བླ་མའི་རྣལ་འབྱོར་རྡོ་རྗེའི་ཡེ་ཤེས་སྣང་བ།

🚧 This website is under continued development. We appreciate your patience!

Previous Text Back to Volume PageNext Text

Wylie title	bla ma'i rnal 'byor rdo rje'i ye shes snang ba
Location	dil mgo mkhyen brtse bka' 'bum Volume 2, Text 25, Pages 137-138 (Folios 1a1 to 2b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Citation	Khyentse, Dilgo. Bla ma'i rnal 'byor rdo rje'i ye shes snang ba. In Skyabs rje dil mgo mkhyen brtse rin po che'i bka' 'bum, Vol. 2: 137-138. Delhi: Shechen Publications, 1994.
Genre	Guru Yoga Texts - bla ma'i rnal 'byor
Colophon	།ཅེས་པའང་སྡོམ་བརྩོན་ཆོས་བཞིན་སྤྱོད་པ་རིག་འཛིན་པདྨ་བསྟན་འཛིན་རྡོ་རྗེས་བསྐུལ་ངོར་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ་དཔལ་ལྡན་བླ་མའི་གོ་འཕང་ཐོབ་པའི་རྒྱུར་གྱུར་ཅིག །མངྒ་ལཾ། དགེའོ།།
	/ces pa'ang sdom brtson chos bzhin spyod pa rig 'dzin pad+ma bstan 'dzin rdo rjes bskul ngor 'gyur med theg mchog bstan pa'i rgyal mtshan gyis bris pa dpal ldan bla ma'i go 'phang thob pa'i rgyur gyur cig__/mang+ga laM/___dge'o//

Tibetan Text

Wylie

[edit]

༄༅། །བླ་མའི་རྣལ་འབྱོར་རྡོ་རྗེའི་ཡེ་ཤེས་སྣང་བ་བཞུགས་སོ། རིག་སྟོང་འོད་གསལ་ངེས་དོན་རྡོ་རྗེ་སེམས། །གདོད་ནས་འདུ་འབྲལ་མེད་པས་སྐྱབས་སུ་མཆི། །མ་རྟོགས་གློ་བུར་འཁྲུལ་པའི་ཡིད་ཅན་རྣམས། །སྐུ་གསུམ་ཞིང་དུ་སྦྱོང་བར་སེམས་བསྐྱེད་དོ། ཨ། ཆོས་ཀུན་མཉམ་ཉིད་བྱང་ཆུབ་སེམས་ཀྱི་ཀློང༌། །ཅིར་སྣང་དག་ཆེན་འོག་མིན་སྟུག་པོ་བཀོད། །རང་མདུན་ཀུན་བཟང་མཆོད་སྤྲིན་རྒྱ་མཚོའི་དབུས། །སེང་ཁྲི་པདྨ་ཉི་ཟླའི་གདན་གསུམ་དབུས། །སྐྱབས་གནས་ཀུན་འདུས་པདྨ་སཾ་བྷ་ཝ། །གཞོན་ཚུལ་རྒྱ་གར་པཎྜི་ཏ་ཡི་ཚུལ། །ཕྱག་གཡས་རྡོ་རྗེས་སྣང་སྲིད་ཟིལ་གྱིས་གནོན། །གཡོན་པས་མཉམ་བཞག་བྷནྡྷ་ཚེ་བུམ་གྱིས། །རིག་འཛིན་རྣམ་བཞིའི་ས་ལམ་རྫོགས་པའི་བརྡ། །ཞབས་ཟུང་མི་གཡོ་རྡོ་རྗེའི་སྐྱིལ་ཀྲུང་གིས། །སྲིད་ཞིར་མི་གནས་འཆི་མེད་རྡོ་རྗེའི་སྐུ། །ཁ་ཊྭཱྃ་མཆན་བཅུག་འཇའ་ཟེར་འོད་ཀློང་འགྱིང༌། །གཡས་སུ་ཐུབ་བསྟན་བཤད་སྒྲུབ་རྒྱ་མཚོ་ནི། །ཞི་དུལ་མཁན་ཆེན་བྱང་ཆུབ་སེམས་དཔའི་ཚུལ། །ཕྱག་གཉིས་ཆོས་འཆད་མཉམ་བཞག་ལྷུང་བཟེད་འཛིན། །པཎ་ཞྭ་ཆོས་གོས་གསུམ་གསོལ་སྐྱིལ་ཀྲུང་བཞུགས། །གཡོན་དུ་ཐེག་མཆོག་བསྟན་པའི་རྒྱལ་མཚན་ནི། །ཚངས་པ་ལྷ་ཡི་མེ་ཏོག་རྒྱལ་པོའི་ཚུལ། །ཆོས་འཆད་པད་སྡོང་རལ་པོད་འཁོར་ལོས་སྤྲས། །དགོངས་པ་མི་གཡོ་རྡོ་རྗེའི་སྐྱིལ་ཀྲུང་བཞུགས། །རབ་འབྱམས་སྐྱབས་གནས་རྒྱ་མཚོའི་ཚོགས་མ་ལུས། །བླ་མའི་ཡེ་ཤེས་གཅིག་གི་རོལ་པར་ཤར། །སྣང་སྲིད་མ་ལུས་ཀུན་བཟང་བླ་མའི་ཞིང༌། །དག་པ་རབ་འབྱམས་ལྟ་བས་ཕྱག་འཚལ་ཞིང༌། །ཆོས་ཉིད་བདེ་ཆེན་རང་མདངས་མཆོད་པ་འབུལ། །ཡིད་དཔྱོད་བློ་ཡི་འཛིན་སྟངས་དབྱིངས་སུ་བཤགས། །ཟག་མེད་ཡོན་ཏན་རྫོགས་ལ་རྗེས་ཡི་རང༌། །དུས་གསུམ་འཕོ་འགྱུར་མེད་པར་ཆོས་འཁོར་བསྐོར། །སྐྱེ་འགག་གནས་མེད་ཡེ་ཤེས་སྐུར་བཞུགས་གསོལ། །ཟག་མེད་ཡོན་ཏན་རྫོགས་ཕྱིར་དགེ་ཀུན་བསྔོ། །གཞི་ཡི་བླ་མ་རང་རིག་ཡེ་རྫོགས་དོན། །བརྡ་ཡི་བླ་མས་མངོན་སུམ་ངོ་སྤྲད་པས། །ལམ་གྱི་བླ་མའི་སྤང་རྟོགས་སྒྲ་ཇི་བཞིན། །སྤྱོད་པ་འབྲས་བུའི་བླ་མ་རྡོ་རྗེ་སེམས། །རིག་སྟོང་མཚོ་སྐྱེས་རྡོ་རྗེ་སངས་རྒྱས་གཉིས། །སྔ་འགྱུར་བསྟན་པའི་ཤིང་རྟ་ཐུབ་བསྟན་མཚན། །ཐེག་མཆོག་བསྟན་པའི་རྒྱལ་མཚན་རྣམ་པ་གསུམ། །དཔག་ཡས་སྐུ་དང་ཞིང་ཁམས་རྒྱ་མཚོའི་བདག །མི་ཤིགས་ཐིག་ལེ་ཆེན་པོར་འདུ་འབྲལ་མེད། །འཁོར་འདས་ཀུན་ཁྱབ་བཞུགས་པའི་རིག་རྩལ་གདངས། །མཉམ་ཉིད་ཆོས་སྐུར་ལྟ་བའི་མོས་གུས་ཀྱིས། །དགོངས་པ་གཅིག་ཏུ་འདྲེས་པར་མཛད་དུ་གསོལ། །སྲིད་ལས་ངེས་འབྱུང་བྱང་ཆུབ་སེམས་གཉིས་འབྱོངས། །མོས་གུས་སྟོབས་ཀྱིས་བླ་མ་སངས་རྒྱས་མཐོང༌། །བསྐྱེད་རྫོགས་སྙིང་པོའི་ཉམས་ལེན་མཐའ་རུ་ཕྱིན། །ཐེག་མཆོག་ལམ་གྱི་ཡོན་ཏན་ཡོངས་རྫོགས་པས། །དོན་གཉིས་ལྷུན་གྲུབ་ཐུགས་ཡིད་དབྱེར་མེད་ཤོག །ཚིག་བདུན་གསོལ་འདེབས་དང༌། ཞལ་གསུང་གསོལ་འདེབས་ཅི་རིགས་གྲངས་བསགས། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་དང༌། ཨོཾ་ཨཱཿཧཱུྃ་གུ་རུ་མཉྫུ་གྷོ་ཥ་མུ་ནི་ཤཱ་ས་བྷ་ཥ་ས་ག་ར་སིདྡྷི་ཨཱ་ཧཱུྃ། ཞེས་དང༌། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་མངྒ་ལ་ཤྲཱི་བྷཱུ་ཏི་སརྦ་སིདྡྷི་ཧཱུྃ། དེ་རྣམས་སོ་སོར་གྲང་བསགས། རིགས་ཀུན་ཁྱབ་བདག་བླ་མ་རྡོ་རྗེ་སེམས། །རབ་འབྱམས་རྒྱལ་བའི་རྡོ་རྗེ་གཞི་དབྱིངས་ཀྱིས། །བྱིན་རླབས་དབང་བཞིའི་ཚུལ་དུ་བསྐུར་ནས་ཀྱང༌། །ཐུགས་ཡིད་གཅིག་ཏུ་འདྲེས་པར་མཛད་དུ་གསོལ། །ཐུགས་རྒྱུད་བསྐུལ་བས་ཆོས་རྒྱལ་འོད་དཀར་དུ། །གྱུར་ནས་དཔྲལ་ཐིམ་གུ་རུ་འོད་དམར་གྱིས། །མགྲིན་ཐིམ་མཁན་ཆེན་འོད་མཐིང་སྙིང་གར་ཐིམ། །སྐུ་གསུང་ཐུགས་དབང་ཐོབ་ཅིང་སྒྲིབ་བཞི་དག །ལམ་བཞིའི་སྣོད་གྱུར་ཡེ་ཤེས་རྡོ་རྗེ་དང༌། །གཅིག་འདྲེས་ཆོས་དབྱིངས་ཀློང་དུ་ཨེ་མ་ཧོ། །བསོད་ནམས་ཕུལ་བྱུང་བླ་མ་མཆོད་པ་ཡིས། །བྱིན་རླབས་ཕུལ་བྱུང་དགོངས་ཀློང་གཅིག་ཏུ་འདྲེས། །ལམ་མཆོག་ཕུལ་བྱུང་དགོངས་པའི་གསང་མཛོད་བརྡོལ། །མཐར་འབྲས་རྨད་བྱུང་བླ་མའི་གནས་ཐོབ་ཤོག །ཚེ་རབས་ཀུན་ཏུ་མཉེས་གསུམ་ཞབས་ཏོག་ཞུ། །ཅི་མཛད་ལེགས་མཐོང་སྐྱོན་དག་ཡོན་ཏན་རྫོགས། །རྒྱལ་བ་རྒྱ་མཚོའི་རྣམ་ཐར་ལོངས་སྤྱོད་པས། །སྐྱོན་དག་ཡོན་ཏན་རྫོགས་པའི་དཔལ་ཐོབ་ཤོག །སྲིད་ཞིའི་ཁྱབ་བདག་བླ་མའི་ཡེ་ཤེས་ལས། །དགེ་ལེགས་དངོས་ཀུན་སྩོལ་མེད་ཐོབ་ནས་ཀྱང༌། །དོན་གཉིས་ལྷུན་གྲུབ་ཟག་མེད་བདེ་ཆོས་དབྱིངས། །འཕེལ་འགྲིབ་བྲལ་བའི་དཔལ་གྱི་བཀྲ་ཤིས་ཤོག །ཅེས་པའང་སྡོམ་བརྩོན་ཆོས་བཞིན་སྤྱོད་པ་རིག་འཛིན་པདྨ་བསྟན་འཛིན་རྡོ་རྗེས་བསྐུལ་ངོར་འགྱུར་མེད་ཐེག་མཆོག་བསྟན་པའི་རྒྱལ་མཚན་གྱིས་བྲིས་པ་དཔལ་ལྡན་བླ་མའི་གོ་འཕང་ཐོབ་པའི་རྒྱུར་གྱུར་ཅིག །མངྒ་ལཾ། དགེའོ།། །།

[edit]

@#/__/bla ma'i rnal 'byor rdo rje'i ye shes snang ba bzhugs so/___rig stong 'od gsal nges don rdo rje sems/__/gdod nas 'du 'bral med pas skyabs su mchi/__/ma rtogs glo bur 'khrul pa'i yid can rnams/__/sku gsum zhing du sbyong bar sems bskyed do/__a/__chos kun mnyam nyid byang chub sems kyi klong*/__/cir snang dag chen 'og min stug po bkod/__/rang mdun kun bzang mchod sprin rgya mtsho'i dbus/__/seng khri pad+ma nyi zla'i gdan gsum dbus/__/skyabs gnas kun 'dus pad+ma saM b+ha wa/__/gzhon tshul rgya gar paN+Di ta yi tshul/__/phyag g.yas rdo rjes snang srid zil gyis gnon/__/g.yon pas mnyam bzhag b+han+d+ha tshe bum gyis/__/rig 'dzin rnam bzhi'i sa lam rdzogs pa'i brda/__/zhabs zung mi g.yo rdo rje'i skyil krung gis/__/srid zhir mi gnas 'chi med rdo rje'i sku/__/kha T+wA~M mchan bcug 'ja' zer 'od klong 'gying*/__/g.yas su thub bstan bshad sgrub rgya mtsho ni/__/zhi dul mkhan chen byang chub sems dpa'i tshul/__/phyag gnyis chos 'chad mnyam bzhag lhung bzed 'dzin/__/paN zhwa chos gos gsum gsol skyil krung bzhugs/__/g.yon du theg mchog bstan pa'i rgyal mtshan ni/__/tshangs pa lha yi me tog rgyal po'i tshul/__/chos 'chad pad sdong ral pod 'khor los spras/__/dgongs pa mi g.yo rdo rje'i skyil krung bzhugs/__/rab 'byams skyabs gnas rgya mtsho'i tshogs ma lus/__/bla ma'i ye shes gcig gi rol par shar/__/snang srid ma lus kun bzang bla ma'i zhing*/__/dag pa rab 'byams lta bas phyag 'tshal zhing*/__/chos nyid bde chen rang mdangs mchod pa 'bul/__/yid dpyod blo yi 'dzin stangs dbyings su bshags/__/zag med yon tan rdzogs la rjes yi rang*/__/dus gsum 'pho 'gyur med par chos 'khor bskor/__/skye 'gag gnas med ye shes skur bzhugs gsol/__/zag med yon tan rdzogs phyir dge kun bsngo/__/gzhi yi bla ma rang rig ye rdzogs don/__/brda yi bla mas mngon sum ngo sprad pas/__/lam gyi bla ma'i spang rtogs sgra ji bzhin/__/spyod pa 'bras bu'i bla ma rdo rje sems/__/rig stong mtsho skyes rdo rje sangs rgyas gnyis/__/snga 'gyur bstan pa'i shing rta thub bstan mtshan/__/theg mchog bstan pa'i rgyal mtshan rnam pa gsum/__/dpag yas sku dang zhing khams rgya mtsho'i bdag__/mi shigs thig le chen por 'du 'bral med/__/'khor 'das kun khyab bzhugs pa'i rig rtsal gdangs/__/mnyam nyid chos skur lta ba'i mos gus kyis/__/dgongs pa gcig tu 'dres par mdzad du gsol/__/srid las nges 'byung byang chub sems gnyis 'byongs/__/mos gus stobs kyis bla ma sangs rgyas mthong*/__/bskyed rdzogs snying po'i nyams len mtha' ru phyin/__/theg mchog lam gyi yon tan yongs rdzogs pas/_/don gnyis lhun grub thugs yid dbyer med shog__/tshig bdun gsol 'debs dang*/__zhal gsung gsol 'debs ci rigs grangs bsags/__oM AHhU~M badz+ra gu ru pad+ma sid+d+hi hU~M:__zhes dang*/__oM AHhU~M gu ru many+dzu g+ho Sha mu ni shA sa b+ha Sha sa ga ra sid+d+hi A hU~M/__zhes dang*/__oM AHhU~M badz+ra ma hA gu ru mang+ga la shrI b+hU ti sarba sid+d+hi hU~M/__de rnams so sor grang bsags/__rigs kun khyab bdag bla ma rdo rje sems/__/rab 'byams rgyal ba'i rdo rje gzhi dbyings kyis/__/byin rlabs dbang bzhi'i tshul du bskur nas kyang*/_/thugs yid gcig tu 'dres par mdzad du gsol/__/thugs rgyud bskul bas chos rgyal 'od dkar du/__/gyur nas dpral thim gu ru 'od dmar gyis/__/mgrin thim mkhan chen 'od mthing snying gar thim/__/sku gsung thugs dbang thob cing sgrib bzhi dag__/lam bzhi'i snod gyur ye shes rdo rje dang*/__/gcig 'dres chos dbyings klong du e ma ho/__/bsod nams phul byung bla ma mchod pa yis/__/byin rlabs phul byung dgongs klong gcig tu 'dres/__/lam mchog phul byung dgongs pa'i gsang mdzod brdol/__/mthar 'bras rmad byung bla ma'i gnas thob shog__/tshe rabs kun tu mnyes gsum zhabs tog zhu/__/ci mdzad legs mthong skyon dag yon tan rdzogs/__/rgyal ba rgya mtsho'i rnam thar longs spyod pas/__/skyon dag yon tan rdzogs pa'i dpal thob shog__/srid zhi'i khyab bdag bla ma'i ye shes las/__/dge legs dngos kun stsol med thob nas kyang*/__/don gnyis lhun grub zag med bde chos dbyings/__/'phel 'grib bral ba'i dpal gyi bkra shis shog__/ces pa'ang sdom brtson chos bzhin spyod pa rig 'dzin pad+ma bstan 'dzin rdo rjes bskul ngor 'gyur med theg mchog bstan pa'i rgyal mtshan gyis bris pa dpal ldan bla ma'i go 'phang thob pa'i rgyur gyur cig__/mang+ga laM/___dge'o//__//