JKW-KABUM-10-THA-001-011

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 10, sde tshan 1, Text 11, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 10: 1-. Khams sde dge rdzong sar dgon: Rdzong sar blo gros phun tshogs, 2020.
Genre
Deity	sgrol ma

1 Texts in this Section (sde tshan or chos tshan)

11 111-116	ཉི་སྦས་ལྕགས་ཀྱི་སྒྲོལ་མ་ཉེར་གཅིག་གི་ཟིན་བྲིས་སྐལ་བཟང་ཉེར་མཁོ། nyi sbas lcags kyi sgrol ma nyer gcig gi zin bris skal bzang nyer mkho Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཉི་སྦས་ལྕགས་ཀྱི་སྒྲོལ་མ་ཉེར་གཅིག་གི་ཟིན་བྲིས་སྐལ་བཟང་ཉེར་མཁོ། ༄༅། །ཉི་སྦས་ལུགས་ཀྱི་སྒྲོལ་མ་ཉེར་གཅིག་གི་ཟིན་བྲིས་སྐལ་བཟང་ཉེར་མཁོ་ཞེས་བྱ་བ་བཞུགས་སོ། །ཨོཾ་སྭ་སྟི་སིདྡྷཾ། འཁོར་ལོའི་མགོན་པོ་རྗེ་བཙུན་མར། །བཏུད་ནས་དེ་ཡི་སྒྲུབ་པའི་ཐབས། །ཉི་མ་སྦས་པའི་ཞལ་ལུང་ལས། །ཉེར་མཁོའི་ཟིན་བྲིས་ཅུང་ཟད་བྲི། །འདི་ལ་གསུམ། །རྗེས་སུ་གནང་བ་དང་། བསྙེན་པ་དང་། ལས་སྦྱོར་གྱི་སྐབས་སུ་ཉེ་བར་མཁོ་བའི་ཟིན་བྲིས་སོ། །དང་པོ་ནི། རྨོར་ཆེན་རིན་པོ་ཆེས་མཛད་པའི་སྒྲུབ་ཐབས་དང་རྗེས་གནང་གི་ཆོ་ག་བློ་གསལ་ཉེར་མཁོ་ལས་རྩ་བའི་སྒྲོལ་མ་སེང་ལྡིང་ནགས་སྒྲོལ་སྤྱིར་བཏང་ལྟར་མཛད་པ་ནི་གཞུང་དེ་ཉིད་དུ་ཤེས་ལ། ཡིག་རྙིང་དང་སྒྲུབ་ཐབས་རིན་འབྱུང་སོགས་ལས་སྒྲོལ་མ་སྤྱི་སྒྲུབ་ཉིད་རྩ་བར་བཀོད་ཅིང་དེའི་རྗེས་གནང་ཡང་བཞུགས་པས། སྤྱིར་སྦྱོར་དངོས་རྗེས་གསུམ་གྱི་ཆིངས་རྣམས་བློ་གསལ་ཉེར་མཁོ་ལྟར་ལ་བདག་མདུན་གྱི་མངོན་རྟོགས་ཁོ་བོས་བྱས་པའི་རྣལ་འབྱོར་ཉེར་མཁོ་ལྟར་སྦྱར། བུམ་པ་སྤྱི་ལྟར་བཅས་ལ་བསང་སྦྱངས། སྟོང་པའི་ངང་ལས་པྃ་ལས་པདྨ་དང་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་ལས་རིན་པོ་ཆེའི་བུམ་པ་ཡངས་ཤིང་རྒྱ་ཆེ་བ། ལྟོ་བ་ལྡིར་བ། ཞབས་ཞུམ་པ། མགྲིན་པ་ཕྲ་བ། ཁ་གཡེལ་བ། མཆུ་འཕྱང་བ། ལྷ་རྫས་ཀྱི་གོས་ཀྱིས་མགུལ་པ་དཀྲིས་ཤིང་། དཔག་བསམ་གྱི་ཤིང་གིས་ཁ་བརྒྱན་པ། ནང་ཆུ་དང་བཅུད་སྣ་ཚོགས་ཀྱིས་ཡོངས་སུ་གང་བའི་དབུས་སུ་པདྨ་དང་ཟླ་བའི་གདན་ལ་ཏཱྃ་ཡིག་སོགས་ནས། དོན་ཡོད་གྲུབ་པས་དབུར་བརྒྱན་ཞེས་པའི་བར་མདུན་བསྐྱེད་ལྟར། རང་གི་སྙིང་ག་ནས་སྔགས་ཀྱི་ཕྲེང་བ་གཟུངས་ཐག་ལ་བརྟེན་ནས་སོང་། བུམ་པའི་ལྷའི་ཐུགས་ཀར་ཞུགས་པས་ཐུགས་རྒྱུད་བསྐུལ། སྐུ་དང་སྔགས་ཕྲེང་ལས་བདུད་རྩིའི་རྒྱུན་བབས་པས་བུམ་པ་གང་བར་བསམས་ལ་བཟླས་པ་ཅི་ནུས་མཐར་མཆོད་བསྟོད་དང་ཡི་གེ་བརྒྱ་པ་བརྗོད། ཨོཾ་ཨཱཿཧཱུྃ་གིས་མཆོད་ཡོན་ཕུལ་བས་བུམ་པའི་ལྷ་མོ་འོད་དུ་ཞུ་བའི་ཆུ་ནུས་པ་དང་ལྡན་པར་བསམ། གཏོར་མ་གཞུང་ལྟར་དབུལ། རྗེས་གནང་གི་ལོ་རྒྱུས་སྐབས། ཐོག་མར་ཐམས་ཅད་ཀྱི་གཞིའམ་རྩ་བ་ལྟ་བུར་གྱུར་པ་སྒྲོལ་མ་སྤྱི་སྒྲུབ་ཀྱི་རྗེས་སུ་གནང་བ་ཡིན་ཞེས་སོགས་མཚན་འབྱིན་འཇུག་དང་། མངོན་རྟོགས་ཀྱི་ཁྱད་པར་མ་འཁྲུལ་བར་སྦྱར། ཡེ་ཤེས་དབབ་བསྟིམ་རྗེས། སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་རིགས་ལྔ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་རྣམས་ལ་མངོན་པར་དབང་བསྐུར་བ་སྩལ་དུ་གསོལ། ནམ་མཁར་བཞུགས་པའི་དབང་གི་ལྷ་དང་སློབ་དཔོན་ལྷན་ཅིག་པས། ཇི་ལྟར་བལྟམས་པ་ཙམ་གྱིས་སོགས་ནས་ཤྲཱི་ཡེ་ཧཱུྃ། ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར་སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་དོན་ཡོད་གྲུབ་པས་དབུར་བརྒྱན་པའི་མོས་པ་མཛོད། དེས་རྗེ་བཙུན་མ་འཕགས་མ་སྒྲོལ་མའི་སྐུའི་རྗེས་སུ་གནང་བ་ཐོབ་སོགས་སྦྲེལ། བཟླས་ལུང་གི་རྗེས། དམ་བཅའ་བའི་སླད་དུ་བཅོམ་ལྡན་འདས་མ་འཕགས་མ་སྒྲོལ་མ་འདི་ཉིད་ཇི་སྲིད་བྱང་ཆུབ་མ་ཐོབ་ཀྱི་བར་དུ་ཡི་དམ་དུ་གཟུང་ངོ་བདག་ཐུགས་ཀྱིས་མ་གཏོང་ཞིག་སྙམ་པའི་བསམ་པས་འདིའི་རྗེས་ཟློས་གསུངས་ཤིག །སློབ་དཔོན་དགོངས་སུ་གསོལ། བདག་རིག་པ་འཛིན་པ་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བཅོམ་ལྡན་འདས་མ་འཕགས་མ་སྒྲོལ་མ་ཡི་དམ་གྱི་ལྷར་བཟུང་ནས་འདིའི་གསང་སྔགས་ཉི་མ་རེ་རེ་བཞིན་འདི་ཙམ་རེ་འདོན་པར་དམ་བཅའ་ལགས་སོ། །ཞེས་ལན་གསུམ་བརྗོད། དེས་རྗེ་བཙུན་མ་འཕགས་མ་སྒྲོལ་མའི་གསུང་གི་རྗེས་སུ་གནང་བ་ཐོབ་སོགས་སྦྲེལ་ལོ། །གཞན་ཡང་ཡིག་རྙིང་དང་སྒྲུབ་ཐབས་རིན་འབྱུང་སོགས་ལས་དཀར་མོ་ཟླ་མདངས། གསེར་མདོག་ཅན། ཧཱུྃ་སྒྲ་སྒྲོག་མ། བཀྲ་ཤིས་སྣང་བ། ཁྲོ་གཉེར་གཡོ་བའི་སྒྲོལ་མ་རྣམས་ཞབས་ཀྱི་བཞུགས་སྟངས་དམིགས་བསལ་མེད་པས་རྡོ་རྗེའི་སྐྱིལ་ཀྲུང་དུ་མཛད། རིན་འབྱུང་ལས་དགུ་པ་མཆོག་སྩོལ་སྒྲོལ་མའི་འཕྲོས་དོན་དུ་སེང་ལྡེང་ནགས་སྒྲོལ་གཙོ་རྐྱང་རྨོར་ཆེན་གྱི་སྒྲུབ་ཐབས་དཀྱུས་ལས་འབྱུང་བ་ལྟར་དང་། གཙོ་འཁོར་གསུམ་མ་གཉིས་བཀོད་སྣང་ནའང་། གཙོ་འཁོར་གསུམ་མའི་རྗེས་གནང་སྐབས་འདིར་ན་ཡམ་དུ་བཀོད་པ་ཙམ་ཡིན་པས་རྗེས་གནང་དངོས་སུ་མི་དགོས། དེས་ན་རྨོར་ཆེན་གྱི་སྒྲུབ་ཐབས་དཀྱུས་ལྟར་སེང་ལྡེང་ནགས་སྒྲོལ་གྱི་རྗེས་གནང་དང་། འདིར་བཤད་པ་ལྟར་སྒྲོལ་མ་སྤྱི་སྒྲུབ་ཀྱི་རྗེས་གནང་། རྨོར་ཆེན་པའི་ཡིག་ཆ་ལྟར་ལས་ཚོགས་སོ་སོའི་རྗེས་གནང་ཉེར་གཅིག་བཅས་རྗེས་གནང་ཉི་ཤུ་རྩ་གསུམ་གྱི་རྒྱུན་སོ་སོར་བཞུགས་པ་ཡིན་པས་ཕྱག་ལེན་མ་ཉམས་པར་བྱ། དེའང་ལས་ཚོགས་སོ་སོའི་སྒྲུབ་ཐབས་ཀྱི་སྐབས་རྗེ་བཙུན་གྲགས་པའི་ཡིག་ཆར་མིག་སོགས་ཡན་ལག་དྲུག་བྱིན་རླབས་དང་། དབང་བསྐུར་རྒྱས་གདབ་རྣམས་དགོས་པར་གསུངས་པ་ནི་ལས་ཀྱི་ལྷ་མོ་སོ་སོའི་བསྙེན་པ་བྱེད་པའི་སྐབས་ལ་དགོངས་ཤིང་། རིན་འབྱུང་དུ་དེ་ལྟར་མི་དགོས་པར་གསུངས་པ་ནི་རྗེས་གནང་ཙམ་ཀྱི་སྐབས་ཟོར་ཡང་བའི་དབང་དུ་མཛད་པ་ཡིན། བུམ་དབང་ཡང་སྤྱི་སྒྲུབ་མ་གཏོགས་གཞན་ལ་མི་དགོས་པར་གསུངས་སོ། །གཉིས་པ་བསྙེན་པ་ནི། དེ་ལྟ་བུའི་རྗེས་སུ་གནང་བས་རྒྱུད་སྨིན་ཅིང་དམ་ཚིག་དང་སྡོམ་པར་ལྡན་པས་འདིའི་བསྙེན་པ་བྱ་བའི་ཚུལ་ལ་གཉིས། སྤྱི་དང་། སོ་སོའི་བསྙེན་པའོ། །དང་པོ་ནི། གནས་དབེན་པར་འདི་ཉིད་ཀྱི་བྲིས་སྐུ་ཡོད་ན་བཀྲམ་པའི་སྤྱན་སྔར་མཆོད་གཏོར་བཤམ། མཚམས་དམ་དུ་བཅད་ལ་ཐུན་བཞིའི་རིམ་པས་སྒྲོལ་མ་སྤྱི་སྒྲུབ་ཀྱི་མངོན་པར་རྟོགས་པ་བསྒོམས་ནས། སྔགས་ཡི་གེ་བཅུ་པ་འབུམ་ཕྲག་བཅུ་གསུམ་བཟླ་བར་བྱའོ། །གཉིས་པ་ནི། དེ་ལྟ་བུའི་རྩ་བའི་བསྙེན་པ་སྔོན་དུ་སོང་བས་ལས་ཀྱི་ལྷ་མོ་ཉི་ཤུ་རྩ་གཅིག་པོ་སོ་སོའི་སྒྲུབ་ཐབས་ཇི་སྐད་བཤད་པ་བཞིན་བསྒོམས་ལ་བཟླས་པ་རབ་ཁྲི་ཕྲག་བཞི། འབྲིང་ཁྲི། ཐ་མའང་སྟོང་ཕྲག་བཞི་རེ་བཟླས་པས་ལས་བསྒྲུབ་པ་ལ་དབང་བ་ཡིན་ནོ། །གསུམ་པ་ལས་ཚོགས་ནི། སྒྲོལ་མ་སྤྱི་སྒྲུབ་དང་འབྲེལ་བའི་ལས་ཚོགས་སྲུང་བ། ཞི་བ། དབང་། རྒྱས་པ། ཤེས་རབ་སོགས་སྤེལ་བ་རྣམས་རྗེ་བཙུན་རིན་པོ་ཆེའི་ཡི་གེ་ལས་ཇི་ལྟར་འབྱུང་བ་བཞིན་ཉམས་སུ་བླང་བར་བྱ་ཞིང་། དེའང་སྒོམ་པ་དང་། བཟླས་པ་དང་། བྲིས་པའི་འཁོར་ལོའི་སྒོ་ནས་ལས་ལ་སྦྱར་བའི་ཚུལ་ལྷ་དང་། འཁོར་ལོ་དང་། ཡི་གེའི་ཁ་དོག་སོ་སོར་བསྒྱུར་བ་སོགས་ཁྱད་པར་དྲུག་གི་སྒོ་ནས་མ་འདྲེས་པར་རྟོགས་པར་བྱའོ། །བྱེ་བྲག་གི་ལས་ཚོགས་ནི། རྗེ་བཙུན་རིན་པོ་ཆེས། ཕྱིར་ཟློག་ཡམས་ཞི་ཚེ་འཕེལ་གསད་པ་དང་། །དབང་བྱེད་སྒྲིབ་སྦྱོང་འཕོ་བ་རྫོགས་རིམ་དང་། །རབ་གནས་དབང་བསྐུར་ནོར་སྤེལ་སྦྱིན་སྲེག་དང་། །འབྱུང་པོ་བཟློག་དང་འཁྲུལ་འཁོར་ཁྲུས་ཆོག་དང་། །བློ་འཕེལ་ཆོམ་རྐུན་བཅིངས་དང་ཀླུ་ནད་གསོ། །ཁྲི་མོན་ལས་ཐར་མི་སྣང་མཁའ་སྤྱོད་དོ། །སྤྱིར་འགྲོའི་ཡན་ལག་རྣམ་པ་ལྔ་ཡིན་ཏེ། །གཏོར་མ་ཆུ་སྦྱིན་སཱཙྪ་དུས་གསུམ་བརྟག །བུ་ཆུང་གཞོན་ནུ་བསྐྱེད་བསྲུང་དང་བཅས་ཏེ། །ལས་ཀྱི་རྣམ་གྲངས་ཉི་ཤུ་རྩ་དྲུག་ཡིན། །ཞེས་གསུངས་པ་ལྟར་སྒྲོལ་མ་སོ་སོའི་སྒྲུབ་ཐབས་དང་འབྲེལ་བའི་ལས་ཚོགས་ཉི་ཤུ་རྩ་གཅིག་དང་། ཐུན་མོང་དུ་དགོས་པའི་ཡན་ལག་ལྔ་སྟེ་ཉི་ཤུ་རྩ་དྲུག་ལས། སོ་སོའི་ལས་ཚོགས་རྣམས་ལའང་བསྙེན་པ་དང་། སྒྲུབ་པ་དང་། ལས་ལ་སྦྱར་བའི་ཚུལ་རྒྱ་གཞུང་དང་། རྗེ་བཙུན་རིན་པོ་ཆེས་མཛད་པའི་གསལ་བྱེད་ས་བཅད་དང་བཅས་པ་རྣམས་ཞིབ་མོར་སྦྱར་ནས་རྒྱ་ཆེར་ཤེས་པར་བྱ་བ་ཉིད་དོ། །གྲུབ་ཆེན་ཉི་མ་སྦས་པའི་ལུགས། །འཕགས་མའི་རྗེས་གནང་སྒྲུབ་ཐབས་བཅས། །གསལ་བྱེད་སྐལ་བཟང་ཉེར་མཁོ་བའི། །ཚུལ་འདིས་གཞན་ལ་སྨན་གྱུར་ཅིག །ཅེས་གཞུང་སྔ་མ་དག་ལས་ཉེར་མཁོའི་ཚུལ་མདོ་ཙམ་བཏུས་པ་འདིའང་འཇམ་དབྱངས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་མངྒ་ལཾ་བྷ་བ་ཏུ།། །། ༈

[edit]

nyi sbas lcags kyi sgrol ma nyer gcig gi zin bris skal bzang nyer mkho/_ @#/_/nyi sbas lugs kyi sgrol ma nyer gcig gi zin bris skal bzang nyer mkho zhes bya ba bzhugs so/__/oM swa sti sid+d+haM/__'khor lo'i mgon po rje btsun mar/__/btud nas de yi sgrub pa'i thabs/__/nyi ma sbas pa'i zhal lung las/__/nyer mkho'i zin bris cung zad bri/__/'di la gsum/__/rjes su gnang ba dang /__bsnyen pa dang /__las sbyor gyi skabs su nye bar mkho ba'i zin bris so/__/dang po ni/__rmor chen rin po ches mdzad pa'i sgrub thabs dang rjes gnang gi cho ga blo gsal nyer mkho las rtsa ba'i sgrol ma seng lding nags sgrol spyir btang ltar mdzad pa ni gzhung de nyid du shes la/__yig rnying dang sgrub thabs rin 'byung sogs las sgrol ma spyi sgrub nyid rtsa bar bkod cing de'i rjes gnang yang bzhugs pas/__spyir sbyor dngos rjes gsum gyi chings rnams blo gsal nyer mkho ltar la bdag mdun gyi mngon rtogs kho bos byas pa'i rnal 'byor nyer mkho ltar sbyar/__bum pa spyi ltar bcas la bsang sbyangs/__stong pa'i ngang las pa~M las pad+ma dang a las zla ba'i dkyil 'khor gyi steng du b+h+rU~M las rin po che'i bum pa yangs shing rgya che ba/__lto ba ldir ba/__zhabs zhum pa/__mgrin pa phra ba/__kha g.yel ba/__mchu 'phyang ba/__lha rdzas kyi gos kyis mgul pa dkris shing /__dpag bsam gyi shing gis kha brgyan pa/__nang chu dang bcud sna tshogs kyis yongs su gang ba'i dbus su pad+ma dang zla ba'i gdan la tA~M yig sogs nas/__don yod grub pas dbur brgyan zhes pa'i bar mdun bskyed ltar/__rang gi snying ga nas sngags kyi phreng ba gzungs thag la brten nas song /__bum pa'i lha'i thugs kar zhugs pas thugs rgyud bskul/__sku dang sngags phreng las bdud rtsi'i rgyun babs pas bum pa gang bar bsams la bzlas pa ci nus mthar mchod bstod dang yi ge brgya pa brjod/__oM AHhU~M gis mchod yon phul bas bum pa'i lha mo 'od du zhu ba'i chu nus pa dang ldan par bsam/__gtor ma gzhung ltar dbul/__rjes gnang gi lo rgyus skabs/__thog mar thams cad kyi gzhi'am rtsa ba lta bur gyur pa sgrol ma spyi sgrub kyi rjes su gnang ba yin zhes sogs mtshan 'byin 'jug dang /__mngon rtogs kyi khyad par ma 'khrul bar sbyar/__ye shes dbab bstim rjes/__slar yang slob dpon gyi thugs ka nas 'od zer 'phros pas dbang gi lha rigs lnga mdun gyi nam mkhar oM badz+ra sa mA dzaH__de bzhin gshegs pa thams cad kyis 'di rnams la mngon par dbang bskur ba stsal du gsol/__nam mkhar bzhugs pa'i dbang gi lha dang slob dpon lhan cig pas/__ji ltar bltams pa tsam gyis sogs nas shrI ye hU~M/__zhes gsung zhing bum pa'i chus spyi bo nas dbang bskur sku gang /__dri ma dag__/chu'i lhag ma yar lud pa las don yod grub pas dbur brgyan pa'i mos pa mdzod/__des rje btsun ma 'phags ma sgrol ma'i sku'i rjes su gnang ba thob sogs sbrel/__bzlas lung gi rjes/__dam bca' ba'i slad du bcom ldan 'das ma 'phags ma sgrol ma 'di nyid ji srid byang chub ma thob kyi bar du yi dam du gzung ngo bdag thugs kyis ma gtong zhig snyam pa'i bsam pas 'di'i rjes zlos gsungs shig__/slob dpon dgongs su gsol/__bdag rig pa 'dzin pa ming 'di zhes bgyi ba dus 'di nas bzung ste/__ji srid byang chub snying po la mchis kyi bar du bcom ldan 'das ma 'phags ma sgrol ma yi dam gyi lhar bzung nas 'di'i gsang sngags nyi ma re re bzhin 'di tsam re 'don par dam bca' lags so/__/zhes lan gsum brjod/__des rje btsun ma 'phags ma sgrol ma'i gsung gi rjes su gnang ba thob sogs sbrel lo/__/gzhan yang yig rnying dang sgrub thabs rin 'byung sogs las dkar mo zla mdangs/__gser mdog can/__hU~M sgra sgrog ma/__bkra shis snang ba/__khro gnyer g.yo ba'i sgrol ma rnams zhabs kyi bzhugs stangs dmigs bsal med pas rdo rje'i skyil krung du mdzad/__rin 'byung las dgu pa mchog stsol sgrol ma'i 'phros don du seng ldeng nags sgrol gtso rkyang rmor chen gyi sgrub thabs dkyus las 'byung ba ltar dang /__gtso 'khor gsum ma gnyis bkod snang na'ang /__gtso 'khor gsum ma'i rjes gnang skabs 'dir na yam du bkod pa tsam yin pas rjes gnang dngos su mi dgos/__des na rmor chen gyi sgrub thabs dkyus ltar seng ldeng nags sgrol gyi rjes gnang dang /__'dir bshad pa ltar sgrol ma spyi sgrub kyi rjes gnang /__rmor chen pa'i yig cha ltar las tshogs so so'i rjes gnang nyer gcig bcas rjes gnang nyi shu rtsa gsum gyi rgyun so sor bzhugs pa yin pas phyag len ma nyams par bya/__de'ang las tshogs so so'i sgrub thabs kyi skabs rje btsun grags pa'i yig char mig sogs yan lag drug byin rlabs dang /__dbang bskur rgyas gdab rnams dgos par gsungs pa ni las kyi lha mo so so'i bsnyen pa byed pa'i skabs la dgongs shing /__rin 'byung du de ltar mi dgos par gsungs pa ni rjes gnang tsam kyi skabs zor yang ba'i dbang du mdzad pa yin/__bum dbang yang spyi sgrub ma gtogs gzhan la mi dgos par gsungs so/__/gnyis pa bsnyen pa ni/__de lta bu'i rjes su gnang bas rgyud smin cing dam tshig dang sdom par ldan pas 'di'i bsnyen pa bya ba'i tshul la gnyis/__spyi dang /__so so'i bsnyen pa'o/__/dang po ni/__gnas dben par 'di nyid kyi bris sku yod na bkram pa'i spyan sngar mchod gtor bsham/__mtshams dam du bcad la thun bzhi'i rim pas sgrol ma spyi sgrub kyi mngon par rtogs pa bsgoms nas/__sngags yi ge bcu pa 'bum phrag bcu gsum bzla bar bya'o/__/gnyis pa ni/__de lta bu'i rtsa ba'i bsnyen pa sngon du song bas las kyi lha mo nyi shu rtsa gcig po so so'i sgrub thabs ji skad bshad pa bzhin bsgoms la bzlas pa rab khri phrag bzhi/__'bring khri/__tha ma'ang stong phrag bzhi re bzlas pas las bsgrub pa la dbang ba yin no/__/gsum pa las tshogs ni/__sgrol ma spyi sgrub dang 'brel ba'i las tshogs srung ba/__zhi ba/__dbang /__rgyas pa/__shes rab sogs spel ba rnams rje btsun rin po che'i yi ge las ji ltar 'byung ba bzhin nyams su blang bar bya zhing /__de'ang sgom pa dang /__bzlas pa dang /__bris pa'i 'khor lo'i sgo nas las la sbyar ba'i tshul lha dang /__'khor lo dang /__yi ge'i kha dog so sor bsgyur ba sogs khyad par drug gi sgo nas ma 'dres par rtogs par bya'o/__/bye brag gi las tshogs ni/__rje btsun rin po ches/__phyir zlog yams zhi tshe 'phel gsad pa dang /___/dbang byed sgrib sbyong 'pho ba rdzogs rim dang /__/rab gnas dbang bskur nor spel sbyin sreg dang /__/'byung po bzlog dang 'khrul 'khor khrus chog dang /__/blo 'phel chom rkun bcings dang klu nad gso/__/khri mon las thar mi snang mkha' spyod do/__/spyir 'gro'i yan lag rnam pa lnga yin te/__/gtor ma chu sbyin sAts+tsha dus gsum brtag__/bu chung gzhon nu bskyed bsrung dang bcas te/__/las kyi rnam grangs nyi shu rtsa drug yin/__/zhes gsungs pa ltar sgrol ma so so'i sgrub thabs dang 'brel ba'i las tshogs nyi shu rtsa gcig dang /__thun mong du dgos pa'i yan lag lnga ste nyi shu rtsa drug las/__so so'i las tshogs rnams la'ang bsnyen pa dang /__sgrub pa dang /__las la sbyar ba'i tshul rgya gzhung dang /__rje btsun rin po ches mdzad pa'i gsal byed sa bcad dang bcas pa rnams zhib mor sbyar nas rgya cher shes par bya ba nyid do/__/grub chen nyi ma sbas pa'i lugs/__/'phags ma'i rjes gnang sgrub thabs bcas/__/gsal byed skal bzang nyer mkho ba'i/__/tshul 'dis gzhan la sman gyur cig__/ces gzhung snga ma dag las nyer mkho'i tshul mdo tsam btus pa 'di'ang 'jam dbyangs bla ma dgyes pa'i 'bangs mkhyen brtse'i dbang pos bris pa mang+ga laM b+ha ba tu//____//__!