JKW-KABAB-11-DA-006

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 11, Text 6, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	བྱང་ཆུབ་གླིང་པ་, འཇམ་དབྱངས་མཁྱེན་བརྩེའི་དབང་པོ་ (byang chub gling pa, 'jam dbyangs mkhyen brtse'i dbang po)
Associated People	ནམ་མཁའི་སྙིང་པོ་ (nam mkha'i snying po)
Citation	'jam dbyangs mkhyen brtse'i dbang po. . In Rdzong sar 'jam dbyangs mkhyen brtse'i dbang po'i bka' babs, Vol. 11: 1-. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Activity Manual - las byang  ·  Revelations - gter ma
Cycle	ཀུན་བཟང་ཐུགས་གཏེར་ (kun bzang thugs gter)
Karchag page	JKW-KABAB-Volume-11-DA-Karchag
RTZ	In the Rinchen Terdzö: https://rtz.tsadra.org/index.php/Terdzo-CHA-033

Tibetan Text

Wylie

[edit]

༄༅། །ཀུན་བཟང་ཐུགས་གཏེར་ལས་བླ་སྒྲུབ་བྱིན་རླབས་སྒྲོན་མེ་ལས་འབྱུང་བའི་དོན་དབང་བསྐུར་བའི་ཚུལ་ནོར་བུའི་སྒྲོན་མེ་ཞེས་བྱ་བ་བཞུགས་སོ།། ན་མོ་གུ་རུ་ཏྲཱི་ཀཱ་ཡ་སཾ་པཱུརྞཱ་ཡ། །ཡིད་བཞིན་དབང་གི་རྒྱལ་ལས་ཆེས་ལྷག་པའི། །དགོས་འདོད་ཀུན་སྩོལ་གུ་རུ་རིན་པོ་ཆེར། །གུས་པས་བཏུད་ནས་སྙིང་པོ་དོན་གྱི་དབང༌། །འབྲེལ་ཚད་ཐར་པའི་སྒོ་ཆེན་འབྱེད་ཕྱིར་དགོད། །དེའང་བླ་སྒྲུབ་བྱིན་རླབས་སྒྲོན་མེ་དང་ལས་བྱང་གཉིས་ཀ་ནས་བདག་འཇུག་དང་སློབ་མ་རྗེས་བཟུང་གི་སྙིང་པོར་གསུངས་པའི་དོན་དབང་ཉིད་ཇི་ལྟར་བསྐུར་བའི་ཚུལ་ལ་གསུམ། །སྦྱོར་བ་ཡོ་བྱད་ཀྱི་གཤོམ། དངོས་གཞི་སྒྲུབ་ཅིང་དབང་བསྐུར་བ་རྗེས་ཀྱི་རིམ་པས་མཇུག་བསྡུ་བའོ། །དང་པོ་ནི། སྟེགས་བཟང་པོར་མཎྜལ་པདྨ་འདབ་བརྒྱད་ཀྱི་ལྟེ་བར་བནྡྷ་མཚན་ལྡན་ཆང་དང་བདུད་རྩི་ཆོས་སྨན་སྦྱར་བས་བཀང་བའི་ཁར་མེ་ལོང་སིནྡྷཱུ་ར་བདལ་བ་ལ་ཧཱུྃ་ཡིག་རྩ་སྔགས་ཀྱིས་བསྐོར་བ་བྲིས་པས་དགབ་དེ་སྟེང་འཕྲུལ་སྟེགས་ལ་རིན་པོ་ཆེའི་སྣོད་དུ་དཔལ་གཏོར་རིན་ཆཻན་འབར་བ་པད་འདབ་བརྒྱད་ལྡན་རྒྱན་སྤྲོས་དར་གདུགས་དང་བཅས་པ། བཟའ་བཅའ་བཏུང་བའི་རིགས་ཀྱིས་བསྐོར་བ་བཞག །ཕྱོགས་བཞིར་གཏོར་མ་བཞི་བཤམ་པར་གསུངས་པ་འགྲུབ་ན་དེ་ལྟར་དང་འཕྲལ་བདེ་ལྟ་བུར་གོང་གི་དཔལ་གཏོར་གྱི་ཕྱོགས་བཞིར་གཏོར་ཆུང་ངམ་ཀྱུ་གུ་བཞིས་བསྐོར། སྨན་རཀ་མཆོད་པ། ཕྲིན་ལས་ལ་དགོས་པའི་ཚོགས་གཏོར་སོགས་སྤྱི་ལྟར་བཤམ་ཞིང་ཚོགས་པར་བྱའོ། །གཉིས་པ་ལ། ཐོག་མར་དབང་དོན་སྒྲུབ་མཆོད་ནི། །གཞུང་གི་དགོངས་པས་བླ་སྒྲུབ་བྱིན་རླབས་སྒྲོན་མེ་ལས་འབྱུང་བའི་ཕྲིན་ལས་གཞིར་བཞག །བླ་མའི་སྒྲུབ་ཐབས་ཕྱི་ནང་གསང་བ་སྐུ་བཞི་ཡོངས་རྫོགས་ཀྱི་སྒྲུབ་ཐབས་དང་སྦྲེལ་བར་སྣང་བས་རྒྱས་པར་ན་དབང་གི་རྣམ་གྲངས་བཞིར་ཡང་འགྱུར་མོད། རྗེ་བླ་མའི་ཕྱག་བཞེས་སུ་ལས་བྱང་ཡིད་བཞིན་ནོར་བུ་དང་སྦྲེལ་བར་མཛད་པ་ཉིད་ལ་དོན་ཚང་ཞིང་སྟབས་བདེ་བས་ལས་བྱང་གཞུང་བསྲང༌། གཏོར་མ་དཀྱིལ་འཁོར་ཀུན་བདག་གུ་རུ་རིན་པོ་ཆེ་དགོས་འདོད་མ་ལུས་པ་འབྱུང་བའི་དབྱིག་གི་སྙིང་པོར་བསམ། བཟླས་པའི་སྐབས་སུ། དེ་ལས་འོད་ཟེར་འཕྲོས། རྩ་གསུམ་རྒྱལ་བ་རབ་འབྱམས་གྱི་ཐུགས་རྒྱུད་བསྐུལ། དེ་རྣམས་ཀྱི་བྱིན་རླབས་དང་དངོས་གྲུབ་མ་ལུས་པ་ཚུར་བསྡུས་ཏེ་ཐིམ་པས་ཐམས་ཅད་ཀྱི་བྱིན་རླབས་དངོས་གྲུབ་ཀྱི་བཅུད་ཡོངས་སུ་རྫོགས་པ་འདུས་པའི་བདག་ཉིད་དུ་གྱུར་པར་བསམས་ལ། ཨོཾ་ཨཱཿཧཱུྃ་གུ་རུ་དྷེ་བ་ཌཱ་ཀི་ནཱི་མ་ཧཱ་བ་ལིན་ཏ་ཀཱ་ཡ་ཝཱ་ཀ་ཙིཏྟ་སིདྡྷི་སིདྡྷི་ཧཱུྃ༔ ཅེས་ཅི་འགྲུབ་བཟླ། དེ་ནས་གཏེར་སྲུང་གཏོར་འབུལ་ཚོགས་མཆོད་བཅས་པ་གྲུབ་ནས་བདག་ཉིད་འཇུག་པའམ་ཏིང་ངེ་འཛིན་གྱི་དབང་བླང་ངོ༌། །དབང་དངོས་ལ། སློབ་མ་རྣམས་ལ་ཁྲུས་བྱ། བགེགས་གཏོར་བཏང་ནས་བསྐྲད་ཅིང་མཚམས་བཅད། སེམས་བསྐྱེད་གསལ་བཏབ་ལ། དེ་ལ་འདིར་གསང་སྔགས་རྡོ་རྗེ་ཐེག་པའི་སྨིན་གྲོལ་མྱུར་ལམ་ཐམས་ཅད་ཀྱི་རྩ་བ། བྱིན་རླབས་དངོས་གྲུབ་མ་ལུས་པའི་འབྱུང་གནས། དཀྱིལ་འཁོར་རྒྱ་མཚོའི་ཁྱབ་བདག་མཆོག་གི་རྡོ་རྗེ་ཅན་དཔལ་ལྡན་བླ་མ་དམ་པ་བསྙེན་ཅིང་སྒྲུབ་པའི་ཐབས་ཚུལ་ཇི་སྙེད་ཅིག་མཆིས་པ་རྣམས་ཀྱི་ནང་ནས་འགྲན་གྱི་ཟླ་དང་བྲལ་བ་ནི་ཨོ་རྒྱན་གྱི་སློབ་དཔོན་ཆེན་པོ་གུ་རུ་པདྨ་འབྱུང་གནས་ཀྱི་ཐུགས་སྒྲུབ་ཟབ་མོ་རྣམས་ཡིན་ཏེ། རྗེ་ཉིད་ཀྱི་རྡོ་རྗེའི་གསུངས་ལས། དུས་གསུམ་རྒྱལ་བ་སྲས་བཅས་ཀྱིས༔ འགྲོ་བའི་དོན་ཕྱིར་བརྩེར་དགོངས་ནས༔ སེམས་ཅན་དོན་དུ་སྐུར་སྤྲུལ་པའི༔ བླ་མའི་སྒྲུབ་ཐབས་དཔག་མེད་ཀྱང་༔ དུས་གསུམ་སངས་རྒྱས་ཐམས་ཅད་ཀྱིས༔ དབང་བསྐུར་རྗེས་གནང་གསོལ་བ་བཏབ༔ མ་འོངས་སྙིགས་མའི་དུས་དག་ཏུ༔ འགྲོ་དོན་བྱེད་པར་རྗེས་གནང་བའི༔ སྨོན་ལམ་མཐུ་ལྡན་ང་ཉིད་ལ༔ བརྟེན་ནས་བླ་མའི་སྒྲུབ་ཐབས་བཤད༔ ཅེས་གསུངས་པ་ལྟར་ཕྱོགས་བཅུའི་རྒྱལ་བ་སྲས་དང་བཅས་པ་རྣམས་ཀྱིས་འགྲོ་བའི་དོན་མཛད་པར་གསོལ་བ་བཏབ། དབང་བསྐུར་ཅིང་རྗེས་སུ་གནང༌། སྙིགས་དུས་གདུལ་དཀའ་འདུལ་བར་ཆེད་དུ་བསྐུལ་ཅིང་བསྔགས། སངས་རྒྱས་གཞན་ལས་ཁྱད་པར་དུ་ལྷག་པའི་ཐུགས་བསྐྱེད་སྨོན་ལམ་གྱི་སྟོབས་ཆེན་པོ་དང་ལྡན་པར་མ་ཟད། དུས་གསུམ་གྱི་སངས་རྒྱས་ཐམས་ཅད་ཀྱང་གུ་རུ་ཉིད་ཀྱི་རྣམ་པར་རོལ་པ་ལས་གཞན་དུ་མེད་དེ། ཇི་སྐད་དུ། ང་ཉིད་རྒྱལ་བ་ཀུན་དངོས་ཡིན༔ འདས་པའི་སངས་རྒྱས་ང་ཡི་ཡབ༔ མ་བྱོན་སངས་རྒྱས་ང་ཡི་སྲས༔ ད་ལྟའི་སངས་རྒྱས་ང་ཡི་མཆེད༔ དུས་གསུམ་སངས་རྒྱས་ང་ཡིན་པས༔ ཐེ་ཚོམ་མེད་པར་གསོལ་བ་ཐོབ༔ ཅེས་བདེན་གསུང་བསླུ་བ་མེད་པས་ཞལ་གྱིས་འཆེས་པ་དང༌། གངས་ཅན་གྱི་ལྗོངས་འདིར་སངས་རྒྱས་ཐམས་ཅད་ལས་ཀྱང་ངེས་པར་ལྷག་པའི་བཀའ་དྲིན་ཅན་གུ་རུ་རིན་པོ་ཆེའི་སྒྲུབ་ཐབས་རྒྱས་བསྡུས་མཐའ་ཡས་པར་བྱོན་པ་རྣམས་ཀྱི་ནང་ནས་ཁྱད་པར་དུ་འཕགས་པ། གནུབས་ཀྱི་དགེ་སློང་ནམ་མཁའི་སྙིང་པོ་ལ་ཐུགས་དམ་དུ་སྩལ་བའི་བླ་སྒྲུབ་བྱིན་རླབས་སྒྲོན་མེ་ཞེས་བྱ་བ་གང་དེའི་ཐུགས་སྤྲུལ་བྱང་ཆུབ་གླིང་པ་དཔལ་རྒྱལ་མཚན་གྱིས་སྤྱན་དྲངས་པའི་ཀུན་བཟང་ཐུགས་གཏེར་འཁོར་འདས་རང་གྲོལ་གྱི་ཆོས་སྡེ་ལས་ནང་གཏེར་རྭ་སྐོར་སྒྲོན་མ་དྲུག་གི་ཐོག་མར་འབྱུང་བའི་བྱིན་རླབས་དོན་གྱི་དབང་བསྐུར་ཟབ་མོ་བསྒྲུབ་པ་ལ་སོགས་ཀྱིས་མཚམས་སྦྱར་ལ་མཎྜལ་འབུལ་དུ་གཞུག །གསོལ་བ་འདེབས་པ་འདིའི་རྗེས་ཟློས། རྒྱལ་བ་སྲས་བཅས་སྲུང་མ་ཐུགས་དམ་ཅན༔ སྐུུ་གསུང་ཐུགས་མཉམ་གཉིས་མེད་དངོས་གྲུབ་མཆོག༔ ཚེ་ཆོས་སྣ་ཚོགས་ཅི་འདོད་གྲུབ་པའི་དཔལ༔ བུམ་པ་བཟང་པོ་དཔག་བསམ་ནོར་བུའི་ཚུལ༔ ད་ལྟ་ཉིད་དུ་བདག་ལ་སྩལ་དུ་གསོལ༔ ལན་གསུམ། རྒྱུད་རྣམ་པར་དག་པར་བྱ་བའི་སླད་དུ་སློབ་དཔོན་དང་ཐ་དད་མེད་པར་སངས་རྒྱས་ཀུན་འདུས་མ་ཧཱ་གུ་རུ་ལ་རྩ་གསུམ་རྒྱལ་བ་སྲས་དང་བཅས་པས་བསྐོར་ཏེ་མངོན་སུམ་བཞིན་དུ་བཞུགས་པའི་སྤྱན་སྔར་སྡིག་པ་བཤགས་ཤིང་དགེ་བ་ལ་ཡི་རང་བ་དང༌། མྱ་ངན་ལས་མི་འདའ་བར་བཞུགས་པར་གསོལ་ཞིང་ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། སྐྱབས་སུ་འགྲོ་ཞིང་བྱང་ཆུབ་མཆོག་ཏུ་སེམས་བསྐྱེད་ནས་དམ་ཚིག་དང་སྡོམ་པ་མཐའ་དག་ཡོངས་སུ་བཟུང་བར་བགྱིའོ་སྙམ་པས་འདིའི་རྗེས་ཟློས། བླ་མ་ཡི་དམ་ལྷ་ཡི་ཚོགས༔ དཔའ་བོ་མཁའ་འགྲོ་མ་ལུས་དགོངས༔ བདག་གིས་ཐོག་དྲངས་འགྲོ་བ་མ་ལུས་པས༔ སྡིག་པ་མི་དགེ་གང་བགྱིས་པ༔ གནོང་ཞིང་འགྱོད་པས་སོ་སོར་བཤགས༔ སླན་ཆད་བདག་གིས་བསྡམ་པར་བགྱི༔ རྒྱལ་བ་སྲས་བཅས་ཐམས་ཅད་ཀྱི༔ དགེ་བའི་རྩ་བ་རྒྱ་ཆེན་ལ༔ ལྷག་པར་རབ་དགའ་རྗེས་ཡི་རང་༔ མྱ་ངན་མི་འདའ་ཐུགས་རྗེ་ཡིས༔ སེམས་ཅན་དོན་མཛད་བརྟན་པར་བཞུགས༔ ཕྱོགས་བཅུ་དུས་བཞིར་ཐེག་ཆེན་གྱི༔ ཆོས་ཀྱི་འཁོར་ལོ་བསྐོར་བར་བསྐུལ༔ བླ་མ་རྒྱལ་བ་སྲས་བཅས་ལ༔ བྱང་ཆུབ་བར་དུ་བདག་སྐྱབས་མཆི༔ འདས་དང་མ་བྱོན་ད་ལྟར་གྱི༔ རྒྱལ་བ་སྲས་བཅས་མ་ལུས་པའི༔ བསླབ་བྱ་གང་ཡིན་བདག་སློབ་ཅིང་༔ སྤང་བྱ་གང་ཡིན་སྤང་བར་བགྱི༔ བྱང་ཆུབ་སེམས་མཆོག་དམ་པ་དག༔ བརྟན་པར་བདག་གིས་རབ་ཏུ་བསྐྱེད༔ སྐུ་གསུང་ཐུགས་ཀྱི་དམ་ཚིག་དང་༔ ཕྱི་ནང་གསང་བའི་སྡོམ་པ་རྣམས༔ བདག་གིས་བརྟན་པོར་བཟུང་བར་བགྱི༔ ལན་གསུམ༔ དབང་གི་གཞི་དགོད་པ༔ ཡེ་ཤེས་པ་དབབ་པ་ཡིན་པས་ལུས་ངག་གི་གནད་གཅུན་ཏེ་ཡིད་རྩེ་གཅིག་པས་དམིགས་པ་འདི་ལྟར་སྒོམས་ཤིག །ཨོཾ་མ་ཧཱ་ཤཱ་ནྱ་ཏཱ་སོགས། སྟོང་པའི་ངང་ལས་ཁྱེད་རང་རྣམས་གང་དུ་གནས་པའི་གོ་སར་པད་སྡོང་འདབ་མ་རྒྱས་པའི་སྟེང་དུ་ཉི་ཟླ་དང་བམ་རོའི་གདན་ལ་ཁྱེད་རང་རྣམས་སྐད་ཅིག་གིས་སངས་རྒྱས་ཀུན་འདུས་པདྨ་འབྱུང་གནས་དཀར་ལ་དམར་བའི་མདངས་འབར་ཞིང་བརྗིད་པའི་ཞལ་རས་སྤྱན་ཟུང་ཉི་ཟླ་ལྟར་འཁྱིལ་བ། འཛུམ་པའི་ཞལ་སྒྲོས་འོད་དུ་འཚེར་ཞིང་དབུ་ལ་པད་ཞྭ་དར་སྣ་མེ་ལོང་རིན་པོ་ཆེ་རྒོད་ཀྱི་རྩེ་རྒྱལ་གྱིས་སྤྲས་པ་གསོལ་བ། ཕྱག་གཡས་པས་རྡོ་རྗེ་ཐུགས་ཀར་འཛིན་ཅིང་གཡོན་མཉམ་བཞག་ཐོད་པ་བདུད་རྩིས་གང་བ་བསྣམས་པ། སྐུ་ལ་གསང་གོས་ཕོད་ཀ་ཆོས་གོས་རྣམ་གསུམ་ཟ་འོག་གི་བེར་ཆེན་རྣམས་བརྩེགས་མར་གསོལ་ཞིང་ཁ་ཊྭཱྃ་རྩེ་གསུམ་མཆན་ཁུང་དུ་བསྟེན་པ། ཞབས་རྡོ་རྗེ་སྐྱིལ་ཀྲུང་གིས་རི་རྒྱལ་ལྟ་བུར་བརྟན་བརྗིད་དུ་བཞུགས་པའི་གཡོན་ཕྱོགས་སུ་ཡུམ་ཡེ་ཤེས་མཁའ་འགྲོ་བཅུ་དྲུག་ལོན་པའི་མདངས་ལྡན་མཛེས་སྡུག་ཡིང་དུ་འོང་བ། རུས་པ་དང་རིན་པོ་ཆེ་དར་གྱི་ན་བཟས་བརྒྱན་ཅིང་ཌཱ་རུ་འཁྲོལ་ཞིང་བདུད་རྩི་སྟོབ་པ། སྒེག་ཅིང་འགྱིང་བའི་གར་གྱིས་རོལ་པར་གསལ་བར་གྱུར། དཀྱིལ་འཁོར་གྱི་གཙོ་བོ་དང་སློབ་དཔོན་དབྱེར་མ་མཆིས་པའི་ཐུགས་སྲོག་ས་བོན་ལས་འོད་ཟེར་ནམ་མཁའི་ཁམས་གང་བར་འཕྲོས། ཕྱོགས་བཅུའི་བླ་མ་སྐུ་གསུམ་གྱི་ཞིང་རབ་འབྱམས་ནས་བསྒོམས་པ་དང་འདྲ་བའི་ཡེ་ཤེས་པ་དཔག་ཏུ་མེད་པར་ཆར་བབ་པ་ལྟར་བྱོན་ཏེ་ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབས་པར་མོས་ལ་དད་པ་དང་མོས་གུས་ཀྱི་ཤུགས་དྲག་ཏུ་སྐྱེད་ཅིག །བྱས་ལ་ཌཱ་དྲིལ་འཁྲོལ་ཤིང་ཚིག་བདུན་གསོལ་འདེབས་དབྱངས་སུ་གྱེར། བཛྲ་གུ་རུའི་མཐར། གུ་རུ་དེ་བ་ཌཱ་ཀི་ནཱི་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཞེས་བཏགས་པ་དང་ཐོད་ཕྲེང་རྩལ་སོགས་བརྗོད། དེ་ལྟར་དབབ་པའི་བྱིན་རླབས་ཀྱི་རྒྱུན་སྒོ་གསུམ་ལ་རབ་ཏུ་གནས་པར་བྱས་པར་མོས་ཤིག །ཏིཥྛ་བཛྲས་བརྟན། དེ་ནས་དབང་བཞི་བྱིན་རླབས་ཀྱི་ཚུལ་དུ་རིམ་པར་བསྐུར་བའི་དང་པོ་དཔལ་གྱི་གཏོར་མ་ལྷར་གསལ་བ་སྤྱི་བོར་བྱོན་ཏེ་བྱིན་གྱིས་རློབ་པར་མོས་ཤིག །བླ་མའི་གཏོར་མ་སྤྱི་བོར་བཞག་ལ། ཨོཾ༔ བླ་མ་ཡི་དམ་མཁའ་འགྲོ་ཡིས༔ སྐུ་ཡི་བྱིན་གྱིས་བརླབ་ཏུ་གསོལ༔ ལུས་ཀྱི་སྒྲིབ་པ་སྦྱང་དུ་གསོལ༔ ལུས་ལ་གཟི་བྱིན་བསྐྱེད་དུ་གསོལ༔ སྐུ་མི་འགྱུར་ཚེ་ཡི་དངོས་གྲུབ་སྩོལ༔ ལྷ་དབང་ལུས་ལ་བསྐུར་དུ་གསོལ༔ གུ་རུ་དེ་བ་ཌཱ་ཀི་ནཱི་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ལྟར་གཏོར་མ་སྤྱི་བོར་བཞག་པས་བུམ་པའི་དབང་ཐོབ། ལུས་ཀྱི་སྒྲིབ་པ་དག་ནས་ལུས་སྣང་སྟོང་ལྷའི་སྐུར་གྱུར་པར་མོས་ཤིག །གཉིས་པ་བྷནྡྷའི་བདུད་རྩི་བྱང་ཆུབ་སེམས་ཀྱི་རང་བཞིན་ལྗགས་ལ་བྱིན་པར་མོས། བྷནྡྷ་མགྲིན་པར་གཏུགས་ཤིང་བདུད་རྩི་སྦྱིན་ལ། ཨཱཿ བླ་མ་ཡི་དམ་མཁའ་འགྲོ་ཡིས༔ གསུང་གི་བྱིན་གྱིས་བརླབ་ཏུ་གསོལ༔ ངག་གི་སྒྲིབ་པ་སྦྱང་དུ་གསོལ༔ ངག་ལ་ནུས་པ་དབྱུང་དུ་གསོལ༔ གསུང་སྙིང་པོ་ལུང་གི་དངོས་གྲུབ་སྩོལ༔ སྔགས་དབང་ངག་ལ་བསྐུར་དུ་གསོལ༔ གུ་རུ་དེ་བ་ཌཱ་ཀི་ནཱི་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཝ་ཀ་ཨ་བྷི་ཥིཉྩ་ཨཱཿ དེ་ལྟར་བདུད་རྩི་མགུལ་དུ་དྲངས་པས་བྱང་སེམས་བདེ་བས་ལུས་གང༌། གསང་བའི་དབང་ཐོབ། ངག་གི་སྒྲིབ་པ་དག་ནས་ངག་གཞོམ་མེད་རྡོ་རྗེའི་སྔགས་རྒྱུན་དུ་གྱུར་པར་མོས། གསུམ་པ་མེ་ལོང་བདེ་སྟོང་དབྱེར་མེད་ཀྱི་བརྡ་མཚོན་སྙིང་གར་བཞག་པར་མོས། མེ་ལོང་སྔགས་ལྡན་སྙིང་གར་བཀོད་པ། ཧཱུྃ༔ བླ་མ་ཡི་དམ་མཁའ་འགྲོ་ཡིས༔ ཐུགས་ཀྱི་བྱིན་གྱིས་བརླབ་ཏུ་གསོལ༔ ཡིད་ཀྱི་སྒྲིབ་པ་སྦྱང་དུ་གསོལ༔ སེམས་ལ་རྟོགས་པ་བསྐྱེད་དུ་གསོལ༔ ཐུགས་སྐྱེ་མེད་རྡོ་རྗེའི་དངོས་གྲུབ་སྩོལ༔ ཆོས་དབང་སེམས་ལ་བསྐུར་དུ་གསོལ༔ གུ་རུ་དེ་བ་ཌཱ་ཀི་ནཱི་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཙིཏྟ་ཨ་བྷྀ་ཥིཉྩ་ཧཱུྃ༔ དེ་ལྟར་མེ་ལོང་སྙིང་གར་བཞག་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་སྒྲིབ་པ་དག་ནས་ཡིད་ཀ་དག་རང་བྱུང་འོད་གསལ་ཆེན་པོའི་ངང་དུ་འདྲེས་པར་མོས་ཤིག །བཞི་པ་སིནྡྷཱུ་རའི་ཐིག་ལེ་གནས་གསུམ་དུ་བཀོད་པས་དོན་དམ་པའི་དབང་བསྐུར་ཐོབ་པར་མོས། གུ་རུ་དེ་བ་ཌཱ་ཀི་ནཱི་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཐིག་ལེ་གནས་གསུམ་དུ་བཀོད། དེ་ལྟར་ཐིག་ལེ་བྱས་པས་བདེ་སྟོང་ཟུང་འཇུག་གི་རྟོགས་པ་སྐྱེས། བཞི་པའི་དབང་ཐོབ། སྐུ་གསུམ་རང་རིག་ཏུ་རྫོགས་པར་ཤེས་པས་འཁོར་བ་ལས་གྲོལ་ཏེ་མངོན་པར་བྱང་ཆུབ་ཐོབ་པའི་སྐལ་བ་ཅན་དུ་གྱུར་པར་མོས་ཤིག །གསུམ་པ་རྗེས་རིམ་ནི། གཏོར་མ་ལྷར་གསལ་བ་འོད་དུ་ཞུ་ནས་ཁྱེད་རང་རྣམས་ལ་ཐིམ། གཏོར་རྫས་བདུད་རྩིའི་བཅུད་དུ་འཁྱིལ་བ་མྱང་བ་ལ་བརྟེན་ནས་དངོས་གྲུབ་རྣམ་གཉིས་སྟན་ཐོག་གཅིག་ཏུ་ཐོབ་པར་མོས་ལ་སྔགས་འདིའི་རྗེས་ཟློས། ཨ་ཧཱོ་མ་ཧཱ་སུ་ཁ་ཧོ༔ ཞེས་བརྗོད་པ་དང་ལྷན་ཅིག་བླ་གཏོར་གྱི་ཆ་ཤས་བཟའ་བཏུང་མྱོང་དུ་གཞུག་ལ་ཤིས་པ་བརྗོད། དམ་ཚིག་ཁས་བླང༌། གཏང་རག་མཎྜལ་སོགས་སྤྱི་ལྟར་བྱ། སློབ་དཔོན་གྱིས་ཚོགས་ལྷག་ནས་ཤིས་བརྗོད་ཀྱི་བར་བླ་སྒྲུབ་ཕྲིན་ལས་ལས་འབྱུང་བ་རྣམས་ཚང་བར་བྱའོ། །དོན་གྱི་དབང་བསྐུར་བདུད་རྩིའི་ཉིང་ཁུའི་བཅུད། །མྱང་བའི་སྐལ་པས་སྐྱེ་དགུ་མི་ཕོངས་པར། །བྱིན་རླབས་ལམ་ལས་རྡོ་རྗེའི་སྐུ་མཆོག་གྲུབ། །མཁའ་སྤྱོད་གྲོང་ཁྱེར་ཤིན་ཏུ་མཛེས་བྱེད་ཤོག །ཅེས་དམིགས་པ་མེད་པའི་ཐུགས་རྗེའི་བདག་ཉིད་ཀུན་མཁྱེན་བླ་མ་ཆོས་ཀྱི་འཁོར་ལོས་སྒྱུར་བ་ཆེན་པོའི་ཞལ་སྔ་ནས་བཀའ་དྲིན་ཇི་ལྟར་སྩལ་བ་བཞིན་ཏུ། ཟབ་ལམ་གྱི་རྒྱུན་ལ་ཕན་ཏུ་རེ་བའི་ལྷག་བསམ་གྱིས་དྲངས་ཏེ་པདྨ་གར་དབང་བློ་གྲོས་མཐའ་ཡས་ཀྱིས་དཔལ་དེ་བཱི་ཀོ་ཊའི་སྒྲུབ་གནས་ཀྱི་སྙིང་པོར་བགྱིས་པ་དགེ་ལེགས་འཕེལ། །

[edit]

@#/__/kun bzang thugs gter las bla sgrub byin rlabs sgron me las 'byung ba'i don dbang bskur ba'i tshul nor bu'i sgron me zhes bya ba bzhugs so//__na mo gu ru trI kA ya saM pUr+NA ya/__/yid bzhin dbang gi rgyal las ches lhag pa'i/__/dgos 'dod kun stsol gu ru rin po cher/__/gus pas btud nas snying po don gyi dbang*/__/'brel tshad thar pa'i sgo chen 'byed phyir dgod/__/de'ang bla sgrub byin rlabs sgron me dang las byang gnyis ka nas bdag 'jug dang slob ma rjes bzung gi snying por gsungs pa'i don dbang nyid ji ltar bskur ba'i tshul la gsum/__/sbyor ba yo byad kyi gshom/__dngos gzhi sgrub cing dbang bskur ba rjes kyi rim pas mjug bsdu ba'o/__/dang po ni/__stegs bzang por maN+Dal pad+ma 'dab brgyad kyi lte bar ban+d+ha mtshan ldan chang dang bdud rtsi chos sman sbyar bas bkang ba'i khar me long sin+d+hU ra bdal ba la hU~M yig rtsa sngags kyis bskor ba bris pas dgab de steng 'phrul stegs la rin po che'i snod du dpal gtor rin chain 'bar ba pad 'dab brgyad ldan rgyan spros dar gdugs dang bcas pa/___bza' bca' btung ba'i rigs kyis bskor ba bzhag__/phyogs bzhir gtor ma bzhi bsham par gsungs pa 'grub na de ltar dang 'phral bde lta bur gong gi dpal gtor gyi phyogs bzhir gtor chung ngam kyu gu bzhis bskor/__sman raka mchod pa/__phrin las la dgos pa'i tshogs gtor sogs spyi ltar bsham zhing tshogs par bya'o/__/gnyis pa la/__thog mar dbang don sgrub mchod ni/__/gzhung gi dgongs pas bla sgrub byin rlabs sgron me las 'byung ba'i phrin las gzhir bzhag__/bla ma'i sgrub thabs phyi nang gsang ba sku bzhi yongs rdzogs kyi sgrub thabs dang sbrel bar snang bas rgyas par na dbang gi rnam grangs bzhir yang 'gyur mod/__rje bla ma'i phyag bzhes su las byang yid bzhin nor bu dang sbrel bar mdzad pa nyid la don tshang zhing stabs bde bas las byang gzhung bsrang*/__gtor ma dkyil 'khor kun bdag gu ru rin po che dgos 'dod ma lus pa 'byung ba'i dbyig gi snying por bsam/__bzlas pa'i skabs su/__de las 'od zer 'phros/__rtsa gsum rgyal ba rab 'byams gyi thugs rgyud bskul/__de rnams kyi byin rlabs dang dngos grub ma lus pa tshur bsdus te thim pas thams cad kyi byin rlabs dngos grub kyi bcud yongs su rdzogs pa 'dus pa'i bdag nyid du gyur par bsams la/__oM AHhU~M gu ru d+he ba DA ki nI ma hA ba lin ta kA ya wA ka tsit+ta sid+d+hi sid+d+hi hU~M:__ces ci 'grub bzla/__de nas gter srung gtor 'bul tshogs mchod bcas pa grub nas bdag nyid 'jug pa'am ting nge 'dzin gyi dbang blang ngo*/__/dbang dngos la/__slob ma rnams la khrus bya/__bgegs gtor btang nas bskrad cing mtshams bcad/__sems bskyed gsal btab la/__de la 'dir gsang sngags rdo rje theg pa'i smin grol myur lam thams cad kyi rtsa ba/__byin rlabs dngos grub ma lus pa'i 'byung gnas/__dkyil 'khor rgya mtsho'i khyab bdag mchog gi rdo rje can dpal ldan bla ma dam pa bsnyen cing sgrub pa'i thabs tshul ji snyed cig mchis pa rnams kyi nang nas 'gran gyi zla dang bral ba ni o rgyan gyi slob dpon chen po gu ru pad+ma 'byung gnas kyi thugs sgrub zab mo rnams yin te/__rje nyid kyi rdo rje'i gsungs las/__dus gsum rgyal ba sras bcas kyis:__'gro ba'i don phyir brtser dgongs nas:__sems can don du skur sprul pa'i:__bla ma'i sgrub thabs dpag med kyang :__dus gsum sangs rgyas thams cad kyis:__dbang bskur rjes gnang gsol ba btab:__ma 'ongs snyigs ma'i dus dag tu:__'gro don byed par rjes gnang ba'i:__smon lam mthu ldan nga nyid la:__brten nas bla ma'i sgrub thabs bshad:__ces gsungs pa ltar phyogs bcu'i rgyal ba sras dang bcas pa rnams kyis 'gro ba'i don mdzad par gsol ba btab/__dbang bskur cing rjes su gnang*/__snyigs dus gdul dka' 'dul bar ched du bskul cing bsngags/__sangs rgyas gzhan las khyad par du lhag pa'i thugs bskyed smon lam gyi stobs chen po dang ldan par ma zad/__dus gsum gyi sangs rgyas thams cad kyang gu ru nyid kyi rnam par rol pa las gzhan du med de/__ji skad du/__nga nyid rgyal ba kun dngos yin:__'das pa'i sangs rgyas nga yi yab:__ma byon sangs rgyas nga yi sras:__da lta'i sangs rgyas nga yi mched:__dus gsum sangs rgyas nga yin pas:__the tshom med par gsol ba thob:__ces bden gsung bslu ba med pas zhal gyis 'ches pa dang*/__gangs can gyi ljongs 'dir sangs rgyas thams cad las kyang nges par lhag pa'i bka' drin can gu ru rin po che'i sgrub thabs rgyas bsdus mtha' yas par byon pa rnams kyi nang nas khyad par du 'phags pa/__gnubs kyi dge slong nam mkha'i snying po la thugs dam du stsal ba'i bla sgrub byin rlabs sgron me zhes bya ba gang de'i thugs sprul byang chub gling pa dpal rgyal mtshan gyis spyan drangs pa'i kun bzang thugs gter 'khor 'das rang grol gyi chos sde las nang gter rwa skor sgron ma drug gi thog mar 'byung ba'i byin rlabs don gyi dbang bskur zab mo bsgrub pa la sogs kyis mtshams sbyar la maN+Dal 'bul du gzhug__/gsol ba 'debs pa 'di'i rjes zlos/__rgyal ba sras bcas srung ma thugs dam can:__sku+u gsung thugs mnyam gnyis med dngos grub mchog:__tshe chos sna tshogs ci 'dod grub pa'i dpal:__bum pa bzang po dpag bsam nor bu'i tshul:__da lta nyid du bdag la stsal du gsol:__lan gsum/__rgyud rnam par dag par bya ba'i slad du slob dpon dang tha dad med par sangs rgyas kun 'dus ma hA gu ru la rtsa gsum rgyal ba sras dang bcas pas bskor te mngon sum bzhin du bzhugs pa'i spyan sngar sdig pa bshags shing dge ba la yi rang ba dang*/__mya ngan las mi 'da' bar bzhugs par gsol zhing chos kyi 'khor lo bskor bar bskul ba dang*/__skyabs su 'gro zhing byang chub mchog tu sems bskyed nas dam tshig dang sdom pa mtha' dag yongs su bzung bar bgyi'o snyam pas 'di'i rjes zlos/__bla ma yi dam lha yi tshogs:__dpa' bo mkha' 'gro ma lus dgongs:__bdag gis thog drangs 'gro ba ma lus pas:__sdig pa mi dge gang bgyis pa:__gnong zhing 'gyod pas so sor bshags:__slan chad bdag gis bsdam par bgyi:__rgyal ba sras bcas thams cad kyi:__dge ba'i rtsa ba rgya chen la:__lhag par rab dga' rjes yi rang :__mya ngan mi 'da' thugs rje yis:__sems can don mdzad brtan par bzhugs:__phyogs bcu dus bzhir theg chen gyi:__chos kyi 'khor lo bskor bar bskul:__bla ma rgyal ba sras bcas la:__byang chub bar du bdag skyabs mchi:__'das dang ma byon da ltar gyi:__rgyal ba sras bcas ma lus pa'i:__bslab bya gang yin bdag slob cing :__spang bya gang yin spang bar bgyi:__byang chub sems mchog dam pa dag:__brtan par bdag gis rab tu bskyed:__sku gsung thugs kyi dam tshig dang :__phyi nang gsang ba'i sdom pa rnams:__bdag gis brtan por bzung bar bgyi:__lan gsum:__dbang gi gzhi dgod pa:__ye shes pa dbab pa yin pas lus ngag gi gnad gcun te yid rtse gcig pas dmigs pa 'di ltar sgoms shig__/oM ma hA shA n+ya tA sogs/__stong pa'i ngang las khyed rang rnams gang du gnas pa'i go sar pad sdong 'dab ma rgyas pa'i steng du nyi zla dang bam ro'i gdan la khyed rang rnams skad cig gis sangs rgyas kun 'dus pad+ma 'byung gnas dkar la dmar ba'i mdangs 'bar zhing brjid pa'i zhal ras spyan zung nyi zla ltar 'khyil ba/__'dzum pa'i zhal sgros 'od du 'tsher zhing dbu la pad zhwa dar sna me long rin po che rgod kyi rtse rgyal gyis spras pa gsol ba/__phyag g.yas pas rdo rje thugs kar 'dzin cing g.yon mnyam bzhag thod pa bdud rtsis gang ba bsnams pa/__sku la gsang gos phod ka chos gos rnam gsum za 'og gi ber chen rnams brtsegs mar gsol zhing kha T+wA~M rtse gsum mchan khung du bsten pa/__zhabs rdo rje skyil krung gis ri rgyal lta bur brtan brjid du bzhugs pa'i g.yon phyogs su yum ye shes mkha' 'gro bcu drug lon pa'i mdangs ldan mdzes sdug ying du 'ong ba/__rus pa dang rin po che dar gyi na bzas brgyan cing DA ru 'khrol zhing bdud rtsi stob pa/__sgeg cing 'gying ba'i gar gyis rol par gsal bar gyur/__dkyil 'khor gyi gtso bo dang slob dpon dbyer ma mchis pa'i thugs srog sa bon las 'od zer nam mkha'i khams gang bar 'phros/__phyogs bcu'i bla ma sku gsum gyi zhing rab 'byams nas bsgoms pa dang 'dra ba'i ye shes pa dpag tu med par char bab pa ltar byon te khyed rang rnams la thim pas rgyud byin gyis brlabs par mos la dad pa dang mos gus kyi shugs drag tu skyed cig__/byas la DA dril 'khrol shing tshig bdun gsol 'debs dbyangs su gyer/__badz+ra gu ru'i mthar/__gu ru de ba DA ki nI badz+ra sa ma ya dzaHsid+d+hi pha la hU~M A:__zhes btags pa dang thod phreng rtsal sogs brjod/__de ltar dbab pa'i byin rlabs kyi rgyun sgo gsum la rab tu gnas par byas par mos shig__/tiSh+Tha badz+ras brtan/__de nas dbang bzhi byin rlabs kyi tshul du rim par bskur ba'i dang po dpal gyi gtor ma lhar gsal ba spyi bor byon te byin gyis rlob par mos shig__/bla ma'i gtor ma spyi bor bzhag la/__oM:__bla ma yi dam mkha' 'gro yis:__sku yi byin gyis brlab tu gsol:__lus kyi sgrib pa sbyang du gsol:__lus la gzi byin bskyed du gsol:__sku mi 'gyur tshe yi dngos grub stsol:__lha dbang lus la bskur du gsol:__gu ru de ba DA ki nI badz+ra sa ma ya dzaHsid+d+hi pha la hU~M A:__kA ya a b+hi Shiny+tsa oM:__de ltar gtor ma spyi bor bzhag pas bum pa'i dbang thob/__lus kyi sgrib pa dag nas lus snang stong lha'i skur gyur par mos shig__/gnyis pa b+han+d+ha'i bdud rtsi byang chub sems kyi rang bzhin ljags la byin par mos/__b+han+d+ha mgrin par gtugs shing bdud rtsi sbyin la/__AH__bla ma yi dam mkha' 'gro yis:__gsung gi byin gyis brlab tu gsol:__ngag gi sgrib pa sbyang du gsol:__ngag la nus pa dbyung du gsol:__gsung snying po lung gi dngos grub stsol:__sngags dbang ngag la bskur du gsol:__gu ru de ba DA ki nI badz+ra sa ma ya dzaHsid+d+hi pha la hU~M A:__wa ka a b+hi Shiny+tsa AH__de ltar bdud rtsi mgul du drangs pas byang sems bde bas lus gang*/__gsang ba'i dbang thob/__ngag gi sgrib pa dag nas ngag gzhom med rdo rje'i sngags rgyun du gyur par mos/__gsum pa me long bde stong dbyer med kyi brda mtshon snying gar bzhag par mos/__me long sngags ldan snying gar bkod pa/__hU~M:__bla ma yi dam mkha' 'gro yis:__thugs kyi byin gyis brlab tu gsol:__yid kyi sgrib pa sbyang du gsol:__sems la rtogs pa bskyed du gsol:__thugs skye med rdo rje'i dngos grub stsol:__chos dbang sems la bskur du gsol:__gu ru de ba DA ki nI badz+ra sa ma ya dzaHsid+d+hi pha la hU~M A:__tsit+ta a b+h-i Shiny+tsa hU~M:__de ltar me long snying gar bzhag pas shes rab ye shes kyi dbang thob/__yid kyi sgrib pa dag nas yid ka dag rang byung 'od gsal chen po'i ngang du 'dres par mos shig__/bzhi pa sin+d+hU ra'i thig le gnas gsum du bkod pas don dam pa'i dbang bskur thob par mos/__gu ru de ba DA ki nI badz+ra sa ma ya dzaHsid+d+hi pha la hU~M A:__thig le gnas gsum du bkod/__de ltar thig le byas pas bde stong zung 'jug gi rtogs pa skyes/__bzhi pa'i dbang thob/__sku gsum rang rig tu rdzogs par shes pas 'khor ba las grol te mngon par byang chub thob pa'i skal ba can du gyur par mos shig__/gsum pa rjes rim ni/__gtor ma lhar gsal ba 'od du zhu nas khyed rang rnams la thim/__gtor rdzas bdud rtsi'i bcud du 'khyil ba myang ba la brten nas dngos grub rnam gnyis stan thog gcig tu thob par mos la sngags 'di'i rjes zlos/__a hA+o ma hA su kha ho:__zhes brjod pa dang lhan cig bla gtor gyi cha shas bza' btung myong du gzhug la shis pa brjod/__dam tshig khas blang*/__gtang rag maN+Dal sogs spyi ltar bya/__slob dpon gyis tshogs lhag nas shis brjod kyi bar bla sgrub phrin las las 'byung ba rnams tshang bar bya'o/__/don gyi dbang bskur bdud rtsi'i nying khu'i bcud/__/myang ba'i skal pas skye dgu mi phongs par/__/byin rlabs lam las rdo rje'i sku mchog grub/__/mkha' spyod grong khyer shin tu mdzes byed shog__/ces dmigs pa med pa'i thugs rje'i bdag nyid kun mkhyen bla ma chos kyi 'khor los sgyur ba chen po'i zhal snga nas bka' drin ji ltar stsal ba bzhin tu/__zab lam gyi rgyun la phan tu re ba'i lhag bsam gyis drangs te pad+ma gar dbang blo gros mtha' yas kyis dpal de bI ko Ta'i sgrub gnas kyi snying por bgyis pa dge legs 'phel/__/