JKCL-KABUM-08-NYA-010-017

🚧 This website is under continued development. We appreciate your patience!

Previous Text Back to Volume PageNext Text

Wylie title		page=1
Location	chos kyi blo gros bka' 'bum Volume 10, Text 17, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre

Tibetan Text

Wylie

[edit]

༈ ཆབ་གཙང་རྗེ་བཙུན་སྐུ་ཞབས་ལ་གདམས་པ་དད་པའི་ས་བོན་ཅེས་བྱ་བ་བཞུགས་སོ། །རྗེ་བླ་མ་རྣམས་ལ་ཕྱག་འཚལ་ལོ། །མི་རྟག་འཆི་བ་དྲན་པར་བྱིན་གྱིས་རློབས། །དུས་ད་ལྟའི་སྒྱུ་ལུས་གོག་པོ་འདི། །སྐད་ཅིག་གིས་འགྱུར་ཤིང་འཆི་ལ་ཉེ། །རྐྱེན་བཟང་ངན་ཅི་འོང་མི་ཤེས་པས། །འཕྲལ་འཕྲལ་དུ་དམ་པའི་ཆོས་ལ་འབུངས། །ཚེ་འཇིག་རྟེན་འདི་ཡི་བྱ་བཞག་རྣམས། །མདང་སུམ་གྱི་རྨི་ལམ་ཇི་བཞིན་དུ། །རྟག་མི་ཐུབ་ཆུ་ཡི་ཆུ་བུར་བཞིན། །ཚུལ་དེ་ལ་བསམ་ནས་དགོས་མེད་ཀྱི། །ད་བྱ་བཞག་ཐམས་ཅད་བསྐྱུར་ལ་ཐོངས། །ནམ་འཆི་བའི་དུས་སུ་འཁོར་བསྒྱུར་གྱི། །དཔལ་མངའ་ཐང་འབྱོར་པ་ཡོད་ན་ཡང་། །ཁབ་གཅིག་ཙམ་ཁྱེར་དབང་མེད་པས་ན། །ཕན་ངེས་པ་དམ་པའི་ལྷ་ཆོས་མཛོད། །དགྲ་འཆི་བདག་ནམ་འོང་ངེས་མེད་པས། །ཆོས་སང་བྱེད་གནང་བྱེད་དབང་མ་ཤོར། །ལས་རྒྱུ་འབྲས་བླང་དོར་ལ་བརྩོན་ན། །སྒོ་གསུམ་གྱི་དགེ་བ་དེ་རང་ཡིན། །སྐྱབས་མཐར་ཐུག་བླ་མར་གསོལ་བ་ཐོབ། །དད་པ་དང་དག་སྣང་བསྐྱེད་པར་མཛོད། །བློ་གཏད་ཀྱི་ཡིད་ཆེས་སྐྱེས་གྱུར་ན། །མཆོག་ཐུན་མོང་དངོས་གྲུབ་མྱུར་དུ་ཐོབ། །ཆོས་ཀུན་གྱི་རྩ་བ་བྱང་ཆུབ་སེམས། །འགྲོ་དྲུག་གི་ཕ་མ་དྲིན་ཅན་ལ། །ཕན་འདོད་ཀྱི་ལྷག་བསམ་བརྟན་པོ་མཛོད། །གཞི་གདོད་མའི་སངས་རྒྱས་རང་ཆས་སུ། །རང་ལ་ནི་ཡོད་ཀྱང་ངོ་མ་ཤེས། །དེ་མ་རིག་སྒྲིབ་པ་ཡིན་པའི་ཕྱིར། །ཚོགས་བསག་དང་སྒྲིབ་སྦྱོང་ལ་བརྩོན་པར་ཞུ། །ལུས་སྣང་སྟོང་ལྷ་ཡི་བསྐྱེད་རིམ་བསྒོམ། །ངག་བཟླས་བརྗོད་ལ་རྒྱུན་དུ་བརྩོན་པ་དང་། །སེམས་ངོ་བོ་ཉིད་ཀྱི་གནས་ལུགས་ལ། །སྒོ་གསུམ་པོ་མ་བཅོས་རང་བབ་ཞོག། ཡིད་དཔྱོད་དང་བྲལ་བའི་རིག་པའི་གཤིས། །གསལ་སྟོང་དང་ཟུང་འཇུག་ཆེན་པོར་ཤར། །དེ་མ་ཡེངས་མ་བསྒོམ་འཛིན་མེད་ངང་། །རིག་སྟོང་དང་འོད་གསལ་རྗེན་པར་ཤར། །དེ་སངས་རྒྱས་ཀུན་གྱི་དགོངས་པ་ལགས། །དུས་གསུམ་དུ་བསགས་པའི་དགེ་ཚོགས་རྣམས། །མ་འགྲོ་དྲུག་སེམས་ཅན་རྣམས་ལ་བསྔོ། །ཚུལ་དེ་སྐད་རང་གི་སློབ་མ་ལ། །སྙིང་བརྩེ་བས་གདམས་པའི་དགེ་ཚོགས་རྣམས། །དམིགས་མེད་དུ་བསྔོ་བས་འགྲོ་བ་ཀུན། །སྐུ་གསུམ་གྱི་གོ་འཕང་མངོན་གྱུར་ཤོག། །ཅེས་པའང་རང་དང་དངོས་འཕྲད་ཀྱི་ཚབ་ཏུ་ཆོས་ཀྱི་བློ་གྲོས་པས་སྤྲིང་བའོ། །སརྦ་མངྒ་ལཾ། དགེའོ། །

[edit]

!_chab gtsang rje btsun sku zhabs la gdams pa dad pa'i sa bon ces bya ba bzhugs so/__/rje bla ma rnams la phyag 'tshal lo/__/mi rtag 'chi ba dran par byin gyis rlobs/__/dus da lta'i sgyu lus gog po 'di/__/skad cig gis 'gyur shing 'chi la nye/__/rkyen bzang ngan ci 'ong mi shes pas/__/'phral 'phral du dam pa'i chos la 'bungs/__/tshe 'jig rten 'di yi bya bzhag rnams/__/mdang sum gyi rmi lam ji bzhin du/__/rtag mi thub chu yi chu bur bzhin/__/tshul de la bsam nas dgos med kyi/__/da bya bzhag thams cad bskyur la thongs/__/nam 'chi ba'i dus su 'khor bsgyur gyi/__/dpal mnga' thang 'byor pa yod na yang /__/khab gcig tsam khyer dbang med pas na/__/phan nges pa dam pa'i lha chos mdzod/__/dgra 'chi bdag nam 'ong nges med pas/__/chos sang byed gnang byed dbang ma shor/__/las rgyu 'bras blang dor la brtson na/__/sgo gsum gyi dge ba de rang yin/__/skyabs mthar thug bla mar gsol ba thob/__/dad pa dang dag snang bskyed par mdzod/__/blo gtad kyi yid ches skyes gyur na/__/mchog thun mong dngos grub myur du thob/__/chos kun gyi rtsa ba byang chub sems/__/'gro drug gi pha ma drin can la/__/phan 'dod kyi lhag bsam brtan po mdzod/__/gzhi gdod ma'i sangs rgyas rang chas su/__/rang la ni yod kyang ngo ma shes/__/de ma rig sgrib pa yin pa'i phyir/__/tshogs bsag dang sgrib sbyong la brtson par zhu/__/lus snang stong lha yi bskyed rim bsgom/__/ngag bzlas brjod la rgyun du brtson pa dang /__/sems ngo bo nyid kyi gnas lugs la/__/sgo gsum po ma bcos rang bab zhog/__yid dpyod dang bral ba'i rig pa'i gshis/__/gsal stong dang zung 'jug chen por shar/__/de ma yengs ma bsgom 'dzin med ngang /__/rig stong dang 'od gsal rjen par shar/__/de sangs rgyas kun gyi dgongs pa lags/__/dus gsum du bsags pa'i dge tshogs rnams/__/ma 'gro drug sems can rnams la bsngo/__/tshul de skad rang gi slob ma la/__/snying brtse bas gdams pa'i dge tshogs rnams/__/dmigs med du bsngo bas 'gro ba kun/__/sku gsum gyi go 'phang mngon gyur shog/__/ces pa'ang rang dang dngos 'phrad kyi tshab tu chos kyi blo gros pas spring ba'o/__/sarba mang+ga laM/__dge'o/__/