JKW-KABUM-22-ZA-012-013

🚧 This website is under continued development. We appreciate your patience!

Previous Text Back to Volume PageNext Text

རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོའི་དོན་གྱི་རྣམ་པར་ཐར་པ་ལ་བསྟོད་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན།

Wylie title	rje btsun bla ma gter chen chos kyi rgyal po'i don gyi rnam par thar pa la bstod pa'i rdo rje'i thol glu ye shes drwa ba'i rgyan
Location	mkhyen brtse'i bka' 'bum Volume 22, sde tshan 12, Text 13, Pages 383-386 (Folios 20a6 to 21b4)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	གཏེར་བདག་གླིང་པ་འགྱུར་མེད་རྡོ་རྗེ་ (Gter bdag gling pa 'gyur med rdo rje)
Citation	'jam dbyangs mkhyen brtse'i dbang po. rje btsun bla ma gter chen chos kyi rgyal po'i don gyi rnam par thar pa la bstod pa'i rdo rje'i thol glu ye shes drwa ba'i rgyan. In 'jam dbyangs mkhyen brtse'i dbang po'i bka' 'bum, Vol. 22: 383-386. Khams sde dge rdzong sar dgon: Rdzong sar blo gros phun tshogs, 2020.
Genre	Biographies - Hagiography - rnam thar  ·  Vajra Songs - rdo rje'i glu  ·  Verses of Praise - bstod pa
Colophon	།ཅེས་རིགས་དང་དཀྱིལ་འཁོར་ཀུན་གྱི་དེ་ཁོ་ན་ཉིད་རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའི་ཐུན་མོང་མ་ཡིན་པའི་རྣམ་པར་ཐར་པ་ལ་བསྔགས་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན་ཅེས་བྱ་བ་འདི་ཡང་མགོན་པོ་གང་གི་རིན་པོ་ཆེའི་མཆོད་སྡོང་ཆེན་པོའི་མདུན་སར་ཕྱི་ནང་གི་ཚོགས་ཀྱི་མཆོད་པའི་འདུ་བ་འདུ་བགྱིས་པའི་རྗེས་ཐོག་ཏུ་གསོལ་བ་བཏབ་པ་སིདྡྷི་རསྟུ།།
	ces rigs dang dkyil 'khor kun gyi de kho na nyid rje btsun bla ma gter chen chos kyi rgyal po 'gro 'dul gter bdag gling pa'i thun mong ma yin pa'i rnam par thar pa la bsngags pa'i rdo rje'i thol glu ye shes drwa ba'i rgyan ces bya ba 'di yang mgon po gang gi rin po che'i mchod sdong chen po'i mdun sar phyi nang gi tshogs kyi mchod pa'i 'du ba 'du bgyis pa'i rjes thog tu gsol ba btab pa sid+d+hi rastu

1 Texts in this Section (sde tshan or chos tshan)

13 383-386	རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོའི་དོན་གྱི་རྣམ་པར་ཐར་པ་ལ་བསྟོད་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན། rje btsun bla ma gter chen chos kyi rgyal po'i don gyi rnam par thar pa la bstod pa'i rdo rje'i thol glu ye shes drwa ba'i rgyan Biographies - Hagiography - rnam thar   ·   Vajra Songs - rdo rje'i glu   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོའི་དོན་གྱི་རྣམ་པར་ཐར་པ་ལ་བསྟོད་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན་ཅེས་བྱ་བ། ཨེ་མ་ཧོ། གཟོད་ནས་འགྱུར་བ་མེད་པའི་དངོས། །བདེ་ཆེན་གྲུབ་པའི་ཐིག་ལེ་ཅན། །ཁྱབ་བདག་རྡོ་རྗེ་སེམས་དཔའ་ལ། །གཉིས་སུ་མེད་པའི་ཕྱག་གིས་འདུད། །ཉེ་བར་སྦས་པའི་ཙཎྜ་ལཱིས། །བྱང་ཆུབ་སེམས་མཆོག་བཞུ་བའི་དཔྱིད། །རྟག་པ་དམ་པར་འཇོ་མཛད་པ། །སྦྱིན་པའི་ཕ་རོལ་ཕྱིན་ལ་འདུད། །ཟུང་འཇུག་གྲུབ་པའི་ཐབས་མཁས་ཀྱིས། །ཆར་ཡང་གཙུག་ཏོར་རྩེར་བཅིངས་པས། །འཕོ་འཛག་སྤྲོས་པ་རིང་བཅད་པ། །ཚུལ་ཁྲིམས་ཕ་རོལ་ཕྱིན་ལ་འདུད། །སྲོག་དང་རྩོལ་བའི་འཇུག་ལྡང་ཀུན། །ཨ་བ་དྷཱུ་ཏིར་རྒྱས་བཏབ་པས། །གཟུང་འཛིན་མཚན་མ་རང་གྲོལ་བ། །བཟོད་པའི་ཕ་རོལ་ཕྱིན་ལ་འདུད། །ཕྲ་མོའི་རྩ་ཡི་རྒྱུ་བ་ཡང་། །སྒྲ་གཅན་ཁམས་སུ་ཉེར་དག་པས། །འབད་པ་ཆེན་པོས་རབ་འཇུག་པ། །བརྩོན་འགྲུས་ཕ་རོལ་ཕྱིན་ལ་འདུད། །དངོས་ཡིད་ཕྱག་རྒྱ་ལ་སྦྱར་བའི། །བདེ་རླུང་སེམས་གསུམ་རོ་གཅིག་པས། །རྣམ་པར་རྟོག་པ་འཆིང་མཛད་པ། །བསམ་གཏན་ཕ་རོལ་ཕྱིན་ལ་འདུད། །ཀ་དག་འོད་གསལ་གཉུག་མའི་གཤིས། །ལྷུན་གྲུབ་ཕྲ་བའི་སྐུར་སྨིན་པས། །འཁོར་འདས་ཀུན་གྱི་ཁྱབ་བདག་ཆེ། །ཤེས་རབ་ཕ་རོལ་ཕྱིན་ལ་འདུད། །ཟག་པ་མེད་པའི་ཚོགས་གཉིས་ལམ། །དབུ་མའི་སྦུབས་སུ་རྫོགས་པ་ཡིས། །ཟག་པའི་ཆ་བཅས་མཐའ་དག་ཀུན། །ཡོངས་སུ་བྱང་བདེ་ཁྱོད་ལ་འདུད། །གང་དུ་སྣང་བའི་བདེན་བདེན་ཀུན། །སྒྱུ་མའི་ལྷ་སྐུར་རྒྱས་བཏབ་པས། །འོད་གསལ་མཆོག་ལ་སྦྱོར་བའི་ལམ། །རྣམ་སྨིན་རིག་འཛིན་ཁྱོད་ལ་འདུད། །བསམ་གྱིས་མི་ཁྱབ་བརྗོད་དུ་མེད། །འཇུག་དང་ལྡང་བ་ཡོངས་སུ་སྤངས། །གཟོད་མའི་བཞུགས་ཚུལ་མཐོང་བའི་ལམ། །ཚེ་དབང་རིག་འཛིན་ཁྱོད་ལ་འདུད། །གང་ཤར་རྟོག་པ་རྒྱུ་དང་བཅས། །ངང་བཞག་ཆེན་པོར་སྒོམ་པའི་ལམ། །ཆོས་དང་ཆོས་ཅན་རོ་གཅིག་པའི། །ཕྱག་རྒྱ་ཆེན་པོ་ཁྱོད་ལ་འདུད། །ལམ་བདེན་བྲལ་བྱ་ཐམས་ཅད་ཀུན། །འགོག་བདེན་བྲལ་འབྲས་ཆོས་སྐུར་དག །མི་སློབ་ལམ་ཀྱི་འབྲས་བུ་ཅན། །ལྷུན་གྲུབ་རིག་འཛིན་ཁྱོད་ལ་འདུད། །ལྷན་སྐྱེས་གྲུབ་པས་རབ་དགའ་བ། །གློ་བུར་དྲི་མ་མེད་པའི་དཔྱིད། །ཉོན་མོངས་བུད་ཤིང་སྲེག་པ་ཡི། །འོད་གསལ་འདུ་བྱེད་ལྡན་ལ་འདུད། །སྲོག་རྩོལ་དག་པའི་འོད་འཕྲོ་ཞིང་། །རྡོ་རྗེའི་སྐུ་མཆོག་སྦྱང་དཀའ་བ། །བདེ་སྟོང་གྲུབ་པའི་བརྟུལ་ཞུགས་ཀྱིས། །མངོན་དུ་གྱུར་པ་ཁྱོད་ལ་འདུད། །སྲིད་དང་ཞི་ལས་རིང་དུ་སོང་། །ཉོན་མོངས་རྐྱེན་གྱིས་གཡོ་བ་མེད། །སོ་སོར་རྟོག་པའི་ཤེས་རབ་ཀྱིས། །ལེགས་པའི་བློ་གྲོས་ཐོབ་ལ་འདུད། །ཆོས་ཁམས་མི་ཤིགས་ནཱ་དའི་སྤྲིན། །པདྨ་ཅན་གྱི་སར་སྤྲོ་ཞིང་། །རིགས་ཀྱི་འཁོར་ལོ་མཐའ་ཡས་ཚོགས། །འདུས་པ་ཆེན་པོ་ཁྱོད་ལ་འདུད། །འགྱུར་མེད་རྟག་པའི་རྡོ་རྗེ་ཡིས། །ཕྲ་མོའི་ས་བོན་ཡོངས་བཅོམ་སྟེ། །སྐུ་བཞིའི་རྒྱལ་ས་འཛིན་མཁས་པ། །ཧེ་རུ་ཀ་དཔལ་ཁྱོད་ལ་འདུད། །དེ་ལྟར་ཕ་རོལ་ཕྱིན་པའི་སྤྱོད་པ་ལམ་ལྔ་ས་བཅུའི་གཙུག་ཏོར་ཅན། །རྡོ་རྗེ་ཐེག་པའི་ལམ་གྱིས་བགྲོད་པས་གྲུབ་པའི་འཁྲི་ཤིང་གཅིག་པུ་ཁྱོད། །གང་ཤར་བསྔགས་པའི་རྡོ་རྗེའི་གླུ་འདིར་མོས་དང་ཡིད་ལ་བྱེད་པ་ཀུན། །འགྱུར་མེད་བདེ་ཆེན་རྡོ་རྗེའི་དགའ་བས་མི་ཕྱེད་སྙིང་ལ་འཁྱུད་པར་ཤོག །ཅེས་རིགས་དང་དཀྱིལ་འཁོར་ཀུན་གྱི་དེ་ཁོ་ན་ཉིད་རྗེ་བཙུན་བླ་མ་གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པའི་ཐུན་མོང་མ་ཡིན་པའི་རྣམ་པར་ཐར་པ་ལ་བསྔགས་པའི་རྡོ་རྗེའི་ཐོལ་གླུ་ཡེ་ཤེས་དྲྭ་བའི་རྒྱན་ཅེས་བྱ་བ་འདི་ཡང་མགོན་པོ་གང་གི་རིན་པོ་ཆེའི་མཆོད་སྡོང་ཆེན་པོའི་མདུན་སར་ཕྱི་ནང་གི་ཚོགས་ཀྱི་མཆོད་པའི་འདུ་བ་འདུ་བགྱིས་པའི་རྗེས་ཐོག་ཏུ་གསོལ་བ་བཏབ་པ་སིདྡྷི་རསྟུ།། །། ༈

[edit]

o rgyan gter bdag gling pa'i rnam thar la bstod pa'i rdo rje'i thol glu ye shes drwa ba'i rgyan/__ rje btsun bla ma gter chen chos kyi rgyal po'i don gyi rnam par thar pa la bstod pa'i rdo rje'i thol glu ye shes drwa ba'i rgyan ces bya ba/__e ma ho/__gzod nas 'gyur ba med pa'i dngos/__/bde chen grub pa'i thig le can/__/khyab bdag rdo rje sems dpa' la/__/gnyis su med pa'i phyag gis 'dud/__/nye bar sbas pa'i tsaN+Da lIs/__/byang chub sems mchog bzhu ba'i dpyid/__/rtag pa dam par 'jo mdzad pa/__/sbyin pa'i pha rol phyin la 'dud/__/zung 'jug grub pa'i thabs mkhas kyis/__/char yang gtsug tor rtser bcings pas/__/'pho 'dzag spros pa ring bcad pa/__/tshul khrims pha rol phyin la 'dud/__/srog dang rtsol ba'i 'jug ldang kun/__/a ba d+hU tir rgyas btab pas/__/gzung 'dzin mtshan ma rang grol ba/__/bzod pa'i pha rol phyin la 'dud/__/phra mo'i rtsa yi rgyu ba yang /__/sgra gcan khams su nyer dag pas/__/'bad pa chen pos rab 'jug pa/__/brtson 'grus pha rol phyin la 'dud/__/dngos yid phyag rgya la sbyar ba'i/__/bde rlung sems gsum ro gcig pas/__/rnam par rtog pa 'ching mdzad pa/__/bsam gtan pha rol phyin la 'dud/__/ka dag 'od gsal gnyug ma'i gshis/__/lhun grub phra ba'i skur smin pas/__/'khor 'das kun gyi khyab bdag che/__/shes rab pha rol phyin la 'dud/__/zag pa med pa'i tshogs gnyis lam/__/dbu ma'i sbubs su rdzogs pa yis/__/zag pa'i cha bcas mtha' dag kun/__/yongs su byang bde khyod la 'dud/__/gang du snang ba'i bden bden kun/__/sgyu ma'i lha skur rgyas btab pas/__/'od gsal mchog la sbyor ba'i lam/__/rnam smin rig 'dzin khyod la 'dud/__/bsam gyis mi khyab brjod du med/__/'jug dang ldang ba yongs su spangs/__/gzod ma'i bzhugs tshul mthong ba'i lam/__/tshe dbang rig 'dzin khyod la 'dud/__/gang shar rtog pa rgyu dang bcas/__/ngang bzhag chen por sgom pa'i lam/__/chos dang chos can ro gcig pa'i/__/phyag rgya chen po khyod la 'dud/__/lam bden bral bya thams cad kun/__/'gog bden bral 'bras chos skur dag__/mi slob lam kyi 'bras bu can/__/lhun grub rig 'dzin khyod la 'dud/__/lhan skyes grub pas rab dga' ba/__/glo bur dri ma med pa'i dpyid/__/nyon mongs bud shing sreg pa yi/__/'od gsal 'du byed ldan la 'dud/__/srog rtsol dag pa'i 'od 'phro zhing /__/rdo rje'i sku mchog sbyang dka' ba/__/bde stong grub pa'i brtul zhugs kyis/__/mngon du gyur pa khyod la 'dud/__/srid dang zhi las ring du song /__/nyon mongs rkyen gyis g.yo ba med/__/so sor rtog pa'i shes rab kyis/__/legs pa'i blo gros thob la 'dud/__/chos khams mi shigs nA da'i sprin/__/pad+ma can gyi sar spro zhing /__/rigs kyi 'khor lo mtha' yas tshogs/__/'dus pa chen po khyod la 'dud/__/'gyur med rtag pa'i rdo rje yis/__/phra mo'i sa bon yongs bcom ste/__/sku bzhi'i rgyal sa 'dzin mkhas pa/__/he ru ka dpal khyod la 'dud/__/de ltar pha rol phyin pa'i spyod pa lam lnga sa bcu'i gtsug tor can/__/rdo rje theg pa'i lam gyis bgrod pas grub pa'i 'khri shing gcig pu khyod/__/gang shar bsngags pa'i rdo rje'i glu 'dir mos dang yid la byed pa kun/__/'gyur med bde chen rdo rje'i dga' bas mi phyed snying la 'khyud par shog__/ces rigs dang dkyil 'khor kun gyi de kho na nyid rje btsun bla ma gter chen chos kyi rgyal po 'gro 'dul gter bdag gling pa'i thun mong ma yin pa'i rnam par thar pa la bsngags pa'i rdo rje'i thol glu ye shes drwa ba'i rgyan ces bya ba 'di yang mgon po gang gi rin po che'i mchod sdong chen po'i mdun sar phyi nang gi tshogs kyi mchod pa'i 'du ba 'du bgyis pa'i rjes thog tu gsol ba btab pa sid+d+hi rastu//__//__!_