JKW-KABUM-17-TSA-002-030

🚧 This website is under continued development. We appreciate your patience!

Previous Text Back to Volume PageNext Text

སི་ཏུ་རིན་པོ་ཆེའི་འབྲུམ་བཅོས་ལེ་ཚན་གྱི་ཟུར་གསལ།

Wylie title	si tu rin po che'i 'brum bcos le tshan gyi zur gsal
Location	mkhyen brtse'i bka' 'bum Volume 17, sde tshan 2, Text 30, Pages 322-327 (Folios 88b5 to 91a6)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. si tu rin po che'i 'brum bcos le tshan gyi zur gsal. In 'jam dbyangs mkhyen brtse'i dbang po'i bka' 'bum, Vol. 17: 322-327. Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

30 322-327	སི་ཏུ་རིན་པོ་ཆེའི་འབྲུམ་བཅོས་ལེ་ཚན་གྱི་ཟུར་གསལ། si tu rin po che'i 'brum bcos le tshan gyi zur gsal Medicine Texts - gso ba rig pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སི་ཏུ་རིན་པོ་ཆེའི་འབྲུམ་བཅོས་ལེ་ཚན་གྱི་ཟུར་གསལ་དགེ། ཨོཾ་ཨ་ཐཱ། ཁོ་བོས་སློབ་དཔོན་མཁས་དབང་ཆོས་གྲགས་རྒྱ་མཚོ་ལས་འབྲུམ་པ་བཙུགས་བཅོས་སྐོར་ཞིབ་ཁྲིད་ཞུས་པ། སྤྱིར་སི་ཏུ་རིན་པོ་ཆེས་སྡེ་དགེ་བློ་གྲོས་རྒྱ་མཚོའི་ཞལ་ངོར་སྩལ་བའི་འབྲུམ་བཅོས་ཚིགས་བཅད། དཔོན་པོ་མི་དབང་ལ་སྩལ་བའི་ཚིག་ལྷུག་གཉིས་གུང་བསྒྲིགས། དེའང་སྔ་མ་བོད་བཅོས་དང་། ཕྱི་མ་རྒྱ་བཅོས་གཙོ་བོར་མཛད་པ་རེད་པས། རྒྱ་བཅོས་ཀྱི་ལག་ལེན་གཙོ་ཆེའང་། རྒྱ་སྨན་རིགས་འཛོམས་ཐབས་མེད་པས་སྨན་བཅོས་དངོས་བོད་བཅོས་ནང་ལྟར་བྱས་ན་འཐུས། དེའང་ཐོག་མར་བཙུག་དུས། རབ་བདུན་གསུམ། འབྲིང་གཉིས། ཐ་ནའང་གཅིག་ཙམ་གྱི་གོང་ནས། ཟས་སྤྱོད་སོགས་གཞུང་ཚིག་ལྷུག་ལྟར་དང་། དེར་མི་གསལ་བ་སྐྲ་ཁ་སྤུ་རིང་མཐུག་ཅན་ཡོད་ན་བཞར་ན་ལེགས་ཞེས་གསུངས་པ་ནི། མགོར་འབྲུམ་པ་མང་པོ་བུད་ན་རྣག་སོགས་འཁྲུ་སྐམ་དཀའ་བ་ལ་དགོངས། ལུས་རིལ་པོའམ་བཀྲུ་གང་བདེ་སར་སུག་བུལ་གྱི་ཆུས་དག་པར་བཀྲུ། སྲན་རྩམ་གྱིས་ཕྱི་ནས་སྣུམ་མེད་པ་བྱུག་ན་འབྲུམ་པ་བུད་སླ། བོད་པ་རྣམས་གནས་ཁང་ཕྱག་དར་ལེགས་པོར་བྱེད། སྤོས་དཀར་བདུག །བཅའ་ལག་དང་འགྲུལ་གསར་སོགས་གདོན་འཛེམས་དང་། གཙང་སྦྲ་གང་ཆེ། འུར་སྒྲ་སོགས་གཏན་ནས་མེད་པའི་གནས་དབེན་པ་གལ་ཆེ་ཚུལ་བཤད་སྣང་བ་བདེན་པར་གདའ། དེ་ནས་གཟའ་སྐར་བཟང་པོའི་དུས་འབྲུམ་པ་བྱམས་པ་དང་། མི་གྲིབ་ཅན་མ་ཡིན་པའི་མགོ་གཙང་གི་མེ་ཏོག་བླངས། གཞུང་དུ་མེ་ཏོག་བཅུ་ཙམ་བཤད་ཀྱང་། བདུན་རེས་ཆོག །གླ་རྩི་དྲི་ཐོན་གསུངས་པ་ནད་དྲི་རྩ་ལ་འཁྲིད་བྱེད་ཡིན་པས་མགོ་སྲིན་སོགས་མེད་པ་ལ་དེ་ལྟར་ལེགས། སྲིན་ཤས་ཆེ་བ་ལ་མི་འཕྲོད་འདུག་པས་དེ་ཚབ་ཁ་ཆེ་དཔུས་ལེགས་དྲི་རོ་མ་ཉམས་པ་ཅུང་ཟད་དང་། གཞུང་དུ་མི་གསལ་ཡང་སྣ་ཐ་རབ་རྒྱ་འདུར། དེ་མིན་རང་རེས་འདུར་ཁ་གང་ཞིབ་བྱས་པ་བཅས་སྨན་པའི་མཆིལ་མས་བསྡུས་ཏེ་སྲིན་བལ་གཙང་མའི་ནང་དུ་མདུང་བསྒྲིལ་དུ་དྲིལ། ཕོ་གཡོན། མོ་གཡས་ཀྱི་སྣ་བུག་ཏུ་སྣའི་ནང་རྩེ་སོར་གསུམ་ཙམ་ཡོད་པར་བྱས་ནས་དམ་པར་བཅུག །དེའང་ནུབ་མོ་ཉལ་ཁ་རང་དུ་བཅུག །དེ་རྗེས་གཡེར་མའི་ཐང་ཚ་མོའམ། ཆུ་ཚན་ཕོར་གང་ཙམ་བཏུང་། གོས་དམར་པོས་བྱིབས་ནས་ལུས་ལ་རྔུལ་ཐོན་པ་ཞིག་བྱས་ནས་གཉིད་ལོག་ན་རབ་ཞག་གསུམ། འབྲིང་བདུན། ཐ་ནའང་ཞག་ཉེར་གཅིག་ནས་ན་འོང་། དེའང་ཞག་གསུམ་བར་སྲིན་བལ་མི་ལེན་ནས་བཞག །དེ་ནས་ན་མ་འོང་ན་ལེན་ནས་ཡང་གོང་ལྟར་བཅུག །དེ་ལྟར་ལན་བདུན་བསྐྱར་བས་ཞག་ཉེར་གཅིག་ནང་མ་ན་ན་སྣ་བརྡུག་ཡིན་སྐད་ཀྱང་ཧ་ཅང་ངེས་པ་རང་ནི་མེད། འོན་ཀྱང་ཕལ་ཆེར་བདུན་རེ་གཉིས་ནས་ན་འོང་ངེས་གསུངས། འབྲུམ་ལྐོག་སྐམ་པོ་ཡུན་རིང་ཅན་དྲི་ཡལ་བ་ལས་ནད་མཆེད་ཐབས་མེད། ལར་ན་ཉིན་ད་ལོ་འབྲུམ་ལྐོག་ཅན་ལ་ཤ་དམར་པོས་དྲིལ་ཕྱིས་བྱས་ནས་ཟ་བ་དང་། ཤ་ཁུ་ནང་འབྲུམ་ལྐོག་བཏབ་ནས་འཐུང་ན་མྱུར་དུ་ན་འོང་ཟེར་བ་དང་། སྣ་དུད་དང་བསྲེས་ནས་འཐེན་པ་དང་། འབྲུམ་པ་ལྗི་མོའི་འབྲུམ་ལྐོག་བླངས་ནས་ན་བཅུག་ན་བྱམས་འདུག་ཟེར་བ་དང་། མི་རྒན་པོའི་རིགས་ལ་བྱམས་འདུག་ཟེར་བ་སོགས་སྔར་གོ་མ་མྱོང་བ་མང་པོ་བཤད་རྒྱུ་འདུག་པས་རྒྱུ་མཚན་ཡོད་མེད་མ་ངེས་རུང་། དེང་སང་དུས་ཚོད་མི་མཆོག་དམན་ཐམས་ཅད་སྤྱོད་པ་གོ་ལོག་པས། ནད་ཀྱང་གོ་ལོག་པ་ཡིན་ཤས་ཆེ་བས་ཟེར་ཚོད་མ་ཐེངས། གང་ལྟར་ཡང་སྔ་མའི་གཙུག་ལུགས་ནི་གོང་གསལ་སོར་བཞག་ཡིན། རྒྱ་སྨན་རྩ་འོ་ཀོ་ཞེས་པ་ཀ་ཀོ་ལ་ཆུང་ངུ་འདྲ་ཞིག་དང་། གསིག་ཡིན་ཟེར་བ་དེ་ལས་ཆུང་ཙམ་གཉིས་མཐོང་ཡང་འདི་ཕྱོགས་ནི་གཏན་ནས་ལོན་ཁུངས་མེད། དེའང་གསར་པ་ཡོད་ན་མ་གཏོགས་སྨན་སྒོག་རྙིང་པས་ནི་ཕན་གནོད་ཅིའང་ག་ལ་ཡོད་པས། དེས་ན་གོང་གསལ་བོད་ཀྱི་གཙུག་ལུགས་འདི་ཁོ་ནས་འཐུས་གསུང་། དེ་ནས་བཅོས་ནི་ཡིག་ཆ་གཉིས་གུང་བསྒྲིགས་པས་ཁྱབ། དེའང་གཞུང་དུ་མི་གསལ་ཡང་ཐོག་མར་སྡུད་ཐང་འབྲས་གསུམ་ཐང་རྐྱང་པའམ། ནོར་བདུན་གང་རིགས་ཞག་གཉིས་གསུམ་བསྟེན་ཅིང་རྔུལ་དབྱུང་། སྐྱ་ནད་ཕོག་ནས་ཅུང་ཟད་མཚམས་སྤུ་སྒོ་དབྱེ་བའི་ཐང་བཏང་། ད་ལོའི་འབྲུམ་དཀར་འདི་མིག་དང་གྲེ་བར་སྐྱོན་བྱས་སྐད་མི་འདུག་རུང་། གལ་སྲིད་མིག་དང་གྲེ་བར་བྱུང་ན་ཅུང་ཉེན་ཆེ་བས་སྲུང་བ་ལྷན་ཐབས་ནང་ལྟར་གྱིས་ཐུབ་ངེས་ཡིན་གསུངས། ནད་རྒྱས་ནས་གཉེན་པོའི་སྨན་རྡོ་རྩིའི་སྦྱོར་བ་སོགས་གཞུང་དུ་གསལ་བ་ལྟར་དང་། ནད་གཞི་གཞན་ཡོད་མཁན་ཡིན་ན་དེ་དཀྲུགས་བྱུང་ཚེ་རང་རང་གི་སྨན་གཉན་ཚད་ལ་མི་གནོད་པའི་རིགས་དང་རྡོ་རྩིའི་སྦྱོར་བ་སོགས་ལྟག་པ་སྤྲད། གཉན་ཚད་ཤས་ཆེན་སྤྲུ་ནག་ཉེར་དགུ་དང་། ཆུང་ན་འབྲི་ལུགས་སྨན་ནག་ཆེན་མོའང་འཕྲོད་པར་སྣང་། སྣ་ཚོགས་ཡུམ་དཀར་མོའི་བུམ་བསྒྲུབ་ཚད་ལྡན་བྱས་པའི་བུམ་ཆུ་སྨན་ཆུ་དང་། བཟའ་བཏུང་ལ་བྲན་ནས་བཏང་ན་ཤིན་ཏུ་བྱམས་པར་འོང་ངེས་ཟེར། རྣག་ཏུ་སྨིན་ནས་སྐམ་དཀའ་ན་སྤོས་དཀར་གྱི་དུད་པས་རུམ་ནང་དུ་ཁྱབ་པར་བདུགས་ནས་མགོ་བསྟུམ་ཉལ་ན་སྐམ་སླ། ལུས་ལ་འདྲའང་། གདོང་པའི་འབྲུམ་ལྐོག་རང་གོག་ཏུ་མ་བྱུང་བར་བཀོག་པ་དང་། སྣུམ་བྱུགས་པ་སོགས་བྱས་ན་འབྲུམ་རྗེས་དང་སྨུག་ཐིག་སྡོད་འོང་པས་འཛེམ་པ་དང་། རང་གོག་ཏུ་ཡལ་རྗེས་རང་གི་དྲི་ཆུ་ཚ་མོས་དཀྲུས་ན་འབྲུམ་རྗེས་མི་འོང་ཞིང་། ཁྱད་པར་ལན་ཚ་ནད་དྲག་རྗེས་ཀྱང་ཟླ་བ་གཉིས་གསུམ་སྤང་ཐུབ་ན་འབྲུམ་རྗེས་གཏན་ནས་མི་འབྱུང་བར་བཤད། བོད་པའི་ཨེ་མཆིས། འབྲུམ་དཀར་ཡང་བའི་རིགས་ལ་སྨན་གཏན་ནས་མ་བཏང་ཡང་ཆོག །གཏོང་ན་སྨན་འཇམ་པོ་ཉིན་རེ་ལན་རེ་ཙམ་ལས། རྩུབ་པོ་དང་མང་པོ་མི་གཏོང་། གཏོང་ན་ནད་གཞི་གཞན་ཡང་དཀྲུགས་ནས་ནད་ཡུན་རིང་འོང་ཟེར་བ་ཕལ་ཆེར་བདེན་པ་འདྲ། རང་ལུགས་སྨན་འོས་མཚམས་བསྟེན་སྲོལ་ཡིན་གསུངས། ནད་དྲགས་ནས་ཁ་གཏོང་རྒྱུ་འདི་སྔ་ཕྱི་ཚོད་ཟིན་ངེས་གལ་ཆེ་བ་མ་གཏོགས། སྔ་ན་ཚ་རོ་འཕར། ཕྱི་ན་རླུང་ཁ་ལྡང་ནས་ནད་གཞི་གཞན་དཀྲུགས་ཉེན་ཆེ་བས་ལྷ་རྗེས་ཞིབ་དཔྱད་ངོས། ཐོག་མར་ཆང་ལམ་སོང་བཟང་པོ་དཀར་ཡོལ་གང་ལ་ཆུ་དཀར་ཡོལ་གང་བསྲེ་ནས་དཀར་ཡོལ་གང་དུ་མ་འཐག་པར་བསྐོལ་ནས་ཚ་མོ་གཏོང་། ལུས་དྲོད་ལ་བསྒོར། དེས་མ་གནོད་ན་ཕྱིར་ནུབ་ནས་རིམ་གྱིས་ཕོར་དོ། ཕོར་གསུམ་ཙམ་གཏོང་། དེ་མཚམས་ལུག་གི་སྲེ་ལོང་སུམ་ཆ། ཕྱེད་ཀ །སྒང་པོའི་ཐང་རིམ་བར་བཏང་ནས་དེ་ནས་ཁ་ཟས་བགས་ཀྱིས་ཀློད་ཅིང་ལུས་ཟུངས་གསོ། ལུས་ཟུངས་སོས་ཕན་ཆུ་ཚན་ཞིག་བརྟེན་ན་ལེགས་པ་བཅས་རང་འབྲུམ་པ་མ་ཐར་པས་ལག་ལེན་མ་མྱོང་ཡང་། སློབ་དཔོན་གྱི་ཞལ་ཁྲིད་བློར་མ་བརྗེད་པ་རགས་རིམ་བྲིས་པ་དགེ་ཞིང་བཀྲ་ཤིས། ། ༈

[edit]

si tu rin po che'i 'brum bcos le tshan gyi zur gsal/ si tu rin po che'i 'brum bcos le tshan gyi zur gsal dge/__oM a thA/__kho bos slob dpon mkhas dbang chos grags rgya mtsho las 'brum pa btsugs bcos skor zhib khrid zhus pa/__spyir si tu rin po ches sde dge blo gros rgya mtsho'i zhal ngor stsal ba'i 'brum bcos tshigs bcad/__dpon po mi dbang la stsal ba'i tshig lhug gnyis gung bsgrigs/__de'ang snga ma bod bcos dang /__phyi ma rgya bcos gtso bor mdzad pa red pas/__rgya bcos kyi lag len gtso che'ang /__rgya sman rigs 'dzoms thabs med pas sman bcos dngos bod bcos nang ltar byas na 'thus/__de'ang thog mar btsug dus/__rab bdun gsum/__'bring gnyis/__tha na'ang gcig tsam gyi gong nas/__zas spyod sogs gzhung tshig lhug ltar dang /__der mi gsal ba skra kha spu ring mthug can yod na bzhar na legs zhes gsungs pa ni/__mgor 'brum pa mang po bud na rnag sogs 'khru skam dka' ba la dgongs/__lus ril po'am bkru gang bde sar sug bul gyi chus dag par bkru/__sran rtsam gyis phyi nas snum med pa byug na 'brum pa bud sla/__bod pa rnams gnas khang phyag dar legs por byed/__spos dkar bdug__/bca' lag dang 'grul gsar sogs gdon 'dzems dang /__gtsang sbra gang che/__'ur sgra sogs gtan nas med pa'i gnas dben pa gal che tshul bshad snang ba bden par gda'/__de nas gza' skar bzang po'i dus 'brum pa byams pa dang /__mi grib can ma yin pa'i mgo gtsang gi me tog blangs/__gzhung du me tog bcu tsam bshad kyang /__bdun res chog__/gla rtsi dri thon gsungs pa nad dri rtsa la 'khrid byed yin pas mgo srin sogs med pa la de ltar legs/__srin shas che ba la mi 'phrod 'dug pas de tshab kha che dpus legs dri ro ma nyams pa cung zad dang /__gzhung du mi gsal yang sna tha rab rgya 'dur/__de min rang res 'dur kha gang zhib byas pa bcas sman pa'i mchil mas bsdus te srin bal gtsang ma'i nang du mdung bsgril du dril/__pho g.yon/__mo g.yas kyi sna bug tu sna'i nang rtse sor gsum tsam yod par byas nas dam par bcug__/de'ang nub mo nyal kha rang du bcug__/de rjes g.yer ma'i thang tsha mo'am/__chu tshan phor gang tsam btung /__gos dmar pos byibs nas lus la rngul thon pa zhig byas nas gnyid log na rab zhag gsum/__'bring bdun/__tha na'ang zhag nyer gcig nas na 'ong /__de'ang zhag gsum bar srin bal mi len nas bzhag__/de nas na ma 'ong na len nas yang gong ltar bcug__/de ltar lan bdun bskyar bas zhag nyer gcig nang ma na na sna brdug yin skad kyang ha cang nges pa rang ni med/__'on kyang phal cher bdun re gnyis nas na 'ong nges gsungs/__'brum lkog skam po yun ring can dri yal ba las nad mched thabs med/___lar na nyin da lo 'brum lkog can la sha dmar pos dril phyis byas nas za ba dang /__sha khu nang 'brum lkog btab nas 'thung na myur du na 'ong zer ba dang /__sna dud dang bsres nas 'then pa dang /__'brum pa lji mo'i 'brum lkog blangs nas na bcug na byams 'dug zer ba dang /__mi rgan po'i rigs la byams 'dug zer ba sogs sngar go ma myong ba mang po bshad rgyu 'dug pas rgyu mtshan yod med ma nges rung /__deng sang dus tshod mi mchog dman thams cad spyod pa go log pas/__nad kyang go log pa yin shas che bas zer tshod ma thengs/__gang ltar yang snga ma'i gtsug lugs ni gong gsal sor bzhag yin/__rgya sman rtsa 'o ko zhes pa ka ko la chung ngu 'dra zhig dang /__gsig yin zer ba de las chung tsam gnyis mthong yang 'di phyogs ni gtan nas lon khungs med/__de'ang gsar pa yod na ma gtogs sman sgog rnying pas ni phan gnod ci'ang ga la yod pas/__des na gong gsal bod kyi gtsug lugs 'di kho nas 'thus gsung /__de nas bcos ni yig cha gnyis gung bsgrigs pas khyab/__de'ang gzhung du mi gsal yang thog mar sdud thang 'bras gsum thang rkyang pa'am/__nor bdun gang rigs zhag gnyis gsum bsten cing rngul dbyung /__skya nad phog nas cung zad mtshams spu sgo dbye ba'i thang btang /__da lo'i 'brum dkar 'di mig dang gre bar skyon byas skad mi 'dug rung /__gal srid mig dang gre bar byung na cung nyen che bas srung ba lhan thabs nang ltar gyis thub nges yin gsungs/__nad rgyas nas gnyen po'i sman rdo rtsi'i sbyor ba sogs gzhung du gsal ba ltar dang /__nad gzhi gzhan yod mkhan yin na de dkrugs byung tshe rang rang gi sman gnyan tshad la mi gnod pa'i rigs dang rdo rtsi'i sbyor ba sogs ltag pa sprad/__gnyan tshad shas chen spru nag nyer dgu dang /__chung na 'bri lugs sman nag chen mo'ang 'phrod par snang /__sna tshogs yum dkar mo'i bum bsgrub tshad ldan byas pa'i bum chu sman chu dang /__bza' btung la bran nas btang na shin tu byams par 'ong nges zer/__rnag tu smin nas skam dka' na spos dkar gyi dud pas rum nang du khyab par bdugs nas mgo bstum nyal na skam sla/__lus la 'dra'ang /__gdong pa'i 'brum lkog rang gog tu ma byung bar bkog pa dang /__snum byugs pa sogs byas na 'brum rjes dang smug thig sdod 'ong pas 'dzem pa dang /__rang gog tu yal rjes rang gi dri chu tsha mos dkrus na 'brum rjes mi 'ong zhing /__khyad par lan tsha nad drag rjes kyang zla ba gnyis gsum spang thub na 'brum rjes gtan nas mi 'byung bar bshad/__bod pa'i e mchis/__'brum dkar yang ba'i rigs la sman gtan nas ma btang yang chog__/gtong na sman 'jam po nyin re lan re tsam las/__rtsub po dang mang po mi gtong /__gtong na nad gzhi gzhan yang dkrugs nas nad yun ring 'ong zer ba phal cher bden pa 'dra/__rang lugs sman 'os mtshams bsten srol yin gsungs/__nad drags nas kha gtong rgyu 'di snga phyi tshod zin nges gal che ba ma gtogs/__snga na tsha ro 'phar/__phyi na rlung kha ldang nas nad gzhi gzhan dkrugs nyen che bas lha rjes zhib dpyad ngos/__thog mar chang lam song bzang po dkar yol gang la chu dkar yol gang bsre nas dkar yol gang du ma 'thag par bskol nas tsha mo gtong /__lus drod la bsgor/__des ma gnod na phyir nub nas rim gyis phor do/__phor gsum tsam gtong /__de mtshams lug gi sre long sum cha/__phyed ka__/sgang po'i thang rim bar btang nas de nas kha zas bags kyis klod cing lus zungs gso/__lus zungs sos phan chu tshan zhig brten na legs pa bcas rang 'brum pa ma thar pas lag len ma myong yang /__slob dpon gyi zhal khrid blor ma brjed pa rags rim bris pa dge zhing bkra shis/_/_!