ཀུན་མཁྱེན་ཐུབ་པའི་བསྟན་པ་རྒྱས་པའི་སྨོན་ལམ་དྲང་སྲོང་ལྷ་ཡི་བདེན་ཚིག།

🚧 This website is under continued development. We appreciate your patience!

Previous Text Back to Volume PageNext Text

Wylie title	kun mkhyen thub pa'i bstan pa rgyas pa'i smon lam drang srong lha yi bden tshig
Location	chos kyi blo gros bka' 'bum Volume 12, Text 48, Pages 249-251 (Folios 1a1 to 2a5)
Author	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་
Less details More details
Citation	'jam dbyangs mkhyen brtse chos kyi blo gros. kun mkhyen thub pa'i bstan pa rgyas pa'i smon lam drang srong lha yi bden tshig. In Rdzong sar mkhyen brtse 'jam dbyangs chos kyi blo gros kyi gsung 'bum, Vol. 12: 249-251. Bir, H.P.: Khyentse Labrang, 2012.
Genre	Prayers - smon lam
Lotsawa House Link	https://www.lotsawahouse.org/tibetan-masters/jamyang-khyentse-chokyi-lodro/powerful-words-truth
Colophon	།ཅེས་པའང་ཆོས་ཀྱི་བློ་གྲོས་པས་འཕགས་ཡུལ་རྡོ་རྗེ་གདན་གྱི་བྱང་ཆུབ་ཤིང་དྲུང་དུ་གང་དྲན་ཤར་མར་བྲིས་པ་འདི་བཞིན་འགྲུབ་པར་བྱིན་གྱིས་བརླབ་ཏུ་གསོལ། སརྦ་དཱ་མངྒ་ལཾ།།
	/ces pa'ang chos kyi blo gros pas 'phags yul rdo rje gdan gyi byang chub shing drung du gang dran shar mar bris pa 'di bzhin 'grub par byin gyis brlab tu gsol/__sarba dA mang+ga laM//

1 Texts in this Section (sde tshan or chos tshan)

249-251	ཀུན་མཁྱེན་ཐུབ་པའི་བསྟན་པ་རྒྱས་པའི་སྨོན་ལམ་དྲང་སྲོང་ལྷ་ཡི་བདེན་ཚིག། kun mkhyen thub pa'i bstan pa rgyas pa'i smon lam drang srong lha yi bden tshig Prayers - smon lam	Text page View PDF
	འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ ('jam dbyangs mkhyen brtse chos kyi blo gros)

Tibetan Text

Wylie

[edit]

ཀུན་མཁྱེན་ཐུབ་པའི་བསྟན་པ་རྒྱས་པའི་སྨོན་ལམ་དྲང་སྲོང་ལྷ་ཡི་བདེན་ཚིག་ཅེས་བྱ་བ་བཞུགས་སོ། །བླ་མ་དང་སངས་རྒྱས་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བསྐལ་བཟང་སངས་རྒྱས་སྟོང་ལས་ཁྱད་པར་དུ། །ངོ་མཚར་ཨུ་དུམ་ཝཱ་ར་ལྟར་འཕགས་ཤིང་། །རྩོད་པའི་དུས་འདིར་ཞིང་ཁམས་ཡོངས་བཟུང་བ། །ཐུབ་མཆོག་དོན་ཀུན་གྲུབ་ལ་ཕྱག་འཚལ་ལོ། །ཕྱོགས་བཅུའི་སངས་རྒྱས་བྱང་སེམས་ཉན་རང་དང་། །འཇམ་དབྱངས་སྤྱན་གཟིགས་ཕྱག་ན་རྡོ་རྗེ་འཛིན། །བྱམས་པ་ལ་སོགས་བྱང་ཆུབ་སེམས་དཔའ་དང་། །གནས་བརྟན་བཅུ་དྲུག་གཏད་རབས་ཆེན་པོ་བདུན། །ཛམ་གླིང་རྒྱན་མཆོག་རྨད་བྱུང་སློབ་དཔོན་ཆེ། །རྣལ་འབྱོར་དབང་ཕྱུག་བརྒྱད་ཅུ་རྩ་བཞི་སོགས། །ཁྱད་པར་བཀའ་དྲིན་མཉམ་མེད་པདྨ་འབྱུང་། །ཞི་འཚོ་ཁྲི་སྲོང་བཻ་རོ་ཨ་ཏི་ཤ། གོང་མ་རྣམ་ལྔ་མར་མི་དྭགས་པོ་རྗེ། །འཇམ་དབྱངས་བླ་མ་ལ་སོགས་རྒྱ་བོད་ཀྱི། །མཁས་དང་གྲུབ་པའི་རིག་འཛིན་ཚོགས་རྣམས་དང་། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་སོགས། །ཐུགས་དམ་གནད་ནས་བསྐུལ་ལོ་ཐུགས་རྗེས་དགོངས། །ཐུབ་བསྟན་འདུལ་བ་མདོ་སྡེ་མངོན་པ་དང་། །གསང་སྔགས་རྒྱུད་སྡེ་ཆེན་པོ་རྣམ་པ་བཞི། །གངས་ལྗོངས་བཤད་བརྒྱུད་ཀ་ཆེན་བཅུ་པོ་དང་། །སྒྲུབ་བརྒྱུད་ཤིང་རྟ་ཆེ་བརྒྱད་ལ་སོགས་པ། །ཐུབ་བསྟན་མདོ་དང་སྔགས་ཀྱི་ཚུལ་མཐའ་དག །ཤིན་ཏུ་ཉམས་པར་གྱུར་པ་འདི་ལ་གཟིགས། །ངེས་འབྱུང་ཚུལ་ཁྲིམས་ངུར་སྨྲིག་རྒྱལ་མཚན་ཐོགས། །གཞན་ཕན་ཟོལ་མེད་བྱང་ཆུབ་སེམས་དཔའ་དང་། །དམ་ཚིག་ལྡན་ཞིང་བསྐྱེད་རྫོགས་རིག་སྔགས་འཆང་། །མཚན་ཉིད་ལྡན་པ་རི་མོའི་མར་མེ་ལྟར། །གྱུར་པ་འདི་ལ་ཡེ་ཤེས་སྤྱན་ལྡན་རྣམས། །ངེས་པར་དགོངས་ལ་ཐུགས་རྗེས་བསྐྱབ་ཏུ་གསོལ། །དུས་ངན་སྙིགས་མ་ལྔ་བདོའི་སེམས་ཅན་རྣམས། །ཉོན་མོངས་སྟོབས་དྲག་འདོད་སྲེད་འཆིང་བས་བཅིངས། །བསྟན་ལ་ཞུགས་རྣམས་ཕྲག་དོག་རླུང་དམར་གྱིས། །བསྟན་པ་ནང་དཀྲུགས་ལྟ་བའི་སྙིགས་མ་རྒྱས། །རྩོད་པ་ཅན་དུ་གྱུར་པས་བསྟན་སེལ་གྱི། །གྲིབ་ཀྱིས་ཆོས་སྐྱོང་དཀར་ཕྱོགས་སྲུང་མ་གཡེལ། །རྒྱལ་ཁམས་ཀུན་ཏུ་ལྷ་མིན་ཀླ་ཀློས་ཁེངས། །འདི་དང་འདི་འདྲར་གྱུར་པས་བསྟན་པ་བསྣུབས། །ཀྱེ་མ་ཀྱི་ཧུད་མགོན་པོ་ཐུགས་རྗེ་ཅན། །ཁྱོད་རྣམས་ཐུགས་དམ་མཐུ་རྩལ་སྟོབས་བསྐྱེད་ལ། །དུས་ངན་སྐྱོ་བས་ཞུམ་པ་ཅི་ལ་མངའ། །སྟོབས་བཅུའི་དབང་ཕྱུག་དབང་བཅུ་མངའ་བས་ན། །བསྟན་པ་ཉམས་པ་འདི་དག་སོར་ཆུད་ཅིང་། །མཁས་བཙུན་གྲུབ་ཐོབ་ཚད་མར་གྱུར་པ་ནི། །མང་པོར་སྤྲུལ་ནས་བསྟན་པ་གསོ་བར་མཛོད། །འཕགས་བོད་གཉིས་སུ་རྫོགས་ལྡན་ཕྱི་མ་ཡི། །དགའ་སྟོན་རིན་ཆེན་སྒྲོན་མེ་སྦར་བ་དང་། །རྒྱལ་བསྟན་རིས་མེད་པད་ཚལ་དར་ལ་བབ། །དེ་ལ་འཁུ་བའི་ཚོགས་ཀྱི་སེམས་བསྒྱུར་ཞིང་། །ཀུན་ཀྱང་བསྟན་ལ་འདུན་དང་དགེ་བཅུར་སྤྱོད། །བསྟན་འཛིན་དགེ་འདུན་སྡེ་ཡིས་འཛམ་གླིང་ཁྱབ། །བཤད་དང་སྒྲུབ་པ་དར་ཞིང་རྒྱས་པར་ཤོག །གཙུག་ལག་ཁང་རྣམས་མཆོད་པའི་སྤྲིན་ཚོགས་རྒྱས། །དམ་པའི་ཆོས་ཀྱི་རྔ་ཆེན་རབ་ཏུ་སྒྲོགས། །མུ་སྟེགས་གླང་པོའི་ཀླད་པ་འགེམས་བྱེད་ཅིང་། །ཐུབ་བསྟན་ཕྱོགས་ལས་རྣམ་པར་རྒྱལ་གྱུར་ཅིག །བསྟན་འཛིན་སྐྱེས་རྣམས་ཞབས་པད་བརྟན་པ་དང་། །བསྟན་པའི་སྦྱིན་བདག་ཚེ་དང་བསོད་ནམས་འཕེལ། །བསྟན་ལ་གནོད་རྣམས་མིང་གི་ལྷག་མར་གྱུར། །བསྟན་པའི་རྒྱལ་མཚན་ཕྱོགས་བཅུར་སྒྲེངས་གྱུར་ཅིག །ཅེས་པའང་ཆོས་ཀྱི་བློ་གྲོས་པས་འཕགས་ཡུལ་རྡོ་རྗེ་གདན་གྱི་བྱང་ཆུབ་ཤིང་དྲུང་དུ་གང་དྲན་ཤར་མར་བྲིས་པ་འདི་བཞིན་འགྲུབ་པར་བྱིན་གྱིས་བརླབ་ཏུ་གསོལ། སརྦ་དཱ་མངྒ་ལཾ།། །།

[edit]

kun mkhyen thub pa'i bstan pa rgyas pa'i smon lam drang srong lha yi bden tshig ces bya ba bzhugs so/__/bla ma dang sangs rgyas byang chub sems dpa' thams cad la phyag 'tshal lo/__/bskal bzang sangs rgyas stong las khyad par du/__/ngo mtshar u dum wA ra ltar 'phags shing /__/rtsod pa'i dus 'dir zhing khams yongs bzung ba/__/thub mchog don kun grub la phyag 'tshal lo/__/phyogs bcu'i sangs rgyas byang sems nyan rang dang /__/'jam dbyangs spyan gzigs phyag na rdo rje 'dzin/__/byams pa la sogs byang chub sems dpa' dang /__/gnas brtan bcu drug gtad rabs chen po bdun/__/dzam gling rgyan mchog rmad byung slob dpon che/__/rnal 'byor dbang phyug brgyad cu rtsa bzhi sogs/__/khyad par bka' drin mnyam med pad+ma 'byung /__/zhi 'tsho khri srong bai ro a ti sha/__gong ma rnam lnga mar mi dwags po rje/__/'jam dbyangs bla ma la sogs rgya bod kyi/__/mkhas dang grub pa'i rig 'dzin tshogs rnams dang /__/yi dam zhi khro mkha' 'gro chos skyong sogs/__/thugs dam gnad nas bskul lo thugs rjes dgongs/__/thub bstan 'dul ba mdo sde mngon pa dang /__/gsang sngags rgyud sde chen po rnam pa bzhi/__/gangs ljongs bshad brgyud ka chen bcu po dang /__/sgrub brgyud shing rta che brgyad la sogs pa/__/thub bstan mdo dang sngags kyi tshul mtha' dag__/shin tu nyams par gyur pa 'di la gzigs/__/nges 'byung tshul khrims ngur smrig rgyal mtshan thogs/__/gzhan phan zol med byang chub sems dpa' dang /__/dam tshig ldan zhing bskyed rdzogs rig sngags 'chang /__/mtshan nyid ldan pa ri mo'i mar me ltar/__/gyur pa 'di la ye shes spyan ldan rnams/__/nges par dgongs la thugs rjes bskyab tu gsol/__/dus ngan snyigs ma lnga bdo'i sems can rnams/__/nyon mongs stobs drag 'dod sred 'ching bas bcings/__/bstan la zhugs rnams phrag dog rlung dmar gyis/__/bstan pa nang dkrugs lta ba'i snyigs ma rgyas/__/rtsod pa can du gyur pas bstan sel gyi/__/grib kyis chos skyong dkar phyogs srung ma g.yel/__/rgyal khams kun tu lha min kla klos khengs/__/'di dang 'di 'drar gyur pas bstan pa bsnubs/__/kye ma kyi hud mgon po thugs rje can/__/khyod rnams thugs dam mthu rtsal stobs bskyed la/__/dus ngan skyo bas zhum pa ci la mnga'/__/stobs bcu'i dbang phyug dbang bcu mnga' bas na/__/bstan pa nyams pa 'di dag sor chud cing /__/mkhas btsun grub thob tshad mar gyur pa ni/__/mang por sprul nas bstan pa gso bar mdzod/__/'phags bod gnyis su rdzogs ldan phyi ma yi/__/dga' ston rin chen sgron me sbar ba dang /__/rgyal bstan ris med pad tshal dar la bab/__/de la 'khu ba'i tshogs kyi sems bsgyur zhing /__/kun kyang bstan la 'dun dang dge bcur spyod/__/bstan 'dzin dge 'dun sde yis 'dzam gling khyab/__/bshad dang sgrub pa dar zhing rgyas par shog__/gtsug lag khang rnams mchod pa'i sprin tshogs rgyas/__/dam pa'i chos kyi rnga chen rab tu sgrogs/__/mu stegs glang po'i klad pa 'gems byed cing /__/thub bstan phyogs las rnam par rgyal gyur cig__/bstan 'dzin skyes rnams zhabs pad brtan pa dang /__/bstan pa'i sbyin bdag tshe dang bsod nams 'phel/__/bstan la gnod rnams ming gi lhag mar gyur/__/bstan pa'i rgyal mtshan phyogs bcur sgrengs gyur cig__/ces pa'ang chos kyi blo gros pas 'phags yul rdo rje gdan gyi byang chub shing drung du gang dran shar mar bris pa 'di bzhin 'grub par byin gyis brlab tu gsol/__sarba dA mang+ga laM//___//