ཆོས་དབང་ཐུགས་ཆེན་འཁོར་བ་དོང་སྤྲུགས་ཀྱི་གཤིན་པོ་རྗེས་འཛིན་ཐུགས་རྗེའི་ལྕགས་ཀྱུ།

🚧 This website is under continued development. We appreciate your patience!

Previous Text Back to Volume PageNext Text

Wylie title	chos dbang thugs chen 'khor ba dong sprugs kyi gshin po rjes 'dzin thugs rje'i lcags kyu
Location	chos kyi blo gros bka' 'bum Volume 5, Text 10, Pages 185-193 (Folios 1a1 to 5a3)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Tertön	གུ་རུ་ཆོས་ཀྱི་དབང་ཕྱུག་ (Gu ru chos kyi dbang phyug)
Citation	'jam dbyangs mkhyen brtse chos kyi blo gros. chos dbang thugs chen 'khor ba dong sprugs kyi gshin po rjes 'dzin thugs rje'i lcags kyu. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 5: 185-193. Bir, H.P.: Khyentse Labrang, 2012.
Genre	Funerary Rituals - gnas lung - byang chog  ·  Ritual and Liturgical Texts - cho ga phyag len
Cycle	ཐུགས་རྗེ་ཆེན་པོ་འཁོར་བ་དོང་སྤྲུག་ (thugs rje chen po 'khor ba dong sprug)
Deity	thugs rje chen po
Colophon	།ཅེས་པའང་མཁྱེན་གཟིགས་མཚུངས་བྲལ་གཙང་སར་མཆོག་སྤྲུལ་རིན་པོ་ཆེས་སྔ་སོར་བཀས་བསྐུལ་བ་དང་། བྲག་ལྗོངས་སྤྱི་མཛོད་མིང་སྲིང་མཆོག་གིས་གསུང་ངོར་འཇམ་དབྱངས་ཆོས་ཀྱི་བློ་གྲོས་པས་བྲིས་པ་འདིས་ཀྱང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །ཤུ་བྷཾ།
	/ces pa'ang mkhyen gzigs mtshungs bral gtsang sar mchog sprul rin po ches snga sor bkas bskul ba dang /__brag ljongs spyi mdzod ming sring mchog gis gsung ngor 'jam dbyangs chos kyi blo gros pas bris pa 'dis kyang sems can la phan pa rgya chen po 'byung bar gyur cig__/shu b+haM/

1 Texts in this Section (sde tshan or chos tshan)

185-193	ཆོས་དབང་ཐུགས་ཆེན་འཁོར་བ་དོང་སྤྲུགས་ཀྱི་གཤིན་པོ་རྗེས་འཛིན་ཐུགས་རྗེའི་ལྕགས་ཀྱུ། chos dbang thugs chen 'khor ba dong sprugs kyi gshin po rjes 'dzin thugs rje'i lcags kyu Funerary Rituals - gnas lung - byang chog   ·   Ritual and Liturgical Texts - cho ga phyag len	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

༄༅། །ཆོས་དབང་ཐུགས་ཆེན་འཁོར་བ་དོང་སྤྲུགས་ཀྱི་གཤིན་པོ་རྗེས་འཛིན་ཐུགས་རྗེའི་ལྕགས་ཀྱུ་ཞེས་བྱ་བ་བཞུགས། ། ན་མོ་མ་ཧཱ་ཀ་རུ་ཎི་ཀཱ་ཡ། གང་གི་མཚན་ཙམ་ཐོས་པས་ཀྱང་། །ངན་འགྲོའི་དུཿཁ་ལས་སྐྱོབས་པ། །ཐུགས་རྗེ་ཆེན་པོར་གུས་བཏུད་ནས། །གནས་ལུང་ཆོ་ག་མདོར་བསྡུས་དབྱེ། །དེ་ཡང་སྦྱོར་བའི་སྐབས་སུ་བུམ་པ་བཅུད་དང་ལྡན་པ་བཤམས། གཟུངས་རྡོར་འཇོག་ལ་ཕྱི་སྒྲུབ་རྐྱང་པའམ། དྲིལ་སྒྲུབ་གང་བྱེད་ཀྱི་དངོས་གཞིའི་བཟླས་པའི་མཐར། བུམ་པ་འོད་དམར་ལས་གྲུབ་པའི་གཞལ་ཡས་ཁང་མཚན་ཉིད་ཡོངས་སུ་རྫོགས་པའི་ནང་དུ་པད་ཟླའི་གདན་ལ་ཐུགས་རྗེ་ཆེན་པོ་འཁོར་བ་དོང་སྤྲུགས་གཅེར་བུ་རྒྱན་མེད་དམར་གསལ་པད་ཕྲེང་དང་བུམ་པ་འཛིན་པ་རིགས་བདག་སྣང་བ་མཐའ་ཡས་དང་བཅས་པ་སྐད་ཅིག་གིས་གསལ་བ་དང་། རང་གི་ཐུགས་ཀ་ནས་སྔགས་ཕྲེང་གཟུངས་ཐག་ལ་འཁྲིལ་ཏེ་སོང་བུམ་ལྷའི་ཐུགས་རྒྱུད་བསྐུལ་སྐུ་ཡི་ཆ་ཐམས་ཅད་ལས་བདུད་རྩིའི་རྒྱུན་བབས་པས་བུམ་པ་ཁེངས་པར་བསམ་ལ་གཟུངས་ཐག་འཛིན་ནས་ཡིག་བདུན་དང་། སྡིག་སྒྲིབ་ཀུན་འཇོམས་ཀྱི་གཟུངས་བཟླ་འོད་ཞུ་མི་བྱེད། དེ་ནས་མདུན་དུ་དྲི་རྟེན་དང་མིང་བྱང་། ཞི་དྲག་གི་སྦྱངས་བ་དང་ཏིལ་སྦྱངས་རྣམས་བཤམས་ལ། ཤཱུ་ནྱ་ཏཱས་སྦྱངས། སྟོང་པའི་ངང་ལས་པདྨ་དང་ཟླ་བའི་གདན་ལ་མིང་བྱང་ནྲྀཿལས་ཚེ་འདས་ཀྱི་རྣམ་པ་ཇི་ལྟ་བར་གྱུར། ན་མོ་རྩ་བརྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ཆོས་ཉིད་རྣམ་པར་དག་ཅིང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་དུའང་བཅོམ་ལྡན་འདས་ཐུགས་རྗེ་ཆེན་པོ་འཁོར་བ་དོང་སྤྲུགས་ཀྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་གྱིས་རླབས་ཀྱིས་དམིགས་ཡུལ་ཚེ་ལས་འདས་པའི་རྣམ་པར་ཤེས་པ་ཁམས་གསུམ་རིགས་དྲུག་གང་ན་གནས་ཀྱང་སྐད་ཅིག་གིས་འདིར་མཆིས་པར་གྱུར་ཅིག །ཨོཾ་བཛྲ་ཨ་ཀཪྵ་ཡ་ཛཿས་རྣམ་ཤེས་དང་། ཨོཾ་སརྦ་པཱ་པཾ་ཨ་ན་ཡ་ཧཱུྃཿགིས་སྡིག་པ་བཀུག་ནས། ཛཿཧཱུྃ་བྃ་ཧོཿས། རྣམ་ཤེས་ཨ་དཀར་པོའི་རྣམ་པས་རྟེན་ལ་ཐིམ་པར་བསམ། གཏོར་མ་གསུམ་རྟེན་ལ་བསྐོར་ཞིང་། ཨོཾ་སརྦ་བིགྷྣཱ་ན྄་ན་མཿསརྦ་སོགས་ལན་གསུམ་གྱི་ཞི་བ་དང་། ཏིང་ལོ་དང་ཆང་བུ་བསྐོར་ཞིང་། སུམྦྷ་ནི་གསུམ་གྱིས་ཕྱེད་མ། རང་ཉིད་དབང་ཆེན་རྟ་མགྲིན་གྱི་སྐུར་གྱུར། ན་མོ། རྩ་བརྒྱུད་ཀྱི་སོགས་བདེན་སྟོབས་བརྗོད་པ་སྔོན་དུ་འགྲོ་བས། ཚེ་ལས་འདས་པ་གསོན་གྱི་དུས་སུ་ཚེ་གནས་པ་དང་། གཤིན་གྱི་དུས་སུ་སྡིག་པ་སྦྱང་བ་ལ་བར་དུ་གཅོད་པའི་བགེགས་ཐམས་ཅད་གཏོར་མ་འདིས་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག་གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་རྡོ་རྗེ་མེ་རབ་ཏུ་འབར་བ་འདིས་བགེགས་ཁྱེད་རྣམས་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། སུམྦྷ་ནིའི་སྔགས་དང་བཅས་སྟེ་གཏོར་མ་ཕྱི་རོལ་དུ་དོར་བ་ནི་དྲག་པོའི་སྦྱང་བའོ། །དེ་ནས་སྤྲོ་ན་གཡས་གཡོན་དུ་མེ་ཆུ། མདུན་དུ་ཏིལ་ཅུང་ཟད་བཅས་འདུ་བགྱིས་པ། ཚེ་ལས་འདས་པའི་སྡིག་སྒྲིབ་ཐམས་ཅད་སྙིང་གར་ཡི་གེ་ཀཾ་ནག་པོའི་རྣམ་པར་གནས་པ་ལྟེ་བའི་གཏུམ་མོའི་མེས་དེད་སྣ་སྒོ་ནས་སྡིག་པ་རྭ་ཅན་གྱི་རྣམ་པས་མདུན་གྱི་ཏིལ་ལ་ཐིམ་པ་དེ་ཉིད་ཡེ་ཤེས་ཀྱི་མེ་དང་ཆུས་བསྲེག་ཅིང་སྦྱངས་བར་བསམ་ལ། ཨོཾ་སརྦ་པཱ་པཾ་ད་ཧ་ན་བྷསྨིཾ་ཀུ་རུ་ཡེ་སྭཱ་ཧཱ༔ཚེ་ལས་འདས་པའི་འཁོར་བ་ཐོག་མེད་ནས་བསགས་པའི་སྡིག་སྒྲིབ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ཞེས་བརྗོད་ཅིང་ཕྱིར་དོར་རོ། །ཡིག་བདུན་དང་གཟུངས་སྔགས་བཟླས་པའི་བྱེ་མས་བྲབ་དྲི་རྟེན་གྱི་གཟུགས་བརྙན་མེ་ལོང་གི་ངོས་སུ་ཤར་བ་ལས་བུམ་གྱི་ཆུས་བཀྲུ་ཞིང་། ཇི་ལྟར་བལྟམས་པ་སོགས་དང་། འདི་ནི་ཕྱིན་དྲུག་རང་བཞིན་ཆུ། །ཉོན་དྲུག་དྲི་མ་སྦྱངས་མཛད་ཅིང་། །ཕྱིན་དྲུག་དྲི་ཡིས་ལེགས་བགོས་ཆུས། །ཁྲུས་ལེགས་མཛད་ཀྱིས་ཁྲུས་བགྱིའོ། །ཞེས་མཚམས་རྣམས་སུ་ཡིག་བདུན་དང་གཟུང་སྔགས་བཟླ་བཞིན་བཀྲུ་བའི་མཐར། ཚེ་ལས་འདས་པའི་དུག་ལྔ་སེར་སྣ་དང་དྲུག་གནས་སུ་དག་ནས། ཕ་རོལ་དུ་ཕྱིན་པ་དྲུག་རིམ་གྱིས་རྫོགས་ཏེ་བླ་ན་མེད་པའི་བྱང་ཆུབ་རིན་པོ་ཆེ་མྱུར་དུ་ཐོབ་པའི་སྐལ་བ་དང་ལྡན་པར་གྱུར་ཅིག །འདོད་ཆགས་ཞེ་སྡང་གཏི་མུག་གསུམ། །འདི་དག་ཚེ་འདས་དུག་གསུམ་སྟེ། །དཀོན་མཆོག་གསུམ་པོ་དུག་མི་མངའ། །མཆོག་གསུམ་བདེན་པས་དུག་བཅོམ་མོ། །ཡིག་བདུན་སྔགས་མཐར། ཚེ་ལས་འདས་པའི་དུག་གསུམ་རྒྱུ་འབྲས་དང་བཅས་པ་ཐམས་ཅད་དཀོན་མཆོག་གསུམ་གྱི་བདེན་པས་ཤཱནྟིཾ་ཀུ་རུ་ཡེ་སྭཱ་ཧཱ། འབྱུང་བཞི་དུག་གི་ཕ་ཡིན་ཏེ། །འབྱུང་བཞི་དུག་གི་མ་ཡང་ཡིན། །ཡུམ་ཆེན་བཞི་ཡི་བྱིན་རླབས་ཀྱིས། །ཚེ་འདས་ཁྱོད་ལ་དུག་མེད་ཤོག །ཡིག་བདུན་སྔགས་མཐར། ཚེ་ལས་འདས་པའི་འབྱུང་བ་དང་འབྱུང་བ་ལས་གྱུར་པའི་དུག་ཐམས་ཅད་རིགས་ཀྱི་ཡུམ་བཞིའི་བདེན་པས་ཤཱནྟིཾ་ཀུ་རུ་ཡེ་སྭཱ་ཧཱ། བྱང་ཆུབ་སྙིང་པོར་གཤེགས་པ་ན། །སོགས་ཀྱི་མཐར། ཚེ་ལས་འདས་པས་གཙོར་བྱས་པའི་སེམས་ཅན་ཐམས་ཅད་སྤངས་བྱ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་ཏེ་ཤིན་ཏུ་བཀྲ་ཤིས་པར་གྱུར་ཅིག །ཅེས་བརྗོད་ཅིང་མེ་ཏོག་འཐོར། ཚེ་འདས་ཉིད་དཀོན་མཆོག་རྩ་གསུམ་རྒྱ་མཚོར་ཕྱག་འཚལ་ཞིང་སྐྱབས་སུ་འགྲོ་བར་བསམ་ལ། མགོན་པོ་ཐུགས་རྗེ་ཆེ་ལྡན་སོགས་ཤྭ་ལོ་ཀ་གསུམ་དང་། རྒྱལ་ཀུན་འདུས་པའི་སྤྱི་གཟུགས་ཆེ༔བྱིན་རླབས་ཐུགས་རྗེའི་གཏེར་ཆེན་པོ༔འཁོར་བ་དོང་ནས་སྤྲུགས་མཛད་པའི༔ཐུགས་རྗེ་ཅན་ལ་ཕྱག་འཚལ་ལོ༔ཕྱག་བྱར་འོས་པ་སོགས་ཀྱིས་ཕྱག་འཚལ། གཙོ་བོ་རྒྱལ་བ་འགྲོ་བའི་མགོན། སོགས་བརྗོད། དབང་བསྐུར་ན། ཚེ་འདས་སྐད་ཅིག་གིས་ཐུགས་རྗེ་ཆེན་པོའི་སྐུར་གྱུར། རང་གི་ཐུགས་ཀ་ནས་འོད་འཕྲོས་ཡེ་ཤེས་པ་སྤྱན་དྲངས་ཏེ་ཐིམ་པར་མོས་ལ། ཡིག་བདུན་མཐར། བཛྲ་ཨཱ་བེ་ཤ་ཡ་ཨ་ཨཱཿཞེས་པས་དབབ། ཏིཥྛ་བཛྲ་ཞེས་བརྗོད་རྡོ་རྗེ་སྤྱི་བོར་བཞག་པས་བརྟན་པར་བྱས། བུམ་པ་ཐོགས་ལ། རྣམ་རྒྱལ་བུམ་པ་འོད་ཕུང་དམར་པོའི་རང་བཞིན་གྱི་གཞལ་ཡས་ཁང་གི་དབུས་སུ་ཐུགས་རྗེ་ཆེན་པོ་འཁོར་བ་དོང་སྤྲུགས་བཞུགས་པའི་སྤྱི་མགྲིན་སྙིང་གའི་ཨོཾ་ཨཱཿཧཱུྃ་གསུམ་ལས་འོད་དཀར་དམར་མཐིང་གསུམ་བྱུང་། ཚེ་འདས་ཀྱི་སྒོ་གསུམ་ལ་ཐིམ་པས་སྒྲིབ་པ་དག །གསང་བ་གསུམ་གྱི་བྱིན་རླབས་ཐོབ་ལུས་ནང་བདུད་རྩི་དཀར་དམར་མཐིང་གསུམ་གྱིས་གང་བར་སྒོམས་ཤིག །ཧྲཱིཿཐུགས་རྗེ་ཆེན་པོའི་ལྷ་ཚོགས་ཀྱི༔རྣམ་རྒྱལ་བུམ་པའི་དབང་མཆོག་འདི༔སྐལ་ལྡན་ཁྱོད་ལ་བསྐུར་བ་ཡིས༔གསང་གསུམ་དབང་བསྐུར་ཐོབ་པར་ཤོག༔ཡིག་བདུན་མཐར། ཀ་ཡ་ཝཱ་ཀ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ་ཧྲཱིཿཞེས་བརྗོད་ལ་བུམ་པ་གནས་གསུམ་འཇོག་ཅིང་བུམ་ཆུས་གཏོར། འདོད་ཡོན་གྱི་དངོས་པོ་རྣམས། རྃ་ཡྃ་ཁྃ་གིས་བསང་སྦྱང་། སྟོང་པའི་ངང་ལས་འདོད་ཡོན་གྱི་དངོས་པོ་ཟད་མི་ཤེས་པ་ནམ་མཁའ་གང་བར་བསམ་ལ། ཕྱོགས་དུས་ཀུན་ན་གཟུགས་སྒྲ་དྲི་རོ་དང་། །རེག་བྱའི་ཁྱད་པར་ལུས་སེམས་ཚིམ་བྱེད་རྣམས། །ཐུགས་རྗེ་ཆེན་པོའི་གནས་ཐོབ་ཁྱོད་ལ་འབུལ། །ཟག་མེད་དགའ་བདེས་རྟག་ཏུ་ཚིམ་པར་ཤོག །ཨོཾ་ཨཱཪྻ་ལོ་ཀེ་ཤྭ་ར་པཉྩ་ཀཱ་མ་གུ་ཎ་པཱུ་ཛི་ཏེ་ཨཱཿཧཱུྃ། ཞེས་པས་བསྔོས། ལམ་སྦྱངས་བསྟན་ནི། ཉོན་ཅིག་ཚེ་འདས་རིགས་ཀྱི་བུ། །རིགས་དྲུག་གནས་ན་བདེ་བ་མེད། །སྡུག་བསྔལ་ལས་ལ་མ་ཆགས་པར། །མ་ཡེངས་རྩེ་གཅིག་དྲན་པ་ཟུངས། །འོག་མིན་བདེ་ཆེན་ཞིང་ཁམས་སུ། །བཅོམ་ལྡན་སྣང་བ་མཐའ་ཡས་བཞུགས། །གཉིས་མེད་སྦྱོར་བའི་མཁའ་དབྱིངས་སུ། །རང་རིག་རྩལ་གྱིས་འགྲོ་བར་གྱིས། །དཀོན་མཆོག་བདེན་པའི་བྱིན་རླབས་དང་། །ལྷ་དང་སྙིང་པོ་ཕྱག་རྒྱའི་མཐུས། །ལམ་ལྔ་ས་བཅུ་སྐད་ཅིག་ལ། །ཐོགས་པ་མེད་པར་བགྲོད་གྱུར་ཅིག །པདྨོ་འདམ་གྱིས་མ་གོས་ལྟར། སོགས་ཀྱིས་མཐར། ཕཊ྄། ཚེ་ལས་འདས་པའི་རྣམ་ཤེས་ཨ་ཐུང་གི་རྣམ་པས་སྤྱི་བོ་ནས་ཐོན། འོག་མིན་གྱི་ཞིང་དུ་སོང་། བཅོམ་ལྡན་འདས་སྣང་བ་མཐའ་ཡས་ཀྱི་ཐུགས་ཀར་ཐིམ་པས་རྒྱལ་བའི་སྲས་སུ་གྱུར་ཏེ་སངས་རྒྱས་པར་བསམ། སླར་ཡང་རྣམ་ཤེས་གཤེགས་པའི་བྱང་བུ་སྡིག་སྒྲིབ་དང་མཉམ་དུ་ཡེ་ཤེས་ཀྱི་མེས་བསྲེག་ཅིང་སྦྱངས་པར་མོས་ཏེ། ཆོས་ཀྱི་དབྱིངས་ཀྱི་ཐབ་ཁུང་དུ། །བདག་འཛིན་ཕུང་པོའི་ཡམ་ཤིང་ལ། །ཤེས་རབ་ཡེ་ཤེས་མེ་སྦར་བས། །ཚེ་འདས་ཉོན་མོངས་བག་ཆགས་སྲེག །ཡིག་བདུན་མཐར། ཨོཾ་ཨགྣ་ཡེ་ཛྭ་ལ་རྃ། ཞེས་བརྗོད་ཅིང་བྱང་བུ་བསྲེག །རྒྱལ་བའི་དཀྱིལ་འཁོར་བཟང་ཞིང་དགའ་བ་དེར། །སོགས་སྨོན་ལམ་ཇི་ལྟར་རིགས་པ་གདབ། བྱང་རོའི་སྟེང་དུ་ཟླ་བའི་དཀྱིལ་འཁོར་ལ་གནས་པའི་ཨཱཿདཀར་པོ་འོད་ཟེར་འཕྲོ་བ། དེ་ལས་ཡེ་ཤེས་ཀྱི་བདུད་རྩིའི་རྒྱུན་བབས་པས་ཚེ་འདས་ཀྱི་སྡིག་སྒྲིབ་ཐམས་ཅད་སྦྱང་བར་བསམ་ལ། ཡིག་བདུན་དང་གཟུང་སྔགས་བཟླས་པའི་དྲི་བཟང་གི་ཆུས་བཀྲུས། སྔགས་བཟླ་བཞིན་པར་སཱཙྪ་གདབས། སུ་པྲ་ཏིཥྛ་ས་མེ་ཏོག་འཐོར་ཞིང་རབ་ཏུ་གནས། དབེན་གནས་སམ་ཆུ་ཀླང་ཆེན་པོར་སྤྱན་འདྲེན་པར་བྱའོ། །ངན་འགྲོ་སྐྱོབ་ལ་ཟླ་མེད་པའི། །གནས་ལུང་ཆོ་ག་འདི་བགྱིས་པས། །འབྲེལ་ཚད་སྡུག་བསྔལ་མཚོ་ལས་ཐར། །བདེ་ཆེན་ཞིང་དུ་སྐྱེ་བར་ཤོག །ཅེས་པའང་མཁྱེན་གཟིགས་མཚུངས་བྲལ་གཙང་སར་མཆོག་སྤྲུལ་རིན་པོ་ཆེས་སྔ་སོར་བཀས་བསྐུལ་བ་དང་། བྲག་ལྗོངས་སྤྱི་མཛོད་མིང་སྲིང་མཆོག་གིས་གསུང་ངོར་འཇམ་དབྱངས་ཆོས་ཀྱི་བློ་གྲོས་པས་བྲིས་པ་འདིས་ཀྱང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །ཤུ་བྷཾ། །། །

[edit]

@#/__/chos dbang thugs chen 'khor ba dong sprugs kyi gshin po rjes 'dzin thugs rje'i lcags kyu zhes bya ba bzhugs/__/ na mo ma hA ka ru Ni kA ya/__gang gi mtshan tsam thos pas kyang /__/ngan 'gro'i duHkha las skyobs pa/__/thugs rje chen por gus btud nas/__/gnas lung cho ga mdor bsdus dbye/__/de yang sbyor ba'i skabs su bum pa bcud dang ldan pa bshams/__gzungs rdor 'jog la phyi sgrub rkyang pa'am/__dril sgrub gang byed kyi dngos gzhi'i bzlas pa'i mthar/__bum pa 'od dmar las grub pa'i gzhal yas khang mtshan nyid yongs su rdzogs pa'i nang du pad zla'i gdan la thugs rje chen po 'khor ba dong sprugs gcer bu rgyan med dmar gsal pad phreng dang bum pa 'dzin pa rigs bdag snang ba mtha' yas dang bcas pa skad cig gis gsal ba dang /__rang gi thugs ka nas sngags phreng gzungs thag la 'khril te song bum lha'i thugs rgyud bskul sku yi cha thams cad las bdud rtsi'i rgyun babs pas bum pa khengs par bsam la gzungs thag 'dzin nas yig bdun dang /__sdig sgrib kun 'joms kyi gzungs bzla 'od zhu mi byed/__de nas mdun du dri rten dang ming byang /__zhi drag gi sbyangs ba dang til sbyangs rnams bshams la/__shU n+ya tAs sbyangs/__stong pa'i ngang las pad+ma dang zla ba'i gdan la ming byang nr-iHlas tshe 'das kyi rnam pa ji lta bar gyur/__na mo rtsa brgyud kyi bla ma mchog gsum rgyal ba rgya mtsho'i tshogs dang bcas pa rnams kyi bden pa dang /__chos nyid rnam par dag cing chos can rgyu 'bras bslu ba med pa'i bden pa dang /__khyad par du'ang bcom ldan 'das thugs rje chen po 'khor ba dong sprugs kyi lha tshogs 'khor dang bcas pa rnams kyi bden pa dang /__bden pa chen po'i byin gyis rlabs kyis dmigs yul tshe las 'das pa'i rnam par shes pa khams gsum rigs drug gang na gnas kyang skad cig gis 'dir mchis par gyur cig__/oM badz+ra a kaR+Sha ya dzaHsa rnam shes dang /__oM sarba pA paM a na ya hU~MHgis sdig pa bkug nas/__dzaHhU~M ba~M hoHsa/__rnam shes a dkar po'i rnam pas rten la thim par bsam/__gtor ma gsum rten la bskor zhing /__oM sarba big+h+nA na? na maHsarba sogs lan gsum gyi zhi ba dang /__ting lo dang chang bu bskor zhing /__sum+b+ha ni gsum gyis phyed ma/__rang nyid dbang chen rta mgrin gyi skur gyur/__na mo/__rtsa brgyud kyi sogs bden stobs brjod pa sngon du 'gro bas/__tshe las 'das pa gson gyi dus su tshe gnas pa dang /__gshin gyi dus su sdig pa sbyang ba la bar du gcod pa'i bgegs thams cad gtor ma 'dis tshim par gyis la 'dir ma gnas par gzhan du dengs shig gal te mi 'gro na khro bo ye shes kyi rdo rje me rab tu 'bar ba 'dis bgegs khyed rnams mgo bo tshal pa brgyar 'gas par 'gyur ta re/__sum+b+ha ni'i sngags dang bcas ste gtor ma phyi rol du dor ba ni drag po'i sbyang ba'o/__/de nas spro na g.yas g.yon du me chu/__mdun du til cung zad bcas 'du bgyis pa/__tshe las 'das pa'i sdig sgrib thams cad snying gar yi ge kaM nag po'i rnam par gnas pa lte ba'i gtum mo'i mes ded sna sgo nas sdig pa rwa can gyi rnam pas mdun gyi til la thim pa de nyid ye shes kyi me dang chus bsreg cing sbyangs bar bsam la/__oM sarba pA paM da ha na b+hasmiM ku ru ye swA hA:tshe las 'das pa'i 'khor ba thog med nas bsags pa'i sdig sgrib thams cad shAn+tiM ku ru ye swA hA/__zhes brjod cing phyir dor ro/__/yig bdun dang gzungs sngags bzlas pa'i bye mas brab dri rten gyi gzugs brnyan me long gi ngos su shar ba las bum gyi chus bkru zhing /__ji ltar bltams pa sogs dang /__'di ni phyin drug rang bzhin chu/__/nyon drug dri ma sbyangs mdzad cing /__/phyin drug dri yis legs bgos chus/__/khrus legs mdzad kyis khrus bgyi'o/__/zhes mtshams rnams su yig bdun dang gzung sngags bzla bzhin bkru ba'i mthar/__tshe las 'das pa'i dug lnga ser sna dang drug gnas su dag nas/__pha rol du phyin pa drug rim gyis rdzogs te bla na med pa'i byang chub rin po che myur du thob pa'i skal ba dang ldan par gyur cig__/'dod chags zhe sdang gti mug gsum/__/'di dag tshe 'das dug gsum ste/__/dkon mchog gsum po dug mi mnga'/__/mchog gsum bden pas dug bcom mo/__/yig bdun sngags mthar/__tshe las 'das pa'i dug gsum rgyu 'bras dang bcas pa thams cad dkon mchog gsum gyi bden pas shAn+tiM ku ru ye swA hA/__'byung bzhi dug gi pha yin te/__/'byung bzhi dug gi ma yang yin/__/yum chen bzhi yi byin rlabs kyis/__/tshe 'das khyod la dug med shog__/yig bdun sngags mthar/__tshe las 'das pa'i 'byung ba dang 'byung ba las gyur pa'i dug thams cad rigs kyi yum bzhi'i bden pas shAn+tiM ku ru ye swA hA/__byang chub snying por gshegs pa na/__/sogs kyi mthar/__tshe las 'das pas gtsor byas pa'i sems can thams cad spangs bya mi mthun pa'i phyogs thams cad las rnam par rgyal te shin tu bkra shis par gyur cig__/ces brjod cing me tog 'thor/__tshe 'das nyid dkon mchog rtsa gsum rgya mtshor phyag 'tshal zhing skyabs su 'gro bar bsam la/__mgon po thugs rje che ldan sogs shwa lo ka gsum dang /__rgyal kun 'dus pa'i spyi gzugs che:byin rlabs thugs rje'i gter chen po:'khor ba dong nas sprugs mdzad pa'i:thugs rje can la phyag 'tshal lo:phyag byar 'os pa sogs kyis phyag 'tshal/__gtso bo rgyal ba 'gro ba'i mgon/__sogs brjod/__dbang bskur na/__tshe 'das skad cig gis thugs rje chen po'i skur gyur/__rang gi thugs ka nas 'od 'phros ye shes pa spyan drangs te thim par mos la/__yig bdun mthar/__badz+ra A be sha ya a AHzhes pas dbab/__tiSh+Tha badz+ra zhes brjod rdo rje spyi bor bzhag pas brtan par byas/__bum pa thogs la/__rnam rgyal bum pa 'od phung dmar po'i rang bzhin gyi gzhal yas khang gi dbus su thugs rje chen po 'khor ba dong sprugs bzhugs pa'i spyi mgrin snying ga'i oM AHhU~M gsum las 'od dkar dmar mthing gsum byung /__tshe 'das kyi sgo gsum la thim pas sgrib pa dag__/gsang ba gsum gyi byin rlabs thob lus nang bdud rtsi dkar dmar mthing gsum gyis gang bar sgoms shig__/hrIHthugs rje chen po'i lha tshogs kyi:rnam rgyal bum pa'i dbang mchog 'di:skal ldan khyod la bskur ba yis:gsang gsum dbang bskur thob par shog:yig bdun mthar/__ka ya wA ka tsit+ta a b+hi Shiny+tsa oM AHhU~M hrIHzhes brjod la bum pa gnas gsum 'jog cing bum chus gtor/__'dod yon gyi dngos po rnams/__ra~M ya~M kha~M gis bsang sbyang /__stong pa'i ngang las 'dod yon gyi dngos po zad mi shes pa nam mkha' gang bar bsam la/__phyogs dus kun na gzugs sgra dri ro dang /__/reg bya'i khyad par lus sems tshim byed rnams/__/thugs rje chen po'i gnas thob khyod la 'bul/__/zag med dga' bdes rtag tu tshim par shog__/oM AR+Ya lo ke shwa ra pany+tsa kA ma gu Na pU dzi te AHhU~M/__zhes pas bsngos/__lam sbyangs bstan ni/__nyon cig tshe 'das rigs kyi bu/__/rigs drug gnas na bde ba med/__/sdug bsngal las la ma chags par/__/ma yengs rtse gcig dran pa zungs/__/'og min bde chen zhing khams su/__/bcom ldan snang ba mtha' yas bzhugs/__/gnyis med sbyor ba'i mkha' dbyings su/__/rang rig rtsal gyis 'gro bar gyis/__/dkon mchog bden pa'i byin rlabs dang /__/lha dang snying po phyag rgya'i mthus/__/lam lnga sa bcu skad cig la/__/thogs pa med par bgrod gyur cig__/pad+mo 'dam gyis ma gos ltar/__sogs kyis mthar/__phaTa?/__tshe las 'das pa'i rnam shes a thung gi rnam pas spyi bo nas thon/__'og min gyi zhing du song /__bcom ldan 'das snang ba mtha' yas kyi thugs kar thim pas rgyal ba'i sras su gyur te sangs rgyas par bsam/__slar yang rnam shes gshegs pa'i byang bu sdig sgrib dang mnyam du ye shes kyi mes bsreg cing sbyangs par mos te/__chos kyi dbyings kyi thab khung du/__/bdag 'dzin phung po'i yam shing la/__/shes rab ye shes me sbar bas/__/tshe 'das nyon mongs bag chags sreg__/yig bdun mthar/__oM ag+na ye dz+wa la ra~M/__zhes brjod cing byang bu bsreg__/rgyal ba'i dkyil 'khor bzang zhing dga' ba der/__/sogs smon lam ji ltar rigs pa gdab/__byang ro'i steng du zla ba'i dkyil 'khor la gnas pa'i AHdkar po 'od zer 'phro ba/__de las ye shes kyi bdud rtsi'i rgyun babs pas tshe 'das kyi sdig sgrib thams cad sbyang bar bsam la/__yig bdun dang gzung sngags bzlas pa'i dri bzang gi chus bkrus/__sngags bzla bzhin par sAts+tsha gdabs/__su pra tiSh+Tha sa me tog 'thor zhing rab tu gnas/__dben gnas sam chu klang chen por spyan 'dren par bya'o/__/ngan 'gro skyob la zla med pa'i/__/gnas lung cho ga 'di bgyis pas/__/'brel tshad sdug bsngal mtsho las thar/__/bde chen zhing du skye bar shog__/ces pa'ang mkhyen gzigs mtshungs bral gtsang sar mchog sprul rin po ches snga sor bkas bskul ba dang /__brag ljongs spyi mdzod ming sring mchog gis gsung ngor 'jam dbyangs chos kyi blo gros pas bris pa 'dis kyang sems can la phan pa rgya chen po 'byung bar gyur cig__/shu b+haM/__//__/