JKCL-KABUM-10-THA-049

🚧 This website is under continued development. We appreciate your patience!

Previous Text Back to Volume PageNext Text

དཔལ་ཀཱ་ལཱི་དེ་ཝཱིར་བསྟོད་པ་དཔལ་ལྷ་དགྱེས་པའི་དབྱངས་སྙན།

Wylie title	dpal kA lI de wIr bstod pa dpal lha dgyes pa'i dbyangs snyan
Location	chos kyi blo gros bka' 'bum Volume 10, Text 49, Pages 373-377 (Folios 1a1 to 3a1)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. dpal kA lI de wIr bstod pa dpal lha dgyes pa'i dbyangs snyan. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 10: 373-377. Bir, H.P.: Khyentse Labrang, 2012.
Genre	Place or Sacred Site Guides - gnas bshad - skor tshad  ·  Verses of Praise - bstod pa
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/kalidevi-praise
Colophon	།ཅེས་པའང་རྒྱ་གར་ཀ་ལ་ཀ་ཏའི་དཔལ་ལྷ་མོའི་གྲོང་ཁྱེར་དུ་ཁྲག་འཐུང་དཔའ་བོ་པདྨ་ཡེ་ཤེས་རྡོ་རྗེས་ཤར་མར་བྲིས་པའོ།།
	/ces pa'ang rgya gar ka la ka ta'i dpal lha mo'i grong khyer du khrag 'thung dpa' bo pad+ma ye shes rdo rjes shar mar bris pa'o//

1 Texts in this Section (sde tshan or chos tshan)

373-377	དཔལ་ཀཱ་ལཱི་དེ་ཝཱིར་བསྟོད་པ་དཔལ་ལྷ་དགྱེས་པའི་དབྱངས་སྙན། dpal kA lI de wIr bstod pa dpal lha dgyes pa'i dbyangs snyan Place or Sacred Site Guides - gnas bshad - skor tshad   ·   Verses of Praise - bstod pa	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

Tibetan Text

Wylie

[edit]

དཔལ་ཀཱ་ལཱི་དེ་ཝཱིར་བསྟོད་པ་དཔལ་ལྷ་དགྱེས་པའི་དབྱངས་སྙན་བཞུགས་སོ། །ན་མོ་ཤྲཱི་མ་ཧཱ་ཀཱ་ལཱི་དེ་ཝཱི་ཡེ། །དཔལ་ཆེན་ཐུགས་ལས་སྤྲུལ་པའི་ལྷ་མོ་ནི། །བདག་མེད་སྟོང་པ་དོན་དམ་ཆོས་ཀྱི་དབྱིངས། །རྣམ་པ་ཀུན་གྱི་མཆོག་དང་རབ་ལྡན་མ། །འཁོར་འདས་ཀུན་ཁྱབ་ཀུན་ཏུ་བཟང་པོར་བསྟོད། །དེ་བཞིན་ཉིད་དབྱིངས་སྤྲོས་མཚན་མི་རྟོག་ཀྱང་། །སྐྱེ་མེད་ངང་ལས་སྐྱེ་བའི་ཆོ་འཕྲུལ་སྟོན། །ཞི་དང་ཁྲོ་ཆགས་སྣ་ཚོགས་རབ་བསྒྱུར་མ། །མིང་བརྒྱ་མཚན་སྟོང་མ་ལ་བསྟོད་པར་བགྱི། །ལྷ་མོ་པརྞ་ཤ་བ་རི་དང་ནི། །གཽ་རཱི་བརྒྱད་སོགས་རྣམ་འགྱུར་ཅིར་ཡང་འཆར། །སྲིད་གསུམ་དབང་བསྒྱུར་རྡོ་རྗེ་འཕྲུལ་མོ་ཆེ། །དཔལ་ལྡན་དབྱིངས་ཀྱི་རྒྱལ་མོར་ཕྱག་འཚལ་བསྟོད། །སྣང་སྲིད་འབྱུང་ཆེན་ལྔ་པོའི་རང་བཞིན་ནི། །སྲ་མཉན་དྲོ་དང་སྐྱེད་བྱེད་བདག་ཉིད་ཆེ། །དུས་བཞིའི་དཔལ་འཛིན་ནམ་མཁའི་གོས་ཅན་མ། །འཁོར་འདས་སྐྱེ་བའི་ཡུམ་ཆེན་མ་ལ་བསྟོད། །རྡོ་རྗེ་བཙུན་མོའི་ཆུ་སྐྱེས་རྒྱས་པའི་དབུས། །རབ་འབྱམས་དཀྱིལ་འཁོར་ཏིལ་གྱི་གོང་བུ་བཞིན། །རྟག་ཏུ་བཞུགས་པའི་འོག་མིན་གསང་བ་ཆེར། །གསང་འཛིན་དབང་མོ་རྣལ་འབྱོར་མ་དཔལ་བསྟོད། །ངོ་བོ་རང་བཞིན་མེད་ཅིང་བདག་རྟོག་སྤངས། །སྤྲོས་པའི་མཚན་མ་ཐམས་ཅད་ཉེར་ཞི་ཞིང་། །འོད་གསལ་རྣམ་པ་ཀུན་གྱི་མཆོག་ལྡན་མ། །ཤེས་རབ་ཕ་རོལ་ཕྱིན་མའི་ངོ་བོར་བསྟོད། །སྟོང་པའི་དབྱིངས་ལས་གཟུགས་ཀྱི་སྐུར་བཞེངས་པ། །ལོངས་སྤྱོད་ཡོངས་རྫོགས་དེ་བཞིན་གཤེགས་མ་ལྔ། །ས་དང་ཕ་རོལ་ཕྱིན་བཅུའི་རྩེ་མོར་ཕྱིན། །དཔལ་ལྡན་རང་བྱུང་རྒྱལ་མོར་ཕྱག་འཚལ་བསྟོད། །ཧེ་རུ་ཀ་དང་དྲེགས་པའི་ལྷ་ཆེན་སོགས། །གཅིག་ཏུ་མ་ངེས་ཐབས་ཆེན་རྣམ་མང་དང་། །ཁ་སྦྱོར་བཞི་ཡི་རོལ་རྩེད་སྟོན་མཛད་མ། །སྒྱུ་འཕྲུལ་ལྷ་མོ་ཆེན་མོར་ཕྱག་འཚལ་བསྟོད། །འཛག་པའི་དྲི་མ་ཐམས་ཅད་རྣམ་སྤངས་ཤིང་། །ཟག་མེད་བདེ་བ་མཆོག་གི་ལོངས་སྤྱོད་ཀྱིས། །རྟག་ཏུ་མྱོས་ཤིང་ཧཾ་ཡིག་རི་བོང་གི། བདུད་རྩིའི་ཆ་ཡིས་ཡོངས་སུ་གང་ལ་བསྟོད། །དམིགས་མེད་སྙིང་རྗེས་སྐྱེ་འགྲོ་ཐམས་ཅད་ལ། །མ་གཅིག་བུ་ལ་བརྩེ་བཞིན་རྟག་ཏུ་གདུང་། །བྱམས་པ་ཆེན་པོའི་སྤྱན་གྱིས་གཟིགས་མཛད་པ། །མ་གཅིག་བྱང་ཆུབ་སེམས་མ་ཆེན་མོར་བསྟོད། །དུས་གསུམ་ཀུན་ཏུ་སྔོན་འགྲོ་རྗེས་སུ་འཇུག །དུས་བཞི་ཀུན་ཁྱབ་སྣོད་བཅུད་ཕྱྭ་ཆེན་མོ། །སྤྲུལ་པའི་གཟུགས་ནི་དུ་མ་མང་པོར་སྟོན། །རྒྱུན་མི་ཆད་པས་འགྲོ་བ་འདུལ་ལ་བསྟོད། །དབྱིངས་ལ་གནས་ཀྱང་ཞི་བའི་མཐར་མ་ལྷུང་། །སྲིད་པར་རྗེས་སུ་ཆགས་པའི་སྒྱུ་ཐབས་ཀྱིས། །ནམ་ཡང་འགོགས་པ་མེད་པའི་ཕྲིན་ལས་ནི། །འཁོར་བ་གནས་ཀྱི་བར་དུ་སྟོན་ལ་འདུད། །ལྷ་ལ་དབང་བསྒྱུར་ལྷ་མོ་ནམ་གྲུ་མ། །ཀླུ་ལ་དབང་བསྒྱུར་ཀླུ་མོ་དུང་སྐྱོང་མ། །སྲིན་པོའི་ཆུང་མ་འབོད་སྒྲོགས་རྒྱལ་མོ་ཆེ། །མཁའ་འགྲོའི་གཙོ་མོ་རྗེ་ལ་ཕྱག་འཚལ་བསྟོད། །གསང་སྔགས་རྒྱུད་སྡེ་ཀུན་གྱི་གཉེར་འཛིན་མ། །འོག་མིན་དུར་ཁྲོད་མེ་རི་འབར་བ་རུ། །བཀའ་ཡི་སྲུང་མ་ཁྲོ་མོ་རག་གདོང་མ། །སྲིད་ཞིའི་དགྲ་ལས་རྣམ་རྒྱལ་མ་ལ་བསྟོད། །རེ་མ་ཛ་ཛི་ཛུ་དང་རབ་བརྟན་མ། །དམག་དང་ཟོར་གྱི་ལས་མཛད་དྲག་མོ་རྒྱལ། །རྡོ་རྗེ་གཤོག་རྒོད་སྲོག་སྒྲུབ་མ་ལ་སོགས། །བསྟན་སྲུང་དུ་མར་འཕྲུལ་ལ་ཕྱག་འཚལ་བསྟོད། །ཁྱོད་ཀྱི་རྗེས་འབྲང་ཀོང་སྲིན་བ་ལང་གདོང་། །འབྲོག་སྲིན་ཆུ་སྲིན་གདོང་དང་དྲེད་གདོང་སོགས། །གཞན་ཡང་ནག་མོ་བྱེ་བ་འབུམ་སྡེའི་ཚོགས། །རླུང་ནག་འཚུབས་མར་འཁྱིལ་ལ་རབ་ཏུ་བསྟོད། །སྟོང་ཁམས་འདི་ན་དྲག་རྩལ་མཐུ་མོ་ཆེ། །སྟོབས་ཤུགས་བསྐལ་པའི་མེ་བཞིན་རབ་འབར་མ། །བསྟན་སྲུང་ཀུན་ལ་དབང་བསྒྱུར་ཆེན་མོ་ནི། །དཔལ་ལྡན་འདོད་ཁམས་ལྷ་མོ་ཁྱོད་ལ་བསྟོད། །མ་ལྟར་བྱམས་དང་སྲིང་ལྟར་རབ་གདུང་ཞིང་། །རྣམ་འབྱོར་སྒྲུབ་པའི་གྲོགས་མོ་ཆེན་མོ་ནི། །བྱང་ཆུབ་བར་གྱི་མཛའ་མོར་མངའ་གསོལ་ཞིང་། །མི་འབྲལ་དང་བའི་སེམས་ཀྱིས་བསྟོད་པར་བགྱི། །དེ་ལྟར་བསྟོད་པའི་དབྱངས་ཀྱི་རོལ་མོ་འདིས། །རེ་མ་ཏི་ཡི་ཐུགས་དམ་གཉེན་པོ་བསྐངས། །འགལ་འཁྲུལ་ཉམས་ཆགས་ཐམས་ཅད་བཟོད་བཞེས་ལ། །ཚངས་པ་མཆོག་གི་དངོས་གྲུབ་སྩལ་དུ་གསོལ། །འཇིག་རྟེན་འཇིག་རྟེན་འདས་པའི་དངོས་པོ་ཀུན། །བློ་ཡིས་བླངས་ཏེ་འདོད་ཁམས་བདག་མོར་འབུལ། །ཁྱོད་ཐུགས་དགྱེས་པ་ཆེན་པོ་རབ་བསྐྱེད་དེ། །རྣམ་བཞིའི་ཕྲིན་ལས་མ་ལུས་འགྲུབ་པར་མཛོད། །ཀུན་མཁྱེན་ཉི་མའི་གཉེན་གྱི་བསྟན་པ་དང་། །བསྟན་འཛིན་སྡེ་རྒྱས་ལུང་རྟོགས་བཤད་སྒྲུབ་འཕེལ། །ཆོས་ལྡན་རྒྱལ་པོ་སྦྱིན་བདག་དབུ་འཕང་མཐོ། །ནག་ཕྱོགས་སྡེར་བཅས་རྩད་ནས་འཇོམས་གྱུར་ཅིག །རྣལ་འབྱོར་བདག་ཅག་ཡོན་མཆོད་འཁོར་བཅས་ལ། །གནོད་པར་བྱེད་པའི་གཟུགས་ཅན་གཟུགས་མེད་ཚོགས། །ཞི་དང་རྒྱས་དང་དབང་གི་ལས་གསུམ་གྱིས། །བྱམས་པའི་སེམས་དང་ལྡན་པའི་ཕྲིན་ལས་མཛོད། །ཞི་བས་མི་འདུལ་སྡང་སེམས་ལྡན་པ་རྣམས། །སྡོང་སྐམ་མེ་ལ་རྒྱབ་པ་ཇི་བཞིན་དུ། །མིང་དང་རུས་དང་བརྒྱུད་པར་བཅས་པ་རྣམས། །མིང་ཙམ་མེད་པ་རྡུལ་དུ་བརླག་པར་མཛོད། །མདོར་ན་གང་བསམ་ཅིར་སྣང་ཐམས་ཅད་པ། །རང་གི་སེམས་ཀྱི་ཆོ་རོལ་ཉིད་དུ་ཤར། །དབྱིངས་ཀྱི་རྒྱལ་མོ་ཨེ་ཀ་ཙ་ཏི་རུ། །ངོ་ཤེས་ཐག་ཆོད་ཐིག་ལེ་ཉག་གཅིག་ཀློང་། །བྱ་རྩོལ་བྲལ་བའི་ཕྲིན་ལས་ལྷུན་གྲུབ་མཛོད། །ཅེས་པའང་རྒྱ་གར་ཀ་ལ་ཀ་ཏའི་དཔལ་ལྷ་མོའི་གྲོང་ཁྱེར་དུ་ཁྲག་འཐུང་དཔའ་བོ་པདྨ་ཡེ་ཤེས་རྡོ་རྗེས་ཤར་མར་བྲིས་པའོ།། །།

[edit]

dpal kA lI de wIr bstod pa dpal lha dgyes pa'i dbyangs snyan bzhugs so/__/na mo shrI ma hA kA lI de wI ye/__/dpal chen thugs las sprul pa'i lha mo ni/__/bdag med stong pa don dam chos kyi dbyings/__/rnam pa kun gyi mchog dang rab ldan ma/__/'khor 'das kun khyab kun tu bzang por bstod/__/de bzhin nyid dbyings spros mtshan mi rtog kyang /__/skye med ngang las skye ba'i cho 'phrul ston/__/zhi dang khro chags sna tshogs rab bsgyur ma/__/ming brgya mtshan stong ma la bstod par bgyi/__/lha mo par+Na sha ba ri dang ni/__/gau rI brgyad sogs rnam 'gyur cir yang 'char/__/srid gsum dbang bsgyur rdo rje 'phrul mo che/__/dpal ldan dbyings kyi rgyal mor phyag 'tshal bstod/__/snang srid 'byung chen lnga po'i rang bzhin ni/__/sra mnyan dro dang skyed byed bdag nyid che/__/dus bzhi'i dpal 'dzin nam mkha'i gos can ma/__/'khor 'das skye ba'i yum chen ma la bstod/__/rdo rje btsun mo'i chu skyes rgyas pa'i dbus/__/rab 'byams dkyil 'khor til gyi gong bu bzhin/__/rtag tu bzhugs pa'i 'og min gsang ba cher/__/gsang 'dzin dbang mo rnal 'byor ma dpal bstod/__/ngo bo rang bzhin med cing bdag rtog spangs/__/spros pa'i mtshan ma thams cad nyer zhi zhing /__/'od gsal rnam pa kun gyi mchog ldan ma/__/shes rab pha rol phyin ma'i ngo bor bstod/__/stong pa'i dbyings las gzugs kyi skur bzhengs pa/__/longs spyod yongs rdzogs de bzhin gshegs ma lnga/__/sa dang pha rol phyin bcu'i rtse mor phyin/__/dpal ldan rang byung rgyal mor phyag 'tshal bstod/__/he ru ka dang dregs pa'i lha chen sogs/__/gcig tu ma nges thabs chen rnam mang dang /__/kha sbyor bzhi yi rol rtsed ston mdzad ma/__/sgyu 'phrul lha mo chen mor phyag 'tshal bstod/__/'dzag pa'i dri ma thams cad rnam spangs shing /__/zag med bde ba mchog gi longs spyod kyis/__/rtag tu myos shing haM yig ri bong gi/__bdud rtsi'i cha yis yongs su gang la bstod/__/dmigs med snying rjes skye 'gro thams cad la/__/ma gcig bu la brtse bzhin rtag tu gdung /__/byams pa chen po'i spyan gyis gzigs mdzad pa/__/ma gcig byang chub sems ma chen mor bstod/__/dus gsum kun tu sngon 'gro rjes su 'jug__/dus bzhi kun khyab snod bcud phywa chen mo/__/sprul pa'i gzugs ni du ma mang por ston/__/rgyun mi chad pas 'gro ba 'dul la bstod/__/dbyings la gnas kyang zhi ba'i mthar ma lhung /__/srid par rjes su chags pa'i sgyu thabs kyis/__/nam yang 'gogs pa med pa'i phrin las ni/__/'khor ba gnas kyi bar du ston la 'dud/__/lha la dbang bsgyur lha mo nam gru ma/__/klu la dbang bsgyur klu mo dung skyong ma/__/srin po'i chung ma 'bod sgrogs rgyal mo che/__/mkha' 'gro'i gtso mo rje la phyag 'tshal bstod/__/gsang sngags rgyud sde kun gyi gnyer 'dzin ma/__/'og min dur khrod me ri 'bar ba ru/__/bka' yi srung ma khro mo rag gdong ma/__/srid zhi'i dgra las rnam rgyal ma la bstod/__/re ma dza dzi dzu dang rab brtan ma/__/dmag dang zor gyi las mdzad drag mo rgyal/__/rdo rje gshog rgod srog sgrub ma la sogs/__/bstan srung du mar 'phrul la phyag 'tshal bstod/__/khyod kyi rjes 'brang kong srin ba lang gdong /__/'brog srin chu srin gdong dang dred gdong sogs/__/gzhan yang nag mo bye ba 'bum sde'i tshogs/__/rlung nag 'tshubs mar 'khyil la rab tu bstod/__/stong khams 'di na drag rtsal mthu mo che/__/stobs shugs bskal pa'i me bzhin rab 'bar ma/__/bstan srung kun la dbang bsgyur chen mo ni/__/dpal ldan 'dod khams lha mo khyod la bstod/__/ma ltar byams dang sring ltar rab gdung zhing /__/rnam 'byor sgrub pa'i grogs mo chen mo ni/__/byang chub bar gyi mdza' mor mnga' gsol zhing /__/mi 'bral dang ba'i sems kyis bstod par bgyi/__/de ltar bstod pa'i dbyangs kyi rol mo 'dis/__/re ma ti yi thugs dam gnyen po bskangs/__/'gal 'khrul nyams chags thams cad bzod bzhes la/__/tshangs pa mchog gi dngos grub stsal du gsol/__/'jig rten 'jig rten 'das pa'i dngos po kun/__/blo yis blangs te 'dod khams bdag mor 'bul/__/khyod thugs dgyes pa chen po rab bskyed de/__/rnam bzhi'i phrin las ma lus 'grub par mdzod/__/kun mkhyen nyi ma'i gnyen gyi bstan pa dang /__/bstan 'dzin sde rgyas lung rtogs bshad sgrub 'phel/__/chos ldan rgyal po sbyin bdag dbu 'phang mtho/__/nag phyogs sder bcas rtsad nas 'joms gyur cig__/rnal 'byor bdag cag yon mchod 'khor bcas la/__/gnod par byed pa'i gzugs can gzugs med tshogs/__/zhi dang rgyas dang dbang gi las gsum gyis/__/byams pa'i sems dang ldan pa'i phrin las mdzod/__/zhi bas mi 'dul sdang sems ldan pa rnams/__/sdong skam me la rgyab pa ji bzhin du/__/ming dang rus dang brgyud par bcas pa rnams/__/ming tsam med pa rdul du brlag par mdzod/__/mdor na gang bsam cir snang thams cad pa/__/rang gi sems kyi cho rol nyid du shar/__/dbyings kyi rgyal mo e ka tsa ti ru/__/ngo shes thag chod thig le nyag gcig klong /__/bya rtsol bral ba'i phrin las lhun grub mdzod/__/ces pa'ang rgya gar ka la ka ta'i dpal lha mo'i grong khyer du khrag 'thung dpa' bo pad+ma ye shes rdo rjes shar mar bris pa'o//___//