JKW-KABUM-07-JA-015-004

🚧 This website is under continued development. We appreciate your patience!

Previous Text Back to Volume Page Next Text

Wylie title
Location	mkhyen brtse'i bka' 'bum Volume 7, sde tshan 15, Text 4, Pages (Folios to )
Author	འཇམ་དབྱངས་མཁྱེན་བརྩེའི་དབང་པོ་
Less details More details
Associated People	ནཱ་རོ་པ་ (Nāropa)
Citation	'jam dbyangs mkhyen brtse'i dbang po. '. In jam dbyangs mkhyen brtse'i dbang po'i bka' 'bum, Vol. 7: 303-. Khams sde dge rdzong sar dgon: Rdzong sar blo gros phun tshogs, 2020.
Genre
Cycle	ནཱ་རོ་མཁའ་སྤྱོད་མ་ (na ro mkha' spyod ma)
Deity	rdo rje rnal 'byor ma

1 Texts in this Section (sde tshan or chos tshan)

4 350-402	རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ། rje btsun rdo rje rnal 'byor ma nA ro mkha' spyod ma'i bskyed rdzogs mdor bsdus pa mkha' spyod bgrod pa'i gsang lam Activity Manual - las byang · Generation Stage - bskyed rim · Completion Stage - rdzogs rim	Text page View PDF
	[[\|འཇམ་དབྱངས་མཁྱེན་བརྩེའི་དབང་པོ་ ()]]

[edit]

རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ། ༄༅། །རྗེ་བཙུན་རྡོ་རྗེ་རྣལ་འབྱོར་མ་ནཱ་རོ་མཁའ་སྤྱོད་མའི་བསྐྱེད་རྫོགས་མདོར་བསྡུས་པ་མཁའ་སྤྱོད་བགྲོད་པའི་གསང་ལམ་ཞེས་བྱ་བ་བཞུགས་སོ། །བླ་མ་རྡོ་རྗེ་རྣལ་འབྱོར་མར། །བཏུད་ནས་དེ་ཡི་རིམ་གཉིས་ཚུལ། །མདོར་བསྡུས་མཁའ་སྤྱོད་རྡོ་རྗེའི་གྲོང་། །བགྲོད་པའི་གསང་ལམ་འདིར་གསལ་བྱ། །དེ་ལ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་དང་། འདི་ཉིད་ཀྱི་བྱིན་རླབས་ཉམས་ཁྲིད་དང་བཅས་པ་ལེགས་པར་ཐོབ་ཅིང་། དམ་ཚིག་དང་སྡོམ་པར་ལྡན་པའི་གང་ཟག་གིས་ཉམས་སུ་བླང་བྱའི་ལམ་ནི། བསྐྱེད་པའི་རིམ་པ་ཕག་མོ་མཁའ་སྤྱོད། རྫོགས་པའི་རིམ་པ་རྩ་དབུ་མ། ལམ་གྱི་ཡན་ལག་པྲ་སེ་ནཱ་དབབས་པ། སྨན་ཆེན་མོ་བཅུད་ལེན། གནོད་སྦྱིན་མོ་དབང་དུ་བྱ་བ་རྣམས་སུ་བཤད་པ་ལས། དང་པོ་ནི། རྗེ་ས་སྐྱ་པ་ཆེན་པོའི་ཞལ་ནས། ཉལ་དང་ལྡང་དང་བདུད་རྩི་མྱང་། །ཚད་མེད་བླ་མ་བདག་ལྷར་བསྐྱེད། །འགྲོ་བ་དག་པའི་རྣལ་འབྱོར་དང་། །དཔའ་བོ་དཔའ་མོས་བྱིན་གྱིས་རླབས། །ངག་བཟླས་ཡིད་བཟླས་གཉིས་གཅིག་ཡིན། །བསམ་མི་ཁྱབ་པའི་རྣལ་འབྱོར་དང་། །སྤྱོད་ལམ་གྱི་ནི་རྣལ་འབྱོར་ཏེ། །དེ་ལྟར་རྣལ་འབྱོར་བཅུ་གཅིག་གོ །ཞེས་གསུངས་པ་འདིར་འདུ་བ་ལས། དང་པོ་ཉལ་བའི་རྣལ་འབྱོར་ནི། ནུབ་མོ་བསམ་གྱིས་མི་ཁྱབ་པའི་རྣལ་འབྱོར་གྱིས་འོད་གསལ་སྟོང་པ་ཉིད་ཀྱི་ངང་དུ་ཉལ་པའམ། སྟོང་ཉིད་དེའི་ངང་ལས་ཐུན་མཚམས་ཀྱི་ལྷར་ལྡང་སྟེ། གནས་ཁང་ཆོས་འབྱུང་དམར་པོ་འོད་ཀྱི་རང་བཞིན་ཅན་གྱི་ནང་དུ། རང་ཉིད་སེང་གེའི་ཁྲི་ལ་འཁོད་པའི་སྔས་མགོར་སེང་ཁྲི་པད་ཟླའི་སྟེང་དུ། རྩ་བའི་བླ་མ་རྡོ་རྗེ་ཆོས་ཀྱི་རྣམ་པར་བཞུགས་པ་ལ་མོས་གུས་དུང་ངེ་བ་དང་། ལྷ་ཡི་གསལ་སྣང་མ་བྲལ་བའི་ངང་ནས་གཉིད་ལོག །གཉིས་པ་ལྡང་བའི་རྣལ་འབྱོར་ནི། ཐོ་རངས་ནམ་གྱི་བརྒྱད་ཆ་ཙམ་ལོན་པ་ན། ནམ་མཁའ་ནས་མཁའ་སྤྱོད་ཀྱི་དཔའ་བོ་དང་རྣལ་འབྱོར་མས་ཌཱ་མ་རུའི་སྒྲ་ཨོཾ་གསུམ་མའི་གདངས་སུ་བསྒྲགས་པས་བསྐུལ་ཏེ། འོད་གསལ་སྟོང་ཉིད་དེའི་ངང་ལས་ཆུ་ལས་ཉ་འཕར་བ་ལྟར་ཐུན་མཚམས་ཀྱི་ལྷར་ལྡང་བའམ། ཉལ་ལུགས་ཕྱི་མ་ལྟར་ན། རང་དང་བླ་མ་གནས་ཁང་སོགས་ཅིར་སྣང་ཐམས་ཅད་ལྷ་དང་གཞལ་ཡས་ཁང་དུ་གསལ་བཞིན་པའི་ངང་ནས་ལྡང་ལ། སྔས་མགོའི་བླ་མ་ལ་མོས་གུས་བྱས་པས་འོད་དུ་ཞུ་སྟེ་རང་ལ་ཐིམ་པས་རྒྱུད་བྱིན་གྱིས་བརླབ་པར་བསམ་མོ། །གསུམ་པ་བདུད་རྩི་མྱོང་བའི་རྣལ་འབྱོར་ནི། བདུད་རྩི་རིལ་བུ་དངོས་སུ་འབྱོར་ན་དང་། མ་འབྱོར་ན་བྱིན་གྱིས་བརླབ་པའི་ནང་མཆོད་སྲིན་ལག་གིས་བླངས་ཏེ། ཨོཾ་ཨཱཿཧཱུྃ་གིས་མྱོང་བས་སྙིང་གའི་བྃ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ། བཞི་པ་ཚད་མེད་པའི་རྣལ་འབྱོར་ནི། ཐོག་མར་ཐ་མལ་གྱི་སྣང་བ་ཐམས་ཅད་དབྱིངས་སུ་ཐིམ་པ་ལས་གནས་ཡུལ་དག་པའི་ཞིང་ཁམས་ཆེན་པོར་གསལ་བའི་ངང་། རང་གི་སྨིན་མཚམས་ཀྱི་ཐད་ཁྲུ་གང་ཙམ་གྱིས་མཐོ་བའི་ནམ་མཁར་སེང་ཁྲི་པདྨ་ཉི་ཟླའི་གདན་ལ་རྩ་བའི་བླ་མ་སངས་རྒྱས་རྡོ་རྗེ་ཆོས། སྐུ་མདོག་དམར་པོ་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། དར་དང་རིན་པོ་ཆེས་བརྒྱན་ཅིང་། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་སྐུ་དགེ་འདུན། གསུང་དམ་ཆོས། ཐུགས་སངས་རྒྱས། ཡོན་ཏན་ནོར་ལྷ། ཕྲིན་ལས་མཁའ་འགྲོ་ཆོས་སྐྱོང་ཐམས་ཅད་འདུས་པའི་ངོ་བོར་གསལ་བཏབ། དེའི་མདུན་དུ་རང་ཉིད། རང་གི་གཡས་གཡོན་དུ་ཕ་མ། མདུན་དུ་གནོད་བྱེད། མཐར་སྐོར་ཀུན་ཏུ་རིགས་དྲུག་གི་སེམས་ཅན་ཐམས་ཅད་འཁོད་དེ། འདུན་པ་ཕྱོགས་གཅིག་པས་སྐྱབས་སུ་འགྲོ་བར་མོས་ལ། ངེས་འབྱུང་དང་སྙིང་རྗེ་ཆེན་པོའི་ཤུགས་དྲག་ཏུ་བསྐྱེད་བཞིན་པའི་ངང་། བདག་དང་འགྲོ་བ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །རྫོགས་པའི་སངས་རྒྱས་བཅོམ་ལྡན་འདས་རྣམས་ལ༴ དམ་པའི་ཆོས་རྣམས༴ འཕགས་པའི་དགེ་འདུན་རྣམས༴ ཞེས་ཅི་ནུས་དང་། མཐར། བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ལ་བདག་ཕྱག་འཚལ་ཞིང་སྐྱབས་སུ་མཆིའོ། །ཁྱེད་རྣམས་ཀྱིས་བདག་གི་རྒྱུད་བྱིན་གྱིས་བརླབ་ཏུ་གསོལ། །ཅེས་གསོལ་བ་བཏབ་པས། གདན་སེང་ཁྲི་ནས་ཡར་འོད་དུ་ཞུ། དབུའི་གཙུག་ཏོར་ནས་མར་འོད་དུ་ཞུ་སྟེ། ཐུགས་ཀའི་ཐད་དུ་འོད་དམར་པོའི་རྣམ་པར་གྱུར་པ་རང་གི་སྨིན་མཚམས་ནས་ཐིམ་པས། རང་གི་ལུས་ངག་ཡིད་གསུམ་དང་། བླ་མའི་སྐུ་གསུང་ཐུགས་དབྱེར་མེད་དུ་གྱུར་པར་བསམ་ལ་རིག་པ་འཛིན་མེད་ཀྱི་ངང་དུ་མཉམ་པར་བཞག །དེ་ནས་ཚད་མེད་དངོས་ནི། བདག་གིས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱས་ལ། སེམས་ཅན་ཐམས་ཅད་སྲིད་པའི་སྡུག་བསྔལ་གྱི་རྒྱ་མཚོ་ལས་བསྒྲལ་བར་བྱ། དེའི་ཆེད་དུ་རྡོ་རྗེ་རྣལ་འབྱོར་མའི་བསྒོམ་བཟླས་ཉམས་སུ་བླང་བར་བགྱིའོ། །ཞེས་པའི་དོན་དྲན་བཞིན་པས་ལན་གསུམ་བརྗོད། སྤྲོ་ཞིང་ནུས་ན་རྡོ་རྗེ་སེམས་དཔའི་བསྒོམ་བཟླས་ཀྱང་སྟོབས་བཞི་ཚང་བའི་དམིགས་གནད་དང་མ་བྲལ་བའི་སྒོ་ནས་མ་རྒྱུད་སྤྱི་ལྟར་བྱ། ལྔ་པ་བླ་མའི་རྣལ་འབྱོར་ལ། ཐུན་མོང་བ་ནི། རང་གི་མདུན་གྱི་ནམ་མཁར་སེང་ཁྲི་པད་ཟླའི་གདན་ལ། རྩ་བའི་བླ་མ་དཔའ་བོ་རྡོ་རྗེ་ཆོས་སྐུ་མདོག་དམར་པོ། །ཕྱག་གཡས་ཌ་མ་རུ་དང་། གཡོན་ཐོད་པ་བདུད་རྩིས་བཀང་བ་དང་། གྲུ་མོ་གཡོན་ན་ཁ་ཊྭཱྃ་ག་བསྣམས་པ། རུས་པའི་རྒྱན་དྲུག་གིས་བརྒྱན་ཅིང་། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ། ལང་ཚོ་དར་ལ་བབ་པའི་རྣམ་པ་ཅན། སྐྱབས་གནས་ཐམས་ཅད་འདུས་པའི་ངོ་བོར་གྱུར་པར་བསམ་ལ་མོས་གུས་དྲག་པོས། གང་གི་དྲིན་གྱིས་སོགས་དང་། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀར། །གསོལ་བ་འདེབས་སོ་བྱིན་གྱིས་རློབས། །ཞེས་གསོལ་བ་བཏབ་པས་འོད་དམར་པོ་བདེ་བ་ཆེན་པོའི་རྣམ་པས་རང་གི་སྤྱི་བོ་ནས་ཞུགས། སྙིང་གའི་བྃ་ཡིག་ལ་ཐིམ་པས། དེ་ཉིད་ཇེ་ཆེར་སོང་སྟེ་མཐར་ནམ་མཁའ་ལ་འཇའ་ཡལ་བ་ལྟར་གྱུར་པར་བསམ་ལ། གསལ་སྟོང་འཛིན་མེད་ཀྱི་ངང་དུ་ཅི་གནས་སུ་མཉམ་པར་བཞག །ཡང་ན་མན་ངག་ཐོབ་པས་ཐུན་མོང་མ་ཡིན་པའི་བླ་མའི་རྣལ་འབྱོར་ཉམས་སུ་བླངས་ཏེ། དེའི་ཚུལ་ནི་གཞན་དུ་ཤེས་པར་བྱའོ། །དྲུག་པ་བདག་གི་གཞི་སྦྱངས་བསྒྱུར་གྱིས་ལྷར་བསྐྱེད་པའི་རྣལ་འབྱོར་ནི། དེའི་ངང་ལས། རང་གི་སྙིང་གར་ཨེ་ཨེ་ལས་ཆོས་འབྱུང་ཉིས་བརྩེགས་ཀྱི་ནང་དུ་ཨ་ལས་ཟླ་བའི་དཀྱིལ་འཁོར་གྱི་དབུས་སུ་བྃ་ཡིག་དམར་པོའི་མཐར། ཨོཾ་ཨོཾ་ཨོཾ་སརྦ་བུདྡྷ་ཌཱ་ཀི་ནཱི་ཡཻ། བཛྲ་ཝརྞྞ་ནཱི་ཡཻ། བཛྲ་བཻ་རོ་ཙ་ནཱི་ཡཻ། ཧཱུྃ་ཧཱུྃ་ཧཱུྃ་ཕ྄ཊ་ཕ྄ཊ་ཕ྄ཊ་སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་གནས་པ་ལས་འོད་ཟེར་འཕྲོས། ལུས་ཀྱི་ཕྱི་ནང་ཐམས་ཅད་གང་བས་སྒོ་གསུམ་གྱི་སྡིག་སྒྲིབ་དག་སྟེ་ལུས་འོད་ཀྱི་གོང་བུར་གྱུར། དེ་ཡོངས་སུ་གྱུར་པ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་གཞལ་ཡས་ཁང་གི་དབུས་སུ་སྣ་ཚོགས་པད་ཉིའི་གདན་ལ། རང་ཉིད་རྣམ་སྣང་རིགས་བདག་དང་བཅས་པའི་རྡོ་རྗེ་རྣལ་འབྱོར་མ་ཞབས་གཡས་བརྐྱངས་པས་དུས་མཚན་མ་དམར་མོའི་ནུ་མ་བརྫིས་ཤིང་། གཡོན་བསྐུམ་པས་འཇིགས་བྱེད་ནག་པོའི་མགོ་བོ་རྒྱབ་ཏུ་བལྟས་པའི་གདོང་མནན་པ་སྐུ་མདོག་དམར་མོ་ཞལ་གཅིག་ཕྱག་གཉིས་སྤྱན་གསུམ་དག་པ་མཁའ་སྤྱོད་དུ་གཟིགས་པ། གཡས་རྡོ་རྗེས་མཚན་པའི་གྲི་གུག་ཐུར་དུ་བརྐྱང་ཞིང་། གཡོན་ཐོད་པ་ཁྲག་གིས་གང་བ་སྟེང་ཕྱོགས་སུ་བཟུང་ནས་ཞལ་གྱེན་དུ་ཕྱོགས་པས་གསོལ་བ། ཕྲག་པ་གཡོན་པར་རྡོ་རྗེས་མཚན་པའི་ཁ་ཊྭཱྃ་ག་ལ་ཌཱ་མ་རུ་དང་། དྲིལ་བུ་དང་། འཕེན་རྩེ་གསུམ་པ་འཕྱང་བཞིན་པ་བསྣམས་པ། བདེ་སྟོང་གི་ཉམས་མཆོག་ཏུ་རྒྱས་ཤིང་། དབུ་སྐྲ་ནག་པོ་སིལ་བུར་གྲོལ་བ། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་དོ་ཤལ་ཅན། ཕྱག་རྒྱ་སྤྱི་བོར་རུས་པའི་འཁོར་ལོ། སྙན་རྒྱན། མགུལ་རྒྱན། གདུ་བུ། སྐེ་རགས་རྣམས་སོ། །ལྔས་བརྒྱན་ཅིང་ཡེ་ཤེས་ཀྱི་མེ་འབར་བའི་དབུས་ན་བཞུགས་པར་གསལ་བཏབ། བདུན་པ་གཞན་གྱི་གཞི་སྦྱང་བསྒྱུར་འགྲོ་བ་དག་པའི་རྣལ་འབྱོར་ནི། སྙིང་གའི་བྃ་ཡིག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་སྣ་ཚོགས་བ་སྤུའི་བུ་ག་ནས་ཕྱིར་འཕྲོས། རིགས་དྲུག་གི་བརྟན་གཡོ་ཐམས་ཅད་ལ་ཕོག་པས། མ་དག་པའི་སྣང་བ་སྡིག་སྒྲིབ་བག་ཆགས་དང་བཅས་པ་སྦྱངས་ཏེ། སྣོད་གཞལ་ཡས་ཁང་དང་། བཅུད་ཐམས་ཅད་རྡོ་རྗེ་རྣལ་འབྱོར་མའི་སྐུར་གྱུར་པར་བསམ། བརྒྱད་པ་དཔའ་བོ་དཔའ་མོས་བྱིན་གྱིས་བརླབས་ཏེ་དམ་ཡེ་དབྱེར་མེད་དུ་བྱ་བ་ནི། འབར་བའི་ཕྱག་རྒྱ་དཔྲལ་བར་གཡོན་དུ་ལན་གསུམ་བསྐོར་ཞིང་། ཕཻཾ། རང་གི་སྙིང་གའི་བྃ་ཡིག་ལས་འོད་ཟེར་འཕྲོས་པས། འོག་མིན་ནས་རྡོ་རྗེ་རྣལ་འབྱོར་མ་ལ་ཕྱོགས་བཅུའི་སངས་རྒྱས་བྱང་སེམས་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་དང་། འགྲོ་བ་རྣལ་འབྱོར་མར་གྱུར་པ་ཐམས་ཅད་ཀྱང་། ཛཿཧཱུྃ་བྃ་ཧོཿས་རང་ཉིད་ལ་གཉིས་སུ་མེད་པར་ཐིམ་པར་བསམ། སྐབས་འདིར་མན་ངག་ཐོབ་པ་ཡིན་ན་ལུས་དཀྱིལ་གསལ་བཏབ་པ་ནི། དེའི་རྐྱེན་གྱིས་སྙིང་གའི་བྃ་ཡིག་འོད་དུ་ཞུ་བ་ལས་དབུས་སུ་བྃ་ཡིག་གི་ངོ་བོ་རྡོ་རྗེ་རྣལ་འབྱོར་མ་དམར་མོ། ཤར་ནས་བརྩམས་ཏེ་གཡོན་སྐོར་གྱིས་བྃ་ཡིག་གི་ཆ་ཤས་ཡ་ར་ལ་ཝ་བཞིའི་ངོ་བོ་སྙིང་པོའི་རྣལ་འབྱོར་མ་དཀར་ལྗང་དམར་སེར་བཞི་དང་། མཐའ་སྐོར་སྔགས་ཀྱི་ཡིག་འབྲུ་སོ་གཉིས་ཀྱང་རེ་རེ་ནས། ཡུལ་ཉེར་བཞིའི་རྣལ་འབྱོར་མ་དང་། སྒོ་མཚམས་མ་བརྒྱད་ཀྱི་ངོ་བོ་རྣལ་འབྱོར་མ་དམར་མོ་རེ་རེ་སྟེ་ཐམས་ཅད་ཀྱང་རྒྱན་ཆ་ལུགས་ཕྱིའི་རྣལ་འབྱོར་མ་ཇི་ལྟ་བ་བཞིན་གསལ་བར་གྱུར་པར་བསམ་མོ། །གང་ལྟར་ཡང་། མཐར་པད་སྐོར་འཁྱུད་རྒྱ་དང་བཅས། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅་ཧཾ། ཐབས་ཤེས་གཉིས་སུ་མེད་པའི་བདེ་ཆེན་གྱི་ཡེ་ཤེས་སུ་བདག་ཉིད་རྣམ་པར་དག་ལ། དེ་བཞིན་དུ་ཆོས་ཐམས་ཅད་ཀྱང་རྣམ་པར་དག་གོ་སྙམ་དུ་ང་རྒྱལ་བཟུང་ཞིང་རིག་པ་འཛིན་མེད་དུ་བཞག །དེ་ནས་གོ་ཆ་བཅིངས་པ་ནི། རང་གི་ལུས་ཀྱི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་ལྟེ་བར་ཨོཾ་བྃ་དམར་མོ་རྡོ་རྗེ་ཕག་མོ། སྙིང་གར་ཧཾ་ཡཾ་སྔོན་མོ་གཤིན་རྗེ་མ། ཁར་ཧྲིཾ་མྃ་དཀར་མོ་རྨོང་བྱེད་མ། དཔྲལ་བར་ཧྲིཾ་ཧྲཱིཾ་སེར་མོ་སྐྱོད་བྱེད་མ། སྤྱི་གཙུག་ཏུ་ཧཱུྃ་ཧཱུྃ་ལྗང་གུ་སྐྲག་བྱེད་མ། ཡན་ལག་ཐམས་ཅད་ལ་ཕ྄ཊ་ཕ྄ཊ་དུད་ཁ་ཙཎྜི་ཀའི་ངོ་བོར་གྱུར། ཅེས་བརྗོད་ཅིང་། དེ་ཡང་གནས་སོ་སོར་ཟླ་དཀྱིལ་ལ་རྒྱབ་ཡོལ་གྱི་ཚུལ་དུ་བྱས་པའི་ངོ་བོ་ལྷ་ལ་རྣམ་པ་ཡི་གེའི་གཟུགས་སུ་འདི་ལ་བཞེད་ཚུལ་འདྲ་མིན་གཞན་ཡང་སྣང་ངོ་། །མཆན། སྦྲེང་ཚར་དུ་གསལ་བཏབ། དགུ་པ་བཟླས་པའི་རྣལ་འབྱོར་ལ་གཉིས་ཏེ། དང་པོ་མཁའ་སྤྱོད་སྒྲུབ་པའི་ལམ་གྱི་གཙོ་བོ་ངག་བཟླས་ནི། ལུས་དཀྱིལ་གསལ་གདབ་ན། ལུས་དཀྱིལ་གྱི་གཙོ་མོའི་ཐུགས་ཀར་ཆོས་འབྱུང་གྲུ་གསུམ་དམར་པོ་ཉིས་བརྩེགས་ཀྱི་ནང་དུ་ཟླ་དཀྱིལ་བྃ་ཡིག་སྔགས་ཕྲེང་དང་བཅས་པ་གསལ་བ་དང་། མ་བཏབ་ན་སྔར་གསལ་བཞིན་པའི་སྔགས་ཕྲེང་ལ་ཡིད་གཏད་པས། དེ་ལས་འོད་ཟེར་དམར་པོ་དཔག་ཏུ་མེད་པ་འཕྲོས། འཕགས་པ་མཆོད། སེམས་ཅན་གྱི་དོན་བྱས། སངས་རྒྱས་དང་བྱང་ཆུབ་སེམས་དཔའ་ཕོ་ཉ་གསུམ་གྱི་བྱིན་རླབས་དང་ནུས་མཐུ་མཁའ་སྤྱོད་ཀྱི་དངོས་གྲུབ་ཐམས་ཅད་འོད་དམར་པོའི་རྣམ་པས་སྔགས་ཕྲེང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ། ཡིད་གཞན་དུ་མ་ཡེངས་པར་བྱིན་གྱིས་བརླབ་པའི་ཕྲེང་བ་བཟུང་སྟེ་ཨོཾ་གསུམ་མ་དམ་བཅས་པའི་གྲངས་ལས་མི་ཉུང་བར་བཟླས། གཉིས་པ་སྤྲོས་བཅས་ཀྱི་རྫོགས་རིམ་ཡིད་བཟླས་ནི། ལུས་གནད་དང་བཅས་རླུང་རོ་བསལ། འོག་རླུང་ཅུང་ཟད་འཐེན། སྟེང་རླུང་ཆིལ་གྱིས་མནན་པ་དང་མཉམ་དུ་མཆིལ་མ་སྒྲ་མེད་ཞིག་མིད་པས་སྙིང་གའི་ཆོས་འབྱུང་ཟླ་བ་ལུས་དཀྱིལ་བཅས། བདེ་བ་བསྐྱེད་པར་འདོད་ན་གསང་གནས་དང་། མི་རྟོག་པ་བསྐྱེད་པར་འདོད་ན་ལྟེ་བར་ཕབས་ལ་རླུང་ཁ་སྦྱོར་དུ་འཛིན་པ་དང་ལྷན་ཅིག་ཡིད་ཀྱིས་ལུས་དཀྱིལ་གྱི་ལྷ་རྣམས་ཡིག་འབྲུའི་གཟུགས་སུ་བསྒྱུར། ཡ་ར་ལ་ཝ་བཞི་བྃ་ཡིག་ལ་ཐིམ་པར་བསམ་ལ། སྔགས་ཕྲེང་ཡིད་ཀྱིས་ཀློག་པའི་ཚུལ་དང་བཅས་རླུང་བུམ་ཅན་ཅི་ཐུབ་འཛིན། མཐར་བཟླས་པ་བསྡུ་བ་ན། ཕྲེང་བ་ཐལ་མོའི་བར་དུ་བཅུག་ལ། བདེ་བར་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱིས་བྱིན་གྱིས་བརླབ་ཏུ་གསོལ། །མྱུར་དུ་ཕྱག་རྒྱ་ཆེན་པོ་མཆོག་གི་དངོས་གྲུབ་རྗེ་བཙུན་རྡོ་རྗེ་རྣལ་འབྱོར་མའི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། །ཞེས་བརྗོད་ཅིང་ཕྲེང་བ་མགོ་ཐོག་ཏུ་བཞག །ཞར་བྱུང་གི་རྫོགས་རིམ་གཉིས་བསྒོམ་པར་འདོད་ནི། དང་པོ་ནི། ཆོས་འབྱུང་གི་མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་དམར་པོ་གཡོན་དུ་ཤུགས་དྲག་ཏུ་འཁོར་བ་ལ་སེམས་གཏད་པས་བདེ་བའི་ཡེ་ཤེས་སྐྱེས་པར་བསམ་ལ་རླུང་ཁ་སྦྱར་དུ་འཛིན། གཉིས་པ་ནི། ཆོས་འབྱུང་སྔགས་ཕྲེང་སོགས་རེ་ཞིག་མི་དམིགས་པའི་ངང་། ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། ཡར་སྣ་སྤྱི་བོ་ནས་སྨིན་མཚམས་སུ་གུག་པ། མར་སྣ་གསང་གནས་ཀྱི་པདྨར་ཟུག་པའི་ནང་དུ་དགའ་འཁྱིལ་དམར་པོ་དང་། སྨིན་མཚམས་སུ་དགའ་འཁྱིལ་དཀར་པོ་ཆུང་ངུ་གཡོན་སྐོར་ཤུགས་དྲག་ཏུ་འཁོར་བ་ལ་སེམས་གཏད་པས། མས་ཡར་ནས་རིམ་གྱིས་བྱུང་སྟེ་བདེ་བ་དང་། སྟོང་པའི་ཡེ་ཤེས་སྐྱེས། མཐར་སྙིང་གར་འདྲེས་ཏེ་དབུ་མའི་སྟོང་པའི་ངང་དུ་མི་དམིགས་པར་བསམས་ལ་འཛིན་མེད་དུ་བཞག་གོ། །དེ་ནས་བསྐྱེད་རིམ་ལ་རིམ་གྱིས་བསླབ་པའི་ཚེ། ང་རྒྱལ་ལ་སེམས་འཛིན་པ། རྣམ་པ་སྤྱི་ལ་སེམས་འཛིན་པ། བྱེ་བྲག་རྒྱན་མེད་དང་། རྒྱན་ཅན་ལ་སེམས་འཛིན་པ། ལུས་དཀྱིལ་ལ་སེམས་འཛིན་པ་རྣམས་རེག་མཐོང་གི་མཚན་མ་བརྟན་པོ་མ་སྐྱེས་ཀྱི་བར་དུ་བསྒོམ་ཞིང་། དེ་ཐམས་ཅད་འཛིན་མེད་ཀྱི་ལྟ་བ་དང་ཟུང་འབྲེལ་དུ་ཉམས་སུ་བླང་ངོ་། །བཅུ་པ་བསམ་མི་ཁྱབ་པའི་རྣལ་འབྱོར་ལ། ཐུན་མོང་བ་ནི། རང་གི་སྙིང་གའི་བྃ་ཡིག་སྔགས་ཕྲེང་དང་བཅས་པ་ལས་འོད་ཟེར་འཕྲོས་པས། ཁམས་གསུམ་སྣོད་བཅུད་ཐམས་ཅད་འོད་དུ་ཞུ་སྟེ། གཟུགས་མེད་ཁམས་འོད་སྔོན་པོའི་རྣམ་པས་ལུས་ཀྱི་སྟོད་ཀྱི་ཆ་ལ་ཐིམ། གཟུགས་ཁམས་འོད་དམར་པོའི་རྣམ་པས་ལུས་ཀྱི་བར་གྱི་ཆ་ལ་ཐིམ། འདོད་ཁམས་འོད་དཀར་པོའི་རྣམ་པས་ལུས་ཀྱི་སྨད་ཀྱི་ཆ་ལ་ཐིམ། རང་རྡོ་རྗེ་རྣལ་འབྱོར་མར་གསལ་བ་སྙིང་གའི་ཆོས་འབྱུང་ལ་ཐིམ། དེ་ཟླ་བ་ལ་ཐིམ། དེ་སྔགས་ཕྲེང་ལ་ཐིམ། དེ་བྃ་ཡིག་ལ་ཐིམ། བྃ་ཡིག་གི་ཁོག་པ་མགོ་བོ་ལ་ཐིམ། མགོ་བོ་ཟླ་ཚེས་ལ་ཐིམ། ཟླ་ཚེས་ཐིག་ལེ་ལ་ཐིམ། ཐིག་ལེ་ནཱ་ད་ལ་ཐིམ། ནཱ་ད་ཡང་མི་དམིགས་པ་འོད་གསལ་སྟོང་པ་ཉིད་ཀྱི་ངང་དུ་གྱུར་པར་བསམ་ལ་མཉམ་པར་བཞག་པའམ། མན་ངག་ཐོབ་པ་ཡིན་ན་བསམ་མི་ཁྱབ་ཐུན་མོང་མ་ཡིན་པ་བསྒོམ་སྟེ། དེའི་ཚུལ་ནི་གཞན་དུ་ཤེས་པར་བྱའོ། །བཅུ་གཅིག་པ་སྤྱོད་ལམ་གྱི་རྣལ་འབྱོར་ལ་དངོས་དང་། ཡན་ལག་གཉིས་ལས་དང་པོ་ནི། རྟོག་པ་ནམ་འཕྲོ་བ་ན། སླར་ཡང་རང་སྐད་ཅིག་གིས་རྡོ་རྗེ་རྣལ་འབྱོར་མ་རྒྱན་དང་ཕྱག་མཚན་སྤངས་པའི་སྐུར་གྱུར་པའི་གནས་རྣམས་སུ་ཟླ་བའི་དཀྱིལ་འཁོར་རེ་རེའི་སྟེང་དུ་སོགས། གོ་ཆ་བཀོད་པས་བདག་དང་རྣལ་འབྱོར་སྲུང་། གནས་སྲུང་བའི་སླད། ལག་པ་གཡོན་པའི་སྡིགས་མཛུབ་ཀྱིས་སེ་གོལ་ཕྱོགས་གཡོན་སྐོར་དང་། མཚམས་གཡས་སྐོར་དུ་བརྡབ་ཅིང་སྔགས་བརྗོད་པ་ནི། ཨོཾ་སུམྦྷ་ནི་སོགས་བརྗོད་ཅིང་། ཤར་དང་སྟེང་དུ་ཁྭ་གདོང་མ་སྔོན་མོ། དེ་བཞིན་དུ། ཨོཾ་གྲྀཧྞཱ་སོགས་བརྗོད་ཅིང་། བྱང་དུ་འུག་གདོང་མ་ལྗང་གུ། ཨོཾ་གྲྀཧྞཱ་པ་ཡ་སོགས་བརྗོད་ཅིང་ནུབ་དང་འོག་ཏུ་ཁྱི་གདོང་མ་དམར་མོ། ཨོཾ་ཨཱ་ན་ཡ་སོགས་བརྗོད་ཅིང་། ལྷོར་ཕག་གདོང་མ་སེར་མོ་རྣམས་གྲུབ་པར་བསམ། ཡང་། ཨོཾ་སུམྦྷ་སོགས་ཚར་གཅིག་གིས། ཤར་ལྷོར་གཤིན་རྗེ་བརྟན་མ་གཡས་སྔོ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་གཡོན་ལྗང་བ། བྱང་ཤར་དུ་གཤིན་རྗེ་འཇོམས་པ་མ་གཡས་ལྗང་གཡོན་སྔོ་བ་རྣམས་གྲུབ་པར་བསམ། དེ་ཐམས་ཅད་ཀྱང་ཞལ་གཅིག་ཕྱག་བཞི་མ་དང་པོ་གཉིས་ཌཱ་མ་རུ་དང་ཁ་ཊྭཱྃ་ག་འོག་མ་གཉིས་གྲི་ཐོད་ཐོགས་པ། སྤྱན་གསུམ་མ། མི་མགོ་སྐམ་པོ་ལྔའི་དབུ་རྒྱན་དང་། ལྔ་བཅུའི་དོ་ཤལ་ཅན། རུས་པའི་རྒྱན་ལྔས་བརྒྱན་པ། ཞབས་གཡས་བརྐྱང་གི་སྟབས་ཀྱིས་བཞུགས་པར་གསལ་བཏབ། སླར་ཡང་ཐུན་མོང་དུ་ཨོཾ་སུམྦྷ་ནི། ཚར་གཅིག་བརྗོད་པས། དེ་རྣམས་ལ་དེ་འདྲ་བའི་སྐུ་གྲངས་མེད་པ་དང་། རྡོ་རྗེའི་གུར། མདའི་དྲྭ་བ། ཡེ་ཤེས་ཀྱི་མེ་དཔུང་གི་ཕྲེང་བ་དཔག་ཏུ་མེད་པ་སྤྲོས་ཏེ་བགེགས་ཐམས་ཅད་ཚར་བཅད། དཔག་ཚད་བརྒྱ་ཡི་ཚད་ཙམ་ཚུན་ཆད་དུ་སྲུང་བའི་གུར་ཁང་གསལ་ཞིང་བརྟན་པར་བསམ་ནས། དགེ་བ་འདི་ཡིས་སོགས་བསྔོ་སྨོན་བྱ། སྤྱོད་ལམ་ལ་འཇུག་པའི་ཚེ་སྣང་བ་ཐམས་ཅད་རྣལ་འབྱོར་མའི་སྐུ། སྒྲར་གྲགས་པ་ཐམས་ཅད་ཨོཾ་གསུམ་མའི་གདངས། ཡིད་ཀྱི་དྲན་རྟོག་གང་ཤར་ཐམས་ཅད་གསལ་སྟོང་འཛིན་མེད་དུ་འཇོག་པ་སྟེ་སྐུ་གསུང་ཐུགས་ཀྱི་དགའ་བ་གསུམ་དང་མ་བྲལ་བར་ལམ་དུ་ཁྱེར་ནས་ཐ་མལ་གྱི་སྣང་ཞེན་སྤང་། གཉིས་པ་ཡན་ལག་ལ། ཁ་ཟས། ཕྱི་རོལ་མཆོད་པ། སྦྱིན་སྲེག །ཚེས་བཅུའི་མཆོད་པ། གཏོར་མའི་རྣལ་འབྱོར་དང་ལྔ་ལས། དང་པོ་ནི། རྒྱས་པར་བྱེད་ན། བཟའ་བཏུང་རྣམས་མདུན་དུ་བདར་ལ། སུམྦྷས་བསངས། སྭཱ་བྷཱ་ཝས་སྦྱངས། སྟོང་པའི་ངང་ལས་རླུང་མེ་དང་། །ཐོད་པའི་སྒྱེད་པུ་གསུམ་གྱི་ཁར། །ཨ་ཡིག་ལས་བྱུང་ཀ་པཱ་ལར། །བཟའ་བཅའ་བཏུང་པའི་དངོས་པོ་ཀུན། །ཤ་ལྔ་བདུད་རྩི་རྣམ་པ་ལྔ། །བསྐོལ་ཞིང་འོད་དུ་ཞུ་བ་ལས། །དམ་ཚིག་ཡེ་ཤེས་དབྱེར་མེད་པའི། །བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱཿཧཱུྃ་ཧ་ཧོཿཧྲཱིཿ རང་ཉིད་རྡོ་རྗེ་རྣལ་འབྱོར་མའི། །སྙིང་གར་བླ་མ་ཡི་དམ་དང་། །ལྟེ་བར་ཆོས་སྲུང་ནོར་ལྷའི་ཚོགས། །གཏུམ་མོའི་མེ་ལྕེའི་ཀློང་ན་བཞུགས། །ལག་གཉིས་རྡོ་རྗེའི་དགང་བླུགས་ཀྱིས། །ཁ་ཟས་ཡེ་ཤེས་བདུད་རྩིའི་རྒྱུན། །ཕུལ་བས་ཟག་མེད་བདེ་བ་ཆེས། །དགྱེས་ཤིང་བྱིན་གྱིས་བརླབ་པར་གྱུར། །ཅེས་བརྗོད་ཅིང་བསམས་ལ། ཞེན་པ་མེད་པར་ལོངས་སྤྱད། དེ་ཙམ་མི་ནུས་ན། ཨོཾ་ཨཱཿཧཱུྃ་ཧ་ཧོཿཧྲཱིཿས་བྱིན་གྱིས་བརླབས་ལ་སྙིང་གའི་བྃ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་མོས་པའམ། བསྡུ་ན། ལྷ་ལ་ལྷ་ཐིམ་པའི་ཚུལ་གྱིས་རོལ། གཉིས་པ་ནི། ཚར་ཆེན་རིན་པོ་ཆེའི་སྒྲུབ་དཀྱིལ་དང་། གནས་གསར་རྗེས་ནག་འགྲོས་སུ་མཛད་པ་སོགས་ལས་རྟོགས་པར་བྱ། གསུམ་པ་ལ། སྦྱིན་སྲེག་དངོས་དང་། མར་མེའི་སྦྱིན་སྲེག་གཉིས་ལས། དང་པོ་ལའང་རྒྱས་པ་དང་། མདོར་བསྡུས་ཏེ་བྱ་བའི་ཚུལ་གཉིས་ཀྱི། དང་པོ་ནི། རྡོ་རྗེ་འཆང་དབང་ཕྱུག་རབ་བརྟན་གྱི་གསུང་གནས་གསར་རིན་པོ་ཆེའི་ནག་འགྲོས་སུ་མཛད་པ་དང་། པཎ་ཆེན་ནམ་མཁའ་དཔལ་བཟང་སོགས་ཀྱིས་མཛད་པའི་ཡིག་ཆ་ཁུངས་ཐུབ་ལས་ཤེས་པར་བྱ་ལ། གཉིས་པ་མདོར་བསྡུས་པ་ནི། སྔགས་ཀྱི་ནུས་པ་དབྱུང་བ་དང་སྡིག་སྒྲིབ་ཞི་བ་སོགས་ཀྱི་སླད་དུ། རྒྱུན་གྱི་དུས་སམ་ཇི་ལྟར་རིགས་པའི་དུས་སུ། རྗེ་ས་སྐྱ་པ་ཆེན་པོས། སྤྲོས་པ་ལ་མི་དགའ་ན། རྗེ་བཙུན་མ་ཉིད་མཆོད་པ་ནས་བཟུང་སྟེ་ལྷ་མཉེས་པ་ཉིད་ཀྱིས་ཆོ་ག་མ་ཚང་བ་མེད་པ་ཡིན་ནོ། །ཞེས་གསུངས་པའི་དོན་ཀུན་མཁྱེན་རིན་པོ་ཆེ་བསོད་ནམས་སེང་གེས་ཇི་ལྟར་བཀྲལ་བ་བཞིན་བརྗོད་ན། ཐབས་སྟེགས་ཀྱི་ངོས་རེ་ཁཱ་ཟླུམ་པོ་གཉིས་སྐོར་གྱི་ནང་དུ་ཆོས་འབྱུང་གྲུ་གསུམ་ཉིས་བརྩེགས་ཀྱི་ཐིག་གདབ། ཆོས་འབྱུང་གི་རི་མོ་རྡུལ་ཚོན་དཀར་པོས་བཅད། ནང་ཐམས་ཅད་རྡུལ་ཚོན་དམར་པོས་བཀང་། མདུན་རྒྱབ་སྤངས་པའི་གྲྭ་བཞིར་དགའ་འཁྱིལ་གཡོན་སྐོར་དང་། དབུས་སུ་ཉི་གདན་ལ་ཚོམ་བུ་དམར་པོ་བཀོད། རང་གི་གཡོན་ཐབ་ཀྱི་གཡས་སུ་མཆོད་པ་ལྔ་དང་གཏོར་མ། རང་གི་གཡས་ཐབ་ཀྱི་གཡོན་དུ་མར་ཁུ་དང་། བསྲེག་རྫས་ཏིལ་ནག་པོ་འབའ་ཞིག་བཤམས། བདག་བསྐྱེད་སྔོན་དུ་འགྲོ་བས། ཐབ་དང་ཡོ་བྱད་རྣམས། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཧཱུྃ་ལས་བྱུང་བའི་རིན་པོ་ཆེ་ལས་གྲུབ་པའི་ཐབ་ཁུང་ཡངས་ཤིང་རྒྱ་ཆེ་བའི་ནང་དུ་བུད་ཤིང་བརྩེགས་པ་དང་བཅས་པ་དངས་ཤིང་ཐོགས་པ་མེད་པར་གྱུར། ཧཱུྃ། ཞེས་ཡང་ཡང་བརྗོད། མཆོད་རྫས་དང་བསྲེགས་རྫས་རྣམས་ཀྱང་། ཨོཾ་ཨཱཿཧཱུྃ་ལས་བྱུང་བའི་མཆོད་རྫས་དང་བསྲེག་རྫས་རྣམས་དྭངས་ཤིང་ཐོགས་པ་མེད་པ་སོ་སོའི་ལས་སྒྲུབ་པའི་ནུས་པ་དང་ལྡན་པར་གྱུར། ཨོཾ་ཨཱཿཧཱུྃ་ཞེས་པས་བྱིན་གྱིས་བརླབ། དེ་ནས། ཨོཾ་གསུམ་མའི་རྗེས་སུ། ཨོཾ་བཛྲ་ཛྭ་ལ་རཾ། ཞེས་པས་མེ་སྦར། བསང་སྦྱང་། སྟོང་པའི་ངང་ལས་མེ་འབར་བའི་དབུས་སུ་ཆོས་འབྱུང་གི་ནང་དུ་པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་སྟེང་དུ་བྃ་ཡིག་དམར་པོའི་མཐར་གཡོན་སྐོར་གྱིས། ཨོཾ་ཨོཾ་ཨོཾ་ནས། སྭཱ་ཧཱ་ཞེས་པའི་སྔགས་ཕྲེང་ཁ་དོག་དམར་པོས་བསྐོར་བ་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡིག་འབྲུ་རྣམས་ལ་ཐིམ། དེ་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། སྣ་ཚོགས་པདྨ་དང་ཉི་མའི་གདན་ལ་ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པའི་སྟེང་འོག་ཕྱོགས་མཚམས་མཐའ་སྐོར་ཀུན་ཏུ་བླ་མ་ཡི་དམ་སངས་རྒྱས་བྱང་སེམས། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བསྐོར་བར་གསལ་བཏབ། ཡེ་ཤེས་པ་གཞུག །གོ་ཆ་བཀོད། དབང་བསྐུར། རྒྱས་གདབ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནཱི་ས་པ་རི་ཝཱ་ར་པུཥྤེ་ནས། ཤབྡའི་བར་གྱིས་ཕྱི་མཆོད། ཨོཾ་གསུམ་མའི་མཐར་ཨོཾ་ཨཱཿཧཱུྃ་བཏགས་པས་ནང་མཆོད་ཕུལ། དཔལ་ལྡན་རྡོ་རྗེ་མཁའ་འགྲོ་མ་སོགས་ཀྱིས་བསྟོད། རང་གཞན་གྱི་སྡིག་སྒྲིབ་ཐམས་ཅད་ཏིལ་ལ་བསྟིམ་ཞིང་དེ་ཉིད་ཡེ་ཤེས་ཀྱི་བདུད་རྩིར་བསྒྱུར་ཏེ། ཐོག་མར་ཨོཾ་གསུམ་མའི་རྗེས་སུ། ཨོཾ་སརྦ་པཱ་པཾ་ད་ཧ་ན་བཛྲ་ཡེ་བདག་གི་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་པ་དང་སྒྲིབ་པ་གསང་སྔགས་ཀྱི་ལྷག་ཆད་ལ་སོགས་པའི་ཉེས་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ། ལན་གསུམ་སོགས་ཀྱི་རྗེས། ཨོཾ་གསུམ་མ་འབའ་ཞིག་གིས་ཕུལ་ལ་གྲངས་བཟུང་། དེའི་ཚེ་ནམ་མཁའི་ཁམས་ཐམས་ཅད་ཁྱབ་པའི་སངས་རྒྱས་བྱང་སེམས་སྐུ་མདོག་དཀར་པོ་ཕྱག་ན་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་པ་རྣམས་ཀྱིས་བདག་ལ་དབང་བསྐུར་བས་སྡིག་སྒྲིབ་ཐམས་ཅད་དག །ལུས་ཡེ་ཤེས་ཀྱི་བདུད་རྩིས་ཁེངས་ཏེ་རྡོ་རྗེ་རྣལ་འབྱོར་མའི་གོ་འཕང་ཐོབ། མདུན་བསྐྱེད་ལས་ཀྱང་འོད་ཟེར་དཀར་པོ་འཕྲོས་པས་བདག་གཞན་ཐམས་ཅད་ཀྱི་སྡིག་སྒྲིབ་སྦྱངས་བར་བསམ། སྐབས་སྐབས་སུ་མར་གྱིས་མེ་གསོ། མཐར་གོང་བཞིན་མཆོད་ཅིང་བསྟོད་ལ་གསོལ་བ་གདབ། གཏོར་མ་དང་པོ་རྗེ་བཙུན་མ་དང་། གཉིས་པ་མཁའ་འགྲོ་སྤྱི་གཏོར་ལྟར་ཕུལ། རྗེ་བཙུན་མའི་ཞབས་དྲུང་ནས་བླངས་པར་མོས་པས་འདི་ཡེ་ཤེས་པ་གཤེགས་པའི་རྗེས་སུ་བྱས་ཀྱང་རུང་། ཐབས་ཀྱི་ཐལ་བ་ཅུང་ཟད་བླངས་ཏེ་གནས་གསུམ་དུ་བྱུགས། ཡི་གེ་བརྒྱ་བས་ལྷག་ཆད་ཁ་བསྐང་། མ་འབྱོར་པ་སོགས་ཀྱིས་ནོངས་པ་བཟོད་པར་གསོལ། ཨོཾ་ཁྱེད་ཀྱི་སོགས་ཀྱིས་མཐར། བཛྲ་མུཿས་ཐབ་ཀྱི་ཡེ་ཤེས་པ་གཤེགས། ཛཿཧཱུྃ་བྃ་ཧོཿས་དམ་ཚིག་པ་རང་ལ་ཐིམ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། བསྔོ་སྨོན་བཀྲ་ཤིས་བརྗོད། ལས་ཀྱི་རྗེས་མི་མངོན་པར་བྱའོ། །གཉིས་པ་མར་མེའི་སྦྱིན་སྲེག་ནི། རང་གི་མདུན་དུ་སྟེགས་ཀྱི་ཁར་མར་མེའི་ཀོང་བུ་ཡངས་པར། རས་དམར་གྱིས་དཀྲིས་པའི་སྡོང་བུ་སྦོམ་པོ་བཙུགས། མར་དཀར་གྱི་ཁུ་བས་བཀང་ལ་བཞག །མ་འབྱོར་ན་གཏོར་མ་དང་། མཆོད་པ་ལྔ་བཤམས། བསྲེག་རྫས་ཏིལ་ནག་པོ་དང་། གཞན་ཡང་རྡོར་དྲིལ་ནང་མཆོད་སོགས་འདུ་བྱས་ལ། བདག་བསྐྱེད་རྒྱས་པར་བྱ་བའམ། ཐུན་མཚམས་ཀྱི་རྗེ་བཙུན་མར་དྲན་པར་བྱས་ཏེ། མཆོད་རྫས་ནང་མཆོད་དང་། སུམྦྷས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་ཨ་ལས་ཐོད་པའི་སྣོད་དུ་འབྲུ་གསུམ་ཞུ་བ་ལས་བྱུང་བའི་མཆོད་རྫས་དངས་ཤིང་ཐོགས་པ་མེད་པ་ནམ་མཁའི་མཐའ་ཀླས་པར་བསམས་ལ། ཨོཾ་བཛྲ་པུཥྤེ་ནས། ཤབྡ་ཨཱཿཧཱུྃ་གི་བར་དང་། གྷཎྜེར་ཎི་ཏས་བརླབས། དེ་ནས་ཨོཾ་གསུམ་མའི་རྗེས་སུ། ཨོཾ་བཛྲ་ཛྭ་ལ་རྃ། ཞེས་པས་མར་མེ་སྦར། བསང་སྦྱང་། སྟོང་པའི་ངང་ལས་ཨེ་ཨེ་ལས་ཆོས་འབྱུང་གྲུ་གསུམ་ཉིས་བརྩེགས་ཀྱི་ནང་དུ། པྃ་ལས་པདྨ་དང་རྃ་ལས་ཉི་མའི་དཀྱིལ་འཁོར་གྱི་དབུས་སུ་བྃ་ཡིག་དམར་པོའི་མཐར། ཨོཾ་ཨོཾ་ཨོཾ་ནས། སྭཱ་ཧཱ། ཞེས་པའི་སྔགས་ཕྲེང་གཡོན་སྐོར་དུ་འཁོར་བ་ལས་འོད་ཟེར་འཕྲོས་འདུས་དོན་གཉིས་བྱས། དེ་ཡོངས་སུ་གྱུར་པ་ལས་རྣམ་སྣང་རིགས་བདག་དང་བཅས་པའི་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱངས་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཕཻཾ། ཐུགས་ཀའི་བྃ་ཡིག་ལས་འོད་ཟེར་འཕྲོས་པས་འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་བོ་མཁའ་འགྲོའི་ཚོགས་ཀྱིས་བསྐོར་བ་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ། ཨོཾ་ཡོ་ག་ཤུདྡྷཿསོགས། དེའི་གནས་རྣམས་སུ་སོགས། གོ་ཆ་བཀོད། ཕྱི་མཆོད། ནང་མཆོད། བསྟོད་པ་རྣམས་བྱ། དེ་ནས་མདུན་དུ་ཏིལ་བཞག་ལ། བདག་དང་སེམས་ཅན་ཐམས་ཅད་ཀྱི་ཚེ་ཐོག་མ་མེད་པ་ནས་བསགས་པའི་སྡིག་སྒྲིབ་ཉེས་ལྟུང་ཐམས་ཅད་སྙིང་ག་ནས་ཀྃ་ནག་པོའི་རྣམ་པས་འཐོན་སྣ་སྒོར་སྡིག་པ་རྭ་ཅན་གྱི་རྣམ་པར་གྱུར་པ་ཏིལ་ལ་ཐིམ་པ་དེ་ཉིད་རྗེ་བཙུན་མའི་ཞལ་དུ་ཕུལ་བས་ལྟེ་བའི་གཏུམ་མོའི་ཡེ་ཤེས་ཀྱི་མེས་བསྲེག་ཅིང་སྦྱངས་པར་བསམ་ལ། གཡོན་པའི་མཐེབ་སྲིན་གྱིས་ཏིལ་བླངས་ཏེ་འབུལ་ཞིང་། ཨོཾ་བཛྲ་ཌཱ་ཀི་ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ད་ཧ་ན་སྭཱ་ཧཱ། ཞེས་པའམ། ཨོཾ་གསུམ་མའི་རྗེས་སུ། ཁ་ཁ་ཁཱ་ཧི་ཁཱ་ཧི་སརྦ་པཱ་པཾ་ཤཱིནྟཾ་ཀུ་རུ་སྭཱ་ཧཱ། གང་རུང་གིས་འབུལ། རྫས་རྫོགས་པ་ན། མཆོད་བསྟོད་གོང་ལྟར་དང་། གཏོར་མ་ཡོད་ན་གཏོར་ཆོག་ལྟར་ཕུལ་བའི་རྗེས། བཅོམ་ལྡན་འདས་མས་བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་བྱང་ཞིང་དག་པ་དང་། མཆོག་དང་ཐུན་མོང་གི་དངོས་གྲུབ་མ་ལུས་པ་སྩལ་དུ་གསོལ། །ཅེས་གསོལ་བ་གདབ། ཡིག་བརྒྱའི་མཐར། མ་འབྱོར་པ་དང་། སོགས་ཀྱིས་ནོངས་པ་བཤགས། ཨོཾ་ཁྱེད་ཀྱི་སོགས་ཀྱི་མཐར། བཛྲ་མུཿས་ཡེ་ཤེས་པ་གཤེགས། ཛཿཧཱུྃ་བྃ་ཧོཿས་དམ་ཚིག་པ་རང་ལ་ཐིམ། བདག་བསྐྱེད་རྒྱས་པ་དང་འབྲེལ་ན། གོ་ཆ་བཀོད་ཅིང་བསྲུང་བ་བྱ། གང་ལྟར་ཡང་བསྔོ་སྨོན་ཤིས་བརྗོད་རྒྱས་པར་བྱའོ། །དེ་ལྟར་འབད་པས་སྡིག་པ་ཐམས་ཅད་བྱང་ཞིང་། རྗེ་བཙུན་མའི་བྱིན་རླབས་མྱུར་དུ་འཇུག་པར་འགྱུར་རོ། །བཞི་པ་ཚེས་བཅུའི་མཆོད་པ་ལའང་རྒྱས་བསྡུས་གཉིས་ལས། དང་པོ་ནི། སྐུ་གསུང་ཐུགས་ཀྱི་དཀྱིལ་འཁོར་གསུམ་བཤམས་ཤིང་སྒྲུབ་ཅིང་མཆོད་པ་དང་། དབང་བླང་བ་དང་། ཚོགས་ཀྱི་མཆོད་པ་སོགས་གནས་གསར་བའི་ཡིག་ཆ་ལྟར་རོ། །གཉིས་པ་ནི། རྗེ་ས་སྐྱ་པ་ཆེན་པོའི་ཚེས་བཅུའི་མཆོད་པའི་ཡི་གེ་ལས་ཇི་ལྟར་འབྱུང་བ་ཀུན་མཁྱེན་རིན་པོ་ཆེས་གསལ་བར་མཛད་པ་བཞིན་བརྗོད་ན་སྦྱོར་བ་དང་། དངོས་གཞི། རྗེས་གསུམ་ལས། དང་པོ་ནི། གནས་དབེན་ཞིང་ཡིད་དང་མཐུན་པར་ཚོགས་གསག་པར་འདོད་ན་ཡར་ངོ་དང་། སྒྲིབ་པ་དག་པར་འདོད་ན་མར་ངོའི་ཚེས་བཅུར། གནས་ཁང་ཕྱག་དར་བྱ་ཞིང་དྲི་བཟང་པོའི་ཆུས་ཆག་ཆག་གདབ། བྲིས་སྐུ་སོགས་རྟེན་ཇི་ལྟར་རིགས་པའི་མདུན། རས་དམར་པོས་བཀབ་པའི་སྟེགས་ཀྱི་ཁར་མཉྫིའི་སྟེང་དུ། མཎྜ་ལར་ཙནྡན་དམར་མོའི་ཆུས་སྲིན་ལག་གཡོན་པས་ཆོས་འབྱུང་གྲུ་གསུམ་གཡོན་སྐོར་དུ་བྲིས་པའི་ནང་ཐམས་ཅད་ཙནྡན་དམར་པོའི་ཆུས་བྱུགས། ཙནྡན་དམར་པོའི་ཆུ་མ་འབྱོར་ན་ཆང་བདུད་རྩིར་བྱིན་གྱིས་བརླབས་པས་དེ་ལྟར་བྱས་ལ། དབུས་སུ་མེ་ཏོག་གི་ཚོམ་བུ་གཅིག་བཀོད་ལ་བཞག །དེའི་གཡས་སུ། མེ་ཏོག་རྩ་བའི་ཡིག་རྙིང་སོགས་སུ་མཆོད་པ་ལྔ་ཁོ་ན་ལས་མ་བཤད་ཀྱང་། སྤྲོ་ན་ཆུ་གཉིས་སྔོན་འགྲོའི་ཉེར་སྤྱོད་ཀྱང་རུང་། བདུག་སྤོས། མར་མེ། གཡོན་དུ་དྲི་ཆབ། གཏོར་མ། ལྷ་བཤོས། མདུན་དུ་མ་ད་ནཱའི་ཕུད་དང་། བཱ་ལ་སོགས་ཚོགས་ཀྱི་ཡོ་བྱད། གཞན་ཡང་ནང་མཆོད། རྡོར་དྲིལ། ཌཱ་མ་རུ་སོགས་དགོས་པའི་ཡོ་བྱད་རྣམས་འདུ་བྱའོ། །གཉིས་པ་དངོས་གཞི་ལ། ཐོག་མར་བདག་བསྐྱེད་བརྒྱུད་འདེབས་དང་སྐྱབས་འགྲོ་ནས། ཐུན་མཚམས་ཀྱི་ལྷར་ལྡང་བའི་བར་བྱ། དེ་ནས་མདུན་བསྐྱེད་གསལ་གདབ་པ་ནི། ཚོམ་བུ་སུམྦྷས་བསང་། སྭཱ་བྷཱ་ཝས་སྦྱང་། སྟོང་པའི་ངང་ལས་མཎྜལ་གྱི་དབུས་སུ་ཆོས་འབྱུང་ལ་གནས་པའི་པྃ་ལས་པདྨ་དང་། རྃ་ལས་ཉི་མའི་དཀྱིལ་འཁོར་གྱི་སྟེང་དུ། རང་གི་ལྟེ་བའི་བྃ་ཡིག་ལས་བྃ་ཡིག་གཉིས་པ་ཞིག་མར་མེ་གཅིག་ལས་གཉིས་མཆེད་ཀྱི་ཚུལ་དུ་ཆད་དེ་ལས་འོད་ཟེར་འཕྲོས། འཕགས་པ་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས་རྗེ་བཙུན་རྡོ་རྗེ་རྣལ་འབྱོར་མའི་སྐུར་གྱུར་པ་ནི། ཞབས་གཡས་བརྐྱང་པས་སོགས་ནས། ཡེ་ཤེས་ཀྱི་མེ་འབར་བའི་དབུས་ན་བཞུགས་པ། ཞེས་པའི་བར་བདག་བསྐྱེད་བཞིན་བརྗོད། འབར་བའི་ཕྱག་རྒྱ་དང་། ཕཻཾ། རང་གི་ཐུགས་ཀའི་བྃ་ཡིག་ལས་འོད་ཟེར་འཕྲོས་པས། འོག་མིན་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་བྱང་སེམས་དཔའ་དཔའ་བོ་དང་རྣལ་འབྱོར་མའི་ཚོགས་བསམ་གྱིས་མི་ཁྱབ་པས་བསྐོར་བ་ཨོཾ་བཛྲ་ས་མཱ་ཛཿས་སྤྱན་དྲངས། ཛཿཧཱུྃ་བྃ་ཧོཿས་མདུན་བསྐྱེད་ལ་གཉིས་སུ་མེད་པར་ཐིམ་པར་བསམ། ཨོཾ་ཡོ་ག་ཤུདྡྷོཿ སོགས་ཀྱིས་བརྟན་པར་བྱ། དེའི་གནས་རྣམས་སུ་ནས། ཙཎྜི་ཀའི་ངོ་བོར་གྱུར། བར་གྱི་གོ་ཆ་བཀོད། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་དབང་གི་ལྷ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་ལྷ་ཚོགས་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། ཞེས་གསོལ་བ་བཏབ་པས། དབང་གི་ལྷ་རྣམས་ཀྱིས། ཨོཾ་སརྦ་ཏ་ཐཱ་ག་ཏ་ནས་ཤྲཱི་ཧཱུྃ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག །ཆུའི་ལྷག་མ་ཡར་ལུད་པ་ལས་རྣམ་པར་སྣང་མཛད་ཀྱིས་དབུར་བརྒྱན། སླར་ཡང་ཐུགས་ཀ་ནས་འོད་ཟེར་འཕྲོས་པས། རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན་ལ་བརྒྱུད་པའི་བླ་མ་དཔའ་བོ་དང་རྣལ་འབྱོར་མའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿས་ཚོགས་ཞིང་སྤྱན་དྲང་། ནང་མཆོད། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཡྃ་ལས་རླུང་། རྃ་ལས་མེ། ཀྃ་ལས་མི་མགོའི་སྒྱེད་པུ་གསུམ་གྱི་སྟེང་དུ། ཨ་ལས་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་དཔྲལ་བ་རང་ལ་བསྟན་པ། དེའི་ནང་དུ་གོ་ཀུ་ད་ཧ་ན་ལས་ཤ་ལྔ། བི་ར་ཤུ་མ་མུ་ལས་བདུད་རྩི་ལྔ་རྣམས་གསལ་བའི། འོག་གི་རླུང་གཡོས། མེ་སྦར། རྫས་ཐམས་ཅད་ཁོལ་བས་འོད་དུ་ཞུ་ནས་དམ་ཚིག་པ་དང་ཡེ་ཤེས་དབྱེར་མེད་པའི་བདུད་རྩིའི་རྒྱ་མཚོ་ཆེན་པོར་གྱུར་པར་བསམ་ལ། གཡོན་པའི་མཐེབ་སྲིན་སྦྱར་བས་ཆོས་འབྱུང་གཡོན་སྐོར་དུ་བྲིས་ཏེ། ཨོཾ་ཨཱཿཧཱུྃ་ཧོཿ ཞེས་བརྗོད་པས་བྱིན་གྱིས་བརླབས་པས་རྫས་ཐམས་ཅད་ལ་གཏོར་ཏེ། སུམྦྷས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། གཞན་ཡང་རོལ་མོ་ལ་སོགས་པ་མཆོད་རྫས་རྣམས་དངས་ཤིང་ཐོགས་པ་མེད་པར་གྱུར། ཨོཾ་བཛྲ་པུཥྤེ་ཨཱཿཧཱུྃ་ནས། ཤཔྡ་ཨཱཿཧཱུྃ་གི་བར་གྱིས་བརླབས་ལ། སོ་སོའི་ཕྱག་རྒྱ་དང་བཅས་ཏེ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནི་ས་པ་རི་ཝཱ་ར་པུཥྤེ་པྲ་ཏིཙྪ་སྭཱ་ཧཱ་ནས། ཤཔྡའི་བར་དང་། གྷཎྜེ་ར་ཎི་ཏས་རོལ་མོ་བྱ། ཨོཾ་གསུམ་མའི་རྗེས་སུ་འབྲུ་གསུམ་བཏགས་ལ་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། །མཁའ་འགྲོ་མ་ཡི་འཁོར་ལོས་སྒྱུར། །ཡེ་ཤེས་ལྔ་དང་སྐུ་གསུམ་བརྙེས། །འགྲོ་བ་སྐྱོབ་ལ་ཕྱག་འཚལ་ལོ། །ཇི་སྙེད་རྡོ་རྗེ་མཁའ་འགྲོ་མ། །ཀུན་ཏུ་རྟོག་པའི་འཆིང་གཅོད་ཅིང་། །འཇིག་རྟེན་བྱ་བར་རབ་འཇུག་མ། །དེ་སྙེད་རྣམས་ལ་ཕྱག་འཚལ་ལོ། །ཞེས་པས་བསྟོད། དེ་ནས་གཏོར་མ་ནང་མཆོད་ཆུ་ཆང་གིས་སྦྱངས་ལ། སུམྦྷས་བསང་། སྭཱ་བྷཱ་ཝས་སྦྱང་། ལག་པ་གཡས་གཡོན་གཉིས་ཀ་བསྟན་ལ། བྱ་ཁྱུང་གིས་ཕྱག་རྒྱ་བཅས། ཨོཾ་ཨཱཿཧཱུྃ་ཧ་ཧོཿཧྲཱིཿས་བརླབས། ཕཻཾ། རང་གི་སྙིང་ག་ནས་འོད་ཟེར་འཕྲོས་པས་རང་བཞིན་གྱི་གནས་ནས་རྗེ་བཙུན་རྡོ་རྗེ་རྣལ་འབྱོར་མ་ལ་སངས་རྒྱས་དང་བྱང་ཆུབ་སེམས་དཔའ་དཔའ་བོ་དང་རྣལ་འབྱོར་མ་ཆོས་སྐྱོང་དང་འཇིག་རྟེན་སྐྱོང་བའི་ཚོགས་ཀྱིས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿ པད་སྐོར་གྱི་རྗེས་རྡོ་རྗེ་ཐལ་མོ་ཁ་གྱེན་དུ་ཕྱེ་བའི་མཐར་སེ་གོལ་གཏོག་པ་དང་བཅས་ཏེ། ཨོཾ་གསུམ་མའི་རྗེས་སུ། ཨོཾ་ཨ་ཀཱ་རོ་སོགས་བཏགས་པ་ལན་ལྔའམ་བདུན་གྱིས་ཕུལ། ཨོཾ་བཛྲ་ཡོ་གི་ནཱི་ས་པ་རི་ཝཱ་ར་པུཥྤེ་ནས། ཤཔྡའི་བར་གྱིས་ཕྱི་མཆོད། ཨོཾ་བཛྲ་ཨཱ་རལླི་ཧོཿ ཨོཾ་ཨཱཿཧཱུྃ། རྗེ་བཙུན་རྡོ་རྗེ་རྣལ་འབྱོར་མའི་ཞལ་དུ་མཆོད་པ་དམ་པ་འབུལ་ལོ། །ཞེས་པས་ནང་མཆོད་འབུལ། དཔལ་ལྡན་རྡོ་རྗེ་མཁའ་འགྲོ་མ། སོགས་ཀྱིས་བསྟོད། འཆི་ཚེ་མགོན་དང་དཔའ་བོ་མ་ཚོགས་ཀྱིས། །མེ་ཏོག་གདུགས་དང་རྒྱལ་མཚན་ཐོགས་ནས་སུ། །རོལ་མོ་གླུ་དབྱངས་སིལ་སྙན་སོགས་མཆོད་ཅིང་། །མཁའ་ལ་སྤྱོད་པའི་གནས་སུ་ཁྲིད་པར་ཤོག །ཅེས་གསོལ་བ་གདབ། དེ་ནས་གཏོར་མ་གཞན་རྣམས་གུར་ཞལ་སོགས་ཆོས་སྲུང་རྣམས་དང་། དུར་ཁྲོད་བདག་པོ་ཡབ་ཡུམ་དང་། མཁའ་འགྲོ་སྤྱི་གཏོར་གྱི་བར་ཇི་ལྟར་རིགས་པས་བཏང་། དེ་ནས་མདུན་གྱི་ཚོགས་རྫས་རྣམས་ལ་ནང་མཆོད་འཐོར་ཞིང་བསང་སྦྱང་བྱིན་རླབས་བདུད་རྩི་ལྟར་བྱས་རྗེས། ཚོགས་ཕུད་སྣོད་གཅིག་ཏུ་བླུགས་པ་དང་། མ་དཱ་ན་སྣོད་གཅིག་ཏུ་བླུགས་པ་མཎྜལ་གྱི་མདུན་དུ་བཞག །གཏོར་མ་རྣམས་ལའང་ཕུལ། སླར་ཐམས་ཅད་ནང་མཆོད་ཆུ་ཆང་གིས་བྲན་ལ། ཐོག་མར། གང་གི་དྲིན་གྱིས་སོགས་ཀྱིས་བླ་མ་ལ་ཕྱག་བྱ་བ་སྔོན་དུ་འགྲོ་བས། དམན་པའི་ཡུལ་ལས་རབ་འདས་ཤིང་། །རྒྱལ་བ་ཀུན་གྱི་དམ་ཚིག་མཆོག །དངོས་གྲུབ་ཀུན་གྱི་གཞིར་གྱུར་པ། །བདུད་རྩི་མཆོག་གིས་མཆོད་པར་བགྱི། །སྒྲིབ་པའི་དྲི་མ་ཀུན་བསལ་ནས། །རྟོག་པ་ཀུན་ལས་རྣམ་གྲོལ་བ། །བླ་ན་མེད་པའི་བྱང་ཆུབ་སེམས། །བདེ་བ་ཆེན་པོས་མཉེས་གྱུར་ཅིག །ཅེས་པས་སྨན་ཕུད་འབུལ། དེ་ནས་ཚོགས་ཕུད་དང་པོ་ནི། ཞལ་ཟས་རོ་བརྒྱ་ལྡན་ཞིང་སོགས་ཀྱི་མཐར། ཨོཾ་གུ་རུ་བུདྡྷ་བོ་དྷི་ས་ཏྭཱ་ས་པཱ་རི་ཝཱ་ར་ཨོཾ་ཨ་ཀཱ་རོ་སོགས་ཀྱིས་བླ་མ་དང་དཀོན་མཆོག་ཡི་དམ་སྤྱི་ལ་ཕུལ། དེ་རྗེས། ཨོཾ་གསུམ་མའི་མཐར། ཨ་ཀཱ་རོ་བཏགས་པས་རྗེ་བཙུན་མ་ལ་འབུལ་ཞིང་། གཞན་ཡང་གུར་ཞལ་སོགས་ཀྱི་གཏོར་མ་ཡོད་ན་སོ་སོའི་གཏོར་སྔགས་ཀྱིས་རྒྱས་པར་འབུལ་བའམ། དེ་ཙམ་མ་ནུས་ན། ཨོཾ་ཤྲཱི་མ་ཧཱ་ཀཱ་ལ་མ་ཧཱ་ཀཱ་ལི་དེ་བཱི་ས་པ་རི་ཝཱ་ར་ཨི་དཾ་བ་ལིངྟ་ཁ་ཁ་ཁཱ་ཧི་ཁཱ་ཧི། ཞེས་དང་། ཨོཾ་ཤྲཱི་དྷརྨ་པཱ་ལ་ཙ་ཏུ་རྨུ་ཁ་ས་པ་རི་སོགས་དང་། ཨོཾ་གྷྲྀ་རཱ་ཛ་གྷྲྀ་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཤྲཱི་ཤྨ་ཤ་ནཱ་ཨདྷི་པ་ཏི་ས་པ་རི་ཝཱ་ར་སོགས་ཀྱིས་འབུལ་ཞིང་། མཐར་འཇིག་རྟེན་པ་ལ་མཁའ་འགྲོ་སྤྱི་གཏོར་གྱི་སྔགས་ཀྱིས་ཕུལ། ཐུན་མོང་དུ་ཕྱི་ནང་གི་མཆོད་པ་སྔར་བཞིན་མཆོད། རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་དཀྱིལ་འཁོར་གྱི་ལྷ་ཚོགས། དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པ་རྣམས་ཀྱི་ཞལ་དུ་མཆོད་པ་དམ་པ་འབུལ་ལོ། །སངས་རྒྱས་ཀྱི་བསྟན་པ་དར་ཞིང་འཇིག་རྟེན་དུ་དགེ་ལེགས་རྒྱ་ཆེན་པོ་འབྱུང་བ་དང་། བདག་ཅག་དཔོན་སློབ་འཁོར་དང་བཅས་པ་རྣམས་ཀྱི་ཆོས་སྒྲུབ་པའི་འགལ་རྐྱེན་བར་ཆད་ཐམས་ཅད་ཞི་ཞིང་མཐུན་རྐྱེན་ཐམས་ཅད་ཡིད་བཞིན་དུ་འགྲུབ་པར་མཛད་དུ་གསོལ། ཅེས་གསོལ་བ་གདབ། ཚོགས་ཀྱི་ཡོ་བྱད་ལ་གཙང་སྨེའི་རྣམ་རྟོག་སྤངས་ཏེ། སྙིང་གའི་བྃ་ཡིག་སངས་རྒྱས་ཐམས་ཅད་འདུས་པའི་ངོ་བོར་མཆོད་པར་བསམ་ལ། ཨ་ཧོ་མ་ཧཱ་སུ་ཁ་ཧོ། ཞེས་བརྗོད་ཅིང་ཚིམ་པར་རོལ། ལྷག་མ་བསྡུས་ཏེ་ཆང་གི་ཁ་ཕྲུ་འབར་བའི་ཕྱག་རྒྱའི་བར་ནས་འཐོར་ཞིང་། ཕཻཾ། ཨུཥྩི་ཊ་བ་ལིདྟ་བྷཀྵ་སཱི་སྭཱ་ཧཱ། འབྱུང་པོ་ལྷག་མ་ལ་དབང་བ་རྣམས་ལ་སྦྱིན་ནོ། །ངོམས་ཤིང་ཚིམ་པའི་སྐལ་བ་དང་ལྡན་པར་གྱུར་ཅིག་ཅེས་ཕྱི་རོལ་དུ་དོར། ཀོལླ་ཨི་རཊྛ་སོགས་རྡོ་རྗེའི་གླུ་དང་། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་བྱུང་བ། །ཧེ་རུ་ཀ་དཔལ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་ཕག་མོའི་པདྨར་རྡོ་རྗེས་རོལ་མཛད་པའི། །བདེན་པ་དེས་ཀྱང་བདེ་མཆོག་ལ་གནས་བཀྲ་ཤིས་ཤོག །སེམས་ཅན་ཐམས་ཅད་བདེ་གྱུར་ཅིག །སེམས་ཅན་ཐམས་ཅད་སྐྱོན་མེད་པར། །གང་གིས་ལམ་གྱིས་གྲོལ་འགྱུར་བ། །དེ་ཡིས་སངས་རྒྱས་མྱུར་ཐོབ་ཤོག །ཅེས་སོགས་བཀྲ་ཤིས་དང་སྨོན་ལམ་བྱའོ། །གསུམ་པ་རྗེས་ནི། མཆོད་པ་རྣམས་ཁ་གསོས་ཤིང་། བསང་སྦྱང་བྱིན་རླབས་བྱ། ཨོཾ་སརྦ་ཏ་ཐཱ་ག་ཏ་བཛྲ་ཡོ་གི་ནཱི་ས་པ་རི་ཝཱ་ར་པུཥྤེ་སོགས་ཀྱིས་ཕྱི་མཆོད་དང་། ཨོཾ་ཨཱཿཧཱུྃ་གིས་ནང་མཆོད་ཕུལ། དཔལ་ལྡན་རྡོ་རྗེ་སོགས་ཀྱིས་བསྟོད། རྗེ་བཙུན་རྡོ་རྗེ་རྣལ་འབྱོར་མས་བདག་དང་སེམས་ཅན་ཐམས་ཅད་དག་པ་མཁའ་སྤྱོད་ཀྱི་གནས་སུ་འཁྲིད་པར་མཛད་དུ་གསོལ། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་མ་ལུས་པ་སྩལ་དུ་གསོལ། །ཞེས་གསོལ་བ་གདབ། ཧེ་རུ་ཀའི་ཡིག་བརྒྱ་ལན་གསུམ་གྱིས་ལྷག་ཆད་ཁ་བསྐང་། མ་འབྱོར་པ་དང་སོགས་ཀྱིས་ནོངས་པར་གསོལ། རྟེན་ཡོད་ན། འདིར་ནི་གཟུགས་དང་སོགས་བརྟན་བཞུགས་དང་། མེད་ན། ཨོཾ་ཁྱེད་ཀྱི་སོགས་ཀྱིས། ཚོམ་བུའི་ཡེ་ཤེས་པ་དང་། གཏོར་མ གྲོན་གྱི་ཡེ་ཤེས་པ་རྣམས་གཤེགས། ཛཿཧཱུྃ་བྃ་ཧོཿས་དམ་ཚིག་པ་རྣམས་རང་ལ་གཉིས་སུ་མེད་པ་ཐིམ་པར་བསམ་ལ། རང་གི་གནས་རྣམས་སུ་སོགས་གོ་ཆ་བཀོད། བསྲུང་བ་བྱ། དགེ་བ་འདི་ཡིས་སོགས་བསྔོ་བ་དང་། མཁའ་སྤྱོད་ཞལ་བཟང་བལྟ་བའི་སྨོན་ལམ་གདབ། ཕུན་ཚོགས་དགེ་ལེགས་སོགས་ཀྱིས་ཤིས་པ་བརྗོད་ཅིང་མེ་ཏོག་གི་ཆར་སིལ་མ་དགྲམ། ལས་ཀྱི་རྗེས་མི་མངོན་པར་བྱའོ། །དེ་ལྟར་བཟླས་བསྒོམ་རྣམ་པ་གཉིས་དང་། ཚེས་བཅུའི་མཆོད་པ་མ་ཆགས་པར་ཉམས་སུ་བླངས་པ་ནི་ལས་དང་པོ་པས་མཁའ་སྤྱོད་སྒྲུབ་པའི་ལམ་གྱི་གཙོ་བོ་ཡིན་པས་ཤིན་ཏུ་གལ་ཆེའོ། །ལྔ་པ་གཏོར་མའི་རྣལ་འབྱོར་ནི། དཀུ་བག་སྟེ་ཤ་ཆང་གི་དམ་རྫས་ངེས་པར་ཚང་ཞིང་བསྒྲུབ་པའི་བདུད་རྩི་རིལ་བུ་དང་སྦྱར་བའི་གཏོར་མ་པདྨའི་སྙིང་པོ་ལྟར་ཟླུམ་པ། འཕྲལ་གཏོར་ལ་པད་འདབ་དང་། འཛིན་གཏོར་སོགས་ལ་མཐེབ་ཀྱུས་བསྐོར་བ་གཙང་སྦྲ་དང་ལྡན་པ་བཤམས། ཚེས་བཅུའི་མཆོད་པའི་སྐབས་སུ་བཤད་པ་ཇི་ལྟ་བ་བཞིན་ཕུལ་བ་ལས། མཆོད་པའི་སྐབས་སུ་ཆུ་གཉིས་སྔོན་འགྲོའི་ཉེར་སྤྱོད་ཀྱིས་མཆོད་པ་ཙམ་གྱི་ཁྱད་པར་རོ། །འདིས་ནི་བར་ཆད་ཐམས་ཅད་ཞི་བ་དང་བསམ་པའི་དོན་འགྲུབ་པ་སོགས་དགོས་པ་ཁྱད་པར་ཅན་མང་ངོ་། །དེ་ལྟར་དབང་པོ་རབ་རྣལ་འབྱོར་བཅུ་གཅིག་པོ་འདི་མ་ཆགས་པར་ཉམས་སུ་བླངས་ཞིང་། ཚེས་བཅུའི་མཆོད་པ་ལ་བརྩོན་པ་ཙམ་གྱིས་ཚེ་འདིར་ལུས་མ་སྤངས་པར་མཁའ་སྤྱོད་ཀྱི་དངོས་གྲུབ་ཐོབ་པར་འགྱུར་ལ། འདི་ཉིད་བསྐྱེད་རིམ་ཕག་མོ་མཁའ་སྤྱོད་ཅེས་གཙོ་བོར་གསུངས་པ་མ་གཏོགས། དོན་གྱིས་བསྐྱེད་རྫོགས་ཟུང་འཇུག་ཡིན་ཏེ་མངོན་རྟོགས་ཀྱི་དཀྱུས་གཅིག་ལ་དབང་བཞིའི་ལམ་མཐའ་དག་ཚང་བའི་ཕྱིར་རོ། །དབང་པོ་འབྲིང་གིས་གཞིའི་བསྙེན་པ་མཐར་ཕྱིན་པ་ན། ལངྐ་ལིའི་ཤིང་ལ་བརྟེན་ནས་སིནྡྷཱུ་རའི་བསྒྲུབ་པ་ཚུལ་བཞིན་དུ་བྱས་པས་རྡོ་རྗེ་རྣལ་འབྱོར་མ་མི་མོའི་རྣམ་པ་ཅན་གྱིས་རྗེས་སུ་བཟུང་ཞིང་མཁའ་སྤྱོད་ཀྱི་གྲོང་དུ་འཁྲིད་པ་སྟེ། དེའི་ཚུལ་ནི། དེང་དུས་ལག་ལེན་ལ་འདེབས་པ་ཉུང་བས་འདིར་མ་བྲིས་ལ། རྟོགས་པར་འདོད་ན་ཁྲིད་ཡིག་ཆེན་མོ་དང་། འཇམ་མགོན་ཀུན་དགའ་བསོད་ནམས་ཀྱི་ཡིག་ཆ་སོགས་ལས་ཤེས་པར་བྱའོ། །དབང་པོ་ཐ་མས་དེ་ལྟ་བུ་ལག་ཏུ་མ་བླངས་པའམ། བླངས་ཀྱང་མ་གྲུབ་ན་བཟླས་བསྒོམ་ལ་བརྩོན་པས། འཆི་ཁའམ་བར་དོར་བཟླས་བསྒོམ་བྱེད་པའི་སྣང་བ་ཤར་མ་ཐག་རྣལ་འབྱོར་མས་མདུན་བསུས་ཏེ་མཁའ་སྤྱོད་དུ་འཁྲིད་པར་ངེས་ནའང་། ཆེས་མྱུར་བར་བྱེད་པའི་ཐབས་ལམ་གྱི་ཆད་མཐུད་འཕོ་བའི་རྣལ་འབྱོར་ཉམས་སུ་བླང་བའི་ཚུལ་ལ། སྦྱང་བ་དང་། ལས་ལ་སྦྱོར་བའོ། །དང་པོ་ལའང་རྗེ་བཙུན་ཡབ་ཡུམ་ཞལ་སྦྱོར་དང་། ཡུམ་རྐྱང་གི་འཕོ་བ་གཉིས་ལས། འདིར་ཕྱི་མ་ཅུང་ཟད་བཤད་ན། གསལ་གདབ་པ་དང་སྦྱང་བ་དངོས་གཉིས་ལས། དང་པོ་ནི། བདག་བསྐྱེད་དང་འབྲེལ་ན་ཐུན་མཚམས་ཀྱི་ལྷར་གསལ་བཞིན་པའི་ངང་དང་། མ་འབྲེལ་ན་སྐྱབས་སེམས་སྔོན་དུ་འགྲོ་བས་རང་སྐད་ཅིག་གིས་རྣལ་འབྱོར་མར་གསལ་གདབ་གང་ལྟར་ཡང་། རང་རྡོ་རྗེ་རྣལ་འབྱོར་མར་གསལ་བའི་ལུས་ཀྱི་དབུས་དྲང་པོར་རྩ་དབུ་མ་ཕྱི་དཀར་ལ་ནང་དམར་བ། རྩ་བ་ཕྲ་བ་མདའ་སྨྱུག་ཙམ་ལ། རྩེ་མོ་སྦོམ་པ་སྦ་ལྕག་ཙམ་པ། ཡར་སྣ་སྤྱི་གཙུག་ཚངས་བུག་ཏུ་ཟུག་ཅིང་རྒྱ་མཐོང་ལྟར་ཁ་བྱེ་བ། མར་སྣ་ལྟེ་བར་ཟླ་གདན་ལ་ཟུག་པ། ཆོས་འབྱུང་དམར་པོ་གྲུ་གསུམ་པའི་ནང་དུ་ཟུག་པར་བསྒོམ་ཀྱང་རུང་། དེའི་སྟེང་དུ་རང་གི་རླུང་སེམས་དབྱེར་མེད་པའི་ངོ་བོ་བྃ་ཡིག་གམ། ཐིག་ལེ་དམར་པོ་ཆེ་ཆུང་རིལ་མ་ཙམ་པ་འཕུར་ལ་ཁད་པ་ཞིག་གསལ་གདབ། རང་གི་སྤྱི་བོར་སེང་ཁྲི་པད་ཟླ་འཇིགས་བྱེད་དུས་མཚན་གྱི་གདན་ལ་རྩ་བའི་བླ་མ་རྡོ་རྗེ་རྣལ་འབྱོར་མའི་རྣམ་པར་བཞུགས་པ་ལ། བརྒྱུད་པའི་བླ་མ་གནས་གསུམ་གྱི་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཀྱིས་བསྐོར་བ། དེ་དག་ཀྱང་འཇའ་གུར་གྱི་དབུས་ན་བཞུགས་ཤིང་། མེ་ཏོག་གི་ཆར་ཆེན་པོ་རྒྱུན་མི་ཆད་པར་འབེབས་པ། འཇའ་མདུང་ཚུགས་སུ་ཟུག་ཅིང་སྤོས་ཀྱི་དྲི་ཞིམ་པོ་འཐུལ་པ་སོགས་མཁའ་སྤྱོད་དངོས་དང་མཚུངས་པར་གྱུར། ཅེས་བརྗོད་ཅིང་བསམ། སླར་ཡང་རང་གི་ཐུགས་ཀ་ནས་འོད་ཟེར་འཕྲོས་པས་རྩ་བརྒྱུད་ཀྱི་བླ་མ་ཡི་དམ་སངས་རྒྱས་བྱང་སེམས་སོགས་སྐྱབས་ཡུལ་ཐམས་ཅད་ཨོཾ་བཛྲ་ས་མཱ་ཛཿ ཛཿཧཱུྃ་བྃ་ཧོཿ གཉིས་སུ་མེད་པར་ཐིམ་པས་སྐྱབས་གནས་ཐམས་ཅད་འདུས་པའི་ངོ་བོར་བསམ་མོ། །གཉིས་པ་སྦྱང་བ་དངོས་ནི། རང་གི་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་རྒྱུར་བྱས་པ་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པས་མཆོད་པར་མོས་ཏེ། ཨོཾ་གུ་རུ་བཛྲ་ཡོ་གི་ནཱི་ས་པ་རི་ཝཱ་ར་ཨརྒྷཾ་ནས། ཤབྡའི་བར་གྱིས་མཆོད། དཔལ་ལྡན་རྡོ་རྗེ་མཁའ་འགྲོ་སོགས་ཀྱིས་བསྟོད། སྤྲོ་ན་བརྒྱུད་པའི་གསོལ་འདེབས་དང་། གང་ལྟར་ཡང་། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་མཁའ་སྤྱོད་རྡོ་རྗེ་རྣལ་འབྱོར་མ་ལ་གསོལ་བ་འདེབས་སོ། །བདག་འཛིན་བློ་ཡིས་ཐོངས་པར་བྱིན་གྱིས་རློབས་ཤིག །དགོས་མེད་རྒྱུད་ལ་སྐྱེ་བར་བྱིན༴ ལམ་མཆོག་འཕོ་བ་འབྱོངས་པར༴ འཕྱུགས་མེད་མཁའ་སྤྱོད་འགྲུབ་པར༴ ཞེས་ཚར་གྲངས་ཅི་ནུས་བརྗོད་ཅིང་གསོལ་བ་ཕུར་ཚུགས་སུ་བཏབ་ལ། འོག་རླུང་དྲག་ཏུ་འཐེན་པ་དང་མཉམ་དུ་གཤང་སྒོའི་རླུང་གཡོས་ཟླ་དཀྱིལ་ལ་ཕོག །རང་སེམས་བྃ་ཡིག་གམ་ཐིག་ལེ་གསལ་བ་དེ་ཉིད་དབུ་མའི་ནང་ནས་སྐར་མདའ་འཕང་བ་ལྟར་སོང་། བླ་མ་རྗེ་བཙུན་མའི་གསང་བ་ནས་ཞུགས་ཏེ་ཐུགས་ཀའི་བྃ་ཡིག་ལ་སིབ་ཀྱིས་ཐིམ་པར་བསམ་ལ་སེམས་བཟུང་། ཡང་སྟེང་རླུང་རྡུབས་པས་བླ་མའི་ཐུགས་ཀ་ནས་བྱུང་སྟེ་སྔར་ལྟར་གདན་ལ་འཁོད་པར་བསམ་ལ་རླུང་བུམ་པ་ཅན་ཁ་སྦྱར་དུ་འཛིན། སླར་ཡང་མཆོད་བསྟོད་བྱ་བའམ། གསོལ་འདེབས་ཀྱི་མཐར་སྔར་བཞིན་དམིགས་པའི་རྟེན་གོམས་པ་ལ་བསླབས་པ་ནི་རླུང་གི་འཕོ་བ་དང་། སྐབས་སུ། ཨཱི་ཧི་ཀ྄ །ཞེས་བརྗོད་པས་ཐིག་ལེ་སྤར་བ་དང་། ཀ་ཧི། ཞེས་པས་འབེབས་པ་སྟེ་སྒྲས་འཕོ་བའང་ཉམས་སུ་བླངས། འདི་གཉིས་ཀྱི་སྔ་མ་འབྱོངས་དཀའ་ཡང་འབྱོངས་ཕྱིན་བརྟན་པ་ཡིན་ལ། ཕྱི་མ་འབྱོངས་སླ་ཡང་བརྟན་དཀའ་བ་ཡིན་ཞེས་གསུངས། དེ་ལྟར་དུས་རྒྱུན་དུ་ལན་བདུན་སོགས་དང་། འདི་ཁོ་ན་སྦྱང་བའི་ཚེ་ཞག་བདུན་སོགས་ཐུན་བཞིར་བཅད་ལ་འབད་རྩོལ་དྲག་པོས་རྟགས་མ་བྱུང་བར་ཉམས་སུ་བླང་བར་བྱ་ཞིང་། རྟགས་ནི་སྤྱི་བོ་ཟ་བ་དང་། སྐྲངས་པ་དང་། ཆུ་སེར་འཛག་པ་དང་། སྒྲུབ་ཁང་ལ་འཇའ་ཟུག་པ་སོགས་འབྱུང་ངོ་། །ཐུན་ལས་ལྡང་བ། རླུང་སེམས་མར་ཕབས་པའི་རྗེས། མཐའ་སྐོར་གྱི་སྐྱབས་ཡུལ་རྣམས་བླ་མ་རྡོ་རྗེ་རྣལ་འབྱོར་མར་ཐིམ། དེ་ཉིད་རང་གི་ཚངས་བུག་ནས་བརྒྱུད་སྙིང་གར་དབུ་མའི་ནང་དུ་ཞུགས། སྤྱི་གཙུག་སྣ་ཚོགས་རྡོ་རྗེ་སྲ་ཞིང་འཐས་པས་བཀག་པར་བསམ། རྟགས་བྱུང་བ་སོགས་ཀྱི་ཚེ་ཚེ་སྒྲུབ་བྱེད་པར་འདོད་ན། སྙིང་གའི་རྣལ་འབྱོར་མ་འཆི་མེད་ཚེའི་བདུད་རྩིའི་ཆུ་རྒྱུན་དུ་གྱུར་ནས་ལུས་ཀྱི་ནང་ཐམས་ཅད་གང་བས་འཆི་མེད་ཚེའི་དངོས་གྲུབ་ཐོབ། བ་སྤུའི་བུ་ག་ཚུན་ཆད་ཀྱང་བདུད་རྩིའི་ཟིལ་པ་ཕྲམ་མེར་ཡོད་པར་བསམ་ལ་རླུང་བུམ་ཅན་ཅི་ནུས་སུ་འཛིན། མཐར་བདག་བསྐྱེད་དང་འབྲེལ་ན་གོ་ཆ་བཀོད་པ་སོགས་དཀྱུས་ལྟར་དང་། མ་འབྲེལ་ན་བསྔོ་སྨོན་བཀྲ་ཤིས་སོགས་བྱའོ། །གཉིས་པ་ལས་ལ་སྦྱར་བ་ནི། ངེས་པའི་འཆི་ལྟས་བྱུང་ཞིང་དུས་ལ་བབས་པའི་ཚེ། སྔར་བཞིན་གསལ་གདབ། ཁྱད་པར་རང་གི་ལུས་ལོངས་སྤྱོད་དགྲ་གཉེན་བར་མའི་འགྲོ་བ་དང་བཅས་པ་བླ་མ་རྣལ་འབྱོར་མར་ཕུལ་ནས། ཆགས་སྡང་རྨོངས་གསུམ་གྱི་ཞེན་པ་བཙན་ཐབས་སུ་སྤངས། དམ་ཚིག་ཉམས་ཆགས་བཤགས་སྡོམ་གྱི་འདུན་པ་དྲག་པོ་བྱ། དམིགས་གནད་སྔར་བཞིན་ལ་རང་སེམས་བླ་མའི་ཐུགས་ཀར་ཐིམ། བླ་མ་རྗེ་བཙུན་མར་གསལ་བ་ཡང་མཁའ་སྤྱོད་དག་པའི་ཞིང་དུ་གཤེགས་པར་བསམ་ལ། དབྱིངས་སྟོང་ཉིད་དུ་རྗེན་ནེ། གདངས་གསལ་རིག་ཏུ་ལམ་མེ། དེ་གཉིས་དབྱེར་མེད་པ་བརྗོད་བྲལ་བློ་འདས་ཀྱི་ངང་དུ་མཉམ་པར་བཞག་པས། དེའི་ངང་དུ་དབུགས་ཆད་ན་འཕོ་བ་ཐེབས་པ་ཡིན་ནོ། །གལ་ཏེ་གཟའ་གདོང་ཐུག་ལྟ་བུ་རྐྱེན་གློ་བུར་བས་དམིགས་པའི་གསལ་འདེབས་རྒྱས་པ་ལང་མ་བྱུང་ན། རང་སེམས་དང་བླ་མའི་ཐུགས་དབྱེར་མེད་དུ་བསྲེས་པའི་ངང་ལ་མཉམ་པར་བཞག །དེ་ལྟར་དྲན་པས་མ་ཟིན་པའམ། འཕོ་བ་མ་འབྱོངས་ནས་བར་དོའི་སྣང་བ་ཤར་ན། དེ་སྦྱང་བའི་ཚུལ་ནི། ད་ལྟ་ནས་གང་ཤར་གྱི་སྣང་བ་སྤྱི་དང་། ཁྱད་པར་འཇིགས་སྐྲག་སོགས་གློ་བུར་དུ་འཆར་བའི་ཚེ་བར་དོའི་སྣང་བ་ཤེས་པར་བྱས་ལ། རང་གཞན་གྱི་སྣང་བ་ཐམས་ཅད་སྦྱང་བསྒྱུར་གྱིས་ལྷ་དང་གཞལ་ཡས་ཁང་དུ་བསྒྱུར། རིག་པ་བརྗོད་མེད་དུ་ཆམ་མེར་འཇོག་པ་ལ་བསླབ་པས་བར་དོར་ཡང་དྲན་པས་ཟིན་ནས་ལམ་གྱི་འཕྲོ་མཐུད་དེ་གྲོལ་བར་འགྱུར་རོ། །དབང་པོ་ཤིན་ཏུ་ཐ་མས་འདའ་ཀ་མའམ། བར་དོའི་གདམས་ངག་མ་ཐེབ་ན། སྐྱེ་བ་ཕྱི་མར་ལམ་གྱི་འཕྲོ་མཐུད་ནས་མཁའ་སྤྱོད་ཀྱི་གོ་འཕང་དོན་དུ་གཉེར་བ་སྟེ། དེ་ཉིད་འགྲུབ་པའི་སླད་དུ་མཁའ་སྤྱོད་ཞལ་བཟང་བལྟ་བའི་སྨོན་ལམ་སོགས་གདབ་ཅིང་། བླ་མ་ལ་མོས་གུས་དང་མ་བྲལ་ན་ངེས་པར་འགྲུབ་པ་ཡིན་ནོ། །དེ་རྣམས་ཀྱིས་གཙོ་བོར་བསྐྱེད་རིམ་གྱི་རྣལ་འབྱོར་ཡན་ལག་དང་བཅས་པ་བསྟན་ནས། །གཉིས་པ་རྫོགས་པའི་རིམ་པ་ལ། སྤྱིར་ཆོས་ཉིད་དངོས་སུ་སྟོན་པ་དང་། བརྒྱུད་ནས་སྟོན་པ་གཉིས་ལས། འདིར་ཕྱི་མ་དཔེ་གསུམ་གྱིས་དོན་གཅིག་གཏན་ལ་འབེབས་པར་བྱེད་པ་ལ། གཞི་ཆོས་ཅན་འཁོར་བའི་དུས་སུ་འཁྲུལ་སྣང་གི་གཙོ་བོ་རྩ་རླུང་ཐིག་ལེ་ཐམས་ཅད་ཀྱི་ཁྱབ་བྱེད་ནང་གི་ཕོ་ཉ་མཆོག་རྩ་དབུ་མ་ཁོ་ན་ལ་གནད་དུ་བསྣུན་པས། གཉིས་མེད་ཀྱི་ཡེ་ཤེས་མྱུར་དུ་འཆར་བའི་གནད་ཤེས་པར་བྱས་ནས། དེ་ལ་གནད་དུ་བསྣུན་པའི་ལམ་ཇི་ལྟར་བསྒོམས་པའི་གནད་རྗེ་བཙུན་ཡབ་དང་ཐུན་མོང་དང་། ཡུམ་རྐྱང་ཐུན་མོང་མ་ཡིན་པའི་རྩ་དབུ་མའི་རྣལ་འབྱོར་གཉིས་ལས། ཕྱི་མ་ལའང་ཆགས་ཅན་ཕོ་ཉའི་ལམ་ལ་དགའ་བ་དང་། ཆགས་བྲལ་རྣལ་འབྱོར་གྱི་ལམ་ལ་དགའ་བ་གཉིས་ཀྱི་ཕྱི་མ་ལྟར་བསྒོམ་པའི་ཚུལ་ལ། ཐོག་མ་སྦྱང་བའི་ཚུལ་སོགས་རྒྱས་པར་འཁྲིད་ཡིག་ཆེན་མོ་ལས་ཤེས་པར་བྱས་ནས། འདིར་རྒྱུན་དུ་ཉམས་སུ་བླངས་པའི་ཚུལ་ཅུང་ཟད་ཙམ་བཤད་ན། རྩ་དབུ་མ་ཁ་དབྱེ་བའི་རྣལ་འབྱོར་དང་། དབྱེ་ནས་བསྒོམ་པའི་མན་ངག་གཉིས་ལས། དང་པོ་ནི། རྒྱན་གྱི་ཉམས་ལེན་ལ་ཞར་བྱུང་གི་རྫོགས་རིམ་གྱི་མཇུག་ཏུ་ལུས་གནད་རྣམ་སྣང་ཆོས་བདུན་དང་ལྡན་པས། རང་རྣལ་འབྱོར་མའི་ལུས་དབུས་དྲང་པོར་རྩ་དབུ་མ་མར་སྣེ་ལྟེ་འོག་སོར་བཞིར་སླེབས་པ། ཡར་སྣེ་སྤྱི་བོར་ཟུག་པའི་ནང་དུ་བྱང་སེམས་ཧཾ་ཡིག་དཀར་པོ་མགོ་ཐུར་བསྟན་གྱིས་མཚན་པ། གཡས་སུ་རོ་མ་དམར་མོ། གཡོན་དུ་རྐྱང་མ་དཀར་མོ། གཉིས་ཀའང་གྲོ་སོག་འབྲིང་པོ་ཙམ་ཡར་སྣེ་སྤྱི་གཙུག་ནས་གུག་སྟེ་སྣ་བུག་གཉིས་སུ་ཧ་རེ་ཟུག་པ། མར་སྣེ་ལྟེ་བའི་ཐད་དུ་དབུ་མ་དང་སྦུབས་གཅིག་ཏུ་གྱུར་པའི་ནང་དུ། ཙཎྜ་ལཱི་རྃ་དམར་པོ་མེའི་རང་བཞིན་ཅན་རིལ་མ་ཙམ་གྱིས་མཚན་པ། མེ་འབར་ལ་ཁད་པ་དེའི་འོག་ཏུ་རླུང་དཀྱིལ་ལྗང་ནག་སྲན་མ་བཀས་པ་ཙམ་གསལ་བཏབ། རླུང་རོ་དགུ་ཕྲུགས་སུ་ཕྱག་ལེན་ལྟར་བུས་ལ། འོག་རླུང་ཕྱེད་འཐེན་ཙམ་དང་། སྟེང་རླུང་རྫོགས་པར་རྔུབས། སླར་འོག་སྒོ་འབྱེད་འཛུམ་གསུམ་ཙམ་གྱིས་འོག་རླུང་རྫོགས་པར་དྲངས་པས་རླུང་དཀྱིལ་ལ་ཕོག །རླུང་གཡོས་རྃ་ཡིག་ལས་མེ་ལྕེ་དམར་ཉུག་ཉུག་འབར་བར་བསམ་ལ་བུམ་ཅན་འཛིན། མཐར་འཛིན་མེད་པའི་ལྟ་བས་རྒྱས་འདེབས། དེ་ནས་ལུས་ཁོལ་བུར་དྲོད་སྐྱེ་བ་སོགས་ཅུང་ཟད་གོམས་པ་ན། རིམ་གྱིས་རྩ་གསུམ་གྱི་ནང་ཐམས་ཅད་མེས་གང་། དེ་ནས་རྩ་ཕྲན་ཐམས་ཅད་ཀྱང་མེས་ཁེངས་ཏེ་སྡིག་སྒྲིབ་བག་ཆགས་དང་བཅས་པའི་ངོ་བོ་ཁམས་སྙིགས་མ་ཐམས་ཅད་ཆམ་ཆམ་བསྲེགས། དྭངས་མ་བདུད་རྩིར་ཞུ་བ་དང་། སྤྱི་བོའི་ཧཾ་ལ་རེག་པས་བདུད་རྩིའི་རྒྱུན་དངུལ་ཆུ་ལྟ་བུའི་དྭངས་མས་རྩ་ཐམས་ཅད་ཁེངས་ཏེ་བདེ་དྲོད་བསམ་གྱིས་མི་ཁྱབ་པ་སྐྱེས་པར་བསམ་ལ་རླུང་བུམ་ཅན་འཛིན། གཉིས་པ་བསྒོམ་པའི་མན་ངག་ལ། རླུང་ལུས་ལ་གནས་པས་བདེ་བ་དང་། སེམས་ལ་ཞུགས་པས་སྟོང་པར་བསྒྲུབ་པའི་རྣལ་འབྱོར་གཉིས་ལས། དང་པོ་ནི། རོ་རྐྱང་གཉིས་མི་དམིགས་པར་བཞག །དབུ་མ་སྦ་ལྕག་འབྲིང་པོ་ཙམ་ཡར་སྣ་སྤྱི་གཙུག་ནས་སྨིན་མཚམས་སུ་གུག་པའི་ནང་དུ། ཆོས་འབྱུང་དམར་སེར་འོད་ཀྱི་རང་བཞིན་ཅན་གྱི་རྩ་བ་ཕྲ་བ་དབུ་མའི་ནང་དུ་ཟུག་པ་ལ་བུག་པ་ཐལ་ལེ་ཡོད་པ། མར་སྣེ་གསང་གནས་ཀྱི་པདྨའི་ནང་དུ་ཧ་རེ་ཡོད་པའི་ནང་ཆོས་འབྱུང་སྔ་མ་ལྟ་བུ་ཞིག་གསལ་གདབ། སྨིན་མཚམས་ཀྱི་ཆོས་འབྱུང་ནང་ཐིག་ལེ་དཀར་ལ་སྔོ་མདངས་ཆགས་པ། འོད་ཁ་དོག་ལྔ་འཕྲོ་བ་སྲན་མ་ཙམ་ཞིག་གསལ་ལ། འོག་རླུང་ཅུང་ཟད་འཐེན། སྟེང་རླུང་ཅུང་ཞིག་རྔུབས་པའི་རྐྱེན་གྱིས་དེ་ལས་འོད་ཁ་དོག་ལྔ་ལྡན་འཕྲོ་བར་བསམ་ལ་སེམས་བཟུང་བས་སྨིན་མཚམས་སུ་ན་ལྷང་ལྷང་བའམ་བདེ་བ་སྐྱེ་བ་སོགས་ཀྱི་རྟགས་བྱུང་ན། ཐིག་ལེ་དེ་བུག་པ་ནས་ཡར་སོང་། སྤྱི་གཙུག་གི་དབུ་མའི་ནང་དུ་རི་རྩེར་སྐར་མ་ཤར་བ་བཞིན་འོད་ཕྲམ་ཕྲམ་དུ་གནས་པར་བསམ་ལ་སེམས་བཟུང་། མཐར་དེ་ལས་བདེ་ཆེན་གྱི་ཐིག་ལེ་ཤེལ་དཀར་བཞུ་བ་ལྟ་བུ་པདྨའི་སྣལ་མ་ཙམ་པ་ཞིག་ནར་གྱིས་བབས། སྤྱི་བོ། མགྲིན་པ། སྙིང་ག །ལྟེ་བ། གསང་གནས་རྣམས་ཀྱི་དབུ་མའི་ནང་དུ་བབས་པ་ལ་སེམས་བཟུང་བས་ཡས་བབས་ཀྱི་དགའ་བཞིའི་ཡེ་ཤེས་སྐྱེས་པར་བསམ། དེ་ནས་གསང་གནས་ཀྱི་ཆོས་འབྱུང་གི་ནང་ནས་ཀྱང་ཕྱིར་སོར་ཕྱེད་དང་གསུམ་ཉུག་གེ་ཡོད་པ་ལ་སེམས་གཏད། སླར་ཆོས་འབྱུང་གི་བུག་པ་ནས་གྱེན་དུ་བྱུང་སྟེ། ལྟེ་བ་ནས་སྤྱི་བོའི་གཞིར་གནས་ཀྱི་ཐིག་ལེ་ལ་ཐིམ་པའི་བར་གནས་སོ་སོར་སེམས་བཟུང་བས། མས་བརྟན་གྱི་དགའ་བཞི་སྐྱེས་པར་བསམ་ལ་རིག་པ་འཛིན་མེད་དུ་བཞག །གཉིས་པ་ནི། དབུ་མ་ཆོས་འབྱུང་བཅས་སྔར་བཞིན་གསལ་བའམ། ཡང་ན་ཆོས་འབྱུང་མི་དམིགས་པར་བཞག །དབུ་མའི་ཡར་སྣ་སྨིན་མཚམས་དང་། མར་སྣ་གསང་གནས་ཀྱི་མཚམས་སུ་ཐད་བཅད་དུ་ཡོད་པར་བསམ། དེ་ནས་སྨིན་མཚམས་ཀྱི་ཆོས་འབྱུང་གི་ནང་ངམ་དབུ་མའི་ཡར་སྣེར་ཐིག་ལེ་བསྒོམ་པ་དེ་ལ་སེམས་བཟུང་སྟེ་སྤྱི་གཙུག་ཏུ་སྤོ་པའི་བར་སྔར་བཞིན་ལ། སྤྲོ་ན་བདེ་ཆེན་གྱི་ཐིག་ལེ་འབེབས་བཟློག་གི་དམིགས་པ་ཡང་བྱ། གང་ལྟར་ཡང་སྤྱི་བོའི་ཐིག་ལེ་ལ་སེམས་ཞུགས་པ་བཞིན་ཆེར་གྱིས་གཏད་པས། དེ་ལས་འོད་ཟེར་ཁ་དོག་ལྔ་ལྡན་འཇའ་ཚོན་ལྟ་བུ་བུན་གྱིས་འཕྲོས། དབུ་མའི་ནང་བརྒྱུད་རྩ་ཁམས་གང་ལ་རེག་པ་ཐམས་ཅད་འཇའ་ཚོན་དུ་སོང་། དེ་ནས་ཆེར་འཕྲོས་པས་ལུས་རིལ་པོ། གནས་ཁང་། ལུང་པ། ཡུལ་ཕྱོགས། མཐར་ཁམས་གསུམ་ཐམས་ཅད་འོད་ཁ་དོག་ལྔ་འཇའ་ཚོན་ལྟ་བུ་ཁྲ་ཤིག་ཤིག ན་བུན་ལོང་ལོང་དུ་གྱུར་པར་བསམ་ལ་སེམས་བཟུང་། མཐར་དེ་ཐམས་ཅད་ནམ་མཁའ་ལ་དུ་བ་ཡལ་བ་བཞིན་བདེ་སྟོང་གི་ངང་དུ་མི་དམིགས་པར་བསམ་པའམ། ཡང་ན་དེ་ཐམས་ཅད་རང་གི་ལུས་ལ་ཐིམ། ལུས་སྤྱི་བོའི་ཐིག་ལེ་ལ་ཐིམ། དེ་ནམ་མཁའ་ལ་འཇའ་ཡལ་བ་ལྟར་ཆོས་ཉིད་ཀྱི་ངང་དུ་ཐིམ་པར་བསམ། སྡུད་རིམ་སྔ་མ་ལྟར་ན། རང་ལུས་ལྷ་སྐུ་རྩ་ཐིག་དང་བཅས་སྐད་ཅིག་གིས་ལམ་གྱིས་གསལ་འདེབས། ཕྱི་མ་ལྟར་ན། ཐོག་མར་རང་གི་སྨིན་མཚམས་ཀྱི་ཐིག་ལེ་དེ་ཁྲ་ཆེམ་གྱིས་གྲུབ། དེ་ནས་རིམ་བཞིན་དུ་ལུས་རྩ་དང་བཅས་པ་གྲུབ་པར་བསམ་ལ་དམིགས་པ་བསྐྱར། དེ་ལྟར་ན་རླུང་ལུས་ལ་གནས་པས་ཁམས་སྙིགས་མ་དངས་མ་དང་། སེམས་ལ་ཞུགས་པས་དངས་མ་འཇའ་ལུས་སུ་བསྒྱུར་པར་བྱེད་པའི་ཐབས་དམ་པ་སྟེ། ཚུལ་འདི་ལ་གོམས་པས་ཅིར་སྣང་བདེ་ཆེན་ཡེ་ཤེས་སུ་འཆར་བ་ན། གསང་བའི་སྤྱོད་པས་བོགས་དབྱུང་ཞིང་། ཕྱོགས་ལས་རྣམ་རྒྱལ་གྱི་སྤྱོད་པ་དང་། ཕྱག་རྒྱའི་ཉེ་རྒྱུས་མཚམས་སྦྱར་ཏེ་ཚེ་གཅིག་གིས་མཆོག་གི་དངོས་གྲུབ་མངོན་དུ་བྱེད་པར་འགྱུར་རོ། །གསུམ་པ་ལམ་གྱི་ཡན་ལག་པྲ་སེ་ན་དབབས་པ་སོགས་ནི། དེང་སང་ལག་ལེན་འདེབས་པ་ཉུང་བས་འདིར་མ་བྲིས་ཏེ། རྗེ་བཙུན་ས་སྐྱ་པའི་གསུང་རབ་རྣམས་ལས་ཤེས་པར་བྱ་ཞིང་། འདིར་འཕྲོས་དོན་དུ་བསྙེན་པ་བྱེད་ཚུལ་གྱི་ལག་ལེན་ཅུང་ཟད་བཤད་ན། སྦྱོར་བ། དངོས་གཞི། རྗེས་སོ། །དང་པོ་ནི། རྟེན་གྱི་གང་ཟག་ངེས་འབྱུང་དང་སྙིང་རྗེ་ཆེན་པོས་རྒྱུད་སྦྱངས་ཏེ་དབང་ཐོབ་ཅིང་དམ་ཚིག་ལ་གནས་པ། བྱིན་རླབས་ཀྱིས་སྨིན་ཞིང་ཉམས་ཁྲིད་ཟབ་མོ་ཐོབ་པ་ཆགས་མེད་ཀྱི་རྒྱུན་དང་ལྡན་ཞིང་བརྩོན་འགྲུས་ཡལ་བར་མི་འདོར་བས། གནས་དབེན་ཞིང་ཡིད་དང་མཐུན་ལ་རང་དབང་འདུས་པའི་གནས་སུ། མར་ངོའི་ཚེས་བཅུ་ལྟ་བུ་དུས་ཁྱད་པར་ཅན་གྱི་སྔ་དྲོ་གནས་ཁང་ཕྱག་དར་བྱ། རང་ཉིད་ཁ་ནུབ་ཏུ་ཕྱོགས་པའི་མདུན་རྣལ་འབྱོར་མའི་སྐུ་བྲིས་འབུར་གང་རིགས་ཀྱི་མདུན་དུ། གཏོར་མ་ལྔ་ཚར་སོགས་ཇི་ལྟར་རིགས་པ་མཆོད་པ་དང་བཅས་པ་བཤམས། བསྒུལ་བསྐྱོད་མི་དགོས་པའི་མལ་འོག་ཏུ་སྣ་ཚོགས་རྡོ་རྗེ་བྲིས་པའི་སྟེང་འབྲུ་དཀར་དང་ཀུ་ཤའི་ཆུན་པོ་དགྲམ། མདུན་དུ་ནང་མཆོད་རྡོར་དྲིལ། ཌཱ་མ་རུ་སོགས་ཉེར་མཁོའི་ཡོ་བྱད་དང་། མལ་ས་དེ་མིན་པ་ཞིག་ཏུ་རང་འཁོད་པའི་མདུན་གཏོར་མ་ཆ་གསུམ་སོགས་འོག་ཏུ་དགོས་པའི་ཡོ་བྱད་རྣམས་སྟ་གོན་བྱ། གཉིས་པ་ནི། ཕྱི་དྲོའི་ཆ་ལ་བབས་པ་ནས། གྲོགས་དམ་ཚིག་པ་དང་བཅས་ཏེ་ཆ་གསུམ་ཡིད་ཆེས་པ་བཏང་པའམ། སྔོན་འགྲོ་གཏོར་མ་དཀྱིལ་ཆོག་ནས་འབྱུང་བ་བཞིན་ལ། མི་འདྲ་བའི་ཁྱད་པར། རྗེ་བཙུན་རྡོ་རྗེ་རྣལ་འབྱོར་མའི་བསྙེན་སྒྲུབ་ཟབ་མོ་བགྱིད་པར་འཚལ་ན། ཞེས་དང་། བསྙེན་སྒྲུབ་ཀྱི་བྱ་བ་མཐར་མ་ཕྱིན་པར་ཞེས་བསྒྱུར། གཏོར་མ་ཕྱིར་དོར་བའི་ཚེ། མདུན་མཁར་བླ་མ་ཡི་དམ་འཁའ་འགྲོ་ཆོས་སྐྱོང་ཐམས་ཅད་མངོན་སུམ་བཞིན་དུ་བཞུགས་པར་མོས་ཏེ། བདེན་སྟོབས་བརྗོད་པས་དེ་རྣམས་ཀྱི་སྐུ་ལས་རྡོ་རྗེ་ཁྲོ་བོ་དང་མེ་དཔུང་མཚོན་ཆའི་ཚོགས་དཔག་ཏུ་མེད་པ་སྤྲོས། ཡུངས་ཀར་ཀྱང་འབྲུ་རེ་རེ་ནས་སྤྲུལ་པའི་ཕོ་ཉ་སྲིན་པོ་ཁྲོས་པ་ལྟ་བུ་བསམ་གྱིས་མི་ཁྱབ་པར་གྱུར་ཏེ་བགེགས་ཐམས་ཅད་རྒྱང་རིང་དུ་བསྐྲད། བསད་བཅད་བཏུབ་ཅིང་ཆོས་དབྱིངས་སུ་ཐིམ། སྤྲུལ་པའི་ཁྲོ་བོའི་ཚོགས་རྣམས་ཚུར་འདུས་ཏེ་སྲུང་བའི་གུར་དུ་གྱུར་པར་བསམ་ལ། གུ་གུལ་གྱིས་བདུག །ཡུངས་ཀར་གྱིས་བྲབ། མཚམས་གཡོག་དང་སྨན་པ་སོགས་དམིགས་ཁོང་དུ་བཅུག་དགོས་པ་རྣམས་ཀྱང་འཇུག །སྤྲོ་ན་ཤེར་སྙིང་བདུད་བཟློག་དང་བཅས་པའང་བྱ། དེ་ནས་སྒོ་ཡི་ཕྱི་རོལ་དུ་ཐོ་དཀར་པོ་བཙུགས་ལ། རང་ཉིད་གྲོགས་དང་བཅས་རྡོར་དྲིལ་ཡུངས་ཀར་སྤོས་སོགས་ཐོགས་ལ། རྒྱས་པར་རྨོར་ཆེན་གྱིས་མཛད་པའི་ཐོ་འཛུགས་ལྟར་བྱ། ངོར་ལུགས་ལ་ཆ་གསུམ་ཙམ་ལས་གཞན་མི་མཛད། མཆན། དེ་ཙམ་མི་ནུས་ཀྱང་། ཐོ་འཇམ་མགོན་ཀུན་བློའི་གསུངས། མཆན། སུམྦྷ་ནི་སོགས་བརྗོད་ཅིང་ཡུངས་ཀར་གྱིས་བྲབས། གུ་གུལ་བདུག །མེ་ཏོག་དང་བཅས་ཐལ་མོ་སྦྱར་ཏེ། ཡེདྷརྨཱ་ཚར་གསུམ། ཕྱོགས་བཅུ་ན་བཞུགས་པའི་སོགས་བརྟན་བཞུགས་སྤྱི་ལྟར་ལ། བྱེ་བྲག་ཏུ་ཐོ་འདི་ལ་རྒྱལ་ཆེན་བཞི་འཁོར་དང་བཅས་པ་བརྟན་པར་བཞུགས་ནས་བདག་གི་བསྙེན་སྒྲུབ་མཐར་མ་ཕྱིན་གྱི་བར་དུ། ཕྱིའི་བར་ཆད་ནང་དུ་མི་གཏོང་ཞིང་། ནང་གི་དངོས་གྲུབ་ཕྱིར་མི་ཡལ་བར་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པའི་སྟོང་གྲོགས་ཕྲིན་ལས་རྒྱ་ཆེན་པོ་མཛད་དུ་གསོལ། སུ་པྲ་ཏིཥྛ་དང་། ཡེ་དྷརྨཱ་བརྗོད་ཅིང་མེ་ཏོག་འཐོར། བཀྲ་ཤིས་བརྗོད། ནང་དུ་ལོག་ལ་རང་ཉིད་མལ་དུ་འཁོད། ངེས་འབྱུང་དང་བྱང་སེམས་གསལ་གདབ་ལ། བརྒྱུད་པའི་བླ་མ་དང་། རྩ་བའི་བླ་མའི་སྐུ་བསྟོད་མོས་གུས་ཤུག་དྲག་པོས་བྱས། དེ་ནས་གནས་ཡོ་བྱིན་རླབས་སྔོན་དུ་འགྲོ་བས། སྐྱབས་འགྲོ་ནས་བསམ་མི་ཁྱབ་པའི་བར་ཚར་ལུགས་ལྟར་ན་གནས་གསར་རྡོ་རྗེ་འཆང་དང་། ངོར་ལུགས་ལྟར་ན་རྗེ་དཀོན་མཆོག་ལྷུན་གྲུབ་ཀྱི་ཡིག་ཆའི་དཀྱུས་ནས་འབྱུང་བ་ལྟར་ཉམས་སུ་བླངས་རྗེས་ཐུན་མཚམས་ཀྱི་ལྷར་ལྡང་ཞིང་གཏོར་མ་འབུལ། གོ་ཆ་བཀོད་ཅིང་བསྲུང་བ་དང་བསྔོ་སྨོན་རྒྱས་པར་བྱ། གོང་གི་ཡིག་ཆ་དེ་གཉིས་མ་འབྱོར་ན་སྔོན་དུ་ཁོ་བོས་བཤད་པའི་སྒྲུབ་ཐབས་འདི་ཁོ་ན་ལྟར་ཉམས་སུ་བླངས་ཀྱང་རུང་ངོ་། །སླར་སྲོད་ཐུན་སྐྱབས་འགྲོ་ནས་བསྡུ་རིམ་པར་དཀྱུས་ལྟར་ལ། ཉལ་བའི་རྣལ་འབྱོར་གྱིས་ཉལ། སང་ནངས་པར་ལྡང་སྟེ་བདུད་རྩི་མྱོང་བ་དང་། སྐྱབས་འགྲོ་སོགས་དཀྱུས་ལྟར། ཉི་མ་ཤར་ཙམ་གྱི་ཚེ་ཐུན་གྲོལ། གཏོར་མ་བརྒྱ་རྩ་དང་ཚེ་སྒྲུབ་སོགས་བྱེད་ན་སྐབས་འདིར་བྱ། དེ་ནས་ཐུན་ཚུགས་ལ་ཉིན་ཕྱེད་མ་ཟིན་ཙམ་ལ་གྲོལ། ཁ་ཟས་ཀྱི་རྣལ་འབྱོར་དང་། ཕྱག་བསྐོར་མདོ་འདོན་པ་སོགས་དགེ་བའི་བྱ་བ་ཅི་འགྲུབ་བྱ་ཞིང་ཅུང་ཟད་ངལ་གསོ། །དེ་ནས་གནས་ཡོ་བྱིན་རླབས་སྔོན་དུ་འགྲོ་བས་ཐུན་ལ་ཞུགས། ཉི་མ་ནུབ་ལ་ཉེ་བ་ན་གྲོལ་ནས་གཏོར་མའི་རྣལ་འབྱོར་རྒྱས་པར་བྱ། སྤྱིར་གྲུབ་ན་ཐུན་སྔ་མ་གཉིས་ཀྱི་མཇུག་ཏུའང་གཏོར་བསྔོ་བྱ་བར་གསུངས། བིར་སྲུང་དང་བྲག་རྫོང་མ་སོགས་སྲུང་འཁོར་གྱི་རིགས་ཡོད་ན་ཉམས་སུ་བླངས། དེ་ནས་སྲོད་ཐུན་ལ་འཇུག་ཅིང་། ནམ་གུང་མ་ཟིན་ཙམ་ལ་གྲོལ་ནས་ཉལ་བའི་རྣལ་འབྱོར་སོགས་སྔར་བཞིན་བྱ་སྟེ། དེ་ལྟར་ཐུན་བཞིའི་སྤྱིར་ཚར་ལུགས་ལ་ཐུན་བཞི་དང་། ངོར་ལུགས་ལ་ཐུན་གསུམ་མཛད་ཀྱང་། སྐབས་འདིར་རྗེ་རྡོ་རྗེ་འཆང་གིས་ཀྱང་། ཐུན་བཞི་བསྒོམ་ཞིང་གུས་པས་གསོལ་བཏབ་པས། ཞེས་གསུངས་པས་ཐུན་བཞི་ཁོ་ན་ལེགས་སོ། །མཆན། ཚུལ་གྱིས་ཐོག་མར་ཐུན་རྣམས་ལ་སྔོན་འགྲོ། སྐྱབས་འགྲོ། རྡོར་སེམས། མཎྜལ་རྣམས་རིམ་པ་གཙོ་བོར་བྱས་ཏེ། རབ་འབུམ་ཐེར་དང་། དེ་མིན་ཀྱང་མཚམས་ཀྱི་དངོས་གཞི་ཡུན་རིང་ཐུང་ལ་ལྟོས་ཏེ་ཞག་གསུམ། བདུན་སོགས་ཇི་ལྟར་འོས་པ་བྱ། དངོས་གཞིར་གཙོ་བོ་ངག་བཟླས་དང་། ཐུན་མཇུག་ཏུ་ཡིད་བཟླས། ཞར་བྱུང་གི་རྫོགས་རིམ་མཁའ་སྤྱོད་སྒྲུབ་པའི་ལམ་ཁྱད་པར་ཅན་བསམ་མི་ཁྱབ་ཐུན་མིན་རྣམས་མ་ཆགས་པར་བྱ། གཞན་འཕོ་བ་དང་། རྩ་དབུ་མའི་རྣལ་འབྱོར་སོགས་ཀྱང་ཇི་ལྟར་རིགས་པར་བསྒོམ། ལམ་དུས་ནི་ཐོར་ཐུན་གྲོལ་ནས་སྔ་ཐུན་མཚུགས་པའི་བར་བྱ་ཞིང་། དེ་མིན་ཁ་འདོན་ཆུང་ངུའི་རིགས་རྣམས་ཐུན་མཚམས་གང་རུང་ལ་མ་ཆགས་ཙམ་བྱ། ཐུན་ལ་ཞུགས་ནས་མ་གྲོལ་བར་ཇ་སོགས་བཞེས་ཀྱང་ངག་མཚམས་དམ་པར་བཅད། ཐོག་མར་ཁོག་གྲིམ་ལ་སོས་དལ་བ། བར་དུ་སྒོ་གསུམ་འཇུག་པ་ཆིག་བསྒྲིལ། མཐར་ཇེ་ལྷོད་ལ་བཏང་ནས་མཚམས་དང་ཞེ་མ་འགྲས་པར་བསླབ། བཟླས་པ་འགྲོ་ཆེ་བ་དང་ཉམས་དང་རྨི་ལམ་གསལ་བ་སོགས་བཟང་རྟགས་དང་། བཟླས་པ་འགྲོ་བ་བུལ་ཞིང་ནད་གདོན་སོགས་རྐྱེན་ངན་གང་བྱུང་ཡང་རེ་དོགས་ཀྱི་རྣམ་རྟོག་ཚབ་ཚུབ་མི་བྱ་བར་བློ་བླ་མ་དང་དཀོན་མཆོག་ལ་གཏད་ནས་ལྷོད་ཀྱིས་གློད། དམ་བཅའ་ཡལ་བར་མི་འདོར་བའི་སྙིང་རུས་བསྐྱེད། རིག་པ་བརྗོད་མེད་དུ་ཆམ་མེར་བཞག་པས་གེགས་ཐམས་ཅད་རང་གྲོལ་དུ་འགྲོ། བཟླས་པའི་ཐོག་མར། ཐོད་པའམ་བོ་དྷི་ཙིའི་ཕྲེང་བ་བརྒྱ་རྩ་བརྒྱད་ལ། ཨོཾ་པ་དེ་པ་དེ་མ་ཧཱ་ཛྙཱ་ནཾ་སརྦ་བུདྡྷ་མ་ཡཾ་བྷ་བེ་ཏ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱཿཁཾ་སྭཱ་ཧཱ། ལན་གསུམ་བཟླས་པའི་ཁ་རླངས་ཕྲེང་བར་ཕོག་པར་བྱས་ཏེ་བྱིན་གྱིས་བརླབས། དངོས་གཞིའི་བཟླས་དམིགས་ནི་གཙོ་བོ་སྔར་བཤད་པ་བཞིན་དང་། དམིགས་པ་གཅིག་ཁོ་ནས་སྐྱོ་ན། རེས་ལྷ་སྐུ་སྣང་ལ་རང་བཞིན་མེད་པར་གསལ་ལམ་མེ་བ་ལ་སེམས་གཏད། རེས་སྐུ་ཡི་ཆ་ཤས་རེ་རེ་ནས་སེམས་འཛིན། རེས་སྔགས་ཀྱི་ཡིག་འབྲུ་དང་སྒྲ་ཙམ་ལ་སེམས་བཟུང་། རེས་གནས་ལུགས་བརྗོད་བྲལ་གྱི་ངང་དུ་ངལ་གསོ། རེས་འོད་ཟེར་གྱི་རྩེ་ལས་མཆོད་པའི་རྣམ་གྲངས་བསམ་གྱིས་མི་ཁྱབ་པ་སྤྲོས་ཏེ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པ་དང་། རེས་སྣོད་བཅུད་ཐམས་ཅད་ལྷར་གསལ་བ་དང་། དེ་ཐམས་ཅད་ཀྱིས་ཀྱང་ཨོཾ་གསུམ་མའི་སྒྲ་འུར་དིར་གྱིས་སྒྲོགས་པར་བསམ་ལ་བཟླ་བ་སོགས་དམིགས་པའི་རྩལ་སྦྱང་བས་གཅིག་གྲོགས་གཅིག་གིས་བྱས་ཏེ་རྣལ་འབྱོར་ལ་བོགས་ཐོན་པར་འགྱུར་ཞིང་། མདོར་ན་སེམས་མ་ཡེངས་པའི་ངང་དུ་བཟླས་བ་བྱ་བ་ནི་ཤིན་ཏུ་གལ་ཆེའོ། །བཟླས་པའི་གྲངས་ནི། གཞིའི་བསྙེན་པར་འབུམ་ཕྲག་བཞི། ཁྲི་ཕྲག་བཞི། སྟོང་ཕྲག་བཞི། བརྒྱ་ཕྲག་བཞི་རྣམས་ཀྱིས་དོན་འགྲུབ་པར་གསུངས་ལ། འབྲུ་འབུམ་བྱེད་ན་འབུམ་ཕྲག་སོ་བདུན་མཛད་པ་ཕྱག་ལེན་ནོ། །དེ་ཡང་སྒྲུབ་པ་པོ་ནམ་འཆི་ཆ་མེད། འཁོར་བ་ལ་ངེས་འབྱུང་། སེམས་ཅན་ལ་སྙིང་རྗེ། བླ་མ་ལ་མོས་གུས་རྣམས་ལམ་གྱི་སྲོག་ཏུ་བཟུང་། ཁས་བླངས་པའི་དམ་ཚིག་དང་སྡོམ་པ་ལ་གཅེས་སྤྲས་སུ་བྱས་ནས་རྩེ་གཅིག་ཏུ་བསྙེན་ན་དངོས་གྲུབ་རྣམ་གཉིས་མྱུར་དུ་འགྲུབ་པ་ནི། རྒྱུད་སྡེའི་བཞུགས་ཚུལ། བསྒོམ་བྱའི་ལྷ། བཟླ་བྱའི་སྔགས། ཟབ་མོའི་རྫོགས་རིམ་རྣམས་ཀྱི་སྒོ་ནས་གཞན་ལས་ཆེས་ཁྱད་དུ་འཕགས་པའི་དབང་གིས་ཏེ། དེ་ཡང་རྒྱུད་སྡེའི་བཞུགས་ཚུལ་གྱི་དབང་དུ་བྱས་ན། རྒྱུད་སྡེ་ཐམས་ཅད་ཀྱི་མཐར་ཐུག་པ་ནི་རྣལ་འབྱོར་གསང་མཐའི་རྒྱུད་ཡིན་ལ། དེ་ལའང་ལཱུ་ནག་དྲིལ་གསུམ་རྣལ་འབྱོར་མ་དང་བཞི་ལས། ཕྱི་མ་འདི་ཁོ་ན་མཆོག་ཏུ་ཟབ་པའི་ཕྱིར་ཡང་རྩེ་ནཱ་རོ་མཁའ་སྤྱོད་ཅེས་གྲགས་སོ། །བསྒོམ་བྱའི་ལྷ་ཡི་དབང་དུ་བྱས་ན། རི་རབ་སུམ་ཅུ་རྩ་གཉིས་ཀྱི་རྡུལ་གྱི་གྲངས་དང་མཉམ་པས་མཚོན། མཁའ་འགྲོ་མ་བསམ་གྱིས་མི་ཁྱབ་པ་ནི། མཁའ་འགྲོ་མ་བྱེ་བ་ཕྲག་ཕྱེད་དང་བཞི་འདུས། དེ་སྟོང་ཕྲག་བདུན་ཅུ་རྩ་གཉིས་སུ། དེ་བདུན་ཅུ་རྩ་བདུན་དུ། དེ་སོ་བདུན་དུ། དེ་ཉི་ཤུ་རྩ་བཞིར། དེ་ཡང་བརྒྱད། དེའང་རྡོ་རྗེ་རྣལ་འབྱོར་མ་འདི་ཁོ་ན་ལ་འདུ་བའི་ཕྱིར། འདི་བསྒོམ་པས་དཔའ་བོ་མཁའ་འགྲོ་ཇི་སྙེད་ཐམས་ཅད་བསྒོམ་པར་འགྱུར་བ་ཉིད་དོ། །བཟླ་བྱའི་སྔགས་ཀྱི་དབང་དུ་བྱས་ན། གསང་སྔགས་ཨོཾ་གསུམ་མ་འདི་ཉིད་ཕག་མོ་སོ་བདུན་མའི་དཀྱིལ་འཁོར་གྱི་ལྷ་ཉིད་ཡི་གེའི་གཟུགས་སུ་ཤར་བ་ཡིན་ཅིང་། དེ་ལས་འཕྲོས་ཏེ་སྔར་སྨོས་པ་བཞིན་དཔའ་བོ་མཁའ་འགྲོ་བསམ་གྱིས་མི་ཁྱབ་པར་ཤར་བའི་ཕྱིར་ན། སངས་རྒྱས་བྱང་སེམས་དཔའ་བོ་མཁའ་འགྲོ་ཐམས་ཅད་ཀྱི་ངོ་བོ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་སྔགས་ཐམས་ཅད་འདུས་པར་བཤད་པས་དེ་ཐམས་ཅད་ཀྱི་བྱིན་རླབས་ཞུགས་པར་འགྱུར་བ་དང་། དམ་ཚིག་དང་ལྡན་པའི་སྔགས་པས་བཀླགས་པ་ཙམ་གྱིས་དོན་ཐམས་ཅད་གྲུབ་པའི་ཕྱིར། བདེ་མཆོག་རྩ་རྒྱུད་ལས། འདི་ལས་ཤིན་ཏུ་མཆོག་གྱུར་པ། །འཇིག་རྟེན་གསུམ་ན་ཅི་ཡང་མེད། །སོགས་ནས། བཀླག་པས་འདི་དག་ཐམས་ཅད་འགྲུབ། །ཞེས་སོགས་རྡོ་རྗེ་འཆང་རང་ཉིད་ཀྱིས་རྒྱ་ཆེར་བསྔགས་པ་མཛད་དོ། །རྫོགས་རིམ་གྱི་དབང་དུ་བྱས་ན། རྩ་རླུང་ཐིག་ལེ་ཐམས་ཅད་དབུ་མ་ཡེ་ཤེས་ཀྱི་རླུང་ཐིག་ལེ་དང་བཅས་པ་འབའ་ཞིག་ལ་འདུས་པས། འདི་ཁོ་ནར་གནད་དུ་བསྣུན་པས་གཞན་ཐམས་ཅད་ཤུགས་ཀྱིས་འབྱོངས་ཞིང་དངོས་གྲུབ་མྱུར་བའི་ཟབ་གནད་ཁྱད་པར་ཅན་ཡིན་པའི་ཕྱིར་རོ། །དེ་ལྟ་བུའི་ལམ་ཟབ་མོ་འདི་ལ་བརྟེན་ནས་འཕགས་བོད་དུ་མཁས་གྲུབ་བསམ་གྱིས་མི་ཁྱབ་པ་ཞིག་འཇའ་ལུས་མཁའ་སྤྱོད་ཀྱི་གོ་འཕང་མངོན་དུ་མཛད་པའི་ཚུལ་ལ་དྲན་པས་ཉེ་བར་བཞག་སྟེ། བདག་ལེགས་སུ་འདོད་པའི་སྐལ་བཟང་རྣམས་ཀྱིས་ཚུལ་འདི་ཁོ་ནར་ཉམས་ལེན་གྱི་སྙིང་པོར་དྲིལ་བར་བྱའོ། །གསུམ་པ་ནི། བསྙེན་པའི་གྲངས་ཐེབས་པ་དང་གྲུབ་ན་ཞག་གསུམ་གྱི་བར་ཕྱི་རོལ་མཆོད་པ་བྱ། གནས་དེ་ཉིད་དམ་ཕྱི་རོལ་གཞན་གྱིས་མི་མཐོང་བའི་སར་ཁ་སྐོང་གི་སྦྱིན་སྲེག །ལྷ་སྔགས་ཨོཾ་གསུམ་མ་དང་རྫས་ཏིལ་འབའ་ཞིག་ལ་གྲངས་བཟུང་ནས་བསྙེན་པ་ཇི་ཙམ་སོང་བའི་བཅུ་ཆ་འབུལ། དེ་ནས་གཟའ་སྐར་བཟང་བའི་ཐོར་ཐུན་གྱི་མཇུག་ཏུ་གཏོར་བསྔོ་རྒྱས་པར་བྱ་ཞིང་གཏོར་མ་འབུལ། སྒོ་དྲུང་གི་རྒྱལ་ཆེན་ལ་གཏང་རག་དང་། གཤེགས་གསོལ་བྱ། དེ་ནས་གྲོགས་དམ་ཚིག་དང་ལྡན་པ་རྣམས་དང་རིམ་གྱིས་འཕྲད་པ་སོགས་བྱའོ། །དེ་དག་གི་གནས་སྐབས་ཐམས་ཅད་དུ་རྒྱས་འདེབས་པར་བྱེད་པ་ཆོས་ཉིད་དངོས་སུ་སྟོན་པའི་ཉམས་ལེན་གྱི་གནད་ཅུང་ཟད་བཤད་ན། ཚར་ཆེན་རྡོ་རྗེ་འཆང་ཆེན་པོས། སྐྱེ་འགགས་གནས་གསུམ་བྲལ་བ་གདོད་མའི་གཤིས། །ཞེས་སོགས་གསུངས་པའི་དོན། འཁོར་འདས་སྣང་སྲིད་ཀྱིས་བསྡུས་པའི་ཆོས་ཐམས་ཅད་རང་སེམས་ཁོ་ནའི་རྣམ་འཕྲུལ་ལས་དོན་ལོགས་སུ་གྲུབ་པ་རྡུལ་ཙམ་ཡང་མེད་ཅིང་། སེམས་དེ་ལ་ཡང་ཁ་ནང་དུ་ལྡོག་ནས་ཆེར་གྱིས་བལྟས་པས། དང་པོར་སྐྱེ་བའི་རྒྱུས་སྟོང་། བར་དུ་གནས་པའི་ངོ་བོས་སྟོང་། མཐར་འགགས་པའི་འབྲས་བུས་སྟོང་པས་ན་གདོད་མ་ནས་རང་ཆས་སུ་གནས་པའི་གཤིས་ལུགས་ངོ་བོ་སྟོང་པ། མཚན་ཉིད་གསལ་བ་དེ་གཉིས་དབྱེར་མེད་པའི་ཟུང་འཇུག །ཉམས་སུ་མྱོང་བཞིན་དུ་བརྗོད་པའི་མཐའ་ཐམས་ཅད་དང་བྲལ་བའི་བློ་འདས་ཀྱི་རིག་པ་སྐད་ཅིག་མ་འདི་ཀ་དོན་དམ་ལྷན་ཅིག་སྐྱེས་པའི་རྡོ་རྗེ་རྣལ་འབྱོར་མར་རང་ངོ་འཕྲོད་ནས་ཐག་བཅད་ངེས་ཤེས་བསྐྱེད། འཛིན་པ་མ་ཞུགས་པར་བྱས་ཏེ་ཉམས་ལེན་གྱི་རྒྱུན་སྐྱོང་། རྣམ་རྟོག་གང་སྐྱེས་ཀྱང་དེ་ཀ་རང་གི་སྟེང་དུ་བཟོ་བཅོས་མ་བྱས་པར་ཀློད་ནས་སེམས་ལ་སེམས་ཀྱིས་བལྟ་བའི་ཚུལ་གྱིས་མ་ཡེངས་ཙམ་དུ་བཞག་པས་རྟོག་པ་ཁོ་རང་གསལ་སྟོང་ཟུང་འཇུག་ཏུ་རྗེན་ལྷང་གིས་འཆར་བ་ཞིག་ཡོང་། དེས་མཚོན་ཏེ་བསྐྱེད་རྫོགས་བསྒོམ་པ་ལ་སོགས་མཉམ་བཞག་དང་རྗེས་ཐོབ་ཀྱི་གནས་སྐབས་ཐམས་ཅད་དུ་ལྟ་བ་འཁོར་འདས་དབྱེར་མེད་ཀྱི་ཉམས་ལེན་དང་མ་བྲལ་བ་གལ་ཆེ་སྟེ། དེའི་ཚུལ་ཡང་། བླ་མ་ས་སྐྱ་པ་ཆེན་པོས། བསྐྱེད་རིམ་རྟོག་པ་ཡིན་མོད་ཀྱང་། །རྟོག་པའི་ངོ་བོ་སེམས་ཡིན་ཏེ། །སེམས་ཀྱི་མཚན་ཉིད་གསལ་རིག་ཡིན། །གསལ་རིག་རང་བཞིན་སྟོང་པ་ཉིད། །སྟོང་པ་གདོད་ནས་ཆོས་ཀྱི་དབྱིངས། །འཁྲུལ་པ་ཆོས་ཀྱི་དབྱིངས་ཉིད་དུ། །ཤེས་པས་རྟོག་པ་ཐམས་ཅད་ཀྱང་། །ཇི་ལྟར་བསྒོམ་ཀྱང་མི་རྟོག་ཉིད། །བཙལ་ཡང་འཁྲུལ་བ་ག་ལ་སྲིད། །ཅེས་གསུངས་པ་ལྟར། སེམས་ཀྱི་གཤིས་ལུགས་བརྗོད་བྲལ་གྱི་ངང་ནས། གདངས་བདེ་ཆེན་དུ་མ་འགགས་པའི་རང་རྩལ་ལྷ་དང་གཞལ་ཡས་ཁང་སོགས་དྭངས་པའི་མཁའ་ལ་འཇའ་ཚོན་ཤར་བ་ལྟར་སྣང་སྟོང་ཟུང་འཇུག་ཆེན་པོའི་ལམ་ལ་བསླབས་པས་བསྐྱེད་རྫོགས་དབྱེར་མེད་དང་ཅིར་སྣང་ཡེ་ཤེས་སུ་འཆར་བའི་དོན་ལ་རིམ་གྱིས་དབང་འབྱོར་བར་འགྱུར་རོ། །དེ་ལྟར་རྗེ་བཙུན་རྡོ་རྗེ་རྣལ་འབྱོར་མའི་ལམ་གྱི་རིམ་པ་ཟབ་མོ་འདི་ལ། སྤྱིར་འཕགས་བོད་ཀྱི་མཁས་གྲུབ་དུ་མས་བཀྲལ་བའི་གཞུང་དང་། ཁྱད་པར་རང་ལུགས་ཉམས་ལེན་སྙིང་པོར་དྲིལ་བའི་དབང་དུ་བྱས་ན། ངག་འདོན་ཐུན་མོང་ཙམ་དུ་ཚར་ཆེན་དང་། ངོར་ཆེན་དཀོན་མཆོག་ལྷུན་གྲུབ། ཐུན་མོང་མ་ཡིན་པར་གནས་གསར་རྡོ་རྗེ་འཆང་གི་སྒྲུབ་ཐབས་ནག་འགྲོས་མ་དང་། དེ་དག་གི་གོ་དོན་འཇམ་དབྱངས་མཁྱེན་བརྩེའི་ཁྲིད་ཡིག་ཆེན་མོ་ལ་གཞི་བྱས། འཇམ་མགོན་སངས་རྒྱས་ཕུན་ཚོགས་ཀྱི་རྣམ་བཤད་དང་། རྡོ་རྗེ་འཆང་དབང་ཕྱུག་རབ་བརྟན་པའི་བླ་མའི་རྣལ་འབྱོར་སོགས་ཡིག་ཆུང་། ཚར་ཆེན་རིན་པོ་ཆེས་མཛད་པའི་ལུས་དཀྱིལ། བསམ་མི་ཁྱབ་ཐུན་མིན། འཕོ་བ་རྣམས་ཀྱི་ཡིག་ཆུང་གིས་བརྒྱན་པ་དང་། ཞལ་ཤེས་ཀྱི་གནད་འགའ་ཞིག་ཞི་བཟང་འཕགས་པ་དགེ་ལེགས་རྒྱལ་མཚན་གྱིས་གནས་གསར་བའི་གསུང་ཇི་ལྟ་བ་བཞིན་ཟིན་བྲིས་སུ་མཛད་པ་རྣམས་སུ་མི་གསལ་བ་གང་ཡང་མ་མཆིས་ཤིང་། དེ་མཚུངས་ཚེས་བཅུའི་མཆོད་པ་དང་། ཞི་བའི་སྦྱིན་སྲེག་གནས་གསར་བ་དང་། བསྙེན་ཡིག་རྨོར་ཆེན་དང་། མཁས་གྲུབ་སངས་རྒྱས་རྒྱ་མཚོས་མཛད་པས་མཚོན་བྱིན་རླབས་དང་ལེགས་བཤད་རྨད་དུ་བྱུང་བ་གླེགས་བམ་དུ་ལོངས་པ་དུ་མ་ཡོད་བཞིན་དུ། འདི་ལྟ་བུ་འབྲི་བ་ལ་དགོས་པ་གང་ཡང་མ་མཆིས་མོད། འོད་ཀྱང་ཟབ་ཆོས་འདི་ཉིད་ཁྱབ་བརྡལ་དུ་དར་ཆེས་བས། གྲུབ་མཐའ་གཞན་གྱི་ཕྱོགས་སུ་གང་གི་དཔེ་དེ་རྣམས་ཐམས་ཅད་རྙེད་དཀའ་བ་དང་། རང་རེའི་རྗེས་འབྲངས་འགའ་ཞིག་ཀྱང་དཔེ་མང་ཀློག་པའི་ངལ་བ་མི་ནུས་ཤིང་། བློ་གྲོས་དམན་པས་ཡིག་ཆ་ཕན་ཚུན་གུང་བསྒྲིགས་མི་ཤེས་པ་སོགས་དང་། སྤྲོས་པ་ཆུང་བས་ཚེས་བཅུའི་མཆོད་པ་སོགས་རྒྱས་པར་མི་ནུས་པ་རྣམས་ལ་ཕན་པའི་བསམ་པ་ཁོ་ནས་ངག་འདོན་དང་དམིགས་རིམ་མདོར་བསྡུས་དཀྱུས་གཅིག་ཏུ་བཀོད་པ་ལ་མཁས་པ་རྣམས་ཀྱིས་བཟོད་པར་མཛད་དུ་གསོལ། །རྗེ་བཙུན་རྡོ་རྗེ་རྣལ་འབྱོར་མའི། །བསྐྱེད་དང་རྫོགས་པའི་ཚུལ་འདི་ལ། །བརྟེན་ནས་འགྲོ་ཀུན་མཁའ་སྤྱོད་གྲོང་། །བགྲོད་པའི་གསང་ལམ་ཉིད་གྱུར་ཅིག །ཅེས་པའང་ལམ་འདི་ལ་མོས་པའི་དགེ་སློང་གུ་ཎ་ལཀྵྨིས་ཚེས་བཅུའི་མཆོད་པ་མདོར་བསྡུས་པ་ཞིག་དགོས་ཞེས་ཆེད་དུ་བསྐུལ་བས་མཚམས་སྦྱར་ཏེ། དོན་གཉེར་བློ་གྲོས་དམན་པ་གཞན་ལའང་ཕན་པའི་བསམ་པས་བསྐྱེད་རྫོགས་ཡན་ལག་དང་བཅས་པ་ཉུང་གསལ་སྙིང་པོར་དྲིལ་བ་འདི་ནི། ཁྱབ་བདག་རྡོ་རྗེ་སེམས་དཔའི་ངོ་བོར་གྱུར་པ་མཁན་ཆེན་ཐམས་ཅད་མཁྱེན་པ་བྱམས་པ་རྣལ་འབྱོར་འཇམ་དཔལ་བཟང་པོ་སོགས་ཡོངས་འཛིན་དམ་པ་ཆོས་བཞིན་དུ་སྤྱོད་པ་རྣམས་ཀྱི་བཀའ་དྲིན་ལས་ཚུལ་འདིའི་སྨིན་གྲོལ་གྱི་བདུད་རྩི་མང་དུ་ཐོས་པའི་རྒྱལ་ཁམས་ཀྱི་བྱ་བྲལ་བ་འཇམ་དབྱངས་མཁྱེན་བརྩེའི་དབང་པོས། མཁས་ཤིང་དངོས་གྲུབ་བརྙེས་པ་རྣམས་ཀྱི་ཞལ་ལུང་དྲི་མ་མེད་པ་ལ་ཉེ་བར་བཏུས་ཏེ་སྦྱར་བའི་དགེ་ལེགས་ཀྱི་སྣང་བས་ཕན་བདེའི་པདྨོ་མཆོག་ཏུ་རྒྱས་པའི་རྒྱུར་གྱུར་ཅིག །སརྦ་དཱ་མངྒ་ལཾ།། །། ༈

[edit]

rje btsun rdo rje rnal 'byor ma nA ro mkha' spyod ma'i bskyed rdzogs mdor bsdus pa mkha' spyod bgrod pa'i gsang lam/ @#/_/rje btsun rdo rje rnal 'byor ma nA ro mkha' spyod ma'i bskyed rdzogs mdor bsdus pa mkha' spyod bgrod pa'i gsang lam zhes bya ba bzhugs so/__/bla ma rdo rje rnal 'byor mar/__/btud nas de yi rim gnyis tshul/__/mdor bsdus mkha' spyod rdo rje'i grong /__/bgrod pa'i gsang lam 'dir gsal bya/__/de la 'khor lo bde mchog gi dkyil 'khor du dbang bskur ba dang /__'di nyid kyi byin rlabs nyams khrid dang bcas pa legs par thob cing /__dam tshig dang sdom par ldan pa'i gang zag gis nyams su blang bya'i lam ni/__bskyed pa'i rim pa phag mo mkha' spyod/__rdzogs pa'i rim pa rtsa dbu ma/__lam gyi yan lag pra se nA dbabs pa/__sman chen mo bcud len/__gnod sbyin mo dbang du bya ba rnams su bshad pa las/__dang po ni/__rje sa skya pa chen po'i zhal nas/__nyal dang ldang dang bdud rtsi myang /__/tshad med bla ma bdag lhar bskyed/__/'gro ba dag pa'i rnal 'byor dang /__/dpa' bo dpa' mos byin gyis rlabs/__/ngag bzlas yid bzlas gnyis gcig yin/__/bsam mi khyab pa'i rnal 'byor dang /__/spyod lam gyi ni rnal 'byor te/__/de ltar rnal 'byor bcu gcig go__/zhes gsungs pa 'dir 'du ba las/__dang po nyal ba'i rnal 'byor ni/__nub mo bsam gyis mi khyab pa'i rnal 'byor gyis 'od gsal stong pa nyid kyi ngang du nyal pa'am/__stong nyid de'i ngang las thun mtshams kyi lhar ldang ste/__gnas khang chos 'byung dmar po 'od kyi rang bzhin can gyi nang du/__rang nyid seng ge'i khri la 'khod pa'i sngas mgor seng khri pad zla'i steng du/__rtsa ba'i bla ma rdo rje chos kyi rnam par bzhugs pa la mos gus dung nge ba dang /__lha yi gsal snang ma bral ba'i ngang nas gnyid log__/gnyis pa ldang ba'i rnal 'byor ni/__tho rangs nam gyi brgyad cha tsam lon pa na/__nam mkha' nas mkha' spyod kyi dpa' bo dang rnal 'byor mas DA ma ru'i sgra oM gsum ma'i gdangs su bsgrags pas bskul te/__'od gsal stong nyid de'i ngang las chu las nya 'phar ba ltar thun mtshams kyi lhar ldang ba'am/__nyal lugs phyi ma ltar na/__rang dang bla ma gnas khang sogs cir snang thams cad lha dang gzhal yas khang du gsal bzhin pa'i ngang nas ldang la/__sngas mgo'i bla ma la mos gus byas pas 'od du zhu ste rang la thim pas rgyud byin gyis brlab par bsam mo/__/gsum pa bdud rtsi myong ba'i rnal 'byor ni/_bdud rtsi ril bu dngos su 'byor na dang /__ma 'byor na byin gyis brlab pa'i nang mchod srin lag gis blangs te/__oM AHhU~M gis myong bas snying ga'i ba~M yig sangs rgyas thams cad 'dus pa'i ngo bor mchod par bsam/__bzhi pa tshad med pa'i rnal 'byor ni/__thog mar tha mal gyi snang ba thams cad dbyings su thim pa las gnas yul dag pa'i zhing khams chen por gsal ba'i ngang /__rang gi smin mtshams kyi thad khru gang tsam gyis mtho ba'i nam mkhar seng khri pad+ma nyi zla'i gdan la rtsa ba'i bla ma sangs rgyas rdo rje chos/__sku mdog dmar po rdo rje dang dril bu thugs kar bsnol nas 'dzin pa/__dar dang rin po ches brgyan cing /__zhabs rdo rje'i skyil krung gis bzhugs pa'i sku dge 'dun/__gsung dam chos/__thugs sangs rgyas/__yon tan nor lha/__phrin las mkha' 'gro chos skyong thams cad 'dus pa'i ngo bor gsal btab/__de'i mdun du rang nyid/__rang gi g.yas g.yon du pha ma/__mdun du gnod byed/__mthar skor kun tu rigs drug gi sems can thams cad 'khod de/__'dun pa phyogs gcig pas skyabs su 'gro bar mos la/__nges 'byung dang snying rje chen po'i shugs drag tu bskyed bzhin pa'i ngang /__bdag dang 'gro ba nam mkha'i mtha' dang mnyam pa'i sems can thams cad dus 'di nas bzung ste ji srid byang chub snying po la mchis kyi bar du dpal ldan bla ma dam pa rnams la skyabs su mchi'o/__/rdzogs pa'i sangs rgyas bcom ldan 'das rnams la=__dam pa'i chos rnams=__'phags pa'i dge 'dun rnams=__zhes ci nus dang /__mthar/__bla ma dang dkon mchog rin po che rnam pa gsum la bdag phyag 'tshal zhing skyabs su mchi'o/__/khyed rnams kyis bdag gi rgyud byin gyis brlab tu gsol/__/ces gsol ba btab pas/__gdan seng khri nas yar 'od du zhu/__dbu'i gtsug tor nas mar 'od du zhu ste/__thugs ka'i thad du 'od dmar po'i rnam par gyur pa rang gi smin mtshams nas thim pas/__rang gi lus ngag yid gsum dang /__bla ma'i sku gsung thugs dbyer med du gyur par bsam la rig pa 'dzin med kyi ngang du mnyam par bzhag__/de nas tshad med dngos ni/__bdag gis rdzogs pa'i sangs rgyas kyi go 'phang thob par byas la/__sems can thams cad srid pa'i sdug bsngal gyi rgya mtsho las bsgral bar bya/__de'i ched du rdo rje rnal 'byor ma'i bsgom bzlas nyams su blang bar bgyi'o/__/zhes pa'i don dran bzhin pas lan gsum brjod/__spro zhing nus na rdo rje sems dpa'i bsgom bzlas kyang stobs bzhi tshang ba'i dmigs gnad dang ma bral ba'i sgo nas ma rgyud spyi ltar bya/__lnga pa bla ma'i rnal 'byor la/__thun mong ba ni/__rang gi mdun gyi nam mkhar seng khri pad zla'i gdan la/__rtsa ba'i bla ma dpa' bo rdo rje chos sku mdog dmar po/__/phyag g.yas Da ma ru dang /__g.yon thod pa bdud rtsis bkang ba dang /__gru mo g.yon na kha T+wA~M ga bsnams pa/__rus pa'i rgyan drug gis brgyan cing /__zhabs rdo rje'i skyil mo krung gis bzhugs pa/__lang tsho dar la bab pa'i rnam pa can/__skyabs gnas thams cad 'dus pa'i ngo bor gyur par bsam la mos gus drag pos/__gang gi drin gyis sogs dang /__bla ma sangs rgyas bla ma chos/__/de bzhin bla ma dge 'dun te/__/bla ma dpal ldan he ru kar/__/gsol ba 'debs so byin gyis rlobs/__/zhes gsol ba btab pas 'od dmar po bde ba chen po'i rnam pas rang gi spyi bo nas zhugs/__snying ga'i ba~M yig la thim pas/__de nyid je cher song ste mthar nam mkha' la 'ja' yal ba ltar gyur par bsam la/__gsal stong 'dzin med kyi ngang du ci gnas su mnyam par bzhag__/yang na man ngag thob pas thun mong ma yin pa'i bla ma'i rnal 'byor nyams su blangs te/__de'i tshul ni gzhan du shes par bya'o/__/drug pa bdag gi gzhi sbyangs bsgyur gyis lhar bskyed pa'i rnal 'byor ni/__de'i ngang las/__rang gi snying gar e e las chos 'byung nyis brtsegs kyi nang du a las zla ba'i dkyil 'khor gyi dbus su ba~M yig dmar po'i mthar/__oM oM oM sarba bud+d+ha DA ki nI yai/__badz+ra war+N+Na nI yai/__badz+ra bai ro tsa nI yai/__hU~M hU~M hU~M pha?T pha?T pha?T swA hA/__zhes pa'i sngags phreng g.yon skor du gnas pa las 'od zer 'phros/__lus kyi phyi nang thams cad gang bas sgo gsum gyi sdig sgrib dag ste lus 'od kyi gong bur gyur/__de yongs su gyur pa las chos 'byung gru gsum nyis brtsegs kyi gzhal yas khang gi dbus su sna tshogs pad nyi'i gdan la/__rang nyid rnam snang rigs bdag dang bcas pa'i rdo rje rnal 'byor ma zhabs g.yas brkyangs pas dus mtshan ma dmar mo'i nu ma brdzis shing /__g.yon bskum pas 'jigs byed nag po'i mgo bo rgyab tu bltas pa'i gdong mnan pa sku mdog dmar mo zhal gcig phyag gnyis spyan gsum dag pa mkha' spyod du gzigs pa/__g.yas rdo rjes mtshan pa'i gri gug thur du brkyang zhing /__g.yon thod pa khrag gis gang ba steng phyogs su bzung nas zhal gyen du phyogs pas gsol ba/__phrag pa g.yon par rdo rjes mtshan pa'i kha T+wA~M ga la DA ma ru dang /__dril bu dang /__'phen rtse gsum pa 'phyang bzhin pa bsnams pa/__bde stong gi nyams mchog tu rgyas shing /__dbu skra nag po sil bur grol ba/__thod pa skam po lnga'i dbu rgyan dang /__skam po lnga bcu'i do shal can/__phyag rgya spyi bor rus pa'i 'khor lo/__snyan rgyan/__mgul rgyan/__gdu bu/__ske rags rnams so/__/lngas brgyan cing ye shes kyi me 'bar ba'i dbus na bzhugs par gsal btab/__bdun pa gzhan gyi gzhi sbyang bsgyur 'gro ba dag pa'i rnal 'byor ni/__snying ga'i ba~M yig sngags phreng dang bcas pa las 'od zer kha dog sna tshogs ba spu'i bu ga nas phyir 'phros/__rigs drug gi brtan g.yo thams cad la phog pas/__ma dag pa'i snang ba sdig sgrib bag chags dang bcas pa sbyangs te/__snod gzhal yas khang dang /__bcud thams cad rdo rje rnal 'byor ma'i skur gyur par bsam/__brgyad pa dpa' bo dpa' mos byin gyis brlabs te dam ye dbyer med du bya ba ni/__'bar ba'i phyag rgya dpral bar g.yon du lan gsum bskor zhing /__phaiM/__rang gi snying ga'i ba~M yig las 'od zer 'phros pas/__'og min nas rdo rje rnal 'byor ma la phyogs bcu'i sangs rgyas byang sems dpa' bo dang rnal 'byor ma'i tshogs kyis bskor ba dang /__'gro ba rnal 'byor mar gyur pa thams cad kyang /__dzaHhU~M ba~M hoHsa rang nyid la gnyis su med par thim par bsam/__skabs 'dir man ngag thob pa yin na lus dkyil gsal btab pa ni/__de'i rkyen gyis snying ga'i ba~M yig 'od du zhu ba las dbus su ba~M yig gi ngo bo rdo rje rnal 'byor ma dmar mo/__shar nas brtsams te g.yon skor gyis ba~M yig gi cha shas ya ra la wa bzhi'i ngo bo snying po'i rnal 'byor ma dkar ljang dmar ser bzhi dang /__mtha' skor sngags kyi yig 'bru so gnyis kyang re re nas/__yul nyer bzhi'i rnal 'byor ma dang /__sgo mtshams ma brgyad kyi ngo bo rnal 'byor ma dmar mo re re ste thams cad kyang rgyan cha lugs phyi'i rnal 'byor ma ji lta ba bzhin gsal bar gyur par bsam mo/__/gang ltar yang /__mthar pad skor 'khyud rgya dang bcas/__oM yo ga shud+d+haHsarba d+harmAHyo ga shud+d+ho\u0f85 haM/__thabs shes gnyis su med pa'i bde chen gyi ye shes su bdag nyid rnam par dag la/__de bzhin du chos thams cad kyang rnam par dag go snyam du nga rgyal bzung zhing rig pa 'dzin med du bzhag__/de nas go cha bcings pa ni/__rang gi lus kyi gnas rnams su zla ba'i dkyil 'khor re re'i steng du lte bar oM ba~M dmar mo rdo rje phag mo/__snying gar haM yaM sngon mo gshin rje ma/__khar hriM ma~M dkar mo rmong byed ma/__dpral bar hriM hrIM ser mo skyod byed ma/__spyi gtsug tu hU~M hU~M ljang gu skrag byed ma/__yan lag thams cad la pha?T pha?T dud kha tsaN+Di ka'i ngo bor gyur/__ces brjod cing /__de yang gnas so sor zla dkyil la rgyab yol gyi tshul du byas pa'i ngo bo lha la rnam pa yi ge'i gzugs su 'di la bzhed tshul 'dra min gzhan yang snang ngo /__/mchan/__sbreng tshar du gsal btab/__dgu pa bzlas pa'i rnal 'byor la gnyis te/__dang po mkha' spyod sgrub pa'i lam gyi gtso bo ngag bzlas ni/__lus dkyil gsal gdab na/__lus dkyil gyi gtso mo'i thugs kar chos 'byung gru gsum dmar po nyis brtsegs kyi nang du zla dkyil ba~M yig sngags phreng dang bcas pa gsal ba dang /__ma btab na sngar gsal bzhin pa'i sngags phreng la yid gtad pas/__de las 'od zer dmar po dpag tu med pa 'phros/__'phags pa mchod/__sems can gyi don byas/__sangs rgyas dang byang chub sems dpa' pho nya gsum gyi byin rlabs dang nus mthu mkha' spyod kyi dngos grub thams cad 'od dmar po'i rnam pas sngags phreng la thim pas rgyud byin gyis brlabs par bsam la/__yid gzhan du ma yengs par byin gyis brlab pa'i phreng ba bzung ste oM gsum ma dam bcas pa'i grangs las mi nyung bar bzlas/__gnyis pa spros bcas kyi rdzogs rim yid bzlas ni/__lus gnad dang bcas rlung ro bsal/__'og rlung cung zad 'then/__steng rlung chil gyis mnan pa dang mnyam du mchil ma sgra med zhig mid pas snying ga'i chos 'byung zla ba lus dkyil bcas/__bde ba bskyed par 'dod na gsang gnas dang /__mi rtog pa bskyed par 'dod na lte bar phabs la rlung kha sbyor du 'dzin pa dang lhan cig yid kyis lus dkyil gyi lha rnams yig 'bru'i gzugs su bsgyur/__ya ra la wa bzhi ba~M yig la thim par bsam la/__sngags phreng yid kyis klog pa'i tshul dang bcas rlung bum can ci thub 'dzin/__mthar bzlas pa bsdu ba na/__phreng ba thal mo'i bar du bcug la/__bde bar gshegs pa thams cad kyi sku gsung thugs yon tan phrin las thams cad kyis byin gyis brlab tu gsol/__/myur du phyag rgya chen po mchog gi dngos grub rje btsun rdo rje rnal 'byor ma'i go 'phang thob par byin gyis brlab tu gsol/__/zhes brjod cing phreng ba mgo thog tu bzhag__/zhar byung gi rdzogs rim gnyis bsgom par 'dod ni/__dang po ni/__chos 'byung gi mdun rgyab spangs pa'i grwa bzhir dga' 'khyil dmar po g.yon du shugs drag tu 'khor ba la sems gtad pas bde ba'i ye shes skyes par bsam la rlung kha sbyar du 'dzin/__gnyis pa ni/__chos 'byung sngags phreng sogs re zhig mi dmigs pa'i ngang /__lus kyi dbus drang por rtsa dbu ma phyi dkar la nang dmar ba/__yar sna spyi bo nas smin mtshams su gug pa/__mar sna gsang gnas kyi pad+mar zug pa'i nang du dga' 'khyil dmar po dang /__smin mtshams su dga' 'khyil dkar po chung ngu g.yon skor shugs drag tu 'khor ba la sems gtad pas/__mas yar nas rim gyis byung ste bde ba dang /__stong pa'i ye shes skyes/__mthar snying gar 'dres te dbu ma'i stong pa'i ngang du mi dmigs par bsams la 'dzin med du bzhag go/__/de nas bskyed rim la rim gyis bslab pa'i tshe/__nga rgyal la sems 'dzin pa/__rnam pa spyi la sems 'dzin pa/__bye brag rgyan med dang /__rgyan can la sems 'dzin pa/__lus dkyil la sems 'dzin pa rnams reg mthong gi mtshan ma brtan po ma skyes kyi bar du bsgom zhing /__de thams cad 'dzin med kyi lta ba dang zung 'brel du nyams su blang ngo /__/bcu pa bsam mi khyab pa'i rnal 'byor la/__thun mong ba ni/__rang gi snying ga'i ba~M yig sngags phreng dang bcas pa las 'od zer 'phros pas/__khams gsum snod bcud thams cad 'od du zhu ste/__gzugs med khams 'od sngon po'i rnam pas lus kyi stod kyi cha la thim/__gzugs khams 'od dmar po'i rnam pas lus kyi bar gyi cha la thim/__'dod khams 'od dkar po'i rnam pas lus kyi smad kyi cha la thim/__rang rdo rje rnal 'byor mar gsal ba snying ga'i chos 'byung la thim/__de zla ba la thim/__de sngags phreng la thim/__de ba~M yig la thim/__ba~M yig gi khog pa mgo bo la thim/__mgo bo zla tshes la thim/__zla tshes thig le la thim/__thig le nA da la thim/__nA da yang mi dmigs pa 'od gsal stong pa nyid kyi ngang du gyur par bsam la mnyam par bzhag pa'am/__man ngag thob pa yin na bsam mi khyab thun mong ma yin pa bsgom ste/__de'i tshul ni gzhan du shes par bya'o/__/bcu gcig pa spyod lam gyi rnal 'byor la dngos dang /__yan lag gnyis las dang po ni/__rtog pa nam 'phro ba na/__slar yang rang skad cig gis rdo rje rnal 'byor ma rgyan dang phyag mtshan spangs pa'i skur gyur pa'i gnas rnams su zla ba'i dkyil 'khor re re'i steng du sogs/__go cha bkod pas bdag dang rnal 'byor srung /__gnas srung ba'i slad/__lag pa g.yon pa'i sdigs mdzub kyis se gol phyogs g.yon skor dang /__mtshams g.yas skor du brdab cing sngags brjod pa ni/__oM sum+b+ha ni sogs brjod cing /__shar dang steng du khwa gdong ma sngon mo/__de bzhin du/__oM gr-ih+NA sogs brjod cing /__byang du 'ug gdong ma ljang gu/__oM gr-ih+NA pa ya sogs brjod cing nub dang 'og tu khyi gdong ma dmar mo/__oM A na ya sogs brjod cing /__lhor phag gdong ma ser mo rnams grub par bsam/__yang /__oM sum+b+ha sogs tshar gcig gis/__shar lhor gshin rje brtan ma g.yas sngo g.yon ser ba/__lho nub tu gshin rje pho nya mo g.yas ser g.yon dmar ba/__nub byang du gshin rje mche ba ma g.yas dmar g.yon ljang ba/__byang shar du gshin rje 'joms pa ma g.yas ljang g.yon sngo ba rnams grub par bsam/__de thams cad kyang zhal gcig phyag bzhi ma dang po gnyis DA ma ru dang kha T+wA~M ga 'og ma gnyis gri thod thogs pa/__spyan gsum ma/__mi mgo skam po lnga'i dbu rgyan dang /__lnga bcu'i do shal can/__rus pa'i rgyan lngas brgyan pa/__zhabs g.yas brkyang gi stabs kyis bzhugs par gsal btab/__slar yang thun mong du oM sum+b+ha ni/__tshar gcig brjod pas/__de rnams la de 'dra ba'i sku grangs med pa dang /__rdo rje'i gur/__mda'i drwa ba/__ye shes kyi me dpung gi phreng ba dpag tu med pa spros te bgegs thams cad tshar bcad/__dpag tshad brgya yi tshad tsam tshun chad du srung ba'i gur khang gsal zhing brtan par bsam nas/__dge ba 'di yis sogs bsngo smon bya/__spyod lam la 'jug pa'i tshe snang ba thams cad rnal 'byor ma'i sku/__sgrar grags pa thams cad oM gsum ma'i gdangs/__yid kyi dran rtog gang shar thams cad gsal stong 'dzin med du 'jog pa ste sku gsung thugs kyi dga' ba gsum dang ma bral bar lam du khyer nas tha mal gyi snang zhen spang /__gnyis pa yan lag la/__kha zas/__phyi rol mchod pa/__sbyin sreg__/tshes bcu'i mchod pa/__gtor ma'i rnal 'byor dang lnga las/__dang po ni/__rgyas par byed na/__bza' btung rnams mdun du bdar la/__sum+b+has bsangs/__swA b+hA was sbyangs/__stong pa'i ngang las rlung me dang /___/thod pa'i sgyed pu gsum gyi khar/__/a yig las byung ka pA lar/__/bza' bca' btung pa'i dngos po kun/__/sha lnga bdud rtsi rnam pa lnga/__/bskol zhing 'od du zhu ba las/__/dam tshig ye shes dbyer med pa'i/__/bdud rtsi'i rgya mtsho chen por gyur/__/oM AHhU~M ha hoHhrIH__rang nyid rdo rje rnal 'byor ma'i/__/snying gar bla ma yi dam dang /__/lte bar chos srung nor lha'i tshogs/__/gtum mo'i me lce'i klong na bzhugs/__/lag gnyis rdo rje'i dgang blugs kyis/__/kha zas ye shes bdud rtsi'i rgyun/__/phul bas zag med bde ba ches/__/dgyes shing byin gyis brlab par gyur/__/ces brjod cing bsams la/__zhen pa med par longs spyad/__de tsam mi nus na/__oM AHhU~M ha hoHhrIHsa byin gyis brlabs la snying ga'i ba~M yig sangs rgyas thams cad 'dus pa'i ngo bor mchod par mos pa'am/__bsdu na/__lha la lha thim pa'i tshul gyis rol/__gnyis pa ni/__tshar chen rin po che'i sgrub dkyil dang /__gnas gsar rjes nag 'gros su mdzad pa sogs las rtogs par bya/__gsum pa la/__sbyin sreg dngos dang /__mar me'i sbyin sreg gnyis las/__dang po la'ang rgyas pa dang /__mdor bsdus te bya ba'i tshul gnyis kyi/__dang po ni/__rdo rje 'chang dbang phyug rab brtan gyi gsung gnas gsar rin po che'i nag 'gros su mdzad pa dang /__paN chen nam mkha' dpal bzang sogs kyis mdzad pa'i yig cha khungs thub las shes par bya la/__gnyis pa mdor bsdus pa ni/__sngags kyi nus pa dbyung ba dang sdig sgrib zhi ba sogs kyi slad du/__rgyun gyi dus sam ji ltar rigs pa'i dus su/__rje sa skya pa chen pos/__spros pa la mi dga' na/__rje btsun ma nyid mchod pa nas bzung ste lha mnyes pa nyid kyis cho ga ma tshang ba med pa yin no/__/zhes gsungs pa'i don kun mkhyen rin po che bsod nams seng ges ji ltar bkral ba bzhin brjod na/__thabs stegs kyi ngos re khA zlum po gnyis skor gyi nang du chos 'byung gru gsum nyis brtsegs kyi thig gdab/__chos 'byung gi ri mo rdul tshon dkar pos bcad/__nang thams cad rdul tshon dmar pos bkang /__mdun rgyab spangs pa'i grwa bzhir dga' 'khyil g.yon skor dang /__dbus su nyi gdan la tshom bu dmar po bkod/__rang gi g.yon thab kyi g.yas su mchod pa lnga dang gtor ma/__rang gi g.yas thab kyi g.yon du mar khu dang /__bsreg rdzas til nag po 'ba' zhig bshams/__bdag bskyed sngon du 'gro bas/__thab dang yo byad rnams/__sum+b+has bsang /__swa b+hA was sbyang /__stong pa'i ngang las hU~M las byung ba'i rin po che las grub pa'i thab khung yangs shing rgya che ba'i nang du bud shing brtsegs pa dang bcas pa dngas shing thogs pa med par gyur/__hU~M/__zhes yang yang brjod/__mchod rdzas dang bsregs rdzas rnams kyang /__oM AHhU~M las byung ba'i mchod rdzas dang bsreg rdzas rnams dwangs shing thogs pa med pa so so'i las sgrub pa'i nus pa dang ldan par gyur/__oM AHhU~M zhes pas byin gyis brlab/__de nas/__oM gsum ma'i rjes su/__oM badz+ra dz+wa la raM/__zhes pas me sbar/__bsang sbyang /__stong pa'i ngang las me 'bar ba'i dbus su chos 'byung gi nang du pa~M las pad+ma dang ra~M las nyi ma'i dkyil 'khor gyi steng du ba~M yig dmar po'i mthar g.yon skor gyis/__oM oM oM nas/__swA hA zhes pa'i sngags phreng kha dog dmar pos bskor ba de las 'od zer 'phros/__'phags pa mchod/__sems can gyi don byas/__tshur 'dus yig 'bru rnams la thim/__de yongs su gyur pa las rje btsun rdo rje rnal 'byor ma'i skur gyur pa ni/__sna tshogs pad+ma dang nyi ma'i gdan la zhabs g.yas brkyang pas sogs nas/__ye shes kyi me 'bar ba'i dbus na bzhugs pa'i steng 'og phyogs mtshams mtha' skor kun tu bla ma yi dam sangs rgyas byang sems/__dpa' bo dang rnal 'byor ma thams cad kyis bskor bar gsal btab/__ye shes pa gzhug__/go cha bkod/__dbang bskur/__rgyas gdab/__oM sarba ta thA ga ta badz+ra yo gi nI sa pa ri wA ra puSh+pe nas/__shab+da'i bar gyis phyi mchod/__oM gsum ma'i mthar oM AHhU~M btags pas nang mchod phul/__dpal ldan rdo rje mkha' 'gro ma sogs kyis bstod/__rang gzhan gyi sdig sgrib thams cad til la bstim zhing de nyid ye shes kyi bdud rtsir bsgyur te/__thog mar oM gsum ma'i rjes su/__oM sarba pA paM da ha na badz+ra ye bdag gi tshe 'khor ba thog ma med pa nas bsags pa'i sdig pa dang sgrib pa gsang sngags kyi lhag chad la sogs pa'i nyes pa thams cad shAn+tiM ku ru ye swA hA/__lan gsum sogs kyi rjes/__oM gsum ma 'ba' zhig gis phul la grangs bzung /__de'i tshe nam mkha'i khams thams cad khyab pa'i sangs rgyas byang sems sku mdog dkar po phyag na bum pa ye shes kyi bdud rtsis gang ba thogs pa rnams kyis bdag la dbang bskur bas sdig sgrib thams cad dag__/lus ye shes kyi bdud rtsis khengs te rdo rje rnal 'byor ma'i go 'phang thob/__mdun bskyed las kyang 'od zer dkar po 'phros pas bdag gzhan thams cad kyi sdig sgrib sbyangs bar bsam/__skabs skabs su mar gyis me gso/__mthar gong bzhin mchod cing bstod la gsol ba gdab/__gtor ma dang po rje btsun ma dang /__gnyis pa mkha' 'gro spyi gtor ltar phul/__rje btsun ma'i zhabs drung nas blangs par mos pas 'di ye shes pa gshegs pa'i rjes su byas kyang rung /__thabs kyi thal ba cung zad blangs te gnas gsum du byugs/__yi ge brgya bas lhag chad kha bskang /__ma 'byor pa sogs kyis nongs pa bzod par gsol/__oM khyed kyi sogs kyis mthar/__badz+ra muHsa thab kyi ye shes pa gshegs/__dzaHhU~M ba~M hoHsa dam tshig pa rang la thim/__rang gi gnas rnams su sogs go cha bkod/__bsrung ba bya/__bsngo smon bkra shis brjod/__las kyi rjes mi mngon par bya'o/__/gnyis pa mar me'i sbyin sreg ni/__rang gi mdun du stegs kyi khar mar me'i kong bu yangs par/__ras dmar gyis dkris pa'i sdong bu sbom po btsugs/__mar dkar gyi khu bas bkang la bzhag__/ma 'byor na gtor ma dang /__mchod pa lnga bshams/__bsreg rdzas til nag po dang /__gzhan yang rdor dril nang mchod sogs 'du byas la/__bdag bskyed rgyas par bya ba'am/__thun mtshams kyi rje btsun mar dran par byas te/__mchod rdzas nang mchod dang /__sum+b+has bsang /__swA b+hA was sbyang /__stong pa'i ngang las a las thod pa'i snod du 'bru gsum zhu ba las byung ba'i mchod rdzas dngas shing thogs pa med pa nam mkha'i mtha' klas par bsams la/__oM badz+ra puSh+pe nas/__shab+da AHhU~M gi bar dang /__g+haN+Der Ni tas brlabs/__de nas oM gsum ma'i rjes su/__oM badz+ra dz+wa la ra~M/__zhes pas mar me sbar/__bsang sbyang /__stong pa'i ngang las e e las chos 'byung gru gsum nyis brtsegs kyi nang du/__pa~M las pad+ma dang ra~M las nyi ma'i dkyil 'khor gyi dbus su ba~M yig dmar po'i mthar/__oM oM oM nas/__swA hA/__zhes pa'i sngags phreng g.yon skor du 'khor ba las 'od zer 'phros 'dus don gnyis byas/__de yongs su gyur pa las rnam snang rigs bdag dang bcas pa'i rje btsun rdo rje rnal 'byor ma'i skur gyur pa ni/__zhabs g.yas brkyangs pas sogs nas/__ye shes kyi me 'bar ba'i dbus na bzhugs pa/__phaiM/__thugs ka'i ba~M yig las 'od zer 'phros pas 'og min nas rje btsun rdo rje rnal 'byor ma la sangs rgyas byang sems dpa' bo mkha' 'gro'i tshogs kyis bskor ba oM badz+ra sa mA dzaH__dzaHhU~M ba~M hoH__gnyis su med par thim/__oM yo ga shud+d+haHsogs/__de'i gnas rnams su sogs/__go cha bkod/__phyi mchod/__nang mchod/__bstod pa rnams bya/__de nas mdun du til bzhag la/__bdag dang sems can thams cad kyi tshe thog ma med pa nas bsags pa'i sdig sgrib nyes ltung thams cad snying ga nas ka~M nag po'i rnam pas 'thon sna sgor sdig pa rwa can gyi rnam par gyur pa til la thim pa de nyid rje btsun ma'i zhal du phul bas lte ba'i gtum mo'i ye shes kyi mes bsreg cing sbyangs par bsam la/__g.yon pa'i mtheb srin gyis til blangs te 'bul zhing /__oM badz+ra DA ki kha kha khA hi khA hi sarba pA paM da ha na swA hA/__zhes pa'am/__oM gsum ma'i rjes su/__kha kha khA hi khA hi sarba pA paM shIn+taM ku ru swA hA/__gang rung gis 'bul/__rdzas rdzogs pa na/__mchod bstod gong ltar dang /__gtor ma yod na gtor chog ltar phul ba'i rjes/__bcom ldan 'das mas bdag dang sems can thams cad kyi sdig pa dang sgrib pa thams cad byang zhing dag pa dang /__mchog dang thun mong gi dngos grub ma lus pa stsal du gsol/__/ces gsol ba gdab/__yig brgya'i mthar/__ma 'byor pa dang /__sogs kyis nongs pa bshags/__oM khyed kyi sogs kyi mthar/__badz+ra muHsa ye shes pa gshegs/__dzaHhU~M ba~M hoHsa dam tshig pa rang la thim/__bdag bskyed rgyas pa dang 'brel na/__go cha bkod cing bsrung ba bya/__gang ltar yang bsngo smon shis brjod rgyas par bya'o/__/de ltar 'bad pas sdig pa thams cad byang zhing /__rje btsun ma'i byin rlabs myur du 'jug par 'gyur ro/__/bzhi pa tshes bcu'i mchod pa la'ang rgyas bsdus gnyis las/__dang po ni/__sku gsung thugs kyi dkyil 'khor gsum bshams shing sgrub cing mchod pa dang /__dbang blang ba dang /__tshogs kyi mchod pa sogs gnas gsar ba'i yig cha ltar ro/__/gnyis pa ni/__rje sa skya pa chen po'i tshes bcu'i mchod pa'i yi ge las ji ltar 'byung ba kun mkhyen rin po ches gsal bar mdzad pa bzhin brjod na sbyor ba dang /__dngos gzhi/__rjes gsum las/__dang po ni/__gnas dben zhing yid dang mthun par tshogs gsag par 'dod na yar ngo dang /__sgrib pa dag par 'dod na mar ngo'i tshes bcur/__gnas khang phyag dar bya zhing dri bzang po'i chus chag chag gdab/__bris sku sogs rten ji ltar rigs pa'i mdun/__ras dmar pos bkab pa'i stegs kyi khar many+dzi'i steng du/__maN+Da lar tsan+dan dmar mo'i chus srin lag g.yon pas chos 'byung gru gsum g.yon skor du bris pa'i nang thams cad tsan+dan dmar po'i chus byugs/__tsan+dan dmar po'i chu ma 'byor na chang bdud rtsir byin gyis brlabs pas de ltar byas la/__dbus su me tog gi tshom bu gcig bkod la bzhag__/de'i g.yas su/__me tog rtsa ba'i yig rnying sogs su mchod pa lnga kho na las ma bshad kyang /__spro na chu gnyis sngon 'gro'i nyer spyod kyang rung /__bdug spos/__mar me/__g.yon du dri chab/__gtor ma/__lha bshos/__mdun du ma da nA'i phud dang /__bA la sogs tshogs kyi yo byad/__gzhan yang nang mchod/__rdor dril/__DA ma ru sogs dgos pa'i yo byad rnams 'du bya'o/__/gnyis pa dngos gzhi la/__thog mar bdag bskyed brgyud 'debs dang skyabs 'gro nas/__thun mtshams kyi lhar ldang ba'i bar bya/__de nas mdun bskyed gsal gdab pa ni/__tshom bu sum+b+has bsang /__swA b+hA was sbyang /__stong pa'i ngang las maN+Dal gyi dbus su chos 'byung la gnas pa'i pa~M las pad+ma dang /__ra~M las nyi ma'i dkyil 'khor gyi steng du/__rang gi lte ba'i ba~M yig las ba~M yig gnyis pa zhig mar me gcig las gnyis mched kyi tshul du chad de las 'od zer 'phros/__'phags pa mchod/__sems can gyi don byas/__tshur 'dus yongs su gyur pa las rje btsun rdo rje rnal 'byor ma'i skur gyur pa ni/__zhabs g.yas brkyang pas sogs nas/__ye shes kyi me 'bar ba'i dbus na bzhugs pa/__zhes pa'i bar bdag bskyed bzhin brjod/__'bar ba'i phyag rgya dang /__phaiM/__rang gi thugs ka'i ba~M yig las 'od zer 'phros pas/__'og min nas rje btsun rdo rje rnal 'byor ma la sangs rgyas byang sems dpa' dpa' bo dang rnal 'byor ma'i tshogs bsam gyis mi khyab pas bskor ba oM badz+ra sa mA dzaHsa spyan drangs/__dzaHhU~M ba~M hoHsa mdun bskyed la gnyis su med par thim par bsam/__oM yo ga shud+d+hoH_sogs kyis brtan par bya/__de'i gnas rnams su nas/__tsaN+Di ka'i ngo bor gyur/__bar gyi go cha bkod/__slar yang rang gi thugs ka nas 'od zer 'phros pas dbang gi lha 'khor lo bde mchog lha drug cu rtsa gnyis kyi lha tshogs mdun gyi nam mkhar oM badz+ra sa mA dzaH__de bzhin gshegs pa thams cad kyis 'di la mngon par dbang bskur ba stsal du gsol/__zhes gsol ba btab pas/__dbang gi lha rnams kyis/__oM sarba ta thA ga ta nas shrI hU~M/__zhes gsungs shing bum pa'i chus spyi bo nas dbang bskur/__sku gang /__dri ma dag__/chu'i lhag ma yar lud pa las rnam par snang mdzad kyis dbur brgyan/__slar yang thugs ka nas 'od zer 'phros pas/__rtsa ba'i bla ma rje btsun rdo rje chos kyi rnam pa can la brgyud pa'i bla ma dpa' bo dang rnal 'byor ma'i tshogs kyis bskor ba mdun gyi nam mkhar oM badz+ra sa mA dzaHsa tshogs zhing spyan drang /__nang mchod/__sum+b+has bsang /__swa b+hA was sbyang /__stong pa'i ngang las ya~M las rlung /__ra~M las me/__ka~M las mi mgo'i sgyed pu gsum gyi steng du/__a las ye shes kyi ka pA la yangs shing rgya che ba dpral ba rang la bstan pa/__de'i nang du go ku da ha na las sha lnga/__bi ra shu ma mu las bdud rtsi lnga rnams gsal ba'i/__'og gi rlung g.yos/__me sbar/__rdzas thams cad khol bas 'od du zhu nas dam tshig pa dang ye shes dbyer med pa'i bdud rtsi'i rgya mtsho chen por gyur par bsam la/__g.yon pa'i mtheb srin sbyar bas chos 'byung g.yon skor du bris te/__oM AHhU~M hoH__zhes brjod pas byin gyis brlabs pas rdzas thams cad la gtor te/__sum+b+has bsang /__swa b+hA was sbyang /__stong pa'i ngang las a las byung ba'i ye shes kyi ka pA la yangs shing rgya che ba rnams kyi nang du hU~M zhu ba las byung ba'i lha rdzas las grub pa'i me tog__/bdug spos/__mar me/__dri chab/__zhal zas/__gzhan yang rol mo la sogs pa mchod rdzas rnams dngas shing thogs pa med par gyur/__oM badz+ra puSh+pe AHhU~M nas/__shap+da AHhU~M gi bar gyis brlabs la/__so so'i phyag rgya dang bcas te/__oM sarba ta thA ga ta badz+ra yo gi ni sa pa ri wA ra puSh+pe pra tits+tsha swA hA nas/__shap+da'i bar dang /__g+haN+De ra Ni tas rol mo bya/__oM gsum ma'i rjes su 'bru gsum btags la nang mchod 'bul/__dpal ldan rdo rje mkha' 'gro ma/__/mkha' 'gro ma yi 'khor los sgyur/__/ye shes lnga dang sku gsum brnyes/__/'gro ba skyob la phyag 'tshal lo/__/ji snyed rdo rje mkha' 'gro ma/__/kun tu rtog pa'i 'ching gcod cing /__/'jig rten bya bar rab 'jug ma/__/de snyed rnams la phyag 'tshal lo/__/zhes pas bstod/__de nas gtor ma nang mchod chu chang gis sbyangs la/__sum+b+has bsang /__swA b+hA was sbyang /__lag pa g.yas g.yon gnyis ka bstan la/__bya khyung gis phyag rgya bcas/__oM AHhU~M ha hoHhrIHsa brlabs/__phaiM/__rang gi snying ga nas 'od zer 'phros pas rang bzhin gyi gnas nas rje btsun rdo rje rnal 'byor ma la sangs rgyas dang byang chub sems dpa' dpa' bo dang rnal 'byor ma chos skyong dang 'jig rten skyong ba'i tshogs kyis bskor ba mdun gyi nam mkhar oM badz+ra sa mA dzaH__pad skor gyi rjes rdo rje thal mo kha gyen du phye ba'i mthar se gol gtog pa dang bcas te/__oM gsum ma'i rjes su/__oM a kA ro sogs btags pa lan lnga'am bdun gyis phul/__oM badz+ra yo gi nI sa pa ri wA ra puSh+pe nas/__shap+da'i bar gyis phyi mchod/__oM badz+ra A ral+li hoH__oM AHhU~M/__rje btsun rdo rje rnal 'byor ma'i zhal du mchod pa dam pa 'bul lo/__/zhes pas nang mchod 'bul/__dpal ldan rdo rje mkha' 'gro ma/__sogs kyis bstod/__'chi tshe mgon dang dpa' bo ma tshogs kyis/__/me tog gdugs dang rgyal mtshan thogs nas su/__/rol mo glu dbyangs sil snyan sogs mchod cing /__/mkha' la spyod pa'i gnas su khrid par shog__/ces gsol ba gdab/__de nas gtor ma gzhan rnams gur zhal sogs chos srung rnams dang /__dur khrod bdag po yab yum dang /__mkha' 'gro spyi gtor gyi bar ji ltar rigs pas btang /__de nas mdun gyi tshogs rdzas rnams la nang mchod 'thor zhing bsang sbyang byin rlabs bdud rtsi ltar byas rjes/__tshogs phud snod gcig tu blugs pa dang /__ma dA na snod gcig tu blugs pa maN+Dal gyi mdun du bzhag__/gtor ma rnams la'ang phul/__slar thams cad nang mchod chu chang gis bran la/__thog mar/__gang gi drin gyis sogs kyis bla ma la phyag bya ba sngon du 'gro bas/__dman pa'i yul las rab 'das shing /__/rgyal ba kun gyi dam tshig mchog__/dngos grub kun gyi gzhir gyur pa/__/bdud rtsi mchog gis mchod par bgyi/__/sgrib pa'i dri ma kun bsal nas/__/rtog pa kun las rnam grol ba/__/bla na med pa'i byang chub sems/__/bde ba chen pos mnyes gyur cig__/ces pas sman phud 'bul/__de nas tshogs phud dang po ni/__zhal zas ro brgya ldan zhing sogs kyi mthar/__oM gu ru bud+d+ha bo d+hi sa twA sa pA ri wA ra oM a kA ro sogs kyis bla ma dang dkon mchog yi dam spyi la phul/__de rjes/__oM gsum ma'i mthar/__a kA ro btags pas rje btsun ma la 'bul zhing /__gzhan yang gur zhal sogs kyi gtor ma yod na so so'i gtor sngags kyis rgyas par 'bul ba'am/__de tsam ma nus na/__oM shrI ma hA kA la ma hA kA li de bI sa pa ri wA ra i daM ba ling+ta kha kha khA hi khA hi/__zhes dang /__oM shrI d+harma pA la tsa tu rmu kha sa pa ri sogs dang /__oM g+hr-i rA dza g+hr-i rA dza ku ma ku ma khum this swA hA/__shrI sh+ma sha nA ad+hi pa ti sa pa ri wA ra sogs kyis 'bul zhing /__mthar 'jig rten pa la mkha' 'gro spyi gtor gyi sngags kyis phul/__thun mong du phyi nang gi mchod pa sngar bzhin mchod/__rtsa ba dang brgyud par bcas pa'i dpal ldan bla ma dam pa rnams dang /__yi dam dkyil 'khor gyi lha tshogs/__dpa' bo mkha' 'gro chos skyong srung ma'i tshogs dang bcas pa rnams kyi zhal du mchod pa dam pa 'bul lo/__/sangs rgyas kyi bstan pa dar zhing 'jig rten du dge legs rgya chen po 'byung ba dang /__bdag cag dpon slob 'khor dang bcas pa rnams kyi chos sgrub pa'i 'gal rkyen bar chad thams cad zhi zhing mthun rkyen thams cad yid bzhin du 'grub par mdzad du gsol/__ces gsol ba gdab/__tshogs kyi yo byad la gtsang sme'i rnam rtog spangs te/__snying ga'i ba~M yig sangs rgyas thams cad 'dus pa'i ngo bor mchod par bsam la/__a ho ma hA su kha ho/__zhes brjod cing tshim par rol/__lhag ma bsdus te chang gi kha phru 'bar ba'i phyag rgya'i bar nas 'thor zhing /__phaiM/__uSh+tsi Ta ba lid+ta b+hak+Sha sI swA hA/__'byung po lhag ma la dbang ba rnams la sbyin no/__/ngoms shing tshim pa'i skal ba dang ldan par gyur cig ces phyi rol du dor/__kol+la i raT+Tha sogs rdo rje'i glu dang /__bkra shis gang zhig chos kyi dbyings las legs byung ba/__/he ru ka dpal 'jigs byed rgyal po 'bar ba'i sku/__/shes rab phag mo'i pad+mar rdo rjes rol mdzad pa'i/__/bden pa des kyang bde mchog la gnas bkra shis shog__/sems can thams cad bde gyur cig__/sems can thams cad skyon med par/__/gang gis lam gyis grol 'gyur ba/__/de yis sangs rgyas myur thob shog__/ces sogs bkra shis dang smon lam bya'o/__/gsum pa rjes ni/__mchod pa rnams kha gsos shing /__bsang sbyang byin rlabs bya/__oM sarba ta thA ga ta badz+ra yo gi nI sa pa ri wA ra puSh+pe sogs kyis phyi mchod dang /__oM AHhU~M gis nang mchod phul/__dpal ldan rdo rje sogs kyis bstod/__rje btsun rdo rje rnal 'byor mas bdag dang sems can thams cad dag pa mkha' spyod kyi gnas su 'khrid par mdzad du gsol/__'jig rten dang 'jig rten las 'das pa'i dngos grub ma lus pa stsal du gsol/__/zhes gsol ba gdab/__he ru ka'i yig brgya lan gsum gyis lhag chad kha bskang /__ma 'byor pa dang sogs kyis nongs par gsol/__rten yod na/__'dir ni gzugs dang sogs brtan bzhugs dang /__med na/__oM khyed kyi sogs kyis/__tshom bu'i ye shes pa dang /__gtor ma_gron gyi ye shes pa rnams gshegs/__dzaHhU~M ba~M hoHsa dam tshig pa rnams rang la gnyis su med pa thim par bsam la/__rang gi gnas rnams su sogs go cha bkod/__bsrung ba bya/__dge ba 'di yis sogs bsngo ba dang /__mkha' spyod zhal bzang blta ba'i smon lam gdab/__phun tshogs dge legs sogs kyis shis pa brjod cing me tog gi char sil ma dgram/__las kyi rjes mi mngon par bya'o/__/de ltar bzlas bsgom rnam pa gnyis dang /__tshes bcu'i mchod pa ma chags par nyams su blangs pa ni las dang po pas mkha' spyod sgrub pa'i lam gyi gtso bo yin pas shin tu gal che'o/__/lnga pa gtor ma'i rnal 'byor ni/__dku bag ste sha chang gi dam rdzas nges par tshang zhing bsgrub pa'i bdud rtsi ril bu dang sbyar ba'i gtor ma pad+ma'i snying po ltar zlum pa/__'phral gtor la pad 'dab dang /__'dzin gtor sogs la mtheb kyus bskor ba gtsang sbra dang ldan pa bshams/__tshes bcu'i mchod pa'i skabs su bshad pa ji lta ba bzhin phul ba las/__mchod pa'i skabs su chu gnyis sngon 'gro'i nyer spyod kyis mchod pa tsam gyi khyad par ro/__/'dis ni bar chad thams cad zhi ba dang bsam pa'i don 'grub pa sogs dgos pa khyad par can mang ngo /__/de ltar dbang po rab rnal 'byor bcu gcig po 'di ma chags par nyams su blangs zhing /__tshes bcu'i mchod pa la brtson pa tsam gyis tshe 'dir lus ma spangs par mkha' spyod kyi dngos grub thob par 'gyur la/__'di nyid bskyed rim phag mo mkha' spyod ces gtso bor gsungs pa ma gtogs/__don gyis bskyed rdzogs zung 'jug yin te mngon rtogs kyi dkyus gcig la dbang bzhi'i lam mtha' dag tshang ba'i phyir ro/__/dbang po 'bring gis gzhi'i bsnyen pa mthar phyin pa na/__lang+ka li'i shing la brten nas sin+d+hU ra'i bsgrub pa tshul bzhin du byas pas rdo rje rnal 'byor ma mi mo'i rnam pa can gyis rjes su bzung zhing mkha' spyod kyi grong du 'khrid pa ste/__de'i tshul ni/__deng dus lag len la 'debs pa nyung bas 'dir ma bris la/__rtogs par 'dod na khrid yig chen mo dang /__'jam mgon kun dga' bsod nams kyi yig cha sogs las shes par bya'o/__/dbang po tha mas de lta bu lag tu ma blangs pa'am/__blangs kyang ma grub na bzlas bsgom la brtson pas/__'chi kha'am bar dor bzlas bsgom byed pa'i snang ba shar ma thag rnal 'byor mas mdun bsus te mkha' spyod du 'khrid par nges na'ang /__ches myur bar byed pa'i thabs lam gyi chad mthud 'pho ba'i rnal 'byor nyams su blang ba'i tshul la/__sbyang ba dang /__las la sbyor ba'o/__/dang po la'ang rje btsun yab yum zhal sbyor dang /__yum rkyang gi 'pho ba gnyis las/__'dir phyi ma cung zad bshad na/__gsal gdab pa dang sbyang ba dngos gnyis las/__dang po ni/__bdag bskyed dang 'brel na thun mtshams kyi lhar gsal bzhin pa'i ngang dang /__ma 'brel na skyabs sems sngon du 'gro bas rang skad cig gis rnal 'byor mar gsal gdab gang ltar yang /__rang rdo rje rnal 'byor mar gsal ba'i lus kyi dbus drang por rtsa dbu ma phyi dkar la nang dmar ba/__rtsa ba phra ba mda' smyug tsam la/__rtse mo sbom pa sba lcag tsam pa/__yar sna spyi gtsug tshangs bug tu zug cing rgya mthong ltar kha bye ba/__mar sna lte bar zla gdan la zug pa/__chos 'byung dmar po gru gsum pa'i nang du zug par bsgom kyang rung /__de'i steng du rang gi rlung sems dbyer med pa'i ngo bo ba~M yig gam/__thig le dmar po che chung ril ma tsam pa 'phur la khad pa zhig gsal gdab/__rang gi spyi bor seng khri pad zla 'jigs byed dus mtshan gyi gdan la rtsa ba'i bla ma rdo rje rnal 'byor ma'i rnam par bzhugs pa la/__brgyud pa'i bla ma gnas gsum gyi dpa' bo mkha' 'gro chos skyong srung ma'i tshogs kyis bskor ba/__de dag kyang 'ja' gur gyi dbus na bzhugs shing /__me tog gi char chen po rgyun mi chad par 'bebs pa/__'ja' mdung tshugs su zug cing spos kyi dri zhim po 'thul pa sogs mkha' spyod dngos dang mtshungs par gyur/__ces brjod cing bsam/__slar yang rang gi thugs ka nas 'od zer 'phros pas rtsa brgyud kyi bla ma yi dam sangs rgyas byang sems sogs skyabs yul thams cad oM badz+ra sa mA dzaH__dzaHhU~M ba~M hoH__gnyis su med par thim pas skyabs gnas thams cad 'dus pa'i ngo bor bsam mo/__/gnyis pa sbyang ba dngos ni/__rang gi lus longs spyod dge tshogs rgya mtsho dang bcas pa rgyur byas pa las byung ba'i mchod sprin bsam gyis mi khyab pas mchod par mos te/__oM gu ru badz+ra yo gi nI sa pa ri wA ra ar+g+haM nas/__shab+da'i bar gyis mchod/__dpal ldan rdo rje mkha' 'gro sogs kyis bstod/__spro na brgyud pa'i gsol 'debs dang /__gang ltar yang /__dus gsum sangs rgyas thams cad kyi ngo bo bla ma mkha' spyod rdo rje rnal 'byor ma la gsol ba 'debs so/__/bdag 'dzin blo yis thongs par byin gyis rlobs shig__/dgos med rgyud la skye bar byin=__lam mchog 'pho ba 'byongs par=__'phyugs med mkha' spyod 'grub par=__zhes tshar grangs ci nus brjod cing gsol ba phur tshugs su btab la/__'og rlung drag tu 'then pa dang mnyam du gshang sgo'i rlung g.yos zla dkyil la phog__/rang sems ba~M yig gam thig le gsal ba de nyid dbu ma'i nang nas skar mda' 'phang ba ltar song /__bla ma rje btsun ma'i gsang ba nas zhugs te thugs ka'i ba~M yig la sib kyis thim par bsam la sems bzung /__yang steng rlung rdubs pas bla ma'i thugs ka nas byung ste sngar ltar gdan la 'khod par bsam la rlung bum pa can kha sbyar du 'dzin/__slar yang mchod bstod bya ba'am/__gsol 'debs kyi mthar sngar bzhin dmigs pa'i rten goms pa la bslabs pa ni rlung gi 'pho ba dang /__skabs su/__I hi ka?__/zhes brjod pas thig le spar ba dang /__ka hi/__zhes pas 'bebs pa ste sgras 'pho ba'ang nyams su blangs/__'di gnyis kyi snga ma 'byongs dka' yang 'byongs phyin brtan pa yin la/__phyi ma 'byongs sla yang brtan dka' ba yin zhes gsungs/__de ltar dus rgyun du lan bdun sogs dang /__'di kho na sbyang ba'i tshe zhag bdun sogs thun bzhir bcad la 'bad rtsol drag pos rtags ma byung bar nyams su blang bar bya zhing /__rtags ni spyi bo za ba dang /__skrangs pa dang /__chu ser 'dzag pa dang /__sgrub khang la 'ja' zug pa sogs 'byung ngo /__/thun las ldang ba/__rlung sems mar phabs pa'i rjes/__mtha' skor gyi skyabs yul rnams bla ma rdo rje rnal 'byor mar thim/__de nyid rang gi tshangs bug nas brgyud snying gar dbu ma'i nang du zhugs/__spyi gtsug sna tshogs rdo rje sra zhing 'thas pas bkag par bsam/__rtags byung ba sogs kyi tshe tshe sgrub byed par 'dod na/__snying ga'i rnal 'byor ma 'chi med tshe'i bdud rtsi'i chu rgyun du gyur nas lus kyi nang thams cad gang bas 'chi med tshe'i dngos grub thob/__ba spu'i bu ga tshun chad kyang bdud rtsi'i zil pa phram mer yod par bsam la rlung bum can ci nus su 'dzin/__mthar bdag bskyed dang 'brel na go cha bkod pa sogs dkyus ltar dang /__ma 'brel na bsngo smon bkra shis sogs bya'o/__/gnyis pa las la sbyar ba ni/__nges pa'i 'chi ltas byung zhing dus la babs pa'i tshe/__sngar bzhin gsal gdab/__khyad par rang gi lus longs spyod dgra gnyen bar ma'i 'gro ba dang bcas pa bla ma rnal 'byor mar phul nas/__chags sdang rmongs gsum gyi zhen pa btsan thabs su spangs/__dam tshig nyams chags bshags sdom gyi 'dun pa drag po bya/__dmigs gnad sngar bzhin la rang sems bla ma'i thugs kar thim/__bla ma rje btsun mar gsal ba yang mkha' spyod dag pa'i zhing du gshegs par bsam la/__dbyings stong nyid du rjen ne/__gdangs gsal rig tu lam me/__de gnyis dbyer med pa brjod bral blo 'das kyi ngang du mnyam par bzhag pas/__de'i ngang du dbugs chad na 'pho ba thebs pa yin no/__/gal te gza' gdong thug lta bu rkyen glo bur bas dmigs pa'i gsal 'debs rgyas pa lang ma byung na/__rang sems dang bla ma'i thugs dbyer med du bsres pa'i ngang la mnyam par bzhag__/de ltar dran pas ma zin pa'am/__'pho ba ma 'byongs nas bar do'i snang ba shar na/__de sbyang ba'i tshul ni/__da lta nas gang shar gyi snang ba spyi dang /_khyad par 'jigs skrag sogs glo bur du 'char ba'i tshe bar do'i snang ba shes par byas la/__rang gzhan gyi snang ba thams cad sbyang bsgyur gyis lha dang gzhal yas khang du bsgyur/__rig pa brjod med du cham mer 'jog pa la bslab pas bar dor yang dran pas zin nas lam gyi 'phro mthud de grol bar 'gyur ro/__/dbang po shin tu tha mas 'da' ka ma'am/__bar do'i gdams ngag ma theb na/__skye ba phyi mar lam gyi 'phro mthud nas mkha' spyod kyi go 'phang don du gnyer ba ste/__de nyid 'grub pa'i slad du mkha' spyod zhal bzang blta ba'i smon lam sogs gdab cing /__bla ma la mos gus dang ma bral na nges par 'grub pa yin no/__/de rnams kyis gtso bor bskyed rim gyi rnal 'byor yan lag dang bcas pa bstan nas/__/gnyis pa rdzogs pa'i rim pa la/__spyir chos nyid dngos su ston pa dang /__brgyud nas ston pa gnyis las/__'dir phyi ma dpe gsum gyis don gcig gtan la 'bebs par byed pa la/__gzhi chos can 'khor ba'i dus su 'khrul snang gi gtso bo rtsa rlung thig le thams cad kyi khyab byed nang gi pho nya mchog rtsa dbu ma kho na la gnad du bsnun pas/__gnyis med kyi ye shes myur du 'char ba'i gnad shes par byas nas/__de la gnad du bsnun pa'i lam ji ltar bsgoms pa'i gnad rje btsun yab dang thun mong dang /__yum rkyang thun mong ma yin pa'i rtsa dbu ma'i rnal 'byor gnyis las/__phyi ma la'ang chags can pho nya'i lam la dga' ba dang /__chags bral rnal 'byor gyi lam la dga' ba gnyis kyi phyi ma ltar bsgom pa'i tshul la/__thog ma sbyang ba'i tshul sogs rgyas par 'khrid yig chen mo las shes par byas nas/__'dir rgyun du nyams su blangs pa'i tshul cung zad tsam bshad na/__rtsa dbu ma kha dbye ba'i rnal 'byor dang /__dbye nas bsgom pa'i man ngag gnyis las/__dang po ni/__rgyan gyi nyams len la zhar byung gi rdzogs rim gyi mjug tu lus gnad rnam snang chos bdun dang ldan pas/__rang rnal 'byor ma'i lus dbus drang por rtsa dbu ma mar sne lte 'og sor bzhir slebs pa/__yar sne spyi bor zug pa'i nang du byang sems haM yig dkar po mgo thur bstan gyis mtshan pa/__g.yas su ro ma dmar mo/__g.yon du rkyang ma dkar mo/__gnyis ka'ang gro sog 'bring po tsam yar sne spyi gtsug nas gug ste sna bug gnyis su ha re zug pa/__mar sne lte ba'i thad du dbu ma dang sbubs gcig tu gyur pa'i nang du/__tsaN+Da lI ra~M dmar po me'i rang bzhin can ril ma tsam gyis mtshan pa/__me 'bar la khad pa de'i 'og tu rlung dkyil ljang nag sran ma bkas pa tsam gsal btab/__rlung ro dgu phrugs su phyag len ltar bus la/__'og rlung phyed 'then tsam dang /__steng rlung rdzogs par rngubs/__slar 'og sgo 'byed 'dzum gsum tsam gyis 'og rlung rdzogs par drangs pas rlung dkyil la phog__/rlung g.yos ra~M yig las me lce dmar nyug nyug 'bar bar bsam la bum can 'dzin/__mthar 'dzin med pa'i lta bas rgyas 'debs/__de nas lus khol bur drod skye ba sogs cung zad goms pa na/__rim gyis rtsa gsum gyi nang thams cad mes gang /__de nas rtsa phran thams cad kyang mes khengs te sdig sgrib bag chags dang bcas pa'i ngo bo khams snyigs ma thams cad cham cham bsregs/__dwangs ma bdud rtsir zhu ba dang /__spyi bo'i haM la reg pas bdud rtsi'i rgyun dngul chu lta bu'i dwangs mas rtsa thams cad khengs te bde drod bsam gyis mi khyab pa skyes par bsam la rlung bum can 'dzin/__gnyis pa bsgom pa'i man ngag la/__rlung lus la gnas pas bde ba dang /__sems la zhugs pas stong par bsgrub pa'i rnal 'byor gnyis las/__dang po ni/__ro rkyang gnyis mi dmigs par bzhag__/dbu ma sba lcag 'bring po tsam yar sna spyi gtsug nas smin mtshams su gug pa'i nang du/__chos 'byung dmar ser 'od kyi rang bzhin can gyi rtsa ba phra ba dbu ma'i nang du zug pa la bug pa thal le yod pa/__mar sne gsang gnas kyi pad+ma'i nang du ha re yod pa'i nang chos 'byung snga ma lta bu zhig gsal gdab/__smin mtshams kyi chos 'byung nang thig le dkar la sngo mdangs chags pa/__'od kha dog lnga 'phro ba sran ma tsam zhig gsal la/__'og rlung cung zad 'then/__steng rlung cung zhig rngubs pa'i rkyen gyis de las 'od kha dog lnga ldan 'phro bar bsam la sems bzung bas smin mtshams su na lhang lhang ba'am bde ba skye ba sogs kyi rtags byung na/__thig le de bug pa nas yar song /__spyi gtsug gi dbu ma'i nang du ri rtser skar ma shar ba bzhin 'od phram phram du gnas par bsam la sems bzung /__mthar de las bde chen gyi thig le shel dkar bzhu ba lta bu pad+ma'i snal ma tsam pa zhig nar gyis babs/__spyi bo/__mgrin pa/__snying ga__/lte ba/__gsang gnas rnams kyi dbu ma'i nang du babs pa la sems bzung bas yas babs kyi dga' bzhi'i ye shes skyes par bsam/__de nas gsang gnas kyi chos 'byung gi nang nas kyang phyir sor phyed dang gsum nyug ge yod pa la sems gtad/__slar chos 'byung gi bug pa nas gyen du byung ste/__lte ba nas spyi bo'i gzhir gnas kyi thig le la thim pa'i bar gnas so sor sems bzung bas/__mas brtan gyi dga' bzhi skyes par bsam la rig pa 'dzin med du bzhag__/gnyis pa ni/__dbu ma chos 'byung bcas sngar bzhin gsal ba'am/__yang na chos 'byung mi dmigs par bzhag__/dbu ma'i yar sna smin mtshams dang /__mar sna gsang gnas kyi mtshams su thad bcad du yod par bsam/__de nas smin mtshams kyi chos 'byung gi nang ngam dbu ma'i yar sner thig le bsgom pa de la sems bzung ste spyi gtsug tu spo pa'i bar sngar bzhin la/__spro na bde chen gyi thig le 'bebs bzlog gi dmigs pa yang bya/__gang ltar yang spyi bo'i thig le la sems zhugs pa bzhin cher gyis gtad pas/__de las 'od zer kha dog lnga ldan 'ja' tshon lta bu bun gyis 'phros/__dbu ma'i nang brgyud rtsa khams gang la reg pa thams cad 'ja' tshon du song /__de nas cher 'phros pas lus ril po/__gnas khang /__lung pa/__yul phyogs/__mthar khams gsum thams cad 'od kha dog lnga 'ja' tshon lta bu khra shig shig__na bun long long du gyur par bsam la sems bzung /__mthar de thams cad nam mkha' la du ba yal ba bzhin bde stong gi ngang du mi dmigs par bsam pa'am/__yang na de thams cad rang gi lus la thim/__lus spyi bo'i thig le la thim/__de nam mkha' la 'ja' yal ba ltar chos nyid kyi ngang du thim par bsam/__sdud rim snga ma ltar na/__rang lus lha sku rtsa thig dang bcas skad cig gis lam gyis gsal 'debs/__phyi ma ltar na/__thog mar rang gi smin mtshams kyi thig le de khra chem gyis grub/__de nas rim bzhin du lus rtsa dang bcas pa grub par bsam la dmigs pa bskyar/__de ltar na rlung lus la gnas pas khams snyigs ma dngas ma dang /__sems la zhugs pas dngas ma 'ja' lus su bsgyur par byed pa'i thabs dam pa ste/__tshul 'di la goms pas cir snang bde chen ye shes su 'char ba na/__gsang ba'i spyod pas bogs dbyung zhing /__phyogs las rnam rgyal gyi spyod pa dang /__phyag rgya'i nye rgyus mtshams sbyar te tshe gcig gis mchog gi dngos grub mngon du byed par 'gyur ro/__/gsum pa lam gyi yan lag pra se na dbabs pa sogs ni/__deng sang lag len 'debs pa nyung bas 'dir ma bris te/__rje btsun sa skya pa'i gsung rab rnams las shes par bya zhing /__'dir 'phros don du bsnyen pa byed tshul gyi lag len cung zad bshad na/__sbyor ba/__dngos gzhi/__rjes so/__/dang po ni/__rten gyi gang zag nges 'byung dang snying rje chen pos rgyud sbyangs te dbang thob cing dam tshig la gnas pa/__byin rlabs kyis smin zhing nyams khrid zab mo thob pa chags med kyi rgyun dang ldan zhing brtson 'grus yal bar mi 'dor bas/__gnas dben zhing yid dang mthun la rang dbang 'dus pa'i gnas su/__mar ngo'i tshes bcu lta bu dus khyad par can gyi snga dro gnas khang phyag dar bya/__rang nyid kha nub tu phyogs pa'i mdun rnal 'byor ma'i sku bris 'bur gang rigs kyi mdun du/__gtor ma lnga tshar sogs ji ltar rigs pa mchod pa dang bcas pa bshams/__bsgul bskyod mi dgos pa'i mal 'og tu sna tshogs rdo rje bris pa'i steng 'bru dkar dang ku sha'i chun po dgram/__mdun du nang mchod rdor dril/__DA ma ru sogs nyer mkho'i yo byad dang /__mal sa de min pa zhig tu rang 'khod pa'i mdun gtor ma cha gsum sogs 'og tu dgos pa'i yo byad rnams sta gon bya/__gnyis pa ni/__phyi dro'i cha la babs pa nas/__grogs dam tshig pa dang bcas te cha gsum yid ches pa btang pa'am/__sngon 'gro gtor ma dkyil chog nas 'byung ba bzhin la/__mi 'dra ba'i khyad par/__rje btsun rdo rje rnal 'byor ma'i bsnyen sgrub zab mo bgyid par 'tshal na/__zhes dang /__bsnyen sgrub kyi bya ba mthar ma phyin par zhes bsgyur/__gtor ma phyir dor ba'i tshe/__mdun mkhar bla ma yi dam 'kha' 'gro chos skyong thams cad mngon sum bzhin du bzhugs par mos te/__bden stobs brjod pas de rnams kyi sku las rdo rje khro bo dang me dpung mtshon cha'i tshogs dpag tu med pa spros/__yungs kar kyang 'bru re re nas sprul pa'i pho nya srin po khros pa lta bu bsam gyis mi khyab par gyur te bgegs thams cad rgyang ring du bskrad/__bsad bcad btub cing chos dbyings su thim/__sprul pa'i khro bo'i tshogs rnams tshur 'dus te srung ba'i gur du gyur par bsam la/__gu gul gyis bdug__/yungs kar gyis brab/__mtshams g.yog dang sman pa sogs dmigs khong du bcug dgos pa rnams kyang 'jug__/spro na sher snying bdud bzlog dang bcas pa'ang bya/__de nas sgo yi phyi rol du tho dkar po btsugs la/__rang nyid grogs dang bcas rdor dril yungs kar spos sogs thogs la/__rgyas par rmor chen gyis mdzad pa'i tho 'dzugs ltar bya/__ngor lugs la cha gsum tsam las gzhan mi mdzad/__mchan/__de tsam mi nus kyang /__tho 'jam mgon kun blo'i gsungs/__mchan/__sum+b+ha ni sogs brjod cing yungs kar gyis brabs/__gu gul bdug__/me tog dang bcas thal mo sbyar te/__yed+harmA tshar gsum/__phyogs bcu na bzhugs pa'i sogs brtan bzhugs spyi ltar la/__bye brag tu tho 'di la rgyal chen bzhi 'khor dang bcas pa brtan par bzhugs nas bdag gi bsnyen sgrub mthar ma phyin gyi bar du/__phyi'i bar chad nang du mi gtong zhing /__nang gi dngos grub phyir mi yal bar bsam pa'i don thams cad yid bzhin du 'grub pa'i stong grogs phrin las rgya chen po mdzad du gsol/__su pra tiSh+Tha dang /__ye d+harmA brjod cing me tog 'thor/__bkra shis brjod/__nang du log la rang nyid mal du 'khod/__nges 'byung dang byang sems gsal gdab la/__brgyud pa'i bla ma dang /__rtsa ba'i bla ma'i sku bstod mos gus shug drag pos byas/__de nas gnas yo byin rlabs sngon du 'gro bas/__skyabs 'gro nas bsam mi khyab pa'i bar tshar lugs ltar na gnas gsar rdo rje 'chang dang /__ngor lugs ltar na rje dkon mchog lhun grub kyi yig cha'i dkyus nas 'byung ba ltar nyams su blangs rjes thun mtshams kyi lhar ldang zhing gtor ma 'bul/__go cha bkod cing bsrung ba dang bsngo smon rgyas par bya/__gong gi yig cha de gnyis ma 'byor na sngon du kho bos bshad pa'i sgrub thabs 'di kho na ltar nyams su blangs kyang rung ngo /__/slar srod thun skyabs 'gro nas bsdu rim par dkyus ltar la/__nyal ba'i rnal 'byor gyis nyal/__sang nangs par ldang ste bdud rtsi myong ba dang /__skyabs 'gro sogs dkyus ltar/__nyi ma shar tsam gyi tshe thun grol/__gtor ma brgya rtsa dang tshe sgrub sogs byed na skabs 'dir bya/__de nas thun tshugs la nyin phyed ma zin tsam la grol/__kha zas kyi rnal 'byor dang /__phyag bskor mdo 'don pa sogs dge ba'i bya ba ci 'grub bya zhing cung zad ngal gso/__/de nas gnas yo byin rlabs sngon du 'gro bas thun la zhugs/__nyi ma nub la nye ba na grol nas gtor ma'i rnal 'byor rgyas par bya/__spyir grub na thun snga ma gnyis kyi mjug tu'ang gtor bsngo bya bar gsungs/__bir srung dang brag rdzong ma sogs srung 'khor gyi rigs yod na nyams su blangs/__de nas srod thun la 'jug cing /__nam gung ma zin tsam la grol nas nyal ba'i rnal 'byor sogs sngar bzhin bya ste/__de ltar thun bzhi'i spyir tshar lugs la thun bzhi dang /__ngor lugs la thun gsum mdzad kyang /__skabs 'dir rje rdo rje 'chang gis kyang /__thun bzhi bsgom zhing gus pas gsol btab pas/__zhes gsungs pas thun bzhi kho na legs so/__/mchan/__tshul gyis thog mar thun rnams la sngon 'gro/__skyabs 'gro/__rdor sems/__maN+Dal rnams rim pa gtso bor byas te/__rab 'bum ther dang /__de min kyang mtshams kyi dngos gzhi yun ring thung la ltos te zhag gsum/__bdun sogs ji ltar 'os pa bya/__dngos gzhir gtso bo ngag bzlas dang /__thun mjug tu yid bzlas/__zhar byung gi rdzogs rim mkha' spyod sgrub pa'i lam khyad par can bsam mi khyab thun min rnams ma chags par bya/__gzhan 'pho ba dang /__rtsa dbu ma'i rnal 'byor sogs kyang ji ltar rigs par bsgom/__lam dus ni thor thun grol nas snga thun mtshugs pa'i bar bya zhing /__de min kha 'don chung ngu'i rigs rnams thun mtshams gang rung la ma chags tsam bya/__thun la zhugs nas ma grol bar ja sogs bzhes kyang ngag mtshams dam par bcad/__thog mar khog grim la sos dal ba/__bar du sgo gsum 'jug pa chig bsgril/__mthar je lhod la btang nas mtshams dang zhe ma 'gras par bslab/__bzlas pa 'gro che ba dang nyams dang rmi lam gsal ba sogs bzang rtags dang /__bzlas pa 'gro ba bul zhing nad gdon sogs rkyen ngan gang byung yang re dogs kyi rnam rtog tshab tshub mi bya bar blo bla ma dang dkon mchog la gtad nas lhod kyis glod/__dam bca' yal bar mi 'dor ba'i snying rus bskyed/__rig pa brjod med du cham mer bzhag pas gegs thams cad rang grol du 'gro/__bzlas pa'i thog mar/__thod pa'am bo d+hi tsi'i phreng ba brgya rtsa brgyad la/__oM pa de pa de ma hA dz+nyA naM sarba bud+d+ha ma yaM b+ha be ta hU~M hU~M hU~M ho ho ho AHkhaM swA hA/__lan gsum bzlas pa'i kha rlangs phreng bar phog par byas te byin gyis brlabs/__dngos gzhi'i bzlas dmigs ni gtso bo sngar bshad pa bzhin dang /__dmigs pa gcig kho nas skyo na/__res lha sku snang la rang bzhin med par gsal lam me ba la sems gtad/__res sku yi cha shas re re nas sems 'dzin/__res sngags kyi yig 'bru dang sgra tsam la sems bzung /__res gnas lugs brjod bral gyi ngang du ngal gso/__res 'od zer gyi rtse las mchod pa'i rnam grangs bsam gyis mi khyab pa spros te sangs rgyas dang byang chub sems dpa' rnams la mchod pa dang /__res snod bcud thams cad lhar gsal ba dang /__de thams cad kyis kyang oM gsum ma'i sgra 'ur dir gyis sgrogs par bsam la bzla ba sogs dmigs pa'i rtsal sbyang bas gcig grogs gcig gis byas te rnal 'byor la bogs thon par 'gyur zhing /__mdor na sems ma yengs pa'i ngang du bzlas ba bya ba ni shin tu gal che'o/__/bzlas pa'i grangs ni/__gzhi'i bsnyen par 'bum phrag bzhi/__khri phrag bzhi/__stong phrag bzhi/__brgya phrag bzhi rnams kyis don 'grub par gsungs la/__'bru 'bum byed na 'bum phrag so bdun mdzad pa phyag len no/__/de yang sgrub pa po nam 'chi cha med/__'khor ba la nges 'byung /__sems can la snying rje/__bla ma la mos gus rnams lam gyi srog tu bzung /__khas blangs pa'i dam tshig dang sdom pa la gces spras su byas nas rtse gcig tu bsnyen na dngos grub rnam gnyis myur du 'grub pa ni/__rgyud sde'i bzhugs tshul/__bsgom bya'i lha/__bzla bya'i sngags/__zab mo'i rdzogs rim rnams kyi sgo nas gzhan las ches khyad du 'phags pa'i dbang gis te/__de yang rgyud sde'i bzhugs tshul gyi dbang du byas na/__rgyud sde thams cad kyi mthar thug pa ni rnal 'byor gsang mtha'i rgyud yin la/__de la'ang lU nag dril gsum rnal 'byor ma dang bzhi las/__phyi ma 'di kho na mchog tu zab pa'i phyir yang rtse nA ro mkha' spyod ces grags so/__/bsgom bya'i lha yi dbang du byas na/__ri rab sum cu rtsa gnyis kyi rdul gyi grangs dang mnyam pas mtshon/__mkha' 'gro ma bsam gyis mi khyab pa ni/__mkha' 'gro ma bye ba phrag phyed dang bzhi 'dus/__de stong phrag bdun cu rtsa gnyis su/__de bdun cu rtsa bdun du/__de so bdun du/__de nyi shu rtsa bzhir/__de yang brgyad/__de'ang rdo rje rnal 'byor ma 'di kho na la 'du ba'i phyir/__'di bsgom pas dpa' bo mkha' 'gro ji snyed thams cad bsgom par 'gyur ba nyid do/__/bzla bya'i sngags kyi dbang du byas na/__gsang sngags oM gsum ma 'di nyid phag mo so bdun ma'i dkyil 'khor gyi lha nyid yi ge'i gzugs su shar ba yin cing /__de las 'phros te sngar smos pa bzhin dpa' bo mkha' 'gro bsam gyis mi khyab par shar ba'i phyir na/__sangs rgyas byang sems dpa' bo mkha' 'gro thams cad kyi ngo bo 'khor lo bde mchog lha drug cu rtsa gnyis kyi sngags thams cad 'dus par bshad pas de thams cad kyi byin rlabs zhugs par 'gyur ba dang /__dam tshig dang ldan pa'i sngags pas bklags pa tsam gyis don thams cad grub pa'i phyir/__bde mchog rtsa rgyud las/__'di las shin tu mchog gyur pa/__/'jig rten gsum na ci yang med/__/sogs nas/__bklag pas 'di dag thams cad 'grub/__/zhes sogs rdo rje 'chang rang nyid kyis rgya cher bsngags pa mdzad do/__/rdzogs rim gyi dbang du byas na/__rtsa rlung thig le thams cad dbu ma ye shes kyi rlung thig le dang bcas pa 'ba' zhig la 'dus pas/__'di kho nar gnad du bsnun pas gzhan thams cad shugs kyis 'byongs zhing dngos grub myur ba'i zab gnad khyad par can yin pa'i phyir ro/__/de lta bu'i lam zab mo 'di la brten nas 'phags bod du mkhas grub bsam gyis mi khyab pa zhig 'ja' lus mkha' spyod kyi go 'phang mngon du mdzad pa'i tshul la dran pas nye bar bzhag ste/__bdag legs su 'dod pa'i skal bzang rnams kyis tshul 'di kho nar nyams len gyi snying por dril bar bya'o/__/gsum pa ni/__bsnyen pa'i grangs thebs pa dang grub na zhag gsum gyi bar phyi rol mchod pa bya/__gnas de nyid dam phyi rol gzhan gyis mi mthong ba'i sar kha skong gi sbyin sreg__/lha sngags oM gsum ma dang rdzas til 'ba' zhig la grangs bzung nas bsnyen pa ji tsam song ba'i bcu cha 'bul/__de nas gza' skar bzang ba'i thor thun gyi mjug tu gtor bsngo rgyas par bya zhing gtor ma 'bul/__sgo drung gi rgyal chen la gtang rag dang /__gshegs gsol bya/__de nas grogs dam tshig dang ldan pa rnams dang rim gyis 'phrad pa sogs bya'o/__/de dag gi gnas skabs thams cad du rgyas 'debs par byed pa chos nyid dngos su ston pa'i nyams len gyi gnad cung zad bshad na/__tshar chen rdo rje 'chang chen pos/__skye 'gags gnas gsum bral ba gdod ma'i gshis/__/zhes sogs gsungs pa'i don/__'khor 'das snang srid kyis bsdus pa'i chos thams cad rang sems kho na'i rnam 'phrul las don logs su grub pa rdul tsam yang med cing /__sems de la yang kha nang du ldog nas cher gyis bltas pas/__dang por skye ba'i rgyus stong /__bar du gnas pa'i ngo bos stong /__mthar 'gags pa'i 'bras bus stong pas na gdod ma nas rang chas su gnas pa'i gshis lugs ngo bo stong pa/__mtshan nyid gsal ba de gnyis dbyer med pa'i zung 'jug__/nyams su myong bzhin du brjod pa'i mtha' thams cad dang bral ba'i blo 'das kyi rig pa skad cig ma 'di ka don dam lhan cig skyes pa'i rdo rje rnal 'byor mar rang ngo 'phrod nas thag bcad nges shes bskyed/__'dzin pa ma zhugs par byas te nyams len gyi rgyun skyong /__rnam rtog gang skyes kyang de ka rang gi steng du bzo bcos ma byas par klod nas sems la sems kyis blta ba'i tshul gyis ma yengs tsam du bzhag pas rtog pa kho rang gsal stong zung 'jug tu rjen lhang gis 'char ba zhig yong /__des mtshon te bskyed rdzogs bsgom pa la sogs mnyam bzhag dang rjes thob kyi gnas skabs thams cad du lta ba 'khor 'das dbyer med kyi nyams len dang ma bral ba gal che ste/__de'i tshul yang /__bla ma sa skya pa chen pos/__bskyed rim rtog pa yin mod kyang /__/rtog pa'i ngo bo sems yin te/__/sems kyi mtshan nyid gsal rig yin/__/gsal rig rang bzhin stong pa nyid/__/stong pa gdod nas chos kyi dbyings/__/'khrul pa chos kyi dbyings nyid du/__/shes pas rtog pa thams cad kyang /__/ji ltar bsgom kyang mi rtog nyid/__/btsal yang 'khrul ba ga la srid/__/ces gsungs pa ltar/__sems kyi gshis lugs brjod bral gyi ngang nas/__gdangs bde chen du ma 'gags pa'i rang rtsal lha dang gzhal yas khang sogs dwangs pa'i mkha' la 'ja' tshon shar ba ltar snang stong zung 'jug chen po'i lam la bslabs pas bskyed rdzogs dbyer med dang cir snang ye shes su 'char ba'i don la rim gyis dbang 'byor bar 'gyur ro/__/de ltar rje btsun rdo rje rnal 'byor ma'i lam gyi rim pa zab mo 'di la/__spyir 'phags bod kyi mkhas grub du mas bkral ba'i gzhung dang /__khyad par rang lugs nyams len snying por dril ba'i dbang du byas na/__ngag 'don thun mong tsam du tshar chen dang /__ngor chen dkon mchog lhun grub/__thun mong ma yin par gnas gsar rdo rje 'chang gi sgrub thabs nag 'gros ma dang /__de dag gi go don 'jam dbyangs mkhyen brtse'i khrid yig chen mo la gzhi byas/__'jam mgon sangs rgyas phun tshogs kyi rnam bshad dang /__rdo rje 'chang dbang phyug rab brtan pa'i bla ma'i rnal 'byor sogs yig chung /__tshar chen rin po ches mdzad pa'i lus dkyil/__bsam mi khyab thun min/__'pho ba rnams kyi yig chung gis brgyan pa dang /__zhal shes kyi gnad 'ga' zhig zhi bzang 'phags pa dge legs rgyal mtshan gyis gnas gsar ba'i gsung ji lta ba bzhin zin bris su mdzad pa rnams su mi gsal ba gang yang ma mchis shing /__de mtshungs tshes bcu'i mchod pa dang /__zhi ba'i sbyin sreg gnas gsar ba dang /__bsnyen yig rmor chen dang /__mkhas grub sangs rgyas rgya mtshos mdzad pas mtshon byin rlabs dang legs bshad rmad du byung ba glegs bam du longs pa du ma yod bzhin du/__'di lta bu 'bri ba la dgos pa gang yang ma mchis mod/__'od kyang zab chos 'di nyid khyab brdal du dar ches bas/__grub mtha' gzhan gyi phyogs su gang gi dpe de rnams thams cad rnyed dka' ba dang /__rang re'i rjes 'brangs 'ga' zhig kyang dpe mang klog pa'i ngal ba mi nus shing /__blo gros dman pas yig cha phan tshun gung bsgrigs mi shes pa sogs dang /__spros pa chung bas tshes bcu'i mchod pa sogs rgyas par mi nus pa rnams la phan pa'i bsam pa kho nas ngag 'don dang dmigs rim mdor bsdus dkyus gcig tu bkod pa la mkhas pa rnams kyis bzod par mdzad du gsol/__/rje btsun rdo rje rnal 'byor ma'i/__/bskyed dang rdzogs pa'i tshul 'di la/__/brten nas 'gro kun mkha' spyod grong /__/bgrod pa'i gsang lam nyid gyur cig__/ces pa'ang lam 'di la mos pa'i dge slong gu Na lak+Sh+mis tshes bcu'i mchod pa mdor bsdus pa zhig dgos zhes ched du bskul bas mtshams sbyar te/__don gnyer blo gros dman pa gzhan la'ang phan pa'i bsam pas bskyed rdzogs yan lag dang bcas pa nyung gsal snying por dril ba 'di ni/__khyab bdag rdo rje sems dpa'i ngo bor gyur pa mkhan chen thams cad mkhyen pa byams pa rnal 'byor 'jam dpal bzang po sogs yongs 'dzin dam pa chos bzhin du spyod pa rnams kyi bka' drin las tshul 'di'i smin grol gyi bdud rtsi mang du thos pa'i rgyal khams kyi bya bral ba 'jam dbyangs mkhyen brtse'i dbang pos/__mkhas shing dngos grub brnyes pa rnams kyi zhal lung dri ma med pa la nye bar btus te sbyar ba'i dge legs kyi snang bas phan bde'i pad+mo mchog tu rgyas pa'i rgyur gyur cig__/sarba dA mang+ga laM//___//__!_

Footnotes

Other Information