JKCL-KABUM-10-THA-032

🚧 This website is under continued development. We appreciate your patience!

Previous Text"THA" is not a number. Back to Volume Page"THA" is not a number.Next Text "THA" is not a number.

Wylie title
Location	chos kyi blo gros bka' 'bum Volume , Text 32, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"THA" is not a number.

1 Texts in this Section (sde tshan or chos tshan)

311-314	དཔལ་ལྡན་སངས་རྒྱས་པདྨ་རྒྱལ༔ ཁྱུང་ཆེན་དཔལ་གྱི་རྫོང་ཆེན་པོའི་སོགས་ཁྱུང་སྟག་གནས་ཡིག། dpal ldan sangs rgyas pad+ma rgyal: khyung chen dpal gyi rdzong chen po'i sogs khyung stag gnas yig Pilgrimage Guides - gnas yig	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"THA" is not a number.

Tibetan Text

Wylie

[edit]

དཔལ་ལྡན་སངས་རྒྱས་པདྨ་རྒྱལ༔ རིག་སྔགས་འཆང་བའི་འཁོར་ལོས་བསྒྱུར༔ ཀུན་མཁྱེན་སྔགས་བདག་ཆེན་པོ་ཡི༔ རང་སྣང་འཁོར་ལོས་བསྒྱུར་བ་ལས༔ སྣང་སྲིད་ཀུན་ཀྱང་ཐིག་ལེར་ཟླུམ༔ ཡེ་ཤེས་དྲྭ་བ་ཆེན་པོ་ལས༔ དུ་མར་སྣང་ཞིང་ཅིར་ཡང་འཆར༔ མ་དག་རྡུལ་ཙམ་མི་དམིགས་ཤིང་༔ དག་པ་རབ་འབྱམས་འབྱམས་ཀླས་པས༔ འོག་མིན་ཆེན་པོའི་བཀོད་པ་རྫོགས༔ དེ་ཡི་བྱེ་བྲག་འཛམ་གླིང་འདིར༔ བྱང་ཕྱོགས་ཤིང་གིས་མཚན་པ་ཡི༔ རྡོ་རྗེ་གདན་གྱི་ཕྱོགས་མཚམས་སུ༔ གནས་ཡུལ་བཀོད་པ་ཅིར་ཡང་སྟོན༔ ཡུལ་ཆེན་སོ་གཉིས་དུར་ཁྲོད་བརྒྱད༔ དཔའ་བོ་མཁའ་འགྲོ་འདུ་བའི་ཞིང་༔ ཇི་སྙེད་བརྗོད་པའི་མཐའ་ལས་འདས༔ དེ་ལ་བྱང་ཕྱོགས་ཁ་བའི་ལྗོངས༔ མངའ་རི་གཙང་དབུས་བོད་ཆེན་གྱི༔ ལྗོངས་འདིར་གནས་ཡུལ་བཀོད་པ་སྣང་༔ མདོ་སྨད་སྒང་དྲུག་ཡ་གྱལ་གྱི༔ གསེར་ལྡན་ཆུ་ཀླུང་བྱང་ཕྱོགས་ཀྱི༔ པདྨ་ཤེལ་གྱི་ཕུག་པའི་ཤར༔ ཁྱུང་ཆེན་དཔལ་གྱི་རྫོང་ཆེན་པོའི༔ བཀོད་པ་ས་འཛིན་ལྟེ་བ་རུ༔ ཡེ་ཤེས་སྤྲུལ་པའི་བྱ་ཁྱུང་གིས༔ བྱིན་རླབས་སྐུ་ཡི་དཀྱིལ་འཁོར་གྱི༔ ཐུགས་ཀར་ཡེ་ཤེས་གསང་བའི་ཕུག༔ ཀུན་བཟང་རྒྱལ་བ་ཞི་ཁྲོའི་གནས༔ བལྟར་ཡོད་བསྒྲོད་དུ་མེད་པ་དང་༔ དབུ་རྩེ་དགའ་རབ་རྡོ་རྗེའི་ཕུག༔ ལྟེ་བའི་གཡས་ཟུར་ཁྱུང་ཆེན་ཕུག༔ ཁྱུང་ཆེན་བཀའ་བརྒྱད་ཡོངས་རྫོགས་གནས༔ སྐུ་གསུང་ཐུགས་ཀྱི་གཏེར་མཆོག་དང་༔ ཡོན་ཏན་ཕྲིན་ལས་འཛད་མེད་གཏེར༔ ཁྱུང་ཆེན་རིགས་ལྔའི་དམ་རྫས་སོགས༔ ནད་གདོན་ཀུན་འཇོམས་གཏེར་ཆེན་བཞུགས༔ དེ་གཡས་གུ་རུའི་གསང་ཕུག་དང་༔ འོག་ཟུར་མཚོ་རྒྱལ་གསང་བའི་ཕུག༔ གཡོན་ཕྱོགས་གོང་དུ་མནྡཱ་རའི༔ རྡོ་རྗེ་ཚེ་ཡི་ཕུག་པ་དང་༔ འཆི་མེད་ཚེ་ཆུའི་རྒྱུན་བཟང་བཞུགས༔ བཏུང་དང་ཁྲུས་བྱས་སྡིག་སྒྲིབ་ཞི༔ ཚེ་བསོད་ཡེ་ཤེས་འཕེལ་བར་འགྱུར༔ གསང་གནས་བདེ་ཆེན་རྡོ་རྗེའི་ཕུག༔ ཆོས་འབྱུང་གྲུ་གསུམ་གཞལ་མེད་ཁང་༔ མཁའ་འགྲོ་ཆོས་སྐྱོང་འདུ་བའི་གནས༔ དེར་བསྒོམ་ཉམས་རྟོགས་དགའ་བཞི་རྒྱས༔ གསང་བ་རྡོ་རྗེ་བདུད་རྩིའི་རྒྱུན༔ དེ་ཡིས་ཁྲུས་བྱ་བཏུང་བྱེད་ན༔ ཤིན་ཏུ་སོས་དཀའི་ཀླུ་གདོན་རྣམས༔ འཇོམས་ཤིང་བདེ་སྐྱིད་ལྡན་པ་འགྱུར༔ གཤོག་གཡས་རིག་འཛིན་བི་མ་དང་༔ བཻ་རོ་ཏིང་འཛིན་བཟང་པོ་དང་༔ གཡོན་རྩེར་ཤྲཱི་སེང་ཆོས་རྒྱལ་སོགས༔ རིག་འཛིན་དུ་མས་བྱིན་བརླབས་པའི༔ སྒྲུབ་ཕུག་ཉམས་དགའ་ཡིད་དུ་འོང་༔ གཡོན་ལོགས་ཞི་ཁྲོའི་ཚོགས་ཁང་དུ༔ ཨོ་རྒྱན་རྗེ་འབངས་ཚོམ་བུའི་ཚོགས༔ བདུད་རྩི་སྨན་སྒྲུབ་བྱ་བའི་གནས༔ ཁྱུང་ཆེན་འདོད་འཇོ་རིགས་ལྔ་ཡི༔ དཔལ་གྱི་དེའུ་སྨན་ཤིང་རྒྱས༔ འཛད་མེད་ནོར་གཏེར་བསམ་མི་ཁྱབ༔ རྡོར་སེམས་སྒྲུབ་ཕུག་བཀྲ་ཤིས་འབྱུང་༔ དེ་ལ་རིགས་ལྔའི་སྐུ་གསུང་ཐུགས༔ ཕྱག་རྒྱའི་མཚན་མ་ཅི་ཡང་ཤར༔ སྤྲུལ་པའི་ཁྱུང་གི་གདུལ་བྱ་རུ༔ ཀླུ་རྒྱལ་གདོལ་པ་ནག་པོ་ཡི༔ རང་གཟུགས་དུག་སྦྲུལ་གདོན་ཆེན་གཟུགས༔ སྨིན་པའི་ཁ་ཆུས་སྐྱེ་འགྲོ་ཡི༔ སྲོག་ལ་གཟན་པ་ལྟར་སྣང་ཡང་༔ དོན་ལ་དཔལ་ཆེན་ཆེ་བའི་རྟགས༔ ཕྱོགས་མཚམས་ས་རྡོ་རི་བྲག་སོགས༔ མ་ལ་ཡ་ཡི་བཀོད་པ་རྫོགས༔ གནས་འདིར་རིག་འཛིན་རྒྱལ་པོ་ནི༔ ཡེ་ཤེས་ཁྱུང་དྲག་ཞེས་བྱ་བས༔ གསང་གཏེར་དྲངས་ཤིང་དེ་ཡི་འོག༔ པདྨ་བདེ་ཆེན་གཡུང་དྲུང་སོགས༔ རིག་འཛིན་དུ་མས་བྱིན་གྱིས་བརླབས༔ དེ་འོག་རྡོ་རྗེའི་མིང་འཆང་དང་༔ ཡེ་ཤེས་རྡོ་རྗེ་དྲག་རྩལ་སོགས༔ མང་དུ་འབྱུང་ཞིང་ཟབ་གཏེར་དབང་༔ གནས་དེར་ཕྱག་མཆོད་བསྙེན་སྒྲུབ་དང་༔ ཚོགས་ཀྱི་འདུ་བར་སྤྱོད་གྱུར་ན༔ ཚེ་འདིར་བར་ཆད་ཀུན་སེལ་ཞིང་༔ ནད་དང་གདོན་གྱིས་མི་ཚུགས་ཤིང་༔ ཚེ་བསོད་ཉམས་རྟོགས་ཡེ་ཤེས་རྒྱས༔ མཐར་ཐུག་པདྨ་འོད་ཀྱི་ཞིང་༔ སྐྱེ་འགྱུར་ཐེ་ཚོམ་མེད་དོ་རྒྱ༔ ས་མ་ཡ༔ དེ་ལྟར་གནས་ཀྱི་བཀོད་པ་ནི༔ མདོ་ཙམ་རིག་འཛིན་ཐུགས་གསང་དུ༔ སྦས་པ་རྟེན་འབྲེལ་དུས་བབ་ཚེ༔ དགོངས་པའི་ཀློང་ནས་རང་བརྡོལ་ཏེ༔ བསྟན་འགྲོ་ཕན་པའི་བཙས་སུ་འགྱུར༔ རྒྱ༔ རྒྱ༔ རྒྱ༔ ཞེས་པའང་ཆུ་འབྲུག་ཟླ་ཚེས་གནས་དེར་ལྗོངས་རྒྱུར་གནས་ཚེ། ཚེ་རིང་ཕུན་ཚོགས་དང་། མཛོད་ཚེ་དཔལ་ཟུང་གིས་བསྐུལ་པ་ན། ཌཱ་ཀིའི་གྲོགས་ཀྱི་བརྡའ་ཡིས་བསྐུལ་ཏེ་པདྨ་ཡེ་ཤེས་རྡོ་རྗེས་གང་ཤར་ཉིད་དུ་བྲིས་པ་འདིས་ཀྱང་བསྟན་འགྲོར་ཕན་པ་རྒྱ་ཆེན་པོར་འབྱུང་བའི་རྒྱུར་གྱུར་ཅིག །མངྒ་ལཾ།། །།

[edit]

dpal ldan sangs rgyas pad+ma rgyal:__rig sngags 'chang ba'i 'khor los bsgyur:__kun mkhyen sngags bdag chen po yi:__rang snang 'khor los bsgyur ba las:__snang srid kun kyang thig ler zlum:__ye shes drwa ba chen po las:__du mar snang zhing cir yang 'char:__ma dag rdul tsam mi dmigs shing :__dag pa rab 'byams 'byams klas pas:__'og min chen po'i bkod pa rdzogs:__de yi bye brag 'dzam gling 'dir:__byang phyogs shing gis mtshan pa yi:__rdo rje gdan gyi phyogs mtshams su:__gnas yul bkod pa cir yang ston:__yul chen so gnyis dur khrod brgyad:__dpa' bo mkha' 'gro 'du ba'i zhing :__ji snyed brjod pa'i mtha' las 'das:__de la byang phyogs kha ba'i ljongs:__mnga' ri gtsang dbus bod chen gyi:__ljongs 'dir gnas yul bkod pa snang :__mdo smad sgang drug ya gyal gyi:__gser ldan chu klung byang phyogs kyi:__pad+ma shel gyi phug pa'i shar:__khyung chen dpal gyi rdzong chen po'i:__bkod pa sa 'dzin lte ba ru:__ye shes sprul pa'i bya khyung gis:__byin rlabs sku yi dkyil 'khor gyi:__thugs kar ye shes gsang ba'i phug:__kun bzang rgyal ba zhi khro'i gnas:__bltar yod bsgrod du med pa dang :__dbu rtse dga' rab rdo rje'i phug:__lte ba'i g.yas zur khyung chen phug:__khyung chen bka' brgyad yongs rdzogs gnas:__sku gsung thugs kyi gter mchog dang :__yon tan phrin las 'dzad med gter:__khyung chen rigs lnga'i dam rdzas sogs:__nad gdon kun 'joms gter chen bzhugs:__de g.yas gu ru'i gsang phug dang :__'og zur mtsho rgyal gsang ba'i phug:__g.yon phyogs gong du man+dA ra'i:__rdo rje tshe yi phug pa dang :__'chi med tshe chu'i rgyun bzang bzhugs:__btung dang khrus byas sdig sgrib zhi:__tshe bsod ye shes 'phel bar 'gyur:__gsang gnas bde chen rdo rje'i phug:__chos 'byung gru gsum gzhal med khang :__mkha' 'gro chos skyong 'du ba'i gnas:__der bsgom nyams rtogs dga' bzhi rgyas:__gsang ba rdo rje bdud rtsi'i rgyun:__de yis khrus bya btung byed na:__shin tu sos dka'i klu gdon rnams:__'joms shing bde skyid ldan pa 'gyur:__gshog g.yas rig 'dzin bi ma dang :__bai ro ting 'dzin bzang po dang :__g.yon rtser shrI seng chos rgyal sogs:__rig 'dzin du mas byin brlabs pa'i:__sgrub phug nyams dga' yid du 'ong :__g.yon logs zhi khro'i tshogs khang du:__o rgyan rje 'bangs tshom bu'i tshogs:__bdud rtsi sman sgrub bya ba'i gnas:__khyung chen 'dod 'jo rigs lnga yi:__dpal gyi de'u sman shing rgyas:__'dzad med nor gter bsam mi khyab:__rdor sems sgrub phug bkra shis 'byung :__de la rigs lnga'i sku gsung thugs:__phyag rgya'i mtshan ma ci yang shar:__sprul pa'i khyung gi gdul bya ru:__klu rgyal gdol pa nag po yi:__rang gzugs dug sbrul gdon chen gzugs:__smin pa'i kha chus skye 'gro yi:__srog la gzan pa ltar snang yang :__don la dpal chen che ba'i rtags:__phyogs mtshams sa rdo ri brag sogs:__ma la ya yi bkod pa rdzogs:__gnas 'dir rig 'dzin rgyal po ni:__ye shes khyung drag zhes bya bas:__gsang gter drangs shing de yi 'og:__pad+ma bde chen g.yung drung sogs:__rig 'dzin du mas byin gyis brlabs:__de 'og rdo rje'i ming 'chang dang :__ye shes rdo rje drag rtsal sogs:__mang du 'byung zhing zab gter dbang :__gnas der phyag mchod bsnyen sgrub dang :__tshogs kyi 'du bar spyod gyur na:__tshe 'dir bar chad kun sel zhing :__nad dang gdon gyis mi tshugs shing :__tshe bsod nyams rtogs ye shes rgyas:__mthar thug pad+ma 'od kyi zhing :__skye 'gyur the tshom med do rgya:__sa ma ya:__de ltar gnas kyi bkod pa ni:__mdo tsam rig 'dzin thugs gsang du:__sbas pa rten 'brel dus bab tshe:__dgongs pa'i klong nas rang brdol te:__bstan 'gro phan pa'i btsas su 'gyur:__rgya:__rgya:__rgya:__zhes pa'ang chu 'brug zla tshes gnas der ljongs rgyur gnas tshe/__tshe ring phun tshogs dang /__mdzod tshe dpal zung gis bskul pa na/__DA ki'i grogs kyi brda' yis bskul te pad+ma ye shes rdo rjes gang shar nyid du bris pa 'dis kyang bstan 'gror phan pa rgya chen por 'byung ba'i rgyur gyur cig__/mang+ga laM//___//