JKCL-KABUM-10-THA-009

Previous Text"THA" is not a number. Back to Volume Page"THA" is not a number.Next Text "THA" is not a number.

Wylie title
Location	chos kyi blo gros bka' 'bum Volume , Text 9, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"THA" is not a number.

1 Texts in this Section (sde tshan or chos tshan)

43-45	སྲོང་བཙན་སྒམ་པོའི་བླ་སྒྲུབ་ཡེ་ཤེས་རང་ཤར། srong btsan sgam po'i bla sgrub ye shes rang shar Guru Yoga Texts - bla ma'i rnal 'byor   ·   Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"THA" is not a number.

Tibetan Text

Wylie

[edit]

སྲོང་བཙན་སྒམ་པོའི་བླ་སྒྲུབ་ཡེ་ཤེས་རང་ཤར་བཞུགས། བོད་ལ་བཀའ་དྲིན་ཆེ་བ་ཡི། །སྤྲུལ་པའི་རྒྱལ་པོའི་རྣལ་འབྱོར་ནི། །ཉམས་སུ་བླང་བར་འདོད་པ་ན། །བདེ་བའི་སྟན་ལ་བག་ཕབ་ནས། །ངེས་འབྱུང་སྐྱབས་འགྲོ་སེམས་བསྐྱེད་བྱ། ཨ། སྟོང་པའི་ངང་ལས་མདུན་གྱི་མཁར། །ནོར་བུ་ཆུ་ཤེལ་ལས་གྲུབ་པའི། །གཞལ་མེད་ཁང་ཆེན་ཡངས་པའི་ནང་། །རཏྣས་བརྒྱན་པའི་ཁྲི་སྟེང་དུ། །དར་ཟབ་འབོལ་ཆེན་བརྩེགས་པའི་སྟེང་། །སྤྲུལ་པའི་རྒྱལ་པོ་སྲོང་བཙན་རྗེ། །དཀར་གསལ་ཞི་འཛུམ་མཚན་དཔེས་སྤྲས། །རྒྱལ་པོའི་ཆ་བྱད་བེར་ཕྱམས་གསོལ། །ཕྱག་གཡས་ཆོས་འཆད་གཡོན་མཉམ་བཞག །ནོར་བུ་དབང་གི་རྒྱལ་པོ་བསྣམས། །དབུ་ལ་དར་དཀར་ལ་ཐོད་བཅིང་། །སྤྱི་བོར་འོད་དཔག་མེད་པ་བཞུགས། །ཞབས་གཉིས་རྒྱལ་པོ་རོལ་པའི་སྟབས། །ཐུགས་ཀར་འཕགས་པ་བཅུ་གཅིག་ཞལ། །དེ་ཡི་ཐུགས་ཀར་སྤྱན་རས་གཟིགས། །ཁ་སར་པ་ཎི་ཕྱག་གཉིས་པ། །བཞེངས་པའི་སྟབས་ཀྱིས་བཞུགས་པར་གསལ། །གནས་གསུམ་ཡི་གེ་འབྲུ་གསུམ་ལས། །འོད་འཕྲོས་ཡེ་ཤེས་སྤྱན་དྲངས་གྱུར། མ་ལུས་སེམས་ཅན་ཀུན་གྱི༴ སོགས་བརྗོད་ནས་སྤྱན་དྲངས། བཅོམ་ལྡན་འདིར་ནི༴ སོགས་དང་། བདག་དང་འགྲོ་ལ༴ སོགས། དེ་སྲིད་བཅོམ་ལྡན་དབྱེར་མེད་བཞུགས། །ཛཿཧཱུྃ་བྃ་ཧོཿས་མ་ཡ་ཏིཥྛ་ལྷན། དམ་ཡེ་དབྱེར་མེད་དུ་བསྟིམ། བཟང་སྤྱོད་ཀྱི་ལན་ལག་བདུན་པ། མཆོད་ཕྲེང་རྒྱས་བསྡུས་ཅི་རིགས་དང་། མཎྜལ་ཀྱང་འབུལ་ལ། གསོལ་བ་འདེབས་སོ་འཕགས་མཆོག་སྤྱན་རས་གཟིགས། །གསོལ་བ་འདེབས་སོ་སྤྲུལ་པའི་རྒྱལ་པོ་མཁྱེན། །གསོལ་བ་འདེབས་སོ་སྲོང་བཙན་སྒམ་པོ་རྗེ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །མཆོག་དང་ཐུན་མོང་དངོས་གྲུབ་སྩལ་དུ་གསོལ། །བྱང་ཆུབ་སེམས་མཆོག་འབྱོང་བར་བྱིན་གྱིས་རློབས། །འགྲོ་དོན་དཔག་མེད་འབྱུང་བར་བྱིན་གྱིས་རློབས། །སྤྲུལ་པའི་རྒྱལ་པོ་ཁྱོད་དང་མཚུངས་པར་ཤོག །ཅེས་དང་། ཨོཾ་ཨཱཿམ་ཧཱ་གུ་རུ་ལོ་ཀི་ཤྭ་ར་ནི་རྨ་ཀཱ་ཡ་དྷརྨ་ར་ཛ་སརྦ་སིདྡྷི་ཧཱུྃ། ཞེས་ཀྱང་བཟླ། སྤྲུལ་པའི་རྒྱལ་པོའི་གནས་རྣམས་ནས། །སྐུ་དང་སྔགས་ཕྲེང་ཕྱག་མཚན་ཚོགས་འོད་ཟེར་དང་བཅས་ཆར་ལྟར་བབས། །རང་ལ་ཐིམ་ཞིང་དབང་བསྐུར་ཐོབ། །སྒྲིབ་དག་སྐུ་བཞིའི་ས་བོན་བཞག །མཐར་ནི་བླ་མ་རང་ལ་ཐིམ། །རང་ཉིད་སྤྲུལ་པའི་རྒྱལ་པོར་གསལ། །ཐུགས་ཀར་ཟླ་སྟེང་ཧྲཱིཿཡིག་མཐར། །སྔགས་ཀྱི་ཕྲེང་བས་བསྐོར་བ་ལས། །འོད་འཕྲོས་རང་གཞན་དོན་གཉིས་བྱས། །སྣོད་བཅུད་འཕགས་པའི་སྐུར་གྱུར་བསམ། །ཨོཾ་མ་ཎི་པདྨེ་ཧཱུྃ། ཅེས་དང་ཞལ་བཅུ་གཅིག་པའི་གཟུངས་རིང་བཟླ། མཐར་ནི་ལྷ་དང་བླ་མ་རྣམས། །རང་སེམས་གཅིག་གི་རོལ་པར་བལྟ། །སྟོང་དང་སྙིང་རྗེ་དབྱེར་མེད་པའི། །རིག་པའི་གཤིས་ལུགས་ངང་ལ་བཞག །མཐར་ནི་དགེ་བསྔོ་སྨོན་ཤིས་དང་། །རྗེས་སྤྱོད་ཆོས་སྤྱོད་རྣམ་བཅུར་བརྩོན། །དེས་ནི་དོན་གཉིས་མཐར་ཕྱིན་འགྱུར། །དེ་ལྟར་བླ་མའི་རྣལ་འབྱོར་འདི། །ཡེར་པ་ཟླ་བ་ཕུག་ཏུ་ནི། །སྨིན་དྲུག་ཟླ་བའི་ཚེས་དྲུག་གི། སྲོད་ལ་ཉམས་ཤར་ཇི་བཞིན་དུ། །ཡི་གེར་བཀོད་པའི་དགེ་བ་ཡིས། །བསྟན་འགྲོའི་བདེ་སྐྱིད་འཕེལ་བ་དང་། །བླ་མ་སྤྲུལ་པའི་ཆོས་རྒྱལ་ཆེའི། །བྱིན་རླབས་འཇུག་པའི་རྒྱུར་གྱུར་ཅིག །སརྦ་མངྒ་ལཾ།། །།

[edit]

srong btsan sgam po'i bla sgrub ye shes rang shar bzhugs/__bod la bka' drin che ba yi/__/sprul pa'i rgyal po'i rnal 'byor ni/__/nyams su blang bar 'dod pa na/__/bde ba'i stan la bag phab nas/__/nges 'byung skyabs 'gro sems bskyed bya/__a/__stong pa'i ngang las mdun gyi mkhar/__/nor bu chu shel las grub pa'i/__/gzhal med khang chen yangs pa'i nang /__/rat+nas brgyan pa'i khri steng du/__/dar zab 'bol chen brtsegs pa'i steng /__/sprul pa'i rgyal po srong btsan rje/__/dkar gsal zhi 'dzum mtshan dpes spras/__/rgyal po'i cha byad ber phyams gsol/__/phyag g.yas chos 'chad g.yon mnyam bzhag__/nor bu dbang gi rgyal po bsnams/__/dbu la dar dkar la thod bcing /__/spyi bor 'od dpag med pa bzhugs/__/zhabs gnyis rgyal po rol pa'i stabs/__/thugs kar 'phags pa bcu gcig zhal/__/de yi thugs kar spyan ras gzigs/__/kha sar pa Ni phyag gnyis pa/__/bzhengs pa'i stabs kyis bzhugs par gsal/__/gnas gsum yi ge 'bru gsum las/__/'od 'phros ye shes spyan drangs gyur/__ma lus sems can kun gyi=__sogs brjod nas spyan drangs/__bcom ldan 'dir ni=__sogs dang /__bdag dang 'gro la=__sogs/__de srid bcom ldan dbyer med bzhugs/__/dzaHhU~M ba~M hoHsa ma ya tiSh+Tha lhan/__dam ye dbyer med du bstim/__bzang spyod kyi lan lag bdun pa/__mchod phreng rgyas bsdus ci rigs dang /__maN+Dal kyang 'bul la/__gsol ba 'debs so 'phags mchog spyan ras gzigs/__/gsol ba 'debs so sprul pa'i rgyal po mkhyen/__/gsol ba 'debs so srong btsan sgam po rje/__/gsol ba 'debs so byin gyis brlab tu gsol/__/mchog dang thun mong dngos grub stsal du gsol/__/byang chub sems mchog 'byong bar byin gyis rlobs/__/'gro don dpag med 'byung bar byin gyis rlobs/__/sprul pa'i rgyal po khyod dang mtshungs par shog__/ces dang /__oM AHma hA gu ru lo ki shwa ra ni rma kA ya d+harma ra dza sarba sid+d+hi hU~M/__zhes kyang bzla/__sprul pa'i rgyal po'i gnas rnams nas/__/sku dang sngags phreng phyag mtshan tshogs 'od zer dang bcas char ltar babs/__/rang la thim zhing dbang bskur thob/__/sgrib dag sku bzhi'i sa bon bzhag__/mthar ni bla ma rang la thim/__/rang nyid sprul pa'i rgyal por gsal/__/thugs kar zla steng hrIHyig mthar/__/sngags kyi phreng bas bskor ba las/__/'od 'phros rang gzhan don gnyis byas/__/snod bcud 'phags pa'i skur gyur bsam/__/oM ma Ni pad+me hU~M/__ces dang zhal bcu gcig pa'i gzungs ring bzla/__mthar ni lha dang bla ma rnams/__/rang sems gcig gi rol par blta/__/stong dang snying rje dbyer med pa'i/__/rig pa'i gshis lugs ngang la bzhag__/mthar ni dge bsngo smon shis dang /__/rjes spyod chos spyod rnam bcur brtson/__/des ni don gnyis mthar phyin 'gyur/__/de ltar bla ma'i rnal 'byor 'di/__/yer pa zla ba phug tu ni/__/smin drug zla ba'i tshes drug gi/__srod la nyams shar ji bzhin du/__/yi ger bkod pa'i dge ba yis/__/bstan 'gro'i bde skyid 'phel ba dang /__/bla ma sprul pa'i chos rgyal che'i/__/byin rlabs 'jug pa'i rgyur gyur cig__/sarba mang+ga laM//___//