JKW-KABUM-12-NA-014-003

🚧 This website is under continued development. We appreciate your patience!

Previous Section Back to Volume PageNext Section

Wylie title		page=1
Location	mkhyen brtse'i bka' 'bum Volume 14, sde tshan 3, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum

Tibetan Text

Wylie

[edit]

རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས། རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས་བཞུགས་སོ། །རྡོར་སེམས་ཐུགས་ཀྱི་སྒྲུབ་པའི་བསྙེན་པ་གཏོང་ལུགས། ཐོག་མར་གནས་ཁང་ཕྱག་དར་བྱ། གཏོར་སྒམ་ལྟ་བུ་བྱི་བས་མི་གནོད་པར། སྨན་རག་གཏོར་གསུམ། དམ་ཅན་སྤྱི་གཏོར། ཉེར་སྤྱོད་བཅས་རྒྱུན་བཞག་རྒྱུར་བཤམ། གུང་དུ་རྡོར་སེམས་ཕྱག་རྒྱ་གཅིག་པའི་བྲིས་སྐུ་ཡོད་ན་དགྲམ། རང་ཉིད་དང་ཞལ་སྤྲོད་བྱུང་ན་ལེགས། མར་ངོའི་གཟའ་ཚེས་དགེ་བར་ཕྱི་དྲོའི་ཆར་སྒོ་དྲུང་དུ་ཐོ་བརྟན་པོར་བཙུགས། མལ་དུ་འཁོད་ནས་སྔོན་འགྲོ་གཏོང་། ཆོ་ག་ལྟར་བསང་ཆུ་བསྒྲུབ། གཞི་བགེགས་ལ་དཀར་དམར་གཏོར་མ་གཏོང་། ཕྱི་རོལ་དུ་རྒྱལ་ཆེན་ཐོ་འཛུགས་བྱ། ནང་དུ་ལོག་ལ་སྲུང་འཁོར་བསྒོམ། མཆོད་པ་བྱིན་རླབས་བྱ། དམ་ཚིག་གི་འཁོར་ལོ་བསྐྱེད་པ་ནས་བཟླས་པའི་བར་བདག་བསྐྱེད་ལྟར། བཟླས་པ་ཅི་ནུས་བྱ། མཇུག་གི་གསོལ་གདབ་སོགས་མཐར་དབྱུང་། དམ་ཅན་སྤྱི་གཏོར་བཀྲ་ཤིས་བར་འདོན། ཐུན་གྲོལ། སླར་སྲོད་ཐུན་ལ་འཇུག །དེའང་བདག་བསྐྱེད་བརྒྱུད་འདེབས་ནས་བཀྲ་ཤིས་བར། སང་ཉིན་སྔ་བར་ལངས་ལ། ཐོར་ཐུན་གྱི་མགོར་སྔོན་འགྲོ་སོགས་ཁ་ཏོན་གཞན་ཅི་རིགས་དང་། དེ་ནས་རྡོར་སེམས་སྔོན་འགྲོ། དལ་འབྱོར་རྙེད་དཀའ་སོགས་ཀྱི་གསལ་འདེབས་སྔོན་དུ་འགྲོ་བས་སྐྱབས་འགྲོ་གཙོ་བོར་བསགས། ཐུན་གྲོལ་རན་པ་ན་སེམས་བསྐྱེད་མན་སྔོན་འགྲོ་མཐར་དབྱུང་། དངོས་གཞི་བརྒྱུད་འདེབས་ནས་བཀྲ་ཤིས་བར་བདག་བསྐྱེད་ཁྱུགས་ཙམ་རེ་བྱ། དེ་ནས་ཐོར་ཐུན་གྲོལ། དེ་བཞིན་དུ་སྔ་ཐུན། ཕྱི་ཐུན། སྲོད་ཐུན་རྣམས་ལ་མ་གཞི་འདོན་ལུགས་འདྲ། ཕྱི་ཐུན་གྱི་མཇུག་ཏུ་དམ་ཅན་སྤྱི་གཏོར་བྱ། དེ་ལྟ་བུའི་རིམ་པས་སྐྱབས་འགྲོ། སེམས་བསྐྱེད། ཡིག་བརྒྱ། མཎྜལ། བླ་མའི་རྣལ་འབྱོར་ཡན་ལག་བདུན་པ་དང་སྦྲགས་ནས་ཕྱག །བླ་མའི་གསོལ་འདེབས་ཤྭ་ལོ་ཀ་གང་རུང་རྣམས་ཁྲི་སོགས་འདོན། དེ་ལྟར་སྔོན་འགྲོ་གྲུབ་ནས་བསྙེན་པ་དངོས་ལ་འཇུག །དེའང་ཐུན་བཞི་ཀའི་མགོར་སྔོན་འགྲོ་ཁྱུགས་ཙམ་རེ་བྱ་བའམ། ཡང་ན་ཐོར་ཐུན་གྱི་མགོར་ཚར་གཅིག་བྱས་ཀྱང་ཆོག གང་ལྟར་ཡང་བདག་བསྐྱེད་བརྒྱུད་འདེབས་ནས་བཀྲ་ཤིས་པར་ཐུན་རེ་བཞིན་བྱ། ཐུན་གྱི་དངོས་གཞིར། དང་པོ་ཡིག་དྲུག་འབུམ་ཕྲག་བདུན་མ་གྲུབ་པར་བསགས། མཇུག་ཏུ་ཡིག་བརྒྱ་ཅུང་ཟད་རེས་ཆོག །དེ་ཚར་ནས་ཡིག་དྲུག་ཅུང་ཟད་རེ་སྔོན་དུ་འགྲོ་བས་ཡིག་བརྒྱ་ཁོ་ན་གསོག །གྲངས་འབུམ་ཕྲག་གཅིག་དང་ཁྲི་ཕྲག་གཅིག་ལས་མི་ཉུང་བ་བཟླ། དམ་ཅན་སྤྱི་གཏོར་ཕྱི་ཐུན་ཐམས་ཅད་ཀྱི་མཇུག་ཏུ་མ་ཆག་པར་བྱ་དགོས། ཚེས་བརྒྱད་དང་ཡར་མར་ཚེས་བཅུ་སོགས་དུས་བཟང་སྐབས་ཚོགས་མཆོད་མདོར་བསྡུས་རེ་གྲུབ་ན་ལེགས་པས། དམ་ཅན་སྤྱི་གཏོར་གྱི་གཞི་བདག་གཏོར་མ་ཚར་རྗེས། ཡེ་ཤེས་སྐུ་མཆོག་སྔོན་དུ་འགྲོ་བས་ཚོགས་བྱིན་རླབས་ནས་བསྒྲལ་སྟོབ་བར་དཀྱུས་ལྟར། དེ་རྗེས་ཚོགས་ལ་རོལ། ལྷག་མ་གཏོང་། དམ་ཅན་སྤྱི་གཏོར་གཏོར་འབུལ་མན་མཐར་དབྱུང་། དེ་ལྟར་ཐུན་བཞིའི་རིམ་པས་བསྙེན་སྒྲུབ་ཀྱི་སྔགས་གྲངས་རྫོགས་ནས་དངོས་གྲུབ་ལེན་ཆོག་མདོར་བསྡུས་བསྙེན་ཡིག་ལྟར་བྱ། དེ་སྔ་དྲོ་གྲུབ་འཕྲལ་མདུན་བསྐྱེད་སྒྲུབ་མཆོད་ཉིན་ཞག་བདུན་ཙམ་བྱུང་ན་ལེགས་པས། རང་གི་མདུན་དུ་སྟེགས་ཇི་ལྟར་རིགས་པར་དཀྱིལ་འཁོར་མཆོད་གཏོར་སོགས་བཤམས། ཕྱི་ཐུན་ནས་དབུ་བཟུང་སྒྲུབ་མཆོད་ཚར་རེ་རྣམ་གྲོལ་ལམ་བཟང་ལྟར་བྱ། སང་ཉིན་ནས་བཟུང་ཐོར་ཐུན་དང་སྲོད་ཐུན་ལ་བདག་བསྐྱེད་ཚར་རེ་གཏོང་། སྔ་ཐུན་དང་ཕྱི་ཐུན་ལ་སྒྲུབ་མཆོད་ཚར་རེ་བྱེད། དེ་ལྟར་ཉིན་བདུན་དང་དང་པོའི་ཕྱི་ཐུན་བཅས་བསྡོམས་པས་ཆོ་ག་ཚར་བཅོ་ལྔ་འགྲོ། སྒྲུབ་མཆོད་ཚར་བའི་ཕྱི་ཉིན་ནས་ཞག་གསུམ་ལ་སྔ་ཐུན་དང་ཕྱི་ཐུན་ལ་ཞི་བའི་སྦྱིན་སྲེག་ཚར་རེ་བྱ། གྲངས་རྫས་ཏིལ་སྔགས་ཡིག་དྲུག་ཕྲེང་སྐོར་རེའི་གཤམ་དུ། ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། སྡིག་པ་དང་སྒྲིབ་པ་སྔགས་ཀྱི་ལྷག་ཆད་ཐམས་ཅད་ཤཱནྟིཾ་ཀུ་རུ་སྭཱ་ཧཱ། ཞེས་སྦྱར། དེ་ལྟ་བུའི་རིམ་པས་ཐུན་རེར་སྟོང་ཕྲག་ལྔ་རེ་ཙམ་བྱ། དེ་ལྟར་བྱས་པས་ཉིན་གསུམ་ལ་ཆོ་ག་ཚར་དྲུག །ཉིན་བཞི་པར་སྔ་ཆོག་ཚར་གཅིག་བཅས་བདུན་འགྲོ་བར་བྱས་ནས། སྔ་དྲོ་རྒྱལ་ཐོ་ལེན་འཚམས་གྲོལ་བས་གྲུབ། སྤྱིར་བསྙེན་པ་ཐམས་ཅད་མར་ངོའི་ཕྱི་དྲོ་ལ་མགོ་བཙུགས། ཡར་ངོའི་སྔ་དྲོ་ལ་གྲོལ་བ་ཕྱག་ལེན་དང་། ཚེ་སྒྲུབ་རིགས་ལ་ཡར་ངོའི་སྔ་དྲོ་ལ་མགོ་བཙུགས། ཡར་ངོའི་སྔ་དྲོ་ཞིག་ལ་གྲོལ་བར་མཛད་སྲོལ་སྣང་ངོ་། །ཞེས་པའང་བློ་དམན་གསར་བུ་འགའ་ལ་ཕན་ཕྱིར་མཁྱེན་བརྩེའི་དབང་པོས་སོ། ། ༈

[edit]

rdor sems thugs kyi sgrub pa'i bsnyen pa gtong lugs/ rdor sems thugs kyi sgrub pa'i bsnyen pa gtong lugs bzhugs so/__/rdor sems thugs kyi sgrub pa'i bsnyen pa gtong lugs/__thog mar gnas khang phyag dar bya/__gtor sgam lta bu byi bas mi gnod par/__sman rag gtor gsum/__dam can spyi gtor/__nyer spyod bcas rgyun bzhag rgyur bsham/__gung du rdor sems phyag rgya gcig pa'i bris sku yod na dgram/__rang nyid dang zhal sprod byung na legs/__mar ngo'i gza' tshes dge bar phyi dro'i char sgo drung du tho brtan por btsugs/__mal du 'khod nas sngon 'gro gtong /__cho ga ltar bsang chu bsgrub/__gzhi bgegs la dkar dmar gtor ma gtong /__phyi rol du rgyal chen tho 'dzugs bya/__nang du log la srung 'khor bsgom/__mchod pa byin rlabs bya/__dam tshig gi 'khor lo bskyed pa nas bzlas pa'i bar bdag bskyed ltar/__bzlas pa ci nus bya/__mjug gi gsol gdab sogs mthar dbyung /__dam can spyi gtor bkra shis bar 'don/__thun grol/__slar srod thun la 'jug__/de'ang bdag bskyed brgyud 'debs nas bkra shis bar/__sang nyin snga bar langs la/__thor thun gyi mgor sngon 'gro sogs kha ton gzhan ci rigs dang /__de nas rdor sems sngon 'gro/__dal 'byor rnyed dka' sogs kyi gsal 'debs sngon du 'gro bas skyabs 'gro gtso bor bsags/__thun grol ran pa na sems bskyed man sngon 'gro mthar dbyung /__dngos gzhi brgyud 'debs nas bkra shis bar bdag bskyed khyugs tsam re bya/__de nas thor thun grol/__de bzhin du snga thun/__phyi thun/__srod thun rnams la ma gzhi 'don lugs 'dra/__phyi thun gyi mjug tu dam can spyi gtor bya/__de lta bu'i rim pas skyabs 'gro/__sems bskyed/__yig brgya/__maN+Dal/__bla ma'i rnal 'byor yan lag bdun pa dang sbrags nas phyag__/bla ma'i gsol 'debs shwa lo ka gang rung rnams khri sogs 'don/__de ltar sngon 'gro grub nas bsnyen pa dngos la 'jug__/de'ang thun bzhi ka'i mgor sngon 'gro khyugs tsam re bya ba'am/__yang na thor thun gyi mgor tshar gcig byas kyang chog__gang ltar yang bdag bskyed brgyud 'debs nas bkra shis par thun re bzhin bya/__thun gyi dngos gzhir/__dang po yig drug 'bum phrag bdun ma grub par bsags/__mjug tu yig brgya cung zad res chog__/de tshar nas yig drug cung zad re sngon du 'gro bas yig brgya kho na gsog__/grangs 'bum phrag gcig dang khri phrag gcig las mi nyung ba bzla/__dam can spyi gtor phyi thun thams cad kyi mjug tu ma chag par bya dgos/__tshes brgyad dang yar mar tshes bcu sogs dus bzang skabs tshogs mchod mdor bsdus re grub na legs pas/__dam can spyi gtor gyi gzhi bdag gtor ma tshar rjes/__ye shes sku mchog sngon du 'gro bas tshogs byin rlabs nas bsgral stob bar dkyus ltar/__de rjes tshogs la rol/__lhag ma gtong /__dam can spyi gtor gtor 'bul man mthar dbyung /__de ltar thun bzhi'i rim pas bsnyen sgrub kyi sngags grangs rdzogs nas dngos grub len chog mdor bsdus bsnyen yig ltar bya/__de snga dro grub 'phral mdun bskyed sgrub mchod nyin zhag bdun tsam byung na legs pas/__rang gi mdun du stegs ji ltar rigs par dkyil 'khor mchod gtor sogs bshams/__phyi thun nas dbu bzung sgrub mchod tshar re rnam grol lam bzang ltar bya/__sang nyin nas bzung thor thun dang srod thun la bdag bskyed tshar re gtong /__snga thun dang phyi thun la sgrub mchod tshar re byed/__de ltar nyin bdun dang dang po'i phyi thun bcas bsdoms pas cho ga tshar bco lnga 'gro/__sgrub mchod tshar ba'i phyi nyin nas zhag gsum la snga thun dang phyi thun la zhi ba'i sbyin sreg tshar re bya/__grangs rdzas til sngags yig drug phreng skor re'i gsham du/__oM sarba pA paM da ha na badz+ra ya swA hA/__sdig pa dang sgrib pa sngags kyi lhag chad thams cad shAn+tiM ku ru swA hA/__zhes sbyar/__de lta bu'i rim pas thun rer stong phrag lnga re tsam bya/__de ltar byas pas nyin gsum la cho ga tshar drug__/nyin bzhi par snga chog tshar gcig bcas bdun 'gro bar byas nas/__snga dro rgyal tho len 'tshams grol bas grub/__spyir bsnyen pa thams cad mar ngo'i phyi dro la mgo btsugs/__yar ngo'i snga dro la grol ba phyag len dang /__tshe sgrub rigs la yar ngo'i snga dro la mgo btsugs/__yar ngo'i snga dro zhig la grol bar mdzad srol snang ngo /__/zhes pa'ang blo dman gsar bu 'ga' la phan phyir mkhyen brtse'i dbang pos so/__/_!