ཐབས་གྲོལ་ལམ་གྱི་ཁྱད་པར།

🚧 This website is under continued development. We appreciate your patience!

Previous Text Back to Volume PageNext Text

Wylie title	thabs grol lam gyi khyad par
Location	dpal sprul bka' 'bum Volume 4, Text 28, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Citation
Genre	Detailed Explanation - rnam bshad
Colophon	།དཔལ་སྤྲུལ་རིན་པོ་ཆེས་ཞལ་གསུངས་སོ།
	/dpal sprul rin po ches zhal gsungs so/

Tibetan Text

[edit]

༄༅། །ཐབས་གྲོལ་ལམ་གྱི་ཁྱད་པར་བཞུགས། ད་ནི་ཁོ་བོས། སྐྱབས་མགོན་རིན་པོ་ཆེའི་གསུང་སྒྲོས་ད་ལྟ་གནང་བ་རྣམས་དང་། གླང་པོར་རབ་འབོག་གི་ལུང་སོགས་ལ་བསྟེན་ནས། འགྲེལ་བ་སྔ་ཕྱི་རྣམས་དང་། རྒྱུད་ཀྱི་ལུང་སྐྱབས་མགོན་གསུང་སྒྲོས་རྣམས་ཐམས་ཅད་འགལ་མེད་དུ་ཐབས་གྲོལ་ལམ་འདི་ལྟར་བཤད་པར་བྱ་སྟེ། སྤྱིར་ཐབས་ལམ་དང་གྲོལ་ལམ་གཉིས་ནི་རྣམ་པ་ཀུན་ཏུ་གང་རུང་རེ་རེས་ཐར་བའི་ལམ་དུ་བགྲོད་མི་ནུས། མ་གི་ཉན་ཐོས་ཐེག་པ་ནས་ཡ་གི་རྫོགས་པ་ཆེན་པོའི་བར་ཐམས་ཅད་མཚུངས། འོན་ཀྱང་གསང་སྔགས་རྡོ་རྗེ་ཐེག་པའི་ཐབས་གྲོལ་ཁྱད་པར་ཅན་གྱི་དབང་དུ་བྱས་ན། སྤྱིར་གྲོལ་ལམ་གྱི་མཚན་གཞི་ནི་སྲིད་པ་ལས་གྲོལ་བྱེད་ཀྱི་ལམ་ལ་དངོས་ལྟ་བ་ཡིན་ལ། ཐབས་ལམ་ནི། དེ་རྟོགས་བྱེད་ཀྱི་ཐབས་ཁྱད་པར་ཅན་དང་། ཞི་མཐའ་གནོན་བྱེད་ཀྱི་སྙིང་རྗེ་བདེ་བ་ཆེན་པོའོ། །འདི་གཉིས་ལའང་གནས་སྐབས་ལམ་གྱི་དབང་དུ་བྱས་པ་དང་། ལམ་གྱུར་གྱི་འབྲས་བུའི་དབང་དུ་བྱས་པ་སོགས་ཡོད་ཀྱང་གནས་སྐབས་ལམ་ཉམས་ལེན་གྱི་དབང་དུ་བྱས་ནས་ཐབས་ལམ་དང་གྲོལ་ལམ་གཉིས་སུ་དབྱེ་བ་ནི། གང་ཟག་གི་རྒྱུད་ཚོད་ལ་དགོངས་པ་ཡིན་ཏེ། དེ་ཡང་སྤྱིར་གསང་བ་སྔགས་ཀྱི་གདུལ་བྱ་ཡིན་པར་འདྲ་ཡང་། དབང་པོ་རྣོན་པོ་དང་བརྟུལ་པོ་གཉིས་ལས་དབང་པོ་རྣོན་པོའི་དབང་དུས་སམ་གཏན་ཚིག་ལ་བརྟེན་ནས་ལྟ་བའི་དོན་ཡུལ་མེད་རང་གསལ་མངོན་སུམ་པར་རྟོགས་པར་ནུས་པ་དང་། དེ་ལྟར་ངོ་སྤྲད་ཀྱང་དོན་སྤྱི་ཙམ་ལས་མངོན་སུམ་རྟོགས་མི་ནུས་པའི་རིགས་ཅན་གཉིས་ལས། དང་པོ་མངོན་སུམ་དུ་རྟོགས་པར་ནུས་པའི་རིགས་ཅན་ལའང་རྟོགས་པ་རྐྱེན་ཐུབ་ཏུ་སྐྱེ་ཞིང་། རྟོགས་གྲོལ་ཆིག་ཆོད་དུ་བྱེད་པ་དང་། ཐབས་དང་གདམས་ངག་ལ་བརྟེན་ནས་མངོན་སུམ་རང་ངོ་འཕྲོད་ཀྱང་། གཉེན་པོ་སྟོབས་ཞན་པས་ཡེངས་འཁྲུལ་རྐྱེན་དབང་དུ་འཆོར་བ་གཉིས་ལས། སྔ་མ་ནི་གྲོལ་ལམ་གཅིག་ཆར་པའི་གདུལ་བྱ་དང་། ཕྱི་མ་ནི་གྲོལ་ལམ་རིམ་གྱིས་པ་ཡིན། གྲོལ་ལམ་པ་འདིའི་རྟོགས་དོན་ལྟ་བའི་ངང་ལ་མཉམ་པར་བཞག་ནས་སྟོང་པ་ཆེན་པོའི་ཏིང་འཛིན་ལ་རྩེ་གཅིག་ཏུ་མཉམ་པར་བཞག་པས་རྣམ་པར་མི་རྟོག་པ་དཔེའི་ཡེ་ཤེས་སྒྲ་ཇི་བཞིན་པ་རྒྱུད་ལ་སྐྱེས་ཤིང་རླུང་སེམས་དབུ་མར་འདུས་པའི་སྣང་བའི་འོད་གསལ་མངོན་དུ་གྱུར་པའི་ཚེ། ཐབས་བསྐྱེད་རིམ་གྱི་རྣལ་འབྱོར་ལྔས་བོགས་བཏོན་ནས་བསྐྱེད་རྫོགས་ཟུང་དུ་འཇུག་པའི་ལམ་གྱི་འབྲས་བུ་རྣམ་སྨིན་རིག་འཛིན་ལ་སྦྱོར། འདིའི་ལམ་ལོ་ཆེན་རིན་པོ་ཆེས་རྫོགས་རིམ་དང་འགྲེལ་བྱེད་གཞན་བསྐྱེད་རིམ་དུ་གསུང་པའི་དོན་ཀྱང་འདིས་འགལ་མེད་དུ་འཆད་ཐུབ། འདི་ལ་དབང་བཞི་ཅིག་ཆར་དུ་རྫོགས། ཐབས་ལམ་པ་ནི་དབང་དང་གཏན་ཚིག་ལ་བརྟེན་པ་ངོ་སྤྲད་ཀྱང་ལྟ་བ་དོན་སྤྱི་ལས་རྟོགས་པར་མ་ནུས་པ་དེ་ནི་ཅི་ཙམ་འབད་ནས་བསྒོམ་ཀྱང་ཚེ་འདིར་དཔེའི་ཡེ་ཤེས་དངོས་སུ་བསྐྱེད་མི་ནུས་པས་དབང་བཞིས་ཐབས་རིམ་ཅན་དུ་བསྒོམ་ནས་ལྟ་དོན་མངོན་སུམ་དུ་རྟོགས་པར་བྱེད་པའོ། །འདིར་གསང་སྔགས་རྡོ་རྗེ་ཐེག་པའི་ལྟ་བ་རྟོགས་ཚུལ་གྱི་སྒོ་ནས་མདོ་ལས་འཕགས་པའི་ཁྱད་པར་ནི་སྤྱིར་དབང་གི་ཐབས་ཀྱི་ངོ་སྤྲོད་པ་དང་། གཏན་ཚིག་རྣམས་ལས་ཀྱང་། མངོན་སུམ་པའི་གཏན་ཚིག་ཁོ་ན་ཡིན་ཏེ་ཡུལ་སྣང་སྟོང་དུ་གཏན་ལ་འབེབས་པ་ནི་མཚན་ཉིད་ཐེག་པ་ལའང་ཡོད་མོད་ཀྱང་ཡུལ་ཅན་རང་ཐོག་ཏུ་གྲོལ་བ་ནི་འདིའི་ཁྱད་ཆོས་སོ། །དགེའོ། །དཔལ་སྤྲུལ་རིན་པོ་ཆེས་ཞལ་གསུངས་སོ། །