DKR-KABUM-19-DZA-017

🚧 This website is under continued development. We appreciate your patience!

Previous Text Back to Volume PageNext Text

Wylie title	'
Location	dil mgo mkhyen brtse bka' 'bum Volume 19, Text 17, Pages (Folios 1a to )
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. '. In Skyabs rje dil mgo mkhyen brtse rin po che'i bka' 'bum, Vol. 19: . Delhi: Shechen Publications, 1994.
Genre	Longevity Rituals - tshe sgrub
Cycle	འཆི་མེད་པདྨ་ཚེ་ཡི་སྙིང་ཐིག་ ('chi med pad+ma tshe yi snying thig)
Deity	tshe dpag med

Tibetan Text

Wylie

[edit]

༄༅། །འཆི་མེད་པདྨ་ཚེ་ཡི་སྙིང་ཐིག་ལས། རང་བྱུང་པདྨ་རྡོ་རྗེ་ཚེ་ཡི་རྒྱུད་ཀྱི་ཁྲིད་ཡིག་པདྨ་དགྱེས་པའི་ཞལ་གྱི་བདུད་རྩིའི་ཉིང་ཁུ་ཞེས་བྱ་བ་བཞུགས་སོ།། ༄༅། །ན་མོ་གུ་རུ་ཨཱ་ཡུ་དེ་བ་མཎྜལ་བྷྱཿ ཡོངས་གྲུབ་རྡོ་རྗེ་ཚེ་ཡི་བདུད་རྩིའི་ཆར། །མཚན་མཆོག་རྔ་སྒྲའི་དབྱངས་སྙན་ཁོ་ནས་ཀྱང༌། །འབེབས་མཛད་འཆི་མེད་པདྨའི་དཀྱིལ་འཁོར་ལྷ། །མི་ཕྱེད་རིག་པའི་དཔལ་བེར་དགྱེས་པར་རོལ། །མཆོག་གི་བྱིན་རླབས་ཉིན་བྱེད་ཀྱིས། །ལེགས་ཕྱེ་རིག་པའི་པདྨོ་ལས། །སྣང་བའི་ཟབ་གསང་སྦྲང་རྩིའི་བཅུད། །སྐལ་བཟང་ཀུན་དགའི་གསོས་སུ་ཤར། །འདིར་མཆོག་ཐུན་དངོས་གྲུབ་ཐམས་ཅད་ཀྱི་རྩ་བ། རྡོ་རྗེ་ཚེ་ཡི་རིག་འཛིན་སྒྲུབ་པའི་ཉེ་ལམ། བླ་མེད་ནང་རྒྱུད་ཡོ་ག་གསུམ་གྱི་དགོངས་པ་དང་གཙོ་བོར་འབྲེལ་བའི་འཆི་མེད་པདྨ་ཚེ་ཡི་སྙིང་ཐིག་གི་ཟབ་དོན་ཉམས་སུ་ལེན་པའི་སྨིན་ཁྲིད་འཆད་པ་ལ་གསུམ། ཐོག་མར་དགེ་བ་ལོ་རྒྱུས་དང་བཅས་པའི་གླེང་གཞི། བར་དུ་དགེ་བ་རྣལ་འབྱོར་ཟབ་མོའི་སྙིང་པོ་དངོས། ཐ་མར་དགེ་བ་ཉམས་ལེན་གྱི་སྤྱི་སྡོམ་འབྲས་བུ་དང་བཅས་པའོ། །དང་པོ་ལ་གསུམ། མཚན་གྱི་དོན། གླེང་གཞི། བབས་ལུགས་བཤད་པའོ། །དང་པོ་ནི། གཏེར་གཞུང་ལས། འཆི་མེད་པདྨ་ཚེ་ཡི་སྙིང་ཐིག་སོགས་ནས། ཅེས་བྱ་བ༔ ཞེས་པའི་བར་ཏེ། ཨ་མཱ་ར་ཞེས་པའི་སྒྲ་ལས་དྲངས་ན་འཆི་བ་མེད་པ་སྟེ། དེ་ཡང་ཀུན་འབྱུང་སྲིད་པའི་ཆོས་ཐམས་ཅད་སྐྱེ་འགག་གནས་གསུམ་དུ་སྣང་བ་ཀུན་རྫོབ་ཀྱི་བདེན་པ་དང༌། རང་བཞིན་དེ་ལས་འདས་པའི་སྐྱེ་འགག་གནས་མེད་ཀྱི་གཤིས་ལུགས་སྟོང་ཉིད་ཀྱི་ངོ་བོ་དོན་དམ་བདེན་པ་སྟེ། དེ་གཉིས་ཀྱང་འགལ་འདུར་མི་གནས་པ་རྣམ་པ་རྒྱུ་རྐྱེན་རྟེན་འབྱུང་གི་སྣང་ཆས་འཁོར་འདས་སྣང་སྲིད་ཀྱི་གཉིས་ཆོས་ཐམས་ཅད་སྐྱེ་འགག་གནས་པ་ལྟར་སྣང་བ་གང༌། ངོ་བོ་རྣམ་ཀུན་མཆོག་ལྡན་གྱི་སྟོང་ཉིད་གཅིག་གི་རང་བཞིན་ལས་གཞན་དུ་མི་འགྱུར་ཞིང་བྲི་གང་བྲལ་བས་ན། སྣང་སྟོང་དེ་གཉིས་རེས་འཇོག་མ་ཡིན་པར་གདོད་ནས་ཟུང་འཇུག་གི་གཤིས་སུ་ལྷུན་གྱིས་གྲུབ་པའི་ཕྱིར་ཆོས་ཉིད་ཅིར་ཡང་མ་ཡིན་པ་ཆོས་ཅན་ཅིར་ཡང་འཆར་བ་སྟེ། དེས་ན་ཀུན་རྫོབ་འཁྲུལ་པའི་གཞན་དབང་ནི་ཆོས་ཡིན་པས་འཁྲུལ་སྣང་ཐམས་ཅད་སྐྱེ་འགག་གནས་གསུམ་དུ་ཤར་ཕྱིར་འཆི་བའི་སྒྲས་འགག་པ་སྟོན་པའི་ཤུགས་ཀྱིས་སྐྱེ་གནས་གཉིས་ཀྱང་མཚོན་པ་སྟེ། མདོར་ན་འཁྲུལ་པ་རྒྱུ་འབྲས་ལས་འདས་པའི་ཡེ་ཤེས་རང་བཞིན་གདོད་མའི་གནས་ལུགས་གཉུག་མ་ཡོངས་གྲུབ་ཆེན་པོའི་གཤིས་ལུགས་ནི་དུས་གསུམ་ཀུན་ཏུ་བྲི་གང་འཕོ་འགྱུར་མེད་པས་ན་ཀུན་རྫོབ་རྫུན་ཆོས་ཀྱིས་མ་གོས་པའི་ཕྱིར་དགག་པའི་སྒྲ་སྦྱར་ཏེ་འཆིྃ་མེདྃ་ཅེས་གསུངས་པ་ནི་སྐབས་འདིའི་སྒྲུབ་བྱའི་གཞི་བསྟན་པ་སྟེ། དེ་ཉིད་ལམ་དུ་བྱེད་པ་བསྐྱེད་རྫོགས་ཀྱི་ཏིང་འཛིན་ཡང་སྡུག་བསྔལ་ཀུན་གྱི་ཉེས་པའི་རྙོག་མས་མ་གོས། ཟབ་མོའི་གནད་དོན་དང་ལྡན་པའི་ཐབས་ཀྱི་སྒོ་དུ་མའི་འདབ་མ་ཡངས་ཤིང་བཀྲ །དོན་གྱི་གནས་ལུགས་ལ་མ་རྨོངས་པའི་ཁ་དོག་གསལ། དངོས་གྲུབ་ཀྱི་སྦྲང་རྩིའི་ཟིལ་མངར་མི་ཟད་པ་རྟག་ཏུ་འཇོ། སྐལ་བཟང་དབང་རབ་ཀྱི་ལང་ཚོ་ཅན་རྣམས་ལ་རྒྱན་དུ་འོས་པའི་ཁྱད་ཆོས་རྣམས་དང་ལྡན་པས་ན་པྃདྨྃ་ནི་སྒྲུབ་བྱེད་ཀྱི་ལམ་དང༌། ཐབས་དེའི་བྱེད་པས་རང་གི་སྒོ་གསུམ་ལ་གནས་པའི་མི་འགྱུར་རྟག་པའི་ཚེ་ཆོས་ཉིད་མི་ཤིགས་པ། འཕོ་བཅས་ཐིག་ལེའི་ཚེ་དབུ་མའི་ཡར་མར་གྱི་སྣེའི་དཔྱིད་ཐིག་གཉིས་སོགས་དྭངས་མའི་ཁམས། དེ་དག་ཀྱང་ཡེ་ཤེས་དང་འབྲེལ་བའི་དགའ་བཞིའི་འཕོ་བ། རྣམ་ཤེས་དང་འབྲེལ་བའི་ལུས་ཀྱི་ཟུང་སམ་བླ། དེ་གཉིས་ཀའི་རྟེན་བརྟེན་པར་གྱུར་པའི་དབང་རྟེན་ཁ་དོག་དང་བཅས་པ་སྲོག་གི་ཚེ་སྟེ་རིམ་པ་བཞིན་ཟུང་འཇུག །རྫོགས་རིམ། བསྐྱེད་པའི་རྣལ་འབྱོར་རྣམ་པ་གསུམ་གྱི་ནུས་པས་ལྟར་སྣང་སྲོག་གི་ཀ་བ་སྐྱེ་འཆིའི་བདུད་ལས་རྒྱལ། འཕོ་བཅས་ཐིག་ལེའི་ཚེ་རྟེན་དྭངས་མ་རྒྱས་པས་འཆི་མེད་ལང་ཚོའི་མཐུ་ཐོབ་ཅིང་བརྟེན་པ་ཡེ་ཤེས་འཕེལ་བས་བདེ་ཆེན་གྱི་དཔྱིད་དུ་གྲུབ་པ་གཟུགས་སྐུ་གཉིས་དང༌། མི་འགྱུར་གཉུག་མའི་ཚེ་ཡེ་ཤེས་ཆེན་པོའི་བཅུད་ལེན་གྱི་ཆོས་དབྱིངས་རྣམ་ཐར་སྒོ་གསུམ་ཟག་མེད་ཡེ་ཤེས་ལྔ་ཡི་རང་བཞིན་མངོན་དུ་བྱེད་པས་ཆོས་སྐུ་སྟེ། དེ་གཉིས་སྒྲུབ་པའི་འབྲས་བུ་ཡིན་པས་རྒྱུ་མིང་འབྲས་བུར་བཏགས་ཏེ་ཚེྃ་ཞེས་གསུངས་ལ། དབྱེ་བ་གང་ལྟར་བཤད་ཀྱང་པཎ་ཆེན་ངག་དབང་གྲགས་པས། འཚོ་བ་ལས་གཞན་སྙིང་པོ་ནི། །འགའ་ཡང་ཡོད་པར་མ་མཐོང་སྟེ། །དེ་ཕྱིར་མྱུར་དུ་ཐབས་མང་པོས། །འཆི་བ་བསླུ་བར་ཡང་དག་བརྩོན། །ཅེས་གསུངས་པ་ལྟར་མཆོག་ཐུན་གྱི་དངོས་གྲུབ་ཐམས་ཅད་ཀྱི་རྩ་བ། གནས་སྐབས་དང་མཐར་ཐུག་གི་མངོན་མཐོ་ངེས་ལེགས་ཀྱི་དཔལ་ཡོན་མཐའ་དག་སྒྲུབ་པའི་དགོས་པ་དུ་མ་དང་བཅས་ཤིང༌། དོན་གཉིས་ཡིད་བཞིན་དུ་སྒྲུབ་པའི་ཐབས་ཀྱི་སྒོ་རྨད་དུ་བྱུང་བ་ནི་རྡོ་རྗེའི་ཚེ་སྒྲུབ་པ་གཅིག་པུར་བསྔགས་ཏེ་ཨོ་རྒྱན་གྱི་སློབ་དཔོན་མ་ཧཱ་གུ་རུས། ཆོས་སྤྱོད་བསླབ་ལྡན་རྣལ་འབྱོར་པའི༔ ཚེ་རིང་བ་ནི་དགེ་བ་སྟེ༔ འདི་དང་ཕྱི་མའི་དོན་འགྲུབ་ཅིང༔ དངོས་གྲུབ་ཀུན་ཀྱང་མངོན་དུ་འགྱུར༔ ཞེས་གསུངས། དེ་ལྟ་བུའི་དགོས་པ་དང་ལྡན་པའི་ལམ་ནི་བཀའ་གཏེར་དུ་མ་ཞིག་བསྟན་པའི་ནང་ནས་བསྐྱེད་རྫོགས་ཀྱི་ལམ་ཡོངས་སུ་རྫོགས་པ། རྩ་བ་གསུམ་ཀའི་སྨིན་གྲོལ་ཡན་ལག་དང་བཅས་པ་ཚང་བ། སྤྲོས་བཅས་སྤྲོས་མེད་ཀྱི་རིང་འཚོའི་ཐབས་ཀྱི་སྒོ་ཐམས་ཅད་གཅིག་ཏུ་འདུས་པའི་བདུད་རྩིའི་ཉིང་ཁུ་ལྟ་བུ་ཡིན་པས་སྙིངྃ་ཐིགྃ་ཅེས་གསུངས། ཚུལ་དེ་ཡང་འཁྲུལ་རྟོག་གི་བསྲེ་བསླད་མ་ཞུགས། གཞན་ཟེར་གྱི་ངག་སྒྲོས་མ་བསྡུས། རྟོག་གེའི་བློ་ཡིས་མ་བཅོས་པ་དཀྱིལ་འཁོར་གྱི་སྟོན་པ་འཁོར་ལོའི་དབང་ཕྱུག་ཉིད་ཀྱི་ཐུགས་ཡེ་ཤེས་ཆེན་པོའི་གསང་མཛོད་ལས་ཆོས་ཉིད་རྡོ་རྗེའི་རང་སྒྲ་དུས་གསུམ་དུས་མེད་དུ་ཤར་བས་ན་རངྃ་བྱུངྃ༌། གླེང་གཞིའི་སྐབས་བཞིན་ཕུན་ཚོགས་ངེས་པ་ལྔ་ལྡན་གྱི་སྟོན་འཁོར་ཐམས་ཅད་སངས་རྒྱས་ཐམས་ཅད་ཀྱི་གསུང་རྡོ་རྗེའི་བདག་ཉིད་པདྨའི་རིགས་གཙོ་བོར་ཤར་བས་པྃདྨྃ། བརྡ་མ་བཅོས། དོན་མ་ནོར། ཚིག་མ་འཁྲུལ་པའི་བརྗོད་བྱ་རྗོད་བྱེད་གཉིས་ཀ་རྡོ་རྗེ་གསང་བའི་ཚིག་ཤིན་ཏུ་ཟབ་ཅིང་རྒྱ་ཆེ་བར་སྣང་བས་རྡོྃ་རྗེྃ། གཞུང་ལམ་གྱི་དོན་དང་གཙོ་བོར་འབྲེལ་བའི་དབང་གིས་ཚེྃ་ཡིྃ་རྒྱུདྃ་ཅེསྃ་བྱྃ་བྃ་བཞུགས་སོ༔ ཞེས་གསུངས་པའོ། །གཉིས་པ་ནི། འཆི་མེད་རྩ་བ་གསུམ་སོགས་ནས། འདི་གསུངས་སོ༔ ཞེས་གསུངས་ཏེ། འོད་གསལ་བྱང་ཆུབ་སེམས་ཀྱི་གནས་ལུགས་ཡེ་ཤེས་གསུམ་ལྡན་དུ་གདོད་ནས་བཞུགས་པའི་དབྱིངས་རྣམ་དག་གི་ལྷ་དམ་ཚིག་སེམས་དཔའ། ཟག་མེད་ཡོན་ཏན་བྱེ་བའི་སྙིང་པོས་གང་བའི་ཡེ་ཤེས་འོད་གསལ་གྱི་བདག་ཉིད་ལ་ཡེ་ཤེས་སེམས་དཔའ། དེ་གཉིས་དབྱེར་མེད་དུ་གདོད་ནས་བཞུགས་པའི་རྩལ་ལས་ཤར་བ་ལ་མཚན་མའི་ལྷ་ཞེས་གསུངས་ལ། དོན་རྟགས་དེ་དང་ལྡན་པའི་ལྷ་ལ་དབྱེ་ན། ངོ་བོ་བྱིན་རླབས་དངོས་གྲུབ་ཕྲིན་ལས་ཀྱི་རྩ་བར་གྱུར་པའི་བླ་མ་ཡི་དམ་མཁའ་འགྲོ། རྣམ་པ་ཞི་ཁྲོ་ཆགས་བྲལ་ཆགས་བཅས་གཙོ་འཁོར་གྱི་དབྱེ་བས་དུ་མ་ཤར་ཡང༌། དོན་ལ་རྟག་གཙང་བདེ་བ་བདག་དམ་པའི་ཕ་རོལ་དུ་ཕྱིན་པའི་མི་ཤིགས་མཆོག་གི་འབྲས་བུའི་གོ་འཕང་ལ་དགྱེས་པར་རོལ་པས་སྐྱེ་འཆི་འཁོར་ཆོས་ཀྱིས་མ་ནོངས་པས་ན་འཆི་མེད་རྩ་བ་གསུམ་ཞེས་ཕྱག་གི་ཡུལ་མཆོག་ལ། བཀའ་ཡི་སྡུད་པ་པོས་ཡུལ་ཅན་ཡེ་ཤེས་ཀྱི་དགོངས་པས་གཉིས་སུ་མེད་པའི་ཚུལ་གྱི་ཕྱག་མཛད་པས་ཟབ་མོའི་རྒྱུད་འབྱུང་བར་ཤུགས་ཀྱིས་གྲུབ་པས་གླེང་གཞིར་གཏོགས་པ་སྟེ། གཏེར་གཞུང་དངོས་ཀྱིས་གསལ་བར་བསྟན་པའི་དུས། གནས། སྟོན་པ། འཁོར། ཆོས་ངེས་པ་ལྔ་ལྡན་བཤད་པའོ། །གསུམ་པ་ནི། རྨད་དུ་བྱུང་བའི་ཏནྟྲའི་སྙིང་སོགས་ནས། སརྦ་ཨརྠ་སིདྡྷི་ཧཱུྃ༔ ཞེས་གཤམ་དུ་གསལ་བ་ལྟར་སྔོན་དང་ད་ལྟ་ཆོས་འདིའི་བབས་ལུགས་སྨོས་པ་སྟེ་དེ་ཡང་གླེང་གཞིའི་དོན་གྱིས་རྒྱལ་བ་དགོངས་བརྒྱུད། བབས་ལུགས་སྔ་ཕྱིས་རིག་འཛིན་བརྡ་དང༌། གང་ཟག་སྙན་བརྒྱུད་དངོས་སུ་བརྟན་ཅིང༌། མཁའ་འགྲོ་གཏད་རྒྱ། སྨོན་ལམ་དབང་བསྐུར། ཤོག་སེར་ཚིག་བརྒྱུད་གསུམ་གཏེར་ཆོས་ཡིན་པའི་ཤུགས་ལས་གྲུབ་པ་སྟེ། སྤྱིར་གཏེར་ཆོས་ཞེས་པ་གང་ཟག་རྩ་ཁམས་དྭངས་པའི་ཡིད་ཀྱི་ཆོ་འཕྲུལ་ཙམ་དུ་ཕལ་མོ་ཆེས་འཛིན་པར་འདུག་ཀྱང་སྒྲ་ཇི་བཞིན་པའི་གཏེར་ཆོས་ཞིག་ཡིན་ན་བསྟན་བཅོས་ལས་ཀྱང་གཏེར་ཆོས་དཀའ་སྟེ། བསྟན་བཅོས་ཚད་མ་རྩོམ་པ་པོ་རྒྱུ་གསུམ་ཚང༌། བརྩམ་བྱའི་བསྟན་བཅོས་ངན་པ་དྲུག་བྲལ་ཚུལ་གསུམ་དང་ལྡན་དགོས་ན། གཏེར་ཆོས་ནི། དེ་ལས་ཀྱང་ཡོན་ཏན་ཆེ་བ་ཞིག་མེད་པར་སྟོན་མི་ནུས་པའི་རྒྱུ་མཚན་ཡོད་དེ། ཡེ་ཤེས་ཀྱི་མཁའ་འགྲོ་ལ་གཉེར་དུ་གཏད་ཅིང་ལོངས་སྐུའི་སྟོན་པའི་ཐུགས་ཀྱི་གསང་མཛོད་རྡོ་རྗེའི་ཚིག་གི་རྒྱུད་རྣམས་གྲངས་མཐའ་མི་མངོན་ཞིང༌། དོན་གནས་ལྔ་རིག་པས་ཀྱང་རྟོགས་པར་མི་ནུས་པའི་རྡོ་རྗེའི་གསང་བ་གུ་ཧྱ་གྷརྦྷ་དང༌། ཧེ་བཛྲ་ལྟ་བུ་ཞིག །སྟོན་པ་རྒྱལ་ཀུན་གསང་བའི་མཛོད་ལ་དབང་ཐོབ་པའི་རིག་འཛིན་གྱི་དབང་ཕྱུག་པདྨ་འབྱུང་གནས་ཀྱི་དོན་གྱི་དགོངས་པ་རྒྱུད་ལུང་མན་ངག་གསུམ་དང་ལྡན་པའི་ཆོས། ཚིག་གསུང་རྡོ་རྗེ་སློབ་དཔོན་གྱི་སྐུར་བཞེངས་པས་རྡོ་རྗེའི་གསུང་འཁྲུལ་པ་མེད་པ། རྒྱུད་སྟོན་པ་དེ་ཡིས་རང་དང་གཉིས་སུ་མེད་པའི་ལས་ཅན་དག་པའི་འཁོར་ལ་ཐུགས་ཀྱི་བརྣག་པ། སྙིང་པོའི་མན་ངག །སྣོད་དང་འཚམས་པས་ཉམས་སུ་བླང་པས་གྲུབ་པ་ཐོབ་པ་ལ་མི་བསླུ་ཞིང་བྱ་སླ་ལ་ཚེགས་ཆུང་བ་ཞིག་གདམས་པས། འཁོར་གྱིས་ཀྱང་དུས་དེ་ཉིད་ནས་རྟགས་ཚད་ཀྱི་གདེངས་ཐོབ་པས་རིག་པ་འཛིན་པའི་གོ་སར་དངོས་སུ་ཕྱིན་ཏེ། གཉིས་ཀའི་ཡེ་ཤེས་ཀྱི་གཟིགས་པས་ཐ་མའི་གདུལ་བྱ་རིས་སུ་མ་བོར་བར་སྨོན་ལམ་གྱི་མཐུས་ད་ལྟ་སྣང་བས་སངས་རྒྱས་ཉིད་ཀྱི་ཞལ་སྒོ་ལ་རེག་པ་ལྟ་བུ་ལས། ཐོས་བསམ་གྱིས་ངེས་པ་རྙེད་པའི་ལག་རྗེས། གཞུང་རྙིང་དང་གོ་བསྟུན་པའི་ཆོག་ཁྲིགས་ཙམ་ཡང་མ་ཡིན་པ་སྟེ་གུ་རུ་རིན་པོ་ཆེས། རྒྱུད་ལུང་མན་ངག་ངེས་པའི་དོན༔ སྙིང་པོ་ལས་ཀྱང་སྙིང་པོའི་བཅུད༔ ཐུགས་ཀྱི་ཐིག་ལེར་རབ་བཞུགས་པ༔ ཆོས་ཉིད་རང་སྒྲར་སྣང་བས་ན༔ རྒྱུད་དང་མི་འགལ་ལུང་དང་མཐུན༔ མན་ངག་མྱོང་བ་ཁྱད་འཕགས་པ༔ ཞེས་གསུངས་པ་ལྟ་བུའོ། །གཉིས་པ་བར་དུ་དགེ་བ་རྣལ་འབྱོར་ཟབ་མོའི་སྙིང་པོ་ཉམས་ལེན་དངོས་བཤད་པ་ལ་གཞུང་འདི་ཉིད་ལས། འཆི་མེད་གཉུག་མ་རྡོ་རྗེའི་སྐུ༔ སྒྲུབ་པའི་རྒྱུ་རྐྱེན་ཐབས་ཀྱི་མཆོག༔ འབྲས་བུ་བཅས་པ་བསྟན་དུ་གསོལ༔ ཞེས་གླེང་བསླངས་པ་བཞིན་རྒྱུ་ཤེས་པའི་མཚན་ཉིད་གཞི་ལྟ་བའི་གནས་ལུགས་གཏན་ལ་ཕབ། རྐྱེན་འཇུག་པའི་ལམ་བསྐྱེད་རྫོགས་ཀྱི་ལམ་ཟབ་དྲིལ་ཁ་ཚང་དུ་བསྟན། འབྲས་བུ་ཡོངས་ཤེས་ཀྱི་དོན་ལམ་གྱུར་གྱི་རིག་འཛིན་བཞིས་བསྡུས་ཏེ་བཤད་པ་ནི་སྔ་འགྱུར་གྱི་རྡོ་རྗེ་ཐེག་པའི་བཤད་སྲོལ་ཐུན་མིན་ཏེ་སྙིང་པོའི་རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ཞེས་གསུངས་པ་སྟེ་དེ་ལྟར་གསུམ་ལས། དང་པོ་གཞི་ལ། ངོ་བོ་ཆོས་ཉིད་ཀྱི་གཞི་དང་ཆོས་ཅན་བཏགས་པའི་གཞི་གཉིས། དང་པོ་ནི། དངོས་གྲུབ་ཀུན་གྱི་སྙིང་པོ་ནི༔སོགས་ནས། རྟོགས་པས་འཆི་མེད་མཆོག་གྲུབ་འགྱུར༔ ཞེས་པ་སྟེ་སྤྱིར་རྒྱུད་ལས། མི་འགྱུར་རྟག་པ་གཉུག་མའི་ཚེ། །ཉམས་ཤིང་འཕོ་བ་ཐིག་ལེའི་ཚེ། །གློ་བུར་ལྟར་སྣང་སྲོག་གི་ཚེ། །ཞེས་དབྱེ་བ་གསུམ་དུ་གསུངས་པའི་དང་པོ་སྟེ་སྨྲ་བསམ་བརྗོད་མེད་ཆོས་ཉིད་གཉུག་མ་མི་ཤིགས་པའི་ཐིག་ལེའི་སྲོག་ཆེན་པོ་སྟེ་དེ་ནི་ངོ་བོ་ཀ་དག་གི་ཡེ་ཤེས་དངོས་མཚན་གང་དུའང་མ་གྲུབ་པས་སངས་རྒྱས་ཀྱི་སྤྱན་གྱིས་ཀྱང་བལྟར་མེད་པའི་གཞི་མེད་རྩ་བྲལ་དུ་གནས་པ་སྟེ། གོ་བའི་ཚིག་དང་མཚོན་པའི་དཔེ་ཀུན་ལས་འདས་པ། བློའི་སྤྱོད་ཡུལ་མ་ཡིན་པའི་རང་བཞིན་སྟོང་པ་རྣམ་ཀུན་མཆོག་ལྡན་གྱི་ཡེ་ཤེས་ཏེ། དེས་ནི་བརྟན་གཡོ་འཁོར་འདས་ཀུན་ལ་ཁྱབ་ཅིང་ཐམས་ཅད་ཀྱི་སྲོག་གི་སྙིང་པོར་གྱུར་ཀྱང་ཡོད་མེད་སྣང་སྟོང་ཡིན་མིན་གང་གིའང་ཕྱོགས་སུ་མ་ལྷུང་བ་ནམ་མཁའ་ལ་སྣོད་བཅུད་ཀྱི་འཇིག་རྟེན་བརྟེན་པ་མེད་པའི་ཚུལ་གྱིས་བརྟེན་ཏེ། འཁོར་འདས་གང་གི་ཡང་ཕྱོགས་སུ་མ་ལྷུང་བའི་ངོ་བོ། རང་བཞིན་ལྷུན་གྲུབ་ཀྱི་ཆས་གཞལ་ན་ཟག་མེད་ཀྱི་ཆོས་ཐམས་ཅད་ཉི་མ་དང་འོད་ཟེར་བཞིན་ལྷུན་གྱིས་རྫོགས་པའི་རང་བཞིན། གློ་བུར་གྱི་དྲི་མས་གཞར་ཡང་མ་གོས་པའི་འོད་གསལ་བའི་ཡེ་ཤེས་ཟུང་འཇུག་མཐར་ཐུག་གི་བཞུགས་ཚུལ་སྒྲ་ཇི་བཞིན་དུ་རྟོགས་ན་སྐྱེ་འཆི་འཕོ་འགྱུར་ཡོངས་ཡེ་མི་མངའ་བའི་དབྱིངས་སུ་བཙན་ས་ཟིན་པས་འཁྲུལ་ཆོས་ཐམས་ཅད་རང་སར་དག་པས་འཆི་མེད་རྟག་པའི་གོ་འཕང་མངོན་དུ་བྱེད་ནུས་པའོ། །གཉིས་པ་ནི། རྩལ་ལས་ཤར་བ་རིག་པའི་བློ༔སོགས་ནས། ལེའུ་དང་པོའོ༔ ཞེས་པ་སྟེ་གཞི་གཉུག་མའི་ཡེ་ཤེས་ཀྱི་ཚེ་ལ་གདོད་ནས་འཕོ་འགྱུར་བྲལ་ཡང་གཞི་སྣང་ཡེ་ཤེས་རིག་པའི་རང་རྩལ་ཅིར་ཡང་འཆར་བ་ལས་ཡེ་ཤེས་ཀྱི་རྩ་རླུང་ཐིག་ལེའི་ཆ་ཐམས་ཅད་ལ་སྒྲིབ་བྱེད་ལས་ཀྱི་རྩ་རླུང་ཐིག་ལེ་ལས་སྨིན་པའི་སྒོ་གསུམ་རྟེན་བརྟེན་པར་སྣང་སྟེ་དེ་དག་གི་བྱེད་ལས་ཀྱིས་ཡུལ་སེམས་གཟུང་འཛིན་དུ་ཞེན་པའི་འབྲེལ་བས་ཕན་ཚུན་འདོད་པའི་ཚོར་བས་ཉམས་ཤིང་མི་བརྟན་པ་འཕོ་བའི་རྟེན་ཀུན་རྫོབ་རྫས་ཀྱི་ཐིག་ལེ་ཁམས་དཀར་དམར་ཏེ། དེ་ལ་བརྟེན་པའི་རླུང་སེམས་བཅས་དྭངས་མ་ཡེ་ཤེས་ཀྱི་སྟོབས་ཉམས་ཤིང་མི་མངོན་པར་འགྱུར་བ་ལས་ན་རྒ་འཆི་བའི་གནས་སྐབས་འབྱུང་བས་སྲིད་པའི་སྡུག་བསྔལ་ཉམས་སུ་མྱོང་ལ། དེ་དག་གི་རྟེན་མི་ལྡན་པའི་འདུ་བྱེད་ལུས་ཀྱི་ངོ་བོ་འབྱུང་ལྔ་བདེ་བ་དང་བཅས་པའི་ཁམས་དྲུག་འདུས་པ་རགས་པའི་གཟུགས་ཅན་ཏེ་བསྒྲུབ་གཞི་དེ་རྣམས་ལ་ཡེ་ཤེས་ཀྱི་སྟོབས་འཕེལ་ཞིང་སྒྲིབ་པའི་ཚོགས་སེལ་ཕྱིར་དངོས་བརྒྱུད་ནས་བཤད་པའི་སྲིད་ཞིའི་བཅུད་ལེན་གྱི་ནུས་པས་དྭངས་མའི་རྩ་རླུང་ཐིག་ལེའི་ཁམས་རྒྱས་ཤིང་བརྟན་པས་ཚེ་དང་ལུས་ཀྱི་བཅུད་ལེན་གྲུབ་ནས་སྐྱེ་འཆིའི་འཁྲུལ་སྣང་རྒྱུ་འབྲས་དང་བཅས་པ་དག་སྟེ་མི་འགྱུར་རྟག་བརྟན་རྡོ་རྗེ་སེམས་དཔའ་འཆི་མེད་རྟག་པ་འབྲས་བུའི་གོ་འཕང་དམ་པ་མངོན་དུ་བྱེད་ནུས་པ་སྟེ། མདོར་ན་གཞི་གཞི་སྣང་དང་བཅས་པས་འཁྲུལ་གྲོལ་གྱི་སྒོ་བཤད་པའི་ཚུལ་གྱིས་ཚེ་ཡི་རྣམ་གཞག་གསུམ་ག་བསྟན་པའོ། །གཉིས་པ་རྐྱེན་འཇུག་པའི་ལམ་ལ་བྱང་གཏེར་ལས། གསང་བ་ཚེ་ཡི་དྭངས་མ་དེ༔ བསྐྱེད་རིམ་དབང་དང་རླུང་གིས་གསོ༔ ཞེས་པ་ལྟར་བསྐྱེད་རྫོགས་ཀྱི་རྣལ་འབྱོར་ལ། སྔོན་འགྲོ་དབང་དང་དམ་ཚིག །དངོས་གཞི་བསྐྱེད་རྫོགས་ཀྱི་རྣམ་དབྱེ། རྗེས་ལམ་གྱི་མདོ་ཆིངས་ཐུན་མོང་དུ་གདམས་པའོ། །དང་པོ་ལ། སྨིན་པར་བྱེད་པ་དབང༌། དབང་སྲོག་འཛིན་པ་དམ་ཚིག་གི་རྣམ་གཞག་གོ །དང་པོ་ནི། དེ་ནས་གཉིས་སུ་མེད་པའི་སོགས་ནས། ལེའུ་སྟེ་གཉིས་པའོ༔ ཞེས་པའི་བར་ཏེ་གཞུང་འདི་ཉིད་ལས། གཞི་ལ་གནས་པ་ནུས་པའི་དབང༔ སད་བྱེད་རྒྱུ་ཡི་དབང་བསྐུར་ཏེ༔ སོགས་ཀྱིས་གཙོ་བོར་བསྟན་པ་ལྟར་དོན་ཡེ་ཤེས་ཀྱི་དབང་གདོད་ནས་གནས་པའི་སྐུ་བཞིའི་ས་བོན་བདེ་གཤེགས་སྙིང་པོའི་རྒྱུད་དུ་བཞུགས་པའི་ནུས་པ་སད་པའི་ཕྱིར་ཀུན་རྫོབ་བརྡ་ཡི་དབང་བསྐུར་བྱ་ཡུལ་སློབ་མའི་དབང་པོ་ཐ་མ་འབྲིང་མཆོག་རབ་ཀྱི་སྣོད་ཅན་ལ། བྱེད་པ་པོ་སློབ་དཔོན་སྔགས་ཀྱི་དེ་ཉིད་ལྔ་ལ་རང་བྱན་ཚུད་པས། བྱ་བའི་ལས་ས་ཆོག་ལྷ་བུམ་སློབ་མ་ལྷག་གནས་ཐིག་ཚོན་རྒྱན་བཀོད་དཀྱིལ་འཁོར་སྒྲུབ་མཆོད་སྔོན་འགྲོས་བདག་ཉིད་འཇུག་སྟེ་གནང་བ་ནོད་པས། ཕྱི་མཚན་མ་ནང་ཡེ་ཤེས་ཀྱི་དཀྱིལ་འཁོར་དུ་འཇུག་པའི་རྒྱུད་སྦྱངས་ཏེ། བྱེད་པ་རྫས་སྔགས་ཏིང་འཛིན་གསུམ་ཚོགས་ཀྱི་ཆོ་གས་ཕན་ནུས་ཟབ་མོའི་དབང་བསྐུར་བས། བྱ་བ་སློབ་མའི་སྒོ་གསུམ་ཕྲ་རགས་ཀྱི་དྲི་མ་སྦྱངས་ཤིང་ཡེ་ཤེས་རང་གནས་ཀྱི་ནུས་པའི་གསོས་དངོས་བརྒྱུད་ཅི་རིགས་ནས་ཐེབས་པས་རྒྱུད་དག་ནུས་པ་རྫོགས་པ་སྟེ། འདིར་རྩ་བ་ནང་སྒྲུབ་ཀྱི་དབང་ཆེན་སྟ་གོན་དངོས་གཞི། ཁྱེར་བདེའི་དོན་དབང༌། ཡན་ལག་ཕྱི་སྒྲུབ་ཀྱི་ཁྲུས་དབང༌། གསང་སྒྲུབ་མཁའ་འགྲོའི་བརྡ་དབང༌། ཡང་ཟབ་རིག་འཛིན་བླ་མའི་དབང་བཞི། བར་ཆད་སེལ་བ་དབང་གི་རྒྱལ་པོའི་རྗེས་གནང༌། གཉེར་འཛིན་ཌཱ་ཀིའི་བཀའ་གཏད་བཅས་བཞུགས་པའི་ཆོ་ག་ཞིབ་མོ་ཀུན་གཟིགས་འཇམ་མགོན་བླ་མའི་དབང་གི་ཆོ་ག་ལྟར་ཤེས་པར་བྱ་དགོས་ཤིང་གྲུབ་པ་ལགས། གཉིས་པ་ནི། དབང་སྲོག་རྒྱུད་ལ་འཛིན་པ་ནི༔སོགས་ནས། ལེའུ་སྟེ་གསུམ་པའོ༔ ཞེས་པ་སྟེ་ངོ་བོ་བསྲུང་བྱའི་དོན་ལས་མི་འདའ་བའི་སེམས་ས་བོན་དང་བཅས་པ། ངེས་ཚིག་ཇི་ལྟར་དམ་བཅས་པའི་ཚིག་ལས་མི་འདའ་བས་སྔགས་ཀྱི་འདུལ་བའམ་རྡོ་རྗེ་ཐེག་པའི་ཡལ་གམ། དབྱེ་ན་རྩ་བ་ཡན་ལག་སྤྱི་དང་ཁྱད་པར་ལྷག་པའམ་འདིར་བཤད་པའི་ཕྱི་ནང་གསང་བ་དེ་ཁོ་ནའི་དམ་ཚིག །དོན་དམ་དང་ཀུན་རྫོབ་ཀྱི་ལྟ་བས་སྲུང་ཚུལ། ཕན་ཡོན། ཉེས་དམིགས་བཅས་ཤེས་པར་བྱས་ཏེ་བླང་དོར་ལ་འབད་པས་དངོས་གྲུབ་དཀའ་བ་མེད་པར་ཐོབ་པའི་ཐབས་ཀྱི་ཁྱད་པར་རྨད་དུ་བྱུང་བའོ། །གཉིས་པ་དངོས་གཞི་བསྐྱེད་རྫོགས་ཀྱི་རྣམ་དབྱེ་རྒྱས་པར་བཤད་པ་ལ། ཀུན་རྫོབ་འཇིག་རྟེན་སྐྱེ་བའི་རིམ་པ་དང་སྦྱར་ཏེ་བཅོས་ཤིང་བརྟག་པ་རྗེས་དཔག་གི་ལྷའི་རྣལ་འབྱོར་བསྐྱེད་པའི་རིམ་པ་དང༌། དོན་དམ་འཇིག་རྟེན་འགག་པའི་རིམ་པ་དང་སྦྱར་ཏེ་བཅོས་མིན་གྱི་ལྷ་སྐུ་རྣམ་པར་མི་རྟོག་པའི་ཡེ་ཤེས་རྣལ་འབྱོར་དུ་བྱ་བ་མངོན་སུམ་པའི་ལྷའི་རྣལ་འབྱོར་རྫོགས་པའི་རིམ་པ་བཤད་པའོ། །དང་པོ་ལའང་གཞུང་ལས། ཐབས་ལ་ཕྱི་ནང་གསང་བ་དང༔ བླ་ན་མེད་པའི་སྒྲུབ་ཚུལ་བཞི༔ ཞེས་པ་ལྟར་ཕྱི་རྒྱུད་སྡེ་འོག་མའི་དགོངས་པ་ལྟར་ཚེ་འོད་དཔག་མེད་ལྷ་དགུའི་དཀྱིལ་འཁོར་དུ་བསག་སྦྱོང་སྙིང་པོར་དྲིལ་བ། ནང་མ་ཧཱ་ཡོ་ག་དང་མཐུན་པར་བླ་མ་ལོངས་སྐུ་ཚེ་དཔག་མེད་ལྷ་བཅུ་བདུན་མའི་བསྙེན་སྒྲུབ་ལས་སྦྱོར་དང་བཅས་པ། གསང་བ་རྫོགས་རིམ་གྱི་སྔོན་འགྲོ་དབྱིངས་ཕྱུག་མནྡ་ར་རིགས་ལྔའི་མཁའ་འགྲོའི་བསྐྱེད་བཟླས། བླ་མེད་ཡང་ཟབ་རིག་འཛིན་བླ་མའི་ཚེ་སྒྲུབ་ཧེ་རུ་ཀ་འདུས་པའི་ཕྲིན་ལས་བཞི་ལས། དང་པོ་ལའང༌། ལམ་སྤྱིའི་སྔོན་འགྲོ་དང༌། ཕྱི་སྒྲུབ་དངོས་སོ། །དང་པོ་ནི། རིག་པའི་སེམས་དཔས་སོགས་ནས། གཅིག་ཅར་བརྩོན༔ ཅེས་པ་སྟེ་འཁོར་བའི་རྒྱུ་འབྲས་མཐའ་དག་གི་མཚང་ཤེས་པས་དེ་ལས་ཐར་འདོད་ཀྱི་བློ་བཅོས་མིན་དུ་རྒྱུད་ལ་སྐྱེ་བའི་ངེས་འབྱུང་གི་བསམ་པ་བསྐྱེད་ཕྱིར་ཆོས་ཀྱི་རྟེན་དལ་འབྱོར་རྙེད་དཀའ་ཚུལ། ཆོས་ལ་འཇུག་པའི་རྐྱེན་མི་རྟག་པར་བསྒོམ་པ། ཆོས་ཀྱི་དོན་རྒྱུ་འབྲས་བསླུ་མེད་ལ་ངེས་ཤེས་བསྐྱེད་པ། ཆོས་ཀྱི་འབྲས་བུ་འཁོར་བ་སྡུག་བསྔལ་དུ་ཤེས་པས་ཐར་པ་རྩེ་གཅིག་ཏུ་སྒྲུབ་པའི་བློ་རྣམས་ཁྲིད་རིམ་སྤྱི་ལྟར་བཤད་ཅིང་ཉམས་སུ་བླང་བར་བྱའོ། །གཉིས་པ་ནི། གནས་ཁང་བཀོད་པས་བརྒྱན་སོགས་ནས། ལེའུ་སྟེ་བཞི་པའོ༔ ཞེས་པ་སྟེ་འདི་ནི་འཕགས་ཡུལ་གྲུབ་པའི་སློབ་དཔོན་ཆེན་པོ་ཛེ་ཏཱ་རི་དགྲ་ལས་རྣམ་པར་རྒྱལ་བའི་ལུགས་ཀྱི་ཚེ་དཔག་མེད་ལྷ་དགུའི་སྒྲུབ་ཐབས་རྒྱ་གཞུང་དུ་གྲགས་པའི་དགོངས་པ་དང་ཆུ་བོ་གཅིག་ཏུ་འདྲེས་པ་སྟེ། སྤྱིར་སངས་རྒྱས་ཀྱི་ཕྲིན་ལས་གདུལ་བྱའི་ཡུལ་ལ་འཇུག་པའི་སྒོའི་གཙོ་བོ་ནི་གསུང་གི་གསང་བ་སྟེ། གསུང་གིས་འགྲོ་ལ་ཐར་པའི་ལམ་སྟོན་ཅིང་བླང་དོར་ཐམས་ཅད་ཡོངས་སུ་སྣང་བར་བྱེད། སྐུ་ཡི་སྣང་བ་མི་འཇུག་པའི་གདུལ་བྱའི་དོན་ཀྱང་གསུང་ཁོ་ནས་མཛད། སངས་རྒྱས་ཀྱི་ཡེ་ཤེས་ཟབ་མོའི་ནུས་པ་ད་ལྟ་སོ་སྐྱེའི་རྒྱུད་ལ་འདྲེན་པའི་ནུས་པའང་གསུང་ལ་མངའ། གཟུངས་རིགས་གསང་སྔགས་ཐམས་ཅད་ཀྱང་གསུང་ཡིན་པས་དེ་རེ་རེའི་བཟླས་པའི་ཕན་ཡོན་ཀྱང་བསམ་གྱིས་མི་ཁྱབ། གསུང་དེ་གདུལ་བྱའི་ངོར་མཚན་མའི་ལྷ་སྐུར་བཞེངས་པ་གསུང་པདྨའི་རིགས་ཀྱི་ཁྱབ་བདག་ནི་འོད་དཔག་ཏུ་མེད་པ་ཡིན་པས་གང་དེ་བསྒྲུབ་པས་བྱིན་རླབས་དང་ཐུགས་རྗེ་ལྷག་པར་མྱུར་བ་སྟེ། ཐུན་མོང་གི་མཛད་པ་དང་སྒོ་བསྟུན་ན་སངས་རྒྱས་འོད་དཔག་མེད་པས་སྔོན་ཐུགས་བསྐྱེད་དེ་སྨོན་ལམ་ཆེན་པོ་བརྒྱ་ཕྲག་བཏབ་པས་ཚོགས་གཉིས་རྫོགས་སྨིན་སྦྱངས་པ་མངོན་དུ་གྱུར་ཏེ། ནུབ་ཕྱོགས་སངས་རྒྱས་ཀྱི་ཞིང་ཁམས་བདེ་བ་ཅན་སྣོད་བཅུད་རང་བྱུང་ཡེ་ཤེས་ཀྱི་བཀོད་པ་བསམ་མི་ཁྱབ་པ་ན་ད་ལྟ་མངོན་སུམ་དུ་སངས་རྒྱས་ཏེ་ཚེ་དང་ཡེ་ཤེས་འོད་སྣང་དཔག་དུ་མེད་པའི་འདྲེན་པར་འཚོ་ཞིང་གཞེས་ཏེ་བཞུགས་པས། ཞིང་དང་སྐུ་ཡི་ཡོན་ཏན་མདོ་རྒྱུད་ནས་གསུངས་པ་བསམ་སྟེ་དད་པ་དང་སྤྲོ་བ་བསྐྱེད། སངས་རྒྱས་དེའི་མཚན་ཙམ་ཐོས་པས་ཀྱང་དུས་མིན་གྱི་འཆི་བའི་འཇིགས་པ་གཙོ་བོར་གྱུར་པའི་ཉེས་པ་མཐའ་དག་སྐྱོབ་པའི་ཕན་ཡོན་དྲན་པས་མཆོད་པ་འབུལ་ཞིང་ཕྱག་བྱ། ཐུགས་རྒྱུད་བསྐུལ་བའི་ཕྱིར་གཟུངས་སྔགས་བཟླ་བ་དང༌། ཐུན་མཚམས་སུ་ལྷ་འདིའི་མདོ་རྒྱུད་བཀླག་པ་ལ་བརྩོན་པས་གནས་སྐབས་སུ་ཚེ་དང་བསོད་ནམས་འཕེལ་བ་དང༌། ཞིང་སྦྱོང་གི་ཆོ་ག་ཡང་ཞར་བྱུང་དུ་ཚང་བས། མཐར་ཐུག་འཆི་མེད་བདེ་ལྡན་མགོན་པོའི་གོ་འཕང་མངོན་དུ་བྱེད་པའི་ཐབས་མཆོག་ཏུ་ཟབ་པས་བརྩོན་པར་གཅེས་ཤིང༌། ཞར་བྱུང་འགལ་རྐྱེན་བསལ་བའི་ཁྲུས་དང༌། མཐུན་རྐྱེན་སྤེལ་བའི་མཆོད་སྡོང་བཞེངས་པ་དང་མཆོད་པ་སོགས་ཅི་ནུས་སྐབས་དང་སྦྱར་ཏེ་ཉམས་སུ་ལེན་དགོས་སོ། །གཉིས་པ་ནང་སྒྲུབ་ཀྱི་ཆོ་ག་ལ་བསྙེན་སྒྲུབ་ཡན་ལག་བཞིའམ། བསྙེན་སྒྲུབ་ལས་གསུམ་དུ་གསུངས་པས་སྐབས་འདིར་ཕྱི་མ་ལྟར་འབྲེལ་ཆེ་བས་བཤད་པ་ལ། དང་པོ་བསྐྱེད་རིམ་ཕྱག་རྒྱ་གཅིག་པ་བསྙེན་པའི་རྣལ་འབྱོར་ནི། ཁྱད་པར་རྒྱུན་གྱི་ཏིང་ངེ་འཛིན༔སོགས་ནས། སྙིང་པོའོ༔ ས་མ་ཡ༔ ཞེས་འོག་ནས་འབྱུང་བ་སྟེ་སྤྱིར་སྔ་འགྱུར་བཀའ་མ་སྒྱུ་འཕྲུལ་རྩ་རྒྱུད་ཀྱི་དགོངས་པ་ལྟར་ལམ་ཡོངས་རྫོགས་ཀྱི་དབང་དུ་བྱས་ཏེ་ལས་དང་པོའི་རྣལ་འབྱོར་བསྐྱེད་རིམ་ཕྱག་རྒྱ་གཅིག་པའི་ཏིང་ངེ་འཛིན་མཐར་ཕྱིན་དགོས་པས་སྔོན་དུ་བཤད་པ་སྟེ། བསྐྱེད་རིམ་ལ་སྒོམ་ཚུལ་གྱི་དབྱེ་བས་བཞི་ལས་སྤྲོས་མེད་སྐད་ཅིག་དྲན་རྫོགས་ཀྱི་ཏིང་འཛིན་སྒོམ་སླ་བ་གཙོ་བོར་བཏོན་ནས་གསུངས་པ་སྟེ། རྒྱུ་ཏིང་འཛིན་གསུམ། འབྲས་བུ་རྟེན་བརྟེན་པའི་ལྷ་བསྒོམས་ཏེ་གསལ་བརྟན་དག་གསུམ་གྱི་བསྐྱེད་རིམ་ལ་རྩེ་གཅིག་ཏུ་བསླབས་པས་ཉམས་ལྔ་རིམ་གྱིས་འཆར། བྱིང་རྒོད་ཀྱི་སྐྱོན་བཅོས་པའི་ཕྱིར་ལྷ་ལམ་དུ་སློང་བ་སོགས་རྣམ་པ་དྲུག་གི་རྣལ་འབྱོར་གནད་དུ་བསྣུན་པས་གེགས་བསལ་ཞིང་བོགས་འབྱིན་བྱ། དེས་སྐྱོ་བའམ་སྐབས་སུ་ཐུགས་དམ་བསྐུལ་ཕྱིར་བཟླས་པའང་བྱ་ཞིང༌། གྲངས་བསྙེན་བྱེད་ན་རྩ་སྔགས་འབུམ་ཕྲག་གསུམ། གཟུངས་རིང་འབུམ་ཕྲག་གཅིག་ཁ་སྐོང་དང་བཅས་པ་བཟླ་བར་གསུངས་སོ། །གཉིས་པ་ཕྱག་རྒྱ་སྤྲོས་བཅས་སྒྲུབ་པའི་རིམ་པ་ལ་བསྐྱེད་བཟླས་གཉིས་ལས། དང་པོ་ནི། གཉིས་པ་ནང་ལྟར་སྒྲུབ་པ་ལ༔སོགས་ནས། བསྟོད་པར་བགྱི༔ ཞེས་པ་སྟེ་རྒྱུ་ཏིང་འཛིན་གསུམ་གྱིས་ཁོག་ཕུབ། འབྲས་བུ་རྟེན་དང་བརྟེན་པའི་ལྷ་བསྐྱེད་པ་བཅས་བསྐྱེད་རིམ་སྤྱི་ལྟར་སྤྲོས་ཏེ་ཤེས་པར་བྱ་བ་ལས་མ་སྨོས་ལ་ལས་ཀྱི་རིམ་པ་རྣམས་ཀྱང་གཞན་ལྟར་ཤེས་དགོས་སོ། །གཉིས་པ་ལ་བསྙེན་སྒྲུབ་ལས་གསུམ་ལས། དང་པོ་ནི། གསང་སྔགས་བཟླས་པའི་ཏིང་འཛིན་གྱིས༔སོགས་ནས། གདོན་མི་ཟ༔ ཞེས་པ་སྟེ་བསྐྱེད་རིམ་ཚུལ་བཞིན་སྒོམ་པའི་དབང་དུ་བྱས་ན་ནང་སྒྲུབ་འདི་བསྙེན་སྒྲུབ་ལས་གསུམ་གྱི་སྒྲུབ་པ་ཡིན་ཀྱང༌། དེང་སང་གི་མོས་སྒོམ་གཙོ་བོར་བཏོན་པའི་དབང་དུ་བྱས་ན། སྔར་བཤད་པའི་ཡང་ཟབ་སྙིང་པོའི་བསྐྱེད་བཟླས། རྒྱུན་གྱི་རྣལ་འབྱོར་གཙོ་བོ་ཡིན་པས་ཕྱི་ནང་གསང་བ་ཆིག་དྲིལ་གྱི་ཟབ་ཏིག་སྟེ། འདི་ཁོ་ན་ལའང་བསྙེན་སྒྲུབ་ལས་གསུམ་གསུངས་པས་ཐོག་མར་དང་པོ་བསྙེན་པ་ནི། ར་བ་བཞིའི་ཡར་ངོའི་གཟའ་སྐར་སྦྱོར་བྱེད་དགེ་བའི་སྔ་ཆར་དབེན་པའི་གནས་སུ་གཞུང་མཐུན་རྟེན་གྱི་དྲུང་བསྙེན་པའི་སྐབས་དཀྱིལ་འཁོར་མེད་ཀྱང་རུང་བས་སྨན་རཀ་གཏོར་མ་ཉེར་སྤྱོད་དང་བཅས་པ་བཤམས། བརྒྱུད་འདེབས་ནས་བརྩམ་ལས་བྱང་ཆོག་ཁྲིགས་ཅན་ལྟར་དཀར་གཏོར། བགེགས་གཏོར་བསྔོས་རྗེས་སྒོ་དྲུང་དུ་ཐོ་བརྩིགས་པར་རྒྱལ་ཆེན་ཐོ་འཛུགས་སྤྱི་ལྟར་བྱས་རྗེས། སྲུང་མཚམས་བཅད་པ་ནས་བསྙེན་པའི་བར་མཐར་ཆགས་སུ་བཏང༌། ཕྲེང་བ་དང་ངག་བྱིན་རླབས་བྱས་ལ། དམིགས་གནད་ནི། རང་གཙོ་བོའི་ཐུགས་ཀར་གསེར་གྱི་རྡོ་རྗེ་རྒྱ་གྲམ་སྟེང་ཉི་ཟླའི་གྭའུ་ཁ་སྦྱོར་གྱི་ནང་དུ་ཧྲཱིཿམཐར་སྔགས་ཕྲེང་དམར་པོས་བསྐོར་བའི་འོད་ལྔ་ལྡན་གྱིས་དག་པའི་ཞིང་གི་རྒྱལ་བ་སྲས་དང་བཅས་པ་ལ་བདེ་བ་ཆེན་པོའི་མཉེས་མཆོད་ཕུལ་བས་ཚོགས་གཉིས་ཡོངས་སུ་རྫོགས། དེ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཀྱི་བྱིན་རླབས་བདུད་རྩིའི་འོད་ཟེར་ཁ་དོག་ལྔ་ལྡན་དུ་ཆར་ལྟར་བྲུལ་ནས་བྱུང་བ་གནས་ལྔར་ཐིམ་པས་ལུས་ཁྲ་ལྟེམ་གྱིས་གང༌། སླར་ཡང་སྔགས་ཕྲེང་ས་བོན་དང་བཅས་པའི་འོད་ཀྱིས་མ་དག་པའི་སྣོད་བཅུད་ཐམས་ཅད་ལ་ཁྱབ། སྐྱེ་འཆིའི་སྡུག་བསྔལ་རྒྱུ་འབྲས་དང་བཅས་པ་སྦྱངས་ཏེ་དག་པ་ལྷ་ཡི་འཁོར་ལོར་སད། ཕྱི་འབྱུང་བ། ནང་སྐྱེ་འགྲོའི་ཚེ་དཔལ་ཐམས་ཅད་ཀྱང་སྔར་བཞིན་བསྡུས་ནས་ཐིམ་པས་མ་དག་པའི་སྒོ་གསུམ་མཐའ་དག་སྦྱངས་ཏེ་གཞོམ་མེད་རྡོ་རྗེའི་གསང་བ་གྲུབ་པའི་མོས་པས་བསྙེན་བཟླས་བྱ་བ་སྟེ། འདིར་ཤེས་པར་བྱ་བའི་གནད་ཀྱང་གཞུང་ལས། གསང་སྔགས་བཟླས་པའི་ཏིང་འཛིན་གྱིས༔ དངོས་གྲུབ་གནད་ལ་ངེས་པར་བསྐུལ། ཞེས་པ་ལྟར་སྔགས་བཟླ་བའི་ཚེ་དམིགས་པའི་ཏིང་འཛིན་དང་ལྡན་ན་ནུས་པ་ལྷག་པར་མྱུར་ཞིང་དེར་མ་ཟད་སངས་རྒྱས་ཀྱི་ཡེ་ཤེས་གསང་བ་གསུམ་ག་གཅིག་ཉིད་དུ་མར་འཕྲུལ་པའི་ཡེ་ཤེས་ལས་ཐ་དད་དུ་མ་དམིགས་པའི་ཕྱིར་ལྷ་སྔགས་ཡེ་ཤེས་རོ་གཅིག་པ་བཞིན་བཟླས་པའི་སྐབས་སུ་ཡང་ཕྱག་རྒྱ་སྔགས་དང་ཏིང་འཛིན་རྣམས་ཆིག་དྲིལ་དུ་བྱ་དགོས་ཤིང་འགལ་འདུར་མི་གནས་པའི་གནད་མ་ཤེས་ན་དག་དྲན་གྱི་སྙིང་པོ་ལྷ་དང་གཞལ་ཡས་ཀྱི་རྟེན་བརྟེན་པ་ཐམས་ཅད་སངས་རྒྱས་ཀྱི་ཡེ་ཤེས་འབའ་ཞིག་གི་རོལ་པ་ལས་མ་འདས་པའི་ཚུལ་བསྒོམ་མི་ནུས་ཤིང༌། སྔགས་ཀྱང་གསང་སྙིང་ལས། དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང༌། །དབྱིབས་དང་ཁ་དོག་མིང་ཚོགས་ཀྱི། །རོལ་པ་ཅིར་ཡང་སྤྲུལ་ཞིང་སྟོན། །ཅེས་པ་ལྟར་ཤེས་པ་ནི་གཅེས་སོ། །ཚུལ་དེ་ལྟ་བུས་བཟླས་གྲངས་གཞུང་ལྟར་མ་གྲུབ་བར་དང༌། ཐུན་ལས་ལྡང་བ་ན་ལས་གཞུང་གི་ཚེ་འགུགས་དང་དབྱངས་གསལ་རྟེན་སྙིང་བཟླ་ཞིང༌། མཆོད་བསྟོད་ཡིག་བརྒྱ་དང་ནོངས་བཤགས་ནས་བརྩམས་བསྡུ་ལྡང་བྱ་བ་ལས་སྒྲུབ་པ་དང་ལས་སྦྱོར་གཉིས་མི་དགོས་སོ། །གཉིས་པ་སྒྲུབ་པ་ནི། བསྙེན་པའི་རྣལ་འབྱོར་ལས་རུང་བས༔སོགས་ནས། དངོས་གྲུབ་ཐོབ༔ ཅེས་པ་སྟེ་བསྙེན་བཟླས་རྫོགས་པའི་སྔ་ཆར་དངོས་གྲུབ་མདོར་བསྡུས་བླངས་ལ་རས་བྲིས་ཀྱི་དཀྱིལ་འཁོར་བཏིང༌། བུམ་པ། ལྷ་ཙཀ །ཚེ་འབྲང༌། ཚེ་རིལ་ཆང་སོགས་དབང་གི་སྐབས་ལྟར་སྒྲུབ་རྫས་རྣམས་ཀྱང་བཀྲམ། རས་བྲིས་མ་འབྱོར་ན་ཚོམ་བུ་ལྷ་གྲངས་ཀྱིས་ཀྱང་རུང༌། སྟབས་བདེ་ཕྱིར་བསྙེན་པའི་དུས་ནས་དཀྱིལ་འཁོར་དང་ཚོམ་བུ་འདུ་བགྱིས་ཀྱང་ཆོག །གང་ལྟར་ཡང་ཉིན་དེ་གའི་ཕྱི་ཐུན་ནས་སྒྲུབ་པའི་དབུ་ཚུགས་པར་བྱ། ལས་བྱང་གི་བཟླས་པའི་དབུར་ཛཔ་ཁང་དབྱེ། བསྙེན་དམིགས་གསལ་བཏབ་ལ་བཟླས་པ་ཁྱུག་ཙམ་ཟིན་པ་དང་སྒྲུབ་པའི་ཛཔ་དགོངས་གཙོ་བོར་བྱ་སྟེ། དམིགས་པའི་ཁྱད་པར་རིགས་ལྔ་སོ་སོའི་ཐུགས་ཀར་རང་རང་གི་ས་བོན་སྔགས་ཕྲེང་གིས་བསྐོར་བའི་སྤྲོ་བསྡུས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ཡེ་ཤེས་རིག་ལྔའི་ཚེ། འབྱུང་ལྔའི་དྭངས་མ། འགྲོ་བ་རྒྱུད་ལྔའི་བླ་ཚེ་སྲོག་གི་སྙིང་པོ་བསྡུ་བསྟིམ་དང༌། སྣང་སྲིད་ཡེ་ཤེས་ཕྱག་རྒྱའི་འཁོར་ལོར་སད་པས་ཀུན་ཀྱང་ཛཔ་སྒྲ་སྒྲོགས་པར་བསམ་ལ་བཟླས་གྲངས་བསྐྱལ། ཐུན་མཐར་ཚེ་གཟུངས་ཀྱང་ཅུང་ཟད་བཟླ། གྲངས་བསྙེན་སྐབས་སྤྲོ་ན་གཟུངས་ཀྱང་འབུམ་ཕྲག་གཅིག་བཟླ། ལས་སྦྱོར་མི་དགོས། ཐུན་ལས་ལྡང་བ་ན་ཚེ་འགུགས་དབྱངས་གསལ་རྟེན་སྙིང་མཆོད་བསྟོད་ནོངས་བཤགས་སོགས་ལ་འཇུག །སྒྲུབ་པའི་སྐབས་འདིར་མཆོད་པ་ཚོགས་སྐོང་སོགས་ཇི་ཙམ་རྒྱས་བཞིན་ལེགས་པས་ཤེས་པར་བྱའོ། །གསུམ་པ་ལས་སྦྱོར་ནི། བསྙེན་དང་སྒྲུབ་པའི་ལྷ་སོགས་ནས། སིདྡྷི་བླང༔ ཞེས་པ་སྟེ་སྒྲུབ་པ་ཟིན་པ་དང༌། ལས་སྦྱོར་གྱི་བཟླས་པ་སྦྱར། ལས་སོ་སོའི་ཤམ་ཅན་ཁྲི་རེ་བཟླ། གྲངས་རྫོགས་པ་ན་དངོས་གྲུབ་བླང་བ་སོགས་སྤྱི་ལྟར་བྱ། དེ་ཡང་བསྙེན་སྒྲུབ་ལས་གསུམ་གྱི་ཐོག་མཐའ་དང༌། ཡར་མར་གྱི་ཚེས་བཅུ་སོགས་དུས་བཟང་རྣམས་དང༌། སྒྲུབ་པའི་སྐབས་ཉིན་བཞིན་ཚོགས་མཆོད་གྲུབ་ན་ལེགས། རྐྱེན་སེལ་ལྟ་བུར་ཟླ་གཅིག་ཙམ་དུ་བསྙེན་སྒྲུབ་བྱེད་ན་བསྙེན་པ་བདུན་གསུམ། སྒྲུབ་པ་བདུན་གཅིག །ལས་སྦྱོར་དང་གཏང་རག་ཚོགས་སྐོང་བཅས་ཞག་གསུམ་དུ་བགྱིས་པས་འབྲེལ་འཇོག་ཏུ་འགྱུར། རྒྱུན་གྱི་བསྐྱེད་རིམ་སྙིང་པོའི་སྟེང་ཁོ་ནར་བསྙེན་བཟླས་གྲངས་ཚད་གཞུང་ལྟར་བྱས་ཀྱང་རུང་ཞིང༌། དེའི་ཚེ་ལས་བྱང་རྒྱུན་ཁྱེར་ཁོ་བོས་བྲིས་པར་ཆོ་གའི་ཡན་ལག་ཅུང་ཟད་རྒྱས་ན་ལེགས་པས་ཀུན་གཟིགས་བླ་མའི་ཆོག་ཁྲིགས་ནང་སྒྲུབ་ཀྱི་གཤོམ་ལྟར་བྱའོ། །སྒྲུབ་པ་རྒྱས་པ་ཚོགས་སྒྲུབ་བྱ་བ་སྔོན་འགྲོ་སྟ་གོན་ནས་བརྩམ། མཇུག་དངོས་གྲུབ་ལེན་པའི་བར་སྒྲུབ་ཁོག་སྤྱིའི་ཆིངས་དང་བསྟུན་ཁོར་ཡུག་གསུང་མི་ཆད་པའི་བཟླས་པ་བཅས་བྱ་བའི་ཁྱད་པར་རོ། །གསུམ་པ་ལས་སྦྱོར་ནི། བསྙེན་དང་སྒྲུབ་པ་ལས་རུང་ནས༔སོགས་ནས། ལེའུ་སྟེ་བཅུ་པའོ༔ ཞེས་པའི་བར་ཏེ། དེ་ཡང་ལས་ཀྱི་ཚོགས་བྱ་བའི་ཡུལ་འཁོར་འདས་ཀྱི་བྱ་བ་ཐམས་ཅད་སྒོ་གསུམ་དང་རྟེན་ཅིང་འབྲེལ་བ་བཞིན། བྱེད་པའི་ཕྲིན་ལས་སངས་རྒྱས་རྣམས་ཐབས་མཁས་ཀྱི་སྤྱོད་ཡུལ་བསམ་མི་ཁྱབ་པས་དོན་གཉིས་ཀྱི་འདོད་པ་སྒྲུབ་པའི་སྒོ་ཐམས་ཅད་གསང་བ་མི་ཟད་རྒྱན་འཁོར་ལྔ་དང་འབྲེལ་བར་སྟོན་པས། བྱེད་ཚུལ་ནོར་བུ་རིན་པོ་ཆེ་གཅིག་གིས་ཡིད་ཀྱི་འདོད་པ་ཐམས་ཅད་རྗེས་སུ་འཇོ་བ་དང་མཚུངས་པར་སྐུ་གསུང་ཐུགས་ཡོན་ཏན་ཕྲིན་ལས་དངོས་གཅིག་དུ་མར་ཤར་བའི་ཆོ་འཕྲུལ་གྱིས། བྱེད་པའི་ཐབས་རྫས་སྔགས་ཏིང་འཛིན་སུམ་འབྲེལ་དུ་སྟོན་པ་ཡིན་ལ། ཇི་ལྟར་བྱེད་ཚུལ་ཐོག་མར་རང་ཉིད་བསྙེན་སྒྲུབ་ལྟ་དགོངས་ཀྱི་གདེངས་དང་མ་ལྡན་ན་ལས་ཚོགས་མཐར་ཕྱིན་པར་མི་ནུས་པས་རྒྱས་པར་སྤྲོ་ན་ཕྱི་ནང་གསང་བ། རྩ་བ་ཡན་ལག་གི་སྒྲུབ་ཐབས་ཐམས་ཅད་དང༌། དེ་ཙམ་མ་གྲུབ་ནའང་ནང་སྒྲུབ་ཀྱི་བསྙེན་སྒྲུབ་ལས་གསུམ་གྲུབ་པ་ཞིག་ངེས་པར་དགོས་ཤིང༌། ལས་ཀྱི་དབྱེ་བ། སྐུ་ཕྱག་རྒྱ། གསུང་རིག་པ། ཐུགས་ཆོས་སྐུའི་རྟེན། ཡོན་ཏན་བཅུད་ལེན། ཕྲིན་ལས་མེ་རླུང་གི་སྦྱོར་བ། འགལ་རྐྱེན་ཚར་གཅོད་པ་དང་འབྲེལ་བའི་ཚེ་བདུད་བཟློག་མདོས་དང༌། པདྨ་དྲག་པོ་རྟ་མཆོག་རོལ་པའི་བསྐྱེད་བཟླས། མཐུན་རྐྱེན་རྗེས་འཛིན་གྱི་ཡན་ལག་བླ་ཚེ་བསླུ་བའི་ཆོ་ག་དང༌། འཆི་བདག་གཏོ་ཆེན་རྣམས་དང༌། གསང་བ་མི་ཟད་རྒྱན་འཁོར་གྱི་ལས་ཚོགས་རྣམས་ནང་སྒྲུབ་ཀྱི་ཡན་ལག་རིགས་ལྔ་བྱེ་བྲག་གི་སྒོས་སྒྲུབ་དང་འབྲེལ་བར་ཉམས་སུ་ལེན་དགོས་པས་གཞན་དུ་ཤེས་ལ། དགོས་པ་ཚེའི་མི་མཐུན་པའི་ཕྱོགས་ཐམས་ཅད་ཞི་ཞིང༌། མཐུན་རྐྱེན་གོང་འཕེལ་དུ་བགྱིས་པས་དཔྱིད་སོས་ཆར་གྱིས་བྲན་པའི་དབྱར་སྐྱེས་བཞིན་རྡོ་རྗེ་ཚེ་ཡི་རིག་འཛིན་བདེ་བླག་ཏུ་འགྲུབ་པ་ནི་ངེས་པའོ། །གསུམ་པ་གསང་བ་རྫོགས་རིམ་གྱི་སྔོན་འགྲོ་དབྱིངས་ཕྱུགས་མནྡ་ར་རིགས་ལྔའི་མཁའ་འགྲོའི་བསྐྱེད་བཟླས་ནི། དག་པ་ཡེ་ཤེས་རྩ་ཐིག་རླུང༔སོགས་ནས། ལེའུ་སྟེ་བཅུ་གཅིག་པའོ༔ ཞེས་པ་སྟེ་སྤྱིར་རྡོ་རྗེའི་ལུས་ལ་བརྟེན་པ་རྩ་རླུང་ཐིག་ལེའི་གནད་འཆིང་བ་རྫོགས་རིམ་སྟེ་ཐིག་ལེའི་ཁམས་གྲུབ་པ་ཙམ་ནས་བཅུད་དྭངས་མ་དཀྱིྃལ། རང་བྱུང་གི་སྣོད་འཁོྃར་གྱི་རང་བཞིན་ཤུགས་ཀྱིས་གྲུབ་པས་རྟོག་པས་གསར་དུ་སྒྲོ་བཏགས་ནས་བཅོས་མར་བྱས་པ་མིན་ཞིང༌། ལྷུན་གྲུབ་ལུས་ཀྱི་དཀྱིལ་འཁོར་དང་མཐུན་པར་བསྒོམ་པ་སྔ་མ་ལས་ཟབ་པའི་ཕྱིར་ཟབ་མོའི་བསྐྱེད་རིམ་ཞེས་གྲགས། དེ་ཡང་རྩ་རླུང་ཐིག་ལེའི་ཁམས་ཐམས་ཅད་ཀྱང་དབུ་མ་ཆོས་ཉིད་ཀྱི་སྲོག་ཏུ་དག་དགོས་ཤིང༌། དེའི་རྐྱེན་བདེ་གསལ་མི་རྟོག་པའི་ཉམས་ལེན་མཐའ་དག་གི་གཞི་ལྟེ་བའི་ཙཎྜ་ལི་འབར་བའི་བྱེད་པས་བྱ་དགོས་པས་དེ་ནི་ཤེས་རབ་ཀྱི་བདག་ཉིད་ཡུམ་དུ་གནས་ལ། དེ་ཐམས་ཅད་ཀྱི་ངེས་དོན་རྣམ་ཐར་སྒོ་གསུམ་རྡོ་རྗེ་བཙུན་མོའི་ཆུ་སྐྱེས་ཀྱི་རྒྱ་ལས་མ་འདས་པས་ན་བསྐྱེད་རིམ་ཀྱང་དེ་དག་དང་མཐུན་པར་ཡུམ་བཀའ་ལྷན་ཅིག་སྐྱེས་མ་རིགས་ལྔའི་རྣལ་འབྱོར་སྟོན་པས་ལྷག་པར་ཡང་ཟབ་པའི་ཕྱིར་གསང་སྒྲུབ་ཏུ་བཞག་པ་སྟེ། གནད་དེ་ལྡན་གྱི་བསྐྱེད་རིམ་གྱི་སྐབས་རང་ལུས་གཞལ་ཡས་ཀྱི་ནང་ཙཎྜ་ལིའི་ཆོས་འབྱུང་དབུས་དཔྱིད་ཐིག་གི་ངོ་བོ་མནྡ་ར། ཡས་བབ་མས་བརྟན་གྱི་དགའ་བཞིའི་འཁོར་བརྒྱད། བདེ་ཆེན་གྱི་དྭངས་མ་རིགས་བདག་བླ་མ། ཀུན་ཀྱང་སེམས་ཉིད་ལྷན་སྐྱེས་ཀྱི་རོལ་རྩེད་གཅིག་ཏུ་ཤེས་པས་གཞུང་ལྟར་ཉམས་སུ་བླང་ངོ༌། །བཞི་པ་དེ་ཁོ་ན་ཉིད་བླ་མེད་ཡང་ཟབ་རིག་འཛིན་བླ་མ་ཧེ་རུ་ཀ་འདུས་པའི་ཕྲིན་ལས་ནི། ཡང་ཟབ་རིག་འཛིན་ཚེ་ཡི་སྒྲུབ་པ་བཞུགས༔ སོགས་གུད་དུ་ཕྱུང་བ་ལྟར་ཏེ། ཐོག་མར་རྒྱུད་སྦྱོང་བ་བསག་སྦྱང་གི་རིམ་པ་གཙོ་བོར་བཏོན་པའི་ཕྱི་སྒྲུབ་ནི་རྒྱལ་པོ་ལ་སྙན་གསན་དབབ་པ་ལྟ་བུ་བསྙེན་པའི་ཡན་ལག་ཏུ་དང་པོར་བསྟན། དེ་ནས་སྤྲོས་པ་ཅན་ཀུན་བཏགས་ཀྱི་ཞེན་པ་སྦྱང་ཕྱིར་མ་ཧཱ་དང་མཐུན་པའི་བསྙེན་སྒྲུབ་ལས་གསུམ་རྒྱས་པར་སྟོན་པ་ནང་སྒྲུབ་ནི་ཡུལ་གཉན་པོ་ལ་འདྲིས་*སྡེབ་པ་ལྟ་བུ་ཉེ་བསྙེན་གྱི་ཡན་ལག །སྤྲོས་མེད་རྡོ་རྗེའི་ལུས་ཀྱི་རྣལ་འབྱོར་ལ་གནད་དུ་བསྣུན་པས་གཞན་དབང་རླུང་སེམས་ཀྱི་མདུད་པ་ཨ་ཝ་དྷཱུ་ཏིར་བཤིག་ཕྱིར་སྙིང་པོའི་རྣལ་འབྱོར་ཨ་ནུ་དང་མཐུན་པར་སྟོན་པ་གསང་སྒྲུབ་ནི་གོང་མ་མཉེས་ནས་རང་གི་འདོད་དོན་སྒྲུབ་པ་ལྟ་བུ་སྒྲུབ་པའི་ཡན་ལག །དབང་རབ་རྣམ་ཀུན་མཆོག་ལྡན་གྱི་དབྱིངས་དང་སྐུ་གསུམ་འོད་གསལ་རིག་པའི་རང་བཞིན་གཉིས་མེད་མཉམ་པ་ཆེན་པོ་ཡོངས་གྲུབ་རྟག་པ་རྡོ་རྗེའི་སྲོག་སྒྲུབ་ཕྱིར་མངོན་སུམ་ལམ་བྱེད་མོས་གུས་ཀྱི་རྣལ་འབྱོར་ཡང་ཟབ་རིག་འཛིན་བླ་མའི་སྒྲུབ་ཐབས་ཏེ་རང་ཉིད་ཀྱང་ཆེན་པོའི་གོ་སར་འཁོད་ནས་དབང་བསྒྱུར་བ་ལྟ་བུ་སྒྲུབ་པ་ཆེན་པོའི་ཡན་ལག་ཏུ་བསྟན་པ་སྟེ། བླ་མའི་རྣལ་འབྱོར་ཁོ་ན་ཉམས་སུ་བླང་པས་མདོ་སྔགས་ཀྱི་ལམ་གནད་ཚང་བ། བྱིན་རླབས་དངོས་གྲུབ་ཕྲིན་ལས་ཀྱི་སྒོ་རྩོམ་པ་ལ་ལམ་མྱུར་བ། གེགས་སོགས་ཕྱི་ནང་གི་བར་ཆད་མེད་པ། ཐབས་ཟབ་མོའི་གསེང་ལམ་ཐུན་མིན་ཡིན་པས་བསྐྱེད་རྫོགས་ཀུན་ལ་མེད་དུ་མི་རུང་བ་ཡིན་པའི་ཚུལ་ཤེས་པས་རང་གཞུང་ལྟར་ཉམས་ལེན་བྱའོ། །གཉིས་པ་དོན་དམ་འཇིག་རྟེན་འགགས་པའི་རིམ་པ་དང་སྦྱར་ཏེ་མངོན་སུམ་ལམ་བྱེད་རྫོགས་རིམ་གྱི་རྣལ་འབྱོར་ཟབ་མོས་རྡོ་རྗེའི་སྲོག་སྒྲུབ་པའི་མན་ངག་བཤད་པ་ལ། རྩོལ་བཅས་རང་གཞན་གྱི་རྡོ་རྗེའི་ལུས་ལ་བྱེད་བཅིང་གི་ཐབས་ལམ་དང༌། རྩོལ་མེད་གཉུག་མ་མི་ཤིགས་པའི་ཐིག་ལེ་ལ་བརྟེན་པའི་གྲོལ་ལམ་བསྟན་པའོ། །དང་པོ་ལའང་རང་ལུས་ཐབས་ལྡན་གྱི་མན་ངག་དང༌། གཞན་ལུས་ཕོ་ཉའི་མྱུར་ལམ་བཤད་པའོ། །དང་པོ་ལ་གསུམ། མི་རྟོག་ཆོས་སྐུའི་ཉམས་ལེན། བདེ་ཆེན་ལོངས་སྐུའི་རྩལ་སྦྱང༌། གསལ་སྟོང་སྤྲུལ་སྐུའི་བོགས་འབྱིན་ནོ། །དང་པོ་ལ་གཉིས། ཟབ་ལམ་ཕྲ་ཐིག་གི་རྣལ་འབྱོར་གྱིས་རླུང་ལས་རུང་དུ་སྒྲུབ། དབྱིངས་ཕྱུག་ནམ་མཁའི་རྣལ་འབྱོར་གྱིས་སྣང་བའི་བདེན་ཞེན་བཤིག་པའོ། །དང་པོ་ནི། དེ་ནས་སྙིང་པོའི་ཏིང་འཛིན་གྱིས༔སོགས་ནས། རྣལ་འབྱོར་ཏེ༔ ཞེས་པ་སྟེ་སྙིང་པོའི་རྒྱུད་ལས། ས་ཆུ་སྤྱན་དང་མཱ་མ་ཀི །མེ་རླུང་གོས་དཀར་དམ་ཚིག་སྒྲོལ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང༌། །ཞེས་གསུངས་པ་ལྟར་ཕྱི་ནང་གཞན་གསུམ་གྱི་འཇིག་རྟེན་ཐམས་ཅད་འབྱུང་བ་ལྔས་བསྡུས་ཤིང༌། འབྱུང་ལྔ་ཉིད་ཀྱང་དག་པ་ཡུམ་ལྔའི་ཡེ་ཤེས་ཀྱི་མཁའ་རུ་གདོད་ནས་གནས་ལ། མཁའ་ནི་བདེ་བའི་འབྱུང་གནས། ཀུན་ཀྱང་དེ་ལས་མི་འདའ་བ་རྣམ་ཐར་གསུམ་གྱི་ཆོས་སུ་གནས་པ་སྟེ། དེའི་དོན་རྟོགས་ན་རྣམ་ཀུན་མཆོག་ལྡན་བདེ་ཆེན་གྱི་ཡེ་ཤེས་གཅིག་པུ་དུ་མའི་གར་དུ་བསྒྱུར་བའི་ཆོ་འཕྲུལ་ཙམ་ལས་སྐྱེ་འཆི་ཞེས་པ་དངོས་མཚན་དུ་མ་གྲུབ་པས། འཁོར་བ་ཡེ་དག་མྱང་འདས་ལྷུན་རྫོགས་ཀྱི་དགོངས་པའི་གདེང་ཐོབ་པ་ཡིན་ལ། མ་རྟོགས་པའི་འགྲོ་ལ་འབྱུང་བཞིའི་བྱེར་སྡུད་ཀྱིས་ཕྱི་ཡི་སྣོད་ཆགས་འཇིག །ནང་གི་སེམས་ཅན་སྐྱེ་ཤི། གསང་བ་རླུང་སེམས་ཀྱི་ཚོགས་པ་འདུ་འབྲལ་སྣ་ཚོགས་སུ་སྟོན་པས་ཅིར་ཡང་སྣང་ཞིང་སྣ་ཚོགས་སུ་འཆར་བ་སྟེ། རྡོ་རྗེ་ཐེག་པའི་གནད་ཀྱིས་སྲོག་ནས་འཛིན་པས་དག་པའི་གནས་ཚུལ་དང་མཐུན་པར་བདེ་བ་ཆེན་པོར་ལམ་དུ་བྱས་པས་མ་དག་པའི་སྣང་བ་ནུབ་ཅིང་དོན་གྱི་ཡིན་ལུགས་མངོན་དུ་འགྱུར་བའི་ཐབས་ཀྱི་གསེང་ལམ་སྔ་མ་རྣམས་ལས་ཀྱང་ཆེས་ཟབ་མོ་ཞིག་སྟེ་སྔར་སྣང་བཅས་ཕྱིྃ་ཡི་འཇིག་རྟེན་གྱི་སྣོད་བཅུད་སྡུག་ཀུན་རང་རྒྱུད་པའི་བདེན་འཛིན། བདེ་གཤེགས་ཡབ་ལྔ་གཅིག་དྲིལ་གྱི་བསྐྱེད་རིམ་གཙོ་བོར་བཏོན་པས་སྦྱང་པ་ཡིན་ལ། འདིར་རང་སྣང་སྟོང་པའི་རང་གཟུགས་ནངྃ་ལུས་ཀྱི་འཇིག་རྟེན་གྱི་འཁྲུལ་པ། འབྱུང་ལྔ་དག་པའི་དབྱིངས་ཕྱུག་ཡུམ་ལྔའི་ཐབས་ཀྱི་རྣལ་འབྱོར་ལ་གནད་དུ་བསྣུན་པས་རྣམ་མེད་སྟོང་ཉིད་ཀྱི་རང་གཟུགས་རྣམ་བཅས་བདེ་ཆེན་རྡུལ་བྲལ་མཁའ་ཁྱབ་ནམ་མཁའི་རྡོ་རྗེའི་ལང་ཚོ་སྒྲུབ་པས། གཞནྃ་དུ་དེ་ཁོ་ན་ཉིད་ཟུང་འཇུག་སྐྱེ་འཆིའི་ཟུག་རྔུ་ཀུན་བྲལ་ཡེ་ཤེས་ཀྱི་སྐུ་འོད་གསལ་བདེ་ཆེན་འཆི་མེད་རྟག་པའི་གོ་འཕང་སྒྲུབ་པའི་རྡོ་རྗེ་ནང་གི་རྣལ་འབྱོར་གྱི་མན་ངག་ཐུན་མིན་ཏེ། བསྒྲུབ་གཞི་ཕྲ་བའི་ལུས་ངག་ཡིད་གསུམ་རྡོ་རྗེ་གསུམ་གྱི་རིགས་དྲུག་གི་ཁྱབ་བདག་སྐུ་གསུང་ཐུགས་རྡོ་རྗེ་མཉམ་པ་ཉིད་དུ་དག་ཅིང་གནས་པས་དོན་ལ་ཕྱི་ནང་གཞན་གསུམ་གཉིས་མེད་ལྷན་སྐྱེས་ཀྱི་ཕྱག་རྒྱ་ཆེན་པོའི་ངེས་གསང་གཅིག་ཏུ་གནས་ཀྱང༌། དེའི་རང་མདངས་ཀུན་རྫོབ་སྣང་ངོའི་ཆ་ནས་ཁུ་རྡུལ་རླུང་གི་རྟེན་རྩ་གསུམ། རླུང་སེམས་འཇུག་པ་གཅིག་པས་སེམས་ཀྱི་རྟེན་ཀྱང་ཡིན་ལ། དེ་ལས་རགས་སྣང་ལུས་ངག་སེམས་གསུམ་རྩ་རླུང་ཐིག་ལེའི་ཆོས་གྲུབ་པས་སྒོ་གསུམ་གྱི་འཇིག་རྟེན་རང་བྱུང་བཀོད་པ་སྟེ། རྒྱུ་རྐྱེན་གྱི་རྟེན་འབྱུང་གཅིག་ཏུ་ཚོགས་པ་ལས་སྐྱེ་བ། དེ་སོ་སོར་གྱེས་པ་ལས་འཆི་བ་སྟེ་དར་གུད་སྣ་ཚོགས་འབྱུང་བས་ལས་ཉོན་གྱི་ཚོགས་བསྐྲུན་ཀྱང༌། མཆོག་དབང་གོང་མ་གསུམ་དང་འབྲེལ་བའི་ཟབ་ལམ་གྱི་བྱེད་བཅིང་གི་ཡེ་ཤེས་ཀྱིས་རྩ་རླུང་ཐིག་ལེ་ལ་གནད་དུ་བསྣུན་པས། འཁྲུལ་པའི་རྩ་རླུང་ཁམས་ཀྱི་སྙིགས་མ་གློ་བུར་མེད་སྣང་གི་སྒྲིབ་པ་དབུ་མའི་སྦུབས་སུ་དག་ནས། ཁྱབ་བྱ་དྲུག་པའི་རིགས་ཀྱི་རྡོ་རྗེའི་གསང་བ་མི་ཟད་པའི་ཁམས་ལ་ཁྱབ་བྱེད་མཆོག་ཏུ་མི་འགྱུར་བདེ་ཆེན་གྱིས་ཡོངས་སུ་གང་བའི་ཟག་མེད་རྡོ་རྗེའི་སྲོག་ཆེན་པོ་སྒྲུབ་ནུས་པ་སྟེ། འཁྲུལ་སྣང་དེ་ཐམས་ཅད་ཀྱི་གཡོ་སྡུད་ནི་རླུང་ཁོ་ནས་བྱེད་པས་བརྟེན་པ་སེམས་ཀྱི་ཆོས་ཀྱང་རིག་རྩལ་རླུང་གིས་ཡུར་བ་ལས་སྣང་བ་ཇེ་རགས་སུ་ཤར་ནས་གཟུང་འཛིན་གྱི་གཉིས་རྟོག་གྲུབ་ཅིང༌། རྟེན་ལུས་ཀྱང་འཕེལ་འགྲིབ་ཀྱི་བྱ་བ་རླུང་གིས་བྱེད། ཕྱིའི་སྣོད་ཀྱི་འབྱུང་ལྔའི་ཆོ་འཕྲུལ་ཀྱང་རླུང་གིས་གཙོ་བོར་བསྐུལ་བ་ནི་གསོ་རིག་ལས་ནད་ཀྱི་སྣ་འདྲེན་རྗེས་གཅོད་ཐམས་ཅད་རླུང་ཡིན་པར་གསུངས་པ་ལྟ་བུ་སྟེ། དེས་ན་ཐོག་མར་ཀུན་གྱི་བྱེད་པོ་ཐབས་ཀྱིས་ལམ་དུ་གཞུག་པས་གཞན་རྣམས་ཞར་བྱུང་དུ་དག་པར་དགོངས་ནས་དམ་ཚིག་སྒྲོལ་མའི་རྣལ་འབྱོར་དང་པོར་བསྟན་པར་མངོན་ལ། སྐྱེ་འཆི་རང་མཚན་དུ་ཞེན་པའི་རྒྱུ་གང་ལས་བྱུང་ན་བདེན་འཛིན་ལས་བྱུང༌། བདེན་པར་འཛིན་ཡུལ་ནི་ལུས་ངག་སེམས་ཀྱི་ཚོགས་པ་སྟེ་དཔྱད་ན་ལུས་ནི་ཤ་རུས་ཁྲག་སོགས་གདོས་བཅས་བེམ་པོའི་ཆོས། ངག་ནི་རླུང་སེམས་ཀྱི་སྒྲ་གློ་བུར་དུ་སྣང་བ་རྔ་ཡི་སྒྲ་ལྟ་བུ། སེམས་ནི་རྟོག་པའི་ཕྲེང་བ་རིག་རིག་ཏུར་ཏུར་དུ་གཡོ་ཡང་དོན་ལ་གང་དུའང་མི་གནས་པ་རླུང་ལྟ་བུ་སྟེ། མདོར་ན་དེ་ཐམས་ཅད་སིལ་བུར་བསིལ་ན་གཅིག་ཀྱང་མ་གྲུབ་པར་གཏན་ལ་ཕེབས་པས་རྟེན་འབྱུང་གི་སྣང་ཆ་ཙམ་ལས་མེད་ན་འཛིན་ཡུལ་མ་དམིགས་པའི་འཛིན་པ་ཞིག་གང་ལས་འབྱུང༌། མ་བརྟགས་ཉམས་དགའ་སྒྱུ་མ་ཙམ་དུ་ངེས་ཤེས་ཀྱི་གདིང་མ་རྙེད་བར་དུ་དཔྱད། གདིང་རྙེད་པ་ན་དེ་གར་ཀློད་ཅིང་བཞག་པས་བདེན་གཉིས་ཟུང་འཇུག་གི་མྱོང་བ་བཅོས་མིན་རྒྱུད་ལ་སྐྱེས་པ་ནི། རྫོགས་རིམ་ཆོས་དྲུག་གི་སྐབས་སུ་བཤད་པའི་མདོ་དང་མཐུན་པ་མ་དག་པའི་སྒྱུ་ལུས་ཏེ། དེ་ལ་གོམས་ནས་ལུས་སེམས་ཀྱི་སྣང་བ་ཐམས་ཅད་རང་སེམས་ཀྱི་འདུ་བྱེད་བཀོད་པའི་ཆོ་འཕྲུལ། སེམས་དེའང་སྣང་སྟོང་གཉིས་མེད་ཡེ་ཤེས་ཀྱི་རོལ་པ་ཙམ་སྟེ། དེས་ན་སེམས་དངོས་མེད་ལ་སྐྱེ་ཤི་མེད་པའི་སྟོང་པའི་རང་མདངས་ལྷ་སྐུ་འཇའ་ཚོན་ལྟ་བུ་སྐད་ཅིག་གིས་གཟུགས་རྫོགས་པ། སྐྱེ་མཆེད་སོགས་གསལ་ཞིང་མ་འདྲེས་པ། གཅིག་གིས་ཀུན་ལ་ཁྱབ་པའི་ཁྱད་པར་སུམ་ལྡན་གྱི་སྐུ་དབུ་མའི་ཐིག་ལེ་བཅས་གསལ་ལ་རླུང་བཅུད་བསྡུ་བའི་དམིགས་པ་བུམ་ཅན་དང་སྦྲགས་པ་བརྒྱ། ལྔ་བཅུ། ཉེར་ལྔ་སོགས་གོམས་ཚད་དང་བསྟུན་ཏེ་སྒོམ་ཞིང་སྐབས་སུ་རླུང་གེགས་བྱུང་ན་གེགས་སེལ་གྱི་ཏིང་འཛིན་གཞུང་གསལ་ལྟར་དང༌། འོག་ནས་འབྱུང་བའི་ཨོཾ་ཏཱ་རེ་ཛྙཱ་ན་ཀརྨ་ཌཱ་ཀི་སོགས་ཀྱི་སྔགས་ཀྱང་བཟླ། ཐུན་མཚམས་ལ་ཡན་ལག་ལྔ་སྦྱོང་གི་འཁྲུལ་འཁོར་ཀྱང་བྱ་བ་ནི་ཐུན་མིན་སྔགས་དང་མཐུན་པ་དག་པའི་སྒྱུ་ལུས་སྒོམ་པའོ། །གཉིས་པ་དབྱིངས་ཕྱུག་ནམ་མཁའི་རྣལ་འབྱོར་གྱིས་སྣང་བའི་བདེན་ཞེན་བཤིག་པ་ནི། བོགས་འབྱིན་མེ་ལོང་དྭངས་པ་ལ༔སོགས་ནས། ལེའུ་སྟེ་བཅུ་གཉིས་པའོ༔ ཞེས་པ་སྟེ་དེ་ལ་བོགས་འབྱིན་གྱི་ཚུལ་དུ་གནས་ཁང་གི་ཕྱོགས་བཞིར་མེ་ལོང་ངམ་དྭངས་ཤེལ་བཞི་བཏགས་ལ། རང་ཉིད་ལྷ་ཡི་ཆ་བྱད་དུ་གནས་པས་དབུས་སུ་འདུག་པ་དང་ཕྱོགས་བཞིར་གཟུགས་འཆར་བ་ལ་ལྟ། གྲོགས་ཞིག་གིས་གཟུགས་བརྙན་འགའ་ཞིག་ལ་བཀུར་སྟི་དང་མཆོད་པ་ཕུལ། འགའ་ཞིག་གིས་བརྡུང་བརྡེག་དང་མི་སྙན་པ་བརྗོད་དུ་བཅུག་ལ་དཔྱད། མེ་ལོང་གི་གཟུགས་ནི་སྣང་ཙམ་ལས་ཕྱི་ནང་གང་ནའང་མེད། དེ་ལ་མཆོད་པས་དགའ་བ་དང༌། བརྡེག་བཙོག་གིས་མི་དགའ་བའི་རེ་དོགས་ཅི་ཡང་མེད་དེ་ཐམས་ཅད་བར་སྣང་ལ་བྱས་པ་དང་མཚུངས། བཟང་ངན་གྱི་ཕན་གནོད་མེད་པའི་གནད་ནི་གཟུགས་སྟོང་ཉིད་ཡིན་པས་ཏེ་ཕན་ཡུལ་མ་གྲུབ་ན་ཕན་པའི་བྱ་བ་གང་དུ་བྱེད། མ་བརྟགས་པ་ཙམ་ལས་རང་གི་ལུས་སེམས་ཀྱང་དེ་དང་མཚུངས་ཏེ་སེམས་ཀྱི་མེ་ལོང་ལ་བག་ཆགས་ཀྱི་གཟུགས་བརྙན་འཆར་བ་ཙམ་ལས་དོན་དུ་གྲུབ་པ་མེད་པའི་སྟོང་ཉིད་ཡིན། བག་ཆགས་ནི་འཁྲུལ་སྣང་ཉིད་ལས་གཞན་དུ་མ་མཆིས། འཁྲུལ་སྣང་ལ་བདེན་པར་འཛིན་མཁན་སུ་ཡོད། དེ་ལ་རེ་དོགས་ཀྱིས་བཅིངས་པས་ཅི་བྱ་སྙམ་དུ་དཔེ་དོན་བསྲེས་ལ་ཡང་ཡང་དཔྱད། ཡང་མི་སྡུག་པའི་ཆས་སུ་བྱས་ལ་སྔ་མ་བཞིན་སྒོམས། གཟུགས་གཅིག་ལ་རྐྱེན་གྱིས་བསྒྱུར་བས་དུ་མར་སྣང་བ་འདི་ལྟ་བུའི་ཕྱིར་ལུས་སེམས་ཀྱི་ཕུང་པོ་དུ་མ་ཚོགས་པ་ལ་སྣ་ཚོགས་སུ་ཤར་བ་ལྟ་ཅི་སྨོས། འདི་དག་གི་རྗེས་སུ་མི་འབྲང་བར་འཁྲུལ་པའི་རྫུན་ཕུག་རིག་པར་བྱས་ཏེ་དཔྱད་སྒོམ་གྱིས་ངེས་ཤེས་འདྲོངས་པར་བྱ། སྟོང་ཉམས་སྐྱེས་པ་དང་ཕྱིའི་ནམ་མཁའ། ནང་གི་སེམས། བར་གྱི་སྣང་བ་བཅས་གཅིག་ཏུ་བསྲེས་ལ་མིག་བར་སྣང་ལ་གཏད་དེ་ཨ་ཞེས་འཇམ་ལ་སྙན་ཞིང་ཧ་ཅང་མི་གསལ་བའི་བཟླས་པ་དང་བཅས་བར་རླུང་བཟུང༌། གོམས་པའི་རྟགས་བྱུང་བ་དང་སྒྱུ་ལུས་སེམས་ཀྱི་ཚོགས་པ་འདུ་འབྲལ་ལས་འབྲས་བུ་སྐྱེ་ཤི་ཞེས་སྣང་ཡང་གཞི་མ་གྲུབ་ན་དེ་ལ་བརྟེན་པའི་ཁྱད་ཆོས་ཤིག་ཅིས་འགྲུབ། དེས་ན་ཀུན་བཏགས་ཀྱི་བློས་བཏགས་པ་ཙམ་དུ་ཤེས་པས་ལྟ་བའི་གདེང་བསྐྱེད་དེ་ནམ་མཁའ་ལ་འབྱུང་བཞིས་ཕན་གནོད་བྲལ་བ་བཞིན་ལུས་སེམས་ལ་སྐྱེ་འཆིས་མི་ཚུགས་པའི་གདེང་བསྐྱེད། ངེས་དོན་དབྱིངས་ཕྱུག་རྣམ་ཀུན་མཆོག་ལྡན་གྱི་ཡེ་ཤེས་ཀྱི་ཀློང་དུ་མཉམ་པར་བཞག་པས་སྟོང་བཞིའི་ཉམས་དྲངས་ཏེ་དེའི་ཉེར་ཐོབ་འོད་གསལ་ལས་རླུང་སེམས་ཀྱི་ལྷ་སྐུར་ལྡང་ནུས་པའི་མཐུས་གནས་སྐབས་སུ་ལུས་ཡངས་ཤེས་པ་གསལ་བ་སོགས་དང༌། མཐར་ཐུག་ཕྱི་ནང་གི་འབྱུང་བ་གཅིག་ཏུ་འདྲེས་ཏེ་རི་བྲག་ཟང་ཐལ། མངོན་ཤེས་འཆར་བ་སོགས་འབྱུང་བ་ནི་སྦས་དོན་གྱི་སྒྱུ་ལུས། མཐར་གྱིས་ཆོས་བརྒྱད་ཀྱི་འཁྲུལ་རྟོག་མཐའ་དག་ཞི་སྟེ་མི་སློབ་ཟུང་འཇུག་ཡེ་ཤེས་ཀྱི་སྐུ་གྲུབ་པས་སྣང་སྤྱོད་འོད་གསལ་སྒྱུ་མའི་རོལ་རྩེད་དུ་ཤར་བ་མཐར་ཐུག་གི་སྒྱུ་ལུས་ཞེས་གསུངས་པ་སྟེ། འདི་ལ་གཅིག་ཏུ་གོམས་པས་ཕུང་པོའི་བདུད་ཀྱིས་མི་ཚུགས་པ་ཟག་མེད་འོད་གསལ་གྱི་རྡོ་རྗེའི་སྲོག་འགྲུབ་པའི་ཨུ་པ་དེ་ཤའོ། །གཉིས་པ་བདེ་ཆེན་ལོངས་སྐུའི་རྩལ་སྦྱོང་ལ། གོས་དཀར་འབར་བའི་ཏིང་འཛིན་གྱིས་བདེ་དྲོད་ཀྱི་སྟོབས་བསྐྱེད། མཱ་ཀི་ཞུ་བདེའི་ཐབས་ཀྱིས་དགའ་བཞིའི་ཉམས་སྦྱར་བའོ། །དང་པོ་ནི། ལུས་ནི་རྣམ་སྣང་ཆོས་བདུན་གྱི༔སོགས་ནས། ལེའུ་སྟེ་བཅུ་གསུམ་པའོ༔ ཞེས་པ་སྟེ་སྤྱིར་ལུས་ཀྱི་ཁམས་ཐམས་ཅད་ཁུ་རྡུལ་མུན་གསུམ་དུ་འདུ་བ་ལས། དེ་ནི་ཕ་མ་ལས་ཐོབ་པའི་ཁམས་དཀའ་དམར་གྱི་ཐིག་ལེ་ལུས་ཀྱི་དྭངས་མ་ཐམས་ཅད་ཀྱི་བདག་པོ། དབུ་མའི་ཆ་ལ་བརྟེན་པ། རྣམ་ཤེས་ཀྱི་རྟེན་བྱེད་པ་དེ་ལས་དྭངས་སྙིགས་གཉིས་སུ་གྱུར་ཏེ་མངལ་དུ་མ་ཡི་རྩ་དང་འབྲེལ་བས་བསྐྱེད། བཙས་ནས་བཟའ་བཏུང་མྱང་བ་དང༌། མཁྲིས་པས་མདོག་འགྱུར། མེ་མཉམ་ཀྱིས་བཞུ་བ་སྟེ་མེ་དྲོད་གསུམ་གྱིས་སྦར་བཞུ་མྱངས་པས་དྭངས་མ་མཆིན་པར་ཁྲག །རྩ་ལ་བརྒྱུད་ནས་དེ་ཤ། ཚིལ་སོགས་དང༌། སྙིགས་མ་དྲི་ཆེན། མཁྲིས་པ་སོགས་དང་བཅས་ལུས་ཟུངས་བདུན་ཞེས་གྲགས། དེ་དག་གི་རྣམ་དབྱེ་སྤྱི་བོ་མི་ཕྱེད་མ་ནས་སོ་སེན་སོགས་ཁམས་ཉི་ཤུ་རྩ་བཞི། དེ་རེ་རེ་ལའང་ཐིམ་ལོངས་བདག་པོ་གསུམ་གྱིས་ཕྱེ་བས་ཁམས་བདུན་ཅུ་རྩ་གཉིས། དེ་སྟོང་གིས་ཕྱེ་བས་སྟོང་ཕྲག་བདུན་བཅུ་རྩ་གཉིས། དེ་སྟོང་གིས་ཕྱེ་བས་བྱེ་བ་ཕྲག་བདུན་ཅུ་རྩ་གཉིས་སོགས་རྩ་ཇི་སྙེད་རླུང༌། རླུང་ཇི་སྙེད་ཐིག་ལེས་ཁྱབ་ཅིང༌། ནང་གི་ཆགས་སྡང་རྨོངས་གསུམ། རང་བཞིན་བརྒྱད་ཅུའི་རྟོག་པ། དེས་ལས་བསགས་ནས་འཁོར་བའི་འཁྲུལ་སྣང་སྣ་ཚོགས་པ་འབྱུང༌། དེ་དག་འཕོ་མེད་དུ་བཅིངས་པས་འཁོར་བ་ལྡོག་ཅིང་ཡང་དག་པའི་ལམ་དུ་འགྲོ་བས་ཐོག་མར་གནད་དུ་བསྣུན་བྱ་དཔེར་ན་འཇིག་རྟེན་དུ་སྣོད་བཅུད་ཀྱི་དྭངས་མའི་སྲོག་ཐམས་ཅད་མེ་ཡིས་སྡུད་ཅིང་སྨིན་པར་བྱེད་པ་ལྟར་འདིར་ཡང་ནང་གི་རྡོ་རྗེ་གཏུམ་མོའི་མེ་སྦར་བ་སྟེ། ངོ་བོ་བདེ་སྟོང་ལྷན་སྐྱེས་ཀྱི་ཡེ་ཤེས་ནང་གི་རྣལ་འབྱོར་མ་སྦས་པའི་རང་གཟུགས་ཀྱི་དཔྱིད། ངེས་ཚིག་ཙཎྜ་ལིའི་སྒྲ་ལས་གཏུམ་པའམ་ཟ་བ་མོ་སྟེ་གང་ལ་བསྣུན་པས་ཕུང་ཁམས་ཀྱི་མ་དག་པ་འཇོམས་ཤིང་རྣམ་རྟོག་དང་ཉོན་མོངས་བསྲེག་པ། གནས་ཚུལ་ཀུན་རྫོབ་ཐིག་ལེའི་དམར་ཆ། དབྱིབས་ཨ་ཤད། ཁ་དོག་དམར་ལ་རེག་བྱ་ཚ་བ་ངོ་བོ་སྟོང་པ་བདེ་བའི་རང་བཞིན་ཀུན་རྫོབ་ཐིག་ལེ་དོན་དམ་ཡེ་ཤེས་སུ་གནས་པ་གང༌། སྦར་བྱེད་བུམ་ཅན་སོགས་རླུང་གིས་བསྐུལ་བས་དབུ་མའི་སྦུབས་ལམ་དུ་ཞུགས་ཏེ་འཁོར་ལོ་བཞིར་རྩ་ཐིག་ཁ་སྦྱོར་གྱི་ལྷ་ལ་ཕུལ་བས། དབྱེ་བ་འབར་བ་དྲོད། ཞུ་བ་བདེ་བ། འདྲེས་པ་ཡེ་ཤེས་ཀྱི་གཏུམ་མོ་གསུམ་དབུ་མར་ཞུགས་གནས་ཐིམ་པས་འབར་བ་ཆུང་འབྲིང་ཆེ་གསུམ་དུ་མཆེད་དེ་སྣོད་བཅུད་མེ་ཡི་དཀྱིལ་འཁོར་དུ་ཆེ་བསྐྱེད་ཆུང་བསྐྱེད་གཞུང་ལྟར་བསྒོམ་ཞིང་སྐབས་སུ་སྔགས་ཀྱང་བཟླས་པས་ཕྱི་ཡི་སྣང་བའི་དངོས་འཛིན་བཤིག །ནང་གི་རྩ་རླུང་ཐིག་ལེའི་སྙིགས་མ་དག་ཅིང་དྭངས་མ་རྒྱས་པས་རྡོ་རྗེའི་ལང་ཚོ་སྒྲུབ་པའི་ཐབས་རྨད་དུ་བྱུང་བའོ། །གཉིས་པ་ནི། བདེ་བའི་སྟན་ལ་ལུས་བསྲང་སྟེ༔སོགས་ནས། ལེའུ་སྟེ་བཅུ་བཞི་པའོ༔ ཞེས་པ་སྟེ་འཇིག་རྟེན་ན་ཕྱི་ནང་གི་དཔལ་གང་ཡང་དྲོད་གཤེར་འཛོམས་པས་བསྐྱེད་ནུས་པ་ལྟར། འདིར་ཡང་ཕྱི་རྡོ་རྗེའི་ཚེ་དང་ལང་ཚོ། ནང་བདེ་སྟོང་གི་ཏིང་འཛིན། གསང་བ་ལྷན་སྐྱེས་ཀྱི་ཡེ་ཤེས་རྣམས་གང་བསྐྱེད་ཀྱང་འབར་འཛག་གཉིས་ཀའི་བྱེད་བཅིངས་ཚོགས་དགོས་ཤིང༌། དེར་མ་ཟད་ཐབས་བདེ་བ་ཆེན་པོ་དང་ཤེས་རབ་རྣམ་ཀུན་མཆོག་ལྡན་གྱི་དེ་ཉིད་ཟུང་དུ་མ་འཇུག་ན་ལམ་ཡ་བྲལ་གྱིས་རྩལ་རྫོགས་མི་ནུས་པས་འབར་བའི་དམིགས་པ་གོང་ལྟར་གསལ་བས་ལྟེ་བའི་མེ་སྤྱི་བོའི་ཧཾ་ལ་རེག །བདེ་བའི་རྒྱུན་ཐིག་ལེ་བ་ཐག་ལྟར་འཛག་པ་ལྟེ་བའི་གཏུམ་མོ་ལ་ཐིམ། སྡོང་རྩ་མར་ཁུས་བརླན་པ་ལྟར་གསོས་ནས་མེ་ཆེས་ཆེར་འབར་བྱང་སེམས་བསྐུལ་བའི་བདེ་བ་དང་འདྲེས། འཁོར་ལོ་བཞི་ནས་རིམ་པར་མཆེད། ལུས་རྩ་ཕྲ་མོའི་ཁམས་ཐམས་ཅད་ཁྱབ། དྲོད་དང་བདེ་བས་གང་བ་རང་རིག་གི་ངོ་བོར་རོ་མཉམ་དུ་ཤེས་ནས་རྩལ་སྦྱངས། ཞུ་བདེ་སྟོབས་སུ་གྱུར་པའི་བདེ་བའི་ཟིལ་གྱིས་སྣོད་བཅུད་དྭངས་མར་བཞུ་སྟེ་རང་གི་སྒོ་གསུམ་ལ་རེག་པས་མཱ་མ་ཀིའི་སྐུ་རུ་གསལ་ཏེ། མན་ངག་ཡིད་དང་འགོག་པའི་བཟླས་པ་ལ་བརྩོན་ཞིང༌། གེགས་སེལ་ཀྱང་དགོས་པའི་དུས་སུ་གནད་ལ་བརྡེག་པས་ཉོན་མོངས་ཀྱི་རྩ་བ་ཆགས་སྡང་གཉིས་ཡིན་ཞིང༌། དེ་ཉིད་དག་པ་བདེ་སྟོང་གི་རྣམ་པ་མཚུངས་ཤིང་ངོ་བོ་ཡེ་ཤེས་སུ་དག་པའི་ལམ་བྱེད་ཐབས་ཟབ་མོས་ཉོན་མོངས་པའི་བདུད་འཇོམས་ཤིང༌། བདེ་སྟོང་གི་ཡེ་ཤེས་ཀྱི་མྱོང་བ་ཁྱད་པར་ཅན་བསྐྱེད་པའོ། །གསུམ་པ་གསལ་སྟོང་སྤྲུལ་སྐུའི་བོགས་འབྱིན་ལ། སྤྱན་མ་ཟུང་འཇུག་གི་ཏིང་འཛིན་གྱིས་རྡོ་རྗེའི་སྲོག་སྒྲུབ་པ་དང༌། སྙིང་དབུས་ཐིག་ལེའི་སེམས་འཛིན་གྱིས་ཁམས་ལྔའི་བླ་ཚེ་གསོ་བ། ཡན་ལག་ཁ་སྦྱོར་བསྲེ་ཕོའི་ལམ་གྱི་སྤྱི་ཆིངས་བཤད་པས་མཇུག་བསྡུ་བའོ། །དང་པོ་ནི། དེ་ལྟར་འབར་དང་འཛག་པ་ཡི༔སོགས་ནས། པུཥྚིཾ་ཀུ་རུ་ཨོཾ༔ ཞེས་པ་སྟེ་སྔར་ཞུ་བདེས་དྲངས་པའི་བདེ་སྟོང་དེ་གཉིས་ཀྱང་རྣམ་པའི་བཞག་ཚུལ་ཙམ་ལས་དོན་ལ་གཉིས་སུ་མེད་པ་ཟུང་འཇུག་གི་ཡེ་ཤེས་ཏེ། བདེ་ཆེན་དེས་ཀུན་ནས་གང་བའི་རྣམ་བཅས་གཟུགས་སྐུ་ཟག་མེད་མཚན་དཔེས་བརྒྱན་པའི་ཕྱག་རྒྱའི་མཆོག་སྒྲུབ་པའི་རྣལ་འབྱོར་ནི་སྔར་ལྟར་འབར་འཛག་གིས་དཀར་དམར་ཐིག་ལེའི་རྒྱུན་གཅིག་ཏུ་འདྲེས་པའི་བདུད་རྩིས་ལུས་ཀྱི་ཁྱོན་ཐམས་ཅད་ཁྱབ་ཅིང་འཕོས་པ་ཙམ་གྱིས་ལྕགས་ལ་གསེར་རྩིས་ཐེབས་པ་བཞིན་དག་པ་ཡེ་ཤེས་འོད་ཀྱི་ལུས་འཁོར་ལོ་ལྔ་དང་བཅས་པར་ལམ་གྱིས་བསྒྱུར་བའི་གནས་ལྔར་མི་ཤིགས་ཐིག་ལེ་ཆེན་པོའི་ཡེ་ཤེས་ཀྱི་ངོ་བོ་རིགས་ལྔ་ཚེ་དཔག་མེད་སྟངས་དཔྱལ་གྱི་སྐུ་ཡི་བདེ་བའི་གཟི་བྱིན་རབ་ཏུ་རྒྱས་པས་འཇིག་རྟེན་ཀུན་ལ་ཁྱབ་སྟེ་སྣང་ཆ་ཐབས་བདེ་བ་ཆེན་པོ་པདྨ་ཧེ་རུ་ཀ་དང༌། སྟོང་ཆ་ཤེས་རབ་དཔའ་མོ་ཚེ་ཡི་དབྱིངས་ཕྱུག་ཡབ་ཡུམ་ཁོ་ནའི་ཡེ་ཤེས་གཅིག་གི་རང་མདངས་སུ་གྱུར་པའི་ཨ་བ་དྷཱུ་ཏིའི་དཀྱིལ་འཁོར་རང་བྱུང་ལྷུན་གྱིས་གྲུབ་པར་སྣང་སྲིད་གཞིར་བཞེངས་སུ་སད་པས་ཕྱི་ལུས་ཀྱི་ཕུང་པོ་དམ་ཚིག་སེམས་དཔའ། ནང་དྭངས་མའི་ཐིག་ལེ་ཏིང་འཛིན་སེམས་དཔའ། དེ་ཐམས་ཅད་ཀྱི་ཁྱབ་བྱེད་རིག་པ་ཡེ་ཤེས་སེམས་དཔའ་གསུམ་པོ་གདོད་ནས་དབྱེར་མེད་དུ་ཡིན་པ་ལ་ཡིན་ལུགས་ངོ་ཤེས་པའི་ང་རྒྱལ་གྱིས་གསལ་སྣང་ཁྱད་པར་ཅན་སྒྲུབས། མཐར་ཀུན་ཀྱང་གནས་ལྔའི་ལྷ་ལ་བསྡུས་ནས་མི་ཤིགས་རྡོ་རྗེའི་སྲོག་གི་བཅུད་དུ་རྒྱས་གདབ་པའི་སྤྲོ་བསྡུ་བཅས་སྔགས་ཉིད་བཟླ་བའོ། །སྤྱིར་ཐིག་ལེ་ལ་རྣམ་ཤེས་དང་ཡེ་ཤེས་ཀྱི་ཐིག་ལེ་གཉིས་ལས་སྔ་མ་ལ་རླུང་སྔགས་རྫས་ཀྱི་ཐིག་ལེ་གསུམ་ལས་རྫས་ཀྱི་ཐིག་ལེ་གནས་ལྔར་བསྒོམས་པས་བླ་ཚེ་གསོ་བ་སྟེ། དེ་ཡང་ཆུ་ཁམས་ཉམས་ཆེ་ན་སྤྱི་བོ། མེ་ཁམས་ཉམས་ན་མགྲིན་པས་མཚོན་འབྱུང་བ་དེ་དང་དེ་སྤྲོ་བསྡུ་གཙོ་བོར་བྱ་ཞིང༌། དེའི་དྭངས་མའི་འོད་ཀྱིས་ལུས་གནས་ཐམས་ཅད་ཁྱབ་པར་སྒོམ་པ་མན་ངག་ཡིན་ནོ། །གཉིས་པ་ནི། ལུས་གནས་སྲོག་གི་དྭངས་མའི་ཆ༔སོགས་ནས། ལེའུ་སྟེ་བཅོ་ལྔ་པའོ༔ ཞེས་པ་སྟེ་ལུས་ཟུངས་ཐིག་ལེའི་ཆ་ལ་ཡེ་ཤེས་དང་རྣམ་ཤེས་སུ་འབྲེལ་བ་གཉིས་ལས་ལུས་ཀྱི་ནུས་པའམ་ངོ་བོ་ཉིད་དུ་སྤྱི་བོ་ལ་སོགས་པའི་གནས་རྣམས་སུ་འཕོ་སྟེ་གནས་པ་བླ་གནས་ནི་རྣམ་ཤེས་དང་འབྲེལ་བ་ཡིན་ལ། དེ་ལ་དྭངས་མ་བསྡུ་བསྟིམ་བྱས་པས་ལང་ཚོའི་དཔལ་བསྐྱེད་པས་དེ་ཡི་ཏིང་འཛིན་ནི་སྙིང་དབུས་ཉི་ཟླའི་གྭ་འུར་ཧྲཱིཿདམར་གསལ། ལུས་ཀྱི་རྐང་པའི་སོར་ཚིགས་ཨ། བོལ་ཨཱ། ཉྭ་ཨི། ལོང་བུ་ཨཱི། པུས་མོ་ཨུ། དཔྱི་ཨཱུ། ལག་སོར་རྀ། རྩིབ་ལོགས་རཱྀ། མཁྲིག་མ་ལྀ། གྲུ་མོ་ལཱྀ། དཔུང་མགོ་ཨེ། མགྲིན་པ་ཨཻ། མཚོག་མ་ཨོ། དཔྲལ་བ་ཨཽ། ལྟག་པ་ཨཾ། སྐེ་ཨཱཿ སྙིང་ག་ཨི། དཔུང་ཚིག་ཨཱི། དཔུང་མགོ་ཨུ། རྩིབ་ལོགས་ཨཱུ། སོར་ཚིགས་རྀ། བརླ་རཱྀ། དཔྱི་རུས་ལྀ། པུས་མོ་ལཱྀ། ལོང་བུ་ཨེ། ལོང་ཚིགས་ཨཻ། ངར་གདོང་ཨོ། རྐང་མཐིལ་ཨཽ་རྣམས་སུ་ཕོ་གཡས་བསྐོར། མོ་གཡོན་བསྐོར་གྱིས་རྐང་པའི་སོར་ཚིགས་ནས་བརྩམ་ཏེ་ཨ། ཨཱ་སོགས་དབྱངས་ཡིག་བཅུ་དྲུག །སྤྱི་བོ་ཨཾ། རྐང་མཐིལ་ཨཿ རུ་བསྒོམས་ནས་དཔྱད་པའི་སྲིད་ཞིའི་དྭངས་བཅུད་བསྡུ་བསྟིམ་བྱས་པས་ཡིག་འབྲུ་རྣམས་གཟི་བྱིན་ལྷག་པར་རྒྱས། དེ་ལས་བྱུང་བའི་བདུད་རྩིས་ལུས་གང་སྟེ་བཅུ་དྲུག་ལང་ཚོའི་དཔལ་དང་ལྡན་པར་མོས་ལ་བུམ་ཅན་དང་སྦྲགས་ཏེ་བསྒོམ་པའོ། །གསུམ་པ་ལ་བསྲེ་ཕོའི་གནད་དངོས་དང༌། ལམ་གྱི་ཡན་ལག་གཉིས་ལས། དང་པོ་ནི། ཡང་ན་དམིགས་པའི་མདེའུ་ཁ་ནི༔སོགས་ནས། ལེའུ་སྟེ་བཅུ་དྲུག་པའོ༔ ཞེས་པ་སྟེ་བདེ་སྟོང་གི་ཏིང་འཛིན་རྩལ་སྦྱང་བའི་ཕྱིར་གནས་ལྔར་རླུང་གི་ཐིག་ལེ་ཁ་དོག་ལྔ་གསལ་ཞིང་འགུལ་འཕྲིགས་དངུལ་ཆུའི་གོང་བུ་ལྟ་བུར་གསལ། རླུང་དུག་དབྱུང་རྗེས་བུམ་པ་ཅན་བཟུང་བའི་སྐབས་གནས་ལྔའི་ཐིག་ལེའི་འོད་ཀྱིས་ཤ་ཁྲག་རུས་པ་སོགས་གདོས་བཅས་ནད་གདོན་བགེགས། ཁྱད་པར་གཟུང་འཛིན་ཉོན་མོངས་ཀྱི་རྟོག་པ་ཆ་དང་བཅས་པ་སྦྱངས། གནས་ལྔའི་ཐིག་ལེ་ལས་ཡེ་ཤེས་ལྔ་ཡི་རང་བཞིན་དབྱངས་གསལ་དཀར་དམར་འོད་ལྔའི་མདངས་ཅན་ཡེ་ཤེས་ཀྱི་རླུང་གིས་བསྐྱོད་པས་རང་སྒྲ་འུ་རུ་རུ་འགུལ་འཕྲིགས་ཅན་གྱིས་ལུས་ཐམས་ཅད་མེར་གྱིས་ཁེངས། ཉོན་མོངས་ཆ་དང་བཅས་པ་སྦྱངས། གཟུངས་དྲན་མངོན་ཤེས་ཚེ་དང་ལང་ཚོ་སོགས་ཡོན་ཏན་ཐམས་ཅད་རྒྱས་པར་མོས་ལ་རླུང་སེམས་བསྲེ་ཞིང་གནས་ལྔའི་ཐིག་ལེ་ལ་རིག་པ་གཏད་དེ་སྔགས་བཟླ། དེ་ནི་གསལ་སྟོང་རླུང་གི་བོགས་འབྱིན་ནོ། །དེས་རླུང་ཤས་ཆེ་ན་རླུང་ནད་ལྡང་བ་སོགས་ཀྱི་སྐྱོན་བྱུང་བ་དང༌། མིན་ཀྱང་སྐབས་སུ་ཡང་དམིགས་པའི་ཁྱད་པར་གནས་ལྔའི་ཐིག་ལེ་ལས་བདེ་བའི་འོད་ཟེར་དམར་སེར་ལི་ཁྲིའི་ཉིང་ཁུ་ལྟ་བུ་སྣུམ་གཤེར་དང་ལྡན་པ་མར་ཁུའི་ཐིག་པ་བཞིན་བྱུང༌། ལུས་ཀྱི་ནང་ཐམས་ཅད་མེར་གྱིས་ཁེངས་པས་སྣུམ་ལྕིག་གིས་སོང་སྟེ་ལྷན་ནེར་གནས། གཡོ་བྱེད་ཀྱི་རླུང་གི་སྒོ་ལྟེམ་མེར་བཀག །ལུས་ཀྱང་སྙུག་དོང་མར་ཁུས་བཀང་བ་བཞིན་བདེ་དྲོད་ཀྱི་ཉམས་དང་བཅས་ཏེ་གནས་པར་བསམ་ལ་རླུང་ལྟེ་འོག་ཏུ་མནན། རིག་པ་དེ་ལ་གཅུན་ཏེ་རླུང་སེམས་བསྲེས་པས་ལྗོན་ཤིང་གི་རྩ་བར་ཆུ་ཡིས་བྲན་པའམ་མེ་ཏོག་ཆར་གྱིས་སིམ་པ་བཞིན་རྩ་རླུང་ཐིག་ལེའི་ཁམས་ཉམས་པ་ཐམས་ཅད་གསོས། སྟོབས་རྒྱས། ཡོན་ཏན་འཕེལ། མཉེན་ལྕུག་གི་དཔལ་དང་ལྡན་པར་བསམ་སྟེ་ངང་བསྐྱང་བ་ནི་བདེ་སྟོང་མི་འགྱུར་བའི་ཐིག་ལེའི་བོགས་འབྱིན་ནོ། །དེའི་ཚེའང་བྱིངས་པའི་ཉམས་བྱུང་ན་གེགས་སེལ་ནི། སྙིང་གི་རྩ་འཁོར་དབུས་སུ་ཨ་ཡིག་དཀར་གསལ་སྒོམ་པའི་འོད་ལྔ་ལྡན་གྱིས་ལུས་གང༌། རླུང་སེམས་ཐིག་ལེ་རྩ་དང་བཅས་པའི་མཚོན་སྣོད་བཅུད་ཐམས་ཅད་ལ་ཕོག །ལན་ཚྭ་ཆུར་ཞུ་བ་བཞིན་སིབ་སིབ་ཐིམ་ནས་ལུས་ལ་ཐིམ། ལུས་ཀྱང་འོད་དུ་འདྲིལ་ཏེ་སྙིང་ནང་གི་ཐིག་ལེར་འདུས། ཨ་ཡང་བར་སྣང་དུ་ལིང་ངེར་གནས་པ་ལ་སེམས་བཟུང་མ་ཐག་འཇའ་ལྟར་ཡལ་རྗེས་སྟོང་རིག་གི་ངང་བསྐྱང༌། རྟོག་པ་འཕྲོ་བར་བརྩམ་པ་ན་ཨ་ཞེས་དྲག་ཏུ་བརྗོད་ལ་མིག་བར་སྣང་དུ་གཟིར། རླུང་སེམས་བསྲེས་ལ་བུམ་ཅན་བཟུང་བས་སྣང་བའི་བདེན་འཛིན་ཞིག །སྲིད་པའི་འཁྲུལ་ཤེས་ཡལ། མི་རྟོག་ཆོས་སྐུའི་དབྱིངས་སུ་བཙན་ས་འཛིན་པའི་མན་ངག་སྟེ་སྒོམས། བྱད་ཕུར་དང་གདོན་བགེགས་ཀྱི་འཚུབ་ལྟས་ཆེ་ན་སྔར་ལྟར་ལ་དམིགས་པའི་ཁྱད་པར། སྙིང་གའི་ཨ་ཡི་འོད་ཀྱིས་གདོན་བགེགས། བྱད་ཕུར་སོགས་འགལ་རྐྱེན་གང་ཡིན་ལ་ཕོག་པས་སྟོང་ཉིད་དུ་སངས་ཀྱིས་དག །གནོད་བྱ་གནོད་བྱེད་ཀྱི་མཚོན་པའི་ཆོས་ཀུན་སྟོང་པ་གཅིག་ཏུ་ཤར་བ་ལ་སུ་དང་གང་གིས་གནོད། གཉིས་མེད་ཆོས་སྐུ་ཀ་དག་ངེས་དོན་དབུ་མའི་སྦུབས་སམ་དབྱིངས་སུ་དག་པར་ལྟ་བའི་གདེང་བསྐྱེད་ལ་ཨ་ཞེས་གླུ་དལ་བུས་ལེན་ཅིང་དབྱིངས་རིག་བསྲེ། རྩ་རླུང་ཐིག་ལེའི་རྐྱེན་གང་ལ་ཡང་འོད་ཀྱིས་སྟོང་པར་སྦྱངས་པར་བསམ་པས་གེགས་སེལ་ཁྱད་པར་ཅན་ཏེ་དེ་ནི་མི་རྟོག་ཨ་ཝ་དྷཱུ་ཏིའི་རྩ་ཡི་བོགས་འབྱིན་ནོ། །འདི་དག་གི་ཚེ་གསལ་སྟོང་གི་བོགས་འབྱིན་སྐབས་ལུས་སྦྱང༌། བདེ་སྟོང་གི་སྐབས་ཐེམས་བུ། མི་རྟོག་པའི་སྐབས་བྲབ་གཞིལ་གྱི་འཁྲུལ་འཁོར་གཙོ་བོར་གནད་དུ་བསྣུན་པའང་གཅེས་སོ། །གཉིས་པ་ནི། དེ་ལྟར་བདེ་གསལ་མི་རྟོག་པའི༔སོགས་ནས། ལེའུ་སྟེ་བཅུ་བདུན་པའོ༔ ཞེས་པ་སྟེ། རྡོ་རྗེའི་ཚེ་སྒྲུབ་པའི་སྙིང་པོ་སྐྱེ་འཆིའི་འཁྲུལ་སྣང་ཉིད་དག་དགོས་པ་ཡིན་ལ། དེས་ན་ད་ལྟ་ཉིན་སྣང་དང་མཚན་མོ་རྨི་ལམ། ནམ་ཞིག་སྐྱེ་བ་ཚེ་འདིའི་སྣང་བ་དང་འཆི་བ་བར་དོའི་སྣང་བ་རྣམས་དོན་གཅིག་པས་འདི་དག་གང་ལ་གནད་དུ་བསྣུན་ཀྱང་དོན་གྱི་བབས་སོ་གཅིག་ཏུ་དགོངས་ནས་བཀའ་གཏེར་རྣམས་ནས་རྨི་ལམ་དང་བར་དོའི་ལམ་ཁྱེར་མང་དུ་གསུངས་པ་གནད་དེའི་དབང་གིས་ཏེ་འདིར་ཡང་ཉིན་མཚན་གྱི་སྣང་བ་ལམ་ཁྱེར་ལ་བསྟེན་ནས་འཁྲུལ་སྣང་དག་པས་ངེས་དོན་གྱི་རྡོ་རྗེའི་ཚེ་སྒྲུབ་པའི་ཐབས་ཡན་ལག་གི་ཚུལ་དུ་བཤད་པ་སྟེ། སྤྱིར་བདག་བྱིན་རླབས་པའི་རིམ་པ་ལ་སྙིང་པོ་རྡོ་རྗེའི་ཆོས་དྲུག་ཏུ་གསུངས་པ་ལས། གནས་སྐབས་བཞི་ལས། སྙོམས་འཇུག་གི་འཕོ་བའི་སྒྲིབ་པ་སྦྱངས་ཤིང་ལྷན་སྐྱེས་ཀྱི་ཡེ་ཤེས་བསྐྱེད་པའི་ཕྱིར་སྟོང་ཉིད་ཀྱི་ཉམས་མྱོང་འདྲེན་པ་གཏུམ་མོ་ལམ་གྱི་གཞུང་ཤིང་དུ་བསྟན་པ་མཉམ་བཞག་གི་ཉམས་ལེན། དེའི་རྗེས་ཐོབ་སད་པའི་གནས་སྐབས་སྦྱང་ཕྱིར་སྒྱུ་ལུས། མཚན་མོའི་རྣལ་འབྱོར་གཉིད་འཐུག་སྦྱང་ཕྱིར་མཉམ་བཞག་གི་ཉམས་ལེན་འོད་གསལ། རྨི་ལམ་སྦྱང་བ་རྗེས་ཐོབ། དེའི་ཡན་ལག་ཏུ་ལམ་གྱི་བློ་ཆོད་བར་དོ་དང༌། བསུན་མ་འཕོ་བ་བཅས་བསྟན་པ་ལས། འདིར་དང་པོ་སྣང་ཆའི་བདེ་ཞེན་བཤིག་ཕྱིར་སྒྱུ་ལུས་ཀྱི་དཔྱད་སྒོམ་སྔོན་དུ་བསྒོམས་པས་ནི་གཏུམ་མོའི་སྐབས་སུ་སྟོང་ར་གསལ་བ་ལ་གནད་དུ་ཟབ་ཅིང་ཞར་བྱུང་མ་དག་པའི་སྒྱུ་ལུས་སོགས་སྒོམ་སླ་ཞིང༌། གཏུམ་མོའང་སྟོང་པའི་ཡེ་ཤེས་ཀྱི་རང་མདངས་སུ་ངེས་ཕྱིར་དངོས་ཞེན་བཤིག་པ་ལ་སྟོབས་ཆེ་བས་བསྐྱེད་རིམ་གྱི་ཐོག་མར་དེ་བཞིན་ཉིད་ཀྱི་ཏིང་འཛིན་གསུངས་པ་དང་མཚུངས་ལ། རྗེས་ཐོབ་ཀྱི་ཉམས་ལེན་སྔོན་དུ་བསྟན་པའང་མི་འགལ་ཏེ་སྣང་སྟོང་གི་ལམ་བྱེད་གཙོ་ཆེ་ཆུང་གི་དབྱེས་པ་ཙམ་ལས་དོན་གནད་ལྷན་སྐྱེས་ཀྱི་ཡེ་ཤེས་རྣམ་ཀུན་མཆོག་ལྡན་གྱི་དེ་ཉིད་རྒྱུད་ལ་འདྲེན་པའི་ནུས་པ་གཅིག་པས་ཤེས་ལ། གང་ལྟར་ཡང་ཉིན་མཚན་སྐྱེ་འཆིའི་སྣང་བ་ཇི་སྙེད་འཁྲུལ་སྣང་གིས་སྒྲོ་བཏགས་ཁོ་ན་ལས་མ་འདས་པའི་གནས་ཚུལ་དངོས་འཆི་མེད་གཉུག་མ་མི་ཤིགས་རྟག་པ་དོན་གྱི་ཚེ་ཡི་དབྱིངས་ཉིད་ཡིན་པས་འཁྲུལ་པ་དེ་དག་ཕྱིར་རྩ་བ་དང་ཡན་ལག་གི་ལམ་དུ་མའི་ཐབས་ཀྱིས་གནད་དུ་བསྣུན་པས་དོན་གནད་གཅིག་ཏུ་འབབ་པར་ཤེས་པས་བསྒོམ་བྱ་དངོས་ལ་དང་པོ་རྨི་ལམ་གྱི་ལམ་ནི། ལུས་ཕྱི་ནང་གི་སྟོང་ར་གཏུམ་མོ་ལྟར་གསལ་བའི། གཉིད་འཐུག་འོད་གསལ་དུ་འཆར་མ་ནུས་པ་རླུང་རོ་རྐྱང་དུ་ཤོར་བ་མགྲིན་རྩར་བརྒྱུད་དེ་བག་ཆགས་ཀྱི་ལུས་ལ་ཉིང་འཁྲུལ་དུ་ཤར་བའི་གནད་ཀྱིས། མགྲིན་པའི་འཁོར་ལོའི་ལྟེ་བར་ཧྲཱིཿའདབ་བཞིར་ཧཱུྃ་སོགས་འབྲུ་བཞི་གསལ་ཏེ་གཉིད་དུ་ཕྱོགས་པ་དང་ཡི་གེ་རྣམས་ཨཱཿཨོཾ་ལ་འདུས་པས་མཚོན་གཅིག་ལ་གཅིག་ཐིམ་གྱིས་ཧྲཱིཿལ་འདུས། ཧྲཱིཿལས་འོད་ཀྱིས་ཐོ་ཕྱི་ཚུན་ཆད་ཁྱབ་པར་དམིགས་ལ་གཉིད་དུ་འགྲོ་བར་བྱ་ཞིང༌། རླུང་སེམས་དབུ་མར་བསྟིམས་ཏེ་ཉལ་བ་དང༌། ཉིན་པར་གྱི་སྣང་སྤྱོད་རྨི་ལམ་དུ་མོས་པའི་འདུན་པ་དྲག་པོས་ངོས་ཟིན་ཏེ་བརྟན་པ་བྱ། གཅིག་ལས་དུ་མ་དང༌། གང་འདུལ་སོགས་སྤྲུལ། དེའང་བརྟན་ནས་བསྒྱུར་སྤེལ་སྦྱང་ཞིང༌། རྩལ་རྫོགས་ནས་ཉིང་འཁྲུལ་སྟོང་པ་ཆེན་པོར་བསྡུ་ཞིང༌། སྙིང་རྗེ་སྒྱུ་མས་རླུང་སེམས་ལས་གྲུབ་པའི་ལྷ་སྐུ་ཕྱག་རྒྱ་གཅིག་སྤྲོས་སུ་བསྒོམ། མཁའ་ཁྱབ་ཀྱི་ཚོམ་བུ་སྤྲོ་ནུས་པའི་བར་རྩལ་སྦྱང༌། དེ་ཉིད་ཀྱི་མྱོང་བ་ཉིན་སྣང་དང་བསྲེས་ཏེ་ཐམས་ཅད་གཅིག་ཏུ་ཤེས་པས་བདེན་མེད་དུ་རྩལ་སྦྱང་ནན་དུ་བྱའོ། །སྤྱིར་བར་དོ་ལ་འཆི་ཁ་འོད་གསལ་གྱི་བར་དོ་ཡེ་ཤེས་གོང་འཕེལ་དང༌། བར་དོ་སྐུ་གསུམ་དུ་བསྲེ་བའི་གདམས་ངག་གཉིས་སུ་གསུངས་ཀྱང་སྐབས་འདིའི་བསྟན་བྱ་ཕྱི་མ་སྟེ་འཆི་ཁ་ལུགས་ལྡོག་གི་འོད་གསལ་ངོས་མ་ཟིན་པས་སྟོང་པ་ལས་ཉེར་ཐོབ་སོགས་སུ་ལྡང་ཞིང་རང་བཞིན་བརྒྱད་ཅུའི་རྟོག་པ་སྐྱེས་པའི་ཚེ་བར་དོའི་ཡིད་ལུས་མིང་གཞི་འདུས་པའི་ཕུང་པོར་གྲུབ་ནས་འཁྲུལ་སྣང་ལ་སྤྱོད་པའི་རླུང་སེམས་ཀྱི་སྣང་བ་ཡ་མ་ཟུང་དུ་འཆར་བ་གང༌། སྔར་གྱི་གདམས་ངག་གི་གནད་དྲན་པར་བྱས་ལ་འཁྲུལ་སྣང་བདེན་མེད་དུ་ཤེས་པས་ནང་གི་རིག་པ་མ་གཡོས་ན་ཕྱིའི་སྣང་བས་ཕན་གནོད་མི་ནུས་པའི་གནད་ཤེས་པའི་གདེང་གིས་སྣང་གྲགས་རིག་པ་ལྷ་སྔགས་ཡེ་ཤེས་ཀྱི་ངོ་བོར་བསྲེས་ཏེ་ཉམས་སུ་བླངས་པས་འཁྲུལ་སྣང་སྐད་ཅིག་ལ་གྲོལ་བའི་གདེང་རྙེད་དེ་འཇིགས་སྐྲག་སྡུག་བསྔལ་ཞི་བ་དང༌། གོམས་པ་མཆོག་ཏུ་བརྟན་པ་ཉིན་མཚན་གྱི་སྣང་བ་འདྲེས་པའི་འོད་གསལ་བཞིན་འདི་དང་བར་དོའི་འཁྲུལ་པ་གཉིས་མེད་དུ་དག་པས་རྡོ་རྗེ་ལྟ་བུའི་གོ་འཕང་ཀྱང་ཐོབ་པར་ནུས་སོ། །དེ་ལྟར་ཉིན་སྣང་གཏུམ་མོ་དང་སྒྱུ་ལུས། མཚན་སྣང་རྨི་ལམ་དང་བར་དོ་བསྲེ་བའི་ཉམས་ལེན་གྱིས་འཁོར་འདས་ཀྱི་ཆོས་ཀུན་རྩ་བ་གདོད་ནས་སྤྲོས་བྲལ་སྟོང་གསལ་གཞིར་གནས་ཀྱི་ཡེ་ཤེས་མྱོང་བ་བརྟན་པས། དུས་གནད་ཐོ་རེངས་ཀྱི་ཆར་གཉིད་སྲབ་པའི་སྐབས་ལུས་ཙོག་པུ། འདུན་པ་སྙིང་གར་དྭངས་མ་མི་ཤིགས་པའི་ཐིག་ལེ་ལ་རྩེ་གཅིག་ཏུ་གཞུར་ནས་མཉམ་པར་བཞག་པའི་ངང་མནལ་ནས་སྔར་གྱི་ཉམས་མྱོང་ལ་གདེང་བསྐྱེད་པས། དབུ་མར་རླུང་སེམས་འདུས་པའི་དུ་བ་ལ་སོགས་པའི་རྟགས་སྣང་ཕྲ་མོ་དང༌། དཀར། དམར། ནག་ལམ་དང་བཅས་རྫོགས་ཏེ་གཞིར་གནས་ཀྱི་འོད་གསལ་འཆར་བའི་བར་སྟོང་བཞིའི་དེ་ཉིད་སོ་སོར་ངོས་ཟིན་པར་བྱས་ལ་ཅི་གནས་སུ་བསྐྱང༌། ཉམས་མྱོང་དེའི་རྒྱུན་ཉིན་མཚན་ཁ་སྦྱོར་དུ་དྲངས་པས་སྲབ་འཐུག་ཉམས་རྟོགས་ཀྱི་འོད་གསལ་རྣམས་རིམ་བཞིན་རང་དབང་ཐོབ་སྟེ་མཐར་ཐུག་དོན་གྱི་འོད་གསལ་ལ་སྦྱོར་ཞིང༌། འདི་དག་མཉམ་རྗེས་ཀྱི་ཉམས་ལེན་གྱིས་ཉིན་མཚན་གྱི་འཁྲུལ་སྣང་འོད་གསལ་གྱི་འཁོར་ལོར་འཆར་བར་བྱེད་པས་ཁ་སྦྱོར་གྱི་ལམ་ཞེས་བསྟན་པའོ། །གཉིས་པ་གཞན་ལུས་ཕོ་ཉའི་མྱུར་ལམ་བསྟན་པ་ལ། སྔོན་འགྲོ་བསྙེན་པ། དངོས་གཞི་ཉེ་བསྙེན་དང་སྒྲུབ་པ། རྗེས་སྒྲུབ་པ་ཆེན་པོའི་ཚུལ་དུ་བཤད་པའོ། །དང་པོ་རིག་མ་བརྟག་འགུགས་སྦྱང་གསུམ་ནི། ལས་ཀྱི་ཕྱག་རྒྱས་བོགས་དབྱུང་ན༔སོགས་ནས། ཡང་ཡང་གསོ༔ ཞེས་པ་སྟེ་འཕོ་མེད་བདེ་བ་ཆེན་པོའི་ཡེ་ཤེས་ཀྱི་གཟི་བྱིན་སྙིང་ལ་རྒྱས་པའི་ནུས་པས་རྡོ་རྗེའི་ཕུང་ཁམས་སྐྱེ་མཆེད་ཀྱི་དྭངས་མ་སྟོབས་སུ་གྱུར་ཏེ་འཆི་བ་མེད་པའི་ཚེ། རྒུད་པ་མེད་པའི་ལང་ཚོ་རྣམས་རྫས་སྔགས་ཀྱི་ནུས་པས་སྒྲུབ་པའི་ངལ་བ་ལ་མ་ལྟོས་པར་ནང་གི་རྣལ་འབྱོར་གྱི་བྱེད་པས་རྩོལ་མེད་དུ་འགྲུབ་ཅིང༌། ནུས་པའང་སྔ་མ་ལས་སྟོབས་ཆེ་བས་རྣལ་འབྱོར་དབང་ཕྱུག་ཐམས་ཅད་ལམ་ཕྱག་རྒྱའི་རྣལ་འབྱོར་དང་ལྡན་པར་ཚེ་ཡི་བརྒྱུད་བསྐུལ་སོགས་ལས་གསལ་བ་ལྟར་ཡིན་ལ། ཇི་ལྟར་བསྟེན་པའི་ཚུལ་དངོས་ལ། རང་བྱིན་རླབས་ཀྱི་ལམ་གྱིས་སྲོག་རྩོལ་སྒྲ་ཇི་བཞིན་དུ་འགྲུབ་པ་དང༌། འཕོ་མེད་ལ་གདེང་དུ་གྱུར་པས་མཚོན་ཉམས་རྟོགས་ཀྱི་རྩལ་ཁ་མཆེད་ཅིང་རྒྱས་པས་ལམ་འདི་ལ་འཇུག་པའི་གནད་ཤེས་པར་བྱས་ཏེ། གང་བསྟེན་བྱའི་ཡུལ་ལྷན་སྐྱེས། སྔགས་སྐྱེས། ཞིང་སྐྱེས་ཀྱི་ཌཱ་ཀི་མཆོག་ཡིན་ཀྱང་རྣལ་འབྱོར་དང་པོའི་རིགས་ཅན་གྱིས་རྙེད་དཀའ་ཞིང༌། ལས་སྐྱེས་ཀྱི་ཕྱག་རྒྱ་མི་མོ་མཚན་ལྡན་ལ་བསྟེན་པས་ཡོན་ཏན་དེ་དག་སྒྲུབ་ནུས་པའི་ཕྱིར་མཚན་ཉིད་རིགས་ཅན་ལྔར་གསུངས་པ་ལས་མཆོག་པདྨ་ཅན་ཏེ་དེ་ནི་ཤ་མདོག་དཀར་ལ་དམར་མདངས་ཤིན་ཏུ་ཆེ་བ། མཁུར་ཚོས་ཀྱི་མེ་ཏོག་སྨུག་ཐིག་གེས་བརྒྱན་པ། མིག་དཀྱུས་རིང་ཞིང་ཆེ་བ། མཛེས་ཤིང་སྙིང་དུ་སྡུག་པ་ནི་ཕྱི་རྟགས། ལྟེ་བ་ནས་གྱེན་འགྲེང་གི་རི་མོ་གསུམ་དང་ལྡན་པ་ནང་རྟགས། གསང་རྩ་པད་སྣ་ལྟར་ཕྲ་ཞིང་ཆུ་སྐྱེས་ཀྱིས་འབྱེད་འཛུམ་ནུས་པ། རྒྱུན་དུའམ་རེས་འགར་རཀྟ་འོ་མའི་མདོག་ཏུ་འབབ་པ་རྣམས་གསང་རྟགས་ཏེ་དེ་དང་ལྡན་ན་རུང་བ་དང༌། གཞན་ཡང་རི་མོ་ཅན་སོགས་རིགས་བཞི་གང་རུང་རང་ལ་དད་གུས་ལྡན། བློ་བརྟན། གསང་ཐུབ། རྩ་བཟང༌། ཆགས་པ་ཆེ། དར་ལ་བབ། སྒྱུ་རྩལ་མཁས་པ་ལོ་བཅུ་དྲུག་ནས་ཉི་ཤུ། ཉེར་ལྔ་རྣམས་རབ་འབྲིང་ཐ་མ་ཡིན་པས་བསྟེན་བྱ་སྟེ། དེ་ཉིད་རྫས་སྔགས་ཏིང་འཛིན་གྱི་ནུས་པས་དབང་དུ་བསྡུས་ལ། ཉམས་དགའ་བག་ཕེབས་དབེན་པའི་གནས་སུ། ངེས་འབྱུང་གི་གཏམ་དང་བསག་སྦྱང་གིས་རྒྱུད་སྦྱངས་ཏེ་དཀྱིལ་འཁོར་དུ་བཅུག་ཅིང་དབང་བསྐུར། དམ་ཚིག་ཕོག་ལ་བསྐྱེད་རྫོགས་ཀྱི་གནད་བསྟན་ཏེ་རང་དང་ནུས་པ་མཉམ་པའམ། ཅུང་ཟད་དམན་ཀྱང་རུང་བས་དེ་ལྟ་བུར་མ་གྱུར་གྱི་བར་དུ་སྦྱང་ངོ༌། །གཉིས་པ་ལ། ཉེ་བསྙེན་དང༌། སྒྲུབ་པ་གཉིས་ལས། དང་པོ་ཐབས་ཉེར་བདུན་གྱིས་ཉེ་བསྙེན་ནི། བལྟས་དགོད་ལག་པ་བཅངས་པ་ཡིས༔སོགས་ནས། བདེ་བ་སྐྱེས་པ་དང༔ ཞེས་པ་སྟེ་མཚན་ལྡན་གྱི་གཟུངས་མ་ཁྲུས་བྱས། རྒྱན་གྱིས་སྤྲས་དྲི་དང་བཀུ་མཉེའི་བྱུག་པ་དང༌། བཅུད་ཆེན་གྱི་ཟས་བསྟེན་ཅིང་སྔར་གོམས་པའི་རྣལ་འབྱོར་ལ་སྦྱངས་ཏེ་སྟན་ནང་ཚང་ཅན་ལ་ཡབ་ཡུམ་ལྷན་ཅིག་ཏུ་འཁོད། འཛུམ་པའི་མིག་གིས་གཟུགས་ལ་བལྟ། ཆགས་པའི་གཏམ་སྨྲ། ཡིད་ཀུན་དགའི་མདངས་བསྐྱེད། ཆགས་པའི་རྣམ་འགྱུར་དྲག་ཏུ་བསྐྱེད་པས་སྒོ་གསུམ་འདོད་ཆགས་ལ་བསླབ། སྟངས་དཔྱལ་ལྷ། མཁའ་གསང་རྡོ་རྗེ་དང་པདྨ། གཞན་དོན་དུ་བདེ་ཆེན་རྡོ་རྗེ་སེམས་དཔའི་ཚེ་སྒྲུབ་པའི་འདུ་ཤེས་གསུམ། ཕན་ཚུན་འཁྱུད་པ་དང༌། མཁའ་གསང་སྤྲོད་པ། དལ་བུས་སྲུབ་པའི་སྦྱོར་ཐབས་གསུམ་གྱིས་བདེ་བ་དབབ་སྟེ། དགའ་བཞི་ངོས་བཟུང་སྙོམས་འཇུག་ཇེ་དྲག་ཏུ་བཏང༌། རིལ་བ་ཞབས་ཚགས་ཅན་གྱི་རླུང་སྦྱོར་བྱ་བའི་བསྐྱིལ་ཐབས་གསུམ་གྱིས་བདེ་བ་སྤེལ། ནོར་བུའི་བུ་ག་དང་ཁཱ་ཁ་མུ་ཁ་སྣ་རྩེར་དཀར་དམར་གཉིས་ཀའི་རླུང་སེམས་ཁ་སྦྱོར་གསུམ་གྱིས་ལྷན་སྐྱེས་ཀྱི་བདེ་བས་རྟོག་པ་ཟིལ་གྱིས་མནན། སྒོ་གསུམ་གྱི་འཁྲུལ་འཁོར་གྱིས་བདེ་བའི་རྟེན་ཐིག་ལེ་མི་འཆོར་བར་བཟུང༌། དུད་འགྲོའི་འགྱུར་བ་བཞི་དང་ཐུར་སེལ་སྟེང་སྦུབས་རླུང་གནད་དམིགས་པ་ཧཾ་ལ་གཏོད་པའི་བཙན་ཐབས་སྦྱོར་བ་གསུམ་གྱིས་རྟེན་བརྟེན་པ་བཅས་རང་གནས་སུ་ལྡོག །གཞིལ་བའི་སྒྱུ་རྩལ་གསུམ་གྱིས་ཐིག་ལེ་རྩ་གནས་སུ་བཀྲམ་ལ། བདེ་བའི་རང་ངོ་སེམས། སེམས་གང་དུའང་འཛིན་མེད་རྒྱ་ཡན་ནམ་མཁའ་ལྟ་བུའི་ངང་དུ་འཇོག་པའི་རྒྱས་འདེབས་གསུམ་སྟེ་ཐབས་ལམ་གྱི་ཆོས་ཉེར་བདུན་གྱི་འདོད་པའི་སྒྱུ་རྩལ། བདེ་བའི་རོལ་མོ་སྦྱོར་བའི་དགའ་སྟོན་མིག་འཕྲུལ་ལྟར་བསླབ་བོ། །གཉིས་པ་ཡས་བབ་ཀྱི་དགའ་བཞིའི་ཉམས་བཤད་པ་སྒྲུབ་པ་ནི། ཡབ་ཡུམ་གནས་ལྔའི་ཚེ་ཡི་བདག༔སོགས་ནས། ཕྲུལ་གྱིས་བྱུང༔ ཞེས་པ་སྟེ་དེ་ལྟར་སྦྱོར་བའི་ཚེ་ཡབ་ཡུམ་གྱི་གནས་ལྔར་རིགས་ལྔའི་ཚེ་དཔག་མེད་གསལ་བ་ཡབ་ཡུམ་མཉམ་པར་སྦྱོར་བའི་འོད་ཀྱིས་སྙོམས་འཇུག་གི་བྱེད་པས་ལུས་སེམས་མྱོས་ཏེ་ལུས་ཀྱི་ནང་གི་དྭངས་མའི་དཀར་དམར་ཀྱང་དབང་མེད་གཡོ་བ་བཞིན་བདེ་སྟོང་གི་རྩལ་གྱིས་སྣོད་བཅུད་བརྟན་གཡོའི་དྭངས་མ་སྒུལ་ཞིང་གཡོས་པས་བསྡུས་པ་དང༌། ཆགས་པས་ཡིད་གཡོས་པ་དངོས་པོ་གཞན་གྱི་ནུས་པ་ལས་སེམས་ཀྱི་བརྟན་པ་འཕྲོག་ནུས་པ་དང་ཆོས་མཚུངས་པ་རྒྱལ་བ་ཀུན་ཀྱང་བདེ་བའི་འོད་ཟེར་གྱིས་བསྐུལ་བས་རྗེས་ཆགས་དབང་མེད་དུ་གཡོས་པས་འདོད་ཆགས་ཆེན་པོའི་རོས་སིམ་སྟེ་ཁུ་བའི་དྭངས་མའི་སེམས་སྤྲིན་དངུལ་ཆུའི་ཆར་པ་ལྟར་བབ། ཡུམ་གྱི་སྤྱི་བོའི་ཧཾ་ལ་ཐིམ། དེ་མར་གསར་མེས་ཞུ་བ་ལྟར་དྭངས་མ་ཆིལ་གྱིས་བྱུང་བ་དཔྲལ། མགྲིན། སྙིང༌། ལྟེ། གསང་གནས་ལྔར་བབ། དེའི་རྐྱེན་གྱིས་ཡབ་ཀྱི་འཁོར་ལོ་ལྔ་ནས་བྱང་སེམས་གཡོས་པ་ཡས་མར་བྱུང་བའི་དྭངས་མ་བདེ་བའི་ཟིལ་པ་གསང་བའི་སྣ་རྩེར་ཕྲུལ་གྱིས་བྱུང་བ་དང་གཅིག་ཏུ་འདྲེས་པར་བསམ། དེའི་ཚེ་དཔྲལ་བའི་འཁོར་ལོར་ཐིག་ལེ་བབ་པས་དགའ་བའི་ཡེ་ཤེས་སྐྱེས་པའི་རང་ངོ་ལ་ཡུན་རིང་དུ་བལྟས་ཏེ་རླུང་སེམས་གཅུན། ཐིག་ལེའི་དྭངས་མའི་ཟིལ་མངར་བརྟན་གཡོའི་སྲིད་ཞིའི་བཅུད་བུདྡྷ་ཚེ་དཔག་མེད་ཡབ་ཡུམ། རྩ་འདབ་ཀྱི་གྲངས་མཉམ་ཌཱ་ཀི་ལ་ཕོག་པས་བདེ་སྟོང་གི་ཉམས་བཟོད་མེད་དུ་འབར། ཀུན་ཀྱང་རང་འོད་ཀྱི་ཐབས་ཤེས་ཕན་ཚུན་སྦྱོར་བའི་འོད་ཀྱིས་སྤྱི་བོའི་རྩ་རླུང་ཐིག་ལེའི་ཁམས་ཉམས་པ་གསོས། ཆད་པ་མཐུད། ཡོ་བ་བསྲངས། འཁྱར་བ་བསྡུས་ཏེ་རྩ་སྦུབས་ཆེ་ཕྲས་མཚོན་སྤྱི་བོ་ལྟེམ་གྱིས་གང་བས་བདེ་བ་མི་བཟོད་པ་སྐྱེས་པར་བསམ། འདིས་མཚོན་ཏེ་གནས་ལྔར་མས་རིམ་དུ་དམིགས་པ་རིགས་འགྲེ་ཤེས་དགོས་སོ། །གསུམ་པ་རྗེས་སྒྲུབ་པ་ཆེན་པོའི་ཚུལ་ལ། མས་བརྟན་གྱི་དགའ་བཞི་ངོ་སྤྲད་པ་དང༌། ལམ་གྱི་ཡན་ལག་གཞན་བཤད་པའོ། །དང་པོ་ནི། ཡབ་ཀྱི་རྡོ་རྗེའི་ལྕེས་གཞིབ་སྟེ༔སོགས་ནས། བཟུང་བ་གཅེས༔ ཞེས་པ་སྟེ་མཁའ་གསང་གི་སྣ་རྩེར་ཁམས་འདྲེས་པ་ཐུར་སེལ་སྤྱི་བོར་དྲངས་པས་དྭངས་མའི་རྒྱུན་རྡོ་རྗེའི་བུ་ག་ནས་དྲངས་པའི་རྟགས་སུ་སྦྲིད་ཆིལ་དྲོད་དང་བཅས་ཏེ་བྱུང་བ་དང་གསང་གནས་ལྟེ་བ་སོགས་ནས་མས་བརྟན་གྱིས་སྤྱི་བོ་བར་ལྡོག །དེའི་ཚེ་ལུས་དཀྱིལ་གྱི་ལྷ་རྣམས་ལ་དྭངས་མའི་སེམས་སྤྲིན་གྱིས་མཆོད་པས་ལྷག་པར་མཉེས་ཏེ་གནས་ལྔའི་སྦྱོར་མཚམས་ནས་བྱང་སེམས་བབས་པས་ལུས་ཐམས་ཅད་ཁེངས། སྙིགས་མ་སྦྱངས། དྭངས་མ་འོད་ཀྱི་ཚུལ་དུ་མས་རིམ་ནས་ཞུ་བ་མཐར་ཀུན་ཀྱང་རིམ་གྱིས་སྤྱི་བོར་ཐིམ། རྩ་སྦུབས་ཐམས་ཅད་སྟོང་སང་ངེ་གནས་པར་བསམ་ལ་རླུང་སེམས་སྤྱི་གཙུག་ཏུ་གཏད། མཐར་ཐམས་ཅད་བདེ་བས་ཞུ་སྟེ་ཡབ་སྤྱི་བོའི་ཧཾ་ལ་ཐིམ། ཡུམ་རང་གི་ལྟེ་བའི་ཨ་ལ་ཐིམ། དེ་གཉིས་ཀྱང་ཉི་ཟླ་བཞིན་དུ་ཐིག་ལེ་དཀར་དམར་དུ་གྱུར་པ་བར་སྣང་ལ་ལིང་ངེར་གནས་པར་བསམ་ལ་སེམས་གཏད། མཐར་དེ་ཡང་སྟོང་ཆེན་སྐྱེ་མེད་ཀྱི་དབྱིངས་སུ་ཐིམ་པར་མོས་ལ་དབྱིངས་རིག་བསྲེ། སླར་ཡང་སྐད་ཅིག་གིས་ཚེ་བདག་ཡབ་ཡུམ་རྩ་གསུམ་འཁོར་ལོ་ལྔ་དང་བཅས་པ་ལམ་གྱིས་གསལ་བའི་སྤྱི་བོའི་ཧཾ་ལས་དྭངས་མའི་བདུད་རྩིའི་ཟིལ་མངར་བྱུང་ནས་འཁོར་ལོ་ལྔས་མཚོན་ལུས་ཀུན་གང༌། ཉིས་དྭངས་སུམ་དྭངས་ཀྱི་ཆ་ཐམས་ཅད་གནས་ལྔར་འདུས་པ་ཚེ་བདག་རིགས་ལྔ་ཕྲ་ལ་སྐྱེ་མཆེད་དོད་པ་བདེ་བའི་རང་བཞིན་སྟོང་པའི་ངོ་བོ། ཟུང་འཇུག་གི་ཡེ་ཤེས་ཀྱི་ཕྱག་རྒྱར་སད་པར་མོས་ལ་རྩ་འདར་དང་ལུས་སྤྲུགས་བྱའོ། །གཉིས་པ་ནི། བདེ་བ་སྲ་ན་སྒྱུ་རྩལ་ནི༔སོགས་ནས། ལེའུ་སྟེ་བཅོ་བརྒྱད་པའོ༔ ཞེས་པ་སྟེ། དེ་ལྟར་བརྩོན་པས་བདེ་བ་སྐྱེར་མ་གཏུབས་ཏེ་སྲ་ན་པདྨ་ཅན་ལ་སྟེང༌། རི་མོ་ཅན་ལ་རྒྱབ། དུང་ཅན་མ་ལ་འདེབས་ཚུལ། གླང་སྣ་ཅན་ལ་ཕན་ཚུན་མཉམ་པ། རི་དྭགས་ཅན་ལ་འོག་ནས་སྦྱོར་བའི་འཁྲིག་ཐབས་དང༌། གཡས་རོལ་གཡོན་རོལ་སོགས་སྒྱུ་རྩལ་གྱི་ཆོ་ག་མ་ངེས་པས་བསྐུལ་ཞིང༌། བྱང་སེམས་རྒྱས་པའི་སྨན་སྔགས་ཏིང་འཛིན་སོགས་ཀྱང་བྱ། ཧ་ཅང་ཆགས་རྟོག་རགས་པས་མྱོས་ན་སྟོང་ཉིད་ཀྱི་རྒྱས་འདེབས་དང་ཆགས་པ་ཆེན་པོའི་ཏིང་འཛིན་ཀྱང་སྒོམས། མདོར་ན་སྐབས་འདིར་ཤེས་བྱའི་གནད་ནི་སྤྱིར་མདོ་སྔགས་ཀྱི་ལམ་གང་བསྒོམས་ཀྱང་རྒྱུད་ཉོན་མོངས་ལས་གྲོལ་དགོས་པ་གནད་གཅིག་ཏུ་ཤེས་དགོས་པས་སོ་ཐར་གྱི་སྐབས་སུ་ངོ་བོ་མ་གྲུབ་པ། འདུ་ཤེས་གཞན་དུ་གྱུར་པ། འཛིན་ཞེན་མེད་པ་ལ་ཕམ་པ་དངོས་གཞི་མི་འགྱུར་གསུངས་པ་ལྟར་སྔགས་སུ་རྣམ་པ་བསྟེན་བྱ་ཆགས་ཡུལ་བུད་མེད། བསྟེན་ཚུལ་སྙོམས་འཇུག་ལ་བསླབ་ཀྱང༌། རྣལ་འབྱོར་པ་དང་པོའི་དུས་ནས་ལྷན་སྐྱེས་ཡེ་ཤེས་ཀྱི་དེ་ཉིད་ལ་དྲོད་ཐོབ་པའི་ལྟ་བས་གདེང་བཟུང་སྟེ་ཐོག་མཐའ་ཀུན་ཏུ་སྒྱུ་མ་རྨི་ལམ་ལྟ་བུའི་རོལ་རྩེད་ལས་དངོས་ཞེན་རང་རྒྱུད་པ་མི་གནས་པའི་ལྟ་བའི་གདེང་གིས་ཆགས་པའི་ཡུལ་དབང་ཤེས་གསུམ་གྱི་ངོ་བོ་མ་གྲུབ། ཕོ་མོ་སོགས་ཆགས་པའི་འདུ་ཤེས་རང་མཚན་པ་མ་ཡིན་པ་འདོད་ཆགས་ལམ་བྱེད་ཀྱི་འདུ་ཤེས་གསུམ་གྱིས་བསྒྱུར་བས་འདུ་ཤེས་གཞན་དུ་གྱུར། རྣམ་པ་གང་ལྟར་སྣང་ཡང་རྗེས་ཤེས་ལ་ཆགས་པའི་ཀུན་དཀྲིས་ཀྱི་འཆིང་བ་མེད་པ་ངོ་བོ་སྐྱེ་མེད་ཀློང་ཡངས་སུ་གྲོལ་བས་སྲིད་རྩའི་འཛག་བདེའི་འཆིང་བ་མི་གནས་པས་འཛིན་ཞེན་མེད་པ་གསུམ་སྒྲ་ཇི་བཞིན་དུ་བྱུང་ན་སྡོམ་གསུམ་འགལ་མེད་ཆིག་རྫོགས་སུ་ཡིན་པའི་གནད་དོན་ཤེས་པར་བྱས་ཏེ། རང་གི་སྐལ་བས་ཇི་ལྟར་འཚམས་པ་ལ་བརྩོན་པ་གནད་དུ་ཆེ་བར་ཤེས་ནས་རང་གཞན་དེང་དུས་ཀྱི་སྔགས་ལ་སྤྱོད་པ་རྣམས་ལ་ཕན་དུ་རེ་ནས་བྲིས་པའོ། །དེ་ལྟར་གོམས་པས་རྣམ་པ་སྣང་སྤྱོད་བདེ་བ་ཆེན་པོའི་ཡེ་ཤེས་སུ་ཤར་བའི་ཐབས་ལམ་ཟབ་མོའི་མཚོན་བྱེད་བྱས་ཏེ། ངོ་བོ་སྟོང་པ་རྣམ་ཀུན་མཆོག་ལྡན་གྱི་ཡེ་ཤེས་ཟུང་འཇུག་ཕྱག་རྒྱ་ཆེན་པོ་མཚོན་བྱའི་དོན་རྟོགས་ཏེ། མྱོང་བས་མངོན་སུམ་དུ་ཤར་ཡང་ངག་གིས་སྨྲ་མི་བཏུབ། རང་སེམས་ལ་ངེས་ཤེས་རྙེད་ཀྱང་དཔེས་མཚོན་དུ་མེད། རྣམ་རྟོག་གི་འདུ་བྱེད་ཀྱིས་མ་བསླད་པའི་སྐྱེ་འགག་གནས་བྲལ་ནམ་མཁའ་ལྟ་བུར་འདུས་མ་བྱས་སུ་རང་ཤར་བ་སྲིད་ཞི་ཀུན་གྱི་ཡེ་ཤེས་སྲོག་གི་སྙིང་པོ་གང༌། ཐབས་ལས་ཐབས་བྱུང་གི་ནུས་པས་གསལ་ཞིང་དེར་འཛིན་མེད་པའི་རང་བཞིན་ཤེས་པའི་ཚུལ་དུ་ཤར་ཏེ་དོན་ལ་འཇུག་པར་ནུས་པས་ཉེ་རྒྱུའམ་ཕོ་ཉའི་ལམ་གྱིས་རྡོ་རྗེའི་ཚེ་སྒྲུབ་པའི་རིམ་པའོ། །རྩ་བའི་ས་བཅད་གཉིས་པ་རྩོལ་མེད་གཉུག་མ་མི་ཤིགས་པའི་ཐིག་ལེ་ལ་བརྟེན་པའི་གྲོལ་ལམ་བཤད་པ་ལ་གཉིས། མ་སྒོམ་པ་འཚང་རྒྱ་བའི་གནད་དབྱིངས་ལ་ལྟོས་ཏེ་སེམས་ཀ་དག་རྩ་བྲལ་དུ་ངོ་སྤྲད་ནས་རིག་པ་རྗེན་ལ་ཕུད་པའི་ལམ་ཁྲེགས་ཆོད། སྒོམ་པས་འཚང་རྒྱ་བ་སྣང་བ་ལ་ལྟོས་ཏེ་འོད་གསལ་ལྷུན་གྲུབ་ཏུ་ངོ་སྤྲད་ནས་མངོན་སུམ་གྱི་གནད་ལ་གཟིར་བས་གདོས་བཅས་འོད་ལུས་སུ་གྲོལ་བའི་ལམ་ཐོད་རྒལ་ལོ། །དང་པོ་ལ་བཞི། གྲོང་ཁྱེར་རྒྱུན་གཅོད་ཀྱི་ལྟ་བས་ཐག་བཅད། ཉིན་མཚན་ཁ་སྦྱོར་གྱི་སྒོམ་པས་ཉམས་སུ་ལེན། སྣང་བ་དབང་བསྒྱུར་གྱི་སྤྱོད་པས་བོགས་འབྱིན། བྱ་བྲལ་ལྷུན་གྲུབ་ཀྱི་འབྲས་བུས་ལྷུན་གྱིས་གྲུབ་ཚུལ་ལོ། །དང་པོ་ནི། དེ་ལྟར་ལམ་རྣམས་ཐམས་ཅད་པའི༔སོགས་ནས། བསམ་གཏན་བྱ༔ ཞེས་པ་སྟེ་རྒྱུ་འབྲས་ཀྱི་ཐེག་པའི་ལམ་རིམ་མཐའ་དག་གི་སྐྱེལ་སོ་དོན་གྱི་ཡེ་ཤེས་རྗེན་ཅེར་དུ་སྟོན་པ་བཞི་པའི་དབང་གི་ལམ། མངོན་སུམ་གྱི་ཡེ་ཤེས་ལམ་དུ་བྱེད་པས་རྣལ་འབྱོར་ཀུན་གྱི་རྩེ་རྒྱལ། སྣང་གསུམ་འཕོ་སྒྲིབ་སྦྱང་བའི་གཉེན་པོ་རྡོ་རྗེ་ལྟ་བུའི་ཏིང་འཛིན་དངོས་འོད་གསལ་རྫོགས་པ་ཆེན་པོའི་ལམ་གྱིས་གཉུག་མ་རྡོ་རྗེའི་ཚེ་སྒྲུབ་པའི་ལམ་མཐར་ཐུག་གི་འབབ་སྟེགས་སུ་བསྟན་པ་སྟེ། གང་གཏན་ལ་དབབ་བྱའི་ལྟ་བའི་བཞུགས་ཚུལ་ངོ་བོ་རིག་སྟོང༌། རང་བཞིན་གསལ་སྟོང༌། ཐུགས་རྗེ་སྣང་སྟོང་དབྱེར་མེད་གསུངས་པའི་དང་པོ་དེ་ཡང་བློས་དཔྱད་སྒོམ་དང༌། ལུང་རིག་གཏན་ཚིགས་ཀྱིས་གཏན་ལ་དབབ་པའི་ངེས་ཤེས་ཙམ་མ་ཡིན་པར་གདོད་ནས་སྐྱེ་མེད་ཀ་དག་གི་ཡེ་ཤེས་མཐའ་ཐམས་ཅད་དང་བྲལ་བ་དོན་དམ་བདེན་པ་ཆོས་སྐུ་ཉག་གཅིག་གཤིས་ལུགས་ལ། གསལ་མདངས་འགག་པ་མེད་པའི་ཡེ་ཤེས་ཀྱི་རང་རྩལ་སྐུ་དང་ཡེ་ཤེས་རྒྱ་མཚོའི་ཆོས་རང་ངོ་དང་འབྲལ་མི་ཤེས་པ་ཉི་མ་དང་འོད་ཟེར་བཞིན་གཉིས་མེད་མཉམ་པའི་ཆོས་སུ་ལྷུན་གྱིས་གྲུབ་པའི་དཔལ་ནི་བདེ་ཆེན་ལོངས་སྐུའི་བདག་ཉིད་སྲིད་ཞི་ཀུན་ལས་འདས་པའི་ཡེ་ཤེས། གདོད་ནས་ཟུང་འཇུག་ཆེན་པོ། བློ་འདས་ཡིན་ལུགས་ཀྱི་ཆོས་ཉིད་སྒྲ་ཇི་བཞིན་པ་སྟེ་གནས་ལུགས་འདིའི་ངོས་ནས་གཞལ་ན་འཁོར་བ་སྡུག་ཀུན་གྱི་སྣང་བ་ཡང་སྐུ་དང་ཡེ་ཤེས་ཀྱི་ཆོས་ལས་སྤང་བྱར་མི་གནས་ཤིང༌། དག་པ་སངས་རྒྱས་ཀྱི་ཡོན་ཏན་ཀྱང་གསར་དུ་ཐོབ་པར་བྱར་མེད་པའི་བདེན་གཉིས་མཉམ་པ་ཐུགས་རྗེ་ཀུན་ལ་ཁྱབ་པའི་དེ་ཁོ་ན་ཉིད་དུ་བཞུགས་ཤིང༌། ཡུལ་ཡུལ་ཅན་གྱི་གཉིས་ཆོས་ལས་འདས་པའི་འཕགས་པའི་མཉམ་བཞག་གི་ལྟ་བ། བརྡ་ཐབས་མན་ངག་བྱིན་རླབས་ཀྱི་སྟོབས་ལས་ངོ་འཕྲོད་པས་སྐྱེ་ཤི་སྲིད་པའི་གྲོང་ཁྱེར་རྒྱུན་གཅོད་པའོ། །གཉིས་པ་ནི། བདེ་བའི་སྟན་ལ་བག་ཕབ་ཏེ༔སོགས་ནས། ལྷོད་དེ་བ༔ ཞེས་པའི་བར་ཏེ་ལྟ་བ་ཡེ་གྲོལ་དུ་རྟོགས་པ་དེ་ནས་སྒོམ་པས་ཡིན་ཐོག་ཏུ་བཞག་སྟེ་རིག་པའི་གཤིས་སུ་ཕེབས་པའི་བཙན་ས་ཟིན་དགོས་པས་ཉམས་སུ་བླང་བའི་ཚུལ་ནི་འཁོར་བ་ཞེས་པའི་འཁྲུལ་སྣང་ཡང་རང་གི་ལུས་ངག་སེམས་ཀྱི་ཚོགས་པ་ཙམ་པོ་བ་ཞིག་སྟེ། དེ་ལས་ལུས་ནི་གདོས་བཅས་ཀྱི་ཕུང་པོ་སིལ་བུར་བསིལ་ན་ཆ་མེད། ངག་ནི་ལུས་སེམས་ཀྱི་འདུས་པའི་རྐྱེན་ལས་རང་སྣང་བའི་སྟོང་སྒྲ། སེམས་ནི་འཁྲུལ་ངོར་བཏགས་པ་ཙམ་ལས་དོན་ལ་ཅིར་ཡང་མ་གྲུབ་པ། སྒོ་གསུམ་ཀུན་ཀྱང་མ་བརྟགས་ཉམས་དགའ་བའི་སྣང་བ་ཙམ་ལས་དོན་ལ་གང་དུའང་མ་གྲུབ་པའི་སྟོང་ཉིད་ཅིག་ལས་དུ་མར་མི་གནས་པ་སྟེ། སྟོང་པ་དེའི་གཤིས་ཀྱང་རིག་པ་ཟང་ཐལ་མཚན་མར་མ་གྲུབ་པའི་རང་བྱུང་གི་ཡེ་ཤེས་ཀྱི་སྙིང་པོ་ཅན་གཟུང་འཛིན་གྱི་རྟོག་པས་གཉིས་སུ་མི་ཕྱེད་པའི་རྡོ་རྗེ། འཁོར་འདས་གང་གི་ཕྱོགས་སུ་མ་ལྷུང་བའི་སེམས་དཔའ། རང་བཞིན་འགྱུར་མེད་མཁའ་ཁྱབ་ནམ་མཁའི་དབྱིངས་ལས་གཞན་དུ་མི་འཕྲོ་བའི་རང་བཞིན་རང་ལ་གནས་པའི་ངོ་རང་ཐོག་ཏུ་འཕྲོད་པ་ལ། འདས་པའི་རྗེས་མ་བཅད། མ་འོངས་པའི་མདུན་མ་བསུས། ད་ལྟ་ཕྱི་ཡུལ་ལ་མ་སྤྲོ། ནང་དུ་མི་བསྡུ། ཐད་ཀར་རང་བབ་སོ་མའི་ཡིན་ལུགས་ལ་བཞག་པས་ཀ་དག་བློ་འདས་ཀྱི་དགོངས་པ་བཞི་ཆ་སུམ་བྲལ་གྱི་ཤེས་པ་ཡིན་ལུགས་ཐོག་ཏུ་བཞག་པ་ཙམ་ལས། དམིགས་པའི་གཏད་སོ། ཡིན་མིན་གྱི་མཚན་འཛིན། རེ་དོགས་ཀྱི་དགག་སྒྲུབ། བསྒོམ་བྱའི་ཆོས་རྡུལ་ཙམ་ཡང་མི་དམིགས་པའི་སྟོང་ཉིད་དུ་རང་བབ་ལྷུག་པར་སྐྱོང་བ་ནི་ཐག་གཅིག་ཐོག་ཏུ་བཅད་པ་དང༌། དེའི་དུས་སུ་ཕྱི་ཆོས་ཅན་ཚོགས་དྲུག་ཡུལ་གྱི་འཁྲུལ་སྣང་ལ་ནང་གི་རྟོག་པ་ཤར་བའི་དུས་ནས་འཛིན་མེད་ཀློད་པས་རྦ་རླབས་ཆུར་ཐིམ་པ་ལྟར་འགྱུ་སྟོང་རྗེས་མེད་དུ་ཞིག །ནང་ཆོས་ཉིད་གཞི་མེད་རྩ་བྲལ་གྱི་ངང་དུ་ཡེངས་པ་མེད་པར་རང་བབ་ཀྱི་དྲན་པས་དགག་བཞག་སྟེ་དགག་སྒྲུབ་རྩོལ་བཅས་ཀྱི་རྟོད་ཕུར་ན་བུན་ནམ་མཁའ་ལ་དེངས་པ་ལྟར་རང་སར་གྲོལ་ཏེ་སྣང་ཤེས་གཉིས་ཀའི་ཕྱོགས་སུ་མ་ལྷུང་བར་ཅིར་སྣང་ཆོས་སྐུའི་རང་བཞིན་རིག་སྟོང་བློ་བྲལ་རྗེན་པར་རྟོགས་པ་གདེང་གྲོལ་ཐོག་ཏུ་བཅས་པ་སྟེ། དམིགས་གཏད་མཚན་འཛིན་གང་ཡང་མེད་པའི་ངང་ལ་འབད་རྩོལ་ཅིའང་བྱར་མེད་པ་ཁ་ཡན་དུ་ཀློད་ནས་བཞག་པས་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་གཞིར་རྫོགས་མཉམ་པ་ཆེན་པོར་བཙན་ས་ཟིན་པར་བྱེད་དོ། །གསུམ་པ་ནི། གཤིས་ལ་གང་དུའང་མི་འཛིན་པའི༔སོགས་ནས། སུ་ཞིག་གྲོལ༔ ཞེས་པ་སྟེ་ཅོག་བཞག་གི་དགོངས་པ་ཀློང་དུ་གྱུར་པར་གདེང་བཅས་པས་རིག་པའི་གཤིས་ཀ་དག་ཕྱོགས་ཡན་གྱི་དགོངས་པ་རྒྱ་ཡན་རང་གྲོལ་དུ་ཤར་བས་སྒོ་གསུམ་གྱི་སྤྱོད་ལམ་གང་དུ་ཞུགས་ཀྱང་ཐམས་ཅད་ཆོས་ཉིད་ཀྱི་རོལ་པའི་ངང་ལས་ནམ་ཡང་མ་གཡོས་པས། ཚོགས་དྲུག་གི་ཡུལ་ལ་ཆགས་སྡང་གིས་དེར་འཛིན་གྱིས་མི་ཞེན་པར་ཐུག་འཕྲད་རང་གྲོལ་གང་དགར་རྒྱ་ཡན་དུ་བཏང་བས། སྣང་བཏགས་ཇི་ལྟར་སྣང་རུང་རིག་པ་ལས་གུད་ན་མེད་པས་སྤྱོད་ལམ་རྣམ་བཞི་ཡེ་ཤེས་ཆེན་པོའི་རོལ་རྩལ་དུ་འུབ་ཆུབ་པས། རྩ་བྲལ་གྱི་ཆོས་ཐམས་ཅད་ཡེ་ནས་ལྷུན་གྲུབ་ཏུ་སངས་རྒྱས་པས་ཆོས་སྐུ་སྤང་བླང་མེད་པའི་ངང་དུ་དམིགས་བཅས་མཚན་མའི་སྒོམ་གྱི་གཏད་སོ་ཞིག་སྟེ། ཀུན་བཟང་ཡེ་ཤེས་ཟང་ཐལ་དག་པ་རབ་འབྱམས་སུ་ཤར་ནས་ཆོས་ཉིད་བཅིང་གྲོལ་མེད་པའི་ཀློང་དུ་འོད་གསལ་ཆུ་བོ་རྒྱུན་གྱི་ཏིང་འཛིན་མ་བཙལ་ལྷུན་རྫོགས་སུ་འཆར་བས་གྲོལ་བའི་ཐ་སྙད་བཏགས་པའོ། །བཞི་པ་ནི། དོན་འདི་ངེས་པའི་གདེང་ཐོབ་ན༔སོགས་ནས། བདེ་ཆེན་ཤར༔ ཞེས་པ་སྟེ་མཁའ་ལ་འབྱུང་བཞིའི་འདུ་དགོད་ཇི་ལྟར་ཤར་ཡང་གོས་པ་མེད་ཅིང་བཅིང་པ་ཡང་མེད་པ་བཞིན་རང་རིག་ཆོས་ཉིད་ཀྱི་དགོངས་པ་བློ་བྲལ་ནམ་མཁའ་ལྟ་བུ་ལ་གདེང་ཐོབ་པའི་རྣལ་འབྱོར་པས་ལྟར་སྣང་གི་བྱ་བ་གང་བྱས་ཀྱང་གདོད་ནས་ཡེ་གྲོལ་དུ་དག་པའི་མཐུས་ལས་ཀྱི་བག་ཆགས་ཀུན་གཞི་ལ་མི་ཕོག་ཅིང་གང་ལྟར་སྤྱོད་ཀྱང་ཆོས་ཉིད་བདེ་བ་ཆེན་པོའི་རང་བཞིན་དུ་དག་པས་ཚོགས་གཉིས་ཀྱི་རྒྱུར་གྱུར་ནས། སེམས་རིག་ཤན་འབྱེད་ཀྱི་བསྙེན་པ། རིག་པ་རྗེན་ལ་བུད་དེ་ངོ་འཕྲོད་པ་ཉེ་བསྙེན། འཁོར་འདས་ཐམས་ཅད་རིག་པ་གཅིག་ཏུ་རྫོགས་པར་ཐག་ཆོད་པ་སྒྲུབ་པ། ཡེ་གྲོལ་ལ་གཉེན་པོས་བསྐྱར་མ་དགོས་པ་འབྲས་བུ་གཞིར་རྫོགས་སུ་ཐག་ཆོད་པ་སྒྲུབ་པ་ཆེན་པོའི་ངང་དུ་ས་ལམ་ཐམས་ཅད་མ་བགྲོད་པར་རྫོགས་པས་གཉུག་མ་ངེས་པ་དོན་གྱི་རྡོ་རྗེའི་སྲོག་ནས་ཟིན་ཏེ་འགྲུབ་པའོ། །གཉིས་པ་སྒོམ་པས་འཚང་རྒྱ་བ་སྣང་བ་ལ་ལྟོས་ཏེ་འོད་གསལ་ལྷུན་གྲུབ་ཏུ་ངོ་སྤྲད་ནས་མངོན་སུམ་གྱི་གནད་ལ་གཟིར་བས་གདོས་བཅས་འོད་ལུས་སུ་གྲོལ་བའི་ལམ་ཐོད་རྒལ་བཤད་པ་ལ། གནད་ཀྱི་ཆིངས། ཐོབ་བྱའི་ལམ། གྲོལ་ཚད་འབྲས་བུའོ། །དང་པོ་ནི། འོད་གསལ་དེ་ཉིད་བོགས་འབྱིན་ཕྱིར༔སོགས་ནས། སྒོམ་པ་ལས༔ ཞེས་པ་སྟེ་འོད་གསལ་གྱི་རིག་པ་ལུས་ལ་གནས་ཀྱང་མངོན་སུམ་དུ་སྟོན་པའི་གནད་མེད་པས་སྣང་མི་ནུས་པ་སྦྲུལ་ལ་ཡན་ལག་ཡོད་ཀྱང་མ་གཅུས་ན་མི་མངོན་པ་དང་མཚུངས་ལ། དེས་ན་མངོན་སུམ་གྱི་ལམ་འདིར་གནད་དེ་དག་མ་སྦས་པར་བསྟན་པས་ཤེས་ཉམས་དང་རླུང་སེམས་འདུས་པའི་སྣང་བ་ཙམ་མ་ཡིན་པར་ཡེ་ཤེས་རང་སྣང་མངོན་སུམ་དུ་བསྟན་པས་ཡང་ཟབ་ཀྱི་མན་ངག་གནད་ཀྱི་གདམས་པ་ཨ་ཏིའི་ཁྱད་ཆོས་ཏེ། སྙིང་དབུས་མི་ཤིགས་པའི་ཐིག་ལེ་དྭངས་མ་འོད་གསལ་གྱི་རིག་པའི་ཡེ་ཤེས་ངོ་བོ་སྐུར་བཞུགས་པ་ཀ་དག་གི་དགོངས་པ་དང་མཐུན་པ་དོན། རང་བཞིན་འོད་གསལ་དུ་བསྟན་པས་གསང་སྐོར་ལུས་དཀྱིལ་དང་མཐུན་པའི་བརྡ། ཐུགས་རྗེ་སྒྲོན་མར་སྣང་བས་ཡང་གསང་སྙིང་ཐིག་དང་མཐུན་པའི་རྟགས་སུ་བསྟན་པ་གང༌། རང་བྱུང་རྡོ་རྗེ་སེམས་དཔའི་གསེང་ལམ་རྩ་ཀ་ཏི་ཤེལ་སྦུབས་ཅན་གྱི་ལམ་བརྒྱུད་དེ་འཆར་བས་མིག་དབང་རྒྱང་ཞགས་ཀྱི་སྒྲོན་མེ་ལས་སྣང༌། ཕྱི་དབྱིངས་ནམ་མཁའ་གོ་ཕྱེས་པའི་འོད་སྣང་མཐིང་ག །ནང་དབྱིངས་ལྔ་ལྡན་སྒྲོན་མེའི་སྣང་བ་རྣམས་ཐིག་ལེ་ལུག་རྒྱུད་དང་བཅས་པ་འཆར་བའི་ཐབས་སུ་ལུས་བཞུགས་སྟངས། མིག་གཟིགས་སྟངས། རླུང་གནད། ཡུལ་གྱི་གནད་རྣམས་ལ་བརྟེན་ཏེ་འཆར་བ་ལ་བསླབ་བོ། །གཉིས་པ་ནི། ནང་གི་རིག་པ་ཟང་ཐལ་གསལ༔སོགས་ནས། ཆེན་པོའི་སྣང་བ་སྟེ༔ ཞེས་པ་སྟེ་ནང་རིག་པའི་དགོངས་པ་གནད་ཀྱིས་གཅུན་ཏེ་སྒོམ་པའི་གདངས་ཕྱི་རུ་འཆར་བ་ལ་ནང་གི་རང་གདངས་སུ་ཤེས་པས་གཟིར་བས་དབྱིངས་ཀྱི་རྟགས་སུ་འོད་འཁྱིལ། ཡེ་ཤེས་ཀྱི་རྟགས་སུ་ཐིག་ལེ། སྐུའི་རྟགས་སུ་ལུ་གུ་རྒྱུད། ཐུགས་རྗེའི་རྟགས་སུ་རང་གསལ། ངོ་བོའི་རྟགས་སུ་མི་རྟོག་པའི་ཡེ་ཤེས་གཞི་ལས་གཞི་སྣང་དུ་ཤར་ནས་ངོ་འཕྲོད་པ་ཆོས་ཉིད་མངོན་སུམ་གྱི་སྣང་བ། དབྱིངས་རིག་སྨིན་མཚམས་ནས་བྲལ་ཏེ་དབྱིངས་སྣང་འོད་ཀྱི་རང་བཞིན་མ་ངེས་པའི་གཟུགས་དབྱིབས་དུ་མ་དང༌། ཟེར་ཐག །སྐུ་ཕྱེད་པའམ་རྐྱང་པ་འགུལ་འཁྲིགས་མེད་པར་འཆར་བ་ཉམས་གོང་འཕེལ། གདོས་བཅས་ཀྱི་སྣང་བ་དག་སྟེ་རང་སྣང་འོད་གསལ་ཆེན་པོ་འབྱམས་ཀླས་པའི་དབྱིངས། ཐིག་ལེ་རེ་རེའི་ནང་དུ་རིགས་ལྔའི་ཡབ་ཡུམ་གྱི་ཚོམ་བུ་ལྔ་ཚན་ལྔ་ཡི་དཀྱིལ་འཁོར་ཚད་མེད་པར་འཆར་ཏེ་སྣང་སྲིད་སྐུ་དང་ཞིང་ཁམས་རང་བཞིན་ཡོངས་སུ་བརྡལ་བ་རིག་པ་སྐུར་སྨིན་པས་ཚད་ཕེབས། ཕྱི་སྣང་བའི་འཕེལ། ནང་སྒྱུ་ལུས་ཀྱི་ཆོས། གསང་བ་རྟོག་ཚོགས་ཀྱི་སེམས་ཟད་དེ་བློ་འདས་གདོད་མའི་བཙན་ས་ཟིན་ཏེ་ཐོག་མའི་སྤྱི་གཞི་ལས་འཕགས་པའི་གཞི་སྣང་ཐིག་ལེ་ཆེན་པོར་སྐད་ཅིག་གིས་གྲོལ་ནས། ནང་གསལ་སྐུ་དང་ཡེ་ཤེས་འདུ་འབྲལ་མེད་པའི་ཀློང་དུ་འཕོ་འགྱུར་མེད་པར་སངས་རྒྱས་པའོ། །གསུམ་པ་ནི། དབྱིངས་ནི་ཀ་དག་གོས་དཀར་མོ༔སོགས་ནས། ལེའུ་སྟེ་བཅུ་དགུ་པའོ༔ ཞེས་པ་སྟེ་དབྱིངས་སྤྲོས་བྲལ་རྣམ་ཀུན་མཆོག་ལྡན་ཀ་དག་གི་དགོངས་པའི་རྩལ་རྫོགས་པ་ཆོས་ཀུན་འབྱུང་གནས་ཡུམ་ཆེན་ན་བཟའ་དཀར་མོ་དང༌། རིག་པ་བདེ་ཆེན་དཀྱིལ་འཁོར་རྒྱ་མཚོའི་ཁྱབ་བདག་སྐུ་ལྔའི་དབང་ཕྱུག་ཚེ་བདག་སྣང་བ་མཐའ་ཡས་གཉིས་སུ་མེད་པ་དཀྱིལ་འཁོར་གཅིག་ཏུ་དག་ཅིང་རྫོགས་ནས་ནམ་མཁའ་ཇི་སྲིད་སྐྱེ་འཆི་བདུད་བཞིས་གཞོམ་དུ་མེད་པ་འཆི་མེད་ཡེ་ཤེས་རྡོ་རྗེ་ལྟ་བུའི་གསང་བ་གསུམ་དུ་བྱང་ཆུབ་པའོ། །གསུམ་པ་ཐ་མར་དགེ་བ་ཉམས་ལེན་གྱི་སྤྱི་སྡོམ་གཏད་རྒྱ་དང་གྲོལ་ཚད་བཅས་བཤད་པ་ལ། དང་པོ་ཉམས་ལེན་གྱི་སྤྱི་སྡོམ་བཤད་པ་ནི། རྨད་དུ་བྱུང་བའི་རྡོ་རྗེའི་ཚིག༔སོགས་ནས། ལེའུ་སྟེ་ཉི་ཤུ་པའོ༔ ཞེས་པ་སྟེ་དེ་ལྟར་བསྟན་པའི་ལམ་འདི་དག་ཀྱང་གང་ཟག་གི་དབང་པོའི་ཁྱད་པར་ཉམས་སུ་ལེན་པ་ལ་རིམ་ཅན། གཅིག་ཅར་དུ་མ་ལས་གང་ཟག་སྤྲོས་པ་ལ་དགའ་བ་དག་ལ་བསག་སྦྱང་གི་རིམ་པ་གཙོ་བོར་སྨྲོས་པའི་ཕྱི་སྒྲུབ། སྣང་སྲིད་དག་ཆེན་ཡེ་ཤེས་ཀྱི་འཁོར་ལོར་ལམ་དུ་ཁྱེར་ནུས་པའི་བློ་གྲོས་མཆོག་དང་ལྡན་པ་ལ་བསྐྱེད་རིམ་སྤྲོས་པ་ཅན་བསྙེན་སྒྲུབ་ཡན་ལག་བཞི་ལྡན་ནང་སྒྲུབ། སྒོ་གསུམ་གནད་ཀྱིས་གཅུན་ཏེ་ཉམས་ལེན་མཐར་དབྱུང་ནུས་པའི་བརྩོན་འགྲུས་ཅན་ལ་རང་ལུས་དང་ཕོ་ཉའི་མྱུར་ལམ། ཤིན་ཏུ་དབང་རབ་ནང་གི་རྣལ་འབྱོར་འབའ་ཞིག་ལམ་དུ་ཁྱེར་ནུས་པས་ནི་རྩོལ་མེད་ཐེག་མཆོག་གི་ཏིང་འཛིན་ཁོ་ན་སྟེ་སོ་སོའི་དབང་པོས་ཆུན་ཚོད་ཀྱི་ལམ་ལ་འབད་པ་རྩལ་དུ་བཏོན་པ་དང༌། བསྐྱེད་རྫོགས་ཟུང་འཇུག་གི་ཚུལ་དུ་བསྒོམ་ན། སྔོན་འགྲོའི་བསག་སྦྱང་གི་རིམ་པ་རྩལ་དུ་བཏོན་པའི་སྐབས་ཕྱི་སྒྲུབ་ཀྱི་གྲངས་བསྙེན་འགྲོ་བར་བྱ། རྒྱུན་གྱི་ཏིང་འཛིན་ལ་བརྟེན་ཏེ་བསྐྱེད་རིམ་མོས་སྒོམ་ལ་འདྲིས་གདགས་ཤིང་བསྙེན་གྲངས་ཐེམས་པར་བྱ། དེ་ནས་ནང་སྒྲུབ་ཀྱང་བསྙེན་སྒྲུབ་ལས་གསུམ་དང༌། མཁའ་འགྲོའི་ཕྲིན་ལས། རིག་འཛིན་བླ་མའི་ཚེ་སྒྲུབ་བཅས་མཐར་ཕྱིན་པ་དང༌། རྩོལ་བཅས་རྩོལ་མེད་གང་རུང་གི་རྫོགས་རིམ་ལ་འཇུག་ཅིང་བརྩོན་པ་མཐར་དབྱུང༌། དེ་དག་སྐབས་ཇི་རིགས་པར་བར་ཆད་སེལ་ཕྱིར་རྟ་མགྲིན་གྱི་བསྐྱེད་བཟླས་དང༌། ཚེ་སྤེལ་ཞིང་གེགས་སེལ་བའི་ལས་རིམ་དང༌། སྤྲོས་བཅས་ཚོགས་སྒྲུབ་མོས་སློབ་སོགས་ཀྱང་སྤྲོ་ན་བྱས་པས་རབ་ཀྱིས་འཆི་མེད་ཡེ་ཤེས་ཀྱི་སྐུ། འབྲིང་གིས་ཚེ་བསོད་དཔལ་འབྱོར། ཐ་མས་ཀྱང་ཚེའི་འགལ་རྐྱེན་ཅི་རིགས་སེལ་ཞིང༌། མཐུན་རྐྱེན་འཕེལ་བའི་དངོས་གྲུབ་ཐོབ་པར་གདོན་མི་ཟའོ། །གཉིས་པ་འབྲས་བུའི་གྲོལ་ཚད་ནི། རྒྱལ་ཀུན་གསུང་གི་གསང་བ་ཆེ༔སོགས་ནས། ལེའུ་སྟེ་ཉི་ཤུ་རྩ་གཅིག་པའོ༔ ཞེས་པ་སྟེ་དེ་ལྟར་བསྐྱེད་རྫོགས་ངེས་པའི་ལམ་ལ་བརྟེན་པས་དབང་རྟུལ་ངོ་བོ་གདོས་བཅས་ཀྱི་ཕུང་པོ་དང་མ་བྲལ་བ་རྣམ་པར་སྨིན་པའི་ལུས་ལ། སེམས་ཉིད་བསྒྲུབ་བྱའི་ལྷ་ཡི་སྐུར་སྨིན་པས་ལུས་རྒྱ་དང་བྲལ་མ་ཐག་ཕྱག་རྒྱའི་རིག་འཛིན་ལ་སྦྱོར་བའི་མཚན་ཉིད་གསུམ་ལྡན་ལྷག་མེད་མྱང་འདས། དགོངས་པ་རྒྱུའི་ཐེག་པའི་མཐོང་ལམ་པ་དང་སྐལ་མཉམ། སྤྱོད་པ་བདག་དོན་དཀྱིལ་འཁོར་བྱ་བས་ཚོགས་གཉིས་རྫོགས་པར་བྱེད་ཅིང་ལྷ་ཡི་སྤྱན་སོགས་ཀྱིས་ཕྲིན་ལས་བཞིའི་འགྲོ་བའི་དོན་བྱེད་པ་རྣམ་སྨིན་རིག་འཛིན། དབང་རྣོན་ངོ་བོ་ལུས་ཟག་པ་གསུམ་ཟད་པ་ཚེ་ལ་དབང་བའི་རྡོ་རྗེའི་ལུས་ཐོབ་པ་ལྷག་བཅས་མྱང་འདས། དགོངས་པ་ས་བརྒྱད་པ་དང་སྐལ་མཉམ། སྤྱོད་པ་ལྟ་བ་ཆེད་འཛིན་ཀུན་འགྲོའི་དྲི་མ་བསལ། མངོན་ཤེས་དང་ཆོ་འཕྲུལ་གྱིས་གཞན་དོན་མཛད་པ་ཚེ་དབང་རིག་འཛིན། ངོ་བོ་མི་གཡོ་བའི་ཏིང་འཛིན་གྱིས་ལྷན་སྐྱེས་ཀྱི་དྲི་མ་སྦྱངས་པ་ལ་ཞུགས་པ་ཡེ་ཤེས་སྒྱུ་མའི་སྐུ་ཅན། དགོངས་པ་དག་པ་ས་གསུམ་དང་སྐལ་མཉམ། སྤྱོད་པ་དགོངས་པ་མི་གཡོ་བའི་ངང་ནས་ཞིང་རྣམས་སུ་སྤྲུལ་པས་གཞན་དོན་བྱེད་པ་ནི་ཕྱག་རྒྱའི་རིག་འཛིན་ངོ་བོ་ལམ་མཐར་ཕྱིན་སྐུ་ལྔ་ལྷུན་གྲུབ་ཀྱི་ས་ལ་སོན་པ། དགོངས་པ་སངས་རྒྱས་དང་མཉམ་པ། སྤྱོད་པ་ཤེས་སྒྲིབ་ཕྲ་བ་སྦྱངས་ནས་ཞིང་རབ་འབྱམས་སུ་གཞན་དོན་མཛད་པ་ལྷུན་གྲུབ་རིག་འཛིན་ལ་སྦྱོར་བས་ལམ་ལྔ་མཐར་སོན་ཏེ་སངས་རྒྱས་ཀྱི་གསང་བ་མི་ཟད་རྒྱན་གྱི་འཁོར་ལོ་ལ་དབང་བསྒྱུར་བས་དོན་གཉིས་ལྷུན་གྲུབ་ཀྱི་ཕྲིན་ལས་ནམ་མཁའ་ཇི་སྲིད་དུ་སྣང་བའི་གོ་འཕང་མངོན་དུ་གྱུར་པའོ། །དེ་ཡང་སྤྱིར་བདག་ནི་སོ་སོའི་སྐྱེ་བོ་འཆིང་བ་ཀུན་ལྡན་གྱི་རྨོངས་འཁྲུལ་མ་རིག་ར་རིའི་རང་གཟུགས་ལ་སོམ་ཉིའི་གནས་སུ་མཆིས་མོད། སྒྲིབ་བྲལ་ཡེ་ཤེས་གཟིགས་པའི་ཆོས་ཀྱི་སྤྱན་རབ་པདྨའི་འདབ་ལྟར་རྒྱས་པ་ཀུན་མཁྱེན་འཇམ་པའི་དབྱངས་བློ་གྲོས་རྒྱ་མཚོའི་སྤྱན་སྔར་རྗེ་གོང་མའི་ཕྱག་བྲིས་ཛེ་ཏཱ་རིའི་ལུགས་ཚེ་དཔག་མེད་ལྷ་དགུའི་རྒྱ་གཞུང་ཞིག་སོན་པའི་རྐྱེན་གྱིས་ལྷ་སྔགས་རྣམ་པ་འདྲ་བའི་སྒྲུབ་སྐོར་ཞིག་རིག་སྟོང་ཡེ་ཤེས་ཀྱི་འཆར་སྒོར་གསལ་བ། ཕྱིས་གུས་ཞབས་རྨོངས་པས་ཆོས་སྐོར་འདི་གཟིགས་འབུལ་ཞུས་པའི་ཚེ་གཅིག་ཏུ་འདུག་པས་ཕྲན་གང་ཟག་དམན་ཆེས་པ་མ་གཏོགས་ཡིད་ཆེས་ཀྱི་གསོས་སུ་འདུག་གསུངས་པ་དང༌། ཡང་ཟབ་རིག་འཛིན་ཚེ་སྒྲུབ་ལ་ཉམས་བཞེས་གནང་བས་རྟགས་མཚན་དགེ་བར་བྱུང་ཚུལ་ཕེབས་པས་རང་ཉིད་ཀྱང་རྩ་གསུམ་དགྱེས་པའི་བྱིན་རླབས་ཀྱི་སྣང་བས་ཟབ་གསང་གི་སྒོ་ཞིག་སྟེས་དབང་གིས་ཐོལ་བྱུང་དུ་རྙེད་པ་ཡིན་སྲིད་སྙམ་དུ་ངེས་པ་བརྟན་པར་གྱུར་པས་སྐལ་བཟང་མོས་ལྡན་དག་གིས་ཀྱང་ཡིད་ཆེས་ཀྱི་གསོས་སུ་འདིར་སྨྲས་པའོ། །མཆོག་གི་བསྟན་དང་སྟོན་པའི་ལེགས་གསུང་བཅུད། །རྒྱུ་མཚན་ཤེས་པའི་བློ་ལྡན་མདུན་ས་རུ། །རྣམ་དཔྱོད་སོར་མོས་བསྟར་བའི་དགའ་སྟོན་འདི། །མཁའ་སྤྱོད་ཀུན་དགའི་ཚལ་ནས་བླངས་པ་བཞིན། །ཅལ་སྒྲོག་འུད་ཀྱི་གླིང་བུ་མ་ལགས་ཤིང༌། །བརྫུན་རིས་ཆུ་གཉེར་བགྲང་བའི་ངལ་མིན་ཀྱང༌། །དེང་དུས་མི་ཤེས་སྐྱེ་བོའི་ཚོགས་པ་ལ། །གསེར་དང་ཞ་ཉེ་ནོར་བ་རང་གི་གཤིས། །འོན་ཀྱང་ལས་སྨོན་སྤུ་སྡུག་དར་བབ་ཅིང༌། །རྣམ་གྲོལ་མཁའ་ལ་རྩེན་འདོད་མདོངས་མཐའ་ཅན། །ལེགས་བཤད་དབྱར་གྱི་རྔ་གསང་འདིས་བསྐུལ་ཏེ། །དགེ་ལེགས་ཟློས་གར་བསྒྱུར་བའི་རྒྱུར་གྱུར་ཅིག །ཅེས་རྡོ་རྗེ་གསང་བའི་ཚིག་འཆི་མེད་རྡོ་རྗེའི་ཚེ་སྒྲུབ་པའི་གསང་ལམ་ཀུན་ཚང་ནོར་བུ་དབང་གི་རྒྱལ་པོའི་སྙིང་པོ་འདི་ལ་གདོད་ནས་དག་པའི་ཐུགས་བསྐྱེད་ཀྱིས་འབྲེལ་བའི་རིགས་ཀུན་ཁྱབ་བདག་འཇམ་དབྱངས་བླ་མ་པདྨ་ཡེ་ཤེས་རྡོ་རྗེའི་སྤྱན་སྔར་ཚུལ་འདིའི་སྨིན་གྲོལ་བདུད་རྩིའི་མཆོད་སྤྲིན་ཐོག་མར་ཕུལ་བའི་ཚེ་ཁྲིད་རིམ་འདི་ལྟར་ཡིད་ལ་འཆར་བས་སླད་ནས་ཡི་གེར་འགོད་འོས་པའི་བཀའ་ལུང་ནོར་བུའི་ཅོད་པན་ཚངས་གནས་སུ་བསྩལ་བ་དང༌། ལུང་ཟིན་ཆོས་ཀྱི་བདག་པོ་སངས་རྒྱས་མཉན་པ་མཆོག་གི་སྤྲུལ་པའི་སྐུ་ཀརྨ་བཤད་སྒྲུབ་བསྟན་པའི་ཉི་མས་ཀྱང་ཐུགས་དམ་ཉམས་བཞེས་སུ་གསུང་གིས་བསྐུལ་བ་ལྟར་རང་ཉིད་ཀྱིས་ཉམས་ལེན་གྱི་གཡར་ཁྲལ་སྐབས་མན་ངག་གི་གནད་གསང་ཅུང་ཟད་རིག་པའི་ཁུལ་གྱིས་རྡོ་རྗེའི་ལམ་མཆོག་འདི་ཉིད་ཀྱི་བཀའ་བབ་པདྨ་གར་གྱི་དབང་ཕྱུག་འོད་གསལ་མདོ་སྔགས་གླིང་པ་ཚེ་དབང་གྲུབ་པའི་རྡོ་རྗེ་མི་ཤིགས་གཡུང་དྲུང་རྩལ་གྱིས་ཡིད་འོང་ལྟ་ན་སྡུག་གི་སྨན་ལྗོངས་ཆོས་གླིང་སྒྲུབ་སྡེ་ངེས་དོན་འོད་གསལ་རིག་པའི་ཕོ་བྲང་དུ་རྫོགས་པའི་སངས་རྒྱས་ཞེ་ཆེན་པ་པདྨ་དགྱེས་པའི་དུས་ཆེན་གྱི་མཆོད་པ་ནས་དབུ་བརྩམས་ནས་རིམ་གྱིས་ཡི་གེར་བཏབ་པ་ཡེ་ཤེས་ཌཱ་ཀིའི་ཐུགས་ཐིག་ཏུ་མཆིས་ཕྱིར་སྐལ་ལྡན་ངེས་པའི་སྣོད་གྱུར་ལ་ལེགས་པར་བསྟན་ཞིང་སྣོད་མིན་ལ་ཁྱབ་བརྡལ་དུ་སྦྱིན་མི་རུང་བའི་གདམས་པ་འདིས་ཀྱང་རྒྱལ་བསྟན་འཛིན་པའི་སྐྱེས་བུ་རྣམས་ཀྱི་སྐུ་ཚེའི་དགའ་སྟོན་མཆོག་ཏུ་འཕེལ་བའི་རྟེན་འབྱུང་རྨད་དུ་བྱུང་བའི་དཔལ་ཁོ་ནར་གྱུར་ཅིག །བཀྲ་ཤིས་དགེ་ལེགས་འཕེལ། །འཆི་མེད་པདྨ་དགྱེས་པའི་བྱིན་རླབས་བདུད་རྩིའི་ཟིལ་མངར་སྙིང་ལ་སིམ། །ཟབ་གསང་རྡོ་རྗེའི་རྒྱུད་ཀྱི་གླིང་བུ་ཌཱ་ཀིའི་གཱིརྟིའི་ཐོས་འཛིན་སྙན། །བླ་མེད་གསང་མཆོག་དགའ་ཚལ་བསྙེན་པའི་རིག་འཛིན་གཞོན་ནུའི་བརྣག་པའི་ཆོས། །ལས་སྨོན་ཤིང་རྟས་མངོན་སུམ་སྣང་བའི་དཔལ་གྱི་དུམ་བུའི་འཛུམ་དཀར་རྨད། ཅེས་ཀྱང་སྨྲས་སོ། །ཨོཾ་སྭ་སྟི་ཤྲཱི་བི་ཛ་ཡནྟུ། སངས་རྒྱས་པདྨའི་ཐུགས་ཏིག་ཟབ་གསང་ཆོས། །རྡོ་རྗེའི་ཚེ་མཆོག་སྒྲུབ་པའི་ཁྲིད་ཀྱི་རིམ། །མདོ་སྔགས་བསྟན་འཛིན་ནོར་བུས་པར་བསྐྲུན་མཐུས། །བདག་སོགས་འཆི་མེད་རྡོ་རྗེའི་སྐུ་ཐོབ་ཤོག །ཅེས་དམ་པ་མཆོག་གི་བཀའ་ཡིས་བསྐུལ་བ་བཞིན་གར་དབང་མདོ་སྔགས་གླིང་པས་ཆེད་དུ་བརྗོད་པ་ཨཱ་ཡུ་ཏིཥྛནྟུ། སརྦ་མངྒ་ལཾ། དགེའོ།། །།

[edit]

@#/__/'chi med pad+ma tshe yi snying thig las/_rang byung pad+ma rdo rje tshe yi rgyud kyi khrid yig pad+ma dgyes pa'i zhal gyi bdud rtsi'i nying khu zhes bya ba bzhugs so// @#/__/na mo gu ru A yu de ba maN+Dal b+h+yaH_yongs grub rdo rje tshe yi bdud rtsi'i char/_/mtshan mchog rnga sgra'i dbyangs snyan kho nas kyang*/_/'bebs mdzad 'chi med pad+ma'i dkyil 'khor lha/_/mi phyed rig pa'i dpal ber dgyes par rol/_/mchog gi byin rlabs nyin byed kyis/_/legs phye rig pa'i pad+mo las/_/snang ba'i zab gsang sbrang rtsi'i bcud/_/skal bzang kun dga'i gsos su shar/_/'dir mchog thun dngos grub thams cad kyi rtsa ba/_rdo rje tshe yi rig 'dzin sgrub pa'i nye lam/_bla med nang rgyud yo ga gsum gyi dgongs pa dang gtso bor 'brel ba'i 'chi med pad+ma tshe yi snying thig gi zab don nyams su len pa'i smin khrid 'chad pa la gsum/_thog mar dge ba lo rgyus dang bcas pa'i gleng gzhi/_bar du dge ba rnal 'byor zab mo'i snying po dngos/_tha mar dge ba nyams len gyi spyi sdom 'bras bu dang bcas pa'o/__/dang po la gsum/_mtshan gyi don/_gleng gzhi/_babs lugs bshad pa'o/__/dang po ni/_gter gzhung las/_'chi med pad+ma tshe yi snying thig sogs nas/_ces bya ba:_zhes pa'i bar te/_a mA ra zhes pa'i sgra las drangs na 'chi ba med pa ste/_de yang kun 'byung srid pa'i chos thams cad skye 'gag gnas gsum du snang ba kun rdzob kyi bden pa dang*/_rang bzhin de las 'das pa'i skye 'gag gnas med kyi gshis lugs stong nyid kyi ngo bo don dam bden pa ste/_de gnyis kyang 'gal 'dur mi gnas pa rnam pa rgyu rkyen rten 'byung gi snang chas 'khor 'das snang srid kyi gnyis chos thams cad skye 'gag gnas pa ltar snang ba gang*/_ngo bo rnam kun mchog ldan gyi stong nyid gcig gi rang bzhin las gzhan du mi 'gyur zhing bri gang bral bas na/_snang stong de gnyis res 'jog ma yin par gdod nas zung 'jug gi gshis su lhun gyis grub pa'i phyir chos nyid cir yang ma yin pa chos can cir yang 'char ba ste/_des na kun rdzob 'khrul pa'i gzhan dbang ni chos yin pas 'khrul snang thams cad skye 'gag gnas gsum du shar phyir 'chi ba'i sgras 'gag pa ston pa'i shugs kyis skye gnas gnyis kyang mtshon pa ste/_mdor na 'khrul pa rgyu 'bras las 'das pa'i ye shes rang bzhin gdod ma'i gnas lugs gnyug ma yongs grub chen po'i gshis lugs ni dus gsum kun tu bri gang 'pho 'gyur med pas na kun rdzob rdzun chos kyis ma gos pa'i phyir dgag pa'i sgra sbyar te 'chi~M meda~M ces gsungs pa ni skabs 'di'i sgrub bya'i gzhi bstan pa ste/_de nyid lam du byed pa bskyed rdzogs kyi ting 'dzin yang sdug bsngal kun gyi nyes pa'i rnyog mas ma gos/_zab mo'i gnad don dang ldan pa'i thabs kyi sgo du ma'i 'dab ma yangs shing bkra_/don gyi gnas lugs la ma rmongs pa'i kha dog gsal/_dngos grub kyi sbrang rtsi'i zil mngar mi zad pa rtag tu 'jo/_skal bzang dbang rab kyi lang tsho can rnams la rgyan du 'os pa'i khyad chos rnams dang ldan pas na pa~Md+ma~M ni sgrub byed kyi lam dang*/_thabs de'i byed pas rang gi sgo gsum la gnas pa'i mi 'gyur rtag pa'i tshe chos nyid mi shigs pa/_'pho bcas thig le'i tshe dbu ma'i yar mar gyi sne'i dpyid thig gnyis sogs dwangs ma'i khams/_de dag kyang ye shes dang 'brel ba'i dga' bzhi'i 'pho ba/_rnam shes dang 'brel ba'i lus kyi zung sam bla/_de gnyis ka'i rten brten par gyur pa'i dbang rten kha dog dang bcas pa srog gi tshe ste rim pa bzhin zung 'jug_/rdzogs rim/_bskyed pa'i rnal 'byor rnam pa gsum gyi nus pas ltar snang srog gi ka ba skye 'chi'i bdud las rgyal/_'pho bcas thig le'i tshe rten dwangs ma rgyas pas 'chi med lang tsho'i mthu thob cing brten pa ye shes 'phel bas bde chen gyi dpyid du grub pa gzugs sku gnyis dang*/_mi 'gyur gnyug ma'i tshe ye shes chen po'i bcud len gyi chos dbyings rnam thar sgo gsum zag med ye shes lnga yi rang bzhin mngon du byed pas chos sku ste/_de gnyis sgrub pa'i 'bras bu yin pas rgyu ming 'bras bur btags te tshe~M zhes gsungs la/_dbye ba gang ltar bshad kyang paN chen ngag dbang grags pas/_'tsho ba las gzhan snying po ni/_/'ga' yang yod par ma mthong ste/_/de phyir myur du thabs mang pos/_/'chi ba bslu bar yang dag brtson/_/ces gsungs pa ltar mchog thun gyi dngos grub thams cad kyi rtsa ba/_gnas skabs dang mthar thug gi mngon mtho nges legs kyi dpal yon mtha' dag sgrub pa'i dgos pa du ma dang bcas shing*/_don gnyis yid bzhin du sgrub pa'i thabs kyi sgo rmad du byung ba ni rdo rje'i tshe sgrub pa gcig pur bsngags te o rgyan gyi slob dpon ma hA gu rus/_chos spyod bslab ldan rnal 'byor pa'i:_tshe ring ba ni dge ba ste:_'di dang phyi ma'i don 'grub cing:_dngos grub kun kyang mngon du 'gyur:_zhes gsungs/_de lta bu'i dgos pa dang ldan pa'i lam ni bka' gter du ma zhig bstan pa'i nang nas bskyed rdzogs kyi lam yongs su rdzogs pa/_rtsa ba gsum ka'i smin grol yan lag dang bcas pa tshang ba/_spros bcas spros med kyi ring 'tsho'i thabs kyi sgo thams cad gcig tu 'dus pa'i bdud rtsi'i nying khu lta bu yin pas snyinga~M thiga~M ces gsungs/_tshul de yang 'khrul rtog gi bsre bslad ma zhugs/_gzhan zer gyi ngag sgros ma bsdus/_rtog ge'i blo yis ma bcos pa dkyil 'khor gyi ston pa 'khor lo'i dbang phyug nyid kyi thugs ye shes chen po'i gsang mdzod las chos nyid rdo rje'i rang sgra dus gsum dus med du shar bas na ranga~M byunga~M*/_gleng gzhi'i skabs bzhin phun tshogs nges pa lnga ldan gyi ston 'khor thams cad sangs rgyas thams cad kyi gsung rdo rje'i bdag nyid pad+ma'i rigs gtso bor shar bas pa~Md+ma~M/_brda ma bcos/_don ma nor/_tshig ma 'khrul pa'i brjod bya rjod byed gnyis ka rdo rje gsang ba'i tshig shin tu zab cing rgya che bar snang bas rdo~M rje~M/_gzhung lam gyi don dang gtso bor 'brel ba'i dbang gis tshe~M yi~M rgyuda~M cesa~M bya~M ba~M bzhugs so:_zhes gsungs pa'o/__/gnyis pa ni/_'chi med rtsa ba gsum sogs nas/_'di gsungs so:_zhes gsungs te/_'od gsal byang chub sems kyi gnas lugs ye shes gsum ldan du gdod nas bzhugs pa'i dbyings rnam dag gi lha dam tshig sems dpa'/_zag med yon tan bye ba'i snying pos gang ba'i ye shes 'od gsal gyi bdag nyid la ye shes sems dpa'/_de gnyis dbyer med du gdod nas bzhugs pa'i rtsal las shar ba la mtshan ma'i lha zhes gsungs la/_don rtags de dang ldan pa'i lha la dbye na/_ngo bo byin rlabs dngos grub phrin las kyi rtsa bar gyur pa'i bla ma yi dam mkha' 'gro/_rnam pa zhi khro chags bral chags bcas gtso 'khor gyi dbye bas du ma shar yang*/_don la rtag gtsang bde ba bdag dam pa'i pha rol du phyin pa'i mi shigs mchog gi 'bras bu'i go 'phang la dgyes par rol pas skye 'chi 'khor chos kyis ma nongs pas na 'chi med rtsa ba gsum zhes phyag gi yul mchog la/_bka' yi sdud pa pos yul can ye shes kyi dgongs pas gnyis su med pa'i tshul gyi phyag mdzad pas zab mo'i rgyud 'byung bar shugs kyis grub pas gleng gzhir gtogs pa ste/_gter gzhung dngos kyis gsal bar bstan pa'i dus/_gnas/_ston pa/_'khor/_chos nges pa lnga ldan bshad pa'o/__/gsum pa ni/_rmad du byung ba'i tan+t+ra'i snying sogs nas/_sarba ar+tha sid+d+hi hU~M:_zhes gsham du gsal ba ltar sngon dang da lta chos 'di'i babs lugs smos pa ste de yang gleng gzhi'i don gyis rgyal ba dgongs brgyud/_babs lugs snga phyis rig 'dzin brda dang*/_gang zag snyan brgyud dngos su brtan cing*/_mkha' 'gro gtad rgya/_smon lam dbang bskur/_shog ser tshig brgyud gsum gter chos yin pa'i shugs las grub pa ste/_spyir gter chos zhes pa gang zag rtsa khams dwangs pa'i yid kyi cho 'phrul tsam du phal mo ches 'dzin par 'dug kyang sgra ji bzhin pa'i gter chos zhig yin na bstan bcos las kyang gter chos dka' ste/_bstan bcos tshad ma rtsom pa po rgyu gsum tshang*/_brtsam bya'i bstan bcos ngan pa drug bral tshul gsum dang ldan dgos na/_gter chos ni/_de las kyang yon tan che ba zhig med par ston mi nus pa'i rgyu mtshan yod de/_ye shes kyi mkha' 'gro la gnyer du gtad cing longs sku'i ston pa'i thugs kyi gsang mdzod rdo rje'i tshig gi rgyud rnams grangs mtha' mi mngon zhing*/_don gnas lnga rig pas kyang rtogs par mi nus pa'i rdo rje'i gsang ba gu h+ya g+har+b+ha dang*/_he badz+ra lta bu zhig_/ston pa rgyal kun gsang ba'i mdzod la dbang thob pa'i rig 'dzin gyi dbang phyug pad+ma 'byung gnas kyi don gyi dgongs pa rgyud lung man ngag gsum dang ldan pa'i chos/_tshig gsung rdo rje slob dpon gyi skur bzhengs pas rdo rje'i gsung 'khrul pa med pa/_rgyud ston pa de yis rang dang gnyis su med pa'i las can dag pa'i 'khor la thugs kyi brnag pa/_snying po'i man ngag_/snod dang 'tshams pas nyams su blang pas grub pa thob pa la mi bslu zhing bya sla la tshegs chung ba zhig gdams pas/_'khor gyis kyang dus de nyid nas rtags tshad kyi gdengs thob pas rig pa 'dzin pa'i go sar dngos su phyin te/_gnyis ka'i ye shes kyi gzigs pas tha ma'i gdul bya ris su ma bor bar smon lam gyi mthus da lta snang bas sangs rgyas nyid kyi zhal sgo la reg pa lta bu las/_thos bsam gyis nges pa rnyed pa'i lag rjes/_gzhung rnying dang go bstun pa'i chog khrigs tsam yang ma yin pa ste gu ru rin po ches/_rgyud lung man ngag nges pa'i don:_snying po las kyang snying po'i bcud:_thugs kyi thig ler rab bzhugs pa:_chos nyid rang sgrar snang bas na:_rgyud dang mi 'gal lung dang mthun:_man ngag myong ba khyad 'phags pa:_zhes gsungs pa lta bu'o/__/gnyis pa bar du dge ba rnal 'byor zab mo'i snying po nyams len dngos bshad pa la gzhung 'di nyid las/_'chi med gnyug ma rdo rje'i sku:_sgrub pa'i rgyu rkyen thabs kyi mchog:_'bras bu bcas pa bstan du gsol:_zhes gleng bslangs pa bzhin rgyu shes pa'i mtshan nyid gzhi lta ba'i gnas lugs gtan la phab/_rkyen 'jug pa'i lam bskyed rdzogs kyi lam zab dril kha tshang du bstan/_'bras bu yongs shes kyi don lam gyur gyi rig 'dzin bzhis bsdus te bshad pa ni snga 'gyur gyi rdo rje theg pa'i bshad srol thun min te snying po'i rgyud las/_shes 'jug mtshan nyid 'byor pa'i gzungs/_/'bras bu smin byed rgyu dang rkyen/_/zhes gsungs pa ste de ltar gsum las/_dang po gzhi la/_ngo bo chos nyid kyi gzhi dang chos can btags pa'i gzhi gnyis/_dang po ni/_dngos grub kun gyi snying po ni:sogs nas/_rtogs pas 'chi med mchog grub 'gyur:_zhes pa ste spyir rgyud las/_mi 'gyur rtag pa gnyug ma'i tshe/_/nyams shing 'pho ba thig le'i tshe/_/glo bur ltar snang srog gi tshe/_/zhes dbye ba gsum du gsungs pa'i dang po ste smra bsam brjod med chos nyid gnyug ma mi shigs pa'i thig le'i srog chen po ste de ni ngo bo ka dag gi ye shes dngos mtshan gang du'ang ma grub pas sangs rgyas kyi spyan gyis kyang bltar med pa'i gzhi med rtsa bral du gnas pa ste/_go ba'i tshig dang mtshon pa'i dpe kun las 'das pa/_blo'i spyod yul ma yin pa'i rang bzhin stong pa rnam kun mchog ldan gyi ye shes te/_des ni brtan g.yo 'khor 'das kun la khyab cing thams cad kyi srog gi snying por gyur kyang yod med snang stong yin min gang gi'ang phyogs su ma lhung ba nam mkha' la snod bcud kyi 'jig rten brten pa med pa'i tshul gyis brten te/_'khor 'das gang gi yang phyogs su ma lhung ba'i ngo bo/_rang bzhin lhun grub kyi chas gzhal na zag med kyi chos thams cad nyi ma dang 'od zer bzhin lhun gyis rdzogs pa'i rang bzhin/_glo bur gyi dri mas gzhar yang ma gos pa'i 'od gsal ba'i ye shes zung 'jug mthar thug gi bzhugs tshul sgra ji bzhin du rtogs na skye 'chi 'pho 'gyur yongs ye mi mnga' ba'i dbyings su btsan sa zin pas 'khrul chos thams cad rang sar dag pas 'chi med rtag pa'i go 'phang mngon du byed nus pa'o/__/gnyis pa ni/_rtsal las shar ba rig pa'i blo:sogs nas/_le'u dang po'o:_zhes pa ste gzhi gnyug ma'i ye shes kyi tshe la gdod nas 'pho 'gyur bral yang gzhi snang ye shes rig pa'i rang rtsal cir yang 'char ba las ye shes kyi rtsa rlung thig le'i cha thams cad la sgrib byed las kyi rtsa rlung thig le las smin pa'i sgo gsum rten brten par snang ste de dag gi byed las kyis yul sems gzung 'dzin du zhen pa'i 'brel bas phan tshun 'dod pa'i tshor bas nyams shing mi brtan pa 'pho ba'i rten kun rdzob rdzas kyi thig le khams dkar dmar te/_de la brten pa'i rlung sems bcas dwangs ma ye shes kyi stobs nyams shing mi mngon par 'gyur ba las na rga 'chi ba'i gnas skabs 'byung bas srid pa'i sdug bsngal nyams su myong la/_de dag gi rten mi ldan pa'i 'du byed lus kyi ngo bo 'byung lnga bde ba dang bcas pa'i khams drug 'dus pa rags pa'i gzugs can te bsgrub gzhi de rnams la ye shes kyi stobs 'phel zhing sgrib pa'i tshogs sel phyir dngos brgyud nas bshad pa'i srid zhi'i bcud len gyi nus pas dwangs ma'i rtsa rlung thig le'i khams rgyas shing brtan pas tshe dang lus kyi bcud len grub nas skye 'chi'i 'khrul snang rgyu 'bras dang bcas pa dag ste mi 'gyur rtag brtan rdo rje sems dpa' 'chi med rtag pa 'bras bu'i go 'phang dam pa mngon du byed nus pa ste/_mdor na gzhi gzhi snang dang bcas pas 'khrul grol gyi sgo bshad pa'i tshul gyis tshe yi rnam gzhag gsum ga bstan pa'o/__/gnyis pa rkyen 'jug pa'i lam la byang gter las/_gsang ba tshe yi dwangs ma de:_bskyed rim dbang dang rlung gis gso:_zhes pa ltar bskyed rdzogs kyi rnal 'byor la/_sngon 'gro dbang dang dam tshig_/dngos gzhi bskyed rdzogs kyi rnam dbye/_rjes lam gyi mdo chings thun mong du gdams pa'o/__/dang po la/_smin par byed pa dbang*/_dbang srog 'dzin pa dam tshig gi rnam gzhag go__/dang po ni/_de nas gnyis su med pa'i sogs nas/_le'u ste gnyis pa'o:_zhes pa'i bar te gzhung 'di nyid las/_gzhi la gnas pa nus pa'i dbang:_sad byed rgyu yi dbang bskur te:_sogs kyis gtso bor bstan pa ltar don ye shes kyi dbang gdod nas gnas pa'i sku bzhi'i sa bon bde gshegs snying po'i rgyud du bzhugs pa'i nus pa sad pa'i phyir kun rdzob brda yi dbang bskur bya yul slob ma'i dbang po tha ma 'bring mchog rab kyi snod can la/_byed pa po slob dpon sngags kyi de nyid lnga la rang byan tshud pas/_bya ba'i las sa chog lha bum slob ma lhag gnas thig tshon rgyan bkod dkyil 'khor sgrub mchod sngon 'gros bdag nyid 'jug ste gnang ba nod pas/_phyi mtshan ma nang ye shes kyi dkyil 'khor du 'jug pa'i rgyud sbyangs te/_byed pa rdzas sngags ting 'dzin gsum tshogs kyi cho gas phan nus zab mo'i dbang bskur bas/_bya ba slob ma'i sgo gsum phra rags kyi dri ma sbyangs shing ye shes rang gnas kyi nus pa'i gsos dngos brgyud ci rigs nas thebs pas rgyud dag nus pa rdzogs pa ste/_'dir rtsa ba nang sgrub kyi dbang chen sta gon dngos gzhi/_khyer bde'i don dbang*/_yan lag phyi sgrub kyi khrus dbang*/_gsang sgrub mkha' 'gro'i brda dbang*/_yang zab rig 'dzin bla ma'i dbang bzhi/_bar chad sel ba dbang gi rgyal po'i rjes gnang*/_gnyer 'dzin DA ki'i bka' gtad bcas bzhugs pa'i cho ga zhib mo kun gzigs 'jam mgon bla ma'i dbang gi cho ga ltar shes par bya dgos shing grub pa lags/_gnyis pa ni/_dbang srog rgyud la 'dzin pa ni:sogs nas/_le'u ste gsum pa'o:_zhes pa ste ngo bo bsrung bya'i don las mi 'da' ba'i sems sa bon dang bcas pa/_nges tshig ji ltar dam bcas pa'i tshig las mi 'da' bas sngags kyi 'dul ba'am rdo rje theg pa'i yal gam/_dbye na rtsa ba yan lag spyi dang khyad par lhag pa'am 'dir bshad pa'i phyi nang gsang ba de kho na'i dam tshig_/don dam dang kun rdzob kyi lta bas srung tshul/_phan yon/_nyes dmigs bcas shes par byas te blang dor la 'bad pas dngos grub dka' ba med par thob pa'i thabs kyi khyad par rmad du byung ba'o/__/gnyis pa dngos gzhi bskyed rdzogs kyi rnam dbye rgyas par bshad pa la/_kun rdzob 'jig rten skye ba'i rim pa dang sbyar te bcos shing brtag pa rjes dpag gi lha'i rnal 'byor bskyed pa'i rim pa dang*/_don dam 'jig rten 'gag pa'i rim pa dang sbyar te bcos min gyi lha sku rnam par mi rtog pa'i ye shes rnal 'byor du bya ba mngon sum pa'i lha'i rnal 'byor rdzogs pa'i rim pa bshad pa'o/__/dang po la'ang gzhung las/_thabs la phyi nang gsang ba dang:_bla na med pa'i sgrub tshul bzhi:_zhes pa ltar phyi rgyud sde 'og ma'i dgongs pa ltar tshe 'od dpag med lha dgu'i dkyil 'khor du bsag sbyong snying por dril ba/_nang ma hA yo ga dang mthun par bla ma longs sku tshe dpag med lha bcu bdun ma'i bsnyen sgrub las sbyor dang bcas pa/_gsang ba rdzogs rim gyi sngon 'gro dbyings phyug man+da ra rigs lnga'i mkha' 'gro'i bskyed bzlas/_bla med yang zab rig 'dzin bla ma'i tshe sgrub he ru ka 'dus pa'i phrin las bzhi las/_dang po la'ang*/_lam spyi'i sngon 'gro dang*/_phyi sgrub dngos so/_/dang po ni/_rig pa'i sems dpas sogs nas/_gcig car brtson:_ces pa ste 'khor ba'i rgyu 'bras mtha' dag gi mtshang shes pas de las thar 'dod kyi blo bcos min du rgyud la skye ba'i nges 'byung gi bsam pa bskyed phyir chos kyi rten dal 'byor rnyed dka' tshul/_chos la 'jug pa'i rkyen mi rtag par bsgom pa/_chos kyi don rgyu 'bras bslu med la nges shes bskyed pa/_chos kyi 'bras bu 'khor ba sdug bsngal du shes pas thar pa rtse gcig tu sgrub pa'i blo rnams khrid rim spyi ltar bshad cing nyams su blang bar bya'o/__/gnyis pa ni/_gnas khang bkod pas brgyan sogs nas/_le'u ste bzhi pa'o:_zhes pa ste 'di ni 'phags yul grub pa'i slob dpon chen po dze tA ri dgra las rnam par rgyal ba'i lugs kyi tshe dpag med lha dgu'i sgrub thabs rgya gzhung du grags pa'i dgongs pa dang chu bo gcig tu 'dres pa ste/_spyir sangs rgyas kyi phrin las gdul bya'i yul la 'jug pa'i sgo'i gtso bo ni gsung gi gsang ba ste/_gsung gis 'gro la thar pa'i lam ston cing blang dor thams cad yongs su snang bar byed/_sku yi snang ba mi 'jug pa'i gdul bya'i don kyang gsung kho nas mdzad/_sangs rgyas kyi ye shes zab mo'i nus pa da lta so skye'i rgyud la 'dren pa'i nus pa'ang gsung la mnga'/_gzungs rigs gsang sngags thams cad kyang gsung yin pas de re re'i bzlas pa'i phan yon kyang bsam gyis mi khyab/_gsung de gdul bya'i ngor mtshan ma'i lha skur bzhengs pa gsung pad+ma'i rigs kyi khyab bdag ni 'od dpag tu med pa yin pas gang de bsgrub pas byin rlabs dang thugs rje lhag par myur ba ste/_thun mong gi mdzad pa dang sgo bstun na sangs rgyas 'od dpag med pas sngon thugs bskyed de smon lam chen po brgya phrag btab pas tshogs gnyis rdzogs smin sbyangs pa mngon du gyur te/_nub phyogs sangs rgyas kyi zhing khams bde ba can snod bcud rang byung ye shes kyi bkod pa bsam mi khyab pa na da lta mngon sum du sangs rgyas te tshe dang ye shes 'od snang dpag du med pa'i 'dren par 'tsho zhing gzhes te bzhugs pas/_zhing dang sku yi yon tan mdo rgyud nas gsungs pa bsam ste dad pa dang spro ba bskyed/_sangs rgyas de'i mtshan tsam thos pas kyang dus min gyi 'chi ba'i 'jigs pa gtso bor gyur pa'i nyes pa mtha' dag skyob pa'i phan yon dran pas mchod pa 'bul zhing phyag bya/_thugs rgyud bskul ba'i phyir gzungs sngags bzla ba dang*/_thun mtshams su lha 'di'i mdo rgyud bklag pa la brtson pas gnas skabs su tshe dang bsod nams 'phel ba dang*/_zhing sbyong gi cho ga yang zhar byung du tshang bas/_mthar thug 'chi med bde ldan mgon po'i go 'phang mngon du byed pa'i thabs mchog tu zab pas brtson par gces shing*/_zhar byung 'gal rkyen bsal ba'i khrus dang*/_mthun rkyen spel ba'i mchod sdong bzhengs pa dang mchod pa sogs ci nus skabs dang sbyar te nyams su len dgos so/__/gnyis pa nang sgrub kyi cho ga la bsnyen sgrub yan lag bzhi'am/_bsnyen sgrub las gsum du gsungs pas skabs 'dir phyi ma ltar 'brel che bas bshad pa la/_dang po bskyed rim phyag rgya gcig pa bsnyen pa'i rnal 'byor ni/_khyad par rgyun gyi ting nge 'dzin:sogs nas/_snying po'o:_sa ma ya:_zhes 'og nas 'byung ba ste spyir snga 'gyur bka' ma sgyu 'phrul rtsa rgyud kyi dgongs pa ltar lam yongs rdzogs kyi dbang du byas te las dang po'i rnal 'byor bskyed rim phyag rgya gcig pa'i ting nge 'dzin mthar phyin dgos pas sngon du bshad pa ste/_bskyed rim la sgom tshul gyi dbye bas bzhi las spros med skad cig dran rdzogs kyi ting 'dzin sgom sla ba gtso bor bton nas gsungs pa ste/_rgyu ting 'dzin gsum/_'bras bu rten brten pa'i lha bsgoms te gsal brtan dag gsum gyi bskyed rim la rtse gcig tu bslabs pas nyams lnga rim gyis 'char/_bying rgod kyi skyon bcos pa'i phyir lha lam du slong ba sogs rnam pa drug gi rnal 'byor gnad du bsnun pas gegs bsal zhing bogs 'byin bya/_des skyo ba'am skabs su thugs dam bskul phyir bzlas pa'ang bya zhing*/_grangs bsnyen byed na rtsa sngags 'bum phrag gsum/_gzungs ring 'bum phrag gcig kha skong dang bcas pa bzla bar gsungs so/__/gnyis pa phyag rgya spros bcas sgrub pa'i rim pa la bskyed bzlas gnyis las/_dang po ni/_gnyis pa nang ltar sgrub pa la:sogs nas/_bstod par bgyi:_zhes pa ste rgyu ting 'dzin gsum gyis khog phub/_'bras bu rten dang brten pa'i lha bskyed pa bcas bskyed rim spyi ltar spros te shes par bya ba las ma smos la las kyi rim pa rnams kyang gzhan ltar shes dgos so/__/gnyis pa la bsnyen sgrub las gsum las/_dang po ni/_gsang sngags bzlas pa'i ting 'dzin gyis:sogs nas/_gdon mi za:_zhes pa ste bskyed rim tshul bzhin sgom pa'i dbang du byas na nang sgrub 'di bsnyen sgrub las gsum gyi sgrub pa yin kyang*/_deng sang gi mos sgom gtso bor bton pa'i dbang du byas na/_sngar bshad pa'i yang zab snying po'i bskyed bzlas/_rgyun gyi rnal 'byor gtso bo yin pas phyi nang gsang ba chig dril gyi zab tig ste/_'di kho na la'ang bsnyen sgrub las gsum gsungs pas thog mar dang po bsnyen pa ni/_ra ba bzhi'i yar ngo'i gza' skar sbyor byed dge ba'i snga char dben pa'i gnas su gzhung mthun rten gyi drung bsnyen pa'i skabs dkyil 'khor med kyang rung bas sman raka gtor ma nyer spyod dang bcas pa bshams/_brgyud 'debs nas brtsam las byang chog khrigs can ltar dkar gtor/_bgegs gtor bsngos rjes sgo drung du tho brtsigs par rgyal chen tho 'dzugs spyi ltar byas rjes/_srung mtshams bcad pa nas bsnyen pa'i bar mthar chags su btang*/_phreng ba dang ngag byin rlabs byas la/_dmigs gnad ni/_rang gtso bo'i thugs kar gser gyi rdo rje rgya gram steng nyi zla'i gwa'u kha sbyor gyi nang du hrIHmthar sngags phreng dmar pos bskor ba'i 'od lnga ldan gyis dag pa'i zhing gi rgyal ba sras dang bcas pa la bde ba chen po'i mnyes mchod phul bas tshogs gnyis yongs su rdzogs/_de thams cad kyi sku gsung thugs yon tan phrin las kyi byin rlabs bdud rtsi'i 'od zer kha dog lnga ldan du char ltar brul nas byung ba gnas lngar thim pas lus khra ltem gyis gang*/_slar yang sngags phreng sa bon dang bcas pa'i 'od kyis ma dag pa'i snod bcud thams cad la khyab/_skye 'chi'i sdug bsngal rgyu 'bras dang bcas pa sbyangs te dag pa lha yi 'khor lor sad/_phyi 'byung ba/_nang skye 'gro'i tshe dpal thams cad kyang sngar bzhin bsdus nas thim pas ma dag pa'i sgo gsum mtha' dag sbyangs te gzhom med rdo rje'i gsang ba grub pa'i mos pas bsnyen bzlas bya ba ste/_'dir shes par bya ba'i gnad kyang gzhung las/_gsang sngags bzlas pa'i ting 'dzin gyis:_dngos grub gnad la nges par bskul/_zhes pa ltar sngags bzla ba'i tshe dmigs pa'i ting 'dzin dang ldan na nus pa lhag par myur zhing der ma zad sangs rgyas kyi ye shes gsang ba gsum ga gcig nyid du mar 'phrul pa'i ye shes las tha dad du ma dmigs pa'i phyir lha sngags ye shes ro gcig pa bzhin bzlas pa'i skabs su yang phyag rgya sngags dang ting 'dzin rnams chig dril du bya dgos shing 'gal 'dur mi gnas pa'i gnad ma shes na dag dran gyi snying po lha dang gzhal yas kyi rten brten pa thams cad sangs rgyas kyi ye shes 'ba' zhig gi rol pa las ma 'das pa'i tshul bsgom mi nus shing*/_sngags kyang gsang snying las/_dngos med yi ge'i rang bzhin sems/_/bdag med mtha' bral mi dmigs kyang*/_/dbyibs dang kha dog ming tshogs kyi/_/rol pa cir yang sprul zhing ston/_/ces pa ltar shes pa ni gces so/__/tshul de lta bus bzlas grangs gzhung ltar ma grub bar dang*/_thun las ldang ba na las gzhung gi tshe 'gugs dang dbyangs gsal rten snying bzla zhing*/_mchod bstod yig brgya dang nongs bshags nas brtsams bsdu ldang bya ba las sgrub pa dang las sbyor gnyis mi dgos so/__/gnyis pa sgrub pa ni/_bsnyen pa'i rnal 'byor las rung bas:sogs nas/_dngos grub thob:_ces pa ste bsnyen bzlas rdzogs pa'i snga char dngos grub mdor bsdus blangs la ras bris kyi dkyil 'khor bting*/_bum pa/_lha tsaka_/tshe 'brang*/_tshe ril chang sogs dbang gi skabs ltar sgrub rdzas rnams kyang bkram/_ras bris ma 'byor na tshom bu lha grangs kyis kyang rung*/_stabs bde phyir bsnyen pa'i dus nas dkyil 'khor dang tshom bu 'du bgyis kyang chog_/gang ltar yang nyin de ga'i phyi thun nas sgrub pa'i dbu tshugs par bya/_las byang gi bzlas pa'i dbur dzapa khang dbye/_bsnyen dmigs gsal btab la bzlas pa khyug tsam zin pa dang sgrub pa'i dzapa dgongs gtso bor bya ste/_dmigs pa'i khyad par rigs lnga so so'i thugs kar rang rang gi sa bon sngags phreng gis bskor ba'i spro bsdus sku gsung thugs yon tan phrin las kyi ye shes rig lnga'i tshe/_'byung lnga'i dwangs ma/_'gro ba rgyud lnga'i bla tshe srog gi snying po bsdu bstim dang*/_snang srid ye shes phyag rgya'i 'khor lor sad pas kun kyang dzapa sgra sgrogs par bsam la bzlas grangs bskyal/_thun mthar tshe gzungs kyang cung zad bzla/_grangs bsnyen skabs spro na gzungs kyang 'bum phrag gcig bzla/_las sbyor mi dgos/_thun las ldang ba na tshe 'gugs dbyangs gsal rten snying mchod bstod nongs bshags sogs la 'jug_/sgrub pa'i skabs 'dir mchod pa tshogs skong sogs ji tsam rgyas bzhin legs pas shes par bya'o/__/gsum pa las sbyor ni/_bsnyen dang sgrub pa'i lha sogs nas/_sid+d+hi blang:_zhes pa ste sgrub pa zin pa dang*/_las sbyor gyi bzlas pa sbyar/_las so so'i sham can khri re bzla/_grangs rdzogs pa na dngos grub blang ba sogs spyi ltar bya/_de yang bsnyen sgrub las gsum gyi thog mtha' dang*/_yar mar gyi tshes bcu sogs dus bzang rnams dang*/_sgrub pa'i skabs nyin bzhin tshogs mchod grub na legs/_rkyen sel lta bur zla gcig tsam du bsnyen sgrub byed na bsnyen pa bdun gsum/_sgrub pa bdun gcig_/las sbyor dang gtang rag tshogs skong bcas zhag gsum du bgyis pas 'brel 'jog tu 'gyur/_rgyun gyi bskyed rim snying po'i steng kho nar bsnyen bzlas grangs tshad gzhung ltar byas kyang rung zhing*/_de'i tshe las byang rgyun khyer kho bos bris par cho ga'i yan lag cung zad rgyas na legs pas kun gzigs bla ma'i chog khrigs nang sgrub kyi gshom ltar bya'o/__/sgrub pa rgyas pa tshogs sgrub bya ba sngon 'gro sta gon nas brtsam/_mjug dngos grub len pa'i bar sgrub khog spyi'i chings dang bstun khor yug gsung mi chad pa'i bzlas pa bcas bya ba'i khyad par ro/__/gsum pa las sbyor ni/_bsnyen dang sgrub pa las rung nas:sogs nas/_le'u ste bcu pa'o:_zhes pa'i bar te/_de yang las kyi tshogs bya ba'i yul 'khor 'das kyi bya ba thams cad sgo gsum dang rten cing 'brel ba bzhin/_byed pa'i phrin las sangs rgyas rnams thabs mkhas kyi spyod yul bsam mi khyab pas don gnyis kyi 'dod pa sgrub pa'i sgo thams cad gsang ba mi zad rgyan 'khor lnga dang 'brel bar ston pas/_byed tshul nor bu rin po che gcig gis yid kyi 'dod pa thams cad rjes su 'jo ba dang mtshungs par sku gsung thugs yon tan phrin las dngos gcig du mar shar ba'i cho 'phrul gyis/_byed pa'i thabs rdzas sngags ting 'dzin sum 'brel du ston pa yin la/_ji ltar byed tshul thog mar rang nyid bsnyen sgrub lta dgongs kyi gdengs dang ma ldan na las tshogs mthar phyin par mi nus pas rgyas par spro na phyi nang gsang ba/_rtsa ba yan lag gi sgrub thabs thams cad dang*/_de tsam ma grub na'ang nang sgrub kyi bsnyen sgrub las gsum grub pa zhig nges par dgos shing*/_las kyi dbye ba/_sku phyag rgya/_gsung rig pa/_thugs chos sku'i rten/_yon tan bcud len/_phrin las me rlung gi sbyor ba/_'gal rkyen tshar gcod pa dang 'brel ba'i tshe bdud bzlog mdos dang*/_pad+ma drag po rta mchog rol pa'i bskyed bzlas/_mthun rkyen rjes 'dzin gyi yan lag bla tshe bslu ba'i cho ga dang*/_'chi bdag gto chen rnams dang*/_gsang ba mi zad rgyan 'khor gyi las tshogs rnams nang sgrub kyi yan lag rigs lnga bye brag gi sgos sgrub dang 'brel bar nyams su len dgos pas gzhan du shes la/_dgos pa tshe'i mi mthun pa'i phyogs thams cad zhi zhing*/_mthun rkyen gong 'phel du bgyis pas dpyid sos char gyis bran pa'i dbyar skyes bzhin rdo rje tshe yi rig 'dzin bde blag tu 'grub pa ni nges pa'o/__/gsum pa gsang ba rdzogs rim gyi sngon 'gro dbyings phyugs man+da ra rigs lnga'i mkha' 'gro'i bskyed bzlas ni/_dag pa ye shes rtsa thig rlung:sogs nas/_le'u ste bcu gcig pa'o:_zhes pa ste spyir rdo rje'i lus la brten pa rtsa rlung thig le'i gnad 'ching ba rdzogs rim ste thig le'i khams grub pa tsam nas bcud dwangs ma dkyi~Ml/_rang byung gi snod 'kho~Mr gyi rang bzhin shugs kyis grub pas rtog pas gsar du sgro btags nas bcos mar byas pa min zhing*/_lhun grub lus kyi dkyil 'khor dang mthun par bsgom pa snga ma las zab pa'i phyir zab mo'i bskyed rim zhes grags/_de yang rtsa rlung thig le'i khams thams cad kyang dbu ma chos nyid kyi srog tu dag dgos shing*/_de'i rkyen bde gsal mi rtog pa'i nyams len mtha' dag gi gzhi lte ba'i tsaN+Da li 'bar ba'i byed pas bya dgos pas de ni shes rab kyi bdag nyid yum du gnas la/_de thams cad kyi nges don rnam thar sgo gsum rdo rje btsun mo'i chu skyes kyi rgya las ma 'das pas na bskyed rim kyang de dag dang mthun par yum bka' lhan cig skyes ma rigs lnga'i rnal 'byor ston pas lhag par yang zab pa'i phyir gsang sgrub tu bzhag pa ste/_gnad de ldan gyi bskyed rim gyi skabs rang lus gzhal yas kyi nang tsaN+Da li'i chos 'byung dbus dpyid thig gi ngo bo man+da ra/_yas bab mas brtan gyi dga' bzhi'i 'khor brgyad/_bde chen gyi dwangs ma rigs bdag bla ma/_kun kyang sems nyid lhan skyes kyi rol rtsed gcig tu shes pas gzhung ltar nyams su blang ngo*/__/bzhi pa de kho na nyid bla med yang zab rig 'dzin bla ma he ru ka 'dus pa'i phrin las ni/_yang zab rig 'dzin tshe yi sgrub pa bzhugs:_sogs gud du phyung ba ltar te/_thog mar rgyud sbyong ba bsag sbyang gi rim pa gtso bor bton pa'i phyi sgrub ni rgyal po la snyan gsan dbab pa lta bu bsnyen pa'i yan lag tu dang por bstan/_de nas spros pa can kun btags kyi zhen pa sbyang phyir ma hA dang mthun pa'i bsnyen sgrub las gsum rgyas par ston pa nang sgrub ni yul gnyan po la 'dris [*]sdeb pa lta bu nye bsnyen gyi yan lag__/spros med rdo rje'i lus kyi rnal 'byor la gnad du bsnun pas gzhan dbang rlung sems kyi mdud pa a wa d+hU tir bshig phyir snying po'i rnal 'byor a nu dang mthun par ston pa gsang sgrub ni gong ma mnyes nas rang gi 'dod don sgrub pa lta bu sgrub pa'i yan lag_/dbang rab rnam kun mchog ldan gyi dbyings dang sku gsum 'od gsal rig pa'i rang bzhin gnyis med mnyam pa chen po yongs grub rtag pa rdo rje'i srog sgrub phyir mngon sum lam byed mos gus kyi rnal 'byor yang zab rig 'dzin bla ma'i sgrub thabs te rang nyid kyang chen po'i go sar 'khod nas dbang bsgyur ba lta bu sgrub pa chen po'i yan lag tu bstan pa ste/_bla ma'i rnal 'byor kho na nyams su blang pas mdo sngags kyi lam gnad tshang ba/_byin rlabs dngos grub phrin las kyi sgo rtsom pa la lam myur ba/_gegs sogs phyi nang gi bar chad med pa/_thabs zab mo'i gseng lam thun min yin pas bskyed rdzogs kun la med du mi rung ba yin pa'i tshul shes pas rang gzhung ltar nyams len bya'o/__/gnyis pa don dam 'jig rten 'gags pa'i rim pa dang sbyar te mngon sum lam byed rdzogs rim gyi rnal 'byor zab mos rdo rje'i srog sgrub pa'i man ngag bshad pa la/_rtsol bcas rang gzhan gyi rdo rje'i lus la byed bcing gi thabs lam dang*/_rtsol med gnyug ma mi shigs pa'i thig le la brten pa'i grol lam bstan pa'o/__/dang po la'ang rang lus thabs ldan gyi man ngag dang*/_gzhan lus pho nya'i myur lam bshad pa'o/__/dang po la gsum/_mi rtog chos sku'i nyams len/_bde chen longs sku'i rtsal sbyang*/_gsal stong sprul sku'i bogs 'byin no/__/dang po la gnyis/_zab lam phra thig gi rnal 'byor gyis rlung las rung du sgrub/_dbyings phyug nam mkha'i rnal 'byor gyis snang ba'i bden zhen bshig pa'o/__/dang po ni/_de nas snying po'i ting 'dzin gyis:sogs nas/_rnal 'byor te:_zhes pa ste snying po'i rgyud las/_sa chu spyan dang mA ma ki_/me rlung gos dkar dam tshig sgrol/_/nam mkha' dbyings kyi dbang phyug ma/_/srid gsum ye nas sangs rgyas zhing*/_/zhes gsungs pa ltar phyi nang gzhan gsum gyi 'jig rten thams cad 'byung ba lngas bsdus shing*/_'byung lnga nyid kyang dag pa yum lnga'i ye shes kyi mkha' ru gdod nas gnas la/_mkha' ni bde ba'i 'byung gnas/_kun kyang de las mi 'da' ba rnam thar gsum gyi chos su gnas pa ste/_de'i don rtogs na rnam kun mchog ldan bde chen gyi ye shes gcig pu du ma'i gar du bsgyur ba'i cho 'phrul tsam las skye 'chi zhes pa dngos mtshan du ma grub pas/_'khor ba ye dag myang 'das lhun rdzogs kyi dgongs pa'i gdeng thob pa yin la/_ma rtogs pa'i 'gro la 'byung bzhi'i byer sdud kyis phyi yi snod chags 'jig_/nang gi sems can skye shi/_gsang ba rlung sems kyi tshogs pa 'du 'bral sna tshogs su ston pas cir yang snang zhing sna tshogs su 'char ba ste/_rdo rje theg pa'i gnad kyis srog nas 'dzin pas dag pa'i gnas tshul dang mthun par bde ba chen por lam du byas pas ma dag pa'i snang ba nub cing don gyi yin lugs mngon du 'gyur ba'i thabs kyi gseng lam snga ma rnams las kyang ches zab mo zhig ste sngar snang bcas phyi~M yi 'jig rten gyi snod bcud sdug kun rang rgyud pa'i bden 'dzin/_bde gshegs yab lnga gcig dril gyi bskyed rim gtso bor bton pas sbyang pa yin la/_'dir rang snang stong pa'i rang gzugs nanga~M lus kyi 'jig rten gyi 'khrul pa/_'byung lnga dag pa'i dbyings phyug yum lnga'i thabs kyi rnal 'byor la gnad du bsnun pas rnam med stong nyid kyi rang gzugs rnam bcas bde chen rdul bral mkha' khyab nam mkha'i rdo rje'i lang tsho sgrub pas/_gzhana~M du de kho na nyid zung 'jug skye 'chi'i zug rngu kun bral ye shes kyi sku 'od gsal bde chen 'chi med rtag pa'i go 'phang sgrub pa'i rdo rje nang gi rnal 'byor gyi man ngag thun min te/_bsgrub gzhi phra ba'i lus ngag yid gsum rdo rje gsum gyi rigs drug gi khyab bdag sku gsung thugs rdo rje mnyam pa nyid du dag cing gnas pas don la phyi nang gzhan gsum gnyis med lhan skyes kyi phyag rgya chen po'i nges gsang gcig tu gnas kyang*/_de'i rang mdangs kun rdzob snang ngo'i cha nas khu rdul rlung gi rten rtsa gsum/_rlung sems 'jug pa gcig pas sems kyi rten kyang yin la/_de las rags snang lus ngag sems gsum rtsa rlung thig le'i chos grub pas sgo gsum gyi 'jig rten rang byung bkod pa ste/_rgyu rkyen gyi rten 'byung gcig tu tshogs pa las skye ba/_de so sor gyes pa las 'chi ba ste dar gud sna tshogs 'byung bas las nyon gyi tshogs bskrun kyang*/_mchog dbang gong ma gsum dang 'brel ba'i zab lam gyi byed bcing gi ye shes kyis rtsa rlung thig le la gnad du bsnun pas/_'khrul pa'i rtsa rlung khams kyi snyigs ma glo bur med snang gi sgrib pa dbu ma'i sbubs su dag nas/_khyab bya drug pa'i rigs kyi rdo rje'i gsang ba mi zad pa'i khams la khyab byed mchog tu mi 'gyur bde chen gyis yongs su gang ba'i zag med rdo rje'i srog chen po sgrub nus pa ste/_'khrul snang de thams cad kyi g.yo sdud ni rlung kho nas byed pas brten pa sems kyi chos kyang rig rtsal rlung gis yur ba las snang ba je rags su shar nas gzung 'dzin gyi gnyis rtog grub cing*/_rten lus kyang 'phel 'grib kyi bya ba rlung gis byed/_phyi'i snod kyi 'byung lnga'i cho 'phrul kyang rlung gis gtso bor bskul ba ni gso rig las nad kyi sna 'dren rjes gcod thams cad rlung yin par gsungs pa lta bu ste/_des na thog mar kun gyi byed po thabs kyis lam du gzhug pas gzhan rnams zhar byung du dag par dgongs nas dam tshig sgrol ma'i rnal 'byor dang por bstan par mngon la/_skye 'chi rang mtshan du zhen pa'i rgyu gang las byung na bden 'dzin las byung*/_bden par 'dzin yul ni lus ngag sems kyi tshogs pa ste dpyad na lus ni sha rus khrag sogs gdos bcas bem po'i chos/_ngag ni rlung sems kyi sgra glo bur du snang ba rnga yi sgra lta bu/_sems ni rtog pa'i phreng ba rig rig tur tur du g.yo yang don la gang du'ang mi gnas pa rlung lta bu ste/_mdor na de thams cad sil bur bsil na gcig kyang ma grub par gtan la phebs pas rten 'byung gi snang cha tsam las med na 'dzin yul ma dmigs pa'i 'dzin pa zhig gang las 'byung*/_ma brtags nyams dga' sgyu ma tsam du nges shes kyi gding ma rnyed bar du dpyad/_gding rnyed pa na de gar klod cing bzhag pas bden gnyis zung 'jug gi myong ba bcos min rgyud la skyes pa ni/_rdzogs rim chos drug gi skabs su bshad pa'i mdo dang mthun pa ma dag pa'i sgyu lus te/_de la goms nas lus sems kyi snang ba thams cad rang sems kyi 'du byed bkod pa'i cho 'phrul/_sems de'ang snang stong gnyis med ye shes kyi rol pa tsam ste/_des na sems dngos med la skye shi med pa'i stong pa'i rang mdangs lha sku 'ja' tshon lta bu skad cig gis gzugs rdzogs pa/_skye mched sogs gsal zhing ma 'dres pa/_gcig gis kun la khyab pa'i khyad par sum ldan gyi sku dbu ma'i thig le bcas gsal la rlung bcud bsdu ba'i dmigs pa bum can dang sbrags pa brgya/_lnga bcu/_nyer lnga sogs goms tshad dang bstun te sgom zhing skabs su rlung gegs byung na gegs sel gyi ting 'dzin gzhung gsal ltar dang*/_'og nas 'byung ba'i oM tA re dz+nyA na karma DA ki sogs kyi sngags kyang bzla/_thun mtshams la yan lag lnga sbyong gi 'khrul 'khor kyang bya ba ni thun min sngags dang mthun pa dag pa'i sgyu lus sgom pa'o/__/gnyis pa dbyings phyug nam mkha'i rnal 'byor gyis snang ba'i bden zhen bshig pa ni/_bogs 'byin me long dwangs pa la:sogs nas/_le'u ste bcu gnyis pa'o:_zhes pa ste de la bogs 'byin gyi tshul du gnas khang gi phyogs bzhir me long ngam dwangs shel bzhi btags la/_rang nyid lha yi cha byad du gnas pas dbus su 'dug pa dang phyogs bzhir gzugs 'char ba la lta/_grogs zhig gis gzugs brnyan 'ga' zhig la bkur sti dang mchod pa phul/_'ga' zhig gis brdung brdeg dang mi snyan pa brjod du bcug la dpyad/_me long gi gzugs ni snang tsam las phyi nang gang na'ang med/_de la mchod pas dga' ba dang*/_brdeg btsog gis mi dga' ba'i re dogs ci yang med de thams cad bar snang la byas pa dang mtshungs/_bzang ngan gyi phan gnod med pa'i gnad ni gzugs stong nyid yin pas te phan yul ma grub na phan pa'i bya ba gang du byed/_ma brtags pa tsam las rang gi lus sems kyang de dang mtshungs te sems kyi me long la bag chags kyi gzugs brnyan 'char ba tsam las don du grub pa med pa'i stong nyid yin/_bag chags ni 'khrul snang nyid las gzhan du ma mchis/_'khrul snang la bden par 'dzin mkhan su yod/_de la re dogs kyis bcings pas ci bya snyam du dpe don bsres la yang yang dpyad/_yang mi sdug pa'i chas su byas la snga ma bzhin sgoms/_gzugs gcig la rkyen gyis bsgyur bas du mar snang ba 'di lta bu'i phyir lus sems kyi phung po du ma tshogs pa la sna tshogs su shar ba lta ci smos/_'di dag gi rjes su mi 'brang bar 'khrul pa'i rdzun phug rig par byas te dpyad sgom gyis nges shes 'drongs par bya/_stong nyams skyes pa dang phyi'i nam mkha'/_nang gi sems/_bar gyi snang ba bcas gcig tu bsres la mig bar snang la gtad de a zhes 'jam la snyan zhing ha cang mi gsal ba'i bzlas pa dang bcas bar rlung bzung*/_goms pa'i rtags byung ba dang sgyu lus sems kyi tshogs pa 'du 'bral las 'bras bu skye shi zhes snang yang gzhi ma grub na de la brten pa'i khyad chos shig cis 'grub/_des na kun btags kyi blos btags pa tsam du shes pas lta ba'i gdeng bskyed de nam mkha' la 'byung bzhis phan gnod bral ba bzhin lus sems la skye 'chis mi tshugs pa'i gdeng bskyed/_nges don dbyings phyug rnam kun mchog ldan gyi ye shes kyi klong du mnyam par bzhag pas stong bzhi'i nyams drangs te de'i nyer thob 'od gsal las rlung sems kyi lha skur ldang nus pa'i mthus gnas skabs su lus yangs shes pa gsal ba sogs dang*/_mthar thug phyi nang gi 'byung ba gcig tu 'dres te ri brag zang thal/_mngon shes 'char ba sogs 'byung ba ni sbas don gyi sgyu lus/_mthar gyis chos brgyad kyi 'khrul rtog mtha' dag zhi ste mi slob zung 'jug ye shes kyi sku grub pas snang spyod 'od gsal sgyu ma'i rol rtsed du shar ba mthar thug gi sgyu lus zhes gsungs pa ste/_'di la gcig tu goms pas phung po'i bdud kyis mi tshugs pa zag med 'od gsal gyi rdo rje'i srog 'grub pa'i u pa de sha'o/__/gnyis pa bde chen longs sku'i rtsal sbyong la/_gos dkar 'bar ba'i ting 'dzin gyis bde drod kyi stobs bskyed/_mA ki zhu bde'i thabs kyis dga' bzhi'i nyams sbyar ba'o/__/dang po ni/_lus ni rnam snang chos bdun gyi:sogs nas/_le'u ste bcu gsum pa'o:_zhes pa ste spyir lus kyi khams thams cad khu rdul mun gsum du 'du ba las/_de ni pha ma las thob pa'i khams dka' dmar gyi thig le lus kyi dwangs ma thams cad kyi bdag po/_dbu ma'i cha la brten pa/_rnam shes kyi rten byed pa de las dwangs snyigs gnyis su gyur te mngal du ma yi rtsa dang 'brel bas bskyed/_btsas nas bza' btung myang ba dang*/_mkhris pas mdog 'gyur/_me mnyam kyis bzhu ba ste me drod gsum gyis sbar bzhu myangs pas dwangs ma mchin par khrag_/rtsa la brgyud nas de sha/_tshil sogs dang*/_snyigs ma dri chen/_mkhris pa sogs dang bcas lus zungs bdun zhes grags/_de dag gi rnam dbye spyi bo mi phyed ma nas so sen sogs khams nyi shu rtsa bzhi/_de re re la'ang thim longs bdag po gsum gyis phye bas khams bdun cu rtsa gnyis/_de stong gis phye bas stong phrag bdun bcu rtsa gnyis/_de stong gis phye bas bye ba phrag bdun cu rtsa gnyis sogs rtsa ji snyed rlung*/_rlung ji snyed thig les khyab cing*/_nang gi chags sdang rmongs gsum/_rang bzhin brgyad cu'i rtog pa/_des las bsags nas 'khor ba'i 'khrul snang sna tshogs pa 'byung*/_de dag 'pho med du bcings pas 'khor ba ldog cing yang dag pa'i lam du 'gro bas thog mar gnad du bsnun bya dper na 'jig rten du snod bcud kyi dwangs ma'i srog thams cad me yis sdud cing smin par byed pa ltar 'dir yang nang gi rdo rje gtum mo'i me sbar ba ste/_ngo bo bde stong lhan skyes kyi ye shes nang gi rnal 'byor ma sbas pa'i rang gzugs kyi dpyid/_nges tshig tsaN+Da li'i sgra las gtum pa'am za ba mo ste gang la bsnun pas phung khams kyi ma dag pa 'joms shing rnam rtog dang nyon mongs bsreg pa/_gnas tshul kun rdzob thig le'i dmar cha/_dbyibs a shad/_kha dog dmar la reg bya tsha ba ngo bo stong pa bde ba'i rang bzhin kun rdzob thig le don dam ye shes su gnas pa gang*/_sbar byed bum can sogs rlung gis bskul bas dbu ma'i sbubs lam du zhugs te 'khor lo bzhir rtsa thig kha sbyor gyi lha la phul bas/_dbye ba 'bar ba drod/_zhu ba bde ba/_'dres pa ye shes kyi gtum mo gsum dbu mar zhugs gnas thim pas 'bar ba chung 'bring che gsum du mched de snod bcud me yi dkyil 'khor du che bskyed chung bskyed gzhung ltar bsgom zhing skabs su sngags kyang bzlas pas phyi yi snang ba'i dngos 'dzin bshig_/nang gi rtsa rlung thig le'i snyigs ma dag cing dwangs ma rgyas pas rdo rje'i lang tsho sgrub pa'i thabs rmad du byung ba'o/__/gnyis pa ni/_bde ba'i stan la lus bsrang ste:sogs nas/_le'u ste bcu bzhi pa'o:_zhes pa ste 'jig rten na phyi nang gi dpal gang yang drod gsher 'dzoms pas bskyed nus pa ltar/_'dir yang phyi rdo rje'i tshe dang lang tsho/_nang bde stong gi ting 'dzin/_gsang ba lhan skyes kyi ye shes rnams gang bskyed kyang 'bar 'dzag gnyis ka'i byed bcings tshogs dgos shing*/_der ma zad thabs bde ba chen po dang shes rab rnam kun mchog ldan gyi de nyid zung du ma 'jug na lam ya bral gyis rtsal rdzogs mi nus pas 'bar ba'i dmigs pa gong ltar gsal bas lte ba'i me spyi bo'i haM la reg_/bde ba'i rgyun thig le ba thag ltar 'dzag pa lte ba'i gtum mo la thim/_sdong rtsa mar khus brlan pa ltar gsos nas me ches cher 'bar byang sems bskul ba'i bde ba dang 'dres/_'khor lo bzhi nas rim par mched/_lus rtsa phra mo'i khams thams cad khyab/_drod dang bde bas gang ba rang rig gi ngo bor ro mnyam du shes nas rtsal sbyangs/_zhu bde stobs su gyur pa'i bde ba'i zil gyis snod bcud dwangs mar bzhu ste rang gi sgo gsum la reg pas mA ma ki'i sku ru gsal te/_man ngag yid dang 'gog pa'i bzlas pa la brtson zhing*/_gegs sel kyang dgos pa'i dus su gnad la brdeg pas nyon mongs kyi rtsa ba chags sdang gnyis yin zhing*/_de nyid dag pa bde stong gi rnam pa mtshungs shing ngo bo ye shes su dag pa'i lam byed thabs zab mos nyon mongs pa'i bdud 'joms shing*/_bde stong gi ye shes kyi myong ba khyad par can bskyed pa'o/__/gsum pa gsal stong sprul sku'i bogs 'byin la/_spyan ma zung 'jug gi ting 'dzin gyis rdo rje'i srog sgrub pa dang*/_snying dbus thig le'i sems 'dzin gyis khams lnga'i bla tshe gso ba/_yan lag kha sbyor bsre pho'i lam gyi spyi chings bshad pas mjug bsdu ba'o/__/dang po ni/_de ltar 'bar dang 'dzag pa yi:sogs nas/_puSh+TiM ku ru oM:_zhes pa ste sngar zhu bdes drangs pa'i bde stong de gnyis kyang rnam pa'i bzhag tshul tsam las don la gnyis su med pa zung 'jug gi ye shes te/_bde chen des kun nas gang ba'i rnam bcas gzugs sku zag med mtshan dpes brgyan pa'i phyag rgya'i mchog sgrub pa'i rnal 'byor ni sngar ltar 'bar 'dzag gis dkar dmar thig le'i rgyun gcig tu 'dres pa'i bdud rtsis lus kyi khyon thams cad khyab cing 'phos pa tsam gyis lcags la gser rtsis thebs pa bzhin dag pa ye shes 'od kyi lus 'khor lo lnga dang bcas par lam gyis bsgyur ba'i gnas lngar mi shigs thig le chen po'i ye shes kyi ngo bo rigs lnga tshe dpag med stangs dpyal gyi sku yi bde ba'i gzi byin rab tu rgyas pas 'jig rten kun la khyab ste snang cha thabs bde ba chen po pad+ma he ru ka dang*/_stong cha shes rab dpa' mo tshe yi dbyings phyug yab yum kho na'i ye shes gcig gi rang mdangs su gyur pa'i a ba d+hU ti'i dkyil 'khor rang byung lhun gyis grub par snang srid gzhir bzhengs su sad pas phyi lus kyi phung po dam tshig sems dpa'/_nang dwangs ma'i thig le ting 'dzin sems dpa'/_de thams cad kyi khyab byed rig pa ye shes sems dpa' gsum po gdod nas dbyer med du yin pa la yin lugs ngo shes pa'i nga rgyal gyis gsal snang khyad par can sgrubs/_mthar kun kyang gnas lnga'i lha la bsdus nas mi shigs rdo rje'i srog gi bcud du rgyas gdab pa'i spro bsdu bcas sngags nyid bzla ba'o/__/spyir thig le la rnam shes dang ye shes kyi thig le gnyis las snga ma la rlung sngags rdzas kyi thig le gsum las rdzas kyi thig le gnas lngar bsgoms pas bla tshe gso ba ste/_de yang chu khams nyams che na spyi bo/_me khams nyams na mgrin pas mtshon 'byung ba de dang de spro bsdu gtso bor bya zhing*/_de'i dwangs ma'i 'od kyis lus gnas thams cad khyab par sgom pa man ngag yin no/__/gnyis pa ni/_lus gnas srog gi dwangs ma'i cha:sogs nas/_le'u ste bco lnga pa'o:_zhes pa ste lus zungs thig le'i cha la ye shes dang rnam shes su 'brel ba gnyis las lus kyi nus pa'am ngo bo nyid du spyi bo la sogs pa'i gnas rnams su 'pho ste gnas pa bla gnas ni rnam shes dang 'brel ba yin la/_de la dwangs ma bsdu bstim byas pas lang tsho'i dpal bskyed pas de yi ting 'dzin ni snying dbus nyi zla'i gwa 'ur hrIHdmar gsal/_lus kyi rkang pa'i sor tshigs a/_bol A/_nywa i/_long bu I/_pus mo u/_dpyi U/_lag sor r-i/_rtsib logs r-I/_mkhrig ma l-i/_gru mo l-I/_dpung mgo e/_mgrin pa ai/_mtshog ma o/_dpral ba au/_ltag pa aM/_ske AH_snying ga i/_dpung tshig I/_dpung mgo u/_rtsib logs U/_sor tshigs r-i/_brla r-I/_dpyi rus l-i/_pus mo l-I/_long bu e/_long tshigs ai/_ngar gdong o/_rkang mthil au rnams su pho g.yas bskor/_mo g.yon bskor gyis rkang pa'i sor tshigs nas brtsam te a/_A sogs dbyangs yig bcu drug_/spyi bo aM/_rkang mthil aH_ru bsgoms nas dpyad pa'i srid zhi'i dwangs bcud bsdu bstim byas pas yig 'bru rnams gzi byin lhag par rgyas/_de las byung ba'i bdud rtsis lus gang ste bcu drug lang tsho'i dpal dang ldan par mos la bum can dang sbrags te bsgom pa'o/__/gsum pa la bsre pho'i gnad dngos dang*/_lam gyi yan lag gnyis las/_dang po ni/_yang na dmigs pa'i mde'u kha ni:sogs nas/_le'u ste bcu drug pa'o:_zhes pa ste bde stong gi ting 'dzin rtsal sbyang ba'i phyir gnas lngar rlung gi thig le kha dog lnga gsal zhing 'gul 'phrigs dngul chu'i gong bu lta bur gsal/_rlung dug dbyung rjes bum pa can bzung ba'i skabs gnas lnga'i thig le'i 'od kyis sha khrag rus pa sogs gdos bcas nad gdon bgegs/_khyad par gzung 'dzin nyon mongs kyi rtog pa cha dang bcas pa sbyangs/_gnas lnga'i thig le las ye shes lnga yi rang bzhin dbyangs gsal dkar dmar 'od lnga'i mdangs can ye shes kyi rlung gis bskyod pas rang sgra 'u ru ru 'gul 'phrigs can gyis lus thams cad mer gyis khengs/_nyon mongs cha dang bcas pa sbyangs/_gzungs dran mngon shes tshe dang lang tsho sogs yon tan thams cad rgyas par mos la rlung sems bsre zhing gnas lnga'i thig le la rig pa gtad de sngags bzla/_de ni gsal stong rlung gi bogs 'byin no/__/des rlung shas che na rlung nad ldang ba sogs kyi skyon byung ba dang*/_min kyang skabs su yang dmigs pa'i khyad par gnas lnga'i thig le las bde ba'i 'od zer dmar ser li khri'i nying khu lta bu snum gsher dang ldan pa mar khu'i thig pa bzhin byung*/_lus kyi nang thams cad mer gyis khengs pas snum lcig gis song ste lhan ner gnas/_g.yo byed kyi rlung gi sgo ltem mer bkag_/lus kyang snyug dong mar khus bkang ba bzhin bde drod kyi nyams dang bcas te gnas par bsam la rlung lte 'og tu mnan/_rig pa de la gcun te rlung sems bsres pas ljon shing gi rtsa bar chu yis bran pa'am me tog char gyis sim pa bzhin rtsa rlung thig le'i khams nyams pa thams cad gsos/_stobs rgyas/_yon tan 'phel/_mnyen lcug gi dpal dang ldan par bsam ste ngang bskyang ba ni bde stong mi 'gyur ba'i thig le'i bogs 'byin no/__/de'i tshe'ang byings pa'i nyams byung na gegs sel ni/_snying gi rtsa 'khor dbus su a yig dkar gsal sgom pa'i 'od lnga ldan gyis lus gang*/_rlung sems thig le rtsa dang bcas pa'i mtshon snod bcud thams cad la phog_/lan tshwa chur zhu ba bzhin sib sib thim nas lus la thim/_lus kyang 'od du 'dril te snying nang gi thig ler 'dus/_a yang bar snang du ling nger gnas pa la sems bzung ma thag 'ja' ltar yal rjes stong rig gi ngang bskyang*/_rtog pa 'phro bar brtsam pa na a zhes drag tu brjod la mig bar snang du gzir/_rlung sems bsres la bum can bzung bas snang ba'i bden 'dzin zhig_/srid pa'i 'khrul shes yal/_mi rtog chos sku'i dbyings su btsan sa 'dzin pa'i man ngag ste sgoms/_byad phur dang gdon bgegs kyi 'tshub ltas che na sngar ltar la dmigs pa'i khyad par/_snying ga'i a yi 'od kyis gdon bgegs/_byad phur sogs 'gal rkyen gang yin la phog pas stong nyid du sangs kyis dag_/gnod bya gnod byed kyi mtshon pa'i chos kun stong pa gcig tu shar ba la su dang gang gis gnod/_gnyis med chos sku ka dag nges don dbu ma'i sbubs sam dbyings su dag par lta ba'i gdeng bskyed la a zhes glu dal bus len cing dbyings rig bsre/_rtsa rlung thig le'i rkyen gang la yang 'od kyis stong par sbyangs par bsam pas gegs sel khyad par can te de ni mi rtog a wa d+hU ti'i rtsa yi bogs 'byin no/__/'di dag gi tshe gsal stong gi bogs 'byin skabs lus sbyang*/_bde stong gi skabs thems bu/_mi rtog pa'i skabs brab gzhil gyi 'khrul 'khor gtso bor gnad du bsnun pa'ang gces so/__/gnyis pa ni/_de ltar bde gsal mi rtog pa'i:sogs nas/_le'u ste bcu bdun pa'o:_zhes pa ste/_rdo rje'i tshe sgrub pa'i snying po skye 'chi'i 'khrul snang nyid dag dgos pa yin la/_des na da lta nyin snang dang mtshan mo rmi lam/_nam zhig skye ba tshe 'di'i snang ba dang 'chi ba bar do'i snang ba rnams don gcig pas 'di dag gang la gnad du bsnun kyang don gyi babs so gcig tu dgongs nas bka' gter rnams nas rmi lam dang bar do'i lam khyer mang du gsungs pa gnad de'i dbang gis te 'dir yang nyin mtshan gyi snang ba lam khyer la bsten nas 'khrul snang dag pas nges don gyi rdo rje'i tshe sgrub pa'i thabs yan lag gi tshul du bshad pa ste/_spyir bdag byin rlabs pa'i rim pa la snying po rdo rje'i chos drug tu gsungs pa las/_gnas skabs bzhi las/_snyoms 'jug gi 'pho ba'i sgrib pa sbyangs shing lhan skyes kyi ye shes bskyed pa'i phyir stong nyid kyi nyams myong 'dren pa gtum mo lam gyi gzhung shing du bstan pa mnyam bzhag gi nyams len/_de'i rjes thob sad pa'i gnas skabs sbyang phyir sgyu lus/_mtshan mo'i rnal 'byor gnyid 'thug sbyang phyir mnyam bzhag gi nyams len 'od gsal/_rmi lam sbyang ba rjes thob/_de'i yan lag tu lam gyi blo chod bar do dang*/_bsun ma 'pho ba bcas bstan pa las/_'dir dang po snang cha'i bde zhen bshig phyir sgyu lus kyi dpyad sgom sngon du bsgoms pas ni gtum mo'i skabs su stong ra gsal ba la gnad du zab cing zhar byung ma dag pa'i sgyu lus sogs sgom sla zhing*/_gtum mo'ang stong pa'i ye shes kyi rang mdangs su nges phyir dngos zhen bshig pa la stobs che bas bskyed rim gyi thog mar de bzhin nyid kyi ting 'dzin gsungs pa dang mtshungs la/_rjes thob kyi nyams len sngon du bstan pa'ang mi 'gal te snang stong gi lam byed gtso che chung gi dbyes pa tsam las don gnad lhan skyes kyi ye shes rnam kun mchog ldan gyi de nyid rgyud la 'dren pa'i nus pa gcig pas shes la/_gang ltar yang nyin mtshan skye 'chi'i snang ba ji snyed 'khrul snang gis sgro btags kho na las ma 'das pa'i gnas tshul dngos 'chi med gnyug ma mi shigs rtag pa don gyi tshe yi dbyings nyid yin pas 'khrul pa de dag phyir rtsa ba dang yan lag gi lam du ma'i thabs kyis gnad du bsnun pas don gnad gcig tu 'bab par shes pas bsgom bya dngos la dang po rmi lam gyi lam ni/_lus phyi nang gi stong ra gtum mo ltar gsal ba'i/_gnyid 'thug 'od gsal du 'char ma nus pa rlung ro rkyang du shor ba mgrin rtsar brgyud de bag chags kyi lus la nying 'khrul du shar ba'i gnad kyis/_mgrin pa'i 'khor lo'i lte bar hrIH'dab bzhir hU~M sogs 'bru bzhi gsal te gnyid du phyogs pa dang yi ge rnams AHoM la 'dus pas mtshon gcig la gcig thim gyis hrIHla 'dus/_hrIHlas 'od kyis tho phyi tshun chad khyab par dmigs la gnyid du 'gro bar bya zhing*/_rlung sems dbu mar bstims te nyal ba dang*/_nyin par gyi snang spyod rmi lam du mos pa'i 'dun pa drag pos ngos zin te brtan pa bya/_gcig las du ma dang*/_gang 'dul sogs sprul/_de'ang brtan nas bsgyur spel sbyang zhing*/_rtsal rdzogs nas nying 'khrul stong pa chen por bsdu zhing*/_snying rje sgyu mas rlung sems las grub pa'i lha sku phyag rgya gcig spros su bsgom/_mkha' khyab kyi tshom bu spro nus pa'i bar rtsal sbyang*/_de nyid kyi myong ba nyin snang dang bsres te thams cad gcig tu shes pas bden med du rtsal sbyang nan du bya'o/__/spyir bar do la 'chi kha 'od gsal gyi bar do ye shes gong 'phel dang*/_bar do sku gsum du bsre ba'i gdams ngag gnyis su gsungs kyang skabs 'di'i bstan bya phyi ma ste 'chi kha lugs ldog gi 'od gsal ngos ma zin pas stong pa las nyer thob sogs su ldang zhing rang bzhin brgyad cu'i rtog pa skyes pa'i tshe bar do'i yid lus ming gzhi 'dus pa'i phung por grub nas 'khrul snang la spyod pa'i rlung sems kyi snang ba ya ma zung du 'char ba gang*/_sngar gyi gdams ngag gi gnad dran par byas la 'khrul snang bden med du shes pas nang gi rig pa ma g.yos na phyi'i snang bas phan gnod mi nus pa'i gnad shes pa'i gdeng gis snang grags rig pa lha sngags ye shes kyi ngo bor bsres te nyams su blangs pas 'khrul snang skad cig la grol ba'i gdeng rnyed de 'jigs skrag sdug bsngal zhi ba dang*/_goms pa mchog tu brtan pa nyin mtshan gyi snang ba 'dres pa'i 'od gsal bzhin 'di dang bar do'i 'khrul pa gnyis med du dag pas rdo rje lta bu'i go 'phang kyang thob par nus so/__/de ltar nyin snang gtum mo dang sgyu lus/_mtshan snang rmi lam dang bar do bsre ba'i nyams len gyis 'khor 'das kyi chos kun rtsa ba gdod nas spros bral stong gsal gzhir gnas kyi ye shes myong ba brtan pas/_dus gnad tho rengs kyi char gnyid srab pa'i skabs lus tsog pu/_'dun pa snying gar dwangs ma mi shigs pa'i thig le la rtse gcig tu gzhur nas mnyam par bzhag pa'i ngang mnal nas sngar gyi nyams myong la gdeng bskyed pas/_dbu mar rlung sems 'dus pa'i du ba la sogs pa'i rtags snang phra mo dang*/_dkar/_dmar/_nag lam dang bcas rdzogs te gzhir gnas kyi 'od gsal 'char ba'i bar stong bzhi'i de nyid so sor ngos zin par byas la ci gnas su bskyang*/_nyams myong de'i rgyun nyin mtshan kha sbyor du drangs pas srab 'thug nyams rtogs kyi 'od gsal rnams rim bzhin rang dbang thob ste mthar thug don gyi 'od gsal la sbyor zhing*/_'di dag mnyam rjes kyi nyams len gyis nyin mtshan gyi 'khrul snang 'od gsal gyi 'khor lor 'char bar byed pas kha sbyor gyi lam zhes bstan pa'o/__/gnyis pa gzhan lus pho nya'i myur lam bstan pa la/_sngon 'gro bsnyen pa/_dngos gzhi nye bsnyen dang sgrub pa/_rjes sgrub pa chen po'i tshul du bshad pa'o/__/dang po rig ma brtag 'gugs sbyang gsum ni/_las kyi phyag rgyas bogs dbyung na:sogs nas/_yang yang gso:_zhes pa ste 'pho med bde ba chen po'i ye shes kyi gzi byin snying la rgyas pa'i nus pas rdo rje'i phung khams skye mched kyi dwangs ma stobs su gyur te 'chi ba med pa'i tshe/_rgud pa med pa'i lang tsho rnams rdzas sngags kyi nus pas sgrub pa'i ngal ba la ma ltos par nang gi rnal 'byor gyi byed pas rtsol med du 'grub cing*/_nus pa'ang snga ma las stobs che bas rnal 'byor dbang phyug thams cad lam phyag rgya'i rnal 'byor dang ldan par tshe yi brgyud bskul sogs las gsal ba ltar yin la/_ji ltar bsten pa'i tshul dngos la/_rang byin rlabs kyi lam gyis srog rtsol sgra ji bzhin du 'grub pa dang*/_'pho med la gdeng du gyur pas mtshon nyams rtogs kyi rtsal kha mched cing rgyas pas lam 'di la 'jug pa'i gnad shes par byas te/_gang bsten bya'i yul lhan skyes/_sngags skyes/_zhing skyes kyi DA ki mchog yin kyang rnal 'byor dang po'i rigs can gyis rnyed dka' zhing*/_las skyes kyi phyag rgya mi mo mtshan ldan la bsten pas yon tan de dag sgrub nus pa'i phyir mtshan nyid rigs can lngar gsungs pa las mchog pad+ma can te de ni sha mdog dkar la dmar mdangs shin tu che ba/_mkhur tshos kyi me tog smug thig ges brgyan pa/_mig dkyus ring zhing che ba/_mdzes shing snying du sdug pa ni phyi rtags/_lte ba nas gyen 'greng gi ri mo gsum dang ldan pa nang rtags/_gsang rtsa pad sna ltar phra zhing chu skyes kyis 'byed 'dzum nus pa/_rgyun du'am res 'gar rak+ta 'o ma'i mdog tu 'bab pa rnams gsang rtags te de dang ldan na rung ba dang*/_gzhan yang ri mo can sogs rigs bzhi gang rung rang la dad gus ldan/_blo brtan/_gsang thub/_rtsa bzang*/_chags pa che/_dar la bab/_sgyu rtsal mkhas pa lo bcu drug nas nyi shu/_nyer lnga rnams rab 'bring tha ma yin pas bsten bya ste/_de nyid rdzas sngags ting 'dzin gyi nus pas dbang du bsdus la/_nyams dga' bag phebs dben pa'i gnas su/_nges 'byung gi gtam dang bsag sbyang gis rgyud sbyangs te dkyil 'khor du bcug cing dbang bskur/_dam tshig phog la bskyed rdzogs kyi gnad bstan te rang dang nus pa mnyam pa'am/_cung zad dman kyang rung bas de lta bur ma gyur gyi bar du sbyang ngo*/__/gnyis pa la/_nye bsnyen dang*/_sgrub pa gnyis las/_dang po thabs nyer bdun gyis nye bsnyen ni/_bltas dgod lag pa bcangs pa yis:sogs nas/_bde ba skyes pa dang:_zhes pa ste mtshan ldan gyi gzungs ma khrus byas/_rgyan gyis spras dri dang bku mnye'i byug pa dang*/_bcud chen gyi zas bsten cing sngar goms pa'i rnal 'byor la sbyangs te stan nang tshang can la yab yum lhan cig tu 'khod/_'dzum pa'i mig gis gzugs la blta/_chags pa'i gtam smra/_yid kun dga'i mdangs bskyed/_chags pa'i rnam 'gyur drag tu bskyed pas sgo gsum 'dod chags la bslab/_stangs dpyal lha/_mkha' gsang rdo rje dang pad+ma/_gzhan don du bde chen rdo rje sems dpa'i tshe sgrub pa'i 'du shes gsum/_phan tshun 'khyud pa dang*/_mkha' gsang sprod pa/_dal bus srub pa'i sbyor thabs gsum gyis bde ba dbab ste/_dga' bzhi ngos bzung snyoms 'jug je drag tu btang*/_ril ba zhabs tshags can gyi rlung sbyor bya ba'i bskyil thabs gsum gyis bde ba spel/_nor bu'i bu ga dang khA kha mu kha sna rtser dkar dmar gnyis ka'i rlung sems kha sbyor gsum gyis lhan skyes kyi bde bas rtog pa zil gyis mnan/_sgo gsum gyi 'khrul 'khor gyis bde ba'i rten thig le mi 'chor bar bzung*/_dud 'gro'i 'gyur ba bzhi dang thur sel steng sbubs rlung gnad dmigs pa haM la gtod pa'i btsan thabs sbyor ba gsum gyis rten brten pa bcas rang gnas su ldog_/gzhil ba'i sgyu rtsal gsum gyis thig le rtsa gnas su bkram la/_bde ba'i rang ngo sems/_sems gang du'ang 'dzin med rgya yan nam mkha' lta bu'i ngang du 'jog pa'i rgyas 'debs gsum ste thabs lam gyi chos nyer bdun gyi 'dod pa'i sgyu rtsal/_bde ba'i rol mo sbyor ba'i dga' ston mig 'phrul ltar bslab bo/__/gnyis pa yas bab kyi dga' bzhi'i nyams bshad pa sgrub pa ni/_yab yum gnas lnga'i tshe yi bdag:sogs nas/_phrul gyis byung:_zhes pa ste de ltar sbyor ba'i tshe yab yum gyi gnas lngar rigs lnga'i tshe dpag med gsal ba yab yum mnyam par sbyor ba'i 'od kyis snyoms 'jug gi byed pas lus sems myos te lus kyi nang gi dwangs ma'i dkar dmar kyang dbang med g.yo ba bzhin bde stong gi rtsal gyis snod bcud brtan g.yo'i dwangs ma sgul zhing g.yos pas bsdus pa dang*/_chags pas yid g.yos pa dngos po gzhan gyi nus pa las sems kyi brtan pa 'phrog nus pa dang chos mtshungs pa rgyal ba kun kyang bde ba'i 'od zer gyis bskul bas rjes chags dbang med du g.yos pas 'dod chags chen po'i ros sim ste khu ba'i dwangs ma'i sems sprin dngul chu'i char pa ltar bab/_yum gyi spyi bo'i haM la thim/_de mar gsar mes zhu ba ltar dwangs ma chil gyis byung ba dpral/_mgrin/_snying*/_lte/_gsang gnas lngar bab/_de'i rkyen gyis yab kyi 'khor lo lnga nas byang sems g.yos pa yas mar byung ba'i dwangs ma bde ba'i zil pa gsang ba'i sna rtser phrul gyis byung ba dang gcig tu 'dres par bsam/_de'i tshe dpral ba'i 'khor lor thig le bab pas dga' ba'i ye shes skyes pa'i rang ngo la yun ring du bltas te rlung sems gcun/_thig le'i dwangs ma'i zil mngar brtan g.yo'i srid zhi'i bcud bud+d+ha tshe dpag med yab yum/_rtsa 'dab kyi grangs mnyam DA ki la phog pas bde stong gi nyams bzod med du 'bar/_kun kyang rang 'od kyi thabs shes phan tshun sbyor ba'i 'od kyis spyi bo'i rtsa rlung thig le'i khams nyams pa gsos/_chad pa mthud/_yo ba bsrangs/_'khyar ba bsdus te rtsa sbubs che phras mtshon spyi bo ltem gyis gang bas bde ba mi bzod pa skyes par bsam/_'dis mtshon te gnas lngar mas rim du dmigs pa rigs 'gre shes dgos so/__/gsum pa rjes sgrub pa chen po'i tshul la/_mas brtan gyi dga' bzhi ngo sprad pa dang*/_lam gyi yan lag gzhan bshad pa'o/__/dang po ni/_yab kyi rdo rje'i lces gzhib ste:sogs nas/_bzung ba gces:_zhes pa ste mkha' gsang gi sna rtser khams 'dres pa thur sel spyi bor drangs pas dwangs ma'i rgyun rdo rje'i bu ga nas drangs pa'i rtags su sbrid chil drod dang bcas te byung ba dang gsang gnas lte ba sogs nas mas brtan gyis spyi bo bar ldog_/de'i tshe lus dkyil gyi lha rnams la dwangs ma'i sems sprin gyis mchod pas lhag par mnyes te gnas lnga'i sbyor mtshams nas byang sems babs pas lus thams cad khengs/_snyigs ma sbyangs/_dwangs ma 'od kyi tshul du mas rim nas zhu ba mthar kun kyang rim gyis spyi bor thim/_rtsa sbubs thams cad stong sang nge gnas par bsam la rlung sems spyi gtsug tu gtad/_mthar thams cad bde bas zhu ste yab spyi bo'i haM la thim/_yum rang gi lte ba'i a la thim/_de gnyis kyang nyi zla bzhin du thig le dkar dmar du gyur pa bar snang la ling nger gnas par bsam la sems gtad/_mthar de yang stong chen skye med kyi dbyings su thim par mos la dbyings rig bsre/_slar yang skad cig gis tshe bdag yab yum rtsa gsum 'khor lo lnga dang bcas pa lam gyis gsal ba'i spyi bo'i haM las dwangs ma'i bdud rtsi'i zil mngar byung nas 'khor lo lngas mtshon lus kun gang*/_nyis dwangs sum dwangs kyi cha thams cad gnas lngar 'dus pa tshe bdag rigs lnga phra la skye mched dod pa bde ba'i rang bzhin stong pa'i ngo bo/_zung 'jug gi ye shes kyi phyag rgyar sad par mos la rtsa 'dar dang lus sprugs bya'o/__/gnyis pa ni/_bde ba sra na sgyu rtsal ni:sogs nas/_le'u ste bco brgyad pa'o:_zhes pa ste/_de ltar brtson pas bde ba skyer ma gtubs te sra na pad+ma can la steng*/_ri mo can la rgyab/_dung can ma la 'debs tshul/_glang sna can la phan tshun mnyam pa/_ri dwags can la 'og nas sbyor ba'i 'khrig thabs dang*/_g.yas rol g.yon rol sogs sgyu rtsal gyi cho ga ma nges pas bskul zhing*/_byang sems rgyas pa'i sman sngags ting 'dzin sogs kyang bya/_ha cang chags rtog rags pas myos na stong nyid kyi rgyas 'debs dang chags pa chen po'i ting 'dzin kyang sgoms/_mdor na skabs 'dir shes bya'i gnad ni spyir mdo sngags kyi lam gang bsgoms kyang rgyud nyon mongs las grol dgos pa gnad gcig tu shes dgos pas so thar gyi skabs su ngo bo ma grub pa/_'du shes gzhan du gyur pa/_'dzin zhen med pa la pham pa dngos gzhi mi 'gyur gsungs pa ltar sngags su rnam pa bsten bya chags yul bud med/_bsten tshul snyoms 'jug la bslab kyang*/_rnal 'byor pa dang po'i dus nas lhan skyes ye shes kyi de nyid la drod thob pa'i lta bas gdeng bzung ste thog mtha' kun tu sgyu ma rmi lam lta bu'i rol rtsed las dngos zhen rang rgyud pa mi gnas pa'i lta ba'i gdeng gis chags pa'i yul dbang shes gsum gyi ngo bo ma grub/_pho mo sogs chags pa'i 'du shes rang mtshan pa ma yin pa 'dod chags lam byed kyi 'du shes gsum gyis bsgyur bas 'du shes gzhan du gyur/_rnam pa gang ltar snang yang rjes shes la chags pa'i kun dkris kyi 'ching ba med pa ngo bo skye med klong yangs su grol bas srid rtsa'i 'dzag bde'i 'ching ba mi gnas pas 'dzin zhen med pa gsum sgra ji bzhin du byung na sdom gsum 'gal med chig rdzogs su yin pa'i gnad don shes par byas te/_rang gi skal bas ji ltar 'tshams pa la brtson pa gnad du che bar shes nas rang gzhan deng dus kyi sngags la spyod pa rnams la phan du re nas bris pa'o/__/de ltar goms pas rnam pa snang spyod bde ba chen po'i ye shes su shar ba'i thabs lam zab mo'i mtshon byed byas te/_ngo bo stong pa rnam kun mchog ldan gyi ye shes zung 'jug phyag rgya chen po mtshon bya'i don rtogs te/_myong bas mngon sum du shar yang ngag gis smra mi btub/_rang sems la nges shes rnyed kyang dpes mtshon du med/_rnam rtog gi 'du byed kyis ma bslad pa'i skye 'gag gnas bral nam mkha' lta bur 'dus ma byas su rang shar ba srid zhi kun gyi ye shes srog gi snying po gang*/_thabs las thabs byung gi nus pas gsal zhing der 'dzin med pa'i rang bzhin shes pa'i tshul du shar te don la 'jug par nus pas nye rgyu'am pho nya'i lam gyis rdo rje'i tshe sgrub pa'i rim pa'o/__/rtsa ba'i sa bcad gnyis pa rtsol med gnyug ma mi shigs pa'i thig le la brten pa'i grol lam bshad pa la gnyis/_ma sgom pa 'tshang rgya ba'i gnad dbyings la ltos te sems ka dag rtsa bral du ngo sprad nas rig pa rjen la phud pa'i lam khregs chod/_sgom pas 'tshang rgya ba snang ba la ltos te 'od gsal lhun grub tu ngo sprad nas mngon sum gyi gnad la gzir bas gdos bcas 'od lus su grol ba'i lam thod rgal lo/__/dang po la bzhi/_grong khyer rgyun gcod kyi lta bas thag bcad/_nyin mtshan kha sbyor gyi sgom pas nyams su len/_snang ba dbang bsgyur gyi spyod pas bogs 'byin/_bya bral lhun grub kyi 'bras bus lhun gyis grub tshul lo/__/dang po ni/_de ltar lam rnams thams cad pa'i:sogs nas/_bsam gtan bya:_zhes pa ste rgyu 'bras kyi theg pa'i lam rim mtha' dag gi skyel so don gyi ye shes rjen cer du ston pa bzhi pa'i dbang gi lam/_mngon sum gyi ye shes lam du byed pas rnal 'byor kun gyi rtse rgyal/_snang gsum 'pho sgrib sbyang ba'i gnyen po rdo rje lta bu'i ting 'dzin dngos 'od gsal rdzogs pa chen po'i lam gyis gnyug ma rdo rje'i tshe sgrub pa'i lam mthar thug gi 'bab stegs su bstan pa ste/_gang gtan la dbab bya'i lta ba'i bzhugs tshul ngo bo rig stong*/_rang bzhin gsal stong*/_thugs rje snang stong dbyer med gsungs pa'i dang po de yang blos dpyad sgom dang*/_lung rig gtan tshigs kyis gtan la dbab pa'i nges shes tsam ma yin par gdod nas skye med ka dag gi ye shes mtha' thams cad dang bral ba don dam bden pa chos sku nyag gcig gshis lugs la/_gsal mdangs 'gag pa med pa'i ye shes kyi rang rtsal sku dang ye shes rgya mtsho'i chos rang ngo dang 'bral mi shes pa nyi ma dang 'od zer bzhin gnyis med mnyam pa'i chos su lhun gyis grub pa'i dpal ni bde chen longs sku'i bdag nyid srid zhi kun las 'das pa'i ye shes/_gdod nas zung 'jug chen po/_blo 'das yin lugs kyi chos nyid sgra ji bzhin pa ste gnas lugs 'di'i ngos nas gzhal na 'khor ba sdug kun gyi snang ba yang sku dang ye shes kyi chos las spang byar mi gnas shing*/_dag pa sangs rgyas kyi yon tan kyang gsar du thob par byar med pa'i bden gnyis mnyam pa thugs rje kun la khyab pa'i de kho na nyid du bzhugs shing*/_yul yul can gyi gnyis chos las 'das pa'i 'phags pa'i mnyam bzhag gi lta ba/_brda thabs man ngag byin rlabs kyi stobs las ngo 'phrod pas skye shi srid pa'i grong khyer rgyun gcod pa'o/__/gnyis pa ni/_bde ba'i stan la bag phab te:sogs nas/_lhod de ba:_zhes pa'i bar te lta ba ye grol du rtogs pa de nas sgom pas yin thog tu bzhag ste rig pa'i gshis su phebs pa'i btsan sa zin dgos pas nyams su blang ba'i tshul ni 'khor ba zhes pa'i 'khrul snang yang rang gi lus ngag sems kyi tshogs pa tsam po ba zhig ste/_de las lus ni gdos bcas kyi phung po sil bur bsil na cha med/_ngag ni lus sems kyi 'dus pa'i rkyen las rang snang ba'i stong sgra/_sems ni 'khrul ngor btags pa tsam las don la cir yang ma grub pa/_sgo gsum kun kyang ma brtags nyams dga' ba'i snang ba tsam las don la gang du'ang ma grub pa'i stong nyid cig las du mar mi gnas pa ste/_stong pa de'i gshis kyang rig pa zang thal mtshan mar ma grub pa'i rang byung gi ye shes kyi snying po can gzung 'dzin gyi rtog pas gnyis su mi phyed pa'i rdo rje/_'khor 'das gang gi phyogs su ma lhung ba'i sems dpa'/_rang bzhin 'gyur med mkha' khyab nam mkha'i dbyings las gzhan du mi 'phro ba'i rang bzhin rang la gnas pa'i ngo rang thog tu 'phrod pa la/_'das pa'i rjes ma bcad/_ma 'ongs pa'i mdun ma bsus/_da lta phyi yul la ma spro/_nang du mi bsdu/_thad kar rang bab so ma'i yin lugs la bzhag pas ka dag blo 'das kyi dgongs pa bzhi cha sum bral gyi shes pa yin lugs thog tu bzhag pa tsam las/_dmigs pa'i gtad so/_yin min gyi mtshan 'dzin/_re dogs kyi dgag sgrub/_bsgom bya'i chos rdul tsam yang mi dmigs pa'i stong nyid du rang bab lhug par skyong ba ni thag gcig thog tu bcad pa dang*/_de'i dus su phyi chos can tshogs drug yul gyi 'khrul snang la nang gi rtog pa shar ba'i dus nas 'dzin med klod pas rba rlabs chur thim pa ltar 'gyu stong rjes med du zhig_/nang chos nyid gzhi med rtsa bral gyi ngang du yengs pa med par rang bab kyi dran pas dgag bzhag ste dgag sgrub rtsol bcas kyi rtod phur na bun nam mkha' la dengs pa ltar rang sar grol te snang shes gnyis ka'i phyogs su ma lhung bar cir snang chos sku'i rang bzhin rig stong blo bral rjen par rtogs pa gdeng grol thog tu bcas pa ste/_dmigs gtad mtshan 'dzin gang yang med pa'i ngang la 'bad rtsol ci'ang byar med pa kha yan du klod nas bzhag pas rdzogs pa chen po rang snang ris med kyi dgongs pa gzhir rdzogs mnyam pa chen por btsan sa zin par byed do/__/gsum pa ni/_gshis la gang du'ang mi 'dzin pa'i:sogs nas/_su zhig grol:_zhes pa ste cog bzhag gi dgongs pa klong du gyur par gdeng bcas pas rig pa'i gshis ka dag phyogs yan gyi dgongs pa rgya yan rang grol du shar bas sgo gsum gyi spyod lam gang du zhugs kyang thams cad chos nyid kyi rol pa'i ngang las nam yang ma g.yos pas/_tshogs drug gi yul la chags sdang gis der 'dzin gyis mi zhen par thug 'phrad rang grol gang dgar rgya yan du btang bas/_snang btags ji ltar snang rung rig pa las gud na med pas spyod lam rnam bzhi ye shes chen po'i rol rtsal du 'ub chub pas/_rtsa bral gyi chos thams cad ye nas lhun grub tu sangs rgyas pas chos sku spang blang med pa'i ngang du dmigs bcas mtshan ma'i sgom gyi gtad so zhig ste/_kun bzang ye shes zang thal dag pa rab 'byams su shar nas chos nyid bcing grol med pa'i klong du 'od gsal chu bo rgyun gyi ting 'dzin ma btsal lhun rdzogs su 'char bas grol ba'i tha snyad btags pa'o/__/bzhi pa ni/_don 'di nges pa'i gdeng thob na:sogs nas/_bde chen shar:_zhes pa ste mkha' la 'byung bzhi'i 'du dgod ji ltar shar yang gos pa med cing bcing pa yang med pa bzhin rang rig chos nyid kyi dgongs pa blo bral nam mkha' lta bu la gdeng thob pa'i rnal 'byor pas ltar snang gi bya ba gang byas kyang gdod nas ye grol du dag pa'i mthus las kyi bag chags kun gzhi la mi phog cing gang ltar spyod kyang chos nyid bde ba chen po'i rang bzhin du dag pas tshogs gnyis kyi rgyur gyur nas/_sems rig shan 'byed kyi bsnyen pa/_rig pa rjen la bud de ngo 'phrod pa nye bsnyen/_'khor 'das thams cad rig pa gcig tu rdzogs par thag chod pa sgrub pa/_ye grol la gnyen pos bskyar ma dgos pa 'bras bu gzhir rdzogs su thag chod pa sgrub pa chen po'i ngang du sa lam thams cad ma bgrod par rdzogs pas gnyug ma nges pa don gyi rdo rje'i srog nas zin te 'grub pa'o/__/gnyis pa sgom pas 'tshang rgya ba snang ba la ltos te 'od gsal lhun grub tu ngo sprad nas mngon sum gyi gnad la gzir bas gdos bcas 'od lus su grol ba'i lam thod rgal bshad pa la/_gnad kyi chings/_thob bya'i lam/_grol tshad 'bras bu'o/__/dang po ni/_'od gsal de nyid bogs 'byin phyir:sogs nas/_sgom pa las:_zhes pa ste 'od gsal gyi rig pa lus la gnas kyang mngon sum du ston pa'i gnad med pas snang mi nus pa sbrul la yan lag yod kyang ma gcus na mi mngon pa dang mtshungs la/_des na mngon sum gyi lam 'dir gnad de dag ma sbas par bstan pas shes nyams dang rlung sems 'dus pa'i snang ba tsam ma yin par ye shes rang snang mngon sum du bstan pas yang zab kyi man ngag gnad kyi gdams pa a ti'i khyad chos te/_snying dbus mi shigs pa'i thig le dwangs ma 'od gsal gyi rig pa'i ye shes ngo bo skur bzhugs pa ka dag gi dgongs pa dang mthun pa don/_rang bzhin 'od gsal du bstan pas gsang skor lus dkyil dang mthun pa'i brda/_thugs rje sgron mar snang bas yang gsang snying thig dang mthun pa'i rtags su bstan pa gang*/_rang byung rdo rje sems dpa'i gseng lam rtsa ka ti shel sbubs can gyi lam brgyud de 'char bas mig dbang rgyang zhags kyi sgron me las snang*/_phyi dbyings nam mkha' go phyes pa'i 'od snang mthing ga_/nang dbyings lnga ldan sgron me'i snang ba rnams thig le lug rgyud dang bcas pa 'char ba'i thabs su lus bzhugs stangs/_mig gzigs stangs/_rlung gnad/_yul gyi gnad rnams la brten te 'char ba la bslab bo/__/gnyis pa ni/_nang gi rig pa zang thal gsal:sogs nas/_chen po'i snang ba ste:_zhes pa ste nang rig pa'i dgongs pa gnad kyis gcun te sgom pa'i gdangs phyi ru 'char ba la nang gi rang gdangs su shes pas gzir bas dbyings kyi rtags su 'od 'khyil/_ye shes kyi rtags su thig le/_sku'i rtags su lu gu rgyud/_thugs rje'i rtags su rang gsal/_ngo bo'i rtags su mi rtog pa'i ye shes gzhi las gzhi snang du shar nas ngo 'phrod pa chos nyid mngon sum gyi snang ba/_dbyings rig smin mtshams nas bral te dbyings snang 'od kyi rang bzhin ma nges pa'i gzugs dbyibs du ma dang*/_zer thag_/sku phyed pa'am rkyang pa 'gul 'khrigs med par 'char ba nyams gong 'phel/_gdos bcas kyi snang ba dag ste rang snang 'od gsal chen po 'byams klas pa'i dbyings/_thig le re re'i nang du rigs lnga'i yab yum gyi tshom bu lnga tshan lnga yi dkyil 'khor tshad med par 'char te snang srid sku dang zhing khams rang bzhin yongs su brdal ba rig pa skur smin pas tshad phebs/_phyi snang ba'i 'phel/_nang sgyu lus kyi chos/_gsang ba rtog tshogs kyi sems zad de blo 'das gdod ma'i btsan sa zin te thog ma'i spyi gzhi las 'phags pa'i gzhi snang thig le chen por skad cig gis grol nas/_nang gsal sku dang ye shes 'du 'bral med pa'i klong du 'pho 'gyur med par sangs rgyas pa'o/__/gsum pa ni/_dbyings ni ka dag gos dkar mo:sogs nas/_le'u ste bcu dgu pa'o:_zhes pa ste dbyings spros bral rnam kun mchog ldan ka dag gi dgongs pa'i rtsal rdzogs pa chos kun 'byung gnas yum chen na bza' dkar mo dang*/_rig pa bde chen dkyil 'khor rgya mtsho'i khyab bdag sku lnga'i dbang phyug tshe bdag snang ba mtha' yas gnyis su med pa dkyil 'khor gcig tu dag cing rdzogs nas nam mkha' ji srid skye 'chi bdud bzhis gzhom du med pa 'chi med ye shes rdo rje lta bu'i gsang ba gsum du byang chub pa'o/__/gsum pa tha mar dge ba nyams len gyi spyi sdom gtad rgya dang grol tshad bcas bshad pa la/_dang po nyams len gyi spyi sdom bshad pa ni/_rmad du byung ba'i rdo rje'i tshig:sogs nas/_le'u ste nyi shu pa'o:_zhes pa ste de ltar bstan pa'i lam 'di dag kyang gang zag gi dbang po'i khyad par nyams su len pa la rim can/_gcig car du ma las gang zag spros pa la dga' ba dag la bsag sbyang gi rim pa gtso bor smros pa'i phyi sgrub/_snang srid dag chen ye shes kyi 'khor lor lam du khyer nus pa'i blo gros mchog dang ldan pa la bskyed rim spros pa can bsnyen sgrub yan lag bzhi ldan nang sgrub/_sgo gsum gnad kyis gcun te nyams len mthar dbyung nus pa'i brtson 'grus can la rang lus dang pho nya'i myur lam/_shin tu dbang rab nang gi rnal 'byor 'ba' zhig lam du khyer nus pas ni rtsol med theg mchog gi ting 'dzin kho na ste so so'i dbang pos chun tshod kyi lam la 'bad pa rtsal du bton pa dang*/_bskyed rdzogs zung 'jug gi tshul du bsgom na/_sngon 'gro'i bsag sbyang gi rim pa rtsal du bton pa'i skabs phyi sgrub kyi grangs bsnyen 'gro bar bya/_rgyun gyi ting 'dzin la brten te bskyed rim mos sgom la 'dris gdags shing bsnyen grangs thems par bya/_de nas nang sgrub kyang bsnyen sgrub las gsum dang*/_mkha' 'gro'i phrin las/_rig 'dzin bla ma'i tshe sgrub bcas mthar phyin pa dang*/_rtsol bcas rtsol med gang rung gi rdzogs rim la 'jug cing brtson pa mthar dbyung*/_de dag skabs ji rigs par bar chad sel phyir rta mgrin gyi bskyed bzlas dang*/_tshe spel zhing gegs sel ba'i las rim dang*/_spros bcas tshogs sgrub mos slob sogs kyang spro na byas pas rab kyis 'chi med ye shes kyi sku/_'bring gis tshe bsod dpal 'byor/_tha mas kyang tshe'i 'gal rkyen ci rigs sel zhing*/_mthun rkyen 'phel ba'i dngos grub thob par gdon mi za'o/__/gnyis pa 'bras bu'i grol tshad ni/_rgyal kun gsung gi gsang ba che:sogs nas/_le'u ste nyi shu rtsa gcig pa'o:_zhes pa ste de ltar bskyed rdzogs nges pa'i lam la brten pas dbang rtul ngo bo gdos bcas kyi phung po dang ma bral ba rnam par smin pa'i lus la/_sems nyid bsgrub bya'i lha yi skur smin pas lus rgya dang bral ma thag phyag rgya'i rig 'dzin la sbyor ba'i mtshan nyid gsum ldan lhag med myang 'das/_dgongs pa rgyu'i theg pa'i mthong lam pa dang skal mnyam/_spyod pa bdag don dkyil 'khor bya bas tshogs gnyis rdzogs par byed cing lha yi spyan sogs kyis phrin las bzhi'i 'gro ba'i don byed pa rnam smin rig 'dzin/_dbang rnon ngo bo lus zag pa gsum zad pa tshe la dbang ba'i rdo rje'i lus thob pa lhag bcas myang 'das/_dgongs pa sa brgyad pa dang skal mnyam/_spyod pa lta ba ched 'dzin kun 'gro'i dri ma bsal/_mngon shes dang cho 'phrul gyis gzhan don mdzad pa tshe dbang rig 'dzin/_ngo bo mi g.yo ba'i ting 'dzin gyis lhan skyes kyi dri ma sbyangs pa la zhugs pa ye shes sgyu ma'i sku can/_dgongs pa dag pa sa gsum dang skal mnyam/_spyod pa dgongs pa mi g.yo ba'i ngang nas zhing rnams su sprul pas gzhan don byed pa ni phyag rgya'i rig 'dzin ngo bo lam mthar phyin sku lnga lhun grub kyi sa la son pa/_dgongs pa sangs rgyas dang mnyam pa/_spyod pa shes sgrib phra ba sbyangs nas zhing rab 'byams su gzhan don mdzad pa lhun grub rig 'dzin la sbyor bas lam lnga mthar son te sangs rgyas kyi gsang ba mi zad rgyan gyi 'khor lo la dbang bsgyur bas don gnyis lhun grub kyi phrin las nam mkha' ji srid du snang ba'i go 'phang mngon du gyur pa'o/__/de yang spyir bdag ni so so'i skye bo 'ching ba kun ldan gyi rmongs 'khrul ma rig ra ri'i rang gzugs la som nyi'i gnas su mchis mod/_sgrib bral ye shes gzigs pa'i chos kyi spyan rab pad+ma'i 'dab ltar rgyas pa kun mkhyen 'jam pa'i dbyangs blo gros rgya mtsho'i spyan sngar rje gong ma'i phyag bris dze tA ri'i lugs tshe dpag med lha dgu'i rgya gzhung zhig son pa'i rkyen gyis lha sngags rnam pa 'dra ba'i sgrub skor zhig rig stong ye shes kyi 'char sgor gsal ba/_phyis gus zhabs rmongs pas chos skor 'di gzigs 'bul zhus pa'i tshe gcig tu 'dug pas phran gang zag dman ches pa ma gtogs yid ches kyi gsos su 'dug gsungs pa dang*/_yang zab rig 'dzin tshe sgrub la nyams bzhes gnang bas rtags mtshan dge bar byung tshul phebs pas rang nyid kyang rtsa gsum dgyes pa'i byin rlabs kyi snang bas zab gsang gi sgo zhig stes dbang gis thol byung du rnyed pa yin srid snyam du nges pa brtan par gyur pas skal bzang mos ldan dag gis kyang yid ches kyi gsos su 'dir smras pa'o/__/mchog gi bstan dang ston pa'i legs gsung bcud/_/rgyu mtshan shes pa'i blo ldan mdun sa ru/_/rnam dpyod sor mos bstar ba'i dga' ston 'di/_/mkha' spyod kun dga'i tshal nas blangs pa bzhin/_/cal sgrog 'ud kyi gling bu ma lags shing*/_/brdzun ris chu gnyer bgrang ba'i ngal min kyang*/_/deng dus mi shes skye bo'i tshogs pa la/_/gser dang zha nye nor ba rang gi gshis/_/'on kyang las smon spu sdug dar bab cing*/_/rnam grol mkha' la rtsen 'dod mdongs mtha' can/_/legs bshad dbyar gyi rnga gsang 'dis bskul te/_/dge legs zlos gar bsgyur ba'i rgyur gyur cig__/ces rdo rje gsang ba'i tshig 'chi med rdo rje'i tshe sgrub pa'i gsang lam kun tshang nor bu dbang gi rgyal po'i snying po 'di la gdod nas dag pa'i thugs bskyed kyis 'brel ba'i rigs kun khyab bdag 'jam dbyangs bla ma pad+ma ye shes rdo rje'i spyan sngar tshul 'di'i smin grol bdud rtsi'i mchod sprin thog mar phul ba'i tshe khrid rim 'di ltar yid la 'char bas slad nas yi ger 'god 'os pa'i bka' lung nor bu'i cod pan tshangs gnas su bstsal ba dang*/_lung zin chos kyi bdag po sangs rgyas mnyan pa mchog gi sprul pa'i sku karma bshad sgrub bstan pa'i nyi mas kyang thugs dam nyams bzhes su gsung gis bskul ba ltar rang nyid kyis nyams len gyi g.yar khral skabs man ngag gi gnad gsang cung zad rig pa'i khul gyis rdo rje'i lam mchog 'di nyid kyi bka' bab pad+ma gar gyi dbang phyug 'od gsal mdo sngags gling pa tshe dbang grub pa'i rdo rje mi shigs g.yung drung rtsal gyis yid 'ong lta na sdug gi sman ljongs chos gling sgrub sde nges don 'od gsal rig pa'i pho brang du rdzogs pa'i sangs rgyas zhe chen pa pad+ma dgyes pa'i dus chen gyi mchod pa nas dbu brtsams nas rim gyis yi ger btab pa ye shes DA ki'i thugs thig tu mchis phyir skal ldan nges pa'i snod gyur la legs par bstan zhing snod min la khyab brdal du sbyin mi rung ba'i gdams pa 'dis kyang rgyal bstan 'dzin pa'i skyes bu rnams kyi sku tshe'i dga' ston mchog tu 'phel ba'i rten 'byung rmad du byung ba'i dpal kho nar gyur cig_/bkra shis dge legs 'phel/_/'chi med pad+ma dgyes pa'i byin rlabs bdud rtsi'i zil mngar snying la sim/_/zab gsang rdo rje'i rgyud kyi gling bu DA ki'i gIrti'i thos 'dzin snyan/_/bla med gsang mchog dga' tshal bsnyen pa'i rig 'dzin gzhon nu'i brnag pa'i chos/_/las smon shing rtas mngon sum snang ba'i dpal gyi dum bu'i 'dzum dkar rmad/_ces kyang smras so/__/oM swa sti shrI bi dza yan+tu/_sangs rgyas pad+ma'i thugs tig zab gsang chos/_/rdo rje'i tshe mchog sgrub pa'i khrid kyi rim/_/mdo sngags bstan 'dzin nor bus par bskrun mthus/_/bdag sogs 'chi med rdo rje'i sku thob shog_/ces dam pa mchog gi bka' yis bskul ba bzhin gar dbang mdo sngags gling pas ched du brjod pa A yu tiSh+Than+tu/_sarba mang+ga laM/_dge'o//__//