JKW-KABUM-22-ZA-012-051

Previous Text Back to Volume PageNext Text

Wylie title
Location	mkhyen brtse'i bka' 'bum Volume 22, sde tshan 12, Text 51, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 22: . Khams sde dge rdzong sar dgon: Rdzong sar blo gros phun tshogs, 2020.
Genre	Vajra Songs - rdo rje'i glu

1 Texts in this Section (sde tshan or chos tshan)

51 501-503	དམ་ཅན་ཆོས་སྐྱོང་ལ་ཕྲིན་དུ་གསོལ་བའི་རྡོ་རྗེའི་ཐོལ་གླུ་ཧེ་རུ་ཀའི་སྒྲ་དབྱངས། dam can chos skyong la phrin du gsol ba'i rdo rje'i thol glu he ru ka'i sgra dbyangs Vajra Songs - rdo rje'i glu	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

དམ་ཅན་ཆོས་སྐྱོང་ལ་ཕྲིན་དུ་གསོལ་བའི་རྡོ་རྗེའི་ཐོལ་གླུ་ཧེ་རུ་ཀའི་སྒྲ་དབྱངས། དམ་ཅན་ཆོས་སྐྱོང་ལ་ཕྲིན་དུ་བཅོལ་བའི་རྡོ་རྗེའི་ཐོལ་གླུ་ཧེ་རུ་ཀའི་སྒྲ་དབྱངས་ཞེས་བྱ་བ། ཨ་ཧོ། །ཚོགས་བརྒྱད་དབུ་མར་ཐིམ་པའི་རང་རྩལ་ལས་བྱུང་བའི། །ཐབས་ཤེས་མཉམ་སྦྱོར་བདེ་སྟོང་ཟུང་འཇུག་གི་ངོ་བོ། །དམ་ཅན་ཆོས་སྐྱོང་རྒྱ་མཚོ་སྐྱོ་གྲོགས་ལ་ཕེབས་དང་། །ང་ཡི་གཟུང་འཛིན་རྟོག་པ་ཟད་ས་རུ་བསྒྲལ་མཛོད། །ཀུན་གཞི་བདེ་གཤེགས་སྙིང་པོ་འཁྲུལ་གྲོལ་ལས་འདས་ཀྱང་། །སྣ་ཚོགས་སྣང་བའི་ཆོ་རོལ་ཨེ་དབྱིངས་སུ་བསྒྲལ་བའི། །ས་བཅུའི་བཀའ་རྟགས་འཆང་བ་གཟའ་བདུད་ཀྱི་རྒྱལ་པོ། །ང་ཡི་འཁྲུལ་པ་རང་གྲོལ་ཆེན་པོ་རུ་ཐོང་ཞིག །སྲིད་ཞི་ཀུན་ཁྱབ་སེམས་ཉིད་གཅིག་པུ་ཡི་ཆོ་འཕྲུལ། །དངོས་པོའི་བདེན་གྲུབ་བྲལ་བའི་པདྨོ་རུ་རོལ་པའི། །ཤེས་རབ་དབྱིངས་ཀྱི་ཌཱ་ཀི་སྔགས་སྲུང་གི་རྒྱལ་མོ། །ང་ཡི་ཡིད་དཔྱོད་འོད་གསལ་ཆེན་པོ་རུ་སྒྲོལ་མཛོད། །སྣང་དང་སྟོང་པའི་མཚན་འཛིན་ཟུང་འཇུག་ཏུ་ཐིམ་པས། །སྤྲོས་བྲལ་བདེ་ཆེན་དཔའ་བོའི་སྣང་ཚུལ་དུ་སྟོན་ཅིང་། །ཁྲོ་ཆགས་སྒེག་པའི་ཉམས་ཅན་རྡོ་རྗེ་ཡི་ལེགས་པ། །ང་ཡི་གཉིས་སྣང་ཟད་པའི་ཐེག་པ་རུ་སྒྲོལ་མཛོད། ཨ་ཧོ། ཁྲག་གི་ཆུ་གཏེར་རྦ་རླབས་འཁྱིལ་བ་ཡི་ཀློང་ནས། །གར་དགུའི་ཕྱག་རྒྱ་དཔའ་བའི་ཡེ་ཤེས་ཀྱི་མགོན་པོ། །མཐིང་ནག་སྤྱན་གསུམ་མེ་འབར་དམ་ཚིག་ལ་བཞེངས་ནས། །སེམས་དང་སེམས་བྱུང་འཆོལ་བའི་དགྲ་བགེགས་ཀུན་གཞོམ་མཛོད། །གངས་རིའི་ཕྲེང་བས་བསྐོར་བའི་ཁང་བཟང་གི་དབུས་སུ། །ཆུ་ཤེལ་གཞོན་ནུའི་དཔལ་འཛིན་སྨན་བཙུན་གྱི་ཌཱ་ཀི །བདེ་སྟོང་ལང་ཚོ་གསར་པའི་འཇོ་སྒེག་དང་སྦྲགས་ནས། །ཟུང་འཇུག་ཕྱག་རྒྱ་ཆེན་པོའི་ངལ་བསོ་ལ་སྦྱོར་མཛོད། །གདུག་པའི་སྣང་ཚུལ་སྟོན་པ་འཇིག་རྟེན་གྱི་མཁའ་འགྲོ། །ཞིང་སྐྱོང་འབྱུང་པོ་ཀུན་གྱི་སྡེ་དཔོན་དུ་བཞེངས་ནས། །རྣལ་འབྱོར་བུ་བཞིན་སྐྱོང་བ་དུར་ཁྲོད་ཀྱི་ལྷ་མོས། །ང་ཡི་རྟེན་དང་བརྟེན་པ་མེལ་ཚེ་ཡིས་སྐྱོངས་ཤིག །གཞན་ཡང་སྣང་ཚུལ་བརྗོད་བྲལ་ཕྱི་ནང་གི་བསྟན་སྲུང་། །ཕོ་རྒྱུད་མོ་རྒྱུད་སྤྲུལ་འཁོར་བཅས་པ་ཀུན་མ་ལུས། །ཧེ་རུ་ཀ་དཔལ་འབར་བའི་དམ་ཚིག་ལ་དགོངས་ཏེ། །རྟེན་ཅིང་འབྲེལ་འབྱུང་ལོག་པའི་བར་ཆད་ཀུན་བཟློག་ཅིག །ཁྱད་པར་འོད་གསལ་རྡོ་རྗེ་སྙིང་པོ་ཡི་བསྟན་པ། །རྣལ་འབྱོར་གསུམ་གྱི་ལམ་མཆོག་རྨད་བྱུང་གི་ནོར་བུ། །རྟག་པར་བསྟན་འཛིན་ཚོགས་ཀྱི་ཤིང་རྟ་ཡིས་དྲངས་ཏེ། །བོད་ཁམས་ཨོ་ཌཱི་བི་ཤ་གཉིས་པ་རུ་འགྱུར་མཛོད། །གཞན་ཡང་རི་སུལ་དབེན་པའི་བྲག་སྐྱིབས་ཀྱི་ཁང་བུར། །བསྐྱེད་རྫོགས་དོན་ལ་བརྩོན་པའི་དམ་བཅའ་ལ་འཇུག་ཀུན། །ཡིད་སྲུབ་སྦྱོར་བ་མིང་གི་ལྷག་མ་རུ་བཅོམ་ནས། །ངེས་གསང་སྒྲུབ་པའི་རྒྱལ་མཚན་ཚུགས་པ་རུ་ཤོག་ཅིག །ཅེས་པ་འདི་ཡང་ཆོས་སྲུང་གི་ཚོགས་ལ་འདོད་དོན་གཞོལ་བའི་ཕྱིར་གང་ཤར་དུ་བླངས་པ་ཛ་ཡནྟུ། ། ༈

[edit]

dam can chos skyong la phrin du gsol ba'i rdo rje'i thol glu he ru ka'i sgra dbyangs/__ dam can chos skyong la phrin du bcol ba'i rdo rje'i thol glu he ru ka'i sgra dbyangs zhes bya ba/__a ho/__/tshogs brgyad dbu mar thim pa'i rang rtsal las byung ba'i/__/thabs shes mnyam sbyor bde stong zung 'jug gi ngo bo/__/dam can chos skyong rgya mtsho skyo grogs la phebs dang /__/nga yi gzung 'dzin rtog pa zad sa ru bsgral mdzod/__/kun gzhi bde gshegs snying po 'khrul grol las 'das kyang /__/sna tshogs snang ba'i cho rol e dbyings su bsgral ba'i/__/sa bcu'i bka' rtags 'chang ba gza' bdud kyi rgyal po/__/nga yi 'khrul pa rang grol chen po ru thong zhig__/srid zhi kun khyab sems nyid gcig pu yi cho 'phrul/__/dngos po'i bden grub bral ba'i pad+mo ru rol pa'i/__/shes rab dbyings kyi DA ki sngags srung gi rgyal mo/__/nga yi yid dpyod 'od gsal chen po ru sgrol mdzod/__/snang dang stong pa'i mtshan 'dzin zung 'jug tu thim pas/__/spros bral bde chen dpa' bo'i snang tshul du ston cing /__/khro chags sgeg pa'i nyams can rdo rje yi legs pa/__/nga yi gnyis snang zad pa'i theg pa ru sgrol mdzod/__a ho/__khrag gi chu gter rba rlabs 'khyil ba yi klong nas/__/gar dgu'i phyag rgya dpa' ba'i ye shes kyi mgon po/__/mthing nag spyan gsum me 'bar dam tshig la bzhengs nas/__/sems dang sems byung 'chol ba'i dgra bgegs kun gzhom mdzod/__/gangs ri'i phreng bas bskor ba'i khang bzang gi dbus su/__/chu shel gzhon nu'i dpal 'dzin sman btsun gyi DA ki__/bde stong lang tsho gsar pa'i 'jo sgeg dang sbrags nas/__/zung 'jug phyag rgya chen po'i ngal bso la sbyor mdzod/__/gdug pa'i snang tshul ston pa 'jig rten gyi mkha' 'gro/__/zhing skyong 'byung po kun gyi sde dpon du bzhengs nas/__/rnal 'byor bu bzhin skyong ba dur khrod kyi lha mos/__/nga yi rten dang brten pa mel tshe yis skyongs shig__/gzhan yang snang tshul brjod bral phyi nang gi bstan srung /__/pho rgyud mo rgyud sprul 'khor bcas pa kun ma lus/__/he ru ka dpal 'bar ba'i dam tshig la dgongs te/__/rten cing 'brel 'byung log pa'i bar chad kun bzlog cig__/khyad par 'od gsal rdo rje snying po yi bstan pa/__/rnal 'byor gsum gyi lam mchog rmad byung gi nor bu/__/rtag par bstan 'dzin tshogs kyi shing rta yis drangs te/__/bod khams o DI bi sha gnyis pa ru 'gyur mdzod/__/gzhan yang ri sul dben pa'i brag skyibs kyi khang bur/__/bskyed rdzogs don la brtson pa'i dam bca' la 'jug kun/__/yid srub sbyor ba ming gi lhag ma ru bcom nas/__/nges gsang sgrub pa'i rgyal mtshan tshugs pa ru shog cig__/ces pa 'di yang chos srung gi tshogs la 'dod don gzhol ba'i phyir gang shar du blangs pa dza yan+tu/___/__!_