JKCL-KABUM-08-NYA-010-009

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 10, Text 9, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ གདམས་ངག་གནད་དྲིལ་བཞུགས་སོ། །སྐྱབས་མཚུངས་མེད་ཨོ་རྒྱན་རྗེ་ལ་འདུད། །རྟེན་ཁྱད་འཕགས་དལ་འབྱོར་མི་ལུས་འདི། །རྙེད་དཀའ་བ་ད་རེས་ཐོབ་དུས་འདིར། །བར་མ་དོར་ཆུད་ཟོས་མ་ཤོར་བ། །སྙིང་པོ་ལེན་པའི་ཐབས་ལ་འབད། །ཆོས་ཀུན་གྱི་རྩ་བ་རང་གི་སེམས། །མ་བརྟགས་ན་ཉམས་དགའ་བསླུ་བྲིད་མཁས། །བརྟགས་ཤིང་དཔྱད་ན་གཞི་རྩ་བྲལ། །བྱུང་གནས་འགྲོ་གསུམ་གྱི་ངོ་བོས་སྟོང་། །འཁོར་འདས་ཀྱི་ཆོས་ཀུན་རང་སེམས་ནི། །དག་མ་དག་གི་ཆོ་འཕྲུལ་ཙམ་དུ་ཟད། །གཤིས་ལུགས་ལ་འཁོར་འདས་གྲུབ་པ་མེད། །གདོད་མ་ནས་ཡེ་སྟོང་ཀ་ནས་དག། སྟོང་པ་དེ་ཕྱང་ཆད་མ་ཡིན་པ། །རང་བཞིན་འོད་གསལ་དུ་ལྷུན་གྱིས་གྲུབ། །ཐུགས་རྗེ་ཡི་རིག་པ་འཆར་གཞིར་གནས། །རིག་པ་ལ་མིང་འདོགས་མཚན་མ་བྲལ། །རྩལ་དེ་ལས་འཁོར་འདས་སྣ་ཚོགས་ཤར། །ཤར་ས་དང་ཤར་མཁན་གཉིས་སུ་མེད། །གཉིས་མེད་ཀྱི་ངང་དེར་མ་བཅོས་ཞོག། ལུས་འགྲོ་འདུག་བསྒུལ་བསྐྱོད་བྲལ་བར་བཞག། ངག་རླུང་གི་འབྱུང་འཇུག་རང་བབ་བཞག། སེམས་ཞེན་རྟོག་རྗེས་སུ་མི་འབྲང་བཞག། ཁོངས་ཡངས་ཤིང་སོས་དལ་ལྷུག་པར་བཞག། སྐྱེ་མེད་ཆོས་སྐུའི་རིག་པ་དེ། །རྐྱེན་གྱིས་མ་བསྐྱེད་རང་བྱུང་ཞིང་། །ཧྲིག་གེ་སོ་མ་ལྗེན་ནེ་བ། །གཟུང་འཛིན་གྱི་རྟོག་པས་མ་བསླད་ཅིང་། །ཡིད་དཔྱོད་ཀྱི་གོ་བས་མ་བསླད་པར། །རང་བབ་ཀྱི་བསམ་གཏན་ངང་དེར་ཞོག། ཞོག་ཅེས་བྱ་བའང་ཚིག་ཙམ་སྟེ། །དོན་ཡིན་ལུགས་ལ་བཞག་བྱ་བཞག་བྱེད་མེད། །རིག་སྟོང་ཆོས་སྐུའི་རང་ཞལ་དེ། །དུས་རྟག་ཏུ་རང་ངོ་ཡེངས་མེད་བསྐྱངས། །འཁོར་བའི་ལས་ལ་ཟད་པ་མེད། །ཇི་ཙམ་ཞིག་འབད་ཀྱང་ཕྱི་ཕྱིར་འཕེལ། །དགྲ་གཉེན་གྱི་རྟོག་པ་ཇེ་མང་འགྲོ། །ངན་སོང་གི་རྒྱུ་ནི་གྲུབ་ནས་འོང་། །དེ་བས་ན་བློ་སྣ་ཆོས་ལ་བསྒྱུར། །ཆོས་དང་སྒོ་གསུམ་འདྲིས་བྱས་ན། །ཐར་པ་བྱང་ཆུབ་ཀྱི་ལམ་སྣ་ཟིན། །འཆི་ཁ་འགྱོད་པ་མེད་པ་འོང་། །ཚེ་འདི་དང་ཕྱི་མ་ཐམས་ཅད་དུ། །བདེ་བ་ནས་བདེ་བའི་ལམ་དུ་འགྲོ། །རང་ཉིད་ལ་བཀའ་དྲིན་ཆེ་བ་ཡི། །བླ་མ་དང་ཨོ་རྒྱན་ཆེན་པོ་ནི། །དབྱེར་མེད་དུ་སྤྱི་གཙུག་སྙིང་གར་བསྒོམ། །མོས་གུས་ཀྱི་གདུང་ཤུགས་དྲག་པོ་བསྐྱེད། །རྐྱེན་བཟང་ངན་སྐྱིད་སྡུག་ཅི་བྱུང་ཡང་། །ཕ་བླ་མ་རྗེ་ལ་གསོལ་བ་ཐོབ། །རང་སེམས་དང་དབྱེར་མེད་བསྲེས་ཏེ་ཞོག། ནམ་འཆི་བའི་དུས་ན་ཆགས་སྡང་སྤངས། །རྗེ་ཨོ་རྒྱན་གུ་རུ་སྤྱི་གཙུག་སྒོམ། །རྣམ་ཤེས་ཐིག་དཀར། ལེ་ཧྲཱིཿདམར། ས་མཚན་གསལ། །དཔལ་ཨོ་རྒྱན་ཆེན་པོའི་ཐུགས་ཀར་བསྟིམ། །དེ་ད་ལྟ་རྒྱུན་དུ་སྒོམ་བྱས་ན། །འཆི་དུས་སུ་གསལ་ཐེབས་སླ་བར་འོངས། །དཔལ་རིའི་སྨོན་ལམ་གདབ་པར་བྱ། །མདོར་ན་ཆོས་ཀྱི་ཉམས་ལེན་ནི། །འཁོར་བ་ལ་ཞེན་པ་བཅད་པ་དང་། །འགྲོ་དྲུག་ལ་བྱམས་དང་སྙིང་རྗེ་སྒོམ། །རང་སེམས་འདི་ཡོངས་སུ་འདུལ་བ་ལ། །དུས་རྟག་པར་ཉམས་ལེན་མཛད་འཚལ་ལོ། །དེ་སྐད་ཀྱི་གདམས་པ་ཉུང་ངུ་འདི། །རང་རྒྱུད་ལ་ཉམས་ལེན་མ་མཆིས་ཀྱང་། །རྗེ་དམ་པ་གོང་མའི་གསུང་བཞིན་དུ། །རིགས་ལྡན་གྱི་དགེ་མ་པད་ལུ་ཡི། །གསུང་གིས་བསྐུལ་བ་མ་ལྡོག་ཙམ། །ཆོས་མེད་ཀྱི་དྲེད་པོ་དཀོར་ཟན་མཁན། །ཆོས་ཀྱི་བློ་གྲོས་ཞེས་བྱས་བྲིས།། །།

[edit]

!_gdams ngag gnad dril bzhugs so/__/skyabs mtshungs med o rgyan rje la 'dud/__/rten khyad 'phags dal 'byor mi lus 'di/__/rnyed dka' ba da res thob dus 'dir/__/bar ma dor chud zos ma shor ba/__/snying po len pa'i thabs la 'bad/__/chos kun gyi rtsa ba rang gi sems/__/ma brtags na nyams dga' bslu brid mkhas/__/brtags shing dpyad na gzhi rtsa bral/__/byung gnas 'gro gsum gyi ngo bos stong /__/'khor 'das kyi chos kun rang sems ni/__/dag ma dag gi cho 'phrul tsam du zad/__/gshis lugs la 'khor 'das grub pa med/__/gdod ma nas ye stong ka nas dag/__stong pa de phyang chad ma yin pa/__/rang bzhin 'od gsal du lhun gyis grub/__/thugs rje yi rig pa 'char gzhir gnas/__/rig pa la ming 'dogs mtshan ma bral/__/rtsal de las 'khor 'das sna tshogs shar/__/shar sa dang shar mkhan gnyis su med/__/gnyis med kyi ngang der ma bcos zhog/__lus 'gro 'dug bsgul bskyod bral bar bzhag/__ngag rlung gi 'byung 'jug rang bab bzhag/__sems zhen rtog rjes su mi 'brang bzhag/__khongs yangs shing sos dal lhug par bzhag/__skye med chos sku'i rig pa de/__/rkyen gyis ma bskyed rang byung zhing /__/hrig ge so ma ljen ne ba/__/gzung 'dzin gyi rtog pas ma bslad cing /__/yid dpyod kyi go bas ma bslad par/__/rang bab kyi bsam gtan ngang der zhog/__zhog ces bya ba'ang tshig tsam ste/__/don yin lugs la bzhag bya bzhag byed med/__/rig stong chos sku'i rang zhal de/__/dus rtag tu rang ngo yengs med bskyangs/__/'khor ba'i las la zad pa med/__/ji tsam zhig 'bad kyang phyi phyir 'phel/__/dgra gnyen gyi rtog pa je mang 'gro/__/ngan song gi rgyu ni grub nas 'ong /__/de bas na blo sna chos la bsgyur/__/chos dang sgo gsum 'dris byas na/__/thar pa byang chub kyi lam sna zin/__/'chi kha 'gyod pa med pa 'ong /__/tshe 'di dang phyi ma thams cad du/__/bde ba nas bde ba'i lam du 'gro/__/rang nyid la bka' drin che ba yi/__/bla ma dang o rgyan chen po ni/__/dbyer med du spyi gtsug snying gar bsgom/__/mos gus kyi gdung shugs drag po bskyed/__/rkyen bzang ngan skyid sdug ci byung yang /__/pha bla ma rje la gsol ba thob/__/rang sems dang dbyer med bsres te zhog/__nam 'chi ba'i dus na chags sdang spangs/__/rje o rgyan gu ru spyi gtsug sgom/__/rnam shes thig dkar/__le hrIHdmar/__sa mtshan gsal/__/dpal o rgyan chen po'i thugs kar bstim/__/de da lta rgyun du sgom byas na/__/'chi dus su gsal thebs sla bar 'ongs/__/dpal ri'i smon lam gdab par bya/__/mdor na chos kyi nyams len ni/__/'khor ba la zhen pa bcad pa dang /__/'gro drug la byams dang snying rje sgom/__/rang sems 'di yongs su 'dul ba la/__/dus rtag par nyams len mdzad 'tshal lo/__/de skad kyi gdams pa nyung ngu 'di/__/rang rgyud la nyams len ma mchis kyang /__/rje dam pa gong ma'i gsung bzhin du/__/rigs ldan gyi dge ma pad lu yi/__/gsung gis bskul ba ma ldog tsam/__/chos med kyi dred po dkor zan mkhan/__/chos kyi blo gros zhes byas bris//___//