JKW-KABUM-10-THA-004-008

🚧 This website is under continued development. We appreciate your patience!

Previous Text Back to Volume PageNext Text

འཇམ་དཔལ་སྨྲ་བའི་སེང་གེའི་སྒྲུབ་ཐབས་ཉུང་གསལ་སྙིང་པོར་དྲིལ་བ་གྲུབ་པ་མཆོག་གི་ཞལ་ལུང་།

Wylie title	'jam dpal smra ba'i seng ge'i sgrub thabs nyung gsal snying por dril ba grub pa mchog gi zhal lung
Location	mkhyen brtse'i bka' 'bum Volume 10, sde tshan 4, Text 8, Pages 240-246 (Folios 29b3 to 32b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ཕ་དམ་པ་སངས་རྒྱས་ (pha dam pa sangs rgyas)
Citation	'jam dbyangs mkhyen brtse'i dbang po. 'jam dpal smra ba'i seng ge'i sgrub thabs nyung gsal snying por dril ba grub pa mchog gi zhal lung. In 'jam dbyangs mkhyen brtse'i dbang po'i bka' 'bum, Vol. 10: 240-246. Khams sde dge rdzong sar dgon: Rdzong sar blo gros phun tshogs, 2020.
Genre	Sadhanas - Evocation Ritual - sgrub thabs
Deity	'jam dpal smra ba'i seng ge
Colophon	།དེ་ལྟར་འཇ༷མ་དཔ༷ལ་སྨྲ༷་བའི༷་སེ༷ང་གེའི༷་སྒྲུབ༷་ཐབ༷ས་མདོ༷ར་བསྡུས༷་སྙིང༷་པོ༷ར་དྲིལ༷་བ༷་འདི་ནི་ཀུན་གཟིགས་སྤྲུལ་པའི་སྐུ་རིན་པོ་ཆེ་ཀརྨ་ངེས་དོན་དབང་པོའི་བཀའ་སྩལ་ནོར་བུའི་ཅོད་པན་སྤྱི་བོར་མཆོད་དེ། མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་གྲུབ༷་པ༷་མཆོ༷ག་གི༷་དེད་དཔོན་དམ་པ་སངས་རྒྱས་ཀྱི་ཞལ༷་ལུང༷་རྩ་བའི་ཡིག་རྙིང་དག་གི་དགོངས་པ་ཇི་ལྟ་བ་བཞིན་སྦྱར་བའི་དགེ་བས་འགྲོ་ཀུན་འཇམ་དཔལ་དཔའ་བོའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།
	de ltar 'jaXm dpaXl smraX ba'iX seXng ge'iX sgrubX thabXs mdoXr bsdusX snyingX poXr drilX baX 'di ni kun gzigs sprul pa'i sku rin po che karma nges don dbang po'i bka' stsal nor bu'i cod pan spyi bor mchod de/__mang du thos pa'i btsun pa 'jam dbyangs mkhyen brtse'i dbang pos grubX paX mchoXg giX ded dpon dam pa sangs rgyas kyi zhalX lungX rtsa ba'i yig rnying dag gi dgongs pa ji lta ba bzhin sbyar ba'i dge bas 'gro kun 'jam dpal dpa' bo'i go 'phang la myur du reg pa'i rgyur gyur cig__/sarba dA ka l+yA NaM b+ha ba tu/

1 Texts in this Section (sde tshan or chos tshan)

8 240-246	འཇམ་དཔལ་སྨྲ་བའི་སེང་གེའི་སྒྲུབ་ཐབས་ཉུང་གསལ་སྙིང་པོར་དྲིལ་བ་གྲུབ་པ་མཆོག་གི་ཞལ་ལུང་། 'jam dpal smra ba'i seng ge'i sgrub thabs nyung gsal snying por dril ba grub pa mchog gi zhal lung Sadhanas - Evocation Ritual - sgrub thabs	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །འཇམ་དཔལ་སྨྲ་བའི་སེང་གེའི་སྒྲུབ་ཐབས་ཉུང་གསལ་སྙིང་པོར་དྲིལ་བ་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ། །ན་མོ་གུ་རུ་ཝཱ་དི་སིཾ་ཧཱ་ཡ། བློ་ལྡན་གང་ཞིག་ངེས་པར་འབྱུང་བ་དང་བྱང་ཆུབ་སེམས་གཉིས་ཀྱི་གཞན་དབང་དུ་གྱུར་པས་མྱུར་དུ་ཐམས་ཅད་གཟིགས་པའི་ཡེ་ཤེས་ལ་བསྙེན་པར་བྱ་བའི་སླད་དུ་འཇམ་དཔལ་སྨྲ་བའི་སེང་གེའི་ཏིང་ངེ་འཛིན་དང་གཟུངས་ཀྱི་སྒོ་སྒྲུབ་པར་འདོད་པས། འདི་ཉིད་ཀྱི་རྗེས་སུ་གནང་བ་དང་གདམས་ངག་ལེགས་པར་ནོས་ཏེ་དམ་ཚིག་དང་སྡོམ་པར་ལྡན་པས་དབེན་ཞིང་ཉམས་དགའ་བའི་བསམ་གཏན་གྱི་ཁང་བུར་རྣལ་འབྱོར་ལ་འཇུག་པར་བྱའོ། །དེ་ལའང་སྦྱོར་དངོས་རྗེས་གསུམ་ལས། དང་པོ་སྦྱོར་བ་ནི། མདུན་གྱི་ནམ་མཁར་བླ་མ་འཇམ་པའི་དབྱངས་གཙོ་བོར་གྱུར་པའི་སྐྱབས་ཡུལ་རྣམས་མངོན་སུམ་ལྟ་བུར་གསལ་བའི་སྤྱན་སྔར་སྐྱབས་སེམས་ཚད་མེད་བཞི་བསྒོམ་པ་རྣམས་སྤྱི་ལྟར་བྱའོ། །གཉིས་པ་དངོས་གཞི་ནི། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་སེང་གེ་སྔོན་པོ་བསྣོལ་བའི་གདན་གྱི་སྟེང་དུ་པདྨ་དང་ཟླ་བའི་དཀྱིལ་འཁོར་གྱི་དབུས་སུ་རང་གི་སེམས་ཉིད་ཀྱི་ངོ་བོ་ཡི་གེ་དྷཱིཿདམར་པོ་དང་། མདུན་གྱིས་གཞིར་པད་ཟླའི་སྟེང་དུ་ཧྲཱིཿཡིག་མཐིང་ཞུན་གྱི་མདོག་ལྟ་བུ། དེ་གཉིས་ལས་འོད་ཟེར་འཕྲོས་འཕགས་པ་མཆོད། སེམས་ཅན་ཐམས་ཅད་ཀྱི་མ་རིག་པའི་མུན་པ་བསལ། ཚུར་འདུས་ཡི་གེ་གཉིས་ལ་ཐིམ་པས་དྷཱིཿཡོངས་སུ་གྱུར་པ་ལས་རང་ཉིད་སྐད་ཅིག་གིས་འཕགས་པ་འཇམ་དཔལ་སྐུ་མདོག་དམར་པོ་ཞལ་གཅིག་ཕྱག་གཉིས་པ། ཕྱག་གཡས་ཡིག་ཆ་ཕྱི་མ་རྣམས་སུ་ཕྱག་གཉིས་ཆོས་འཆད་ཀྱི་ཕྱག་རྒྱར་གསུངས་ཀྱང་རྩ་བའི་ཡིག་རྙིང་རྣམས་ཀྱི་དགོངས་པ་ནི་འདི་ཁོ་ན་སྟེ། དེས་མཚོན་གོང་འོག་རྣམས་སུ་ཡིག་ཆ་ཕྱི་མ་དང་མི་མཐུན་པ་རྣམས་ཡིག་རྙིང་སོར་བཞག་པའོ། །ཤེས་རབ་ཀྱི་རལ་གྲི་མེ་འབར་བ་ནམ་མཁའ་ལ་འཕྱར་ཞིང་། གཡོན་ཨུཏྤ་ལའི་ཡུ་བ་མཐེབ་སྲིན་གྱིས་ཐུགས་ཀར་བཟུང་བའི་འདབ་མ་སྙན་གྱི་ཐད་སོར་ཁ་ཕྱེ་བའི་སྟེང་ན་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་གླེགས་བམ་བསྣམས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཅིང་ཞི་འཛུམ་སྒེག་པའི་ཆ་ལུགས་ཅན། རལ་པའི་ཐོར་ཚུགས་གྱེན་དུ་བསྒྲེངས་པའི་རྩེར་ཡིད་བཞིན་ནོར་བུ་འབར་བས་མཚན་པའི་ལྷག་མ་ཟུར་ཕུད་ལྔ་གཡོན་དུ་འཕྱང་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་ཐུགས་ཀར་བྷྲཱུྃ་ལས་འཁོར་ལོ་སེར་པོ་རྩིབས་བཞི་པའི་ལྟེ་བར་རལ་གྲི་སོར་བཞི་པ་གྱེན་འགྲེང་དུ་འཁོད་པའི་ཆངས་ཟུང་ལ་དྷཱིཿདམར་པོའི་མཐར་རྩ་བའི་སྔགས་ཀྱིས་བསྐོར་བ། མདུན་གྱི་ཧྲཱིཿཡིག་ཡོངས་སུ་གྱུར་པ་ལས་ལྷ་མོ་དབྱངས་ཅན་མ་སྐུ་མདོག་སྔོན་མོ་ཅུང་ཟད་ཁྲོ་ཞིང་འཛུམ་ལ་སྒེག་པའི་ཉམས་དང་ལྡན་པ། རལ་གྲི་དང་པུསྟི་འཛིན་ཅིང་དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། དབུ་སྐྲ་མཐོན་མཐིང་སྤྱི་བོར་བཅིངས་པའི་རྩེ་མོར་ནོར་བུས་མཚན་ཅིང་ལྷག་མ་ལྕང་ལོའི་ཚུལ་དུ་འཕྱང་བ། ཞབས་གཉིས་བཞེངས་པའི་སྟབས་ཀྱིས་སྐུ་འགྱིང་བག་དང་བཅས་ཏེ་བཞུགས་པའི་ཐུགས་ཀར་ཟླ་བའི་སྟེང་དུ་རལ་གྲི་སོར་བཞི་པའི་ཆངས་ཟུང་ལ་ཧྲཱིཿཡིག་སྔོན་པོའི་མཐར་སྔགས་ཀྱི་ཕྲེང་བས་བསྐོར་བ། ཡབ་ཡུམ་གཉིས་ཀའི་ཐུགས་ཀའི་ས་བོན་ལས་འོད་ཟེར་འཕྲོས་པས་ཡེ་ཤེས་སེམས་དཔའི་ཚོགས་བསམ་གྱིས་མི་ཁྱབ་པ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་བསམས་ལ་ལྷར་སྣང་སྒྱུ་མ་ལྟ་བུའི་ཏིང་ངེ་འཛིན་ལ་ཡུན་རིང་དུ་སེམས་འཛིན། དེས་སྐྱོ་ན་བཟླས་པ་བྱ་བ་ནི། རང་གི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས་ཕྱི་སྣོད་ཀྱི་འཇིག་རྟེན་གཞལ་ཡས་ཁང་དུ་གྱུར། ནང་བཅུད་ཀྱི་སེམས་ཅན་ཐམས་ཅད་འཇམ་དཔལ་ཡབ་ཡུམ་གྱི་གོ་འཕང་ལ་བཀོད། སླར་ཡང་ཐུགས་ཀའི་དྷཱིཿལས་དྷཱིཿཡིག་གི་ཕྲེང་བ་དཔག་ཏུ་མེད་པ་བྱུང་། རང་གི་སྣ་བུག་གཡས་ནས་ཐོན། ཡུམ་གྱི་སྣ་བུག་གཡོན་ནས་ཞུགས་ཏེ་ཐུགས་ཀའི་ཧྲཱིཿལ་ཐིམ། དེ་ལས་གྲོལ་བའི་ཚུལ་གྱིས་ཧྲཱིཿཡིག་གི་ཕྲེང་བ་སྣ་བུག་གཡས་ནས་བྱུང་། རང་གི་སྣ་བུག་གཡོན་ནས་ཞུགས་པས་ཨཱ་ལི་ཀཱ་ལིའི་སྔགས་སུ་གྱུར་ཏེ་ལུས་ཀྱི་ནང་ཐམས་ཅད་གང་། བ་སྤུའི་བུ་ག་ཚུན་ཆད་ཀྱང་སྔགས་ཀྱི་ཡི་གེས་གཏམས་པས་བློ་ཡི་མུན་པ་ཐམས་ཅད་བསལ་ནས། ཤེས་རབ་ཀྱི་སྣང་བ་རྒྱས། དེ་ལྟར་སྔགས་ཕྲེང་རྒྱུན་མི་འཆད་པར་འཁོར་བའི་བར་ནས་ཤེས་རབ་ཀྱི་བུང་བའི་ཚོགས་འོད་ཟེར་དང་བཅས་པ་དཔག་ཏུ་མེད་པར་ཕྱོགས་བཅུར་འཕྲོས་པས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་བླ་མ་དམ་པ་རྣམས་ཀྱི་བྱིན་རླབས། ཉན་རང་གི་ཤེས་རབ། སོ་སོ་སྐྱེ་བོའི་ནུས་མཐུ་རྣམས་བསྡུས་ནས་རང་གི་སྤྱི་བོར་ཐིམ་པས་ལུས་ཡེ་ཤེས་དང་ལྡན་པར་བྱས། ཡང་འོད་ཟེར་འཕྲོས་པས་བཀའ་སྡེ་སྣོད་གསུམ་གྱི་བཅུད། གནས་ལྔ་རིག་པའི་པཎྜི་ཏའི་ཤེས་རབ། དགེ་བའི་བཤེས་གཉེན་གྱི་ནུས་པ། སྨན་གྱི་ནུས་པ་རྣམས་བསྡུས་ནས་རང་གི་ལྕེ་ལ་ཐིམ་པས་ངག་ནུས་པ་དང་ལྡན་པར་བྱིན་གྱིས་བརླབས། སླར་ཡང་འོད་ཟེར་འཕྲོས་པས་རྩི་ཤིང་ནགས་ཚལ་གྱི་བཅུད། ཉི་ཟླའི་འོད་ཟེར། རྒྱ་མཚོའི་ནང་གི་ནོར་བུ་རིན་པོ་ཆེའི་འོད། ལྷ་ཀླུ་གཟའ་སྐར་རྣམས་ཀྱི་ཤེས་རབ་དང་ནུས་པ། རྒྱལ་པོ་དང་བཙུན་མོའི་སེམས་རྣམས་བསྡུས་ཏེ་རང་གི་ཐུགས་ཀར་ཐིམ་པས་ཐུགས་བདེ་སྟོང་གཉིས་སུ་མེད་པའི་ཡེ་ཤེས་དང་ལྡན་པར་གྱུར། དེ་ལྟ་བུའི་དམིགས་པ་དང་མ་བྲལ་བའི་ངང་། ཨོཾ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མུྃ་ཧྲཱིཿཔྲཛྙཱ་ཝརྡྷ་ནི་ཧྲཱིཿདྷཱིཿསྭཱ་ཧཱ། ཞེས་ཇི་ཙམ་ནུས་པ་བཟླས་པའི་མཐར་དབྱངས་གསལ་དང་རྟེན་འབྲེལ་སྙིང་པོས་སྔགས་ཀྱི་ནུས་པ་བརྟན་པར་བྱའོ། །གསུམ་པ་རྗེས་ནི། རྗེ་བཙུན་འཇམ་པའི་དབྱངས་ཀྱིས་བདག་དང་སེམས་ཅན་ཐམས་ཅད་ཀྱི་མི་ཤེས་པའི་མུན་པ་ཐམས་ཅད་བསལ་ནས་བདག་མེད་རྟོགས་པའི་ཤེས་རབ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་བཏབ་ནས། རང་གི་ཐུགས་ཀའི་ས་བོན་ལས་འོད་ཟེར་འཕྲོས་པས་ཁམས་གསུམ་སྣོད་བཅུད་ཐམས་ཅད་འོད་དུ་ཞུ་ནས་རང་ལ་ཐིམ། རང་ཐུགས་ཀའི་འཁོར་ལོ་ལ་ཐིམ། དེ་རལ་གྲི་ལ་ཐིམ། དེ་དྷཱིཿལ་ཐིམ། དེ་ཐིག་ལེ་དམར་པོར་གྱུར་པ་འོད་དུ་ཞུ་ནས་སྣང་བ་ཐམས་ཅད་དམར་ལམ་གྱིས་སོང་བས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དབང་དུ་བྱས་པར་བསམས་ལ། འོད་གསལ་སྟོང་ཉིད་ཀྱི་ངང་དུ་བློ་བཞག །དེ་ལས་ལྡང་བ་ན། སླར་ཡང་རང་སྐད་ཅིག་གིས་རྗེ་བཙུན་འཇམ་པའི་དབྱངས་ཀྱི་སྐུར་གྱུར། དགེ་བ་འདི་ཡིས་མྱུར་དུ་བདག །འཇམ་དཔལ་ཡབ་ཡུམ་འགྲུབ་གྱུར་ནས། སོགས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་སུ་ཅི་འབྱོར་པའི་གཏོར་མ་བྱིན་གྱིས་བརླབས་ཏེ། ཡེ་ཤེས་པ་སྤྱན་དྲངས་ལ། རྩ་སྔགས་ཀྱི་མཐར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་པས་འབུལ་ཞིང་མཆོད་བསྟོད་གསོལ་བ་གདབ། ཉལ་བའི་ཚེ་འོད་གསལ་སྟོང་ཉིད་ཀྱི་ངང་དུ་ཉལ། ལྡང་བ་ན་ནམ་མཁའ་སྟོང་པ་ལས་དབྱངས་ཅན་མའི་ཚོགས་དཔག་ཏུ་མེད་པས་དྷཱིཿཧྲཱིཿའི་སྔགས་ཀྱིས་བསྐུལ་བར་བསམས་ལ་སྒྱུ་མ་ལྟ་བུའི་ལྷའི་སྐུར་ལྡང་། བསྙེན་པ་བྱེད་ན་གཙང་སྦྲ་དང་བཅས་ཐུན་གསུམ་མམ་བཞིའི་རིམ་པ་སྔགས་འབུམ་ཕྲག་བཞི་ཁ་སྐོང་དང་བཅས་པའམ། གཞུང་ནས་བཤད་པའི་རྟགས་རྣམས་དངོས་སམ་རྨི་ལམ་དུ་མཐོང་བའི་བར་བཟླ། དེ་ནས་ཁ་སྐོང་གི་སྦྱིན་སྲེག་དང་། བོགས་འབྱིན་པའི་སླད་དུ་རིལ་བུ་སྒྲུབ་པ་དང་། ལས་ཀྱི་ཚོགས་རབ་འབྱམས་ཀྱིས་རང་གཞན་ལ་ཕན་གདགས་པ་རྣམས་ནི་རྩ་བའི་ཡིག་རྙིང་གསལ་བྱེད་དང་བཅས་པ་རྣམས་ལས་རྟོགས་པར་བྱ་བ་ཁོ་ནའོ། །ཚུལ་དེ་ལྟར་འབད་པས་གནས་སྐབས་སུ་ཤེས་རབ་ཕྱོགས་མེད་དུ་སྐྱེ་ཞིང་། མངོན་པར་ཤེས་པ་དང་། ཏིང་ངེ་འཛིན་དང་། གཟུངས་ཀྱི་སྒོ་བསམ་གྱིས་མི་ཁྱབ་པར་ཐོབ་པར་འགྱུར་ལ། མཐར་ཐུག་འཕགས་པ་འཇམ་དཔལ་ཡེ་ཤེས་སེམས་དཔའི་སྐུར་མངོན་པར་བྱང་ཆུབ་པར་འགྱུར་པ་ནི་ངེས་པའོ། །དེ་ལྟར་འཇ༷མ་དཔ༷ལ་སྨྲ༷་བའི༷་སེ༷ང་གེའི༷་སྒྲུབ༷་ཐབ༷ས་མདོ༷ར་བསྡུས༷་སྙིང༷་པོ༷ར་དྲིལ༷་བ༷་འདི་ནི་ཀུན་གཟིགས་སྤྲུལ་པའི་སྐུ་རིན་པོ་ཆེ་ཀརྨ་ངེས་དོན་དབང་པོའི་བཀའ་སྩལ་ནོར་བུའི་ཅོད་པན་སྤྱི་བོར་མཆོད་དེ། མང་དུ་ཐོས་པའི་བཙུན་པ་འཇམ་དབྱངས་མཁྱེན་བརྩེའི་དབང་པོས་གྲུབ༷་པ༷་མཆོ༷ག་གི༷་དེད་དཔོན་དམ་པ་སངས་རྒྱས་ཀྱི་ཞལ༷་ལུང༷་རྩ་བའི་ཡིག་རྙིང་དག་གི་དགོངས་པ་ཇི་ལྟ་བ་བཞིན་སྦྱར་བའི་དགེ་བས་འགྲོ་ཀུན་འཇམ་དཔལ་དཔའ་བོའི་གོ་འཕང་ལ་མྱུར་དུ་རེག་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་བ་ཏུ།། །། ༈

[edit]

'jam dpal smra ba'i seng ge'i sgrub thabs nyung gsal snying por dril ba grub pa mchog gi zhal lung / @#/_/'jam dpal smra ba'i seng ge'i sgrub thabs nyung gsal snying por dril ba grub pa mchog gi zhal lung zhes bya ba bzhugs so/__/na mo gu ru wA di siM hA ya/__blo ldan gang zhig nges par 'byung ba dang byang chub sems gnyis kyi gzhan dbang du gyur pas myur du thams cad gzigs pa'i ye shes la bsnyen par bya ba'i slad du 'jam dpal smra ba'i seng ge'i ting nge 'dzin dang gzungs kyi sgo sgrub par 'dod pas/__'di nyid kyi rjes su gnang ba dang gdams ngag legs par nos te dam tshig dang sdom par ldan pas dben zhing nyams dga' ba'i bsam gtan gyi khang bur rnal 'byor la 'jug par bya'o/__/de la'ang sbyor dngos rjes gsum las/__dang po sbyor ba ni/__mdun gyi nam mkhar bla ma 'jam pa'i dbyangs gtso bor gyur pa'i skyabs yul rnams mngon sum lta bur gsal ba'i spyan sngar skyabs sems tshad med bzhi bsgom pa rnams spyi ltar bya'o/__/gnyis pa dngos gzhi ni/__oM swa b+hA wa shud+d+haHsarba d+harmAHswa b+hA wa shud+d+ho\u0f85haM/__stong pa'i ngang las seng ge sngon po bsnol ba'i gdan gyi steng du pad+ma dang zla ba'i dkyil 'khor gyi dbus su rang gi sems nyid kyi ngo bo yi ge d+hIHdmar po dang /__mdun gyis gzhir pad zla'i steng du hrIHyig mthing zhun gyi mdog lta bu/__de gnyis las 'od zer 'phros 'phags pa mchod/__sems can thams cad kyi ma rig pa'i mun pa bsal/__tshur 'dus yi ge gnyis la thim pas d+hIHyongs su gyur pa las rang nyid skad cig gis 'phags pa 'jam dpal sku mdog dmar po zhal gcig phyag gnyis pa/__phyag g.yas yig cha phyi ma rnams su phyag gnyis chos 'chad kyi phyag rgyar gsungs kyang rtsa ba'i yig rnying rnams kyi dgongs pa ni 'di kho na ste/__des mtshon gong 'og rnams su yig cha phyi ma dang mi mthun pa rnams yig rnying sor bzhag pa'o/__/shes rab kyi ral gri me 'bar ba nam mkha' la 'phyar zhing /__g.yon ut+pa la'i yu ba mtheb srin gyis thugs kar bzung ba'i 'dab ma snyan gyi thad sor kha phye ba'i steng na shes rab kyi pha rol tu phyin pa brgyad stong pa'i glegs bam bsnams pa/__dar dang rin po che'i rgyan thams cad kyis brgyan cing zhi 'dzum sgeg pa'i cha lugs can/__ral pa'i thor tshugs gyen du bsgrengs pa'i rtser yid bzhin nor bu 'bar bas mtshan pa'i lhag ma zur phud lnga g.yon du 'phyang ba/__zhabs rdo rje'i skyil mo krung gis bzhugs pa'i thugs kar b+h+rU~M las 'khor lo ser po rtsibs bzhi pa'i lte bar ral gri sor bzhi pa gyen 'greng du 'khod pa'i changs zung la d+hIHdmar po'i mthar rtsa ba'i sngags kyis bskor ba/__mdun gyi hrIHyig yongs su gyur pa las lha mo dbyangs can ma sku mdog sngon mo cung zad khro zhing 'dzum la sgeg pa'i nyams dang ldan pa/__ral gri dang pusti 'dzin cing dar dang rin po che'i rgyan thams cad kyis brgyan pa/__dbu skra mthon mthing spyi bor bcings pa'i rtse mor nor bus mtshan cing lhag ma lcang lo'i tshul du 'phyang ba/__zhabs gnyis bzhengs pa'i stabs kyis sku 'gying bag dang bcas te bzhugs pa'i thugs kar zla ba'i steng du ral gri sor bzhi pa'i changs zung la hrIHyig sngon po'i mthar sngags kyi phreng bas bskor ba/__yab yum gnyis ka'i thugs ka'i sa bon las 'od zer 'phros pas ye shes sems dpa'i tshogs bsam gyis mi khyab pa oM badz+ra sa mA dzaH__dzaHhU~M ba~M hoH__gnyis su med par bsams la lhar snang sgyu ma lta bu'i ting nge 'dzin la yun ring du sems 'dzin/__des skyo na bzlas pa bya ba ni/__rang gi thugs ka'i sa bon sngags phreng dang bcas pa las 'od zer 'phros pas phyi snod kyi 'jig rten gzhal yas khang du gyur/__nang bcud kyi sems can thams cad 'jam dpal yab yum gyi go 'phang la bkod/__slar yang thugs ka'i d+hIHlas d+hIHyig gi phreng ba dpag tu med pa byung /__rang gi sna bug g.yas nas thon/__yum gyi sna bug g.yon nas zhugs te thugs ka'i hrIHla thim/__de las grol ba'i tshul gyis hrIHyig gi phreng ba sna bug g.yas nas byung /__rang gi sna bug g.yon nas zhugs pas A li kA li'i sngags su gyur te lus kyi nang thams cad gang /__ba spu'i bu ga tshun chad kyang sngags kyi yi ges gtams pas blo yi mun pa thams cad bsal nas/__shes rab kyi snang ba rgyas/__de ltar sngags phreng rgyun mi 'chad par 'khor ba'i bar nas shes rab kyi bung ba'i tshogs 'od zer dang bcas pa dpag tu med par phyogs bcur 'phros pas/__phyogs bcu'i sangs rgyas dang byang chub sems dpa' thams cad dang bla ma dam pa rnams kyi byin rlabs/__nyan rang gi shes rab/__so so skye bo'i nus mthu rnams bsdus nas rang gi spyi bor thim pas lus ye shes dang ldan par byas/__yang 'od zer 'phros pas bka' sde snod gsum gyi bcud/__gnas lnga rig pa'i paN+Di ta'i shes rab/__dge ba'i bshes gnyen gyi nus pa/__sman gyi nus pa rnams bsdus nas rang gi lce la thim pas ngag nus pa dang ldan par byin gyis brlabs/__slar yang 'od zer 'phros pas rtsi shing nags tshal gyi bcud/__nyi zla'i 'od zer/__rgya mtsho'i nang gi nor bu rin po che'i 'od/__lha klu gza' skar rnams kyi shes rab dang nus pa/__rgyal po dang btsun mo'i sems rnams bsdus te rang gi thugs kar thim pas thugs bde stong gnyis su med pa'i ye shes dang ldan par gyur/__de lta bu'i dmigs pa dang ma bral ba'i ngang /__oM hrIHd+hIHma me dI paM many+dzu shrI mu~M hrIHpradz+nyA war+d+ha ni hrIHd+hIHswA hA/_zhes ji tsam nus pa bzlas pa'i mthar dbyangs gsal dang rten 'brel snying pos sngags kyi nus pa brtan par bya'o/__/gsum pa rjes ni/__rje btsun 'jam pa'i dbyangs kyis bdag dang sems can thams cad kyi mi shes pa'i mun pa thams cad bsal nas bdag med rtogs pa'i shes rab khyad par can rgyud la skye bar byin gyis brlab tu gsol/__zhes gsol ba btab nas/__rang gi thugs ka'i sa bon las 'od zer 'phros pas khams gsum snod bcud thams cad 'od du zhu nas rang la thim/__rang thugs ka'i 'khor lo la thim/__de ral gri la thim/__de d+hIHla thim/__de thig le dmar por gyur pa 'od du zhu nas snang ba thams cad dmar lam gyis song bas 'jig rten dang 'jig rten las 'das pa'i dngos grub thams cad dbang du byas par bsams la/__'od gsal stong nyid kyi ngang du blo bzhag__/de las ldang ba na/__slar yang rang skad cig gis rje btsun 'jam pa'i dbyangs kyi skur gyur/__dge ba 'di yis myur du bdag__/'jam dpal yab yum 'grub gyur nas/__sogs bsngo smon gyis mtshams sbyar te spyod lam la 'jug__/thun mtshams su ci 'byor pa'i gtor ma byin gyis brlabs te/__ye shes pa spyan drangs la/__rtsa sngags kyi mthar i daM ba liM ta kha kha khA hi khA hi btags pas 'bul zhing mchod bstod gsol ba gdab/__nyal ba'i tshe 'od gsal stong nyid kyi ngang du nyal/__ldang ba na nam mkha' stong pa las dbyangs can ma'i tshogs dpag tu med pas d+hIHhrIH'i sngags kyis bskul bar bsams la sgyu ma lta bu'i lha'i skur ldang /__bsnyen pa byed na gtsang sbra dang bcas thun gsum mam bzhi'i rim pa sngags 'bum phrag bzhi kha skong dang bcas pa'am/__gzhung nas bshad pa'i rtags rnams dngos sam rmi lam du mthong ba'i bar bzla/__de nas kha skong gi sbyin sreg dang /__bogs 'byin pa'i slad du ril bu sgrub pa dang /__las kyi tshogs rab 'byams kyis rang gzhan la phan gdags pa rnams ni rtsa ba'i yig rnying gsal byed dang bcas pa rnams las rtogs par bya ba kho na'o/__/tshul de ltar 'bad pas gnas skabs su shes rab phyogs med du skye zhing /__mngon par shes pa dang /__ting nge 'dzin dang /__gzungs kyi sgo bsam gyis mi khyab par thob par 'gyur la/__mthar thug 'phags pa 'jam dpal ye shes sems dpa'i skur mngon par byang chub par 'gyur pa ni nges pa'o/__/de ltar 'jaXm dpaXl smraX ba'iX seXng ge'iX sgrubaX thabaXs mdoXr bsdusaX snyingaX poXr drilaX baX 'di ni kun gzigs sprul pa'i sku rin po che karma nges don dbang po'i bka' stsal nor bu'i cod pan spyi bor mchod de/__mang du thos pa'i btsun pa 'jam dbyangs mkhyen brtse'i dbang pos grubaX paX mchoXg giX ded dpon dam pa sangs rgyas kyi zhalaX lungaX rtsa ba'i yig rnying dag gi dgongs pa ji lta ba bzhin sbyar ba'i dge bas 'gro kun 'jam dpal dpa' bo'i go 'phang la myur du reg pa'i rgyur gyur cig__/sarba dA ka l+yA NaM b+ha ba tu//____//__!_