DKR-KABUM-17-TSA-003

🚧 This website is under continued development. We appreciate your patience!

Previous Text Back to Volume PageNext Text

གུ་རུའི་ཐུགས་སྒྲུབ་དངོས་གྲུབ་སྙིང་པོ་ལས། སྔོན་འགྲོའི་ངག་འདོན་ཟབ་ལམ་སྣང་བྱེད།

Wylie title	gu ru'i thugs sgrub dngos grub snying po las/ sngon 'gro'i ngag 'don zab lam snang byed
Location	dil mgo mkhyen brtse bka' 'bum Volume 17, Text 3, Pages 6-12 (Folios 1a to 7b6)
Author	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་
Less details More details
Tertön	དིལ་མགོ་མཁྱེན་བརྩེ་བཀྲ་ཤིས་དཔལ་འབྱོར་ (Khyentse, Dilgo)
Citation	Khyentse, Dilgo. Gu ru'i thugs sgrub dngos grub snying po las sngon 'gro'i ngag 'don zab lam snang byed. In Skyabs rje dil mgo mkhyen brtse rin po che'i bka' 'bum, Vol. 17: 6-12. Delhi: Shechen Publications, 1994.
Genre	Preliminary Practices - sngon 'gro
Cycle	རང་བྱུང་པདྨ་སྙིང་ཐིག་ (rang byung pad+ma snying thig)
Colophon	།ཅེས་པའང་རྒྱལ་ཁབ་ཕ་རན་སེའི་ཐེག་མཆོག་རིན་ཆེན་གླིང་དུ་སྒྲུབ་སྡེ་གསར་འཇུགས་སྐབས་རྙིང་སྔགས་རྒན་པོ་མངྒ་ལ་ཤྲཱི་བྷཱུ་ཏིས་རང་ཉིད་ཀྱི་བསམ་གཏན་ཁང་བུ་བཀྲ་ཤིས་དཔལ་འབར་གླིང་དུ་བྲིས་པ་ཐེག་མཆོག་སྙིང་པོའི་བསྟན་པ་ལ་བྱ་བ་བྱེད་ནུས་པར་གྱུར་ཅིག།
	/ces pa'ang rgyal khab pha ran se'i theg mchog rin chen gling du sgrub sde gsar 'jugs skabs rnying sngags rgan po mang+ga la shrI b+hU tis rang nyid kyi bsam gtan khang bu bkra shis dpal 'bar gling du bris pa theg mchog snying po'i bstan pa la bya ba byed nus par gyur cig/

Tibetan Text

Wylie

[edit]

༄༅། གུ་རུའི་ཐུགས་སྒྲུབ་དངོས་གྲུབ་སྙིང་པོ་ལས། སྔོན་འགྲོའི་ངག་འདོན་ཟབ་ལམ་སྣང་བྱེད་བཞུགས་སོ།།

༄༅། །ན་མོ་གུ་རུ་བྷྱཿ འདིར་རྩ་གསུམ་གཅིག་དྲིལ་ཐུགས་སྒྲུབ་དངོས་གྲུབ་སྙིང་པོའི་དབང་བཞིའི་ལམ་ཡོངས་སུ་རྫོགས་པ་ཉམས་སུ་ལེན་པ་ལ་མེད་དུ་མི་རུང་བ་སྔོན་འགྲོའི་ངག་འདོན་འཇུག་བདེར་བསྡེབ་པ་ལ་གསུམ། ཐུན་གྱི་སྔོན་འགྲོ། ཐུན་མོང་གི་སྔོན་འགྲོ། ཁྱད་པར་གྱི་སྔོན་འགྲོའོ། །དང་པོ་ནི། ཐོག་མར་བདེ་བའི་སྟན་ལ་སྒོ་གསུམ་བག་ཕབ་སྟེ་ངལ་གསོ། རླུང་རོ་བསལ། ལུས་སེམས་ཁོང་ལྷོད་ནས་ཀུན་སློང་ལེགས་པར་བཅོས་ཏེ། ཨེ་མ་ཧོཿ སྐྱབས་གནས་ཀུན་འདུས་ཁྱབ་བདག་འཁོར་ལོའི་མགོན༔ སྙིང་དབུས་འོད་གསལ་དབུ་མའི་ཕོ་བྲང་ནས༔ མདུན་གྱི་ནམ་མཁར་ཡིད་འཕྲོག་མཆོད་སྤྲིན་དབུས༔ མངོན་སུམ་གཤེགས་ནས་བདག་རྒྱུད་བྱིན་གྱིས་རློབས༔ མོས་གུས་གཞལ་མེད་ཕོ་བྲང་ཉམས་དགའ་བར། །རིང་ནས་འཁྱུད་པའི་དྲིན་ཆེན་བླ་མའི་ཞལ། །ཡང་ཡང་དྲན་པས་རྟག་ཏུ་ཕྱག་བགྱིད་ན། །དངོས་གྲུབ་རྒྱ་མཚོའི་གནས་ལ་གེགས་མེད་མཛོད། ཅེས་དང༌། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བཀའ་དྲིན་མཚུངས་པ་མེད་པའི་གཏེར་ཆེན་བླ་མ་རིན་པོ་ཆེ་མཁྱེན་ནོ། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་མཛད་དུ་གསོལ། ཞེས་གསོལ་བ་ཕུར་ཚུགས་སུ་གདབ། གཉིས་པ་ཐུན་མོང་གི་སྔོན་འགྲོ་ནི། དལ་བརྒྱད་འབྱོར་བཅུས་བརྒྱན་པའི་མི་ལུས་འདི༔ དཔེ་གྲངས་རྒྱུ་དང་ངོ་བོས་རྙེད་དཀའ་ཞིང༔ དོན་ཆེན་སྒྲུབ་པའི་མཆོག་ཏུ་ངེས་མཐོང་ནས༔ རྩེ་གཅིག་སྙིང་པོ་ལོན་པར་བྱིན་གྱིས་རློབས༔ དམ་པའི་ཆོས་སྒྲུབ་བྱེད་རྟེན་དལ་འབྱོར་རྙེད་དཀའ་བའི་དམིགས་རྐང་དང་པོ་དང༌། ཕྱི་ནང་སྣོད་བཅུད་དགྲ་གཉེན་བར་མ་སོགས༔ གང་ལ་བསམས་ཀྱང་མི་རྟག་འཇིག་པའི་ཕྱིར༔ ལོང་མེད་འཆི་བ་དྲན་པའི་བརྩོན་འགྲུས་ཀྱིས༔ ཚེ་འདིའི་མངོན་ཞེན་ལྡོག་པར་བྱིན་གྱིས་རློབས༔ ཆོས་ལ་བསྐུལ་བའི་རྐྱེན་འདུས་བྱས་མི་རྟག་པར་བསམ་པའི་དམིགས་རྐང་གཉིས་པ་དང༌། འཆི་ཚེ་དཀར་ནག་ལས་ཀྱི་གཞན་དབང་གིས༔ ཁམས་གསུམ་རིགས་དྲུག་མཐོ་དམན་སྣ་ཚོགས་སུ༔ བདེ་སྡུག་འབྲས་བུ་མི་བསླུ་སྨིན་པའི་ཕྱིར༔ བླང་དོར་ཚུལ་བཞིན་ནུས་པར་བྱིན་གྱིས་རློབས༔ ཆོས་ཀྱི་གནད་ལས་རྒྱུ་འབྲས་ལ་ཡིད་ཆེས་བསྐྱེད་པའི་དམིགས་རྐང་གསུམ་པ་དང༌། དམྱལ་བ་ཚ་གྲང་ཡི་དྭགས་བཀྲེས་སྐོམ་དང༔ དུད་འགྲོ་བཀོལ་སྤྱོད་སྡུག་བསྔལ་མཐའ་ཡས་ཤིང༔ མཐོ་རིས་ན་ཡང་བདེ་བའི་སྐབས་མེད་པས༔ ངེས་འབྱུང་དྲག་པོ་སྐྱེ་བར་བྱིན་གྱིས་རློབས༔ ཆོས་ཀྱི་སྲོག་འཁོར་བའི་ཉེས་དམིགས་ཀྱིས་ངེས་འབྱུང་བསྐྱེད་པའི་དམིགས་རྐང་བཞི་པ་དང༌། དེ་ལས་སྐྱོབ་པའི་དེད་དཔོན་གཅིག་གྱུར་པ༔ མཚན་ལྡན་བླ་མ་དགེ་བའི་བཤེས་གཉེན་མཆོག༔ མཉེས་པ་གསུམ་གྱི་བྱ་བས་ལེགས་བསྟེན་ནས༔ ཐོས་བསམ་སྒོམ་ལ་བརྩོན་པར་བྱིན་གྱིས་རློབས༔ ཆོས་ཀྱི་སྒོ་འབྱེད་དགེ་བའི་བཤེས་གཉེན་བསྟེན་ཚུལ་དང་ཐར་པའི་ཕན་ཡོན་བསྟན་པའི་དམིགས་རྐང་ལྔ་པའོ། །བྱིན་གྱིས་རློབས་ཤིག་དྲིན་ཅན་བླ་མ་རྗེ༔ དངོས་གྲུབ་སྩོལ་ཅིག་འཆི་མེད་ཐོད་ཕྲེང་རྩལ༔ བར་ཆད་སོལ་ཅིག་མཁའ་འགྲོ་ཆོས་སྐྱོང་ཚོགས༔ སྙིང་ནས་དྲན་ནོ་ཐུགས་རྗེའི་སྤྱན་གྱིས་གཟིགས༔ ཞེས་འདོད་པའི་དོན་ལ་གསོལ་བ་གདབ་པས་མཚམས་སྦྱར་རོ། །གཉིས་པ་ཁྱད་པར་གྱི་སྔོན་འགྲོ་ལ་སྐྱབས་འགྲོ། སེམས་བསྐྱེད། རྡོར་སེམས་བསྒོམ་བཟླས། བླ་མའི་རྣལ་འབྱོར་ལ་བརྟེན་ནས་བསགས་སྦྱང་གསོལ་བ་གདབ་པའོ། །དང་པོ་ནི། དེ་ལྟ་བུའི་འཇིགས་རུང་འཁོར་བའི་སྡུག་བསྔལ་དེ་ལས་རང་གཞན་སེམས་ཅན་ཐམས་ཅད་བསྒྲལ་བའི་ཕྱིར་བླ་མ་དང་དཀོན་མཆོག་གསུམ་ལ་སྐྱབས་སུ་འགྲོ་བར་བགྱིའོ་སྙམ་པའི་སྐྱེས་བུ་ཆེན་པོའི་བློས། རང་ཉིད་གང་དུ་གནས་པའི་ས་ཕྱོགས་ཐམས་ཅད་རིན་པོ་ཆེ་སྣ་ཚོགས་ལས་གྲུབ་པའི་ཞིང་ཁམས་མཛེས་ཤིང་ཡིད་དུ་འོང་བའི་གཞིར་དཔག་བསམ་ལྗོན་ཤིང་ཡལ་ག་ལྔ་པ། ལོ་འདབ་དང་མེ་ཏོག་འབྲས་བུ་ཕུན་སུམ་ཚོགས་པ་ལ་རིན་པོ་ཆེའི་འཕྱང་འཕྲུལ་དྲིལ་གཡེར་ལ་སོགས་པས་རྣམ་པར་བརྒྱན་པ་ནམ་མཁའི་དབྱིངས་ཀུན་ཁྱབ་པའི་དབུས་སུ་སེང་གེས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་ཉི་ཟླ་བརྩེགས་པའི་གདན་ལ་སངས་རྒྱས་ཀུན་འདུས་ཀྱི་ངོ་བོ་རྩ་བའི་བླ་མ་ཨོ་རྒྱན་རྡོ་རྗེ་འཆང་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ། ཡུམ་མཚོ་རྒྱལ་དཀར་མོ་གྲི་གུག་དང་ཐོད་པ་འཛིན་པ་དང་མཉམ་པར་སྦྱོར་བ། དར་དང་རུས་པའི་རྒྱན་གྱིས་བརྒྱན་ཅིང༌། ཞབས་རྡོ་རྗེའི་སྐྱིལ་ཀྲུང་གིས་བཞུགས་པའི་དབུ་གཙུག་ཏུ་བརྒྱུད་གསུམ་བླ་མ་རྣམས་ཐོ་བརྩེགས་སུ་བཞུགས་ཤིང༌། གཞན་ཡང་རྩ་བརྒྱུད་ཀྱི་བླ་མ་དམ་པ་རྣམས་དང༌། གནས་གསུམ་གྱི་དཔའ་བོ་མཁའ་འགྲོ་བསམ་གྱིས་མི་ཁྱབ་པས་མཐའ་ནས་བསྐོར་བ། མདུན་གྱི་ཡལ་ག་ལ་ཁྱད་པར་གྱི་སངས་རྒྱས་དཔལ་རྡོ་རྗེ་སེམས་དཔའ་ལ་ཡི་དམ་རྒྱུད་སྡེ་དྲུག་གི་ལྷ་ཚོགས་ཀྱིས་བསྐོར་བ། གཡས་ཀྱི་ཡལ་གར་ཐུན་མོང་གི་སངས་རྒྱས་ཤཱཀྱ་ཐུབ་པ་སོགས་དུས་གསུམ་གྱི་སངས་རྒྱས་མཆོག་གི་སྤྲུལ་པའི་སྐུ་རྣམས་དང༌། གཡོན་གྱི་ཡལ་ག་ལ་ཉེ་བའི་སྲས་བརྒྱད་སོགས་ཐེག་ཆེན་བྱང་སེམས་དང་ཉན་རང་གི་དགེ་འདུན་འཕགས་པའི་ཚོགས། རྒྱབ་ཀྱི་ཡལ་གར་ཆོས་དཀོན་མཆོག་གླེགས་བམ་བརྩེགས་པའི་རྣམ་པ་ཅན་ཁ་དོག་དམར་པོ་ཨཱ་ལི་ཀཱ་ལིའི་རང་སྒྲ་སྒྲོགས་པ་དང༌། དེ་དག་གི་བར་མཚམས་ཐམས་ཅད་དུ་ཡེ་ཤེས་དང་ལས་ལས་གྲུབ་པའི་ཆོས་སྲུང་དམ་ཅན་རྒྱ་མཚོའི་ཚོགས་ཀྱིས་བར་མེད་དུ་གང་བ། ཐམས་ཅད་ཀྱང་མཁྱེན་བརྩེ་ནུས་གསུམ་གྱི་ཡོན་ཏན་དཔག་ཏུ་མེད་པ། རྩ་བའི་བླ་མའི་ཐུགས་ཡེ་ཤེས་གཅིག་གི་རོལ་པ་ལས་མ་འདས་པ། བདག་ཉིད་ལ་རྗེས་སུ་བརྩེ་ཞིང་འདྲེན་པའི་དེད་དཔོན་ཆེན་པོར་མངོན་སུམ་དུ་བཞུགས་པར་བསམ་ལ། དེའི་མདུན་དུ་རང་གཞན་རིགས་དྲུག་གི་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་འདི་ནས་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་མ་ལ་འདྲེན་པ། ཡི་དམ་དང་སངས་རྒྱས་ལ་སྟོན་པ། ཆོས་ལ་ལམ། མཁའ་འགྲོ་ཆོས་སྐྱོང་དགེ་འདུན་ལ་ལམ་སྒྲུབ་པའི་ཟླ་གྲོགས་ཞུ་བའི་ཚུལ་གྱིས་བདག་ཅག་རྣམས་ཁྱེད་ལ་བསྟེན། ཁྱེད་ལ་འབུལ། ཁྱེད་ལས་གཞན་པའི་སྐྱབས་དང་རེ་ས་མེད་པས་ཅི་མཛད་ཁྱེད་མཁྱེན་སྙམ་པའི་གདུང་བ་དྲག་པོས་སྐྱབས་སུ་འགྲོ་བར་མོས་ཏེ། ན་མོཿ བླ་མ་སངས་རྒྱས་རིན་པོ་ཆེ༔ སྐྱབས་གནས་རྒྱ་མཚོའི་ཡེ་ཤེས་སྐུ༔ མཁྱེན་བརྩེ་ནུས་པའི་བདག་ཉིད་ལ༔ མི་ཕྱེད་དད་པས་སྐྱབས་སུ་མཆི༔ ཞེས་སྐྱབས་འགྲོ་ཅི་ནུས་བྱ། མཐར་སྐྱབས་ཡུལ་རྣམས་ཀྱི་ཐུགས་ཀ་ནས་འོད་ཟེར་འཕྲོས། བདག་དང་སེམས་ཅན་ཐམས་ཅད་ཀྱི་ལུས་སེམས་ལ་ཞུགས། སྒྲིབ་གཉིས་བག་ཆགས་དང་བཅས་པ་དག །ཚེ་དང་བསོད་ནམས་ལུང་རྟོགས་ཀྱི་ཡོན་ཏན་ལ་སོགས་པ་གོང་ནས་གོང་དུ་འཕེལ་ཞིང་རྒྱས་པར་བསམ་ལ་སེམས་འཛིན་མེད་ཀྱི་ངང་དུ་མཉམ་པར་བཞག་གོ །གཉིས་པ་ནི། འདི་ལྟར་མཁའ་ཁྱབ་ཀྱི་སེམས་ཅན་ཐམས་ཅད་ཚེ་རབས་ཐོག་མ་མེད་པ་ནས་དགྲས་ཀྱང་གཉེན་བྱས། གཉེན་གྱིས་ཀྱང་དགྲ་བྱས་པ་སོགས་དགྲ་གཉེན་ངེས་པ་མེད་ཅིང༌། ཚེ་འདི་དང་མ་འོངས་པ་ནའང་དགྲ་གཉེན་ངེས་མེད་འགྱུར་བར་བསམ་ནས་ཉེ་རིང་ཆགས་སྡང་དང་བྲལ་བའི་སེམས་བཏང་སྙོམས་ཐོག་མར་བསྐྱེད་ཅིང༌། དེ་ནས་དེ་ཐམས་ཅད་རང་གི་ཕ་མ་དྲིན་ཅན་ཤ་སྟག་ཡིན་པའི་ཕྱིར། དྲིན་གཟོ་བའི་སླད་དུ་བདེ་བ་དང་འཕྲད་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ། དེ་ལྟ་བུ་དང་མི་འབྲལ་བ་བྱུང་ན་རེ་དགའ་སྙམ་པའི་དགའ་བ་སྟེ་ཚད་མེད་བཞིས་བློ་སྦྱངས་པའི་མཐར། སྐྱབས་ཡུལ་རྣམས་དཔང་པོར་བཞུགས་པའི་ཚུལ་གྱིས། ཧོཿ ནམ་མཁའ་མཉམ་པའི་སེམས་ཅན་རྣམས༔ མེད་སྣང་འཁོར་བའི་ཆོས་ལ་ཞེན༔ སྡུག་བསྔལ་མཚོ་ལས་བསྒྲལ་བའི་ཕྱིར༔ བྱང་ཆུབ་བསྒྲུབ་པར་སེམས་བསྐྱེད་དོ༔ ཞེས་གྲངས་བསོག །སྤྲོ་ན་བར་འདིར་བདག་གཞན་མཉམ་བརྗེའི་བློ་སྦྱོང་དང༌། ཁྱད་པར་དབུགས་འགྲོ་འོང་དང་བསྟུན་ཏེ་བདེ་སྡུག་གཏོང་ལེན་གྱི་དམིགས་པའང་ཉམས་སུ་བླང་ཞིང་བདག་མེད་རྣམ་གཉིས་ཀྱི་ངེས་པས་དྲངས་པའི་ཞི་ལྷག་ཟུང་འཇུག་དོན་དམ་པའི་བྱང་ཆུབ་སེམས་ཀྱང་ཅི་རིགས་སུ་སྒོམ། མཐར་བདག་གཞན་སེམས་ཅན་ཐམས་ཅད་སྐྱབས་ཡུལ་ལ་ཐིམ། དེ་རྣམས་ཀྱང་དབུས་ཀྱི་བླ་མ་ལ་ཐིམ། དེ་ཡང་ཆོས་སྐུ་སྤྲོས་བྲལ་གདོད་མའི་དབྱིངས་སུ་བསྟིམས་ནས་མཉམ་པར་བཞག་གོ །གསུམ་པ་ནི། ཨ། བདག་ཉིད་སྤྱི་བོར་པད་ཟླའི་སྟེང༔ བླ་མ་རྡོར་སེམས་ཡབ་ཡུམ་གྱི༔ ཐུགས་ཀའི་ཧཱུྃ་ལས་བདུད་རྩིའི་རྒྱུན༔ བབས་པས་ནད་གདོན་སྡིག་སྒྲིབ་སྦྱངས༔ །ཞེས་བརྗོད་དེ་བདག་ཉིད་ཐ་མལ་དུ་གནས་པའི་སྤྱི་བོར་པད་ཟླའི་སྟེང་དུ་བླ་མ་རྡོ་རྗེ་སེམས་དཔའ་ཡབ་ཡུམ་སྐུ་མདོག་དཀར་གསལ་མཚན་དཔེའི་ཉམས་འགྱུར་ཡོངས་སུ་རྫོགས་པར་གསལ་བཏབ་ནས། མོས་གུས་གདུང་ཤུགས་དྲག་པོས་བདག་གི་ཤེས་རྒྱུད་ཀྱི་སྡིག་སྒྲིབ་ཐམས་ཅད་དག་པ་ཞིག་ཁྱེད་མཁྱེན་ནོ་སྙམ་པ་རྟེན་གྱི་སྟོབས། སྔར་བྱས་ཀྱི་སྡིག་པ་ལ་འགྱོད་སེམས་ཤུགས་དྲག་ཏུ་བྱེད་པ་རྣམ་པར་སུན་འབྱིན་པའི་སྟོབས། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པ་ཉེས་བྱས་སྡོམ་པའི་སྟོབས། སྔར་བྱས་ཀྱི་གཉེན་པོར་རྡོར་སེམས་ཀྱི་ཐུགས་ཀར་ཧཱུྃ་ཡིག་གི་མཐར་ཡིག་བརྒྱའི་སྔགས་ཕྲེང་དཀར་པོ་སྤུ་ཤད་ཀྱིས་བྲིས་པ་ལྟ་བུ་གཡས་བསྐོར་དུ་གསལ་བ་ལ་ཀློག་པའི་ཚུལ་གྱིས་ཅུང་ཟད་བཟླས་པས། དེ་ལས་བདུད་རྩི་དཀར་པོ་འོད་ཟེར་དང་བཅས་པ་དཔག་ཏུ་མེད་པ་བབ་ནས་ཡབ་ཡུམ་གྱི་སྐུའི་དབྱིབས་བརྒྱུད་སྦྱོར་མཚམས་ནས་བྱུང༌། པད་མའི་སྡོང་བུ་ལ་འཁྲིལ་བའི་ཚུལ་གྱིས་རང་གི་ཚངས་བུག་ནས་ཞུགས་ཏེ། ཤྭ་འུད་ཆེན་པོའི་སྣ་ལ་སྦུར་མི་ཆགས་པ་ལྟར་ནད་ཐམས་ཅད་རྣག་ཁྲག །གདོན་ཐམས་ཅད་སྲོག་ཆག །སྡིག་སྒྲིབ་ཐམས་ཅད་དུད་སོལ་ཁུ་རླངས་ཀྱི་རྣམ་པས་བ་སྤུའི་བུ་ག་དང་འོག་སྒོ་གཉིས་ནས་ཐོན། ས་རིམ་པ་དགུའི་འོག་ཏུ་འཆི་བདག་གླང་དམར་པོའི་རྣམ་པར་གནས་པའི་ཁ་གདངས་པའི་ནང་དུ་ཞུགས། ལྟོ་བར་ཚུད་པས་དུས་མ་ཡིན་པའི་འཆི་བ་བསླུས་པར་བསམ་ལ་ཡི་གེ་བརྒྱ་པ་ཅི་ནུས་བཟླ་བ་གཉེན་པོ་ཀུན་ཏུ་སྤྱོད་པའི་སྟོབས་བཞིའི་གནད་དང་ལྡན་པས་ཉམས་སུ་བླངས་མཐར། མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་བྱང་ཞིང་དག་པར་མཛད་དུ་གསོལ། ཞེས་སྐྱབས་གསོལ་གྱི་ཚིག་བརྗོད་པ་དང༌། རང་རྒྱུད་ཀྱི་སྡིག་ལྟུང་དག་པ་ལ་བླ་མ་རྡོ་རྗེ་སེམས་དཔའ་ཐུགས་དགྱེས་པས་ཞལ་འཛུམ་མདངས་སུ་བཞད་ཅིང༌། རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ། །ཞེས་གསུང་གིས་དངོས་སུ་གནང་བ་བྱིན་པ་དང་ཆབས་ཅིག་བདེ་སྟོང་ཆེན་པོའི་ངོ་བོར་འོད་དུ་ཞུ་ནས་རང་ལ་ཐིམ་པར་གྱུར་པས་རང་གནས་ཡེ་ཤེས་གཉུག་མའི་གནས་ལུགས་དོན་གྱི་རྡོ་རྗེ་སེམས་དཔའི་རང་ཞལ་བལྟས་ལ་མཉམ་པར་བཞག །བཞི་པ་ནི། རང་ལུས་རྒྱལ་ཡུམ་རྡོ་རྗེ་རྣལ་འབྱོར་མ། དམར་གསལ་གྲི་ཐོད་ཕྱག་རྒྱ་ལྔས་སྤྲས་པ། །བརྐྱང་བསྐུམ་སྟབས་ཀྱིས་པད་ཉི་བམ་རོ་བརྫིས། །བདེ་སྟོང་ཡེ་ཤེས་མེ་དཔུང་དབུས་རོལ་པའི། སྤྱི་བོ་ཛ་ལནྡྷ་རའི་དཀྱིལ་འཁོར་དུ། པད་དཀར་ཟླ་སྟེང་ཁྱབ་བདག་ཧེ་རུ་ཀཿ །སྐུ་མདོག་དཀར་དམར་བདེ་སྟོང་སྙོམས་འཇུག་མདངས། །ཕྱག་གཉིས་ཐབས་ཤེས་རྡོ་རྗེ་དྲིལ་བུས་མཚན། གཅེར་བུ་རུས་པའི་ཕྱག་རྒྱ་དྲུག་གིས་སྤྲས། དབྱིངས་ཕྱུག་སྔོན་མོ་ཡུམ་དང་འཁྲིལ་བར་བསྒོམ། །འཁོར་དུ་བརྒྱུད་གསུམ་བླ་མ་ཡི་དམ་ལྷ། །སངས་རྒྱས་བྱང་སེམས་དཔའ་བོ་དྷཱ་ཀི་མ། །ཕྱོགས་དུས་སྐྱབས་གནས་རྒྱ་མཚོའི་ཚོགས་ཐམས་ཅད། ཏིལ་གྱི་གོང་བུ་ཁ་ཕྱེ་ལྟ་བུར་བསམ། ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱི་རྗེས་སུ་བདག་བསྒྲུབ་ཀྱི༔ བྱིན་གྱིས་རླབས ་ཕྱིར་གཤེགས་སུ་གསོལ༔ གུ་རུ་པདྨ་སིདྡྷི་ཧཱུྃ༔ གིས་སྤྱན་དྲངས་དམ་ཡེ་དབྱེར་མེད་དུ་བསྟིམ་ལ། དེ་ཡང་ཐམས་ཅད་མཁྱེན་པ་ཐོབ་པའི་ལམ་ཤེས་པ་ནི་དགེ་བའི་བཤེས་གཉེན་ལ་རག་ལས་ཤིང༌། ལམ་སྟོན་བཤེས་གཉེན་མཚན་ལྡན་ནི་སངས་རྒྱས་ལས་ཀྱང་བཀའ་དྲིན་ཆེ་བར་ཤེས་པའི་བློས། ཚོགས་ཀྱི་ཞིང་ཁྱད་པར་ཅན་ལ་བསགས་སྦྱང་སྙིང་པོ་ཡན་ལག་བདུན་པ་འབུལ་བ་ནི། སོ་སོའི་དམིགས་པ་རྣམས་དྲན་བཞིན་པས། བླ་མ་རྩ་གསུམ་ལྷ་ཚོགས་ལ༔ སྒོ་གསུམ་གུས་པས་ཕྱག་འཚལ་ལོ༔ ཀུན་བཟང་སྒྱུ་འཕྲུལ་དྲྭ་བས་མཆོད༔ སྡིག་ལྟུང་ཉེས་པར་བྱས་ཀུན་བཤགས༔ རྣམ་གྲོལ་དགེ་ལ་རྗེས་ཡི་རང༔ ཟབ་རྒྱས་ཆོས་འཁོར་བསྐོར་བར་བསྐུལ༔ མྱ་ངན་མི་འདའ་བཞུགས་གསོལ་འདེབས༔ དགེ་ཚོགས་བྱང་ཆུབ་ཆེན་པོར་བསྔོ༔ ཀུན་ཀྱང་བླ་མའི་གནས་ཐོབ་ཤོག སྔར་སྐྱབས་འགྲོའི་སྐབས་ཕྱག་འབུམ་མ་སོང་ན་ཡན་ལག་བདུན་པ་དང་སྦྲགས་ནས་ཕྱག་འཚལ། རིན་པོ་ཆེ་སོགས་ཇི་ལྟར་འབྱོར་བའི་མཎྜལ་ལ། སྨན་འབྲུ་རིན་ཆེན་སྣ་ཚོགས་པའི་ཚོམ་བུ་བཀོད་དེ། ཨོཾ་ཨཱཿཧཱུྃ། སྐུ་གསུམ་ཞིང་ཁམས་ལོངས་སྤྱོད་དང༌། །ཕྱི་ནང་གསང་བའི་མཆོད་པའི་སྤྲིན། །དཀོན་མཆོག་རྩ་བ་གསུམ་ལ་འབུལ། བཞེས་ནས་མཆོག་ཐུན་དངོས་གྲུབ་སྩོལ། ཨོཾ་ཨཱཿཧཱུྃ་གུ་རུ་དྷཱེ་ཝ་ཌཱ་ཀི་ནི་ས་པཱ་རི་ཝ་ར་རཏྣ་མཎྜལ་པཱུ་ཛ་མེ་གྷ་ཨཱཿཧཱུྃ། གྲངས་ཇི་ལྟར་འོས་པ་འབུལ། འདི་ལྟར་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པ་ནི། རང་སེམས་ལྷན་ཅིག་སྐྱེས་པའི་ཡེ་ཤེས་རྟོགས་པ་ལ་རག་ལས་ཤིང༌། རྟོགས་པ་སྐྱེ་བ་བླ་མའི་བྱིན་རླབས་དང༌། བྱིན་རླབས་འཇུག་པ་མོས་གུས་ཀྱི་རྟེན་འབྲེལ་ཁོ་ན་ལ་རག་ལས་པས་ན། རང་གི་རྩ་བའི་བླ་མ་ཉིད་ཕྱོགས་དུས་ཀྱི་སངས་རྒྱས་ཐམས་ཅད་ཀྱི་མཁྱེན་བརྩེ་ནུས་པའི་ཡེ་ཤེས་གཅིག་ཏུ་བསྡུས་པའི་བདག་ཉིད། འགྲོ་བ་སྒྲོལ་བའི་སླད་དུ་རང་རང་དང་རིགས་མཐུན་པའི་བླ་མའི་སྐུར་སྣང་བས། གསུང་གིས་ལམ་བདེན་གྱི་ཆོས་འདོམས་ཤིང༌། དེ་ནས་འགོག་བདེན་གྱི་འབྲས་བུ་ལ་སྦྱོར་བས་སངས་རྒྱས་ལས་ཀྱང་བཀའ་དྲིན་ཆེ་བར་ཐག་བཅད། ངེས་ཤེས་བསྐྱེད། བློ་སྙིང་བྲང་གསུམ་ལིང་གིས་གཏད། འདི་ནས་བྱང་ཆུབ་མ་ཐོབ་ཀྱི་བར་དུ་སྐྱིད་སྡུག་ལེགས་ཉེས་ཅི་བྱུང་ཡང་ཁྱེད་མཁྱེན་ནོ་སྙམ་པའི་བློ་གཏད་ལིང་བསྐྱུར་གྱི་ཚུལ་གྱིས་ལུས་ཀྱི་བ་སྤུ་གཡོ། མིག་མཆི་མ་འཁྲུགས། བློ་སྣ་བླ་མས་འཕྲོག་པ། བསམ་རྒྱུ་བླ་མ་ལས་མེད་པ། ལུས་སེམས་ཚུགས་མི་ཐུབ་པའི་མོས་གུས་དང་གདུང་ཤུགས་དྲག་པོས། འོད་གསལ་སྙིང་ཐིག་གི་གསོལ་འདེབས་བྱིན་རླབས་མྱུར་ལམ། བརྒྱུད་འདེབས་བྱིན་རླབས་སྤྲིན་ཕུང་བཅས་སྔོན་དུ་འགྲོ་བས། སྐྱབས་གནས་ཀུན་འདུས་རྡོ་རྗེ་འཆང༔ དཔལ་ལྡན་བླ་མ་རིན་པོ་ཆེ༔ གསོལ་བ་འདེབས་སོ་བྱིན་གྱིས་རློབས༔ དབང་དང་དངོས་གྲུབ་བསྩལ་དུ་གསོལ༔ ཞེས་གསོལ་འདེབས་བསྡུས་པ་ཉིད་ཅི་ནུས་དང༌། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་ཛྙཱ་ན་སརྦ་སིདྡྷི་ཧཱུྃ༔ ཐུགས་དམ་རྒྱུད་བསྐུལ་གྱི་བཟླས་པ་ཆིག་དྲིལ་བྱ། ཐུན་མཐར། གནས་གསུམ་འབྲུ་གསུམ་འོད་ཟེར་གྱིས། །སྐུ་གསུང་ཐུགས་ཀྱི་བྱིན་རླབས་དང༌། དབང་བཞི་ཐོབ་ཅིང་ལམ་བཞི་སྒོམ། །སྒྲིབ་བཞི་དག་ཅིང་སྐུ་བཞི་ཡི། འབྲས་བུ་མངོན་གྱུར་སྐལ་ལྡན་བྱས། བླ་མ་འོད་ཞུ་རང་ལ་ཐིམ། །དབྱེར་མེད་མ་བཅོས་ལྷུག་པར་བཞག །བླ་མའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་དུ་བསྲེས་ཏེ་རང་སེམས་རིག་སྟོང་རྗེན་པ་སྐད་ཅིག་མའི་རང་མདངས་བསྐྱང༌། ཐུན་མཚམས་རྣམས་སུ་ཐུན་མོང་ཁྱེར་སོ་གསུམ་གྱི་རྣལ་འབྱོར་ལ་བསླབ། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི་སྙིང་གར་པདྨའི་གདན་བཞུགས་ལ། །བཀའ་དྲིན་ཆེན་པོའི་སྒོ་ནས་རྗེས་བཟུང་སྟེ། །སྐུ་གསུང་ཐུགས་ཀྱི་དངོས་གྲུབ་བསྩལ་དུ་གསོལ། །སྐྱེ་བ་ཀུན་ཏུ་ཡང་དག་བླ་མ་དང༌། །འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང༌། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །དཔལ་ལྡན་བླ་མའི་རྣམ་པར་ཐར་པ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང༌། ཅི་མཛད་ལེགས་པར་མཐོང་བའི་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །བསྔོ་སྨོན་བྱས་ཏེ་ཉམས་སུ་བླང་བའི་ཕན་ཡོན་ཀྱང་རྡོ་རྗེའི་ཚིག་རྐང་ལས། འདིས་ནི་མཆོག་གི་དངོས་གྲུབ་ཀྱང༔ མྱུར་བ་ཉིད་དུ་མངོན་གྱུར་ན༔ ཐུན་མོང་དངོས་གྲུབ་སྨོས་ཅི་དགོས༔ ཡིད་བཞིན་ནོར་བུའི་མན་ངག་གོ༔ ཞེས་གསུངས་པའི་མཚོན་ཕན་ཡོན་མཐའ་ཡས་པ་མདོ་རྒྱུད་མན་ངག་དུ་མ་ནས་གསུངས་པ་ལྟར་ཉམས་སུ་ལེན་པ་ཅིས་ཀྱང་གལ་ཆེའོ། །ཅེས་པའང་རྒྱལ་ཁབ་ཕ་རན་སེའི་ཐེག་མཆོག་རིན་ཆེན་གླིང་དུ་སྒྲུབ་སྡེ་གསར་འཇུགས་སྐབས་རྙིང་སྔགས་རྒན་པོ་མངྒ་ལ་ཤྲཱི་བྷཱུ་ཏིས་རང་ཉིད་ཀྱི་བསམ་གཏན་ཁང་བུ་བཀྲ་ཤིས་དཔལ་འབར་གླིང་དུ་བྲིས་པ་ཐེག་མཆོག་སྙིང་པོའི་བསྟན་པ་ལ་བྱ་བ་བྱེད་ནུས་པར་གྱུར་ཅིག། །།

[edit]

@#/_gu ru'i thugs sgrub dngos grub snying po las/_sngon 'gro'i ngag 'don zab lam snang byed bzhugs so//

@#/_/na mo gu ru b+h+yaH__'dir rtsa gsum gcig dril thugs sgrub dngos grub snying po'i dbang bzhi'i lam yongs su rdzogs pa nyams su len pa la med du mi rung ba sngon 'gro'i ngag 'don 'jug bder bsdeb pa la gsum/_thun gyi sngon 'gro/_thun mong gi sngon 'gro/_khyad par gyi sngon 'gro'o/__/dang po ni/_thog mar bde ba'i stan la sgo gsum bag phab ste ngal gso/_rlung ro bsal/_lus sems khong lhod nas kun slong legs par bcos te/_e ma hoH_skyabs gnas kun 'dus khyab bdag 'khor lo'i mgon:_snying dbus 'od gsal dbu ma'i pho brang nas:_mdun gyi nam mkhar yid 'phrog mchod sprin dbus:_mngon sum gshegs nas bdag rgyud byin gyis rlobs:_mos gus gzhal med pho brang nyams dga' bar/_/ring nas 'khyud pa'i drin chen bla ma'i zhal/_/yang yang dran pas rtag tu phyag bgyid na/_/dngos grub rgya mtsho'i gnas la gegs med mdzod/_ces dang*/_dus gsum sangs rgyas thams cad kyi ngo bo bka' drin mtshungs pa med pa'i gter chen bla ma rin po che mkhyen no/_bdag gi rgyud smin cing grol bar byin gyis brlab tu gsol/_zab lam gyi rtogs pa khyad par can rgyud la skye bar byin gyis brlab tu gsol/_tshe 'di nyid la phyag rgya chen po mchog gi dngos grub thob par mdzad du gsol/_zhes gsol ba phur tshugs su gdab/_gnyis pa thun mong gi sngon 'gro ni/_dal brgyad 'byor bcus brgyan pa'i mi lus 'di:_dpe grangs rgyu dang ngo bos rnyed dka' zhing:_don chen sgrub pa'i mchog tu nges mthong nas:_rtse gcig snying po lon par byin gyis rlobs:_dam pa'i chos sgrub byed rten dal 'byor rnyed dka' ba'i dmigs rkang dang po dang*/_phyi nang snod bcud dgra gnyen bar ma sogs:_gang la bsams kyang mi rtag 'jig pa'i phyir:_long med 'chi ba dran pa'i brtson 'grus kyis:_tshe 'di'i mngon zhen ldog par byin gyis rlobs:_chos la bskul ba'i rkyen 'dus byas mi rtag par bsam pa'i dmigs rkang gnyis pa dang*/_'chi tshe dkar nag las kyi gzhan dbang gis:_khams gsum rigs drug mtho dman sna tshogs su:_bde sdug 'bras bu mi bslu smin pa'i phyir:_blang dor tshul bzhin nus par byin gyis rlobs:_chos kyi gnad las rgyu 'bras la yid ches bskyed pa'i dmigs rkang gsum pa dang*/_dmyal ba tsha grang yi dwags bkres skom dang:_dud 'gro bkol spyod sdug bsngal mtha' yas shing:_mtho ris na yang bde ba'i skabs med pas:_nges 'byung drag po skye bar byin gyis rlobs:_chos kyi srog 'khor ba'i nyes dmigs kyis nges 'byung bskyed pa'i dmigs rkang bzhi pa dang*/_de las skyob pa'i ded dpon gcig gyur pa:_mtshan ldan bla ma dge ba'i bshes gnyen mchog:_mnyes pa gsum gyi bya bas legs bsten nas:_thos bsam sgom la brtson par byin gyis rlobs:_chos kyi sgo 'byed dge ba'i bshes gnyen bsten tshul dang thar pa'i phan yon bstan pa'i dmigs rkang lnga pa'o/__/byin gyis rlobs shig drin can bla ma rje:_dngos grub stsol cig 'chi med thod phreng rtsal:_bar chad sol cig mkha' 'gro chos skyong tshogs:_snying nas dran no thugs rje'i spyan gyis gzigs:_zhes 'dod pa'i don la gsol ba gdab pas mtshams sbyar ro/__/gnyis pa khyad par gyi sngon 'gro la skyabs 'gro/_sems bskyed/_rdor sems bsgom bzlas/_bla ma'i rnal 'byor la brten nas bsags sbyang gsol ba gdab pa'o/__/dang po ni/_de lta bu'i 'jigs rung 'khor ba'i sdug bsngal de las rang gzhan sems can thams cad bsgral ba'i phyir bla ma dang dkon mchog gsum la skyabs su 'gro bar bgyi'o snyam pa'i skyes bu chen po'i blos/_rang nyid gang du gnas pa'i sa phyogs thams cad rin po che sna tshogs las grub pa'i zhing khams mdzes shing yid du 'ong ba'i gzhir dpag bsam ljon shing yal ga lnga pa/_lo 'dab dang me tog 'bras bu phun sum tshogs pa la rin po che'i 'phyang 'phrul dril g.yer la sogs pas rnam par brgyan pa nam mkha'i dbyings kun khyab pa'i dbus su seng ges btegs pa'i rin po che'i khri sna tshogs pad+ma nyi zla brtsegs pa'i gdan la sangs rgyas kun 'dus kyi ngo bo rtsa ba'i bla ma o rgyan rdo rje 'chang sku mdog sngon po rdo rje dang dril bu 'dzin pa/_yum mtsho rgyal dkar mo gri gug dang thod pa 'dzin pa dang mnyam par sbyor ba/_dar dang rus pa'i rgyan gyis brgyan cing*/_zhabs rdo rje'i skyil krung gis bzhugs pa'i dbu gtsug tu brgyud gsum bla ma rnams tho brtsegs su bzhugs shing*/_gzhan yang rtsa brgyud kyi bla ma dam pa rnams dang*/_gnas gsum gyi dpa' bo mkha' 'gro bsam gyis mi khyab pas mtha' nas bskor ba/_mdun gyi yal ga la khyad par gyi sangs rgyas dpal rdo rje sems dpa' la yi dam rgyud sde drug gi lha tshogs kyis bskor ba/_g.yas kyi yal gar thun mong gi sangs rgyas shAkya thub pa sogs dus gsum gyi sangs rgyas mchog gi sprul pa'i sku rnams dang*/_g.yon gyi yal ga la nye ba'i sras brgyad sogs theg chen byang sems dang nyan rang gi dge 'dun 'phags pa'i tshogs/_rgyab kyi yal gar chos dkon mchog glegs bam brtsegs pa'i rnam pa can kha dog dmar po A li kA li'i rang sgra sgrogs pa dang*/_de dag gi bar mtshams thams cad du ye shes dang las las grub pa'i chos srung dam can rgya mtsho'i tshogs kyis bar med du gang ba/_thams cad kyang mkhyen brtse nus gsum gyi yon tan dpag tu med pa/_rtsa ba'i bla ma'i thugs ye shes gcig gi rol pa las ma 'das pa/_bdag nyid la rjes su brtse zhing 'dren pa'i ded dpon chen por mngon sum du bzhugs par bsam la/_de'i mdun du rang gzhan rigs drug gi sems can thams cad sgo gsum 'jug pa gcig pas 'di nas byang chub snying po la mchis kyi bar du bla ma la 'dren pa/_yi dam dang sangs rgyas la ston pa/_chos la lam/_mkha' 'gro chos skyong dge 'dun la lam sgrub pa'i zla grogs zhu ba'i tshul gyis bdag cag rnams khyed la bsten/_khyed la 'bul/_khyed las gzhan pa'i skyabs dang re sa med pas ci mdzad khyed mkhyen snyam pa'i gdung ba drag pos skyabs su 'gro bar mos te/_na moH_bla ma sangs rgyas rin po che:_skyabs gnas rgya mtsho'i ye shes sku:_mkhyen brtse nus pa'i bdag nyid la:_mi phyed dad pas skyabs su mchi:_zhes skyabs 'gro ci nus bya/_mthar skyabs yul rnams kyi thugs ka nas 'od zer 'phros/_bdag dang sems can thams cad kyi lus sems la zhugs/_sgrib gnyis bag chags dang bcas pa dag_/tshe dang bsod nams lung rtogs kyi yon tan la sogs pa gong nas gong du 'phel zhing rgyas par bsam la sems 'dzin med kyi ngang du mnyam par bzhag go_/gnyis pa ni/_'di ltar mkha' khyab kyi sems can thams cad tshe rabs thog ma med pa nas dgras kyang gnyen byas/_gnyen gyis kyang dgra byas pa sogs dgra gnyen nges pa med cing*/_tshe 'di dang ma 'ongs pa na'ang dgra gnyen nges med 'gyur bar bsam nas nye ring chags sdang dang bral ba'i sems btang snyoms thog mar bskyed cing*/_de nas de thams cad rang gi pha ma drin can sha stag yin pa'i phyir/_drin gzo ba'i slad du bde ba dang 'phrad 'dod kyi byams pa/_sdug bsngal dang bral 'dod kyi snying rje/_de lta bu dang mi 'bral ba byung na re dga' snyam pa'i dga' ba ste tshad med bzhis blo sbyangs pa'i mthar/_skyabs yul rnams dpang por bzhugs pa'i tshul gyis/_hoH_nam mkha' mnyam pa'i sems can rnams:_med snang 'khor ba'i chos la zhen:_sdug bsngal mtsho las bsgral ba'i phyir:_byang chub bsgrub par sems bskyed do:_zhes grangs bsog_/spro na bar 'dir bdag gzhan mnyam brje'i blo sbyong dang*/_khyad par dbugs 'gro 'ong dang bstun te bde sdug gtong len gyi dmigs pa'ang nyams su blang zhing bdag med rnam gnyis kyi nges pas drangs pa'i zhi lhag zung 'jug don dam pa'i byang chub sems kyang ci rigs su sgom/_mthar bdag gzhan sems can thams cad skyabs yul la thim/_de rnams kyang dbus kyi bla ma la thim/_de yang chos sku spros bral gdod ma'i dbyings su bstims nas mnyam par bzhag go__/gsum pa ni/_a/_bdag nyid spyi bor pad zla'i steng:_bla ma rdor sems yab yum gyi:_thugs ka'i hU~M las bdud rtsi'i rgyun:_babs pas nad gdon sdig sgrib sbyangs:_/zhes brjod de bdag nyid tha mal du gnas pa'i spyi bor pad zla'i steng du bla ma rdo rje sems dpa' yab yum sku mdog dkar gsal mtshan dpe'i nyams 'gyur yongs su rdzogs par gsal btab nas/_mos gus gdung shugs drag pos bdag gi shes rgyud kyi sdig sgrib thams cad dag pa zhig khyed mkhyen no snyam pa rten gyi stobs/_sngar byas kyi sdig pa la 'gyod sems shugs drag tu byed pa rnam par sun 'byin pa'i stobs/_phyin chad srog la bab kyang mi byed snyam pa nyes byas sdom pa'i stobs/_sngar byas kyi gnyen por rdor sems kyi thugs kar hU~M yig gi mthar yig brgya'i sngags phreng dkar po spu shad kyis bris pa lta bu g.yas bskor du gsal ba la klog pa'i tshul gyis cung zad bzlas pas/_de las bdud rtsi dkar po 'od zer dang bcas pa dpag tu med pa bab nas yab yum gyi sku'i dbyibs brgyud sbyor mtshams nas byung*/_pad ma'i sdong bu la 'khril ba'i tshul gyis rang gi tshangs bug nas zhugs te/_shwa 'ud chen po'i sna la sbur mi chags pa ltar nad thams cad rnag khrag_/gdon thams cad srog chag_/sdig sgrib thams cad dud sol khu rlangs kyi rnam pas ba spu'i bu ga dang 'og sgo gnyis nas thon/_sa rim pa dgu'i 'og tu 'chi bdag glang dmar po'i rnam par gnas pa'i kha gdangs pa'i nang du zhugs/_lto bar tshud pas dus ma yin pa'i 'chi ba bslus par bsam la yi ge brgya pa ci nus bzla ba gnyen po kun tu spyod pa'i stobs bzhi'i gnad dang ldan pas nyams su blangs mthar/_mgon po bdag ni mi shes rmongs pa yis/_/dam tshig las ni 'gal zhing nyams/_/bla ma mgon pos skyabs mdzod cig_/gtso bo rdo rje 'dzin pa ste/_/thugs rje chen po'i bdag nyid can/_/'gro ba'i gtso la bdag skyabs mchi/_/sku gsung thugs rtsa ba dang yan lag gi dam tshig nyams pa thams cad mthol lo bshags so/_/sdig pa dang sgrib pa nyes ltung dri ma'i tshogs byang zhing dag par mdzad du gsol/_zhes skyabs gsol gyi tshig brjod pa dang*/_rang rgyud kyi sdig ltung dag pa la bla ma rdo rje sems dpa' thugs dgyes pas zhal 'dzum mdangs su bzhad cing*/_rigs kyi bu khyod kyi sdig sgrib nyes ltung thams cad dag pa yin no/__/zhes gsung gis dngos su gnang ba byin pa dang chabs cig bde stong chen po'i ngo bor 'od du zhu nas rang la thim par gyur pas rang gnas ye shes gnyug ma'i gnas lugs don gyi rdo rje sems dpa'i rang zhal bltas la mnyam par bzhag_/bzhi pa ni/_rang lus rgyal yum rdo rje rnal 'byor ma/_dmar gsal gri thod phyag rgya lngas spras pa/_/brkyang bskum stabs kyis pad nyi bam ro brdzis/_/bde stong ye shes me dpung dbus rol pa'i/_spyi bo dza lan+d+ha ra'i dkyil 'khor du/_pad dkar zla steng khyab bdag he ru kaH_/sku mdog dkar dmar bde stong snyoms 'jug mdangs/_/phyag gnyis thabs shes rdo rje dril bus mtshan/_gcer bu rus pa'i phyag rgya drug gis spras/_dbyings phyug sngon mo yum dang 'khril bar bsgom/_/'khor du brgyud gsum bla ma yi dam lha/_/sangs rgyas byang sems dpa' bo d+hA ki ma/_/phyogs dus skyabs gnas rgya mtsho'i tshogs thams cad/_til gyi gong bu kha phye lta bur bsam/_hU~M:_o rgyan yul gyi nub byang mtshams:_pad+ma ge sar sdong po la:_ya mtshan mchog gi dngos grub brnyes:_pad+ma 'byung gnas zhes su grags:_'khor du mkha' 'gro mang pos bskor:_khyed kyi rjes su bdag bsgrub kyi:_byin gyis rlabs_ phyir gshegs su gsol:_gu ru pad+ma sid+d+hi hU~M:_gis spyan drangs dam ye dbyer med du bstim la/_de yang thams cad mkhyen pa thob pa'i lam shes pa ni dge ba'i bshes gnyen la rag las shing*/_lam ston bshes gnyen mtshan ldan ni sangs rgyas las kyang bka' drin che bar shes pa'i blos/_tshogs kyi zhing khyad par can la bsags sbyang snying po yan lag bdun pa 'bul ba ni/_so so'i dmigs pa rnams dran bzhin pas/_bla ma rtsa gsum lha tshogs la:_sgo gsum gus pas phyag 'tshal lo:_kun bzang sgyu 'phrul drwa bas mchod:_sdig ltung nyes par byas kun bshags:_rnam grol dge la rjes yi rang:_zab rgyas chos 'khor bskor bar bskul:_mya ngan mi 'da' bzhugs gsol 'debs:_dge tshogs byang chub chen por bsngo:_kun kyang bla ma'i gnas thob shog_sngar skyabs 'gro'i skabs phyag 'bum ma song na yan lag bdun pa dang sbrags nas phyag 'tshal/_rin po che sogs ji ltar 'byor ba'i maN+Dal la/_sman 'bru rin chen sna tshogs pa'i tshom bu bkod de/_oM AHhU~M/_sku gsum zhing khams longs spyod dang*/_/phyi nang gsang ba'i mchod pa'i sprin/_/dkon mchog rtsa ba gsum la 'bul/_bzhes nas mchog thun dngos grub stsol/_oM AHhU~M gu ru d+hA+e wa DA ki ni sa pA ri wa ra rat+na maN+Dal pU dza me g+ha AHhU~M/_grangs ji ltar 'os pa 'bul/_'di ltar thar pa dang thams cad mkhyen pa'i go 'phang thob pa ni/_rang sems lhan cig skyes pa'i ye shes rtogs pa la rag las shing*/_rtogs pa skye ba bla ma'i byin rlabs dang*/_byin rlabs 'jug pa mos gus kyi rten 'brel kho na la rag las pas na/_rang gi rtsa ba'i bla ma nyid phyogs dus kyi sangs rgyas thams cad kyi mkhyen brtse nus pa'i ye shes gcig tu bsdus pa'i bdag nyid/_'gro ba sgrol ba'i slad du rang rang dang rigs mthun pa'i bla ma'i skur snang bas/_gsung gis lam bden gyi chos 'doms shing*/_de nas 'gog bden gyi 'bras bu la sbyor bas sangs rgyas las kyang bka' drin che bar thag bcad/_nges shes bskyed/_blo snying brang gsum ling gis gtad/_'di nas byang chub ma thob kyi bar du skyid sdug legs nyes ci byung yang khyed mkhyen no snyam pa'i blo gtad ling bskyur gyi tshul gyis lus kyi ba spu g.yo/_mig mchi ma 'khrugs/_blo sna bla mas 'phrog pa/_bsam rgyu bla ma las med pa/_lus sems tshugs mi thub pa'i mos gus dang gdung shugs drag pos/_'od gsal snying thig gi gsol 'debs byin rlabs myur lam/_brgyud 'debs byin rlabs sprin phung bcas sngon du 'gro bas/_skyabs gnas kun 'dus rdo rje 'chang:_dpal ldan bla ma rin po che:_gsol ba 'debs so byin gyis rlobs:_dbang dang dngos grub bstsal du gsol:_zhes gsol 'debs bsdus pa nyid ci nus dang*/_oM AHhU~M badz+ra ma hA gu ru dz+nyA na sarba sid+d+hi hU~M:_thugs dam rgyud bskul gyi bzlas pa chig dril bya/_thun mthar/_gnas gsum 'bru gsum 'od zer gyis/_/sku gsung thugs kyi byin rlabs dang*/_dbang bzhi thob cing lam bzhi sgom/_/sgrib bzhi dag cing sku bzhi yi/_'bras bu mngon gyur skal ldan byas/_bla ma 'od zhu rang la thim/_/dbyer med ma bcos lhug par bzhag_/bla ma'i sku gsung thugs dang rang gi sgo gsum dbyer med du bsres te rang sems rig stong rjen pa skad cig ma'i rang mdangs bskyang*/_thun mtshams rnams su thun mong khyer so gsum gyi rnal 'byor la bslab/_dpal ldan rtsa ba'i bla ma rin po che/_/bdag gi snying gar pad+ma'i gdan bzhugs la/_/bka' drin chen po'i sgo nas rjes bzung ste/_/sku gsung thugs kyi dngos grub bstsal du gsol/_/skye ba kun tu yang dag bla ma dang*/_/'bral med chos kyi dpal la longs spyod cing*/_/sa dang lam gyi yon tan rab rdzogs nas/_/rdo rje 'chang gi go 'phang myur thob shog_/dpal ldan bla ma'i rnam par thar pa la/_/skad cig tsam yang log lta mi skye zhing*/_ci mdzad legs par mthong ba'i mos gus kyis/_/bla ma'i byin rlabs sems la 'jug par shog_/bsngo smon byas te nyams su blang ba'i phan yon kyang rdo rje'i tshig rkang las/_'dis ni mchog gi dngos grub kyang:_myur ba nyid du mngon gyur na:_thun mong dngos grub smos ci dgos:_yid bzhin nor bu'i man ngag go:_zhes gsungs pa'i mtshon phan yon mtha' yas pa mdo rgyud man ngag du ma nas gsungs pa ltar nyams su len pa cis kyang gal che'o/__/ces pa'ang rgyal khab pha ran se'i theg mchog rin chen gling du sgrub sde gsar 'jugs skabs rnying sngags rgan po mang+ga la shrI b+hU tis rang nyid kyi bsam gtan khang bu bkra shis dpal 'bar gling du bris pa theg mchog snying po'i bstan pa la bya ba byed nus par gyur cig/__//