DKR-KABUM-16-MA-002

🚧 This website is under continued development. We appreciate your patience!

Previous Text Back to Volume PageNext Text

ཡོན་ཏན་མཛོད་ཀྱི་འཆད་ཐབས་ཡིད་ཀྱི་མེ་ལོང་།

Wylie title	yon tan mdzod kyi 'chad thabs yid kyi me long
Location	dil mgo mkhyen brtse bka' 'bum Volume 16, Text 2, Pages 329-332 (Folios 1a to 4a6)
Author	དཔལ་སྤྲུལ་རིན་པོ་ཆེ་
Less details More details
Source Author(s)	འཇིགས་མེད་གླིང་པ་ ('jigs med gling pa)
Citation	Khyentse, Dilgo. Yon tan mdzod kyi 'chad thabs yid kyi me long. In Skyabs rje dil mgo mkhyen brtse rin po che'i bka' 'bum, Vol. 16: 329-332. Delhi: Shechen Publications, 1994.
Genre	Commentary Synoptic - bsdus don 'grel pa
Lotsawa House Link	https://www.lotsawahouse.org/tibetan-masters/patrul-rinpoche/yonten-dzo-prologue https://www.lotsawahouse.org/tibetan-masters/patrul-rinpoche/yonten-dzo-synopsis
Colophon	First colophon: དཔལ་སྤྲུལ་གྱིས་གསུངས་སོ།། Second colophon: །ཆོས་རྗེ་དཔལ་སྤྲུལ་རིན་པོ་ཆེའི་ཀུན་བཟང་ཐེག་མཆོག་རྡོ་རྗེར་གསུངས་པའི་སྐབས་སུ་མཛད་པའོ།།
	First colophon: dpal sprul gyis gsungs so/ Second colophon: chos rje dpal sprul rin po che'i kun bzang theg mchog rdo rjer gsungs pa'i skabs su mdzad pa'o//

Tibetan Text

Wylie

[edit]

༄༅། །ཡོན་ཏན་མཛོད་ཀྱི་འཆད་ཐབས་ཡིད་ཀྱི་མེ་ལོང་བཞུགས།། །།

༄༅། །ཉན་པོ་སྣོད་དུ་རུང་བའི་ཆོས་ལ། མཛད་པ་པོ་སློབ་དཔོན་གྱི་ཆེ་བ། དེའི་མཛད་པའི་ཆོས་ཀྱི་ཆེ་བ། ཆེ་བ་དེ་ལྟ་བུ་དང་ལྡན་པའི་ཆོས་བཤད་ཅིང་ཉན་པའི་ཚུལ་དང་གསུམ་ལས། དང་པོ་ནི། བདེ་བར་གཤེགས་པའི་བསྟན་པ་ལ་གུས་པས་ལེགས་པར་འཛིན་པ། ཐོས་བསམ་རྟོག་གེའི་ཤེས་རབ་ཀྱིས་སྦྱང་བརྩོན་མ་མཛད་ཀྱང་ཆོས་ཉིད་ཇི་ལྟ་བའི་ཡེ་ཤེས་དོན་དམ་པའི་གནས་ལུགས་རྫོགས་པ་ཆེན་པོ་ཆོས་ཉིད་མངོན་སུམ་དུ་གཟིགས་པའི་རྩལ་ལས་ཆོས་ཅན་ཤེས་བྱའི་གནས་ཚུལ་ཇི་སྙེད་མཁྱེན་པའི་ཡེ་ཤེས་བསྒོམ་བྱུང་གི་ཤེས་རབ་ཀློང་རྡོལ་ཏེ་ཆོས་རབ་ཏུ་རྣམ་པར་འབྱེད་པའི་ཤེས་རབ་ལ་མངའ་དབང་འབྱོར་ཞིང་། རྗེས་ཐོབ་སྙིང་རྗེ་ཆེན་པོས་རང་གཞན་གྱི་དོན་ལ་བརྩོན་པའི་གོ་ཆ་བགོས་པ་རྫོགས་པ་ཆེན་པོ་རང་བྱུང་རྡོ་རྗེའམ་རིག་འཛིན་འཇིགས་མེད་གླིང་པ་ཞེས་བྱའོ། །ཆོས་ནི་ཐེག་པ་མཐའ་དག་གི་སོགས་ཐེག་པ་ཆེན་པོའི་མན་ངག་གི་བསྟན་བཅོས་ཡོན་ཏན་རིན་པོ་ཆེའི་མཛོད་ཅེས་བྱ་བ་ཡིན་ནོ། །ཆིངས་ཆེན་པོ་ལྔ་ལས། དང་པོ་དགོས་པ་ནི། ཡོན་ཏན་རིན་པོ་ཆེའི་མཛོད་ལེའུ་བཅུ་གསུམ་གྱི་བདག་ཉིད་ཉེ་བར་བཀོད་པ་ལས། སྐལ་བ་དང་ལྡན་པའི་གང་ཟག་གིས་ཐོས་པ་དང་བསམ་པ་དང་བསྒོམ་པས་བདེ་བླག་ཏུ་རྟོགས་ཏེ་ཞུགས་པས། གནས་སྐབས་དང་མཐར་ཐུག་གི་དོན་གཉིས་འགྲུབ་པའི་ཐབས་དམ་པར་གྱུར་པ་ནི་འདིའི་དགོས་པའོ། །བསྡུས་པའི་དོན་ནི། ལམ་ལ་འཇུག་པའི་རྒྱུ་དང་། ལམ་དངོས་དང་། མཐར་ཐུག་གི་འབྲས་བུ་གསུམ་དུ་འདུ་ཞིང་། ཚིག་གི་དོན་ནི། གཞུང་རྒྱ་ཆེར་བཤད་པའི་སྐབས་བཞིན་ལ། སྔ་ཕྱི་འབྲེལ་བའི་མཚམས་སྦྱོར་ནི། ལེའུ་དང་པོས་དལ་འབྱོར་གྱི་རང་བཞིན་རྙེད་པར་དཀའ་བའི་རྒྱུ་མཚན་བཤད་དེ་ཆོས་ལ་འཇུག་པའི་རྒྱུ་བྱེད་ཅིང་། ལེའུ་གཉིས་པས་དེ་ལྟ་བུའི་དལ་འབྱོར་དེ་ཡང་མི་རྟག་པའི་རང་བཞིན་དུ་བསྟན་པས་ཆོས་ལ་མྱུར་དུ་འཇུག་ཅིང་བརྩོན་འགྲུས་ཀྱི་ཕྱི་བཤོལ་དུ་མི་ལུས། ལེའུ་གསུམ་པས་དེ་ལྟར་མི་རྟག་པར་གྱུར་ནས་ཀྱང་སྲིད་པ་ཕྱི་མར་དཀར་ནག་གི་ལས་འབའ་ཞིག་གི་རྗེས་སུ་འབྲང་དགོས་པའི་ལས་འབྲས་ཀྱི་འདོར་ལེན་བཤད། །དེ་ལྟར་དགེ་སྡིག་གི་འབྲས་བུ་རིགས་དྲུག་གི་གནས་ཡིན་པས་ལེའུ་བཞི་པས་འཁོར་བའི་སྡུག་བསྔལ་བསྟན། དེ་ལྟར་འཁོར་བ་སྡུག་བསྔལ་དུ་ཤེས་ནས་དེ་སྤོངས་པའི་ཐབས་དམ་པའི་ཆོས་ལ་འཇུག་པའི་སྒོ་འཁོར་ལོ་ཆེན་པོ་བཞིའི་ཚོམ་ལེའུ་ལྔ་པས་བཤད། དེ་ལྟར་འཁོར་ལོ་ཆེན་པོ་བཞིའི་རང་བཞིན་ངེས་པར་ཚང་བའི་སྐྱེས་བུ་དེ་བསྟན་པ་ལ་འཇུག་པའི་གཞི་རྟེན་སྐྱབས་འགྲོ་ཡིན་པས་ལེའུ་དྲུག་པས་སྟོན། སྐྱབས་སུ་སོང་ནས་ཐེག་པ་ཆེན་པོའི་ལམ་ལ་འཇུག་པའི་ཐོག་མར་ཚད་མེད་བཞིའི་རང་བཞིན་ལེའུ་བདུན་པས་སྟོན། དེ་ལྟར་ཚད་མེད་བཞིས་བློ་སྦྱངས་པས་བྱང་ཆུབ་ཀྱི་སེམས་རང་ཤུགས་ཀྱིས་སྐྱེ་ཞིང་རྒྱུད་ལས་སུ་རུང་བར་བྱས་ནས་སེམས་བསྐྱེད་པ་དངོས་ལེའུ་བརྒྱད་པས་སྟོན། དེ་ལྟར་སེམས་བསྐྱེད་ནས་དེའང་བསླབ་བྱ་ལེགས་པར་བསླབ་པ་ལ་བརྟེན་ནས་མི་ཉམས་པར་བཟུང་དགོས་པས་ལེའུ་དགུ་པ་སྨོན་འཇུག་གི་བསླབ་བྱ་སྟོན། དེ་ལྟར་སེམས་བསྐྱེད་པའི་གང་ཟག་དེ་ངང་གིས་བློ་ཆེན་པོར་གྱུར་པས་ཆོས་ཟབ་མོའི་སྣོད་རུང་དུ་བྱས་ནས་ལམ་བདེ་མྱུར་དང་ལྡན་པས་གསང་སྔགས་རྡོ་རྗེ་ཐེག་པའི་ལམ་དུ་འཇུག་རུང་བ་ཡིན་པས་དེ་སྟོན་ཕྱིར་ལེའུ་བཅུ་པས་གསང་སྔགས་སྤྱིའི་རང་བཞིན་དང་། བཅུ་གཅིག་པ་དང་བཅུ་གཉིས་པས་རྫོགས་པ་ཆེན་པོའི་གཞི་ལམ་གྱི་རྣམ་བཞག་ལེགས་པར་གཏན་ལ་ཕབས་ཏེ་དབང་རྣོན་ཚེ་གཅིག་གིས་གྲོལ་བའི་ལམ་བཟང་རྫོགས་པར་བསྟན་ནས་ལེའུ་བཅུ་གསུམ་པས་དེ་ལྟར་ལམ་མཐར་ཕྱིན་པའི་འབྲས་བུ་མཐར་ཐུག་པ་ལེགས་པར་བསྟན་པ་ཡིན་ནོ། །བརྒལ་ལན་གྱི་སྒོ་ནས་བཤད་པ་ནི་གཞུང་རྒྱ་ཆེར་བཀྲོལ་སྐབས་ཉིད་དུ་ཕྱོགས་སྔ་མའི་རྩོད་པའི་རིགས་སུ་གཏོགས་པ་རྣམས་ལུང་རིག་གཏན་ཚིགས་ཀྱི་སྒོ་ནས་ལེགས་པར་སྤངས་ཏེ་འཆད་པར་འགྱུར་བ་ལས་ཤེས་པར་འགྱུར་རོ། ། དཔལ་སྤྲུལ་གྱིས་གསུངས་སོ།། །། ༈ །མན་ངག་གི་བསྟན་བཅོས་ཡོན་ཏན་མཛོད་ཀྱི་བསྡུས་དོན་བསྡུས་པ་ཨུཏྤལ་གཞོན་ནུའི་ཕྲེང་བ་བཞུགས་སོ། །སྤྱིར་ཆོས་གང་ཞིག་འཆད་པ་ལ་བཤད་བྱའི་ཡན་ལག་བཤད་པ་དང་། བཤད་བྱ་དངོས་བཤད་པ་གཉིས། དང་པོ་ལའང་བཤད་ཐབས་ཀྱི་ཚུལ་བསམ་པ། ཇི་ལྟར་བཤད་ཅིང་ཉན་པའི་ཚུལ། བཤད་ཅིང་ཉན་པའི་ཕན་ཡོན་བསྟན་པ་དང་གསུམ་ལས། དང་པོ་ལའང་སངས་རྒྱས་ཀྱིས། ཉན་ཐོས་དགྲ་བཅོམ་པས། མཁས་པ་པཎྜི་ཏས་ཆོས་འཆད་ཚུལ་གསུམ། སངས་རྒྱས་ཀྱིས་ཆོ་འཕྲུལ་གསུམ་གྱིས། ཉན་ཐོས་ཀྱིས་དག་པ་གསུམ་གྱིས། པཎྜི་ཏས་འཆད་ཚུལ་ལ་དཔལ་ན་ལེནྡྲའི་གཙུག་ལག་གི་པཎྜི་ཏ་རྣམས་ནི་བཀའ་ཐམས་ཅད་ཕུན་སུམ་ཚོགས་པ་ལྔ་དང་། བསྟན་བཅོས་ཐམས་ཅད་རྩིས་མགོ་ཡན་ལག་ལྔས་འཆད། བི་ཀྲ་མ་ཤི་ལའི་པཎྜི་ཏ་རྣམས་ཉན་པ་པོ་སྣོད་དུ་རུང་བར་བྱེད་པ་དང་། བསྟན་པའི་རྣམ་བཞག་ངེས་པ་གཉིས་ཀྱིས་འཆད། ཉན་པ་པོ་སྣོད་དུ་རུང་བའི་ཆོས་ལ་གསུམ། བསྟན་པའི་རྣམ་བཞག་ངེས་པ་ལ་གསུམ་གྱི་སྒོ་ནས་འཆད། གཉིས་པ་ཇི་ལྟར་བཤད་ཅིང་ཉན་པའི་ཚུལ་ལ། འཆད་པ་པོའི་སློབ་དཔོན། ཉན་པ་པོའི་སློབ་མ། ཐུན་མོང་དུ་བྱ་བའི་རང་བཞིན་ནོ། །གསུམ་པ་བཤད་ཅིང་ཉན་པའི་ཚུལ་བསྟན་པ་གཞུང་བཞིན་ནོ། །བཤད་བྱ་དངོས་བཤད་པ་ལ། སྐབས་དོན་བྱེ་བྲག་ཏུ་བཤད་པ་དང་། གཞུང་དོན་རྒྱས་པར་བཤད་པ་གཉིས། དང་པོ་ལ་ཆིངས་ཆེན་པོ་ལྔ་དང་དགོས་འགྲེལ་ཡན་ལག་བཞི་བཤད་པ་གཉིས། གཉིས་པ་གཞུང་དོན་རྒྱས་པར་བཤད་པ་ལ་ཀླད་ཀྱི་དོན། གཞུང་གི་དོན། མཇུག་གི་དོན་གསུམ། དང་པོ་ལ་མཚན་བཤད་པ། ཕྱག་འཚལ་བ། མཆོད་པར་བརྗོད་པ། རྩོམ་པར་དམ་བཅའ་བ་རྣམས་སོ། གཞུང་དོན་ལེའུ་བཅུ་གསུམ། མཇུག་དོན་ལ་བསྟན་བཅོས་རྩོམ་པའི་རྒྱུ། ཉེས་པ་མཐོལ་བཤགས། རྗེས་འཇུག་སྤྲོ་བ་བསྐྱེད་པ། དགེ་རྩ་ཡོངས་སུ་བསྔོ་བ་དང་གསུམ་གྱིས་ཚང་ངོ་། །དགེའོ།། །ཆོས་རྗེ་དཔལ་སྤྲུལ་རིན་པོ་ཆེའི་ཀུན་བཟང་ཐེག་མཆོག་རྡོ་རྗེར་གསུངས་པའི་སྐབས་སུ་མཛད་པའོ།། །

[edit]

/yon tan mdzod kyi 'chad thabs yid kyi me long bzhugs//_// @#/__/nyan po snod du rung ba'i chos la/_mdzad pa po slob dpon gyi che ba/_de'i mdzad pa'i chos kyi che ba/_che ba de lta bu dang ldan pa'i chos bshad cing nyan pa'i tshul dang gsum las/_dang po ni/_bde bar gshegs pa'i bstan pa la gus pas legs par 'dzin pa/_thos bsam rtog ge'i shes rab kyis sbyang brtson ma mdzad kyang chos nyid ji lta ba'i ye shes don dam pa'i gnas lugs rdzogs pa chen po chos nyid mngon sum du gzigs pa'i rtsal las chos can shes bya'i gnas tshul ji snyed mkhyen pa'i ye shes bsgom byung gi shes rab klong rdol te chos rab tu rnam par 'byed pa'i shes rab la mnga' dbang 'byor zhing /_rjes thob snying rje chen pos rang gzhan gyi don la brtson pa'i go cha bgos pa rdzogs pa chen po rang byung rdo rje'am rig 'dzin 'jigs med gling pa zhes bya'o/_/chos ni theg pa mtha' dag gi sogs theg pa chen po'i man ngag gi bstan bcos yon tan rin po che'i mdzod ces bya ba yin no/_/chings chen po lnga las/_dang po dgos pa ni/_yon tan rin po che'i mdzod le'u bcu gsum gyi bdag nyid nye bar bkod pa las/_skal ba dang ldan pa'i gang zag gis thos pa dang bsam pa dang bsgom pas bde blag tu rtogs te zhugs pas/_gnas skabs dang mthar thug gi don gnyis 'grub pa'i thabs dam par gyur pa ni 'di'i dgos pa'o/_/bsdus pa'i don ni/_lam la 'jug pa'i rgyu dang /_lam dngos dang /_mthar thug gi 'bras bu gsum du 'du zhing /_tshig gi don ni/_gzhung rgya cher bshad pa'i skabs bzhin la/_snga phyi 'brel ba'i mtshams sbyor ni/_le'u dang pos dal 'byor gyi rang bzhin rnyed par dka' ba'i rgyu mtshan bshad de chos la 'jug pa'i rgyu byed cing /_le'u gnyis pas de lta bu'i dal 'byor de yang mi rtag pa'i rang bzhin du bstan pas chos la myur du 'jug cing brtson 'grus kyi phyi bshol du mi lus/_le'u gsum pas de ltar mi rtag par gyur nas kyang srid pa phyi mar dkar nag gi las 'ba' zhig gi rjes su 'brang dgos pa'i las 'bras kyi 'dor len bshad/_/de ltar dge sdig gi 'bras bu rigs drug gi gnas yin pas le'u bzhi pas 'khor ba'i sdug bsngal bstan/_de ltar 'khor ba sdug bsngal du shes nas de spongs pa'i thabs dam pa'i chos la 'jug pa'i sgo 'khor lo chen po bzhi'i tshom le'u lnga pas bshad/_de ltar 'khor lo chen po bzhi'i rang bzhin nges par tshang ba'i skyes bu de bstan pa la 'jug pa'i gzhi rten skyabs 'gro yin pas le'u drug pas ston/_skyabs su song nas theg pa chen po'i lam la 'jug pa'i thog mar tshad med bzhi'i rang bzhin le'u bdun pas ston/_de ltar tshad med bzhis blo sbyangs pas byang chub kyi sems rang shugs kyis skye zhing rgyud las su rung bar byas nas sems bskyed pa dngos le'u brgyad pas ston/_de ltar sems bskyed nas de'ang bslab bya legs par bslab pa la brten nas mi nyams par bzung dgos pas le'u dgu pa smon 'jug gi bslab bya ston/_de ltar sems bskyed pa'i gang zag de ngang gis blo chen por gyur pas chos zab mo'i snod rung du byas nas lam bde myur dang ldan pas gsang sngags rdo rje theg pa'i lam du 'jug rung ba yin pas de ston phyir le'u bcu pas gsang sngags spyi'i rang bzhin dang /_bcu gcig pa dang bcu gnyis pas rdzogs pa chen po'i gzhi lam gyi rnam bzhag legs par gtan la phabs te dbang rnon tshe gcig gis grol ba'i lam bzang rdzogs par bstan nas le'u bcu gsum pas de ltar lam mthar phyin pa'i 'bras bu mthar thug pa legs par bstan pa yin no/_/brgal lan gyi sgo nas bshad pa ni gzhung rgya cher bkrol skabs nyid du phyogs snga ma'i rtsod pa'i rigs su gtogs pa rnams lung rig gtan tshigs kyi sgo nas legs par spangs te 'chad par 'gyur ba las shes par 'gyur ro/_/_dpal sprul gyis gsungs so//_//_!_/man ngag gi bstan bcos yon tan mdzod kyi bsdus don bsdus pa ut+pal gzhon nu'i phreng ba bzhugs so/_/spyir chos gang zhig 'chad pa la bshad bya'i yan lag bshad pa dang /_bshad bya dngos bshad pa gnyis/_dang po la'ang bshad thabs kyi tshul bsam pa/_ji ltar bshad cing nyan pa'i tshul/_bshad cing nyan pa'i phan yon bstan pa dang gsum las/_dang po la'ang sangs rgyas kyis/_nyan thos dgra bcom pas/_mkhas pa paN+Di tas chos 'chad tshul gsum/_sangs rgyas kyis cho 'phrul gsum gyis/_nyan thos kyis dag pa gsum gyis/_paN+Di tas 'chad tshul la dpal na len+d+ra'i gtsug lag gi paN+Di ta rnams ni bka' thams cad phun sum tshogs pa lnga dang /_bstan bcos thams cad rtsis mgo yan lag lngas 'chad/_bi kra ma shi la'i paN+Di ta rnams nyan pa po snod du rung bar byed pa dang /_bstan pa'i rnam bzhag nges pa gnyis kyis 'chad/_nyan pa po snod du rung ba'i chos la gsum/_bstan pa'i rnam bzhag nges pa la gsum gyi sgo nas 'chad/_gnyis pa ji ltar bshad cing nyan pa'i tshul la/_'chad pa po'i slob dpon/_nyan pa po'i slob ma/_thun mong du bya ba'i rang bzhin no/_/gsum pa bshad cing nyan pa'i tshul bstan pa gzhung bzhin no/_/bshad bya dngos bshad pa la/_skabs don bye brag tu bshad pa dang /_gzhung don rgyas par bshad pa gnyis/_dang po la chings chen po lnga dang dgos 'grel yan lag bzhi bshad pa gnyis/_gnyis pa gzhung don rgyas par bshad pa la klad kyi don/_gzhung gi don/_mjug gi don gsum/_dang po la mtshan bshad pa/_phyag 'tshal ba/_mchod par brjod pa/_rtsom par dam bca' ba rnams so/_gzhung don le'u bcu gsum/_mjug don la bstan bcos rtsom pa'i rgyu/_nyes pa mthol bshags/_rjes 'jug spro ba bskyed pa/_dge rtsa yongs su bsngo ba dang gsum gyis tshang ngo /_/dge'o//_/chos rje dpal sprul rin po che'i kun bzang theg mchog rdo rjer gsungs pa'i skabs su mdzad pa'o//_/