བཞི་པ་ལྷུན་གྲུབ་རིག་འཛིན་གྱི་རྒྱུ་སྒོམ་ལམ་དུ་མཐོང་གོམས་ཀྱི་མཐུ་རྫོགས་པས་ཤེས་རབ་གསུམ་མཐར་ཐུག་པས་ལྷན་གནས་ཀྱི་དྲི་མ་དག་པ་ལས། ངོ་བོ་ལམ་གྱི་རྟོགས་པ་མཐར་ཕྱིན་ཏེ་མི་སློབ་པའི་རང་བཞིན་སངས་རྒྱས་ཀྱི་རྒྱལ་ཚབ་ཆེན་པོའི་ས་ལ་སྐུ་ལྔ་ལྷུན་གྱིས་གྲུབ་པའི་ཆ་ལུགས་འཛིན་པ། དགོངས་པ་མདོ་ལམ་གྱི་ས་བཅུ་གཅིག་ཀུན་ཏུ་འོད་ཀྱི་ས་ལ་གནས་པ་དང་མཉམ་ཞིང་སྤྱོད་པ་རང་དོན་ཏུ་སྐུ་ལྔའི་རྒྱལ་བ་ལ་སོགས་པར་བརྟེན་ཏེ་ཤེས་སྒྲིབ་ཕྲ་བ་སྦྱོང་ལ། ཇི་སྙེད་མཁྱེན་པའི་ཡེ་ཤེས་ཀྱིས་སངས་རྒྱས་ཀྱི་ཞིང་ཁམས་རབ་འབྱམས་སུ་སྤྲུལ་པའི་སྐུས་གཞན་དོན་མཛད་པའོ།

།རྩ་བའི་ས་བཅད་གསུམ་པ་དོན་བསྡུ་བ་ནི། མདོར་ན་རིམ་པས་སྨིན་ཅིང་དམ་ཚིག་བརྟན༔ ལྟ་བས་རྒྱུད་སྦྱངས་ཏིང་འཛིན་རྩེ་གཅིག་བརྟན༔ དཀྱིལ་འཁོར་ལེགས་བཀོད་སྒྲུབ་པའི་རྣལ་འབྱོར་པས༔ སྔགས་དང་ཕྱག་རྒྱ་མཆོད་པའི་དཔུང་བསྐྱེད་དེ༔ སྤྱོད་པས་མཚམས་སྦྱར་དངོས་གྲུབ་མཐུ་ཐོབ་ནས༔ མཆོག་དང་ཐུན་མོང་ཕྲིན་ལས་འབད་མེད་འགྲུབ༔ གཞི་དང་ལམ་དང་འབྲས་བུའི་ཚུལ་ཉིད་དུ༔ རྒྱུད་དོན་དངོས་པོ་ཉམས་ལེན་སྙིང་པོར་བྱ༔ ཞེས་གསུངས་ཏེ། དེ་ལྟར་རྒྱས་པར་ཕྱི་ནས་བསྟན་པ་དེ་རྣམས་ཀྱང་ཉམས་ལེན་གནད་དུ་མདོར་དྲིལ་ན། ཐོག་མར་གཞི་རིམ་བར་བགྲོད་པར་བྱེད་པ་དབང་གིས་རྒྱུད་སྨིན་ཅིང་དེའི་སྲོག་མི་འདའ་བ་དམ་ཚིག་སྤྱི་དང་ཁྱད་པར་ལྷག་པས་བསྡུས་པ་རྣམས་བརྟན་པོར་བཟུང་བ་དང༌། དེ་ཁོ་ན་ཉིད་གནས་ལུགས་དང་རྗེས་སུ་མཐུན་པའི་ལྟ་བ་ལྷག་པའི་བདེན་པ་དབྱེར་མེད་ཀྱིས་རྒྱུད་སྦྱངས་ནས། ལམ་རིམ་གཉིས་ཀྱིས་ཏིང་ངེ་འཛིན་ལས་མི་གཡོ་བའི་སེམས་རྩེ་གཅིག་ཏུ་བརྟན་པ་ན། དཀྱིལ་འཁོར་སྒྲུབ་རྫས་སོགས་དམིགས་པའི་རྟེན་དུ་ལེགས་པར་བཀོད་ནས་འདོད་འབྲས་དོན་ཏུ་གཉེར་བའི་སྒྲུབ་པ་ལ་ཞུགས་པའི་རྣལ་འབྱོར་པས། བཟླས་པ་ལས་ཀྱི་སྔགས་དང་འཆིང་བ་དམ་ཚིག་ཕྱག་རྒྱ་འཆིང་འགྲོལ་དུ་བསྒྱུར་ལ་ཕྱི་ནང་གསང་བའི་མཆོད་པའི་དཔུང་བསྐྱེད་དེ་ལྷ་རྣམས་ཀྱི་དབང་པོར་སྟོབ་པས་དགྱེས་པ་བསྐང༌། སྤང་བླང་མེད་པར་ལ་དོར་བའི་ཉེ་རྒྱུའི་སྤྱོད་པས་མཚམས་སྦྱར་བས་དངོས་གྲུབ་གཉིས་མྱུར་དུ་འགྲུབ་པའི་ནུས་མཐུ་ཐོབ་ནས། གཙོ་བོར་རང་གཞན་མཆོག་ལ་སྦྱོར་བ་དང༌། ཞར་བྱུང་ཐུན་མོང་ཕྲིན་ལས་རྣམ་པ་བཞི་སོགས་ཡུལ་དུས་སྐལ་བ་དང་འཚམས་པར་རོལ་པའི་ལས་བདེ་བླག་ཏུ་འགྲུབ་པར་འགྱུར་རོ། །དེས་ན་དང་པོ་གསུམ་ལམ་ཉམས་སུ་ལེན་པའི་གཞི་དང༌། བར་པ་དྲུག་ལམ་གྱི་ཉམས་ལེན་དངོས་དང༌། ཐ་མ་གཅིག་འབྲས་བུའི་ཚུལ་ཉིད་དུ་འབྱུང་བར་ཤེས་ནས། རྒྱུད་རྒྱལ་སྒྱུ་འཕྲུལ་དྲྭ་བ་སོགས་ཀྱི་དགོངས་དོན་དངོས་པོ་བཅུ་ལ་གང་ཟག་གཅིག་ཚེ་གཅིག་ཏུ་འཚང་རྒྱ་བའི་ལམ་ཚང་ལ་མ་ནོར་བ་ཡིན་པས་ཉམས་ལེན་གྱི་སྙིང་པོར་བྱ་བར་གཅེས་སོ། །གཉིས་པ་གསང་དབང་གི་ལམ་དང་འབྲེལ་བ་བདག་བྱིན་བརླབ་པའི་རིམ་པ་བསྒོམ་པ་ལ་གཉིས། གོང་འོག་མཚམས་སྦྱར་ཏེ་མདོར་བསྟན་པ་དང༌། དེ་དག་རྒྱས་པར་བཀྲོལ་བའོ། །དང་པོ་ནི། དེ་ལྟར་བུམ་དབང་ལམ་ཁྱེར་གཙོར་གྱུར་པའི༔ རྣལ་འབྱོར་ཆེན་པོའི་སྒྲུབ་པས་གཞི་བཟུང་སྟེ༔ གསང་དབང་ཉེ་བར་བསྙེན་པའི་ལམ་རིམ་ནི༔ ཞེས་གསུངས་ཏེ། དེ་ལྟར་ན་དབང་བཞིའི་རྩ་བ། བུམ་དབང་ལམ་དུ་ཁྱེར་བའི་ཐབས་གཙོ་བོར་གྱུར་པའི་བསྐྱེད་པའི་རིམ་པ་ཡན་ལག་དང་བཅས་པ་མ་ཧཱ་ཡོ་ག་སྟེ་རྣལ་འབྱོར་ཆེན་པོའི་རྒྱུད་དང་འབྲེལ་པར་ལམ་གོང་མའི་སྟེགས་སུ་བསྙེན་པས་གཞི་བཟུང་སྟེ། ཟབ་མོ་ལུས་ཀྱི་དཀྱིལ་འཁོར་དུ་གསང་བའི་དབང་བསྐུར་བ་ཐོབ་པའི་ཡེ་ཤེས་དེ་ཉིད་ལམ་དུ་བྱེད་ཅིང་ཤེར་ཡེ་ལ་ཉེ་བར་བསྙེན་པའི་ལམ་གྱི་རིམ་པ་ནི་འདི་ལྟ་སྟེ། གཉིས་པ་ལ་གཉིས། ལམ་དངོས་དང༌། ལམ་གཞན་འདུ་བའི་ཚུལ་འབྲས་བུ་དང་བཅས་པའོ། །དང་པོ་ལ་གཉིས། མདོར་བསྟན། རྒྱས་བཤད་དོ།

།དང་པོ་ནི། རྟེན་དང་བརྟེན་པ་རྗེས་སུ་རྣལ་འབྱོར་ལམ༔ ཟབ་པའི་བསྐྱེད་རིམ་རྩ་རླུང་ཐིག་ལེའི་ཁམས༔ གྲུབ་ཙམ་ཉིད་ནས་རང་བྱུང་སྣོད་དང་བཅུད༔ བཅོས་མ་མིན་པའི་དཀྱིལ་འཁོར་ཉིད་ཡིན་པས༔ ཞེས་གསུངས་ཏེ། དེའང་རྟེན་རྡོ་རྗེའི་ལུས་དང་བརྟེན་པ་རྩ་རླུང་ཐིག་ལེའི་གནད་འཆིང་བ་རྫོགས་པ་ཨ་ནུ་ཡོ་ག་སྟེ་རྗེས་སུ་རྣལ་འབྱོར་གྱི་ལུང་དང་འབྲེལ་བའི་ལམ། སྔ་མ་ལས་ཟབ་པས་ཟབ་མོའི་བསྐྱེད་རིམ་སྟེ་ཐོག་མར་རྩ་དང་རླུང་དང་ཐིག་ལེའི་ཁམས་རྣམས་གྲུབ་ཙམ་ཉིད་ནས་རང་བྱུང་གི་སྣོད་འཁོར་དང་བཅུད་དཀྱིལ་གྱི་རང་གཞིན་ཤུགས་ཀྱིས་གྲུབ་པས་རྟོགས་པས་གསར་དུ་སྒྲོ་བཏགས་ནས་བཅོས་མར་བྱས་པ་མིན་པའི་ལྷུན་གྲུབ་ལུས་ཀྱི་དཀྱིལ་འཁོར་ཅེས་བྱ་བ་ཉིད་ཡིན་པས་ཁྱད་པར་དུ་འཕགས་ཏེ། བང་མཛོད་འཕྲུལ་ལྡེ་ལས། རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། ཅེས་དང༌། དྲིལ་བུ་པས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་པ་ལྟར་རོ། །སྤྱིར་རྡོ་རྗེའི་ལུས་ལ་གནད་དུ་བསྣུན་པ་ལ་དེའི་གནས་ལུགས་ཤེས་པ་གལ་ཆེ་སྟེ་དེའི་རྒྱུ་མཚན་ཕྲ་བའི་ལུས་ངག་ཡིད་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་གྱི་ལྷར་རྣམ་པར་དག་ལ། དེ་གསུམ་ཡང་དོན་དམ་པའི་རིགས་དྲུག་གི་ལྷ་ཡབ་ཡུམ་གྱི་བདག་ཉིད་འབྱུང་ལྔ་སེམས་ཀྱི་དྭངས་མ་དྲུག་པོ་ཡང་གཉིས་གཉིས་སུ་ཟུང་དུ་འཇུག་པ་ལས། ས་ཆུའི་དྭངས་མ་སྐུ་རྡོ་རྗེ། མེ་རླུང་གི་དྭངས་མ་གསུང་རྡོ་རྗེ། མཁའ་སེམས་ཀྱི་དྭངས་མ་ཐུགས་རྡོ་རྗེར་བཞུགས་ཤིང༌། དེ་གསུམ་ལྡོག་ཆས་ཕྱེ་བ་ཙམ་ལས་དོན་དམ་པར་སྐུ་གསུང་ཐུགས་རྡོ་རྗེ་མཉམ་པ་ཉིད་དེ་སྦྱང་གཞི། དེའི་རང་མདངས་ཀུན་རྫོབ་སྣང་ངོའི་ཆ་ནས་རྐྱང་མ་རོ་མ་དབུ་མ་གསུམ་ཁུ་རྡུལ་རླུང་གི་རྟེན་དང༌། རླུང་སེམས་འཇུག་པ་གཅིག་པས་སེམས་ཀྱི་རྟེན་ཡང་ཡིན་ལ། དེ་ཉིད་རགས་པ་གྲུབ་པ་ན་རྩ་ལས་ལུས། རླུང་ལས་ངག །ཐིག་ལེ་ལས་སེམས་ཀྱི་ཆོས་འགྲུབ་པ་ནི་སྦྱང་བྱ་འཁྲུལ་པའི་སྒོ་གསུམ་ཡིན་ཅིང༌། དེ་སྦྱོང་བྱེད་དབང་གོང་མ་གསུམ་དང་འབྲེལ་བའི་ཟབ་ལམ་ཁྱད་པར་རྣམས་ཀྱིས་བྱེད་པ་བཅིང་ཞིང་འོད་གསལ་དུ་སྦྱངས་པས་གློ་བུར་སྒྲིབ་པ་ཐམས་ཅད་གདོད་མའི་ཡེ་ཤེས་སུ་ཐིམ་པ་ན། སྦྱངས་འབྲས་སྒྲིབ་བྲལ་བདེ་བ་ཆེན་པོས་ཁྱབ་བྱེད་དུ་བྱས་པའི་སྐུ་གསུམ་པོ་འགྲུབ་པར་འགྱུར་བ་ཡིན་པས་དེ་དག་གི་ཚུལ་མདོ་ཙམ་སྨོས་ན་བཞི། ལུས་འགྲུབ་པའི་རྒྱུ་རྐྱེན། གནས་པ་རྩ། གཡོ་བ་རླུང༌། བཀོད་པ་ཐིག་ལེའོ། །དང་པོ་རྡོ་རྗེ་ཐེག་པའི་རྟེན་ཁྱད་པར་དུ་འཕགས་པ་ཛམྦུའི་གླིང་པའི་མི་ཁམས་དྲུག་ལྡན་གྱི་ལུས་ནི། དྲི་མ་དང་བཅས་པའི་སེམས་ཀྱིས་འདུ་བྱས་ཤིང༌། ལས་མངོན་པར་བསྒྲུབས་པས་རྒྱུ་བྱས། ཕ་མའི་འདུ་འཕྲོད་ཀྱིས་རྐྱེན་བྱས་ཏེ། དེ་གསུམ་ཚོགས་པ་ཉི་ཟླ་སྒྲ་གཅན་ཞེས་བཏགས་པའི་ཕ་མའི་ཁུ་ཁྲག་བར་དོའི་རྣམ་ཤེས་དང་བཅས་པ་ལས་ལུས་ངག་ཡིད་གསུམ་བསྐྱེད། བར་དོའི་ཤེས་པ་དེས་ཕ་མ་གཉིས་ཀྱི་རེག་པ་སྲ་བ་དེ་ཉམས་སུ་མྱོང་བས་སའི་ཁམས་གྲུབ་ཅིང༌། དེ་བཞིན་དུ་བྱང་སེམས་ཁུ་བ་གཤེར་བའི་རང་བཞིན་ཆུ། བསྐྱོད་པ་ལས་དྲོད་སྐྱེ་བ་མེ། རྩ་གནས་ཐམས་ཅད་ལས་བྱང་སེམས་གཡོ་བ་རླུང༌། བདེ་བ་ནམ་མཁའི་ཁམས་ཏེ་འབྱུང་བ་ལྔ། རྣམ་པར་ཤེས་པ་ཡེ་ཤེས་ཀྱི་ཁམས་དང་དྲུག་འདུས་པ་ལས་ལུས་གྲུབ་སྟེ་མའི་མངལ་དུ་ས་བཅུའི་རང་བཞིན་གྱི་ཟླ་བ་ངོ་བཅུར་གནས་པའི་ཚེ་རྩའི་གཙོ་མོ་གསུམ་ནས་བརྩམས་ཏེ་སྟོང་ཕྲག་ལྔ་བཅུ་རྩ་བཞི་དང༌། བཙས་ནས་ཟླ་བ་གསུམ་པ་ན་རྩ་སྟོང་ཕྲག་བདུན་ཅུ་རྩ་གཉིས་རྫོགས་པར་ལུས་ཆགས་པའི་གནས་སྐབས་རྫོགས་པའོ། །གཉིས་པ་ནི། ལུས་ཀྱི་དབུས་གསང་གནས་ནས་གཙུག་ཏོར་གྱི་བར་དུ་རྩ་ཨ་བ་དྷུ་ཏི་སྲོག་ཤིང་གི་ཚུལ་དུ་ཡར་སྣ་སྨིན་མཚམས་སུ་ཟུག་པ་དེའི་གཡས་ན་རོ་མ་དང༌། གཡོན་ན་རྐྱང་མ་གཉིས་ཡར་སྣ་སྣ་བུག་ཏུ་ཟུག་སྟེ་སྨིན་མཚམས་ནས་སུམ་གཤིབས་ཀྱི་ཚུལ་དུ་སོང་བའི་འཁོར་ལོ་བཞིའི་ལྟེ་བར་སོ་སོར་མདུད་པའི་ཚུལ་གྱིས་ནང་འབྲེལ་པར་གནས་པ། ལྟེ་བའི་འོག་ནས་རྩ་གསུམ་འདྲེས་ཤིང་དབུ་མའི་མར་སྣ་དུང་ཅན་མ་གཡས་ངོས་སུ་སོང་སྟེ་ཁུ་བ། རྐྱང་མ་དབུས་སུ་སོང་སྟེ་དྲི་ཆུ། རོ་མ་གཡོན་ཏུ་སོང་སྟེ་ཁྲག་དང་དྲི་ཆེན་འབྱིན་སྡོམ་བྱེད། སྤྱི་མགྲིན་སྙིང་ལྟེའི་འཁོར་ལོ་བཞི་ཀའི་དབུས་ནས་ཕྱོགས་བཞིར་རྩ་བཞི་བཞི་གྱེས་པ། སྙིང་གར་དེ་བཞི་ལས་གཉིས་རེ་གྱེས་པས་བརྒྱད། མགྲིན་པར་དེ་ལས་གཉིས་གཉིས་གྱེས་པས་བཅུ་དྲུག །སྤྱི་བོར་དེ་ལས་གཉིས་གཉིས་གྱེས་པས་སོ་གཉིས། ལྟེ་བར་སྙིང་ག་ལྟར་གྱེས་པ་བརྒྱད་གྱི་བཞི་ལས་གཉིས་རེ་གྱེས་པས་འཕོ་བའི་རྩ་བཅུ་གཉིས་དང༌། དེའི་སྔར་གྱེས་པ་བརྒྱད་ལས་ལྔ་ལྔ་དང་མ་གྱེས་པ་བཞི་ལས་དྲུག་རེ་གྱེས་པ་དྲུག་ཅུ་རྩ་བཞིའོ། །དེའང་སྤྱི་བོ་སྐུའི་འཁོར་ལོའམ་བདེ་བ་ཆེན་པོའི་རྟེན་ཧཾ་ཡིག་བཞུགས་པས་བདེ་ཆེན་འཁོར་ལོ། །མགྲིན་པར་གསུང་གི་འཁོར་ལོའམ་རོ་དྲུག་མྱོང་བའི་ཕྱིར་ལོངས་སྤྱོད་འཁོར་ལོ། །སྙིང་གའི་རྩ་འདབ་ཐུགས་སམ་ཆོས་ཀྱི་འཁོར་ལོ། ལྟེ་བ་ནི་ལུས་ཐོག་མར་བསྐྱེད་པ་དང་སྤྲུལ་པའི་གནས་སམ་ཁམས་གསུམ་ལ་ཁྱབ་པས་སྤྲུལ་པའི་འཁོར་ལོར་གྲགས་ཏེ། དེ་རྣམས་ལ་འཁོར་ལོར་བརྗོད་པའང་རྩིབས་ལ་སོགས་པ་དབྱིབས་མཚུངས་པ་དང༌། དེ་དང་དེར་བྱེད་པ་བཅིངས་པ་ལས་རྟོག་པ་གཅོད་པའི་ཕྱིར་འཁོར་ལོ་དང་བྱེད་ལས་མཚུངས་པས་ཀྱང་དེ་སྐད་ཅེས་བྱའོ། །རྩ་དེ་དག་ལས་ཀྱང་ཕྱེ་ན་ནང་གི་གནས་ཉེར་བཞི་དང་ཡུལ་སོ་བདུན་དང༌། རོ་རྐྱང་དབུ་མ་གསུམ་གྱི་རིགས་འཛིན་པའི་རྩ་སྟོང་ཕྲག་ཉི་ཤུ་རྩ་བཞི་པ་ཚོ་གསུམ་ལ་སྟོང་ཕྲག་བདུན་ཅུ་རྩ་གཉིས། དེ་རྣམས་ལས་གྱེས་པ་ནི་བསམ་གྱིས་མི་ཁྱབ་པ་སྟེ། བ་སྤུའི་གྲངས་ཇི་སྙེད་པའི་རྩའི་གྲངས་ཀྱང་དེ་སྙེད་དོ། །གཞན་ཡང་དབུ་མའི་ཡར་སྣར་གཙུག་ཏོར་དང༌། འོག་ཏུ་གསང་བའི་འཁོར་ལོ་བསྣན་པ་སོགས་མང་ཉུང་མཐའ་གཅིག་ཏུ་མ་ངེས་པར་གསུངས་ཤིང༌། མདོར་ན་རྣལ་འབྱོར་པས་ཤེས་པར་བྱ་བའི་རྩ་སྟོང་ཕྲག་བདུན་ཅུ་རྩ་གཉིས་དང༌། དེ་རྣམས་ཀྱི་གཙོ་བོར་གྱུར་པ་འཁོར་ལོའི་རྩ་དང༌། དེ་རྣམས་ལས་ཀྱང་གཙོ་བོར་གྱུར་པའི་རྩ་སུམ་ཅུ་རྩ་གཉིས་ལ་སོགས་པ་བཤད་ལ། འཁོར་ལོ་དྲུག་གི་རླུང་སེམས་ཀྱི་དྭངས་མ་འཛིན་ཅིང་སྙིགས་མས་ནད་སྐྱེད་པར་བྱེད་དེ། གཙུག་ཏོར་དང་དཔྲལ་བས་བད་ཀན། མགྲིན་སྙིང་གིས་མཁྲིས་ནད། ལྟེ་གསང་གི་ཕྱི་སྐོར་གྱིས་རླུང་ནད། གསང་བའི་ནང་སྐོར་གྱིས་འདུས་པའི་ནད་བསྐྱེད་དོ་ཞེས་འབྱུང་ངོ༌། །དེ་ཡང་ལུས་ལ་རགས་ཕྲ་ཤིན་ཏུ་ཕྲ་བའི་ལུས། དེ་རྣམས་ཀྱི་ཆོས་ཉིད་དོན་དམ་ཡེ་ཤེས་ཀྱི་རྩ་ནི་རང་རིག་པའི་རྣམ་པར་ཤར་བའི་ཕྱིར་ཐ་མལ་གྱི་རྩ་ཐམས་ཅད་ལ་ཁྱབ་བྱེད་དུ་བཞུགས་པས་ཡེ་ཤེས་ཀྱི་དབུ་མ་ཆེན་པོ་ཞེས་ཀྱང་གྲགས་ལ། དེ་ཉིད་རྣམ་པ་ཐམས་ཅད་པ་ཡིན་པས་ཀུན་རྫོབ་ཀྱི་རྩ་ཡང་དེའི་རྗེས་སུ་འགྲོ་བའི་ཕྱིར། རྣལ་འབྱོར་པའི་སེམས་ཀྱིས་རྣམ་པ་གར་གཏད་དེ་དང་འདྲ་བར་ཐ་མལ་པའི་རྩ་རྣམས་ཀྱིས་ཀྱང་བྱ་བ་བྱེད་པས་རྒྱུད་སྡེ་ཐ་དད་ལས་གསུངས་པའི་རྩའི་རྣམ་བཞག་མི་འདྲ་བ་རྣམས་ཀྱང་མི་འགལ་བའི་གནད་ཤེས་པར་བྱའོ།

།གསུམ་པ་ནི། སྤྱིར་ལུས་ཅན་རྣམས་ཀྱི་ངག་གི་ཆོས་དང༌། ཕྱི་རོལ་ཏུ་དབུགས་སྲང་ཆུ་ཚོད་ཞག་སོགས་དུས་ཀྱི་ཆོས་རྣམས་ཀྱི་འཆར་གཞིར་གྱུར་པ་དོན་དམ་ཡེ་ཤེས་ཀྱི་རླུང་ངམ་སྲོག་ཆེན་པོའི་རླུང་ཞེས་བྱ་སྟེ། འཇམ་དཔལ་སྒྱུ་དྲྭ་ལས། སྲོག་ཆེན་པོ་སྟེ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་གསུངས་ཏེ། རླུང་མཐའ་དག་གི་གཤིས་ལ་རྒྱུན་མི་ཆད་པར་ཁྱབ་པ་རྒྱུ་རྒྱུད་ཀྱི་རྟེན་དུ་གྱུར་པ་ཡིན་ལ། དེའི་གློ་བུར་གྱི་དྲི་མ་ཀུན་གཞིའི་རྣམ་ཤེས་ཀྱི་རང་བཞིན་ཡུལ་ལ་གཡོ་བ་ནི་ལས་ཀྱི་རླུང་སྟེ། དེ་ལ་ཕུང་པོ་ལྔའི་རྟེན་བྱེད་པ་རྩ་བའི་རླུང་ལྔ་ནི། སྲོག་འཛིན། གྱེན་རྒྱུ། ཁྱབ་བྱེད། མེ་མཉམ། ཐུར་སེལ་ལྔ་ནི་རྩ་བ་ཕུང་པོའི་རླུང་སྟེ། བྱེད་ལས་ཀྱང༌། སྲོག་གནས་པ་དང༌། དབུགས་འབྱུང་རྔུབ་དང༌། ལུས་གནས་པ་དང༌། དྲོད་འབེབས་པ་དང༌། འགྲོ་འདུག་བཤང་གཅི་ཁུ་གསུམ་འབྱིན་སྡོམ་དང་བཅས་པའི་བྱ་བ་བྱེད་ལ། གལ་ཏེ་ལོག་ན། བརྒྱལ་སྨྱོ་ཤི་བ་སོགས་དང༌། སྟོད་ནད་དང༌། ཞ་རེངས་ཀྱི་ནད་དང༌། ཕོ་བའི་ནད་དང༌། སྨད་ཀྱི་ནད་རྣམས་བསྐྱེད་ཅིང༌། དེ་དག་ལུས་ཀྱི་དབུས་དང༌། སྟོད་དང༌། པགས་པའི་མཐར་ཐུག་པ་དང༌། ཞུ་བའི་མཚམས་དང༌། ལྟེ་བ་མན་ཆད་ན་གནས་པར་བཤད་ལ། རྒྱུ་བ། རྣམ་པར་རྒྱུ་བ། ཡང་དག་རྒྱུ་བ། རབ་ཏུ་རྒྱུ་བ། ངེས་པར་རྒྱུ་བ་སྟེ་ཡན་ལག་གི་རླུང་ལྔ་ནི། དབང་པོ་ལྔ་ལ་གནས་ཤིང་བསྐྱེད་པ་སོགས་ཀྱི་བྱ་བ་བྱེད་པ་དང༌། བྱེ་བྲག་ཏུ་སྣར་རྒྱུ་བའི་རླུང་ནི་ཉིན་ཞག་ཕྲུགས་རེ་ལ་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་ལ། དེ་ཡང་འཕོ་བ་བཅུ་གཉིས་པའི་དབང་དུ་བྱས་ན། ལྟེ་བའི་རྩ་འདབ་དྲུག་ཅུ་རེ་བཞི་ལས། སྔར་དྲུག་ཏུ་གྱེས་པའི་ཡ་གྱལ་བཞི་པོ་དབུ་མའི་འཕོ་བ་ཡིན་པའི་ཕྱིར། དཀྱིལ་འཁོར་མི་འབབས་པས་སྟོང་པའི་རྩ་བཞི་ཞེས་བྱའོ། །དེ་ལྷག་དྲུག་ཅུ་པོ་ནས་རྒྱུ་ཚུལ་ནི། བ་སྤུའི་མཐར་ཐུག་པའི་རྩ་ལམ་ནས་རྩ་འཁོར་གྱི་རླུང་རྣམས་ལྟེ་བའི་རླུང་དང་འདྲེས་ཏེ་རོ་རྐྱང་གི་ལམ་ལས་སྣ་སྒོར་འབབ་ལ། དེ་ཡང་འབྱུང་བ་ལྔ་གཡས་གཡོན་སྡུད་བསྐྱེད་ཀྱི་རིམ་པས་འཕོ་བ་རེ་ལ་དབྱུག་གུ་ལྔ་རེ། དབྱུག་གུ་རེ་ལ་དབུགས་སུམ་བརྒྱ་དྲུག་ཅུ་སྟེ། འཕོ་བ་རེ་ལ་དབུགས་སྟོང་བརྒྱད་བརྒྱ་པ་རེ་རྒྱུ་ནའང༌། དེའི་སྟེང་ན་སྟོང་པའི་རྩ་བཞིའི་དབྱེ་བས་དབུགས་གཅིག་གི་ཕྱེད་བཅས་སོ་གཉིས་ཆ་རེ་ཡེ་ཤེས་ཀྱི་རླུང་ཡིན་ལ། དེ་བསགས་པས་དབྱུག་གུ་རེ་ལ་དབུགས་བཅུ་གཅིག་དང་བཞི་ཆ་གཅིག །འཕོ་བ་རེ་ལ་ང་དྲུག་རྐང་བཅས། ཉིན་ཞག་གཅིག་ལ་དྲུག་བརྒྱ་དོན་ལྔ་རྣམས་རྒྱུ་ཞིང༌། དེ་ཆུ་ཚོད་དུ་དྲིལ་ན། ཆུ་ཚོད་གཅིག །ཆུ་སྲང་ང་གཉིས། དབུགས་གསུམ། དེ་ཟླ་བ་གཅིག་ཏུ་བསགས་པས་ཆུ་ཚོད་ང་དྲུག་དང༌། ཆུ་ཆུང་བཅོ་ལྔ། དེ་བཅུ་གཉིས་སུ་ཟློས་པས་ཞག་བཅུ་གཅིག་དང༌། ཆུ་ཚོད་བཅོ་ལྔ་རྣམས་ལོ་གཅིག་གི་ཡེ་རླུང་གི་གྲངས་ཏེ་ཕྱི་རོལ་དུ་ཟླ་ཤོལ་གྱི་རྒྱུར་འགྱུར་ལ། སྐྱེས་བུ་ལོ་བརྒྱ་པའི་ཡེ་རླུང་བསྡོམས་པས་ལོ་གསུམ་ཕྱོགས་གསུམ་ཏུ་ལོངས་པ་སོགས་རྒྱུད་རྣམས་ལས་རྒྱ་ཆེར་གསུངས་སོ། །ཁ་དོག་ས་ཆུ་མེ་རླུང་ནམ་མཁའ་རིམ་པར་སེར་དཀར་དམར་ནག་སྔོན་པོ། ཚད་ཀྱང་ལྟེ་འོག་སོར་བཞི་ནས་བརྒྱུད་དེ་སྣ་རྩེ་ལས་སོར་བཅུ་གཉིས་ནས་བཅུ་དྲུག་གི་བར་དུ་འགྲོ་བ་ཡིན་ནོ། །རླུང་དེ་དག་ལས་སྣ་སྒོར་རྒྱུ་བ་དང་རྒུལ་སྐྱོད་བྱེད་པའི་རླུང་སོགས་རགས་པ། ལུས་ནང་དུ་མི་གཡོ་ཞིང་འཁོར་བའི་རང་བཞིན་འབྱུང་ལྔའི་རླུང་དང༌། རྣམ་འགྱུར་རླུང་བཅུ། རྣམ་རྟོག་སྣ་ཚོགས་གཡོ་བའི་གཞོན་པ་རྣམས་འབྲིང་པོ། སྣང་བཞིའི་བཞོན་པར་གྱུར་པའི་རླུང་རྣམས་ཕྲ་བ། ཁྱད་པར་འོད་གསལ་གྱི་བཞོན་པའི་རླུང་ནི་ཤིན་ཏུ་ཕྲ་བ་ཡིན་ལ། དེ་ཡང་མན་ངག་ཐ་དད་པ་ལས་རླུང་གི་རྣམ་བཞག་མི་འདྲ་བ་བྱུང་བ་རྣམས་ཀྱང༌། ཡེ་ཤེས་ཀྱི་རླུང་རྣམ་པ་ཐམས་ཅད་པ་ཡིན་པས། དེའི་རྗེས་སུ་འགྲོ་བའི་ཕྱིར་གནད་གཅིག་ཏུ་འདུ་བ་ཡིན་ནོ། །དེས་ན་རླུང་བཅིངས་པས་རགས་པའི་ལས་རླུང་ཉིད་ཀྱང་ཡེ་ཤེས་ཀྱི་རླུང་དུ་གྱུར་ནས་ཡོན་ཏན་བསྐྱེད་པར་གསུངས་སོ། །བཞི་པ་ལ་ཡེ་ཤེས་དང་རྣམ་ཤེས་ཀྱི་ཐིག་ལེ་གཉིས་ལས་དང་པོ་ནི། ཐིག་ལེ་ཐམས་ཅད་ཀྱི་རྩ་བ་རྒྱུ་རྒྱུད་ཀྱི་རྟེན་དུ་གྱུར་པ་ཡེ་ཤེས་སྙིང་པོའི་ཐིག་ལེའམ་མི་ཤིགས་པའི་ཐིག་ལེ་ཞེས་བཤད་པ་གང་ཡིན་པ་སྟེ། སྟོང་གསལ་འགག་མེད་ཀྱི་ངོ་བོར་བཞུགས་པའོ།

།གཉིས་པ་ནི། རླུང་སྔགས་རྫས་ཀྱི་ཐིག་ལེ་གསུམ་གསུངས་ཏེ། སྙིང་གའི་མི་ཤིགས་པའི་ཐིག་ལེའི་ངེས་པས། རླུང་གི་བྱེད་བཅིངས་ལས་གཟུང་འཛིན་གྱི་སྣང་བ་རང་གྲོལ་དུ་གྱུར་པ་ནི་རླུང་ཐིག །སྣ་རྩེར་ཐིག་ལེ་ལ་ལྷའི་མཚན་མ་བསྒོམས་པས་ཐ་མལ་གྱི་སྣང་ཞེན་ལས་ཡིད་སྐྱོབ་པའི་ཕྱིར་སྔགས་ཐིག །འོག་གི་སྣ་རྩེར་ཐིག་ལེ་བསྒོམ་པ་ལས་བདེ་བ་འཆར་བ་སོགས་རྫས་ཐིག་གོ །དེའང་ཕྱི་མ་ཅུང་ཟད་བཤད་ན། ཁམས་དཀར་དམར་གཉིས་ལས་དྭངས་སྙིགས་གཉིས་སུ་གྱུར་ཏེ། སྤྱི་བོར་ཕ་ལས་ཐོབ་པའི་དཀར་ཆ་ཧཾ་གི་རང་བཞིན་དང༌། ལྟེ་འོག་རྩ་གསུམ་འདུས་མདོར་མ་ལས་ཐོབ་པའི་དམར་ཆ་ཨ་ཐུང་གི་རང་བཞིན་ཏེ། ལུས་ཀྱི་དཀར་ཆ་དང་དམར་ཆ་ཐམས་ཅད་ཀྱི་བདག་པོར་གྱུར་པ། དབུ་མའི་ཆ་ལ་བརྟེན་པ། རྣམ་ཤེས་ཀྱི་རྟེན་བྱེད་པའོ། །དེ་ལས་ཀྱང་དྭངས་སྙིགས་གཉིས་སུ་འགྱུར་ཏེ། མངལ་དུ་མའི་རྩ་དང་འབྲེལ་བས་བསྐྱེད་ཅིང༌། བཙས་ནས་བཟའ་བཏུང་རྣམས་ཕོ་བར་བད་ཀན་གྱིས་མྱགས་པར་བྱེད། མཁྲིས་པས་མདོག་འགྱུར། རླུང་མེ་མཉམ་སྟེ་མེ་དྲོད་གསུམ་གྱིས་སྦར་བཞུ་མྱགས་པར་བྱས་པས། དྭངས་མ་མཆིན་པར་ཁྲག་ཏུ་གྱུར་ཏེ། རྩ་ལ་བརྒྱུད་ནས། དེ་ཤ། རིམ་པར་ཚིལ། རུས། རྐང༌། བྱང་སེམས། དེས་སྟོབས་དང་མདངས་སུ་འགྱུར་ལ། དེ་རྣམས་ཀྱི་སྙིགས་མ་ནི་རིམ་བཞིན་ཏུ། དྲི་ཆེན་དང༌། མཁྲིས་པ་དང༌། པགས་པ་དང༌། རྨེན་བུ་དང༌། སོ་སེན་དང༌། སྦུབས་ཀྱི་དྲི་མ་མཆིལ་སྣབས་ལ་སོགས་པ་དང༌། དགའ་བའི་མཐར་འཛག་པ་སྟེ། ལུས་ཟུངས་བདུན་ཞེས་གྲགས་ཤིང༌། དེ་དག་གི་རྣམ་དབྱེ་ཡང༌། སྤྱི་བོ་མི་ཕྱེད་པ་ནས་སོ་སེན་འབབ་པ་སོགས་ཁམས་ཉི་ཤུ་རྩ་བཞི། དེ་རེ་རེ་ལའང་ཐིམས་ལོངས་སྤྱོད་བདག་པོ་གསུམ་དུ་ཕྱེ་བས་ཁམས་བདུན་ཅུ་རྩ་གཉིས། དེ་སྟོང་གིས་ཕྱེ་བས་སྟོང་ཕྲག་བདུན་ཅུ་རྩ་གཉིས། དེ་སྟོང་གིས་ཕྱེ་བས་བྱེ་བ་ཕྲག་བདུན་ཅུ་རྩ་གཉིས་སོགས་རྩ་ཇི་སྙེད་པར་རླུང༌། རླུང་ཇི་སྙེད་པར་ཐིག་ལེས་ཁྱབ་པར་གསུངས་སོ། །རྣལ་འབྱོར་པའི་རྒྱུད་ལས་ཁམས་ཉེར་བཞིའི་སྟེང་དུ་རྩའི་གཙོ་མོ་གསུམ་དང༌། སུམ་སྒྲིལ་མ་ལ་སོགས་ཏེ་ལྔ་བསྣན་ནས་སོ་གཉིས་སུ་གསུངས་ཏེ། ཧེ་རུ་ཀ་གལ་པོ་ལས། ལུས་ལ་བྱང་ཆུབ་སེམས་རྒྱུ་བའི། །རྩ་ནི་སུམ་ཅུ་རྩ་གཉིས་ཏེ། ཞེས་སོ། །དེའི་སྟེང་དུ་རྩ་བའི་རླུང་ལྔ་རྒྱུ་བའི་སྲོག་ཆེན་པོ་མ་གཏོགས་པའི་བཞི་བསྣན་ནས་སུམ་ཅུ་རྩ་དྲུག་ཏུ་བཤད་པའང་སྣང་ངོ༌། །དེ་དག་ཀྱང་འཁོར་ལོ་བཞིར་དགའ་བཞིའི་འགྲོས་ཀྱིས་ཡེ་ཤེས་དང་རྗེས་སུ་འབྲེལ་བར་འཕོ་བ་དང༌། ལུས་ལ་ཟུངས་སམ་ནུས་པའམ་གནད་ཀྱི་ངོ་བོ་ཉིད་དུ་རྣམ་ཤེས་དང་རྗེས་སུ་འབྲེལ་བར་འཕོ་བ་བླ་གནས་ཞེས་གྲགས་པའོ། །མདོར་ན་ཐིག་ལེ་མཐའ་དག་ཁུ་རྡུལ་མུན་གསུམ་དུ་འདུ་ཞིང༌། དེ་གསུམ་གྱིས་ཆགས་སྡང་རྨོངས་གསུམ་སྐྱེད་པ་ལས། རང་བཞིན་བརྒྱད་ཅུའི་རྟོག་པ་དང༌། དེས་ལས་བསགས་ནས་འཁོར་བའི་འཁྲུལ་སྣང་གི་སྡུག་བསྔལ་སྣ་ཚོགས་འབྱུང་བ་ཡིན་ལ། དེ་གསུམ་འགྱུར་མེད་དུ་བཅིངས་པ་ལས་འཁོར་བ་ལྡོག་པར་འགྱུར་ཞིང༌། ཐིག་ལེ་ཐམས་ཅད་ཀྱི་རྩ་བ་ཆོས་ཉིད་མི་ཤིགས་པའི་ཐེག་ལེ་ནི་རྣམ་པ་ཐམས་ཅད་པ་ཡིན་པས། བརྟགས་པ་དང་མ་བརྟགས་པའི་ཐིག་ལེའི་རྣལ་འབྱོར་ཇི་སྙེད་པ་ཀུན་ཀྱང་དངོས་བརྒྱུད་གང་རུང་གི་སྒོ་ནས་ཡང་དག་པའི་ལམ་དུ་འགྲོ་བའི་གནད་ཀྱང་ཤེས་པར་བྱའོ། །དེ་དག་ནི་བླ་མེད་རྒྱུད་སྡེ་སྤྱིར་གྲགས་པ་ལྟར་ཏེ་འོད་གསལ་རྫོགས་པ་ཆེན་པོའི་རང་ལུགས་ཐུན་མོང་མ་ཡིན་པ་ནི་ཐེག་མཆོག་རིན་པོ་ཆེའི་མཛོད་སོགས་ལས་རྒྱ་ཆེར་འབྱུང་བ་ལྟར་རོ། །གཉིས་པ་ལ་གཉིས། རྟེན་རྡོ་རྗེའི་ལུས་ཀྱི་སྒོམ་ཚུལ་བཤད་པ་དང༌། བརྟེན་པ་རྩ་རླུང་ཐིག་ལེའི་རྣལ་འབྱོར་བཤད་པའོ།

།དང་པོ་ལའང་ལམ་དངོས་དང༌། དེ་གོམས་པའི་འབྲས་བུ་གཉིས། དང་པོ་ནི། འབྱུང་བཞིའི་རྟོག་པ་ཡུམ་གྱི་བྷ་ག་རུ༔ ཕུང་པོ་རགས་པ་གཞལ་མེད་ཁང་ཆེན་ཏེ༔ དབང་པོ་སྒོ་ལྔ་ཤ་ཁྲག་དྲོད་དབུགས་སོགས༔ རྒྱན་དང་བཀོད་པ་གཟི་བརྗིད་དཔལ་དུ་འབར༔ རོ་མ་དཔའ་བོ་རྐྱང་མ་དཔའ་མོ་དང་༔ དབུ་མ་ཧེ་རུ་ཀ་དཔལ་ཀུན་ཏུ་བཟང་༔ འཁོར་ལོའི་གནས་རྣམས་རིགས་མཆོག་ཞི་ཁྲོའི་གཙོ༔ རྩ་འདབ་ཐམས་ཅད་རིགས་ཀྱི་ཡབ་དང་ཡུམ༔ ཕུང་པོ་དམ་ཚིག་ཐིག་ལེ་ཏིང་འཛིན་སེམས༔ རིག་པ་ཡེ་ཤེས་དབྱེར་མེད་ང་རྒྱལ་གྱིས༔ འདོད་ཡོན་ལོངས་སྤྱོད་བདེ་ཆེན་སྤྲིན་ལ་རོལ༔ ཆེ་བའི་ཡོན་ཏན་བསྔགས་པ་བསྟོད་པའི་གླུ༔ བསྒུལ་བསྐྱོད་ཕྱག་རྒྱ་འགྲོ་འདུག་རྡོ་རྗེའི་གར༔ སྲོག་རྩོལ་འབྱུང་འཇུག་བཟླས་པ་རྒྱུན་མི་འཆད༔ བཟའ་བཏུང་གཏོར་མ་ཚོགས་འཁོར་རྟག་ཏུ་རོལ༔ སྙོམས་འཇུག་བདེ་བས་ཚིམ་པའི་འོད་གསལ་ལྷ༔ ཐིག་ལེ་ལས་བཞེངས་ནཱ་དར་སྟོང་པར་ཡལ༔ སྟོང་ཉིད་ངང་ལས་སྣང་གྲགས་རྟོག་ཚོགས་ཀུན༔ རྡོ་རྗེ་གསུམ་མཆོག་དབྱེར་མེད་ལྷུན་གྱིས་གྲུབ༔ ཅེས་གསུངས་ཏེ། ཟབ་མོའི་བསྐྱེད་རིམ་མ་བཅོས་རང་བྱུང་གི་དཀྱིལ་འཁོར་དེ་ཇི་ལྟར་ན། འབྱུང་བཞི་རིམ་བརྩེགས་ཆོས་འབྱུང་དང་བཅས་པ་ནི་ཐོག་མར་ཕ་མའི་འདུ་འཕྲོད་ཀྱི་རྐྱེན་ལས་མངལ་དུ་འབྱུང་བཞིའི་ཚོགས་པ་ལ་རླུང་སེམས་ཀྱི་རྟོག་པས་བདག་ཏུ་བཟུང་བའི་རྟེན་ཨེ་དབྱིངས་ཡུམ་གྱི་བྷ་ག་རུ། གཟུགས་ཀྱི་ཕུང་པོ་རགས་པར་གྲུབ་པ་གཞལ་མེད་ཀྱི་ཁང་པ་ཆེན་པོ་སྟེ། དེའང་ལུས་འདོམ་གང་གྲུ་བཞི་གཞལ་ཡས་ཁང༌། ཡན་ལག་བརྒྱད་ཀ་བ་བརྒྱད། འབྱུང་ལྔའི་རླུང་རྒྱུ་བའི་དབང་པོ་སྒོ་ལྔ་ལས་མིག་ཉི་ཟླའི་སྐར་ཁུང༌། རྣ་བ་སྣ་ཁ་འོག་སྒོ་བཞི་པོ་སྒོ་བཞི། ཤ་དཀྱིལ་འཁོར་གྱི་གཞི། ཁྲག་མཚོ་རྫིང༌། དྲོད་མེ་ཕུང༌། དབུགས་འཇའ་འོད། སོགས་ཁོངས་ནས་སྙིང་ནོར་བུའམ་ཙིཏྟའི་ཕོང་ཏོ། །རྒྱུ་མ་དྲྭ་བ་དྲྭ་ཕྱེད། སོར་མོ་རྣམས་ཟླ་ཕྱེད་མེ་ལོང༌། སོ་མདའ་ཡབ། ལྕེ་པུ་ཤུ། བུ་ག་བརྒྱད་དུར་ཁྲོད་སྐྲ་དང་པགས་པ་རུས་ཚིགས་སྲུང་འཁོར་སོགས་རང་བྱུང་གི་རྒྱན་དང་བཀོད་པ་གཟི་བརྗིད་ཀྱི་དཔལ་དུ་འབར་བའི་རྟེན་གཞལ་ཡས་ཁང་དུ་ལྷུན་གྱིས་གྲུབ་པ་དང༌། ནང་གི་རྩ་གཡས་རོ་མ་ཐབས་དཔའ་བོ། །གཡོན་རྐྱང་མ་ཤེས་རབ་དཔའ་མོ། །དབུ་མ་ཧེ་རུ་ཀ་སྤྱི་དཔལ་ཆེན་པོ་ཁྱབ་བདག་ཀུན་ཏུ་བཟང་པོ། འཁོར་ལོའི་གནས་ལྔ་ནི་སྤྱི་བོ་སངས་རྒྱས། མགྲིན་པ་པདྨ། སྙིང་ག་རྡོ་རྗེ། ལྟེ་བ་རིན་ཆེན། གསང་བ་ལས་ཏེ་རིགས་མཆོག་རྣམ་ལྔའི་ཞི་ཁྲོའི་གཙོ་བོ་རྣམ་སྣང་དང་བུདྡྷ་ཧེ་རུ་ཀ་ལ་སོགས་པ་དང༌། དེ་དག་གི་རྩ་འདབ་ཐམས་ཅད་ནི་རིགས་ཆུང་རྣམས་ཀྱི་ཚོམ་བུའི་དཀྱིལ་འཁོར་ཡབ་དང་ཡུམ་བཅས་བརྟེན་པ་ལྷའི་དཀྱིལ་འཁོར་དུ་ལྷུན་གྱིས་གྲུབ་པ་དང༌། ཕྱི་ལུས་ཀྱི་ཕུང་པོ་དམ་ཚིག་སེམས་དཔའ། ནང་དྭངས་མའི་ཐིག་ལེ་ཏིང་འཛིན་སེམས་དཔའ། དེའི་ཁྱབ་བྱེད་རིག་པ་ཡེ་ཤེས་སེམས་དཔའ་གསུམ་པོ་གདོད་ནས་དབྱེར་མེད་དུ་གྲུབ་པ་ཡིན་པ་ལ་ཡིན་པར་ཤེས་པའི་ང་རྒྱལ་གྱིས། རྫོགས་བྱེད་ཡན་ལག་སྒོ་ལྔའི་ཡུལ་དུ་འདོད་ཡོན་གྱི་ལོངས་སྤྱོད་ཇི་ལྟར་སྣང་བ་ཐམས་ཅད་བདེ་བ་ཆེན་པོའི་མཆོད་པའི་སྤྲིན་ཕུང་དུ་ཤེས་པ་ལ་སྤང་བླང་མེད་པར་རོལ་པ་དང༌། གཞན་གྱིས་ཆེ་བའི་ཡོན་ཏན་བསྒྲགས་ནས་བསྔགས་པ་ཐམས་ཅད་བསྟོད་པའི་གླུར་ཤེས་པ་དང༌། བསྒུལ་བསྐྱོད་བྱེད་པ་ཕྱག་རྒྱ་དང་འགྲོ་འདུག་ཐམས་ཅད་རྡོ་རྗེའི་གར་བསྒྱུར་བ་དང༌། སྲོག་དང་རྩོལ་བའི་རླུང་འབྱུང་འཇུག་གནས་གསུམ་པོ་རྡོ་རྗེའི་བཟླས་པར་ངང་གིས་གྲུབ་པས་ཉིན་མཚན་རྟག་ཏུ་རྒྱུན་མི་འཆད་པ་དང༌། བཟའ་བཅའ་བཏུང་བའི་རིགས་གྱུར་ནང་གི་གཏོར་མ་དང་ཚོགས་འཁོར་ལ་རྟག་ཏུ་རོལ་པ་ཡིན་པ་དང༌། སྙོམས་པར་འཇུག་པའི་ཚེ་གནས་བཞིར་དགའ་བཞིའི་བདེ་བས་རྒྱུད་ཚིམས་པའི་འོད་གསལ་ཡེ་ཤེས་ཀྱི་ལྷ། བཅུ་དྲུག་ཕྱེད་ཕྱེད་ཀྱི་ཐིག་ལེ་ལས་རིམ་པར་བཞེངས་ཏེ་ལྷན་ཅིག་སྐྱེས་པ་མི་ཤིགས་པའི་ནཱ་ད་སྟོང་བཞིའི་མཐར་ཐུག་པར་ཡལ་བས་རྣམ་བཅས་ཀྱི་བསྐྱེད་རིམ་ཡན་ལག་དང་བཅས་པ་དེ་དག་བསམ་མི་ཁྱབ་པའི་རྫོགས་རིམ་དུ་ཞུགས། སྟོང་ཉིད་དེའི་ངང་ལས་གཟུགས་སྣང་སྒྲ་གྲགས་འགྱུ་དྲན་གྱི་རྟོག་ཚོགས་ཀུན་ཀྱང་སྐུ་གསུང་ཐུགས་རྡོ་རྗེ་གསུམ་གྱི་མཆོག་ཏུ་དབྱེར་མེད་པར་ལྷུན་གྱིས་གྲུབ་པའོ། །འདིར་ནཱ་ད་ཞེས་པའི་དོན་ཀྱང་ཤིན་ཏུ་ཕྲ་བའི་རླུང་ཁམས་གསུམ་པའི་བདག་ཉིད་ཅན་རྒྱུན་མཐའི་བར་གཞོམ་དུ་མེད་པ་དེ་ཉིད་མཚོན་པ་རྣམ་བཅས་ཀྱི་མཚན་མ་ཤིན་ཏུ་ཕྲ་བའོ། །བསྐྱེད་ཚུལ་འདི་ནི་ཀུན་འདུས་རིག་པའི་མདོ་ལས། ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བར་བཀོད་པའི་དཀྱིལ་འཁོར་ནི། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །ཞེས་སོགས་འབྱུང་བ་ལྟར་རོ། །གཉིས་པ་ནི། ཟབ་མོའི་བསྐྱེད་རྀམ་འདི་ལ་སུས་གོམས་པ༔ རླུང་སེམས་ལས་རུང་སྤྱན་དང་མངོན་ཤེས་འགྲུབ༔ དྲོད་དང་རྟགས་མཚན་རྩོལ་མེད་ངང་གིས་ཤར༔ ཅེས་གསུངས་ཏེ། དེ་ལྟར་བཤད་པའི་ཟབ་མོའི་བསྐྱེད་རིམ་འདི་ལ་རྣལ་འབྱོར་པ་སུས་ཉམས་ལེན་གྱིས་གོམས་ཤིང་འདྲིས་པར་བྱེད་པ་དེ་ནི་རིང་པོར་མི་ཐོགས་པར་རླུང་སེམས་ལས་སུ་རུང་བས་ཏིང་ངེ་འཛིན་ཁྱད་པར་ཅན་སྐྱེ། སྤྱན་དང་མངོན་པར་ཤེས་པའང་འགྲུབ་སྟེ། དེ་ལ་སྤྱན་ལྔ་ནི། དཔག་ཚད་བརྒྱ་སྟོང་ཚུན་གྱི་དངོས་པོ་མཐོང་བ་ཤའི་སྤྱན། །སེམས་ཅན་ཀུན་གྱི་འཆི་འཕོ་དང་སྐྱེ་བའི་ཚུལ་མཐོང་བ་ལྷའི་སྤྱན། ཆོས་ཉིད་ཀྱི་དོན་ཇི་ལྟ་བར་མཐོང་བ་ཤེས་རབ་ཀྱི་སྤྱན། རང་དང་སྤངས་རྟོགས་མཉམ་པའི་རྒྱུད་ཚོད་རིག་པ་ཆོས་ཀྱི་སྤྱན། ཆོས་ཐམས་ཅད་མངོན་པར་བྱང་ཆུབ་པར་མཐོང་བ་སངས་རྒྱས་ཀྱི་སྤྱན་ཏེ་དང་པོ་གཉིས་རྣམ་སྨིན་གྱི་རྒྱུ་དང་ཀུན་གྱི་རྒྱུ་ནི་སྒོམ་སྟོབས་སོ། །མངོན་ཤེས་དྲུག་ནི། ལུས་རྣམ་པར་དག་པ་རྫུ་འཕྲུལ། ངག་རྣམ་པར་དག་པ་ལྷའི་རྣ་བ་དང་གཞན་སེམས་ཤེས་པ། སེམས་རྣམ་པར་དག་པ་སྔོན་གནས་རྗེས་དྲན། ལྷའི་མིག །ཟག་པ་ཟད་པའི་མངོན་ཤེས་རྣམས་ཏེ། དེ་གཉིས་ཀྱི་དང་པོ་རྣམས་ནི་སོ་སྐྱེ་དང་འཕགས་པའི་ས་རྣམས་སུའང་ཡོད་ལ། ཕྱི་མ་རེ་རེ་ནི་སངས་རྒྱས་ཀྱི་སས་བསྡུས་པ་ཡིན་ཅིང་འཕགས་པ་ལའང་རྗེས་མཐུན་པ་ཙམ་ཡོད་པར་བཞེད་དོ། །གཞན་ཡང་ཕྱི་ནང་གསང་བའི་དྲོད་དང་དངོས་ཉམས་རྨི་ལམ་གྱི་རྟགས་མཚན་ངོ་མཚར་བ་རྣམས་ཀྱང་རྩོལ་བ་མེད་པར་ངང་གིས་ཤར་བར་འགྱུར་ཏེ། རྒྱུད་ལས། ཕྱི་དང་ནང་དང་དེ་བཞིན་ཉིད། །དངོས་དང་དངོས་མིན་གནས་ལུགས་ཀུན། །རྡོ་རྗེ་ལུས་ཀྱི་དཀྱིལ་འཁོར་དང༌། །ཀུན་གཞི་ཡེ་ཤེས་རང་བྱུང་ལྷ། །དེ་ལ་གོམས་འདྲིས་བརྟན་པ་ནི། །ཕྱི་ནང་ཞིང་ཁམས་མ་ལུས་པ། །གཉིད་སད་སྣང་བ་ཇི་བཞིན་ཏུ། །རིང་པོར་མི་ཐོགས་འཆར་བར་འགྱུར། །ཅེས་སོ།

།གཉིས་པ་རྩ་རླུང་ཐིག་ལེའི་རྣལ་འབྱོར་བཤད་པ་ལ་གཉིས། མཚམས་སྦྱར་ཏེ་མདོར་བསྟན། དེའི་དོན་རྒྱས་པར་བཤད་པའོ། །དང་པོ་ནི། དེ་ལྟར་བདེ་ཆེན་སྐུ་ལ་རྟེན་བྱས་ནས༔ བརྟེན་པ་རྩ་རླུང་ཐིག་ལེའི་རྫོགས་རིམ་ནི༔ ཞེས་གསུངས་ཏེ། དེ་ལྟར་བདེ་བ་ཆེན་པོ་རང་བྱུང་རྡོ་རྗེ་ལུས་ཀྱི་སྐུ་ལ་རྟེན་བྱས་ནས། བརྟེན་པ་རྩ་དང་རླུང་དང་ཐིག་ལེའི་རྣལ་འབྱོར་ལ་བརྟེན་ཏེ་རང་བྱིན་བརླབ་པའི་རྫོགས་རིམ་ནི་འདི་ལྟ་སྟེ། གཉིས་པ་ལ་གསུམ། བཀོད་པ་རྩ། གཡོ་བ་རླུང༌། ཐིག་ལེ་བྱང་ཆུབ་ཀྱི་སེམས་སྦྱོང་བའོ། །དང་པོ་ནི། ལུས་གནད་ལྡན་པས་ཆུན་བཙལ་རླུང་དུག་དབྱུང་༔ ངོ་བོ་བདེ་སྟོང་རྣམ་པ་ཡི་དམ་ལྷ༔ རྣམ་འགྱུར་རྙོག་པ་མེད་པ་ཆུ་ཟླའི་གར༔ འཇའ་ཚོན་ལྟ་བུའི་སྐུ་དབུས་དྷཱུ་ཏིའི་རྩ༔ གཡས་གཡོན་རོ་རྐྱང་དེ་གསུམ་ལ་བརྟེན་པའི༔ རྩེ་མོ་རྣམ་བཀོད་འདབ་མ་སུམ་ཅུ་གཉིས༔ རོ་རྣམས་འདུས་པར་བརྒྱད་གཉིས་བཅུ་དྲུག་སྟེ༔ དྲན་པ་རྣམ་པར་བཀོད་ལ་ཚོགས་བརྒྱད་འདབ༔ སྐྱེད་བྱེད་འཁོར་ལོར་དྲུག་ཅུ་རྩ་བཞིར་བཅས༔ གནས་པ་བཞིན་དུ་གསལ་གདབ་གོམས་པ་ན༔ ཞེས་གསུངས་ཏེ། དེའང་ལུས་གྲོང་ཁྱེར། རླུང་རྟ་ལོང་བ། རྣམ་ཤེས་མི་ཞ་བོ་འདྲ་བར་ཁ་ལོ་སྒྱུར་བས་བྱེད་པ་མ་འཆིངས་ན་མིས་ཞོན་པའི་རྟ་དེ་སྲང་བར་ནས་ཕྱིར་ཤོར་བ་དང་འདྲ། འཆིང་ན་སྲང་སྒོ་ཁེགས་ནས་མི་རྟ་ནང་དུ་ཚུད་དེ་འགྲོར་མི་ཐུབ་པ་དང་འདྲ་བས། རྣམ་རྟོག་གི་བཞོན་པ་རླུང་འཆིང་བ་ལ་ལུས་ཀྱི་གནད་འཆིང་བ་གལ་ཆེའོ། །དེའང་ཀློང་ཆེན་རབ་འབྱམས་ལས། རྐང་པ་རྡོ་རྗེའི་སྐྱིལ་ཀྲུང་བཅའ། །ལག་པ་གཉིས་ཀྱིས་མཉམ་བཞག་བསྣོལ། །ལུས་ནི་མདའ་སྨྱུག་བཞིན་ཏུ་བསྲང༌། །དཔུང་པ་རྒོད་གཤོག་བཞིན་དུ་བརྒྱང༌། །མཇིང་པ་གཞུ་མཆོག་བཞིན་དུ་བསྐུམ། །ལུས་གནད་ཕག་པའི་གཟེངས་ལྟར་བསྟོད། །མིག་དང་སྣ་རྩེ་སེམས་རྩེ་བསྟུན། །ཞེས་གསུངས་པ་ལྟ་བུའི་ལུས་གནད་དང་ལྡན་པས་ཆ་ཆ་ནས་བསྒྲིམས་ཏེ་ཆུན་བཙལ། ཁོང་པར་ཉོན་མོངས་པའི་རླུང་གི་དུག་ཡོད་པ་དབྱུང་བའི་ཕྱིར་རླུང་རོ་སྣ་སྒོ་ནས་ལན་གསུམ་བསལ། སེམས་ཀྱི་གནད་རང་ལུས་ཐ་མལ་གྱི་སྣང་བ་དབྱིངས་སུ་ཡལ་ཏེ་རྣམ་པར་མི་རྟོག་པའི་ངང་ལས། ངོ་བོ་བདེ་སྟོང་གི་རང་བཞིན་རྣམ་པ་ཡི་དམ་ལྷའི་སྐུ། རྣམ་འགྱུར་དྭངས་གསལ་རྙཽགས་པ་མེད་པ་ཆུ་ཟླའི་རོལ་གར་དང་སྒྲིབ་ཐོགས་མེད་པ་ནམ་མཁའ་ལ་འཇའ་ཚོན་ཤར་བ་ལྟ་བུའི་སྐུར་གསལ་བའི་ལུས་ཀྱི་དབུས་སུ་ཨ་བ་དྷཱུ་ཏི་མར་གྲགས་པའི་རྩ་སྔོན་པོ་ཚངས་བུག་ནས་གསང་གནས་བར་དུ་ཀ་བ་ལྟར་ཡོད་པ་མཚན་ཉིད་བཞི་ལྡན། དེའི་གཡས་གཡོན་གཉིས་སུ་རོ་མ་དམར་མོ་དང་རྐྱང་མ་དཀར་མོ་དྷཱུ་ཏི་ལས་འདབ་འགྱུར་གྱིས་ཕྲ་བ་སུམ་བཤིབས་སུ་ཡོད་པ། རོ་རྐྱང་གཉིས་ཀྱི་ཡར་སྣ་སྤྱི་བོ་ནས་ཐུར་དུ་གུག་པ་སྣ་བུག་གཉིས་སུ་ཟུག་ཅིང་མར་སྣ་གཉིས་ལྟེ་འོག་སོར་བཞིའི་ཐད་ནས་དྷུ་ཏིར་ཚུད་པ། གཙོ་མོ་དེ་གསུམ་སྲོག་ཤིང་བསླངས་པ་ལྟ་བུ་ལ་གདུགས་ཀྱི་རྩིབས་མ་བཀོན་པ་ལྟར་བརྟེན་པའི་སྤྱི་བོར་རྩེ་མོ་རྣམ་པར་བཀོད་པའི་འཁོར་ལོ་འདབ་མ་སུམ་ཅུ་རྩ་གཉིས། མགྲིན་པར་རོ་རྣམས་འདུས་པའི་འཁོར་ལོ་འདབ་མ་བརྒྱད་གཉིས་བཅུ་དྲུག །སྙིང་ག་དྲན་པ་རྣམ་པར་བཀོད་པའི་འཁོར་ལོ་ལ་རྣམ་ཤེས་ཚོགས་བརྒྱད་བརྟེན་པའི་འདབ་མ་བརྒྱད། ལྟེ་བ་སྐྱེད་བྱེད་ཀྱི་འཁོར་ལོར་འདབ་མ་དྲུག་ཅུ་རྩ་བཞི་བཅས་འཁོར་ལོ་བཞི་པོའི་ལྟེ་བ་དྷཱུ་ཏི་ནས་ཕྱོགས་བཞིར་འབྱུང་བཞིའི་ནུས་པ་འཛིན་པའི་རྩ་འདབ་རེ་རེ་གྱེས་ཤིང༌། སྙིང་གར་དེ་ལས་གཉིས་གཉིས་གྱེས་པས་ཕྱི་སྐོར་ལ་བརྒྱད། མགྲིན་པར་དེ་ལས་ཀྱང་གཉིས་རེ་གྱེས་པས་བར་སྐོར་ལ་བརྒྱད་དང་ཕྱི་སྐོར་ལ་བཅུ་དྲུག །སྤྱི་བོ་དེ་ལས་ཀྱང་གཉིས་རེ་གྱེས་པས་བར་སྐོར་ཕྱི་མར་བཅུ་དྲུག་དང་ཕྱི་སྐོར་ལ་སོ་གཉིས། ལྟེ་བར་སྙིང་ག་ལྟར་གྱེས་པའི་བརྒྱད་ཀྱི་བཞི་ལས་གཉིས་རེ་གྱེས་ཤིང༌། དེ་ལྟར་གྱེས་པ་བརྒྱད་ལས་ལྔ་ལྔ་དང༌། མ་གྱེས་པའི་བཞི་ལས་དྲུག་དྲུག་གྱེས་པས་བར་སྐོར་ལ་བཅུ་གཉིས་དང་ཕྱི་སྐོར་ལ་དྲུག་ཅུ་རྩ་བཞི་སྟེ་ལུས་ལ་ཇི་ལྟར་གནས་པ་བཞིན་ཏུ་གསལ་གདབ། རྩ་དེ་ཐམས་ཅད་དྭངས་གསལ་སྦུབས་སྟོང་གི་རྣམ་པར་བསྒོམས་ལ་རྩའི་སྟོང་ར་ཉིད་ཐམས་ཅད་ཀྱི་གཞི་ཡིན་པས་ལེགས་པར་གོམས་པ་ན་རྣལ་འབྱོར་ཕྱི་མ་ལ་འཇུག་པར་བྱའོ། །གཉིས་པ་ལ་གཉིས། ཐུན་གྱི་ཉམས་ལེན་དང༌། ཐུན་མཚམས་ཀྱི་ཉམས་ལེན་ནོ། །དང་པོ་ལའང་གཉིས། གཙོ་བོ་བུམ་ཅན་དང༌། དེ་སྦྱངས་པའི་འབྲས་བུའོ། །དང་པོ་ནི། སྐྱོན་ཅན་རླུང་ནི་ཕྱིར་ལ་སངས་ཀྱིས་འབུད༔ སྐྱོན་མེད་སྟེང་འོག་ལྟེ་བར་ནར་གྱིས་དྲངས༔ བུམ་པ་ལྟར་དགང་གཞིལ་ཞིང་མདའ་ལྟར་འཕང་༔ རྩོལ་བ་རིམ་བསྐྱེད་རྒྱུན་མི་འཆད་པ་ཡིས༔ ཞེས་གསུངས་ཏེ།

ལུས་གནད་རྩའི་སྟོང་ར་གསལ་བཏབ་ནས་སྔར་ཁོང་པར་བསྐྱིལ་བའི་དུག་གསུམ་གྱི་སྐྱོན་དང་འདྲེས་པ་ཅན་གྱི་རླུང་ནི་སྣ་སྒོ་ནས་ཕྱིར་ལ་སངས་ཀྱིས་འབུད་དེ་དེའང་འབུད་པ་དགུ་ཕྲུགས་སམ་སུམ་ཕྲུགས་བྱ། མཉམ་རྒྱུའི་ཡེ་རླུང་སོགས་རླུང་གི་དུས་གནད་ལ་མཁས་པས་སྐྱོན་མེད་པ་འབྱུང་ལྔ་དྭངས་མའི་རླུང་སྣ་སྒོ་ནས་རྔུབས་ཏེ་སྟེང་རླུང་དང་ཐུར་སེལ་བསྐུམ་སྟེ་འོག་རླུང་གཉིས་ལྟེ་བར་ནར་གྱིས་དྲངས་ལ་དབུ་མར་ཁ་སྦྱོར་དུ་བསྐྱིལ་བ་བུམ་པ་ལྟར་དགང༌། མི་ནོན་པའི་ཚེ་གཡས་གཡོན་འཐེན་གནོན་དང་ཕྱི་ནང་དུ་གཞིལ། མི་ཐུབ་ཙ་ན་མདའ་ལྟར་འཕང་སྟེ་དེ་ལྟ་བུའི་སྦྱོར་བ་བཞི་ལྡན་གྱི་རླུང་སྦྱོར་ལ། རྩོལ་བ་རིམ་གྱིས་ཇེ་དྲག་ཏུ་བསྐྱེད། ལུས་སེམས་དུབ་ཀྱང་རྟག་ཏུ་རྒྱུན་མི་འཆད་པར་བསྒོམ་པས་སྡོམ་འབྱུང་ནས་བཤད་པའི་བུམ་ཅན་རབ་འབྲིང་ཐ་མའི་ཚད་ལྡན་དུ་གྲུབ་པར་གསུངས་ཀྱང་ད་ལྟའི་ལག་ལེན་ལ། ལག་པའི་ཐལ་མོས་པུས་མོ་ལ་ལན་རེ་བསྐོར་ཏེ་སེ་གོལ་གཅིག་གཏོགས་པའི་ཡུན་ཚད་སུམ་ཅུ་རྩ་དྲུག་ནི་བུམ་པ་ཅན་ཆུང་ངུུ༌། བདུན་ཅུ་དོན་གཉིས་འབྲིང༌། བརྒྱ་རྩ་བརྒྱད་ཁེགས་པ་ཆེན་པོའི་ཚད་དུ་བཞེད་དོ། །གཉིས་པ་ནི། ལུས་བདེ་ངག་སྙན་སེམས་གནས་འཆི་མེད་འགྲུབ༔ ཅེས་གསུངས་ཏེ། རླུང་བུམ་པ་ཅན་གྲུབ་པའི་ཡོན་ཏན་མང་དུ་བཤད་པ་ལས་མདོར་བསྡུ་ན་ལུས་མཉེན་ལྕུག་ཐོབ་པའི་བདེ་བ། ངག་རང་དབང་དུ་གྱུར་པས་སྙན་པ། སེམས་ཏིང་ངེ་འཛིན་ལ་གཡོ་མེད་དུ་གནས་པ་དང༌། འཆི་བ་མེད་པའི་བཅུད་ལེན་འགྲུབ་པར་འགྱུར་ཏེ། སྡོམ་འབྱུང་ལས། ཡང་ན་བུམ་པ་ཅན་སྦྱོར་བས། ཐམས་ཅད་དུ་ནི་འཆི་ལས་རྒྱལ། །ཅེས་སོ། །གཉིས་པ་ཐུན་མཚམས་བྱ་བ་ནི། ཐུན་མཚམས་འཁྲུལ་འཁོར་བྱ་ཞིང་དལ་བར་བཞག༔ སྐབས་སུ་རྡོ་རྗེའི་བཟླས་པས་སེམས་གནས་བསྒྲུབ༔ ཅེས་གསུངས་ཏེ། དེ་ལྟར་རླུང་གི་རྣལ་འབྱོར་ལ་བརྩོན་པའི་ཐུན་མཚམས་རྣམས་སུ་ཡན་ལག་ལྔ་སྦྱོང་སོགས་རྩ་རླུང་གི་སྐྱོན་སྦྱང་བ་རྣམས་དང༌། ལུས་ཀྱི་ཆུན་བཙལ་ཞིང་གནད་ལ་རྡེག་པར་བྱེད་པ་དང༌། ཐིག་ལེའི་སྐབས་སུ་འདྲེན་ལྡོག་བཀྲམ་པར་བྱེད་པ་དང༌། ཐམས་ཅད་དུ་གེགས་བསལ་ཞིང་བོགས་དབྱུང་བའི་འཁྲུལ་འཁོར་རྣམས་ཀྱང་ལག་ལེན་ལྟར་བྱ་ཞིང༌། མཐར་སྒོ་གསུམ་དལ་བར་བཞག་པས་རྩ་འཁྲུགས་རླུང་འཁྲུགས་རང་བཞིན་གྱིས་དྭངས་པར་འགྱུར་བ་དང༌། བར་སྐབས་རྣམས་སུ་རྡོ་རྗེའི་བཟླས་པས་བོགས་འབྱིན་ཅིང་སེམས་གནས་པ་བསྒྲུབ། སྤྱིར་རྡོར་བཟླས་ནི་ཐམས་ཅད་དུ་གལ་ཆེ་བས་དེའི་དོན་ཅུང་ཟད་སྨོས་ན། ཧེ་རུ་ཀ་གལ་པོ་ལས། ལམ་དུ་ཁྱེར་བའི་བཟླས་པ་ནི། འཇུག་དང་གནས་དང་ལྡང་བ་ལ། །ཡན་ལག་དྲུག་ཏུ་ཚང་བསྒོམས་པས། །རྡོ་རྗེའི་བཟླས་པ་ལམ་དུ་ཁྱེར། །ཞེས་གསུངས་པའི་ཡན་ལག་དྲུག་ནི་བཤེད་རྒྱུད་རྡོར་ཕྲེང་སོགས་ལས་རྣལ་འབྱོར་དྲུག་ཅེས་བཤད་པ་དང་དགོངས་པ་མཐུན་པས་དེ་ལས་དང་པོ་ནི། རྒྱུ་བ་ངེས་པའི་ཚུལ་གྱིས་ཇི་སྲིད་ཉི་ཁྲི་ཆིག་སྟོང་དྲུག་བརྒྱ་པོ་ཐམས་ཅད་བགྲང་ནུས་ཀྱི་བར་གྲངས་བརྩི་བ་ལ་སེམས་འཛིན་པ་ནི་བགྲང་བའི་རྣལ་འབྱོར་དང༌། གཉིས་པ་རྗེས་སུ་འགྲོ་བ་ནི་ཐུན་ཚོད་བརྒྱད་ཀྱི་དུས་རེ་རེ་ལ་ཉིས་སྟོང་བདུན་བརྒྱ་རྒྱུ་ཞིང་རླུང་འབྱུང་བ་རེ་རེ་ལའང་འབྱུང་བ་གཞན་བཞི་རྗེས་སུ་འགྲོ་བར་ཤེས་པ་སྟེ་འདི་ནི་རྣམ་པར་གསལ་བའོ། །གསུམ་པ་འཇོག་པའི་རྣལ་འབྱོར་ནི་རླུང་འབྱིན་འཇུག་གི་རྒྱུད་རྣམས་ལ་འདི་ནི་རྩའི་འཁོར་ལོ་འདི་དང་འདི་ལས་རྒྱུ་བ་ཡིན་ནོ་ཞེས་སོ་སོར་ཤེས་པ་སྟེ་སྤྱི་བོ་ནས་རྐང་མཐིལ་གྱི་བར་དུ་གོང་བུའི་ཚུལ་ལ་སེམས་འཛིན་པའོ། །བཞི་པ་རྟོགས་པའི་རྣལ་འབྱོར་ནི་འཁོར་ལོ་བཞིའི་འབྱུང་ལྔའི་རླུང་ཉི་ཤུས་རྟོག་པའི་རླུང་བརྒྱ་རྩ་བརྒྱད་བསྒྱུར་ཞིང་དེའང་གཡས་གཡོན་གྱི་དཀྱིལ་འཁོར་སྡོམ་པ་བཅུས་བསྒྱུར་བའི་རླུང་གི་མཚན་ཉིད་ཤེས་པས། དེས་རྣམ་རྟོག་གང་སྐྱེས་ཀྱང་ཤེས་ལ། དེ་དག་རྒྱུས་མ་ཐག་ཏུ་རྟོག་མེད་དུ་འགྱུར་བས་རྟོག་མེད་ཀྱི་ཡེ་ཤེས་འཆར་ཚུལ་ཡང་ཤེས་ཏེ་རྟོག་པ་དང་མི་རྟོག་པའི་སྐྱོན་ཡོན་རིག་པར་བྱེད་པའོ། །ལྔ་པ་བསྒྱུར་བའི་རྣལ་འབྱོར་ནི་སྔར་གྱི་རྣམ་རྟོག་རྒྱུ་བ་ཤུགས་ཅན་དེ་ལོག་ནས་རྟོག་པའི་རླུང་བརྒྱ་རྩ་བརྒྱད་པོ་རྟོག་བྲལ་གྱི་རླུང་དུ་སོང་བས་མཉམ་བཞག་ཏུ་མི་རྟོག་པར་ཁོ་ནར་གནས་ཀྱང་རྩ་འཁོར་ལ་རྒྱུ་བ་ན་ཉོན་མོངས་པའི་ཞད་ཡོད་པས་ཉོན་མོངས་པའམ་ཀུན་རྫོབ་ཅེས་བྱ་ལ། དེ་འགགས་ནས་མི་ཤིགས་པ་ལ་ཐིམ་པ་ན་ཡེ་ཤེས་དང་དོན་དམ་ཞེས་བྱ་ཞིང༌། ཡང་དེ་ལས་ལངས་ནས་རྩ་བའི་འཁོར་ལོར་རྒྱུ་བ་སོགས་སྔར་ལྟར་འཁོར་བར་བྱེད་པའོ། །དྲུག་པ་ཡོངས་དག་གི་རྣལ་འབྱོར་ནི། རྩ་འཁོར་རྣམས་སུ་རླུང་རྒྱུ་མི་རྒྱུའི་དབྱེ་བའང་སྤངས་ཏེ། རྟག་ཏུ་མི་ཤིགས་པ་ལ་ཐིམ་པས་རླུང་གི་དེ་ཁོ་ན་ཉིད་མཉམ་བཞག་གསལ་སྟོང་བདེ་བའི་མཚན་ཉིད་ཅན་དེའི་ངང་དུ་རླུང་ཐམས་ཅད་ཐིམ་པའི་འོད་གསལ་ལ་མཉམ་པར་འཇོག་པའོ། །དེ་ལྟར་ཡན་ལག་དྲུག་པོ་དེ་ལ་རྡོ་རྗེའི་བཟླས་པ་ཇི་ལྟར་བྱ་བའི་ཚུལ་ནི། དགོངས་པ་ལུང་སྟོན་ལས། བརྗོད་དང་དམིགས་པར་བཅས་པ་དང༌། །བརྡར་གྱུར་དང་ནི་དོན་དམ་མོ། །ཞེས་རྡོ་རྗེའི་བཟླས་པ་རྣམ་པ་བཞི་གསུངས་ཏེ། དེའི་དོན་འཆད་ཚུལ་མང་ཡང་དཀྱུས་ཀྱི་ཕྱག་ལེན་ལྟར་ན། འབྲུ་གསུམ་ངག་ཏུ་བཟླ་བ་བརྗོད་བཅས་རྡོར་བཟླས། ཡི་གེ་གསུམ་དབྱིབས་དང་ཁ་དོག་གི་རྣམ་པར་བསྒོམ་པ་དམིགས་པ་རྡོར་བཟླས། རླུང་ལྡང་འཇུག་གནས་གསུམ་འབྲུ་གསུམ་གྱི་གདངས་སུ་མོས་པས་རླུང་སྔགས་དབྱེར་མེད་དུ་ཤེས་ནས་བཟླ་བ་བརྡར་གྱུར་རྡོར་བཟླས། རླུང་གི་འགྲོ་འོང་གནས་གསུམ་དང་སྟོང་གཟུགས་ཕྱག་རྒྱ་ཆེན་པོ་དབྱེར་མེད་དུ་ཤེས་པས་མིང་ཚིག་བརྗོད་པ་ཐམས་ཅད་སྒྱུ་མ་ལྟ་བུར་རྟོགས་པ་དོན་དམ་རྡོ་རྗེའི་བཟླས་པར་བཞེད་དོ། །གསུམ་པ་ཐིག་ལེ་སྦྱོང་བ་ལ་གཉིས། ལམ་གྱི་གཙོ་བོ་དང༌། ལམ་གྱི་ཡན་ལག་གོ །དང་པོ་ལ་གཉིས། དྲོད་དང་བདེ་བ་མི་རྟོག་པའི་གཏུམ་མོ་བཤད་པ་དང༌། གོང་གི་དོན་རྣམས་བསྙེན་སྒྲུབ་བཞིར་སྦྱར་བའི་ཚུལ་གྱིས་དོན་བསྡུ་བའོ།

།དང་པོ་ནི། དེ་ལ་གོམས་ནས་སྤྲུལ་པའི་འཁོར་ལོའི་འོག༔ ཤེས་རབ་སྦས་པའི་རང་གཟུགས་ཙཎྜ་ལི༔ ཨ་ཤད་གསལ་གདབ་རླུང་གིས་བསྐུལ་ལ་སྦར༔ དབུ་མའི་ལམ་ཞུགས་འཁོར་ལོའི་ལྷ་ཚོགས་བསྐུལ༔ སྤྱི་བོའི་ཧྃ་ལས་བདེ་བའི་ཐིག་ལེ་ཡིས༔ དེ་ཉིད་གསོས་བཏབ་སླར་ཡང་ཆེས་ཆེར་འབར༔ རྩ་ཁམས་དྲོད་བདེས་གང་ནས་མི་རྟོག་པའི༔ ཡེ་ཤེས་མངོན་གྱུར་ཆོས་ཉིད་དབྱིངས་སུ་བསྐྱལ༔ ཅེས་གསུངས་ཏེ། རྩ་རླུང་རྣལ་འབྱོར་དེ་དག་ལ་གོམས་ནས་ལྟེ་བ་སྤྲུལ་པའི་འཁོར་ལོའི་འོག་སོར་བཞི་ཙམ་དུ། ཤེས་རབ་ཕར་ཕྱིན་རྣལ་འབྱོར་མ་སྦས་པའི་རང་གཟུགས་དཔྱིད་དམ་ཙཎྜ་ལཱི་སྟེ་གཏུམ་མོ་ཡེ་ཤེས་ཀྱི་མེ། དབྱིབས་ཨ་ཤད་ཀྱི་རྣམ་པ། ཁ་དོག་དམར་ལ་རེག་བྱ་ཚ་བ་ངོ་བོ་སྟོང་པ་ཉམས་བདེ་བའི་རང་བཞིན་དང༌། དབུ་མའི་ཡར་སྣར་ཧཾ་ཡིག་དངོས་སམ་ཐིག་ལེ་གསལ་འཚེར་སྣུམ་འདྲིལ་མཚན་ཉིད་བཞི་ལྡན་ཏུ་གསལ་གདབ། སྦྱོར་བ་བཞི་ལྡན་བུམ་ཅན་རླུང་གིས་བསྐུལ་བས་མེ་ལྕེ་སོར་བཞི་ཙམ་ནས་རིམ་པར་ཇེ་རིང་ལ་སྦར། དབུ་མའི་སྦུབས་ལམ་དུ་ཞུགས་ཏེ་ལྟེ་བ་སོགས་འཁོར་ལོ་བཞིར་རྩ་ཐིག་ཁ་སྦྱོར་གྱི་ལྷ་ཚོགས་རྣམས་བསྐུལ། མཐར་སྤྱི་བོའི་ཧཾ་ལ་རེག་པས་དེ་ལས་བདེ་བའི་རྒྱུན་གྱི་ཐིག་ལེ་ཆར་ཟིམ་མམ་བ་ཐག་ལྟར་བྱུང་སྟེ་ལྟེ་བའི་གཏུམ་མོ་ལ་ཐིམ་པས་སྡོང་རྩ་མར་ཁུས་བརླན་པ་ལྟར་གསོས་བཏབ་སླར་ཡང་མེ་དེ་ཉིད་ཆེས་ཆེར་འབར་བས་བྱང་སེམས་བསྐུལ་བའི་བདེ་བ་དང་འདྲེས་ཏེ་འཁོར་ལོ་བཞི་ནས་རིམ་པར་མཆེད་པས་ལུས་རྩ་ཕྲ་མོའི་ཁམས་ཐམས་ཅད་ཁྱབ། དྲོད་དང་བདེ་བས་གང་བ་དེ་ཉིད་རང་རིག་གི་ངོ་བོར་རོ་མཉམ་དུ་ཤེས་པའི་ལྟ་བས་རྣམ་པར་མི་རྟོག་པའི་ཡེ་ཤེས་མངོན་དུ་བྱེད་པར་འགྱུར་ལ། ཞུ་བདེ་སྟོབས་སུ་གྱུར་བའི་ཉམས་གསུམ་ཀར་ཡང་ཆེད་འཛིན་མེད་པར་མཐར་ཐུག་ཀ་དག་རང་བཞིན་འོད་གསལ་ཆོས་ཉིད་ཀྱི་དབྱིངས་སུ་བསྐྱལ་བར་བྱའོ། །སྤྱིར་གཏུམ་མོ་ལ་ནམ་མཁའ་དང་མཉམ་པའི་རྒྱུད་ལས། རང་བཞིན་ཕྱི། ཨ་ཐུང་ནང་ཁ་སྦྱོར་གསང་བའི་གཏུམ་མོ་གསུམ་དུ་གསུངས་པ་ལས་འདིར་བསྒོམ་བྱ་ནང་གི་གཏུམ་མོའི་ངོ་བོ་ནི། བདེ་སྟོང་ལྷན་ཅིག་སྐྱེས་པའི་ཡེ་ཤེས་ནང་གི་རྣལ་འབྱོར་མ་སྟེ། རྡོར་ཕྲེང་ལས། ལྟེ་བའི་དབུས་སུ་རྟག་གནས་པ། །ཉི་མ་སྟོང་དང་མཚུངས་པའི་འོད། །ཡེ་ཤེས་ཆེན་པོའི་མེ་འབྱུང་བ། །ཞེས་སོ། །ངེས་ཚིག་ཙཎྜ་ལཱིའི་སྒྲ་ལས་དྲག་ཅིང་གཏུམ་ལ་སྲེག་པ་སྟེ་གང་ལ་གནད་དུ་བསྣུན་པས་ཕུང་ཁམས་ཀྱི་མ་དག་པ་དང་རྣམ་རྟོག་ཉོན་མོངས་མྱུར་དུ་སྲེག་པར་བྱེད་པའོ། །གནས་ཚུལ་རྒྱུད་སྡེ་སོ་སོའི་དགོངས་པས་མེ་དང་རླུང་དང་རྩ་དང་ཐིག་ལེ་དང་སྔགས་དང་ཡེ་ཤེས་རྣམས་སུ་གནས་པར་བཤད་ལ་ཀུན་རྫོབ་ཐིག་ལེ་དོན་དམ་ཡེ་ཤེས་སུ་གནས་པ་སྤྱིའི་དགོངས་པའོ། །སྤར་བྱེད་བུམ་ཅན་སོགས་རླུང་སྦྱོར། ས་བོན་ཕྱག་མཚན་མེ་ཐིག་ཨ་ཤད་སོགས་དམིགས་པ། རང་ལུས་གཞན་ལུས་ཐབས་ལ་བསྟན་པ་སྟེ་གསུམ་མོ། །འབར་བའི་ཚད་རོ་རྐྱང་གི་རླུང་དབུ་མར་ཞུགས་གནས་ཐིམ་གསུམ་ཀའང་འབར་བ་ཆུང་འབྲིང་ཆེན་པོ་གསུམ་དུ་འབྱུང༌། དབྱེ་བ་ལས་དང་རྣལ་འབྱོར་ལྷན་སྐྱེས་ཀྱི་གཏུམ་མོ་གསུམ་མམ། འབར་བ་དམ་ཚིག་དྲོད། ཞུ་བ་ཆོས་བདེ་བ། འདྲེས་པའི་ཉམས་མྱོང་ཡེ་ཤེས་མི་རྟོག་པའི་གཏུམ་མོ་གསུམ་དུ་བཤད། རྟགས་ཚད་ཕྱི་ནང་གི་རྟགས་བཅུ་དང་ཡོན་ཏན་གྲུབ་པ་རྣམ་པ་གཉིས་ཀའི་རྒྱུར་འགྱུར་རོ། །གཉིས་པ་ནི། ཟབ་པའི་བསྐྱེད་རིམ་བསྙེན་དང་ཉེ་བསྙེན་ནི༔ རླུང་གི་རྣལ་འབྱོར་འཁྲུལ་འཁོར་བཅས་པ་སྟེ༔ གཏུམ་མོའི་སྒྲུབ་པས་བདེ་སྟོང་དབྱེར་མེད་པའི༔ སྒྲུབ་པ་ཆེན་པོའི་དེ་ཉིད་མངོན་དུ་འགྱུར༔ ཅེས་གསུངས་ཏེ། དེ་ལྟར་བཤད་པའི་བཅོས་མིན་ཟབ་མོའི་བསྐྱེད་རིམ་ནི་བསྙེན་པ་དང༌། ཉེ་བར་བསྙེན་པ་ནི་རླུང་གི་རྣལ་འབྱོར་ལུས་སྦྱོང་འཁྲུལ་འཁོར་དང་བཅས་པ་ཡིན་ཏེ། དེ་ནས་གཏུམ་མོའི་འབར་འཛག་གི་སྒྲུབ་པའི་རིམ་པས་བདེ་སྟོང་དབྱེར་མེད་པའི་སྒྲུབ་པ་ཆེན་པོའི་དེ་ཉིད་མངོན་དུ་འགྱུར་བ་སྟེ་དཀྱིལ་འཁོར་བཀོད་པ་སོགས་སྤྲོས་བཅས་ལ་མ་ལྟོས་པར་ནང་རྡོ་རྗེའི་ལམ་དུ་བསྙེན་སྒྲུབ་ཡན་ལག་བཞི་མཐར་ཕྱིན་པའོ། །གཉིས་པ་ལམ་གྱི་ཡན་ལག་བཤད་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། ལམ་གྱི་ཡན་ལག༔ ཅེས་གསུངས་ཏེ། ཐབས་ལམ་གྱི་ཡན་ལག་ཏུ་གལ་ཆེ་བ་ཉིན་མཚན་གྱི་རྣལ་འབྱོར། མཚམས་སྦྱོར་གྱི་གདམས་པ་རྣམས་རིམ་བཞིན་བསྟན་པར་བྱའོ། །གཉིས་པ་ལ་གཉིས། ཉིན་མོ་དང་མཚན་མོའི་རྣལ་འབྱོར་རོ།

།དང་པོ་ནི། ཉིན་མོའི་རྗེས་ཐོབ་ཀུན༔ མ་དག་སྒྱུ་མའི་དཔེ་བརྒྱད་ལྟ་བུ་དང་༔ དག་པ་སེམས་ཙམ་སྣང་སྟོང་ལྷ་སྐུར་བལྟ༔ རླུང་སེམས་ཕྱག་རྒྱར་ལྡང་བས་སློབ་པ་དང་༔ མི་སློབ་ཟུང་འཇུག་སྒྱུ་མའི་བདེ་བར་རོལ༔ ཅེས་གསུངས་ཏེ། ཞུ་བདེ་གཏུམ་མོའི་རྣལ་འབྱོར་ནི་སྒྲིབ་རྩ་སྙོམས་འཇུག་འཕོ་བའི་གནས་སྐབས་སྦྱོང་ཞིང་ལྷན་སྐྱེས་ཀྱི་ཡེ་ཤེས་སྐྱེད་པའི་ཕྱིར་ལམ་གྱི་གཞུང་ཤིང་ཡིན་པས་མཉམ་བཞག་ཉམས་ལེན་དངོས་གཞིར་བྱས་ལ། རྗེས་ཐོབ་ཏུ་ཉིན་མཚན་གྱི་རྣལ་འབྱོར་གྱིས་སོ་སོའི་ངོ་སྐལ་སྦྱང་དགོས་པས། དེའང་ཉིན་མོའི་རྗེས་ཐོབ་ཐ་མལ་འཁྲུལ་པའི་གནས་སྐབས་ཀུན་སྒྱུ་ལུས་ཀྱིས་སྦྱངས་ཏེ། དེའང་བསྒྲུབ་བྱ་དངོས་སྦས་དོན་གྱི་སྒྱུ་ལུས་ཡིན་ཀྱང་སྔོན་ཏུ་སྒྱུ་མ་ལྟ་བུའི་ཏིང་ངེ་འཛིན་ལ་བློ་འབྱོངས་པར་བྱ་དགོས་པས་མདོར་དྲིལ་ན་བཞི། དང་པོ་མ་དག་སྒྱུ་ལུས་ནི། ཁམས་གསུམ་སྣོད་བཅུད་ཀྱི་དངོས་པོ་ཐམས་ཅད་སྒྱུ་མའི་དཔེ་བརྒྱད་ཀྱིས་མཚོན་ནས་མེད་བཞིན་ཏུ་སྣང་ལ་བདེན་པར་མ་གྲུབ་པ་དཔེ་དེ་དག་ལྟ་བུར་ཤེས་པར་བྱ་སྟེ། བརྒྱད་ནི། བདེན་པར་མ་གྲུབ་ཀྱང་བྱ་བྱེད་དངོས་པོ་ཚང་བར་སྣང་བ་སྒྱུ་མ། འཁྲུལ་པས་བསླད་པའི་སེམས་ཙམ་དུ་སྣང་བ་རྨི་ལམ། གདོས་བཅས་སུ་མ་གྲུབ་པས་ཕྱི་ནང་གང་དུའང་མེད་པ་མིག་ཡོར། སྐད་ཅིག་གིས་གཡོ་བ་སྨིག་རྒྱུ། གཅིག་གིས་གར་ཡང་ཁྱབ་པ་ཆུ་ཟླ། རྒྱུ་རྐྱེན་ལས་སྐད་ཅིག་གིས་སྐྱེ་འགག་བྱེད་པ་བྲག་ཆ། སྣང་ཡང་ངེས་པ་མེད་པ་དྲི་ཟའི་གྲོང་ཁྱེར། གཅིག་དང་དུ་མར་སྣང་བ་སྤྲུལ་པ་རྣམས་ཏེ། དེ་བཞིན་ཏུ་འཁོར་འདས་ཀྱི་ཆོས་ཐམས་ཅད་སྟོང་བཞིན་ཏུ་ཉེ་བར་སྣང་བ་སྒྱུ་མའི་ལུས་ཅན་ཡིན་པས་ཚིག་དོན་ནམ་མདོ་དང་ཐུན་མོང་བའི་སྤྱི་དོན་གྱི་སྒྱུ་ལུས་སོ། །གཉིས་པ་དག་པ་སྒྱུ་ལུས་ནི། འདི་ལྟར་སྣང་བ་ཐམས་ཅད་ལོགས་སུ་མ་གྲུབ་པ་སེམས་ཀྱི་འདུ་བྱེད་ཙམ་དུ་ཤར་བ་དང་སེམས་དེའང་གདོད་ནས་རང་བྱུང་སྣང་སྟོང་ཟུང་འཇུག་གི་ལྷ་སྐུར་བལྟ་བ་སྟེ། དེའི་ཚུལ་ཡང་རིམ་ལྔ་ལས། མེ་ལོང་ནང་གི་གཟུགས་བརྙན་གྱིས། །སྒྱུ་མའི་ལུས་ནི་མཚོན་པར་བྱ། །ཁ་དོག་རྣམས་ནི་འཇའ་ལྟ་བུ། །ཁྱབ་པ་ཆུ་ཡི་ཟླ་བས་སོ། །ཞེས་སྐད་ཅིག་གིས་གཟུགས་རྫོགས་པ་དང་གསལ་ཞིང་མ་འདྲེས་པ་དང་གཅིག་གིས་ཀུན་ལ་ཁྱབ་པ་ཁྱད་པར་སུམ་ལྡན་ཏུ་བསྒོམ་པ་ནི་སྔགས་ཀྱི་སྤྱི་དོན་ནོ། །གསུམ་པ་རྣམ་དག་སྒྱུ་ལུས་ནི། རླུང་དབུ་མར་ཐིམ་པས་སྟོང་པ་གསུམ་མམ་བཞི་དྲངས་ཏེ། དེའི་ཉེར་ཐོབ་བམ་འོད་གསལ་གྱི་མཐར་རླུང་སེམས་ཙམ་ལས་སྐད་ཅིག་གིས་ལྷ་སྐུར་ལྡང༌། དེ་ལྟ་བུའི་འཇུག་ལྡངས་ལ་ཡང་ཡང་གོམས་ནས་རླུང་སེམས་ཙམ་ལས་གྲུབ་པའི་ཡེ་ཤེས་ཀྱི་ཕྱག་རྒྱར་ལྡངས་པས་སློབ་པའི་ཟུང་འཇུག་འགྲུབ་པ་སྦས་དོན་དང༌། བཞི་པ་ནི། དེ་དག་མཐར་ཕྱིན་པ་ལས་དྲི་མ་ཐམས་ཅད་དང་བྲལ་བ་མི་སློབ་པའི་ཟུང་འཇུག་ཡེ་ཤེས་ཀྱི་སྤྱོད་ཡུལ་སྒྱུ་མ་ལྟ་བུའི་བདེ་བར་རོལ་པ་ནི་མཐར་ཐུག་གི་སྒྱུ་ལུས་སོ། །དེ་ལྟར་ཡང་གལ་པོ་ལས། །འབྲས་བུའི་བདག་བྱིན་བརླབ་པ་ནི། སྒྱུ་མ་དང་ནི་ཆུ་ཟླ་དང༌། །འཇའ་ཚོན་བཞིན་ཏུ་དངོས་མེད་པ། །དེ་ལྟར་འབྲས་བུའི་སྐུར་སྣང་བ། །མཚན་དང་དཔེ་བྱད་རྒྱན་གྱིས་བརྒྱན། །ཅེས་སོ། །གཉིས་པ་མཚན་མོའི་རྣལ་འབྱོར་ལ་གཉིས། མཉམ་བཞག་དང༌། རྗེས་ཐོབ་བོ། །དང་པོ་ནི། ཆོས་ཀུན་རང་བཞིན་སྟོང་གསལ་ཡིན་ཤེས་ནས༔ གཉིད་དུས་སྙིང་དབུས་མི་ཤིག་ཐིག་ལེ་ལ༔ མཉམ་བཞག་སྟོང་བཞིའི་ཉམས་མྱོང་དྲངས་པ་ལས༔ དཔེ་དང་དོན་གྱི་འོད་གསལ་རྩོལ་མེད་འཆར༔ ཅེས་གསུངས་ཏེ། གཉིད་མཐུག་གནས་སྐབས་ཀྱི་དྲི་མ་སྦྱོང་བ་འོད་གསལ་ལའང་ཚུལ་བཞི་ལས། དང་པོ་ཚིག་དོན་དང་མདོ་སྤྱི་ནི། འཁོར་འདས་ཀྱིས་བསྡུས་པའི་ཆོས་ཀུན་གྱི་རང་བཞིན་ནི་གདོད་མ་ནས་སྤྲོས་པའི་མཐའ་དང་བྲལ་བས་ངོ་བོ་སྟོང་ལ་རྣམ་པ་འགགས་མེད་ཅིར་ཡང་གསལ་བ་ཡིན་པ་ལ་ཡིན་པར་ཤེས་པའི་ཏིང་འཛིན་བརྟན་པས་རླུང་དབུ་མར་ཐིམ་སྟེ་སྟོང་བཞི་འདྲེན་ནུས་པ་གཞིར་བྱས་ནས། གཉིས་པ་སྔགས་སྤྱིའི་འོད་གསལ་འཛིན་པ་ལ་དུས་གནད་ཐོ་རངས་གཉིད་སྲབ་པའི་དུས། ལུས་གནད་ཙོག་པུ། འདུན་པ་གཉིད་ཁའི་དྲན་པ། ཡུལ་གནད་སྙིང་གའི་དྭངས་མ་མི་ཤིགས་པའི་ཐིག་ལེ་ལ་སེམས་རྩེ་གཅིག་ཏུ་མཉམ་པར་བཞག་པས་རྐྱེན་བྱས། སྔར་གྱི་ཉམས་མྱོང་གིས་རྒྱུ་བྱས་ཏེ་དབུ་མར་རླུང་སེམས་ཅུང་ཟད་འདུས་པ་ལས་འབྱུང་བ་རིམ་པར་ཐིམ་པའི་རྟགས་སྣང་ཕྲ་མོ་དུ་བ་ལ་སོགས་པ་འཆར། རྣམ་ཤེས་སྣང་བ་ལ་ཐིམ་སྟེ་རྟོག་པ་རགས་པ་འགགས་པས་དཀར་ལམ་ཟླ་འོད་ལྟ་བུར་ཤར་བ་ནི་སྟོང་པ། སྣང་བ་མཆེད་པ་ལ་ཐིམ་སྟེ་ཕྲ་བའི་རྟོག་པ་འགགས་པས་དམར་ལམ་ཉི་འོད་ལྟ་བུ་ནི་ཤིན་ཏུ་སྟོང་པ། མཆེད་པ་ཉེར་ཐོབ་ལ་ཐིམ་པས་རྟོག་པ་ཕལ་ཆེར་འགགས་པ་ནགས་ལམ་མཚམས་ཀྱི་སྨག་ལྟ་བུ་ནི་སྟོང་པ་ཆེན་པོ། ཉེར་ཐོབ་འོད་གསལ་ལ་ཐིམ་སྟེ་རླུང་སེམས་ཐམས་ཅད་འགགས་པས་ཐོ་རངས་ཀྱི་སྟོན་གནམ་སློང་བྱེད་རྐྱེན་གསུམ་དང་བྲལ་བ་ལྟ་བུ་ནི་ཐམས་ཅད་སྟོང་པ་སྟེ། སྟོང་བཞི་སོ་སོའི་ཐད་དུ་ངོས་ཟིན་པར་བྱ་ཞིང་ཁྱད་པར་བཞི་པ་འོད་གསལ་གྱི་ངང་ཅི་གནས་སུ་བསྐྱང༌།

གསུམ་པ་སྦས་དོན་ནི། ཉམས་མྱོང་དེའི་རྒྱུན་ཉིན་མཚན་ཁ་སྦྱོར་དུ་དྲངས་པ་ལས་ལམ་དུས་སྲབ་མཐུག་ཉམས་རྟོགས་ཀྱིས་ཕྱེ་བའི་དཔེའི་འོད་གསལ་ལ་རང་དབང་ཐོབ་པའི་རྒྱུ་ལས། བཞི་པ་མཐར་ཐུག་དོན་གྱི་འོད་གསལ་རྩོལ་མེད་དུ་འཆར་བར་འགྱུར་ཏེ། འཆི་བ་ཆོས་ཀྱི་སྐུར་ལམ་དུ་བསླངས། འོད་གསལ་མ་དང་བུ་འདྲེས་གདོད་མའི་གཞི་ཐོག་ཏུ་སྐད་ཅིག་གཅིག་གིས་བྱེ་བྲག་ཕྱེད་པར་འགྱུར་རོ། །གཉིས་པ་ནི། རྗེས་ཐོབ་འདུན་པའི་སྟོབས་དང་རླུང་སྦྱོར་གྱིས༔ རྨི་ལམ་ངོ་ཤེས་སྤྲུལ་སྒྱུར་རྩལ་ཆེན་སྦྱང་༔ སྟོང་ཆེན་ངང་བསྡུ་སྙིང་རྗེ་སྒྱུ་མའི་གདངས༔ ཕྱག་རྒྱ་གཅིག་སྤྲོས་མཁའ་ཁྱབ་ཚོམ་བུར་བསྒྲུབ༔ ཅེས་གསུངས་ཏེ། གཉིད་ཀྱི་འོད་གསལ་ལ་མཉམ་པར་བཞག་པའི་རྗེས་ཐོབ་ཏུ་རྨི་ལམ་འཆར་བར་རྩོམ་ན་སྐད་ཅིག་གིས་སྒྱུ་ལུས་ཀྱི་ལྷ་སྐུར་ལྡང་བ་ཡིན་ཀྱང་དེ་ལྟར་མི་ནུས་པས་རྨི་ལམ་གྱི་གནས་སྐབས་སྦྱོང་བའི་གདམས་ངག་ནི། ཉིན་མོ་སྣང་བ་ཐམས་ཅད་རྨི་ལམ་དུ་དྲན་པ་རྒྱུན་ཆགས་པ་འདུན་པའི་སྟོབས་དང༌། སྲོག་རྩོལ་རླུང་གི་སྦྱོར་བ་ལ་གནད་དུ་བསྣུན་པའི་སྟོབས་ཀྱིས། ནུབ་མོ་གཉིད་མཐུག་འོད་གསལ་དུ་འཆར་མ་ནུས་པར་རླུང་རོ་རྐྱང་དུ་ཤོར་ནས་མགྲིན་པའི་རྩར་རྒྱུས་ཏེ་བག་ཆགས་ཀྱི་ལུས་ལ་ཉིང་འཁྲུལ་གྱི་སྣང་བར་ཤར་མ་ཐག་རྨི་ལམ་དུ་ངོ་ཤེས་པར་བྱས་ལ་འདུན་པ་དྲག་པོས་བཟུང༌། དེ་བརྟན་པ་ན་གཅིག་ལས་དུ་མ་དང་གང་འདུལ་སོགས་སུ་སྤྲུལ། དེའང་བརྟན་ནས་དངོས་པོ་ལ་མ་ངེས་པ་སྣ་ཚོགས་སུ་བསྒྱུར་བ་དང་སྤེལ་བ་སོགས་བྱས་ལ་རྨི་ལམ་གྱི་ཏིང་འཛིན་རྩལ་ཆེན་མ་རྫོགས་བར་དུ་སྦྱང༌། རྩལ་རྫོགས་ནས་ཉིང་འཁྲུལ་གྱི་སྣང་བ་ཐམས་ཅད་སྟོང་པ་ཆེན་པོའི་ངང་དུ་བསྡུ་ཞིང་དེའི་ངང་ལས་སྙིང་རྗེ་སྒྱུ་མ་ལྟ་བུའི་རང་གདངས་རླུང་སེམས་ལས་གྲུབ་པའི་ལྷ་སྐུ་ཕྱག་རྒྱ་གཅིག་པར་ལྡང༌། དེ་ལས་ཕྱག་རྒྱ་དུ་མར་སྤྲོས་ཤིང་མཐར་ཇི་སྲིད་མཁའ་ཁྱབ་ཀྱི་ཚོམ་བུར་སྤྲོ་ནུས་པ་དེ་སྲིད་དུ་བརྩོན་པས་བསྒྲུབ་པ་ནི། རྨི་ལམ་ལ་བསྙེན་སྒྲུབ་ཡན་ལག་བཞི་ཚང་བར་རྫོགས་པའོ། །དེས་གནས་སྐབས་སུ་འཁྲུལ་སྣང་གི་བདེན་ཞེན་ལྡོག་ཅིང་མཐར་ཐུག་བར་དོ་ལོངས་སྐུ་མངོན་དུ་བྱེད་པར་འགྱུར་རོ། །གཉིས་པ་འཆི་ཁ་དང་བར་དོའི་ཉམས་ལེན་བསྟན་པ་ལ་གཉིས། དགོས་པ་བསྟན་པས་མཚམས་སྦྱར། དེ་གཉིས་སོ་སོར་བཤད་པའོ། །དང་པོ་ནི། ཚེ་འདིར་གོམས་པ་མངོན་དུ་མ་གྱུར་ན༔ ཅེས་གསུངས་ཏེ། གང་ཟག་ལེ་ལོ་ཅན་གདམས་ངག་ཐོབ་ལ་ཉམས་སུ་བླངས་ཀྱང་ཚེ་འདིར་རྟོགས་པའི་གདིང་མ་ཐོབ་ཅིང་གོམས་པ་མངོན་དུ་མ་གྱུར་ན། ལམ་གྱི་ཆད་མཐུད་འཆི་ཁར་ཡེ་ཤེས་གོང་དུ་འཕོ་བ་དང༌། བར་དོ་སྐུ་གསུམ་དུ་བསྲེ་བའི་གདམས་ངག་འདི་དག་ཉམས་སུ་བླང་བར་བྱའོ། །གཉིས་པ་ལ་གཉིས། འཆི་ཁ་མའི་ཉམས་ལེན། བར་དོའི་ཉམས་ལེན་ནོ། །དང་པོ་ནི། རླུང་སེམས་བསྡུ་ཞིང་འཕོས་ཏེ་ངང་ལ་གཞག༔ ཅེས་གསུངས་ཏེ། དེའང་སྤྱིར་རབ་འཆི་བ་དོན་དམ་བདེན་པ་འོད་གསལ་གྱི་ངང་དུ་འཕོ་བ་དང༌། འབྲིང་བར་དོ་ཡང་དག་པའི་ཀུན་རྫོབ་སྒྱུ་ལུས་ཀྱི་ལྷ་སྐུར་འཕོ་བ་དང༌། ཐ་མ་བསྐྱེད་རིམ་དུ་འཕོ་བ་བཅས་གསུམ་དུ་གསུངས་པ་ལས་འདིར་བསྟན་བྱ་ཕྱི་མ་སྟེ། གསོན་དུས་སུ་ལེགས་པར་སྦྱངས་ནས་འཆི་ཁར་ལས་ལ་སྦྱོར་བར་བྱའོ། །དེའང་ལུས་གནད་རླུང་སྦྱོར་དང་ལྡན་པས་འཁོར་བའི་སྒོ་དགུ་དགག །ཐར་པའི་སྒོ་གཅིག་དབྱེ། རླུང་སེམས་ལྟེ་བའམ་སྙིང་གའི་དབུ་མར་རྟེན་ལ་བསྡུ་ཞིང་ཚངས་བུག་ནས་རྟེན་ཅན་རྟེན་མེད་གང་རུང་དུ་འཕོ་ཞིང་འབེབས་པ་སོགས་བྱས་ནས་འབྱོངས་པར་གྱུར་པ་ན། འཆི་བའི་རྟགས་ཚང་ཞིང་བསླུ་བའི་ཐབས་ཀྱིས་མ་ལྡོག་པའི་ཚེ་འདུན་པ་རྩེ་གཅིག་པས་དབྱིངས་སུ་འཕོས་ཏེ་ཀ་དག་བསམ་བརྗོད་བྲལ་བའི་ངང་ལ་བཞག་པས་རབ་དག་པ་མཁའ་སྤྱོད་ཀྱི་ཞིང་དུ་བགྲོད་དེ་ལམ་ལྷག་མ་རྫོགས་ནས་མཆོག་ཐོབ་པ་དང༌། འབྲིང་སྔགས་སྤྱོད་ཀྱི་རྟེན་བཟུང་ནས་སྐྱེ་བ་དག་པར་བརྒྱུད་དེ་དངོས་གྲུབ་ཐོབ་པ་དང༌། ཐ་མ་མཐོ་རིས་སུ་སྐྱེས་ནས་ལམ་སྣ་ཟིན་ཏེ་རིམ་པས་ཐར་པ་ལ་སྦྱོར་བར་བཤད་དོ། །གཉིས་པ་ནི། བར་དོའི་སྣང་གྲགས་རྟོག་ཚོགས་ལྷ་སྔགས་དང་༔ ཡེ་ཤེས་ཆེན་པོར་བསྲེ་བས་མཚམས་སྦྱར་རོ༔ ཞེས་གསུངས་ཏེ།

འཆི་བའི་ཚེ་ལུགས་ལྡོག་གི་འོད་གསལ་ངོས་མ་ཟིན་པས་ལུགས་འབྱུང་ཐམས་ཅད་སྟོང་པ་ལས་ཉེར་ཐོབ་སོགས་སུ་ལྡང་ཞིང་རང་བཞིན་བརྒྱད་ཅུའི་རྟོག་པ་སྐྱེས་པའི་ཚེ་བར་དོའི་ཡིད་ལུས་མིང་གཞི་འདུས་པའི་ཕུང་པོར་གྲུབ་ནས་འཁྲུལ་སྣང་ལ་སྤྱོད་པ་སྟེ། དེའི་ཚེ་སྔར་གྱི་གདམས་ངག་གི་གནད་དྲན་པར་བྱས་ལ་འཁྲུལ་སྣང་བདེན་མེད་དུ་ཤེས་པས་སྣང་ཡུལ་སྒྲ་གྲགས་རྟོག་ཚོགས་གསུམ་པོ་སྣང་སྟོང་ལྷ་དང་གྲགས་སྟོང་སྔགས་དང་རིག་སྟོང་ཡེ་ཤེས་ཆེན་པོར་བསྲེ་བ་དང༌། གཞན་ཡང་སྔོན་གྱི་གོམས་པ་དང་བསྟུན་སྨིན་བྱེད་དབང༌། གྲོལ་བྱེད་ལམ། བསྲུང་བྱ་དམ་ཚིག །ཐོབ་བྱ་འབྲས་བུ་དང་མཐུན་པར་བསྲེ་བས་དག་པའི་ཞིང་ཁམས་སོགས་སུ་མཚམས་སྦྱར་ཏེ་སྐྱེ་བ་སྤྲུལ་སྐུར་འགྲུབ་པ་དང༌། དབང་པོ་ཤིན་ཏུ་ཐ་མས་ཀྱང་འདུན་པ་ཅེར་གྱིས་བཟུང་ལ་མོས་གུས་སྙིང་རྗེ་ཞེན་ལོག་སོགས་ཤུགས་བསྐྱེད་པས་སྐྱེ་གནས་ངན་པའི་མངལ་སྒོ་ཁེགས་པར་འགྱུར་རོ། །རྩ་བའི་གཉིས་པ་དེ་དག་ལམ་གཞན་གྱི་དོད་སྦྱར་བ་ནི། དེ་ལྟར་རྩ་ཁམས་དམ་ཡེ་དབྱེར་མེད་ལྷ༔ རང་བྱུང་གསལ་གདབ་སྦྱོང་བ་རྣམ་གསུམ་གྱིས༔ སྐུ་གསུང་ཐུགས་ཀྱི་ཡེ་ཤེས་ལམ་དུ་བྱ༔ ཁ་སྦྱོར་དབང་བསྐུར་རྡོ་རྗེའི་བཟླས་པ་དང་༔ གཏུམ་མོའི་མེས་མཆོད་འབར་འཛག་གླུ་ཡིས་བསྟོད༔ དྲོད་ཀྱིས་ཁྱབ་པའི་ཚོགས་ཁང་ཉམས་དགའ་བར༔ ཞུ་བདེའི་ལོངས་སྤྱོད་ཚོགས་དང་གཏོར་མར་རོལ༔ མི་རྟོག་ངང་ཐིམ་སྒྱུ་མའི་ལྷ་སྐུར་ལྡང་༔ ལུགས་ལྡོག་འོད་གསལ་དེ་བཞིན་ཉིད་ཀྱི་དབྱིངས༔ ལུགས་འབྱུང་ཀུན་སྣང་རྒྱུ་ཡི་ཡི་གེའི་སྤྲིན༔ རྨི་ལམ་ཕྱག་རྒྱ་གཅིག་སྤྲོས་རྩལ་སྦྱངས་པས༔ རླུང་སེམས་དབྱེར་མེད་ཚོམ་བུ་ཚོགས་སྒྲུབ་ཀྱིས༔ རྣམ་སྨིན་སྒོ་གསུམ་རྡོ་རྗེ་གསུམ་དུ་འཕོ༔ སྐྱེ་ཤི་བར་དོར་སྐུ་གསུམ་ལྷུན་གྲུབ་པའི༔ མཆོག་གི་དངོས་གྲུབ་རྩོལ་མེད་ངང་གིས་འཆར༔ ཞེས་གསུངས་ཏེ། རང་བྱིན་བརླབ་ཀྱི་རྫོགས་རིམ་དེ་ལྟར་བསྟན་པ་ཁོ་ནས་རིམ་པ་དང་པོའི་ལམ་ཡང་ཡོངས་སུ་རྫོགས་པར་འགྱུར་ཏེ། ཐོག་མར་གཞི་ལུས་རྩའི་ཁམས་གཙོ་མོ་འཁོར་དང་བཅས་པ་ནི་དམ་ཚིག་ཡེ་ཤེས་དབྱེར་མེད་པའི་ལྷ་ཚོགས་གཙོ་འཁོར། དེ་ཉིད་རྡོ་རྗེ་ལུས་ཀྱི་དཀྱིལ་འཁོར་རང་བྱུང་དུ་གྲུབ་པར་ཤེས་པས་གསལ་གདབ། རྩ་རླུང་ཐིག་ལེའི་སྦྱོང་བ་རྣམ་པ་གསུམ་གྱིས་སྒོ་གསུམ་སྐུ་གསུང་ཐུགས་རྡོ་རྗེར་བྱིན་བརླབས་པའི་ཡེ་ཤེས་ལམ་དུ་བྱ་བ་དང༌། སྟེང་འོག་གི་རླུང་ཁ་སྦྱོར་དུ་བཅིངས་པས་དབང་བསྐུར་ཞིང་འབྱུང་འཇུག་གནས་གསུམ་རྡོ་རྗེའི་བཟླས་པ་རྒྱུན་མི་འཆད་པ་དང༌། ལྟེ་བར་གཏུམ་མོ་སྦར་བའི་མེས་མཆོད་ཅིང་དཔྱིད་ཐིག་འབར་འཛག་མི་ཤིགས་པའི་རང་སྒྲ་རྡོ་རྗེའི་གླུ་ཡིས་བསྟོད་པ་དང༌། ལུས་ཙཎྜ་ལཱིའི་དྲོད་ཀྱིས་ཁྱབ་པའི་ནང་གི་ཚོགས་ཁང་ཉམས་སུ་དགའ་བར། ཨ་ཧཾ་ཞུ་བདེའི་ལོངས་སྤྱོད་ཟག་མེད་བདུད་རྩིའི་ཚོགས་དང་གཏོར་མར་ཚིམས་པ་ཆེན་པོར་རོལ་ནས་འོད་གསལ་རྣམ་པར་མི་རྟོག་པའི་ངང་དུ་ཐིམ། སླར་ཡང་ཟུང་འཇུག་སྒྱུ་མ་ལྟ་བུའི་ལྷའི་སྐུ་རང་མདངས་སྣོད་བཅུད་དཀྱིལ་འཁོར་གསུམ་སྒྱུ་མའི་རང་བཞིན་ཏུ་ལྡང་བ་བཅས་ཀྱིས་སད་དུས་མཉམ་རྗེས་ཀྱི་རྣལ་འབྱོར་གཉིས་སུ་སྤྲོས་བཅས་ཀྱི་ཕྲིན་ལས་ལ་ཇི་ལྟར་ཡོད་པ་ཚང་བ་དང༌། སྣང་གསུམ་ལུགས་ལྡོག་འོད་གསལ་དུ་ཐིམ་ནས་དེའི་ངང་དུ་གནས་པ་དེ་བཞིན་ཉིད་སྟོང་པ་ཆེན་པོའི་དབྱིངས་ལས། རྗེས་ཐོབ་ལུགས་ལྡོག་ཏུ་ཤར་བ་ཀུན་སྣང་སྒྱུ་མ་དང་རྒྱུའི་ས་བོན་གྱི་ཡི་གེའི་སྤྲིན་ལས། རྨི་ལམ་ལྷ་སྐུ་ཕྱག་རྒྱ་གཅིག་པར་ལྡང་ཞིང་དེ་ལས་ཕྱག་རྒྱ་སྤྲོས་བཅས་ཀྱི་རྩལ་སྦྱངས་པས། རླུང་སེམས་དབྱེར་མེད་པའི་ལྷའི་ཚོམ་བུ་མཐའ་ཡས་པར་སྤྲོ་བ་ཚོགས་སྒྲུབ་ཆེན་མོ་སྟེ་གཉིད་དུས་མཉམ་རྗེས་ཀྱི་རྣལ་འབྱོར་བསྙེན་སྒྲུབ་ཡན་ལག་བཞི་དང་བཅས་པ་རྣམས་ཀྱིས། མ་དག་རྣམ་སྨིན་གྱི་སྒོ་གསུམ་པོ་རྣམ་པར་དག་པ་སྐུ་གསུང་ཐུགས་རྡོ་རྗེ་གསུམ་དུ་གོ་འཕོ་ཞིང་གནས་འགྱུར། སྐྱེ་བ་སྤྲུལ་སྐུ། འཆི་བ་ཆོས་སྐུ། བར་དོ་ལོངས་སྐུ་སྟེ་བར་སྲིད་གསུམ་པོ་སྐུ་གསུམ་དུ་རང་བཞིན་ལྷུན་གྱིས་གྲུབ་པར་མངོན་བྱང་ཆུབ་པའི་མཆོག་གི་དངོས་གྲུབ་འབད་རྩོལ་མེད་པར་ངང་གིས་འཆར་བར་འགྱུར་རོ། །གསུམ་པ་ཤེར་དབང་ཉམས་ལེན་བཤད་པ་ལ་གསུམ། མཚམས་སྦྱར་ཏེ་མདོར་བསྟན་པ་དང༌། དེ་ཉིད་རྒྱས་པར་བཤད་པ། དེ་དག་གི་དོན་བསྡུ་བའོ། །དང་པོ་ནི། གང་ཡང་ཉམས་རྟོགས་ཆེས་ཆེར་མཆེད་པ་ན༔ ཤེས་རབ་ཡེ་ཤེས་དབང་གི་ཉམས་ལེན་ནི༔ བདེ་བ་ཆེན་པོ་སྒྲུབ་པའི་རིམ་པ་སྟེ༔ ཞེས་གསུངས་ཏེ།

རང་བྱིན་བརླབ་ཀྱི་ཉམས་ལེན་དེ་དག་གི་རྩ་བ་སྲོག་རྩོལ་སྒྲ་ཇི་བཞིན་འགྲུབ་ཅིང་འཕོ་མེད་ལ་གདིང་དུ་གྱུར་པ་སོགས་མཉམ་རྗེས་ཀྱི་རྣལ་འབྱོར་གང་ལ་ཡང་རྟོགས་གོམས་ཀྱིས་ཉམས་རྟོགས་རྩལ་ཁ་ཆེས་ཆེར་མཆེད་ཅིང་རྒྱས་པར་གྱུར་པ་ན། གསུམ་པ་ཤེས་རབ་ཡེ་ཤེས་ཀྱི་དབང་གི་ཉམས་ལེན་གཞན་ལུས་ལ་འཇུག་པའི་དུས་ཡིན་ཅིང༌། དེ་ནི་མཆོག་ཏུ་མི་འགྱུར་བའི་བདེ་བ་ཆེན་པོ་སྒྲུབ་པའི་ལམ་གྱི་རིམ་པ་རྒྱུད་སྡེ་ཀུན་ལས་ཁྱད་པར་དུ་བསྔགས་པ་སྟེ། དུར་ཁྲོད་ཁང་བརྩེགས་ཀྱི་རྒྱུད་ལས། ལས་རྒྱའི་བྱང་ཆུབ་སེམས་འབྱོངས་པས། །མཆོག་དང་ཐུན་མོང་ཡོན་ཏན་རྣམས། །རང་གི་སེམས་ལ་གང་འདོད་པ། །འདི་ཡིས་ངེས་པར་འགྲུབ་པར་འགྱུར། །ཅེས་དང༌། འཇམ་དཔལ་ཞལ་ལུང་ལས། གསལ་ཞིང་རབ་དགའ་མཁའ་མཉམ་པ། །གཞན་ཏུ་རིག་པར་མི་འགྱུར་བས། །སྒྱུ་མ་ཀུན་ལས་ཁྱད་པར་དུ། །བུད་མེད་སྒྱུ་མ་ཁྱད་པར་འཕགས། །ཞེས་སོ། །གཉིས་པ་ལ་གསུམ། ལམ་དངོས་དང༌། གཞན་དེར་འདུ་ཚུལ། དེ་དག་གི་འབྲས་བུའོ། །དང་པོ་ལའང་གཉིས། མདོར་བསྟན་རྒྱས་བཤད་དོ། །དང་པོ་ནི། ཡུལ་དང་དུས་དང་ཐབས་དང་མཚོན་བྱ་བ༔ རྣམ་པ་བཞི་ཡིས་དེ་ཉིད་འགྲུབ་པར་འགྱུར༔ ཅེས་གསུངས་ཏེ། ཟབ་ལམ་དེ་ཉམས་སུ་ལེན་པའི་ཐབས་མདོར་བསྡུ་ན། གང་ལ་བསྟེན་བྱའི་ཡུལ་དང༌། ནམ་བསྟེན་པའི་དུས་ཚོད་དང༌། ཇི་ལྟར་བསྟེན་པའི་ཐབས་དང༌། དེ་ལྟར་བསྟེན་པས་མཚོན་པར་བྱ་བ་སྟེ་རྣམ་པ་བཞི་ཡིས་གཞན་ལུས་ཤེས་རབ་ལ་བསྟེན་པའི་ཐབས་ལམ་ཟབ་མོ་དེ་ཉིད་དཔྱིས་ཕྱིན་པར་འགྲུབ་པར་འགྱུར་རོ། །གཉིས་པ་ལ་གསུམ། ཡུལ་དང་དུས་བཤད་པ། ཐབས་བཤད་པ། མཚོན་ཚུལ་བཤད་པའོ། །དང་པོ་ལའང་གསུམ། ཡུལ་བཤད་པ། དུས་བཤད་པ། དེ་གཉིས་ཀྱི་མཇུག་བསྡུ་བའོ། །དང་པོ་ཡུལ་ཕྱག་རྒྱ་བརྟག་ཅིང་དགུག་པའི་ཚུལ་བཤད་པ་ནི། ཡུལ་ནི་ཕྱག་རྒྱ་པད་ཅན་རབ་ཡིན་ལ༔ རི་མོ་དུང་ཅན་གླང་སྣ་རི་དྭགས་འབྲིང་༔ དེ་ལ་པད་ཅན་བཞིན་ཟླུམ་པདྨའི་མདོག༔ རུ་སྦལ་ལུས་དབྱིབས་བྲང་མཛེས་ནུ་མ་མཁྲེགས༔ ལྟེ་བར་གྱེན་འགྲེང་གཉེར་མ་གསུམ་ཡོད་པ༔ མཆོག་གྱུར་རཀྟའོ་མའི་མདོག་ཏུ་སྣང་༔ རི་མོ་ཅན་ནི་ཁྲོ་གཏུམ་ནུ་མ་ཟབ༔ ལུས་ཐུང་བྱིན་པ་ཕྲ་ཞིང་གསུས་པ་སྦོམ༔ དུང་ཅན་མ་ནི་བོང་འཚམས་ཡིད་དུ་འོང་༔ སྐྲ་དང་སྣ་རྩེ་རིང་ཞིང་ནུ་མ་མཁྲེགས༔ གླང་སྣ་ཅན་ནི་ལུས་ཆེ་བྱིན་པ་སྦོམ༔ བཞིན་གྱི་མདངས་གསལ་ཆགས་ལྡན་ཆང་དྲི་བསྣམ༔ རི་དྭགས་ཅན་ནི་དཀར་དམར་རི་དྭགས་མིག༔ སྤྱོད་ལམ་སྙོམས་ཞིང་ནུུ་མ་ཟླུམ་ལ་འཁྱིལ༔ རིགས་ཅན་རྣམ་ལྔ་གང་ཡང་རུང་བའམ༔ སྒྲུབ་པོ་ལ་གུས་གསང་ཐུབ་ཆགས་པ་ཆེ༔ བདེ་བ་བཟོད་མེད་འདོད་པའི་སྒྱུ་རྩལ་མཁས༔ བཅུ་དྲུག་ཉི་ཤུ་ཉེར་ལྔའི་ན་ཚོད་ཅན༔ ལེགས་པར་བརྟག་ལ་རྫས་སྔགས་དམིགས་པས་དགུག༔ ཅེས་གསུངས་ཏེ། དེ་ལ་གཞན་ལུས་དཀྱིལ་འཁོར་འཁོར་ལོ་ནི་ཕོ་ཉའི་མགྱོགས་ལམ་ཡིན་པས་ཐོག་མར་བསྟེན་བྱའི་ཡུལ་གལ་ཆེ་སྟེ། དེའང་རབ་དོན་གྱི་འོད་གསལ་ཐོབ་པའི་ལྷན་སྐྱེས། འབྲིང་དབང་དང་བསྐྱེད་རིམ་གྱིས་རྒྱུད་སྦྱངས་པའི་སྔགས་སྐྱེས་དང་ཡུལ་ཉེར་བཞི་ལ་སོགས་པར་སྐྱེས་པ་ནི་བསྟེན་པ་ཙམ་གྱིས་དངོས་གྲུབ་ཏུ་འགྱུར་བས་མཆོག་ཡིན་ཀྱང༌། སྐལ་བ་དང་ནུས་པ་དམན་པས་ཐ་མ་ལས་སྐྱེས་གྱི་ཕྱག་རྒྱ་མི་མོ་དཀྱུས་མ་ལས་གཞན་མི་འགྲུབ་ཅིང་དེའང་མཚན་ངན་བསྟེན་ན་ཡོན་ཏན་མི་འཕེལ་གྱི་སྟེང་དུ་སྐྱོན་སྐྱེད་པས་ནུས་པ་མ་ཐོབ་ཀྱི་བར་དུ་སྤང་དགོས་ཤིང་མཚན་ལྡན་ཁོ་ན་གལ་ཆེ་བ་དང༌། བུད་མེད་ཐམས་ཅད་རིགས་ཅན་ལྔ་ལས་མ་འདས་པར་བཤད་པས་ལྔ་པོ་ལས། པདྨ་ཅན་ནི་རྩ་བཟང་བས་བདེ་བ་ལྷག་པར་སྐྱེད་ཅིང་ཆོས་ཉིད་གསལ་བས་རབ་ཡིན་ལ། རི་མོ་ཅན་དང་དུང་ཅན་མ་དང་གླང་སྣ་ཅན་དང་རི་དྭགས་མ་བཞི་ནི་རྩ་སྔ་མ་ལས་དམན་པས་འབྲིང་དུ་བཤད་དོ། །དེ་ལ་པདྨ་ཅན་གྱི་མཚན་ཉིད་ནི་ཕྱི་རྟགས་བཞིན་རས་ཟླུམ་པོ་སྔོ་སང་ངམ་པདྨའི་མདོག་ཅན། སྐྲ་སེར་ཞིང་ལི་བ། རུས་སྦལ་ལྟར་ཆུ་ཞིང་གབ་བའི་ལུས་དབྱིབས་ཅན། བྲང་མཛེས་ལ་ནུ་མ་སྲ་ཞིང་མཁྲེགས་པ། ནང་རྟགས་སུ་ལྟེ་བར་གྱེན་དུ་འགྲེང་བའི་གཉེར་མ་སྟེ་རི་མོ་གསུམ་ཡོད་པ། མཆོག་གྱུར་པདྨའི་རིགས་ཡིན་པས་གསང་རྟགས་སུ་གསང་རྩ་པད་སྣལ་ལྟར་ཕྲ་ཞིང་འབྱེད་འཛུམ་བྱེད་པས་རྒྱུན་ཏུའང་རེས་འགའ་རཀྟ་འོ་མའི་མདོག་ཏུ་སྣང་བའོ། །རི་མོ་ཅན་ནི། རྒྱུད་ཁྲོ་ཞིང་གཏུམ་ལ་ནུ་མའི་གཏིང་ཟབ་པ། ལུས་ཀྱི་བོང་ཐུང་ལ་བྱིན་པ་རི་དྭགས་ལྟར་ཕྲ་ཞིང་གསུས་པ་རྒྱས་པས་རྐད་པ་སྦོམ་པ། སྐྲ་བཟང་ལ་དཔྲལ་བར་གཉེར་མ་གྱེན་འགྲེང་ཡོད་པ། གསང་རྩ་རི་མོ་ལྟར་ཕྲ་བ་སྟེ་ལས་ཀྱི་རིགས་སོ། །དུང་ཅན་མ་ནི་ལུས་བོང་ཧ་ཅང་རིང་བའམ་ཐུང་བ་མ་ཡིན་པས་འཚམས་ཤིང་བཞིན་རས་ཡིད་དུ་འོང་བ། སྐྲ་ནག་ལ་རིང་བ་དང་སྣའི་རྩེ་མོའང་ལེབ་མོར་མིན་པར་རིང་ཞིང་ནུ་མ་རྒྱས་ལ་མཁྲེགས་པ། གསང་རྩ་དུང་ལྟར་འཁྲིལ་བ་སྟེ་རིན་ཆེན་རིགས་སོ། །གླང་སྣ་ཅན་ནི། ལུས་བོང་ཆེ་ཞིང་བྱིན་པ་སྦོམ་པ། སྐྲ་ངན་ལ་བཞིན་རས་ཀྱི་མདངས་གསལ་བ། ངོ་ཚ་ཆུང་བའི་ཆགས་པ་དང་ལྡན་ལ་ལུས་ལས་ཆང་དྲི་མནམ་པ། གསང་རྩ་གླང་ཆེན་སྣ་ལྟར་བལྟབས་པ་སྟེ་སངས་རྒྱས་རིགས་སོ། །རི་དྭགས་ཅན་མ་ནི། བཞིན་མདོག་དཀར་ལ་དམར་བའི་མདངས་ཅན་རི་དྭགས་ལྟ་བུའི་མིག་མཛེས་པ། དཔྲལ་བ་དབྱེས་ཆེ་ཞིང་སྐྲ་རྩུབ་པ། སྤྱོད་ལམ་ཧ་ཅང་དལ་བའམ་བྲེལ་བ་མིན་པར་སྙོམས་ཤིང་ནུ་མ་ཟླུམ་ལ་འཁྱིལ་བ། གསང་རྩ་རི་དྭགས་ཀྱི་རྩི་ལྟ་བུས་བཀབ་པ་སྟེ་རྡོ་རྗེའི་རིགས་སོ། །དེ་ལྟར་རིགས་རྣམ་པ་ལྔ་པོ་རེ་རེ་ལའང་ཕྱི་ནང་གསང་རྟགས་ཚང་བ་རྫོགས་མ་རྫོགས་ཁྱད་པར་གྱིས་རབ་འབྲིང་ཐ་མ་གསུམ་གསུམ་དུ་འགྱུར་བས་དེ་དག་གང་ཡང་རུང་བའམ། མཚན་ཉིད་ཚང་མ་ཚང་ཅི་ཡིན་ཀྱང་རུང་གཙོ་བོར་སྒྲུབ་པ་པོ་རང་ལ་དད་ཅིང་གུས་པས་སྙིང་ཉེ་བ། བློ་བརྟན་པས་ལྟ་སྤྱོད་ཟབ་མོ་གསང་ཐུབ་པ། རྩ་བཟང་བས་ཆགས་པ་ཆེ་བ། དར་ལ་བབས་པས་མཐོང་རེག་ཙམ་གྱིས་བདེ་བ་བཟོད་མེད་དུ་གཡོ་ཞིང་འཁྲིག་ཐབས་ཀྱི་འདོད་པའི་སྒྱུ་རྩལ་ལ་མཁས་པ། ལོ་གྲངས་ཀྱང་བཅུ་དྲུག་ནས་རབ། ཉི་ཤུ་ནས་འབྲིང༌། ཉེར་ལྔ་ནས་ཐ་མ་སྟེ་དེ་ཚུན་ཆད་ཀྱི་ན་ཚོད་ཅན་གལ་ཆེ་བ་ནི། སྒྱུ་འཕྲུལ་མེ་ལོང་ལས། བཅོ་བརྒྱད་བཅུད་ལྡན་རབ་ཡིན་ཏེ། །ཉི་ཤུ་ལ་སོགས་འབྲིང་དུ་བཤད། །རྩ་ལྔ་ཐ་མའི་ཚད་ཡིན་ཏེ། །གཞན་ལ་དངོས་གྲུབ་མེད་པར་གསུངས། །ཞེས་སོ། །དེ་ལྟ་བུའི་མཚན་ཉིད་དང་ལྡན་པའི་རིག་མ་དེ་ལེགས་པར་བརྟགས་ལ་རྙེད་ནས་རང་བཞིན་གྱིས་མ་ཁུག་ན་གདམས་ངག་རྣམས་ལས་འབྱུང་བ་ལྟར་རྫས་ཀྱི་རྟེན་འབྲེལ་དང་སྔགས་བཟླ་བ་དང་དམིགས་པའི་འཕྲོ་འདུ་གསུམ་གྱིས་དགུག་པར་བྱའོ། །གཉིས་པར་དུས་རིག་པར་བྱ་ཞིང་ལས་རུང་དུ་བསྒྲུབ་པ་ནི། དེ་ནས་ཉམས་དགའ་བག་ཕེབས་དབེན་གནས་སུ༔ ཐུན་མོང་ཆོས་ཀྱིས་བློ་རྒྱུད་ལེགས་པར་སྦྱང་༔ ཟབ་མོའི་དབང་བསྐུར་དམ་ཚིག་ལྷག་པར་འབོགས༔ རིམ་གཉིས་ཉམས་ཀྱི་དྲོད་རྟགས་ངེས་པ་དང་༔ གསང་སྔགས་སྤྱོད་ལ་སྐྲག་པ་མེད་པའི་བློ༔ ཟུངས་ཐུབ་བརྟན་པོ་རབ་ཏུ་སྐྱེ་བར་བྱ༔ ཞེས་གསུངས་ཏེ།

རིག་མ་དེ་རང་ཉིད་ཀྱི་དབང་དུ་གྱུར་པ་དེ་ནས་ཡིད་དང་མཐུན་པས་ཉམས་དགའ་བ། མི་མཐུན་པ་མེད་པས་བག་ཕེབས་པ། སྐྱེ་བོའི་རྒྱུ་འགྲུལ་མེད་པས་དབེན་པའི་གནས་སུ། འཁོར་བའི་སྡུག་བསྔལ་དང་མི་རྟག་པའི་གཏམ་སོགས་བཤད་ལ་ངེས་འབྱུང་བསྐྱེད་ཅིང་བསགས་སྦྱོང་གི་རིམ་པ་སོགས་ཐེག་པ་ཐུན་མོང་གི་སྔོན་ཏུ་འགྲོ་བའི་ཆོས་རྣམས་ཀྱིས་བློ་རྒྱུད་ལེགས་པར་སྦྱང༌། དེ་ནས་སྔགས་ཀྱི་དཀྱིལ་འཁོར་དུ་གཞུག་ལ་ཕན་ནུས་ཟབ་མོའི་དབང་བསྐུར་བས་སྨིན་པར་བྱས་ལ་ཐུན་མོང་དང་ཐུན་མོང་མ་ཡིན་པའི་དམ་ཚིག་རྣམས་ཁེ་ཉེན་གྱི་གནད་ལ་བཀར་ཏེ་ལྷག་པར་ནན་ཏན་དུ་འབོགས། ཐོག་མར་བསྐྱེད་རིམ་དང་དེ་ནས་རྫོགས་རིམ་གྱི་གདམས་པ་བསྟན་ཏེ་རེ་རེའང་དྲོད་རྟགས་ཀྱི་ངེས་པ་མ་མཐོང་བར་དུ་སྦྱོང་བ་དང༌། གསང་སྔགས་ཀྱི་བརྟུལ་ཞུགས་སྤྱོད་པ་ཟབ་མོ་ལ་ནམ་ཡང་སྐྲག་པ་མེད་པའི་བློ་ཟུང་ཐུབ་རྐྱེན་གྱིས་མི་འཕྲོག་པའི་བརྟན་པོ་རབ་ཏུ་སྐྱེ་བར་བྱའོ། །གསུམ་པ་ནི། མདོར་ན་བརྟག་དང་དགུག་དང་སྦྱང་བ་སྟེ༔ སྔོན་འགྲོ་གསུམ་གྱིས་བདེ་བའི་ཉེར་བསྡོགས་བསྒྲུབ༔ ཅེས་གསུངས་ཏེ། རྒྱས་པར་བཤད་པ་དེ་དག་གི་དོན་མདོར་བསྡུ་ན་ཐོག་མར་རིག་མ་མཚན་བཟང་ངན་བརྟག་པ་དང༌། བར་དུ་རྫས་སྔགས་དམིགས་པས་དགུག་པ་དང༌། ཐ་མར་ཐུན་མོང་ཐུན་མིན་གྱི་གདམས་པས་རྒྱུད་སྦྱོང་བ་སྟེ་སྔོན་འགྲོའི་ཆོས་རྣམ་པ་གསུམ་གྱིས་བདེ་བའི་གསེང་ལམ་ལ་འཇུག་པའི་ཉེར་བསྡོགས་བསྒྲུབ་པའོ། །གཉིས་པ་ཐབས་བཤད་པ་ལ་གཉིས། ཐབས་ལམ་གྱི་ཆོས་ཉེར་བདུན་སྤྱིར་བསྟན་པ་དང༌། ཉམས་ལེན་ལག་ཏུ་བླང་ཚུལ་བྱེ་བྲག་ཏུ་བཤད་པའོ། །དང་པོ་ནི། ཐབས་ནི་ཁྲུས་བྱས་རྒྱན་སྤྲས་བཀུ་མཉེ་བྱ༔ བཅུད་ཅན་ཟས་བསྟེན་རྩ་རླུང་འཁྲུལ་འཁོར་སྦྱང་༔ འབོལ་བའི་གདན་ལ་ཡབ་ཡུམ་འཁོད་ནས་ཀྱང་༔ བལྟ་ཞིང་ཆགས་པའི་གཏམ་དང་མདངས་བསྐྱེད་སོགས༔ བསླབ་པ་གསུམ་གྱིས་བདེ་བའི་ལས་ལ་བསྐུལ༔ ལྷར་གསལ་བྱིན་བརླབ་འདོད་པ་མཉམ་ལྡན་པའི༔ འདུ་ཤེས་གསུམ་གྱིས་ཐ་མལ་སྣང་ཞེན་ལྡོག༔ འཁྱུད་དང་སྤྲད་དང་དལ་བུས་བསྲུབ་པ་ཡི༔ སྦྱོར་ཐབས་གསུམ་གྱིས་བདེ་བ་རིམ་གྱིས་དབབ༔ འཁོར་ལོའི་ལྷ་མཆོད་སྙོམས་འཇུག་རླུང་སྦྱོར་བཅས༔ བསྐྱིལ་ཐབས་གསུམ་གྱིས་བདེ་བ་གོང་དུ་སྤོར༔ གསང་བའི་རྩ་དང་ཐིག་ལེ་རླུང་སེམས་བཅས༔ ཁ་སྦྱོར་གསུམ་གྱིས་ལྷན་སྐྱེས་བདེ་བ་མྱང་༔ ལུས་ངག་འགྱུར་དང་ཏིང་འཛིན་རྩེ་གཅིག་པའི༔ འཁྲུལ་འཁོར་གསུམ་གྱིས་བདེ་བ་མི་ཉམས་གཟུང་༔ དུད་འགྲོའི་འགྱུར་དང་རླུང་གདངས་དམིགས་པའི་མདའ༔ བཙན་ཐབས་གསུམ་གྱིས་བདེ་བ་གནས་སུ་ལྡོག༔ སེང་གེ་རྣམ་རོལ་བྲབ་དང་གཞིལ་བ་ཡི༔ སྒྱུ་རྩལ་གསུམ་གྱིས་བདེ་བ་ཁྱབ་པར་དགྲམ༔ སེམས་བཟུང་འཛིན་མེད་མཁའ་སྒྱུར་རྣམ་དག་པའི༔ རྒྱས་འདེབས་གསུམ་གྱིས་བདེ་སྟོང་ཟུང་དུ་ཆུད༔ ཅེས་གསུངས་ཏེ། ཡུལ་དེ་ལ་བརྟཻན་ནས་བདེ་བ་ཆེན་པོ་སྐྱེད་པའི་ཐབས་ནི། རིག་མ་ལ་སྔ་གོང་ནས་ཡང་ཡང་དུ་དྲི་ཞིམ་པོའི་ཆས་ཁྲུས་བྱས་ལ་མཛེས་པའི་རྒྱན་ཡིད་དུ་འོང་བས་སྤྲས། དྲི་བཟང་དང་བྱང་སེམས་རྒྱས་བྱེད་ཀྱི་བཀུ་མཉེ་བྱ། ཤ་ཆང་སོགས་བཅུད་ཅན་ཀྱི་ཟས་བསྟེན་ཅིང་རྩ་རླུང་གི་རྣལ་འབྱོར་དང་འཁྲུལ་འཁོར་རྣམས་སྔར་འབྱོངས་ཟིན་ཀྱང་ཆུ་འདྲེན་པ་ལ་ཡུར་བའི་ཚུལ་དུ་སྦྱང༌། སྟན་ནང་ཚང་ཅན་སོགས་འབོལ་བའི་གདན་ལ་རྣལ་འབྱོར་པ་ཡབ་ཡུམ་གཉིས་ལྷན་ཅིག་ཏུ་འཁོད། འཁོད་མ་ཐག་ནས་ཀྱང་སྙོམས་འཇུག་མི་བྱ་བར་ཐབས་ལམ་གྱི་ཆོས་ཉེར་བདུན་གྱིས་རིམ་པར་བསྒྲུབ་དགོས་པས། ཐོག་མར་འཛུམ་པའི་མིག་གིས་གཟུགས་ལ་བལྟ་ཞིང་ངག་གིས་ཆགས་པའི་གཏམ་སྣ་ཚོགས་སྨྲ་བ་དང་ཡིད་དགའ་བའི་མདངས་བསྐྱེད་ལ་ཆགས་པའི་ཚུལ་དྲན་པ་སོགས་སྒོ་གསུམ་འདོད་ཆགས་ཀྱི་སྦྱོར་བ་ལ་བསླབ་པ་གསུམ་གྱིས་བདེ་བའི་ལས་ལ་འཇུག་འདོད་དྲག་པོར་བསྐུལ། རྣལ་འབྱོར་པ་དང་རིག་མ་གཉིས་ཀས་ལྷ་ཡབ་ཡུམ་དུ་གསལ་བ་དང་མཁའ་གསང་རྡོ་རྗེ་པདྨར་བྱིན་བརླབས་མཚུངས་པ་དང་ཐབས་འདི་ལ་བསྟེན་ནས་གཞན་དོན་དུ་བདེ་ཆེན་རྡོ་རྗེ་སེམས་དཔའ་བསྒྲུབ་པའི་འདོད་པ་མཉམ་པོར་ལྡན་པའི་འདུ་ཤེས་གསུམ་གྱིས་ཐ་མལ་གྱི་གཟུགས་སུ་སྣང་ཞིང་ཆགས་པའྀ་ཞེན་པ་ལས་ལྡོག །རྩ་སྐུལ་བའི་ཐབས་དང་ལྡན་པས་ལུས་ལ་འཁྱུད་པ་དང་མཁའ་གསང་གཅིག་ཏུ་སྤྲད་པ་དང་བྲོད་ནས་དྲག་ཏུ་མི་ཤོར་བར་དལ་བུས་བསྲུབ་པའི་སྦྱོར་ཐབས་རྣམ་པ་གསུམ་གྱིས་བདེ་བ་སྤྱི་བོ་ནས་འཁོར་ལོ་བཞིར་རིམ་གྱིས་དབབ། སྤྱི་བོའི་འཁོར་ལོར་ཐིག་ལེ་བབས་པས་དགའ་བའི་ཡེ་ཤེས་སྐྱེས་པའི་རང་ངོ་ལ་ཡུན་རིང་དུ་བལྟས་ཏེ་རྩ་འཁོར་དེའི་ལྷ་མཆོད་པར་མོས་པས་མཚོན་འཁོར་ལོ་བཞི་པོའི་ལྷ་རྣམས་མཆོད། སྙོམས་འཇུག་ཇེ་དྲག་ཏུ་བཏང་བ་དང༌། རིལ་བ་ཞབས་ཚགས་ཅན་གྱི་རླུང་སྦྱོར་སོགས་དང་བཅས་ཏེ་ཐིག་ལེ་བསྐྱིལ་ཐབས་གསུམ་གྱིས་བདེ་བའི་རྒྱུན་མི་ཉམས་པར་གོང་ནས་གོང་དུ་སྤོར། གསང་བའི་རྡོ་རྗེ་ནོར་བུའི་རྩ་དང་ཡུམ་གྱི་ཁ་ག་མུ་ཁ། སྣ་རྩེའི་ཐིག་ལེ་དཀར་དམར། གཉིས་ཀའི་རླུང་དང་སེམས་གཅིག་ཏུ་འདྲེས་པ་བཅས་རྩ་ཐིག་རླུང་གི་ཁ་སྦྱོར་གསུམ་གྱིས་དགའ་བཞིའི་མཐར་ཐུག་ལྷན་སྐྱེས་ཀྱི་བདེ་བ་མྱང༌། རྒྱ་མཚོ་བྲག་གཏད་གླིང་བཞི་སྡུད་པ་ཉི་ཟླ་གྱེན་ལྡོག་སོགས་ལུས་དང་ཧཱུྃ་དང་ཧིང་འདྲེན་སོགས་ངག་གི་འགྱུར་བ་དང༌། ཡིད་དམིགས་བཅས་དམིགས་མེད་ཀྱི་ཡུལ་གང་རུང་གི་ཏིང་ངེ་འཛིན་ལ་རྩེ་གཅིག་ཏུ་གཏད་པའི་སྒོ་གསུམ་འཁྲུལ་འཁོར་གྱི་གནད་གསུམ་གྱིས་བདེ་བའི་རྟེན་ཐིག་ལེ་མི་ཉམས་པར་དམ་བཅའ་བརྟན་པོས་བཟུང༌། སྟག་མོའི་སྐྱུག་སྟངས་སོགས་དུད་འགྲོའི་འགྱུར་བ་བཞི་དང་རླུང་གི་གདངས་རྩལ་གྱེན་དུ་འདྲེན་པ་དང་དམིགས་པའི་མདའ་ཚངས་པའི་ཧཾ་ཡིག་གི་འབེན་ལ་གཏོད་པ་བཅས་བཙན་ཐབས་ཀྱི་སྦྱོར་བ་རྣམ་པ་གསུམ་གྱིས་བདེ་བ་རྟེན་ཐིག་ལེ་དང་བཅས་པ་སྤྱི་བོའི་རང་གནས་སུ་ལྡོག །སེང་གེ་རྣམ་རོལ་དང༌། གྱི་ལིང་པྲ་ཚུལ་སོགས་ཟབ་པ་དང༌། གཡང་མོ་སྤྲུགས་སྟངས་སོགས་གཞིལ་བའི་སྒྱུ་རྩལ་གསུམ་གྱིས་འདྲེན་ལྡོག་བྱས་པའི་ཐིག་ལེའི་བདེ་བ་རྩ་གནས་ཐམས་ཅད་དུ་ཁྱབ་པར་དགྲམ། བདེ་བའི་རང་ངོ་ལ་སེམས་བཟུང་བ་དང་གང་དུའང་འཛིན་པ་མེད་པ་དང་སེམས་རྒྱ་ཡན་དུ་ཀློད་དེ་ནམ་མཁའ་ལྟར་རྣམ་པར་དག་པའི་ངང་དུ་འཇོག་པ་སྟེ་རྒྱས་འདེབས་གསུམ་གྱིས་བདེ་བ་དང་སྟོང་པ་ཡ་བྲལ་མ་ཡིན་པར་ཟུང་དུ་ཆུད་པར་བྱའོ། །གཉིས་པ་ལ་གསུམ། སྦྱོར་བ། དངོས་གཞི། རྗེས་སོ།

།དང་པོ་ནི། གང་ཡང་སྔོན་དུ་རང་ལུས་ཐབས་ལྡན་བསླབ༔ ཅེས་གསུངས་ཏེ། གཞན་ལུས་ཀྱི་ལམ་གང་ལ་ཡང་སྔོན་དུ་ཡིད་རིག་ཡེ་ཤེས་ཕྱག་རྒྱ་ལ་བརྟེན་ནས་ལས་རྒྱ་ལ་ཇི་སྐད་བཤད་པའི་ཚུལ་ཐམས་ཅད་ཉམས་སུ་བླངས་པས་ཀུན་རྫོབ་བྱང་སེམས་དབབ་བཟུང་ལྡོག་དགྲམ་གྱི་བྱ་བ་ལ་རང་དབང་ཐོབ་ངེས་པ་རང་ལུས་ཐབས་ལྡན་གྱི་གདམས་པ་ལ་བསླབ་པ་གལ་ཆེའོ། །གཉིས་པ་ནི། དངོས་གཞི་རིགས་ཅན་ལྔ་ལ་རིམ་པ་བཞིན༔ སྟེང་དང་རྒྱབ་དང་འདེགས་དང་མཉམ་པ་དང་༔ འོག་ནས་སྦྱོར་བའི་འཁྲིག་ཐབས་གཙོ་བོ་སྟེ༔ གཞན་ཡང་གཡས་གཡོན་མདུན་ནས་རོལ་པ་སོགས༔ འདོད་པའི་རྩེ་འཇོ་མིག་འཕྲུལ་ལྟ་བུ་ཡིས༔ དབབ་ལ་མཁས་པ་དལ་བུ་རུ་སྦལ་འགྲོས༔ བཟུང་ལ་མཁས་པ་རྩེ་གཅིག་ཐེམ་བུ་བཞིན༔ ལྡོག་ལ་མཁས་པ་བཙན་ཐབས་མདའ་ལྟར་འཕང་༔ འགྲེམས་ལ་མཁས་པ་ཡུར་བ་བཞིན་དུ་ཁྱབ༔ ཁྱད་པར་ཟག་མེད་ཐིག་ལེ་སྙིང་གར་སྦས༔ བརྗོད་བྲལ་ཀ་དག་ངང་དུ་ཡུན་རིང་བཞག༔ ཅེས་གསུངས་ཏེ། གཞན་ལུས་ཀྱི་ལག་ལེན་དངོས་གཞི་གོང་དུ་བསྟན་པའི་ཕྱག་རྒྱ་རིགས་ཅན་ལྔ་ལ་སྦྱོར་ཐབས་རིམ་པ་བཞིན། པདྨ་ཅན་ལ་སྟེང་ནས་སྦྱོར་བ་དང་རི་མོ་ཅན་ལ་རྒྱབ་ནས་དང་དུང་ཅན་མ་ལ་འདེགས་པའི་ཚུལ་གྱིས་དང་གླང་སྣ་ཅན་ལ་ཕན་ཚུན་མཉམ་པར་ལྟ་བས་དང་རི་དྭགས་ཅན་ལ་འོག་ནས་སྦྱོར་བའི་འཁྲིག་ཐབས་གཙོ་བོར་བྱ་སྟེ་དེ་དག་རྒྱུད་ཀྱི་དགོངས་པ་དང་འབྲེལ་བ་ཡིན་ལ། གཞན་ཡང་མཐའ་གཅིག་ཏུ་མ་ངེས་པར་གཡས་རོལ་གཡོན་རོལ་མདུན་ནས་རོལ་པ་ལ་སོགས་པ་འདོད་པའི་སྒྱུ་རྩལ་གྱི་རྩེ་འཇོ་མིག་འཕྲུལ་ལྟ་བུས་སྙོམས་པར་འཇུག་ཅིང་སྦྱོར་ཐབས་ཀྱི་བྱེ་བྲག་རེ་རེས་བདེ་བའི་ཡེ་ཤེས་མི་འདྲ་བ་རེ་རེ་འདྲེན་ནུས་པར་བྱའོ། །དེ་ལ་དགོས་པའི་གནད་བཞི་ནི། དང་པོ་དབབ་པ་ལ་མཁས་པ་དལ་བུ་རུ་སྦལ་གྱི་འགྲོས་ལྟ་བུ། བར་དུ་བཟུང་བ་ལ་མཁས་པ་ཐེམ་བུ་བདུན་གྱི་གནད་ལ་རྩེ་གཅིག་པ་རྫ་སྣོད་ཐེམ་བུས་བཀག་པ་བཞིན་དང༌། དེ་ལས་ལྡོག་པ་ལ་མཁས་པ་བཙན་ཐབས་ཀྱི་སྦྱོར་བས་སྐྱེན་པོའི་མདའ་ལྟར་རང་གནས་སུ་འཕང་ཞིང༌། མཐར་འགྲེམས་པ་ལ་མཁས་པ་ཞིང་པས་ཡུར་བ་ལ་ཆུ་དྲོངས་པ་བཞིན་ཏུ་ལུས་གནས་ཐམས་ཅད་དུ་ཁྱབ་པར་བཀྲམ། ཁྱད་པར་སྣང་རིག་དབྱེར་མེད་ཀྱི་གནད་ལ་གོམས་པས་ཟག་མེད་དྭངས་མའི་ཐིག་ལེ་སྙིང་ག་མི་ཤིགས་པའི་མཛོད་དུ་སྦས་ཏེ་བརྗོད་བྲལ་ཀ་དག་གི་ངང་དུ་ཡུན་རིང་པོར་མཉམ་པར་བཞག་པ་གནད་ཀྱི་མཆོག་ཡིན་ནོ། །གསུམ་པ་ནི། དེ་ཚེ་བདེ་བ་ཐིག་ལེའི་ཀློང་དུ་སྦ༔ ཐིག་ལེ་འོད་གསལ་དེ་ཡང་མི་རྟོག་ངང་༔ སྦས་ཤིང་གོམས་པས་བདེ་ཆེན་བརྟུལ་ཞུགས་བསྒྲུབ༔ ཅེས་གསུངས་ཏེ། དེ་ལྟར་ཉམས་སུ་ལེན་པའི་ཚེ་བདེ་བའི་རང་བཞིན་གྲོལ་བ་ལ་མཁས་པ་མཁའ་ལ་ན་བུན་ཡལ་བ་ལྟར་གཤིས་ལུགས་སུ་ལ་ཟློ་དགོས་པས། ཟག་བཅས་བདེ་བ་རྟོག་པའི་རོ་མྱོང་བས་ཟག་ཏུ་མི་གཞུག་པར་ཟག་མེད་མི་ཤིགས་པའི་ཐིག་ལེའི་ཀློང་དུ་སྦ། ཐིག་ལེ་དེའང་ལྷུན་གྲུབ་འོད་གསལ་གྱི་དབྱིངས་སུ་སྦ། དེའང་ཀ་དག་རྣམ་པར་མི་རྟོག་པའི་ངང་དུ་སྦ། ཚུལ་དེ་ལྟ་བུ་ཡང་ནས་ཡང་དུ་སྦྱང་ཞིང་གོམས་པས་མཆོག་ཏུ་མི་འགྱུར་བའི་བདེ་བ་ཆེན་པོའི་བརྟུལ་ཞུགས་བསྒྲུབ་པར་བྱའོ། །གསུམ་པ་ཐབས་དེས་མཚོན་བྱ་བཤད་པ་ནི། ཐབས་དེས་མཚོན་པའི་བདེ་སྟོང་ཕྱག་རྒྱ་ཆེ༔ འཁོར་འདས་བརྟན་གཡོ་ཀུན་གྱི་དེ་ཉིད་ནི༔ ཉམས་མྱོང་ཡོད་ཀྱང་སྨྲ་རུ་མི་བཏུབ་ལ༔ ཡིད་ཆེས་ལྡན་ཀྱང་འདི་ཞེས་དཔེས་མི་མཚོན༔ མངོན་སུམ་གྱུར་ཀྱང་རྟོག་པས་མ་བསླད་པ༔ ཡེ་ཤེས་སོ་སོར་རང་གིས་རིག་བྱ་བ༔ ནམ་མཁའ་ལྟ་བུར་འདུས་མ་བྱས་པ་སྟེ༔ ཆུ་ཟླ་བཞིན་དུ་གསལ་ཞིང་འཛིན་པ་མེད༔ སྤྲུལ་པའི་གཟུགས་བརྙན་ངོས་གཟུང་ལས་འདས་པ༔ བདེ་སྟོང་དབྱེར་མེད་དཔེ་ཡི་ཚུལ་དུ་འཆར༔ ཅེས་གསུངས་ཏེ། མཚོན་བྱེད་ཐབས་ལམ་ཟབ་མོ་དེས་མཚོན་བྱའི་དོན་བདེ་སྟོང་ཟུང་འཇུག་ཕྱག་རྒྱ་ཆེན་པོ་ཞེས་བྱ་བ། འཁོར་བ་དང་མྱང་འདས་བརྟན་པ་སྣོད་དང་གཡོ་བ་བཅུད་ཀྱི་སྐྱེ་འགྲོ་ཀུན་གྱི་སྲོག་གམ་སྙིང་པོར་ཁྱབ་པའི་དེ་ཁོ་ན་ཉིད་ཀྱི་གནས་ལུགས་ནི། རྣལ་འབྱོར་པའི་ཉམས་སུ་མྱང་བྱར་ཡོད་ཀྱང་འདིའོ་ཞེས་ངག་གིས་སྨྲ་རུ་མི་བཏུབ་ལ། རང་ཉིད་ཡིད་ཆེས་པའི་ངེས་ཤེས་དང་ལྡན་ཀྱང་འདི་ལྟ་བུའོ་ཞེས་དཔེ་གང་གིས་ཀྱང་མི་མཚོན་པ་དང༌། རིག་ངོར་མངོན་སུམ་དུ་མཐོང་བར་གྱུར་ཀྱང་ཡུལ་ཡུལ་ཅན་དུ་འདུ་ཤེས་པའི་རྣམ་པར་རྟོག་པས་མ་བསླད་པ། རང་བཞིན་གྱིས་དྲི་མས་མ་བསླད་པའི་ཡེ་ཤེས་སོ་སོར་རང་གིས་རིག་པར་བྱ་བ། སྐྱེ་འགག་གནས་གསུམ་དང་བྲལ་བ་ནམ་མཁའ་ལྟ་བུར་གདོད་ནས་རྒྱུ་རྐྱེན་གང་གིས་ཀྱང་འདུས་མ་བྱས་པ་སྟེ། སྣང་ཚུལ་ཆུ་དྭངས་པ་ལ་ཟླ་བའི་གཟུགས་བརྙན་འཆར་བ་བཞིན་དུ་ཐབས་ལས་ཐབས་བྱུང་གི་ཚུལ་དུ་གསལ་ཞིང་དེར་ཞེན་གྱི་འཛིན་པ་མེད་པ། རྣམ་པ་ཐམས་ཅད་པའི་རང་བཞིན་ཅན་སྤྲུལ་པའི་གཟུགས་བརྙན་ཐ་སྙད་ཤེས་བརྗོད་འཇུག་གསུམ་གྱིས་ངོས་བཟུང་གི་ཡུལ་ལས་འདས་པ། རྣམ་པ་བདེ་བ་དང་ངོ་བོ་སྟོང་པ་དབྱེར་མེད་ཟུང་དུ་འཇུག་པ་ཉིད་དཔེའི་ཚུལ་དུ་འཆར་བས་དོན་གྱི་ཡེ་ཤེས་ལ་སྦྱོར་བར་བྱེད་དོ། །གཉིས་པ་ལམ་གཞན་གྱི་དོད་ཐུབ་སྦྱར་བ་ནི། སྒོ་ལྔའི་རྣམ་ཤེས་བདེ་བས་ཚིམ་པ་ལས༔ ཕྱི་རོལ་ཡུལ་ཀུན་བདེ་ཆེན་གཞལ་མེད་ཁང་༔ ཡབ་ཡུམ་གཟུགས་སྣང་ཐབས་ཤེས་རང་བྱུང་ལྷ༔ འདུ་ཤེས་རྡོ་རྗེ་གསུམ་གྱི་ཕྱག་རྒྱས་གདབ༔ རྡོ་རྗེ་པདྨ་འདུ་འཕྲོད་བྱེད་པ་ཡིས༔ རླུང་སེམས་ཐིག་ལེ་རྩེ་གཅིག་རང་དབང་བསྐུར༔ རྣམ་ཤེས་གནས་གྱུར་བདེ་སྟོང་ཡེ་ཤེས་བསྟིམ༔ ཟག་མེད་ཚོར་བ་རྨད་བྱུང་མཆོད་པའི་སྤྲིན༔ ཨ་ཧྃ་རང་སྒྲས་ཆེ་བའི་ཡོན་ཏན་བསྟོད༔ ཁ་སྦྱོར་གསུམ་གྱི་ཉམས་མྱོང་ལ་བརྟེན་ནས༔ ལྷ་སྔགས་ཏིང་འཛིན་དམ་ཚིག་རྒྱུན་མི་འཆད༔ བསྐྱིལ་དང་ལྡོག་དང་འགྲེམས་པའི་འཁྲུལ་འཁོར་གྱིས༔ ཚོགས་དང་གཏོར་མ་རྡོ་རྗེའི་གླུ་གར་སོགས༔ གང་སྣང་བདེ་སྟོང་རོལ་པར་ཡོངས་ཤར་བས༔ འཁོར་འདས་གཞིར་བཞེངས་བདེ་ཆེན་ཐིག་ལེའི་ཀློང་༔ རྣལ་འབྱོར་ཟབ་མོའི་ཆོ་ག་ཡོངས་སུ་རྫོགས༔ ཞེས་གསུངས་ཏེ།

ཕོ་ཉའི་ལམ་ལས་འབར་ཞུ་ཁྱད་པར་བའི་རྐྱེན་གྱིས་དྭངས་མའི་ཐིག་ལེ་སྟོབས་སུ་གྱུར་པའི་མཐུས། མིག་སོགས་དབང་པོ་སྒོ་ལྔའི་རྣམ་པར་ཤེས་པ་རྣམས་བདེ་བ་ཆེན་པོའི་བཅུད་ཀྱིས་མྱོས་ཤིང་ཚིམས་པ་ལས་སྡུག་བསྔལ་གྱི་ཚོར་རྟོག་དབྱིངས་སུ་ནུབ་སྟེ། ཕྱི་རོལ་སྣང་བའི་ཡུལ་ཀུན་བདེ་ཆེན་གཞལ་དུ་མེད་པའི་ཁང་པ། ནང་ཡབ་ཡུམ་གྱི་གཉིས་ཀྱི་གཟུགས་སུ་སྣང་བའང་ཐབས་དང་ཤེས་རབ་ཟུང་འབྲེལ་རང་བྱུང་གི་ལྷ་སྐུ་ལ། ལྷ་སྔགས་ཆོས་ཉིད་དུ་འདུ་ཤེས་པ་རྡོ་རྗེ་གསུམ་གྱི་ཕྱག་རྒྱའི་རྒྱས་གདབ་པ་དང༌། མཁའ་གསང་རྡོ་རྗེ་པདྨ་སྙོམས་འཇུག་འདུ་འཕྲོད་བྱེད་པས་རླུང་སེམས་ཐིག་ལེ་རྣམས་ཡུལ་དང་ཡུལ་ཅན་དབྱེར་མེད་རྩེ་གཅིག་པར་རང་བཞིན་གྱིས་འདུས་ཏེ་དབང་དུ་གྱུར་པའི་དབང་སྐུར་རྫོགས་ལ། སྐད་ཅིག་མཆོག་ཏུ་དགའ་བའི་ལྷན་སྐྱེས་མྱོང་བའི་རྣམ་པར་ཤེས་པ་གནས་གྱུར་ཏེ་བདེ་སྟོང་མི་རྟོག་པའི་ཡེ་ཤེས་ལྷག་གིས་འཆར་བས་གློ་བུར་རྣམ་ཤེས་དམ་ཚིག་པ་ལ་གདོད་མའི་ཡེ་ཤེས་བསྟིམ་པ་ལྟར་སྣང་བ་དང༌། དེའི་ཚེ་ཟག་མེད་བདེ་བའི་ཚོར་བ་ཉམས་སུ་མྱོང་བ་ནི་ངོ་མཚར་རྨད་དུ་བྱུང་བའི་མཆོད་སྤྲིན། ཨ་ཧཾ་གཡོ་བའི་རང་སྒྲ་ཡིད་དུ་འོང་བས་འདོད་ཆགས་ཆེན་པོ་ཆེ་བའི་ཡོན་ཏན་ལ་བསྟོད་པ། རླུང་ཐིག་སེམས་རྣམས་ཁ་སྦྱོར་བ་གསུམ་གྱི་ཉམས་མྱོང་ལ་བརྟེན་ནས་བདེ་སྟོང་ཐིག་ལེའི་ལྷ་སྣང་སྲོག་རྩོལ་རྡོ་རྗེའི་བཟླས་པ་སེམས་རྟོག་བདེ་བར་འགགས་པའི་ཏིང་ངེ་འཛིན་འཕོ་མེད་འདའ་དཀའི་དམ་ཚིག་རྣམས་རྒྱུན་མི་འཆད་པ་དང༌། ཐིག་ལེ་འོག་གི་སྣ་རྩེར་བསྐྱིལ་བ་དང་རང་གནས་སུ་ལྡོག་པ་དང་རྩ་གནས་སུ་འགྲེམས་པར་བྱེད་པའི་འཁྲུལ་འཁོར་གསུམ་གྱིས་རིམ་པ་ལྟར་གསང་བའི་ཚོགས་ཀྱི་འདུ་བར་རོལ་པ་དང་གཏོར་མ་གནས་སུ་སྟོབ་པ་དང་རྡོ་རྗེའི་གླུ་གར་བྱ་བ་སོགས་ལྷུན་གྱིས་གྲུབ་པ་སྟེ། མདོར་ན་བུད་མེད་ཤེས་རབ་ཀྱི་རང་བཞིན་ཐབས་ཀྱི་ཆོ་ག་ཟབ་མོས་ལམ་དུ་བསླངས་པ་ལ་བརྟེན་ནས་རྣམ་རྟོག་གི་བཞོན་པ་རླུང་དང་རྟོག་ཚོགས་རང་བཞིན་བརྒྱད་ཅུ་རིམ་གྱིས་འགགས་ཏེ་སྟོང་པ་བཞིའི་ཡེ་ཤེས་ཉམས་སུ་མྱོང༌། རང་བཞིན་ལྷན་སྐྱེས་ཀྱི་བདེ་བའི་ཡེ་ཤེས་བརྟན་པའི་མཐུ་ལས་གང་སྣང་ཐམས་ཅད་བདེ་སྟོང་འབའ་ཞིག་པའི་རོལ་པར་ཡོངས་སུ་ཤར་བས་འཁོར་འདས་དབྱེར་མེད་གནས་ལུགས་དོན་གྱི་གཞིར་ཡོངས་གྲུབ་ཆེན་པོར་བཞེངས་ཏེ་བདེ་ཆེན་ཐིག་ལེ་ཁྱབ་བརྡལ་གྱི་ཀློང་དུ་རྣལ་འབྱོར་དུ་བྱ་བའི་ནང་ནས་ཉེ་ལམ་ཤིན་ཏུ་ཟབ་མོའི་ཆོ་ག་ཡོངས་སུ་རྫོགས་པ་ཡིན་ནོ། །གསུམ་པ་འབྲས་བུ་ནི། སྣོད་བཅུད་ཧེ་རུ་ཀ་དཔལ་ཞིང་དང་སྐུར༔ བདེ་བ་མཆོག་གི་བྱིན་ཆེན་དབབ་པ་ལས༔ དེ་བཞིན་གཤེགས་པ་སྲས་དང་བཙུན་མོར་བཅས༔ མངོན་སུམ་གཤེགས་ནས་མེ་ཏོག་ཆར་ཆེན་འབེབས༔ རྒུད་པ་ཀུན་ཞི་ཕན་བདེ་ངང་གིས་འཕེལ༔ རྣལ་འབྱོར་རྒྱུད་ལ་བདེ་ཆེན་གཟི་འབར་བས༔ ཚེ་དང་ལང་ཚོའི་བཅུད་ལེན་རྩོལ་མེད་འགྲུབ༔ བདེན་ཚིག་མཐུ་བཙན་གཞན་སྣང་ཟིལ་གྱིས་ནོན༔ ཏིང་འཛིན་མི་གཡོ་གྲུབ་པ་ཅིར་ཡང་འཆར༔ འབྲེལ་ཚད་ཉེར་བཞིའི་ཞིང་ན་རོལ་པ་ཡི༔ དཔའ་བོ་རྣལ་འབྱོར་ཚོགས་དང་སྐལ་བ་མཉམ༔ ཞེས་གསུངས་ཏེ།

ལམ་དེ་རྒྱུད་ལ་བརྟེན་པའི་ཕན་ཡོན་གསར་རྙིང་གི་རྒྱུད་སྡེ་རྣམས་ལས་རྒྱ་ཆེར་གསུངས་པའི་དོན་བསྡུ་ན། བདེ་སྟོང་ཏིང་འཛིན་གྱི་རོལ་མོས་མ་དག་པ་སྣོད་བཅུད་དུ་སྣང་བ་ཐམས་ཅད་རྣམ་དག་ཧེ་རུ་ཀ་སྤྱི་དཔལ་ཆེན་པོའི་ཡེ་ཤེས་ཀྱི་ཞིང་དང་སྐུའི་རོལ་པ་ལྷུན་གྱིས་གྲུབ་པའི་བདེ་བ་མཆོག་གི་བྱིན་རླབས་ཆེན་པོ་དབབ་པའི་མཐུ་ལས། ཕུང་པོ་དག་པའི་དེ་བཞིན་གཤེགས་པ་རིགས་ལྔ། སྐྱེ་མཆེད་དག་པའི་སྲས་བྱང་སེམས་རྣམས་དང༌། ཁམས་ལྔ་དག་པའི་བཙུན་མོ་ཡུམ་ལྔར་བཅས་པ་ནམ་མཁའི་ལམ་ལ་དབང་པོའི་སྤྱོད་ཡུལ་མངོན་སུམ་དུ་གྱུར་པའི་ཆོ་འཕྲུལ་ཆེན་པོས་གཤེགས་ནས། ནང་དུ་བྱང་སེམས་དཀར་དམར་གྱི་རྒྱུན་བརྟན་པའི་རང་མདངས་མེ་ཏོག་གི་ཆར་ཆེན་པོ་འབེབས་པ་དང༌། སྒྲུབ་པ་པོ་གང་རུང་གནས་པའི་ཕྱི་སྣོད་བཅུད་ཀྱི་ཉེས་ཚོགས་རྒུད་པ་ཀུན་ཞི་ཞིང་ཕན་བདེའི་དཔལ་འབྱོར་ངང་ངམ་ཤུགས་ཀྱིས་འཕེལ་བ་དང༌། ནང་རྣལ་འབྱོར་པའི་རྒྱུད་ལ་འཕོ་མེད་བདེ་བ་ཆེན་པོའི་གཟི་བརྗིད་རིམ་གྱིས་འབར་བས། འཆི་བ་མེད་པའི་ཚེ་དང་རྒུད་པ་མེད་པའི་ལང་ཚོའི་བཅུད་ལེན་དག་ཀྱང་སོ་སོའི་ཆོ་གས་སྒྲུབ་པའི་བྱ་བ་ལ་མ་ལྟོས་པར་རྩོལ་བ་མེད་པར་འགྲུབ་ཅིང༌། ངག་བདེན་ཚིག་གྲུབ་པ་ལ་གང་བརྗོད་དོན་ཏུ་འགྱུར་བའི་མཐུུ་བཙན། ལུས་གཟི་བརྗིད་ཆེ་བས་གཞན་མི་དང་མི་མ་ཡིན་པའི་སྣང་བ་ཟིལ་གྱིས་ནོན། སེམས་བདེ་སྟོང་གི་ཏིང་ངེ་འཛིན་ལས་རྟག་ཏུ་མི་གཡོ་བས་གྲུབ་པ་བརྙེས་པའི་རྟགས་མཚན་ཅིར་ཡང་འཆར། གསང་སྤྱོད་ཀྱི་འདུ་བར་འབྲེལ་ཚད་ཀུན་ཀྱང་ཕྱི་རོལ་གྱི་པུལླིར་སོགས་ཡུལ་ཆེན་ཉེར་བཞིའི་ཞིང་རྣམས་ན་རྟག་ཏུ་རོལ་པའི་དཔའ་བོ་ཐོད་པའི་དུམ་བུ་དང་རྣལ་འབྱོར་མ་རབ་གཏུམ་མ་སོགས་ལྷན་སྐྱེས་མཁའ་འགྲོའི་ཚོགས་དང་སྐལ་བ་མཉམ་པར་འགྱུར་རོ།

།རྩ་བའི་ས་བཅད་གསུམ་པ་དོན་བསྡུ་བ་ནི། མདོར་ན་རིག་མ་འདུ་བྱ་བསྙེན་པ་སྟེ༔ ཉེ་བསྙེན་སྦྱོར་བའི་ཡན་ལག་རྣམ་མང་པོས༔ ཡས་བབས་སྒྲུབ་དང་མས་བརྟན་སྒྲུབ་པ་ཆེས༔ འདུན་པ་སེམས་པས་རླུང་སེམས་ལས་སུ་རུང་༔ རིགས་ཆེན་འབྱེད་པས་ཟུང་འཇུག་ལྷ་སྐུར་ལྡང་༔ དབུགས་ཆེན་འབྱིན་པས་ཡེ་ཤེས་མངོན་དུ་འགྱུར༔ ལུང་ཆེན་ཐོབ་པའི་ཕྱག་རྒྱ་རྟགས་ཀྱི་སྐུས༔ སྤངས་ཐོབ་རྩལ་ཆེན་རྫོགས་པའི་མཐར་ཕྱིན་ནས༔ ཧེ་རུ་ཀ་དང་སྤྱོད་ཡུལ་རོ་གཅིག་འགྱུར༔ ཅེས་གསུངས་ཏེ། ཤེར་དབང་གི་ཉམས་ལེན་རྒྱས་པར་བསྟན་པ་དེ་རྣམས་ཀྱི་དོན་མདོར་བསྡུ་ན། ཐོག་མར་རིག་མ་བརྟག་འགུགས་སྦྱོང་གསུམ་གྱིས་འདུ་བྱ་བ་བསྙེན་པའི་ཡན་ལག་སྟེ། ཉེ་བར་བསྙེན་པའི་ཡན་ལག་ནི་ཐབས་ལམ་གྱི་ཆོས་ཉེར་བདུན་གྱིས་བསྡུས་པའི་སྦྱོར་བའི་ཡན་ལག་རྣམ་པ་མང་པོས། ཡས་བབས་ཀྱི་དགའ་བ་བཞི་འཁོར་ལོའི་གནས་བཞིར་མས་རིམ་དུ་བསྐྱེད་པ་ནི་སྒྲུབ་པའི་ཡན་ལག་དང༌། མས་བརྟན་གྱི་དགའ་བ་བཞི་ཡས་རིམ་དུ་བརྟན་པར་བྱེད་པ་ནི་སྒྲུབ་པ་ཆེན་པོའི་ཡན་ལག་སྟེ་བཞི་པོ་ཉམས་ལེན་ལ་བརྩོན་པས། འགྱུར་བ་མ་ངེས་པ་དང༌། བརྟེན་པ་བཞིའི་ས་གཉིས་ཀྱིས་བསྡུས་པའི་ཚོགས་ལམ་འདུན་པ་སེམས་པ་ལས་དང་པོ་པའི་རྣལ་འབྱོར་གྱིས་རླུང་སེམས་ལས་སུ་རུང་བས་ཐུན་མོང་གི་དངོས་གྲུབ་རོ་ལངས། གསེར་འགྱུར། རལ་གྲི། གོ་ཆ། པྲ་སེ་ན། རྐང་མགྱོགས། གཞན་ཡང་རྡོ་རྗེ་ཚེ་དང༌། དབང་པོ་དྲུག་གི་མངོན་ཤེས་དང༌། སྒྱུ་མ་རྡོ་རྗེ་ལ་སོགས་པའི་གྲུབ་པ་དང༌། ལས་ཆེན་བཞི་སོགས་ཇི་སྐད་གསུངས་པ་ལྟར་གྲུབ་པས་དོན་བྱེད་ཅིང༌། དེ་ནས་གལ་ཆེན་སྦྱོང་བ། བསླབ་པ་རྒྱུན། བསོད་ནམས་རྟེན་གྱི་ས་གསུམ་པོས་བསྡུས་པ་རིགས་ཆེན་འབྱེད་པའི་རྣལ་འབྱོར་ཟག་བཅས་ཀྱི་ལམ་གྱི་རྩེ་མོ་སྦྱོར་ལམ་བརྙེས་ནས་སྒྲུབ་པའི་ཉེ་རྒྱུ་ལ་བརྟེན་རླུང་སེམས་ཟུང་འཇུག་གི་ལྷ་སྐུ་ཕྱག་རྒྱ་ཆེན་པོར་ལྡངས་ཤིང་མཆོག་གི་དངོས་གྲུབ་བརྟན་པས་ཁྱད་པར་དུ་འགྲོ་བའི་སས་བསྡུས་པ་མཐོང་ལམ་དབུགས་ཆེན་འབྱིན་པའི་རྣལ་འབྱོར་ཐོབ་སྟེ། ཆོས་ཉིད་ཀྱི་ཡེ་ཤེས་རང་མཚན་པ་མངོན་སུམ་དུ་མཐོང་བས་ཟག་མེད་ཀྱི་ལམ་གྱི་ཐོག་མར་གྱུར་ལ། དེ་ནས་མཐོང་ཟིན་གོམས་པར་བྱེད་པའི་ལམ་དམིགས་པ་འབྲས་བུ་སྐྱེ་བའི་སས་བསྡུས་པ་སྒོམ་ལམ་ལུང་ཆེན་ཐོབ་པའི་རྣལ་འབྱོར་རིགས་སོ་སོའི་ཕྱག་རྒྱ་རྟགས་ཀྱི་ཆ་ལུགས་འཛིན་པའི་སྐུར་སྣང་བས། གནས་པ་མི་འགྱུར་བ་བརྡལ་བ་ཆོས་ཉིད། རྫོགས་པ་ཅིར་ཆུབ་ཀྱི་ས་རྣམ་པ་གསུམ་པོས་བསྡུས་པ་མཐར་ལམ་སྤང་བྱའི་དྲི་མ་ཕྲ་བའང་སྤངས་ཤིང་ཐོབ་བྱའི་ཡེ་ཤེས་ཆེན་པོའི་ཆེན་པོ་ལ་རྩལ་ཆེན་རྫོགས་པའི་རྣལ་འབྱོར་རྣམས་རིམ་ཐོད་རྒལ་གང་རུང་གིས་བགྲོད་དེ་མཐར་ཕྱིན་ནས། རང་གནས་ཀྱི་དོན་ཉིད་སྒྲིབ་བྱེད་ཀྱི་ཞེན་པ་མཐའ་དག་དང་བྲལ་བར་མངོན་དུ་གྱུར་པ་ཡི་གེ་འཁོར་ལོ་ཚོགས་ཆེན་གྱི་སས་བསྡུས་པ་མཐར་ཐུག་གི་འབྲས་བུ་མི་སློབ་པའི་ཟུང་འཇུག་སྐུ་བཞིའི་བདག་ཉིད་དཔལ་ཀུན་བཟང་ཧེ་རུ་ཀ་མངོན་རྫོགས་རྒྱལ་པོའི་གསང་བ་གསུམ་དང་སྤྱོད་ཡུལ་རོ་གཅིག་ཏུ་འདྲེས་པར་འགྱུར་རོ། །དེ་ལྟར་ཡང༌། ཨ་ནུ་ཡོ་གའི་ཐེག་པ་ནི། བར་མ་ཆོད་པ་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་སོ། །དབང་བཞི་པ་དང་རྗེས་སུ་འབྲེལ་བའི་ལམ་རིག་སྟོང་ཟུང་འཇུག་ཨ་ཏི་ཡོ་ག་བསྒོམ་པ་ལ་གཉིས། ཚིག་གོང་འོག་མཚམས་སྦྱར་ཏེ་མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། བདེ་སྟོང་ཉམས་མྱོང་རྒྱུད་ལ་བརྟན་པ་ན༔ མཐར་ཐུག་དོན་གྱི་དབང་གི་ལམ་གྱི་མཆོག༔ འབྲས་བུ་ཤིན་ཏུ་རྣལ་འབྱོར་སྒྲུབ་པ་ཆེ༔ བླ་མེད་རྡོ་རྗེ་ལྟ་བུའི་ཏིང་ངེ་འཛིན༔ རང་བཞིན་རྫོགས་པ་ཆེན་པོར་ལ་བཟླ་བྱ༔ ཞེས་གསུངས་ཏེ།

དེ་ལྟར་གསང་བ་དང་ཤེར་དབང་གི་ཉམས་ལེན་རྗེས་སུ་རྣལ་འབྱོར་གྱི་ལམ་རིམ་དེ་དག་གིས་ཐབས་བདེ་བ་ཆེན་པོ་དང་ཤེས་རབ་སྟོང་པ་ཉིད་ཟུང་དུ་འབྲེལ་བའི་ཉམས་མྱོང་རང་གི་རྒྱུད་ལ་ལེགས་པར་སྐྱེས་ཤིང་བརྟན་པར་གྱུར་པ་ན། ལམ་གྱི་ཐེག་རིམ་མཐའ་དག་གི་མཐར་ཐུག་སྐྱེལ་སོ། །དོན་གྱི་ཡེ་ཤེས་རྗེན་ཅེར་དུ་སྟོན་པ་བཞི་པ་རིག་པའི་རྩལ་དབང་གི་ཡེ་ཤེས་ལམ་དུ་བྱེད་པས་རྣལ་འབྱོར་ཀུན་གྱི་མཆོག་གམ་རྩེ་མོ། །བྱ་བྲལ་འབྲས་བུའི་ཐེག་པ་ཨ་ཏི་ཡོ་ག་ཤིན་ཏུ་རྣལ་འབྱོར་གྱི་སྒྲུབ་པ་ཆེན་པོ་ལ་འཇུག་པར་བྱ་སྟེ། དེའང་སློབ་ལམ་བཞིའི་མཐར་ཐུག་བར་ཆད་མེད་ལམ་གྱིས་བསྡུས་པ་ཏིང་ངེ་འཛིན་གཞན་གང་ཡང་འདིའི་བླ་ན་མེད་པ། གཞོམ་པར་དཀའ་བའི་དྲི་མ་ཕྲ་མོ་བཅོམ་པ་ལ་མི་ཕྱེད་མི་ཤིགས་ཐོགས་པ་མེད་པ་སོགས་ཆོས་བདུན་དང་ལྡན་པས་རྒྱུན་མཐའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན། གདོད་མའི་གནས་ལུགས་ཀྱི་རང་བཞིན་འོད་གསལ་རྫོགས་པ་ཆེན་པོའི་དགོངས་པར་ཐབས་གྲོལ་གྱི་ལམ་དང་ལམ་གྱི་འབྲས་བུ་ཐམས་ཅད་ལ་བཟླ་བར་བྱའོ། །དེ་ལྟར་ཡང་ཀུན་བྱེད་རྒྱལ་པོའི་རྒྱུད་ལས། ཡོད་ནི་གཅིག་ལས་མེད་པ་ལ། །བསྟན་ནི་རྣམ་པ་གཉིས་སུ་བསྟན། །བྱུང་ནི་ཐེག་པ་དགུ་རུ་བྱུང༌། །འདུས་ནི་རྫོགས་པ་ཆེན་པོར་འདུས། །ཞེས་དང༌། ཆོས་རྣམས་ཀུན་གྱི་ལ་ནི་ང་ཡིས་བཟླས། །ཞེས་སོ། །འདིར་རྫོགས་པ་ཆེན་པོའི་ཐུན་མོང་མ་ཡིན་པའི་གྲུབ་མཐའ་སྤྱིའི་གནད། རང་བཞིན་གཞིའི་གནས་ལུགས། དེ་ལས་སེམས་ཅན་གྱི་འཁྲུལ་ལུགས། འཁྲུལ་དུས་འོད་གསལ་གྱི་གནས་ཚུལ། ཉམས་སུ་ལེན་ཐབས། མཐར་ཕྱིན་འབྲས་བུའི་གྲུབ་ལུགས་རྣམས་དང༌། ཁྱད་པར་གསང་སྐོར་མན་ངག་སྡེའི་ངེས་པའི་དོན། གཞི་དང་འཁྲུལ་ཚུལ་ཁྱབ་ཚུལ་དང༌། །གནས་དང་ལམ་དང་སྒོ་དང་ཡུལ། །ཉམས་ལེན་ཚད་དང་བར་མ་དོ། །གྲོལ་ས་ཉིད་དང་བཅུ་གཅིག་གོ །ཞེས་གསུངས་པའི་དོན་ཤེས་ན་གལ་ཆེ་ཡང་འདིར་ཡི་གེ་མང་གིས་དོགས་པས་རྒྱུད་ལུང་མན་ངག་སྤྱི་དང་ཁྱད་པར་ཀུན་ཏུ་བཟང་པོ་དྲི་མེད་འོད་ཟེར་གྱི་གསུང་རབས་རྣམས་ལས་རྟོགས་པར་བྱ་བ་ཁོ་ནའོ། །གཉིས་པ་ལ་གསུམ། ཕྱི་སེམས་སྡེ། ནང་ཀློང་སྡེ། གསང་བ་མན་ངག་སྡེའི་སྒོམ་ཚུལ་བསྟན་པའོ། །དང་པོ་ལ་བཞི། ལྟ་བས་ཐག་བཅད་པ། སྒོམ་པས་ལ་བཟླ་བ། སྤྱོད་པས་འཕྲང་བསལ་བ། འབྲས་བུ་རེ་དོགས་སྤང་བའོ། །དང་པོ་ནི། དེ་ལ་ཕྱི་ལྟར་སེམས་སྡེའི་དགོངས་པ་ནི༔ ཕྱི་རོལ་ཡུལ་ཀུན་རྨི་ལམ་ལྟ་བུར་བལྟ༔ ནང་གི་དབང་པོ་བདེན་མེད་སྒྱུ་མར་བཤིག༔ བར་གྱི་རྣམ་ཤེས་སྐྱེ་འགགས་གནས་གསུམ་བྲལ༔ གསང་བ་ཀུན་གཞི་གསལ་ལ་མི་རྟོག་ངང་༔ ལྟ་བ་ཀུན་བྱེད་གཉུག་མ་བྱང་ཆུབ་སེམས༔ ཞེས་གསུངས་ཏེ། ཐེག་རྩེ་རང་བཞིན་རྫོགས་པ་ཆེན་པོའི་ལམ་རྩོལ་སྒྲུབ་སྤང་གཉེན་གོལ་སྒྲིབ་ལས་འདས་པ་སྐལ་ལྡན་ཤིན་ཏུ་དབང་རྣོན་གྱི་སྤྱོད་ཡུལ་ཏེ། དེ་ལའང་དབང་པོའི་ཁྱད་པར་གྱིས་ནང་གསེས་གྲུབ་མཐའ་གསུམ་ཡོད་པའི་ཐོག་མར་ཕྱི་སྐོར་ལུས་ལྟ་བུ་ཀུན་བྱེད་རྒྱལ་པོ་སེམས་སྨད་བཅོ་བརྒྱད་སོགས་རྒྱུད་ལུང་གི་བསྟན་དོན་སེམས་སྡེའི་དགོངས་པ་ནི། ཕྱི་རོལ་གཟུང་བའི་ཡུལ་སྣང་སྲིད་འཁོར་འདས་ཀྱིས་བསྡུས་པ་ཀུན་རྨི་ལམ་གྱི་ཡུལ་སྣང་ལྟ་བུར་རང་གི་སེམས་ལས་གཞན་ཏུ་འགའ་ཡང་མ་གྲུབ་པར་རང་སེམས་ཀྱི་རྩལ་དུ་བལྟ་བ་དང༌། ནང་གི་འཛིན་པའང་དེ་ལས་གཞན་ཏུ་མེད་དེ་ལུས་ལ་བརྟེན་པའི་དབང་པོ་དྲུག་ནི་འཁྲུལ་ངོར་ཀུན་བརྟགས་གྱྀ་ཆོས་ཡིན་པས་བདེན་པ་མེད་པ་སྒྱུ་མའི་སྐྱེས་བུའི་དབང་པོ་དང་མཚུངས་པ་རིག་པས་དཔྱད་ནས་བཤིགས་པས་ཤེས་ལ། བར་གྱི་རྣམ་ཤེས་ཡུལ་ལ་འཇུག་པ་དྲུག་ཀྱང་ཐོག་མར་སྐྱེ་བའི་ཁུངས་དང་མཐར་འགག་པའི་ཡུལ་ད་ལྟར་གང་ལ་གནས་པར་བརྟགས་ཤིང་རྩད་བཅད་ན་གང་དུ་འང་གདགས་གཞི་བྲལ་བ་ནམ་མཁའ་དང་འདྲ་བས་ཐམས་ཅད་སེམས་ཉིད་ཀྱི་རོལ་པར་ཤར་བ་དང༌། གསང་བ་ཀུན་གཞི་སེམས་ཀྱི་གཤིས་ལུགས་རང་བཞིན་གསལ་ལ་ངོ་བོ་རྣམ་པར་མི་རྟོག་པ་རང་བྱུང་གི་ཡེ་ཤེས་བརྗོད་བྲལ་ཆོས་ཉིད་ཀྱི་ངང་དུ་ཆོས་ཅན་ཐམས་ཅད་རྫོགས་པར་ལྟ་བ་འཁོར་འདས་ཀུན་བྱེད་རྒྱལ་པོ་ཡོངས་གྲུབ་ལ་བཅོས་མས་མ་རེག་པའི་གཉུག་མ་བྱང་ཆུབ་སེམས་ཀྱི་རང་བཞིན་ཏུ་ཐག་བཅད་པ་སྟེ། ཀུན་བྱེད་ལས། སངས་རྒྱས་སྐུ་དང་ཡེ་ཤེས་ཡོན་ཏན་དང༌། །སེམས་ཅན་ལས་དང་བག་ཆགས་ལ་སོགས་པ། །སྣང་སྲིད་སྣོད་བཅུད་བསྡུས་པ་ཐམས་ཅད་ཀུན། །བྱང་ཆུབ་སེམས་ཀྱི་ངོ་བོ་ཡེ་ནས་ཡིན། །ཅེས་སོ། །གཉིས་པ་ནི། སྒོམ་པ་རྩོལ་མེད་གང་ཤར་མ་བཅོས་བཞག༔ ཞེས་གསུངས་ཏེ།

དེ་ལྟར་རྒྱ་ཆད་ཕྱོགས་ལྷུང་མེད་པའི་ལྟ་བས་ཐག་ཆོད་ནས། སྒོམ་པ་ཉམས་སུ་བླང་བ་ནི། གནས་དབེན་པར་རྣམ་སྣང་ཆོས་བདུན་དང་ལྡན་པས། ད་ལྟའི་སེམས་ཉིད་ཡེ་སྟོང་ནམ་མཁའ་ལྟ་བུའི་ངང་དུ་སྒོ་གསུམ་བྱ་རྩོལ་མེད་པར་ལྷོད་ཀྱིས་གློད་དེ། ཡུལ་གཞི་གྲོལ་ལ་འཛིན་པ་ཡེ་གྲོལ་གང་ཤར་ཡང་བསྐྱར་གྲོལ་གྱི་གཉེན་པོས་མ་བཅོས་པར་ངང་བཞག་ཆེན་པོར་ལ་བཟླ་སྟེ། ཀུན་བྱེད་ལས། ཇི་བཞིན་སྤྲོས་བྲལ་བདེ་བ་ཆེན་པོ་ལ། །སྒོ་གསུམ་མི་རྩོལ་བཅོས་ཤིང་དམིགས་མི་བྱེད། །ཡིད་ལ་མི་བྱེད་མཚན་མའི་རྗེས་མི་འབྲང༌། རང་བྱུང་ཡེ་ཤེས་བདེ་བའི་དོན་ལ་བཞག །ཅེས་སོ། །གསུམ་པ་ནི། སྤྱོད་པ་ལམ་ཁྱེར༔ ཅེས་གསུངས་ཏེ། ཡུལ་འདོད་པའི་ཡོན་ཏན་ཅིར་སྣང་ཡང་ཡུལ་ཅན་ཆོས་ཉིད་རང་གྲོལ་གྱི་རྒྱན་ཏུ་བྱེད་ཅིང་དུག་ལྔའི་ངོ་བོར་བལྟས་པས་དེ་དག་སྐྱེས་གྲོལ་ཡེ་ཤེས་སུ་ཤར་བ་ཉོན་མོངས་རང་གྲོལ་གྱི་སྤྱོད་པ། ཚོགས་དྲུག་གི་རྟོག་པ་ཐམས་ཅད་ཤར་དུས་ཉིད་ནས་མ་སྐྱེས་ལྷུན་གྲུབ་ཀྱི་དཀྱིལ་འཁོར་གསུམ་དུ་རྫོགས་པར་ཤེས་པ་སྣང་བ་དབང་བསྒྱུར་གྱི་སྤྱོད་པ། བླང་དོར་དགག་སྒྲུབ་ཀྱི་ཞེན་ཡུལ་ཐམས་ཅད་ཀྱི་སྟེང་དུ་རོ་སྙོམས་ཐོག་འགེལ་གྱི་ཟློག་སྒོམ་བྱས་པས་གཉིས་མེད་རང་གྲོལ་དུ་སོང་ནས་རེ་དོགས་ཀྱི་འཕྲང་ལས་གྲོལ་བ་བརྟུལ་ཞུགས་ལམ་སློང་གི་སྤྱོད་པ་སྟེ། དེ་གསུམ་ལམ་དུ་ཁྱེར་ནས་ལྟ་སྒོམ་ལ་བོགས་དབྱུང་ངོ༌། །བཞི་པ་ནི། འབྲས་བུ་མངོན་དུ་བྱ༔ ཞེས་པས་བསྟན་ཏེ། ད་ལྟའི་སེམས་ཉིད་ཀྱི་དབྱིངས་ཡེ་གྲོལ་གཞི་རྩ་མེད་པའི་ངོ་བོ་ཉིད་སྐུ་ཡེ་ནས་འདུ་འབྲལ་མེད་པར་མ་བཙལ་ངང་ལ་རྫོགས་པས་དེ་ལས་གཞན་པའི་སངས་རྒྱས་ལོགས་སུ་བསྒྲུབ་ཏུ་མེད་པས་དེ་ཉིད་ལྟ་སྒོམ་ཉམས་སུ་བླངས་ནས་མངོན་ཏུ་འགྱུར་བར་བྱ་སྟེ། ཀུན་བྱེད་ལས། ངོ་བོ་ཉིད་ལས་གཞན་དུ་མ་སྒྲུབས་ཤིག །རང་ཉིད་ཡིན་གྱིས་གཞན་དུ་མ་ཚོལ་ཅིག །བཙལ་ན་རྒྱལ་བ་དབྱིངས་ནས་རྙེད་མི་འགྱུར། ཅེས་སོ། །གཉིས་པ་ནང་ཀློང་སྡེ་ལ་གཉིས། ལྟ་བ་ཆོས་ཉིད་ཀྱི་ཀློང་བཤད་པ། སྒོམ་པ་བརྡ་བཞིའི་གནད་བསྟན་པའོ། །དང་པོ་ནི། ནང་ལྟར་ཡེ་ཤེས་ཀློང་ཆེན་རྣམ་པ་ལྔས༔ ཕྱི་ནང་བརྟན་གཡོ་ཀུན་ལ་ཁྱབ་པར་བརྡལ༔ བྱུང་དང་འབྱུང་འགྱུར་འཁོར་འདས་ཆོས་རྣམས་ཀུན༔ མཁའ་ཀློང་དབྱིངས་ལས་རྡུལ་ཙམ་མ་གཡོས་ཕྱིར༔ ཅེས་གསུངས་ཏེ། ནང་སྐོར་སྙིང་ལྟ་བུ་ཀུན་ཏུ་བཟང་པོ་ཀློང་ཆེན་རབ་འབྱམས་རྒྱལ་པོ་སོགས་རྒྱུད་ལུང་རྣམས་ཀྱི་བསྟན་དོན་ཀློང་སྡེའི་ལྟ་བ་ནི། ཀུན་ཏུ་བཟང་མོ་ཆོས་ཀྱི་དབྱིངས་སོགས་ཡེ་ཤེས་ཀྱི་ཀློང་ཆེན་པོ་རྣམ་པ་ལྔས་ཕྱི་བརྟན་པ་སྣོད་དང་ནང་གཡོ་བ་བཅུད་ཀྱི་འཇིག་རྟེན་ཀུན་ལ་རིས་མེད་མཉམ་པ་ཆེན་པོར་ཁྱབ་པར་བརྡལ་བས། ད་ལྟ་ཕན་ཆད་བྱུང་བ་དང་ཕྱིན་ཆད་འབྱུང་བར་འགྱུར་བའི་ཟག་བཅས་འཁོར་བ་དང་ཟག་མེད་མྱ་ངན་ལས་འདས་པའི་བཏགས་ཆོས་སུ་སྣང་བ་རྣམས། སྣང་ངོ་ལ་ཇི་ལྟར་སྣང་ཡང་སྟོང་ངོ་ནས་ཡེ་གྲོལ་རང་དག་ཡིན་པས་ཀུན་ཀྱང་གདོད་ནས་ཆོས་ཉིད་ཀུན་ཏུ་བཟང་མོའི་ངོ་བོའི་མཁའ་དང་རང་བཞིན་གྱི་ཀློང་དང་ཐུགས་རྗེའི་དབྱིངས་ལས་རྡུལ་ཙམ་ཡང་མ་གཡོས་པའི་ཕྱིར་སེམས་ཉིད་ཕྱིར་སྣང་དུ་ཤར་བ་མ་ཡིན་པར་ནམ་མཁའ་ལ་གཟའ་སྐར་བཞིན་ཏུ་ཆོས་ཅན་མཚན་མ་ཇི་ལྟར་སྣང་ཡང་ཆོས་ཉིད་ཀྱི་དབྱིངས་ལས་གཞན་ཏུ་འགྲོ་ས་མེད་པར་རང་སྣང་བཀོད་པའི་རྒྱན་ཏུ་ལྷུན་གྱིས་གྲུབ་པ་ཡིན་མིན་ཕྱོགས་བྲལ་ཆེན་པོའི་དགོངས་པ་སྟེ། ཀློང་ཆེན་རབ་འབྱམས་རྒྱལ་པོའི་རྒྱུད་ལས། ཀློང་ཆེན་འཁྱིལ་བའི་མཁའ་དབྱིངས་ནི། །ཀུན་གྱི་གནས་ཆེན་ཡིན་པའི་ཕྱིར། །ཡུལ་ལ་སྤྱོད་ཅིང་རྣམ་པར་ཡན། །འཁྲུལ་པས་དོན་ལ་གོལ་བའི་ཕྱིར། །ཚད་མས་བཤིགས་པས་མི་ཤིགས་ཏེ། །ཀློང་ཆེན་རང་གི་མཐུ་ཡིས་གྲོལ། །ཅེས་སོ། །གཉིས་པ་ནི། དབང་པོའི་སྒོ་ལྔ་མ་བཀག་གསལ་ལམ་མེ༔ གཡོ་མེད་མི་རྟོག་ངང་དུ་ཟང་ཐལ་ལེ༔ ཐུར་སེལ་འཆིང་བས་ཟག་མེད་བདེ་ཁྲིལ་ལེ༔ དབྱེར་མེད་ཕྱོགས་བྲལ་བསམ་འདས་ངང་དུ་བཞག༔ ཅེས་གསུངས་ཏེ། ལྟ་བའི་དོན་དེ་ཉིད་སྒོམ་པས་ཉམས་སུ་ལེན་པ་ལ། ཐོག་མར་དུས་ཀྱི་བརྡ་སྒོམ་ཚུལ་བླ་མའི་བྱིན་རླབས་ཀྱིས་ཁྱད་པར་དུ་སྨིན་པར་བྱས་ནས། དངོས་གཞི་སྒོམ་མེད་དོན་གྱི་གཟེར་གདབ་པ་བརྡ་བཞི་གནད་ཀྱི་མན་ངག་ནི། གསལ་བ་གནད་ཀྱི་བརྡ་དབང་པོ་སྒོ་ལྔ་མ་བཀག་ཡན་པར་བཞག་པས་ཚོགས་དྲུག་གི་ཤེས་པ་ཐིམ་ལ་མ་རྨུགས་པར་གསལ་ལམ་མེར་གནས་པ་དང༌། མི་རྟོག་པ་གནད་ཀྱི་བརྡ་དབང་པོའི་སྒོ་རྣམས་འབྱེད་འཛུམ་སོགས་ཀྱིས་གཡོ་བ་མེད་པར་བཞག་པས་སེམས་ཉིད་གང་དུའང་མི་རྟོག་པའི་ངང་དུ་ཟང་ཐལ་ལེར་གནས་པ་སྟེ་ཕ་རྒྱུད་གཡོ་བ་རླུང་འཛིན་པའི་གདམས་ངག་གཉིས། བདེ་བ་གནད་ཀྱི་བརྡ་འོག་རླུང་ཡིད་ཙམ་འཐེན་ཏེ་ཐུར་སེལ་འཆིང་བས་ལུས་སེམས་ཟག་མེད་ཀྱི་བདེ་བ་ཕྲི་ལེར་འཆར་བ་དང༌། དབྱེར་མེད་གནད་ཀྱི་བརྡ་ལྕེའི་རྩེ་མོ་གང་ལའང་མ་རེག་པར། ཇི་སྐད་དུ། བསྒོམ་མ་མྱོང་དང་འབྲེལ་མ་མྱོང༌། །མི་སྒོམ་དོན་དང་མ་བྲལ་བ། །ཞེས་པ་ལྟར་ཤེས་པ་ཕྱོགས་ལྷུང་དང་བྲལ་ཞིང་བསམ་བརྗོད་ལས་འདས་པའི་ངང་དུ་བཞག་པ་སྟེ་མ་རྒྱུད་བདེ་བ་ཉམས་ཀྱི་མན་ངག་གོ །དེའང་དབང་བཞིའི་དོན་བརྡ་བཞི་ལ་ཚང་བས་དབང་ངང་གིས་རྫོགས་ལ། བརྡ་བཞིའི་དོན་གསལ་བ། བདེ་བ། མི་རྟོག་པ། དབྱེར་མེད་པ་བཞི་རྒྱུད་ལ་ཤར་བས་གསལ་བ་སྤྲུལ་སྐུ། བདེ་བ་ལོངས་སྐུ། མི་རྟོག་པ་ཆོས་སྐུ། དབྱེར་མི་ཕྱེད་པ་ངོ་བོ་ཉིད་སྐུ་སྟེ་སྐུ་བཞི་རང་ཆས་སུ་འགྲུབ་པའོ། །མདོར་ན་རྒྱུད་སྔ་མ་ལས། མ་ནོར་བ་ཡི་ཆོས་ཉིད་ལ། །མ་བཅོས་གནས་ཤིང་མ་བྱས་གསལ། །མ་འགགས་པ་ཉིད་ཡེ་ཤེས་ཀློང༌། །ཞེས་པ་ལྟར་ལྟ་བ་མ་ནོར་བས་ཐག་བཅད། སྒོམ་པ་མ་བཅོས་པས་ཉམས་སུ་བླང༌། སྤྱོད་པ་མ་བྱས་པས་བོགས་དབྱུང་བས། འབྲས་བུ་མ་འགགས་པ་ཉམས་སུ་མྱོང་བའི་ཀློང་ཆེན་པོ་བཞིས་བསྡུས་པ་སྟེ། དེ་བཞི་པོའང་ཐ་མལ་གྱི་ཤེས་པ། གཉུག་མ། སོ་མ་ལྷུག་པ་སྟེ་མཚན་ཉིད་བཞི་ལྡན་འདིར་འདུ་བས་དེ་ལ་ཡང་ཡང་ལྟ་བས་ལྟ་བ། དེ་ལ་མ་ཡེངས་པས་སྒོམ་པ། དེ་གྲོགས་སུ་གྱུར་པ་སྤྱོད་པ། དེ་མངོན་དུ་གྱུར་པ་འབྲས་བུར་གསུངས་སོ། །གསུམ་པ་མན་ངག་གི་སྡེ་ལའང་གཉིས། དགོས་པ་དང་བཅས་པའི་ཚིག་གིས་མདོར་བསྟན་པ་དང༌། དེའི་དོན་རྒྱས་པར་བཤད་པའོ།

།དང་པོ་ནི། ཁྱད་པར་གསང་བ་མན་ངག་ཐིག་ལེའི་སྡེ༔ རང་བཞིན་འོད་གསལ་སྙིང་པོ་མངོན་བྱའི་ཕྱིར༔ ཅེས་གསུངས་ཏེ། སྔ་མ་གཉིས་ལ་སྣང་ཕྱོགས་དང་སྟོང་ཕྱོགས་ཀྱི་ཡིད་དཔྱོད་ཕྲ་མོ་འདྲེས་པས་གཤིས་ཤོར་གྱི་གོལ་སྒྲིབ་འབྱུང་ཉེ་ལ། འདིར་ཡིད་དཔྱོད་ཀུན་ལས་འདས་ཤིང་ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀ་དག་ཡོངས་གྲོལ་ཆེན་པོར་སྡུད་པས་ཁྱད་པར་དུ་འཕགས་པ་གནད་ཐོག་ཏུ་ཐེབས་པའི་མེ་བཙའ་ལྟ་བུ་གསང་བ་སྙིང་ཁྲག་གམ་སྲོག་གི་དྭངས་མ་དང་འདྲ་བ་རྒྱུད་ཆེན་བཅུ་བདུན་སོགས་ཀྱིས་བསྟན་དོན། མན་ངག་གི་གནད་ངེས་པ་ཐིག་ལེ་གསང་སྐོར་གྱི་སྡེ། གཞིར་གནས་རང་བཞིན་གྱི་འོད་གསལ་དབྱིངས་རིག་གཉིས་མེད་ཡེ་ཤེས་སྙིང་པོའི་ཚུལ་མངོན་སུམ་ལམ་དུ་བྱ་བའི་ཕྱིར་འདི་ལྟར་བླ་ན་མེད་པའི་རྣལ་འབྱོར་ལ་འཇུག་གོ །དེ་ལྟར་ཡང་ཨ་ཏི་བཀོད་པ་ཆེན་པོ་ལས། དེ་ཕྱིར་ངེས་གསང་སྙིང་པོ་འདི། །མུན་པ་ལས་ནི་མར་མེའམ། །གཅན་གཟན་རྣམས་ལས་སེང་གེ་བཞིན། །ཀུན་གྱི་ནང་ནས་ཁྱད་པར་འཕགས། ཞེས་སོ། །དེ་ལ་སྤྱིར་དངོས་གཞི་ལེ་ལོ་ཅན་མ་བསྒོམ་པར་འཚང་རྒྱ་བའི་གནད་དབྱིངས་ལ་ལྟོས་ཏེ་སེམས་ཀ་དག་རྩ་བྲལ་དུ་ངོ་སྤྲད་ནས་རིག་པ་རྗེན་པ་ལྷོངས་སུ་ཕུད་པས་འབད་མེད་དུ་གྲོལ་བའི་ལམ་ཁྲེགས་ཆོད་དང༌། བརྩོན་འགྲུས་ཅན་བསྒོམས་པས་འཚང་རྒྱ་བའི་གནད་སྣང་བ་ལ་ལྟོས་ཏེ་འོད་གསལ་ལྷུན་གྲུབ་ཏུ་ངོ་སྤྲད་ནས་མངོན་སུམ་གྱི་གནད་ལ་གཟིར་བས་གདོས་བཅས་འོད་ལུས་སུ་གྲོལ་བའི་ལམ་ཐོད་རྒལ་གཉིས་སུ་ཡོད་དེ། ངོ་སྤྲོད་སྤྲས་པའི་རྒྱུད་ལས། འབད་མེད་རང་གྲོལ་ཚད་འཛིན་པ། །ཁྲེགས་ཆོད་ཐོད་རྒལ་གཉིས་སུ་བརྟགས། །ཞེས་སོ། །གཉིས་པ་ལ་གཉིས། ཀ་དག་ཁྲེགས་ཆོད་ཀྱི་ལྟ་བ་དང༌། ལྷུན་གྲུབ་ཐོད་རྒལ་གྱི་ཉམས་ལེན་ནོ། །དང་པོ་ལ་གསུམ། སྔོན་འགྲོ། དངོས་གཞི། མཇུག་བསྡུ་བའོ། །དང་པོ་ནི། སྔོན་འགྲོ་ལུས་སྦྱོང་རྡོ་རྗེའི་འདུག་སྟངས་ལ༔ ངག་ནི་ཧཱུྃ་གི་རྣལ་འབྱོར་བཞི་དང་སྦྱར༔ སེམས་ལ་བྱུང་གནས་འགྲོ་གསུམ་བརྟག་དཔྱད་ནས༔ རྣལ་དབབ་སོར་གཞུག་སྤྲོ་བསྡུ་བྲལ་བར་བཞག༔ ཅེས་གསུངས་ཏེ། དང་པོ་སྔོན་འགྲོ་ལ་གསུམ། ལུས་ངག་ཡིད་གསུམ་སྦྱོང་བ་དང༌། རྣལ་དབབ། སོར་གཞུག་གོ །དང་པོ་ལུས་ཀྱི་སྦྱོང་བ་ནི། ཐལ་འགྱུར་ལས། རྡོ་རྗེ་སྐྱིལ་མོ་ཀྲུང་བཅས་ཏེ། །ལུས་སྦྱངས་སེམས་ལ་ཕན་པའོ། །ཞེས་པ་ལྟར་ཡེ་ཤེས་གསུམ་དང་སྐུ་གསུམ་པོ་ལམ་གཅིག་ཏུ་འདྲིལ་བ་མཚོན་བྱེད་ལུས་རྡོ་རྗེ་རྩེ་གསུམ་པའི་འདུག་སྟངས་བྱས་ལ་སེམས་ཀྱིས་ཀྱང་དེར་བསྒོམས་པས་ཐུན་མོང་དུ་ལུས་ཀྱི་སྡིག་པ་འདག་ཅིང་བར་ཆད་ཞི། ཁྱད་པར་ལུས་ཀྱི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་སྐུ་རྡོ་རྗེ་སྤྲུལ་པའི་སྐུར་གཉིས་སུ་མེད་པར་འགྱུར་རོ། །གཉིས་པ་ངག་སྦྱོང་བ་ནི་ཧཱུྃ་གི་རྣལ་འབྱོར་རྣམ་པ་བཞི་དང་སྦྱར་བར་བྱ་སྟེ། དེའང་ཐལ་འགྱུར་ལས། ངག་ནི་ཧཱུྃ་ཞེས་གནས་པ་ལ། །རྒྱས་གདབ་པ་དང་རྩལ་སྦྱང་ཉིད། །མཉེན་བཙལ་ལམ་དུ་གཞུག་པ་ཡིས། །ཞེས་གསུངས་པའི་དང་པོ་ནི་སྙིང་གའི་ཧཱུྃ་ལས་ཧཱུྃ་མང་པོ་སྣ་བུག་གཡས་ནས་སྤྲོས། ཧཱུྃ་གི་གླུ་སྙན་ལ་རིང་བར་བླངས་ཏེ་ཕྱིའི་སྣང་བ་ཐམས་ཅད་ཁེངས། སྣ་བུག་གཡོན་ནས་ནང་དུ་ཞུགས་པས་ལུས་ཀྱི་ནང་ཁེངས་པར་བསྒོམས་པས་ཕྱི་ནང་ཧཱུྃ་གི་རང་བཞིན་ཏུ་འཆར་བ་ནི་རྒྱས་ཐེབས་པ་སྟེ་དེ་དག་རང་བཞིན་མེད་པར་གྲོལ་བའི་དགོས་པ་ཡོད་དོ། །གཉིས་པ་ནི། སྙིང་གའི་ཧཱུྃ་ལས་ཧཱུྃ་མཐིང་དྲག་རྩུབ་རྣོ་མྱུར་ཐོག་ལྟ་བུ་མང་པོས་ཡུལ་སྣང་དང་ལུས་ལ་ཕུག་སྟེ་ཁྲལ་ཁྲོལ་དུ་སོང་བར་བསམ། ཧཱུྃ་དྲག་པོར་བརྗོད་པས་དེ་དག་རང་བཞིན་མེད་པའི་ཉམས་འཆར་ན་རྩལ་འབྱོངས་པ་སྟེ་སྣང་བ་འོད་གསལ་དང་ཕུང་པོ་འཇའ་ལུས་སུ་གྲོལ་བའི་དགོས་པ་ཡོད་དོ། །གསུམ་པ་ནི། མདུན་ཏུ་ཤིང་བུ་ལྟ་བུའི་དམིགས་རྟེན་ལ་སྙིང་གར་ཧཱུྃ་ལས་སྤྲོས་པའི་ཧཱུྃ་གི་ཕྲེང་བ་དཀྲིས་ཤིང་བསྐོར། ཡང་བཤིགས་ནས་ནང་དུ་སྡུད་པའི་འགྲོ་ལྡོག་ལ་སྦྱང་ཞིང་ཧཱུྃ་གླུ་བླངས་པས་སེམས་ལས་སུ་རུང་བ་ནི་མཉེན་བཙལ་བ་སྟེ་སེམས་ཤིན་སྦྱང་ཐོབ་པའི་དགོས་པ་ཡོད་དོ། །བཞི་པ་ནི། རང་གི་ལུས་དང་རླུང་སེམས་གཅིག་དྲིལ་ཧཱུྃ་ཡིག་སྔོན་པོའི་རྣམ་པར་མདུན་གྱི་ལམ་སྲིན་མོ་འགྲོས་སུ་ཞུགས་ནས་ཇེ་རིང་སོང་ཞིང་སླར་ཚུར་ཞུགས་ཏེ་རང་གནས་སུ་སླེབ་པའི་འགྲོ་ལྡོག་སྤེལ་མར་སྦྱངས་པས་རྣམ་རྟོག་རང་ཤུགས་སུ་ཆོད་ཅིང་བདེ་གསལ་མི་རྟོག་པའི་ཉམས་སྐྱེ་བ་ནི་ལམ་དུ་གཞུག་པའོ།

།དེ་དག་གི་དགོས་པ་ནི། ཐུན་མོང་དུ་ངག་གི་སྡིག་པ་འདག་ཅིང་བར་ཆད་ཞི། ཁྱད་པར་ངག་གི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་གསུང་རྡོ་རྗེ་ལོངས་སྤྱོད་རྫོགས་པའི་སྐུར་གཉིས་སུ་མེད་པར་འགྱུར་རོ། །གསུམ་པ་སེམས་སྦྱོང་བ་ལ། ཐལ་འགྱུར་ལས། སེམས་ནི་དང་པོ་བྱུང་ས་དང༌། །བར་དུ་གནས་དང་ཐ་མར་འགྲོ། །དེ་ལྟར་གསུམ་ལ་བརྟག་དཔྱད་ན། །སེམས་སྦྱོང་སེམས་ཀྱི་གནས་ལུགས་ཤེས། །ཞེས་པ་ལྟར་གསུམ་ལས་དང་པོ་ནི། སེམས་ཞེས་བདེ་སྡུག་ཐམས་ཅད་མྱོང་བ་པོ་རིག་རིག་བགྱུ་འགྱུ་བ་འདི་ཕྱི་ནང་སྣོད་བཅུད་རང་ལུས་སྟོད་སྨད་སྣང་སྟོང་གང་ལས་བྱུང་དང༌། འཚོལ་བྱ་འཚོལ་བྱེད་ལ་བལྟས་ཤིང་དཔྱད། གཉིས་པ་སེམས་ཕྱི་ནང་སྣོད་བཅུད་ལུས་ཀྱི་ཆ་ཤས་སོགས་གང་ལ་གནས། དབྱིབས་དང་ཁ་དོག་བྱེད་ལས་ངོ་བོ་གང་གིས་མཚོན་བརྟགས་ཤིང་དཔྱད། གསུམ་པ་སེམས་ཝལ་གྱིས་ཤར་ནས་ཡལ་གྱི་སོང་སྙམ་བྱེད་པ་འདི་གང་དུ་འགྲོ་བ་རྟགས་པས་ཕྱི་ནང་སྣོད་བཅུད་སྣང་སྟོང་ཡོད་མེད་གང་ལས་ཀྱང་མ་བྱུང༌། གང་ལའང་མི་གནས། གང་དུའང་མི་འགྲོ་བའི་གཞི་མེད་རྩ་བྲལ་དུ་ཤེས་པ་སྟེ་མདོར་ན་སེམས་ཀྱི་བྱུང་གནས་འགྲོ་གསུམ་གཏན་ལ་མ་ཕེབ་ཀྱི་བར་དུ་འབད་པ་ཆེན་པོས་བརྟག་ཅིང་དཔྱད་ནས་བཙལ། དེ་དག་གི་དགོས་པ་ནི། ཐུན་མོང་དུ་ཡིད་ཀྱི་སྡིག་པ་བདག་ཅིང་བར་ཆད་ཞི། ཁྱད་པར་ཡིད་ཀྱི་མངོན་ཞེན་ལྡོག་པས་འཁོར་བར་མི་ལྟུང༌། མཐར་ཐུག་ཐུགས་རྡོ་རྗེ་ཆོས་ཀྱི་སྐུར་གཉིས་སུ་མེད་པར་འགྱུར་རོ། །གཉིས་པ་རྣལ་དུ་དབབ་པ་ནི། དམིགས་པ་སེམས་ཚོལ་གང་ཡང་ཡིན་ལ་མི་བྱེད་པར་ལུས་ཅི་བདེ། ངག་བཟོ་མེད། སེམས་རྟོག་མེད་རང་ལུགས་སུ་སྣང་བ་དང་སྟོང་པ་དང་སྤང་བྱ་དང་གཉེན་པོའི་མཚན་མ་གང་ལ་ཡང་མི་རྟོག་པར་འཇོག་པ་སྟེ། རྣལ་མ་ནི་མ་བཅོས་པའི་དོན་དང༌། དབབ་པ་ནི་དེ་ལ་རང་བབས་སུ་འཇོག་པའི་དོན་ཏེ། དགོས་པ་ནི་གནས་སྐབས་སུ་སྒོ་གསུམ་རྣལ་དུ་ཕེབས་པས་འབྱུང་བ་མི་འཁྲུག་ཅིང་ནད་རྐྱེན་མི་འབྱུང་བ་དང་རང་བཞིན་གྱི་བསམ་གཏན་ལ་གནས། མཐར་ཐུག་སྒོ་གསུམ་གྱི་འཛིན་པ་རང་དག་ཏུ་གྲོལ་བར་འགྱུར་རོ། །གསུམ་པ་སོར་གཞུག་ནི། སྔར་རྣལ་དུ་ཕབ་པའི་སེམས་ཉིད་གསལ་ལ་མི་རྟོག་པར་གནས་པ་དེ་ཉིད་སྤྱོད་ལམ་ཞི་བ་ཉན་ཐོས། བར་མ་བྱང་སེམས། དྲག་པོ་ཁྲོ་བོའི་ལྟ་སྟངས་དང་རྣམ་འགྱུར་གྱིས་རིམ་གྱིས་ཁྲིད་དེ་ཚོགས་དྲུག་གི་ཤེས་པ་ཇི་ལྟར་ཤར་བ་སྤྲོ་བསྡུ་བྲལ་བར་རང་སོར་བཞག་པས་རྐྱེན་སྣང་རང་གི་ངོ་བོ་གསལ་ཡང་མི་རྟོག་པའི་ངང་མ་ཤོར་བ་དང༌། ཤར་ཙམ་ཉིད་ནས་རང་བཞིན་གྱིས་མ་གྲུབ་པ་སྣང་སྟོང་དབྱེར་མེད་ཆུ་ཟླ་ལྟར་རྟོགས་པ་དང༌། རང་བྱུང་རང་ཤར་སྤྲོས་བྲལ་བསལ་བཞག་མེད་པ་ཆུ་རླབས་རྒྱ་མཚོར་ཐིམ་པ་ལྟར་རྟོགས་པ་ལ་བསླབ། དགོས་པ་ནི། གནས་སྐབས་སུ་བདེ་གསལ་མི་རྟོག་པའི་ཉམས་དང་ལྡན་པའི་ཞི་གནས་ཁྱད་པར་ཅན་སྐྱེ་བས་སྡུག་བསྔལ་དང་ཉོན་མོངས་རགས་པ་གནོན། མཐར་ཐུག་ལྷག་མཐོང་ཀ་དག་གི་དོན་རྟོགས་པས་ཉོན་མོངས་རགས་པ་རྣམས་འཇོམས་ཤིང་ཡང་དག་པའི་ལམ་ལ་སྲོལ་དུ་འཇུག་པ་ཡིན་ནོ། །གཉིས་པ་དངོས་གཞི་ལ་གཉིས། སྡོམ་གྱིས་མདོར་བསྟན། དེའི་དོན་རྒྱས་པར་བཤད་པའོ། །དང་པོ་ནི། ལྟ་བས་ཐག་བཅད་སྒོམ་པས་ཉམས་སུ་བླང་༔ སྤྱོད་པས་བོགས་འབྱིན་འབྲས་བུ་རང་ལ་རྙེད༔ ཅེས་གསུངས་ཏེ། གྲོང་ཁྱེར་རྒྱུན་གཅོད་ཀྱི་ལྟ་བས་ཐག་བཅད། ཉིན་མཚན་ཁ་སྦྱོར་གྱི་སྒོམ་པས་ཉམས་སུ་བླང༌། སྣང་བ་དབང་སྒྱུར་གྱི་སྤྱོད་པས་བོགས་འབྱིན། བྱ་བྲལ་ལྷུན་གྲུབ་ཀྱི་འབྲས་བུ་རང་ལས་རྙེད་པ་བཞིར་འདུས་པས་དེ་རྣམས་རིམ་བཞིན་བཤད་པར་བྱའོ། །གཉིས་པ་ལ་བཞི། ལྟ་བས་ཐག་བཅད་པ། སྒོམ་པས་ཉམས་སུ་ལེན་པ། སྤྱོད་པས་བོགས་འབྱིན་པ། འབྲས་བུ་ལྷུན་གྱིས་གྲུབ་པའི་ཚུལ་ལོ། །དང་པོ་ལའང་གསུམ། ངོ་བོ་ཀ་དག་གི་ཡེ་ཤེས་བཤད་པ། རང་བཞིན་ལྷུན་གྲུབ་ཀྱི་ཡེ་ཤེས་བཤད་པ། དབྱེར་མེད་ཟུང་འཇུག་གི་ཡེ་ཤེས་ངོ་སྤྲད་པའོ། །དང་པོ་ནི། དེ་ལ་ངོ་བོ་ཀ་དག་ཡེ་ཤེས་ནི༔ བལྟར་མེད་བརྗོད་མེད་ཚིག་དང་དཔེ་ལས་འདས༔ བློ་ཡི་ཡུལ་མིན་གདོད་ནས་སྟོང་པའི་བབས༔ འཁོར་བ་མ་གྲུབ་མྱང་འདས་བཏགས་པ་ཙམ༔ ཞེས་གསུངས་ཏེ།

ལྟ་བས་ཐག་བཅད་པ་དེ་ལའང༌། རྒྱུད་ཀློང་གསལ་ལས། ངོ་བོ་ཀ་དག་ཡེ་ཤེས་ནི། །མ་རིག་རྟོགས་པ་ཀུན་དང་བྲལ། །རང་བཞིན་ལྷུན་གྲུབ་ཡེ་ཤེས་ནི། །སྟོང་གསལ་རང་གདངས་ཉིད་དུ་གནས། །ཐུགས་རྗེ་ཀུན་ཁྱབ་ཡེ་ཤེས་ནི། །འགགས་མེད་སྣང་སྟོང་ཉིད་དུ་གནས། །ཞེས་ངོ་བོ་རིག་སྟོང༌། རང་བཞིན་གསལ་སྟོང༌། ཐུགས་རྗེ་སྣང་སྟོང་དབྱེར་མེད་གསུམ་དུ་གསུངས་པའི་དང་པོ་ངོ་བོ་ཀ་ནས་དག་པའི་ཡེ་ཤེས་ནི། དངོས་པོ་དང་མཚན་མར་མ་གྲུབ་པས་སངས་རྒྱས་ཀྱི་སྤྱན་གྱིས་ཀྱང་བལྟར་མེད་པ། གཞི་མེད་རྩ་བ་དང་བྲལ་བས་འདིའོ་ཞེས་བརྗོད་དུ་མེད་པ། གོ་བའི་ཚིག་དང་མཚོན་པའི་དཔེ་ཀུན་གྱི་ཡུལ་ལས་འདས་པ། བསམ་གྱིས་མི་ཁྱབ་པའི་གནས་ལུགས་ཀྱི་ཕྱིར་བློའི་སྤྱོད་ཡུལ་མ་ཡིན་པ། ཡེ་གདོད་མ་ཉིད་ནས་རང་བཞིན་གྱིས་སྟོང་པའི་གཤིས་སམ་རང་བབས། འཁྲུལ་གྲོལ་གཉིས་ཀ་ཡོད་མ་མྱོང་བས་འཁོར་བ་གཞི་མ་གྲུབ་ཅིང་མྱང་འདས་ཞེས་པའང་ལྟོས་ནས་བཏགས་པ་ཙམ་ལས་དོན་ལ་མ་གྲུབ་པ་སྟེ། ཀློང་དྲུག་པ་ལས། སྟོང་པ་ཡུལ་གྱི་སྤྲོས་པ་མེད། ཅེས་སོ། །གཉིས་པ་ནི། རང་བཞིན་ལྷུན་གྲུབ་འགགས་མེད་ཡེ་ཤེས་རྩལ༔ ནམ་མཁའ་ལས་ནི་ཉི་མའི་ཟེར་བཞིན་དུ༔ ཀུན་ལ་ཁྱབ་ཅིང་ཀུན་གྱི་སྲོག་ཏུ་བཞུགས༔ ཀུན་དང་དབྱེར་མེད་འཁོར་འདས་རིས་མེད་དོ༔ ཞེས་གསུངས་ཏེ། རང་བཞིན་ལྷུན་གྱིས་གྲུབ་པའི་ཡེ་ཤེས་ནི། །ངོ་བོ་ཀ་དག་སྨྲ་བསམ་བརྗོད་བྲལ་དེ་ཉིད་གསལ་མདངས་འགགས་པ་མེད་པའི་ཡེ་ཤེས་ཀྱི་རང་རྩལ། ནམ་མཁའི་དབྱིངས་ལས་ཉི་མའི་འོད་ཟེར་ཕྱོགས་མེད་དུ་ཁྱབ་པ་བཞིན་ཏུ་བརྟན་གཡོ་འཁོར་འདས་ཀུན་ལ་ཁྱབ་ཅིང་ཀུན་གྱི་སྲོག་གམ་སྙིང་པོའི་ཚུལ་དུ་བཞུགས་ལ། དེའང་རྟེན་དང་བརྟེན་པའི་རྣམ་པ་ཅན་མ་ཡིན་པ་ནམ་མཁས་འབྱུང་བ་ཆེན་པོ་རྣམས་ལ་ཁྱབ་པ་བཞིན་ཏུ་མཐའ་གང་ལའང་མི་གནས་པར་ཀུན་དང་དབྱེར་མེད་པར་བཞུགས་པ་སྟེ། འཁོར་འདས་གཉིས་ལ་རྒྱ་ཆད་དང་ཕྱོགས་ལྷུང་གི་རིས་སུ་བཅད་པ་མེད་དེ། སྔ་མ་ལས། གསལ་བ་ཡོད་མེད་མཐའ་ལས་འདས། །མཚོན་ཚིག་དུ་མའི་སྤྲོས་དང་བྲལ། ཅེས་སོ། །གསུམ་པ་ནི། དེ་གཉིས་གཅིག་དང་དུ་མའི་སྤྲོས་ལས་འདས༔ ཟུང་འཇུག་འདུས་མ་བྱས་པའི་གནས་ལུགས་ནི༔ བལྟར་མེད་ལྟ་བ་ཀུན་གྱི་རྒྱལ་པོ་སྟེ༔ རྣལ་འབྱོར་དབང་པོ་རང་གི་ཉམས་མྱོང་ལས༔ ལྟ་བའི་ཚུལ་དུ་ངོ་སྤྲོད་མངོན་དུ་བྱ༔ ཞེས་གསུངས་ཏེ། ངོ་བོ་སྟོང་པ་དང་རང་བཞིན་གསལ་བ་དེ་གཉིས་ཀྱང་གཅིག་དང་དུ་མའི་སྤྲོས་པ་ཀུན་ལས་འདས་ཤིང་གདོད་ནས་དབྱེར་མེད་ཟུང་དུ་འཇུག་པ་མར་མེ་དང་མར་མེའི་འོད་ལྟ་བུ་སུས་ཀྱང་བཅོས་ནས་འདུས་མ་བྱས་པའི་རང་བབས་ཀྱི་གནས་ལུགས་དེ་ནི་ཡུལ་དང་ཡུལ་ཅན་ཏུ་བརྟགས་ནས་བལྟར་མེད་པའི་ཕྱིར་བློ་ལས་འདས་པས་ལྟ་བ་ཀུན་གྱི་རྒྱལ་པོ་གོང་ན་མེད་པ་སྟེ། དེ་ཉིད་ཇི་བཞིན་ཏུ་རྟོགས་པའི་རྣལ་འབྱོར་གྱི་དབང་པོ་རང་གི་ཉམས་མྱོང་ལས་དཔག་སྟེ། ལྟ་བའི་ཡིན་ལུགས་ཀྱི་ཚུལ་དུ་བརྡ་ཐབས་མན་ངག་བྱིན་རླབས་ཀྱི་སྒོ་ནས་ངོ་སྤྲོད་ཅིང་མངོན་ཏུ་རྟོགས་པར་བྱའོ། །དེ་ལྟར་ཡང་ཁྱུང་ཆེན་ལས། སྤྱོད་བྲལ་སྒོམ་བྲལ་བལྟ་རྒྱུ་མེད་པའི་དོན། །མ་བཅོས་སྣང་བ་རང་སར་བཞག་པས་གྲོལ། ཅེས་སོ། །གཉིས་པ་སྒོམ་པས་ཉམས་སུ་བླང་བ་ལ་གཉིས། དངོས་དང༌། འབྱོངས་པའི་ཚད་དོ། །དང་པོ་ནི། དེ་ནས་སྒོམ་པས་ཉམས་སུ་བླང་བ་ནི༔ སེམས་ཉིད་རིག་སྟོང་ཟུང་འཇུག་སྐད་ཅིག་མ༔ དུས་གསུམ་རྟོག་པས་མ་བསླད་སོ་མ་དེ༔ རྣལ་མར་བཞག་པས་མངོན་སུམ་ལྷུག་པར་མཐོང་༔ ཕྱི་རོལ་ཡུལ་ལ་གཡེང་བའི་རྟོག་པ་ཞིག༔ ནང་དུ་དགུག་པའི་དྲན་འཛིན་རང་སར་གྲོལ༔ གཏད་མེད་ངང་ལ་བྱར་མེད་གློད་པ་ཡིས༔ ཆོས་ཉིད་མཉམ་པ་ཆེན་པོ་མངོན་དུ་འགྱུར༔ ཅེས་གསུངས་ཏེ། ལྟ་བས་ཡེ་གྲོལ་དུ་རྟོགས་པ་དེ་ནས་སྒོམ་པས་ཡིན་ཐོག་ཏུ་བཞག་སྟེ་རིག་པ་གཤིས་ཐོག་ཏུ་ཕེབ་པར་ཉམས་སུ་བླང་བ་ནི། སེམས་ཉིད་ངོ་བོ་ངོས་བཟུང་ལས་འདས་པ། རིག་པ་ཟངས་ཐལ་མཚན་མར་མ་གྲུབ་པ་སྟོང་གསལ་རང་བྱུང་གི་ཡེ་ཤེས། དེ་གཉིས་ཡ་བྲལ་མ་ཡིན་པར་གདོད་ནས་ཟུང་དུ་འཇུག་པ་འདི་ལས་ཆོས་སྐུ་གཞན་ཏུ་མེད་པར་ངོ་རང་ཐོག་ཏུ་འཕྲོད་ནས། དྲན་བསམ་སྔ་མ་འགགས། ཕྱི་མ་མ་སྐྱེས་ཤིང་ད་ལྟའི་ཤེས་པ་སྐད་ཅིག་མ་ལ་བཟོ་བཅོས་མ་བྱས་པས་དུས་གསུམ་གྱི་རྣམ་པར་རྟོག་པས་མ་བསླད་པའི་ཀ་དག་བློ་འདས་ཀྱི་དགོངས་པ་བཞི་ཆ་སུམ་བྲལ་ཐ་མལ་གྱི་ཤེས་པ་སོ་མ་དེ་ཉིད། རང་བབས་རྣལ་མར་བཞག་པ་ལས་གཞན་པའི་བསྒོམ་བྱ་རྡུལ་ཙམ་མེད་པ་ཐག་གཅིག་ཐོག་ཏུ་བཅད་པས་མངོན་སུམ་ཆོས་ཉིད་ཀྱི་རང་བབས་ལྷུག་པར་མཐོང་སྟེ་རང་དྭངས་སྤྲིན་བྲལ་ནམ་མཁའ་ལྟར་གནས་པ་ཡིན་ལ། དེའི་དུས་སུ་ཕྱི་ཆོས་ཅན་ཚོགས་དྲུག་ཡུལ་གྱི་འཁྲུལ་སྣང་ལ་གཡེང་བའི་རྟོག་པ་ཤར་དུས་ནས་འཛིན་མེད་དུ་གློད་པས་རྦ་རླབས་ཆུར་ཐིམ་པ་ལྟར་འགྱུ་སྟོང་རྗེས་མེད་དུ་ཞིག །ནང་ཆོས་ཉིད་ཀྱི་ངང་དུ་ཡེངས་པ་མེད་པར་དགུག་པའི་དྲན་འཛིན་དགག་སྒྲུབ་རྩོལ་བཅས་ཀྱི་བརྟོད་ཕུར་ན་བུན་མཁའ་ལ་དེངས་པ་ལྟར་རང་སར་གྲོལ་ཏེ་སྣང་ཤེས་གཉིས་ཀའི་ཕྱོགས་སུ་མ་ལྷུང་བ་ཅིར་སྣང་ཆོས་སྐུའི་རང་བཞིན་རིག་སྟོང་བློ་བྲལ་རྗེན་པར་རྟོགས་པའི་གདིང་གྲོལ་ཐོག་ཏུ་བཅས་ཏེ། དམིགས་གཏད་མཚན་འཛིན་གང་ཡང་མེད་པའི་ངང་ལ་འབད་རྩོལ་ཅིའང་བྱར་མེད་པར་ཁ་ཡན་ཏུ་གློད་ནས་བཞག་པས་རྫོགས་པ་ཆེན་པོ་རང་སྣང་རིས་མེད་ཀ་དག་གཞི་རྫོགས་ཆོས་ཉིད་མཉམ་པ་ཆེན་པོར་མངོན་ཏུ་འགྱུར་ཏེ། ཁྱུང་ཆེན་ལས། མ་བསྒོམས་བཞག་པ་དེ་ཉིད་རང་རིག་པ། །སྒྲ་དང་བློ་བྲལ་ཀུན་གྱི་ཕ་རོལ་ཕྱིན། །དམིགས་བཅས་རང་སོ་ཉིད་དེ་བཅོས་ཅི་དགོས། །གནས་པས་འགུགས་ལ་འགྱུས་པས་རང་སར་དག །ཅེས་སོ། །གཉིས་པ་ནི། དེ་ཚེ་རྟོག་པའི་སྤྲོ་བསྡུ་ཇི་སྙེད་ཀྱང་༔ ཆུ་དང་རླབས་བཞིན་རང་གསལ་རྗེན་པར་ཐིམ༔ རླུང་མེད་གཡོ་བ་མེད་པའི་མར་མེ་བཞིན༔ རྩེ་གཅིག་ངང་གནས་གནས་པའི་དེ་ཉིད་རིག༔ རིག་ཀྱང་མི་འཛིན་གསལ་ཡང་འཕྲོ་བ་མེད༔ མི་རྟོག་པ་ལ་ཞེན་པ་བྲལ་བ་ལས༔ མཉམ་གཞག་རྗེས་ཐོབ་ཟུང་དུ་ཆུད་པ་ན༔ ཞེས་གསུངས་ཏེ།

རིག་སྟོང་རྗེན་པ་ངོས་ཟིན་ནས་གཤིས་ཐོག་བཟོ་མེད་དུ་བཞག་པ་དེའི་ཚེ། རྣམ་པར་རྟོག་པའི་སྤྲོ་བསྡུ་ཇི་སྙེད་ཤར་བ་དེ་ཐམས་ཅད་ཀྱང་དྲན་པའི་གཉེན་པོས་བསྐྱར་གྲོལ་མ་དགོས་པར། ཆུ་བོ་ཆེན་པོ་ལས་རླབས་གཡོས་ཀྱང་ཆུ་དང་རླབས་གཉིས་ཐ་དད་མེད་པ་བཞིན་དུ་རྟོག་མེད་རང་གསལ་རྗེན་པར་ཐིམ་པ་དང༌། གཡོ་བྱེད་ཀྱི་རླུང་མེད་པའི་མར་མེ་གསལ་དྭངས་བརྟན་པར་འབར་བ་བཞིན་རིག་ཐོག་ཏུ་རྩེ་གཅིག་པར་གནས་ཤིང༌། དེ་ལའང་ཡུལ་ཤེས་ཀྱི་འཛིན་པས་མ་བསླད་པ་གནས་པའི་ངོ་བོའི་དེ་ཁོ་ན་ཉིད་རིག་ལ། རིག་པ་ཉིད་ཀྱང་དེར་རྟོག་གིས་མི་འཛིན་པར་གསལ་ཧྲིག་རྗེན་པ་གཞི་མེད་རྩ་བྲལ་དུ་ལྷག་གེར་ཤར་བ་དང༌། གསལ་ཆ་མ་འགགས་ཀྱང་ཚོགས་དྲུག་གི་ཡུལ་ལ་འགྱུ་བ་རང་ག་མར་འཕྲོ་བ་མེད་ཅིང༌། གང་དུའང་མི་རྟོག་པ་དེ་ལའང་ཞེན་པའི་འཛིན་སྟངས་བྲལ་བ་ལས་མཉམ་བཞག་རྗེས་ཐོབ་ཀྱི་འཇོག་ལེན་མེད་པར་སྒོམ་པ་འོད་གསལ་ཁོར་ཡུག་ཏུ་ཤར། གནས་འགྱུའི་དགག་སྒྲུབ་མི་དགོས་པར་མཐའ་གྲོལ་ཀློང་ཡངས་ཀྱི་དགོངས་པར་ཕྱམ་བརྡལ། ཞི་གནས་ལྷག་མཐོང་གི་རྣམ་པར་དབྱེ་བ་ལས་གྲོལ་ཏེ་རིག་ཐོག་ཟུང་འཇུག་ཏུ་ཆུད་པ་ན་སྒོམ་པ་ཀློང་དུ་གྱུར་པ་ཡིན་ཏེ། དགའ་རབ་རྡོ་རྗེས། ཡིན་པ་གྲུབ་པ་མེད་པའི་རིག་པ་འདི། །རང་གདངས་འཆར་ཚུལ་ཅིར་ཡང་མ་འགགས་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཐོག་ཏུ་གྲོལ། ཅེས་སོ། །གསུམ་པ་སྤྱོད་པས་བོགས་དབྱུང་བ་ནི། སྤྱོད་ལམ་ཐམས་ཅད་ཆོས་ཉིད་རོལ་པའི་ངང་༔ ཚོགས་དྲུག་ཡུལ་ལ་མི་ཞེན་གང་དགར་བཏང་༔ འགྲོ་འཆག་ཉལ་འདུག་ཡེ་ཤེས་རོལ་པའི་ངང་༔ གཟུང་འཛིན་སྤང་བླང་མཉམ་པ་ཆེན་པོར་བརྡལ༔ མཚན་མའི་བསྒོམ་པར་བྱ་བ་རྡུལ་ཙམ་མེད༔ མི་བསྒོམ་དོན་དང་འབྲལ་བ་མེད་པས་ན༔ སྤྱོད་ཡུལ་ཀུན་ཏུ་ཡེ་ཤེས་རིས་མེད་པ༔ ཆུ་བོའི་རྒྱུན་དང་མར་མེའི་རྩེ་མོ་བཞིན༔ དེ་ཉིད་རིག་པས་རྟག་ཏུ་མཉམ་པར་གཞག༔ ཅེས་གསུངས་ཏེ། ཅོག་བཞག་གི་སྒོམ་པ་ཀློང་དུ་གྱུར་པ་ན་སྒོ་གསུམ་སྤྱོད་པའི་ལམ་གང་རུང་དུ་ཞུགས་ཀྱང་ཐམས་ཅད་ཆོས་ཉིད་ཀྱི་རོལ་པར་ངང་ལས་ནམ་ཡང་མ་གཡོས་ཏེ་འབྱུང་བཞིའི་ཆོ་འཕྲུལ་ཇི་ལྟར་ཤར་ཡང་ནམ་མཁའི་ཀློང་ལས་འདས་པ་མེད་པ་བཞིན་ནོ། །དེས་ན་འཁྲུལ་གྲོལ་གྱི་རེ་དོགས་མེད་པས་ཚོགས་དྲུག་གི་ཡུལ་ལ་དེར་འཛིན་གྱིས་མི་ཞེན་པར་ཐུག་ཕྲད་རང་གྲོལ་རང་དགར་རྒྱ་ཡན་དུ་བཏང༌། སྣང་བཏགས་ཇི་ལྟར་སྣང་རུང་རིག་པའི་ཀློང་ལས་གུད་ན་མེད་པས་འགྲོ་འཆག་ཉལ་འདུག་ཐམས་ཅད་རང་བྱུང་གི་ཡེ་ཤེས་ཆེན་པོའི་རྩལ་ལམ་རོལ་པའི་ངང་དུ་འུབ་ཆུབ་པར་ཐག་བཅད། རྩ་བྲལ་གྱི་ཆོས་ཐམས་ཅད་ཡེ་ནས་ལྷུན་གྲུབ་ཀྱི་ཆོས་སྐུར་སངས་རྒྱས་པས་གཟུང་བྱ་འཛིན་བྱེད་སྤང་བྱ་བླང་བྱེད་གཉིས་སུ་མེད་པ་ཆོས་ཉིད་མཉམ་པ་ཆེན་པོར་ཁྱབ་པར་བརྡལ་བས། འབད་རྩོལ་དམིགས་བཅས་མཚན་མའི་བསྒོམ་པར་བྱ་བ་རྡུལ་ཙམ་ཡང་མེད་པས་སྒོམ་འདོད་ཀྱི་རྟོག་པ་ལས་གྲོལ་ཏེ་ཐ་མལ་གྱི་ན་བར་འབྱམས་ཤིང༌། བཅོས་མའི་བློས་མི་བསྒོམ་པའི་དོན་རིག་སྟོང་ཆོས་ཉིད་ཟང་ཐལ་རྗེན་པ་དང་རྒྱུན་ཏུ་འབྲལ་བ་མེད་པས་ན་གང་ཟག་ཐ་མལ་པའི་ཚུལ་ལས་རིང་དུ་འདས་ཏེ་སྤྱོད་ཡུལ་ཇི་ལྟར་སྤྱོད་པ་ཐམས་ཅད་ཀུན་ཏུ་བཟང་པོ་ཡེ་ཤེས་ཟང་ཐལ་རང་སྣང་རིས་མེད་དག་པ་རབ་འབྱམས་སུ་ཤར་བ་ན། ཆོས་ཉིད་རྒྱུན་ཆད་མེད་པ་ཆུ་བོ་ཆེན་པོའི་རྒྱུན་དང་འོད་གསལ་གསལ་འགྲིབ་མེད་པ་མར་མེའི་རྩེ་མོ་བཞིན་ཏེ་དེ་ཁོ་ན་ཉིད་ཀྱི་གནས་ལུགས་རིག་པས་རྟག་ཏུ་མཉམ་པར་བཞག་པ་ལས་མ་གཡོས་བཞིན་ཏུ་ཡེ་ཤེས་ཀྱི་འཁོར་ལོ་ཕྱོགས་མེད་དུ་བསྐོར་བ་ཡིན་ཏེ། ཉི་ཟླ་ཁ་སྦྱོར་ལས། དམིགས་པས་སྣང་བའི་ཡུལ་རྣམས་ལ། །རང་བཞིན་མེད་པར་སུས་རྟོགས་པ། །འདི་ལ་སྣང་སྟོང་གཉིས་སུ་མེད། །ཅེས་གསུངས་པ་ལྟར་རོ། །བཞི་པ་འབྲས་བུ་ལ་གསུམ། སྐུ་གསུམ་ལྷུན་གྱིས་གྲུབ་པའི་ཚུལ་དང༌། ལམ་རྐྱེན་དངོས་པོ་བཅུ་ལྷུན་གྱིས་གྲུབ་པའི་ཚུལ། བསྙེན་སྒྲུབ་ཡན་ལག་བཞི་དང་སྦྱར་བའི་ཚུལ་གྱིས་འབྲས་བུ་དོན་བསྡུ་བའོ།

།དང་པོ་ནི། མདོར་ན་རང་རིག་གདོད་ནས་སངས་རྒྱས་ཏེ༔ སངས་རྒྱས་ཆེན་པོ་གུད་དུ་བཙལ་བས་མེད༔ བླ་མའི་དྲིན་གྱིས་རྟོགས་པ་ངོ་འཕྲོད་དེ༔ གསལ་སྟོང་རོ་མཉམ་རིག་པའི་སྙིང་པོ་ཅན༔ མ་ནོར་གནས་ལུགས་མ་བཅོས་གདོད་མའི་བབས༔ ཇི་བཞིན་པ་ལས་འཆོས་པ་མེད་པ་ཡིས༔ སངས་རྒྱས་ས་ལ་ད་ལྟ་ལྷུན་གྱིས་གྲུབ༔ ཅེས་གསུངས་ཏེ། མདོར་བསྡུ་ན་རང་རིག་མ་བཅོས་པ་ཆོས་ཉིད་ཀྱི་གནས་ལུགས་འདི་ཁོ་ན་གདོད་ནས་འཁྲུལ་མ་མྱོང་བར་སངས་རྒྱས་པ་སྟེ། བསྒྲུབ་བྱའི་སངས་རྒྱས་ཆེན་པོ་གསུམ་ལྡན་གུད་དུ་བཙལ་བས་ནམ་ཡང་རྙེད་པ་མེད་ཀྱང་གློ་བུར་འཁྲུལ་རྟོག་གིས་བསྒྲིབས་ཏེ་གཞན་ནས་རྩོལ་སྒྲུབ་ཏུ་ལྟ་བའི་འཛིན་པས་བཅིངས་པ་ལ་ཡང་དག་པའི་ལམ་གྱི་ས་མཁན་བླ་མ་དམ་པའི་བཀའ་དྲིན་གྱིས་གདོད་ནས་ཡེ་གྲོལ་གྱི་རྟོགས་པ་བསྐྱེད་ཅིང་ལྷུན་གྲུབ་ཀྱི་སངས་རྒྱས་རང་ལ་གནས་པར་ངོ་འཕྲོད་དེ། རྣམ་པ་མ་འགགས་པར་གསལ་ལ་ངོ་བོ་མ་སྐྱེས་པའི་སྟོང་པ་གཉིས་པོ་རོ་གཅིག་ཏུ་མཉམ་པའི་ཁྱབ་བྱ་ལ། ཁྱབ་བྱེད་རང་རིག་པའི་སྙིང་པོ་ཅན་གྱི་གཞི་མ་ནོར་བའི་གནས་ལུགས་དེ་ཉིད་ལམ་མ་བཅོས་པ་གདོད་མའི་རང་བབས་སུ་བསྐྱངས་པས་གཤིས་ཇི་བཞིན་པ་མངོན་ཏུ་གྱུར་པ་ལས། སེམས་ཅན་གྱིས་ངན་པར་དང་སངས་རྒྱས་ཀྱིས་བཟང་པོར་བཏང་ནས་གསར་ཐོབ་ཏུ་འཆོས་པ་མེད་པར་རྟོགས་པ་དེ་ཡིས། སྐུ་གསུམ་རྫོགས་པའི་སངས་རྒྱས་ཀྱི་ས་ལ་ད་ལྟ་ཉིད་ནས་ཕྱིན་ཏེ་ཆོས་སྐུ་རང་གནས་ཆེན་པོར་ལ་བཟླས་པ་ནི་མ་བཙལ་ལྷུན་གྱིས་གྲུབ་པའི་འབྲས་བུའོ། །དེ་ལྟར་ཡང་ནོར་བུ་ཕྲ་བཀོད་ལས། རྫོགས་སངས་རྒྱས་ནི་རང་རིག་ཉིད། །ངོ་བོ་དུས་གསུམ་འགྱུར་བ་མེད། །རང་བཞིན་རྟག་ཏུ་འགག་པ་མེད། །ཐུགས་རྗེ་ཀུན་ལ་རབ་སྣང་ངོ༌། །ཞེས་སོ། །གཉིས་པ་ནི། ལྟ་བ་བལྟར་མེད་སྒོམ་པའི་རྩིས་གདབ་བྲལ༔ སྤྱོད་པ་བྱར་མེད་འབྲས་བུ་བླང་དོར་འདས༔ དེ་ནི་ཡེ་ཤེས་སྤྱི་བླུགས་དབང་ཞེས་བྱ༔ དམ་ཚིག་ཡེ་སྲུང་ཕྱལ་བ་ཆེན་པོར་ཟླུམ༔ བསྒྲུབ་བྱའི་རྒྱལ་པོ་ཆེ་བ་རང་ལས་རྙེད༔ བསྒྲུབ་ཆོས་ཏིང་འཛིན་ཁོར་ཡུག་རྒྱུན་ཆད་མེད༔ སྒྲུབ་པར་ཕྲིན་ལས་སྣང་སྲིད་ཆོས་སྐུར་བརྡལ༔ སྒྲུབ་པའི་ཡན་ལག་མི་གསུང་མཉམ་བཞག་སྔགས༔ མ་བཅོས་ཚོགས་དྲུག་ལྷུག་པ་མཆོད་པའི་སྤྲིན༔ གསལ་སྣང་ཕྱག་རྒྱ་རིག་རྩལ་རོལ་པའི་གར༔ ཅེས་གསུངས་ཏེ། གསང་རྒྱུད་ཟབ་མོ་རྣམས་སུ་རྡོ་རྗེའི་ཚིག་གིས་བསྟན་པའི་ལམ་གྱི་ཆ་རྐྱེན་དངོས་པོ་བཅུའང་འདིར་འབད་མེད་ཀྱི་ངང་ལ་ལྷུན་གྱིས་གྲུབ་པ་སྟེ། ལྟ་བའི་མཁན་པོས་བལྟ་བྱའི་ཡུལ་མེད་པས་གནས་ལུགས་དེ་ཁོ་ན་ཉིད་དུ་ལྟ་བ་དང༌། སྒོམ་པ་དམིགས་གཏད་ཀྱི་རྩིས་གདབ་དང་བྲལ་བས་རང་སྣང་རིས་མེད་ཀྱི་དཀྱིལ་འཁོར་བཀོད་པ་ཁྱབ་པར་བརྡལ་བ་དང༌། སྤྱོད་པ་སྤང་བླང་བྱར་མེད་པས་ཆོས་ཉིད་ཀྱི་དབྱིངས་སུ་ཆོས་ཅན་གྱི་མཚན་མ་ལ་དོར་ནས་འབྲས་བུ་བླང་བྱ་རྣམ་གྲོལ་དང་སྤང་བྱ་འཁོར་ཆོས་གཉིས་ཀ་ལས་འདས་ཏེ་རང་གནས་ཀྱི་རིག་པ་གཞི་ཐོག་ཏུ་རྫོགས་པ་དེ་ནི། གཞི་ལམ་འབྲས་བུའི་རིམ་པ་ཀུན་ལ་ཁྱབ་པས་ཡེ་ཤེས་སྤྱི་བླུགས་ཀྱི་དབང་ཞེས་བྱ་བ་གཏོར་བླུགས་ཀྱི་ཆོ་ག་ཀུན་ལས་ཁྱད་པར་འཕགས་པ་དང༌། ས་མ་ཡ་འབུམ་སྡེའི་དམ་ཚིག་རྣམས་ཀྱང་གདོད་ནས་ཆོས་ཉིད་ལས་མི་འདའ་བས་ཡེ་སྲུང་ལྷུན་གྲུབ་གཟུང་འཛིན་དང་བྲལ་བའི་དབྱིངས་རྒྱ་འབྱམས་སམ་ཕྱལ་བ་ཆེན་པོ་གཅིག་ཏུ་བཟླུམ་པ་དང༌། དོན་ཏུ་གཉེར་ཏེ་བསྒྲུབ་བྱའི་རྒྱལ་པོ་རང་བྱུང་ཡེ་ཤེས་ཆེ་བའི་མཆོག་གཞན་ལས་མ་བཙལ་རང་ཉིད་ལས་རྙེད་པ་དང༌། སྒྲུབ་བྱེད་ཀྱི་ཆོས་བཏང་བཞག་མེད་པའི་ཏིང་ངེ་འཛིན་ཁོར་མོ་ཡུག་ལས་མི་གཡོ་བས་རྒྱུན་ཆད་མེད་པ་དང༌། སྒྲུབ་པའི་ཕྲིན་ལས་སྣང་སྲིད་ཐམས་ཅད་ཆོས་སྐུའི་ཡོ་ལངས་སུ་བརྡལ་བས་ཅིར་སྣང་ཡེ་ཤེས་ཀྱི་རོལ་པར་ཤུགས་ལས་འབྱུང་བ་དང༌། སྒྲུབ་པའི་ཡན་ལག་ཅིའང་མི་གསུང་ཞིང་བྱར་མེད་མཉམ་པར་བཞག་པའི་བཟླས་པ་ཆེན་པོས་གསང་སྔགས་ཀྱི་འཁོར་ལོ་བླ་མེད་དུ་བསྐོར་བ་དང༌། བློ་ཡིས་བཟོ་མ་བཅོས་པ་ཚོགས་དྲུག་གི་ཡུལ་ཤེས་རང་བབས་ལྷུག་པར་བཞག་པས་ཐུག་ཕྲད་རེག་གྲོལ་དུ་སྟོབ་པ་མཆོད་པའི་སྤྲིན་འབྱམས་སུ་ཀླས་པ་དང༌། སེམས་ཀྱི་གསལ་སྣང་ཀུན་ཏུ་ཁྱབ་པའི་ཕྱག་རྒྱ་ཡེ་ཤེས་སུ་འཆིང་བ་དང་རིག་རྩལ་ཕྱོགས་མེད་དུ་འགྲོ་བ་རོལ་པའི་གར་གྱི་རྣམ་འགྱུར་དུ་ལྷུན་གྱིས་གྲུབ་པའོ།

།གསུམ་པ་ནི། སེམས་ཀྱི་མཚངས་བཙལ་ཡེ་ཤེས་བསྙེན་པ་སྟེ༔ རང་ཐོག་རྣལ་མར་ངོ་སྤྲོད་ཉེ་བར་བསྙེན༔ ཐིག་ལེ་ཉག་གཅིག་ཐག་ཆོད་སྒྲུབ་པའི་ངང་༔ གྲོལ་ཐོག་གདེངས་བཅའ་སྒྲུབ་པ་ཆེན་པོ་ཡིས༔ ཅོག་བཞག་བཞི་ལྡན་ཀ་དག་ཟང་ཐལ་དབྱིངས༔ ཀུན་བཟང་སྙིང་པོའི་ས་ལ་ད་ལྟ་ཕྱིན༔ ཅེས་གསུངས་ཏེ། ཁྲེགས་ཆོད་ཡེ་བབས་སོར་བཞག་གི་ཐོག་མར་སེམས་ཀྱི་མཚང་བཙལ་ཏེ་སྐྱེ་མེད་དུ་རྩད་བཅད་པ་ནི་རང་བྱུང་ཡེ་ཤེས་ལ་བསྙེན་པ་སྟེ། བར་དུ་རང་རིག་ཀ་དག་གི་ཐོག་ཏུ་གནས་ལུགས་མ་བཅོས་རྣལ་མར་ངོ་སྤྲོད་པ་ནི་ཉེ་བར་བསྙེན་པ་དང༌། འགགས་མེད་དུ་གཏན་ལ་ཕབ་སྟེ་རང་བྱུང་གི་ཐིག་ལེ་ཉག་གཅིག་ཏུ་འཁོར་འདས་ཐམས་ཅད་རྫོགས་པར་ཐག་ཆོད་པ་ནི་སྒྲུབ་པའི་ངང་དུ་གནས་པ་ཡིན་ལ། མཐར་གཉུག་མ་ཡེ་གྲོལ་གྱི་ཐོག་ཏུ་གཉེན་པོས་བསྐྱར་གྲོལ་མ་དགོས་པའི་གདིང་བཅའ་བ་སྒྲུབ་པ་ཆེན་པོའི་རིམ་པས་གཉིས་མེད་དུ་རྩལ་སྦྱང་སྟེ། དེའང་སྒྲོན་མ་སྣང་བྱེད་ལས། རི་བོ་ཅོག་བཞག་ལྟ་བའི་ཚད། །རྒྱ་མཚོ་ཅོག་བཞག་སྒོམ་པའི་ཚད། །སྣང་བ་ཅོག་བཞག་སྤྱོད་པའི་ཚད། །རིག་པ་ཅོག་བཞག་འབྲས་བུའི་ཚད། །ཚད་བཞི་ལྡན་པའི་རྣལ་འབྱོར་དེ། །ངེས་པའི་དོན་ལ་བློ་འདྲེས་པའོ། །ཞེས་པ་ལྟར། དགོངས་པ་ཆོས་ཉིད་ཀྱི་ངང་ལ་གནས་པས་རྐྱེན་སྣང་རླུང་ཚོགས་ལྟ་བུས་ནམ་ཡང་མི་གཡོ་བའི་གདིང་རྙེད་པ་རི་བོ་ཅོག་བཞག་གི་ལྟ་བ། རིག་པ་ཟང་ཐལ་ལ་དབང་པོའི་གདངས་མ་འགགས་པ་རྒྱ་མཚོ་རླུང་གིས་མ་བསྐྱོད་པ་ལྟ་བུ་ལ། སྣང་ཡུལ་གཟའ་སྐར་གྱི་གཟུགས་བརྙན་ཤར་ཡང་ཡུལ་དང་ཡུལ་ཅན་ཏུ་རྣམ་པར་རྟོག་པ་མེད་པས་གཟུགས་བརྙན་གྱིས་ཆུ་ལ་མ་གོས་པ་དང་མཚུངས་པ་རྒྱ་མཚོ་ཅོག་བཞག་གི་སྒོམ་པ། རིག་པའི་དྭངས་ཆ་མེ་ལོང་ལྟ་བུར་ཆོས་ཅན་མཚན་མ་ཅིར་སྣང་ཡང་དགག་སྒྲུབ་བྲལ་བར་སྣང་ཤེས་རོ་མཉམ་ཡན་གར་བཞག་པ་སྣང་བ་ཅོག་བཞག་གི་སྤྱོད་པ། རིག་པ་ཟང་ཐལ་ངོས་བཟུང་མེད་པ་ལ་བློ་ཡིས་བཟོ་བཅོས་དང་འཛིན་ཞེན་གང་ཡང་མི་བྱ་བར་རང་གྲོལ་ཀློང་ཡངས་ཆེན་པོའི་དགོངས་པར་རང་གནས་སུ་བཞག་པ་ནི་རིག་པ་ཅོག་བཞག་གི་འབྲས་བུ་སྟེ། དེ་ལྟར་ཅོག་བཞག་གི་གནད་བཞི་དང་ལྡན་པ་ལས། ཀ་དག་ཟང་ཐལ་གདོད་མའི་ཆོས་དབྱིངས་ཀུན་ཏུ་བཟང་པོའི་གྲོལ་གཞི་བྱང་ཆུབ་སྙིང་པོའི་ས་ལ་ཕྱི་དུས་སུ་མི་ལྟོས་པར་ད་ལྟ་ཕྱིན་པར་འགྱུར་རོ། །གསུམ་པ་ཀ་དག་གི་ལྟ་བའི་མཇུག་བསྡུ་བ་ནི། མདོར་ན་སྣོད་བཅུད་བྱེ་བྲག་ཐ་དད་ཀྱང་༔ ནམ་མཁའི་ངང་དུ་རོ་གཅིག་དབྱེར་མེད་ལྟར༔ དཀར་པོའི་ལམ་དང་འབྲས་བུ་བསམ་འདས་ཀྱང་༔ རིག་པའི་ངང་དུ་ལྷུན་གྲུབ་ཆེན་པོར་རྫོགས༔ ཞེས་གསུངས་ཏེ། གཞི་ཀ་དག་གི་ལྟ་བའི་གནས་ལུགས་མདོར་བསྡུས་ཏེ་དཔེར་མཚོན་ན། ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་སྐྱེ་འགྲོ་གནས་ལུས་བཀོད་པའི་བྱེ་བྲག་གཅིག་ཏུ་མ་ངེས་པས་ཐ་དད་སྣ་ཚོགས་སུ་མཆིས་ཀྱང༌། འབྱུང་བ་ཆེན་པོ་ནམ་མཁའ་སྟོང་པའི་ཀློང་དུ་མ་འདུས་པ་མེད་པས་དེའི་ངང་དུ་དབྱེར་མེད་རོ་གཅིག་པ་ལྟར། དྲང་དོན་ཏུ་ལམ་སྟེགས་ལྷ་དང་ཚངས་པའི་ཐེག་པ་དང་རྣམ་བྱང་གིས་བསྡུས་པའི་དཀར་པོའི་ལམ་ཉན་ཐོས་ནས་ཨ་ནུའི་བར་དང་དེ་དག་སོ་སོའི་ཐོབ་བྱའི་འབྲས་བུ་བསམ་ལས་འདས་པར་གསུངས་ཀྱང༌། ངེས་པའི་དོན་ཏུ་གདོད་མའི་གྲོལ་ས་ཀ་དག་རང་བྱུང་རིག་པའི་ངང་དུ་ལྷུན་གྲུབ་ཆེན་པོར་གཞི་ལ་རྫོགས་པ་སྟེ། དེའང་ཡེ་གྲོལ་ལ་གཞི་དང་སྣང་བ་ཡུལ་རྣམས་ཡེ་ནས་རྫོགས་པ་དང༌། རང་གྲོལ་ལ་འཁྲུལ་གཞི་ལམ་དང་ཤེས་བྱ་རང་སར་རྫོགས་པ་དང༌། གཅིག་གྲོལ་ལ་འབྲས་བུ་རྒྱུ་རྐྱེན་ཆོས་ཉིད་རྣམས་རང་བཞིན་ཏུ་རྫོགས་པ་དང༌། མཐའ་གྲོལ་འཁོར་འདས་རྒྱུད་ལུང་ཐམས་ཅད་མཐའ་བྲལ་དུ་རྫོགས་པ་དང༌། གཅེར་གྲོལ་ལ་གདམས་ངག་བསམ་གཏན་འབྲས་བུ་བཅས་ཆོས་དབྱིངས་རང་ངོར་རྫོགས་པར་གསུངས་ཏེ། མུ་ཏིག་ཕྲེང་བ་ལས། དེ་ཕྱིར་གཞི་གནས་རིག་པ་ལ། །རང་ཤར་ཡིན་ཕྱིར་སྣང་བ་རྫོགས། །ཞེས་པ་ནས། རང་ལོག་ཡིན་ཕྱིར་འཁོར་འདས་རྫོགས། །རང་གནས་ཡིན་ཕྱིར་རྒྱུད་ལུང་རྫོགས། །རང་རྫོགས་ཡིན་ཕྱིར་དུས་གཅིག་རྫོགས། །ཞེས་སོགས་གསུངས་སོ། །གཉིས་པ་ཐོད་རྒལ་གྱི་ཉམས་ལེན་བཤད་པ་ལ་གཉིས། མདོར་བསྟན། རྒྱས་པར་བཤད་པའོ། །དང་པོ་ནི། ཡང་ཟབ་མན་ངག་གནད་ཀྱི་གདམས་པ་ནི༔ མངོན་སུམ་ལམ་བྱེད་ཐེག་པའི་ཟད་ས་སྟེ༔ རིག་རྩལ་སྐུ་གསུམ་ལམ་དུ་སྣང་བའི་ཕྱིར༔ ཕྱི་དུས་མི་ལྟོས་ད་ལྟར་གྲོལ་བའི་ཐབས༔ ཞེས་གསུངས་ཏེ།

ཐེག་དགུ་འོག་མ་རྣམས་ལས་ཆེས་ཟབ་པའི་ཁྲེགས་ཆོད་ཀྱི་གདམས་པ་ལའང་རིག་པ་ལུས་ལ་གནས་ཀྱང་དེ་མངོན་ཏུ་སྟོན་པའི་གནད་མེད་པས་འདིར་དེ་ལས་ཀྱང་ཡང་ཟབ་ཀྱི་མན་ངག་སྟེ་གདམས་པའི་དོན་ལ་བློས་བརྟགས་ཀྱི་ཟབ་མི་ཟབ་བྱ་བའི་གླགས་མི་རྙེད་པས་གནད་ཀྱི་གདམས་པ་ཁྱད་པར་བདུན་དང་ལྡན་པ་སྟེ། ཡི་གེ་མེད་པ་ལས། རིག་པའི་རང་བཞིན་ཀུན་ལ་ཁྱབ་ཀྱང་ཆོས་ཀྱི་སྐུ་གདམས་ངག་ལ་ཐུག་གོ །ཞེས་འབྱུང་སྟེ། དེའང་ཕྱི་དབྱིངས་ནམ་མཁའ་སྟོང་པར་ནང་གི་རིག་གདངས་རྡོ་རྗེ་ལུ་གུ་རྒྱུད་མངོན་སུམ་སྟོན་ཅིང་ལམ་དུ་བྱེད་པས་ཡིད་དཔྱོད་རྟོག་པའི་ཤེས་རབ་ལ་རགས་མ་ལུས་པའི་ཕྱིར། རིམ་དགུའི་ཐེག་པའི་ཟད་སའམ་སྐྱེལ་སོར་གྱུར་པ་སྟེ། ཚིག་དང་གོ་བ་ཤེས་རབ་ལ་མི་ལྟོས་པར་དབང་པོས་མཐོང་བ་དང༌། དབང་པོ་རྣོ་བརྟུལ། ལས་བཟང་ངན། ཕོ་མོའི་ཁྱད་པར་སོགས་མེད་པར་རིག་རྩལ་དབྱིངས་ཀྱི་སྣང་ཆར་སྐུ་གསུམ་པོ་ལམ་དུ་སྣང་བ་སྟེ། ངོ་བོ་ཆོས་སྐུའི་རྟགས་སུ་སྐྱེ་མེད་སྤྲོས་པ་དང་བྲལ་བ། རང་བཞིན་ལོངས་སྐུའི་རྟགས་སུ་འོད་གདངས་སྣ་ཚོགས་སུ་སྣང་བ། ཐུགས་རྗེ་སྤྲུལ་པའི་རྟགས་སུ་ཤེས་པ་གསལ་སྟོང་དུ་འཆར་བ་སྟེ། ཆོས་སྐུ་ཀ་དག་ཡིན་པས་དངོས་པོ་འཕོ་འགྱུར་མེད་ལ། ལྷུན་གྲུབ་ལོངས་སྤྲུལ་དུ་སྣང་བས་འབྲས་བུ་ཕྱི་དུས་ལ་མི་ལྟོས་པའི་ཕྱིར་ཚེ་ཕྱི་མའི་དུས་སམ་ཚེ་ལོ་བརྒྱ་པའི་ཡུན་སོགས་ལ་མི་ལྟོས་པར་ད་ལྟ་མཐོང་མ་ཐག་ནས་གྲོལ་བའི་སྣེ་ཟིན་ཅིང༌། བརྩོན་འགྲུས་ཅན་ལོ་གསུམ་མམ་དྲུག་ལ་སོགས་པས་གྲོལ་བའི་ཐབས་འོད་གསལ་སྣང་བ་བཞིའི་ལམ་མཆོག་ཐོད་རྒལ་ཉིད་བཤད་པ་ཡིན་ནོ། །དེ་ལྟར་ཡང་ཐལ་འགྱུར་ལས། རང་རིག་མངོན་སུམ་མཐོང་མེད་པས། །རིམ་དགུའི་འདོད་པས་གྲོལ་བ་མིན། །ཆོས་ཉིད་ཟད་ས་མཐར་ཕྱིན་པས། །སྐུ་གསུམ་ལམ་གྱི་སྣང་བའོ། །ཞེས་སོ། །གཉིས་པ་ལ་གསུམ། སྔོན་འགྲོ་དངོས་གཞི། མཇུག་གི་བྱ་བའོ། །དང་པོ་ལའང་གཉིས། རིག་པའི་སྣ་ཁྲིད་འཁོར་འདས་རུ་ཤན་ཕྱེ་བ་དང༌། གནད་བཞིས་མངོན་སུམ་གྱི་སྣང་བ་ལ་འཇུག་པའོ། །དང་པོ་ནི། རིག་པའི་སྣ་ཁྲིད་སྒོ་གསུམ་རུ་ཤན་དབྱེ༔ ཕྱི་ནང་གསང་བའི་བྱ་བ་དགུ་ཕྲུགས་བཏང་༔ ཞེས་གསུངས་ཏེ། དེའང་གཞུང་གི་ལུགས་སྐྱེས་བུ་སྤྲོས་པ་ཅན་ཐུན་མོང་གི་དྲོད་རྟགས་ལ་དགའ་བས་སྐུ་གསུམ་གྱི་སྣ་ཁྲིད་པ་འབྱུང་བཞིའི་སྒྲ་དོན་ལ་སྦྱང་བར་གསུངས་ཀྱང༌། འདིར་མན་ངག་གི་ལུགས་བརྩོན་འགྲུས་ཅན་བརྟུལ་ཞུགས་ལ་དགའ་བས་རིག་པའི་སྣ་ཁྲིད་པ་འཁོར་འདས་རུ་ཤན་འབྱེད་པའི་སྤྱོད་པ་སྔོན་ཏུ་སྦྱང་བར་བྱ་སྟེ། ཐལ་འགྱུར་ལས། འཁོར་འདས་རུ་ཤན་མ་ཕྱེ་ན། ཁམས་གསུམ་ལུས་ངག་ཡིད་ཀྱིས་ཀྱང༌། །འབྲེལ་པ་ཆོད་པར་མི་འགྱུར་བས། །འཁོར་འདས་རུ་ཤན་དབྱེ་བར་བྱ། །ཞེས་གསུངས་ཤིང་སྒོ་གསུམ་གྱི་རུ་ཤན་སོ་སོར་དབྱེ་བའང་ལུས་ཀྱིས་འགྲོ་བ་རིགས་དྲུག་གི་སྤྱོད་ཚུལ། བདེ་གཤེགས་ཞི་ཁྲོའི་སྐུའི་རྣམ་འགྱུར། ངག་གིས་འགྲོ་དྲུག་སྒྲ་སྐད་ཆོས་སྒྲ་གསང་སྔགས་སོགས། སེམས་ཀྱིས་རིགས་དྲུག་གི་བདེ་སྡུག་བཏང་སྙོམས་སྤྱོད་པ་དང་མི་རྟོག་པའི་ཏིང་ངེ་འཛིན་སོགས་ལ་ངལ་དུབ་ཐང་ཆད་མ་གྱུར་བར་རྟགས་ཐོན་པར་སྦྱངས་ནས་རྣལ་དུ་དབབ། མན་ངག་ལུགས་རྣམས་སུ་ནང་ལྟར་རུ་ཤན་དབྱེ་བ་ལུས་ལ་རིགས་དྲུག་གི་ས་བོན་རྩ་ཡིག་ཚུལ་དུ་གནས་པ་སྔགས་དང་དམིགས་པས་སྦྱངས་བའང་བྱ་བར་གསུངས་ལ། དེས་ལུས་ངག་ཡིད་གསུམ་གྱི་སྡིག་པ་འདག །བར་ཆད་ཞི། མངོན་ཞེན་ལྡོག །སྐུ་གསུང་ཐུགས་རྡོ་རྗེར་འཚང་རྒྱ་བར་བྱེད་པའོ། །དེ་ནས་སྒོ་གསུམ་རེ་རེར་ཡང་ཕྱི་ནང་གསང་བ་གསུམ་རེས་དབྱེ་བའི་བྱ་བ་དགུ་ཕྲུགས་རྣམས་རིང་དུ་བོར་ཞིང་བཏང་བར་བྱ་སྟེ། དེ་ལ་ལུས་ཀྱི་གསུམ་ནི། ཕྱི་འཇིག་རྟེན་འཁྲུལ་པའི་བྱ་བྱེད་དང་རྣམ་གཡེང་ཐམས་ཅད། ནང་ཕྱག་དང་སྐོར་བ་སོགས་དམན་པའི་དགེ་བ་རྣམས། གསང་བ་རྣམ་གཡེང་སྒུལ་བསྐྱོད་ཐམས་ཅད་སྤངས་ཏེ་གཅིག་པུར་འདུག་པའོ། །གཉིས་པ་ངག་གི་གསུམ་ནི། ཕྱི་འཇིག་རྟེན་གྱི་འཁྲུལ་གཏམ་སྣ་ཚོགས། ནང་ཁ་ཏོན་དང་བཟླས་བརྗོད་ལ་སོགས་པ། གསང་བ་སྨྲ་བརྗོད་ཐམས་ཅད་སྤངས་ཏེ་མི་སྨྲ་བར་གནས་པར་བྱའོ། །གསུམ་པ་ཡིད་ཀྱི་གསུམ་ནི། ཕྱི་འཇིག་རྟེན་གྱི་འཁྲུལ་རྟོག་ཐམས་ཅད། ནང་བསྐྱེད་རྫོགས་ཀྱི་སེམས་འཛིན་སྣ་ཚོགས། གསང་བ་རྣམ་རྟོག་གི་འཕྲོ་འདུ་ཐམས་ཅད་སྤངས་ནས་རྟོག་མེད་ཀྱི་ངང་ལ་གནས་པར་བྱ་ཞིང་དེས་ནི་སྒོ་གསུམ་གནས་པ་དང༌། བརྟན་པ་དང༌། གྲོལ་བར་འགྱུར་བ་སྟེ། འདས་རྗེས་ལས། གནས་བརྟན་གྲོལ་བའི་གདིང་ཐོབ་ནས། ཕྱི་ནང་བྱ་བ་ཀུན་བཏང་སྟེ། །ཞེས་གསུངས་པ་ལྟར་རོ། །གཉིས་པ་ནི། ལུས་གནད་སེང་གེ་གླང་ཆེན་དྲང་སྲོང་ཚུལ༔ ངག་གནད་འགྲོ་འོང་རླུང་ནི་དལ་བར་བསླབ༔ ཡིད་གནད་ཡུལ་ལ་མི་གཡོ་རྩེ་གཅིག་གཏད༔ སྒོ་གནད་སྡཽག་ཕབས་ཟུར་གྱིས་གཟིར་བ་ལས༔ ཞེས་གསུངས་ཏེ།

སྒོ་གསུམ་ལ་གནད་བཞིས་བཅུན་ནས་མངོན་སུམ་གྱི་སྣང་བ་ལ་འཇུག་པར་བྱ་སྟེ། བཞི་ནི་ལུས་ངག་ཡིད་སྒོའི་གནད་དོ། །དེ་ལ་དང་པོ་ལུས་ཀྱི་གནད་ནི། ཀློང་གསལ་ལས། དེ་ཡང་ལུས་ནི་སྐུ་གསུམ་ལས། རྒྱུན་དུ་འདའ་བར་མི་བྱའོ། །ཞེས་པ་ལྟར། ཆོས་སྐུའི་བཞུགས་སྟངས་སེང་གེ་ལྟ་བུ་དང༌། ལོངས་སྐུའི་བཞུགས་སྟངས་གླང་ཆེན་ལྟ་བུ་དང༌། སྤྲུལ་སྐུའི་བཞུགས་སྟངས་དྲང་སྲོང་ལྟ་བུ་རྣམས་བྱས་པས་གནས་སྐབས་སུ་དང་པོས་འབྱུང་བ་རང་སར་དག །གཉིས་པས་གཡོ་བྱེད་ཀྱི་རླུང་ཟིན། གསུམ་པས་དྲོད་བསྐྱེད་ཅིང་འབྱུང་བ་སྙོམས་པར་བྱེད། མཐར་ཐུག་སྐུ་གསུམ་དུ་གྲོལ་ཏེ་མྱ་ངན་ལས་འདའ་བར་འགྱུར་རོ། །གཉིས་པ་ངག་གནད་ནི། འདས་རྗེས་ལས། ངག་ནི་བསླབ་བྱའི་རིམ་པ་དང༌། །གནས་པ་བརྟན་ཅིང་ལ་ཡང་བཟླ། །ཞེས་པ་ལྟར་སྨྲ་བ་ཉུང་བ་དང་ཅུང་ཟད་ལས་མི་སྨྲ་བ་དང་བརྡ་ཙམ་ལ་བརྟན་པས་གནས་སྐབས་སུ་འཁྲུལ་པའི་གཏམ་འགགས་པས་ཉོན་མོངས་མི་འཕེལ། མཐར་ཐུག་བརྗོད་མེད་ཀྱི་དོན་ལ་རེག་ཅིང་སངས་རྒྱས་ཀྱི་གསུང་རྡོ་རྗེའི་ཀློང་དུ་མྱ་ངན་ལས་འདའ་བར་འགྱུར་རོ། །ཁྱད་པར་འདས་རྗེས་ལས། རླུང་གནད་ཤིན་ཏུ་དལ་ལ་བསླབ། །ཅེས་གསུངས་པས་རླུང་དལ་བ་མ་བརྟེན་ན། རླུང་གིས་རིག་པ་སྤུར་ནས་མི་ཟིན་པས་ཕྱི་ནང་འགྲོ་འོང་གི་རླུང་ནི་དལ་བར་བསླབ་ཅིང༌། དེའི་ཚུལ་ཡང༌། ཕྱི་ནང་རླུང་ནི་དལ་ཞིང་མཉམ། །ཡིད་ཙམ་ཕྱི་རུ་འདུར་བ་ཡིས། །རླུང་གི་འགྲོ་འོང་ཆད་པར་འགྱུར། །ཞེས་གསུངས་པས། །རླུང་གི་འགྲོ་འོང་ཟད་པས་རྟོག་པའི་འཕྲོ་འདུ་ཟད་དེ་དབྱིངས་རིག་གཡོ་འགུལ་མེད་པར་སྡོད་པའི་དགོས་པ་ཡོད་དོ། །གསུམ་པ་ཡིད་གནད་ནི། ཐལ་འགྱུར་ལས། སེམས་ནི་དབྱིངས་ལ་གཏད་པས་འགྲུབ། །ཅེས་པས་ཡུལ་རྐྱེན་དང་བྲལ་བའི་ཕྱིའི་ནམ་མཁའ་སྟོང་སང་ངེ་བ་དེ་ལ་དབང་པོ་མི་གཡོ་བར་རྩེ་གཅིག་མདུང་ཚུགས་སུ་གཏད་ནས་ནམ་མཁའི་དབུས་སུ་སེམས་ཐིམ་འགྲོ་བ་ལྟ་བུའི་ ཤེས་པས་དྲག་ཏུ་བཅུན་པས་ནང་གི་དབྱིངས་རྣམ་དག་སྒྲོན་མ་རིག་པ་སྟོང་གསལ་དུ་ལྷག་གིས་འཆར་བར་འགྱུར་ཏེ། དེས་གནས་སྐབས་སུ་རིག་པའི་ཡེ་ཤེས་མངོན་སུམ་དུ་མཐོང་ཞིང༌། མཐར་ཐུག་ལྷག་མེད་དུ་འཚང་རྒྱ་བར་འགྱུར་རོ། །བཞི་པ་སྒོའི་གནད་ནི། ཐལ་འགྱུར་ལས། སྒོ་ནི་སྐུ་གསུམ་མིག་གིས་བལྟ། །ཞེས་པ་ལྟར་ཆོས་སྐུའི་གཟིགས་སྟངས་གྱེན་དུ་ལྡོག་ཏེ་གཙུག་ཏོར་གྱི་རྣམ་པར་བལྟ་བ། ལོངས་སྐུའི་གཟིགས་སྟངས་གཡས་གཡོན་དུ་ཟུར་གྱིས་འཁྲིད་དེ་སྨྱུག་མ་བསྲོང་བ་ལྟ་བུ། སྤྲུལ་སྐུའི་གཟིགས་སྟངས་ཕྱེད་བཙུམ་ཅུང་ཟད་ཐུར་ལ་ཕབ་པ་དྲང་སྲོང་བསམ་གཏན་བསྒོམ་པ་ལྟ་བུ་རྣམས་གོང་གི་འདུག་སྟངས་གསུམ་དང་རིམ་པར་སྦྱར་ནས་བྱ་སྟེ། དེ་དག་གིས་ཕྱི་ནང་གི་དབྱིངས་རིག་མཐོང་སྟེ་འཁྲུལ་སྣང་ཞིང་ཁམས་སུ་འཆར་བར་འགྱུར་རོ། །གཉིས་པ་དངོས་གཞི་ལ་ལྔ། ཉམས་སུ་བླང་བྱ་འོད་གསལ་ཡེ་ཤེས་ཀྱི་ཐིག་ལེ་བཤད་པ། དེ་ཇི་ལྟར་ཉམས་སུ་བླངས་ཚུལ་བཤད་པ། དེ་ལྟར་ཉམས་སུ་བླངས་བ་ལ་དངོས་པོ་བཅུ་ཚང་བའི་ཚུལ་གྱིས་ཁྱད་པར་འཕགས་པའི་གནས་བཤད་པ། ཐུན་བཞིའི་མན་ངག་དང་སྦྱར་ཏེ་ཉམས་ལེན་གནད་དུ་བསྣུན་པ། བསྙེན་སྒྲུབ་བཞིར་སྦྱར་བའི་ཚུལ་གྱིས་ཉམས་སུ་བླངས་པའི་འབྲས་བུ་བཤད་པས་དོན་བསྡུ་བའོ།

།དང་པོ་ནི། སྙིང་དབུས་མི་ཤིགས་ཟག་མེད་འོད་གསལ་གདངས༔ རང་བྱུང་གསང་བ་ཤེལ་སྦུག་ལམ་ལས་འཆར༔ རྒྱངས་ཞགས་སྒྲོན་མའི་རྟེན་ལས་ཕྱི་དབྱིངས་སུ༔ སློང་བྱེད་རྐྱེན་བྲལ་འཆར་དང་སྡུད་པའི་དུས༔ དག་པ་དབྱིངས་སྒྲོན་འོད་ལྔའི་མུ་ཁྱུད་དབུས༔ ཐིག་ལེ་སྟོང་སྒྲོན་མཐིང་གསལ་དྭངས་པ་ལ༔ རྡོ་རྗེ་ལུ་གུ་རྒྱུད་ཀྱི་འགྲོ་འོང་ཅན༔ གནད་བཞི་གཟིར་བ་ལས་མངོན་སུམ་གྱི་སྣང་བ་དེ་གཞི་གང་ལས་འཆར་ན་སྙིང་དབུས་མི་ཤིགས་པ་དྭངས་མའི་ཐིག་ལེ་འོད་གསལ་རིག་པའི་ཡེ་ཤེས་ཉིད་བུམ་ནང་གི་མར་མེ་ལྟར་གསལ་བ་ལ་ཟེར་གདངས་སུ་འཆར་ཏེ། ཀློང་གསལ་ལས། རིན་ཆེན་ལུས་ཀྱི་གནས་དེ་ན། །ངོ་བོ་སྟོང་གསལ་སྐུ་རུ་གནས། །རང་བཞིན་གསལ་འཚེར་ཐིག་ལེ་འོད། །ཐུགས་རྗེ་སྣང་སྟོང་སྒྲོན་མར་གནས། །ཞེས་པ་ལྟར། ངོ་བོ་སྐུར་བཞུགས་པས་ཀ་དག་གི་དགོངས་པ་དང་མཐུན་པ་ནི་དོན། རང་བཞིན་འོད་དུ་བསྟན་པས་གསང་སྐོར་ལུས་དཀྱིལ་དང་མཐུན་པ་ནི་བརྡ། ཐུགས་རྗེ་སྒྲོན་མར་སྣང་བས་ཡང་གསང་སྙིང་ཏིག་དང་མཐུན་པ་ནི་རྟགས་སོ། །ལམ་གང་དུ་འཆར་ན། རང་བྱུང་རྡོ་རྗེ་སེམས་དཔའི་གསང་བའི་ལམ་རྩ་ཀ་ཏི་ཤེལ་སྦུག་ཅན་ཞེས་བྱ་བ་སྙིང་ནས་མིག་ཏུ་དར་དཀར་གྱི་སྐུད་པ་ལྟ་བུར་འབྲེལ་བའི་འོད་རྩའི་ལམ་ལས་བརྒྱུད་དེ་འཆར་བས་མིག་གི་དབང་པོ་རྒྱངས་ཞགས་ཆུའི་སྒྲོན་མེའི་རྟེན་ལས་མངོན་སུམ་དུ་སྣང༌། ཡུལ་གང་དུ་འཆར་ན། ཕྱིའི་དབྱིངས་སུ་འཆར་ཏེ་ནམ་མཁའ་སྟོང་པ་མེ་ལོང་དང་འདྲ་བས་སྣང་བའི་གོ་ཕྱེ་ནས། ནང་གི་དབྱིངས་རྣམས་དག་སྒྲོན་མ་བདག་པོའི་བྱད་དང་འདྲ་བར་འཆར་བས་སྤྲིན་དང་བསིལ་བུ་སོགས་རྙོག་པའི་རྡུལ་སླད་བྱེད་ཀྱི་རྐྱེན་དང་བྲལ་བའི་ནམ་མཁའ་དྭངས་ཤིང་གསལ་བ་ཉིད་ལ། སྔ་དྲོ་ནུབ་དང་ཕྱི་དྲོ་ཤར་དུ་བལྟ་བའམ། འོད་གསལ་འཆར་སླ་བའི་ཆེད་དུ་ཉི་མ་འཆར་བ་དང་སྡུད་པའི་དུས་ཀྱི་ཟེར་གཉིས་དང་སྦྱར་ནས་སྔ་དྲོ་ཤར་དང་ཕྱི་དྲོ་ནུབ་ཏུ་བལྟ། ཚུལ་ཇི་ལྟར་འཆར་ན། རྣམ་དག་དབྱིངས་སྒྲོན་ཉིད་ཐོག་མར་སྨིན་མཚམས་ནས་མཐིང་ག་ཁྱབ་པ་ཆེན་པོའི་འོད་ལས་རིམ་གྱིས་མཆེད་ནས་ནམ་མཁའི་འཇའ་ཚོན་ལྟ་བུ་འོད་ལྔའི་མུ་ཁྱུད་ཐིག་ཕྲན་དང་བཅས་པའི་ནང་དུ་ཐིག་ལེ་སྟོང་པའི་སྒྲོན་མ་རྫིང་བུར་རྡོ་བོར་བའི་རི་མོ་ལྟར་འལ་འོལ་ལས་མཐར་ཐིག་ལེ་མཐིང་གསལ་དྭངས་པའི་ནང་དུ་རིག་པ་རྡོ་རྗེ་ལུ་གུ་རྒྱུད་བདག་པོའི་སེམས་དང་འདྲ་བར་འགྲོ་འོང་དལ་བྲེལ་ཅན་མུ་ཏིག་གི་ཕྲེང་བ་ལྟ་བུ་འཆར་བར་འགྱུར་ཏེ། སྒྲོན་མ་འབར་བ་ལས། མིག་གི་རྣམ་ཤེས་དག་པ་ལ། གསལ་བྱེད་འབར་བའི་འོད་ཟེར་ལྔ། །མི་འགྱུར་ཁྱབ་པའི་ཚུལ་དུ་ཡང༌། །མཐིང་གའི་རང་གདངས་ཆེན་པོར་གནས། །འཆར་བྱེད་སྣང་བ་མ་འགགས་པས། །ཕྱི་ཡི་ཡུལ་ལ་རྣམ་པར་སྣང༌། །ཞེས་དང༌། འཆར་ཚུལ་ཡང་སེང་གེ་རྩལ་རྫོགས་ལས། དབྱིངས་ནི་དབྱིངས་ཀྱི་སྒྲོན་མ་ལ། །རིག་པ་ལུ་གུ་རྒྱུད་དུ་གསལ། །དབྱིངས་ནི་འོད་ཀྱི་མུ་ཁྱུད་ལ། །རིག་པ་སྐུ་ལྔའི་སྣང་བར་ཤར། །དབྱིངས་དང་རིག་པ་ཡེ་ཤེས་གསུམ། །འདུ་འབྲལ་མེད་པའི་ཚུལ་དུ་གསལ། །ཞེས་སོ། །ཚུལ་འདིའི་གཞུང་གདམས་རྒྱས་པ་རྣམས་སུ་སྒྲོན་མ་རྣམ་པ་དགུ་དང་དྲུག་དང་བཞིར་གསུངས་པའི་སྔ་མ་ལ་ཕྱི་མ་རྣམས་འདུ་ཞིང་ལམ་དུ་བྱ་བ་དངོས་ནི་སྒྲོན་མ་བཞི་པོ་འདི་དག་ཡིན་པ་དང༌། དགུར་དབྱེ་བ་ལྟར་ན། གནས་པ་གཞིའི་སྒྲོན་མ་ངོ་བོ་རང་བཞིན་ཐུགས་རྗེའི་བདག་ཉིད་སྟོང་གསལ་རིག་པའི་སྙིང་པོ་ཅན་ཀུན་ཁྱབ་ཏུ་བཞུགས་པ་དང༌། ལམ་ལ་ནང་ཙིཏྟ་ཤའི་སྒྲོན་མ་སྙིང་དྭངས་མའི་ཐིག་ལེ་བརྟེན་པའི་གནས་ནས། དཀར་འཇམ་རྩའི་སྒྲོན་མ་ཤེལ་སྦུག་ཅན་སོགས་ཡེ་ཤེས་འོད་ཀྱི་རྩ་ལྔ་ལས་འོད་གསལ་གྱི་སྣང་བ་འབྱུང་བའི་ལམ་བྱས་ཏེ། མིག་རྒྱང་ཞགས་ཆུའི་སྒྲོན་མ་ལའང་འབྱུང་བ་འདུས་པའི་རྒྱངས་ཞགས་མིག་གི་དབང་རྟེན། དབང་པོ་འདུས་པའི་རྒྱང་ཞགས་གཟུགས་སྣང་འཛིན་ནུས་པའི་མིག་ཤེས། ཡེ་ཤེས་འདུས་པའི་རྒྱངས་ཞགས་འོད་རྩའི་སྒོ་དངོས་འཚོགས་པའི་མཐུ་ལས། ཕྱི་རུ་དབྱིངས་རྣམ་དག་གི་སྒྲོན་མ་མཐིང་ག་ཁྱབ་པ་ཆེན་པོ་འོད་ལྔའི་ར་བར་ཐིག་ལེ་སྟོང་པའི་སྒྲོན་མ་ཟླུམ་སྐོར་མུ་ཁྱུད་ཅན་ཐོག་མར་གཉིས་འབྲེལ་སུམ་འབྲེལ་སྲན་མ་ཙམ་པ་ནས་མཐར་གྲངས་ལས་འདས་ཤིང་རྒྱ་ཆེ་བར་འཆར་བ་དང༌། དེ་དག་གི་ཁྱབ་བྱེད་དུ་ཤེས་རབ་རང་བྱུང་གི་སྒྲོན་མ་རང་རིག་ཡེ་ཤེས་ཇེ་གསལ་ཇེ་བརྟན་དུ་སོང་བ་ལས། གྲོལ་ས་བར་དོ་དུས་ཀྱི་སྒྲོན་མར་ཐིམ་ལུགས་བརྒྱད་ཀྱིས་གདིང་ཐོབ་སྟེ། གྲོལ་གཞི་མཐར་ཐུག་འབྲས་བུའི་སྒྲོན་མ་ནང་དབྱིངས་ཀ་དག་གཞོན་ནུ་བུམ་སྐུ་ཁྱད་ཆོས་དྲུག་ལྡན་གྱི་གདངས་རྩལ་ལྷུན་གྲུབ་འཕོ་བ་ཆེན་པོ་རྡོ་རྗེའི་སྐུས་འཁོར་བ་ཇི་སྲིད་དུ་གཞན་དོན་མཛད་པར་གསུངས་སོ།

།གཉིས་པ་ནི། སྟོང་པའི་དབྱིངས་སུ་རིག་པའི་གཟེར་བཅུག་སྟེ༔ བསམ་གྱིས་མི་ཁྱབ་གཟུང་འཛིན་བྲལ་བའི་ངང་༔ ཡིད་མིག་རླུང་གསུམ་རྩེ་གཅིག་མཉམ་བཞག་པས༔ ནང་དུ་ཤེས་རབ་རང་བྱུང་སྒྲོན་མའི་ཉམས༔ སྟོང་གསལ་བསམ་བརྗོད་སྤྲོས་ལས་འདས་པ་འཆར༔ ཅེས་གསུངས་ཏེ། དེ་ལྟ་བུའི་དབྱིངས་རིག་དེ་ལ་གོམས་པར་བྱེད་པའི་ཚུལ་ཡང༌། ཕྱི་ནང་གསང་བའི་ནམ་མཁའ་སྟོང་པའི་དབྱིངས་སུ་སྒོ་གསུམ་གྱི་གནད་གཅུན་ཅིང་མིག་འབྲས་མི་འགུལ་བར་རྡོ་རྗེ་ལུ་གུ་རྒྱུད་ཨར་ལ་གཏད་པས་རིག་པའི་གཟེར་བཅུག་སྟེ་ཡེ་ཤེས་ཀྱི་རང་གདངས་བསམ་གྱིས་མི་ཁྱབ་པའི་དབྱིངས་སྣང་ཤར་བ་ལ་ཕྱི་རུ་གཟུང་ཡུལ་དང་ནང་དུ་འཛིན་པའི་ཤེས་པས་མཐོང་བྱ་མཐོང་བྱེད་ཀྱི་གཉིས་རྟོག་དང་བྲལ་བའི་ངང་དུ། ནང་འཆར་གཞི་སེམས་ཡིད། ཕྱི་འཆར་སྒོ་མིག་དབང༌། བར་སྐྱོད་བྱེད་རླུང་གི་འགྲོ་ལྡོག་གསུམ་པོ་འཇུག་པའི་གནད་ལ་རྩེ་གཅིག་ཏུ་དྲིལ་ནས་མཉམ་པར་བཞག་ཅིང་རང་སོ་བཟུང་བས། ཡུལ་དང་ཡུལ་ཅན་དབྱེར་མེད་དུ་འདྲེས་པས་འོད་གསལ་གྱི་སྣང་བ་སྨིན་མཚམས་ནས་དྲལ་ཏེ་གསལ་འགྲིབ་མེད་པར་འཆར་བ་སོགས་སྣང་བཞིའི་སྣང་ཤེས་ཀྱི་ཉམས་རྣམས་རིམ་གྱིས་སྐྱེ་བ་དང༌། དེ་ལ་བརྟེན་ནས་ནང་དུ་ཤེས་རབ་རང་བྱུང་གི་སྒྲོན་མ་གསལ་བརྟན་གོང་འཕེལ་དུ་འགྲོ་བའི་ཉམས་སྟོང་གསལ་ནམ་མཁའ་དྭངས་པའི་དཀྱིལ་ལྟ་བུ། བློས་བསམ་པ་དང་ངག་གིས་བརྗོད་མི་ནུས་པ་སྤྲོས་པ་ཀུན་ལས་འདས་པ་རང་བབས་ཤུགས་འབྱུང་དུ་འཆར་བར་འགྱུར་རོ། །དེས་གནས་སྐབས་སུ་རིག་པའི་ཡེ་ཤེས་མངོན་སུམ་དུ་གསལ་བས་མ་རིག་པ་དང་བྲལ། ཚེའི་དུས་བྱས་ཀྱང་སྤྲུལ་པའི་སྐུར་གྲོལ། མཐར་ཐུག་སྣང་བཞི་མཐར་ཕྱིན་ནས་ལྷག་མེད་དུ་འགྲུབ་པར་འགྱུར་རོ། །གསུམ་པ་ནི། ཡེ་ནས་ཤར་བའི་དབྱིངས་རིག་རང་བྱུང་ལྷ༔ འབྲལ་མེད་བསྒོམས་པས་སྐུ་གསུམ་རང་དབང་རྫོགས༔ སྔགས་དང་ཕྱག་རྒྱ་ཏིང་འཛིན་རྒྱུན་མི་འཆད༔ མ་བཀོད་དཀྱིལ་འཁོར་སྤྲོ་བསྡུ་བྲལ་བར་ཤར༔ འཇའ་ཟེར་ཐིག་ལེའི་སྒྲུབ་ཅིང་མཆོད་པ་དང་༔ རླུང་སེམས་རང་དེངས་ཕྲིན་ལས་འབྱམས་སུ་ཀླས༔ གནད་ལས་མི་འདའ་དམ་ཚིག་སྡོམ་པའི་ཕུལ༔ ཅེས་གསུངས་ཏེ། ཡེ་གདོད་མ་ནས་ཆོས་ཉིད་ཀྱི་རྒྱན་ཏུ་རང་ཤར་བའི་དབྱིངས་འོད་ལྔའི་ཐིག་ལེར་རིག་པ་རྡོ་རྗེ་ལུ་གུ་རྒྱུད་མ་བཅོས་རང་བྱུང་གི་ལྷ་སྣང་དེ་ཁོ་ན་ཉིད་ལྟ་བའི་རྒྱལ་པོ་སྟེ། དབྱིངས་རིག་འདུ་འབྲལ་མེད་པར་སྒོམ་པའི་སྤྱོད་པས་ཆོས་ཟད་ཆེན་པོར་ལ་དོར་བས་སྐུ་གསུམ་རང་ཆས་ལམ་དུ་སྣང་བའི་དབང་གི་རིམ་པ་རྫོགས་ལ། རྟོག་བཅས་ཀྱི་རླུང་འགྲོ་འོང་ཟད་པའི་རྡོ་རྗེའི་བཟླས་པ་དང༌། སྣང་ཞེན་སྐུ་དང་ཐིག་ལེའི་ཕྱག་རྒྱར་འཆིང་བ་དང༌། སྣང་བཞི་གོང་འཕེལ་གྱི་ཉམས་ལས་གཞན་ཏུ་མི་གཡོ་བའི་ཏིང་ངེ་འཛིན་ཉིན་མཚན་བསུ་སྐྱེལ་རྒྱུན་མི་འཆད་པ་དང༌། བློའི་འདུ་བྱེད་ཀྱིས་མ་བཀོད་པའི་ཐིག་ལེ་ཚོམ་བུའི་དཀྱིལ་འཁོར་སྤྲོ་བསྡུའི་སྤྲོས་པ་དང་བྲལ་བར་རྟག་ཏུ་ཤར་ཅིང༌། རང་སྣང་གི་ཞིང་ཁམས་ཀུན་ཏུ་ཁྱབ་པའི་འཇའ་ཟེར་ཐིག་ལེའི་བཀོད་པའི་རྣམ་འགྱུར་བསམ་ལས་འདས་པས་འཁྲུལ་སྣང་བཙན་ཐབས་སུ་འགོགས་པའི་དོན་སྒྲུབ་ཅིང་དག་པ་རབ་འབྱམས་ཀྱི་གནས་སུ་མཆོད་པ་དང༌། གཞི་སྣང་གི་རྩལ་ལ་ཡིད་དཔྱོད་ཀྱི་འཛིན་པས་འཁྲུལ་པ་ཁ་བརྒྱུད་པའི་རླུང་སེམས་ཟག་མེད་ཡེ་ཤེས་ཀྱི་དབྱིངས་སུ་རང་བཞིན་གྱིས་དེངས་པས་དོན་གཉིས་ཕྲིན་ལས་རོལ་པ་འབྱམས་སུ་ཀླས་ཤིང༌། བསྲུང་མཚམས་མེད་པའི་གནད་དང་གཟུང་འཛིན་རྒྱ་ལས་གྲོལ་བའི་ཕྱལ་བ་ལས་མི་འདའ་བར་ཆོས་ཟད་གཅིག་པུར་སྐྱེལ་བའི་དམ་ཚིག་དང་ལྷུན་གྲུབ་ཆེན་པོའི་སྦུབས་སུ་ཆོས་ཀུན་སྡོམ་པའི་ཕུལ་དུ་ཕྱིན་པའོ། །བཞི་པ་ནི། དགེ་སྦྱོར་སྲང་འཇུག་ཐུན་བཞིའི་མན་ངག་གིས༔ བསྐྱེད་རྫོགས་དབྱེར་མེད་ཁོར་ཡུག་འོད་གསལ་ངང་༔ ཞེས་གསུངས་ཏེ།

དུད་འགྲོ་རྨུ་རྒོད་འདུལ་ཐབས་ལ་མཁས་པས་ལམ་སྲང་དུ་བདེ་བ་རྒྱུར་གཞུག་པ་ལྟར་སེམས་རྟོག་ཁ་ཡན་འཁྲུལ་པའི་ཡུལ་ལ་མི་འཆུགས་པར་དགེ་སྦྱོར་གྱི་ལམ་སྲང་དུ་འཇུག་པའི་ཐབས། ཉིན་མོ་སྣང་བ་རང་རྒྱས་འདེབས་པ། སྲོད་ལ་དབང་པོ་གནས་སུ་བསྡུ་བ། ནམ་གུང་ཤེས་བྱ་བུམ་པར་གཞུག་པ། ཐོ་རངས་ཡེ་ཤེས་རང་གསལ་གདབ་པ་སྟེ་ཉིན་ཞག་གཅིག་ལ་ཐུན་གྱི་ཆ་བཞིར་བགོས་པའི་རྣལ་འབྱོར་ཟབ་མོ་གནད་ཀྱི་མན་ངག་གིས་ཡེངས་འཁྲུལ་མེད་པའི་ཉམས་ལེན་ལ་འབད་བརྩོན་བསྐྱེད་ན་རིང་པོར་མི་ཐོགས་པར་གཞིར་གནས་ཀྱི་བསྐྱེད་རྫོགས་དབྱེར་མེད་ཉིན་མཚན་ཁོར་ཡུག་ཏུ་འོད་གསལ་ཆེན་པོ་གཅིག་གི་ངང་དུ་གནས་པར་འགྱུར་རོ། །ལྔ་པ་ནི། མདོར་ན་སྒོ་གསུམ་སྒོ་ཡུལ་རླུང་རིག་གི༔ གནད་ཀྱི་བསྙེན་པས་ཆོས་ཉིད་རོལ་པའི་རྩལ༔ དབང་པོའི་མངོན་སུམ་སྣང་བ་ཉེ་བསྙེན་ཏེ༔ འོད་དང་ཟེར་ཐིག་སྐུ་ཡི་སྣང་བར་བཅས༔ ཉམས་སྣང་གོང་དུ་འཕེལ་བའི་སྒྲུབ་པ་དང་༔ སྣང་སྲིད་སྐུ་དང་ཞིང་དུ་ཡོངས་བརྡལ་བ༔ རིག་པ་ཚད་ཕེབས་སྒྲུབ་པ་ཆེན་པོ་ཡིས༔ ཆོས་ཟད་བླཽ་འདས་གདོད་མའི་དངོས་གྲུབ་ཐོབ༔ གཞི་ལས་འཕགས་པའི་གཞི་སྣང་ཐིག་ལེར་གྲོལ༔ ཅེས་གསུངས་ཏེ། སྔར་བཤད་པའི་དོན་དེ་དག་མདོར་བསྡུ་ན། ཐབས་སྒོ་གསུམ་འཁྲུལ་འཁོར་གྱིས་གཅུན་པ་དང་སྒོ་མིག་ཡུལ་ཕྱི་དབྱིངས་རླུང་དལ་ཞིང་རིག་པ་ཨར་ལ་གཏད་པའི་གནད་ཀྱི་སྦྱོར་བས་ལྷུན་གྲུབ་ཀྱི་འོད་གསལ་བསྙེན་པས། ཐབས་བྱུང་སྣང་བཞིའི་ཉམས་རིམ་པར་འཆར་ཏེ་ཐོག་མར་ཆོས་ཉིད་ཀ་དག་གི་གཞི་ལས་གཞི་སྣང་དུ་རོལ་པའི་རང་རྩལ་དབང་པོའི་མངོན་སུམ་དུ་སྣང་བ་ནི་ཉེ་བར་བསྙེན་པ་སྟེ། དེའང་དབྱིངས་ཀྱི་རྟགས་སུ་འོད་ཁྱིམ། ཡེ་ཤེས་ཀྱི་རྟགས་སུ་ཐིག་ལེ། སྐུའི་རྟགས་སུ་ལུ་གུ་རྒྱུད། ཐུགས་རྗེའི་རྟགས་རང་གསལ། ངོ་བོའི་རྟགས་མི་རྟོག་པའི་ཡེ་ཤེས་དུས་གསུམ་འཕོ་འགྱུར་མེད་པའི་དགོངས་པ་མཉམ་ཉིད་གཞི་རྫོགས་སུ་གྱུར་པའོ། །དེ་ནས་དབྱིངས་རྀག་སྨིན་མཚམས་དང་བྲལ་ཏེ་དབང་པོའི་མངོན་སུམ་དུ་གསལ་ཞིང༌། དབྱིངས་སྣང་འོད་ཀྱི་རང་བཞིན་དེའང་མ་ངེས་པའི་གཟུགས་དབྱིབས་དུ་མ་དང༌། བཀྲག་ལ་འཚེར་བའི་ཟེར་ཐག །ཐིག་ལེ་ཇེ་གསལ་ཇེ་འཕེལ་དུ་གྱུར་པའི་ནང་དུ་རྡོར་སེམས་ལ་སོགས་པ་ཕྱེད་སྐུའམ་སྐུ་རྐྱང་རེ་ཤར་ནས་འགུལ་འཕྲིག་མེད་པ་ནི་ཉམས་སྣང་གོང་དུ་འཕེལ་བའི་སྒྲུབ་པ་ཡིན་པ་དང༌། དབྱིངས་ཀྱི་སྣང་བས་ཐམས་ཅད་ལ་རྒྱས་ཐེབས་པས་ས་ཆུ་མེ་རླུང་གི་སྣང་བ་རང་དག་སྟེ། འོད་གསལ་ཆེན་པོའི་སྣང་བ་འབྱམས་ཀླས་པའི་དབྱིངས། ཐིག་ལེ་རེ་རེའི་ནང་དུ་རིགས་ལྔ་ཡབ་ཡུམ་གྱི་ཚོམ་བུ་ལྔ་ཚན་ལྔའི་དཀྱིལ་འཁོར་ཚད་མེད་པར་འཆར་ཞིང་སྣང་སྲིད་ཐམས་ཅད་སྐུ་དང་ཞིང་ཁམས་ཀྱི་རང་བཞིན་ཏུ་ཡོངས་སུ་བརྡལ་བ་རིག་པ་སྐུར་སྨིན་པའི་ཚད་ལ་ཕེབས་པས་མ་བསྒོམས་ཀྱང་འགྱུར་བ་མེད་པ་སྒྲུབ་པ་ཆེན་པོའི་གྲུབ་འབྲས། ཕྱི་སྣང་བའི་འཕེལ་ཟད། ནང་སྒྱུ་ལུས་ཀྱི་ཆོས་ཟད། གསང་བ་རྟོག་ཚོགས་ཀྱི་སེམས་ཟད་པས་འཕྲུལ་སྣང་གི་ཆོས་ཐམས་ཅད་རང་ཟད་དེ་སྣང་དང་མི་སྣང་དུ་འཛིན་པའི་བློ་ལས་འདས་ཤིང་ཀ་དག་གདོད་མའི་བཙན་ས་ཟིན་པའི་དངོས་གྲུབ་ཐོབ་པར་འགྱུར་ཏེ། དེའང་གནས་ལུགས་ཐོག་མའི་སྤྱི་གཞི་ལས་འཕགས་པའི་ལྷུན་གྲུབ་ཀྱི་གཞི་སྣང་འགྱུར་བ་མེད་པའི་ཐིག་ལེ་ཆེན་པོར་སྐད་ཅིག་གཅིག་གིས་རྣམ་པར་གྲོལ་ནས། ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་དགོངས་པ་དུས་གསུམ་འཕོ་འགྱུར་མེད་པ་མངོན་ཏུ་འགྱུར་རོ། །དེ་ལྟར་ཡང་ཐལ་འགྱུར་ལས། ཆོས་ཉིད་མངོན་སུམ་སྣང་བ་ཡིས། །ཡིད་དཔྱོད་འཛིན་པའི་མཐའ་ལས་འདས། །གོང་དུ་འཕེལ་བའི་ཉམས་སྣང་གིས། །འཁྲུལ་པའི་སྣང་བ་ནུབ་པར་བྱེད། །རིག་པ་ཚད་ཕེབ་སྣང་བ་ཡིས། །སྐུ་གསུམ་རྟོགས་པའི་ལམ་སྣང་འདས། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་ཆོད། །ཅེས་སོ། །གསུམ་པ་མཇུག་གི་བྱ་བ་ལ་གཉིས། དངོས་དང༌། ཞར་བྱུང་གྲོལ་ཚུལ་བཤད་པའོ།

།དང་པོ་ནི། ལམ་གྱི་ཡན་ལག་མཐའ་རྟེན་མན་ངག་གིས༔ ཉམས་ལེན་གཞི་ཐིངས་གྲོལ་ཚད་མངོན་དུ་འགྱུར༔ ཅེས་གསུངས་ཏེ། འོད་གསལ་སྣང་བཞི་ཉམས་སུ་ལེན་པའི་ལམ་གྱི་ཡན་ལག་ཏུ་གལ་ཆེ་བ་ནི། ཀློང་གསལ་ལས། མཐའ་རྟེན་མན་ངག་རྣམ་པ་བཞི། །གོང་མའི་རྒྱབ་ཏུ་མེད་ཐབས་མེད། །ཅེས་གསུངས་པ་ལྟར། །མི་འགུལ་བ་གསུམ་གྱིས་གཞི་བཅའ་བ། སྡོད་པ་གསུམ་གྱིས་ཚད་བཟུང་བ། ཐོབ་པ་གསུམ་གྱིས་གཟེར་གདབ་པ། གདིང་བཞིའི་གྲོལ་ཚད་བསྟན་པ་རྣམས་ཏེ། །དང་པོ་ནི། ལུས་བཞུགས་སྟངས་གསུམ་ལས་མི་འགུལ་བ་དང༌། མིག་གཟིགས་སྟངས་གསུམ་ལས་མི་འགུལ་བ་དང༌། རིག་པ་འོད་གསལ་ཀྱི་སྣང་བ་མངོན་སུམ་དུ་མཐོང་བ་ལས་མི་འགུལ་བར་བྱའོ། །གཉིས་པ་ནི། དབྱིངས་རིག་བརྟན་པའི་ཚད་དུ་འབྱུང་སྟེ། ཕྱི་སྣང་བ་སྐྱོད་བྱེད་ཀྱི་རླུང་ཟད་པས་དབྱིངས་རིག་འགྲོ་འོང་མེད་པར་སྡོད། །ནང་ཕུང་པོ་སྐྱོད་བྱེད་ཀྱི་རླུང་ཟད་པས་ལུས་གཡོ་འགུལ་མེད་པར་སྡོད། གསང་བ་རྟོག་པ་སྐྱོད་བྱེད་ཀྱི་རླུང་ཟད་པས་རྣམ་རྟོག་འགྱུར་མི་སྲིད་པར་སྡོད་པའོ། །སྐབས་འདིར་ཚད་རྨི་ལམ་གྱིས་བཟུང་བ་དང༌། རྟགས་ལུས་ངག་ཡིད་གསུམ་ལ་འཆར་བ་གཉིས་ཀྱང་འབྱུང་བར་གསུངས་ཤིང༌། ཕྱི་མ་ལ་སྣང་བཞི་རེ་རེར་རྟགས་གསུམ་གསུམ་སྟེ་བཅུ་གཉིས་སུ་དབྱེར་ཡོད་དོ། །གསུམ་པ་ནི། སྐྱེ་བ་དང་འཇུག་པ་དང་རླུང་སེམས་ལ་རང་དབང་ཐོབ་པ་སྟེ། དེའང་ཀ་དག་ཁྲེགས་ཆོད་དུ་གྲོལ་བ་ནམ་མཁའ་དང་མཁའ་འགྲོའི་འཆི་ལུགས། ལྷུན་གྲུབ་ཐོད་རྒལ་དུ་གྲོལ་བ་མེ་ཕུང་དང་རིག་འཛིན་གྱི་འཆི་ལུགས་རྣམས་ཀྱིས་སོ། །བཞི་པ་ལ། ཡར་གྱི་གདིང་གཉིས་ནི། མྱང་འདས་ཀྱི་ཡོན་ཏན་ཐོས་ཀྱང་ཐོབ་ཏུ་རེ་བ་དང༌། མ་ཐོབ་ཀྱིས་དོགས་པ་མེད་དེ། རང་རིག་ལས་གཞན་པའི་སངས་རྒྱས་མེད་པར་རྟོགས་པའི་ཕྱིར་རོ། །མར་གྱི་གདིང་གཉིས་ནི། འཁོར་བའི་སྡུག་བསྔལ་ཐོས་ཀྱང་མི་ལྟུང་དུ་རེ་བ་དང༌། ལྟུང་གིས་དོགས་པ་མེད་དེ། རང་རིག་ཡེ་ནས་འཁྲུལ་པ་མེད་པར་ཤེས་པས་འཁོར་བར་འཁྱམས་མཁན་མ་གྲུབ་པར་ཐག་ཆོད་པའི་ཕྱིར་རོ། །དེ་དག་གི་དགོས་པ་ནི། དང་པོས་རླུང་སེམས་གནད་ལ་ཕེབས་ཏེ་ཉམས་ལེན་གྱི་གཞི་ཐིངས། གཉིས་པ་དྲོད་ཚད་ཀྱིས་མཚམས་ཕྱེད། གསུམ་པས་ཟག་བཅས་མི་སྣང་བའི་འཕོ་ཆེན་རྡོ་རྗེའི་སྐུ་མངོན་ཏུ་འགྱུར། བཞི་པས་མི་ལྡོག་པའི་ཡེ་ཤེས་ཀྱི་ཚད་བཟུང་བར་བྱེད་དོ། །གཉིས་པ་ནི། གལ་ཏེ་ཚེ་འདིར་གྲོལ་བ་མ་ཐོབ་ན༔ འཆི་ཁ་བར་དོར་དབྱིངས་རིག་སྦུབས་སུ་འཇུག༔ ཆོས་ཉིད་བར་དོར་རང་སྣང་རང་ངོར་གྲོལ༔ སྲིད་པ་བར་དོར་སྤྲུལ་སྐུའི་ཞིང་དུ་བགྲོད༔ ཅེས་གསུངས་ཏེ། བརྩོན་འགྲུས་དང་སྐལ་བ་དམན་པས་སྐྱེ་གནས་རང་བཞིན་གྱི་བར་དོའི་ཚེ་དུས་འདིར་གདོད་མའི་ས་ལ་གདོས་བཅས་ཟད་པའི་རྣམ་པར་གྲོལ་བ་མ་ཐོབ་ན། དབང་པོ་རབ་འཆི་ཁ་མའི་བར་དོར་སྔར་ཤེས་པའི་གདམས་ངག་རྣམས་གསལ་བཏབ་སྟེ། འབྱུང་ལྔ་རིམ་གྱིས་ཐིམ་ནས་ནམ་མཁའ་དབྱིངས་རིག་ལ་ཐིམ་པའི་ཚེ་སྲོག་ལྔ་སྙིང་དབུས་རིག་པའི་སྦུབས་སུ་འཇུག་པར་བྱས་པས་རིག་པ་ཉིད་གཞི་ལས་ལྡོག་སྟེ་ཀ་དག་གི་ས་ལ་ཕྱིན་པས་བེམ་རིག་བྲལ་བ་དང་འཚང་རྒྱ་བ་དུས་མཉམ་པ་ཚེས་བཅོ་ལྔའི་ཟླ་བ་ནུབ་པ་དང་ཉི་མའི་སྣང་བ་འཆར་བ་དུས་མཉམ་པ་བཞིན་ནོ། །དབང་པོ་འབྲིང་འཆི་ཀར་ཀ་དག་གི་གྲོལ་སར་མི་སྙོགས་ན་གཞི་ལས་འཕགས་པའི་ཆོས་ཉིད་དུ་སྣང་བའི་བར་དོར་འོད་དང་ཐིག་ལེ་ཞི་ཁྲོའི་ཚོམ་བུ་ཟེར་ཐག་སྒྲ་སྐད་སྣ་ཚོགས་སུ་ཤར་བ་ཐམས་ཅད་རང་སྣང་ལས་གཞན་ཏུ་མེད་པར་ཡིད་ཆེས་ནས་མ་པང་དུ་བུ་འཇུག་པ་ལྟར་ངེས་པའི་ཤེས་པ་བརྟན་པོར་གནས་པས་སྐད་ཅིག་དང་པོར་རང་ངོ་ཤེས། གཉིས་པར་ཤེས་ཐོག་ཏུ་གྲོལ། གསུམ་པར་གྲོལ་ཐོག་ནས་ཀ་དག་གི་དབྱིངས་སུ་ཐིམ་པར་འགྱུར་རོ། །དབང་པོ་ཐ་མ་ཡེ་ཤེས་བཞི་སྦྱོར་གྱི་སྣང་བ་ལ་འཁྲུལ་པས་གཞན་ཏུ་རྟོགས་ན་དེ་དག་ཡལ་མ་ཐག་ཏུ་མིང་གཞི་འདུས་པའི་ཕུང་པོ་བརྫུས་སྐྱེས་ཡིད་ཀྱི་ལུས་སུ་གྲུབ་ནས་འཁྲུལ་སྣང་ཅིའང་སྲིད་པའི་བར་དོ་ལ་འཁྲུལ་པ་རྨི་ལམ་ཙམ་དུ་ཤར་ནའང༌། ཆོས་འདིའི་སྒོ་མཐོང་ནས་ཐེ་ཚོམ་མེད་པའི་མོས་པ་དང་བརྒྱུད་པའི་བླ་མ་རྣམས་ཀྱི་ཐུགས་རྗེའི་སྟོབས་ལས་བར་དོར་རང་ངོ་ཤེས་པའི་ཚེ་རང་བཞིན་སྤྲུལ་པ་སྐུའི་ཞིང་ཡིད་ལ་བྱས་པས་རྨི་ལམ་སད་པའི་ཆ་ཙམ་ལ་དེ་དག་ཏུ་བགྲོད་ཅིང་པདྨོ་ལ་བརྫུས་ཏེ་སྐྱེས། སྲིད་མཐའི་བྱང་ཆུབ་སེམས་དཔར་གྱུར་ཏེ་སྟོན་པ་ལོངས་སྤྱོད་རྫོགས་སྐུ་ལས་ཆོས་ཉན་པས་བདེན་པ་མཐོང་བ་དང་དབང་དང་ལུང་བསྟན་པ་ཐོབ་ནས་གདོད་མའི་ཞིང་དུ་འཚང་རྒྱ་བར་འགྱུར་རོ།

།རྩ་བའི་ས་བཅད་བཞི་པ་གེགས་བསལ་བའི་རིམ་པ་ལ་གསུམ། བསྟན་ བཤད་ བསྡུ་བའོ། །དང་པོ་ནི། དེ་ལྟར་དབང་བཞི་བསྙེན་སྒྲུབ་ཡན་ལག་བཞིའི༔ ལམ་མཆོག་ཕྱི་ནང་གསང་བའི་གེགས་སེལ་ནི༔ ཞེས་གསུངས་ཏེ། དེ་ལྟར་རྒྱུད་སྨིན་པར་བྱེད་པ་དབང་བཞི་དང༌། སྨིན་ནས་གྲོལ་བར་བྱེད་པ་བསྙེན་སྒྲུབ་ཡན་ལག་བཞིའི་ལམ་མཆོག་ལ་ཞུགས་པ་དེའི་ཚེ་ཚོང་པ་ནོར་ཅན་ལ་ཕས་ཀྱི་རྒོལ་བས་གླགས་ལྟ་བ་བཞིན་དུ་ཕྱི་ནང་གསང་བའི་བར་དུ་གཅོད་པ་འབྱུང་སྟེ། སྡུད་པ་ལས། ཐེག་པར་གསར་དུ་ཞུགས་པའི་སེམས་ཅན་བློ་ཆུང་བ། །གང་ཞིག་དཀོན་པའི་རིན་ཆེན་འདི་ནི་མ་རྙེད་པར། །དེ་ལ་བར་ཆད་བྱ་ཕྱིར་བདུད་ནི་སྤྲོ་བར་འགྱུར། །ཅེས་སོ། །དེལ་གེགས་གང་ཞིག་བྱུང་ཡང་དེ་དག་སེལ་བྱེད་ཐབས་ཀྱི་རིམ་པ་ཁས་དྲག་ཅན་གྱི་དཔུང་གི་སྐྱེལ་མ་དང་མཚུངས་པ་སོ་སོའི་གཉེན་པོ་བསྟེན་པའི་ཚུལ་ནི་འདི་ལྟ་བུའོ། །གཉིས་པ་ལ་གཉིས། སྤྱི་དང༌། བྱེ་བྲག་གོ །དང་པོ་ནི། དོན་ལ་བར་དུ་གཅོད་བྱ་གཅོད་བྱེད་ཀུན༔ ཐམས་ཅད་བདེན་མེད་སྦྲུལ་མདུད་བཞིན་གྲོལ་ཕྱིར༔ སྤང་བླང་གཉེན་པོའི་ཕྱོགས་ལས་རིང་འདས་ཀྱང་༔ དང་པོའི་ལས་ཅན་བློ་རྟོག་སྦྱང་བའི་སླད༔ ཅེས་གསུངས་ཏེ། དོན་དམ་བདེན་པའི་རང་ངོ་ལ་བར་དུ་གཅོད་བྱ་བདག་དང་གཅོད་བྱེད་གེགས་ཀུན་དང༌། གཅོད་པའི་ལས་ཐམས་ཅད་བདེན་པར་གྲུབ་པ་རྡུལ་ཙམ་ཡང་མེད་དེ་སྦྲུལ་གྱི་མདུད་པ་བཞིན་གདོད་ནས་རང་བཞིན་གྱིས་གྲོལ་བའི་ཕྱིར། སྤང་བྱ་མི་མཐུན་པའི་ཕྱོགས་དང་བླང་བྱ་མཐུན་པའི་ཕྱོགས་དང་བསྟེན་བྱ་གཉེན་པོའི་ཕྱོགས་ཀུན་ལས་རིང་དུ་འདས་ཀྱང༌། ཀུན་རྫོབ་བདེན་པ་ལ་བསྟེན་པའི་ལམ་ཞུགས་དང་པོའི་ལས་ཅན་བྱིས་བློའི་ཀུན་ཏུ་རྟོག་པའི་འཁྲུལ་འཁོར་སྦྱོང་བའི་སླད་དུ་ཐབས་འདི་དག་བསྟེན་པར་བྱའོ། །གཉིས་པ་ལ་བཞི། ཕྱི་འབྱུང་བ་ལུས་ཀྱི་གེགས་སེལ། ནང་བར་ཆད་བདུད་ཀྱི་གེགས་སེལ། གསང་བ་ཏིང་འཛིན་སེམས་ཀྱི་གེགས་སེལ། ཐུན་མོངས་ཉམས་གྲིབ་རྐྱེན་གྱི་གེགས་སེལ་ལོ། །དང་པོ་རྒྱུ་རྐྱེན་འབྲས་བུར་ལྡན་པའི་ནད་བསལ་ཚུལ་ནི། འབྱུང་བ་ལུས་འཁྲུགས་ནད་ཀྱི་གེགས་སེལ་ནི༔ ཀུན་གཞིའི་བག་ཆགས་བདག་འཛིན་རྒྱུ་ཡིས་བསགས༔ རྣམ་རྟོག་གིས་བསླངས་བཞི་བརྒྱ་རྩ་བཞིའི་ནད༔ ཐམས་ཅད་དུག་ལྔ་དེ་ཡང་རང་གི་སེམས༔ སེམས་ཉིད་སྤྲོས་བྲལ་རྗེན་པའི་རང་ངོ་བསྐྱང་༔ རེ་དོགས་འཁུ་འཕྲིག་བཅད་ལ་གང་དགར་བོར༔ ཧཱུྃ་གིས་བསྡུས་ལ་ཐད་ཀར་ཟུང་རྔུ་དབྱུང་༔ རླུང་རོ་བསལ་ཞིང་ཤེས་པ་རྣལ་དུ་དབབ༔ ཅེས་གསུངས་ཏེ་འབྱུང་བ་བཞི་ལས་གྲུབ་པའི་ལུས་ལ་འབྱུང་བ་ཁོད་མ་སྙོམས་ཏེ་འཁྲུགས་པ་ལས་བྱུང་བའི་ནད་རིགས་རྣམས་ཀྱི་གེགས་སེལ་བའི་ཐབས། གཞི་བག་ཆགས་སྣ་ཚོགས་པའི་ཀུན་གཞིའི་སྟེང་དུ་དུག་གསུམ་བག་ལ་ཉལ་བ་ལ། བདག་ཏུ་འཛིན་པའི་ཉེ་བར་ལེན་ནམ་རྒྱུ་ཡིས་ལས་བསགས་པས་ཉོན་མོངས་ཀུན་ནས་ལྡངས་པའི་རྣམ་རྟོག་གིས་སློང་བའི་རྐྱེན་བྱས་ཏེ། འབྲས་བུ་དུག་གསུམ་རྣམ་པར་གྱུར་པ་ལས་བྱུང་བའི་ཀུན་བརྟགས་གདོན་གཞན་དབང་སྔོན་ལས་ཡོངས་གྲུབ་ཚེ་ལྟར་སྣང་འཕྲལ་གྱི་ནད་བཞི་རེ་རེར་བརྒྱ་རྩ་གཅིག་རེ་སྟེ་བསྡམས་པས་བཞི་བརྒྱ་རྩ་བཞིའི་ནད་དུ་སྨིན་ནས་ལུས་སེམས་ལ་ཟུག་རྔུའི་ཚོར་བས་ཡོངས་སུ་གདུང་བ་ཐམས་ཅད་བཅོས་པའི་ཐབས་ཐ་མལ་བ་ལྟར་མོ་གཏོ་སྨན་དཔྱད་ལ་རེ་ལྟོས་མི་འཆའ་བར་བདག་འཛིན་གྱི་འཁྲི་བ་བཅད་ཅིང་རེ་དོགས་ཀྱི་འཕྲང་བསལ་དགོས་ཏེ། ནད་ཀྱི་རྒྱུ་འདོད་ཆགས་ཀྱིས་རླུང་བསྐྱེད་པས་མཚོན་དུག་ལྔ་ལས་བྱུང༌། དུག་ལྔ་པོ་དེའང་རང་གི་སེམས་འཁྲུལ་པའི་རང་རྩལ་ལས་གུད་ན་མེད་ཅིང༌། སེམས་ཉིད་གདོད་ནས་སྐྱེ་རྒ་ན་འཆིའི་སྤྲོས་པ་དང་བྲལ་བ་ཡིན་པར་ཤེས་ནས། བདག་འཛིན་བློས་བཏང༌། གཉིས་འཛིན་གྱི་རེ་དོགས་བཅད་དེ་རྒྱུ་ལྷན་སྐྱེས་ཀྱི་ནད་རྩད་བཅད་པས་འབྲས་བུ་ཀུན་བརྟགས་ནད་རང་བཞིན་གྱིས་འགགས་པར་འགྱུར་ལ། བཅོས་པའི་ཐབས་རབ་ངང་ལ་བཞག་པ་ནི། ནད་ཟུག་དང་བདག་རྟོག་ལ་སྤང་ལེན་མེད་པར་ཟུང་འཇུག་རིག་སྟོང་རྗེན་པའི་རང་ངོ་རྩེ་གཅིག་ཏུ་བསྐྱངས་པས་རྒྱུ་མ་རིག་པ་རིག་པའི་ཡེ་ཤེས་ཀྱིས་བཅོམ། རྐྱེན་ཉོན་མོངས་དབྱིངས་སུ་ལོག །མཚམས་སྦྱོར་རྣམ་རྟོག་མི་རྟོག་པར་ཐིམ་པར་འགྱུར་ལ། འབྲིང་རོ་སྙོམས་བྱ་བ་ནི། གོང་གི་རྟོགས་པ་མི་ཆུན་ན་མི་ན་བའི་རེ་བ་དང་ན་བའི་དོགས་པའི་འཁུ་འཕྲིག་རྩད་ནས་བཅད་ལ་ལུས་སྣང་བདག་འཛིན་དང་བཅས་པ་ལྟོས་མེད་གང་དགར་ལིང་གིས་བོར། དེས་ཀྱང་མ་སེལ་ན་ཐ་མ་དམིགས་པས་བཅོས་པ་ནི། ཧཱུྃ་གི་སྒྲ་གདངས་རླུང་སེམས་དྲིལ་བས་ནད་ཀུན་གང་ནས་གཟེར་བའི་དམིགས་གཅིག་ཏུ་ཧཱུྃ་ཡིག་གི་རྣམ་པར་བསྡུས་ལ་ཐད་ཀར་གྱི་ལུས་ལས་ཟུག་རྔུ་ཧཱུྃ་གི་རྣམ་པར་ཕྱིར་དབྱུང་བས་ཐག་རིང་པོར་ཡལ་བར་མོས་ལ་རླུང་རོ་ཡང་ཡང་བསལ་ཞིང་ཤེས་པ་ལ་ནའོ་སྙམ་པའྀ་འཛིན་སྟངས་བོར་ལ་རང་བཞིན་བདེ་ལུགས་ཀྱི་རྣལ་དུ་དབབ་པར་བྱའོ།

།གཉིས་པ་ནི། བར་ཆད་བདུད་དང་བགེགས་ཀྱི་གེགས་སེལ་ནི༔ ཕོ་མོ་མ་ནིང་བགེགས་དང་བདུད་ཆེན་པོ༔ ཇི་ལྟར་སྣང་ཡང་དེ་བཞིན་མ་གྲུབ་སྟེ༔ རང་གི་གྲིབ་མ་ཤ་ཟར་འཁྲུལ་པ་བཞིན༔ གསལ་སྟོང་ཟུང་འཇུག་གནས་ལུགས་ཕྱིར་ཤོར་བས༔ གཟུང་འཛིན་རགས་པའི་དབང་གིས་དེ་ལྟར་སྣང་༔ ངར་འཛིན་ཞེན་པས་འཁུ་འཕྲིག་སྣ་ཚོགས་སྐྱེ༔ གཞི་རྩ་བཅད་པས་རྫུན་ཕུག་རང་སར་བརྡིབ༔ སྡུག་བསྔལ་ཀུན་ཞི་ཡིད་བདེ་ཁོངས་ནས་འཆར༔ དེས་ཀྱང་མ་ཆོད་ཕུང་པོ་ཚོགས་སུ་འབུལ༔ བདག་འཛིན་བློས་བཏང་སྙེམས་མེད་གང་དགར་ཉལ༔ རྗེས་ཐོབ་བྱང་ཆུབ་སེམས་བསྐྱེད་སྨོན་ལམ་གདབ༔ ཅེས་གསུངས་ཏེ། ཐར་པ་སྒྲུབ་པ་ལ་བར་ཆད་བྱེད་པའི་བདུད་རིས་ཀྱི་ལྷ་དང་འབྱུང་པོ་བགེགས་རིགས་རྣམས་ཀྱི་གེགས་སེལ་བའི་ཐབས་ནི། སྤྱིའི་བདུད་ཉོན་མོངས་ཕུང་པོ་འཆི་བདག་ལྷའི་བུའི་བདུད་བཞི་དང༌། ལྷ་བདུད་ཀྱི་འཁོར་འཇིག་རྟེན་ཆེན་པོ་བཞི་སོགས་བདུད་རིགས་ཀྱི་ཡི་དྭགས་སུམ་ཅུ་རྩ་དྲུག་གི་འཁོར་དུ་གཏོགས་པ་བསམ་གྱིས་མི་ཁྱབ་པ་རྣམས་དང༌། ཁྱད་པར་གྱི་བདུད་འབྱུང་པོ་ལོག་འདྲེན་སོགས་ཕྱི། རྣམ་རྟོག་ཁུ་འཕྲིག་སོགས་ནང༌། གྲུབ་རྟགས་རློམས་སེམས་སོགས་གསང་བ། རེ་རེ་ལའང་དྲུག་རེ་སྟེ་བཅོ་བརྒྱད་ཀྱི་དབྱེ་བར་མདོ་སྡེ་རིན་པོ་ཆེར་གསུངས་པ་དེ་དག་བསྡུ་ན། ཞེ་སྡང་འདོད་ཆགས་གཏི་མུག་གསུམ་གྱི་རང་རྩལ་ཕོ་མོ་མ་ནིང་གི་རིགས་གྱུར་ལོགས་འདྲེན་གྱི་བགེགས་དང་བར་གཅོད་ཀྱི་བདུད་ཆེན་པོ་རྣམས་སུ་ཤར་བས་དེ་གསུམ་དུ་འདུ་ལ། རྣམ་པ་བཟང་ངན་བྱེད་ལས་ཆོ་འཕྲུལ་ཇི་ལྟར་སྣང་ཡང་དོན་ལ་དེ་བཞིན་དུ་ཅུང་ཟད་ཙམ་ཡང་མ་གྲུབ་སྟེ་གཞི་མེད་པའི་ཕྱིར། དཔེར་ན་རང་གི་གྲིབ་མ་ལ་ཤ་ཟ་སྲིན་པོར་འཕྲུལ་ནས་དངངས་སྐྲག་སྐྱེས་པ་བཞིན་ནོ། །བདུད་བགེགས་ཀྱི་ངོ་བོ་ནི། ཞི་བ་ལྷས། འཇིག་རྟེན་དག་ན་འཚེ་བ་གང་ཡོད་དང༌། །འཇིགས་དང་སྡུག་བསྔལ་ཇི་སྙེད་ཡོད་གྱུར་པ། །དེ་ཀུན་བདག་ཏུ་འཛིན་པ་ལས་བྱུང་ན། །འདྲེ་ཆེན་དེས་ཀོ་བདག་ལ་ཅི་ཞིག་བྱ། །ཞེས་གསུངས་པ་ལྟར་ཐམས་ཅད་ཀྱི་རྩ་བ་ངར་འཛིན་པའི་སེམས་འདི་ཡིན་ལ། དེའང་གསལ་སྟོང་ཟུང་འཇུག་ཏུ་གདོད་ནས་ཡོད་པའི་རང་ངོ་མ་ཤེས་ཏེ་གསལ་ཆ་ཕྱི་རོལ་དུ་ཤོར་བ་ལ་གཟུང་བའི་ཡུལ་དུ་བྱས། དེ་ལ་འཛིན་བྱེད་ཀྱི་ཤེས་པ་སྐྱེས་ནས་བདག་འཛིན་ཇེ་རགས་སུ་གྱུར་པའི་དབང་གིས་གསལ་ཆ་ཞེ་སྡང་སྟོང་ཆ་འདོད་ཆགས་ཟུང་འཇུག་གི་རང་བཞིན་གཏི་མུག་ཏུ་སོང༌། དེ་ལས་ཀྱང་ཉོན་མོངས་པ་བརྒྱད་ཁྲི་བཞི་སྟོང་བྱུང་ཞིང་དེ་དག་གི་རང་མདངས་མེད་སྣང་གློ་བུར་བའི་གཟུགས་བརྙན་མཐའ་ཡས་པ་དེ་ལྟར་སྣང་བ་སྟེ་རང་གི་སེམས་ནི་བདུད་ཅེས་བྱ། །རང་གི་སེམས་ནི་བགེགས་ཡིན་ནོ། །ཞེས་སོ། །འཇུག་པའི་རྒྱུ་མང་ཡང་གཙོ་བོ་ལམ་ལ་བརྩོན་འགྲུས་རྩོམ་པ་ལས་འབྱུང་བར་གསུངས་ཏེ། འཇམ་དཔལ་རྣམ་པར་འཕྲུལ་པའི་མདོ་ལས། བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ནི་བརྩོན་འགྲུས་ལས་འབྱུང་བར་རིག་པར་བྱའོ། །དེ་ཅིའི་ཕྱིར་ཞེ་ན། མི་བརྩོན་པ་ལ་ནི་བདུད་ཀྱིས་ཅི་ཞིག་བྱ་སྟེ་དེ་ཉིད་བདུད་ཡིན་པའི་ཕྱིར་རོ། །ཞེས་སོ། །འཇུག་པའི་ཉེར་ལེན་ནི། ཐོག་མེད་ནས་ངར་འཛིན་པ་ལ་ཞེན་པའི་རྒྱུན་གྱིས་རྐྱེན་ཕྲ་མོ་ལ་བརྟན་ནས་ཁུ་འཕྲིག་སྣ་ཚོགས་པ་སྐྱེ་བས་ནམ་མཁའ་མཛོད་ཀྱིས་ཞུས་པ་ལས། དཔེར་ན་བུག་པ་ཡོད་པ་ལས་རླུང་འཇུག་པ་བཞིན་ཏུ་རྣལ་འབྱོར་པའི་སེམས་ལ་སྐྱོན་གང་དང་གང་ལ་ཡོད་པ་དེ་ལ་བདུད་འཇུག་ཅིང་གླགས་རྙེད་དོ། །དེ་བས་ན་བྱང་ཆུབ་སེམས་དཔའ་ཉོན་མོངས་པའི་སྐྱོན་མེད་པར་བྱའོ། །ཞེས་སོ། །བདུད་ཀྱིས་བྱིན་གྱིས་བརླབས་པའི་རྟགས་དང་སྤྱོད་ཡུལ་བདུད་ཀྱི་ལས་སོགས་རྒྱས་པར་གསུངས་པ་ནི་མདོ་སྡེ་རྣམས་དང་གཞུང་གཞན་ལས་ཤེས་པ་གལ་ཆེའོ། །དེ་དག་སེལ་བའི་ཐབས་རྣལ་འབྱོར་པ་རབ་ཀྱིས་ཕྱི་རོལ་ལྟར་སྣང་བའི་བདུད་བགེགས་དེ་དག་གང་ལས་བྱུང་བའི་གཞི་རྩ་སེམས་ཐོག་ཏུ་བཅད་པས། རང་སེམས་འདྲེར་འཛིན་ལས་ཕྱི་རོལ་ཏུ་བདེན་པར་མ་གྲུབ་པར་ཐག་ཆོད། འདྲེར་འཛིན་ངོ་བོ་ལ་བལྟས་པས་སྐྱེ་འགག་གནས་གསུམ་དང་བྲལ་བར་རྟོགས་ནས་འཁྲུལ་པའི་རྫུན་ཕུག་རང་སར་བརྡིབས་ཏེ་རྣམ་རྟོག་གི་ལམ་སྲང་ཆད་པས་རེ་དོགས་སྡུག་བསྔལ་གྱི་རྒྱུ་འགྲུལ་ཀུན་རྩ་བ་ནས་ཞི་ཞིང་ལྟས་ངན་གཡང་དུ་ཁུག་སྟེ་ཡིད་བདེའི་ཉི་མ་ཁོང་ནས་འཆར་བར་འགྱུར་རོ། །དེས་ཀྱང་ཆོ་འཕྲུལ་མ་ཆོད་པའམ་རྣལ་འབྱོར་པ་འབྲིང་གིས་བདུད་བགེགས་ཆེད་དུ་བཀུག་ལ་ཕུང་པོ་འདོད་ཡོན་གྱི་ཚོགས་སུ་དམིགས་ཏེ་འབུལ། ལུས་གཟན་དུ་བོར་ལ་བདག་གཅེས་འཛིན་བློས་ལིང་གིས་བཏང༌། ཡང་ཁུ་འཕྲིག་གི་སྙེམས་བྱེད་རྟོག་པ་རྡུལ་ཙམ་མེད་པར་ཅི་འོང་བ་ཤོག་སྙམ་དུ་འཇིགས་པའི་དུར་ཁྲོད་དང༌། ལྷ་འདྲེ་དྲག་པོའི་རྒྱུ་སྲང་སོགས་གང་དགའ་བར་ལྟོས་མེད་དུ་ཉལ་བས་ཆོ་འཕྲུལ་གྱི་སློང་རྣམས་ཚར་ཚད་དང་ཆོད་ཚད་དུ་གྱུར་ནས་བར་ཆད་དངོས་གྲུབ་ཀྱི་མཆོག་ཏུ་འགྱུར་རོ། །དེ་དག་གི་རྗེས་ཐོབ་དང་རྣལ་འབྱོར་པ་ཐ་མས་བདུད་བགེགས་ཕ་མར་ཤེས་པས་བྱམས་སྙིང་རྗེ་དྲག་ཏུ་བསྐྱེད་ཅིང་དེ་དག་སངས་རྒྱས་ཀྱི་ས་ལ་འགོད་པའི་ཕྱིར་ལམ་ལ་བརྩོན་པར་འདོད་པའི་བྱང་ཆུབ་ཏུ་སེམས་ལྷག་པར་བསྐྱེད་ལ་བདག་གཞན་བརྗེ་བའི་བཏང་ལེན་དང་ཐེག་པ་ཆེན་པོའི་ཚུལ་དང་མཐུན་པའི་སྨོན་ལམ་རྒྱ་ཆེན་པོ་གདབ་པ་དང༌། གཞན་ཡང་བླ་མ་དཀོན་མཆོག་ལ་སྙིང་ཐག་པ་ནས་བློ་ཁེལ་བའི་དད་གུས་དང༌། བསོད་ནམས་ཀྱི་ཚོགས་རྒྱ་ཆེན་པོ་གསོག་པ་རྣམས་ཀྱིས་ཀྱང་བདུད་བགེགས་ཀྱི་ཉེར་འཚེ་མཐའ་དག་ཞི་བར་འགྱུར་ཏེ། སྡུད་པ་ལས། རྒྱུ་རྣམས་བཞི་ཡིས་བྱང་ཆུབ་སེམས་དཔའ་མཁས་སྟོབས་ལྡན། བདུད་བཞིས་ཐུབ་པར་དཀའ་ཞིང་སྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང༌། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཞེས་པ་ལྟར་རོ། །གསུམ་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། ཁྱད་པར་ཏིང་འཛིན་སེམས་འཁྲུགས་གེགས་སེལ་ནི༔ བྱིང་རྒོད་ཉམས་གསུམ་དོན་ལ་མ་གྲུབ་ཀྱང་༔ རྣམ་པ་མི་འགགས་སྒྱུ་མར་ཤར་བའི་ཚེ༔ ཞེས་གསུངས་ཏེ།

རྣལ་འབྱོར་པ་ལ་ཁྱད་པར་དུ་གཅེས་པ་ཏིང་ངེ་འཛིན་ལ་མཉམ་པར་འཇོག་པའི་ཚེ་ཁམས་འདུས་པ་ལས་སེམས་འཁྲུགས་པའི་གེགས་འབྱུང་བས་དེ་སེལ་བའི་ཐབས་ཤེས་པ་ནི་གལ་ཆེ་སྟེ། གྲུབ་ཐོབ་ལྕེ་སྒོམ་པས། ཉམས་རྟོགས་ཅུང་ཟད་སྐྱེས་གྱུར་ཀྱང༌། །ཤེས་རབ་བློ་གྲོས་ཞན་པ་དག །སོ་མི་ཐུབ་ཅིང་རྐྱེན་གྱིས་འཕྲོག །དེ་ལྟ་བུ་ཡི་གང་ཟག་ལ། །སྐྱོན་དང་གེགས་སེལ་ཤིན་ཏུ་གཅེས། །ཞེས་གསུངས་པ་ལྟར་རོ། །དེའང་ཏིང་ངེ་འཛིན་ལ་མི་མཐུན་པའི་ཉམས་ཀྱི་གེགས་དུ་མ་མཆིས་ཤིང༌། དེ་དག་འབྱུང་བའི་རྒྱུ། སློང་བའི་རྐྱེན། གེགས་སུ་འགྱུར་ཚུལ། ལམ་དུ་བཏང་ལུགས་སོགས་མང་དུ་ཡོད་ཀྱང་མདོར་བསྡུ་ན། སེམས་བྱིང་བ། རྒོད་པ། ཕན་པའི་ཉམས། གནོད་པའི་ཉམས། ཕན་གནོད་མེད་པའི་ཉམས་གསུམ་སྟེ་ལྔར་འདུ་ལ། དེ་དག་དོན་ལ་བདེན་དངོས་རང་མཚན་ཏུ་མ་གྲུབ་ཀྱང་རྐྱེན་ལ་བརྟཻན་ནས་སོ་སོའི་རྣམ་པ་མི་འགགས་པར་གློ་བུར་ལྟར་སྣང་སྒྱུ་མའི་གཟུགས་བརྙན་སེམས་ཀྱི་མེ་ལོང་དུ་ཤར་བའི་ཚེ་འདི་ལྟར་ལམ་དུ་བཏང་བར་བྱའོ། །གཉིས་པ་ལ་གསུམ། བྱིང་བ། རྒོད་པ། ཉམས་ཀྱི་གེགས་སེལ་ལོ། །དང་པོ་ནི། བྱིང་ན་ལུས་ཀྱི་ཆུན་བཙལ་འཁྲུལ་འཁོར་བྱ༔ ལྟ་སྟངས་ནམ་མཁར་གཏད་ཅིང་གསལ་ངར་འདོན༔ ཅེས་གསུངས་ཏེ། འདི་ལ་གསུམ། རིག་པའི་དྭངས་ཆ་མེད་པའི་བྱིང་བ་དང༌། གསལ་ཉམས་ཀྱིས་མ་ཟིན་པའི་རྨུགས་པ་དང༌། གཉིད་དང་འདྲེས་པའི་འཐིབས་པ་སྟེ་གསུམ་ཀར་ལུས་གྲིམས་པར་བསྒྲིམས་ཏེ་ཆ་ཆ་ནས་ཆུན་བཙལ་ལ་འཁྲུལ་འཁོར་སྐབས་སུ་གང་བབ་བྱ། ལྟ་སྟངས་ནམ་མཁར་གཏོད་ཅིང་ཤེས་པ་གསལ་ངར་འདོན། སེམས་སྙིང་ག་སོགས་གནས་གཅིག་ཏུ་རྩེ་གཅིག་མདུང་ཚུགས་སུ་བཟུང་བ་དང་ཟས་བཅུད་ཅན་སྤང་ཞིང་གོས་སྲབ་ཏུ་བཏང་ལ་སྣང་གཡེལ་ཆེ་སར་སྡོད་པ་སོགས་གསེང་བའི་ཐབས་རྣམས་བྱའོ། །གཉིས་པ་ནི། རྒོད་ན་ཁོང་ཀློད་ཤེས་པ་ལྟེ་བར་གཏད༔ ཞེས་གསུངས་ཏེ། འདི་ལའང་གསུམ་ལས། ཤེས་པ་ཡུལ་ལ་འཕྲོ་ཞིང་གནས་མི་བཏུབ་པའི་འཕྲོ་བ། གནས་ཆ་གཏན་ནས་མེད་པར་རྟག་ཏུ་གཡེང་བའི་རྒོད་པ་བཀོལ་ཏུ་མི་བཏུབ་པ་ཡུལ་མ་ངེས་པར་པྲ་ཡས་པའི་འཐོར་བ་རྣམས་དང༌། འགྲོ་བའི་བྱེ་བྲག་སེམས་གནས་པ་སྙམ་བྱེད་པ་ལ་མ་ཚོར་བར་འཕྲོ་བའི་འོག་འགྱུ་དང༌། གནས་པ་ལ་དེར་འཛིན་ཞུགས་པའི་རང་འགྱུས་སོགས་ཡོད་ཅིང༌། ཀུན་ལའང་ལུས་སེམས་ཀྱི་ཁོང་ཀློད་ལ་ཤེས་པ་ལྟེ་བས་མཚོན་དམའ་སར་གཏད། ལྟ་སྟངས་དམའ་བར་སྨད་ཅིང་ཤེས་པ་འཇུར་ལ་མི་འདེབས། ཟས་བཅུད་ཅན་བཟའ་ཞིང་གོས་དྲོ་བ་དང་ཁྱིམ་འཐིབས་སར་སྡོད་པ་སོགས་གནོན་པའི་ཐབས་བྱའོ། །གསུམ་པ་ནི། བདེ་གསལ་མི་རྟོག་ཞེན་མེད་ལམ་དུ་བཏང་༔ རྩུབ་པའི་ཉམས་སྐྱེས་བདེན་མེད་རང་གྲོལ་བསྐྱང་༔ བར་མའི་ཉམས་ཀུན་དགག་སྒྲུབ་མེད་པར་བཞག༔ ཐམས་ཅད་སེམས་ཉིད་གཅིག་པུ་ཡིན་ཤེས་ནས༔ བླང་དོར་མེད་པར་རིག་པའི་ངང་བསྐྱང་ངོ་༔ ཞེས་གསུངས་ཏེ།

ཕན་པའི་ཉམས་ལུས་ཡོད་དུ་མི་ཚོར་ཞིང་སེམས་བདེ་བར་ནུབ་པ་ལྟ་བུའི་བདེ་ཉམས་དང༌། ཁམས་གསུམ་གྱི་སྤྱོད་ཚུལ་མཐོང་སྙམ་བྱེད་པའི་གསལ་ཉམས་དང༌། སྟོང་ཉིད་མཐའ་དབུས་མེད་པ་ནམ་མཁའ་ལྟ་བུའི་མི་རྟོག་པའི་ཉམས་གསུམ་སྐྱེས་པ་དང༌། གཞན་ཡང་ཞེན་ལོག་མོས་གུས་སྙིང་རྗེ་སོགས་གཏིང་ནས་ལྷོངས་པའི་ཚེ་དེའི་རོ་མྱོང་ན་ཉམས་ན་བུན་འདྲ་བ་ཡལ། འཕྲོ་བཅད་ན་འཕེལ་བའི་རྒྱུད་ཆད། རང་ཉིད་གཞན་དབང་དུ་འགྱུར་བའི་ས་བོན་ཐེབས་པ་ཡིན་པས་དེ་ལ་དགའ་རློམས་དང་ཞེན་འཛིན་མེད་པར་ཉམས་ཀྱི་སྣ་མི་བསྐྱིལ་བར་རང་ངོར་བལྟས་ཏེ་མཉམ་པར་བཞག་ལ་ལམ་དུ་བཏང༌། རྩུབ་ཅིང་གནོད་པའི་ཉམས་ན་ཚ་ཟུག་གཟེར་སྙིང་རླུང་ཁམས་འདུས་ལ་སོགས་པ་སྐྱེས་པའི་ཚེ་སེམས་ཞུམས་ནས་དེའི་དབང་དུ་ཤོར་ན་ཐ་མལ་པ་ལས་ལོད་པས་ཐམས་ཅད་བདེན་མེད་སྒྱུ་མར་ཤེས་པ་དང་ཚོར་བ་མི་བདེ་བར་འདུ་ཤེས་པའི་རང་ངོ་ལ་བལྟས་ནས་གཞི་མེད་རྩ་བྲལ་དུ་གྲོལ་བའི་ཉམས་མྱོང་དེ་ཉིད་བསྐྱང་ངོ༌། །ཕན་གནོད་མེད་པ་བར་མའི་ཉམས། ཀུན་གཞི་ལ་འཁོར་འདས་ཀྱི་ས་བོན་བག་ཉལ་དུ་གནས་པ་དང༌། རྡོ་རྗེའི་ལུས་ལ་རྩ་ཡིག་རླུང་ཐིག་ཏུ་གནས་པ་རྣམས་ལུས་གནད་དང་ཏིང་ངེ་འཛིན་གྱིས་གཅུན་ཏེ་བསླངས་ནས་འཁོར་འདས་ཀྱི་ཉམས་སྣང་སྣ་ཚོགས་སུ་འཆར་བའི་ཚེ། རྗེས་སུ་འབྲང་ན་བདུད་འཇུག །བཏང་སྙོམས་བཞག་ན་ལམ་དུ་མི་ལྷོངས་པས་ཇི་ལྟར་བྱུང་བ་དེ་ཀུན་ལ་སྐྱོན་ཏུ་བཟུང་བའི་དགག་པ་དང་ཡོན་ཏན་ཏུ་འཛིན་པའི་བསྒྲུབ་བྱར་མི་བལྟ་བར་ཞེན་འཛིན་མེད་པར་རང་གྲོལ་ཆེན་པོར་བཞག་པས་ལམ་དུ་འགྱུར་ལ། གེགས་ཇི་ལྟ་བུ་ཞིག་བྱུང་ཡང་ཐམས་ཅད་རང་གི་སེམས་ཉིད་གཅིག་པུའི་ཆོ་འཕྲུལ་ཡིན་པར་ཤེས་ནས་བཟང་སྙམ་གྱི་བླང་བྱ་དང་ངན་རྟོག་གིས་དོར་བྱ་མེད་པར་བཟོ་མེད་རིག་པའི་ངང་རང་བབས་སུ་བསྐྱངས་པས་སྐྱོན་རྣམས་ཡོན་ཏན་ཏུ་འགྱུར་ཏེ། མན་ངག་རིན་སྤུངས་ལས། གནས་ལུགས་རྟོགས་པའི་ཐག་ཆོད་ཅིང༌། །ཉམས་མྱོང་རིག་པའི་གཞི་འཛིན་པས། །ཅི་སྣང་ཅི་བྱུང་ཆོས་ཉིད་རྟོགས། །སྐྱོན་རྣམས་ཡོན་ཏན་བསྒྱུར་ཤེས་ཤིང༌། །བར་ཆད་དངོས་གྲུབ་བསྒྱུར་ཤེས་ན། །སྐྱོན་དང་གེགས་ནི་ཅི་བྱུང་ཡང༌། །རྣལ་འབྱོར་ལམ་གྱི་གྲོགས་སུ་ཆེ། །ཞེས་སོ། །བཞི་པ་ལ་གཉིས། ཉམས་གྲིབ་བྱུང་བའི་རྟགས། དེ་སེལ་བའི་ཐབས་སོ། །དང་པོ་ནི། ཐུན་མོང་མོས་གུས་སྙིང་རྗེ་ཤེས་རབ་སོགས༔ ཇི་ལྟར་བསྒོམས་ཀྱང་བོགས་མེད་ལེ་ལོ་དང་༔ ང་རྒྱལ་ཕྲག་དོག་གཏི་མུག་མུན་གཏིབས་ན༔ ཕལ་ཆེར་དམ་ཚིག་ཉམས་ལས་བྱུང་བའི་ཕྱིར༔ ཅེས་གསུངས་ཏེ། ཕྱི་ནང་གསང་བ་ཐུན་མོང་དུ་ཉམས་གྲིབ་ཀྱི་རྐྱེན་ལས་བྱུང་བའི་གེགས་ཀྱིས་བླ་མར་མོས་གུས་དང་སེམས་ཅན་ལ་སྙིང་རྗེ་དང༌། ཟབ་མོ་རྟོགས་པའི་ཤེས་རབ་དང༌། སོགས་ཁོང་ནས་རིམ་གཉིས་ཀྱི་ཏིང་འཛིན་གྱིས་མཚོན་རྒྱུད་ལ་བསྐྱེད་པར་བྱ་བ་གང་ཡང་རུང༌། བརྩོན་འགྲུས་ཆེན་པོས་ཇི་ལྟར་བསྒོམས་ཀྱང་ཡར་བསྐྱེད་ཐོན་པའི་བོགས་མེད་ཅིང་ལེ་ལོ་སྙོམ་ལས་ཀྱི་དབང་དུ་ཤོར་བ་དང༌། མོས་གུས་ཀྱི་འགལ་ཟླ་ང་རྒྱལ། སྙིང་རྗེའི་འགལ་ཟླ་ཕྲག་དོག །ཤེས་རབ་འགལ་ཟླ་གཏི་མུག་མུན་པ་ཤུགས་ཀྱིས་གཏིབས་ཏེ་བསྒོམ་བྱའི་སྣང་བ་སྒྲིབ་པར་བྱེད་པ་ན། སེལ་བའི་ཐབས་ནི་སྤྱིར་གནས་མལ་ཟས་གོས་དམ་ཉམས་རྨེ་ཡུག་ཤན་པ་སོགས་གྲིབ་ཅན་དང་འགྲོགས་ཤིང་བསྟེན་པ་ལས་བྱུང་བས་དེ་དག་སྤང་ཞིང་ཁྲུས་དང་གྲིབ་སེལ་སོགས་ཀྱིས་ཞི་བར་བྱ་དགོས་ཀྱང༌། ཕལ་ཆེར་སྒྲུབ་པ་པོ་རང་ཉིད་རྟོག་པ་རྩིང་བའི་སྐྱོན་གྱིས་དམ་ཚིག་ཉམས་ཆགས་སུ་གྱུར་པ་ལས་བྱུང་བའི་ཕྱིར་དེ་བཤགས་པའི་ཐབས་ལ་འབད་དོ། །གཉིས་པ་ལ་གཉིས། སྤྱི་དང་ཁྱད་པར་གྱི་བཤགས་ཐབས་སོ།

།དང་པོ་ནི། ཉམས་པ་མཐོལ་བཤགས་སླན་ཆད་སྙིང་ནས་བསྡམ༔ ཉམས་དང་མི་འགྲོགས་ཉམས་པའི་ཟས་མི་ཟ༔ གནས་སུ་མི་སྡོད་སྒོ་གསུམ་རྣལ་དུ་དབབ༔ ཅེས་གསུངས་ཏེ། དེའང་གསང་སྔགས་ཀྱི་དམ་ཚིག་ཉམས་པས་ཚེ་འདིར་མི་འདོད་པ་དུ་མ་བསྐྱེད། ལམ་ལ་བར་དུ་བཅད་དེ་རྡོ་རྗེའི་དམྱལ་བར་ཟང་ཐལ་དུ་འགྲོ་བར་གསུངས་པས་ཁེ་ཉེན་ཤིན་ཏུ་ཆེ་བའི་ཕྱིར་ཉམས་པའི་ཉེས་པ་ཕྲ་མོ་ཙམ་བྱུང་ཡང་དེ་མ་ཐག་ཏུ་བཤགས་ཡུལ་བླ་མ་དངོས་སམ་རྩ་གསུམ་རྒྱལ་བ་རབ་འབྱམས་ཡིད་ལ་བྱས་ཏེ་གསང་པོར་སྨྲ་བས་མཐོལ་ཞིང་འགྱོད་པ་དྲག་པོས་བཤགས་ཏེ་སླན་ཆད་དེ་ལྟ་བུ་མི་བགྱིད་པ་སྙིང་ཐག་པ་ནས་བསྡམ། དེའང་ཉེས་པ་གསང་ན་སྡིག་པའི་ས་བོན་དང་གཡོ་སྒྱུའི་ཆུ་ལུད་འཛོམས་པས་ཇེ་འཕེལ་དུ་འགྲོ་ཞིང་མ་སྦས་པར་བསྒྲགས་ན་མི་འཕེལ་ཞིང་སྟོབས་བྲི་བ་དང༌། སྙིང་ནས་གནོང་འགྱོད་ཀྱིས་བཤགས་ན་ལས་ལ་རང་བཞིན་མ་གྲུབ་པས་འདགས་པར་མི་འགྱུར་བ་མེད་ལ། བཤགས་པའི་ཚུལ་སྟོབས་བཞི་དང་ལྡན་པས་བཤགས་ཚིག་རྒྱུད་ལུང་རྣམས་ནས་འབྱུང་བ་གང་རུང་བརྗོད་ལ་འཕྲལ་འཕྲལ་བཤགས་བསྡོམ་བྱ། སྔགས་ཀྱི་དམ་ཚིག་གཉན་དྲགས་པས་གཞན་གྱི་ཉམས་གྲིབ་རང་ལ་འགོ་བའི་གནས་ཡོད་པའི་ཕྱིར་དམ་ཚིག་ཉམས་པའི་མི་དང་ལུང་པ་གཅིག་གི་ཆུ་ལ་བཏུང་མི་རུང་བར་གསུངས་པས་དམ་ཉམས་དང་གནས་གཅིག་ཏུ་སྡོད་པ་སོགས་བཤེས་འདྲིས་སུ་མི་འགྲོགས་ཤིང་ཉམས་པའི་རྒྱུ་ལས་བྱུང་བ་དང་ལག་གིས་སྟེར་བའི་ཟས་ཁམ་གང་ཡང་མི་ཟ། དམ་ཉམས་དངོས་སུ་ཡོད་པའི་གནས་སུ་ལྟ་ཅི་སྨོས་སྡོད་པའི་རྗེས་ཤུལ་དུའང་མི་སྡོད་ཅིང་མདོར་ན་སྒོ་གསུམ་བག་ཡོད་པ་དང་དྲན་ཤེས་ཀྱི་བྱ་ར་བཏང་ལ་རྣལ་དུ་དབབ་པར་བྱའོ། །གཉིས་པ་ལ་གསུམ། རུ་བཞིའི་བཤགས་པ། ཟུང་བཞིའི་སྐོང་བ། བཤགས་པའི་འབྲས་བུའོ། །དང་པོ་ནི། ལྷག་པར་ཉམས་བཤགས་སྐོང་བའི་ཆོ་ག་ནི༔ བླ་མ་ཡི་དམ་མཁའ་འགྲོ་གང་རུང་གི༔ སྒྲུབ་པའི་དཀྱིལ་འཁོར་བཤམ་ཞིང་མཆོད་ཚོགས་བཀྲམ༔ ཏིང་འཛིན་གསལ་བརྟན་བཟླས་པས་ཐུགས་དམ་བསྐུལ༔ ཚོགས་རྟེན་སྤྱན་དྲངས་གུས་པས་ཕྱག་འཚལ་ཞིང་༔ རྡོར་སེམས་སྒོམ་བཟླས་སྨྲེ་བཤགས་གསང་མཐོར་བརྗོད༔ ལྟ་བའི་ངང་གཞག་ཐུན་མོང་ཉེས་པ་མཐོལ༔ ཅེས་གསུངས་ཏེ། སྤྱི་མདོ་དགོངས་པ་འདུས་པ་ལས། ལས་དང་རྫས་དང་འདུན་པ་ཏིང་ངེ་འཛིན་དེ་ཁོ་ན་ཉིད་ཀྱི་སྐོང་བ་ལྔར་གསུངས་པས་མཚོན་སྔ་འགྱུར་གྱི་རྒྱུད་ལུང་མན་ངག་རྣམས་ལས་ལྷག་པར་བསྔགས་པའི་ཉམས་ཆགས་བཤགས་ཤིང་སྐོང་བའི་ཆོ་ག་ཟབ་ཅིང་རྒྱ་ཆེ་བར་གསུངས་པ་རྣམས་ཀྱི་ཡང་བཅུད་ཉིང་ཁུར་དྲིལ་བ་ནི། བླ་མ་ཡི་དམ་མཁའ་འགྲོ་རྩ་བ་གསུམ་གཅིག་ཏུ་འདུས་པའམ་སོ་སོ་བ་གང་རུང་དག་གི་སྒྲུབ་པའི་དཀྱིལ་འཁོར་གཞུང་ལྟར་བཤམ་ཞིང་ཕྱི་ནང་གི་མཆོད་པ་བརྒྱ་རྩ་དང་ཚོགས་ཀྱི་ཡོ་བྱད་གང་འབྱོར་གཙང་དག་མཛེས་པར་བཀྲམ་ལ། བདག་མདུན་གྱི་ཏིང་འཛིན་གསལ་ཞིང་བརྟན་པ་དང་འཕྲཽ་འདུའི་དམིགས་པའི་གཟེར་བཅས་ཛབ྄་ཀྱི་བཟླས་པས་སྔོན་གྱི་ཐུགས་བསྐྱེད་ཀྱི་དམ་བཅའ་གཉན་པོ་བསྐུལ། ཚོགས་གསོག་པའི་རྟེན་དཀྱིལ་འཁོར་པ་དང་སླར་ཡང་མགྲོན་ཐབས་ཀྱི་ལྷ་ནམ་མཁའི་ཁྱོན་གང་བ་སྤྱན་དྲངས་ལ། ལུས་ཀྱི་སྒོ་ནས་གུས་པ་ཆེན་པོས་ལུས་ས་ལ་རྡེབ་པའི་བརྐྱང་ཕྱག་དང་གནས་ལྔ་ས་ལ་འདུད་པའི་འགྲེང་ཕྱག་འཚལ་ཞིང་བརྗོད་མེད་དོན་གྱི་བཤགས་པ་དང་རྒྱལ་བ་ཞི་ཁྲོ་རབ་འབྱམས་ཀྱི་མཚན་བརྗོད། ངག་གི་སྒོ་ནས་ཉམས་ཆགས་སྦྱོང་བའི་ལྷ་གཅིག་སྔགས་གཅིག་ཏུ་གྱུར་པ་བཅོམ་ལྡན་འདས་རྡོ་རྗེ་སེམས་དཔའི་བསྒོམ་བཟླས་ཕྱི་ནང་གསང་བ་ཡང་གསང་གི་རིམ་པ་རྣམས་བྱ་བ་དང་རུ་དྲའི་སྨྲེ་བཤགས་ཀྱིས་མཚོན་སྨྲེ་སྔགས་ཀྱི་སྒོ་ནས་བཤགས་པའི་ཚིག་སྐད་གསང་མཐོན་པོར་བརྗོད། ཡིད་ཀྱི་སྒོ་ནས་ལྟ་བའི་ཀློང་བཤགས་ཀྱིས་གསལ་གདབ་ཅིང་འཁོར་གསུམ་ཡོངས་དག་འདས་ཉམས་ཕྱོགས་ལྷུང་མེད་པའི་ཀ་དག་ཁྱབ་བརྡལ་ཆེན་པོའི་ངང་དུ་མཉམ་པར་བཞག །ཐུན་མོང་དུ་བདེ་གཤེགས་སྤྱི་བཤགས་བརྗོད་ཅིང་སྒོ་གསུམ་གྱི་ཉེས་པ་ཅི་མཆིས་པ་ཐམས་ཅད་གནོང་འགྱོད་དྲག་པོས་མི་འཆབ་པར་མཐོལ་ཞིང་བཤགས་པར་བྱའོ། །དེ་ལྟར་ལུས་ངག་ཡིད་གསུམ་དང་སྒོ་གསུམ་ཐུན་མོང་གི་ཉེས་བཤགས་གཉེན་པོ་སོ་སོ་དང་འབྲེལ་བར་ཀློང་ཆེན་རབ་འབོགས་ཀྱི་བཀོལ་རྒྱུད་དྲི་མེད་བཤགས་པའི་རྒྱལ་པོ་སོགས་ལས་ཆེད་དུ་བསྔགས་པའྀ་བཤགས་ཆེན་རུ་བཞི་བྱ་བ་ནི་དམིགས་སུ་གསལ་བའི་དགོངས་དོན་ནོ། །གཉིས་པ་ནི། ཉེར་སྤྱོད་སྨན་རག་གཏོར་མ་མར་མེ་དང་༔ སྦྱོར་སྒྲོལ་ཟབ་མོའི་ཚོགས་ཀྱིས་དགྱེས་པ་བསྐང་༔ ཞེས་གསུངས་ཏེ།

རང་རྒྱུད་ཀྱི་ཉམས་ཆགས་བཤགས་པས་སྦྱངས་ནས་གཞན་རྒྱུད་ལྟར་སྣང་བའི་རྩ་གསུམ་ལྷ་ཚོགས་རྣམས་ཉམས་པའི་སྐྱོན་གྱིས་ཐུགས་མི་མཉེས་པའི་ཚུལ་དུ་བསྟན་ཅིང་བཀའི་ཆད་པའི་གནས་སུ་གྱུར་པ་སྐོང་བའི་ལས་ཀྱིས་སོར་ཆུད་པར་བྱེད་པ་ལ། སྤྱིར་རྒྱུད་ལུང་རྣམས་ནས་ཕྱི་ཡོ་བྱད་ཚོགས། ནང་ཕུང་པོ་རྟེན། གསང་བ་བྱང་ཆུབ་སེམས་ཀྱིས་སྐོང་བའི་ཚུལ་དང༌། ཁྱད་པར་དོང་སྤྲུགས་ལས་ལྟ་བས་ལ་ཟླ་བའི་ཚུལ་དུ་རྟོགས་ཚིག་གིས་ངོ་བོས་སྐོང་བ་དང༌། སྒོམ་པ་ཏིང་ངེ་འཛིན་གྱིས་གནས་ལུགས་ལས་མི་གཡོ་བའི་ཚུལ་དུ་ཟུང་བཞིས་རང་བཞིན་སྐོང་བ་དང༌། ལྷ་རྟོག་དབྱེར་མེད་ཀྱི་གནས་དག་གནས་བསྒྱུར་དུ་ཤེས་པས་ཐུགས་རྗེའི་ཚུལ་ལ་སྐོང་བར་བྱེད་པ་གསུམ། བདེ་འདུས་སོགས་ལས། མཆོད་པ་ཕུད། དམ་རྫས་མདངས། སྲོག་ཆགས་རྒྱུ། གླིང་བཞི་མདོས། འགྱོད་ཚངས་བཤགས་པའི་སྐོང་བ་སྟེ་སྐོང་བ་ལྔར་གྲགས་པ་སོགས་མང་ཡང་ཐམས་ཅད་ཀྱི་གནད་བསྡུས་པའི་སྙིང་པོ། ཕྱི་ལྟར་ཡེ་ཤེས་ཀྱི་དབང་པོ་ཚིམས་པའི་སླད་དུུ་མེ་ཏོག་སོགས་ཉེ་བར་སྤྱོད་པ་ལྔ་པོ་དངོས་བཤམས་ཀྱི་རྟེན་བྱས་ནས་ཡིད་སྤྲུལ་ནམ་མཁའི་ཁྱོན་ཁེངས་པ་དང་བཀོད་པའི་ཁྱད་པར་རང་བཞིན་གྱིས་གྲུབ་པ་རྣམས་ཀྱིས་མཆོད་ཅིང་སྐོང་བ་དང༌། ནང་ལྟར་ཡིད་དང་ངག་དང་ལུས་དང་དེ་ཁོ་ན་ཉིད་ཀྱི་རྟོག་སྒྲིབ་སྦྱང་བའི་སླད་དུ་རིམ་པ་བཞིན་ཟུང་བཞིའི་སྐོང་བར་གྲགས་པ། བདུད་རྩི་སྨན་དམར་ཆེན་རཀྟ། བ་ལིཾ་གཏོར་མ། སྣང་གསལ་སྒྲོན་མེ་བཞི་པོའང་དམ་ཚིག་གི་རྫས་ཀྱིས་མཚོན་བྱེད་དུ་བྱས་ཏེ་གནས་ལུགས་ཀྱི་རང་བཞིན་གསལ་གདབ་ཅིང་སྐོང་བ་དང༌། གསང་བ་དམ་སྐོང་རྨད་དུ་བྱུང་ཞིང་དངོས་གྲུབ་མཆོག་གི་ཉེ་རྒྱུ་ཏ་ན་སྦྱོར་བ་དང༌། ག་ཎ་སྒྲོལ་བ་ཟུང་དུ་འབྲེལ་པའི་བརྟུལ་ཞུགས་ཟབ་མོ་ཚོགས་ཀྱི་འཁོར་ལོ་དངོས་སམ། རྗེས་མཐུན་ཚོགས་ཀྱི་མཆོད་པ་ཙམ་ལའང་ཕན་ཡོན་ཆེན་པོ་དང་ལྡན་པས་དེ་དག་རྣམས་ཀྱིས་ཐུགས་དགྱེས་པ་ཆེན་པོའི་དམ་ཚིག་ཡོངས་སུ་བསྐང་བར་བྱའོ། །གསུམ་པ་ནི། སྒོ་གསུམ་བྱ་བྱེད་ཉམས་ཆག་ཀུན་ཞི་ཞིང་༔ རྡོ་རྗེ་བཞི་ཡི་ཡེ་ཤེས་མངོན་དུ་འགྱུར༔ ཅེས་གསུངས་ཏེ། བཤགས་སྐོང་དེ་དག་ཚུལ་བཞིན་ཏུ་བྱས་པའི་ཡོན་ཏན་ནི། གནས་སྐབས་སུ་སྒོ་གསུམ་གྱི་རྟོག་སྒྲིབ་དང་དེ་དག་གི་བྱ་བ་དང་བྱེད་པའི་ལས་ལས་གྱུར་པའི་ཉམས་ཆགས་ཅི་མཆིས་པ་ཀུན་ཞི་ཞིང༌། མཐར་ཐུག་སྐུ་གསུང་ཐུགས་ཡེ་ཤེས་རྡོ་རྗེ་བཞི་ཡི་གོ་འཕང་མངོན་ཏུ་བྱེད་པར་འགྱུར་ཏེ་གསང་བ་ཟབ་མོའི་ཐབས་མཐར་ཐུག་པ་ཡིན་པའི་ཕྱིར་རོ། །དེ་ལྟར་ཡང་དྲི་མེད་བཤགས་རྒྱུད་ལས། དཀྱིལ་འཁོར་གྱི་ལྷ་དེ་རྣམས་ཀྱི་མཚན་རྣལ་འབྱོར་ཕོ་མོ་རྣམས་ཀྱིས་ཐོས་པ་ཙམ་གྱིས། རྩ་བ་དང་ཡན་ལག་གི་དམ་ཚིག་ཉམས་ཆགས་ཐམས་ཅད་བསྐངས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་བསམ་གྱིས་མི་ཁྱབ་པ་དང་ལྡན་པར་འགྱུར་ཏེ། ཡི་གེ་འཁོར་ལོ་ཚོགས་ཆེན་གྱི་ས་ལ་ལྷུན་གྱིས་གྲུབ་པར་གྱུར་ཏོ། །ཞེས་པས་མཚོན་ནོ། །གསུམ་པ་དོན་བསྡུ་བ་ནི། གཞན་ཡང་བཟོད་མེད་མོས་གུས་རྩལ་དུ་གཏོན༔ ཕྱོགས་རིས་བྲལ་བའི་སྙིང་རྗེ་བྱང་སེམས་བསྐྱེད༔ ཤེས་རབ་ཟབ་མོས་དོན་གྱི་གནད་གསང་བཙལ༔ ལྟ་བས་ལ་བཟླ་སྤྱོད་པས་ཤན་དབྱེ་བས༔ བདེན་གཉིས་ཕྱོགས་ལྷུང་གེགས་ཆེན་རང་གྲོལ་ནས༔ ལམ་གྱི་ཡོན་ཏན་རྩོལ་མེད་ངང་གིས་འཆར༔ ཅེས་གསུངས་ཏེ། ལམ་གྱི་གེགས་སེལ་བའི་ཐབས་གཞན་ཡང་རྩ་བའི་བླ་མ་ལ་སངས་རྒྱས་དངོས་སུ་མཐོང་བའི་ཡིད་ཆེས་དང་བཀའ་དྲིན་རྗེས་སུ་དྲན་པའི་གདུང་ཤུགས་ཀྱིས་དྲངས་ཏེ་བཟོད་མེད་མཆི་མ་འཁྲུགས་པའི་མོས་གུས་ཁོ་ན་ཉམས་ལེན་གྱི་སྲོག་ཏུ་བཟུང་སྟེ་རྩལ་དུ་འདོན། མཁའ་ཁྱབ་ཀྱི་སེམས་ཅན་རྣམས་ལ་ཕྱོགས་རིས་དང་བྲལ་བའི་བྱམས་པ་དང་སྙིང་རྗེ་ཚད་མེད་པ་བསྒོམ་ཞིང་ཐམས་ཅད་སངས་རྒྱས་ཀྱི་སར་འགོད་པར་འདོད་པའི་བྱང་ཆུབ་ཀྱི་སེམས་རྟག་ཏུ་བསྐྱེད། ཐོས་བསམ་བསྒོམ་པ་ལས་བྱུང་བའི་དྲི་མ་མེད་པའི་ཤེས་རབ་ཟབ་མོས་ཐ་སྙད་སྒྲ་ཚིག་ཙམ་ལ་མི་ཞེན་པར་ཡང་དག་པའི་དོན་གྱི་གནད་གསང་ཚུལ་བཞིན་ཏུ་བཙལ། ཐེག་པ་ཡས་འབུབས་ཀྱི་ལྟ་བས་འཁོར་འདས་ལ་ཟླ་ཞིང་བསྟན་རིམ་མས་འཛེགས་ཀྱི་སྤྱོད་པས་བླང་དོར་ཤན་དབྱེ་བས་ཀུན་རྫོབ་དང་དོན་དམ་པ་གཉིས་ཀྱི་ཕྱོགས་རེ་རེར་ལྷུང་བའི་གེགས་ཆེན་རང་བཞིན་གྱིས་གྲོལ་ནས། ལམ་ཉམས་སུ་བླངས་པའི་དྲོད་རྟགས་ཡོན་ཏན་རྣམས་འབད་རྩོལ་མེད་པར་ངང་གིས་འཆར་བ་ནི་དཔྱིད་དུས་རླན་དྲོད་ཀྱི་རྟེན་འབྲེལ་འཚོགས་པ་ན་རྩི་ཤིང་མེ་ཏོག་རང་བཞིན་གྱིས་རྒྱས་པ་བཞིན་ནོ།

།རྩ་བའི་ས་བཅད་ལྔ་པ་བོགས་འདོན་ལ་གསུམ། མདོར་བསྟན། རྒྱས་བཤད། དོན་བསྡུའོ། །དང་པོ་ནི། དེ་ནས་བོགས་འདོན་ཕྱི་ནང་གསང་བ་ནི༔ ཞེས་གསུངས་ཏེ། དཔེར་ན་ཞིང་གི་ལོ་ཏོག་ལ་འཚེ་བ་སྲུང་བའི་བྱ་བ་གྲུབ་ནས་སྐྱོང་བྲན་དང་རིག་སྔགས་ཀྱི་ཆོ་ག་སོགས་ཡར་སྐྱེད་འབྱུང་བའི་ཐབས་ལ་བརྩོན་པ་ལྟར་ལམ་གྱི་གེགས་བསལ་བ་གྲུབ་པ་དེ་ནས་ཡོན་ཏན་ལ་སྐྱེད་འཕེལ་གྱི་བོགས་འདོན་དགོས་ཤིང་དེལའང་ཕྱི་ནང་གསང་བ་གསུམ་གྱི་རིམ་པར་བསྟན་པ་ནི་འདི་ལྟར་རོ། །གཉིས་པ་ལ་གསུམ། ཕྱིའི། ནང་གི །གསང་བའི་བོགས་འབྱིན་ནོ། །དང་པོ་ལའང་གཉིས། མདོར་བསྟན་རྒྱས་བཤད་དོ། །དང་པོ་ནི། ཕྱི་རོལ་ཡུལ་རྐྱེན་ཅི་དང་ཅི་ཤར་ཡང་༔ ལམ་ཁྱེར་ཤེས་པས་བྱང་ཆུབ་གྲོགས་སུ་འགྱུར༔ ཅེས་གསུངས་ཏེ། ཕྱི་རོལ་དུ་ཆགས་སྡང་གཏི་མུག་སྐྱེད་པའི་ཡུལ་བཟང་ངན་བར་མ་ཅི་དང་ཅི་ལྟ་བུ་ཞིག་ཤར་ཡང་བླང་དོར་བཏང་སྙོམས་ཀྱི་རྟོག་པའི་གཞན་དབང་དུ་མ་ཤོར་བར་རབ་སྐད་ཅིག་དང་པོ། འབྲིང་གཉིས་པ། ཐ་མས་ཀྱང་གསུམ་ཕན་ཆད་ལས་མི་འདའ་བར་ལམ་དུ་ཁྱེར་བའི་ཚུལ་ཤེས་པས་གནད་དུ་བཏང་ན་ཚོགས་དྲུག་གི་ཡུལ་དུ་སྣང་བ་ཐམས་ཅད་ཀྱང་བྱང་ཆུབ་སྒྲུབ་པའི་གྲོགས་སུ་འགྱུར་རོ། །གཉིས་པ་ལ་གཉིས། སྤྱི་དང་བྱེ་བྲག་གོ །དང་པོ་ནི། དགྲ་ལ་བཟོད་པ་བསྒོམ་ཞིང་སྙིང་རྗེ་བསྐྱེད༔ གཉེན་ལ་བདེན་མེད་བསྒོམ་ཞིང་ཞེན་པ་བཅད༔ བར་མ་ཀུན་ལ་བཟང་པོའི་ལས་འབྲེལ་བཞག༔ ཅེས་གསུངས་ཏེ། ཡུལ་རྐྱེན་དེ་དག་ལམ་དུ་ཇི་ལྟར་ཁྱེར་ན་འདུན་པས་བློ་སྦྱོང་བ་དང་ཀུན་རྫོབ་རྟེན་འབྲེལ་དོན་དམ་སྟོང་ཉིད་ཀྱི་ཚུལ་ལ་བརྟེན་ནས་ཏེ། སྤྱིར་སྔོན་ལས་ཤ་འཁོན་གྱིས་འཚེ་བ་དང༌། དྲིན་ལན་ལོག་འཇལ་འཁོར་གྱི་ལོག་སྒྲུབ་སོགས་མི་དང་མི་མིན་གྱི་གནོད་པའི་དགྲ་ཆེ་ཕྲ་གང་ལའང་འཁོན་འཛིན་མི་བྱ་བར་བཟོད་པ་བསྒོམ་ཞིང་དེ་དག་ཚེ་རབས་དུ་མའི་ཕ་མ་ཡིན་ཀྱང་འཁྲུལ་པའི་དབང་གིས་ད་ལྟ་ངོ་མ་ཤེས་པས་ལས་ངན་བསགས་པ་ལ་སླར་ཡང་སྙིང་རྗེ་ཆེན་པོ་བསྐྱེད། གཉེན་ཉེ་འབྲེལ་དང་མཛའ་གྲོགས་ནོར་རྫས་སོགས་ཡིད་དུ་འོང་བ་ཐམས་ཅད་ལ་སྒྱུ་མ་རྨི་ལམ་ལྟ་བུར་བལྟ་བ་བདེན་མེད་ཀྱི་འདུན་པ་དྲག་ཏུ་བསྒོམ་ཞིང་ཞེན་འཁྲིས་ཀྱི་འཛིན་པ་བཅད། ཆགས་སྡང་གཉིས་ཀ་མི་སྐྱེ་བའི་ཡུལ་སྣང་བར་མ་ཀུན་ལའང་བཏང་སྙོམས་སུ་མི་བཞག་པར་མིག་ལམ་དུ་དཀོན་མཆོག་གི་རྟེན་མཐོང་དུ་གཞུག་པ་དང་རྣ་བར་སངས་རྒྱས་ཀྱི་མཚན་དང་གཟུངས་སྔགས་ཟབ་མོ་སྒྲོག་པ་སྣར་ཚོར་གྲོལ་གྱི་བདུག་པ་ལྕེར་མྱོང་གྲོལ་དམ་རྫས་ལུས་ཀྱིས་ཕྱག་བསྐོར་ཡིད་ལ་དད་མོས་སོགས་དགེ་རྩ་སྣ་རེའི་བག་ཆགས་འཇོག་ཏུ་གཞུག་པས་མཚོན་བཟང་པོའི་ལས་ཀྱི་འབྲེལ་པ་ཅི་ཐེབས་སུ་བཞག་གོ །གཉིས་པ་ལ་གཉིས། ཀུན་རྫོབ་དང༌། དོན་དམ་གྱིས་ལམ་དུ་ཁྱེར་ཚུལ་ལོ། །དང་པོ་ལའང་གཉིས། དངོས་དང༌། རྒྱུད་ལ་བསྟེན་ཚུལ་ལོ། །དང་པོ་ནི། ཀུན་ཀྱང་ཀུན་རྫོབ་མི་རྟག་སྒྱུ་མར་བསམ༔ ཅིས་ཀྱང་དགོས་མེད་ཞེ་བཅད་དྲག་ཏུ་བྱ༔ ཞེས་གསུངས་ཏེ།

བཟང་ངན་བར་མས་བསྡུས་པའི་སྣང་བ་ཀུན་ཀྱང་གསོག་དང་གསོབ་དང་སྙིང་པོ་མེད་པས་ཀུན་རྫོབ་དང་སྐད་ཅིག་རེ་རེས་འཕོ་ཞིང་འགྱུར་བས་མི་རྟག་པ་དང་སྣང་ཡང་བདེན་པར་མ་གྲུབ་པས་སྒྱུ་མ་དང་མཚུངས་པར་བསམ་སྟེ། ཏིང་རྒྱལ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ཏེ། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་སོ། །དེས་ན་དམ་པའི་ཆོས་ཉམས་སུ་ལེན་པ་མ་གཏོགས་གཞན་ཅིས་ཀྱང་ཚེ་ཕྱི་མ་ལྟ་ཞོག་འདིར་ཡང་ཕན་པ་སྤུ་ཙམ་མེད་པས་གཏན་ནས་དགོས་པ་མེད་སྙམ་དུ་ཅི་སྣང་ཐམས་ཅད་ལ་དགོས་མེད་ཀྱི་འདུན་པས་ཟིན་པའི་ཞེ་བཅད་དྲག་ཏུ་བྱའོ། །གཉིས་པ་ནི། བདེ་སྡུག་རྐྱེན་ལ་གཏོང་ལེན་གནད་ཀྱིས་བཟུང་༔ གང་བྱུང་ཆོག་ཤེས་ཡིད་བདེ་རྒྱུན་དུ་བསྟེན༔ ཅེས་གསུངས་ཏེ། ཁྱད་པར་ལུས་དང་སེམས་ལ་བདེ་སྡུག་གི་ཚོར་བ་མྱོང་བའི་ཕྱི་ནང་གི་རྐྱེན་ཕྲ་རགས་གང་ལའང་དེའི་རྗེས་སུ་འབྲངས་ནས་རོ་མི་མྱང་བར་བདེ་བར་ཤར་ན་དེའི་རྒྱུ་དགེ་བ་དང་བཅས་པ་མཐའ་ཡས་པར་སྤེལ་ཏེ་སེམས་ཅན་ལ་གཏོང་བ་དང༌། སྡུག་བསྔལ་བྱུང་ན་དེའི་རྒྱུ་སྡིག་པ་དང་བཅས་པ་སེམས་ཅན་ཀུན་ལས་བསྡུས་ནས་རང་ལ་ལེན་པའི་བློ་སྦྱོང་ཟབ་མོའི་གནད་ཀྱིས་བཟུང་ལ་ལམ་དུ་བཏང༌། ཟས་གོས་གནས་མལ་སོགས་ཤུགས་ཀྱིས་འབྱོར་ན་བརྒྱ་ཕྲག་རི་བའི་ཟས་གོས་དང་ཁང་པ་བརྩེགས་པ་སོགས་རབ་བྱུང་ལ་སངས་རྒྱས་ཀྱིས་རྗེས་སུ་གནང་བས་ཞེན་པ་མེད་ན་ཆེད་དུ་སྤང་མི་དགོས་ཤིང༌། མ་འབྱོར་ན་ཕྱགས་དར་ཁྲོད་པའི་གོས་དང་ལུས་འཚོ་ཙམ་གྱིས་ཁ་ཟས་ངན་ངོན་གྱིས་བཏུབས་པས་གང་ལྟར་བྱུང་ཡང་ཆོག་ཤེས་པ་དང༌། རྐྱེན་བཟང་ངན་ལ་དགའ་སྡུག་སྐྱེན་ཅིང་གཅིག་བྱུང་གཉིས་དགོས་ཀྱི་རྟོག་པའི་བཟེ་རེ་མང་ན་འདོད་པའི་ཁོལ་པོར་འཕྱན་ཏེ་ལུས་སེམས་རྣལ་དུ་གནས་པའི་གོ་སྐབས་མི་འབྱུང་བས་ཇི་ལྟར་བྱུང་ཡང་མི་དགའ་བ་མེད་པའི་ཡིད་བདེ་ཁོ་ན་རྒྱུན་ཏུ་བསྟེན་པར་བྱའོ། །གཉིས་པ་དོན་དམ་ལ་གཉིས། མཉམ་བཞག་དང༌། རྗེས་ཐོབ་བོ།

།དང་པོ་ནི། དོན་དམ་སྣང་གྲགས་རྟོག་པའི་ཆོས་རྣམས་ཀུན༔ རང་བཞིན་མ་གྲུབ་བདེན་མེད་ངང་ལ་གཞག༔ ཅེས་གསུངས་ཏེ། ལམ་ཁྱེར་མཐའ་དག་ལ་དངོས་འཛིན་ཨ་འཐས་སུ་ཞེན་ན་གནད་དུ་མི་འགྲོ་སྟེ། སྡུད་པ་ལས། ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་སོ། །དེས་ན་གནས་ལུགས་དོན་དམ་པར་མིག་ཡུལ་དུ་སྣང་བའི་གཟུགས་དང༌། རྣ་བར་གྲགས་པའི་སྒྲ་དང༌། ཡིད་ཡུལ་དུ་རྣམ་པར་རྟོག་པའི་འཁོར་འདས་ཀྱི་ཆོས་རྣམས་ཀུན་ཀྱང་འཁྲུལ་ངོར་སྣང་བ་ཙམ་ལས་མངོན་རྗེས་ཚད་མ་དང་ཡང་དག་པའི་ཤེས་རབ་ཀྱིས་དཔྱད་པའམ་སྒོམ་བྱུང་ཡེ་ཤེས་ཁོང་ནས་ཤར་ན་གདོད་ནས་རང་བཞིན་གྱིས་མ་གྲུབ་པའི་བདེན་མེད་ནམ་མཁའི་གཟུགས་བརྙན་ལྟ་བུ་སྐྱེ་འགག་གནས་གསུམ་དང་བྲལ་བ་ཡིན་པ་ལ་དེ་ལྟར་ཤེས་ནས་འཁྲུལ་འཛིན་རང་ངོར་བལྟས་ནས་མི་རྟོག་པའི་ངང་ལ་མཉམ་པར་བཞག་པ་གལ་ཆེ་སྟེ། སྡུད་པ་ལས། གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིགས་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་ལའང་ཅུང་ཟད་མི་གནས་དེ་དང་འདྲ། །ཞེས་པ་ལྟར་ལམ་ཁྱེར་རྣམས་ཀྱི་ཕུལ་དུ་གྱུར་པའོ། །གཉིས་པ་ནི། རྗེས་ཐོབ་རྨི་ལམ་སྒྱུ་མའི་དཔེ་བརྒྱད་དང་༔ བསོད་ནམས་ཚོགས་ཆེན་ཞེན་མེད་ལམ་དུ་ཁྱེར༔ འཁོར་བའི་ཆོས་ཀུན་མ་དག་རྟེན་འབྲེལ་ཏེ༔ མྱ་ངན་འདས་པའང་དག་པའི་རྟེན་འབྱུང་ཙམ༔ དེ་ཕྱིར་ལམ་གྱི་སྣང་བ་ཐམས་ཅད་ཀུན༔ རྒྱུ་རྐྱེན་རྟེན་འབྲེལ་ལེགས་པའི་ཕྱོགས་སུ་བསྒྲིག༔ ཅེས་གསུངས་ཏེ། མཉམ་བཞག་ལས་ལྡང་བའི་རྗེས་ཐོབ་ཏུའང་སྣང་གྲགས་ཀྱི་ཆོས་ཐམས་ཅད་ལ་བདེན་དངོས་སུ་མི་ཞེན་པར། ཕྱི་ཡུལ་གྱི་སྣང་བ་ཐམས་ཅད་མེད་བཞིན་འཁྲུལ་ངོར་སྣང་བ་རྨི་ལམ་ལྟ་བུ། རྒྱུ་རྐྱེན་རྟེན་འབྲེལ་ཚོགས་པ་ལས་གློ་བུར་དུ་སྣང་བ་སྒྱུ་མ་ལྟ་བུ། །མེད་པ་ལ་ཡོད་པར་སྣང་བ་མིག་ཡོར་ལྟ་བུ། སྣང་བཞིན་བདེན་པར་མ་གྲུབ་པ་སྨིག་རྒྱུ་ལྟ་བུ། ཕྱི་ནང་གང་ལའང་མེད་བཞིན་སྣང་བ་བྲག་ཆ་ལྟ་བུ། རྟེན་དང་བརྟེན་པར་སྣང་ཡང་དོན་ལ་མེད་པ་དྲི་ཟའི་གྲོང་ཁྱེར་ལྟ་བུ། སྣང་ལ་རང་བཞིན་མ་གྲུབ་པ་མེ་ལོང་ནང་གི་གཟུགས་བརྙན་ལྟ་བུ། མེད་སྣང་ཅིར་ཡང་འཆར་བ་སྤྲུལ་པ་ལྟ་བུ་སྟེ་བདེན་མེད་ཀྱི་དཔེ་བརྒྱད་དང་མཚུངས་པར་བལྟ་ཞིང་སྒོ་གསུམ་གྱིས་ཇི་ལྟར་ནུས་ཤིང་འབྱོར་པས་རྣམ་པར་དཀར་བའི་ལས་ཕྱོགས་རེ་བ་མ་ཡིན་པར་བསོད་ནམས་ཀྱི་སྒོ་མཐའ་ཡས་པར་འཇུག་བཟོད་པའི་ཚོགས་ཆེན་པོ་བསགས་ཤིང་དེ་ལའང་ཞེན་མེད་སྒྱུ་མ་ལྟ་བུར་ཤེས་པ་དང་འཁོར་གསུམ་ཡོངས་དག་གི་ལྟ་བས་ལམ་དུ་ཁྱེར། ཕུང་ཁམས་སྐྱེ་མཆེད་ཀྱིས་བསྡུས་པའི་འཁོར་བའི་ཆོས་ཀུན་ཉོན་མོངས་པ་ཐམས་ཅད་གནས་ལུགས་བདེ་གཤེགས་སྙིང་པོ་ཉིད་ལྷན་སྐྱེས་ཀྱི་མ་རིག་པ་ལ་བརྟེན་ནས་འདུ་བྱེད་འབྱུང་བ་སོགས་གློ་བུར་གྱི་དྲི་མས་རྙོགས་ཤིང་མ་དག་པའི་རྒྱུ་དང་རྐྱེན་གྱིས་མངོན་པར་འདུ་བྱས་པའི་རྟེན་འབྲེལ་ཡན་ལག་བཅུ་གཉིས་ལུགས་འབྱུང་དུ་འཁོར་བ་སྟེ། མ་རིག་པ་དང་སྲེད་ལེན་ཏེ་ཉོན་མོངས་པ་གསུམ་གྱིས་འདུ་བྱེད་དང་སྲིད་པའི་ལས་གཉིས་བྱས་པ་ལས། རྣམ་ཤེས་མིང་གཟུགས་སྐྱེ་མཆེད་དྲུག་རེག་ཚོར་སྐྱེ་བ་རྒ་ཤི་བཅས་སྐྱེ་བའི་ཀུན་ནས་ཉོན་མོངས་པའི་གཞི་བདུན་བྱུང་ཞིང་དེ་དག་ལས་ཀྱང་ཉོན་མོངས་གསུམ་འབྱུང་བས་བྱ་དང་སྒོ་ང་ལྟར་ཕན་ཚུན་ཏུ་འཁོར་བ་སྟེ། དབུ་མ་རྟེན་འབྲེལ་སྙིང་པོར། གསུམ་པོ་དག་ལས་གཉིས་འབྱུང་སྟེ། །གཉིས་ལས་བདུན་འབྱུང་བདུན་ལས་ཀྱང༌། །གསུམ་འབྱུང་སྲིད་པའི་འཁོར་ལོ་དེ། །ཉིད་ནི་ཡང་དང་ཡང་དུ་འཁོར། །ཅེས་པ་ལྟར་རོ། །སྲིད་པའི་མྱ་ངན་ལས་རིང་དུ་འདས་པ་ཞི་བ་ཐར་པ་དམ་པའང་སྐྱེ་བ་འགགས་ན་རྒ་ཤི་འགག །སྲིད་པ་འགགས་ན་སྐྱེ་བ་འགག་པ་སོགས་ཡན་ལག་བཅུ་གཉིས་ལུགས་ལས་ལྡོག་ཅིང་མ་རིག་པ་ཕུག་རྡིབ་པས་དྲི་མ་དེ་ཉིད་རྣམ་པར་བྱང་ཞིང་དག་པའི་རྟེན་ཅིང་འབྲེལ་འབྱུང་ཙམ་ཡིན་ལ། དོན་དམ་རང་བཞིན་འོད་གསལ་བསྐྱེད་བྱ་སྐྱེད་བྱེད་ཀྱི་རྟེན་འབྲེལ་ལས་འདས་ཀྱང་རྣམ་པའི་འདོགས་ཆ་ཙམ་དུ་གཞི་དུས་སྲིད་རྩ་ཡན་ལག་བཅུ་གཉིས། ལམ་དུས་སུ་བདེན་དོན་ཡན་ལག་བཅུ་གཉིས། འབྲས་བུས་དག་པ་རྣམ་པ་བཅུ་གཉིས་ཀྱི་ཚུལ་དུ་འཆར་བ་སྟེ། མཚན་བརྗོད་ལས། ཡན་ལག་བཅུ་གཉིས་སྲིད་རྩ་བཏོན། །དག་པ་རྣམ་པ་བཅུ་གཉིས་འཆང༌། །བདེན་བཞིའི་ཚུལ་གྱི་རྣམ་པ་ཅན། །ཅེས་སོ། །མདོར་ན་འཁོར་འདས་ལམ་གསུམ་གྱི་ཆོས་ཐམས་ཅད་རྟེན་ཅིང་འབྲེལ་འབྱུང་གི་སྣང་བ་ཙམ་ཡིན་ཅིང་དེའང་རང་བཞིན་སྟོང་པ་ཉིད་ལས་བདེན་དངོས་སུ་གྲུབ་པ་མེད་པས། འཕགས་པ་ཀླུས། གང་ཕྱིར་རྟེན་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ཏེ། །དེ་ཕྱིར་སྟོང་པ་མ་ཡིན་པའི། །ཆོས་འགའ་ཡོད་པ་མ་ཡིན་ནོ། ཞེས་སོ། །རྒྱུ་མཚན་དེ་དག་གི་ཕྱིར་ལམ་གྱི་སྣང་བ་ཐམས་ཅད་ཀུན་ཀྱང་རྟེན་འབྲེལ་ལ་རགས་ལུས་པས་ཐར་པར་འདོད་པ་རྣམས་ཀྱིས་ཐོག་མར་ཆོས་སྒོར་ཞུགས་པའི་འདུན་པ་དང་བླ་མ་བསྟེན་པ་ནས་བརྩམས། ཡང་དག་པའི་འབྲས་བུ་མངོན་ཏུ་མ་བྱས་ཀྱི་བར་དུ་དམ་ཆོས་སྒྲུབ་པའི་རྒྱུ་དང་དེའི་གྲོགས་སུ་འགྱུར་བའི་རྐྱེན་གྱི་རྟེན་འབྲེལ་ཐམས་ཅད་ལེགས་པའི་ཕྱོགས་འབའ་ཞིག་ཏུ་བསྒྲིགས་པས་འཕྲལ་དང་ཡུན་ཏུ་དོན་གཉིས་རླབས་པོ་ཆེ་འགྲུབ་པར་འགྱུར་ཏེ། བཤེས་སྤྲིང་ལས། རྟེན་ཅིང་འབྲེལ་བར་འབྱུང་འདི་སངས་རྒྱས་ཀྱི། །གསུང་གི་མཛོད་ཀྱི་གཅེས་པ་ཟབ་མོ་སྟེ། །གང་གིས་འདི་ནི་ཡང་དག་མཐོང་བ་དེས། །ཆོས་མཐོང་དེ་ཡིས་དེ་བཞིན་གཤེགས་པ་མཐོང༌། ཞེས་སོ། །གཉིས་པ་ནང་བསྐྱེད་རྫོགས་ཀྱི་བོགས་འདོན་ལ་གཉིས། བསྐྱེད་པའི་དང༌། རྫོགས་རིམ་ཀྱི་བོགས་འདོན་ནོ། །དང་པོ་ལ་གཉིས། སྤྱི་དང་བྱེ་བྲག་གོ། དང་པོ་ནི། ནང་དུ་བསྐྱེད་རིམ་སྣང་སྟོང་ཆུ་ཟླ་དང་༔ གང་སྣང་ལྷ་དང་དེ་ཡང་རང་གི་སེམས༔ སེམས་དང་ལྷ་སྐུ་རོ་མཉམ་སྣང་སྲིད་ཀུན༔ ལྷ་སྐུར་གཞིར་བཞེངས་ཐུག་ཕྲད་ཏིང་འཛིན་སྤེལ༔ ཅེས་གསུངས་ཏེ། ནང་དུ་རིམ་པ་གཉིས་ཀྱི་ཏིང་ངེ་འཛིན་ལ་རྩལ་སྦྱོང་ཞིང་བོགས་འདོན་པའི་ཚུལ་ཡང༌། ཐོག་མར་ཀུན་བརྟགས་ཀྱི་བསྐྱེད་རིམ་ཇི་ལྟ་བུ་བསྒོམ་ཡང་སྣང་ལ་རང་བཞིན་མ་གྲུབ་པ་སྟོང་པའི་གཟུགས་བརྙན་ཆུའི་ཟླ་བ་ལྟ་བུར་བསྒོམ་པ་ཟབ་པའི་ཚུལ་དང༌། སྣོད་དང་བཅུད་ཀྱི་རྣམ་པ་གང་ཞིག་སྣང་བ་དེ་ཐམས་ཅད་ཡི་དམ་ལྷའི་རྣམ་པར་བསྒོམ་པས་རྒྱ་ཆེ་བ་ལ་འཇུག་པ་དང༌། དེའང་རང་གི་སེམས་ཀྱི་རོལ་རྩལ་ལས་ལོགས་སུ་གྲུབ་པ་མེད་པས་སྒོམ་མཁན་སེམས་དང་བསྒོམ་བྱའི་ལྷ་སྐུ་གཉིས་དོན་དམ་ཆོས་ཉིད་དུ་རོ་མཉམ་པར་ཤེས་པ་དང༌། སྣང་ཞིང་སྲིད་པས་བསྡུས་པའི་འཇིག་རྟེན་ཀུན་ཀྱང་རང་བྱུང་ཡེ་ཤེས་ལྷའི་སྐུ་རུ་གདོད་ནས་གཞི་ཐོག་ཏུ་བཞེངས་ཤིང་རྫོགས་པ་ཡོངས་གྲུབ་དོན་དམ་པའི་བསྐྱེད་ཚུལ་དང༌། ཚོགས་དྲུག་གི་ཡུལ་དུ་རྟོག་པའི་རྒྱུ་བ་གང་བྱུང་ཡང་གློ་བུར་ཐུགས་ཕྲད་དེ་མ་ཐག་པར་ལྷའི་རང་བཞིན་ཁོ་ནར་ཤེས་པའི་ཏིང་འཛིན་གྱི་རོལ་མོ་མཐའ་ཡས་པར་སྤེལ་བ་སྟེ་རྣམ་པ་ལྔ་ཡིས་བསྐྱེད་རིམ་སྤྱིའི་ཡོན་ཏན་གྱི་བོགས་དབྱུང་ངོ༌། །གཉིས་པ་ལ་གཉིས། བསྐྱེད་པའི་རྩལ་སྦྱོང་བ་དང་དེ་ཉིད་དག་རྫོགས་སྨིན་པའི་ཚུལ་གྱིས་ཉམས་སུ་བླང་བའོ།

།དང་པོ་ནི། བྲིས་སྐུ་མེ་ལོང་གཟུགས་བརྙན་འཆར་བ་ཉིད༔ ཆུ་སྣོད་དྭངས་པར་འཕོས་ལ་རྟེན་བྱས་ཏེ༔ ཡིད་མིག་རླུང་གསུམ་གཏད་པའི་གསལ་སྣང་དང་༔ མཚན་དུས་རྨི་ལམ་ལྷ་སྐུར་ལྡང་ལ་བསླབ༔ ཅེས་གསུངས་ཏེ། ཉིན་མོའི་དུས་སུ་ལྷ་བཟོ་མཁས་པས་བྲིས་པའི་ཡི་དམ་གྱི་སྐུ་མཚན་ཉིད་དང་ལྡན་པའམ་ཤེལ་ལམ་མེ་ལོང་གི་གཟུགས་བརྙན་བཀྲག་མདངས་ཁྱད་དུ་མཚར་བ་ཉིད་རང་གི་རྒྱབ་ངོས་ལྟ་བུར་བཞག །མདུན་ཏུ་ཆུའི་སྣོད་དྭངས་ཤིང་གཡོ་བ་མེད་པར་དེའི་གཟུགས་བརྙན་འཕོས་པ་ལ་རྟེན་བྱས་ཏེ་ཡིད་མིག་རླུང་གསུམ་པོ་དྲིལ་ལ་རྩེ་གཅིག་ཏུ་གཏད་པའི་གསལ་སྣང་གི་རྩལ་སྒྲུབ་པ་དང༌། མཚན་མོའི་དུས་སུ་འཛིན་པའི་གདམས་ངག་གིས་རྨི་ལམ་བཟུང་ལ་ཟིན་པ་དང་དེ་མ་ཐག་ཉིན་མོར་བསྒོམས་པ་ལྟ་བུའི་ལྷའི་སྐུར་ལྡང་བ་ལ་བསླབས་པས་མཚན་དུས་ཀྱིས་ཉིན་སྣང་དང་དེས་ཀྱང་མཚན་སྣང་གི་རྩལ་བསྐྱེད་དེ་བོགས་ཆེན་པོ་ཐོན་པར་འགྱུར་རོ། །གཉིས་པ་ནི། ཁྱད་པར་འཁོར་བའི་སྣང་ཞེན་དག་པ་ལས༔ མཐར་ཐུག་མྱང་འདས་ཡོན་ཏན་རྫོགས་པ་དང་༔ གནས་སྐབས་རིམ་གཉིས་གཞི་རུ་སྨིན་པའི་ཚུལ༔ ལེགས་པར་ཤེས་པས་ལམ་མཆོག་མངོན་དུ་འགྱུར༔ ཅེས་གསུངས་ཏེ། དབྱིབས་དང་ཁ་དོག་གི་རྣམ་པ་ལམ་བྱེད་ཙམ་གྱི་བསྐྱེད་རིམ་ནི་ཕྱི་རོལ་པ་ལའང་ཡོད་ཅིང་དེའི་གྲུབ་འབྲས་ཉི་ཚེ་བ་དང་བསྐྱེད་རིམ་རང་རྒྱུད་པར་གོལ་བའི་རང་འབྲས་རུ་དྲ། རྒྱུ་མཐུན་འབྱུང་པོ་མཐུ་ཆེན་ཏུ་འགྱུར་བ་ཡོད་པས། དེ་དག་ལམ་དུ་འགྱུར་བའི་ཁྱད་པར་གྱི་གནད་ནི། འཆི་བར་སྐྱེ་བའི་སྲིད་པ་དང་མཐུན་པའི་བསྐྱེད་བསྡུ་དང༌། ཕྱི་སྣོད་ནང་བཅུད་དང་མཐུན་པའི་རྟེན་གཞལ་ཡས་ཁང་བརྟེན་པ་ལྷའི་འཁོར་ལོ་བསྒོམ་པ་སོགས་མར་བལྟས་འཁོར་བའི་རྣམ་པ་དང་མཐུན་པར་ལམ་དུ་བྱས་པས་དེའི་སྣང་ཞེན་དག་པ་ལས། བསྐྱེད་པས་གཟུགས་སྐུ་དང་བསྡུ་རིམ་གྱིས་ཆོས་སྐུ། རྟེན་བརྟེན་པ་རྣམ་དག་ལྷའི་དཀྱིལ་འཁོར་དུ་གྲུབ་པ་སོགས་ཡར་བལྟས་རྣམ་བྱང་གི་འདྲ་འབག་ཏུ་གྱུར་པས་མཐར་ཐུག་མྱང་འདས་ཀྱི་ཡོན་ཏན་རྫོགས་པའི་རྒྱུར་འགྱུར་བ་དང༌། གནས་སྐབས་རིམ་པ་གཉིས་ཀའི་གཞི་བཏིང་བ་ལས་རྫོགས་རིམ་གྱི་ཡེ་ཤེས་སྨིན་པའི་ཐབས་ཁྱད་པར་ཅན་ཏུ་འགྱུར་བའི་ཚུལ་ལེགས་པར་ཤེས་པས་གོལ་འཕྱུགས་མེད་པའི་ལམ་གྱི་མཆོག་མངོན་ཏུ་འགྱུར་བ་ཡིན་ནོ། །གཉིས་པ་རྫོགས་རིམ་གྱི་བོགས་འདོན་ལ་གསུམ། རྩ་རླུང༌། ཆགས་ལམ། རྫོགས་རིམ་སྤྱིའི་བོགས་འདོན་འབྲས་བུ་དང་བཅས་པའོ། །དང་པོ་ནི། འཁྲུལ་འཁོར་ཟབ་མོས་རྩ་ཡི་མདུད་པ་དཀྲོལ༔ བར་རླུང་ཐད་ཀར་འཛིན་པའི་ཉམས་ལེན་གྱིས༔ རླུང་སེམས་རང་དེངས་ཤེས་པ་རྣལ་དུ་ཕེབས༔ གཏུམ་མོའི་འབར་སྣང་མཉམ་རྗེས་ཀུན་ཏུ་བརྟན༔ ཅེས་གསུངས་ཏེ། རང་ལུས་ཐབས་ལྡན་ཉམས་སུ་ལེན་པའི་ཚེ། ཐུན་མཚམས་རྣམས་སུ་ལུས་སྦྱོང་འཁྲུལ་འཁོར་ཟབ་མོ་མན་ངག་ལག་ལེན་གྱི་གནད་དང་ལྡན་པ་ལ་འབད་པས་རྩའི་མདུད་པ་རྣམས་བཀྲོལ། རྟག་ཏུ་བར་གྱི་རླུང་ལྟེ་བ་ཐད་ཀར་བརྒྱངས་ཏེ་འཛིན་པ་གསང་བ་ཡེ་ཤེས་ཆེན་པོའི་རླུང་སྦྱོར་གྱིས་རླུང་སེམས་ཀྱི་རྙོགས་པ་ཕྲ་རགས་རང་སར་དེངས་ཤིང་ཤེས་པ་རྣལ་དུ་ཕེབས་པར་འགྱུར་བ་དང༌། གཏུམ་མོའི་མེ་དམིགས་མཉམ་བཞག་ཏུ་བསྒོམས་ཤིང་རྗེས་ཐོབ་ཏུ་མི་བསྒོམ་པའི་རེས་འཇོག་ཅན་གྱིས་ནུས་པ་རྙེད་པར་མི་འགྱུར་བས་འབར་བའི་གསལ་སྣང་མཉམ་རྗེས་ཀུན་ཏུ་མ་ཆད་པར་བརྟན་པར་བསྒོམ་པ་རྣམས་གནད་དུ་ཆེའོ། །གཉིས་པ་ནི། ཐིག་ལེ་ཞུ་བ་སྙིང་གའི་དབུས་སུ་བསྟིམ༔ དེ་ལ་བརྟེན་བྱས་འཛིན་མེད་སྒྱུ་མའི་ངང་༔ ཚོགས་དྲུག་ཡུལ་དུ་གང་ཤར་སྣང་བ་ཡིས༔ བདེ་ཆེན་འདྲེན་པའི་ཏིང་འཛིན་རང་རྩལ་སྤེལ༔ ཅེས་གསུངས་ཏེ། གཞན་ལུས་ཕོ་ཉའི་ལམ་ལ་འཇུག་པ་ན། ཕྱག་རྒྱ་དང་སྙོམས་པར་འཇུག་པའི་རྗེས་ཆགས་ཀྱི་མེས་ཀུན་རྫོབ་བྱང་ཆུབ་སེམས་ཀྱི་ཐིག་ལེ་རིམ་པར་འཛག་ཅིང་ཞུ་བ་ན་རིག་སྟོང་ཀ་དག་ནམ་མཁའ་ལྟ་བུའི་ངང་ལས་ནམ་ཡང་མ་གཡོས་པས་འཁོར་ལོ་སོ་སོའི་དབུ་མའི་ལྟེ་བར་དང༌། ཁྱད་པར་ལྷན་སྐྱེས་ཀྱི་མཐར་བཟུང་ལྡོག་བཀྲམ་ཁྱབ་དང་འབྲེལ་བར་སྙིང་གའི་དབུས་སུ་ཟག་མེད་ཡེ་ཤེས་དྭངས་མའི་ཐིག་ལེ་ཆེན་པོར་བསྟིམས་པས་རྟག་ཏུ་ལུས་སེམས་བདེ་སྟོང་གི་ཉམས་དང་མི་འབྲལ་བར་འགྱུར་ཞིང༌། དེ་ལ་རྟེན་བྱས་ནས་ཕྱི་ནང་གང་ལའང་ཆེད་དུ་འཛིན་ཞེན་མེད་པ་སྒྱུ་མར་ཤེས་པའི་ངང་ནས་ཚོགས་དྲུག་གི་ཡུལ་དུ་བཟང་ངན་བར་མ་གང་ཤར་གྱི་སྣང་བ་སྣ་ཚོགས་པ་ཡིས་ཀྱང་བདེ་ཆེན་ཁོ་ན་འདྲཻན་པར་ནུས་པའི་ཏིང་འཛིན་གྱི་རང་བཞིན་དང་མི་འབྲལ་བར་རྩལ་སྦྱོང་གོང་ནས་གོང་དུ་སྤེལ་བས་མཐར་འཁོར་འདས་ཀྱི་རྟོག་ཚོགས་བདེ་ཆེན་ཡེ་ཤེས་གཅིག་གི་ངང་དུ་གྱུར་པ་ན་ཐབས་ལམ་མཐར་ཕྱིན་པའོ། །གསུམ་པ་ནི། ཁྱད་པར་སྦྱང་གཞི་འཁྲུལ་སྣང་བག་ཆགས་ཀུན༔ སྦྱོང་བྱེད་རྡོ་རྗེའི་རྣལ་འབྱོར་ཟབ་མོའི་མཐུས༔ ལེགས་པར་རྒྱས་བཏབ་རྩེ་གཅིག་བསྒོམས་པ་ཡིས༔ སྦྱངས་པའི་འབྲས་བུ་ཡེ་ཤེས་རིས་མེད་ཤར༔ ཅེས་གསུངས་ཏེ། མཚན་བཅས་རྫོགས་རིམ་སྤྱི་ལ་ཁྱད་པར་དུ་ཤེས་དགོས་པ་སྦྱང་གཞིའི་ལས་སུ་བྱ་བ་མ་དག་པའི་རྩ་རླུང་ཐིག་ལེ་ལས་གྱུར་པའི་ཕུང་ཁམས་སྐྱེ་མཆེད་ཀྱི་འཁྲུལ་སྣང་བག་ཆགས་མཐའ་ཡས་པ་ཀུན། སྦྱོང་བྱེད་ཐབས་ཀྱི་ལམ་མཆོག་ལུས་རྩ་སྐུ། ངག་རླུང་གསུང༌། ཡིད་ཐིག་ལེ་ཐུགས་རྡོ་རྗེའི་རྣལ་འབྱོར་གནད་ཐོག་ཏུ་ཐེབས་པའི་མེ་བཙའ་ལྟར་ཟབ་མོའི་མཐུ་དང་ནུས་པའི་ཕྱག་རྒྱས་བྱེད་པའི་གནད་ལེགས་པར་བཅིངས་ཏེ་རྒྱས་བཏབ་ནས་གཞན་ཏུ་མི་གཡེངས་པའི་སེམས་རྩེ་གཅིག་པས་བསྒོམ་པ་དེ་ཡིས། གློ་བུར་གྱི་དྲི་མ་རྣམས་དག་ཅིང་སྦྱངས་པའི་འབྲས་བུ་ཆོས་ཉིད་ཀྱི་མཁའ་ལ་སྐུ་དང་ཡེ་ཤེས་ཕྱོགས་རིས་མེད་པའི་ཉི་མ་ཤར་བ་ཡིན་པས་དེ་དག་གི་གནད་གསང་ཤེས་ན་ལམ་ལ་ནོར་འཁྲུལ་གྱི་སྐྱོན་མེད་པས་བླུན་སྒོམ་གྱི་འཕྲང་ལས་གྲོལ་ཏེ་འཕྲལ་ཡུན་ཀུན་ཏུ་བོགས་ཆེན་པོར་འགྱུར་རོ། །གསུམ་པ་གསང་བ་ཨ་ཏིའི་ལམ་གྱི་བོགས་འདོན་ལ་གཉིས། ཁྲེགས་ཆོད་དང༌། ཐོད་རྒལ་གྱིའོ། །དང་པོ་ལའང་གསུམ། མདོར་བསྟན། རྒྱས་བཤད། དོན་བསྡུའོ། །དང་པོ་ནི། གསང་བ་དུག་ལྔའི་རྣམ་རྟོག་ཇི་སྙེད་ཀུན༔ རིག་པའི་གནད་ཀྱིས་བཟུང་ལ་ལམ་དུ་བཏང་༔ ཞེས་གསུངས་ཏེ།

གསང་བ་རྫོགས་ཆེན་ཤིན་ཏུ་ཀ་དག་ཁྲེགས་ཆོད་ཀྱི་དགོངས་པ་ལ་གནས་པའི་ཚེ། ཉོན་མོངས་པ་བརྒྱད་ཁྲི་བཞི་སྟོང་གི་རྩ་བ་དུག་ལྔ་ལས་གྱུར་པའི་རྣམ་པར་རྟོག་པ་ཇི་སྙེད་པ་རང་སེམས་ཀྱི་ཆོ་འཕྲུལ་ལས་ཤར་བ་ཀུན། ཁ་ཡན་ཏུ་བཏང་བ་དང་སྤང་བསྒྱུར་གྱི་གཉེན་པོ་བརྟེན་པ་སོགས་མི་བྱ་བར་ཡེ་གྲོལ་རང་ངོ་རིག་པའི་གནད་ཀྱིས་སྐད་ཅིག་མ་གསུམ་པ་ལས་ཕན་མི་འདའ་བར་བཟུང་ལ་ལམ་དུ་བཏང་བར་བྱའོ། །གཉིས་པ་ནི། འདོད་ལ་ཆགས་པའི་རྟོག་པ་ཤར་བའི་ཚེ༔ དགག་སྒྲུབ་མི་བྱ་རིག་སྟོང་རྗེན་པར་ཀློད༔ བདེ་ལ་ཞེན་མེད་ཉམས་མྱོང་ཁོང་ནས་སད༔ སོ་སོར་རྟོག་པའི་ཡེ་ཤེས་དེ་ལ་བྱ༔ ཞེ་སྡང་གཏུམ་པའི་རྣམ་རྟོག་ཤར་བའི་ཚེ༔ དེ་རྗེས་མི་འབྲང་མ་བཅོས་ལྷུག་པར་བསྐྱང་༔ གསལ་ལ་འཛིན་མེད་མྱོང་ཞེན་རྩིས་གདབ་བྲལ༔ མེ་ལོང་ལྟ་བུའི་ཡེ་ཤེས་དེ་ལ་བྱ༔ གཏི་མུག་མུན་པའི་འཐིབ་པོ་བྱུང་བའི་ཚེ༔ དེ་ཉིད་ངང་དུ་བསྐྱང་ལ་སྤང་བླང་དོར༔ རྩེ་གཅིག་མི་རྟོག་སྤྲོས་བྲལ་རྗེན་པར་ཤར༔ ཆོས་ཀྱི་དབྱིངས་ཀྱི་ཡེ་ཤེས་དེ་ལ་བྱ༔ ང་རྒྱལ་ཁེངས་པའི་འཛིན་པ་ལྡང་བ་ན༔ བླང་དོར་མི་བྱ་ངར་འཛིན་རང་ངོར་བཞག༔ ཅིར་ཡང་མི་རྟོག་མཉམ་པའི་ཀློང་གྱུར་ན༔ མཉམ་པ་ཉིད་ཀྱི་ཡེ་ཤེས་དེ་ལ་བྱ༔ ཕྲག་དོག་འགྲན་སེམས་ཟུག་རྔུ་ཤར་བའི་ཚེ༔ ཤར་མཁན་རང་གི་ཐོག་ཏུ་གང་དགར་བོར༔ བདག་གཞན་འཛིན་མེད་རིག་སྟོང་སྒྱུ་མར་རྫོགས༔ བྱ་བ་གྲུབ་པའི་ཡེ་ཤེས་དེ་ལ་བྱ༔ དེ་ལྟར་ཤེས་ན་དུག་ལྔའི་རྟོག་པ་ཀུན༔ ཡེ་ཤེས་ལྔ་ཡི་ངོ་བོར་བོགས་སུ་ཐོན༔ རྟོག་པའི་ཕུང་པོ་བརྒྱད་ཁྲི་བཞི་སྟོང་ཡང་༔ སྦྲུལ་མདུད་བཞིན་དུ་ཡེ་ཤེས་ཆེན་པོར་གྲོལ༔ ཅེས་གསུངས་ཏེ། དེའང་ཞིབ་པར་བཀྲོལ་ན། མིག་གི་ཡུལ་དུ་གཟུགས་སྡུག་པས་མཚོན་ལུས་ལོངས་སྤྱོད་གཉེན་འབྲེལ་འཁོར་གཡོག་སོགས་འདོད་པའི་ཡུལ་ལ་ཆགས་ཤིང་ཞེན་པའི་རྟོག་པ་ཤར་བའི་ཚེ། རྟོག་པ་འགགས་ནས་དགག་པ་དང་རྗེས་འབྲང་གིས་སྒྲུབ་པ་གང་ཡང་མི་བྱ་བར་རང་ངོ་ལ་བལྟས་པས་རིག་སྟོང་རྗེན་པར་འཆར་བ་དེ་ཐོག་ཏུ་ཀློད་ལ་བཞག་པས། བདེ་བ་ལ་ཞེན་འཛིན་གྱི་དྲི་མ་མེད་བཞིན་ཏུ་བདེ་སྟོང་མ་འགགས་པའི་ཉམས་མྱོང་ཁོང་ནས་སད་པར་གྱུར་པ་ན། སོ་སོར་རྟོག་པའི་ཡེ་ཤེས་ཞེས་གྲགས་པ་དེ་ཉིད་ལ་བྱ་བ་ཡིན་གྱི་ལོགས་སུ་བཙལ་དུ་མེད་དོ། །དེས་མཚོན་ཏེ། མི་དང་མི་མ་ཡིན་པའི་གནོད་བྱེད་སོགས་ཚོགས་དྲུག་གི་ཡིད་དུ་མི་འོང་བ་ལ་ཞེ་སྡང་བས་སེམས་ཁྲོ་ཞིང་གཏུམ་པའི་རྣམ་པར་རྟོག་པ་ལམ་གྱིས་ཤར་བའི་ཚེ། དེའི་རྗེས་སུ་འབྲང་ན་ལས་བསགས་པས་མི་འབྲང་ཞིང་སྐྱོན་ཏུའང་མི་བཟུང་བར་རང་ངོ་རིག་བཞིན་གང་ཤར་དེ་ཉིད་མ་བཅོས་རང་བབས་སུ་ལྷུག་པར་བསྐྱངས་པས། རྣམ་པ་གསལ་ལ་མ་འགགས་ཤིང་ངོ་བོ་དེར་འཛིན་མེད་པ། དེའི་རོ་མྱོང་བ་དང་རྗེས་སུ་འབྲང་བའི་ཞེན་པ་དང་འདི་ཡིན་གྱི་རྩིས་གདབ་དང་བྲལ་བ་དྭངས་ཤེལ་གྱི་གཟུགས་བརྙན་ལྟར་འཆར་ཏེ། མེ་ལོང་ལྟ་བུའི་ཡེ་ཤེས་ཞེས་པ་ནི། དེ་ལ་བྱ་བ་ཡིན་ནོ། །གཉིད་དང་སྙོམས་ལས་གཙོར་གྱུར་ཐོས་བསམ་སྒོམ་གསུམ་ལ་བློ་གྲོས་ཀྱི་སྣང་བ་སྒྲིབ་པ་གཏི་མུག་མུན་པའི་འཐིབ་པོ་ནམ་བྱུང་བའི་ཚེ། དེ་ཉིད་ཀྱི་རང་ངོ་རིག་པའི་ངང་བསྐྱང་བ་ལས་སྐྱོན་རྟོག་གིས་སྤང་བའམ་ཡོན་ཏན་ཏུ་བལྟ་བའི་དང་བླང་གཉིས་ཀ་དོར་བས། ཁྱབ་བརྡལ་ཆེན་པོ་རྩེ་གཅིག་གི་ཀློང་དུ་རྣམ་པར་མི་རྟོག་པའི་རང་བྱུང་སྤྲོས་བྲལ་རྗེན་པར་ལྷག་གིས་ཤར་བར་འགྱུར་ཏེ། ཆོས་ཀྱི་དབྱིངས་ཀྱི་ཡེ་ཤེས་ཞེས་པའང་དེ་ལ་བྱ་བ་ཡིན་ནོ། །གཞན་ལས་བདག་ཉིད་རིགས་རུས་ཡོན་ཏན་འབྱོར་པ་སོགས་ཀྱིས་ལྷག་གོ་སྙམ་དུ་ང་རྒྱལ་གྱིས་སེམས་ཁེངས་པའི་འཛིན་པ་ནང་དུ་ལྡང་བ་ན། དེ་ལའང་སྔ་མ་རྣམས་བཞིན་ཏུ་བླང་དོར་གང་ཡང་མི་བྱ་བར་ངར་འཛིན་པ་དེ་ཉིད་ཀྱི་རང་ངོར་བལྟས་ཏེ་མཉམ་པར་བཞག་པས་ཅི་ཡང་མི་རྟོག་པ་རང་གཞན་མཉམ་པ་ཆེན་པོའི་ཀློང་གཅིག་ཏུ་གྱུར་ན་མཉམ་པ་ཉིད་ཀྱི་ཡེ་ཤེས་ཞེས་པ་ནི་དེ་ལ་བྱའོ།

།གཞན་གྱི་ཕུན་སུམ་ཚོགས་པ་ལ་ཕྲག་དོག་ཅིང་འགྲན་ཟླར་སེམས་པའི་ཟུག་རྔུ་ཡིད་ལ་ཤར་བའི་ཚེ་ནའང༌། དེ་ལ་གཉེར་ཁ་མི་བྱ་བར་ཤར་མཁན་ཁོ་རང་གི་ཐོག་ཏུ་གང་དགར་བོར་ཏེ་ངོ་བོར་བལྟས་པས། བདག་དང་གཞན་ཅེས་གཉིས་སུ་འཛིན་པའི་རྟོག་པ་མེད་པར་རིག་སྟོང་སྒྱུ་མར་རྫོགས་པར་འགྱུར་ཏེ་བྱ་བ་གྲུབ་པའི་ཡེ་ཤེས་ཞེས་པའང་དེ་ལ་བྱ་བ་ཡིན་ནོ། །ཉོན་མོངས་པའི་རྟོག་པ་དང་པོར་ངོས་ཟིན་དཀའ། བར་དུ་ལྡོག་དཀའ། མཐར་རྒྱུན་བཅད་པར་དཀའ་བས་དྲན་ཤེས་ཀྱི་བྱ་རས་བཟུང་ནས་ཇི་སྐད་བསྟན་པ་དེ་ལྟར་རང་གྲོལ་ཆེན་པོའི་དབྱིངས་སུ་ལ་ཟློ་ཤེས་ན་དུག་ལྔའི་རྟོག་པ་མི་ཤར་བ་ནི་མི་སྲིད་ལ་ཤར་ཚད་ཀུན་སྤང་སྒྱུར་གང་ཡང་མ་དགོངས་པར་ཡེ་ཤེས་ལྔའི་ངོ་བོར་བོགས་སུ་ཐོན་ཅིང༌། འདོད་ཆགས་ཞེ་སྡང་གཏི་མུག་གསུམ་དང་དེ་གསུམ་ཆ་མཉམ་ལས་བྱུང་བ་རེ་རེར་ཡང་ཉི་ཁྲི་ཆིག་སྟོང་རེ་སྟེ་བསྡམས་པས་ཉོན་མོངས་རྟོག་པའི་ཕུང་པོ་བརྒྱད་ཁྲི་བཞི་སྟོང་དུ་གྲགས་པ་ཇི་སྙེད་པའང་སྦྲུལ་མདུད་དཀྲོལ་བ་པོ་མེད་པར་རང་གྲོལ་བ་བཞིན་ཏུ་ཡེ་ཤེས་ཆེན་པོར་རང་སར་གྲོལ་བར་འགྱུར་ཏེ། ཞི་རྒྱུད་ལས། རང་བཞིན་ཤེས་པས་མི་སྤང་སྟེ། །རང་རིག་ཡེ་ཤེས་ཉིད་ཡིན་ནོ། །ཞེས་དང༌། མུ་ཏིག་ཕྲེང་བར། འབད་པས་གྲོལ་བ་མ་ཡིན་ཏེ། །ཡེ་ཉིད་ནས་ནི་གྲོལ་བར་གནས། །ཞེས་སོ། །སྤྱིར་ཉོན་མོངས་པ་ཤར་མ་ཐག་ཏུ་གདོང་ཟློག་བྱས་ན་བྱ་ཤོར་དུ་འགྲོ་བས་རྩལ་རྫོགས་སུ་གཞུག །རྩལ་རྫོགས་ལས་མ་བསགས་པའི་སྐད་ཅིག་དེ་མ་ཐག་པར་ལམ་དུ་བཏང་བས་ཡེ་ཤེས་སུ་ལྷག་གིས་ཤར་བའི་དུས་ན་རྟེན་འབྲེལ་བསྒྲིགས་དགོས་ཤིང༌། དེ་ཉིད་ཡེ་ཤེས་ཀྱི་གཞིར་མེད་ན་ལམ་དུ་མི་འགྲོ་བ་དྭངས་པའི་བཞིན་སྣོད་མེད་ན་བཞིན་རས་མི་འཆར་བ་དང་མཚུངས་ལ། ཉོན་མོངས་པ་གང་སྐྱེས་དེ་རྩལ་རྫོགས་ཤིང་ལས་མ་བསགས། ངོ་བོ་ཡེ་ཤེས་སུ་ཤེས་པའི་སྐད་ཅིག་དེ་ཉིད་ལ་རྟོག་པ་གཞན་གྱིས་བར་མ་ཆོད་པར་ལམ་དུ་བཏང་བ་ནི་གྲུབ་པའི་དངུལ་ཆུས་ལྕགས་གསེར་དུ་བསྒྱུར་བ་བཞིན་ནོ། །གསུམ་པ་ནི། མདོར་ན་རྣམ་རྟོག་ཉོན་མོངས་ལྷ་དང་འདྲེ༔ སྡུག་བསྔལ་ནད་འཆིའི་རེ་དོགས་ཅི་བྱུང་ཡང་༔ སྤང་བླང་མེད་པར་ངོ་བོར་རོ་སྙོམས་ཤིང་༔ རང་རྩལ་སྦྱངས་པས་ཀུན་ཀྱང་བོགས་སུ་འཆར༔ ཅེས་གསུངས་ཏེ། ཇི་སྐད་བཤད་པ་དེ་དག་གི་དོན་མདོར་བསྡུ་ན། སེམས་དང་སེམས་ལས་བྱུང་བའི་རྣམ་རྟོག །དུག་ལྔས་བསྡུས་པའི་ཉོན་མོངས་པ། ལྷ་མཐོང་ཞིང་དད་གུས་སོགས་བཟང་རྟོག །འདྲེར་སྣང་ཞིང་ཉམས་མི་དགའ་བ་སོགས་ངན་རྟོག །ལུས་སེམས་ལ་སྡུག་བསྔལ་ཚོར་བ། ན་བ་དང་འཆི་བ་སོགས་བཟང་དུ་རེ་ཞིང་ངན་པར་དོགས་པ་ཅི་དང་ཅི་ལྟ་བུ་བྱུང་ཡང་སྤང་བླང་ཁུ་འཁྲིག་གི་སྙེམས་རྟོག་རྡུལ་ཙམ་མེད་པར་རྟོག་པ་དེ་ཀ་རང་གི་ངོ་བོར་བལྟས་ཏེ་བཟང་ངན་རོ་སྙོམས་ཤིང༌། དེ་ཀ་ཙམ་དུའང་མ་ལུས་པར་རང་རིག་གི་རྩལ་སྦྱོང་ཕྱོགས་མེད་དུ་བྱས་པས་རྣམ་རྟོག་གི་འཕྲོ་འདུ་ཀུན་ཀྱང་སྐྱོན་སྐྱེད་པའི་གེགས་སུ་མི་འགྱུར་བར་ཡོན་ཏན་ལྷག་པར་འཕེལ་བའི་བོགས་འདོན་ཏུ་འཆར་བར་འགྱུར་ཏེ། ཏིང་འཛིན་རྒྱལ་པོ་ལས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །རྟོག་མེད་ཏིང་འཛིན་ལ་གནས་ན། །ནམ་མཁའ་བཞིན་ཏུ་མི་རྟོག་གསལ། །ཅེས་སོ། །གཉིས་པ་ཐོད་རྒལ་གྱི་བོགས་འདོན་ནི། ཁྱད་པར་བྱེད་བཅིངས་མུན་པའི་རྣལ་འབྱོར་གྱིས༔ སྟོང་གཟུགས་གསལ་བརྟན་སྲོག་རྩོལ་གཡོ་མེད་འཆིང་༔ ཞུ་བདེ་དྲངས་ཤིང་ཀུན་ཀྱང་རོ་མཉམ་དུ༔ མི་འགྱུར་ཐབས་ཀྱིས་བདེ་ཆེན་མཆོག་ལ་སྦྱོར༔ ཅེས་གསུངས་ཏེ། ཐོད་རྒལ་ལྷུན་གྲུབ་ཀྱི་རྣལ་འབྱོར་ལ་གནས་པའི་སྐབས་སུ་སྤྱི་གནད་རྣམས་དཀྱུས་ལྟར་ལ། ཁྱད་པར་འོད་གསལ་སྣང་བའི་བོགས་འདོན་ཏུ་ཐོག་མར་ཁྲ་ཁང་དང་དེ་ནས་མུན་ཁང་སྒོ་ཁྱུད་རིམ་པ་གསུམ་པར་སྒོ་གསུམ་བྱེད་པ་བཅིངས་པའི་གནད་དང་ལྡན་པས་མུན་པའི་རྣལ་འབྱོར་གྱིས་ཞག་བདུན་ཕྲག་གསུམ་ལ་སོགས་པར་བསྒོམས་པས་ཉིན་མཚན་རྟགས་བཅུ་དང་འོད་གསལ་གྱི་སྣང་བ་སྟོང་པའི་གཟུགས་བརྙན་རྣམ་པ་ཐམས་ཅད་པ་རབ་ཏུ་གསལ་ཞིང་འཕེལ་འགྲིབ་བྲལ་བའི་བརྟན་པོར་འགྱུར་ལ། སྐབས་སུ་རྡོ་རྗེའི་བཟླས་པ་དང་བུམ་པ་ཅན་གྱི་སྦྱོར་བས་སྲོག་དང་རྩོལ་བའི་རླུང་འཁོར་ལོ་བཞིའི་ལྟེ་བར་རྟགས་སྣང་དང་ལྷན་ཅིག་གཡོ་མེད་དུ་འཆིང་བ་དང༌། འབར་འཛག་གི་ཞུ་བདེ་དྲངས་ཤིང་བདེ་གསལ་གྱི་ཉམས་རྟོགས་ཀུན་ཀྱང་གཉིས་མེད་རོ་མཉམ་ཁྱབ་བརྡལ་ཆེན་པོའི་ངང་དུ་འཕོ་མེད་མི་འགྱུར་བའི་ཐབས་ཀྱིས་བདེ་བ་ཆེན་པོ་མཆོག་ལ་སྦྱོར་རོ། །འདི་ནི་གསང་སྔགས་གསར་མའི་ལུགས་ཀྱི་བླ་མེད་རྒྱུད་སྡེ་ཐམས་ཅད་ཀྱི་རྒྱལ་པོ་དཔལ་དུས་ཀྱི་འཁོར་ལོའི་རྫོགས་རིམ་སྦྱོར་བ་ཡན་ལག་དྲུག་པ་དང་བསྙེན་སྒྲུབ་རྡོ་རྗེ་གསུམ་གྱི་གནད་ཐམས་ཅད་ཀྱང་འདུས་པ་སྟེ། བྱེད་བཅིངས་མུན་པའི་རྣལ་འབྱོར་རྟགས་སྣང་དང་བཅས་པ་ནི་ཐོག་མར་དགེ་བ་སོར་བསམ་སྐུ་རྡོ་རྗེ། སྲོག་རྩོལ་རླུང་གི་སྦྱོར་བ་ནི་བར་དུ་དགེ་བ་སྲོག་འཛིན་གསུང་རྡོ་རྗེ། ཞུ་བདེ་འགྱུར་མེད་དུ་བསྒྲུབ་པ་ནི་མཐར་དགེ་དྲན་ཏིང་ཐུགས་རྡོ་རྗེའི་རྣལ་འབྱོར་རྣམས་དང་དོན་གཅིག་པའོ།

།གསུམ་པ་དེ་དག་ཐམས་ཅད་ཀྱི་དོན་བསྡུས་ཏེ་བཤད་པ་ནི། གཞན་ཡང་ཐུན་མོང་གནད་ཀྱི་མན་ངག་ནི༔ སྐྱོན་རྣམས་ཐམས་ཅད་བདག་འཛིན་ལས་བྱུང་བས༔ ཀུན་རྫོབ་བྱང་ཆུབ་སེམས་ཀྱིས་བཅེས་འཛིན་བཤིག༔ དོན་དམ་སྤྲོས་བྲལ་ལྟ་བས་དྲུང་ནས་ཕྱུངས༔ བདེན་གཉིས་དབྱེར་མེད་རྟེན་འབྲེལ་ལམ་དུ་ཁྱེར༔ ཡོན་ཏན་ཉམས་སུ་བླངས་ལས་བྱུང་བའི་ཕྱིར༔ མཁའ་མཉམ་འགྲོ་ལ་ཚད་མེད་སྙིང་རྗེ་བསྒོམ༔ དཔལ་ལྡན་བླ་མར་བཟོད་མེད་མོས་གུས་བསྐྱེད༔ ཟག་བཅས་ཟག་མེད་དགེ་ཚོགས་བརྩོན་པས་བསྒྲུབ༔ ཁྱད་པར་སེམས་ཉིད་རིག་སྟོང་ལམ་ཁྱེར་ལ༔ སྐད་ཅིག་ཙམ་ཡང་མ་ཡེངས་མི་སྒོམ་པས༔ ཐབས་ཤེས་ཕྱོགས་རེའི་ལམ་ལ་མ་གོལ་བར༔ ཐབས་ཀྱི་གྲོགས་སུ་ཤེས་རབ་ལྟ་གདེངས་བསྐྱེད༔ ཤེས་རབ་གྲོགས་སུ་བསོད་ནམས་སྣ་ཚོགས་སྤེལ༔ དེ་ལྟར་འགལ་མེད་ལམ་དུ་ཁྱེར་བ་ཡིས༔ ཡོན་ཏན་དབྱར་གྱི་མཚོ་བཞིན་གོང་དུ་འཕེལ༔ ས་དང་ལམ་གྱི་རིམ་པ་མ་ལུས་ཀུན༔ ཐབས་དང་ཤེས་རབ་ཟུང་དུ་འབྲེལ་བས་འགྲུབ༔ ཅེས་གསུངས་ཏེ། བྱེ་བྲག་ཏུ་བསྟན་པ་དེ་དག་ལས་གཞན་ཡང་ལམ་གྱི་རྣལ་འབྱོར་ཐུན་མོང་སྤྱི་ལ་གལ་ཆེ་བ་གནད་ཀྱི་མན་ངག་ཟབ་མོ་ཉིང་ཁུར་ཕྱུངས་ནས་བསྟན་པ་ནི། འཇིག་རྟེན་ན་ཉེས་པའི་སྐྱོན་ཅི་ཡོད་པ་དེ་རྣམས་ཐམས་ཅད་ནི་གཞན་ལས་མ་བྱུང་སྟེ་བདག་ཏུ་འཛིན་པ་འདི་ཁོ་ན་ལས་བྱུང་བས། ཀུན་རྫོབ་བྱང་ཆུབ་ཀྱི་སེམས་བྱམས་པ་དང་སྙིང་རྗེ་ཚད་མེད་པ་ལ་བརྟེན་པ་བདག་གཞན་བརྗེ་བའི་བློ་སྦྱོང་སོགས་ཀྱིས་བདག་ཏུ་གཅེས་པར་འཛིན་པའི་བློ་བཤིག །དོན་དམ་བྱང་ཆུབ་སེམས་བདག་གཞན་ཏུ་རྟོག་པ་སོགས་གཉིས་ཆོས་ཀྱི་སྤྲོས་པ་ཀུན་བྲལ་ཟབ་མོ་སྟོང་ཉིད་ཀྱི་ལྟ་བས་བདག་ལྟའི་ངོ་བོའང་ཆོས་ཀྱི་དབྱིངས་སུ་བཅོམ་སྟེ་དྲུང་ངམ་རྩ་བ་ནས་ཕྱུང༌། འཁོར་འདས་ལམ་གསུམ་གྱི་ཆོས་ཐམས་ཅད་ལ་ཀུན་རྫོབ་དོན་དམ་གྱི་བདེན་པ་གཉིས་པོ་ལྟོས་འཇོག་ཅན་ཏུ་གྲུབ་པས་ཡ་བྲལ་དུ་མ་སོང་བར་དེ་གཉིས་དབྱེར་མེད་དུ་སྤྱོད་པའི་རྟེན་འབྲེལ་ལམ་དུ་ཁྱེར། འཕྲལ་ཡུན་ཡོན་ཏན་གང་ཡང་རུང་བ་ཐམས་ཅད་ཆོས་ཉམས་སུ་བླངས་བ་ལས་བྱུང་བའི་ཕྱིར་ཐེག་ཆེན་ཉམས་ལེན་ཐམས་ཅད་ཀྱི་རྩ་བ་ནམ་མཁའ་དང་མཉམ་པའི་ཕ་མ་འགྲོ་དྲུག་སེམས་ཅན་རིས་སུ་མ་ཆད་པ་ཀུན་ལ་ཚད་དང་མུ་མཐའ་མེད་པའི་སྙིང་རྗེ་དུས་རྟག་ཏུ་བསྒོམ། བྱིན་རླབས་དངོས་གྲུབ་ཀྱི་འབྱུང་གནས་དཔལ་ལྡན་རྩ་བའི་བླ་མ་ཉིད་དཀོན་མཆོག་ཀུན་འདུས་སུ་ཤེས་པས་བཟོད་མེད་ཀྱི་མོས་གུས་དྲག་པོ་བསྐྱེད། འཇིག་རྟེན་པས་བསྡུས་པ་ཟག་བཅས་བསོད་ནམས་ཀྱི་ཚོགས་དང་འཇིག་རྟེན་ལས་འདས་པས་བསྡུས་པ་ཟག་མེད་ཡེ་ཤེས་ཀྱི་དགེ་ཚོགས་ཕྲ་མོས་མི་ངོམས་པར་གོང་ནས་གོང་འཕེལ་བརྩོན་པ་ཆེན་པོས་བསྒྲུབ། དམིགས་བཅས་ཀྱི་ཉམས་ལེན་ཀུན་ལས་ཁྱད་པར་དུ་གྱུར་པ་སེམས་ཉིད་རིག་སྟོང་རྗེན་པ་ལམ་དུ་ཁྱེར་ལ་མཉམ་རྗེས་སྤྱོད་ལམ་གང་གི་སྐབས་སུའང་སྐད་ཅིག་ཙམ་ཡང་ཕྱི་ཡུལ་སྣང་ལ་མ་ཡེངས་ཤིང་ནང་སེམས་ཀྱིས་གང་ཡང་མི་བསྒོམ་པས། སྣང་ཕྱོགས་ཐབས་དང་སྟོང་ཕྱོགས་ཤེས་རབ་ཕྱོགས་རེར་ཞེན་ཅིང་ཨ་འཐས་པའི་ལམ་ལ་མ་གོལ་བར་ཐབས་སྙིང་རྗེ་ཆེན་པོས་ཀུན་ནས་བསླངས་ཏེ་སྦྱིན་སོགས་བསོད་ནམས་ཀྱི་ཚོགས་སྒྲུབ་པའི་བོགས་སུ་ཤེས་རབ་སྟོང་པ་ཉིད་ཀྱི་ལྟ་བའི་གདིང་བསྐྱེད་ཅིང༌། །ཤེས་རབ་སྟོང་ཉིད་ཀྱི་གནས་ལུགས་ཇི་བཞིན་རྟོགས་པའི་གྲོགས་སུ་གོང་དུ་བསྟན་པའི་སྙིང་རྗེ་མོས་གུས་སོགས་ཐབས་ཀྱི་མཆོག་དང་བསོད་ནམས་སྣ་ཚོགས་པ་ཉིན་རེ་བཞིན་གོང་དུ་སྤེལ་བར་བྱ་དགོས་ཏེ། རྒྱུད་ལས། །རྣལ་འབྱོར་ཐབས་ཀྱི་ཚུལ་མིན་ཅིང༌། །ཤེས་རབ་གཅིག་པུས་འགྱུར་བ་མིན། །ཐབས་དང་ཤེས་རབ་སྙོམས་འཇུག་པ། །རྣལ་འབྱོར་དེ་བཞིན་གཤེགས་པས་གསུངས། །ཞེས་དང༌། ལམ་སྒྲོན་ལས་ཀྱང༌། ཤེས་རབ་བྲལ་བའི་ཐབས་དག་དང༌། །ཐབས་དང་བྲལ་བའི་ཤེས་རབ་ཀྱིས། །གང་ཕྱིར་འཆིང་བ་ཞེས་གསུངས་པས། །དེ་བས་གཉིས་ཀ་སྤང་མི་བྱ། །ཞེས་སོ། །དེ་ལྟར་ན་ཐབས་ཀྱིས་ཤེས་རབ་སྒྲིབ་པ་དང་ཤེས་རབ་ཀྱིས་ཐབས་ཁྱད་དུ་གསོད་པ་མ་ཡིན་པར་གཉིས་ཀ་འགལ་མེད་ཟུང་འཇུག་ཏུ་ལམ་དུ་ཁྱེར་བ་དེ་ཡིས་ཉམས་དང་རྟོགས་པའི་ཡོན་ཏན་མཐའ་དག་དབྱར་གྱི་མཚོ་བཞིན་གོང་ནས་གོང་དུ་འཕེལ་བ་དང༌། ས་བཅུ་དང་ལམ་ལྔའི་རིམ་པ་མ་ལུས་པ་ཀུན་ཀྱང་ཐབས་དང་ཤེས་རབ་ཟུང་དུ་འབྲེལ་བས་བདེ་བླག་ཏུ་བགྲོད་ཅིང་མཐར་སོན་པར་འགྲུབ་པར་འགྱུར་ཏེ། སྡོམ་འབྱུང་ལས། ཤེས་རབ་ཐབས་ནི་མཉམ་སྦྱོར་བས། །རྫོགས་པའི་བྱང་ཆུབ་སྒྲུབ་བྱེད་པ། །དེ་ཉིད་ལ་ནི་བླ་མེད་པའི། །སངས་རྒྱས་ཀུན་རྣམས་རབ་ཏུ་བཞུགས། །དབྱེར་མེད་རྣམ་པར་ཡང་དག་རིག །གང་གི་གནས་པ་རྡོ་རྗེ་སེམས། །ཇི་སྲིད་རྫོགས་བྱང་ཆུབ་པར་འགྱུར། །ཅེས་སོ། །བོགས་འདོན་གྱི་རིམ་པ་འདི་རྣམས་ཀྱང་རིག་འཛིན་ཆེན་པོ་དགའ་རབ་རྡོ་རྗེའི་བསམ་གཏན་ཉམས་སྒྲོན་ལས། ལུང་ཟབ་བླ་མ་ཉམས་ཅན་སྤུན། །བལྟ་དང་ལྟ་འབུལ་ཉམས་བསྡུར་དང༌། །མི་རྟག་འཆི་བསམ་བརྩོན་འགྲུས་བསྐྱེད། །གནས་ལུགས་དྲན་པའི་རྩིས་ཟིན་པས། །གསང་སྤྱོད་ཐབས་ལ་བསྟེན་པ་དང༌། །རླུང་དང་བདེ་བའི་མན་ངག་དང༌། །དམིགས་མེད་སྙིང་རྗེ་གོམས་པ་དང༌། །གདམས་པའི་གནད་དང་ཤེས་རབ་ཀྱིས། །རིག་པ་རྩལ་སྦྱོང་ཉམས་བོགས་འདོན། །ཅེས་གསུངས་པ་སོགས་ཀྱི་དོན་རྣམས་སྙིང་པོར་དྲིལ་བའོ། །གསུམ་པ་གང་དུ་མཐར་ཕྱིན་པའི་འབྲས་བུ་བཤད་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། སྦྱངས་པའི་འབྲས་བུ་མངོན་དུ་གྱུར་པ་ནི༔ ཞེས་གསུངས་ཏེ།

དེ་ལྟར་སྦྱང་གཞི་ཀུན་ཁྱབ་བདེ་གཤེགས་སྙིང་པོ་ལ་བརྟེན་པའི་སྦྱང་བྱ་གློ་བུར་གྱི་དྲི་མ་སྦྱོང་བྱེད་རིམ་གཉིས་ལམ་གྱིས་ཚུལ་བཞིན་སྦྱངས་པའི་འབྲས་བུ་གཞི་ཇི་ལྟ་བ་བཞིན་མངོན་དུ་གྱུར་པས་སྤང་ཐོབ་མེད་པའི་སྐུ་དང་ཡེ་ཤེས་ཀྱི་དཀྱིལ་འཁོར་ཆེན་པོར་རང་སྣང་བའི་ཚུལ་ནི་འདི་ལྟ་སྟེ། ཞེས་སོ། །དེ་ལ་འབྲས་བུའི་ངོ་བོ་བཤད་མ་ཐག་པ་ཉིད་དེ། སྒྱུ་འཕྲུལ་བྱེ་བྲག་བསྟན་པ་ལས། །གྲུབ་པའི་རྣལ་འབྱོར་རྣལ་འབྱོར་ཆེ། །ལྷུན་གྲུབ་ཇི་བཞིན་མངོན་བྱས་པའང༌། །བརྟགས་པ་ཙམ་སྟེ་གཉིས་པ་མེད། །དེ་ཕྱིར་དེ་ལ་དེ་བརྗོད་དོ། །ཞེས་སོ། །ངེས་ཚིག་ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་པ་ལྟར། རྣལ་འབྱོར་པས་དོན་ཏུ་གཉེར་ནས་བསྒྲུབ་པར་བྱ་བ་མཆོག་གི་གྲུབ་པ་མཐར་ཕྱིན་པས་འབྲས་བུ་ཞེས་བརྗོད་པ་དང༌། དབྱེ་བ་སྔ་མ་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །དེ་ཡང་སྐབས་ཀྱིས་ལྔ་ལྔ་སྟེ། །ཞེས་སྐུ་གསུང་ཐུགས་ཡོན་ཏན་ཕྲིན་ལས་ལྔ་དང་རེ་རེ་ལའང་ལྔ་ལྔ་སྟེ་འབྲས་ཆོས་ཉེར་ལྔའི་བདག་ཉིད་འཆད་པར་འགྱུར་བ་ལྟར་རོ། །གཉིས་པ་ནི། རང་དོན་མཐར་ཕྱིན་ཞི་བ་ཆོས་ཀྱི་སྐུ༔ གཞན་དོན་ལྷུན་གྲུབ་ཟུང་འཇུག་ལོངས་སྤྱོད་རྫོགས༔ གང་འདུལ་ཐབས་མཁས་སྣ་ཚོགས་སྤྲུལ་པའི་ཚུལ༔ སྣང་ཆ་སོ་སོར་མ་འདྲེས་མངོན་བྱང་ཆུབ༔ སྟོང་ཆ་དབྱིངས་སུ་རོ་གཅིག་རྡོ་རྗེའི་སྐུ༔ སྐུ་ལྔ་ཐོབ་ནས་གསུང་ལྔས་དོན་མཚོན་པ༔ བརྗོད་བྲལ་རྣམ་དག་ཆོས་སྐུ་དོན་གྱི་གསུང་༔ སྐུ་ཡིས་མཚོན་པ་ལོངས་སྐུ་བརྡ་ཡི་གསུང་༔ ཚངས་པའི་དབྱངས་ལྡན་སྤྲུལ་སྐུ་ཚིག་གི་གསུང་༔ སོ་སོར་དེར་སྣང་མངོན་བྱང་རིག་པའི་གསུང་༔ གྲགས་སྟོང་གཉིས་མེད་ཡེ་ཤེས་རྡོ་རྗེའི་གསུང་༔ སྐུ་ཡི་སྙིང་པོ་ཐུགས་ནི་ཡེ་ཤེས་ལྔ༔ ཆོས་ཀྱི་དབྱིངས་ལས་མེ་ལོང་ལྟ་བུར་ཤར༔ བྱ་གྲུབ་སོར་རྟོག་གཉམ་པ་ཉིད་དུ་ཟླུམ༔ སྐུ་ཡི་ཡན་ལག་ཞིང་ཁམས་གཞལ་ཡས་དང་༔ འོད་ཟེར་གདན་ཁྲི་རྒྱན་གྱི་ཡོན་ཏན་རྫོགས༔ ཞི་རྒྱས་དབང་དྲག་ལྷུན་གྲུབ་ཕྲིན་ལས་ཀྱིས༔ ནམ་མཁའ་ཇི་སྲིད་རྒྱུན་ཆད་མི་མངའ་བར༔ ཇི་སྙེད་མཁའ་ཁྱབ་སེམས་ཅན་ཐམས་ཅད་དོན༔ ཇི་ལྟ་བ་བཞིན་རྩོལ་མེད་ངང་གིས་འབྱུང་༔ ཞེས་གསུངས་ཏེ།

འདི་ལ་ལྔ། སངས་རྒྱས་ཀུན་གྱི་ཆེ་བའི་ཡོན་ཏན་གྱི་རྟེན་བྱེད་པའི་ཆ་ནས་སྐུ་དང༌། གདུལ་བྱ་ལ་ཆོས་དོན་བརྡ་སྤྲོད་པས་གསུང་དང༌། བརྟེན་པ་སྙིང་པོ་མི་གཡོ་བས་ཐུགས་དང༌། དགོས་འདོད་ཐམས་ཅད་འབྱུང་བས་ཡོན་ཏན་དང༌། གཞན་དོན་མཛད་པས་ཕྲིན་ལས་སོ། །དང་པོ་ནི། སྤངས་པ་དང་རྟོགས་པ་ཆེན་པོས་རང་དོན་མཐར་ཕྱིན་པའི་ངོ་བོ་དབྱིངས་ཐོག་ཏུ་རིག་པའི་ཡེ་ཤེས་གྲོལ་བས་སྤྲོས་པ་ཐམས་ཅད་ཉེ་བར་ཞི་བ་ནི་ཆོས་ཀྱི་སྐུ། སྙིང་རྗེའི་སེམས་ཆེན་པོས་གཞན་དོན་ལྷུན་གྱིས་གྲུབ་པའི་རང་བཞིན་ཆོས་ཀྱི་སྐུ་ལས་མ་གཡོས་བཞིན་ཏུ་དག་པའི་གདུལ་བྱ་རྒྱལ་སྲས་ས་བཅུ་པའི་ངོར་སྣང་སྟོང་ཟུང་འཇུག་ཐུན་མིན་རྒྱུ་འབྲས་ཀྱི་མཚན་དཔེ་དང་ལྡན་པར་སྣང་བ་ནི་ལོངས་སྤྱོད་རྫོགས་པའི་སྐུ། མ་དག་པའི་གདུལ་བྱ་འགྲོ་བ་དྲུག་གི་མོས་པ་དང་མཐུན་པར་གང་གིས་འདུལ་བ་དེ་ལ་དེར་སྟོན་གྱི་ཐབས་ལ་མཁས་པའི་ཐུགས་རྗེའི་རོལ་པས་མ་ངེས་སྣ་ཚོགས་སྤྲུལ་པའི་ཚུལ་བཟོ་སྐྱེ་མཆོག་སོགས་སྣང་བ་ནི་སྤྲུལ་པའི་སྐུ། གསུམ་པོ་དེ་དག་གདུལ་བྱ་སོ་སོའི་སྐལ་བ་དང་མཐུན་པར་སྣང་བའི་ཆ་སོ་སོར་མ་འདྲེས་པར་སྟོན་པའི་ཡོན་ཏན་སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད། བྱང་ཕྱོགས་ཀྱི་ཆོས་སོ་བདུན་གྱིས་མཚོན་མཁྱེན་བརྩེ་ནུས་པའི་ཡོན་ཏན་བསམ་གྱིས་མི་ཁྱབ་པ་མངའ་བའི་ཆ་ནས་མངོན་པར་བྱང་ཆུབ་པའི་སྐུ། དོན་དམ་པར་གཟུགས་སྐུ་གཉིས་པོའང་ཐ་དད་རང་རྒྱུད་པར་མེད་ཅིང་དག་པ་གཉིས་ལྡན་སྟོང་པའི་ཆ་ཆོས་ཉིད་འོད་གསལ་འཕོ་འགྱུར་མེད་པའི་དབྱིངས་སུ་སྐུ་གསུམ་དབྱེར་མེད་རོ་གཅིག་པ་ནི་མི་འགྱུར་རྡོ་རྗེའི་སྐུའོ། །གཉིས་པ་ནི། དེ་ལྟར་སྐུ་ལྔ་ཐོབ་ནས་སོ་སོའི་གསུང་ལྔ་པོས་འཁོར་ལ་བརྡ་སྤྲོད་ཅིང་དོན་མཚོན་པར་བྱེད་པ་སྟེ། དེའང་ཆོས་ཉིད་སྨྲ་བརྗོད་དང་བྲལ་བའི་རྣམ་པར་དག་པའི་ཡེ་ཤེས་ཉིད་བསམ་བརྗོད་ཐམས་ཅད་ཀྱི་གཞིར་གྱུར་པའི་ཆ་ནི་ཆོས་སྐུ་སྐྱེ་མེད་དོན་གྱི་གསུང༌། མེ་ལོང་གིས་བྱེད་ཀྱི་དྲི་མ་ངོས་ཟིན་ནས་སེལ་བར་བྱེད་པ་ལྟར་སྐུ་མཐོང་བ་དེ་ཡིས་འཁོར་གྱི་བློ་ལ་དོན་གྱི་བརྡ་འཕྲོད་པའི་ཡེ་ཤེས་མཚོན་པ་ནི་ལོངས་སྐུ་དགོངས་པ་བརྡའི་གསུང༌། ཚངས་པའི་གསུང་དབྱངས་ཡན་ལག་དྲུག་ཅུ་དང་ལྡན་པས་གདུལ་བྱ་གང་ལ་གང་འདུལ་གྱི་ངོར་སོ་སོའི་སྒྲ་སྐད་དང་མཐུན་པར་དུས་གཅིག་ཏུ་ཚིག་རེས་དོན་རེ་གོ་བ་ནི་སྤྲུལ་སྐུ་བརྗོད་པ་ཚིག་གི་གསུང༌། དོན་ཏུ་ཚིག་གཅིག་མ་གསུངས་ཀྱང་རིགས་དྲུག་སོ་སོའི་སྒྲ་སྐད་དང་མོས་པ་ཇི་ལྟ་དེ་ལྟར་སྣང་ཞིང་དེ་ཐམས་ཅད་ཀྱང་རང་རིག་པར་གསལ་ལ་ཅིར་ཡང་མི་འགག་པའི་ཡེ་ཤེས་ནི་མངོན་བྱང་རིག་པའི་གསུང༌། སྒྲ་སྐད་ཐམས་ཅད་གྲགས་སྟོང་གཉིས་སུ་མེད་པས་མཐའ་གཉིས་གྲོལ་བར་གོ་བརྡ་འཕྲོད་པའི་ཡེ་ཤེས་ནི་རྡོ་རྗེའི་གསུང་སྟེ། གསུང་ལྔ་པོ་དེ་རྣམས་ངོ་བོ་བརྡ་སྤྲོད་པར་གཅིག་ལ་བརྗོད་ཚུལ་དང་རྟོག་པ་ཐ་དད་པའོ། །གསུམ་པ་ནི། སྐུ་ལྔའི་སྙིང་པོར་གྱུར་པ་ཐུགས་ལྔ་ནི་བརྟེན་པ་ཡེ་ཤེས་ལྔ་པོ་སྟེ། དེའང་གློ་བུར་གྱི་སྒྲིབ་པ་མཐའ་དག་མ་སྤངས་བྲལ་བའི་རང་བཞིན་རྟོགས་པའི་ཚེ་གཞི་དོན་གྱི་ཀུན་གཞི་མངོན་ཏུ་གྱུར་པ་ནི་ཅིར་ཡང་མི་དམིགས་པ་ཆོས་ཀྱི་དབྱིངས་ཀྱི་ཡེ་ཤེས། དེའི་ཚེ་སྦྱོར་བ་དོན་གྱི་ཀུན་གཞི་གནས་གྱུར་པ་ལས་གསལ་ལ་མི་རྟོག་པས་ལྷག་མ་གསུམ་གྱི་འཆར་གཞིར་གྱུར་པ་ནི་མེ་ལོང་ལྟ་བུའི་ཡེ་ཤེས་དེར་ཤར་ཅིང༌། སྒོ་ལྔ་གནས་གྱུར་འགྲོ་དོན་མཛད་པ་ལ་ཐོགས་པ་མེད་པ་བྱ་བ་གྲུབ་པའི་ཡེ་ཤེས་དང༌། ཡིད་གནས་གྱུར་པས་ཤེས་བྱའི་ཡུལ་དུས་གསུམ་གྱི་ཆོས་ཐམས་ཅད་པདྨའི་འདབ་མ་ལྟར་གསལ་ལ་མ་འདྲེས་པར་མཁྱེན་པ་ནི་སོར་རྟོག་ཡེ་ཤེས་གཉིས་ཀྱང༌། ཉོན་ཡིད་གནས་གྱུར་བཟང་ངན་བླང་དོར་མེད་པ་མཉམ་པ་ཉིད་ཀྱི་ཡེ་ཤེས་སུ་ཟླུམ་པའོ། །དེ་དག་ལས་ཆོས་དབྱིངས་སྟོང་པ་ཉིད་ཀྱི་ཡེ་ཤེས་ནི་ཆོས་སྐུ་རྣམ་པར་མི་རྟོག་པའི་ཐུགས། མཉམ་ཉིད་ཡེ་ཤེས་ནི་ལོངས་སྐུ་མཉམ་པ་ཆེན་པོའི་ཐུགས། བྱ་གྲུབ་ཡེ་ཤེས་ནི་སྤྲུལ་སྐུ་འགྲོ་བ་སྒྲོལ་བའི་ཐུགས། མེ་ལོང་ཡེ་ཤེས་ནི་མངོན་བྱང་ཅིར་ཡང་ས་ལེར་མཁྱེན་པའི་ཐུགས། སོར་རྟོག་ཡེ་ཤེས་ནི་མི་ཕྱེད་རྡོ་རྗེའི་ཐུགས་སོ། །བཞི་པ་ནི། སྐུ་དེ་རྣམས་ཀྱི་ཡན་ལག་གི་ཆོས་སུ་གྱུར་པ་རྣམ་པར་དག་པའི་ཞིང་ཁམས། རྒྱ་ཚད་བྲལ་བའི་གཞལ་ཡས་ཁང་པ་དང༌། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་རྒུར་རོལ་པའི་རྒྱན་གྱི་ཡོན་ཏན་རྣམས་རྫོགས་པའོ། །དེ་ལ་ཅུང་ཟད་སྤྲོ་ན། ཆོས་སྐུའི་ཞིང་ཁམས་དབྱིངས་རང་བཞིན་གྱིས་རྣམ་པར་དག་པ། ལོངས་སྐུའི་ཞིང་ཁམས་རང་གསལ་ལྷུན་གྲུབ་འོད་ཀྱི་འཁོར་ལོ། །སྤྲུལ་སྐུའི་ཞིང་ཁམས་སྟོང་གསུམ་མི་མཇེད་བྱེ་བ་ཕྲག་བརྒྱ། གཞལ་ཡས་ཁང་ནི་ཆོས་སྐུ་ལ་ཆོས་དབྱིངས་སྤྲོས་པ་དང་བྲལ་བ། ལོངས་སྐུ་ལ་ལྷུན་གྲུབ་དབྱིངས་ཀྱི་སྣང་བ། སྤྲུལ་སྐུ་ལ་ཡེ་ཤེས་རིན་པོ་ཆེའི་རང་བཞིན། འོད་ཟེར་ལའང་ཆོས་སྐུ་ལ་ཡེ་ཤེས་ལྔའི་འོད་ཟེར། ལོངས་སྐུ་ལ་ཡེ་ཤེས་ཀྱི་རང་གདངས་འོད་ལྔ་རུ་འབར་བ། སྤྲུལ་སྐུ་ལ་སྐུའི་གནས་བ་སྤུའི་བུ་ག་རེ་རེ་ནས་ཀྱང་འོད་ཟེར་བྱེ་བ་བརྒྱ་སྟོང་ཕྲག་དྲུག་ཅུ་འཕྲོ་བ། གདན་ཁྲི་ནི་ཆོས་སྐུ་ལ་ལྟ་བ་ཁ་སྦྱོར། ལོངས་སྐུ་ལ་ཤེས་རབ་ཁ་སྦྱོར། སྤྲུལ་སྐུ་ལ་ཐུགས་རྗེ་ཁ་སྦྱོར་རོ། །རྒྱན་ཆ་ནི་ཆོས་སྐུ་སྐྱེ་མེད་རྣམ་དག་ལ་རྒྱན་གྱི་ཐ་སྙད་མཛད་པ་དང༌། ལོངས་སྐུ་ལ་འགག་མེད་རང་གསལ་གྱི་རྒྱན་ཐུན་མོང་མ་ཡིན་པའི་མཚན་དཔེ་སྟེ། དེ་ལ་ཕྱི་ནང་གསང་བ་གསུམ་གསུམ་དུ་དབྱེར་ཡོད་ཅིང༌། གཞན་ཡང་ལོངས་སྐུ་རྟགས་ཀྱི་རྒྱན་བཅུར་གྲགས་པ། དབུ་རྒྱན། སྙན་རྒྱན། མགུར་ཆུ། དོ་ཤལ། དཔུང་རྒྱན། ཕྱག་གདུབ་གཉིས། ཞབས་གདུབ་གཉིས། སེ་མོ་དོ་དང་བཅུའོ། །སྤྲུལ་སྐུའི་རྒྱན་ཐུན་མོང་གི་མཚན་བཟང་སོ་གཉིས་དང་དཔེ་བྱད་བརྒྱད་ཅུ་སྟེ། དེ་ནི་འཁོར་ལོས་སྒྱུར་བའི་རྒྱལ་པོ་ལའང་ཕྱོགས་མཐུན་ཙམ་ཡོད་པས་ཐུན་མོང་གི་མཚན་དཔེར་བཤད་དོ། །ལྔ་པ་ནི། ལས་དང་ཉོན་མོངས་པའི་རྣམ་པར་རྟོག་པ་དང་ནད་གདོན་སོགས་ཞི་བར་བྱེད་པ་དང༌། ཚེ་བསོད་དཔལ་འབྱོར་རང་རིག་པའི་ཡེ་ཤེས་ཀྱི་མངོན་རྟོགས་ཐམས་ཅད་རྒྱས་པར་བྱེད་པ་དང༌། རླུང་སེམས་སྣང་བས་བསྡུས་པའི་འཁོར་འདས་ཀྱི་ཆོས་ཐམས་ཅད་རང་དབང་དུ་མཛད་པ་དང༌། ཞི་བས་མི་ཐུལ་པའི་དགྲ་བགེགས་ལོག་འདྲེན་རྣམས་ཐུགས་རྗེ་དྲག་པོར་ཁྲོས་པས་ཚར་བཅད་པ་དང༌། གནས་ལུགས་ཇི་ལྟ་བ་མངོན་ཏུ་གྱུར་པས་མཛད་དང་མཛད་པར་བྱ་བ་གང་ཡང་མི་དམིགས་པའི་ངང་ནས་ཕྱོགས་དང་རིས་སུ་ཆད་པ་མེད་པ་ནི་ལྷུན་གྱིས་གྲུབ་པའྀ་ཕྲིན་ལས་སོ། །དེ་ལྟ་བུའི་ཕྲིན་ལས་ཀྱིས་གདུལ་བྱ་འདུལ་བ་ནི་རྟག་ཁྱབ་ལྷུན་གྲུབ་ཀྱི་བདག་ཉིད་ཅན་ཏེ། ནམ་མཁའ་ཇི་སྲིད་པར་འཁོར་བའི་མཐའ་ཟད་པ་མེད་ཅིང་འཁོར་བ་ཇི་སྲིད་མ་སྟོང་བར་སངས་རྒྱས་ཀྱི་ཕྲིན་ལས་རྒྱུན་ཆད་མི་མངའ་བར་རྟག་པ་སྟེ། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་ཆད་པར་འདོད། །ཅེས་སོ། །རྟག་པ་དེའང་ཕྱོགས་རེར་འཇུག་པ་མ་ཡིན་པར་ཇི་སྙེད་ནམ་མཁའི་ཁམས་ཀྱིས་ཁྱབ་པ་དེ་སྙེད་ཀྱི་གདུལ་བྱ་སེམས་ཅན་ཀྱི་ཁམས་ལ་ཕྱོགས་རིས་མེད་པར་ཁྱབ་པ་སྟེ། རྒྱུད་བླ་མར། དེ་ལྟར་ནམ་མཁའི་མཐའ་ཀླས་ཀྱི། །འགྲོ་ལ་རྟག་ཏུ་ལྷུན་གྲུབ་པར། །ཐོགས་མེད་བློ་ལྡན་དེ་ཡིས་ནི། །སེམས་ཅན་དོན་ནི་ཡང་དག་འཇུག །ཅེས་སོ། །གདུལ་བྱ་འདུལ་བའི་དུས་ལ་བབས་པ་ན་དབང་པོ་དང་འཚམས་པར་ཐམས་ཅད་ཀྱི་དོན་མ་ནོར་བར་ཇི་ལྟ་བ་བཞིན་འབད་རྩོལ་མེད་པར་ངང་གིས་འབྱུང་བ་ལྷུན་གྱིས་གྲུབ་པ་སྟེ། རིམ་གསུམ་ལས། འབྲས་བུ་ཡོན་ཏན་ལྷུན་གྲུབ་པས། །ཡིད་བཞིན་ནོར་བུ་ལྟར་སྣང་བའོ། །ཞེས་སོ།

།བཞི་པ་མན་ངག་གི་དགོས་འབྲེལ་བསྟན་པ་ནི། དེ་ལྟར་གཞི་ལ་ལམ་གྱིས་མཚམས་སྦྱར་བས༔ གློ་བུར་དྲི་མ་བག་ཆགས་བཅས་སྤངས་ཏེ༔ འབྲས་བུ་མངོན་གྱུར་རང་དང་གཞན་གྱི་དོན༔ མྱུར་དུ་རྫོགས་བྱེད༔ ཅེས་གསུངས་ཏེ། སྔར་རྒྱས་པར་བསྟན་པ་དེ་ལྟར་སྦྱང་གཞི་བདེ་བར་གཤེགས་པའི་སྙིང་པོ་འདམ་ཁྲོད་ན་གནས་པའི་ནོར་བུ་བཞིན་ཏུ་སེམས་ཅན་ཐམས་ཅད་ཀྱི་རྒྱུད་ལ་གདོད་ནས་རང་བབས་སུ་བཞུགས་པ་ལ། སྦྱོང་བྱེད་ཐུན་མོང་དང་ཐུན་མོང་མ་ཡིན་པ་རིམ་པ་གཉིས་ཀྱིས་བསྡུས་པའི་རྣལ་འབྱོར་ཆུ་དང་འདག་རྫས་ལྟ་བུའི་ལམ་གྱིས་མཚམས་སྦྱར་ནས། སྦྱང་བྱ་མེད་སྣང་གཉིས་འཛིན་གློ་བུར་གྱི་དྲི་མ་རགས་པ་འདམ་རྫབ་ལྟ་བུ་སྦྱངས་ཤིང་ཕྲ་བ་ས་བོན་བག་ཆགས་དང་བཅས་པའང་སྤངས་ཏེ། སྦྱངས་པའི་འབྲས་བུ་གཞི་ལ་ཇི་ལྟར་ཡོད་པའི་ཡོན་ཏན་མངོན་ཏུ་གྱུར་ཏེ་ཡིད་བཞིན་གྱི་ནོར་བུ་དྲི་མ་ཐམས་ཅད་དང་བྲལ་བ་ལས་འདོད་རྒུ་འབད་མེད་དུ་འབྱུང་བ་བཞིན་རང་དང་གཞན་གྱི་དོན་རྩོལ་བ་མེད་པར་མྱུར་དུ་རྫོགས་པར་བྱེད་པའོ། །དེ་ལ་དགོས་འབྲེལ་གྱི་ངོ་བོ་ནི། མཚོན་བྱ་མཚོན་བྱེད་ཡོད་པ་ལས་དགོས་པ་དང་ཉིང་དགོས་ཤུགས་ལས་གྲུབ་པའོ། །ངེས་ཚིག་ནི། དགོས་སོགས་ཆོས་བཞི་ཡོད་པ་དེ་དག་ཕན་ཚུན་གཅིག་ལ་གཅིག་ལྟོས་སུ་འབྲེལ་ཞིང༌། མཐར་ཐུག་འབྲས་བུ་སྒྲུབ་པ་ལའང་དེ་དག་མེད་ན་མི་འབྱུང་གི་འབྲེལ་བར་གྲུབ་པའོ། །དབྱེ་ན། ཐུགས་ཐིག་ལས། བརྗོད་འབྲེལ་དགོས་པ་ཡང་དགོས་དང༌། རྒྱུ་རྐྱེན་ཡན་ལག་བཞི་རུ་བཟུང༌། །ཞེས་པ་ལྟར་བརྗོད་བྱ། རྗོད་བྱེད། དགོས་པ་ཉིང་དགོས་བཞི། དེ་ལའང་གྲོལ་ལམ་དབང་བཙན་ཏུ་བྱས་ན། སྔར་སྨོས་པའི་སྦྱང་གཞི་བདེ་གཤེགས་སྙིང་པོ་ནི་མཚོན་བྱ་རང་བཞིན་གཞིའི་རྒྱུད་དེ་བརྗོད་བྱ། སྦྱོང་བྱེད་ལམ་གྱི་རིམ་པ་བརྡར་བཏགས་ཡི་གེ་དང་བཅས་པ་ནི་མཚོན་བྱེད་ལམ་རྐྱེན་ཏེ་རྗོད་བྱེད། དེ་ལ་ཐོས་བསམ་བྱས་པས་བརྗོད་བྱ་དོན་སྤྱིའི་ཚུལ་དུ་གོ་བ་ནི་དགོས་པ། དེ་ལྟར་ཤེས་པའི་དོན་བསྒོམས་པས་ཐུན་མོང་དང་མཆོག་གི་དངོས་གྲུབ་མངོན་ཏུ་བྱེད་པ་ནི་ཉིང་དགོས་སོ། །ཐབས་ལམ་དབང་བཙན་ཏུ་བྱས་ན། ལྷན་སྐྱེས་ཡེ་ཤེས་གདོད་ནས་རང་ལ་རང་ཆས་སུ་བཞུགས་པ་ནི་བརྗོད་བྱ། དེ་རྟོགས་བྱེད་ཐབས་ཀྱི་མན་ངག་གླེགས་བམ་དང་བཅས་པ་ནི་རྗོད་བྱེད། དེ་དོན་ཉམས་སུ་བླངས་པས་བདེ་ཆེན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་ནི་དགོས་པ། དེ་གོམས་པར་བྱས་པས་མཆོག་ཏུ་མི་འགྱུར་བའི་བདེ་ཆེན་ཡེ་ཤེས་མངོན་ཏུ་བྱས་པ་ནི་ཉིང་དགོས་སོ། །འབྲེལ་བའི་དོན་ཀྱང༌། བརྗོད་བྱ་རྗོད་བྱེད་གཉིས་ཤེས་བྱ་ཤེས་བྱེད་དང༌། རྗོད་བྱེད་དགོས་པ་གཉིས་ཐབས་ལས་ཐབས་བྱུང་དང༌། དགོས་པ་ཉིང་དགོས་གཉིས་དེ་ལས་དེ་བྱུང་དང༌། ཉིང་དགོས་དང་བརྗོད་བྱ་གཉིས་ངོ་བོ་བདག་གཅིག་གི་འབྲེལ་བར་གྲུབ་པ་ཡིན་ནོ། །ལྔ་པ་འཁོར་ལ་གདམས་ཤིང་བསྟན་པ་གཏད་པ་ལ་གཉིས། མན་ངག་འདི་ཤིན་ཏུ་ཟབ་པར་གདམས་པ་དང༌། འཁོར་ལ་གཏད་པ་སྨོན་ལམ་དང་བཅས་པའོ། །དང་པོ་ནི། རྒྱུ་འབྲས་ཐེག་པའི་བཅུད༔ ཁྱད་པར་ནང་རྒྱུད་སྡེ་གསུམ་དགོངས་པའི་མཐིལ༔ ཀུན་དང་མཐུན་ལ་ཀུན་ལས་ཁྱད་པར་འཕགས༔ ཀུན་གྱི་སྤྱྀ་འདྲིལ་ཡེ་ཤེས་སྙིང་པོའི་ལམ༔ མིག་འཕྲུལ་ལྟ་བུར་འབྲས་བུ་མངོན་བྱེད་ཐབས༔ མཐོང་བ་ཙམ་གྱིས་བྱིན་རླབས་ཟིལ་ཆེན་འབེབས༔ ཐོས་པས་དོན་གོ་ཉམས་རྟོགས་ཀློང་ནས་བརྡོལ༔ གཡེང་བ་སྤངས་ཏེ་ཟླ་བ་དྲུག་བསྒོམ་པས༔ རྡོ་རྗེ་གསུམ་གྱི་ཡེ་ཤེས་རང་ཤར་བ༔ ཀུན་བཟང་རྡོ་རྗེ་སེམས་དཔའ་པདྨ་འབྱུང་༔ དོན་ལ་དབྱེར་མེད་གཅིག་ཏུ་ལྷུན་རྫོགས་ཕྱིར༔ རབ་འབྱམས་རྒྱུད་སྡེ་ཀུན་གྱི་འཕྲོ་གཞི་དང་༔ སྙིང་པོའི་དོན་དང་མན་ངག་ཉིད་ཡིན་ཀྱང་༔ རྣམ་པ་འཛམ་གླིང་གདུལ་བྱ་དྲང་བའི་སླད༔ དྷ་ན་ཀོ་ཥར་བརྫུས་ཏེ་བྱུང་བ་དང་༔ མངལ་དུ་སྐྱེས་སོགས་སྣང་ཚུལ་ཐ་དད་པའི༔ མཛད་པའི་ཆོ་འཕྲུལ་ཅིར་ཡང་སྟོན་པ་ན༔ མཱ་ར་ཏཱི་ཀར་ཚེ་དཔག་མེད་མགོན་དང་༔ ཡང་ལེ་ཤོད་དུ་དཔལ་ཆེན་ཧེ་རུ་ཀས༔ ཆོས་ཉིད་རང་སྒྲས་བདག་ལ་སྩལ་བ་ཡི༔ གདམས་པ་ཀུན་གྱི་ཡང་ཞུན་འདི་ཁོ་ན༔ དགའ་རབ་ཤྲཱི་སིཾ་རིག་འཛིན་བརྒྱད་ལ་སོགས༔ གྲུབ་མཆོག་རྣམས་ལས་ལམ་རིམ་མནོས་པ་དང་༔ ཕན་ཚུན་ཆོས་ཀྱི་བགྲོ་བ་ཆེན་པོ་ཡིས༔ དགོངས་ཉམས་བསྡུར་བའི་མདོ་བྱང་འདི་ལས་མེད༔ ཨོ་རྒྱན་རྒྱ་གར་བོད་ཡུལ་ལ་སོགས་སུ༔ བླ་རྫོགས་ཐུགས་གསུམ་སྒྲུབ་སྡེ་བརྒྱད་ལ་སོགས༔ ཟབ་ཅིང་རྒྱ་ཆེའི་ཆོས་འཁོར་འབྱམས་ཀླས་པ༔ ཀུན་གྱི་དོན་བསྡུས་མ་ནོར་འདི་ཡིན་ནོ༔ མདོར་ན་རྗོད་བྱེད་ཚིག་ཉུང་བརྗོད་བྱ་འདྲིལ༔ གོ་སླ་ཁྱེར་བདེ་གཞན་ལ་མ་ལྟོས་པར༔ དབང་པོ་དམན་འབྲིང་མཆོག་གི་ལམ་རྫོགས་པའི༔ མཐར་ཐུག་ཞལ་གདམས་འདི་ལས་གཞན་མ་མཆིས༔ དེ་ཕྱིར་བདག་ཉིད་པདྨ་སཾ་བྷ་བའི༔ ཐུགས་ཀྱི་ཐིག་ལེ་ལྔ་ལྡན་འོད་གསལ་དབྱིངས༔ མི་ཤིགས་དྭངས་མ་ཆོས་ཉིད་རང་སྒྲའི་རྒྱུད༔ དུས་གསུམ་སངས་རྒྱས་ཀུན་གྱི་གཤེགས་ཤུལ་འདི༔ ཞེས་གསུངས་ཏེ།

དེ་ལྟར་ཇི་སྐད་བསྟན་པའི་ཞལ་གདམས་མན་ངག་ལམ་གྱི་རིམ་པ་ཁྱད་གཞིའི་གཞུང་ཉིད་ནི། རྒྱུ་ལམ་དུ་བྱེད་པ་ཕར་ཕྱིན་གྱི་ཐེག་པ་དང་འབྲས་བུ་ལམ་དུ་བྱེད་པ་གསང་སྔགས་རྡོ་རྗེ་ཐེག་པའི་ཆོས་ཚུལ་རྒྱ་མཚོ་ཆེན་པོའི་ཡང་བཅུད་བདུད་རྩིའི་གོང་བུ་ལྟ་བུ། ཁྱད་པར་དུའང་རྒྱུད་མ་ཧཱ་ལུང་ཨ་ནུ་མན་ངག་ཨ་ཏི་ཡོ་ག་སྟེ་ནང་རྒྱུད་སྡེ་གསུམ་གྱི་དགོངས་པའི་མཐིལ་དུ་ཐུག་པ། འཆད་པའི་ཚུལ་མདོ་སྔགས་ཀྱི་ཆོས་སྒོ་ཀུན་དང་མཐུན་ལ་དོན་ཟབ་ཅིང་འདྲིལ་ལ་མ་ཚང་བ་མེད་པའི་ཕྱིར་ཀུན་ལས་ཁྱད་པར་དུ་འཕགས་པ་ཐེག་རིམ་ཀུན་གྱི་སྤྱི་གནད་གཅིག་ཏུ་འདྲིལ་བ་ཡེ་ཤེས་སྙིང་པོའི་ལམ་རིམ་ཟབ་མོ་འདི་ལ་བརྟེན་ནས། མིག་འཕྲུལ་གྱི་སྣང་བ་ལྟ་བུར་དཀའ་བ་མེད་ཅིང་མྱུར་བ་ཁོ་ནར་སངས་རྒྱས་ཀྱི་འབྲས་བུ་མངོན་ཏུ་བྱེད་པའི་ཐབས་བླ་ན་མེད་པར་གྱུར་པ་ཡིན་ལ། ཁྱད་ཆོས་ཡོན་ཏན་གཞུང་འདི་ཉིད་སྐལ་བ་དང་ལྡན་པ་གང་དག་གིས་མཐོང་བ་ཙམ་གྱིས་བྱིན་རླབས་ཀྱི་ཟིལ་དང་གཟི་བརྗིད་ཆེན་པོ་རང་ཤུགས་ཀྱིས་འབེབས་པ་དང༌། སློབ་དཔོན་གྱིས་བཤད་པའི་ཚིག་རྣ་བར་ཐོས་པ་ཙམ་གྱིས་དོན་སྤྱི་གོ་ཞིང་དེ་ལ་རྟོག་དཔྱོད་གྱི་བསམ་པས་ཉམས་མྱོང་དང་རྟོགས་པའི་ཡེ་ཤེས་ཀློང་ནས་བརྡོལ་བ་དང༌། རྣམ་པར་གཡེང་བ་སྤངས་ཏེ་ཟླ་བ་དྲུག་ཏུ་འདིའི་དོན་རྩེ་གཅིག་ཏུ་བསྒོམས་པས་རྡོ་རྗེ་མི་ཕྱེད་པ་གསུམ་གྱི་ཡེ་ཤེས་ཆེན་པོ་རང་བཞིན་གྱིས་ཤར་བར་ངེས་པ་སྟེ། ཁྱད་པར་དེ་ལྡན་གྱི་གཞུང་འདི་ཚུལ་ཇི་ལྟར་ན། ཀ་དག་ཆོས་སྐུ་ཀུན་ཏུ་བཟང་པོ་དང་ལྷུན་གྲུབ་ལོངས་སྐུ་རྡོ་རྗེ་སེམས་དཔའ། ཟུང་འཇུག་སྤྲུལ་སྐུ་པདྨ་འབྱུང་གནས་གསུམ་པོ་དོན་དམ་གྱི་དབྱིངས་ལ་ཐ་དད་དུ་དབྱེ་བ་བྱར་མེད་ཅིང་ཆོས་ཀྱི་དབྱིངས་སུ་རོ་གཅིག་པར་ལྷུན་གྱིས་རྫོགས་པའི་ཕྱིར་ན། བརྟག་གཉིས་ལས། འཆད་པ་པོ་ང་ཆོས་ཀྱང་ང༌། །རང་གི་ཚོགས་ལྡན་ཉན་པ་ང༌། །འཇིག་རྟེན་སྟོན་པ་བསྒྲུབ་བྱ་ང༌། །འཇིག་རྟེན་འཇིག་རྟེན་འདས་པ་ང༌། །ཞེས་གསུངས་པ་ལྟར་ཚད་དང་མུ་མེད་པའི་རབ་འབྱམས་རྒྱུད་སྡེ་རྒྱ་མཚོ་ཀུན་གྱི་འཕྲོ་གཞིར་གྱུར་པས་རྒྱུད་སྟོན་པ་པོ་དང་དེའི་བསྟན་པ་ཟབ་གསང་སྙིང་པོའི་དོན་གྱི་རྒྱུད་ལུང་རྣམས་དང༌། དེའི་ཟབ་གནད་ལག་ལེན་ཏུ་དྲིལ་བའི་མན་ངག་ཉིད་ཀྱང་ཐ་དད་རང་མཚན་ཏུ་མ་གྲུབ་པར་ངོ་བོ་ཆོས་སྐུ་གཅིག་གི་རང་སྣང་ཉིད་ཡིན་ཀྱང༌། རྣམ་པ་ཙམ་དུ་ཛམྦུས་མཚན་པའི་གླིང་བསྐལ་པ་བཟང་པོའི་སངས་རྒྱས་རྣམས་འབྱུང་བའི་ཞིང་འདིའི་གདུལ་བྱ་རྣམས་ཐར་པར་དྲང་པའི་སླད་དུ། ནུབ་ཕྱོགས་ཨོ་རྒྱན་དྷ་ན་ཀོ་ཥའི་མཚོ་གླིང་དུ་ངོ་མཚར་པདྨའི་སྡོང་པོ་ནས་བརྫུས་ཏེ་བྱུང་བ་དང༌། ཨོ་ཌཱི་ཡ་ནའི་ཡུལ་སོགས་སུ་རིགས་མཆོག་གི་མངལ་དུ་སྐྱེས་པ་སོགས་གཞན་སྣང་འཆར་ཚུལ་གཅིག་ཏུ་མ་ངེས་པར་ཐ་དད་པས་མཛད་པའི་ཆོ་འཕྲུལ་བཅུ་གཅིག་དང་བརྒྱ་རྩ་ལ་སོགས་པ་ཅིར་ཡང་སྟོན་པའི་སྐབས་སུ་བབས་པ་དེའི་ཚེ་ན། འཕགས་ཡུལ་ཤར་ཕྱོགས་བཀྲ་ཤིས་མཱ་ར་ཏཱི་ཀའི་བྲག་ཕུག་ཏུ་ཚེ་ལམ་གྱི་ཕྱག་རྒྱ་མནྡ་ར་བ་ལ་རྟེན་བྱས་ཏེ་འཆི་མེད་ཚེའི་རིག་འཛིན་བསྒྲུབས་པའི་དུས་བཅོམ་ལྡན་འདས་ཚེ་དཔག་མེད་མགོན་དངོས་སུ་བྱོན་ནས་བསྐལ་པ་མ་སྟོང་གི་བར་དུ་སྐྱེ་འཆི་མེད་པ་རྡོ་རྗེའི་སྐུར་བཞུགས་པའི་དབང་བསྐུར་ཞིང་རྒྱུད་དང་གདམས་ངག་དཔག་ཏུ་མེད་པ་སྩལ་བ་དང༌། བལ་ཡུལ་ཡང་ལེ་ཤོད་བཀྲ་ཤིས་པའི་ནགས་ཚལ་བྱང་ཆུབ་དམ་པའི་གླིང་དུ་ཡང་དག་གྲུབ་པ་གཅིག་པུའི་རྣལ་འབྱོར་གྱིས་ཕྱག་རྒྱ་ཆེན་པོའི་མཆོག་སྒྲུབ་པའི་ཚེ་དཔལ་ཆེན་ཧེ་རུ་ཀའི་ཡེ་ཤེས་ཀྱི་སྐུས་རང་བྱུང་ཆོས་ཉིད་རྡོ་རྗེའི་རང་སྒྲས་པདྨ་སཾ་བྷ་བ་བདག་ལ་དངོས་སུ་སྩལ་བའི་རྒྱུད་དང་གདམས་པ་མཐའ་ཡས་པ་དེ་དག་ཀུན་གྱི་ཡང་ཞུན་བཅུད་དུ་དྲིལ་བའང་ལམ་རིམ་ཟབ་མོ་འདི་ཁོ་ན་ཡིན་ལ། སྤྲུལ་པའི་སྐུ་མཆོག་དགའ་རབ་རྡོ་རྗེ། ཡེ་ཤེས་སྐུ་ཅན་ཤྲཱི་སིཾ་ཧ། ཀློང་དགུའི་ཡེ་ཤེས་དཔལ་ཆེན་པོ་བརྒྱད་ཀྱི་གོ་འཕང་གྲུབ་པ་རྡོ་རྗེའི་རིག་འཛིན་ཆེན་པོ་རྣམ་པ་བརྒྱད་ལ་སོགས་པ་གྲུབ་པ་མཆོག་གི་ས་ལ་བཞུགས་པ་རྣམས་ལས་ཐུན་མོང་ཁྱད་པར་གྱི་ལམ་རིམ་མཐའ་ཡས་པ་ནོས་པའི་ཚུལ་བསྟན་པ་དང༌། ཕན་ཚུན་ཏུ་དམ་པ་ཆོས་ཀྱི་བཀའི་འགྲོ་བ་ཆེན་པོ་མཛད་ནས་རྟོགས་པའི་གདིང་ཚད་དང་ལྟ་དགོངས་ཀྱི་ཉམས་མྱོང་ཟབ་མོ་བསྡུར་ནས་གཏན་ལ་ཕབ་པའི་གནད་ཀྱི་མདོ་བྱང་ཡང་འདི་ལས་གཞན་ཏུ་མེད་ཅིང༌། འཕགས་ཡུལ་ནུབ་ཕྱོགས་གསང་ཆེན་འབྱུང་གནས་ཨོ་རྒྱན། ལྷོ་ཕྱོགས་སངས་རྒྱས་འབྱོན་པའི་གནས་རྒྱ་གར། བྱང་ཕྱོགས་ཐུགས་རྗེ་ཆེན་པོའི་གདུལ་ཞིང་བོད་ཡུལ་ལ་སོགས་པ་ཛམ་གླིང་གི་ཡུལ་གྲུ་མཐའ་དབུས་སིངྒ་ལ་དང་འགྲོ་ལྡིང་སོགས་གླིང་ཕྲན་རྣམས་སུ། བླ་མ་གུ་རུ་རིན་པོ་ཆེ་ཉིད་ཀྱི་སྒྲུབ་ཐབས་ཆེ་ཆུང་མཐའ་ཡས་པ་རྫོགས་པ་ཆེན་པོ་ཕ་མ་གཉིས་འབྲེལ་གྱི་རྒྱུད་དང་འབྲེལ་བའི་གདམས་ཟབ། ཐུགས་རྗེ་ཆེན་པོ་ཞི་ཁྲོའི་བསྐྱེད་རྫོགས་གྲངས་ལས་འདས་པ་སྟེ་སྐལ་ལྡན་གཅིག་མི་ཚེ་གཅིག་གིས་སངས་རྒྱས་ཀྱི་སར་བགྲོད་པའི་ལམ་ཟབ་སྙིང་པོར་དྲིལ་བ་དེ་གསུམ་དང༌། སྒྲུབ་སྡེ་ཆེན་པོ་བརྒྱད་དཀྱིལ་འཁོར་གཅིག་ཏུ་སྒྲུབ་པ་དང་བྱེ་བྲག་སོ་སོར་སྒྲུབ་པའི་ཐབས་ལ་སོགས་པ་ཟབ་ཅིང་རྒྱ་ཆེ་བའི་ཆོས་ཀྱི་འཁོར་ལོ་འབྱམས་སུ་ཀླས་པ་བསྐོར་བ་དེ་དག་ཀུན་གྱི་ཟབ་དོན་གཅིག་ཏུ་བསྡུས་ཤིང་མ་ནོར་བའི་ལམ་མཆོག་ཀྱང་འདི་ཉིད་ཁོ་ན་ཡིན་ནོ།

།མདོར་བསྡུ་ན་རྗོད་བྱེད་ཚིག་ཚོགས་ཉུང་ཡང་བརྗཽད་བྱའི་དོན་མ་ཚང་བ་གང་ཡང་མེད་པར་གནད་དུ་འདྲིལ་ཞིང༌། རྡོ་རྗེའི་ཚིག་གིས་མ་བཅིངས་པར་ཞལ་གདམས་རྗེན་ཕྱུངས་སུ་བསྟན་པས་གོ་སླ་བ། མང་ཉུང་རན་པས་རྒྱུན་ཏུ་ཁྱེར་བདེ་བ། ལྟ་སྒོམ་སྤྱོད་པ་ཡན་ལག་བཅས་མ་ཚང་བ་མེད་པས་གཞུང་གཞན་ལ་མ་ལྟོས་པར། དབང་པོ་དམན་པ་ཉན་རང༌། འབྲིང་པོ་བྱང་སེམས། དབང་མཆོག་རྡོ་རྗེ་ཐེག་པ་དག་གི་རང་ལམ་ཡོངས་སུ་རྫོགས་པའི་ཕྱིར་ན། སྡེ་སྣོད་གསུམ་དང་ཐེག་དགུའི་སྙིང་པོ་མཐར་ཐུག་པའི་ཞལ་གདམས་འདི་ལས་ལྷག་པ་གཞན་གང་དུ་བཙལ་ཡང་མ་མཆིས་སོ། །རྒྱུ་མཚན་དེ་ལྟ་བུའི་ཕྱིར་བདག་ཉིད་གསུང་རྡོ་རྗེ་པདྨ་སཾ་བྷ་བའི་གསང་ཆེན་ཐུགས་ཀྱི་ཐིག་ལེ་ཡེ་ཤེས་ལྔ་ལྡན་གྱི་རང་འོད་གསལ་བའི་དབྱིངས་ལས། མི་ཤིགས་ནཱ་དའི་དྭངས་མ་ཆོས་ཉིད་རྡོ་རྗེའི་རང་སྒྲའི་རྒྱུད་ཀྱི་རྒྱལ་པོར་རང་བྱུང་བ། འདས་པ་དང་ད་ལྟར་དང་མ་བྱོན་པའི་དུས་གསུམ་གྱི་སངས་རྒྱས་སྟོབས་བཅུ་མངའ་བ་ཀུན་གཤེགས་ཤིང་གཤེགས་ལ་གཤེགས་པར་འགྱུར་བའི་ཤུལ་ལམ་ཆེན་པོ་འདི་ནི། ཞེས་ཟབ་གཉན་གཅེས་པའི་གདམས་པ་ལ་དངོས་པོ་ངེས་བཟུང་དུ་བསྟན་པའོ། །གཉིས་པ་ནི། མངའ་བདག་ཡབ་སྲས་གདམས་པའི་སྣོད་ལྡན་ཅིང་༔ བཻ་རོ་ཙ་ན་བདག་དང་དགོངས་པ་མཉམ༔ ཐུགས་ཀྱི་གཟུངས་མ་ཞབས་ཏོགས་ཕུལ་ཕྱིན་པའི༔ སྣོད་ལྡན་སྐལ་ལྡན་མཚན་ལྡན་ཚོགས་ལ་གཏད༔ ཡལ་བར་མ་དོར་སྙིང་གི་དབུས་སུ་ཟུངས༔ འདི་ལྟོས་འདིར་ཞུགས་འདི་ཉིད་བཤད་དང་སྒྲུབས༔ འདི་ལ་བརྟེན་ནས་མཐའ་ཡས་གདུལ་བྱ་ཀུན༔ ཡེ་ཤེས་སྙིང་པོ་ཚེ་འདིར་འགྲུབ་པར་ཤོག༔ ཅེས་གསུངས་ཏེ། མངའ་བདག་ཆོས་ཀྱི་རྒྱལ་པོ་ཡབ་འཇམ་མགོན་ཁྲི་སྲོང་ལྡེའུ་བཙན་དང་ལྷ་སྲས་སྐུ་མཆེད་སྔོན་གྱི་ལས་འཕྲོ་དང་སྨོན་ལམ་དག་པས་གདམས་ཟབ་བདུད་རྩི་སྦྱིན་པའི་སྣོད་དང་ལྡན་ཅིང་སྤྲུལ་པའི་ལོ་ཙཱ་བ་བཻ་རོ་ཙ་ན་སློབ་དཔོན་ཆེན་པོ་ཤྲཱི་སིང་ཧ་ལས་རྫོགས་པ་ཆེན་པོའི་ལྟ་དགོངས་མཐར་ཕྱིན་པས་ཨོ་རྒྱན་བདག་དང་དགོངས་པའི་རྟོགས་ཚད་མཉམ་པ་དང༌། ཐུགས་ཟིན་གྱི་གཟུངས་མ་དབྱིངས་ཕྱུག་ཡེ་ཤེས་ཌཱ་ཀི་མཚོ་རྒྱལ་མ་གུ་རུ་ཉིད་ལ་སྒོ་གསུམ་གུས་པ་ཆེན་པོས་ཞབས་ཏོག་ཕུལ་དུ་ཕྱིན་པས་མཉེས་པ་རྣམ་གསུམ་འགྲུབ་པའི་ཕྱིར། ཆོས་རྒྱལ་ཡབ་སྲས་དག་པའི་སྣོད་ལྡན་དུ་གྱུར་ཅིང་ལོ་ཙཱ་ཆེན་པོ་སྐལ་བ་མཆོག་དང་ལྡན་ལ་ཡེ་ཤེས་མཚོ་རྒྱལ་རྒྱུད་ལུང་ནས་འབྱུང་བའི་མཚན་ཉིད་དང་ལྡན་པ་སྟེ། དངོས་སུ་སྨིན་པ་གསུམ་ལྡན་ལྷན་ཅིག་པའི་འཁོར་འདུས་པ་རྣམས་དང༌། བརྒྱུད་ནས་གོ་ཕྱེ་བའི་འཁོར་མ་འོངས་པའི་གང་ཟག་སྣོད་ལྡན་སྐལ་ལྡན་མཚན་ལྡན་གྱི་ཚོགས་རྣམས་ལ་གཉེར་དུ་གཏད་པ་ཡིན་པས། བཏང་སྙོམས་ངང་དུ་ཡལ་བར་མ་དོར་བར་གཅེས་ཚད་སྲོག་དང་ཕོངས་ཚད་མིག་འབྲས་ལྟར་བཙའ་བས་རྟག་པར་སྙིང་གི་དབུས་སུ་དྲན་པའི་གཟུངས་ཀྱིས་མ་བརྗེད་པར་ཟུང་ཞིག །དེར་མ་ཟད་གཞུང་འདི་ཡི་གེར་བཀོད་ནས་ཡང་དང་ཡང་དུ་ལྟོས་ལ་ཇི་སྐད་བསྟན་པའི་ལམ་འདིར་ཞུགས་པ་དང་འདི་ཉིད་གཞན་ལ་རྒྱ་ཆེར་བཤད་པ་དང་རང་གིས་བརྩོན་པས་འདིའི་དོན་ཉམས་སུ་ལོང་ངེས་པར་སྒྲུབས་ཤིག །ཅེས་ཟབ་མོའི་བཀའི་གཏད་གཉེར་ཕྱི་ཚིག་ནན་ཐག་ཏུ་བསྡམས་ནས། གོང་དུ་བསྔགས་པ་བརྗོད་པ་དོན་དང་ལྡན་པའི་གདམས་པ་ཁྱད་པར་ཅན་འདི་ལ་བརྟེན་ནས། ད་ལྟར་དང་མ་འོངས་པ་ན་མཐའ་ཡས་པའི་གདུལ་བྱ་དངོས་དང་བརྒྱུད་ནས་མཐོང་ཐོས་དྲན་རེག་གིས་འབྲེལ་བར་གྱུར་པ་དེ་ཀུན་གཅིག་ཀྱང་མ་ལུས་པར། རང་བྱུང་གདོད་མའི་སངས་རྒྱས་ཡེ་ཤེས་སྙིང་པོའི་འབྲས་བུ་དུས་གཞན་ཏུ་མི་ལྟོས་པས་ཚེ་འདིར་ཁོ་ནར་འགྲུབ་པར་ཤོག་ཅིག །ཅེས་སྨོན་ལམ་དུ་མཛད་པ་སྟེ་རྡོ་རྗེའི་གསུང་ནམ་ཡང་བསླུ་བ་མེད་པས་དེ་ལྟར་འགྲུབ་པའང་ཡང་དག་ངེས་པའི་ཚད་མའོ། །རྩ་བའི་བཞི་པ་མཇུག་གི་དོན་ལ་གཉིས། གཞུང་ཡང་དག་པར་གྲུབ་པའི་ཚིག་གིས་མཇུག་བསྡུ་བ་དང༌། དེ་ལྟར་གྲུབ་པའི་གཞུང་ཉིད་སྔོན་དང་ཕྱི་མར་དར་བའི་ཚུལ་ལོ། །དང་པོ་ནི། ཅེས་ཐུགས་གྱི་སྙིང་པོ་གསང་བའི་མཛོད་བརྟོལ་ནས་གསུངས་ཚངས་པའི་དབྱངས་ཀྱིས་བཀའ་སྩལ་ཏེ་རྫུ་འཕྲུལ་གྱི་རྣམ་པར་རོལ་པ་དང་༔ བཀོད་པ་མཐའ་ཡས་པ་དང་བཅས་ཏེ་སྐུ་གསུང་ཐུགས་མི་ཟད་པ་ལྷུན་གྲུབ་སྟུག་པོ་བཀོད་པའི་རྒྱན་དམ་པར་བཞུགས་སོ༔ ཞེས་གསུངས་ཏེ།

དེ་སྐད་ཅེས་དུས་གསུམ་སངས་རྒྱས་ཐམས་ཅད་ཀྱི་གསང་གསུམ་སྒྱུ་འཕྲུལ་དྲྭ་བའི་སྤྱི་གཟུགས་གུ་རུ་རིན་པོ་ཆེའི་ཐུགས་ཀྱི་དགོངས་པའི་སྙིང་པོ་ཕྱུང༌། གསང་བ་ཡེ་ཤེས་ཆེན་པོའི་མཛོད་བརྟོལ་ནས་གསུང་ཡན་ལག་དྲུག་ཅུ་དང་ལྡན་པ་ཚངས་པའི་དབྱངས་ཀྱིས་མདོ་སྔགས་གདམས་པ་ཟབ་རྒུའི་ཡང་ཞུན་དུ་དྲིལ་ནས་བཀའ་སྩལ་པས་ཐམས་ཅད་དགྱེས་པ་ཆེན་པོས་ཚིམས་པའི་མདོངས་གསོལ་དུ། ངོ་མཚར་རྨད་དུ་བྱུང་བའི་རྫུ་འཕྲུལ་གྱི་རྣམ་པར་རོལ་པ་དང༌། རྣམ་པར་ཐར་པའི་བཀོད་པ་མཐའ་ཡས་པ་འདུས་པའི་ཚོགས་ཀྱི་དབང་པོའི་སྤྱོད་ཡུལ་དུ་སྣང་བར་མཛད་པ་དང་བཅས་ཏེ་སྟོན་འཁོར་དགོངས་པ་མཉམ་ཉིད་དུ་གྱུར་ནས་གུ་རུ་ཉིད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོར་ལྷུན་གྱིས་གྲུབ་པ་སྟུག་པོ་བཀོད་པའི་རྒྱན་མཆོག་དམ་པར་དུས་བཞིར་འཕོ་འགྱུར་མི་མངའ་བར་བཞུགས་སོ། །ས་མ་ཡ༔ ཞེས་པ་དོན་མང་པོར་འཇུག་ཀྱང་འདིར་གཞུང་ཟབ་པའི་ཕྱིར་སྣོད་མིན་ལ་གསང་བ་དང༌། རྡོ་རྗེའི་ཚིག་མི་འགྱུར་བའི་དམ་ཚིག་གི་རྒྱའོ། །གཉིས་པ་ལ་གཉིས། སྔོན་གྱི་སྐལ་ལྡན་རྣམས་ཀྱིས་བཟུང་ཚུལ་དང༌། མ་འོངས་འགྲོ་བ་རྣམས་ཀྱི་དོན་ཏུ་གཏེར་དུ་སྦས་པའི་ཚུལ་ལོ། །དང་པོ་ལ་གསུམ། བཀའི་བསྡུ་བ་ཇི་ལྟར་བྱས་ཚུལ། དེས་འགྲོ་དོན་འབྱུང་ཚུལ། དེ་ཉམས་སུ་བླང་ཚུལ་ལོ། །དང་པོ་ནི། དེ་ལྟར་བཀའ་སྩལ་པ་རྣམས་བདག་ཉིད་མཚོ་རྒྱལ་གྱིས་མི་བརྗེད་པའི་གཟུངས་སུ་བཟུང་ནས་བསམ་པ་དང་སྒོམ་པས་ཡིད་ལ་བྱས་སྟེ༔ སླར་ཡང་མངའ་བདག་ཡབ་སྲས་དང་༔ ལོ་ཙཱ་བ་ཆེན་པོ་དང་བཅས་ཕན་ཚུན་དགོངས་པ་བསྡུར་ཏེ་ཚིག་དོན་ལྷག་ཆད་མེད་པར་མཁའ་འགྲོ་གསང་བའི་ཡི་གེར་བྲིས༔ སོ་སོའི་མགུལ་གྱི་གའུར་འཆང་སྟེ་གནས་སོ༔ ཞེས་པའི་བར་གྱིས་རྡོ་རྗེའི་གསུང་མཐའ་དག་གི་བཀའི་སྡུད་པ་པོ་ཡེ་ཤེས་མཚོ་རྒྱལ་གྱིས་མི་བརྗེད་པའི་གཟུངས་གྱིས་ཐུགས་སུ་བཟུང་སྟེ་བསམ་སྒོམ་གྱིས་གཏན་ལ་ཕབ། དེ་ཙམ་དུ་མ་བཞག་པར་ཆོས་རྒྱལ་ཡབ་སྲས་ལོ་ཆེན་བཻ་རོ་བཅས་ལྷན་ཅིག་ཐོས་པའི་འཁོར་རྣམས་དང་དགོངས་བསྡུར་ཀྱི་ཚིག་དོན་ལྷག་ཆད་མེད་པའི་ཞུ་ཏིག་མཛད་ནས་མཁའ་འགྲོའི་བརྡ་ཡིག་ཏུ་བཀོད་ཅིང་ཐུགས་དམ་དུ་འབྲལ་མེད་བཅངས་པར་བསྟན་པའོ།

།གཉིས་པ་ནི། ནམ་ཞིག་གི་ཚེ་བདག་ཅག་རྗེ་འབངས་ཀུན་ཀྱང་གྲོས་མ་བྱས་པར་དགོངས་པ་གཅིག་ཏུ་མཐུན་པར་གུ་རུ་རིན་པོ་ཆེའི་སྤྱན་སྔར་ཕྱིན་ཏེ༔ ལྷ་ཕྱག་དགུ་ཕྲུགས་སུ་བཙལ་ཏེ་གསོལ་བ་བཏབ་པ་ནི༔ ཨེ་མ་གུ་རུ་རིན་པོ་ཆེ༔ ཁྱེད་ནི་སངས་རྒྱས་ཐམས་ཅད་དང་༔ དབྱེར་མེད་དཀྱིལ་འཁོར་ཀུན་གྱི་གཙོ༔ ཀུན་ཏུ་འཆང་བ་ཉིད་ལགས་ན༔ འཛམ་གླིང་བྱེ་བ་ཕྲག་བརྒྱ་དང་༔ ཁྱད་པར་གངས་ཅན་བོད་ཡུལ་འདིར༔ སངས་རྒྱས་ལས་ཀྱང་ལྷག་པ་ཡི༔ བཀའ་དྲིན་མཛད་པ་བསམ་མི་ཁྱབ༔ བྱེ་བྲག་བདག་ཅག་རྗེ་འབངས་ལ༔ སྣོད་ལྡན་སྐལ་ལྡན་མཚན་ལྡན་དུ༔ རྡོ་རྗེའི་གསུང་གིས་རྗེས་གནང་ཞིང་༔ ཤིན་ཏུ་དགྱེས་པའི་མདངས་ཕྱུངས་ཏེ༔ སྔོན་ཆད་ཟབ་ཅིང་རྒྱ་ཆེ་བའི༔ གདམས་ངག་བྱེ་བ་ཕྲག་བརྒྱའི་གཞུང་༔ ཇི་སྙེད་གསུངས་པའི་སྙིང་པོའི་ཕུལ༔ རྒྱུ་འབྲས་ལམ་མཆོག་ཡོངས་རྫོགས་པ༔ མ་བྱུང་འབྱུང་བར་དཀའ་བའི་བཅུད༔ སྙིང་གི་ཟུངས་སུ་སྩལ་ལགས་ན༔ ཕྱོགས་དུས་བདེ་གཤེགས་ཐམས་ཅད་ཀྱི༔ དགོངས་ཉམས་གསང་བའི་ཡང་ཞུན་འདི༔ ད་ལྟ་སྤེལ་ལམ་གཏེར་དུ་སྦ༔ འགྲོ་དོན་གདུལ་བྱ་ཇི་ལྟར་འབྱུང་༔ དུས་གསུམ་ཀུན་ཏུ་གཟིགས་པ་ཡི༔ མ་ཧཱ་གུ་རུས་བཀའ་སྩལ་གསོལ༔ ཅེས་གསོལ་བ་བཏབ་པ་ན༔ དར་ཅིག་དགོངས་པ་མི་གཡོ་བའི་ཏིང་ངེ་འཛིན་ལ་བཞུགས་ཏེ༔ དེ་ལས་བཞེངས་པ་ན་འདི་སྐད་ཅེས་བཀའ་སྩལ་ཏོ༔ ཉོན་ཅིག་སྣོད་ལྡན་འདུས་པའི་ཚོགས༔ བདག་ཉིད་པདྨ་འབྱུང་གནས་ནི༔ གདོད་ནས་མ་འཁྲུལ་རིག་པའི་གཤིས༔ ཀུན་བཟང་ཐོག་མའི་མགོན་པོར་རྫོགས༔ དེ་ལས་ལྔ་ལྡན་འོད་ཀྱི་ལུས༔ རྣམ་པར་གྲོལ་བའི་ཞིང་ཁམས་སུ༔ དུས་གསུམ་དུས་མེད་རྟག་པ་ཡི༔ ལོངས་སྤྱོད་ཆེན་པོར་རང་དབང་འབྱོར༔ གདུལ་བྱའི་ཡུལ་དང་ཉེར་འཚམས་པར༔ ཁ་ཅིག་ཆགས་བྲལ་རབ་བྱུང་དང་༔ ལ་ལར་འཁོར་ལོས་སྒྱུར་བའི་ཚུལ༔ བསམ་གྱིས་མི་ཁྱབ་སྣང་བ་ན༔ མི་མཇེད་འཇིག་རྟེན་འཛམ་གླིང་འདིར༔ སྙིགས་མ་ལྔ་བདོའི་དུས་ཀྱི་མཐར༔ ཉོན་མོངས་ཤུགས་དྲག་གཉེན་པོ་ཞན༔ རྩོལ་བཅས་ཐེག་པས་གདུལ་དཀའི་ཚེ༔ དྷ་ན་ཀོ་ཤའི་པད་གླིང་དུ༔ མཚོ་སྐྱེས་འཆི་མེད་རྡོ་རྗེ་འཆང་༔ རྫུས་སྐྱེས་ཐོག་བབས་ཚུལ་ཉིད་དུ༔ རང་བྱུང་སྤྲུལ་པའི་སྐུ་རུ་འོང་༔ ཞི་ བས་མི་འདུལ་གདུག་པའི་དཔུང་༔ ཚར་གཅོད་རྡོ་རྗེ་དྲག་པོ་རྩལ༔ ཡེ་ཤེས་ཧཱུྃ་ལྔའི་སྣང་གླུ་ཅན༔ རིག་འཛིན་མཁའ་འགྲོའི་གཙོ་བོར་བཞེངས༔ ཨོ་རྒྱན་རྒྱ་གར་ཡུལ་ཀུན་ཏུ༔ བསྟན་ལ་རིམ་གྱིས་ཞུགས་པའི་ཚུལ༔ དགེ་སློང་པདྨ་སཾ་བྷ་བ༔ མཚན་དང་རྣམ་ཐར་བསམ་ལས་འདས༔ གདུལ་དཀའི་ཚོགས་རྣམས་སྤ་བཀོང་ཞིང་༔ བར་ཆད་འབྱུང་པོ་གཟིར་བའི་སླད༔ སྣང་སྲིད་ཟིལ་གནོན་ཐོད་ཕྲེང་སྩལ༔ བོད་ཀྱི་ཡུལ་དུ་ལྷག་པར་སྣང་༔ མདོར་ན་གདུལ་བྱའི་གང་ཟག་དང་༔ འདུལ་བྱེད་སྟོན་པ་འདུལ་ཐབས་སོགས༔ འདོད་རྒུར་བསྒྱུར་བའི་ཆོ་འཕྲུལ་གྱིས༔ འགྲོ་འདུལ་ཕྲིན་ལས་བསམ་མི་ཁྱབ༔ ཁྱད་པར་གངས་ཅན་བོད་ཡུལ་འདིར༔ སྔོན་ནས་འབྲེལ་བའི་མཐུ་བཙན་པས༔ ཆོས་ཀྱི་རྒྱལ་པོ་ཆེན་པོ་ཡིས༔ གུས་པས་སྤྱན་དྲངས་གསོལ་བཏབ་ལྟར༔ མཐའ་དབུས་ཐམས་ཅད་ཞབས་ཀྱིས་བཅགས༔ ལྷ་སྲིན་གདུག་པའི་རྩུབ་འགྱུར་བཏུལ༔ བསམ་ཡས་གཙུག་ལག་མཐར་ཕྱིན་ཞིང་༔ བཀྲ་ཤིས་ལྷག་གནས་མེ་ཏོག་འཐོར༔ རྒྱ་ཆེའི་མདོ་རྒྱུད་འབྱམས་ཀླས་དང་༔ ཟབ་པའི་མན་ངག་སྙིང་པོ་སོགས༔ སྐད་ཅིག་རེར་ཡང་རྫུ་འཕྲུལ་གྱིས༔ ཆོས་ཀྱི་འཁོར་ལོ་གྲངས་མེད་བསྐོར༔ གནས་ཆེན་གངས་བྲག་མཚོ་གསུམ་རྣམས༔ བྱིན་གྱིས་བརླབས་ཤིང་ཟབ་གཏེར་སྦས༔ ད་ལྟར་བཞུགས་དང་འབྱུང་འགྱུར་གྱི༔ བོད་ལ་བཀའ་དྲིན་ཆེ་བར་བྱས༔ བྱེ་བྲག་ཕྱི་ནང་བདུད་སྡེའི་དཔུང་༔ འཇོམས་བྱེད་རྡོ་རྗེ་དྲག་པོ་རྩལ༔ གཉེན་པོ་སྟོབས་ཀྱི་ལྷར་བཞེངས་ནས༔ སྨིན་གྲོལ་ཡན་ལག་མཐའ་རྒྱས་གདམས༔ དེ་རྣམས་ལས་ཀྱང་ཕུལ་བྱུང་བ༔ བསྐྱེད་རྫོགས་རབ་འབྱམས་ཐམས་ཅད་ཀྱི༔ རྒྱབ་ཡིག་དམར་བྱང་གནད་བསྡུས་པ༔ ཡེ་ཤེས་སྙིང་པོའི་ལམ་རིམ་བཅས༔ བདག་གིས་མ་འོང་དུས་ཤེས་པས༔ ད་ལྟ་སྤེལ་བའི་གནས་མེད་ཀྱི༔ རང་རང་ཉམས་སུ་ལེན་པ་དང་༔ སྐལ་ལྡན་གཞན་ལ་ཅི་རིགས་སྟོན༔ ནམ་ཞིག་རང་བྱུང་པདྨ་བདག༔ སྲིན་པོའི་གདུལ་བྱ་འདུལ་བའི་ཕྱིར༔ ཆོ་འཕྲུལ་ཆེན་པོས་གཤེགས་ནས་ཀྱང་༔ ལོ་སྐོར་གཅིག་གི་མཐར་སོན་ཚེ༔ བདག་ཉིད་ཀུན་བཟང་ཐོད་ཕྲེང་གི༔ ཚོགས་བརྒྱད་དག་པའི་རང་གདངས་ལས༔ ཡེ་ཤེས་རྣམ་པ་བརྒྱད་ཀྱི་སྐུ༔ སྤྲུལ་པའི་མཚན་མཆོག་རྣམ་བརྒྱད་ལས༔ མཐའ་གྲོལ་ཡེ་ཤེས་ཧེ་རུ་ཀ༔ འཆོལ་བའི་ཁྲོ་རྒྱལ་ཆེན་པོ་ནི༔ དཔལ་ཆེན་རྡོ་རྗེ་གྲོ་ལོད་ཀྱིས༔ དམ་སྲི་གདུག་པ་འདུལ་བའི་ཕྱིར༔ རོལ་པའི་ཆོ་འཕྲུལ་བསྟན་པའི་གནས༔ སྟག་ཚང་མིང་ཅན་བཅུ་གསུམ་ལས༔ ཤར་ཕྱོགས་མདོ་ཁམས་ཡུལ་གྱི་དབུས༔ འབྲི་ཟླ་ཟལ་མོ་སྒང་གི་རྒྱུད༔ སྦས་ཡུལ་གངས་རིས་བསྐོར་བའི་འདབས༔ རང་བྱུང་ཤེལ་གྱི་ཕུག་པའི་བྱང་༔ བོད་ཁམས་བཀྲ་ཤིས་འབྱུང་བའི་གནས༔ རིན་ཆེན་ཆུ་མིག་དཀར་མོའི་མགོ༔ རྨུ་སྟག་མི་ཟན་བཏུལ་བའི་འགྲམ༔ སེང་གེ་དྲེགས་པས་བསྒྱིངས་པའི་སྤོ༔ བསམ་འགྲུབ་བྲག་གི་ཀེའུ་ཚང་ནི༔ རྣམ་ཐར་སྒོ་གསུམ་གཞལ་མེད་ཁང་༔ ཞི་ཁྲོའི་ལྷ་ཚོགས་ཕྱག་རྒྱ་དང་༔ རྒྱ་བོད་ཡི་གེ་དབྱངས་གསལ་ཕྲེང་༔ དྷཱ་ཀི་གསང་བའི་རི་མོ་སོགས༔ རྣམ་པ་དུ་མས་མཚན་པ་དེར༔ ཨོ་རྒྱན་བདག་གིས་ཟླ་བ་གཅིག༔ རྡོ་རྗེ་ཁྲོས་པའི་ཏིང་འཛིན་བསྒོམས༔ བར་ཆད་འབྱུང་པོ་ཚར་བཅད་ནས༔ བོད་ཡུལ་བཀྲ་ཤིས་འབྱུང་བར་བྱས༔ དེ་ལྟ་བུ་ཡི་གནས་ཀྱི་མཆོག༔ ཐོས་པས་ལས་ཀྱི་སྡིག་པ་འདག༔ མཐོང་བས་ཉོན་མོངས་སྒྲིབ་པ་ཞི༔ ཕྱག་བསྐོར་མཆོད་པ་བྱས་པ་ཡིས༔ ཚེ་དང་བསོད་ནམས་ཡེ་ཤེས་རྒྱས༔ རྩེ་གཅིག་བསྒོམ་དང་བསྒྲུབ་པ་ཡིས༔ དངོས་གྲུབ་རྣམ་གཉིས་མྱུར་དུ་ཐོབ༔ འབྲེལ་ཚད་དོན་དང་ལྡན་པ་སྟེ༔ ཡོན་ཏན་བསྔགས་པ་བརྗོད་མི་ལངས༔ དེ་ཡི་གནས་ཀྱི་རྩེ་མོ་རུ༔ དབུས་སུ་ཞི་ཁྲོ་ཡོངས་རྫོགས་པ༔ བདེ་གཤེགས་འདུས་པའི་གསང་ཕུག་ནི༔ བལྟར་ཡོད་བགྲོད་དུ་མེད་པར་བཞུགས༔ གཡས་སུ་ཨོ་རྒྱན་བདག་ཉིད་དང་༔ གཡོན་དུ་ཐུགས་ཀྱི་དགྱེས་སྡེ་མོའི༔ གསང་བའི་ཉམས་མྱོང་བསྐྱང་བ་དང་༔ རྡོ་རྗེའི་རྟོགས་པ་སྤེལ་བའི་སར༔ ཟབ་མོའི་གཏེར་ཀ་དུ་མ་དང་༔ ཁྱད་པར་ཕྱི་མའི་སྙིང་པོ་རུ༔ གཟུགས་སྐུ་རྟགས་ཀྱི་མཚན་མ་དང་༔ ཟབ་མོའི་བརྡ་རིས་གསུང་གི་རྟེན༔ བདག་ཉིད་དྲག་རྩལ་ཧེ་རུ་ཀའི༔ ཕྱག་མཚན་ཐུགས་ཀྱི་རྡོ་རྗེར་བཅས༔ ཡེ་ཤེས་དྷཱ་ཀི་མཚོ་རྒྱལ་མས༔ བཅུ་གསུམ་རིམ་པའི་རྒྱ་དང་ནི༔ རིག་འཛིན་དགའ་རབ་རྡོ་རྗེ་ཡིས༔ རོ་ལངས་གསེར་དུ་བསྒྱུར་བ་སོགས༔ རིན་ཆེན་དུ་མའི་སྙིང་པོ་རྣམས༔ སྨོན་ལམ་ཟབ་མོའི་མཚམས་སྦྱོར་བཅས༔ མགོན་པོ་མིག་གསུམ་དྲག་པོ་དང་༔ གིང་བཙན་རྡོ་རྗེ་ལེགས་པ་ལ༔ ལས་ཀྱི་གཉེར་དུ་གཏོད་ལ་སྦོས༔ མ་འོངས་ཕྱི་མ་ཕྱི་མའི་དུས༔ རྩུབ་འགྱུར་སུམ་ཅུ་ཁ་རལ་ཚེ༔ ཆོས་རྒྱལ་ཡབ་སྲས་བྱིན་རླབས་ལས༔ མ་ངེས་འགྲོ་འདུལ་རིག་པ་འཛིན༔ སྒྱུ་མ་ལྟ་བུའི་སྐྱེས་བུ་ཟུང་༔ ཁམས་དབུས་ཤར་དང་ལྷོ་རུ་འབྱུང་༔ ཁྱད་པར་༡༢༢༣༣༤༥༦༧༨༩༩༔ སྔོན་གྱི་སྨོན་ལམ་མཐུ་བཙན་པས༔ རྡོ་རྗེའི་གནས་དེར་ལྷན་ཅིག་ཚོགས༔

ད་ལྟའི་ངང་ཚུལ་ཐམས་ཅད་ཀུན༔ རྨི་ལམ་བཞིན་དུ་ཡད་ཡུད་དྲན༔ དགའ་དང་སྐྱོ་བའི་ཉམས་འབར་ཞིང་༔ སྣང་བ་བན་བུན་གཟའ་གཏད་བྲལ༔ སྒྱུ་མ་ལྟ་བུའི་སྤྱོད་པ་དང་༔ མ་འགགས་རྫུ་འཕྲུལ་རོལ་པ་ཡིས༔ ཀུན་གྱིས་མཐོང་བར་སྤྱན་དྲངས་ཏེ༔ རྩོད་པ་བྲལ་ཞིང་ཡིད་ཆེས་པས༔ ཨོ་རྒྱན་བསྟན་ལ་བྱ་བ་བྱེད༔ བོད་ཁམས་སྡུག་བསྔལ་ཞི་བ་དང་༔ ཀུན་ལ་ཕན་བདེ་ཐང་ཅིག་འབྱུང་༔ དེ་ཚེ་ཐོག་མའི་སྐལ་ལྡན་ནི༔ རྣམ་པར་སྣང་མཛད་ལོ་ཙཱ་བས༔ བྱིན་བརླབས་ཞི་བའི་བློ་གྲོས་ཀྱིས༔ ཟབ་རྒྱས་ཚིག་དོན་གཏན་ལ་འབེབས༔ མཚོ་རྒྱལ་ཁྱོད་ཀྱིས་བྱིན་བརླབས་པས༔ འདི་ཉིད་ཉམས་བླངས་ཡེ་ཤེས་རྙེད༔ པདྨའི་མིང་ཅན་བརྟུལ་ཞུགས་ལྡན༔ དབུས་ཀྱི་ཕྱོགས་སུ་བསྟན་པ་སྤེལ༔ བདག་དང་རིགས་གསུམ་སེམས་དཔའ་ཡིས༔ བྱིན་བརླབས་རིག་པ་འཛིན་ལྔ་དང་༔ ཟབ་མོའི་ལམ་འདི་འཕྲད་པ་ན༔ བར་ཆད་ཞི་ཞིང་བོད་ཁམས་བདེ༔ ཐུགས་ཀྱི་བཀའ་བབས་མི་བརྒྱད་དང་༔ མཆོག་གི་རིག་འཛིན་ཉི་ཤུ་ལྔ༔ འཛིན་དང་སྤེལ་བ་བཅུ་དྲུག་སྟེ༔ རིགས་ལྡན་མཁའ་འགྲོ་ལྔ་ཕྲག་ཟུང་༔ དེ་དག་རྣམས་ཀྱིས་ཉམས་བླངས་ན༔ མཆོག་ཐུན་དངོས་གྲུབ་ཁྱད་པར་འཐོབ༔ གཞན་ཡང་ལས་ཅན་བརྒྱ་རྩ་སྟེ༔ དངོས་གྲུབ་ཐོབ་པ་སྟོང་རྩ་བརྒྱད༔ འབྲེལ་ཐོགས་འབུམ་ཚོ་བཅོ་བརྒྱད་སོགས༔ མི་དང་མི་མ་ཡིན་པ་ཡི༔ གདུལ་བྱའི་སྐྱེ་བོ་བསམ་མི་ཁྱབ༔ འདུལ་བྱེད་ཐབས་ཀྱི་ཁྱད་པར་ལས༔ འགའ་ཞིག་ནད་གདོན་བར་ཆད་ཞི༔ ལ་ལ་མངའ་ཐང་དཔལ་འབྱོར་རྒྱས༔ ལ་ལས་སྣང་སྲིད་དབང་དུ་འགྱུར༔ གཞན་དག་དྲག་པོའི་བརྟུལ་ཞུགས་ཀྱིས༔ གདུག་པ་ཅན་རྣམ་ཚར་གཅོད་བྱེད༔ ཁྱད་པར་མཆོག་གི་ཕྲིན་ལས་ནི༔ བསྐྱེད་རིམ་གསལ་སྣང་བརྟན་པ་ལས༔ དམིགས་གཏད་ནུས་མཐུ་རྩོལ་མེད་འབྱུང་༔ རྫོགས་རིམ་རླུང་སེམས་ལས་རུང་བས༔ མངོན་ཤེས་རྫུ་འཕྲུལ་སྣ་ཚོགས་འཆར༔ ཐབས་ལམ་ཟབ་མོའི་ཉམས་ལེན་གྱིས༔ བདེ་བ་ཆེན་པོའི་བརྟུལ་ཞུགས་གྲུབ༔ མཐར་ཐུག་འོད་གསལ་རྫོགས་པ་ཆེ༔ རྡོ་རྗེ་སྙིང་པོའི་གསང་ལམ་ནས༔ གནས་ལུགས་མངོན་གྱུར་ཡེ་ཤེས་སུ༔ པདྨ་བདག་དང་སྐལ་མཉམ་པ༔ མཐའ་དབུས་ཀུན་ཏུ་འབྱུང་བ་ཡིས༔ སྙིང་པོའི་བསྟན་ལ་བྱ་བ་བྱེད༔ དེ་ཡང་བྱང་ཆུབ་སེམས་དཔའ་རྣམས༔ གང་འདུལ་རྣམ་ཐར་ཚད་མེད་པས༔ ཁ་ཅིག་རྒྱ་ཆེར་བཤད་པ་དང་༔ འགའ་ཞིག་ཟབ་དོན་སྒྲུབ་པ་དང་༔ ལ་ལས་མ་ངེས་འགྲོ་འདུལ་ཕྱིར༔ གཞན་ཕན་སྤྱོད་པ་ཅིར་ཡང་སྟོན༔ ཀུན་ཀྱང་པདྨ་བདག་ཉིད་དང་༔ ཟབ་མོའི་ལམ་འདིར་ཡིད་ཆེས་པས༔ འབྲེལ་ཚད་དོན་དང་ལྡན་འགྱུར་ཞིང་༔ བསམ་པ་ཐམས་ཅད་ངེས་པར་འགྲུབ༔ ཡེ་ཤེས་སྙིང་པོའི་ལམ་རིམ་འདི༔ རིན་ཆེན་གསེར་གྱིས་བྲིས་ནས་ཀྱང་༔ བདུད་རྩི་ལྔ་ཡིས་རབ་ཏུ་བྱུགས༔ ཐབས་དང་ཤེས་རབ་དམ་རྫས་བཅས༔ གང་གི་མགུལ་དུ་གདགས་པའམ༔ སྤྱྀ་བོའི་གཙུག་ཏུ་འཆང་བས་ཀྱང་༔ མཐོང་ཐོས་དྲན་རེག་གྲོལ་བ་དང་༔ དགོངས་ཉམས་ཡེ་ཤེས་རྩོལ་མེད་འཆར༔ དེ་བཞིན་ཀློག་དང་འཛིན་པ་དང་༔ ཁ་ཏོན་འཆད་ཉན་བྱེད་པ་ཡང་༔ པདྨ་བདག་གིས་བྱིན་བརླབ་ན༔ ཚུལ་བཞིན་ཉམས་ལེན་སྨོས་ཅི་དགོས༔ གཞན་ཡང་བོད་ཁམས་ཐམས་ཅད་ལ༔ བདེ་སྐྱིད་བཀྲ་ཤིས་འབྱུང་འདོད་ན༔ མེས་དབོན་གསུམ་གྱིས་བཞེངས་པ་ཡི༔ གཙུག་ལག་ཁང་རྣམས་ཐམས་ཅད་དང་༔ སྒྲུབ་པའི་གནས་རྣམས་ཉམས་པ་གསོ༔ དགེ་འདུན་རྣམས་ཀྱིས་བརྟན་བཞུགས་དང་༔ ནུས་ལྡན་རབ་གནས་ཡང་ཡང་འཐོར༔ ཕྱག་མཆོད་བཀུར་སྟི་རྒྱ་ཆེར་བྱ༔ སྐུ་གསུང་ཐུགས་ཀྱི་རྟེན་བཞེངས་ལ༔ དུས་སྟོན་བཙུག་ཅིང་སྡེ་སྣོད་བཤད༔ གནས་ཆེན་བྱིན་འབེབས་ཆོ་ག་དང་༔ བདུད་རྩི་སྨན་གྱི་སྒྲུབ་པ་དང་༔ ཚོགས་མཆོད་རྡོ་རྗེའི་གླུ་གར་བྱ༔ ཞིབ་པར་བོད་ལ་སྙིང་བརྩེ་བས༔ མཁན་ཆེན་བྱང་ཆུབ་སེམས་དཔའ་དང་༔ བདག་དང་ཆོས་ཀྱི་རྒྱལ་པོ་ཡི༔ སྙིང་པོའི་ཞལ་གདམས་ཇི་ལྟ་བར༔ བླ་ཡི་མཆོད་གནས་སྡེ་གཉིས་དང་༔ རྒྱལ་བློན་འབངས་དང་བཅས་པ་ཡིས༔ ཆོས་བརྒྱད་ལྟར་སྣང་མ་ཡིན་པར༔ ཐེ་ཚོམ་མེད་པའི་ངེས་ཤེས་དང་༔ ཕྱིར་མི་ལྡོག་པའི་བརྩོན་འགྲུས་ཀྱིས༔ འབད་པས་རྩལ་དུ་བཏོན་བྱས་ན༔ སེམས་བསྐྱེད་བསམ་པའི་ཁྱད་པར་བཞིན༔ བོད་ཡུལ་སྤྱྀ་དང་བྱེ་བྲག་གི༔ དུས་ཀྱི་རྒུད་པ་ཞི་བ་དང་༔ སྣོད་བཅུད་འབྱོར་པ་འཕེལ་བ་དང་༔ བཤད་སྒྲུབ་བསྟན་པ་ཡུན་བསྲིངས་ནས༔ བཀྲ་ཤིས་བདེ་ལེགས་ཕུན་སུམ་ཚོགས་འགྱུར༔ ཅེས་བཀའ་སྩལ་པ་ན་བདག་ཅག་རྣམས་ཤིན་ཏུ་དད་ཅིང་རྗེས་སུ་ཡི་རང་བས་བཟོད་དུ་མེད་པའི་མོས་གུས་ཀྱི་ཉམས་འབར་བ་དང་བཅས་ཕྱག་དང་མཆོད་པ་ཕུལ་ཞིང་རྡོ་རྗེའི་གླུས་མགྲིན་གཅིག་ཏུ་བསྟོད་པ་ནི༔ ཨེ་མ་ཧོ༔ ཀུན་བཟང་ཐོག་མའི་མགོན་པོ་འོད་དཔག་མེད༔ ཐུགས་རྗེའི་སྐུར་བཞེངས་མཚོ་སྐྱེས་རྡོ་རྗེ་འཆང་༔ ཡོན་ཏན་ཡོངས་རྫོགས་པདྨ་སཾ་བྷ་བ༔ གདུལ་དཀའི་འགྲོ་འདུལ་རྡོ་རྗེ་དྲག་པོ་རྩལ༔ སྣང་སྲིད་ཟིལ་གནོན་རིག་འཛིན་པདྨ་འབྱུང་༔ བདེ་སྟོང་ཟུང་འཇུག་ཐིག་ལེ་གཅིག་ཉིད་ལས༔ སེམས་ཅན་ཀུན་གྱི་དབང་པོའི་ཁྱད་པར་བཞིན༔ ཞི་དང་ཁྲོ་དང་རྗེས་སུ་ཆགས་པའི་སྐུ༔ རོལ་པ་ཆེན་པོའི་ཆོ་འཕྲུལ་མཁའ་ལྟར་ཁྱབ༔ མོས་པ་དང་ནི་བློ་ཡི་བྱེ་བྲག་དང་༔ རྗེས་སུ་མཐུན་པར་ཆོས་འཁོར་རྒྱུན་མི་འཆད༔ འོད་གསལ་དབྱིངས་ལས་མ་གཡོས་ཡེ་ཤེས་ཀྱི༔ ཐུགས་རྗེའི་འཇུག་པས་བོད་ལ་ལྷག་པར་དགོངས༔ བཀའ་དྲིན་མཉམ་མེད་གུ་རུ་རིན་པོ་ཆེར༔ ལུས་དང་ལོངས་སྤྱོད་ལྟོས་པ་མེད་པར་འབུལ༔ བྱང་ཆུབ་བར་དུ་ནམ་ཡང་མི་འབྲལ་བར༔ ཐུགས་དམ་ཞལ་བཞེས་དགོངས་པས་རྗེས་སུ་ཟུངས༔ བོད་ཁམས་མཐའ་དབུས་ཀུན་དུ་བདེ་བ་དང་༔ སངས་རྒྱས་བསྟན་པ་ཡུན་དུ་གནས་པ་དང་༔ བདག་ཅག་ལས་དང་སྨོན་པས་གར་སྐྱེས་ཀྱང་༔ གུ་རུའི་ཕྲིན་ལས་ཡོངས་སུ་སྤེལ་བ་ལས༔ མཐོང་ཐོས་དྲན་རེག་འབྲེལ་ཚད་དོན་ལྡན་ཅིང་༔ ཀུན་བཟང་དགོངས་ཀློང་ཕྱམས་གཅིག་གྲོལ་བར་ཤོག༔ ཁྱད་པར་རྡོ་རྗེའི་གསུང་གི་སྙིང་པོ་རྣམས༔ དུས་སུ་བབས་ཚེ་བཏོན་ཅིང་སྤེལ་བ་དང་༔ འཆད་ཉན་སྒོམ་སྒྲུབ་ཟབ་མོ་ལ་བརྟེན་ནས༔ རྒྱལ་བ་ཀུན་གྱི་ཕྲིན་ལས་ཡོངས་རྫོགས་ཤོག༔ ཅེས་བསམ་པ་ཐག་པས་སྨོན་ལམ་དུ་གསོལ་བ་ན༔ གུ་རུ་རིན་པོ་ཆེས་ཀྱང་དེ་དེ་བཞིན་དུ་གྱུར་ཅིག་ཅེས་རྡོ་རྗེའི་གསུང་གིས་བདེན་ཚིག་སྩལ་བ་དང་ལྷན་ཅིག༔ སངས་རྒྱས་དང་བྱང་ཆུབ་སེམས་དཔའ་ནམ་མཁའ་གང་བས་མེ་ཏོག་གི་ཆར་ཕབས༔ བཀྲ་ཤིས་ཀྱིས་མངའ་གསོལ༔ རིག་པ་འཛིན་པ་དང་༔ གྲུབ་པ་དང་༔ མཁའ་འགྲོ་དང་༔ སྲུང་མ་དང་༔ ལྷ་དང་༔ ཀླུ་དང་༔ དཀར་ཕྱོགས་སྐྱོང་བའི་གཞིའི་བདག་པོ་རྣམས་ཀྱིས་ཀྱང་མངོན་པར་བསྟོད་ཅིང་བསྟན་པ་སྐྱོང་བ་དང་༔ སྤེལ་བ་དང་༔ འཛིན་པར་ཁས་བླངས་ཏེ་མི་སྣང་བར་གྱུར་ཏོ༔ ས་མ་ཡ༔ ཞེས་གསུངས་ཏེ།

དག་པའི་འཁོར་རྣམས་མགྲིན་གཅིག་ཏུ་གདམས་པ་འཛིན་སྐྱོང་སྤེལ་གསུམ་ཇི་ལྟར་བྱ་བ་ཞུས་པའི་ལན་དུ་གུ་རུ་རིན་པོ་ཆེས་རྣམ་ཐར་མདོར་བསྡུས་པས་ཐོག་གྲངས། སྤྱིར་མཛད་པའི་ཆོ་འཕྲུལ་མཐའ་ཡས་པ་དང་བྱེ་བྲག་གངས་ཅན་བོད་ཀྱི་ཡུལ་དུ་སངས་རྒྱས་ཀྱི་མཛད་པ་བསམ་ཡས་རབ་འབྱམས་སུ་བསྟན་པའི་ཚུལ་དང༌། ཁྱད་པར་བདུད་འཇོམས་རྡོ་རྗེ་དྲག་པོ་རྩལ་གྱི་སྐུར་བཞེངས་ནས་ཟབ་རྒུའི་གདམས་བཅུད་ཡེ་ཤེས་སྙིང་པོ་ལམ་འབྲས་བུ་དང་བཅས་པའི་ཆོས་སྐོར་མ་འོངས་གདུལ་བྱའི་དོན་དུ་ཟབ་མོའི་གཏེར་དུ་སྦ་བར་གདམས་པ་དང༌། གཏེར་གནས་འཆོལ་བའི་ཁྲོ་རྒྱལ་རྡོ་རྗེ་གྲོ་ལོད་མཆོག་གི་སྐུར་བསྟན་ཏེ་གཅིག་ལས་དུ་མར་འཕྲུལ་པའི་ཚུལ་གྱིས་དམ་སྲི་གདུག་པ་ཅན་བཏུལ་བའི་གནས་སྟག་ཚང་མིང་ཅན་བཅུ་གསུམ་ཡོད་པའི་ཡ་གྱལ་མདོ་ཁམས་འབྲི་ཟླ་ཟལ་མོ་སྒང་གི་རྒྱུད་སྦས་གནས་ཆེན་པོ་རྡོ་རྗེ་ཟིལ་ཁྲོམ་གྱི་འདབ་ཞོལ་རོང་རྨེ་དཀར་མོ་སྟག་ཚང་གི་གནས་ཀྱི་བཞུགས་ཚུལ་ཆཻ་བརྗོད་ཕན་ཡོན་དང་བཅས་པ། དེར་སྐུ་གསུང་ཐུགས་རྟེན་སོགས་ཇི་ལྟར་སྦ་བའི་ཚུལ། གང་ལ་བཅོལ་གདམས་བྱ་བའི་གཏེར་སྲུང༌། སྦས་པའི་གཏེར་དེ་འབྱིན་པའི་དུས་ཚོད། འདོན་པའི་སྐྱེས་བུ། གདམས་པའི་སྣོད་ལྡན། དེ་ལ་བརྟེན་ནས་ཕྲིན་ལས་འབྱུང་ཚུལ། སྐྱེས་བུ་དམ་པའི་རྣམ་ཐར་མ་ངེས་པ་སྐྱོང་ཚུལ། ལམ་རིམ་འབྲི་ཀློག་འཆད་ཉན་གྱི་ཕན་ཡོན། ཞར་བྱུང་བོད་ཁམས་བདེ་བའི་རིམ་གྲོ་ཇི་ལྟར་སྒྲུབ་པའི་ཚུལ་ཡོན་ཏན་དང་བཅས་པ་གསལ་བར་བསྟན་མཐར་བཀའ་སྩལ་པ་ལ་རྗེས་སུ་ཡི་རང་ཞིང་དད་གུས་ཆེན་པོས་མཆོད་བསྟོད་ཕུལ་ཏེ་སྨོན་ལམ་བཏབ་པས་གུ་རུ་རིན་པོ་ཆེས་མཐུན་འགྱུར་སྩལ་ཞིང་བཀྲ་ཤིས་པའི་མཚན་ལྟས་རྒྱ་ཆེར་སྣང་བ་དང༌། རིག་འཛིན་མཁའ་འགྲོ་དཀར་ཕྱོགས་སྐྱོང་བ་རྣམས་ཀྱིས་བསྟན་པ་འདི་ཉིད་སྲུང་ཞིང་སྐྱོང་བའི་དམ་བཅའ་ཕུལ་བ་བཅས་བསྟན་ཏོ། །གསུམ་པ་ནི། དེ་ནས་ཇི་ལྟར་བཀའ་སྩལ་པའི་རྗེས་སུ་འབྲངས་ཏེ༔ བདག་ཅག་རྗེ་འབངས་རྣམས་ཀྱིས་ཐོས་བསམ་སྒོམ་གསུམ་གྱིས་ཡིད་ལ་བྱས་ཏེ་དཔེ་རྒྱུད་མགུལ་དུ་འཆང་༔ སྙན་བརྒྱུད་ཅི་རིགས་པ་གཞན་ལའང་སྟོན་ཅིང་གནས་པ་ན༔ ཞེས་པའི་བར་གྱིས་དག་པའི་འཁོར་དེ་རྣམས་ཀྱིས་གཞུང་འདི་ལ་ཐོས་བསམ་སྒོམ་པ་མཐར་ཕྱིན་པར་མཛད་ནས་ཚིག་དོན་ཆ་ཚང་བའི་དཔེ་རྒྱུད་གཞན་ལ་མ་བསྟན་པར་མགུལ་དུ་འཆང༌། སྙན་བརྒྱུད་དུམ་དུམ་ཁྲིགས་ཅི་རིགས་པ་སྐལ་ལྡན་གཞན་ལའང་བསྟན་ཅིང་སྤེལ་བའི་ཚུལ་བཤད། གཉིས་པ་གཏེར་དུ་སྦས་པའི་ཚུལ་ལ་གཉིས། སྦས་ཚུལ་དངོས་དང༌། ཞར་བྱུང་དེ་བཏོན་ནས་འགྲོ་དོན་འབྱུང་ཚུལ་ལོ། །དང་པོ་ནི། ནམ་ཞིག་གུ་རུ་རིན་པོ་ཆེ་སྲིན་པོའི་ཁ་གནོན་དུ་གཤེགས་ནས་ལོ་སྐོར་གཅིག་གི་མཐར་སོན་པའི་དུས༔ དབྱིངས་ཀྱི་མཁའ་འགྲོ་ཨེ་ཀ་ཛ་ཊཱིས་ཀྱང་རྗེས་སུ་བསྐུལ་བ་ལ་བརྟེན་ནས༔ རྡོ་རྗེའི་ལུང་གིས་མངོན་པར་བསྔགས་པའི་གནས་སུ་མི་འགྱུར་བའི་བཀའ་རྟགས་གསུམ་སོ་སོར་སྦས་ནས་བཀའ་སྲུང་བདུད་མགོན་ནག་པོ་དང་༔ གཏེར་སྲུང་གིང་བཙན་དམར་པོ་ལ་བཅོལ་གདམ་དུ་བགྱིས་པ་ན༔ དེ་དག་གིས་ཀྱང་སྐལ་མེད་བྱུང་ན་དབང་པོ་བསྣུབ་པ་དང་༔ སྐལ་ལྡན་ལ་ཚུལ་བཞིན་དུ་གཏད་ཅིང་ཕྲིན་ལས་སྤེལ་བའི་གཡར་དམ་མདོངས་གསོལ་དུ་བཞེས་སོ༔ དེའི་ཚེ་སྨོན་ལམ་དུ་གདབ་པ༔ དུས་གསུམ་ཀུན་མཁྱེན་ཀུན་ཏུ་འཆང་༔ བདེ་ཆེན་པདྨ་སཾ་བྷ་བའི༔ ཞལ་གདམས་ལམ་རིམ་སྙིང་པོ་དང་༔ རྡོ་རྗེ་དྲག་རྩལ་ཧེ་རུ་ཀའི༔ སྨིན་གྲོལ་བསྐྱེད་རྫོགས་ཡན་ལག་བཅས༔ མི་འགྱུར་བྲག་གི་སུལ་དུ་སྦས༔ རིམ་པ་མང་པོའི་རྒྱས་བཏབ་ནས༔ གཏེར་བདག་སྲུང་མར་གཉེར་གཏད་པ༔ ནམ་ཞིག་བོད་ཁམས་མཐའ་དབུས་ཀུན༔ སྡུག་བསྔལ་རྒྱ་མཚོར་གཡེང་བའི་ཚེ༔ མངའ་བདག་ཡབ་སྲས་ཐུགས་བསྐྱེད་ལས༔ རྣམ་འཕྲུལ་ཟུང་དང་འཕྲད་ནས་ཀྱང་༔ ཟབ་མོའི་ལུང་བཞིན་སྤེལ་བའི་མཐུས༔ བསྟན་འགྲོའི་རྒུད་པ་ཞི་བ་དང་༔ ཕན་བདེ་རྒྱ་ཆེར་འབྱུང་བར་ཤོག༔ ཅེས་བསམ་པ་ཐག་པས་སྨོན་ལམ་དུ་བགྱིས་པ་ན་གུ་རུ་རིན་པོ་ཆེའི་ཡེ་ཤེས་ཀྱི་སྐུ་སྐད་ཅིག་གིས་གློག་འཁྱུགས་པ་ལྟ་བུའི་རྫུ་འཕྲུལ་གྱིས་མངོན་པར་སྣང་བར་མཛད་དེ་རྡོ་རྗེའི་བདེན་ཚིག་གིས་སླར་ཡང་དབུགས་དབྱུང་བ་དང་༔ རབ་ཏུ་གནས་པའི་མེ་ཏོག་འཐོར་བ་རིན་པོ་ཆེའི་ཆར་དུ་སྣང་བར་གྱུར་ཏོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ མནྟྲ་གུ་ཧྱ་ས་མ་ཡ༔ ཞེས་གསུངས་ཏེ།

ཡེ་ཤེས་ཌཱ་ཀའི་རྗེ་མོ་མཚོ་རྒྱལ་མས་གུ་རུ་སྲིན་པོའི་ཁ་གནོན་དུ་གཤེགས་པའི་རྗེས་བོད་ཁམས་མཐའ་དབུས་ཀུན་ཏུ་གཏེར་ཞབས་བསྡམས་པའི་དུས་སུ་སྔགས་སྲུང་རལ་གཅིག་མས་རྗེས་སུ་བསྐུལ་བས་རྐྱེན་བྱས་ཏེ། གུ་རུས་ལུང་བསྟན་པའི་གནས་སུ་རྫུ་འཕྲུལ་གྱིས་སྦས་ཤིང་ཟབ་མོའི་རྒྱ་རིམ་པ་བཅུ་གསུམ་གྱིས་བཏབ་ནས་གཏེར་སྲུང་བདུད་དང་བཙན་གྱི་མགོན་པོ་ལ་གཉེར་དུ་གཏད་ཅིང་རྡོ་རྗེའི་ལུང་དོན་འགྲུབ་པའི་སྨོན་ལམ་མཛད་པ་ན་གུ་རུ་རིན་པོ་ཆེ་སྐད་ཅིག་གིས་བྱོན་ནས་བདེན་ཚིག་དང་རབ་ཏུ་གནས་པའི་ཕྲིན་ལས་མཛད་ཚུལ་རྣམས་བསྟན་ཏོ། །གཉིས་པ་ནི། ཨོཾ་སྭ་སྟི་སརྦ་སིདྡྷི། ཞེས་བཀྲ་ཤིས་པའི་སྔགས་ཚིག་གིས་ཐོག་དྲངས། མཁས་པའི་གཙུག་རྒྱན་གྲུབ་པའི་འཁོར་ལོས་སྒྱུར། །པདྨ་འོད་གསལ་མདོ་སྔགས་གླིང་པ་ལ། །ཡེ་ཤེས་ཌཱའ་ཀིས་ཁ་བྱང་དངོས་སུ་ཕུལ། །སྔ་ཕྱིར་གསལ་སྣང་གཟིགས་པས་ངེས་པ་འཁྲུངས། །གཏེར་ཆེན་ཆོས་ཀྱི་རྒྱལ་པོ་མཆོག་གྱུར་གླིང༌། །མདོ་སྨད་བསྟན་འགྲོའི་དཔལ་དུ་ཆག་ཕེབ་ཅིང༌། །ཟད་པར་དུས་ཀྱི་ཁུག་པ་རྫོགས་པ་དང༌། །རབ་ཚེས་ཤར་ལ་ཉེ་བའི་གནས་དུས་ཀྱི། །རྟེན་འབྱུང་ཕུན་ཚོགས་ངང་གིས་འགྲིགས་པ་ན། །གུ་རུའི་ལུང་བཞིན་ཡབ་སྲས་ལྷན་རྒྱས་པས། །རོང་མེ་དཀར་མོ་སྟག་ཚང་གནས་ཀྱི་སྒོ། །སྣང་བར་མཛད་ཅིང་བསམ་འགྲུབ་ཀེའུ་ཚང་གི །གསང་ཕུག་གཡས་གཡོན་སེང་གེ་གཡུ་མཚོ་ནས། །ངོ་མཚར་ཟབ་གཏེར་ནོར་བུའི་མཛོད་ཕྱུང་བའི། །ཡང་ཟབ་བླ་མ་རྡོ་རྗེ་དྲག་རྩལ་གྱི། །སྐུ་གསུང་ཐུགས་རྟེན་ཁྱད་པར་འཕགས་པ་ནི། །གཡོན་ངོས་མཁའ་འགྲོ་གསང་བའི་ཕུག་པ་ནས། །བོད་ཁམས་སྤྱི་ཁྱབ་སྐྱོབ་པའི་མགོན་ཏུ་བྱོན། །བླ་སྒྲུབ་སྐོར་བཞིའི་རྒྱབ་ཆོས་ལམ་གྱི་རིམ། །མདོ་རྒྱུད་སྙིང་པོའི་དགོངས་པའི་བཅུད་འདི་ཡང༌། །རིག་འཛིན་ཆེ་མཆོག་གསེར་ཞལ་རྒྱས་པ་ཡིས། །མདོ་རྒྱས་འཚམས་པའི་མཁའ་འགྲོའི་བརྡ་བསྒྱུར་ཅིང༌། །སྐལ་བཟང་སྣོད་ལྡན་བློ་གྲོས་མཐའ་ཡས་སྡེས། །སྒོ་གསུམ་གུས་པས་སྲི་ཞུ་ལྷུར་བླངས་ཏེ། །སྙིང་པོའི་བསྟན་པའི་བཙས་དང་ཕྱི་རབས་ཀྱི། །སྐལ་ལྡན་ཡོངས་ཀྱི་སྙིང་བཅུད་རིན་ཆེན་དབྱིག །ས་སྟེང་ཉི་ཟླའི་སྒྲོན་མེ་སྦར་བྱས་པའི། །དགེ་བས་གསང་ཆེན་ངེས་པའི་ཐེག་པ་ལས། །ཁམས་གསུམ་སྐྱེ་རྒུ་རྩོལ་མེད་དབུགས་དབྱུང་ཞིང༌། །དུས་ཀྱི་རྒུད་པ་ཀུན་ཞི་གངས་ཅན་གྱི། །མཐའ་དབུས་བདེ་སྐྱིད་རྫོགས་ལྡན་དཔལ་འབར་ཤོག ཞེས་གསུངས་ཏེ་རྡོ་རྗེའི་ལུང་དོན་ལྟར་འགྲོ་འདུལ་གྲུབ་པའི་རིག་འཛིན་ཆེན་པོ་ལྷན་རྒྱས་པས་འཕྲལ་གྱི་ཁ་བྱང་དང་སྔོན་གནས་རྗེས་དྲན་གྱི་གསལ་སྣང་ལ་བརྟེན། ཟབ་མོའི་གཏེར་རྒྱ་བཀྲོལ་ཏེ་སྦས་པའི་གཏེར་རྣམས་ས་སྟེང་དུ་སྣང་བར་མཛད་པས་སྐལ་ལྡན་སྐྱེས་མཆོག་རྣམས་ཀྱིས་འཛིན་སྐྱོང་སྤེལ་ཏེ་འགྲོ་དོན་མཐའ་རྒྱས་སུ་འཕེལ་བའི་སྒོ་མོ་གསར་དུ་ཕྱེས་པའི་ཚུལ་སྨོན་ལམ་དང་བཅས་བསྟན་པའོ། །ཨོཾ་སྭ་སྟི་སིདྡྷཾ། གང་ཞིག་སངས་རྒྱས་སྙིང་པོ་དྲི་མར་བཅས་པ་རྒྱུ་དང་འབྲས་བུའི་བསྟན་རིམ་གྱིས། །ལེགས་སྦྱོང་ཆོ་ག་གཞུང་ལུགས་གཅིག་ཏུ་མ་ཚང་མེད་སྟོན་ཤིང་རྟ་ཆེན་པོའི་སྲོལ། །ཀུན་མཁྱེན་ཡེ་ཤེས་རྒྱ་མཚོ་ལས་འཁྲུངས་བྱིས་བློའི་ཡུལ་འདས་རྡོ་རྗེའི་ཚིག་གི་མཛོད། །ཐར་འདོད་འཇུག་ངོགས་གཅིག་པུ་འདིར་ཞུགས་མི་གནས་བྱང་ཆུབ་མྱུར་དུ་མངོན་བྱེད་འགྱུར། །བློ་དམན་སྦྲང་བུའི་བགྲོད་པས་མཁའ་ལམ་བཞིན། །དགོངས་དོན་ཇི་བཞིན་འགྲེལ་པར་ནུས་མིན་ཀྱང༌། །གསང་བདག་རིག་འཛིན་བླ་མས་རྗེས་གནང་ཞིང༌། །གཞན་དག་འབད་པས་བསྐུལ་ཕྱིར་ཅུང་ཟད་བཀྲོལ། །ཐོས་པའི་ལང་ཚོས་རབ་དྲེགས་སྟོན་ཆེན་གྱི། །དོན་ཏུ་འགྱུར་མིན་ཐར་པ་དོན་གཉེར་བའི། །དད་བརྩོན་བློ་དམན་རྣམས་ལ་སྙིང་གི་དཔྱིད། །སྟེར་བྱེད་ཡོངས་འདུས་གསར་པའི་སྐྱེད་ཚལ་ལོ། །མ་རྟོགས་ལོག་རྟོག་བློ་ཡིས་ཕྱོགས་བསླད་པས། །མ་བཀྲལ་ལོག་པར་བཀྲལ་སོགས་ནོངས་པའི་སྤྲིན། གཞུང་བཟང་ཉིན་བྱེད་སྒྲིབ་རྣམས་ཆོས་དབྱིངས་མཁར། །རྩ་གསུམ་ཐུགས་རྗེའི་ཤུགས་ཀྱིས་དེངས་མཛད་གསོལ། །ཁེངས་པའི་བློས་མིན་དད་པ་ཁོ་ན་ཡིས། །སྲི་ཞུ་ཕུལ་བའི་དགེ་འབྲས་ཕྲ་མོ་ཙམ། །གང་མཆིས་སྐྱེ་དགུའི་རྨོངས་པའི་མིག་སེལ་ཅིང༌། །དྲི་བྲལ་ཡེ་ཤེས་སྤྱན་ཡངས་ཐོབ་ཕྱིར་བསྔོ། །འགྲོ་ཀུན་རྒྱལ་བསྟན་ཡོངས་རྫོགས་བཀའ་སྲོལ་འདིར། །ཐོས་བསམ་སྒོམ་པའི་སྐལ་བ་མཆོག་ལྡན་ཅིང༌། །རང་ལམ་མཐར་ཕྱིན་བགྲོད་གཅིག་འབྲས་བུའི་དཔལ། །མྱུར་དུ་ཐོབ་ནས་དོན་གཉིས་ལྷུན་གྲུབ་ཤོག །སྲིད་ན་མཚུངས་མེད་ནོར་བུ་དཔག་བསམ་ཤིང༌། །ཉི་ཟླའི་དཀྱིལ་འཁོར་རྒྱས་འདྲའི་གཞུང་འདི་ཡང༌། །མི་ཉམས་རབ་འཕེལ་དེ་འཛིན་སྐྱེས་མཆོག་རྣམས། །སྐུ་ཚེ་བརྟན་ཅིང་བཞེད་དོན་ཀུན་འགྲུབ་ཤོག །འདིར་འབྲེལ་ཡོན་ཏན་ཇི་ལྟར་རྡོ་རྗེའི་ལུང་གིས་བསྔགས་པ་བཞིན། །བདག་གཞན་འབྲེལ་བཅས་དཀའ་བ་མེད་ཐོབ་ཐེག་མཆོག་ཡིད་བཞིན་ནོར། །བཤད་སྒྲུབ་རྒྱལ་མཚན་རྩེ་མོར་བཀོད་ལས་གྲུབ་གཉིས་འདོད་རྒུའི་ཆར། །འཇིག་རྟེན་གསུམ་ན་ཁྱབ་ཅིང་རྟག་འབེབས་བཀྲ་ཤིས་ཁྱབ་གྱུར་ཅིག །ཅེས་ཐུགས་སྒྲུབ་རྣམ་པ་བཞིའི་རྒྱབ་ཆོས་ཞལ་གདམས་ལམ་རིམ་ཡེ་ཤེས་སྙིང་པོའི་འགྲེལ་པ་མདོར་བསྡུས་སུ་བྱས་པ་འདིའང༌། ཁྱབ་བདག་འཁོར་ལོའི་མགོན་པོ་གཏེར་ཆེན་རིག་འཛིན་བླ་མ་ལྷན་རྒྱས་ནས་བཀའ་ལུང་གི་རྗེས་སུ་གནང་བ་དང༌། རྒྱལ་དབང་ཐམས་ཅད་མཁྱེན་པ་བཅུ་བཞི་པའི་ཐུགས་སྲས་ཀཾ་ཚང་བསྟན་པའི་གསལ་བྱེད་མཚུར་ཕུ་རྗེ་དབོན་མཆོག་སྤྲུལ་རྣམ་པ་གཉིས་དང༌། མཁྱེན་ལྡན་ཌཱ་ཀི་བདེ་ཆེན་ཆོས་སྒྲོན་ནས་ཀྱང་གསེར་གྱི་མེ་ཏོག་བཅས་རིང་ནས་བསྐུལ་ཅིང་སླད་དུ་གཏེར་སྲས་རིག་འཛིན་ཚེ་དབང་གྲགས་པ་དང་ལྷན་ཅིག་གསུང་བསྐུལ་གནང་བ་དང༌། བྱང་སེམས་དགེ་བའི་བཤེས་གཉེན་ཚྭ་ཉག་བླ་མ་ཤེས་རབ་གཙོར་གྱུར་མོས་ལྡན་གཞན་དག་གིས་ཀྱང་ནན་བསྐྱར་མཛད་པ་ལ་བརྟེན། ཐམས་ཅད་མཁྱེན་གཟིགས་འཇམ་མགོན་བླ་མ་རིན་པོ་ཆེས་སྩལ་བའི་ས་བཅད་དང༌། ཞལ་གྱི་བདུད་རྩི་དངོས་སུ་ཐོབ་པ་ཡིད་ཡུལ་གང་མཆིས་གཙོར་བཟུང༌། འཐད་འོས་ཀྱི་ཆ་འགའ་ཞིག་མཁས་པ་གཞན་གྱི་ལེགས་བཤད་ལས་ཀྱང་བླངས་ཏེ་བླུན་སྒོམ་སྤོང་བ་པའི་གཟུགས་བརྙན་པདྨ་གར་དབང་བློ་གྲོས་མཐའ་ཡས་སམ། འཆི་མེད་བསྟན་གཉིས་གཡུང་དྲུང་གླིང་པ་རྩལ་གྱིས་ཤྲཱི་དེ་བཱི་ཀོ་ཊི་དཔལ་སྤུངས་ཡང་ཁྲོད་ཙཱ་འདྲ་རིན་ཆེན་བྲག་གི་སྒྲུབ་གནས་སུ་གོ་སླ་འདུས་གསལ་གྱི་ཚུལ་དུ་བགྱིས་པ་བསྟན་འགྲོར་ཕན་བདེའི་སྣང་བ་མི་ནུབ་དར་ཞིང་རྒྱས་པའི་རྒྱུར་གྱུར་ཅིག། །།

[edit]

/_gu_ro_sh+tsi_t+ta_sA_d+ha_ka_ba_dz+ra_kro_d+hA_tra/__su_kho_pa_de_sha_pa_thathA_kra_ma_dz+nyA_na_ga_r+b+ha_s+ya_TI_ka_dz+nyA_na_b+ha_sa_pra_phu_l+la_nA_ma_bi_ha_ra_ti_smra/_/ /__bla ma'i thugs sgrub rdo rje drag rtsal las/__zhal gdams lam rim ye shes snying po'i 'grel pa ye shes snang ba rab tu rgyas pa zhes bya ba bzhugs so//

@##/__/bla ma'i thugs sgrub rdo rje drag rtsal las/__zhal gdams lam rim ye shes snying po'i 'grel pa ye shes snang ba rab tu rgyas pa zhes bya ba/__dus gsum sangs rgyas thams cad kyi ngo bo dpal bde ba chen po pad+ma saM b+ha ba'i zhabs la sgo gsum gus pa chen pos phyag 'tshal zhing skyabs su mchi'o/__/dus dang rnam pa thams cad du brtse ba chen pos rjes su bzung zhing byin gyis brlab tu gsol/__bsam gyis mi khyab nam mkha'i rang bzhin bsam yas rnam thar 'byung ba'i gnas/__/'chi med rdo rje bde chen rol pas nam mkha' ji srid gzhan don mdzad/__bka' drin zla med gu ru yab yum lha dang DA ki chos skyong bcas/__/ye shes gcig nyid du ma'i tshul snang ro mnyam lta bas mjal phyag 'tshal/__/byang chub spyod pa mthar son 'bras bu'i chos/__/lhun rdzogs sgyu 'phrul drwa ba'i rol gar ni/__/bka' babs bdun ldan bstan 'gro'i snang chen spel/__/pad+ma 'od gsal mdo sngags gling par 'dud/__/oX brgyanaX rgyal ba'i phrin las shing rta pa/__/gter 'byin kun gyi mchoXg gyuraX 'gyur med kyi/__/bdeX cheXn dgyes rol glingaX pa'i mtshan can gyis/__/dus gsum kun tu mi 'bral rjes 'dzin mdzod/__/sangs rgyas chos kun lam gyi rim pa yi/__/nyams len kho nar 'dus phyir gsar rnying gi__/gzhung lugs che phra thun mong thun min gyi/__/glegs bam phreng bas gangs can khor yug gtams/__/kun mthun kun las khyad 'phags tshe gcig gis/__/gdod ma'i grub mtha' mngon byed theg rtse'i lam/__/tshang la gsal ston sngon med nor bu'i mdzod/__/skal ldan kun dga'i dpyid du 'dir dbye'o/__/de la 'dir gang 'chad par bya ba ni/__thog mtha' bar du dge bas shes bya thams cad kyi mchog dang phul du gyur pa legs gsung dam pa'i chos rgyu lam du byed pa rgya che ba mtshan nyid kyi theg pa las khyad par bzhi la sogs pas 'phags pa 'bras bu lam byed zab mo rdo rje theg pa phyi nang gnyis las nang rgyud yo ga sde gsum gyi zab don dang 'brel ba yin la/__de'ang gangs can gyi ljongs su sangs rgyas kyi phrin las thog mar mdzad pa po mkhan slob chos gsum sprul pa'i lo paN brgya rtsa 'dzoms nas bstan pa snga dar gyi dus su 'gyur ba'i rnying ma zhes grags pa la/__rgya che ba bka' ma/__zab mo gter ma/__nye brgyud dag snang gi babs so chen po gsum du 'chis pa las/__'dir khyad par gsum ldan gter las byon pa'i zab chos/__rtog ge'i rig pas ma bcos/__phal tshig gi bsre bslad ma zhugs/__gzhan zer gyi rjes su ma zlos pa'i rdo rje'i tshig byin rlabs kyi gzi brjid dang ldan pa'i gzhung ye shes snying po 'chad/__don gang zhig bshad na/__spyir 'khor lo'i mgon po las chos nyid kyi rang sgrar shar ba'i rgyud mtha' drug tshul bzhi'i sgrom du bzhugs pa rin po che'i mdzod lta bu rnams dang*/__de'i dgongs pa sa bcu'i dbang phyug rnams kyis bkral ba'i lung gsang don rnam par 'byed pa mdzod kyi lde'u mig lta bur gyur pa rnams dang*/__de dag gi gnad kyi man ngag grub brnyes rig 'dzin rnams kyis skal ldan nyams len du dril ba rang skal lag bcangs su sprod pa lta bu gsum las/__'dir gnad gdams man ngag gi gzhung*/__gzhi lam 'bras bu'i rang bzhin spyi dang khyad par lam gyi rim pa'i nyams len mtha' dag ma sbas gsal ston du 'chad/__ji ltar 'chad pa'i tshul la/__gsar rnying gi rgyud dang gdams pa'i bka' srol 'dzin pa'i mkhas grub skyes chen rnams kyi bzhed tshul mang du mchis pa las/__'dir gang zag spros med nyams len snying por dril ba la dgongs te gsungs pa'i gzhung nyid kyi bzhugs tshul gzhir byas/__bshad pa'i tshig dang lung rig gi spros pa brgal brtags kyi mtha' dpyod sogs rtog ge'i gzhung lugs kyi rjais su ma 'brangs shing*/__mchog gi rig 'dzin khyab bdag bla ma'i zhal lung bdud rtsi dngos su thob pa'i skal ba bzang po chud ma zos par dkyus kyi _sa gcod pa dang*/__gzhung don 'bru gnyer du dgrol ba tsam gyis khyad par 'phags pa'i gzhung gsang ba zab mo nyid dad cing mos pa'i blo nus kyis ji ltar dpog par 'chad par bya'o/__/de ltar na dus gsum kun mkhyen pad+ma saM b+ha ba'i snying tig__/bla sgrub zab mo skor bzhi'i rgyab chos/__yo ga rnam pa gsum gyi lta sgom spyod pa'i rim pa yongs su rdzogs pa gsal bar ston pa sangs rgyas gnyis pa o rgyan gyi slob dpon chen po zhal dngos su bsnyen pa dang mtshungs pa'i zhal gdams lam gyi rim pa 'di 'chad pa la bzhi/__gzhung la bde blag tu 'jug pa'i phyir mtshan bstan/__khungs btsun pa'i brda yig 'god cing yul khyad par can la phyag 'tshal/__mtshan don de ldan gyi gzhung dngos nyid bshad/__gzhung grub pa'i tshig gis mjug bsdu ba'o/__/dang po la gsum/__mtshan dngos bkod/__de'i don bshad/__mtshan las brtsams pa'i mtha' dpyad do/__/dang po ni/__bla ma'i thugs sgrub rdo rje dral rtsal las:__zhal gdams lam rim ye shes snying po bzhugs so:__/zhes pa'o/__/gnyis pa la gnyis/__yig don spyir bshad/__khyad par gyi mtshan don rgyas par dbye ba'o/__/dang po ni/__spyir rgyud man ngag gi mtha' can/__man ngag sgrub thabs kyi mtha' can/__sgrub thabs lag len gyi mtha' can du grags pa'i nang tshan sgrub pa'i thabs la'ang rtsa ba gsum dang 'brel ba'i sgrub thabs mtha' yas shing*/__re re la'ang spyi dang khyad par/__rtsa ba dang yan lag___/gnas skabs dang mthar thug la dgongs pa'i sgrub lugs mang du gsungs pa las/__'dir rig 'dzin sgyu 'phrul drwa ba rtsa bshad man ngag gi rgyud rnams dang*/__rig 'dzin 'dus pa'i rtsa rgyud sogs las man ngag gnad kyi nying khur phyung ba'i byin rlabs kyi rtsa ba bla ma gtso bor sgrub pa'i thabs phyogs dus rgyal ba'i thugs dgongs gcig bsdus/__dus gsum rig 'dzin yongs kyi thugs dam snying po/__gu ru rin po che'i thugs klong ye shes thig le'i bcud phyungs pa/__yang zab snying po gnad kyi sgrub thabs yin pa'i phyir/__bla ma'i thugs sgrub ces gsungs te/__zhal gdams snying byang las/__rang byung pad+ma bdag nyid kyi:__dgongs pa'i klong nas rang shar ba:__yang zab thugs kyi sgrub pa ni:__zhes dang*/__o rgyan bdag gis rgyud lung dang*/__man ngag gzhan la brten nas ni/__'grel ba'i tshul du ma bkral bar:__rgyud lung man ngag nges pa'i don:__snying po las kyang snying po'i bcud:__thugs kyi thig ler rab bzhugs pa:__chos nyid rang sgrar snang bas na:__rgyud dang mi 'gal lung dang mthun:__man ngag myong bas khyad 'phags pa:__zhes gsungs pa ltar ro/__/de lta bu'i thugs sgrub zab mo skor bzhi bzhugs pa las 'dir bla ma yang gsang ltar sgrub pa'i thabs rdo rje drag po rtsal gyi chos skor gyi bsdebs su byon pa/__rjes 'jug skal ldan rnams la thugs brtse bas dgongs te zhal gyi sgo nas gdams pa dang rjes su gdams pa'i tshul du gsungs shing*/__tshe gcig gis zung 'jug gi go 'phang sgrub pa'i lam gyi rim pa mtha' dag tshang zhing gsal la mdo rgyas 'tshams pa/__mtshan ye shes snying po zhes bya ba 'dir bzhugs so/__/zhes pa'i don to/__/gnyis pa la gnyis/__tshul bzhi'i sgo nas bshad pa/__gzhi lam 'bras gsum gyi don du bshad pa'o/__/dang po ni/__spyi las bye brag tu 'byed pa'i mtshan ye shes snying po zhes bya ba bshad pa'i gzhir byas/__de 'chad pa'i tshul la/__yi ge'i don ltar na/__spyir ye shes zhes pa sgra yangs pa'i dbang du byas na/__dz+nyA khong du chud pa'i byings don las yul shes bya dang yul can shes pa gnyis ka la sbyor du yod de/__thabs shes grub pa las/__shes pas shes bya rab phyed ste/__/sbyor bas yongs su brtags nas ni/__/chos rnams rang bzhin med pa nyid/__/ye shes de nyid du ni brjod/__/ces so/__/'dir dri mas rnam par spangs pa'i mkhyen pa sangs rgyas kyi ye shes bstan la/__rnam byang gi chos mtha' dag rgyal ba'i ye shes rol pa kho na las byung ba ste/__rgyal tshab byams pas/__sangs rgyas las chos chos las 'phags pa'i tshogs/__zhes sogs gsungs pa ltar te/__des na sgra des khyad gzhi'i gzhung bstan/__snying po ni gar+b+ha'i sgra las shun pa dang bral ba'i snying po rjen par phyungs pa'i don te/__tshig dang spros pa'i shun pa dang bral ba/__mdo sngags chos tshul kun gyi zab don snying por phyung pa'i don yin pas khyad chos bzhugs tshul bstan pa ste/__ye shes kyi phul du phyin pa'i dam chos mtha' dag gi snying por gyur pa'i don to/__/spyi don ltar 'chad ba la/__mdo dang thun mong ba ltar na/__ye shes ni ye nas dri ma dang bral ba'i shes rab gnas lugs stong pa nyid dang*/__snying po ni hr-i da ya'i sgra las/__bcud dam mchog la 'jug pas sangs rgyas sgrub pa la med du mi rung ba'i lam gyi mchog snying rje ste/__'bum lnga las/__stong nyid dpag bsam ljon shing las/__/dmigs med snying rje'i 'bras bu 'byung*/__/sangs rgyas kun gyi rtsa ba ni/__/'di las 'byung bar the tshom med/__/ces so/__/des na stong nyid snying rje'i snying po can gyi lam phul du byung ba 'dir bstan pa'i don to/__/sngags kyi spyi don ltar na/__ye shes ni rten dkyil 'khor/__snying po ni brten pa 'khor lo'i lha rnams te/__brtag gnyis las/__dkyil ni snying po zhes brjod de/__/byang chub sems ni bde chen po/__/len par byed pas dkyil 'khor nyid/__/'dus pa dkyil 'khor nyid du brjod/__/ces pa'i don bskyed rim gyi lam 'khor dang bcas pa'ang 'dir ston to/__/sbas don ltar na/__ye shes ni rten gdod ma'i stong chen e yig__/snying po ni brten pa bde ba chen po'i wa~M yig ste/__gsang 'dus bshad rgyud las/__e wa~M yig gnyis sgyu ma la/__/thams cad mkhyen pa 'dir bzhugs pas/__/dam chos bstan pa'i thog mar ni/__/e wa~M de nyid rab tu bshad/__/ces dang*/__rdo rje phreng ba las/__e ni stong pa nyid du gsungs/__/de bzhin wa~M ni snying rje dang*/__/thig le de gnyis sbyor las byung*/__/de sbyor ba ni rmad byung mchog__/chos phung brgyad khri bzhi stong khyab/__/mdor bsdus chos kyi phyag rgya'o/__/zhes sogs mtha' yas pa 'byung ba ltar/__e wa~M gnyis ni mdo rgyud thams cad kyi gleng gzhir gyur pas zab cing rgya che ba'i don spror yod la/__'phags zhabs kyi bzhed pa kun rdzob bden sbas ltar na/__sgyu lus kyi rim pa mthar phyin nas 'od gsal gyi ye shes las zung 'jug gi sku snying po'i tshul du ldang ba'i don dang*/__'dod chags chos sbas ltar na/__sgyu 'phrul rgya mtsho sogs las gsungs pa ltar/__rtsa 'khor e yig thig le wa~M yig ste steng sgo rnam grol dang sbyar ba dang*/__yum gyi chu skyes e/__yab kyi rdo rje wa~M ste gsang ba 'og sgo la sbyar te/__don de dag kyang gzhung 'dir bstan pa'o/__/mthar thug gi don ltar na/__ye shes ni ka dag gdod ma'i dbyings/__snying po ni lhun grub rig pa rdo rje lu gu rgyud de dbyings rig 'du 'bral med pa gdod ma'i mgon po'i dgongs pa mthar thug pa'ang bstan rim 'di las rtogs pa'o/__/gnyis pa mtshan don gzhi lam 'bras gsum ltar bshad pa la/__dang po gzhi thun mong ltar sbyor na/__ye shes ni gzhir gnas kyi chos sku dbyings dang ye shes dbyer med pa'i don dam chos thams cad la nam mkha' ltar khyab par bzhugs pa'i don te/__'phags pa klus/__sa yi dkyil na yod pa'i chu/__/dri ma med par gnas pa ltar/__/nyon mongs nang na ye shes kyang*/__/de bzhin dri ma med par gnas/__/zhes dang*/__sam+bu Tir/__rtog pa thams cad rnam spangs pa'i/__/ye shes chen po lus la gnas/__/dngos po kun la khyab pa po/__/zhes so/__/snying po ni/__dgongs pa lung ston rgyud las/__snying po zhes ni sangs rgyas kyi/__/chos nyid dag pa 'di yin zhing*/__/sngags kyi spyod don spyod rnams kyi/__/byang chub spyod pa'i mchog 'di yin/__/ces pa ltar don dam pa'i ye shes de nyid 'khor 'das thams cad la snying po'i chos su bzhugs pa'i don te/__rgyal ba byams pas/__de bzhin nyid de thams cad la/__/khyad par med kyang dag gyur pa/__/de bzhin gshegs nyid de yi phyir/__/'gro kun de yi snying po can/__/zhes dang*/__sgron gsal las/__rgyal ba kun gyi gnas ni sems can thams cad de/__/de bzhin gshegs pa'i snying po yin pa'i phyir ro/__/zhes gsungs pa ltar/__ye shes kyi snying po ste dri ma sbyong ba'i gzhi bde gshegs snying po'i gnas lugs mtshon pa'o/__/thun min ma hA ltar na/__bden gnyis dbyer med lhag pa'i chos sku chen po dang*/__a nu ltar na/__dbyings ye gnyis med bde chen byang chub sems kyi dkyil 'khor gdod nas rang chas su bzhugs pa'i don yin cing*/__rdzogs pa chen po'i lugs ltar na/__ye thog gzhi'i ka dag smra bsam brjod bral spros pa'i mtha' las 'das pa ye shes gsum ldan 'khrul grol gnyis ka'i spyi gzhir gyur pa de nyid/__dbyings kyi rgya ral nas phyi gsal gyi snang ba mched de 'khor 'das rgyab gyes pa'i tshe na'ang sems can rnams la snying po'i tshul du gnas skabs kyi gzhir bzhugs pa ste/__klong drug pa las/__spros bral chos nyid ka dag ni/__/rang ngo rnam dag snying po'i gzhi/__/zhes pa ltar ka dag gi ye gzhi mtshon pa ste/__gzhi'i gnas lugs de dag kyang gzhung 'dir bstan pa'o/__lam dang sbyor na/__ye shes ni shes rab/__snying po ni sA ra'i sgra las/__du ma 'phro ba'i rtsa ba'am gnas te thabs bsod nams kyi tshogs la sogs pa las gnas skabs dang mthar thug gi legs pa'i 'bras bu du ma 'byung bas te/__thabs shes gnyis ni lam thun mong ba ltar na bsod nams dang ye shes/__thun min ltar na bskyed rim dang rdzogs rim/__khyad par ltar na bde ba dang stong pa/__dbyings dang rig pa sogs lam gyi gnyis chos kyi don thams cad dang 'brel zhing*/__sangs rgyas sgrub pa la de gnyis kyang phyogs re ma yin par zung du 'jug dgos te/__mdo sde'i don bsdus byang chub lam sgron las/__thabs dang bral ba'i shes rab dang*/__/shes rab bral ba'i thabs dag kyang*/__/gang phyir 'ching ba zhes gsungs pas/__/de bas gnyis ga spang mi bya/__/zhes so/__/de ltar na zung du 'jug pa'i lam rim rgyas par 'dir bstan pa'i phyir/__gzhung nyid las/__kun gyi spyi 'dril ye shes snying po'i lam:__zhes gsungs so/__/'bras bu dang sbyar ba la'ang*/__thun mong ltar na/__mdo sde rgyan las/__sangs rgyas rnams kyi sku dbye ba/__/rang bzhin longs spyod rdzogs pa dang*/__/gzhan ni sprul pa'i sku yin te/__/dang po gnyis po'i rten yin no/__/zhes gsungs pa ltar/__khyab bya gzhan don du ye shes kyi snang ba las brdar shar ba'i gzugs sku/__khyab byed rang don don dam snying po'i rang bzhin chos kyi sku ste 'thob bya sku gnyis dang*/__dag pa gnyis ldan gyi ye shes mngon du gyur pa'i rang bzhin bral ba'i yon tan/__rgyas 'gyur gyi nus pas snying po'i nus pa gsal ba rnam par smin pa'i yon tan te bral smin gyi yon tan gnyis dang*/__ye shes ni kun la khyab pa'i don dang*/__snying po ni mi zad cing mi 'gyur bas rtag pa'i don te rtag khyab kyi phrin las bcas bstan/__thun min ltar na ye shes dbyings/__snying po rig pa ste dbyings rig 'du 'bral med par byang chub pa'am/__ye shes kyi snying po can zhes sku dang ye shes zung 'jug gi don bstan pa ste/__rig pa ye nas nyi ma ltar mkhyen rig tu gsal ba'i char lhun grub tu gnas pa nyid rtogs pa mngon du gyur pas glo bur sgrib pa'i sprin dang bral nas shes rab dri ma med pa'i dgongs pa yon tan ma lus pa'i dkyil 'khor du rgyas te/__sku rnams kyi snying por gnas pas sku dang ye shes 'du 'bral med pa ste/__rang shar las/__tha dad rang bzhin 'gyur ba med/__/de phyir sku lnga'i ye shes te/__/sku dang ye shes 'du 'bral med/__/don la de bzhin gnas pa'o/__/zhes so/__/des na rten sku/__brten pa ye shes bcas dngos su bstan pa'i shugs las mdzad pa phrin las kyang bstan pas na/__gzhung las/__ye shes snying po tshe 'dir 'grub par shog:__ces 'byung ba ltar ro/__/gsum pa mtha' cung zad dpyad na/__'dir zhal gdams zhes pa'i gdams ngag la/__las dang po pa blo chos la skul ba dang*/__rgya che ba tshig tu gdams pa/__zab pa don du gdams pa/__nyams len gnad 'dril du gdams pa/__ngo sprod lag bcangs su gdams pa sogs mang du mchis pa las/__'dir zab rgyas kyi nyams len gnad 'dril lag gtod rjen phyung du gdams pa ste/__gzhung las/__sngon chad zab cing rgya che ba'i:__gdams ngag bye ba phrag brgya'i gzhung :__ji snyed gsungs pa'i snying po'i phul:__rgyu 'bras lam mchog yongs rdzogs pa:__ma byung 'byung bar dka' ba'i bcud:__ces sogs yang yang bsngags pas mtshon no/__/lam gyi rim pa la'ang dpal ldan a ti sha'i bka' srol byang chub lam gyi rim pa/__a ro dang rong zom paN+Di ta'i theg chen rnal 'byor sogs mdo dang thun mong ba rnams dang*/__pad+ma lam rim rin chen sgron me sogs bka' gter thun mong ma yin pa mang du mchis pa las/__'dir khyad par du mas 'phags pa'i lam rim ye shes snying po zhes bya ba ste/__mtshan de sus btags na/__gang zag gi blos bcos nas btags pa ma yin gyi/__kun bzang pad+ma 'byung gnas nyid kyi dgongs klong ye shes chen po'i gsang mdzod nas rang byung rdo rje'i rang sgrar shar ba ste/__gu h+ya gar+b+ha dang he badz+ra sogs rgyud kyi rdo rje'i tshig rnams dang dbye ba med pa'o/__/gang zag gi blos bcos nas btags pa la/__dpe dang don dang yul dang gnas skabs kyi sgo nas mtshan gyi 'dogs tshul mang du 'byung yang*/__'dir ni phyogs kyi glang pos/__shes rab pha rol phyin gnyis med/__/ye shes de ni de bzhin gshegs/__/bsgrub bya'i don dang de ldan pas/__/gzhung dang lam la'ang de sgras bstan/__/ces gsungs pa ltar gzhung lam 'brel ba'i ye shes kyi rang sgrar snang ba'o/__/mtshan 'byung ba'i dgos pa ni/__dbang po rab la mtshan gyi nang du gzhung don tshang bas de tsam gyis dbu zhabs kyi don thams cad bde blag tu rtogs par byed pa dang*/__'bring rnams kyis kyang gzhung gi bzhugs tshul gyi don spyi la nges pa rnyed par 'gyur ba dang*/__tha mas kyang mtshan don de ldan gyi gzhung nyid la myur du 'jug par spro bar 'gyur ba'o/__/gnyis pa brda dang phyag bshad pa la gnyis/__brda yig gi rgyu mtshan dang*/__phyag gi don no/__/dang po ni/__gsang rgyud las/__mkha' 'gro brda la brten pa ste/__/brda dang brda yi len la mkhas/__/don gyi ngo bo brda la sbyor/__/mkha' 'gro brda yi srog can no/__/zhes gsungs pa ltar/__brda la brten pa'i mkha' 'gro'i yi ge ni de dang skal mnyam gyi gang zag las gzhan gyis khrol mi srid pas/__gter du bzhugs pa'i zab chos phal mo che brda'i yi ges bcings pa ste/__chos de rnams mkha' 'gro'i gsang mdzod nas phyungs pas 'phags bod kyi mkhas grub thun mong ba rnams kyi spyod yul du ma gyur pa'i don yin la/__ji skad du/__gter yig sprul pa'i sku yin te/__/sgra tshig go ba gsung yang yin/__/zhes 'byung ba ltar gter yig sprul pa'i sku rdo rje'i gzugs rnam pa thams cad pa de nyid las 'phro dang skal ba ldan pa'i gang zag gis gnas dus smon lam zab mo'i rten 'brel gyis brda'i don khrol nas ji bzhin gtan la phebs pa mtshon pa'i phyir/__glegs bam gyi dbur brda'i yi ge 'bru bdun bkod par mdzad de/__de la dgos pa gsum/__o rgyan sangs rgyas gnyis pa'i bka' rtags phyag rgya'i ri mo dngos la thug pas gang zag phal pa'i brgyud pas bar du ma chod cing khungs btsun par ston pa dang*/__brda ma bcos/__tshig ma 'khrul/__don ma nor bar mkha' 'gro gsang ba'i brda bsgyur bas gzhung zab cing byin rlabs che bar ston pa dang*/__skal ba dang mi ldan pa'i gang zag blo ji ltar sgrin kyang dmus long gis glang chen dpyad pa ltar phyogs tsam yang brtag mi bzod pas gter bdag skyes bu nyid phal pa'i spyod yul las 'das par yid ches pa'o/__/gnyis pa ni/__rtsa gsum kun 'dus rdo rje drag po rtsal la phyag 'tshal lo:__zhes 'byung ste/__phyag gang gis mdzad na/__gsang chen bka'i sdud pa mo ye shes mkha' 'gro mtsho rgyal gyis mdzad/__yul gang la mdzad na/__byin rlabs kyi rtsa ba bla ma/__dngos grub kyi rtsa ba yi dam/__phrin las kyi rtsa ba mkha' 'gro kun 'dus pa'i bdag nyid/__dkyil 'khor sprul bshad mdzad pa po slob dpon pad+mA ka ra thugs rjes khro ba'i tshul bstan pa'i gsang mtshan rdo rje drag po rtsal du grags pa la mdzad/__dgos pa gang gi phyir na/__spyir rdo rje theg pa'i lam la zhugs pa thams cad dngos grub bla ma la rag las pas las dang rnal 'byor thams cad la de nyid rjes su dran dgos pa dang*/__gnas skabs gzhung 'god pa la bar chad mi 'byung zhing byin rlabs 'jug pa dang*/__rjes 'jug 'chad nyan sgom sgrub byed pa rnams la'ang de'i tshul zhar byung du gdams pa'o/__/ji ltar 'tshal na/__drang don du sgo gsum gus pa chen pos brda'i phyag dang*/__nges don du thabs shes dgongs pa ro mnyam don dam lta ba mjal ba'i tshul gyis so/__/'dir rtsa ba gsum zhes pa'i don yang*/__dper na ljon shing dang lo tog rnams 'byung ba'i rgyu'am gzhi la rtsa bar grags pa ltar/__byin rlabs sogs 'byung ba'i rgyu'am rtsa ba bla ma sogs yin te/__gter gzhung rnams las/__byin rlabs rtsa ba bla ma rje:__dngos grub 'byung gnas yi dam lha:__legs par byin rlob mkha' 'gro ma:__zhes 'byung ngo*/__/des na rdo rje theg pa'i dkon mchog khyad par du 'phags pa rtsa ba gsum yin te/__bla ma'i sku dge 'dun/__gsung dam chos/__thugs sangs rgyas/__yi dam zhi chags khro bo'i rnam pa ji ltar bstan kyang sangs rgyas longs sprul gyi rang bzhin/__de'i sngags rgyud ni thun mong min pa'i chos/__mkha' 'gro chos skyong ni khyad par gyi dge 'dun yin la/__yi dam mkha' 'gro gnyis ka'ang bla ma'i ye shes kyi rol pa las byung bas 'khor lo'i mgon po zhes pa'i mtshan gyis brjid pa ste/__dgongs 'dus sku rgyud las/__ngo bo bla ma chos sku la:__rang bzhin yi dam longs spyod rdzogs:__thugs rje sprul sku mkha' 'gro ma:__zhes gsungs so/__/de ltar mtshan nyid dang ldan pa'i bla ma gang yang dkon mchog rtsa gsum kun 'dus yin te/__rdo rje me long gi rgyud las/__rdo rje sems dpa' dkyil 'khor gtso/__/bla ma sangs rgyas kun dang mnyam/__/zhes sogs yongs su grags la/__khyad par gu ru rin po che ni sangs rgyas thams cad 'dus pa'i rdo rje'i ye shes kyi rang gzugs yin te/__rdo rje'i gsungs las/__nga sgrub sangs rgyas thams cad 'grub:__nga mthong sangs rgyas thams cad mthong :__nga ni bde gshegs 'dus pa yin:__zhes sogs lung mtha' yas pa 'byung ngo*/__mtshan gyi don las/__rdo rje ni/__mnyam sbyor las/__rdo rje stong pa nyid du bshad/__/ces dang*/__sgyu 'phrul me long las/__tha dad med pa'i rang bzhin nyid/__/rdo rje zhes ni bshad pa yin/__/ces 'byung ba ltar 'khor 'das kyi chos thams cad tha dad du dbye ba med pa stong nyid kyi rang bzhin yin cing*/__gnas lugs de dang rgyal ba rnams kyi chos sku la dbye ba med pas 'dir rdo rje'i sgras ngo bo chos sku bstan/__de la sgra de 'jug pa'i rgyu mtshan yang rdzas kyi rdo rje dang chos mtshungs pas te/__rtse mor/__sra zhing snying po khong stong med/__/bcad dang gzhig par bya ba med/__/bsreg par bya min 'jig med pas/__/stong nyid rdo rjer brjod par bya/__/zhes pa ltar ro/__/chos sku'i ngang las gdul bya gdug pa can zhi bas mi 'dul ba rnams la snying rje chen pos drag por khros pa'i tshul gyis skur bstan pa ste/__dgongs 'dus las/__shin tu gdug cing gtum pa la/__zhi bas phan par mi 'gyur te/__/shes rab thabs kyi sbyor ba yis/__/khro bor de bzhin gshegs kun mdzad/__/ces so/__/rtsal ces pa'i sgra mthu stobs nus pa'i shugs la 'jug pas/__gzhan las ches khyad par du 'phags pa'i mthu stobs nus pa'i rtsal shugs dang ldan pa'i don yin no/__/rnam pa gcig tu na/__lha dbang lag gi rdo rje rtse mo brgya pa de gdengs pa tsam gyis lha min dpung tshogs thal bar byed pa'i nus stobs chen po yod pa bzhin du/__rdo rje drag po rtsal ces pa'i sgras ye shes las dang 'jig rten gyi khro bo thams cad kyi stobs rtsal gcig tu bsdus pa'i khro rgyal chen po sus kyang 'gran du mi bzod par bstan pa'ang yin no/__/gsum pa gzhung dngos bshad pa la lnga/__man ngag 'byung ba'i rgyu gleng gzhi/__rkyen gleng slong ba/__'bras bu yongs su shes par bya ba man ngag gi don/__man ngag gi dgos 'brel/__'khor la gdams shing bstan pa gtad pa'o/__/dang po la lnga/__ston pa/__'khor/__gnas/__chos/__dus phun sum tshogs pa'o/__/dang po ni/__dus gsum sangs rgyas thams cad kyi ngo bo:__rig 'dzin rtsal 'chang kun gyi gtso mchog:__yi dam zhi khro rgya mtsho'i khyab bdag:__dpa' bo mkha' 'gro yongs kyi tshogs rje:__rdo rje'i chos srung ba dang snang srid dregs pa can thams cad zil gyis gnon pa'i bdag nyid:__ma hA gu ru pad+ma saM b+ha ba zhes sku gsum ston pa'i zhing khams rab 'byams na yongs su grags pa nyid:__ces gsungs te/__rgyal dbang pad+ma ka ra nyid lam zhugs kyi gang zag ma yin par sangs rgyas 'od dpag med dang mnyam med shAkya'i rgyal po nyid gdul bya gdul dka' ba rnams kyi don du rdo rje slob dpon gyi skur bstan pa yin pas/__'das pa dang ma 'ongs pa dang da lta'i dus gsum du gshegs shing bzhugs pa'i sangs rgyas thams cad mnyam pa nyid gsum gyis mnyam pa'i phyir/__nam mkha'i ngo bo la dbye ba med pa ltar sangs rgyas thams cad kyi ngo bo la rnam dbyer med pas der grub pa dang*/__gzhan snang sprul pa'i skur bstan pa na'ang 'chi med tshe'i rig 'dzin brnyes/__sgom lam phyag rgya'i rig 'dzin mthar phyin nas mthar lam lhun grub kyi rig 'dzin drug pa'i rgyal tshab kyi sa la bzhugs par bstan pa'i phyir/__bka' babs rig 'dzin chen po brgyad kyis kyang zhabs la btud pas mtshon/__rig pa 'dzin pa'i sa brnyes shing ye shes kyi rtsal chen 'chang ba kun gyi gtso bo mchog gi gnas la bzhugs pa dang*/__rang bzhin gyis rnam par dag pa'i phung khams skye mched las dbang yul dang bcas pa dbyings snang lhun grub chen po'i lha'i 'khor lor rang shar bas/__yi dam zhi ba rdo rje dbyings chen po dang khro bo tshogs chen yongs su 'dus pa'i dkyil dang 'khor du snang ba rab 'byams spro ba dang bsdu ba'i khyab bdag tu gyur pa dang*/__bkod pa rtsa g.yo ba rlung thig le byang chub kyi sems rnams 'od gsal ye shes chen po'i sbubs su dag pa'i nang gi gnas rnams dbang du mdzad pa'i stobs las/__phyi rol gyi gnas yul dur khrod chen po rnams su brtul zhugs spyod pa'i dpa' bo dang mkha' la rdzu 'phrul gyis 'gro ba'i rnal 'byor ma rnams dang lhan cig tshogs kyi 'khor los sgyur ba'i rje btsan chen por gyur pa dang*/__rtsal snang sku dang ye shes chen po'i rol par shar bas 'bar ba chen po he ru ka'i phyag rgya gnyan po'i gzi brjid kyis/__rdo rje'i dam tshig 'chang ba'i ye shes las dang 'jig rten gyi tshul ston pa'i chos skyong srung ma rgyud gsum gyis bsdus pa rnams dang*/__dpal mgon dang phyogs skyong ba sogs snang srid kyi 'byung po che ba'i nga rgyal gyis dregs pa thams cad gdong lnga'i dbang pos gcan gzan gnon pa bzhin du mtshan tsam gyis kyang bka' las 'dar mi bzod par zil gyis gnon par nus pa'i bdag nyid chen po/__mtshan gcig gis phyogs bcu'i zhing khams kun tu khyab pa dang*/__zhing gcig la'ang mtshan gyi rnam grangs mtha' yas pas rnam par rol pa las/__sangs rgyas kyi zhing 'dir/__'jam dpal sgyu 'phrul drwa ba las/__dpal ldan sangs rgyas pad+ma skyes/__kun mkhyen ye shes mdzod 'dzin pa/__/rgyal po sgyu 'phrul sna tshogs 'chang*/__/che ba sangs rgyas rigs sngags 'chang*/__/zhes tshigs rkang dang pos dpal ldan thog ma'i mgon po rdo rje 'chang dang sangs rgyas 'od dpag med pa shAkya'i rgyal po rnams dbyer med par bzhan snang du pad+ma'i sdong po las skyes pa'i tshul bstan pa'i mtshan pad+ma 'byung gnas sam pad+ma saM b+ha ba/__gnyis pas chos kun mkhyen pa'i ye shes kyi mdzod 'dzin pas blo ldan mchog sred dang*/__gsum pas pad+ma rgyal po dang sgyu 'phrul gyi rol pa sna tshogs 'chang ba nyi ma 'od zer/__bzhi pas srid pa gsum na che ba'i mthu ldan seng ge sgra sgrog__/sangs rgyas gnyis pa'i tshul can shAkya seng ge__/rig sngags nus stobs kyi gzi brjid khyad par du 'bar ba rdo rje gro lod bcas gsal bar lung bstan pa ltar/__bdag cag gi ston pa'i rgyal tshab tu dkyil 'khor rgya mtsho'i khyab bdag rigs 'dus bla ma chen po'i skur bstan cing*/__de'ang gtso bor gsung mchog pad+ma'i rigs las byung zhing pad+ma las brdzus te 'khrungs pa'i tshul bstan pa'i phyir ma hA gu ru pad+ma saM b+ha ba ste pad+ma 'byung gnas sam pad+ma las 'khrungs zhes pa'i mtshan sku gsum ston pa'i zhing khams rab 'byams rgya mtsho na yongs su grags pa nyid de/__chos sku 'od gsal rdo rje snying po'i zhing du ka dag gi grol gzhir rang rig mngon byang chub pa thog ma'i mgon po 'od mi 'gyur ba zhes bya ba dang*/__rang snang longs sku tshangs pa rnga sgra'i zhing na ye shes rigs lnga gangs chen mtsho nges pa lnga ldan gyi bkod pa 'byams klas su snang ba las phyir gsal phyed snang rang bzhin sprul pa sku tshangs chen gyi zhing na rigs lnga'i sangs rgyas zhing dang sku'i bkod pa tshad med pa sa bcu'i dbang phyug rnams la snang ba de dag kyang gu ru'i ye shes kyi rol mo las ma g.yos pas pad+ma kun tu 'chang zhes bya ba dang*/__de dag las 'gro 'dul sprul pa sku'i cho 'phrul phyogs bcu'i zhing khams tshad med pa rnams dang*/__bye brag mi mjed kyi zhing 'di kho nar mtshan nges par bstan pa mdo sngags ston pa brgya rtsas 'jig rten gyi khams lnga bcu'i sgron me mdzad cing*/__de re re'i phyogs mtsham kyi 'jig rten rnams su gu ru mtshan brgyad re rer sprul nas 'gro ba 'dul bar gsungs pa dang*/__khyad par ye shes mkha' 'gro mtsho rgyal gyis khyad par gyi bkod pa gzigs pa las/__shar du gu ru rdo rje gangs chen mtsho'i ba spu'i khung bu re rer zhing khams bye ba phrag brgya brgya/__de re rer 'jigs rten gyi khams bye ba phrag brgya brgya/__de re rer gu ru bye ba phrag brgya brgya/__de re rer sprul pa bye ba phrag brgya brgya/__de re rer gdul bya bye ba phrag brgya brgya/__de bzhin du dbus dang phyogs gzhan rnams su rigs bzhi'i bkod pa sogs tshad med par gsungs pa dang*/__dzam+bu'i gling 'di kho nar 'gro 'dul sprul pa sku'i phyogs gcig bstan pa la'ang gdul bya'i skal ba dang dbang po'i khyad par gyis mthong tshul tha dad par snang ste/__gter gsar rnam thar dpag bsam ljon shing las/__de yang kha cig snang ngor o rgyan yul:__d+ha na ko Shar pad sdong rtse las sprul:__kha cig snang ngor o rgyan rgyal po'i sras:__kha cig snang ngor gnam lcags yod pa'i rtser:__thog babs tshul du byung zhes tha dad kyang :__zhes sogs gsungs pa ltar gter ma'i phyogs phal mo cher rdzus skyes kyi rnam par thar pa sha stag 'byung zhing*/__phur pa bka' ma'i lo rgyus sogs dang 'phags yul phal cher du'ang o rgyan rgyal po'am blon po'i sras su 'khrungs par bshad pa dang*/__ma la ya gnam lcags yod pa'i ri rtser thog babs kyi tshul du byon pa'i lo rgyus kyang yod pa gong gi lung des rtogs shing*/__de re re la'ang ngo mtshar ba'i rnam thar mi mthun pa mtha' yas pa mchis pa ni/__ji skad du/__rnam thar stong phrag bcu dang brgya phrag dgu:__ma 'ongs dam ldan don du bkod nas sbas:__zhes gsungs pas mtshon/__so skye'i blo'i spyod yul las shin tu 'das pa ste/__'dir che ba'i yon tan dngos su bstan pa rnams kyang byis pa'i blo gros la 'jug par 'os pa'i phyogs mtshon tsam yin la/__des ni bstan pa'i bdag po slob dpon khyad par 'phags pa'i don bstan pa'o/__/gnyis pa ni/__chos skyong ba'i rgyal po 'jam dbyangs sprul pa khri srong lde'u btsan gyis spyan drangs te:__zhes gsungs te/__de lta bu'i slob dpon chen po sangs rgyas sprul pa'i sku de nyid bod yul du sku dngos kyis phebs pa'i bdag po'i rkyen ni rgyal bas 'jam dpal rtsa rgyud du lung bstan pa'i bod skyong mnga' bdag rim par byon pa las/__kun bzang rnam 'phrul tho ri snyan shal gyis dam pa chos kyi dbu brnyes/__spyan ras gzigs dngos srong btsan sgam pos srol btod/__chos skyong ba'i rgyal po chen po 'phags pa 'jam dpal dbyangs kyi sprul pa'i sku khri srong lde'u btsan gyis dar zhing rgyas par mdzad do zhes yongs su grags pa ltar/__chos rgyal de nyid kyis bod la dam pa'i chos kyi bstan pa dar ba'i ched du 'phags pa'i yul nas mkhan chen zhi ba mtsho/__rdo rje'i sku can bi ma la mi tra sogs paN chen brgya rtsa brgyad dang*/__khyad par 'chi med rig 'dzin chen po pad+ma ka ra spyan drangs/__'bangs mi dad pa can rab tu phyungs te lo tsA bslabs/__gtsug lag khang bzhengs/__dge 'dun gyi sde btsugs/__dam pa'i chos bsgyur bshad nyams len gyi srol btod de/__sangs rgyas kyi bstan pa thog ma nyid du dar rgyas mdzad pa'i phyag ris dang snyan grags srid pa'i mtha' yang nub tu med pa ni bstan pa'i spyin bdag khyad par du 'phags pa'i tshul bstan pa'o/__/gsum pa ni/__'phags pa thugs rje chen po'i zhing khams gangs can bod kyi ljongs 'dir byon:__zhes gsungs te/__mnyam med thub pa'i dbang pos 'phags pa thugs rje chen po la gnyer du gtad pa bzhin 'phags pa nyid kyis gdul bya'i zhing khams su bdag gir bzhes pa'i gangs can bod kyi yul ljongs 'dir rten phyi snod bems po'i dngos po rnams kyang ri bo gru 'dzin sogs dang rnam dbyer med pa grol ba bzhi ldan du byin gyis brlabs pa'i bka' rtags rang byon grangs med bkod/__brten pa 'gro ba mi'i sa bon thog mar bskrun/__rim gyis rgyal blon khyim bdag mkhas grub rtogs ldan dge ba'i bshes gnyen gyis mtshon/__gang 'dul sprul pa'i rol gar sna tshogs rgyun mi 'chad par sprul te byis pa smra shes tsam nas yi ge drug pa'i sgra rtsol med du 'byung bar byin gyis brlabs shing*/__gu ru nyid kyang 'phags pa'i thugs rje las snang ba'i tshul gyis bsil ldan skye rgu'i mgon skyabs gcig pu par byon/__rgyal bas bstan pa byang nas byang du dar bar lung bstan pa ltar/__'phags yul lung rtogs kyi bstan pa rin po che'ang phyis nas bod kyi yul 'dir 'phos pa ltar deng dus bar nyams pa med par bzhugs pa dang*/__sangs rgyas kyi zhal skyin mched sogs sku gsung thugs rten khyad 'phags grangs las 'das pas gtams shing gtsug lang khang dang dge 'dun gyi sdes nor 'dzin gyi khyon khengs pa sogs sgo du ma nas ngo mtshar che ba bstan pa bzhugs pa'i yul khyad par du 'phags pa'i don bstan pa'o/__/bzhi pa ni/__ma rungs pa'i 'byung po rnams bka' rtags phyag rgya'i zil 'og tu bcug:__lugs gsum mi 'gyur lhun gyis grub pa'i gtsug lag khang rten dang brten par bcas pa bzhengs te rab tu gnas pa'i me tog 'thor:__sangs rgyas kyi bstan pa yongs su rdzogs pa'i bshad sgrub kyi srol chen po btsug:__khyad par rdo rje theg pa'i rgyud lung man ngag gi chos kyi 'khor lo 'byams klas pa bskor:__gnas chen gangs brag mtsho gsum thams cad zhabs kyis bcags:__byin gyis brlabs:__zab mo'i gter kha ming can ming med grangs med par sbas pas ma 'ongs phyi ma phyi ma'i mthar thug pa'i bar bod khams mtha' dbus thams cad la gzhal du med pa'i bka' drin gyis khyab par mdzad do:__sa ma ya:__zhes gsungs te/__spyir sangs rgyas rnams sku gsung thugs yon tan phrin las mi zad pa rgyan gyi 'khor lo'i sgo nas 'dul ba bzhi'i cho 'phrul la mnga' dbang 'byor bas mdzad pa'i tshul bsam gyis mi khyab cing*/__thams cad kyang gzhan phan chos kyi 'khor lo sha stag tu gyur pas de bzhin gshegs pa'i spyod yul kho nar zad kyang*/__'dir bod yul gdul bya spyi mthun la ji ltar snang ba'i dbang du byas te/__slob dpon sprul pa'i sku chen po gangs can ljongs su phebs pa'i tshe/__mdzad pa'i chos sgo dbye ba'i thog mar/__bod na gnyug mar gnas shing rgyud ma rungs pa'i 'byung po rang rgyud pa chos dang dge ba'i bya ba la bar du gcod pas sngon chad sar gnas kyi byang sems zhi ba 'tsho lta bus kyang chos khrims btsugs ma nus pa'i mi min gdug pa can mnga' ris nas mdo khams kyi bar la gang mchis pa thams cad bka' rtags phyag rgya gnyan po'i zil 'og tu bcug nas btul/__phyin chad dam pa'i chos dang chos sgrub pa po'i srung mar bskos te gtsigs la phab cing nam yang 'dar med par mdzad/__mnga' bdag gi bzhed pa ltar bshad sgrub 'byung ba'i gnas bi kra ma la shI la la dpe byas te ri rab gling bzhi nyi zla lcags ri dang bcas pa'i tshul du yod pa sprul pa'i chos 'khor chen mo'i dbu rtse rim gsum gyi 'og khang bod/__bar khang rgya nag__/steng khang rgya gar te lugs gsum gyi tshul du/__sa steng nyi 'og na 'gran zla bral ba dpal bsam yas mi 'gyur lhun gyis grub pa'i gtsug lag khang phyi'i rten gzhal yas khang*/__nang gi brten pa sku gsung thugs kyi rten ngo mtshar bsam gyis mi khyab pa rnams dang bcas pa bzhengs te rab tu gnas pa'i me tog phyag gis 'thor/__ye shes sems dpa' dngos su thim pa'i cho 'phrul chen po rmad du byung bas lha dang bcas pa'i 'jig rten dad pa'i gnas la bkod cing bod yul du sangs rgyas kyi bstan pa rin po che da lta'i bar du 'tsho zhing gzhes pa dang*/__snod bcud la dge mtshan mi nyams pa'i bka' drin mdzad/__sangs rgyas kyi bstan pa rin po che lung rtogs gnyis kyi bdag nyid du gnas shing*/__lung gi chos sde snod gsum/__rtogs pa'i don bslab pa gsum du 'du ba las/__thog mar lung chos bod skad du sgyur ba po lo tsA ba lung bstan cing shes bya la blo sbyong du stsal/__rim par lo paN bsdebs te 'phags yul na yongs su grags pa'i dam chos rnams bod du 'gyur ba'i bdag po'i rkyen mdzad/__mdo sngags lung rtogs yongs su rdzogs pa'i bshad nyan dang*/__bslab pa nyams len sgom sgrub kyi phyag srol chen mo'i rgyun 'di thog mar btsugs/__mtshan nyid kyi theg pa las khyad par du mas 'phags pa tshe gcig gis sangs rgyas ster ba'i gsang sngags rdo rje theg pa'i smin grol rnams rje 'bangs skal ba dang ldan pa rnams la mnog chos su stsal te/__rgyud ma hA/__lung a nu/__man ngag a ti ste/__yo ga rnam pa gsum dang*/__re re la'ang rgyud lung man ngag gi zab don rim par bzhugs pa rnams kyi chos kyi 'khor lo 'byams klas par bskor bas bstan pa'i snying po 'phags yul las kyang ches lhag par gsal bar mdzad/__sku gcig zhing khams rgya mtshor khyab pa'i cho 'phrul chen pos sprul pa'i rje 'bangs grogs 'khor dang lhan cig__/bod kyi gnas chen po gangs chen bzhi/__brag phug chen po brgyad/__grags pa'i mtsho chen bzhi/__lung lnga/__ljongs gsum/__sbas yul gling chen rnams gtsor byas/__bod khams stod smad bar gsum gyi sa gzhi'i khyon rta rmig tsam yang ma lus par zhabs kyis bcags/__skad cig bskal par bsgyur ba'i rdzu 'phrul gyis de dag re rer yang lo zla mang por tshogs kyi sgrub pa dang chos 'khor bskor ba sogs kyis gdod nas grub pa'i gnas chen rnams dang dbye ba med par byin gyis brlabs/__dus skabs de'i gdul byar gyur pa rnams rtogs grol dus mnyam du gyur kyang skal dman zhal mthong tsam gyi sa bon bzhag pa dang*/__phyi rabs kyi 'gro ba rnams la brtse ba'i thugs rjes dgongs nas/__sku gter chos gter nor gter rdzas gter la sogs pa zab mo'i gter kha kha byang dang bcas shing 'don pa'i skyes bu lung bstan pa ming can dang*/__las can gang rung la dgongs pa gtad cing kha byang dmigs su+u ma gsal ba'i ming med grangs las 'das pa sbas te sa steng chos nor dam rdzas kyis bkang bas/__ma 'ongs phyi ma las kyang phyi ma'i mthar thug pa thub bstan nub nas kyang byams mgon ma byon gyi bar du skal ldan rnams la gter gyi 'gro don mdzad par gsungs pas mtshon/__bod khams mtha' dang dbus thams cad la byang chub bar du gzhal du med pa'i bka' drin gyis khyab par mdzad pa ni deng gi dus blo ldan rnams kyi spyod yul du mngon sum gyur pa 'di nyid do/__/des mdzad pa'i chos sgo khyad par du 'phags pa'i tshul bstan pa'o/__/lnga pa ni/__bsam yas ngo mtshar gyi cho 'phrul chos sgo chen po de dag nam byung ba de'i tshe skabs te shugs las bstan pa'o/__/gnyis pa rkyen gleng slong ba la gnyis/__gleng slong ba'i gzhi 'god pa dang*/__gleng slong ba dngos so/__/dang po ni/__de'i tshe de'i dus na:__tshe rabs du ma nas smon lam log par btab pa'i 'bras bu dus su smin pa bdud blon gdug pa can rnams dang :__btsun mo dmar rgyan mas log pa'i bsam sbyor sna tshogs su shar te:__mnga' bdag rgyal po'i spyan sngar gsol ba:__mtha'i mon bu ngan sngags mkhan 'dis g.yo dang :__sgyu dang :__mig 'phrul sna tshogs pas rgyal po bslus te:__mthar gyis che ste sku srog dang phral:__'bring ste mnga' thang 'phrog:__tha ma'ang rgyal blon btsun mo'i bar du snyan phra bcug ste 'bangs ngo log par 'gyur na:__thams cad kyis mthong ba'i lam du chab la gsol bar 'tshal zhes nan tan du zhus pas:__rgyal po thugs ma bde bar gyur te:__de ltar gyur pa'i rgyu mtshan rnams gu ru rin po cher zhib tu gsol nas:__'di la thabs ji ltar bgyi zhes spyan chab g.yo zhing gdung shugs drag pos dar cig brgyal bar gyur to:__cung zad lon pa na brgyal ba las sangs pa'i tshe:__gu ru chen po ches zhal 'dzum mdangs su bzhad cing :__gsung seng ge'i sgra 'jigs pa med pa'i dbyangs kyis:__rgyal po chen po de lta bu la thugs mi bde ba cung zad kyang mi 'tshal te:__sngon yang dag par rdzogs pa'i sangs rgyas la bdud dang mu stegs kyis mtho btsams pa na'ang :__sangs rgyas kyi che ba 'don pa ma gtogs dkon mchog gsum la cung zad tsam yang 'tshe bar ma nus pa ltar:__rig pa rtsal gyi dbang thob pas snang srid 'dod rgur bsgyur zhing :__'ja' lus rdo rje'i skur grub pas 'byung ba bzhis cir yang byar med pa:__dus gsum gyi rgyal ba dang sems dpa' thams cad kyi gdung 'tshob pa o rgyan gyi mkhan po bdag la ni khams gsum thams cad dgrar langs kyang :__rdzu 'phrul gyi che ba 'don pa ma gtogs glags rnyed pa'i skabs lta ci:__ba spu'i rtse mo'ang g.yo bar mi 'gyur ro:__zhes bka' stsal pa na:__rgyal po chen po shin tu dad cing rjes su yi rangs pas lha phyag grangs med pa btsal te:__e ma gu ru sprul pa'i sku:__khyed ni bla ma kun gyi dngos:__yi dam rgya mtsho'i khyab bdag che:__mkha' 'gro'i tshogs rje nyid lags na:__ji ltar rdo rje'i bka' stsal pa:__nam yang bslu ba med pa'i phyir:__bdag sogs dad ldan gdul bya rnams:__yi rangs spro ba bskyed pa dang :__sangs rgyas chos dang dge 'dun gyi:__bstan pa rin chen 'phel ba'i slad:__rdzu 'phrul rnam par brtse ba yis:__bdud blon tshogs rnams spa bkong gsol:__ces gsol ba btab pas de de bzhin du bgyi'o zhes dgyes pa chen po'i zhal gyis bzhes te bod khams gling dgu'i lte ba:__dpal gyi bsam yas dbu tshal gser khang gling gi khyams su bdud tshogs 'dul ba'i ting nge 'dzin la snyoms par zhugs pa na:__paN+Di ta dang :__lo tsA ba dang :__rab byung dang :__sngags pa dang :__rgyal po dang :__blon po dang :__btsun mo dang :__dmangs phal pa rnams 'dus pa'i 'khor gyi khyams chen po'i gung du:__gu ru nyid bzhugs bzhin du sku mi snang ba dang :__me 'bar ba dang :__sa g.yo ba dang :__tshom bu dang bcas pa zhi ba dang :__khro bo dang :__'brug stong lta bu'i sngags kyi sgra nam mkha' gang ba sogs gang la gang 'dul ba'i dpag par dka' ba'i cho 'phrul bye ba phrag brgya mngon par 'du mdzad pa na:__bdud rigs rnams ni sems khong du chud de mtho 'tshams pa'i nus pa zad:__bar ma'i 'gro ba dang ma dad pa rnams dad pa'i dbang po lhag par rgyas:__dad pa rnams gong nas gong du 'phel zhing zhal gyi bdud rtsi 'thung ba la 'dun:__rgyud smin pa'i gang zag rnams grol ba mchog gi dngos grub brnyes:__grol ba rnams gu ru rin po che nyid dang ston 'khor dgongs pa dbyer med du gyur to:__zhes pas bstan/__gnyis pa ni/__de lta bu'i ngo mtshar bsam gyis mi khyab pa'i mdzad pa la brten nas mnga' bdag rgyal po nyid lhag par dad cing 'dun pa dang :__khyad par ma 'ongs snyigs ma'i dus kyi gdul bya rnams la dgongs te:__gu ru rin po che nyid dpal gyi bsam yas bar khang g.yu zhal 'bar ba na bzhugs pa'i skabs:__gser gyi maN+Dal la bla g.yu rin po che 'od 'bar ba'i tshom bu skar chen shar ba ltar bkram ste:__yab sras lhan cig tu phyag grangs med pa btsal:__sprul pa'i lo tsA ba bai ro tsa na dang :__thugs kyi gzungs mar bkas gnang ba bdag nyid dang bcas chab cig tu gsol ba btab pa ni:__phyogs bcu dus bzhi'i sangs rgyas sras bcas kyi:__sku gsung thugs yon phrin las yongs rdzogs pa:__mngal gyis ma gos mtsho skyes rdo rje'i sku:__ma hA gu ru'i zhabs la phyag 'tshal lo:__mgon po khyed ni sangs rgyas kun dang mnyam:__gangs can 'gro la bka' drin lhag par che:__bye brag bdag cag rje 'bangs 'dus pa yi:__gtsug gi nor bu gnyis pa gzhan ma mchis:__khyad par rdzu 'phrul chen po'i rnam rol gyis:__ma dag bdud rig tshogs rnams spa bkong ste:__sangs rgyas bstan pa'i rgyal mtshan phyogs bcur bsgrengs:__las can smin grol byang chub lam la bkod:__'brel tshad don ldan ngo mtshar bsams las 'das:__bdag cag bsags pa rab tu gyur lags kyang :__ma 'ongs snyigs ma'i dus la babs pa'i tshe:__dkar phyogs mthu chung nag phyogs mgo 'phang mtho:__dam sri mngon sum 'gro ba'i snying zhugs te:__sangs rgyas bstan dang bstan pa 'dzin pa dang :__sems can bde skyid 'phrog cing 'joms pa'i phyir:__nad mug mtshon 'khrugs skal ngan dus gcig langs:__bod khams sdug bsngal rgya mtsho brdol ba'i tshe:__gu ru nyid las skyabs gzhan ma mchis pas:__gnas skabs phyi nang bdud sde tshar bcad cing :__phrin las rnam bzhi 'bad med 'grub pa dang :__mthar thug lnga ldan snying po 'od kyi lus:__ye shes bla ma'i go 'phang 'thob pa'i thabs:__zab rgyas gdams pa kun gyi snying po'i bcud:__bdag cag rnams dang ma 'ongs gdul bya'i don:__thugs kyis dgongs te bka' drin stsal du gsol:__ces gsol ba btab pa na:__gu ru rin po che nyid skad cig gis rig 'dzin rdo rje drag po rtsal gyi skur bzhengs te:__dbang dang :__gdams ngag rnams bstan pa'i mthar:__bsnyen pa phyag rgya gcig pa'i he ru ka las:__zhal phyag gi spros bcas nye bsnyen dang :__sgrub pa dang :__sgrub pa chen po'i tshul gyi gtso 'khor mtha' yas pa skad cig gis spro ba dang bsdu ba'i cho 'phrul chos kyi dbyings rgyas par bkang ba'i tshul du bstan nas byin rlabs kyi zil chen pos bod khams mtha' dbus thams cad du 'ja' dang :__'od dang :__me tog gi char dang :__sa g.yo ba dang :__sgra dang rol mo rang 'khrol ba dang :__skal ldan rnams la rdo rje'i ye shes mngon sum phebs pa'i sgyu ma lta bu'i rnam par 'phrul ba 'du mdzad de:__slar yang gu ru nyid pad+ma saM b+ha ba sku 'od kyi rang bzhin can du lam mer snang ba'i zhal nas rdo rje'i gsung gi mthar thug pa lam gyi rim pa snying por dril ba 'di chos nyid rdo rje'i dbyangs kyis bka' stsal to:__sa ma ya:__zhes pas bstan to/__/'dir spyi don spros na yi ge mang dogs pas ma bris shing tshig don ni go sla'o/__/gsum pa 'bras bu yongs shes man ngag gi don bshad pa la gsum/__bshad bya don gyi sgo nas mdor bstan/__'chad byed thun min gleng gzhis go phye/__ji ltar 'chad pa'i tshul gyis tshig don rgyas par phye ba'o/__/dang po ni/__oM AHhU~M hoH__zhes 'byung ste/__de'i don 'chad pa la gnyis/__'phro gzhi yi ge'i de nyid spyir bshad/__de las 'phros pa'i 'bru bzhi'i don khyad par du bstan pa'o/__/dang po la lnga/__ngo bo/__/rang bzhin/__nges tshig__/byed las/__dbye ba'o/__/dang po la'ang*/__thun mong tha snyad kyi gnas skabs su phung po lnga las mi ldan pa'i 'du byed du bzhag pa dang chos kyi brda 'am mtshan mar gyur pa'i phyir sangs rgyas rnams kyi chos kyi phyag rgyar bzhag pa dang*/__lha dang sngags la tha dad med pa'i phyir rnal 'byor pa rnams kyis lhar bzhag pa dang*/__mtshan ma 'dis 'gro ba'i rgyud byin gyis rlob nus pa'i phyir sangs rgyas su bzhag pa dang*/__de bzhin gshegs pa'i byin rlabs dang rnam par smin pa'i chos 'dres pa'i phyir snang bar bzhag pa dang*/__sangs rgyas kyi ye shes nyid yi ger byin gyis brlabs pas de gnyis tha dad med par bzhag pa ste/__gang zag dang gnas skabs kyi khyad par las brtags pa rnam pa drug tu bshad do/__/gnyis pa ni/__sems kyi rang bzhin 'od gsal ba nyid yi ge 'khor lo'i sprin du rang snang ba ste/__de las gzhan du dngos por grub pa gang yang med de/__gsang snying las/__sems kyi rang bzhin yi ge ste/__/yi ge dngos por yod ma yin/__/zhes dang*/__mdo las kyang*/__rab 'byor yi ge ni don dam par ma skyes pa ste a'i ngo bo nyid do/__/a'i ngo bo nyid gang yin pa de ni sems kyi rang bzhin te/__dngos po dang dngos po med pa thams cad las yang dag par 'das pa'o/__/zhes gsungs so/__/gsum pa ni/__yul chos kyi dbyings la yul can rang byung shes rab kyis bya rtsol med par bris pa ste/__ye nas lhun gyis grub cing 'gyur ba med pas ak+Sha ra dang*/__brjod bya thams cad gsal bar byed pas byany+dza na dang*/__don mtshon pa'i nus pa dang ldan pas war+Na zhes pa'i ming gis brjod pa ste/__gsang snying las/__dbyings la dbyings kyis bris pa ste/__/yi ge zhes ni de phyir brjod/__/ces so/__/bzhi pa ni/__dngos po med pa'i rang bzhin yi ge 'khor lo'i sprin gyi rol pa sna tshogs su snang bas don gyi ngo bo tsam ston pa'i ming dang*/__don gyi khyad par ston pa'i tshig rnams 'byung zhing*/__de dag 'dus pa las gzhi lam 'bras bus bsdus pa'i 'khor 'das kyi brjod pa ji snyed pa ston pa sangs rgyas kyi mdzad pa sgrub pa'i phrin las dang ldan pa ste/__tshig rnams ma lus 'dzin pa'i gnas/__/sna tshogs don chen smra zhing ston/__/zhes so/__/lnga pa rnam par dbye ba'i tshul yang*/__chos rje kun mkhyen chen po'i bzhed pa ltar na bzhi ste/__gnas lugs don gyi yi ge ni/__sgyu 'phrul las/__sems nyid yi ge'i rang bzhin te/__/yi ge yid bzhin rin chen sprin/__/zhes gsungs pa/__sems nyid rang bzhin gyis 'od gsal ba rang byung gi ye shes rtag chad 'gro 'ong dang bral ba ste 'khor 'das kyi yi ge thams cad 'phro ba'i gzhir gyur pa'o/__/lus gnas rtsa'i yi ge ni/__lus kyi rtsa 'khor lo bzhi'i srog shing ro rkyang dbu ma gsum gyi nang du oM AHhU~M dkar dmar mthing ga'i tshul du rang byung du gnas pas/__phyi ru lus ngag yid gsum/__nang du nyon mongs dug gsum/__gsang bar sku gsung thugs su 'char ba'i rten byed la/__de'i 'od mdangs las 'khor lo bzhi'i rtsa 'dab rnams su thabs shes dbyangs gsal gyi yi ge rkyang brtsegs 'dogs dang yan lag tu phye ba'i brgyad khri bzhi stong gnas pas/__phyi phung khams skye mched kyi rten dang smra brjod de snyed 'byung ba'i rgyu byed/__nang nyon mongs rtog tshogs kyi rten dang nyin mtshan rnam rtog de snyed 'byung ba'i rten byed/__gsang bar de rnams dag dus chos sgo de snyed 'byung ba'i rten byed pa'o/__/brjod pa sgra'i yi ge ni/__ngag gi smra ba dang brjod pa rnams yin te/__rgyu rtsa gnas kyi yi ge rlung gis bskyod/__rkyen lce rkan sogs kyi byed pa la brten nas gnas dang rtsol ba 'phrad nas 'byung ba rnams so/__/mthar thug 'bras bu'i yi ge ni/__longs sku'i rtsa gnas dag pa'i yi ge las yi ge'i sprin 'phros te nam mkha' la chos kyi dbyangs su grags pa dang*/__yi ge skur gyur nas sems can kyi don mdzad pa dang*/__longs sprul gnyis ka'i rtsa yig ye shes lnga'i snang bas brgyan pa dang*/__gsung dbyangs yan lag drug cu dang ldan pa'i chos sgrar snang ba rnams so/__/de'ang dbyings don dam gyi yi ge'i rang mdangs las lus rtsa'i yi ge byung*/__de'i gdangs brjod pa sgra'i yi ger shar/__de sgrib pa las grol bas 'bras bu'i yi ger gnas 'gyur ba yin pas bzhi ka'ang ngo bo gcig tu 'dus pa'o/__/gnyis pa ni/__de las 'dir mdor bstan du mdzad pa'i yi ge 'di dag rtog ge dang nyan thos sogs kyi blos mi phyed pas gsang ba chen po rdo rje'i ye ge'am/__ji ltar e dang wa~M yig bzhin du de bzhin gshegs pa'i brdar gyur pa'i yi ge ste/__brda la'ang don dam nyid brda'am rtags su shar ba dang*/__tha snyad kyis brdar btags pa gnyis las/__'di ni bcos nas tha snyad du sbyar ba ma yin pa don dam pa'i gnas lugs brda'i tshul du rang shar ba de nyid thams cad mkhyen pa'i ye shes kyis gzigs nas gsal bar mdzad pa ste/__'khor 'das lam gsum gyi chos thams cad kyi srog gam gnad 'dus pa'i phyir de dag gang las 'phro ba'i gzhi dang*/__bshad pa'i gzhi dang*/__bzlas sgom gyi gnad dang*/__mthar thug gi skyel so rnams su gyur pa'o/__/de la rdo rje'i yi ge bzhi'i don cung zad bkrol ba la lnga/__gang las byung ba/__de'i rgyu mtshan/__'bru bzhi'i ngo bo/__/mtshon don byed las/__bzhi chos rnams bstan pa'i tshul lo/__/dang po ni/__spyir rang byung 'od gsal gzhom du med pa'i sgra mi shigs pa'i rlung dang dbyer med pa las 'od gsal gyi rlung byung*/__de las snang ba'i rlung*/__de las rags pa'i rlung bcu sogs byung zhing bskul bya de rnams/__sgra don 'dres 'dzin gyi rnam par rtog pa skul byed du byas nas ngag tu brjod pa'i yi ge rnams byung ba yin cing*/__bye brag tu/__dri med 'od las/__stong pa chen po lnga las sku rdo rje la sogs pa sngags rab tu brjod pa'i chos can rnams 'byung ste/__rjes su nga ro dang*/__a yig gnyis dang*/__thig le gnyis dang*/__gzhom du med pa'i ha yig rnams las sku dang gsung dang thugs dang ye shes rdo rje rnams yang dag par 'byung bar gsungs pa bzhin/__a u ma gsum 'dus pa las oM/__a a ha gsum 'dus pa las AH__ha U ma gsum 'dus pa las hU~M/__ha u ha gsum 'dus pa las hoHrnams byung ste re re'ang yon tan gsum gsum gyi bdag nyid can du grub pa'o/__/gnyis pa ni/__spyir gsang sngags rig sngags gzungs sngags thams cad 'byung ba'i gnas ni a li kA li yin la/__de rnams kyang rang byung 'od gsal mi shigs snying po'i thig le dang dbyer med pa a yig kho na'i rnam 'gyur las byung ba yin te/__'jam dpal sgyu drwar/__a ni yig 'bru kun gyi mchog__/don chen yi ge dam pa yin/__/khongs nas 'byung ba skye ba med/__/tshig tu brjod pa spangs pa ste/__/brjod pa kun gyi rgyu yi mchog__/ces dang*/__gsang snying las/__a nyid sna tshogs par snang ba'i/__/ka la sogs pa bzhi bcu gnyis/__/zhes sogs 'byung ba ltar ro/__/gsum pa ni/__gong du bshad pa'i brtags pa rnam pa drug ka 'jug kyang*/__'dir sku gzugs snang rnam pa thams cad pa/__gsung sgra brnyan rnam pa thams cad pa/__thugs stong nyid rnam pa thams cad pa/__bde ba chen po'i ye shes rnam pa thams cad pa rnams rim bzhin oM sogs kyi ngo bo dang rang bzhin dbyer med pa shes par bya'o/__/bzhi pa ni/__dper na a ni yi ge gzhan las gzugs tha dad pas gcig pa'ang ma yin la/__kun gyi khyab byed du 'dres pas tha dad pa'ang ma yin pa bzhin du/__rang bzhin 'od gsal byang chub kyi sems ye shes kyi rlung dang bcas pa nyid/__gnyis bsdus kyi chos thams cad dang ngo bo tha dad pas gcig pa'ang ma yin la/__'khor 'das kyi khyab byed du gyur pas tha dad pa'ang ma yin par mtshon la/__khyad par gzugs snang gi rang bzhin dkyil 'khor 'khor lo snang stong du gdod nas gnas pa de oM gyis mtshon/__sgra brjod ngag tshig gi rang bzhin mi shigs nA da'i 'khor lo grags stong du ye nas gnas pa de AHsa mtshon/__rtog tshogs 'gyu dran gyi rang bzhin 'od gsal snying po de bzhin nyid ka dag kun khyab tu bzhugs pa de hU~M gis mtshon/__srid rtsa 'pho ba'i rang bzhin bde ba chen po ngo bo 'gyur med du gnas pa de ho:yig gis mtshon/__'bru bzhi po re rer yang yon tan gsum gsum ste rnam pa bcu gnyis kyi bdag nyid du gnas pa ni rten 'brel lugs 'byung ldog bcu gnyis dang*/__rdo rje bzhi po re rer yang sku gsum gyi bdag nyid du bzhugs pa sogs mtshon no/__/yi ge 'di dag gi gdangs lus ngag yid gsum snyoms 'jug gi rtog pa dang bcas par shar bas 'khor ba'i gzugs su grub la/__rnal 'byor gyis lam du byas pas sgrib pa gcod pa'i gnyen por 'gyur ba dang*/__glo bur gyi dri ma dag pa las rdo rje bzhi po mngon du 'gyur bas na grol 'khrul gnyis ka'i byed pa dang ldan pa ste/__dri med 'od las/__gdengs can gyi gnas oM/__me'i 'jig rten AH__mtho ris kyi gnas hU~M/__sgo gsum chags rtog bcas 'bru bzhir sbyor ba sogs dang*/__rdo rje'i bzlas pas lam du byed tshul 'dus pa gtsos gsar rnying kun las rgya cher 'byung ba dang*/__rdo rje phreng bar/__sangs rgyas yi ge hU~M du bshad/__/gsung ni yi ge AHru brjod/__/dge 'dun zhes bya yi ge oM/__/zhes dkon mchog gsum la sbyar ba dang*/__'dus pa rtsa rgyud las/__byang chub thams cad thob bya'i phyir/__/ye shes rdo rje dag gis bya/__/oM ni ye shes snying po ste/__/rdo rje'i sku ni thob byed pa'o/__/AHni byang chub bdag med pas/__/rdo rje'i gsung ni thob byed pa'o/__/hU~M ni sku gsung thugs nyid de/__/rdo rje mi phyed gsum thob pa'o/__/zhes gsungs pas mtshon no/__/lnga pa ni/__yi ge 'bru bzhis gzhi lam 'bras gsum gyi bzhi 'gros kyi chos thams cad bstan pa ste/__gzhi dus ltar na/__oM yig gis kun gzhi dang lus rtsa'i khams/__AHyig gis nyon yid dang ngag rlung gi khams/__hU~M yig gis 'jug pa'i rnam shes dang yid thig le'i khams/__hoHyig gis kun khyab rig pa dang ye shes kyi khams rnams bstan pa dang*/__lam dus su sbyang bya ltar na/__oM sad pa'i gnas skabs dang lus sgrib/__AHrmi lam gnas skabs dang ngag sgrib/__hU~M gnyid stug gnas skabs dang yid sgrib/__hoHchags rtog gnas skabs dang 'pho sgrib/__sbyong byed ltar na/__bum pa/__gsang ba/__shes rab ye shes/__tshig gi dbang ste smin byed dbang bzhi/__mtshan bcas bskyed rim/__kun rdzob rang byin rlabs/__dkyil 'khor 'khor lo/__/don dam rdzogs pa chen po ste grol byed lam mam rnal 'byor bzhi/__byams pa/__snying rje dga' ba btang snyoms te tshad med bzhi/__bsnyen pa nye bsnyen sgrub pa sgrub chen te yan lag bzhi/__dga' ba mchog dga' dga' bral lhan skyes dga' ba bzhi la sogs pa rim bzhin bstan pa dang*/__'bras dus ltar na/__oM yig sku rdo rje sprul pa'i sku smon pa med pa'i rnam thar bya grub ye shes/__AHyig gsung rdo rje longs spyod rdzogs sku mtshan ma med pa'i rnam thar mnyam nyid dang sor rtog ye shes/__hU~M yig thugs rdo rje chos kyi sku stong pa nyid kyi rnam thar me long ye shes/__hoHyig ye shes rdo rje ngo bo nyid sku 'du mi byed pa'i rnam par thar pa stong pa nyid kyi ye shes rnams kyi rang bzhin du gyur pa'o/__/gnyis pa 'chad byed thun min gleng gzhis go phye ba la gnyis/__spyir sku gsum ston pas chos 'khor bskor tshul/__bye brag man ngag 'dir bsdus te 'dzin par gdams pa'o/__/dang po la lnga/__ston pa/__gnas/__'khor/__chos/__dus phun sum tshogs pa'o/__/dang po ni/__ka dag dbyings kyi ngo bo kun tu bzang :__lhun grub rig pa pad+ma saM b+ha ba:__dbyer med zung 'jug rdo rje drag po rtsal:__dkyil 'khor kun gyi gtso mchog he ru kas:__zhes gsungs te/__spyir gsang ba chen po'i chos thams cad phun sum tshogs pa lnga ldan gyi sgo nas 'byung zhing*/__de la'ang tshig gi rgyud dang man ngag 'byung bar mtshon pa thun mong gi gleng gzhi dang*/__don gyi rgyud dang man ngag 'byung bar mtshon pa thun mong ma yin pa'i gleng gzhi gnyis te/__nyi zla kha sbyor gyi rgyud las/__gsang ba chen po'i rgyud rnams ni/__/phun sum tshogs pa lnga ldan pas/__/thun mong nyid dang thun mong min/__/gleng gzhi rnams kyi sa bon no/__/zhes gsungs/__de las snga ma gong du song*/__'dir phyi ma ste de'ang thal 'gyur rtsa ba'i rgyud las/__gzhi ni rnam pa lnga yin te/__gnas ni rnam pa gsum du 'dod/__/ces sogs gsungs pa ltar phun sum tshogs lnga re re la'ang rgyal ba sku gsum gyi dbye bas phye ba ste/__de la ston pa phun sum tshogs pa ni/__ka dag gdod ma'i gnas lugs spros pa thams cad dang bral ba'i dbyings kyi ngo bo chos sku'i ston pa kun tu bzang po dang*/__lhun grub rang gsal gyi rig pa gzhi thog tu bya rtsol med par grol ba rang snang longs sku'i ston pa pad+ma saM b+ha ba dang*/__ngo bo rang bzhin dbyer med dbyings rig zung du 'jug pa'i thugs rje'i rang rtsal sprul sku'i ston pa rdo rje drag po rtsal te/__zhi ba dang khro bo'i dkyil 'khor rab 'byams spro ba dang sdud pa'i byed por gyur pas dkyil 'khor kun gyi gtso bo'i mchog gam phul du gyur pa'i he ru ka chen pos sangs rgyas kyi mdzad pa 'di ltar bsgrubs pa'o/__/zhes so/__/'dir he ru ka'i don ni rgyud las/__he ni rgyu sogs stong pa nyid/__/ru ni gnas 'jig tshogs dang bral/__/ka ni gang du mi gnas pa'o/__/zhes gsungs pa ltar rnam thar sgo gsum gyi don mtshon pa yin pas sku gsum ka la 'jug pa yin no/__/gnyis pa ni/__chos dbyings khyab brdal thig le chen po'i zhing :__lnga ldan 'od gsal longs sku'i pho brang dang :__ma nges 'gro 'dul sprul sku'i gnas rnams su:__zhes gsungs te/__chos kyi dbyings 'khor 'das thams cad la khyab par brdal ba rang byung thig le chen po chos sku'i zhing khams dang*/__ye shes kyi rang 'od lnga dang ldan pa dbyings snang 'od gsal gyi rgyan stug po bkod pa longs sku rigs lnga'i pho brang dang dag pa dang ma dag pa'i zhing dang gnas kyi bkod pa ma nges 'gro 'dul sprul pa sku'i gnas sna tshogs pa rnams su/__zhes pa'o/__/gsum pa ni/__rigs can gdul bya'i 'khor tshogs rgya mtsho la:__zhes gsungs ste/__chos sku'i 'khor rang snang ye shes rgya mtsho/__longs sku'i 'khor gshegs sems khro bo'i tshogs mkha' khyab kyi dkyil 'khor/__sprul sku'i 'khor 'jig rten las 'das pa dang 'jig rten pa'i skye bau skal ba dang ldan pa ste/__mdor na rang gi skal ba dang mthun pa'i rigs can rnams dang gdul bar bya ba'i 'khor tshogs bsam yas bgrang ba las 'das pas rgya mtsho'i brdas bstan pa rnams la'o/__/bzhi pa ni/__so so'i snod dang dbang po'i khyad par bzhin:__rgyu dang 'bras bu'i theg pa bsam yas kyi:__chos kyi 'khor lo:__zhes gsungs te/__chos sku'i bstan pa rang bzhin 'od gsal rdzogs pa chen po/__longs sku'i bstan pa 'bras bu bla med theg pa chen po/__sprul sku'i bstan pa rgyu'i theg pa gsum gtso bor gyur pa ste/__mdor na gdul bya so so'i skal ba'i snod dang dbang po'i khyad par bzhin du/__sangs rgyas kyi rgyu dang 'bras bu lam du byed pa'i theg pa che chung bsam las 'das pa'i chos kyi 'khor lo tshad med pa byung ba'o/__/lnga pa ni/__dus gsum kun tu bskor:__ces pa ste/__chos skus dus bzhi mnyam pa nyid chos nyid brjod pa las 'das pa'i dus su rtsol bral dgongs pa mnyam nyid chen por snang*/__longs skus lhun grub kyi ye shes rang snang ba'i dus su tshig dang yi ge med par brda'i sgo nas don bstan/__sprul skus gdul bya rnams smin pa gsum dang ldan pa'i dus su skal ba'i khyad par dang mthun pa'i chos snang ba'i sgo 'byung ba ste/__mdor na rgyal ba sku gsum phrin las khyab pa dang rtag pa'i bdag nyid yin pas gdul bya 'dul ba'i chos kyi 'khor lo dus gsum kun tu chad pa med par bskor ba'o/__/gnyis pa ni/__de rnams kun gyi snying po gcig 'dril ba:__thugs kyi thig le zhal chems mthar thug pa:__go sla khyer bde lag len dmar khrid du:__shin tu nye ba'i 'dus pa rnams la bstan:__yal bar ma dor rtse gcig nyams su longs:__zhes gsungs te/__rgyal ba sku gsum gyi chos 'khor rgyu 'bras theg pa zab cing rgya che ba de rnams kun gyi tshig don snying po phyogs gcig tu 'dril ba/__sangs rgyas rnams kyi thugs kyi thig le/__gu ru rin po che'i zhal chems mthar thug pa/__kha gsal bas dbang po rno rtul kun gyis go sla ba/__rgyas bsdus 'tshams pas nyams len du khyer bde ba/__tshig gi bshad yam tsam ma yin pa lag len dmar khrid rjen phyung gi tshul du/__mnyes pa gsum gyis bla ma'i thugs zin pas shin tu nye ba'i thugs sras su gyur pa'i 'dus pa rje 'bangs grogs kyi tshogs rnams la bstan par bya'o zhes gdams ngag bstan par zhal gyis bzhes te/__zab cing dkon la bcud du 'dril ba'i gdams ngag 'di lta bu rnyed par dka' bas btang snyoms kyis yal bar ma dor bar thos pas tshig zungs/__bsam pas don dpyad/__sgom pas rtse gcig nyams su longs la rang gzhan gyi don grub par gyis shig__/ces gdams par mdzad pa'o/__/gsum pa ji ltar 'chad pa'i tshul gyis tshig don rgyas par dbye ba la gnyis/__mdor bstan/__rgyas bshad do/__/dang po ni/__de la shes bya rtogs byed mthar phyin 'bras:__rnam pa gsum gyis mtshon par bya ba ste:__zhes gsungs te/__bshad par zhal gyis bzhes pa'i gdams ngag de la mdo chings chen po gsum gyis bsdams te/__gang shes par bya ba'i gzhi/__gang gis rtogs par byed pa'i lam/__gang du mthar phyin par 'gyur ba'i 'bras bu bcas rnam pa gsum gyis mtshon par bya ba yin te/__zhes lhag bcas kyi sgras rgyas bshad kyi tshig drangs par mdzad do/__/gnyis pa la gsum/__gzhi/__lam/__'bras bu rgyas par bshad pa'o/__/de'i dang po la gsum/__gnas lugs ngo bo'i gzhi dang*/__'khrul pa brtags pa'i gzhi bshad/__skabs kyi don bsdus te mtshams sbyar ba'o/__/dang po ni/__shes bya'i gzhi ni kun khyab bde gshegs snying :__'dus ma byas pa gsal stong rig pa'i babs:__'khrul grol las 'das mkha' ltar rab tu zhi:__'khor 'das dbye bsri med par gnas gyur kyang :__zhes pas bstan te/__rgyal ba byams pas/__thos pa las byung shes pa yi/__/snang ba rgya chen 'dis brgyan pas/__/blo ldan myur du sangs rgyas kyi/__/spyod yul kun la 'jug par 'gyur/__/zhes gsungs pa ltar/__sangs rgyas sgrub pa'i lam la zhugs pa'i thog mar thos pa'i shes rab kyis shes bya gtan la dbab dgos kyang*/__'dir nyams len dmar khrid kyi dbang du mdzad nas mi shes su mi rung ba'i gnad mdor bsdus te/__shes bya thams cad kyi gzhir gyur pa ni snod bcud kyi dngos po la nam mkhas khyab pa bzhin du 'khor 'das kun la khyab pa'i bde gshegs snying po zhes bya ba khyad par lnga ldan du bzhugs pa yin te/__ngo bo 'dus ma byas pa/__bzhugs tshul gsal stong rig pa'i rang babs/__dang por 'khrul ma myong zhing mthar grol ba las 'das pa/_nam mkha' ltar skye 'gag sogs spros pa'i mtshan ma med pas rab tu zhi ba/__'khor ba dang myang 'das gnyis la skyon rtog gis dbye zhing ring ba dang*/__yon tan du shes pas bsri ba ste nye bar gyur pa gang yang med par bzhugs shing gnas par gyur to/__/kyang zhes pa ni tshig phyi ma sdud pa'i sgra'o/__/de'i don cung zad bshad na/__gshegs snying shes bya thams cad kyi gzhi yin pa'i rgyu mtshan ni/__chos mngon pa'i mdo las/__thog ma med dus can gyi dbyings/__/chos rnams kun gyi gnas yin te/__/de yod pas ni 'gro kun dang*/__/mya ngan 'das pa'ang thob pa yin/__/zhes 'byung ste/__thog ma med pa'i dus can gyi dbyings de nyid dag ma dag ma phye bar rnam par bzhag pa'i dbang du byas te 'khor 'das kyi chos kun gyi gnas sam gzhi yin la/__phye na kun gzhi'i rnam shes la brten pa'i glo bur gyi dri ma ni zag bcas 'khor ba'i rgyu/__kun gzhi'i ngo bo gshegs snying ni zag med myang 'das kyi rgyu yin te/__'phags pa klus/__gang zhig 'khor ba'i rgyur gyur pa/__/de nyid sbyang bar byas pa las/__/dag pa de nyid mya ngan 'das/__/chos kyi sku yang de nyid do/__/zhes so/__/de gnyis kyang rten dang brten pa'i tshul du gnas pa mgon po byams pas/__sa ni chu la chu rlung la/__/sogs dpe dang bcas pas bstan cing*/__de gnyis la gsung rab rnams su chos can dang chos nyid/__mtha' dang dbus/__snang ba dang stong pa/__kun rdzob dang don dam sogs tha snyad du mas bstan pa yin no/__/de ltar khyad gzhi dbyings kun khyab bde gshegs snying po de nyid/__khyad chos 'dus ma byas pa sogs kyis gsal bar mdzad pa ste/__de'ang dbyings de nyid kun la khyab pa'i tshul ni/__rgyud blar/__ji ltar rtog med bdag nyid can/__/nam mkha' kun tu rjes song ltar/__/sems kyi rang bzhin dri med dbyings/__/de bzhin kun tu 'gro ba nyid/__/ces nam mkha'i spyi mtshan mchog dman bar ma'i gzugs thams cad la rang bzhin gyis khyab pa bzhin du dbyings kyi mtshan nyid chos thams cad la rang bzhin gyis khyab par gsungs shing*/__dbyings de 'jug tshul gyi sgo nas ming gsum gyis bstan te/__glo bur gyi dri mas bsgribs pa'i sems can gyi skabs su rigs/__dri ma bral ba'i sangs rgyas kyi skabs su chos sku/__gnyis ka'i ngo bor khyab cing 'gyur ba med pa'i cha nas de bzhin nyid ces bya ste/__'di yi rang bzhin chos sku dang*/__/de bzhin nyid dang rigs kyang ste/__/zhes so/__/dbyings de la 'khor lo bar pa'i mdo rnams nas stong pa nyid dang*/__de bzhin nyid la sogs pa'i sgras bstan te/__sdud par/__'das pa'i de bzhin nyid gang ma byon de bzhin nyid/__/da lta'i de bzhin nyid gang dgra bcom de bzhin nyid/__/chos kun de bzhin nyid gang rgyal ba'i de bzhin nyid/__/chos kyi de bzhin nyid 'di thams cad bye brag med/__/ces sogs dang*/__rtsa sher/__de bzhin gshegs pa'i rang bzhin gang*/__/'gro ba 'di yi rang bzhin yin/__/ces sogs dngos po'i gnas lugs stong pa nyid kyi don mtha' yas par gsungs so/__/'khor lo tha ma sogs su bde gshegs snying po zhes rgya cher bstan te/__ting 'dzin rgyal po las/__dag pa dwangs pa 'od gsal ba/__/mi 'khrugs 'dus ma byas pa nyid/__/bde bar gshegs pa'i snying po ste/__/ye nas gnas pa'i chos nyid do/__/zhes sogs dang*/__gsang sngags kyi rgyud sde zab mo rnams su e wa~M dang rdor sems dang*/__rgyud dang thig le 'gyur med 'od gsal rang byung ye shes sogs mtshan gyi rnam grangs du mas bstan te/__he badz+ra las/__sangs rgyas kun gyi sdom pa ni/__/e wa~M yi ger rab tu gnas/__/zhes dang*/__sam+bu Tir/__lus la ye shes chen po gnas/__/rtog pa thams cad rnam par spangs/__/lus gnas lus las ma skyes pa'o/__/zhes dang*/__'dus par/__rigs ni rgyud ces bya bar bshad/__/rgyud ni thog ma zhes brjod de/__/mi 'jig skye ba med gang yin/__/mgon po de ni yin par bshad/__/ces so/__/gshegs snying sems can la bzhugs par yid ches pa'i thun mong gi lung ni/__mdo las/__sems can thams cad ni de bzhin gshegs pa'i snying po can no/__/zhes dang*/__bde gshegs snying pos 'gro kun yongs la khyab/__/'gro ba 'di dag thams cad sangs rgyas rgyu/__/zhes dang*/__shA ri'i bu/__don dam pa zhes bya ba ni sems can gyi khams kyi tshig bla dwags so/__/sems can gyi khams zhes bya ba de bzhin gshegs pa'i snying po'i tshig bla dwags so/__/de bzhin gshegs pa'i snying po zhes bya ba 'di ni chos kyi sku'i tshig bla dwags so/__/zhes sogs dang*/__khyad par gyi lung ni/__he badz+ra las/__'di nyid ye shes chen po ste/__/thams cad lus la rtag tu gnas/__/dngos dang dngos med bdag nyid gtso/__/gnyis dang gnyis su med pa'i tshul/__/brtan dang g.yo bar khyab par gnas/__/zhes sogs dang*/__bla na med pa'i lung rdo rje sems dpa' snying gi me long gi rgyud las/__'jig rten gyi khams kyi sems can thams cad la de bzhin gshegs pa'i snying po til 'bru+u la mar gyis khyab pa bzhin du gnas so/__/zhes dang*/__rang shar las/__yang dag sangs rgyas dgongs pa ni/__/sems can kun gyi rang rgyud la/__/sku dang ye shes tshul du gnas/__/zhes sogs rgya cher 'byung zhing*/__de'i sgrub byed du mgon po byams pas rgyu mtshan gsum bkod de/__rdzogs sangs sku ni 'phro phyir dang*/__/de bzhin nyid dbyer med phyir dang*/__/rigs yod phyir na lus can kun/__/rtag tu sangs rgyas snying po can/__/ces gsungs te/__sems can thams cad la sangs rgyas chos kyi sku 'phro ba ste khyab pa dang*/__sems can dang sangs rgyas kyi de bzhin nyid la rdza bum dang gser bum gyi nam mkha' bzhin khyad par du dbye ba med pa dang*/__sems can gyi rgyud la sangs rgyas sku gsum 'byung rung gi rigs gnyis yod pa'i phyir ro/__/gshegs snying yod pa'i rig pa dpes bstan pa ni/__sor phreng gi mdo las/__'o ma la mar yod pas srub kyi chu la mi srub pa dang*/__gser 'dod pa brag la rko yi shing la mi rko ba bzhin du sems can la sangs rgyas kyi khams yod pas sangs rgyas sgrub pa la don yod kyi khams med na sgrub pa don med du 'gyur ba'i tshul rgyas par gsungs pa'i don bsdus/__'phags pa klus/__khams yod na ni las byas pas/__/sa le sbram dag mthong bar 'gyur/__/khams med na ni las byas kyang*/__/nyon mongs 'ba' zhig skyed par zad/__/ces so/__/'thad pa dpal phreng gi mdo don rgyud blar ldog phyogs kyis bstan pa/__gal te sangs rgyas khams med na/__/sdug la skyo bar mi 'gyur zhing*/__/mya ngan 'das la 'dod pa dang*/__/don gnyer smon pa'ang med par 'gyur/__/ces dang*/__sgrub phyogs kyis bstan pa/__srid dang mya ngan 'das la de'i/__/sdug bde'i skyon yon mthong ba 'di/__/rigs yod las yin gang gi phyir/__/rigs med dag la med phyir ro/__/zhes so/__/gshegs snying ngo bo rgyu rkyen las ma byung bas rgyun dang skad cig gis rtag mi rtag la sogs pa blo'i yul las 'das pas nam yang 'jig pa mi mnga' zhing*/__de'ang rtag pa brtan pa zhi ba 'pho 'gyur med pa'i chos bzhi dang ldan pas 'dus ma byas su gsungs te/__sems kyi rang bzhin nam mkha' yi/__/khams ltar rgyu med rkyen med de/__/tshogs pa med cing skye ba med/__/'jig dang gnas pa'ang yod ma yin/__/ces dang*/__gtan du 'jig pa med pa yi/__/rang bzhin yin phyir 'dus ma byas/__/'jig med nyid ni brtan pa ste/__/brtan sogs rnams kyis de bshad do/__/zhes sogs gsungs so/__/gzhugs tshul ngo bo ma skyes pas stong pa nam mkha' lta bu/__rang bzhin 'gag pa med par 'od gsal ba/__rnam pa zung 'jug rig pa'i gshis lugs su gnas pa ste/__rang shar las/__dbyings de'i ngo bo ni nam mkha' lta bu'o/__/rang bzhin ni rang gis 'od gsal ba'o/__/thugs rje ni rig pa'i snying por gnas te yon tan thams cad kyi 'char gzhir gyur pa'o/__/zhes so/__/de nyid 'khrul grol ltar snang ba ni sems can gyi ngos nas btags pa yin gyi don la 'khrul grol gnyis ka mi dmigs te/__nam mkha' dang nyi ma sprin gyis bsgribs pa dang mi bsgribs zhes pa ni sa steng du 'khod pa'i lus can rnams kyis mthong ba log pa'i dbang du byas kyi de gnyis la bsgribs ma bsgribs med pa bzhin te/__sems kyi rang bzhin 'od gsal gang yin pa/__/de ni nam mkha' bzhin du 'gyur med de/__yang dag min rtog las byung 'dod chags sogs/__/glo bur dri mas de nyon mongs mi 'gyur/__/ces dang*/__gsang snying las/__rnam rtog bdag tu 'dzin pa yis/__/nan gyis mkha' la mdud pa bor/__/bcings med rnam par grol med pa'i/__/ye nas lhun rdzogs sangs rgyas chos/__/zhes so/__/de'i rgyu mtshan nam mkha' ltar yod med yin min rtag chad skye 'gag sogs spros pa'i mtha' thams cad rab tu zhi zhing gnyis su med pa dbu ma'i bdag nyid can te/__myang 'das chen por/__sems can la bzhugs pa'i sangs rgyas kyi rang bzhin ni nam mkha' dang 'dra ste/__nam mkha' ni 'das pa dang ma 'ongs pa dang da lta ba ma yin/__nang dang phyi rol ma yin te gzugs sgra dri ro reg byas ma bsdus pa ltar sangs rgyas kyi rang bzhin kyang de dang 'dra'o/__/zhes dang*/__rdo rje gur las/__nam mkha'i khams ni ji snyed dang*/__'jig rten khams ni stong phrag na/__/bde chen phun tshogs phyag rgya che/__/sangs rgyas nam mkha' 'dra bar bzhugs/__/zhes so/__/snying po'i rang ngo nas 'khor ba'i skyon spang zhing bsal ba dang myang 'das kyi yon tan bzhag cing bsnan du med pa'i rgyu mtshan kyang*/__rgyud blar/__nyes pa glo bur dang ldan phyir/__yon tan rang bzhin nyid ldan phyir/__/ji ltar sngar bzhin phyis de bzhin/__/'gyur ba med pa'i mtshan nyid do/__/zhes dang*/__de dang mngon rgyan gnyis kar/__'di la bsal bya ci yang med/__/bzhag par bya ba cung zad med/__/yang dag nyid la yang dag blta/__/yang dag mthong na rnam par grol/__/ces so/__/des na 'khor 'das gnyis la bzang ngan blang dor du rtog pa med pas nye ring mi mnga' bar nam mkha' ltar khyab pa ste/__rgyud blar/__ji ltar rtog med bdag nyid can/__/nam mkha' kun tu rjes song ltar/__/sems kyi rang bzhin dri med dbyings/__/de bzhin kun tu 'gro ba nyid/__/ces so/__/gnyis pa ni/__lhan skyes kun brtags ma rig gdon chen gyis:__gzung dang 'dzin pa'i bag chags brtas pa las:__snod dang bcud dang 'dzin pa tha dad pa'i:__'gro ba rigs drug rmi lam bzhin du snang :__zhes gsungs te/__snying po rang bzhin gyis 'od gsal ba nam mkha' lta bu de la sgrib byed glo bur gyi sgrib pa sprin ldangs ba ltar byung ste/__de'ang rang bzhin rnam dag dang dus snga phyi med par mnyam du byung ba lhan cig skyes pa'i ma rig pa gser dang g.ya' lta bu dang*/__med bzhin du yod par brtags pa glo bur ba'i 'khrul pa yul yul can snang ba kun tu brtags pa'i ma rig pa ste/__'khrul pa thams cad 'byung ba'i gzhi nyes pa mtha' dag skyed pa'i gdon chen po de gnyis kyi rang ngo ma shes par gzung ba yul dang 'dzin pa sems zhes gnyis su rtog pa'i bag chags rim gyis rgyas shing brtas par gyur pa las/__phyi snod kyi 'jig rten dang nang bcud kyi sems can so sor zhen cing 'dzin pa gnas yul rigs gzugs byed las sna tshogs tha dad pa'i 'gro ba rigs drug po gnyid kyis bslad pa'i rmi lam bzhin don la gcig kyang med rung 'khrul pa'i snang ba sna tshogs su snang ba'o/__/de'i don cung zad bshad na lnga ste/__dang po 'khrul pa'i gzhi ni/__gzhi yod pa las 'khrul pa sbrul yod pas thag khra la sbrul 'dzin gyi shes pa zhugs pa lta bu dang*/__med pa las 'khrul pa rab rib can gyi mig tu nam mkha' la skra shad mthong ba lta bu dang*/__dbyer med las 'khrul pa ga bur gyi ngo bo la nus pa gnyis yod pas tshad nad la sman dang rlung nad la dug tu 'gyur ba lta bu'o/__/gnyis pa 'khrul pa'i rgyu ni/__gsang snying las/__srid rtsa'i nyes dmigs bdag tu rtog las 'phros/__/zhes gsungs pa ltar 'khor ba'i chos thams cad kyi spyi'i rgyu ni bdag tu rtog pa nyid yin la/__bye brag brgyud pa'i rgyu ni chos nyid bde gshegs snying po rang bzhin rnam dag rang ngo ma shes pa'i cha tsam gnas pa bdag nyid gcig pa'i ma rig pa dang*/__mtshungs ldan gyi rgyu chos nyid dang lhan cig skyes pa'i ma rig pa rkyen dang 'phrad na 'khrul pa 'byung rung du gnas pa dang*/__lhan cig byed rgyu sems nyid rang gis rang la yul dang yul can gzung ba kun brtags kyi ma rig pa yid shes rtog bcas dang*/__nyer len gyi rgyu las kyi bag chags bsags pas rang 'bras 'byin nges kyi nus pa yod pa'o/__/de las yid shes la dbye na/__kun gzhi la nga'o snyam du 'dzin cing rnam shes nyon mongs par byed pa'i nyon yid dang*/__tshogs drug gi shes pa skye 'gag gi rgyur byed cing las kyi nus pa kun gzhi la 'jog pa de ma thag yid ces gnyis su yod cing*/__yid de gnyis kyi rten du gyur cing bag chags dang sa bon thams cad 'dzin pa ni 'khrul pa btags pa'i gzhi ste/__gzhung lugs rnams su kun gzhi'i rnam shes zhes bya bar rnam par bzhag go__/gsum pa rkyen ni/__mtho ris ngan 'gro khams gong ma rnams su skye ba'i rkyen bsod nams dang bsod nams ma yin pa dang mi g.yo ba'i las gsum/__las de dag kun nas slong ba po nyon mongs pa dug lnga rnams so/__/rgyu rkyen de dag 'dzom pas 'khor ba'i 'khor lo chen po 'di byung ba ste/__de'ang bde gshegs snying po'i ngo bo stong cha la dri ma nam yang med kyang gsal cha la rang ngo ma rig ste skad cig ma dang po la 'du byed kyi yid g.yos pas gzung 'dzin tha dad du brtag__/de las don mthong ba'i rnam shes/__des blang dor du brtags pas tshor ba/__de las yul la mtshan mar 'dzin pa'i 'du shes/__de'i bag chags brtas pa gzugs bcas phung po lnga grub ste/__dpe phyi'i rten 'brel sa bon las myu gu sogs rgyu dang 'brel pa drug po 'byung ba lnga dus kyi sbyor ba bcas rkyen dang 'brel ba drug gis khor mo yug tu bskyed pa ltar/__nang gi rten 'brel ma rig pa las 'du byed sogs bcu gnyis pos khams gsum du 'khor ba yin no/__/bzhi pa byed pa po ni/__rig gsum las/__rgyun dang bcas pa'i skad cig ma/__/las kyi byed pa por brjod do/__/zhes pa ltar 'khor 'das gnyis ka'i byed pa po ma bcos rgyun gyi skad cig ma yin la/__khyad par 'khor ba'i byed pa po gnyis med la gnyis su 'dzin pa'i 'khrul rtog rgyun gyi skad cig ma ste/__des 'khrul shes lu gu rgyud du sbrel te nus pa je rgyas su song bas mtha' med pa'i 'khor ba 'di grub bo/__/lnga pa 'bras bu ni/__las nyon gyi rgyu 'bras zo chun ltar 'khor ba las/__snang 'gyur thun mong ba'i las kyis snod kyi 'jig rten dang*/__myong 'gyur thun mong ma yin pa'i las kyis bcud kyi sems can du snang zhing rnam par smin pa myong ba ste/__de dag rnams kyi don gsang snying las/__e ma ho bde gshegs snying po las/__/rang gi rnam rtog las kyis sprul/__/gnas dang sdug bsngal la sogs pa/__/bdag dang bdag gir so sor 'dzin/__/ces sogs gsungs pa ltar ro/__/'od gsal rdzogs pa chen po'i dgongs pa ltar na/__ngo bo ka dag gi gzhi bde gshegs snying po las rang bzhin lhun grub kyi gzhi snang shar ba'i skad cig la rang ngo shes te tshogs brgyad kyi nyer len dbyings su dengs pa ni kun tu bzang po gdod ma'i grol gzhir sangs rgyas pa dang*/__gzhi snang de nyid lhan skyes ma rig pas bsgribs nas gzung 'dzin kun tu brtags te lhun grub rin po che'i sbubs las phyir gsal snang ba'i sgo brgyad rmi lam ltar shar nas 'khor bar med bzhin du 'khrul pa la sems can ces btags par gsungs so/__/gsum pa ni/__de lta na'ang ngo bo'i bzhugs tshul las:__rnam par ma g.yos g.yo bar mi 'gyur phyir:__glo bur dri ma sbyang la brtson par bya:__zhes gsungs te/__thog ma med pa nas 'khor 'das gnyis su brtags shing 'khrul pa'i tshul de lta bu yin na'ang*/__sprin gyi 'du 'god kyis nam mkha' la nam yang g.yo ba med pa bzhin du/__thog ma'i ka dag bde gshegs snying po rang gi ngo bo'i bzhugs tshul de las gzhan du 'gyur ba mi srid pas/__sngon chad 'khor 'das gnyis ka'i chos su rnam par ma g.yos shing*/__da rung mu mtha' med pa'i 'khor bar 'khor kyang g.yo bar mi 'gyur ba de'i phyir na/__'khrul pa glo bur gyi dri ma nam dag pa'i tshe rang ngo mngon du byas te 'tshang rgya bar 'gyur ba'i phyir/__de nyid sbyong pa'i thabs la 'bad brtson mi g.yel bar bya'o/__/de ltar yang le lag las/__'khor ba dang ni mya ngan 'das/__/gnyis ka yod pa ma yin te/__/'khor ba yongs su shes pa na/__/mya ngan 'das zhes de la bya/__/zhes dang*/__brtag gnyis las/__sems can rnams ni sangs rgyas nyid/__/'on kyang glo bur dri mas bsgribs/__/de bsal na ni sangs rgyas so/__/zhes so/__/blo bur dri mas snying po'i rang ngo la nam yang ma gos pas sbyangs na 'bral du rung ba ni/__snying po las/__sus kyang ma bcings bcings med do/__/bcing bar bya ba'ang yod ma yin/__ces so/__/sems can spyi btsan du 'khor ba la thog mtha' med par gsungs kyang gang zag sgos btsan du mngon pa'i mdo las/__thog med gyur kyang tha ma dang ldan pa/__/zhes 'byung ba bzhin dri ma lam gyis sbyangs pas myang 'das la reg cing*/__sbyangs zin nas 'brum nad byang ba'i skyes bu ltar 'bras bu rgyu ru mi ldog pas lam la brtson pa ni 'thad pa dang bcas pa'o/__/gnyis pa gang gis rtogs par byed pa'i lam bshad pa la gnyis/__sdom gyis mdor bstan/__de nyid rgyas par bshad pa'o/__/dang po ni/__rtogs byed lam gyi rim pa bsam yas kyang :__rgyud sbyong sa bon gdab dang bskyed bsring pa:__gegs sel dang ni de bzhin bogs 'don te:__rnam pa lnga yis yang dag lam la 'jug:__ces gsungs te/__gzhi 'bras dbyer med pa de nyid rtogs par byed pa'i thabs su mdo sngags lam gyi rim pa bsam pa'i mtha' yas par gsungs kyang*/__gnad kyi snying po gcig tu dril na/__blo rgyud sbyong ba'i tshul zhing tha rgod btul ba lta bu dang*/__smin grol gyi sa bon gdab pa'i tshul 'bru skyon med pa 'debs pa lta bu dang*/__de nyid skyed bsring ba'i tshul chu lud sogs so nam la brtson pa lta bu dang*/__lam gyi gegs sel ba'i thabs sad ser sogs srung ba'i thabs la 'bad pa lta bu dang*/__yon tan gyi bogs 'don pa'i thabs char 'bebs sogs gong 'phel du 'gyur ba'i thabs byed pa lta bu ste rnam pa lnga yis lam legs par sbyangs pas/__'bras bu bcud du smin pa ltar rnam grol gyi 'bras bu mngon du byed par 'gyur bas na yang dag pa'i lam la rab tu 'jug par bya'o/__/gnyis pa la lnga/__rgyud sbyong ba/__sa bon gdab pa/__skyed bsring ba/__gegs sel ba/__bogs 'don pa'i rim pa'o/__/dang po la gnyis/__lam gyi rtsa ba bshes gnyen bsten pa'i tshul/__bsten nas blo rgyud ji ltar sbyong ba'i rim pa'o/__/de'i dang po la'ang bzhi/__bsten bya slob dpon gyi mtshan nyid/__ji ltar bsten pa'i thabs/__sten byed slob ma'i mtshan nyid/__bsten nas gdams pa ston tshul lo/__/dang po ni/__de la dang po blo rgyud sbyang ba'i phyir:__lam gyi rtsa ba rdo rje slob dpon ni:__dam tshig sdom pa'i kun spyaud rnam par dag:__thos pas rab brgyan bsam pas de nyid phyed:__sgom pas nyams rtogs yon tan drod rtags ldan:__thugs rje'i 'jug pas slob ma rjes 'dzin pa'i:__mtshan nyid kun ldan:__ces gsungs te/__gzhi shes nas glo bur dri ma sbyang ba'i phyir du lam gyi rim pa la 'jug pa'i tshul de la'ang dang po nyid du rtog 'khrul gyi blo ngan goms kyi dbang du shor bas las su mi rung ba de nyid dul bar bya ba'i ched du rgyud legs par sbyang dgos pas de'i tshul 'chad par bya'o/__/de'ang byis pa'i skye bo rnams rang gi blo stobs kyis yang dag pa'i lam gyi phyogs tsam du'ang bgrod par mi nus pas spyir sangs rgyas kyi chos thams cad dang khyad par lam la tshul bzhin 'jug cing legs par bgrod par byed pa'i rtsa ba rdo rje slob dpon mtshan nyid dang ldan pa thog ma nyid du legs par brtags nas bsten dgos te/__dper na rgyus med pa'i lam du zhugs pa la rgyus shes kyi lam mkhan dang*/__'jigs sar bgrod pa la stobs ldan gyi skyel ma dang*/__chu'i pha rol du bgrod pa la gru 'dzin pa'i mnyen pa nyid med thabs med pa bzhin no/__/slob dpon gyi mtshan nyid mdo rgyud man ngag rnams nas rgya cher gsungs kyang mdor bsdu na/__yon tan thams cad kyi gzhi rten sdom pa gsum ji ltar blangs pa'i dam tshig dang sdom pa'i kun spyod la nyes ltung gis ma gos pas rgyud rnam par dag cing kha na ma tho ba spangs pa/__mdo sngags kyi rgyud lung man ngag mang du thos pas gang la'ang ma rmongs shing phyogs lhung bral ba'i rnam thar gyis rab tu brgyan pa/__thos don bsam pas gtan la phab pas mtha' drug tshul bzhi'i bye brag phyed pa/__de'i don sgom pas rgyud la sbyar bas nyams dang rtogs pa'i yon tan yar zla ltar rgyas shing sa lam gong du spogs pa'i drod rtags dang ldan pa ste thos bsam sgom gsum gyis rang don mthar phyin pa/__de dag las byung ba'i dri ma med pa'i mkhyen rab kyi rtsal rgyas pas rnyed bkur grags pa la mi ltos par dmigs pa med pa'i thugs rje'i 'jug pas skal ldan gyi slob ma rjes su 'dzin par mdzad pa'i brtse ba can/__de'ang tshig gi gdams pas sgro 'dogs gcod nus pa/__don gyi ngo sprod kyis rtogs pa skyed nus pa/__byin rlabs stobs kyis ma dag pa'i snang ba 'gog nus pa/__nyams kyi gegs sel zhing rtogs pa'i bogs 'byin nus pa ste/__mdor na mkhyen brtse nus pas gzhan don lhun gyis grub pa'i mtshan nyid bzang po kun dang ldan pa'o/__/thog mar dge ba'i bshes gnyen la bsten dgos pa'i lung yang sdong po bkod pa las/__thams cad mkhyen pa ni dge ba'i bshes gnyen gyi gdams ngag la rag las so/__/zhes dang*/__sdud pa las/__sangs rgyas chos rnams dge ba'i bshes la bsten to zhes/__/yon tan kun gyi mchog mnga' rgyal bas de skad gsungs/__/zhes dang*/__yum las/__byang chub sems dpa' mngon par rdzogs par 'tshang rgya bar 'dod pas thog ma nyid du dge ba'i bshes gnyen dag la bsnyen par bya/__bsten par bya/__bsnyen bkur bar bya'o/__/zhes dang*/__ji skad du/__gdos pa 'dzin pa med par ni/__/gru yis pha rol phyin mi 'gyur/__/yon tan thams cad rab rdzogs kyang*/__/bla ma med na srid mthar min/__/ces sogs lung dang rig pa dang dpe mtha' yas pa gsungs so/__/gnyis pa ni/__mnyes pa gsum gyis bsten:__mi mnyes bya ba skad cig tsam yang spang :__dgongs spyod tshul bzhin bslab la mkhas pa yis:__ci gsung bka' bzhin bsgrub pa'i yal gam blang :__zhes gsungs te/__mtshan nyid dang de ldan gyi slob dpon rnyed nas ji ltar bsten pa'i tshul yang*/__mdo sde rgyan las/__rnyed pa bkur sti dag dang rim gro dag__/sgrub pa'i sgo nas bla ma bsten par bya/__/zhes pa ltar rab gdams ngag gi don nyams su len cing bka' bzhin byed pa sgrub pa'i zhabs tog__/'bring lus ngag yid gsum gyis sri zhu rim gro ji ltar lcogs pa/__tha ma zang zing rnyed pa rang la bdog rgu thams cad 'bul zhing bkur sti bya ba ste mnyes pa rnam pa gsum gyi sgo nas/__dgos 'byung gi nor bu/__'chi gsos kyi sman pa/__khong pa'i don snying du 'du shes nas mos pa dang gus pa tshad bzung thang lhod med par bsten/__sgo gsum bya ba kha na ma tho ba'am legs su re ba'i tshod 'dzin sogs thugs la mi mnyes par 'gyur ba'i bya ba skad cig ma tsam yang mi bya bar spang*/__zab mo'i chos dang skyes bu dam pa'i dgongs spyod kyi gting dpog par dka' bas blo sgrin cing thugs zin pas gsang ba gsum gyi rnam par thar pa tshul bzhin du bslab pa la mkhas par bya ba'i sgo nas/__ci mdzad legs par mthong zhing ci gsung tshad mar 'dzin te bka' bzhin rjes su sgrub pa'i yal gam mam dam bca' brtan po rkyen gyis mi 'phrog pa yang dang yang du blangs te lag len du khel bar bya'o/__/de ltar yang 'dus pa las/__rigs kyi bu/__slob dpon ni de bzhin gshegs pa rnams dang byang chub sems dpa' rnams kyis byang chub kyi sems rdo rje bzhin du blta bar bya'o/__/zhes dang*/__rang shar las/__de ltar gsang sngags slob dpon la/__/rang lus dang ni rin chen rdzas/__/shin tu dkon pa dag gis bsten/__/ces dang*/__mdo las/__dge ba'i banyes gshen mgu bar byas na sangs rgyas thams cad kyi byang chub thob bo/__/zhes so/__/ji skad bshad pa'i mtshan nyid kun ldan gyi slob dpon dus kyi dbang gis rnyed par dka' zhing*/__rnyed kyang rang snang ma dag pa'i sems can gyis gzhan dag skyon can du mthong bas yon tan shas che bstan par bya dgos te/__don dam bsnyen pa las/__rtsod dus dbang gis bla ma skyon dang yon tan 'dres/__/rnam pa kun tu sdig pa med pa yod ma yin/__/gang zhig yon tan lhag pa yang ni legs dpyad nas/__/bu rnams kyis ni de la bsten par 'gyur ba'o/__/zhes 'byung ba bzhin no/__/gsum pa ni/__des kyang dad dang nges 'byung snying rje dang :__dbang rnon blo che brtul zhugs ldan pa yi:__slob ma'i:__zhes gsungs te/__mtshan ldan gyi slob dpon des kyang slob ma ji lta bu la gdams pa ston ce na/__dad brtson brtul zhugs ldan pa snod/__/ces dang*/__gsang snying las/__snod ldan ngang tshul bzang la bstan/__/lus dang longs spyod gtong la sbyin/__/ces 'byung ba ltar/__chos dkar thams cad kyi rtsa ba dwang ba dang 'dod pa dang yid ches pa'i dad pa dang*/__'khor ba la me 'obs sam btson ra ltar shes nas srid pa las nges par 'byung ba'i blo dang*/__sems can pha mar shes pas gzhan don spro ba'i snying rje dang*/__sngon sbyangs kyis rigs sad pas thos pa tsam gyis don phyin ci ma logs par rtogs pa'i dbang po rnon por gyur pa dang*/__rgya che ba theg pa chen po dang zab mo gsang sngags kyi lta spyod la the tshom med par yid la shong ba'i blo che ba dang*/__gang la'ang mi bsnyengs shing zhum pa med par 'jug nus pa'i brtul zhugs dang ldan pa ste drug po de la yon tan gyi mtshan nyid thams cad 'dus pas/__mtshan nyid de ldan gyi slob ma rjes su bzung bar bya'o/__/bzhi pa ni/__rgyud dang sbyar la gdams par bstan:__snod dang mi 'tshams gdams pa sbyin mi bya:__zhes gsungs te/__de ltar bla slob kyi rten 'brel legs par 'grigs pa na/__bla mas slob ma'i rgyud zhib mor brtags te blo tshod dang sbyar la theg pa che chung gi gdams pa bstan dgos kyi so so'i blo dang mi 'tshams pa blo dman la zab cing rgya che ba dang blo chen la theg dman gyi gdams pa sbyin pa sogs mi bya ste/__de ltar byas na chos bstan pa'i yul la mi phan cing ston pa po nyid nyes pa dang bcas par 'gyur ba ste/__blo dman zab rgyas kyis dngas skrag skye bas lam las phyir ldog par 'gyur ba dang*/__blo chen lta spyod kyis ma tshims par lam stegs spong ba'i skyon bskyed par byed do/__/de ltar yang rgyud rdor phreng las/__/ji ltar seng ge'i 'o ma ni/__/sa yi snod du bzhag mi bya/__/de bzhin rnal 'byor chen po'i rgyud/__/snod min dag la sbyin mi bya/__/'di dang pha rol tu ni phung*/__/snod min man ngag rab bshad na/__/slob dpon dngos grub nyams par 'gyur/__/ces dang*/__spyod 'jug las/__rgya chen chos kyi snod gyur pa/__/dman pa'i chos la sbyar mi bya/__/zhes so/__/snod dang ji ltar sbyar ba'i tshul yang*/__/dman la chags bral spyod pa ste/__/rgya che ba la pha rol phyin/__/zab la sngags kyi theg pa'o/__/zhes dang*/__gur las/__dman pa rnams la bya ba'i rgyud/__/bya min rnal 'byor de ltag la/__/sems can mchog la rnal 'byor rgyud/__/rnal 'byor bla med de ltag la'o/__/zhes pa ltar ro/__/gnyis pa blo sbyong ba'i tshul la gnyis/__sngon 'gro dang*/__dngos gzhi'o/__/dang po la gnyis/__thun gyi sngon 'gro dang*/__khrid kyi sngon 'gro'o/__/de'i dang po la'ang gnyis/__ring ba dang*/__nye'i sngon 'gro'o/__/dang po ni/__blo rigs mthun par rim gyis dkri tshul ni:__dang po 'du 'dzi'i gnas las thag bsrings te:__dben par song la 'jig rten bya ba btang :__zhes gsungs te/__blo'i rigs sam rgyud tshod dang mthun par gdams ngag ston pa'i tshul de'ang gtso bor rim gyis dkri ba'i tshul shes na cig car dkri tshul zhar las shes par 'gyur ba dang*/__spyi lam rim par ma 'dzegs par thod rgal gyis gong mar 'phar bar mi nus pa dang*/__lam gyi yon tan 'og ma ma skyes par gong ma thob par mi nus pa'i phyir rim bgrod kyi tshul gal che ste/__mdo myang 'das las/__ji ltar skas kyi rim pa bzhin/__/nga yi bstan pa zab mo yang*/__/rim gyis bslab cing nan tan bya/__/thod rgal ma yin mthar chags so/__/ji ltar byis pa chung ngu dag__/rim gyis lus shed rdzogs pa ltar/__/chos 'di yang ni de dang 'dra/__/dang por 'jug pa'i rim pa nas/__/yongs su rdzogs pa'i bar du'o/__/zhes so/__/de nas lam rim gyis dkri ba'i tshul ni/__lam la 'jug par 'dod pa'i gang zag des dang po nyid du 'jig rten gyi lus sems rnam par g.yeng ba'i 'du 'dzi'i gnas las ring du byol nas thag bsrings te/__rgyal bas bsngags pa'i bas mtha'i dben gnas dam par song la der yang 'phral mkho'i yo byad ma thogs tsam gyis chog shes par byas te/__lus kyi mi dge ba dang lung ma bstan gyi bya ba/__ngag don med long gtam/__yid nyon mongs 'khrul rtog gi rjes su 'breng ba sogs 'jig rten pa dang mthun pa'i bya ba mtha' dag btang nas dam pa'i chos sgrub pa la rtse gcig tu gzhol bar bya'o/__/de'ang 'du 'dzis rnam par g.yeng ba la sgo gsum ma bsdams shing bdud ris kyi bar du gcod pa dang bsam gtan dang shes rab mi skye ba sogs nyes pa nyi shu yod pa lhag pa'i bsam pa skul ba'i mdo las gsungs shing*/__sangs rgyas rnams la mchod pa'i bye brag du mas bskal par mchod pa bas nges 'byung gi sems kyis dben par gom bdun bor ba'i bsod nams che ba ting 'dzin rgyal po sogs las gsungs pa dang*/__gong gi 'du 'dzi'i nyes pa las ldog pa'i yon tan rnams thob par 'gyur ba dang*/__khyad par sems la brtan pa ma thob pa'i gang zag las dang po pas dben pa bsten pa kho na gal che ste/__dkon mchog gi za ma tog las/__las dang po pas sems nye bar zhi ba dang rab tu dul bar bya ba'i phyir dben par gnas par bya'o/__/zhes so/__/gnyis pa ni/__bde ba'i stan 'dug lus bsrang rlung ro bsal:__dkon mchog gsol gdab bla mar mos gus bskyed:__dran pa mngon du bzhag la 'di ltar bsam:__zhes gsungs te/__dben gnas brag phug gam bsam gtan gyi khang par bde ba'i stan 'jam zhing snyoms pa la 'dug pas yun ring sdod tshugs/__lus gnad drang por bsrang bas rtsa rlung rang mal du gnas te 'khrul rtog nyung*/__rlung ro lan gsum bsal bas rtsa nang nyon mongs kyi snyigs ma dag__/dkon mchog gsum la dam pa'i chos mthar phyin pa'i gsol ba btab pas bar chad mi 'byung*/__bla ma la sangs rgyas su mthong ba'i mos gus bskyed pas sgo gsum la byin rlabs 'jug__/rkyen gyis mi 'phrog pa'i dran pa rang mal mngon du bzhag pas sgom don gsal thebs par 'gyur bas na/__ji skad bshad pa rnams tshul bzhin byas la blo sbyong ba'i tshul 'di ltar bsam par bya'o/__/gnyis pa khrid kyi sngon 'gro la gsum/__skyes bu chung ngu dang thun mong ba/__'bring po dang thun mong ba/__chen po dang thun mong ba'i lam rim mo/__/dang po la gsum/__dal 'byor rnyed dka'/__'chi ba mi rtag__/las rgyu 'bras bsam pa'o/__/dang po ni/__dal 'byor phun sum tshogs pas brgyan pa'i rten:__shin tu rnyed dka' u dum+Wa ra 'dra:__snying po len pa'i thabs la rab mkhas na:__rnyed pa don chen yid bzhin nor las lhag:__de phyir dus dang gnas skabs thams cad du:__dge ba'i bshes dang dge ba'i grogs po bsten:__tshe 'di blos btang phyi ma'i don gyi phyir:__myur du snying po len la ma 'bad na:__zhes gsungs te/__'di la bzhi/__rten gyi ngo bo/__de rnyed par dka' ba'i rgyu mtshan/__rnyed pa don che ba'i tshul/__de las snying po len dgos par gdams pa'o/__/dang po ni/__mi khom pa brgyad las log pa'i dal ba ni rten gyi ngo bo yin la/__rang 'byor gzugs rgyan legs pa lta bu lnga dang gzhan 'byor snang ba'i bye brag gis gsal ba lta bu lnga ni de'i khyad par gyi chos te phun sum tshogs pa de lta bus brgyan pa'i mi lus rin po che 'di ni byang chub sgrub pa la med du mi rung ba'i rten yin no/__/de la mi khom pa brgyad ni/__ji skad du/__dmyal ba yi dwags dud 'gro dang*/__/kla klo tshe ring lha dang ni/__/log lta sangs rgyas kyis stong pa/__/lkugs pa 'di dag mi khom brgyad/__/ces dang*/__rang 'byor lnga ni/__mi nyid dbus skyes dbang po tshang*/__/las mtha' ma log gnas la dad/__/ces dang*/__gzhan 'byor lnga ni/__sangs rgyas byon dang des chos gsungs/__/bstan pa gnas dang de rjes zhugs/__/gzhan phyir snying ni brtse ba'o/__/zhes 'byung ba ltar ro/__/gnyis pa la rgyu'i sgo nas rnyed par dka' ba ni/__tshul khrims la sogs dge ba'i las rgya chen po bsags shing smon lam gyis mtshams sbyar na dal 'byor thob par 'gyur na'ang*/__zhi ba lhas/__bdag gi spyod pa 'di 'dras ni/__/mi yi lus kyang 'thob mi 'gyur/__/mi lus thob par ma gyur na/__/sdig pa 'ba' zhig dge ba med/__/ces gsungs pa bzhin du bsod nams gsog pa dkon pa dang*/__dpe'i sgo nas kyang rnyed par dka' ste/__dal 'byor gyi rten ni u dum+Wara'i me tog dang 'dra ste/__de ni sangs rgyas 'jig rten du byon pa brgya lam na'ang dkon pa dang mtshungs par grags shing*/__gzhan yang*/__rgya mtsho cher g.yeng gnya' shing gi__/bu gar rus sbal mgrin chud ltar/__/mi nyid shin tu rnyed dkar gsungs/__/zhes pa ltar ro/__/grangs la bsam yang rnyed par dka' ste/__dmyal ba ni sa chen po'i rdul/__yi dwags ni kha ba bu yug__/dud 'gro chang gi sbang ma/__lha mi gnyis sen mo'i steng gi rdul chags pa tsam las med par mdo las gsungs pa'i phyir ro/__/gsum pa ni/__mi yi gru+u la brten nas ni/__sdug bsngal chu bo che las sgrol/__/gru 'di phyi nas rnyed dka' bas/__/rmongs pa dus su gnyid ma log__/ces pa ltar mi lus gyi gru la brten nas 'khor ba sdug bsngal gyi rgya mtsho las brgal te snying po gtan 'dun gyi nor bu len pa'i thabs la rab tu mkhas shing sgrin par gyur na/__rnyed dka' rnyed pa de nyid shin tu don che ba dbul pos yid bzhin nor bu rnyed pa las kyang lhag ste/__tsan+d+ra go mIs/__gang zhig thob nas skye ba'i rgya mtsho mthar 'byin cing*/__byang chub mchog gi sa bon dge ba'ang 'debs byed la/__/yid bzhin nor bu bas kyang yon tan ches lhag pa'i/__/mi nyid thob nas su zhig 'bras bu med par byed/__/ces so/___/bzhi pa ni/__rnyed dka' zhing rnyed na don che ba nyid rnyed par gyur pa de'i phyir/__dus kyi rgyun dang gnas skabs kyi bye brag thams cad du/__dal 'byor las snying po len pa'i thabs yang dag pa'i lam ston pa po dge ba'i bshes gnyen dang dge ba'i lta spyod can gyi grogs po bsten dgos te/__bshes spring las/__dge ba'i bshes gnyen bsten pa tshangs par spyod/__/yongs su rdzogs pa thub pas gsungs de'i phyir/__/dge ba'i bshes gnyen bsten bgyi bshes gnyen la/__/bsten nas rab tu mang po zhi ba thob/__/ces so/__/de las log pa rang blo mi dge ba'i lam du 'khrid de dal 'byor chud zos su gtong bar byed po'i sdig to'i bshes gnyen dang sdig pa'i grogs po spang dgos te/__dran nyer las/__'dod chags dang zhe sdang dang gti mug thams cad kyi rgyur gyur pa ni sdig pa'i grogs po ste dug gi sdong po lta bu'o/__/zhes dang*/__dkon brtsegs las/__sdig pa'i grogs po gang zhe na/__dge ba 'grib cing mi dge ba la sbyor ba gang yin pa ste/__de bsnyen par mi bya/__bsten par mi bya/__mthong bar mi bya'o/__/zhes so/__/der ma zad tshe 'dir ltos kyi snang ba thams cad gnyid thun gcig gi rmi lam bzang ngan ltar yun thung la snying po med pas blos ling gis btang nas tshe phyi ma phan chad kyi don gtan gyi 'dun ma 'grub pa'i phyir/__da lta myur ba nyid du dal 'byor snying po len pa'i thabs la ma 'bad na tshe la nges pa med de/__ji skad du/__sang dang 'jig rten phyi ma gnyis/__/sngon la gang 'ong gtol med pas/__/sang gi tshis la mi 'bad par/__/phyi ma'i don du 'bad par rigs/__/zhes so/__/gnyis pa ni/__'dus byas mi rtag nyi zla'i 'char nub 'dra:__nam 'chi cha med bar snang glog dang mtshungs:__shi tshe chos min cis kyang mi phan pas:__dam pa'i lha chos tshul bzhin spyod par bya:__zhes gsungs te/__spyir snod bcud du snang ba 'di dag thams cad rgyu rkyen rten 'brel tshogs te 'dus shing byas pa'i chos yin pa'i phyir gcig kyang mi rtag ste/__mdo las/__dge slong dag 'dus byas thams cad ni mi rtag pa'o/__/zhes gsungs/__ji ltar mi rtag na tshoms las/__bsags pa kun gyi mtha' mdzad cing*/__/bslangs pa'i tha ma 'gyel bar 'gyur/__/'phrad ba'i mtha' ni 'bral ba ste/__/gson pa'i mtha' ma 'chi bar 'gyur/__/ces pa ltar mi rtag pa'i mtha' bzhi las ma 'das pas rag pa snod bcud chags 'jig lo zla dus bzhi'i 'gyur ba dang phra ba skad cig re re bzhin rnyings shing 'pho ba nyi ma dang zla ba'i 'char nub skad cig yud yud 'gro ba dang 'dra la/__bye brag mi tshe la nges pa med pas nam 'chi cha med cing 'chi rkyen mang bas myur du 'chi nges pa bar snang gi glog shar ba'i mod nas yal ba dang mtshungs te/__'dul ba lung las/__ri gzar chu bo rgya mtshor 'jug pa dang*/__/nyi ma zla ba nub rir phyogs pa dang*/__/nyin mtshan thang cig yud tsam shugs kyis 'gro/__/skyes bu'i tshe 'gro 'di dag mtshungs par ldan/__ces so/__/shi ba'i tshe dam pa'i chos ma yin pa blo stobs gnyen 'khor longs spyod cis kyang mi phan pas/__'jig rten dang ltar snang gi chos mchil ma'i thal ba ltar ring du bor nas dam pa'i lha chos rnam par dag pa rgyal ba sras dang bcas pas ji ltar gdams pa'i tshul bzhin du spyad par bya'o/__/gsum pa ni/__lha chos sgrub pa'i rtsa ba las 'bras te:__sdig pa mi dges ngan song gsum du 'gro:__dge ba byas pas mtho ris thar pa thob:__de bas sdig pa bshags shing snying nas bsdam:__dge ba'i rtsa ba 'bad pas dang du blang :__phyag dang bskor bas lus kyi sdig pa 'dag:__bzlas brjod bka' bklag ngag gi sgrib pa 'byang :__dkon mchog gsol gdab yid kyi nyes pa zhi:__rtag tu dran shes bag yod tshul bzhin bslab:__ces gsungs te/__thar pa dam pa'i lha chos sgrub pa'i gzhi'am rtsa bar gyur pa ni/__sems pa yid dang byas pa lus ngag gi las kyi 'bras bu rnam par smin pa bcas sangs rgyas kyis bstan pa la yid ches pas dge sdig gi blang dor tshul bzhin du bya ba ste/__de'ang rin chen phreng ba las/__'dod chags zhe sdang gti mug dang*/__/des bskyed las ni mi dge ba/__/mi dge las ni sdug bsngal dang*/__/de bzhin ngan 'gro thams cad do/__/ma chags mi sdang gti mug med/__/des bskyed las ni dge ba ste/__/dge las bde 'gro thams cad dang*/__/skye ba kun tu bde ba dang*/__/ces 'byung ba ltar nyon mongs pas kun nas bslangs pa'i sgo gsum gyi las sdig pa mi dge ba bcu cha dang bcas pa chen pos dmyal ba/__'bring gis yi dwags/__chung ngus byol song ste ngan song gsum du 'gro zhing sdug bsngal drag pos mnar bar byed la/__bsod nams cha mthun gyi las dge ba bcu'i 'khor dang bcas pas mtho ris su skyes nas bde 'bras myong zhing*/__/nges 'byung dang byang sems kyis zin pa'i thar pa cha mthun gyi las dge ba byas pas thar pa rnam gsum gang rung thob par 'gyur ba yin no/__/de'ang ting 'dzin rgyal po las/__las bsags pa ni nam yang med mi 'gyur/__/'khor ba na ni dkar nag 'bras bu smin ces gsungs pa ltar las kyi rnam smin nam yang mi bslu zhing dge sdig gi 'bras bu mi 'chol bar byed pa po rang rang la smin pa dang*/__las rnams 'phel ba 'gyur dang bcas pas rgyu chung yang 'bras bu che ba de bas na/__'phen rdzogs dang byas bsags la bzhir phyes pa'i sngar byas kyi sdig pa cha dang bcas pa yul mchog la bshags shing phyin chad mi bya bar snying thag pa nas dam bcas pas bsdam/__dge ba'i rtsa ba cha bcas phra mo nas kyang khyad du mi gsod par 'bad pa chen pos dang du blang bar bya dgos la/__de'ang zag bcas thun mong gi dge ba dkon mchog gi rten la phyag dang bskor ba byas pas lus kyi mi dge ba gsum gtso bor gyur pa'i sdig pa 'dag__/sngags dang snying po bzlas brjod dang rgyal ba'i bka' mdo rgyud zab mo bklags pas ngag gi mi dge ba bzhi gtso bor gyur pa'i sgrib pa byang*/__dwang ba dang 'dod pa dang yid ches pa'i dad pas kun nas bslangs te dkon mchog gsum dang rtsa ba gsum la gsol ba gdab pas mtshon rnam rtog dge ba'i las lam du bsgyur bas yid kyi mi dge ba gsum gtso bor gyur pa'i nyes pa rnam zhi bar 'gyur/__dge sdig gnyis ka'ang rang gi sems kho nar rag las pa ste/__dkon mchog sprin las/__dge ba'am 'on te mi dge ba'i/__/las kun sems kyis bsags pa yin/__ces gsungs pas dus rtag tu sems bsrung ba la 'bad par bya ste/__de'i tshul yang zhi ba lhas/__sems srung 'dod pa rnams la ni/__/dran pa dang ni shes bzhin dang*/__/thams cad 'bad pas srungs shig ces/__/bdag ni de ltar thal mo sbyor/__/ces gsungs pa ltar/__dus rtag par srung sems mi brjed pa'i dran pa dang*/__rang rgyud la nyes pa byung ma byung rtogs pa'i shes bzhin dang*/__bya ba gang yin gyi 'jug ldog gi gnas la gzob pa'i bag yod pa rnams la tshul bzhin du bslab po/__gnyis pa skyes bu 'bring dang thun mong ba'i lam rim la gnyis/__blo sbyong ba'i tshul/__'byongs pa'i tshad do/__/dang po ni/__khyad par thar pa'i go 'phang bsgrub pa la:__'khor ba thams cad me 'obs spu gri'i tshal:__ral gri'i nags ltar shes shing dran pa yis:__sdug bsngal gsum las myur du thar 'dod blo:__shugs drag bcos ma min pa yang yang bskyed:__ces gsungs te/__skyes bu chung ngu dang thun mong ba'i 'du shes de dag yang dag pa'i lta ba yin mod kyi/__de las khyad par du gyur pa thar pa zhi ba bla na med pa'i go 'phang bsgrub pa la/__'khor ba thams cad las nges par 'byung ba'i bsam pa nyid gal che ba ste/__de la 'khor ba'i mtshan nyid ni/__lung rnam 'byed las/__mi gtsang ba la dri zhim med/__/de bzhin 'gro drug bde ba med/__/'bar ba'i 'obs na bsil ba med/__/sr-id pa dag na'ang dga' ba med/__ces pa ltar srid pa'i gnas ris mtho dman gang du skyes kyang me mdag gi 'obs la sha rjen du gnas pa dang*/__spu gri rnon po'i tshal la rkang rjen du rgyu ba dang*/__ral gri'i nags la gcer bur 'dzegs pa ltar sdug bsngal kho na'i rang bzhin can yin la/__'khor ba'i rang bzhin ni/__mdo las/__sred srid ma rig dbang gis skye bo rnams/__/mi dang lha dang ngan song rnam gsum po/__/'gro ba lnga po dag tu mi mkhas 'khor/__/dper na rdza mkhan 'khor lo 'khor ba bzhin/__zhes pa ltar thog ma dang tha ma med par 'khor bas de'i tshul dang por shes par bya zhing*/__de nas rgyun du mi 'arjed pa'i dran pa yis bskul lo/__/de la 'khor ba'i sdug bsngal mdor bsdu na gsum ste/__sdug bsngal gyi sdug bsngal ni/__spyir nye bar len pa'i phung po lnga blang ba tsam nas sdug bsngal bden par grub pa'i steng du sdug bsngal chen po mngon par mdze thog tu phol mig byung ba lta bu ste/__mtshan gzhi'i gtso bo dmyal ba tsha grang*/__yi dwags bkres skom/__dud 'gro glen lkugs rnams yin la/__mi la sdug bsngal brgyad/__lha dang lha min la'ang 'dod pas mi ngoms pa dang 'thab rtsod sogs kyang der gtogs pa'o/__/'gyur ba'i sdug bsngal ni/__'khor ba'i bde 'byor thams cad mi rtag g.yo ba'i chos nyid yin pas bde bar sdod 'phro la nad dam dgras glo bur du bcom pa lta bu ste/__lha mi rnams ltar snang bde bar gnas kyang yun ring mi brtan par 'gyur nas 'gro ba'o/__/khyab pa 'du byed kyi sdug bsngal ni/__phung lngas bsdus pa'i 'khor ba'i chos thams cad skad cig gis skye 'gag byed pa so skyes mi rtogs kyang 'phags pa rnams kyi gzigs ngor rtag tu g.yo ba'i 'du byed can yin pas sdug bsngal ba ste/__mdzod Ti ka las/__lag mthil spu nyag gcig 'dug pa/__/de ni mig tu song ba na/__/mi bde ba dang sdug bsngal skyed/__/byis pa lag mthil 'dra ba yis/__/'du byed sdug bsngal spu mi rtogs/__/'phags pa mig dang 'dra ba yis/__/'du byed la ni sdug bsngal gzigs/__/zhes so/__/des na da lta nad dang dgra sogs sdug bsngal ltar snang ba yud tsam re'ang lus sems kyis mi bzod na/__'khor ba'i gnas su thog mtha' med par sdug bsngal tshab po che de gsum dang rtag tu 'grogs pa la bzod pa'i blags ga la yod pas rgyu mtshan zhib mor bsams la/__de dag las myur du thar bar 'dod pa'i blo shugs drag po 'phral rkyen gyis bskul ba'i bcos ma ma yin par snying khong rus pa'i gting nas yang dang yang du bskyed par bya ste/__spyod 'jug las/__sems can phan par mdzad pa yi/__/sangs rgyas grangs med 'das gyur kyang*/__/bdag ni rang gi nyes pa des/__/gso ba'i spyod yul ma gyur to/__/da dung de bzhin bdag byed na/__/yang dang yang du de bzhin te/__zhes dang*/__'dul ba lung las/__ngas ni khyed la thar pa'i thabs bstan gyi/__/thar pa rang la rag las brtson par gyis/__/zhes pa'i tshul bsam mo/__/gnyis pa ni/__nam zhig srid pa'i 'byor pa mtha' dag kun:__mi rtag mi brtan bslu bar rtogs pa yis:__tshangs dang brgya byin dpal la'ang chags pa'i blo:__skad cig tsam yang skye ba'i skabs med 'gyur:__zhes gsungs te/__de ltar 'khor ba sdug bsngal gyi mtshan nyid gtan la phebs nas skyo shas dang nges 'byung drag po bskyed pas nam zhig srid pa'i rtse mo man chad kyi dpal dang 'byor pa legs legs ltar snang ba mtha' dag pa 'di kun 'dus byas yin pas mi rtag pa sgyu ma lta bu/__g.yo ba'i chos yin pas mi brtan pa ston ka'i sprin lta bu/__snying po med pas slu bar byed pa chu bur rtogs par 'gyur la/__rtogs ris de yis 'khor ba'i gnas su che bar grags pa chags bral gyi bde ba can tshangs pa dang*/__lha rnams kyi dbang por gyur pa brgya byin/__mi dbang 'khor los sgyur rgyal lta bu'i dpal 'byor la'ang chags shing zhen pa'i blo skad cig tsam yang skye ba'i go skabs med par 'gyur te/__rgyal tshab byams pas/__lha la 'chi 'pho mi la yongs 'tshol sdug bsngal zhes ni rtogs pa'i phyir/__/shes rab ldan pa lha mi'i dbang phyug mchog la'ang mngon par 'dod med de/__/shes rab dag dang de bzhin gshegs pa'i gsung rab dad pa'i rjes 'brangs la/__/'di ni sdug bsngal 'di rgyu 'di 'gog pa zhes shes pas mthong phyir ro/__/zhes so/__/gsum pa skyes bu chen po dang thun mong ba'i lam rim bstan pa la gnyis/__lam gyi 'jug sgo skyabs su 'gro ba/__dngos gzhi'i sems bskyed pa'o/__/dang po ni/__de nas dkon mchog rtsa gsum chos srung tshogs:__bslu med gtan gyi skyabs su nges mthong nas:__rang gzhan 'khor ba'i 'jigs las bsgral ba'i phyir:__byang chub bar du gus pas skyabs su bzung :__zhes gsungs te/__lam rim de rnams kyis dal 'byor chud zos su mi btang bar myur ba nyid du khams gsum las thar bar 'dod pa'i nges 'byung gi blo skyes pa de nas/__rang stobs kho nas ni 'khor ba'i 'jigs pa lta ci smos tshe 'di'i 'jigs skrag tsam las kyang brgal mi nus pa tshad mas grub pas/__de las skyob nus pa'i skyabs gnas la skyabs su 'gro dgos pa'i phyir/__yul sangs rgyas chos dang dge 'dun te dkon mchog gsum/__bla ma yi dam mkha' 'gro ste rtsa ba gsum chos srung ye shes pa'i 'khor tshogs dang bcas pa rnams/__rang nyid nyes pa'i skyon thams cad spangs pas srid pa'i 'ching ba las grol zhing tshad med pa'i yon tan dang ldan pas gzhan skyob par nus pa'i phyir nam yang bslu ba med par gtan gyi skyabs su gyur pa rgyu mtshan shes pa'i nges pas mthong nas/__bsam pa rang nyid dang gzhan dag mkha' khyab kyi pha ma sems can thams cad 'khor ba'i 'jigs pa chen po las myur ba nyid du brgal zhing bsgral ba'i phyir/__dus 'di nas bzung ste byang chub chen po ma thob kyi bar du/__tshul lus gus pa/__ngag gdung ba/__yid dad mos rtse gcig pas skyabs su 'gro bar bya'o/__/'di'i don cung zad bshad na bdun/__dang po skyabs su 'gro dgos pa'i rgyu mtshan ni/__jo bo rjes/__sdom pa kun la yod mod kyang*/__/skyabs su ma song ba la med/__ces gsungs pa ltar sangs rgyas pa'i sdom pa thams cad kyi gzhi rten med du mi rung ba dang*/__nang pa dang phyi pa'i khyad par skyabs 'gro yod med las 'byed pa dang*/__'di dag gi skyabs la ma brten par 'khor ba las thar pa'i thabs med pa'o/__/gnyis pa skyabs yul la rgyu 'bras gnyis las/__rgyu'i yul ni gzhan rgyud kyis bsdus pa'i dkon mchog rtsa gsum ste mchog gsum la theg pa che chung gi ngos 'dzin mi 'dra ba las/__theg chen bla na med pa'i lugs 'dir/__sangs rgyas dag pa gnyis ldan sku bzhi ye shes lnga'i bdag nyid don gnyis phun sum tshogs pa/__chos brjod bya 'gog lam gyis bsdus pa'i zag med rnam byang gi bden pa dang rjod byed gsung rab ming tshig yi ger snang ba lung rtogs gnyis/__dge 'dun dngos rgyal sras 'phags pa'i sar bzhugs rig grol gyi yon tan dang ldan pa/__rjes mthun tshogs sbyor dang nyan rang 'phags pa rnams so/__/sngags la de steng khyad par gyi dkon mchog byin rlabs zhu ba'i yul bla ma/__dngos grub yul yi dam/__phrin las sgrub pa'i grogs mkha' 'gro chos skyong ste/__bla ma dkon mchog kun 'dus/__yi dam sangs rgyas/__mkha' 'gro chos skyong dge 'dun yin kyang rtsal du bton nas skyabs yul du bzung ba'o/__/'bras bu'i yul rang sems stong gsal zung 'jug ngo bo rang bzhin thugs rje'i bdag nyid du bzhugs pa nyid dkon mchog gsum gyi rang bzhin te/__de'ang 'bras bu 'grub pa'i ched du skyabs gnas su khas blangs nas skyabs su 'gro ba ni rgyu'i skyabs 'gro dang*/__sems nyid sangs rgyas mngon du 'gyur ba'i phyir rgyu la 'jug pa'am gtso bor rang la lhun grub tu yod pas gzhan du mi btsal bar ngang la 'jog pa ni 'bras bu'i skyabs 'gro ste/__ye shes grub pa las/__dkon mchog gsum gyi mnga' bdag la/__/gzhan du phun tshogs bde 'dod nas/__/gang phyir rgyu la smon pa dang*/__/'od gsal ba yi sems nyid ni/__/dkyil 'khor gsum gyi bdag nyid du/__/rtogs nas rtse gcig mnyam 'jog pa/__/'bras bu'i mchog tu yang dag bshad/__/ces so/__/gsum pa skyabs su 'gro ba'i tshul ni/__dmigs pa sgom khrid so sor 'byung ba ltar la bsam pa dang dus dang byed tshul gzhung gis dngos su bstan pa bzhin no/__/bzhi pa ji ltar skyob pa'i tshul ni/__sangs rgyas la mthar thug gi skyabs dang ston pa/__des bstan pa'i don nyams su blangs pas 'jigs pa las thar pa'i phyir chos la lam/__dge 'dun la lam sna 'dren pa'i zla grogs zhu zhing de bzhin du skyob pa yin la/__gsang sngags kyi bla ma ni mchog gsum gyi phrin las de gcig pus mdzad pas de thams cad kun 'dus yin te/__sdom 'byung las/__bla ma sangs rgyas bla ma chos/__/de bzhin bla ma dge 'dun te/__/bla ma dpal ldan rdo rje sems/__/zhes so/__/lnga pa skyabs su song ba'i tshad ni/__dkon mchog gsum gyi yon tan shes pa/__rang gzhan gyi skyabs dang dkon mchog nang phan tshun gyi khyad par shes pa/__shes nas skyabs su 'gro bar dam bcas pa/__/de las srog gi phyir yang skyabs gzhan mi tshol ba ste khyad par bzhi dang ldan pa'o/__/drug pa bslab bya ni/__dgag sgrub kyi phyogs drug cha mthun dang bcas pa'o/__/bdun pa phan yon ni/__mdo rgyal mtshan dam pa las/__'tshe ba dag ni thams cad dang*/__/'jigs dang theg pa dman dag las/__/skyob phyir skyabs kyi dam par bshad/__/ces dang*/__gang zhig gsum la skyabs 'grau ba/__/de yis myur du sangs rgyas thob/__/ces sogs lung mtha' yas so/__/gnyis pa dngos gzhi sems bskyed bshad pa la gnyis/__kun rdzob dang*/__don dam sems bskyed do/__/dang po la'ang gnyis/__smon pa dang*/__'jug pa'i sems bskyed do/__/dang po ni/__rang nyams la dpag ma gyur 'gro ba rnams:__bde dang ldan zhing sdug bsngal bral ba'i phyir:__byams dang snying rje dga' ba btang snyoms te:__tshad med rnam bzhis smon pa'i byang sems bskyed:__ces gsungs te/__ji ltar rang nyid rnam pa kun tu sdug bsngal mi 'dod cing bde ba rgya cher 'dod pa'i nyams myong las rjes su dpag ste pha mar gyur pa'i 'gro ba rigs drug po rnams kyang de ltar 'dod pa mtshungs ldan yin pa'i phyir/__de dag lus sems bde ba dang bde ba'i rgyu bsod nams byed pa dang ldan cing sdug bsngal dang sdug bsngal gyi rgyu las dang nyon mongs pa rnams bral ba bdag kho nas bya dgos pa'i phyir/__mar shes pas dang du len 'dod kyi byams pa dang*/__de dag srid lam du sdug bsngal bar shes nas spang du mi bzod pa'i snying rje dang*/__lha dang sangs rgyas kyi bde ba thob pa la spro ba'i dga' ba dang*/__nye ring chags sdang med pa'i btang snyoms te/__rgyu la dam bca' ba de bzhi po mkha' khyab kyi 'gro ba dmigs yul du byas pas tshad med pa ste/__ting 'dzin rnam pa bzhi'i sgo nas/__'bras bu la dam bca' ba thams cad sangs rgyas kyi sa la bkod par bya ba'i bsam pas smon pa byang chub kyi sems bskyed do/__/'di'i don cung zad bshad na bdun/__dang po sems bskyed kyi ngo bo ni/__mngon rtogs rgyan las/__sems bskyed pa ni gzhan don phyir/__/yang dag rdzogs pa'i sangs rgyas 'dod/__ces pa ltar/__sems can thams cad sangs rgyas kyi sa la 'god pa'i ched du rang nyid rdzogs pa'i byang chub thob par 'dod pa ste/__de'ang rgyu grogs stobs sogs bzhi las byung ba/__grogs sems can ma lus pa'i don gyi khur chen rang nyid kho nas khyer ba'i lhag bsam gyi snying stobs dang ldan pa/__ngo bo 'gro kun sgrol nus pa'i rdzogs byang thob par 'dod pa'o/__/gnyis pa dbye ba ni/__so skye mos spyod nas sangs rgyas kyi bar sa mtshams kyi dbye ba bzhi/__dpes bstan pa nyer gnyis sogs yod kyang*/__mtshan nyid kyi sgo nas dbye ba gnyis po 'di go sla zhing grags che ste/__de'ang 'gro bar 'dod pa dang mtshungs par sangs rgyas thob 'dod ni smon pa dang*/__'gro bzhin pa ltar sangs rgyas sgrub pa'i thabs byang chub kyi sems rnam pa gnyis la brtson pa ni 'jug pa'i sems te/__spyod 'jug las/__byang chub sems de mdor bsdu na/__/rnam pa gnyis su shes bya ste/__/byang chub smon pa'i sems dang ni/__/byang chub 'jug pa nyid yin no/__/'gro bar 'dod dang 'gro ba yi/__/bye brag ji ltar shes pa ltar/__/de bzhin mkhas pas 'di gnyis kyi/__/bye brag rim pas shes par bya/__/zhes so/__/gsum pa dmigs pa ni/__byang sa las/__sems bskyed pa de ni byang chub la dmigs pa dang*/__sems can la dmigs pa'o/__/zhes pa ltar theg pa chen po'i ye shes tshol bar dmigs pa dang*/__tshad med pa bzhi la dmigs pa'o/__/bzhi pa bskyed tshul ni/__gzhung gi dngos bstan nyid de/__de la'ang tshad med bzhi'i ngo bo ni/__sems can thams cad sngar med kyi bde dge gsar pa dang 'phrad par 'dod pa ni byams pa/__da ltar yod pa'i sdug bsngal dang bral zhing phyin chad de'i rgyu 'gog 'dod ni snying rje/__de ltar 'gro ba rnams bde ba dang ldan par dga' zhing yi rangs pas drangs pa ni dga' ba/__de gsum gyis drangs pa'i zhe sdang med pa dang mtshungs ldan gyi ma chags pa'i sems kyi khyad par ni btang snyoms te rang rang gi mi mthun phyogs spangs pa'o/__/ming don ni/__sems can grangs dang ris su chad pa ma yin par/__nam mkhas ji tsam khyab pa de tsam 'gro khams gyis khyab pa dmigs yul byas pas tshad med pa'o/__/dbye ba ni/__snying po mchog gi mdo las/__byang chub tu sems bskyed pas ma zin pa'i byams sogs bzhi'i srid bde'i rgyu tsam yin pas tshangs pa'i gnas pa bzhi zhes bya zhing*/__de bzhi sems bskyed kyis zin pa ni myang 'das kyi rgyu byed pas tshad med bzhi zhes bshad do/__/skyed byed ni rkyen bzhi ste/__rang bzhin gnas rigs rgyu'i rkyen/__/dge ba'i bshes gnyen bdag rkyen/__rang rang gi yul mngon gyur dmigs rkyen/__phan yon dang nyes dmigs mthong ba de ma thag rkyen no/__/skye tshul ni/__sems can la brten nas dmigs pa dang bcas pa'i tshad med bzhi skye zhing*/__chos nyid la brten nas de dag gi rang bzhin ma skyes par rtogs pa dmigs pa med par bzhi pos skye ba sa sde dang mdo rgyan las bshad do/__/go rim ni/__yum bar ma las/__de la byang chub sems dpa' chen pos/__byams pa chen po dang*/__snying rje chen po dang*/__dga' ba chen po dang*/__btang snyoms chen po bsgom par bya'o/__/zhes dang*/__brtag gnyis las/__dang por byams pa bsgom par bya/__/gnyis par snying rje rnam bsgom zhing*/__/gsum par dga' ba bsgom par bya/__/kun gyi mthar ni btang snyoms so/__/zhes mdo rgyud mthun par gsungs so/__/lnga pa cho ga ni/__zab mo lta brgyud/__rgya chen spyod brgyud/__khyad par sngags kyi tshul las byung ba rnams so/__/drug pa bslab bya ni/__spyir nyams su blang bya'i chos thams cad sems bskyed kyi bslab byar 'gro yang*/__khyad par smon pa'i bslab bya ni/__byang sems kyi phan yon dran pas sems can blos mi spong ba dang*/__tshogs bsags shing tshad med bzhi bsgom pa dang*/__dkar nag chos brgyad blang dor du bya ba'o/__/'jug pa'i bslab bya/__bslab pa rnam pa gsum gyis bsdus pa'i phar phyin drug dang bsdu dngos bzhi la slob tshul rgyas pa 'og tu 'byung ba ltar ro/__/bdun pa phan yon ni/__sangs rgyas ma bsgrub na phar zhog__/bsgrub phyin chad nam yang med thabs med pas yon tan la tshad med par theg pa chen po'i bka' dang bstan bcos rnams su yang yang gsungs pa ltar la/__mdor na/__byang chub sems kyi bsod nams gang*/__/gal te de la gzugs mchis na/__/nam mkha'i khams ni kun gang ste/__/de ni de bas lhag par 'gyur/__/zhes mdo las 'byung ba ltar ro/__/gnyis pa 'jug pa la gsum/__rang smin par byed pa phar phyin drug la bslab pa/__gzhan smin par byed pa bsdu dngos bzhi la bslab pa/__de gnyis kyi nyams len snying por dril te blo sbyong ba'i tshul lo/__/dang po ni/__gzhan phyir rdzogs byang kho na don gnyer blos:__lus dang longs spyod thams cad rtswa ltar btang :__'jigs pas nyen la skyabs kyi dbugs 'byin bya:__rang yang chos spyod gzhan yang de la dgod:__spong ba'i sems pa rab tu dwang ba'i blos:__sgau gsum kha na ma tho'i nyes spyod bsdam:__zag bcas zag med dge tshogs ci nus bsgrub:__thams cad sems can don du 'phen pa btang :__gnod pa'i yul gyis nam yang mi brdzi phyir:__khong khro'i nyes pa dran pas bzod pa bsgom:__chos kyi phyir du dka' ba spro bzhin len:__stong nyid zab mor skrag pa med par bya:__snying stobs dge ba'i phyogs su sad pa yis:__byang chub spyod la zhum med go cha gyon:__nyin mtshan kun tu yengs med brtson 'grus brtsam:__gzhan don 'grub na skyo ngal spang bar bya:__yid ni zhi la mngon par sems pa yis:__'jig rten pa yi bsam gtan gzhir bzung ste:__lhag mthong dang bcas ting 'dzin rab bsgrubs pas:__de bzhin gshegs pa'i spyod yul nyid la zhugs:__chos rab rnam par 'byed pa'i blo gros kyis:__dang por thos pas chos rnams tshig la 'jug:__bar du bsam pas don gyi go ba btsal:__tha mar sgom pas don nyid mngon du bya:__zhes gsungs te/__bsam pa mkha' khyab kyi sems can gzhan dag rnams sangs rgyas kyi sa la 'god par bya ba'i phyir du rang nyid mngon par rdzogs par 'tshang rgya ba don du gnyer ba'i blos/__sbyor ba pha rol tu phyin pa drug la bslab par bya ste/__de'ang mdo las/__lag bzang*/__byang chub sems dpa' sems dpa' chen po myur du mngon par rdzogs par byang chub bar bya ba'i phyir/__pha rol tu phyin pa drug po 'di dag la rtag par rgyun du bslab par bya'o/__/zhes sogs rgyas par gsungs pa ltar phyin drug gi dang po sbyin pa'i ngo bo ni ma chags pa'i sems kyis bdog pa yongs su gtong ba/__kun slong bshad ma thag pa gzhan phyir rdzogs byang don gnyer gyi blo dang ldan pas/__gtang bya sbyin pa la dbye na zang zing dang mi 'jigs pa dang chos kyi sbyin pa gsum las/__dang po ni/__bsam pa dngos po zhing dang thabs te ma dag pa bzhi dang bral la dag pa bzhi dang ldan pas/__nang gi dngos po rang gi lus su gtogs pa dang phyi'i dngos po rang la bdog pa'i 'byor pa longs spyod ji snyed pa thams cad khyad par du byas pa'i zhing bzhi la bsam sbyor phun sum tshogs pas ser sna med par rtswa ltar yongs su gtong ba dang*/__gnyis pa ni/__rgyal po dang gcan gzan dang dgra dang chom rkun me chu nad gdon sogs 'jigs pas nyen pa la rang gi nus pa dang sbyar te so so'i gnyen po gang la 'os pa'i skyabs kyi thabs sbyin pas 'jigs pa de las dbugs 'byin par byed pa dang*/__gsum pa ni/__gzhan dad cing rang mi nyams par bya ba'i phyir rang yang sgo gsum gyi ma dag pa spong zhing dag pa gsum ldan gyis dam pa'i chos la spyod pas dge ba'i bshes gnyen gyi 'os su 'gyur zhing*/__de las gzhan yang gus shing snod bcud kyi rten 'brel 'dzom par 'gyur bas/__yul chos 'dod pa la/__bsam pa zang zing med pa'i sems kyis/__theg pa che chung gi chos snod dang 'tshams pa/__chos ston pa'i thabs dang ldan pas/__rang gis slob pa'i chos de la 'god par bya'o/__/gnyis pa tshul khrims kyi ngo bo ni/__len pa dang srung bas bsdus pa'i yon tan bzhi ldan gang zhig nyes pa spong ba'i sems pa mtshungs ldan dang bcas pa dang*/__nges par 'byung ba'i blos bslab pa la rab tu dwang zhing mos pa'i blo dang ldan pas/__bslab bya la dbye na/__sdom pa'i/__dge ba chos sdud kyi/__sems can don byed kyi tshul khrims gsum las/__dang po ni/__thun mong ba so thar ris bdun/__thun mong ma yin pa shing rta gnyis kyi bka' srol las byung ba'i byang sdom gyi bslab bya thams cad legs par bsrungs te sgo gsum la kha na ma tho bar 'gyur ba'i nyes spyod kyi rgyun bcad de phyin chad bsdam pa dang*/__gnyis pa ni/__gtso bor lus ngag gi bya ba dang 'brel zhing shes rab kyis ma zin pa zag bcas kyi dge ba dang*/__gtso bor sems kyi ting nge 'dzin dang 'brel zhing shes rab kyis zin pa zag med kyi dge ba'i tshogs ci nus su bsgrub pa dang*/__gsum pa ni/__byang sa las bya ba don ldan gyi grogs byed pa sogs rnam pa bcu gcig tu gsungs kyang*/__mdor na sgo gsum gyi bya ba ci byed pa thams cad sems can gzhan kho na'i don du byed pa'i lhag bsam gyi 'phen pa btang nas dngos su gzhan phan gyi bya ba lag tu ci lon bya'o/__/gsum pa bzod pa'i ngo bo ni/__bzang ngan la dgag sgrub bral ba'i ji mi snyam pa/__don ched mi 'os pa'i log sgrub sogs gnod pa'i yul gyis rang gi lhag pa'i bsam pa la nam yang mi brdzi zhing g.yo ba med pa'i phyir bsgom pa ste/__de la dbye na/__gnod pa la ji mi snyam pa/__sdug bsngal dang len/__chos la nges sems gsum las/__dang po ni/__bdag dang bdag gi ba'i phyogs la khro 'khrugs bcom rdeg gshe skur byed pa sogs gnod pa la khong khro byung na/__bskal pa stong du bsags pa yi/__/sbyin dang bde gshegs mchod la sogs/__/legs spyad gang yin de kun kyang*/__/khong khro gcig gis 'joms par 'gyur/__/ces sogs de'i nyes pa dran cing gzhan yang 'du shes lnga dang brtag pa rnam pa dgu'i sgo nas gnod pa de dag la ji mi snyam du bzod pa dang*/__gnyis pa ni/__byang chub sgrub pa'i chos kyi phyir du rang gi sgo gsum la bya dka' ba'i sdug bsngal chen po ci zhig byung yang spro ba nyams pa med par dga' bzhin dang du len pa ni/__dper na nad drag po'i sdug bsngal sel slad dpyad rtsub mo bsten pa bzhin 'khor ba'i g.yul ngo zlog cing nyon mongs pa'i dgra 'joms pa'i dpa' bo chen po yin pa dang*/__gsum pa ni/__dkon mchog gi yon tan sogs bsam gyis mi khyab pa'i gnas rnams la mos pa dang*/__khyad par yang dag pa'i de kho na nyid bdag rnam pa gnyis kyis stong pa'i gnas lugs spros bral stong pa nyid zab mo la skrag pa med pa dang mos shing khong du chud par bya ba'o/__/bzhi pa brtson 'grus kyi ngo bo ni/__dge ba la spro zhing le lo med pa/__rgyu sngon gyi las 'phrau bzang pos snying stobs rlabs po che dkar po dge ba'i phyogs su sad pa/__de yis brtson bya la dbye na/__go cha'i/__sbyor ba'i/__don byed kyi brtson 'grus gsum las/__dang po ni/__dus 'di nas bzung ste sems can thams cad bla na med pa'i byang chub la ma bkod kyi bar du bdag gi byang chub spyod pa skad cig kyang mi 'dor snyam du dus ring ba dang bsgrub dka' ba sogs la sems zhum pa med pa'i go cha gyon pa dang*/__gnyis pa ni/__nyon mongs spong ba dang*/__dge ba sgrub pa dang*/__gzhan don byed pa rnams la nyin dang mtshan mo kun tu skad cig kyang yengs pa med par rtag gus mi g.yo mi ldog nga rgyal med pa'i brtson 'grus brtsam pa dang*/__gsum pa ni/__sems can gzhan la dngos dang brgyud nas phan par byed pa'i don cung zad re 'grub na rang nyid bskal par ngan 'gror gnas dgos na'ang skyo ba dang ngal ba'i sems spang bar byas nas don de thog mar sgrub par byed pa'o/__/lnga pa bsam gtan gyi ngo bo ni/__sems byung dge ba'i ngo bor nang du rtse gcig tu gnas pa/__sbyor ba rang gi yid g.yo ba dang bcas pa 'di ni gnod pa dang sdug bsngal thams cad kyi rtsa ba yin pas rnam par rtog pa zhi ba'i bde ba la mngon par 'dod pa'i sems pas/__lus 'du 'dzi/__sems rnam rtog las bsring zhing 'dod chung chog shes sogs rgyu bsgrub pa dang*/__nyes pa lnga spangs pa'i 'du byed brgyad bsten pa sogs sngon du song nas dngos gzhi'i bsam gtan la dbye na/__mthong chos bder gnas/__yon tan sgrub pa/__sems can don byed gsum las/__dang po ni/__sems gnas pa'i thabs dgu la brten te/__rnam rtog kun dang bral ba'i lus sems shin sbyang gi bde ba ro myong dang rloms sems med pa 'jig rten pa'i lam dang thun mong gyur pa'i bsam gtan yin la/__de nyid yon tan thams cad skye ba'i rten yin pas gzhir bzung bar bya dgos te/__de la 'ang bsam gtan dang po nas bzhi pa'i bar du nyer bsdogs dang dngos gzhi rnams kyi khyad par sogs yod do/__/gnyis pa ni/__bsam gtan dang po'i dngos gzhi yan chad thob par byed pa la yid byed bdun gyis 'jig rten pa'i lhag mthong bsgrub dgos pas mnyam gzhag zhi gnas dang rjes thob lhag mthong gtsor byed pa dang bcas/__nyan thos dang thun mong ba zad par bcu dang zil gnon dang rnam thar brgyad la sogs pa dang*/__thun mong min pa nyan rang gi spyod yul las 'das pa'i rnam thar dang ting nge 'dzin gyi sgo mtha' yas pa rab tu bsgrubs pas tshogs sbyor mthar phyin pa'o/__/gsum pa ni/__de nas mthong lam yan chad du 'phags pa'i ting nge 'dzin thob pa la zag med dam de bzhin gshegs dga'i bsam gtan ces bya ste/__de'i mthus lus kyi bkod pa mtha' yas pa sprul te gzhan don bcu gcig sogs de bzhin gshegs pa'i spyod yul nyid la zhugs pa ste/__rgyud blar/__byang chub sems dpa'i tshul 'di ni/__/rjes thob sangs rgyas thams cad dang*/__/'gro ba yang dag sgrol ba la/__/'jig rten na ni mtshungs pa nyid/__/ces sogs gsungs pa ltar ro/__/'di yan chad kyi phar phyin thams cad 'khor gsum mi rtog pa'i shes rab kyis zin cing zhen pa dang re ba med pa dang mthar mi rtog pa'i bsngo bas spel zhing*/__stong nyid dang snying rjes dag pa'i thabs dang ldan dgos so/__/drug pa shes rab kyi ngo bo ni/__chos thams cad rab tu rnam par 'byed pa'i blo gros te dngos sangs rgyas kyis sas bsdus pa yin kyang*/__'dir de'i rgyu so sor rtog pa'i blo gros kyis shes rab ji ltar bskyed na/__klu sgrub kyis/__shes rab rgyas byed pa ni thos pa ste/__bsams pa dang ni gnyis po yod gyur na/__/de las sgom pa yang ni rab tu 'byung*/__/de las dngos grub bla na med pa 'thob/__/ces gsungs pa ltar thos bsam sgom pa'i shes rab gsum rim gyis bskyed par bya ba las/__dang por thos pa'i shes rab kyis shes bya ji snyed pa'i chos rnams kyi sgra tshig ma lus pa khong du chud par bya dgos te/__de'ang sgra tshad bzo gso la sogs pa 'jig rten pa'i shes rab dang*/__legs gsung bka' dang dgongs 'grel bstan bcos shes pa la 'jig rten las 'das pa'i shes rab ces 'bras ming rgyu la btags pa bcas/__mdor na shes bya gang la'ang rmongs pa med pa'i thos pa phyogs med du bya/__gnyis pa ni/__thos pa de'ang blun po dad pa'i rjes 'brang tsam du ma bzhag bar bar du rtog cing zhib mor dpyod pa'i bsam pas don spyi tsam du ma lus par/__tshad ma'i lung*/__dngos stobs kyi rig pa/__'gal med kyi sgrub byed dang ldan pas bden gnyis drang nges la sogs zab mo'i don gyi go ba tshul bzhin du btsal/__gsum pa ni/__thos bsam gyis nges pa rnyed pa'i tshul de nyid tha mar blang dor gyi sgo nas rang gi rgyud la sbyor zhing khyad par lta ba'i don nyid rtse gcig tu sgom pas nyams su blangs te tshig dang yid dpyod tsam du ma song bar gnas lugs kyi don yang dag pa'i mngon rtog nyid mngon du thob par bya'o/__/'di dag gi don rgyas pa mdo rgyan sogs su 'byung ba ltar la/__bsdu na phyin drug gi mtshan nyid ni/__byang sems kyis bsgrub pa'i bslab bya gang zhig__/khyad chos bzhi dang ldan pa'i sbyin sogs drug gis bsdus pa'i dge ba mtha' dag sgrub pa'i sems pa mtshungs ldan dang bcas pa'o/__/khyad chos bzhi ni/__rang rang gi mi mthun phyogs dang bral ba/__grogs 'khor gsum mi rtog pa'i shes rab kyis zin pa/__byed las gzhan gyi 'dod don rdzogs par byed pa/__de ltar byas nas chos bstan pas gdul bya'i rgyud byang chub gsum gang rung du smin par byed pa'o/__/rab dbye ni/__sbyin pa sogs drug po re re la'ang sbyin sogs drug rer dbye na/__gzhan pha rol tu phyin pa drug la 'god pa sbyin pa'i sbyin pa sogs so so'i sbyin pa/__de bzhin du rang rang gi mi mthun phyogs kyis ma gos par spyod pa so so'i tshul khrims/__/rang rang gi dka' spyad bzod pas spyod pa so so'i bzod pa/__dga' spro dang bcas pas spyod pa so so'i brtson 'grus/__de ltar brtson pas sems zin te gzhan du mi g.yeng bas spyod pa so so'i bsam gtan/__'khor gsum mi rtog pa'i sgo nas phyin drug la spyod pa so so'i shes rab ste sum cu rtsa drug tu 'gyur bar mngon rgyan las bshad cing*/__der ma zad mdo sde bskal bzang las dbye ba rgya cher 'byung ba sogs so/__/grangs nges ni/__byang sems kyi bsgrub pa'i chos thams cad bslab pa gsum du 'du ba la ltos nas pha rol tu phyin pa drug tu grangs nges pa yin te/__spyin pas longs spyod la chags pa dang bral ba las tshul khrims phun sum tshogs par 'gyur la/__de las dge sbyong du byed pa'i chos bzhi dang ldan par 'gyur bas bzod pa ste/__de gsum ni rgyu dang ngo bo dang khyad par gyi sgo nas lhag pa tshul khrims kyi bslab par bsdus so/__/bsam gtan ni lhag pa ting nge 'dzin gyi bslab pa dang*/__shes rab ni lhag pa'i shes rab kyi bslab par bsdus la/__brtson 'grus ni de thams cad kyi grogs su 'gyur ba yin no/__/sgrub tshul ni mdo rgyan las/__re ba med pa'i sbyin pa dang*/__/yang srid mi 'dod tshul khrims dang*/__/thams cad la ni bzod pa dang*/__/yon tan kun sdud brtson 'grus dang*/__/de bzhin bsam gtan gzugs med min/__/shes rab thabs dang ldan pa yin/__/pha rol phyin pa drug po la/__/brtan pa rnams kyis yang dag sbyor/__/ces so/__/de thams cad kyang dam pa drug dang ldan par nyams su blang dgos te/__rten dam pa byang chub kyi sems dang ldan pa/__dngos po dam pa sbyin sogs phyogs re ma yin par gzhi thams cad la 'jug pa/__ched du bya ba dam pa sems can thams cad kyi don du sbyor ba/__thabs dam pa 'khor gsum mi rtog pa'i shes rab kyis zin pa/__bsngo ba dam pa bla na med pa'i byang chub tu bsngo ba/__rnam dag dam pa sgrib gnyis kyi dngos gnyen du spyod pa rnams so/__/gnyis pa gzhan smin byed bsdu dngos la bslab pa'i tshul ni/__rang rgyud smin nas sbyin pas 'khor bsdus la:__snyan pas yid drangs don mthun bag phabs te:__don spyod gros gdab gnas skabs mthar thug tu:__phan dang bde ba'i dpal la rab tu dgod:__ces gsungs te/__de ltar 'jug pa'i spyod pa la bslabs pas rang rgyud yongs su smin par gyur nas sems can gzhan dag smin par byed dgos pas/__de'i thabs sam lag len thams cad kyi gtso bor gyur pa ni bsdu ba'i dngos po bzhi yin te/__mdo rgyan las/__sbyin mtshungs de ston len 'jug dang*/__/bdag nyid rjes su 'jug rnams kyis/__/snyan par smra dang don spyod dang*/__/don mthun nyid du 'dod pa yin/__/zhes go rim dang rnam grangs bstan/__phan par byed pa'i thabs dang ni/__/'dzin par byed dang 'jug byed dang*/__/de bzhin rjes su 'jug byed pas/__/bsdu ba'i dngos po bzhir shes bya/__/zhes dgos ched sgra don sogs rgyas par gsungs pa de mtshungs pad+ma spungs pa las/__sbyin pa'i g.yab mos legs bos te/__/snyan par smra ba'i tshig gis bsu/__/don spyod pa yis bag phab ste/__/don mthun gros chen gdab par bya/__/zhes ji ltar bya ba'i tshul yang bstan pa ltar/__thog mar gdul bya'i snod ldan 'khor du ma 'dus pa rnams la zang zing gi dngos po ji ltar 'os pa sbyin pas legs par bsdus la/__'dus nas pha rol po'i blo la 'thad cing yid la 'bab pa'i tshig snyan par smra ba'i gtam smras pas yid thar pa dang thams cad mkhyen pa'i lam du drang*/__drangs pa de dag slar mi ldog pa rang gi rjes su 'jug cing spro ba skyed pa'i phyir rang nyid kyang gzhan la bshad bya'i chos don de dag dang mi 'gal zhing mthun par spyod pa la skyo dub med par bya bas blo bag phabs te/__gdul bya'i khams dang dbang po dman 'bring mchog gi khyad par dang mthun par theg pa che chung gi chos sgo so sor bstan nas de'i don sgrub cing spyod du 'jug pa'i gtan 'dun gyi gros chen gdab/__bzhi po'ang bsdu na zang zing dang chos kyi sbyin pa gnyis su 'du ba yin la/__de gnyis pos gnas skabs dang mthar thug dag tu 'phral gyi phan pa dang yun gyi bde ba'i dpal la 'gro ba rnams rab tu 'god par bya'o/__/gsum pa de dag gi nyams len snying por dril te blo sbyong ba'i tshul ni/__gnad kyi snying po sems can thams cad kyi:__sdug bsngal ma lus bdag gi khur du blang :__bdag gi bde dge 'gro drug kun la sbyin:__rkyen gyis mi 'chor snying rje byang sems sbyang :__zhes gsungs te/__byang chub sems dpa'i nyams len ma lus pa'i gnad kyi snying por dril na gsum ste/__rgyu la sbyong ba byams pa dang snying rje drag tu bsgom/__sems dngos la sbyong ba nyin mtshan dus drug tu sems bskyed blang*/__spyod pa la sbyong ba dge ba gzhan don du bsngo zhing bde sdug btang len la rtse gcig tu 'bad par bya ste/__de'ang zhi ba lhas/__gang zhig bdag dang gzhan rnams ni/__/myur du bskyab par 'dod pa des/__/bdag dang gzhan du brje bya ba/__/gsang ba'i dam pa spyad par bya/__/zhes gsungs pa ltar bdag gzhan brje ba'i blo sbyong zab mo la bslab pa gal che ste/__de'i rgyu mtshan yang*/__'jig rten bde ba ji snyed pa/__/de kun gzhan bde 'dod las byung*/__/'jig rten sdug bsngal ji snyed pa/__de kun rang bde 'dod las byung*/__zhes dang*/__bdag bde gzhan gyi sdug bsngal dag__/yang dag brje bar ma byas na/__/sangs rgyas nyid ni mi 'grub cing*/__/'khor ba na yang bde ba med/__/ces rnal ma dang ldog phyogs kyi sgo nas bstan pa ltar yin la/__de'i tshul yang*/__khe dang rgyal kha gzhan la sbyin/__/gyong dang bub kha rang gis blang*/__/zhes pa'i don ltar nam mkhas khyab pa'i mar gyur sems can thams cad kyi rgyud la thog ma med pa nas bsags pa'i rgyu las dang nyon mongs pa/__'bras bu lus sems la sdug bsngal gyi tshor ba ji snyed yod pa thams cad bdag gi khur du the tshom med par dga' bzhin spro bzhin du blang ba'i 'dun pa bya ba dang*/__bdag gi rgyud la thog ma ma mchis pa nas bsags pa'i rnam dkar gyi dge ba'i rtsa ba dang*/__'bras bu lus sems la bde ba'i tshor ba ci yod pa thams cad 'gro ba rigs drug gi sems can kun la re re nas tshang bar sbyin pa'i 'dun pa bya ba ste/__de dag kyang blo sbyong don bdun ma las/__gtong len gnyis po spel mar sbyang*/__/de gnyis rlung la bskyon te bya/__/zhes pa ltar nyams su len cing*/__khams bzang ngan skyid sdug mtho dman ji ltar byung yang rkyen ngan gyis mi 'chor ba'i go cha chen po bgos la snying rje gzhir byas pa'i kun rdzob byang chub kyi sems rtse gcig tu sbyangs la skyes brtan gong 'phel du bya'o/__/gnyis pa don dam sems bskyed bstan pa la gsum/__lta bas thag bcad pa/__sgom pas nyams su len pa/__de'i 'bras bu bstan te mtshams sbyar ba'o/__/dang po la'ang bzhi/__phyi gzung yul rang bzhin med par gtan la 'bebs pa/__nang 'dzin pa dang gang zag gi bdag rang bzhin med par gtan la 'bebs pa/__dpyod byed kyi blo rang bzhin med par gtan la 'bebs pa/__skabs kyi don bsdu ba'o/__/dang po ni/__khyad par phyi rol 'dzin pas gzung ba'i yul:__thams cad bden min sgyu ma lta bur snang :__rtag pa ma yin mi rtag don byed nus:__gcig pu ma yin sna tshogs 'byung zhing 'gyur:__rang dbang med de las kyi phyi bzhin 'gro:__rdul phran ma yin cha med rdul ma grub:__gal te grub na rags pa brtsam mi nus:__cha bcas yin na cha med dam bcas 'gal:__des na med snang rdzun snang rten 'brel tsam:__rmi lam sgyu ma chu yi zla ba 'dra:__dri za'i grong khyer 'ja' tshon lta bur blta:__zhes gsungs te/__thabs kun rdzob byang sems las khyad par du gyur pa shes rab don dam byang chub kyi sems sgom pa la'ang thog mar phyi rol du bden bden ltar snang ba bdag tu 'dzin pas gzung bar bya ba'i yul thams cad lung rig gis legs par brtags na gcig kyang bden pa ma yin pa sgyu ma mkhan gyis sprul pa'i sgyu ma'i dngos po lta bur snang ba yin no/__/de'ang grub mthas blo ma bsgyur ba'i 'jig rten phal pa rnams kyis snang dngos bden rtag tu zhen cing*/__grub mtha' log par zhugs pa'i mu stegs pa rnams kyis rtag pa/__gcig pu/__rang dbang can sogs su 'dod pa yod kyang ma rtogs pa dang log par rtog pa la zhugs pa yin te/__'di ltar snang dngos rnams chos can/__rtag pa ma yin par thal/__rtag la bya ba med phyir ro/__/zhes pa ltar te nam mkha' bzhin no/__/de chos can/__mi rtag par thal/__'khrul ngor rgyun 'pho bas don byed nus pa'i phyir/__sa bon dang myu gu bzhin no/__/snang ba chos can/__gcig pu ma yin par thal/__dngos snang sna tshogs su 'byung zhing 'gyur ba'i phyir/__chu'i dngos po gcig la rigs drug gi mthong tshul tha dad pa bzhin/__de chos can/__sna tshogs pa'ang don la bden pa med par thal/__rkyen las byung ba'i phyir 'ja' tshon bzhin no/__/khams gsum po chos can/__rang dbang du 'gyur ba med par thal/__las kyi phyi bzhin du 'gro ba'i phyir/__'gyur ba'i sdug bsngal bzhin no/__/las chos can/__don dam par mi bden par thal/__rdzas dang dus kyi dngos por ma grub pa'i phyir/__'dus ma byas pa bzhin no/__/de'ang go sla bar brjod na/__'dus byas kyi dngos po thams cad ni rtag pa ma yin te/__de yin na rtag dngos gzhan du 'gyur mi srid pas nam mkha'i rang bzhin gang du'ang mi 'gyur ba bzhin don byed mi nus pa'i phyir/__mi rtag pa yin te/__skad cig gnyis par rgyun 'gyur bas sa bon las myu gu dang mar me'i rgyun bzhin kun rdzob tsam du don byed nus pa'i phyir/__'o na mi rtag par grub bam zhe na/__de'ang ma grub ste rtag mi rtag gcig la gcig ltos pa'i ming tsam yin pas ltaus sa ma grub pa'i ltos chos kyang mi bden pa'i phyir/__'phags zhabs kyis/__gal te dngos po gang ltos 'grub/__/de nyid la yang ltos nas ni/__/ltos bya gang yin de 'grub na/__/gang la ltos nas gang zhig 'grub/__/ces pa ltar ro/__/gzhi gcig pu nyid du nges pa'ang ma yin te/__yin na gcig dang du ma rdzas 'gal bas sna tshogs su 'byung bar mi rigs pa la/__chu'i dngos po gcig la dmyal bas khro chu/__yi dwags kyis rnag khrag__/dud 'gros btung ba/__mi yis nyer spyad/__lha yis bdud rtsi sogs su mthong ba ltar las snang gi rjes su 'gyur zhing 'gro ba'i phyir/__sna tshogs nyid kyang mi bden te gcig pu'i gzhi ma grub pas de'i khyad chos ma grub ste/__khyad gzhi mo gsham gyi bu+u ma grub pas khyad chos mdzes pa sogs ma grub pa bzhin te/__'phags zhabs kyis/__dngos rnams ngo bo nyid med de/__/gzhan du snang bar 'gyur phyir ro/__/dngos po ngo bo nyid med de/__/gang phyir dngos rnams stong pa nyid/__/ces so/__/byed pa por grags pa tshangs dbang khyab 'jug gis mtshon khams gsum na rang dbang du gyur pa 'ga' yang med de/__yod na myang 'das bzhin ldog mi srid pa la thams cad kyang las dkar nag gi rjes su 'brangs te khams gsum na zag pa dang bcas pa'i phyir ro/__/'o na las bden par grub bam zhe _na/__don dam par las kyang bden par grub pa med de/__'phags pas/__chos 'di dag ni chos nyid kyis/__/'ong ba med cing 'gro med na/__/las dang las kyi rnam par smin/__/ci lta bur ni 'thad par 'gyur/__/dam pa'i don du'ang med cing*/__/gang du'ang 'gro ba yod ma yin/__/kun rdzob tu ni lam 'jug cing*/__/rnam par smin pa nye bar ston/__/ces gsungs pa ltar ro/__/nang pa'i grub mtha' 'dzin pa las phyogs rtogs nyan thos bye brag smra ba rnams/__dngos snang rnams mi bden pas kun rdzob yin kyang dngos po dang dus rtsom byed rags mtha' rdul phran cha med tho ba la sogs pas gzhig mi nus pa dang*/__shes pa'i mtha' skad cig cha med blos gzhig tu mi rung ba don dam bden par 'dod de/__mdzod las/__gang la bcom dang blo yis gzhan/__/bsal na de blo mi 'jug pa/__/bum chu bzhin du kun rdzob tu/__/yod de don dam yod gzhan no/__/zhes so/__/de'ang lta ba'i mun pas khebs pa ste/__rdul phran don dam pa ma yin te cha med pa'i rdul ma grub pa'i phyir/__gal te grub na cha shas med pa'i nam mkha' dang nam mkha' 'dres pa ltar thams cad go sa gcig tu 'dre bas dngos po rags pa rtsom mi nus te/__nyi shu pa las/__drug gi char ni sbyar ba na/__/phra rab rdul cha drug tu 'gyur/__/drug po dag gi go gcig na/__/gong bu'ang rdul phran tsam du 'gyur/__/zhes so/__/rdul phran rnams phyogs so sor yod na shar la sogs pa'i dbye bas cha dang bcas pas sngar cha med du dam bcas pa'i rang tshig dang 'gal lo/__/rdul phran sil bu reg la ma 'byar bar gnas par 'dod pa'ang 'gal te/__reg la ma 'byar ba'i bar du snang mun gyi rdul gyis mi chod mi srid pas chod na de dang 'byar bas bar med du 'gyur la/__ma chod na bar med pas khas blangs dang 'gal lo/__/skad cig ma'i rgyun gyis dus brtsams pa'ang 'gal te/__skad cig ma snga phyi ma 'phrad na shes pa phyi ma rgyu med du 'gyur bas snga ma rtsom byed du mi 'gro la/__'phrad na'ang skad cig ma gsum dus gcig la 'phrad na thams cad dus mnyam du 'gyur bas bskal pa'ang skad cig gcig kho nar 'gyur zhing*/__res mos su 'phrad na skad cig ma gcig gi cha snga ma 'das pa/__gnyis pa da lta ba ste cha gnyis su 'gyur bas cha med kyi dam bca' nyams pa'o/__/'dis ni shes bya rdzas yod du 'dod pas don la mthar lta khas len par song ba'i phyir nang pa'i lta grub dman shos yin pas 'dir mtshan gzhi tsam du dngos su bstan par snang la/__des mtshon nas shugs bstan mdo sde pas rtsom byed lkog na mos brtsams pa'i shes bya rnams btags pa tsam du 'dod pa dang*/__sems tsam pas chos thams cad sems kyi snang ba tsam du bden par 'dod pa rnams kyang dngos por smra ba'i grub mtha' yin pas lung rig gis sun phyungs la dbu ma'i lam du 'jug par bya'o/__/rgyu mtshan des na dngos snang thams cad bden par grub pa gcig kyang med pas med bzhin du snang ba/__snang yang mi bden par rdzun par snang ba/__de'ang rten cing 'brel bar 'byung ba tsam du snang ba yin te chos thams cad rang ngos nas bden par grub na dngos po'i rang mtshan mi btang bas skye 'jig sogs gang yang mi rung la/__de ma grub pa'i gnad kyis rten cing 'brel 'byung gi chos rnams 'gag pa med par 'char du rung bas stong pa nyid la snang ba mi 'gag cing snang ba'ang stong nyid kyi rgya las ma 'das pa ste/__'phags zhabs kyis/__rten cing 'brel 'byung ma gtogs pa'i/__/chos 'ga' yod pa ma yin te/__/de phyir stong pa ma gtogs pa'i/__/chos 'ga' yod pa ma yin no/__/zhes so/__/de lta bu'i rdzun snang rten 'brel tsam du shar ba de sgyu ma'i rang bzhin gyi dpe rnams dang 'dra ba yin te/__sems 'khrul pa'i snang ba las phyi rol du ma grub pa rmi lam dang*/__rgyu dang rkyen gyi rten 'brel tshogs pas snang ba sna tshogs su 'khrul pa sgyu ma dang*/__rkyen la brten nas thams cad du khyab pa chu'i zla ba rnams dang 'dra zhing*/__yul nges pa med par so sor snang ba dri za'i grong khyer/__bden dngos med pa'i kha dog sna tshogs su snang ba bar snang gi 'ja' tshon lta bu blta bar bya ste/__ji skad du/__skar ma rab rib mar me dang*/__/sgyu ma zil pa chu bur dang*/__/rmi lam glog dang sprin lta bur/__/'dus byas chos rnams de ltar blta/__/zhes gsungs pa'i phyir ro/__/gnyis pa ni/__lta mkhan sems la'ang nga dang bdag med de:__de ni phung po las gzhan tha dad dang :__phung po lnga dang gcig tu ma dmigs phyir:__dang po grub na rdzas gzhan yod par 'gyur:__de ltar ma yin gnyis pa grub tsa na:__phung po mi rtag bdag nyid rtag pa 'gal:__de bas phung po lnga la brten nas kyang :__ngar 'dzin dbang gis de ltar gdags par zad:__ces gsungs te/__phyi blta bya'i yul bden par ma grub kyang nang lta mkhan sems bden par grub bam zhe na de'ang ma grub ste/__sems ni nyer len gyi phung po la sgro btags nas nga'o snyam pa'i ngar 'dzin 'di las logs su med cing de dang bdag gnyis kyang tha dad med pas yang dag pa'i shes rab kyis brtag na de dag tu grub pa med de/__nga'am bdag tu 'dzin pa chos can/__don dam par ma grub par thal/__phung po lnga las tha dad pa'am gcig tu med pa'i phyir/__/dang po grub ste/__tha dad du yod na phung lnga las rdzas gzhan phung po drug par 'gyur ba la de 'dra shes bya la mi srid pa'i phyir/__mo gsham gyi bu'i ming bzhin no/__/gcig tu yod na rdzas gcig par 'gyur ba la phung lnga rdzas yod dang ngar 'dzin btags yod rdzas 'gal ba'i phyir/__dngos po dang dngos med bzhin no/__/de'ang go sla bar brjod na/__bdag de ni phung po lnga'i tshogs pa las gzhan tha dad pa dang*/__phung po lnga dang gcig tu'ang ma dmigs pa'i phyir bdag ma grub ste/__dang po ltar bdag phung tha dad du grub na gzhan phung po drug pa yod par 'gyur ba dang*/__phung po las gzhan la ngar 'dzin 'jug pa med pa'i phyir dang*/__phung po'i mtshan nyid bral bas dngos po med par 'gyur zhing dngos med kyis don byed mi nus pa'i phyir tha dad du ma grub bo/__de ltar tha dad du grub pa ma yin kyang gnyis pa bdag phung gcig par grub bam zhe na de'ang ma grub ste/__mtshan nyid mi mthun pa'i phyir de'ang phung po rnams 'dus byas yin pas mi rtag par grub cing bdag ni sngar mthong ba nyid da ltar ngo shes par rloms pa sogs rtag par 'dzin pas de gnyis 'gal ba'i phyir dang*/__phung po gzugs tshor sogs nang gses bcas dbye ba du ma spungs pa can yin la/__bdag ni nga nyid do zhes gcig pur 'dzin pa'i phyir dang*/__phung po skye 'jig gi gzhan dbang can du grub la/__bdag ni nga'o snyam du rang dbang can du 'dzin par myong bas grub pa'i phyir ro/__/de ltar yang rtsa sher las/__gal te phung po bdag yin na/__/skye dang 'jig pa can du 'gyur/__/'on te phung po las gzhan na/__/phung po'i mtshan nyid med par 'gyur/__/ces so/__/bdag ma grub kyang de'i rgyun rtag pas de grub bo snyam na de'ang ma yin te/__bden gnyis las/__rgyun dang skad cig ces bya ba/__/phreng ba dmag la sogs bzhin rdzun/__/ces so/__/de bas nyer len gyi phung po lnga'i tshogs pa tsam la brten nas don la cung zad ma grub kyang ngar 'dzin dbang gis bdag dang gang zag sogs de ltar sgro btags par zad de/__'jug pa las/__de phyir phung po las gzhan bdag med de/__/phung po ma gtogs de 'dzin ma grub phyir/__/ces dang*/__phung po bdag ces brjod tshe phung rnams kyi/__/tshogs pa yin gyi phung po'i ngo bo min/__/ces pa ltar ro/__/de'ang dper na shing rta'i 'khor lo dang srog shing sogs yan lag tshogs pa la shing rta zhes gdags par zad kyi/__de dag ma yin pa yan lag can gyi shing rta'i mtshan gzhi mi rnyed pa ltar phung po'i tshogs par ngar 'dzin pa tsam las bdag ces bya ba gzhi ma grub ste/__mdo las/__ji ltar yan lag tshogs rnams la/__/shing rta'i ming du bshad pa ltar/__/de bzhin phung po rnams brten nas/__/kun rdzob sems can ces bya'o/__/zhes so/__/gsum pa ni/__'dogs mkhan rtog pa 'das pa zhig nas med:__ma 'ongs ma skyes da lta brtag mi btub:__ces gsungs te/__de ltar gzung ba'i yul dang 'dzin pa'i sems gnyis bden par ma grub kyang*/__de ltar 'dogs mkhan gyi rtog pa nyid bden par grub bam snyam na/__/de la dus gsum gyi cha shas yod dam med/__/med na skad cig ma dngos med du thal bas rtog pa gang yod dngos med du thal la/__yod na sngar skyes pa'i rtog pa 'das pa ni yal te zhig nas med la/__ma 'ongs pa ni da rung ma skyes pas ma grub la/__da lta ba'i rtog pa rang gis rang la brtag cing mtshon mi btub ste mig gis mig mi mthong zhing ral gri'i sos rang nyid gcod mi nus pa bzhin no/__/de ltar yang rin chen phreng ba las/__ji ltar skad cig mtha' yod pa/__/de bzhin thog ma dbus brtag dgos/__/de ltar skad cig gsum brtag phyir/__/'jig rten skad cig la mi gnas/__/zhes so/__/bzhi pa ni/__mdor na bdag gnyis gzung 'dzin gzhi dang bcas:__mkha' ltar rab zhi skye ba med shes nas:__skye med nyid kyang blau yi yul las 'das:__thams cad mkhyen pa'ang tshig gis dbul ba'i phyir:__spros pa kun bral dbu ma'i lam zhes bya:__zhes gsungs te/__de ltar sngar bshad pa'i don mdor bsdu na chos dang gang zag tu 'dzin pa'i bdag gnyis dang*/__yul gzung ba dang yul can 'dzin pa gnyis/__de dag gang la brten pa'i kun gzhi dang bcas pa de thams cad bden pa med pas dngos med du grub bam snyam na/__sngar bden dngos su grub pa phyis bden med du song na der gdags su rung yang*/__chos thams cad gdod ma nas rang bzhin gyis ma grub pas yod med gnyis ka'i mtha' las 'das pa ste/__sa ra has/__dngos por 'dzin pa phyugs dang 'dra ba ste/__/dngos med 'dzin pa de bas kyang ni blun/__/ces dang*/__rtsa sher las/__de phyir yod dang med pa la/__/mkhas pas gnas par mi bya'o/__/zhes gsungs pa ltar yod med sogs spros pa'i gzeb las grol ba nam mkha' lta bu/__dngos dang dngos med du 'dzin pa'i blo'i 'jug pa rab tu zhi/__gdod ma nas rang bzhin gyis skye ba med par lung dang rig pas shes par byas nas/__skye med kyi gnas lugs de nyid kyang smra bsam brjod pa dang bral bas sgra rtog dang blo'i yul las 'das par rtogs dgos te/__spyod 'jug las/__gang tshe dngos dang dngos med dag__/blo yi mdun na mi gnas pa/__/de tshe rnam pa gzhan med pas/__/dmigs pa med par rab tu zhi/__/zhes so/__/de lta bu'i gnas lugs de brjod pas mi mtshon pas shes bya thams cad mngon sum du mkhyen cing gzigs pa smra ba'i zla ba rnams kyang gnas lugs thad kar ston pa la brjod byed tshig gis dbul ba ltar snang ba'i phyir/__mtha' brgyad kyis spros pa kun dang bral ba'i brjod med de ni theg chen gyi lta ba'i yang rtse dbu ma chen po ste/__de nyid lam du byed pas de'i lam zhes bya'o/__/gnyis pa sgom pas nyams su len tshul ni/__de ltar shes nas 'dzin pa bral ba'i ngang :__blo yis byar med mnyam par bzhag pa las:__zhes gsungs te/__lta ba spros bral gyi gnas lugs de ltar legs par shes nas/__don dam dpyod byed kyi rig pas spros pa'i mtshan ma ci'ang ma rnyed par mthar 'dzin gyi rtog pa thams cad dang bral zhing gang du'ang mi zhen la mtha' bral gyi don la nges pa gting tshugs su rnyed pa'i shes rab kyi rgyun de la bden dngos bkag pa'i stong nyid du zhen pa sogs rig shes rjes dpag gi blo yis bcas bcos ci'ang byar med par gtsubs shing dang gtsubs gtan las byung ba'i mes shing gnyis bsregs te me'ang rang yal ba ltar rang bzhin du 'jog ste/__skye med rin po che'i mdzod las/__gar yang ma rtog cir yang ma sems shig__/ma bcos pa de skye med rin chen mdzod/__/ces dang*/__brgyad stong pa las/__shes rab kyi pha rol tu phyin pa sgom pa 'di ni chos gang yang mi sgom pa lags so/__/zhes dang*/__mdo dang rgyan gnyis ka mthun par/__'di la bsal bya ci yang med/__/bzhag par bya ba cung zad med/__/yang dag nyid la yang dag blta/__/yang dag mthong na rnam par grol/__/zhes pa ltar rtag tu mnyam par bzhag__/rjes thob tu/__sdud pa las/__bdag ni mnyam par bzhag ce'am langs zhes rloms sems med/__/ci phyir zhe na chos kyi rang bzhin yongs shes phyir/__/ces gsungs pa ltar chos thams cad sgyu ma lta bur shes pa'i blos bsod nams kyi tshogs ci nus bsags pa las goms pa rab kyi mthar phyin pa na ting nge 'dzin la brtan pa thob par 'gyur ro/__/gsum pa de'i 'bras bu bstan cing mtshams sbyar ba ni/__rnam rtog zhi zhing ngo bo'i tshul rig pas:__spyan dang mngon shes gzungs sogs yon tan 'grub:__lam dang sa rnams rim gyis thob pa ni:__pha rol phyin pa rgyu yi theg pa ste:__'bras bu'i lam la'ang stong nyid snying rje gnyis:__zung 'brel spyod pa lam gyi gzhi ru bzung :__zhes gsungs te/__de ltar sgom pa goms pa las rnam par rtog pa'i 'tshubs ma mtha' dag zhi zhing gshis kyi thog tu ji tsam 'dod pa de srid du gnas pas lus sems las su rung*/__yang dag pa'i ye shes kyi ngo bo mthong ba med pa'i tshul gyis lhag ger mthong zhing rig par 'gyur te/__sdud pa las/__nam mkha' mthong zhes sems can tshig tu rab brjod pa/__/nam mkha' ji ltar mthong ste don 'di brtag par gyis/__/de ltar chos mthong ba yang de bzhin gshegs pas bstan/__/ces dang*/__dbu ma bden chung las/__/ma mthong ba nyid de mthong bar/__/shin tu zab pa'i mdo las gsungs/__/zhes so/__/thabs shes zung 'jug gi lam des sgrib pa gnyis po drungs nas phyung ste/__spyan lnga dang*/__mngon par shes pa drug__/mi brjed pa'i gzungs*/__chags thogs med pa'i spobs pa/__rlung sems la dbang 'byor ba'i rdzu 'phrul/__chos kyi rgyun gyi ting nge 'dzin sogs gnas skabs dang mthar thug gi yon tan rnams rim pa bzhin 'grub pa dang*/__lam lnga po dang sa bcu po rnams rim gyis bgrod cing de dag gi yon tan thob par 'gyur ba ste/__de'ang dang por byang chub tu sems bskyed nas nam drod kyi ye shes ma thob bar sbyin sogs tshogs gnyis la 'bad pa thar pa cha mthun gyi dge ba'i tshogs gsog pa ni tshogs lam ste/__de la gsum las tshogs lam chung ngur dran pa nyer bzhag bzhi/__'br-ing por yang dag par spong ba bzhi/__chen por rdzu 'phrul gyi rkang pa bzhi gtso bor bsgom pa'o/__/tshogs lam rab kyi mthar phyin pa na bden pa bzhi rtogs pa dang rjes su mthun pa sgom byung 'jig rten pa'i ye shes nges 'byed yan lag rnam bzhi skye ba ste/__bden pa mngon par rtogs pa la sbyor bas sbyor lam mo/__/bzhi ni bden pa mthong ba'i snga ltas kyi drod/__'jig rten pa'i ting nge 'dzin gyi rtse mo/__zab mo'i chos la bzod pa/__'jig rten pa'i chos kyi mchog tu gyur pa'i gnas skabs bzhi ste/__snga ma gnyis la dbang po lnga/__phyi ma gnyis la stobs lnga dang ldan pa'o/__/bzhi po re re la chung 'bring chen po gsum du dbye bas nges 'byed bcu gnyis su grags/__chos mchog gi rjes thob tu bden pa bzhi re re yang chos rjes shes bzod kyis dbye ba'i skad cig ma bcu drug gi bdag nyid can gyi ye shes skyes te khams gsum gyis bsdus pa'i mthong bas spang bya rnams spangs te/__'jig rten las 'das pa'i shes rab kyis sngar ma mthong ba'i don 'phags pa'i bden pa dngos su mthong bas mthong lam ste/__byang chub kyi yan lag bdun dang ldan pa'o/__/de nas brtsam sngar rtogs pa'i de kho na nyid yang dang yang du goms par byed pas sgom lam ste/__de la'ang chung 'bring che gsum du yod cing 'phags pa'i lam yan lag brgyad dang ldan pa'o/__/de ltar slob lam gyis bsdus pa'i byang phyogs kyi chos so bdun rdzogs nas sgom lam mthar phyin pa'i rjes la rdo rje lta bu'i ting nge 'dzin gyis spang bya phra zhing phra ba ma lus pa spangs nas rtogs pa'i ye shes mthar thug pa ni mi slob pa'am mthar phyin pa'i lam ste mi slob pa'i chos bcu mngon du gyur pa'o/__/gnas skabs de dag gi yon tan gyi rten dang gong ma gong ma skyed par byed pa'i cha nas sa zhes rnam par bzhag pa'i dbang du byas na yongs su sbyong ba'i khyad par gyis sa bcur nges te/__mthong lam du sa dang po rab tu dga' ba thob/__'jigs pa lnga dang bral/__yon tan brgya phrag bcu gnyis thob/__sgom lam gsum du sa gnyis pa nas bcu pa'i bar bgrod de spang rtogs yon tan gyi khyad par gong nas gong du bye ba brgya stong 'gyur du 'phel zhing*/__sa brgyad bar dbang bcu/__dgu par so so yang dag rig bzhi/__bcu par 'od zer chen po'i dbang bskur ba brnyes te bcu gcig kun 'od sangs rgyas kyi sa la gnas par 'gyur ro/__/sa de dag re re la'ang khyad par dgu dgus bshad pa sogs mdo sde rgyan gyis mtshon gzhung rnams su gsal/__tshul de dag gis pha rol tu phyin pa rgyu lam du byed pa'i theg pa las ji ltar gsungs pa'i don mdor bsdus nas bstan pa ste/__stong nyid snying rje'i snying po can gyi byang chub kyi sems zhes bya ba ni chos thams cad kyi rtsa ba yin pas/__'bras bu lam byed rdo rje theg pa la'ang shes rab stong pa nyid dang thabs snying rje chen po gnyis zung du 'brel bar spyod pa lam gyi gzhi'am rten du bzung dgos pas 'dir thog mar bshad pa yin te/__rim lnga las/__shes rab snying rje gcig par ni/__/'jug pa gang gis shes gyur pa/__/zung 'jug ces byar bshad pa ste/__/rim 'di sangs rgyas spyod yul lo/__/zhes dang*/__rdo rje gur las/__stong nyid snying rje dbyer med pa/__/gang du sems ni rab sgom pa/__/de ni sangs rgyas chos dang ni/__/dge 'dun gyi yang bstan pa'o/__/zhes dang*/__lam sgron las/__thabs dang bral ba'i shes rab dang*/__/shes rab bral ba'i thabs dag kyang*/__/gang phyir 'ching ba zhes gsungs pas/__/de bas gnyis ka spang mi bya/__/zhes 'byung ba ltar ro/__/'dir rgyu 'bras kyi theg pa zhes pa'i don yang*/__/mtha' gnyis sel ba las/__rgyu la sbyor ba rgyu chos kyi/__/'khor lo rab tu bskor byas nas/__/'bras bu theg pa'i nye lam ni/__/zhes gsungs pa ltar/__/spyir 'dis 'dong bas rgyu dang*/__'dir 'dong bas 'bras bu'i theg pa zhes grags shing*/__kun mkhyen klong chen pas/__khams bde gshegs snying po sa bon tu yod pa tsam rkyen tshogs gnyis kyis yon tan gong du 'phel ba las sangs rgyas thob par 'dod pas rgyu 'bras snga phyir khas len pa'i phyir rgyu'i theg pa dang*/__snying po yon tan bcas sems can la rang chas lhun grub tu yod pa sbyang gzhi nyi ma 'od zer ldan pa 'dra ba la/__sbyang bya tshogs brgyad glo bur ba'i dri ma sprin lta bus bsgribs pa nyid/__sbyong byed smin grol lam gyis sbyangs pa'i 'bras bu gdod gnas kyi rang bzhin mngon du gyur pa las snga phyir bzang ngan khyad par med par 'dod pas 'bras bu'i theg pa zhes btags par bzhed de/__brtag gnyis las/__sems can rnams ni sangs rgyas nyid/__/'on kyang blo bur dri mas bsgribs/__/de bsal na ni sangs rgyas so/__/zhes pa ltar ro/__/de gnyis kyi khyad par ni/__tshul gsum sgron me las/__don gcig na yang ma rmongs dang*/__/thabs mang dka' ba med pa dang*/__/dbang po rnon po'i dbang byas phyir/__/sngags kyi theg pa khyad par 'phags/__/zhes 'byung ba ltar rgyu 'bras kyi theg pa de gnyis mthar thug 'bras bu'i don gcig na'ang lam bgrod pa la gsang sngags tshul bzhis khyad par du 'phags pa ste/__snga mas phyi'i phar phyin la 'jug pas yun ring por mthar mi phyin cing gegs dang bcas pas rmongs la/__sngags pas nang thabs shes zung 'jug gi ting nge 'dzin gyis de dag myur du rdzogs nus pas ma rmongs pa dang*/__snga mas nyon mongs gcig sbyong zhing 'dod pa gcig sgrub pa la'ang dka' thub sdom pa sogs mi zab pa'i thabs phyogs re ba yun tu bsten dgos la/__sngags pas bskyed rdzogs yan lag dang bcas pa'i rnam grangs mang po re res kyang don bde blag tu sgrub nus pa'i phyir thabs zab la mang ba dang*/__snga mas so so'i blo dang mthun par 'bras bu sgrub pa'i thabs dkon pas dka' tshegs chen pos bsgrub dgos la/__sngags pas yul dus gnas skabs dbang po'i khyad par dang 'tshams pa'i thabs bde zhing 'ching byed kyang grol byed du sgyur bas 'bras bu bde blag tu byed nus pa'i phyir dka' ba med pa dang*/__theg dman pa thabs mi shes pas dbang po brtul zhing phar phyin pa thabs la 'khrul pas dbang po 'bring yin la/__sngags pas sbyang na ngan 'gror 'gyur ba'i las kyang thabs kyi khyad par gyis byang chub tu sgyur nus pa dang*/__snga mas gnyis rtog blang dor kho nar spyod la sngags pas lhag pa'i bden pa dbyer med snod bcud dag mnyam chen por shes nas gzung 'dzin blang dor med par cir snang lam du slong nus pa'i phyir dbang po rnon por gyur pas 'phags so/__/gzhan yang tshul drug dang bdun dang bcu gnyis la sogs pas khyad par du 'phags pa'i tshul mang du bshad do/__/lam 'dir 'jug dgos pa'i rgyu mtshan yang*/__rgyal bas gnyen po la dgongs te gsungs pa'i chos phung brgya khri bzhi stong*/__de bsdu na gsung rab yan lag bcu gnyis/__de theg pa rim dgu/__de yang bsdu na sde snod gsum mam bzhir bsdu ba sogs ji snyed cig bstan pa de thams cad kyang rnal 'byor bla med 'dir 'jug pa'i lam stegs tsam du gyur pa ste/__nyan rang 'bras bu mthar phyin pa rnams kyang nam zhig sangs rgyas kyi 'od zer chen pos 'gog pa las bslangs nas gdod theg chen 'jug dgos pa dang*/__byang sems dang sngags phyi rgyud gsum gyis sa bcu pa rgyal tshab chen po'i go 'phang la bgrod par nus kyang*/__byang chub chen po thob pa la 'khor bar 'ching byed kyi kun rtog phra ba tsam du ma zad snang gsum mam 'pho ba'i bag chags kyang rtsad nas spang dgos shing*/__de spong byed kyi gnyen po dbang bzhi pa'i lam zung 'jug mi 'gyur ba'i bde chen rang rig pa'i ye shes nyid yin pas de ni rnal 'byor bla med las gzhan du ma gsungs pa'i phyir/__theg pa'i sgo gang nas zhugs kyang mthar rnal 'byor bla med kyi lam du 'jug dgos pa ma zad de/__theg rim snga ma snga ma'i don rnams phyi ma phyi ma'i nang du 'du bas theg pa 'di nyid bstan pa dang theg rim thams cad kyi mchog dang yang rtser gyur pa ste/__gsang snying las/__rang bzhin gsang ba'i snying po 'di/__/sde snod kun dang rgyud kun gyi/__/'byung gnas nges par gtan la 'bebs/__/zhes dang*/__bshad rgyud las/__mnyam nyid don rtogs rang rig rgyal po ni/__/rgya mtsho chen por chu klung kun 'babs ltar/__/bla med don rtogs thabs chen 'di dag tu/__rnam thar theg pa bsam yas ma lus 'dus/__/zhes so/__/gnyis pa sa bon gdab pa la gnyis/__mtshan smos pa'i sgo nas mdor bstan/__de'i don rgyas par bshad pa'o/__/dang po ni/__de nas sa bon gdab pa'i rim pa ni:__zhes pa ste/__thun mong ba'i lam gyis rgyud sbyangs pa sngon du song ba de nas thun mong ma yin pa'i lam rim la 'jug pa'i thog mar rang rgyud la sangs rgyas kyi sa bon gdab pa'i rim pa ni 'di lta ste/__zhes pa'o/__/gnyis pa la gnyis/__sa bon gdab thabs dngos dang*/__de'i srog dam tshig bstan pa'o/__/dang po la'ang gsum/__gang la dbang bskur ba'i yul/__gang bskur ba'i dbang*/__de ji ltar skur ba'i tshul lo/__/dang po ni/__nges par 'byung bas rgyud bskul theg chen rigs:__byang chub sems gnyis tshul la blo 'byongs pas:__myur du sangs rgyas bsgrub 'dod skal bzang la:__zhes gsungs te/__gang la sa bon gdab pa'i yul ni rgyan las/__shes pas srid la mi gnas shing*/__/snying rjes zhi la mi gnas pa/__/zhes pa ltar shes rab dang snying rjes srid pa dang zhi ba'i mtha' gnyis las nges par 'byung bas rgyud bskul zhing theg pa chen po'i rigs dang ldan pa ste de'i rtags ni/__mdo rgyan las/__sbyor ba'i sngon tu snying rje dang*/__mos pa dang ni bzod pa dang*/__/dge ba yang dag spyod pa ni/__/rigs kyi rtags su nges par bshad/__/ces pa ltar/__de'ang thos pa la sogs pa'i rkyen gyis sad par gyur pa/__kun rdzob dang don dam pa'i byang chub kyi sems rin chen po che rnam pa gnyis kyi tshul la blo legs par 'byongs pa las/__grangs med gsum sogs yun dang tshegs la mi ltos par tshe gcig sogs dus myur ba nyid du sems can gyi don tu sangs rgyas kyi go 'phang sgrub cing thob par 'dod pa'i skal ba bzang po can de ni smin byed kyi sa bon gdab pa'i snod du gyur pa yin no/__/gnyis pa la gnyis/__mdor bstan pa dang*/__de rgyas par bshad pa'o/__/dang po ni/__rang rgyud sku gsung thugs dang ye shes te:__rdo rje bzhi yi ngo bor gnas pa nyid:__gsang sngags bla na med pa'i thabs mkhas kyis:__dbang bskur rnam bzhi'i sa bon gdab par bya:__zhes gsungs te/__de'ang dbang skur rgyal po'i rgyud las/__dbang mchog rang la med gyur na/__/bskur bas thob par ga la 'gyur/__bra sran 'bras su dbang bskur bas/__/de la 'bras kyi dngos snang med/__/ces pa ltar sems can rang rang gi rgyud la mtshungs ldan gyi rgyu sku bzhi'i rang bzhin gdod ma nas gnas pa de nyid lhan cig byed pa'-i rkyen sngags kyi thabs kyis mngon du 'gyur bar byed pa ste/__de'ang rtsa khams sku rdo rje/__ngag rlung gsung rdo rje/__thig le thugs rdo rje/__kun gzhi ye shes rdo rje ste rdo rje bzhi'i ngo bor ye nas lhun grub tu gnas kyang glo bur dri ma'i sbubs su bag la nyal bas nus pa mi gsal ba de nyid/__phar phyin dang gsang sngags kyi rgyud sde 'og ma rnams su ma grags pa rdo rje theg pa'i yang rtse bla na med pa'i rgyud don thabs la mkhas pa'i khyad par cho ga'i las kyis/__rten gyi dkyil 'khor bzhir bcug nas bum pa sogs dbang bskur ba rnam pa bzhis sku bzhir smin byed kyi sa bon rgyud la gdab par bya'o/__/gnyis pa ni/__lus rtsa dag par byed pa bum pa'i dbang :__sku yi rdo rje sprul sku'i sa bon yin:__ngag rlung dag par byed pa gsang ba'i dbang :__gsung gi rdo rje longs sku'i sa bon yin:__yid dang thig le dag byed pho nya'i dbang :__thugs kyi rdo rje chos sku'i sa bon yin:__kun gzhi'i bag chags dag byed don gyi dbang :__ye shes rdo rje nyid sku'i sa bon yin:__ces gsungs te/__skal ldan la dbang bzhi'i sa bon ji ltar 'debs na/__thal 'gyur rtsa ba'i rgyud las/__'gro ba'i lus ngag yid sems bzhi/__/rnam par dag par bya ba'i phyir/__/dbang ni rnam pa bzhi yis kyang*/__/skal ba ldan pa smin par bya/__/zhes gsungs pa ltar rnal 'byor bla med kyi tshul 'dir gzhi lam 'bras bu'i 'brel gyis dbang bzhir nges la de'i rten kyang khams drug ldan pa'i rdo rje'i lus rtsa rlung thig le yongs su rdzogs pa kho na yin pas de'i dbang du byas te/__mtho ris kyi rten mngal du skye srid 'dzin pa'i thog mar mig dang lte ba'i rtsa mdud chags/__de nas 'khor lo lnga nas stong phrag bdun cu rtsa gnyis kyi bar du rim par chags te lus bskyed pa'i phyir gnas pa rtsa ni lus kyi sbyang bya'i gtso bo yin pa dang*/__lus kyang ngag yid kyi rten dang rags pa'i sbyang bya yin pas thog mar de nyid dag par byed pa'i phyir du/__lhag pa gzugs brnyan gyi dkyil 'khor gsum po gang rung du phan nus gnyis kyis bsdus pa'i spros bcas bum pa'i dbang bskur bas/__sad pa'i gnas skabs dang lus rtsa'i dri ma dag__/phung po lngar 'dzin gyi rtog pa 'gag__/phung po'i bdud bcom/__phung khams skye mched gdan gsum tshang ba'i dkyil 'khor du lta ba'i bskyed rim dbyibs kyi rnal 'byor bsgom pa la dbang*/__gnas skabs rgyu'i sa brgyad pa dang skal ba mnyam/__mthar thug gi 'bras bu sku rdo rje snang stong zung 'jug sprul pa'i sku mngon du 'gyur ba'i sa bon thebs pa yin no/__/rtsa de dag la rtsa ba dang yan lag gi rlung rnams brten nas nang du 'khrul rtog skyed cing phyi rol du ngag gi brjod pa sna tshogs su 'byung bas g.yo ba rlung ni ngag gi sbyang bya'i gtso bo yin cing*/__lus las ngag phra bas bum dbang gi rjes su ngag rlung dag par byed pa'i phyir du/__bdag gi de kho na nyid lus kyi dkyil 'khor zab mo'i dbang gsum ka dang 'brel pa gzhir bzhag ste 'dir khyad par sngags kyi de kho na nyid yi ge b+ha ga'i dkyil 'khor du skal med la bstan du mi rung ba byang sems dkar dmar la brten nas gsang ba'i dbang bskur bas/__rmi lam gyi gnas skabs dang ngag rlung gi dri ma dag__/dbyibs la lhar zhen gyi rtog pa 'gag__/nyon mongs pa'i bdud bcom/__rlung sngags dbyer med du shes pa'i rang byin rlabs mtshan bcas rdzogs rim gyi lam bsgom pa la dbang*/__rgyu'i sa dgu pa dang skal ba mnyam/__'bras bu gsung rdo rje gsal stong zung 'jug longs spyod rdzogs sku mngon tu 'grub pa'i sa bon theb pa yin no/__/rtsa rlung de dag la khams kyi dwangs ma thig le byang chub sems rnams brten nas gnas te/__rtsa yur ba lta bu'i nang du rlung gi g.yo rtsol la brten nas khams dkar dmar chu rgyun lta bu 'gro 'ong gi rkyen gyis yid gzung 'dzin gyi snang ba bskyed pas bkod pa thig le ni yid dang 'brel ba'i sbyang bya yin pa dang*/__ngag las yid phra bas gsang dbang gi rjes su yid dang thig le dag par byed pa'i phyir du/__lha'i de kho na nyid kun rdzob byang chub sems kyi dkyil 'khor du shes rab pho nya mo la brten nas dpe'i ye shes mtshon pa'i dbang bskur bas/__gnyid 'thug gi gnas skabs dang yid thig le'i dri ma dag__/rang bzhin brgyad cu'i rtog pa 'gag__/'chi bdag gi bdud bcom/__phyag rgya gsum gyis dpe'i ye shes sgrub pa dkyil 'khor 'khor lo'i lam bsgom pa la dbang*/__rgyu'i sa bcu pa dang skal ba mnyam/__'bras bu thugs rdo rje bde stong zung 'jug chos kyi sku mngon du byed pa'i sa bon thebs pa yin no/__/rtsa rlung thig le de thams cad kyang bag chags sna tshogs pa'i kun gzhi las 'du byed kyi yid g.yos te bzung 'dzin tu zhen pa'i snang ba las gzhan du med pas sbyang bya thams cad kyi gtso bo/__/snga ma rnams las ches shin tu phra ba kun gzhi ma rig pa'i bag chags dang bcas pa dag par byed pa'i phyir du/__ye shes kyi de kho na nyid don dam byang chub sems kyi dkyil 'khor du rang rig don dam pa mtshon byed brda dang tshig gi dbang bskur bas/__snyoms 'jug gi gnas skabs 'dzag bde'i spros pa dang sgo gsum cha mnyam 'pho ba'i sgrib pa bag chags bcas dag__/gnyis snang byung tshor gyi rtog pa 'gag__/lha'i bu'i bdud bcom/__rdzogs pa chen po ye shes spyi gzugs ka dag lhun grub kyi lam bsgom pa la dbang*/__rgyu'i sa bcu gcig pa dang skal ba mnyam/__'bras bu ye shes rdo rje rig stong zung 'jug ngo bo nyid sku mngon du byed pa'i sa bon nam nus pa rgyud la bzhag pa yin no/__/gsum pa ni/__de rnams kun kyang thun mong gang zag la:__lhag gnas dang bcas 'jug dang smin pa ste:__dbang rnon kha cig brda thabs ngo sprod dang :__mchog gzhan ting 'dzin kho nas grol bar 'gyur:__ces gsungs te/__dbang bzhi po de rnams cho ga'i bya ba ji lta bus bskur na/__dbang kun kyang skur ba po slob dpon dang bskur yul slob ma'i dbang po'i khyad par gyis thun mong ma yin pa'i skur tshul yang mang du 'gyur ba las/__thun mong ba'i gang zag spyi tsam gyi dbang du byas na bya byed las gsum gyis bsdus pa ste/__byed pa po rdo rje slob dpon lha dang bdag dang gsang sngags dang bzlas brjod dang 'phro 'du'i de kho na nyid de sngags kyi yan lag lnga la rang byan chud pas/__bya ba'i las bcud bzang po blugs pa la snod gtsang mar bya ba bzhin du/__sa'i cho ga sngon du 'gro bas lha dang bum pa dang slob ma lhag par gnas pa dang*/__thig tshon rgyan bkod dkyil 'khor sgrub cing mchod de bdag nyid 'jug pa'am rig pa'i me tog dor cing gnang ba nod pa bcas byas nas/__phyi mtshan ma dang nang ye shes kyi dkyil 'khor du 'jug pas rgyud sbyangs pa'i slob ma la/__byed pa rdzas sngags ting 'dzin gsum tshogs pa'i cho ga khyad par can gyis dbang bskur bas/__bya ba slob ma'i sgo gsum phra rags gdod nas gdan gsum tshang ba'i lhar dag pa nyid ngo 'phrod par byas pa las rang skal gyi sbyang bya'i dri ma ci rigs dag pa'am nyams smad par byas shing*/__thob bya rang gnas kyi ye shes ci rigs gsos thebs pa'i mthus lam rim pa gnyis kyi ye shes mngon du skyes sam/__chu lud drod gsher 'dzom pa la sa bon thebs pa ltar skye nges kyi nus rung du smin par byas pas rgyur 'gyur ba'i khyad par ni dbang thob pa ste/__he ru ka 'dus pa las/__gang gis gang la dbang bskur ba/__/rgyud dag nus pa thob phyir dbang*/__/zhes so/__/thun mong ma yin pa'i gang zag sngon nas sbyangs pa'i las 'phro can rang bzhin gyis dbang po rnon po kha cig cho ga'i las rim rgyas pa la ma ltos par brda thabs dang*/__de'i don ngo sprod pa tsam la brten nas rgyud smin byed kyi dbang bzhi yongs su rdzogs par 'gyur te/__dper na/__rig 'dzin 'dus pa rtsa ba'i rgyud las/__rdul tshon me long bum pa dang*/__/gtor ma la sogs rdzas dag la/__/brten nas mtshan nyid kun ldan pa'i/__/bla ma'i byin rlabs dbang bskur na/__/dkyil 'khor kun gyi snying po mchog__/bzhi pa'i de nyid dbang bzhi thob/__/ces gsungs pa'i don gsang sngags snga 'gyur ba rnams kyis bla ma'i zlum po bzhi dbang sogs dang*/__phyi 'gyur ba rnams kyis rdo rje rnal 'byor ma'i byin rlabs kyi rim pa sogs zab dbang mtha' yas pa 'byung ba bzhin no/__/de las kyang skal ba mchog tu gyur pa'i gang zag gzhan pa 'ga' zhig ni mtshan ldan bla ma'i ting nge 'dzin dang byin rlabs kyi mthu kho nas rgyud smin cing grol bar 'gyur te/__snod bcud kyi rten 'brel 'dzom pa la ye shes btsan thabs su skye zhing de nyid dbang skur thams cad kyi rgyal po rdo rje ye shes kyi dbang yin pa'i phyir/__dper na 'phags yul grub pa'i slob dpon mang po dang bod kyi sngon byon grub thob brgyud pa'i rnam par thar pa bzhin no/__/'dir 'phros don cung zad smos na/__dbang gi ngo bo/__/nges tshig__/dbye ba/__ji ltar skur ba'i tshul/__/ma thob pa'i nyes dmigs/__thob pa'i phan yon te drug las/__dang po ni/__thob bya rang gnas kyi ye shes mngon du skyes sam skye nges kyi nus rung du smin par byed pa'o/__/gnyis pa ni/__a b+hi Shiny+tsa'i sgra las mngon par gtor ba'am blugs pas na dbang ste/__sbyang bya'i dri ma 'khru ba'am gtor zhing*/__/lam sgom rung dang 'bras bu thob rung gi nus pa khyad par can 'jog pa'i phyir te/__dgyes rdor las/__gtor dang blugs pa zhes bya ba/__/des na dbang zhes brjod par bya/__/zhes so/__/gsum pa la rgyu lam 'bras bu'i dbang gsum las/__/rgyu dus kyi dbang ni/__dang por bla ma las blang dgos te/__smin byed gang zhig__/de yin na sngags kyi lam so so nyan sgom gyi sngon du thob dgos pa'i phyir/__lam dus kyi dbang ni/__phyis bla ma las sam sdom ldan rang nyid kyis blangs kyang rung ste/__sngar rgyud smin zin gyi dbang rgyun de gong 'phel du byed pa'i dbang yin pa'i phyir/__'bras dus kyi dbang ni/__slob lam rdzogs pa'i rgyun mtha'i dus su bskur te/__de mthar thug gi 'bras bur sbyor byed kyi dbang yin pa'i phyir ro/__/bzhi pa ni/__dbang bskur ba de'ang dkyil 'khor sngon du 'gro ba can te/__dril bu pas/__dbang bskur dkyil 'khor sngon 'gro bar/__/rdo rje 'chang gis gsungs pa ste/__/zhes so/__/de la rang bzhin ye shes kyi dkyil 'khor dang*/__lhag pa ting nge 'dzin nam sprul pa'i dkyil 'khor dang*/__rig pa nyams kyi dkyil 'khor gsum ni rim pa ji lta bar slob dpon rdzogs pa'i sangs rgyas dang*/__mthar lam pa dang*/__mthong sgom la gnas pa ste 'phags pa rnams kyi spyod yul yin la/__ting nge 'dzin la brtan pa rjes mthun tsam thob pa la sogs pa'i slob dpon gyis ni gdul bya'i dbye bas skal dman 'jug pa la rdul tshon/__'bring ras ris/__rab tshom bu lta bu dmigs rten cung zad tsam dang*/__de las kyang blo che ba skal ldan yang rab la bla ma'i lus dkyil la brten nas bskur bar gsungs so/__/dkyil 'khor der bskur bya'i dbang ni/__spyir rnal 'byor bla na med pa'i rgyu dus kyi dbang thams cad bzhir nges pa yin te/__sbyang bya dri ma bzhi dang sbyong byed bskyed rdzogs kyi lam bzhi dang*/__sbyangs 'bras sku bzhir nges pa'i phyir de ltar yang snying po'i rgyud phyi ma las/__slob dpon gsang ba shes rab dang*/__/de ma thag pa bzhi pa ste/__rnam rtog dri ma dag bya'i phyir/__/dbang bskur rnam pa bzhi yin no/__/zhes dang*/__'dus pa las/__bum pa'i dbang ni dang po ste/__/gnyis pa gsang ba'i dbang yin no/__/gsum pa shes rab ye shes te/__/bzhi pa de yang de bzhin no/__/zhes sogs gsar rnying rgyud sde kun mthun par 'byung ngo*/__/bye brag snga 'gyur rang lugs rgyud lung man ngag gsum gyi dbye bas rgyud sgyu 'phrul drwa ba ltar na/__slob bu dad pa can la phyi phan pa'i dbang bcu/__bdag dang gzhan dang gnyis ka'i don nus pa'i brtson 'grus can la nang nus pa'i dbang lnga/__spyod rigs mnyam pa'i brtul zhugs can la gsang ba zab mo'i dbang gsum bskur bar gsungs pa dang*/__lung 'dus mdo ltar na/__rang bzhin gyis snodadu gyur pa zab mo'i don la mos pa'i slob ma khyad par can la mdo rtsa ba'i dkyil 'khor du rgyud kyi dngos bstan ltar chu bo bzhi rdzogs kyi dbang sum cu rtsa drug bskur ba dang*/__sbyangs pas snod du gyur pa rgya che ba la mos pa'i slob ma thun mong ba la mdo yongs rdzogs yan lag dang bcas pa'i dkyil 'khor so sor phye nas dbang rtsa ba so drug la yan lag gi rags par brgyad brgya so gcig tu phye nas bskur ba ste/__rgyud man ngag gi lugs gnyis ka'ang phyi nang sgrub gsang gi dbang bzhis bsdus pa dang*/__man ngag a ti yo ga la rig pa rtsal gyi dbang rtsal du bton nas skur ba'i tshul rdzogs chen sde gsum gyi lugs so sor 'byung ba las/__man ngag sde pa ltar na/__spros bcas dbang gis sgo gsum dang shes bya la rmongs pa'i dri ma sbyong*/__spros med kyis sku gsung thugs dang rang byung 'od gsal gyi nus pa 'jug__/shin tu spros med kyis sems nyid gzhi med rtsa bral du ngo sprad cing ka dag gi ye shes dang*/__rab tu spros med kyis lhun grub 'od gsal mngon sum gyi don nyams su len pa la dbang bar byed do/__/sgrub sde ltar na spyi bka' bde gshegs 'dus pa las/__gdul bya zhe sdang can sgrol ba lam du khyer ba'i phyir phyi dbang bum pa sogs phyi nang gi rdzas brgya rtsa brgyad la brten nas bskur ba/__nga rgyal can lha lam du khyer ba'i phyir nang dbang lus la brten nas bskur ba/__'dod chags can sbyor ba lam du khyer ba'i phyir gsang dbang yum la brten nas bskur ba/__gti mug can rnam rtog lam du khyer ba'i phyir de kho na nyid kyi dbang sems la brten nas bskur ba dang bzhir bshad do/__/lnga pa ni/__sangs rgyas thod pa'i rgyud las/__dper na pi wang sbyor kun 'tshogs/__/rgyud dang bral na brdung mi rung*/__/de bzhin dbang dang bral na ni/__/sngags dang bsam gtan 'grub mi 'gyur/__/ces so/__/drug pa ni/__rngam glog las/__/gsang ba mchog gi dkyil 'khor du/__/'jug dang dngos grub gsol ba dang*/__/dbang bskur ba yi las rnams bya/__/des ni tshe 'di nyid la yang*/__/sangs rgyas nyid kyang thob 'gyur na/__/dngos grub gzhan lta smos ci dgos/__/zhes sogs lung rigs mtha' yas pa 'byung ngo*/__/gnyis pa srog dam tshig bstan pa ni/__dbang gi srog ni dam tshig sdom pa ste:__sngags kyi 'dul ba mi 'da'i yal gam can:__spyi dang khyad par lhag pas bsdus pa rnams:__phyi nang gsang ba'i tshul du dag par bya:__zhes gsungs te/__dbang gis rgyud smin kyang de'i don rgyud la bsten pa'i srog ni dam tshig ste/__de'ang dbang bskur ba nyid kyis dam tshig dang sdom pa thob pa yin pas de nyid legs par bskyang dgos te/__kun 'dus las/__dbang rnams legs par rdzogs gyur pas/__/rtsa ba yan lag dam tshig kun/__/ma nyams rab tu bsrung bar bya/__/des ni dngos grub mchog thob 'gyur/__/zhes so/__/de la dam tshig gi ngo bo ni/__bsrung bya'i don khyad par can las mi 'da' ba'i sems pa sa bon dang bcas pa ste/__snying po'i rgyud phyi ma las/__gang zhig nan tan las mi 'gong*/__/rmi lam du yang dam tshig brjod/__/dam bca' ba ni sdom par 'dod/__/ces gsungs pa ltar/__sangs rgyas kun gyi rdo rje'i gsang ba gsum 'dzin cing mi nyams par srung ba'i cha nas dam tshig__/rang rgyud sdom pa'i cha nas sdom pa yin pas ngo bo gcig la khyad par dang spyi ldog gis phye ba'o/__/nges tshig ni/__sngags kyi sgor zhugs nas de nyid kyi brtul zhugs srung zhing bsgrubs pas rang rgyud kyi nyon mongs pa 'dul bar byed pas sngags kyi 'dul ba zhes bya zhing*/__sa ma ya'i sgra las dam bcas pa'i tha tshig dang mna' dang sdom pa sogs la 'jug pas ji ltar dam bcas pa las 'da' bar bya ba ma yin pas rdo rje'i yal gam mam dam tshig ste/__bsrungs na sngags kyi bslab pa thams cad kyi gzhi rten du 'gyur zhing*/__ma bsrungs na bslab pa thams cad don med du 'gyur bas khe nyen dang bcas pa'i phyir/__de ltar yang he ru ka 'dus pa'i rgyud las/__mi 'da' dam pa mchog gyur pa/__/'das par gyur na tshig par bshad/__ces so/__/de la dbye na/__bde 'dus zhi rgyud las/__/spyi dang khyad par lhag pa yi/__/rnam par dbye bas bzung bya ste/__zhes pas spyi'i dam tshig__/khyad par gyi dam tshig__/lhag pa'i dam tshig ste gsum du bsdus pa yin la/__de rnams rim pa bzhin du phyi snying*/__nang snying khrag__/gsang ba srog gi tshul du bsrung zhing rnam par dag par bya'o/__/de dag gi don cung zad smos na/__spyi'i dam tshig ni/__so thar/__byang sems/__phyi rgyud gsum gyi bsrung mtshams su grags pa rnams te/__dang po la so thar ris brgyad kyi spang blang*/__gnyis pa la shing rta gnyis kyi bka' srol nas byung ba'i bslab bya/__gsum pa la bya spyod rnal 'byor gyi rgyud rnams la 'byung ba'i dam tshig thun mong dang thun mong ma yin pa rnams so/__/khyad par gyi dam tshig ni/__sngags bla med nas gsungs pa'i rigs lnga spyi'i dam tshig dang*/__rtsa ba dang yan lag gis bsdus pa'i dam tshig khyad par ba rnams te/__de la rigs lnga'i dam tshig ni/__phyi smon sems dang 'jug sems sdom sdud don byed kyi tshul khrims gsum dang*/__dkon mchog gsum 'dzin cing*/__sbas don bde stong dbyer med kyi byang sems dang sems nyid dkon mchog gsum gyi rang bzhin can du bzung ba ste de bzhin rigs kyi dam tshig__/phyi rdzas kyi rdor dril dang lha sku phyag rgya/__nang yab yum gnyis kyi mkha' gsang phan tshun rgyas btab ste sbyor ba/__gsang ba khams dkar dmar gnyis 'bar 'dzag gi rgyas zung du 'brel ba/__de kho na nyid bde stong gnyis zung 'jug gi rgyas 'ching ba ste/__de ltar phyi nang la sogs pa'i rdo rje dang*/__dril bu dang*/__phyag rgya gsum 'dzin cing*/__de dag ston pa'i bla ma la gus pas bsten pa ste rdo rje'i rigs kyi dam tshig__/phyi chos skyob zang zing dang de'i rtsa ba byams pa'i sbyin pa ste bzhi ster zhing*/__sbas don rjes chags kyi mes byang sems dbab ldog gi dga' bzhi'i ye shes sbyin pa ni rin chen rigs kyi dam tshig__/phyi nyan rang*/__nang byang sems/__gsang ba bya ba spyod pa rnal 'byor phyi nang ste theg pa gsum 'dzin cing*/__sbas don rlung dbu mar bcings pas gzhom med kyi gsung sgrub pa ni pad+ma rigs kyi dam tshig__/sngar gyi sdom pa de thams cad dang mchod pa'i las kyang ci nus su sgrub cing*/__'jug par gtogs pa'i sems can ma bsgral ba rnams sgrol ba dang*/__ma grol ba rnams dgrol ba dang*/__dbugs ma phyin pa rnams dbyung ba dang*/__yongs su mya ngan las ma 'das pa rnams zlo ba la 'god cing*/__sbas don du thams cad zung 'jug e waM gyi sdom pas rgyas 'debs pa dang*/__zhu bdes phung khams dbang yul gyi lha rnams tshim par mchod cing phra rags kyi sgo gsum shin tu phra ba rdo rje gsum gyi rang bzhin gzhi rdzogs ye grol chen por sgrol dgrol dbyung zhing zlo bar byed pa ni las kyi rigs kyi dam tshig go__/rtsa ba'i dam tshig ni/__spyir sgo gsum mi dge ba las ldog cing lha sngags ting nge 'dzin las mi 'da' ba ni/__sku gsung thugs kyi dam tshig yin la/__khyad par du sgo gsum g.yo zol med pas ci mnyes kyis bla ma bskur ba dang*/__mched lcam la rtag tu mi 'bral zhing phan 'dogs pa'i bsam pas brtse gdung rgyun mi chad pa'i byams pas bya ba gnyis ni rdo rje'i sku'i dam tshig__/sngags dang phyag rgya brtson pa rab 'bring gi dbang las nyin mtshan dus drug gam zla zhag lo dus rnams las mi 'da' bar byed pa ni rdo rje gsung gi dam tshig__/gsang ba'i don gzhan du mi smra ba dang*/__bla na med pa'i byang chub kyi sems zung 'jug gyi phyag rgya las mi 'da' ba gnyis ni rdo rje thugs kyi dam tshig go__/khyad par du'ang 'gro ba mtha' dag ye nas rang bzhin rnam dag yin pas sangs rgyas thams cad kyi sku gsung thugs dang mnyam par sbyor ba ni mnyam pa chen po'i dam tshig ste/__de nyid shes rab dang ting nge 'dzin gyis rtogs shing goms par byas pa las dngos grub thams cad 'byung ba'i phyir brtson par bya'o/__/yan lag gi dam tshig ni/__lnga tshan lnga las/__shes par bya ba lnga ni/__phung khams sogs lnga tshan gyi rtog tshogs rnams ye nas rigs lnga yab yum sogs sku dang ye shes kyi dkyil 'khor du rtogs par byed pa ste lta ba'i dam tshig go__/mi spang ba lnga ni/__dug lnga thabs gyis zin na lam gyi grogs su 'gyur bas mi spong zhing*/__sbas don chos thams cad mnyam pa nyid du rdzogs pas lta ba la phyogs ris dang spyod pa la blang dor gyis 'byed pa med pa'i gti mug__/mi dmigs pa'i snying rje chen po'i 'dod chags/__rang rig pa'i ye shes rtog pa 'joms pa'i zhe sdang*/__zung 'jug lta ba'i rgyal po gshongs su mi 'bebs pa'i nga rgyal/__gnyis 'dzin gyi zhen rtog mnyam nyid kyi klong du mi shong ba'i phrag dog ste rtogs goms kyi sbyor bas mi spong ba'o/__/spyad par bya ba lnga ni/__srog gcod/__ma byin len/__mi tshangs spyod/__rdzun dang*/__brlang tshig smra ba rnams zhing bcu sgrol ba la sogs te gzhan don du 'gyur na spyad par bya zhing*/__sbas don du srog ni rlung ste bum can la sogs pa'i thabs kyis dgag pa'am gzung 'dzin rtog pa'i srog rang rig pa'i ye shes kyis gcod pa/__btsun mo'i shu kra'am bde chen gyi ye shes sus kyang sbyin pa med par de blang ba dang*/__rang rig nyid yul phyag rgya chen po dang kha sbyor la brten nas zhu bde 'gyur med sgrub pa ni 'dod pa spyod pa dang*/__'khor ba med snang las 'gro ba sgrol ba'i rdzun dang*/__sgra thams cad brjod med du rtogs pas gab sbas med par brda sprod pa la sogs pa'i brlang tshig rnams so/__/dang du blang ba lnga ni/__byang sems dkar dmar/__dri chen/__dri chu/__sha chen gyi dwangs ma rnams gtsang dme'i rtog pa sbyong ba la sogs pa'i dgos pas brten cing*/__sbas don du phung lnga'i dwangs ma 'dzag med du 'ching bas dang du blang ba'o/__/bsgrub par bya ba lnga ni/__shes par bya ba'i dam tshig lnga po de nyid rtogs goms kyis sbyor bas rang rgyud la tshul bzhin du sgrub par byed pa ste sgom pa'i dam tshig dang*/__bar ma gsum po phyi ltar na spyod pa'i dam tshig gtso che'o/__/rtsa ba'i dam tshig gsum dang yan lag nyer lnga bsdams pas dam tshig nyer brgyad ces ma hA'i spyi skad du grags so/__/lhag pa'i dam tshig ni/__spyi dang khyad par gyi dam tshig la gnas pa'i gang zag gis sgrub pa la sogs pa'i skabs su bsrung bar bya ba lhag par bsten pa'i dam tshig__/gcan gzan gyi rgyal po'i khri mi bshig pa la sogs nyi shu ste/__brdas bstan pa'i don go bde bar bkrol na/__rdo rje slob dpon gyi sku+u la mi 'tshe zhing bka' mi gcog__/bla ma'i yum la mi spyod/__dad can tshogs mi gcog__/dkon cog dang mkhas pa'i dkor la mi 'bag cing chang myos par mi 'thung*/__rdo rje spun gyi yum la mi spyod/__mtshan ngan gyi gzungs ma mi bsten/__mtshan nyid dang mi ldan pa'i dam rdzas mi bsten/__mkhas pa'i yon tan la mi gshe__/snod min la gsang chos mi ston/__mtshan ldan gyi gzungs ma dang*/__snod ldan gyi slob ma mi spang*/__don bde stong dang rtags yab yum dang mi 'bral/__mched la kyal ka tsam du'ang nang 'thab mi byed/__gzhan gyis spyad pa'i lhag mi spyod/__bla ma'i gdan sa mi rlom/__rang gzhan gyi mtshams mi 'dral/__ting 'dzin bying rgod kyi dbang du mi gtong bzlas pa dang cho ga mi tshig gis bar mi gcod/__dbang rtags kyi phyag rgya las mi 'da' zhing brda mi brjed/__rnal 'byor pa'i dkyil 'khor mi dkrugs shing skye bo'i mthu zlog mi byed/__slob dpon gtsug tu khur ba las nyams par mi bya ba rnams so/__/de dag srung ba'i thabs ni/__gnang bkag gi gnas rnams mi brjed pa'i dran pa dang*/__dam tshig las 'das ma 'das rtog dpyod byed pa'i shes bzhin dang*/__gzob pa lhur len pa'i bag yod dang*/__nyams na bdag nyid ngan snyam du rang la brten nas 'dzem pa'i ngo tsha shes pa dang*/__yul gzhan la brten nas 'dzem pa'i khrel yod pa dang*/__nyams pa'i nyes dmigs mthong bas 'jigs pa dang*/__phan yon la brod pas gus pa ste de dag gi sgo nas 'bad pas bsrung ba'o/__/de yang sdom 'byung las/__ci ste dngos grub mchog 'dod na/__/srog ni yongs su gtong yang sla/__/'chi ba'i dus la bab kyang sla'i/__/rtag tu dam tshig bsrung bar bya/__/zhes so/__/nyams na phyir bcos pa ni/__yul gang zag las nyams pa rnams de dag gi drung du bshags shing*/__gzhan rnams 'gyod sdom gyi sgo nas ji ltar rigs pas bshags par bya la/__nyams pa chen po ni/__yul gang la brten nas nyams kyang rung ste/__thog mar so so'i lugs bzhin bshags nas slar dbang dang dam tshig nod par bya ba yin no/__/sngags pas rtsa ba'i dam tshig las 'gal na rdo rje'i dmyal bar zang thal du 'gro bas mtshon nyams pa'i nyes dmigs dang*/__dam tshig tshul bzhin tu bsrung na rab tshe gcig__/'bring dang tha mas skye ba bdun nam bcu drug tshun la mchog 'grub pa sogs gnas skabs dang mthar thug gi phan yon dpag tu med par gsungs so/__/gsum pa skyed bsring ba la gnyis/__tshig gong ma dang mtshams sbyor ba'i tshul gyis ming bstan pa dang*/__de'i don rgyas par bshad pa'o/__/dang po ni/__de ltar rgyud smin dag pa'i gang zag gis:__sa bon skyed byed lam gyi rim pa ni:__zhes gsungs te/__de ltar dbang bzhis rgyud smin cing dam tshig ma nyams pas sgo gsum rnam par dag pa'i gang zag sngags kyi lam las dngos grub myur du sgrub par 'dod pa dag gis sa bon btab pa de nyid byang chub kyi lam du skyed bsring bar byed pa'i thabs zab mo lam gyi rim pa ni 'di ltar ro/__/zhes so/__/de'ang rdo rje theg pa'i lam rim dngos ni bskyed rdzogs gnyis yin la de gnyis kyi spyi don cung zad bshad na/__rim gnyis so so'i ngo bo/__/nges tshig__/dbye ba/__go rim/__dgos pa ste lnga las/__dang po bskyed rim gyi ngo bo ni/__rjes dpag gi lha'i rnal 'byor te/__mtshan nyid zhu bde dang mtshungs ldan du gyur pa bcos shing brtags pa las byung ba'i lha sku snang stong*/__de yang khyad gzhi rnam rtog gis brtags pa'i lha sku la/__khyad chos cho ga'i khyad par rgyal bas sngags rgyud las gsungs pa'i bskyed chog gi rim pa tshang ba/__rang 'bras kyi khyad par sngags kyi mthu bskyed nus pa/__ngo bo'i khyad par thun mong ma yin pa'i zhu bde'i cha shas dang stong nyid kyis rgyas btab pa/__byed las kyi khyad par dag rdzogs smin gsum tshang ba ste khyad chos bzhi ldan no/__/rdzogs rim gyi ngo bo ni/__mngon sum pa'i lha'i rnal 'byor te/__mtshan nyid zhu bde dang mtshungs ldan du gyur pa'i bcos min gyi lha sku snang stong mi brtan pa rgyu'i rdzogs rim dang*/__de brtan pa 'bras bu'i rdzogs rim gyi mtshan nyid/__de yang khyad gzhi rnam par mi rtog pa'i ye shes la/__khyad chos rgyu'i khyad par rdo rje'i lus la gnad du bsnun pa/__byed las kyi khyad par rtsa rlung thig le dbu mar dag byed/__rnam pa'i khyad par bde ba chen po dang stong gzugs lhan cig pa ste khyad par gsum ldan no/__/gnyis pa ni/__bskyed rim gyi skad dod ut+pat+ti kra ma zhes pa'i ut+pat+ti ni bcos pa'am btags pa sogs la 'jug pas rnam par rtog pas gsar du bcos pa'am btags pa'i don te bskyed pa yin la gang las bcos shing gdags pa'i gzhi ni rdzogs pa'i rim pa ste/__de nyid kyi skad dod niSh+pan+na kra ma zhes pa'i niSh+pan+na ni ma bcos pa/__grub pa/__rdzogs pa sogs la 'jug pas bcos med shugs 'byung gi don no/__/de gnyis ka'i kra ma ni rim pa ste thabs sam lam gyi go rim gyi don du 'gyur ro/__/gsum pa ni/__ngo bo'i sgo nas dbye na/__bcos shing btags pa rjes su dpag pa'i lha'i rnal 'byor gyi lam 'khor bcas la bskyed rim dang*/__bcos ma dang bral ba mngon sum pa'i lha'i rnal 'byor gyi lam 'khor bcas la rdzogs rim ste gnyis/__sbyang bya sbyong byed la ltos na/__kun rdzob 'jig rten skye ba'i rim pa dang sbyar te bskyed rim kun rdzob bden pa'i rnal 'byor dang*/__don dam 'jig rten 'gag pa'i rim pa dang sbyar te rdzogs rim don dam bden pa'i rnal 'byor zhes pa gnyis/__sgom tshul gyi sgo nas/__skye gnas bzhi'i bag chags sbyong ba dang bstun nas bskyed rim sgom tshul bzhi ste/__sgyu 'phrul drwa ba las/__skye gnas bzhi po dag bya'i phyir/__/bskyed pa'ang de bzhin rnam pa bzhi/__/spros can spros dang spros pa med/__/shin tu spros pa med bzhi'o/__/zhes so/__/rdzogs rim ni/__kun rdzob rang byin rlabs pa'-i rim pa rtsa rlung thig le'i rnal 'byor dang*/__gzhan lus la brten pa dkyil 'khor 'khor lo/__de dag rnams kyi rgyas 'debs su gyur pa don dam 'od gsal chen po brjod med lhan cig skyes pa'i rim pa spyi dang*/__khyad par rdzogs pa chen po sems klong man ngag gi sde rnams so/__/bzhi pa ni/__gnas lugs kyi lam la 'jug pa'i sngon du rgyud sbyong ba'i phyir bskyed rim lam gyi sngon 'gror sbyar zhing*/__rgyud byang nas gnas lugs dngos bsgom pa'i phyir rdzogs rim lam gyi dngos gzhi yin pa'i rim pa'am/__ye shes kyi tshogs kyi gzhi 'ding ba bsod nams kyi tshogs dang*/__ye shes kyi tshogs khyad par can rnam pa thams cad pa'i ye shes skye ba'i gegs bsal ba'i rgyur yang bsod nams kyi tshogs bskyed pa'i rim pa bsgom pa sngon du 'gro dgos pa'i phyir te/__rdo rje snying 'grel las/__rnam rtog bag chags kyis bcings pa/__/thog mar rtog pa'i cho ga bstan/__/rnam rtog rang bzhin shes pa na/__/mi rtog pa la 'jug par bya/__/zhes dang*/__rim lnga las kyang*/__bskyed pa'i rim la legs gnas shing*/__/rdzogs pa'i rim pa 'dod rnams la/__/thabs 'di rdzogs pa'i sangs rgyas kyis/__/skas kyi rim pa lta bur gsungs/__/zhes 'byung ste mdor na sbyang bya 'khrul pa kun brtags dang sa bon gyi cha gnyis sbyong byed rten dang brten pa/__grub 'bras thun mong dang mchog gi go rim sogs la ltos pa'o/__/lnga pa ni/__snod bcud tha mal du 'dzin pa spong zhing*/__lam ma dag sa bdun dang*/__'bras bu gzugs sku'i rten 'brel sgrig pa'i phyir dang*/__khyad par rang gi dngos 'bras 'jig rten pa'i dngos grub 'grub pa ni bskyed rim dang*/__'pho ba'i bag chags kyi dri ma spong zhing*/__lam dag pa sa gsum dang 'bras bu lhan cig skyes sku'i rten 'brel sgrig pa'i phyir dang*/__khyad par rang gi dngos 'bras phyag rgya chen po mchog gi dngos grub 'grub pa ni rdzogs rim gyi dgos pa ste/__snying po'i rgyud phyi ma las/__'jig rten pa yi dngos grub ni/__/bskyed pa'i rim pa'i sbyor bas thob/__/'jig rten 'das pa'i dngos grub ni/__/rdzogs pa'i rim pa'i sbyor bas so/__/zhes pa ltar ro/__/gnyis pa la bzhi/__bum dbang dang rjes su 'brel ba'i bskyed rim snang stong zung 'jug bsgom pa/__gsang dbang dang rjes su 'brel ba'i zab lam gsal stong zung 'jug bsgom pa/__dbang gsum pa dang rjes su 'brel ba'i pho nya'i lam bde stong zung 'jug bsgom pa/__dbang bzhi pa dang rjes su 'brel ba'i rdzogs chen rig stong zung 'jug tu bsgom pa'o/__/dang po la gsum/__bskyed rim gyi dgos pa bstan pa/__bskyed rim dngos/__de'i don bsdu ba'o/__/dang po ni/__dang po bum pa'i dbang dang rjes 'brel ba:__snod bcud thal mal snang zhen sbyang ba'i phyir:__thun mong khyad par bskyed rim dag la bslab:__ces gsungs te/__lam gyi rim pa de la'ang dbang bzhi so so dang rjes su 'brel ba'i lam bzhi yod pa las/__dang po bum pa'i dbang dang rjes su 'brel ba'i lam ni/__brtan pa snod dang g.yo ba bcud kyi 'jig rten tha mal gyi dngos por snang ba la de dang der zhen pa'i kun tu rtog pa 'di nyid sbyang bar bya ba'i phyir du/__thun mong ba ma hA dang khyad par ba yo ga gong ma gnyis kyi tshul dang mthun pa'i bskyed rim dag la bslab par bya'o/__/gnyis pa la gnyis/__sdom gyi sgo nas mdor bstan/__de'i don rgyas par bshad pa'o/__/dang po ni/__de la bsgrub bya'i lha dang sgrub byed thabs:__ji ltar bsgrub pa'i lam dang 'bras bur bcas:__zhes gsungs te/__de'ang dper na tshong don du gnyer ba la/__bsgrub bya rin thang che ba'i nor/__sgrub byed rin thang dpog pa'i zong*/__sgrub tshul tshong gi thabs la mkhas pas/__grub 'bras 'dod pa'i nor bde blag tu thob pa bzhin/__bskyed rim gyi lam de la'ang bsgrub bya chos dbyings rang bzhin gyis rnam par dag pa'i lha dang*/__ye shes kyi bdag nyid kyi lha dang*/__de dag gi byin rlabs mtshan ma'i lhar grags pa ste gsum/__sgrub byed kyi thabs sngon 'gro dngos gzhi rjes kyis bsdus pa rnams dang*/__ji ltar sgrub pa'i tshul phyag rgya gcig spros tshom bu tshogs kyi sgrub pa rnams dang*/__bsgrubs pa'i 'bras bu rig 'dzin bzhir grub pa'i tshul dang bcas ltos nas 'brel ba'i tshul gyis rim par bstan par bya'o/__/gnyis pa la bzhi/__gang bsgrub bya'i lha/__gang gis sgrub pa'i thabs/__ji ltar sgrub pa'i lam/__de ltar bsgrubs pa'i 'bras bu'o/__/dang po ni/__bsgrub bya bla ma yi dam mkha' 'gro'i tshogs:__zhi dang khro bo'i bye brag bsams 'das kyang :__byin rlabs dngos grub khyad par myur 'dod na:__rtsa gsum kun 'dus pad+ma nga nyid bsgom:__de yang phyi ltar bar chad kun sel phyir:__snang srid zil gnon sku gsum pad+ma 'byung :__rig 'dzin rtsal 'chang rnam 'phrul bcu gnyis bcas:__spy-i dang bye brag tshul du bsnyen par bya:__nang ltar mchog thun bsam pa lhun grub phyir:__bde ba chen po pad+ma saM b+ha ba:__yid bzhin nor bu gu ru bcu gsum bcas:__bskyed rdzogs thabs dang grol ba nye bar bsnyen:__gsang ba dbyings dang rig pa dbyer med pa:__phyag rgya'i gzugs shar mtsho skyes rdo rje 'chang :__rtsa gsum kun 'dril snying po'i rnal 'byor gyis:__mi 'gyur lhan cig skyes pa'i ye shes bsgrub:__yang gsang rig 'dzin rdo rje drag po rtsal:__bde gshegs kun 'dus khrag 'thung yongs rdzogs lha:__sgrub pa chen po nye rgyu'i spyod pa yis:__mthar thug sku dang ye shes mngon du bya:__zhes gsungs te/__de la dang po bsgrub par bya ba'i lha ni spyir gong du smos pa ltar gsum las/__dang po ni/__'od gsal byang chub kyi sems stong gsal 'gag pa med pa'i gnas lugs ye shes gsum ldan te/__ngo bo rang bzhin thugs rje gsum du 'gro ba kun la khyad par med par gdod nas bzhugs pa ni dam tshig sems dpa' dang*/__gnyis pa ni/__'khor 'das thams cad la khyab pa sangs rgyas thams cad kyi chos kyi sku ye shes sems dpa' ste/__de gnyis gdod ma nas dbyer mi phyed pa'i rang bzhin can du bzhugs pa ni dam ye gnyis med kyi don te/__dri ma sbyang ba'i gzhi nor bu rin po che lta bu'o/__de la rgyu'i theg par rigs dang khams dang bde bar gshegs pa'i snying po sogs kyis bstan la/__sngags kri ya bas bdag gi de kho na nyid dang*/__u b+ha yas byang chub kyi sems/__/yo gas thog mtha' med pa'i byang chub kyi sems sam byang chub kyi sems kun tu bzang po dang*/__ma hA yo ga bas rang rig pa byang chub kyi sems lhag pa'i bden pa dbyer med spyod yul dang bral ba'am bden pa dbyer med lhag pa'i chos sku chen po/__a nus dbyings ye shes gnyis su med pa'i sras bde ba chen po rtsa ba byang chub sems kyi dkyil 'khor zhes btags shing*/__man ngag sde pas/__lus can rnams kyi snying dbus na dwangs ma lnga 'dus la brten pa'i sems nyid 'od gsal ba'i chos sku byang chub kyi sems bzhugs par gsungs pa dang*/__gzhan du ma dag pa'i phung khams skye mched kyis bsdus pa'i chos 'di dag gi snang gzhi gnyug ma'i phung sogs sam phung khams skye mched gzhan zhes grags pa ye nas gdan gsum tshang ba'i lha'i dkyil 'khor du rnam par dag pa dang*/__shin tu phra ba'i sgo gsum gdod ma nas rdo rje mi shigs pa gsum gyi lha'i bdag nyid du gnas par bshad pa rnams kyang don gcig tu 'bab bo/__/de ltar yin kyang rang ngo ma shes pas tha dad du bzung bas 'khrul te ma rtogs pa ni sbyang bya'i dri ma 'dam rdzab lta bu ste/__dper na nor bu nyid 'dam kyi dri ma las ma grol bar rang gi bya ba byed mi nus pa ltar gnyis med kyi don de yang ma rtogs na yin pa tsam gyis phan mi thogs pas dri ma sbyang dgos la/__de sbyong byed kyi thabs ni 'khrul pa glo bur ba kun brtags kyi cha rnams bskyed rim gyis dang*/__sa bon gyi cha ni rdzogs rim gyis sbyong ba yin cing*/__ji ltar sbyaung na/__'khrul pa'i chos las nyon sdug bsngal gyi rnam par shar ba'i rigs rgyun de nyid lam bde ba chen por sgyur bar byed pa la/__sgyur tshul de'i rang ngo la bsal bzhag med par bzhag pas gang shar gyi rang bzhin dag snang du 'char ba'i gnad kyis te/__rgyu mtshan des gsang sngags kyi theg pa 'dir kun 'byung bden pa'i rang bzhin lam bden dang sdug bsngal bden pa'i rang bzhin 'gog bden du snang bas 'bras bu lam byed kyi don yang de yin pa'i phyir na mtshan nyid theg pa bas gzhi spong bgegs sbyong ba'i lam las khyad par du 'phags pa'o/__/de ltar bsgrub gzhi dam ye dbyer med dngos zin nas skabs kyi bsgrub bya dngos/__de dag gi byin rlabs sam rtsal las shar ba'i mtshan ma'i lha ste/__de'ang ngo bo brgyud gsum gyi bla ma rig 'dzin/__/theg rim dgu'i yi dam/__gnas gsum mkha' 'gro'i tshogs te rtsa ba gsum/__rnam pa zhi ba dang khro bo/__chags bral dang chags bcas/__'khor lo'i dbang phyug dang 'khor kyi tshul du bstan pa'i bye brag bsam las 'das pa yod kyang*/__byin rlabs dang dngos grub rnam pa gnyis gzhan las khyad par du mas 'phags pa myur du thob par 'dod na rtsa ba gsum po de kun gyi gsang gsum yon tan phrin las dang bcas pa gcig tu 'dus pa pad+ma thod phreng rtsal nga nyid bsgom par bya'o/__/de ltar yang thugs sgrub gsang 'dus gnad yig las/__nga sgrub sangs rgyas thams cad 'grub:__nga mthong sangs rgyas thams cad mthong :__nga ni bde gshegs 'dus pa yin:__ces dang*/__byang gter las/__dus gsum sangs rgyas ma lus thams cad kyis:__dbang bskur rjes gnang rdo rje drag po rtsal:__pad+ma 'byung gnas nga nyid sgom pa yis:__zhi khro rab 'byams thams cad rdzogs par 'gyur:__ces sogs 'byung ba ltar ro/__/de ltar bde gshegs kun 'dus gu ru pad+ma sgrub pa'i tshul gter kha re rer yang spyi dang khyad par mtha' yas pa zhig mchis pa las/__'dir snyigs ma'i rgud pa mthar thug pa skyob pa'i dpal mgon gcig pu pa gter 'byin rig 'dzin grub pa'i rgyal po rnam pa gnyis kyi zab gter dang 'brel ba'i dbang du byas nas/__phyi ltar byang chub sgrub pa'i lam la 'phral dang yun tu phyi nang gsang ba'i gegs dang bar chad kun sel ba'i phyir du/__snang srid zil gyis gnon pa'i dkyil 'khor gtso bo rgyal ba sku gsum gyi rnam par shar ba gu ru pad+ma 'byung gnas la/__'khor gu ru rgyal ba'i gdung 'dzin sogs rig 'dzin rtsal 'chang chen po rnam 'phrul bcu gnyis/__sgo srung dpa' bo yab yum gyis bskor ba bcas dkyil 'khor yongs rdzogs spyi dang*/__bye brag chos sku tshe dpag med lha bcu gsum pa sger du phyung bas mtshon so so'i tshul du bsnyen par bya ste rgyal po chen po la snyan gsan 'bebs pa lta bu'o/__/nang ltar mchog dang thun mong gi dngos grub yid la gang bsam pa thams cad lhun gyis grub pa'i phyir du/__gtso bo khyab bdag bde ba chen po gu ru yid bzhin nor bu la/__'khor gu ru che ba'i che mchog sogs rnam 'phrul bcu gsum sgo srung bzhi dang bcas pa/__bskyed pa dang rdzogs pa'i rim pa gnyis la brten nas thabs lam dang grol ba'i lam la zhugs nas nye bar bsnyen par bya ste rgyal po la 'brel btags pa lta bu'o/__/gsang ba don rang sems chos thams cad gyi gnas lugs dbyings ka dag dang lhun grub rig pa dbyer med zung du 'jug pa nyid rtags phyag rgya'i gzugs su shar ba mtsho skyes rdo rje 'chang chen po/__rtsa ba gsum po kun kha gcig tu 'dril ba rang byung bde chen rol pa'i 'khor lo nyid/__/bskyed rdzogs dbyer med lam zab snying po'i rnal 'byor gyis nyams su blangs nas mi 'gyur lhan cig skyes pa'i ye shes bsgrub par bya ste rgyal po mnyes nas 'dod don sgrub pa lta bu'o/__/yang gsang rig 'dzin gtso mchog rdo rje drag po rtsal phyogs dus kyi bde bar gshegs pa kun 'dus shing 'bar ba chen po khrag 'thung rol pa'i dkyil 'khor rab 'byams yongs su rdzogs pa'i yi dam gyi lha gsang ba gcig 'grub nyid/__sgrub pa chen po dang 'brel ba'i nye rgyu'i spyod pa'i brtul zhugs la brten nas mthar thug gi 'bras bu sku dang ye shes lnga mngon du bya ste/__rgyal po'i go sar rang nyid 'khod nas dbang bsgyur ba bzhin no/__/gnyis pa gang gis sgrub pa'i thabs bstan pa la gnyis/__mdor bstan/__rgyas bshad do/__/dang po ni/__gang yang sgrub byed thabs kyi rim pa ni:__sngon 'gro dngos gzhi rjes kyi bya bas 'jug:__ces gsungs te/__de ltar bsgrub bya bla ma phyi nang gsang ba yang gsang de dag gang la'ang sgrub byed thabs kyi rim pa ni/__thog mar sngon du 'gro ba bsags sbyong 'gal spong mthun sgrub kyi rim pa dang*/__bar du dngos gzhi bskyed pa'i rnal 'byor yan lag dang bcas pa dang*/__mthar phrin las kyi kha skong ba rjes kyi bya ba ste rnam pa gsum gyis nyams len la 'jug par bya'o/__/gnyis pa la gnyis/__rtsa ba'i dkyil 'khor sgrub pa'i thabs dang*/__de la brten pa'i phrin las rab 'byams sgrub pa'i thabs so/__/dang po la gsum/__sngon 'gro/__dngos gzhi/__rjes kyi bya ba'o/__/dang po la'ang gnyis/__khrid kyi sngon 'gro dang*/__cho ga'i sngon 'gro'o/__/dang po khrid kyi sngon 'gro la'ang bzhi/__lam gyi rtsa ba skyabs sems/__'gal rkyen sdig sgrib sbyong ba rdor sems bsgom bzlas/__mthun rkyen tshogs bsags pa maN+Dal gyi rim pa/__byin rlabs myur du 'jug pa bla ma'i rnal 'byor ro/__/dang po ni/__de la skyabs song byang chub sems bskyed nas:__zhes pa ste/__sgrub byed kyi thabs de la'ang thog mar yul khyad par can la skyabs su song zhing*/__lhag pa'i bsam pas byang chub mchog tu sems bskyed pa sngon du btang nas nyams len rnams la rim gyis 'jug par bya dgos te/__sangs rgyas kyi chos thams cad kyi gzhi'am rtsa ba yin pa'i phyir/__de dag gi don rgyas par gong du bstan zin cing mdor bsdu na/__skyabs 'gro'i rgyu nges 'byung dang gzhan phan gyi bsam pa/__yul tshangs sogs log pa'i ston pa dang rtag chad kyi lam dang de 'dzin gang zag bcas spangs nas/__de dag las khyad par du mas 'phags pa thun mong dkon mchog gsum/__khyad par rtsa ba gsum/__kun 'dus rdo rje slob dpon la/__gang zag rang gis thog drangs mar gyur mkha' khyab gyi 'gro bas/__dus byang chub ma thob kyi bar du/__tshul ci mdzad khyed shes kyi gus pa chen pos/__dmigs 'don phrin las so so'i gzhung las gsung pa ltar byed pa ni*/__yul dang byed po gnyis su 'dzin pas kun rdzob rgyu'i skyabs 'gro dang*/__sems nyid ye nas rang bzhin rnam dag ye shes sum ldan dkon mchog rtsa gsum du lhun gyis grub pa la de ltar shes pas yul dang byed po gnyis med du rtogs pa ni don dam 'bras bu'i skyabs 'gro ste/__ye shes grub pa las/__dag thob bral ba'i sems sangs rgyas/__/mi 'gyur dri med chos dang ni/__/yon tan lhun rdzogs dge 'dun nyid/__/yin phyir rang gi sems nyid mchog__/ces so/__/sems bskyed kyang mdor na rten snying rje dang*/__brten pa byang chub kyi sems zung du 'brel bas kun rdzob smon 'jug dang*/__don dam spros pa thams cad dang bral ba'i gnas lugs 'od gsal ba'i dbyings su mnyam par 'jog pa la gnad thams cad tshang ste/__myang 'das las/__kun rdzob don dam dbye ba yis/__/byang chub sems de rnam pa gnyis/__/zhes so/__/gnyis pa ni/__nyams rtogs yon tan skye ba'i gegs gcig pu:__sdig ltung la 'gyod bla ma rdo rje sems:__skyabs su bzung zhing lha bsgom sngags bzlas te:__bshags sdom drag pos rang rgyud legs par sbyang :__zhes gsungs te/__spyir so so skye bo'i rgyud la thog med nas bsags pa'i sgrib gnyis bag chags dang bcas pa tshan po che yod pas thar pa dang rnam mkhyen la bar du gcod cing*/__khyad par lam gyi dngos gzhi'i nyams myong dang rtogs pa'i ye shes tshul bzhin du mi skye ba'i gegs gcig pu ni/__sngar bsags kyi sdig pa dang bcas pa las 'gal ba'i ltung ba rnams yin pas de dag la gnong zhing 'gyod pa chen pos de sbyong byed kyi gnyen po khyad par du 'phags pa/__bla ma dang dbyer med pa'i bcom ldan 'das rdo rje sems dpa' skyabs su rtse gcig par bzung zhing*/__phyi nang gsang ba'i rnal 'byor gang rung dang 'brel bar sku lha'i rnam pa bsgom/__snying po'i gsang sngags yi ge brgya pa bdud rtsi 'bebs sbyong sogs dmigs pa'i 'phro 'du dang bcas te bzla/__sdig ltung sngar byas bshags shing phyin chad mi bya ba'i sdom sems drag pos rang gi rgyud legs par sbyangs nas rnam par dag par bya'o/__/de'ang chos bzhi bstan pa'i mdo las/__byams pa/__byang chub sems dpa' chos bzhi dang ldan na sdig pa byas shing bsags pa thams cad zil gyis non par 'gyur ro/__/bzhi gang zhe na/__'di lta ste/__rnam par sun 'byin pa kun tu spyod pa dang*/__gnyen po kun tu spyod pa dang*/__sor chud pa'i stobs dang*/__rten gyi stobs so/__/zhes gsungs pa ltar sdig pa bshags pa la stobs bzhi tshang dgos shing de tshang na sdig pa'i phung po ri rab tsam yang bshags pa tshad ldan lan gcig gis byang bar 'gyur te/__mdo las/__gang gis bskal pa du ma ru/__/sdig pa shin tu mi bzad bgyis/__/lan cig rab tu bshags pa yis/__/de dag thams cad byang bar 'gyur/__/ces so/__/de la skabs 'dir rten gyi stobs ni/__bshags yul kyi rten bla ma rdo rje sems dpa'/__rang rgyud kyi rten de la rtse gcig gus pas skyabs su 'gro ba dang byang chub kyi sems mi gtong ba yin la/__de'ang 'dir bdag gzhan gyi sdig sgrib dag par mdzad du gsol snyam pa dang*/__sngags don bsam pa la tshang*/__sngags don ni/__rdo rje sems dpa' dam tshig rjes su skyong*/__zhes sogs gsol 'debs thugs rgyud bskul ba'i tshig yin/__gnyen po kun tu spyod pa'i stobs ni mi dge ba'i gnyen por dge ba la spyod pa ste 'dir lha sgom sngags bzla sdig sgrib bkru ba'i dmigs gnad sogs yin/__sun 'byin pa'i stobs sngar byas la 'gyod pa dang*/__sor chud pa'am slar ldog pa'i stobs phyin chad sdom pa'i sems yin pas/__stobs gnyis po de bzlas pa'i 'jug tu bdag ni mi shes sogs tshigs bcad lhug gi bshags pa bton na de la tshang zhing*/__gal te mi 'don na'ang gnong 'gyod med na bshags pa'i blo mi skye zhing*/__'gyod pa gsha' ma zhig skyes phyin chad nyes dmigs shes pas sdom sems shugs la 'byung ba chos nyid do/__/'di nyid gsang sngags bla med kyi nang gi khrus yin pas thog mar sbyor ba'ang shin tu 'brel chags pa yin cing*/__spyir bsgom bzlas 'di'i phan yon tshad med par gsungs te/__dgongs pa tshig gsum pa'i rgyud las/__rdo rje sems dpa' bsgoms nas ni/__/sngags kyang rab tu bzla byed pa/__/de yi sdig kun byang nas ni/__/rdo rje sems dpa' 'dra bar 'gyur/__zhes dang*/__rdo rje sems dpa' glu'i rgyud las/__rang byung thig le yi ge brgya/__/sangs rgyas kun gyi sa bon te/__/nyams chags thams cad 'joms par byed/__ces dang*/__dri med bshags pa'i rgyud las/__'di dag dus gcig la brgya rtsa brgyad bzlas na/__nyams chags thams cad bskangs te/__ngan song gsum las thar bar 'gyur ro/__/zhes sogs rgya cher gsungs so/__/gsum pa ni/__ye shes bsod nams tshogs la rag las phyir:__rtsa gsum rgya mtshor phyi nang snod bcud dang :__phung khams skye mched rang byung byang chub sems:__mkha' khyab mchod sprin nam mkha'i mdzod du 'bul:__zhes gsungs te/__'phags pa klu sgrub kyis/__de 'dra'i sa bon thams cad las/__/rgyu dang 'dra ba'i 'bras bu 'byung*/__/sa bon med par 'bras yod pa/__/shes ldan gang gis sgrub par nus/__/zhes pa ltar chos thams cad rgyu 'bras 'brel ba can tu grub pas/__bden gnyis dbyer med kyi lta bas gzhi bzung*/__tshogs gnyis zung 'brel du rdzogs pas rgyu byas/__chos sku dang gzugs sku'i 'bras bu 'byung ba yin cing*/__de'ang rin chen phreng ba las/__/gzugs kyi sku de mdor bsdu na/__/bsod nams tshogs las 'byung ba ste/__/chos kyi sku de mdor bsdu na/__/rgyal po ye shes tshogs las 'khrungs/__/zhes gsungs pa ltar 'bras bu'i mthar thug chos sku thob pa'i rgyu mthun zhi lhag gis bsdus pa'i ye shes kyi tshogs yin la/__de'ang bsod nams kyi tshogs bsags pa la rags las shing sbyin sogs phar phyin gyis bsdus pa'i bsod nams bsags thabs mtha' yas pa zhig mchis kyang*/__bya sla la don che ba maN+Dal phul ba las lhag pa gang yang med pas de la 'bad dgos pa yin pas/__de'ang gang la 'bul ba'i yul sgrub pa'i maN+Dal rtsa gsum rab 'byams rgya mtsho mkha' khyab kyi 'khor lor mngon sum bzhin tu bzhugs par mos pa la/__'bul bya'i dngos po mchod pa'i maN+Dal gtsang zhing dag pa gya nom pa lag len mthong brgyud ltar bkod pas dmigs rten du byas te/__phyi ltar na dbang chen gser gyi sa gzhi la brten pa'i ri rab gling bzhi nyi zla sogs snod kyi 'jig rten lha mi'i 'byor tshogs bsam gyis mi khyab pa'i bcud kyis yongs su gtams pa dang*/__nang ltar na/__rang lus phung po lnga khams lnga skye mched drug gis bsdus pa dkyil 'khor du lhun gyis grub pa ste/__pags pa gser gyi sa gzhi/__khrag byug pa/__sgal tshigs ri rab/__yan lag bzhi gling bzhi/__rtsa ro rkyang nyi zla/__byang chub kyi sems lha ma'i 'byor tshogs sogs rang lus snod bcud kyi 'jig rten rin po che'i 'byung gnas su dmigs pa dang*/__gsang ba ltar na/__'khor 'das kyi rgyur gyur pa'i kun gzhi gser gyi sa gzhi de nyid snying rje byang chub kyi sems dang ma bral ba dri'i byug pa/__rang rig pa rang byung 'od gsal byang chub kyi sems rin po che'i ri rab/__de las tshad med bzhi dang dga' ba bzhi dang ye shes bzhi sogs 'byung ba gling bzhi thabs shes zung du 'brel ba nyi zla la sogs par lhun gyis grub pa ste/__mdor na yul chos kyi dbyings gzod ma nas rang bzhin gyis rnam par dag pa me long shin tu dwangs pa lta bu'i ngos la/__rang rig pa rang byung gi ye shes mi 'gyur ba'i bde ba chen po'i rol pa cir yang ma 'gags pa'i rtsal snang gzugs brnyan lta bu nam mkha'i mthas gtugs par khyab pa'i mchod pa'i sprin chen byang chub sems dpa' nam mkha' mdzod kyi smon lam gyi stobs las rnam par 'phrul pa ltar mos shing 'khor gsum yongs dag gi ngang du 'bul lo/__/de ltar phyi nang gsang ba thams cad mchod sprin stobs pa'i ldog cha nas bsod nams dang*/__mi dmigs pa'i shes rab kyis zin pa'i ldog cha nas ye shes kyi tshogs su 'gyur ba yin la/__maN+Dal 'di nyid dngos po chung yang dmigs pa dang bsam pa'i thabs khyad par can gyis spel bas bsod nams mtha' yas pa thob par 'gyur te/__ji skad du/__pha rol phyin pa 'di rnams nyid/__/thub pas maN+Dal byas pas thob/__/bde gshegs pho brang dam pa 'di/__/lus kyis las rnams byas pa ni/__/gser gyi kha dog dang ldan zhing*/__/nad kun las ni grol ba dang*/__/zla ba ltar gsal yid 'ong ba'i/__/lha mi khyad par 'phags pa dang*/__/nor dang gser ni phun tshogs pas/__/rgyal po'i rigs su skye bar 'gyur/__/zhes dang*/__ka ma la shI las/__gling bzhi phul ba'i bsod nams kyis/__/bdud bzhi ma lus zhi bar 'gyur/__/gling phran phul ba'i bsod nams kyis/__/tshad med bzhi dang ldan par 'gyur/__/rin chen sna bdun phul ba yis/__/'phags pa'i nor bdun thob par 'gyur/__/gter chen phul ba'i bsod nams kyis/__/mi zad longs spyod 'phel bar 'gyur/__/nyi zla phul ba'i bsod nams kyis/__/lta sgom sems la gsal bar 'gyur/__/rin chen phul ba'i bsod nams kyis/__/rang byung ye shes thob par 'gyur/__/maN+Dal gcig phul drug dang ldan/__/bsod nams tshogs ni bsam mi khyab/__/des na de la brtson par bya/__zhes so/__/bzhi pa ni/__khyad par byin rlabs dngos grub kun gyi gzhi:__bla ma'i rnal 'byor mos gus gnad du bsnun:__tshogs bsags gsol gdab dbang bzhi'i ye shes blang :__thugs yid gcig bsres dgongs pa'i rang ngo bskyang :__zhes gsungs te/__bsags sbyang de dag kun las kyang sngags kyi lam 'dir khyad par du gal che ba ni/__rang rgyud la byin rlabs myur du 'jug pa dang thun mong dang mchog gi dngos grub kun gyi gzhi rten du gyur pa ni bka' drin sum ldan gyi rtsa ba'i bla ma kho na yin pas de nyid phyogs dus dkon mchog kun 'dus su nges pa'i shes pa brtan pos rnal 'byor du byed pa la 'bad cing*/__de'ang thog mar tshad med pa'i bka' drin dran te ci mdzad legs par mthong ba'i sgo nas mos gus la gnad du bsnun/__goms nas bcos min gyi mos gus drag pos tha mal gyi snang ba btsan thabs su sgyur nus pa la bslab/__de'ang thog mar khrid rim so so ltar yul lam rten gsal gdab/__spyi 'gro'i yan lag bdun pa'am khyad par rgyun bshags yan lag brgyad pa dang bcu pa gang rung gis tshogs bsag__/dad gus drag pos rtsa brgyud bla ma la gsol ba yang yang gdab/__mthar byin rlabs dbang bzhi'i ye shes lam dus 'od zer spros thim gyi tshul du blang*/__mos gus shugs kyis 'od du zhu nas rang la bstim/__bla ma'i thugs rnam par dag pa'i ye shes dang rang gi yid chu la chu bzhag pa ltar dbyer med gcig tu bsres la rang snang ris med chen po'i dgongs pa'i rang ngo rtsol bral lhug par bskyangs la mnyam par bzhag go__/de'i don cung zad smos na/__slob dpon b+ha bi lhas/__gang phyir rdo rje 'dzin pa yi/__/dngos grub slob dpon rjes 'brangs gsungs/__/zhes pa ltar/__rdo rje theg pa'i dngos grub thams cad bla ma dam pa'i rjes su 'brangs ba las gzhan cis kyang tshul bzhin grub pa ma yin pas bla ma'i rnal 'byor gyi lam la 'jug dgos/__de'ang rdo rje me long las/__rdo rje sems dpa' dkyil 'khor gtso/__/bla ma sangs rgyas kun dang mnyam/__/zhes pas rtsa ba'i bla ma de nyid so skye 'am 'phags pa gang yin kyang rung*/__sangs rgyas dngos su blta dgos shing*/__don la de bzhin gshegs pa gcig la gsol ba btab pas thams cad la btab par 'gyur na'ang*/__rang nyid kyi bsam pa'i khyer sos mos pa 'jug tshul gyi khyad par las phan yon rgya che chung 'byung bas na phyogs bcu'i dkon mchog kun 'dus su blta dgos pa dang*/__der ma zad bdag cag gi snang ngor sangs rgyas thams cad las kyang bka' drin che zhing ches lhag ste/__ci'i phyir zhe na bdag cag la sangs rgyas gzugs kyi sku dngos kyi zhal blta ba dang gsung thos pa'i skal bas phongs pa'i skabs 'dir rang rgyud la sangs rgyas kyi phrin las 'jog pa'i bdag rkyen mdzad pas sangs rgyas chos kyi sku'i zhal blta ba la sbyor ba'i bka' drin ni bsam gyis mi khyab cing sangs rgyas kun las lhag par nges pas so/__/de ltar yang nam mkha' dri ma med pa'i mdo las/__/kun dga' bo/__/de bzhin gshegs pa rnams ni sems can thams cad la snang ba'ang ma yin gyi/__dge ba'i bshes gnyen ni yongs su snang bas chos ston cing*/__/thar pa'i sa bon 'debs pa'i phyir/__de bzhin gshegs pa rnams las dge ba'i bshes gnyen lhag par zung zhig__/ces dang*/__khyad par sngags kyi theg pa 'dir rdo rje slob dpon gyi sku gsung thugs la dkyil 'khor gyi lha thams cad rjes su zhugs pa'i tshul gyis 'gro don mdzad pa yin pas/__rdo rje slob dpon la brnyas pa'am mchod na dkyil 'khor gyi 'khor lo thams cad la de ltar byas par 'gyur bas khe nyen gnyis ka gzhan las ches che ba yin cing*/__gsol 'debs kyi yul gsal gdab pa la'ang*/__ye shes pa ltar gzhan nas spyan 'dren pa dang*/__sngar yod gsal 'debs kyi tshul du sgom pa gnyis don la khyad par med de/__mdo las/__gang zhig rgyal ba yid byed pa/__/de yi mdun na de bzhugs te/__/rtag par byin gyis rlob par byed/__/ces so/__/tshogs bsags yan lag bdun pa mdo sde rnams las rgyas bsdus ci rigs pa phan yon bcas yang yang gsungs shing*/__dpal sbas kyis zhus pa'i mdo las/__gang zhig phyogs bcu'i sangs rgyas la/__/dmigs nas thal mo sbyar byas te/__/phyag 'tshal de bzhin mchod byed dam/__/bsod nams dag la yi rang zhing*/__/sdig pa dag kyang 'chags par bgyid/__/bskul dang gsol ba 'debs gyur pa/__/de yi bsod nams phung po ni/__/nam mkha' gang bar rtag tu 'byung*/__/zhes gsungs/__yan lag brgyad pa ni/__sangs rgyas gsang ba'i lam rim du/__/yan lan brgyad pa'i tshul bzung la/__zhes pa'i don sgeg pa rdo rje'i rgyun bshags rtsa bar/__rgyal ba 'khor bcas spyan drangs te/__bla ma snying por bzhugs pa la/__/phyag skyabs mchod dang bshags pa dang*/__/yi rang sems bskyed lus dbul dang*/__/byang chub chen por yongs su bsngo/__/zhes dang*/__de yi las byang du/__rdo rje slob dpon sangs rgyas dpal/__/ces sogs 'byung ba 'di'i skabs su mya ngan las mi 'da' bar gsol ba 'debs pa dang*/__chos 'khor bskor ba gnyis mi 'byung ba ni sngags kyi ston pa nges pa lnga ldan yin phyir mya ngan las 'da' bar mi ston pa dang*/__de bzhin du chos dus gsum dus med du ston pa las bskul ba la mi staus pas/__thun mong ma yin pa'i skabs 'dir de gnyis mi dgos par bzhed cing*/__gnyis po'i tshab tu skyabs sems lus dbul ba snan pas yan lag brgyad dang*/__bcu pa ni bka' brgyad yongs rdzogs dang gter rnying thugs sgrub 'ga' zhig las kyang 'byung zhing spyi mthun drug po'i steng du spyan 'dren bzhugs gsol/__bsngo ba dang smon lam khyad par phye bas bcur brtsi/__de dag gi dmigs pa ni 'dir yig tshogs la 'jigs pas ma spros so/__/gsol ba gang la 'debs pa'i yul yang rgyal ba dgongs brgyud/__rig 'dzin brda brgyud/__gang zag snyan brgyud gsum gyi steng du gter ma'i phyogs 'dir thugs rje byin rlabs/__mkha' 'gro gtad rgya/__smon lam dbang bskur gsum gyi chu bo yang sprul sku gter ston nyid la tshang bas brgyud pa drug ldan gyi rtsa brgyud rig 'dzin bla ma rnams phyogs dus dkon mchog rtsa gsum ma lus pa'i ngo bor shes pa dang*/__gang gis 'debs pa po mkha' mnyam 'gro ba kun gyi byang rang gis drangs pas dang*/__ji ltar 'debs na rtsa brgyud bla ma de rnams skyon kun zad yon tan kun rdzogs dgos 'dod kun 'byung du blo thag bcad nas re ltos lings bskyur gyi gdung shugs drag pos dang*/__gang gi phyir na/__rim gnyis sgom pa'i bar chad zhi zhing dngos grub spyi dang khyad par ye shes chen po'i byin rlabs rgyud la zhugs nas mchog gi dngos grub myur du 'grub pa'i slad du'o/__/bla ma'i rnal 'byor sgom pa'i phan yon ni/__kun 'dus rin po che'i rgyud las/__gang gis bskal pa 'bum phrag tu/__/lha sku 'bum phrag bsgom pa bas/__/bla ma cung zad dran pa mchog__/bsod nams 'di ni pha mtha' yas/__/zhes sogs gsar rnying rgyud gzhung kun las mtha' yas pa gsungs so/__/gnyis pa cho ga'i sngon 'gro la gnyis/__'gal rkyen bsal ba dang*/__mthun rkyen bsgrub pa'o/__/dang po la gnyis/__bgegs bskrad pa dang*/__srung ba'i 'khor lo bsgom pa'o/__/dang po ni/__rang bzhin ma grub ltar snang bgegs kyi tshogs:__gtor ma byin la bka' bsgo drag tu bskrad:__ces gsungs te/__ji skad du/__rnam par rtog pa bgegs yin te/__/bgegs ni rang gi sems las byung*/__zhes pa ltar/__gdod nas rang bzhin gyis dngos mtshan tu ma grub kyang rang gi nyon mongs pa'i rtog tshogs phyi rol du shar bas mtshan ma ltar snang ba/__bdag 'khor yo byad rnal 'byor rnams la 'tshe zhing glags lta ba'i bgegs kyi tshogs stong phrag brgyad cu la sogs pa la/__bdag nyid he ru ka'i nga rgyal dang ldan pas bshams pa'i gtor ma sngags dang phyag rgyas 'dod pa'i longs spyod zad mi shes par brlabs te brngan par byin la/__bden pa'i tshig gis gnod 'tshe med par gzhan tu song zhig pa'i bka' bsgo/__brngan kyang mi tshims shing zhi ba'i tshig la mi nyan pa'i gdug pa can mtha' dag drag po'i sngags dang me mtshon khro chung 'bar ba'i char dbab pas sdigs bskrad gzir te dpag tshad mang po'i pha rol tu bskrad par bya'o/__/gnyis pa ni/__rdo rje'i rgyal thabs phyag mtshan me phung dang :__sgo gsum lha sngags gnyug mas bar chad bsrung :__zhes gsungs te/__rkun ma bskrad nas sgo gcod pa'i dpe ltar bar gcod kyi bgegs bskrad nas phyin chad mi 'jug pa'i slad du srung ba'i 'khor lo bsgom pa la lnga ste/__dang po ni/__bdag nyid zhe sdang rdo rje las 'phros pa'i 'od zer gyis/__'og rdo rje'i sa gzhi/__bar rdo rje'i rwa ba/__steng rdo rje'i gur dang bla bre/__ra gur gyi phyi rol du rdo rje'i drwa bas gtams pa'i gur khang rgyal thabs te rgyal po'i pho brang gi lcags ri btsan po lta bu mi phyed mi shigs pa/__gnyis pa ni/__de'i phyi rol du 'khor lo rdo rje rin chen pad+ma ral gri ste rigs bsdus pa'i phyag mtshan lnga po re re bzhin 'bar zhing brtan pa grangs med pa'i gur khyim zlum po phyi nang lnga sbrags kyis steng 'og phyogs mtshams kun tu gtams pa/__gsum pa ni/__de dag las skyes pa'i me ye shes lnga ldan gyi kha dog can bskal pa 'jig pa'i me phung lta bu rab tu 'bar bas mgar gyi zhun me la sbrang bu bzhin tu bar du gcod pas phyogs su'ang nye mi nus par dmigs pa'o/__/bzhi pa ni/__rang gzhan gyi sgo gsum lha sngags gnyug ma'i ye shes su gdod nas yin pa la yin par shes pa ni rang bzhin lhun grub kyi srung 'khor chen po ste/__bde 'dus las/__thams cad sku dang ye shes ngang :__bgegs su rtog pa gang yang med:__bsrung bar bya dang srung byed med:__ces so/__/lnga pa ni/__gsang 'grel las/__mtshams kyi rgyal po mi rtog ye shes kyis/__/bgegs kyi rgyal po rnam rtog mnan par bya/__/zhes pa ltar thams cad kyang de kho na nyid kyi lta bas zin pa ste/__bar du bcad bya gcod byed bar chad gsum ka'ang rang bzhin gyis mi dmigs pa ka dag mnyam yangs chen por shes na stong pa nyid la stong pa nyid kyis glags mi rnyed pas srung ba rnams kyi mchog yin te/__slob dpon chen pos/__rtog sems blo yi dri ma dag:__bgegs zhes bya ba'i ming yang med:__ces gsungs so/__/de dag gi dgos pa'ang gal phreng las/__/ngo bo bdag gzhan gnyis med kyang*/__/dang po'i las can rnal 'byor pa'i/__/ting 'dzin nyams len bar gcod dag__/nges par bsal phyir mtshams gcod bya/__zhes so/__/gnyis pa mthun rkyen sgrub pa la'ang gnyis/__byin dbab pa/__mchod rdzas byin brlab bo/__/dang po ni/__ye shes gzi byin bdag gnas yo byad la:__lhag par dbab pas mtshan ma'i rtog pa bsal:__ces gsungs te/__rnal 'byor gyi 'gal rkyen bsal nas mthun rkyen gtso bo snod bcud ye shes kyi 'khor lor byin gyis brlab pa la/__dbab bya ye shes lha'i 'bras chos rnam lnga'i gzi brjid byin rlabs chen po/__dbab pa'i yul bdag sgrub pa po dang gnas khang sgrub pa'i yo byad dang bcas pa rnams la/__'bebs pa'i tshul dad mos gdung shugs sngags dang ting 'dzin khyad par gyi sbyar spos yi dwags kyi mer bsregs pa dang cang te'u dril bu sogs kyi sgras bskul te/__til gyi gang bu kha phye ba ltar mkha' khyab tu sad pa'i lha tshogs thams cad bdag gnas yo byad la lhag par bstim zhing dbab pas/__ma dag gnyis snang mtshan ma'i rtog pa thams cad dag pa rab 'byams ye shes kyi rol pa chen por shar ba ste/__gal phreng las/__sngags brjod 'od bsdu'i phyag rgya yis/__/'bras bu rnam lnga'i byin rlabs dbab/__/ces so/__/gnyis pa ni/__phyi nang gsang mchod ting 'dzin rol mo dang :__sngags dang phyag rgyas bde chen 'dod rgur spel:__ces gsungs te/__byin dbab pa'i rjes su gal po las/__mi dmigs chos la blo btags shing*/__/ye shes can gyis sbyin stobs kyis/__/thams cad tshul bzhin byin gyis brlab/__ces 'byung ba ltar mchod rdzas byin gyis brlab pa'i thog mar ye shes rang rtsal me rlung chur shar bas ma dag gnyis 'dzin gyi nyes skyon thams cad bsregs gtor bkrus te bsang*/__tha mal du zhen pa'i dngos po rnams spros bral stong nyid du sbyangs nas/__phyi mchod lha rdzas kyi me tog sogs nyer spyod lnga dbang lnga'i puSh+pe sogs rang byung gi dam rdzas lnga/__rdo rje'i gzugs sogs 'dod pa'i yon tan lnga po rnams so so'i ming gi thog ma las de dang de'i 'dod yon gyi rnam pa ma tshang ba med pa mchod pa'i rdul re re las kyang mchod rdzas so so thogs pa'i lha mo rdul snyed du 'phro ba'i mchod sprin rab 'byams kyis nam mkha'i khams gang bar bsam pa dang*/__nang mchod sman gtor rak+ta gsum so sor me rlung chu'i sa bon sogs kyis sbyong bas mtshan 'dzin rang ga ma'i rtog pa sbyang*/__dam ye gnyis med kyi bdud rtsi dang zag med 'dod yon gyi phung po dang chags med dmar chen gyi rgya mtshor rtog__/ches cher 'phel bas mchod sprin mkha' khyab tu sbar ba dang*/__gsang mchod gnyis snang log rtog gnyis med chos dbyings su bsgral ba dang*/__yul dbang shes gsum thabs shes zung 'jug tu sbyor ba dang*/__lhag pa ting nge 'dzin gyi mchod pa snod dag pa'i zhing bcud lha dang lha mo ste snang spyod thams cad mchod pa'i phyag rgya las 'da' ba med pa dang*/__mchod pa'i yo byad ji snyed pa'ang sems nyid ye shes chen po'i rol par sdud pa rol pa ye shes kyi mchod pa ste/__thams cad kyang mchod rdzas dam tshig gi phyag rgya la so so'i rang sngags brjod pa chos rgya/__bca' ba las rgya/__bsgom pa ye rgya/__kun kyang chos nyid kyi rtsal cir yang snang ba ye shes sgyu ma'i rol par shes pa phyag rgya chen po rnams dang ldan pas bde ba chen po'i rang bzhin gyi mchod pa'i sprin phung dkyil 'khor pa rnams kyi dbang po'i spyod yul du 'dod rgur 'byung bar spel te byin gyis brlab bo/__/sngon 'gro de rnams la dag rdzogs smin gsum sbyor na/__sbyang bya 'khor ba'i dus su ji ltar 'dod pa'i srid par 'jug pa la skye gnas kyi skyon dang phyi ma'i gnas lus longs spyod kyi 'gal rkyen rnams sbyang zhing bsrung ba dang*/__mthun rkyen bsod nams cha mthun gyi las gsog pa rnams dag par byed/__sbyangs 'bras dngos gzhi sangs rgyas kyi mdzad pa la bar du gcod pa'i bdud bzhi bcom pa dang tshogs gnyis gsog cing*/__'od zer chen pos dbang bskur ba dang sangs rgyas kyi zhing yongs su sbyong ba'i ting nge 'dzin mngon du byed pa la sogs pa dang mthun pas 'bras bu rdzogs par byed/__sbyong byed sngon 'gro 'di dag gis rtsa rlung thig le'i gegs dang gol sa chod cing nyams rtogs kyi rtsal kha skyed pa'i thabs rmad du byung du 'gyur bas rdzogs rim gyi smin byed du 'gro bar bshad do/__/rtsa ba'i sa bcad gnyis pa dngos gzhi la gnyis/__rtsa ba'i rnal 'byor dang*/__de'i yan lag bye brag tu bshad pa'o/__/dang po la bzhi/__rgyu ting nge 'dzin gsum gyi khog dbub pa/__'bras bu rten dang brten pa'i dkyil 'khor bskyed pa/__gsal brtan dag gsum bshad pa/__srog sdom bzer bzhi'i man ngag bshad pa'o/__/dang po la'ang gnyis/__dag pa dang bcas te mdor bstan pa/__de rgyas par bshad pa'o/__/dang po ni/__dngos gzhi 'chi dang bar do skye ba'i tshul:__sbyong byed zab dang rgya che'i ting 'dzin ni:__zhes gsungs te/__sgrub thabs kyi dngos gzhi rten brten pa'i dkyil 'khor bskyed pa'i thog mar/__sbyang bya sems can rnams kyi 'chi srid dang bar do'i srid pa dang skye ba'i srid pa'i tshul rim par 'byung ba dang mthun par/__sbyong byed zab pa dang rgya che ba de bzhin nyid/__kun tu snang*/__rgyu'i ting nge 'dzin gsum bsgom par bya ste/__des ni sbyangs 'bras sku gsum 'grub rung gi rten 'brel 'grigs pa ste/__sangs rgyas gsang ba'i lam rim las/__srid pa'i rim pa smin tshul gyis/__/'jug pa'i yan lag lnga ru bzhag___/gang dag dngos kun rang rig phyir/__/shi ba don dam bden pa ste/__/skye ba bar ma kun rdzob yin/__/skyes pa'i rim gsum gnyis med don/__ces so/__/gnyis pa la gsum/__de bzhin nyid/__kun snang*/__rgyu'i ting nge 'dzin no/__/dang po ni/__stong chen de bzhin nyid dbyings mkha' ltar dag:__bden gnyis dbyer med dbyings su mnyam par bzhag:__ces gsungs te/__de bzhin nyid stong pa chen po'i ting nge 'dzin ni/__sbyang bya 'gro ba rnams 'chi ba'i tshe phyi nang gi thim rim rnams rdzogs pa'i mthar 'chi srid chos sku'i 'od gsal zhes ngo ma shes na ldog pa can gyi sgrib bral gsal stong rnam par mi rtog pa'i ngang du dar gcig gnas pa de yin la/__sbyong byed 'khor 'das kyis bsdus pa'i chos thams cad sems las gzhan du med cing sems kyang rang gi ngo bos ma grub pas chos thams cad kyi gnas lugs de bzhin nyid gdod ma nas spros pa'i mtha' thams cad dang bral bas nam mkha' ltar dag pa/__kun rdzob dang don dam du 'dzin pa'i bzang ngan dbye ba byar med pas bden gnyis dbyer med lhag pa'i chos sku chen po rang bzhin gyis 'od gsal ba'i dbyings su ma bcos par mnyam par bzhag__/de lam du ji ltar 'gyur na/__rnam par mi rtog pa'i stong nyid de 'chi ba 'od gsal dang*/__'bras bu chos sku gnyis ka dang rnam pa mthun zhing de ltar bsgoms pa'i rjes thog nyid du 'chi ba dag pa chos sku'o snyam pa'i gzhi 'bras sbrel ba'i nga rgyal bya zhing de ltar bsgoms pas mar 'khor ba'i dri ma 'chi srid sbyong zhing rtag par lta ba dang*/__gzugs med kyi khams dag par byed/__yar spros pa dang bral ba'i ye shes chos sku mngon tu byed pa'i rigs kyi sa bon gsos 'debs pas 'bras bu rdzogs par byed/__bar du don gyi 'od gsal rgyud la skye ba'i gzhi bting bas na lam gong ma'i rdzogs rim gyi smin byed du 'gyur ro/__/gnyis pa ni/__snying rje sgyu ma kun snang rig pa'i sprin:__gsal la 'dzin med mkha' khyab kun tu spro:__zhes gsungs te/__snying rje sgyu ma kun tu snang ba'i ting nge 'dzin ni/__sbyang bya 'chi srid kyi skad cig bzhi pa'i rjes de nyid la lhun grub longs sku'i 'od gsal nam mkha' sprin dang bral ba lta bu la ye shes lnga'i rang snang 'od dang thig le tshom bu'i rnam pa sgyu ma lta bur shar yang ngo ma shes pas las rlung gi rkyen las sems snang gsum lugs ldog gi rim pa shin tu phra zhing dwangs pa'i bar do'i lus dbang po kun tshang bar grub pa rmi lam ltar yad yud phyad phyod du snang ba de nyid yin la/__sbyong byed de kho na nyid ma rtogs pa'i 'gro ba kun la rang rig pa'i rang rtsal snying rje sgyu ma lta bu'i sprin spro ba ste/__de'ang nam mkha' dag pa las sprin dang 'ja' tshon gsal bar snang yang nam mkha'i cho 'phrul tsam las bden par ma grub pa bzhin tu snying rje de'ang rnam pa gsal la ngo bo 'dzin pa med pa mkha' ltar khyab par brdal zhing ris su ma chad pa kun tu spro/__de lam du ji ltar 'gyur na/__de nyid sgyu ma ltar snang ba'i cha nas bar do dang 'bras bu longs sku gnyis ka dang rnam pa mthun pa dang*/__rjes thob tu bar do dag pa longs spyod rdzogs pa'i sku'o/__/zhes dag rdzogs kyi nga rgyal byed cing de ltar bsgoms pas bar do'i srid pa sbyong*/__chad par lta ba dang gzugs kyi khams dag par byed/__longs sku sgyu ma lta bu mtshan dpes spras pa mngon tu 'gyur ba'i rigs kyi sa bon gsos 'debs pas 'bras bu rdzogs par byed/__'od gsal de nyid ye shes kyi skur ldang ba'i rgyu snying rje chen po rgyud la skye ba'i gzhi bting pas rdzogs rim gyi smin byed du 'gyur ro/__/gsum pa ni/__phyag rgya gcig pa phra mo yig 'bru'i tshul:__thams cad skyed byed rgyu yi sa bon ni:__mi 'gyur ye shes snying po mkha' la shar:__rtse gcig sems bzung gsal snang tshad du 'don:__ces gsungs te/__rgyu'i ting nge 'dzin ni/__sbyang bya bar srid de phyi ma'i srid pa len pa la mngon du phyogs pa na gang du skye bar 'gyur ba'i gnas la srid pa skye ba'i rkyen gyis der 'jug la khad kyi bar do'i rlung sems de yin la/__sbyong byed ni lha sku phyag rgya gcig pa dang phra mo yig 'bru'i tshul gyis dkyil 'khor thams cad skyed cing sprul par byed pa dang*/__de nyid bde gsal stong pa nyid kyi rang bzhin can du bsgoms nas dkyil 'khor thams cad kyang bde gsal gyi rnam par 'phrul pa'i stong pa nyid kyi rang bzhin can du 'char ba'i rgyu byed pa'i phyir stong nyid snying rje zung 'jug gi rang rtsal rgyu'i sa bon ni/__rang rig las gzhan du mi 'gyur ba'i ye shes kyi snying po hrIHdang hU~M la sogs pa gzung 'dzin gnyis stong gi nam mkha' la skad cig gis shar bar bsgoms nas yid gzhan tu ma yengs par rtse gcig tu sems bzung la gsal snang tshad du phyin par 'don par bya ste/__de'ang sa le/__sing nge*/__lhag ge__/lhang nge ba ste gsal ba'i tshad bzhi dang*/__mi g.yo/__mi 'gyur/__mngon par mi 'gyur/__cir yang bsgyur du btub pa ste brtan pa'i tshad bzhi bcas tshad brgyad gyad du gyur pa la bslab/__de lam du ji ltar 'gyur na/__de nyid dkyil 'khor thams cad skyed pa'i rgyur 'gyur ba ltar 'khor ba'i skye gnas su 'jug ka'i bar do'i rlung sems de nyid kyis srid pa phyi ma'i rgyu byed pa bzhin du sangs rgyas sprul pa'i skus kyang gdul bya'i ched du gzugs sku'i rnam par 'phrul pa sna tshogs par ston pa'i cha nas de gsum rnam pa mthun pas na skye ba gnas su dag pa sprul pa'i sku'o zhes nga rgyal bya/__de ltar bsgoms pas skye gnas su 'jug pa'i srid pa sbyong zhing 'dod pa'i khams dag par byed/__gdul bya gang 'dul du snang ba'i sprul sku mngon du byed rung gi thar pa'i sa bon gsos 'debs pas 'bras bu rdzogs par byed/__bde ba dang rlung sems las byung ba'i ye shes kyi lha skur mngon du ldang nus pa'i gzhi bting bas rdzogs rim gyi smin byed du 'gyur ba yin no/__/de rnams kyang lam rim las/__stong pas rnam kun mtshan ma med/__/bdag tu 'dzin pa'i zhen pa grol/__/de phyir mthong rjes de bzhin nyid/__/snying rje 'byung ba'i gzhi ru bzhag__/go rim 'gyur ba'ang de bzhin nges/__/zhes sogs kyis bstan pa ltar ro/__/gnyis pa dkyil 'khor bskyed pa la gnyis/__rten gzhal yas khang dang*/__brten pa lhar bskyed pa'o/__/dang po ni/__de las 'bar ba'i 'od spros dngos 'dzin sbyang :__'byung ba rim brtsegs yum lnga'i mkha' klong du:__he ru ka dpal dgyes pa'i pho brang dang :__rdo rje'i srung 'khor dur khrod bkod par bcas:__pad+ma nyi zla dregs pa'i gdan la sogs:__phyi snod zhi khro'i zhing khams chen por gsal:__ces gsungs te/__'bras bu rten dang brten pa'i dkyil 'khor bskyed pa la spyi'i go rim ni/__snod chags pa'i rjes su bcud rim par chags pa'i zhen pa sbyong ba dang*/__de bzhin gshegs pa rnams gang du 'tshang rgya ba'i zhing sgrib pa thams cad bral ba'i rang snang gi zhing khams tshad med pa der 'tshang rgya ba dang*/__lam gong ma'i dus su thog mar rags pa lus rtsa'i khams sbyangs nas phra ba ngag rlung dang yid thig le rim par 'ching zhing dag par byed dgos pas rten dang brten pa'i go rim nges pa yin la/__de'i phyir dang po rten gyi dkyil 'khor bsgom dgos shing de'ang ma dag pa'i gnas skabs 'jig rten chags rim dang bstun nas sgom par byed pa ste/__gal phreng las/__snod kyi rim pa 'byung tshul gyis/__/rim brtsegs gzhal yas gzhung bzhin bskyed/__ces so/__/de ji ltar bsgom na/__nam mkhar gnas pa'i rgyu'i sa bon de las 'bar ba chen po'i 'od zer me rlung chu'i rnam par spros/__snod bcud dngos por 'dzin pa thams cad sbyangs nas stong nyid du gyur par mos/__sngar de ting skabs stong par bsgom pa ni nang 'dzin rtog sbyong ba yin la/__'dir ni gzung yul sbyong ba'i dgos pa tha dad yin pas bldabs par mi 'gro'o/__/de nas sbyang bya sems can rnams gang du skye ba'i snod kyi 'jig rten chags pa'i gzhir gyur pa nam mkha'i khams dang chags par 'gyur ba'i rgyu'i gtso bo kun byed sems nyid dang bye brag 'gro ba'i las spyi mthun par bsags pa'i bag chags sems la zhen pas yul snang gyur thun mong du smin pa'i 'byung bzhi'i dkyil 'khor ri rab dang bcas pa grub pa de yin la/__sbyong byed rgyu'i yi ge las rim par chad pa'i sa bon rnams las chos 'byung nam mkha'i khongs su rlung me chu+u sa ste 'byung ba bzhi ri rab dang bcas rim par brtsegs par bsgom ste/__de dag kyang sgyu 'phrul rol pa las/__phyi rol 'byung sogs yum rnams kun/__/thabs dang shes rab gnyis med pa'i/__/sra brtan rdo rje spyan ma ste/__/gsher ba lha mo mA ma ki__/smin byed sreg mdzad gos dkar mo/__/yang zhing g.yo ba sgrol ma'i mkha'/__/stong gsal nam mkha' kun bzang mo/__/zhes pa ltar 'byung lnga dag pa yum lnga'o zhes nga rgyal bzung bas/__sbyangs 'bras sangs rgyas rnams gang du 'tshang rgya ba'i zhing chos kyi dbyings dang de'i phyag rgya yum lngar rnam par dag par 'gyur ro/__/de ltar 'byung lnga yul lnga'i rang bzhin gyi mkha' klong du gzhal yas khang gsal gdab ste/__de'i sbyang bya sems can rnams rang gi tshe dang rjes su 'brel ba'i longs spyod kyi yul du gyur pa yul phyogs dang khang khyim dang yo byad la sogs pa'i zhen rtog yin la/__sbyong byed rnam snang gi ngo bo b+h+rU~M yig las zhi ba thar pa chen po'i gzhal med khang ngam/__drag po la he ru ka dpal chen po rab tu dgyes pas rol pa'i dur khrod gsang ba mchog gi pho brang gi rnam pa lam du byed pa/__'og gzhi 'khor yug logs/__thog dbub/__sgo/__rta babs/__rgyan gyi khyad par sogs dang ldan pa'i phyi rol du rdo rje'i srung ba'i 'khor lo rang byung gi dur khrod chen po brgyad kyi bkod pa bcas bsgoms nas 'bras dus kyi zhing dang gzhal yas khang du mos pa'i nga rgyal byas pas/__sbyangs 'bras sangs rgyas kyi gnas chos dbyings spros bral gyi rang bzhin rdo rje btsun mo lnga'i b+ha ga gsang ba dgyes pa chen po mngon tu byed pa'o/__/lam dus su 'byung ba rim brtsegs ri rab dang bcas pa rtsa 'khor lo lnga dang dbu ma'o/__/gzhal yas khang gi 'og gzhi sna tshogs rdo rje pad nyi rnams ni rtsa 'khor rnams kyi lte bar gnas pa'i rlung dang khams rnams so/__/de rnams dang ro gcig tu 'dres pa'i sems gsal stong bde ba'i cha ni gzhal yas khang ste de nyid legs par bsgoms pas rtsa rlung thig le rnams mnyen cing dul nas ye shes khyad par can gyi gzhi 'ding bas lam gong ma'i smin byed du 'gro'o/__/de'i nang du sbyang bya sems can rnams gang du skye bar 'gyur ba'i gnas ma'i pad+ma dang*/__pha ma'i khu khrag drod gsher la sogs pa'i rtog pa sbyong byed zhi ba la pad+ma nyi zla/__khro bo la pad nyi dregs pa can byol song gi gdan la sogs pa bsgoms pas/__sbyangs 'bras ma chags pa dang 'od gsal ba sogs gdan de dag gi mtshon don mthun par sangs rgyas kyi gzugs sku'i yon tan 'char ba yin la/__lam dus su pad+ma ni rtsa 'khor/__nyi ma ni gtum mo'i me/__zla ba ni spyi bo'i haM yig ste/__'bar 'dzag gi zhu bde dang yang na shes rab ma'i pad+ma'i lte bar nyi ma byang chub kyi sems gnas pa yab kyi kun+da brtan pa'i rim pa ji lta ba bzhin pad nyi zla ba'o/__/de ltar bsgoms pas rdzogs rim gyi dus su gtum mo dang*/__phyag rgya'i lus la brten nas mi 'gyur ba'i bde ba chen po thob pa'i gzhi bting bas na smin byed du 'gro'o/__/mdor na sbyang bya phyi snod kyis bsdus pa'i 'jig rten tha mal du snang ba 'di nyid/__sbyong byed rgya dang tshad las 'das pas zhi ba dang khro bo'i zhing khams chen po rgyan stug po bkod par gsal btab pas/__sbyangs 'bras sangs rgyas rang snang gi zhing khams mtha' dang dbus med pa la dbang 'byor thob par 'gyur ro/__/gnyis pa la gsum/__mdor bstan/__rgyas bshad/__mjug bsdu ba'o/__/dang po ni/__nang bcud skye ba bzhis bsdus bag chags kun:__snang stong phyag rgyar bsgrub pa'i rim pa ni:__zhes gsungs te/__de ltar rten gzhal yas khang bskyed pa'i rjes su brten pa lha'i 'khor lo bsgom pa ni/__spyir ye shes rdo rje kun las btus par/__skye ba kun rdzob bden pa zhes bya ste/__/'chi ba yang ni don dam bden pa yin/__/bden gnyis 'di la rnam par nges byas nas/__/rim pa gnyis kyi dbye ba gsungs pa yin/__ces pa ltar rim pa dang po ni skye srid sbyong byed yin pas srid par skye ba'i rim pa dang mthun par bsgom pa yin la/__de'ang sbyang bya nang bcud kyi sems can mngal sogs skye ba'i gnas rnam pa bzhis bsdus pa'i lus kyi bag chags rags pa kun yin la/__sbyong byed snang la rang bzhin ma grub pa stong pa'i gzugs brnyan chu zla 'ja' tshon me long gi gzugs lta bu'i lha'i phyag rgyar bsgoms pas/__sbyangs 'bras sangs rgyas kyi gzugs sku rnam gnyis 'grub pa'i nyer len tu 'gyur ba ste/__de lta bu'i lam bsgrub pa'i rim pa dang po ni 'di lta ste/__gnyis pa ni/__rgyu las 'bras bur bzhengs pas sgaung skyes sbyong :__ye shes mngon byang lnga yis mngal skyes sbyong :__skad cig sngags las grub pas drod skyes sbyong :__sems tsam rdzogs pa'i lha yis rdzus skyes sbyong :__zhes gsungs te/__'di la bzhi/__dbang rtul las dang po pa spros bcas rnams la sgong skyes dang mthun par rgyas pa chen po'i bskyed rim dang*/__dbang 'bring spros pa chung ba la mngal skyes dang mthun par mngon byang gi bskyed chog dang*/__dbang rnon spros med kyi gang zag la drod gsher skyes dang mthun par sngags tsam gyis bskyed pa dang*/__yang rab shin tu spros med la rdzus skyes dang mthun par skad cig dran rdzogs su bskyed pa ste skyed chog rnam pa bzhi yod pa las/__dang po ni/__gnyis skyes rnams thog mar ma'i mngal dang de nas sgo nga ste lan gnyis su skye ba ste/__gsar snying spyi khyab ltar na thog mar rgyu'i sa bon las rgyu rdo rje 'dzin pa lhan skyes kyi skur bsgom/__de nyid rjes chags kyi thig ler zhu ba glus bskul ba'i rkyen las 'bras bu rdo rje 'dzin pa zhal phyag yongs su rdzogs pa'i skur bzhengs pa'am/__snga 'gyur rang skad bdag sras gzhan sras su bya ba'i cho ga ltar na/__ye shes rtse mo las/__sras dang btsun mor bcas pa ni/__/'khor ba'i chos las skyes pa ste/__/sems can gyis ni sras su bya/__/zhes dang*/__ji ltar sangs rgyas mthu las byung*/__/lhun gyis grub pa'i cho ga dang*/__/cho ga'i yan lag rdzogs pa la/__/mkhas pa sangs rgyas sras yin no/__/zhes gsungs te/__de la'ang man ngag sgrub sde'i lugs ltar na/__bde 'dus las/__bdag gi sras su gzhan bya ba la lnga ste rgyu'i sa bon las gtso bo yab yum bskyed pa/__phyogs bcu'i bde bar gshegs pa rnams bkug nas mkha' ru bstim pa dang*/__sems can rnams bkug nas sgrib pa sbyang ba dang*/__gnyis su med pa la che ba brjod pa dang*/__mkha' nas bton la dkyil 'khor du 'god pa'o/__/zhes dang*/__gzhan gyi sras su bdag bya ba la brgyad de gtso bo yab yum zhu ste rgyu'i sa bon du byung ba dang*/__de las yab yum du bskyed pa dang*/__yab kyi rtog tshogs las yi ge bskyed pa dang*/__yum las 'od 'phro zhing lha la gsol ba gdab pa dang*/__dkyil 'khor thams cad bdag yab yum la bstims pas ye shes par nga rgyal bskyed pa dang*/__yab yum sbyor ba bya zhing mkha' ru dkyil 'khor bskyed pa dang*/__bdag gi rtog pa zhe gnyis lhar bskyed de phyir 'don pa dang*/__spyan drangs pa la rgyas gdab pa'o/__/zhes pa ltar ro/__/rgyud sde sgyu 'phrul ltar na gtso bo yab yum lhar bskyed nas snyoms par 'jug cing ngo mtshar rdzas kyi dkyil 'khor yi ge'i sprin spro ba bdag gi sras su gzhan bya ba dang*/__thugs dam bskul zhing byin rlabs rjes gnang gi rkyen gyis gong bu yi ge phyag mtshan sku yongs rdzogs su byed pas snang phyogs dang stong phyogs kyi zhen pa sbyong ba gzhan gyi sras su bdag bya ba ste/__de dag gis sgong skyes kyi bag chags sbyong bar byed do/__/gnyis pa ni/__'di la'ang dgos don tshang tshul mtshungs pa la cho ga rgyas 'bring bsdus gsum du 'byung ba'i rgyas pa ma rgyud rnams kyi dgongs pa mngon byang lnga bskyed la thog mar mngal zhugs kyi rim pa dang sbyor na/__klong gsal las/__mngal zhugs byang chub rnam lnga ste/__/zla ba bcu ni sa bcu'i tshul/__/skyes pa rang bzhin sprul pa'i sku/__/lhun grub sku gsum bdag nyid do/__/zhes bar do nas lus 'tshol ba tshogs lam/__mngal du lus len pa dngos la sbyor bas sbyor lam/__mngal du zhugs pa nas bzung byang chub lnga'i rim pa mthong sgom gyi lam du bzhag ste/__zla ba bcu'i ngos bcus sa bcur mtshon nas mi slob pa'i zung 'jug rang bzhin sprul pa'i skur grub pa ni skye ba sprul pa'i sku ste/__gzhi lam 'bras bu'i 'brel du babs kyis grub pa'o/__/sbyang gzhi de la brten pa'i sbyong byed mngon byang dang po zla ba'i dkyil 'khor bsgom pa ni/__sbyang gzhi gzugs kyi phung po nam mkha'i khams/__lus kun gzhi'i rnam shes/__nyon mongs pa gti mug__/pha'i khams dkar cha sogs sbyong zhing dag par byed la/__rdzogs rim gyi dus dga' ba bcu drug yas babs thabs kyi rang bzhin du shar ba'i ye shes dang po sems so sor rtog pa'i ngo bor rdzogs pa'i rnam pa lam byed zla ba'i dkyil 'khor du bsgyur nas bsgoms pas/__'bras bu'i dus na mtshan bzang po sum cu rtsa gnyis su smin zhing me long lta bu'i ye shes su mngon par byang chub bo/__/mngon byang gnyis pa nyi ma'i dkyil 'khor ni/__sbyang gzhi tshor ba'i phung po sa'i khams/__nyon mongs pa can gyi yid de ser sna nga rgyal/__ma'i khams dmar cha sogs sbyong zhing dag par byed la/__rdzogs rim gyi dus khu rdul gnyis rnam par byang ba'i bde stong lhan cig skyes pa'i ngo bo mas brtan shes rab kyi rang bzhin gzugs la sogs pa'i phung po lnga/__'byung bzhis phye ba'i khams nyi shu po chos kyi dbyings la sogs pa'i ye shes lnga tshad med bzhis phye ba'i lam stong pa nyid nyi shur shar ba'i ye shes gnyis pa byang chub kyi sems su rdzogs pa'i rnam pa lam byed nyi ma'i dkyil 'khor du bsgyur nas bsgoms pas 'bras bu'i dus na dpe byad bzang po brgyad cu'i rang bzhin du smin zhing mnyam pa nyid kyi ye shes su mngon par byang chub pa'o/__/mngon byang gsum pa sa bon phyag mtshan dang bcas pa ni/__khu rdul gnyis kyi bar du dri za nye bar len pa'i sems bar do'i rnam shes zhugs pa dang*/__'du shes kyi phung po me'i khams/__ngag yid kyi rnam par shes pa/__nyon mongs pa 'dod chags/__bar do'i rnam shes rnam sbyong zhing dag par byed la/__rdzogs rim gyi dus khu rdul gnyis lugs ldog tu dag pa'i rjes su las rlung dus sbyor dang bcas pa 'gags pas ye shes gsum pa brtan pa'i rdo rjer rdzogs pa'i rnam pa lam byed sa bon phyag mtshan gyi tshul du bsgyur nas bsgoms pas/__'bras bu'i dus na chos thams cad ma 'dres par rtogs pa'i rang bzhin du smin cing so sor rtog pa'i ye shes su mngon par byang chub pa'o/__/mngon byang bzhi pa sa bon phyag mtshan dang bcas pa ro gcig tu 'dres pa ni khu rdul sems gsum ro gcig tu 'dres pa dang*/__'du byed kyi phung po rlung gi khams/__bya ba sgo lnga'i rnam shes/__nyon mongs pa phrag dog__/bar do'i rnam shes dang khu khrag 'dres pa sogs sbyong zhing dag par byed la/__rdzogs rim gyi dus khu rdul rlung gsum gyi byed las rnam par dag pa rgyu rdo rje 'dzin pa'i ngo bo dang*/__ji snyed pa'i ye shes bzhi pa shes bya kun la khyab pa rdo rje'i bdag nyid du rdzogs pa'i rnam pa lam byed 'dres pa'i ngo bo 'od kyi thig le'am gong bu gcig tu bsgyur nas bsgoms pas/__'bras bu'i dus na sangs rgyas thams cad kyi mdzad pa ro gcig tu 'dres pa'i bdag nyid du smin cing bya ba grub pa'i ye shes su mngon par byang chub pa'o/__/mngon byang lnga pa de las sku yongs su rdzogs pa ni/__mngal gyi gnas skabs yongs su rdzogs nas phyir btsas pa dang*/__rnam shes kyi phung po chu'i khams/__yid kyi rnam shes tshogs brgyad kyi chos nyid du 'dzin pa'i cha/__nyon mongs pa zhe sdang*/__skyai ba len pa'i lus kyi skye mched rdzogs pa'i gnas skabs rang bzhin sprul pa'i skur sbyong zhing dag par byed la/__rdzogs rim gyi smin byed du 'gro tshul khu rdul rlung gsum sems dang bcas shin tu rnam par dag pa'i ngo bo 'bras bu'i rdo rje 'dzin pa dang*/__rang bzhin sangs rgyas rnams kyi ji lta ba'i ye shes rnam par grol ba'i 'bras bu lnga pa de bzhin gshegs pa'i bdag nyid rang rgyud la rdzogs pa'i rnam pa lam byed lha'i sku rgyan dang cha lugs rdzogs par bsgoms pas 'bras bu'i dus na sgrib pa thams cad dang bral ba'i ye shes dbyings dang rang bzhin dbyer med pa'i bdag nyid du smin cing chos kyi dbyings kyi ye shes su mngon par byang chub pa ste/__rgyud las/__zla ba me long ye shes te/__/bdun gyi bdun pa mnyam pa nyid/__/rang lha'i sa bon phyag mtshan ni/__/so sor rtog par brjod par bya/__/thams cad gcig gyur nan tan nyid/__/rdzogs pa chos dbyings dag pa ste/__zhes so/__/'bring po mngon byang bzhi bskyed pa ni/__gal po las/__dang po stong nyid byang chub sems/__/gnyis pa sa bon 'byung ba ste/__/gsum pa la ni gzugs rdzogs pa/__/bzhi pa la ni yi ge 'god/__ces pas stong pa nyid kyis 'chi srid bar do dang bcas pa sbyong*/__lha'i sa bon bsgoms pas skye srid kyi nyer len dri za'i rnam shes khu khrag gi dbus su zhugs pa sbyong*/__lha sku rdzogs par bsgoms pas rlung bcus rim gyis bskyed nas lus grub pa sbyong*/__gnas gsum la sogs par yi ge bkod pas btsas nas dbang po yul la sred pa'i gnas skabs sbyong ba ste rdo rje bzhi'i cho gas bskyed pa 'di dang 'dra bar/__'dus pa'i rgyud phyi ma las kyang gsungs so/__/bsdus pa pha rgyud ltar cho ga gsum bskyed ni/__gdan gyi nyi mas ma'i rdul/__zla bas pha'i khu ba/__sa bon yi ge gdan steng du babs pas ni bar do'i rnam shes te sbyong byed gsum po des dkar dmar tshogs zin pa la rnam shes 'jug par nye ba nyid sbyong ba yin la/__de phyag mtshan du bsgyur bas ni pha ma'i 'du 'phrod kyis 'gyur ba'i gnas skabs lnga'i rim pa/__de la yi ges mtshan pa las 'od zer spro bsdu byas pas ni mngal du lus chags pa de nyid 'byung ba lngas 'phel sdud smin brtan go phyes te phung khams skye mched rim pa bzhin grub pa de sbyong*/__sku yongs su rdzogs pas ni dbang po rnams rdzogs nas phyi rol du btsas pa sbyong bar byed do/__/de gsum gyi dngos bstan ni phyag mtshan de bzhin gshegs pa thams cad kyi thugs rdo rje'i ngo bo/__/yig 'bru gsung rdo rje lha'i rnam pa yongs su rdzogs pa sku'i rdo rjer dag par byed pa'o/__/sbyangs 'bras de bzhin gshegs pa rnams gang 'dul gyi sprul pa'i skur bzhengs nas rdo rje btsun mo'i b+ha ga la sogs par lhums su zhugs pa dang bltams pa'i mdzad pa ston pa'i rten 'brel bsgrigs pa yin no/__/de ltar ye shes lnga'i rang bzhin mngon byang lnga'i cho gas mngal skyes kyi bag chags sbyong bar byed do/__/de'ang sbyang bya'i gtso bor bstan pa tsam las sgong skyes sogs skye gnas gzhan gyi bag chags sbyong byed du 'gro ba'ang shes par bya'o/__/gsum pa ni/__srin bu sogs drod dang gsher tsam la gnas lus kyi sred len zhugs nas phung por grub pa dang mthun par lung a nu yo ga'i dgongs pa spros med kyi bskyed rim la'ang gnyis te/__rang shar las/__gcig car 'jug pa gang zhe na/__lha rnams ma bskyed snying po dran pas rdzogs/__rim gyis 'jug pa gang zhe na/__dbyings dang ye shes rim gyis 'jug nas ni/__zhes 'byung ba ltar na/__rim gyis 'jug pas/__shes rab kyi dbyings stong chen kun tu bzang mo'i klong du kun rdzob kyi snang cha thams cad lha'i phyag rgyar rang bzhin gyis shar ba gnyis med zung 'jug sgyu ma lta bu'i lha skur skad cig gis bzhengs pa dang*/__gcig car du 'jug pas lha rnams tshig gis ma bskyed kyang sngags dran pa tsam las dkyil 'khor 'khor lor gsal bar grub pa ste/__'khrul lde las/__a nu yo ga'i theg pa ni/__snying po tsam zhig brjod byas pas/__/ma skyes rdzogs pa'i lha ru bsgom/__zhes so/__/de dag gis gtso bor drod gsher skyes kyi bag chags sbyong bar byed do/__/bzhi pa ni/__rdzus skyes rnam sems tsam la brten nas skad cig gis lus su grub pa dang mthun par man ngag a ti yo ga shin tu spros med kyi bskyed tshul cho ga dang tshig la ma ltos par yid chos gdod nas lha'i 'khor lo ye shes sgyu ma'i phyag rgyar gnas pa nyid dran pas gsal 'debs tsam gyis yongs su rdzogs pa me long la gzugs brnyan btsan thabs su shar ba ltar bskyed rdzogs dbyer med du bsgom pa ste/__rmad byung rgyal po las/__ye nas lhun mnyam dkyil 'khor la/__/yin par shes nas bsgom pa las/__/tha dad blo yi rim pa yis/__/spyan drangs gshegs gsol 'dir mi dgos/__/zhes so/__/de ltar bskyed chog rnam pa bzhi po de gtso bor skye ba gang gis bsdus pa des de dang mthun par bsgom la/__thog med kyi bag chags sbyang phyir skye ba re res kyang thams cad bsgom pa dang*/__khyad par las dang po pa/__sems cung zad brtan pa/__brtan pa cher thob pa/__shin tu thob pa'i go rim dang sbyar te bsgom pa kun mkhyen klong chen pas gsungs so/__/de'ang rten dang brten pa'i dkyil 'khor pa thams cad gcig car du gsal mi nus la rim gyis ma 'dres par ci 'dod du gsal nus pa tshun chad ni las dang po pa yin la/__rags pa'i dkyil 'khor gcig char gsal thebs shing skye mched kyi lha la sogs pa gcig char gsal mi thebs pa ni gnyis pa dang*/__skye mched kyi lha rnams kyang gcig char gsal thebs pa ni gsum pa ste de yan chad bskyed rim kho nas 'byung la/__de nas rdzogs rim dang sgrags te bsgoms pas phra thig gi dbus su dkyil 'khor spro bsdu nus shing thun dang thun mtshams nyin mtshan dbye ba med cing bsam gtan gyi las tshogs thogs med du 'grub par 'gyur la/__/bzhi pa skad cig gcig la ting nge 'dzin gyi gsal snang zad mi shes par 'byung zhing yid la bsam pa tsam gyis sems can gyi don mang po sgrub nus pas grub pa'i skyes bu zhes bya ste/__de dag la rim bzhin las dang po pa/__ye shes pheb pa/__ye shes la cung zad dbang ba/__cher dbang ba zhes mnyam sbyor rgyud sogs kyi dgongs pa ye shes zhabs rjes 'brangs dang bcas pas rtsal du 'don par mdzad do/__/gsum pa ni/__gang yang phyag rgya gcig spros tshogs sgrub kyis:__skye ba'i rim pa gsum po sbyong bar byed:__ces gsungs te/__skyed thabs kyi cho ga bzhi po de dag gang la'ang las dang po pas rtsa ba'i lha phyag rgya gcig pa bsgoms pas lus can rnams dang por skyes nas byis par gyur pa'i gnas skabs dang*/__de la gsal snang thob nas phyag rgya spros bcas kyis lang tsho dar la babs pa'i gnas skabs dang*/__de la brten pa thob nas tshom bu tshogs kyi sgrub pas na tshod yol nas rgan po'i gnas skabs te skye ba'i srid pa'i rim pa gsum po de sbyong bar byed pa yin la/__de'i rgyu mtshan gang zag gcig gi rgyud la'ang rim gyis goms pa brtan pa'i dbang gis dbang po brtul 'bring rnon po gsum du na 'pho ba'i phyir ro/__/gsum pa gsal brtan dag gsum la bslab pa ni/__sbyong byed khyad par lha yi gsal snang ni:__mngon sum goms pa brtan pos gzugs snang sbyong :__nga rgyal drag pos zhen pa'i sems sbyong ste:__dag pa dran pas thams cad lha ru sbyong :__ces gsungs te/__skyed pa'i tshul de nyid sbyong bar byed pa'i thabs kyi khyad par ni/__sgrub thabs kun bzang las/__tha mal rnam rtog rgyun las gzhan pa yi/__/srid pa'i sdug bsngal gzhan ci'ang yod ma yin/__/de dang rnam pa 'gal bar gyur pa'i sems/__/'di ni mngon sum du ni rtogs par 'gyur/__/zab cing rgya che ba yi bdag nyid can/__/gang yin de ni kun rtog snang mi 'gyur/__ces gsungs pa bzhin tha mal bdag dang bdag gi ba'i dngos por zhen pa dang 'dzin stangs 'gal ba'i ting nge 'dzin lhag par lam du byed dgos shing*/__de la gsum/__dang po rnam pa gsal ba zhes lha'i gsal snang sgrub pa ni las dang po pas dkyil 'khor la gsal snang thon dka' yang lhag par mos pas bsgoms pas rgyud smin byed kyi stobs che ba dang*/__phyag rgya gcig pa lta bur gang sems bzung sla sa nas brtsams go rim sogs ma nges par zhal dang sku dang phyag mtshan rgyan cha'i cha shas rnams re re la sems zin pas so so'i gsal snang skyes pa dang gcig char du gsal 'debs/__mthar rnyogs pa med pa'i rdzing bu mi g.yo ba gsal dwangs kyi nang du gzugs brnyan gsal bkra ma 'dres par snang ba ltar yul gsum la mngon sum bzhin du snang ba'i goms pa brtan por gyur pas ni phyi rol gzugs phung du snang ba rnams sbyong bar byed do/__/gnyis pa nga rgyal brtan pa ni/__lha'i gsal snang thob ma thob gang ltar lha der shes pa tsam gyi nga rgyal nyi tshe ba min par 'bras dus kyi sangs rgyas skyon thams cad zad cing yon tan mtha' dag rdzogs pa de nyid dngos su mos pa'i nga rgyal brtan po dang*/__gsal snang thob nas de nyid ye shes kyi skur dngos su nges pa'i shes pa drag pos rang nyid sems tha mal du zhen pa'i 'dzin sems sbyong bar byed pa yin no/__/gsum pa dag pa dran pa ni/__rgyas par zhi khro'i dkyil 'khor gang dang gang bsgom pa de'i zhal phyag sku mdog rgyan chas sogs rten dang brten par bcas pa sangs rgyas kyi ye shes de nyid de dang de'i rnam par shar ba'i brda don rtags gsum re re nas dran par bya dgos kyang*/__mdor na gnyug ma chos nyid kyi steng na 'bras bu rnam byang gi yon tan rnams rang bzhin lhun grub tu bzhugs pa las yon tan gang dang gang zhig lha'i rnam pa de dang de'i ngo bor gdod nas dag par bzhugs pa la ting nge 'dzin gyis bsgom pa'i lha de yang de las gzhan du ma gyur par rnam par dag par mos pas snang zhen thams cad kyang gdod nas rnam par dag pa'i lha ye shes kyi 'khor lo ru sbyong bar byed do/__/bzhi pa srog sdom gzer bzhi bshad pa la bzhi/__ting nge 'dzin gyi gzer/__snying po sngags kyi gzer/__'phro 'du phrin las kyi gzer/__dgongs pa mi 'gyur ba'i gzer bshad pa'o/__/dang po la gnyis/__ting nge 'dzin gyi rtsal sbyang ba dang*/__'byongs pa'i tshad 'bras bu dang bcas pa'o/__/kun kyang sems 'dzin rtse gcig bsam gtan gyis:__rang gi sems nyid lha skur rdzogs pa'i phyir:__phyag rgya phra rags gzugs su 'du byas pa:__dmigs pa'i rten du mkhas pas bzhag nas kyang :__lus bsrang rlung ro bsal zhing yid mig rlung :__rtse gcig gtad de yun thung grangs mang bsgom:__rim gyis g.yo thob goms brtan mthar phyin bar:__legs par bslab phyir thun tshod bsrings te bya:__bying rgod la sogs ting 'dzin skyon kun bsal:__skabs su mi rtog gnyug ma'i ngang du klong :__res 'ga' lha sku'i rtsal sbyong lam du slong :__lha dang rang sems dbyer med don la blta:__spyod yul thams cad ye shes rol par khyer:__ces gsungs te/__bskyed pa'i cho ga de dag kun gang la brten kyang bde gshegs zhi khro'i sku gsung thugs dang rang gi sgo gsum ro mnyam chen por brtan par bsgrub pa'i phyir srog sdom gzer bzhi'i man ngag dang ldan par gces te/__gsang rdzogs rgyud las/__ye shes 'jig rten gang la yang*/__/srog sdom gzer bzhi ma thebs na/__/nam yang don med yug pa rkyang*/__/yongs rdzogs dpal gyi srog 'phrog thabs/__/gcig shes pas ni kun srog thob/__/dper na sgra gcan 'dzin gyi khas/__/nam mkha'i nyi ma gcig zin pas/__/chu bran stong gi nyi ma kun/__/ma bzung par yang stong srog thob/__/de phyir srog sdom gzer bzhi gces/__zhes gsungs pa ltar las dang po pas/__lha sku'i rnam par sems 'dzin pa las gzhan du mi g.yo ba'i yid rtse gcig tu gnas pa'i bsam gtan gyis/__rang gi sems nyid rnam shes tshogs brgyad dang lha'i sku dang ye shes su rdzogs pa'i phyir ting nge 'dzin gyi gzer gdab par bya ste/__de'ang*/__ting 'dzin gzer ni thod sku la/__/rtse gcig sems bzung yengs mi bya/__zhes pa ltar/__thog mar lha phyag rgya gcig pa la phra ba sa bon a dkar po'am hUM sngon po la sogs pa khru gang pa gsal bar bris pa dang*/__rags pa lha'i gzugs mtshan nyid dang ldan pa thod par bris pa sogs 'du byas la/__rang mdun khad nye bar dmigs pa gtod pa'i rten du bskyed pa'i tshul la mkhas pa'i sgrub pa pos bzhag par bya/__de ltar byas nas kyang bde ba'i stan la lus gnad bsrang*/__rlung ro lan gsum bsal zhing yid kyi 'dzin stangs mig gi lta stangs rlung gi 'gro ldog gsum yul so so la ya bral du ma song bar phyogs mnyam por dmigs rten la rtse gcig tu btad de yun thung la grangs mang bar bsgoms pas nyams lnga rim par 'char bar 'gyur te/__de'ang dmigs rten la sems mi gnas par 'du byed kyi rtog pa mang po ban bun lang long du 'gyu ba ni g.yo ba'i nyams ri gzar kyi chu lta bu/__de nas rnam rtog cung zad zhi nas phal cher dmigs rten la sems gnas shing de'i rnam 'gyur gyi bag chags brtas pas mig btsum yang yid yul du wal gyis 'char ba ni thob pa'i nyams gcong rong gi klung lta bu/__dmigs rten la sgom pa ji lta bar rang nyid de dang der gsal thebs shing de'ang che chung rnam 'gyur ma nges pa ci 'dod bsgyur du btubs shing de las rtog pa gzhan tu mi g.yo ba ni goms pa'i nyams chu chen dal 'bab lta bu/__lha'i rnam pa de'ang rang sems dang dbyer med du bsres nas bsgoms pas rtog pa gang gis kyang bar du mi chod par sku yongs rdzogs la sems ji tsam gnas 'dod pa de srid du sdod pa ni g.yo ba'i nyams mtsho chung rlung gis bskyod pa lta bu/__de las kyang spyan gyi dkar nag ba spu'i bu ga tshun chad gsal nus shing nyin mtshan rtag tu yul rkyen gang gis kyang mi 'phrog par gsal brtan tshad brgyad gyad du gyur pa ni mthar phyin pa'i nyams rgya mtsho chen po rlabs dang bral ba lta bu ste/__de ltar ma gyur gyi bar du legs par bslab cing dang po nas mi sun par bya ba'i phyir goms rim gyis thun tshod kyi yun rim par bsrings te bsgom par bya dgos la/__de'i tshe sems mi gsal ba'i bying ba dang*/__'gyu ba spun por gyur pa'i rgod pa dang*/__la sogs pa'i khong nas rmugs 'thibs dang*/__'thor yas sogs ting nge 'dzin gyi skyon byung na ngo shes shing btang snyoms su ma shor bar kun la so so'i gnyen po brten te bsal lo/__/de nyid rtsal sbyong zhing bogs 'byin pa'i thabs nyang gter mtsho rgyal zhus lan dang*/__bla ma dgongs 'dus las lha lam du slong ba sogs rnam pa drug tu gsungs pa ltar gnad bsdu na/__skabs su sems rnam par mi rtog pa gnyug ma'i ngang du rang babs su lhod kyis klod la ngal gso/__res 'gar lha sku de nyid che ba ri rab nas chung ba til 'bru tsam sogs che chung mdog dbyibs spyod lam nye ring bzhugs gnas ma nges par bsgoms pas rtsal sbyong zhing lam du slong*/__skabs rer lha'i rnam pa dang rang sems dbyer med du bsres te bsgom bya sgom byed kyi gnyis 'dzin spangs la sgom mkhan rang ngo rig pa'i tshul gyis gnas lugs kyi don la blta ba rnams kyis mnyam bzhag gi rnal 'byor bskyang*/__rjes thob snang grags rtog tshogs lha sngags ye shes kyi 'khor lo/__/bgo ba zhi khro'i chas/__bza' btung tshogs 'khor/__'gro 'dug rdo rje'i gar sogs mdor na spyod yul ci dang cir snang ba thams cad lha ye shes pa'i rol pa 'ba' zhig par lam du khyer bar bya'o/__/gnyis pa ni/__de ltar ting 'dzin gzer la brten nas kyang :__yid kyi yul du ma 'dres gsal snang rdzogs:__dbang po'i yul du phyag rgya mngon sum shar:__lus kyi yul du shin sbyang thob pa'i ltas:__gzhan snang dbang bsgyur cho 'phrul cir yang 'char:__he ru ka dpal sku yi dngos grub thob:__ces gsungs te/__de ltar ji skad bstan pa'i man ngag gi rtsa ba ting nge 'dzin gyi gzer kho na la brten nas kyang yul gsum gyad du gyur te lus tha mal du 'dzin pa'i mngon zhen lha'i skur rdzogs par 'gyur te/__dang po rang gi yid kyi yul du gang bsgom pa'i lha sku phyag mtshan rgyan cha lugs dang bcas pa gsal la ma 'dres pa me long gi gzugs brnyan ltar 'char ba'i gsal snang rdzogs/__gnyis pa sems shin tu sbyangs pa'i mthu las yid dpyod ma yin par mig sogs dbang po'i spyod yul du lha'i phyag rgya mngon sum du shar/__gsum pa sems kyis lus 'byongs te lha nyid reg pa lus kyi yul du gsal bas lus shin tu sbyangs pa thob pa'i ltas gzhan gyi snang ba zil gyis gnon cing rang dbang du sgyur ba dang*/__las dang dngos grub thogs med du sgrub nus pa sogs ting nge 'dzin gyi spyod yul bsam gyis mi khyab pa'i cho 'phrul chen po cir yang 'char zhing sku'i srog 'phrog pas mthar thug he ru ka dpal chen po'i sku mi zad pa rgyan gyi 'khor lo dang dbyer med pa'i dngos grub thob par 'gyur ro/__/gnyis pa ni/__sngags kyi gzer ni mi 'gyur thugs srog dang :__yi ge'i phreng ba gsal bkod bsnyen pa ste:__yab yum zhal nas zhal dang gsang ba nas:__'gal me lta bur 'khor ba nye bsnyen yin:__he ru ka dpal gsung gi dngos grub thob:____ces gsungs te/__ngag la snying po sngags kyi gzer gdab pa ni/__lha so so'i rigs mi 'gyur ba'i rang bzhin thugs srog sa bon gang yin pa dang*/__de'i mthar rtsa sngags sam snying po'i yi ge gsal bar bkod pa la sems gtad pa ni bsnyen pa'i yan lag ste zla ba skar phreng lta bu'i dgongs pa dang*/__thugs srog las sngags phreng byung*/__yab kyi zhal nas yum gyi zhal dang de nas thugs kar brgyud yum gyi gsang ba nas yab kyi gsang bar zhugs te thugs kar thim/__slar yang de ltar bar ma chad pa 'gal me lta bur 'khor ba ni nye bsnyen gyi yan lag ste 'gal me klad kor gyi dgongs pa yin la/__de dag gis sngags rlung dbyer med du dag nas gsung gi srog 'phrog pas mthar thug he ru ka dpal chen po'i gsung mi zad pa rgyan gyi 'khor lo dang dbyer med pa'i dngos grub thob par 'gyur ro/__/gsum pa ni/__'phro 'du'i gzer gyis don gnyis mdzad pa dang :__dngos grub dbang du bya ba sgrub pa ste:__snod bcud snang grags rtog tshogs lha sngags dang :__ye shes chen por 'char ba sgrub pa ches:__yon tan phrin las kun la dbang 'byor zhing :__zhes gsungs te/__gang 'dod phrin las kyi kha sgyur ba 'phro 'du'i gzer ni/__thugs srog sngags phreng las 'phros pa'i 'od zer gyis rgyal ba mchod cing byin rlabs bsdus te rang don bsgrub/__'gro ba'i sgrib gnyis sbyangs nas sangs rgyas kyi sa la bkod pas gzhan don 'grub pa ste don gnyis mdzad pa dang*/__slar yang 'od zer spro bsdus thun mong dang mchog gi dngos grub bdag nyid kyi dbang du bya ba ni sgrub pa'i yan lag ste rgyal po'i pho nya 'gyed pa lta bu'i dgongs pa yin la/__mthar de ltar bsgrubs pa'i grub mtha' snod bcud kyi gzugs snang*/__grags pa'i sgra skad/__yid kyi rtog tshogs ji snyed pa thams cad snang stong lha'i sku/__grags stong sngags kyi sgra dang rig stong ye shes chen po'i 'khor lor 'char ba sgrub pa chen po'i yan lag bung ba tshang zhig gi dgongs pa ste/__de dag gis ye shes kyi rtsal 'byongs shing phrin las sna tshogs la rang dbang brnyes pas mthar thug sangs rgyas rnams kyi yon tan dang phrin las mi zad pa rgyan gyi 'khor lo kun la dbang 'byor chen po thob par 'gyur ro/__/zhing zhes pa'i tshig phrad ni lhag ma 'dren pa'i sgra'o/__/bzhi pa ni/__dgongs pa mi 'gyur lha tshogs ji snyed kun:__rang rig rtsal du rtogs shing goms pa las:__rlung sems lha sku dbyer med ro mnyam pa'i:__he ru ka dpal thugs kyi dngos grub thob:__ces gsungs te/__de dag spyi'i rgyas 'debs gal po che dgongs pa mi 'gyur ba'i gzer ni/__zhi ba dang khro bo'i lha tshogs ji snyed pa kun kyang shel las 'ja' tshon bzhin rang gi rig pa'i rang rtsal las gzhan tu ma grub par rtogs shing de'i rgyun la goms pa cher brtas pa las/__bag chags kyi bzhon pa rlung dang de'i kha lo sgyur ba po sems dang byin gyis rlob pa po ye shes kyi lha sku gsum ka'ang sems nyid kyi ngang du dbyer med ro mnyam du smin pa'i mthu las dgongs pa'i rtsal rdzogs te stong srog gcig car du 'phrog pa thob/__mthar thug he ru ka dpal chen po'i thugs mi zad pa rgyan gyi 'khor lo dang dbyer med pa'i dngos grub thob par 'gyur ro/__/gnyis pa rnal 'byor gyi yan lag bye brag tu bshad pa la/__dam tshig pa bskyed pa/__ye shes pa bstim pa sogs dkyus gcig tu bstan pa ni/__rnal 'byor yan lag dam tshig phyag rgya'i sku:__rdo rje gsum gyi ngo bor byin brlabs shing :__ye shes dbang bskur sgrib pa'i dri sbyangs te:__rigs dang rigs bdag ma 'chol phyag rgyas gdab:__gnyis snang bsal phyir dbyings las ye shes pa:__spyan drangs ro mnyam lhun gyis grub par blta:__rdo rje'i phyag dang zhabs ni bsil nas kyang :__dgyes pa'i gdan la brtan par bzhugs su gsol:__rang las rnam sprul rig pa'i lha mo yis:__brda' yi phyag 'tshal don gyi phyag len btab:__phyi nang gsang ba'i dbang por dgyes rgu'i yul:__nyer spyod 'dod yon sman gtor rak+ta dang :__sbyor sgrol zung 'jug mchod pa'i sprin chen pos:__bde ba chen po'i longs spyod lhag par spel:__che ba'i yon tan bsngags pa rdo rje'i glus:__sku dang ye shes phrin las nga rgyal bskyed:__ces gsungs te/__sngar bshad pa de rnams rim pa dang po'i rnal 'byor dngos gzhi yin la/__de nyid rdzogs par byed pa'i yan lag gi rnal 'byor rnams gang la 'byung ba'i gzhi dang po lha dam tshig pa'i skur bskyed pa de la'ang phyag rgya gcig spros tshogs sgrub kyi dbye bas bstan pa gang yang gtso bo'i sku rdzogs par bsgom pa/__yum gyi sa bon bskyed pa/__de las yum bsgom pa/__sems dpa' sum brtsegs bsgom pa/__rigs bdag gi rgyas 'debs pa dang lnga rim pa ji lta bar gzhi dus su/__byis pa btsas pa/__nar son nas 'dod pa'i tshor bas gdungs te/__de don du gnyer ba/__chung ma len pa/__sgo gsum gyi nus pa rim gyis 'phel ba/__rang rigs kyi bya ba la dbang sgyur ba rnams sbyong zhing 'bras dus su sangs rgyas sprul pa'i sku bltams pa dang*/__byang chub don du gnyer bas rab tu byung nas dka' thub mdzad pa dang*/__de las bzhengs te byang chub snying por gshegs pa dang*/__bdud btul te bsam gtan bskyed pa dang*/__rnam pa thams cad mkhyen pa'i ye shes brnyes pa rnams yin la/__lam gong ma'i tshe na bde stong ye shes kyi lha skur grub par bya ba'i phyir/__bde rlung sems la lha skur ldang ba dang*/__de nas mchog gi dngos grub la myur du sbyor ba'i gzhi 'ding pas na smin byed du 'gro ba yin no/__/yan lag rnal 'byor dngos la bdun yod pa'i dang po byin gyis brlab pa ni/__sbyang bya byis pa de nyid kyi lus ngag yid gsum gyi nus pa'i rtsal nar son par sbyong bar byed/__sbyangs 'bras ni sangs rgyas pa na sku gsung thugs kyi gsang ba bsam gyis mi khyab pa la mnga' brnyes pa nyid yin cing*/__sbyong byed ni/__dam tshig pa'i 'khor lo bskyed zin pa na de thams cad kyi spyi bor oM dkar po/__mgrin par AHdmar po/__thugs kar hU~M sngon po gsal zhing 'bar ba'am/__yang na rnam snang 'od dpag med mi bskyod pa bsgoms nas dam tshig pa'i sku gsung thugs sangs rgyas thams cad kyi rdo rje gsum gyi ngo bo dang dbyer med par byin gyis brlabs shing sgo gsum rnam par dag pa sangs rgyas kun gyi sku gsung thugs su mos pa'i nga rgyal byas pas/__lam gong ma'i dus na/__khu rdul rlung gi khams gsum sku gsung thugs te/__de rnams kyi snyigs ma zad nas dwangs ma 'phel ba las byung ba'i ye shes rgyud la skye ba'i gzhi 'ding ba'o/__/gnyis pa dbang bskur ba la/__sbyang bya ni/__byis pa de rtsa khams 'phel bas nyon mongs pa dug lnga'i rnam rtog rags par gyur pa de sbyong bar byed/__sbyangs 'bras ni sangs rgyas pa na de bzhin gshegs pa thams cad kyis bdag nyid khams gsum chos kyi rgyal por dbang bskur ba de yin cing*/__sbyong byed ni/__byin rlabs kyi rjes su lha tshogs rnams kyi mgo bo'i gnas lngar rigs bdag gtso bor gyur pa'i de bzhin gshegs pa lnga rang rang gi yum dang mnyam par sbyor ba'i rjes chags kyi mes byang chub kyi sems ye shes rnam pa lnga'i rang bzhin gyi bdud rtsi lngar zhu ba'i chu bo'i rgyun babs pas dbang bskur/__sku lus kyi nang gang*/__nyon mongs pa lnga'i sgrib pa'i dri ma bag chags dang bcas pa sbyangs/__chu'i lhag ma yar lud pa las rdo rje'i rigs la mi bskyod pas mtshon/__lha so so'i rigs dang mthun pa'i rigs kyi bdag po rigs gzhan du ma 'chol ba'i phyag rgyas gdab ste thob bya rang gnas kyi ye shes mngon tu gyur pa'i nga rgyal bzung bas/__rdzogs rim gyi skabs dga' bzhi lugs 'byung ldog gi rim pas dug lnga ye shes lngar dbang bskur zhing rlung sems gtsug tor du thim pa'i rgyu byed pas lam gong ma'i smin byed du 'gro ba yin no/__/gsum pa bsgrub bya dang sgrub byed gnyis su snang ba'i rtog pa bsal ba'i phyir du ye shes kyi 'khor lo sgrub pa ni/__sbyang bya byis pa de rang dang ris mthun gyi 'gro ba snga ma rnams dang blo gros kyi nus pa mnyam par gyur pa de sbyong bar byed/__sbyang 'bras ni sangs rgyas pa'i tshe na de bzhin gshegs pa thams cad ye shes gcig tu gyur pas dgongs pa gnyis su med par ro mnyam pa nyid yin cing*/__sbyong byed ni/__dam tshig pa'i thugs srog las byung ba'i 'od zer gyis rang bzhin gyi dbyings na bzhugs pa'i ye shes pa rnams kyi thugs rgyud bskul bas de dag chos kyi sku las ma g.yos bzhin du gzugs kyi sku bsgoms pa dang 'dra ba'i lha tshogs kyi rnam par bzhengs pa rnams skad cig gis spyan drangs te dam tshig pa'i 'khor lo dang ro mnyam du 'dres/__gdod nas lus dam tshig__/sems ye shes sems dpar lhun gyis grub par blta/__des dam ye la mchog dman tha dad du 'dzin pa'i zhen rtog spong ba dang*/__ye shes kyi 'khor lo de nyid rang gi sems dang dbyer med du shes pa dang*/__sangs rgyas thams cad kyi byin rlabs bdag nyid la 'jug pa sogs kyi dgos pa yod cing lam gong ma'i tshe dpe'i 'od gsal gyis don gyi ye shes mtshon par byed pa dang*/__'khor 'das gnyis med kyi ye shes rgyud la skye ba'i gzhi 'ding ba'o/__/bzhi pa bzhugs su gsol ba ni/__de nas yan lag brgyad ldan gyi chu bai DUr+Ya'i bya ma bum nas sbreng ba'i mchod yon dang*/__'dag chal dang ldan pa'i chu gtsang gis lha rnams kyi rdo rje'i phyag dang zhabs dag ni bkrus te dri ma bsil bar byas nas kyang*/__khri rkang pad nyi zla ba sogs gtso 'khor so so dang 'tshams pas thugs dgyes pa'i gdan brjid cing mdzes pa la dam ye dbyer med chu la chu bzhag pa ltar dngos grub kyi 'bras bu ma thob pa de srid du brtan cing g.yo ba med par bzhugs su gsol lo/__/lnga pa phyag bya ba ni/__'di dang mchod bstod rnams kyi sbyang bya ni/__byis pa de bza' btung gos rgyan gnas khang sogs la ci dgar spyod cing*/__yul nor gyi bcad ris dang khe grags sgrub pa rnams sbyong*/__sbyangs 'bras ni sangs rgyas pa'i tshe na de nyid du mchod pa'i bkod pa mtha' yas pa'i sprin rtag tu 'byung ba dang phyag gi gnas mchod pa'i zhing bla na med par gyur pa nyid yin cing*/__sbyong byed ni phyag mchod bstod pa'i las rim rnams te/__des lam gong ma'i tshe rig pa brtul zhugs kyi rol rtsed la ci dgar spyod pa'i gzhi 'ding bas smin byed du 'gro'o/__/de la dbyings dang ye shes gnyis su med pa'i ngang du dbyer med pa'i lhar rtogs pa nyid 'dres pa nan tan gyi phyag ces bya ba rnal 'byor mchog gi phyag yin la/__'jig rten sri zhu'i tshul du sngags phyi ba dang sgo bstun te phyag mchod phul ba la 'phrul dga'i lha rnams rang gis sprul pa'i longs spyod la rtse ba bzhin rang gi snying ga sogs las rnam par sprul pa rang gi rig pa'i rang bzhin las gzhan du ma g.yos pa'i lha mo dpag tu med pas shin tu gus pa'i tshul gyis/__a ti b+hu hoHzhes brda'i phyag mtshal bas lha rnams mnyes te pra ti b+hu hoHzhes don gyi phyag gi lan btab par mos/__drug pa mchod pa ni/__lha rnams kyi spyan sogs gzugs can dwangs pa phyi'i dbang po lnga/__de la brten pa'i rnam shes nang gi dbang po lnga/__de nyid ye shes rnam pa thams cad par bzhugs pa gsang ba'i dbang po ste longs spyod pa'i yul can so sor dgyes rgur skyed pa/__longs spyod bya'i yul phyi mchod zhi ba la thang skyes chu skyes mdzes pa'i me tog sogs dang drag po la dbang lnga'i puSh+pe sogs rang byung dur khrod kyi rdzas te dbang shes kyi nye bar spyod pa lnga/__nang mchod yid du 'ong ba'i gzugs sogs brda dang*/__snyoms 'jug las byung ba don te dbang shes kyi sgo lnga'i 'dod pa tshim byed kyi yon tan lnga/__nang mchod khyad par ba dug lnga rnam dag rtsa brgyad stong sbyar bdud rtsi sman mchod/__'dod yon zag med kyi bde bas ye shes kyi stobs skyed pa'i gtor ma/__rgyud drug khams gsum gyi rtsa ba chags med dmar chen gyi dwangs mar bskyil ba'i rak+ta rnams dang*/__gsang mchod don dbyings dang ye shes rtags lha tshogs yab yum mnyam par sbyor ba'i zhu bde khyad par can gyis yas babs dang mas brtan gyi dga' bzhi'i rim pa las skyes pa'i bde ba chen po mchog tu mi 'gyur ba'i ye shes kyis tshims par sbyor mchod dang*/__thog mar rang gi gnyis 'dzin gyi rtog tshogs gnyis med shes rab zab mos chos kyi dbyings su bcom nas/__de las dmigs med kyi snying rje chen pos bdag lta'i nyer len la brten nas log par zhugs pa'i dgra bgegs mtha' dag sgyu ma lta bu'i ting nge 'dzin gyi 'khrul 'khor gyis 'khor 'das ro mnyam klong du bsgral ba'i mchod pa dang*/__de kho na nyid kyi mchod pa bya byed las gsum gdod ma nas rnam par dag pas snang shes thams cad sku dang ye shes chen por zung du 'jug par shes par ste/__de ltar na dngos bshams dang yid byung ting nge 'dzin gyi rol pas spel ba'i mchod pa'i sprin chen pos chos kyi dbyings rgyas par bkang ste lha rnams kyi dbang po'i yul du phul bas bde ba chen po'i longs spyod lhag par spel bar bya'o/__/bdun pa bstod pa ni/__chos kyi sku las gzugs sku longs spyod rdzogs pa zhi chags khro bo'i rnam par shar ba dang*/__de las gang 'dul sprul pa'i skur bstan pa rnams kyi sku gsung thugs kyi che ba'i yon tan rjes su dran pas bsngags pa brjod pa zab cing rgya che ba'i rdo rje'i glu rab tu sgrog cing bstod pas/__sku dang ye shes rtag cing khyab pa'i phrin las dang bcas pa'i gzi byin lhag par 'phel bar mos pa nyon mongs pa dang bral ba che ba'i nga rgyal bskyed par bya'o/__/lam rim nyams su len pa'i skabs bskyed pa'i rnal 'byor yan lag dang bcas pa'i zhar byung du bzlas pa'i rnal 'byor 'byung bas/__de'i sbyang bya ni/__'khor bar ming tshig yi ge'i ngag gi brjod pa du ma dang sgra don 'dres 'dzin gyi rtog pa rnams sbyong zhing*/__sbyangs 'bras ni sangs rgyas nas gdul bya la chos 'khor bskor ba sogs gsung rdo rje'i phrin las kyis don mdzad pa'i rten 'brel sgrig__/lam gong ma'i skabs su rtsa rlung dbyangs gsal gyi yi ger smin pa dang*/__srog thur 'dres shing bde gsal mi rtog par 'char ba'i smin byed du 'gro/__sbyong byed ni ngag bzlas yid bzlas rdor bzlas mkha' khyab kyi bzlas pa sogs dang 'brel ba'i ting nge 'dzin ji snyed pa rnams so/__/rtsa ba'i sa bcad gsum pa sgrub thabs rjes kyi bya ba rnams dkyus gcig tu bshad pa ni/__ting 'dzin bsgom pa'i rjes kyi bya ba ni:__bar chad bsal zhing dngos grub spel ba'i phyir:__thun mtshams kun tu gtor ma'i mchod pa 'bul:__thabs shes dbyer med kun spyod khyad par can:__bde chen tshogs kyi 'khor los nyon mongs gcod:__skal ldan mi dang dgyes ldan yo byad mchog:__dngos grub lha dang bsod nams ye shes tshogs:__phyi nang gsang ba bla na med pa yis:__bsgrub bya mnyes shing sgrub pa'i nyams chags skong :__sgrol ba lam longs sbyor ba tshad du phyin:__he ru ka dang spyod yul mnyam par 'gyur:__ye shes lha la bsnyen bsrings mi mnga' yang :__'gro ba'i don phyir thugs dam gnad nas bskul:__'jig rten tshul ston rgyud gsum bka' nyan rnams:__tha tshig bsgrags shing las kyi gnyer byang gtad:__khyad par bod khams so kha srung ba'i phyir:__che zhe 'khor bcas bshal chu'i bdud rtsis brngan:__las rnams gsor mi rung ba'i mtha' sdud ni:__rnam bzhi'i dal du rdau rje'i rta bro brdung :__bsgrub bya'i lha la thun mong mchog nyid kyi:__dngos grub rgyun dang dus su lhag par blang :__dmigs med thugs rje'i bka' drin gsob pa'i phyir:__mchod cing bstod pas gtang rag dag kyang dbul:__cho ga yo byad lhag chad nyams pa rnams:__gnong zhing 'gyod pa'i tshul gyis rab tu bshags:__rtag mtha' sbyang phyir snod bcud lhar snang kun:__'od gsal stong nyid thig le chen por bsdu:__chad mtha' bsal slad zung 'jug sgyu ma'i skus:__snang grags rtog tshogs lha sngags chos skur sbyong :__dge tshogs mi zad 'phel zhing mthar dbyung ba:__yongs su bsngo dang smon lam zab mo gdab:__shis brjod glu dang me tog char 'bes pas:__phyogs dus gnas skabs kun tu dge legs spel:__ces gsungs te/__de ltar bskyed rim gyi ting nge 'dzin de dag bsgoms zin pa'i rjes kyi bya ba yang ni bcu gsum ste/__dang po gtor ma 'bul ba ni/__dgos pa ni/__gzugs can gzugs med kyi bar gcod thams cad bsal zhing tshogs rnam pa gnyis rdzogs pa las dngos grub rnam pa gnyis kyi stobs spel bar byed de/__brtag gnyis las/__sems can kun gyi srog bsrung phyir/__/rdo rje sems dpas gtor ma bstan/__/ces pas mtshon gsar rnying gi rgyud dang man ngag las mang du gsungs pa'i phyir/__dus rnal 'byor las ldang ba'i thun mtshams kun tu btang bar bya zhing khyad par bla med nang gi gtor ma ni srod kyi dus su lhag par bsngags so/__/gtor ma'i ngo bo ni/__ji skad du/__gtor ni chos kyi dbyings yin te/__/ma ni rig pa'i ye shes yin/__ces pa ltar dbyings ye gnyis su med pa'o/__/nges tshig ni/__ba la'i sgra las phung po lnga dang 'byung ba bzhi rnams kyi stobs skyed pa'o/__/dbye ba ni/__phyi rdzas/__nang phung po/__gsang ba byang sems/__yang gsang de kho na nyid kyi gtor ma bzhi/__de re re la'ang rnam dbye mang ba las 'dir phyi'i gtor ma gtso bor bstan/__de la'ang rten gtor rtag gtor 'dzin gtor rgyun gtor 'phral gtor sogs yod pa las/__'dir thun mtshams su 'phral du btang ba'i gtor ma'i mchod pa ste/__gtor rdzas rin po che dang pad+ma b+hany+dza'i snod du kha zas bzang rgu spungs pa'am yul lugs bshams pa'i dbyibs 'das ma 'das tshan tu bcos pa la bza' btung dang bcas pa/__yul 'jig rten las 'das pa rtsa gsum dam can rnams dang 'jig rten pa srid gsum 'byung po'i tshogs rnams la 'bul ba'o/__/gnyis pa tshogs kyi 'khor los mchod pa la/__ngo bo ni/__thabs shes dbyer med kyi kun spyod khyad par can yin la/__nges tshig ga Na tsakra'i sgra las/__bde ba chen po'i tshogs chen 'dus pa'i 'khor los nyon mongs pa'i drwa ba gcod par byed pa'o/__/dbye na/__skal ldan mi'i tshogs/__dgyes ldan yo byad mchog gi tshogs/__dngos grub lha'i tshogs dang*/__tshogs chen po bsod nams ye shes dang bcas bzhir gsungs la/__de dag kyang rim bzhin thabs shes zung du 'brel ba'i skye bo dam pa 'dus pa dang*/__khyad par yo byad lnga la sogs pa tshang ba dang*/__dngos grub kyi rten tu gzugs brnyan bkod cing ye shes kyi dkyil 'khor rten dang brten pa srung ma bcas bsgom pa dang*/__snang la ma 'gags par spyad pas bsod nams dang spyod bzhin du mi dmigs pa'i shes rab kyis zin pas ye shes kyi tshogs rdzogs pa ste/__sgyu 'phrul bshad rgyud rdo rje las/__skye bo mdza' ba kun tshogs pa/__/rnal 'byor 'dus pa'i tshogs zhes bya/__/'byor pa'i longs spyod tshang ba ni/__/bde ba'i longs spyod tshogs su bshad/__/lha dang dam can kun 'dus pa/__/'dus pa chen po'i tshogs su bshad/__/thams cad spyod la mi 'dzin pas/__/tshogs gnyis rgyun du rdzogs byed pa/__/tshogs chen po ru nges par bshad/__ces so/__/de dag gi las kyi rim pa ni/__spyir las rgya la brten pa'i tshogs 'khor mtshan nyid pa la gang du 'tshogs pa'i gnas dur khrod sogs dben pa'i gnas su skor khang rim pa gsum pa brtsegs la/__gang gi tshe 'tshogs pa'i dus spyi dang khyad par ba rnams dang*/__ji ltar bya ba'i khyad par brda dang brda'i lan bya ba sogs phrin las kyi kha skong ba'i tshogs mchod nyi tshe ba tsam la mi 'grub pas ma smos shing gang la'ang rnal 'byor pho mo lha'i ting nge 'dzin la gnas pas thabs shes kyi rdzas rnams dam ye gnyis med kyi bdud rtsir byin brlab/__dam tshig gi rdzas rnams las phyi nyer spyod nang 'dod yon gsang ba rig ma'i tshogs dpag tu med par sprul pa dang*/__thams cad kyang ka dag rtsol bral gdod ma'i gzhi la ngang gis rdzogs pa bla na med pa'i mchod pa rnams kyis phyi ltar dkyil 'khor pa rnams mchod pas bsgrub bya'i lha mnyes shing sgrub pa po'i dam tshig nyams chags thams cad skong bar byed/__tshogs gral du 'thab rtsod ku co tha mal gyi bden zhen spangs te bdud rtsi'i mchod rdzas gtum mo'i mes bzhu ba'i dwangs mas lus nang gi lha tshogs thams cad mchod par bsams pas nang ltar rnal 'byor pa'i phung khams skye mched kyi lha rnams mchod/__smin slob spros bcas la nub tha ma'i nam gung gi dus su ta na'i mdzad spyod rmad du byung ba la sbyor te/__de'ang bsgral bya'i zhing rtogs pas bsgral bya gnyis 'dzin gyi zhen rtog dang snying rjes bsgral bya zhing bcu/__sgrol byed slob dpon yang rang bzhin gyis sgrol ba'i lta ba/__ting nge 'dzin gyis sgrol ba'i nyams/__dbang po yul dus kyis sgrol ba'i spyod pa/__thabs chen pos sgrol ba'i sngon byung gi rjes su 'jug pa'i gdams ngag__/mngon du phyung bas sgrol ba'i mdzad spyod la mkhas pa dang*/__bsgral bya 'dzin pa/__sgrol ba/__stob pa la mkhas pa'i king ka ra gsum tshogs pa rnams kyis sgrol ba lam du longs/__rnal 'byor pho mo 'khrig pa'i kun spyod kyis snyoms par zhugs pas sngar gyi tshogs zhing gi lha rnams kyang 'dod chags chen pos byang chub sems kyi ngo bor zhu nas rang la ro gcig tu thim zhing*/__reg pa'i bde ba sa dang*/__gsher ba chu sogs lugs ldog gi 'byung lnga'i rim pas rin chen mkha' 'gro la sogs pa rigs lnga'i bde ba skyed cing*/__lugs 'byung gi dga' bzhi myong ba'i mthar rlung sbyor gyis khams 'dzag med du bzung ba ldog khyab bsre ba'i sbyor bas lugs ldog gi dga' bzhi'i ye shes nyams su myong ba'i mtshon rim gyis dpe don gyi lhan cig skyes pa'i ye shes kyi ro mnyam pa la yang dag par sbyar bas rtsa khams kyi dpa' bo mkha' 'gro thams cad gsang ba'i sregs blugs kyis mnyes par bsams pas gsang ba rtsa khams kyi lha rnams mnyes te sbyor ba tshad du phyin/__yul stong pa nyid dang*/__yul can rang rig zung du 'jug pas 'khor 'das gdod nas dkyil 'khor du grub pa nyid 'khor gsum mi dmigs bde ba chen po de kho na nyid kyis mchod par bsams pas yang gsang mchog gi tshogs 'khor mthar phyin no/__/mos slob 'dra 'bag gi tshe gal po las/__/dang po 'dod yon drug gis mchod/__/gnyis pa dam rdzas bdud rtsis bshags/__/gsum pa dgra bgegs gzugs phung stob/__/ces pa ltar tshogs phud cha gsum du spros nas/__dang po 'dod yon gyi lha mo nam mkha' gang bar spros te mchod/__/bar pa bdud rtsir brlabs la bshags/__tha mar gsang ba la 'khu ba'i dgra bgegs 'gugs bsgral bstabs nas tshogs rdzas nang gi sregs blugs su longs spyad la slob dpon gyis gnang ba thob na rdo rje'i glu dang gar la sogs pa'ang bya/__lhag ma rnams gsog 'jog med par bsdus pa'i dme gtor mchod pa'i ras ma dang bcas pa'i steng du phud cha gsum pa'ang bsnan te bdud rtsir sbar bas mar gyi gnas bdun sogs lhag ma'i dam tshig tu gtogs pa rnams la bsngos te/__sgrub khang nas gom pa bdun cu bor ba ni srin mo'i za lam yin pas der bskyal lo/__/de lta bu'i tshogs kyi 'khor lo der 'dus pa thams cad dpal he ru ka dang spyod yul mnyam pa'i dngos grub chen po dus de nyid du 'thob par 'gyur la/__rjes mthun pas kyang rim gyis de ltar 'thob pa'i skal ba can du 'gyur ba sogs phan yon che ste/__rdo rje drwa ba las/__bsod nams nang nas tshogs 'khor mchog__/tshe 'dir bsam pa kun 'grub cing*/__/bgegs dang bar chad zhi ba dang*/__/phyi ma rig 'dzin rgyal ba'i zhing*/__/kun tu bzang po 'thob par 'gyur/__/ces so/__/gsum pa thugs dam bskul ba ni/__brtan g.yo kun tu khyab pa'i ye shes kyi lha la bskul dang ma bskul bas bsnyen bsring ste nye ring mi mnga' yang*/__'khor bar sdug bsngal gyis mnar ba'i 'gro ba rnams kyi don mdzad pa'i phyir du sngon ji ltar thugs dam bcas pa'i tha tshig gi gnad nas smos te gdung shugs drag po dang gsang ba'i rnge'u chung sogs kyi sgras bskul lo/__/bzhi pa chad tho bsgrags pa ni/__'jig rten rang rgyud pa'i tshul du ston cing ston pa'i bstan pa dang khyad par bla med rdo rje theg pa srung ba'i gnyer kha dang ldan pa pho rgyud mo rgyud ma ning ste rgyud gsum gyis bsdus pa'i chos skyong dam tshig can ci bsgo ba'i bka' nyan pa rnams la gtor ma 'dod yon gyi phung por bsngos te/__sngon brgyud gsum rig 'dzin bla ma rnams kyis ji ltar bsgos pa las mi g.yel ba'i tha tshig bsgrag cing phrin las bzhi sogs ji ltar 'dod pa'i las kyi gnyer byang bcol dam du gtad par bya'o/__/lnga pa brtan ma skyong ba ni/__dgos pa khyad par can du gyur pa sngon o rgyan gyi slob dpon chen pos bod khams la mtha' dmag chos min gyi nyer 'tshe mi 'byung ba'i slad du phyogs bzhi'i so kha srung bar bka' bsgos pa'i phrin las rtag tu mdzad pa'i phyir/__che zhe ste ma sring gi tshul du brtse zhing gdung ba'i sems ldan bdud mo gnod sbyin sman mo'i rigs can brtan ma bcu gnyis 'khor dang bcas pa srung ma'i gtor gzhong bshal ba'i chu bdud rtsir brlabs pa las kyi brngan par sbyin/__drug pa rol pa'i bro brdung ba ni/__phrin las rnam pa bzhi'i bya ba bsgrubs zin pa de rnams zhi ba la ma zhi ba sogs ldog phyogs su gsor mi rung bar byed pa'i mtha' sdud kyi phrin las ni/__zhi rgyas dbang drag rnam pa bzhi la rim bzhin snang srid thams cad badz+ra rat+na pad+ma karma he ru ka'i dal du gsal nas las bzhi'i dbyibs dang mthun pa'i bro ra bskor te rdo rje'i rta skad kyi dgongs pa ldan pas bro brdung ngo*/__/bdun pa dngos grub bskul ba ni/__bsgrub bya ye shes lha'i dkyil 'khor la mtshan ldan gyi thod par dza gad dang gsol byang bcug pa sogs bkra shis pa'i rdzas la brten te thun mong phrin las bzhi dang grub pa chen po brgyad/__thun min sku dang ye shes mchog nyid kyi dngos grub myur ba nyid du stsol ba'i gsol ba khyad par du gdab ste/__de'ang sgrub pa'i skabs su ltas bzang byung na de ma thag tu dngos grub ma blangs na yal ba'i nyan yod pas de ltar len pa la rgyun gyi dngos grub blang ba zhes grags pa dang*/__sgrub pa mthar phyin pa'i tho rangs skya rengs shar ba'i dus su lhag par te nges pa kho nar dngos grub blang ba'i cho ga bya'o/__/brgyad pa gtang rag 'bul ba ni/__bsgrub bya'i dkyil 'khor pa rnams kyis dmigs pa med pa'i thugs rje'i shugs kyis dgongs te bdag cag gi dang por bsnyen pa dang nye bsnyen gyi dus na thugs nye bar mdzad/__sgrub pa dang sgrub chen gyi dus su ji ltar 'dod pa'i don thams cad bsgrubs par mdzad pa'i bka' drin rjes su gsob pa'i phyir du phyi nang gi mchod pa ji snyed pas mchod cing che ba'i yon tan la gus pa chen pos bsngags shing bstod pas las sgrub pa'i gtang rag dag kyang dbul lo/__/dgu pa nongs bshags ni/__bsnyen sgrub kyi dus su cho ga ting nge 'dzin gyi rim pas rten sgrub mchod pa'i rdzas sogs dgos pa'i yo byad rnams la gzhung las ma gsungs pa'i lhag pa dang gzhung mthun ma tshang bas chad pa dang cho ga'i yan lag bzlas brjod kyi tshul sogs gzhung dang mi mthun cing yo byad ma dag pas nyams pa ste/__mdor na nyes pa'i rgyu bzhis nongs par gyur pa rnams kyis 'phral yun gyi dngos grub la sgrib par byed pas/__sems gnong zhing 'gyod pa'i ngang tshul lus kyis phyag dang ngag gis gsong por smra bas mthol ba'i smre sngags dang rdor sems yig brgya bzlas la rab tu bshags te sor chud par bya'o/__/bcu pa bsdu rim ni/__dgos ched sems can rnams kyi rgyud la 'khrul snang rtag par lta ba'i mtha' la zhen pa yod pas de sbyong ba'i phyir yin la/__sdud tshul sngar bsgoms pa'i phyi snod gzhal yas khang dang nang bcud lha'i 'khor lor snang ba kun gtso bo'i thugs ka'i 'od zer gyis rim par bsdus te/__mthar sa bon dang nA da shin tu phra ba'i bar dang de'ang 'od gsal stong pa nyid gdod nas rang byung gi thig le chen po spros pa mtha' dag bral ba'i dbyings su bsdus la ci gnas su mnyam par bzhag go__/bcu gcig pa thun mtshams kyi lhar ldang ba ni/__stong nyid kho nar snyoms par 'jug pa ni/__chad pa'i mtha' yin pas de bsal ba'i slad du slar yang stong nyid kyi ngang las snying rje'i rang rtsal snang stong zung 'jug sgyu ma lta bu'i lha'i sku rang byung gnyug ma'i tshul can du lam gyis gsal ba'i gnas gsum rdo rje gsum gyi rgyas gdab cing*/__gzugs snang sgra grags sems kyi rtog tshogs thams cad yi dam gyi lha dang de'i sngags kyi sgra dang gnas lugs chos kyi skur shes pas spyod lam la 'jug go__/'di dag gi sbyang bya ni/__byis pa de nyid lang tsho rdzogs nas 'chi ba slar yang 'byung ba mtshon pa ste/__snod bcud srung 'khor la bsdu ba ni gzugs sogs snang ba thim pa dang*/__srung 'khor nas snying po'i pho brang gi lte ba'i bar bsdu ba ni sa chu la thim pa sogs rags pa thim pa/__'khor rnams rim par gtso bo la thim par snang ba/__yum yab dang de ye shes sems dpa' la thim pa mched pa/__ye shes sems dpa' sa bon la thim pa thob pa/__de gyen rdzogs kyis nA' da'ang bsdus pa nyer thob ste 'chi ba'i 'od gsal dang*/__de las lhar ldang ba bar do sbyong zhing*/__sbyangs 'bras ni/__sangs rgyas gzugs kyi sku'i snang ba ni chos sku'i phrin las yin cing*/__chos kyi sku'i ye shes kyang dbyings kyi ngo bo yin pas der thim pa dang*/__de las gzugs sku'i snang ba rgyun mi chad pas na de las ldang ba mtshon no/__/lam gong ma'i dus su dbang bzhi pa'i nyams len snod bcud 'od gsal du bcug nas slar yang zung 'jug gi skur ldang nus su sgrub pa'i rgyur 'gro bas smin byed do/__/bcu gnyis pa bsngo smon ni/__de ltar phar phyin theg pa las khyad par du mas 'phags pa bla na med pa'i dge ba tshogs gnyis zung 'brel du bsgrubs pas mtshon/__dus gsum gyi dge rtsa thams cad 'gyod pa sogs kyis nam yang mi zad par nyin re bzhin gong nas gong du 'gyur khyad chen pos 'phel ba dang*/__sems dang por bskyed pa nas brtsams lam sgrub pa thams cad kyi 'bras bu rgya cher smin cing mthar dbyung ba la mchog tu bsngags pa/__'khor gsum yongs su dag pa'i bsngo ba dngos sam rjes mthun pas rgyas btab cing theg pa chen po spyi dang khyad par gyi tshul las 'byung ba'i smon lam zab cing rgya che ba rnams kyang gdab pas las byas pa don chen po dang ldan par 'gyur ro/__/bcu gsum pa shis brjod ni/__de dag gi mthar phyogs dus rgyal ba sras bcas dkyil 'khor pa'i lha tshogs rnams kyis bkra shis pa'i bden tshig brjod/__rdo rje'i glu dbyangs len/__me tog man+da ra ba'i char chen 'bebs par bsams la rang nyid kyang de dang mthun pa'i shis brjod dbyangs rol me tog 'thor ba sogs bya ste/__phyogs bcu dus bzhi gnas skabs ji lta bur spyod kyang kun tu mi mthun pa'i ming yang mi grags shing bsam don yid bzhin tu 'grub pa'i dge mtshan dang legs pa'i dpal 'byor gong 'phel du spel bar bya'o/__/phrin las kyi rim pa de dag kyang gsang sngags lung gi sgo bzhi dang 'brel dgos te/__ji skad du/__don dam gsal 'debs brjod pa tshig gi sgo/__/thugs dam gnad bskul gsang ba sngags kyi sgo/__/dmigs pa rtse gcig ting 'dzin yid gyi sgo/__/mtshon pa brdar btags phyag rgya gar gyi sgo/__/zhes pa las sngags tshig ting nge 'dzin gsum ni thams cad du 'brel dgos shing mchod pa sogs la phyag rgya'ang dgos pa yin no/__/gnyis pa de la brten pa'i phrin las rab 'byams sgrub pa la gnyis/__gang gis sgrub pa'i gang zag thun mong du bshad pa/__gang sgrub pa'i phrin las so sor phye ste bshad pa'o/__/dang po ni/__gzhan yang lam gyi drod thob rnal 'byor pas:__ces gsungs te/__rtsa ba'i sgrub thabs bstan zin nas nye bar mkho ba'i phrin las rab 'byams kyi nang nas rdo rje slob dpon kyi bya ba'i gtso bor gyur pa/__gzhan yang ji ltar sgrub pa'i tshul bstan par bya ste/__las de dag gang zag gang gis sgrub na spyir de nyid bcu dang ldan pas rdo rje slob dpon gyi mtshan nyid tshang ba dang khyad par rim pa gnyis kyi lam tshul bzhin nyams su blangs pas phyi nang gsang ba'i drod dang rtags tshad thob pa'i rnal 'byor pas bsgrub par bya ba yin te/__rgyud las/__slob dpon de nyid bcu shes shing*/__/mtshan nyid kun dang yang dag ldan/__/phyag rgya sngags dang cho ga shes/__/las rnams kun la mkhas pa'o/__/zhes pa ltar ro/__/gnyis pa la bdun/__rab gnas/__sbyin sreg__/bcud len/__gnas lung*/__rjes bzung dang tshar gcod kyi phrin las/__bam sgrub/__bdud rtsi'i sgrub pa'o/__/dang po la gnyis/__dgos pa bstan te mtshams sbyar ba/__rab tu gnas pa'i cho ga dngos so/__/dang po ni/__'jig rten kun tu phan bde 'byung ba'i phyir:__dam tshig rten la ye shes sems dpa'i tshogs:__dbyer med lhag par rab tu gnas pa ni:__zhes gsungs te/__de'ang rten la rab gnas byed pa'i dgos pa ni/__rten rab gnas ma byas pa dang*/__cho ga dman pas byas na mi shis shing bsod nams kyi zhing du mi 'gyur la de dag tshul bzhin byas na rten de la mchod pas dkon mchog gsum dngos la mchod pa'i bsod nams thob cing gzhan rgyud byin gyis rlob nus par 'gyur te/__gsang snying las/__sa la sogs las phyag rgyar byas/__/rnam grol rim par thob 'gyur na/__/dag pa'i ye shes kyis sbyangs bas/__/smos ci dgos te de nyid yin/__ces so/__de yi mthu las 'jig rten gyi khams kun tu phan pa dang bde ba rgya chen po 'byung bar 'gyur te/__rngam glog las/__rab gnas cho ga yang dag bya/__/bkra shis dpal dang bde legs byed/__/ces pas mtshon rgyud lung rnams su rgya cher gsungs pa'i phyir ro/__/ngo bo ni/__rgyal ba'i phrin las sprul pa'i gzugs brnyan dam tshig rten la ye shes sems dpa'i lha tshogs kyi gsang gsum yon tan mtha' dag bstim zhing dbyer med par dge zhing bkra shis pa'i rang bzhin tu byed pa ste/__gal po las/__sku gsung thugs kyi rten rnams la/__ye shes gzhug pa'i byin rlabs can/__/'khor ba 'byung ba lnga'i gnas/__/sku dang gsung dang thugs nyid yin/__zhes so/__/nges tshig ni/__su pra tiSh+Tha'i sgra las/__rten nyid lhag par ye shes pa'i ngo bor yun ring por rab tu gnas par byed pa'i cho ga ste de'i tshul ni 'di ltar ro/__/gnyis pa la gsum/__gang la rab tu gnas pa'i yul/__gang gis rab tu gnas pa'i tshul/__ji ltar rab tu gnas pa'i bya ba'o/__/dang po ni/__mtshan nyid rdzogs shing bya ba mthar phyin rten:__zhes gsungs te/__rab tu gnas bya'i rten rgyud dang mkhas pas bshad pa'i cha tshad dang lha so so'i rgyan dang rnam 'gyur tshul bzhin ldan pa dang*/__dam tshig gi glegs bam rgyud bzhin bris pa sogs so so'i mtshan nyid tshul bzhin rdzogs shing bzo 'phro lus pa ma yin pa bya ba mthar phyin pa'i sku gsung thugs kyi rten gtso bor gyur pa rnams ni/__ji skad du sku gzugs mtshan nyid ldan pa ste/__/zhi ba la sogs nyams dang ldan/__tshad kyi tshad la phab cing bzang*/__de 'dra rab tu gnas par bya/__/zhes gsungs pa bzhin no/__/gnyis pa ni/__gnas dus yo byad ston 'khor phun tshogs pas:__zhes gsungs te/__gang du bya ba'i gnas ni/__phyogs dang kha dog la sogs pa'i sgo nas zhi rgyas kyi gnas su bsngags pa dang*/__khyad par bkra shis shing nyams dga' ba ste/__gal por/__bkra shis dag pa chen po'i gnas/__/yid 'ong nyams ni rnam par dga'/__/zhes so/__/dus ni dgun zla tha chung nas dbyar zla 'bring po'i bar nyi ma byang bgrod kyi dkar phyogs gza' skar 'phrod sbyor bzang zhing bkra shis pa la bya ste/__sgyu 'phrul las/__tshes grangs yar gyi brgyad la brtsam/__/shin tu skar ma rgyal rnams la/__/zhes so/__/yo byad dkyil 'khor sgrub mchod la dgos pa rnams dang rdzas sum cu sogs dang ldan pa'i khrus bum 'dag chal gos zung mnga' dbul spyi dang bye brag gzung bum me tog bzang po la sogs pa/__byed pa po ston pa rdo rje slob dpon de nyid bcu ldan/__'khor dam tshig dang sdom pas rgyud dag cing cho ga'i bya ba so so la mkhas pa ste phun sum tshogs pa lnga dang ldan pas rab tu gnas pa'i cho ga brtsam par bya'o/__/gsum pa ni/__bgegs dang dri sbyang byang chub sems mchog bzung :__bskyed cing dgug bstim dbang bskur phyag rgyas gdab:__mos pa bzhin du zhal bsgyur mngal dbul la:__mchod pa'i gnyer gtad bkra shis bden tshig brjod:__ces gsungs te/__thog mar gang la brten pa'i bdag gi rnal 'byor dkyil 'khor sgrub mchod lha bum khrus bum bsgrub pa sogs byas nas/__rab gnas dngos la don tshan bcu gcig yod pa'i dang po bar gcod kyi bgegs rnams la gtor ma sbyin te zhi bas sbyang ba dang*/__rdzas zhi ba dang sngags drag po ste phyed mas sbyang ba dang*/__rdo rje'i khro bo'i snyems pas sprul pa'i pho nya dang bcas pas bsdigs shing tshar gcod pa drag po'i sgo nas sbyangs te bsal ba'i rjes 'brel du zan chang sogs rdzas bzhi sngags dang bcas pas mi shis pa sbyang ba dang*/__til dang me chu'i sbyor bas sdig pa sbyang*/__sbyang gzhi rten de la sbyang bya bzo bo la sogs pa'i mi gtsang ba'i dri ma sbyong byed bum chu bdud rtsir bsgrubs pa dang*/__sbyong pa po slob dpon rjes 'brang dang bcas pas/__sbyangs 'bras rten ye shes sems dpa'i ngo bor bsgrub rung du byed pa ni nyes tshogs bsal ba'i cho ga'o/__/gnyis pa mkha' mnyam pha ma sems can ma brgal ba rnams bsgral zhing ma grol ba dgrol ba'i slad du bzang po spyod par dam bca' ba'i go cha brtan po bgo ste byang chub sems mchog rnam pa gnyis lhag par bskyed cing bzung bas rang gnas kyi rgyu rkyen nus ldan du bsgrub/__gsum pa rten so so dang mthun pa'i lha'am/__rigs thams cad khyab bdag rdo rje sems dpa' kho nar bskyed kyang chog la/__yang na gal po las/__gzugs sku'i rten gyi sku gsung thugs/__/lug ma ri mo la sogs pa/__/spyir na rnam par snang mdzad gzhi/__/yang na rigs bdag gang yin lha/__/pusti glegs bam la sogs gsung*/__/mtha' yas mchog tu bsgoms par bya/__/yang na yi dam rigs gang yin/__rdo rje dril bu la sogs kun/__/mi bskyod rdo rje 'dzin pa'am/__/sku gsung thugs dang rigs lngar 'dus/__zhes gsungs pa ltar sangs rgyal rig lngas bsdus pa'i dam tshig pa bskyed cing*/__bzhi pa bdag dang dam tshig pa'i thugs ka'i 'od zer gyis rang bzhin gyi gnas nas ye shes pa spyan drangs shing dgug ste mdun mkhar bzhugs pa la mchod/__de nyid dam tshig pa la 'gug gzhug bcing mnyes kyi phyag rgya bzhis chu dang 'o ma ltar dbyer med du bstim/__lnga pa de la cho ga rgyas bsdus gang yang rung bas dbang bskur te/__de'ang sbyang gzhi lha'i rgyud nyes pas rnyog pa can du byas pa'i dri ma sbyong byed lha rnams chags pa chen pos zhu ba'i byang sems ye shes kyi chu rgyun/__sbyong ba po nam mkhar spyan drangs pa'i gdan gsum tshang ba'i lha rnams/__sbyangs 'bras dmigs med kyi rgyud dag pas ye shes lha'i ngo bo khyad par can du sgrub pa dbang bskur ba'i byed pa can te/__nges tshig dri ma bkru ba dang nus pa 'jog pas 'brel bas so/__/bdun pa dbang bskur ba'i chu zhabs kyi spyi bor rigs kyi bdag po'i phyag rgya dang gnas gsum du rdo rje gsum gyi rgyas gdab pa'ang bya ste/__kun mkhyen 'jigs bral chen pos/__mi la dbang bskur ba dang lha la rab tu gnas pa don gcig yin par gsungs so/__/des sangs rgyas thams cad kyi sku gsung thugs rdo rje gsum dang rten gyi sku gsung thugs gnyis su med pa'i ngo bor rgyas btab pa las 'da' bar mi skyod pas rab tu gnas pa'i don gyi snying po grub par byas pa yin no/__/brgyad pa sngar rten bskyed kyi skabs rigs lnga gang du bsgoms pa de skabs 'dir ji ltar gnas bya'i sku gzugs dang glegs bam dang mchod rten la sogs pa so so'i rnam pa gang yin pa de dang de'i phrin las gdul bya'i mos pa'i yul la ji ltar 'jug pa bzhin du zhal bsgyur cing gong 'og ji ltar rigs par yul can ye shes kyi gzigs pa yul 'dod yon la spyod yul mtshungs par bya ba'i phyir spyan dbye ba sogs dbang po'i sgo bsal ba rnams ni yon tan mngon par sgrub pa'i cho ga'o/__/dgu pa 'jig rten na rgyal bu rgyal sar dbang bskur ba de la 'khor 'bangs rnams kyis phun sum tshogs pa'i yo byad kyis mnga' gsol ba bzhin du 'dir yang go 'phang gi chos la dbang thob par gyur pa'i rten de la/__spyir chu gnyis nyer spyod rol mo/__/rin chen bdun/__'dod yon lnga sogs kyis mchod cing bstod pa dang*/__khyad par sku gsung thugs kyi rten so so dang 'brel ba nye bar mkho ba'i yo byad dang*/__sbyin sreg gam tsA ru'i bza' ba zhes pa lha'i zas su grags pa dang*/__rab gnas kyi sngags dang bkra shis kyi mnga' dbul ba rnams la mnga' dbul rnam pa bzhir grags pas mnga' gsol zhing*/__rang gi dam tshig bzhin tu 'khor ba ji srid bar rten de la bzhugs su gsol bas rab tu gnas pa dngos gzhi ste de dag ni phun tshogs spel bar byed pa'i cho ga'o/__/bcu pa rten ye shes pa'i ngo bor bsgrubs pa de nyid lha dang bcas pa'i 'gro ba thams cad kyi phyag gi gnas/__mchod pa'i yul bsod nams kyi zhing du gyur pa'i phyir/__srung zhing mchod pa po mi snang ba lha la gtod pa rdo rje'i chos skyong ba rnams la mchod gtor phul te dam tshig bsgrags shing gnyer gtad pa dang*/__snang ba mi la gtod pa yon bdag bsgo zhing zhal bsro ba'i mchod pa phul/__bcu gcig pa sbyin bdag lhar bskyed cing bgegs bsal nas/__bkra shis pa'i rdzas brgyad gtod pa sngon du 'gro bas zhal nas gsungs pa'i tshigs bcad kyis thog drangs bkra shis pa'i bden tshig brjod/__des kyang slob dpon la gtang rag gi yon 'bul zhing slob dpon gyis dge ba rdzogs byang du bsngo ba dang dkyil 'khor gyi rjes chog rnams byas pas rgyud kyi dgongs pa grub pa'i man ngag gis bkral ba'i cho ga rgyas par grub pa yin no/__/gnyis pa sbyin sreg bshad pa la gsum/__dgos pa/__cho ga dngos/__de'i 'bras bu'o/__/dang po ni/__lha rnams tshim byed mchod sbyin sreg pa'i las:__ces gsungs te/__sam+bu Ti las/__sbyin sreg gis ni lha rnams tshims/__/tshims par gyur las dngos grub stsol/__/zhes sogs rgyud rnams nas rgya cher bsngags pa ltar bsgrub bya'i lha rnams tshims shing de las gang 'dod pa'i don thogs med myur du 'grub par byed pa'i phrin las ni mchod sbyin gyi khyad par sreg pa me'i sbyor ba yin te/__de'i rgyu mtshan dang ji ltar bya ba'ang snying po las/__dbyibs dang kha dog mtshan ldan par/__/zhal du gyur pa'i me bos la/__/bza' btung bro ba'i tshogs rnams kyis/__/las bzhi'i mchod pa rab tu sbyin/__/ces pa ltar ro/__/gnyis pa ni/__dbyibs dang kha dog tshad ldan yo byad bsham:__'dug stangs chas gos bsam pa rtse gcig pas:__las mthun me sbar srid zhi'i me lha bskyed:__mnyes byed 'bul zhing ting 'dzin spro bsdu bcas:__zhes gsungs te/__dgos pa de ldan gyi sbyin sreg bya ba'i yul ni spyir sems can thams cad dang*/__bye brag gud du phye na/__gnod sdig can dang*/__dbul phongs can dang*/__log lta can dang*/__gdug pa can dang*/__sgrib gnyis bag chags rnams so/__/byed pa'i dus ni/__spyir bsnyen sgrub grub pa'i rjes dang sa chog skabs pra ngan na zhi ba/__rab gnas la rgyas pa/__dbang skur ba'i gong du dbang*/__slob ma sta gon gyi rmi lam ngan pa la drag po/__mchod bshags sogs la lhun grub bya bar rdo rje las rim sogs las bshad/__bye brag zhi rgyas la dkar phyogs dang srod snga dro/__dbang drag la dmar phyogs dang dgongs mo gung gnyis su bya bar gsung*/__bya ba'i phrin las ni/__thun mong zhi sogs las bzhi dang*/__thun mong ma yin pa mchog sgrub lhun grub kyi las so/__/bya ba'i thabs la/__phyi nang gsang ba/__yang gsang bzhi las dang po la'ang sbyor dngos rjes gsum yod pa'i dang po sbyor ba ni/__sa'i cho ga rgyas bsdus ji ltar rigs pas sbyangs pa'i gzhir/__las so so'i dbyibs dang mthun pa'i brkos thab brtsigs thab bri thab gang yang rung ba zhi ba la dkar zlum rgyar khru gang pa rdo rjes mtshan pa/__rgyas pa la ser po gru bzhi khru do pa rin chen/__dbang la dmar po zla gam mdzub gang ba lcags kyu/__drag po la gru gsum nag po sor nyi shu pa ral gri/__lhun grub la zhi ba dang 'dra ba las 'khor los mtshan pa ste/__thams cad kyang dpangs su rang gi phyed tshad dang sor bzhi pa'i kha khyer mu ran dang bcas pas bskor ba/__bsreg rdzas ni zhi ba la til yungs/__rgyas par dUrba nas 'bras/__dbang la myos byed zas mchog gtsor gyur pa'i rdzas chen bcu gcig tu grags pa dang*/__drag por dug khrag ling+ga lan tsha thun rdzas la sogs pa mchog la zhi rgyas kyi rdzas kun 'tshogs pa/__de dag gi kha dog dkar ser dmar nag las mthun bsgyur cing*/__snod kyang dngul shel dung sogs dkar po las grub pa'i zlum pos mtshon so so ba dang*/__dgangs blugs tshad ldan sogs yo byad ma tshang ba med pa phyag len ltar bsham/__dngos gzhi slob dpon mthun pa'i stan la zhi ba la pad+ma'i stabs/__rgyas pa la bzang po'i stabs/__dbang la skyil krung*/__drag po la tsog pu'i 'dug stangs kyis zhi ba la shar/__rgyas par byang*/__dbang la nub/__drag por lhor bltas te 'khod/__zhi bar gos dkar po gyon cing dung shel gyi rgyan gdags pa sogs las dang rjes su mthun pa'i chas gos bstar/__bsam pa'am gtso sems la gnyis kyi/__don gyi sems ni/__de kho na nyid rtogs pa'i shes rab dang*/__byang chub kyi sems kyis zin pa ni las thams cad la khyab byed du dgos pa rgyu'i sems so/__/stangs kyi sems ni/__las bzhis kun nas slong ba'i bsam pa ste/__zhi ba la zhi zhing dwangs pa/__rgyas pa la spro zhing dga' ba/__dbang la chags shing zhen pa/__drag po la zhe sdang khros pa'i sems kyis te/__las so so'i mthun pa'i grogs byed pas na rkyen gyi sems zhes kyang zer te de dag gi sems rtse gcig pas 'jug__/cho ga'i rim pa bdag gi rnal 'byor bzlas pa bsdu ldangs bcas grub nas mchod sreg gi rdzas byin brlab/__las mthun gyi thab khung bskyed nas zhi ba la btsub shing gi me/__rgyas pa la rat+na las byung ba/__dbang la smad 'tshong ma'i/__drag po la gdol shan nam ro bsregs pa'i me du ba med pas sbar ba'i 'jig rten srid pa'i me lha bskyed bstims phyag mchod byas nas/__dgang blug yam shing bsreg rdzas phul bas me'i las kyis me lha tshims pas des dkyil 'khor gyi lha rnams tshims pa'i dgos pa yod de/__lha rnams zhal ni me yin te/__/sbyin sreg de ni me la gnas/__zhes pa ltar te/__dper na zas zos pas lus kyi lang tsho brta bar byed cing*/__de'i mthus de la brten pa'i skye mched rnams rgyas par byed pa bzhin no/__/de nas zhi ba 'jig rten las 'das pa'i me lha ni/__gzhung so so'i dgongs pas me lha'i lto bar bskyed pa dang*/__snying gar bskyed pa dang*/__rang bzhin me lha thab kyi shar lhor bzhag ste/__dam tshig pa mer bsgyur ba'am/__dam ye dbyer med du 'bar ba'i rnam par bsgyur ba'i dbus su bskyed pa ste lugs bzhi yod pas rang rang gi lugs ltar byas la dam tshig gi dkyil 'khor bskyed cing gnas gsum byin gyis brlabs te/__ye shes pa spyan drangs nas gnyis su med par gyur pa la mchod cing bstod de ljags dang gzar bu byin gyis brlab/__dgang blugs yam shing mar khu bsreg rdzas spyi dang khyad par mnyes byed du gyur pa rnams rtsa sngags la spel tshig mthar las skul ba'i sa bon so so btags pas 'bul zhing ye shes kyi bdud rtsi las bzhi gang yin gyi kha dog can gyi ngo bor dwangs pa gsol bar bsams la phrin las bcol/__mchod bstod 'dod don gsol bas lha rnams kyi sku las 'phros pa'i 'od kyis las gang yin sgrub par mos pa'i ting nge 'dzin gyi spro bsdu'ang bya ste/__zhi ba la 'od zla zer lta bu 'phros pas nad gdon sdig sgrib rnams sbyangs/__rgyas pa la 'od zer gser mdog nyi zer lta bu'i rtse las rin po che 'char babs pas dbul ba bsal/__dbang la 'od zer dmar po lcags kyu lta bus bsgrub bya'i snying nas drangs te bdag la 'dud cing dbang du gyur/__drag po la me lce'am 'od zer mtshon cha lta bu'i rtse las mtshon cha'i char babs pas dgra bgegs rnams brlag par byed/__lhun grub la 'od zer sna lnga'i rtse las bdud rtsi'i bum pa thogs pa'i sangs rgyas tshad med pas dbang bskur zhing byin gyis brlabs par bsam/__nongs pa bshags te/__rlung nang du 'jug pa dang lhan cig lha tshogs rnams mi shigs pa'i thig ler bsdu/__slar blugs gzar phul bas me lha gsal btab ste mchod sreg gi rdzas phul/__bstod pa gtor 'bul phrin bcol gshegs gsol smon lam shis brjod dang bcas pa bya/__rjes ni me rnams rang zhi'am/__yang na zhi ba 'o ma/__rgyas pa dri ser po'i chu/__dbang chang*/__drag po dug chu/__mchog dri dang 'o ma rnams kyis gzhil te/__thal sol rnams rim bzhin 'bab chur skyel ba dang*/__bang mdzod du sba ba dang*/__ri rtse'am chur sbyang ba dang*/__gzhi mdor gnon pa dang*/__mchog ni cha gcig 'bab chur gshegs shing cha gcig gter du sba'o/__/zhar byung nang gi sbyin sreg ni/__rang lus lhar gsal ba'i sku'i nang du dpa' bo dang mkha' 'gro til gyi gong bu ltar bzhugs pa la kha zas bdud rtsir sbar ba lte ba'i thab khung du lag pa'i dgang blugs kyis phul ba nyid gtum mo'i mes zhu ba'i dwangs mas lha rnams tshim zhing snyigs ma thal bar sbyangs par bsam ste rlung kha sbyor du 'ching ba'o/__/gsang ba'i sbyin sreg ni/__rang lhar gsal ba'i sku la rtsa gsum 'khor lo bzhi gsal btab pa'i 'khor lo dang rtsa khams thams cad la rgyal ba til gyi gang bu ltar bzhugs par mos te/__bde ba bskul nus pa'i rlung gis gtum mo sbar bas spyi bo'i haM bzhu ba'i bdud rtsi'i dwangs mas lha thams cad tshim par bsam zhing*/__zhu bdes drangs pa'i bde stong gi ngang mdangs bskyangs ba'o/__/yang gsang mchog gi sbyin sreg ni/__bdag med rtogs pa'i ye shes kyi mes ma rig bag chags kyis bsdus pa'i rtog tshogs thams cad bsregs pa'i zung 'jug bde chen gyi bdud rtsis 'khor 'das ro mnyam dkyil 'khor gyi 'khor lor dag pa nyid 'khor gsum mi dmigs pa'i dbyings su mchod pa'o/__/gsum pa ni/__rno la ngar gyis gdags pa ji bzhin du:__sngags kyi lhag chad skong zhing dngos grub ster:__las bzhi'i bye brag 'bad pa med par 'grub:__ces gsungs te/__de ltar byas pa'i yon tan ni/__mtshon rnon po la slar yang ngar gyis gdags pa ji lta ba bzhin du spyir bsnyen sgrub skabs su sngags bzlas pa rnams kyi lhag chad kha skong zhing yid la 'dod pa'i dngos grub myur du ster bar byed pa dang*/__nad gdon zhi zhing tshe bsod 'phel ba sogs phrin las bzhi'i dgos pa bye brag pa rnams kyang 'bad pa dang dka' ba med par 'grub ste/__dpal kha sbyor las/__gang zhig sngags kyi lhag chad dang*/__/de kun sbyin sreg gis ni dgang*/__/zhes dang*/__phyag chen thig ler/__gang zhig yid la ci bsam pa/__/dngos grub chen po mtha' yas ster/__/re ba thams cad 'grub byed pa/__/de lta'i sbyin sreg bdag gis gsungs/__/zhes so/__/gsum pa bcud len la gnyis/__dgos pa bstan/__bcud len dngos bshad pa'o/__/dang po ni/__rdo rje'i rten mchog yun du gnas pa'i thabs:__tshe dang lus kyi bcud len sgrub pa ni:__zhes gsungs te/__dzam gling las kyi sa par skyes shing khams drug dang ldan pa'i rdo rje'i lus tshe gcig gis sangs rgyas sgrub par nus pa'i dal rten mchog 'di yun ring du 'tsho zhing gnas par byed pa'i thabs la 'bad dgos pa ni/__paN chen ngag dbang grags pas/__'tsho ba las gzhan snying po ni/__/'khor bar cud zad ma mthong ngo*/__/de phyir myur du thabs mang pos/__/'chi ba bslu bar brtsam par bya/__/zhes gsungs/__des na 'chi ba med pa'i tshe dang rga ba med pa'i lus kyi bcud len sgrub pa'i thabs ni 'di lta ste/__gnyis pa la gsum/__gang la bcud du len pa'i yul/__gang bcud du len pa'i dngos po/__ji ltar len pa'i thabs so/__/dang po ni/__nyams shing 'pho ba'i thig le brten par bcas:__zhes gsungs te/__gso bya'i tshe la rnam grangs mang du bshad pa las skabs 'dir bcud len bya ba'i yul gtso bo ni yul sems 'dod pa'i tshor bas nyams shing gcig tu mi brtan par 'pho ba'i rten thig le dkar dmar gyis bsdus pa dang*/__de la brten pa'i rlung sems bcas nyams shing 'gyur ba las na rga 'chi ba'i gnas skabs 'byung bar 'gyur bas de dag bcud len sogs kyis rgyas shing brtan par bya ba'o/__/gnyis pa ni/__'khor 'das bcud kyis:__zhes gsungs te/__gang zhig bcud du len pa'i dngos po la gnyis te 'khor ba'i bcud rdzas la brten pa dang*/__myang 'das kyi bcud rlung rig la gtso bor brten pa'o/__/dang po la phyi 'byung ba lnga/__sman dang rtsi shing*/__grub pa'i dngul chu/__nang rang byung gi bdud rtsi gnyis sogs bcud len gdams pa brgya rtsar grags pas mtshon rgyud dang grub pa'i man ngag las mtha' yas pa 'byung ba rnams te/__rtag ngu'i bcud len kho na la'ang nyang gter bdud rtsi ye shes 'od ldan gyi rgyud las rgya cher bshad pas mtshon no/__/gnyis pa la/__srid las 'das pa'i bcud mchog bsod nams kun gyi sngon 'gro dad pa rnam gsum brtan pa dang byang chub kyi sems rnam pa gnyis la nan tu bya ba gtsor gsungs pa dang*/__rdo rje theg pa'i lam las lhag pa'i lha'i bskyed bzlas/__mtshan bcas rdzogs rim rtsa rlung thig le'i rnal 'byor gyis steng 'og gi sgo la brten pa'i bcud lan khyad par ba rnams dang rjes 'brel rdo rje'i bzlas pa/__b+h+rU rlung gi sbyor ba/__lce rtse rkan sbyar/__bdud rtsi sdud pa/__nam mkhar ba 'jo'i bsam gtan la sogs pa rnams dang*/__mtshan med rdzogs rim rnam par mi rtog pa dang zung 'jug 'od gsal mngon sum lam du byed pa'i bcud len gyis ye shes kyi lang tsho brtas pas 'chi bdag gi bdud bcom par 'gyur te/__slob dpon chen po ngag dbang grags pas/__rnam pa kun gyi mchog ldan pa'i/__/stong nyid 'dzin pa rnam par spang*/__/stong pa nyid ni rtag bsgoms pa/__/'chi ba yis ni mthong mi 'gyur/__ces so/__/gsum pa ni/__skyed bsring mi 'gyur slad:__ting 'dzin gsal zhing pho nya btang la dgug:__mi shig thig ler rgyas gdab brtan par bya:__zhes gsungs te/__bshad ma thag pa'i phyi srid pa dang 'brel ba'i bcud len de dag slob dpon mkhas pa'i phyag rgyun bzhin bsten/__nang zhi ba'i bcud rnams bla ma'i zhal las blangs te nyams su blangs pas lus zungs kyi lang tsho dang tshe srog gi myu gu rim par bskyed bsring zhing rgyas par 'gyur la/__de nyid brtan cing mi 'gyur bar bya ba'i slad du thabs mang dka' ba med pa rdo rje theg pa'i khyad chos 'chi med tshe sgrub kyi rnal 'byor la 'jug par bya ste/__de'ang bdud rtsi'i 'khyil ba 'chi med tshe'i rgyud la brten pa dang*/__rgyud lung man ngag gi cho ga spyi dang khyad par zab gter mkha' 'gro'i kha rlangs ma yal ba'i gdams zab la brten te dkyil 'khor bzhengs shing tshe'i rten bca'/__bdag mdun tshe lha'i ting nge 'dzin gsal zhing tshe 'dzab bzlas pa'i mthar tshe 'gugs kyi pho nya btang la brtan g.yo'i dwangs ma bcu bzhi bsgrub rdzas dang bsgrub byar dgug cing bstim/__chos nyid 'od gsal byang chub kyi sems mi shigs pa'i thig le chen po gdod nas skye 'chi bral ba'i dbyings su rgyas gdab la nam yang mi 'gyur bar rtag cing brtan par bya'o/__/'dir 'phros don cung zad smos pa la drug__/lus sems kyi ngo bo/__sgra don/__mtshan nyid/__dbye ba/__de'i don/__bsgrub bya/__sgrub byed kyi 'brel bstan pa'o/__/dang po ni/__tshe srog gi ngo bo rnam shes drod dang bcas pa rgyun chags su gnas pa'i rten mi ldan pa'i 'du byed/__lus kyi ngo bo 'byung lnga bde ba bcas khams drug 'dus pa rags pa'i gzugs can no/__/gnyis pa ni/__A yuH'i sgra 'gro ba'i dus skabs la 'jug pas las kyis 'phangs pa'i 'tshau ba'i dus ji srid du 'gro bas tshe dang*/__prA Na'i sgra rab tu 'gro ba'i don las gson pa'i dus de srid du rjes su 'gro bas srog ste/__de gnyis ngo bo'i cha nas dbye ba byar med kyang rten dang brten par 'brel ba'i ldog cha'i rnam pa tsam las btags pa'o/__/kA ya'i sgra bsags pa phung po gnas sogs la 'jug pas 'byung ba bsags pa'i phung po ngag yid kyi gnas su gyur pas lus so/__/gsum pa tshe srog gi mtshan nyid ni/__las kyi rnam par smin pas ji srid 'phangs pa de srid du gnas pa'i dus skabs la spyod pa/__lus kyi mtshan nyid sems yid rnam shes gsum rten pa'i bya ba can no/__/bzhi pa ni/__rgyud las/__mi 'gyur rtag pa gnyug ma'i tshe/__/nyams shing 'pho ba thig le'i tshe/__glo bur ltar snang srog gi tshe/__/zhes dbye ba gsum du gsungs shing*/__lus ni khams gsum dang rigs drug gi rten so so ba rnams so/__/lnga pa ni/__drangs ma thag pa'i lung don dang po ni/__sems can kun gyi rgyud la dus gsum du mi 'gyur ba rtag gtsang bde ba bdag dam pa'i rang bzhin tu gshis sam gnyug mar bzhugs pa chos nyid mi shigs pa'i thig le ni 'chi med rtag pa'i tshe sgrub pa'i gzhir gyur pa dang*/__de'i rang mdangs dbu ma'i yar mar du gnas pa'i dpyid thig gnyis dang rjes 'brel 'khor lo drug gi thig le bdag por gyur pa'i dwangs ma bcu gnyis dang snyigs ma nyer bzhi sogs 'bab cing*/__de dag kyang ye shes dang rjes su 'brel bar 'khor lo bzhir dga' bzhi'i 'gros kyis 'pho ba dang*/__rnam shes dang rjes su 'brel bar lus la zungs sam gnad kyi ngo bo nyid du 'pho ba bla gnas zhes grags pa ste/__de dag ji srid rang gnas las mi g.yo zhing stobs ma nyams pa de srid du 'tsho ba brtan por 'gyur bas thig le'i tshe ni bsgrub bya'i gtso bo dang*/__thog mar lus rten rtsa'i gtso mo chags pa'i tshe glo bur rten cing 'brel ba ltar snang zhing gdos bcas rags pa dbang rten khog pa dang bcas pa rnam par shes pas yongs su bzung ba mi 'bral ba'i zungs su gyur pas snga ma rten dang brten par 'brel ba srog gi dbang po'i tshe ni khyad par gyi bsgrub bya yin no/__/drug pa la/__dang po'i sgrub byed kyi 'brel ni/__chos nyid kyi rang bzhin gdod nas 'gyur med du grub pa li/__'gyur ba ltar snang glo bur 'pho ba'i dri ma gsal bas gnas lugs mngon tu 'gyur ba'i phyir/__sgrub byed 'jig rten las 'das pa ye shes chen po'i bcud len rnam thar sgo gsum dang rjes su 'brel ba'i ting nge 'dzin la gnas dgos pa dang*/__bar pa la 'pho ba'i byed pa rlung sems yin pas thabs lam zab mos de dag gi byed pa 'dzag med du bcing zhing gnas skabs thabs kyi khyad par rdzas kyi bcud len man ngag ltar brten pas rten kun rdzob kyi dwangs ma rgyas/__des brten pa bde chen gyi ye shes 'phel bar 'gyur ba dang gsum pa gtso bor da lta'i las kyi rjes su 'gro ldog byed par bshad pas srog gcod spang zhing srog bslu bas mtshon bsod nams ma yin pa spang zhing bsod nams ci nus bsags pa dang*/__sngags kyi thabs mkhas rdo rje tshe sgrub pa'i cho ga rnams kyis srog gi ka ba brtan cing de la brten pa'i tshe yun ring du gnas par byed do/__/bzhi pa gnas lung la gnyis/__dgos pa bstan/__gnas lung dngos bshad pa'o/__/dang po ni/__snying rje'i yul gyur srid pa bar ma'i 'gro:__ngo mtshar thugs rjes ngan 'gro thar pa'i thabs:__gnas nas spar zhing lam lnga rdzogs pa'i lung :__zhes gsungs te/__tshe 'di'i snang ba nub nas gdos bcas kyi rten dang bral/__rnam par shes pa las kyi rlung gis bdas te 'jigs pa'i sgra bzhi ya nga ba'i g.yang sa gsum sogs log pa'i 'khrul snang du ma dang bcas skyabs bral gtad med du 'khyams pas snying rje'i yul du gyur pa/__ma nges pa'i rtags drug dang ldan pa'i srid pa bar ma do'i 'gro ba rnams rta kha srab kyis bsgyur ba ltar kha lo sgyur sla ba yin pas/__sangs rgyas rnams kyi ngo mtshar gsang ba'i mdzod khang las byung ba cho ga dang ting 'dzin zab mo'i thugs rjes ngan 'gro'i skye gnas las skyob cing myur du thar pa zhi ba thob pa'i thabs mkhas/__rigs drug gi gnas nas rim par drangs te sbar zhing lam lnga gdan thog gcig tu rdzogs par byed pa'i gnas lung thugs rje'i dpyang thag ni 'di lta ste/__zhes so/__/'dir yang 'phros don cung zad smos na/__bar do spyi'i ngo bo ni/__gzhi dbyings ka dag gi sbubs las lhun grub snang ba'i sgor shar ba nyid 'char gzhi'i dbyings su ma rdzogs bar gyi sems pa sa bon dang bcas pa yin la/__de'ang gzhi snang ye shes su shar ba'i cha ni dag pa chos nyid kyi bar do dang*/__'khrul snang 'gro drug gis bsdus pa'i chos rnams ni ma dag 'khrul pa'i bar do zhes btags par bshad do/__/bye brag srid pa bar do ni/__lhun grub kyi snang ba thim nas phyi ma'i skye srid ma grub pa tshun tu bag chags las rdzus skyes kyi lus rten rmi lam lta bur snang ba'o/__/nges tshig ni/__spyir 'khrul grol gyi bar na gnas pa dang*/__bye brag chos nyid kyi snang ba nub nas rigs drug gi lus dngos ma blangs pa'i bar gyi snang ba la gnas pa dang*/__'khrul grol dang rten mtho dman cir yang 'gyur srid pas bar srid ces bya'o/__/dbye ba ni/__thal 'gyur las skye 'chi'am rang bzhin gyi bar do/__/'chi kha'i bar do/__/chos nyid kyi bar do/__/srid pa'i bar do bzhir gsungs pa las 'dir gnas lung bya ba'i yul srid pa bar do'o/__/de'i mtshan nyid ni/__mdzod las/__sngon byung srid pa'i sha tshugs can/__/dbang po kun tshang thogs med rgyu/__/las kyi rdzu 'phrul shugs dang ldan/__/mi ldog de ni dri za'o/__/zhes dang*/__rgyud chen nyi zla kha sbyor las rgya cher gsungs pa ltar te/__ring mtha' zhag zhe dgu/__thung mtha' bdun nam yud tsam gnas pa'o/__/'di'i dus g.yul ngor rta las lhung ba 'dzegs pa la ring ba ltar srid pa phyi ma la ring zhing phyogs pas dge ba'i sdong gdab pa la myur du 'bad dgos pa yin no/__/gnyis pa gnas lung dngos la gnyis/__mdor bstan/__rgyas bshad do/__/dang po ni/__yul dang thabs dang mthar phyin bya ba ste:__zhes gsungs te/__gnas lung bya ba'i yul gsal gdab pa dang*/__de'i sdig sgrib sbyong zhing yon tan yar ldan tu 'phel bas lam lnga bde blag tu bgrod pa'i thabs dang*/__gnas lung mthar phyin pa'i rjes kyi bya ba ste gsum gyis bsdus so/__/gnyis pa la gsum/__yul gsal gdab/__sgrib sbyong gnas sbar gyi thabs/__rjes kyi bya ba'o/__/dang po ni/__rten bskyed dgug bstim:__zhes pas bstan te/__slob dpon gyis lha gang la brten pa'i bdag mdun bum pa sgrub pa sogs rgyas bsdus ci rigs pa song nas/__'phags yul ba'i yul chos dang mthun par dkyil 'khor lho sgor tshe 'das kyi dri rten bcas pa la dmigs rten byas nas gson po'i gnas skabs ji lta bar bskyed cing gsal gdab/__thugs ka'i 'od zer gyis bar dor 'khyams pa'i rnam shes sdig pa dang bcas pa bkug nas phyag rgya bzhis dbyer med du bstims la mi g.yo bar bya'o/__/gnyis pa ni/__rten bskyed dgug bstim bar chad bgegs tshogs sbyang :__rigs drug 'khor ba'i bag chags la brten pa'i:__sdig sgrib thams cad bsreg gtor lhag med bkru:__rig 'dzin gral du rdo rje'i dbang bskur zhing :__'dod yon rgya mtsho bde chen sprin du spel:__zab mo'i chos bshad dag pa'i zhing khams su:__dbugs dbyung lam lnga yongs su rdzogs pa'i phyir:__kun tu 'chang ba chen po'i sras su bskrun:__ces gsungs te/__mtho ris dang thar lam gyi bar chad gson po'i bdud dang gshin gyi lcags su byed pa'i bgegs kyi tshogs la zhi bas gtor glud sbyin/__zhi drag phyed mas bka' bsgo/__mi nyan pa rnams drag po'i tsham rngams kyis rgyang ring por bskrad cing lhag med du sbyangs la srung ba'i go bsgo ba ni tshogs kyi lam mo/__/thog ma med nas rigs drug gi gnas su 'khor ba kha brgyud pa'i tshe ma rig pa'i bag chags tshan po che la brten nas yang dang yang du bsags pa'i sdig ltung gi phung po las kyi sgrib pa lus dang grib ma ltar 'grogs pas 'khor ba dang ngan song gi rgyu byed pa'i phyir de thams cad spang dgos la/__sbyong byed sngags rgya/__phyir zlog__/bum khrus/__bden stobs sogs kyis 'bral ba'i thabs mang du gsungs pa las gtso bor kun 'dus rig pa'i mdo sogs las rgya cher bsngags pa'i spyi khrus ting 'dzin rig rtsal gyi thabs mchog__/dmigs bya'i lus kyi gnas drug tu sbyang bya rigs drug gi sa bon rtsa yig rang chas su yod pa dang sbyong byed 'bru gsum lhan cig pa nyid thugs ka'i 'od kyis sbyong byed bskul bas de las ye shes kyi rang rtsal me 'bar bas sbyang bya bsregs/__rlung g.yos pas thal ba gtor/__chu byung bas dri ma'i rjes shul lhag med du bkru bar byed pa ni sbyor lam mo/__/rgyud rnam par dag pa de nyid sar gnas rig 'dzin gyi gral du 'god pa'i phyir lha dam tshig par gsal ba la bum pa sogs dbang bzhi rgyas pa'am bsdus pa sku gsung thugs dbang gis mtshon rdo rje'i gtor blug gi cho gas dbang bskur zhing rgyas gdab pa ni mthong lam mo/__/de la zhal bsro ba dang bag chags kyi zhen 'khris bcad pa'i phyir bza' btung dngos su bshams pa la rten byas te rnam pa 'dod pa'i yon tan lnga po zad mi shes pa'i rgya mtsho/__ngo bo zag med bde ba chen po'i sprin phung du sngags dang phyag rgyas spel nas bsngo/__'khor bar phyir mi ldog pa'i slad du de'i nyes skyon dang thar pa'i yon tan bsngags pa las brtsam zab mo'i chos bshad la rigs lnga'i gnas sogs dag pa'i zhing khams su lam bstan cing dbugs dbyung ba ni sgom pa'i lam mo/__/lam lnga yongs su rdzogs shing mthar phyin par bya ba'i phyir rnam par shes pa dkyil 'khor gyi gtso bo kun tu 'chang ba chen po yab yum gyi thugs dang dbyer med du byas la/__des kyang sbyor mtshams nas rgyal ba'i sras su bskrun te sangs rgyas kyi mdzad pa sgrub par mos pa ni mi slob pa'i lam mtshon pa'o/__/gsum pa ni/__snyigs ma ye shes mes sbyang sku gdung gdab:__'gro don phrin las rgyun mi 'chad par bya:__zhes gsungs te/__dwangs ma'i rnam shes gnas spar ba'i snyigs ma phung po bag chags kyi rten shul du lus pa de nyid dkyil 'khor ba'i thugs las spros pa'i ye shes kyi mes bsregs shing sbyangs pas lhag med du byed pa ni rang don chos sku brnyes pa dang*/__byang thal dri bzang chu 'jim pa dang bsres pas sku gdung sAts+tsha cho ga bzhin gdab pa ni gzhan don gzugs sku 'byung ba'i rten 'brel yin la/__de ltar na lam lnga yongs su rdzogs shing don gnyis lhun gyis grub pa'i go 'phang brnyes pas/__'gro ba'i don nam mkha' dang mnyam par mdzad pa'i phrin las rgyun mi 'chad par 'byung ba'i thabs zab mo rgyud dang man ngag gi nges pa las 'byung ba bzhin lhag chad med par bya'o/__/lnga pa phrin las la gnyis/__dgos pa dang bcas te mdor bstan pa dang*/__de nyid rgyas par bshad pa'o/__/dang po ni/__thun mong de bzhin gshegs pa'i spyaud yul gyis:__bsam kun rdzogs par byed pa'i phrin las ni:__sgo gsum bya bas phan bde sgrub pa ste:__rjes su bzung dang tshar bcad rnam pa gnyis:__zhes gsungs te/__rang gzhan thun mong la gal che ba de bzhin gshegs pa rnams kyi thabs la mkhas pa'i spyod yul bsam gyis mi khyab pa las byung ba/__ji ltar bsam pa'i don kun yongs su rdzogs par byed pa rol pa phrin las kyi rim pa ni/__sgo gsum gyi las sam bya ba'i sgo nas kun la phan pa dang bde ba sgrub pa ste/__khog gzhung las/__bdag gzhan don sgrub phrin las te/__/zhes so/__/de la nang gses kyi rnam grangs mang yang mdor bsdu na rang gzhan la phan gdags shing don gnyer rjes su bzung ba dang*/__sdang zhing gdug pa can tshar gcod pa'i phrin las te rnam pa gnyis su 'du'o/__/de la phrin las kyi ngo bo ni/__bsam don sgrub byed thabs mkhas kyi bya ba snying rje'i rgyu las byung zhing shes rab zab mos zin pa'o/__/nges tshig karma'i sgra las phrin las te sgo gsum gyi las su gyur pa'o/__/rnam grangs ni las bzhi sgrub pa'i thabs kyi khyad par 'og nas 'byung ba la sogs pa ste/__de'ang bya ba'i yul spyir khams gsum gyi 'gro ba/__bye brag zhi sogs la rim bzhin gnod sdig dbul phongs log lta gdug pa can rnams/__byed pa'i phrin las bzhi dang lhun grub rnams la so so'i 'dug stangs sngags kyi bzla tshul dbyangs kyi 'gyur ba stangs kyi sems sogs kyi khyad par dang ldan pa/__byed tshul lam gyi rgyud tshod dang mthun pa'i gzhi ting nge 'dzin thabs spros med la brten pa/__bya ba'i dus las so so dgos pa'i yul nye bar gnas pa ste/__byas pa'i dgos pa zhi bas phyi nad gdon nang mtshan rtog 'joms/__rgyas pas phyi 'khor dang longs spyod nang tshe bsod nyams rtogs spel/__dbang gis phyi 'dod pa'i yul nang rlung sems la dbang thob/__drag pos phyi dgra bgegs nang dug lnga'i rtog pa bcom par byed do/__/gnyis pa la gnyis/__rjes bzung*/__tshar bcad do/__/dang po ni/__srung dang zhi dang rgyas dang dbang bsgyur ba:__ting 'dzin sngags dang phyag rgyas gzhi bzung ste:__mchod rten khrus dang me dang 'khor lo dang :__phur bu bro gar rten 'brel rdzas kyis bsgrub:__ces gsungs te/__de la rjes su bzung ba'i phrin las ni/__bsgrub bya nad gdon bar chad sogs mi mthun pa'i phyogs mi 'byung bar srung ba dang 'jigs pa bcu drug zhi ba dang 'byor pa drug rgyas pa dang yid la 'dod pa mos pa bzhis dbang du sgyur ba rnams yin la/__sgrub byed kyi gtso bo gsal snang thob pa'i ting nge 'dzin dang sngags kyi bzlas pa tshad du 'khyol ba dang 'ching 'grol gyi phyag rgyas gzhi bzung ste/__phal pa'i las mchod rten nam sAts+tshas las dngos dang 'byung ba gzhan las yid kyis sprul te so so la shis pa'i dbyibs mdog can gzungs sngags dang ldan par las mthun gyi lhar gsal ba'i 'od kyis bsgrub bya bkug cing 'og tu mnan pa la 'od kyis gdung bas las 'grub par mos pa dang*/__sdig sgrib nad gdon grib dang mi gtsang ba sel ba la de dang de'i gnyen por bsngags pa'i lha rnams bum pa bcud ldan du bskyed bzlas 'od zhu byas pa'i khrus kyi cho gas bkru ba dang*/__rnal 'byor pa'i blo khyad dang bstun pa'i phyi nang gsang ba'i me'i sreg blugs kyi sbyor bas ji ltar 'dod pa'i las sgrub pa dang*/__bsgom pa yid dang bkod pa bris pa'i 'khor lo man ngag las 'byung ba ltar sgom sgrub tshul bzhin bsten pas las gang yin sgrub pa dang*/__las bzhi'i so so'i rgyu dbyibs tshad mdog can gyi phur bu bsnyen cing bsgrubs pa yul so so'i phyogs su 'debs pa dang*/__bro ra las bzhi'i dbyibs dang mthun par bcos pa la lha so so'i nga rgyal gyis rkang pas rdo rje'i bro brdung zhing lag pas gar stabs bsgyur te lu gu rgyud kyi las bya ba dang*/__'khyud dpyad sogs las 'byung ba ltar bya sla ba'i thabs kyi 'khrul 'khor rten 'brel sna tshogs pa bya ba dang*/__gu gul dud pas 'dre gdon bskrad pas mtshon rdzas gcig rkyang ngam mang du sbyar ba'i nus pa kho nas kyang nad zhi bar byed pa la sogs te/__thabs de rnams kyis 'dod pa'i las thams cad 'grub par bya'o/__/gnyis pa ni/__khyad par tshar gcod nan tur bya ba'i tshul:__rang nyid srung dang 'gal rkyen zlog pa dang :__rdzong 'phrang srog dang 'bras bu'i gnad ldan pas:__kha sbyor dbye ba gsad pa'i cho ga ste:__las kyi mtha' ni mnan 'phang sreg pas bsdu:__zhes gsungs te/__khyad par bsgral ba'i zhing bcur gyur pa sogs zhi bas mi 'dul zhing tshar gcod par 'os pa rnams la nan tur gyi las bya ba'i tshul yang phyogs tsam bstan par bya ste/__de'i tshul mdor bsdu na drag sngags rdo rje gtsug lag gi rgyud las gzir ba po/__gzir bya/__gzir byed gsum du gsungs pa'i/__dang po ni/__sgeg rdor dam tshig gsal bkra las/__lta spyod ting 'dzin 'brel goms pas/__zhes 'byung ba'i don/__lus lha sku/__ngag brjod bral/__sems skye med du dpa' ba ste dpa' ba gsum/__lta ba mtha' bral/__sgom pa blo 'das/__spyod pa shugs 'byung gi gding ste gding gsum/__rig pa mdung las rno bas phyi'i dregs pa 'bigs pa/__rig pa gseg bdar lta bus nang gi nyon mongs gcod pa/__rig pa rlung shugs lta bus rnam rtog sprin phung gtor ba'i ngar dang ldan pas ngar gsum ste dpa' gding ngar ba dgu dang ldan pa zhig dgos la/__gzir bya dgra bgegs gnyis las dgra ni zhing bcur gyur pa ste/__gsal bkra las/__dkon mchog slob dpon sku dgra gnyis/__/dam nyams log dang 'khu ba dang*/__'du bar 'tshe dang yongs la gnod/__/dam dgra ngan pa'i ngang tshul can/__/ngan song gsum dang bcu po 'di/__rnal 'byor kun gyis dang du blang*/__zhes dang rgyud las mi dge bcu dang mtshams med lnga spyod la bshad do/__/bgegs la grangs nges pa sogs go rim drug gis bstan/__gzir byed rdzas sngags ting nge 'dzin gsum/__rdzas la mchod rdzas rten rdzas gzir rdzas gsum/__snga ma gnyis la spyi dang khyad par/__phyi ma la gnas brub khung ling+ga bla rdo dbye gzir thun rdzas nang gses dang bcas pas bsdus/__sngags la mtshan nyid 'god thabs bzlas sngags gsum/__ting nge 'dzin la lha dang sngags dang rdzas kyi ting 'dzin gsum po rnams ma 'dres ma nor ma tshang med pa gces te/__rgyud de las/__sngags ni dug gi mtshon cha la/__/ting 'dzin gsal bas gnas su skyel/__/rdzas ni sbyor ba thabs kyi grogs/__/de gsum ldan na lha dbang yang*/__/dngos su sgrol bar the tshom med/__/ces so/__/spyir mngon spyod kyi phyogs la rnam grangs bcur gsungs te/__sad ser/__thog dang ltas ngan/__srung zlog__/bsad mnan/__'phang sreg bcas thams cad la'ang log rdugs 'byams gsum gyi skyon spangs pa dang*/__phan gnod kyi phrin las kun la grogs rnam pa lnga bstan/__dug rnam pa lnga spang*/__rgyan rnam pa lnga gdags pa bcas rab tu gces par gsungs so/__/de las 'dir bshad bya nan tur phrin las kyi gtso bo thog mar rang nyid srung ba rdo rje'i rdzong mkhar du zhugs nas sgo gsum longs spyod bcas cis kyang mi shigs par bya ba dang*/__'gal rkyen bar chad zlog pa'i rdo rje'i dpung bshams te phas rgol gyi byad stems nus pa rang gshed du dbab pa dang*/__lta ba chos nyid kyi rdzong*/__sgom pa ting nge 'dzin gyi 'phrang*/__spyod pa snying rje chen po'i srog dang ldan pa la gzhi bcas nas/__mi ldog pa'i gnad rang nyid dpal he ru kar gsal/__mi rdugs pa'i phyir phur bu sras mchog tu gsal/__mi 'byams pa'i phyir ling+ga gzas pa po dngos su gsal ba la tshe lung gsum dang khrus lung gsum gyi dgongs pa dang ldan pas gdab pa dang bsgral ba dang bstab pa'i las byas pas tshe bcud kyis bdag__/rnam shes spar bas dgra/__sha khrag bstabs pas lha ste 'tshing ba gsum gyis bsgral ba'i 'bras bu'i gnad la sbyor ba dang ldan pas/__lha rtain/__lus sems/__sha rus te kha sbyor gsum po dbye ba ni bsad pa'i las kyi cho ga ste/__de ltar mngon spyod phrin las kyi gtso bo srung zlog bsad pa gsum yin la de gsum gyi mthar ni/__srung ba la mnan pa/__zlog pa la 'phang ba/__bsad pa sreg pas bsdu bar bya ste/__de dag gi 'thad pa'ang srung bas bar gcod mi mthun pa'i phyogs las skyob/__mnan pas phas rgol gyi stobs nus thams cad 'ching bar byed pas 'brel te/__dper na rdzong la lcags ris bskor ba dang phas rgol gyi chom rkun btson tu bcug pa gnyis ka rang phyogs srung ba'i nyer len tu don mtshungs pa lta bu dang*/__zlog pas 'gal rkyen nyer 'tshe thams cad nye mi nus par ring du byed/__'phang ba zor gyis de dag rmings med du brlag par byed pas 'brel te/__dper na dgra dpung gis 'tshe ba la thog mar dmag gi dpung bsham/__mthar g.yul sprad pas rgol ba bcom pa lta bu dang*/__bsad pas bsgral bya'i rnam shes spar te gzugs phung tshogs su bsgral ba ba de nyid/__lha rnams kyi zhal me la bstabs pas shin tu mnyes par 'gyur ba dang spyir las kyi nus pa thams cad sreg blugs kyis myur du 'byin pa ste rno la ngar gyis gdags pa lta bu'o/__/mngon spyod kyi dgos pa'ang rgyud las/__log lta can bcu bsgral bar bya/__/ma bsgral 'khor bar 'khyams pa la/__/bsgral te gnas spar bde ba thob/__/bdag gzhan gnyis ka mngon 'tshang rgya/__/'khor ba'i chu las bsgral ba'o/__/zhes dang*/__gsal bkra las/__byang chub spyod 'phel sems can bde/__/lha mnyes bdag la dam skong zhing*/__las ngan bag chags sdug yun bstungs/__/rang gi bsam med ngan song las/__/bde lam 'di las gzhan med do/__/zhes so/__/drug pa bam chen mchog sgrub la gnyis/__mdor bstan/__rgyas bshad do/__/dang po ni/__mchog gi phrin las bla na med pa'i phul:__nyams chags zhi ba bam gyi sgrub pa ni:__zhes gsungs te/__sgrub pa po la mchog gi dngos grub bde blag tu sgrub par byed pa'i phrin las te las su bya ba kun las khyad par du 'phags pas bla na med pa'i phul du gyur pa ni/__slob dpon chen pos/__sgrub pa chen po 'di nyid ni/__/sgrub pa mang po'i rtsa ba ste/__dper na chu bo chen po las/__/chu phran thams cad gyes dang mtshungs/__gsang sngags bla na med pa yi/__/sgrub pa rnams kyi yang snying ni/__dngos grub bam gyi sgrub pa'o/__/zhes gsungs pa dang*/__khyad par dam tshig nyams chags zhi ba la lhag par bsngags shing*/__gal po las/__dngos grub chen po blang ba ni/__/las las grub pa'i dngos grub can/__/zhes bam chen la las las grub pa'i dngos grub yod pas yon tan mtha' yas par bsngags pa'i bam gyi sgrub pa mchog ni 'di lta ste/__gnyis pa ni/__mtshan nyid legs brtags bkra shis gtsang ma'i bam:__brtul zhugs ldan pas rdo rje'i 'gros kyis blang :__dkyil 'khor dbus bzhag lhar gsal bsnyen cing bsgrub:__'od dang sgra dang dri sogs rtags byung nas:__lha nyid 'od zhu lha la lha thim tshul:__yul dang yul can dbyer med bde ba che'i:__rdo rje'i longs spyaud dgyes rgur spro bas bskang :__zhes gsungs te/__de'ang sgrub pa po rab lta ba'i gding thob pa/__'bring bsnyen sgrub gyi drod rtags dang ldan pa/__tha ma rtog pa chung zhing ro snyoms pas/__dus dbyar tsha ba dang dgun grang ba'i sgang rul khengs kyi skyon 'byung ba ma yin pa'i skabs su bsgrub bya rgyud dang man ngag las 'byung ba ltar mtshan nyid legs par brtags nas blang te/__de'ang skyes nas lo ma 'khor ba dang lnga bcu yan chad rgan pa/__dbang thob sngags pa dang rigs ngan/__gcong nad rims dug sogs kyis shi ba ma yin pa/__rab skye ba bdun pa/__'bring rgyal rigs rje'u rigs/__tha ma skyes dar ma grir shi nas zhag gsum mam bdun nam dgu las ma lon pa bkra shis shing bya gcan gyis ma bsnad pas gtsang mar gyur pa'i bam ro de nyid/__rnal 'byor pa lta sgom gyi brtul zhugs dang ldan pas sngags dang ting 'dzin stangs stabs kyis 'dul zhing khro bo rol pa dang phra men 'gying tshul gyis btsal la zhi ba dang khro bo'i rdo rje'i 'gros kyis blang*/__de nas shes pa bdun ldan gyis sbyang zhing bsgrub ste/__mi gtsang bar shes pas khrus kyis bkru/__sems can tu shes pas sdug bsngal phral/__slob mar shes pas dbang bskur/__rig pa'i me tog tu shes pas dkyil 'khor gyi dbus su bzhag__/lhar shes pas thog mar bam hril por dkyil 'khor pa bskyed la bsnyen/__bar du lus kyi rgya bkral nas don snod yan lag rnams lha gnas so sor bkod la dam ye dbyer med kyi bdud rtsir bsgrub/__skabs su mchod rdzas su shes pas phung po tshogs su 'bul/__mthar 'ja' 'od dang sngags sgra dang dri bzang dang bdud rtsi'i rgyun 'dzag cing bag dro nyams dga' ba sogs grub pa'i rtags byung ba dang*/__thig le nyag gcig tu shes pa ni bam la bskyed pa'i lha nyid 'od du zhu nas rang byung phung po dam tshig pa'i lha la bskyed cing spyan drangs pa ye shes kyi lha gnyis med du thim par mos la 'khor 'das ro mnyam gnas lugs kyi tshul la mnyam par bzhag ste dus kyi dngos grub chen po blang*/__de'ang rab yul bam gyi rdzas dang yul can rang gi dbang po dbyer med bde ba chen po rdo rje'i bdud rtsi zag pa med par shes pas dngos su longs spyod/__'bring rdzas dang spel ba dang tha mas kyang dmigs pas rol/__ban+d+ha dang snying dngos grub kyi rten du bzung ba sogs yo byad du spel ba dang*/__rdzas dang bsres pa'i ril bu slar yang bsgrubs nas 'gro ba kun la spel ba dang*/__sa chu me rlung las mkha' khyab tu spel ba ste spel ba drug ldan gyi sgo nas rnal 'byor pa'i dgyes rgur spro bas rang gzhan nyams chags bskang zhing 'brel tshad don dang ldan par bya'o/__/de'i yon tan gu ru'i gsung las/__gang zhig rnal 'byor sgrub pa po/__/dngos grub rnam gnyis 'dod pa na/__/gzhan gang nor bu'i 'ching bu ltar/__/phran tshegs yin gyi 'di nyid ni/__/rin chen dbang gi rgyal po ltar/__/mchog dang thun mong la sogs pa/__/ci 'dod 'byung phyir 'di la 'bad/__/ces sogs rgya cher gsungs so/__/bdun pa bdud rtsi sman gyi sgrub pa la dgos pa dang bcas te mdor bstan/__de'i tshul rgyas par bshad pa'o/__/dang po ni/__ye shes rgyas byed bdud rtsi'i sgrub pa ni:__zhes gsungs te/__dang blang dam tshig gi rdzas sha lngas dug lnga sel zhing bdud rtsi lngas ye shes lnga'i rtogs pa rgyud la skyed pa'i mthu las bdud bzhi bcom zhing dbang bzhi'i ye shes lam du bslangs te gong nas gong du rgyas par byed pa'i thabs mchog bdud rtsi sman gyi sgrub pa ni dngos grub rnam pa gnyis kyi gter du gyur pa ste/__bdud rtsi'i rgyud las/__ra sA ya na sman chen po/__/zos pas mchog thun dngos grub 'grub/__/ces so/__/gnyis pa la gnyis/__ji ltar sgrub pa'i tshul/__de ltar bsgrubs pa'i 'bras bu'o/__/dang po ni/__snod bcud ye nas bdud rtsi chen por dag:__de nyid rtogs pas 'chi med bcud kyis len:__mchog dang thun mong rdzas btsal legs par sbyar:__khrol bu sbyang zhing phye ma tshul bzhin bsgrub:__zhi khro yab yum dgyes pa chen po'i lha:__sbyor thabs du mas byang chub sems sprin dbab:__gsang sgo dbye zhing thig le gcig tu bskyil:__dngos grub gsol nas skal bar ldan pa'i tshogs:__bde chen rdo rje'i rigs su mnyam sbyar bas:__zhes gsungs te/__de la bdud rtsi'i ngo bo/__/srid gsum snod kyis bsdus pa'i 'byung ba phung po 'dod yon nyon mongs pa lngar snang ba ye nas rang byung gi bdud rtsi chen po lngar rnam par dag pas rkyen gyis bcos ma dgos pa gdod nas 'khor 'das thams cad bdud rtsi'i ngo bor gnas pa ste/__bdud rtsi bam brgyad las/__srid gsum ye nas bdud rtsi lnga/__/ma bcos lhun grub rdzogs sangs rgyas/__/zhes so/__/nges tshig a mr-i ta'i sgra las 'chi ba med pa ste 'chi ba'i 'jigs pa bcom pa'i gsos sman yin pa'i nges pa las bdud rtsir grags pa ste/__gsang ba 'khor lo'i rgyud las/__/'khor ba bdud dang 'dra ba la/__/chos nyid bden pa'i rtsi btang nas/__/bdud rtsi zhes ni de la bya/__zhes so/__/byed las ni/__don gyi bdud rtsi lngar bshad pa de nyid sgom pa'i nyams myong gi rtogs pas skye 'chi med pa'i ye shes kyi bcud kyis byang chub rdo rje nye bar len par byed pa ste/__bdud rtsi mchog lung las/__/thams cad ma lus sangs rgyas lnga/__/lus pa med pa ye shes lnga/__/ma bcos ye nas de nyid do/__/de phyir sman chen bcud kyi mchog__/ces so/__/rtags lus gnas bdud rtsir dwangs mar gyur na 'chi ba med pa 'grub cing*/__de'i rigs gtogs phyi rol gyi rdzas la'ang nus pa cha mthun yod pas sbyang rtogs sbar gsum gyis brlabs te bsten na lus khams bdud rtsi dwangs ma'i bcud kyis rgyas shing 'chi ba med pa'i tshe dbang nye bar len pa'i grogs byed de/__bam brgyad las/__bzhi brgya rtsa bzhi'i nad sel zhing*/__/bdud bzhi nges par 'joms par byed/__/sman gyi rgyal po bcud kyi mchog__/ces so/__/bsgrub pa'i rdzas ni/__bdud rtsi'i rgyud las/__gtso bo'i dam rdzas bdud rtsi lnga/__/rtsa ba brgyad la yan lag stong*/__/dam rdzas rtsi bcud sman tu sbyar/__/ces gsungs pa'i gtso bo mchog gi dam rdzas rang byung bdud rtsi lnga dang*/__thun mong gi rdzas rtsa ba brgyad la sngon byung dang phyi nang gsang gsum sgrub pa lag len gyi rtsa ba ste brgyad tshan lngar bshad pa'i phyi ma sbyar bya dngos la/__snying po lnga/__'bras bu lnga/__yon tan lnga/__sdud pa lnga/__dul ba lnga dang gtso bo lnga bcas pa la rigs mthun gyi rtsi bcud sman tu gyur tshad sbyar bas yan lag stong du grub pa yin la/__dgos don lnga dang dgos chas lnga rnams kyang tshogs par byas nas thog mar tshol ba la mkhas pas btsal/__bar du bsrel ba la mkhas pas legs par sbyar ro/__/sgrub pa'i dus ni ston dpyid bsil drod snyoms pa'i yar gyi tshes brgyad la bya bar bshad/__ji ltar sgrub pa'i tshul ni/__sngon 'gro bsnyen pa gso zhing sgrub pa'i gzhi bzung ba/__phyi bshags dang sa chog__/khyad par gyi yo byad dang rten gyi dkyil 'khor 'du byas te dam rdzas kyi rigs dang kha dog gi dbye bas bkod/__dngos gzhi'i thog mar khrol bur sbyong ba ni/__rdo rje bkod pa las/__dam pa de nyid gsang chen gyi/__/rigs brgya rigs lnga rigs gcig gis/__/thams cad sbyong ba'i mchog tu bya/__/zhes pa ltar/__'khrul snang gnyis chos du mar bden par zhen pa'i rtog tshogs dam pa rigs brgya sku'i 'khor lor sbyang ba dang*/__rigs mang po bzang ngan du blta ba'i rtog pa ldog phyir de nyid rigs lnga gsung gi dbyings su sbyong ba dang*/__rigs tha dad du 'dzin pa'i zhen pa bsal phyir gsang chen rigs gcig thugs kyi thig ler bsdus te mchod cing bstod la dngos grub kyi dbyig bsdu/__skabs su sman gyi dngos grub myur ba'i grogs rig 'dzin rnams bskul zhing gtsang sbra la gnas pa de dag gnyis 'dzin gyi rtog pa bsal ba thams cad bzang ngan blang dor bral ba'i dam tshig la gnas par bya/__sbyor sgrol gnyis med kyi dgongs pas btags shing btsags la spol/__tshad gzhal la rgyas btab ste dkyil 'khor du bkod/__de nas phye ma tshul bzhin bsgrub par bya ste/__de'ang dang po 'ju 'dul gyi dgongs pa zhi ba'am khro bo he ru ka yab yum dga' bzhi'i ros dgyes pa chen po'i nyams dang ldan pa'i lha'i dkyil 'khor sum ldan nam brgyad ldan du bsgoms la/__ye shes rdzas dang thabs shes sogs sbyor ba brgyad ldan gyis mtshon gzhung so so las bshad pa'i sbyor thabs du mas bdud rtsi byang chub sems kyi sprin mkha' khyab tu spros te don gnyis byas/__tshur 'dus sku'i dbyibs brgyud yum gyi mkha' dang bdud rtsir dbab/__bam brgyad las/__rtags dang mtshan ma bdun gyis 'byung*/__/'od dang du ba sgra dang dri/__/lha mo'i gzugs kyang ston par byed/__/mang du 'phel ba grub rtags yin/__/ces pa ltar grub pa'i rtags mthong nas yab yum mkha' gsang gi sgo dbye zhing 'khor 'das dwangs bcud thig le gcig tu bskyil nas sman gyi pho brang du dbab/__dbang du bya ba dang gnad la dbab pa sogs phrin las kyi bya ba rnams grub nas/__rjes kyi rim pa ni/__nye snying las/__'dus pa'i rnal 'byor rab gus pas/__/dngos grub thob phyir gsol ba gdab/__/ces pa ltar byas te gu h+ya lag gi phyag rgyas blangs la dbang nod/__dad mos skal ba ldan pa'i 'dus tshogs gzhan la'ang dbang dang dngos grub kyi bgo skal sbyin te 'brel par bcas pa thams cad bde ba chen po rdo rje'i rigs gcig tu mnyam par sbyar bas/__rgyud dang lung la ji skad gsungs pa'i phan yon rnams 'thob par 'gyur ro/__/gnyis pa ni/__tshe dang skong dang yid 'ong nad sel sogs:__yon tan khyad par brgya rtsa brgyad 'grub cing :__snod bcud thams cad he ru ka yi zhing :__tshom bu dang bcas grol ba mchog la sbyor:__zhes gsungs te/__de ltar bsgrubs pa'i yon tan kyang gnas skabs su 'chi med tshe dang nyams chags skong ba dang 'gro ba kun gyi yid du 'ong ba dang nad gdon sdig sgrib sel ba sogs mdor na yon tan gyi khyad par brgya rtsa brgyad 'grub cing*/__gang du sgrub pa'i snod bcud thams cad kyang dpal he ru ka'i zhing dang sku'i rang bzhin tu byin gyis brlabs te mthar thug 'dus pa'i tshom bu 'khor dang bcas pa stan thog gcig tu gdod ma'i sar rnam par grol ba mchog la sbyor bar byed de/__de dag gi tshul yang bdud rtsi'i lung bam po brgyad pa sogs las rgya cher gsungs so/__/gsum pa ji ltar sgrub pa'i lam bshad pa la gnyis/__mtshams sbyar ba'i tshul gyis mdor bstan/__de'i don rgyas par bshad pa'o/__/dang po ni/__de ltar mchog dang thun mong dngos grub kun:__tshul bzhin sgrub pa yongs rdzogs lam rim ni:__zhes gsungs te/__bshad zin pa de ltar bskyed rim dang 'brel bar mchog sgrub gtsor gyur pa dang thun mong gi phrin las gtsor bstan pa ste dngos grub rnam pa gnyis kyis bsdus pa kun kyang rgyud lung man ngag gi zab don ltar tshul bzhin tu sgrub pa la lus yongs su rdzogs pa'i lam la bsten dgos pas de'i rim pa ni 'di lta ste/__gnyis pa la gnyis/__stong chen sogs rnal 'byor snga ma bzhi mdo tsam bshad pa dang*/__tshom bu tshogs kyi sgrub pa rgyas par bshad pa'o/__/dang po ni/__stong chen snying rje sgyu ma'i bsnyen pa dang :__phra rags phyag rgya gcig pa'i gsal snang brtan:__phyag rgya spros bcas nye bar bsnyen pa'am:__de rnams bsnyen dang nye bsnyen sgrub pa yis:__drod dang rtags dang mtshan ma mngon gyur nas:__zhes gsungs te/__de bzhin nyid stong pa chen po dang kun snang snying rje sgyu ma'i ting nge 'dzin gyis bskyed pa la bsnyen pa dang*/__phra ba yig 'bru dang rags pa lha sku phyag rgya gcig pa'i gsal snang brtan por grub nas/__phyag rgya spros bcas kyi dkyil 'khor bsgoms te nye bar bsnyen pa'am/__yang na de rnams las de ting gi bsnyen pa dang kun ting gis nye bsnyen rgyu ting phyag rgya gcig spros sgrub pa'i tshul du nyams su blangs pas gnas skabs kyi 'bras bu gong bshad nyams lnga mthar phyin pa'i drod tshad phyi nang gsang ba dang rtags kyi rim pa dang dngos grub kyi mtshan ma ci rigs pa mngon du gyur nas sgrub pa chen po la 'jug par bya'o/__/de la drod ni sgyu 'phrul lam rim las/__de ltar bya byed med bsrings na/__/lus ngag sems la drod 'byung ste/__zhes pa ltar phyi'i drod lus yang ba snyam byed pa dang*/__nang gi drod dbugs rgyu ba mi tshor ba dang*/__gsang ba'i drod don thog tu shin tu phebs pa ste/__lus bde/__ngag gsal/__sems mi rtog pa'i drod gsum mo/__/rtags ni mig sgron 'grel par/__nges par drod gsum myong nas ni/__rtags kyi rnam pa cir yang snang*/__/zhes pa ltar drod brnyes pa'i rtags kyang phyi rtags su dngos po thams cad lha'i sku gsung thugs kyi mtshan ma phra mos spyod yul gang bar mthong ba dang*/__gzhan yang du ba lta bu la sogs pa dang*/__sa chu me rlung nam mkha' ste kha dog lnga'i zad par gyi skye mched dang*/__nam mkha' las pad+ma chen po'i 'od dang rdul phran dang*/__skar ma dang*/__zla tshes sogs mthong ba dang*/__nang rtags su lus ngag la bzod pa thob pa dang*/__nyon mongs pa lnga'i sems rgyun bags kyis chung ngu 'gro bas chos brgyad 'go snyoms pa sogs 'byung ba dang*/__gsang rtags rlung la cung zad dbang thob cing mngon shes phra mo 'char ba dang*/__rmi lam du sdig sgrib dag pa dang sa thob pa dang thun mong dang mchog gi dngos grub 'grub pa'i ltas yang nas yang du 'byung ba'o/__/dngos grub kyi mtshan ma thun mong gi las dang grub pa chen po rnams te/__sgyu 'phrul rtsa rgyud du/__yon tan 'byung ba'i dngos grub drug__/'byung lnga'i dngos grub lnga/__las phran tshegs kyi dngos grub brgyad dang der ma zad bshad rgyud rnams su mang du gsungs pa sogs mtha' yas te/__dkon mchog brtsegs pa las/__ting nge 'dzin grub pa'i sems kyi spyod yul dang rdzu 'phrul yang bsam gyis mi khyab/__rdzas dang sman dang sngags dang nor bu rnams kyi yon tan yang bsam gyis mi khyab/__ces gsungs pa ltar ro/__/gnyis pa la'ang mdor bstan pa dang*/__rgyas par bshad pa la gnyis/__dang po ni/__tshom bu tshogs kyi sgrub dang sgrub chen la:__brten nas rig 'dzin go 'phang mthar phyin slad:__ces gsungs te/__bshad ma thag pa'i bsnyen pa nye bsnyen sgrub pa gsum gyis drod rtags mtshan ma mngon tu gyur nas tshom bu tshogs kyi sgrub pa dngos gzhi dang sgrub pa chen po'i las sbyor la brten nas lam gyur gyi 'bras bu rig 'dzin rnam bzhi'i go 'phang mthar phyin pa'i slad du tshul 'di la 'jug par bya'o/__/tshom bu tshogs sgrub ces pa'i don yang khog gzhung las/__tshogs ni 'byor pa rnam pa gsum/__tshom bu gcig gsum lnga pa'o/__/zhes 'dus pa chung ngu'i tshe tshom bu gcig gsum lnga pa'i gtso bo yab yum tsam 'tshogs pa ste gnyis pa dang drug dang bcu tshang ba/__'bring la dkyil 'khor gyi grangs/__chen po de yan chad rab tu mang po 'dus pa dang*/__re re'ang skabs kyis gsum gsum ste/__skal ldan mi dang dgyes ldan lha/__/'byor ldan yo byad lnga pos so/__/zhes gsungs te steng du tshogs chen po bsnan pa bcas mdor na rten dang gang zag yo byad khyad par can tshogs nas sgrub pa'i don no/__/gnyis pa la gnyis/__phun sum tshogs pa lngas sgrub pa'i gzhi bzung ba/__bsnyen bsgrub yan lag bzhi bye brag dang bcas pas sgrub pa'i gzhung bsrang ba'o/__/dang po ni/__dben zhing byin rlabs zil ldan gnas mchog tu:__gza' skar tshes bzang ya mtshan chen po'i dus:__phun sum tshogs pa'i yo byad dang bcas te:__ston 'khor mtshan nyid tshang pa'i tshom bu yis:__ting 'dzin gsal zhing cho ga rnam dag pas:__zhes gsungs te/__de'ang sgrub pa chen po brtsam pa la phun sum tshogs pa lnga tshogs dgos te/__las rim las/__de yang thog mar gnas dang dus/__/yo byad ston 'khor sgrub pa po/__/sgrub thabs phun sum tshogs pa yi/__/gzhi dang sbyar bas gzhung rdzogs bya/__/zhes pas gang du sgrub pa'i gnas ni/__bsam gtan g.yeng ba'i rkyen spyi dang bye brag dgra rkun gcan gzan gtum po sogs gzugs can dang 'byung po gdug pa can gyi gnas rten med pas 'tshe dogs kyis dben cing las bzhi'i dngos grub sgrub pa'i mtshan nyid tshang bas nyams dga' ba dang khyad par rgyal ba rig 'dzin gong mas zhabs gcags pas byin rlabs kyi zil dang ldan la bkra shis pa'i gnas phun sum tshogs pa dag tu'o/__/gang gi tshe sgrub pa'i dus ni/__byang bgrod lha'i nyin mo dang ra ba bzhi'i yar ngo'am mdo sngags kyi ston pas byin gyis brlabs pa'i dus chen khyad par gza' chen lha'i bla ma rgyu skar rgyal dkar phyogs kyi tshes brgyad sum 'dzom dngos grub sbyor ba lta bu rgyud dang gtsug lag gi gzhung las kyang ya mtshan chen por bsngags pa'i dus phun sum tshogs par ro/__/gang la brten nas sgrub pa'i rdzas ni/__sgrub pa rten mchod pa rdzas 'tsho ba zas nad zlog sman rkyen zlog thabs kyi khyad par sogs spyi dang khyad par du bshad pa phun sum tshogs pa'i yo byad dang bcas te'o/__/gang gis sgrub pa po ni/__bskyed rdzogs dam pa'i mdzod gsum 'dzin pa sogs yon tan brgyad ldan gyi ston pa rdo rje slob dpon dang*/__rdo rje'i gzungs ma rgyal tshab rigs bzhi'i rgyal thebs nas phyag tshang rdul phyag kyi bar so so'i las bskos la mkhas shing snod kyi skyon gsum bral la yon tan lnga dang ldan pa'i 'khor phun sum tshogs pa ste mtshan nyid tshang ba'i sgrub pa po tshom bu che 'bring chung ngu gang rung 'dus pa de yis so/__/ji ltar sgrub pa'i thabs ni/__rnal 'byor pa rim gnyis kyi ting 'dzin gsal zhing brtan la gzhung nas ji skad bshad pa ltar bsnyen sgrub yan lag bzhi ldan gyi cho ga rnams la nyams pa'i rgyu bzhi dang sla thal bas ma lhag pa dang dka' bas ma chad par rnam par dag pa'i sgrub thabs phun sum tshogs pas 'dir 'jug par bya'o/__/gnyis pa ni/__sa gzhi bslang zhing dbang byas sbyong dang srung :__phyi nang gsang ba'i rgyud sbyang mtshams bcad cing :__ma traM bsgral mnan rdo rje'i zhing khams su:__lhag par gnas pa'i sta gon tshul bzhin bya:__dkyil 'khor bzhengs te rdzas dang sgrub po dgod:__bsnyen pa'i cho gas snod sbyangs sgrib pa bsal:__nye bar bsnyen pas bcud sbyangs dngos grub bsdu:__sgrub pas rgyud sbyangs dngos grub dbang du bya:__dus drug tshogs kyi mchod pas dgyes pa bskang :__lta nyan 'byung po tshar gcod byin chen dbab:__lha sngags ting 'dzin 'phro 'du rgyun mi bcad:__yid g.yengs spangs te rtse gcig bsgrub pa las:__bris sku bzhad cing bdud rtsi sgrar bcas khol:__mar me rang 'bar sgrub rdzas zhag du 'khyil:__rtogs pa'i rtsal 'bar ye shes dbab pa sogs:__nges pa'i rtags byung sgrub pa chen po yis:__srod la lha dang nam gung sgrol ba dang :__tho rangs sbyor ba lam byas dngos grub blang :__zhes gsungs te/__sgrub pa'i sngon 'gro sa gzhi legs par brtags nas rung bar gyur pa de snang ba gzugs can gyis bdag na rin dang bden pas bslang*/__mi snang ba sa lha gzhi gnas kyi bdag po la gtor ma gser skyems kyis brngan nas bslang zhing rdzas dang dmigs pas bdag gi dbang du byas te sngags rgya ting nge 'dzin gyis sbyang ba dang khro bcu'i phur bu gdab cing 'bar ba'i stangs stabs rnams kyis srung*/__phyi bshags mchod sbyin gsung rab klog pa sogs sgrib sbyong tshogs gsog gi rim pa spyi dang*/__nang ru chen bzhi'i bshags pa/__gsang ba na raka dong sprugs kyi cho ga rnams kyis rgyud sbyang*/__phyi mtshams rgyal chen bzhi la gnyer gtad/__bar mtshams sngags kyi dam tshig nyams nas sri rkyen tu skyes pa rnams nus pa'i stobs kyis mnan/__nang mtshams galpo las/__chos kyi rgyal po bdud rtsi yi/__/phyi nang sgo byang gdags par bya/__/zhes pa ltar las gshin 'khyil pa sgo phyi nang gi srung mar bcol/__gsang mtshams mtshon cha lnga dang khro bo 'chol ba sogs kyi srung 'khor dang de bzhin nyid lta ba'i mtshams bcad bcas bya zhing*/__bgegs phran rnams kyis bar du gcod mi nus pa'i phyir du bgegs kyi rgyal po ma traM ru dra drag po'i stabs kyis bsgral zhing spar te rol pa'i bros mnan la yan lag sogs dur khrod brgyad dang khog pa gzhal yas khang pa ste rdo rje'i zhing khams su byin gyis brlab/__dkyil 'khor bri bar gnang ba zhu ba'i don du lha dang dbang bskur ba'i don du bum pa dang slob ma rnams lhag par gnas pa'i sta gon gyi rim pa tshul bzhin du bya/__de nas rten gyi dkyil 'khor bca' ba la thog mar dri dang bdud rtsi lnga la sogs pa'i chag chag gdab/__byin rlabs kyi cho ga dang ldan pas las dang ye shes kyi thig btab la rab 'bring tha ma'i rdul tshon gyis dkyil 'khor mtshan nyid dang ldan pa bzhengs la sgrub rten dbang chas dngos grub dang mchod rdzas rgyan gyi byai brag rnams legs par bkod/__phrin las la 'jug rung gi bya ba sgrub pa po mched lcam rnams rang gnas su 'god cing zhi khro'i chas kyis mnga' gsol ma mo mkha' 'gros rang gi sde tshan du shes pa'i phyir dpal gyi rtags gsum gdab/__mched gsar bu ba bsre bsnan gyi cho gas snod rung du bya'o/__/de nas dngos gzhi sgrub dus kyi bsnyen bsgrub yan lag bzhis gzhung srong ba ste/__ting 'dzin rnam pa gsum gyis gzhi bzung rnal 'byor pho mo dang lha yab yum grangs sbyar nas sgom pa'am/__mos slob la rnal 'byor pa spyis dkyil 'khor spyi bsgoms la bdag dam tshig pa lha ye shes pa bar gyi 'phro 'du ste gsal ba gsum ldan gyi sgo nas phrin las tshul bzhin tu btang*/__sgrub pa ji tsam byed pa'i sum cha dang por bsnyen pa'i cho gas snod gzhal yas khang du sbyangs te rtog tshogs kyi sgrib pa bsal/__sum cha gnyis par nye bar bsnyen pas bcud snang stong lha'i 'khor lor sbyangs te dngos grub kyi dbyig bsdu/__cha gsum par sgrub pa'i dgongs pas sems kyi rgyud rang byung ye shes chen por sbyangs te dngos grub gnyis la rang gi dbang du gyur par bya/__de dag gi skabs nyin mtshan dus drug tu tshogs kyi mchod pas lha dang dam can dgyes pa bskyed cing nyams chags bskang*/__dus tshod bcu gnyis su lta nyan gyis nyul zhing sgrub pa la bar gcod byed pa'i 'byung po rnams phur thun gyis gzir cing dpal gyi pho nya bcu gnyis tshar gcod du bskul/__dus der dngos grub sbyin pa'i lha re'ang 'byung bas rgyan gos sogs kyis gzi byin bskyed la bdag gnas sgrub pa'i rten rnams la byin chen dbab/__sgrub pa dbu btsugs nas mthar ma son gyi bar du snang ba lha'i dkyil 'khor grags pa sngags kyi rang sgra dran rtog chos nyid kyi ngang las ma g.yos par bzlas pa gsung mi 'chad du bya ba dang ting nge 'dzin gyi 'phro 'du rgyun mi bcad par gnyid rmugs le lo chags sdang sogs kyis yid rnam par g.yeng ba spangs te rtse gcig tu bsgrub par byas pa las/__grub pa'i rtags rab dngos 'bring nyams tha ma rmi lam du sgrub rten dam tshig gi bris sku bzhad cing nang mchod bdud rtsi sol sgra bcas khol nas rlangs pa phyur ba dang*/__mar me rang bzhin gyis 'bar zhing gtor ma la bdud rtsi 'babs pa sogs sgrub rdzas zhag tu 'khyil ba dang*/__lha'i zhal mthong zhing mkha' 'gros lung bstan pa dang*/__'od dang sgra dang dri bzang 'thul ba sogs spyi dang*/__khyad par gyi rtags nyams dang rtogs pa'i rtsal chen phyogs med du 'bar zhing yang dag pa'i ye shes la rang dbang thob pas 'dod rgur sgyur ba sogs nges pa'i rtags rdzogs par byung ba dang*/__rjes kyi las rim nub tha mar sgrub pa chen po'i las la sbyar bar bya ste/__de'ang nam gyi srod la mAM sa zla rgyas tshe gal ma da na sogs bkra shis pa'i rdzas la rten byas thugs dam gnad nas bskul te lha las dngos grub blang ba dang*/__nam gung du 'khor khang bar mar bsgral bya mchog chen mchog phran/__sgrol byed 'dzin sgrol stob pa'i king+ka ra/__sgrol ba'i thabs ngo mtshar bdun ldan gyi cho ga sogs kyis sgrol ba lam du byas nas dngos grub blang ba dang*/__tho rangs dus su rnal 'byor pa'i nus pa dang mthun pa'i gzungs ma lha klu mi mo rigs can lnga sogs khrus nas dbyung zhing rgyan btags snod rung du byas te 'khor khang nang mar 'dod pa'i bstan bcos kyis bde ba bskyed pa bsnyen pa/__'du shes gsum ldan gyis sbyor ba'i brdas bskul ba nye bsnyen/__phyag rgya bzhis snyoms par zhugs te yas bab kyi dga' bzhi ngos bzung ba sgrub pa/__mkha' las byang chub sems rdo rje'i lces 'jib ste ldog dgram gyi sbyor bas mas brtan gyi dga' bzhi mthar skyel bsgrub chen te sbyor dus gyi bsnyen sgrub yan lag bzhi dang ldan pas sbyor ba lam du byas la dngos grub blang*/__mos slob tsam la lha las dngos su blang*/__gzhan dag ting nge 'dzin gyis bsgrub pa sogs byas nas gzhan dag la sgrub pa'i dbang sbyin/__lhag ma'i cho ga dang phyi rol du gtor ma btang*/__dgos pa dang 'brel na drag gtor zor du bskul/__bzod par gsol la dkyil 'khor bsdu/__spyod lam rgyun ting la 'jug cing bsngo smon gyis rgyas gdab/__phyi mtshams bkrol zhing gnas srung ba sogs sgrub chen gyi khog gzhung rnams las 'byung ba bzhin shes par bya'o/__/bzhi pa de ltar bsgrub pa'i 'bras bu rig 'dzin 'grub pa'i dus bstan pa ni/__de ltar zla drug bcu gnyis bco brgyad nas:__phyi nang bskyed rdzogs sems la dbang thob pas:__rlung rig las rung 'od gsal mngon du 'gyur:__rnam smin lus la sems nyid lha skur smin:__zag pa gsum zad tshe la dbang ba thob:__rigs lnga'i gdung 'dzin phyag rgya chen po'i skus:__rgyal tshab chen po'i sa la lhun gyis grub:__ces gsungs te/__zag bcas lam gyi rnal 'byor stong chen snying rje phyag rgya gcig spros te tshogs lam gyi rnal 'byor bzhi dang*/__tshogs sgrub sbyor lam bar chad med pa'i lam du ji skad bshad pa de ltar smin par slob pas dbang po rab zla ba drug 'bring bcu gnyis tha mas kyang zla ba bco brgyad song nas/__phyi bskyed rim gyi gsal snang mthar phyin/__nang rdzogs rim gyi ting nge 'dzin brtan nas sems la rang dbang thob pas rlung dang rig pa las su rung*/__de las don dam 'od gsal gyi ye shes mngon tu 'gyur bas zag med kyi mthong sgoms mthar lam gsum gyis bsdus pa'i rig 'dzin bzhi'i 'bras bu la sbyor te/__gsang snying las/__le lo sgyid snyom med pa yis/__/the tshom med par bsgrubs byas na/__/dkyil 'khor thams cad 'grub par 'gyur/__/rdo rje gsang mchog dam pa thob/__ces so/__/de la dang po rnam smin gyi rig 'dzin gyi rgyu dbang brtul gcig spros la brtan pa thob nas tshogs kyi sgrub pas chos nyid kyi bden pa mthong yang blo'i nus pa dang nye rgyu'i spyod stobs chung bas/__ngo bo gdos bcas kyi phung po dang ma bral ba rnam par smin pa'i lus la/__sems nyid bsgrub bya'i lha skur smin pa/__lus rgya bral ma thag phyag rgya'i rig 'dzin la sbyor ba mtshan nyid sum ldan lhag med myang 'das/__dgongs pa rgyu'i theg pa'i mthong lam rab dga' la gnas pa'i byang sems 'phags pa dang mnyam pa/__spyod pa bdag don bkod pa dkyil 'khor bya bas tshogs gnyis rdzogs par byed cing lha'i spyan sogs gyis phrin las bzhi'i sgo nas gling bzhi'i 'gro ba'i don sgrub bo/__/gnyis pa tshe dbang rig 'dzin gyi rgyu dbang rnon shes rab gsum gyi lta ba ting nge 'dzin la rtogs goms khyad par can du gyur nas blo nus dang spyod stobs che bas/__ngo bo lus snyigs ma'i zag pa khams 'pho ba'i zag pa sems skye gnas len pa'i zag pa gsum zad nas mthong ba'i lam du skye 'jig med pa rdo rje'i lus su gyur te tshe la dbang ba thob nas ji ltar 'dod pa bzhin du bzhugs pa lhag bcas myang 'das/__dgongs pa rgyu'i sa brgyad pa'i 'phags pa dang mnyam zhing*/__spyod pa bdag don lta sgom la rig rtsal sbyong zhing lta ba ched 'dzin kun 'gro'i dri ma bsal/__mngon shes drug la sogs pa dang cho 'phrul bzhis gzhan don mdzad pa'o/__/gsum pa phyag rgya'i rig 'dzin gyi rgyu gcig spros kyi ting nge 'dzin la goms pa'i rgyun dang kun 'gro'i sgrib pa dag pa las/__ngo bo bsgom bya mngon du gyur pas mi g.yo ba'i ting nge 'dzin gyis lhan cig gnas pa'i dri ma sbyong ba la zhugs pa/__ye shes sgyu ma'i skus sprul pa cir yang ston cing sgom lam sa dgu bgrod pa/__dgongs pa rgyu'i sa dgu pa'i 'phags pa dang mnyam la/__spyod pa bdag don tu lhan cig gnas pa'i dri ma sbyong zhing dbang shes nyer lnga'i yon tan dang ldan pas dgongs pa mi g.yo ba'i ngang nas dag ma dag gi zhing rnams su sprul pa sna tshogs pas gzhan don mdzad pa ste/__de la nang gses su sa gnyis pa nas lnga pa'i bar rdo rje/__drug pa dang bdun par 'khor lo/__brgyad par rin chen/__dgu par pad+ma/__bcu par ral gri'i rig 'dzin te rigs lnga'i gdung 'dzin pa'i phyag rgya chen po ye shes lha skus mthar lam la sbyor ba'o/__/bzhi pa lhun grub rig 'dzin gyi rgyu sgom lam du mthong goms kyi mthu rdzogs pas shes rab gsum mthar thug pas lhan gnas kyi dri ma dag pa las/__ngo bo lam gyi rtogs pa mthar phyin te mi slob pa'i rang bzhin sangs rgyas kyi rgyal tshab chen po'i sa la sku lnga lhun gyis grub pa'i cha lugs 'dzin pa/__dgongs pa mdo lam gyi sa bcu gcig kun tu 'od kyi sa la gnas pa dang mnyam zhing spyod pa rang don tu sku lnga'i rgyal ba la sogs par brten te shes sgrib phra ba sbyong la/__ji snyed mkhyen pa'i ye shes kyis sangs rgyas kyi zhing khams rab 'byams su sprul pa'i skus gzhan don mdzad pa'o/__/rtsa ba'i sa bcad gsum pa don bsdu ba ni/__mdor na rim pas smin cing dam tshig brtan:__lta bas rgyud sbyangs ting 'dzin rtse gcig brtan:__dkyil 'khor legs bkod sgrub pa'i rnal 'byor pas:__sngags dang phyag rgya mchod pa'i dpung bskyed de:__spyod pas mtshams sbyar dngos grub mthu thob nas:__mchog dang thun mong phrin las 'bad med 'grub:__gzhi dang lam dang 'bras bu'i tshul nyid du:__rgyud don dngos po nyams len snying por bya:__zhes gsungs te/__de ltar rgyas par phyi nas bstan pa de rnams kyang nyams len gnad du mdor dril na/__thog mar gzhi rim bar bgrod par byed pa dbang gis rgyud smin cing de'i srog mi 'da' ba dam tshig spyi dang khyad par lhag pas bsdus pa rnams brtan por bzung ba dang*/__de kho na nyid gnas lugs dang rjes su mthun pa'i lta ba lhag pa'i bden pa dbyer med kyis rgyud sbyangs nas/__lam rim gnyis kyis ting nge 'dzin las mi g.yo ba'i sems rtse gcig tu brtan pa na/__dkyil 'khor sgrub rdzas sogs dmigs pa'i rten du legs par bkod nas 'dod 'bras don tu gnyer ba'i sgrub pa la zhugs pa'i rnal 'byor pas/__bzlas pa las kyi sngags dang 'ching ba dam tshig phyag rgya 'ching 'grol du bsgyur la phyi nang gsang ba'i mchod pa'i dpung bskyed de lha rnams kyi dbang por stob pas dgyes pa bskang*/__spang blang med par la dor ba'i nye rgyu'i spyod pas mtshams sbyar bas dngos grub gnyis myur du 'grub pa'i nus mthu thob nas/__gtso bor rang gzhan mchog la sbyor ba dang*/__zhar byung thun mong phrin las rnam pa bzhi sogs yul dus skal ba dang 'tshams par rol pa'i las bde blag tu 'grub par 'gyur ro/__/des na dang po gsum lam nyams su len pa'i gzhi dang*/__bar pa drug lam gyi nyams len dngos dang*/__tha ma gcig 'bras bu'i tshul nyid du 'byung bar shes nas/__rgyud rgyal sgyu 'phrul drwa ba sogs kyi dgongs don dngos po bcu la gang zag gcig tshe gcig tu 'tshang rgya ba'i lam tshang la ma nor ba yin pas nyams len gyi snying por bya bar gces so/__/gnyis pa gsang dbang gi lam dang 'brel ba bdag byin brlab pa'i rim pa bsgom pa la gnyis/__gong 'og mtshams sbyar te mdor bstan pa dang*/__de dag rgyas par bkrol ba'o/__/dang po ni/__de ltar bum dbang lam khyer gtsor gyur pa'i:__rnal 'byor chen po'i sgrub pas gzhi bzung ste:__gsang dbang nye bar bsnyen pa'i lam rim ni:__zhes gsungs te/__de ltar na dbang bzhi'i rtsa ba/__bum dbang lam du khyer ba'i thabs gtso bor gyur pa'i bskyed pa'i rim pa yan lag dang bcas pa ma hA yo ga ste rnal 'byor chen po'i rgyud dang 'brel par lam gong ma'i stegs su bsnyen pas gzhi bzung ste/__zab mo lus kyi dkyil 'khor du gsang ba'i dbang bskur ba thob pa'i ye shes de nyid lam du byed cing sher ye la nye bar bsnyen pa'i lam gyi rim pa ni 'di lta ste/__gnyis pa la gnyis/__lam dngos dang*/__lam gzhan 'du ba'i tshul 'bras bu dang bcas pa'o/__/dang po la gnyis/__mdor bstan/__rgyas bshad do/__/dang po ni/__rten dang brten pa rjes su rnal 'byor lam:__zab pa'i bskyed rim rtsa rlung thig le'i khams:__grub tsam nyid nas rang byung snod dang bcud:__bcos ma min pa'i dkyil 'khor nyid yin pas:__zhes gsungs te/__de'ang rten rdo rje'i lus dang brten pa rtsa rlung thig le'i gnad 'ching ba rdzogs pa a nu yo ga ste rjes su rnal 'byor gyi lung dang 'brel ba'i lam/__snga ma las zab pas zab mo'i bskyed rim ste thog mar rtsa dang rlung dang thig le'i khams rnams grub tsam nyid nas rang byung gi snod 'khor dang bcud dkyil gyi rang gzhin shugs kyis grub pas rtogs pas gsar du sgro btags nas bcos mar byas pa min pa'i lhun grub lus kyi dkyil 'khor ces bya ba nyid yin pas khyad par du 'phags te/__bang mdzod 'phrul lde las/__rdzogs pa a nu yo ga ni/__/phung po khams dang skye mched rnams/__/lha dang lha mo'i dkyil 'khor du/__/ma bskyed rdzogs pa'i tshul du 'dod/__ces dang*/__dril bu pas/__'gro ba 'di dag rang bzhin gyis/__/grub pa'i dkyil 'khor gnyis med pa'o/__/zhes pa ltar ro/__/spyir rdo rje'i lus la gnad du bsnun pa la de'i gnas lugs shes pa gal che ste de'i rgyu mtshan phra ba'i lus ngag yid gsum gdod ma nas rdo rje mi shigs pa gsum gyi lhar rnam par dag la/__de gsum yang don dam pa'i rigs drug gi lha yab yum gyi bdag nyid 'byung lnga sems kyi dwangs ma drug po yang gnyis gnyis su zung du 'jug pa las/__sa chu'i dwangs ma sku rdo rje/__me rlung gi dwangs ma gsung rdo rje/__mkha' sems kyi dwangs ma thugs rdo rjer bzhugs shing*/__de gsum ldog chas phye ba tsam las don dam par sku gsung thugs rdo rje mnyam pa nyid de sbyang gzhi/__de'i rang mdangs kun rdzob snang ngo'i cha nas rkyang ma ro ma dbu ma gsum khu rdul rlung gi rten dang*/__rlung sems 'jug pa gcig pas sems kyi rten yang yin la/__de nyid rags pa grub pa na rtsa las lus/__rlung las ngag__/thig le las sems kyi chos 'grub pa ni sbyang bya 'khrul pa'i sgo gsum yin cing*/__de sbyong byed dbang gong ma gsum dang 'brel ba'i zab lam khyad par rnams kyis byed pa bcing zhing 'od gsal du sbyangs pas glo bur sgrib pa thams cad gdod ma'i ye shes su thim pa na/__sbyangs 'bras sgrib bral bde ba chen pos khyab byed du byas pa'i sku gsum po 'grub par 'gyur ba yin pas de dag gi tshul mdo tsam smos na bzhi/__lus 'grub pa'i rgyu rkyen/__gnas pa rtsa/__g.yo ba rlung*/__bkod pa thig le'o/__/dang po rdo rje theg pa'i rten khyad par du 'phags pa dzam+bu'i gling pa'i mi khams drug ldan gyi lus ni/__dri ma dang bcas pa'i sems kyis 'du byas shing*/__las mngon par bsgrubs pas rgyu byas/__pha ma'i 'du 'phrod kyis rkyen byas te/__de gsum tshogs pa nyi zla sgra gcan zhes btags pa'i pha ma'i khu khrag bar do'i rnam shes dang bcas pa las lus ngag yid gsum bskyed/__bar do'i shes pa des pha ma gnyis kyi reg pa sra ba de nyams su myong bas sa'i khams grub cing*/__de bzhin du byang sems khu ba gsher ba'i rang bzhin chu/__bskyod pa las drod skye ba me/__rtsa gnas thams cad las byang sems g.yo ba rlung*/__bde ba nam mkha'i khams te 'byung ba lnga/__rnam par shes pa ye shes kyi khams dang drug 'dus pa las lus grub ste ma'i mngal du sa bcu'i rang bzhin gyi zla ba ngo bcur gnas pa'i tshe rtsa'i gtso mo gsum nas brtsams te stong phrag lnga bcu rtsa bzhi dang*/__btsas nas zla ba gsum pa na rtsa stong phrag bdun cu rtsa gnyis rdzogs par lus chags pa'i gnas skabs rdzogs pa'o/__/gnyis pa ni/__lus kyi dbus gsang gnas nas gtsug tor gyi bar du rtsa a ba d+hu ti srog shing gi tshul du yar sna smin mtshams su zug pa de'i g.yas na ro ma dang*/__g.yon na rkyang ma gnyis yar sna sna bug tu zug ste smin mtshams nas sum gshibs kyi tshul du song ba'i 'khor lo bzhi'i lte bar so sor mdud pa'i tshul gyis nang 'brel par gnas pa/__lte ba'i 'og nas rtsa gsum 'dres shing dbu ma'i mar sna dung can ma g.yas ngos su song ste khu ba/__rkyang ma dbus su song ste dri chu/__ro ma g.yon tu song ste khrag dang dri chen 'byin sdom byed/__spyi mgrin snying lte'i 'khor lo bzhi ka'i dbus nas phyogs bzhir rtsa bzhi bzhi gyes pa/__snying gar de bzhi las gnyis re gyes pas brgyad/__mgrin par de las gnyis gnyis gyes pas bcu drug__/spyi bor de las gnyis gnyis gyes pas so gnyis/__lte bar snying ga ltar gyes pa brgyad gyi bzhi las gnyis re gyes pas 'pho ba'i rtsa bcu gnyis dang*/__de'i sngar gyes pa brgyad las lnga lnga dang ma gyes pa bzhi las drug re gyes pa drug cu rtsa bzhi'o/__/de'ang spyi bo sku'i 'khor lo'am bde ba chen po'i rten haM yig bzhugs pas bde chen 'khor lo/__/mgrin par gsung gi 'khor lo'am ro drug myong ba'i phyir longs spyod 'khor lo/__/snying ga'i rtsa 'dab thugs sam chos kyi 'khor lo/__lte ba ni lus thog mar bskyed pa dang sprul pa'i gnas sam khams gsum la khyab pas sprul pa'i 'khor lor grags te/__de rnams la 'khor lor brjod pa'ang rtsibs la sogs pa dbyibs mtshungs pa dang*/__de dang der byed pa bcings pa las rtog pa gcod pa'i phyir 'khor lo dang byed las mtshungs pas kyang de skad ces bya'o/__/rtsa de dag las kyang phye na nang gi gnas nyer bzhi dang yul so bdun dang*/__ro rkyang dbu ma gsum gyi rigs 'dzin pa'i rtsa stong phrag nyi shu rtsa bzhi pa tsho gsum la stong phrag bdun cu rtsa gnyis/__de rnams las gyes pa ni bsam gyis mi khyab pa ste/__ba spu'i grangs ji snyed pa'i rtsa'i grangs kyang de snyed do/__/gzhan yang dbu ma'i yar snar gtsug tor dang*/__'og tu gsang ba'i 'khor lo bsnan pa sogs mang nyung mtha' gcig tu ma nges par gsungs shing*/__mdor na rnal 'byor pas shes par bya ba'i rtsa stong phrag bdun cu rtsa gnyis dang*/__de rnams kyi gtso bor gyur pa 'khor lo'i rtsa dang*/__de rnams las kyang gtso bor gyur pa'i rtsa sum cu rtsa gnyis la sogs pa bshad la/__'khor lo drug gi rlung sems kyi dwangs ma 'dzin cing snyigs mas nad skyed par byed de/__gtsug tor dang dpral bas bad kan/__mgrin snying gis mkhris nad/__lte gsang gi phyi skor gyis rlung nad/__gsang ba'i nang skor gyis 'dus pa'i nad bskyed do zhes 'byung ngo*/__/de yang lus la rags phra shin tu phra ba'i lus/__de rnams kyi chos nyid don dam ye shes kyi rtsa ni rang rig pa'i rnam par shar ba'i phyir tha mal gyi rtsa thams cad la khyab byed du bzhugs pas ye shes kyi dbu ma chen po zhes kyang grags la/__de nyid rnam pa thams cad pa yin pas kun rdzob kyi rtsa yang de'i rjes su 'gro ba'i phyir/__rnal 'byor pa'i sems kyis rnam pa gar gtad de dang 'dra bar tha mal pa'i rtsa rnams kyis kyang bya ba byed pas rgyud sde tha dad las gsungs pa'i rtsa'i rnam bzhag mi 'dra ba rnams kyang mi 'gal ba'i gnad shes par bya'o/__/gsum pa ni/__spyir lus can rnams kyi ngag gi chos dang*/__phyi rol tu dbugs srang chu tshod zhag sogs dus kyi chos rnams kyi 'char gzhir gyur pa don dam ye shes kyi rlung ngam srog chen po'i rlung zhes bya ste/__'jam dpal sgyu drwa las/__srog chen po ste skye ba med/__/tshig tu brjod pa spangs pa ste/__/brjod pa kun gyi rgyu yi mchog__/tshig kun rab tu gsal bar byed/__/ces gsungs te/__rlung mtha' dag gi gshis la rgyun mi chad par khyab pa rgyu rgyud kyi rten du gyur pa yin la/__de'i glo bur gyi dri ma kun gzhi'i rnam shes kyi rang bzhin yul la g.yo ba ni las kyi rlung ste/__de la phung po lnga'i rten byed pa rtsa ba'i rlung lnga ni/__srog 'dzin/__gyen rgyu/__khyab byed/__me mnyam/__thur sel lnga ni rtsa ba phung po'i rlung ste/__byed las kyang*/__srog gnas pa dang*/__dbugs 'byung rngub dang*/__lus gnas pa dang*/__drod 'bebs pa dang*/__'gro 'dug bshang gci khu gsum 'byin sdom dang bcas pa'i bya ba byed la/__gal te log na/__brgyal smyo shi ba sogs dang*/__stod nad dang*/__zha rengs kyi nad dang*/__pho ba'i nad dang*/__smad kyi nad rnams bskyed cing*/__de dag lus kyi dbus dang*/__stod dang*/__pags pa'i mthar thug pa dang*/__zhu ba'i mtshams dang*/__lte ba man chad na gnas par bshad la/__rgyu ba/__rnam par rgyu ba/__yang dag rgyu ba/__rab tu rgyu ba/__nges par rgyu ba ste yan lag gi rlung lnga ni/__dbang po lnga la gnas shing bskyed pa sogs kyi bya ba byed pa dang*/__bye brag tu snar rgyu ba'i rlung ni nyin zhag phrugs re la rlung nyi khri chig stong drug brgya rgyu la/__de yang 'pho ba bcu gnyis pa'i dbang du byas na/__lte ba'i rtsa 'dab drug cu re bzhi las/__sngar drug tu gyes pa'i ya gyal bzhi po dbu ma'i 'pho ba yin pa'i phyir/__dkyil 'khor mi 'babs pas stong pa'i rtsa bzhi zhes bya'o/__/de lhag drug cu po nas rgyu tshul ni/__ba spu'i mthar thug pa'i rtsa lam nas rtsa 'khor gyi rlung rnams lte ba'i rlung dang 'dres te ro rkyang gi lam las sna sgor 'bab la/__de yang 'byung ba lnga g.yas g.yon sdud bskyed kyi rim pas 'pho ba re la dbyug gu lnga re/__dbyug gu re la dbugs sum brgya drug cu ste/__'pho ba re la dbugs stong brgyad brgya pa re rgyu na'ang*/__de'i steng na stong pa'i rtsa bzhi'i dbye bas dbugs gcig gi phyed bcas so gnyis cha re ye shes kyi rlung yin la/__de bsags pas dbyug gu re la dbugs bcu gcig dang bzhi cha gcig__/'pho ba re la nga drug rkang bcas/__nyin zhag gcig la drug brgya don lnga rnams rgyu zhing*/__de chu tshod du dril na/__chu tshod gcig__/chu srang nga gnyis/__dbugs gsum/__de zla ba gcig tu bsags pas chu tshod nga drug dang*/__chu chung bco lnga/__de bcu gnyis su zlos pas zhag bcu gcig dang*/__chu tshod bco lnga rnams lo gcig gi ye rlung gi grangs te phyi rol du zla shol gyi rgyur 'gyur la/__skyes bu lo brgya pa'i ye rlung bsdoms pas lo gsum phyogs gsum tu longs pa sogs rgyud rnams las rgya cher gsungs so/__/kha dog sa chu me rlung nam mkha' rim par ser dkar dmar nag sngon po/__tshad kyang lte 'og sor bzhi nas brgyud de sna rtse las sor bcu gnyis nas bcu drug gi bar du 'gro ba yin no/__/rlung de dag las sna sgor rgyu ba dang rgul skyod byed pa'i rlung sogs rags pa/__lus nang du mi g.yo zhing 'khor ba'i rang bzhin 'byung lnga'i rlung dang*/__rnam 'gyur rlung bcu/__rnam rtog sna tshogs g.yo ba'i gzhon pa rnams 'bring po/__snang bzhi'i bzhon par gyur pa'i rlung rnams phra ba/__khyad par 'od gsal gyi bzhon pa'i rlung ni shin tu phra ba yin la/__de yang man ngag tha dad pa las rlung gi rnam bzhag mi 'dra ba byung ba rnams kyang*/__ye shes kyi rlung rnam pa thams cad pa yin pas/__de'i rjes su 'gro ba'i phyir gnad gcig tu 'du ba yin no/__/des na rlung bcings pas rags pa'i las rlung nyid kyang ye shes kyi rlung du gyur nas yon tan bskyed par gsungs so/__/bzhi pa la ye shes dang rnam shes kyi thig le gnyis las dang po ni/__thig le thams cad kyi rtsa ba rgyu rgyud kyi rten du gyur pa ye shes snying po'i thig le'am mi shigs pa'i thig le zhes bshad pa gang yin pa ste/__stong gsal 'gag med kyi ngo bor bzhugs pa'o/__/gnyis pa ni/__rlung sngags rdzas kyi thig le gsum gsungs te/__snying ga'i mi shigs pa'i thig le'i nges pas/__rlung gi byed bcings las gzung 'dzin gyi snang ba rang grol du gyur pa ni rlung thig__/sna rtser thig le la lha'i mtshan ma bsgoms pas tha mal gyi snang zhen las yid skyob pa'i phyir sngags thig__/'og gi sna rtser thig le bsgom pa las bde ba 'char ba sogs rdzas thig go__/de'ang phyi ma cung zad bshad na/__khams dkar dmar gnyis las dwangs snyigs gnyis su gyur te/__spyi bor pha las thob pa'i dkar cha haM gi rang bzhin dang*/__lte 'og rtsa gsum 'dus mdor ma las thob pa'i dmar cha a thung gi rang bzhin te/__lus kyi dkar cha dang dmar cha thams cad kyi bdag por gyur pa/__dbu ma'i cha la brten pa/__rnam shes kyi rten byed pa'o/__/de las kyang dwangs snyigs gnyis su 'gyur te/__mngal du ma'i rtsa dang 'brel bas bskyed cing*/__btsas nas bza' btung rnams pho bar bad kan gyis myags par byed/__mkhris pas mdog 'gyur/__rlung me mnyam ste me drod gsum gyis sbar bzhu myags par byas pas/__dwangs ma mchin par khrag tu gyur te/__rtsa la brgyud nas/__de sha/__rim par tshil/__rus/__rkang*/__byang sems/__des stobs dang mdangs su 'gyur la/__de rnams kyi snyigs ma ni rim bzhin tu/__dri chen dang*/__mkhris pa dang*/__pags pa dang*/__rmen bu dang*/__so sen dang*/__sbubs kyi dri ma mchil snabs la sogs pa dang*/__dga' ba'i mthar 'dzag pa ste/__lus zungs bdun zhes grags shing*/__de dag gi rnam dbye yang*/__spyi bo mi phyed pa nas so sen 'bab pa sogs khams nyi shu rtsa bzhi/__de re re la'ang thims longs spyod bdag po gsum du phye bas khams bdun cu rtsa gnyis/__de stong gis phye bas stong phrag bdun cu rtsa gnyis/__de stong gis phye bas bye ba phrag bdun cu rtsa gnyis sogs rtsa ji snyed par rlung*/__rlung ji snyed par thig les khyab par gsungs so/__/rnal 'byor pa'i rgyud las khams nyer bzhi'i steng du rtsa'i gtso mo gsum dang*/__sum sgril ma la sogs te lnga bsnan nas so gnyis su gsungs te/__he ru ka gal po las/__lus la byang chub sems rgyu ba'i/__/rtsa ni sum cu rtsa gnyis te/__zhes so/__/de'i steng du rtsa ba'i rlung lnga rgyu ba'i srog chen po ma gtogs pa'i bzhi bsnan nas sum cu rtsa drug tu bshad pa'ang snang ngo*/__/de dag kyang 'khor lo bzhir dga' bzhi'i 'gros kyis ye shes dang rjes su 'brel bar 'pho ba dang*/__lus la zungs sam nus pa'am gnad kyi ngo bo nyid du rnam shes dang rjes su 'brel bar 'pho ba bla gnas zhes grags pa'o/__/mdor na thig le mtha' dag khu rdul mun gsum du 'du zhing*/__de gsum gyis chags sdang rmongs gsum skyed pa las/__rang bzhin brgyad cu'i rtog pa dang*/__des las bsags nas 'khor ba'i 'khrul snang gi sdug bsngal sna tshogs 'byung ba yin la/__de gsum 'gyur med du bcings pa las 'khor ba ldog par 'gyur zhing*/__thig le thams cad kyi rtsa ba chos nyid mi shigs pa'i theg le ni rnam pa thams cad pa yin pas/__brtags pa dang ma brtags pa'i thig le'i rnal 'byor ji snyed pa kun kyang dngos brgyud gang rung gi sgo nas yang dag pa'i lam du 'gro ba'i gnad kyang shes par bya'o/__/de dag ni bla med rgyud sde spyir grags pa ltar te 'od gsal rdzogs pa chen po'i rang lugs thun mong ma yin pa ni theg mchog rin po che'i mdzod sogs las rgya cher 'byung ba ltar ro/__/gnyis pa la gnyis/__rten rdo rje'i lus kyi sgom tshul bshad pa dang*/__brten pa rtsa rlung thig le'i rnal 'byor bshad pa'o/__/dang po la'ang lam dngos dang*/__de goms pa'i 'bras bu gnyis/__dang po ni/__'byung bzhi'i rtog pa yum gyi b+ha ga ru:__phung po rags pa gzhal med khang chen te:__dbang po sgo lnga sha khrag drod dbugs sogs:__rgyan dang bkod pa gzi brjid dpal du 'bar:__ro ma dpa' bo rkyang ma dpa' mo dang :__dbu ma he ru ka dpal kun tu bzang :__'khor lo'i gnas rnams rigs mchog zhi khro'i gtso:__rtsa 'dab thams cad rigs kyi yab dang yum:__phung po dam tshig thig le ting 'dzin sems:__rig pa ye shes dbyer med nga rgyal gyis:__'dod yon longs spyod bde chen sprin la rol:__che ba'i yon tan bsngags pa bstod pa'i glu:__bsgul bskyod phyag rgya 'gro 'dug rdo rje'i gar:__srog rtsol 'byung 'jug bzlas pa rgyun mi 'chad:__bza' btung gtor ma tshogs 'khor rtag tu rol:__snyoms 'jug bde bas tshim pa'i 'od gsal lha:__thig le las bzhengs nA dar stong par yal:__stong nyid ngang las snang grags rtog tshogs kun:__rdo rje gsum mchog dbyer med lhun gyis grub:__ces gsungs te/__zab mo'i bskyed rim ma bcos rang byung gi dkyil 'khor de ji ltar na/__'byung bzhi rim brtsegs chos 'byung dang bcas pa ni thog mar pha ma'i 'du 'phrod kyi rkyen las mngal du 'byung bzhi'i tshogs pa la rlung sems kyi rtog pas bdag tu bzung ba'i rten e dbyings yum gyi b+ha ga ru/__gzugs kyi phung po rags par grub pa gzhal med kyi khang pa chen po ste/__de'ang lus 'dom gang gru bzhi gzhal yas khang*/__yan lag brgyad ka ba brgyad/__'byung lnga'i rlung rgyu ba'i dbang po sgo lnga las mig nyi zla'i skar khung*/__rna ba sna kha 'og sgo bzhi po sgo bzhi/__sha dkyil 'khor gyi gzhi/__khrag mtsho rdzing*/__drod me phung*/__dbugs 'ja' 'od/__sogs khongs nas snying nor bu'am tsit+ta'i phong to/__/rgyu ma drwa ba drwa phyed/__sor mo rnams zla phyed me long*/__so mda' yab/__lce pu shu/__bu ga brgyad dur khrod skra dang pags pa rus tshigs srung 'khor sogs rang byung gi rgyan dang bkod pa gzi brjid kyi dpal du 'bar ba'i rten gzhal yas khang du lhun gyis grub pa dang*/__nang gi rtsa g.yas ro ma thabs dpa' bo/__/g.yon rkyang ma shes rab dpa' mo/__/dbu ma he ru ka spyi dpal chen po khyab bdag kun tu bzang po/__'khor lo'i gnas lnga ni spyi bo sangs rgyas/__mgrin pa pad+ma/__snying ga rdo rje/__lte ba rin chen/__gsang ba las te rigs mchog rnam lnga'i zhi khro'i gtso bo rnam snang dang bud+d+ha he ru ka la sogs pa dang*/__de dag gi rtsa 'dab thams cad ni rigs chung rnams kyi tshom bu'i dkyil 'khor yab dang yum bcas brten pa lha'i dkyil 'khor du lhun gyis grub pa dang*/__phyi lus kyi phung po dam tshig sems dpa'/__nang dwangs ma'i thig le ting 'dzin sems dpa'/__de'i khyab byed rig pa ye shes sems dpa' gsum po gdod nas dbyer med du grub pa yin pa la yin par shes pa'i nga rgyal gyis/__rdzogs byed yan lag sgo lnga'i yul du 'dod yon gyi longs spyod ji ltar snang ba thams cad bde ba chen po'i mchod pa'i sprin phung du shes pa la spang blang med par rol pa dang*/__gzhan gyis che ba'i yon tan bsgrags nas bsngags pa thams cad bstod pa'i glur shes pa dang*/__bsgul bskyod byed pa phyag rgya dang 'gro 'dug thams cad rdo rje'i gar bsgyur ba dang*/__srog dang rtsol ba'i rlung 'byung 'jug gnas gsum po rdo rje'i bzlas par ngang gis grub pas nyin mtshan rtag tu rgyun mi 'chad pa dang*/__bza' bca' btung ba'i rigs gyur nang gi gtor ma dang tshogs 'khor la rtag tu rol pa yin pa dang*/__snyoms par 'jug pa'i tshe gnas bzhir dga' bzhi'i bde bas rgyud tshims pa'i 'od gsal ye shes kyi lha/__bcu drug phyed phyed kyi thig le las rim par bzhengs te lhan cig skyes pa mi shigs pa'i nA da stong bzhi'i mthar thug par yal bas rnam bcas kyi bskyed rim yan lag dang bcas pa de dag bsam mi khyab pa'i rdzogs rim du zhugs/__stong nyid de'i ngang las gzugs snang sgra grags 'gyu dran gyi rtog tshogs kun kyang sku gsung thugs rdo rje gsum gyi mchog tu dbyer med par lhun gyis grub pa'o/__/'dir nA da zhes pa'i don kyang shin tu phra ba'i rlung khams gsum pa'i bdag nyid can rgyun mtha'i bar gzhom du med pa de nyid mtshon pa rnam bcas kyi mtshan ma shin tu phra ba'o/__/bskyed tshul 'di ni kun 'dus rig pa'i mdo las/__kun bzang rdzogs chen ye nas brdal ba la/__/phyi nang gsang bar bkod pa'i dkyil 'khor ni/__/snang srid rnam dag lha dang lha mo'i dbyings/__/zhes sogs 'byung ba ltar ro/__/gnyis pa ni/__zab mo'i bskyed r-im 'di la sus goms pa:__rlung sems las rung spyan dang mngon shes 'grub:__drod dang rtags mtshan rtsol med ngang gis shar:__ces gsungs te/__de ltar bshad pa'i zab mo'i bskyed rim 'di la rnal 'byor pa sus nyams len gyis goms shing 'dris par byed pa de ni ring por mi thogs par rlung sems las su rung bas ting nge 'dzin khyad par can skye/__spyan dang mngon par shes pa'ang 'grub ste/__de la spyan lnga ni/__dpag tshad brgya stong tshun gyi dngos po mthong ba sha'i spyan/__/sems can kun gyi 'chi 'pho dang skye ba'i tshul mthong ba lha'i spyan/__chos nyid kyi don ji lta bar mthong ba shes rab kyi spyan/__rang dang spangs rtogs mnyam pa'i rgyud tshod rig pa chos kyi spyan/__chos thams cad mngon par byang chub par mthong ba sangs rgyas kyi spyan te dang po gnyis rnam smin gyi rgyu dang kun gyi rgyu ni sgom stobs so/__/mngon shes drug ni/__lus rnam par dag pa rdzu 'phrul/__ngag rnam par dag pa lha'i rna ba dang gzhan sems shes pa/__sems rnam par dag pa sngon gnas rjes dran/__lha'i mig__/zag pa zad pa'i mngon shes rnams te/__de gnyis kyi dang po rnams ni so skye dang 'phags pa'i sa rnams su'ang yod la/__phyi ma re re ni sangs rgyas kyi sas bsdus pa yin cing 'phags pa la'ang rjes mthun pa tsam yod par bzhed do/__/gzhan yang phyi nang gsang ba'i drod dang dngos nyams rmi lam gyi rtags mtshan ngo mtshar ba rnams kyang rtsol ba med par ngang gis shar bar 'gyur te/__rgyud las/__phyi dang nang dang de bzhin nyid/__/dngos dang dngos min gnas lugs kun/__/rdo rje lus kyi dkyil 'khor dang*/__/kun gzhi ye shes rang byung lha/__/de la goms 'dris brtan pa ni/__/phyi nang zhing khams ma lus pa/__/gnyid sad snang ba ji bzhin tu/__/ring por mi thogs 'char bar 'gyur/__/ces so/__/gnyis pa rtsa rlung thig le'i rnal 'byor bshad pa la gnyis/__mtshams sbyar te mdor bstan/__de'i don rgyas par bshad pa'o/__/dang po ni/__de ltar bde chen sku la rten byas nas:__brten pa rtsa rlung thig le'i rdzogs rim ni:__zhes gsungs te/__de ltar bde ba chen po rang byung rdo rje lus kyi sku la rten byas nas/__brten pa rtsa dang rlung dang thig le'i rnal 'byor la brten te rang byin brlab pa'i rdzogs rim ni 'di lta ste/__gnyis pa la gsum/__bkod pa rtsa/__g.yo ba rlung*/__thig le byang chub kyi sems sbyong ba'o/__/dang po ni/__lus gnad ldan pas chun btsal rlung dug dbyung :__ngo bo bde stong rnam pa yi dam lha:__rnam 'gyur rnyog pa med pa chu zla'i gar:__'ja' tshon lta bu'i sku dbus d+hU ti'i rtsa:__g.yas g.yon ro rkyang de gsum la brten pa'i:__rtse mo rnam bkod 'dab ma sum cu gnyis:__ro rnams 'dus par brgyad gnyis bcu drug ste:__dran pa rnam par bkod la tshogs brgyad 'dab:__skyed byed 'khor lor drug cu rtsa bzhir bcas:__gnas pa bzhin du gsal gdab goms pa na:__zhes gsungs te/__de'ang lus grong khyer/__rlung rta long ba/__rnam shes mi zha bo 'dra bar kha lo sgyur bas byed pa ma 'chings na mis zhon pa'i rta de srang bar nas phyir shor ba dang 'dra/__'ching na srang sgo khegs nas mi rta nang du tshud de 'gror mi thub pa dang 'dra bas/__rnam rtog gi bzhon pa rlung 'ching ba la lus kyi gnad 'ching ba gal che'o/__/de'ang klong chen rab 'byams las/__rkang pa rdo rje'i skyil krung bca'/__/lag pa gnyis kyis mnyam bzhag bsnol/__/lus ni mda' smyug bzhin tu bsrang*/__/dpung pa rgod gshog bzhin du brgyang*/__/mjing pa gzhu mchog bzhin du bskum/__/lus gnad phag pa'i gzengs ltar bstod/__/mig dang sna rtse sems rtse bstun/__/zhes gsungs pa lta bu'i lus gnad dang ldan pas cha cha nas bsgrims te chun btsal/__khong par nyon mongs pa'i rlung gi dug yod pa dbyung ba'i phyir rlung ro sna sgo nas lan gsum bsal/__sems kyi gnad rang lus tha mal gyi snang ba dbyings su yal te rnam par mi rtog pa'i ngang las/__ngo bo bde stong gi rang bzhin rnam pa yi dam lha'i sku/__rnam 'gyur dwangs gsal rnyaugs pa med pa chu zla'i rol gar dang sgrib thogs med pa nam mkha' la 'ja' tshon shar ba lta bu'i skur gsal ba'i lus kyi dbus su a ba d+hU ti mar grags pa'i rtsa sngon po tshangs bug nas gsang gnas bar du ka ba ltar yod pa mtshan nyid bzhi ldan/__de'i g.yas g.yon gnyis su ro ma dmar mo dang rkyang ma dkar mo d+hU ti las 'dab 'gyur gyis phra ba sum bshibs su yod pa/__ro rkyang gnyis kyi yar sna spyi bo nas thur du gug pa sna bug gnyis su zug cing mar sna gnyis lte 'og sor bzhi'i thad nas d+hu tir tshud pa/__gtso mo de gsum srog shing bslangs pa lta bu la gdugs kyi rtsibs ma bkon pa ltar brten pa'i spyi bor rtse mo rnam par bkod pa'i 'khor lo 'dab ma sum cu rtsa gnyis/__mgrin par ro rnams 'dus pa'i 'khor lo 'dab ma brgyad gnyis bcu drug__/snying ga dran pa rnam par bkod pa'i 'khor lo la rnam shes tshogs brgyad brten pa'i 'dab ma brgyad/__lte ba skyed byed kyi 'khor lor 'dab ma drug cu rtsa bzhi bcas 'khor lo bzhi po'i lte ba d+hU ti nas phyogs bzhir 'byung bzhi'i nus pa 'dzin pa'i rtsa 'dab re re gyes shing*/__snying gar de las gnyis gnyis gyes pas phyi skor la brgyad/__mgrin par de las kyang gnyis re gyes pas bar skor la brgyad dang phyi skor la bcu drug__/spyi bo de las kyang gnyis re gyes pas bar skor phyi mar bcu drug dang phyi skor la so gnyis/__lte bar snying ga ltar gyes pa'i brgyad kyi bzhi las gnyis re gyes shing*/__de ltar gyes pa brgyad las lnga lnga dang*/__ma gyes pa'i bzhi las drug drug gyes pas bar skor la bcu gnyis dang phyi skor la drug cu rtsa bzhi ste lus la ji ltar gnas pa bzhin tu gsal gdab/__rtsa de thams cad dwangs gsal sbubs stong gi rnam par bsgoms la rtsa'i stong ra nyid thams cad kyi gzhi yin pas legs par goms pa na rnal 'byor phyi ma la 'jug par bya'o/__/gnyis pa la gnyis/__thun gyi nyams len dang*/__thun mtshams kyi nyams len no/__/dang po la'ang gnyis/__gtso bo bum can dang*/__de sbyangs pa'i 'bras bu'o/__/dang po ni/__skyon can rlung ni phyir la sangs kyis 'bud:__skyon med steng 'og lte bar nar gyis drangs:__bum pa ltar dgang gzhil zhing mda' ltar 'phang :__rtsol ba rim bskyed rgyun mi 'chad pa yis:__zhes gsungs te/__lus gnad rtsa'i stong ra gsal btab nas sngar khong par bskyil ba'i dug gsum gyi skyon dang 'dres pa can gyi rlung ni sna sgo nas phyir la sangs kyis 'bud de de'ang 'bud pa dgu phrugs sam sum phrugs bya/__mnyam rgyu'i ye rlung sogs rlung gi dus gnad la mkhas pas skyon med pa 'byung lnga dwangs ma'i rlung sna sgo nas rngubs te steng rlung dang thur sel bskum ste 'og rlung gnyis lte bar nar gyis drangs la dbu mar kha sbyor du bskyil ba bum pa ltar dgang*/__mi non pa'i tshe g.yas g.yon 'then gnon dang phyi nang du gzhil/__mi thub tsa na mda' ltar 'phang ste de lta bu'i sbyor ba bzhi ldan gyi rlung sbyor la/__rtsol ba rim gyis je drag tu bskyed/__lus sems dub kyang rtag tu rgyun mi 'chad par bsgom pas sdom 'byung nas bshad pa'i bum can rab 'bring tha ma'i tshad ldan du grub par gsungs kyang da lta'i lag len la/__lag pa'i thal mos pus mo la lan re bskor te se gol gcig gtogs pa'i yun tshad sum cu rtsa drug ni bum pa can chung ngu+u*/__bdun cu don gnyis 'bring*/__brgya rtsa brgyad khegs pa chen po'i tshad du bzhed do/__/gnyis pa ni/__lus bde ngag snyan sems gnas 'chi med 'grub:__ces gsungs te/__rlung bum pa can grub pa'i yon tan mang du bshad pa las mdor bsdu na lus mnyen lcug thob pa'i bde ba/__ngag rang dbang du gyur pas snyan pa/__sems ting nge 'dzin la g.yo med du gnas pa dang*/__'chi ba med pa'i bcud len 'grub par 'gyur te/__sdom 'byung las/__yang na bum pa can sbyor bas/__thams cad du ni 'chi las rgyal/__/ces so/__/gnyis pa thun mtshams bya ba ni/__thun mtshams 'khrul 'khor bya zhing dal bar bzhag:__skabs su rdo rje'i bzlas pas sems gnas bsgrub:__ces gsungs te/__de ltar rlung gi rnal 'byor la brtson pa'i thun mtshams rnams su yan lag lnga sbyong sogs rtsa rlung gi skyon sbyang ba rnams dang*/__lus kyi chun btsal zhing gnad la rdeg par byed pa dang*/__thig le'i skabs su 'dren ldog bkram par byed pa dang*/__thams cad du gegs bsal zhing bogs dbyung ba'i 'khrul 'khor rnams kyang lag len ltar bya zhing*/__mthar sgo gsum dal bar bzhag pas rtsa 'khrugs rlung 'khrugs rang bzhin gyis dwangs par 'gyur ba dang*/__bar skabs rnams su rdo rje'i bzlas pas bogs 'byin cing sems gnas pa bsgrub/__spyir rdor bzlas ni thams cad du gal che bas de'i don cung zad smos na/__he ru ka gal po las/__lam du khyer ba'i bzlas pa ni/__'jug dang gnas dang ldang ba la/__/yan lag drug tu tshang bsgoms pas/__/rdo rje'i bzlas pa lam du khyer/__/zhes gsungs pa'i yan lag drug ni bshed rgyud rdor phreng sogs las rnal 'byor drug ces bshad pa dang dgongs pa mthun pas de las dang po ni/__rgyu ba nges pa'i tshul gyis ji srid nyi khri chig stong drug brgya po thams cad bgrang nus kyi bar grangs brtsi ba la sems 'dzin pa ni bgrang ba'i rnal 'byor dang*/__gnyis pa rjes su 'gro ba ni thun tshod brgyad kyi dus re re la nyis stong bdun brgya rgyu zhing rlung 'byung ba re re la'ang 'byung ba gzhan bzhi rjes su 'gro bar shes pa ste 'di ni rnam par gsal ba'o/__/gsum pa 'jog pa'i rnal 'byor ni rlung 'byin 'jug gi rgyud rnams la 'di ni rtsa'i 'khor lo 'di dang 'di las rgyu ba yin no zhes so sor shes pa ste spyi bo nas rkang mthil gyi bar du gong bu'i tshul la sems 'dzin pa'o/__/bzhi pa rtogs pa'i rnal 'byor ni 'khor lo bzhi'i 'byung lnga'i rlung nyi shus rtog pa'i rlung brgya rtsa brgyad bsgyur zhing de'ang g.yas g.yon gyi dkyil 'khor sdom pa bcus bsgyur ba'i rlung gi mtshan nyid shes pas/__des rnam rtog gang skyes kyang shes la/__de dag rgyus ma thag tu rtog med du 'gyur bas rtog med kyi ye shes 'char tshul yang shes te rtog pa dang mi rtog pa'i skyon yon rig par byed pa'o/__/lnga pa bsgyur ba'i rnal 'byor ni sngar gyi rnam rtog rgyu ba shugs can de log nas rtog pa'i rlung brgya rtsa brgyad po rtog bral gyi rlung du song bas mnyam bzhag tu mi rtog par kho nar gnas kyang rtsa 'khor la rgyu ba na nyon mongs pa'i zhad yod pas nyon mongs pa'am kun rdzob ces bya la/__de 'gags nas mi shigs pa la thim pa na ye shes dang don dam zhes bya zhing*/__yang de las langs nas rtsa ba'i 'khor lor rgyu ba sogs sngar ltar 'khor bar byed pa'o/__/drug pa yongs dag gi rnal 'byor ni/__rtsa 'khor rnams su rlung rgyu mi rgyu'i dbye ba'ang spangs te/__rtag tu mi shigs pa la thim pas rlung gi de kho na nyid mnyam bzhag gsal stong bde ba'i mtshan nyid can de'i ngang du rlung thams cad thim pa'i 'od gsal la mnyam par 'jog pa'o/__/de ltar yan lag drug po de la rdo rje'i bzlas pa ji ltar bya ba'i tshul ni/__dgongs pa lung ston las/__brjod dang dmigs par bcas pa dang*/__/brdar gyur dang ni don dam mo/__/zhes rdo rje'i bzlas pa rnam pa bzhi gsungs te/__de'i don 'chad tshul mang yang dkyus kyi phyag len ltar na/__'bru gsum ngag tu bzla ba brjod bcas rdor bzlas/__yi ge gsum dbyibs dang kha dog gi rnam par bsgom pa dmigs pa rdor bzlas/__rlung ldang 'jug gnas gsum 'bru gsum gyi gdangs su mos pas rlung sngags dbyer med du shes nas bzla ba brdar gyur rdor bzlas/__rlung gi 'gro 'ong gnas gsum dang stong gzugs phyag rgya chen po dbyer med du shes pas ming tshig brjod pa thams cad sgyu ma lta bur rtogs pa don dam rdo rje'i bzlas par bzhed do/__/gsum pa thig le sbyong ba la gnyis/__lam gyi gtso bo dang*/__lam gyi yan lag go__/dang po la gnyis/__drod dang bde ba mi rtog pa'i gtum mo bshad pa dang*/__gong gi don rnams bsnyen sgrub bzhir sbyar ba'i tshul gyis don bsdu ba'o/__/dang po ni/__de la goms nas sprul pa'i 'khor lo'i 'og:__shes rab sbas pa'i rang gzugs tsaN+Da li:__a shad gsal gdab rlung gis bskul la sbar:__dbu ma'i lam zhugs 'khor lo'i lha tshogs bskul:__spyi bo'i ha~M las bde ba'i thig le yis:__de nyid gsos btab slar yang ches cher 'bar:__rtsa khams drod bdes gang nas mi rtog pa'i:__ye shes mngon gyur chos nyid dbyings su bskyal:__ces gsungs te/__rtsa rlung rnal 'byor de dag la goms nas lte ba sprul pa'i 'khor lo'i 'og sor bzhi tsam du/__shes rab phar phyin rnal 'byor ma sbas pa'i rang gzugs dpyid dam tsaN+Da lI ste gtum mo ye shes kyi me/__dbyibs a shad kyi rnam pa/__kha dog dmar la reg bya tsha ba ngo bo stong pa nyams bde ba'i rang bzhin dang*/__dbu ma'i yar snar haM yig dngos sam thig le gsal 'tsher snum 'dril mtshan nyid bzhi ldan tu gsal gdab/__sbyor ba bzhi ldan bum can rlung gis bskul bas me lce sor bzhi tsam nas rim par je ring la sbar/__dbu ma'i sbubs lam du zhugs te lte ba sogs 'khor lo bzhir rtsa thig kha sbyor gyi lha tshogs rnams bskul/__mthar spyi bo'i haM la reg pas de las bde ba'i rgyun gyi thig le char zim mam ba thag ltar byung ste lte ba'i gtum mo la thim pas sdong rtsa mar khus brlan pa ltar gsos btab slar yang me de nyid ches cher 'bar bas byang sems bskul ba'i bde ba dang 'dres te 'khor lo bzhi nas rim par mched pas lus rtsa phra mo'i khams thams cad khyab/__drod dang bde bas gang ba de nyid rang rig gi ngo bor ro mnyam du shes pa'i lta bas rnam par mi rtog pa'i ye shes mngon du byed par 'gyur la/__zhu bde stobs su gyur ba'i nyams gsum kar yang ched 'dzin med par mthar thug ka dag rang bzhin 'od gsal chos nyid kyi dbyings su bskyal bar bya'o/__/spyir gtum mo la nam mkha' dang mnyam pa'i rgyud las/__rang bzhin phyi/__a thung nang kha sbyor gsang ba'i gtum mo gsum du gsungs pa las 'dir bsgom bya nang gi gtum mo'i ngo bo ni/__bde stong lhan cig skyes pa'i ye shes nang gi rnal 'byor ma ste/__rdor phreng las/__lte ba'i dbus su rtag gnas pa/__/nyi ma stong dang mtshungs pa'i 'od/__/ye shes chen po'i me 'byung ba/__/zhes so/__/nges tshig tsaN+Da lI'i sgra las drag cing gtum la sreg pa ste gang la gnad du bsnun pas phung khams kyi ma dag pa dang rnam rtog nyon mongs myur du sreg par byed pa'o/__/gnas tshul rgyud sde so so'i dgongs pas me dang rlung dang rtsa dang thig le dang sngags dang ye shes rnams su gnas par bshad la kun rdzob thig le don dam ye shes su gnas pa spyi'i dgongs pa'o/__/spar byed bum can sogs rlung sbyor/__sa bon phyag mtshan me thig a shad sogs dmigs pa/__rang lus gzhan lus thabs la bstan pa ste gsum mo/__/'bar ba'i tshad ro rkyang gi rlung dbu mar zhugs gnas thim gsum ka'ang 'bar ba chung 'bring chen po gsum du 'byung*/__dbye ba las dang rnal 'byor lhan skyes kyi gtum mo gsum mam/__'bar ba dam tshig drod/__zhu ba chos bde ba/__'dres pa'i nyams myong ye shes mi rtog pa'i gtum mo gsum du bshad/__rtags tshad phyi nang gi rtags bcu dang yon tan grub pa rnam pa gnyis ka'i rgyur 'gyur ro/__/gnyis pa ni/__zab pa'i bskyed rim bsnyen dang nye bsnyen ni:__rlung gi rnal 'byor 'khrul 'khor bcas pa ste:__gtum mo'i sgrub pas bde stong dbyer med pa'i:__sgrub pa chen po'i de nyid mngon du 'gyur:__ces gsungs te/__de ltar bshad pa'i bcos min zab mo'i bskyed rim ni bsnyen pa dang*/__nye bar bsnyen pa ni rlung gi rnal 'byor lus sbyong 'khrul 'khor dang bcas pa yin te/__de nas gtum mo'i 'bar 'dzag gi sgrub pa'i rim pas bde stong dbyer med pa'i sgrub pa chen po'i de nyid mngon du 'gyur ba ste dkyil 'khor bkod pa sogs spros bcas la ma ltos par nang rdo rje'i lam du bsnyen sgrub yan lag bzhi mthar phyin pa'o/__/gnyis pa lam gyi yan lag bshad pa la gnyis/__mdor bstan/__rgyas bshad do/__/dang po ni/__lam gyi yan lag:__ces gsungs te/__thabs lam gyi yan lag tu gal che ba nyin mtshan gyi rnal 'byor/__mtshams sbyor gyi gdams pa rnams rim bzhin bstan par bya'o/__/gnyis pa la gnyis/__nyin mo dang mtshan mo'i rnal 'byor ro/__/dang po ni/__nyin mo'i rjes thob kun:__ma dag sgyu ma'i dpe brgyad lta bu dang :__dag pa sems tsam snang stong lha skur blta:__rlung sems phyag rgyar ldang bas slob pa dang :__mi slob zung 'jug sgyu ma'i bde bar rol:__ces gsungs te/__zhu bde gtum mo'i rnal 'byor ni sgrib rtsa snyoms 'jug 'pho ba'i gnas skabs sbyong zhing lhan skyes kyi ye shes skyed pa'i phyir lam gyi gzhung shing yin pas mnyam bzhag nyams len dngos gzhir byas la/__rjes thob tu nyin mtshan gyi rnal 'byor gyis so so'i ngo skal sbyang dgos pas/__de'ang nyin mo'i rjes thob tha mal 'khrul pa'i gnas skabs kun sgyu lus kyis sbyangs te/__de'ang bsgrub bya dngos sbas don gyi sgyu lus yin kyang sngon tu sgyu ma lta bu'i ting nge 'dzin la blo 'byongs par bya dgos pas mdor dril na bzhi/__dang po ma dag sgyu lus ni/__khams gsum snod bcud kyi dngos po thams cad sgyu ma'i dpe brgyad kyis mtshon nas med bzhin tu snang la bden par ma grub pa dpe de dag lta bur shes par bya ste/__brgyad ni/__bden par ma grub kyang bya byed dngos po tshang bar snang ba sgyu ma/__'khrul pas bslad pa'i sems tsam du snang ba rmi lam/__gdos bcas su ma grub pas phyi nang gang du'ang med pa mig yor/__skad cig gis g.yo ba smig rgyu/__gcig gis gar yang khyab pa chu zla/__rgyu rkyen las skad cig gis skye 'gag byed pa brag cha/__snang yang nges pa med pa dri za'i grong khyer/__gcig dang du mar snang ba sprul pa rnams te/__de bzhin tu 'khor 'das kyi chos thams cad stong bzhin tu nye bar snang ba sgyu ma'i lus can yin pas tshig don nam mdo dang thun mong ba'i spyi don gyi sgyu lus so/__/gnyis pa dag pa sgyu lus ni/__'di ltar snang ba thams cad logs su ma grub pa sems kyi 'du byed tsam du shar ba dang sems de'ang gdod nas rang byung snang stong zung 'jug gi lha skur blta ba ste/__de'i tshul yang rim lnga las/__me long nang gi gzugs brnyan gyis/__/sgyu ma'i lus ni mtshon par bya/__/kha dog rnams ni 'ja' lta bu/__/khyab pa chu yi zla bas so/__/zhes skad cig gis gzugs rdzogs pa dang gsal zhing ma 'dres pa dang gcig gis kun la khyab pa khyad par sum ldan tu bsgom pa ni sngags kyi spyi don no/__/gsum pa rnam dag sgyu lus ni/__rlung dbu mar thim pas stong pa gsum mam bzhi drangs te/__de'i nyer thob bam 'od gsal gyi mthar rlung sems tsam las skad cig gis lha skur ldang*/__de lta bu'i 'jug ldangs la yang yang goms nas rlung sems tsam las grub pa'i ye shes kyi phyag rgyar ldangs pas slob pa'i zung 'jug 'grub pa sbas don dang*/__bzhi pa ni/__de dag mthar phyin pa las dri ma thams cad dang bral ba mi slob pa'i zung 'jug ye shes kyi spyod yul sgyu ma lta bu'i bde bar rol pa ni mthar thug gi sgyu lus so/__/de ltar yang gal po las/__/'bras bu'i bdag byin brlab pa ni/__sgyu ma dang ni chu zla dang*/__/'ja' tshon bzhin tu dngos med pa/__/de ltar 'bras bu'i skur snang ba/__/mtshan dang dpe byad rgyan gyis brgyan/__/ces so/__/gnyis pa mtshan mo'i rnal 'byor la gnyis/__mnyam bzhag dang*/__rjes thob bo/__/dang po ni/__chos kun rang bzhin stong gsal yin shes nas:__gnyid dus snying dbus mi shig thig le la:__mnyam bzhag stong bzhi'i nyams myong drangs pa las:__dpe dang don gyi 'od gsal rtsol med 'char:__ces gsungs te/__gnyid mthug gnas skabs kyi dri ma sbyong ba 'od gsal la'ang tshul bzhi las/__dang po tshig don dang mdo spyi ni/__'khor 'das kyis bsdus pa'i chos kun gyi rang bzhin ni gdod ma nas spros pa'i mtha' dang bral bas ngo bo stong la rnam pa 'gags med cir yang gsal ba yin pa la yin par shes pa'i ting 'dzin brtan pas rlung dbu mar thim ste stong bzhi 'dren nus pa gzhir byas nas/__gnyis pa sngags spyi'i 'od gsal 'dzin pa la dus gnad tho rangs gnyid srab pa'i dus/__lus gnad tsog pu/__'dun pa gnyid kha'i dran pa/__yul gnad snying ga'i dwangs ma mi shigs pa'i thig le la sems rtse gcig tu mnyam par bzhag pas rkyen byas/__sngar gyi nyams myong gis rgyu byas te dbu mar rlung sems cung zad 'dus pa las 'byung ba rim par thim pa'i rtags snang phra mo du ba la sogs pa 'char/__rnam shes snang ba la thim ste rtog pa rags pa 'gags pas dkar lam zla 'od lta bur shar ba ni stong pa/__snang ba mched pa la thim ste phra ba'i rtog pa 'gags pas dmar lam nyi 'od lta bu ni shin tu stong pa/__mched pa nyer thob la thim pas rtog pa phal cher 'gags pa nags lam mtshams kyi smag lta bu ni stong pa chen po/__nyer thob 'od gsal la thim ste rlung sems thams cad 'gags pas tho rangs kyi ston gnam slong byed rkyen gsum dang bral ba lta bu ni thams cad stong pa ste/__stong bzhi so so'i thad du ngos zin par bya zhing khyad par bzhi pa 'od gsal gyi ngang ci gnas su bskyang*/__gsum pa sbas don ni/__nyams myong de'i rgyun nyin mtshan kha sbyor du drangs pa las lam dus srab mthug nyams rtogs kyis phye ba'i dpe'i 'od gsal la rang dbang thob pa'i rgyu las/__bzhi pa mthar thug don gyi 'od gsal rtsol med du 'char bar 'gyur te/__'chi ba chos kyi skur lam du bslangs/__'od gsal ma dang bu 'dres gdod ma'i gzhi thog tu skad cig gcig gis bye brag phyed par 'gyur ro/__/gnyis pa ni/__rjes thob 'dun pa'i stobs dang rlung sbyor gyis:__rmi lam ngo shes sprul sgyur rtsal chen sbyang :__stong chen ngang bsdu snying rje sgyu ma'i gdangs:__phyag rgya gcig spros mkha' khyab tshom bur bsgrub:__ces gsungs te/__gnyid kyi 'od gsal la mnyam par bzhag pa'i rjes thob tu rmi lam 'char bar rtsom na skad cig gis sgyu lus kyi lha skur ldang ba yin kyang de ltar mi nus pas rmi lam gyi gnas skabs sbyong ba'i gdams ngag ni/__nyin mo snang ba thams cad rmi lam du dran pa rgyun chags pa 'dun pa'i stobs dang*/__srog rtsol rlung gi sbyor ba la gnad du bsnun pa'i stobs kyis/__nub mo gnyid mthug 'od gsal du 'char ma nus par rlung ro rkyang du shor nas mgrin pa'i rtsar rgyus te bag chags kyi lus la nying 'khrul gyi snang bar shar ma thag rmi lam du ngo shes par byas la 'dun pa drag pos bzung*/__de brtan pa na gcig las du ma dang gang 'dul sogs su sprul/__de'ang brtan nas dngos po la ma nges pa sna tshogs su bsgyur ba dang spel ba sogs byas la rmi lam gyi ting 'dzin rtsal chen ma rdzogs bar du sbyang*/__rtsal rdzogs nas nying 'khrul gyi snang ba thams cad stong pa chen po'i ngang du bsdu zhing de'i ngang las snying rje sgyu ma lta bu'i rang gdangs rlung sems las grub pa'i lha sku phyag rgya gcig par ldang*/__de las phyag rgya du mar spros shing mthar ji srid mkha' khyab kyi tshom bur spro nus pa de srid du brtson pas bsgrub pa ni/__rmi lam la bsnyen sgrub yan lag bzhi tshang bar rdzogs pa'o/__/des gnas skabs su 'khrul snang gi bden zhen ldog cing mthar thug bar do longs sku mngon du byed par 'gyur ro/__/gnyis pa 'chi kha dang bar do'i nyams len bstan pa la gnyis/__dgos pa bstan pas mtshams sbyar/__de gnyis so sor bshad pa'o/__/dang po ni/__tshe 'dir goms pa mngon du ma gyur na:__ces gsungs te/__gang zag le lo can gdams ngag thob la nyams su blangs kyang tshe 'dir rtogs pa'i gding ma thob cing goms pa mngon du ma gyur na/__lam gyi chad mthud 'chi khar ye shes gong du 'pho ba dang*/__bar do sku gsum du bsre ba'i gdams ngag 'di dag nyams su blang bar bya'o/__/gnyis pa la gnyis/__'chi kha ma'i nyams len/__bar do'i nyams len no/__/dang po ni/__rlung sems bsdu zhing 'phos te ngang la gzhag:__ces gsungs te/__de'ang spyir rab 'chi ba don dam bden pa 'od gsal gyi ngang du 'pho ba dang*/__'bring bar do yang dag pa'i kun rdzob sgyu lus kyi lha skur 'pho ba dang*/__tha ma bskyed rim du 'pho ba bcas gsum du gsungs pa las 'dir bstan bya phyi ma ste/__gson dus su legs par sbyangs nas 'chi khar las la sbyor bar bya'o/__/de'ang lus gnad rlung sbyor dang ldan pas 'khor ba'i sgo dgu dgag__/thar pa'i sgo gcig dbye/__rlung sems lte ba'am snying ga'i dbu mar rten la bsdu zhing tshangs bug nas rten can rten med gang rung du 'pho zhing 'bebs pa sogs byas nas 'byongs par gyur pa na/__'chi ba'i rtags tshang zhing bslu ba'i thabs kyis ma ldog pa'i tshe 'dun pa rtse gcig pas dbyings su 'phos te ka dag bsam brjod bral ba'i ngang la bzhag pas rab dag pa mkha' spyod kyi zhing du bgrod de lam lhag ma rdzogs nas mchog thob pa dang*/__'bring sngags spyod kyi rten bzung nas skye ba dag par brgyud de dngos grub thob pa dang*/__tha ma mtho ris su skyes nas lam sna zin te rim pas thar pa la sbyor bar bshad do/__/gnyis pa ni/__bar do'i snang grags rtog tshogs lha sngags dang :__ye shes chen por bsre bas mtshams sbyar ro:__zhes gsungs te/__'chi ba'i tshe lugs ldog gi 'od gsal ngos ma zin pas lugs 'byung thams cad stong pa las nyer thob sogs su ldang zhing rang bzhin brgyad cu'i rtog pa skyes pa'i tshe bar do'i yid lus ming gzhi 'dus pa'i phung por grub nas 'khrul snang la spyod pa ste/__de'i tshe sngar gyi gdams ngag gi gnad dran par byas la 'khrul snang bden med du shes pas snang yul sgra grags rtog tshogs gsum po snang stong lha dang grags stong sngags dang rig stong ye shes chen por bsre ba dang*/__gzhan yang sngon gyi goms pa dang bstun smin byed dbang*/__grol byed lam/__bsrung bya dam tshig__/thob bya 'bras bu dang mthun par bsre bas dag pa'i zhing khams sogs su mtshams sbyar te skye ba sprul skur 'grub pa dang*/__dbang po shin tu tha mas kyang 'dun pa cer gyis bzung la mos gus snying rje zhen log sogs shugs bskyed pas skye gnas ngan pa'i mngal sgo khegs par 'gyur ro/__/rtsa ba'i gnyis pa de dag lam gzhan gyi dod sbyar ba ni/__de ltar rtsa khams dam ye dbyer med lha:__rang byung gsal gdab sbyong ba rnam gsum gyis:__sku gsung thugs kyi ye shes lam du bya:__kha sbyor dbang bskur rdo rje'i bzlas pa dang :__gtum mo'i mes mchod 'bar 'dzag glu yis bstod:__drod kyis khyab pa'i tshogs khang nyams dga' bar:__zhu bde'i longs spyod tshogs dang gtor mar rol:__mi rtog ngang thim sgyu ma'i lha skur ldang :__lugs ldog 'od gsal de bzhin nyid kyi dbyings:__lugs 'byung kun snang rgyu yi yi ge'i sprin:__rmi lam phyag rgya gcig spros rtsal sbyangs pas:__rlung sems dbyer med tshom bu tshogs sgrub kyis:__rnam smin sgo gsum rdo rje gsum du 'pho:__skye shi bar dor sku gsum lhun grub pa'i:__mchog gi dngos grub rtsol med ngang gis 'char:__zhes gsungs te/__rang byin brlab kyi rdzogs rim de ltar bstan pa kho nas rim pa dang po'i lam yang yongs su rdzogs par 'gyur te/__thog mar gzhi lus rtsa'i khams gtso mo 'khor dang bcas pa ni dam tshig ye shes dbyer med pa'i lha tshogs gtso 'khor/__de nyid rdo rje lus kyi dkyil 'khor rang byung du grub par shes pas gsal gdab/__rtsa rlung thig le'i sbyong ba rnam pa gsum gyis sgo gsum sku gsung thugs rdo rjer byin brlabs pa'i ye shes lam du bya ba dang*/__steng 'og gi rlung kha sbyor du bcings pas dbang bskur zhing 'byung 'jug gnas gsum rdo rje'i bzlas pa rgyun mi 'chad pa dang*/__lte bar gtum mo sbar ba'i mes mchod cing dpyid thig 'bar 'dzag mi shigs pa'i rang sgra rdo rje'i glu yis bstod pa dang*/__lus tsaN+Da lI'i drod kyis khyab pa'i nang gi tshogs khang nyams su dga' bar/__a haM zhu bde'i longs spyod zag med bdud rtsi'i tshogs dang gtor mar tshims pa chen por rol nas 'od gsal rnam par mi rtog pa'i ngang du thim/__slar yang zung 'jug sgyu ma lta bu'i lha'i sku rang mdangs snod bcud dkyil 'khor gsum sgyu ma'i rang bzhin tu ldang ba bcas kyis sad dus mnyam rjes kyi rnal 'byor gnyis su spros bcas kyi phrin las la ji ltar yod pa tshang ba dang*/__snang gsum lugs ldog 'od gsal du thim nas de'i ngang du gnas pa de bzhin nyid stong pa chen po'i dbyings las/__rjes thob lugs ldog tu shar ba kun snang sgyu ma dang rgyu'i sa bon gyi yi ge'i sprin las/__rmi lam lha sku phyag rgya gcig par ldang zhing de las phyag rgya spros bcas kyi rtsal sbyangs pas/__rlung sems dbyer med pa'i lha'i tshom bu mtha' yas par spro ba tshogs sgrub chen mo ste gnyid dus mnyam rjes kyi rnal 'byor bsnyen sgrub yan lag bzhi dang bcas pa rnams kyis/__ma dag rnam smin gyi sgo gsum po rnam par dag pa sku gsung thugs rdo rje gsum du go 'pho zhing gnas 'gyur/__skye ba sprul sku/__'chi ba chos sku/__bar do longs sku ste bar srid gsum po sku gsum du rang bzhin lhun gyis grub par mngon byang chub pa'i mchog gi dngos grub 'bad rtsol med par ngang gis 'char bar 'gyur ro/__/gsum pa sher dbang nyams len bshad pa la gsum/__mtshams sbyar te mdor bstan pa dang*/__de nyid rgyas par bshad pa/__de dag gi don bsdu ba'o/__/dang po ni/__gang yang nyams rtogs ches cher mched pa na:__shes rab ye shes dbang gi nyams len ni:__bde ba chen po sgrub pa'i rim pa ste:__zhes gsungs te/__rang byin brlab kyi nyams len de dag gi rtsa ba srog rtsol sgra ji bzhin 'grub cing 'pho med la gding du gyur pa sogs mnyam rjes kyi rnal 'byor gang la yang rtogs goms kyis nyams rtogs rtsal kha ches cher mched cing rgyas par gyur pa na/__gsum pa shes rab ye shes kyi dbang gi nyams len gzhan lus la 'jug pa'i dus yin cing*/__de ni mchog tu mi 'gyur ba'i bde ba chen po sgrub pa'i lam gyi rim pa rgyud sde kun las khyad par du bsngags pa ste/__dur khrod khang brtsegs kyi rgyud las/__las rgya'i byang chub sems 'byongs pas/__/mchog dang thun mong yon tan rnams/__/rang gi sems la gang 'dod pa/__/'di yis nges par 'grub par 'gyur/__/ces dang*/__'jam dpal zhal lung las/__gsal zhing rab dga' mkha' mnyam pa/__/gzhan tu rig par mi 'gyur bas/__/sgyu ma kun las khyad par du/__/bud med sgyu ma khyad par 'phags/__/zhes so/__/gnyis pa la gsum/__lam dngos dang*/__gzhan der 'du tshul/__de dag gi 'bras bu'o/__/dang po la'ang gnyis/__mdor bstan rgyas bshad do/__/dang po ni/__yul dang dus dang thabs dang mtshon bya ba:__rnam pa bzhi yis de nyid 'grub par 'gyur:__ces gsungs te/__zab lam de nyams su len pa'i thabs mdor bsdu na/__gang la bsten bya'i yul dang*/__nam bsten pa'i dus tshod dang*/__ji ltar bsten pa'i thabs dang*/__de ltar bsten pas mtshon par bya ba ste rnam pa bzhi yis gzhan lus shes rab la bsten pa'i thabs lam zab mo de nyid dpyis phyin par 'grub par 'gyur ro/__/gnyis pa la gsum/__yul dang dus bshad pa/__thabs bshad pa/__mtshon tshul bshad pa'o/__/dang po la'ang gsum/__yul bshad pa/__dus bshad pa/__de gnyis kyi mjug bsdu ba'o/__/dang po yul phyag rgya brtag cing dgug pa'i tshul bshad pa ni/__yul ni phyag rgya pad can rab yin la:__ri mo dung can glang sna ri dwags 'bring :__de la pad can bzhin zlum pad+ma'i mdog:__ru sbal lus dbyibs brang mdzes nu ma mkhregs:__lte bar gyen 'greng gnyer ma gsum yod pa:__mchog gyur rak+ta'o ma'i mdog tu snang :__ri mo can ni khro gtum nu ma zab:__lus thung byin pa phra zhing gsus pa sbom:__dung can ma ni bong 'tshams yid du 'ong :__skra dang sna rtse ring zhing nu ma mkhregs:__glang sna can ni lus che byin pa sbom:__bzhin gyi mdangs gsal chags ldan chang dri bsnam:__ri dwags can ni dkar dmar ri dwags mig:__spyod lam snyoms zhing nu+u ma zlum la 'khyil:__rigs can rnam lnga gang yang rung ba'am:__sgrub po la gus gsang thub chags pa che:__bde ba bzod med 'dod pa'i sgyu rtsal mkhas:__bcu drug nyi shu nyer lnga'i na tshod can:__legs par brtag la rdzas sngags dmigs pas dgug:__ces gsungs te/__de la gzhan lus dkyil 'khor 'khor lo ni pho nya'i mgyogs lam yin pas thog mar bsten bya'i yul gal che ste/__de'ang rab don gyi 'od gsal thob pa'i lhan skyes/__'bring dbang dang bskyed rim gyis rgyud sbyangs pa'i sngags skyes dang yul nyer bzhi la sogs par skyes pa ni bsten pa tsam gyis dngos grub tu 'gyur bas mchog yin kyang*/__skal ba dang nus pa dman pas tha ma las skyes gyi phyag rgya mi mo dkyus ma las gzhan mi 'grub cing de'ang mtshan ngan bsten na yon tan mi 'phel gyi steng du skyon skyed pas nus pa ma thob kyi bar du spang dgos shing mtshan ldan kho na gal che ba dang*/__bud med thams cad rigs can lnga las ma 'das par bshad pas lnga po las/__pad+ma can ni rtsa bzang bas bde ba lhag par skyed cing chos nyid gsal bas rab yin la/__ri mo can dang dung can ma dang glang sna can dang ri dwags ma bzhi ni rtsa snga ma las dman pas 'bring du bshad do/__/de la pad+ma can gyi mtshan nyid ni phyi rtags bzhin ras zlum po sngo sang ngam pad+ma'i mdog can/__skra ser zhing li ba/__rus sbal ltar chu zhing gab ba'i lus dbyibs can/__brang mdzes la nu ma sra zhing mkhregs pa/__nang rtags su lte bar gyen du 'greng ba'i gnyer ma ste ri mo gsum yod pa/__mchog gyur pad+ma'i rigs yin pas gsang rtags su gsang rtsa pad snal ltar phra zhing 'byed 'dzum byed pas rgyun tu'ang res 'ga' rak+ta 'o ma'i mdog tu snang ba'o/__/ri mo can ni/__rgyud khro zhing gtum la nu ma'i gting zab pa/__lus kyi bong thung la byin pa ri dwags ltar phra zhing gsus pa rgyas pas rkad pa sbom pa/__skra bzang la dpral bar gnyer ma gyen 'greng yod pa/__gsang rtsa ri mo ltar phra ba ste las kyi rigs so/__/dung can ma ni lus bong ha cang ring ba'am thung ba ma yin pas 'tshams shing bzhin ras yid du 'ong ba/__skra nag la ring ba dang sna'i rtse mo'ang leb mor min par ring zhing nu ma rgyas la mkhregs pa/__gsang rtsa dung ltar 'khril ba ste rin chen rigs so/__/glang sna can ni/__lus bong che zhing byin pa sbom pa/__skra ngan la bzhin ras kyi mdangs gsal ba/__ngo tsha chung ba'i chags pa dang ldan la lus las chang dri mnam pa/__gsang rtsa glang chen sna ltar bltabs pa ste sangs rgyas rigs so/__/ri dwags can ma ni/__bzhin mdog dkar la dmar ba'i mdangs can ri dwags lta bu'i mig mdzes pa/__dpral ba dbyes che zhing skra rtsub pa/__spyod lam ha cang dal ba'am brel ba min par snyoms shing nu ma zlum la 'khyil ba/__gsang rtsa ri dwags kyi rtsi lta bus bkab pa ste rdo rje'i rigs so/__/de ltar rigs rnam pa lnga po re re la'ang phyi nang gsang rtags tshang ba rdzogs ma rdzogs khyad par gyis rab 'bring tha ma gsum gsum du 'gyur bas de dag gang yang rung ba'am/__mtshan nyid tshang ma tshang ci yin kyang rung gtso bor sgrub pa po rang la dad cing gus pas snying nye ba/__blo brtan pas lta spyod zab mo gsang thub pa/__rtsa bzang bas chags pa che ba/__dar la babs pas mthong reg tsam gyis bde ba bzod med du g.yo zhing 'khrig thabs kyi 'dod pa'i sgyu rtsal la mkhas pa/__lo grangs kyang bcu drug nas rab/__nyi shu nas 'bring*/__nyer lnga nas tha ma ste de tshun chad kyi na tshod can gal che ba ni/__sgyu 'phrul me long las/__bco brgyad bcud ldan rab yin te/__/nyi shu la sogs 'bring du bshad/__/rtsa lnga tha ma'i tshad yin te/__/gzhan la dngos grub med par gsungs/__/zhes so/__/de lta bu'i mtshan nyid dang ldan pa'i rig ma de legs par brtags la rnyed nas rang bzhin gyis ma khug na gdams ngag rnams las 'byung ba ltar rdzas kyi rten 'brel dang sngags bzla ba dang dmigs pa'i 'phro 'du gsum gyis dgug par bya'o/__/gnyis par dus rig par bya zhing las rung du bsgrub pa ni/__de nas nyams dga' bag phebs dben gnas su:__thun mong chos kyis blo rgyud legs par sbyang :__zab mo'i dbang bskur dam tshig lhag par 'bogs:__rim gnyis nyams kyi drod rtags nges pa dang :__gsang sngags spyod la skrag pa med pa'i blo:__zungs thub brtan po rab tu skye bar bya:__zhes gsungs te/__rig ma de rang nyid kyi dbang du gyur pa de nas yid dang mthun pas nyams dga' ba/__mi mthun pa med pas bag phebs pa/__skye bo'i rgyu 'grul med pas dben pa'i gnas su/__'khor ba'i sdug bsngal dang mi rtag pa'i gtam sogs bshad la nges 'byung bskyed cing bsags sbyong gi rim pa sogs theg pa thun mong gi sngon tu 'gro ba'i chos rnams kyis blo rgyud legs par sbyang*/__de nas sngags kyi dkyil 'khor du gzhug la phan nus zab mo'i dbang bskur bas smin par byas la thun mong dang thun mong ma yin pa'i dam tshig rnams khe nyen gyi gnad la bkar te lhag par nan tan du 'bogs/__thog mar bskyed rim dang de nas rdzogs rim gyi gdams pa bstan te re re'ang drod rtags kyi nges pa ma mthong bar du sbyong ba dang*/__gsang sngags kyi brtul zhugs spyod pa zab mo la nam yang skrag pa med pa'i blo zung thub rkyen gyis mi 'phrog pa'i brtan po rab tu skye bar bya'o/__/gsum pa ni/__mdor na brtag dang dgug dang sbyang ba ste:__sngon 'gro gsum gyis bde ba'i nyer bsdogs bsgrub:__ces gsungs te/__rgyas par bshad pa de dag gi don mdor bsdu na thog mar rig ma mtshan bzang ngan brtag pa dang*/__bar du rdzas sngags dmigs pas dgug pa dang*/__tha mar thun mong thun min gyi gdams pas rgyud sbyong ba ste sngon 'gro'i chos rnam pa gsum gyis bde ba'i gseng lam la 'jug pa'i nyer bsdogs bsgrub pa'o/__/gnyis pa thabs bshad pa la gnyis/__thabs lam gyi chos nyer bdun spyir bstan pa dang*/__nyams len lag tu blang tshul bye brag tu bshad pa'o/__/dang po ni/__thabs ni khrus byas rgyan spras bku mnye bya:__bcud can zas bsten rtsa rlung 'khrul 'khor sbyang :__'bol ba'i gdan la yab yum 'khod nas kyang :__blta zhing chags pa'i gtam dang mdangs bskyed sogs:__bslab pa gsum gyis bde ba'i las la bskul:__lhar gsal byin brlab 'dod pa mnyam ldan pa'i:__'du shes gsum gyis tha mal snang zhen ldog:__'khyud dang sprad dang dal bus bsrub pa yi:__sbyor thabs gsum gyis bde ba rim gyis dbab:__'khor lo'i lha mchod snyoms 'jug rlung sbyor bcas:__bskyil thabs gsum gyis bde ba gong du spor:__gsang ba'i rtsa dang thig le rlung sems bcas:__kha sbyor gsum gyis lhan skyes bde ba myang :__lus ngag 'gyur dang ting 'dzin rtse gcig pa'i:__'khrul 'khor gsum gyis bde ba mi nyams gzung :__dud 'gro'i 'gyur dang rlung gdangs dmigs pa'i mda':__btsan thabs gsum gyis bde ba gnas su ldog:__seng ge rnam rol brab dang gzhil ba yi:__sgyu rtsal gsum gyis bde ba khyab par dgram:__sems bzung 'dzin med mkha' sgyur rnam dag pa'i:__rgyas 'debs gsum gyis bde stong zung du chud:__ces gsungs te/__yul de la brtain nas bde ba chen po skyed pa'i thabs ni/__rig ma la snga gong nas yang yang du dri zhim po'i chas khrus byas la mdzes pa'i rgyan yid du 'ong bas spras/__dri bzang dang byang sems rgyas byed kyi bku mnye bya/__sha chang sogs bcud can kyi zas bsten cing rtsa rlung gi rnal 'byor dang 'khrul 'khor rnams sngar 'byongs zin kyang chu 'dren pa la yur ba'i tshul du sbyang*/__stan nang tshang can sogs 'bol ba'i gdan la rnal 'byor pa yab yum gnyis lhan cig tu 'khod/__'khod ma thag nas kyang snyoms 'jug mi bya bar thabs lam gyi chos nyer bdun gyis rim par bsgrub dgos pas/__thog mar 'dzum pa'i mig gis gzugs la blta zhing ngag gis chags pa'i gtam sna tshogs smra ba dang yid dga' ba'i mdangs bskyed la chags pa'i tshul dran pa sogs sgo gsum 'dod chags kyi sbyor ba la bslab pa gsum gyis bde ba'i las la 'jug 'dod drag por bskul/__rnal 'byor pa dang rig ma gnyis kas lha yab yum du gsal ba dang mkha' gsang rdo rje pad+mar byin brlabs mtshungs pa dang thabs 'di la bsten nas gzhan don du bde chen rdo rje sems dpa' bsgrub pa'i 'dod pa mnyam por ldan pa'i 'du shes gsum gyis tha mal gyi gzugs su snang zhing chags pa'-i zhen pa las ldog__/rtsa skul ba'i thabs dang ldan pas lus la 'khyud pa dang mkha' gsang gcig tu sprad pa dang brod nas drag tu mi shor bar dal bus bsrub pa'i sbyor thabs rnam pa gsum gyis bde ba spyi bo nas 'khor lo bzhir rim gyis dbab/__spyi bo'i 'khor lor thig le babs pas dga' ba'i ye shes skyes pa'i rang ngo la yun ring du bltas te rtsa 'khor de'i lha mchod par mos pas mtshon 'khor lo bzhi po'i lha rnams mchod/__snyoms 'jug je drag tu btang ba dang*/__ril ba zhabs tshags can gyi rlung sbyor sogs dang bcas te thig le bskyil thabs gsum gyis bde ba'i rgyun mi nyams par gong nas gong du spor/__gsang ba'i rdo rje nor bu'i rtsa dang yum gyi kha ga mu kha/__sna rtse'i thig le dkar dmar/__gnyis ka'i rlung dang sems gcig tu 'dres pa bcas rtsa thig rlung gi kha sbyor gsum gyis dga' bzhi'i mthar thug lhan skyes kyi bde ba myang*/__rgya mtsho brag gtad gling bzhi sdud pa nyi zla gyen ldog sogs lus dang hU~M dang hing 'dren sogs ngag gi 'gyur ba dang*/__yid dmigs bcas dmigs med kyi yul gang rung gi ting nge 'dzin la rtse gcig tu gtad pa'i sgo gsum 'khrul 'khor gyi gnad gsum gyis bde ba'i rten thig le mi nyams par dam bca' brtan pos bzung*/__stag mo'i skyug stangs sogs dud 'gro'i 'gyur ba bzhi dang rlung gi gdangs rtsal gyen du 'dren pa dang dmigs pa'i mda' tshangs pa'i haM yig gi 'ben la gtod pa bcas btsan thabs kyi sbyor ba rnam pa gsum gyis bde ba rten thig le dang bcas pa spyi bo'i rang gnas su ldog__/seng ge rnam rol dang*/__gyi ling pra tshul sogs zab pa dang*/__g.yang mo sprugs stangs sogs gzhil ba'i sgyu rtsal gsum gyis 'dren ldog byas pa'i thig le'i bde ba rtsa gnas thams cad du khyab par dgram/__bde ba'i rang ngo la sems bzung ba dang gang du'ang 'dzin pa med pa dang sems rgya yan du klod de nam mkha' ltar rnam par dag pa'i ngang du 'jog pa ste rgyas 'debs gsum gyis bde ba dang stong pa ya bral ma yin par zung du chud par bya'o/__/gnyis pa la gsum/__sbyor ba/__dngos gzhi/__rjes so/__/dang po ni/__gang yang sngon du rang lus thabs ldan bslab:__ces gsungs te/__gzhan lus kyi lam gang la yang sngon du yid rig ye shes phyag rgya la brten nas las rgya la ji skad bshad pa'i tshul thams cad nyams su blangs pas kun rdzob byang sems dbab bzung ldog dgram gyi bya ba la rang dbang thob nges pa rang lus thabs ldan gyi gdams pa la bslab pa gal che'o/__/gnyis pa ni/__dngos gzhi rigs can lnga la rim pa bzhin:__steng dang rgyab dang 'degs dang mnyam pa dang :__'og nas sbyor ba'i 'khrig thabs gtso bo ste:__gzhan yang g.yas g.yon mdun nas rol pa sogs:__'dod pa'i rtse 'jo mig 'phrul lta bu yis:__dbab la mkhas pa dal bu ru sbal 'gros:__bzung la mkhas pa rtse gcig them bu bzhin:__ldog la mkhas pa btsan thabs mda' ltar 'phang :__'grems la mkhas pa yur ba bzhin du khyab:__khyad par zag med thig le snying gar sbas:__brjod bral ka dag ngang du yun ring bzhag:__ces gsungs te/__gzhan lus kyi lag len dngos gzhi gong du bstan pa'i phyag rgya rigs can lnga la sbyor thabs rim pa bzhin/__pad+ma can la steng nas sbyor ba dang ri mo can la rgyab nas dang dung can ma la 'degs pa'i tshul gyis dang glang sna can la phan tshun mnyam par lta bas dang ri dwags can la 'og nas sbyor ba'i 'khrig thabs gtso bor bya ste de dag rgyud kyi dgongs pa dang 'brel ba yin la/__gzhan yang mtha' gcig tu ma nges par g.yas rol g.yon rol mdun nas rol pa la sogs pa 'dod pa'i sgyu rtsal gyi rtse 'jo mig 'phrul lta bus snyoms par 'jug cing sbyor thabs kyi bye brag re res bde ba'i ye shes mi 'dra ba re re 'dren nus par bya'o/__/de la dgos pa'i gnad bzhi ni/__dang po dbab pa la mkhas pa dal bu ru sbal gyi 'gros lta bu/__bar du bzung ba la mkhas pa them bu bdun gyi gnad la rtse gcig pa rdza snod them bus bkag pa bzhin dang*/__de las ldog pa la mkhas pa btsan thabs kyi sbyor bas skyen po'i mda' ltar rang gnas su 'phang zhing*/__mthar 'grems pa la mkhas pa zhing pas yur ba la chu drongs pa bzhin tu lus gnas thams cad du khyab par bkram/__khyad par snang rig dbyer med kyi gnad la goms pas zag med dwangs ma'i thig le snying ga mi shigs pa'i mdzod du sbas te brjod bral ka dag gi ngang du yun ring por mnyam par bzhag pa gnad kyi mchog yin no/__/gsum pa ni/__de tshe bde ba thig le'i klong du sba:__thig le 'od gsal de yang mi rtog ngang :__sbas shing goms pas bde chen brtul zhugs bsgrub:__ces gsungs te/__de ltar nyams su len pa'i tshe bde ba'i rang bzhin grol ba la mkhas pa mkha' la na bun yal ba ltar gshis lugs su la zlo dgos pas/__zag bcas bde ba rtog pa'i ro myong bas zag tu mi gzhug par zag med mi shigs pa'i thig le'i klong du sba/__thig le de'ang lhun grub 'od gsal gyi dbyings su sba/__de'ang ka dag rnam par mi rtog pa'i ngang du sba/__tshul de lta bu yang nas yang du sbyang zhing goms pas mchog tu mi 'gyur ba'i bde ba chen po'i brtul zhugs bsgrub par bya'o/__/gsum pa thabs des mtshon bya bshad pa ni/__thabs des mtshon pa'i bde stong phyag rgya che:__'khor 'das brtan g.yo kun gyi de nyid ni:__nyams myong yod kyang smra ru mi btub la:__yid ches ldan kyang 'di zhes dpes mi mtshon:__mngon sum gyur kyang rtog pas ma bslad pa:__ye shes so sor rang gis rig bya ba:__nam mkha' lta bur 'dus ma byas pa ste:__chu zla bzhin du gsal zhing 'dzin pa med:__sprul pa'i gzugs brnyan ngos gzung las 'das pa:__bde stong dbyer med dpe yi tshul du 'char:__ces gsungs te/__mtshon byed thabs lam zab mo des mtshon bya'i don bde stong zung 'jug phyag rgya chen po zhes bya ba/__'khor ba dang myang 'das brtan pa snod dang g.yo ba bcud kyi skye 'gro kun gyi srog gam snying por khyab pa'i de kho na nyid kyi gnas lugs ni/__rnal 'byor pa'i nyams su myang byar yod kyang 'di'o zhes ngag gis smra ru mi btub la/__rang nyid yid ches pa'i nges shes dang ldan kyang 'di lta bu'o zhes dpe gang gis kyang mi mtshon pa dang*/__rig ngor mngon sum du mthong bar gyur kyang yul yul can du 'du shes pa'i rnam par rtog pas ma bslad pa/__rang bzhin gyis dri mas ma bslad pa'i ye shes so sor rang gis rig par bya ba/__skye 'gag gnas gsum dang bral ba nam mkha' lta bur gdod nas rgyu rkyen gang gis kyang 'dus ma byas pa ste/__snang tshul chu dwangs pa la zla ba'i gzugs brnyan 'char ba bzhin du thabs las thabs byung gi tshul du gsal zhing der zhen gyi 'dzin pa med pa/__rnam pa thams cad pa'i rang bzhin can sprul pa'i gzugs brnyan tha snyad shes brjod 'jug gsum gyis ngos bzung gi yul las 'das pa/__rnam pa bde ba dang ngo bo stong pa dbyer med zung du 'jug pa nyid dpe'i tshul du 'char bas don gyi ye shes la sbyor bar byed do/__/gnyis pa lam gzhan gyi dod thub sbyar ba ni/__sgo lnga'i rnam shes bde bas tshim pa las:__phyi rol yul kun bde chen gzhal med khang :__yab yum gzugs snang thabs shes rang byung lha:__'du shes rdo rje gsum gyi phyag rgyas gdab:__rdo rje pad+ma 'du 'phrod byed pa yis:__rlung sems thig le rtse gcig rang dbang bskur:__rnam shes gnas gyur bde stong ye shes bstim:__zag med tshor ba rmad byung mchod pa'i sprin:__a ha~M rang sgras che ba'i yon tan bstod:__kha sbyor gsum gyi nyams myong la brten nas:__lha sngags ting 'dzin dam tshig rgyun mi 'chad:__bskyil dang ldog dang 'grems pa'i 'khrul 'khor gyis:__tshogs dang gtor ma rdo rje'i glu gar sogs:__gang snang bde stong rol par yongs shar bas:__'khor 'das gzhir bzhengs bde chen thig le'i klong :__rnal 'byor zab mo'i cho ga yongs su rdzogs:__zhes gsungs te/__pho nya'i lam las 'bar zhu khyad par ba'i rkyen gyis dwangs ma'i thig le stobs su gyur pa'i mthus/__mig sogs dbang po sgo lnga'i rnam par shes pa rnams bde ba chen po'i bcud kyis myos shing tshims pa las sdug bsngal gyi tshor rtog dbyings su nub ste/__phyi rol snang ba'i yul kun bde chen gzhal du med pa'i khang pa/__nang yab yum gyi gnyis kyi gzugs su snang ba'ang thabs dang shes rab zung 'brel rang byung gi lha sku la/__lha sngags chos nyid du 'du shes pa rdo rje gsum gyi phyag rgya'i rgyas gdab pa dang*/__mkha' gsang rdo rje pad+ma snyoms 'jug 'du 'phrod byed pas rlung sems thig le rnams yul dang yul can dbyer med rtse gcig par rang bzhin gyis 'dus te dbang du gyur pa'i dbang skur rdzogs la/__skad cig mchog tu dga' ba'i lhan skyes myong ba'i rnam par shes pa gnas gyur te bde stong mi rtog pa'i ye shes lhag gis 'char bas glo bur rnam shes dam tshig pa la gdod ma'i ye shes bstim pa ltar snang ba dang*/__de'i tshe zag med bde ba'i tshor ba nyams su myong ba ni ngo mtshar rmad du byung ba'i mchod sprin/__a haM g.yo ba'i rang sgra yid du 'ong bas 'dod chags chen po che ba'i yon tan la bstod pa/__rlung thig sems rnams kha sbyor ba gsum gyi nyams myong la brten nas bde stong thig le'i lha snang srog rtsol rdo rje'i bzlas pa sems rtog bde bar 'gags pa'i ting nge 'dzin 'pho med 'da' dka'i dam tshig rnams rgyun mi 'chad pa dang*/__thig le 'og gi sna rtser bskyil ba dang rang gnas su ldog pa dang rtsa gnas su 'grems par byed pa'i 'khrul 'khor gsum gyis rim pa ltar gsang ba'i tshogs kyi 'du bar rol pa dang gtor ma gnas su stob pa dang rdo rje'i glu gar bya ba sogs lhun gyis grub pa ste/__mdor na bud med shes rab kyi rang bzhin thabs kyi cho ga zab mos lam du bslangs pa la brten nas rnam rtog gi bzhon pa rlung dang rtog tshogs rang bzhin brgyad cu rim gyis 'gags te stong pa bzhi'i ye shes nyams su myong*/__rang bzhin lhan skyes kyi bde ba'i ye shes brtan pa'i mthu las gang snang thams cad bde stong 'ba' zhig pa'i rol par yongs su shar bas 'khor 'das dbyer med gnas lugs don gyi gzhir yongs grub chen por bzhengs te bde chen thig le khyab brdal gyi klong du rnal 'byor du bya ba'i nang nas nye lam shin tu zab mo'i cho ga yongs su rdzogs pa yin no/__/gsum pa 'bras bu ni/__snod bcud he ru ka dpal zhing dang skur:__bde ba mchog gi byin chen dbab pa las:__de bzhin gshegs pa sras dang btsun mor bcas:__mngon sum gshegs nas me tog char chen 'bebs:__rgud pa kun zhi phan bde ngang gis 'phel:__rnal 'byor rgyud la bde chen gzi 'bar bas:__tshe dang lang tsho'i bcud len rtsol med 'grub:__bden tshig mthu btsan gzhan snang zil gyis non:__ting 'dzin mi g.yo grub pa cir yang 'char:__'brel tshad nyer bzhi'i zhing na rol pa yi:__dpa' bo rnal 'byor tshogs dang skal ba mnyam:__zhes gsungs te/__lam de rgyud la brten pa'i phan yon gsar rnying gi rgyud sde rnams las rgya cher gsungs pa'i don bsdu na/__bde stong ting 'dzin gyi rol mos ma dag pa snod bcud du snang ba thams cad rnam dag he ru ka spyi dpal chen po'i ye shes kyi zhing dang sku'i rol pa lhun gyis grub pa'i bde ba mchog gi byin rlabs chen po dbab pa'i mthu las/__phung po dag pa'i de bzhin gshegs pa rigs lnga/__skye mched dag pa'i sras byang sems rnams dang*/__khams lnga dag pa'i btsun mo yum lngar bcas pa nam mkha'i lam la dbang po'i spyod yul mngon sum du gyur pa'i cho 'phrul chen pos gshegs nas/__nang du byang sems dkar dmar gyi rgyun brtan pa'i rang mdangs me tog gi char chen po 'bebs pa dang*/__sgrub pa po gang rung gnas pa'i phyi snod bcud kyi nyes tshogs rgud pa kun zhi zhing phan bde'i dpal 'byor ngang ngam shugs kyis 'phel ba dang*/__nang rnal 'byor pa'i rgyud la 'pho med bde ba chen po'i gzi brjid rim gyis 'bar bas/__'chi ba med pa'i tshe dang rgud pa med pa'i lang tsho'i bcud len dag kyang so so'i cho gas sgrub pa'i bya ba la ma ltos par rtsol ba med par 'grub cing*/__ngag bden tshig grub pa la gang brjod don tu 'gyur ba'i mthu+u btsan/__lus gzi brjid che bas gzhan mi dang mi ma yin pa'i snang ba zil gyis non/__sems bde stong gi ting nge 'dzin las rtag tu mi g.yo bas grub pa brnyes pa'i rtags mtshan cir yang 'char/__gsang spyod kyi 'du bar 'brel tshad kun kyang phyi rol gyi pul+lir sogs yul chen nyer bzhi'i zhing rnams na rtag tu rol pa'i dpa' bo thod pa'i dum bu dang rnal 'byor ma rab gtum ma sogs lhan skyes mkha' 'gro'i tshogs dang skal ba mnyam par 'gyur ro/__/rtsa ba'i sa bcad gsum pa don bsdu ba ni/__mdor na rig ma 'du bya bsnyen pa ste:__nye bsnyen sbyor ba'i yan lag rnam mang pos:__yas babs sgrub dang mas brtan sgrub pa ches:__'dun pa sems pas rlung sems las su rung :__rigs chen 'byed pas zung 'jug lha skur ldang :__dbugs chen 'byin pas ye shes mngon du 'gyur:__lung chen thob pa'i phyag rgya rtags kyi skus:__spangs thob rtsal chen rdzogs pa'i mthar phyin nas:__he ru ka dang spyod yul ro gcig 'gyur:__ces gsungs te/__sher dbang gi nyams len rgyas par bstan pa de rnams kyi don mdor bsdu na/__thog mar rig ma brtag 'gugs sbyong gsum gyis 'du bya ba bsnyen pa'i yan lag ste/__nye bar bsnyen pa'i yan lag ni thabs lam gyi chos nyer bdun gyis bsdus pa'i sbyor ba'i yan lag rnam pa mang pos/__yas babs kyi dga' ba bzhi 'khor lo'i gnas bzhir mas rim du bskyed pa ni sgrub pa'i yan lag dang*/__mas brtan gyi dga' ba bzhi yas rim du brtan par byed pa ni sgrub pa chen po'i yan lag ste bzhi po nyams len la brtson pas/__'gyur ba ma nges pa dang*/__brten pa bzhi'i sa gnyis kyis bsdus pa'i tshogs lam 'dun pa sems pa las dang po pa'i rnal 'byor gyis rlung sems las su rung bas thun mong gi dngos grub ro langs/__gser 'gyur/__ral gri/__go cha/__pra se na/__rkang mgyogs/__gzhan yang rdo rje tshe dang*/__dbang po drug gi mngon shes dang*/__sgyu ma rdo rje la sogs pa'i grub pa dang*/__las chen bzhi sogs ji skad gsungs pa ltar grub pas don byed cing*/__de nas gal chen sbyong ba/__bslab pa rgyun/__bsod nams rten gyi sa gsum pos bsdus pa rigs chen 'byed pa'i rnal 'byor zag bcas kyi lam gyi rtse mo sbyor lam brnyes nas sgrub pa'i nye rgyu la brten rlung sems zung 'jug gi lha sku phyag rgya chen por ldangs shing mchog gi dngos grub brtan pas khyad par du 'gro ba'i sas bsdus pa mthong lam dbugs chen 'byin pa'i rnal 'byor thob ste/__chos nyid kyi ye shes rang mtshan pa mngon sum du mthong bas zag med kyi lam gyi thog mar gyur la/__de nas mthong zin goms par byed pa'i lam dmigs pa 'bras bu skye ba'i sas bsdus pa sgom lam lung chen thob pa'i rnal 'byor rigs so so'i phyag rgya rtags kyi cha lugs 'dzin pa'i skur snang bas/__gnas pa mi 'gyur ba brdal ba chos nyid/__rdzogs pa cir chub kyi sa rnam pa gsum pos bsdus pa mthar lam spang bya'i dri ma phra ba'ang spangs shing thob bya'i ye shes chen po'i chen po la rtsal chen rdzogs pa'i rnal 'byor rnams rim thod rgal gang rung gis bgrod de mthar phyin nas/__rang gnas kyi don nyid sgrib byed kyi zhen pa mtha' dag dang bral bar mngon du gyur pa yi ge 'khor lo tshogs chen gyi sas bsdus pa mthar thug gi 'bras bu mi slob pa'i zung 'jug sku bzhi'i bdag nyid dpal kun bzang he ru ka mngon rdzogs rgyal po'i gsang ba gsum dang spyod yul ro gcig tu 'dres par 'gyur ro/__/de ltar yang*/__a nu yo ga'i theg pa ni/__bar ma chod pa tshe gcig gis/__/sangs rgyas sa la nges par 'gro/__/zhes so/__/dbang bzhi pa dang rjes su 'brel ba'i lam rig stong zung 'jug a ti yo ga bsgom pa la gnyis/__tshig gong 'og mtshams sbyar te mdor bstan pa dang*/__rgyas par bshad pa'o/__/dang po ni/__bde stong nyams myong rgyud la brtan pa na:__mthar thug don gyi dbang gi lam gyi mchog:__'bras bu shin tu rnal 'byor sgrub pa che:__bla med rdo rje lta bu'i ting nge 'dzin:__rang bzhin rdzogs pa chen por la bzla bya:__zhes gsungs te/__de ltar gsang ba dang sher dbang gi nyams len rjes su rnal 'byor gyi lam rim de dag gis thabs bde ba chen po dang shes rab stong pa nyid zung du 'brel ba'i nyams myong rang gi rgyud la legs par skyes shing brtan par gyur pa na/__lam gyi theg rim mtha' dag gi mthar thug skyel so/__/don gyi ye shes rjen cer du ston pa bzhi pa rig pa'i rtsal dbang gi ye shes lam du byed pas rnal 'byor kun gyi mchog gam rtse mo/__/bya bral 'bras bu'i theg pa a ti yo ga shin tu rnal 'byor gyi sgrub pa chen po la 'jug par bya ste/__de'ang slob lam bzhi'i mthar thug bar chad med lam gyis bsdus pa ting nge 'dzin gzhan gang yang 'di'i bla na med pa/__gzhom par dka' ba'i dri ma phra mo bcom pa la mi phyed mi shigs thogs pa med pa sogs chos bdun dang ldan pas rgyun mtha'i ye shes rdo rje lta bu'i ting nge 'dzin/__gdod ma'i gnas lugs kyi rang bzhin 'od gsal rdzogs pa chen po'i dgongs par thabs grol gyi lam dang lam gyi 'bras bu thams cad la bzla bar bya'o/__/de ltar yang kun byed rgyal po'i rgyud las/__yod ni gcig las med pa la/__/bstan ni rnam pa gnyis su bstan/__/byung ni theg pa dgu ru byung*/__/'dus ni rdzogs pa chen por 'dus/__/zhes dang*/__chos rnams kun gyi la ni nga yis bzlas/__/zhes so/__/'dir rdzogs pa chen po'i thun mong ma yin pa'i grub mtha' spyi'i gnad/__rang bzhin gzhi'i gnas lugs/__de las sems can gyi 'khrul lugs/__'khrul dus 'od gsal gyi gnas tshul/__nyams su len thabs/__mthar phyin 'bras bu'i grub lugs rnams dang*/__khyad par gsang skor man ngag sde'i nges pa'i don/__gzhi dang 'khrul tshul khyab tshul dang*/__/gnas dang lam dang sgo dang yul/__/nyams len tshad dang bar ma do/__/grol sa nyid dang bcu gcig go__/zhes gsungs pa'i don shes na gal che yang 'dir yi ge mang gis dogs pas rgyud lung man ngag spyi dang khyad par kun tu bzang po dri med 'od zer gyi gsung rabs rnams las rtogs par bya ba kho na'o/__/gnyis pa la gsum/__phyi sems sde/__nang klong sde/__gsang ba man ngag sde'i sgom tshul bstan pa'o/__/dang po la bzhi/__lta bas thag bcad pa/__sgom pas la bzla ba/__spyod pas 'phrang bsal ba/__'bras bu re dogs spang ba'o/__/dang po ni/__de la phyi ltar sems sde'i dgongs pa ni:__phyi rol yul kun rmi lam lta bur blta:__nang gi dbang po bden med sgyu mar bshig:__bar gyi rnam shes skye 'gags gnas gsum bral:__gsang ba kun gzhi gsal la mi rtog ngang :__lta ba kun byed gnyug ma byang chub sems:__zhes gsungs te/__theg rtse rang bzhin rdzogs pa chen po'i lam rtsol sgrub spang gnyen gol sgrib las 'das pa skal ldan shin tu dbang rnon gyi spyod yul te/__de la'ang dbang po'i khyad par gyis nang gses grub mtha' gsum yod pa'i thog mar phyi skor lus lta bu kun byed rgyal po sems smad bco brgyad sogs rgyud lung gi bstan don sems sde'i dgongs pa ni/__phyi rol gzung ba'i yul snang srid 'khor 'das kyis bsdus pa kun rmi lam gyi yul snang lta bur rang gi sems las gzhan tu 'ga' yang ma grub par rang sems kyi rtsal du blta ba dang*/__nang gi 'dzin pa'ang de las gzhan tu med de lus la brten pa'i dbang po drug ni 'khrul ngor kun brtags gy-i chos yin pas bden pa med pa sgyu ma'i skyes bu'i dbang po dang mtshungs pa rig pas dpyad nas bshigs pas shes la/__bar gyi rnam shes yul la 'jug pa drug kyang thog mar skye ba'i khungs dang mthar 'gag pa'i yul da ltar gang la gnas par brtags shing rtsad bcad na gang du 'ang gdags gzhi bral ba nam mkha' dang 'dra bas thams cad sems nyid kyi rol par shar ba dang*/__gsang ba kun gzhi sems kyi gshis lugs rang bzhin gsal la ngo bo rnam par mi rtog pa rang byung gi ye shes brjod bral chos nyid kyi ngang du chos can thams cad rdzogs par lta ba 'khor 'das kun byed rgyal po yongs grub la bcos mas ma reg pa'i gnyug ma byang chub sems kyi rang bzhin tu thag bcad pa ste/__kun byed las/__sangs rgyas sku dang ye shes yon tan dang*/__/sems can las dang bag chags la sogs pa/__/snang srid snod bcud bsdus pa thams cad kun/__/byang chub sems kyi ngo bo ye nas yin/__/ces so/__/gnyis pa ni/__sgom pa rtsol med gang shar ma bcos bzhag:__zhes gsungs te/__de ltar rgya chad phyogs lhung med pa'i lta bas thag chod nas/__sgom pa nyams su blang ba ni/__gnas dben par rnam snang chos bdun dang ldan pas/__da lta'i sems nyid ye stong nam mkha' lta bu'i ngang du sgo gsum bya rtsol med par lhod kyis glod de/__yul gzhi grol la 'dzin pa ye grol gang shar yang bskyar grol gyi gnyen pos ma bcos par ngang bzhag chen por la bzla ste/__kun byed las/__ji bzhin spros bral bde ba chen po la/__/sgo gsum mi rtsol bcos shing dmigs mi byed/__/yid la mi byed mtshan ma'i rjes mi 'brang*/__rang byung ye shes bde ba'i don la bzhag__/ces so/__/gsum pa ni/__spyod pa lam khyer:__ces gsungs te/__yul 'dod pa'i yon tan cir snang yang yul can chos nyid rang grol gyi rgyan tu byed cing dug lnga'i ngo bor bltas pas de dag skyes grol ye shes su shar ba nyon mongs rang grol gyi spyod pa/__tshogs drug gi rtog pa thams cad shar dus nyid nas ma skyes lhun grub kyi dkyil 'khor gsum du rdzogs par shes pa snang ba dbang bsgyur gyi spyod pa/__blang dor dgag sgrub kyi zhen yul thams cad kyi steng du ro snyoms thog 'gel gyi zlog sgom byas pas gnyis med rang grol du song nas re dogs kyi 'phrang las grol ba brtul zhugs lam slong gi spyod pa ste/__de gsum lam du khyer nas lta sgom la bogs dbyung ngo*/__/bzhi pa ni/__'bras bu mngon du bya:__zhes pas bstan te/__da lta'i sems nyid kyi dbyings ye grol gzhi rtsa med pa'i ngo bo nyid sku ye nas 'du 'bral med par ma btsal ngang la rdzogs pas de las gzhan pa'i sangs rgyas logs su bsgrub tu med pas de nyid lta sgom nyams su blangs nas mngon tu 'gyur bar bya ste/__kun byed las/__ngo bo nyid las gzhan du ma sgrubs shig__/rang nyid yin gyis gzhan du ma tshol cig__/btsal na rgyal ba dbyings nas rnyed mi 'gyur/__ces so/__/gnyis pa nang klong sde la gnyis/__lta ba chos nyid kyi klong bshad pa/__sgom pa brda bzhi'i gnad bstan pa'o/__/dang po ni/__nang ltar ye shes klong chen rnam pa lngas:__phyi nang brtan g.yo kun la khyab par brdal:__byung dang 'byung 'gyur 'khor 'das chos rnams kun:__mkha' klong dbyings las rdul tsam ma g.yos phyir:__ces gsungs te/__nang skor snying lta bu kun tu bzang po klong chen rab 'byams rgyal po sogs rgyud lung rnams kyi bstan don klong sde'i lta ba ni/__kun tu bzang mo chos kyi dbyings sogs ye shes kyi klong chen po rnam pa lngas phyi brtan pa snod dang nang g.yo ba bcud kyi 'jig rten kun la ris med mnyam pa chen por khyab par brdal bas/__da lta phan chad byung ba dang phyin chad 'byung bar 'gyur ba'i zag bcas 'khor ba dang zag med mya ngan las 'das pa'i btags chos su snang ba rnams/__snang ngo la ji ltar snang yang stong ngo nas ye grol rang dag yin pas kun kyang gdod nas chos nyid kun tu bzang mo'i ngo bo'i mkha' dang rang bzhin gyi klong dang thugs rje'i dbyings las rdul tsam yang ma g.yos pa'i phyir sems nyid phyir snang du shar ba ma yin par nam mkha' la gza' skar bzhin tu chos can mtshan ma ji ltar snang yang chos nyid kyi dbyings las gzhan tu 'gro sa med par rang snang bkod pa'i rgyan tu lhun gyis grub pa yin min phyogs bral chen po'i dgongs pa ste/__klong chen rab 'byams rgyal po'i rgyud las/__klong chen 'khyil ba'i mkha' dbyings ni/__/kun gyi gnas chen yin pa'i phyir/__/yul la spyod cing rnam par yan/__/'khrul pas don la gol ba'i phyir/__/tshad mas bshigs pas mi shigs te/__/klong chen rang gi mthu yis grol/__/ces so/__/gnyis pa ni/__dbang po'i sgo lnga ma bkag gsal lam me:__g.yo med mi rtog ngang du zang thal le:__thur sel 'ching bas zag med bde khril le:__dbyer med phyogs bral bsam 'das ngang du bzhag:__ces gsungs te/__lta ba'i don de nyid sgom pas nyams su len pa la/__thog mar dus kyi brda sgom tshul bla ma'i byin rlabs kyis khyad par du smin par byas nas/__dngos gzhi sgom med don gyi gzer gdab pa brda bzhi gnad kyi man ngag ni/__gsal ba gnad kyi brda dbang po sgo lnga ma bkag yan par bzhag pas tshogs drug gi shes pa thim la ma rmugs par gsal lam mer gnas pa dang*/__mi rtog pa gnad kyi brda dbang po'i sgo rnams 'byed 'dzum sogs kyis g.yo ba med par bzhag pas sems nyid gang du'ang mi rtog pa'i ngang du zang thal ler gnas pa ste pha rgyud g.yo ba rlung 'dzin pa'i gdams ngag gnyis/__bde ba gnad kyi brda 'og rlung yid tsam 'then te thur sel 'ching bas lus sems zag med kyi bde ba phri ler 'char ba dang*/__dbyer med gnad kyi brda lce'i rtse mo gang la'ang ma reg par/__ji skad du/__bsgom ma myong dang 'brel ma myong*/__/mi sgom don dang ma bral ba/__/zhes pa ltar shes pa phyogs lhung dang bral zhing bsam brjod las 'das pa'i ngang du bzhag pa ste ma rgyud bde ba nyams kyi man ngag go__/de'ang dbang bzhi'i don brda bzhi la tshang bas dbang ngang gis rdzogs la/__brda bzhi'i don gsal ba/__bde ba/__mi rtog pa/__dbyer med pa bzhi rgyud la shar bas gsal ba sprul sku/__bde ba longs sku/__mi rtog pa chos sku/__dbyer mi phyed pa ngo bo nyid sku ste sku bzhi rang chas su 'grub pa'o/__/mdor na rgyud snga ma las/__ma nor ba yi chos nyid la/__/ma bcos gnas shing ma byas gsal/__/ma 'gags pa nyid ye shes klong*/__/zhes pa ltar lta ba ma nor bas thag bcad/__sgom pa ma bcos pas nyams su blang*/__spyod pa ma byas pas bogs dbyung bas/__'bras bu ma 'gags pa nyams su myong ba'i klong chen po bzhis bsdus pa ste/__de bzhi po'ang tha mal gyi shes pa/__gnyug ma/__so ma lhug pa ste mtshan nyid bzhi ldan 'dir 'du bas de la yang yang lta bas lta ba/__de la ma yengs pas sgom pa/__de grogs su gyur pa spyod pa/__de mngon du gyur pa 'bras bur gsungs so/__/gsum pa man ngag gi sde la'ang gnyis/__dgos pa dang bcas pa'i tshig gis mdor bstan pa dang*/__de'i don rgyas par bshad pa'o/__/dang po ni/__khyad par gsang ba man ngag thig le'i sde:__rang bzhin 'od gsal snying po mngon bya'i phyir:__ces gsungs te/__snga ma gnyis la snang phyogs dang stong phyogs kyi yid dpyod phra mo 'dres pas gshis shor gyi gol sgrib 'byung nye la/__'dir yid dpyod kun las 'das shing chos can gyi snang ba thams cad chos nyid ka dag yongs grol chen por sdud pas khyad par du 'phags pa gnad thog tu thebs pa'i me btsa' lta bu gsang ba snying khrag gam srog gi dwangs ma dang 'dra ba rgyud chen bcu bdun sogs kyis bstan don/__man ngag gi gnad nges pa thig le gsang skor gyi sde/__gzhir gnas rang bzhin gyi 'od gsal dbyings rig gnyis med ye shes snying po'i tshul mngon sum lam du bya ba'i phyir 'di ltar bla na med pa'i rnal 'byor la 'jug go__/de ltar yang a ti bkod pa chen po las/__de phyir nges gsang snying po 'di/__/mun pa las ni mar me'am/__/gcan gzan rnams las seng ge bzhin/__/kun gyi nang nas khyad par 'phags/__zhes so/__/de la spyir dngos gzhi le lo can ma bsgom par 'tshang rgya ba'i gnad dbyings la ltos te sems ka dag rtsa bral du ngo sprad nas rig pa rjen pa lhongs su phud pas 'bad med du grol ba'i lam khregs chod dang*/__brtson 'grus can bsgoms pas 'tshang rgya ba'i gnad snang ba la ltos te 'od gsal lhun grub tu ngo sprad nas mngon sum gyi gnad la gzir bas gdos bcas 'od lus su grol ba'i lam thod rgal gnyis su yod de/__ngo sprod spras pa'i rgyud las/__'bad med rang grol tshad 'dzin pa/__/khregs chod thod rgal gnyis su brtags/__/zhes so/__/gnyis pa la gnyis/__ka dag khregs chod kyi lta ba dang*/__lhun grub thod rgal gyi nyams len no/__/dang po la gsum/__sngon 'gro/__dngos gzhi/__mjug bsdu ba'o/__/dang po ni/__sngon 'gro lus sbyong rdo rje'i 'dug stangs la:__ngag ni hU~M gi rnal 'byor bzhi dang sbyar:__sems la byung gnas 'gro gsum brtag dpyad nas:__rnal dbab sor gzhug spro bsdu bral bar bzhag:__ces gsungs te/__dang po sngon 'gro la gsum/__lus ngag yid gsum sbyong ba dang*/__rnal dbab/__sor gzhug go__/dang po lus kyi sbyong ba ni/__thal 'gyur las/__rdo rje skyil mo krung bcas te/__/lus sbyangs sems la phan pa'o/__/zhes pa ltar ye shes gsum dang sku gsum po lam gcig tu 'dril ba mtshon byed lus rdo rje rtse gsum pa'i 'dug stangs byas la sems kyis kyang der bsgoms pas thun mong du lus kyi sdig pa 'dag cing bar chad zhi/__khyad par lus kyi mngon zhen ldog pas 'khor bar mi ltung*/__mthar thug sku rdo rje sprul pa'i skur gnyis su med par 'gyur ro/__/gnyis pa ngag sbyong ba ni hU~M gi rnal 'byor rnam pa bzhi dang sbyar bar bya ste/__de'ang thal 'gyur las/__ngag ni hU~M zhes gnas pa la/__/rgyas gdab pa dang rtsal sbyang nyid/__/mnyen btsal lam du gzhug pa yis/__/zhes gsungs pa'i dang po ni snying ga'i hU~M las hU~M mang po sna bug g.yas nas spros/__hU~M gi glu snyan la ring bar blangs te phyi'i snang ba thams cad khengs/__sna bug g.yon nas nang du zhugs pas lus kyi nang khengs par bsgoms pas phyi nang hU~M gi rang bzhin tu 'char ba ni rgyas thebs pa ste de dag rang bzhin med par grol ba'i dgos pa yod do/__/gnyis pa ni/__snying ga'i hU~M las hU~M mthing drag rtsub rno myur thog lta bu mang pos yul snang dang lus la phug ste khral khrol du song bar bsam/__hU~M drag por brjod pas de dag rang bzhin med pa'i nyams 'char na rtsal 'byongs pa ste snang ba 'od gsal dang phung po 'ja' lus su grol ba'i dgos pa yod do/__/gsum pa ni/__mdun tu shing bu lta bu'i dmigs rten la snying gar hU~M las spros pa'i hU~M gi phreng ba dkris shing bskor/__yang bshigs nas nang du sdud pa'i 'gro ldog la sbyang zhing hU~M glu blangs pas sems las su rung ba ni mnyen btsal ba ste sems shin sbyang thob pa'i dgos pa yod do/__/bzhi pa ni/__rang gi lus dang rlung sems gcig dril hU~M yig sngon po'i rnam par mdun gyi lam srin mo 'gros su zhugs nas je ring song zhing slar tshur zhugs te rang gnas su sleb pa'i 'gro ldog spel mar sbyangs pas rnam rtog rang shugs su chod cing bde gsal mi rtog pa'i nyams skye ba ni lam du gzhug pa'o/__/de dag gi dgos pa ni/__thun mong du ngag gi sdig pa 'dag cing bar chad zhi/__khyad par ngag gi mngon zhen ldog pas 'khor bar mi ltung*/__mthar thug gsung rdo rje longs spyod rdzogs pa'i skur gnyis su med par 'gyur ro/__/gsum pa sems sbyong ba la/__thal 'gyur las/__sems ni dang po byung sa dang*/__/bar du gnas dang tha mar 'gro/__/de ltar gsum la brtag dpyad na/__/sems sbyong sems kyi gnas lugs shes/__/zhes pa ltar gsum las dang po ni/__sems zhes bde sdug thams cad myong ba po rig rig bgyu 'gyu ba 'di phyi nang snod bcud rang lus stod smad snang stong gang las byung dang*/__'tshol bya 'tshol byed la bltas shing dpyad/__gnyis pa sems phyi nang snod bcud lus kyi cha shas sogs gang la gnas/__dbyibs dang kha dog byed las ngo bo gang gis mtshon brtags shing dpyad/__gsum pa sems wal gyis shar nas yal gyi song snyam byed pa 'di gang du 'gro ba rtags pas phyi nang snod bcud snang stong yod med gang las kyang ma byung*/__gang la'ang mi gnas/__gang du'ang mi 'gro ba'i gzhi med rtsa bral du shes pa ste mdor na sems kyi byung gnas 'gro gsum gtan la ma pheb kyi bar du 'bad pa chen pos brtag cing dpyad nas btsal/__de dag gi dgos pa ni/__thun mong du yid kyi sdig pa bdag cing bar chad zhi/__khyad par yid kyi mngon zhen ldog pas 'khor bar mi ltung*/__mthar thug thugs rdo rje chos kyi skur gnyis su med par 'gyur ro/__/gnyis pa rnal du dbab pa ni/__dmigs pa sems tshol gang yang yin la mi byed par lus ci bde/__ngag bzo med/__sems rtog med rang lugs su snang ba dang stong pa dang spang bya dang gnyen po'i mtshan ma gang la yang mi rtog par 'jog pa ste/__rnal ma ni ma bcos pa'i don dang*/__dbab pa ni de la rang babs su 'jog pa'i don te/__dgos pa ni gnas skabs su sgo gsum rnal du phebs pas 'byung ba mi 'khrug cing nad rkyen mi 'byung ba dang rang bzhin gyi bsam gtan la gnas/__mthar thug sgo gsum gyi 'dzin pa rang dag tu grol bar 'gyur ro/__/gsum pa sor gzhug ni/__sngar rnal du phab pa'i sems nyid gsal la mi rtog par gnas pa de nyid spyod lam zhi ba nyan thos/__bar ma byang sems/__drag po khro bo'i lta stangs dang rnam 'gyur gyis rim gyis khrid de tshogs drug gi shes pa ji ltar shar ba spro bsdu bral bar rang sor bzhag pas rkyen snang rang gi ngo bo gsal yang mi rtog pa'i ngang ma shor ba dang*/__shar tsam nyid nas rang bzhin gyis ma grub pa snang stong dbyer med chu zla ltar rtogs pa dang*/__rang byung rang shar spros bral bsal bzhag med pa chu rlabs rgya mtshor thim pa ltar rtogs pa la bslab/__dgos pa ni/__gnas skabs su bde gsal mi rtog pa'i nyams dang ldan pa'i zhi gnas khyad par can skye bas sdug bsngal dang nyon mongs rags pa gnon/__mthar thug lhag mthong ka dag gi don rtogs pas nyon mongs rags pa rnams 'joms shing yang dag pa'i lam la srol du 'jug pa yin no/__/gnyis pa dngos gzhi la gnyis/__sdom gyis mdor bstan/__de'i don rgyas par bshad pa'o/__/dang po ni/__lta bas thag bcad sgom pas nyams su blang :__spyod pas bogs 'byin 'bras bu rang la rnyed:__ces gsungs te/__grong khyer rgyun gcod kyi lta bas thag bcad/__nyin mtshan kha sbyor gyi sgom pas nyams su blang*/__snang ba dbang sgyur gyi spyod pas bogs 'byin/__bya bral lhun grub kyi 'bras bu rang las rnyed pa bzhir 'dus pas de rnams rim bzhin bshad par bya'o/__/gnyis pa la bzhi/__lta bas thag bcad pa/__sgom pas nyams su len pa/__spyod pas bogs 'byin pa/__'bras bu lhun gyis grub pa'i tshul lo/__/dang po la'ang gsum/__ngo bo ka dag gi ye shes bshad pa/__rang bzhin lhun grub kyi ye shes bshad pa/__dbyer med zung 'jug gi ye shes ngo sprad pa'o/__/dang po ni/__de la ngo bo ka dag ye shes ni:__bltar med brjod med tshig dang dpe las 'das:__blo yi yul min gdod nas stong pa'i babs:__'khor ba ma grub myang 'das btags pa tsam:__zhes gsungs te/__lta bas thag bcad pa de la'ang*/__rgyud klong gsal las/__ngo bo ka dag ye shes ni/__/ma rig rtogs pa kun dang bral/__/rang bzhin lhun grub ye shes ni/__/stong gsal rang gdangs nyid du gnas/__/thugs rje kun khyab ye shes ni/__/'gags med snang stong nyid du gnas/__/zhes ngo bo rig stong*/__rang bzhin gsal stong*/__thugs rje snang stong dbyer med gsum du gsungs pa'i dang po ngo bo ka nas dag pa'i ye shes ni/__dngos po dang mtshan mar ma grub pas sangs rgyas kyi spyan gyis kyang bltar med pa/__gzhi med rtsa ba dang bral bas 'di'o zhes brjod du med pa/__go ba'i tshig dang mtshon pa'i dpe kun gyi yul las 'das pa/__bsam gyis mi khyab pa'i gnas lugs kyi phyir blo'i spyod yul ma yin pa/__ye gdod ma nyid nas rang bzhin gyis stong pa'i gshis sam rang babs/__'khrul grol gnyis ka yod ma myong bas 'khor ba gzhi ma grub cing myang 'das zhes pa'ang ltos nas btags pa tsam las don la ma grub pa ste/__klong drug pa las/__stong pa yul gyi spros pa med/__ces so/__/gnyis pa ni/__rang bzhin lhun grub 'gags med ye shes rtsal:__nam mkha' las ni nyi ma'i zer bzhin du:__kun la khyab cing kun gyi srog tu bzhugs:__kun dang dbyer med 'khor 'das ris med do:__zhes gsungs te/__rang bzhin lhun gyis grub pa'i ye shes ni/__/ngo bo ka dag smra bsam brjod bral de nyid gsal mdangs 'gags pa med pa'i ye shes kyi rang rtsal/__nam mkha'i dbyings las nyi ma'i 'od zer phyogs med du khyab pa bzhin tu brtan g.yo 'khor 'das kun la khyab cing kun gyi srog gam snying po'i tshul du bzhugs la/__de'ang rten dang brten pa'i rnam pa can ma yin pa nam mkhas 'byung ba chen po rnams la khyab pa bzhin tu mtha' gang la'ang mi gnas par kun dang dbyer med par bzhugs pa ste/__'khor 'das gnyis la rgya chad dang phyogs lhung gi ris su bcad pa med de/__snga ma las/__gsal ba yod med mtha' las 'das/__/mtshon tshig du ma'i spros dang bral/__ces so/__/gsum pa ni/__de gnyis gcig dang du ma'i spros las 'das:__zung 'jug 'dus ma byas pa'i gnas lugs ni:__bltar med lta ba kun gyi rgyal po ste:__rnal 'byor dbang po rang gi nyams myong las:__lta ba'i tshul du ngo sprod mngon du bya:__zhes gsungs te/__ngo bo stong pa dang rang bzhin gsal ba de gnyis kyang gcig dang du ma'i spros pa kun las 'das shing gdod nas dbyer med zung du 'jug pa mar me dang mar me'i 'od lta bu sus kyang bcos nas 'dus ma byas pa'i rang babs kyi gnas lugs de ni yul dang yul can tu brtags nas bltar med pa'i phyir blo las 'das pas lta ba kun gyi rgyal po gong na med pa ste/__de nyid ji bzhin tu rtogs pa'i rnal 'byor gyi dbang po rang gi nyams myong las dpag ste/__lta ba'i yin lugs kyi tshul du brda thabs man ngag byin rlabs kyi sgo nas ngo sprod cing mngon tu rtogs par bya'o/__/de ltar yang khyung chen las/__spyod bral sgom bral blta rgyu med pa'i don/__/ma bcos snang ba rang sar bzhag pas grol/__ces so/__/gnyis pa sgom pas nyams su blang ba la gnyis/__dngos dang*/__'byongs pa'i tshad do/__/dang po ni/__de nas sgom pas nyams su blang ba ni:__sems nyid rig stong zung 'jug skad cig ma:__dus gsum rtog pas ma bslad so ma de:__rnal mar bzhag pas mngon sum lhug par mthong :__phyi rol yul la g.yeng ba'i rtog pa zhig:__nang du dgug pa'i dran 'dzin rang sar grol:__gtad med ngang la byar med glod pa yis:__chos nyid mnyam pa chen po mngon du 'gyur:__ces gsungs te/__lta bas ye grol du rtogs pa de nas sgom pas yin thog tu bzhag ste rig pa gshis thog tu pheb par nyams su blang ba ni/__sems nyid ngo bo ngos bzung las 'das pa/__rig pa zangs thal mtshan mar ma grub pa stong gsal rang byung gi ye shes/__de gnyis ya bral ma yin par gdod nas zung du 'jug pa 'di las chos sku gzhan tu med par ngo rang thog tu 'phrod nas/__dran bsam snga ma 'gags/__phyi ma ma skyes shing da lta'i shes pa skad cig ma la bzo bcos ma byas pas dus gsum gyi rnam par rtog pas ma bslad pa'i ka dag blo 'das kyi dgongs pa bzhi cha sum bral tha mal gyi shes pa so ma de nyid/__rang babs rnal mar bzhag pa las gzhan pa'i bsgom bya rdul tsam med pa thag gcig thog tu bcad pas mngon sum chos nyid kyi rang babs lhug par mthong ste rang dwangs sprin bral nam mkha' ltar gnas pa yin la/__de'i dus su phyi chos can tshogs drug yul gyi 'khrul snang la g.yeng ba'i rtog pa shar dus nas 'dzin med du glod pas rba rlabs chur thim pa ltar 'gyu stong rjes med du zhig__/nang chos nyid kyi ngang du yengs pa med par dgug pa'i dran 'dzin dgag sgrub rtsol bcas kyi brtod phur na bun mkha' la dengs pa ltar rang sar grol te snang shes gnyis ka'i phyogs su ma lhung ba cir snang chos sku'i rang bzhin rig stong blo bral rjen par rtogs pa'i gding grol thog tu bcas te/__dmigs gtad mtshan 'dzin gang yang med pa'i ngang la 'bad rtsol ci'ang byar med par kha yan tu glod nas bzhag pas rdzogs pa chen po rang snang ris med ka dag gzhi rdzogs chos nyid mnyam pa chen por mngon tu 'gyur te/__khyung chen las/__ma bsgoms bzhag pa de nyid rang rig pa/__/sgra dang blo bral kun gyi pha rol phyin/__/dmigs bcas rang so nyid de bcos ci dgos/__/gnas pas 'gugs la 'gyus pas rang sar dag__/ces so/__/gnyis pa ni/__de tshe rtog pa'i spro bsdu ji snyed kyang :__chu dang rlabs bzhin rang gsal rjen par thim:__rlung med g.yo ba med pa'i mar me bzhin:__rtse gcig ngang gnas gnas pa'i de nyid rig:__rig kyang mi 'dzin gsal yang 'phro ba med:__mi rtog pa la zhen pa bral ba las:__mnyam gzhag rjes thob zung du chud pa na:__zhes gsungs te/__rig stong rjen pa ngos zin nas gshis thog bzo med du bzhag pa de'i tshe/__rnam par rtog pa'i spro bsdu ji snyed shar ba de thams cad kyang dran pa'i gnyen pos bskyar grol ma dgos par/__chu bo chen po las rlabs g.yos kyang chu dang rlabs gnyis tha dad med pa bzhin du rtog med rang gsal rjen par thim pa dang*/__g.yo byed kyi rlung med pa'i mar me gsal dwangs brtan par 'bar ba bzhin rig thog tu rtse gcig par gnas shing*/__de la'ang yul shes kyi 'dzin pas ma bslad pa gnas pa'i ngo bo'i de kho na nyid rig la/__rig pa nyid kyang der rtog gis mi 'dzin par gsal hrig rjen pa gzhi med rtsa bral du lhag ger shar ba dang*/__gsal cha ma 'gags kyang tshogs drug gi yul la 'gyu ba rang ga mar 'phro ba med cing*/__gang du'ang mi rtog pa de la'ang zhen pa'i 'dzin stangs bral ba las mnyam bzhag rjes thob kyi 'jog len med par sgom pa 'od gsal khor yug tu shar/__gnas 'gyu'i dgag sgrub mi dgos par mtha' grol klong yangs kyi dgongs par phyam brdal/__zhi gnas lhag mthong gi rnam par dbye ba las grol te rig thog zung 'jug tu chud pa na sgom pa klong du gyur pa yin te/__dga' rab rdo rjes/__yin pa grub pa med pa'i rig pa 'di/__/rang gdangs 'char tshul cir yang ma 'gags pas/__/snang srid kun kyang chos sku'i zhing du shar/__/shar ba de nyid rang gi thog tu grol/__ces so/__/gsum pa spyod pas bogs dbyung ba ni/__spyod lam thams cad chos nyid rol pa'i ngang :__tshogs drug yul la mi zhen gang dgar btang :__'gro 'chag nyal 'dug ye shes rol pa'i ngang :__gzung 'dzin spang blang mnyam pa chen por brdal:__mtshan ma'i bsgom par bya ba rdul tsam med:__mi bsgom don dang 'bral ba med pas na:__spyod yul kun tu ye shes ris med pa:__chu bo'i rgyun dang mar me'i rtse mo bzhin:__de nyid rig pas rtag tu mnyam par gzhag:__ces gsungs te/__cog bzhag gi sgom pa klong du gyur pa na sgo gsum spyod pa'i lam gang rung du zhugs kyang thams cad chos nyid kyi rol par ngang las nam yang ma g.yos te 'byung bzhi'i cho 'phrul ji ltar shar yang nam mkha'i klong las 'das pa med pa bzhin no/__/des na 'khrul grol gyi re dogs med pas tshogs drug gi yul la der 'dzin gyis mi zhen par thug phrad rang grol rang dgar rgya yan du btang*/__snang btags ji ltar snang rung rig pa'i klong las gud na med pas 'gro 'chag nyal 'dug thams cad rang byung gi ye shes chen po'i rtsal lam rol pa'i ngang du 'ub chub par thag bcad/__rtsa bral gyi chos thams cad ye nas lhun grub kyi chos skur sangs rgyas pas gzung bya 'dzin byed spang bya blang byed gnyis su med pa chos nyid mnyam pa chen por khyab par brdal bas/__'bad rtsol dmigs bcas mtshan ma'i bsgom par bya ba rdul tsam yang med pas sgom 'dod kyi rtog pa las grol te tha mal gyi na bar 'byams shing*/__bcos ma'i blos mi bsgom pa'i don rig stong chos nyid zang thal rjen pa dang rgyun tu 'bral ba med pas na gang zag tha mal pa'i tshul las ring du 'das te spyod yul ji ltar spyod pa thams cad kun tu bzang po ye shes zang thal rang snang ris med dag pa rab 'byams su shar ba na/__chos nyid rgyun chad med pa chu bo chen po'i rgyun dang 'od gsal gsal 'grib med pa mar me'i rtse mo bzhin te de kho na nyid kyi gnas lugs rig pas rtag tu mnyam par bzhag pa las ma g.yos bzhin tu ye shes kyi 'khor lo phyogs med du bskor ba yin te/__nyi zla kha sbyor las/__dmigs pas snang ba'i yul rnams la/__/rang bzhin med par sus rtogs pa/__/'di la snang stong gnyis su med/__/ces gsungs pa ltar ro/__/bzhi pa 'bras bu la gsum/__sku gsum lhun gyis grub pa'i tshul dang*/__lam rkyen dngos po bcu lhun gyis grub pa'i tshul/__bsnyen sgrub yan lag bzhi dang sbyar ba'i tshul gyis 'bras bu don bsdu ba'o/__/dang po ni/__mdor na rang rig gdod nas sangs rgyas te:__sangs rgyas chen po gud du btsal bas med:__bla ma'i drin gyis rtogs pa ngo 'phrod de:__gsal stong ro mnyam rig pa'i snying po can:__ma nor gnas lugs ma bcos gdod ma'i babs:__ji bzhin pa las 'chos pa med pa yis:__sangs rgyas sa la da lta lhun gyis grub:__ces gsungs te/__mdor bsdu na rang rig ma bcos pa chos nyid kyi gnas lugs 'di kho na gdod nas 'khrul ma myong bar sangs rgyas pa ste/__bsgrub bya'i sangs rgyas chen po gsum ldan gud du btsal bas nam yang rnyed pa med kyang glo bur 'khrul rtog gis bsgribs te gzhan nas rtsol sgrub tu lta ba'i 'dzin pas bcings pa la yang dag pa'i lam gyi sa mkhan bla ma dam pa'i bka' drin gyis gdod nas ye grol gyi rtogs pa bskyed cing lhun grub kyi sangs rgyas rang la gnas par ngo 'phrod de/__rnam pa ma 'gags par gsal la ngo bo ma skyes pa'i stong pa gnyis po ro gcig tu mnyam pa'i khyab bya la/__khyab byed rang rig pa'i snying po can gyi gzhi ma nor ba'i gnas lugs de nyid lam ma bcos pa gdod ma'i rang babs su bskyangs pas gshis ji bzhin pa mngon tu gyur pa las/__sems can gyis ngan par dang sangs rgyas kyis bzang por btang nas gsar thob tu 'chos pa med par rtogs pa de yis/__sku gsum rdzogs pa'i sangs rgyas kyi sa la da lta nyid nas phyin te chos sku rang gnas chen por la bzlas pa ni ma btsal lhun gyis grub pa'i 'bras bu'o/__/de ltar yang nor bu phra bkod las/__rdzogs sangs rgyas ni rang rig nyid/__/ngo bo dus gsum 'gyur ba med/__/rang bzhin rtag tu 'gag pa med/__/thugs rje kun la rab snang ngo*/__/zhes so/__/gnyis pa ni/__lta ba bltar med sgom pa'i rtsis gdab bral:__spyod pa byar med 'bras bu blang dor 'das:__de ni ye shes spyi blugs dbang zhes bya:__dam tshig ye srung phyal ba chen por zlum:__bsgrub bya'i rgyal po che ba rang las rnyed:__bsgrub chos ting 'dzin khor yug rgyun chad med:__sgrub par phrin las snang srid chos skur brdal:__sgrub pa'i yan lag mi gsung mnyam bzhag sngags:__ma bcos tshogs drug lhug pa mchod pa'i sprin:__gsal snang phyag rgya rig rtsal rol pa'i gar:__ces gsungs te/__gsang rgyud zab mo rnams su rdo rje'i tshig gis bstan pa'i lam gyi cha rkyen dngos po bcu'ang 'dir 'bad med kyi ngang la lhun gyis grub pa ste/__lta ba'i mkhan pos blta bya'i yul med pas gnas lugs de kho na nyid du lta ba dang*/__sgom pa dmigs gtad kyi rtsis gdab dang bral bas rang snang ris med kyi dkyil 'khor bkod pa khyab par brdal ba dang*/__spyod pa spang blang byar med pas chos nyid kyi dbyings su chos can gyi mtshan ma la dor nas 'bras bu blang bya rnam grol dang spang bya 'khor chos gnyis ka las 'das te rang gnas kyi rig pa gzhi thog tu rdzogs pa de ni/__gzhi lam 'bras bu'i rim pa kun la khyab pas ye shes spyi blugs kyi dbang zhes bya ba gtor blugs kyi cho ga kun las khyad par 'phags pa dang*/__sa ma ya 'bum sde'i dam tshig rnams kyang gdod nas chos nyid las mi 'da' bas ye srung lhun grub gzung 'dzin dang bral ba'i dbyings rgya 'byams sam phyal ba chen po gcig tu bzlum pa dang*/__don tu gnyer te bsgrub bya'i rgyal po rang byung ye shes che ba'i mchog gzhan las ma btsal rang nyid las rnyed pa dang*/__sgrub byed kyi chos btang bzhag med pa'i ting nge 'dzin khor mo yug las mi g.yo bas rgyun chad med pa dang*/__sgrub pa'i phrin las snang srid thams cad chos sku'i yo langs su brdal bas cir snang ye shes kyi rol par shugs las 'byung ba dang*/__sgrub pa'i yan lag ci'ang mi gsung zhing byar med mnyam par bzhag pa'i bzlas pa chen pos gsang sngags kyi 'khor lo bla med du bskor ba dang*/__blo yis bzo ma bcos pa tshogs drug gi yul shes rang babs lhug par bzhag pas thug phrad reg grol du stob pa mchod pa'i sprin 'byams su klas pa dang*/__sems kyi gsal snang kun tu khyab pa'i phyag rgya ye shes su 'ching ba dang rig rtsal phyogs med du 'gro ba rol pa'i gar gyi rnam 'gyur du lhun gyis grub pa'o/__/gsum pa ni/__sems kyi mtshangs btsal ye shes bsnyen pa ste:__rang thog rnal mar ngo sprod nye bar bsnyen:__thig le nyag gcig thag chod sgrub pa'i ngang :__grol thog gdengs bca' sgrub pa chen po yis:__cog bzhag bzhi ldan ka dag zang thal dbyings:__kun bzang snying po'i sa la da lta phyin:__ces gsungs te/__khregs chod ye babs sor bzhag gi thog mar sems kyi mtshang btsal te skye med du rtsad bcad pa ni rang byung ye shes la bsnyen pa ste/__bar du rang rig ka dag gi thog tu gnas lugs ma bcos rnal mar ngo sprod pa ni nye bar bsnyen pa dang*/__'gags med du gtan la phab ste rang byung gi thig le nyag gcig tu 'khor 'das thams cad rdzogs par thag chod pa ni sgrub pa'i ngang du gnas pa yin la/__mthar gnyug ma ye grol gyi thog tu gnyen pos bskyar grol ma dgos pa'i gding bca' ba sgrub pa chen po'i rim pas gnyis med du rtsal sbyang ste/__de'ang sgron ma snang byed las/__ri bo cog bzhag lta ba'i tshad/__/rgya mtsho cog bzhag sgom pa'i tshad/__/snang ba cog bzhag spyod pa'i tshad/__/rig pa cog bzhag 'bras bu'i tshad/__/tshad bzhi ldan pa'i rnal 'byor de/__/nges pa'i don la blo 'dres pa'o/__/zhes pa ltar/__dgongs pa chos nyid kyi ngang la gnas pas rkyen snang rlung tshogs lta bus nam yang mi g.yo ba'i gding rnyed pa ri bo cog bzhag gi lta ba/__rig pa zang thal la dbang po'i gdangs ma 'gags pa rgya mtsho rlung gis ma bskyod pa lta bu la/__snang yul gza' skar gyi gzugs brnyan shar yang yul dang yul can tu rnam par rtog pa med pas gzugs brnyan gyis chu la ma gos pa dang mtshungs pa rgya mtsho cog bzhag gi sgom pa/__rig pa'i dwangs cha me long lta bur chos can mtshan ma cir snang yang dgag sgrub bral bar snang shes ro mnyam yan gar bzhag pa snang ba cog bzhag gi spyod pa/__rig pa zang thal ngos bzung med pa la blo yis bzo bcos dang 'dzin zhen gang yang mi bya bar rang grol klong yangs chen po'i dgongs par rang gnas su bzhag pa ni rig pa cog bzhag gi 'bras bu ste/__de ltar cog bzhag gi gnad bzhi dang ldan pa las/__ka dag zang thal gdod ma'i chos dbyings kun tu bzang po'i grol gzhi byang chub snying po'i sa la phyi dus su mi ltos par da lta phyin par 'gyur ro/__/gsum pa ka dag gi lta ba'i mjug bsdu ba ni/__mdor na snod bcud bye brag tha dad kyang :__nam mkha'i ngang du ro gcig dbyer med ltar:__dkar po'i lam dang 'bras bu bsam 'das kyang :__rig pa'i ngang du lhun grub chen por rdzogs:__zhes gsungs te/__gzhi ka dag gi lta ba'i gnas lugs mdor bsdus te dper mtshon na/__phyi snod kyi 'jig rten dang nang bcud kyi skye 'gro gnas lus bkod pa'i bye brag gcig tu ma nges pas tha dad sna tshogs su mchis kyang*/__'byung ba chen po nam mkha' stong pa'i klong du ma 'dus pa med pas de'i ngang du dbyer med ro gcig pa ltar/__drang don tu lam stegs lha dang tshangs pa'i theg pa dang rnam byang gis bsdus pa'i dkar po'i lam nyan thos nas a nu'i bar dang de dag so so'i thob bya'i 'bras bu bsam las 'das par gsungs kyang*/__nges pa'i don tu gdod ma'i grol sa ka dag rang byung rig pa'i ngang du lhun grub chen por gzhi la rdzogs pa ste/__de'ang ye grol la gzhi dang snang ba yul rnams ye nas rdzogs pa dang*/__rang grol la 'khrul gzhi lam dang shes bya rang sar rdzogs pa dang*/__gcig grol la 'bras bu rgyu rkyen chos nyid rnams rang bzhin tu rdzogs pa dang*/__mtha' grol 'khor 'das rgyud lung thams cad mtha' bral du rdzogs pa dang*/__gcer grol la gdams ngag bsam gtan 'bras bu bcas chos dbyings rang ngor rdzogs par gsungs te/__mu tig phreng ba las/__de phyir gzhi gnas rig pa la/__/rang shar yin phyir snang ba rdzogs/__/zhes pa nas/__rang log yin phyir 'khor 'das rdzogs/__/rang gnas yin phyir rgyud lung rdzogs/__/rang rdzogs yin phyir dus gcig rdzogs/__/zhes sogs gsungs so/__/gnyis pa thod rgal gyi nyams len bshad pa la gnyis/__mdor bstan/__rgyas par bshad pa'o/__/dang po ni/__yang zab man ngag gnad kyi gdams pa ni:__mngon sum lam byed theg pa'i zad sa ste:__rig rtsal sku gsum lam du snang ba'i phyir:__phyi dus mi ltos da ltar grol ba'i thabs:__zhes gsungs te/__theg dgu 'og ma rnams las ches zab pa'i khregs chod kyi gdams pa la'ang rig pa lus la gnas kyang de mngon tu ston pa'i gnad med pas 'dir de las kyang yang zab kyi man ngag ste gdams pa'i don la blos brtags kyi zab mi zab bya ba'i glags mi rnyed pas gnad kyi gdams pa khyad par bdun dang ldan pa ste/__yi ge med pa las/__rig pa'i rang bzhin kun la khyab kyang chos kyi sku gdams ngag la thug go__/zhes 'byung ste/__de'ang phyi dbyings nam mkha' stong par nang gi rig gdangs rdo rje lu gu rgyud mngon sum ston cing lam du byed pas yid dpyod rtog pa'i shes rab la rags ma lus pa'i phyir/__rim dgu'i theg pa'i zad sa'am skyel sor gyur pa ste/__tshig dang go ba shes rab la mi ltos par dbang pos mthong ba dang*/__dbang po rno brtul/__las bzang ngan/__pho mo'i khyad par sogs med par rig rtsal dbyings kyi snang char sku gsum po lam du snang ba ste/__ngo bo chos sku'i rtags su skye med spros pa dang bral ba/__rang bzhin longs sku'i rtags su 'od gdangs sna tshogs su snang ba/__thugs rje sprul pa'i rtags su shes pa gsal stong du 'char ba ste/__chos sku ka dag yin pas dngos po 'pho 'gyur med la/__lhun grub longs sprul du snang bas 'bras bu phyi dus la mi ltos pa'i phyir tshe phyi ma'i dus sam tshe lo brgya pa'i yun sogs la mi ltos par da lta mthong ma thag nas grol ba'i sne zin cing*/__brtson 'grus can lo gsum mam drug la sogs pas grol ba'i thabs 'od gsal snang ba bzhi'i lam mchog thod rgal nyid bshad pa yin no/__/de ltar yang thal 'gyur las/__rang rig mngon sum mthong med pas/__/rim dgu'i 'dod pas grol ba min/__/chos nyid zad sa mthar phyin pas/__/sku gsum lam gyi snang ba'o/__/zhes so/__/gnyis pa la gsum/__sngon 'gro dngos gzhi/__mjug gi bya ba'o/__/dang po la'ang gnyis/__rig pa'i sna khrid 'khor 'das ru shan phye ba dang*/__gnad bzhis mngon sum gyi snang ba la 'jug pa'o/__/dang po ni/__rig pa'i sna khrid sgo gsum ru shan dbye:__phyi nang gsang ba'i bya ba dgu phrugs btang :__zhes gsungs te/__de'ang gzhung gi lugs skyes bu spros pa can thun mong gi drod rtags la dga' bas sku gsum gyi sna khrid pa 'byung bzhi'i sgra don la sbyang bar gsungs kyang*/__'dir man ngag gi lugs brtson 'grus can brtul zhugs la dga' bas rig pa'i sna khrid pa 'khor 'das ru shan 'byed pa'i spyod pa sngon tu sbyang bar bya ste/__thal 'gyur las/__'khor 'das ru shan ma phye na/__khams gsum lus ngag yid kyis kyang*/__/'brel pa chod par mi 'gyur bas/__/'khor 'das ru shan dbye bar bya/__/zhes gsungs shing sgo gsum gyi ru shan so sor dbye ba'ang lus kyis 'gro ba rigs drug gi spyod tshul/__bde gshegs zhi khro'i sku'i rnam 'gyur/__ngag gis 'gro drug sgra skad chos sgra gsang sngags sogs/__sems kyis rigs drug gi bde sdug btang snyoms spyod pa dang mi rtog pa'i ting nge 'dzin sogs la ngal dub thang chad ma gyur bar rtags thon par sbyangs nas rnal du dbab/__man ngag lugs rnams su nang ltar ru shan dbye ba lus la rigs drug gi sa bon rtsa yig tshul du gnas pa sngags dang dmigs pas sbyangs ba'ang bya bar gsungs la/__des lus ngag yid gsum gyi sdig pa 'dag__/bar chad zhi/__mngon zhen ldog__/sku gsung thugs rdo rjer 'tshang rgya bar byed pa'o/__/de nas sgo gsum re rer yang phyi nang gsang ba gsum res dbye ba'i bya ba dgu phrugs rnams ring du bor zhing btang bar bya ste/__de la lus kyi gsum ni/__phyi 'jig rten 'khrul pa'i bya byed dang rnam g.yeng thams cad/__nang phyag dang skor ba sogs dman pa'i dge ba rnams/__gsang ba rnam g.yeng sgul bskyod thams cad spangs te gcig pur 'dug pa'o/__/gnyis pa ngag gi gsum ni/__phyi 'jig rten gyi 'khrul gtam sna tshogs/__nang kha ton dang bzlas brjod la sogs pa/__gsang ba smra brjod thams cad spangs te mi smra bar gnas par bya'o/__/gsum pa yid kyi gsum ni/__phyi 'jig rten gyi 'khrul rtog thams cad/__nang bskyed rdzogs kyi sems 'dzin sna tshogs/__gsang ba rnam rtog gi 'phro 'du thams cad spangs nas rtog med kyi ngang la gnas par bya zhing des ni sgo gsum gnas pa dang*/__brtan pa dang*/__grol bar 'gyur ba ste/__'das rjes las/__gnas brtan grol ba'i gding thob nas/__phyi nang bya ba kun btang ste/__/zhes gsungs pa ltar ro/__/gnyis pa ni/__lus gnad seng ge glang chen drang srong tshul:__ngag gnad 'gro 'ong rlung ni dal bar bslab:__yid gnad yul la mi g.yo rtse gcig gtad:__sgo gnad sdaug phabs zur gyis gzir ba las:__zhes gsungs te/__sgo gsum la gnad bzhis bcun nas mngon sum gyi snang ba la 'jug par bya ste/__bzhi ni lus ngag yid sgo'i gnad do/__/de la dang po lus kyi gnad ni/__klong gsal las/__de yang lus ni sku gsum las/__rgyun du 'da' bar mi bya'o/__/zhes pa ltar/__chos sku'i bzhugs stangs seng ge lta bu dang*/__longs sku'i bzhugs stangs glang chen lta bu dang*/__sprul sku'i bzhugs stangs drang srong lta bu rnams byas pas gnas skabs su dang pos 'byung ba rang sar dag__/gnyis pas g.yo byed kyi rlung zin/__gsum pas drod bskyed cing 'byung ba snyoms par byed/__mthar thug sku gsum du grol te mya ngan las 'da' bar 'gyur ro/__/gnyis pa ngag gnad ni/__'das rjes las/__ngag ni bslab bya'i rim pa dang*/__/gnas pa brtan cing la yang bzla/__/zhes pa ltar smra ba nyung ba dang cung zad las mi smra ba dang brda tsam la brtan pas gnas skabs su 'khrul pa'i gtam 'gags pas nyon mongs mi 'phel/__mthar thug brjod med kyi don la reg cing sangs rgyas kyi gsung rdo rje'i klong du mya ngan las 'da' bar 'gyur ro/__/khyad par 'das rjes las/__rlung gnad shin tu dal la bslab/__/ces gsungs pas rlung dal ba ma brten na/__rlung gis rig pa spur nas mi zin pas phyi nang 'gro 'ong gi rlung ni dal bar bslab cing*/__de'i tshul yang*/__phyi nang rlung ni dal zhing mnyam/__/yid tsam phyi ru 'dur ba yis/__/rlung gi 'gro 'ong chad par 'gyur/__/zhes gsungs pas/__/rlung gi 'gro 'ong zad pas rtog pa'i 'phro 'du zad de dbyings rig g.yo 'gul med par sdod pa'i dgos pa yod do/__/gsum pa yid gnad ni/__thal 'gyur las/__sems ni dbyings la gtad pas 'grub/__/ces pas yul rkyen dang bral ba'i phyi'i nam mkha' stong sang nge ba de la dbang po mi g.yo bar rtse gcig mdung tshugs su gtad nas nam mkha'i dbus su sems thim 'gro ba lta bu'i _shes pas drag tu bcun pas nang gi dbyings rnam dag sgron ma rig pa stong gsal du lhag gis 'char bar 'gyur te/__des gnas skabs su rig pa'i ye shes mngon sum du mthong zhing*/__mthar thug lhag med du 'tshang rgya bar 'gyur ro/__/bzhi pa sgo'i gnad ni/__thal 'gyur las/__sgo ni sku gsum mig gis blta/__/zhes pa ltar chos sku'i gzigs stangs gyen du ldog te gtsug tor gyi rnam par blta ba/__longs sku'i gzigs stangs g.yas g.yon du zur gyis 'khrid de smyug ma bsrong ba lta bu/__sprul sku'i gzigs stangs phyed btsum cung zad thur la phab pa drang srong bsam gtan bsgom pa lta bu rnams gong gi 'dug stangs gsum dang rim par sbyar nas bya ste/__de dag gis phyi nang gi dbyings rig mthong ste 'khrul snang zhing khams su 'char bar 'gyur ro/__/gnyis pa dngos gzhi la lnga/__nyams su blang bya 'od gsal ye shes kyi thig le bshad pa/__de ji ltar nyams su blangs tshul bshad pa/__de ltar nyams su blangs ba la dngos po bcu tshang ba'i tshul gyis khyad par 'phags pa'i gnas bshad pa/__thun bzhi'i man ngag dang sbyar te nyams len gnad du bsnun pa/__bsnyen sgrub bzhir sbyar ba'i tshul gyis nyams su blangs pa'i 'bras bu bshad pas don bsdu ba'o/__/dang po ni/__snying dbus mi shigs zag med 'od gsal gdangs:__rang byung gsang ba shel sbug lam las 'char:__rgyangs zhags sgron ma'i rten las phyi dbyings su:__slong byed rkyen bral 'char dang sdud pa'i dus:__dag pa dbyings sgron 'od lnga'i mu khyud dbus:__thig le stong sgron mthing gsal dwangs pa la:__rdo rje lu gu rgyud kyi 'gro 'ong can:__gnad bzhi gzir ba las mngon sum gyi snang ba de gzhi gang las 'char na snying dbus mi shigs pa dwangs ma'i thig le 'od gsal rig pa'i ye shes nyid bum nang gi mar me ltar gsal ba la zer gdangs su 'char te/__klong gsal las/__rin chen lus kyi gnas de na/__/ngo bo stong gsal sku ru gnas/__/rang bzhin gsal 'tsher thig le 'od/__/thugs rje snang stong sgron mar gnas/__/zhes pa ltar/__ngo bo skur bzhugs pas ka dag gi dgongs pa dang mthun pa ni don/__rang bzhin 'od du bstan pas gsang skor lus dkyil dang mthun pa ni brda/__thugs rje sgron mar snang bas yang gsang snying tig dang mthun pa ni rtags so/__/lam gang du 'char na/__rang byung rdo rje sems dpa'i gsang ba'i lam rtsa ka ti shel sbug can zhes bya ba snying nas mig tu dar dkar gyi skud pa lta bur 'brel ba'i 'od rtsa'i lam las brgyud de 'char bas mig gi dbang po rgyangs zhags chu'i sgron me'i rten las mngon sum du snang*/__yul gang du 'char na/__phyi'i dbyings su 'char te nam mkha' stong pa me long dang 'dra bas snang ba'i go phye nas/__nang gi dbyings rnams dag sgron ma bdag po'i byad dang 'dra bar 'char bas sprin dang bsil bu sogs rnyog pa'i rdul slad byed kyi rkyen dang bral ba'i nam mkha' dwangs shing gsal ba nyid la/__snga dro nub dang phyi dro shar du blta ba'am/__'od gsal 'char sla ba'i ched du nyi ma 'char ba dang sdud pa'i dus kyi zer gnyis dang sbyar nas snga dro shar dang phyi dro nub tu blta/__tshul ji ltar 'char na/__rnam dag dbyings sgron nyid thog mar smin mtshams nas mthing ga khyab pa chen po'i 'od las rim gyis mched nas nam mkha'i 'ja' tshon lta bu 'od lnga'i mu khyud thig phran dang bcas pa'i nang du thig le stong pa'i sgron ma rdzing bur rdo bor ba'i ri mo ltar 'al 'ol las mthar thig le mthing gsal dwangs pa'i nang du rig pa rdo rje lu gu rgyud bdag po'i sems dang 'dra bar 'gro 'ong dal brel can mu tig gi phreng ba lta bu 'char bar 'gyur te/__sgron ma 'bar ba las/__mig gi rnam shes dag pa la/__gsal byed 'bar ba'i 'od zer lnga/__/mi 'gyur khyab pa'i tshul du yang*/__/mthing ga'i rang gdangs chen por gnas/__/'char byed snang ba ma 'gags pas/__/phyi yi yul la rnam par snang*/__/zhes dang*/__'char tshul yang seng ge rtsal rdzogs las/__dbyings ni dbyings kyi sgron ma la/__/rig pa lu gu rgyud du gsal/__/dbyings ni 'od kyi mu khyud la/__/rig pa sku lnga'i snang bar shar/__/dbyings dang rig pa ye shes gsum/__/'du 'bral med pa'i tshul du gsal/__/zhes so/__/tshul 'di'i gzhung gdams rgyas pa rnams su sgron ma rnam pa dgu dang drug dang bzhir gsungs pa'i snga ma la phyi ma rnams 'du zhing lam du bya ba dngos ni sgron ma bzhi po 'di dag yin pa dang*/__dgur dbye ba ltar na/__gnas pa gzhi'i sgron ma ngo bo rang bzhin thugs rje'i bdag nyid stong gsal rig pa'i snying po can kun khyab tu bzhugs pa dang*/__lam la nang tsit+ta sha'i sgron ma snying dwangs ma'i thig le brten pa'i gnas nas/__dkar 'jam rtsa'i sgron ma shel sbug can sogs ye shes 'od kyi rtsa lnga las 'od gsal gyi snang ba 'byung ba'i lam byas te/__mig rgyang zhags chu'i sgron ma la'ang 'byung ba 'dus pa'i rgyangs zhags mig gi dbang rten/__dbang po 'dus pa'i rgyang zhags gzugs snang 'dzin nus pa'i mig shes/__ye shes 'dus pa'i rgyangs zhags 'od rtsa'i sgo dngos 'tshogs pa'i mthu las/__phyi ru dbyings rnam dag gi sgron ma mthing ga khyab pa chen po 'od lnga'i ra bar thig le stong pa'i sgron ma zlum skor mu khyud can thog mar gnyis 'brel sum 'brel sran ma tsam pa nas mthar grangs las 'das shing rgya che bar 'char ba dang*/__de dag gi khyab byed du shes rab rang byung gi sgron ma rang rig ye shes je gsal je brtan du song ba las/__grol sa bar do dus kyi sgron mar thim lugs brgyad kyis gding thob ste/__grol gzhi mthar thug 'bras bu'i sgron ma nang dbyings ka dag gzhon nu bum sku khyad chos drug ldan gyi gdangs rtsal lhun grub 'pho ba chen po rdo rje'i skus 'khor ba ji srid du gzhan don mdzad par gsungs so/__/gnyis pa ni/__stong pa'i dbyings su rig pa'i gzer bcug ste:__bsam gyis mi khyab gzung 'dzin bral ba'i ngang :__yid mig rlung gsum rtse gcig mnyam bzhag pas:__nang du shes rab rang byung sgron ma'i nyams:__stong gsal bsam brjod spros las 'das pa 'char:__ces gsungs te/__de lta bu'i dbyings rig de la goms par byed pa'i tshul yang*/__phyi nang gsang ba'i nam mkha' stong pa'i dbyings su sgo gsum gyi gnad gcun cing mig 'bras mi 'gul bar rdo rje lu gu rgyud ar la gtad pas rig pa'i gzer bcug ste ye shes kyi rang gdangs bsam gyis mi khyab pa'i dbyings snang shar ba la phyi ru gzung yul dang nang du 'dzin pa'i shes pas mthong bya mthong byed kyi gnyis rtog dang bral ba'i ngang du/__nang 'char gzhi sems yid/__phyi 'char sgo mig dbang*/__bar skyod byed rlung gi 'gro ldog gsum po 'jug pa'i gnad la rtse gcig tu dril nas mnyam par bzhag cing rang so bzung bas/__yul dang yul can dbyer med du 'dres pas 'od gsal gyi snang ba smin mtshams nas dral te gsal 'grib med par 'char ba sogs snang bzhi'i snang shes kyi nyams rnams rim gyis skye ba dang*/__de la brten nas nang du shes rab rang byung gi sgron ma gsal brtan gong 'phel du 'gro ba'i nyams stong gsal nam mkha' dwangs pa'i dkyil lta bu/__blos bsam pa dang ngag gis brjod mi nus pa spros pa kun las 'das pa rang babs shugs 'byung du 'char bar 'gyur ro/__/des gnas skabs su rig pa'i ye shes mngon sum du gsal bas ma rig pa dang bral/__tshe'i dus byas kyang sprul pa'i skur grol/__mthar thug snang bzhi mthar phyin nas lhag med du 'grub par 'gyur ro/__/gsum pa ni/__ye nas shar ba'i dbyings rig rang byung lha:__'bral med bsgoms pas sku gsum rang dbang rdzogs:__sngags dang phyag rgya ting 'dzin rgyun mi 'chad:__ma bkod dkyil 'khor spro bsdu bral bar shar:__'ja' zer thig le'i sgrub cing mchod pa dang :__rlung sems rang dengs phrin las 'byams su klas:__gnad las mi 'da' dam tshig sdom pa'i phul:__ces gsungs te/__ye gdod ma nas chos nyid kyi rgyan tu rang shar ba'i dbyings 'od lnga'i thig ler rig pa rdo rje lu gu rgyud ma bcos rang byung gi lha snang de kho na nyid lta ba'i rgyal po ste/__dbyings rig 'du 'bral med par sgom pa'i spyod pas chos zad chen por la dor bas sku gsum rang chas lam du snang ba'i dbang gi rim pa rdzogs la/__rtog bcas kyi rlung 'gro 'ong zad pa'i rdo rje'i bzlas pa dang*/__snang zhen sku dang thig le'i phyag rgyar 'ching ba dang*/__snang bzhi gong 'phel gyi nyams las gzhan tu mi g.yo ba'i ting nge 'dzin nyin mtshan bsu skyel rgyun mi 'chad pa dang*/__blo'i 'du byed kyis ma bkod pa'i thig le tshom bu'i dkyil 'khor spro bsdu'i spros pa dang bral bar rtag tu shar cing*/__rang snang gi zhing khams kun tu khyab pa'i 'ja' zer thig le'i bkod pa'i rnam 'gyur bsam las 'das pas 'khrul snang btsan thabs su 'gogs pa'i don sgrub cing dag pa rab 'byams kyi gnas su mchod pa dang*/__gzhi snang gi rtsal la yid dpyod kyi 'dzin pas 'khrul pa kha brgyud pa'i rlung sems zag med ye shes kyi dbyings su rang bzhin gyis dengs pas don gnyis phrin las rol pa 'byams su klas shing*/__bsrung mtshams med pa'i gnad dang gzung 'dzin rgya las grol ba'i phyal ba las mi 'da' bar chos zad gcig pur skyel ba'i dam tshig dang lhun grub chen po'i sbubs su chos kun sdom pa'i phul du phyin pa'o/__/bzhi pa ni/__dge sbyor srang 'jug thun bzhi'i man ngag gis:__bskyed rdzogs dbyer med khor yug 'od gsal ngang :__zhes gsungs te/__dud 'gro rmu rgod 'dul thabs la mkhas pas lam srang du bde ba rgyur gzhug pa ltar sems rtog kha yan 'khrul pa'i yul la mi 'chugs par dge sbyor gyi lam srang du 'jug pa'i thabs/__nyin mo snang ba rang rgyas 'debs pa/__srod la dbang po gnas su bsdu ba/__nam gung shes bya bum par gzhug pa/__tho rangs ye shes rang gsal gdab pa ste nyin zhag gcig la thun gyi cha bzhir bgos pa'i rnal 'byor zab mo gnad kyi man ngag gis yengs 'khrul med pa'i nyams len la 'bad brtson bskyed na ring por mi thogs par gzhir gnas kyi bskyed rdzogs dbyer med nyin mtshan khor yug tu 'od gsal chen po gcig gi ngang du gnas par 'gyur ro/__/lnga pa ni/__mdor na sgo gsum sgo yul rlung rig gi:__gnad kyi bsnyen pas chos nyid rol pa'i rtsal:__dbang po'i mngon sum snang ba nye bsnyen te:__'od dang zer thig sku yi snang bar bcas:__nyams snang gong du 'phel ba'i sgrub pa dang :__snang srid sku dang zhing du yongs brdal ba:__rig pa tshad phebs sgrub pa chen po yis:__chos zad blau 'das gdod ma'i dngos grub thob:__gzhi las 'phags pa'i gzhi snang thig ler grol:__ces gsungs te/__sngar bshad pa'i don de dag mdor bsdu na/__thabs sgo gsum 'khrul 'khor gyis gcun pa dang sgo mig yul phyi dbyings rlung dal zhing rig pa ar la gtad pa'i gnad kyi sbyor bas lhun grub kyi 'od gsal bsnyen pas/__thabs byung snang bzhi'i nyams rim par 'char te thog mar chos nyid ka dag gi gzhi las gzhi snang du rol pa'i rang rtsal dbang po'i mngon sum du snang ba ni nye bar bsnyen pa ste/__de'ang dbyings kyi rtags su 'od khyim/__ye shes kyi rtags su thig le/__sku'i rtags su lu gu rgyud/__thugs rje'i rtags rang gsal/__ngo bo'i rtags mi rtog pa'i ye shes dus gsum 'pho 'gyur med pa'i dgongs pa mnyam nyid gzhi rdzogs su gyur pa'o/__/de nas dbyings r-ig smin mtshams dang bral te dbang po'i mngon sum du gsal zhing*/__dbyings snang 'od kyi rang bzhin de'ang ma nges pa'i gzugs dbyibs du ma dang*/__bkrag la 'tsher ba'i zer thag__/thig le je gsal je 'phel du gyur pa'i nang du rdor sems la sogs pa phyed sku'am sku rkyang re shar nas 'gul 'phrig med pa ni nyams snang gong du 'phel ba'i sgrub pa yin pa dang*/__dbyings kyi snang bas thams cad la rgyas thebs pas sa chu me rlung gi snang ba rang dag ste/__'od gsal chen po'i snang ba 'byams klas pa'i dbyings/__thig le re re'i nang du rigs lnga yab yum gyi tshom bu lnga tshan lnga'i dkyil 'khor tshad med par 'char zhing snang srid thams cad sku dang zhing khams kyi rang bzhin tu yongs su brdal ba rig pa skur smin pa'i tshad la phebs pas ma bsgoms kyang 'gyur ba med pa sgrub pa chen po'i grub 'bras/__phyi snang ba'i 'phel zad/__nang sgyu lus kyi chos zad/__gsang ba rtog tshogs kyi sems zad pas 'phrul snang gi chos thams cad rang zad de snang dang mi snang du 'dzin pa'i blo las 'das shing ka dag gdod ma'i btsan sa zin pa'i dngos grub thob par 'gyur te/__de'ang gnas lugs thog ma'i spyi gzhi las 'phags pa'i lhun grub kyi gzhi snang 'gyur ba med pa'i thig le chen por skad cig gcig gis rnam par grol nas/__nang gsal sku dang ye shes 'du 'bral med pa'i dgongs pa dus gsum 'pho 'gyur med pa mngon tu 'gyur ro/__/de ltar yang thal 'gyur las/__chos nyid mngon sum snang ba yis/__/yid dpyod 'dzin pa'i mtha' las 'das/__/gong du 'phel ba'i nyams snang gis/__/'khrul pa'i snang ba nub par byed/__/rig pa tshad pheb snang ba yis/__/sku gsum rtogs pa'i lam snang 'das/__/chos nyid zad pa'i snang ba yis/__/khams gsum 'khor ba'i rgyun thag chod/__/ces so/__/gsum pa mjug gi bya ba la gnyis/__dngos dang*/__zhar byung grol tshul bshad pa'o/__/dang po ni/__lam gyi yan lag mtha' rten man ngag gis:__nyams len gzhi things grol tshad mngon du 'gyur:__ces gsungs te/__'od gsal snang bzhi nyams su len pa'i lam gyi yan lag tu gal che ba ni/__klong gsal las/__mtha' rten man ngag rnam pa bzhi/__/gong ma'i rgyab tu med thabs med/__/ces gsungs pa ltar/__/mi 'gul ba gsum gyis gzhi bca' ba/__sdod pa gsum gyis tshad bzung ba/__thob pa gsum gyis gzer gdab pa/__gding bzhi'i grol tshad bstan pa rnams te/__/dang po ni/__lus bzhugs stangs gsum las mi 'gul ba dang*/__mig gzigs stangs gsum las mi 'gul ba dang*/__rig pa 'od gsal kyi snang ba mngon sum du mthong ba las mi 'gul bar bya'o/__/gnyis pa ni/__dbyings rig brtan pa'i tshad du 'byung ste/__phyi snang ba skyod byed kyi rlung zad pas dbyings rig 'gro 'ong med par sdod/__/nang phung po skyod byed kyi rlung zad pas lus g.yo 'gul med par sdod/__gsang ba rtog pa skyod byed kyi rlung zad pas rnam rtog 'gyur mi srid par sdod pa'o/__/skabs 'dir tshad rmi lam gyis bzung ba dang*/__rtags lus ngag yid gsum la 'char ba gnyis kyang 'byung bar gsungs shing*/__phyi ma la snang bzhi re rer rtags gsum gsum ste bcu gnyis su dbyer yod do/__/gsum pa ni/__skye ba dang 'jug pa dang rlung sems la rang dbang thob pa ste/__de'ang ka dag khregs chod du grol ba nam mkha' dang mkha' 'gro'i 'chi lugs/__lhun grub thod rgal du grol ba me phung dang rig 'dzin gyi 'chi lugs rnams kyis so/__/bzhi pa la/__yar gyi gding gnyis ni/__myang 'das kyi yon tan thos kyang thob tu re ba dang*/__ma thob kyis dogs pa med de/__rang rig las gzhan pa'i sangs rgyas med par rtogs pa'i phyir ro/__/mar gyi gding gnyis ni/__'khor ba'i sdug bsngal thos kyang mi ltung du re ba dang*/__ltung gis dogs pa med de/__rang rig ye nas 'khrul pa med par shes pas 'khor bar 'khyams mkhan ma grub par thag chod pa'i phyir ro/__/de dag gi dgos pa ni/__dang pos rlung sems gnad la phebs te nyams len gyi gzhi things/__gnyis pa drod tshad kyis mtshams phyed/__gsum pas zag bcas mi snang ba'i 'pho chen rdo rje'i sku mngon tu 'gyur/__bzhi pas mi ldog pa'i ye shes kyi tshad bzung bar byed do/__/gnyis pa ni/__gal te tshe 'dir grol ba ma thob na:__'chi kha bar dor dbyings rig sbubs su 'jug:__chos nyid bar dor rang snang rang ngor grol:__srid pa bar dor sprul sku'i zhing du bgrod:__ces gsungs te/__brtson 'grus dang skal ba dman pas skye gnas rang bzhin gyi bar do'i tshe dus 'dir gdod ma'i sa la gdos bcas zad pa'i rnam par grol ba ma thob na/__dbang po rab 'chi kha ma'i bar dor sngar shes pa'i gdams ngag rnams gsal btab ste/__'byung lnga rim gyis thim nas nam mkha' dbyings rig la thim pa'i tshe srog lnga snying dbus rig pa'i sbubs su 'jug par byas pas rig pa nyid gzhi las ldog ste ka dag gi sa la phyin pas bem rig bral ba dang 'tshang rgya ba dus mnyam pa tshes bco lnga'i zla ba nub pa dang nyi ma'i snang ba 'char ba dus mnyam pa bzhin no/__/dbang po 'bring 'chi kar ka dag gi grol sar mi snyogs na gzhi las 'phags pa'i chos nyid du snang ba'i bar dor 'od dang thig le zhi khro'i tshom bu zer thag sgra skad sna tshogs su shar ba thams cad rang snang las gzhan tu med par yid ches nas ma pang du bu 'jug pa ltar nges pa'i shes pa brtan por gnas pas skad cig dang por rang ngo shes/__gnyis par shes thog tu grol/__gsum par grol thog nas ka dag gi dbyings su thim par 'gyur ro/__/dbang po tha ma ye shes bzhi sbyor gyi snang ba la 'khrul pas gzhan tu rtogs na de dag yal ma thag tu ming gzhi 'dus pa'i phung po brdzus skyes yid kyi lus su grub nas 'khrul snang ci'ang srid pa'i bar do la 'khrul pa rmi lam tsam du shar na'ang*/__chos 'di'i sgo mthong nas the tshom med pa'i mos pa dang brgyud pa'i bla ma rnams kyi thugs rje'i stobs las bar dor rang ngo shes pa'i tshe rang bzhin sprul pa sku'i zhing yid la byas pas rmi lam sad pa'i cha tsam la de dag tu bgrod cing pad+mo la brdzus te skyes/__srid mtha'i byang chub sems dpar gyur te ston pa longs spyod rdzogs sku las chos nyan pas bden pa mthong ba dang dbang dang lung bstan pa thob nas gdod ma'i zhing du 'tshang rgya bar 'gyur ro/__/rtsa ba'i sa bcad bzhi pa gegs bsal ba'i rim pa la gsum/__bstan _bshad _bsdu ba'o/__/dang po ni/__de ltar dbang bzhi bsnyen sgrub yan lag bzhi'i:__lam mchog phyi nang gsang ba'i gegs sel ni:__zhes gsungs te/__de ltar rgyud smin par byed pa dbang bzhi dang*/__smin nas grol bar byed pa bsnyen sgrub yan lag bzhi'i lam mchog la zhugs pa de'i tshe tshong pa nor can la phas kyi rgol bas glags lta ba bzhin du phyi nang gsang ba'i bar du gcod pa 'byung ste/__sdud pa las/__theg par gsar du zhugs pa'i sems can blo chung ba/__/gang zhig dkon pa'i rin chen 'di ni ma rnyed par/__/de la bar chad bya phyir bdud ni spro bar 'gyur/__/ces so/__/del gegs gang zhig byung yang de dag sel byed thabs kyi rim pa khas drag can gyi dpung gi skyel ma dang mtshungs pa so so'i gnyen po bsten pa'i tshul ni 'di lta bu'o/__/gnyis pa la gnyis/__spyi dang*/__bye brag go__/dang po ni/__don la bar du gcod bya gcod byed kun:__thams cad bden med sbrul mdud bzhin grol phyir:__spang blang gnyen po'i phyogs las ring 'das kyang :__dang po'i las can blo rtog sbyang ba'i slad:__ces gsungs te/__don dam bden pa'i rang ngo la bar du gcod bya bdag dang gcod byed gegs kun dang*/__gcod pa'i las thams cad bden par grub pa rdul tsam yang med de sbrul gyi mdud pa bzhin gdod nas rang bzhin gyis grol ba'i phyir/__spang bya mi mthun pa'i phyogs dang blang bya mthun pa'i phyogs dang bsten bya gnyen po'i phyogs kun las ring du 'das kyang*/__kun rdzob bden pa la bsten pa'i lam zhugs dang po'i las can byis blo'i kun tu rtog pa'i 'khrul 'khor sbyong ba'i slad du thabs 'di dag bsten par bya'o/__/gnyis pa la bzhi/__phyi 'byung ba lus kyi gegs sel/__nang bar chad bdud kyi gegs sel/__gsang ba ting 'dzin sems kyi gegs sel/__thun mongs nyams grib rkyen gyi gegs sel lo/__/dang po rgyu rkyen 'bras bur ldan pa'i nad bsal tshul ni/__'byung ba lus 'khrugs nad kyi gegs sel ni:__kun gzhi'i bag chags bdag 'dzin rgyu yis bsags:__rnam rtog gis bslangs bzhi brgya rtsa bzhi'i nad:__thams cad dug lnga de yang rang gi sems:__sems nyid spros bral rjen pa'i rang ngo bskyang :__re dogs 'khu 'phrig bcad la gang dgar bor:__hU~M gis bsdus la thad kar zung rngu dbyung :__rlung ro bsal zhing shes pa rnal du dbab:__ces gsungs te 'byung ba bzhi las grub pa'i lus la 'byung ba khod ma snyoms te 'khrugs pa las byung ba'i nad rigs rnams kyi gegs sel ba'i thabs/__gzhi bag chags sna tshogs pa'i kun gzhi'i steng du dug gsum bag la nyal ba la/__bdag tu 'dzin pa'i nye bar len nam rgyu yis las bsags pas nyon mongs kun nas ldangs pa'i rnam rtog gis slong ba'i rkyen byas te/__'bras bu dug gsum rnam par gyur pa las byung ba'i kun brtags gdon gzhan dbang sngon las yongs grub tshe ltar snang 'phral gyi nad bzhi re rer brgya rtsa gcig re ste bsdams pas bzhi brgya rtsa bzhi'i nad du smin nas lus sems la zug rngu'i tshor bas yongs su gdung ba thams cad bcos pa'i thabs tha mal ba ltar mo gto sman dpyad la re ltos mi 'cha' bar bdag 'dzin gyi 'khri ba bcad cing re dogs kyi 'phrang bsal dgos te/__nad kyi rgyu 'dod chags kyis rlung bskyed pas mtshon dug lnga las byung*/__dug lnga po de'ang rang gi sems 'khrul pa'i rang rtsal las gud na med cing*/__sems nyid gdod nas skye rga na 'chi'i spros pa dang bral ba yin par shes nas/__bdag 'dzin blos btang*/__gnyis 'dzin gyi re dogs bcad de rgyu lhan skyes kyi nad rtsad bcad pas 'bras bu kun brtags nad rang bzhin gyis 'gags par 'gyur la/__bcos pa'i thabs rab ngang la bzhag pa ni/__nad zug dang bdag rtog la spang len med par zung 'jug rig stong rjen pa'i rang ngo rtse gcig tu bskyangs pas rgyu ma rig pa rig pa'i ye shes kyis bcom/__rkyen nyon mongs dbyings su log__/mtshams sbyor rnam rtog mi rtog par thim par 'gyur la/__'bring ro snyoms bya ba ni/__gong gi rtogs pa mi chun na mi na ba'i re ba dang na ba'i dogs pa'i 'khu 'phrig rtsad nas bcad la lus snang bdag 'dzin dang bcas pa ltos med gang dgar ling gis bor/__des kyang ma sel na tha ma dmigs pas bcos pa ni/__hU~M gi sgra gdangs rlung sems dril bas nad kun gang nas gzer ba'i dmigs gcig tu hU~M yig gi rnam par bsdus la thad kar gyi lus las zug rngu hU~M gi rnam par phyir dbyung bas thag ring por yal bar mos la rlung ro yang yang bsal zhing shes pa la na'o snyam pa'-i 'dzin stangs bor la rang bzhin bde lugs kyi rnal du dbab par bya'o/__/gnyis pa ni/__bar chad bdud dang bgegs kyi gegs sel ni:__pho mo ma ning bgegs dang bdud chen po:__ji ltar snang yang de bzhin ma grub ste:__rang gi grib ma sha zar 'khrul pa bzhin:__gsal stong zung 'jug gnas lugs phyir shor bas:__gzung 'dzin rags pa'i dbang gis de ltar snang :__ngar 'dzin zhen pas 'khu 'phrig sna tshogs skye:__gzhi rtsa bcad pas rdzun phug rang sar brdib:__sdug bsngal kun zhi yid bde khongs nas 'char:__des kyang ma chod phung po tshogs su 'bul:__bdag 'dzin blos btang snyems med gang dgar nyal:__rjes thob byang chub sems bskyed smon lam gdab:__ces gsungs te/__thar pa sgrub pa la bar chad byed pa'i bdud ris kyi lha dang 'byung po bgegs rigs rnams kyi gegs sel ba'i thabs ni/__spyi'i bdud nyon mongs phung po 'chi bdag lha'i bu'i bdud bzhi dang*/__lha bdud kyi 'khor 'jig rten chen po bzhi sogs bdud rigs kyi yi dwags sum cu rtsa drug gi 'khor du gtogs pa bsam gyis mi khyab pa rnams dang*/__khyad par gyi bdud 'byung po log 'dren sogs phyi/__rnam rtog khu 'phrig sogs nang*/__grub rtags rloms sems sogs gsang ba/__re re la'ang drug re ste bco brgyad kyi dbye bar mdo sde rin po cher gsungs pa de dag bsdu na/__zhe sdang 'dod chags gti mug gsum gyi rang rtsal pho mo ma ning gi rigs gyur logs 'dren gyi bgegs dang bar gcod kyi bdud chen po rnams su shar bas de gsum du 'du la/__rnam pa bzang ngan byed las cho 'phrul ji ltar snang yang don la de bzhin du cung zad tsam yang ma grub ste gzhi med pa'i phyir/__dper na rang gi grib ma la sha za srin por 'phrul nas dngangs skrag skyes pa bzhin no/__/bdud bgegs kyi ngo bo ni/__zhi ba lhas/__'jig rten dag na 'tshe ba gang yod dang*/__/'jigs dang sdug bsngal ji snyed yod gyur pa/__/de kun bdag tu 'dzin pa las byung na/__/'dre chen des ko bdag la ci zhig bya/__/zhes gsungs pa ltar thams cad kyi rtsa ba ngar 'dzin pa'i sems 'di yin la/__de'ang gsal stong zung 'jug tu gdod nas yod pa'i rang ngo ma shes te gsal cha phyi rol du shor ba la gzung ba'i yul du byas/__de la 'dzin byed kyi shes pa skyes nas bdag 'dzin je rags su gyur pa'i dbang gis gsal cha zhe sdang stong cha 'dod chags zung 'jug gi rang bzhin gti mug tu song*/__de las kyang nyon mongs pa brgyad khri bzhi stong byung zhing de dag gi rang mdangs med snang glo bur ba'i gzugs brnyan mtha' yas pa de ltar snang ba ste rang gi sems ni bdud ces bya/__/rang gi sems ni bgegs yin no/__/zhes so/__/'jug pa'i rgyu mang yang gtso bo lam la brtson 'grus rtsom pa las 'byung bar gsungs te/__'jam dpal rnam par 'phrul pa'i mdo las/__byang chub sems dpa' rnams kyi bdud kyi las ni brtson 'grus las 'byung bar rig par bya'o/__/de ci'i phyir zhe na/__mi brtson pa la ni bdud kyis ci zhig bya ste de nyid bdud yin pa'i phyir ro/__/zhes so/__/'jug pa'i nyer len ni/__thog med nas ngar 'dzin pa la zhen pa'i rgyun gyis rkyen phra mo la brtan nas khu 'phrig sna tshogs pa skye bas nam mkha' mdzod kyis zhus pa las/__dper na bug pa yod pa las rlung 'jug pa bzhin tu rnal 'byor pa'i sems la skyon gang dang gang la yod pa de la bdud 'jug cing glags rnyed do/__/de bas na byang chub sems dpa' nyon mongs pa'i skyon med par bya'o/__/zhes so/__/bdud kyis byin gyis brlabs pa'i rtags dang spyod yul bdud kyi las sogs rgyas par gsungs pa ni mdo sde rnams dang gzhung gzhan las shes pa gal che'o/__/de dag sel ba'i thabs rnal 'byor pa rab kyis phyi rol ltar snang ba'i bdud bgegs de dag gang las byung ba'i gzhi rtsa sems thog tu bcad pas/__rang sems 'drer 'dzin las phyi rol tu bden par ma grub par thag chod/__'drer 'dzin ngo bo la bltas pas skye 'gag gnas gsum dang bral bar rtogs nas 'khrul pa'i rdzun phug rang sar brdibs te rnam rtog gi lam srang chad pas re dogs sdug bsngal gyi rgyu 'grul kun rtsa ba nas zhi zhing ltas ngan g.yang du khug ste yid bde'i nyi ma khong nas 'char bar 'gyur ro/__/des kyang cho 'phrul ma chod pa'am rnal 'byor pa 'bring gis bdud bgegs ched du bkug la phung po 'dod yon gyi tshogs su dmigs te 'bul/__lus gzan du bor la bdag gces 'dzin blos ling gis btang*/__yang khu 'phrig gi snyems byed rtog pa rdul tsam med par ci 'ong ba shog snyam du 'jigs pa'i dur khrod dang*/__lha 'dre drag po'i rgyu srang sogs gang dga' bar ltos med du nyal bas cho 'phrul gyi slong rnams tshar tshad dang chod tshad du gyur nas bar chad dngos grub kyi mchog tu 'gyur ro/__/de dag gi rjes thob dang rnal 'byor pa tha mas bdud bgegs pha mar shes pas byams snying rje drag tu bskyed cing de dag sangs rgyas kyi sa la 'god pa'i phyir lam la brtson par 'dod pa'i byang chub tu sems lhag par bskyed la bdag gzhan brje ba'i btang len dang theg pa chen po'i tshul dang mthun pa'i smon lam rgya chen po gdab pa dang*/__gzhan yang bla ma dkon mchog la snying thag pa nas blo khel ba'i dad gus dang*/__bsod nams kyi tshogs rgya chen po gsog pa rnams kyis kyang bdud bgegs kyi nyer 'tshe mtha' dag zhi bar 'gyur te/__sdud pa las/__rgyu rnams bzhi yis byang chub sems dpa' mkhas stobs ldan/__bdud bzhis thub par dka' zhing skyod par mi nus te/__/stong par gnas dang sems can yongs su mi gtong dang*/__/ji skad smras bzhin byed dang bde gshegs byin rlabs can/__/zhes pa ltar ro/__/gsum pa la gnyis/__mdor bstan/__rgyas bshad do/__/dang po ni/__khyad par ting 'dzin sems 'khrugs gegs sel ni:__bying rgod nyams gsum don la ma grub kyang :__rnam pa mi 'gags sgyu mar shar ba'i tshe:__zhes gsungs te/__rnal 'byor pa la khyad par du gces pa ting nge 'dzin la mnyam par 'jog pa'i tshe khams 'dus pa las sems 'khrugs pa'i gegs 'byung bas de sel ba'i thabs shes pa ni gal che ste/__grub thob lce sgom pas/__nyams rtogs cung zad skyes gyur kyang*/__/shes rab blo gros zhan pa dag__/so mi thub cing rkyen gyis 'phrog__/de lta bu yi gang zag la/__/skyon dang gegs sel shin tu gces/__/zhes gsungs pa ltar ro/__/de'ang ting nge 'dzin la mi mthun pa'i nyams kyi gegs du ma mchis shing*/__de dag 'byung ba'i rgyu/__slong ba'i rkyen/__gegs su 'gyur tshul/__lam du btang lugs sogs mang du yod kyang mdor bsdu na/__sems bying ba/__rgod pa/__phan pa'i nyams/__gnod pa'i nyams/__phan gnod med pa'i nyams gsum ste lngar 'du la/__de dag don la bden dngos rang mtshan tu ma grub kyang rkyen la brtain nas so so'i rnam pa mi 'gags par glo bur ltar snang sgyu ma'i gzugs brnyan sems kyi me long du shar ba'i tshe 'di ltar lam du btang bar bya'o/__/gnyis pa la gsum/__bying ba/__rgod pa/__nyams kyi gegs sel lo/__/dang po ni/__bying na lus kyi chun btsal 'khrul 'khor bya:__lta stangs nam mkhar gtad cing gsal ngar 'don:__ces gsungs te/__'di la gsum/__rig pa'i dwangs cha med pa'i bying ba dang*/__gsal nyams kyis ma zin pa'i rmugs pa dang*/__gnyid dang 'dres pa'i 'thibs pa ste gsum kar lus grims par bsgrims te cha cha nas chun btsal la 'khrul 'khor skabs su gang bab bya/__lta stangs nam mkhar gtod cing shes pa gsal ngar 'don/__sems snying ga sogs gnas gcig tu rtse gcig mdung tshugs su bzung ba dang zas bcud can spang zhing gos srab tu btang la snang g.yel che sar sdod pa sogs gseng ba'i thabs rnams bya'o/__/gnyis pa ni/__rgod na khong klod shes pa lte bar gtad:__zhes gsungs te/__'di la'ang gsum las/__shes pa yul la 'phro zhing gnas mi btub pa'i 'phro ba/__gnas cha gtan nas med par rtag tu g.yeng ba'i rgod pa bkol tu mi btub pa yul ma nges par pra yas pa'i 'thor ba rnams dang*/__'gro ba'i bye brag sems gnas pa snyam byed pa la ma tshor bar 'phro ba'i 'og 'gyu dang*/__gnas pa la der 'dzin zhugs pa'i rang 'gyus sogs yod cing*/__kun la'ang lus sems kyi khong klod la shes pa lte bas mtshon dma' sar gtad/__lta stangs dma' bar smad cing shes pa 'jur la mi 'debs/__zas bcud can bza' zhing gos dro ba dang khyim 'thibs sar sdod pa sogs gnon pa'i thabs bya'o/__/gsum pa ni/__bde gsal mi rtog zhen med lam du btang :__rtsub pa'i nyams skyes bden med rang grol bskyang :__bar ma'i nyams kun dgag sgrub med par bzhag:__thams cad sems nyid gcig pu yin shes nas:__blang dor med par rig pa'i ngang bskyang ngo :__zhes gsungs te/__phan pa'i nyams lus yod du mi tshor zhing sems bde bar nub pa lta bu'i bde nyams dang*/__khams gsum gyi spyod tshul mthong snyam byed pa'i gsal nyams dang*/__stong nyid mtha' dbus med pa nam mkha' lta bu'i mi rtog pa'i nyams gsum skyes pa dang*/__gzhan yang zhen log mos gus snying rje sogs gting nas lhongs pa'i tshe de'i ro myong na nyams na bun 'dra ba yal/__'phro bcad na 'phel ba'i rgyud chad/__rang nyid gzhan dbang du 'gyur ba'i sa bon thebs pa yin pas de la dga' rloms dang zhen 'dzin med par nyams kyi sna mi bskyil bar rang ngor bltas te mnyam par bzhag la lam du btang*/__rtsub cing gnod pa'i nyams na tsha zug gzer snying rlung khams 'dus la sogs pa skyes pa'i tshe sems zhums nas de'i dbang du shor na tha mal pa las lod pas thams cad bden med sgyu mar shes pa dang tshor ba mi bde bar 'du shes pa'i rang ngo la bltas nas gzhi med rtsa bral du grol ba'i nyams myong de nyid bskyang ngo*/__/phan gnod med pa bar ma'i nyams/__kun gzhi la 'khor 'das kyi sa bon bag nyal du gnas pa dang*/__rdo rje'i lus la rtsa yig rlung thig tu gnas pa rnams lus gnad dang ting nge 'dzin gyis gcun te bslangs nas 'khor 'das kyi nyams snang sna tshogs su 'char ba'i tshe/__rjes su 'brang na bdud 'jug__/btang snyoms bzhag na lam du mi lhongs pas ji ltar byung ba de kun la skyon tu bzung ba'i dgag pa dang yon tan tu 'dzin pa'i bsgrub byar mi blta bar zhen 'dzin med par rang grol chen por bzhag pas lam du 'gyur la/__gegs ji lta bu zhig byung yang thams cad rang gi sems nyid gcig pu'i cho 'phrul yin par shes nas bzang snyam gyi blang bya dang ngan rtog gis dor bya med par bzo med rig pa'i ngang rang babs su bskyangs pas skyon rnams yon tan tu 'gyur te/__man ngag rin spungs las/__gnas lugs rtogs pa'i thag chod cing*/__/nyams myong rig pa'i gzhi 'dzin pas/__/ci snang ci byung chos nyid rtogs/__/skyon rnams yon tan bsgyur shes shing*/__/bar chad dngos grub bsgyur shes na/__/skyon dang gegs ni ci byung yang*/__/rnal 'byor lam gyi grogs su che/__/zhes so/__/bzhi pa la gnyis/__nyams grib byung ba'i rtags/__de sel ba'i thabs so/__/dang po ni/__thun mong mos gus snying rje shes rab sogs:__ji ltar bsgoms kyang bogs med le lo dang :__nga rgyal phrag dog gti mug mun gtibs na:__phal cher dam tshig nyams las byung ba'i phyir:__ces gsungs te/__phyi nang gsang ba thun mong du nyams grib kyi rkyen las byung ba'i gegs kyis bla mar mos gus dang sems can la snying rje dang*/__zab mo rtogs pa'i shes rab dang*/__sogs khong nas rim gnyis kyi ting 'dzin gyis mtshon rgyud la bskyed par bya ba gang yang rung*/_brtson 'grus chen pos ji ltar bsgoms kyang yar bskyed thon pa'i bogs med cing le lo snyom las kyi dbang du shor ba dang*/__mos gus kyi 'gal zla nga rgyal/__snying rje'i 'gal zla phrag dog__/shes rab 'gal zla gti mug mun pa shugs kyis gtibs te bsgom bya'i snang ba sgrib par byed pa na/__sel ba'i thabs ni spyir gnas mal zas gos dam nyams rme yug shan pa sogs grib can dang 'grogs shing bsten pa las byung bas de dag spang zhing khrus dang grib sel sogs kyis zhi bar bya dgos kyang*/__phal cher sgrub pa po rang nyid rtog pa rtsing ba'i skyon gyis dam tshig nyams chags su gyur pa las byung ba'i phyir de bshags pa'i thabs la 'bad do/__/gnyis pa la gnyis/__spyi dang khyad par gyi bshags thabs so/__/dang po ni/__nyams pa mthol bshags slan chad snying nas bsdam:__nyams dang mi 'grogs nyams pa'i zas mi za:__gnas su mi sdod sgo gsum rnal du dbab:__ces gsungs te/__de'ang gsang sngags kyi dam tshig nyams pas tshe 'dir mi 'dod pa du ma bskyed/__lam la bar du bcad de rdo rje'i dmyal bar zang thal du 'gro bar gsungs pas khe nyen shin tu che ba'i phyir nyams pa'i nyes pa phra mo tsam byung yang de ma thag tu bshags yul bla ma dngos sam rtsa gsum rgyal ba rab 'byams yid la byas te gsang por smra bas mthol zhing 'gyod pa drag pos bshags te slan chad de lta bu mi bgyid pa snying thag pa nas bsdam/__de'ang nyes pa gsang na sdig pa'i sa bon dang g.yo sgyu'i chu lud 'dzoms pas je 'phel du 'gro zhing ma sbas par bsgrags na mi 'phel zhing stobs bri ba dang*/__snying nas gnong 'gyod kyis bshags na las la rang bzhin ma grub pas 'dags par mi 'gyur ba med la/__bshags pa'i tshul stobs bzhi dang ldan pas bshags tshig rgyud lung rnams nas 'byung ba gang rung brjod la 'phral 'phral bshags bsdom bya/__sngags kyi dam tshig gnyan drags pas gzhan gyi nyams grib rang la 'go ba'i gnas yod pa'i phyir dam tshig nyams pa'i mi dang lung pa gcig gi chu la btung mi rung bar gsungs pas dam nyams dang gnas gcig tu sdod pa sogs bshes 'dris su mi 'grogs shing nyams pa'i rgyu las byung ba dang lag gis ster ba'i zas kham gang yang mi za/__dam nyams dngos su yod pa'i gnas su lta ci smos sdod pa'i rjes shul du'ang mi sdod cing mdor na sgo gsum bag yod pa dang dran shes kyi bya ra btang la rnal du dbab par bya'o/__/gnyis pa la gsum/__ru bzhi'i bshags pa/__zung bzhi'i skong ba/__bshags pa'i 'bras bu'o/__/dang po ni/__lhag par nyams bshags skong ba'i cho ga ni:__bla ma yi dam mkha' 'gro gang rung gi:__sgrub pa'i dkyil 'khor bsham zhing mchod tshogs bkram:__ting 'dzin gsal brtan bzlas pas thugs dam bskul:__tshogs rten spyan drangs gus pas phyag 'tshal zhing :__rdor sems sgom bzlas smre bshags gsang mthor brjod:__lta ba'i ngang gzhag thun mong nyes pa mthol:__ces gsungs te/__spyi mdo dgongs pa 'dus pa las/__las dang rdzas dang 'dun pa ting nge 'dzin de kho na nyid kyi skong ba lngar gsungs pas mtshon snga 'gyur gyi rgyud lung man ngag rnams las lhag par bsngags pa'i nyams chags bshags shing skong ba'i cho ga zab cing rgya che bar gsungs pa rnams kyi yang bcud nying khur dril ba ni/__bla ma yi dam mkha' 'gro rtsa ba gsum gcig tu 'dus pa'am so so ba gang rung dag gi sgrub pa'i dkyil 'khor gzhung ltar bsham zhing phyi nang gi mchod pa brgya rtsa dang tshogs kyi yo byad gang 'byor gtsang dag mdzes par bkram la/__bdag mdun gyi ting 'dzin gsal zhing brtan pa dang 'phrau 'du'i dmigs pa'i gzer bcas dzaba? kyi bzlas pas sngon gyi thugs bskyed kyi dam bca' gnyan po bskul/__tshogs gsog pa'i rten dkyil 'khor pa dang slar yang mgron thabs kyi lha nam mkha'i khyon gang ba spyan drangs la/__lus kyi sgo nas gus pa chen pos lus sa la rdeb pa'i brkyang phyag dang gnas lnga sa la 'dud pa'i 'greng phyag 'tshal zhing brjod med don gyi bshags pa dang rgyal ba zhi khro rab 'byams kyi mtshan brjod/__ngag gi sgo nas nyams chags sbyong ba'i lha gcig sngags gcig tu gyur pa bcom ldan 'das rdo rje sems dpa'i bsgom bzlas phyi nang gsang ba yang gsang gi rim pa rnams bya ba dang ru dra'i smre bshags kyis mtshon smre sngags kyi sgo nas bshags pa'i tshig skad gsang mthon por brjod/__yid kyi sgo nas lta ba'i klong bshags kyis gsal gdab cing 'khor gsum yongs dag 'das nyams phyogs lhung med pa'i ka dag khyab brdal chen po'i ngang du mnyam par bzhag__/thun mong du bde gshegs spyi bshags brjod cing sgo gsum gyi nyes pa ci mchis pa thams cad gnong 'gyod drag pos mi 'chab par mthol zhing bshags par bya'o/__/de ltar lus ngag yid gsum dang sgo gsum thun mong gi nyes bshags gnyen po so so dang 'brel bar klong chen rab 'bogs kyi bkol rgyud dri med bshags pa'i rgyal po sogs las ched du bsngags pa'-i bshags chen ru bzhi bya ba ni dmigs su gsal ba'i dgongs don no/__/gnyis pa ni/__nyer spyod sman rag gtor ma mar me dang :__sbyor sgrol zab mo'i tshogs kyis dgyes pa bskang :__zhes gsungs te/__rang rgyud kyi nyams chags bshags pas sbyangs nas gzhan rgyud ltar snang ba'i rtsa gsum lha tshogs rnams nyams pa'i skyon gyis thugs mi mnyes pa'i tshul du bstan cing bka'i chad pa'i gnas su gyur pa skong ba'i las kyis sor chud par byed pa la/__spyir rgyud lung rnams nas phyi yo byad tshogs/__nang phung po rten/__gsang ba byang chub sems kyis skong ba'i tshul dang*/__khyad par dong sprugs las lta bas la zla ba'i tshul du rtogs tshig gis ngo bos skong ba dang*/__sgom pa ting nge 'dzin gyis gnas lugs las mi g.yo ba'i tshul du zung bzhis rang bzhin skong ba dang*/__lha rtog dbyer med kyi gnas dag gnas bsgyur du shes pas thugs rje'i tshul la skong bar byed pa gsum/__bde 'dus sogs las/__mchod pa phud/__dam rdzas mdangs/__srog chags rgyu/__gling bzhi mdos/__'gyod tshangs bshags pa'i skong ba ste skong ba lngar grags pa sogs mang yang thams cad kyi gnad bsdus pa'i snying po/__phyi ltar ye shes kyi dbang po tshims pa'i slad du+u me tog sogs nye bar spyod pa lnga po dngos bshams kyi rten byas nas yid sprul nam mkha'i khyon khengs pa dang bkod pa'i khyad par rang bzhin gyis grub pa rnams kyis mchod cing skong ba dang*/__nang ltar yid dang ngag dang lus dang de kho na nyid kyi rtog sgrib sbyang ba'i slad du rim pa bzhin zung bzhi'i skong bar grags pa/__bdud rtsi sman dmar chen rak+ta/__ba liM gtor ma/__snang gsal sgron me bzhi po'ang dam tshig gi rdzas kyis mtshon byed du byas te gnas lugs kyi rang bzhin gsal gdab cing skong ba dang*/__gsang ba dam skong rmad du byung zhing dngos grub mchog gi nye rgyu ta na sbyor ba dang*/__ga Na sgrol ba zung du 'brel pa'i brtul zhugs zab mo tshogs kyi 'khor lo dngos sam/__rjes mthun tshogs kyi mchod pa tsam la'ang phan yon chen po dang ldan pas de dag rnams kyis thugs dgyes pa chen po'i dam tshig yongs su bskang bar bya'o/__/gsum pa ni/__sgo gsum bya byed nyams chag kun zhi zhing :__rdo rje bzhi yi ye shes mngon du 'gyur:__ces gsungs te/__bshags skong de dag tshul bzhin tu byas pa'i yon tan ni/__gnas skabs su sgo gsum gyi rtog sgrib dang de dag gi bya ba dang byed pa'i las las gyur pa'i nyams chags ci mchis pa kun zhi zhing*/__mthar thug sku gsung thugs ye shes rdo rje bzhi yi go 'phang mngon tu byed par 'gyur te gsang ba zab mo'i thabs mthar thug pa yin pa'i phyir ro/__/de ltar yang dri med bshags rgyud las/__dkyil 'khor gyi lha de rnams kyi mtshan rnal 'byor pho mo rnams kyis thos pa tsam gyis/__rtsa ba dang yan lag gi dam tshig nyams chags thams cad bskangs nas de bzhin gshegs pa thams cad kyi sku gsung thugs yon tan phrin las bsam gyis mi khyab pa dang ldan par 'gyur te/__yi ge 'khor lo tshogs chen gyi sa la lhun gyis grub par gyur to/__/zhes pas mtshon no/__/gsum pa don bsdu ba ni/__gzhan yang bzod med mos gus rtsal du gton:__phyogs ris bral ba'i snying rje byang sems bskyed:__shes rab zab mos don gyi gnad gsang btsal:__lta bas la bzla spyod pas shan dbye bas:__bden gnyis phyogs lhung gegs chen rang grol nas:__lam gyi yon tan rtsol med ngang gis 'char:__ces gsungs te/__lam gyi gegs sel ba'i thabs gzhan yang rtsa ba'i bla ma la sangs rgyas dngos su mthong ba'i yid ches dang bka' drin rjes su dran pa'i gdung shugs kyis drangs te bzod med mchi ma 'khrugs pa'i mos gus kho na nyams len gyi srog tu bzung ste rtsal du 'don/__mkha' khyab kyi sems can rnams la phyogs ris dang bral ba'i byams pa dang snying rje tshad med pa bsgom zhing thams cad sangs rgyas kyi sar 'god par 'dod pa'i byang chub kyi sems rtag tu bskyed/__thos bsam bsgom pa las byung ba'i dri ma med pa'i shes rab zab mos tha snyad sgra tshig tsam la mi zhen par yang dag pa'i don gyi gnad gsang tshul bzhin tu btsal/__theg pa yas 'bubs kyi lta bas 'khor 'das la zla zhing bstan rim mas 'dzegs kyi spyod pas blang dor shan dbye bas kun rdzob dang don dam pa gnyis kyi phyogs re rer lhung ba'i gegs chen rang bzhin gyis grol nas/__lam nyams su blangs pa'i drod rtags yon tan rnams 'bad rtsol med par ngang gis 'char ba ni dpyid dus rlan drod kyi rten 'brel 'tshogs pa na rtsi shing me tog rang bzhin gyis rgyas pa bzhin no/__/rtsa ba'i sa bcad lnga pa bogs 'don la gsum/__mdor bstan/__rgyas bshad/__don bsdu'o/__/dang po ni/__de nas bogs 'don phyi nang gsang ba ni:__zhes gsungs te/__dper na zhing gi lo tog la 'tshe ba srung ba'i bya ba grub nas skyong bran dang rig sngags kyi cho ga sogs yar skyed 'byung ba'i thabs la brtson pa ltar lam gyi gegs bsal ba grub pa de nas yon tan la skyed 'phel gyi bogs 'don dgos shing dela'ang phyi nang gsang ba gsum gyi rim par bstan pa ni 'di ltar ro/__/gnyis pa la gsum/__phyi'i/__nang gi__/gsang ba'i bogs 'byin no/__/dang po la'ang gnyis/__mdor bstan rgyas bshad do/__/dang po ni/__phyi rol yul rkyen ci dang ci shar yang :__lam khyer shes pas byang chub grogs su 'gyur:__ces gsungs te/___phyi rol du chags sdang gti mug skyed pa'i yul bzang ngan bar ma ci dang ci lta bu zhig shar yang blang dor btang snyoms kyi rtog pa'i gzhan dbang du ma shor bar rab skad cig dang po/__'bring gnyis pa/__tha mas kyang gsum phan chad las mi 'da' bar lam du khyer ba'i tshul shes pas gnad du btang na tshogs drug gi yul du snang ba thams cad kyang byang chub sgrub pa'i grogs su 'gyur ro/__/gnyis pa la gnyis/__spyi dang bye brag go__/dang po ni/__dgra la bzod pa bsgom zhing snying rje bskyed:__gnyen la bden med bsgom zhing zhen pa bcad:__bar ma kun la bzang po'i las 'brel bzhag:__ces gsungs te/__yul rkyen de dag lam du ji ltar khyer na 'dun pas blo sbyong ba dang kun rdzob rten 'brel don dam stong nyid kyi tshul la brten nas te/__spyir sngon las sha 'khon gyis 'tshe ba dang*/__drin lan log 'jal 'khor gyi log sgrub sogs mi dang mi min gyi gnod pa'i dgra che phra gang la'ang 'khon 'dzin mi bya bar bzod pa bsgom zhing de dag tshe rabs du ma'i pha ma yin kyang 'khrul pa'i dbang gis da lta ngo ma shes pas las ngan bsags pa la slar yang snying rje chen po bskyed/__gnyen nye 'brel dang mdza' grogs nor rdzas sogs yid du 'ong ba thams cad la sgyu ma rmi lam lta bur blta ba bden med kyi 'dun pa drag tu bsgom zhing zhen 'khris kyi 'dzin pa bcad/__chags sdang gnyis ka mi skye ba'i yul snang bar ma kun la'ang btang snyoms su mi bzhag par mig lam du dkon mchog gi rten mthong du gzhug pa dang rna bar sangs rgyas kyi mtshan dang gzungs sngags zab mo sgrog pa snar tshor grol gyi bdug pa lcer myong grol dam rdzas lus kyis phyag bskor yid la dad mos sogs dge rtsa sna re'i bag chags 'jog tu gzhug pas mtshon bzang po'i las kyi 'brel pa ci thebs su bzhag go__/gnyis pa la gnyis/__kun rdzob dang*/__don dam gyis lam du khyer tshul lo/__/dang po la'ang gnyis/__dngos dang*/__rgyud la bsten tshul lo/__/dang po ni/__kun kyang kun rdzob mi rtag sgyu mar bsam:__cis kyang dgos med zhe bcad drag tu bya:__zhes gsungs te/__bzang ngan bar mas bsdus pa'i snang ba kun kyang gsog dang gsob dang snying po med pas kun rdzob dang skad cig re res 'pho zhing 'gyur bas mi rtag pa dang snang yang bden par ma grub pas sgyu ma dang mtshungs par bsam ste/__ting rgyal las/__sgyu ma byed pa dag gis gzugs sprul te/__/rta dang glang po shing rta sna tshogs byas/__/de la ji bzhin snang ba gang yang med/__/chos rnams thams cad de bzhin shes par gyis/__/zhes so/__/des na dam pa'i chos nyams su len pa ma gtogs gzhan cis kyang tshe phyi ma lta zhog 'dir yang phan pa spu tsam med pas gtan nas dgos pa med snyam du ci snang thams cad la dgos med kyi 'dun pas zin pa'i zhe bcad drag tu bya'o/__/gnyis pa ni/__bde sdug rkyen la gtong len gnad kyis bzung :__gang byung chog shes yid bde rgyun du bsten:__ces gsungs te/__khyad par lus dang sems la bde sdug gi tshor ba myong ba'i phyi nang gi rkyen phra rags gang la'ang de'i rjes su 'brangs nas ro mi myang bar bde bar shar na de'i rgyu dge ba dang bcas pa mtha' yas par spel te sems can la gtong ba dang*/__sdug bsngal byung na de'i rgyu sdig pa dang bcas pa sems can kun las bsdus nas rang la len pa'i blo sbyong zab mo'i gnad kyis bzung la lam du btang*/__zas gos gnas mal sogs shugs kyis 'byor na brgya phrag ri ba'i zas gos dang khang pa brtsegs pa sogs rab byung la sangs rgyas kyis rjes su gnang bas zhen pa med na ched du spang mi dgos shing*/__ma 'byor na phyags dar khrod pa'i gos dang lus 'tsho tsam gyis kha zas ngan ngon gyis btubs pas gang ltar byung yang chog shes pa dang*/__rkyen bzang ngan la dga' sdug skyen cing gcig byung gnyis dgos kyi rtog pa'i bze re mang na 'dod pa'i khol por 'phyan te lus sems rnal du gnas pa'i go skabs mi 'byung bas ji ltar byung yang mi dga' ba med pa'i yid bde kho na rgyun tu bsten par bya'o/__/gnyis pa don dam la gnyis/__mnyam bzhag dang*/__rjes thob bo/__/dang po ni/__don dam snang grags rtog pa'i chos rnams kun:__rang bzhin ma grub bden med ngang la gzhag:__ces gsungs te/__lam khyer mtha' dag la dngos 'dzin a 'thas su zhen na gnad du mi 'gro ste/__sdud pa las/__ji ltar dug dang 'dres pa'i kha zas bzang za ba/__/dkar po'i chos la dmigs pa'ang de 'drar rgyal bas gsungs/__/zhes so/__/des na gnas lugs don dam par mig yul du snang ba'i gzugs dang*/__rna bar grags pa'i sgra dang*/__yid yul du rnam par rtog pa'i 'khor 'das kyi chos rnams kun kyang 'khrul ngor snang ba tsam las mngon rjes tshad ma dang yang dag pa'i shes rab kyis dpyad pa'am sgom byung ye shes khong nas shar na gdod nas rang bzhin gyis ma grub pa'i bden med nam mkha'i gzugs brnyan lta bu skye 'gag gnas gsum dang bral ba yin pa la de ltar shes nas 'khrul 'dzin rang ngor bltas nas mi rtog pa'i ngang la mnyam par bzhag pa gal che ste/__sdud pa las/__gang tshe 'dus byas 'dus ma byas dang dkar nag chos/__/shes rab rnam par bshigs nas rdul tsam mi dmigs tshe/__/'jig rten dag na shes rab pha rol phyin grangs 'gro/__/nam mkha' gang la'ang cung zad mi gnas de dang 'dra/__/zhes pa ltar lam khyer rnams kyi phul du gyur pa'o/__/gnyis pa ni/__rjes thob rmi lam sgyu ma'i dpe brgyad dang :__bsod nams tshogs chen zhen med lam du khyer:__'khor ba'i chos kun ma dag rten 'brel te:__mya ngan 'das pa'ang dag pa'i rten 'byung tsam:__de phyir lam gyi snang ba thams cad kun:__rgyu rkyen rten 'brel legs pa'i phyogs su bsgrig:__ces gsungs te/__mnyam bzhag las ldang ba'i rjes thob tu'ang snang grags kyi chos thams cad la bden dngos su mi zhen par/__phyi yul gyi snang ba thams cad med bzhin 'khrul ngor snang ba rmi lam lta bu/__rgyu rkyen rten 'brel tshogs pa las glo bur du snang ba sgyu ma lta bu/__/med pa la yod par snang ba mig yor lta bu/__snang bzhin bden par ma grub pa smig rgyu lta bu/__phyi nang gang la'ang med bzhin snang ba brag cha lta bu/__rten dang brten par snang yang don la med pa dri za'i grong khyer lta bu/__snang la rang bzhin ma grub pa me long nang gi gzugs brnyan lta bu/__med snang cir yang 'char ba sprul pa lta bu ste bden med kyi dpe brgyad dang mtshungs par blta zhing sgo gsum gyis ji ltar nus shing 'byor pas rnam par dkar ba'i las phyogs re ba ma yin par bsod nams kyi sgo mtha' yas par 'jug bzod pa'i tshogs chen po bsags shing de la'ang zhen med sgyu ma lta bur shes pa dang 'khor gsum yongs dag gi lta bas lam du khyer/__phung khams skye mched kyis bsdus pa'i 'khor ba'i chos kun nyon mongs pa thams cad gnas lugs bde gshegs snying po nyid lhan skyes kyi ma rig pa la brten nas 'du byed 'byung ba sogs glo bur gyi dri mas rnyogs shing ma dag pa'i rgyu dang rkyen gyis mngon par 'du byas pa'i rten 'brel yan lag bcu gnyis lugs 'byung du 'khor ba ste/__ma rig pa dang sred len te nyon mongs pa gsum gyis 'du byed dang srid pa'i las gnyis byas pa las/__rnam shes ming gzugs skye mched drug reg tshor skye ba rga shi bcas skye ba'i kun nas nyon mongs pa'i gzhi bdun byung zhing de dag las kyang nyon mongs gsum 'byung bas bya dang sgo nga ltar phan tshun tu 'khor ba ste/__dbu ma rten 'brel snying por/__gsum po dag las gnyis 'byung ste/__/gnyis las bdun 'byung bdun las kyang*/__/gsum 'byung srid pa'i 'khor lo de/__/nyid ni yang dang yang du 'khor/__/ces pa ltar ro/__/srid pa'i mya ngan las ring du 'das pa zhi ba thar pa dam pa'ang skye ba 'gags na rga shi 'gag__/srid pa 'gags na skye ba 'gag pa sogs yan lag bcu gnyis lugs las ldog cing ma rig pa phug rdib pas dri ma de nyid rnam par byang zhing dag pa'i rten cing 'brel 'byung tsam yin la/__don dam rang bzhin 'od gsal bskyed bya skyed byed kyi rten 'brel las 'das kyang rnam pa'i 'dogs cha tsam du gzhi dus srid rtsa yan lag bcu gnyis/__lam dus su bden don yan lag bcu gnyis/__'bras bus dag pa rnam pa bcu gnyis kyi tshul du 'char ba ste/__mtshan brjod las/__yan lag bcu gnyis srid rtsa bton/__/dag pa rnam pa bcu gnyis 'chang*/__/bden bzhi'i tshul gyi rnam pa can/__/ces so/__/mdor na 'khor 'das lam gsum gyi chos thams cad rten cing 'brel 'byung gi snang ba tsam yin cing de'ang rang bzhin stong pa nyid las bden dngos su grub pa med pas/__'phags pa klus/__gang phyir rten 'byung ma yin pa'i/__/chos 'ga' yod pa ma yin te/__/de phyir stong pa ma yin pa'i/__/chos 'ga' yod pa ma yin no/__zhes so/__/rgyu mtshan de dag gi phyir lam gyi snang ba thams cad kun kyang rten 'brel la rags lus pas thar par 'dod pa rnams kyis thog mar chos sgor zhugs pa'i 'dun pa dang bla ma bsten pa nas brtsams/__yang dag pa'i 'bras bu mngon tu ma byas kyi bar du dam chos sgrub pa'i rgyu dang de'i grogs su 'gyur ba'i rkyen gyi rten 'brel thams cad legs pa'i phyogs 'ba' zhig tu bsgrigs pas 'phral dang yun tu don gnyis rlabs po che 'grub par 'gyur te/__bshes spring las/__rten cing 'brel bar 'byung 'di sangs rgyas kyi/__/gsung gi mdzod kyi gces pa zab mo ste/__/gang gis 'di ni yang dag mthong ba des/__/chos mthong de yis de bzhin gshegs pa mthong*/__zhes so/__/gnyis pa nang bskyed rdzogs kyi bogs 'don la gnyis/__bskyed pa'i dang*/__rdzogs rim kyi bogs 'don no/__/dang po la gnyis/__spyi dang bye brag go/__dang po ni/__nang du bskyed rim snang stong chu zla dang :__gang snang lha dang de yang rang gi sems:__sems dang lha sku ro mnyam snang srid kun:__lha skur gzhir bzhengs thug phrad ting 'dzin spel:__ces gsungs te/__nang du rim pa gnyis kyi ting nge 'dzin la rtsal sbyong zhing bogs 'don pa'i tshul yang*/__thog mar kun brtags kyi bskyed rim ji lta bu bsgom yang snang la rang bzhin ma grub pa stong pa'i gzugs brnyan chu'i zla ba lta bur bsgom pa zab pa'i tshul dang*/__snod dang bcud kyi rnam pa gang zhig snang ba de thams cad yi dam lha'i rnam par bsgom pas rgya che ba la 'jug pa dang*/__de'ang rang gi sems kyi rol rtsal las logs su grub pa med pas sgom mkhan sems dang bsgom bya'i lha sku gnyis don dam chos nyid du ro mnyam par shes pa dang*/__snang zhing srid pas bsdus pa'i 'jig rten kun kyang rang byung ye shes lha'i sku ru gdod nas gzhi thog tu bzhengs shing rdzogs pa yongs grub don dam pa'i bskyed tshul dang*/__tshogs drug gi yul du rtog pa'i rgyu ba gang byung yang glo bur thugs phrad de ma thag par lha'i rang bzhin kho nar shes pa'i ting 'dzin gyi rol mo mtha' yas par spel ba ste rnam pa lnga yis bskyed rim spyi'i yon tan gyi bogs dbyung ngo*/__/gnyis pa la gnyis/__bskyed pa'i rtsal sbyong ba dang de nyid dag rdzogs smin pa'i tshul gyis nyams su blang ba'o/__/dang po ni/__bris sku me long gzugs brnyan 'char ba nyid:__chu snod dwangs par 'phos la rten byas te:__yid mig rlung gsum gtad pa'i gsal snang dang :__mtshan dus rmi lam lha skur ldang la bslab:__ces gsungs te/__nyin mo'i dus su lha bzo mkhas pas bris pa'i yi dam gyi sku mtshan nyid dang ldan pa'am shel lam me long gi gzugs brnyan bkrag mdangs khyad du mtshar ba nyid rang gi rgyab ngos lta bur bzhag__/mdun tu chu'i snod dwangs shing g.yo ba med par de'i gzugs brnyan 'phos pa la rten byas te yid mig rlung gsum po dril la rtse gcig tu gtad pa'i gsal snang gi rtsal sgrub pa dang*/__mtshan mo'i dus su 'dzin pa'i gdams ngag gis rmi lam bzung la zin pa dang de ma thag nyin mor bsgoms pa lta bu'i lha'i skur ldang ba la bslabs pas mtshan dus kyis nyin snang dang des kyang mtshan snang gi rtsal bskyed de bogs chen po thon par 'gyur ro/__/gnyis pa ni/__khyad par 'khor ba'i snang zhen dag pa las:__mthar thug myang 'das yon tan rdzogs pa dang :__gnas skabs rim gnyis gzhi ru smin pa'i tshul:__legs par shes pas lam mchog mngon du 'gyur:__ces gsungs te/__dbyibs dang kha dog gi rnam pa lam byed tsam gyi bskyed rim ni phyi rol pa la'ang yod cing de'i grub 'bras nyi tshe ba dang bskyed rim rang rgyud par gol ba'i rang 'bras ru dra/__rgyu mthun 'byung po mthu chen tu 'gyur ba yod pas/__de dag lam du 'gyur ba'i khyad par gyi gnad ni/__'chi bar skye ba'i srid pa dang mthun pa'i bskyed bsdu dang*/__phyi snod nang bcud dang mthun pa'i rten gzhal yas khang brten pa lha'i 'khor lo bsgom pa sogs mar bltas 'khor ba'i rnam pa dang mthun par lam du byas pas de'i snang zhen dag pa las/__bskyed pas gzugs sku dang bsdu rim gyis chos sku/__rten brten pa rnam dag lha'i dkyil 'khor du grub pa sogs yar bltas rnam byang gi 'dra 'bag tu gyur pas mthar thug myang 'das kyi yon tan rdzogs pa'i rgyur 'gyur ba dang*/__gnas skabs rim pa gnyis ka'i gzhi bting ba las rdzogs rim gyi ye shes smin pa'i thabs khyad par can tu 'gyur ba'i tshul legs par shes pas gol 'phyugs med pa'i lam gyi mchog mngon tu 'gyur ba yin no/__/gnyis pa rdzogs rim gyi bogs 'don la gsum/__rtsa rlung*/__chags lam/__rdzogs rim spyi'i bogs 'don 'bras bu dang bcas pa'o/__/dang po ni/__'khrul 'khor zab mos rtsa yi mdud pa dkrol:__bar rlung thad kar 'dzin pa'i nyams len gyis:__rlung sems rang dengs shes pa rnal du phebs:__gtum mo'i 'bar snang mnyam rjes kun tu brtan:__ces gsungs te/__rang lus thabs ldan nyams su len pa'i tshe/__thun mtshams rnams su lus sbyong 'khrul 'khor zab mo man ngag lag len gyi gnad dang ldan pa la 'bad pas rtsa'i mdud pa rnams bkrol/__rtag tu bar gyi rlung lte ba thad kar brgyangs te 'dzin pa gsang ba ye shes chen po'i rlung sbyor gyis rlung sems kyi rnyogs pa phra rags rang sar dengs shing shes pa rnal du phebs par 'gyur ba dang*/__gtum mo'i me dmigs mnyam bzhag tu bsgoms shing rjes thob tu mi bsgom pa'i res 'jog can gyis nus pa rnyed par mi 'gyur bas 'bar ba'i gsal snang mnyam rjes kun tu ma chad par brtan par bsgom pa rnams gnad du che'o/__/gnyis pa ni/__thig le zhu ba snying ga'i dbus su bstim:__de la brten byas 'dzin med sgyu ma'i ngang :__tshogs drug yul du gang shar snang ba yis:__bde chen 'dren pa'i ting 'dzin rang rtsal spel:__ces gsungs te/__gzhan lus pho nya'i lam la 'jug pa na/__phyag rgya dang snyoms par 'jug pa'i rjes chags kyi mes kun rdzob byang chub sems kyi thig le rim par 'dzag cing zhu ba na rig stong ka dag nam mkha' lta bu'i ngang las nam yang ma g.yos pas 'khor lo so so'i dbu ma'i lte bar dang*/__khyad par lhan skyes kyi mthar bzung ldog bkram khyab dang 'brel bar snying ga'i dbus su zag med ye shes dwangs ma'i thig le chen por bstims pas rtag tu lus sems bde stong gi nyams dang mi 'bral bar 'gyur zhing*/__de la rten byas nas phyi nang gang la'ang ched du 'dzin zhen med pa sgyu mar shes pa'i ngang nas tshogs drug gi yul du bzang ngan bar ma gang shar gyi snang ba sna tshogs pa yis kyang bde chen kho na 'drain par nus pa'i ting 'dzin gyi rang bzhin dang mi 'bral bar rtsal sbyong gong nas gong du spel bas mthar 'khor 'das kyi rtog tshogs bde chen ye shes gcig gi ngang du gyur pa na thabs lam mthar phyin pa'o/__/gsum pa ni/__khyad par sbyang gzhi 'khrul snang bag chags kun:__sbyong byed rdo rje'i rnal 'byor zab mo'i mthus:__legs par rgyas btab rtse gcig bsgoms pa yis:__sbyangs pa'i 'bras bu ye shes ris med shar:__ces gsungs te/__mtshan bcas rdzogs rim spyi la khyad par du shes dgos pa sbyang gzhi'i las su bya ba ma dag pa'i rtsa rlung thig le las gyur pa'i phung khams skye mched kyi 'khrul snang bag chags mtha' yas pa kun/__sbyong byed thabs kyi lam mchog lus rtsa sku/__ngag rlung gsung*/__yid thig le thugs rdo rje'i rnal 'byor gnad thog tu thebs pa'i me btsa' ltar zab mo'i mthu dang nus pa'i phyag rgyas byed pa'i gnad legs par bcings te rgyas btab nas gzhan tu mi g.yengs pa'i sems rtse gcig pas bsgom pa de yis/__glo bur gyi dri ma rnams dag cing sbyangs pa'i 'bras bu chos nyid kyi mkha' la sku dang ye shes phyogs ris med pa'i nyi ma shar ba yin pas de dag gi gnad gsang shes na lam la nor 'khrul gyi skyon med pas blun sgom gyi 'phrang las grol te 'phral yun kun tu bogs chen por 'gyur ro/__/gsum pa gsang ba a ti'i lam gyi bogs 'don la gnyis/__khregs chod dang*/__thod rgal gyi'o/__/dang po la'ang gsum/__mdor bstan/__rgyas bshad/__don bsdu'o/__/dang po ni/__gsang ba dug lnga'i rnam rtog ji snyed kun:__rig pa'i gnad kyis bzung la lam du btang :__zhes gsungs te/__gsang ba rdzogs chen shin tu ka dag khregs chod kyi dgongs pa la gnas pa'i tshe/__nyon mongs pa brgyad khri bzhi stong gi rtsa ba dug lnga las gyur pa'i rnam par rtog pa ji snyed pa rang sems kyi cho 'phrul las shar ba kun/__kha yan tu btang ba dang spang bsgyur gyi gnyen po brten pa sogs mi bya bar ye grol rang ngo rig pa'i gnad kyis skad cig ma gsum pa las phan mi 'da' bar bzung la lam du btang bar bya'o/__/gnyis pa ni/__'dod la chags pa'i rtog pa shar ba'i tshe:__dgag sgrub mi bya rig stong rjen par klod:__bde la zhen med nyams myong khong nas sad:__so sor rtog pa'i ye shes de la bya:__zhe sdang gtum pa'i rnam rtog shar ba'i tshe:__de rjes mi 'brang ma bcos lhug par bskyang :__gsal la 'dzin med myong zhen rtsis gdab bral:__me long lta bu'i ye shes de la bya:__gti mug mun pa'i 'thib po byung ba'i tshe:__de nyid ngang du bskyang la spang blang dor:__rtse gcig mi rtog spros bral rjen par shar:__chos kyi dbyings kyi ye shes de la bya:__nga rgyal khengs pa'i 'dzin pa ldang ba na:__blang dor mi bya ngar 'dzin rang ngor bzhag:__cir yang mi rtog mnyam pa'i klong gyur na:__mnyam pa nyid kyi ye shes de la bya:__phrag dog 'gran sems zug rngu shar ba'i tshe:__shar mkhan rang gi thog tu gang dgar bor:__bdag gzhan 'dzin med rig stong sgyu mar rdzogs:__bya ba grub pa'i ye shes de la bya:__de ltar shes na dug lnga'i rtog pa kun:__ye shes lnga yi ngo bor bogs su thon:__rtog pa'i phung po brgyad khri bzhi stong yang :__sbrul mdud bzhin du ye shes chen por grol:__ces gsungs te/__de'ang zhib par bkrol na/__mig gi yul du gzugs sdug pas mtshon lus longs spyod gnyen 'brel 'khor g.yog sogs 'dod pa'i yul la chags shing zhen pa'i rtog pa shar ba'i tshe/__rtog pa 'gags nas dgag pa dang rjes 'brang gis sgrub pa gang yang mi bya bar rang ngo la bltas pas rig stong rjen par 'char ba de thog tu klod la bzhag pas/__bde ba la zhen 'dzin gyi dri ma med bzhin tu bde stong ma 'gags pa'i nyams myong khong nas sad par gyur pa na/__so sor rtog pa'i ye shes zhes grags pa de nyid la bya ba yin gyi logs su btsal du med do/__/des mtshon te/__mi dang mi ma yin pa'i gnod byed sogs tshogs drug gi yid du mi 'ong ba la zhe sdang bas sems khro zhing gtum pa'i rnam par rtog pa lam gyis shar ba'i tshe/__de'i rjes su 'brang na las bsags pas mi 'brang zhing skyon tu'ang mi bzung bar rang ngo rig bzhin gang shar de nyid ma bcos rang babs su lhug par bskyangs pas/__rnam pa gsal la ma 'gags shing ngo bo der 'dzin med pa/__de'i ro myong ba dang rjes su 'brang ba'i zhen pa dang 'di yin gyi rtsis gdab dang bral ba dwangs shel gyi gzugs brnyan ltar 'char te/__me long lta bu'i ye shes zhes pa ni/__de la bya ba yin no/__/gnyid dang snyoms las gtsor gyur thos bsam sgom gsum la blo gros kyi snang ba sgrib pa gti mug mun pa'i 'thib po nam byung ba'i tshe/__de nyid kyi rang ngo rig pa'i ngang bskyang ba las skyon rtog gis spang ba'am yon tan tu blta ba'i dang blang gnyis ka dor bas/__khyab brdal chen po rtse gcig gi klong du rnam par mi rtog pa'i rang byung spros bral rjen par lhag gis shar bar 'gyur te/__chos kyi dbyings kyi ye shes zhes pa'ang de la bya ba yin no/__/gzhan las bdag nyid rigs rus yon tan 'byor pa sogs kyis lhag go snyam du nga rgyal gyis sems khengs pa'i 'dzin pa nang du ldang ba na/__de la'ang snga ma rnams bzhin tu blang dor gang yang mi bya bar ngar 'dzin pa de nyid kyi rang ngor bltas te mnyam par bzhag pas ci yang mi rtog pa rang gzhan mnyam pa chen po'i klong gcig tu gyur na mnyam pa nyid kyi ye shes zhes pa ni de la bya'o/__/gzhan gyi phun sum tshogs pa la phrag dog cing 'gran zlar sems pa'i zug rngu yid la shar ba'i tshe na'ang*/__de la gnyer kha mi bya bar shar mkhan kho rang gi thog tu gang dgar bor te ngo bor bltas pas/__bdag dang gzhan ces gnyis su 'dzin pa'i rtog pa med par rig stong sgyu mar rdzogs par 'gyur te bya ba grub pa'i ye shes zhes pa'ang de la bya ba yin no/__/nyon mongs pa'i rtog pa dang por ngos zin dka'/__bar du ldog dka'/__mthar rgyun bcad par dka' bas dran shes kyi bya ras bzung nas ji skad bstan pa de ltar rang grol chen po'i dbyings su la zlo shes na dug lnga'i rtog pa mi shar ba ni mi srid la shar tshad kun spang sgyur gang yang ma dgongs par ye shes lnga'i ngo bor bogs su thon cing*/__'dod chags zhe sdang gti mug gsum dang de gsum cha mnyam las byung ba re rer yang nyi khri chig stong re ste bsdams pas nyon mongs rtog pa'i phung po brgyad khri bzhi stong du grags pa ji snyed pa'ang sbrul mdud dkrol ba po med par rang grol ba bzhin tu ye shes chen por rang sar grol bar 'gyur te/__zhi rgyud las/__rang bzhin shes pas mi spang ste/__/rang rig ye shes nyid yin no/__/zhes dang*/__mu tig phreng bar/__'bad pas grol ba ma yin te/__/ye nyid nas ni grol bar gnas/__/zhes so/__/spyir nyon mongs pa shar ma thag tu gdong zlog byas na bya shor du 'gro bas rtsal rdzogs su gzhug__/rtsal rdzogs las ma bsags pa'i skad cig de ma thag par lam du btang bas ye shes su lhag gis shar ba'i dus na rten 'brel bsgrigs dgos shing*/__de nyid ye shes kyi gzhir med na lam du mi 'gro ba dwangs pa'i bzhin snod med na bzhin ras mi 'char ba dang mtshungs la/__nyon mongs pa gang skyes de rtsal rdzogs shing las ma bsags/__ngo bo ye shes su shes pa'i skad cig de nyid la rtog pa gzhan gyis bar ma chod par lam du btang ba ni grub pa'i dngul chus lcags gser du bsgyur ba bzhin no/__/gsum pa ni/__mdor na rnam rtog nyon mongs lha dang 'dre:__sdug bsngal nad 'chi'i re dogs ci byung yang :__spang blang med par ngo bor ro snyoms shing :__rang rtsal sbyangs pas kun kyang bogs su 'char:__ces gsungs te/__ji skad bshad pa de dag gi don mdor bsdu na/__sems dang sems las byung ba'i rnam rtog__/dug lngas bsdus pa'i nyon mongs pa/__lha mthong zhing dad gus sogs bzang rtog__/'drer snang zhing nyams mi dga' ba sogs ngan rtog__/lus sems la sdug bsngal tshor ba/__na ba dang 'chi ba sogs bzang du re zhing ngan par dogs pa ci dang ci lta bu byung yang spang blang khu 'khrig gi snyems rtog rdul tsam med par rtog pa de ka rang gi ngo bor bltas te bzang ngan ro snyoms shing*/__de ka tsam du'ang ma lus par rang rig gi rtsal sbyong phyogs med du byas pas rnam rtog gi 'phro 'du kun kyang skyon skyed pa'i gegs su mi 'gyur bar yon tan lhag par 'phel ba'i bogs 'don tu 'char bar 'gyur te/__ting 'dzin rgyal po las/__rnam rtog ma rig chen po ste/__/'khor ba'i rgya mtshor ltung byed yin/__/rtog med ting 'dzin la gnas na/__/nam mkha' bzhin tu mi rtog gsal/__/ces so/__/gnyis pa thod rgal gyi bogs 'don ni/__khyad par byed bcings mun pa'i rnal 'byor gyis:__stong gzugs gsal brtan srog rtsol g.yo med 'ching :__zhu bde drangs shing kun kyang ro mnyam du:__mi 'gyur thabs kyis bde chen mchog la sbyor:__ces gsungs te/__thod rgal lhun grub kyi rnal 'byor la gnas pa'i skabs su spyi gnad rnams dkyus ltar la/__khyad par 'od gsal snang ba'i bogs 'don tu thog mar khra khang dang de nas mun khang sgo khyud rim pa gsum par sgo gsum byed pa bcings pa'i gnad dang ldan pas mun pa'i rnal 'byor gyis zhag bdun phrag gsum la sogs par bsgoms pas nyin mtshan rtags bcu dang 'od gsal gyi snang ba stong pa'i gzugs brnyan rnam pa thams cad pa rab tu gsal zhing 'phel 'grib bral ba'i brtan por 'gyur la/__skabs su rdo rje'i bzlas pa dang bum pa can gyi sbyor bas srog dang rtsol ba'i rlung 'khor lo bzhi'i lte bar rtags snang dang lhan cig g.yo med du 'ching ba dang*/__'bar 'dzag gi zhu bde drangs shing bde gsal gyi nyams rtogs kun kyang gnyis med ro mnyam khyab brdal chen po'i ngang du 'pho med mi 'gyur ba'i thabs kyis bde ba chen po mchog la sbyor ro/__/'di ni gsang sngags gsar ma'i lugs kyi bla med rgyud sde thams cad kyi rgyal po dpal dus kyi 'khor lo'i rdzogs rim sbyor ba yan lag drug pa dang bsnyen sgrub rdo rje gsum gyi gnad thams cad kyang 'dus pa ste/__byed bcings mun pa'i rnal 'byor rtags snang dang bcas pa ni thog mar dge ba sor bsam sku rdo rje/__srog rtsol rlung gi sbyor ba ni bar du dge ba srog 'dzin gsung rdo rje/__zhu bde 'gyur med du bsgrub pa ni mthar dge dran ting thugs rdo rje'i rnal 'byor rnams dang don gcig pa'o/__/gsum pa de dag thams cad kyi don bsdus te bshad pa ni/__gzhan yang thun mong gnad kyi man ngag ni:__skyon rnams thams cad bdag 'dzin las byung bas:__kun rdzob byang chub sems kyis bces 'dzin bshig:__don dam spros bral lta bas drung nas phyungs:__bden gnyis dbyer med rten 'brel lam du khyer:__yon tan nyams su blangs las byung ba'i phyir:__mkha' mnyam 'gro la tshad med snying rje bsgom:__dpal ldan bla mar bzod med mos gus bskyed:__zag bcas zag med dge tshogs brtson pas bsgrub:__khyad par sems nyid rig stong lam khyer la:__skad cig tsam yang ma yengs mi sgom pas:__thabs shes phyogs re'i lam la ma gol bar:__thabs kyi grogs su shes rab lta gdengs bskyed:__shes rab grogs su bsod nams sna tshogs spel:__de ltar 'gal med lam du khyer ba yis:__yon tan dbyar gyi mtsho bzhin gong du 'phel:__sa dang lam gyi rim pa ma lus kun:__thabs dang shes rab zung du 'brel bas 'grub:__ces gsungs te/__bye brag tu bstan pa de dag las gzhan yang lam gyi rnal 'byor thun mong spyi la gal che ba gnad kyi man ngag zab mo nying khur phyungs nas bstan pa ni/__'jig rten na nyes pa'i skyon ci yod pa de rnams thams cad ni gzhan las ma byung ste bdag tu 'dzin pa 'di kho na las byung bas/__kun rdzob byang chub kyi sems byams pa dang snying rje tshad med pa la brten pa bdag gzhan brje ba'i blo sbyong sogs kyis bdag tu gces par 'dzin pa'i blo bshig__/don dam byang chub sems bdag gzhan tu rtog pa sogs gnyis chos kyi spros pa kun bral zab mo stong nyid kyi lta bas bdag lta'i ngo bo'ang chos kyi dbyings su bcom ste drung ngam rtsa ba nas phyung*/__'khor 'das lam gsum gyi chos thams cad la kun rdzob don dam gyi bden pa gnyis po ltos 'jog can tu grub pas ya bral du ma song bar de gnyis dbyer med du spyod pa'i rten 'brel lam du khyer/__'phral yun yon tan gang yang rung ba thams cad chos nyams su blangs ba las byung ba'i phyir theg chen nyams len thams cad kyi rtsa ba nam mkha' dang mnyam pa'i pha ma 'gro drug sems can ris su ma chad pa kun la tshad dang mu mtha' med pa'i snying rje dus rtag tu bsgom/__byin rlabs dngos grub kyi 'byung gnas dpal ldan rtsa ba'i bla ma nyid dkon mchog kun 'dus su shes pas bzod med kyi mos gus drag po bskyed/__'jig rten pas bsdus pa zag bcas bsod nams kyi tshogs dang 'jig rten las 'das pas bsdus pa zag med ye shes kyi dge tshogs phra mos mi ngoms par gong nas gong 'phel brtson pa chen pos bsgrub/__dmigs bcas kyi nyams len kun las khyad par du gyur pa sems nyid rig stong rjen pa lam du khyer la mnyam rjes spyod lam gang gi skabs su'ang skad cig tsam yang phyi yul snang la ma yengs shing nang sems kyis gang yang mi bsgom pas/__snang phyogs thabs dang stong phyogs shes rab phyogs rer zhen cing a 'thas pa'i lam la ma gol bar thabs snying rje chen pos kun nas bslangs te sbyin sogs bsod nams kyi tshogs sgrub pa'i bogs su shes rab stong pa nyid kyi lta ba'i gding bskyed cing*/__/shes rab stong nyid kyi gnas lugs ji bzhin rtogs pa'i grogs su gong du bstan pa'i snying rje mos gus sogs thabs kyi mchog dang bsod nams sna tshogs pa nyin re bzhin gong du spel bar bya dgos te/__rgyud las/__/rnal 'byor thabs kyi tshul min cing*/__/shes rab gcig pus 'gyur ba min/__/thabs dang shes rab snyoms 'jug pa/__/rnal 'byor de bzhin gshegs pas gsungs/__/zhes dang*/__lam sgron las kyang*/__shes rab bral ba'i thabs dag dang*/__/thabs dang bral ba'i shes rab kyis/__/gang phyir 'ching ba zhes gsungs pas/__/de bas gnyis ka spang mi bya/__/zhes so/__/de ltar na thabs kyis shes rab sgrib pa dang shes rab kyis thabs khyad du gsod pa ma yin par gnyis ka 'gal med zung 'jug tu lam du khyer ba de yis nyams dang rtogs pa'i yon tan mtha' dag dbyar gyi mtsho bzhin gong nas gong du 'phel ba dang*/__sa bcu dang lam lnga'i rim pa ma lus pa kun kyang thabs dang shes rab zung du 'brel bas bde blag tu bgrod cing mthar son par 'grub par 'gyur te/__sdom 'byung las/__shes rab thabs ni mnyam sbyor bas/__/rdzogs pa'i byang chub sgrub byed pa/__/de nyid la ni bla med pa'i/__/sangs rgyas kun rnams rab tu bzhugs/__/dbyer med rnam par yang dag rig__/gang gi gnas pa rdo rje sems/__/ji srid rdzogs byang chub par 'gyur/__/ces so/__/bogs 'don gyi rim pa 'di rnams kyang rig 'dzin chen po dga' rab rdo rje'i bsam gtan nyams sgron las/__lung zab bla ma nyams can spun/__/blta dang lta 'bul nyams bsdur dang*/__/mi rtag 'chi bsam brtson 'grus bskyed/__/gnas lugs dran pa'i rtsis zin pas/__/gsang spyod thabs la bsten pa dang*/__/rlung dang bde ba'i man ngag dang*/__/dmigs med snying rje goms pa dang*/__/gdams pa'i gnad dang shes rab kyis/__/rig pa rtsal sbyong nyams bogs 'don/__/ces gsungs pa sogs kyi don rnams snying por dril ba'o/__/gsum pa gang du mthar phyin pa'i 'bras bu bshad pa la gnyis/__mdor bstan/__rgyas bshad do/__/dang po ni/__sbyangs pa'i 'bras bu mngon du gyur pa ni:__zhes gsungs te/__de ltar sbyang gzhi kun khyab bde gshegs snying po la brten pa'i sbyang bya glo bur gyi dri ma sbyong byed rim gnyis lam gyis tshul bzhin sbyangs pa'i 'bras bu gzhi ji lta ba bzhin mngon du gyur pas spang thob med pa'i sku dang ye shes kyi dkyil 'khor chen por rang snang ba'i tshul ni 'di lta ste/__zhes so/__/de la 'bras bu'i ngo bo bshad ma thag pa nyid de/__sgyu 'phrul bye brag bstan pa las/__/grub pa'i rnal 'byor rnal 'byor che/__/lhun grub ji bzhin mngon byas pa'ang*/__/brtags pa tsam ste gnyis pa med/__/de phyir de la de brjod do/__/zhes so/__/nges tshig khog gzhung las/__grub pa mthar phyin 'bras bur brjod/__/ces pa ltar/__rnal 'byor pas don tu gnyer nas bsgrub par bya ba mchog gi grub pa mthar phyin pas 'bras bu zhes brjod pa dang*/__dbye ba snga ma las/__'bras bu'i ngo bo sku gsung thugs/__/yon tan phrin las rnam pa lnga/__/de yang skabs kyis lnga lnga ste/__/zhes sku gsung thugs yon tan phrin las lnga dang re re la'ang lnga lnga ste 'bras chos nyer lnga'i bdag nyid 'chad par 'gyur ba ltar ro/__/gnyis pa ni/__rang don mthar phyin zhi ba chos kyi sku:__gzhan don lhun grub zung 'jug longs spyod rdzogs:__gang 'dul thabs mkhas sna tshogs sprul pa'i tshul:__snang cha so sor ma 'dres mngon byang chub:__stong cha dbyings su ro gcig rdo rje'i sku:__sku lnga thob nas gsung lngas don mtshon pa:__brjod bral rnam dag chos sku don gyi gsung :__sku yis mtshon pa longs sku brda yi gsung :__tshangs pa'i dbyangs ldan sprul sku tshig gi gsung :__so sor der snang mngon byang rig pa'i gsung :__grags stong gnyis med ye shes rdo rje'i gsung :__sku yi snying po thugs ni ye shes lnga:__chos kyi dbyings las me long lta bur shar:__bya grub sor rtog gnyam pa nyid du zlum:__sku yi yan lag zhing khams gzhal yas dang :__'od zer gdan khri rgyan gyi yon tan rdzogs:__zhi rgyas dbang drag lhun grub phrin las kyis:__nam mkha' ji srid rgyun chad mi mnga' bar:__ji snyed mkha' khyab sems can thams cad don:__ji lta ba bzhin rtsol med ngang gis 'byung :__zhes gsungs te/__'di la lnga/__sangs rgyas kun gyi che ba'i yon tan gyi rten byed pa'i cha nas sku dang*/__gdul bya la chos don brda sprod pas gsung dang*/__brten pa snying po mi g.yo bas thugs dang*/__dgos 'dod thams cad 'byung bas yon tan dang*/__gzhan don mdzad pas phrin las so/__/dang po ni/__spangs pa dang rtogs pa chen pos rang don mthar phyin pa'i ngo bo dbyings thog tu rig pa'i ye shes grol bas spros pa thams cad nye bar zhi ba ni chos kyi sku/__snying rje'i sems chen pos gzhan don lhun gyis grub pa'i rang bzhin chos kyi sku las ma g.yos bzhin tu dag pa'i gdul bya rgyal sras sa bcu pa'i ngor snang stong zung 'jug thun min rgyu 'bras kyi mtshan dpe dang ldan par snang ba ni longs spyod rdzogs pa'i sku/__ma dag pa'i gdul bya 'gro ba drug gi mos pa dang mthun par gang gis 'dul ba de la der ston gyi thabs la mkhas pa'i thugs rje'i rol pas ma nges sna tshogs sprul pa'i tshul bzo skye mchog sogs snang ba ni sprul pa'i sku/__gsum po de dag gdul bya so so'i skal ba dang mthun par snang ba'i cha so sor ma 'dres par ston pa'i yon tan stobs bcu/__mi 'jigs pa bzhi/__ma 'dres pa bco brgyad/__byang phyogs kyi chos so bdun gyis mtshon mkhyen brtse nus pa'i yon tan bsam gyis mi khyab pa mnga' ba'i cha nas mngon par byang chub pa'i sku/__don dam par gzugs sku gnyis po'ang tha dad rang rgyud par med cing dag pa gnyis ldan stong pa'i cha chos nyid 'od gsal 'pho 'gyur med pa'i dbyings su sku gsum dbyer med ro gcig pa ni mi 'gyur rdo rje'i sku'o/__/gnyis pa ni/__de ltar sku lnga thob nas so so'i gsung lnga pos 'khor la brda sprod cing don mtshon par byed pa ste/__de'ang chos nyid smra brjod dang bral ba'i rnam par dag pa'i ye shes nyid bsam brjod thams cad kyi gzhir gyur pa'i cha ni chos sku skye med don gyi gsung*/__me long gis byed kyi dri ma ngos zin nas sel bar byed pa ltar sku mthong ba de yis 'khor gyi blo la don gyi brda 'phrod pa'i ye shes mtshon pa ni longs sku dgongs pa brda'i gsung*/__tshangs pa'i gsung dbyangs yan lag drug cu dang ldan pas gdul bya gang la gang 'dul gyi ngor so so'i sgra skad dang mthun par dus gcig tu tshig res don re go ba ni sprul sku brjod pa tshig gi gsung*/__don tu tshig gcig ma gsungs kyang rigs drug so so'i sgra skad dang mos pa ji lta de ltar snang zhing de thams cad kyang rang rig par gsal la cir yang mi 'gag pa'i ye shes ni mngon byang rig pa'i gsung*/__sgra skad thams cad grags stong gnyis su med pas mtha' gnyis grol bar go brda 'phrod pa'i ye shes ni rdo rje'i gsung ste/__gsung lnga po de rnams ngo bo brda sprod par gcig la brjod tshul dang rtog pa tha dad pa'o/__/gsum pa ni/__sku lnga'i snying por gyur pa thugs lnga ni brten pa ye shes lnga po ste/__de'ang glo bur gyi sgrib pa mtha' dag ma spangs bral ba'i rang bzhin rtogs pa'i tshe gzhi don gyi kun gzhi mngon tu gyur pa ni cir yang mi dmigs pa chos kyi dbyings kyi ye shes/__de'i tshe sbyor ba don gyi kun gzhi gnas gyur pa las gsal la mi rtog pas lhag ma gsum gyi 'char gzhir gyur pa ni me long lta bu'i ye shes der shar cing*/__sgo lnga gnas gyur 'gro don mdzad pa la thogs pa med pa bya ba grub pa'i ye shes dang*/__yid gnas gyur pas shes bya'i yul dus gsum gyi chos thams cad pad+ma'i 'dab ma ltar gsal la ma 'dres par mkhyen pa ni sor rtog ye shes gnyis kyang*/__nyon yid gnas gyur bzang ngan blang dor med pa mnyam pa nyid kyi ye shes su zlum pa'o/__/de dag las chos dbyings stong pa nyid kyi ye shes ni chos sku rnam par mi rtog pa'i thugs/__mnyam nyid ye shes ni longs sku mnyam pa chen po'i thugs/__bya grub ye shes ni sprul sku 'gro ba sgrol ba'i thugs/__me long ye shes ni mngon byang cir yang sa ler mkhyen pa'i thugs/__sor rtog ye shes ni mi phyed rdo rje'i thugs so/__/bzhi pa ni/__sku de rnams kyi yan lag gi chos su gyur pa rnam par dag pa'i zhing khams/__rgya tshad bral ba'i gzhal yas khang pa dang*/__gsal zhing dag pa'i 'od zer/__khyad par 'phags pa'i gdan khri/__dgyes rgur rol pa'i rgyan gyi yon tan rnams rdzogs pa'o/__/de la cung zad spro na/__chos sku'i zhing khams dbyings rang bzhin gyis rnam par dag pa/__longs sku'i zhing khams rang gsal lhun grub 'od kyi 'khor lo/__/sprul sku'i zhing khams stong gsum mi mjed bye ba phrag brgya/__gzhal yas khang ni chos sku la chos dbyings spros pa dang bral ba/__longs sku la lhun grub dbyings kyi snang ba/__sprul sku la ye shes rin po che'i rang bzhin/__'od zer la'ang chos sku la ye shes lnga'i 'od zer/__longs sku la ye shes kyi rang gdangs 'od lnga ru 'bar ba/__sprul sku la sku'i gnas ba spu'i bu ga re re nas kyang 'od zer bye ba brgya stong phrag drug cu 'phro ba/__gdan khri ni chos sku la lta ba kha sbyor/__longs sku la shes rab kha sbyor/__sprul sku la thugs rje kha sbyor ro/__/rgyan cha ni chos sku skye med rnam dag la rgyan gyi tha snyad mdzad pa dang*/__longs sku la 'gag med rang gsal gyi rgyan thun mong ma yin pa'i mtshan dpe ste/__de la phyi nang gsang ba gsum gsum du dbyer yod cing*/__gzhan yang longs sku rtags kyi rgyan bcur grags pa/__dbu rgyan/__snyan rgyan/__mgur chu/__do shal/__dpung rgyan/__phyag gdub gnyis/__zhabs gdub gnyis/__se mo do dang bcu'o/__/sprul sku'i rgyan thun mong gi mtshan bzang so gnyis dang dpe byad brgyad cu ste/__de ni 'khor los sgyur ba'i rgyal po la'ang phyogs mthun tsam yod pas thun mong gi mtshan dper bshad do/__/lnga pa ni/__las dang nyon mongs pa'i rnam par rtog pa dang nad gdon sogs zhi bar byed pa dang*/__tshe bsod dpal 'byor rang rig pa'i ye shes kyi mngon rtogs thams cad rgyas par byed pa dang*/__rlung sems snang bas bsdus pa'i 'khor 'das kyi chos thams cad rang dbang du mdzad pa dang*/__zhi bas mi thul pa'i dgra bgegs log 'dren rnams thugs rje drag por khros pas tshar bcad pa dang*/__gnas lugs ji lta ba mngon tu gyur pas mdzad dang mdzad par bya ba gang yang mi dmigs pa'i ngang nas phyogs dang ris su chad pa med pa ni lhun gyis grub pa'-i phrin las so/__/de lta bu'i phrin las kyis gdul bya 'dul ba ni rtag khyab lhun grub kyi bdag nyid can te/__nam mkha' ji srid par 'khor ba'i mtha' zad pa med cing 'khor ba ji srid ma stong bar sangs rgyas kyi phrin las rgyun chad mi mnga' bar rtag pa ste/__mngon rtogs rgyan las/__de bzhin 'khor ba ji srid 'di'i/__/las ni rgyun mi chad par 'dod/__/ces so/__/rtag pa de'ang phyogs rer 'jug pa ma yin par ji snyed nam mkha'i khams kyis khyab pa de snyed kyi gdul bya sems can kyi khams la phyogs ris med par khyab pa ste/__rgyud bla mar/__de ltar nam mkha'i mtha' klas kyi/__/'gro la rtag tu lhun grub par/__/thogs med blo ldan de yis ni/__/sems can don ni yang dag 'jug__/ces so/__/gdul bya 'dul ba'i dus la babs pa na dbang po dang 'tshams par thams cad kyi don ma nor bar ji lta ba bzhin 'bad rtsol med par ngang gis 'byung ba lhun gyis grub pa ste/__rim gsum las/__'bras bu yon tan lhun grub pas/__/yid bzhin nor bu ltar snang ba'o/__/zhes so/__/bzhi pa man ngag gi dgos 'brel bstan pa ni/__de ltar gzhi la lam gyis mtshams sbyar bas:__glo bur dri ma bag chags bcas spangs te:__'bras bu mngon gyur rang dang gzhan gyi don:__myur du rdzogs byed:__ces gsungs te/__sngar rgyas par bstan pa de ltar sbyang gzhi bde bar gshegs pa'i snying po 'dam khrod na gnas pa'i nor bu bzhin tu sems can thams cad kyi rgyud la gdod nas rang babs su bzhugs pa la/__sbyong byed thun mong dang thun mong ma yin pa rim pa gnyis kyis bsdus pa'i rnal 'byor chu dang 'dag rdzas lta bu'i lam gyis mtshams sbyar nas/__sbyang bya med snang gnyis 'dzin glo bur gyi dri ma rags pa 'dam rdzab lta bu sbyangs shing phra ba sa bon bag chags dang bcas pa'ang spangs te/__sbyangs pa'i 'bras bu gzhi la ji ltar yod pa'i yon tan mngon tu gyur te yid bzhin gyi nor bu dri ma thams cad dang bral ba las 'dod rgu 'bad med du 'byung ba bzhin rang dang gzhan gyi don rtsol ba med par myur du rdzogs par byed pa'o/__/de la dgos 'brel gyi ngo bo ni/__mtshon bya mtshon byed yod pa las dgos pa dang nying dgos shugs las grub pa'o/__/nges tshig ni/__dgos sogs chos bzhi yod pa de dag phan tshun gcig la gcig ltos su 'brel zhing*/__mthar thug 'bras bu sgrub pa la'ang de dag med na mi 'byung gi 'brel bar grub pa'o/__/dbye na/__thugs thig las/__brjod 'brel dgos pa yang dgos dang*/__rgyu rkyen yan lag bzhi ru bzung*/__/zhes pa ltar brjod bya/__rjod byed/__dgos pa nying dgos bzhi/__de la'ang grol lam dbang btsan tu byas na/__sngar smos pa'i sbyang gzhi bde gshegs snying po ni mtshon bya rang bzhin gzhi'i rgyud de brjod bya/__sbyong byed lam gyi rim pa brdar btags yi ge dang bcas pa ni mtshon byed lam rkyen te rjod byed/__de la thos bsam byas pas brjod bya don spyi'i tshul du go ba ni dgos pa/__de ltar shes pa'i don bsgoms pas thun mong dang mchog gi dngos grub mngon tu byed pa ni nying dgos so/__/thabs lam dbang btsan tu byas na/__lhan skyes ye shes gdod nas rang la rang chas su bzhugs pa ni brjod bya/__de rtogs byed thabs kyi man ngag glegs bam dang bcas pa ni rjod byed/__de don nyams su blangs pas bde chen gyi ye shes khyad par can rgyud la skyes pa ni dgos pa/__de goms par byas pas mchog tu mi 'gyur ba'i bde chen ye shes mngon tu byas pa ni nying dgos so/__/'brel ba'i don kyang*/__brjod bya rjod byed gnyis shes bya shes byed dang*/__rjod byed dgos pa gnyis thabs las thabs byung dang*/__dgos pa nying dgos gnyis de las de byung dang*/__nying dgos dang brjod bya gnyis ngo bo bdag gcig gi 'brel bar grub pa yin no/__/lnga pa 'khor la gdams shing bstan pa gtad pa la gnyis/__man ngag 'di shin tu zab par gdams pa dang*/__'khor la gtad pa smon lam dang bcas pa'o/__/dang po ni/__rgyu 'bras theg pa'i bcud:__khyad par nang rgyud sde gsum dgongs pa'i mthil:__kun dang mthun la kun las khyad par 'phags:__kun gyi spy-i 'dril ye shes snying po'i lam:__mig 'phrul lta bur 'bras bu mngon byed thabs:__mthong ba tsam gyis byin rlabs zil chen 'bebs:__thos pas don go nyams rtogs klong nas brdol:__g.yeng ba spangs te zla ba drug bsgom pas:__rdo rje gsum gyi ye shes rang shar ba:__kun bzang rdo rje sems dpa' pad+ma 'byung :__don la dbyer med gcig tu lhun rdzogs phyir:__rab 'byams rgyud sde kun gyi 'phro gzhi dang :__snying po'i don dang man ngag nyid yin kyang :__rnam pa 'dzam gling gdul bya drang ba'i slad:__d+ha na ko Shar brdzus te byung ba dang :__mngal du skyes sogs snang tshul tha dad pa'i:__mdzad pa'i cho 'phrul cir yang ston pa na:__mA ra tI kar tshe dpag med mgon dang :__yang le shod du dpal chen he ru kas:__chos nyid rang sgras bdag la stsal ba yi:__gdams pa kun gyi yang zhun 'di kho na:__dga' rab shrI siM rig 'dzin brgyad la sogs:__grub mchog rnams las lam rim mnos pa dang :__phan tshun chos kyi bgro ba chen po yis:__dgongs nyams bsdur ba'i mdo byang 'di las med:__o rgyan rgya gar bod yul la sogs su:__bla rdzogs thugs gsum sgrub sde brgyad la sogs:__zab cing rgya che'i chos 'khor 'byams klas pa:__kun gyi don bsdus ma nor 'di yin no:__mdor na rjod byed tshig nyung brjod bya 'dril:__go sla khyer bde gzhan la ma ltos par:__dbang po dman 'bring mchog gi lam rdzogs pa'i:__mthar thug zhal gdams 'di las gzhan ma mchis:__de phyir bdag nyid pad+ma saM b+ha ba'i:__thugs kyi thig le lnga ldan 'od gsal dbyings:__mi shigs dwangs ma chos nyid rang sgra'i rgyud:__dus gsum sangs rgyas kun gyi gshegs shul 'di:__zhes gsungs te/__de ltar ji skad bstan pa'i zhal gdams man ngag lam gyi rim pa khyad gzhi'i gzhung nyid ni/__rgyu lam du byed pa phar phyin gyi theg pa dang 'bras bu lam du byed pa gsang sngags rdo rje theg pa'i chos tshul rgya mtsho chen po'i yang bcud bdud rtsi'i gong bu lta bu/__khyad par du'ang rgyud ma hA lung a nu man ngag a ti yo ga ste nang rgyud sde gsum gyi dgongs pa'i mthil du thug pa/__'chad pa'i tshul mdo sngags kyi chos sgo kun dang mthun la don zab cing 'dril la ma tshang ba med pa'i phyir kun las khyad par du 'phags pa theg rim kun gyi spyi gnad gcig tu 'dril ba ye shes snying po'i lam rim zab mo 'di la brten nas/__mig 'phrul gyi snang ba lta bur dka' ba med cing myur ba kho nar sangs rgyas kyi 'bras bu mngon tu byed pa'i thabs bla na med par gyur pa yin la/__khyad chos yon tan gzhung 'di nyid skal ba dang ldan pa gang dag gis mthong ba tsam gyis byin rlabs kyi zil dang gzi brjid chen po rang shugs kyis 'bebs pa dang*/__slob dpon gyis bshad pa'i tshig rna bar thos pa tsam gyis don spyi go zhing de la rtog dpyod gyi bsam pas nyams myong dang rtogs pa'i ye shes klong nas brdol ba dang*/__rnam par g.yeng ba spangs te zla ba drug tu 'di'i don rtse gcig tu bsgoms pas rdo rje mi phyed pa gsum gyi ye shes chen po rang bzhin gyis shar bar nges pa ste/__khyad par de ldan gyi gzhung 'di tshul ji ltar na/__ka dag chos sku kun tu bzang po dang lhun grub longs sku rdo rje sems dpa'/__zung 'jug sprul sku pad+ma 'byung gnas gsum po don dam gyi dbyings la tha dad du dbye ba byar med cing chos kyi dbyings su ro gcig par lhun gyis rdzogs pa'i phyir na/__brtag gnyis las/__'chad pa po nga chos kyang nga*/__/rang gi tshogs ldan nyan pa nga*/__/'jig rten ston pa bsgrub bya nga*/__/'jig rten 'jig rten 'das pa nga*/__/zhes gsungs pa ltar tshad dang mu med pa'i rab 'byams rgyud sde rgya mtsho kun gyi 'phro gzhir gyur pas rgyud ston pa po dang de'i bstan pa zab gsang snying po'i don gyi rgyud lung rnams dang*/__de'i zab gnad lag len tu dril ba'i man ngag nyid kyang tha dad rang mtshan tu ma grub par ngo bo chos sku gcig gi rang snang nyid yin kyang*/__rnam pa tsam du dzam+bus mtshan pa'i gling bskal pa bzang po'i sangs rgyas rnams 'byung ba'i zhing 'di'i gdul bya rnams thar par drang pa'i slad du/__nub phyogs o rgyan d+ha na ko Sha'i mtsho gling du ngo mtshar pad+ma'i sdong po nas brdzus te byung ba dang*/__o DI ya na'i yul sogs su rigs mchog gi mngal du skyes pa sogs gzhan snang 'char tshul gcig tu ma nges par tha dad pas mdzad pa'i cho 'phrul bcu gcig dang brgya rtsa la sogs pa cir yang ston pa'i skabs su babs pa de'i tshe na/__'phags yul shar phyogs bkra shis mA ra tI ka'i brag phug tu tshe lam gyi phyag rgya man+da ra ba la rten byas te 'chi med tshe'i rig 'dzin bsgrubs pa'i dus bcom ldan 'das tshe dpag med mgon dngos su byon nas bskal pa ma stong gi bar du skye 'chi med pa rdo rje'i skur bzhugs pa'i dbang bskur zhing rgyud dang gdams ngag dpag tu med pa stsal ba dang*/__bal yul yang le shod bkra shis pa'i nags tshal byang chub dam pa'i gling du yang dag grub pa gcig pu'i rnal 'byor gyis phyag rgya chen po'i mchog sgrub pa'i tshe dpal chen he ru ka'i ye shes kyi skus rang byung chos nyid rdo rje'i rang sgras pad+ma saM b+ha ba bdag la dngos su stsal ba'i rgyud dang gdams pa mtha' yas pa de dag kun gyi yang zhun bcud du dril ba'ang lam rim zab mo 'di kho na yin la/__sprul pa'i sku mchog dga' rab rdo rje/__ye shes sku can shrI siM ha/__klong dgu'i ye shes dpal chen po brgyad kyi go 'phang grub pa rdo rje'i rig 'dzin chen po rnam pa brgyad la sogs pa grub pa mchog gi sa la bzhugs pa rnams las thun mong khyad par gyi lam rim mtha' yas pa nos pa'i tshul bstan pa dang*/__phan tshun tu dam pa chos kyi bka'i 'gro ba chen po mdzad nas rtogs pa'i gding tshad dang lta dgongs kyi nyams myong zab mo bsdur nas gtan la phab pa'i gnad kyi mdo byang yang 'di las gzhan tu med cing*/__'phags yul nub phyogs gsang chen 'byung gnas o rgyan/__lho phyogs sangs rgyas 'byon pa'i gnas rgya gar/__byang phyogs thugs rje chen po'i gdul zhing bod yul la sogs pa dzam gling gi yul gru mtha' dbus sing+ga la dang 'gro lding sogs gling phran rnams su/__bla ma gu ru rin po che nyid kyi sgrub thabs che chung mtha' yas pa rdzogs pa chen po pha ma gnyis 'brel gyi rgyud dang 'brel ba'i gdams zab/__thugs rje chen po zhi khro'i bskyed rdzogs grangs las 'das pa ste skal ldan gcig mi tshe gcig gis sangs rgyas kyi sar bgrod pa'i lam zab snying por dril ba de gsum dang*/__sgrub sde chen po brgyad dkyil 'khor gcig tu sgrub pa dang bye brag so sor sgrub pa'i thabs la sogs pa zab cing rgya che ba'i chos kyi 'khor lo 'byams su klas pa bskor ba de dag kun gyi zab don gcig tu bsdus shing ma nor ba'i lam mchog kyang 'di nyid kho na yin no/__/mdor bsdu na rjod byed tshig tshogs nyung yang brjaud bya'i don ma tshang ba gang yang med par gnad du 'dril zhing*/__rdo rje'i tshig gis ma bcings par zhal gdams rjen phyungs su bstan pas go sla ba/__mang nyung ran pas rgyun tu khyer bde ba/__lta sgom spyod pa yan lag bcas ma tshang ba med pas gzhung gzhan la ma ltos par/__dbang po dman pa nyan rang*/__'bring po byang sems/__dbang mchog rdo rje theg pa dag gi rang lam yongs su rdzogs pa'i phyir na/__sde snod gsum dang theg dgu'i snying po mthar thug pa'i zhal gdams 'di las lhag pa gzhan gang du btsal yang ma mchis so/__/rgyu mtshan de lta bu'i phyir bdag nyid gsung rdo rje pad+ma saM b+ha ba'i gsang chen thugs kyi thig le ye shes lnga ldan gyi rang 'od gsal ba'i dbyings las/__mi shigs nA da'i dwangs ma chos nyid rdo rje'i rang sgra'i rgyud kyi rgyal por rang byung ba/__'das pa dang da ltar dang ma byon pa'i dus gsum gyi sangs rgyas stobs bcu mnga' ba kun gshegs shing gshegs la gshegs par 'gyur ba'i shul lam chen po 'di ni/__zhes zab gnyan gces pa'i gdams pa la dngos po nges bzung du bstan pa'o/__/gnyis pa ni/__mnga' bdag yab sras gdams pa'i snod ldan cing :__bai ro tsa na bdag dang dgongs pa mnyam:__thugs kyi gzungs ma zhabs togs phul phyin pa'i:__snod ldan skal ldan mtshan ldan tshogs la gtad:__yal bar ma dor snying gi dbus su zungs:__'di ltos 'dir zhugs 'di nyid bshad dang sgrubs:__'di la brten nas mtha' yas gdul bya kun:__ye shes snying po tshe 'dir 'grub par shog:__ces gsungs te/__mnga' bdag chos kyi rgyal po yab 'jam mgon khri srong lde'u btsan dang lha sras sku mched sngon gyi las 'phro dang smon lam dag pas gdams zab bdud rtsi sbyin pa'i snod dang ldan cing sprul pa'i lo tsA ba bai ro tsa na slob dpon chen po shrI sing ha las rdzogs pa chen po'i lta dgongs mthar phyin pas o rgyan bdag dang dgongs pa'i rtogs tshad mnyam pa dang*/__thugs zin gyi gzungs ma dbyings phyug ye shes DA ki mtsho rgyal ma gu ru nyid la sgo gsum gus pa chen pos zhabs tog phul du phyin pas mnyes pa rnam gsum 'grub pa'i phyir/__chos rgyal yab sras dag pa'i snod ldan du gyur cing lo tsA chen po skal ba mchog dang ldan la ye shes mtsho rgyal rgyud lung nas 'byung ba'i mtshan nyid dang ldan pa ste/__dngos su smin pa gsum ldan lhan cig pa'i 'khor 'dus pa rnams dang*/__brgyud nas go phye ba'i 'khor ma 'ongs pa'i gang zag snod ldan skal ldan mtshan ldan gyi tshogs rnams la gnyer du gtad pa yin pas/__btang snyoms ngang du yal bar ma dor bar gces tshad srog dang phongs tshad mig 'bras ltar btsa' bas rtag par snying gi dbus su dran pa'i gzungs kyis ma brjed par zung zhig__/der ma zad gzhung 'di yi ger bkod nas yang dang yang du ltos la ji skad bstan pa'i lam 'dir zhugs pa dang 'di nyid gzhan la rgya cher bshad pa dang rang gis brtson pas 'di'i don nyams su long nges par sgrubs shig__/ces zab mo'i bka'i gtad gnyer phyi tshig nan thag tu bsdams nas/__gong du bsngags pa brjod pa don dang ldan pa'i gdams pa khyad par can 'di la brten nas/__da ltar dang ma 'ongs pa na mtha' yas pa'i gdul bya dngos dang brgyud nas mthong thos dran reg gis 'brel bar gyur pa de kun gcig kyang ma lus par/__rang byung gdod ma'i sangs rgyas ye shes snying po'i 'bras bu dus gzhan tu mi ltos pas tshe 'dir kho nar 'grub par shog cig__/ces smon lam du mdzad pa ste rdo rje'i gsung nam yang bslu ba med pas de ltar 'grub pa'ang yang dag nges pa'i tshad ma'o/__/rtsa ba'i bzhi pa mjug gi don la gnyis/__gzhung yang dag par grub pa'i tshig gis mjug bsdu ba dang*/__de ltar grub pa'i gzhung nyid sngon dang phyi mar dar ba'i tshul lo/__/dang po ni/__ces thugs gyi snying po gsang ba'i mdzod brtol nas gsungs tshangs pa'i dbyangs kyis bka' stsal te rdzu 'phrul gyi rnam par rol pa dang :__bkod pa mtha' yas pa dang bcas te sku gsung thugs mi zad pa lhun grub stug po bkod pa'i rgyan dam par bzhugs so:__zhes gsungs te/__de skad ces dus gsum sangs rgyas thams cad kyi gsang gsum sgyu 'phrul drwa ba'i spyi gzugs gu ru rin po che'i thugs kyi dgongs pa'i snying po phyung*/__gsang ba ye shes chen po'i mdzod brtol nas gsung yan lag drug cu dang ldan pa tshangs pa'i dbyangs kyis mdo sngags gdams pa zab rgu'i yang zhun du dril nas bka' stsal pas thams cad dgyes pa chen pos tshims pa'i mdongs gsol du/__ngo mtshar rmad du byung ba'i rdzu 'phrul gyi rnam par rol pa dang*/__rnam par thar pa'i bkod pa mtha' yas pa 'dus pa'i tshogs kyi dbang po'i spyod yul du snang bar mdzad pa dang bcas te ston 'khor dgongs pa mnyam nyid du gyur nas gu ru nyid kyi sku gsung thugs mi zad pa rgyan gyi 'khor lor lhun gyis grub pa stug po bkod pa'i rgyan mchog dam par dus bzhir 'pho 'gyur mi mnga' bar bzhugs so/__/sa ma ya:__zhes pa don mang por 'jug kyang 'dir gzhung zab pa'i phyir snod min la gsang ba dang*/__rdo rje'i tshig mi 'gyur ba'i dam tshig gi rgya'o/__/gnyis pa la gnyis/__sngon gyi skal ldan rnams kyis bzung tshul dang*/__ma 'ongs 'gro ba rnams kyi don tu gter du sbas pa'i tshul lo/__/dang po la gsum/__bka'i bsdu ba ji ltar byas tshul/__des 'gro don 'byung tshul/__de nyams su blang tshul lo/__/dang po ni/__de ltar bka' stsal pa rnams bdag nyid mtsho rgyal gyis mi brjed pa'i gzungs su bzung nas bsam pa dang sgom pas yid la byas ste:__slar yang mnga' bdag yab sras dang :__lo tsA ba chen po dang bcas phan tshun dgongs pa bsdur te tshig don lhag chad med par mkha' 'gro gsang ba'i yi ger bris:__so so'i mgul gyi ga'ur 'chang ste gnas so:__zhes pa'i bar gyis rdo rje'i gsung mtha' dag gi bka'i sdud pa po ye shes mtsho rgyal gyis mi brjed pa'i gzungs gyis thugs su bzung ste bsam sgom gyis gtan la phab/__de tsam du ma bzhag par chos rgyal yab sras lo chen bai ro bcas lhan cig thos pa'i 'khor rnams dang dgongs bsdur kyi tshig don lhag chad med pa'i zhu tig mdzad nas mkha' 'gro'i brda yig tu bkod cing thugs dam du 'bral med bcangs par bstan pa'o/__/gnyis pa ni/__nam zhig gi tshe bdag cag rje 'bangs kun kyang gros ma byas par dgongs pa gcig tu mthun par gu ru rin po che'i spyan sngar phyin te:__lha phyag dgu phrugs su btsal te gsol ba btab pa ni:__e ma gu ru rin po che:__khyed ni sangs rgyas thams cad dang :__dbyer med dkyil 'khor kun gyi gtso:__kun tu 'chang ba nyid lags na:__'dzam gling bye ba phrag brgya dang :__khyad par gangs can bod yul 'dir:__sangs rgyas las kyang lhag pa yi:__bka' drin mdzad pa bsam mi khyab:__bye brag bdag cag rje 'bangs la:__snod ldan skal ldan mtshan ldan du:__rdo rje'i gsung gis rjes gnang zhing :__shin tu dgyes pa'i mdangs phyungs te:__sngon chad zab cing rgya che ba'i:__gdams ngag bye ba phrag brgya'i gzhung :__ji snyed gsungs pa'i snying po'i phul:__rgyu 'bras lam mchog yongs rdzogs pa:__ma byung 'byung bar dka' ba'i bcud:__snying gi zungs su stsal lags na:__phyogs dus bde gshegs thams cad kyi:__dgongs nyams gsang ba'i yang zhun 'di:__da lta spel lam gter du sba:__'gro don gdul bya ji ltar 'byung :__dus gsum kun tu gzigs pa yi:__ma hA gu rus bka' stsal gsol:__ces gsol ba btab pa na:__dar cig dgongs pa mi g.yo ba'i ting nge 'dzin la bzhugs te:__de las bzhengs pa na 'di skad ces bka' stsal to:__nyon cig snod ldan 'dus pa'i tshogs:__bdag nyid pad+ma 'byung gnas ni:__gdod nas ma 'khrul rig pa'i gshis:__kun bzang thog ma'i mgon por rdzogs:__de las lnga ldan 'od kyi lus:__rnam par grol ba'i zhing khams su:__dus gsum dus med rtag pa yi:__longs spyod chen por rang dbang 'byor:__gdul bya'i yul dang nyer 'tshams par:__kha cig chags bral rab byung dang :__la lar 'khor los sgyur ba'i tshul:__bsam gyis mi khyab snang ba na:__mi mjed 'jig rten 'dzam gling 'dir:__snyigs ma lnga bdo'i dus kyi mthar:__nyon mongs shugs drag gnyen po zhan:__rtsol bcas theg pas gdul dka'i tshe:__d+ha na ko sha'i pad gling du:__mtsho skyes 'chi med rdo rje 'chang :__rdzus skyes thog babs tshul nyid du:__rang byung sprul pa'i sku ru 'ong :__zhi _bas mi 'dul gdug pa'i dpung :__tshar gcod rdo rje drag po rtsal:__ye shes hU~M lnga'i snang glu can:__rig 'dzin mkha' 'gro'i gtso bor bzhengs:__o rgyan rgya gar yul kun tu:__bstan la rim gyis zhugs pa'i tshul:__dge slong pad+ma saM b+ha ba:__mtshan dang rnam thar bsam las 'das:__gdul dka'i tshogs rnams spa bkong zhing :__bar chad 'byung po gzir ba'i slad:__snang srid zil gnon thod phreng stsal:__bod kyi yul du lhag par snang :__mdor na gdul bya'i gang zag dang :__'dul byed ston pa 'dul thabs sogs:__'dod rgur bsgyur ba'i cho 'phrul gyis:__'gro 'dul phrin las bsam mi khyab:__khyad par gangs can bod yul 'dir:__sngon nas 'brel ba'i mthu btsan pas:__chos kyi rgyal po chen po yis:__gus pas spyan drangs gsol btab ltar:__mtha' dbus thams cad zhabs kyis bcags:__lha srin gdug pa'i rtsub 'gyur btul:__bsam yas gtsug lag mthar phyin zhing :__bkra shis lhag gnas me tog 'thor:__rgya che'i mdo rgyud 'byams klas dang :__zab pa'i man ngag snying po sogs:__skad cig rer yang rdzu 'phrul gyis:__chos kyi 'khor lo grangs med bskor:__gnas chen gangs brag mtsho gsum rnams:__byin gyis brlabs shing zab gter sbas:__da ltar bzhugs dang 'byung 'gyur gyi:__bod la bka' drin che bar byas:__bye brag phyi nang bdud sde'i dpung :__'joms byed rdo rje drag po rtsal:__gnyen po stobs kyi lhar bzhengs nas:__smin grol yan lag mtha' rgyas gdams:__de rnams las kyang phul byung ba:__bskyed rdzogs rab 'byams thams cad kyi:__rgyab yig dmar byang gnad bsdus pa:__ye shes snying po'i lam rim bcas:__bdag gis ma 'ong dus shes pas:__da lta spel ba'i gnas med kyi:__rang rang nyams su len pa dang :__skal ldan gzhan la ci rigs ston:__nam zhig rang byung pad+ma bdag:__srin po'i gdul bya 'dul ba'i phyir:__cho 'phrul chen pos gshegs nas kyang :__lo skor gcig gi mthar son tshe:__bdag nyid kun bzang thod phreng gi:__tshogs brgyad dag pa'i rang gdangs las:__ye shes rnam pa brgyad kyi sku:__sprul pa'i mtshan mchog rnam brgyad las:__mtha' grol ye shes he ru ka:__'chol ba'i khro rgyal chen po ni:__dpal chen rdo rje gro lod kyis:__dam sri gdug pa 'dul ba'i phyir:__rol pa'i cho 'phrul bstan pa'i gnas:__stag tshang ming can bcu gsum las:__shar phyogs mdo khams yul gyi dbus:__'bri zla zal mo sgang gi rgyud:__sbas yul gangs ris bskor ba'i 'dabs:__rang byung shel gyi phug pa'i byang :__bod khams bkra shis 'byung ba'i gnas:__rin chen chu mig dkar mo'i mgo:__rmu stag mi zan btul ba'i 'gram:__seng ge dregs pas bsgyings pa'i spo:__bsam 'grub brag gi ke'u tshang ni:__rnam thar sgo gsum gzhal med khang :__zhi khro'i lha tshogs phyag rgya dang :__rgya bod yi ge dbyangs gsal phreng :__d+hA ki gsang ba'i ri mo sogs:__rnam pa du mas mtshan pa der:__o rgyan bdag gis zla ba gcig:__rdo rje khros pa'i ting 'dzin bsgoms:__bar chad 'byung po tshar bcad nas:__bod yul bkra shis 'byung bar byas:__de lta bu yi gnas kyi mchog:__thos pas las kyi sdig pa 'dag:__mthong bas nyon mongs sgrib pa zhi:__phyag bskor mchod pa byas pa yis:__tshe dang bsod nams ye shes rgyas:__rtse gcig bsgom dang bsgrub pa yis:__dngos grub rnam gnyis myur du thob:__'brel tshad don dang ldan pa ste:_yon tan bsngags pa brjod mi langs:__de yi gnas kyi rtse mo ru:__dbus su zhi khro yongs rdzogs pa:__bde gshegs 'dus pa'i gsang phug ni:__bltar yod bgrod du med par bzhugs:__g.yas su o rgyan bdag nyid dang :__g.yon du thugs kyi dgyes sde mo'i:__gsang ba'i nyams myong bskyang ba dang :__rdo rje'i rtogs pa spel ba'i sar:__zab mo'i gter ka du ma dang :__khyad par phyi ma'i snying po ru:__gzugs sku rtags kyi mtshan ma dang :__zab mo'i brda ris gsung gi rten:__bdag nyid drag rtsal he ru ka'i:__phyag mtshan thugs kyi rdo rjer bcas:__ye shes d+hA ki mtsho rgyal mas:__bcu gsum rim pa'i rgya dang ni:__rig 'dzin dga' rab rdo rje yis:__ro langs gser du bsgyur ba sogs:__rin chen du ma'i snying po rnams:__smon lam zab mo'i mtshams sbyor bcas:__mgon po mig gsum drag po dang :__ging btsan rdo rje legs pa la:__las kyi gnyer du gtod la sbos:__ma 'ongs phyi ma phyi ma'i dus:__rtsub 'gyur sum cu kha ral tshe:__chos rgyal yab sras byin rlabs las:__ma nges 'gro 'dul rig pa 'dzin:__sgyu ma lta bu'i skyes bu zung :__khams dbus shar dang lho ru 'byung :__khyad par 122334567899:__sngon gyi smon lam mthu btsan pas:__rdo rje'i gnas der lhan cig tshogs:__da lta'i ngang tshul thams cad kun:__rmi lam bzhin du yad yud dran:__dga' dang skyo ba'i nyams 'bar zhing :__snang ba ban bun gza' gtad bral:__sgyu ma lta bu'i spyod pa dang :__ma 'gags rdzu 'phrul rol pa yis:__kun gyis mthong bar spyan drangs te:__rtsod pa bral zhing yid ches pas:__o rgyan bstan la bya ba byed:__bod khams sdug bsngal zhi ba dang :__kun la phan bde thang cig 'byung :__de tshe thog ma'i skal ldan ni:__rnam par snang mdzad lo tsA bas:__byin brlabs zhi ba'i blo gros kyis:__zab rgyas tshig don gtan la 'bebs:__mtsho rgyal khyod kyis byin brlabs pas:__'di nyid nyams blangs ye shes rnyed:__pad+ma'i ming can brtul zhugs ldan:__dbus kyi phyogs su bstan pa spel:__bdag dang rigs gsum sems dpa' yis:__byin brlabs rig pa 'dzin lnga dang :__zab mo'i lam 'di 'phrad pa na:__bar chad zhi zhing bod khams bde:__thugs kyi bka' babs mi brgyad dang :__mchog gi rig 'dzin nyi shu lnga:__'dzin dang spel ba bcu drug ste:__rigs ldan mkha' 'gro lnga phrag zung :__de dag rnams kyis nyams blangs na:__mchog thun dngos grub khyad par 'thob:__gzhan yang las can brgya rtsa ste:__dngos grub thob pa stong rtsa brgyad:__'brel thogs 'bum tsho bco brgyad sogs:__mi dang mi ma yin pa yi:__gdul bya'i skye bo bsam mi khyab:__'dul byed thabs kyi khyad par las:__'ga' zhig nad gdon bar chad zhi:__la la mnga' thang dpal 'byor rgyas:__la las snang srid dbang du 'gyur:__gzhan dag drag po'i brtul zhugs kyis:__gdug pa can rnam tshar gcod byed:__khyad par mchog gi phrin las ni:__bskyed rim gsal snang brtan pa las:__dmigs gtad nus mthu rtsol med 'byung :__rdzogs rim rlung sems las rung bas:__mngon shes rdzu 'phrul sna tshogs 'char:__thabs lam zab mo'i nyams len gyis:__bde ba chen po'i brtul zhugs grub:__mthar thug 'od gsal rdzogs pa che:__rdo rje snying po'i gsang lam nas:__gnas lugs mngon gyur ye shes su:__pad+ma bdag dang skal mnyam pa:__mtha' dbus kun tu 'byung ba yis:__snying po'i bstan la bya ba byed:__de yang byang chub sems dpa' rnams:__gang 'dul rnam thar tshad med pas:__kha cig rgya cher bshad pa dang :__'ga' zhig zab don sgrub pa dang :__la las ma nges 'gro 'dul phyir:__gzhan phan spyod pa cir yang ston:__kun kyang pad+ma bdag nyid dang :__zab mo'i lam 'dir yid ches pas:__'brel tshad don dang ldan 'gyur zhing :__bsam pa thams cad nges par 'grub:__ye shes snying po'i lam rim 'di:__rin chen gser gyis bris nas kyang :__bdud rtsi lnga yis rab tu byugs:__thabs dang shes rab dam rdzas bcas:__gang gi mgul du gdags pa'am:__spy-i bo'i gtsug tu 'chang bas kyang :__mthong thos dran reg grol ba dang :__dgongs nyams ye shes rtsol med 'char:__de bzhin klog dang 'dzin pa dang :__kha ton 'chad nyan byed pa yang :__pad+ma bdag gis byin brlab na:__tshul bzhin nyams len smos ci dgos:__gzhan yang bod khams thams cad la:__bde skyid bkra shis 'byung 'dod na:__mes dbon gsum gyis bzhengs pa yi:__gtsug lag khang rnams thams cad dang :__sgrub pa'i gnas rnams nyams pa gso:__dge 'dun rnams kyis brtan bzhugs dang :__nus ldan rab gnas yang yang 'thor:__phyag mchod bkur sti rgya cher bya:__sku gsung thugs kyi rten bzhengs la:__dus ston btsug cing sde snod bshad:__gnas chen byin 'bebs cho ga dang :__bdud rtsi sman gyi sgrub pa dang :__tshogs mchod rdo rje'i glu gar bya:__zhib par bod la snying brtse bas:__mkhan chen byang chub sems dpa' dang :__bdag dang chos kyi rgyal po yi:__snying po'i zhal gdams ji lta bar:__bla yi mchod gnas sde gnyis dang :__rgyal blon 'bangs dang bcas pa yis:__chos brgyad ltar snang ma yin par:__the tshom med pa'i nges shes dang :__phyir mi ldog pa'i brtson 'grus kyis:__'bad pas rtsal du bton byas na:__sems bskyed bsam pa'i khyad par bzhin:__bod yul spy-i dang bye brag gi:__dus kyi rgud pa zhi ba dang :__snod bcud 'byor pa 'phel ba dang :__bshad sgrub bstan pa yun bsrings nas:__bkra shis bde legs phun sum tshogs 'gyur:__ces bka' stsal pa na bdag cag rnams shin tu dad cing rjes su yi rang bas bzod du med pa'i mos gus kyi nyams 'bar ba dang bcas phyag dang mchod pa phul zhing rdo rje'i glus mgrin gcig tu bstod pa ni:__e ma ho:__kun bzang thog ma'i mgon po 'od dpag med:__thugs rje'i skur bzhengs mtsho skyes rdo rje 'chang :__yon tan yongs rdzogs pad+ma saM b+ha ba:__gdul dka'i 'gro 'dul rdo rje drag po rtsal:__snang srid zil gnon rig 'dzin pad+ma 'byung :__bde stong zung 'jug thig le gcig nyid las:__sems can kun gyi dbang po'i khyad par bzhin:__zhi dang khro dang rjes su chags pa'i sku:__rol pa chen po'i cho 'phrul mkha' ltar khyab:__mos pa dang ni blo yi bye brag dang :__rjes su mthun par chos 'khor rgyun mi 'chad:__'od gsal dbyings las ma g.yos ye shes kyi:__thugs rje'i 'jug pas bod la lhag par dgongs:__bka' drin mnyam med gu ru rin po cher:__lus dang longs spyod ltos pa med par 'bul:__byang chub bar du nam yang mi 'bral bar:__thugs dam zhal bzhes dgongs pas rjes su zungs:__bod khams mtha' dbus kun du bde ba dang :__sangs rgyas bstan pa yun du gnas pa dang :__bdag cag las dang smon pas gar skyes kyang :__gu ru'i phrin las yongs su spel ba las:__mthong thos dran reg 'brel tshad don ldan cing :__kun bzang dgongs klong phyams gcig grol bar shog:__khyad par rdo rje'i gsung gi snying po rnams:__dus su babs tshe bton cing spel ba dang :__'chad nyan sgom sgrub zab mo la brten nas:__rgyal ba kun gyi phrin las yongs rdzogs shog:__ces bsam pa thag pas smon lam du gsol ba na:__gu ru rin po ches kyang de de bzhin du gyur cig ces rdo rje'i gsung gis bden tshig stsal ba dang lhan cig:__sangs rgyas dang byang chub sems dpa' nam mkha' gang bas me tog gi char phabs:__bkra shis kyis mnga' gsol:__rig pa 'dzin pa dang :__grub pa dang :__mkha' 'gro dang :__srung ma dang :__lha dang :__klu dang :__dkar phyogs skyong ba'i gzhi'i bdag po rnams kyis kyang mngon par bstod cing bstan pa skyong ba dang :__spel ba dang :__'dzin par khas blangs te mi snang bar gyur to:__sa ma ya:__zhes gsungs te/__dag pa'i 'khor rnams mgrin gcig tu gdams pa 'dzin skyong spel gsum ji ltar bya ba zhus pa'i lan du gu ru rin po ches rnam thar mdor bsdus pas thog grangs/__spyir mdzad pa'i cho 'phrul mtha' yas pa dang bye brag gangs can bod kyi yul du sangs rgyas kyi mdzad pa bsam yas rab 'byams su bstan pa'i tshul dang*/__khyad par bdud 'joms rdo rje drag po rtsal gyi skur bzhengs nas zab rgu'i gdams bcud ye shes snying po lam 'bras bu dang bcas pa'i chos skor ma 'ongs gdul bya'i don du zab mo'i gter du sba bar gdams pa dang*/__gter gnas 'chol ba'i khro rgyal rdo rje gro lod mchog gi skur bstan te gcig las du mar 'phrul pa'i tshul gyis dam sri gdug pa can btul ba'i gnas stag tshang ming can bcu gsum yod pa'i ya gyal mdo khams 'bri zla zal mo sgang gi rgyud sbas gnas chen po rdo rje zil khrom gyi 'dab zhol rong rme dkar mo stag tshang gi gnas kyi bzhugs tshul chai brjod phan yon dang bcas pa/__der sku gsung thugs rten sogs ji ltar sba ba'i tshul/__gang la bcol gdams bya ba'i gter srung*/__sbas pa'i gter de 'byin pa'i dus tshod/__'don pa'i skyes bu/__gdams pa'i snod ldan/__de la brten nas phrin las 'byung tshul/__skyes bu dam pa'i rnam thar ma nges pa skyong tshul/__lam rim 'bri klog 'chad nyan gyi phan yon/__zhar byung bod khams bde ba'i rim gro ji ltar sgrub pa'i tshul yon tan dang bcas pa gsal bar bstan mthar bka' stsal pa la rjes su yi rang zhing dad gus chen pos mchod bstod phul te smon lam btab pas gu ru rin po ches mthun 'gyur stsal zhing bkra shis pa'i mtshan ltas rgya cher snang ba dang*/__rig 'dzin mkha' 'gro dkar phyogs skyong ba rnams kyis bstan pa 'di nyid srung zhing skyong ba'i dam bca' phul ba bcas bstan to/__/gsum pa ni/__de nas ji ltar bka' stsal pa'i rjes su 'brangs te:__bdag cag rje 'bangs rnams kyis thos bsam sgom gsum gyis yid la byas te dpe rgyud mgul du 'chang :__snyan brgyud ci rigs pa gzhan la'ang ston cing gnas pa na:__zhes pa'i bar gyis dag pa'i 'khor de rnams kyis gzhung 'di la thos bsam sgom pa mthar phyin par mdzad nas tshig don cha tshang ba'i dpe rgyud gzhan la ma bstan par mgul du 'chang*/__snyan brgyud dum dum khrigs ci rigs pa skal ldan gzhan la'ang bstan cing spel ba'i tshul bshad/__gnyis pa gter du sbas pa'i tshul la gnyis/__sbas tshul dngos dang*/__zhar byung de bton nas 'gro don 'byung tshul lo/__/dang po ni/__nam zhig gu ru rin po che srin po'i kha gnon du gshegs nas lo skor gcig gi mthar son pa'i dus:__dbyings kyi mkha' 'gro e ka dza TIs kyang rjes su bskul ba la brten nas:__rdo rje'i lung gis mngon par bsngags pa'i gnas su mi 'gyur ba'i bka' rtags gsum so sor sbas nas bka' srung bdud mgon nag po dang :__gter srung ging btsan dmar po la bcol gdam du bgyis pa na:__de dag gis kyang skal med byung na dbang po bsnub pa dang :__skal ldan la tshul bzhin du gtad cing phrin las spel ba'i g.yar dam mdongs gsol du bzhes so:__de'i tshe smon lam du gdab pa:__dus gsum kun mkhyen kun tu 'chang :__bde chen pad+ma saM b+ha ba'i:__zhal gdams lam rim snying po dang :__rdo rje drag rtsal he ru ka'i:__smin grol bskyed rdzogs yan lag bcas:__mi 'gyur brag gi sul du sbas:__rim pa mang po'i rgyas btab nas:__gter bdag srung mar gnyer gtad pa:__nam zhig bod khams mtha' dbus kun:__sdug bsngal rgya mtshor g.yeng ba'i tshe:__mnga' bdag yab sras thugs bskyed las:__rnam 'phrul zung dang 'phrad nas kyang :__zab mo'i lung bzhin spel ba'i mthus:__bstan 'gro'i rgud pa zhi ba dang :__phan bde rgya cher 'byung bar shog:__ces bsam pa thag pas smon lam du bgyis pa na gu ru rin po che'i ye shes kyi sku skad cig gis glog 'khyugs pa lta bu'i rdzu 'phrul gyis mngon par snang bar mdzad de rdo rje'i bden tshig gis slar yang dbugs dbyung ba dang :__rab tu gnas pa'i me tog 'thor ba rin po che'i char du snang bar gyur to:__sa ma ya:__rgya rgya rgya:__gter rgya:__sbas rgya:__gtad rgya:__man+t+ra gu h+ya sa ma ya:__zhes gsungs te/__ye shes DA ka'i rje mo mtsho rgyal mas gu ru srin po'i kha gnon du gshegs pa'i rjes bod khams mtha' dbus kun tu gter zhabs bsdams pa'i dus su sngags srung ral gcig mas rjes su bskul bas rkyen byas te/__gu rus lung bstan pa'i gnas su rdzu 'phrul gyis sbas shing zab mo'i rgya rim pa bcu gsum gyis btab nas gter srung bdud dang btsan gyi mgon po la gnyer du gtad cing rdo rje'i lung don 'grub pa'i smon lam mdzad pa na gu ru rin po che skad cig gis byon nas bden tshig dang rab tu gnas pa'i phrin las mdzad tshul rnams bstan to/__/gnyis pa ni/__oM swa sti sarba sid+d+hi/__zhes bkra shis pa'i sngags tshig gis thog drangs/__mkhas pa'i gtsug rgyan grub pa'i 'khor los sgyur/__/pad+ma 'od gsal mdo sngags gling pa la/__/ye shes DA' kis kha byang dngos su phul/__/snga phyir gsal snang gzigs pas nges pa 'khrungs/__/gter chen chos kyi rgyal po mchog gyur gling*/__/mdo smad bstan 'gro'i dpal du chag pheb cing*/__/zad par dus kyi khug pa rdzogs pa dang*/__/rab tshes shar la nye ba'i gnas dus kyi/__/rten 'byung phun tshogs ngang gis 'grigs pa na/__/gu ru'i lung bzhin yab sras lhan rgyas pas/__/rong me dkar mo stag tshang gnas kyi sgo/__/snang bar mdzad cing bsam 'grub ke'u tshang gi__/gsang phug g.yas g.yon seng ge g.yu mtsho nas/__/ngo mtshar zab gter nor bu'i mdzod phyung ba'i/__/yang zab bla ma rdo rje drag rtsal gyi/__/sku gsung thugs rten khyad par 'phags pa ni/__/g.yon ngos mkha' 'gro gsang ba'i phug pa nas/__/bod khams spyi khyab skyob pa'i mgon tu byon/__/bla sgrub skor bzhi'i rgyab chos lam gyi rim/__/mdo rgyud snying po'i dgongs pa'i bcud 'di yang*/__/rig 'dzin che mchog gser zhal rgyas pa yis/__/mdo rgyas 'tshams pa'i mkha' 'gro'i brda bsgyur cing*/__/skal bzang snod ldan blo gros mtha' yas sdes/__/sgo gsum gus pas sri zhu lhur blangs te/__/snying po'i bstan pa'i btsas dang phyi rabs kyi/__/skal ldan yongs kyi snying bcud rin chen dbyig__/sa steng nyi zla'i sgron me sbar byas pa'i/__/dge bas gsang chen nges pa'i theg pa las/__/khams gsum skye rgu rtsol med dbugs dbyung zhing*/__/dus kyi rgud pa kun zhi gangs can gyi/__/mtha' dbus bde skyid rdzogs ldan dpal 'bar shog__zhes gsungs te rdo rje'i lung don ltar 'gro 'dul grub pa'i rig 'dzin chen po lhan rgyas pas 'phral gyi kha byang dang sngon gnas rjes dran gyi gsal snang la brten/__zab mo'i gter rgya bkrol te sbas pa'i gter rnams sa steng du snang bar mdzad pas skal ldan skyes mchog rnams kyis 'dzin skyong spel te 'gro don mtha' rgyas su 'phel ba'i sgo mo gsar du phyes pa'i tshul smon lam dang bcas bstan pa'o/__/oM swa sti sid+d+haM/__gang zhig sangs rgyas snying po dri mar bcas pa rgyu dang 'bras bu'i bstan rim gyis/__/legs sbyong cho ga gzhung lugs gcig tu ma tshang med ston shing rta chen po'i srol/__/kun mkhyen ye shes rgya mtsho las 'khrungs byis blo'i yul 'das rdo rje'i tshig gi mdzod/__/thar 'dod 'jug ngogs gcig pu 'dir zhugs mi gnas byang chub myur du mngon byed 'gyur/__/blo dman sbrang bu'i bgrod pas mkha' lam bzhin/__/dgongs don ji bzhin 'grel par nus min kyang*/__/gsang bdag rig 'dzin bla mas rjes gnang zhing*/__/gzhan dag 'bad pas bskul phyir cung zad bkrol/__/thos pa'i lang tshos rab dregs ston chen gyi/__/don tu 'gyur min thar pa don gnyer ba'i/__/dad brtson blo dman rnams la snying gi dpyid/__/ster byed yongs 'dus gsar pa'i skyed tshal lo/__/ma rtogs log rtog blo yis phyogs bslad pas/__/ma bkral log par bkral sogs nongs pa'i sprin/__gzhung bzang nyin byed sgrib rnams chos dbyings mkhar/__/rtsa gsum thugs rje'i shugs kyis dengs mdzad gsol/__/khengs pa'i blos min dad pa kho na yis/__/sri zhu phul ba'i dge 'bras phra mo tsam/__/gang mchis skye dgu'i rmongs pa'i mig sel cing*/__/dri bral ye shes spyan yangs thob phyir bsngo/__/'gro kun rgyal bstan yongs rdzogs bka' srol 'dir/__/thos bsam sgom pa'i skal ba mchog ldan cing*/__/rang lam mthar phyin bgrod gcig 'bras bu'i dpal/__/myur du thob nas don gnyis lhun grub shog__/srid na mtshungs med nor bu dpag bsam shing*/__/nyi zla'i dkyil 'khor rgyas 'dra'i gzhung 'di yang*/__/mi nyams rab 'phel de 'dzin skyes mchog rnams/__/sku tshe brtan cing bzhed don kun 'grub shog__/'dir 'brel yon tan ji ltar rdo rje'i lung gis bsngags pa bzhin/__/bdag gzhan 'brel bcas dka' ba med thob theg mchog yid bzhin nor/__/bshad sgrub rgyal mtshan rtse mor bkod las grub gnyis 'dod rgu'i char/__/'jig rten gsum na khyab cing rtag 'bebs bkra shis khyab gyur cig__/ces thugs sgrub rnam pa bzhi'i rgyab chos zhal gdams lam rim ye shes snying po'i 'grel pa mdor bsdus su byas pa 'di'ang*/__khyab bdag 'khor lo'i mgon po gter chen rig 'dzin bla ma lhan rgyas nas bka' lung gi rjes su gnang ba dang*/__rgyal dbang thams cad mkhyen pa bcu bzhi pa'i thugs sras kaM tshang bstan pa'i gsal byed mtshur phu rje dbon mchog sprul rnam pa gnyis dang*/__mkhyen ldan DA ki bde chen chos sgron nas kyang gser gyi me tog bcas ring nas bskul cing slad du gter sras rig 'dzin tshe dbang grags pa dang lhan cig gsung bskul gnang ba dang*/__byang sems dge ba'i bshes gnyen tshwa nyag bla ma shes rab gtsor gyur mos ldan gzhan dag gis kyang nan bskyar mdzad pa la brten/__thams cad mkhyen gzigs 'jam mgon bla ma rin po ches stsal ba'i sa bcad dang*/__zhal gyi bdud rtsi dngos su thob pa yid yul gang mchis gtsor bzung*/__'thad 'os kyi cha 'ga' zhig mkhas pa gzhan gyi legs bshad las kyang blangs te blun sgom spong ba pa'i gzugs brnyan pad+ma gar dbang blo gros mtha' yas sam/__'chi med bstan gnyis g.yung drung gling pa rtsal gyis shrI de bI ko Ti dpal spungs yang khrod tsA 'dra rin chen brag gi sgrub gnas su go sla 'dus gsal gyi tshul du bgyis pa bstan 'gror phan bde'i snang ba mi nub dar zhing rgyas pa'i rgyur gyur cig/__//____________________