JKW-KABUM-07-JA-010

From Khyentse Lineage - A Tsadra Foundation Project
Revision as of 13:41, 19 May 2021 by Mort (talk | contribs)
Previous Section"JA" is not a number. Back to Volume Page"JA" is not a number.Next Section "JA" is not a number.

དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ།
Wylie title dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo JKW-KABUM-07-JA-010.pdf
Location mkhyen brtse'i bka' 'bum
Volume Expression error: Unrecognized word "ja"., sde tshan 10, Pages (Folios to )
Author འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre Collected Works - Selected - bka' 'bum "JA" is not a number.

1 Texts in this Section (sde tshan or chos tshan)

165-208
དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ།
 dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo
Generation Stage - bskyed rim
  ·  
Completion Stage - rdzogs rim
 Text page
View PDF
[[|འཇམ་དབྱངས་མཁྱེན་བརྩེའི་དབང་པོ་ ()]]

"JA" is not a number.

[edit]
༄༅། །དཔལ་འཁོར་ལོ་བདེ་མཆོག་ལཱུ་ཧི་པའི་བསྐྱེད་རྫོགས་ཀྱི་སྙིང་པོ་ཤིན་ཏུ་བསྡུས་པ་བདེ་ཆེན་འདོད་འཇོ་ཞེས་བྱ་བ་བཞུགས་སོ།།

ཨོཾ་སྭསྟི་སིདྡྷཾ། གང་གི་དྲིན་གྱིས་ལྷན་སྐྱེས་བདེ་བ་མཆོག །སྩོལ་མཛད་འཁོར་ལོའི་དབང་ཕྱུག་བླ་མ་ལ། །བཏུད་ནས་དངོས་གྲུབ་མཆོག་བརྙེས་ལཱུ་ཧི་པའི། །གདམས་ཟབ་བསྐྱེད་རྫོགས་སྙིང་པོ་ཅུང་ཟད་དབྱེ། །འདི་ལ་གཉིས། རྒྱུད་ལས་ཇི་ལྟར་གསུངས་པའི་ཁུངས་དགོད་པ་དང་། མངོན་པར་རྟོགས་པ་བསྒོམ་ཚུལ་བྱེ་བྲག་ཏུ་བཤད་པའོ། །དང་པོ་ལ་གསུམ། རྩ་རྒྱུད་ཀྱི་གླེང་གཞིའི་གསང་བ་ཞེས་པའི་ཚིག་གིས་བསྟན་པའི་ལམ་རིམ་དང་། ལེའུ་ལྔ་བཅུ་རྩ་གཅིག་པའི་དེ་ཁོ་ན་ཉིད་བཅུ་བཞིས་བསྟན་པའི་ལམ་རིམ་དང་། བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པའོ། །དང་པོ་ནི། རྩ་རྒྱུད་ཀྱི་ཐོག་མར། དེ་ནས་གསང་བ་བཤད་བྱ་བ། །ཞེས་བྱ་བའི་གསང་བ་ཞེས་པའི་ཚིག་ངེས་དོན་དུ་བཤད་ན། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེ་དག་གི་བསྒྲུབས་པའི་འབྲས་བུ་གསུམ་བསྟན་པ་ལས། དང་པོ་ནི། གསང་བ་མཆོག་གི་དགེས་པ་ན། །ཞེས་སོགས་ཚིག་བཅད་གཉིས་ཀྱི་སྟོན་ཏེ། འདི་ལ་རྟེན་ལ་སྦྱར་བ་དང་། བརྟེན་པ་ལ་སྦྱར་བ་གཉིས་ལས། དང་པོ་ནི། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྣལ་འབྱོར་པའི་རྟེན་རི་བོ་ཚང་ཚིང་རི་སུལ་ལ་སོགས་པ་སྟོན་ཅིང་། ལྷའི་རྟེན་མངལ་སྐྱེས་སྒོང་སྐྱེས་གང་བསྒོམ་ཡང་རླུང་གི་དཀྱིལ་འཁོར་ནས་རི་རབ་ཀྱི་བར་བསྟན་ནོ། །ཡང་ལྷའི་རྟེན་ཐུན་མོང་མ་ཡིན་པ་ཆོས་འབྱུང་ནས་གཞལ་ཡས་ཁང་གི་བར་ཡང་བསྟན་ནོ། །བརྟེན་པ་ལྷ་བསྐྱེད་པ་ལ། མཁའ་འགྲོ་ཀུན་དངོས་སེམས་པ་ནི། ཞེས་པ་ནས། དམ་ཚིག་སྤྱོད་པའི་སྤྱོད་ཡུལ་ཡིན། ཞེས་པའི་བར་ཚིག་རྐང་བ་དྲུག་གིས་མངལ་སྒོང་གཉིས་ཆར་གྱི་བསྐྱེད་རིམ་རྫོགས་པར་བསྟན་ནོ། །གཉིས་པ་རྫོགས་པའི་རིམ་པ་ལ་སྦྱར་ན། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྫོགས་རིམ་རིམ་བཞིའི་དང་པོ་ཤེས་བྱ་རྒྱུད་ཀྱི་རིམ་པ་བསྟན། སྒྲ་ཡི་ཚུལ་ལ་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཡིན། །ཅེས་པས་སྔགས་ཀྱི་རིམ་པ་བསྟན། །མཁའ་འགྲོ་ཀུན་དངོས་སེམས་པ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པས་ཡེ་ཤེས་ཀྱི་རིམ་པ་བསྟན། །འདི་ནི་རང་བྱུང་བཅོམ་ལྡན་པ། །མཁའ་འགྲོ་དྲྭ་བའི་སྡོམ་པ་ནི། །ཞེས་པས་གསང་བའི་རིམ་པ་བསྟན་ཏེ། དེ་ལྟར་ན་གསང་བ་ཞེས་དང་། དེའི་དོན་ཚིགས་བཅད་གཉིས་ཀྱིས་ལམ་གྱི་གསང་བ་བསྐྱེད་རྫོགས་གཉིས་ཀ་སྟོན་པས། འཁོར་ལོ་བདེ་མཆོག་གི་ལམ་གྱི་རིམ་པ་མ་ལུས་པ་བསྟན་ནོ། །གསུམ་པ་དེ་དག་གིས་བསྒྲུབས་པའི་འབྲས་བུ་གསང་བ་ནི། ཐུན་མོང་དང་མཆོག་གི་དངོས་གྲུབ་སྟེ། །སྔགས་བཟླས་བསམ་གཏན་ལ་སོགས་ལྡན། །ཆོ་གའི་སྦྱོར་ཉིད་ཡེ་ཤེས་ཀྱང་། །ཞེས་པས་བསྟན་ནོ། །གཉིས་པ་ནི། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲ། །ཨཱ་ལི་ཀཱ་ལི་ཞེས་བརྗོད་པ། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་ཞིང་། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོས་ཡང་དག་བསྲུང་། །སྔགས་རྣམས་ཀུན་གྱིས་མཆོད་པ་ཡིན། དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་ཏེ། འདི་ཉིད་ལྷ་མངལ་སྐྱེས་ལྟར་ན། བསྐྱེད་རིམ་འབའ་ཞིག་གི་མཉམ་བཞག་རྗེས་སྤྱོད་དང་བཅས་ལ་སྦྱར་བ་དང་། ལྷ་སྒོང་སྐྱེས་ལྟར་ན། བསྐྱེད་རྫོགས་མ་ལུས་པ་སྦྱར་བ་གཉིས་ལས། འདིར་ཕྱི་མ་ལྟར་བཤད་ན། གོས་ནི་ཕན་འདོགས་པས་གོས་ཞེས་བྱ་སྟེ། བསྐྱེད་རིམ་གྱི་སྔོན་འགྲོ་ཚངས་པའི་གནས་བཞི་བསྒོམ་པ་ལ་སོགས་པའོ། །ཕྱག་རྒྱ་ལྔ་ལ་སོགས་པ་ནི་མཉམ་བཞག་གི་དུས་ཀྱི་དཔའ་བོ་དཔའ་མོ་རྣམས་ཀྱི་སྐུ་ལ་ཡོད་པའི་རྒྱན་ནོ། །ཤེས་རབ་ཡན་ལག་ནི་ཕུང་པོ་དང་ཁམས་དང་སྐྱེ་མཆེད་ཀྱི་དག་པ་དྲན་པའོ། །ཕུར་བུ་དྲ་བ་ནི་རྗེས་སྤྱོད་ཀྱི་དུས་སུ་ཚམ་རྔམ་སྔགས་ཀྱིས་སྲུང་བ་བྱེད་པའོ། །ཨཱ་ལི་ཀཱ་ལི་ཞེས་བརྗོད་པ་ནི་ངག་དག་པར་བྱེད་པ་སྟེ། དེས་མཚོན་ནས་ཐོག་མ་ཉིད་དུ་ལུས་ངག་ཡིད་གསུམ་དག་པར་བྱ་བའོ། །རྒྱུ་སོགས་བསོད་ནམས་ཀྱི་ཚོགས། སྟོང་པ་སྔོན་འགྲོ་བ་ཡེ་ཤེས་ཀྱི་ཚོགས་སོ། །འཇུག་པ་ནི་སེམས་ཅན་གྱི་དོན་ལ་འཇུག་ཅིང་སྤྲོ་བ་ཡིན་ལ། སྒྲ་ལ་སོགས་པས་ནི། སྟོང་པའི་ངང་ལས་འབྱུང་བ་རིམ་བརྩེགས་སྣ་ཚོགས་པདྨའི་བར་དུ་བསྐྱེད་པ་དང་། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེའི་བར་དུ་ཧཱུྃ། ཉི་མའི་སྟེང་དུ་ཡི་གེ་གསུམ་རིམ་པ་བཞིན་དུ། དེའི་སྟེང་དུ་པདྨ། དེའི་སྟེང་དུ་ཟླ་བ། དེའི་སྟེང་དུ་ཧཱུྃ་སྟེ་ཡི་གེ་གསུམ་མས་རིམ་གྱིས་གཅིག་ལ་གཅིག་ཐིམ་ནས་ཧཱུྃ་གི་ཐིག་ལེ་ནཱ་དར་གྱུར་པའི་བར་ནི་སྒྲ་ཡིན་ལ། སོགས་པ་ཞེས་པའི་ནི་ནཱ་ད་སྒྲ་དེ་ཉི་ཟླའི་བར་གྱི་ཚུལ་ཧཱུྃ་ལ་ཐིམ་སྟེ། དེ་ཐམས་ཅད་གྱུར་པ་ལས། རྟེན་བརྟེན་པ་ཐམས་ཅད་དུས་གཅིག་ལ་བསྐྱེད་པའོ། །དེ་ནས་བརྩམ་ནས། ཇི་སྲིད་བསྡུས་པའི་སྦྱོར་ལྡན་ཞིང་ནི། སྤྲུལ་སྐུ་ལ་དམིགས་པའི་རྗེས་ལ་ལུས་དཀྱིལ་བསྒོམ་པ་དང་། ལོངས་སྤྱོད་རྫོགས་པའི་སྐུ་ལ་དམིགས་པ་དང་། བྱང་ཆུབ་ཀྱི་ཕྱོགས་ཀྱི་དག་པ་དྲན་པ་དང་། །ཆོས་ཀྱི་སྐུ་ལ་དམིགས་པའི་བར་དང་། ཡེ་ཤེས་སེམས་དཔའ་སྤྱན་དྲང་བའི་བར་བསྡུ་བའོ། །བདུད་རྩི་ཚིམ་བྱེད་ནི་མཆོད་པ་བྱེད་པའི་དུས་སུ་བདུད་རྩི་མྱོང་བའོ། མྱ་ངན་འདས་ནི་ཕྱག་རྒྱ་བཞི་དང་། རྡོ་རྗེ་སེམས་དཔའ་བསྡུ་བ་སོགས་རྫོགས་རིམ་བསྒོམ་པ་སྟེ། དེ་ལྟར་དེ་ཁོ་ན་ཉིད་བཅུ་པ་དེས་ནི་མཉམ་གཞག་ཁོ་ན་བསྟན་ཏོ། །ལག་པའི་མཆོད་པ་ལ་སོགས་པ་བཞི་ནི་རྗེས་སྤྱོད་ཁོ་ན་སྟེ། རྗེས་སྤྱོད་ཀྱི་དུས་སུ་ལག་མཆོད་བྱ་བ་དང་། དབང་བསྐུར་བ་ཁྲུས་ཀྱི་རྣལ་འབྱོར་བྱ་བ་དང་། རྗེས་ཀྱི་དུས་སུ་གོ་ཆ་ཆེན་པོས་བདག་ཉིད་བསྲུང་བ་དང་། རྩ་བའི་སྔགས་བརྗོད་པ་ལ་སོགས་པའི་སྔགས་རྣམས་ཀུན་གྱིས་མཆོད་པ་བྱ་བ་སྟེ། དེ་ལྟར་ན་འབྲས་བུ་འགྲུབ་པ་ལ་མི་བསླུ་ཞིང་། སྒྲུབ་པ་པོ་ལ་ཕན་འདོགས་པར་བྱེད་པ་དེ་ཁོ་ན་ཉིད་བཅུ་བཞི་པོ་དེ་ནི། བདེ་མཆོག་ཉུང་ངུའི་རྒྱུད་འདིར། འབུམ་ཕྲག་གསུམ་པའི་རྒྱུད་ལས། མདོར་བསྡུས་ནས་བཤད་པ་ཡིན་ནོ། །གསུམ་པ་ནི། བཤད་རྒྱུད་ཀུན་སྤྱོད་ལས་གསུངས་པའི་ལམ་གྱི་རིམ་པ་ལ་གཉིས་ཏེ། རྒྱུད་ཀྱི་བརྗོད་བྱ་མ་ལུས་པ་འཁྲུགས་བསྡེབས་པའི་ལམ་རིམ་དང་། ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བའོ། །དང་པོ་ནི། རྣལ་འབྱོར་མ་ཀུན་ཏུ་སྤྱོད་པའི་བརྗོད་བྱ་ཐམས་ཅད་གཉིས་སུ་བསྡུ་བ་དང་། གསུམ་དུ་བསྡུ་བ་དང་། བཞིར་བསྡུ་བ་དང་གསུམ་ལས། །དང་པོ་ནི། དེ་བཞིན་གཤེགས་པའི་དབུགས་དབྱུང་དང་། རྡོ་རྗེ་འཛིན་པའི་དབུགས་དབྱུང་གཉིས་ཏེ། དེ་ཉིད་རྒྱུའི་དབང་དུ་བྱས་ན་ཀུན་རྫོབ་ཀྱི་བདེན་པ་ནི་དེ་བཞིན་གཤེགས་པའི་དབུགས་དབྱུང་། དོན་དམ་པའི་བདེན་པ་ནི་རྡོ་རྗེ་འཛིན་པའི་དབུགས་དབྱུང་། ལམ་གྱི་དབང་དུ་བྱས་ན་བསྐྱེད་རིམ་དང་། རྫོགས་རིམ་གཉིས། འབྲས་བུའི་དབང་དུ་བྱས་ན་གཟུགས་སྐུ་དང་། ཆོས་སྐུ་གཉིས་ལ་དབུགས་དབྱུང་གཉིས་སྦྱར་དགོས་ཏེ། ཀུན་སྤྱོད་ལས། རྒྱུད་འདི་ཡི་ནི་རྣལ་འབྱོར་པ། །བདེན་པ་གཉིས་ལ་ཡང་དག་བརྟེན། །ཞེས་དང་། ཀུན་སྤྱོད་ལེའུ་བཅུ་གསུམ་པ་ལས། བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་བརྟེན་པ་ཡིན། །ཞེས་དང་། ལེའུ་བཅུ་གཅིག་པ་ལས། བདེ་གཤེགས་དབུགས་དབྱུང་གསུངས་པ་ནི། །དག་པའི་ལུས་ནི་སྐྱོན་མེད་པ། །ཞེས་གསུངས་པས་སོ། །གཉིས་པ་ནི། ལམ་གྱི་ཀུན་ཏུ་སྤྱོད་པ་དང་། དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་དང་། འབྲས་བུའི་ཀུན་ཏུ་སྤྱོད་པ་གསུམ་དུ་འདུས་སོ། །གསུམ་པ་ནི། དེའི་སྔོན་དུ་རྒྱུའི་ཀུན་སྤྱོད་སྔོན་དུ་སོང་བས་ཉམས་སུ་ལེན་པའི་རྟེན་གྱི་གང་ཟག་བགྲངས་ན་བཞིར་འགྱུར་རོ། །དེ་ལྟར་བཤད་ན་རྟེན་གྱི་གང་ཟག་ལ་གཉིས་ཏེ། ལམ་ལ་འཇུག་པ་དང་། ཞུགས་པའོ། །དང་པོ་ལ་གསུམ། མི་དགེ་བ་འབའ་ཞིག་སྤྱོད་པ་ལམ་དག་པ། ཕ་རོལ་ཏུ་ཕྱིན་པས་རྒྱུད་ཅི་རིགས་སྦྱངས་བ་དག་པ། རེས་སྡིག་པ། རེས་དགེ་བ་སྤྱོད་པ་འདྲེས་པ་སྟེ། དེ་སྐད་དུ། དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །ཞེས་གསུངས་པས་སོ། །ལམ་ཞུགས་ལའང་གསུམ་སྟེ། བསྐྱེད་རིམ་འབའ་ཞིག་ལ་དགའ་བ་མཉེས་པར་བྱེད་པའི་སྒྲུབ་པ་པོ་དང་། རྫོགས་རིམ་འབའ་ཞིག་བསྒོམ་པ་རྣམ་པར་དག་པའི་སྒྲུབ་པ་པོ་དང་། ཟུང་དུ་འཇུག་པ་ལ་དགའ་བ་གསལ་བྱེད་ཡོན་ཏན་ལྡན་པ་ཞེས་བྱ་བ་སྟེ། དེ་ཡང་། མཉེས་བྱ་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མི། །ཞེས་གསུངས་པ་ཡིན་ནོ། །ཡང་རྒྱུད་འདིར་ནི་གང་ཟག་གཉིས་ཏེ། སྤང་བར་བྱ་བ་དང་། བསྒྲུབ་པར་བྱ་བའི་གང་ཟག་གོ། །དང་པོ་ནི། ལེའུ་བཅུ་གཅིག་པ་ལས། ལྐུགས་ཤིང་གླེན་པ་སྡིག་དང་ལྡན། །བྱིས་པའི་ཤེས་པས་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་བ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང་། །ཁེངས་པ་ལ་ནི་རྟག་དགའ་བ། །ང་རྒྱལ་ལ་སོགས་བདུན་སེམས་ལྡན། །དེ་དག་ཀུན་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཞེས་པའི་ཡན་ལག་གསུངས་པ་དང་། །སྒྲུབ་པའི་མཚན་ཉིད་ཀྱང་དེ་ཉིད་ལས། །བླ་མའི་རིམ་པ་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བོ་བྱེ་བ་སྟོང་ཕྲག་ཏུ། །ང་ཡི་ཡེ་ཤེས་ཀྱིས་བསྐུལ་ཡིན། དད་པ་ཡང་དག་ལྡན་པ་དང་། །རྣལ་འབྱོར་སྤྱོད་ཚུལ་ལ་གནས་ཡིན། །ཞེས་གསུངས་ལ། ལེའུ་དང་པོ་ལ་རྣལ་འབྱོར་གྱི་དབང་ཕྱུག་ཅེས་གསུངས་སོ། །དང་པོ་ལམ་གྱི་ཀུན་ཏུ་སྤྱོད་པ་ལ་གསུམ། རྟེན་དང་བརྟེན་པར་བཅས་པ་བསྐྱེད་པ་ཕྱིའི་ཀུན་སྤྱོད་སྤྲུལ་པའི་སྐུ་ལམ་དུ་བྱེད་པ་དང་། ལུས་ལ་ལྷ་རྣམས་རྫོགས་པར་བསྒོམ་པ་ནང་གི་ཀུན་སྤྱོད་ལོངས་སྐུ་ལམ་དུ་བྱེད་པ་དང་། རྫོགས་པའི་རིམ་པ་ཉམས་མྱོང་དང་བཅས་པ་ནི་རྫོགས་པའི་ཀུན་སྤྱོད་ཆོས་སྐུ་ལམ་དུ་བྱེད་པའོ། །གཉིས་པ་དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་ལ་གསུམ་སྟེ། དང་པོ་རྫོགས་པར་བྱེད་པའི་ཡན་ལག་དང་། གསུམ་ག་རྫོགས་པར་བྱེད་པའི་ཡན་ལག་དང་། དེ་དག་བརྟན་པར་བྱེད་པའི་སྤྱོད་པའོ། །དང་པོ་ལ་ལྔ་སྟེ། ཕུང་པོ་ཁམས་དང་སྐྱེ་མཆེད་སྦྱང་བསྒྱུར་དང་། ཚོགས་གཉིས་བསགས་པ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་དང་། དབང་བསྐུར་བའོ། །གཉིས་པ་ལ་ལྔ་སྟེ། སྔགས་མཆོད་དང་། །གསང་པའི་མཆོད་པ་དང་། དམ་ཚིག་ཅན་ལ་གཏོར་མ་སྦྱིན་པ་དང་། དམ་ཚིག་དང་། སྡོམ་པ་དང་། ཐུན་མོང་གི་བྱ་བ་བྱང་ཆུབ་ཀྱི་ཕྱོགས་ཀྱི་དག་པ་དང་། ཐུན་མཚམས་གྱི་ཕྱེ་བའོ། །འདི་ལའང་ལྔ་སྟེ། ཁམས་དང་རྒྱན་ཆའི་དག་པ་དང་། སུམ་བྷ་ནིའི་སྲུང་བ། སྤྱོད་ལམ་གྱི་རྣལ་འབྱོར། ཁ་ཟས་ཀྱི་རྣལ་འབྱོར། ཉལ་བ་དང་ལྡང་བའི་རྣལ་འབྱོར་རོ། །གསུམ་པ་ལ་རང་དོན་གྱི་སྤྱོད་པ་དང་། གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་གཉིས་ལས། དང་པོ་ལ་གསུམ་སྟེ། བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ། །གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པའོ། །གསུམ་པ་འབྲས་བུའི་ཀུན་ཏུ་སྤྱོད་པ་ལ། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་གསུམ་སྟེ། དེ་ལྟར་ན་ཀུན་ཏུ་སྤྱོད་པ་ཞེས་པའི་ཚིག་དེ་ཉིད་ཀྱིས། འཁོར་ལོ་བདེ་མཆོག་གི་ལམ་དང་འབྲས་བུ་མ་ལུས་པ་བསྟན་ཅིང་། ལེའུ་གང་ནས་གང་འབྱུང་བ་ནི་རྒྱུད་ཀྱི་སྟེང་དུ་རྟོགས་པར་བྱའོ། །གཉིས་པ་ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུས་པ་ནི། ཀུན་སྤྱོད་ལེའུ་བཅུ་གཉིས་པ་ལས། འདུག་དང་ལྡང་བ་ཉིད་དང་ནི། །འཇུག་དང་རྫོགས་པ་ཉིད་དག་དང་། །བྱིན་གྱིས་བརླབ་དང་དབང་བསྐུར་དང་། །ཏིང་འཛིན་མཆོད་པ་བསྡུ་བ་ཡིན། །ཞེས་བྱ་བ་དེ་ཁོ་ན་ཉིད་བཅུ་སྟེ། དེ་ལ་གདུག་པ་ཞེས་བྱ་བ་ནི། ཚངས་པའི་གནས་བཞི་དང་། གཞི་སྦྱང་བསྒྱུར་དང་། སྲུང་བའི་འཁོར་ལོ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་ནས་བདག་མེད་པ་ལ་བློ་ཅུང་ཟད་འདུག་པ་ཡིན་ནོ། །གཉིས་པ་ལྡང་བ་ནི། བྱང་ཆུབ་ཀྱི་སེམས་ཀྱི་རྒྱུན་གྱིས་སེམས་ཅན་གྱི་དོན་བྱའོ་སྙམ་པའི་བསམ་པས་འབྱུང་བ་རིམ་བརྩེགས་རི་རབ་དང་བཅས་པ་བསྒོམ་པའོ། །གསུམ་པ་འཇུག་པ་ནི། རི་རབ་ཀྱི་སྟེང་དུ་མངོན་པར་བྱང་ཆུབ་པ་ལྔ་ལས་རྟེན་དང་བརྟེན་པ་དུས་གཅིག་ཏུ་ཕྱིའི་དཀྱིལ་འཁོར་བསྒོམ་པའོ། །བཞི་པ་རྫོགས་པ་ནི། ལུས་ཀྱི་དཀྱིལ་འཁོར་རྫོགས་པར་བསྒོམ་པ་སྔགས་ཀྱི་བྱིན་གྱིས་བརླབ་པའོ། །ལྔ་པ་བྱིན་གྱིས་བརླབ་པ་ནི། ཕོ་ཉ་བསྲེ་བ། གོ་ཆ་བཅིང་པ། ཡེ་ཤེས་པ་དགུག་པ་རྣམས་ཡིན་ནོ། །དྲུག་པ་ནི། དབང་བསྐུར་ནས་རིགས་ཀྱི་བདག་པོས་རྒྱས་གདབ་པ་དང་བཅས་པའོ། །བདུན་པ་ཏིང་ངེ་འཛིན་ནི། བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱས་ལ། ལྷའི་སྐུ་མདོག་དང་ཕྱག་མཚན་ལ་སེམས་ཅུང་ཟད་འཛིན་པ་ཡིན་ནོ། །བརྒྱད་པ་མཆོད་པ་ནི། སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་དང་། གསང་བའི་མཆོད་པ་སྟེ། དེ་རྣམས་བཟླས་པ་སྔགས་མཆོད་ཀྱི་ཁོངས་སུ་འདུ་ལ། གསང་བའི་མཆོད་པ་ནི་རྫོགས་པའི་རིམ་པར་འགྲོ་བའི་སྐབས་ཀྱང་ཡོད་དོ། །གཏོར་མའང་མཆོད་པའི་སྐབས་སུ་འདུ་བ་ཡིན་ཏེ། ཐུན་གོང་མ་རྣམས་ལ་གཏོར་མ་ཐུན་མཇུག་བསྡུ་བའི་རྗེས་ལ་གཏོང་ལ། ཐུན་ཐ་མ་ལ་ནི་གཏོར་མ་དང་དག་པ་དྲན་པའི་རྗེས་ལ་བསྡུ་བ་བསྒོམ་པ་ཡིན་ནོ། །ཐུན་མཚམས་ཀྱི་བྱ་བ་ལ། ཁ་ཟས་དང་། སྤྱོད་ལམ་དང་། ཕྱི་མཆོད་དང་། ལག་མཆོད་ཀྱང་མཆོད་པའི་ཁོངས་སུ་བསྡུ་ལ། ཚེས་བཅུའི་མཆོད་པའང་དེར་འདུའོ། །དགུ་པ་བསྡུ་བ་ཞེས་བྱ་བ་ནི་རྫོགས་པའི་རིམ་པ་སྟེ། རྡོ་རྗེ་སེམས་དཔའ་བསྡུ་བའི་རིམ་པས་དཀྱིལ་འཁོར་བསྡུས་ལ། ཐུན་གོང་མ་རྣམས་ལ་ནི། དེ་ལས་ལངས་ལ་དག་པ་དྲན་པ་བྱེད་ལ། ཐུན་ཐ་མ་ལ་ནི་དག་པ་རྗེས་དྲན་གྱི་རྗེས་ལ་རྡོ་རྗེ་སེམས་དཔའི་བསྡུ་བ་བྱས་ནས་དེའི་ངང་ལ་ཉལ་བའི་རྣལ་འབྱོར་བྱེད་པ་ཡིན་ནོ། །བཅུ་བ་ཡིན་ཞེས་པ་ནི་ངེས་པ་སྟེ། དག་པ་ནི་ཁམས་ཀྱི་དག་པ་དང་། རྒྱན་ཆའི་དག་པ་བྱས་ལ། དཀྱིལ་འཁོར་གྱི་འཁོར་ལོ་བསྡུས་ཏེ་ཚམ་རྔམས་སྔགས་ཀྱིས་བསྲུངས་ལ། སྤྱོད་ལམ་གྱི་རྣལ་འབྱོར་བྱེད་པ་ཡིན་ནོ་ཞེས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱིས་གསུངས་སོ། །གཉིས་པ་ནི། དེ་ལྟ་བུའི་རྒྱུད་སྡེ་ཟབ་མོའི་དགོངས་པ་སྤྱི་དང་། ཁྱད་པར་རྣལ་འབྱོར་མ་ཀུན་ཏུ་སྤྱོད་པའི་རྒྱུད་ལ་བརྟེན་ནས་གྲུབ་ཆེན་ལཱུ་ཧི་པའི་ཞལ་སྔ་ནས་བསྐྱེད་རྫོགས་གཉིས་ཀའི་སྙིང་པོ་བསྡུས་པ་དཔལ་མངོན་པར་རྟོགས་པ་ཞེས་བྱ་བའི་གཞུང་འདི་མཛད་པ་སྟེ། འདིའི་དོན་ཉེ་བར་བསྡུ་ན་བཞི། གང་དུ་བསྒོམ་པའི་གནས། གང་གིས་སྒོམ་པའི་གང་ཟག །དེས་བསྒོམ་པའི་ལམ། ལམ་དེས་གྲུབ་པའི་འབྲས་བུའོ། །དང་པོ་ནི། རིའི་སུལ་དང་། ཆུ་བོའི་ངོགས་དང་། ཤིང་གཅིག་གི་དྲུང་སོགས་མདོར་ན་དབེན་ཞིང་ཡིད་དང་མཐུན་པའི་གནས་ཇི་ལྟར་རིགས་པའོ། །གཉིས་པ་ནི། གཞུང་ལས། དང་པོར་རེ་ཞིག་རྣལ་འབྱོར་པའི་དབང་ཕྱུག་གིས་ཞེས་གསུངས་པའི་དོན་འཕགས་པ་རིན་པོ་ཆེས། བྱང་ཆུབ་སེམས་བརྟན་དབང་རབ་ཐོབ། །སྔགས་རིག་རྣལ་འབྱོར་དབང་ཕྱུག་གིས། །ཞེས་གསུངས་པ་ལྟར། ངེས་འབྱུང་དང་སྙིང་རྗེ་ཆེན་པོས་རྒྱུད་ལེགས་པར་སྦྱངས་པས་བྱང་ཆུབ་ཀྱི་སེམས་རིན་པོ་ཆེ་ལ་བརྟན་པ་ཐོབ་པ། དཔལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་རྫོགས་པར་ཐོབ་ཅིང་། དབང་དུས་སུ་ཁས་བླངས་པའི་དམ་ཚིག་དང་སྡོམ་པ་རྣམ་པར་དག་པ། གསང་སྔགས་ཀྱི་རྒྱུད་སྡེའི་དོན་ཐོས་བསམ་གྱིས་གཏན་ལ་ཕབ་པས་ཇི་ལྟ་བ་བཞིན་རིག་པ་སློབ་པའི་རྣལ་འབྱོར་པས་གཞན་དོན་དུ་རྫོགས་པའི་བྱང་ཆུབ་ཚེ་འདི་ཉིད་ལ་དོན་དུ་གཉེར་བའི་བློས་རིམ་པ་གཉིས་ཀྱི་ལམ་འདིར་འཇུག་པར་བྱའོ། །གསུམ་པ་ནི། པཎ་གྲུབ་ནཱ་རོ་ཏ་པའི་སློབ་བཤད་ཀྱི་མན་ངག་འཛིན་པ་བལ་པོ་ཕམ་མཐིང་པ་ཡབ་སྲས་དང་། མལ་གྱོ་བློ་གྲོས་གྲགས་པའི་དགོངས་པ་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་ནས་འདི་ལྟར་གསུངས་ཏེ། ལམ་མངོན་པར་རྟོགས་པ་ནི་བཞིས་བཅིངས་པ་སྟེ། མཉམ་པར་གཞག་པའི་རྣལ་འབྱོར། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། །ཉལ་བའི་རྣལ་འབྱོར་ནི་རྫོགས་པའི་རིམ་པའི་ཁོངས་སུ་འདུ་ལ། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་གཉིས་ནི་བསྐྱེད་རིམ་གྱི་སྔོན་འགྲོ་ཡིན་ཞིང་། དག་པ་རྗེས་སུ་དྲན་པ་ནི་ཁ་ཅིག་སྤྱོད་ལམ་གྱི་རྣལ་འབྱོར་གྱི་ཁོངས་སུའང་བསྡུ་མོད་ཀྱི། འདིར་བསྐྱེད་རིམ་བརྟན་པར་བྱེད་པ་ཡིན་པས་མཉམ་གཞག་གི་ཁོངས་སུ་བསྡུའོ། །དང་པོ་མཉམ་པར་གཞག་པའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་གསུམ་སྟེ། རྒྱས་པ་ལ་དགའ་བས་ཇི་སྙེད་ཡོད་པའི་ཆོས་ཇི་ལྟ་བ་བཞིན་དུ་བསྒོམ་པ་དང་། འབྲིང་ལ་དགའ་བས་ཇི་ལྟ་བ་བཞིན་བསྒོམ་པ་དང་། བསྡུས་པ་ལ་དགའ་བས་རང་གི་ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པའོ། །ཞེས་གསུངས་པའི་དང་པོ་རྒྱས་པར་བསྒོམ་པ་ལ་གཉིས། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་གཉིས། རྒྱུ་ཚོགས་གཉིས་བསགས་པ་དང་། འབྲས་བུ་ལྷ་བསྐྱེད་པའོ། །དང་པོ་ལ་གཉིས། བསོད་ནམས་ཀྱི་ཚོགས་བསག་པ་དང་། ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་ཚངས་པའི་གནས་བཞི་བསྒོམ་པ། ཚོགས་གསོག་པའི་རྟེན་བདག་གི་གཞི་སྦྱང་བསྒྱུར། ཚོགས་བསག་པ་དངོས་ལ་ཚོགས་བསག་བཅུ་གསུམ། ཡེ་ཤེས་ཀྱི་ཚོགས་བསྒོམ་པ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པའོ། །འབྲས་བུ་ལྷ་བསྐྱེད་པ་ལ་བཞི། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་བཞུག་བྱ་བ། གོ་ཆ་བཅིང་པ། དབང་བསྐུར་ཞིང་རྒྱས་གདབ་པའོ། །དེའི་དང་པོ་ལ་གཉིས། ཕྱིའི་དཀྱིལ་འཁོར་དག་པ་དང་བཅས་བསྒོམ་པ་དང་། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་བསྒོམ་པའོ། །དེ་ལྟར་བདག་ཉིད་སངས་རྒྱས་སུ་བསྐྱེད་ནས་མཆོད་པ་དང་བཟླས་པས་མཉེས་པར་བྱ། རྫོགས་པའི་རིམ་པས་འོད་གསལ་དུ་བསྡུ་ཞིང་། སླར་ཡང་ལྷའི་སྐུར་ལངས་ཏེ་དག་པ་རྗེས་སུ་དྲན་པ་དང་། གཏོར་མ་དང་། སྤྱོད་ལམ་དང་། ཁ་ཟས་ཀྱི་རྣལ་འབྱོར་སོགས་ཅི་རིགས་པ་ལ་འཇུག་པར་བྱ་སྟེ། མདོར་ན་སྐྱབས་སུ་འགྲོ་བ་དང་། སེམས་བསྐྱེད་པ་དང་། རྡོ་རྗེ་སེམས་དཔའི་སྒོམ་བཟླས་རྣམས་ཁ་བསྐངས་ཏེ། རང་འཁོར་ལོ་བདེ་མཆོག་ཏུ་གསལ་གདབ། བདུད་རྩི་བྱིན་གྱིས་བརླབས་པ་མྱང་བ་ནས་བརྩམས་ཏེ་སྒྲུབ་ཐབས་རྒྱས་པ་ནས་ཇི་ལྟར་གསུངས་པ་བཞིན་ཉམས་སུ་བླང་བ་ཡིན་ནོ། །གཉིས་པ་འབྲིང་དུ་བསྒོམ་པ་ནི། ཉལ་བ་དང་ལྡང་བའི་རྣལ་འབྱོར་སྔོན་དུ་འགྲོ་བས་དགའ་བ་གསུམ་གྱི་རྣལ་འབྱོར་དང་། སེམས་བསྐྱེད་པ་དང་། རང་གི་ལུས་གདོད་ནས་གྲུབ་པའི་དཀྱིལ་འཁོར་གྱི་འཁོར་ལོ་དྲན་པ་དང་། བླ་མ་ལ་གསོལ་བ་གདབ་ཅིང་སྲུང་བའི་འཁོར་ལོ་བསྒོམ་པ་ཙམ་སྔོན་དུ་འགྲོ་བས་ལུས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་བསྒོམ། སྔགས་ཀྱིས་བྱིན་བརླབ། དག་པ་དྲན་པར་བྱ་བའམ་མ་བྱས་ཀྱང་རུང་། ཡེ་ཤེས་པ་བཅུག་ཅིང་གོ་ཆ་བཅིང་བ་སོགས་ལྷག་མ་རྣམས་རྒྱས་པའི་སྐབས་ལྟར་བྱའོ། །གསུམ་པ་བསྡུས་ཏེ་བསྒོམ་པའི་ཚུལ་འདིར་གསལ་བར་བརྗོད་ན་གཉིས། རྟེན་བསྐྱེད་པའི་རིམ་པ་དང་། བརྟེན་པ་རྫོགས་པའི་རིམ་པའོ། །དང་པོ་ལ་གསུམ། འཇུག་པའི་རིམ་པ། གནས་པའི་རིམ་པ། ལྡང་བའི་རིམ་པའོ། །དང་པོ་ལ་བརྒྱད། ཉལ་བའི་རྣལ་འབྱོར། ལྡང་བའི་རྣལ་འབྱོར། ཁྲུས་ཀྱི་རྣལ་འབྱོར། ཚད་མེད་པའི་རྣལ་འབྱོར། བླ་མའི་རྣལ་འབྱོར། བདག་ཉིད་སངས་རྒྱས་སུ་བསྐྱེད་པའི་རྣལ་འབྱོར། མཆོད་པའི་རྣལ་འབྱོར། བཟླས་པའི་རྣལ་འབྱོར་རོ། །དང་པོ་ཉལ་བའི་རྣལ་འབྱོར་ནི། མདངས་ནུབ་མོར་ཉལ་བའི་རྣལ་འབྱོར་ཆོས་ཐམས་ཅད་བསམ་གྱིས་མི་ཁྱབ་པ་རྡོ་རྗེ་སེམས་དཔའི་བསྡུ་བའི་རྫོགས་རིམ་སྟོང་པ་ཉིད་ཀྱི་ངང་དུ་ཉལ། །གཉིས་པ་ལྡང་བའི་རྣལ་འབྱོར་ནི། །ཐོ་རངས་ནམ་གྱི་བཞི་ཆའམ་བརྒྱད་ཆའི་དུས་སུ་བབ་པ་ན། ནམ་མཁའ་ནས་ཌཱ་མ་རུའི་སྒྲ་སྔགས་ཀྱི་གདངས་སུ་བསྒྲགས་པས་གཉིད་བསྐུལ་ནས། དེའི་སྐད་ཅིག་ལ་དཔལ་འཁོར་ལོ་བདེ་མཆོག་ཡབ་ཡུམ་གྱི་སྐུར་ལངས་ཏེ་ལྡང་བ་ནི་སྐུའི་དགའ་བ། བདུད་རྩི་རིལ་བུ་དངོས་སམ། ནང་མཆོད་ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ཏེ་མྱོང་ཞིང་། ངག་ཏུ། ཤྲཱི་ཧེ་རུ་ཀ་ཨ་ཧཾ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་བརྗོད་ཅིང་དོན་དྲན་པར་བྱ་བ་གསུང་གི་དགའ་བ། སྙིང་གར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་མཐིང་ནག །ཨ་ནི་རྣམ་པར་མི་རྟོག་པའི་ཡེ་ཤེས། ཟླ་བ་ནི་དག་པ་འཇིག་རྟེན་པའི་ཡེ་ཤེས། ཧཱུྃ་ནི་གཟུང་འཛིན་གཉིས་དང་བྲལ་བའི་ཡིད་ཡེ་ཤེས་ལྔའི་རང་བཞིན་ནོ་ཞེས་མོས་པ་ནི་ཐུགས་ཀྱི་དགའ་བའོ། །གསུམ་པ་ཁྲུས་ཀྱི་རྣལ་འབྱོར་ནི། བསམ་གཏན་གྱི་གྲོགས་སུ་འགྲོ་ན། ཆུ་གཙང་མའམ་རྡོ་རྗེའི་ཆུས་དབང་ལྷ་སྤྱན་དྲངས་པས་ཁྲུས་མཛད་པར་བསམས་ལ། ཇི་ལྟར་བལྟམས་པ་སོགས་བརྗོད་ཅིང་ཁྲུས་བྱའོ། །བཞི་པ་ཚད་མེད་པའི་རྣལ་འབྱོར་ནི། བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། སྐྱབས་ཡུལ་འཁོར་ལོ་སྡོམ་པའི་རྣམ་པར་གསལ་བཏབ་ལ། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །དམ་པའི་ཆོས་རྣམས་ལ་སྐྱབས་སུ་མཆིའོ། །འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་ཅི་ནུས་ཀྱི་མཐར་ཐལ་མོ་སྦྱར་ཏེ། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ་པར་བསམ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་བདག་གིས་ལམ་ཟབ་མོ་ཉམས་སུ་བླང་བར་བགྱིའོ། །ཞེས་ལན་གསུམ་གྱིས་སེམས་བསྐྱེད། སྤྲོ་ན་རྡོར་སེམས་སྒོམ་བཟླས་ཀྱང་མ་རྒྱུད་སྤྱི་ལྟར་བྱའོ། །ལྔ་པ་བླ་མའི་རྣལ་འབྱོར་ནི། རང་གི་སྤྱི་བོར་པདྨ་དང་ཟླ་བའི་གདན་ལ་སྐད་ཅིག་གིས་རྩ་བའི་བླ་མ་སངས་རྒྱས་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་རྡོ་རྗེ་དང་དྲིལ་བུ་འཛིན་པ། དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། སྐྱབས་གནས་ཐམས་ཅད་འདུས་པའི་ངོ་བོར་གྱུར་པར་བསམས་ལ། གང་གི་དྲིན་གྱིས་བདེ་ཆེན་ཉིད། སྐད་ཅིག་ཉིད་ལ་འཆར་བ་གང་། །བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པད་ལ་འདུད། །ཅེས་དང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཅེས་མོས་གུས་དྲག་པོས་གསོལ་བ་བཏབ་པས། བླ་མ་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་དང་བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམས་ལ། ཆོས་ཐམས་ཅད་རང་གི་སེམས་ཀྱི་རྣམ་འཕྲུལ་དང་། དེའང་སྒྱུ་མ་ལྟ་བུ་དང་། རང་བཞིན་མེད་པའི་སྟོང་ཉིད་དུ་ཤེས་པའི་ངང་ལ་མཉམ་པར་གཞག །དྲུག་པ་བདག་ཉིད་སངས་རྒྱས་སུ་བསྐྱེད་པ་ནི། འོག་གི་རླུང་གིས་རང་གི་ལུས་ལ་གདོད་ནས་གྲུབ་པའི་ལྟེ་བའི་ཨྃ་མས་ཡར་ཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧྃ་ཡས་མར་ཕུལ་བ་ནི་སྒྲ་སྟེ། དེ་ལྟར་སྒྲ་ཚུལ་གཉིས་སྙིང་གར་འདྲེས་པའི་རྐྱེན་གྱིས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་ཅིག་ཅར་དུ་གྱུར་པ་ནི། རྐང་མཐིལ་རླུང་གི་དཀྱིལ་འཁོར། སུམ་མདོ་མེ། ལྟོ་བ་ཆུ། སྙིང་ག་ས། སྒལ་ཚིགས་རིའི་རྒྱལ་པོ་རི་རབ། མགོ་བོ་རི་རབ་ཀྱི་སྟོད། དཔྲལ་བ་དང་། ལྟག་པ་རྣ་བ་གཉིས་སྣ་ཚོགས་རྡོ་རྗེ། ཀླད་པ་དཀར་པོ་ཟླ་བ། ཀླད་ཁྱིམ་དམར་པོ་ཉི་མ། དེ་གཉིས་ཀྱི་བར་ན་གནས་པའི་ཧྃ་ཡིག་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན། ལུས་འདོམ་གང་གྲུ་བཞི་ནི་གཞལ་ཡས་ཁང་པ་གྲུ་བཞི། སྙིང་ག་ཆོས་ཀྱི་འཁོར་ལོ་ནས་འབྱུང་བ་བཞིའི་རླུང་རྒྱུ་བའི་སྒོ་བཞི། རྐང་བརྒྱད་ཀ་བ་བརྒྱད། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན། རང་ཉིད་ཕྱི་དབྱིབས་ཀྱི་ལུས་དང་སྙིང་གའི་ནང་གི་ཧཱུྃ་གཉིས་ཀའང་བཅོམ་ལྡན་འདས་ཧེ་རུ་ཀ་སྐུ་མདོག་སྔོན་པོ། ཞལ་བཞི་ཕྱག་བཅུ་གཉིས་པ། རྩ་ཞལ་སྔོན་པོ། གཡོན་ལྗང་། རྒྱབ་དམར། གཡས་སེར་བ། ཞལ་རེ་རེ་བཞིན་སྤྱན་གསུམ་གསུམ་དང་ལྡན་ཞིང་མཆེ་བ་བཞི་བཞི་གཙིགས་པ། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་བརྒྱངས་ཏེ་འཛིན་པ། གཡས་ཀྱི་གསུམ་པ་ན་ཌཱ་མ་རུ། །བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་པ་སྒྲེང་བ། གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག །བཞི་པ་ན་ཁྲག་གིས་བཀང་པའི་ཐོད་པ། ལྔ་པ་ན་རྡོ་རྗེའི་ཞགས་པ། དྲུག་པ་ན་ཚངས་པའི་མགོ་བོ་བསྣམས་པ། པདྨ་དང་ཉི་མའི་སྟེང་ན་ཞབས་གཡས་བརྐྱངས་པས་དུས་མཚན་མ་དམར་མོ་དང་། གཡོན་བསྐུམས་པས་འཇིགས་བྱེད་ནག་པོ་མནན་པ། རལ་པའི་ཐོར་ཚུགས་སྤྱི་བོར་བཅིངས་པའི་རྩེར་ཡིད་བཞིན་གྱི་ནོར་བུས་སྤྲས་ཤིང་གཡོན་ན་ཚེས་གཅིག་གི་ཟླ་བ་དང་མཚོགས་མའི་སྟེང་ན་སྣ་ཚོགས་རྡོ་རྗེས་མཚན་པ། དབུ་རེ་རེ་ལ་མི་མགོ་སྐམ་པོ་ལྔ་ལྔས་བརྒྱན་ཅིང་རློན་པ་ལྔ་བཅུའི་དོ་ཤལ་ཅན། རུས་པའི་རྒྱན་དྲུག་གིས་བརྒྱན་པ། སྟག་གི་པགས་པའི་ཤམ་ཐབས་གྲོལ་བ། །སྒེག་པ་དཔའ་བ་མི་སྡུག་པ། །དགོད་ཅིང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་ཡི། །གར་དགུའི་ཉམས་དང་ལྡན་པ་ཉིད། །དེའི་པང་ན་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་དང་ལྡན་པ། ཕྱག་གཡོན་པས་བདུད་དང་གདུག་པའི་ཁྲག་གིས་གང་པའི་ཐོད་པ་འཛིན་པས་ཡབ་ལ་འཁྱུད་པ། གཡས་པས་སྡིགས་མཛུབ་དང་བཅས་པའི་གྲི་གུག་གིས་ཕྱོགས་ཐམས་ཅད་དུ་བསྡིགས་པ། དབུ་སྐྲ་གྲོལ་བ། བྱིན་པ་གཉིས་ཀྱིས་བཅོམ་ལྡན་འདས་ལ་ལེགས་པར་འཁྱུད་ཅིང་། གཅེར་བུའི་མཆོག་མི་མགོ་སྐམ་པོ་ལྔའི་དབུ་རྒྱན་དང་མི་མགོ་སྐམ་པོ་ལྔ་བཅུའི་དོ་ཤལ་དང་རུས་པའི་རྒྱན་ལྔས་བརྒྱན་པ། གཉིས་ཀའང་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཕྱིའི་ཧེ་རུ་ཀའི་ཕྱག་གཡས་ཀྱི་དང་པོ་ལ་མཁའ་འགྲོ་མ་ནག་མོ། །གཉིས་པ་ལཱ་མཱ་ལྗང་གུ། གཡོན་གྱི་དང་པོ་ལ་ཁཎྜ་རོ་ཧ་དམར་མོ། གཉིས་པ་ལ་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་སྤྱན་གསུམ་མ། ཕྱག་བཞིའི་གཡས་ཌ་མ་རུ་དང་གྲི་གུག །གཡོན་ཁ་ཊྭཱཾ་ག་དང་ཐོད་པ་འཛིན་པ། སྐྲ་གྲོལ་བ། གཅེར་བུ་གཡས་བརྐྱངས་པས་བཞུགས་པ་ཕྱག་རྒྱ་ལྔས་བརྒྱན་པའོ། །གཡས་ཀྱི་གསུམ་པ་ན་ཁྭ་གདོང་མ་སྔོན་མོ། བཞི་པ་ན་འུག་གདོང་མ་ལྗང་གུ། ལྔ་པ་ན་ཁྱི་གདོང་མ་དམར་མོ། །དྲུག་པ་ན་ཕག་གདོང་མ་སེར་མོ། གཡོན་གྱི་གསུམ་པ་ན་གཤིན་རྗེ་བརྟན་མ་གཡས་སྔོ་གཡོན་སེར་བ། བཞི་པ་ན་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ལྔ་པ་ན་གཤིན་རྗེ་མཆེ་བ་མ་གཡས་དམར་གཡོན་ལྗང་བ། དྲུག་པ་ན་གཤིན་རྗེ་འཇོམས་མ་གཡས་ལྗང་གཡོན་སྔོ་བ་སྟེ། ཐམས་ཅད་ཀྱང་ཞལ་གཅིག་ཕྱག་བཞི་མ་གཡས་གཉིས་ན་ཌ་མ་རུ་དང་གྲི་གུག །གཡོན་གཉིས་ན་ཁ་ཊྭཱཾ་ག་དང་ཐོད་པ་འཛིན་པ། གཅེར་བུ་ཕྱག་རྒྱས་ལྔས་བརྒྱན་པ། ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་སེམས་ཅན་གྱི་དོན་ལ་བརྩོན་པ། རྣལ་འབྱོར་མ་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བས་བརྒྱན་པའོ། །དེ་ནས་སྤྱི་བོ་ལ་སོགས་པའི་གནས་རྣམས་སུ་པུ་ཛཱ་ཨོ་ཨ་གོ་རཱ་དེ་མཱ། ཀཱ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུའི་དབྱིབས་སུ་གནས་པའི་ཁམས་དང་རྩ་རྣམས་དཔའ་བོ་དང་རྣལ་འབྱོར་མ་རྣམས་སུ་གྱུར་པ་ནི། སྤྱི་བོ་པུ་ལླི་ར་མཱ་ལ་ཡང་ཁཎྜ་ཀ་པཱ་ལི་དང་རབ་ཏུ་གཏུམ་མོ། །སྤྱི་གཙུག་ཛཱ་ལནྡྷ་ར་ར་མ་ཧཱ་ཀཾ་ཀཱ་ལ་དང་གཏུམ་པའི་མིག་ཅན་མ། རྣ་བ་གཡས་པ་ཨཽ་ཌྱ་ན་དུ་ཀངྐཱ་ལ་དང་འོད་ལྡན་མ། ལྟག་པ་ཨརྦུ་དང་མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས། རྣ་བ་གཡོན་པ་གོ་དཱ་ཝ་རཱི་ར་སུར་ཝི་རེ་དང་བརྟན་པའི་བློ་ཅན་མ། སྨིན་མའི་དབུས་རཱ་མེ་ཤྭ་རཱི་ར་འོད་དཔག་མེད་དང་མིའུ་ཐུང་མ། མིག་གཉིས་དེ་ཝཱི་ཀོ་ཊར་རྡོ་རྗེའི་འོད་དང་ལངྐའི་དབང་ཕྱུག་མ། ཕྲག་པ་གཉིས་མཱ་ལ་ཝ་ར་རྡོ་རྗེའི་སྐུ་དང་ཤིང་གྲིབ་མ་སྟེ་ཉེ་བའི་གནས་རྣམས་ཐུགས་ཀྱི་འཁོར་ལོ་ཁ་དོག་སྔོན་པོ་མཁའ་ལ་སྤྱོད་པའོ། །མཆན་ཁུང་གཉིས་ཀཱ་མ་རཱུ་པ་ར་ཨངྐུ་རི་དང་ཨཻ་རཱ་ཝ་ཏཱི། ནུ་མ་གཉིས་ཨོ་ཏྲེ་རར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་། ལྟེ་བ་ཏྲི་ཤ་ཀུ་ནེ་ར་དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་ས་ལར་རྡོ་རྗེ་ཧཱུྃ་མཛད་དང་ཆང་འཐུང་མ་སྟེ་ཉེ་བའི་ཞིང་། ཁ་ཀ་ལིངྒར་རབ་ཏུ་བཟང་མོ་དང་ཤྲཱ་མ་དེ་ཝཱི། མགྲིན་པ་ལམྦཱ་ཀ་ར་རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚནྡོ། སྙིང་ག་ཀཱཉྩི་ར་འཇིགས་བྱེད་ཆེན་པོ་དང་རྟ་རྣ་མ། འདོམས་པ་ར་ཧི་མཱ་ལ་ཡར་མིག་མི་བཟང་དང་ཁ་གཱ་ན་ན་སྟེ་ཉེ་བའི་ཚནྡོ་རྣམས་གསུང་གི་འཁོར་ལོ་ཁ་དོག་དམར་པོ་ས་ལ་སྤྱོད་པའོ། །མཚན་མ་པྲེ་ཏ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤང་ལམ་གྲྀ་ཧ་དེ་ཝར་རིན་ཆེན་རྡོ་རྗེ་དང་ཁཎྜ་རོ་ཧཱ་སྟེ་འདུ་བ། བརླ་གཉིས་སཽ་རཱ་ཥྟར་རྟ་མགྲིན་དང་ཤོཎྜི་ནཱི། བྱིན་པ་གཉིས་སུ་ཝརྞ་དཱི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ་སྟེ་ཉེ་བའི་འདུ་བ། སོར་མོ་བཅུ་དྲུག་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བོལ་གོང་སིནྡྷུར་པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད། མཐེ་བོང་བཞི་མ་རོ་ལ་རྣམ་པར་སྣང་མཛད་དང་འཁོར་ལོས་སྒྱུར་མ། པུས་མོ་གཉིས་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་རྣམས་སྐུའི་འཁོར་ལོ་ཁ་དོག་དཀར་པོས་འོག་ན་སྤྱོད་པའོ། ཁཎྜ་ཀ་པཱ་ལི་ལ་སོགས་པའི་དཔའ་བོ་ཐམས་ཅད་ཞལ་གཅིག་ཕྱག་བཞི་པ་རལ་པའི་ཐོར་ཚུགས་ཀྱིས་མཚན་པའི་ཅོད་པན་ཅན། ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། གཡས་འོག་མས་ཌཱ་མ་རུ། གཡོན་འོག་མས་ཁ་ཊྭཱཾ་ཀ་འཛིན་པ། སྐུ་ལ་ཕྱག་རྒྱ་དྲུག་གིས་བརྒྱན་པ་གཡས་བརྐྱང་པའི་གནས་པས་བཞུགས་པའོ། །རབ་ཏུ་གཏུམ་མོ་ལ་སོགས་པའི་དཔའ་མོ་རྣམས་ནི་ཞལ་གཅིག་ཕྱག་གཉིས་མ་གཡོན་ཐོད་པ་བསྣམས་པས་ཡབ་ལ་འཁྱུད་པ། གཡས་སྡིགས་མཛུབ་དང་བཅས་པས་གྲི་གུག་བསྣམས་པ། སྤྱན་གསུམ་པ་དྲག་མོའི་གཟུགས་ཅན་མ། སྐྲ་གྲོལ་བས་རྣམ་པར་མཛེས་མ། །གཉིས་སུ་མེད་པའི་སྦྱོར་བ་ལ་བརྩོན་པ། གཅེར་བུའི་མཆོག་རྒྱན་ལྔ་དང་ཚངས་པའི་སྐུད་པས་བརྒྱན་པ། མི་མགོའི་དོ་ཤལ་དང་སྐ་རགས་སིལ་སིལ་གྱི་སྒྲ་སྒྲོགས་པའོ། །དེ་ནས་སྔགས་ཀྱིས་བྱིན་གྱིས་བརླབ་པ་ནི། ངག་ཏུ་ཨོཾ་ཨཱཿཧཱུྃ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀ྄་ཙིཏྟ་བཛྲ་སྭ་བྷཱ་བ་ཨཏྨ་ཀོ྅་ཧཾ། ཞེས་བརྗོད་པས་བདག་གིས་བསྒོམས་པའི་ལུས་དཀྱིལ་དང་། འཛམ་བུའི་གླིང་ན་བཞུགས་པ་དང་། འོག་མིན་ན་བཞུགས་པའི་སྐུ་གསུང་ཐུགས་ཀྱི་འཁོར་ལོའི་དཔའ་བོ་དང་རྣལ་འབྱོར་མ་རྣམས་དབྱེར་མི་ཕྱེད་པའི་སྐུ་གསུང་ཐུགས་རྡོ་རྗེའི་རང་བཞིན་ངའོ་སྙམ་དུ་ང་རྒྱལ་བཟུང་། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོཉ་ཧཾ་ཞེས་བརྗོད་པས་ཐམས་ཅད་སྟོང་པ་ཉིད་རྡོ་རྗེའི་རང་བཞིན་དུ་རྣམ་པར་དག་པའི་ངོ་བོ་བདག་ཡིན་ནོ་སྙམ་པ་ལན་གསུམ་དུ་བྱའོ། །དེ་ནས་ལྷ་ལ་ཞེན་པ་སྐྱེ་བ་དང་ལམ་ལ་སོམ་ཉི་ཟ་ན་བྱང་ཆུབ་ཕྱོགས་ཀྱི་དག་པ་དྲན་པ་སྐབས་འདིར་བྱ། མི་སྐྱེ་ན་མི་དགོས་ཞེས་གསུངས་པས་དག་དྲན་བྱེད་ན་རྒྱས་པར་མངོན་རྟོགས་རྒྱས་པའི་སྐབས་ལྟར་བརྗོད། བསྡུ་ན། བདག་གི་བློ་ལ་སྣང་བའི་ལྷ་སུམ་ཅུ་རྩ་བདུན་པོ་འདི་ཉིད་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ངོ་བོ་ཡིན་ལ། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ཀྱང་ལྷ་སུམ་ཅུ་རྩ་བདུན་གྱི་ངོ་བོར་རྣམ་པར་དག་པ་ཡིན་ནོ། །ཞེས་བརྗོད་ཅིང་དོན་དྲན་པར་བྱའོ། །བདུན་པ་མཆོད་པའི་རྣལ་འབྱོར་ལ་དྲུག་ལས། དང་པོ་སྔགས་ཀྱི་མཆོད་པ་ནི། རྒྱས་པར་རྩ་སྔགས་དང་། སྙིང་པོ་དང་། ཉེ་སྙིང་གཉིས་མེད་ཞལ་བཞི་པ་དང་སྙིང་པོའི་རྣལ་འབྱོར་མ། དཔའ་བོ་དང་དཔའ་མོ་ཉེར་བཞི། ཡབ་ཀྱི་རྐང་བརྒྱད་དང་སྒོ་མཚམས་མ་བརྒྱད་རྣམས་སྤེལ་བའི་སོགས་ལན་རེ་བརྗོད་པས་ལྷ་གསལ་གདབ་པའི་ཚུལ་གྱིས་མཆོད། བསྡུ་ན་སྙིང་པོ་གཉིས་སུ་མེད་པ་བརྗོད་ཅིང་ལྷ་ཐམས་ཅད་གསལ་གདབ་པའམ། ཧཱུྃ་བྃ་མཱྃ་ཏཱྃ་པཱྃ་ལཱྃ། པཱུ་ཛ་ཨོ་ཨ་གོ་རཱ་དེ་མཱ། ཀ་ཨོ་ཏྲི་ཀོ་ཀ་ལ་ཀཱ་ཧི། པྲེ་གྲྀ་སཽ་སུ་ནཱ་སི་མ་ཀུ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཞེས་ས་བོན་ཙམ་བརྗོད་པས་ཀྱང་རུང་བར་རྗེ་གྲོལ་མཆོག་སོགས་ཀྱིས་གསུངས་སོ། །གཉིས་པ་ཕྱི་མཆོད་ནི། དངོས་སུ་བཤམས་པའམ་ཡིད་ཀྱིས་སྤྲུལ་པ་ལ་དམིགས་ཏེ་སུམྦྷས་བསང་། སྭ་བྷཱ་བས་སྦྱང་། སྟོང་པའི་ངང་ལས་ཨཱཿབདུན་ལས་ཐོད་པའི་སྣོད་བདུན་དུ། ཧཱུྃ་ལས་མཆོད་ཡོན་ལ་སོགས་པ་དྭངས་ཤིང་ཐོགས་པ་མེད་པ་ཡེ་ཤེས་ཀྱི་བདུད་རྩིའི་རང་བཞིན་ཅན་གྱིས་གང་བར་བསམ་ཞིང་། ཨོཾ་བཛྲ་ཨརྒྷཾ་ཨཱཿཧཱུྃ་ནས། ཤབྡའི་བར་གྱིས་བརླབ། ཨོཾ་སརྦ་ཏ་ཐཱ་ག་ཏཱ་ཤྲཱི་ཙཀྲ་སམྦ་ར་མཎྜ་ལ་ཙཀྲ་སརྦ་བཱི་ར་ཡོ་གི་ནཱི་ཨརྒྷཾ་པྲ་ཏཱིཙྪ་སྭཱ་ཧཱ། དེ་བཞིན་དུ་པཱ་དྱཾ་པྲ་ཏཱི་ཙྪ་སྭཱ་ཧཱ། བཛྲ་པུཥྤེ་ཨཱཿཧཱུྃ་ནས། ནཻ་བི་དྱེའི་བར་སྦྱར་བས་ཆུ་གཉིས་སྔོན་འགྲོའི་ཉེར་སྤྱོད་དང་། ཨོཾ་བཛྲ་གཎྜེ་ར་ཎི་ཏ། པྲ་ར་ཎི་ཏ། སཾ་པྲ་ར་ཎི་ཏ། སརྦ་བུདྡྷ་ཀྵེ་ཏྲ། པྲ་ཙ་ལི་ཏེ། པྲཛྙཱ་པཱ་ར་མི་ཏཱ་ནཱ་ད་སཾ་བྷ་ཝེ་ཏེ། བཛྲ་དྷརྨཱ་ཧྲི་ད་ཡ་སནྟོཥ་ནི་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨ་ཁཾ་སྭཱ་ཧཱ། །ཞེས་རོལ་མོ་འབུལ། །གསུམ་པ་བདུད་རྩིའི་མཆོད་པ་ནི། བདུད་རྩི་དངོས་སམ་ཡིད་ཀྱིས་སྤྲུལ་པ། ཨོཾ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབས་ནས། གཡོན་པའི་མཐེབ་སྲིན་གྱིས་སྤྱི་བོ་ནས་འཐོར་ཞིང་། དྲིན་ཅན་རྩ་བའི་བླ་མའི་ཞལ་དུ་ཨོཾ་ཨཱཿཧཱུྃ། བརྒྱུད་པའི་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། སྙིང་གའི་ཐད་ནས་འཐོར་ཏེ། ཧཱུྃ་བྃ་སོགས་ཀྱི་མཐར་ཨོཾ་ཨཱཿཧཱུྃ་ཞེས་དང་། རང་གི་ལྕེ་རྩེ། སྨིན་མཚམས། སྤྱི་གཙུག་རྣམས་སུ་བདུད་རྩིའི་ཐིག་ལེ་བྱས་ལ། ཨོཾ་ཨཱཿཧཱུྃ་ཞེས་བརྗོད་པས་ལུས་ཀྱི་ལྷ་ཐམས་ཅད་ཚིམ་པར་བསམ། ལྟེ་བའི་ཐད་ནས་འཐོར་ཏེ། ཨོཾ་ཤྲཱི་མ་ཧཱ་ཀཱ་ལཱ་ཡ་ཨོཾ་ཨཱཿཧཱུྃ། ཨོཾ་ཤྲཱི་དྷརྨ་པཱ་ལ་ཙ་ཏུ་རྨུ་ཁ་ཨོཾ་ཨཱཿཧཱུྃ། ཞེས་བརྗོད་དོ། །བཞི་པ་མཉེས་པའི་མཆོད་པ་ནི། རང་གི་ལྕེ་ལ་བདུད་རྩི་མྱངས་པས་ཕྱི་ནང་གི་ལྷ་ཐམས་ཅད་དགྱེས་ཤིང་། ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་གསུངས་པར་བསམས་ལ། སྙིང་གར་རྣམ་ལྔ་འདོད་སྐོར་གྱི་མཐར་འཁྱུད་རྒྱ་བྱའོ། །ལྔ་པ་ཡིད་བྱུང་གི་མཆོད་པ་ནི། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ལ། ན་མོ་ཆོས་ཀྱི་དབྱིངས་ཀྱི་བྱིན་གྱི་རླབས་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་རྗེ་རྣམ་པར་དག་པའི་བྱིན་གྱི་རླབས་དང་། གསང་སྔགས་དང་ཕྱག་རྒྱའི་མཐུ་དང་། བདག་གི་མོས་པ་དང་ཏིང་འཛིན་དང་སྨོན་ལམ་གྱི་དབང་གིས་འཇིག་རྟེན་གྱི་ཁམས་ན་བདག་པོས་ཡོངས་སུ་མ་བཟུང་བའི་མཆོད་པའི་བྱེ་བྲག་ཇི་སྙེད་ཡོད་པ་དང་། གཞན་ཡང་བྱང་ཆུབ་སེམས་དཔའ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་དཀྱིལ་འཁོར་གྱི་འཁོར་ལོ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ལ་སེ་གོལ་བརྡབ། ཡང་ཕྱག་རྒྱ་བཅས་ལ། ཨོཾ་སརྦ་བིཏ་པཱུ་ར་པཱུ་ར། སུ་ར་སུ་ར། ཨཱ་བརྟ་ཡ་ཨཱ་བརྟ་ཡ་ཧོ། ན་མཿས་སནྟ་བུདྡྷཱ་ནཱཾ། ཨ་བྷི་སྨ་ར་ཡེ་སྥ་ར་ཎ་ཨི་མཾ་ག་ག་ན་ཁཾ། དྷརྨ་དྷཱ་ཏུ་ཨཱ་ཀཱ་ཤ་ས་མནྟ་མཱཾ། སརྦ་ཏ་ཐཱ་ག་ཏ་ཨ་པ་རི་ཤོ་དྷ་ཡེ། མཎྜ་ལེ་མ་མ་པྲ་ཎི་དྷི་པུཎྱ་ཛྙཱ་ན་བ་ལ་ན། སརྦ་ཏ་ཐཱ་ག་ཏ་བ་ལོནྡྷ་བནྡྷ་སྭསྠཱ་ན་བ་ལེ་ན་ཙ་ཡེ་སྭཱ་ཧཱ། ཞེས་བརྗོད་དེ་ཕྱག་རྒྱ་བཀྲོལ་ཏེ་སེ་གོལ་ལན་གཉིས་བརྡབ་པར་བྱའོ། །དྲུག་པ་བསྟོད་པའི་མཆོད་པ་ནི། རྡོ་རྗེ་དྲིལ་བུ་འཛིན་པས་ཡབ་ཡུམ་གྱི་རྐང་བརྒྱད་ཚང་བར་བརྗོད། དེ་ཙམ་མི་ནུས་ན། ཆོས་དབྱིངས་རྣམ་དག་དབྱིངས་ལས་མ་གཡོས་ཀྱང་།།ཐབས་ཀྱིས་ཁྲོ་བོའི་སྐུར་སྟོན་གདུག་པ་འདུལ། །ཆེ་བའི་ཆེ་མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཞེས་པས་བསྟོད་དོ། །བརྒྱད་པ་བཟླས་པའི་རྣལ་འབྱོར་ལ། དམིགས་པ་ནི། ཡབ་ཀྱི་ཐུགས་ཀའི་ཧཱུྃ་ལས་སྔགས་ཀྱི་ཕྲེང་བ་བྱུང་། ཡབ་ཀྱི་ཞལ་ནས་འཐོན། ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསུང་བའི་རྡོ་རྗེའི་བུ་གར་ཞུགས། སྐུའི་དབྱིབས་བརྒྱུད་དེ་ཐུགས་ཀའི་ཧཱུྃ་ལ་ཐིམ་པའི་ཚུལ་གྱིས་རྒྱུན་མི་འཆད་པར་འཁོར་བས་བདེ་བ་ཆེན་པོའི་ཡེ་ཤེས་བརྟན་པར་བསམས་ལ། བཟླ་བྱའི་སྔགས་ནི། རིན་ཆེན་བཞི་པོ་གང་མོས་པ་གཉིས་མེད་དུ་བཟླ་བར་གསུངས་པས། ཨོཾ་ཤྲཱི་བཛྲ་ཧེ་ཧེ་རུ་རུ་ཀྃ་ཧུྃ་ཧཱུྃ་ཕཊ། ཌཱ་ཀི་ནཱི་ཛྭ་ལ་སམྦ་རི་བཛྲ་བཻ་རོ་ཙ་ནཱི་ཡེ་ཧུྃ་ཧཱུྃ་ཕཊ་སྭཱ་ཧཱ། ཞེས་ཡབ་ཡུམ་གྱི་སྙིང་པོ་གཉིས་སུ་མེད་པ་གཙོ་བོར་བཟླ། གཞན་རྣམས་བཟླ་བར་འདོད་ན་སྒྲུབ་ཐབས་རྒྱས་པར་ཤེས། མཐར་ཐལ་མོ་སྦྱར་ཏེ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བདག་དང་སེམས་ཅན་ཐམས་ཅད་ལ་བྱིན་གྱིས་བརླབ་ཏུ་གསོལ། མྱུར་ཏུ་ཕྱག་རྒྱ་ཆེན་པོ་མཆོག་གི་དངོས་གྲུབ་དཔལ་འཁོར་ལོ་བདེ་མཆོག་གི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། ཞེས་དངོས་གྲུབ་བླངས་ལ་ཡིག་བརྒྱ་ལན་གསུམ་གྱིས་བརྟན་པར་བྱའོ། །གཉིས་པ་གནས་པའི་རིམ་པ་ནི། བསྐྱེད་རིམ་གྱི་སེམས་འཛིན་ཏེ། དེ་ལ་གཉིས། ང་རྒྱལ་དང་། རྣམ་པ་ལ་སེམས་འཛིན་པའོ། །དང་པོ་ནི། ལུས་གནད་བསྲང་། རླུང་རང་བབས་སུ་བཞག །དྲན་པ་རྩེ་གཅིག་ཏུ་བྱས་ཏེ། ང་ནི་ཐ་མལ་པ་ནམ་ཡང་མ་ཡིན། སྐྱོན་ཀུན་ཟད། ཡོན་ཏན་ཀུན་རྫོགས། འབྲས་བུས་བཅུ་གསུམ་རྡོ་རྗེ་འཛིན་པའི་ས་ལ་བཞུགས་པ་དཔལ་འཁོར་ལོ་སྡོམ་པ་དེ་དངོས་ཡིན་སྙམ་པའི་ང་རྒྱལ་བསྐྱེད། དེའང་དང་པོ་ཧྲིལ་གྱིས་བསྒྲིམ། བར་དུ་ལྷོད་ཀྱིས་ཀློད། ཐ་མ་རང་སོ་བཟུང་ཞེས་སྤེལ་མའི་ཚུལ་དུ་ཉམས་སུ་བླང་། གཉིས་པ་ལ་གཉིས། སྤྱི་དང་། བྱེ་བྲག་གོ །དང་པོ་ནི། རང་འཁོར་ལོ་སྡོམ་པར་གསལ་བའི་སྐུའི་རྣམ་པ་སྤྱི་ཙམ་པ་མེ་ལོང་དུ་གཟུགས་བརྙན་ཤར་བ་ལྟར་དབུ་ནས་ཞབས་ཀྱི་བར་བློ་ལ་གཅིག་ཅར་དུ་སྣང་བ་ལ་སྔར་བཞིན་སེམས་གཟུང་། གཉིས་པ་ལ་གཉིས། རྒྱན་མེད་དང་། རྒྱན་ཅན་ནོ། །དང་པོ་ནི། རྣམ་པ་སྤྱིའི་གསལ་སྣང་མ་ཤོར་བའི་ངང་སྤྱན་དབུས་མ་ནས་བརྩམས་ཏེ་ཡབ་ཡུམ་གྱི་སྐུའི་ཆ་ཤས་སོ་སོ་དང་། དེས་མཚོན་ཏེ་ལུས་དཀྱིལ་གྱི་ལྷ་སོ་སོ་ལ་སེམས་གཟུང་། གཉིས་པ་ནི། སོ་སོའི་རྒྱན་ཆ་རགས་ཕྲ་ནས་མེ་རི་དང་གདན་ཁྲིའི་བར་དུ་སེམས་བཟུང་ཞིང་། ཡུན་ཐུང་ལ་གྲངས་མང་བའི་ཚུལ་གྱིས་བསླབས་པས་གསལ་སྣང་མཐར་ཕྱིན་པར་བྱའོ། །ཐུན་མཐར་རྡོ་རྗེ་སེམས་དཔའི་བསྡུ་བས་འོད་གསལ་དུ་འཇུག་པ་ནི། རྒྱུ་མཚན་རྒྱས་པར་འོག་ཏུ་འབྱུང་ཞིང་། འདིར་དམིགས་པའི་ངོ་བོ་ཙམ་བརྗོད་ན། རང་གི་ལྟེ་བར་པད་ཟླའི་སྟེང་དུ་ཧཱུྃ་ལས་རྡོ་རྗེ་སེམས་དཔའ་དཀར་པོ་རྡོར་དྲིལ་འཛིན་ཅིང་། ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཧཱུྃ། དེ་ལས་འོད་ཟེར་འཕྲོས་པས་ཕྱི་ནང་གི་ལྷ་ཐམས་ཅད་དང་། ཁམས་གསུམ་སྣོད་བཅུད་མ་ལུས་པ་གསལ་ཞིང་གཡོས་ཏེ། རང་ཧེ་རུ་ཀ་ཡབ་ཡུམ་ལ་ཐིམ། ཡུམ་ཡབ་ལ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ། དེའི་ཡུམ་རྡོ་རྗེ་སེམས་དཔའ་ལ། དེ་ཐུགས་ཀའི་ཧཱུྃ་ནས་ནཱ་དའི་བར་དུ་ཐིམ་སྟེ། མཐར་ནཱ་དའང་འོད་གསལ་སྟོང་པ་ཉིད་ཀྱི་ངང་དུ་ཐིམ་པར་བསམས་ལ། གནས་ལུགས་བརྗོད་བྲལ་བསམ་གྱིས་མི་ཁྱབ་པའི་དབྱིངས་སུ་མཉམ་པར་བཞག །སླར་ཡང་རང་སྐད་ཅིག་གིས་ཧེ་རུ་ཀ་ཡབ་ཡུམ་ལུས་དཀྱིལ་གྱི་ལྷ་དང་བཅས་པའི་སྐུར་གྱུར་པར་བསམས་ལ་དག་དྲན་རྒྱས་བསྡུས་གང་རུང་བྱའོ། །གསུམ་པ་ལྡང་བའི་རིམ་པ་མཉམ་པར་མ་བཞག་པའི་རྣལ་འབྱོར་ལ་གསུམ། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། དང་པོ་ནི། རང་གི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ། ཡབ་ཀྱི་སྙིང་གར་ཨོཾ་ཧ་དཀར་པོ་རྡོ་རྗེ་སེམས་དཔའ། མགོ་བོར་ན་མ་ཧི་སེར་པོ་རྣམ་པར་སྣང་མཛད། སྤྱི་གཙུག་ཏུ་སྭཱ་ཧཱ་ཧུ་དམར་པོ་པདྨ་གར་གྱི་དབང་ཕྱུག །ཕྲག་པ་གཉིས་སུ་པཽ་ཥ་ཊ་ཧེ་ནག་པོ་ཧེ་རུ་ཀ །མིག་གཉིས་སུ་ཧཱུྃ་ཧཱུྃ་ཧོ་དམར་སེར་རྡོ་རྗེ་ཉི་མ། ཚིགས་ཆེན་བརྒྱད་ལ་ཕཊ་ཧཾ་ལྗང་གུ་རྟ་མཆོག་གི་ངོ་བོ། ཡུམ་གྱི་ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧེཾ་ཡོཾ་སྔོན་མོ་གཤིན་རྗེ་མ། ཁར་ཧྲེཾ་མྃ་དཀར་མོ་རྨོངས་བྱེད་མ། སྤྱི་བོར་ཧྲཱིཾ་ཧྲཱིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧུྃ་ཧཱུྃ་ལྗང་གུ་སྐྲག་བྱེད་མ། ཚིགས་ཆེན་བརྒྱད་ལ་ཕཊ་ཕཊ་དུད་ཀ་ཙཎྜི་ཀིའི་ངོ་བོར་མོས་པ་ནི་ཡབ་ཡུམ་གྱི་གོ་ཆ་དང་། པུ་ཛཱ་སོགས་ཉེར་བཞི་བརྗོད་པས་ལུས་དཀྱིལ་གྱི་ལྷ་རྣམས་རང་རང་གི་གནས་སུ་ཐིམ་པར་བསམ་པ་ནི་གོ་ཆ་ཆེན་པོ་དང་། སྡིགས་མཛུབ་དང་བཅས་སུམྦྷའི་སྔགས་བརྗོད་ཅིང་། ཕྱོགས་གཡོན་སྐོར་དང་། མཚམས་གཡས་སྐོར་དུ་སེ་གོལ་གཏོགས་པ་ཚམ་རྔམས་སྔགས་ཀྱི་སྲུང་བ་སྟེ། དེ་ལྟ་བུའི་སྲུང་བ་རྣམ་པ་གསུམ་གྱིས་བསྲུངས་ལ། རང་དང་སྣང་བ་ཐམས་ཅད་དཔལ་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་ཤེས་པས་སྔགས་ཟློས་བཞིན་ཏུ། དགེ་བ་འདི་ཡིས་མྱུར་དུ་བདག །འཁོར་ལོ་བདེ་མཆོག་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེའི་ས་ལ་འགོད་པར་ཤོག །འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་ཀྱང་། །རོལ་མོ་གླུ་དབྱངས་སིལ་སྙན་སོགས་མཆོད་ནས། །མཁའ་ལ་སྤྱོད་པའི་གནས་སུ་འཁྲིད་པར་ཤོག །ལྷ་མོ་ཚད་མ་དམ་ཚིག་ཚད་མ་དང་། །དེས་ཆོས་གསུང་ཡང་ཚད་མའི་མཆོག་ཡིན་པས། །བདེན་པ་དེས་ཀྱང་ལྷ་མོ་དེ་དག་གིས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ཐམས་ཅད་ལྷ་དང་ཡེ་ཤེས་སུ་ཤེས་པས་དུས་འདའ་བར་བྱའོ། །གཉིས་པ་ནི། ཐོད་པ་ལ་སོགས་པའི་སྣོད་དུ་ཤ་ཆང་གི་དམ་རྫས་དང་བཅས་པའི་གཏོར་མ་བཤམས། འོད་གསལ་གྱི་ངང་ལས་ལྷ་སྐུར་ལྡངས་ཏེ། ནང་མཆོད་ཆུ་ཆང་དང་སུམྦྷས་བསང་། སྭབྷཱ་བས་སྦྱང་། རྒྱས་པར་མངོན་རྟོགས་རྣམས་ནས་འབྱུང་བ་ལྟར་རམ། བསྡུ་ན། ཨོཾ་ཨཱཿཧཱུྃ་ཧ་ཧོ་ཧྲཱིཿཧྲཱིཿས་བརླབ། མདུན་གྱི་ནམ་མཁར་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་དུར་ཁྲོད་ཆེན་པོ་བརྒྱད་དང་བཅས་པ་གསལ་བར་དམིགས་ལ། བདག་གི་སྙིང་གའི་ཧཱུྃ་ལས་འོད་ཟེར་འཕྲོས་ཏེ་དུར་ཁྲོད་བརྒྱད་ལ་ཕོག་པས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཆ་བརྒྱད་དུ་གྱུར་པར་བསམས་ལ་འབར་བའི་ཕྱག་རྒྱ་དང་ལྡན་པས་ངག་ཏུ་ཕཻཾ་ཞེས་བརྗོད་ཅིང་། སེམས་ཀྱིས་སྙིང་གའི་ཧཱུྃ་གི་འོད་ཀྱིས་ཡེ་ཤེས་ཀྱི་དཀྱིལ་འཁོར་ཆ་དགུ་སྤྱན་དྲངས་ལ། ཛཿཧཱུྃ་བྃ་ཧོཿ ཞེས་བརྗོད་པས་དཀྱིལ་འཁོར་ཆ་དགུ་ལ་དགུག་གཞུག་བཅིངས་དབང་དུ་བྱས། ཨོཾ་ཡོ་ག་ཞེས་སོགས་བརྗོད་ཅིང་རྣམ་ལྔ་འདོད་སྐོར་བྱ་སྟེ་བརྟན་པར་བྱའོ། །དེ་ནས་ལྷ་ཐམས་ཅད་ཀྱི་ལྗགས་ལ་ཧཱུྃ་ལས་རྡོ་རྗེ་སྦུ་གུ་ཅན་ཧཱུྃ་གིས་མཚན་པར་བསམ། གཏོར་མ་ལས་ཐོད་པ་བདུད་རྩིས་གང་བ་དུ་མ་ཆད་དེ་ཐམས་ཅད་ཀྱི་ཕྱག་ཏུ་བཞག་པས་གསོལ་བར་བསམ་ཞིང་ལག་པ་རྡོ་རྗེ་ཐལ་མོ་ཁ་ཕྱེ་ལ། ངག་ཏུ། ཨོཾ་བཛྲ་ཨཱ་རལླི་ཧོཿ ཛཿཧཱུྃ་བྃ་ཧོཿ བཛྲ་ཌཱ་ཀི་ནཱི་ས་མ་ཡ་སྟྭཾ་དྲི་ཤྱ་ཧོཿཨོཾ་ཨཱཿཧཱུྃ། ཞེས་ལན་ལྔ་བརྗོད་པས་འཁོར་ལོ་དགུ་ཚན་ལྔ་རིམ་པ་བཞིན་ཚིམ་པར་བསམས་ཏེ། །སྔགས་མཆོད་དང་། ཕྱི་ནང་གིས་མཆོད། བསྟོད་པ་ཅི་རིགས་ཀྱི་མཐར། ཧེ་རུ་ཀ་དཔལ་འཁོར་བཅས་རྣམས། མཆོད་སྦྱིན་གཏོར་མ་འདི་བཞེས་ལ་སོགས་ཀྱིས་འདོད་དོན་གསོལ། གཏོར་མ་གཉིས་པ་སོགས་ཡོད་ན་ཆོས་སྐྱོང་དང་། མཁའ་འགྲོ་སྤྱི་གཏོར་གྱི་ཆོ་གས་གཏང་། ཡི་གེ་བརྒྱ་པས་ནོངས་པ་བཟོད་པར་གསོལ་ཏེ། སྤྱན་དྲངས་པའི་གཏོར་མགྲོན་རྣམས་རང་བཞིན་གྱི་གནས་སུ་གཤེགས། མདུན་དུ་སྤྲུལ་པ་རྣམས་བདག་གི་ལུས་ལ་ཐིམ་པར་བསམ། དེ་ནས་དག་དྲན་དང་། གོ་ཆ་དགོད་པ་སོགས་སྔར་ལྟར་བྱའོ། །གསུམ་པ་ནི། ཁ་ཟས་ལ་ལག་པ་གཡོན་པའི་མཐེབ་སྲིན་གྱིས་རེག་སྟེ། ཨོཾ་ཨཱཿཧཱུྃ་ཞེས་བརྗོད་པས་བདུད་རྩིའི་རང་བཞིན་དུ་བརླབས་ལ་ནང་གི་སྦྱིན་སྲེག་གི་ཚུལ་དུ་ཚིམ་པར་རོལ་པའི་མཐར་བདག་མེད་པའི་ངང་དུ་ངལ་བསོ། ནུབ་མོ་ཉལ་བའི་ཚེ་རྡོ་རྗེ་སེམས་དཔའ་བསྡུ་བའི་རིམ་པས་འོད་གསལ་ལ་འཇུག །ཐོ་རངས་ལྡང་བའི་རྣལ་འབྱོར་གྱིས་ལངས་ཏེ་སྔར་བཞིན་དུ་རིམ་པ་གཉིས་ཀྱི་རྣལ་འབྱོར་ལ་བརྩོན་པར་བྱའོ། །བསྙེན་པ་བྱེད་ན་རྒྱས་པར་གཞན་དུ་ཤེས། བསྡུ་ན་མཚམས་དམ་དུ་བཅད། ཇི་སྐད་བཤད་པའི་མངོན་རྟོགས་ཐུན་བཞིའམ། གསུམ་དུ་བསྒོམས་ལ་ཡབ་ཡུམ་གྱི་སྙིང་པོ་འབུམ་ཕྲག་བཞི་ཁ་སྐོང་དང་བཅས་བཟླས་པས་ཀྱང་ལས་རུང་ཙམ་དུ་འགྱུར་བ་ཡིན་ནོ། །གཉིས་པ་བརྟེན་པ་རྫོགས་པའི་རིམ་པ་ནི། རྒྱས་པར་རྩ་དབུ་མ་ཆེ་བའི་ཁྲིད་ཡིག་ལྟར་ཉམས་སུ་བླང་བར་བྱ་ཞིང་། འདིར་གཞུང་གི་དངོས་བསྟན་བསྡུ་བ་གསུམ་གྱི་རྫོགས་རིམ་ཅུང་ཟད་བརྗོད་ན་གསུམ། རྩ་བའི་གཞུང་གིས་མདོར་བསྟན་པ། དེའི་དོན་རྒྱས་པར་བཀྲལ་བ། ཉམས་སུ་ལེན་པའི་ཚུལ་གྱིས་དོན་བསྡུ་བའོ། །དང་པོ་ནི། རྣལ་འབྱོར་མ་ཀུན་སྤྱོད་ཀྱི་རྒྱུད་དང་། གྲུབ་ཆེན་གྱི་གཞུང་ལས། ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོ་ངལ་བསོ་སྟེ། །ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཡི་གེ་མཆོག་གི་གནས་གྱུར་པ། །དེ་ཡི་དབུས་སུ་རྣམ་པར་བསྒོམ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་ཆོས་ཉིད་ཡིན། །དེ་ཡང་བསམ་གྱིས་མི་ཁྱབ་བསམ། །སེམས་ཉིད་བརྟག་པར་མི་བྱའོ། །བསམ་གྱིས་མི་ཁྱབ་དེ་བསམས་ནས། །དེ་ལས་གཟུགས་ནི་ཐོབ་པར་འགྱུར། །ཅེས་གསུངས་སོ། །གཉིས་པ་ནི། དེའི་དོན་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་སྔ་ནས། དེ་བརྗོད་པ་ལ་གསུམ་སྟེ། རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བའོ། །དང་པོ་ནི། རྩ་བའི་དཔེ་ལྔ་དང་། ཡན་ལག་གི་དཔེ་དུ་མས་མཚོན་པ་སྟེ། དེའང་བསྐྱེད་པའི་རིམ་པའི་ཐུན་གྱི་མཇུག་ཏུ། བཅོམ་ལྡན་འདས་ཀྱི་ལྟེ་བར་པདྨ་འདབ་མ་བརྒྱད་པའི་ལྟེ་བར་ཟླ་བས་བརྒྱན་པར་བསྒོམ། དེར་ཧཱུྃ་ལས་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་ཚུལ་དུ་བཞུགས་པ། གཉིས་ཀའང་རུས་པའི་རྒྱན་གྱིས་བརྒྱན་པའི་ཐུགས་ཀར་ཟླ་བའི་སྟེང་དུ་ཡི་གེ་ཧཱུྃ་བསྒོམ། ཧཱུྃ་དེ་ལས་འོད་ཟེར་འཕྲོས་པས། རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་དེ་ནས་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་གསལ་བར་བྱས་ལ། དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོས་པར་བསམས་ཏེ། དེ་ནི་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བའི་དཔེ་དང་པོ་ཡིན་ནོ། །དེ་ནས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ་བ་ནས། བཅོམ་ལྡན་འདས་ཀྱི་ཞལ་བཞི་ལ་བསྡུ་བའི་བར་ཏེ། དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་སྡུད་པ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི། ཞལ་གཅིག་ཕྱག་གཉིས་པར་བསྡུ་སྟེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡབ་ཡུམ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ་བསྡུ། རྡོ་རྗེ་སྙེམས་མའང་ཡབ་ལ། ཡབ་ཧཱུྃ་ལ། ཧཱུྃ་གི་གདན་ཟླ་བ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུ་སྟེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེའང་ཇེ་ཕྲ་ཇེ་ཕྲ་མི་དམིགས་པ་བསམ་གྱིས་མི་ཁྱབ་པའི་ངང་ལ་གཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚྭ་ཆུ་ལ་ཐིམ་པ་ཞེས་བྱ་བ་ཡིན་ནོ། །དེ་ནས་ཡན་ལག་གི་དཔེ་ནི་ངོ་བོ་ཉིད་ཀྱི་སྟེང་དུ་གཏན་ལ་དབབ་སྟེ། གོང་གི་སྤྲོས་པ་རྣམས་ནི་ཆ་ལུགས་སམ། འོད་ཟེར་རམ། རླབས་ཞེས་བྱ་བ་ཡིན་ལ། བསམ་གྱིས་མི་ཁྱབ་པའི་ངོ་བོ་ཉིད་ནི་གར་མཁན་དངོས་སམ། ཉི་མའམ། རྒྱ་མཚོ་ཉིད་དང་འདྲ་བ་ཡིན་པས་ན་གར་མཁན་ཉིད་དང་ཆ་ལུགས་དང་། ཉི་མ་དང་འོད་ཟེར་དང་། མཚོ་དང་རླབས་དག་ངོ་བོ་ཉིད་ཀྱི་སྟེང་དུ་ནི་ཆུ་ལ་ཆུ་བཞག་པའམ། མར་ལ་མར་བཞག་པ་སྟེ་ཡན་ལག་གི་དཔེ་ལྔས་མཚོན་པ་ཡིན་ནོ། །དེའི་ངང་ལ་བློ་ཇི་ཙམ་གནས་པ་ཅིག་བཞག་ལ། ལྡང་བར་འདོད་ན་གོང་དུ་བསྟན་པའི་ལྡང་བའི་རྣལ་འབྱོར་གྱིས་ཧེ་རུ་ཀར་ལངས་ཏེ། དག་པ་རྗེས་སུ་དྲན་པ་བྱ་བ་ཡིན་ནོ། །རྡོ་རྗེ་སེམས་དཔའ་བསྡུ་བ་ཞེས་བྱ་བའི་རིམ་པ་འདི་ནི་བསྐྱེད་པའི་རིམ་པའི་རྗེས་ལ་ཅིས་ཀྱང་བསྒོམ་པ་ཡིན་ནོ། །རྡོ་རྗེ་སེམས་དཔའ་བསྡུ་བའོ། །ཡི་གེ་བསྡུ་བ་དང་། ཐིག་ལེ་བསྡུ་བ་འདི་གཉིས་ནི་བསྐྱེད་རིམ་གྱི་རྗེས་ལ་ཅིས་ཀྱང་འབྱུང་བའི་རྫོགས་རིམ་ནི་མ་ཡིན་ཏེ། རྣལ་འབྱོར་པ་བསྐྱེད་རིམ་ལ་བརྟེན་པའམ། ཡང་ན་ལས་དང་པོ་པ་ཉིད་ནས་ཀྱང་རུང་སྟེ། རླུང་དང་སེམས་ཀྱི་དམིགས་པ་ལ་བརྟེན་ནས་ཏིང་ངེ་འཛིན་གྱི་ཡེ་ཤེས་མྱུར་དུ་ཚོལ་བར་འདོད་པའི་རྟེན་ཡིན་པས། བསྐྱེད་པའི་རིམ་པ་རྒྱས་པར་བསྒོམས་པའི་རྗེས་སམ། འདི་ཉིད་གཙོ་བོར་བྱེད་པའི་དུས་སུ་སྐད་ཅིག་གིས་ཧེ་རུ་ཀ་ཡབ་ཡུམ་དུ་དྲན་པར་བྱས་པའི་ལྟེ་བར་པདྨ་འདབ་མ་བཞི་པའི་ཤར་དུ་ས་རླུང་གི་རང་བཞིན་ལ་སེར་པོ། གཡོན་དུ་ཆུ་རླུང་གི་རང་བཞིན་ཝ་དཀར་པོ། རྒྱབ་ཏུ་མེ་རླུང་གི་རང་བཞིན་ར་དམར་པོ། གཡས་སུ་རླུང་རླུང་གི་རང་བཞིན་ཡ་ལྗང་གུ། དབུས་སུ་ནམ་མཁའི་རླུང་གི་རང་བཞིན་ཐིག་ལེ་ཁ་དོག་སྔོན་པོ་ཅིག་བསམས་ལ། རིམ་གྱིས་བློ་སྦྱང་བའི་ཕྱིར་དབུགས་ཕྱིར་རྒྱུ་བའི་དུས་སུ་མདུན་གྱི་ལ་སེར་པོ་ལས་འོད་ཟེར་ཁ་དོག་སེར་པོ་སྦོམ་ཕྲ་སྐུད་པ་འབྲིང་པོ་ཙམ་ལངས་ཏེ་གྱེན་དུ་བྱུང་བ་སྣ་སྒོ་གཡོན་པ་ནས་ཕྱུང་སྟེ། མདུན་དུ་སོར་བཅུ་དྲུག་ཙམ་གྱི་ཚད་དུ་བྱུང་བར་བསམ། རླུང་ནང་དུ་འཇུག་པ་དང་བསྟུན་ལ་འོད་ཟེར་དེ་ནང་དུ་བསྡོགས། ལ་སེར་པོ་དེ་ལ་བསྟིམས་ལ་ཡིད་ཀྱིས་ལ་སེར་པོ་དེ་ལ་བལྟ་ཞིང་རླུང་ཁ་སྦྱོར་གྱི་དམིགས་པ་བྱའོ། །དེས་དུ་བ་ལྟ་བུའི་རྟགས་མཐོང་བ་དེའི་ཚེ་ས་རླུང་དབང་དུ་གྱུར་པའི་རྟགས་ཡིན་པས་ལ་སེར་པོ་དེ་གཡོན་གྱི་ཝ་དཀར་པོ་ལ་བསྟིམ། ཝ་དཀར་པོ་ལས་འོད་ཟེར་དཀར་པོ་སྣ་བུག་གཡོན་པ་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་དང་བཅས་པ་སྔ་མ་བཞིན་བསྒོམས་པས་སྨིག་རྒྱུ་ལྟ་བུ་མཐོང་བ་དེའི་ཚེ་ཆུ་རླུང་དབང་དུ་འདུས་པ་ཡིན་པས་ཝ་དཀར་པོ་དེ་རྒྱབ་ཀྱི་ར་དམར་པོ་ལ་བསྟིམ། ར་དམར་པོ་ལས་འོད་ཟེར་དམར་པོ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་སྲིན་བུ་མེ་ཁྱེར་ལྟ་བུའི་རྟགས་མཐོང་བ་དེའི་ཚེ་མེ་རླུང་དབང་དུ་འདུས་པ་ཡིན་པས་ར་དམར་པོ་དེ་གཡས་ཀྱི་ཡ་ལྗང་གུ་ལ་བསྟིམས་ལ་བཞག །ཡ་དེ་ལས་འོད་ཟེར་ལྗང་གུ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་མར་མེ་འབར་བ་ལྟ་བུའི་རྟགས་མཐོང་བ་དེའི་ཚེ་རླུང་གི་རླུང་དབང་དུ་འདུས་པའི་རྟགས་ཡིན་པས་ཡི་གེ་ཡ་ལྗང་གུ་དེ་དབུས་ཀྱི་ཐིག་ལེ་སྔོན་པོ་ལ་བསྟིམས་ལ་བཞག །དེ་ནས་ཐིག་ལེ་སྔོན་པོ་ལས་འོད་ཟེར་འབྱུང་འཇུག་མེད་པར་ཐིག་ལེ་ལ་ཡིད་ཀྱིས་བལྟ་ཞིང་རླུང་ཁ་སྦྱར་གྱི་རྣལ་འབྱོར་པས་ནམ་མཁའ་སྤྲིན་མེད་ལྟ་བུ་མཐོང་བ་དེའི་ཚེ་ནམ་མཁའི་རླུང་དབང་དུ་འདུས་པ་ཡིན་པས། འདིའི་མཇུག་ཏུ་མཐོང་བའི་ལམ་གྱི་ཡེ་ཤེས་སྐྱེ་ཞེས་གསུངས་སོ། །ཡི་གེ་བསྡུ་བའོ། །ཐིག་ལེ་བསྡུ་བ་ནི། ཡི་གེ་རྣམས་ཀྱི་ཤུལ་དུ་ཐིག་ལེ་བསྒོམ་པ་སྟེ། ཤར་དུ་ཐིག་ལེ་སེར་པོ། གཡོན་དུ་དཀར་པོ། རྒྱབ་ཏུ་དམར་པོ། གཡས་སུ་ལྗང་གུ་རྣམས་བསྒོམས་ལ། འོད་ཟེར་གྱི་སྐུད་པའི་འབྱུང་འཇུག་དང་། རླུང་གི་རྣལ་འབྱོར་ལ་སོགས་པ་སྔ་མའི་ཚུལ་དུ་བསྒོམས་པས་མཐར་ཕྱིན་པའི་ཚད་སྔ་མ་བཞིན་དུ་འབྱུང་བར་འགྱུར་རོ། །དེས་ན་འདི་གཉིས་ཀྱང་རྣལ་འབྱོར་པ་རང་གི་བློ་ལ་གང་བདེ་བ་བསྒོམ་པ་ཡིན་ལ། གཅིག་གི་རྗེས་ལ་གཅིག་བསྒོམ་པ་ནི་མ་ཡིན་ནོ། ཞེས་གསུངས་པ་ལྟར་རོ། །གསུམ་པ་ནི། དེ་ལྟ་བུའི་རྡོ་རྗེ་སེམས་དཔའ་བསྡུ་བའི་རྫོགས་རིམ་ནི་བསྐྱེད་རིམ་གྱི་མཇུག་ཏུ་ངེས་པར་བསྒོམ་པའི་ཚུལ་གོང་དུ་བསྟན་ཟིན་ཅིང་། ཡི་གེ་བསྡུ་བ་དང་། ཐིག་ལེ་བསྡུ་བ་ནི་བསྐྱེད་རིམ་དང་འབྲེལ་ན་རྡོ་རྗེ་སེམས་དཔའ་བསྡུ་བའི་གོང་དུ་བསྒོམ། བསྐྱེད་རིམ་ལ་ཅུང་ཟད་བརྟན་པ་ཐོབ་པས་རྫོགས་རིམ་གཙོ་བོར་བྱེད་ནས་འདི་རྐྱང་པ་བསྒོམ་ན། སྐྱབས་འགྲོ་སེམས་བསྐྱེད་བླ་མའི་རྣལ་འབྱོར་རྣམས་སྔོན་དུ་འགྲོ་བས། བླ་མ་རང་ལ་བསྟིམས་པའི་རྐྱེན་གྱིས་རང་སྐད་ཅིག་གིས་དཔལ་འཁོར་ལོ་བདེ་མཆོག་གི་སྐུར་གྱུར་པར་བསམས་ལ་སེམས་གཟུང་། གསལ་སྣང་ཐོན་པ་ན་ལུས་བསྲང་། རླུང་རོ་བསལ། རང་གི་ལུས་ཀྱི་ནང་ཐམས་ཅད་སྟོང་གསལ་འོད་ཀྱི་རང་བཞིན་ཅན་དུ་གྱུར་པའི་སྤྲུལ་འཁོར་གྱི་ལྟེ་བར་ཇི་སྐད་བཤད་པའི་ཡི་གེའམ་ཐིག་ལེ་བསྒོམ། དེ་ལ་སེམས་ཟིན་པ་ན་འོད་ཀྱི་འབྱུང་འཇུག་བྱ། དེ་བརྟན་པའི་ཕྱིར་བུམ་པ་ཅན་ཁ་སྦྱར་དུ་བཟུང་བ་སོགས་ཇི་སྐད་གསུངས་པ་ལྟར་ཉམས་སུ་བླང་ངོ་། །དེ་ལྟར་བསྐྱེད་རྫོགས་ཀྱི་རིམ་པ་ཟབ་མོ་འདི་ནི་སྐུ་གསུམ་ལམ་བྱེད་ཀྱི་རྣལ་འབྱོར་དུ་ཇི་ལྟར་འགྱུར་པའི་ཚུལ་རྗེ་བཙུན་རིན་པོ་ཆེས། དེ་ལ་སློབ་དཔོན་ལཱུ་ཧི་པའི་དགོངས་པ་ཇོ་བོ་ནཱ་རོ་ཏ་པས་བསྐངས་པས་མངོན་པར་རྟོགས་པ་གཅིག་ལ་སྐུ་གསུམ་ལམ་དུ་བྱེད་པའི་སྒྲུབ་ཐབས་ཡིན་ཏེ། དེ་ཡང་བློའི་སྤྱོད་ཡུལ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། མངོན་པར་རྟོགས་པ་གཅིག་ལ་སྐུ་གསུམ་དུ་བཞག་པའོ། །དང་པོ་བདག་གི་བློ་སྣང་གི་དཀྱིལ་འཁོར་ནི་ཞིང་སྐྱེས་ཀྱིས་སྤྲུལ་ལ། ཞིང་སྐྱེས་ཉིད་ཀྱང་ལྷན་སྐྱེས་ཀྱིས་སྤྲུལ་པའི་ཕྱིར། དེ་གཉིས་ཀའང་སྤྲུལ་པའི་སྐུའོ། །ལྷན་སྐྱེས་ནི་གནས་འཕོ་བ་མེད་པའི་ཚུལ་གྱིས་ཟག་པ་མེད་པའི་བདེ་བ་དང་། ཆོས་ལ་ལོངས་སྤྱོད་པའི་ཕྱིར་ལོངས་སྤྱོད་རྫོགས་པའི་སྐུའོ། །ཆོས་ཀྱི་སྐུ་ནི་ཆོས་ཀྱི་སྐུ་ཉིད་དོ། །གཉིས་པ་དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་འཇོག་ན། བདེ་བ་ཆེན་པོའི་འཁོར་ལོ་ནི་ཆོས་ཀྱི་སྐུ། འཁོར་ལོ་གསུམ་ནི་ལོངས་སྐུ། སྒོ་མཚམས་མ་བརྒྱད་ནི་སྤྲུལ་པའི་སྐུའོ། །མངོན་པར་རྟོགས་པ་རྫོགས་པ་གཅིག་ལ་སྐུ་གསུམ་དུ་འཇོག་ན། ཕྱིའི་དཀྱིལ་འཁོར་དག་པ་དང་བཅས་པ་སྤྲུལ་པའི་སྐུ་ལམ་དུ་བྱེད་པའི་སྒྲུབ་ཐབས། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་ལོངས་སྤྱོད་རྫོགས་པའི་སྐུ་ལམ་དུ་བྱེད་པའི་སྒྲུབ་ཐབས། རྫོགས་པའི་རིམ་པ་སྤྱོད་པ་གཅིག་དང་བཅས་པ་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །དེ་ལ་འབྲིང་བསྡུས་གཉིས་ཀྱི་དབང་དུ་བྱས་ན་ཕྱིའི་དཀྱིལ་འཁོར་མེད་པས། ལུས་ལ་ལྷ་རྣམས་རྫོགས་པར་བསྐྱེད་པ་ཙམ་ནི་སྤྲུལ་པའི་སྐུ་ཡིན་ལ། བསྐྱེད་པ་གསལ་གདབ་པ་དང་། ཐིམ་པའི་ཚུལ་གྱིས་ལོངས་སྤྱོད་པ་ནི། ལོངས་སྤྱོད་རྫོགས་པའི་སྐུ་ཡིན་ལ། རྫོགས་པའི་རིམ་པ་སྤྱོད་པ་དང་བཅས་པ་ནི་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །ཞེས་གསུངས་པ་ལྟར་ཡིན་ལ། མདོར་ན་རིམ་གཉིས་བཟླས་པ་དང་བཅས་པ་ལ་བརྩོན་པས་དྲོད་ཅི་རིགས་པ་ཐོབ་ནས། སྤྲོས་བཅས་དང་། སྤྲོས་མེད་དང་། ཤིན་ཏུ་སྤྲོས་མེད་ཀྱི་སྤྱོད་པས་བོགས་དབྱུང་ཞིང་། ཡེ་ཤེས་ལ་དབང་འབྱོར་པ་ན་གཞན་དོན་དུ་ཕྱོགས་ལས་རྣམ་པར་རྒྱལ་བའི་སྤྱོད་པས་མཚམས་སྦྱར་ཏེ་མཐར་ཐུག་གི་འབྲས་བུ་ལ་རེག་པར་འགྱུར་རོ། །བཞི་པ་དེས་གྲུབ་པའི་འབྲས་བུ་ནི། དམན་བཞི་སོགས་ལས་རབ་འབྱམས་དང་། འབྲིང་གྲུབ་པ་ཆེན་པོ་བརྒྱད་དང་། འབྲིང་གི་རབ་མཁའ་སྤྱོད་ཀྱི་རིག་པ་འཛིན་པ་ཐོབ་པར་འགྱུར་བ་ནི་གནས་སྐབས་ཀྱི་འབྲས་བུ་ཡིན་ལ། །མཐར་ཐུག་ལམ་ལྔ་དང་ས་བཅུ་བདེ་བླག་ཏུ་བགྲོད་དེ་མཆོག་གི་དངོས་གྲུབ་སྐུ་གསུམ་གྱི་རང་བཞིན་སངས་རྒྱས་ཀྱི་ས་རྡོ་རྗེ་འཛིན་པ་ཉིད་འགྲུབ་པར་འགྱུར་བ་ཡིན་ནོ། །རྣལ་འབྱོར་གསང་མཐའ་འཁོར་ལོ་བདེ་མཆོག་གི། །རིམ་གཉིས་མན་ངག་གྲུབ་པའི་ཞལ་གྱི་ལུང་། །བདེ་ཆེན་འདོད་འཇོ་འདིར་བསྟེན་ཡིད་ཅན་ཀུན། །འཆི་མེད་སྐུ་གསུམ་གོ་འཕང་མྱུར་ཐོབ་ཤོག །ཅེས་པའང་རྗེ་བཙུན་རྡོ་རྗེ་འཆང་གྲགས་པ་རྒྱལ་མཚན་གྱི་གསུང་རབ་ཇི་ལྟ་བ་ལ། ཀུན་མཁྱེན་ཆེན་པོའི་རྣམ་བཤད་དང་། རྗེ་སངས་རྒྱས་དཔལ་བཟང་སློབ་ཚོགས་དང་བཅས་པའི་ཟིན་བྲིས་སོགས་ལས་དོན་གྱི་སྙིང་པོ་མདོར་བསྡུས་ཏེ། མང་དུ་ཐོས་པ་ལྟར་སྣང་བའི་བྱ་བྲལ་སྤོང་བ་པ་འཇམ་དབྱངས་མཁྱེན་བརྩེའི་དབང་པོས་བྲིས་པ་དགེ་ལེགས་མཆོག་ཏུ་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ། །འདིའི་རྫོགས་རིམ་ནི། རྗེ་བཙུན་རིན་པོ་ཆེའི་གསུང་གི་དངོས་བསྟན་བླ་མ་ཕྱི་མ་རྣམས་ཀྱིས་ཀྱང་སོར་བཞག་ཏུ་མཛད་པ་ལྟར་བྲིས་པ་ཡིན་ལ། དམིགས་པ་ཉམས་སུ་ལེན་ཚུལ་ཞིབ་པར་ཁྲིད་ཡིག་དག་ལས་ཤེས་པར་བྱའོ།། །།

[edit]

dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo/ @#/__/dpal 'khor lo bde mchog lU hi pa'i bskyed rdzogs kyi snying po shin tu bsdus pa bde chen 'dod 'jo zhes bya ba bzhugs so// oM swasti sid+d+haM/_gang gi drin gyis lhan skyes bde ba mchog__/stsol mdzad 'khor lo'i dbang phyug bla ma la/__/btud nas dngos grub mchog brnyes lU hi pa'i/__/gdams zab bskyed rdzogs snying po cung zad dbye/__/'di la gnyis/__rgyud las ji ltar gsungs pa'i khungs dgod pa dang /__mngon par rtogs pa bsgom tshul bye brag tu bshad pa'o/__/dang po la gsum/__rtsa rgyud kyi gleng gzhi'i gsang ba zhes pa'i tshig gis bstan pa'i lam rim dang /__le'u lnga bcu rtsa gcig pa'i de kho na nyid bcu bzhis bstan pa'i lam rim dang /__bshad rgyud kun spyod nas gsungs pa'i lam gyi rim pa'o/__/dang po ni/__rtsa rgyud kyi thog mar/__de nas gsang ba bshad bya ba/__/zhes bya ba'i gsang ba zhes pa'i tshig nges don du bshad na/__bskyed pa'i rim pa dang /__rdzogs pa'i rim pa dang /__de dag gi bsgrubs pa'i 'bras bu gsum bstan pa las/__dang po ni/__gsang ba mchog gi dges pa na/__/zhes sogs tshig bcad gnyis kyi ston te/__'di la rten la sbyar ba dang /__brten pa la sbyar ba gnyis las/__dang po ni/__gsang ba mchog gi dges pa na/__/thams cad bdag nyid rtag tu bzhugs/__/zhes pas rnal 'byor pa'i rten ri bo tshang tshing ri sul la sogs pa ston cing /__lha'i rten mngal skyes sgong skyes gang bsgom yang rlung gi dkyil 'khor nas ri rab kyi bar bstan no/__/yang lha'i rten thun mong ma yin pa chos 'byung nas gzhal yas khang gi bar yang bstan no/__/brten pa lha bskyed pa la/__mkha' 'gro kun dngos sems pa ni/__zhes pa nas/__dam tshig spyod pa'i spyod yul yin/__zhes pa'i bar tshig rkang ba drug gis mngal sgong gnyis char gyi bskyed rim rdzogs par bstan no/__/gnyis pa rdzogs pa'i rim pa la sbyar na/__gsang ba mchog gi dges pa na/__/thams cad bdag nyid rtag tu bzhugs/__/zhes pas rdzogs rim rim bzhi'i dang po shes bya rgyud kyi rim pa bstan/__sgra yi tshul la nges 'byung zhing /__/dam tshig spyod pa'i spyod yul yin/_/ces pas sngags kyi rim pa bstan/__/mkha' 'gro kun dngos sems pa ni/__/rdo rje sems dpa' bde ba'i mchog__/ces pas ye shes kyi rim pa bstan/__/'di ni rang byung bcom ldan pa/__/mkha' 'gro drwa ba'i sdom pa ni/__/zhes pas gsang ba'i rim pa bstan te/__de ltar na gsang ba zhes dang /__de'i don tshigs bcad gnyis kyis lam gyi gsang ba bskyed rdzogs gnyis ka ston pas/__'khor lo bde mchog gi lam gyi rim pa ma lus pa bstan no/__/gsum pa de dag gis bsgrubs pa'i 'bras bu gsang ba ni/__thun mong dang mchog gi dngos grub ste/__/sngags bzlas bsam gtan la sogs ldan/__/cho ga'i sbyor nyid ye shes kyang /__/zhes pas bstan no/__/gnyis pa ni/__rtsa rgyud le'u lnga bcu rtsa gcig pa las/__gos dang phyag rgya lnga la sogs/__/shes rab yan lag phur bu dra/__/A li kA li zhes brjod pa/__/rgyu sogs stong pa sngon 'gro ba/__/'jug pa sgra la sogs pa nas/__/ji srid bsdus pa'i sbyor ldan zhing /__/bdud rtsi tshim byed mya ngan 'das/__/lag pa'i mchod pa dbang bskur ba/__/go cha chen pos yang dag bsrung /__/sngags rnams kun gyis mchod pa yin/__de ltar de nyid bcu bzhi ni/__/mdor bsdus nas ni bshad pa yin/__/zhes gsungs te/__'di nyid lha mngal skyes ltar na/__bskyed rim 'ba' zhig gi mnyam bzhag rjes spyod dang bcas la sbyar ba dang /__lha sgong skyes ltar na/_bskyed rdzogs ma lus pa sbyar ba gnyis las/__'dir phyi ma ltar bshad na/__gos ni phan 'dogs pas gos zhes bya ste/_bskyed rim gyi sngon 'gro tshangs pa'i gnas bzhi bsgom pa la sogs pa'o/__/phyag rgya lnga la sogs pa ni mnyam bzhag gi dus kyi dpa' bo dpa' mo rnams kyi sku la yod pa'i rgyan no/__/shes rab yan lag ni phung po dang khams dang skye mched kyi dag pa dran pa'o/__/phur bu dra ba ni rjes spyod kyi dus su tsham rngam sngags kyis srung ba byed pa'o/__/A li kA li zhes brjod pa ni ngag dag par byed pa ste/__des mtshon nas thog ma nyid du lus ngag yid gsum dag par bya ba'o/__/rgyu sogs bsod nams kyi tshogs/__stong pa sngon 'gro ba ye shes kyi tshogs so/__/'jug pa ni sems can gyi don la 'jug cing spro ba yin la/__sgra la sogs pas ni/__stong pa'i ngang las 'byung ba rim brtsegs sna tshogs pad+ma'i bar du bskyed pa dang /__sna tshogs pad+ma'i lte bar A li las zla ba/__de'i steng du kA li las nyi ma/__de'i bar du hU~M/__nyi ma'i steng du yi ge gsum rim pa bzhin du/__de'i steng du pad+ma/__de'i steng du zla ba/__de'i steng du hU~M ste yi ge gsum mas rim gyis gcig la gcig thim nas hU~M gi thig le nA dar gyur pa'i bar ni sgra yin la/__sogs pa zhes pa'i ni nA da sgra de nyi zla'i bar gyi tshul hU~M la thim ste/__de thams cad gyur pa las/__rten brten pa thams cad dus gcig la bskyed pa'o/__/de nas brtsam nas/__ji srid bsdus pa'i sbyor ldan zhing ni/__sprul sku la dmigs pa'i rjes la lus dkyil bsgom pa dang /__longs spyod rdzogs pa'i sku la dmigs pa dang /__byang chub kyi phyogs kyi dag pa dran pa dang /__/chos kyi sku la dmigs pa'i bar dang /__ye shes sems dpa' spyan drang ba'i bar bsdu ba'o/__/bdud rtsi tshim byed ni mchod pa byed pa'i dus su bdud rtsi myong ba'o/__mya ngan 'das ni phyag rgya bzhi dang /__rdo rje sems dpa' bsdu ba sogs rdzogs rim bsgom pa ste/__de ltar de kho na nyid bcu pa des ni mnyam gzhag kho na bstan to/__/lag pa'i mchod pa la sogs pa bzhi ni rjes spyod kho na ste/__rjes spyod kyi dus su lag mchod bya ba dang /__dbang bskur ba khrus kyi rnal 'byor bya ba dang /__rjes kyi dus su go cha chen pos bdag nyid bsrung ba dang /__rtsa ba'i sngags brjod pa la sogs pa'i sngags rnams kun gyis mchod pa bya ba ste/__de ltar na 'bras bu 'grub pa la mi bslu zhing /__sgrub pa po la phan 'dogs par byed pa de kho na nyid bcu bzhi po de ni/__bde mchog nyung ngu'i rgyud 'dir/__'bum phrag gsum pa'i rgyud las/__mdor bsdus nas bshad pa yin no/__/gsum pa ni/__bshad rgyud kun spyod las gsungs pa'i lam gyi rim pa la gnyis te/__rgyud kyi brjod bya ma lus pa 'khrugs bsdebs pa'i lam rim dang /__lam gyi dngos gzhi nyin zhag phrugs gcig la ji ltar bya ba'i tshul mdor bsdu ba'o/__/dang po ni/__rnal 'byor ma kun tu spyod pa'i brjod bya thams cad gnyis su bsdu ba dang /__gsum du bsdu ba dang /__bzhir bsdu ba dang gsum las/__/dang po ni/__de bzhin gshegs pa'i dbugs dbyung dang /__rdo rje 'dzin pa'i dbugs dbyung gnyis te/__de nyid rgyu'i dbang du byas na kun rdzob kyi bden pa ni de bzhin gshegs pa'i dbugs dbyung /__don dam pa'i bden pa ni rdo rje 'dzin pa'i dbugs dbyung /__lam gyi dbang du byas na bskyed rim dang /__rdzogs rim gnyis/__'bras bu'i dbang du byas na gzugs sku dang /__chos sku gnyis la dbugs dbyung gnyis sbyar dgos te/__kun spyod las/__rgyud 'di yi ni rnal 'byor pa/__/bden pa gnyis la yang dag brten/__/zhes dang /__kun spyod le'u bcu gsum pa las/__bsod nams ye shes tshogs dag ni/__/bden pa gnyis la brten pa yin/__/zhes dang /__le'u bcu gcig pa las/__bde gshegs dbugs dbyung gsungs pa ni/__/dag pa'i lus ni skyon med pa/__/zhes gsungs pas so/__/gnyis pa ni/__lam gyi kun tu spyod pa dang /__de rdzogs par byed pa yan lag gi kun tu spyod pa dang /__'bras bu'i kun tu spyod pa gsum du 'dus so/__/gsum pa ni/__de'i sngon du rgyu'i kun spyod sngon du song bas nyams su len pa'i rten gyi gang zag bgrangs na bzhir 'gyur ro/__/de ltar bshad na rten gyi gang zag la gnyis te/__lam la 'jug pa dang /__zhugs pa'o/__/dang po la gsum/__mi dge ba 'ba' zhig spyod pa lam dag pa/__pha rol tu phyin pas rgyud ci rigs sbyangs ba dag pa/__res sdig pa/__res dge ba spyod pa 'dres pa ste/__de skad du/__dag dang ma dag 'dres pa ste/__/sgrub pa po ni gsum du gnas/__/zhes gsungs pas so/__/lam zhugs la'ang gsum ste/__bskyed rim 'ba' zhig la dga' ba mnyes par byed pa'i sgrub pa po dang /__rdzogs rim 'ba' zhig bsgom pa rnam par dag pa'i sgrub pa po dang /__zung du 'jug pa la dga' ba gsal byed yon tan ldan pa zhes bya ba ste/__de yang /__mnyes bya rnam par dag pa dang /__/gsal byed yon tan ldan pa'i mi/__/zhes gsungs pa yin no/___/yang rgyud 'dir ni gang zag gnyis te/__spang bar bya ba dang /__bsgrub par bya ba'i gang zag go/__/dang po ni/__le'u bcu gcig pa las/__lkugs shing glen pa sdig dang ldan/__/byis pa'i shes pas shes pa can/__/sems can yongs su ma smin dang /__/phyi rol bstan bcos kyis 'chal ba/__/de dag kun gyis mi shes te/__/mi shes mun pas khebs pa dang /__/khengs pa la ni rtag dga' ba/__/nga rgyal la sogs bdun sems ldan/__/de dag kun kyang sangs rgyas kyi/__/spyod yul gsang ba mi shes so/__/zhes pa'i yan lag gsungs pa dang /__/sgrub pa'i mtshan nyid kyang de nyid las/__/bla ma'i rim pa ji ltar bstan/__/gang gis myur du shes 'gyur ba/__/skye bo bye ba stong phrag tu/__/nga yi ye shes kyis bskul yin/__dad pa yang dag ldan pa dang /__/rnal 'byor spyod tshul la gnas yin/__/zhes gsungs la/__le'u dang po la rnal 'byor gyi dbang phyug ces gsungs so/__/dang po lam gyi kun tu spyod pa la gsum/__rten dang brten par bcas pa bskyed pa phyi'i kun spyod sprul pa'i sku lam du byed pa dang /__lus la lha rnams rdzogs par bsgom pa nang gi kun spyod longs sku lam du byed pa dang /__rdzogs pa'i rim pa nyams myong dang bcas pa ni rdzogs pa'i kun spyod chos sku lam du byed pa'o/__/gnyis pa de rdzogs par byed pa yan lag gi kun tu spyod pa la gsum ste/__dang po rdzogs par byed pa'i yan lag dang /__gsum ga rdzogs par byed pa'i yan lag dang /__de dag brtan par byed pa'i spyod pa'o/__/dang po la lnga ste/__phung po khams dang skye mched sbyang bsgyur dang /__tshogs gnyis bsags pa dang /__go cha bcing ba dang /__ye shes pa dgug pa dang /__dbang bskur ba'o/__/gnyis pa la lnga ste/__sngags mchod dang /__/gsang pa'i mchod pa dang /__dam tshig can la gtor ma sbyin pa dang /__dam tshig dang /__sdom pa dang /__thun mong gi bya ba byang chub kyi phyogs kyi dag pa dang /__thun mtshams gyi phye ba'o/__/'di la'ang lnga ste/__khams dang rgyan cha'i dag pa dang /__sum b+ha ni'i srung ba/__spyod lam gyi rnal 'byor/__kha zas kyi rnal 'byor/__nyal ba dang ldang ba'i rnal 'byor ro/__/gsum pa la rang don gyi spyod pa dang /__gzhan don phyogs las rnam par rgyal ba'i spyod pa gnyis las/__dang po la gsum ste/__bskyed rim brtan par byed pa spros bcas kyi spyod pa/__rdzogs rim brtan par byed pa spros med kyi spyod pa/__/gnyis ka brtan par byed pa shin tu spros med kyi spyod pa'o/__/gsum pa 'bras bu'i kun tu spyod pa la/__thun mong gi dngos grub dang /__mchog gi dngos grub dang /__phyag rgya chen po mchog gi dngos grub gsum ste/__de ltar na kun tu spyod pa zhes pa'i tshig de nyid kyis/__'khor lo bde mchog gi lam dang 'bras bu ma lus pa bstan cing /__le'u gang nas gang 'byung ba ni rgyud kyi steng du rtogs par bya'o/__/gnyis pa lam gyi dngos gzhi nyin zhag phrugs gcig la ji ltar bya ba'i tshul mdor bsdus pa ni/__kun spyod le'u bcu gnyis pa las/__'dug dang ldang ba nyid dang ni/__/'jug dang rdzogs pa nyid dag dang /__/byin gyis brlab dang dbang bskur dang /__/ting 'dzin mchod pa bsdu ba yin/__/zhes bya ba de kho na nyid bcu ste/__de la gdug pa zhes bya ba ni/__tshangs pa'i gnas bzhi dang /__gzhi sbyang bsgyur dang /__srung ba'i 'khor lo dang /__bsod nams dang ye shes kyi tshogs bsags nas bdag med pa la blo cung zad 'dug pa yin no/__/gnyis pa ldang ba ni/__byang chub kyi sems kyi rgyun gyis sems can gyi don bya'o snyam pa'i bsam pas 'byung ba rim brtsegs ri rab dang bcas pa bsgom pa'o/__/gsum pa 'jug pa ni/__ri rab kyi steng du mngon par byang chub pa lnga las rten dang brten pa dus gcig tu phyi'i dkyil 'khor bsgom pa'o/__/bzhi pa rdzogs pa ni/__lus kyi dkyil 'khor rdzogs par bsgom pa sngags kyi byin gyis brlab pa'o/__/lnga pa byin gyis brlab pa ni/__pho nya bsre ba/__go cha bcing pa/__ye shes pa dgug pa rnams yin no/__/drug pa ni/__dbang bskur nas rigs kyi bdag pos rgyas gdab pa dang bcas pa'o/__/bdun pa ting nge 'dzin ni/__byang chub kyi phyogs kyi dag pa dran par byas la/__lha'i sku mdog dang phyag mtshan la sems cung zad 'dzin pa yin no/__/brgyad pa mchod pa ni/__sngags kyi mchod pa dang /__phyi'i mchod pa dang /__bdud rtsi'i mchod pa dang /__mnyes pa'i mchod pa dang /__yid las byung ba'i mchod pa dang /__bstod pa'i mchod pa dang /__gsang ba'i mchod pa ste/__de rnams bzlas pa sngags mchod kyi khongs su 'du la/__gsang ba'i mchod pa ni rdzogs pa'i rim par 'gro ba'i skabs kyang yod do/__/gtor ma'ang mchod pa'i skabs su 'du ba yin te/__thun gong ma rnams la gtor ma thun mjug bsdu ba'i rjes la gtong la/__thun tha ma la ni gtor ma dang dag pa dran pa'i rjes la bsdu ba bsgom pa yin no/__/thun mtshams kyi bya ba la/__kha zas dang /__spyod lam dang /__phyi mchod dang /__lag mchod kyang mchod pa'i khongs su bsdu la/__tshes bcu'i mchod pa'ang der 'du'o/__/dgu pa bsdu ba zhes bya ba ni rdzogs pa'i rim pa ste/__rdo rje sems dpa' bsdu ba'i rim pas dkyil 'khor bsdus la/__thun gong ma rnams la ni/__de las langs la dag pa dran pa byed la/__thun tha ma la ni dag pa rjes dran gyi rjes la rdo rje sems dpa'i bsdu ba byas nas de'i ngang la nyal ba'i rnal 'byor byed pa yin no/__/bcu ba yin zhes pa ni nges pa ste/__dag pa ni khams kyi dag pa dang /__rgyan cha'i dag pa byas la/__dkyil 'khor gyi 'khor lo bsdus te tsham rngams sngags kyis bsrungs la/__spyod lam gyi rnal 'byor byed pa yin no zhes rje btsun rin po che grags pa rgyal mtshan gyis gsungs so/__/gnyis pa ni/__de lta bu'i rgyud sde zab mo'i dgongs pa spyi dang /__khyad par rnal 'byor ma kun tu spyod pa'i rgyud la brten nas grub chen lU hi pa'i zhal snga nas bskyed rdzogs gnyis ka'i snying po bsdus pa dpal mngon par rtogs pa zhes bya ba'i gzhung 'di mdzad pa ste/__'di'i don nye bar bsdu na bzhi/__gang du bsgom pa'i gnas/__gang gis sgom pa'i gang zag__/des bsgom pa'i lam/__lam des grub pa'i 'bras bu'o/__/dang po ni/__ri'i sul dang /__chu bo'i ngogs dang /__shing gcig gi drung sogs mdor na dben zhing yid dang mthun pa'i gnas ji ltar rigs pa'o/__/gnyis pa ni/__gzhung las/__dang por re zhig rnal 'byor pa'i dbang phyug gis zhes gsungs pa'i don 'phags pa rin po ches/__byang chub sems brtan dbang rab thob/__/sngags rig rnal 'byor dbang phyug gis/__/zhes gsungs pa ltar/__nges 'byung dang snying rje chen pos rgyud legs par sbyangs pas byang chub kyi sems rin po che la brtan pa thob pa/__dpal 'khor lo bde mchog gi dkyil 'khor du dbang bskur ba rdzogs par thob cing /__dbang dus su khas blangs pa'i dam tshig dang sdom pa rnam par dag pa/__gsang sngags kyi rgyud sde'i don thos bsam gyis gtan la phab pas ji lta ba bzhin rig pa slob pa'i rnal 'byor pas gzhan don du rdzogs pa'i byang chub tshe 'di nyid la don du gnyer ba'i blos rim pa gnyis kyi lam 'dir 'jug par bya'o/__/gsum pa ni/__paN grub nA ro ta pa'i slob bshad kyi man ngag 'dzin pa bal po pham mthing pa yab sras dang /__mal gyo blo gros grags pa'i dgongs pa rje btsun rin po che grags pa rgyal mtshan gyi zhal nas 'di ltar gsungs te/__lam mngon par rtogs pa ni bzhis bcings pa ste/__mnyam par gzhag pa'i rnal 'byor/__spyod lam gyi rnal 'byor/__gtor ma'i rnal 'byor/__kha zas kyi rnal 'byor ro/__/nyal ba'i rnal 'byor ni rdzogs pa'i rim pa'i khongs su 'du la/__ldang ba'i rnal 'byor dang /__khrus kyi rnal 'byor gnyis ni bskyed rim gyi sngon 'gro yin zhing /__dag pa rjes su dran pa ni kha cig spyod lam gyi rnal 'byor gyi khongs su'ang bsdu mod kyi/__'dir bskyed rim brtan par byed pa yin pas mnyam gzhag gi khongs su bsdu'o/__/dang po mnyam par gzhag pa'i rnal 'byor la gnyis te/__bskyed pa'i rim pa dang /__rdzogs pa'i rim pa'o/__/dang po la gnyis te/__bdag nyid sangs rgyas su bskyed pa la mchod pa dang /__bzlas pa'i rnal 'byor ro/__/dang po la gsum ste/__rgyas pa la dga' bas ji snyed yod pa'i chos ji lta ba bzhin du bsgom pa dang /__'bring la dga' bas ji lta ba bzhin bsgom pa dang /__bsdus pa la dga' bas rang gi lus la ji ltar grub pa tsam zhig bsgom pa'o/__/zhes gsungs pa'i dang po rgyas par bsgom pa la gnyis/__bdag nyid sangs rgyas su bskyed pa dang /__de la mchod pa'o/__/dang po la gnyis/__rgyu tshogs gnyis bsags pa dang /__'bras bu lha bskyed pa'o/__/dang po la gnyis/__bsod nams kyi tshogs bsag pa dang /__ye shes kyi tshogs bsgom pa'o/__/dang po la bzhi/__nyal ba dang ldang ba'i rnal 'byor sngon du 'gro bas tshangs pa'i gnas bzhi bsgom pa/__tshogs gsog pa'i rten bdag gi gzhi sbyang bsgyur/__tshogs bsag pa dngos la tshogs bsag bcu gsum/__ye shes kyi tshogs bsgom pa la bar chad mi 'byung bar bya ba'i phyir srung ba'i 'khor lo bsgom pa'o/__/'bras bu lha bskyed pa la bzhi/__dam tshig sems dpa' bskyed pa/__ye shes kyi 'khor lo dgug bzhug bya ba/__go cha bcing pa/__dbang bskur zhing rgyas gdab pa'o/__/de'i dang po la gnyis/__phyi'i dkyil 'khor dag pa dang bcas bsgom pa dang /__lus kyi dkyil 'khor sngags kyi byin gyis brlab pa dang bcas bsgom pa'o/__/de ltar bdag nyid sangs rgyas su bskyed nas mchod pa dang bzlas pas mnyes par bya/__rdzogs pa'i rim pas 'od gsal du bsdu zhing /__slar yang lha'i skur langs te dag pa rjes su dran pa dang /__gtor ma dang /__spyod lam dang /__kha zas kyi rnal 'byor sogs ci rigs pa la 'jug par bya ste/__mdor na skyabs su 'gro ba dang /__sems bskyed pa dang /__rdo rje sems dpa'i sgom bzlas rnams kha bskangs te/__rang 'khor lo bde mchog tu gsal gdab/__bdud rtsi byin gyis brlabs pa myang ba nas brtsams te sgrub thabs rgyas pa nas ji ltar gsungs pa bzhin nyams su blang ba yin no/__/gnyis pa 'bring du bsgom pa ni/__nyal ba dang ldang ba'i rnal 'byor sngon du 'gro bas dga' ba gsum gyi rnal 'byor dang /__sems bskyed pa dang /__rang gi lus gdod nas grub pa'i dkyil 'khor gyi 'khor lo dran pa dang /__bla ma la gsol ba gdab cing srung ba'i 'khor lo bsgom pa tsam sngon du 'gro bas lus kyi dkyil 'khor rten dang brten par bcas pa bsgom/__sngags kyis byin brlab/__dag pa dran par bya ba'am ma byas kyang rung /__ye shes pa bcug cing go cha bcing ba sogs lhag ma rnams rgyas pa'i skabs ltar bya'o/__/gsum pa bsdus te bsgom pa'i tshul 'dir gsal bar brjod na gnyis/__rten bskyed pa'i rim pa dang /__brten pa rdzogs pa'i rim pa'o/__/dang po la gsum/__'jug pa'i rim pa/__gnas pa'i rim pa/__ldang ba'i rim pa'o/__/dang po la brgyad/__nyal ba'i rnal 'byor/__ldang ba'i rnal 'byor/__khrus kyi rnal 'byor/__tshad med pa'i rnal 'byor/__bla ma'i rnal 'byor/__bdag nyid sangs rgyas su bskyed pa'i rnal 'byor/__mchod pa'i rnal 'byor/__bzlas pa'i rnal 'byor ro/__/dang po nyal ba'i rnal 'byor ni/__mdangs nub mor nyal ba'i rnal 'byor chos thams cad bsam gyis mi khyab pa rdo rje sems dpa'i bsdu ba'i rdzogs rim stong pa nyid kyi ngang du nyal/__/gnyis pa ldang ba'i rnal 'byor ni/__/tho rangs nam gyi bzhi cha'am brgyad cha'i dus su bab pa na/__nam mkha' nas DA ma ru'i sgra sngags kyi gdangs su bsgrags pas gnyid bskul nas/__de'i skad cig la dpal 'khor lo bde mchog yab yum gyi skur langs te ldang ba ni sku'i dga' ba/__bdud rtsi ril bu dngos sam/__nang mchod oM AHhU~M ha ho hrIHsa byin gyis brlabs te myong zhing /__ngag tu/__shrI he ru ka a haM/__shrI ni gnyis med ye shes te/__/he ni rgyu sogs stong pa nyid/__/ru ni tshogs dang bral ba ste/__/ka ni gang du'ang mi gnas pa'o/__/zhes brjod cing don dran par bya ba gsung gi dga' ba/__snying gar a las zla ba'i dkyil 'khor gyi steng du hU~M mthing nag__/a ni rnam par mi rtog pa'i ye shes/__zla ba ni dag pa 'jig rten pa'i ye shes/__hU~M ni gzung 'dzin gnyis dang bral ba'i yid ye shes lnga'i rang bzhin no zhes mos pa ni thugs kyi dga' ba'o/__/gsum pa khrus kyi rnal 'byor ni/__bsam gtan gyi grogs su 'gro na/__chu gtsang ma'am rdo rje'i chus dbang lha spyan drangs pas khrus mdzad par bsams la/__ji ltar bltams pa sogs brjod cing khrus bya'o/__/bzhi pa tshad med pa'i rnal 'byor ni/__bde ba'i stan la bsam gtan gyi spyod lam dang ldan pas 'dug ste/__skyabs yul 'khor lo sdom pa'i rnam par gsal btab la/__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste/__ji srid byang chub snying po la mchis kyi bar du/__phyogs bcu dus gsum gyi de bzhin gshegs pa thams cad kyi sku gsung thugs yon tan phrin las thams cad kyi ngo bo/__chos kyi phung po stong phrag brgyad cu rtsa bzhi'i 'byung gnas/__'phags pa'i dge 'dun thams cad kyi mnga' bdag__/rje btsun rtsa ba dang brgyud par bcas pa'i dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la skyabs su mchi'o/__/dam pa'i chos rnams la skyabs su mchi'o/__/'phags pa'i dge 'dun rnams la skyabs su mchi'o/__/zhes ci nus kyi mthar thal mo sbyar te/__bla ma dang dkon mchog rin po che rnam pa gsum la bdag phyag 'tshal zhing skyabs su mchi'o/__/khyed rnams kyis bdag gi rgyud byin gyis brlab tu gsol/__skyabs yul rnams 'od du zhu nas rang la thim par bsam/__sems can thams cad kyi don du rdzogs pa'i sangs rgyas kyi go 'phang thob par bya/__de'i ched du bdag gis lam zab mo nyams su blang bar bgyi'o/__/zhes lan gsum gyis sems bskyed/__spro na rdor sems sgom bzlas kyang ma rgyud spyi ltar bya'o/__/lnga pa bla ma'i rnal 'byor ni/__rang gi spyi bor pad+ma dang zla ba'i gdan la skad cig gis rtsa ba'i bla ma sangs rgyas rdo rje chos kyi rnam pa can/__sku mdog dmar po rdo rje dang dril bu 'dzin pa/__dar dang rin po che dang rus pa'i rgyan gyis brgyan pa/__zhabs rdo rje'i skyil mo krung gis bzhugs pa/__skyabs gnas thams cad 'dus pa'i ngo bor gyur par bsams la/__gang gi drin gyis bde chen nyid/__skad cig nyid la 'char ba gang /__/bla ma rin chen lta bu'i sku/__/rdo rje can zhabs pad la 'dud/__/ces dang /__dus gsum sangs rgyas thams cad kyi ngo bo bla ma rin po che la gsol ba 'debs so/__/bdag gi rgyud byin gyis brlab tu gsol/__ces mos gus drag pos gsol ba btab pas/__bla ma 'od du zhu nas rang la thim pas rang gi lus ngag yid gsum dang bla ma'i sku gsung thugs dbyer med du gyur par bsams la/__chos thams cad rang gi sems kyi rnam 'phrul dang /__de'ang sgyu ma lta bu dang /__rang bzhin med pa'i stong nyid du shes pa'i ngang la mnyam par gzhag__/drug pa bdag nyid sangs rgyas su bskyed pa ni/__'og gi rlung gis rang gi lus la gdod nas grub pa'i lte ba'i a~M mas yar phul ba ni tshul/__ltag pa'i rlung gis spyi gtsug gi ha~M yas mar phul ba ni sgra ste/__de ltar sgra tshul gnyis snying gar 'dres pa'i rkyen gyis skad cig gis rten dang brten par bcas pa'i dkyil 'khor cig car du gyur pa ni/__rkang mthil rlung gi dkyil 'khor/__sum mdo me/__lto ba chu/__snying ga sa/__sgal tshigs ri'i rgyal po ri rab/__mgo bo ri rab kyi stod/__dpral ba dang /__ltag pa rna ba gnyis sna tshogs rdo rje/__klad pa dkar po zla ba/__klad khyim dmar po nyi ma/__de gnyis kyi bar na gnas pa'i ha~M yig ni yi ge hU~M rdo rje sems dpa'i rang bzhin/__lus 'dom gang gru bzhi ni gzhal yas khang pa gru bzhi/__snying ga chos kyi 'khor lo nas 'byung ba bzhi'i rlung rgyu ba'i sgo bzhi/__rkang brgyad ka ba brgyad/__mig dang /__rna ba dang /__sna dang /__lce dang /__mchu dang /__rgyu long la sogs pa ni gzhal yas khang gi rgyan/__rang nyid phyi dbyibs kyi lus dang snying ga'i nang gi hU~M gnyis ka'ang bcom ldan 'das he ru ka sku mdog sngon po/__zhal bzhi phyag bcu gnyis pa/__rtsa zhal sngon po/__g.yon ljang /__rgyab dmar/__g.yas ser ba/__zhal re re bzhin spyan gsum gsum dang ldan zhing mche ba bzhi bzhi gtsigs pa/__phyag dang po gnyis kyis rdo rje dang dril bu 'dzin pas yum la 'khyud pa/__de'i 'og ma gnyis kyis glang po che'i pags pa brgyangs te 'dzin pa/__g.yas kyi gsum pa na DA ma ru/__/bzhi pa na dgra sta/__lnga pa na gri gug__/drug pa na mdung rtse gsum pa sgreng ba/__g.yon gyi gsum pa na rdo rjes mtshan pa'i kha T+wAM ga__/bzhi pa na khrag gis bkang pa'i thod pa/__lnga pa na rdo rje'i zhags pa/__drug pa na tshangs pa'i mgo bo bsnams pa/__pad+ma dang nyi ma'i steng na zhabs g.yas brkyangs pas dus mtshan ma dmar mo dang /__g.yon bskums pas 'jigs byed nag po mnan pa/__ral pa'i thor tshugs spyi bor bcings pa'i rtser yid bzhin gyi nor bus spras shing g.yon na tshes gcig gi zla ba dang mtshogs ma'i steng na sna tshogs rdo rjes mtshan pa/__dbu re re la mi mgo skam po lnga lngas brgyan cing rlon pa lnga bcu'i do shal can/__rus pa'i rgyan drug gis brgyan pa/__stag gi pags pa'i sham thabs grol ba/__/sgeg pa dpa' ba mi sdug pa/__/dgod cing drag shul 'jigs su rung /__/snying rje rngam dang zhi ba yi/__/gar dgu'i nyams dang ldan pa nyid/__/de'i pang na yum rdo rje phag mo dmar mo zhal gcig phyag gnyis ma spyan gsum dang ldan pa/__phyag g.yon pas bdud dang gdug pa'i khrag gis gang pa'i thod pa 'dzin pas yab la 'khyud pa/__g.yas pas sdigs mdzub dang bcas pa'i gri gug gis phyogs thams cad du bsdigs pa/__dbu skra grol ba/__byin pa gnyis kyis bcom ldan 'das la legs par 'khyud cing /__gcer bu'i mchog mi mgo skam po lnga'i dbu rgyan dang mi mgo skam po lnga bcu'i do shal dang rus pa'i rgyan lngas brgyan pa/__gnyis ka'ang ye shes kyi me 'bar ba'i dbus na bzhugs pa'o/__/phyi'i he ru ka'i phyag g.yas kyi dang po la mkha' 'gro ma nag mo/__/gnyis pa lA mA ljang gu/__g.yon gyi dang po la khaN+Da ro ha dmar mo/__gnyis pa la gzugs can ma ser mo/__thams cad kyang zhal gcig spyan gsum ma/__phyag bzhi'i g.yas Da ma ru dang gri gug__/g.yon kha T+wAM ga dang thod pa 'dzin pa/__skra grol ba/__gcer bu g.yas brkyangs pas bzhugs pa phyag rgya lngas brgyan pa'o/__/g.yas kyi gsum pa na khwa gdong ma sngon mo/__bzhi pa na 'ug gdong ma ljang gu/__lnga pa na khyi gdong ma dmar mo/__/drug pa na phag gdong ma ser mo/__g.yon gyi gsum pa na gshin rje brtan ma g.yas sngo g.yon ser ba/__bzhi pa na gshin rje pho nya mo g.yas ser g.yon dmar ba/__lnga pa na gshin rje mche ba ma g.yas dmar g.yon ljang ba/__drug pa na gshin rje 'joms ma g.yas ljang g.yon sngo ba ste/__thams cad kyang zhal gcig phyag bzhi ma g.yas gnyis na Da ma ru dang gri gug__/g.yon gnyis na kha T+wAM ga dang thod pa 'dzin pa/__gcer bu phyag rgyas lngas brgyan pa/__yi dwags kyi gdan la zhabs g.yas brkyangs pas bzhugs shing sems can gyi don la brtson pa/__rnal 'byor ma thams cad kyi dpral bar rdo rje'i phreng bas brgyan pa'o/__/de nas spyi bo la sogs pa'i gnas rnams su pu dzA o a go rA de mA/__kA o tri ko ka la kA hi/__pre gr-i sau su nA si ma ku'i dbyibs su gnas pa'i khams dang rtsa rnams dpa' bo dang rnal 'byor ma rnams su gyur pa ni/__spyi bo pu l+li ra mA la yang khaN+Da ka pA li dang rab tu gtum mo/__/spyi gtsug dzA lan+d+ha ra ra ma hA kaM kA la dang gtum pa'i mig can ma/__rna ba g.yas pa au D+ya na du kang+kA la dang 'od ldan ma/__ltag pa arbu dang mche ba rnam par gtsigs pa dang sna chen ma ste gnas/__rna ba g.yon pa go dA wa rI ra sur wi re dang brtan pa'i blo can ma/__smin ma'i dbus rA me shwa rI ra 'od dpag med dang mi'u thung ma/__mig gnyis de wI ko Tar rdo rje'i 'od dang lang+ka'i dbang phyug ma/__phrag pa gnyis mA la wa ra rdo rje'i sku dang shing grib ma ste nye ba'i gnas rnams thugs kyi 'khor lo kha dog sngon po mkha' la spyod pa'o/__/mchan khung gnyis kA ma rU pa ra ang+ku ri dang ai rA wa tI/__nu ma gnyis o tre rar rdo rje ral pa can dang 'jigs byed chen mo ste zhing /__lte ba tri sha ku ne ra dpa' bo chen po dang rlung gi shugs can ma/__sna rtse ko sa lar rdo rje hU~M mdzad dang chang 'thung ma ste nye ba'i zhing /__kha ka ling+gar rab tu bzang mo dang shrA ma de wI/__mgrin pa lam+bA ka ra rdo rje bzang po dang shin tu bzang mo ste tshan+do/__snying ga kAny+tsi ra 'jigs byed chen po dang rta rna ma/__'doms pa ra hi mA la yar mig mi bzang dang kha gA na na ste nye ba'i tshan+do rnams gsung gi 'khor lo kha dog dmar po sa la spyod pa'o/__/mtshan ma pre ta pu rir stobs po che dang 'khor lo'i shugs can ma/__bshang lam gr-i ha de war rin chen rdo rje dang khaN+Da ro hA ste 'du ba/__brla gnyis sau rA Sh+tar rta mgrin dang shoN+Di nI/__byin pa gnyis su war+Na dI bar nam mkha'i snying po dang 'khor lo'i go cha ma ste nye ba'i 'du ba/__sor mo bcu drug nA ga rar dpal he ru ka dang shin tu dpa' mo/__bol gong sin+d+hur pad+ma gar gyi dbang phyug dang stobs chen ma ste dur khrod/__mthe bong bzhi ma ro la rnam par snang mdzad dang 'khor los sgyur ma/__pus mo gnyis ku lu tar rdo rje sems dpa' dang brtson 'grus chen mo ste nye ba'i dur khrod rnams sku'i 'khor lo kha dog dkar pos 'og na spyod pa'o/__khaN+Da ka pA li la sogs pa'i dpa' bo thams cad zhal gcig phyag bzhi pa ral pa'i thor tshugs kyis mtshan pa'i cod pan can/__phyag dang po gnyis kyis rdo rje dang dril bu 'dzin pas yum la 'khyud pa/__g.yas 'og mas DA ma ru/__g.yon 'og mas kha T+wAM ka 'dzin pa/__sku la phyag rgya drug gis brgyan pa g.yas brkyang pa'i gnas pas bzhugs pa'o/__/rab tu gtum mo la sogs pa'i dpa' mo rnams ni zhal gcig phyag gnyis ma g.yon thod pa bsnams pas yab la 'khyud pa/__g.yas sdigs mdzub dang bcas pas gri gug bsnams pa/__spyan gsum pa drag mo'i gzugs can ma/__skra grol bas rnam par mdzes ma/__/gnyis su med pa'i sbyor ba la brtson pa/__gcer bu'i mchog rgyan lnga dang tshangs pa'i skud pas brgyan pa/__mi mgo'i do shal dang ska rags sil sil gyi sgra sgrogs pa'o/__/de nas sngags kyis byin gyis brlab pa ni/__ngag tu oM AHhU~M sarba bI ra yo gi nI kA ya wA ka? tsit+ta badz+ra swa b+hA ba at+ma ko\u0f85 haM/__zhes brjod pas bdag gis bsgoms pa'i lus dkyil dang /__'dzam bu'i gling na bzhugs pa dang /__'og min na bzhugs pa'i sku gsung thugs kyi 'khor lo'i dpa' bo dang rnal 'byor ma rnams dbyer mi phyed pa'i sku gsung thugs rdo rje'i rang bzhin nga'o snyam du nga rgyal bzung /__oM badz+ra shud+d+haHsarba d+harmA badz+ra shud+d+honya haM zhes brjod pas thams cad stong pa nyid rdo rje'i rang bzhin du rnam par dag pa'i ngo bo bdag yin no snyam pa lan gsum du bya'o/__/de nas lha la zhen pa skye ba dang lam la som nyi za na byang chub phyogs kyi dag pa dran pa skabs 'dir bya/__mi skye na mi dgos zhes gsungs pas dag dran byed na rgyas par mngon rtogs rgyas pa'i skabs ltar brjod/__bsdu na/__bdag gi blo la snang ba'i lha sum cu rtsa bdun po 'di nyid byang chub phyogs kyi chos sum cu rtsa bdun gyi ngo bo yin la/__byang chub phyogs kyi chos sum cu rtsa bdun kyang lha sum cu rtsa bdun gyi ngo bor rnam par dag pa yin no/__/zhes brjod cing don dran par bya'o/__/bdun pa mchod pa'i rnal 'byor la drug las/__dang po sngags kyi mchod pa ni/__rgyas par rtsa sngags dang /__snying po dang /__nye snying gnyis med zhal bzhi pa dang snying po'i rnal 'byor ma/__dpa' bo dang dpa' mo nyer bzhi/__yab kyi rkang brgyad dang sgo mtshams ma brgyad rnams spel ba'i sogs lan re brjod pas lha gsal gdab pa'i tshul gyis mchod/__bsdu na snying po gnyis su med pa brjod cing lha thams cad gsal gdab pa'am/__hU~M ba~M mA~M tA~M pA~M lA~M/__pU dza o a go rA de mA/__ka o tri ko ka la kA hi/__pre gr-i sau su nA si ma ku/__hU~M hU~M hU~M hU~M hU~M hU~M hU~M hU~M zhes sa bon tsam brjod pas kyang rung bar rje grol mchog sogs kyis gsungs so/__/gnyis pa phyi mchod ni/__dngos su bshams pa'am yid kyis sprul pa la dmigs te sum+b+has bsang /__swa b+hA bas sbyang /__stong pa'i ngang las AHbdun las thod pa'i snod bdun du/__hU~M las mchod yon la sogs pa dwangs shing thogs pa med pa ye shes kyi bdud rtsi'i rang bzhin can gyis gang bar bsam zhing /__oM badz+ra ar+g+haM AHhU~M nas/__shab+da'i bar gyis brlab/__oM sarba ta thA ga tA shrI tsakra sam+ba ra maN+Da la tsakra sarba bI ra yo gi nI ar+g+haM pra tIts+tsha swA hA/__de bzhin du pA d+yaM pra tI ts+tsha swA hA/__badz+ra puSh+pe AHhU~M nas/__nai bi d+ye'i bar sbyar bas chu gnyis sngon 'gro'i nyer spyod dang /__oM badz+ra gaN+De ra Ni ta/__pra ra Ni ta/__saM pra ra Ni ta/__sarba bud+d+ha k+She tra/__pra tsa li te/__pradz+nyA pA ra mi tA nA da saM b+ha we te/__badz+ra d+harmA hri da ya san+toSha ni hU~M hU~M hU~M ho ho ho a khaM swA hA/__/zhes rol mo 'bul/__/gsum pa bdud rtsi'i mchod pa ni/__bdud rtsi dngos sam yid kyis sprul pa/__oM AHhU~M ha ho hrIHsa byin gyis brlabs nas/__g.yon pa'i mtheb srin gyis spyi bo nas 'thor zhing /__drin can rtsa ba'i bla ma'i zhal du oM AHhU~M/__brgyud pa'i bla ma rnams kyi zhal du oM AHhU~M/__snying ga'i thad nas 'thor te/__hU~M ba~M sogs kyi mthar oM AHhU~M zhes dang /__rang gi lce rtse/__smin mtshams/__spyi gtsug rnams su bdud rtsi'i thig le byas la/__oM AHhU~M zhes brjod pas lus kyi lha thams cad tshim par bsam/__lte ba'i thad nas 'thor te/__oM shrI ma hA kA lA ya oM AHhU~M/__oM shrI d+harma pA la tsa tu rmu kha oM AHhU~M/__zhes brjod do/__/bzhi pa mnyes pa'i mchod pa ni/__rang gi lce la bdud rtsi myangs pas phyi nang gi lha thams cad dgyes shing /__oM hrIHha ha hU~M hU~M phaT ces gsungs par bsams la/__snying gar rnam lnga 'dod skor gyi mthar 'khyud rgya bya'o/__/lnga pa yid byung gi mchod pa ni/__dpral bar nam mkha' mdzod kyi phyag rgya bcas la/__na mo chos kyi dbyings kyi byin gyi rlabs dang sangs rgyas dang byang chub sems dpa' thams cad kyi thugs rje rnam par dag pa'i byin gyi rlabs dang /__gsang sngags dang phyag rgya'i mthu dang /__bdag gi mos pa dang ting 'dzin dang smon lam gyi dbang gis 'jig rten gyi khams na bdag pos yongs su ma bzung ba'i mchod pa'i bye brag ji snyed yod pa dang /__gzhan yang byang chub sems dpa' kun tu bzang po'i rnam par thar pa las byung ba'i mchod pa'i sprin gyi phung po lta bu bsam gyis mi khyab pa zhig bla ma dang dkyil 'khor gyi 'khor lo sangs rgyas dang byang chub sems dpa' thams cad kyi spyan lam du 'byung zhing rgyas par gyur cig__/ces brjod la se gol brdab/__yang phyag rgya bcas la/__oM sarba bita pU ra pU ra/__su ra su ra/__A brta ya A brta ya ho/__na maHsa san+ta bud+d+hA nAM/__a b+hi sma ra ye s+pha ra Na i maM ga ga na khaM/__d+harma d+hA tu A kA sha sa man+ta mAM/__sarba ta thA ga ta a pa ri sho d+ha ye/__maN+Da le ma ma pra Ni d+hi puN+ya dz+nyA na ba la na/__sarba ta thA ga ta ba lon+d+ha ban+d+ha swas+thA na ba le na tsa ye swA hA/__zhes brjod de phyag rgya bkrol te se gol lan gnyis brdab par bya'o/_/drug pa bstod pa'i mchod pa ni/__rdo rje dril bu 'dzin pas yab yum gyi rkang brgyad tshang bar brjod/__de tsam mi nus na/__chos dbyings rnam dag dbyings las ma g.yos kyang //thabs kyis khro bo'i skur ston gdug pa 'dul/__/che ba'i che mchog lha yi lhar gyur pa/__/kun bzang he ru ka la phyag 'tshal lo/__/zhes pas bstod do/__/brgyad pa bzlas pa'i rnal 'byor la/__dmigs pa ni/__yab kyi thugs ka'i hU~M las sngags kyi phreng ba byung /__yab kyi zhal nas 'thon/__yum gyi zhal du zhugs/__sku'i dbyibs brgyud/__yum gyi pad+ma nas yab kyi gsung ba'i rdo rje'i bu gar zhugs/__sku'i dbyibs brgyud de thugs ka'i hU~M la thim pa'i tshul gyis rgyun mi 'chad par 'khor bas bde ba chen po'i ye shes brtan par bsams la/__bzla bya'i sngags ni/__rin chen bzhi po gang mos pa gnyis med du bzla bar gsungs pas/__oM shrI badz+ra he he ru ru ka~M hu~M hU~M phaT/__DA ki nI dz+wa la sam+ba ri badz+ra bai ro tsa nI ye hu~M hU~M phaT swA hA/__zhes yab yum gyi snying po gnyis su med pa gtso bor bzla/__gzhan rnams bzla bar 'dod na sgrub thabs rgyas par shes/__mthar thal mo sbyar te/__bde bar gshegs pa thams cad kyi sku gsung thugs yon tan phrin las thams cad kyis bdag dang sems can thams cad la byin gyis brlab tu gsol/__myur tu phyag rgya chen po mchog gi dngos grub dpal 'khor lo bde mchog gi go 'phang thob par byin gyis brlab tu gsol/__zhes dngos grub blangs la yig brgya lan gsum gyis brtan par bya'o/_/gnyis pa gnas pa'i rim pa ni/__bskyed rim gyi sems 'dzin te/__de la gnyis/__nga rgyal dang /__rnam pa la sems 'dzin pa'o/__/dang po ni/__lus gnad bsrang /__rlung rang babs su bzhag__/dran pa rtse gcig tu byas te/__nga ni tha mal pa nam yang ma yin/__skyon kun zad/__yon tan kun rdzogs/__'bras bus bcu gsum rdo rje 'dzin pa'i sa la bzhugs pa dpal 'khor lo sdom pa de dngos yin snyam pa'i nga rgyal bskyed/__de'ang dang po hril gyis bsgrim/__bar du lhod kyis klod/__tha ma rang so bzung zhes spel ma'i tshul du nyams su blang /__gnyis pa la gnyis/__spyi dang /__bye brag go__/dang po ni/__rang 'khor lo sdom par gsal ba'i sku'i rnam pa spyi tsam pa me long du gzugs brnyan shar ba ltar dbu nas zhabs kyi bar blo la gcig car du snang ba la sngar bzhin sems gzung /__gnyis pa la gnyis/__rgyan med dang /__rgyan can no/__/dang po ni/__rnam pa spyi'i gsal snang ma shor ba'i ngang spyan dbus ma nas brtsams te yab yum gyi sku'i cha shas so so dang /__des mtshon te lus dkyil gyi lha so so la sems gzung /__gnyis pa ni/__so so'i rgyan cha rags phra nas me ri dang gdan khri'i bar du sems bzung zhing /__yun thung la grangs mang ba'i tshul gyis bslabs pas gsal snang mthar phyin par bya'o/__/thun mthar rdo rje sems dpa'i bsdu bas 'od gsal du 'jug pa ni/__rgyu mtshan rgyas par 'og tu 'byung zhing /__'dir dmigs pa'i ngo bo tsam brjod na/__rang gi lte bar pad zla'i steng du hU~M las rdo rje sems dpa' dkar po rdor dril 'dzin cing /__yum rdo rje snyems ma dkar mo gri thod 'dzin pa dang mnyam par sbyor ba/__gnyis ka'ang rus pa'i rgyan gyis brgyan pa'i thugs kar zla ba'i steng du hU~M/__de las 'od zer 'phros pas phyi nang gi lha thams cad dang /__khams gsum snod bcud ma lus pa gsal zhing g.yos te/__rang he ru ka yab yum la thim/__yum yab la/__yab lte ba'i rdo rje sems dpa' yab yum la/__de'i yum rdo rje sems dpa' la/__de thugs ka'i hU~M nas nA da'i bar du thim ste/__mthar nA da'ang 'od gsal stong pa nyid kyi ngang du thim par bsams la/__gnas lugs brjod bral bsam gyis mi khyab pa'i dbyings su mnyam par bzhag__/slar yang rang skad cig gis he ru ka yab yum lus dkyil gyi lha dang bcas pa'i skur gyur par bsams la dag dran rgyas bsdus gang rung bya'o/__/gsum pa ldang ba'i rim pa mnyam par ma bzhag pa'i rnal 'byor la gsum/__spyod lam gyi rnal 'byor/__gtor ma'i rnal 'byor/__kha zas kyi rnal 'byor ro/__dang po ni/__rang gi gnas rnams su zla ba'i dkyil 'khor re re'i steng du/__yab kyi snying gar oM ha dkar po rdo rje sems dpa'/__mgo bor na ma hi ser po rnam par snang mdzad/__spyi gtsug tu swA hA hu dmar po pad+ma gar gyi dbang phyug__/phrag pa gnyis su pau Sha Ta he nag po he ru ka__/mig gnyis su hU~M hU~M ho dmar ser rdo rje nyi ma/__tshigs chen brgyad la phaT haM ljang gu rta mchog gi ngo bo/__yum gyi lte bar oM ba~M dmar mo rdo rje phag mo/__snying gar heM yoM sngon mo gshin rje ma/__khar hreM ma~M dkar mo rmongs byed ma/__spyi bor hrIM hrIM ser mo skyod byed ma/__spyi gtsug tu hu~M hU~M ljang gu skrag byed ma/__tshigs chen brgyad la phaT phaT dud ka tsaN+Di ki'i ngo bor mos pa ni yab yum gyi go cha dang /__pu dzA sogs nyer bzhi brjod pas lus dkyil gyi lha rnams rang rang gi gnas su thim par bsam pa ni go cha chen po dang /__sdigs mdzub dang bcas sum+b+ha'i sngags brjod cing /__phyogs g.yon skor dang /__mtshams g.yas skor du se gol gtogs pa tsham rngams sngags kyi srung ba ste/__de lta bu'i srung ba rnam pa gsum gyis bsrungs la/__rang dang snang ba thams cad dpal he ru ka'i sku gsung thugs kyi ngo bor shes pas sngags zlos bzhin tu/__dge ba 'di yis myur du bdag__/'khor lo bde mchog 'grub gyur nas/__/'gro ba gcig kyang ma lus pa/__/de'i sa la 'god par shog__/'chi tshe mgon dang dpa' bo ma tshogs kyis/__/me tog gdugs dang rgyal mtshan thogs nas kyang /__/rol mo glu dbyangs sil snyan sogs mchod nas/__/mkha' la spyod pa'i gnas su 'khrid par shog__/lha mo tshad ma dam tshig tshad ma dang /__/des chos gsung yang tshad ma'i mchog yin pas/__/bden pa des kyang lha mo de dag gis/__/bdag la rjes su 'dzin pa'i rgyur gyur cig__/ces bsngo smon gyis mtshams sbyar te spyod lam thams cad lha dang ye shes su shes pas dus 'da' bar bya'o/__/gnyis pa ni/__thod pa la sogs pa'i snod du sha chang gi dam rdzas dang bcas pa'i gtor ma bshams/__'od gsal gyi ngang las lha skur ldangs te/__nang mchod chu chang dang sum+b+has bsang /__swab+hA bas sbyang /__rgyas par mngon rtogs rnams nas 'byung ba ltar ram/__bsdu na/__oM AHhU~M ha ho hrIHhrIHsa brlab/__mdun gyi nam mkhar 'khor lo bde mchog lha drug cu rtsa gnyis kyi dkyil 'khor dur khrod chen po brgyad dang bcas pa gsal bar dmigs la/__bdag gi snying ga'i hU~M las 'od zer 'phros te dur khrod brgyad la phog pas dkyil 'khor gyi 'khor lo yongs su rdzogs pa cha brgyad du gyur par bsams la 'bar ba'i phyag rgya dang ldan pas ngag tu phaiM zhes brjod cing /__sems kyis snying ga'i hU~M gi 'od kyis ye shes kyi dkyil 'khor cha dgu spyan drangs la/__dzaHhU~M ba~M hoH__zhes brjod pas dkyil 'khor cha dgu la dgug gzhug bcings dbang du byas/__oM yo ga zhes sogs brjod cing rnam lnga 'dod skor bya ste brtan par bya'o/__/de nas lha thams cad kyi ljags la hU~M las rdo rje sbu gu can hU~M gis mtshan par bsam/__gtor ma las thod pa bdud rtsis gang ba du ma chad de thams cad kyi phyag tu bzhag pas gsol bar bsam zhing lag pa rdo rje thal mo kha phye la/__ngag tu/__oM badz+ra A ral+li hoH__dzaHhU~M ba~M hoH__badz+ra DA ki nI sa ma ya s+t+waM dri sh+ya hoHoM AHhU~M/__zhes lan lnga brjod pas 'khor lo dgu tshan lnga rim pa bzhin tshim par bsams te/__/sngags mchod dang /__phyi nang gis mchod/__bstod pa ci rigs kyi mthar/__he ru ka dpal 'khor bcas rnams/__mchod sbyin gtor ma 'di bzhes la sogs kyis 'dod don gsol/__gtor ma gnyis pa sogs yod na chos skyong dang /__mkha' 'gro spyi gtor gyi cho gas gtang /__yi ge brgya pas nongs pa bzod par gsol te/__spyan drangs pa'i gtor mgron rnams rang bzhin gyi gnas su gshegs/__mdun du sprul pa rnams bdag gi lus la thim par bsam/__de nas dag dran dang /__go cha dgod pa sogs sngar ltar bya'o/__/gsum pa ni/__kha zas la lag pa g.yon pa'i mtheb srin gyis reg ste/__oM AHhU~M zhes brjod pas bdud rtsi'i rang bzhin du brlabs la nang gi sbyin sreg gi tshul du tshim par rol pa'i mthar bdag med pa'i ngang du ngal bso/__nub mo nyal ba'i tshe rdo rje sems dpa' bsdu ba'i rim pas 'od gsal la 'jug__/tho rangs ldang ba'i rnal 'byor gyis langs te sngar bzhin du rim pa gnyis kyi rnal 'byor la brtson par bya'o/__/bsnyen pa byed na rgyas par gzhan du shes/__bsdu na mtshams dam du bcad/__ji skad bshad pa'i mngon rtogs thun bzhi'am/__gsum du bsgoms la yab yum gyi snying po 'bum phrag bzhi kha skong dang bcas bzlas pas kyang las rung tsam du 'gyur ba yin no/__/gnyis pa brten pa rdzogs pa'i rim pa ni/__rgyas par rtsa dbu ma che ba'i khrid yig ltar nyams su blang bar bya zhing /__'dir gzhung gi dngos bstan bsdu ba gsum gyi rdzogs rim cung zad brjod na gsum/__rtsa ba'i gzhung gis mdor bstan pa/__de'i don rgyas par bkral ba/__nyams su len pa'i tshul gyis don bsdu ba'o/__/dang po ni/__rnal 'byor ma kun spyod kyi rgyud dang /__grub chen gyi gzhung las/__A li kA li mdun bsams nas/__/rnal 'byor chen po ngal bso ste/__/zla ba'i dkyil 'khor rdzogs pa ni/__/lte ba'i rtsa bar gnas par bsgom/__/yi ge mchog gi gnas gyur pa/__/de yi dbus su rnam par bsgom/__/sku gsung thugs kyi rdo rje can/__/lha yi sku ni bsgom par bya/__/de ni gzugs las 'das pa ste/__/dngos po med pa'i chos nyid yin/__/de yang bsam gyis mi khyab bsam/__/sems nyid brtag par mi bya'o/__/bsam gyis mi khyab de bsams nas/__/de las gzugs ni thob par 'gyur/__/ces gsungs so/__/gnyis pa ni/__de'i don rje btsun rin po che grags pa rgyal mtshan gyi zhal snga nas/__de brjod pa la gsum ste/__rdo rje sems dpa' bsdu ba dang /__yi ge bsdu ba dang /__thig le bsdu ba'o/__/dang po ni/__rtsa ba'i dpe lnga dang /__yan lag gi dpe du mas mtshon pa ste/__de'ang bskyed pa'i rim pa'i thun gyi mjug tu/__bcom ldan 'das kyi lte bar pad+ma 'dab ma brgyad pa'i lte bar zla bas brgyan par bsgom/__der hU~M las bcom ldan 'das rdo rje sems dpa' sku mdog dkar po rdo rje dang dril bu 'dzin pa/__yum rdo rje snyems ma gri gug dang thod pa 'dzin pas yab la 'khyud pa'i tshul du bzhugs pa/__gnyis ka'ang rus pa'i rgyan gyis brgyan pa'i thugs kar zla ba'i steng du yi ge hU~M bsgom/__hU~M de las 'od zer 'phros pas/__rdo rje sems dpa' yab yum dang /__phyi'i he ru ka yab yum nas 'khor lo nang ma de nas rim gyis je gsal je gsal khams gsum snod bcud thams cad gsal bar byas la/__de'i stobs kyis thams cad phrig phrig g.yos par bsams te/__de ni rdo khab len gyis lcags g.yo ba zhes bya ba'i dpe dang po yin no/__/de nas khams gsum snod bcud thams cad srung ba'i 'khor lo la bsdu ba nas/__bcom ldan 'das kyi zhal bzhi la bsdu ba'i bar te/__dpe gnyis pa lci bas dngul chu sdud pa zhes bya ba yin no/__/'bring bsdus gnyis la phyi'i dkyil 'khor med pas khams gsum lus la sdud pa nyid dpe gnyis pa yin no/__/de nas bcom ldan 'das zhal bzhi phyag bcu gnyis pa ni/__zhal gcig phyag gnyis par bsdu ste/__dpe gsum pa rus sbal yan lag 'khums pa zhes bya ba yin no/__/de nas bdag phyi'i he ru ka yab yum la bsdu/__yab lte ba'i rdo rje sems dpa' yab yum la bsdu/__rdo rje snyems ma'ang yab la/__yab hU~M la/__hU~M gi gdan zla ba zhabs kyu la/__zhabs kyu khog pa la/__khog pa mgo bo la/__mgo bo zla tshes la/__zla tshes thig le la bsdu ste/__de ni dpe bzhi pa skar mda' gcig la gcig thim pa zhes bya ba yin no/__/de nas thig le'ang je phra je phra mi dmigs pa bsam gyis mi khyab pa'i ngang la gzhag par bya ste/__de ni rtsa ba'i dpe lnga pa lan tshwa chu la thim pa zhes bya ba yin no/__/de nas yan lag gi dpe ni ngo bo nyid kyi steng du gtan la dbab ste/__gong gi spros pa rnams ni cha lugs sam/__'od zer ram/__rlabs zhes bya ba yin la/__bsam gyis mi khyab pa'i ngo bo nyid ni gar mkhan dngos sam/__nyi ma'am/__rgya mtsho nyid dang 'dra ba yin pas na gar mkhan nyid dang cha lugs dang /__nyi ma dang 'od zer dang /__mtsho dang rlabs dag ngo bo nyid kyi steng du ni chu la chu bzhag pa'am/__mar la mar bzhag pa ste yan lag gi dpe lngas mtshon pa yin no/__/de'i ngang la blo ji tsam gnas pa cig bzhag la/__ldang bar 'dod na gong du bstan pa'i ldang ba'i rnal 'byor gyis he ru kar langs te/__dag pa rjes su dran pa bya ba yin no/__/rdo rje sems dpa' bsdu ba zhes bya ba'i rim pa 'di ni bskyed pa'i rim pa'i rjes la cis kyang bsgom pa yin no/__/rdo rje sems dpa' bsdu ba'o/__/yi ge bsdu ba dang /__thig le bsdu ba 'di gnyis ni bskyed rim gyi rjes la cis kyang 'byung ba'i rdzogs rim ni ma yin te/__rnal 'byor pa bskyed rim la brten pa'am/__yang na las dang po pa nyid nas kyang rung ste/__rlung dang sems kyi dmigs pa la brten nas ting nge 'dzin gyi ye shes myur du tshol bar 'dod pa'i rten yin pas/__bskyed pa'i rim pa rgyas par bsgoms pa'i rjes sam/__'di nyid gtso bor byed pa'i dus su skad cig gis he ru ka yab yum du dran par byas pa'i lte bar pad+ma 'dab ma bzhi pa'i shar du sa rlung gi rang bzhin la ser po/__g.yon du chu rlung gi rang bzhin wa dkar po/__rgyab tu me rlung gi rang bzhin ra dmar po/__g.yas su rlung rlung gi rang bzhin ya ljang gu/__dbus su nam mkha'i rlung gi rang bzhin thig le kha dog sngon po cig bsams la/__rim gyis blo sbyang ba'i phyir dbugs phyir rgyu ba'i dus su mdun gyi la ser po las 'od zer kha dog ser po sbom phra skud pa 'bring po tsam langs te gyen du byung ba sna sgo g.yon pa nas phyung ste/__mdun du sor bcu drug tsam gyi tshad du byung bar bsam/__rlung nang du 'jug pa dang bstun la 'od zer de nang du bsdogs/__la ser po de la bstims la yid kyis la ser po de la blta zhing rlung kha sbyor gyi dmigs pa bya'o/__/des du ba lta bu'i rtags mthong ba de'i tshe sa rlung dbang du gyur pa'i rtags yin pas la ser po de g.yon gyi wa dkar po la bstim/__wa dkar po las 'od zer dkar po sna bug g.yon pa nas 'byung ba dang /__'jug pa dang /__rlung gi rnal 'byor dang bcas pa snga ma bzhin bsgoms pas smig rgyu lta bu mthong ba de'i tshe chu rlung dbang du 'dus pa yin pas wa dkar po de rgyab kyi ra dmar po la bstim/__ra dmar po las 'od zer dmar po sna g.yon nas 'byung ba dang /__'jug pa dang /__rlung gi rnal 'byor snga ma bzhin du bsgoms pas srin bu me khyer lta bu'i rtags mthong ba de'i tshe me rlung dbang du 'dus pa yin pas ra dmar po de g.yas kyi ya ljang gu la bstims la bzhag__/ya de las 'od zer ljang gu sna g.yon nas 'byung ba dang /__'jug pa dang /__rlung gi rnal 'byor snga ma bzhin du bsgoms pas mar me 'bar ba lta bu'i rtags mthong ba de'i tshe rlung gi rlung dbang du 'dus pa'i rtags yin pas yi ge ya ljang gu de dbus kyi thig le sngon po la bstims la bzhag__/de nas thig le sngon po las 'od zer 'byung 'jug med par thig le la yid kyis blta zhing rlung kha sbyar gyi rnal 'byor pas nam mkha' sprin med lta bu mthong ba de'i tshe nam mkha'i rlung dbang du 'dus pa yin pas/__'di'i mjug tu mthong ba'i lam gyi ye shes skye zhes gsungs so/__/yi ge bsdu ba'o/__/thig le bsdu ba ni/__yi ge rnams kyi shul du thig le bsgom pa ste/__shar du thig le ser po/__g.yon du dkar po/__rgyab tu dmar po/__g.yas su ljang gu rnams bsgoms la/__'od zer gyi skud pa'i 'byung 'jug dang /__rlung gi rnal 'byor la sogs pa snga ma'i tshul du bsgoms pas mthar phyin pa'i tshad snga ma bzhin du 'byung bar 'gyur ro/__/des na 'di gnyis kyang rnal 'byor pa rang gi blo la gang bde ba bsgom pa yin la/__gcig gi rjes la gcig bsgom pa ni ma yin no/__zhes gsungs pa ltar ro/__/gsum pa ni/__de lta bu'i rdo rje sems dpa' bsdu ba'i rdzogs rim ni bskyed rim gyi mjug tu nges par bsgom pa'i tshul gong du bstan zin cing /__yi ge bsdu ba dang /__thig le bsdu ba ni bskyed rim dang 'brel na rdo rje sems dpa' bsdu ba'i gong du bsgom/__bskyed rim la cung zad brtan pa thob pas rdzogs rim gtso bor byed nas 'di rkyang pa bsgom na/__skyabs 'gro sems bskyed bla ma'i rnal 'byor rnams sngon du 'gro bas/__bla ma rang la bstims pa'i rkyen gyis rang skad cig gis dpal 'khor lo bde mchog gi skur gyur par bsams la sems gzung /__gsal snang thon pa na lus bsrang /__rlung ro bsal/__rang gi lus kyi nang thams cad stong gsal 'od kyi rang bzhin can du gyur pa'i sprul 'khor gyi lte bar ji skad bshad pa'i yi ge'am thig le bsgom/__de la sems zin pa na 'od kyi 'byung 'jug bya/__de brtan pa'i phyir bum pa can kha sbyar du bzung ba sogs ji skad gsungs pa ltar nyams su blang ngo /__/de ltar bskyed rdzogs kyi rim pa zab mo 'di ni sku gsum lam byed kyi rnal 'byor du ji ltar 'gyur pa'i tshul rje btsun rin po ches/__de la slob dpon lU hi pa'i dgongs pa jo bo nA ro ta pas bskangs pas mngon par rtogs pa gcig la sku gsum lam du byed pa'i sgrub thabs yin te/__de yang blo'i spyod yul rdzogs pa gcig la sku gsum du bzhag pa dang /__dkyil 'khor gyi 'khor lo rdzogs pa gcig la sku gsum du bzhag pa dang /__mngon par rtogs pa gcig la sku gsum du bzhag pa'o/__/dang po bdag gi blo snang gi dkyil 'khor ni zhing skyes kyis sprul la/__zhing skyes nyid kyang lhan skyes kyis sprul pa'i phyir/__de gnyis ka'ang sprul pa'i sku'o/__/lhan skyes ni gnas 'pho ba med pa'i tshul gyis zag pa med pa'i bde ba dang /__chos la longs spyod pa'i phyir longs spyod rdzogs pa'i sku'o/__/chos kyi sku ni chos kyi sku nyid do/__/gnyis pa dkyil 'khor gyi 'khor lo rdzogs pa gcig la sku gsum du 'jog na/__bde ba chen po'i 'khor lo ni chos kyi sku/__'khor lo gsum ni longs sku/__sgo mtshams ma brgyad ni sprul pa'i sku'o/__/mngon par rtogs pa rdzogs pa gcig la sku gsum du 'jog na/__phyi'i dkyil 'khor dag pa dang bcas pa sprul pa'i sku lam du byed pa'i sgrub thabs/__lus kyi dkyil 'khor sngags kyis byin gyis brlab pa dang bcas pa longs spyod rdzogs pa'i sku lam du byed pa'i sgrub thabs/__rdzogs pa'i rim pa spyod pa gcig dang bcas pa chos kyi sku lam du byed pa'i sgrub thabs so/__/de la 'bring bsdus gnyis kyi dbang du byas na phyi'i dkyil 'khor med pas/__lus la lha rnams rdzogs par bskyed pa tsam ni sprul pa'i sku yin la/__bskyed pa gsal gdab pa dang /__thim pa'i tshul gyis longs spyod pa ni/__longs spyod rdzogs pa'i sku yin la/__rdzogs pa'i rim pa spyod pa dang bcas pa ni chos kyi sku lam du byed pa'i sgrub thabs so/__/zhes gsungs pa ltar yin la/__mdor na rim gnyis bzlas pa dang bcas pa la brtson pas drod ci rigs pa thob nas/__spros bcas dang /__spros med dang /__shin tu spros med kyi spyod pas bogs dbyung zhing /__ye shes la dbang 'byor pa na gzhan don du phyogs las rnam par rgyal ba'i spyod pas mtshams sbyar te mthar thug gi 'bras bu la reg par 'gyur ro/__/bzhi pa des grub pa'i 'bras bu ni/__dman bzhi sogs las rab 'byams dang /__'bring grub pa chen po brgyad dang /__'bring gi rab mkha' spyod kyi rig pa 'dzin pa thob par 'gyur ba ni gnas skabs kyi 'bras bu yin la/__/mthar thug lam lnga dang sa bcu bde blag tu bgrod de mchog gi dngos grub sku gsum gyi rang bzhin sangs rgyas kyi sa rdo rje 'dzin pa nyid 'grub par 'gyur ba yin no/__/rnal 'byor gsang mtha' 'khor lo bde mchog gi/__/rim gnyis man ngag grub pa'i zhal gyi lung /__/bde chen 'dod 'jo 'dir bsten yid can kun/__/'chi med sku gsum go 'phang myur thob shog__/ces pa'ang rje btsun rdo rje 'chang grags pa rgyal mtshan gyi gsung rab ji lta ba la/__kun mkhyen chen po'i rnam bshad dang /__rje sangs rgyas dpal bzang slob tshogs dang bcas pa'i zin bris sogs las don gyi snying po mdor bsdus te/__mang du thos pa ltar snang ba'i bya bral spong ba pa 'jam dbyangs mkhyen brtse'i dbang pos bris pa dge legs mchog tu gyur cig__/sarba dA ka l+yA NaM b+ha ba tu/_/'di'i rdzogs rim ni/__rje btsun rin po che'i gsung gi dngos bstan bla ma phyi ma rnams kyis kyang sor bzhag tu mdzad pa ltar bris pa yin la/__dmigs pa nyams su len tshul zhib par khrid yig dag las shes par bya'o//__//

Footnotes

Other Information

Retrieved from "https://khyentselineage.tsadra.org/index.php?title=JKW-KABUM-07-JA-010&oldid=10731"
Khyentse Lineage
Collected Works of the Masters
A Tsadra Foundation initiative designed to house the writings and revelations of the masters of the Khyentse lineage.
Join the Tsadra Foundation mailing list:

Tsadra Foundation
Translation & Transmission Conference
DharmaCloud Tibetan eBooks
Buddha-Nature
Śāntideva's Life and Works
Rinchen Terdzö Chenmo
Damngak Rinpoche Dzö
Dharma Dictionary

About us
Privacy policy
General disclaimer
Site guide

Project Description

Welcome to the Khyentse Lineage Project, a Tsadra Foundation initiative designed to house the writings and revelations of the masters of the Khyentse lineage in a digital format that allows for open access to these materials in authoritative modern Tibetan editions for the sake of scholars, translators, and practitioners the world over.

About us

© Tsadra Foundation. Please feel free to use this website and its content in accordance with fair use policies for teaching, scholarship, education, and research.
See General disclaimer for more information.