ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་ཡིག།

🚧 This website is under continued development. We appreciate your patience!

Previous Text Back to Volume Page Next Text

Wylie title	zab chos zhi khro dgongs pa rang grol gyi bsnyen yig
Location	dpal sprul bka' 'bum Volume 4, Text 18, Pages (Folios to )
Author	དཔལ་སྤྲུལ་རིན་པོ་ཆེ་
Less details More details
Tertön	ཀརྨ་གླིང་པ་ (karma gling pa)
Citation
Genre	Recitation Manual - bsnyen yig
Cycle	ཟབ་ཆོས་ཞི་ཁྲོ་དགོངས་པ་རང་གྲོལ་ (zab chos zhi khro dgongs pa rang grol)
Deity	zhi khro

[edit]

༄༅། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་ཡིག་བཞུགས།

བླ་མ་ལ་ཕྱག་འཚལ་ལོ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་མཚམས་བྱེད་པ་ལ། སྤྱིར་ཞི་བར་བསྙེན་ཅིང་ཁྲོ་བོར་སྒྲུབ་པ་ཡོངས་ལ་གྲགས་ཆེ་ཞིང་། དོང་སྤྲུགས་དང་སྒྱུ་འཕྲུལ་སོགས་བསྙེན་པ་ཡང་དེ་ལྟར་བྱེད་པ་བརྒྱུད་པ་གོང་མའི་ཕྱག་བཞེས་ལ་ཡོད་འདུག་པ་ལྟར་འདིར་ཡང་ཞི་ཁྲོ་ཐ་དད་དུ་བསྙེན་པ་དོན་ལ་གནས་རྒྱུ་ཡིན་འདུག་རུང་། ལས་བྱང་ཆེ་ཆུང་དང་ད་ལྟ་རང་རེའི་ཚོགས་འདོན་གྱི་ཕྱག་ལེན་བཞིན། ཞི་ཁྲོ་ཟུང་འཇུག་ཏུ་བསྒྲུབ་ཀྱང་འགལ་བ་མེད་པར་མ་ཟད་ཡོ་ག་གོང་མའི་དགོངས་པ་དང་འབྱོར་ཆེ་བས་དེ་ལྟར་བསྙེན་པ་བྱེད་རྒྱུའི་གོ་དོན་ཅུང་ཟད་བཤད་ན། སྤྱིར་བསྙེན་བསྒྲུབ་སོགས་ཉམས་ལེན་གང་བྱེད་ཐུན་དུ་གཅོད་པ་ནི་དགེ་སྦྱོར་གནད་དུ་འགྲོ་བའི་ཐབས་ཁྱད་པར་ཅན་ཡིན་ཞིང་། དེ་ཡང་ཐུན་བཞིར་བྱེད་པ་ཕྱག་ལེན་ལ་བདེ་བས་ཐོར་ཐུན་དང་སྔ་ཐུན། ཕྱི་ཐུན་དང་སྲོད་ཐུན་བཞི་ལས། ཐོ་རེངས་ཀྱི་དུས་སུ་གཏི་མུག་གཉིད་སྐྲོག་ནས་སྔོན་འགྲོ་རང་རྒྱུད་སྦྱོང་བའི་སྐོར་རྒྱས་པར་གཏོང་ཞིང་། སྔོན་གཏོར་གཉིས་ཡོད་དམ་མེད་ཀྱང་རུང་སྟེ་མཚམས་གཅོད་ནས་བཟུང་ལས་བྱང་ཆེ་ཆུང་གང་བྱེད་གཞུང་ལྟར་ལ། བསྐྱེད་རིམ་གྱི་སྐབས་ཚོགས་གྲལ་གྱི་འདོན་པ་ལྟར་ཧྲུག་འདོན་ཁོ་ན་བྱས་པ་གནད་དུ་མི་འགྲོ་བས། མཆོད་པ་བྱིན་རླབས་ཚར་འཕྲལ། རང་སེམས་ཁོང་གློད་དེ་ཆགས་སྡང་རྨོང་གསུམ་ལ་སོགས་པའི་རྟོག་པའི་རྗེས་ཕྱིར་མི་འབྲང་བར་རང་གི་ཉམས་ལེན་གང་ཤེས་དེ་གའི་རང་དུ་ཡུན་རིང་ཙམ་མཉམ་པར་བཞག །འདི་སྐབས་རྣམ་རྟོག་འོག་འགྱུའི་འབྲེལ་ཆོད་ངེས་ཤིག་མ་བྱས་ན་ཆོ་གའི་དངོས་གཞི་ཚང་མ་འཁྲུལ་འབྱམས་ཀྱི་དབང་དུ་འགྲོ་བས་རིག་པ་ཧུར་བསྐྱེད། འཁྲུལ་རྟོག་རྦད་ཆོད་དུ་བཏང་། སེམས་བཟོ་མེད་ཀྱི་ངང་དུ་མཉམ་པར་བཞག་པ་དེ་ཁོ་ན་ཉིད་ཀྱི་ཏིང་ངེ་འཛིན་ཡིན། དེའི་ངང་ལ་དེ་ལྟར་མ་རྟོགས་པའི་སེམས་ཅན་རྣམས་ལ་དམིགས་མེད་སྒྱུ་མ་ལྟ་བུའི་སྙིང་རྗེ་ཅུང་ཟད་ཅིག་བསྒོམ་པ་ཀུན་སྣང་གི་ཏིང་ངེ་འཛིན་ཡིན། རྟོག་མེད་ཀྱི་ངང་ལས་སྙིང་རྗེ་དེས་འཕེན་བྱེད་བྱས་ནས། རང་གི་སེམས་ཀྱི་ངོ་བོ་ཡི་གེ་ཨཱཿམཐིང་ག་གསལ་འཚེར་འོད་དུ་འབར་བ། རྟེན་མེད་པའི་ནམ་མཁའ་སྟོང་པའི་དབྱིངས་ན་ལིང་ངེར་གནས་པ་ལ་སེམས་བཟུང་བ་རྒྱུའི་ཏིང་ངེ་འཛིན་ཡིན། ཏིང་ངེ་འཛིན་རྣམ་པ་གསུམ་འདི་བསྐྱེད་རིམ་ཐམས་ཅད་ཀྱི་གཞི་མ་གནད་ཆེ་ཤོས་ཤིག་ཡིན་པས་འདོན་ཞོར་ལ་གཤར་སྒོམ་ཙམ་བྱས་པས་མི་འཐུས་པས་དང་པོའི་རིང་ཡུན་རིང་རེར་མཉམ་པར་བཞག་ནས་བསྒོམ་པ་གལ་ཆེའོ། །སྒོམ་ནུས་ན་ཡི་གེ་ཨའི་ཏིང་ངེ་འཛིན་འདི་ཁོ་ནས་ཀྱང་ཐུན་མོང་གི་གྲུབ་པ་བརྒྱད་སྒྲུབ་ནུས་པ་ཡིན་པས། ཕྲ་བ་ཡིག་འབྲུ་ལ་བསླབ་པ་འདི་གནད་ཆེའོ། །དེ་ལྟར་ཏིང་ངེ་འཛིན་གསུམ་པོ་འདིའི་དང་པོ་དེ་བཞིན་ཉིད་ཏིང་ངེ་འཛིན་འཆི་བའི་བག་ཆགས་སྦྱོང་བྱེད་ཡིན། སངས་རྒྱས་ཆོས་སྐུའི་གོ་འཕང་ཐོབ་པའི་རྟེན་འབྲེལ་སྒྲིགས་པ་ཡིན། གཉིས་པ་ཀུན་སྣང་འདི་བར་དོའི་སྲིད་པ་སྦྱོང་བྱེད་ཡིན། ལོངས་སྐུའི་རྟེན་འབྲེལ་སྒྲིགས། གསུམ་པ་ཨའི་ཏིང་ངེ་འཛིན་འདི་སྐྱེ་བ་ལེན་པའི་སྲིད་པ་སྦྱོང་བྱེད་ཡིན། སྤྲུལ་སྐུའི་རྟེན་འབྲེལ་སྒྲིགས་པ་ཡིན། བསྐྱེད་རིམ་དངོས་གཞི་བསྒོམ་སྐབས་ཀྱང་། དེ་བཞིན་ཉིད་ཏིང་ངེ་འཛིན་གྱི་ཉམས་ལེན་ངང་དང་ཀུན་སྣང་སྙིང་རྗེའི་འཕེན་པ་གཉིས་པོ་མ་བྲལ་བའི་ངང་ནས་བསྐྱེད་རིམ་ལྷའི་གསལ་སྣང་ཅི་ཐོན་དགོས་རྒྱུ་ལས། དེ་ཏིང་ངང་ཀུན་སྣང་སྔ་སོར་བསྒོམ་ཙམ་བྱས་ནས་བསྐྱུར་བས་ནི་མི་ཆོག་གི་དེའི་རིང་ལ་གསལ་སྣང་མ་བྲལ་བ་དེ་གསལ་སྟོང་ཟུང་འཇུག་གམ་ཟབ་གསལ་དབྱེར་མེད་དམ་བསྐྱེད་རྫོགས་ཟུང་འཇུག་ཡིན། དེའི་སྙིང་རྗེའི་འཕེན་བྱེད་དང་མ་བྲལ་བ་དེ་ཐེག་ཆེན་གྱི་ལམ་གྱི་དངོས་གཞི་སྟོང་ཉིད་སྙིང་རྗེའི་སྙིང་པོ་ཅན་ཟེར་བ་དེ་ཡིན་པས་དེ་ཏིང་ཀུན་སྣང་གཉིས་པོ་འདི་ལས། གལ་ཆེ་པ་མེད་ངེས་ཡིན་པས་བརྗེད་མི་ཉན། དེ་ནས་རྟོག་བྲལ་བསྒོམ་མེད་དེ་བཞིན་ཉིད་སོགས་བསྐྱེད་རིམ་གསལ་འདེབས་ཀྱི་ཚིག་རྣམས་རིམ་པར་འདོན། སྐབས་སུ་དལ་བུས་འདོན་སྒོམ་སྒྲགས་ཤིང་གཙོ་བོར་སེམས་ཀྱི་དམིགས་པ་ལ་སེམས་གཏོད་པ་ལས། འདོན་རྟ་སོགས་ལ་བསམ་བློ་མི་གཏོང་བར། བསྐྱེད་རིམ་གསལ་འདེབས་བརྗོད་པ་ཚིག་གི་སྒོ་ཟེར་བ་དེ་ཡིན་པས། བྲེལ་འདོན་མི་བྱེད་པར་སེམས་ལྷོད་ཕབ་ནས་ཚིག་རེ་རེ་བཞིན་དམིགས་འདོན་ཡ་མ་བྲལ་བར་བྱ། སྐབས་སུ་ཡེངས་ཤོར་ན་ཡང་བསྐྱར་མགོ་ནས་བཟུང་ཕྱིར་ལོག་དགོས། །དེ་ལྟར་བྱས་ན་ཕྱིན་ཆད་ཡེངས་མི་འཆོར་བ་ལའང་ཕན་ནོ། །ལྷ་བསྒོམ་དངོས་གཞི་ལས་བྱང་ཆེ་བ་ལྟར་ན་ཡི་གེ་སྤྲོས་ཏེ་བསྐྱེད་པ་འབྲུ་བསྐྱེད། ཆུང་བ་ལྟར་ན་ས་བོན་མེད་པ་ཐོལ་བསྐྱེད་དེ་གང་ལྟར་ཡང་འདྲ་བར་འབྱུང་བ་བཞི་རིམ་བརྩེགས་དང་གཞལ་ཡས་ཁང་བསྐྱེད་པ། གཞུང་ལྟར་ལ། གདན་རྣམས་ཀྱང་གཞལ་ཡས་ཁང་དང་མཉམ་དུ་བསྐྱེད། དེ་འཕྲལ་རང་སེམས་ཨཱཿཡིག་ཕོ་བྲང་དབུས་ཀྱི་གདན་སྟེང་དུ་བབ་པ་སྐད་ཅིག་གིས་ཀུན་བཟང་ཡབ་ཡུམ་དུ་བསྐྱེད། དེ་ནས་རིམ་བཞིན་རིགས་ལྔ། སེམས་དཔའ། ཐུབ་དྲུག །སྒོ་བ་རྣམས་གསལ་གདབ། རྣམ་སྣང་ཀུན་བཟང་ཡབ་ཡུམ་ཐོ་བརྩེགས་སུ་བསྒོམ་པ་མཆན་བུ་ལ་ཡོད་པ་ལྟར་རམ། ཡང་ན་རྣམ་སྣང་ཐུགས་ཀར་ཡེ་ཤེས་སེམས་དཔའི་ཚུལ་དུ་བཞུགས་པ་གང་ལྟར་བྱས་ཀྱང་མི་འགལ་ལ། བདག་པོ་ཀུན་བཟང་འཁོར་ལོས་བསྒྱུར། །བཀའ་སྡོད་སྐྱེས་བུ་མདུན་ན་གནས། །ཞེས་པ་ལྟར། ཀུན་བཟང་གི་མདུན་དུ་རྣམ་སྣང་བསྒོམ་ཡང་ཆོག་པར་སེམས། གང་ལྟར་ཡང་། རིགས་ལྔ་རྣམས་དང་། སེམས་དཔའ་ཡབ་ཡུམ་བཅས་ཚོམ་བུ་སོ་སོའི་ལྷ་རྣམས་ཕྱོགས་ཕྱོགས་ནས་གཙོ་བོ་ལ་ཞལ་ཕྱོགས་པ་དང་། སྒོ་བ་རྣམས་སྒོ་ནང་ནས། ཞལ་ཕྱིར་ཕྱོགས་པ་ལྟར་བཞུགས་པར་བསྒོམ། ཁྲོ་བོའི་ལྷ་ཚོགས་རྣམས་སྟེང་ཁང་ན་བཞུགས་པ་དང་། ཞི་ཁྲོ་བསྲེས་ནས་བསྒོམ་པ་སོགས་སྣ་ཚོགས་མཛད་འདུག་པ་གང་ལྟར་བྱས་པས་ཀྱང་ཆོག་མོད་ཀྱི། གཞལ་ཡས་ཁང་གཅིག་པ་དེར་སྟེང་འོག་བྱས་ནས་བསྒོམ་པ་རང་ལུགས་ངན་སོང་སྦྱོང་བ་སོགས་དང་མཚུངས་ཤིང་། རྫོགས་ཆེན་སྐབས་གཞི་གནས་ཀྱི་དཀྱིལ་འཁོར་བཤད་པ་དང་མཚུངས་པས། དེ་ལྟར་བྱེད་ཚེ། ཞི་བའི་ལྷ་ཚོགས་ཀྱི་དབུའི་སྟེང་། གཞལ་ཡས་ཁང་གི་ནང་གི་བར་སྣང་ལ། རང་བྱུང་རང་ཤར་གྱི་དཀྱིལ་འཁོར་སྒྲས་བསྟན་པ་ལྟར་གྱི་དབུས་དང་ཕྱོགས་སོ་སོར་ཁྲོ་བོར་བསྐྱེད་པ་ཡིན་ལ། དེ་ཡང་ལས་བྱང་ཆེ་བ་ལྟར་ན་དབུས་སུ་ཆེ་མཆོག་དང་བུདྡྷ་ཧེ་རུ་ཀ་གཉིས་ཀ་དང་། ཆུང་བ་ལྟར་ན་བུདྡྷ་ཧེ་རུ་ཀ་ཁོ་ན་དང་། རྒྱལ་བ་རིགས་བཞིའི་དབུའི་སྟེང་གི་བར་སྣང་ལ་ཁྲག་འཐུང་ལྔ་དང་། དེའི་ཕྱི་རིམ་ཀཻ་སེང་སྒོ་བ་སོགས་བསྐྱེད། དེའི་ཕྱི་རིམ་དབང་ཕྱུག་རྣམས་ཀྱང་ཕྱོགས་བཞིར་བདུན་རེ་བསྐྱེད་དེ་འདི་ཞི་བ་རྣམས་དང་ཐོ་བརྩེགས་མར་བྱས་ནས་མི་སྒོམ་པར། སྟེང་གི་བར་སྣང་ལ་ཡར་བསྐྱེད་ནས་མེ་རི་དང་མེ་དཔུང་གི་ཀློང་ན་བཞུགས་པར་བསྒོམ་པ་ཡིན། མདུན་བསྐྱེད་བུམ་བསྐྱེད་གཉིས་པོ་བསྙེན་པའི་ཚེ་མི་དགོས་པས། བདག་བསྐྱེད་ཁོ་ན་དང་། དེ་ལས་ཀྱང་དང་པོར་གཙོ་བོ་ཡབ་ཡུམ་ལ་སེམས་འཛིན་པ་གལ་ཆེ། བསྐྱེད་རིམ་གྱི་དོན་པོ་ལྷ་ལ་སེམས་འཛིན་པའི་ཞི་གནས་སྒྲུབ་པའི་ཐབས་ཁྱད་པར་ཅན་ཡིན་པས། རྟོགས་པ་ཀློང་དུ་གྱུར་པའི་ཆོས་སྐད་ཀྱིས་མཐོ་གཏམ་མི་བྱེད་པར་རྣམ་པ་གསལ་བ་ལ་རིག་པ་གཅུན་ནས་སྒོམ་པ་གལ་ཆེ། ཚོགས་བསགས་ཀྱི་སྐོང་ཆོག་དང་འབྲེལ་སྐབས་དང་། སྒྲུབ་པ་དང་སྒྲུབ་ཆེན་གྱི་ཚེ་མདུན་བསྐྱེད་དགོས་ཀྱང་། ཆོ་ག་གཅིག་པོ་དེའི་ཁོང་ནས་བདག་མདུན་མཉམ་བསྐྱེད་བྱེད་པ་ཡིན། གཞན་དོན་དབང་སྐུར་གནས་འདྲེན་སོགས་དང་། བདག་འཇུག་སོགས་ཀྱི་ཚེ་བུམ་བསྐྱེད་ཀྱང་དགོས་པས་གསུམ་པོ་ཆོ་ག་གཅིག་པོ་དེའི་ཁོང་ནས་བསྐྱེད་པ་ཡིན་ཏེ། བསྐྱེད་ཚུལ་ཁྱད་པར་མེད་པས། བདག་བསྐྱེད་མདུན་བསྐྱེད་ཐོལ་བསྐྱེད་དང་། འབྲུ་བསྐྱེད་བུམ་བསྐྱེད་གང་བྱེད་ཀྱང་། བསྒོམ་ཁོག་བློ་ལ་བྱང་བ་གཅེས་གསུངས་པ་ཡིན། དེ་ནས་སྤྱན་འདྲེན། བཞུགས་གསོལ། ཕྱག་འཚལ་སོགས་འདོན་སྒོམ་བསྒྲགས་ནས་བྱེད། ཕྱག་དང་མཆོད་པ་སོགས་ཀྱི་སྐབས་ཀྱང་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་ལོངས་སྤྱོད་པ་ལྟར་ལས། ཕྱག་འཚལ་མཁན་དང་འཚལ་ཡུལ་ཐ་དད་དུ་མི་དགོས། ཕྱག་ཞེས་པ་ཡང་ལུས་ངག་ཡིད་གསུམ་གུས་པ་འདུད་པའི་དོན་ཡིན་པས་འཚལ་མཁན་དམིགས་བསལ་མི་དགོས། མཆོད་པ་རྣམས་ཀྱང་དཀྱིལ་འཁོར་གྱི་འདོད་སྣམ་ལ་འཁོད་པའི་མཆོད་པའི་ལྷ་མོ་རྣམས་ཀྱིས་མཆོད་པར་མོས་པ་ཡིན། བསྟོད་པ་འདི་རྣམས་རྣམ་དག་དྲན་པའི་དོན་པོ་ཡིན་པས་ཚིག་དོན་ལ་སེམས་གཞོལ་ནས་ལྷར་སྣང་གི་རྣམ་པ་དེ་དག་ཀྱང་དོན་ལ་ཡེ་ཤེས་ལྔ་ལ་སོགས་པའི་རྣམ་རོལ་ལམ། མཚོན་པའི་བརྡར་ཤར་བ་ཙམ་ལས། འཇིག་རྟེན་གྱི་སྣོད་བཅུད་རང་མཚན་པ་ལྟ་བུ་མེད་པའི་དོན་ལ་ངེས་ཤེས་འདྲོང་བར་བྱ། བཟླས་པའི་ཚེ་ལྷ་ཚོགས་ཞི་བ་རྣམས་ཀྱིས་ཐུགས་ཀར་ཟླ་བ་དང་། ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་སྲན་མ་བཀས་པ་ཙམ་གྱི་ཆུང་ངུ་རེའི་སྟེང་དུ་རང་སྲོག་ས་བོན་སྤུས་བྲིས་པ་ལྟ་བུ་ཕྲ་མོ་རེ་སྔགས་ཕྲེང་གིས་བསྐོར་བར་བསྒོམ་པ་ཡིན། འདི་རྣམས་ཅི་ཙམ་ཕྲ་ན་སེམས་ཟིན་པ་ལ་ཕན་པ་ཡིན། བདག་བསྐྱེད་ཁོ་ན་ལས་མེད་ཚེ་མདུན་བསྐྱེད་ཀྱི་ལྷ་ལ་ཕོག་ཅེས་པའི་ཚིག་བསྒྱུར་ནས་བདག་བསྐྱེད་ཀྱི་ཐུགས་ཀའི་སྔགས་ཕྲེང་ལས་སྤྲོ་བསྡུ་བྱེད་པ་ཡིན་ཡང་། དང་པོའི་རིང་སྔགས་ཕྲེང་རང་ལ་སེམས་འཛིན་པ་ལས་སྤྲོ་བསྡུ་སོགས་མང་པོ་མ་བྱས་ཀྱང་ཆོག །སྔགས་བཟླས་པའི་ཚེ་སྔགས་འབྲུ་རྣམས་ཀྱང་རང་སྒྲ་ཏི་རི་རི་སྒྲོགས་པ་དང་། ལྷ་ཚོགས་ཐམས་ཅད་ཀྱང་ཞལ་ནས་སྔགས་ཀྱི་སྒྲ་འུར་དིར་གསུངས་ཤིང་། སྣོད་བཅུད་སྐྱེ་འགྲོ་རྩི་ཤིང་ལ་སོགས་པ་ཐམས་ཅད་ཀྱང་ལྷའི་རང་བཞིན་དུ་གྱུར་ནས་སྔགས་ཀྱི་སྒྲ་འུར་དིར་རེ་སྒྲོགས་པར་བསམ་པ་ཕན་ཡོན་དང་ནུས་པ་ཆེ་བ་ཡིན། དེ་དག་ཐམས་ཅད་ཀྱི་སྐབས་སུ་བསྐྱེད་རིམ་ལ་བརྟེན་ནས་ཐ་མལ་གྱི་སྣང་ཞེན་སྦྱོང་བ་ལམ་བསྒོམ་པའི་དོན་འབྲས་ཡིན་པས། དེ་ལ་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་དང་གསུམ་ཡོད། དེ་ཡང་དང་པོ་སྣང་ཞེན་ཞེས་པ་དེ་ལ་སྣང་བ་དང་ཞེན་པ་གཉིས་ཡོད་པའི་དང་པོ་སྣང་བ་ནི། རང་གི་དབང་པོ་ལྔའི་ཡུལ་དུ། གཟུགས་སྒྲ་དྲི་རོ་རེག་བྱ་ལྔ་དང་། ཡིད་ཡུལ་དུ་ཆོས་ཐམས་ཀྱི་རྣམ་རྟོག་སྣང་བ་དེ་ཡིན་པས། དེ་སྦྱོང་བྱེད་དུ་རྣམ་པ་གསལ་བ་གསུང་སྟེ། སྣོད་བཅུད་ལྷ་དང་གཞལ་ཡས། སྒྲ་གྲགས་སྔགས་ཀྱི་རང་བཞིན་དུ་གསལ་ནས། སེམས་ཡུལ་ལ་མི་འཕྲོ་བ་དེ་ཡིན། ཞེན་པ་ཞེས་པ་ལ། བདག་ཏུ་ཞེན་པ་དང་། དངོས་པོར་ཞེན་པ་གཉིས་ཡོད་པའི་དང་པོ་བདག་ཏུ་ཞེན་པ་ནི། ཐོག་མ་མེད་པའི་དུས་ནས་ངའོ་སྙམས་པའི་ངར་འཛིན་འདི་ཡིན་པས། དེའི་གཉེན་པོར་ང་རྒྱལ་བརྟེན་པ་གསུངས་ཏེ་ངའམ་བདག་ཐ་མལ་དུ་འཛིན་པ་དོར་ནས་ཡི་དམ་གྱི་ལྷ་ཡིན་ནོ་སྙམ་པའི་ངེས་ཤེས་བརྟན་པོ་བྱེད་པ་དེ་ཡིན། རྣམ་པ་གསལ་བ་དང་། ང་རྒྱལ་བརྟན་པ་འདི་གཉིས་ལས། ང་རྒྱལ་བརྟན་པ་འདི་གལ་ཆེ་སྟེ། རང་ལྷ་ཡིན་པའི་ངེས་ཤེས་མེད་ན་རྣམ་པ་གསལ་བ་ཡང་རྒྱུད་ཐ་མལ་པ་ཡིན་པས་དོན་མེད། རང་ངེས་པར་ལྷ་ཡིན་པའི་ང་རྒྱལ་ཡོད་ན་བདག་འཛིན་འཇིག་ཅིང་རྣམ་པའང་ཤུགས་ཀྱིས་གསལ་འོང་བ་ཡིན། དངོས་པོར་ཞེན་པ་ཞེས་པ་དེ་སྣོད་བཅུད་དུ་སྣང་བའི་བདེན་བདེན་རྟག་རྟག་ཏུ་ཡོད་པར་ཞེན་པའི་ཨ་འཐས་ཆོས་ཀྱི་བདག་ཟེར་བ་དེ་ཡིན་པས་དེའི་གཉེན་པོར་རྣམ་དག་དྲན་པ་གསུངས་ཏེ། སྣོད་བཅུད་ལྷ་དང་གཞལ་ཡས་སུ་སྣང་བ་དེ་ཡང་དོན་ལ་དེ་ལྟ་བུའི་ལྷ་དང་གཞལ་ཡས་ཁང་དུ་གྲུབ་པ་མེད་དེ། སངས་རྒྱས་ཀྱི་ཐུགས་རྒྱུད་ལ་ཡོད་པའི་ཡོན་ཏན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་རང་བཞིན་གཞལ་ཡས་ཁང་དང་། ཡེ་ཤེས་ལྔ་མཚོན་པའི་རིགས་ལྔ་དེ་ཡང་ཆོས་སྐུ་སྐྱེ་བ་མེད་པ་མཚོན་ཕྱིར་ཞལ་གཅིག །ཐབས་ཤེས་མཚོན་པའི་ཕྱག་གཉིས་ལ་སོགས་པའི་བརྡའ་ཙམ་མམ་རྣམ་པ་ཙམ་ཡིན་པས། དོན་ལ་ལྷ་དང་ཞལ་ཕྱག །སྐུ་མདོག་ཕྱག་མཚན་སོགས་བདེན་གྲུབ་ཏུ་འཛིན་པའི་ཞེན་པ་སྦྱོང་པ་ཡིན་པས་འདི་གསུམ་གལ་ཆེ་བས་རེས་མོས་ཀྱི་བློ་སྦྱངས། འདི་རྣམས་མཚན་ཉིད་ཀྱིས་ཐེག་པ་ལྟར་སྣང་བའི་གཉེན་པོ་རྡུལ་ཕྲན་དུ་བསལ་བ་སོགས་དང་། བདག་གི་གཉེན་པོར་བདག་མེད་བསྒོམ་པ་སོགས་སྤངས་གཉེན་འགལ་བར་སྤྱོད་པ་མ་ཡིན་ཏེ། གསང་སྔགས་ཐབས་ལ་མཁས་པའི་ཁྱད་པར་གྱིས། དཔེར་ན་རྣ་བར་ཆུ་སོང་བ་ཆུ་བླུགས་ནས་འདོན་པ་དང་། མེས་ཚིག་པའི་ཟུག་རྔུ་སླར་མེ་ལ་བསྲོ་བ་ལྟར། འཁྲུལ་སྣང་གི་གཉེན་པོ་ལྷ་སྣང་དང་། བདག་ཏུ་ང་རྒྱལ་བའི་གཉེན་པོར་ལྷའི་ང་རྒྱལ་བསྐྱེད་པ་སོགས། རྣམ་རྟོག་གི་གཉེན་པོར་རྣམ་རྟོག་བསྒོམ་པས་མ་དག་པའི་རྣམ་རྟོག་མེད་པར་བྱེད་པ་སྔགས་ཀྱི་ཐབས་མཁས་ཡིན་པས་ཐབས་བསྐྱེད་པའི་རིམ་པ་ཟེར་དོན་ཡང་དེ་ཡིན་ནོ། །རྣམ་རྟོག་དང་ཉོན་མོངས་པ་མི་སྤོང་ཟེར་བ་འདི་ལྟ་བུ་ལ་ཟེར་བ་ཡིན་གྱི་ཐ་མལ་གྱི་རྣམ་རྟོག་དང་ཉོན་མོངས་མི་སྤོང་བ་མིན་པ་ཤེས་དགོས། དེ་ལྟར་བསྒོམ་པའི་ཚེ་ཤེས་པ་མི་གསལ་བ་དང་། བྱིང་ཞིང་འཐིབ་པ་དང་བསྒོམ་སྙིང་མི་འདོད་པ་སོགས་བྱུང་ན་ཤེས་པ་ཧུར་བཏོན། བློའི་ཤོང་ཡང་བསྐྱེད། ལྷའི་རྣམ་པ་སྐུ་མདོག་ཕྱག་མཚན་ལྟ་བུའི་ཕྱོགས་སུ་ཤེས་པ་གུད་དུ་མི་གཅོད་པར། སྣོད་བཅུད་ལྷ་དང་གཞལ་ཡས། འོད་དང་འོད་ཟེར་གྱིས་རང་བཞིན་དུ་བཀྲ་ལམ་ལམ་གཡོ་འགུལ་ཤིག་ཤིག །སྒྲ་གྲགས་སྔགས་ཀྱི་རང་བཞིན་དུ་འུར་དི་རི་རི། དྲན་རྟོག་ཆོས་ཉིད་ཀྱི་རང་བཞིན་དུ་ཕྱལ་ལེ་བཏང་སྟེ་ཧཱྃ་གླུ་ལེན་ཞིང་ཤེས་པ་རྒྱ་བསྐྱེད། དཔང་བསྟོད། རྟོག་ཚོགས་དུམ་བུར་རྦུད་རྦུད་བཅད། ཧ་ཅང་གནས་ན་མི་གནས་ན། གསལ་ན་མི་གསལ་ན་སྙམ་པའི་གུ་དོགས་སྤངས་ཏེ་ཁྲོ་ལེར་བསྒོམ། ཡང་ཤེས་པ་ཧ་ཅང་རྒོད་པ་དང་། འཕྲོ་བརྒྱ་འབྱམས་ན་བསྙེན་པ་སོགས་བཟླ་བ་ཅུང་ཟད་མཚམས་བཅད། རླུང་རོ་བུས། ཤེས་པ་ལྷོད་ཀྱིས་གློད་ནས་རང་ངོ་ཅེར་གྱིས་བལྟས། དེའི་ངང་ནས་ཐུགས་སྲོག་ས་བོན་ལ་དམིགས་པ་གཅུར་ཏེ་སེམས་གཏད་ནས་སྒོམ། ཧ་ཅང་དམིགས་པ་སོགས་ཨེ་གསལ་རེ་དོགས་ཆེ་བའི་གུ་དོགས་དང་གསལ་མི་གསལ་མེད་པར་ཁ་ཁྲལ་འཇལ་བ་ལྟ་བུའི་གུ་ཡངས་གཉིས་ཀ་མི་བྱ་བར་གུ་ཡོངས་དོགས་ཚོད་ཟིན་པར་བྱ། སྐབས་སྐབས་སུ་དེ་ལྟར་ལྷ་བསྒོམ་པ་དང་། རྣམ་པ་གསལ་མི་གསལ་སོགས་ཀྱི་བྱེད་པོ་ཁོ་རང་གི་ངོ་ལ་ཁ་ཚུར་ལོག་ནས་བལྟ། དེ་ཡང་བལྟ་བྱ་དང་བལྟ་མཁན་ལ་སོགས་པའི་རྟོག་པ་ཕྲ་མོ་རྒྱ་ཁྲོ་ལེ་བཏང་ནས། གང་ཡིན་དང་འདི་ཡིན་མེད་པའི་ཤེས་པ་ཧ་ཆད་དེ་བ་དེའི་ངང་བསྐྱངས། དེ་ལྟར་དགོངས་པ་མི་འགྱུར་བ་ཆོས་ཉིད་ཀྱི་གཟེར་དང་། ཏིང་ངེ་འཛིན་ལྷའི་གཟེར་གཉིས། རེས་མོས་ཟུང་འཇུག་བློས་གང་འཆུན་བྱེད་ཅིང་དེ་དག་ཀུན་གྱི་དུས་སུ་བཟླས་པ་སྔགས་ཀྱི་གཟེར། རྩ་བསྙེན་རྒྱུན་ཆད་མེད་པར་བཟླ། ཐུན་འཇོག་ཀ་དང་། བསྙེན་འཚམས་གྲོལ་ཀ་རྣམས་སུ་འཕྲོ་འདུ་ཕྲིན་ལས་ཀྱི་གཟེར་འོད་ཟེར་སྤྲོ་བསྡུ་སོགས་བསྙེན་ཡིག་རྣམས་ནས་བཤད་པ་ལྟར་བྱེད་པ་ནི་སྲོག་སྡོམ་གཟེར་བཞི་ཞེས་སྔ་འགྱུར་རྙིང་མའི་ཆོས་སྐད་ཨོ་རྒྱན་སངས་རྒྱས་གཉིས་པའི་མན་ངག་ཐུན་མོང་མ་ཡིན་པས་ཅིས་ཀྱང་གལ་ཆེ། ལྷ་བསྒོམ་པའི་དུས་སུ་བརྗེད་རྐྱེན་པ། རྟོག་པ་སྔར་ལས་མང་བ་ལྟ་བུ་དང་། སྤྱིར་བསྙེན་མཚམས་སོགས་ལ་བསྡད་ནས་ལུས་ངག་ཡིད་ལ་མི་བདེ་བ་མང་བོ་འཚུབ་ཟང་ངེ་ལང་འོང་བ་ལྟ་བུ་དེ། གཡོ་བའི་ཉམས་རི་གཟར་གྱི་འབབ་ཆུ་ལྟ་བུ་ཟེར་བ་ཡོན་ཏན་འགོ་མ་སྐྱེ་བ་ཡིན་པས་སྐྱོན་དུ་མི་བལྟ། ཐུན་མཚམས་རྣམས་སུ་ཐུན་འཇོག་ཀ་ལྷར་སྣང་རྣམས་མཐའ་ནས་རིམ་པར་བསྡུ་བ་རིམ་བསྡུ་དང་། འཇའ་ཚོན་ནམ་མཁའ་རུ་ཡལ་བ་ལྟ་བུར་བསྡུ་བ་འཇའ་ཡལ་ལམ། ཡང་ན་སྔ་མ་རྗེས་གཞིག་དང་། ཕྱི་མ་རིལ་འཛིན་ཟེར་བ་ཡིན་པས་གང་ལྟར་བསྡུས་ཀྱང་འདྲ་ཡང་ལས་དང་པོའི་ཚེ་རྗེས་གཞིག་བྱེད་པ་གལ་ཆེ་བས། ཕྱི་སྣོད་གཞལ་ཡས། གཞལ་ཡས་འཁོར། འཁོར་རྣམས་གཙོ་བོ། གཙོ་བོ་ཡང་རིམ་གྱིས་སྔགས་ཕྲེང་། དེ་ཐུགས་སྲོག་དེ་ཡང་ཇེ་ཕྲལ་མི་དམིགས་པའི་ངང་ལ་ཅུང་ཟད་མཉམ་པར་བཞག །དེ་ལས་སླར་ཡང་རྒྱུན་སྤྱོད་ཀྱི་ལྷ་གཙོ་བོ་ཡབ་ཡུམ་གསང་ཆེན་རིགས་གཅིག་ཡིན་ལ། རིགས་བརྒྱ་འདུས་པའི་ངོ་བོར་ངེས་ཤེས་བསྐྱེད། བསྡུ་རིམ་འདི་ཡང་འཆི་ཀའི་ཉམས་ལེན་ཁྱད་པར་ཅན་ཡིན་པས་ཐུན་ཐམས་ཅད་ཀྱི་མཇུག་ཏུ་བྱེད། ལྷའི་གསལ་སྣང་ལ་ཞེན་པ་ཡོད་ན་ཅིས་ཀྱང་བསྡུ་རིམ་བྱེད་དགོས། ཡོ་ག་གོང་མ་བ་རྣམས་གཤེགས་གསོལ་མང་པོ་མི་བྱེད་པ་ལྟར་བསྡུ་རིམ་ཡང་མི་བྱེད་པ་ནི་གནད་མ་གོ་བའི་རྟགས་ཡིན། བསྡུ་རིམ་རིམ་བསྡུ་བྱས་ནས། སྙིང་དབུས་ཀྱི་ཐུགས་སྲོག་ལ་སེམས་བཟུང་ནས་དེ་ཡང་མི་དམིགས་པའི་ངང་ལ་འཇོག་པས་འཆི་དུས་ཀྱི་འབྱུང་བ་ཐིམ་རིམ་སོགས་དང་ཆོས་མཐུན་ཞིང་། གོམས་པ་བརྟན་ན་སྣང་མཆེད་ཐོབ་གསུམ་ཡང་ངེས་པར་འདྲེན་ནུས་པ་ཡིན་པས་རྫོགས་རིམ་གྱི་དོན་པོ་ཞིག་འདི་ཡིན་པས་འདི་ཡང་མི་དྲན་པའམ་གལ་ཆུང་དུ་མི་བསམ། ཐུན་བར་རྣམས་སུ་སྤྱོད་ལམ་གྱི་ལྷ་གསང་ཆེན་རིགས་གཅིག་རྡོ་རྗེ་སེམས་དཔའི་ང་རྒྱལ་དང་མ་བྲལ་པའི་ངང་ནས་བཟའ་བཏུང་ཚོགས་འཁོར་དུ་རོལ་པ་དང་། རྗེས་ཆགས་ཀྱི་དཀྱིལ་འཁོར་མཆོད་པ་དང་། གཉིད་འོད་གསལ་དུ་སྦ་བ་དང་། བྱེད་སྤྱོད་ཕྱག་རྒྱར་སྤྱོད་པ་སོགས་ཡིན་ཡང་། གཉིས་པ་དགེ་སློང་རྡོར་འཛིན་ལ་མི་མཁོ་བས་ལྷག་རྣམས་ཉམས་པ་ཞེས་བྱ། དེ་དག་གི་སྐབས་ཐམས་ཅད་དུ་རང་ལ་རང་གི་བརྙས་ནས། དེ་ལྟ་བུ་ངས་ག་ལ་ནུས་ག་ལ་ཤེས་སྙམ་ནས། བཅོམ་བསྐྱུངས་ཏེ། སྙོམས་ཆུང་བཟང་མདོག་ལྟ་བུ་ཁོ་ན་ལ་སྐྱབས་བཅོལ་བ་ནི། སྒྱིད་ལུག་པ་དང་། བདག་ཉིད་བརྙས་པའི་ལེ་ལོ་ཟེར་བ་དེ་ཡིན་པས། ཐེག་ཆེན་པ་ཡིན་ན་ཕོ་ཚོད་གནམ་སྔོན་པོ་ཙམ་བསྐྱེད་ནས་སྙིང་རུས་བྱེད་དགོས་པ་ཡིན་པས། དང་པོ་ནས་ཤེས་མཁན་དང་ནུས་མཁན་ཞིག་ཡིན་ན་སློབ་དང་སྒྲུབ་ཀྱང་ཅི་དགོས་པས་ཐུགས་གུ་མི་དོགས་ངོས་ནས། དུས་དང་གནས་སྐབས་ཐམས་ཅད་དུ་ངེས་འབྱུང་སྐྱོ་ཤས། བྱམས་སྙིང་རྗེ་ལ་སོགས་པའི་རྩ་བའི་བླ་མའི་ཞལ་གདམས་རྣམས་ལ་ཐུགས་བསམ་གཏང་བ་ནི་གལ་ཆེ་སྟེ། ཐུན་མཚམས་རྣམས་སུ་རྟོག་པ་རྒྱ་འབྱམས་ཤོར་ན་ཐུན་ཡང་ལད་འགྲོ་ཞིང་ཐུན་མཚམས་སུ་ངེས་འབྱུང་སྐྱོ་ཤས་སོགས་བསྐྱེད་ནས་ཐུན་ལ་འཇུག་ཀར་ཤེས་པ་སྐྱོ་ཆད་དེ་ཡོད་ན་ཐུན་དེ་ཡང་གོ་ཆོད་ངེས་ཤིག་འོང་ཞིང་། དེས་སྤྲོ་བ་བསྐྱེད་ནས་ཐུན་རྗེས་མ་རྣམས་ཀྱང་དེ་ལྷག་ཙམ་རེ་འོང་ཞིང་། དེའི་མཚོན་བསྒྲུབ་པ་བྱས་ཚད་ཇེ་བཟང་ཇེ་བཟང་ལ་སོང་ནས་མཐར་གྲུབ་པ་ཡང་ཐོབ་འགྲོ་བ་ལགས་ཤིང་། ཐུན་མཚམས་སུ་རྟོག་པ་ཡུལ་ལ་གཡེང་ནས་འབྱམས་ཤོར་ན་ཐུན་དེའི་མུར་འཁྲུལ་འབྱམས་སུ་འགྲོ། དེ་ནས་ཐུན་ཕྱི་མ་རྣམས་ཀྱང་བསྡུ་རྒྱུ་བདག་རྒྱུ་མེད་པར་ཇེ་འཁྲུལ་ཇེ་ངན་ལ་སོང་ནས། སྒྲུབ་པ་བྱས་ཚད་ལ་སྙིང་པོ་སྤུ་ཙམ་མེད་པའི་ཆོས་དྲེད་ང་རང་ལྟ་བུ་ཞིག་རེད་འགྲོ་བ་ཡིན་པས། དུས་ཐམས་ཅད་དུ་མི་རྟག་སྐྱོ་ཤས་ཀྱི་ལྕགས་བྲབ་སྟེ། བསྐྱེད་རྫོགས་ལ་བརྩོན་འགྲུས་བྱས་ནས་དཔལ་མགོན་རྩ་བའི་བླ་མའི་དགོངས་པ་ཟིན་པ་ཞིག་དགོས་པ་ལགས་སོ། །ཆོས་དང་འཇིག་རྟེན་བྱ་བ་གང་ལ་ཡང་། །ཉམས་མྱོང་མེད་ཀྱང་ཁ་བཤད་བདེན་བདེན་མོ། །ཉམས་མྱོང་ཡོད་པ་ལྟར་དུ་བཅོས་པ་འདི། །ཨ་བུ་སྨྱོན་པའི་མཚན་ཉིད་མ་ལགས་སམ། །ལས་ངན་རླུང་འཚུབ་ལང་བའི་དབུས་ཤིག་ན། །སྤྱོད་ངན་རྒྱན་དུ་ཐོགས་པའི་རྣམ་འགྱུར་བཅས། །གཤིས་ངན་སྤྲེའུ་སྨྱོན་པའི་གར་བྱེད་པ། །གྲོགས་ངན་བདག་འདྲའི་རྗེས་སུ་མ་འབྲང་བར། །བསོད་ནམས་དཔལ་གྱི་ལྷུན་པོ་རྟག་བཅའ་ཞིང་། །བག་ཡོད་བསླབ་གསུམ་དགེ་བའི་མཛད་སྤྱོད་ཅན། །ཚངས་སྤྱོད་ཚངས་པར་སྤྱོད་པའི་རྗེས་བསླབ་སྟེ། །ཁྱོད་བློ་དམ་པའི་ཆོས་དང་འདྲེས་པར་ཤོག །དགེའོ། །དགེའོ། །དགེའོ། །