JKW-KABUM-12-NA-002-003

🚧 This website is under continued development. We appreciate your patience!

First text in section. Back to Volume PageNext Text

Wylie title
Location	mkhyen brtse'i bka' 'bum Volume 12, sde tshan 2, Text 1, Pages (Folios 77a3 to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 12: 303-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

3 303-326	སེང་གདོང་རིགས་ལྔའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་ཕྲིན་ལས་རྣམ་རོལ། seng gdong rigs lnga'i sgrub thabs rjes gnang las tshogs dang bcas pa phrin las rnam rol Activity Manual - las byang   ·   Permission to Invoke (anujñā) - rjes gnang   ·   Sadhanas - Evocation Ritual - sgrub thabs   ·   Activity Practices - las tshogs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སེང་གདོང་རིགས་ལྔའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་ཕྲིན་ལས་རྣམ་རོལ། སེང་གདོང་རིགས་ལྔའི་སྒྲུབ་ཐབས་རྗེས་གནང་ལས་ཚོགས་དང་བཅས་པ་ཕྲིན་ལས་རྣམ་རོལ་ཞེས་བྱ་བ་བཞུགས་སོ། །ཨོཾ་སྭ་སྟི། །བདེ་སྟོང་ཟུང་འཇུག་འོད་གསལ་གཅིག་ཉིད་ལས། །གང་འདུལ་རིགས་ལྔའི་སྐུར་སྣང་སེང་གེའི་ཞལ། །བླ་མ་ཡེ་ཤེས་མཁའ་འགྲོར་གུས་བཏུད་ནས། །ཕྲིན་ལས་རྣམ་པར་རོལ་པའི་ལམ་བཟང་དབྱེ། །འདི་ལ་གསུམ། སྒྲུབ་པའི་ཐབས། རྗེས་སུ་གནང་བའི་ཆོ་ག །ལས་ཀྱི་རིམ་པའོ། །དང་པོ་ནི། ཐུན་མོང་གི་ལམ་གྱིས་རྒྱུད་སྦྱངས་ཤིང་རྡོ་རྗེ་ཐེག་པ་ལ་ལྷག་པར་གནས་པའི་སྒྲུབ་པ་པོས་བདེ་བའི་སྟན་ལ་འདུག་ནས། སྐྱབས་སེམས་ཚད་མེད་བཞི་སྒོམ་པ་སྔོན་དུ་འགྲོ་བས། ཨོཾ་སྭ་བྷཱ་བ་ཤུདྡྷཿསརྦ་དྷ་རྨཱཿསྭ་བྷཱ་བ་ཤུདྡྷོ྅་ཧཾ། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་ཆེན་པོ་བརྒྱད་དང་བཅས་པས་ཡོངས་སུ་བསྐོར་བའི་དབུས་སུ། ཨེ་ཨེ་ལས་ཆོས་འབྱུང་གྲུ་གསུམ་ཉིས་བརྩེགས་དབུས་སྔོ། ཤར་དཀར། བྱང་ལྗང་། ནུབ་དམར། ལྷོ་སེར་པོ་རྣམས་ཀྱི་ནང་དུ་རུ་དྲ་ཕོ་མོ་ཉི་མའི་གདན་དང་བཅས་པར་ཧཱུྃ་རེ་རེ་ལས། དབུས་སུ་རྡོ་རྗེ། ཤར་དུ་གྲི་གུག །བྱང་དུ་རལ་གྲི། ནུབ་ཏུ་པདྨ། ལྷོར་རིན་པོ་ཆེ་རྣམས་སོ་སོའི་རིགས་ཀྱི་ཁ་དོག་ཅན་གྱི་ཧཱུྃ་ཡིག་གིས་མཚན་པ་ལས་འོད་ཟེར་འཕྲོ་འདུས་ཡོངས་སུ་གྱུར་པ་ལས། དབུས་སུ་རྡོ་རྗེ་མཁའ་འགྲོ་མཐིང་ནག་སེང་ཞལ་དཀར་མོ་རྔམས་ཤིང་རྡོ་རྗེ་དང་ཐོད་ཁྲག་འཛིན་པ། ཤར་དུ་སངས་རྒྱས་མཁའ་འགྲོ་དཀར་མོ་སེང་ཞལ་སྔོན་མོ་ཅན་གྲི་གུག་དང་བདུད་རྩིའི་ཐོད་པ་འཛིན་པ། བྱང་དུ་ལས་ཀྱི་མཁའ་འགྲོ་ལྗང་ནག་སེང་ཞལ་ནག་པོ་ཅན་རལ་གྲི་དང་ཐོད་ཁྲག་འཛིན་པ། ནུབ་ཏུ་པདྨ་མཁའ་འགྲོ་དམར་མོ་སེང་ཞལ་སེར་མོ་ཅན་ལྕགས་ཀྱུ་དང་གཏེར་བུམ་འཛིན་པ། ལྷོར་རིན་ཆེན་མཁའ་འགྲོ་སེར་མོ་སེང་ཞལ་དམར་མོ་ཅན་རིན་པོ་ཆེ་དང་ནེའུ་ལེ་འཛིན་པ། ཐམས་ཅད་ཀྱང་དམར་ལ་ཟླུམ་པའི་ཁྲོ་མོའི་སྤྱན་གསུམ་བགྲད་པ། ཞལ་གདངས་ལྗགས་འདྲིལ་མཆེ་བ་གཙིགས་ཤིང་སྨ་ར་དང་སྨིན་མ་ལས་མེ་སྟག་འཕྲོ་བ། དབུ་སྐྲ་ཕྱེད་གྱེན་དུ་བརྫེས་ཤིང་དུག་སྦྲུལ་ནག་པོས་བཅིངས་པའི་སྟེང་དུ་རུས་པའི་འཁོར་ལོ་དང་རྡོ་རྗེ་ཕྱེད་པས་མཚན་པ། ཕྱེད་ཐུར་དུ་གྲོལ་བ་གསིགས་པའི་གསེབ་ནས་རང་འདྲའི་སྤྲུལ་པ་སྤྲོ་བ། མི་མགོ་སྐམ་པོ་ལྔའི་དབུ་རྒྱན་དང་། རློན་པ་ལྔ་བཅུའི་དོ་ཤལ་ཅན། ཞིང་ལྤགས་དང་གླང་པོ་ཆེའི་ཀོ་བས་སྟོད་གཡོགས་ཤིང་། སྟག་ལྤགས་ཀྱི་ཤམ་ཐབས་འཕྱང་བ། ཐལ་ཆེན་གྱི་ཚོམ་བུ་དང་། ཁྲག་གི་ཐིག་ལེ་དང་། ཞག་གི་ཟོར་རིས་རྣམས་ཀྱིས་མཚན་ཅིང་སྦྲུལ་རིགས་ལྔ་དང་། རུས་པའི་ཕྱག་རྒྱ་ལྔས་བརྒྱན་པ། གྲུ་མོ་གཡོན་ན་རིགས་ཀྱི་ཕྱག་མཚན་གྱིས་བརྒྱན་པའི་ཁ་ཊྭཱཾ་ག་བསྒྲེང་ཞིང་བརྐྱངས་བསྐུམས་གར་གྱི་རོལ་པས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་སྔོན་པོ། དེ་ལས་འོད་ཟེར་འཕྲོས་པས་ཡེ་ཤེས་པ་དབང་ལྷ་དང་བཅས་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ ཡེ་ཤེས་པ་རང་ལ་གཉིས་སུ་མེད་པར་ཐིམ། དབང་ལྷས་དབང་བསྐུར། མི་བསྐྱོད་པ་ལ་སོགས་པ་སོ་སོའི་རིགས་ཀྱི་བདག་པོས་དབུར་བརྒྱན། ཨོཾ་པཉྩ་ཌཱ་ཀི་ནཱི་སིཾ་ཧ་མུ་ཁ་ས་པ་རི་བཱ་ར་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། གདོད་ནས་རྣམ་དག་སྒྲིབ་ཀུན་ངེས་པར་གྲོལ། །འཇིག་རྟེན་འདས་ཀྱང་ཚུལ་ནི་སྣ་ཚོགས་སྟོན། །རྒྱལ་བ་ཀུན་གྱི་ཡུམ་གྱུར་ཀུན་བཟང་མོ། །སེང་གདོང་རིགས་ལྔའི་ཚོགས་ལ་ཕྱག་འཚལ་བསྟོད། །ཅེས་བསྟོད། སོ་སོའི་ཐུགས་ཀར་ཉི་མའི་སྟེང་དུ་ཧཱུྃ་ཡིག་རིགས་ཀྱི་ཁ་དོག་ཅན་ལ་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་པས་ལས་ཐམས་ཅད་འགྲུབ་པར་བསམས་ལ། ཐུན་མོང་དུ། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ཅེས་དང་། སོ་སོའི་སྔགས། ཨོཾ་བཛྲ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། རྡོ་རྗེ་མཁའ་འགྲོའི་རྩ་སྔགས་སོ། །ཨོཾ་ཛྙཱ་ན་ཌཱ་ཀི་ནཱི་སརྦ་སིདྡྷི་ཕ་ལ་ཧོཿ དེའི་ལས་སྔགས་སོ། །ཨོཾ་བུདྡྷ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། སངས་རྒྱས་མཁའ་འགྲོའི་རྩ་སྔགས་སོ། །ཨོཾ་སརྦ་ཤཱནྟིཾ་ཀུ་རུ་སྭཱ་ཧཱ། དེའི་ལས་སྔགས་སོ། །ཨོཾ་ཀརྨ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ལས་ཀྱི་མཁའ་འགྲོའི་རྩ་སྔགས་སོ། །ཨོ་སརྦ་ཀརྨ་ཙ་ཏུར་མཱ་ར་ཡ་ཕཊ། དེའི་ལས་སྔགས་སོ། །ཨོཾ་པདྨ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། པདྨ་མཁའ་འགྲོའི་རྩ་སྔགས་སོ། །ཨོཾ་སརྦ་པཱ་ཤཾ་ཀུ་རུ་ཧོཿ དེའི་ལས་སྔགས་སོ། །ཨོཾ་རཏྣ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། རིན་ཆེན་མཁའ་འགྲོའི་རྩ་སྔགས་སོ། །ཨོཾ་སརྦ་པུཥྟི་ཀུ་རུ་ཨོཾཿ དེའི་ལས་སྔགས་སོ། །ཐུན་བསྡུ་བ་ན། བཅོམ་ལྡན་འདས་མས་བདག་ལ་མཆོག་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། ཞེས་གསོལ་བ་གདབ། འཁོར་གྱི་ལྷ་མོ་རྣམས་འོད་དུ་ཞུ་ནས་རང་ལ་ཐིམ། རང་ཡང་འོད་གསལ་གྱི་དབྱིངས་སུ་བསྡུས་ཏེ་མཉམ་པར་བཞག །དེ་ལས་སླར་ཡང་རྡོ་རྗེ་མཁའ་འགྲོ་མའི་སྐུར་ལྡངས་ལ་དགེ་བ་བསྔོ་ཞིང་སྨོན་ལམ་གདབ། ཐུན་མཚམས་ཀྱི་བྱ་བ་ལ་འཇུག །བསྙེན་པ་བྱེད་ན་གཙོ་བོར་ཡི་གེ་འབྲུ་བཅུ་བཞི་པ་འབུམ་ཕྲག་བཞི་སོགས་ཇི་ལྟར་རིག་པ། དེའི་ཕྱེད་རྡོ་རྗེ་མཁའ་འགྲོའི་སྔགས། དེའི་བཅུ་ཆ་འཁོར་བཞིའི་སྔགས་དང་། ལས་སྔགས་རྣམས་ཅི་རིགས་པ་བཟླས་པས་གྲུབ་བོ། །གཉིས་པ་རྗེས་སུ་གནང་བ་ནི། གནས་དབེན་པར་མཁའ་འགྲོ་འདུ་བའི་དུས་བཟང་པོར་སྟེགས་བུའི་དབུས་སུ་ཇི་སྐད་བཤད་པའི་རྡོ་ར་མེ་རི་དུར་ཁྲོད་ཆོས་འབྱུང་ལྷ་མཚན་དང་བཅས་པ་བྲི་བའམ། མ་གྲུབ་ན་མཎྜ་ལར་རིགས་ཀྱི་ཁ་དོག་དང་མཐུན་པའི་ཚོམ་བུ་ལྔ་བཀོད་པའི་སྟེང་མཉྫིའི་ཁར་གཏོར་མ་དམར་པོ་ཟུར་གསུམ་གཙོ་འཁོར་ལྔ་པ་དར་གདུགས་ཀྱིས་བརྒྱན། དེའི་གཡས་སུ་བུམ་པ་བཅུད་ལྡན། གཡོན་དུ་འབུལ་གཏོར། མཐར་ཆུ་གཉིས་ཉེར་སྤྱོད་ཀྱིས་བསྐོར། མཆོད་པ་བྱིན་རླབས་སྤྱི་ལྟར་སྔོན་དུ་འགྲོ་བས་བདག་བསྐྱེད་བཟླས་པ་གསོལ་གདབ་ཀྱི་བར་བྱ། དེ་ནས་མདུན་གྱི་རྟེན་གཏོར་བསང་སྦྱང་། སྟོང་པའི་ངང་ལས་སོགས་བཟླས་པ་གསོལ་གདབ་ཀྱི་བར་བདག་བསྐྱེད་ལྟར་བྱ། གཏོར་མ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབ། ཨོཾ་པཉྩ་ཌཱ་ཀི་ནཱི་སིཾ་ཧ་མུ་ཁ་ས་པ་རི་བཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། མཆོད་བསྟོད་མཐར། སེང་གདོང་རིགས་ལྔ་འཁོར་བཅས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་སོགས་ཀྱིས་ཕྲིན་ལས་བཅོལ། བུམ་པར་སེང་གདོང་རིགས་ལྔ་སྐད་ཅིག་གིས་གསལ་བའི་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་ཡི་གེ་བཅུ་བཞི་པ་ཅི་ནུས་བཟླས་མཐར། ལྷ་འོད་དུ་ཞུ་བ་ལས་བུམ་པའི་ཆུ་ནུས་པ་དང་ལྡན་པར་བསམ། རྗེས་གནང་བདག་འཇུག་གི་ཚུལ་དུ་ལེན་པའམ། མདུན་བསྐྱེད་ཀྱི་གནས་གསུམ་དུ་ཨོཾ་ཨཱཿཧཱུྃ་དང་ལྟེ་བར་ཧོཿཡིག་གིས་མཚན་པ་ལས་འོད་ཟེར་དཀར་དམར་མཐིང་ག་སྣ་ཚོགས་པའི་མདོག་ཅན་འཕྲོས། རང་གི་གནས་བཞིར་ཐིམ་པས་སྐུ་གསུང་ཐུགས་ཡེ་ཤེས་རྡོ་རྗེའི་བྱིན་རླབས་ཞུགས་པར་བསམ། དེ་ནས་སློབ་མ་རྣམས་ཁྲུས་བྱ། བགེགས་བསྐྲད། མཎྜལ་ཕུལ། ཆོས་བཤད་ཅི་རིགས་པས་མཚམས་སྦྱར་ནས། དེ་ལ་འདིར་ཡེ་ཤེས་དང་། ལས་དང་། འཇིག་རྟེན་གྱི་མ་མོ་མཁའ་འགྲོ་ཡོངས་ཀྱི་འཁོར་ལོས་སྒྱུར་བ་ཆེན་མོ། །རིག་སྔགས་འཆང་བ་ཙམ་གྱིས་ཀྱང་ལས་ཐམས་ཅད་གྲུབ་པར་བྱེད་པ་མཁའ་འགྲོ་མ་སེང་གེའི་གདོང་པ་ཅན་གྱི་སྐོར་ལ་སྒྲུབ་ཐབས་དང་མན་ངག་གི་བཀའ་སྲོལ་མང་དུ་ཡོད་པ་ལས། རིང་བརྒྱུད་སྙིང་རྗེ་ཆེན་པོ་བ་རཱི་ལོ་ཙཱ་བ་ནས་བླ་མ་ས་སྐྱ་པ་ཡབ་སྲས་ལ་བཀའ་བབས་པ་བརྒྱུད་པ་བར་མ་ཆད་པ་ལས་གསན་པའི་རྣལ་འབྱོར་གྱི་དབང་ཕྱུག་སངས་རྒྱས་མགོན་པོས་ལམ་འདིའི་སྒྲུབ་པ་ལྷུང་མཛད་པ་ལ་བརྟེན་ནས། ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་དང་། གྲུབ་པའི་སློབ་དཔོན་པདྨ་བཛྲ་གྱིས་དངོས་སུ་ཞལ་བསྟན་ཅིང་། ཉེ་བརྒྱུད་ཐུན་མོང་མ་ཡིན་པའི་གདམས་པ་ཟབ་མོས་དབུགས་དབྱུང་བས་གྲུབ་པ་ཆེན་པོའི་ས་ལ་གཤེགས་པར་གྱུར། དེ་ལས་པཎྜི་ཏ་ཆེན་པོ་འཇིགས་བྲལ་གསང་བ་སྦྱིན་གྱི་སློབ་བརྒྱུད་རྣམས་ཀྱིས་བཞེས་ཏེ་མཁས་ཤིང་དངོས་གྲུབ་བརྙེས་པའི་བརྒྱུད་པ་ཟམ་མ་ཆད་པ་ཟབ་གསང་སྙན་བརྒྱུད་དུ་གྲགས་པའི་ཆོས་སྡེ་ལའང་། ཕྱི་ནང་གསང་གསུམ་ལས་ཚོགས་དང་བཅས་པའི་སྒྲུབ་ཐབས་དང་། རྗེས་གནང་གི་བཀའ་ཇི་སྙེད་ཅིག་བཞུགས་པ་ལས། འདིར་ཐམས་ཅད་ཀྱི་གཞིའམ་རྩ་བ་ལྟ་བུར་གྱུར་པ་སེང་གེའི་གདོང་ཅན་ནང་སྒྲུབ་རིགས་ལྔའི་རྗེས་སུ་གནང་བ་ལ། སློབ་དཔོན་གྱི་བྱ་བ་གྲུབ་ནས། ཁྱེད་རང་གི་ངོ་སྐལ་དུ་གྱུར་པ་ཐོག་མར་གསོལ་བ་གདབ་པ་འདིའི་རྗེས་ཟློས་མཛོད། ཀུན་མཁྱེན་ཡེ་ཤེས་སོགས་ལན་གསུམ། རྒྱུད་སྡོམ་པ་དང་ལྡན་པར་བྱ་བའི་སླད་དུ། སློབ་དཔོན་དང་མདུན་གྱི་རྟེན་གཏོར་རྡོ་རྗེ་སྲུང་བའི་གུར་དང་དུར་ཁྲོད་བརྒྱད་ཀྱིས་བསྐོར་བའི་དབུས་སུ་ཆོས་འབྱུང་རིགས་ཀྱི་ཁ་དོག་ཅན་རེ་རེའི་ལྟེ་བར་རུ་དྲ་དང་ཉི་མའི་གདན་ལ། དབུས་སུ་རྡོ་རྗེ་མཁའ་འགྲོ་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྐུ་ཅན་དུ་ལམ་སྟེ་གསལ་བའི་སྤྱན་སྔར་སྐྱབས་སུ་འགྲོ་བ་དང་སེམས་བསྐྱེད་པའི་སྡོམ་པ་བཟུང་སྙམ་པས་འདིའི་རྗེས་ཟློས་མཛོད། །དཀོན་མཆོག་གསུམ་ལ་སོགས་ལན་གསུམ། རྗེས་གནང་གི་གཞི་འགོད་པའི་སླད་དུ་ཁྱེད་རང་རྣམས་ལྷར་གསལ་འདེབས་པ་ཡིན་པས་དམིགས་པ་འདི་བཞིན་མཛོད། སློབ་མ་བསང་སྦྱང་། སྟོང་པའི་ངང་ལས་སློབ་མ་རྣམས་གང་དུ་གནས་པའི་གོ་སར་རྡོ་རྗེ་སྲུང་བའི་འཁོར་ལོ་སོགས་ནས། ཐུགས་ཀར་ཧཱུྃ། སྤྱི་བོར་རྩ་བའི་བླ་མ་དང་གཉིས་སུ་མེད་པའི་ཡེ་ཤེས་ཀྱི་མཁའ་འགྲོ་རིགས་ལྔ་བཞུགས་པ་ལ་མོས་གུས་དུང་པ་མཛད་པས་བླ་མ་དང་སྤྱི་བོའི་ཌཱ་ཀི་ནཱི་རྣམས་ཀྱི་ཐུགས་ཀ་ནས་འོད་ཟེར་འཕྲོས། ནུབ་ཕྱོགས་ཨོ་རྒྱན་གྱི་དུར་ཁྲོད་ནས་མཁའ་འགྲོ་མ་སེང་གེའི་གདོང་པ་ཅན་རིགས་ལྔ་ལ་འཁོར་ཤ་ཟ་མ་མོ་བྱེ་བ་འབུམ་སྡེ་བཀའ་སྡོད་སྲུང་མའི་ཚོགས་ཀྱིས་བསྐོར་བ་སྤྱན་དྲངས། སྤྱི་བོའི་ལྷ་ཚོགས་རྣམས་ལ་ཐིམ། དེ་རྣམས་འོད་དུ་ལྟེམ་གྱིས་ཞུ་སྟེ་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབ་པའི་མོས་པ་མཛོད། སྤོས་རོལ་དང་བཅས་རྩ་སྔགས་བརྗོད། ཏིཥྛ་བཛྲ་བརྗོད་ཅིང་མེ་ཏོག་འཐོར། དེ་ལྟར་ཡེ་ཤེས་དབབ་ཅིང་བརྟན་པར་བྱ་བ་སྔོན་དུ་སོང་ནས། དངོས་གཞི་སྐུ་གསུང་ཐུགས་ཀྱི་རྗེས་སུ་གནང་བ་ཞུ་བའི་དོན་དུ་གསོལ་བ་འདེབས་པ་འདིའི་རྗེས་ཟློས་མཛོད། བདུད་འདུལ་ཤ་ཟ་འཇིགས་པའི་སྐུ། །སྲོག་གཅོད་མ་མོ་ཁྲོ་ཞིང་རྔམས། །ཌཱ་ཀི་སེང་གེའི་གདོང་ཅན་གྱི། །སྐུ་གསུང་ཐུགས་ཀྱི་རྗེས་གནང་སྩོལ། །ལན་གསུམ། ཞེས་གསོལ་བ་བཏབ་པས་བླ་མའི་ཐུགས་ཀའི་འོད་ཀྱིས་དབང་ལྷ་རིགས་ལྔ་སྤྱན་དྲངས། བྱང་ཆུབ་སེམས་ཀྱི་བདུད་རྩིས་དབང་བསྐུར་བའི་མོས་པ་མཛོད། སངས་རྒྱས་ཀུན་གྱི་གསང་གསུམ་གྱི། །དཀྱིལ་འཁོར་ཆེན་པོའི་གནས་ལས་བྱུང་། །ཁམས་གསུམ་ཀུན་གྱིས་ཕྱག་བྱས་པ། །བུམ་པའི་དབང་བསྐུར་ཆེན་པོ་སྦྱིན། །ཨོཾ་བཛྲཱི་བྷ་བ་ཨ་བྷི་ཥིཉྩ་མི། །དེ་ནི་སྐུ་ཡི་རྗེས་གནང་ངོ་། །ཡང་ཁྱེད་རང་རྣམས་ཀྱིས་བླ་མ་དང་ལྷ་ལ་མོས་གུས་མཛད་པས། བླ་མ་དང་སེང་གེའི་གདོང་ཅན་ཐ་མི་དད་པའི་ཞལ་ནས་སྔགས་ཀྱི་ཕྲེང་བ་བྱུང་། ཁྱེད་རང་རྣམས་ཀྱི་ཞལ་དུ་ཞུགས། ལུས་ཀྱི་ནང་ཐམས་ཅད་སྔགས་ཀྱི་འོད་ཟེར་གྱིས་ཁྲིགས་མེར་གྱིས་གང་བར་མོས་ཏེ་སྔགས་འདི་རྣམས་ཀྱི་རྗེས་ཟློས་ལན་གསུམ་མཛོད། གོང་གི་སྔགས་རྣམས་བཟླར་གཞུག་མཐར་སློབ་དཔོན་གྱིས། སེང་གདོང་འདི་ལ་འགོ་བར་མཛོད། སྔགས་ཀྱི་དངོས་གྲུབ་སྩལ་དུ་གསོལ། །ཅེས་མེ་ཏོག་འཐོར། དེ་ནི་གསུང་གི་རྗེས་གནང་ངོ་། །སླར་ཡང་བླ་མ་དང་ལྷ་ལ་མོས་གུས་མཛད་པས། དེ་དག་གི་ཐུགས་ཀ་ནས་འོད་ཟེར་འཕྲོས། ཁྱེད་རང་རྣམས་ཀྱི་སྙིང་གར་ཕོག །སྙིང་པདྨ་འདབ་བརྒྱད་ཀྱི་ནང་དུ་ཆོས་འབྱུང་ཁ་སྦྱོར། དེའི་དབུས་སུ་རྡོ་རྗེ་སྔོན་པོ་རྩེ་ལྔ་པའི་ལྟེ་བར་རང་འདྲ་བའི་ཡེ་ཤེས་སེམས་དཔའི་ཐུགས་ཀར་ཏིང་འཛིན་སེམས་དཔའ་ཧཱུྃ་ཡིག་སྔོན་པོའི་མཐར་སྔགས་ཀྱི་ཕྲེང་བས་བསྐོར་བ་ལ་ཡིད་གཏད་པས་པདྨ་ཁ་ཟུམ་པའི་ཕྱི་རོལ་ཏུ་སྔགས་ཀྱི་ཕྲེང་བས་ལུ་གུ་རྒྱུད་དུ་བཅིངས་པར་མོས་པ་དང་བཅས་འོད་གསལ་ཕྱག་རྒྱ་ཆེན་པོའི་དབྱིངས་སུ་མཉམ་པར་འཇོག་མཛོད། དེ་ནི་ཐུགས་ཀྱི་རྗེས་གནང་ངོ་། །མཐའ་རྟེན་གཏོར་མ་ལ་བརྟེན་ནས་བཀའ་བསྒོ་བ་ནི། གཏོར་མ་འདི་ཉིད་ཡེ་ཤེས་ཀྱི་མཁའ་འགྲོ་མ་དངོས་སུ་གསལ་བ་ཁྱེད་རང་རྣམས་ཀྱི་སྤྱི་བོར་སྤྱན་དྲངས་ཤིང་བྱིན་གྱིས་བརླབས་པའི་མོས་པ་མཛོད། རྩ་བརྒྱུད་བླ་མས་བཀའ་བསྒོས་ལྟར། །སེང་གདོང་མཁའ་འགྲོ་འཁོར་བཅས་ཀྱིས། །རྡོ་རྗེ་སློབ་མའི་འགལ་རྐྱེན་སེལ། །མཐུན་རྐྱེན་ཕུན་སུམ་ཚོགས་པར་མཛོད། །ཅེས་དང་རྩ་སྔགས་བརྗོད། དེས་རྗེས་གནང་གི་དངོས་གཞི་གྲུབ་ནས། དམ་ཚིག་ཁས་བླངས་མཎྜལ། ལུས་ལོངས་སྤྱོད་འབུལ་བ། དགེ་བ་བསྔོ་བ་རྣམས་བྱས་ལ་སློབ་མ་གྱེས། སློབ་དཔོན་གྱིས་མདུན་བསྐྱེད་ལ་མཆོད་བསྟོད། ནོངས་བཤགས། ཡེ་ཤེས་པ་གཤེགས། དམ་ཚིག་པ་རང་ལ་བསྟིམ། རང་ཉིད་འོད་གསལ་དུ་བསྡུ་ཞིང་ཐུན་མཚམས་ཀྱི་ལྷར་ལྡང་། བསྔོ་སྨོན་ཤིས་བརྗོད་སྤྱི་ལྟར་བྱའོ། །གསུམ་པ་ལས་ཀྱི་ཚོགས་རབ་འབྱམས་ནི་གཞན་དུ་ཤེས་ལ་འདིར་རིགས་ལྔ་དང་རྗེས་སུ་འབྲེལ་བའི་ཁྱད་པར་གྱི་ལས་མདོ་ཙམ་བརྗོད་ན་ལྔ་ལས། དང་པོ་རྡོ་རྗེ་མཁའ་འགྲོ་མ་ལ་བརྟེན་ནས་མཆོག་སྒྲུབ་པ་ནི། སྐྱབས་སེམས་ཚད་མེད་བཞི་བསྒོམ། སྭ་བྷཱ་བས་སྟོང་པར་སྦྱང་། སྟོང་པའི་ངང་ལས་ཆོས་འབྱུང་དུར་ཁྲོད་སྲུང་འཁོར་དང་བཅས་པའི་དབུས་སུ་པདྨ་རུ་དྲ་ཉི་མའི་གདན་གྱི་སྟེང་དུ་རང་སྐད་ཅིག་གིས་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་ཅན་མཐིང་ནག་སེང་ཞལ་དཀར་པོ་ཅན་གྲི་ཐོད་འཛིན་ཅིང་ཁ་ཊྭཱཾ་ག་ལ་འཁྱུད་པ། དུར་ཁྲོད་འཇིགས་པའི་ཆས་ཀྱིས་བརྒྱན་ཅིང་སྐྱིལ་ཀྲུང་བྱེད་པའི་གར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་ཐུགས་ཀ་ནས་འོད་ཟེར་འཕྲོས། རྩ་བརྒྱུད་ཀྱི་བླ་མ་རྣམས་སྤྱན་དྲངས། རང་ལ་གཉིས་སུ་མེད་པར་ཐིམ། དེའི་རྐྱེན་གྱིས་རང་གི་ལུས་རྩ་གསུམ་འཁོར་ལོ་ལྔ་ལྡན་གྱི་སྤྱི་བོ་བདེ་ཆེན་འཁོར་ལོའི་དབུས་སུ་སངས་རྒྱས་མཁའ་འགྲོ་དཀར་མོ་གྲི་གུག་དང་བདུད་རྩིའི་ཐོད་པ། མགྲིན་པ་པདྨ་མཁའ་འགྲོ་དམར་མོ་ལྕགས་ཀྱུ་དང་གཏེར་བུམ། ཐུགས་ཀར་རྡོ་རྗེ་མཁའ་འགྲོ་སྔོན་མོ་རྡོ་རྗེ་དང་ཐོད་ཁྲག །ལྟེ་བར་རིན་ཆེན་མཁའ་འགྲོ་སེར་མོ་རིན་པོ་ཆེ་དང་ནེའུ་ལེ། གསང་བར་ལས་ཀྱི་མཁའ་འགྲོ་ལྗང་ནག་རལ་གྲི་དང་ཐོད་ཁྲག་འཛིན་པ་རྣམས་ལ་སོ་སོའི་རྩ་འདབ་ཀྱི་གྲངས་དང་མཉམ་པའི་མཁའ་འགྲོས་བསྐོར་བ། མིག་ཏུ་དམ་ཚིག་མཁའ་འགྲོ་ནག་མོ་ཕུར་བུ་དང་ཐོད་ཁྲག །རྣ་བར་འཇིག་རྟེན་མཁའ་འགྲོ་དམར་མོ་དགྲ་སྟྭ་དང་སྦྲུལ་ཞགས་སྣ་ལ་སྣ་ཚོགས་མཁའ་འགྲོ་སེར་མོ་ཅང་ཏེའུ་དང་ཐོད་ཁྲག །ཁར་ཐམས་ཅད་མཁའ་འགྲོ་གཡས་ཐོ་བ་དང་། གཡོན་ཕུབ་འཛིན་པ། ཐམས་ཅད་ཀྱང་སེངྒེའི་གདོང་ཅན་དུར་ཁྲོད་འཇིགས་པའི་ཆས་ཀྱིས་བརྒྱན་ཅིང་ཁ་ཊྭཱཾ་ག་ལ་འཁྱུད་པ། སྐྱིལ་ཀྲུང་ཕྱེད་པའི་གར་སྟབས་ཀྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། གཞན་ཡང་རྩ་ཁམས་དང་བ་སྤུའི་བུ་ག་ཚུན་ཆད་དཔའ་བོ་དང་རྣལ་འབྱོར་མ་དམ་ཅན་རྒྱ་མཚོའི་སྤྲིན་འཕྲོ་བར་གྱུར་པའི་གཙོ་མོ་ལྔའི་ཐུགས་ཀར་ཉི་མ་ལ་ཧཱུྃ་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོ་འདུས་སྣང་གྲགས་རིགས་གསུམ་ལྷ་སྔགས་ཡེ་ཤེས་ཀྱི་འཁོར་ལོར་སྦྱངས་ཏེ། དངོས་གྲུབ་རྣམ་གཉིས་འགྲུབ་པར་བསམས་ལ། ལྷར་སྣང་སྒྱུ་མ་ལྟ་བུ་ལ་སེམས་རྩེ་གཅིག་ཏུ་བཟུང་། དེ་ལ་མི་གནས་ན་མཁའ་འགྲོ་སྤྱིའི་རྩ་སྔགས་ཡི་གེ་འབྲུ་བཅུ་བཞི་པ། དེའི་ཕྱེད་མཁའ་འགྲོ་ལྔའི་སྔགས་སོ་སོ། །དེའི་ཕྱེད་སྐྱེ་མཆེད་ཀྱི་མཁའ་འགྲོ་བཞིའི་སྔགས་བཟླ། དེའང་། ཨོཾ་ས་མ་ཡཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། དམ་ཚིག་མཁའ་འགྲོའི་རྩ་སྔགས་སོ། །དེ་བཞིན་ཏུ་ཨོཾ་ལོ་ཀ་ཌཱ་ཀི་ནཱི་སོགས་སྦྱར་བ་འཇིག་རྟེན། བི་ཤྭ་ཌཱ་ཀི་ནཱི་སྣ་ཚོགས་མཁའ་འགྲོ། སརྦ་ཌཱ་ཀིས་ཐམས་ཅད་མཁའ་འགྲོའི་སྔགས་སོ། །བཞི་ཀ་ལ་ལས་སྦྱོར་ཐུན་མོང་དུ། ཨོཾ་སརྦ་ཤཱཏྲུ་ན་མཱ་ར་ཡ་ཕཊ། ཅེས་སྦྱར། དེ་ལྟ་བུའི་ངག་བཟླས་ཅི་རིགས་པའི་མཐར། འཁོར་ལོ་ལྔའི་མཁའ་འགྲོ་སོ་སོར་དམིགས་ནས་རླུང་བུམ་པ་ཅན་བཟུང་ཞིང་འོད་གསལ་ཕྱག་རྒྱ་ཆེན་པོའི་ངང་དུ་མཉམ་པར་བཞག་པས་རླུང་དབུ་མར་ཞུགས་གནས་ཐིམ་པའི་རྟགས་སོགས་ཉམས་མྱོང་ཡོན་ཏན་སྐྱེ་བར་འགྱུར་རོ། །ཐུན་གྱི་མཇུག་ཏུ་མཆོད་བསྟོད་འདོད་དོན་གསོལ། རང་གི་སྙིང་ག་ནས་འོད་ཟེར་འཕྲོས། གདན་གསུམ་ཚང་བའི་དབང་ལྷ་ནམ་མཁའ་གང་བར་སྤྱན་དྲངས། བྱང་ཆུབ་སེམས་ཀྱི་བདུད་རྩིས་དབང་བསྐུར་བས་སྐུ་གང་། དྲི་མ་དག །ཆུའི་ལྷག་མ་གྱེན་དུ་ལུད་པ་ལས་ཕྱི་དཀྱིལ་རྡོ་རྗེ་མཁའ་འགྲོ་ལ་མི་བསྐྱོད་པ་དང་། ལུས་དཀྱིལ་རྣམས་ལ་སོ་སོའི་རིགས་ཀྱི་བདག་པོས་དབུར་བརྒྱན། དབང་གི་ལྷ་ཕྱིའི་ལྷ་མོ་ལུས་དཀྱིལ་རྣམས་ལ་ཐིམ་པས་བདེ་བ་ཆེན་པོའི་གཟི་བྱིན་འབར། མཐར་ཐིག་ལེ་འོད་ཟེར་ཁ་དོག་ལྔ་ལྡན་འབར་ཞིང་འཁྲིགས་པའི་རྣམ་པ་ཅན་དུ་གྱུར། དེ་ཉིད་ཀྱང་ཟག་མེད་བདེ་བ་ཆེན་པོའི་ངང་དུ་ཐིམ་པར་བསམས་ལ་དབྱིངས་རིག་བསྲེས་ཏེ་མཉམ་པར་བཞག །སྐབས་སུ་ལུས་གནད་ཕྱེད་བཅིངས་ཀྱི་སྦྱོར་བ་དང་བཅས་མིག་བར་སྣང་དུ་ཧར་རེ་གཏད། སེམས་འཛིན་མེད་ཀྱི་ངང་དུ་རླུང་རང་བབས་སུ་འཇོག །དེ་ལས་ལྡང་བ་ན་བསྔོ་སྨོན་ཤིས་བརྗོད་ཀྱིས་མཚམས་སྦྱར་ཏེ་སྤྱོད་ལམ་ལ་འཇུག་གོ །གཉིས་པ་སངས་རྒྱས་མཁའ་འགྲོ་མ་ལ་བརྟེན་ནས་སྡིག་སྒྲིབ་ཞི་བའི་སྦྱིན་སྲེག་ནི། ཞི་བའི་ཐབས་སྤྱི་ལྟར་འདུ་བྱ་བའམ། རྒྱུན་གྱི་རྣལ་འབྱོར་ལ་སོལ་མེས་ཀྱང་རུང་། རང་གི་མདུན་ཏིལ་ལམ་ཡུངས་ཀར་ཅུང་ཟད་འདུ་བྱ། བདག་བསྐྱེད་སྔོན་དུ་འགྲོ་བས། མདུན་གྱི་མེ་ཐབ་བསང་སྦྱང་། སྟོང་པའི་ངང་ལས་ཡེ་ཤེས་ཀྱི་མེ་ཕུང་འབར་བའི་དབུས་སུ། ཨེ་ཨེ་ལས་ཆོས་ཀྱི་འབྱུང་གནས་གྲུ་གསུམ་དཀར་པོ་ཉིས་བརྩེགས་ཀྱི་ལྟེ་བར། པད་ཉི་རུ་དྲའི་སྟེང་དུ་ཧཱུྃ་ལས་སངས་རྒྱས་མཁའ་འགྲོ་སེང་གདོང་ཅན་སྐུ་མདོག་དཀར་མོ་སེང་ཞལ་སྔོན་པོ་བཞད་ཅིང་གྲི་ཐོད་ཁ་ཊྭཱཾ་ག་འཛིན་པ། དུར་ཁྲོད་འཇིགས་པའི་ཆས་ཅན། ཞབས་གཉིས་གར་སྟབས་སུ་བཞེངས་པའི་ལྟོ་བ་རབ་ཏུ་ཡངས་པར་འཁོར་ལོ་དཀར་པོ་རྩིབས་སྟོང་དང་ལྡན་པའི་ལྟེ་བར་ཧཱུྃ། རྩིབས་རྣམས་ལ་རྩ་སྔགས་སྙིང་པོ་ལས་སྔགས་རྣམས་འོད་ཟེར་འཕྲོ་བར་གྱུར། རང་གཞན་ཐམས་ཅད་ཀྱི་སྡིག་སྒྲིབ་མཐའ་དག་འདུས་པའི་ངོ་བོ་སྙིང་གར་པྃ་ནག་པོ། རྐང་འོག་གི་རླུང་གཡོས། ལྟེ་བའི་མེ་སྦར། དེས་སྙིང་གའི་པྃ་སྣ་སྒོར་བྱུང་བ་སྡིག་པའི་རྣམ་པས་ཏིལ་ལ་ཐིམ། དེ་ཉིད་མཁའ་འགྲོ་མའི་ཞལ་དུ་ཕུལ་བ་ལྟེ་བའི་སྔགས་ཀྱི་འཁོར་ལོ་འོད་ཟེར་རབ་ཏུ་འབར་བས་བསྲེགས་ཤིང་སྦྱངས་པར་བསམས་ལ། ཡི་གེ་བཅུ་བཞི་པ་དང་། ཨོཾ་བུདྡྷ་ཌཱ་ཀི་ནཱི་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཨོཾ་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ། ཞེས་སྤེལ་བས་བརྒྱ་རྩ་ལ་སོགས་པ་ཕུལ་མཐར་མདུན་བསྐྱེད་ཀྱི་མཁའ་འགྲོ་མ་དགྱེས་པའི་སྐུ་དང་སྔགས་ཕྲེང་ལས་བདུད་རྩིའི་རྒྱུན་ཆར་སྤྲིན་འཁྲུགས་པ་ལས་ཆར་འབབ་པ་བཞིན་བྱུང་། བདག་དང་སེམས་ཅན་ཐམས་ཅད་ལ་ཐིམ་པས་སྡིག་སྒྲིབ་མཐའ་དག་སྦྱང་བར་བསམ། གཏོར་མ་ཡོད་ན་བསང་སྦྱང་བྱིན་གྱིས་བརླབ། སྙིང་པོའི་མཐར་ཨི་དཾ་བ་ལིཾ་སོགས་བཏགས་པས་ཕུལ། གང་ལྟར་ཡང་། ཨོཾ་བུདྡྷ་ཌཱ་ཀི་ནཱི་སིཾ་ཧ་མུ་ཁ་ས་པ་རི་བཱ་ར་ཨརྒྷཾ་སོགས་ཀྱིས་ཕྱི་མཆོད། ཨོཾ་ཨཱཿཧཱུྃ་གིས་ནང་མཆོད། གདོད་ནས་རྣམ་དག་སོགས་ཀྱི་མཐར། །སངས་རྒྱས་མཁའ་འགྲོ་མ་ལ་ཕྱག་འཚལ་བསྟོད། །ཅེས་བསྟོད། བདག་དང་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་ཞི་བར་བྱིན་གྱིས་བརླབ་ཏུ་གསོལ། ཞེས་གསོལ་བ་གདབ། ཡི་གེ་བརྒྱ་པ་དང་མ་འབྱོར་པ་དང་སོགས་ཀྱིས་ནོངས་པ་བཤགས། ཛཿཧཱུྃ་བྃ་ཧོཿ མདུན་བསྐྱེད་ཀྱི་ལྷ་རང་ལ་ཐིམ་པར་བསམ། བསྔོ་སྨོན་ཤིས་བརྗོད་བྱའོ། །གསུམ་པ་རིན་ཆེན་མཁའ་འགྲོ་མ་ལ་བརྟེན་ནས་ཚེ་བསོད་རྒྱས་པའི་མན་ངག་ནི། ཚེ་དང་འབྱོར་པ་རྒྱས་པའི་མཚན་ཉིད་ལེགས་པར་ཚང་བའི་ཀ་པཱ་ལའི་ནང་དུ་སྨན་སྣ་དང་དྲི་བཟང་སིནྡྷཱུར་རྣམས་ཀྱིས་བྱུགས། སྙིང་པོ་ལྔ་དང་། དཱུརྦ་སོགས་ཚེའི་རྫས་དང་། དར་ཟབ་རིན་ཆེན་འབྲུ་སྨན་སོགས་དཔལ་ཅན་གྱི་རྫས་ཀྱིས་གཏམ། མཐིང་ཤོག་ལ་གསེར་གྱིས་ཡི་གེ་བཅུ་བཞི་པ། རིན་ཆེན་མཁའ་འགྲོའི་སྙིང་པོ། ལས་སྔགས། གཞན་ཡང་ཚེ་གཟུངས་དང་ནོར་ལྷའི་གཟུངས་སོགས་བྲིས་པའི་ཤོག་དྲིལ་དར་སེར་པོའི་རས་དང་། དྲི་བཟང་བཅས་ཤིང་ཏོག་བིལྦའི་ནང་ཁེངས་པར་བཅུག་པ་དབུས་སུ་བཞག །མཐའ་མཆོད་གཏོར་གྱིས་བསྐོར། སེང་གདོང་རིགས་ལྔའི་བདག་བསྐྱེད་བཟླས་པ་དང་བཅས་པའི་རྗེས་མདུན་གྱི་རྟེན་བསང་སྦྱང་། སྟོང་པའི་ངང་ལས་འདོད་རྒུའི་འབྱུང་གནས་ཀ་པཱ་ལ་ཡངས་ཤིང་རྒྱ་ཆེ་བ་ལྷ་མིའི་དཔལ་འབྱོར་རབ་ཏུ་རྒྱས་པས་གཏམས་པའི་དབུས་སུ། ཨེ་ཨེ་ལས་ཆོས་འབྱུང་སེར་པོ་བསྣོལ་མའི་ལྟེ་བར། པད་ཉི་རུ་དྲའི་སྟེང་དུ་ཧཱུྃ་ལས་རིན་ཆེན་མཁའ་འགྲོ་སེང་གདོང་ཅན་སེར་མོ་ནོར་བུ་དང་ནེའུ་ལེ་ཁ་ཊྭཱཾ་ག་འཛིན་པ། དུར་ཁྲོད་འཇིགས་པའི་ཆས་ཅན་འོད་ཟེར་སེར་པོ་སྤྲོ་བ་དང་བསྡུ་བས་རྒྱས་པའི་ལས་རབ་འབྱམས་མཛད་པར་གྱུར། གནས་གསུམ་བྱིན་གྱིས་བརླབ། ཡེ་ཤེས་པ་བསྟིམ། དབང་བསྐུར། རིན་ཆེན་འབྱུང་ལྡན་གྱིས་དབུར་བརྒྱན་པར་བསམ། མཆོད་བསྟོད་གཏོར་མ་འབུལ། ཐུགས་ཀར་ཉི་མ་ལ་གནས་པའི་ཧཱུྃ་སེར་པོའི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་འཕྲོས་འདུས་ཚེ་བསོད་དཔལ་འབྱོར་ཐམས་ཅད་རྒྱས་པར་བསམས་ལ། རྩ་སྔགས། སྙིང་པོ། ལས་སྔགས་རྣམས་སྦྲེལ་ཏེ་བཟླ། མཐར་ནོངས་པ་བཤགས། བརྟན་བཞུགས་བྱ། བསྔོ་སྨོན་བཀྲ་ཤིས་རྒྱ་ཆེར་བརྗོད། ཐོད་པ་དར་ཟབ་སེར་པོས་དྲིལ་ཏེ་མཛོད་ཀྱི་དབུས་སུ་བཞག །དུས་བཟང་པོར་མཆོད་བསྟོད་ཚོགས་གཏོར་ཕུལ་བས་ཚེ་དང་བསོད་ནམས་རྒྱས་པར་འགྱུར་རོ། །བཞི་པ་པདྨ་མཁའ་འགྲོ་ལ་བརྟེན་ནས་དབང་གི་མེ་མཆོད་བྱ་བ་ནི། ས་དམར་པོའི་སྟེགས་བུར་དབང་གི་ཐབ་སྤྱི་ལྟར་བྲིས་པའི་སྟེང་དུ་ཙནྡན་དམར་པོའམ་མཛོ་མོ་ཤིང་སོགས་རུང་བའི་བུད་ཤིང་ཟླ་གམ་དུ་བརྩིག །རང་གི་གཡས་སུ་ཟངས་སྡེར་ནང་། གུར་གུམ་དང་། ཙནྡན་སོགས་དྲི་དམར་པོ། གླང་སྣ་སོགས་མེ་ཏོག་དམར་པོ། བྱེ་རུ་དང་ཟངས་སོགས་རིན་པོ་ཆེ་དམར་པོ། དར་སྣ། འབྲུ་སྣ། ཟས་སྣ། ཤིང་ཏོག །ལན་ཚྭ་སོགས་ཀྱང་ལི་ཁྲིས་དམར་པོར་བསྒྱུར་བ་དང་། འབྲི་མོག་གིས་ཁ་སྒྱུར་བའི་མར་ཁུ་བཅས། དེ་ཙམ་མ་འབྱོར་ན་འབྲས་ལྟ་བུའི་འབྲུ་ཁ་དོག་དམར་པོར་བྱས་པ་དང་། མར་ཁུ་ཙམ་ལ་བརྟེན་ཀྱང་རུང་། གཡོན་དུ་གཏོར་མ་དམར་པོ་དང་ཉེར་སྤྱོད་བཅས་བཤམ། བདག་བསྐྱེད་སྔོན་དུ་འགྲོ་བས་སྙིང་པོའི་སྔགས་ཀྱིས་མེ་སྦར། བསང་སྦྱང་། སྟོང་པའི་ངང་ལས་དབང་གི་ཐབ་ཁུང་མཚན་ཉིད་རྫོགས་པ་མེ་འབར་བའི་དབུས་སུ། ཨེ་ཨེ་ལས་ཆོས་འབྱུང་དམར་པོ་བསྣོལ་མའི་ལྟེ་བར་པད་ཉི་རུ་དྲའི་སྟེང་དུ་ཧཱུྃ་དམར་པོ་ལས་པདྨ་མཁའ་འགྲོ་སེང་གདོང་མ་སྐུ་མདོག་དམར་མོ་སེང་ཞལ་སེར་པོ་བཞད་ཅིང་ལྕགས་ཀྱུ་དང་གཏེར་བུམ་ཁ་ཊྭཱཾ་ག་འཛིན་པ། དུར་ཁྲོད་འཇིགས་པའི་ཆས་ཅན་འོད་ཟེར་དམར་པོ་སྤྲོ་བ་དང་བསྡུ་བས་རབ་འབྱམས་དབང་གི་ལས་མཛད་པར་གྱུར། གནས་གསུམ་བྱིན་བརླབ། ཡེ་ཤེས་པ་བསྟིམ། དབང་བསྐུར་ཞིང་རིགས་བདག་འོད་དཔག་མེད་པས་དབུར་བརྒྱན། མཆོད་བསྟོད་བྱ། དེ་ནས་རྫས་རྣམས་ཕྱོགས་གཅིག་ཏུ་བསྲེས་ཏེ་རྩ་སྔགས། སྙིང་པོ། ལས་སྔགས་རྣམས་སྦྲེལ་བས་བརྒྱ་རྩ་ལ་སོགས་པ་ཕུལ་མཐར། མདུན་བསྐྱེད་ཀྱི་པདྨ་མཁའ་འགྲོ་དགྱེས་པའི་སྐུ་ལས་འོད་ཟེར་དང་བདུད་རྩི་དམར་པོ་དབང་གི་རང་བཞིན་ཅན་དཔག་ཏུ་མེད་པ་བྱུང་། བདག་གི་ལུས་ངག་ཡིད་གསུམ་ལ་ཐིམ་པས་བདེ་བ་ཆེན་པོའི་གཟི་བྱིན་མཆོག་ཏུ་འབར་བས་མཐོང་ཐོས་དྲན་རེག་ཐམས་ཅད་དབང་དུ་འདུ་བའི་བདག་ཉིད་ཅན་དུ་གྱུར། སླར་ཡང་བདག་དང་མདུན་བསྐྱེད་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་སྤྱི་དང་། བྱེ་བྲག་དམིགས་བྱ་ལ་ཕོག་པས་ཆགས་པའི་ཟིལ་གྱིས་དམར་ལམ་སོང་སྟེ་བདག་ཉིད་ཀྱི་དབང་དུ་འདུས་པར་བསམས་ལ་གནས་ལུགས་ཀྱི་ངང་དུ་བཞག །དེ་ནས་སླར་ཡང་མཆོད་བསྟོད་གཏོར་མ་ཕུལ། འདོད་དོན་གསོལ། ནོངས་པ་བཤགས། ཛཿཧཱུྃ་བྃ་ཧོཿས་ཐབ་ཀྱི་ལྷ་རང་ལ་བསྟིམ། བསྔོ་སྨོན་ཤིས་བརྗོད་བྱ། ཐལ་བ་རི་རྩེར་རླུང་ལ་བསྐུར་བའམ། འབབ་ཆུ་ཆེན་པོར་དོར་རོ། །ལྔ་པ་ཀརྨ་མཁའ་འགྲོ་ལ་བརྟེན་ནས་ཕྱིར་ཟློག་གི་མན་ངག་ནི། དྲག་པོའི་ལས་ལ་ཤིས་པའི་དུས་སུ། དུར་ཁྲོད་ཀྱི་སའམ་ལྕགས་ཀྱི་བྲུབ་ཁུང་གི་ནང་བྱད་མའི་ལིངྒ་གཞུག །དེའི་སྟེང་མཉྫིའི་ཁར་ལྕགས་སམ་བྷནྡྷའི་སྣོད་དུ་དམར་གཏོར་ཟུར་གསུམ་ཤ་ཁྲག་དང་མཚེ་ཡུངས་སོགས་ཀྱིས་བརྒྱན་པའི་མདུན་དུ་དྲག་པོའི་ཉེར་སྤྱོད་དང་བཅས་པ་བཤམ། བདག་བསྐྱེད་སེང་གདོང་རིགས་ལྔའི་བསྒོམ་བཟླས་སྔོན་དུ་སོང་ནས། གཏོར་མ་བསང་སྦྱང་། སྟོང་པའི་ངང་ལས་རྡོ་རྗེ་སྲུང་བའི་འཁོར་ལོ་དུར་ཁྲོད་བརྒྱད་དང་བཅས་པའི་དབུས་ཨེ་ཨེ་ལས་ཆོས་འབྱུང་གྲུ་གསུམ་ལྗང་ནག་ཉིས་བརྩེགས་ཁྲག་མཚོ་ཁོལ་ཞིང་མེ་རླུང་འཁྲུགས་པའི་ལྟེ་བར་པད་ཉི་རུ་དྲའི་གདན་ལ་ཧཱུྃ་ལྗང་ནག་ལས་འོད་ཟེར་འཕྲོས་འདུས་རལ་གྲི་ཧཱུྃ་གིས་མཚན་པ། དེ་ཡོངས་སུ་གྱུར་པ་ལས་ཀརྨ་མཁའ་འགྲོ་སེང་གདོང་མ་ལྗང་ནག་སེང་ཞལ་ནག་པོ་རྔམས་ཤིང་རལ་གྲི་དང་ཐོད་ཁྲག་ཁ་ཊྭཱཾ་ག་བསྣམས་པ། དུར་ཁྲོད་འཇིགས་པའི་ཆས་ཀྱིས་བརྒྱན་ཅིང་དྲག་ཤུལ་སྲིན་མོ་ཁྲོས་པའི་ཉམས་ཅན། ཞབས་གཉིས་བརྐྱང་བསྐུམ་གར་གྱི་རོལ་པས་ཡེ་ཤེས་ཀྱི་མེ་འབར་བའི་དབུས་ན་བཞུགས་པ། སྲིད་ཞིའི་ཁམས་ན་ཆེ་བཙན་འགྲན་ཟླ་དང་བྲལ་བ། ཁྲོ་བོ་ཁྲོ་མོ་དྲེགས་པ་ཅན་གྱི་ཚོགས་བསམ་གྱིས་མི་ཁྱབ་པ་སྤྲོ་ཞིང་བསྡུ་བའི་སྐུར་གྱུར། གནས་གསུམ་བྱིན་བརླབ། ཡེ་ཤེས་པ་བསྟིམ། དབང་བསྐུར་ཞིང་། རིགས་བདག་དོན་ཡོད་གྲུབ་པས་དབུར་བརྒྱན། མཆོད་བསྟོད་བྱ། ཐུགས་ཀར་ཉི་མའི་སྟེང་དུ་ཧཱུྃ་ལྗང་ནག་གི་མཐར་སྔགས་ཀྱི་ཕྲེང་བས་བསྐོར་བ་ལས་འོད་ཟེར་མེ་དང་མཚོན་ཆ་ཁྲོ་མོའི་སྤྲིན་ཕུང་འཕྲོ་བས་གདོན་བགེགས་འབྱུང་པོ་ཚར་བཅད་པར་བསམས་ལ། རྩ་སྔགས། སྙིང་པོ་ལས་སྔགས་རྣམས་སྦྲེལ་ཏེ་བཟླས་མཐར་སླར་ཡང་མཆོད་ཅིང་བསྟོད། བཅོམ་ལྡན་འདས་མས་གདུག་པ་ཅན་ཚར་བཅད་པའི་ཕྲིན་ལས་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀ་ནས་སྤྲོས་པའི་ཕོ་ཉའི་ཚོགས་ཀྱིས་དམིགས་བྱ་དབང་མེད་དུ་བཀུག་ནས་གཟུགས་བརྙན་ལ་བསྟིམས་པར་བསམས་ལ། ན་མོ། རྩ་བརྒྱུད་བླ་མ་ཡི་དམ་ལྷ། །སེང་གདོང་མཁའ་འགྲོའི་བདེན་པའི་མཐུས། །དགྲ་བགེགས་འབྱུང་པོ་བྱད་མ་ཀུན། །གཟུགས་བརྙན་འདི་ལ་མྱུར་དུ་ཁུག །ཅེས་བདེན་སྟོབས་དང་། རྩ་སྔགས་དང་། སྔགས་རྣམས་ཀྱི་མཐར། སརྦ་བིགྷྣཱན་ཤ་ཏྲཱུ་ན་ཛཿཧཱུྃ་བྃ་ཧོཿ ཡང་ཡང་བརྗོད་ཅིང་དམིགས་པ་དྲག་ཏུ་བྱ། དེ་ནས། ཨཿཀཿསཿམཿརཿཙཿཤཿདཿརཿསཿམཿརཿཡཿཕཊཿ ཅེས་བརྗོད་པས། དགྲ་བགེགས་ཀྱི་རྣམ་ཤེས་དྭངས་མ་ཨ་ཡིག་གི་རྣམ་པས་ཡེ་ཤེས་མཁའ་འགྲོའི་ཐུགས་ཀར་ཐིམ། ཚེ་དང་བསོད་ནམས་ཐམས་ཅད་རང་ལ་འདུས། མདུན་བསྐྱེད་ལས་ནད་མཚོན་དུག་གི་ཆར་བབས་པས་གཟུགས་ཕུང་རྡུལ་དུ་བརླག་པར་བསམས་ལ། ཆུ་སྔགས་དང་། ལས་སྔགས་ཀྱི་མཐར། སརྦ་བིགྷྣན་ཤ་ཏྲཱུ་ན་མཱ་ར་ཡ་ཕཊ། ཅེས་བརྗོད་ཅིང་ཡུངས་ཀར་གྱིས་བྲབ། གུ་གུལ་གྱིས་བདུག །བསད་གྲིས་དུམ་བུར་གཏུབ་པ་དང་། ཤ་དུམ། ཁྲག་ཐིག །བཙོང་སྒོག །ལན་ཚྭ། ཐང་ཕྲོམ་སོགས་དང་སྦྱར་ཏེ། ཨོཾ་ཨཱཿཧཱུྃ་ཧ་ཧོ་ཧྲཱིཿ གཏོར་མ་དགྲ་བགེགས་ཀྱི་ཤ་ཁྲག་ཡེ་ཤེས་ཀྱི་བདུད་རྩིའི་ངོ་བོར་གྱུར། སྙིང་པོའི་མཐར། སརྦ་བིགྷྣཱན་ཤཏྲཱུ་ན་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་མམ་བདུན་གྱིས་ཕུལ། ཨོཾ་ཀརྨ་ཌཱ་ཀི་ནཱི་སིཾ་ཧ་མུ་ཁ་ས་པ་རི་བཱ་ར་ཨརྒྷཾ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད། གདོད་ནས་རྣམ་དག་སོགས་ནས། ཀརྨ་མཁའ་འགྲོ་མ་ལ་ཕྱག་འཚལ་བསྟོད། །ཅེས་བསྟོད། ལས་ཀྱི་སེང་གདོང་ཌཱ་ཀི་འཁོར་བཅས་ཀུན། །དགྲ་བགེགས་ཤ་རི་ཁྲག་མཚོའི་གཏོར་མ་བཞེས། །བསྟན་ལ་གནོད་པའི་གདུག་ཅན་དཔུང་དང་བཅས། །ཚར་གཅོད་དྲག་པོའི་ཕྲིན་ལས་འགྲུབ་པར་མཛོད། ཅེས་ཕྲིན་ལས་བཅོལ། དེ་ལྟ་བུ་ལན་གསུམ་ལ་སོགས་པའི་མཐར་ཕྱིར་ཟློག་པའི་ལས་བཅོལ་བ་ནི། ཧཱུྃ་བྷྱོཿ འཇིགས་བྱེད་དཔའ་བོ་ཆེན་མོ་ནི། རྩུབ་འགྱུར་ལས་ཀྱི་སེང་གདོང་མ། །མ་མོ་བྱེ་བའི་ཚོགས་ཀྱིས་བསྐོར། །ལྷ་སྲིན་སྡེ་བརྒྱད་ཕོ་ཉར་འགྱེད། །འཁོར་བཅས་དོ་ནུབ་མཐུ་རྩལ་སྐྱེད། །རྣལ་འབྱོར་བདག་ཅག་འཁོར་བཅས་ལ། །འགལ་རྐྱེན་བར་དུ་གཅོད་བྱེད་པའི། །བདུད་དང་ལོག་འདྲེན་མི་མཐུན་ཚོགས། །དམ་ཉམས་དགྲ་བོའི་སྟེང་དུ་ཟློག །ཟློག་ཅིག་སྒྱུར་ཅིག་ས་མ་ཡ། །རྨི་ལྟས་མཚན་མ་ངན་པ་དང་། །བྱད་དང་བྱུར་ཁ་རྦོད་གཏོང་རྣམས། །དམ་ཉམས་དགྲ་བོའི་སྟེང་དུ་ཟློག །བགེགས་རིགས་སྟོང་ཕྲག་བརྒྱད་ཅུ་དང་། །གདོན་རིགས་སུམ་བརྒྱ་དྲུག་ཅུ་རྣམས། །དམ་ཉམས་དགྲ་བོའི་སྟེང་དུ་ཟློག །གློ་བུར་ཡེ་འདྲོག་དྲུག་ཅུ་དང་། །གཏོར་ཁ་ཕུར་ཁ་ཟུག་པ་རྣམས། །དམ་ཉམས་དགྲ་བོའི་སྟེང་དུ་ཟློག །གཤིན་རྗེའི་ཕུར་ཁ་ཟུག་པ་དང་། །རྒྱལ་པོའི་སྨྱོ་འབོག་གཏོང་བ་རྣམས། །དམ་ཉམས་དགྲ་བོའི་སྟེང་དུ་ཟློག །མ་མོའི་ཁྲག་ཟོར་གྲུ་ཚོན་འཕེན། །ཀླུ་སྲིན་ཁ་བླངས་མཛེ་ནད་ཀུན། །དམ་ཉམས་དགྲ་བོའི་སྟེང་དུ་ཟློག །གཞན་ཡང་མི་མཐུན་བར་ཆད་རྣམས། །ཟློག་ཅིག་སྒྱུར་ཅིག་དགྲ་ལ་ཟློག །དགྲ་བགེགས་ཐལ་བའི་རྡུལ་བཞིན་དུ། །རྩད་ནས་རླག་པའི་ཕྲིན་ལས་མཛོད། །ཅེས་དང་། རྩ་སྔགས་དང་སྙིང་པོའི་མཐར། བྷྱོ་བྷྱོ་ཟློག་ཟློག་ཅེས་བརྗོད་ཅིང་ཐལ་མོ་བརྡབ། དེ་ལྟ་བུ་ཚར་དྲུག་ཅུ་རྩ་བཞི་སོགས་ཀྱི་མཐར་མདུན་བསྐྱེད་ལ་མཆོད་ཅིང་བསྟོད། ཨོཾ་བཛྲ་ཨུཏྟིཥྛ། གཏོར་མའི་ལྷ་ཚོགས་རྟེན་དང་བཅས་པ་མདུན་གྱི་ནམ་མཁར་བཞུགས་པར་བསམས་ལ། སླར་ཡང་ཟློག་པའི་ཕྲིན་ལས་བཅོལ་བས། གཏོར་མ་ནད་མཚོན་དུག་གི་ཆར་ཆེན་པོར་གྱུར་པ་དགྲ་བོའི་ཡུལ་དུ་གློག་འཁྱུག་པ་ལྟར་བབས་པའི་རྗེས་སུ་ནམ་མཁར་བཞུགས་པའི་མཁའ་འགྲོ་མ་འཁོར་དང་བཅས་གཤེགས་ཏེ་དགྲ་བགེགས་དཔུང་བཅས་ཁ་ཕུང་རྗེས་མེད་དུ་བཏང་བར་བསམས་ལ་དགྲ་ཕྱོགས་སུ་འཕང་། དམིགས་མེད་ཀྱི་ལྟ་བའི་ངང་ལ་ཡུན་རིང་དུ་མཉམ་པར་བཞག །དེ་ནས་བདག་ཉིད་ལྷར་གསལ་བ་འོད་གསལ་གྱི་དབྱིངས་སུ་ཐིམ་པར་བསམ། སླར་ཡང་རྡོ་རྗེ་སེང་གདོང་མའི་སྐུར་གྱུར་པའི་ཐུགས་ཀ་ནས་འོད་ཟེར་འཕྲོས། ཕྱོགས་མཚམས་སྟེང་འོག་ཐམས་ཅད་རྡོ་རྗེའི་སྲུང་བའི་གུར་གྱིས་གཏམས་པར་བསམས་ལ། རྩ་སྔགས་ཀྱི་མཐར། བཛྲ་རཀྵ་རཀྵ་ཧཱུྃ། ཞེས་པས་སྲུང་བ་བྱ། དགེ་བསྔོ་ཤིས་བརྗོད་རྒྱས་པར་བྱ། ལས་ཀྱི་རྗེས་མི་མངོན་པར་བསྡུའོ། །འདི་ནི་བསྙེན་པ་ཐེམ་ཞིང་དམིགས་པ་གསལ་བས་ལན་གསུམ་བྱས་ན་བྱད་ཕུར་རྦོད་གཏོང་ཇི་ལྟར་ཆེ་ཡང་ཟློག་ངེས་པའི་ཟབ་རྒྱ་ཅན་ནོ། །དེ་ལྟར་སྒྲུབ་རྗེས་ལས་ཚོགས་དང་བཅས་པ་ཡིག་རྙིང་རྣམས་ལ་གཞིར་བྱས་ཏེ་དོན་ཚན་སྙིང་པོར་དྲིལ་བའོ། །ཡེ་ཤེས་མཁའ་འགྲོའི་ཞལ་ལུང་གྲུབ་པའི་གཏམ། །རྒྱ་ཆེའི་སྙིང་པོ་ཕྲིན་ལས་རྣམ་རོལ་བ། །ལེགས་བཤད་ཉི་མ་གསར་པའི་གཟི་འོད་ཀྱིས། །ས་གསུམ་བཀྲ་ཤིས་སྣང་བ་རྒྱས་པར་ཤོག །ཅེས་པའང་ཚུལ་འདིའི་གདམས་སྐོར་གྱི་ཡིག་ཆ་སྔ་ཕྱི་མང་དུ་ཐོས་ཤིང་མཐོང་བ་ལ་བརྟེན་ནས་འཇམ་དབྱངས་མཁྱེན་བརྩེའི་དབང་པོས་སྦྱར་པའི་དགེ་བས་འགྲོ་ཀུན་དངོས་གྲུབ་རྣམ་པ་གཉིས་ཀྱི་དགའ་སྟོན་ལ་ལོངས་སྤྱོད་པའི་རྒྱུར་གྱུར་ཅིག། ། ༈

[edit]

seng gdong rigs lnga'i sgrub thabs rjes gnang las tshogs dang bcas pa phrin las rnam rol/_ seng gdong rigs lnga'i sgrub thabs rjes gnang las tshogs dang bcas pa phrin las rnam rol zhes bya ba bzhugs so/__/oM swa sti/__/bde stong zung 'jug 'od gsal gcig nyid las/__/gang 'dul rigs lnga'i skur snang seng ge'i zhal/__/bla ma ye shes mkha' 'gror gus btud nas/__/phrin las rnam par rol pa'i lam bzang dbye/__/'di la gsum/__sgrub pa'i thabs/__rjes su gnang ba'i cho ga__/las kyi rim pa'o/__/dang po ni/__thun mong gi lam gyis rgyud sbyangs shing rdo rje theg pa la lhag par gnas pa'i sgrub pa pos bde ba'i stan la 'dug nas/__skyabs sems tshad med bzhi sgom pa sngon du 'gro bas/__oM swa b+hA ba shud+d+haHsarba d+ha rmAHswa b+hA ba shud+d+ho\u0f85 haM/__stong pa'i ngang las rdo rje srung ba'i 'khor lo dur khrod chen po brgyad dang bcas pas yongs su bskor ba'i dbus su/__e e las chos 'byung gru gsum nyis brtsegs dbus sngo/__shar dkar/__byang ljang /__nub dmar/__lho ser po rnams kyi nang du ru dra pho mo nyi ma'i gdan dang bcas par hU~M re re las/__dbus su rdo rje/__shar du gri gug__/byang du ral gri/__nub tu pad+ma/__lhor rin po che rnams so so'i rigs kyi kha dog can gyi hU~M yig gis mtshan pa las 'od zer 'phro 'dus yongs su gyur pa las/__dbus su rdo rje mkha' 'gro mthing nag seng zhal dkar mo rngams shing rdo rje dang thod khrag 'dzin pa/__shar du sangs rgyas mkha' 'gro dkar mo seng zhal sngon mo can gri gug dang bdud rtsi'i thod pa 'dzin pa/__byang du las kyi mkha' 'gro ljang nag seng zhal nag po can ral gri dang thod khrag 'dzin pa/__nub tu pad+ma mkha' 'gro dmar mo seng zhal ser mo can lcags kyu dang gter bum 'dzin pa/__lhor rin chen mkha' 'gro ser mo seng zhal dmar mo can rin po che dang ne'u le 'dzin pa/__thams cad kyang dmar la zlum pa'i khro mo'i spyan gsum bgrad pa/__zhal gdangs ljags 'dril mche ba gtsigs shing sma ra dang smin ma las me stag 'phro ba/__dbu skra phyed gyen du brdzes shing dug sbrul nag pos bcings pa'i steng du rus pa'i 'khor lo dang rdo rje phyed pas mtshan pa/__phyed thur du grol ba gsigs pa'i gseb nas rang 'dra'i sprul pa spro ba/__mi mgo skam po lnga'i dbu rgyan dang /__rlon pa lnga bcu'i do shal can/__zhing lpags dang glang po che'i ko bas stod g.yogs shing /__stag lpags kyi sham thabs 'phyang ba/__thal chen gyi tshom bu dang /__khrag gi thig le dang /__zhag gi zor ris rnams kyis mtshan cing sbrul rigs lnga dang /__rus pa'i phyag rgya lngas brgyan pa/__gru mo g.yon na rigs kyi phyag mtshan gyis brgyan pa'i kha T+wAM ga bsgreng zhing brkyangs bskums gar gyi rol pas ye shes kyi me 'bar ba'i dbus na bzhugs pa'i spyi bor oM dkar po/__mgrin par AHdmar po/__thugs kar hU~M sngon po/__de las 'od zer 'phros pas ye shes pa dbang lha dang bcas oM badz+ra sa mA dzaH__dzaHhU~M ba~M hoH__ye shes pa rang la gnyis su med par thim/__dbang lhas dbang bskur/__mi bskyod pa la sogs pa so so'i rigs kyi bdag pos dbur brgyan/__oM pany+tsa DA ki nI siM ha mu kha sa pa ri bA ra ar+g+haM sogs kyis phyi mchod dang /__oM AHhU~M gis nang mchod phul/__gdod nas rnam dag sgrib kun nges par grol/__/'jig rten 'das kyang tshul ni sna tshogs ston/___/rgyal ba kun gyi yum gyur kun bzang mo/__/seng gdong rigs lnga'i tshogs la phyag 'tshal bstod/__/ces bstod/__so so'i thugs kar nyi ma'i steng du hU~M yig rigs kyi kha dog can la sngags kyi phreng bas bskor ba las 'od zer 'phros pas las thams cad 'grub par bsams la/__thun mong du/__aHkaHsaHmaHraHtsaHshaHdaHraHsaHmaHraHyaHphaTaH__ces dang /__so so'i sngags/__oM badz+ra DA ki nI siM ha mu kha hU~M hU~M phaT/__rdo rje mkha' 'gro'i rtsa sngags so/__/oM dz+nyA na DA ki nI sarba sid+d+hi pha la hoH__de'i las sngags so/__/oM bud+d+ha DA ki nI siM ha mu kha hU~M hU~M phaT/__sangs rgyas mkha' 'gro'i rtsa sngags so/__/oM sarba shAn+tiM ku ru swA hA/__de'i las sngags so/__/oM karma DA ki nI siM ha mu kha hU~M hU~M phaT/__las kyi mkha' 'gro'i rtsa sngags so/__/o sarba karma tsa tur mA ra ya phaT/__de'i las sngags so/__/oM pad+ma DA ki nI siM ha mu kha hU~M hU~M phaT/__pad+ma mkha' 'gro'i rtsa sngags so/__/oM sarba pA shaM ku ru hoH__de'i las sngags so/__/oM rat+na DA ki nI siM ha mu kha hU~M hU~M phaT/__rin chen mkha' 'gro'i rtsa sngags so/__/oM sarba puSh+ti ku ru oMH__de'i las sngags so/__/thun bsdu ba na/__bcom ldan 'das mas bdag la mchog thun mong gi dngos grub ma lus pa stsal du gsol/__zhes gsol ba gdab/__'khor gyi lha mo rnams 'od du zhu nas rang la thim/__rang yang 'od gsal gyi dbyings su bsdus te mnyam par bzhag__/de las slar yang rdo rje mkha' 'gro ma'i skur ldangs la dge ba bsngo zhing smon lam gdab/__thun mtshams kyi bya ba la 'jug__/bsnyen pa byed na gtso bor yi ge 'bru bcu bzhi pa 'bum phrag bzhi sogs ji ltar rig pa/__de'i phyed rdo rje mkha' 'gro'i sngags/__de'i bcu cha 'khor bzhi'i sngags dang /__las sngags rnams ci rigs pa bzlas pas grub bo/__/gnyis pa rjes su gnang ba ni/__gnas dben par mkha' 'gro 'du ba'i dus bzang por stegs bu'i dbus su ji skad bshad pa'i rdo ra me ri dur khrod chos 'byung lha mtshan dang bcas pa bri ba'am/__ma grub na maN+Da lar rigs kyi kha dog dang mthun pa'i tshom bu lnga bkod pa'i steng many+dzi'i khar gtor ma dmar po zur gsum gtso 'khor lnga pa dar gdugs kyis brgyan/__de'i g.yas su bum pa bcud ldan/__g.yon du 'bul gtor/__mthar chu gnyis nyer spyod kyis bskor/__mchod pa byin rlabs spyi ltar sngon du 'gro bas bdag bskyed bzlas pa gsol gdab kyi bar bya/__de nas mdun gyi rten gtor bsang sbyang /__stong pa'i ngang las sogs bzlas pa gsol gdab kyi bar bdag bskyed ltar bya/__gtor ma/__oM AHhU~M ha ho hrIHsa byin gyis brlab/__oM pany+tsa DA ki nI siM ha mu kha sa pa ri bA ra i daM ba liM ta kha kha khA hi khA hi/__lan gsum gyis phul/__mchod bstod mthar/__seng gdong rigs lnga 'khor bcas rnams/__/mchod sbyin gtor ma 'di bzhes la/__/zhes sogs kyis phrin las bcol/__bum par seng gdong rigs lnga skad cig gis gsal ba'i sku las bdud rtsi'i rgyun babs pas bum pa gang bar bsams la yi ge bcu bzhi pa ci nus bzlas mthar/__lha 'od du zhu ba las bum pa'i chu nus pa dang ldan par bsam/__rjes gnang bdag 'jug gi tshul du len pa'am/__mdun bskyed kyi gnas gsum du oM AHhU~M dang lte bar hoHyig gis mtshan pa las 'od zer dkar dmar mthing ga sna tshogs pa'i mdog can 'phros/__rang gi gnas bzhir thim pas sku gsung thugs ye shes rdo rje'i byin rlabs zhugs par bsam/__de nas slob ma rnams khrus bya/__bgegs bskrad/__maN+Dal phul/__chos bshad ci rigs pas mtshams sbyar nas/__de la 'dir ye shes dang /__las dang /__'jig rten gyi ma mo mkha' 'gro yongs kyi 'khor los sgyur ba chen mo/__/rig sngags 'chang ba tsam gyis kyang las thams cad grub par byed pa mkha' 'gro ma seng ge'i gdong pa can gyi skor la sgrub thabs dang man ngag gi bka' srol mang du yod pa las/__ring brgyud snying rje chen po ba rI lo tsA ba nas bla ma sa skya pa yab sras la bka' babs pa brgyud pa bar ma chad pa las gsan pa'i rnal 'byor gyi dbang phyug sangs rgyas mgon pos lam 'di'i sgrub pa lhung mdzad pa la brten nas/__ye shes kyi mkha' 'gro ma seng ge'i gdong pa can dang /__grub pa'i slob dpon pad+ma badz+ra gyis dngos su zhal bstan cing /__nye brgyud thun mong ma yin pa'i gdams pa zab mos dbugs dbyung bas grub pa chen po'i sa la gshegs par gyur/__de las paN+Di ta chen po 'jigs bral gsang ba sbyin gyi slob brgyud rnams kyis bzhes te mkhas shing dngos grub brnyes pa'i brgyud pa zam ma chad pa zab gsang snyan brgyud du grags pa'i chos sde la'ang /__phyi nang gsang gsum las tshogs dang bcas pa'i sgrub thabs dang /__rjes gnang gi bka' ji snyed cig bzhugs pa las/__'dir thams cad kyi gzhi'am rtsa ba lta bur gyur pa seng ge'i gdong can nang sgrub rigs lnga'i rjes su gnang ba la/__slob dpon gyi bya ba grub nas/__khyed rang gi ngo skal du gyur pa thog mar gsol ba gdab pa 'di'i rjes zlos mdzod/__kun mkhyen ye shes sogs lan gsum/__rgyud sdom pa dang ldan par bya ba'i slad du/__slob dpon dang mdun gyi rten gtor rdo rje srung ba'i gur dang dur khrod brgyad kyis bskor ba'i dbus su chos 'byung rigs kyi kha dog can re re'i lte bar ru dra dang nyi ma'i gdan la/__dbus su rdo rje mkha' 'gro nas/__ye shes kyi me 'bar ba'i dbus na bzhugs pa'i sku can du lam ste gsal ba'i spyan sngar skyabs su 'gro ba dang sems bskyed pa'i sdom pa bzung snyam pas 'di'i rjes zlos mdzod/__/dkon mchog gsum la sogs lan gsum/__rjes gnang gi gzhi 'god pa'i slad du khyed rang rnams lhar gsal 'debs pa yin pas dmigs pa 'di bzhin mdzod/__slob ma bsang sbyang /__stong pa'i ngang las slob ma rnams gang du gnas pa'i go sar rdo rje srung ba'i 'khor lo sogs nas/__thugs kar hU~M/__spyi bor rtsa ba'i bla ma dang gnyis su med pa'i ye shes kyi mkha' 'gro rigs lnga bzhugs pa la mos gus dung pa mdzad pas bla ma dang spyi bo'i DA ki nI rnams kyi thugs ka nas 'od zer 'phros/__nub phyogs o rgyan gyi dur khrod nas mkha' 'gro ma seng ge'i gdong pa can rigs lnga la 'khor sha za ma mo bye ba 'bum sde bka' sdod srung ma'i tshogs kyis bskor ba spyan drangs/__spyi bo'i lha tshogs rnams la thim/__de rnams 'od du ltem gyis zhu ste khyed rang rnams la thim pas rgyud byin gyis brlab pa'i mos pa mdzod/__spos rol dang bcas rtsa sngags brjod/__tiSh+Tha badz+ra brjod cing me tog 'thor/__de ltar ye shes dbab cing brtan par bya ba sngon du song nas/__dngos gzhi sku gsung thugs kyi rjes su gnang ba zhu ba'i don du gsol ba 'debs pa 'di'i rjes zlos mdzod/__bdud 'dul sha za 'jigs pa'i sku/__/srog gcod ma mo khro zhing rngams/__/DA ki seng ge'i gdong can gyi/__/sku gsung thugs kyi rjes gnang stsol/__/lan gsum/__zhes gsol ba btab pas bla ma'i thugs ka'i 'od kyis dbang lha rigs lnga spyan drangs/__byang chub sems kyi bdud rtsis dbang bskur ba'i mos pa mdzod/__sangs rgyas kun gyi gsang gsum gyi/__/dkyil 'khor chen po'i gnas las byung /__/khams gsum kun gyis phyag byas pa/__/bum pa'i dbang bskur chen po sbyin/__/oM badz+rI b+ha ba a b+hi Shiny+tsa mi/__/de ni sku yi rjes gnang ngo /__/yang khyed rang rnams kyis bla ma dang lha la mos gus mdzad pas/__bla ma dang seng ge'i gdong can tha mi dad pa'i zhal nas sngags kyi phreng ba byung /__khyed rang rnams kyi zhal du zhugs/__lus kyi nang thams cad sngags kyi 'od zer gyis khrigs mer gyis gang bar mos te sngags 'di rnams kyi rjes zlos lan gsum mdzod/__gong gi sngags rnams bzlar gzhug mthar slob dpon gyis/__seng gdong 'di la 'go bar mdzod/__sngags kyi dngos grub stsal du gsol/__/ces me tog 'thor/__de ni gsung gi rjes gnang ngo /__/slar yang bla ma dang lha la mos gus mdzad pas/__de dag gi thugs ka nas 'od zer 'phros/__khyed rang rnams kyi snying gar phog__/snying pad+ma 'dab brgyad kyi nang du chos 'byung kha sbyor/__de'i dbus su rdo rje sngon po rtse lnga pa'i lte bar rang 'dra ba'i ye shes sems dpa'i thugs kar ting 'dzin sems dpa' hU~M yig sngon po'i mthar sngags kyi phreng bas bskor ba la yid gtad pas pad+ma kha zum pa'i phyi rol tu sngags kyi phreng bas lu gu rgyud du bcings par mos pa dang bcas 'od gsal phyag rgya chen po'i dbyings su mnyam par 'jog mdzod/__de ni thugs kyi rjes gnang ngo /__/mtha' rten gtor ma la brten nas bka' bsgo ba ni/__gtor ma 'di nyid ye shes kyi mkha' 'gro ma dngos su gsal ba khyed rang rnams kyi spyi bor spyan drangs shing byin gyis brlabs pa'i mos pa mdzod/__rtsa brgyud bla mas bka' bsgos ltar/__/seng gdong mkha' 'gro 'khor bcas kyis/__/rdo rje slob ma'i 'gal rkyen sel/__/mthun rkyen phun sum tshogs par mdzod/__/ces dang rtsa sngags brjod/__des rjes gnang gi dngos gzhi grub nas/__dam tshig khas blangs maN+Dal/__lus longs spyod 'bul ba/__dge ba bsngo ba rnams byas la slob ma gyes/__slob dpon gyis mdun bskyed la mchod bstod/__nongs bshags/__ye shes pa gshegs/__dam tshig pa rang la bstim/__rang nyid 'od gsal du bsdu zhing thun mtshams kyi lhar ldang /__bsngo smon shis brjod spyi ltar bya'o/__/gsum pa las kyi tshogs rab 'byams ni gzhan du shes la 'dir rigs lnga dang rjes su 'brel ba'i khyad par gyi las mdo tsam brjod na lnga las/__dang po rdo rje mkha' 'gro ma la brten nas mchog sgrub pa ni/__skyabs sems tshad med bzhi bsgom/__swa b+hA bas stong par sbyang /__stong pa'i ngang las chos 'byung dur khrod srung 'khor dang bcas pa'i dbus su pad+ma ru dra nyi ma'i gdan gyi steng du rang skad cig gis ye shes kyi mkha' 'gro ma seng ge'i gdong can mthing nag seng zhal dkar po can gri thod 'dzin cing kha T+wAM ga la 'khyud pa/__dur khrod 'jigs pa'i chas kyis brgyan cing skyil krung byed pa'i gar stabs kyis ye shes kyi me 'bar ba'i dbus na bzhugs pa'i thugs ka nas 'od zer 'phros/__rtsa brgyud kyi bla ma rnams spyan drangs/__rang la gnyis su med par thim/__de'i rkyen gyis rang gi lus rtsa gsum 'khor lo lnga ldan gyi spyi bo bde chen 'khor lo'i dbus su sangs rgyas mkha' 'gro dkar mo gri gug dang bdud rtsi'i thod pa/__mgrin pa pad+ma mkha' 'gro dmar mo lcags kyu dang gter bum/__thugs kar rdo rje mkha' 'gro sngon mo rdo rje dang thod khrag__/lte bar rin chen mkha' 'gro ser mo rin po che dang ne'u le/__gsang bar las kyi mkha' 'gro ljang nag ral gri dang thod khrag 'dzin pa rnams la so so'i rtsa 'dab kyi grangs dang mnyam pa'i mkha' 'gros bskor ba/__mig tu dam tshig mkha' 'gro nag mo phur bu dang thod khrag__/rna bar 'jig rten mkha' 'gro dmar mo dgra s+t+wa dang sbrul zhags sna la sna tshogs mkha' 'gro ser mo cang te'u dang thod khrag__/khar thams cad mkha' 'gro g.yas tho ba dang /__g.yon phub 'dzin pa/__thams cad kyang seng+ge'i gdong can dur khrod 'jigs pa'i chas kyis brgyan cing kha T+wAM ga la 'khyud pa/__skyil krung phyed pa'i gar stabs kyis ye shes kyi me 'bar ba'i dbus na bzhugs pa/__gzhan yang rtsa khams dang ba spu'i bu ga tshun chad dpa' bo dang rnal 'byor ma dam can rgya mtsho'i sprin 'phro bar gyur pa'i gtso mo lnga'i thugs kar nyi ma la hU~M gi mthar sngags kyi phreng bas bskor ba las 'od zer 'phro 'dus snang grags rigs gsum lha sngags ye shes kyi 'khor lor sbyangs te/__dngos grub rnam gnyis 'grub par bsams la/__lhar snang sgyu ma lta bu la sems rtse gcig tu bzung /__de la mi gnas na mkha' 'gro spyi'i rtsa sngags yi ge 'bru bcu bzhi pa/__de'i phyed mkha' 'gro lnga'i sngags so so/__/de'i phyed skye mched kyi mkha' 'gro bzhi'i sngags bzla/__de'ang /__oM sa ma yaDA ki nI siM ha mu kha hU~M hU~M phaT/__dam tshig mkha' 'gro'i rtsa sngags so/__/de bzhin tu oM lo ka DA ki nI sogs sbyar ba 'jig rten/__bi shwa DA ki nI sna tshogs mkha' 'gro/__sarba DA kis thams cad mkha' 'gro'i sngags so/__/bzhi ka la las sbyor thun mong du/__oM sarba shAtru na mA ra ya phaT/__ces sbyar/__de lta bu'i ngag bzlas ci rigs pa'i mthar/__'khor lo lnga'i mkha' 'gro so sor dmigs nas rlung bum pa can bzung zhing 'od gsal phyag rgya chen po'i ngang du mnyam par bzhag pas rlung dbu mar zhugs gnas thim pa'i rtags sogs nyams myong yon tan skye bar 'gyur ro/__/thun gyi mjug tu mchod bstod 'dod don gsol/__rang gi snying ga nas 'od zer 'phros/__gdan gsum tshang ba'i dbang lha nam mkha' gang bar spyan drangs/__byang chub sems kyi bdud rtsis dbang bskur bas sku gang /__dri ma dag__/chu'i lhag ma gyen du lud pa las phyi dkyil rdo rje mkha' 'gro la mi bskyod pa dang /__lus dkyil rnams la so so'i rigs kyi bdag pos dbur brgyan/__dbang gi lha phyi'i lha mo lus dkyil rnams la thim pas bde ba chen po'i gzi byin 'bar/__mthar thig le 'od zer kha dog lnga ldan 'bar zhing 'khrigs pa'i rnam pa can du gyur/__de nyid kyang zag med bde ba chen po'i ngang du thim par bsams la dbyings rig bsres te mnyam par bzhag__/skabs su lus gnad phyed bcings kyi sbyor ba dang bcas mig bar snang du har re gtad/__sems 'dzin med kyi ngang du rlung rang babs su 'jog__/de las ldang ba na bsngo smon shis brjod kyis mtshams sbyar te spyod lam la 'jug go__/gnyis pa sangs rgyas mkha' 'gro ma la brten nas sdig sgrib zhi ba'i sbyin sreg ni/__zhi ba'i thabs spyi ltar 'du bya ba'am/__rgyun gyi rnal 'byor la sol mes kyang rung /__rang gi mdun til lam yungs kar cung zad 'du bya/__bdag bskyed sngon du 'gro bas/__mdun gyi me thab bsang sbyang /__stong pa'i ngang las ye shes kyi me phung 'bar ba'i dbus su/__e e las chos kyi 'byung gnas gru gsum dkar po nyis brtsegs kyi lte bar/__pad nyi ru dra'i steng du hU~M las sangs rgyas mkha' 'gro seng gdong can sku mdog dkar mo seng zhal sngon po bzhad cing gri thod kha T+wAM ga 'dzin pa/__dur khrod 'jigs pa'i chas can/__zhabs gnyis gar stabs su bzhengs pa'i lto ba rab tu yangs par 'khor lo dkar po rtsibs stong dang ldan pa'i lte bar hU~M/__rtsibs rnams la rtsa sngags snying po las sngags rnams 'od zer 'phro bar gyur/__rang gzhan thams cad kyi sdig sgrib mtha' dag 'dus pa'i ngo bo snying gar pa~M nag po/__rkang 'og gi rlung g.yos/__lte ba'i me sbar/__des snying ga'i pa~M sna sgor byung ba sdig pa'i rnam pas til la thim/__de nyid mkha' 'gro ma'i zhal du phul ba lte ba'i sngags kyi 'khor lo 'od zer rab tu 'bar bas bsregs shing sbyangs par bsams la/__yi ge bcu bzhi pa dang /__oM bud+d+ha DA ki nI siM ha mu kha hU~M hU~M phaT/__oM sarba pA paM shAn+tiM ku ru swA hA/__zhes spel bas brgya rtsa la sogs pa phul mthar mdun bskyed kyi mkha' 'gro ma dgyes pa'i sku dang sngags phreng las bdud rtsi'i rgyun char sprin 'khrugs pa las char 'bab pa bzhin byung /__bdag dang sems can thams cad la thim pas sdig sgrib mtha' dag sbyang bar bsam/__gtor ma yod na bsang sbyang byin gyis brlab/__snying po'i mthar i daM ba liM sogs btags pas phul/__gang ltar yang /__oM bud+d+ha DA ki nI siM ha mu kha sa pa ri bA ra ar+g+haM sogs kyis phyi mchod/__oM AHhU~M gis nang mchod/__gdod nas rnam dag sogs kyi mthar/__/sangs rgyas mkha' 'gro ma la phyag 'tshal bstod/__/ces bstod/__bdag dang sems can thams cad kyi sdig sgrib bag chags dang bcas pa zhi bar byin gyis brlab tu gsol/__zhes gsol ba gdab/__yi ge brgya pa dang ma 'byor pa dang sogs kyis nongs pa bshags/__dzaHhU~M ba~M hoH__mdun bskyed kyi lha rang la thim par bsam/__bsngo smon shis brjod bya'o/__/gsum pa rin chen mkha' 'gro ma la brten nas tshe bsod rgyas pa'i man ngag ni/__tshe dang 'byor pa rgyas pa'i mtshan nyid legs par tshang ba'i ka pA la'i nang du sman sna dang dri bzang sin+d+hUr rnams kyis byugs/__snying po lnga dang /__dUrba sogs tshe'i rdzas dang /__dar zab rin chen 'bru sman sogs dpal can gyi rdzas kyis gtam/__mthing shog la gser gyis yi ge bcu bzhi pa/__rin chen mkha' 'gro'i snying po/__las sngags/__gzhan yang tshe gzungs dang nor lha'i gzungs sogs bris pa'i shog dril dar ser po'i ras dang /__dri bzang bcas shing tog bilba'i nang khengs par bcug pa dbus su bzhag__/mtha' mchod gtor gyis bskor/__seng gdong rigs lnga'i bdag bskyed bzlas pa dang bcas pa'i rjes mdun gyi rten bsang sbyang /__stong pa'i ngang las 'dod rgu'i 'byung gnas ka pA la yangs shing rgya che ba lha mi'i dpal 'byor rab tu rgyas pas gtams pa'i dbus su/__e e las chos 'byung ser po bsnol ma'i lte bar/__pad nyi ru dra'i steng du hU~M las rin chen mkha' 'gro seng gdong can ser mo nor bu dang ne'u le kha T+wAM ga 'dzin pa/__dur khrod 'jigs pa'i chas can 'od zer ser po spro ba dang bsdu bas rgyas pa'i las rab 'byams mdzad par gyur/__gnas gsum byin gyis brlab/__ye shes pa bstim/__dbang bskur/__rin chen 'byung ldan gyis dbur brgyan par bsam/__mchod bstod gtor ma 'bul/__thugs kar nyi ma la gnas pa'i hU~M ser po'i mthar sngags kyi phreng bas bskor ba las 'od zer 'phros 'dus tshe bsod dpal 'byor thams cad rgyas par bsams la/__rtsa sngags/__snying po/__las sngags rnams sbrel te bzla/__mthar nongs pa bshags/__brtan bzhugs bya/__bsngo smon bkra shis rgya cher brjod/__thod pa dar zab ser pos dril te mdzod kyi dbus su bzhag__/dus bzang por mchod bstod tshogs gtor phul bas tshe dang bsod nams rgyas par 'gyur ro/__/bzhi pa pad+ma mkha' 'gro la brten nas dbang gi me mchod bya ba ni/__sa dmar po'i stegs bur dbang gi thab spyi ltar bris pa'i steng du tsan+dan dmar po'am mdzo mo shing sogs rung ba'i bud shing zla gam du brtsig__/rang gi g.yas su zangs sder nang /__gur gum dang /__tsan+dan sogs dri dmar po/__glang sna sogs me tog dmar po/__bye ru dang zangs sogs rin po che dmar po/__dar sna/__'bru sna/__zas sna/__shing tog__/lan tshwa sogs kyang li khris dmar por bsgyur ba dang /__'bri mog gis kha sgyur ba'i mar khu bcas/__de tsam ma 'byor na 'bras lta bu'i 'bru kha dog dmar por byas pa dang /__mar khu tsam la brten kyang rung /__g.yon du gtor ma dmar po dang nyer spyod bcas bsham/__bdag bskyed sngon du 'gro bas snying po'i sngags kyis me sbar/__bsang sbyang /__stong pa'i ngang las dbang gi thab khung mtshan nyid rdzogs pa me 'bar ba'i dbus su/__e e las chos 'byung dmar po bsnol ma'i lte bar pad nyi ru dra'i steng du hU~M dmar po las pad+ma mkha' 'gro seng gdong ma sku mdog dmar mo seng zhal ser po bzhad cing lcags kyu dang gter bum kha T+wAM ga 'dzin pa/__dur khrod 'jigs pa'i chas can 'od zer dmar po spro ba dang bsdu bas rab 'byams dbang gi las mdzad par gyur/__gnas gsum byin brlab/__ye shes pa bstim/__dbang bskur zhing rigs bdag 'od dpag med pas dbur brgyan/__mchod bstod bya/__de nas rdzas rnams phyogs gcig tu bsres te rtsa sngags/__snying po/__las sngags rnams sbrel bas brgya rtsa la sogs pa phul mthar/__mdun bskyed kyi pad+ma mkha' 'gro dgyes pa'i sku las 'od zer dang bdud rtsi dmar po dbang gi rang bzhin can dpag tu med pa byung /__bdag gi lus ngag yid gsum la thim pas bde ba chen po'i gzi byin mchog tu 'bar bas mthong thos dran reg thams cad dbang du 'du ba'i bdag nyid can du gyur/__slar yang bdag dang mdun bskyed las 'od zer 'phros pas khams gsum snod bcud spyi dang /__bye brag dmigs bya la phog pas chags pa'i zil gyis dmar lam song ste bdag nyid kyi dbang du 'dus par bsams la gnas lugs kyi ngang du bzhag__/de nas slar yang mchod bstod gtor ma phul/__'dod don gsol/__nongs pa bshags/__dzaHhU~M ba~M hoHsa thab kyi lha rang la bstim/__bsngo smon shis brjod bya/__thal ba ri rtser rlung la bskur ba'am/__'bab chu chen por dor ro/__/lnga pa karma mkha' 'gro la brten nas phyir zlog gi man ngag ni/__drag po'i las la shis pa'i dus su/__dur khrod kyi sa'am lcags kyi brub khung gi nang byad ma'i ling+ga gzhug__/de'i steng many+dzi'i khar lcags sam b+han+d+ha'i snod du dmar gtor zur gsum sha khrag dang mtshe yungs sogs kyis brgyan pa'i mdun du drag po'i nyer spyod dang bcas pa bsham/__bdag bskyed seng gdong rigs lnga'i bsgom bzlas sngon du song nas/__gtor ma bsang sbyang /__stong pa'i ngang las rdo rje srung ba'i 'khor lo dur khrod brgyad dang bcas pa'i dbus e e las chos 'byung gru gsum ljang nag nyis brtsegs khrag mtsho khol zhing me rlung 'khrugs pa'i lte bar pad nyi ru dra'i gdan la hU~M ljang nag las 'od zer 'phros 'dus ral gri hU~M gis mtshan pa/__de yongs su gyur pa las karma mkha' 'gro seng gdong ma ljang nag seng zhal nag po rngams shing ral gri dang thod khrag kha T+wAM ga bsnams pa/__dur khrod 'jigs pa'i chas kyis brgyan cing drag shul srin mo khros pa'i nyams can/__zhabs gnyis brkyang bskum gar gyi rol pas ye shes kyi me 'bar ba'i dbus na bzhugs pa/__srid zhi'i khams na che btsan 'gran zla dang bral ba/__khro bo khro mo dregs pa can gyi tshogs bsam gyis mi khyab pa spro zhing bsdu ba'i skur gyur/__gnas gsum byin brlab/__ye shes pa bstim/__dbang bskur zhing /__rigs bdag don yod grub pas dbur brgyan/__mchod bstod bya/__thugs kar nyi ma'i steng du hU~M ljang nag gi mthar sngags kyi phreng bas bskor ba las 'od zer me dang mtshon cha khro mo'i sprin phung 'phro bas gdon bgegs 'byung po tshar bcad par bsams la/__rtsa sngags/__snying po las sngags rnams sbrel te bzlas mthar slar yang mchod cing bstod/__bcom ldan 'das mas gdug pa can tshar bcad pa'i phrin las mdzad du gsol/__zhes gsol ba btab pas/__thugs ka nas spros pa'i pho nya'i tshogs kyis dmigs bya dbang med du bkug nas gzugs brnyan la bstims par bsams la/__na mo/__rtsa brgyud bla ma yi dam lha/__/seng gdong mkha' 'gro'i bden pa'i mthus/__/dgra bgegs 'byung po byad ma kun/__/gzugs brnyan 'di la myur du khug__/ces bden stobs dang /__rtsa sngags dang /__sngags rnams kyi mthar/__sarba big+h+nAn sha trU na dzaHhU~M ba~M hoH_yang yang brjod cing dmigs pa drag tu bya/_de nas/__aHkaHsaHmaHraHtsaHshaHdaHraHsaHmaHraHyaHphaTaH__ces brjod pas/__dgra bgegs kyi rnam shes dwangs ma a yig gi rnam pas ye shes mkha' 'gro'i thugs kar thim/__tshe dang bsod nams thams cad rang la 'dus/__mdun bskyed las nad mtshon dug gi char babs pas gzugs phung rdul du brlag par bsams la/__chu sngags dang /__las sngags kyi mthar/__sarba big+h+nan sha trU na mA ra ya phaT/__ces brjod cing yungs kar gyis brab/__gu gul gyis bdug__/bsad gris dum bur gtub pa dang /__sha dum/__khrag thig__/btsong sgog__/lan tshwa/__thang phrom sogs dang sbyar te/__oM AHhU~M ha ho hrIH__gtor ma dgra bgegs kyi sha khrag ye shes kyi bdud rtsi'i ngo bor gyur/__snying po'i mthar/__sarba big+h+nAn shatrU na ba liM ta kha kha khA hi khA hi/__lan gsum mam bdun gyis phul/__oM karma DA ki nI siM ha mu kha sa pa ri bA ra ar+g+haM sogs kyis phyi mchod dang /__oM AHhU~M gis nang mchod/__gdod nas rnam dag sogs nas/__karma mkha' 'gro ma la phyag 'tshal bstod/__/ces bstod/__las kyi seng gdong DA ki 'khor bcas kun/__/dgra bgegs sha ri khrag mtsho'i gtor ma bzhes/__/bstan la gnod pa'i gdug can dpung dang bcas/__/tshar gcod drag po'i phrin las 'grub par mdzod/__ces phrin las bcol/__de lta bu lan gsum la sogs pa'i mthar phyir zlog pa'i las bcol ba ni/__hU~M b+h+yoH__'jigs byed dpa' bo chen mo ni/__rtsub 'gyur las kyi seng gdong ma/__/ma mo bye ba'i tshogs kyis bskor/__/lha srin sde brgyad pho nyar 'gyed/__/'khor bcas do nub mthu rtsal skyed/__/rnal 'byor bdag cag 'khor bcas la/__/'gal rkyen bar du gcod byed pa'i/__/bdud dang log 'dren mi mthun tshogs/__/dam nyams dgra bo'i steng du zlog__/zlog cig sgyur cig sa ma ya/__/rmi ltas mtshan ma ngan pa dang /__/byad dang byur kha rbod gtong rnams/__/dam nyams dgra bo'i steng du zlog__/bgegs rigs stong phrag brgyad cu dang /__/gdon rigs sum brgya drug cu rnams/__/dam nyams dgra bo'i steng du zlog__/glo bur ye 'drog drug cu dang /__/gtor kha phur kha zug pa rnams/__/dam nyams dgra bo'i steng du zlog__/gshin rje'i phur kha zug pa dang /__/rgyal po'i smyo 'bog gtong ba rnams/__/dam nyams dgra bo'i steng du zlog__/ma mo'i khrag zor gru tshon 'phen/__/klu srin kha blangs mdze nad kun/__/dam nyams dgra bo'i steng du zlog__/gzhan yang mi mthun bar chad rnams/__/zlog cig sgyur cig dgra la zlog__/dgra bgegs thal ba'i rdul bzhin du/__/rtsad nas rlag pa'i phrin las mdzod/__/ces dang /__rtsa sngags dang snying po'i mthar/__b+h+yo b+h+yo zlog zlog ces brjod cing thal mo brdab/__de lta bu tshar drug cu rtsa bzhi sogs kyi mthar mdun bskyed la mchod cing bstod/__oM badz+ra ut+tiSh+Tha/__gtor ma'i lha tshogs rten dang bcas pa mdun gyi nam mkhar bzhugs par bsams la/__slar yang zlog pa'i phrin las bcol bas/__gtor ma nad mtshon dug gi char chen por gyur pa dgra bo'i yul du glog 'khyug pa ltar babs pa'i rjes su nam mkhar bzhugs pa'i mkha' 'gro ma 'khor dang bcas gshegs te dgra bgegs dpung bcas kha phung rjes med du btang bar bsams la dgra phyogs su 'phang /__dmigs med kyi lta ba'i ngang la yun ring du mnyam par bzhag__/de nas bdag nyid lhar gsal ba 'od gsal gyi dbyings su thim par bsam/__slar yang rdo rje seng gdong ma'i skur gyur pa'i thugs ka nas 'od zer 'phros/__phyogs mtshams steng 'og thams cad rdo rje'i srung ba'i gur gyis gtams par bsams la/__rtsa sngags kyi mthar/__badz+ra rak+Sha rak+Sha hU~M/__zhes pas srung ba bya/__dge bsngo shis brjod rgyas par bya/__las kyi rjes mi mngon par bsdu'o/__/'di ni bsnyen pa them zhing dmigs pa gsal bas lan gsum byas na byad phur rbod gtong ji ltar che yang zlog nges pa'i zab rgya can no/__/de ltar sgrub rjes las tshogs dang bcas pa yig rnying rnams la gzhir byas te don tshan snying por dril ba'o/__/ye shes mkha' 'gro'i zhal lung grub pa'i gtam/__/rgya che'i snying po phrin las rnam rol ba/__/legs bshad nyi ma gsar pa'i gzi 'od kyis/__/sa gsum bkra shis snang ba rgyas par shog__/ces pa'ang tshul 'di'i gdams skor gyi yig cha snga phyi mang du thos shing mthong ba la brten nas 'jam dbyangs mkhyen brtse'i dbang pos sbyar pa'i dge bas 'gro kun dngos grub rnam pa gnyis kyi dga' ston la longs spyod pa'i rgyur gyur cig/____/_!_