JKW-KABUM-13-PA-010

🚧 This website is under continued development. We appreciate your patience!

Previous Section"PA" is not a number. Back to Volume Page"PA" is not a number.Next Section "PA" is not a number.

Wylie title
Location	mkhyen brtse'i bka' 'bum Volume , sde tshan 10, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation
Genre	Collected Works - Selected - bka' 'bum "PA" is not a number.

1 Texts in this Section (sde tshan or chos tshan)

129-138	ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་བསྙེན་སྒྲུབ་སོགས་ཀྱི་གསལ་བྱེད་འཆི་མེད་དགའ་སྟོན། tshe dpag med rigs lnga 'chi med mchog sbyin gyi bsnyen sgrub sogs kyi gsal byed 'chi med dga' ston Longevity Rituals - tshe sgrub	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

"PA" is not a number.

Tibetan Text

Wylie

[edit]

༄༅། །ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་བསྙེན་སྒྲུབ་སོགས་ཀྱི་གསལ་བྱེད་འཆི་མེད་དགའ་སྟོན་ཅེས་བྱ་བ་བཞུགས་སོ།། །།

ན་མོ་གུ་རུ་བྷྱཿ འདིར་ཚེ་དཔག་མེད་རིགས་ལྔ་འཆི་མེད་མཆོག་སྦྱིན་གྱི་རྣལ་འབྱོར་ལ་བརྟེན་ནས་ཚེ་དང་ཡེ་ཤེས་ཀྱི་དངོས་གྲུབ་ཐོབ་པར་འདོད་པས་ཉམས་སུ་བླང་བའི་རིམ་པ་ལ་གསུམ་སྟེ། བསྙེན་པ། སྒྲུབ་པ་སྒྲུབ་ཆེན་ནོ། །དེ་ལ་དང་པོ་ལྷ་ཉེ་བར་བསྙེན་པ་ནི། འདིའི་དབང་ཐོབ་ཅིང་དམ་ཚིག་དང་སྡོམ་པར་ལྡན་པའི་རྣལ་འབྱོར་པས་གནས་དབེན་ཞིང་ཡིད་དང་མཐུན་པར། ཚེ་སྒྲུབ་པ་ལ་ཤིས་པའི་གཟའ་སྐར་སྦྱོར་བྱེད་བཟང་པོ་འཛོམ་པའི་སྔ་དྲོའི་ཆར་གནས་ཁང་ཕྱག་དར་ལེགས་པར་བྱ། རང་གི་མདུན་དུ་སྐུ་རྟེན་བྲིས་འབུར་གང་རིགས་རབ་གནས་ཅན་བཀྲམ་པའི་སྤྱན་སྔར་སྨན་རག་གཏོར་གསུམ་ཕྱི་མཆོད་དང་བཅས་པ་བཤམ། གཞན་ཡང་ཉེར་མཁོའི་ཡོ་བྱད་ཐམས་ཅད་འདུ་བ་སྐྱབས་སེམས་ནས་བགེགས་ལ་གཏོར་མ་སྦྱིན་པའི་བར་ལས་བྱང་གི་དཀྱུས་ནས་འབྱུང་བ་བཞིན་བྱས་རྗེས། བགེགས་གཏོར་ཕྱིར་དོར་བ་དང་མཉམ་དུ་གུ་གུལ་གྱིས་བདུག །ཡུངས་ཀར་གྱིས་བྲབས། སྒོ་དྲུང་དུ་ཐོ་བརྟན་པོར་བཙུགས་ལ་རྒྱལ་ཆེན་ཐོ་འཛུགས་སྤྱི་ལྟར་བྱ་ཞིང་ཤིས་པ་རྒྱས་པར་བརྗོད། ནང་དུ་ལོག་ལ་སྲུང་འཁོར་ཤིན་ཏུ་གསལ་བར་བསྒོམ་པ་སོགས་ནས་བཟླས་པའི་བར་དཀྱུས་ནས་འབྱུང་བ་ལྟར་ཉམས་སུ་བླང་། བཟླས་དམིགས་ནི། རང་གི་ཐུགས་ཀར་པད་ཟླའི་གདན་ལ་མི་འགྱུར་བའི་ཐུགས་སྲོག་ཧྲཱིཿཡིག་དམར་པོའི་མཐར་སྔགས་ཕྲེང་དམར་གསལ་གཡས་སུ་བཀོད་པ་ལས། ཛབ་སྐུལ་དང་བཟླས་པའི་རྐྱེན་གྱིས་འོད་ཟེར་མཁའ་ཁྱབ་ཏུ་འཕྲོས། འཕགས་པ་རྣམས་མཆོད། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། ཚེ་དཔག་མེད་ཀྱི་གོ་འཕང་ལ་བཀོད། སྲིད་ཞིའི་དྭངས་བཅུད་ཐམས་ཅད་ཚེའི་བདུད་རྩི་འོད་ཟེར་དང་བཅས་པའི་རྣམ་པར་སྤྱན་དྲངས་ཏེ་ཐུགས་སྲོག་ལ་ཐིམ་པས་འཆི་མེད་ཚེ་དང་ཡེ་ཤེས་ཀྱི་དངོས་གྲུབ་ཐོབ་པར་བསམས་ལ། སྣང་གྲགས་རིག་གསུམ་ཚེ་དཔག་མེད་རིགས་ལྔའི་སྐུ་གསུང་ཐུགས་ཀྱི་གསལ་སྣང་ལ་དྲན་པ་ཉེ་བར་བཞག་སྟེ་བཟླས་པ་ཅི་ནུས་སུ་བྱ། དེ་ལྟ་བུའི་རིམ་པས་ཐུན་བཞིའི་རྣལ་འབྱོར་ལ་བརྩོན། དེའང་ཐོར་ཐུན་གྱི་མགོར་སྔོན་འགྲོ་རྣམས་རྒྱས་པར་བྱ། གཞན་རྣམས་ལ་སྐྱབས་སེམས་ཀྱི་རྗེས་ཏིང་ངེ་འཛིན་རྣམ་གསུམ་ལ་འཇུག །མཆོད་བསྟོད་མདོར་བསྡུས་ཙམ་གྱིས་ཆོག །བཟླས་པ་ལ་གཙོ་བོར་དྲིལ། ཐུན་སོ་སོའི་མཐར་ཡིག་བརྒྱ་དང་དབྱངས་གསལ་རྟེན་སྙིང་སྤེལ་ཚིག་ཅན་བདུན་རེ་བཟླ་ཞིང་མཆོད་བསྟོད་ཀྱང་བྱ། ཉེར་བསྡུའི་རྣལ་འབྱོར་གྱིས་འོད་གསལ་ལ་འཇུག་ཅིང་དེའི་ངང་ལས་ཐུན་མཚམས་ཀྱི་ལྷར་ལྡངས་ཏེ་བསྔོ་སྨོན་ཤིས་བརྗོད་བཅས་སྤྱོད་ལམ་ལ་འཇུག་པ་དང་། སྲོད་ཐུན་གྱི་མཐར་གྲུབ་ན་ཚོགས་མཆོད་རེ་གཏོང་། ཉེར་བསྡུའི་མཐར་གཉིད་ཀྱི་འོད་གསལ་ལ་འཇུག །ཐོ་རངས་དཔའ་བོ་དང་རྣལ་འབྱོར་མའི་ཌ་དྲིལ་དང་སྔགས་ཀྱི་སྒྲས་གཉིད་ལས་སད་པར་མོས་ཏེ་ཐུན་མཚམས་ཀྱི་ལྷར་ལྡངས་ནས་ཐོར་ཐུན་གྱི་རྣལ་འབྱོར་ལ་བརྩོན། བཟའ་བཏུང་ཐམས་ཅད་བདུད་རྩིའི་རང་བཞིན་དུ་བྱིན་གྱིས་བརླབས་ལ་ལྷ་མཆོད་པའི་བསམ་པས་རོལ། གཞན་མཚམས་ཀྱི་སྤང་བླང་སོགས་གསང་བ་སྤྱིའི་ལུགས་བཞིན་ཤེས་པས་སྔགས་འབུམ་ཕྲག་ལྔ་ཁ་སྐོང་དང་བཅས་པ་འགྲོ་བར་བྱའོ། །གཉིས་པ་བར་དུ་དངོས་གྲུབ་བསྒྲུབ་པ་ནི། བསྙེན་པ་ཐོར་ཐུན་ལ་གྲུབ་པར་བྱས་ནས། དགོངས་ཐུན་ནས་བརྩམས་ཏེ་མགོ་བཟུང་། དེའང་མདུན་དུ་སྟེགས་བུའི་དབུས་རས་བྲིས་ས མ་ཚོམ་བུའི་དཀྱིལ་འཁོར་གྱི་སྟེང་དུ་ལྡིང་ཁྲིའི་ཁར་རྣམ་བུམ་བཅུད་ལྡན་ཙམ་མམ། དངོས་གྲུབ་བླང་བའི་དོན་དུ་གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་ཚེ་མདའ་བཅས་བཤམ། གང་ལྟར་ཡང་མཆོད་གཏོར་དང་ཚོགས་ཀྱི་ཡོ་བྱད་རྣམས་འདུ་བྱ། སྐྱབས་འགྲོ་ནས་བཟླས་པའི་བར་ལས་གཞུང་བསྲངས་ཏེ་བདག་མདུན་དབྱེར་མེད་དུ་གསལ་གདབ། བཟླས་པའི་ཚེ་ཛཔ྄་ཁང་དབྱེ་བར་མོས་ན། དབྱེ་གཞིའི་དཀྱིལ་འཁོར་གསལ་བཏབ་རྗེས། བྷྲཱུྃ་བི་ཤྭ་བི་ཤུདྡྷེ་ཕཊ་ཛཿ ཨྃ་བྷྲཱུྃ་ཧཱུྃ་ཛྲིཾ་ཁྃ་ཛཿཧཱུྃ་བྃ་ཧོཿཕཊ་ཛཿ ཞེས་བརྗོད་པས་བདག་དམ་ཚིག་གི་འཁོར་ལོ་ལས་ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་ལོགས་སུ་ཕྱེ་ནས་མདུན་གྱི་ནམ་མཁར་མེ་རི་འདབས་འབྱོར་གྱི་ཚུལ་དུ་བཞུགས་པའི་བདག་མདུན་གཉིས་ཀའི་ཐུགས་ཀར་པད་ཟླའི་གདན་ལ་ཐུགས་སྲོག་གི་མཐར་སྔགས་ཀྱི་ཕྲེང་བས་བསྐོར་བ། བདག་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་འཕྲོས། མདུན་གྱི་ཡེ་ཤེས་པ་རྣམས་ལ་ཐིམ་པས་དགྱེས་པ་མཆོག་ཏུ་བསྐྱེད། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འོད་དང་འོད་ཟེར་གྱི་རྣམ་པས་བདག་ལ་སྩལ་ཞིང་ཐིམ་པར་གྱུར། །ཅེས་བརྗོད་ཅིང་བསམས་ལ་བཟླ། སྐབས་སུ་བསྙེན་པའི་སྐབས་ཇི་སྐད་བཤད་པའི་ཚེ་བཅུད་བསྡུ་བསྟིམ་གྱི་དམིགས་པའང་བྱ། ཚེ་འགུགས་བྱེད་པར་སྤྲོ་ན། མདའ་དར་གཡབ་ཅིང་འོག་གི་སྐུལ་ཚིག་བརྗོད་པ་དང་མཉམ་དུ། བདག་མདུན་གྱི་ཐུགས་ཀ་ནས་འོད་ཟེར་བསམ་གྱིས་མི་ཁྱབ་པ་ལྷ་མོ་མགྱོགས་མའི་ཚོགས་དང་བཅས་པ་སྤྲོས་པས་འཁོར་འདས་བརྟན་གཡོའི་དྭངས་བཅུད་ཐམས་ཅད་ཚེའི་བདུད་རྩི་འོད་ཟེར་དང་བཅས་པའི་རྣམ་པས་བསྡུས་ཏེ་བདག་དང་བསྒྲུབ་བྱ་ལ་ཐིམ་པས་འཆི་མེད་ཚེའི་དངོས་གྲུབ་ཐོབ། མདུན་གྱི་ཚེ་རྫས་རྣམས་ལ་ཐིམ་པས་འཆི་མེད་ཚེའི་བཅུད་ལེན་དུ་གྱུར་པར་བསམས་ཏེ། ཧྲཱིཿ བཅོམ་ལྡན་མགོན་པོ་ཡེ་ཤེས་ཚེ་དཔག་མེད༔ འབྱུང་བ་ལྔ་ལ་དབང་བསྒྱུར་ལྷ་མོའི་ཚོགས༔ རྣལ་འབྱོར་བདག་གི་ཚེ་དང་གཡང་སྤེལ་ཅིག༔ སྟེང་འོག་ཕྱོགས་བཅུའི་སྣོད་ཀྱི་འཇིག་རྟེན་ན༔ འབྲོས་དང་འཁྱམས་དང་ཡར་བའི་ཚེ་ཁུག་ཅིག༔ སྟོང་ཕྲག་བརྒྱད་ཅུའི་བགེགས་ཀྱི་ཚོགས་རྣམས་ཀྱིས༔ བརྐུས་དང་འཕྲོག་དང་གཞོམས་པའི་ཚེ་ཁུག་ཅིག༔ འབྱུང་བ་དགྲ་གཤེད་འཁྲུགས་པའི་ལས་སྦྱོར་གྱིས༔ ཉམས་དང་ཟད་དང་འཐོར་བའི་ཚེ་གསོས་ཤིག༔ ཡིད་ཀྱིས་དངངས་དང་ཧད་ཀྱིས་བརྒྱལ་བ་དང་༔ ཧུད་ཀྱིས་འདྲོག་པའི་ཚེ་དང་གཡང་ཁུག་ཅིག༔ ཚེ་ཁུག་གཡང་སྐྱོབས་དངོས་གྲུབ་བདག་ལ་སྩོལཿ འབྱུང་ལྔ་འོད་ལྔ་འབར་བའི་ཚེ་བཅུད་སྡུསཿ འཆི་མེད་ཚེ་ཡི་དངོས་གྲུབ་བདག་ལ་སྩོལ༔ ཨཱ་ཡུརྫྙཱ་ན་བིནྡུ་བྷྲཱུྃ་ནྲྀ་བྷྲཱུྃ་ཧཱུྃ་ཛཿ བཛྲ་ཨཱ་ཡུ་ཥེ་ཨཱ་ཡུརྫྙཱ་ན་སིདྡྷི་ཨཱ་བྷྲཱུྃ༔ ཞེས་གདུང་ཤུགས་དང་བཅས་ཏེ་བསྐུལ། ཐུན་བསྡུ་བ་ན་མཆོད་བསྟོད་ཡི་གེ་བརྒྱ་པ་དང་། ཛཿཧཱུྃ་བྃ་ཧོཿས་མདུན་གྱི་ཡེ་ཤེས་པ་རྟེན་དང་བརྟེན་པར་བཅས་པ་རང་ལ་ཐིམ་ནས་གསལ་བརྟན་གྱི་གཟི་བྱིན་མཆོག་ཏུ་འབར་བར་བསམས་ལ་ཡི་གེ་བརྒྱ་པ་ལན་གསུམ་གྱིས་ཤིན་ཏུ་བརྟན་པར་བྱའོ། །གཞན་རྗེས་ཆོག་དང་། ལས་བྱང་རྒྱས་བསྡུས་བྱ་ཚུལ་སོགས་བསྙེན་པའི་སྐབས་ལྟར་ལས། སྒྲུབ་པའི་སྐབས་འདིར་ཐུན་བཞིའམ་སྲོད་ཐུན་གྱི་མཇུག་ཏུ་ཚོགས་མཆོད་རེ་ངེས་པར་བྱ། དེ་ལྟ་བུའི་རིམ་པས་སྔགས་འབུམ་ཕྲག་ལྔ་ཁ་སྐོང་དང་བཅས་པ་བཟླའོ། །གསུམ་པ་ཐ་མ་སྒྲུབ་པ་ཆེན་པོའི་ཚུལ་གྱིས་དངོས་གྲུབ་བླང་བ་ནི། གྲུབ་ན་དབང་རྫས་རྣམས་ཚོགས་པར་བཤམ། ཞག་བདུན་ལ་སོགས་པར་ཐུན་བཞིའི་རིམ་པས་ལས་བྱང་གི་གཞུང་རྒྱས་པར་བསྲངས་ཏེ་ཚོགས་བསྒྲལ་མཆོད་ཡན་གྲུབ་པའི་མཚམས། སློབ་མ་ལ་ཇི་ལྟར་བསྐུར་བའི་དབང་རྣམས་བདག་འཇུག་གི་ཚུལ་དུ་བླངས་མཐར་ལྷག་མ་ནས་བཀྲ་ཤིས་ཀྱི་བར་བྱ། གང་ལྟར་ཡང་སང་གྲོལ་རྒྱུའི་དེ་རིང་ནས་མཆོད་གཏོར་གསར་པ་རྒྱ་ཆེར་བཤམ། བཟླས་པའི་སྐབས། ཛཔ྄་ཁང་ཕྱེས་ནས་སྔགས་ཀྱི་འོད་ཟེར་མཆོད་སྤྲིན་གྱི་ཚུལ་དུ་སྤྲོ་བ་ཡན་སྒྲུབ་པའི་སྐབས་ལྟར་ལ། ལྷ་ཚོགས་རྣམས་ལས་མཆོག་དང་ཐུན་མོང་གི་དངོས་གྲུབ་ཐམས་ཅད་འོད་ཟེར་གྱི་རྣམ་པར་བྱུང་ནས་བདག་ལ་ཐིམ་པས་ཕྲིན་ལས་བཞི། གྲུབ་པ་བརྒྱད། དབང་བཅུ་སོགས་འཇིག་རྟེན་དང་། འཇིག་རྟེན་ལས་འདས་པའི་དངོས་གྲུབ་མ་ལུས་པར་དབང་འབྱོར་པར་བསམས་ཏེ། སྔགས་ཀྱི་མཐར། ཀཱ་ཡ་ཝཱ་ཀཙིཏྟ་སརྦ་སིདྡྷི་ཕ་ལ་ཧཱུྃ། ཞེས་བཏགས་པ་བཟླ་ཞིང་། གཞན་སྒྲུབ་པའི་དུས་ལྟར་ཉམས་སུ་བླང་། ནངས་པར་སྔ་བར་ལངས་ཏེ། སླར་ཡང་མཆོད་གཏོར་གསར་པ་བཤམ། ལས་བྱང་རྒྱས་པར་བཏང་ཞིང་བཟླས་པའི་བར་གོང་དུ་བཤད་པ་བཞིན་གྲུབ་རྗེས། སྐྱ་རེངས་ཤར་བའི་དུས་ན་མདུན་གྱི་དཀྱིལ་འཁོར་ལ་མཆོད་བསྟོད་དང་། ཡེ་ཤེས་སྐུ་མཆོག་གིས་ནོངས་པ་བཤགས། སྤྲོ་ན་བྱིན་འབེབས་ཀྱིས་སྒྲུབ་རྫས་རྣམས་སླར་ཡང་གཟི་བྱིན་བསྐྱེད། གོང་གི་དམིགས་གནད་དང་། ཧཱུྃ། སྐྱེ་མེད་ཆོས་དབྱིངས་སོགས་གྱི་སྐུལ་ཚིག་བཅས་བུམ་པ་སོགས་གནས་གསུམ་དུ་འཇོག་པ་ན་སྒྲུབ་རྫས་ཀྱི་ལྷ་རྣམས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ། བུམ་ཆུ་དང་། ཚེ་རྫས་སོགས་ལྕེ་ཐོག་ཏུ་མྱོང་ཞིང་། བཅུད་བདུད་རྩིའི་དྭངས་མས་རྩ་ཁམས་ཐམས་ཅད་ཁྱབ་པས་འཆི་མེད་བདེ་བ་ཆེན་པོའི་ཡེ་ཤེས་རྒྱས་པར་མོས་ཏེ་རིག་སྟོང་འཛིན་མེད་ཀྱི་རང་ཞལ་ལྷུག་པར་བསྐྱང་། དེ་ནས་ཚོགས་མཆོད་སོགས་རྗེས་ཀྱི་ཆོ་ག་སྤྱི་དང་། ཁྱད་པར་ཤིས་བརྗོད་རྒྱས་པར་བྱ་ཞིང་མེ་ཏོག་གི་ཆར་དབབ། ཉི་ཤར་གྱི་དུས་རྒྱལ་ཆེན་ཐོ་འགྲོལ་སྤྱི་ལྟར་བྱ། མིག་ཉི་མའི་ཕྱོགས་སུ་བལྟས་པས་ཚེ་ཉི་ཟླ་དང་མཉམ་པའི་རྟེན་འབྲེལ་དུ་བཤད་པས་མཚོན། རྟེན་འབྱུང་ལེགས་པའི་མཚམས་སྦྱོར་དང་། གནས་སྲུང་བ་སོགས་གསང་བ་སྤྱིའི་ལུགས་ལྟར་ཤེས་པར་བྱས་ལ་ཉམས་སུ་བླང་ངོ་། །སྦྱིན་སྲེག་བྱེད་ན། མཚམས་དེ་ཉིད་ཀྱི་ཁོངས་སུ་གྲུབ་པ་བྱུང་ཚེ་ཤིན་ཏུ་ལེགས། མ་གྲུབ་ཀྱང་སྐབས་སུ་བབ་པའི་ཚེ་བྱས་ཀྱང་འགལ་བ་མེད་ལ། དེའང་བསྙེན་པའི་ཁ་སྐོང་དུ་ཞི་བའི་སྦྱིན་སྲེག་ཏིལ་ལ་གྲངས་བཟུང་སྟེ་སྔགས་བསྙེན་སྒྲུབ་ཀྱི་བཅུ་ཆ་འགྲོ་བ་དང་། ཚེ་སྤེལ་བ་སོགས་ཀྱི་ལས་བསྒྲུབ་པ་ལ་རྒྱས་པའི་སྦྱིན་སྲེག་དཱུཪྺ་དང་ཟས་མཆོག་གི་རྫས་གཙོ་བོར་བཟུང་སྟེ་ཁྲི་ཕྲག་སོགས་བྱ་ཞིང་། ཆོ་གའི་རིམ་པ་ནི་སྔ་འགྱུར་རྡོ་རྗེ་ཐེག་པའི་གསང་བ་སྤྱིའི་འགྲོས་བཞིན་ཤེས་པར་བྱ། གཞན་ཡང་དབང་གི་སྐབས་སུ་རྒྱས་པར་སྤྲོ་ན། སྦྱོར་བའི་སྐབས་ཚེ་རྫས་དང་། ཚེ་མདའ་བཅས་བཤམ། དངོས་གཞི་སྒྲུབ་པའི་དུས་ལྟར་ཚེ་འགུགས་བསྐུལ། སློབ་མ་རྗེས་སུ་བཟུང་བའི་སྐབས་རིག་པའི་དབང་ལྔའི་གོང་དུ་ཚེ་བཅུད་བསྡུ་བསྟིམ་གྱི་དམིགས་པ་ཕོག་ལ་ཚེ་འགུགས་བྱ། དབང་བཞི་པའི་མཐའ་རྟེན་གྱི་ཚུལ་དུ་ཚིགས་བཅད་ཇི་ལྟར་རིགས་པ་དང་བཅས་ཚེ་རིལ་དང་ཚེ་ཆང་སྦྱིན། རྒྱལ་སྲིད་སྣ་བདུན་དང་། བཀྲ་ཤིས་རྫས་བརྒྱད་སོགས་ཀྱིས་མངའ་གསོལ་ཞིང་ཤིས་བརྗོད་རྒྱས་པར་སྤེལ་བའང་ཕྱག་ལེན་དུ་མཛད་ཅེས་འབྱུང་ངོ་། །ཞེས་པའང་བྱ་བྲལ་བ་མཉྫུ་གྷོ་ཥས་སྟན་ཐོག་གཅིག་ཏུ་ཤར་མར་བྲིས་པ་འགྲོ་ཀུན་འཆི་མེད་ཡེ་ཤེས་ཀྱི་སྐུ་མྱུར་དུ་འགྲུབ་པའི་རྒྱུར་གྱུར་ཅིག །སརྦ་དཱ་མངྒ་ལཾ་བྷ་བ་ཏུ།། །།

[edit]

@#/__/tshe dpag med rigs lnga 'chi med mchog sbyin gyi bsnyen sgrub sogs kyi gsal byed 'chi med dga' ston ces bya ba bzhugs so//__// na mo gu ru b+h+yaH__'dir tshe dpag med rigs lnga 'chi med mchog sbyin gyi rnal 'byor la brten nas tshe dang ye shes kyi dngos grub thob par 'dod pas nyams su blang ba'i rim pa la gsum ste/__bsnyen pa/__sgrub pa sgrub chen no/__/de la dang po lha nye bar bsnyen pa ni/__'di'i dbang thob cing dam tshig dang sdom par ldan pa'i rnal 'byor pas gnas dben zhing yid dang mthun par/__tshe sgrub pa la shis pa'i gza' skar sbyor byed bzang po 'dzom pa'i snga dro'i char gnas khang phyag dar legs par bya/__rang gi mdun du sku rten bris 'bur gang rigs rab gnas can bkram pa'i spyan sngar sman rag gtor gsum phyi mchod dang bcas pa bsham/__gzhan yang nyer mkho'i yo byad thams cad 'du ba skyabs sems nas bgegs la gtor ma sbyin pa'i bar las byang gi dkyus nas 'byung ba bzhin byas rjes/__bgegs gtor phyir dor ba dang mnyam du gu gul gyis bdug__/yungs kar gyis brabs/__sgo drung du tho brtan por btsugs la rgyal chen tho 'dzugs spyi ltar bya zhing shis pa rgyas par brjod/__nang du log la srung 'khor shin tu gsal bar bsgom pa sogs nas bzlas pa'i bar dkyus nas 'byung ba ltar nyams su blang /__bzlas dmigs ni/__rang gi thugs kar pad zla'i gdan la mi 'gyur ba'i thugs srog hrIHyig dmar po'i mthar sngags phreng dmar gsal g.yas su bkod pa las/__dzab skul dang bzlas pa'i rkyen gyis 'od zer mkha' khyab tu 'phros/__'phags pa rnams mchod/__sems can thams cad kyi sdig sgrib sbyangs/__tshe dpag med kyi go 'phang la bkod/__srid zhi'i dwangs bcud thams cad tshe'i bdud rtsi 'od zer dang bcas pa'i rnam par spyan drangs te thugs srog la thim pas 'chi med tshe dang ye shes kyi dngos grub thob par bsams la/__snang grags rig gsum tshe dpag med rigs lnga'i sku gsung thugs kyi gsal snang la dran pa nye bar bzhag ste bzlas pa ci nus su bya/__de lta bu'i rim pas thun bzhi'i rnal 'byor la brtson/__de'ang thor thun gyi mgor sngon 'gro rnams rgyas par bya/__gzhan rnams la skyabs sems kyi rjes ting nge 'dzin rnam gsum la 'jug__/mchod bstod mdor bsdus tsam gyis chog__/bzlas pa la gtso bor dril/__thun so so'i mthar yig brgya dang dbyangs gsal rten snying spel tshig can bdun re bzla zhing mchod bstod kyang bya/__nyer bsdu'i rnal 'byor gyis 'od gsal la 'jug cing de'i ngang las thun mtshams kyi lhar ldangs te bsngo smon shis brjod bcas spyod lam la 'jug pa dang /__srod thun gyi mthar grub na tshogs mchod re gtong /__nyer bsdu'i mthar gnyid kyi 'od gsal la 'jug__/tho rangs dpa' bo dang rnal 'byor ma'i Da dril dang sngags kyi sgras gnyid las sad par mos te thun mtshams kyi lhar ldangs nas thor thun gyi rnal 'byor la brtson/__bza' btung thams cad bdud rtsi'i rang bzhin du byin gyis brlabs la lha mchod pa'i bsam pas rol/__gzhan mtshams kyi spang blang sogs gsang ba spyi'i lugs bzhin shes pas sngags 'bum phrag lnga kha skong dang bcas pa 'gro bar bya'o/__/gnyis pa bar du dngos grub bsgrub pa ni/__bsnyen pa thor thun la grub par byas nas/__dgongs thun nas brtsams te mgo bzung /__de'ang mdun du stegs bu'i dbus ras bris sa_ma tshom bu'i dkyil 'khor gyi steng du lding khri'i khar rnam bum bcud ldan tsam mam/__dngos grub blang ba'i don du g.yas su tshe ril/__g.yon du tshe chang /__rgyab tu tshe mda' bcas bsham/__gang ltar yang mchod gtor dang tshogs kyi yo byad rnams 'du bya/__skyabs 'gro nas bzlas pa'i bar las gzhung bsrangs te bdag mdun dbyer med du gsal gdab/__bzlas pa'i tshe dzapa? khang dbye bar mos na/__dbye gzhi'i dkyil 'khor gsal btab rjes/__b+h+rU~M bi shwa bi shud+d+he phaT dzaH__a~M b+h+rU~M hU~M dz+riM kha~M dzaHhU~M ba~M hoHphaT dzaH__zhes brjod pas bdag dam tshig gi 'khor lo las ye shes kyi 'khor lo rten dang brten par bcas pa logs su phye nas mdun gyi nam mkhar me ri 'dabs 'byor gyi tshul du bzhugs pa'i bdag mdun gnyis ka'i thugs kar pad zla'i gdan la thugs srog gi mthar sngags kyi phreng bas bskor ba/__bdag gi thugs ka nas sngags kyi 'od zer mchod pa'i tshul du 'phros/__mdun gyi ye shes pa rnams la thim pas dgyes pa mchog tu bskyed/__sku gsung thugs kyi byin rlabs dang dngos grub thams cad 'od dang 'od zer gyi rnam pas bdag la stsal zhing thim par gyur/__/ces brjod cing bsams la bzla/__skabs su bsnyen pa'i skabs ji skad bshad pa'i tshe bcud bsdu bstim gyi dmigs pa'ang bya/__tshe 'gugs byed par spro na/__mda' dar g.yab cing 'og gi skul tshig brjod pa dang mnyam du/__bdag mdun gyi thugs ka nas 'od zer bsam gyis mi khyab pa lha mo mgyogs ma'i tshogs dang bcas pa spros pas 'khor 'das brtan g.yo'i dwangs bcud thams cad tshe'i bdud rtsi 'od zer dang bcas pa'i rnam pas bsdus te bdag dang bsgrub bya la thim pas 'chi med tshe'i dngos grub thob/__mdun gyi tshe rdzas rnams la thim pas 'chi med tshe'i bcud len du gyur par bsams te/__hrIH__bcom ldan mgon po ye shes tshe dpag med:__'byung ba lnga la dbang bsgyur lha mo'i tshogs:__rnal 'byor bdag gi tshe dang g.yang spel cig:__steng 'og phyogs bcu'i snod kyi 'jig rten na:__'bros dang 'khyams dang yar ba'i tshe khug cig:__stong phrag brgyad cu'i bgegs kyi tshogs rnams kyis:__brkus dang 'phrog dang gzhoms pa'i tshe khug cig:__'byung ba dgra gshed 'khrugs pa'i las sbyor gyis:__nyams dang zad dang 'thor ba'i tshe gsos shig:__yid kyis dngangs dang had kyis brgyal ba dang :__hud kyis 'drog pa'i tshe dang g.yang khug cig:__tshe khug g.yang skyobs dngos grub bdag la stsolaH__'byung lnga 'od lnga 'bar ba'i tshe bcud sdusaH__'chi med tshe yi dngos grub bdag la stsol:__A yur+dz+nyA na bin+du b+h+rU~M nr-i b+h+rU~M hU~M dzaH__badz+ra A yu She A yur+dz+nyA na sid+d+hi A b+h+rU~M:__zhes gdung shugs dang bcas te bskul/__thun bsdu ba na mchod bstod yi ge brgya pa dang /__dzaHhU~M ba~M hoHsa mdun gyi ye shes pa rten dang brten par bcas pa rang la thim nas gsal brtan gyi gzi byin mchog tu 'bar bar bsams la yi ge brgya pa lan gsum gyis shin tu brtan par bya'o/__/gzhan rjes chog dang /__las byang rgyas bsdus bya tshul sogs bsnyen pa'i skabs ltar las/__sgrub pa'i skabs 'dir thun bzhi'am srod thun gyi mjug tu tshogs mchod re nges par bya/__de lta bu'i rim pas sngags 'bum phrag lnga kha skong dang bcas pa bzla'o/__/gsum pa tha ma sgrub pa chen po'i tshul gyis dngos grub blang ba ni/__grub na dbang rdzas rnams tshogs par bsham/__zhag bdun la sogs par thun bzhi'i rim pas las byang gi gzhung rgyas par bsrangs te tshogs bsgral mchod yan grub pa'i mtshams/__slob ma la ji ltar bskur ba'i dbang rnams bdag 'jug gi tshul du blangs mthar lhag ma nas bkra shis kyi bar bya/__gang ltar yang sang grol rgyu'i de ring nas mchod gtor gsar pa rgya cher bsham/__bzlas pa'i skabs/__dzapa? khang phyes nas sngags kyi 'od zer mchod sprin gyi tshul du spro ba yan sgrub pa'i skabs ltar la/__lha tshogs rnams las mchog dang thun mong gi dngos grub thams cad 'od zer gyi rnam par byung nas bdag la thim pas phrin las bzhi/__grub pa brgyad/__dbang bcu sogs 'jig rten dang /__'jig rten las 'das pa'i dngos grub ma lus par dbang 'byor par bsams te/__sngags kyi mthar/__kA ya wA katsit+ta sarba sid+d+hi pha la hU~M/__zhes btags pa bzla zhing /__gzhan sgrub pa'i dus ltar nyams su blang /__nangs par snga bar langs te/__slar yang mchod gtor gsar pa bsham/__las byang rgyas par btang zhing bzlas pa'i bar gong du bshad pa bzhin grub rjes/__skya rengs shar ba'i dus na mdun gyi dkyil 'khor la mchod bstod dang /__ye shes sku mchog gis nongs pa bshags/__spro na byin 'bebs kyis sgrub rdzas rnams slar yang gzi byin bskyed/__gong gi dmigs gnad dang /__hU~M/__skye med chos dbyings sogs gyi skul tshig bcas bum pa sogs gnas gsum du 'jog pa na sgrub rdzas kyi lha rnams rang la thim pas rgyud byin gyis brlabs par bsam/__bum chu dang /__tshe rdzas sogs lce thog tu myong zhing /__bcud bdud rtsi'i dwangs mas rtsa khams thams cad khyab pas 'chi med bde ba chen po'i ye shes rgyas par mos te rig stong 'dzin med kyi rang zhal lhug par bskyang /__de nas tshogs mchod sogs rjes kyi cho ga spyi dang /__khyad par shis brjod rgyas par bya zhing me tog gi char dbab/__nyi shar gyi dus rgyal chen tho 'grol spyi ltar bya/__mig nyi ma'i phyogs su bltas pas tshe nyi zla dang mnyam pa'i rten 'brel du bshad pas mtshon/__rten 'byung legs pa'i mtshams sbyor dang /__gnas srung ba sogs gsang ba spyi'i lugs ltar shes par byas la nyams su blang ngo /__/sbyin sreg byed na/__mtshams de nyid kyi khongs su grub pa byung tshe shin tu legs/__ma grub kyang skabs su bab pa'i tshe byas kyang 'gal ba med la/__de'ang bsnyen pa'i kha skong du zhi ba'i sbyin sreg til la grangs bzung ste sngags bsnyen sgrub kyi bcu cha 'gro ba dang /__tshe spel ba sogs kyi las bsgrub pa la rgyas pa'i sbyin sreg dUR+Wa dang zas mchog gi rdzas gtso bor bzung ste khri phrag sogs bya zhing /__cho ga'i rim pa ni snga 'gyur rdo rje theg pa'i gsang ba spyi'i 'gros bzhin shes par bya/__gzhan yang dbang gi skabs su rgyas par spro na/__sbyor ba'i skabs tshe rdzas dang /__tshe mda' bcas bsham/__dngos gzhi sgrub pa'i dus ltar tshe 'gugs bskul/__slob ma rjes su bzung ba'i skabs rig pa'i dbang lnga'i gong du tshe bcud bsdu bstim gyi dmigs pa phog la tshe 'gugs bya/__dbang bzhi pa'i mtha' rten gyi tshul du tshigs bcad ji ltar rigs pa dang bcas tshe ril dang tshe chang sbyin/__rgyal srid sna bdun dang /__bkra shis rdzas brgyad sogs kyis mnga' gsol zhing shis brjod rgyas par spel ba'ang phyag len du mdzad ces 'byung ngo /__/zhes pa'ang bya bral ba many+dzu g+ho Shas stan thog gcig tu shar mar bris pa 'gro kun 'chi med ye shes kyi sku myur du 'grub pa'i rgyur gyur cig__/sarba dA mang+ga laM b+ha ba tu//__//