JKW-KABUM-04-NGA-001-023

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' 'bum Volume 4, sde tshan 1, Text 23, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 4: 155-. Khams sde dge rdzong sar dgon: Rdzong sar blo gros phun tshogs, 2020.
Genre

1 Texts in this Section (sde tshan or chos tshan)

23 286-341	ཨིནྡྲ་བྷུ་ཏིའི་ཡེ་ཤེས་གྲུབ་པ་སོགས་འཕགས་ཡུལ་གྱི་གྲུབ་པའི་དབང་ཕྱུག་ཆེན་པོ་རྣམས་ཀྱིས་མཛད་པའི་རྒྱུད་སྡེའི་མན་ངག་རྣམས་ལས་ཁོལ་ཕྱུང་ཤིན་ཏུ་མང་བ། in+d+ra b+hu ti'i ye shes grub pa sogs 'phags yul gyi grub pa'i dbang phyug chen po rnams kyis mdzad pa'i rgyud sde'i man ngag rnams las khol phyung shin tu mang ba Notes - zin bris   ·   Pith Instructions - man ngag	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཨིནྡྲ་བྷུ་ཏིའི་ཡེ་ཤེས་གྲུབ་པ་སོགས་འཕགས་ཡུལ་གྱི་གྲུབ་པའི་དབང་ཕྱུག་ཆེན་པོ་རྣམས་ཀྱིས་མཛད་པའི་རྒྱུད་སྡེའི་མན་ངག་རྣམས་ལས་ཁོལ་ཕྱུང་ཤིན་ཏུ་མང་བ།

སློབ་དཔོན་ཨིནྡྲ་བྷཱུ་ཏིས་མཛད་པའི་ཡེ་ཤེས་གྲུབ་པ་ཞེས་བྱ་བའི་སྒྲུབ་ཐབས་ལས། ལེའུ་དང་པོ་ཕྱག་རྒྱ་ཆེན་པོ་བསྟན་པ་ཞེས་བྱ་བར། །སེམས་ཅན་ཀུན་གྱི་ཡིད་ཁྱབ་པར། །རྡོ་རྗེ་སེམས་དཔའ་རང་ཉིད་བཞུགས། །དེ་ལྟར་བསམས་ནས་རྣལ་འབྱོར་གྱི། །དབང་པོ་གང་ལའང་བརྙས་མི་བྱ། །ཞེས་དང་། བཟའ་དང་བཟའ་མིན་ལས་འདས་དང་། །བཏུང་དང་བཏུང་མིན་རྣམ་པར་སྤངས། །བགྲོད་དང་བགྲོད་མིན་རྣམ་གྲོལ་བདག །རྣལ་འབྱོར་པ་ནི་མཉམ་འཇོག་འགྱུར། །ཞེས་དང་། །གང་ལ་བླ་མའི་དྲིན་ཡོད་པ། །དེ་ཡིས་དེ་ཉིད་མཆོག་རྙེད་འགྱུར། །གཞན་དུ་བྱིས་པས་ཡུན་རིང་དུ། །རྣམ་པར་རྨོངས་པས་ཉོན་མོངས་འགྱུར། །ཞེས་དང་། དེ་མཉམ་འགྲོ་བ་འཇིག་རྟེན་ན། །ཁམས་གསུམ་ན་ནི་གཞན་མེད་དེ། །རྡོ་རྗེ་སེམས་ཉིད་འཇིག་རྟེན་ན། །ཕུན་སུམ་ཚོགས་ཀུན་ཕྱིར་ཞུགས་ཡིན། །ཞེས་དང་། རྟོག་པ་ཐམས་ཅད་རྣམ་སྤངས་པའི། །ཡེ་ཤེས་མཆོག་བཟང་ཐོབ་པ་ཡིས། །རྡོ་རྗེ་ཡེ་ཤེས་དབང་བསྐུར་བས། །དངོས་གྲུབ་མཆོག་ནི་བསྒྲུབ་པར་བྱ། །ཡང་དག་ཡེ་ཤེས་ཀུན་ལྡན་ན། །བྲིས་པའི་དཀྱིལ་འཁོར་ལོགས་གཞན་དུ། །དབང་བསྐུར་བ་ནི་ལེན་ཅེ་ན། །འདི་ནི་དམ་ཚིག་ཉམས་པར་འགྱུར། །དམ་ཚིག་ཉམས་པའི་སྡུག་བསྔལ་ནི། །ལུས་དང་དེ་བཞིན་ཡིད་དང་ནི། །དེ་ཡི་དོན་རྣམས་ཉམས་འགྱུར་ཞིང་། །མྱུར་བ་ཉིད་དུ་ཤི་བར་འགྱུར། །ཤི་ནས་དམྱལ་བའི་སྡུག་བསྔལ་ནི། །བསྐལ་པ་བྱེ་བ་བརྒྱ་ཕྲག་ཏུའང་། །མྱོང་ནས་གནས་ལས་འཕོས་གྱུར་ནའང་། །གདོལ་པའམ་དམན་པའི་རིགས་སུ་སྐྱེ། །ལྐུགས་པའམ་ཡང་ན་འོན་པའམ། །སྐྱེ་ཞིང་སྐྱེ་བར་དམུས་ལོང་དུ། །སྐྱེ་བར་འགྱུར་བ་ཐེ་ཚོམ་མེད། །དེ་བཞིན་གཤེགས་ཀུན་ཡེ་ཤེས་ནི། །རྡོ་རྗེ་ཡེ་ཤེས་ཞེས་བྱར་བཤད། །བློ་ལྡན་དེ་ཡིས་དབང་བསྐུར་ན། །དབང་བསྐུར་བར་ནི་ཤེས་པར་བྱ། །རྣལ་འབྱོར་སངས་རྒྱས་ཀུན་བདག་ཉིད། །འགྲོ་བའི་བདག་པོ་ལ་སོགས་པའི། །ཚོགས་ཀྱིས་ཐལ་མོ་སྦྱར་ནས་ནི། །བྱས་ནས་མངོན་པར་ཕྱག་བྱེད་འགྱུར། །བྱང་ཆུབ་སེམས་དཔའ་སྟོབས་ཆེན་དང་། །བདག་ཉིད་ཆེན་པོ་སངས་རྒྱས་ཀྱང་། །དཔལ་ཆེན་བསྲུང་བར་མཛད་གྱུར་ཏེ། །རྡོ་རྗེ་སྐུ་ཡིས་རྟག་ཏུ་བཞུགས། །བདེན་པའི་ཆོས་འཛིན་མི་འཁྲུགས་ཤིང་། །སངས་རྒྱས་གདུང་ནི་རབ་འཇུག་པ། །བྱིན་གྱིས་བརླབས་དང་ལྡན་པ་རྣམས། །གུས་དང་བཅས་པས་བསྔགས་པར་མཛད། །འཇིག་རྟེན་སྐྱོང་བ་དེ་བཞིན་གཞན། །སྟོབས་ཆེན་ཕ་རོལ་གནོན་པ་རྣམས། །གནས་རྣམས་ཀུན་ཏུ་རྟོགས་པ་ནའང་། །གསུང་བཞིན་དུ་ནི་རབ་ཏུ་གནས། །གང་ཡང་སེམས་ཅན་ཐམས་ཅད་ལ། །བདུད་དང་བགེགས་སུ་གནས་པ་རྣམས། །དེ་ཡང་དེ་ལ་མི་བྱེད་དེ། །བགེགས་རྣམས་སྐྲག་ནས་འབྱེར་བར་འགྱུར། །ལྷ་ལ་སོགས་པ་གྲུབ་པ་རྣམས། །མཁའ་ལ་རྒྱུ་དང་མི་རྒྱུ་ཀུན། །ངན་འགྲོར་འགྲོ་བས་འཇིགས་པས་ན། །དེ་ཡང་དེ་ལ་མགོན་མི་བྱེད། །གལ་ཏེ་རྨོངས་པའི་དབང་གིས་ནི། །རྣམ་པར་རྨོངས་རྣམས་མགོན་བྱེད་ན། །བརྩོན་དང་ཡེ་ཤེས་རྣམ་ཤེས་དང་། །དངོས་གྲུབ་དག་ཀྱང་ཉམས་པར་འགྱུར། །ཀུན་མཁྱེན་མཆོག་སྦྱིན་གསུངས་པའོ། །དབྱིབས་ཀུན་དང་ནི་རྣམ་བྲལ་ཞིང་། །འགྲོ་དང་འོང་ལས་རྣམ་གྲོལ་བདག །རླུང་ཀུན་ཀྱིས་ཀྱང་བསྐྱོད་མི་ནུས། །མེ་ཡི་ཕུང་པོས་མི་ཚིག་ཅིང་། །ཆུ་རྣམས་ཀྱིས་ཀྱང་གཡེངས་མི་འགྱུར། །རབ་ཏུ་འབད་པས་མཚོན་ཆ་ནི། །རྣོན་པོས་ཀྱང་ནི་ཆོད་མི་འགྱུར། །ཇི་ལྟར་མི་གནས་ནམ་མཁའ་ནི། །ཁྱབ་ཅིང་མཚན་ཉིད་རྣམས་དང་བྲལ། །འདི་ན་དོན་དམ་དེ་ཉིད་དེ། །རྡོ་རྗེ་ཡེ་ཤེས་བླ་ན་མེད། །ཀུན་ཏུ་བཟང་པོ་ཞེས་བཤད་ཅིང་། །ཕྱག་རྒྱ་ཆེན་པོ་ཞེས་ཀྱང་བྱ། །འདི་ནི་ཆོས་སྐུར་ཤེས་བྱ་སྟེ། །མེ་ལོང་ཡེ་ཤེས་ཞེས་ཀྱང་བྱ། །ཇི་ལྟར་གཟུགས་བརྙན་མེ་ལོང་ལ། །རང་ཉིད་ངེས་པར་སྣང་བ་ལྟར། །དེ་བཞིན་ཆོས་སྐུར་ཡེ་ཤེས་ནི། །སྣང་བས་མེ་ལོང་ཞེས་བྱའོ། །དེ་བཞིན་གཤེགས་ཀུན་ཡེ་ཤེས་དང་། །རང་གི་དང་ནི་འགྲོ་བའི་ཡང་། །དངོས་ཉིད་གཅིག་པུར་ཐུགས་སུ་ཆུད། །མཉམ་ཉིད་ཡེ་ཤེས་ཞེས་བྱའོ། །གདོད་ནས་དག་ཅིང་སྐྱེ་བ་མེད། །རང་བཞིན་གྱིས་ནི་འོད་གསལ་བ། །ཕན་ཚུན་ཁྱབ་པའི་ཡེ་ཤེས་པས། །སོ་སོར་རྟོག་པ་ཅན་ཞེས་བཤད། །ཀུན་ཏུ་ཀུན་ནས་སངས་རྒྱས་ཀྱི། །མཛད་པ་ཐམས་ཅད་ལ་འཇུག་པ། །སངས་རྒྱས་ཐམས་ཅད་མཛད་གཅིག་པས། །བྱ་བ་གྲུབ་པ་ཞེས་བཤད་དོ། །གང་ཚེ་ཉོན་མོངས་ཤེས་བྱའི་སྒྲིབ། །ཐམས་ཅད་ལས་གྲོལ་དེ་ཡི་ཚེ། །རྣལ་འབྱོར་པ་མཆོག་རྡོ་རྗེ་ཅན། །ཤིན་ཏུ་རྣམ་དག་ཅེས་བཤད་དོ། །ཇི་ལྟར་གདུལ་བྱའི་ཆོས་རྣམས་དང་། །འདོད་ཡོན་ཀུན་ལ་སངས་རྒྱས་རྣམས། །ཐམས་ཅད་ལོངས་སྤྱོད་གཅིག་པས་ན། །ལོངས་སྤྱོད་རྫོགས་པའི་སྐུར་འདོད་དོ། །མཚན་རྣམས་ཀུན་དང་ཡང་དག་ལྡན། །སྣ་ཚོགས་སྐུ་སྟེ་མཚན་ཉིད་མེད། །སངས་རྒྱས་རྣམས་ཀྱི་སྤྲུལ་པ་བས། །སྤྲུལ་པའི་སྐུར་ནི་བཤད་པ་ཡིན། །ཕྱག་རྒྱ་ཆེན་པོ་རབ་བསྒྲུབ་ཕྱིར། །ཤེས་ནས་རྣལ་འབྱོར་པས་དེ་བསྒོམས། །ཀུན་རྟོག་ཐམས་ཅད་རྣམ་སྤངས་ན། །ཚེ་འདི་ཉིད་ལ་འགྲུབ་པར་འགྱུར། །ཞེས་སོགས་རྒྱས་པར་གསུངས་སོ། །ལེའུ་གཉིས་པ་གཟུགས་སུ་བསྒོམ་པ་དགག་པ་ལས། །གལ་ཏེ་མགོན་མེད་སྐྱེ་བོ་འགའ། །རྒྱལ་པོར་འགྱུར་རོ་ཞེས་བསྒོམས་པས། །བསྐལ་པ་བྱེ་བ་བརྒྱ་ཡིས་ཀྱང་། །འདི་ནི་རྒྱལ་པོ་ཐོབ་མི་འགྱུར། །གང་ཞིག་ལོག་པར་རྟོག་པས་ནི། །དེ་ལ་རྒྱལ་པོ་ཡོད་མིན་ལྟར། །དེ་བཞིན་ལོག་པའི་སྒོམ་པ་ཡིས། །སངས་རྒྱས་ཉིད་དུ་འགྱུར་མ་ཡིན། །ཞེས་དང་། གལ་ཏེ་བྱས་པའི་ལྷ་ཡི་གཟུགས། །རྡོ་རྗེ་སེམས་དཔར་གྱུར་ན་ཀོ །གང་ཕྱིར་འདུས་བྱས་ལས་བྱུང་བས། །བུམ་པ་ལ་སོགས་བཞིན་དུ་འཇིག །ཅེས་སོ། །ལེའུ་གསུམ་པ་རྣམ་པ་དང་བཅས་པའི་ཡེ་ཤེས་དགག་པ་ལས། །དེ་ལྟར་གཟུགས་སུ་བསྒོམས་པ་ཡིས། །རྡོ་རྗེ་སེམས་དཔའ་མི་འགྲུབ་སྟེ། །རྣམ་བཅས་རྟོག་པས་ཀྱང་དེ་བཞིན། །རྡོ་རྗེ་སེམས་དཔའ་མི་འགྲུབ་བོ། །ཞེས་དང་། གཟུགས་མེད་གཟུགས་སུ་མི་འགྱུར་ཏེ། །གཟུགས་མེད་གཟུགས་ཅན་ཡོད་མ་ཡིན། །ཡེ་ཤེས་གཟུགས་ནི་མེད་པར་གྲགས། །རྣམ་པ་གཟུགས་ཅན་ཡིན་པར་བཤད། །ཅེས་དང་། ཡེ་ཤེས་འབྱུང་བའི་དུས་སུ་ཡང་། །རྣམ་པ་ཀུན་ཏུ་མི་འབྱུང་ལ། །རྣམ་པའང་ཀུན་ཏུ་འབྱུང་བ་ན། །ཡེ་ཤེས་ཉིད་ནི་མི་རིགས་སོ། །ཞེས་དང་། ཡེ་ཤེས་རྣམ་བཅས་ཡིན་ཞེས་པ། །རྣམ་པ་དང་བྲལ་མ་ཡིན་ཏེ། །རྣམ་པ་དང་བཅས་ཡེ་ཤེས་ནི། །རྣམ་བཅས་ཉིད་དུ་ཇི་ལྟར་འགྱུར། །ཞེས་སོགས་རྒྱས་པར་བསྟན་ནོ། །ལེའུ་བཞི་པ་རྣམ་པ་མེད་པ་དགག་པ་ལས། གལ་ཏེ་རྣམ་པ་མེད་ན་ཡང་། །ཡེ་ཤེས་འགྱུར་བ་རྣམ་རྟོག་ན། །རྣམ་པ་དང་ནི་རྣམ་བྲལ་བ། །འདིས་ཅི་རིག་ན་ཀུན་རིག་ཡིན། །ཀུན་མཁྱེན་དེ་ལ་ཡོད་མིན་ཞིང་། །ཡེ་ཤེས་ཞེས་བྱ་རྟོག་པ་ཉིད། །རྣམ་པ་ཐམས་ཅད་མི་གཟིགས་པས། །བེམ་པོ་ཉིད་དུ་ཐལ་བར་འགྱུར། །བེམ་མེད་རྟོག་པའི་ངོ་བོ་ནི། །རྣམ་པ་མེད་པ་ཡིན་པར་བཤད། །ཅེས་དང་། གལ་ཏེ་གཟུགས་སོགས་དངོས་པོ་རྣམས། །རྣམ་པ་ཀུན་ཏུ་ཡོད་མིན་ན། །སངས་རྒྱས་ཐུགས་རྗེའི་བདག་ཉིད་ཀྱི། །ལྷ་ཡི་སྤྱན་ནི་ཇི་ལྟར་འགྲུབ། །ལྷ་ཡི་སྙན་སོགས་ཐམས་ཅད་ཀྱང་། །དེ་བཞིན་དུ་ནི་ཡོད་མིན་པས། །མངོན་པར་ཤེས་པ་མེད་པའི་ཕྱིར། །དེ་བས་ཀུན་མཁྱེན་མེད་པར་འགྱུར། །ཞེས་དང་། སེམས་ཅན་ཀུན་དོན་ལེགས་བསྒྲུབ་ཕྱིར། །གང་ཚེ་ངེས་པ་ཉིད་འགྱུར་བས། །ཡེ་ཤེས་ཡིད་བཞིན་ནོར་བུ་བཤད། །བེམ་པོའི་བདག་ཉིད་མ་ཡིན་ནོ། །ཞེས་སོགས་གསུངས་སོ། །ལེའུ་ལྔ་པ་རྨོངས་པ་བསྒོམས་པ་དགག་པར། །ཤིན་ཏུ་རྨོངས་སྐབས་ཡེ་ཤེས་ནི། །རྣལ་འབྱོར་པ་ནི་ལ་ལ་འདོད། །རྨོངས་པ་བསྒོམས་པས་རྨོངས་པས་ནི། །ཚུལ་ངན་ཉིད་རྣམས་ཐོབ་པར་འགྱུར། །ཐམས་ཅད་རྒྱུ་དང་མཚུངས་པ་ཡི། །འབྲས་བུ་འཇིག་རྟེན་ལས་སྤྱོད་དོ། །ཀོ་ཊ་པ་ལས་འབྲས་སྐྱེ་བ། །གང་ལའང་ཡོད་པ་མ་ཡིན་ནོ། །ཞེས་སོགས་གསུངས་སོ། །ལེའུ་དྲུག་པ་དབུགས་རྔུབས་པ་དང་དབྱུང་བའི་དེ་ཁོ་ན་ཉིད་དགག་པར། དབུགས་འབྱུང་མ་ཡིན་རྔུབས་མིན་ནི། །དེ་ཉིད་གྲུབ་པར་རིགས་པ་མིན། །དེ་གཉིས་དབུས་ནའང་ཡོད་མ་ཡིན། །རླུང་གི་དེ་ཉིད་ཇི་ལྟར་འགྱུར། །ཞེས་དང་། ལུས་ཀྱིས་འབུད་པ་གང་ཡིན་པ། །སྦུད་པ་འབུད་པར་བྱེད་པ་དག །དེ་དག་ཁྱད་པར་མ་མཐོང་སྟེ། །དེ་ཉིད་མཐོང་བའི་རྣལ་འབྱོར་པས། །འབུད་པ་ཡི་ནི་བྱ་བ་མིན། །ཞེས་དང་། ཡང་། མངོན་པར་རྨོངས་ཤིང་ལམ་ཉམས་རྣམས། །ལོག་པའི་དོན་ནི་རབ་སྒོམ་པ། །དེ་དག་བདེ་འགྲོར་མི་སྐྱེ་སྟེ། །དམྱལ་བ་གཅིག་པུར་འགྲོ་བ་ཉིད། །ཅེས་གསུངས། ལེའུ་བདུན་པ་བདེ་བ་ཆེན་པོ་སྨྲ་བ་དགག་པའི་ལེའུ་ལས། དབང་པོ་གནས་བྱུང་བདེ་བ་ནི། །དེ་ཉིད་ཡིན་ཞེས་སྐྱེ་ངན་སྨྲ། །དེ་ནི་བདེ་བ་ཆེ་ཡིན་ཞེས། །རྒྱལ་བ་མཆོག་གིས་མ་གསུངས་སོ། །རྟེན་ཅིང་འབྲེལ་འབྱུང་ལས་སྐྱེས་པ། །གང་དུ་དེ་ཉིད་ཤེས་མི་འགྲུབ། །གང་ཕྱིར་འདི་དེ་ཐམས་ཅད་དུ། །ངོ་བོ་ཉིད་ཀྱིས་ཡོད་མ་ཡིན། །བདེ་གཤེགས་ཀུན་གྱི་ཡེ་ཤེས་ནི། །རང་གི་ངོ་བོ་ཉིད་མཁྱེན་པའི། །བདེ་བ་ཀུན་གྱི་གཙོར་གྱུར་པས། །བདེ་བ་ཆེན་པོ་ཞེས་བཤད་དོ། །བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །མཆན་ཁུང་གཡའ་འཕྲུགས་ལས་བྱུང་བ། །ཅི་ཡི་ཕྱིར་ན་བདེ་ཆེན་མིན། །ཆགས་དང་མཉམ་པའི་བདེ་མེད་དེ། །དེ་ནི་རྒྱལ་བ་རྣམས་ལ་ཕུལ། །འདོད་པའི་དོན་ཀུན་ལོངས་སྤྱོད་ཅིང་། །སྨོད་པ་དག་ཏུ་མི་བྱ་ཞེས། །རྣལ་འབྱོར་རྒྱུད་ནི་ཐམས་ཅད་ལས། །རྡོ་རྗེ་སེམས་དཔས་གསུངས་པ་ནི། །རྣལ་འབྱོར་པ་ཡི་སེམས་བདེ་ཕྱིར། །དོན་དམ་པ་ཡི་དེ་ཉིད་མིན། ཅེས་གསུངས་སོ། །ལེའུ་བརྒྱད་པ་བསོད་ནམས་དང་ཡེ་ཤེས་ཀྱི་ཚོགས་རབ་ཏུ་འཕེལ་བར། །དེ་བས་ཐབས་ཤེས་རྣལ་འབྱོར་པ། །སེམས་ཅན་ཀུན་གྱི་གཉེན་གཅིག་པས། །ནམ་ཡང་བསླུ་བ་མེད་པའི་སེམས། །དེ་ནས་བརྟན་པ་བསྐྱེད་པར་བྱ། །འདི་བྱས་པས་ནི་རྫོགས་སངས་རྒྱས། །དགྱེས་པའི་བདག་ཉིད་ཅན་ཀུན་མཉེས། །ཞེས་དང་། ལམ་འདིར་གནས་པའི་རྣལ་འབྱོར་པས། །ཡར་ངོའི་ཟླ་བ་ཇི་བཞིན་དུ། །རིམ་གྱིས་ཡང་དག་འཕེལ་འགྱུར་གྱི། །ནམ་ཡང་ཟད་པར་མི་འགྱུར་རོ། །ཞེས་སོ། །ལེའུ་དགུ་པ་བསོད་ནམས་དང་སྡིག་པ་སྐྱེ་བ་དང་འཇིག་པ་ཡོངས་སུ་ཤེས་པར། །ཇི་ལྟར་བཤགས་པའི་སྡིག་པ་ནི། །ཤིན་ཏུ་མི་བཟད་ཟད་འགྱུར་ཞིང་། །དེ་ཡི་རྗེས་སུ་ཡི་རངས་པས། །ཇི་ལྟར་བསོད་ནམས་ཡང་དག་རྫོགས། །ཞེས་དང་། སེམས་མེད་པར་ནི་ལུས་ངག་གིས། །ཅི་ཡང་བྱེད་པར་ནུས་མ་ཡིན། །དེ་མེད་པར་ནི་ཚིག་གིས་ཀྱང་། །ནམ་ཡང་ནུས་འགྱུར་མ་ཡིན་ནོ། །དེ་བས་ལུས་ངག་ལས་རྣམས་ནི། །ཡིད་ཉིད་ལས་ནི་གྱུར་པ་ཡིན། །ཞེས་དང་། དེ་བས་དགེ་དང་མི་དགེ་ཀུན། །སེམས་ཉིད་ཀྱིས་ནི་བྱེད་པ་དང་། །སེམས་ཉིད་ཀྱིས་ནི་འཇིག་འགྱུར་ཞེས། །འགྲོ་བའི་བླ་མས་གསུངས་པ་ཡིན། །ཞེས་སོ། །ལེའུ་བཅུ་པ་གཙང་པ་དང་མི་གཙང་བའི་རྟོག་ལས་གྲོལ་བར། །ཆར་གྱི་ཚོགས་ནི་འབབ་པ་ཡིས། །སྨོད་པ་ཐམས་ཅད་བཀྲུ་བ་དང་། །འབྲུ་རྣམས་ཐམས་ཅད་བསྐྱེད་ནས་ནི། །དེ་ནས་རྒྱ་མཚོར་འབབ་པར་འགྱུར། །མི་གཙང་རྣམས་དང་ལྡན་པ་ཡི། །ཆུ་ནི་ཆུ་ཡིས་བླངས་ནས་ཀྱང་། །ཆུ་ནི་གང་དང་གང་ཡིན་པ། །ཐམས་ཅད་དེ་བཞིན་ཆར་དུ་འབབ། །རྫིང་བུ་ལ་སོགས་ཀུན་རྒྱས་ཤིང་། །ཐམས་ཅད་ཀྱིས་ནི་ཐམས་ཅད་འཁྲུད། །ཅེས་དང་། གཙང་བ་ཉིད་ནི་ཡོད་གྱུར་ན། །མི་གཙང་ཉིད་ནི་འབྱུང་བར་འགྱུར། །དག་པ་མེད་པའི་མི་གཙང་ཉིད། །རྣམ་པ་ཀུན་ཏུ་མི་རྙེད་དོ། །ཞེས་སོ། །ལེའུ་བཅུ་གཅིག་པ་བགྲོད་པ་དང་བགྲོད་པ་མ་ཡིན་པ་བྲལ་བར། དེ་ལྟར་གནས་ཤིང་འཁོར་བར་ནི། །ཡུན་རིང་དུས་སུ་འཇུག་པ་དང་། །ཕ་དང་མར་ནི་མ་གྱུར་པའི། །སེམས་ཅན་གང་ཡང་ཡོད་མ་ཡིན། །ཞེས་སོགས་གསུངས། ལེའུ་བཅུ་གཉིས་པ་གནས་པ་བཞག་པ་ཞེས་བྱ་བར། །ཡང་དག་ཡེ་ཤེས་རིག་པ་ལས། །ཁྱབ་བདག་རྡོ་རྗེའི་སྐུ་ཉིད་དང་། །འགྱུར་བ་མེད་པ་ཉིད་དང་ནི། །ཀུན་མཁྱེན་ཉིད་ནི་དེ་ཡིས་འགྲུབ། །ཅེས་དང་། ལུས་ཅན་དག་ནི་ཐམས་ཅད་ལ། །ཡེ་ཤེས་ཆེ་གནས་ཉིད་ཡིན་ནའང་། །མི་ཤེས་རབ་རིབ་ཀྱིས་ཁེབས་པའི། །བྱིས་པ་རྨོངས་པས་མི་ཤེས་སོ། །ཞེས་སོ། །ལེའུ་བཅུ་གསུམ་པ་སློབ་དཔོན་གྱི་མཚན་ཉིད་ལས། །ཇི་ལྟར་དམུས་ལོང་བྱ་བ་ཡིས། །འབྲོག་དགོན་དག་ཏུ་ཞུགས་གྱུར་པ། །གཉིས་ཀའང་དེ་འདྲ་ལ་ལ་ཞིག །ཇི་ལྟར་གྲོང་དུ་འཇུག་པར་འགྱུར། །དེ་བཞིན་དམུས་ལོང་གྱུར་པ་དེས། །ཡང་དག་ཡེ་ཤེས་མ་མཐོང་བས། །གནས་དེ་ཐོབ་པར་མི་ནུས་ན། །ཇི་ལྟར་དེས་ནི་གཞན་གྲོལ་བྱེད། །དེ་བས་བླ་མ་བསྟེན་པ་ཡི། །ཡང་དག་དང་ལྡན་སློབ་མ་ཡིས། །ཡོངས་སུ་བརྟག་པར་བྱའོ་ཞེས། །རྒྱལ་བ་མཆོག་གིས་རབ་ཏུ་གསུངས། །དཀོན་མཆོག་གསུམ་ལ་ངང་གིས་དད། །སེམས་ཅན་ཀུན་ལ་སྙིང་རྗེར་ལྡན། །བརྟན་ཞིང་གཏོང་སོགས་ཡོན་ཏན་ལྡན། །བསོད་ནམས་ཐམས་ཅད་ཆེར་བསྐྱེད་ལ། །བྱང་ཆུབ་སེམས་ནི་ཡང་དག་བསྐྱེད། །བློ་བཟང་རབ་དང་ཡོན་ཏན་ལྡན། །ཁྲོ་བ་མེད་ཅིང་སྤྲོ་བ་ཆེ། །ཟབ་མོའི་ཆོས་ལ་ལྷག་པར་མོས། །དེ་ནི་ཆོས་ཀྱི་སྦྱིན་པ་དག །ཟང་ཟིང་མེད་ལ་རྟག་པར་དགའ། །དེ་ནི་རྟག་ཏུ་འདོད་པ་ཆུང་། །ཚོགས་གཉིས་ཡང་དག་བསགས་པའོ། །དེ་ནི་བླ་མར་སངས་རྒྱས་དང་། །རྡོ་རྗེ་འཛིན་པ་ཀུན་གྱིས་གསུངས། །ཞེས་སོ། །ལེའུ་བཅུ་བཞི་པ་སློབ་མའི་མཚན་ཉིད་ལས། །ཇི་ལྟར་འགའ་ཞིག་གྲུར་ཞུགས་པས། །སྐྱ་བ་འཛིན་པར་ལེགས་བསླབས་ན། །མཚོ་ཆེན་ཕ་རོལ་འགྲོ་འགྱུར་ཞིང་། །གཞན་དུ་ཕ་རོལ་འགྲོ་མི་འགྱུར། །དེ་བཞིན་བླ་མ་དཀོན་མཆོག་གསུམ། །བྱང་ཆུབ་སེམས་ལའང་དད་ལྡན་ཞིང་། །འཇིག་རྟེན་ལ་ནི་སྙིང་རྗེར་ལྡན། །འདི་ནི་གྲུ་ཞེས་བྱ་བར་བཤད། །བླ་མ་མཁས་པ་སྐྱ་བ་འཛིན། །གྲུ་ནི་ཐམས་ཅད་རབ་སྟོན་པ། །འཁོར་བའི་ཕ་རོལ་འགྲོ་རྣམས་ལ། །རྡོ་རྗེ་སེམས་དཔའ་གསུངས་པ་ཡིན། །སྐྱ་བ་འཛིན་པ་མེད་པར་ནི། །གྲུས་ཀྱང་ཕ་རོལ་བགྲོད་མི་ནུས། །ཡོན་ཏན་ཐམས་ཅད་རབ་རྟོགས་ཀྱང་། །བླ་མ་མེད་ན་སྲིད་མཐར་མིན། ཞེས་དང་། །ཤེས་རབ་དད་པར་ཡང་དག་ལྡན། །ཁྲོ་བ་མེད་ཅིང་བསླུ་བ་མེད། །གཏོང་སོགས་ཡོན་ཏན་རྣམས་ཀྱིས་བརྒྱན། །སྤྲོ་ཆེན་རང་གི་བརྩོན་འགྲུས་ལྡན། །རྟག་ཏུ་བླ་མའི་བཀའ་བཞིན་བྱེད། །མ་བསྒོས་པར་ཡང་རང་གི་བློས། །ཡོ་བྱད་ལ་སོགས་དངོས་པོ་རྣམས། །ཅི་སྙེད་པ་དང་ཅི་ནུས་དང་། །དེ་བཞིན་བཟའ་དང་བཅའ་སོགས་དབུལ། །ཇི་ལྟར་བརྙས་པར་གྱུར་ཀྱང་ནི། །ཡིད་ནི་ཞུམ་པ་མེད་པར་བཟོད། །ལུང་དང་རིགས་པ་རྟོགས་པ་པོ། །སློབ་མ་ཡོན་ཏན་ཀུན་ལྡན་ཡིན། །མི་རྟོག་པ་ཡི་རང་བཞིན་ཅན། །གང་ལའང་འདྲི་བ་མེད་པ་ནི། །སློབ་མར་བྱ་བ་མི་ནུས་ཞེས། །སངས་རྒྱས་ཉིད་ཀྱིས་རབ་ཏུ་གསུངས། །ཞེས་དང་། སྔར་གྱི་ལེའུ་བཅུ་གསུམ་པར། གང་གཞན་བླ་མར་བཤད་པ་དག །ལོག་ཤེས་མངོན་པའི་ང་རྒྱལ་ཅན། །ཆགས་སོགས་དོན་གཉེར་ཆོས་རྣམས་ནི། །མཆོག་དག་སྟོན་པར་བྱེད་འགྱུར་བ། །འགྲོ་བའི་སྡིག་པའི་གྲོགས་པོ་རུ། །འཇིག་རྟེན་ན་དེ་རབ་ཏུ་གནས། །ཞེས་གསུངས། ལེའུ་བཅོ་ལྔ་པ་དེ་ཁོ་ན་ཉིད་ཡི་གེའི་ཚོགས་ངེས་པར་བསྟན་པ་ལས། ཐོག་མ་དང་ཐ་མ་མེད་ཅེས་པ་ནི་སྐྱེ་བ་དང་འཇིག་པ་མེད་པ་སྟེ། འདིས་ནི་ཁྱབ་པ་ཉིད་དང་། གཟུགས་ཅན་མ་ཡིན་པ་ཉིད་དང་། མི་འགྱུར་བ་ཉིད་དང་། དུས་ཐམས་ཅད་པ་ཉིད་དུ་ཡང་སྟོན་ཏེ། ཞེས་དང་། ཞི་བ་ཞེས་བྱ་བ་ནི་ཉོན་མོངས་པ་ཐམས་ཅད་གློ་བུར་བ་ཡིན་པའི་ཕྱིར་རབ་ཏུ་ཞི་བའོ། །ཞེས་དང་། འདུས་པ་ལས་ལུང་དྲངས་པ། ཆོས་རྣམས་རང་བཞིན་འོད་གསལ་བ། །གཟོད་ནས་དག་པ་མཁའ་དང་མཚུངས། །བྱང་ཆུབ་མེད་ཅིང་རྟོག་པའང་མེད། །བྱང་ཆུབ་ཚུལ་འདི་སྟོན་པའོ། །ཞེས་དང་། ལེའུ་བཅུ་པ་ལས། ལུས་ངག་སེམས་རྣམས་བསྒོམ་པ་ནི། །རྣམ་པར་མི་རྟོག་མི་དམིགས་པ། །གང་ལའང་མི་གནས་མཉམ་པ་ཉིད། །སྐུ་གསུང་ཐུགས་ཀྱི་རྡོ་རྗེ་བསྒོམ། །ལེའུ་བཅུ་གཉིས་པ་ལས། ནམ་མཁའི་ཁམས་དང་མཉམ་གྱུར་ཅིང་། །རྣམ་པར་མི་རྟོག་ངོ་བོ་ཉིད། །རང་བཞིན་དག་པའི་ཆོས་རྣམས་ལ། །རོལ་མོ་འདི་དག་རབ་ཏུ་བསྒོམ། །ལེའུ་བཅུ་དྲུག་པ་ལས། རྡོ་རྗེའི་ཐིག་ནི་གདབ་པ་དང་། །མཚོན་རྩི་དག་ཀྱང་དགྱེ་བ་ནི། །སྔགས་ཀྱི་སེམས་དཔས་མི་བྱ་སྟེ། །བྱས་ན་བྱང་ཆུབ་རྙེད་དཀའོ། །ཞེས་སོགས་དང་། གཉིས་མེད་རྣམ་རྒྱལ་ལས་དྲངས་པ། ལེའུ་བཅུ་གསུམ་པ་ལས། སངས་རྒྱས་ཀུན་གྱི་དཀྱིལ་འཁོར་ནི། །དེ་ཉིད་ཤེས་པའི་དཀྱིལ་འཁོར་ཏེ། །འདི་ནི་དེ་ཉིད་གྲུབ་པ་ཡིན། །ཡིད་བཞིན་ནོར་བུ་ལྟ་བུར་བཤད། །ཅེས་དང་། ཟླ་གསང་ཐིག་ལེ་ནོར་བུའི་རྒྱུད་ལས། །ཡན་ལག་ཀུན་བསྒོམ་ལས་འདས་ཤིང་། །རྟོག་དང་བརྟག་བྱ་རྣམ་པར་སྤངས། །གུག་སྐྱེད་ཐིག་ལེ་ཡང་དག་འདས། །འདི་ནི་དཀྱིལ་འཁོར་དམ་པ་ཡིན། །ཞེས་སོགས་དང་། སྒྱུ་འཕྲུལ་དྲྭ་བའི་ལེའུ་བདུན་པ་བྱང་ཆུབ་སེམས་ཀྱི་ལེའུ་ལས་དྲངས་པར། ཆོས་རྣམས་རང་བཞིན་འོད་གསལ་བས། །གཟོད་ནས་དག་ཅིང་རྙོག་པ་མེད། །སེམས་ཅན་མེད་ཅིང་སྲོག་ཀྱང་མེད། །སངས་རྒྱས་ཉིད་དང་བྱང་ཆུབ་སེམས། །ཞེས་དང་། དཔལ་རྡོ་རྗེ་དཀྱིལ་འཁོར་གྱི་རྒྱན་ལས་དྲངས་པ། དཔེར་ན་མེ་ཏོག་ལ་དྲི་དང་། །དཔེར་ན་ཞོ་ལ་མར་སར་བཞིན། །ཀུན་ཏུ་སེམས་ཅན་ཐམས་ཅད་དང་། །རྒྱུ་བ་དང་ནི་མི་རྒྱུ་བ། །གཟུགས་དང་གཟུགས་མེད་རྟོག་པ་ལ། །ཕྱག་རྒྱ་ཆེན་པོ་རབ་ཏུ་གནས། །ཞེས་དང་། ཡང་། ཡེ་ཤེས་འདི་ནི་མི་འཇིག་པ་དང་། མི་ཟད་པ་དང་། མི་གཡོ་བ་དང་། གཟོད་མ་ནས་དག་པ་དང་། །དྲི་མ་མེད་པ་དང་། འོད་གསལ་བ་དང་། བརྗོད་དུ་མེད་པའོ། །ཞེས་སོ། །ལེའུ་བཅུ་དྲུག་པ་ཐབས་ངེས་པར་བསྟན་པ་ལས། དེ་ལྟར་ཤེས་མཆོག་ཐབས་དང་ནི། །བཅས་པར་ཡང་དག་བསྒོམ་པར་ནི། །ཤིན་ཏུ་དྲག་པོའི་བདག་ཉིད་ཅན། །སྐྱེ་བ་གཅིག་གིས་འགྲུབ་པར་འགྱུར། །ཞེས་སོ། །ལེའུ་བཅུ་བདུན་པ་དབང་བསྐུར་བའི་ཆོ་གའི་ལེའུར། ཐུགས་རྗེའི་བདག་ཉིད་བཀའ་དྲིན་གྱིས། །ཡང་དག་ཡེ་ཤེས་མཆོག་ཐོབ་སྟེ། །རང་རིག་པ་ཡི་ངོ་བོ་ལ། །བདག་ནི་ཤིན་ཏུ་ངོ་མཚར་སྐྱེས། །ཞེས་སོ། །ལེའུ་བཅོ་བརྒྱད་པ་དབང་པོ་མཆོག་ལེགས་པར་སྤྱོད་པའི་རིམ་པར། །སངས་རྒྱས་ཞིང་ནི་མ་ལུས་པར། །སངས་རྒྱས་སྤྲུལ་པ་སྒྲུབ་པར་བྱེད། །སངས་རྒྱས་སྤྲུལ་པ་སྒྱུ་མ་ཡིས། །སངས་རྒྱས་རྣམས་ཀྱི་མཛད་པ་སྟོན། ཞེས་སོ། །ལེའུ་བཅུ་དགུ་པ་དབང་པོ་འབྲིང་བསྟན་པར། །རྣམ་པ་ཀུན་མཆོག་ལྡན་པ་ཡི། །རང་གི་ལྷ་ཡི་སྐད་ཅིག་གིས། །བསྐྱེད་ལ་སྔོན་བཞིན་རྣལ་འབྱོར་པས། །ལམ་ལ་གནས་ཏེ་བཟླས་བརྗོད་རྩོམ། །ཞེས་སོ། །ལེའུ་ཉི་ཤུ་པ་དབང་པོ་ཐ་མ་བསྟན་པར། །ཕྱག་རྒྱའི་དཀྱིལ་འཁོར་སྐུ་མདོག་སོགས། །ཕྱག་དང་གདན་ནི་རྣམ་སྒོམ་དང་། །ཏིང་འཛིན་གསུམ་དང་ཕྱག་རྒྱ་བཞི། །ཞལ་གསུམ་དང་ནི་ཕྱག་དྲུག་རྣམས། །སྒོམ་འགྱུར་དེ་ནི་ཕྱི་ཤུན་བཅས། །སྣ་ཚོགས་སྤྲོས་པའི་མན་ངག་རྣམས། །དེ་ཀུན་དམན་པའི་ཡིན་པར་བཤད། །ཅེས་གསུངས་སོ། །གཞུང་འདི་སྔོན་རྒྱ་གར་གྱི་མཁན་པོ་དད་བྱེད་གོ་ཆ་དང་། ལོ་ཆེན་རིན་བཟང་གིས་འགྱུར་ལ། །ཕྱིས་ནག་ཚོས་ཀྱང་བཅོས་པ་སྟེ། །དེ་ཉིད་ལས་ལུང་གི་དུམ་བུ་འགའ་ཞིག་ཕྱུང་བའོ། །གང་ཚེ་ཉི་གཞོན་ཐིགས་པ་དང་། །དཔྱིད་ཀྱི་དཔལ་མོ་མ་ཡིན་ཡང་། །བློ་ལྡན་དགའ་བའི་ཨུཏྤ་ལ། །འབྱེད་པའི་ངེས་དོན་གྲུབ་པའི་གཏམ། ཞེས་ཀྱང་སྨྲས་སོ། །ཤུ་བྷཾ།། །། ༈ གཉིས་སུ་མེད་པར་གྲུབ་པ་ཞེས་བྱ་བའི་སྒྲུབ་ཐབས་ལས། །དམ་བཅའ་དཀའ་ཐུབ་སྨྱུང་བ་དང་། །སྙིང་པོ་བསྒོམ་པར་སྨྲ་བ་ལས། །འདི་ཉིད་མེད་པར་གྱུར་ན་ནི། །བསྐལ་པ་འབུམ་ཕྲག་བརྒྱར་མི་འགྱུར། ཞེས་དང་། །ཐམས་ཅད་རིག་ནས་བྱུང་བ་ཡི། །བུད་མེད་དག་ལ་བརྟག་མི་བྱ། །དེ་ཉིད་བཅོམ་ལྡན་ཕ་རོལ་ཕྱིན། །ཀུན་རྫོབ་ཙམ་གྱི་གཟུགས་ཅན་ནོ། །ཚེས་གྲངས་སྐར་མ་མི་དགོས་ཏེ། །སྨྱུང་བར་ཡང་ནི་གནས་མི་བྱ། །གཉིས་མེད་ཡེ་ཤེས་ལྡན་པ་ཡིས། །བདེ་བར་གཤེགས་པའི་དངོས་གྲུབ་འགྱུར། །ཞེས་དང་། ཐམས་ཅད་སེམས་ཀྱི་ཆོས་ཉིད་ནི། །དངོས་པོ་མ་གྲུབ་བརྟག་དཀའ་བ། །དེ་ཉིད་སློབ་དཔོན་ཞལ་ལས་ནི། །ཐོབ་པར་འགྱུར་བ་ཐེ་ཚོམ་མེད། །ཅེས་གསུངས་སོ། །འདི་ནི་ཨུ་རྒྱན་ན་ཆེ་བའི་རྣལ་འབྱོར་མ་གདན་གྱིས་སྒྲུབ་པའི་ལྷའི་གནས་ནས་ཕྱུང་བ་བཅོམ་ལྡན་འདས་མ་ལཀྵྨཱིའི་ཞལ་སྔ་ནས་བྱུང་བ་ལས་བཏུས་པའོ།། །། ༈ དངོས་པོ་གསལ་བའི་རྗེས་འགྲོ་དེ་ཁོ་ན་ཉིད་གྲུབ་པ་ཞེས་རྣལ་འབྱོར་མ་ཙི་ཏོས་མཛད་པ་ལས། འགྲོ་བ་རྣམས་ཀྱི་བདེ་ཆེན་རྒྱལ་པོ་གཅིག་པུ་ཉིད། །རྒྱུ་རྣམས་དང་བྲལ་རྟག་ཏུ་འབྱུང་བར་འགྱུར་བ་སྟེ། །གང་ཞིག་གིས་ནི་ཉེ་བར་བརྗོད་པའི་དུས་དག་ཏུ། །ཐམས་ཅད་མཁྱེན་པའང་ཚིག་གིས་དབུལ་གྱུར་རྒྱལ་གྱུར་ཅིག །ཅེས་དང་། །སྐྱེ་བ་སྔ་མར་བྱས་པའི་ལས་ཀྱི་རྒྱུ་ལས་ནི། །སེམས་དེ་འདི་རུ་སྐྱེ་བ་ཡོངས་སུ་ལེན་ཅིང་འགྲོ། །དེ་ཡི་རྒྱུ་ཡིས་མ་ལུས་འདི་དག་ཐམས་ཅད་ནི། །བག་ཆགས་བཅས་པའི་སེམས་ཀྱིས་ཉེ་བར་བརྩམ་པར་འགྱུར། །ཞེས་གསུངས་ཤིང་། འདི་ཉིད་ཞི་བཟང་དང་། འགོས་ཀྱིས་བསྒྱུར་པའོ།། །། ༈ ཌོམྦྷི་ཧེ་རུ་ཀས་མཛད་པའི་ལྷན་ཅིག་སྐྱེས་གྲུབ་ལས། །ལེའུ་དང་པོར་ལྷན་ཅིག་སྐྱེས་པ་བསྟན་པ་ལས། །དགའ་བ་ཅུང་ཞིག་བདེ་བ་སྟེ། །རབ་དགའ་དེ་ལས་ལྷག་པ་ཡིན། །དགའ་བྲལ་དགའ་བ་ཆགས་བྲལ་ཏེ། །ལྷན་ཅིག་སྐྱེས་དགའ་ལྷག་མ་ཉིད། །དང་པོ་རིག་པར་འདོད་པ་སྟེ། །གཉིས་པ་བདེ་བར་འདོད་པ་ཡིན། །གསུམ་པ་ཆག་པ་མཉམ་ཉིད་ཕྱིར། །བཞི་པ་དེར་ནི་བསྒོམ་བྱ་ཡིན། །དང་པོ་ཤེས་རབ་དྲོ་བ་སྟེ། །གཉིས་པ་དུ་བར་ལྡན་པ་ཡིན། །གསུམ་པ་མེ་སྟག་འཕྲོ་བ་སྟེ། །བཞི་པ་དེ་བཞིན་འབར་བ་ཡིན། །ཞེས་དང་། ལེའུ་གཉིས་པ་དེ་ཁོ་ན་ཉིད་བསྟན་པར། །གང་ཞིག་སྲིད་གསུམ་འགྱུར་བ་ཡི། །འགྲོ་ཀུན་ལྷན་ཅིག་སྐྱེས་པར་ལྡན། །འགྲོ་བའི་རང་བཞིན་གཞན་མི་སྣང་། །ཐམས་ཅད་དེ་ཉིད་ཀྱིས་ཁྱབ་ཡིན། །ཞེས་སོ། །ལེའུ་གསུམ་པ་སྤྱོད་པའི་དེ་ཁོ་ན་ཉིད་བསྟན་པར། །སོ་སོ་རང་རིག་བདེ་ཆེན་པོ། །གང་གིས་སོ་སོ་རང་རིག་བསྒོམ། །རང་གི་དངོས་གྲུབ་འབྱུང་བར་འགྱུར། །ཞེས་སོ།། །། ༈ ཨོ་རྒྱན་གྱི་ས་སྤྱོད་དབང་པོའི་བློས་མཛད་པའི་ལྷན་ཅིག་སྐྱེས་གྲུབ་ལས། །རྟོག་དང་བྲལ་ཞིང་མངོན་སུམ་པ། །རྒྱལ་བས་ཡིད་ནི་ནང་གནས་གསུངས། །རྟག་དང་ཆད་པ་བྲལ་བ་ཉིད། །མཚོན་དང་མཚན་གཞི་སྤངས་པ་ཉིད། །ཅེས་དང་། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མཆོག་ཏུ་མི་འགྱུར་བ། །དེ་ཉིད་ཀུན་ལ་ཁྱབ་པ་ཡི། །ལུས་ཀུན་ལ་ནི་རྣམ་པར་གནས། །ཞེས་དང་། བདག་ཏུ་འཛིན་པའི་མཐར་གནས་པ། །གླེན་པ་རྨོངས་པས་མི་ཤེས་སོ། །མཆོག་གི་གོ་འཕང་མི་ཤེས་ཕྱིར། །རྨོངས་པ་ཐམས་ཅད་ཉོན་མོངས་འགྱུར། །བསྐལ་པ་གསུམ་དུ་གདུང་བྱས་ལ། །བདག་ཉིད་གཅིག་པུ་འདུལ་བའོ། །རྣམ་པ་ཀུན་ཏུ་འདི་དག་མིན། །ཉན་ཐོས་པ་ཡི་བྱང་ཆུབ་འདོད། །དབུ་མའི་འདོད་ལུགས་གཞུང་གི་ཚུལ། །དེ་ནི་རྩོད་པ་ཀུན་ལ་མོས། །བསྐལ་པའི་ཡལ་གར་ངལ་བྱས་ཀྱང་། །དེ་ཡིས་ཀུན་ནས་མི་ཤེས་སོ། །ཐེག་ཆེན་ཤིན་ཏུ་ཡངས་པ་ལ། །རྒྱལ་བ་མཆོག་གིས་སྔོན་གསུངས་པ། །འདི་ལྟར་གཅིག་པུ་ཉིད་ཀྱིས་ནི། །ཡང་དག་རྫོགས་པའི་བྱང་ཆུབ་མཆོག །ཅེས་དང་། །ཁ་ཅིག་དངོས་གྲུབ་དབང་གཉིས་སྐྱེས། །བྱིས་པ་ཡུན་རིང་རྒན་སོགས་ཀྱིས། །འབད་པ་ཡིས་ནི་ཐོབ་མི་འགྱུར། །ཞེས་སོགས་ལྷན་སྐྱེས་འདོད་པ་གཞན་ཐམས་ཅད་བཀག་ཅིང་། བྱིས་པའི་བརྗོད་པ་དག་དང་བྲལ། །བརྗོད་བྱ་རྗོད་བྱེད་སྤངས་པ་ཉིད། །ལྷན་ཅིག་སྐྱེས་པ་དེ་ལྟ་བུར། །བླ་མ་མཆོག་གིས་སྔོན་དུ་གསུངས། །ཞེས་དང་། །ཟ་བའམ་ནི་འཁྲིག་པ་ན། །གནས་སྐབས་ཀུན་ལ་ཐམས་ཅད་དུ། །གསང་བ་མེད་ཅིང་འཇིག་པ་སྤངས། །ཡེ་ཤེས་ཆེན་པོ་རང་གིས་རིག །ཅེས་གསུངས་སོ། །གཞུང་འདི་ཟླ་བའི་མགོན་པོ་དང་། །པྲཛྙཱ་ཀཱིརྟྟིས་བསྒྱུར་བ་སྟེ། །ཉེར་མཁོའི་དུམ་བུ་ཅུང་ཟད་ཙམ་མོ། །འདི་ལ་གཞུང་མཛད་པ་པོ་རྒྱལ་པོ་ཨིནྡྲ་བྷཱུ་ཏི་རང་གི་བླ་མར་གྱུར་པའི་ལྷ་ལྕམ་ལཀྵྨཱིའམ་དཔལ་མོས་མཛད་པའི་འགྲེལ་པ་ཉུང་ངུ་རྣམ་གསལ་ཞིག་བཞུགས་འདུག་གོ། །། ༈ སློབ་དཔོན་ཆེན་པོ་ཀེར་ལི་པས་མཛད་པའི་དེ་ཁོ་ན་ཉིད་གྲུབ་པར། དཔེར་ན་དུག་གི་དེ་ཉིད་ཤེས། །དུག་ཟོས་ཀྱང་ནི་གནོད་མི་འགྱུར། །དེ་བཞིན་ཡུལ་གྱི་དེ་ཉིད་ཤེས། །འདོད་པ་སྤྱོད་པས་གནོད་པ་མེད། །ཅེས་དང་། ཇི་ལྟར་འདམ་གྱི་པདྨ་ནི། །འདམ་ལ་གནས་ཀྱང་དེས་མི་གོས། །དེ་ཉིད་རིག་པས་རྟག་ཏུ་ནི། །འདོད་པ་རོལ་པས་སྤྱད་པར་བྱ། །ཞེས་དང་། །དེ་ཕྱིར་དངོས་གྲུབ་མཆོག་གཉེར་ན། །དཀའ་ཐུབ་བརྟུལ་ཞུགས་སྤྱད་མི་བྱ། །ཇི་ལྟར་བདེ་བ་དེ་བཞིན་མནོས། །བདེ་བ་སྤངས་ན་དངོས་གྲུབ་མེད། །ཅེས་དང་། །མི་གཡོ་སྒྲིབ་བྲལ་ཕྲ་བ་ཡི། །ཐིག་ལེའི་གཟུགས་ཅན་རྟོག་པ་མེད། །ཐོག་མཐའ་མེད་པའི་དེ་ཉིད་ནི། །མ་བྱུང་མ་བྱས་མཆོག་ཡིན་ནོ། །ཞེས་དང་། །རྒྱུ་ལ་འབྲས་བུས་རྒྱས་གདབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །རྒྱུ་འབྲས་གཅིག་ཏུ་རྒྱས་གདབ་པས། །ཕྱག་རྒྱ་ཆེན་པོ་སྐྱེ་བར་འགྱུར། །ཞེས་སོགས་གསུངས་སོ། །དེ་ལྟར་རྒྱུད་སྡེ་སྤྱིའི་དགོངས་འགྲེལ་དུ་གྱུར་ཅིང་། ལྷན་ཅིག་སྐྱེས་པ་གཙོ་བོར་སྟོན་པའི་བསྟན་བཅོས། འཕགས་ཡུལ་གྱི་རྣལ་འབྱོར་མཆོག་རྣམས་ཀྱི་དགོངས་བཅུད་སྙིང་པོར་དྲིལ་བ། གྲུབ་པ་སྡེ་བརྒྱད་ལས། རང་དང་གཞན་དག་གི་ཆེད་དུ་ལུང་གི་དུམ་བུ་ཅུང་ཟད་ཙམ་བཏུས་པ་སྟེ་དཔལ་ཨེ་ཝཾ་ཆོས་ལྡན་གྱི་རི་ཁྲོད་དུའོ། །ཇི་ལྟར་སྦྲང་རྩིའི་དོག་པས་བརླན་གྱུར་པདྨའི་ནགས། །མཐོང་བས་དགའ་བའི་རཿཡིག་གཉིས་པ་ཇི་བཞིན་དུ། །ངེས་དོན་གཞུང་བཟང་དྲི་མེད་སྙིང་ལ་བཟུང་བའི་ཚེ། །ཚུལ་འདི་མཐོང་ནས་རང་གཞན་དོན་དུ་ཉེ་བར་བསྡུས། ཤུ་བྷ་སིདྡྷྱནྟུ།། །། ༈ སློབ་དཔོན་ཀླུ་སྒྲུབ་ཀྱིས་མཛད་པའི་ཕྱག་རྒྱ་བཞི་གཏན་ལ་དབབ་པ་ལས། དེ་ལ་ལས་ཀྱི་ཕྱག་རྒྱ་བརྟག་པར་བྱ་སྟེ། ལས་ཀྱི་ལུས་དང་། ངག་དང་། ཡིད་ཀྱི་བསམ་པ་སྟེ་གཙོ་བའོ། །ཕྱག་རྒྱ་ནི་བརྟག་པའི་རང་བཞིན་ཡིན་ནོ། །ལས་ཀྱི་ཕྱག་རྒྱ་དེ་ལ་ཡང་སྐད་ཅིག་མའི་དབྱེ་བས་དགའ་བ་བཞི་དག་སྐྱེ་བར་འགྱུར་རོ། །སྐད་ཅིག་ཤེས་པའི་དེས་ཡེ་ཤེས། །ཨེ་ཝཾ་ལ་ནི་རབ་ཏུ་གནས། །ཞེས་དང་། ཡང་ཆོས་ཀྱི་ཕྱག་རྒྱ་མ་ཤེས་པར་ལས་ཀྱི་ཕྱག་རྒྱ་བཅོས་མ་འབའ་ཞིག་ལས་ལྷན་ཅིག་སྐྱེས་པའི་རང་བཞིན་བཅོས་མ་མ་ཡིན་པ་ཇི་ལྟར་འགྱུར་ཞིང་སྐྱེ་བར་འགྱུར། རིགས་མཐུན་པའི་རྒྱུ་ལས་རིགས་མཐུན་པའི་འབྲས་བུ་སྐྱེ་བར་འགྱུར་གྱི་རིགས་མི་མཐུན་པ་ལས་ནི་མ་ཡིན་ནོ། །ཇི་ལྟར་འབྲས་སཱ་ལུའི་ས་བོན་ལས་སཱ་ལུའི་མྱུ་གུ་སྐྱེ་བར་འགྱུར་གྱི། དྲུག་ཅུ་པ་ལས་ནི་མ་ཡིན་ནོ། །དེ་བཞིན་དུ་མ་བཅོས་པའི་ཆོས་ཀྱི་ཕྱག་རྒྱའི་རང་བཞིན་ལས་མ་བཅོས་པའི་ལྷན་ཅིག་སྐྱེས་པ་འབྱུང་ངོ་། །ཞེས་དང་། སངས་རྒྱས་རིན་ཆེན་ཟ་མ་ཏོག །ཅེས་པའི་དོན་དུ། ཟ་མ་ཏོག་ནི་གནས་སམ་གཞིའོ། །ཞེས་བཀྲལ། ཡང་། ཨོཾ་ཆོས་ཀྱི་ཕྱག་རྒྱ་ནི། ཆོས་ཀྱི་དབྱིངས་ཀྱི་རང་བཞིན་ཏེ། སྤྲོས་པ་དང་བྲལ་བ། མི་རྟོག་པ། མ་བཅོས་པ། སྐྱེ་བ་དང་བྲལ་བ། སྙིང་རྗེའི་རང་བཞིན་མཆོག་ཏུ་དགའ་བས་གཅིག་ཏུ་མཛེས་པའི་ཐབས་སུ་འགྱུར་བ། རྒྱུན་གྱིས་རྟག་པ་ལྷན་ཅིག་སྐྱེས་པའི་རང་བཞིན་གྱི་ཤེས་རབ་དང་ལྷན་ཅིག་སྐྱེས་པ་ལས་འབྱུང་བ། དབྱེར་མེད་པ་གང་ཡིན་པ་དེ་ནི་ཆོས་ཀྱི་ཕྱག་རྒྱར་རིག་པར་བྱའོ། །ཞེས་དང་། ཆོས་ཀྱི་ཕྱག་རྒྱ་ནི་ཕྱག་རྒྱ་ཆེན་པོ་དབྱེར་མེད་པའི་རྒྱུར་གྱུར་པའོ། །ཞེས་དང་། ཨཱཿ ཕྱག་རྒྱ་ཆེན་པོ་ཞེས་བྱ་བ་ནི། ཕྱག་རྒྱ་ཡང་ཡིན་ལ་ཆེན་པོའང་ཡིན་པས་ཕྱག་རྒྱ་ཆེན་པོ་སྟེ། །རང་བཞིན་མེད་པ་ཉིད་ཤེས་བྱ་ལ་སོགས་པའི་སྒྲིབ་པ་སྤངས་པ། །སྟོན་ཀའི་ཉི་མ་ཕྱེད་ཀྱི་ནམ་མཁའ་ལྟར་དྲི་མ་མེད་པ། །ཕུན་སུམ་ཚོགས་པ་ཐམས་ཅད་ཀྱི་གཞིར་གྱུར་པ། །འཁོར་བ་དང་མྱ་ངན་གྱི་མཐའ་ལས་འདས་པས་གཅིག་པའི་རང་བཞིན། །དམིགས་པ་མེད་པའི་སྙིང་རྗེའི་ལུས་བདེ་བ་ཆེན་པོའི་རང་བཞིན་ནོ། །དེ་བཞིན་དུ་ཡིད་ལ་བྱེད་པ་མེད་པའི་ཆོས་དགེ་བའོ། །ཡིད་ལ་བྱེད་པའི་ཆོས་མི་དགེ་བའོ་ཞེས་གསུངས་པ་དང་། །ཀུན་ཏུ་རྟོག་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་བྱ་བ་གང་ཡིན་པ་ཕྱག་རྒྱ་ཆེན་པོར་རིག་པར་བྱའོ། །དེའི་ཕྱིར་ཕྱག་རྒྱ་ཆེན་པོ་བསམ་གྱིས་མི་ཁྱབ་པའི་རང་བཞིན་ལས། དམ་ཚིག་ཕྱག་རྒྱ་མཆོག་གི་འབྲས་བུ་སྐྱེ་བར་འགྱུར་རོ། །ཞེས་དང་། ཧཱུྃ། དམ་ཚིག་གི་ཕྱག་རྒྱ་ཞེས་བྱ་བ་ནི། ལོངས་སྤྱོད་རྫོགས་པ་དང་སྤྲུལ་པའི་སྐུའི་རྣམ་པའི་རང་བཞིན་དང་པོའི་ངོ་བོ་ཉིད་སེམས་ཅན་གྱི་དོན་གྱི་ཕྱིར་རྡོ་རྗེ་འཛིན་པ་ཧེ་རུ་ཀའི་རྣམ་པར་སྤྲོས་པ། དེ་ནི་དམ་ཚིག་གི་ཕྱག་རྒྱར་འདོད་དོ། །ཞེས་སོགས་གསུངས་སོ། །གཞུང་འདི་བླ་མ་དྷི་རི་ཤྲཱི་ཛྙཱ་ན་དང་། ལོ་ཙཱ་བ་རྨ་བན་ཆོས་འབར་གྱིས་བསྒྱུར་བ་ལས་སོ། །འདི་ལ་ཊཱི་ཀ་ཕྱག་རྒྱ་བཞིའི་འགྲེལ་པ་རིན་པོ་ཆེའི་སྙིང་པོ་ཞེས་བྱ་བ་རྒྱ་གར་གྱི་མཁན་པོ་བྷི་ཏ་ཀརྨས་མཛད་པ་ཤིན་ཏུ་ལེགས་པ་གཅིག་བཞུགས་སོ།། །། ༈ སློབ་དཔོན་དེ་བ་ཙནྡྲས་མཛད་པའི་ཤེས་རབ་ཡེ་ཤེས་གསལ་བ་ལས། དེ་བས་ན་འདོད་ཆགས་ཅན་གྱི་སེམས་ཅན་རྣམས་འདོད་ཆགས་བྲལ་བ་ལ་འཛུད། འདོད་ཆགས་བྲལ་བ་རྣམས་འདོད་ཆགས་བར་མ་ལའོ། །འདོད་ཆགས་བར་མ་རྣམས་འདོད་ཆགས་ཆེན་པོ་ལ་དགོད་དོ། །དེ་བས་ན་སེམས་ཅན་མཆོག་ཏུ་གྱུར་པའི་དབང་དུ་མཛད་ནས། བླ་ན་མེད་པ་ཤིན་ཏུ་ཟབ་མོའི་ཤེས་རབ་ཡེ་ཤེས་འདི་བསྟན་ནོ། །ཞེས་དང་། ཡེ་ཤེས་གྲུབ་པ་ལས་ཀྱང་། དཔེར་ན་བཅུད་ཀྱིས་ཕུག་པའི་ཟངས་མཛེས་པའི་གསེར་དུ་འགྱུར་བ་བཞིན། ཡེ་ཤེས་བཅུད་ཀྱིས་ཕུག་པ་ན། །ཉོན་མོངས་དགེ་བར་བྱེད་པ་ཡིན། །ཞེས་དང་། མ་སྐྱེས་པ་དང་། མི་འཛིན་པ་དང་། རང་བཞིན་མེད་པ་ཤེས་པ་ཤེས་རབ་ཅེས་བརྗོད་དོ། །ཞེས་དང་། དེ་ཁོ་ན་ཉིད་འཇུག་པ་ལས། གང་ཞིག་སྤྲོས་བཅས་ཀུན་གྱི་ཡུལ་མིན་པས། །དེ་ནི་ངག་གི་ཡུལ་ཡང་མ་ཡིན་ནོ། །རྡོ་རྗེ་འཛིན་པས་རིག་པ་དེ་ཉིད་ལ། །ཤེས་རབ་ཅེས་བྱར་ཡོངས་སུ་བསྒྲགས་པ་ཡིན། །ཞེས་གསུངས་སོ། །དེ་ཉིད་ཀྱི་ཕྱིར། རྟེན་ཅིང་འབྲེལ་བར་འབྱུང་བའི་སེམས་སྣ་ཚོགས་པ་བདེ་བ་ཆེན་པོ་རང་རིག་པ་ཙམ་སྟེ། དམིགས་པ་མེད་པའི་སྙིང་རྗེ་ཆེན་པོ་ཞེས་བྱ་བ། མིང་གཞན་པ་ཅན་གྱི་ཡེ་ཤེས་ཡིན་ནོ། །ཤེས་རབ་ཀྱང་དེ་ཡིན་ལ་ཡེ་ཤེས་ཀྱང་དེ་ཡིན་པས་ཚིག་བསྡུས་པའོ། །ཞེས་དང་། དེ་ཡང་ཁོ་བོའི་བླ་མའི་ཞལ་སྔ་ནས། །ཕྱག་རྒྱ་ཆེན་པོ་མི་ཤེས་པར། །ལས་ཀྱི་ཕྱག་རྒྱ་གཅིག་བསྒྲུབས་པ། དེ་ཉིད་བརྒྱུད་པ་ལས་ཉམས་ནས། །རྣལ་འབྱོར་པ་དེ་ངུ་འབོད་འགྲོ། །ཞེས་གསུངས་སོ། ཞེས་དང་། །བླ་མ་དམ་པའི་མན་ངག་འདི་ཡང་། །ལས་ཀྱི་ཕྱག་རྒྱ་ལེགས་བསྒྲུབས་ནས། །ཆོས་ཀྱི་ཕྱག་རྒྱ་རྣམ་པར་བསྒོམས། །དེ་སྟེང་ཕྱག་རྒྱ་ཆེན་པོ་སྟེ། །གང་ལས་དམ་ཚིག་འབྱུང་བའོ། །ཞེས་གསུངས་སོ། །ཞེས་དང་། ལས་ཀྱི་ཕྱག་རྒྱ་རྣམ་སྣ་ཚོགས། །རྣམ་སྨིན་ལས་བྱུང་ཆོས་ཕྱག་རྒྱ། །མཚན་ཉིད་བྲལ་བ་ཕྱག་རྒྱ་ཆེ། །རྣམ་ཉིད་དམ་ཚིག་ཕྱག་རྒྱ་ཡིན། །ཞེས་དང་། དེ་ལྟ་བས་ན་མཆོག་དགའ་དང་དགའ་བྲལ་གྱི་དབུས་ན་གནས་པ། བཙན་ཐབས་དང་ལོག་པའི་དབང་སྤངས་པ། འདོད་ཆགས་དང་འདོད་ཆགས་བྲལ་བས་དབེན་པའི་སྟོང་ཉིད་དང་། སྙིང་རྗེ་དབྱེར་མེད་པའི་ལྷན་ཅིག་སྐྱེས་པ་དེ་བླ་མ་དམ་པའི་ཞལ་ནས་ཉམས་སུ་མྱོང་བ་ལས་ཁོང་དུ་ཆུད་པར་བྱའོ། །ཞེས་དང་། དེ་ནས་ཡང་ཕ་རོལ་ཏུ་ཕྱིན་པའི་ཐེག་པ་རྣམས་ཀྱི་གྲུབ་མཐའ་ནི་འདི་ཡིན་ཏེ། གང་དག་བསྐལ་པ་གྲངས་མེད་པར་རྫོགས་པའི་སངས་རྒྱས་སུ་འགྱུར་རོ། །སྔགས་ཀྱི་ཚུལ་ནི་ཚེ་འདི་ལ་སངས་རྒྱས་སམ་རྡོ་རྗེ་སེམས་དཔར་འགྱུར་རོ། །ཞེས་རྟོག་པ་རྣམས་ཡན་ལག་བདུན་དང་ལྡན་པའི་བསྒྲུབ་བྱར་འདོད་དེ། ཞེས་དང་། ཡན་ལག་བདུན་དང་ལྡན་པ་སྟོང་ཉིད་དང་སྙིང་རྗེ་དབྱེར་མེད་པའི་ཡེ་ཤེས་ལ་འཐད་པར་འགྱུར་ཏེ། འདི་ལྟར་ལོངས་སྤྱོད་རྫོགས་པ་སྟེ་ཉམས་སུ་མྱོང་བ་རྟེན་ཅིང་འབྲེལ་བར་འབྱུང་བ་ལས་རྣམ་པ་ཐམས་ཅད་དུ་སྣང་བ་ཡིན་ནོ། །ཁ་སྦྱོར་ནི་སྟོང་པ་ཉིད་དང་སྙིང་རྗེ་དབྱེར་མེད་པར་ཡང་དག་པར་སྦྱོར་བའི་ཕྱིར་རོ། །བདེ་བ་ཆེན་པོ་ནི་ཡོད་པ་དང་མེད་པ་ལ་སོགས་པའི་རྟོག་པ་ཐམས་ཅད་སྤངས་པའི་ཕྱིར་རོ། །རང་བཞིན་མེད་པ་ནི་སྐྱེ་བ་མེད་པའོ། །སྙིང་རྗེས་ངེས་པར་གང་བ་ནི་སྙིང་རྗེ་ཆེན་པོའི་བདག་ཉིད་ཡིན་པའི་ཕྱིར་རོ། །རྒྱུན་མི་འཆད་པ་ནི་རྒྱུན་གྱིས་རྟག་པ་ཡིན་པའི་ཕྱིར་རོ། །འགག་པ་མེད་པ་ནི་ཆད་པ་མེད་པ་ཡིན་པའི་ཕྱིར་རོ། །ལས་ཀྱི་ཡན་ལག་མའི་ཡེ་ཤེས་ལ་ནི་ཁྱད་པར་ཅན་དུ་གྱུར་པ་དེ་དག་ཡོད་པ་མ་ཡིན་ནོ། །ཞེས་སོགས་ཕར་ཕྱིན་སྔགས་ཀྱི་བསྒྲུབ་བྱ་མཚུངས་པའི་ཕྱོགས་སྔ་བཀོད་ནས། སླར་དེ་ཉིད་འགེགས་པའི་ལུང་རིག་རྒྱས་པ་དང་། ཡང་། དོན་གཅིག་ན་ཡང་མ་རྨོངས་དང་། སོགས་ལའང་དེ་མཚུངས་ཀྱི་ཕྱོགས་སྔ་དགོད་པ་དང་། དེ་འགོག་པ་བཅས་གསལ་བར་ཡོད་དོ། །ཡང་། ལས་ཀྱི་ཕྱག་རྒྱ་དང་བྲལ་ན། །ཕྱག་རྒྱ་ཆེན་པོ་ཡོད་མ་ཡིན། ཞེས་དང་། ཡང་། དབང་པོ་གཉིས་སྙོམས་པར་འཇུག་པ་མེད་པར་བདེ་བའི་རྣམ་པ་ཅན་ཉིད་མི་རྟོགས་པའི་ཕྱིར་རོ། །དེ་མེད་པར་ནི་བདེ་བ་ཆེན་པོའི་ངོ་བོ་ཉིད་ཅན་གྱི་ལོངས་སྤྱོད་པའི་སྐུ་འགྲུབ་པར་མི་འགྱུར་བ་ཉིད་དེ། ཞེས་དང་། དེ་ལྟར་བསྐྱེད་པའི་རིམ་པ་དང་མི་འགལ་བར་རང་བྱིན་བརླབས་པ་བསྒོམས་ནས། སྣ་ཚོགས་ཉིད་ལྷའི་བདག་ཉིད་ཀྱི་དཀྱིལ་འཁོར་འཁོར་ལོའི་ལྷན་ཅིག་སྐྱེས་པ་གྲུབ་པ་ཡིན་ཏེ། དེ་སྐད་དུའང་ཀླུ་སྒྲུབ་ཀྱིས། འདི་ནི་གཞལ་ཡས་ཁང་མིན་ཁམས་གསུམ་པོ་མིན་ཡུལ་མིན་དབང་པོ་འབྱུང་བ་མིན། །གཟུགས་ལ་སོགས་པ་མ་ཡིན་སྲོག་ཆགས་མིན་ཞིང་མི་མིན་འདི་ནི་རྒྱལ་བ་སྟེ། །འཁོར་ལོ་གཙོ་བོ་ཆོས་ཉིད་བདག་ཉིད་ཡིན་ཏེ་དེས་ནི་དཀྱིལ་འཁོར་མ་ཡིན་ལ། །ཁམས་གསུམ་པོ་འདི་སྣ་ཚོགས་འཁོར་ལོར་ཤེས་ན་སེམས་ནི་ཅི་སྟེ་འཁྲུལ་བར་བྱེད། །ཅེས་གསུངས་པ་ལ་དགྱེས་པ་རྡོ་རྗེ་ལས་ཀྱང་། སྔགས་བཟླས་མེད་ཅིང་དཀའ་ཐུབ་སྦྱིན་སྲེག་མེད། །དཀྱིལ་འཁོར་པ་མེད་དཀྱིལ་འཁོར་ཉིད་ཀྱང་མེད། དེ་ནི་སྔགས་བཟླས་དཀའ་ཐུབ་སྦྱིན་སྲེག་དེ། །དེ་ཉིད་དཀྱིལ་འཁོར་པ་དང་དཀྱིལ་འཁོར་ཉིད། །མདོར་བསྡུས་སེམས་སུ་འདུས་པའི་ཚུལ་ཅན་ནོ། །ཞེས་དང་། དེ་ཁོ་ན་ཉིད་དེ་ཡང་རྒྱལ་བའི་དབང་པོས་ཕ་རོལ་ཏུ་ཕྱིན་པའི་ཐེག་པར་ལུང་དང་། རིགས་པ་དག་གིས་གསུངས་པའི་ཕྱིར་རོ། །འོ་ན་རང་རིག་པའི་སྒྲུབ་ཐབས་ཀྱི་དེ་ཁོ་ན་ཉིད་ནི། སྔགས་ཀྱི་ཚུལ་ལས་མངོན་དུ་བྱེད་པ་མ་ཡིན་ནམ། དེའི་ཕྱིར་དོན་གཅིག་ཡིན་ན་ཡང་བཅོམ་ལྡན་འདས་ཀྱིས་རྒྱུ་ཡི་བསྟན་བཅོས་ཞེས་ཕ་རོལ་ཏུ་ཕྱིན་པ་ལོགས་སུ་བསྟན་ཏོ། །རྡོ་རྗེ་ཐེག་པ་འདི་ནི་འབྲས་བུའི་བསྟན་བཅོས་ཏེ། འབྲས་བུ་སྟོན་པའི་ཕྱིར་རོ། །སྨྲ་མཁས་པས་གཉི་ག་ལ་རྨོངས་པ་མི་འབྱུང་ངོ་ཞེས་ཟེར་བ་དེ་ཡང་། གང་གི་ཕྱིར་དུག་གི་དེ་ཉིད་ཤེས་པས་དུག་དང་བསྲེས་ཏེ་བཟའ་བ་དང་། སྦྲུལ་གྱི་རྒྱན་བྱེད་པ་དང་། ཁ་ཅིག་དུག་གིས་མི་ཚུགས་པ་བཞིན་ནོ། །དོན་དམ་པ་དེ་རྟོགས་པ་ལས་གཞན་མེད་དོ་སྙམ་པའི་ཡིད་ཅན་ནི་རྨོངས་པར་མི་འགྱུར་རོ། །ཞེས་དང་། དེ་བཞིན་དུ་ཕ་རོལ་ཏུ་ཕྱིན་པས་ཀྱང་གང་དག་རྣམ་པ་སྣ་ཚོགས་པ་ལ་སོགས་པའི་སྐད་ཅིག་མ་བཞི་དང་ལྡན་པའི་དགའ་བ་བཞི་ཉམས་སུ་མྱོང་བ་དང་བྲལ་བའི་ཕྱིར། །མཚན་ཉིད་དང་བྲལ་བའི་སྐད་ཅིག་མ་མངོན་དུ་མ་གྱུར་པས། ལྷན་ཅིག་སྐྱེས་པའི་ངོ་བོ་ཉིད་མ་ཤེས་པར་མངོན་པར་བྱང་ཆུབ་པ་ཆེན་པོ་མངོན་སུམ་བྱེད་པར་མི་ནུས་ཀྱི། སྔགས་ཀྱི་ཐེག་པ་ནི་དེ་བཞིན་གཤེགས་པས་རྣམ་པར་དག་པས་སོ་སོ་སྐྱེ་བོའི་བག་ཆགས་དང་བྲལ་བའི་ཕྱིར་རོ། །ལྷའི་ང་རྒྱལ་དང་ལྡན་པའི་རྣལ་འབྱོར་དམ་ཚིག་ཐམས་ཅད་ལ་སྤྱོད་པས་རོ་མཉམ་པ་མངོན་དུ་བྱས་ནས། ཕྱག་རྒྱ་བཞི་ལ་སོགས་པའི་སྒྲུབ་ཐབས་ཀྱི་ཡན་ལག་བདུན་དང་ལྡན་པའི་ཡང་དག་པར་རྫོགས་པའི་སངས་རྒྱས་རང་རིག་པའི་མངོན་སུམ་ཚེ་འདི་ཉིད་ལ་མངོན་དུ་བྱེད་པའི་ཕྱིར། ལས་ཀྱི་ཕྱག་རྒྱ་ལ་སོགས་པའི་བདག་བྱིན་གྱིས་བརླབས་པ་ནི་ཐབས་མང་བའོ། །བཅོམ་ལྡན་འདས་ཀྱིས་ཀྱང་། ཐབས་གཞན་གྱིས་ནི་སངས་མི་རྒྱ། །ཞེས་གསུངས་སོ། །ཞེས་དང་། སངས་རྒྱས་ཐམས་ཅད་མཉམ་པར་སྦྱོར་བའི་རྒྱུད་ལས་ཀྱང་། །བསྐལ་པ་བྱེ་བ་གྲངས་མེད་ཀྱིས། །སངས་རྒྱས་ཀུན་དངོས་མི་ཐོབ་སྟེ། །ཕྱག་རྒྱའི་ཆོ་ག་འདི་ཡིས་ནི། །ཚེ་འདི་ཉིད་ལ་ཐོབ་པར་འགྱུར། །ཞེས་སོ། །དེའི་དགོངས་པ་ནི་འདི་ཡིན་ཏེ། གཞན་གང་གིས་ཀྱང་སངས་རྒྱས་ཙམ་ལས་ཡང་དག་པར་རྫོགས་པའི་སངས་རྒྱས་ཐོབ་པ་མ་ཡིན་ཏེ། ཕྱག་རྒྱ་ཆེན་པོ་བདེ་བའི་ངོ་བོ་ཉིད་ཀྱི་ཁ་སྦྱོར་བ་མེད་པའི་ཕྱིར་རོ། །ཞེས་དང་། དེས་ན་འདོད་ཆགས་ཆེན་པོའི་ཚུལ་འདིར་རྡོ་རྗེ་སེམས་དཔའ་གྲུབ་པར་བྱ་བའི་ཕྱིར་ཁ་སྦྱོར་བསྟན་པ་ཡིན་ནོ། །དེ་ཉིད་ཀྱི་ཕྱིར་སངས་རྒྱས་ཉིད་འདིར་ཁྱད་པར་ཡོད་པའི་ཕྱིར་རྡོ་རྗེ་འཆང་ཞེས་བྱའོ། །ཞེས་དང་། སྔགས་ཀྱི་ཐེག་པ་ནི་མཚམས་མེད་པ་ལྔ་བྱེད་པར་ཡང་རིགས་ལ་སོགས་པའི་རྐྱེན་དང་ལྡན་པ་དེ་ཡིས་དགེ་བའི་བཤེས་གཉེན་དམ་པ་བསྟེན་པ་ལས། ལས་ཀྱི་ཕྱག་རྒྱའི་ཐབས་ཀྱིས་ཇི་བཞིན་པའི་དོན་བསྒྲུབས་ནས། ཇི་བཞིན་པའི་མན་ངག་ཅན་སྡིག་པ་མི་དགེ་བའི་ལས་སྤངས་པ་དེས། དགེ་བའི་སྤྱོད་པ་དང་ཐབས་ལ་མཁས་པའི་ཁྱད་པར་གྱིས་སེ་གོལ་གཏོགས་པ་ཙམ་གྱིས་སྦྱིན་པ་ལ་སོགས་པ་བླ་ན་མེད་པའི་བསོད་ནམས་ཀྱི་ཚོགས་རྫོགས་ཏེ་ཚེ་འདི་ཉིད་ལ་སངས་རྒྱས་རྡོ་རྗེ་འཆང་ཉིད་ཐོབ་པར་འགྱུར་བ་ནི་ཁྱད་པར་རོ། །ཞེས་དང་། རྡོ་རྗེ་ཨཱ་ར་ལིའི་རྒྱུད་ལས་དྲངས་པ། །ཐེག་པ་ཆེན་པོ་འདི་ནི་འདི་ལྟ་བུ་སྟེ། །རྒྱུ་དང་འབྲས་བུའི་དངོས་པོ་ཕ་རོལ་ཏུ་ཕྱིན་པའི་ཐེག་པ་དང་། སྔགས་ཀྱི་ཐེག་པ་གཉིས་བསྟན་ནོ། །ཞེས་དང་། དེའི་ཕྱིར་གཙོ་བོ་མ་ཡིན་པར་འགྱུར་བའི་ཐབས་ཅུང་ཟད་ཙམ་གྱིས་ལས་ཀྱི་ཕྱག་རྒྱ་ལ་སོགས་པ་ཐབས་ཁྱད་པར་ཅན་དང་བྲལ་ནས། ཐབས་མང་ལ་གཉི་ག་ལ་མཚུངས་པ་མ་ཡིན་ནོ། །དེ་ཁོ་ན་དཀའ་བ་མེད་པར་གང་གིས་འདོད་པའི་ཡོན་ཏན་ལྔ་ལ་ལོངས་སྤྱོད་པ་ཉིད་ཀྱིས་དུས་མི་རིང་བར་རྡོ་རྗེ་འཆང་གི་ངོ་བོ་ཉིད་འབྲས་བུ་ཆེན་པོ་ཐོབ་པར་འགྱུར་བའི་ཕྱིར་རོ། །དཀའ་ཐུབ་བརྟུལ་ཞུགས་ཀྱིས་བརྟུལ་བས། །སྡུག་བསྔལ་གྱུར་ནས་ལུས་བསྐམས་ཤིང་། །སྡུག་བསྔལ་ཉིད་ཀྱིས་སེམས་གཡེང་སྟེ། །གཡེང་བས་བྱང་ཆུབ་གཞན་དུ་འགྱུར། །ཞེས་དང་། ཡང་། དབང་པོ་རྣོན་པོ་ནི་སྔགས་ཀྱི་ཐེག་པ་འདི་ལ་སོ་སོ་སྐྱེ་བོ་ཉིད་ཀྱིས་ཀྱང་སྔགས་ཀྱི་དེ་ཁོ་ན་ཉིད་རྟོགས་པར་ནུས་ཏེ། དགྱེས་པའི་རྡོ་རྗེ་དང་འཇམ་པའི་རྡོ་རྗེ་ལ་སོགས་པའི་ང་རྒྱལ་ལ་གནས་པས་སློབ་བཞིན་པའི་གནས་སྐབས་སུ་ཡང་། དེ་ལྟ་བུ་ལ་བསྟེན་པར་འགྱུར་བ་སྲིད་པའི་ཕྱིར། རྒྱུ་དང་འབྲས་བུ་འདུས་པར་བྱས་ནས་ཕྱིར་མི་ལྡོག་པར་ཐོབ་པར་འགྱུར་རོ། །གང་གི་ཕྱིར་ཕ་རོལ་ཏུ་ཕྱིན་པའི་ཐེག་པའི་རྗེས་སུ་འབྲང་བ་རྣམས་ནི། ས་བརྒྱད་པ་ལས་ཕྱིར་མི་ལྡོག་པ་སྟེ། དེ་སྐད་དུ། ཕྱི་ནས་ས་བརྒྱད་པ་ལ་ནི། །དོགས་པ་བཟློག་པར་འགྱུར་བ་ཡིན། །ཞེས་སོ། །དེ་ལ་སྔགས་ཀྱི་ཐེག་པ་ཆེན་པོ་བསྟན་པ་ནི་གཉིས་ཏེ། །བསྐྱེད་པའི་རིམ་པ་དང་རྫོགས་པའི་རིམ་པའོ། །བསྐྱེད་པའི་རིམ་པ་ལ་གཉིས་ཏེ། །ཕྱི་རོལ་བསྐྱེད་པའི་རིམ་པ་དང་། །ཟབ་མོ་བསྐྱེད་པའི་རིམ་པའོ། །རྫོགས་པའི་རིམ་པ་ལ་གསུམ་སྟེ། རྫོགས་པ་དང་། ཡོངས་སུ་གྲུབ་པ་དང་། ངོ་བོ་ཉིད་ཀྱི་རིམ་པའོ། །ཞེས་གསུངས། དང་པོ་ནི་བསྐྱེད་པའི་རིམ་པ་སྤྱི་དང་། ལྷག་མ་བཞི་ནི། ལས་དང་། ཆོས་དང་། དམ་ཚིག་དང་། ཕྱག་རྒྱ་ཆེན་པོ་བཞིར་སྦྱར་ནས་རྒྱས་པར་འཆད་སྣང་སྟེ་ཡི་གེའི་ངལ་བས་དེ་ཙམ་མོ། །གཞུང་འདི་བཛྲ་པཱ་ཎི་དང་། །དྷ་རྨ་ཀཱིརྟྟཱིས་བསྒྱུར་བ་སྟེ། །དེ་ལས་བཏུས་པའི་དུམ་བུ་ཅུང་ཟད་དོ། །ཤུ་བྷཾ།། །། ༈ གནས་པ་བསྡུས་པ་ཞེས་བྱ་བ་སློབ་དཔོན་ལྷན་སྐྱེས་རྡོ་རྗེས་མཛད་པ་ལས། །མདོ་སྡེ་བྱེ་བྲག་སྨྲ་ རྣམ་རིག །དབུ་མའི་རིམ་བཞིན་གསལ་བ་ཡི། །ཞེས་དང་། སྲིད་པ་སྡུག་བསྔལ་བདེན་པ་སྟེ། །དེ་ནི་འབྲས་བུར་ཤེས་པར་བྱ། །རྒྱུ་ནི་ཀུན་འབྱུང་བདེན་པ་སྟེ། །ལས་དང་ཉོན་མོངས་བདག་ཉིད་དོ། །བདེན་པ་དེ་གཉིས་ཟག་བཅས་ཏེ། །ཕྱི་མ་གཉིས་ནི་ཟག་པ་མེད། །ཅེས་དང་། རང་སངས་རྒྱས་ཀྱི་བསྒོམ་པ་ཡང་། །ལུང་བསྟན་པ་ལ་མི་ལྟོས་པར། །རང་གི་སྔོན་གྱི་སྨོན་ལམ་གྱིས། །དོན་མཐོང་བྱས་ནས་མྱ་ངན་འདའ། །ཞེས་དང་། ཡང་དག་རྫོགས་པའི་བྱང་ཆུབ་སེམས། །ཚོགས་མ་རྫོགས་ན་ཡོད་མ་ཡིན། །མངོན་དུ་བྱེད་པ་མི་བྱ་སྟེ། །བྱས་ན་ཐེག་པ་དམན་པར་འགྱུར། །ཞེས་དང་། སྣ་ཚོགས་གསལ་བ་དེ་ཉིད་ཀུན་ཏུ་བརྟགས་པ་སྡུག་བསྔལ་ཏེ། །ཀུན་འབྱུང་གི་ནི་བག་ཆགས་གཞན་གྱི་དབང་གི་རང་བཞིན་ནོ། །སྦྱིན་པ་ལ་སོགས་ལམ་ཉིད་ཡོངས་སུ་རྫོགས་པ་འགོག་པ་སྟེ། །རྫོགས་པར་ཡོངས་སུ་གྲུབ་པ་རྣམ་མེད་རྣམ་པར་རིག་པ་ཙམ། །ཞེས་དང་། ཤིན་ཏུའང་འགོག་པར་གྱུར་པ་ན། །དམ་པའི་རྣམ་ཐར་མངོན་སུམ་དོན། །ཞི་དང་སྡུག་བསྔལ་ཟད་པ་ཡིན། །འཕགས་ལམ་ཡན་ལག་བརྒྱད་དེ་ནི། །གོམས་པ་ངེས་པར་འབྱིན་པའི་མཆོག །ཅེས་དང་། དེ་བཞིན་ཉིད་དང་ཆོས་ཀྱི་དབྱིངས། །ཤེས་རབ་ཕ་རོལ་ཕྱིན་པའི་མཆོག །ཡང་དག་མཐའ་དང་སྐྱེ་བ་མེད། །མི་དམིགས་པ་དང་མྱ་ངན་འདས། །སྟོང་ཉིད་མཚན་མ་མེད་པ་དང་། །སྨོན་པ་མེད་དང་འདུས་མ་བྱས། །རྨི་ལམ་སྒྱུ་མ་ལ་སོགས་དཔེ། །དེ་ཉིད་རྒྱལ་བ་རྣམས་ཀྱིས་བསྒྲུབས། །ཞེས་དང་། གང་ཕྱིར་ཇི་ལྟར་མེ་ལོང་ནང་དུ་གཟུགས་བརྙན་མཐོང་། །རིགས་པས་བརྟགས་པའི་སྟོབས་ཀྱིས་དེ་མེད་དེ་མཐོང་མེད། །ཕྱི་ཡི་དོན་མེད་འདི་ཡང་མེད་དེ་རྣམ་པ་སྣ་ཚོགས་སེམས། །འོན་ཀྱང་རྟེན་འབྲེལ་དག་ལས་རིག་པས་འགལ་བ་མེད། །ཅེས་དང་། དེ་ཉིད་ཕ་རོལ་ཕྱིན་པའི་ཚུལ། །ཕྱག་རྒྱ་བཞི་ཡི་རང་བཞིན་ལུང་། །སྔགས་ཀྱི་ཚུལ་ལ་བརྟེན་ནས་སུ། །བླ་མའི་ཁྱད་པར་མྱོང་བ་ཡིན། །ཞེས་དང་། ཆགས་བྲལ་ལས་ནི་སྡིག་པ་མེད། །བདེ་བ་མཆོག་ལས་བསོད་ནམས་མེད། །དེ་ཕྱིར་མི་འགྱུར་བདེ་བའི་སེམས། །རྟག་ཏུ་དེར་གནས་མོས་པར་བྱ། །འཕོ་བ་ལས་ནི་ཆགས་བྲལ་འབྱུང་། །ཆགས་བྲལ་ལས་ནི་སྡུག་བསྔལ་འབྱུང་། །ཞེས་དང་། ཇི་ལྟར་ལྕགས་ནི་གསེར་གྱུར་ན། །ནམ་ཡང་ནག་པོར་འགྱུར་བ་མིན། །དེ་བཞིན་སེམས་ཉིད་རྟོགས་པ་ཡང་། །ནམ་ཡང་བག་ཆགས་འགྱུར་བ་མིན། །ཞེས་དང། ཐ་མས་བསྐྱེད་རིམ་བསྒོམ་པ་སྟེ། །ལས་ཀྱི་ཡན་ལག་དང་བྲལ་འབྲིང་། །རབ་ཀྱིས་ཀྱང་ནི་བསམ་བྱ་བ། །མྱུར་དུ་རྫོགས་པའི་དཀྱིལ་འཁོར་རོ། །ཞེས་སོགས་གྲུབ་མཐའ་བཞི་དང་། གསང་སྔགས་བཅས་པའི་རྣམ་གཞག་རྒྱ་ཆེར་སྣང་ངོ་། །འདི་སྔོན་ཆད་རྨ་ཆོས་འབར་དང་། ཕྱིས་མཚུར་ལོ་ཙཱ་བས་བསྒྱུར་བར་སྣང་ངོ་།། །། ༈ སློབ་དཔོན་ཏོག་རྩེ་བས་མཛད་པའི་བསམ་གྱིས་མི་ཁྱབ་པའི་རིམ་པ་ཞེས་བྱ་བར། གཉིས་མེད་ཡེ་ཤེས་རྣལ་འབྱོར་ཆེ། །བདེ་བ་ཆེན་པོ་གཅིག་ཉིད་དུ། །བརྟན་དང་གཡོ་བའི་དངོས་པོ་ཀུན། །གཉིས་སུ་མེད་པའི་རྣམ་སྤངས་པ། །ཞེས་དང་། གཉིས་མེད་བདེ་བ་ཆེན་པོ་ཉིད། །གང་ཡང་བསམ་མེད་རང་བཞིན་ཉིད། །སངས་རྒྱས་བློ་ཡི་སྤྱོད་ཡུལ་མིན། །ཐམས་ཅད་དེ་ཡི་རང་བཞིན་ཉིད། །ཅེས་དང་། །ཐབས་དང་ཤེས་རབ་རྣལ་འབྱོར་ཆེ། །རོ་གཅིག་གཉིས་སུ་མེད་པར་བརྗོད། །འདོད་ཆགས་འདོད་ཆགས་བྲལ་བ་སྤངས། །དབང་བསྐུར་དམིགས་པར་མི་འགྱུར་རོ། །ཞེས་དང་། སྤྲོས་པ་ཐམས་ཅད་རྣམ་བྲལ་ཞིང་། །ནམ་མཁའ་ལྟ་བུར་དྲི་མ་མེད། །རྟོག་པའི་དྲི་མ་རྣམ་གཅོད་ཅིང་། །བསམ་གྱིས་མི་ཁྱབ་གཉིས་མེད་མཆོག །ཅེས་དང་། མ་སྐྱེས་པ་དང་མི་འཇིག་པ། །མི་འགྱུར་བ་དང་མི་གནས་པ། །གཉིས་སུ་མེད་པའི་ཡེ་ཤེས་མཆོག །འདི་ནི་ཕྱག་རྒྱ་ཆེན་པོ་ཉིད། །ཅེས་དང། ཤིན་ཏུ་དྲི་མེད་ཆེས་དག་ཅིང་། །སྒོམ་པ་པོ་དང་བསྒོམ་བྱ་སྤངས། །དཔལ་ལྡན་བདེ་བའི་འབྱུང་གནས་ཀུན། །རྣམ་རྟོག་མེད་པས་ངེས་མཐོང་འགྱུར། །ཞེས་དང། ཀུན་མཁྱེན་གནས་ཀྱི་སྦྱོར་བ་འདི། །བསམ་གྱིས་མི་ཁྱབ་མི་རྟོག་པ། །ཀུན་ཏུ་བཟང་པོ་ཞེས་བྱའི་ལྷ། །ཡིད་བཞིན་ནོར་བུ་བཞིན་དུ་འབྱུང་། །ཞེས་དང་། ཡི་གེ་དང་ནི་མིང་བརྗོད་པ། །སྦྱོར་བའི་ཚིག་ཏུ་རབ་ཏུ་བསྟན། །གཞན་དུ་ངག་གི་ལམ་འདས་ཕྱིར། །སྨྲ་བ་ཉིད་དེ་མི་ནུས་སོ། །ཞེས་དང་། ཐོག་མ་དབུས་དང་ཐ་མ་བྲལ། །བསྐྱེད་པ་དང་ནི་རྫོགས་པ་སྤངས། །བསམ་དང་སེམས་པ་དང་བྲལ་བ། །གཉིས་སུ་མེད་པའི་ཡེ་ཤེས་མཆོག །ཅེས་དང་། རྣལ་འབྱོར་སྐྱེས་བུར་བཤད་པ་སྟེ། །རྗེས་སུ་རྣལ་འབྱོར་རིག་པའི་མཆོག །གཉིས་འདས་ཤིན་ཏུ་རྣལ་འབྱོར་ཏེ། །གཉིས་མེད་ཡེ་ཤེས་རྣལ་འབྱོར་ཆེ། །ཞེས་དང་། ཉི་ཟླ་གཟའ་ཡིས་ཟིན་པ་ན། །ཤེས་རབ་རྡོ་རྗེའི་སྦྱོར་བ་ལས། །ཞུ་བ་གཉིས་མེད་ཡེ་ཤེས་ཀྱིས། །སྐྱེ་བ་འདིར་ནི་སངས་རྒྱས་ཉིད། །ཅེས་དང་། རྒྱ་མཚོ་དང་ནི་རི་ཤིང་དང་། །རྩ་ལྕུག་གེལ་པ་ལ་སོགས་པ། །གཉིས་མེད་ཡེ་ཤེས་ལས་བྱུང་བ། །འདི་ལ་ཐེ་ཚོམ་ཡོད་མ་ཡིན། །ཞེས་གསུངས་སོ། །གཞུང་འདི་བདེ་བའི་མྱུ་གུ་དང་འགོས་ཀྱི་འགྱུར་རོ།། །། ༈ སློབ་དཔོན་གཉིས་མེད་རྡོ་རྗེས་མཛད་པའི་ལྟ་བ་ངན་སེལ་ལས། །བ་ལྕི་ཆུ་དང་བཅས་པ་སྦྱིན་པ་སྟེ། །ལེགས་པར་བྱུགས་པ་ཚུལ་ཁྲིམས་བཟོད་པ་ནི། །སྲོག་ཆགས་ཕྲ་མོ་སེལ་བར་བྱེད་པ་ཡིན། །བརྩོན་འགྲུས་བྱ་བ་དག་ལ་འཇུག་པའོ། །བསམ་གཏན་དེ་དུས་རྩེ་གཅིག་བྱེད་པའི་སེམས། །ཤེས་རབ་ཚོགས་སོགས་ལེགས་པར་མཛེས་པ་ཡིན། །ཐུབ་པ་རྣམས་ཀྱི་དཀྱིལ་འཁོར་བྱས་པ་ཡིས། །ཕ་རོལ་ཕྱིན་པ་དྲུག་ནི་དེས་ཐོབ་ཤོག །ཅེས་སོ།། །། ༈ སློབ་དཔོན་གཉིས་མེད་རྡོ་རྗེས་མཛད་པའི་རབ་ཏུ་མི་གནས་པ་གསལ་པར་བསྟན་པ་ལས། །ཆོས་རྣམས་ཀྱི་ནི་སྐྱེ་བ་མེད། །རང་རིག་གཉུག་མ་བསམ་མི་ཁྱབ། །དེ་ཉིད་སྟོང་པ་ཉིད་ཅེས་བརྗོད། །ཆད་པའི་རྗེས་འགྲོ་མ་ཡིན་ནོ། །རབ་ཏུ་མི་གནས་ས་བོན་ལས། །འབྲས་བུ་རབ་ཏུ་མི་གནས་འབྱུང་། །སྐྱོབ་པ་དེ་ཉིད་དམ་པ་སྟེ། །བཅོས་མའི་བཅོས་མ་དེ་བཞིན་ནོ། །ཞེས་སོ། །བཛྲ་པཱ་ཎི་དང་ནགས་ཚོའི་འགྱུར་རོ།། །། ༈ གཉིས་མེད་རྡོ་རྗེའི་དེ་ཉིད་བཅུ་པར། །དེ་བཞིན་ཉིད་ནི་ཤེས་འདོད་པས། །རྣམ་བཅས་མ་ཡིན་རྣམ་མེད་མིན། །བླ་མའི་ངག་གིས་མ་བརྒྱན་པའི། །དབུ་མའང་འབྲིང་པོ་ཙམ་ཉིད་དོ། །ཞེས་སོ། ། ༈ སློབ་དཔོན་ཨ་བ་དྷཱུ་ཏཱིའི་ཟུང་འཇུག་རབ་ཏུ་གསལ་བར། །ཟུང་འཇུག་ཕྱིར་ན་རང་བཞིན་མེད། །རྐྱེན་ལས་བྱུང་བ་མི་འགགས་ཉིད། །དངོས་དང་དངོས་མེད་ཉམས་པས་ན། །ཟུང་འཇུག་རབ་ཏུ་སྣང་བར་འགྱུར། །ཞེས་སོ། ། ༈ མཻ་ཏྲི་པའི་དགའ་གཙུགས་ལྔ་པར། །མཚན་ཉིད་ཐམས་ཅད་ཡང་དག་རྫོགས། །མཐའ་གཉིས་རྣམ་པར་སྤངས་པ་སྟེ། །དངོས་པོ་ཀུན་གྱི་ངོ་བོ་ཉིད། །རང་བཞིན་མེད་པར་རྟག་ཏུ་ཤར། །ཞེས་སོ། །དེའི་མི་ཕྱེད་ལྔ་པར། །སངས་རྒྱས་རྟོགས་ན་འགྲོ་བ་དག །སངས་རྒྱས་རྟོགས་པ་ཅན་རྩ་ལག །ཨེ་མའོ་སངས་རྒྱས་གཟོད་ནས་དག །སངས་རྒྱས་བསྟན་པ་ཇི་ལྟར་རྟོགས། །ཞེས་སོ།། །། ༈ གཉིས་མེད་རྡོ་རྗེས་མཛད་པའི་བདེ་ཆེན་གསལ་བར། བདེ་ཆེན་ངོ་བོ་ཉིད་འདོད་གང་། །བདེ་བ་མེད་ན་བྱང་ཆུབ་མིན། །ཡོད་ནའང་ཆགས་པ་ཆེན་པོ་སྟེ། །འཁོར་བར་སྐྱེ་བའི་རྒྱུ་ཉིད་དོ། །ཞེས་དང་། ཡང་། །རྟེན་ཅིང་འབྲེལ་འབྱུང་བདེ་བ་གང་། །གཟོད་ནས་དག་པར་ཤེས་པར་བྱ། །ཞེས་སོ།། །། ༈ དེ་ཉིད་རབ་ཏུ་བསྟན་པར། །དེ་བཞིན་ཟག་པ་མེད་ཆོས་རྣམས། །ལོངས་སྤྱོད་སྤྲུལ་པའི་སྐུ་དག་གི །རྟེན་འབྲེལ་སྨོན་ལམ་དག་གིས་ནི། །སེམས་ཅན་དོན་དུ་རབ་ཏུ་འཇུག །ཅེས་སོ། །དེ་བཞིན་གཤེགས་པ་ལྔའི་ཕྱག་རྒྱ་རྣམ་པར་བཤད་པར། །སྤྲོས་པ་མེད་ཅིང་སྣང་བ་མེད། །ཐུབ་པ་ཆེན་པོ་ཆོས་ཀྱི་སྐུ། །དེ་ལས་གཟུགས་སྐུ་གཉིས་བྱུང་བ། །རྗེས་ཐོབ་སྒྱུ་མ་བཞིན་དུ་གནས། །ཞེས་དང་། ཡང་འདི་ལྟར། འཇམ་དཔལ་ལ་དེ་བཞིན་གཤེགས་པས་དྲིས་པ། འདི་བསམ་གྱིས་མི་ཁྱབ་པའི་དབྱིངས་གང་ཡིན། འཇམ་དཔལ་གྱིས་གསོལ་པ། ཁམས་གང་བསམ་དུ་མེད་པའི་སེམས་དེ་བརྗོད་དུ་མེད་པ་དང་། སེམས་ཀྱི་གཞལ་བྱ་མ་ཡིན་པ་དང་། སེམས་ཀྱིས་སེམས་མེད་པ་རབ་ཏུ་བསམ་པར་བྱ་སྟེ། འདི་ནི་བསམ་གྱིས་མི་ཁྱབ་པའི་དབྱིངས་ཞེས་བྱའོ། །དེ་ལྟར་ན་བཅོམ་ལྡན་འདས་སེམས་ཉིད་བསམ་གྱིས་མི་ཁྱབ་པའི་དབྱིངས་སོ། །ཅིའི་ཕྱིར་ཞེ་ན། བསམ་གྱིས་མི་ཁྱབ་པའི་དབྱིངས་ལ་སེམས་ཡོད་པ་མ་ཡིན་ཏེ། གང་གི་ཕྱིར་སེམས་ནི་བསམ་དུ་མེད་ལ། དོན་ཇི་ལྟ་བ་བཞིན་དུ་རྟོགས་པའི་སེམས་སོ། །འོན་ཀྱང་བཅོམ་ལྡན་འདས་རྣམ་པ་ཐམས་ཅད་བསམ་གྱིས་མི་ཁྱབ་པའི་དབྱིངས་སོ། །ཞེས་དྲངས་སྣང་ངོ་། །སློབ་དཔོན་གཉིས་མེད་རྡོ་རྗེས་མཛད་པའོ།། །། ༈ དབང་གི་བྱ་བ་མདོར་བསྡུས་པ་ལས། དེ་ལ་རྣམ་པར་རྒྱལ་བའི་བུམ་པ་ནི་མཆུ་ཡོ་བ་མེད་པ། རྩ་བ་ནག་པོ་མེད་པ། གསུས་པ་ཆེ་བ། མགྲིན་པ་རིང་པ། མཚན་མ་ལེགས་པར་བྲིས་པ། གོས་གཙང་མས་མགྲིན་པ་དཀྲིས་པ། བུ་ཏ་ཏ་བ་བ་ལ་སོགས་པས་ཁ་བརྒྱན་པ། གསེར་དང་། །དངུལ་དང་། རཱ་ཛ་བརྟི་དང་། མུ་ཏིག་དང། བྱུ་རུ་དང་། ནས་དང་། གྲོ་དང་། སོ་བ་དང་། ཏིལ་དང་། མ་ཤ་དང་། པྲྀ་ཧ་ཏི་དང། ཀཎྜ་ཀ་རཱི་དང་། ཤྭེ་ཏ་ཨ་པ་ར་ཛི་ཏ་དང་། དཎྜོཏྤལ་དང་། ཧ་ས་དེ་བ་དང། རིན་ཆེན་སྣ་ལྔ་དང་། འབྲུ་ལྔ་དང་། སྨན་ལྔ་བུམ་པའི་ནང་དུ་བླུགས་ལ། དྲིའི་ཆུས་ཡོངས་སུ་བཀང་སྟེ། དེ་ལ་དཀྱིལ་འཁོར་བསམས་ནས་མཆོད་ཡོན་དང་ཞབས་བསིལ་ལ་སོགས་པ་ཕུལ་ལ། ཡེ་ཤེས་ཀྱི་བདུད་རྩིར་ཞུ་བའི་གཟུགས་སུ་བཞག་གོ །དེའི་རྗེས་ལ་མེ་ཏོག་གི་ཕྲེང་བས་ཉེ་བར་མཛེས་པའི་རྡོ་རྗེ་སྟེང་དུ་ཡང་དག་པར་བཞག་སྟེ། རང་རིག་པའི་ལྷ་ཡི་སྔགས་བརྒྱ་རྩ་བརྒྱད་དམ། བདུད་རྩི་འཁྱིལ་བའི་སྔགས་ཀྱིས་མངོན་པར་བསྔགས་སོ། །ཞེས་དང་། ལས་ཐམས་ཅད་ལ་ནི་རྡོ་རྗེ་སེམས་དཔའམ། བདུད་རྩི་འཁྱིལ་བ་བྲི་བར་བྱའོ། །ཞེས་དང་། དེའི་རྗེས་སུ་བདུད་རྩི་འཁྱིལ་བའི་སྔགས་ཀྱི་མངོན་པར་བཟླས་པའི་མ་གས་པ་དང། འབུས་མ་ཟོས་པའི་ཨ་ཤཏྠའི་ཤིང་ལ་སོགས་པ་སོར་བཅུ་གཉིས་པའི་ཚད་ལ། རྩེ་མོར་མེ་ཏོག་གི་ཕྲེང་བས་བཅིངས་པའི་སོ་ཤིང་སློབ་མ་ལ་སྦྱིན་པར་བྱའོ། །ཞེས་དང་། ཀུ་ཤ་ལ་བདུད་རྩི་འཁྱིལ་བའི་སྔགས་ཀྱིས་མངོན་པར་བསྔགས་ཏེ། སྔས་དང་སྟན་དུ་སྦྱིན་པར་བྱའོ། །ཞེས་དང་། དེས་མངོན་པར་བསྔགས་པའི་སྐུད་པ་སུམ་བསྒྲིལ་མདུད་པ་གསུམ་བྱས་ལ་བསྲུང་བའི་དོན་དུ་དཔུང་པ་གཡས་པར་བཅིང་བར་བྱའོ། །ཞེས་དང་། དེ་ནས་མེ་ཏོག་ལྷུང་བས་དམན་པ་དང་། འབྲིང་དང་། མཆོག་གི་དངོས་གྲུབ་མཚོན་པར་བྱའོ། །དེ་ལ་གལ་ཏེ་སངས་རྒྱས་རྣམས་ཀྱི་དབུའམ། མཛོད་སྤུའམ། གཙུག་ཏོར་ལ་ལྷུང་ན་ཕྱག་རྒྱ་ཆེན་པོའི་དངོས་གྲུབ་སྟེར་རོ། །མཆོག་གི་ཡན་ལག་ལས་ནི་མཆོག་གོ །འབྲིང་གི་ཡན་ལག་ལས་ནི་འབྲིང་ངོ་། །མཐའ་མའི་ཡན་ལག་ལས་ནི་མཐའོ། །གཟུགས་བརྙན་དང་རིང་བ་ལས་ནི་ཤིན་ཏུ་ཡུན་རིང་བ་ནའོ། །ཉེ་བ་ལས་ནི་མྱུར་བའི་དངོས་གྲུབ་བོ། །ལྷ་རྣམས་ཀྱི་རིགས་ནི་རེའུ་མིག་ལ་སོགས་པ་རྣམ་པར་བཅད་པ་ལས་ཤེས་པར་བྱའོ། །གལ་ཏེ་ལྷ་གཉིས་པོའི་བར་དུ་ལྷུང་ན། དེ་ཡང་གང་གི་ཉེ་བ་དེའི་རིགས་སུ་འགྱུར་རོ། །དཀྱིལ་འཁོར་གྱི་ཕ་རོལ་དུ་ལྷུང་ན་དམན་པའི་དངོས་གྲུབ་བོ། །གལ་ཏེ་འོག་ལ་ལྷུང་ན་སླར་འཕང་ངོ་། །ལན་གསུམ་བར་དུ་དེ་ཉིད་དུ་ལྷུང་ན་དངོས་གྲུབ་མེད་དོ། །སྙིང་ག་ལ་ལྷུང་ན་ཤིན་ཏུ་དཀའོ། །ཞེས་སོ། །ཡང་། །སྐད་ཅིག་ཤེས་པའི་ཡེ་ཤེས་གང་། །ངག་གི་སྤྱོད་ཡུལ་ལམ་ལས་འདས། །ཞེས་དང་། བདེ་ཆེན་རྒྱལ་པོ་གཅིག་ཤེས་པ། །འགྲོ་བའི་རྒྱུད་ལ་རྟག་ཤེས་པར། །གང་གིས་ཀྱང་ནི་སྟོན་པའི་དུས། །ཐམས་ཅད་མཁྱེན་པའང་ཚིག་ཕོངས་འགྱུར། །ཞེས་སོ། །འདི་ཡང་སློབ་དཔོན་གཉིས་མེད་རྡོ་རྗེས་མཛད་པའོ།། །། ༈ ཡང་དེས་མཛད་པའི་རང་བཞིན་ལྔ་པར། དེ་ཉིད་རྒྱུ་དང་འབྲས་བུའི་བདག་ཉིད་རྣམ་པ་ཐམས་ཅད་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་འདུས་མ་བྱས་ཤིང་། དེ་བཞིན་ཉིད་ཀྱི་བདག་ཉིད་ཡིན་པའི་ཕྱིར་ཆོས་སྐུའོ། །རབ་ཏུ་སྣང་བ་ཙམ་ཡིན་པའི་ཕྱིར་ལོངས་སྤྱོད་རྫོགས་པའི་སྐུ། བརྟགས་པའི་རྣམ་པར་ཤེས་པའི་ངོ་བོ་ཉིད་ཡིན་པའི་ཕྱིར་སྤྲུལ་པའི་སྐུའོ། །དེ་སྐད་དུའང་། །འདུས་མ་བྱས་སེམས་ཆོས་ཀྱི་སྐུ། །རྟག་པ་ལོངས་སྤྱོད་རྫོགས་མཚན་ཉིད། །སྣ་ཚོགས་དེ་ཉིད་སྤྲུལ་པའོ། །གཉུག་མ་ཀུན་གྱི་རང་བཞིན་ནོ། །ཞེས་སོ།། །། ༈ སློབ་དཔོན་གཉིས་མེད་རྡོ་རྗེ་མཛད་པའི་ཐིག་ཆེན་ཉི་ཤུ་པར། བྱང་ཆུབ་ཉོན་མོངས་ཐ་དད་མེད། །ཉོན་མོངས་བྱང་ཆུབ་ལས་མི་འབྱུང་། །འཁྲུལ་པས་ཉོན་མོངས་རྟོག་པ་སྟེ། །འཁྲུལ་པའི་ངོ་བོ་དྲི་མ་མེད། །ཅེས་དང་། ནམ་མཁའ་དང་མཉམ་ཞི་བ་དང་། །ཐོག་མ་དབུས་དང་ཐ་མ་སྤངས། །བསམ་གྱིས་མི་ཁྱབ་སེམས་ཉིད་ནི། །དངོས་པོ་ཀུན་གྱི་རང་བཞིན་ནོ། །ཞེས་སོ། །དེ་བ་ཀ་ར་ཙཱནྡྲ་དང་། ཤཱཀྱ་བརྩོན་འགྲུས་ཀྱི་འགྱུར། ། ༈ ཡིད་ལ་མི་བྱེད་པ་སྟོན་པ་ཞེས་བྱ་བ་སློབ་དཔོན་མཻ་ཏྲི་པས་མཛད་པ་ལས། འཕགས་པ་སངས་རྒྱས་ཐམས་ཅད་ཀྱི་ཡུལ་ལ་འཇུག་པ་ཡེ་ཤེས་སྣང་བ་རྒྱན་གྱི་མདོ་ལས། ཡིད་ལ་མི་བྱེད་པའི་ཆོས་རྣམས་དགེ་བའོ། །ཡིད་ལ་བྱེད་པའི་ཆོས་རྣམས་མི་དགེ་བའོ། །ཞེས་དང་། རྣམ་པར་མི་རྟོག་པ་ལ་འཇུག་པའི་གཟུངས་ལས། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྟོག་པ་ཐབས་ཀྱི་ མཚན་མ་ནི་སྣང་བ་ལ་རྟོག་པ་སྟེ། ཡིད་ལ་མི་བྱེད་པའི་ཡོངས་སུ་སྤང་བའོ། །ཞེས་དང་། ཧེ་བཛྲ་ལས་གསུངས་པ། །ངོ་བོ་ཉིད་ཀྱིས་སེམས་མེད་ཅིང་། །སེམས་ལས་བྱུང་བའང་མེད་པའོ། །ཞེས་དང་། གང་ཕྱིར་ཡིད་ཀྱིས་མ་བསྒོམ་པར། །འགྲོ་བ་ཐམས་ཅད་བསྒོམ་པར་བྱ། །ཞེས་སོགས་དྲངས་ནས་མདོ་སྔགས་གཉི་གའི་ལུང་གིས་སྒྲུབ་ཅིང་། བར་འདིར་དགག་པ་གཉིས་ཀྱི་སྒོ་ནས་རྒྱས་པར་བཤད་མཐར། ཨི་ཡིག་གཙོ་བོར་མི་འགྱུར་བའི་ཡིད་ལ་བྱེད་པ་ནི་ཡིད་ལ་མི་བྱེད་པ་སྟེ། ལོ་མའི་རྒྱལ་པོ་བཞིན་དུ་ཚིག་དབུས་མ་ཕྱིས་པའི་བསྡུ་བའོ། །དེ་གང་གིས་ན་ཡིད་ལ་བྱེད་པ་གང་ཡིན་པ་ཐམས་ཅད་ནི་ཨ་སྟེ་སྐྱེ་བ་མེད་པའི་དོན་ཏེ། །ཞེས་སོགས་རྒྱས་པར་དང་། ཡང་ན་ཨ་ཞེས་བྱ་བ་ནི་འོད་གསལ་བའི་ཚིག་གོ །ཡིད་ལ་མི་བྱེད་པ་ནི་བདག་བྱིན་གྱིས་བརླབས་པའི་ཚིག་གོ །འདིར་ཨ་ཡང་ཡིན་ལ་ཡིད་ལ་མི་བྱེད་པའང་ཡིན་པས་ཡིད་ལ་མི་བྱེད་པའོ། །འདིས་ནི་ཡིད་ལ་མི་བྱེད་པའི་གནས་བསམ་གྱིས་མི་ཁྱབ་པ་འོད་གསལ་བ་བདག་ལ་བྱིན་གྱིས་བརླབས་པའི་བདག་ཉིད་སྟོང་པ་ཉིད་དང་སྙིང་རྗེ་དབྱེར་མེད་པ་ཟུང་དུ་འཇུག་པ་གཉིས་སུ་མེད་པའི་རྒྱུན་ཡང་དག་པར་རིག་པ་སྐྱེ་བར་འགྱུར་རོ། །ཞེས་དང་། མ་ཕྱིས་བསྡུ་བ་བྱས་པས་ཡིད་ལ་མི་བྱེད་པ་དང་། ཡིད་ལ་མི་བྱེད་པ་སྟེ། པགས་པའི་སྙིང་པོ་དང་། པགས་པའི་སྙིང་པོའོ། །ཞེས་སྣང་ལ། གཞུང་འདི་བཛྲ་པཱ་ཎི་དང་། གཉན་ཆུང་གིས་བསྒྱུར་བའོ།། །། ༈ སློབ་དཔོན་གཉིས་མེད་རྡོ་རྗེ་མཛད་པའི་དེ་ཁོ་ན་ཉིད་ཐེག་ཆེན་ཉི་ཤུ་པར། །རྣམ་པ་ཀུན་གྱི་མཆོག་ལྡན་པ། །དངོས་དང་དངོས་མེད་གཟུང་དང་འཛིན། །རྣམ་པར་ཤེས་པས་པོར་པའི་སེམས། །དམིགས་པ་མེད་ཅིང་བླ་ན་མེད། །དག་ཅིག་ཞི་བ་སྣང་བ་མེད། །རིག་པ་ཤེས་རབ་ཅེས་སུ་གྲགས། །ཞེས་དང་། སེམས་ཀྱི་འདོད་པ་སེམས་མ་ཡིན། །རང་གི་རིག་པ་སེམས་མིན་ཏེ། །རིག་པ་བླ་མ་ལ་ལྟོས་འགྱུར། །དངོས་མེད་ཀུན་གྱི་ངོ་བོ་ཉིད། །ཅེས་སོ།། །། ༈ སློབ་དཔོན་མཻ་ཏྲི་པས་མཛད་པའི་དབང་བསྐུར་ངེས་པར་བསྟན་པར། གཉེན་པོའི་ཕྱོགས་ལ་མི་གནས་ཤིང་། །དེ་ཉིད་ལ་ཡང་མི་ཆགས་པ། །གང་གི་འབྲས་བུའང་མི་འདོད་པ། །དེ་ཡིས་ཕྱག་རྒྱ་ཆེན་པོ་ཤེས། །ཞེས་སོ། །འདི་ཀྲྀཥྞ་པ་དང་། ཚུལ་ཁྲིམས་རྒྱལ་བས་བསྒྱུར་ཞིང་། དེའི་འགྲེལ་པ་སློབ་དཔོན་དགའ་བ་སྐྱོང་གིས་མཛད་པ་ལས། ཨེ་ཝཾ་གྱི་དོན་རྒྱས་པར་བཤད་འདུག་ཅིང་། ཡང་། དེ་བཞིན་དུ་རྣམ་པར་ཉེད་པ་ནི་ཆོས་ཀྱི་སྐུའོ། །རྣམ་པར་སྨིན་པ་ནི་ལོངས་སྤྱོད་རྫོགས་པའོ། །རྣམ་པ་སྣ་ཚོགས་ནི་སྤྲུལ་པའོ། །མཚན་ཉིད་དང་བྲལ་བ་ནི་ངོ་བོ་ཉིད་སྐུའོ། །ཞེས་དང་། ཡན་ལག་བདུན་དང་ལྡན་པ་ནི་བསྒྲུབ་བྱར་འདོད་པར་འགྱུར་རོ། །དེ་ལ་ཡན་ལག་བདུན་ནི། ལོངས་སྤྱོད་རྫོགས་པའི་ཚོར་བ་དང་། །ཁ་སྦྱོར་སྙོམས་པར་འཇུག་པ་དང་། བདེ་བ་ཆེན་པོ་བདེ་བའི་ངོ་བོ་ཉིད་དང་། རང་བཞིན་མེད་པ་རྟོག་པ་བྲལ་བ་དང་། སྙིང་རྗེས་ངེས་པར་གང་བ་སྔོན་གྱི་སྨོན་ལམ་གྱི་དབང་གིས་ལོངས་སྤྱོད་རྫོགས་པ་ལ་སོགས་པས་སེམས་ཅན་གྱི་དོན་མཛད་པ་དང་། རྒྱུན་མི་འཆད་པར་རབ་ཏུ་འཇུག་པས་རྒྱུན་ཆད་པ་མེད་པ་དང་། འགོག་པ་མེད་པས་རྒྱུད་རྒྱུན་ཆད་མེད་པའོ། །ཞེས་དང་། གང་གིས་ཕྱིར་བདག་མེད་རྣལ་འབྱོར་མའི་འཁོར་ལོ་སྒོམ་པ་ཡང་སངས་རྒྱས་ཉིད་ཀྱི་རྒྱུ་མ་ཡིན་ནམ། འདིར་ཡན་ལག་བདུན་གྱི་སྒྲུབ་ཐབས་ཀྱི་རྣལ་འབྱོར་མ་ཡིན་ཏེ། ཁ་སྦྱོར་མེད་པའི་ཕྱིར་རོ། །ཞེས་ཕྱོགས་སྔ་བཀོད་ནས། དེ་ལ་ཡང་ཁ་ཊྭཱྃ་གའི་ཐབས་དང་ཁ་སྦྱོར་བ་ཡོད་དེ། དེ་སྐད་དུ། ཁ་ཊྭཱྃ་ག་དང་སྦྱོར་ལྷ་མོ། །ལོངས་སྤྱོད་རྫོགས་པ་ལ་སོགས་ལྡན། །བདག་མེད་རྣལ་འབྱོར་མ་འཁོར་ལོར། །རྟོགས་པ་ཅི་ཡི་ཕྱིར་མི་འགྲུབ། །ཅེས་དགག་པར་མཛད་དོ། །ཡང་། གཉེན་པོའི་ཕྱོགས་ལ། ཞེས་པ་ནི། རང་བཞིན་དང་། ཡོན་ཏན་དང་། སྙིང་པོ་ལ་ངེས་པར་སྤྱོད་པ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་བདག་ཉིད་ཅན། གཉེན་པོའི་ཕྱོགས་ལ་དཔྱོད་པའི་རྣམ་པར་རྟོག་པའི་ཚོགས་ཡིད་ལ་མི་བྱེད་པས་སྤང་བའོ། །མི་གནས་ཤིང་། ཞེས་བྱ་བ་ནི་གཉེན་པོའི་ཕྱོགས་ལ་ངེས་པར་དཔྱོད་པའི་རྣམ་པར་རྟོག་པའི་ཚོགས་རབ་ཏུ་སྤངས་པའི་ཟག་པ་དང་བཅས་པའི་གཟུགས་ལ་སོགས་པའི་ཉེ་བར་ལེན་པའི་ཕུང་པོ་ལྔ་ལ་སོགས་པའི་བདག་ཉིད་མི་མཐུན་པའི་ཕྱོགས་ལ་ངེས་པར་དཔྱོད་པའི་རྣམ་པར་རྟོག་པའི་ཚོགས་རབ་ཏུ་སྤངས་པར་ཡང་བལྟ་བར་བྱའོ། །ཞེས་དེ་མེད་པའི་ཕྱིར་འདི་དག་ངེས་པར་མེད་པ་ཉིད་དོ། །དེ་ཉིད་ལ་ཡང་མི་ཆགས་པ། ཞེས་བྱ་བ་ནི། ངོ་བོ་ཉིད་ལ་སོགས་པ་ལ་ངེས་པར་དཔྱད་པ་ཉིད་ཀྱིས་སྟོང་པ་ཉིད་དང་། ཡང་དག་པའི་མཐའ་དང་། དེ་བཞིན་ཉིད་ཀྱི་བདག་ཉིད་ལ་དེ་ཁོ་ན་ཉིད་ངེས་པར་དཔྱོད་པ་རྣམ་པར་རྟོག་པའི་ཚོགས་ཀྱི་ཏིང་ངེ་འཛིན་ལའང་མ་ཆགས་པའོ། །གང་གིས་འབྲས་བུའང་འདོད་པ་མེད། ཅེས་བྱ་བ་ནི། ས་དང་པོ་ལ་སོགས་པ་དང་། རྣམ་པ་ཐམས་ཅད་མཁྱེན་པ་ཉིད་དེ་ཐོབ་པ་ལ་ངེས་པར་དཔྱོད་པའི་ཚོགས་ཀྱི་འབྲས་བུ་ལ་འདོད་པ་སྟེ། དེ་ལ་རེ་བ་འགའ་ཡང་མེད་དོ། །དེ་ཡིས་ཕྱག་རྒྱ་ཆེན་པོ་ཤེས། །ཞེས་བྱ་བ་ནི་ཐོབ་པའོ། །དེ་དག་གིས་འགྲོ་བའི་བདག་ཉིད་མི་གནས་ཤིང་སྒྲོ་མ་བཏགས་པ། མི་མཐུན་པའི་ཕྱོགས་གཉེན་པོ་དང་། དེ་ཁོ་ན་ཉིད་དང་། འབྲས་བུའི་ཚོགས་ལ་ཆགས་པ་སྤངས་བས་ཆགས་པ་ཐམས་ཅད་ལས་རྣམ་པར་གྲོལ་བ་ནི་ཕྱག་རྒྱ་ཆེན་པོ་ཐོབ་པ་ཞེས་བྱའོ། །གལ་ཏེ་དེ་ལྟར་ན་ཕྱག་རྒྱ་ཆེན་པོ་ལ་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་མེད་པ་ཞིག་གམ་ཞེ་ན། མ་ཡིན་ཏེ། དེ་ནི་ཕ་རོལ་ཏུ་ཕྱིན་པ་ལ་སོགས་པའི་བདག་ཉིད་ཅན་བསོད་ནམས་དང་ཡེ་ཤེས་ཀྱི་ཚོགས་གཉིས་གྱི་ངོ་བོ་ཡིན་པའི་ཕྱིར་རོ། །དེ་སྐད་དུ་ཡང་། ཚངས་པ་ཁྱད་པར་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་ལས། གང་ཉོན་མོངས་པ་ཐམས་ཅད་སྤངས་པ་དེའི་དོན་ནི་སྦྱིན་པའོ། །གང་མངོན་པར་འདུ་བྱེད་པ་མེད་པ་དེ་ནི་ཚུལ་ཁྲིམས་སོ། །གང་མཚན་ཉིད་དང་བྲལ་བ་དེ་ནི་བཟོད་པའོ། །གང་རྣམ་པར་དཔྱོད་པ་མེད་པ་དེ་ནི་བརྩོན་འགྲུས་སོ། །གང་རབ་ཏུ་མི་གནས་པ་དེ་ནི་བསམ་གཏན་ནོ། །གང་སྤྲོས་པ་མེད་པ་དེ་ནི་ཤེས་རབ་བོ། །དེ་ལྟར་གནས་མེད་པ་སྤྲོས་པ་མེད་པའི་ངོ་བོ་ཉིད་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཞེས་དང་། ཤེར་ཕྱིན་བདུན་བརྒྱ་པ་ལས་ཀྱང་ལུང་མང་བར་དྲངས་མཐར། བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་དེ་ཆོས་གང་ཅུང་ཟད་འཕེལ་བར་འགྱུར་བའམ། འགྲིབ་པར་འགྱུར་བ་ནི་མ་མཆིས་སོ། །བཅོམ་ལྡན་འདས་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་རིག་པར་བྱའོ། །ཞེས་དང་། བཅོམ་ལྡན་འདས་གང་ཅི་ལ་ཡང་མི་གནས་པ་ཉིད་དེ་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པའོ། །ཞེས་དང་། བཅོམ་ལྡན་འདས་ཆོས་གང་ཅུང་ཟད་འཕེལ་བའམ་འགྲིབ་པ་ལ་རབ་ཏུ་གནས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་མ་ལགས་ཏེ། སོ་སོ་སྐྱེ་བོའི་ཆོས་ཀྱང་མི་སྤོང་ལ། སངས་རྒྱས་ཀྱི་ཆོས་ཀྱང་ཡང་དག་པར་མི་ལེན་ཏོ། །ཞེས་དང་། མགོན་པོ་བྱམས་པས། སྟོང་པ་ཉིད་དེ་མདོར་བསྡུ་ན། །དེ་བཞིན་ཉིད་དང་ཡང་དག་མཐའ། །མཚན་མ་མེད་དང་དོན་དམ་སྟེ། །ཆོས་ཀྱི་དབྱིངས་ནི་རྣམ་གྲངས་སོ། །ཞེས་སོ། ཡང་། བསྐྱེད་རྫོགས་ཀྱི་རྣམ་གྲངས་ལྔ་པོ་ཤེས་རབ་གསལ་བ་དང་མཐུན་པར། ཕྱི་བསྐྱེད་པའི་རིམ་པ་དང་། ནང་ཟབ་མོའི་བསྐྱེད་རིམ་དང་། རྫོགས་པ་དང་། ཡོངས་སུ་གྲུབ་པ་དང་། ངོ་བོ་ཉིད་ཀྱི་རིམ་པ་ལྔ་པོ་རིམ་ལྔ་དང་སྦྱར་ཏེ། འདི་ལྟར་མདོར་བསྡུས་པ་དང་། རྡོ་རྗེའི་བཟླས་པ་དང་། བདག་བྱིན་བརླབས་པ་དང་། མངོན་པར་བྱང་ཆུབ་པ་དང་། ཟུང་དུ་འཇུག་པའི་མིང་གཞན་ཡིན་པར་བཤད་ཅིང་། དེ་ཉིད་ཀྱང་ཕྱག་རྒྱ་བཞིར་བསྡུ་ཚུལ་བསྟན་ནས། ཕྱག་རྒྱ་ཆེན་པོ་ཡིད་ཀྱིས་ཏེ། །དམ་ཚིག་ཕྱག་རྒྱ་ཀུན་ཏུ་འགྲོ། ཆོས་ཀྱི་ཕྱག་རྒྱ་ངག་ལས་ཏེ། །ལས་ཀྱི་ཕྱག་རྒྱ་ལུས་ཀྱིའོ། །ཞེས་སོ། །ཡང་ཟླ་གྲགས་སྒྲོན་གསལ་ལུང་། གསང་སྔགས་སྐུ་ནི་རབ་བསྒྲུབ་ཕྱིར། །སྐྱེས་པའི་རིམ་པ་དང་པོ་ཡིན། །སེམས་ལ་དམིགས་པ་ཙམ་ཞིག་ནི། །རིམ་པ་གཉིས་པ་ཞེས་བརྗོད་དོ། །ཀུན་རྫོབ་བདེན་པ་སྟོན་པ་ནི། །ཡིད་འོང་རིམ་པ་གསུམ་པའོ། །ཀུན་རྫོབ་བདེན་པ་དག་པ་ནི། །རིམ་པ་བཞི་པ་ཞེས་བརྗོད་དོ། །བདེན་གཉིས་སྦྱོར་བ་གང་ཡིན་པ། །ཟུང་དུ་འཇུག་ཅེས་ལྔ་པ་སྟེ། །འདི་ནི་སྒྲུབ་པའི་ཡན་ལག་མཆོག །རྒྱུད་ཀུན་གྱི་ནི་མདོར་བསྡུས་པའོ། །ཞེས་དང་། །སྔགས་དང་སེམས་དང་ལུས་དང་ནི། །རྣམ་དག་དང་ནི་ཟུང་འཇུག་སྟེ། །རིམ་པ་ལྔ་ཡིས་བསྡུས་པའི་དོན། །ཤེས་ན་མཐའ་དྲུག་ལ་འཇུག་ཡིན། །ཞེས་དང་། འཕགས་པ་ལྷས། སྔགས་དང་། ཕྱག་རྒྱ་དང་། བདག་དང་། ཆོས་དང་། ལྷ་ཡི་དེ་ཁོ་ན་ཉིད་དེ་ལྟར་གསུངས་སོ། །གཞུང་འདི་ས་མནྟ་བྷ་དྲ་དང་། ནགས་ཚོས་བསྒྱུར་བའོ།། །། ༈ པཎྜི་ཏ་ལྷན་ཅིག་སྐྱེས་པའི་རྡོ་རྗེས་མཛད་པ་དེ་ཁོ་ན་ཉིད་བཅུ་པའི་རྒྱ་ཆེར་འགྲེལ་ལས། དེ་ལྟར་རང་གི་ངོ་བོ་མ་རྟོགས་པས་ཕྱིན་ཅི་ལོག་གི་ངོ་བོར་བཞག་པ་ཡང་ཉོན་མོངས་པ་དང་། ལས་དང་སྐྱེ་བ་རྣམས་ཀྱིས་འཁོར་བ་འབྱུང་བའི་ཕྱིར་རྙོག་པ་རྣམས་སོ་སོར་སྣང་བར་འགྱུར་ཏེ། འདི་རྣམས་རང་གི་ངོ་བོ་མ་རྟོགས་པ་ནི་གློ་བུར་གྱི་དྲི་མ་ཞེས་བརྗོད་དོ། །ཞེས་དང་། གློ་བུར་འདི་དག་ཤིན་ཏུ་སྤངས་པ་ནི་རྣམ་པར་དག་པ་བཞེད་དོ། །དེ་སྐད་དུ་མགོན་པོ་བྱམས་པས། །ཀུན་ནས་ཉོན་མོངས་མེད་རྣམ་དག །དེ་ནི་དྲིར་བཅས་དྲི་མ་མེད། །ཆུ་ཁམས་གསེར་དང་ནམ་མཁའ་བཞིན། །དག་པ་བཞིན་དུ་དག་པར་འདོད། །གལ་ཏེ་རྣམ་དག་དེ་མ་འགྱུར། །ལུས་ཅན་ཐམས་ཅད་གྲོལ་བར་འགྱུར། །གལ་ཏེ་ཉོན་མོངས་དེ་མ་འགྱུར། །འབད་པ་འབྲས་བུ་མེད་པར་འགྱུར། །ཞེས་པའོ། །དེ་ལྟར་ཐམས་ཅད་འདིར་བསྒྲུབ་པར་བྱ་བ་དང་། སྒྲུབ་པར་བྱེད་པའི་ཐ་སྙད་ཉིད་ནི་ཀུན་རྫོབ་ཉིད་དོ། །སངས་རྒྱས་དང་རྡོ་རྗེ་འཛིན་པ་ཉིད་ནི་ཀུན་རྫོབ་ལ་རབ་ཏུ་བསྒྲུབ་པར་བྱའོ། །དོན་དམ་པར་དེ་ལ་དེ་བཞིན་ཉིད་ནི་ཉོན་མོངས་པ་དང་ལྡན་པ་མ་ཡིན་ལ། །རྣམ་པར་དག་པའང་མ་ཡིན་ཏེ། །དེ་སྐད་དུ་ཡང་དེ་ཉིད་ཀྱིས། །ཉོན་མོངས་མ་ཡིན་མི་མོངས་མིན། །དེ་ཉིད་དག་དང་མ་དག་མིན། །ཞེས་པའོ། །ཞེས་སོགས་དང་། ཇི་སྐད་དུ། །ཏིང་ངེ་འཛིན་གྱི་རྒྱལ་པོ་ལས། །ངེས་པ་དོན་གྱི་མདོ་སྡེའི་བྱེ་བྲག་ཤེས། །བདེ་གཤེགས་ཇི་ལྟར་བསྟན་པའི་སྟོང་པ་ཉིད། །སླར་ཡང་གང་ཟག་སེམས་ཅན་སྐྱེས་བུ་རྣམས། །ཆོས་རྣམས་ཐམས་ཅད་དྲང་བའི་དོན་དུ་ཤེས། །ཆོས་བདག་མེད་ལ་སོ་སོར་རྟོག་པར་བྱེད། །སོ་སོར་རྟོག་པས་གལ་ཏེ་སྒོམ་པར་བྱེད། །དེ་ལ་རྒྱུ་ཡིས་མྱ་ངན་འདས་ཐོབ་འགྱུར། །གང་ཡང་བདག་གཞན་ཞི་བའི་རྒྱུར་མི་འགྱུར། །ཆོས་ཀུན་རང་བཞིན་རྟག་ཏུ་སྟོང་པ་ཉིད། །རྒྱལ་སྲས་ཉོན་མོངས་རྣམ་པར་བསྒོམ་པ་ནི། །ཀུན་གྱིས་ཀུན་ཏུ་ཐམས་ཅད་སྟོང་པར་འགྱུར། །ཉི་ཚེའི་སྟོང་ཉིད་མུ་སྟེགས་ཅན་རྣམས་ཀྱི། །ཞེས་དང་། དབུ་མ་འཇུག་པར། དེ་ལྟར་གང་ཕྱིར་ཤིན་ཏུ་ཟབ་མོའི་དངོས་པོ་ནི། གང་གིས་མི་ཤེས་དེ་ནི་རབ་ཏུ་བརྟེན་བྱ་བ། །ཀུན་གཞི་ཡོད་ཅིང་གང་ཟག་སྟོང་ཉིད་ཡོད། །ཕུང་པོ་འདི་དག་ལ་ནི་འབའ་ཞིག་དང་། །འཇིག་ཚོགས་ལྟ་བ་སྤངས་པའི་སངས་རྒྱས་ཀྱིས། །ང་དང་བདག་ཅེས་ཇི་ལྟར་སྟོན་པ་ལྟར། །དེ་ལྟར་དངོས་པོ་ཐམས་ཅད་རང་བཞིན་གྱིས། །མེད་པ་དྲང་པའི་དོན་ནི་སྟོན་པར་འགྱུར། །ཞེས་དང། འོད་གསལ་བ་ཞེས་བྱ་བ་ནི། རང་བཞིན་གྱིས་དྲི་མ་སྤངས་པའི་རང་རིག་པ་སྟེ། རབ་ཏུ་འོད་གསལ་བའི་ཕྱིར་རོ། །ཞེས་དང་། ཐབས་དང་ཤེས་རབ་རང་བཞིན་རྟོགས་པས་སྒྲོ་འདོགས་དང་སྐུར་པ་འདེབས་པ་དག་སྤངས་པའི་དབུ་མ་རབ་ཏུ་མི་གནས་པ་རྟོགས་པའོ། ། ཤེས་རབ་ཀྱིས་ནི་སྒྲོ་འདོགས་པ་སྤོང་བའི་ཕྱིར་རོ། །ཐབས་ཀྱིས་ནི་སྐུར་པ་འདེབས་པ་སྤོང་བའི་ཕྱིར་རོ། །ཞེས་དང་། ཟུང་དུ་འཇུག་པ་དེ་བཞིན་ཉིད་ཀྱི་བདག་ཉིད། བླ་མ་དམ་པའི་མན་ངག་གིས་རིག་པ། དེ་ཉིད་སྟོང་པ་ཉིད་དང་། སྙིང་རྗེ་དབྱེར་མེད་པ་དོན་དམ་པ་བྱང་ཆུབ་སེམས་ཀྱི་མཚན་ཉིད་དོ། །ཞེས་སོ། །ཡང་རྟོག་གེ་སྐམ་པོ་འབའ་ཞིག་བྱིས་པའི་དམིགས་པ་ནི་མ་ཡིན་ཏེ། དེ་ཁོ་ན་ཉིད་ཤེས་པའི་སྐལ་བ་མེད་པའི་ཕྱིར་རོ། །དེ་ཉིད་ཡང་འདིར་རྟོག་གེ་ངན་པས་ཞེས་བྱ་བར་བསྟན་ཏོ། །དེ་སྐད་དུའང་བཅོམ་ལྡན་འདས་ཀྱིས། རང་བཞིན་མ་ཡིན་བརྟགས་པ་མིན། །དངོས་པོ་མ་ཡིན་ཀུན་གཞི་མིན། །གང་ལ་བྱིས་པའི་རྟོག་པས་བརྟགས། །རྟོག་གེ་ངན་པ་རོ་དང་འདྲ། །ཞེས་བྱ་བ་ལ་སོགས་པའོ། །དེའི་ཕྱིར་རྟོག་གེའི་སྤྱོད་ཡུལ་ཡང་མ་ཡིན་ནོ། །རྟོག་གེ་སྐམ་པོ་རྣམ་པར་སྤངས། །ཞེས་བྱ་བ་ལ་སོགས་པའོ། །ཞེས་སོ། །འདི་པཎྜི་ཏ་ཀ་ལྱཱ་ཎ་བརྨ་དང་། ལོ་ཙཱ་བ་ཛྙཱ་ནཱ་ཀ་ར་མཚུར་གྱིས་བསྒྱུར་བའོ།། །། ༈ སློབ་དཔོན་བཛྲ་པཱ་ཎིས་མཛད་པའི་རྡོ་རྗེའི་ཚིག་ཅེས་བྱ་བར། །དགའ་བ་དང་པོ་འགྲོ་བ་སྟེ། །མཆོག་ཏུ་དགའ་བའང་འགྲོ་བ་ཉིད། །དགའ་བྲལ་དགའ་བ་འགྲོ་བ་ཉིད། །ལྷན་ཅིག་སྐྱེས་པ་གསུམ་མི་དམིགས། །ཞེས་དང་། རང་རིག་པ་ཡི་ཡེ་ཤེས་འདི། །ངག་གི་སྤྱོད་ཡུལ་ལམ་ལས་འདས། །བྱིན་གྱིས་བརླབས་པའི་རིག་པ་གང་། །ཀུན་མཁྱེན་ཡེ་ཤེས་དེ་རང་བཞིན། །ཞེས་དང་། སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །གཅིག་པུའི་རྣམ་པའི་བདེ་ཆེན་པོ། །ཡང་དག་དབང་བསྐུར་ལས་ཤེས་བྱ། །ཞེས་དང་། ཨེ་ཡི་ཆ་བྱད་བཟང་པོ་གང་། །དབུས་སུ་ཝཾ་གྱིས་རྣམ་པས་བརྒྱན། །བདེ་བ་ཐམས་ཅད་འབྱུང་བའི་གནས། །སངས་རྒྱས་རིན་ཆེན་དཀོན་མཆོག །ཟ་མ་ཏོག །ཅེས་སོ། །སློབ་དཔོན་དེ་ཉིད་དང་། མཚུར་གྱིས་བསྒྱུར་བའོ། །ཇི་ལྟར་དྲི་མེད་སྦྲང་རྩིའི་བཅུད། །བཏུང་བས་མྱོས་པའི་བུང་བ་བཞིན། །ཡང་དག་ཡེ་ཤེས་རོས་ཚིམས་པའི། །རྣལ་འབྱོར་མཆོག་གི་ཚུལ་འདིའོ། །ཤུ་བྷ་མསྟུ་སརྦ་ཛ་ག་ཏཱམ།། །། ༈ སློབ་དཔོན་བྷི་དྷི་ཀརྨས་མཛད་པའི་ཕྱག་རྒྱ་བཞི་༢༣གཏན་ལ་དབབ་པའི་འགྲེལ་པ་རིན་པོ་ཆེའི་སྙེ་མ་ཞེས་བྱ་བ་ལས། ཕྱག་རྒྱ་ནི་མི་འདའ་བའི་དོན་ཏོ། །དཔེ་དང་། ཡོད་པ་དང་། ཡིན་པས་མི་འདའ་བའོ། །དེ་ཡང་ནམ་མཁའ་ལྟ་བུ་དང་། གྱད་ཀྱི་ནོར་བུ་ལྟ་བུ་དང་། སྡུག་བསྔལ་གྱིས་བརྟུལ་བ་ལྟ་བུ་ཡིན་ལ། ཆེན་པོ་ནི་ལས་དང་ཆོས་དང་དམ་ཚིག་དང་གསུམ་གྱི་མཆོག་ཏུ་གྱུར་པའི་ཕྱིར་ཡང་ཡིན་པས་ན་ཕྱག་རྒྱ་ཆེན་པོའོ། །ཞེས་དང་། ཕྱག་རྒྱ་ཆེན་པོ་ལ་འབྲས་བུར་བཞག་པའི་རྒྱུ་མཚན་གང་ཡིན་ན། རང་བཞིན་མེད་པའི་ངོ་བོ་ཉིད་སྒྲོ་སྐུར་གྱིས་དབེན་པ། ཞེས་བྱ་བ་སྟེ། རང་བཞིན་མེད་པ་ནི། རྣམ་པ་སྣ་ཚོགས་པ་དང་། རྣམ་པར་སྨིན་པ་དང་། རྣམ་པར་ཉེད་པའི་གནས་སྐབས་གསུམ་ནི་དྲི་མ་དང་བཅས་པ་སྟེ། དེ་དག་གི་རང་བཞིན་མེད་པའོ། །དེ་ལྟ་བུའི་ངོ་བོ་ཉིད་ནི་དགག་སྒྲུབ་སྒྲོ་སྐུར་གྱི་དྲི་མ་དབེན་པའོ། །འོ་ན་ཕྱག་རྒྱ་ཆེན་པོ་ཉིད་ཇི་ལྟ་བུ་ཞེ་ན་རེ་བ་བཅད་པ་སྟེ། ཤེས༵་བྱ༵་ལ༵་སོ༵གས་པ༵འི་སྒྲིབ༵་པ༵་སྤངས༵་པ༵། ཞེས་པ་སྟེ། ཤེས་བྱའི་སྒྲིབ་པ་ནི་ཉོན་མོངས་པ་བག་ལ་ཉལ་ཤིན་ཏུ་ཕྲ་བ་རྣམས་སོ། །སོགས་པ་ནི་དེ་ལས་གཞན་པའི་རགས་པ་སྤོང་སླ་བ་རྣམས་ཀྱང་ངོ་། །སྤངས་པ་ནི་སེར་སྣའི་གཉེན་པོར་སྦྱིན་པ་ལ་སོགས་པའི་ཕྱོགས་ཀྱིས་སྤོང་འདོད་མེད་པར་གྱུར་པ་ནི་གཉེན་པོ་ལ་རེ་བ་མེད་པའོ། །བསྐྱེད་རྫོགས་ཀྱིས་སྦྱངས་པ་ལས་འབྲས་བུ་ཞིག་ཐོབ་སྙམ་པ་མེད་པ་ནི་དེ་ཁོ་ན་ཉིད་ལ་རེ་བ་མེད་པའོ། །འབྲས་བུ་རྫོགས་པའི་སངས་རྒྱས་ཞིག་གུད་ན་ཐོབ་པའི་བློ་མེད་པ་ནི་འབྲས་བུ་ལ་རེ་བ་མེད་པའོ། །དེ་ཡང་ཉོན་མོངས་པ་ལམ་དུ་སློང་བ་ཆོས་ཐམས་ཅད་ཀྱི་དེ་བཞིན་ཉིད་བསྒོམ་དུ་མེད་པ་དང་། བདེ་བ་ཆེན་པོ་རང་ཆས་སུ་ཡོད་པའི་ཕྱིར་རོ། །དེ་ཡང་ཆོས་ལྔ་ལྡན་ཏེ། སྟོན༵་ཀ༵འི་ཉི༵་མ༵་ཕྱེད༵་ཀྱི༵་ནམ༵་མཁའ༵་ལྟར༵་དྲི༵་མ༵་མེད༵་པ༵། ཞེས་པས་བསྟན། དེ་ལ་སྟོན་ཀའི་ཉི་མ་ཕྱེད་ཀྱི་ནམ་མཁའ་ནི་སྤྲིན་དང་། འཇའ་ཚོན་དང་། ན་བུན་དང་། ཁུག་སྣ་དང་། རླུང་གིས་མ་དཀྲུགས་བདག་ནི་མ་སྐྱེས་ཤིང་། རང་བཞིན་མེད་པ། འདས་པ་དང་མ་འོངས་པ་དང་ད་ལྟར་གྱི་དུས་སུ་ཁྱབ་པ་དང་། གདོད་མ་ནས་མི་འགྱུར་བ་དང་། འཁོར་བ་ཐམས་ཅད་ལ་ཁྱབ་བཞིན་དུ་ཕྱག་རྒྱ་ཆེན་པོ་ཡང་ངོ་བོ་ཉིད་ཀྱིས་མ་སྐྱེས་པ་དང་། མཐའ་བཞིའི་རང་བཞིན་མེད་པ་དང་། འཁོར་བའི་དུས་དང། སྦྱངས་པ་དང་། ཁྱད་པར་དུ་སྦྱངས་པ། བླ་ན་མེད་པ་དང་། མངོན་དུ་གྱུར་པའི་དུས་རྣམས་སུ་ཕྱག་རྒྱ་ཆེན་པོ་ལས་མི་འགྱུར་ཏེ། དཔེར་ན་ནམ་མཁའ་ལ་སྤྲིན་ལ་སོགས་པ་སྣང་ཡང་ནམ་མཁའ་ལས་མི་འགྱུར་བ་དང་། ཡུངས་ཀར་ལ་མར་གྱིས་ཁྱབ་པ་བཞིན་དུ་འཁོར་བ་ལ་ཁྱབ་པའོ། །དེ་ལ་སྐུའི་བྱེ་བྲག་ཇི་ལྟར་བཞག་ཅེ་ན། ཡོན་ཏན་ཐམས་ཅད་ཀྱི་འབྱུང་གནས། །ཞེས་བྱ་ལ། ཡོན་ཏན་ནི་སྐུ་བཞིའོ། །དེ་ཡང་རང་གི་ཉམས་སུ་མྱོང་བ་ལ་གནས་ཏེ། སྒྲོ་སྐུར་དང་བྲལ་བ་དང་། ཉམས་སུ་མྱོང་བ་དང་། སྣ་ཚོགས་སུ་ཤར་བ་དང། གཉུག་མའི་ངོ་བོར་གཅིག་པའོ། །དེ་ལྟ་བུའི་ཡེ་ཤེས་ནི། ཕུན་སུམ་ཚོགས་པ་ཐམས་ཅད་ཀྱི་གཞིར༵་གྱུར༵་པ༵། ཞེས་གསུངས། དེ་ཡང་། ཕུན་སུམ་ཚོགས་པ་ནི་ཇི་ལྟར་འདོད་པའི་བདེ་བ་ཚོགས་པའོ། །ཐམས་ཅད་ནི་འཁོར་འདས་ཐམས་ཅད་ཀྱི་བདེ་བའོ། །གཞིར་གྱུར་པ་ནི་འབྱུང་བའི་གནས་སུ་གྱུར་པའོ། །དེ་ཡང་ཇི་ལྟར་ལྟ་ཞེ་ན། ལྷུན་གྱིས་གྲུབ་པ་སྟེ་གདོད་མ་ནས་སངས་རྒྱས་པ་ནི་དག་པའོ། །བདེ་སྟོང་ཟུང་འཇུག་ནི་རྟག་ཆད་ཀྱི་མཐའ་ལས་བྲལ་བ་སྟེ་དམ་པའོ། །བསམ་གྱིས་མི་ཁྱབ་པ་ནི་ཡེངས་པའི་མུ་དང་བྲལ་བའོ། །དེ་ལས་གཞན་དོན་འབྱུང་ངམ་ཞེ་ན། དམིགས་པ་མེད་པའི་སྙིང་རྗེ་ཆེན་པོའི་ལུས་ཞེས་བྱ་བ་ལ། །དམིགས་པ་མེད་པའི་སྙིང་རྗེ་ཆེན་པོ་དང་། སྨོན་ལམ་ཐུན་མོང་མ་ཡིན་པའི་སྟོབས་ཀྱིས། ལུས་གཟུགས་སྐུ་རྣམ་པ་གཉིས། སྣང་བ་ཤིན་ཏུ་རྣམ་པར་དག་པ་དང་། དག་པ་ལས་འབྱུང་ངོ་། །ལུས་དེ་ཁོ་ན་ཉིད་ལས་གཞན་ནམ་ཞེ་ན་བསྟན་པར་བྱ་སྟེ། བདེ་བ་ཆེན་པོའི་རང་བཞིན་གང་ཡིན་པའི་ངོ་བོ་ཉིད་དོ། །ཞེས་བྱ་བ་སྟེ། བདེ་བ་ཆེན་པོ་ནི་སྒྲོ་སྐུར་དང་བྲལ་བ། ཡིད་ལ་མི་བྱེད་པ་ཉིད་ཀྱི་སྐུའོ། །དེ་དག་གི་རང་བཞིན་གང་ཡིན་པ་ནི་གཟུགས་ཀྱི་སྐུ་སྟེ་ངོ་བོ་ཉིད་དོ། །ཞེས་སོ། །འདི་རྣམས་ཕྱག་རྒྱ་ཆེན་པོའི་རང་བཞིན་ཅུང་ཟད་རྒྱས་པར་བཤད་པར་སྟེ་གཞུང་དེ་ཉིད་ལས་བཏུས་པའོ། །ས་ར་ཧའི་དོ་ཧ་མཛོད་ཀྱི་བཀའ་འགྲེལ་སློབ་དཔོན་ཆེན་པོ་དཔལ་གཉིས་སུ་མེད་པའི་རྡོ་རྗེས་༢༧མཛད་པ། དངུལ་ཆུ་ཤྲཱི་བཻ་རོ་ཙ་ནས་བསྒྱུར་བ་ལས། དགེ་ཚུལ་ནི་བསླབ་པའི་གནས་བཅུ་པའོ། །དགེ་སློང་ནི་བསླབ་པའི་གནས་ཉིས་བརྒྱ་ལྔ་བཅུ་པའོ། །གནས་བརྟན་ནི་བསྙེན་པར་རྫོགས་ནས་ལོ་བཅུ་ལོན་པའོ། །བནྡེ་ནི་དེ་རྣམས་ལ་གཞན་གྱིས་ཕྱག་འཚལ་བའི་ཆེད་དུ་རབ་ཏུ་བྱུང་བར་ཁས་བླངས་ནས་བསོད་སྙོམས་དང་། བསླབ་པ་སློབ་ཀྱང་མཆོག་ནི་མ་ཡིན་ཏེ། དེ་ཉིད་མི་ཤེས་པའི་ཕྱིར། ཞེས་སོགས་གསུངས། །ཡུལ་རྣམས་བསྟེན་པས་ཡུལ་གྱིས་ནི། །གོས་པར་འགྱུར་བ་མ་ཡིན་ཏེ། །ཇི་ལྟར་ཆུ་ལས་ཨུཏྤལ་ལ། བླངས་ཀྱང་ཆུ་ཡིས་མ་རེག་བཞིན། ཞེས་གསུངས་ཏེ། ཇི་ལྟར་ཆུ་ཡི་ནང་དུ་གྲུ་ལ་ཞུགས་ནས་ཨུཏྤལ་བླངས་ཀྱང་ཆུ་ཡིས་མ་གོས་པ་བཞིན་དུ། དེ་ཁོ་ན་ཉིད་ཤེས་པའི་རྟོགས་པ་ཡོད་ན་འདོད་པའི་ཡོན་ཏན་ལྔ་ལ་ལོངས་སྤྱོད་ཀྱང་ཉོན་མོངས་པས་གོས་པར་མི་འགྱུར་རོ། །ཞེས་སོགས་གསུངས་ཏེ། འདི་འགྲེལ་༡༨༧ཤིན་ཏུ་ལེགས་༢༥པར་༢༧ཡོད་༢༨དོ།། །། ༈ སློབ་དཔོན་མཻ་ཏྲི་པ་གཉིས་མེད་རྡོ་རྗེས་མཛད་པའི་མི་ཟད་པའི་གཏེར་མཛོད་ཡོངས་སུ་གང་བའི་གླུ་ཞེས་བྱ་བ་གཉུག་མའི་དེ་ཉིད་རབ་ཏུ་སྟོན་པའི་རྒྱ་ཆེར་བཤད་པ་ཞེས་བྱ་བ། རྣལ་འབྱོར་བསོད་སྙོམས་པ་པྲ་ཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་སུ་མཛད་པ་དེར། རི་ཁྲོད་ཀྱི་མུ་སྟེགས་རྣལ་འབྱོར་སྤྱོད་པ་རྣམས། རྣལ་འབྱོར་པ་ཆེན་པོ་ཏེ་ལོ་པ་ཞེས་བྱ་བ་དཔལ་ཧེ་རུ་ཀ་བཟང་པོའི་བརྟུལ་ཞུགས་ལ་ཞུགས་ཏེ་གྲུབ་པ་ཐོབ་པ། མུ་སྟེགས་པ་ཀི་ན་ཉི་ཞེས་བྱ་བས་མཐོང་ནས་དེ་དང་ཆོས་མཚུངས་པར་འཁྲུལ་པར་སྤྱོད་པའི་རྗེས་འབྲང་ལས་བྱུང་བ་སོགས་སོ་སོའི་འཁྲུལ་ཚུལ་རྒྱས་པར་བཤད་འདུག་གོ །དེའི་གཤམ་དུ། །སེམས་ཉིད་ལྷན་ཅིག་སྐྱེས་པ་ཆོས་ཀྱི་སྐུ། །སྣང་བ་ལྷན་ཅིག་སྐྱེས་པ་ཆོས་སྐུའི་འོད། །སྣང་སྟོང་དབྱེར་མེད་ལྷན་ཅིག་སྐྱེས་པ་སྟེ། །དེ་ཉིད་ཆོས་སྐུའི་དགོངས་པ་ཆོས་སྐུ་ཉིད། ཅེས་སོགས་གསུངས་སོ།། །། ༈ སློབ་དཔོན་ཐར་པའི་འབྱུང་གནས་སྦས་པས་དོ་ཧ་མཛོད་ཀྱི་བཀའ་འགྲེལ༢༡། རྒྱལ་བའི་ལྷ་༢༦༤དང་། རྒྱ་ལོ་ཙཱ་བས་བསྒྱུར་༢༨༣བ་ཡང་ཡོད་དོ། །འདི་གསུམ་ཀ་མགོར། དོ་ཧ་མཛོད་གྱི་གླུ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དུག་སྦྲུལ་ལྟ་བུའི་སྐལ་མེད་ནི། སོགས་ནས་དེ་ཁོ་ན་ཉིད་རྣལ་དུ་མཚོན་པ་དོན་དམ་པའི་ཡི་གེ་རྫོགས་སོའི་མཐའ་ཅན་དེ་གའི་འགྲེལ་པ་ཁོ་ནར་སྣང་ནའང་། གཞུང་གི་ཟུར་ཅུང་ཟད་མི་འདྲ་བ་དེར་བཅོས་པར་སྣང་ངོ་། །མངྒ་ལཾ།། །། ༈

ད་ནི་དཀྱིལ་འཁོར་ཆེན་པོ་བཀོད་པའི་རྗེས་སུ་འབྲངས་ནས་ས་ཙྪ་གདབ་པའི་ཆོ་ག་བཤད་པར་བྱ་སྟེ། ན་མསྶ་མནྟ་བུདྡྷཱ་ནཱཾ། ཨོཾ་བཛྲ་ཨཱ་ཡུ་ཥེ་སྭཱ་ཧཱ། འཇིམ་པ་བླང་བའི་སྔགས་སོ། །ཨོཾ་བཛྲོད་བྷ་བཱ་ཡ་སྭཱ་ཧཱ། འབི་འབི་བྱ་བའི་སྔགས་སོ། །ཨོཾ་ཨ་ར་ཛེ་བི་ར་ཛེ་སྭཱ་ཧཱ། སྣུམ་བསྐུ་བའི་སྔགས་སོ། །ཨོཾ་བཛྲ་དྷརྨ་དྷཱ་ཏུ་གརྦྷེ་སྭཱ་ཧཱ། རྒྱར་གཞུག་པའི་སྔགས་སོ། །ཨོཾ་བཛྲ་མུངྒ་ར་ཨཱ་ཀོ་ཊ་ཡ་སྭཱ་ཧཱ། གདབ་པའི་སྔགས་སོ། །ཨོཾ་དྷརྨ་ཨཱ་ཡུ་ཥེ་སྭཱ་ཧཱ། སྤྱན་དྲངས་པའི་སྔགས་སོ། །ཨོཾ་སུ་པྲ་ཏིཥྛ་བཛྲཱ་ཡ་སྭཱ་ཧཱ། བཞུགས་སུ་གསོལ་བའི་སྔགས་སོ། །ཨོཾ་སརྦ་ཏ་ཐཱ་ག་ཏ་མ་ཎི་ཤ་ཏ་དཱི་པ་ཏེ་ཛྭ་ལ་ཛྭ་ལ་དྷརྨ་དྷཱ་ཏུ་གརྦྷེ་སྭཱ་ཧཱ། རབ་ཏུ་གནས་པའི་སྔགས་སོ། །ཨོཾ་སྭ་བྷཱ་བ་བི་ཤུདྡྷེ་ཨ་ཧ་ར་ཨ་ཧ་ར་ཨཱ་གཙྪ་ཨཱ་གཙྪ་དྷརྨ་དྷཱ་ཏུ་གརྦྷེ་སྭཱ་ཧཱ། གཤེགས་སུ་གསོལ་བའི་སྔགས་སོ། །ཨོཾ་ཨཱ་ཀ་ཤ་དྷརྨ་དྷཱ་ཏུ་གརྦྷེ་སྭཱ་ཧཱ། བཟོད་པར་གསོལ་བའི་སྔགས་སོ། །དེ་ལྟ་བུ་ནི་སཙྪ་གདབ་པའི་སྔགས་སོ། །ན་མོ་བྷ་ག་ཝ་ཏེ་བཻ་རོ་ཙ་ན་པྲ་བྷ་རཱ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ། སཾམྱཀྶཾ་བུདྡྷ་ཡ། ཏདྱ་ཐཱ། ཨོཾ་སུཀྵྨེ་སུཀྵྨེ། ས་མ་ཡེ་པྲ་ས་མ་ཡེ། ཤཱནྟེ་ཤཱནྟེ། ས་མ་རོ་པེ། ཨ་ན་ལམྦྷེ། ཏརྦྷ། ཡ་ཤོ་བ་ཏི། མ་ཧཱ་ཏེ་ཛ་ནི་རྐུ་མེ། ནིརྦཱ་ན། སརྦ་བུདྡྷ་ཨདྷིཥྛཱ་ན་ཨདྷིཥྛཱི་ཏེ་སྭཱ་ཧཱ། ཞེས་བྱ་བའི་གཟུངས་འདི་འཇིམ་པའམ། བྱེ་མ་ལ་ལན་ཉི་ཤུ་རྩ་གཅིག་གི་བར་དུ་བཟླས་ཏེ། མཆོད་རྟེན་བྱས་ན། དེ་ལ་རྡུལ་ཕྲ་རབ་ཇི་སྙེད་ཡོད་པ་དེ་སྙེད་ཀྱི་བྱེ་མ་སྙེད་ཀྱི་འགྱུར་གྱི་མཆོད་རྟེན་བྱས་པའི་བསོད་ནམས་ཐོབ་པར་འགྱུར་རོ། །ས་བཅུའི་དབང་ཕྱུག་ཏུ་འགྱུར་རོ། །མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ་ཞེས་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་ཏེ། གཟུངས་འདི་ནི་ཕན་ཡོན་དཔག་ཏུ་མེད་དོ། །ཡེདྷརྨཱ་ཧེ་ཏུ་པྲ་བྷཱ་བ་ཧེ་དུནྟེ་ཥཱནྟ་ཐཱ་ག་ཏོ་དྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ ཚིགས་སུ་བཅད་པས་རབ་གནས་བྱས་ལ། ན་མོ་བྷ་ག་ཝ་ཏེ་རཏྣ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡཱ་ཧརྟེ་སཾམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་རཏྣེ་རཏྣེ་མ་ཧཱ་རཏྣ་བོ་དྷི་སྭཱ་ཧཱ། ཞེས་བྱ་བའི་གཟུངས་ལ་སོགས་པ་འདི་བརྗོད་ཅིང་མཆོད་རྟེན་ལ་ཕྱག་འཚལ་བ་སོགས་བྱས་ན། མཆོད་རྟེན་གཅིག་ལ་ཕྱག་བྱས་པས། མཆོད་རྟེན་བྱེ་བ་ལ་ཕྱག་ལ་སོགས་པ་བྱས་པར་འགྱུར་རོ། །འཇིམ་པ་ལ་སོགས་པ་ལ་མཆོད་རྟེན་བྱ་བའི་ཆོ་གའོ། །ཞེས་དང་། འགྲོ་བའི་ལས་འདི་བདག་གིས་བྱས་པ་ཡིས། རིང་པོར་མི་ཐོགས་འཇིག་རྟེན་སངས་རྒྱས་ནས། །འགྲོ་ལ་ཕན་ཕྱིར་ཆོས་ནི་སྟོན་བྱེད་ཅིང་། །སྡུག་བསྔལ་མང་པོས་མནར་བའི་སེམས་ཅན་གྲོལ་གྱུར་ཅིག །ཅེས་དང་། ཁ་ཟས་ཀྱི་བྱ་བ་ཟིན་རྗེས། །རྒྱལ་པོ་དང་ནི་ཡོན་བདག་དང་། །སེམས་ཅན་ཕུང་པོ་གཞན་དག་ཀྱང་། །ཚེ་དང་ནད་མེད་ཕུན་སུམ་ཚོགས། །རྟག་ཏུ་བདེ་བ་ཐོབ་གྱུར་ཅིག །ཅེས་བརྗོད་དོ། །ཞེས་དང་། །དཀྱིལ་འཁོར་ལ་སོགས་ཆོ་ག་ཡིས། །ཡང་དག་ཤེས་རབ་ཕ་རོལ་ཕྱིན། །རྟག་ཏུ་མཆོད་ཅིང་བཀླག་པར་བྱའོ། །ཚིགས་བཅད་གཅིག་དང་ཚིགས་བཅད་བཞི། །ཚིགས་བཅད་གཉིས་དང་སྒོ་དྲུག་པའི། །གཟུངས་དང་བཟང་པོ་སྤྱོད་པ་དང་། །ཕུང་པོ་གསུམ་པ་དུས་གསུམ་དུ། །ཡི་གེ་གཅིག་ནས་ཉེར་བཟུང་ནས། །གསུམ་གྱི་བར་དུ་མཉམ་བཞག་པས། །ཡི་དམ་ཉམས་པ་མེད་པ་ཡིས། །བློ་ལྡན་ཇི་ལྟར་རྙེད་པ་བཀླག །ཅེས་སོ། །འདི་དག་སློབ་དཔོན་གཉིས་མེད་རྡོ་རྗེས་མཛད་པའི་ལྟ་བ་ངན་སེལ་ལས་བཏུས་པའོ། །ཇི་ལྟར་དག་པའི་ཨུཏྤལ་མིག་སྨན་མདངས། །ཆུ་མཚོར་བརྟེན་ཀྱང་ཉམས་པ་མེད་པ་ལྟར། །འདོད་པའི་ཡུལ་རྣམས་བདག་གིར་མཛད་པའི་མོད། །ཆགས་བྲལ་བརྟུལ་ཞུགས་མཆོག་ཏུ་གྲུབ་དེས་སྲུངས། །སརྦ་མངྒ་ལཾ་ཤུ་བྷཾ་བྷ་བནྟུ།། །། ༈

[edit]

in+d+ra b+hu ti'i ye shes grub pa sogs 'phags yul gyi grub pa'i dbang phyug chen po rnams kyis mdzad pa'i rgyud sde'i man ngag rnams las khol phyung shin tu mang ba/ slob dpon in+d+ra b+hU tis mdzad pa'i ye shes grub pa zhes bya ba'i sgrub thabs las/__le'u dang po phyag rgya chen po bstan pa zhes bya bar/__/sems can kun gyi yid khyab par/__/rdo rje sems dpa' rang nyid bzhugs/__/de ltar bsams nas rnal 'byor gyi/__/dbang po gang la'ang brnyas mi bya/_/zhes dang /___bza' dang bza' min las 'das dang /__/btung dang btung min rnam par spangs/__/bgrod dang bgrod min rnam grol bdag__/rnal 'byor pa ni mnyam 'jog 'gyur/__/zhes dang /__/gang la bla ma'i drin yod pa/__/de yis de nyid mchog rnyed 'gyur/_/gzhan du byis pas yun ring du/__/rnam par rmongs pas nyon mongs 'gyur/__/zhes dang /__de mnyam 'gro ba 'jig rten na/__/khams gsum na ni gzhan med de/__/rdo rje sems nyid 'jig rten na/__/phun sum tshogs kun phyir zhugs yin/__/zhes dang /___rtog pa thams cad rnam spangs pa'i/__/ye shes mchog bzang thob pa yis/__/rdo rje ye shes dbang bskur bas/__/dngos grub mchog ni bsgrub par bya/__/yang dag ye shes kun ldan na/__/bris pa'i dkyil 'khor logs gzhan du/__/dbang bskur ba ni len ce na/__/'di ni dam tshig nyams par 'gyur/__/dam tshig nyams pa'i sdug bsngal ni/__/lus dang de bzhin yid dang ni/__/de yi don rnams nyams 'gyur zhing /__/myur ba nyid du shi bar 'gyur/__/shi nas dmyal ba'i sdug bsngal ni/__/bskal pa bye ba brgya phrag tu'ang /__/myong nas gnas las 'phos gyur na'ang /__/gdol pa'am dman pa'i rigs su skye/__/lkugs pa'am yang na 'on pa'am/__/skye zhing skye bar dmus long du/__/skye bar 'gyur ba the tshom med/__/de bzhin gshegs kun ye shes ni/__/rdo rje ye shes zhes byar bshad/__/blo ldan de yis dbang bskur na/__/dbang bskur bar ni shes par bya/__/rnal 'byor sangs rgyas kun bdag nyid/__/'gro ba'i bdag po la sogs pa'i/__/tshogs kyis thal mo sbyar nas ni/_/byas nas mngon par phyag byed 'gyur/__/byang chub sems dpa' stobs chen dang /_/bdag nyid chen po sangs rgyas kyang /__/dpal chen bsrung bar mdzad gyur te/__/rdo rje sku yis rtag tu bzhugs/__/bden pa'i chos 'dzin mi 'khrugs shing /__/sangs rgyas gdung ni rab 'jug pa/__/byin gyis brlabs dang ldan pa rnams/__/gus dang bcas pas bsngags par mdzad/__/'jig rten skyong ba de bzhin gzhan/__/stobs chen pha rol gnon pa rnams/__/gnas rnams kun tu rtogs pa na'ang /____/gsung bzhin du ni rab tu gnas/__/gang yang sems can thams cad la/__/bdud dang bgegs su gnas pa rnams/__/de yang de la mi byed de/__/bgegs rnams skrag nas 'byer bar 'gyur/__/lha la sogs pa grub pa rnams/__/mkha' la rgyu dang mi rgyu kun/__/ngan 'gror 'gro bas 'jigs pas na/__/de yang de la mgon mi byed/__/gal te rmongs pa'i dbang gis ni/_/rnam par rmongs rnams mgon byed na/__/brtson dang ye shes rnam shes dang /__/dngos grub dag kyang nyams par 'gyur/__/kun mkhyen mchog sbyin gsungs pa'o/__/dbyibs kun dang ni rnam bral zhing /__/'gro dang 'ong las rnam grol bdag__/rlung kun kyis kyang bskyod mi nus/__/me yi phung pos mi tshig cing /__/chu rnams kyis kyang g.yengs mi 'gyur/_/rab tu 'bad pas mtshon cha ni/__/rnon pos kyang ni chod mi 'gyur/__/ji ltar mi gnas nam mkha' ni/__/khyab cing mtshan nyid rnams dang bral/__/'di na don dam de nyid de/_/rdo rje ye shes bla na med/__/kun tu bzang po zhes bshad cing /__/phyag rgya chen po zhes kyang bya/__/'di ni chos skur shes bya ste/__/me long ye shes zhes kyang bya/__/ji ltar gzugs brnyan me long la/__/rang nyid nges par snang ba ltar/__/de bzhin chos skur ye shes ni/_/snang bas me long zhes bya'o/__/de bzhin gshegs kun ye shes dang /__/rang gi dang ni 'gro ba'i yang /__/dngos nyid gcig pur thugs su chud/__/mnyam nyid ye shes zhes bya'o/_/gdod nas dag cing skye ba med/__/rang bzhin gyis ni 'od gsal ba/__/phan tshun khyab pa'i ye shes pas/__/so sor rtog pa can zhes bshad/__/kun tu kun nas sangs rgyas kyi/_/mdzad pa thams cad la 'jug pa/__/sangs rgyas thams cad mdzad gcig pas/__/bya ba grub pa zhes bshad do/__/gang tshe nyon mongs shes bya'i sgrib/__/thams cad las grol de yi tshe/__/rnal 'byor pa mchog rdo rje can/__/shin tu rnam dag ces bshad do/__/ji ltar gdul bya'i chos rnams dang /__/'dod yon kun la sangs rgyas rnams/__/thams cad longs spyod gcig pas na/__/longs spyod rdzogs pa'i skur 'dod do/__/mtshan rnams kun dang yang dag ldan/__/sna tshogs sku ste mtshan nyid med/__/sangs rgyas rnams kyi sprul pa bas/__/sprul pa'i skur ni bshad pa yin/__/phyag rgya chen po rab bsgrub phyir/__/shes nas rnal 'byor pas de bsgoms/__/kun rtog thams cad rnam spangs na/__/tshe 'di nyid la 'grub par 'gyur/__/zhes sogs rgyas par gsungs so/__/le'u gnyis pa gzugs su bsgom pa dgag pa las/__/gal te mgon med skye bo 'ga'/__/rgyal por 'gyur ro zhes bsgoms pas/__/bskal pa bye ba brgya yis kyang /__/'di ni rgyal po thob mi 'gyur/_/gang zhig log par rtog pas ni/__/de la rgyal po yod min ltar/__/de bzhin log pa'i sgom pa yis/__/sangs rgyas nyid du 'gyur ma yin/__/zhes dang /___gal te byas pa'i lha yi gzugs/__/rdo rje sems dpar gyur na ko__/gang phyir 'dus byas las byung bas/_/bum pa la sogs bzhin du 'jig__/ces so/__/le'u gsum pa rnam pa dang bcas pa'i ye shes dgag pa las/__/de ltar gzugs su bsgoms pa yis/__/rdo rje sems dpa' mi 'grub ste/__/rnam bcas rtog pas kyang de bzhin/__/rdo rje sems dpa' mi 'grub bo/_/zhes dang /__gzugs med gzugs su mi 'gyur te/__/gzugs med gzugs can yod ma yin/__/ye shes gzugs ni med par grags/__/rnam pa gzugs can yin par bshad/_/ces dang /___ye shes 'byung ba'i dus su yang /__/rnam pa kun tu mi 'byung la/__/rnam pa'ang kun tu 'byung ba na/__/ye shes nyid ni mi rigs so/__/zhes dang /___ye shes rnam bcas yin zhes pa/__/rnam pa dang bral ma yin te/__/rnam pa dang bcas ye shes ni/_/rnam bcas nyid du ji ltar 'gyur/__/zhes sogs rgyas par bstan no/__/le'u bzhi pa rnam pa med pa dgag pa las/___gal te rnam pa med na yang /__/ye shes 'gyur ba rnam rtog na/_/rnam pa dang ni rnam bral ba/__/'dis ci rig na kun rig yin/__/kun mkhyen de la yod min zhing /__/ye shes zhes bya rtog pa nyid/__/rnam pa thams cad mi gzigs pas/__/bem po nyid du thal bar 'gyur/__/bem med rtog pa'i ngo bo ni/__/rnam pa med pa yin par bshad/__/ces dang /___gal te gzugs sogs dngos po rnams/__/rnam pa kun tu yod min na/__/sangs rgyas thugs rje'i bdag nyid kyi/__/lha yi spyan ni ji ltar 'grub/__/lha yi snyan sogs thams cad kyang /__/de bzhin du ni yod min pas/__/mngon par shes pa med pa'i phyir/__/de bas kun mkhyen med par 'gyur/__/zhes dang /___sems can kun don legs bsgrub phyir/__/gang tshe nges pa nyid 'gyur bas/__/ye shes yid bzhin nor bu bshad/__/bem po'i bdag nyid ma yin no/__/zhes sogs gsungs so/__/le'u lnga pa rmongs pa bsgoms pa dgag par/__/shin tu rmongs skabs ye shes ni/__/rnal 'byor pa ni la la 'dod/__/rmongs pa bsgoms pas rmongs pas ni/__/tshul ngan nyid rnams thob par 'gyur/__/thams cad rgyu dang mtshungs pa yi/__/'bras bu 'jig rten las spyod do/__/ko Ta pa las 'bras skye ba/__/gang la'ang yod pa ma yin no/__/zhes sogs gsungs so/_/le'u drug pa dbugs rngubs pa dang dbyung ba'i de kho na nyid dgag par/__dbugs 'byung ma yin rngubs min ni/__/de nyid grub par rigs pa min/__/de gnyis dbus na'ang yod ma yin/__/rlung gi de nyid ji ltar 'gyur/__/zhes dang /__lus kyis 'bud pa gang yin pa/_/sbud pa 'bud par byed pa dag__/de dag khyad par ma mthong ste/__/de nyid mthong ba'i rnal 'byor pas/__/'bud pa yi ni bya ba min/__/zhes dang /__yang /__mngon par rmongs shing lam nyams rnams/__/log pa'i don ni rab sgom pa/__/de dag bde 'gror mi skye ste/_/dmyal ba gcig pur 'gro ba nyid/__/ces gsungs/__le'u bdun pa bde ba chen po smra ba dgag pa'i le'u las/___dbang po gnas byung bde ba ni/__/de nyid yin zhes skye ngan smra/_/de ni bde ba che yin zhes/__/rgyal ba mchog gis ma gsungs so/__/rten cing 'brel 'byung las skyes pa/__/gang du de nyid shes mi 'grub/__/gang phyir 'di de thams cad du/__/ngo bo nyid kyis yod ma yin/__/bde gshegs kun gyi ye shes ni/__/rang gi ngo bo nyid mkhyen pa'i/__/bde ba kun gyi gtsor gyur pas/__/bde ba chen po zhes bshad do/__/bde chen mi rtag ma yin te/__/bde ba chen po rtag tu rtag__/mchan khung g.ya' 'phrugs las byung ba/_/ci yi phyir na bde chen min/__/chags dang mnyam pa'i bde med de/__/de ni rgyal ba rnams la phul/__/'dod pa'i don kun longs spyod cing /__/smod pa dag tu mi bya zhes/__/rnal 'byor rgyud ni thams cad las/__/rdo rje sems dpas gsungs pa ni/__/rnal 'byor pa yi sems bde phyir/__/don dam pa yi de nyid min/__ces gsungs so/__/le'u brgyad pa bsod nams dang ye shes kyi tshogs rab tu 'phel bar/__/de bas thabs shes rnal 'byor pa/__/sems can kun gyi gnyen gcig pas/__/nam yang bslu ba med pa'i sems/__/de nas brtan pa bskyed par bya/__/'di byas pas ni rdzogs sangs rgyas/__/dgyes pa'i bdag nyid can kun mnyes/__/zhes dang /__lam 'dir gnas pa'i rnal 'byor pas/_/yar ngo'i zla ba ji bzhin du/__/rim gyis yang dag 'phel 'gyur gyi/__/nam yang zad par mi 'gyur ro/__/zhes so/__/le'u dgu pa bsod nams dang sdig pa skye ba dang 'jig pa yongs su shes par/__/ji ltar bshags pa'i sdig pa ni/__/shin tu mi bzad zad 'gyur zhing /__/de yi rjes su yi rangs pas/__/ji ltar bsod nams yang dag rdzogs/__/zhes dang /___sems med par ni lus ngag gis/__/ci yang byed par nus ma yin/__/de med par ni tshig gis kyang /__/nam yang nus 'gyur ma yin no/__/de bas lus ngag las rnams ni/__/yid nyid las ni gyur pa yin/__/zhes dang /___de bas dge dang mi dge kun/__/sems nyid kyis ni byed pa dang /__/sems nyid kyis ni 'jig 'gyur zhes/_/'gro ba'i bla mas gsungs pa yin/__/zhes so/__/le'u bcu pa gtsang pa dang mi gtsang ba'i rtog las grol bar/__/char gyi tshogs ni 'bab pa yis/__/smod pa thams cad bkru ba dang /__/'bru rnams thams cad bskyed nas ni/__/de nas rgya mtshor 'bab par 'gyur/_/mi gtsang rnams dang ldan pa yi/__/chu ni chu yis blangs nas kyang /__/chu ni gang dang gang yin pa/__/thams cad de bzhin char du 'bab/__/rdzing bu la sogs kun rgyas shing /_/thams cad kyis ni thams cad 'khrud/__/ces dang /___gtsang ba nyid ni yod gyur na/_/mi gtsang nyid ni 'byung bar 'gyur/__/dag pa med pa'i mi gtsang nyid/__/rnam pa kun tu mi rnyed do/__/zhes so/__/le'u bcu gcig pa bgrod pa dang bgrod pa ma yin pa bral bar/___de ltar gnas shing 'khor bar ni/__/yun ring dus su 'jug pa dang /__/pha dang mar ni ma gyur pa'i/__/sems can gang yang yod ma yin/__/zhes sogs gsungs/__le'u bcu gnyis pa gnas pa bzhag pa zhes bya bar/__/yang dag ye shes rig pa las/__/khyab bdag rdo rje'i sku nyid dang /__/'gyur ba med pa nyid dang ni/__/kun mkhyen nyid ni de yis 'grub/__/ces dang /___lus can dag ni thams cad la/__/ye shes che gnas nyid yin na'ang /__/mi shes rab rib kyis khebs pa'i/__/byis pa rmongs pas mi shes so/__/zhes so/__/le'u bcu gsum pa slob dpon gyi mtshan nyid las/__/ji ltar dmus long bya ba yis/__/'brog dgon dag tu zhugs gyur pa/__/gnyis ka'ang de 'dra la la zhig__/ji ltar grong du 'jug par 'gyur/__/de bzhin dmus long gyur pa des/__/yang dag ye shes ma mthong bas/__/gnas de thob par mi nus na/__/ji ltar des ni gzhan grol byed/__/de bas bla ma bsten pa yi/__/yang dag dang ldan slob ma yis/__/yongs su brtag par bya'o zhes/__/rgyal ba mchog gis rab tu gsungs/__/dkon mchog gsum la ngang gis dad/_/sems can kun la snying rjer ldan/__/brtan zhing gtong sogs yon tan ldan/__/bsod nams thams cad cher bskyed la/__/byang chub sems ni yang dag bskyed/__/blo bzang rab dang yon tan ldan/__/khro ba med cing spro ba che/__/zab mo'i chos la lhag par mos/_/de ni chos kyi sbyin pa dag__/zang zing med la rtag par dga'/__/de ni rtag tu 'dod pa chung /__/tshogs gnyis yang dag bsags pa'o/__/de ni bla mar sangs rgyas dang /__/rdo rje 'dzin pa kun gyis gsungs/__/zhes so/__/le'u bcu bzhi pa slob ma'i mtshan nyid las/_/ji ltar 'ga' zhig grur zhugs pas/__/skya ba 'dzin par legs bslabs na/__/mtsho chen pha rol 'gro 'gyur zhing /__/gzhan du pha rol 'gro mi 'gyur/__/de bzhin bla ma dkon mchog gsum/__/byang chub sems la'ang dad ldan zhing /__/'jig rten la ni snying rjer ldan/__/'di ni gru zhes bya bar bshad/__/bla ma mkhas pa skya ba 'dzin/__/gru ni thams cad rab ston pa/__/'khor ba'i pha rol 'gro rnams la/__/rdo rje sems dpa' gsungs pa yin/__/skya ba 'dzin pa med par ni/__/grus kyang pha rol bgrod mi nus/_/yon tan thams cad rab rtogs kyang /__/bla ma med na srid mthar min/__zhes dang /_/shes rab dad par yang dag ldan/__/khro ba med cing bslu ba med/__/gtong sogs yon tan rnams kyis brgyan/__/spro chen rang gi brtson 'grus ldan/__/rtag tu bla ma'i bka' bzhin byed/__/ma bsgos par yang rang gi blos/__/yo byad la sogs dngos po rnams/_/ci snyed pa dang ci nus dang /__/de bzhin bza' dang bca' sogs dbul/__/ji ltar brnyas par gyur kyang ni/__/yid ni zhum pa med par bzod/__/lung dang rigs pa rtogs pa po/__/slob ma yon tan kun ldan yin/__/mi rtog pa yi rang bzhin can/__/gang la'ang 'dri ba med pa ni/__/slob mar bya ba mi nus zhes/__/sangs rgyas nyid kyis rab tu gsungs/__/zhes dang /__sngar gyi le'u bcu gsum par/___gang gzhan bla mar bshad pa dag__/log shes mngon pa'i nga rgyal can/__/chags sogs don gnyer chos rnams ni/_/mchog dag ston par byed 'gyur ba/__/'gro ba'i sdig pa'i grogs po ru/__/'jig rten na de rab tu gnas/__/zhes gsungs/__le'u bco lnga pa de kho na nyid yi ge'i tshogs nges par bstan pa las/__thog ma dang tha ma med ces pa ni skye ba dang 'jig pa med pa ste/__'dis ni khyab pa nyid dang /___gzugs can ma yin pa nyid dang /___mi 'gyur ba nyid dang /___dus thams cad pa nyid du yang ston te/__zhes dang /__zhi ba zhes bya ba ni nyon mongs pa thams cad glo bur ba yin pa'i phyir rab tu zhi ba'o/__/zhes dang /___'dus pa las lung drangs pa/__chos rnams rang bzhin 'od gsal ba/__/gzod nas dag pa mkha' dang mtshungs/__/byang chub med cing rtog pa'ang med/__/byang chub tshul 'di ston pa'o/__/zhes dang /__le'u bcu pa las/___lus ngag sems rnams bsgom pa ni/__/rnam par mi rtog mi dmigs pa/__/gang la'ang mi gnas mnyam pa nyid/__/sku gsung thugs kyi rdo rje bsgom/_/le'u bcu gnyis pa las/___nam mkha'i khams dang mnyam gyur cing /__/rnam par mi rtog ngo bo nyid/__/rang bzhin dag pa'i chos rnams la/__/rol mo 'di dag rab tu bsgom/_/le'u bcu drug pa las/___rdo rje'i thig ni gdab pa dang /__/mtshon rtsi dag kyang dgye ba ni/_/sngags kyi sems dpas mi bya ste/__/byas na byang chub rnyed dka'o/__/zhes sogs dang /___gnyis med rnam rgyal las drangs pa/__le'u bcu gsum pa las/___sangs rgyas kun gyi dkyil 'khor ni/__/de nyid shes pa'i dkyil 'khor te/__/'di ni de nyid grub pa yin/_/yid bzhin nor bu lta bur bshad/__/ces dang /___zla gsang thig le nor bu'i rgyud las/_/yan lag kun bsgom las 'das shing /__/rtog dang brtag bya rnam par spangs/__/gug skyed thig le yang dag 'das/__/'di ni dkyil 'khor dam pa yin/__/zhes sogs dang /___sgyu 'phrul drwa ba'i le'u bdun pa byang chub sems kyi le'u las drangs par/___chos rnams rang bzhin 'od gsal bas/__/gzod nas dag cing rnyog pa med/__/sems can med cing srog kyang med/__/sangs rgyas nyid dang byang chub sems/__/zhes dang /__dpal rdo rje dkyil 'khor gyi rgyan las drangs pa/__dper na me tog la dri dang /__/dper na zho la mar sar bzhin/__/kun tu sems can thams cad dang /__/rgyu ba dang ni mi rgyu ba/__/gzugs dang gzugs med rtog pa la/__/phyag rgya chen po rab tu gnas/__/zhes dang /__yang /__ye shes 'di ni mi 'jig pa dang /__mi zad pa dang /__mi g.yo ba dang /__gzod ma nas dag pa dang /__/dri ma med pa dang /__'od gsal ba dang /__brjod du med pa'o/__/zhes so/_/le'u bcu drug pa thabs nges par bstan pa las/__de ltar shes mchog thabs dang ni/_/bcas par yang dag bsgom par ni/__/shin tu drag po'i bdag nyid can/__/skye ba gcig gis 'grub par 'gyur/__/zhes so/__/le'u bcu bdun pa dbang bskur ba'i cho ga'i le'ur/__thugs rje'i bdag nyid bka' drin gyis/__/yang dag ye shes mchog thob ste/_/rang rig pa yi ngo bo la/__/bdag ni shin tu ngo mtshar skyes/__/zhes so/__/le'u bco brgyad pa dbang po mchog legs par spyod pa'i rim par/__/sangs rgyas zhing ni ma lus par/_/sangs rgyas sprul pa sgrub par byed/__/sangs rgyas sprul pa sgyu ma yis/__/sangs rgyas rnams kyi mdzad pa ston/__zhes so/__/le'u bcu dgu pa dbang po 'bring bstan par/_/rnam pa kun mchog ldan pa yi/__/rang gi lha yi skad cig gis/__/bskyed la sngon bzhin rnal 'byor pas/__/lam la gnas te bzlas brjod rtsom/__/zhes so/__/le'u nyi shu pa dbang po tha ma bstan par/__/phyag rgya'i dkyil 'khor sku mdog sogs/__/phyag dang gdan ni rnam sgom dang /__/ting 'dzin gsum dang phyag rgya bzhi/__/zhal gsum dang ni phyag drug rnams/__/sgom 'gyur de ni phyi shun bcas/__/sna tshogs spros pa'i man ngag rnams/__/de kun dman pa'i yin par bshad/__/ces gsungs so/__/gzhung 'di sngon rgya gar gyi mkhan po dad byed go cha dang /__lo chen rin bzang gis 'gyur la/__/phyis nag tshos kyang bcos pa ste/__/de nyid las lung gi dum bu 'ga' zhig phyung ba'o/__/gang tshe nyi gzhon thigs pa dang /__/dpyid kyi dpal mo ma yin yang /__/blo ldan dga' ba'i ut+pa la/_/'byed pa'i nges don grub pa'i gtam/__zhes kyang smras so/__/shu b+haM//____//__! gnyis su med par grub pa zhes bya ba'i sgrub thabs las/__/dam bca' dka' thub smyung ba dang /_/snying po bsgom par smra ba las/__/'di nyid med par gyur na ni/__/bskal pa 'bum phrag brgyar mi 'gyur/__zhes dang /__/thams cad rig nas byung ba yi/__/bud med dag la brtag mi bya/__/de nyid bcom ldan pha rol phyin/__/kun rdzob tsam gyi gzugs can no/_/tshes grangs skar ma mi dgos te/__/smyung bar yang ni gnas mi bya/__/gnyis med ye shes ldan pa yis/__/bde bar gshegs pa'i dngos grub 'gyur/__/zhes dang /__thams cad sems kyi chos nyid ni/__/dngos po ma grub brtag dka' ba/__/de nyid slob dpon zhal las ni/__/thob par 'gyur ba the tshom med/__/ces gsungs so/__/'di ni u rgyan na che ba'i rnal 'byor ma gdan gyis sgrub pa'i lha'i gnas nas phyung ba bcom ldan 'das ma lak+Sh+mI'i zhal snga nas byung ba las btus pa'o//____//__! dngos po gsal ba'i rjes 'gro de kho na nyid grub pa zhes rnal 'byor ma tsi tos mdzad pa las/__'gro ba rnams kyi bde chen rgyal po gcig pu nyid/__/rgyu rnams dang bral rtag tu 'byung bar 'gyur ba ste/__/gang zhig gis ni nye bar brjod pa'i dus dag tu/__/thams cad mkhyen pa'ang tshig gis dbul gyur rgyal gyur cig__/ces dang /__/skye ba snga mar byas pa'i las kyi rgyu las ni/__/sems de 'di ru skye ba yongs su len cing 'gro/__/de yi rgyu yis ma lus 'di dag thams cad ni/_/bag chags bcas pa'i sems kyis nye bar brtsam par 'gyur/__/zhes gsungs shing /__'di nyid zhi bzang dang /__'gos kyis bsgyur pa'o//____//__! Dom+b+hi he ru kas mdzad pa'i lhan cig skyes grub las/__/le'u dang por lhan cig skyes pa bstan pa las/__/dga' ba cung zhig bde ba ste/__/rab dga' de las lhag pa yin/__/dga' bral dga' ba chags bral te/__/lhan cig skyes dga' lhag ma nyid/__/dang po rig par 'dod pa ste/__/gnyis pa bde bar 'dod pa yin/__/gsum pa chag pa mnyam nyid phyir/__/bzhi pa der ni bsgom bya yin/__/dang po shes rab dro ba ste/__/gnyis pa du bar ldan pa yin/__/gsum pa me stag 'phro ba ste/__/bzhi pa de bzhin 'bar ba yin/__/zhes dang /__le'u gnyis pa de kho na nyid bstan par/__/gang zhig srid gsum 'gyur ba yi/__/'gro kun lhan cig skyes par ldan/__/'gro ba'i rang bzhin gzhan mi snang /__/thams cad de nyid kyis khyab yin/_/zhes so/__/le'u gsum pa spyod pa'i de kho na nyid bstan par/__/so so rang rig bde chen po/__/gang gis so so rang rig bsgom/__/rang gi dngos grub 'byung bar 'gyur/__/zhes so//____//__! o rgyan gyi sa spyod dbang po'i blos mdzad pa'i lhan cig skyes grub las/_/rtog dang bral zhing mngon sum pa/__/rgyal bas yid ni nang gnas gsungs/__/rtag dang chad pa bral ba nyid/__/mtshon dang mtshan gzhi spangs pa nyid/__/ces dang /__/de nyid srog chags rnams kyi srog__/de nyid mchog tu mi 'gyur ba/__/de nyid kun la khyab pa yi/_/lus kun la ni rnam par gnas/__/zhes dang /__bdag tu 'dzin pa'i mthar gnas pa/_/glen pa rmongs pas mi shes so/__/mchog gi go 'phang mi shes phyir/__/rmongs pa thams cad nyon mongs 'gyur/__/bskal pa gsum du gdung byas la/__/bdag nyid gcig pu 'dul ba'o/__/rnam pa kun tu 'di dag min/__/nyan thos pa yi byang chub 'dod/__/dbu ma'i 'dod lugs gzhung gi tshul/__/de ni rtsod pa kun la mos/__/bskal pa'i yal gar ngal byas kyang /__/de yis kun nas mi shes so/__/theg chen shin tu yangs pa la/__/rgyal ba mchog gis sngon gsungs pa/__/'di ltar gcig pu nyid kyis ni/__/yang dag rdzogs pa'i byang chub mchog__/ces dang /__/kha cig dngos grub dbang gnyis skyes/__/byis pa yun ring rgan sogs kyis/__/'bad pa yis ni thob mi 'gyur/__/zhes sogs lhan skyes 'dod pa gzhan thams cad bkag cing /___byis pa'i brjod pa dag dang bral/__/brjod bya rjod byed spangs pa nyid/__/lhan cig skyes pa de lta bur/__/bla ma mchog gis sngon du gsungs/_/zhes dang /__/za ba'am ni 'khrig pa na/__/gnas skabs kun la thams cad du/__/gsang ba med cing 'jig pa spangs/__/ye shes chen po rang gis rig__/ces gsungs so/_/gzhung 'di zla ba'i mgon po dang /__/pradz+nyA kIr+t+tis bsgyur ba ste/__/nyer mkho'i dum bu cung zad tsam mo/__/'di la gzhung mdzad pa po rgyal po in+d+ra b+hU ti rang gi bla mar gyur pa'i lha lcam lak+Sh+mI'am dpal mos mdzad pa'i 'grel pa nyung ngu rnam gsal zhig bzhugs 'dug go/____//__! slob dpon chen po ker li pas mdzad pa'i de kho na nyid grub par/__dper na dug gi de nyid shes/__/dug zos kyang ni gnod mi 'gyur/__/de bzhin yul gyi de nyid shes/__/'dod pa spyod pas gnod pa med/__/ces dang /___ji ltar 'dam gyi pad+ma ni/_/'dam la gnas kyang des mi gos/__/de nyid rig pas rtag tu ni/__/'dod pa rol pas spyad par bya/__/zhes dang /__/de phyir dngos grub mchog gnyer na/__/dka' thub brtul zhugs spyad mi bya/__/ji ltar bde ba de bzhin mnos/__/bde ba spangs na dngos grub med/_/ces dang /__/mi g.yo sgrib bral phra ba yi/__/thig le'i gzugs can rtog pa med/__/thog mtha' med pa'i de nyid ni/__/ma byung ma byas mchog yin no/__/zhes dang /__/rgyu la 'bras bus rgyas gdab cing /__/'bras bu la yang rgyus rgyas gdab/__/rgyu 'bras gcig tu rgyas gdab pas/__/phyag rgya chen po skye bar 'gyur/__/zhes sogs gsungs so/__/de ltar rgyud sde spyi'i dgongs 'grel du gyur cing /___lhan cig skyes pa gtso bor ston pa'i bstan bcos/__'phags yul gyi rnal 'byor mchog rnams kyi dgongs bcud snying por dril ba/__grub pa sde brgyad las/__rang dang gzhan dag gi ched du lung gi dum bu cung zad tsam btus pa ste dpal e waM chos ldan gyi ri khrod du'o/_/ji ltar sbrang rtsi'i dog pas brlan gyur pad+ma'i nags/__/mthong bas dga' ba'i raHyig gnyis pa ji bzhin du/__/nges don gzhung bzang dri med snying la bzung ba'i tshe/__/tshul 'di mthong nas rang gzhan don du nye bar bsdus/__shu b+ha sid+d+h+yan+tu//____//__! slob dpon klu sgrub kyis mdzad pa'i phyag rgya bzhi gtan la dbab pa las/__de la las kyi phyag rgya brtag par bya ste/__las kyi lus dang /__ngag dang /__yid kyi bsam pa ste gtso ba'o/__/phyag rgya ni brtag pa'i rang bzhin yin no/_/las kyi phyag rgya de la yang skad cig ma'i dbye bas dga' ba bzhi dag skye bar 'gyur ro/_/skad cig shes pa'i des ye shes/__/e waM la ni rab tu gnas/__/zhes dang /__yang chos kyi phyag rgya ma shes par las kyi phyag rgya bcos ma 'ba' zhig las lhan cig skyes pa'i rang bzhin bcos ma ma yin pa ji ltar 'gyur zhing skye bar 'gyur/___rigs mthun pa'i rgyu las rigs mthun pa'i 'bras bu skye bar 'gyur gyi rigs mi mthun pa las ni ma yin no/_/ji ltar 'bras sA lu'i sa bon las sA lu'i myu gu skye bar 'gyur gyi/__drug cu pa las ni ma yin no/__/de bzhin du ma bcos pa'i chos kyi phyag rgya'i rang bzhin las ma bcos pa'i lhan cig skyes pa 'byung ngo /__/zhes dang /__sangs rgyas rin chen za ma tog__/ces pa'i don du/__za ma tog ni gnas sam gzhi'o/__/zhes bkral/__yang /__oM chos kyi phyag rgya ni/__chos kyi dbyings kyi rang bzhin te/__spros pa dang bral ba/__mi rtog pa/__ma bcos pa/__skye ba dang bral ba/__snying rje'i rang bzhin mchog tu dga' bas gcig tu mdzes pa'i thabs su 'gyur ba/__rgyun gyis rtag pa lhan cig skyes pa'i rang bzhin gyi shes rab dang lhan cig skyes pa las 'byung ba/__dbyer med pa gang yin pa de ni chos kyi phyag rgyar rig par bya'o/__/zhes dang /__chos kyi phyag rgya ni phyag rgya chen po dbyer med pa'i rgyur gyur pa'o/_/zhes dang /__AH__phyag rgya chen po zhes bya ba ni/__phyag rgya yang yin la chen po'ang yin pas phyag rgya chen po ste/__/rang bzhin med pa nyid shes bya la sogs pa'i sgrib pa spangs pa/_/ston ka'i nyi ma phyed kyi nam mkha' ltar dri ma med pa/__/phun sum tshogs pa thams cad kyi gzhir gyur pa/__/'khor ba dang mya ngan gyi mtha' las 'das pas gcig pa'i rang bzhin/_/dmigs pa med pa'i snying rje'i lus bde ba chen po'i rang bzhin no/__/de bzhin du yid la byed pa med pa'i chos dge ba'o/__/yid la byed pa'i chos mi dge ba'o zhes gsungs pa dang /__/kun tu rtog pas ma brtags pa/__/rab tu mi gnas pa yi yid/__/dran pa med cing yid byed med/__/dmigs pa med la phyag 'tshal 'dud/__/ces bya ba gang yin pa phyag rgya chen por rig par bya'o/__/de'i phyir phyag rgya chen po bsam gyis mi khyab pa'i rang bzhin las/__dam tshig phyag rgya mchog gi 'bras bu skye bar 'gyur ro/__/zhes dang /__hU~M/__dam tshig gi phyag rgya zhes bya ba ni/__longs spyod rdzogs pa dang sprul pa'i sku'i rnam pa'i rang bzhin dang po'i ngo bo nyid sems can gyi don gyi phyir rdo rje 'dzin pa he ru ka'i rnam par spros pa/__de ni dam tshig gi phyag rgyar 'dod do/__/zhes sogs gsungs so/_/gzhung 'di bla ma d+hi ri shrI dz+nyA na dang /__lo tsA ba rma ban chos 'bar gyis bsgyur ba las so/_/'di la TI ka phyag rgya bzhi'i 'grel pa rin po che'i snying po zhes bya ba rgya gar gyi mkhan po b+hi ta karmas mdzad pa shin tu legs pa gcig bzhugs so//____//__! slob dpon de ba tsan+d+ras mdzad pa'i shes rab ye shes gsal ba las/__de bas na 'dod chags can gyi sems can rnams 'dod chags bral ba la 'dzud/__'dod chags bral ba rnams 'dod chags bar ma la'o/__/'dod chags bar ma rnams 'dod chags chen po la dgod do/_/de bas na sems can mchog tu gyur pa'i dbang du mdzad nas/__bla na med pa shin tu zab mo'i shes rab ye shes 'di bstan no/__/zhes dang /__ye shes grub pa las kyang /__dper na bcud kyis phug pa'i zangs mdzes pa'i gser du 'gyur ba bzhin/__ye shes bcud kyis phug pa na/__/nyon mongs dge bar byed pa yin/__/zhes dang /__ma skyes pa dang /__mi 'dzin pa dang /__rang bzhin med pa shes pa shes rab ces brjod do/__/zhes dang /__de kho na nyid 'jug pa las/__gang zhig spros bcas kun gyi yul min pas/__/de ni ngag gi yul yang ma yin no/__/rdo rje 'dzin pas rig pa de nyid la/__/shes rab ces byar yongs su bsgrags pa yin/__/zhes gsungs so/__/de nyid kyi phyir/__rten cing 'brel bar 'byung ba'i sems sna tshogs pa bde ba chen po rang rig pa tsam ste/__dmigs pa med pa'i snying rje chen po zhes bya ba/__ming gzhan pa can gyi ye shes yin no/__/shes rab kyang de yin la ye shes kyang de yin pas tshig bsdus pa'o/__/zhes dang /__de yang kho bo'i bla ma'i zhal snga nas/__/phyag rgya chen po mi shes par/__/las kyi phyag rgya gcig bsgrubs pa/__de nyid brgyud pa las nyams nas/__/rnal 'byor pa de ngu 'bod 'gro/__/zhes gsungs so/__zhes dang /__/bla ma dam pa'i man ngag 'di yang /__/las kyi phyag rgya legs bsgrubs nas/_/chos kyi phyag rgya rnam par bsgoms/__/de steng phyag rgya chen po ste/__/gang las dam tshig 'byung ba'o/__/zhes gsungs so/__/zhes dang /__las kyi phyag rgya rnam sna tshogs/__/rnam smin las byung chos phyag rgya/__/mtshan nyid bral ba phyag rgya che/__/rnam nyid dam tshig phyag rgya yin/__/zhes dang /__de lta bas na mchog dga' dang dga' bral gyi dbus na gnas pa/_btsan thabs dang log pa'i dbang spangs pa/___'dod chags dang 'dod chags bral bas dben pa'i stong nyid dang /__snying rje dbyer med pa'i lhan cig skyes pa de bla ma dam pa'i zhal nas nyams su myong ba las khong du chud par bya'o/__/zhes dang /__de nas yang pha rol tu phyin pa'i theg pa rnams kyi grub mtha' ni 'di yin te/__gang dag bskal pa grangs med par rdzogs pa'i sangs rgyas su 'gyur ro/__/sngags kyi tshul ni tshe 'di la sangs rgyas sam rdo rje sems dpar 'gyur ro/__/zhes rtog pa rnams yan lag bdun dang ldan pa'i bsgrub byar 'dod de/__zhes dang /__yan lag bdun dang ldan pa stong nyid dang snying rje dbyer med pa'i ye shes la 'thad par 'gyur te/__'di ltar longs spyod rdzogs pa ste nyams su myong ba rten cing 'brel bar 'byung ba las rnam pa thams cad du snang ba yin no/_/kha sbyor ni stong pa nyid dang snying rje dbyer med par yang dag par sbyor ba'i phyir ro/_/bde ba chen po ni yod pa dang med pa la sogs pa'i rtog pa thams cad spangs pa'i phyir ro/_/rang bzhin med pa ni skye ba med pa'o/_/snying rjes nges par gang ba ni snying rje chen po'i bdag nyid yin pa'i phyir ro/__/rgyun mi 'chad pa ni rgyun gyis rtag pa yin pa'i phyir ro/_/'gag pa med pa ni chad pa med pa yin pa'i phyir ro/__/las kyi yan lag ma'i ye shes la ni khyad par can du gyur pa de dag yod pa ma yin no/__/zhes sogs phar phyin sngags kyi bsgrub bya mtshungs pa'i phyogs snga bkod nas/__slar de nyid 'gegs pa'i lung rig rgyas pa dang /__yang /__don gcig na yang ma rmongs dang /__sogs la'ang de mtshungs kyi phyogs snga dgod pa dang /__de 'gog pa bcas gsal bar yod do/__/yang /__las kyi phyag rgya dang bral na/__/phyag rgya chen po yod ma yin/__zhes dang /__yang /__dbang po gnyis snyoms par 'jug pa med par bde ba'i rnam pa can nyid mi rtogs pa'i phyir ro/_/de med par ni bde ba chen po'i ngo bo nyid can gyi longs spyod pa'i sku 'grub par mi 'gyur ba nyid de/__zhes dang /__de ltar bskyed pa'i rim pa dang mi 'gal bar rang byin brlabs pa bsgoms nas/__sna tshogs nyid lha'i bdag nyid kyi dkyil 'khor 'khor lo'i lhan cig skyes pa grub pa yin te/__de skad du'ang klu sgrub kyis/__'di ni gzhal yas khang min khams gsum po min yul min dbang po 'byung ba min/_/gzugs la sogs pa ma yin srog chags min zhing mi min 'di ni rgyal ba ste/__/'khor lo gtso bo chos nyid bdag nyid yin te des ni dkyil 'khor ma yin la/__/khams gsum po 'di sna tshogs 'khor lor shes na sems ni ci ste 'khrul bar byed/__/ces gsungs pa la dgyes pa rdo rje las kyang /__sngags bzlas med cing dka' thub sbyin sreg med/__/dkyil 'khor pa med dkyil 'khor nyid kyang med/___de ni sngags bzlas dka' thub sbyin sreg de/__/de nyid dkyil 'khor pa dang dkyil 'khor nyid/__/mdor bsdus sems su 'dus pa'i tshul can no/__/zhes dang /__de kho na nyid de yang rgyal ba'i dbang pos pha rol tu phyin pa'i theg par lung dang /__rigs pa dag gis gsungs pa'i phyir ro/__/'o na rang rig pa'i sgrub thabs kyi de kho na nyid ni/__sngags kyi tshul las mngon du byed pa ma yin nam/__de'i phyir don gcig yin na yang bcom ldan 'das kyis rgyu yi bstan bcos zhes pha rol tu phyin pa logs su bstan to/_/rdo rje theg pa 'di ni 'bras bu'i bstan bcos te/__'bras bu ston pa'i phyir ro/__/smra mkhas pas gnyi ga la rmongs pa mi 'byung ngo zhes zer ba de yang /__gang gi phyir dug gi de nyid shes pas dug dang bsres te bza' ba dang /__sbrul gyi rgyan byed pa dang /__kha cig dug gis mi tshugs pa bzhin no/__/don dam pa de rtogs pa las gzhan med do snyam pa'i yid can ni rmongs par mi 'gyur ro/__/zhes dang /__de bzhin du pha rol tu phyin pas kyang gang dag rnam pa sna tshogs pa la sogs pa'i skad cig ma bzhi dang ldan pa'i dga' ba bzhi nyams su myong ba dang bral ba'i phyir/__/mtshan nyid dang bral ba'i skad cig ma mngon du ma gyur pas/__lhan cig skyes pa'i ngo bo nyid ma shes par mngon par byang chub pa chen po mngon sum byed par mi nus kyi/__sngags kyi theg pa ni de bzhin gshegs pas rnam par dag pas so so skye bo'i bag chags dang bral ba'i phyir ro/__/lha'i nga rgyal dang ldan pa'i rnal 'byor dam tshig thams cad la spyod pas ro mnyam pa mngon du byas nas/__phyag rgya bzhi la sogs pa'i sgrub thabs kyi yan lag bdun dang ldan pa'i yang dag par rdzogs pa'i sangs rgyas rang rig pa'i mngon sum tshe 'di nyid la mngon du byed pa'i phyir/__las kyi phyag rgya la sogs pa'i bdag byin gyis brlabs pa ni thabs mang ba'o/__/bcom ldan 'das kyis kyang /__thabs gzhan gyis ni sangs mi rgya/__/zhes gsungs so/__/zhes dang /__sangs rgyas thams cad mnyam par sbyor ba'i rgyud las kyang /__/bskal pa bye ba grangs med kyis/__/sangs rgyas kun dngos mi thob ste/__/phyag rgya'i cho ga 'di yis ni/__/tshe 'di nyid la thob par 'gyur/__/zhes so/__/de'i dgongs pa ni 'di yin te/__gzhan gang gis kyang sangs rgyas tsam las yang dag par rdzogs pa'i sangs rgyas thob pa ma yin te/__phyag rgya chen po bde ba'i ngo bo nyid kyi kha sbyor ba med pa'i phyir ro/__/zhes dang /__des na 'dod chags chen po'i tshul 'dir rdo rje sems dpa' grub par bya ba'i phyir kha sbyor bstan pa yin no/__/de nyid kyi phyir sangs rgyas nyid 'dir khyad par yod pa'i phyir rdo rje 'chang zhes bya'o/__/zhes dang /__sngags kyi theg pa ni mtshams med pa lnga byed par yang rigs la sogs pa'i rkyen dang ldan pa de yis dge ba'i bshes gnyen dam pa bsten pa las/__las kyi phyag rgya'i thabs kyis ji bzhin pa'i don bsgrubs nas/__ji bzhin pa'i man ngag can sdig pa mi dge ba'i las spangs pa des/__dge ba'i spyod pa dang thabs la mkhas pa'i khyad par gyis se gol gtogs pa tsam gyis sbyin pa la sogs pa bla na med pa'i bsod nams kyi tshogs rdzogs te tshe 'di nyid la sangs rgyas rdo rje 'chang nyid thob par 'gyur ba ni khyad par ro/__/zhes dang /___rdo rje A ra li'i rgyud las drangs pa/__/theg pa chen po 'di ni 'di lta bu ste/__/rgyu dang 'bras bu'i dngos po pha rol tu phyin pa'i theg pa dang /__sngags kyi theg pa gnyis bstan no/__/zhes dang /__de'i phyir gtso bo ma yin par 'gyur ba'i thabs cung zad tsam gyis las kyi phyag rgya la sogs pa thabs khyad par can dang bral nas/__thabs mang la gnyi ga la mtshungs pa ma yin no/__/de kho na dka' ba med par gang gis 'dod pa'i yon tan lnga la longs spyod pa nyid kyis dus mi ring bar rdo rje 'chang gi ngo bo nyid 'bras bu chen po thob par 'gyur ba'i phyir ro/_/dka' thub brtul zhugs kyis brtul bas/__/sdug bsngal gyur nas lus bskams shing /__/sdug bsngal nyid kyis sems g.yeng ste/__/g.yeng bas byang chub gzhan du 'gyur/__/zhes dang /__yang /__dbang po rnon po ni sngags kyi theg pa 'di la so so skye bo nyid kyis kyang sngags kyi de kho na nyid rtogs par nus te/__dgyes pa'i rdo rje dang 'jam pa'i rdo rje la sogs pa'i nga rgyal la gnas pas slob bzhin pa'i gnas skabs su yang /__de lta bu la bsten par 'gyur ba srid pa'i phyir/__rgyu dang 'bras bu 'dus par byas nas phyir mi ldog par thob par 'gyur ro/__/gang gi phyir pha rol tu phyin pa'i theg pa'i rjes su 'brang ba rnams ni/__sa brgyad pa las phyir mi ldog pa ste/__de skad du/__phyi nas sa brgyad pa la ni/__/dogs pa bzlog par 'gyur ba yin/__/zhes so/__/de la sngags kyi theg pa chen po bstan pa ni gnyis te/_/bskyed pa'i rim pa dang rdzogs pa'i rim pa'o/__/bskyed pa'i rim pa la gnyis te/__/phyi rol bskyed pa'i rim pa dang /__/zab mo bskyed pa'i rim pa'o/__/rdzogs pa'i rim pa la gsum ste/__rdzogs pa dang /__yongs su grub pa dang /__ngo bo nyid kyi rim pa'o/__/zhes gsungs/__dang po ni bskyed pa'i rim pa spyi dang /__lhag ma bzhi ni/__las dang /__chos dang /__dam tshig dang /__phyag rgya chen po bzhir sbyar nas rgyas par 'chad snang ste yi ge'i ngal bas de tsam mo/__/gzhung 'di badz+ra pA Ni dang /__/d+ha rma kIr+t+tIs bsgyur ba ste/__/de las btus pa'i dum bu cung zad do/__/shu b+haM//____//__! gnas pa bsdus pa zhes bya ba slob dpon lhan skyes rdo rjes mdzad pa las/__/mdo sde bye brag smra _rnam rig__/dbu ma'i rim bzhin gsal ba yi/__/zhes dang /___srid pa sdug bsngal bden pa ste/__/de ni 'bras bur shes par bya/__/rgyu ni kun 'byung bden pa ste/__/las dang nyon mongs bdag nyid do/__/bden pa de gnyis zag bcas te/__/phyi ma gnyis ni zag pa med/__/ces dang /___rang sangs rgyas kyi bsgom pa yang /__/lung bstan pa la mi ltos par/__/rang gi sngon gyi smon lam gyis/__/don mthong byas nas mya ngan 'da'/__/zhes dang /___yang dag rdzogs pa'i byang chub sems/__/tshogs ma rdzogs na yod ma yin/__/mngon du byed pa mi bya ste/__/byas na theg pa dman par 'gyur/__/zhes dang /__sna tshogs gsal ba de nyid kun tu brtags pa sdug bsngal te/_/kun 'byung gi ni bag chags gzhan gyi dbang gi rang bzhin no/__/sbyin pa la sogs lam nyid yongs su rdzogs pa 'gog pa ste/__/rdzogs par yongs su grub pa rnam med rnam par rig pa tsam/_/zhes dang /__shin tu'ang 'gog par gyur pa na/__/dam pa'i rnam thar mngon sum don/_/zhi dang sdug bsngal zad pa yin/__/'phags lam yan lag brgyad de ni/__/goms pa nges par 'byin pa'i mchog__/ces dang /__de bzhin nyid dang chos kyi dbyings/__/shes rab pha rol phyin pa'i mchog__/yang dag mtha' dang skye ba med/__/mi dmigs pa dang mya ngan 'das/__/stong nyid mtshan ma med pa dang /__/smon pa med dang 'dus ma byas/__/rmi lam sgyu ma la sogs dpe/__/de nyid rgyal ba rnams kyis bsgrubs/__/zhes dang /__gang phyir ji ltar me long nang du gzugs brnyan mthong /__/rigs pas brtags pa'i stobs kyis de med de mthong med/__/phyi yi don med 'di yang med de rnam pa sna tshogs sems/__/'on kyang rten 'brel dag las rig pas 'gal ba med/__/ces dang /___de nyid pha rol phyin pa'i tshul/__/phyag rgya bzhi yi rang bzhin lung /__/sngags kyi tshul la brten nas su/__/bla ma'i khyad par myong ba yin/__/zhes dang /__chags bral las ni sdig pa med/__/bde ba mchog las bsod nams med/__/de phyir mi 'gyur bde ba'i sems/__/rtag tu der gnas mos par bya/__/'pho ba las ni chags bral 'byung /__/chags bral las ni sdug bsngal 'byung /_/zhes dang /__ji ltar lcags ni gser gyur na/__/nam yang nag por 'gyur ba min/__/de bzhin sems nyid rtogs pa yang /__/nam yang bag chags 'gyur ba min/__/zhes dang/___tha mas bskyed rim bsgom pa ste/__/las kyi yan lag dang bral 'bring /__/rab kyis kyang ni bsam bya ba/__/myur du rdzogs pa'i dkyil 'khor ro/__/zhes sogs grub mtha' bzhi dang /__gsang sngags bcas pa'i rnam gzhag rgya cher snang ngo /__/'di sngon chad rma chos 'bar dang /__phyis mtshur lo tsA bas bsgyur bar snang ngo //____//__! slob dpon tog rtse bas mdzad pa'i bsam gyis mi khyab pa'i rim pa zhes bya bar/__gnyis med ye shes rnal 'byor che/__/bde ba chen po gcig nyid du/__/brtan dang g.yo ba'i dngos po kun/_/gnyis su med pa'i rnam spangs pa/__/zhes dang /___gnyis med bde ba chen po nyid/_/gang yang bsam med rang bzhin nyid/__/sangs rgyas blo yi spyod yul min/__/thams cad de yi rang bzhin nyid/__/ces dang /__/thabs dang shes rab rnal 'byor che/__/ro gcig gnyis su med par brjod/__/'dod chags 'dod chags bral ba spangs/__/dbang bskur dmigs par mi 'gyur ro/__/zhes dang /___spros pa thams cad rnam bral zhing /__/nam mkha' lta bur dri ma med/__/rtog pa'i dri ma rnam gcod cing /__/bsam gyis mi khyab gnyis med mchog__/ces dang /___ma skyes pa dang mi 'jig pa/__/mi 'gyur ba dang mi gnas pa/___/gnyis su med pa'i ye shes mchog__/'di ni phyag rgya chen po nyid/__/ces dang/__shin tu dri med ches dag cing /__/sgom pa po dang bsgom bya spangs/__/dpal ldan bde ba'i 'byung gnas kun/__/rnam rtog med pas nges mthong 'gyur/__/zhes dang/___kun mkhyen gnas kyi sbyor ba 'di/__/bsam gyis mi khyab mi rtog pa/__/kun tu bzang po zhes bya'i lha/_/yid bzhin nor bu bzhin du 'byung /__/zhes dang /___yi ge dang ni ming brjod pa/__/sbyor ba'i tshig tu rab tu bstan/__/gzhan du ngag gi lam 'das phyir/__/smra ba nyid de mi nus so/__/zhes dang /__thog ma dbus dang tha ma bral/__/bskyed pa dang ni rdzogs pa spangs/__/bsam dang sems pa dang bral ba/__/gnyis su med pa'i ye shes mchog__/ces dang /___rnal 'byor skyes bur bshad pa ste/__/rjes su rnal 'byor rig pa'i mchog__/gnyis 'das shin tu rnal 'byor te/__/gnyis med ye shes rnal 'byor che/__/zhes dang /___nyi zla gza' yis zin pa na/__/shes rab rdo rje'i sbyor ba las/__/zhu ba gnyis med ye shes kyis/__/skye ba 'dir ni sangs rgyas nyid/__/ces dang /__rgya mtsho dang ni ri shing dang /__/rtsa lcug gel pa la sogs pa/__/gnyis med ye shes las byung ba/__/'di la the tshom yod ma yin/__/zhes gsungs so/__/gzhung 'di bde ba'i myu gu dang 'gos kyi 'gyur ro//____//__! slob dpon gnyis med rdo rjes mdzad pa'i lta ba ngan sel las/__/ba lci chu dang bcas pa sbyin pa ste/__/legs par byugs pa tshul khrims bzod pa ni/__/srog chags phra mo sel bar byed pa yin/__/brtson 'grus bya ba dag la 'jug pa'o/__/bsam gtan de dus rtse gcig byed pa'i sems/__/shes rab tshogs sogs legs par mdzes pa yin/_/thub pa rnams kyi dkyil 'khor byas pa yis/__/pha rol phyin pa drug ni des thob shog__/ces so//____//__! slob dpon gnyis med rdo rjes mdzad pa'i rab tu mi gnas pa gsal par bstan pa las/__/chos rnams kyi ni skye ba med/__/rang rig gnyug ma bsam mi khyab/__/de nyid stong pa nyid ces brjod/__/chad pa'i rjes 'gro ma yin no/__/rab tu mi gnas sa bon las/__/'bras bu rab tu mi gnas 'byung /__/skyob pa de nyid dam pa ste/_/bcos ma'i bcos ma de bzhin no/__/zhes so/__/badz+ra pA Ni dang nags tsho'i 'gyur ro//__//__!_ gnyis med rdo rje'i de nyid bcu par/__/de bzhin nyid ni shes 'dod pas/__/rnam bcas ma yin rnam med min/__/bla ma'i ngag gis ma brgyan pa'i/__/dbu ma'ang 'bring po tsam nyid do/_/zhes so/____/_! slob dpon a ba d+hU tI'i zung 'jug rab tu gsal bar/__/zung 'jug phyir na rang bzhin med/__/rkyen las byung ba mi 'gags nyid/__/dngos dang dngos med nyams pas na/__/zung 'jug rab tu snang bar 'gyur/__/zhes so/____/_! mai tri pa'i dga' gtsugs lnga par/__/mtshan nyid thams cad yang dag rdzogs/__/mtha' gnyis rnam par spangs pa ste/__/dngos po kun gyi ngo bo nyid/__/rang bzhin med par rtag tu shar/_/zhes so/__/de'i mi phyed lnga par/__/sangs rgyas rtogs na 'gro ba dag__/sangs rgyas rtogs pa can rtsa lag__/e ma'o sangs rgyas gzod nas dag__/sangs rgyas bstan pa ji ltar rtogs/__/zhes so//____//__! gnyis med rdo rjes mdzad pa'i bde chen gsal bar/___bde chen ngo bo nyid 'dod gang /__/bde ba med na byang chub min/__/yod na'ang chags pa chen po ste/_/'khor bar skye ba'i rgyu nyid do/__/zhes dang /__yang /__/rten cing 'brel 'byung bde ba gang /__/gzod nas dag par shes par bya/__/zhes so//____//__! de nyid rab tu bstan par/__/de bzhin zag pa med chos rnams/__/longs spyod sprul pa'i sku dag gi__/rten 'brel smon lam dag gis ni/__/sems can don du rab tu 'jug__/ces so/__/de bzhin gshegs pa lnga'i phyag rgya rnam par bshad par/__/spros pa med cing snang ba med/_/thub pa chen po chos kyi sku/__/de las gzugs sku gnyis byung ba/__/rjes thob sgyu ma bzhin du gnas/__/zhes dang /__yang 'di ltar/__'jam dpal la de bzhin gshegs pas dris pa/__'di bsam gyis mi khyab pa'i dbyings gang yin/__'jam dpal gyis gsol pa/__khams gang bsam du med pa'i sems de brjod du med pa dang /__sems kyi gzhal bya ma yin pa dang /__sems kyis sems med pa rab tu bsam par bya ste/__'di ni bsam gyis mi khyab pa'i dbyings zhes bya'o/__/de ltar na bcom ldan 'das sems nyid bsam gyis mi khyab pa'i dbyings so/__/ci'i phyir zhe na/__bsam gyis mi khyab pa'i dbyings la sems yod pa ma yin te/__gang gi phyir sems ni bsam du med la/__don ji lta ba bzhin du rtogs pa'i sems so/__/'on kyang bcom ldan 'das rnam pa thams cad bsam gyis mi khyab pa'i dbyings so/__/zhes drangs snang ngo /__/slob dpon gnyis med rdo rjes mdzad pa'o//____//__! dbang gi bya ba mdor bsdus pa las/__de la rnam par rgyal ba'i bum pa ni mchu yo ba med pa/__rtsa ba nag po med pa/__gsus pa che ba/__mgrin pa ring pa/__mtshan ma legs par bris pa/__gos gtsang mas mgrin pa dkris pa/__bu ta ta ba ba la sogs pas kha brgyan pa/__gser dang /__/dngul dang /__rA dza brti dang /__mu tig dang/__byu ru dang /__nas dang /__gro dang /__so ba dang /__til dang /__ma sha dang /__pr-i ha ti dang/__kaN+Da ka rI dang /__shwe ta a pa ra dzi ta dang /__daN+Dot+pal dang /__ha sa de ba dang/__rin chen sna lnga dang /__'bru lnga dang /__sman lnga bum pa'i nang du blugs la/__dri'i chus yongs su bkang ste/__de la dkyil 'khor bsams nas mchod yon dang zhabs bsil la sogs pa phul la/__ye shes kyi bdud rtsir zhu ba'i gzugs su bzhag go__/de'i rjes la me tog gi phreng bas nye bar mdzes pa'i rdo rje steng du yang dag par bzhag ste/__rang rig pa'i lha yi sngags brgya rtsa brgyad dam/___bdud rtsi 'khyil ba'i sngags kyis mngon par bsngags so/_/zhes dang /__las thams cad la ni rdo rje sems dpa'am/__bdud rtsi 'khyil ba bri bar bya'o/__/zhes dang /__de'i rjes su bdud rtsi 'khyil ba'i sngags kyi mngon par bzlas pa'i ma gas pa dang/__'bus ma zos pa'i a shat+tha'i shing la sogs pa sor bcu gnyis pa'i tshad la/__rtse mor me tog gi phreng bas bcings pa'i so shing slob ma la sbyin par bya'o/_/zhes dang /__ku sha la bdud rtsi 'khyil ba'i sngags kyis mngon par bsngags te/__sngas dang stan du sbyin par bya'o/__/zhes dang /__des mngon par bsngags pa'i skud pa sum bsgril mdud pa gsum byas la bsrung ba'i don du dpung pa g.yas par bcing bar bya'o/_/zhes dang /__de nas me tog lhung bas dman pa dang /__'bring dang /__mchog gi dngos grub mtshon par bya'o/__/de la gal te sangs rgyas rnams kyi dbu'am/__mdzod spu'am/__gtsug tor la lhung na phyag rgya chen po'i dngos grub ster ro/__/mchog gi yan lag las ni mchog go__/'bring gi yan lag las ni 'bring ngo /__/mtha' ma'i yan lag las ni mtha'o/_/gzugs brnyan dang ring ba las ni shin tu yun ring ba na'o/__/nye ba las ni myur ba'i dngos grub bo/__/lha rnams kyi rigs ni re'u mig la sogs pa rnam par bcad pa las shes par bya'o/__/gal te lha gnyis po'i bar du lhung na/__de yang gang gi nye ba de'i rigs su 'gyur ro/__/dkyil 'khor gyi pha rol du lhung na dman pa'i dngos grub bo/_/gal te 'og la lhung na slar 'phang ngo /__/lan gsum bar du de nyid du lhung na dngos grub med do/_/snying ga la lhung na shin tu dka'o/__/zhes so/__/yang /__/skad cig shes pa'i ye shes gang /_/ngag gi spyod yul lam las 'das/__/zhes dang /__bde chen rgyal po gcig shes pa/_/'gro ba'i rgyud la rtag shes par/__/gang gis kyang ni ston pa'i dus/__/thams cad mkhyen pa'ang tshig phongs 'gyur/_/zhes so/__/'di yang slob dpon gnyis med rdo rjes mdzad pa'o//____//__! yang des mdzad pa'i rang bzhin lnga par/__de nyid rgyu dang 'bras bu'i bdag nyid rnam pa thams cad mchog dang ldan pa'i stong pa nyid kyi mtshan nyid 'dus ma byas shing /__de bzhin nyid kyi bdag nyid yin pa'i phyir chos sku'o/_/rab tu snang ba tsam yin pa'i phyir longs spyod rdzogs pa'i sku/__brtags pa'i rnam par shes pa'i ngo bo nyid yin pa'i phyir sprul pa'i sku'o/__/de skad du'ang /__/'dus ma byas sems chos kyi sku/_/rtag pa longs spyod rdzogs mtshan nyid/__/sna tshogs de nyid sprul pa'o/__/gnyug ma kun gyi rang bzhin no/__/zhes so//____//__! slob dpon gnyis med rdo rje mdzad pa'i thig chen nyi shu par/__byang chub nyon mongs tha dad med/__/nyon mongs byang chub las mi 'byung /_/'khrul pas nyon mongs rtog pa ste/__/'khrul pa'i ngo bo dri ma med/__/ces dang /__nam mkha' dang mnyam zhi ba dang /__/thog ma dbus dang tha ma spangs/__/bsam gyis mi khyab sems nyid ni/__/dngos po kun gyi rang bzhin no/__/zhes so/__/de ba ka ra tsAn+d+ra dang /__shAkya brtson 'grus kyi 'gyur/__/__! yid la mi byed pa ston pa zhes bya ba slob dpon mai tri pas mdzad pa las/__'phags pa sangs rgyas thams cad kyi yul la 'jug pa ye shes snang ba rgyan gyi mdo las/__yid la mi byed pa'i chos rnams dge ba'o/__/yid la byed pa'i chos rnams mi dge ba'o/__/zhes dang /__rnam par mi rtog pa la 'jug pa'i gzungs las/__byang chub sems dpa' sems dpa' chen po rnam par rtog pa thabs kyi _mtshan ma ni snang ba la rtog pa ste/__yid la mi byed pa'i yongs su spang ba'o/__/zhes dang /___he badz+ra las gsungs pa/__/ngo bo nyid kyis sems med cing /__/sems las byung ba'ang med pa'o/__/zhes dang /___gang phyir yid kyis ma bsgom par/__/'gro ba thams cad bsgom par bya/__/zhes sogs drangs nas mdo sngags gnyi ga'i lung gis sgrub cing /__bar 'dir dgag pa gnyis kyi sgo nas rgyas par bshad mthar/__i yig gtso bor mi 'gyur ba'i yid la byed pa ni yid la mi byed pa ste/__lo ma'i rgyal po bzhin du tshig dbus ma phyis pa'i bsdu ba'o/__/de gang gis na yid la byed pa gang yin pa thams cad ni a ste skye ba med pa'i don te/__/zhes sogs rgyas par dang /__yang na a zhes bya ba ni 'od gsal ba'i tshig go__/yid la mi byed pa ni bdag byin gyis brlabs pa'i tshig go__/'dir a yang yin la yid la mi byed pa'ang yin pas yid la mi byed pa'o/__/'dis ni yid la mi byed pa'i gnas bsam gyis mi khyab pa 'od gsal ba bdag la byin gyis brlabs pa'i bdag nyid stong pa nyid dang snying rje dbyer med pa zung du 'jug pa gnyis su med pa'i rgyun yang dag par rig pa skye bar 'gyur ro/__/zhes dang /__ma phyis bsdu ba byas pas yid la mi byed pa dang /__yid la mi byed pa ste/__pags pa'i snying po dang /__pags pa'i snying po'o/_/zhes snang la/__gzhung 'di badz+ra pA Ni dang /__gnyan chung gis bsgyur ba'o//____//__! slob dpon gnyis med rdo rje mdzad pa'i de kho na nyid theg chen nyi shu par/__/rnam pa kun gyi mchog ldan pa/__/dngos dang dngos med gzung dang 'dzin/__/rnam par shes pas por pa'i sems/__/dmigs pa med cing bla na med/__/dag cig zhi ba snang ba med/__/rig pa shes rab ces su grags/__/zhes dang /__sems kyi 'dod pa sems ma yin/__/rang gi rig pa sems min te/__/rig pa bla ma la ltos 'gyur/__/dngos med kun gyi ngo bo nyid/_/ces so//____//__! slob dpon mai tri pas mdzad pa'i dbang bskur nges par bstan par/__gnyen po'i phyogs la mi gnas shing /__/de nyid la yang mi chags pa/__/gang gi 'bras bu'ang mi 'dod pa/__/de yis phyag rgya chen po shes/__/zhes so/__/'di kr-iSh+Na pa dang /__tshul khrims rgyal bas bsgyur zhing /__de'i 'grel pa slob dpon dga' ba skyong gis mdzad pa las/__e waM gyi don rgyas par bshad 'dug cing /__yang /__de bzhin du rnam par nyed pa ni chos kyi sku'o/__/rnam par smin pa ni longs spyod rdzogs pa'o/__/rnam pa sna tshogs ni sprul pa'o/__/mtshan nyid dang bral ba ni ngo bo nyid sku'o/__/zhes dang /__yan lag bdun dang ldan pa ni bsgrub byar 'dod par 'gyur ro/__/de la yan lag bdun ni/__longs spyod rdzogs pa'i tshor ba dang /__/kha sbyor snyoms par 'jug pa dang /__bde ba chen po bde ba'i ngo bo nyid dang /__rang bzhin med pa rtog pa bral ba dang /__snying rjes nges par gang ba sngon gyi smon lam gyi dbang gis longs spyod rdzogs pa la sogs pas sems can gyi don mdzad pa dang /__rgyun mi 'chad par rab tu 'jug pas rgyun chad pa med pa dang /__'gog pa med pas rgyud rgyun chad med pa'o/__/zhes dang /__gang gis phyir bdag med rnal 'byor ma'i 'khor lo sgom pa yang sangs rgyas nyid kyi rgyu ma yin nam/__'dir yan lag bdun gyi sgrub thabs kyi rnal 'byor ma yin te/__kha sbyor med pa'i phyir ro/__/zhes phyogs snga bkod nas/__de la yang kha T+wA~M ga'i thabs dang kha sbyor ba yod de/__de skad du/__kha T+wA~M ga dang sbyor lha mo/__/longs spyod rdzogs pa la sogs ldan/__/bdag med rnal 'byor ma 'khor lor/__/rtogs pa ci yi phyir mi 'grub/__/ces dgag par mdzad do/_/yang /__gnyen po'i phyogs la/__zhes pa ni/__rang bzhin dang /__yon tan dang /__snying po la nges par spyod pa ste/__sbyin pa dang /__tshul khrims dang /__bzod pa dang /__brtson 'grus dang /__bsam gtan dang /__shes rab kyi bdag nyid can/__gnyen po'i phyogs la dpyod pa'i rnam par rtog pa'i tshogs yid la mi byed pas spang ba'o/__/mi gnas shing /__zhes bya ba ni gnyen po'i phyogs la nges par dpyod pa'i rnam par rtog pa'i tshogs rab tu spangs pa'i zag pa dang bcas pa'i gzugs la sogs pa'i nye bar len pa'i phung po lnga la sogs pa'i bdag nyid mi mthun pa'i phyogs la nges par dpyod pa'i rnam par rtog pa'i tshogs rab tu spangs par yang blta bar bya'o/__/zhes de med pa'i phyir 'di dag nges par med pa nyid do/__/de nyid la yang mi chags pa/__zhes bya ba ni/__ngo bo nyid la sogs pa la nges par dpyad pa nyid kyis stong pa nyid dang /__yang dag pa'i mtha' dang /__de bzhin nyid kyi bdag nyid la de kho na nyid nges par dpyod pa rnam par rtog pa'i tshogs kyi ting nge 'dzin la'ang ma chags pa'o/__/gang gis 'bras bu'ang 'dod pa med/__ces bya ba ni/__sa dang po la sogs pa dang /__rnam pa thams cad mkhyen pa nyid de thob pa la nges par dpyod pa'i tshogs kyi 'bras bu la 'dod pa ste/__de la re ba 'ga' yang med do/__/de yis phyag rgya chen po shes/__/zhes bya ba ni thob pa'o/__/de dag gis 'gro ba'i bdag nyid mi gnas shing sgro ma btags pa/__mi mthun pa'i phyogs gnyen po dang /__de kho na nyid dang /__'bras bu'i tshogs la chags pa spangs bas chags pa thams cad las rnam par grol ba ni phyag rgya chen po thob pa zhes bya'o/__/gal te de ltar na phyag rgya chen po la sbyin pa la sogs pa'i pha rol tu phyin pa med pa zhig gam zhe na/__ma yin te/__de ni pha rol tu phyin pa la sogs pa'i bdag nyid can bsod nams dang ye shes kyi tshogs gnyis gyi ngo bo yin pa'i phyir ro/__/de skad du yang /__tshangs pa khyad par sems kyis zhus pa zhes bya ba theg pa chen po'i mdo las/__gang nyon mongs pa thams cad spangs pa de'i don ni sbyin pa'o/_/gang mngon par 'du byed pa med pa de ni tshul khrims so/__/gang mtshan nyid dang bral ba de ni bzod pa'o/__/gang rnam par dpyod pa med pa de ni brtson 'grus so/__/gang rab tu mi gnas pa de ni bsam gtan no/__/gang spros pa med pa de ni shes rab bo/__/de ltar gnas med pa spros pa med pa'i ngo bo nyid ni/__shes rab kyi pha rol tu phyin pa'o/__/zhes dang /__sher phyin bdun brgya pa las kyang lung mang bar drangs mthar/__bcom ldan 'das shes rab kyi pha rol tu phyin pa bsgom pa de chos gang cung zad 'phel bar 'gyur ba'am/__'grib par 'gyur ba ni ma mchis so/__/bcom ldan 'das de ni shes rab kyi pha rol tu phyin pa bsgom par rig par bya'o/__/zhes dang /__bcom ldan 'das gang ci la yang mi gnas pa nyid de shes rab kyi pha rol tu phyin pa bsgom pa'o/__/zhes dang /__bcom ldan 'das chos gang cung zad 'phel ba'am 'grib pa la rab tu gnas pa de ni shes rab kyi pha rol tu phyin pa bsgom pa ma lags te/__so so skye bo'i chos kyang mi spong la/__sangs rgyas kyi chos kyang yang dag par mi len to/__/zhes dang /__mgon po byams pas/__stong pa nyid de mdor bsdu na/__/de bzhin nyid dang yang dag mtha'/__/mtshan ma med dang don dam ste/__/chos kyi dbyings ni rnam grangs so/__/zhes so/__yang /__bskyed rdzogs kyi rnam grangs lnga po shes rab gsal ba dang mthun par/__phyi bskyed pa'i rim pa dang /__nang zab mo'i bskyed rim dang /__rdzogs pa dang /__yongs su grub pa dang /__ngo bo nyid kyi rim pa lnga po rim lnga dang sbyar te/__'di ltar mdor bsdus pa dang /__rdo rje'i bzlas pa dang /__bdag byin brlabs pa dang /__mngon par byang chub pa dang /__zung du 'jug pa'i ming gzhan yin par bshad cing /__de nyid kyang phyag rgya bzhir bsdu tshul bstan nas/__phyag rgya chen po yid kyis te/__/dam tshig phyag rgya kun tu 'gro/__chos kyi phyag rgya ngag las te/_/las kyi phyag rgya lus kyi'o/__/zhes so/__/yang zla grags sgron gsal lung /__gsang sngags sku ni rab bsgrub phyir/__/skyes pa'i rim pa dang po yin/__/sems la dmigs pa tsam zhig ni/__/rim pa gnyis pa zhes brjod do/__/kun rdzob bden pa ston pa ni/__/yid 'ong rim pa gsum pa'o/__/kun rdzob bden pa dag pa ni/__/rim pa bzhi pa zhes brjod do/__/bden gnyis sbyor ba gang yin pa/__/zung du 'jug ces lnga pa ste/__/'di ni sgrub pa'i yan lag mchog__/rgyud kun gyi ni mdor bsdus pa'o/__/zhes dang /__/sngags dang sems dang lus dang ni/__/rnam dag dang ni zung 'jug ste/__/rim pa lnga yis bsdus pa'i don/__/shes na mtha' drug la 'jug yin/__/zhes dang /__'phags pa lhas/__sngags dang /__phyag rgya dang /__bdag dang /__chos dang /__lha yi de kho na nyid de ltar gsungs so/__/gzhung 'di sa man+ta b+ha dra dang /__nags tshos bsgyur ba'o//____//__! paN+Di ta lhan cig skyes pa'i rdo rjes mdzad pa de kho na nyid bcu pa'i rgya cher 'grel las/__de ltar rang gi ngo bo ma rtogs pas phyin ci log gi ngo bor bzhag pa yang nyon mongs pa dang /__las dang skye ba rnams kyis 'khor ba 'byung ba'i phyir rnyog pa rnams so sor snang bar 'gyur te/__'di rnams rang gi ngo bo ma rtogs pa ni glo bur gyi dri ma zhes brjod do/__/zhes dang /__glo bur 'di dag shin tu spangs pa ni rnam par dag pa bzhed do/__/de skad du mgon po byams pas/__/kun nas nyon mongs med rnam dag__/de ni drir bcas dri ma med/__/chu khams gser dang nam mkha' bzhin/__/dag pa bzhin du dag par 'dod/__/gal te rnam dag de ma 'gyur/__/lus can thams cad grol bar 'gyur/__/gal te nyon mongs de ma 'gyur/_/'bad pa 'bras bu med par 'gyur/__/zhes pa'o/__/de ltar thams cad 'dir bsgrub par bya ba dang /__sgrub par byed pa'i tha snyad nyid ni kun rdzob nyid do/__/sangs rgyas dang rdo rje 'dzin pa nyid ni kun rdzob la rab tu bsgrub par bya'o/__/don dam par de la de bzhin nyid ni nyon mongs pa dang ldan pa ma yin la/__/rnam par dag pa'ang ma yin te/__/de skad du yang de nyid kyis/__/nyon mongs ma yin mi mongs min/__/de nyid dag dang ma dag min/_/zhes pa'o/__/zhes sogs dang /__ji skad du/__/ting nge 'dzin gyi rgyal po las/__/nges pa don gyi mdo sde'i bye brag shes/__/bde gshegs ji ltar bstan pa'i stong pa nyid/__/slar yang gang zag sems can skyes bu rnams/__/chos rnams thams cad drang ba'i don du shes/__/chos bdag med la so sor rtog par byed/__/so sor rtog pas gal te sgom par byed/__/de la rgyu yis mya ngan 'das thob 'gyur/__/gang yang bdag gzhan zhi ba'i rgyur mi 'gyur/_/chos kun rang bzhin rtag tu stong pa nyid/__/rgyal sras nyon mongs rnam par bsgom pa ni/_/kun gyis kun tu thams cad stong par 'gyur/__/nyi tshe'i stong nyid mu stegs can rnams kyi/__/zhes dang /__dbu ma 'jug par/__de ltar gang phyir shin tu zab mo'i dngos po ni/__gang gis mi shes de ni rab tu brten bya ba/__/kun gzhi yod cing gang zag stong nyid yod/__/phung po 'di dag la ni 'ba' zhig dang /__/'jig tshogs lta ba spangs pa'i sangs rgyas kyis/__/nga dang bdag ces ji ltar ston pa ltar/__/de ltar dngos po thams cad rang bzhin gyis/__/med pa drang pa'i don ni ston par 'gyur/__/zhes dang/__'od gsal ba zhes bya ba ni/__rang bzhin gyis dri ma spangs pa'i rang rig pa ste/__rab tu 'od gsal ba'i phyir ro/__/zhes dang /__thabs dang shes rab rang bzhin rtogs pas sgro 'dogs dang skur pa 'debs pa dag spangs pa'i dbu ma rab tu mi gnas pa rtogs pa'o/_/_shes rab kyis ni sgro 'dogs pa spong ba'i phyir ro/__/thabs kyis ni skur pa 'debs pa spong ba'i phyir ro/__/zhes dang /__zung du 'jug pa de bzhin nyid kyi bdag nyid/__bla ma dam pa'i man ngag gis rig pa/__de nyid stong pa nyid dang /__snying rje dbyer med pa don dam pa byang chub sems kyi mtshan nyid do/__/zhes so/__/yang rtog ge skam po 'ba' zhig byis pa'i dmigs pa ni ma yin te/__de kho na nyid shes pa'i skal ba med pa'i phyir ro/__/de nyid yang 'dir rtog ge ngan pas zhes bya bar bstan to/__/de skad du'ang bcom ldan 'das kyis/__rang bzhin ma yin brtags pa min/__/dngos po ma yin kun gzhi min/__/gang la byis pa'i rtog pas brtags/__/rtog ge ngan pa ro dang 'dra/__/zhes bya ba la sogs pa'o/_/de'i phyir rtog ge'i spyod yul yang ma yin no/__/rtog ge skam po rnam par spangs/__/zhes bya ba la sogs pa'o/__/zhes so/__/'di paN+Di ta ka l+yA Na barma dang /__lo tsA ba dz+nyA nA ka ra mtshur gyis bsgyur ba'o//____//__! slob dpon badz+ra pA Nis mdzad pa'i rdo rje'i tshig ces bya bar/__/dga' ba dang po 'gro ba ste/__/mchog tu dga' ba'ang 'gro ba nyid/__/dga' bral dga' ba 'gro ba nyid/__/lhan cig skyes pa gsum mi dmigs/_/zhes dang /__rang rig pa yi ye shes 'di/__/ngag gi spyod yul lam las 'das/__/byin gyis brlabs pa'i rig pa gang /__/kun mkhyen ye shes de rang bzhin/__/zhes dang /__sangs rgyas kun gyi sdom pa ni/__/e waM rnam par rab tu gnas/__/gcig pu'i rnam pa'i bde chen po/__/yang dag dbang bskur las shes bya/__/zhes dang /__e yi cha byad bzang po gang /__/dbus su waM gyis rnam pas brgyan/__/bde ba thams cad 'byung ba'i gnas/__/sangs rgyas rin chen dkon mchog__/za ma tog__/ces so/__/slob dpon de nyid dang /__mtshur gyis bsgyur ba'o/_/ji ltar dri med sbrang rtsi'i bcud/__/btung bas myos pa'i bung ba bzhin/__/yang dag ye shes ros tshims pa'i/__/rnal 'byor mchog gi tshul 'di'o/__/shu b+ha mastu sarba dza ga tAm//____//__! slob dpon b+hi d+hi karmas mdzad pa'i phyag rgya bzhi 23gtan la dbab pa'i 'grel pa rin po che'i snye ma zhes bya ba las/__phyag rgya ni mi 'da' ba'i don to/__/dpe dang /__yod pa dang /__yin pas mi 'da' ba'o/__/de yang nam mkha' lta bu dang /__gyad kyi nor bu lta bu dang /__sdug bsngal gyis brtul ba lta bu yin la/__chen po ni las dang chos dang dam tshig dang gsum gyi mchog tu gyur pa'i phyir yang yin pas na phyag rgya chen po'o/__/zhes dang /__phyag rgya chen po la 'bras bur bzhag pa'i rgyu mtshan gang yin na/__rang bzhin med pa'i ngo bo nyid sgro skur gyis dben pa/__zhes bya ba ste/__rang bzhin med pa ni/__rnam pa sna tshogs pa dang /__rnam par smin pa dang /__rnam par nyed pa'i gnas skabs gsum ni dri ma dang bcas pa ste/__de dag gi rang bzhin med pa'o/__/de lta bu'i ngo bo nyid ni dgag sgrub sgro skur gyi dri ma dben pa'o/__/'o na phyag rgya chen po nyid ji lta bu zhe na re ba bcad pa ste/__shesa~X bya~X la~X so~Xgs pa~X'i sgriba~X pa~X spangasa~X pa~X/__zhes pa ste/__shes bya'i sgrib pa ni nyon mongs pa bag la nyal shin tu phra ba rnams so/__/sogs pa ni de las gzhan pa'i rags pa spong sla ba rnams kyang ngo /__/spangs pa ni ser sna'i gnyen por sbyin pa la sogs pa'i phyogs kyis spong 'dod med par gyur pa ni gnyen po la re ba med pa'o/__/bskyed rdzogs kyis sbyangs pa las 'bras bu zhig thob snyam pa med pa ni de kho na nyid la re ba med pa'o/__/'bras bu rdzogs pa'i sangs rgyas zhig gud na thob pa'i blo med pa ni 'bras bu la re ba med pa'o/__/de yang nyon mongs pa lam du slong ba chos thams cad kyi de bzhin nyid bsgom du med pa dang /__bde ba chen po rang chas su yod pa'i phyir ro/__/de yang chos lnga ldan te/__stona~X ka~X'i nyi~X ma~X phyeda~X kyi~X nama~X mkha'a~X ltara~X dri~X ma~X meda~X pa~X/__zhes pas bstan/__de la ston ka'i nyi ma phyed kyi nam mkha' ni sprin dang /__'ja' tshon dang /__na bun dang /__khug sna dang /__rlung gis ma dkrugs bdag ni ma skyes shing /__rang bzhin med pa/__'das pa dang ma 'ongs pa dang da ltar gyi dus su khyab pa dang /__gdod ma nas mi 'gyur ba dang /__'khor ba thams cad la khyab bzhin du phyag rgya chen po yang ngo bo nyid kyis ma skyes pa dang /__mtha' bzhi'i rang bzhin med pa dang /__'khor ba'i dus dang/__sbyangs pa dang /__khyad par du sbyangs pa/__bla na med pa dang /__mngon du gyur pa'i dus rnams su phyag rgya chen po las mi 'gyur te/__dper na nam mkha' la sprin la sogs pa snang yang nam mkha' las mi 'gyur ba dang /__yungs kar la mar gyis khyab pa bzhin du 'khor ba la khyab pa'o/__/de la sku'i bye brag ji ltar bzhag ce na/__yon tan thams cad kyi 'byung gnas/__/zhes bya la/__yon tan ni sku bzhi'o/__/de yang rang gi nyams su myong ba la gnas te/__sgro skur dang bral ba dang /__nyams su myong ba dang /__sna tshogs su shar ba dang/__gnyug ma'i ngo bor gcig pa'o/__/de lta bu'i ye shes ni/__phun sum tshogs pa thams cad kyi gzhira~X gyura~X pa~X/__zhes gsungs/__de yang /__phun sum tshogs pa ni ji ltar 'dod pa'i bde ba tshogs pa'o/__/thams cad ni 'khor 'das thams cad kyi bde ba'o/_/gzhir gyur pa ni 'byung ba'i gnas su gyur pa'o/__/de yang ji ltar lta zhe na/__lhun gyis grub pa ste gdod ma nas sangs rgyas pa ni dag pa'o/__/bde stong zung 'jug ni rtag chad kyi mtha' las bral ba ste dam pa'o/__/bsam gyis mi khyab pa ni yengs pa'i mu dang bral ba'o/__/de las gzhan don 'byung ngam zhe na/__dmigs pa med pa'i snying rje chen po'i lus zhes bya ba la/__/dmigs pa med pa'i snying rje chen po dang /__smon lam thun mong ma yin pa'i stobs kyis/__lus gzugs sku rnam pa gnyis/__snang ba shin tu rnam par dag pa dang /__dag pa las 'byung ngo /__/lus de kho na nyid las gzhan nam zhe na bstan par bya ste/__bde ba chen po'i rang bzhin gang yin pa'i ngo bo nyid do/__/zhes bya ba ste/__bde ba chen po ni sgro skur dang bral ba/__yid la mi byed pa nyid kyi sku'o/__/de dag gi rang bzhin gang yin pa ni gzugs kyi sku ste ngo bo nyid do/__/zhes so/__/'di rnams phyag rgya chen po'i rang bzhin cung zad rgyas par bshad par ste gzhung de nyid las btus pa'o/__/sa ra ha'i do ha mdzod kyi bka' 'grel slob dpon chen po dpal gnyis su med pa'i rdo rjes 27mdzad pa/__dngul chu shrI bai ro tsa nas bsgyur ba las/__dge tshul ni bslab pa'i gnas bcu pa'o/__/dge slong ni bslab pa'i gnas nyis brgya lnga bcu pa'o/__/gnas brtan ni bsnyen par rdzogs nas lo bcu lon pa'o/__/ban+de ni de rnams la gzhan gyis phyag 'tshal ba'i ched du rab tu byung bar khas blangs nas bsod snyoms dang /__bslab pa slob kyang mchog ni ma yin te/__de nyid mi shes pa'i phyir/__zhes sogs gsungs/__/yul rnams bsten pas yul gyis ni/_/gos par 'gyur ba ma yin te/__/ji ltar chu las ut+pal la/_blangs kyang chu yis ma reg bzhin/__zhes gsungs te/__ji ltar chu yi nang du gru la zhugs nas ut+pal blangs kyang chu yis ma gos pa bzhin du/__de kho na nyid shes pa'i rtogs pa yod na 'dod pa'i yon tan lnga la longs spyod kyang nyon mongs pas gos par mi 'gyur ro/__/zhes sogs gsungs te/__'di 'grel 187shin tu legs 25par 27yod 28do//____//__! slob dpon mai tri pa gnyis med rdo rjes mdzad pa'i mi zad pa'i gter mdzod yongs su gang ba'i glu zhes bya ba gnyug ma'i de nyid rab tu ston pa'i rgya cher bshad pa zhes bya ba/__rnal 'byor bsod snyoms pa pra dz+nyA shrI dz+nyA na kIrtis rang 'gyur su mdzad pa der/__ri khrod kyi mu stegs rnal 'byor spyod pa rnams/__rnal 'byor pa chen po te lo pa zhes bya ba dpal he ru ka bzang po'i brtul zhugs la zhugs te grub pa thob pa/__mu stegs pa ki na nyi zhes bya bas mthong nas de dang chos mtshungs par 'khrul par spyod pa'i rjes 'brang las byung ba sogs so so'i 'khrul tshul rgyas par bshad 'dug go__/de'i gsham du/__/sems nyid lhan cig skyes pa chos kyi sku/__/snang ba lhan cig skyes pa chos sku'i 'od/__/snang stong dbyer med lhan cig skyes pa ste/__/de nyid chos sku'i dgongs pa chos sku nyid/__ces sogs gsungs so//____//__! slob dpon thar pa'i 'byung gnas sbas pas do ha mdzod kyi bka' 'grel21/__rgyal ba'i lha 264dang /__rgya lo tsA bas bsgyur 283ba yang yod do/__/'di gsum ka mgor/__do ha mdzod gyi glu/__'jam dpal gzhon nur gyur pa la phyag 'tshal lo/__/dug sbrul lta bu'i skal med ni/__sogs nas de kho na nyid rnal du mtshon pa don dam pa'i yi ge rdzogs so'i mtha' can de ga'i 'grel pa kho nar snang na'ang /__gzhung gi zur cung zad mi 'dra ba der bcos par snang ngo /__/mang+ga laM//____//__! da ni dkyil 'khor chen po bkod pa'i rjes su 'brangs nas sa ts+tsha gdab pa'i cho ga bshad par bya ste/__na mas+sa man+ta bud+d+hA nAM/__oM badz+ra A yu She swA hA/__'jim pa blang ba'i sngags so/__/oM badz+rod b+ha bA ya swA hA/__'bi 'bi bya ba'i sngags so/__/oM a ra dze bi ra dze swA hA/__snum bsku ba'i sngags so/__/oM badz+ra d+harma d+hA tu gar+b+he swA hA/__rgyar gzhug pa'i sngags so/__/oM badz+ra mung+ga ra A ko Ta ya swA hA/__gdab pa'i sngags so/__/oM d+harma A yu She swA hA/__spyan drangs pa'i sngags so/__/oM su pra tiSh+Tha badz+rA ya swA hA/__bzhugs su gsol ba'i sngags so/__/oM sarba ta thA ga ta ma Ni sha ta dI pa te dz+wa la dz+wa la d+harma d+hA tu gar+b+he swA hA/__rab tu gnas pa'i sngags so/__/oM swa b+hA ba bi shud+d+he a ha ra a ha ra A gats+tsha A gats+tsha d+harma d+hA tu gar+b+he swA hA/__gshegs su gsol ba'i sngags so/_/oM A ka sha d+harma d+hA tu gar+b+he swA hA/__bzod par gsol ba'i sngags so/__/de lta bu ni sats+tsha gdab pa'i sngags so/__/na mo b+ha ga wa te bai ro tsa na pra b+ha rA dzA ya/__ta thA ga tA ya/__ar+ha te/__saMmyak+saM bud+d+ha ya/__tad+ya thA/__oM suk+Sh+me suk+Sh+me/__sa ma ye pra sa ma ye/__shAn+te shAn+te/__sa ma ro pe/__a na lam+b+he/__tar+b+ha/__ya sho ba ti/__ma hA te dza ni rku me/__nirbA na/__sarba bud+d+ha ad+hiSh+ThA na ad+hiSh+ThI te swA hA/__zhes bya ba'i gzungs 'di 'jim pa'am/__bye ma la lan nyi shu rtsa gcig gi bar du bzlas te/__mchod rten byas na/__de la rdul phra rab ji snyed yod pa de snyed kyi bye ma snyed kyi 'gyur gyi mchod rten byas pa'i bsod nams thob par 'gyur ro/__/sa bcu'i dbang phyug tu 'gyur ro/_/myur du bla na med pa yang dag par rdzogs pa'i byang chub tu 'gyur ro zhes bcom ldan 'das rnam par snang mdzad kyis gsungs te/__gzungs 'di ni phan yon dpag tu med do/_/yed+harmA he tu pra b+hA ba he dun+te ShAn+ta thA ga to d+ya ba da ta/__te ShAny+tsa yo ni ro d+ha e waM bA dI ma hA shra ma NaH__tshigs su bcad pas rab gnas byas la/__na mo b+ha ga wa te rat+na ke tu rA dzA ya/__ta thA ga tA yA harte saMmyak+saM bud+d+hA ya/__tad+ya thA/__oM rat+ne rat+ne ma hA rat+na bo d+hi swA hA/__zhes bya ba'i gzungs la sogs pa 'di brjod cing mchod rten la phyag 'tshal ba sogs byas na/__mchod rten gcig la phyag byas pas/__mchod rten bye ba la phyag la sogs pa byas par 'gyur ro/__/'jim pa la sogs pa la mchod rten bya ba'i cho ga'o/__/zhes dang /__'gro ba'i las 'di bdag gis byas pa yis/__ring por mi thogs 'jig rten sangs rgyas nas/_/'gro la phan phyir chos ni ston byed cing /__/sdug bsngal mang pos mnar ba'i sems can grol gyur cig__/ces dang /__kha zas kyi bya ba zin rjes/__/rgyal po dang ni yon bdag dang /_/sems can phung po gzhan dag kyang /__/tshe dang nad med phun sum tshogs/_/rtag tu bde ba thob gyur cig__/ces brjod do/__/zhes dang /__/dkyil 'khor la sogs cho ga yis/__/yang dag shes rab pha rol phyin/__/rtag tu mchod cing bklag par bya'o/_/tshigs bcad gcig dang tshigs bcad bzhi/__/tshigs bcad gnyis dang sgo drug pa'i/_/gzungs dang bzang po spyod pa dang /__/phung po gsum pa dus gsum du/__/yi ge gcig nas nyer bzung nas/__/gsum gyi bar du mnyam bzhag pas/__/yi dam nyams pa med pa yis/__/blo ldan ji ltar rnyed pa bklag__/ces so/__/'di dag slob dpon gnyis med rdo rjes mdzad pa'i lta ba ngan sel las btus pa'o/__/ji ltar dag pa'i ut+pal mig sman mdangs/__/chu mtshor brten kyang nyams pa med pa ltar/__/'dod pa'i yul rnams bdag gir mdzad pa'i mod/__/chags bral brtul zhugs mchog tu grub des srungs/__/sarba mang+ga laM shu b+haM b+ha ban+tu//____//__!