JKW-KABUM-17-TSA-002-047

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 17, sde tshan 2, Text 47, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 17: . Khams sde dge rdzong sar dgon: Rdzong sar blo gros phun tshogs, 2020.
Genre	Medicine Texts - gso ba rig pa

1 Texts in this Section (sde tshan or chos tshan)

47 388-398	སྨན་སྦྱོར་གྱི་ཞལ་ཤེས་ཟིན་བྲིས་སྣ་ཚོགས། sman sbyor gyi zhal shes zin bris sna tshogs Medicine Texts - gso ba rig pa	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

སྨན་སྦྱོར་གྱི་ཞལ་ཤེས་ཟིན་བྲིས་སྣ་ཚོགས། ཨོཾ་ཨ་ཐཱ། ཞལ་ཤེས་ཟིན་བྲིས་ལ། ནོར་བུ་བདུན་ཐང་སྟེང་ཀོ་བྱི་ལ་བསྣན་པའི་རཏྣ་བརྒྱད་པས་འབམ་ནད་སྟོད་དུ་བབས་པ་ལ་ཕན། ཀོ་བྱི་བདུན་སྟེང་སྐྱུ་རུ་ར་བསྣན་པ་ཁྲག་རླུང་སྟོད་འཚང་སེལ་བའི་རཏྣ་བརྒྱད་པ་ཞེས་ཟེར། ཀིག་བུ་ལ་ཨ་མྲྀ་འདོག་མཚམས་ཡུ་བ་ཞེས་རྒྱ་ཡུང་བ་ཚྭ་ཅན་ལ་བཞེད། ཆུ་རྟ་མོ་ནི་སྟག་ཤ །འདབས་ལྡན་ཁྲ་བོ་ནི་སྐྱ་ཀ །སྒྲ་ལྡན་མེ་རྫས་ནི་མེ་མདའི་རྫས་སམ་བཀྲུས་ཁུ་དང་མཁན་པ་ལྷན་གཅིག་སྣ་བུག་ཏུ་བརྫངས། ལྷོག་པའི་གསང་སྨན་ནི་ཨ་བྲའི་ཉུང་ཝའུ་ཆུང་ཡང་ཟེར། མ་རི་ལྡན་ནག་པོའི་ག་བུར་ལ་ལས་གསལ་ནག་སྟོང་ཟིལ་བཞེད་ཀྱང་། ཕག་རྒོད་ཀྱི་བྲུན་ཡིན་འདྲ། ལུག་སྙིང་ནི་བྱ་རོག་ནོར་བུ། ལྡུམ་ནག་དོམ་མཁྲིས། ། ༈ བདུད་རྩི་ལྔ་ལུམ་སྟེང་། ཚ་རྙོགས་ལ་སྲོ་ལོ་དམར་པོ། སྦྱར་དུག་ལ་འོམ་བུ། རླུང་ལ་རུས་བཅུད། དྲེགས་གྲུམ་ལ་མཁན་པ་དང་སྤང་སྤོས། ཚད་རྙིང་ལ་འོམ་བུ་དང་ཀྱི་ཀྱེ། རྙིང་ཚད་རུས་ལ་ཞེན་པར་ཙན་དམར། མཁལ་གྲུམ་དང་རྩ་གྲུམ་ལ་ཤུག་པ་དང་སྐྱེར་ཤུན། རུས་འབྲས་ལ་སྤྲུ་རྩ་དང་ཤུག་པ་སྤ་མའི་འབྲས་བུ། གཞན་ཡང་རང་རང་གི་གཉེན་པོ་ཇི་ལྟར་རིགས་པའི་ཁུ་བས་བསྲིངས། ། ༈ ཁཎྜའི་རིགས་གང་ཡང་། ཐོག་མར་ས་དང་རྡུལ་སོག་ཆུ་ཡིས་དག་པར་བཤལ། སྔོ་སྨན་ཡིན་ན་རྨ་ཅུང་ཟད་ཕབས་ནས་བཞག །གང་ལྟར་ཡང་ཆུ་གྲང་དུ་ཞག་གསུམ་སོགས་སྦངས། དེ་ནས་རན་བར་བསྐོལ་ལ་ཁུ་བ་ལེགས་པར་ཐོན་ནས་སྙིགས་མ་རྣམས་དོར། དྭངས་དེ་གར་སླ་ཞོ་ཙམ་སོང་བའི་ཚེ་མེ་དལ་བུས་གཉུག་བསྲིངས་ལ་འབུད་པའམ། ཡང་ན་རླངས་ཚོས་བྱས་ནས་སྣ་མ་ཚིག་བར་གདུས་པ། གྲོད་པུ་ལ་སོགས་པའི་སྣོད་གཙང་མར་ཚགས་བྱའོ། ། ༈ དམར་པོ་རྟ་ཟི་ལ་ཐར་ནུ་བསྐྱེད་པ་སྦྱངས་སྨན་ཟབ། ། ༈ རྟེན་འབྲེལ་མེ་བཙའ་ནི་བྱིས་པ་སོགས་མེ་བཙའ་བསྲེགས་མི་རུང་བ་ལ་ཟབ། དབྱུགས་བཅོས་ཁྲག་རླུང་གིས་རོ་སྟོད་གཟེར་བ་སོགས་གཟེར་རིགས་སྤྱི་ལ་ཟབ། དེ་སྟེང་རྔབ་རུའམ་བུམ་པ་བྱ། མེ་ལོང་ལས་སྦྱོར་སྐྲན་ལ་བྱ། ། ༈ ཆོས་ཉིད་རིལ་བུར་གླ་རྩི་བསྐྱེད་པ་རྐེད་སྨན་ཟབ། ཕུར་ནག་ཐང་གིས་ཕུལ་བས་རྒྱུ་གཟེར་དམར་བཤལ་ལ་ཤིན་ཏུ་ཕན། བཙོད་མདུད་ཞེས་ཚིགས་པ་ཅན་ཅུང་ཟད་བརྔོོས་པ་བཏང་བ་ཕྱག་ལེན། ། ༈ སེ་འབྲུ་ཉི་དཀྱིལ་སྟེང་ཁྱུང་ལྔ་བསྣན་པས་གཞང་ལུག་ལ་ཕན། སྲམ་ཤ་དང་། དབང་ལག་བསྣན་ན་གྲང་ནད་ཀྱིས་ཁམས་ཟག་པ་དང་། མཁལ་རྐེད་ནད་ལ་ཕན། ། ༈ གསེར་མདོག་ལྔ་སྟེང་སེ་མེ་བསྣན་པ་གསེར་མདོག་དུང་ལོ་ཅན་ཞེས་བད་མཁྲིས་ཕོ་བར་བབས་པ་ལ་ཕན་ཆེ། གུར་ཏིག་བསྣན་པས་མཁྲིས་པས་ཕོ་བ་གཟེར་བ་འཇོམས། ། ༈ ཀོ་བྱིལ་ནི། ཁྲག་རླུང་སྟོད་འཚང་སོགས་ལ་དེ་ག་རང་གཏོང་། སྨུག་པོ་དང་དུག་སོགས་ལ་སྤུ་བཞར། ཀོ་བྱི་བདུན་ལ་མཛོ་འོ་ཕུལ་དོ་སྟེ། དེས་འདྲེས་ངེས་པར་བྱས་ནས་ཁུ་བ་རང་ཐིམ་དུ་འགྲོ་བར་བཙོས་ལ་སྐམ་ནས་ལོངས་སྤྱོད། ། ༈ ཅོང་ཞི་ཁྲོལ་ཙམ་བརྡུངས་པ་གདུས་ནས་ཆུ་དྲོན་གྱིས་བཤལ། དེ་རྗེས་ཆུ་གྲང་གིས་ལེགས་པར་བཤལ། ། ༈ རྡོ་དྲེགས་གླ་རྩིའི་ཆུས་ནེམ་ཙམ་བྱས་ནས་སླ་ངར་ཅུང་ཟད་བརྔོ། ། ༈ མིག་སྨན་ལ་རྒྱ་ཚྭ་བསྲེགས་པའི་དུད་པ་དགོས། ། ༈ ནི་ལ་ཐོ་ཋ་འདི་ནད་ལ་བཏང་ཡང་ལྕགས་སྣོད་དུ་ཧར་བསྲེགས་བྱ། མིག་སྨན་ལ་རྒོད་པོ་དེ་ག་བཏང་། ༈ །ཅོང་ཞི་འཕྲུལ་ཐལ་གྱི་ལག་ལེན་ཤིན་ཏུ་ཞིབ་པ་ནི། ཨ་རུ་གསེར་མདོག་ལེགས་པ། ༤ ༠༠ ཚྭ་ལ་ཆུ་བཅད། ༤ ༠༠ རྒྱམ་ཚྭ་གྲུ་བཞི་ཤེལ་འདྲ་བ། ༤ ༠༠ བོང་དཀར་རྒྱ་གར་མ་བྱུང་ན་ལེགས། མ་འབྱོར་ན་ཉིས་འགྱུར་བཏང་དགོས་པས། ༨ ༠༠ ཅོང་ཞི་རིགས་གང་བྱུང་དུག་ཐོན་ངེས། ༤ ༠༠ མུ་ཟི་གསེར་འདྲ་དུག་འདོན་མ་བྱས་པ། ༢ ༠༠ ཙམ་བཅས་སྟ་གོན་བྱ། དངོས་གཞི། བསྲེགས་ཐབ་གྲུ་བཞི་པ། ནང་ཚ་འདམས་དང་ཞི་ག་བྱུགས། རྐེད་པ་ན་བསྲེགས་སྣོད་བཞག་ན་ལྕགས་ཀྱི་ཐབ་རུ་བཏང་། ཁ་དོག་ཅིང་མཐིལ་ཡངས་པ་ཞིག་བྱ། དེ་ནང་མེ་ཐུབ་ངེས་ཀྱི་རྫ་མ་ཁ་གཅོད་ཉིས་རིམ་ཅན་གྱི་སུམ་ཆ་གཉིས་སྨན་གྱིས་གང་བར་བླུགས། སྟེང་ས་སྦྱོར་གྱིས་བསྡམས། སྐམ་ནས་ཉི་མ་ཕྱེད་གཅིག་ཏུ་བསྲེགས། ཀོང་བུ་ཚ་མོ་ལ་བསྣམས་པས་མུ་ཟིའི་དྲི་མ་སངས་ན་ཚོས་ཚད་ཡིན། དཀར་པོ་ཁ་བ་ལྟར་གྱུར་ན་ལེགས་པར་བཞེད། ། ༈ གར་ནག་བརྒྱད་པ་ལ། དེ་སྟེང་། བྱི་ཏང་ཀ །གསེར་མེ། སེ་མེ་བསྣན་བ་གར་ནག་བཅུ་གཅིག་པ་ཡིན། དེ་དང་སྤང་རྩི་བཅུ་གཉིས་བསྲེས་པས་མཁྲིས་སྲིན་ཚད་པ་དང་བསྡོངས་བ་ལ་ཤིན་ཏུ་ཟབ། ། ༈ སྤང་རྩི་བཅུ་གཉིས་སྟེང་སྦྲུལ་ཤ །ཨ་ཝ་བསྣན་པས་ལིང་ཏོག་ལ་ཟབ། ། ༈ སྙིང་རླུང་སོགས་ལ་འགྲོ་བའི་བོང་ང་ཐམས་ཅད་འབྲི་ཚིལ་མ་ཁོ་ན་དགོས། ། ༈ སྤང་རྩི་བཅུ་གཉིས་སྦྱོར་ཚད་ལུགས་གཅིག་ནི། སྤང་རྩི་བོང་དཀར་སྟག་ཤ་གསུམ་ཆ་མཉམ། དེ་ཀུན་དང་མཉམ་པའི་བདུད་རྩི་ལོ་མ། ཅུ་གང་གློ་ལ་བསྐྱེད། པྲི་ཡང་ཀུ་ཅུང་ཟད་བསྣན་པ་ཕོ་མཆིན་སོགས་ལ་མི་གནོད་པའི་ཁ་འཛིན་ཡིན་གསུངས། ། ༈ གླང་ཆེན་བཅོ་བརྒྱད་སྟེང་གླ་རྩི་བསྣན་པས་མཆིན་པ་ཁྲག་གིས་གཟེར་པ་ལ་ཕན་པ་མྱོང་བས་གྲུབ། མ་ནུ་བཞི་སྟེང་། ཨ་རུ། བ་རུ། གཟེར་འཇོམས་བཅས་ཆ་མཉམ། ཀུན་དང་མཉམ་པའི་སྐྱུ་རུ་སྦྱར་བའི་ཐང་འདི་འབམ་ལ་མཆོག་ཏུ་བཟང་། ། ༈ སྒ་ལོས་མཛད་པའི་སྨན་མར་ལུགས་གཅིག་ནི། ཅོང་ཞི་ཆ་གཅིག འབྲི་མོག་དེ་ཡི་སུམ་གཉིས་སྦྱར་བ་སྦྱོར་སྡེའི་རྩ་བ་ཡིན། དེ་སྟེང་སྟོད་འཚངས་ལ་ཀོ་བྱི་དང་། གཟེར་འཇོམས། ཁྲག་ལ་བར་སྐྱུར་རུ་རྟ། བད་ཀན་ལ་མ་ནུ་འུ་སུ་རྣམས་ཆ་བསྐྱེད། གློ་ལ་ཤིང་མངར་དང་ཨ་ཀྲོང་བསྣན་པ་མཆོག་ཏུ་ཟབ། རྒྱུན་སྨན་ལ་དེ་ཐམས་ཅད་སྦྱར་བས་བཤད་མ་ཐག་པའི་ནད་ཀུན་ལ་འགྲོ། ། ༈ འཁྲུགས་ཁྲག་ཀུན་སེལ་ལུགས་གཅིག་ལ། ཅོང་ཞི་ཆ་གསུམ། འབྲི་མོག་ཆ་བཞི་སྦྱར་བའི་སྟེང་། འཁྲུགས་ལ་ མ་ནུ་དང་། ཁྲག་ལ་བ་ཤ་ཀ། །གློ་ལ་ཅུ་གང་ཀཎྜ་ཀ་རཱི་ཤིང་མངར་རྣམས་བསྣན། མཆོག་ཏུ་ཟབ། ། ༈ སྨུག་པོ་གཡུལ་རྒྱལ་ཞལ་ཤེས་ལ། ཅོང་ཞི། སེ་འབྲུ། སུག་སྨེལ། པི་ལིང་བཞི་གཙོ་བོ་ལ། གྲང་ཤས་ཆེ་ན་སེ་འབྲུ་པི་ལིང་ཆ་བསྐྱེད། །ཁྲག་ཤས་ཆེ་དུས་འདི་གཉིས་འཕྲི་བའམ་ཞད་ཙམ་སྦྱར། མ་ནུ། འུ་སུ། ཨུཏྤལ། པྲི་ཡངྐུ་བཞི་བློན་པོའི་ཚུལ་དུ་ཐུན་གཉིས་རེ་བསྡེབས། བསེ་ཡབ་སྟར་བུ་སྐྱུ་རུ་བ་ཤ་ཀ་བཞི་པོ་དང་པོ་ཆུ་སྐྱུར་སྐྱུགས་དུས་གཙོ་བོར་སྦྱར། ཨ་རུ། གསེར་མེ། དུག་ཉུང་བཞི་པོ་བར་དུ་མཁྲིས་པ་རྒྱས་པའི་དུས་བསྐྱེད། གི་ཝཾ། ཏིགྟ། རུ་རྟ། ཙནྡན་དམར། བྲག་ཞུན་རྣམས་མཆིན་ཁྲག་རྒྱས་ཤིང་དུག་ཐབས་སུ་གཟེར་བ་དང་། ཁྲག་རུལ་དུད་ཁུ་སྐྱུགས་དུས་གཙོ་བོར་སྦྱར་རོ། ། ༈ བློན་པོ་གསུམ་སྦྱོར་སྟེང་གླ་གུལ་བསྣན་པ་བྱིས་གདོན་ལ་ཟབ། སེ་འབྲུ་སུག་སྨེལ་བསྣན་པས་ཕོ་ནད་ལ་ཕན། ། ༈ ཏིགྟ་བརྒྱད་སྟེང་ཕག་ཐལ་དང་འཛིན་པ་བསྣན་པ་དང་། མཁྲིས་ཕྱེ་བདུན་སྟེང་བྲག་ཞུན་དང་འཛིན་པ་བསྣན་པས་མཁྲིས་ཚད་ལ་ཕན། ། ༈ དྲིས་ལན་བཀའ་རྒྱ་མ་ལས། ཙནྡན་བརྒྱད་པ་དང་ཨར་བརྒྱད་བསྲེས་པ་རྨ་བྱ་འཇིང་བསྣོལ་ཏེ་གློ་སྙིང་གཟེར་བ་ལ་ཕན། མཆིན་མཁྲིས་གཉིས་ལྡན་ལ་གི་དགུ་དང་ཏིག་བརྒྱད་སྦྱར་བ་བ་གླང་གསེར་བྱ་འཇིང་བསྣོལ་ཏེ་གློ་སྙིང་གཟེར་བ་ལ་ཕན། ཕོ་མཚེར་ལྡན་པ་ལ། བྲག་ཞུན་དགུ་པ་དང་། ཨ་རུ་བདུན་པ་བསྲེས་པ་སེངྒེ་འཇིང་བསྣོལ་ཟེར། ཆུ་སེར་དང་མོ་ནད་མཁལ་མར་བབས་པ་ལ་སྤོས་དཀར་བཅུ་པ་དང་། ཨ་རུ་བཅུ་པ་སྡེབས་པ་རྒྱ་སྟག་འཇིང་བསྣོལ་ཟེར། གུར་གུམ་བཅུ་གསུམ་དང་ཨཾ་བྷི་དྲུག་ཐང་བསྡེབས་པས་ཚ་ཆུ་ལ་ཕན། གུར་གུམ་མཆོག་བདུན་དང་ཅུ་གང་བཅུ་གསུམ་བསྡེབས་པས་མཆིན་གློ་ལུ་བ་ལ་ཕན་ཞེས་སོགས་སྣང་། ། ༈ སྤྱིར་ཏིགྟ་འགྲོ་བ་ཐམས་ཅད་ལ་སུམ་ཏིག་དང་། བྱེ་བྲག་མཁྲིས་ཚད་ལ་ལྕགས་ཏིག་བཏང་བ་ནུས་པ་རྣོ། ། ༈ རྒྱ་ནག་རིལ་བུར། ཡུངས་ཀར་དང་བོང་ང་མཉམ་སྦྱོར་བྱེད་པ་དེ་གཉན་དང་ཆུ་སེར་བསྡོངས་པ་ལ་ཟབ། ཆོས་ཉིད་རིལ་བུ་དམར་བཤལ་ལ་ཕན་ཆེ། ཆུ་སེར་སྨན་གསུམ། བོང་ཁྲག །སེང་ལྡེང་ཁཎྜ་བཅས་བསྣན་པས། དྲེག་གྲུམ་དང་མཛེ་ལ་མཆོག་ཏུ་བཤད། མན་བསིལ་དང་ཅོང་ཞི་དགུ་སྦྱོར་ལ་ཡུང་བ་མདོག་འགྱུར་བ་བསྣན་པས་ཤ་དུག་ལ་ཟབ། ཚྭ་ལའི་འཕྲུལ་བཤལ་ལ་ཐར་ནུ་འདུལ་དྲུག་བཏང་དགོས། ། ༈ རྟ་ཡི་རྒྱབ་སྲིན་སེལ་བྱེད་སྟེང་། ལྡོང་རོས། ནཱི་ལ་ཐོ་ཋ། ཤིང་ཀུན། རམ། ཡུང་བ། ཐར་ནུའི་མྱུ་གུ་གསར་པ། ཨ་བྷི་ཥ། ཧ་ཤིག །འབྲུག་རུས། ལི་ཁྲི། སྟག་ཤ །ཐང་ཕྲམ་ནག་པོའི་འབྲས་བུ་བཅས་བསྣན་པ་རྨ་རིགས་སྤྱི་ཡི་བྱུགས་པ་ལ་ཟབ། རྙེད་ན་སྦྲུལ་དབའ་མདའ་དང་། མ་རྙེད་ན་ཟེར་མོའི་རུས་པ་བསྣན་པ་མན་ངག ༈ །གྲེ་བ་ཚ་ཞིང་སྐད་འགགས་པ་ལ། ལི་ཤི་དྲུག་སྟེང་། ཚར་བོང་། གླ་རྩི། འཛིན་པ་བསྣན་པས་ཕན་ངེས་ཟབ། ། ༈ གཟའ་གདོན་ཡིན་མིན་བརྟག་པ་ནི། ནད་པའི་སེན་མོ་ལ་ལ་ཆ་བྲད་པའི་དུ་བས་བདུག་ན། གཟེར་སྦྲིད་ཤ་འགུལ་བྱུང་ན་ཡིན། ཁོང་སྨན་གང་ཡང་མ་སོང་གོང་དུ། སྤོས་དཀར་དང་གུ་གུལ་ཞོག་ཆུས་ཕུལ་ལ་གཏོང་བས་བཙོན་དུ་བཟུང་། དེ་ནས་གཞུང་གི་སྨན་རྣམས་བསྟེན། ། ༈ གཡུ་དྲིལ་བཅུ་གསུམ་འདི་གླང་ཐབས་དུག་སྨུག་སྤྱི་སྨན་ཟབ། ཨུཏྤལ་ཚབ་ལུག་མིག་བཏང་བ་ཕྱག་ལེན། ། ༈ རྒྱ་རུ་བཅུ་བཞིའི་སྟེང་། ཨ་གར་བཅོ་ལྔ་བསྣན་པས་རླུང་ཚབ་སྙིང་སྲོག་གཟེར་བ་འཇོམས། ཨ་རུ་བཅོ་བརྒྱད་བསྡེབས་པས་མཁལ་སྐེད་གཟེར་བ་འཇོམས། སྤོས་དཀར་བཅུ་པ་བསྡེབས་པས་རྐང་ལག་དང་ཚིག་མིག་ལ་བབས་པ་འཇོམས། མོ་ནད་གྲང་བའི་རིགས་དང་། ཁྱད་པར་རྩ་ཆུ་འགགས་པ་ལ་སུག་སྨེལ་དང་རྣོན་པོ་གསུམ་བསྡེབས། ཁྲག་ཚབ་སྟོད་ལ་ཕྱུར་ནས་སྙིང་སྲོག་གཟེར་བ་ལ་སྒ་ལོ་སྨན་དམར་དང་། ལྟག་པ་སྤྲད་ལ་གཏོང་བ་སོགས་རིག་པས་འཁྲུལ་ཤེས་ན་མོ་ནད་ཀྱི་སྤྱི་འཇོམས་བླ་ན་མེད་པ་ཡིན་གསུངས། དགེའོ། །བྲག་ཞུན་ལྡེ་གུའི་ཕྱག་ལེན་འཆི་མེད་བདུད་རྩི་བུམ་བཟང་ལྟར་རོ། ། ༈ སེ་འབྲུ་ལྔ་པ། གུར་གུམ་བཅུ་གསུམ། གི་ཝཾ་དགུ་པ། བདེ་བྱེད་སྙོམ་ལྡན་བཅས་ལ། འུ་སུ། ལྕམ་པ། གསེར་བྱེ། སྡིག་སྲིན། ལྕགས་ཕྱེ། འབུ་སྐྱོགས། རྒྱ་ཚྭ། གཟེ་མ། ཆུ་མ་རྩི་བཅས་ཆ་སྙམ་སྦྱར་བས་རྨུ་ཆུ་ཚ་གྲང་ལམ་ནས་འདྲེན་པ་ལ་བསྔགས་སོ། ། ༈ ཏིག་ཏ་བརྒྱད་པའི་སྟེང་། མཁྲིས་རིམས་གཉན་དང་བསྡངས་བ་ལ། གུ་གུལ། འཛིམ་པ། སྟག་ཤ །གཟེར་ཆེ་ན་ཨ་བྱག །ལུས་ཤེད་ཞན་ན་ཤ་ཆེན་རྣམས་བསྣན། ཀྵ་ཡ་ལ། གཡའ་ཀྱི། དུག་ཉུང་། ནིམ་པ། གུར་གུམ་བསྣན་པ་ཟབ། གུར་གུམ་བསྣན་པའི་སེ་འབྲུ་ལྔ་པའི་སྟེང་། མཁྲིས་སེལ་བདུད་རྩི་སུམ་སྦྱོར་བསྣན་པས་བད་མཁྲིས་གྲང་ཤས་ཆེ་བ་ལ་ཟབ་ངེས། ཐང་ཆེན་ཉེར་ལྔའི་སྟེང་། ནུས་པ་མྱུར་བར་འདོད་ན། ཐང་ཆེན་ཉེར་ལྔ་ཆ་གཉིས་ལ། དངུལ་ཆུ། མུ་ཟི། སོག་ཐལ། ཆུ་རྩ་བཅས་བསྡམས་པའི་ཆ་གཅིག་བསྣན་པ་སྨུག་པོའི་རིགས་ལ་ཟབ་ཀྱང་མཐར་སྦྱོང་མ་གཏོང་ན་མི་ལེགས་པས་རིགས་པས་དཔྱད། ། ༈ བདུད་རྩི་སུམ་སྦྱོར་དང་། གུར་གུམ་བཅུ་གསུམ། ཞི་དྲུག་འཁྲུལ་འཁོར་ཟུར་དུ་གསལ། ད་ལིས་བཅུ་དྲུག་བཏང་ཚུལ་འབྲི་གཅེས་ཡང་ཡིག་ཏུ་གསལ། དངུལ་ཆུ་བཙོ་བཀྲུ། ཟླ་ཤེལ་གྱི་ཕྱག་ལེན། ནོར་ནད་སྨན་རྣམས་ཟུར་དུ་གསལ། ། ༈ འབོལ་སྨན་བདུན་པའི་སྟེང་གློ་མང་གློ་འཁྲུགས་ཆེ་ན་ཙནྡན་བརྒྱད་པ། སྨུག་པོའི་མཆིན་ནད་རྒྱས་པའི་ཆུ་ལ་གི་ཝཾ་དགུ་པ། མཁལ་ནད་དང་གྲང་ཤས་ཆེ་བའི་རིགས་ལ་སུག་སྨེལ་བཅུ་པ། ཕོ་བའི་མེ་ཉམས་ཟས་མི་འཇུ་བ་ལ་གུར་གུམ་བསྣན་པའི་སེ་འབྲུ་ལྔ་པ། འབམ་གཞུག་ལ་གུར་ཏིག །ཤ་ལྤགས་ཀྱི་ཆུ་ལྷག་སྐེམས་བྱེད་ལ་འུ་སུ་དང་། ལྕམ་པའི་ཐང་གིས་ཕུལ་བ་མན་ངག །ཡང་སེངྒེ་སྦར་སྡེར་དང་། པྲི་ཡངྐུ་ཆ་མཉམ་ཐང་གིས་ཚ་ཆུ་གྲང་ཆུར་བསྐྱུར་བ་ཟབ། ། ༈ ཙནྡན་བཅོ་བརྒྱད་ཀྱི་ཏིག་ཏ་ནི། མགོ་གཟེར་ལ་ལྕགས་ཏིག་དང་། མཁྲིས་ཤས་ཆེ་ན་ཟངས་ཏིག །སྲིན་དང་བསྡོངས་པའི་རིགས་ལ་བྱི་ཏང་ཀ་བསྣན་ཞེས་སྣང་། ། ༈ དུག་རིགས་དང་གླང་ཐབས་གང་ལའང་། ཞི་བྱེད་དྲུག་པའི་སྟེང་དྲེས་མའི་གེ་སར་སྦྱར་བས་ཕན་པ་མྱོང་གྲུབ། ། ༈ རྟ་ཟི་རིལ་བུའི་ཞལ་ཤེས། གཟེར་ཐུང་ལ་གུ་གུལ། གློ་འཁྲུགས་ལ་སྒང་ཐོག །གྲེ་འགགས་ལ་སྤང་རྩི། གཉིད་འཐིབས་ལ་བྱི་ཚེར། འཁྲུགས་ལ་ཧོང་ལེན་ཐང་གིས་ཕུལ། ཨྠིྀ། འཕྲུལ་ཐལ་གྱི་ཁ་བསྒྱུར་སོགས་བྱེ་རིངས་སུ་གསལ། ། ༈ མཁྲིས་ཚད་རྐྱང་པ་ལ་ཏིག་བརྒྱད་ལེགས། དེ་དང་མཆིན་ལྡན་གུར་གུམ་མཆོག་བདུན། མིག་ཆུ་སེར་ན་གྲང་མཁྲིས་ཡིན་པས་གསེར་ལྔ། བད་མཁྲིས་ལ་བདུད་རྩི་སུམ་སྦྱོར་དང་སྤེལ། ཀྵ་ཡ་ལ་གཏར་བཤལ་སྤངས་ནས། འབྲས་གསུམ་ཆ་མཉམ་ག་བུར་ཏིག །དུག་ཉུང་འུ་སུ་བྱི་ཏང་ཀ །བོང་དཀར་ཙི་ཏྲ་པི་པི་ལིང་། །ཞིབ་བཏགས་བུར་སྦྱར་ཆང་གིས་དབུལ། །མཁྲིས་ཚད་མཐར་ལུས་བྱིང་ཉོབ་པ། སྨན་གཞན་གང་གིས་ཀྱང་མ་ཕན་པ་ལ་ག་བུར་ཉེར་ལྔ་ཐུན་ཁ་ཤས་ཀྱིས་ཕན་པ་མྱོང་གྲུབ་བོ། ། ༈

[edit]

sman sbyor gyi zhal shes zin bris sna tshogs/ oM a thA/__zhal shes zin bris la/__nor bu bdun thang steng ko byi la bsnan pa'i rat+na brgyad pas 'bam nad stod du babs pa la phan/__ko byi bdun steng skyu ru ra bsnan pa khrag rlung stod 'tshang sel ba'i rat+na brgyad pa zhes zer/__kig bu la a mr-i 'dog mtshams yu ba zhes rgya yung ba tshwa can la bzhed/__chu rta mo ni stag sha__/'dabs ldan khra bo ni skya ka__/sgra ldan me rdzas ni me mda'i rdzas sam bkrus khu dang mkhan pa lhan gcig sna bug tu brdzangs/__lhog pa'i gsang sman ni a bra'i nyung wa'u chung yang zer/__ma ri ldan nag po'i ga bur la las gsal nag stong zil bzhed kyang /__phag rgod kyi brun yin 'dra/__lug snying ni bya rog nor bu/__ldum nag dom mkhris/__/_!_bdud rtsi lnga lum steng /__tsha rnyogs la sro lo dmar po/__sbyar dug la 'om bu/__rlung la rus bcud/__dregs grum la mkhan pa dang spang spos/__tshad rnying la 'om bu dang kyi kye/__rnying tshad rus la zhen par tsan dmar/__mkhal grum dang rtsa grum la shug pa dang skyer shun/__rus 'bras la spru rtsa dang shug pa spa ma'i 'bras bu/__gzhan yang rang rang gi gnyen po ji ltar rigs pa'i khu bas bsrings/__/_!__khaN+Da'i rigs gang yang /__thog mar sa dang rdul sog chu yis dag par bshal/__sngo sman yin na rma cung zad phabs nas bzhag__/gang ltar yang chu grang du zhag gsum sogs sbangs/__de nas ran bar bskol la khu ba legs par thon nas snyigs ma rnams dor/__dwangs de gar sla zho tsam song ba'i tshe me dal bus gnyug bsrings la 'bud pa'am/__yang na rlangs tshos byas nas sna ma tshig bar gdus pa/__grod pu la sogs pa'i snod gtsang mar tshags bya'o/__/_!_dmar po rta zi la thar nu bskyed pa sbyangs sman zab/__/_!_rten 'brel me btsa' ni byis pa sogs me btsa' bsregs mi rung ba la zab/__dbyugs bcos khrag rlung gis ro stod gzer ba sogs gzer rigs spyi la zab/__de steng rngab ru'am bum pa bya/__me long las sbyor skran la bya/__/_!_chos nyid ril bur gla rtsi bskyed pa rked sman zab/__phur nag thang gis phul bas rgyu gzer dmar bshal la shin tu phan/__btsod mdud zhes tshigs pa can cung zad brngo+os pa btang ba phyag len/__/_!_se 'bru nyi dkyil steng khyung lnga bsnan pas gzhang lug la phan/__sram sha dang /__dbang lag bsnan na grang nad kyis khams zag pa dang /__mkhal rked nad la phan/__/_!_gser mdog lnga steng se me bsnan pa gser mdog dung lo can zhes bad mkhris pho bar babs pa la phan che/__gur tig bsnan pas mkhris pas pho ba gzer ba 'joms/__/_!_ko byil ni/__khrag rlung stod 'tshang sogs la de ga rang gtong /__smug po dang dug sogs la spu bzhar/__ko byi bdun la mdzo 'o phul do ste/__des 'dres nges par byas nas khu ba rang thim du 'gro bar btsos la skam nas longs spyod/__/_!_cong zhi khrol tsam brdungs pa gdus nas chu dron gyis bshal/__de rjes chu grang gis legs par bshal/__/_!_rdo dregs gla rtsi'i chus nem tsam byas nas sla ngar cung zad brngo/__/_!_mig sman la rgya tshwa bsregs pa'i dud pa dgos/__/_!_ni la tho Tha 'di nad la btang yang lcags snod du har bsregs bya/__mig sman la rgod po de ga btang /__!___/cong zhi 'phrul thal gyi lag len shin tu zhib pa ni/__a ru gser mdog legs pa/__4_00__tshwa la chu bcad/__4_00__rgyam tshwa gru bzhi shel 'dra ba/__4_00__bong dkar rgya gar ma byung na legs/__ma 'byor na nyis 'gyur btang dgos pas/__8_00__cong zhi rigs gang byung dug thon nges/__4_00__mu zi gser 'dra dug 'don ma byas pa/__2_00__tsam bcas sta gon bya/__dngos gzhi/__bsregs thab gru bzhi pa/__nang tsha 'dams dang zhi ga byugs/__rked pa na bsregs snod bzhag na lcags kyi thab ru btang /__kha dog cing mthil yangs pa zhig bya/__de nang me thub nges kyi rdza ma kha gcod nyis rim can gyi sum cha gnyis sman gyis gang bar blugs/__steng sa sbyor gyis bsdams/__skam nas nyi ma phyed gcig tu bsregs/__kong bu tsha mo la bsnams pas mu zi'i dri ma sangs na tshos tshad yin/__dkar po kha ba ltar gyur na legs par bzhed/__/_!_gar nag brgyad pa la/__de steng /__byi tang ka__/gser me/__se me bsnan ba gar nag bcu gcig pa yin/__de dang spang rtsi bcu gnyis bsres pas mkhris srin tshad pa dang bsdongs ba la shin tu zab/__/_!_spang rtsi bcu gnyis steng sbrul sha__/a wa bsnan pas ling tog la zab/__/_!_snying rlung sogs la 'gro ba'i bong nga thams cad 'bri tshil ma kho na dgos/__/_!_spang rtsi bcu gnyis sbyor tshad lugs gcig ni/__spang rtsi bong dkar stag sha gsum cha mnyam/__de kun dang mnyam pa'i bdud rtsi lo ma/__cu gang glo la bskyed/__pri yang ku cung zad bsnan pa pho mchin sogs la mi gnod pa'i kha 'dzin yin gsungs/__/_!_glang chen bco brgyad steng gla rtsi bsnan pas mchin pa khrag gis gzer pa la phan pa myong bas grub/__ma nu bzhi steng /__a ru/__ba ru/__gzer 'joms bcas cha mnyam/__kun dang mnyam pa'i skyu ru sbyar ba'i thang 'di 'bam la mchog tu bzang /__/_!_sga los mdzad pa'i sman mar lugs gcig ni/__cong zhi cha gcig__'bri mog de yi sum gnyis sbyar ba sbyor sde'i rtsa ba yin/__de steng stod 'tshangs la ko byi dang /__gzer 'joms/__khrag la bar skyur ru rta/__bad kan la ma nu 'u su rnams cha bskyed/__glo la shing mngar dang a krong bsnan pa mchog tu zab/__rgyun sman la de thams cad sbyar bas bshad ma thag pa'i nad kun la 'gro/__/_!_'khrugs khrag kun sel lugs gcig la/__cong zhi cha gsum/__'bri mog cha bzhi sbyar ba'i steng /__'khrugs la _ma nu dang /__khrag la ba sha ka/__/glo la cu gang kaN+Da ka rI shing mngar rnams bsnan/__mchog tu zab/__/_!_smug po g.yul rgyal zhal shes la/__cong zhi/__se 'bru/__sug smel/__pi ling bzhi gtso bo la/__grang shas che na se 'bru pi ling cha bskyed/__/khrag shas che dus 'di gnyis 'phri ba'am zhad tsam sbyar/__ma nu/__'u su/__ut+pal/__pri yang+ku bzhi blon po'i tshul du thun gnyis re bsdebs/__bse yab star bu skyu ru ba sha ka bzhi po dang po chu skyur skyugs dus gtso bor sbyar/__a ru/__gser me/__dug nyung bzhi po bar du mkhris pa rgyas pa'i dus bskyed/__gi waM/__tig+ta/__ru rta/__tsan+dan dmar/__brag zhun rnams mchin khrag rgyas shing dug thabs su gzer ba dang /__khrag rul dud khu skyugs dus gtso bor sbyar ro/__/_!_blon po gsum sbyor steng gla gul bsnan pa byis gdon la zab/__se 'bru sug smel bsnan pas pho nad la phan/__/_!_tig+ta brgyad steng phag thal dang 'dzin pa bsnan pa dang /__mkhris phye bdun steng brag zhun dang 'dzin pa bsnan pas mkhris tshad la phan/__/_!_dris lan bka' rgya ma las/__tsan+dan brgyad pa dang ar brgyad bsres pa rma bya 'jing bsnol te glo snying gzer ba la phan/__mchin mkhris gnyis ldan la gi dgu dang tig brgyad sbyar ba ba glang gser bya 'jing bsnol te glo snying gzer ba la phan/__pho mtsher ldan pa la/__brag zhun dgu pa dang /__a ru bdun pa bsres pa seng+ge 'jing bsnol zer/__chu ser dang mo nad mkhal mar babs pa la spos dkar bcu pa dang /__a ru bcu pa sdebs pa rgya stag 'jing bsnol zer/__gur gum bcu gsum dang aM b+hi drug thang bsdebs pas tsha chu la phan/__gur gum mchog bdun dang cu gang bcu gsum bsdebs pas mchin glo lu ba la phan zhes sogs snang /__/_!_spyir tig+ta 'gro ba thams cad la sum tig dang /__bye brag mkhris tshad la lcags tig btang ba nus pa rno/__/_!_rgya nag ril bur/__yungs kar dang bong nga mnyam sbyor byed pa de gnyan dang chu ser bsdongs pa la zab/__chos nyid ril bu dmar bshal la phan che/__chu ser sman gsum/__bong khrag__/seng ldeng khaN+Da bcas bsnan pas/__dreg grum dang mdze la mchog tu bshad/__man bsil dang cong zhi dgu sbyor la yung ba mdog 'gyur ba bsnan pas sha dug la zab/__tshwa la'i 'phrul bshal la thar nu 'dul drug btang dgos/__/_!_rta yi rgyab srin sel byed steng /__ldong ros/__nI la tho Tha/__shing kun/__ram/__yung ba/__thar nu'i myu gu gsar pa/__a b+hi Sha/__ha shig__/'brug rus/__li khri/__stag sha__/thang phram nag po'i 'bras bu bcas bsnan pa rma rigs spyi yi byugs pa la zab/__rnyed na sbrul dba' mda' dang /__ma rnyed na zer mo'i rus pa bsnan pa man ngag__!__/gre ba tsha zhing skad 'gags pa la/__li shi drug steng /__tshar bong /__gla rtsi/__'dzin pa bsnan pas phan nges zab/__/_!_gza' gdon yin min brtag pa ni/__nad pa'i sen mo la la cha brad pa'i du bas bdug na/__gzer sbrid sha 'gul byung na yin/__khong sman gang yang ma song gong du/__spos dkar dang gu gul zhog chus phul la gtong bas btson du bzung /__de nas gzhung gi sman rnams bsten/__/_!_g.yu dril bcu gsum 'di glang thabs dug smug spyi sman zab/__ut+pal tshab lug mig btang ba phyag len/__/_!_rgya ru bcu bzhi'i steng /__a gar bco lnga bsnan pas rlung tshab snying srog gzer ba 'joms/__a ru bco brgyad bsdebs pas mkhal sked gzer ba 'joms/__spos dkar bcu pa bsdebs pas rkang lag dang tshig mig la babs pa 'joms/__mo nad grang ba'i rigs dang /__khyad par rtsa chu 'gags pa la sug smel dang rnon po gsum bsdebs/__khrag tshab stod la phyur nas snying srog gzer ba la sga lo sman dmar dang /__ltag pa sprad la gtong ba sogs rig pas 'khrul shes na mo nad kyi spyi 'joms bla na med pa yin gsungs/__dge'o/__/brag zhun lde gu'i phyag len 'chi med bdud rtsi bum bzang ltar ro/__/_!_se 'bru lnga pa/__gur gum bcu gsum/__gi waM dgu pa/__bde byed snyom ldan bcas la/__'u su/__lcam pa/__gser bye/__sdig srin/__lcags phye/__'bu skyogs/__rgya tshwa/__gze ma/__chu ma rtsi bcas cha snyam sbyar bas rmu chu tsha grang lam nas 'dren pa la bsngags so/__/_!_tig ta brgyad pa'i steng /__mkhris rims gnyan dang bsdangs ba la/__gu gul/__'dzim pa/__stag sha__/gzer che na a byag__/lus shed zhan na sha chen rnams bsnan/__k+Sha ya la/__g.ya' kyi/__dug nyung /__nim pa/__gur gum bsnan pa zab/__gur gum bsnan pa'i se 'bru lnga pa'i steng /__mkhris sel bdud rtsi sum sbyor bsnan pas bad mkhris grang shas che ba la zab nges/__thang chen nyer lnga'i steng /__nus pa myur bar 'dod na/__thang chen nyer lnga cha gnyis la/__dngul chu/__mu zi/__sog thal/__chu rtsa bcas bsdams pa'i cha gcig bsnan pa smug po'i rigs la zab kyang mthar sbyong ma gtong na mi legs pas rigs pas dpyad/__/_!_bdud rtsi sum sbyor dang /__gur gum bcu gsum/__zhi drug 'khrul 'khor zur du gsal/__da lis bcu drug btang tshul 'bri gces yang yig tu gsal/__dngul chu btso bkru/__zla shel gyi phyag len/__nor nad sman rnams zur du gsal/__/_!_'bol sman bdun pa'i steng glo mang glo 'khrugs che na tsan+dan brgyad pa/__smug po'i mchin nad rgyas pa'i chu la gi waM dgu pa/__mkhal nad dang grang shas che ba'i rigs la sug smel bcu pa/__pho ba'i me nyams zas mi 'ju ba la gur gum bsnan pa'i se 'bru lnga pa/__'bam gzhug la gur tig__/sha lpags kyi chu lhag skems byed la 'u su dang /__lcam pa'i thang gis phul ba man ngag__/yang seng+ge sbar sder dang /__pri yang+ku cha mnyam thang gis tsha chu grang chur bskyur ba zab/__/_!_tsan+dan bco brgyad kyi tig ta ni/__mgo gzer la lcags tig dang /__mkhris shas che na zangs tig__/srin dang bsdongs pa'i rigs la byi tang ka bsnan zhes snang /__/_!_dug rigs dang glang thabs gang la'ang /__zhi byed drug pa'i steng dres ma'i ge sar sbyar bas phan pa myong grub/__/_!_rta zi ril bu'i zhal shes/__gzer thung la gu gul/__glo 'khrugs la sgang thog__/gre 'gags la spang rtsi/__gnyid 'thibs la byi tsher/__'khrugs la hong len thang gis phul/__a+thi+-i/__'phrul thal gyi kha bsgyur sogs bye rings su gsal/__/_!_mkhris tshad rkyang pa la tig brgyad legs/__de dang mchin ldan gur gum mchog bdun/__mig chu ser na grang mkhris yin pas gser lnga/__bad mkhris la bdud rtsi sum sbyor dang spel/__k+Sha ya la gtar bshal spangs nas/__'bras gsum cha mnyam ga bur tig__/dug nyung 'u su byi tang ka__/bong dkar tsi tra pi pi ling /__/zhib btags bur sbyar chang gis dbul/__/mkhris tshad mthar lus bying nyob pa/__sman gzhan gang gis kyang ma phan pa la ga bur nyer lnga thun kha shas kyis phan pa myong grub bo/__/_!_