JKW-KABUM-03-GA-001-028

🚧 This website is under continued development. We appreciate your patience!

Previous Text Back to Volume PageNext Text

ཁྲེགས་ཆོད་ཅེས་པའི་སྒྲ་དོན་ནི་སོགས།

Wylie title	khregs chod ces pa'i sgra don ni sogs
Location	mkhyen brtse'i bka' 'bum Volume 3, sde tshan 1, Text 28, Pages 577-580 (Folios 289a2 to 290b5)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Citation	'jam dbyangs mkhyen brtse'i dbang po. khregs chod ces pa'i sgra don ni sogs. In 'jam dbyangs mkhyen brtse'i dbang po'i bka' 'bum, Vol. 3: 577-580. Khams sde dge rdzong sar dgon: Rdzong sar blo gros phun tshogs, 2020.
Genre	Notes - zin bris

1 Texts in this Section (sde tshan or chos tshan)

28 577-580	ཁྲེགས་ཆོད་ཅེས་པའི་སྒྲ་དོན་ནི་སོགས། khregs chod ces pa'i sgra don ni sogs Notes - zin bris	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

ཨོཾ་སྭ་སྟི། ཁྲེགས་ཆོད་ཅེས་པའི་སྒྲ་དོན་ནི་གནས་ལུགས་ཀྱི་ངོས་ནས་བཞག་པ་སྟེ། ཟུང་འཇུག་བདེན་པ་དབྱེར་མེད་འཁོར་འདས་རོ་མཉམ་གྱི་དགོངས་པ་དེ་ལ་ཐག་ཁྲེག་སེར་ཆོད་པས་ཐེ་ཚོམ་དང་བྲལ་བའོ། །ཐོད་རྒལ་གྱི་སྒྲ་དོན་ནི་སྣང་ལུགས་དང་འབྲས་བུའི་ངོས་ནས་བཞག་པ་སྟེ། ལམ་དེ་བསྟེན་པ་ཙམ་གྱིས་ལམ་གཞན་བར་ནས་བོར་ཏེ་འབྲས་བུའི་མཐར་ཐུག་པར་མྱུར་དུ་ཐོད་རྒལ་སྦྱོར་བར་བྱེད་པའི་དོན་ནོ། །སྟོང་གསུམ་དར་ཡུག་ཆེན་པོའི་དཔེ་ནི། མདོ་དེ་ཁའི་ལུང་ལས་གསལ་བ་ལྟར་དར་ཡུག་ལ་སྟོང་གསུམ་བྲིས་བ་ལྟ་བུའི་བསམ་གྱིས་མི་ཁྱབ་པ་སངས་རྒྱས་ཀྱི་སྐུ་དང་ཡེ་ཤེས་ཐམས་ཅད་སེམས་ཅན་ཀྱི་ཁམས་ན་ཟབ་ཅིང་ཕྲ་ལ་བརྟག་པར་དཀའ་བར་གནས་པས་ཡུངས་འབྲུར་བཅུག་པའི་དཔེས་བསྟན་པ་སྟེ་འདི་དོན་ཅུང་ཟད་ད་དུང་གོ་དཀའ་བར་སྣང་ངོ་། །ཤུབྷཾ།། །། ༈

མ་ཧཱ་ཡོ་ག་ལ། དཔེར་ན་འདུལ་བའི་འདུལ་བ་སོགས་ལྟར་ནང་གསེས་ཀྱི་ལྡོག་ཆས། མཧཱའི་མ་ཧཱ། མ་ཧཱའི་ཨ་ནུ། མ་ཧཱའི་ཨ་ཏི་གསུམ་དུ་ཡོད་པ་འདི་དོན་དཔལ་ཆེན་ཞལ་ལུང་གསལ། དེ་ལ་རྡོ་རྗེ་སེམས་དཔའ་དཔལ་སྒྱུ་འཕྲུལ་དྲྭ་བ་འདི་ཉིད་མ་ཧཱའི་མ་ཧཱ་ལྟར་བཀྲལ་བ་འཕགས་ཡུལ་སློབ་དཔོན་སྒེག་པའི་རྡོ་རྗེའི་པར་བཀབ་དང་། བོད་དུ་ཟུར་པ་རྗེས་འབྲངས་དང་བཅས་པ། རྗེ་གཏེར་ཆེན་བླ་མ་སྐུ་མཆེད་ཀྱང་དེ་ལྟར་བཞེད། ཡང་མ་ཧཱའི་ཨ་ཏི་ལྟར་བཀྲལ་བ་ནི་འཕགས་ཡུལ་སློབ་དཔོན་ཉི་འོད་སེང་གེའི་རྒྱ་ཆེར་འགྲེལ་དང་། བོད་ཡུལ་ཀུན་མཁྱེན་ཆེན་པོ་དྲི་མེད་འོད་ཟེར་གྱི་ཕྱོགས་བཅུ་མུན་སེལ་སོགས་བཞེད་སྣང་། གཞན་དུ་སྒྲོལ་ཊཱིཀ་དང་། ཁོག་ཕུབ། སྨན་ལུང་པའི་སྤྱི་དོན། གཡུང་ཊཱིཀ་སོགས་ཀྱང་གཙོ་བོར་ཟུར་པའི་བཤད་སྲོལ་ཡིན། རོང་ཟོམ་པའི་འགྲེལ་པ་ནི་དཀའ་འགྲེལ་ཙམ་མོ། ། ༈ ཞི་ཁྲོ་ལས། ཡི་གེ་གསུམ་གྱི་གོལ་ས་དེར་བཀག་གོ །ཞེས་པ་ནི། ཡི་གེ་ཨོཾ་དེ། ཨ། ཨུ། མ་གསུམ་འདུས་པས། ཨ་ནི་ཨ་ཏི་ཡོ་ག །ཨུ་ནི་ཨ་ནུ་ཡོ་ག །མ་ནི་མ་ཧཱ་ཡོ་གའི་སྒྲ་མཚོན་བྱེད་དེ་རྣལ་འབྱོར་དེ་གསུམ་གྱི་གོལ་ས་བཀག་གོ། །ཞེས་པའི་དོན་ཞིག །དཔེ་ལ་ལར། ཡོ་ག་གསུམ་གྱི་གོལ་ས་དེར་བཀག་གོ །ཞེས་ཀྱང་འབྱུང་ངོ་། ། ༈

མདོ་དབང་ཆེན་མོ་ལས། ཕུན་སུམ་ཚོགས་པ་ལྔའི་གཞི་བཟུང་བའི་སྐབས་སུ། སྟོན་པ་ཕུན་སུམ་ཚོགས་པ་ནི། སྟོན་པ་མཛོད་ལྡན་སོགས་དྲངས། གཉིས་པ་གནས་ཕུན་སུམ་ཚོགས་པ་ནི། རྡོ་རྗེ་ལས་རིམ་ལས། ཟུར་བརྒྱད་ལ་སོགས་རྩེ་མང་དང་། །ཆུ་བོ་བཞིན་དུ་མ་པོ་ཞིང་། །མཉམ་ཞིང་གདྒཱའི་ཆུ་ལྟར་དྭངས། །ཉི་མ་ཤིན་ཏུ་གནས་པ་ནི། །ནམ་མཁའི་མཚན་ཉིད་ཤེས་པར་བྱ། །མཐོ་དང་འདུད་པ་ནུབ་བྱང་ཡིན། །ཤར་ལྷོ་གཞོལ་ཞིང་འཇམ་པ་ལ། །མཐོ་སྒྲོ་གྲོག་པོ་ཆུ་སྣ་ཚོགས། །དཀྱིལ་འཁོར་དབང་དགྲ་མཚམས་རྟགས་བྱ། །ལྷུན་སྡུག་རི་བོ་ནགས་ཚལ་ལྡན། །རབ་ཏུ་མཉམ་ཞིང་སྣུམ་བག་ཅན། །ཆུ་བོ་དབང་གི་ཕྱོགས་ཡིན་ཏེ། །ཅུང་ཟད་ཀྱིས་ནི་རླུང་ཉུང་ཞིང་། །མེ་ཏོག་སྐྱེད་ཚལ་བྱ་སྐད་བརྟག །ལོ་རྒྱུས་ཤིས་པའང་མཆོག་ཏུ་གསུངས། །ཞེས་དང་། ལམ་རིམ་ལས། སྡེ་དཔུང་ཆེན་པོས་མི་ཚུགས་ཤིང་། །ས་དང་བར་སྣང་ཤིས་པ་དང་། །ལོ་རྒྱུས་རྣམ་གཉིས་ལྡན་པ་དང་། །ཡིད་འོང་ས་བཙལ་རྒྱས་བར་བྱ། །འཁོར་ཁང་ཕྱི་ནང་བར་ལྡན་པར། རིན་ཆེན་བྱུགས་པས་བསྲུང་བ་དང་། །རིན་ཆེན་སྤྲས་པའི་གཞལ་ཡས་ཁང་། །ཞེས་སོ། །འཁོར་ཕུན་ཚོགས་ནི། རྡོ་རྗེ་རྒྱལ་ཐེབས། གཟུངས་མ། སློབ་མ་སྟེ། རྒྱུད་ལས། སྒྲུབ་དང་སྒོམ་ལ་དགའ་བ་དང་། །རྟག་ཏུ་བླ་མ་ལ་གུས་ཤིང་། །དུས་གསུམ་བླ་མ་མཆོད་བྱེད་པ། །ཡོན་ཏན་དང་ལྡན་སློབ་མ་ཡིན། །ཞེས་སོ། །བཞི་པ་ཡོ་བྱད་ཕུན་སུམ་ཚོགས་པ་ནི། རྒྱུད་ལས། ཡོ་བྱད་དཀའ་བ་ཀུན་བསྡུས་ནས། །ཁྱད་པར་ཚོགས་དང་ལྡན་པ་ཡི། །དངོས་གྲུབ་སྒྲུབ་པའི་རྫས་སུ་བཞག །ཅེས་སྐུའི་རྟེན་ཕྱི་ནང་གི་ཙཀླི། བྲིས་སྐུ། ལུགས་མ་སོགས། གསུང་རྟེན་གླེགས་བམ། ཐུགས་རྟེན་ཕྱག་མཚན་དུ་མ་དང་། དབང་རྫས་བུམ་པ་བདུད་རྩི་ལྔ་ལ་སོགས་པ། སྒྲུབ་རྫས་ཀ་པཱ་ལ། སྨན་རཀ་གཏོར་མ་སོགས། མཆོད་རྫས་མེ་ཏོག་སོགས། བགེགས་བཟློག་པའི་བསྙེན་ཕུར། ཡུངས་ཀར། གུ་གུལ། ནད་ཞི་བའི་སྨན་ལ་སོགས་པ་དང་། དགྲ་རྐྱེན་བཟློག་པའི་གོ་མཚོན་དང་། གཞན་ཡང་རྔ་དུང་སིལ་སྙན་ལ་སོགས་པ། གདུགས་རྒྱལ་མཚན་བ་དན་ཡོལ་བ་བླ་བྲེ་སོགས་ཉེར་མཁོ་དུ་མ་དང་། འཚོ་བ་ཟས་ཀྱི་ཡོ་བྱད་ཀྱང་། ཚེ་འཛིན་ཏེ་ཟན། གལ་བྱི་སྟེ་བུ་ཟླུམ་བཙོས་པ། ཛ་གད་སྟེ་ཆང་། ཛ་ག་ཏི་སྟེ་ཉེའུ། ཟླ་རྒྱས་མར། ཟླ་ཁྲོམ་མཐུང་། འཇམ་དེས་བུ་རམ། མང་ས་གཡུ་མདོག་ཁུར་བ། ཙ་ཏ་རུ་ཚ་བ། རྡོ་རྗེ་ཤུགས་ཀྱང་ཆང་། རྡོ་རྗེ་ཀུན་ཏུ་རྒྱུ་ཚྭ། རྡོ་རྗེ་ཀ་ཏ་རི་ཤ་ཡིན་ཅེས་གསུངས། གཏེར་མ་རྣམས་ལ་ངོས་འཛིན་འདི་དང་ཅུང་མི་འདྲ་བའི་ཁྱད་པར་ཡོད་དོ། །ལྔ་པ་དུས་ཕུན་སུམ་ཚོགས་པ་ནི། རྔམས་གློག་ལས། ཚེས་གྲངས་ཡར་གྱི་བརྒྱད་ལ་བརྩམས། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱད་བྱ། །སྔ་དྲོའི་དུས་སུ་དཀྱིལ་འཁོར་འབྲི། །ཞེས་སོ། ། ༈

[edit]

khregs chod ces pa'i sgra don ni sogs/ oM swa sti/__khregs chod ces pa'i sgra don ni gnas lugs kyi ngos nas bzhag pa ste/__zung 'jug bden pa dbyer med 'khor 'das ro mnyam gyi dgongs pa de la thag khreg ser chod pas the tshom dang bral ba'o/__/thod rgal gyi sgra don ni snang lugs dang 'bras bu'i ngos nas bzhag pa ste/__lam de bsten pa tsam gyis lam gzhan bar nas bor te 'bras bu'i mthar thug par myur du thod rgal sbyor bar byed pa'i don no/__/stong gsum dar yug chen po'i dpe ni/__mdo de kha'i lung las gsal ba ltar dar yug la stong gsum bris ba lta bu'i bsam gyis mi khyab pa sangs rgyas kyi sku dang ye shes thams cad sems can kyi khams na zab cing phra la brtag par dka' bar gnas pas yungs 'brur bcug pa'i dpes bstan pa ste 'di don cung zad da dung go dka' bar snang ngo /__/shub+haM//___//__! ma hA yo ga la/__dper na 'dul ba'i 'dul ba sogs ltar nang gses kyi ldog chas/__mahA'i ma hA/__ma hA'i a nu/__ma hA'i a ti gsum du yod pa 'di don dpal chen zhal lung gsal/__de la rdo rje sems dpa' dpal sgyu 'phrul drwa ba 'di nyid ma hA'i ma hA ltar bkral ba 'phags yul slob dpon sgeg pa'i rdo rje'i par bkab dang /__bod du zur pa rjes 'brangs dang bcas pa/__rje gter chen bla ma sku mched kyang de ltar bzhed/__yang ma hA'i a ti ltar bkral ba ni 'phags yul slob dpon nyi 'od seng ge'i rgya cher 'grel dang /__bod yul kun mkhyen chen po dri med 'od zer gyi phyogs bcu mun sel sogs bzhed snang /__gzhan du sgrol TIka dang /__khog phub/__sman lung pa'i spyi don/__g.yung TIka sogs kyang gtso bor zur pa'i bshad srol yin/__rong zom pa'i 'grel pa ni dka' 'grel tsam mo/___/__!_ zhi khro las/__yi ge gsum gyi gol sa der bkag go__/zhes pa ni/__yi ge oM de/__a/__u/__ma gsum 'dus pas/__a ni a ti yo ga__/u ni a nu yo ga__/ma ni ma hA yo ga'i sgra mtshon byed de rnal 'byor de gsum gyi gol sa bkag go/___/zhes pa'i don zhig__/dpe la lar/__yo ga gsum gyi gol sa der bkag go__/zhes kyang 'byung ngo /___/__!_ mdo dbang chen mo las/__phun sum tshogs pa lnga'i gzhi bzung ba'i skabs su/__ston pa phun sum tshogs pa ni/__ston pa mdzod ldan sogs drangs/__gnyis pa gnas phun sum tshogs pa ni/__rdo rje las rim las/__zur brgyad la sogs rtse mang dang /__/chu bo bzhin du ma po zhing /__/mnyam zhing gad+gA'i chu ltar dwangs/__/nyi ma shin tu gnas pa ni/__/nam mkha'i mtshan nyid shes par bya/__/mtho dang 'dud pa nub byang yin/__/shar lho gzhol zhing 'jam pa la/__/mtho sgro grog po chu sna tshogs/__/dkyil 'khor dbang dgra mtshams rtags bya/__/lhun sdug ri bo nags tshal ldan/__/rab tu mnyam zhing snum bag can/__/chu bo dbang gi phyogs yin te/__/cung zad kyis ni rlung nyung zhing /__/me tog skyed tshal bya skad brtag__/lo rgyus shis pa'ang mchog tu gsungs/__/zhes dang /__lam rim las/__sde dpung chen pos mi tshugs shing /__/sa dang bar snang shis pa dang /__/lo rgyus rnam gnyis ldan pa dang /__/yid 'ong sa btsal rgyas bar bya/__/'khor khang phyi nang bar ldan par/__rin chen byugs pas bsrung ba dang /__/rin chen spras pa'i gzhal yas khang /__/zhes so/__/'khor phun tshogs ni/__rdo rje rgyal thebs/__gzungs ma/__slob ma ste/__rgyud las/__sgrub dang sgom la dga' ba dang /__/rtag tu bla ma la gus shing /__/dus gsum bla ma mchod byed pa/__/yon tan dang ldan slob ma yin/__/zhes so/__/bzhi pa yo byad phun sum tshogs pa ni/__rgyud las/__yo byad dka' ba kun bsdus nas/__/khyad par tshogs dang ldan pa yi/__/dngos grub sgrub pa'i rdzas su bzhag__/ces sku'i rten phyi nang gi tsakli/__bris sku/__lugs ma sogs/__gsung rten glegs bam/__thugs rten phyag mtshan du ma dang /__dbang rdzas bum pa bdud rtsi lnga la sogs pa/__sgrub rdzas ka pA la/__sman raka gtor ma sogs/__mchod rdzas me tog sogs/__bgegs bzlog pa'i bsnyen phur/__yungs kar/__gu gul/__nad zhi ba'i sman la sogs pa dang /__dgra rkyen bzlog pa'i go mtshon dang /__gzhan yang rnga dung sil snyan la sogs pa/__gdugs rgyal mtshan ba dan yol ba bla bre sogs nyer mkho du ma dang /__'tsho ba zas kyi yo byad kyang /__tshe 'dzin te zan/__gal byi ste bu zlum btsos pa/__dza gad ste chang /__dza ga ti ste nye'u/__zla rgyas mar/__zla khrom mthung /__'jam des bu ram/__mang sa g.yu mdog khur ba/__tsa ta ru tsha ba/__rdo rje shugs kyang chang /__rdo rje kun tu rgyu tshwa/__rdo rje ka ta ri sha yin ces gsungs/__gter ma rnams la ngos 'dzin 'di dang cung mi 'dra ba'i khyad par yod do/__/lnga pa dus phun sum tshogs pa ni/__rngams glog las/__tshes grangs yar gyi brgyad la brtsams/__/shin tu skar ma rgyal rnams la/__/byang chub spyod pa cher spyad bya/__/snga dro'i dus su dkyil 'khor 'bri/___/zhes so/___/__!