JKCL-KABUM-07-JA-019

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	chos kyi blo gros bka' 'bum Volume 7, Text 19, Pages (Folios 1a1 to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. '. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 7: . Bir, H.P.: Khyentse Labrang, 2012.
Genre

1 Texts in this Section (sde tshan or chos tshan)

387-389	རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་པ་པདྨའི་ལྕུག་ཕྲན། rje btsun rdo rje rnal 'byor ma la bstod pa pad+ma'i lcug phran Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

རྗེ་བཙུན་རྡོ་རྗེ་རྣལ་འབྱོར་མ་ལ་བསྟོད་པ་པདྨའི་ལྕུག་ཕྲན་ཞེས་བྱ་བ། །ན་མོ་ཛྙཱ་ན་ཝཱ་ར་ཧི་ཡེ། དཔལ་དང་ལྡན་པའི་པདྨའི་མྱུ་གུ་མ་ཆགས་པདྨའི་རིགས་མཆོག་མ། །ཌཱ་ཀི་བྱེ་བ་འབུམ་གྱི་གཙོ་མོ་ལྷན་སྐྱེས་རྡོ་རྗེ་རྣལ་འབྱོར་མ། །དོན་དམ་དབྱིངས་སུ་སྤྲོས་ལས་འདས་ཀྱང་ཀུན་རྫོབ་སྒྱུ་མ་ལྟ་བུར་སྟོན། །ཤིན་ཏུ་རྣམ་དག་བཻཌཱུར་དབང་སྔོན་ཐུན་མཚམས་གསར་པས་འཁྱུད་ལ་བསྟོད། །ལྷན་སྐྱེས་ཡེ་ཤེས་རྣམ་པའི་གཟུགས་འདས་རྡུལ་བྲལ་སྟོང་པ་ཆེན་པོ་ཉིད། །རྣམ་བཅས་བདེ་བ་མཆོག་གི་སྐུར་སྟོན་བདེ་མཆོག་སྒྱུ་མའི་གར་གྱིས་ནི། །ས་གསུམ་ཀུན་ཏུ་རྣམ་པར་རྩེན་པས་ཧེ་རུ་ཀ་རྣམས་དགྱེས་མཛད་མ། །མཁའ་ལ་སྤྱོད་པའི་རྣལ་འབྱོར་དབང་མོ་ཡེ་ཤེས་རྗེ་མོ་ཁྱེད་ལ་བསྟོད། །སྣང་སྲིད་འཁོར་འདས་བསྐྱེད་དང་སྡུད་མཛད་གཅིག་དང་དུ་མའི་མཐའ་ལས་འདས། །ཞི་བའི་དབྱིངས་སུ་འགོགས་པར་མི་མཛད་སྙིང་རྗེ་ཆེན་པོའི་གཞན་དབང་གིས། །དཔལ་ལྡན་བརྟན་གཡོ་ཀུན་ལ་ཁྱབ་པའི་རྡོ་རྗེ་བཙུན་མོ་རྣལ་འབྱོར་མ། །གྲུབ་གཉིས་ནོར་བུའི་གཏེར་སྒྲོམ་ཆེན་མོར་ཡང་ཡང་བསྔགས་ཤིང་བསྟོད་པར་བགྱི། །འོག་མིན་རྡོ་རྗེ་བཙུན་མོའི་གྲོང་ཁྱེར་གསང་བ་མཆོག་གི་གཞལ་མེད་ཁང་། །རབ་འཇིགས་དུར་ཁྲོད་སྲུང་བའི་འཁོར་ལོས་ཕྱོགས་མཚམས་ཟླུམ་པོར་བཅིང་བའི་དབུས། །རིན་ཆེན་བདུན་གྱི་བ་གམ་མངོན་མཐོ་སུམ་ཐོག་རྒྱན་གྱིས་མཛེས་པར་སྤྲས། །ཆགས་མེད་པདྨ་སྣ་ཚོགས་བརྡལ་དབུས་ཚ་ཟེར་དཀྱིལ་འཁོར་ངོམ་ལ་བསྟོད། །རྡུལ་མུན་དག་པ་འཇིགས་བྱེད་དྲག་པོ་དུས་མཚན་དག་ནི་བརྟབས་ཤིང་བསྒྱེལ། །གཡས་བརྐྱང་གཡོན་བསྐུམ་གར་གྱིས་རོལ་ཞིང་སྐེད་སྐབས་ཕྲ་ལ་ཆུ་སྐྱེས་རྒྱས། །ཞལ་གཅིག་ཕྱག་གཉིས་གྲི་ཐོད་དང་ནི་ཕྲག་གཡོན་ཁ་ཊྭྃ་ག་འགེལ་ཞིང་། །ཟར་བུ་རིང་གྲོལ་ཞལ་ནི་གཡོན་སྟེང་ཕྱོགས་པས་ཁྲག་ཆེན་བཞེས་ལ་བསྟོད། །སྐུ་གསུམ་མཚོན་པའི་སྤྱན་གསུམ་མཁའ་སྤྱོད་དབྱིངས་སུ་ཟླུམ་པོར་གཟིགས་ཤིང་གཏད། །ཕ་རོལ་ཕྱིན་མཚོན་ཕྱག་རྒྱ་ལྔ་ཡིས་མཛེས་ཤིང་བརྗིད་པར་རབ་ཏུ་སྤྲས། །མཐོང་བས་ཡིད་འཕྲོག་བཅོམ་ལྡན་འདས་མ་ཁྱོད་གསུང་སྔགས་ཀྱི་རང་སྒྲ་སྒྲོགས། །བཀླག་པས་འགྲུབ་པའི་གསང་སྔགས་རྒྱལ་པོའི་འབྱུང་གནས་ཆེན་མོར་བསྟོད་པར་བགྱི། །རེས་འགའ་ཙམ་མིན་ཞིང་ཁམས་རབ་འབྱམས་ཕྲ་རབ་རྡུལ་གྱི་ཁོངས་སུ་ཞུགས། །ཇི་ལྟ་ཇི་སྙེད་བཀོད་པ་བསམ་ཡས་འཕགས་བློས་ཀྱང་ནི་གཞལ་བར་དཀའ། །བདག་ཏུ་འཛིན་པའི་ཆོས་ལས་འདས་ཤིང་པྲ་ཕབ་ས་ཡི་རྣམ་པ་ཅན། །ལོངས་སྤྱོད་ཡོངས་རྫོགས་འཁོར་ལོའི་དབང་མོ་འགོག་མེད་སྒྱུ་མ་ཆེན་མོར་བསྟོད། །གསང་ཆེན་རོལ་བའི་ཞིང་གི་ཕྱོགས་མཚམས་སྟེང་དང་འོག་གི་བར་དག་ཏུ། །གྲུབ་པའི་རིག་འཛིན་རྣལ་འབྱོར་ཕོ་མོ་ཏིལ་གྱི་གོང་བུ་བཞིན་དུ་གཏིབ། །མིག་འཕྲུལ་ལྟ་བུར་རྡོ་རྗེའི་གླུ་དང་གར་བསྒྱུར་དམ་མེད་སྐྲག་པར་མཛད། །དམ་ལྡན་རྣལ་འབྱོར་སྤྱན་གྱི་ཟུར་མདས་རྗེས་ཆགས་ཤུགས་ཀྱིས་དྲངས་ལ་བསྟོད། །དེ་ལྟར་རབ་བསྔགས་བསྟོད་པའི་དགེ་བ་ཡིས། །དམིགས་བཅས་དམིགས་མེད་ཟུང་འཇུག་ཚོགས་མཐར་ཕྱིན། །ཚེ་འདི་ཉིད་དམ་བར་དོ་ལས་མི་འདའ། །མཁའ་སྤྱོད་ཆེན་མོའི་གོ་འཕང་མྱུར་ཐོབ་ཤོག །ཅེས་པའང་ས་ཁྱི་སྣྲོན་ཟླའི་ཚེས་ཉེར་ལྔ་ལ་ཀུན་དགའ་ཕྲིན་ལས་རྒྱ་མཚོས་འབྲས་ལྗོངས་ཌཱ་ཀི་དགྱེས་པའི་གནས་དང་ཉེ་བ་རྡོ་རྗེ་གླིང་གི་དགའ་ཚལ་དུ་བྲིས་ཏེ་གསོལ་བ་བཏབ་པ་སིདྡྷི་རསྟུ།། །།

[edit]

rje btsun rdo rje rnal 'byor ma la bstod pa pad+ma'i lcug phran zhes bya ba/__/na mo dz+nyA na wA ra hi ye/__dpal dang ldan pa'i pad+ma'i myu gu ma chags pad+ma'i rigs mchog ma/__/DA ki bye ba 'bum gyi gtso mo lhan skyes rdo rje rnal 'byor ma/__/don dam dbyings su spros las 'das kyang kun rdzob sgyu ma lta bur ston/__/shin tu rnam dag baiDUr dbang sngon thun mtshams gsar pas 'khyud la bstod/__/lhan skyes ye shes rnam pa'i gzugs 'das rdul bral stong pa chen po nyid/__/rnam bcas bde ba mchog gi skur ston bde mchog sgyu ma'i gar gyis ni/__/sa gsum kun tu rnam par rtsen pas he ru ka rnams dgyes mdzad ma/__/mkha' la spyod pa'i rnal 'byor dbang mo ye shes rje mo khyed la bstod/__/snang srid 'khor 'das bskyed dang sdud mdzad gcig dang du ma'i mtha' las 'das/__/zhi ba'i dbyings su 'gogs par mi mdzad snying rje chen po'i gzhan dbang gis/__/dpal ldan brtan g.yo kun la khyab pa'i rdo rje btsun mo rnal 'byor ma/__/grub gnyis nor bu'i gter sgrom chen mor yang yang bsngags shing bstod par bgyi/__/'og min rdo rje btsun mo'i grong khyer gsang ba mchog gi gzhal med khang /__/rab 'jigs dur khrod srung ba'i 'khor los phyogs mtshams zlum por bcing ba'i dbus/__/rin chen bdun gyi ba gam mngon mtho sum thog rgyan gyis mdzes par spras/__/chags med pad+ma sna tshogs brdal dbus tsha zer dkyil 'khor ngom la bstod/__/rdul mun dag pa 'jigs byed drag po dus mtshan dag ni brtabs shing bsgyel/__/g.yas brkyang g.yon bskum gar gyis rol zhing sked skabs phra la chu skyes rgyas/__/zhal gcig phyag gnyis gri thod dang ni phrag g.yon kha T+wa~M ga 'gel zhing /__/zar bu ring grol zhal ni g.yon steng phyogs pas khrag chen bzhes la bstod/__/sku gsum mtshon pa'i spyan gsum mkha' spyod dbyings su zlum por gzigs shing gtad/__/pha rol phyin mtshon phyag rgya lnga yis mdzes shing brjid par rab tu spras/__/mthong bas yid 'phrog bcom ldan 'das ma khyod gsung sngags kyi rang sgra sgrogs/__/bklag pas 'grub pa'i gsang sngags rgyal po'i 'byung gnas chen mor bstod par bgyi/__/res 'ga' tsam min zhing khams rab 'byams phra rab rdul gyi khongs su zhugs/__/ji lta ji snyed bkod pa bsam yas 'phags blos kyang ni gzhal bar dka'/__/bdag tu 'dzin pa'i chos las 'das shing pra phab sa yi rnam pa can/__/longs spyod yongs rdzogs 'khor lo'i dbang mo 'gog med sgyu ma chen mor bstod/__/gsang chen rol ba'i zhing gi phyogs mtshams steng dang 'og gi bar dag tu/__/grub pa'i rig 'dzin rnal 'byor pho mo til gyi gong bu bzhin du gtib/__/mig 'phrul lta bur rdo rje'i glu dang gar bsgyur dam med skrag par mdzad/__/dam ldan rnal 'byor spyan gyi zur mdas rjes chags shugs kyis drangs la bstod/__/de ltar rab bsngags bstod pa'i dge ba yis/__/dmigs bcas dmigs med zung 'jug tshogs mthar phyin/__/tshe 'di nyid dam bar do las mi 'da'/__/mkha' spyod chen mo'i go 'phang myur thob shog__/ces pa'ang sa khyi snron zla'i tshes nyer lnga la kun dga' phrin las rgya mtshos 'bras ljongs DA ki dgyes pa'i gnas dang nye ba rdo rje gling gi dga' tshal du bris te gsol ba btab pa sid+d+hi rastu//___//