JKCL-KABUM-03-GA-047

🚧 This website is under continued development. We appreciate your patience!

Previous Text"GA" is not a number. Back to Volume Page"GA" is not a number.Next Text "GA" is not a number.

Wylie title
Location	chos kyi blo gros bka' 'bum Volume , Text 47, Pages (Folios to )
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation
Genre	"GA" is not a number.

1 Texts in this Section (sde tshan or chos tshan)

173-176	རྡོ་རྗེ་འཆང་ངག་དབང་ལེགས་པའི་ཞབས་ལ་བསྟོད་ཅིང་གསོལ་བ་འདེབས་པ་བྱིན་རླབས་སྤྲིན་ཕུང་། rdo rje 'chang ngag dbang legs pa'i zhabs la bstod cing gsol ba 'debs pa byin rlabs sprin phung Supplications - gsol 'debs	Text page View PDF
	[[|འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ()]]

"GA" is not a number.

Tibetan Text

Wylie

[edit]

རྡོ་རྗེ་འཆང་ངག་དབང་ལེགས་པའི་ཞབས་ལ་བསྟོད་ཅིང་གསོལ་བ་འདེབས་པ་བྱིན་རླབས་སྤྲིན་ཕུང་ཞེས་བྱ་བ་བཞུགས་སོ། །བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །ཕྱོགས་དུས་རྒྱལ་བ་སྲས་དང་བཅས་པ་ཡི། །མཁྱེན་པའི་ཡེ་ཤེས་ཉིན་མོར་བྱེད་པའི་སྐུ། །བློ་གྲོས་སྣང་སྟེར་རྗེ་བཙུན་བླ་མ་ཡི། །ཞབས་ལ་སྤྱི་བོས་བཏུད་དེ་གུས་ཕྱག་འཚལ། །རྣམ་དག་བསླབ་གསུམ་ནོར་བུའི་ལྷུན་པོ་ལ། །མཁྱེན་བརྩེའི་ཉི་གཞོན་འབུམ་ཕྲག་གིས་འཁྱུད་ཅིང་། །ཕྲིན་ལས་འོད་སྟོང་ས་གསུམ་འབར་བའི་གཟིས། །བདུད་སྡེའི་མུན་པ་བཅོམ་ལ་གུས་ཕྱག་འཚལ། །སྔོན་སྦྱངས་སྟོབས་ཀྱི་བློ་གྲོས་མཚུངས་མེད་ཅིང་། །ཤེས་བྱ་མཐའ་དག་མ་འདྲེས་ཐུགས་སུ་ཆུབ། །རྒྱལ་སྲས་སྤྱོད་པ་རྒྱ་མཚོར་ཉམས་འོག་ཚུད། །རྟག་པར་གཞན་ལ་ཕན་བརྩོན་གུས་ཕྱག་འཚལ། །དམ་པས་རྗེས་བཟུང་གསང་གསུམ་བྱིན་རླབས་ཐོབ། །ཐོས་བསམ་བསྒོམ་པ་རབ་ཀྱི་རྩེ་མོར་སོན། །ཚར་གཅོད་རྗེས་འཛིན་དངོས་གྲུབ་མཐུ་ཐོབ་པ། །རྡོ་རྗེ་འཛིན་པའི་དབང་པོར་གུས་ཕྱག་འཚལ། །ཁྱད་པར་མདོ་རྒྱུད་མན་ངག་རྒྱལ་ཐབས་ལ། །དབང་བསྒྱུར་ཆོས་ཀྱི་རྒྱལ་པོ་པཎྜི་ཏ། །ང༵ག་གི་དབ༵ང་ཕྱུག་འཇམ་དབྱངས་བླ་མ་དང་། །དབྱེར་མེད་ཆོས་ཀྱི་རྗེ་ལ་གུས་ཕྱག་འཚལ། །ཟབ་དོན་སྙན་རྒྱུད་རྒྱ་མཚོར་བསྟི་ཞིང་རོལ། །བིཪྺའི་ཐུགས་བཅུད་གསུང་ངག་གདམས་པའི་གཏེར། །དགེ་ལེག༵ས་ཐར་པའི་ནོར་བུ་སྦྱིན་མཛད་པ༵། །མཁས་གྲུབ་གདེང་ཅན་དབང་པོ་ལ་ཕྱག་འཚལ། །ཕན་བདེ་ཀུན་གྱི་འབྱུང་གནས་རྒྱལ་བའི་བསྟན། །བཤད་དང་སྒྲུབ་པའི་གདུགས་དཀར་སྲིད་རྩེར་སྒྲེང་། །སྙན་གྲགས་རི་བོའི་ཁོངས་སུ་ཡོངས་ཁྱབ་པ། །བསྟན་འཛིན་བྱེ་བའི་དབང་པོར་གུས་ཕྱག་འཚལ། །དངོས་དང་དངོས་མེད་སྤྲོས་པའི་ཆོས་ལས་འདས། །འཁོར་འདས་མཉམ་པ་ཉིད་ཀྱི་ལྟ་བ་དང་། །འོད་གསལ་བདེ་ཆེན་ལྷན་སྐྱེས་ཡེ་ཤེས་ལས། །ནམ་ཡང་གཡོ་མེད་ཁྱེད་ལ་གུས་ཕྱག་འཚལ། །སྡེ་སྣོད་གསུམ་གྱི་ཁང་བཟང་ཡངས་པ་རུ། །འཕགས་ནོར་རིན་ཆེན་བདུན་གྱི་འབྱོར་པའི་རབ། །དྲེགས་ལྡན་གཙུག་གིས་ཞབས་མཐིལ་བཏུད་གྱུར་པ། །སྨྲ་བའི་སེང་གེ་ཁྱེད་ལ་གུས་ཕྱག་འཚལ། །ཚུལ་ཁྲིམས་གོས་བཟང་རྒྱལ་མཚན་མཐོན་པོ་ལ། །མཁས་ཚུལ་གསུམ་གྱི་དར་གྱི་ཤམ་བའི་མཛེས། །རྩ་ཡི་མདུད་གྲོལ་རླུང་སེམས་དབུ་མར་ཚུད། །གྲུབ་པའི་ཏོག་གིས་མཛེས་ལ་གུས་ཕྱག་འཚལ། །གང་ཞིག་འཁོར་བ་ཟད་པར་གྱུར་གྱི་བར། །གང་ཐུགས་ཟག་མེད་བདེ་ཆེན་བདུད་རྩིའི་མྱོས། །གང་གསུངས་མི་ཤིགས་རྡོ་རྗེ་ནཱ་དའི་དབྱངས། །གང་སྐུ་འཆི་མེད་མགོན་པོར་འཚོ་བཞེས་གསོལ། །ཁྱེད་ཀྱི་རྣམ་ཐར་ཡིད་ལ་བྱེད་པ་དང་། །མོས་གུས་རྒྱུན་མི་ཆད་པའི་གདུང་ཤུགས་ཀྱི། །གསོལ་བ་སྙིང་ནས་འདེབས་སོ་བརྩེ་བས་དགོངས། །དཀྱིལ་འཁོར་རྣམ་བཞིར་དབང་བཞི་བསྐུར་དུ་གསོལ། །ལམ་དུས་དབང་བཞི་ཐུན་བཞིར་བརྩོན་པའི་མཐུས། །སྒྲིབ་པ་བཞི་དག་འགྲོས་བཞི་ཐིམ་པ་དང་། །སྐུ་བཞི་ཡེ་ཤེས་ལྔ་ལྡན་མངོན་དུ་གྱུར། །མཁའ་མཉམ་འགྲོ་བའི་དོན་ཀུན་བྱེད་པར་ཤོག །དེ་མ་ཐོབ་ཀྱི་ཚེ་རབས་ཐམས་ཅད་དུ། །དལ་འབྱོར་རྟེན་ཐོབ་ངེས་འབྱུང་རྒྱུད་ལ་སྐྱེས། །བཤེས་གཉེན་ལེགས་བསྟེན་དམ་པའི་ཆོས་དང་འཕྲད། །ཚུལ་ཁྲིམས་གཙང་མའི་གོས་ཀྱིས་བཀླུབ་པར་ཤོག །རྣམ་དག་བྱང་ཆུབ་སེམས་དང་མི་འབྲལ་ཞིང་། །ཡང་དག་ལྟ་བ་རྒྱུད་ལ་སྐྱེ་བ་དང་། །དབང་གི་རྒྱུད་སྨིན་དམ་ཚིག་རྣམ་པར་དག །དཔལ་ལྡན་བླ་མའི་ཐུགས་དང་དབྱེར་མེད་ཤོག །སྐྱེ་བ་ཀུན་ཏུ་བླ་མས་རྗེས་སུ་འཛིན། །དམ་ཆོས་བསྒྲུབ་པའི་འགལ་རྐྱེན་ཀུན་ཞི་ཞིང་། །མཐུན་རྐྱེན་ལེགས་ཚོགས་དབྱར་གྱི་ཆུ་ལྟར་རྒྱས། །དོན་གཉིས་ལྷུན་གྱིས་གྲུབ་པའི་བཀྲ་ཤིས་ཤོག །ཅེས་པའང་བླ་མ་རྡོ་རྗེ་འཆང་ལ་དད་ཅིང་འདུན་པའི་བློ་ཅན་ཡེ་ཤེས་ཉི་མ་དང་། ངག་དབང་རིན་ཆེན་གཉིས་ཀྱིས་ལྷ་རྫས་བཅས་བསྐུལ་ངོར་རྗེ་བླ་མ་མཉྫུ་གྷོ་ཥའི་ཕྲིན་ལས་ཀྱི་མཇུག་སྐྱོང་བསྟོད་ཡུལ་དམ་པའི་གསུང་གི་བདུད་རྩིས་འཚོ་བ་འཇམ་དབྱངས་ཆོས་ཀྱི་བློ་གྲོས་པས་གསོལ་བ་བཏབ་པ་འདིས་ཀྱང་རྗེ་བཙུན་བླ་མ་ཆོས་ཀྱི་རྒྱལ་པོས་ཡེ་ཤེས་གཟིགས་པའི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག །སརྦ་དཱ་ཀ་ལྱཱ་ཎཾ་བྷ་ཝ་ཏུ།། །།

[edit]

rdo rje 'chang ngag dbang legs pa'i zhabs la bstod cing gsol ba 'debs pa byin rlabs sprin phung zhes bya ba bzhugs so/____/bla ma dang mgon po 'jam pa'i dbyangs la phyag 'tshal lo/____/phyogs dus rgyal ba sras dang bcas pa yi/____/mkhyen pa'i ye shes nyin mor byed pa'i sku/____/blo gros snang ster rje btsun bla ma yi/____/zhabs la spyi bos btud de gus phyag 'tshal/____/rnam dag bslab gsum nor bu'i lhun po la/____/mkhyen brtse'i nyi gzhon 'bum phrag gis 'khyud cing /____/phrin las 'od stong sa gsum 'bar ba'i gzis/____/bdud sde'i mun pa bcom la gus phyag 'tshal/____/sngon sbyangs stobs kyi blo gros mtshungs med cing /____/shes bya mtha' dag ma 'dres thugs su chub/____/rgyal sras spyod pa rgya mtshor nyams 'og tshud/____/rtag par gzhan la phan brtson gus phyag 'tshal/____/dam pas rjes bzung gsang gsum byin rlabs thob/____/thos bsam bsgom pa rab kyi rtse mor son/____/tshar gcod rjes 'dzin dngos grub mthu thob pa/____/rdo rje 'dzin pa'i dbang por gus phyag 'tshal/____/khyad par mdo rgyud man ngag rgyal thabs la/____/dbang bsgyur chos kyi rgyal po paN+Di ta/____/nga~Xg gi dba~Xng phyug 'jam dbyangs bla ma dang /____/dbyer med chos kyi rje la gus phyag 'tshal/____/zab don snyan rgyud rgya mtshor bsti zhing rol/____/biR+Wa'i thugs bcud gsung ngag gdams pa'i gter/____/dge lega~Xs thar pa'i nor bu sbyin mdzad pa~X/____/mkhas grub gdeng can dbang po la phyag 'tshal/____/phan bde kun gyi 'byung gnas rgyal ba'i bstan/____/bshad dang sgrub pa'i gdugs dkar srid rtser sgreng /____/snyan grags ri bo'i khongs su yongs khyab pa/____/bstan 'dzin bye ba'i dbang por gus phyag 'tshal/____/dngos dang dngos med spros pa'i chos las 'das/____/'khor 'das mnyam pa nyid kyi lta ba dang /____/'od gsal bde chen lhan skyes ye shes las/____/nam yang g.yo med khyed la gus phyag 'tshal/____/sde snod gsum gyi khang bzang yangs pa ru/____/'phags nor rin chen bdun gyi 'byor pa'i rab/____/dregs ldan gtsug gis zhabs mthil btud gyur pa/____/smra ba'i seng ge khyed la gus phyag 'tshal/____/tshul khrims gos bzang rgyal mtshan mthon po la/____/mkhas tshul gsum gyi dar gyi sham ba'i mdzes/____/rtsa yi mdud grol rlung sems dbu mar tshud/____/grub pa'i tog gis mdzes la gus phyag 'tshal/____/gang zhig 'khor ba zad par gyur gyi bar/____/gang thugs zag med bde chen bdud rtsi'i myos/____/gang gsungs mi shigs rdo rje nA da'i dbyangs/____/gang sku 'chi med mgon por 'tsho bzhes gsol/____/khyed kyi rnam thar yid la byed pa dang /____/mos gus rgyun mi chad pa'i gdung shugs kyi/____/gsol ba snying nas 'debs so brtse bas dgongs/____/dkyil 'khor rnam bzhir dbang bzhi bskur du gsol/____/lam dus dbang bzhi thun bzhir brtson pa'i mthus/____/sgrib pa bzhi dag 'gros bzhi thim pa dang /____/sku bzhi ye shes lnga ldan mngon du gyur/____/mkha' mnyam 'gro ba'i don kun byed par shog__/de ma thob kyi tshe rabs thams cad du/____/dal 'byor rten thob nges 'byung rgyud la skyes/____/bshes gnyen legs bsten dam pa'i chos dang 'phrad/____/tshul khrims gtsang ma'i gos kyis bklub par shog__/rnam dag byang chub sems dang mi 'bral zhing /____/yang dag lta ba rgyud la skye ba dang /____/dbang gi rgyud smin dam tshig rnam par dag__/dpal ldan bla ma'i thugs dang dbyer med shog__/skye ba kun tu bla mas rjes su 'dzin/____/dam chos bsgrub pa'i 'gal rkyen kun zhi zhing /____/mthun rkyen legs tshogs dbyar gyi chu ltar rgyas/____/don gnyis lhun gyis grub pa'i bkra shis shog__/ces pa'ang bla ma rdo rje 'chang la dad cing 'dun pa'i blo can ye shes nyi ma dang /__ngag dbang rin chen gnyis kyis lha rdzas bcas bskul ngor rje bla ma many+dzu g+ho Sha'i phrin las kyi mjug skyong bstod yul dam pa'i gsung gi bdud rtsis 'tsho ba 'jam dbyangs chos kyi blo gros pas gsol ba btab pa 'dis kyang rje btsun bla ma chos kyi rgyal pos ye shes gzigs pa'i byin rlabs myur du 'jug pa'i rgyur gyur cig__/sarba dA ka l+yA NaM b+ha wa tu//____//_