JKW-KABUM-17-TSA-002-049

🚧 This website is under continued development. We appreciate your patience!

Previous Text Back to Volume PageNext Text

མན་ངག་ཉེར་མཁོ་སྣ་ཚོགས།

Wylie title	man ngag nyer mkho sna tshogs
Location	mkhyen brtse'i bka' 'bum Volume 17, sde tshan 2, Text 49, Pages 406-419 (Folios 130b4 to 137a3)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. man ngag nyer mkho sna tshogs. In 'jam dbyangs mkhyen brtse'i dbang po'i bka' 'bum, Vol. 17: 406-419. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

49 406-419	མན་ངག་ཉེར་མཁོ་སྣ་ཚོགས། man ngag nyer mkho sna tshogs Medicine Texts - gso ba rig pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཨོཾ་ཨ་ཐཱ། ཚོགས་གསུམ་ཆུ་གཏེར་བསྲུབས་པའི་ཕུལ། །མཚན་བཟང་བདུད་རྩིའི་དོ་ཤལ་ཅན། །བླ་མ་སྨན་རྒྱལ་ཟླ་བ་དེས། །དེང་འདིར་ཤིས་པའི་སྣང་བ་སྩོལ། །གང་ཚེ་གཞན་ལ་སྨན་འདོད་པའི། །ལྷག་བསམ་ཨུཏྤལ་འཛུམ་པ་དང་། །ལྷན་ཅིག་སྣ་ཚོགས་གདམས་པའི་བཅུད། །སྦྲང་རྩི་གསར་བའི་ཟོལ་གྱིས་འོང་། །དེ་ལ་སྙིང་རླུང་སྨྱོ་འབོགས་ཀྱི་ནད་ཚབ་ཆེན་རིགས་ལ། །སྐྱེས་པ་དར་མ་གྲིར་ཤི་བའི་སྙིང་སྐྱུ་རུ་རའམ། རླུང་ཤས་ཆེ་ན། མྱོས་བྱེད་ནར་སོན་གྱི་ཁུ་བས་ཕུལ་ན་འཕྲལ་དུ་བདེ་བ་སྟེར། ཨུཏྤལ་སེར་པོའི་ཕྱེ་མ་རི་ཤོའི་ཐང་གིས་ཕུལ་ན་བད་མཁྲིས་མགོ་ནད་སྐྱུགས་པར་བྱེད། ཅོང་ཞི་གཉེན་པོའི་ཆུར་བཞུས་པའི་ཐལ་བ་ཁོ་ནས་བད་ཀན་ཕོ་ནད་ཀྱི་རིགས་ལ་ཕན། སྟར་བུའི་ཁཎྜ་ཆ་གཅིག་ལ། རྡོ་ཐལ་ཆ་ཕྱེད་བསྣན་པས་སྐྲན་རིགས་ཐམས་ཅད་ཐལ་བར་རློག །སྐྱུ་རུ་རའི་ཁཎྜས་རྨུ་ཆུའི་ནད་རིགས་ཐམས་ཅད་ལ་ཕན། ཆུ་བསྐོལ་ཁོ་ནས་ཀྱང་རིམས་ཚད་སྨིན་པར་བྱེད། རི་མཐོ་སར་སྐྱེས་བའི་བདུད་རྩི་ལོ་མ་སོར་བཞི་ཙམ་དུས་བཏུས་པས་རིམས་ཚད་སྨིན་པའི་རིགས་ཀུན་ལ་བསྔགས། ཁྱུང་ལྔའི་སྟེང་གླང་ཆེན་སྨྱོན་པ་བསྣན་པས་གཉན་དང་ལྷོག་རྒོད་རིགས་ཀུན་ལ་ཕན། ཏི་ཚའི་དུད་པ་ལག་ལེན་ལྟར་བླང་ནས་ནུ་ཞོས་བྱུགས་པས་མིག་ནད་གྲང་རྐྱེན་ལ་ཕན། ཕ་ཝཾ་ལོང་བུའི་ཕྱེ་མ་ཆུ་གཙང་དང་སྦྱར་བས་ཚ་རྐྱེན་ལ་ཕན། དེ་གཉིས་ལ་ག་བུར་དང་ཁ་ཆེ་ཁ་ཚར་བཏབ་ནས་ཟངས་སྣོད་དུ་སྦྱར་བས་ནུས་པ་རྣོ། མཁན་སྐྱ་སོར་བཞིའི་དུས་བཏུས་པས་སྣ་ཁྲག་གཅོད། ཨ་རུ་ར་དང་གྲི་ཤ་སྦྱར་བས་ཁམ་ཟག་འཇོམས། དྭ་བའི་རྩ་བ་དང་གླ་རྩི་སྦྱར་བས་ཁོང་སྲིན་གྱི་རིགས་ཀུན་ལ་བསྔགས། གུར་ཏིག་སྐྱུ་རུ་རའི་ཐང་གིས་ཕུལ་བས་འབམ་སྟོད་དུ་བབས་པར་མཆོག །སྨད་འབམ་གཉན་དང་བསྡོངས་པ་ལ་ཀླུ་བདུད་ནག་པོ་འཁྲུལ་མེད་དེས་ཕན། བྱ་རོག་ནོར་བུའི་ཐང་གིས་མོ་ནད་ཁྲག་འདྲིལ་བཤིགས། ཤ་དུག་ལ། གསེར་ཤ །རེ་རལ། སྙག །འོམ་བུའི་ལོ་མ་རྣམས་གང་ཡང་རུང་བའི་ཐང་གིས་ཕན། ཁ་སྟོད་དུ་སྐྱེ་བའི་མེ་ཏོག་སེར་ཆེན་མདངས་མི་གསལ་བ་དེས་ཆུ་དུག་ལ་ཕན། རྟ་ལྤགས་གཅིག་པུའི་ཁཎྜའམ། ཡུ་གུ་ཤིང་གི་ཁཎྜ་རྨ་རིགས་ཐམས་ཅད་ལ་བདུད་རྩི་དང་འདྲ། སྔོན་བུ་འཁྲུལ་སྔོ་སྨན་ཞིག་ཡོད། མེད་ཆ་གཅིག །ཐར་ནུ་ཆ་གཅིག་སྦྱར་བའི་ཁཎྜས་ནད་ཐམས་ཅད་སྦྱོང་པར་བྱེད། འཕར་བའི་ཤ་ཁུས་ཁ་ཚའི་ནད་ལ་ཕན་ཞེས་འགའ་ཞིག་བཞེད། འདི་མན་ངག་ཁྱད་པར་ཅན་ཡོད། མེས་ཚིག་གི་རྨ་རིགས་ཉ་ལྕིབས་བྱུགས་པས་འཕྲལ་དུ་བདེ་བ་སྟེར། རྨུ་ཆུའི་ནད་རིགས་ཆུ་སེར་རྡོལ་བ་ལ་འུག་པའི་ཤ་ཁུས་ཕན་པ་ལག་བླངས། ཁྱུང་ལྔའི་སྟེང་མགྲོན་ཐལ་བསྣན་པས་ཕོ་སྐྲན་དང་ཕོ་ཐོག་ལ་ཟབ། ནཱི་ལ་ཐོ་ཋས་རེག་ཞོ་དང་སྦྱར་ནས་བྱུགས། དུག་དང་། བད་མཆུ་ལ་ཕན། རྒུན་འབྲུམ་ཐལ་བ་མར་དཀར་དང་སྦྱར་ནས་བྱུགས་པས་སྣ་ཤུའི་རིགས་ཀུན་འཇོམས། བདུད་རྩི་གངས་ཤམས་སྤར་བ་གང་བ་ཞོ་དང་སྦྱར་ནས་སྔས་སུ་ཐོ་རང་བཞགས་ནས། ཟོས་པ་ཁོ་ནས། གློ་ནད། གསོ་བ་དང་། འདྲེན་པར་བྱེད། འབྲུག་རུས་དང་། མི་རུས་བཙའ་མ་གང་རུང་གི་ཐང་གིས་འཁྲུ་བ་གཅོད། ཡུང་བ། སྐྱུ་རུ་ར། སྦྲང་རྩི་སྦྱར་བས་ཆུ་ཁ་སྲ་བར་བྱེད། གོ་གྲེ་དང་རྒྱ་རུ་སྦྱར་བས་བུད་མེད་ཀྱི་ལྟོ་བར་བུ་ཤི་བའི་ནད་རིགས་ལ་ཕན། ར་མཆིན་རློན་པ་ལ་ཁ་ཆེ་དང་ཕོ་བ་རིས་བཏབ་སྐམ་ནས་ཟོས་པས་སྲོད་དུས་ལོང་བའི་ནད་རིགས་སེལ། ནགས་མའི་མེ་ཏོག་གསར་དུས་ཀྱི་ཁཎྜ་ལ། རྩ་ཨ་ཝ་དང་། འབུ་སུ་ཧང་བཏབ་པ་རྨ་སྨན་མཆོག །ཅོང་ཞི་ཆ་གསུམ། ལྕུམ་རྩ་ཆ་གཉིས་བུལ་ཏོག་ཆ་གཅིག་སྦྱར་བ་ཕོ་ནད་ཐམས་ཅད་ལ་འགྲོ། སྦྲུལ་གྱིས་ཕུག་མ་ཐག་རང་གི་དྲི་ཆུ་དྲོན་མོས་བཀྲུ། དེ་ནས་གླ་རྩི་བཏབ་ལ་ཁ་ཤའི་རྭ་ཅོས་ཚུགས་བྱ། དེས་ཕན་ངེས། ཅོ་གའི་ཀླད་པས་གཉིད་སྲུངས། བསྟེན་དྲགས་ན་སྐྱོན་ཡང་ཡོད། གཏར་ཉེས་ཁྲག་ལོག་ན་སྡོམ་ཐག་བརླན། སྣ་ཁྲག་མ་ཆོད་ན་དཔུང་མགོ་གཡས་གཡོན་ལ་མེ་བཙའ་བྱ་བས་ཕན་ཆེ། སྣ་སྲིན་ལ། གླ་རྩི། ཤིང་ཀུན། འཇམ་འབྲས། བྱི་ཏང་། མ་རུ་ཙེ། བཅས་སྣ་དུད་དང་བསྲེས་ནས་རྔུབས་པས་ཕན་ངེས་ཡིན། བཤལ་བཅད་མ་ཐུབ་ན་ད་ཏྲིག་ཆིག་ཐང་གིས་ཕན་ཆེ། རླུང་གཟེར་འདྲ་བ་ཀུན་ལ་འདར་པུ་བརླན། དམར་དུག་གི་རིགས་ཤིན་ཏུ་ཐུ་བ་ལ། འོམ་ལོ་ལྕགས་སྣོད་དུ་བསྐོལ་བའི་གཡའ་ཁུ་ལས་ཕན་ཆེ་མེད། བོང་ང་ཆིག་དྲིལ་གྱིས་ནད་ངན་རིགས་ཀུན་ལ་ཕན། རྒྱུ་གཟེར་དམར་བཤལ་ལ་ཆོས་ཉིད་རིལ་བུ་ཕུར་ནག་ཐང་གིས་ཕུལ་བ་ཁོ་ནས་ཕན་ཆེ། རྟ་བླའི་རོ་ཆུར་སྦྱངས་ནས་བླུད་པས་ལྷོག་པ་གསོད། རྟ་ལག་པ་ཞ་བ་ཏེ་ལོའི་ཤ་དང་ལྷན་དུ་དཀྲིས་པས་ཕན། གླ་རྩི་ལང་ཐང་། བྱི་ཏང་གསུམ་སོ་བར་བཟུང་བས་སོ་སྲིན་ལ་ཕན། ལྡུམ་ཟངས་རྩི་དང་གཡའ་ཀྱི་ཆ་མཉམ་གྱིས་མཁྲིས་ནད་གྱེན་དུ་འདྲེན་པ་ལ་ཟབ། ཤངས་དྲིལ་དམར་པོ་མདངས་མི་གསལ་བ་དེ་གློ་སྨན་ཆིག་ཐུབ་ཡིན། དེ་སྟེང་ཚན་དམར། འབྲོག་ཟ། སྒ་ཤ་ལ་ཡུ་རིངས་བཅས་ལ་གློ་སྨན་སྙན་བརྒྱུད་སྡེ་བཞི་ཟེར། གློ་རྣག་སྐེམས་པ་ལ་ཟངས་ཐལ་དང་། འདྲེན་པ་ལ་སྤ་ཡག་སྟར་བུ་བཅས་སྦྱར་བས་ཆིག་རྒྱུགས་ཡིན། བདུད་རྩི་གངས་ཤམ་བ་ཞོ་དང་སྦྱར་བ་གློ་རྣག་ལ་ཆིག་རྒྱུགས། ཐར་ནུའི་ལོ་མ་ཁ་འབུས་དུས་བཏུས་པ་དང་། ཐང་ཁྲམ་མེ་ཏོག་གསར་པ། ནགས་མའི་མེ་ཏོག་གཞོན་ནུ་བཅས་ཆ་རེ་རེ་ཁཎྜར་བསྐོལ་བས་རྨ་རིགས་ཐམས་ཅད་ལ་ཐེངས་ཆོག །གྲོགས་ཚང་གི་ས། ཨུག་ཆོས་འབྲས་བུ། རེ་ཚལ། དྲི་ཆེན་བཅས་ནུས་བསྲེགས་ཀྱིས་རྒྱ་ཐོར་ལ་ཤིན་ཏུ་ཕན། ཨ་བྷི་ཥ། ཅོག་ལམ། སྒ་སེར། སྡོང་རོས་བཞིས་རྨ་རིགས་ཐམས་ཅད་ལ་ཕན། ཀྲྀཥྞའི་རཱ་ཡི་དུད་པས་ལུག་ནད་ལ་ཕན། ཨིནྡྲ་བཞི་སྟེང་རམ་པ་བསྣན་པས་འཁྲུ་གཅོད་ཟབ། བཙས་རྗེས་ཟླ་མཚན་འབྱམས་པ་སོགས་ལ་ནང་ལང་འཕར་རྩ་བསྲེགས་པས་ཆོད་ངེས། གློ་བ་སྐྱ་རྩི་ལ་ག་བུར་ཉེར་ལྔ་སྟེང་། གྲོ་ལོ་དམར་པོ་བུངས་ཆེ་བ་དང་། ནག་པོ་དགུ་སྦྱོར་བཅས་བསྲེ་སྨན་གཞན་ལས་འདི་ཕན་ཆེ་བ་ལག་བླངས། ཧོན་གྱི་ཁ་སྲུངས་ལ། ཤིང་རྟ་མའི་རོ་སྒོ་སྐས་སོགས་མ་འགྲིམས་པ་དེ་ཉིད་ཆུ་བརྡུངས་བྱས་ལ། ནག་པོ་དགུ་སྦྱོར་དང་བསྲེས་ལ་བླུད། །སྤྱང་ཁུའི་ཤ་སྐྲན་གྱི་གསང་སྨན། སྤྱང་ལྕེ་དང་། སྐྱི་བའི་འབྲས་བུར་ཁྲག་ལ་སྦྱར་བས་གག་པར་ཕན། སྤྱང་ལྕེ་གཅིག་པུས་ལྕེ་ལ་འབྲུམ་ཐོར་བྱུང་བ་ལ་ཕན། སྤྱང་ཀིའི་སློ་དྲོན་གྱིས་མགུལ་འགགས་ལ་ཕན། དེ་ཡང་བཤས་མ་ཐག་པ་དགོས། རྟ་ནད་རིགས་ཐམས་ཅད་ལ་དང་པོ་གུ་གུལ་གྱི་ཐང་བཏང་། ཁྱིམ་ནང་མ་ཡིན་པར་བྱ་རྒོད་ཀྱི་ཤ་ཕོན་ཆེར་བདུག་པས་ཕན་ངེས་ཡིན། ས་ཟ་བའི་ནད་ལ་ཁམ་ས། གཡག་རྒོད་དར་མའི་ཁྲག །གསེར་མེ་བཅས་བསྐོལ་ནས་བླུད་པས་ཕན། སྦ་བྱིས་ཀྱི་ཚང་ནང་ནས་གཡའ་མ་ཆག་སྦྱོར་གྱི་སྨན་ཐམས་ཀྱིས་བླངས་པས་རྐང་ལག་ཆག་པ་ལ་ཕན་ཟེར་སྲོལ་སྣང་། བྱང་བའི་ཚབ་ཁུག་རྟའི་བྲུན་གྱིས་རུང་། བྱང་བ་ནག་པོ་འདི་རྣོ་ཆེ། ཕྱེད་དུག་བར་གཤོག བཏོན་ཕྱེད་མི་བཏོན། དཀར་ཡོལ་གན་དཀར་ཆགས་ཕྱེས་བུ་རོགས་འཕྲལ་དུ་འབྱིན། ཁྱི་དུག་ལ། ཁྱི་སྨྱོན་ཀླད་པ་བཏང་བས་སྨྱོ་མ་སྨྱོ་གང་ལའང་ཕན་ཆིག་བརྒྱུད། བུད་མེད་ཀྱི་ཟླ་མཚན་འབྱམས་པ་ལ། དེ་ཕོའི་ཨོག་ཞོལ། བྱ་ཕོ་ཙི་ཙི། དོམ་མཁྲིས། ཁ་ཆེ་བཅས་ཀྱི་ཐང་གིས་ཐེམ་བུ་སྡམ་པ་དང་མཚུངས། རྗེས་གཅོད་ལང་རྩ་ལ་མེ་གདབ། རྒྱ་ཚོས་ཀྱི་ཐང་གར་མ་ལ་དོམ་མཁྲིས་བཏབ་གཏོང་ཟླ་མཚན་གཅོད་པ་ལ་ཟབ་འགྱིངས་ན་དེ་ཕོའི་གཙུག་གི་ཟེ་བ། སྟར་བུ། སྦྲུལ་ཤ །བྱང་བུལ་བཅས་གཡེར་ལྕམ་ཐང་གིས་ཕུལ་བས་མྱུར་དུ་འདྲེན་ཅིང་རྗེས་སུ་རྩ་ཁ་སྡོམ་པར་བྱེད། བུ་འགྱིངས་ན་སྤྲེའུའི་རུས་པའི་ཕྱེ་མ་བླུད། ཁབ་དང་མདེའུ་སོགས་ཁོང་དུ་ལུས་པ་ལ་དེ་ཕོའི་ཨོག་ཞོལ་གྱི་ཐང་བཏང་། རྨ་རིགས་ཁྲག་མ་ཆོད་ན་ཟེར་མོའི་རུས་ཕྱེ་འདེབས། མིག་ཁ་བས་ཕྱིད་པ་ལ་ཉ་རུས་ཀྱི་དུད་པས་ཕན། བྱིས་པའི་གཞང་ལུགས་ན་སྔོ་ཆུ་སྲིན་སྡེར་མོའི་ཕྱེ་མ་མར་ཁུ་ཅུང་ཟད་ཀྱིས་ཕུལ། བྲག་སྐྱེས་དབྱི་མོང་ནག་པོ་བཞི་ཤོག་ཅན་དེ་ར་འོ་དང་སྦྱར་ནས་བྱུགས་པས་མཛེར་པ་ལ་ཕན། རྗེས་གཅོད་རང་གི་མ་ཡོད་ན་དེ་ཡི་སྐྲ་ཆུས་བཀྲུ། མེད་ན་ཐོག་མར་གྲུ་ཀོ་ནང་གི་ཆུས་བཀྲུ། དེ་རྗེས་གཙང་ཆེན་གྱི་ཆུས་བཀྲུས་པས་རྟིང་དག་ལ་འགྲོ། སྨན་ནད་ཐལ་ཆེ་བ་ལ། བྲག་སྐྱ། ༡༠༠ ཟེ་ཚྭ། ༠༩༠ ཨ་རུ། ༠་༨༠ བཙོད་མདུད། ༠༥༠ བྱང་བུལ། ༠༤༠ ཡུངས་ཀར། ༠༣༠ བཅས་ཐང་བྱས་ནས། ཁ་ཤིང་ཐུར་གྱིས་བཀར་ལ་བླུགས། སྐྱུགས་ན་ལེགས་ཤིང་། མ་སྐྱུགས་ན་གདུང་བསྐོར་བྱེད། ལུས་ལ་ཆུ་གྲང་ཕྱར། རྟ་སྦང་བཙིར་བའི་ཁུ་བར་བུལ་ཏོག་བཏབ་པ་བླུད་ཀྱང་ཕན། ཡང་ན་ཡུངས་ཀར་གྱི་ཐང་བཏང་འཕྲལ་དུ་མ་བཅོས་ན་ཉེན་ཆེ། ཝ་ཏས་བཟི་བ་ལ་ཆང་སོགས་སྐྱུར་རིགས་ཀྱིས་ཕན། རྟ་དྲེལ་དེ་ཡིས་དུག་པ་ལའང་སྐྱུར་རིགས་བླུད། ཨོལ་འགགས་ལ། གོ་གྲེ་ལ་སོགས་པའི་གྲེ་བའི་རིགས་ཐམས་ཅད་དང་། གིའུ་ཝཾ་ཡུ་མོ་ཨོལ་གོང་བཅས་སྦྱར་བས་ཕན་ཆེ་བ་ཞལ་རྒྱུན་ཆིག་བརྒྱུད་མའོ། །རྒྱུ་གཟེར་གྱི་གསང་སྨན་ཁུག་རྟའི་བྲུན་ལ་བྱེད། སྤྲུ་པ་དང་མཁན་སྐྱ་སོར་བཞི་ཙམ་དུས་བཏུས་པ་ཁ་དོམ་གྱི་ཆུས་སྦགས་ནས་སྣ་བུག་ཏུ་བཙུད་པ་རཀྟ་བཅད་པའི་གདམས་པ་ཟབ། རྟ་ཕྱུགས་ཀྱི་རྔོ་ཤུ་ལ། རྒྱ་རྩི་དུག་ལོ་དང་། འོལ་མོ་སེའི་འབྲས་བུ་མཉམ་སྦྱོར་མཆོག་ཏུ་ཟབ་ཀྱང་ནུས་པ་རྣོ་བས་ཐལ་ཆེས་ན་རྨ་ཤུ་འབྱུང་བའི་སྐྱོན་ཡོད། ཐ་རམ། ན་རམ། ནད་མ་རྣམས་གང་ཡང་རུང་བའི་ཐང་གིས་ཐིག་ལེ་འཛག་པ་གཅོད། ཀླུ་བདུད་ནག་པོ་ཁྱད་པར་ཅན་འཁྲུལ་མེད་དེ་གཉན་འབམ་དང་། དཀར་པོ་ལྦ་བ། དམར་ས་རོང་གི་བེ་ནགས་སོགས་སུ་སྐྱེ་བ། པོ་མཛེ་ནད་ཀྱི་གསང་སྨན་བླ་ན་མེད་པ་ཡིན། ཁ་ཆེ། དོམ་མཁྲིས། གླ་རྩི། རྒྱ་མཚལ། བཞི་བསྡུས་པ་ལ་རྨ་སྨན་སྟག་མོ་ཞེས་ཤིན་ཏུ་ཟབ་པར་བཞེད། རྟ་ནོར་གྱི་ནད་རིགས་ཀུན་ལ། བོང་ང་ག་བུར་སྟག་ཤ་དོམ་མཁྲིས་དང་། གིའུ་ཝཾ་ཅུ་གུར་རྒྱ་ཚྭ་ཨ་རུ་ར། །སྦྱར་བའི་དཔའ་ཆེན་སེང་སྟག་དགུ་སྤྲུགས་འདིས། །ས་བདག་ཀླུ་གདོན་ལྷོག་རིགས་བཅུ་གཅིག་དང་། །ཁྱད་པར་ཨོལ་འགགས་ནད་ཀུན་སེལ་བའི་མཆོག །ནཱ་ག་ཤྲཱི་ཕུད། ནཱ་ག་ཤྲཱི་ཤིག །ནཱ་ག་ཤྲཱི་རྦད། སྔགས་འདི་ཁྲི་ཡིས་རྫས་ལ་ངར་གདགས་ཤིང་། །ནམ་དགོས་བརྒྱ་རྩ་རེ་ཡིས་ཁ་སབ་བྱ། །གུ་རུ་རཏྣ་གླིང་པའི་གཏེར་བྱོན་ནོ། ། ༈ རྒྱུན་དུ་བརྒྱལ་ན། བོང་བུའི་བྲུན། ཕག་ནག་དང་། ཁྱི་ནག་པོའི་བྲུན་བཅས་ཀྱི་ཁུ་བ་སྣར་བླུགས་པས་འཕྲལ་དུ་སོས་ཡོང་། ། ༈ མིད་པ་ཁྲག་སྐྱེས་ལ་ཚྭ་དང་། གྲེ་བར་གྲ་མ་ཟུག་ན་ཟན་སྲ་མོ་འཇང་པས་ཕན། བུད་མེད་སྐྱེས་པ་མེད་པ་ཁོག་སྟོད་འཚང་ཞིང་། ལ་ལས་བད་ཀན་དུ་ངོས་འཛིན་པ་དེ་ལ་ལོ་བརྒྱད་དྲི་ཆུ་བླུད་པས་ཕན་ངེས་ཡིན། རྒྱ་མེན་མོ་ནད་ཆིག་སྡུམ་ཤིན་ཏུ་ཟབ། གྲེ་ཐོག་མཇུག་ཏུ་རྒྱ་ཁྲག་དྲོན་མོ་སྦྱར་བའི་མན་ངག །རྣ་བའི་ཁྲག་དྲོན་འཐུང་བས་ཆང་ནད་གཏན་དུ་འབྱངས། བུལ་ཏོག །རུ་རྟ། ཆུ་རྩ། དུར་བྱིད་ཀྱིས་རྒྱ་སྨར་སྲུངས། ལྤགས་སྲིན་ལ་སྤང་སྤོས་བདུག་ཅིང་། ལི་ཤི་བརྡར་ཁུ་བྱུགས་པས་ཕན། ཁ་ཤའི་རྭ་ཚུགས་དྲོད་ཅུང་ཟད་ཡོད་པས་བསྲོ། མིག་གི་ཤ་འཛེར་ལ་ནད་པ་རང་གི་སྐྲ་དང་ཁ་སྤུ། རྐང་སེན། ཤ་རུས་བཙའ་མ་ལྷམ་དྲེགས་བཅས་བདུག་པས་ཕན། སོ་སྲིན་ལ། སྨན་ཆེན། གླ་རྩི། ཤིང་ཀུན། སྒོག་སྐྱ་བཅས་རས་ཐུམ་པོར་བསྟེམས། ཁ་ནད་རྙིལ་ཆུང་ཆད་པའི་རིགས་ལ། དྲི་ཆུས་བཀྲུས་ནས། གླ་རྩི། ཚལ་ནག་མཚུར་རྣམས་ཀྱི་ལྡེ་གུ་བྱུགས་ན་མྱུར་དུ་ཕན་ནོ། ། ༈ འབོགས་པ་རྣམས་འབོགས་གྲབས་དུས་རྐང་པའི་མཐེ་བོང་ལ་སྐུད་པ་ཞིག་བཏགས་ནས་མི་གཞན་ཞིག་གིས་བཟུང་བས་འབོགས་འཕྲོ་ཆད། སྨན་ནི་ཁྲའམ་པུ་ཤུད་ཀྱི་སྙིང་སྐམ་པོ་ཆང་གིས་ཕུལ་བས་ལན་གསུམ་གྱིས་ཕན། དེ་རྗེས་ཨར་བརྒྱད་བསྟེན། ལྐུགས་པ་ཏི་ཏིའི་སྒོ་ང་གྱུར་མིད་བྱེད། གཟའ་དང་རྒྱལ་པོའི་བདུག་པ་སོགས་རྫས་ངན་འགྲོ་རིགས་ལ། སྤང་སྤོས། མཁན་པ། རྡོ་དྲེགས། ཤུག་པ་བཞི་བསྲེས་ན་ལྷ་སྲུང་ལ་མི་ཕོག་པ་མན་ངག །བུལ་ཏོག །རུ་རྟ། དུར་བྱིད། དབྱི་མོང་ནག་པོའི་མེ་ཏོག་བཞིས་ཤྲུ་ཏ་ལོ་སེ། ཟབ། ཡུང་བ། སྐྱེར་པ། སྐྱུ་རུ་རའི་ཐང་ཞག་འགའ་བསྟེན་པས་མཁྲིས་པ་ཤ་སེར་མིག་སེར་ལ་ཕན། བོང་དམར། ༡༠༠ ཨ་རུ་ར་འཇིགས་མེད། ༠༡༠ སྦྱར་བས་བད་ཀན་གྲེ་འགགས་ནད་ལ་ཐེང་པས་ཆོག་པ་ལག་བླངས། རྣ་བའི་ནང་སྲོག་ཆགས་ཤོར་ན། རྒྱ་ཚྭ་ནས་ཙམ་ཆུ་དྲོན་ཐིག་པ་གཅིག་བླུགས། ཡང་ན་མཁན་པའི་ཁུ་བ་བླུགས། ལུག་ཤིག་ལ་ཆང་དང་། ར་ཤིག་སོང་ན་གཡེར་མའི་ཆུ་བླུགས་པས་ཕན། མི་ཐོད་དུམ་བུ། ཕོ་བ་རིལ་འབྲུ་བདུན་བཅས་ནད་པའི་མཆིལ་མ་ལ་བརྡར་ནས་བྱུགས་ན་སྒྲོ་བ་སྐྲངས་པ་ལ་ཕན། ཡུང་བ་དང་། སྐྱུ་རུ་རའི་ཁུ་བ་སྦྲང་རྩི་སྦྱར་བ་གཏོང་བས་ཆུ་ཁ་སྲ་བར་བྱེད། ཧ་ལོ། རྒྱ་སྐྱེགས་དོམ་མཁྲིས་ཀ་ར་སྦྱར་བས་མཁལ་ནད་དམར་པོ་ཆུ་ལམ་ནས་ཁྲག་འཛགས་པ་ལ་ཕན་ངེས་ཟབ། བྱིས་པ་ཁ་ལོང་ན། ར་ཁྲག་གམ། ཡང་ན་སྐྱ་གའི་སྒྲོ་ཐལ་བྱུགས་པས་ཕན་ངེས། བྱིས་པའི་ཆུ་སོ་དང་། བུད་མེད་ཀྱི་བྱ་ལྕེ་སྐྲངས་ན། གླ་རྩི་ཚྭ་མར་ལ་སྦྱར་ནས་བྱུགས་པས་ཕན། རླིག་པ་སྐྲངས་ན་ར་ཁྱིའི་སྤུ་གཞོབས་ཆུ་སེར་སྦྱར་བ་བྱུགས། བཙན་དུག་གི་ནད་ཚབས་ཆེན་ལ་རྟ་གསེབ་སྔོན་པོའི་སྦང་སར་མ་ལྷུངས་པ་བཙིར་བའི་ཁུ་བས་ཕན་ངེས། ཡང་རྟ་སྦངས་ཀྱི་ཁུ་བ་བུལ་ཏོག་བཏབ་པ་དང་། བྲག་སྐྱ་ཧ་ཝོ་ལན་ཚྭ་དང་སྦྱར་བས་ཀྱང་འཇོམས། གཏར་ཁྲག་དྲོན་མོ་བླུད་ན་སྲོག་རྩ་སོགས་ལ་མི་བྱེར། ཧ་ཅང་ཚབ་ཆེ་ན་ཐལ་ཁུ་མང་དུ་བླུད་ཅིང་ཕུབ་བསྐོར་བྱས་པས་སྐྱུགས་ཡོང་། ཅོང་ཞི། ༠༡༠ རྒྱ་མཚལ། ༠༡༠ ཨ་ཝ། ༠༡༠ བཅས་མགོ་ཆག་ཁོང་སྨན་ལ་ཟབ། སྦྱར་དུག་གཞན་ལ་གསང་། ཐར་ནུའི་མྱུ་གུ་གྲིབ་སྐམ། ༡༢༠ ཚྭ་ལ་ཆུ་བཅད། ༠༡༠ ཆུ་རྩ་མདོག་འགྱུར་བཅས་མགོ་རྨ་ལ་ཟབ། སྟག་ཤ་འབྲུག་རུས་གཉིས་སམ། དེ་སྟེང་ཧ་ཤིག་བཅས་སྦྱར་བས་རྨ་རིགས་ཀུན་ལ་སྐུད་པས་བཙེམས་དང་མཚུངས། མེས་ཚིག་པའི་རྨ་ལ་རྟ་ཕྲུ་སྐམ་པོ་ཞིབ་པར་བཏགས་ནས་བཏབ་པས་ག་བུར་ལས་ཀྱང་བསིལ། སིནྡྷཱུ་ར་དང་། ཅུ་གང་ངམ། རས་ལྕགས་ནག་བསྲེགས་ཐལ་གྱིས་ཕན་ཆེ། བུལ་ཏོག་དང་དུད་པ་བྱབ་ལ་མ་གཉིས་བྱུགས། ཉི་མ་ལ་བསྟན་པས་ཚབས་ཆེ་བ་ཉིན་གཅིག་དང་། ཆུང་བ་ཉིན་གསུམ་ནས་སོས། ཆུ་ཚན་གྱིས་ཚིག་པ་ལ་ཆུ་བལ་བརླན་པས་ཕན། རི་བོང་མཁྲིས་པ་དང་སྤྲུ་རྩས་ལིང་ཏོག་ལ་ཕན། མར་མེའི་དུད་པ་དང་སྐྱེར་ཤུན་སྦྱར་བས་མིག་ནད་ལ་ཕན། ཟངས་སྡེར་ནང་དུ་ལི་ཤི་ཞོ་དང་སྦྱར་བ་བྱུགས་པས་ཀྱང་ཕན། ཡུང་བ། གསེར་མདོག །མྱོང་རྩི་ཏྲ་གསུམ་ཆ་མཉམ་ནུ་ཞོས་སྦྱར་བ་བྱུགས་པས་ཕན་ཆེ། ཟངས་ལ་ཞོ་སྦྱར་ཉི་མར་བསྲོ་སྟེང་ནས་པྲི་ཡངྐུའི་མེ་ཏོག་གིས་བཀབ་སག་རྩི་ཆུ་སྦྱར་མིག་ལ་བྱུགས། །ལོང་པ་ལ་ཡང་མིག་དང་ལྡན། །འདི་ནི་མར་པ་ལོ་ཙཱའི་ལུགས། །ཨྠིྀ། མིག་ཏུ་རྡུལ་སོང་ན། ལག་རྔ་སྲི། ཞེས་མང་དུ་བགྲངས་ནས་མཛུབ་མོ་ལ་བཏབ། མིག་ཏུ་བསྐོར་བས་དོན་འོང་། མིག་ཏུ་སྐྱེར་བྱུང་ན་བྱ་ལོ་པས་ཕུ་བྱ། དེས་ཕན། དྲང་སྲོང་གི་དུག་ལ་སྲིན་བྱའི་གོ་རོ་ཙ་ན། ཟངས་རྡོ། གྲི་ཁྲག །ཡུགས་སའི་མངལ་ཁྲག་རྣམས་ཞིབ་པར་བཏགས། ཟངས་གཞོང་དུ་བུ་རམ་གྱི་མགོ་བསྡུས་ལ་རིལ་བུར་དྲིལ། ཕྱག་རྡོར་གོས་སྔོན་ཅན་གྱི་གཟུངས་རིང་མཐར་སྡུམ་པོ་ལི་སོགས་བཏགས་ལ་རབ་གནས་བྱ། སྲུང་ན་ཚེས་བཅོ་བརྒྱད་བཅོ་ལྔ་ཉེར་དགུ་དང་། ནད་གཞི་ཡོད་ན་ཚེས་བཞི་བརྒྱད་བཅུ་གཉིས་བཅུ་གསུམ་བཅོ་ལྔ་ཉེར་གསུམ་ཉེར་ལྔ་ཉེར་དགུ་གནམ་གང་རྣམས་ལ་གུལ་ཐང་གིས་ཕུལ་ལ་གཏོང་། རང་གིས་ཟོས་པས་རང་ལ་མི་ལྡོག །ནད་ཕོག་མ་ཐག་ནས་ནད་པས་ནད་དེ་རེད་ཚུལ་མ་ཐོས་གོང་དུ་སྤོས་དཀར་གུ་གུལ་བསྣན་པ་ཟབ། ཐང་ཞག་གསུམ་གཏོང་ནས་བཙོན་དུ་བཟུང་བ་གལ་ཆེ། གཟའ་ནད་ཀྱིས་ཁ་ལྐུགས་པ་ལ། གངས་བྱིས་སྐེ་སེར་པོ་ཅན་གྱི་ཤ་ཆ་༡། ཟངས་རྡོ་དེ་ཕྱེད། བཙོད་ཁྲག་ཉུང་ཙམ་བཅས་ཀྱིས་འཕྲལ་དུ་ཕན་པ་མྱོང་གྲུབ་མའོ། །མགོ་རླུང་ཅིས་ཀྱང་མ་ཕན་ན་གུལ་ནག་གི་ཐང་བཏང་། སོ་ནད་སྤྱི་ལ་ཤོག་ཤིང་གི་བར་ཤུན་སོ་བར་དུ་བལ་གྱིས་དྲིལ་ལ་བསྟེམས་པས་ཕན། རླུང་ཤས་ཆེ་བའི་སོ་སྲིན་ལ་སྒོག་སྐྱས་ཕན། སྨན་ཆེན་རས་ལ་བསྟུམ་པས་གྲང་སྲིན་སེལ། སེང་སྦར་དང་། པྲི་ཡངྐུ་ཆ་མཉམ་གྱི་ཐང་གིས་ཚ་ཆུ་གྲང་ཆུར་བསྒྱུར། དྲེག་ནད་ལ་ཟ་ཡི་ཁཎྜ་བྱུགས། ཡང་ན་མཛོ་ལྕི་དང་ལོ་བརྒྱད་དྲི་ཆུའི་ལུམ་བྱའོ། །བྱིས་པའི་ཁ་ལང་ལ་རུག་པ་དང་ར་ཁྲག་སྦྱང ་བ་བྱུགས། ལྕུམ་རྩ་ཅོང་ཞི་གོ་ཐལ་གསུམ། །མ་ཞུ་ཀུན་ལ་བདུད་རྩི་འདྲ། །ཆིག་ཐུབ་༢༠མིང་ཅན་༡༠སྟག་༡༠ཤ་དང་། །ལན་ཚྭ་ཐུར་མགོ་གང་ཙམ་སྦྱར། གག་ལྷོག་གཉན་རིགས་ཀུན་ལ་འགྲོ། །སོལ་བས་ལོས་དང་གཡི་མང་ཚད། །ཤ་བམ་ཐང་ཐལ་ཁུ་ཚོས་ལེན། །ཁྲག་རླུང་གིས་འདར་བ་ལ། ཀོཾ་བྱི་ལའི་སྤུའམ། དེ་དང་ཨར་ནག་འཁྲུལ་མེད་བསྲེས་པ་བདུག་ན་འཕྲལ་དུ་ཞི་འགྲོ་བ་ལག་བླངས། ། ༈

[edit]

man ngag nyer mkho sna tshogs/ oM a thA/__tshogs gsum chu gter bsrubs pa'i phul/__/mtshan bzang bdud rtsi'i do shal can/__/bla ma sman rgyal zla ba des/__/deng 'dir shis pa'i snang ba stsol/__/gang tshe gzhan la sman 'dod pa'i/__/lhag bsam ut+pal 'dzum pa dang /__/lhan cig sna tshogs gdams pa'i bcud/__/sbrang rtsi gsar ba'i zol gyis 'ong /__/de la snying rlung smyo 'bogs kyi nad tshab chen rigs la/__/skyes pa dar ma grir shi ba'i snying skyu ru ra'am/__rlung shas che na/__myos byed nar son gyi khu bas phul na 'phral du bde ba ster/__ut+pal ser po'i phye ma ri sho'i thang gis phul na bad mkhris mgo nad skyugs par byed/__cong zhi gnyen po'i chur bzhus pa'i thal ba kho nas bad kan pho nad kyi rigs la phan/__star bu'i khaN+Da cha gcig la/__rdo thal cha phyed bsnan pas skran rigs thams cad thal bar rlog__/skyu ru ra'i khaN+Das rmu chu'i nad rigs thams cad la phan/__chu bskol kho nas kyang rims tshad smin par byed/__ri mtho sar skyes ba'i bdud rtsi lo ma sor bzhi tsam dus btus pas rims tshad smin pa'i rigs kun la bsngags/__khyung lnga'i steng glang chen smyon pa bsnan pas gnyan dang lhog rgod rigs kun la phan/__ti tsha'i dud pa lag len ltar blang nas nu zhos byugs pas mig nad grang rkyen la phan/__pha waM long bu'i phye ma chu gtsang dang sbyar bas tsha rkyen la phan/__de gnyis la ga bur dang kha che kha tshar btab nas zangs snod du sbyar bas nus pa rno/__mkhan skya sor bzhi'i dus btus pas sna khrag gcod/__a ru ra dang gri sha sbyar bas kham zag 'joms/__dwa ba'i rtsa ba dang gla rtsi sbyar bas khong srin gyi rigs kun la bsngags/__gur tig skyu ru ra'i thang gis phul bas 'bam stod du babs par mchog__/smad 'bam gnyan dang bsdongs pa la klu bdud nag po 'khrul med des phan/__bya rog nor bu'i thang gis mo nad khrag 'dril bshigs/__sha dug la/__gser sha__/re ral/__snyag__/'om bu'i lo ma rnams gang yang rung ba'i thang gis phan/__kha stod du skye ba'i me tog ser chen mdangs mi gsal ba des chu dug la phan/__rta lpags gcig pu'i khaN+Da'am/__yu gu shing gi khaN+Da rma rigs thams cad la bdud rtsi dang 'dra/__sngon bu 'khrul sngo sman zhig yod/__med cha gcig__/thar nu cha gcig sbyar ba'i khaN+Das nad thams cad sbyong par byed/__'phar ba'i sha khus kha tsha'i nad la phan zhes 'ga' zhig bzhed/___'di man ngag khyad par can yod/___mes tshig gi rma rigs nya lcibs byugs pas 'phral du bde ba ster/__rmu chu'i nad rigs chu ser rdol ba la 'ug pa'i sha khus phan pa lag blangs/__khyung lnga'i steng mgron thal bsnan pas pho skran dang pho thog la zab/__nI la tho Thas reg zho dang sbyar nas byugs/__dug dang /__bad mchu la phan/__rgun 'brum thal ba mar dkar dang sbyar nas byugs pas sna shu'i rigs kun 'joms/__bdud rtsi gangs shams spar ba gang ba zho dang sbyar nas sngas su tho rang bzhags nas/__zos pa kho nas/__glo nad/__gso ba dang /__'dren par byed/__'brug rus dang /__mi rus btsa' ma gang rung gi thang gis 'khru ba gcod/__yung ba/__skyu ru ra/__sbrang rtsi sbyar bas chu kha sra bar byed/__go gre dang rgya ru sbyar bas bud med kyi lto bar bu shi ba'i nad rigs la phan/__ra mchin rlon pa la kha che dang pho ba ris btab skam nas zos pas srod dus long ba'i nad rigs sel/__nags ma'i me tog gsar dus kyi khaN+Da la/__rtsa a wa dang /__'bu su hang btab pa rma sman mchog__/cong zhi cha gsum/__lcum rtsa cha gnyis bul tog cha gcig sbyar ba pho nad thams cad la 'gro/__sbrul gyis phug ma thag rang gi dri chu dron mos bkru/__de nas gla rtsi btab la kha sha'i rwa cos tshugs bya/__des phan nges/__co ga'i klad pas gnyid srungs/__bsten drags na skyon yang yod/__gtar nyes khrag log na sdom thag brlan/__sna khrag ma chod na dpung mgo g.yas g.yon la me btsa' bya bas phan che/__sna srin la/__gla rtsi/__shing kun/__'jam 'bras/__byi tang /__ma ru tse/__bcas sna dud dang bsres nas rngubs pas phan nges yin/__bshal bcad ma thub na da trig chig thang gis phan che/__rlung gzer 'dra ba kun la 'dar pu brlan/__dmar dug gi rigs shin tu thu ba la/__'om lo lcags snod du bskol ba'i g.ya' khu las phan che med/__bong nga chig dril gyis nad ngan rigs kun la phan/__rgyu gzer dmar bshal la chos nyid ril bu phur nag thang gis phul ba kho nas phan che/__rta bla'i ro chur sbyangs nas blud pas lhog pa gsod/__rta lag pa zha ba te lo'i sha dang lhan du dkris pas phan/__gla rtsi lang thang /__byi tang gsum so bar bzung bas so srin la phan/__ldum zangs rtsi dang g.ya' kyi cha mnyam gyis mkhris nad gyen du 'dren pa la zab/__shangs dril dmar po mdangs mi gsal ba de glo sman chig thub yin/__de steng tshan dmar/__'brog za/__sga sha la yu rings bcas la glo sman snyan brgyud sde bzhi zer/__glo rnag skems pa la zangs thal dang /__'dren pa la spa yag star bu bcas sbyar bas chig rgyugs yin/__bdud rtsi gangs sham ba zho dang sbyar ba glo rnag la chig rgyugs/__thar nu'i lo ma kha 'bus dus btus pa dang /__thang khram me tog gsar pa/__nags ma'i me tog gzhon nu bcas cha re re khaN+Dar bskol bas rma rigs thams cad la thengs chog__/grogs tshang gi sa/__ug chos 'bras bu/__re tshal/__dri chen bcas nus bsregs kyis rgya thor la shin tu phan/__a b+hi Sha/__cog lam/__sga ser/__sdong ros bzhis rma rigs thams cad la phan/__kr-iSh+Na'i rA yi dud pas lug nad la phan/__in+d+ra bzhi steng ram pa bsnan pas 'khru gcod zab/__btsas rjes zla mtshan 'byams pa sogs la nang lang 'phar rtsa bsregs pas chod nges/__glo ba skya rtsi la ga bur nyer lnga steng /__gro lo dmar po bungs che ba dang /__nag po dgu sbyor bcas bsre sman gzhan las 'di phan che ba lag blangs/__hon gyi kha srungs la/__shing rta ma'i ro sgo skas sogs ma 'grims pa de nyid chu brdungs byas la/__nag po dgu sbyor dang bsres la blud/__/spyang khu'i sha skran gyi gsang sman/__spyang lce dang /__skyi ba'i 'bras bur khrag la sbyar bas gag par phan/__spyang lce gcig pus lce la 'brum thor byung ba la phan/__spyang ki'i slo dron gyis mgul 'gags la phan/__de yang bshas ma thag pa dgos/__rta nad rigs thams cad la dang po gu gul gyi thang btang /__khyim nang ma yin par bya rgod kyi sha phon cher bdug pas phan nges yin/__sa za ba'i nad la kham sa/__g.yag rgod dar ma'i khrag__/gser me bcas bskol nas blud pas phan/__sba byis kyi tshang nang nas g.ya' ma chag sbyor gyi sman thams kyis blangs pas rkang lag chag pa la phan zer srol snang /__byang ba'i tshab khug rta'i brun gyis rung /__byang ba nag po 'di rno che/__phyed dug bar gshog__bton phyed mi bton/__dkar yol gan dkar chags phyes bu rogs 'phral du 'byin/__khyi dug la/__khyi smyon klad pa btang bas smyo ma smyo gang la'ang phan chig brgyud/__bud med kyi zla mtshan 'byams pa la/__de pho'i og zhol/__bya pho tsi tsi/__dom mkhris/__kha che bcas kyi thang gis them bu sdam pa dang mtshungs/__rjes gcod lang rtsa la me gdab/__rgya tshos kyi thang gar ma la dom mkhris btab gtong zla mtshan gcod pa la zab 'gyings na de pho'i gtsug gi ze ba/__star bu/__sbrul sha__/byang bul bcas g.yer lcam thang gis phul bas myur du 'dren cing rjes su rtsa kha sdom par byed/__bu 'gyings na spre'u'i rus pa'i phye ma blud/__khab dang mde'u sogs khong du lus pa la de pho'i og zhol gyi thang btang /__rma rigs khrag ma chod na zer mo'i rus phye 'debs/__mig kha bas phyid pa la nya rus kyi dud pas phan/__byis pa'i gzhang lugs na sngo chu srin sder mo'i phye ma mar khu cung zad kyis phul/__brag skyes dbyi mong nag po bzhi shog can de ra 'o dang sbyar nas byugs pas mdzer pa la phan/__rjes gcod rang gi ma yod na de yi skra chus bkru/__med na thog mar gru ko nang gi chus bkru/__de rjes gtsang chen gyi chus bkrus pas rting dag la 'gro/__sman nad thal che ba la/__brag skya/__100__ze tshwa/__090__a ru/__0 80__btsod mdud/__050__byang bul/__040__yungs kar/__030__bcas thang byas nas/__kha shing thur gyis bkar la blugs/__skyugs na legs shing /__ma skyugs na gdung bskor byed/__lus la chu grang phyar/__rta sbang btsir ba'i khu bar bul tog btab pa blud kyang phan/__yang na yungs kar gyi thang btang 'phral du ma bcos na nyen che/__wa tas bzi ba la chang sogs skyur rigs kyis phan/__rta drel de yis dug pa la'ang skyur rigs blud/__ol 'gags la/__go gre la sogs pa'i gre ba'i rigs thams cad dang /__gi'u waM yu mo ol gong bcas sbyar bas phan che ba zhal rgyun chig brgyud ma'o/__/rgyu gzer gyi gsang sman khug rta'i brun la byed/__spru pa dang mkhan skya sor bzhi tsam dus btus pa kha dom gyi chus sbags nas sna bug tu btsud pa rak+ta bcad pa'i gdams pa zab/__rta phyugs kyi rngo shu la/__rgya rtsi dug lo dang /__'ol mo se'i 'bras bu mnyam sbyor mchog tu zab kyang nus pa rno bas thal ches na rma shu 'byung ba'i skyon yod/__tha ram/__na ram/__nad ma rnams gang yang rung ba'i thang gis thig le 'dzag pa gcod/__klu bdud nag po khyad par can 'khrul med de gnyan 'bam dang /__dkar po lba ba/__dmar sa rong gi be nags sogs su skye ba/__po mdze nad kyi gsang sman bla na med pa yin/__kha che/__dom mkhris/__gla rtsi/__rgya mtshal/__bzhi bsdus pa la rma sman stag mo zhes shin tu zab par bzhed/__rta nor gyi nad rigs kun la/__bong nga ga bur stag sha dom mkhris dang /__gi'u waM cu gur rgya tshwa a ru ra/__/sbyar ba'i dpa' chen seng stag dgu sprugs 'dis/__/sa bdag klu gdon lhog rigs bcu gcig dang /__/khyad par ol 'gags nad kun sel ba'i mchog__/nA ga shrI phud/__nA ga shrI shig__/nA ga shrI rbad/__sngags 'di khri yis rdzas la ngar gdags shing /__/nam dgos brgya rtsa re yis kha sab bya/__/gu ru rat+na gling pa'i gter byon no/__/_!_rgyun du brgyal na/__bong bu'i brun/__phag nag dang /__khyi nag po'i brun bcas kyi khu ba snar blugs pas 'phral du sos yong /__/_!_mid pa khrag skyes la tshwa dang /__gre bar gra ma zug na zan sra mo 'jang pas phan/__bud med skyes pa med pa khog stod 'tshang zhing /__la las bad kan du ngos 'dzin pa de la lo brgyad dri chu blud pas phan nges yin/__rgya men mo nad chig sdum shin tu zab/__gre thog mjug tu rgya khrag dron mo sbyar ba'i man ngag__/rna ba'i khrag dron 'thung bas chang nad gtan du 'byangs/__bul tog__/ru rta/__chu rtsa/__dur byid kyis rgya smar srungs/__lpags srin la spang spos bdug cing /__li shi brdar khu byugs pas phan/__kha sha'i rwa tshugs drod cung zad yod pas bsro/__mig gi sha 'dzer la nad pa rang gi skra dang kha spu/__rkang sen/__sha rus btsa' ma lham dregs bcas bdug pas phan/__so srin la/__sman chen/__gla rtsi/__shing kun/__sgog skya bcas ras thum por bstems/__kha nad rnyil chung chad pa'i rigs la/__dri chus bkrus nas/__gla rtsi/__tshal nag mtshur rnams kyi lde gu byugs na myur du phan no/__/_!_'bogs pa rnams 'bogs grabs dus rkang pa'i mthe bong la skud pa zhig btags nas mi gzhan zhig gis bzung bas 'bogs 'phro chad/__sman ni khra'am pu shud kyi snying skam po chang gis phul bas lan gsum gyis phan/__de rjes ar brgyad bsten/__lkugs pa ti ti'i sgo nga gyur mid byed/__gza' dang rgyal po'i bdug pa sogs rdzas ngan 'gro rigs la/__spang spos/__mkhan pa/__rdo dregs/__shug pa bzhi bsres na lha srung la mi phog pa man ngag__/bul tog__/ru rta/__dur byid/__dbyi mong nag po'i me tog bzhis shru ta lo se/__zab/__yung ba/__skyer pa/__skyu ru ra'i thang zhag 'ga' bsten pas mkhris pa sha ser mig ser la phan/__bong dmar/__100_a ru ra 'jigs med/__010__sbyar bas bad kan gre 'gags nad la theng pas chog pa lag blangs/__rna ba'i nang srog chags shor na/__rgya tshwa nas tsam chu dron thig pa gcig blugs/__yang na mkhan pa'i khu ba blugs/__lug shig la chang dang /__ra shig song na g.yer ma'i chu blugs pas phan/__mi thod dum bu/__pho ba ril 'bru bdun bcas nad pa'i mchil ma la brdar nas byugs na sgro ba skrangs pa la phan/__yung ba dang /__skyu ru ra'i khu ba sbrang rtsi sbyar ba gtong bas chu kha sra bar byed/__ha lo/__rgya skyegs dom mkhris ka ra sbyar bas mkhal nad dmar po chu lam nas khrag 'dzags pa la phan nges zab/__byis pa kha long na/__ra khrag gam/__yang na skya ga'i sgro thal byugs pas phan nges/__byis pa'i chu so dang /__bud med kyi bya lce skrangs na/__gla rtsi tshwa mar la sbyar nas byugs pas phan/__rlig pa skrangs na ra khyi'i spu gzhobs chu ser sbyar ba byugs/__btsan dug gi nad tshabs chen la rta gseb sngon po'i sbang sar ma lhungs pa btsir ba'i khu bas phan nges/__yang rta sbangs kyi khu ba bul tog btab pa dang /__brag skya ha wo lan tshwa dang sbyar bas kyang 'joms/__gtar khrag dron mo blud na srog rtsa sogs la mi byer/__ha cang tshab che na thal khu mang du blud cing phub bskor byas pas skyugs yong /__cong zhi/__010__rgya mtshal/__010__a wa/__010_bcas mgo chag khong sman la zab/__sbyar dug gzhan la gsang /__thar nu'i myu gu grib skam/__120__tshwa la chu bcad/__010_chu rtsa mdog 'gyur bcas mgo rma la zab/__stag sha 'brug rus gnyis sam/__de steng ha shig bcas sbyar bas rma rigs kun la skud pas btsems dang mtshungs/__mes tshig pa'i rma la rta phru skam po zhib par btags nas btab pas ga bur las kyang bsil/__sin+d+hU ra dang /__cu gang ngam/__ras lcags nag bsregs thal gyis phan che/__bul tog dang dud pa byab la ma gnyis byugs/__nyi ma la bstan pas tshabs che ba nyin gcig dang /__chung ba nyin gsum nas sos/__chu tshan gyis tshig pa la chu bal brlan pas phan/__ri bong mkhris pa dang spru rtsas ling tog la phan/__mar me'i dud pa dang skyer shun sbyar bas mig nad la phan/__zangs sder nang du li shi zho dang sbyar ba byugs pas kyang phan/__yung ba/__gser mdog__/myong rtsi tra gsum cha mnyam nu zhos sbyar ba byugs pas phan che/__zangs la zho sbyar nyi mar bsro steng nas pri yang+ku'i me tog gis bkab sag rtsi chu sbyar mig la byugs/__/long pa la yang mig dang ldan/__/'di ni mar pa lo tsA'i lugs/__/a+thi+-i/__mig tu rdul song na/__lag rnga sri/__zhes mang du bgrangs nas mdzub mo la btab/__mig tu bskor bas don 'ong /__mig tu skyer byung na bya lo pas phu bya/__des phan/__drang srong gi dug la srin bya'i go ro tsa na/__zangs rdo/__gri khrag__/yugs sa'i mngal khrag rnams zhib par btags/__zangs gzhong du bu ram gyi mgo bsdus la ril bur dril/__phyag rdor gos sngon can gyi gzungs ring mthar sdum po li sogs btags la rab gnas bya/__srung na tshes bco brgyad bco lnga nyer dgu dang /__nad gzhi yod na tshes bzhi brgyad bcu gnyis bcu gsum bco lnga nyer gsum nyer lnga nyer dgu gnam gang rnams la gul thang gis phul la gtong /__rang gis zos pas rang la mi ldog__/nad phog ma thag nas nad pas nad de red tshul ma thos gong du spos dkar gu gul bsnan pa zab/__thang zhag gsum gtong nas btson du bzung ba gal che/__gza' nad kyis kha lkugs pa la/__gangs byis ske ser po can gyi sha cha 1/__zangs rdo de phyed/__btsod khrag nyung tsam bcas kyis 'phral du phan pa myong grub ma'o/__/mgo rlung cis kyang ma phan na gul nag gi thang btang /__so nad spyi la shog shing gi bar shun so bar du bal gyis dril la bstems pas phan/__rlung shas che ba'i so srin la sgog skyas phan/__sman chen ras la bstum pas grang srin sel/__seng sbar dang /__pri yang+ku cha mnyam gyi thang gis tsha chu grang chur bsgyur/__dreg nad la za yi khaN+Da byugs/__yang na mdzo lci dang lo brgyad dri chu'i lum bya'o/__/byis pa'i kha lang la rug pa dang ra khrag sbyang_ ba byugs/__lcum rtsa cong zhi go thal gsum/__/ma zhu kun la bdud rtsi 'dra/__/chig thub 20ming can 10stag 10sha dang /__/lan tshwa thur mgo gang tsam sbyar/__gag lhog gnyan rigs kun la 'gro/__/sol bas los dang g.yi mang tshad/__/sha bam thang thal khu tshos len/__/khrag rlung gis 'dar ba la/__koM byi la'i spu'am/__de dang ar nag 'khrul med bsres pa bdug na 'phral du zhi 'gro ba lag blangs/__/_!_