JKW-KABUM-12-NA-017

🚧 This website is under continued development. We appreciate your patience!

Previous Section Back to Volume PageNext Section

ཐུགས་སྒྲུབ་ཡང་སྙིང་ཀུན་འདུས་ཀྱི་དབང་ཆོག་པདྨ་དགྱེས་པའི་འཇུག་ངོགས།

Wylie title	thugs sgrub yang snying kun 'dus kyi dbang chog pad+ma dgyes pa'i 'jug ngogs
Location	mkhyen brtse'i bka' 'bum Volume 12, sde tshan 17, Pages 535-552 (Folios 1a to 9b2)
Author	འཇམ་དབྱངས་མཁྱེན་བརྩེའི་དབང་པོ་
Less details More details
Tertön	ངག་དབང་བློ་བཟང་རྒྱ་མཚོ་ (Dalai Lama, 5th)
Citation	'jam dbyangs mkhyen brtse'i dbang po. thugs sgrub yang snying kun 'dus kyi dbang chog pad+ma dgyes pa'i 'jug ngogs. In 'jam dbyangs mkhyen brtse'i dbang po'i bka' 'bum, Vol. 12: 535-552. Khams sde dge rdzong sar dgon: Rdzong sar blo gros phun tshogs, 2020.
Genre	Empowerment Ritual - dbang chog - dbang skur
Cycle	ཐུགས་སྒྲུབ་ཡང་སྙིང་ཀུན་འདུས་ (thugs sgrub yang snying kun 'dus)
Parent Cycle	དག་སྣང་རྒྱ་ཅན་ (dag snang rgya can)
Colophon	།ཅེས་པའང་མཚོ་སྐྱེས་བླ་མ་དགྱེས་པའི་འབངས་རྡོ་རྗེ་གཟི་བརྗིད་ཀྱིས་ཀུན་མཁྱེན་རྒྱལ་བའི་དབང་པོ་ཉིད་ཀྱི་རྡོ་རྗེའི་གསུང་ཇི་ལྟ་བ་ལ་མཚམས་སྦྱོར་བཀླགས་ཆོག་ཏུ་བཀོད་པ་སརྦ་དཱ་སུ་ཤྲི་ཡོ་བྷ་བནྟུ།།
	ces pa'ang mtsho skyes bla ma dgyes pa'i 'bangs rdo rje gzi brjid kyis kun mkhyen rgyal ba'i dbang po nyid kyi rdo rje'i gsung ji lta ba la mtshams sbyor bklags chog tu bkod pa sarba dA su shri yo b+ha ban+tu

1 Texts in this Section (sde tshan or chos tshan)

535-552	ཐུགས་སྒྲུབ་ཡང་སྙིང་ཀུན་འདུས་ཀྱི་དབང་ཆོག་པདྨ་དགྱེས་པའི་འཇུག་ངོགས། thugs sgrub yang snying kun 'dus kyi dbang chog pad+ma dgyes pa'i 'jug ngogs Empowerment Ritual - dbang chog - dbang skur	Text page View PDF
	[[|འཇམ་དབྱངས་མཁྱེན་བརྩེའི་དབང་པོ་ ()]]

Tibetan Text

Wylie

[edit]

༄༅། །ཐུགས་སྒྲུབ་ཡང་སྙིང་ཀུན་འདུས་ཀྱི་དབང་ཆོག་པདྨ་དགྱེས་པའི་འཇུག་ངོགས་ཞེས་བྱ་བ་བཞུགས་སོ།།

ཨོཾ་སྭ་སྟི་སིདྡྷཾ། རྩ་རླུང་ཐིག་ལེ་ཡེ་ཤེས་གཉུག་མའི་ཁམས། །རྡོ་རྗེ་རྣམ་བཞིར་སྨིན་མཛད་མཚོ་སྐྱེས་རྗེར། །བཏུད་ནས་བླ་མ་ཡང་སྙིང་ཀུན་འདུས་ཀྱི། །དབང་ཆོག་པདྨ་དགྱེས་པའི་འཇུག་ངོགས་དབྱེ། །འདི་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། གནས་དབེན་ཞིང་ཡིད་དང་མཐུན་པར་སྟེགས་བུའི་ཁར་རས་བྲིས་སམ། མཎྜ་ལར་ལྷ་གྲངས་དང་མཐུན་པའི་ཚོམ་བུ་དགོད། དེའི་སྟེང་མཉྫིའི་ཁར་བུམ་པ་བཅུད་ལྡན་དང་། ཐོད་པ་བདུད་རྩིས་གང་བ་མེ་ལོང་ལ་སིནྡྷུརའི་ཐིག་ལེ་དང་རྩ་སྔགས་ཀྱིས་མཚན་པས་ཁ་དགབ། གཡས་སུ་གུ་རུའི་སྐུ་འབག །མེ་ལོང་གི་སྟེང་ངམ་གཡོན་ཏུ་གཏོར་མ་རིན་ཆེན་འབར་བ། མདུན་རྒྱབ་གང་བདེར་ལྷ་ཙག །གཞན་ཡང་སྨན་རཀ །ཉེར་སྤྱོད། ཚོགས་ཀྱི་ཡོ་བྱད། ལས་བུམ། སྔོན་གཏོར་སོགས་འོག་ཏུ་དགོས་པ་ཐམས་ཅད་འདུ་བྱའོ། །གཉིས་པ་ལ་གཉིས། སློབ་དཔོན་གྱི་བྱ་བ་དང་། སློབ་མ་ལ་བྱ་བའོ། །དང་པོ་ནི། བདག་མདུན་དབྱེར་མེད་ཀྱི་དགོངས་པས་ལས་གཞུང་བསྲངས་ཏེ་བཟླས་པ་ཇི་ལྟར་རིགས་པ་དང་། བྱེ་བྲག་ཏུ། བུམ་པ་དང་བྷཉྫ་རང་བྱུང་གི་གཞལ་མེད་ཁང་ཆེན་པོར་ལྷ་རྣམས་དྭངས་པའི་མཚོ་ལ་གཟའ་སྐར་ཤར་བ་བཞིན་ལྷག་པར་གསལ་བའི་སྐུ་ལས་བྱང་སེམས་བདུད་རྩིའི་རྒྱུན་བབས་པས་སྣོད་ཡོངས་སུ་གང་བར་མོས་ཏེ་བཟླས་པ་དང་། སིནྡྷུ་རའི་མེ་ལོང་གི་ཡིག་འབྲུ་དང་། གུ་རུའི་སྐུ་འབག །གཏོར་མ་རིན་ཆེན་འབར་བ་རྣམས་ཀྱང་བླ་མ་རྡོ་རྗེ་འཆང་ཆེན་པོའི་ཡེ་ཤེས་ཀྱི་རང་གཟུགས་སྐུ་གསུམ་རྒྱ་མཚོའི་སྤྲིན་ཕུང་འཕྲོ་བར་བསམས་ལ་བཟླས་པས་བྱིན་གྱིས་བརླབ། ལས་བུམ་དུ་རྟ་མགྲིན་གྱི་བསྐྱེད་བཟླས་བྱ། དབྱངས་གསལ་རྟེན་སྙིང་བཟླ་ཞིང་མཆོད་བསྟོད་དང་། རིག་པའི་མེ་ཏོག་དོར་བས་བདག་ཉིད་འཇུག་ཅིང་། སློབ་མ་གཞུག་པར་གསོལ་བ་གདབ་བོ། །གཉིས་པ་ནི། སློབ་མ་རྣམས། ཇི་ལྟར་བལྟམས་པ་སོགས་ཀྱིས་ཁྲུས་བྱ། ལས་བྱང་ལྟར་བགེགས་གཏོར་གཏོང་། སྲུང་འཁོར་བསྒོམ། མཚམས་སྦྱོར་ཅི་རིགས་པ་དང་། དེ་ལ་འདིར་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་བདག་ཉིད་ཨོ་རྒྱན་གྱི་སློབ་དཔོན་ཆེན་པོ་པདྨ་སཾ་བྷ་བས་འཁྲུལ་མེད་རྡོ་རྗེའི་ལུང་གིས་ལན་ཅིག་མ་ཡིན་པར་བསྔགས་ཤིང་། འཇམ་པའི་དབྱངས་མངའ་བདག་ཁྲི་སྲོང་ལྡེའུ་བཙན་གྱི་འབྲས་བུ་མཐར་ཕྱིན་པའི་ཕྲིན་ལས་མི་ཟད་པ་རྒྱན་གྱི་འཁོར་ལོའི་རྣམ་འཕྲུལ་དུ་གདོད་ནས་གྲུབ་པ། གངས་ཅན་གྱི་མགོན་པོ་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་ངག་གི་དབང་ཕྱུག་རྡོ་རྗེ་ཐོགས་མེད་རྩལ་གྱི་དག་པ་ཡེ་ཤེས་ཀྱི་སྣང་ངོར་ཤར་བའི་ཡང་གསང་རྒྱ་ཅན་གྱི་ཆོས་སྡེ་ཉི་ཤུ་རྩ་ལྔའི་ནང་ཚན། རྡོ་རྗེའི་རྒྱ་ཅན་ལས་བྱུང་བའི་ཟབ་མོ་བླ་མའི་ཐུགས་སྒྲུབ་ཡང་སྙིང་ཀུན་འདུས་ཀྱི་དཀྱིལ་འཁོར་དུ་དབང་བསྐུར་བ་ལ། སློབ་དཔོན་གྱི་བྱ་བ་རྣམས་གྲུབ་ནས། ཁྱེད་རང་རྣམས་ཀྱི་ངོ་སྐལ་དུ་གྱུར་པ་ཐོག་མར་དཀྱིལ་འཁོར་དུ་འཇུག་པའི་ཕྱིར་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཧོཿ རྡོ་རྗེ་སློབ་དཔོན་དགོངས་སུ་གསོལ། །བདག་ཅག་བླ་མ་རིག་འཛིན་གྱི། །དཀྱིལ་འཁོར་ཆེན་པོར་འཇུག་ལགས་ན། །ཐུགས་རྗེ་ཆེན་པོས་གཟུང་དུ་གསོལ། །སྔོན་ཆད་དཀྱིལ་འཁོར་འདིར་མ་ཞུགས་པའམ་བསྐྱར་ནས་ཞུགས་པའི་མཚོན་བྱེད་དུ་མིག་དར་དམར་པོ་རེས་གདོང་གཡོགས་པའི་མོས་པ་མཛོད། ཨོཾ་ཙཀྵུ་བྷནྡྷ་ཝཱ་ར་མ་ནཱ་ཡ་སྭཱ་ཧཱ། ཕྱག་རྟེན་གྱི་སླད་དུ་མཆོག་གི་མེ་ཏོག་ཁ་དོག་ལྔ་པ་རེའང་བྱིན་པར་མོས་མཛོད། ཨཱ་ཁཾ་བཱི་ར་ཧཱུྃ། རྒྱུད་སྦྱང་བའི་སླད་དུ་བླ་མ་དང་དཀྱིལ་འཁོར་གྱི་གཙོ་བོ་རྡོ་རྗེ་ཐོད་ཕྲེང་རྩལ་ཐ་མི་དད་པ་ལ་རྩ་གསུམ་རྒྱ་མཚོའི་ཚོགས་ཀྱིས་བསྐོར་བ་མངོན་སུམ་དུ་བཞུགས་པའི་སྤྱན་སྔར་སྐྱབས་འགྲོ་སེམས་བསྐྱེད་སྡོམ་པ་གཟུང་བ་རྣམས་ཚུལ་བཞིན་ཏུ་བགྱི་སྙམ་པས་འདི་རྣམས་ཀྱི་རྗེས་ཟློས་ལན་གསུམ་མཛོད། ན་མོ། བླ་མ་བདེ་གཤེགས་འདུས་པའི་སོགས་ལས་གཞུང་གི་སྐྱབས་སེམས་དང་། ཧོཿ ཕྱོགས་བཅུ་དུས་བཞིའི་རྒྱལ་བ་སྲས་བཅས་རྣམས། །རང་བྱུང་དཀྱིལ་འཁོར་ཆེན་པོར་ལྷུན་རྫོགས་པའི། །རིགས་འདུས་བླ་མ་རྩ་གསུམ་ལྷ་ཚོགས་རྣམས། །བདག་ལ་བརྩེ་བས་གསན་ཅིང་དགོངས་སུ་གསོལ། །བདག་ཅག་དུས་འདི་ནས་བཟུང་བྱང་ཆུབ་བར། །བླ་མེད་དཀོན་མཆོག་གསུམ་ལ་སྐྱབས་མཆི་ཞིང་། །བྱང་ཆུབ་སེམས་མཆོག་མི་ཉམས་གཟུང་བར་བགྱི། །རྡོ་རྗེ་སྙིང་པོའི་རྩ་བ་རིགས་ལྔ་པོའི། །དམ་ཚིག་མ་ལུས་བདག་གིས་གཟུང་བར་བགྱི། །ལྷུན་གྲུབ་དེ་བཞིན་རིགས་ཀྱི་དམ་ཚིག་ཏུ། །སྐྱབས་གསུམ་ཁྲིམས་གསུམ་མ་ལུས་གཟུང་བར་བགྱི། །མི་འགྱུར་རྡོ་རྗེའི་རིགས་ཀྱི་དམ་ཚིག་ཏུ། །ཕྱག་རྒྱ་རྣམ་གསུམ་མི་འབྲལ་གཟུང་བར་བགྱི། །འདོད་འབྱུང་རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞིའི་ལས་ལ་བརྩོན་པར་བྱ། །སྐྱོན་བྲལ་པདྨའི་རིགས་ཀྱི་དམ་ཚིག་ཏུ། །དམ་ཆོས་མ་ལུས་ཡོངས་སུ་གཟུང་བར་བྱ། །སྣ་ཚོགས་ལས་ཀྱི་རིགས་ཀྱི་དམ་ཚིག་ཏུ། །སྡོམ་ལྡན་མཆོད་པའི་ལས་ལ་བརྩོན་པར་བྱ། །ཁྱད་པར་ལྷ་སྔགས་བདེ་ཆེན་རྡོ་རྗེ་གསུམ། །བདག་གི་སྒོ་གསུམ་མཉམ་སྦྱོར་སྒྲུབ་པ་དང་། །ཤེས་དང་མི་སྤང་དང་དུ་བླང་བ་དང་། །བསྒྲུབ་དང་སྤྱད་པར་བྱ་བ་ལྔ་ལྔ་སྟེ། །ཉི་ཤུ་རྩ་བརྒྱད་རྩ་བ་ཡན་ལག་བཅས། །གསང་སྔགས་རྡོ་རྗེ་སྙིང་པོའི་སྡོམ་པ་ཀུན། །བདག་གིས་མ་ལུས་ཡོངས་སུ་གཟུང་བར་བྱ། །དེ་ཡིས་འགྲོ་ཀུན་སྲིད་མཚོ་ལས་བསྒྲལ་ཏེ། །བླ་མེད་རྡོ་རྗེ་འཆང་གི་ས་ཐོབ་ཤོག །དེ་ནི་ཕྱི་ལྟར་འཇུག་པའོ། །ནང་འཇུག་གི་སླད་དུ། སློབ་དཔོན་གྱིས། ཛཿཧཱུྃ་བྃ་ཧོཿ ཞེས་བརྗོད་པས་ཁྱེད་རང་རྣམས་དཀྱིལ་འཁོར་གྱི་ནང་དུ་ཁྲིད། ཤར་སྒོར་འཁོད་ནས་སྐུ་གསུང་ཐུགས་ཀྱི་ཕྱག་བགྱིད་པར་མོས་ཏེ་འདིའི་རྗེས་ཟློས་མཛོད། ཧོཿ ཞི་ཁྲོ་རབ་འབྱམས་ཀུན་འདུས་པའི། །མཚན་བརྒྱད་བླ་མའི་དཀྱིལ་འཁོར་ལ། །ལུས་ངག་ཡིད་གསུམ་གུས་ཕྱག་འཚལ། །སྐུ་གསུང་ཐུགས་ཀྱི་བྱིན་གྱིས་རློབས། །ཞེས་པས་ཕྱག་བྱས་ནས། དམ་ལ་བཞག་པ་ནི་དམ་ཚིག་བདུད་རྩིའི་ཆུ་ནན་སྦྱིན་པར་བྱ་བ་ཡིན་ཏེ། རྡོ་རྗེ་ཐེག་པའི་དམ་ཚིག་རྣམས། །ཚུལ་བཞིན་བསྲུངས་ན་དངོས་གྲུབ་ཐོབ། །མ་བསྲུངས་དམྱལ་བ་ཆེན་པོར་སྐྱེ། །དེ་ཕྱིར་སྲོག་ལྟར་གཅེས་པར་སྲུངས། །ས་མ་ཡ་ཨི་དན་ན་ར་ཀན། །ཞེས་དམ་ཆུ་བླུད། སླར་ཡང་བདུད་རྩི་སྦྱིན་ལ། ནང་འཇུག་གི་དངོས་གཞི་ཡེ་ཤེས་དབབ་པའི་སླད་དུ། ཁྱེད་རང་རྣམས་ལུས་གནད་སྐྱིལ་ཀྲུང་དྲང་པོར་བསྲང་ཞིང་བདུད་རྩི་ལྕེ་ཐོག་ཏུ་བཟུང་། ངག་གནད་སྟེང་འོག་གི་རླུང་ཁ་སྦྱོར་དུ་འཆིང་། སེམས་ཀྱི་གནད་གཞན་དུ་མ་ཡེངས་པར་དམིགས་པ་འདི་བཞིན་ཏུ་མཛོད། ཨོཾ་ཧྲཱིཿབཛྲ་ཀྲོདྷ་ཧ་ཡ་གྲི་བ་ཧུ་ལུ་ཧུ་ལུ་ཧཱུྃ་ཕཊ། ཅེས་པས་བགེགས་བསང་། སྭ་བྷཱ་ཝས་སྟོང་པར་སྦྱང་། སྟོང་པའི་ངང་ལས་ཁྱེད་རང་རྣམས་སྐད་ཅིག་གིས་པདྨ་ཉི་ཟླའི་སྟེང་དུ་སེམས་ཉིད་ཀྱི་ངོ་བོ་ཧཱུྃ་མཐིང་ག་ཡོངས་སུ་གྱུར་པ་ལས་བླ་མ་རྡོ་རྗེ་འཆང་སྐུ་མདོག་མཐིང་གསལ་ཞལ་གཅིག་ཕྱག་གཉིས་སྤྱན་གསུམ་པ་ཁྲོ་འཛུམ་མཚན་དཔེའི་གཟི་བྱིན་རབ་ཏུ་འབར་བ། ཕྱག་གཡས་རྡོ་རྗེ་རྩེ་ལྔ་ཐུགས་ཀར་གཏོད་དེ་འཛིན་པ། གཡོན་དྲིལ་བུ་དཀུར་བརྟེན་པས་ཡུམ་མཚོ་རྒྱལ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་དར་དང་རིན་པོ་ཆེ་དང་རུས་པའི་རྒྱན་གྱིས་བརྒྱན་པའི་ཐུགས་ཀར་རླུང་སེམས་དབྱེར་མེད་ཀྱི་ངོ་བོ་རྡོ་རྗེ་རྣལ་འབྱོར་མ་དམར་མོ་གྲི་ཐོད་འཛིན་ཅིང་བདེ་བའི་གར་སྟབས་ལིང་ལིང་སྒྱུར་བ། དེའི་ཐུགས་ཀར་གཡུང་དྲུང་རིས་དམར་པོ་གཡོན་སྐོར་དུ་འཁོར་བའི་དབུས་སུ་བྃ། ཡན་ལག་བཞི་ལ་ཧ་རི་ནི་སས་མཚན་པ། སློབ་དཔོན་གྱིས་ཡྃ་ཞེས་བརྗོད་པས་གཞིར་གནས་ཀྱི་རླུང་གཡོས་ཤིང་དྲག་ཏུ་བསྐུལ་ཏེ་སྨིན་མཚམས་ཀྱི་ཐད་ཀར་འཁོར་བ་ལ་ཡིད་གཏད་པས་བདེ་བ་ཆེན་པོའི་ཉམས་མཆོག་ཏུ་འབར་བའི་འོད་ཟེར་གྱིས་ཡེ་ཤེས་སེམས་དཔའི་ཚོགས་ནམ་མཁའ་གང་བར་སྤྱན་དྲངས་སིབ་སིབ་ཏུ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཧཱུྃ༔ བཞེངས་ཤིག་པདྨ་འབྱུང་གནས་མཁའ་འགྲོའི་ཚོགས༔ དགོངས་ཤིག་ཕྱོགས་བཅུ་དུས་གསུམ་བདེ་གཤེགས་རྣམས༔ རྗེ་བཙུན་ཆེན་པོ་པདྨ་ཐོད་ཕྲེང་རྩལ༔ རིན་འཛིན་མཁའ་འགྲོའི་གནས་ནས་གཤེགས་སུ་གསོལ༔ དབུ་སྐྲ་མཛེས་པའི་ཐོར་ཚུགས་ཤིགས་སེ་ཤིག༔ རིན་ཆེན་རྒྱན་ཆ་མང་པོ་སི་ལི་ལི༔ དུར་ཁྲོད་རུས་པའི་རྒྱན་ཆ་ཁྲོ་ལོ་ལོ༔ སྒྲ་དང་རོལ་མོ་མང་པོ་འུ་རུ་རུ༔ ཡི་དམ་ལྷ་ཚོགས་ཧཱུྃ་སྒྲ་དི་རི་རི༔ མཁའ་འགྲོ་སྡེ་ལྔ་གར་བྱེད་ཤིགས་སེ་ཤིག༔ གིང་ཆེན་དཔའ་བོའི་བྲོ་བརྡུང་ཁྲབས་སེ་ཁྲབ༔ མ་མོ་མཁའ་འགྲོ་སྤྲིན་ལྟར་ཐིབས་སེ་ཐིབ༔ ཆོས་སྐྱོང་སྡེ་བརྒྱད་ལས་བྱེད་ཁྱུགས་སེ་ཁྱུག༔ ཞུབས་ཆེན་སྟོང་གི་སྒྲ་སྐད་སི་ལི་ལི༔ གཡས་ན་ཕོ་རྒྱུད་ཐམས་ཅད་ཤ་ར་ར༔ གཡོན་ན་མོ་རྒྱུད་ཐམས་ཅད་ཤ་ར་ར༔ བར་སྣང་ཐམས་ཅད་དར་གདུགས་ལྷབས་སེ་ལྷབ༔ དྲི་ཞིམ་སྤོས་ཀྱི་ངད་ལྡང་ཐུ་ལུ་ལུ༔ མཁའ་འགྲོ་གསང་བའི་བརྡ་སྐད་དི་རི་རི༔ གིང་ཆེན་དཔའ་བོའི་བཤུག་གླུ་ཀྱུ་རུ་རུ༔ ཧཱུྃ་གི་སྣང་གླུ་མང་པོ་དི་རི་རི༔ ཕཊ་ཀྱི་བརྡ་སྐད་དྲག་པོ་སངས་སེ་སང་༔ བདག་དང་འགྲོ་དྲུག་སེམས་ཅན་ཐམས་ཅད་ལ༔ ཐུགས་རྗེས་གཟིགས་ལ་གནས་འདིར་གཤེགས་སུ་གསོལ༔ གནས་འདིར་ཐུགས་རྗེས་དགོངས་ཏེ་གཤེགས་ནས་ཀྱང་༔ བདག་གིས་བྱང་ཆུབ་སྙིང་པོ་མ་ཐོབ་བར༔ བགེགས་དང་ལོག་འདྲེན་བར་ཆད་འདུལ་བ་དང་༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་དུ་གསོལ༔ ཞེས་བཞེངས་བསྐུལ་དང་ཐོད་ཕྲེང་རྩལ་གྱི་ཛཔྲ་བཟླ་ཞིང་སྤོས་རོལ་བཅས་པས་བྱིན་དབབ། རྡོ་རྗེ་སྤྱི་བོར་བཞག་ནས། ཏིཥྛ་བཛྲ་ཞེས་བརྗོད་པས་བྱིན་ཕབ་པའི་ཡེ་ཤེས་པ་དེ་ཉིད་བརྟན་པར་བྱས་ནས། སེམས་ལ་བདེ་གསལ་མི་རྟོག་པའི་ཉམས་གང་འཆར་བའི་བདེ་བ་སྤྲུལ་སྐུ། གསལ་བ་ལོངས་སྐུ། མི་རྟོག་པ་ཆོས་སྐུ། དབྱེར་མེད་ངོ་བོ་ཉིད་ཀྱི་སྐུ་སྟེ་བླ་མ་སྐུ་བཞིའི་ཡེ་ཤེས་གདོད་ནས་རང་ཆས་སུ་བཞུགས་པ་ངོ་ཤེས་པས། དེ་ཉིད་མཚོན་པའི་མཚན་མའི་དཀྱིལ་འཁོར་དུ་མེ་ཏོག་འདོར་བ་འདིའི་རྗེས་ཟློས་མཛོད། ཧོཿ །མཚན་བརྒྱད་བླ་མའི་དཀྱིལ་འཁོར་དུ། །རིན་ཐང་མེད་པའི་མེ་ཏོག་འབུལ། །ཚེ་རབས་སྔོན་ནས་ལས་ཀྱི་འཕྲོ། །གང་སད་དེ་ལ་འབབ་པར་ཤོག །པུཥྤེ་པཱུ་ཛ་ཧོཿ སླར་ཡང་མེ་ཏོག་དེ་ཉིད་སློབ་དཔོན་གྱི་ཕྱག་གིས་བླངས་ཏེ་དབང་རྟགས་ཅོད་པན་གྱི་ཚུལ་དུ་སྤྱི་བོར་བཅིངས་པའི་མོས་པ་མཛོད། ཀྱེ་ཧོ་སྔོན་ནས་ཉེར་བསྒྲུབས་པའི། །ལྷག་པའི་ལྷ་ཡིས་ལེགས་བསྩལ་བའི། །མེ་ཏོག་ཕྲེང་བའི་ཅོད་པན་གྱི། །དབང་བསྐུར་ཁྱོད་ལ་སྦྱིན་པར་བྱ། །རྡོ་རྗེས་སྤྱན་དབྱེ་བའི་སྟངས་ཀ་དང་བཅས་ཏེ། ཧོཿ ཡེ་ཤེས་ལྷ་ཚོགས་མཇལ་བ་ལ། །གེགས་བྱེད་མ་རིག་མིག་དར་འདི། །བསལ་བས་དེ་རིང་ཡི་དམ་ལྷ། །མངོན་སུམ་མཐོང་ལ་སྤྲོ་དགས་ལྟོས། །ཞེས་པས་མ་རིག་པའི་ལིང་ཏོག་དང་མིག་དར་ལྷན་ཅིག་ཏུ་བསལ་བས། ཐར་པ་ཆེན་པོའི་གྲོང་ཁྱེར་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་བླ་མ་རྡོ་རྗེ་ཐོད་ཕྲེང་རྩལ་ཡབ་ཡུམ། འདབ་མ་བརྒྱད་ལ་སྤྲུལ་པའི་གུ་རུ་མཚན་བརྒྱད། ཁྱམས་ལ་མཁའ་འགྲོ་རིགས་ལྔ་གིང་ཆེན་དང་བཅས་པས་མཚོན་ཏེ་རྩ་གསུམ་རྒྱ་མཚོའི་སྤྲིན་ཕུང་འཕྲོ་བའི་རྟེན་དང་བརྟེན་པར་བཅས་པའི་དཀྱིལ་འཁོར་པ་རྣམས་མངོན་སུམ་དུ་མཇལ་བའི་མོས་པ་མཛོད། དེས་འཇུག་པའི་ཆོས་རྣམས་སོང་ནས། ཞུགས་ནས་མངོན་པར་དབང་བསྐུར་བ་ཞུ་བའི་སླད་དུ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད། ཀྱེ། དཀྱིལ་འཁོར་རྒྱ་མཚོའི་གཙོ་ཁྱོད་ཀྱིས། །བདག་ཅག་བླ་མའི་དཀྱིལ་འཁོར་དུ། །རྣམ་པ་ཉི་ཤུས་བྱང་ཆུབ་པའི། །བྱིན་རླབས་དབང་བཞི་བསྐུར་དུ་གསོལ། །ཅེས་གསོལ་བ་བཏབ་པས། བླ་མ་རྡོ་རྗེ་ཐོད་ཕྲེང་རྩལ་གྱིས་ཕྱག་ན་རྣམ་པར་རྒྱལ་བའི་བུམ་པ་གུ་རུ་ཡབ་ཡུམ་གྱི་བྱང་ཆུབ་སེམས་ཀྱི་ཆུས་གང་བ་ཐོགས་ཏེ་གནས་བཞིར་བཞག་པས་བུམ་པ་ལ་བརྟེན་ནས་དབང་བཞི་ཡོངས་རྫོགས་སུ་བསྐུར་བའི་མོས་པ་མཛོད། ཧཱུྃ༔ བུམ་པ་སྤྲོས་བྲལ་ཟླུམ་པོ་འདི༔ ཕྱི་ནང་སྣོད་བཅུད་ལྷུན་གྱིས་གྲུབ༔ སྐྱེ་མེད་བྱང་ཆུབ་སེམས་ཀྱི་ཆུས༔ སྣ་ཚོགས་མ་རིག་དྲི་མ་འཁྲུད༔ ཆོས་སྐུ་སྤྲོས་བྲལ་བདེ་ཆེན་ཆུས༔ གཟུང་འཛིན་འཁོར་བའི་བག་ཆགས་འཁྲུད༔ རང་བྱུང་ཡེ་ཤེས་སེམས་ཉིད་ཆུས༔ དུག་ལྔ་རྣམ་དག་དབྱིངས་སུ་འཁྲུད༔ ཉོན་མོངས་དུག་ལྔའི་བག་ཆགས་སྦྱངས༔ བུམ་གསང་ཤེས་རབ་ཡེ་ཤེས་ཀྱི༔ དབང་བཞི་མ་ལུས་ཡོངས་རྫོགས་ཤོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱཿ ལན་གསུམ་བརྗོད་ཅིང་། སྤྱི་མགྲིན་སྙིང་ག་ལྟེ་བ་རྣམས་སུ་བཞག་མཐར་བུམ་ཆུ་སྦྱིན། དེ་ལྟར་བུམ་པ་སྤྱི་བོར་བཞག་པ་བུམ་དབང་། མགྲིན་པར་བཞག་པ་གསང་དབང་། སྙིང་གར་བཞག་པ་ཤེར་དབང་། ལྟེ་བར་བཞག་ཅིང་ཚིག་གི་སྒོ་ནས་བརྡ་དོན་ངོ་སྤྲད་པ་དབང་བཞི་པ་སྟེ། མདོར་ན་བུམ་པ་ལ་བརྟེན་པའི་དབང་བཞི་ཡོངས་སུ་རྫོགས་པར་ཐོབ་པ་ཡིན་ནོ། །སྣོད་པདྨ་བྷཉྫར་བཅུད་ཆོས་སྨན་སྦྱར་བྱའི་བདུད་རྩི་དང་བླ་མ་ཡབ་ཡུམ་སྙོམས་པར་ཞུགས་པའི་ཀུནྡ་བྱང་ཆུབ་ཀྱི་སེམས་རོ་གཅིག་ཏུ་སྦྱར་བ་གནས་བཞིར་བཞག་ཅིང་སྦྱིན་ཏེ་བྷནྡྷའི་བདུད་རྩི་ལ་བརྟེན་ནས་དབང་བཞི་ཡོངས་རྫོགས་སུ་བསྐུར་བའི་མོས་པ་མཛོད། ཧཱུྃ༔ ཐོད་པ་ཟླུམ་པོ་ཆོས་ཉིད་དབྱིངས་ཀྱི་ངང་༔ འཆི་མེད་བདུད་རྩིའི་ཆང་གིས་རབ་ཏུ་བཀང་༔ ཤ་ལྔ་བདུད་རྩི་རིགས་ལྔ་ཡེ་ཤེས་ལྔ༔ ཉོན་མོངས་བདུད་འཇོམས་རིགས་ལྔ་སྐུ་ལྔར་བསྐྱེད༔ གཉིས་མེད་ངང་དུ་ཆོས་ཉིད་རོལ་པར་བསྐྱེད༔ མ་བཅོས་རང་བྱུང་བདེ་ཆེན་བྱང་ཆུབ་སེམས༔ ཆོས་ཉིད་བདུད་རྩི་རྣམ་རྟོག་བདུད་ལས་རྒྱལ༔ དབང་བཞི་ཡེ་ཤེས་རྫོགས་པའི་དབང་ཐོབ་ཤོག༔ ཐོད་ཕྲེང་རྩལ་ཀྱི་སྔགས་དང་བཅས་ཏེ་གནས་བཞིར་གཞག་ཅིང་བདུད་རྩི་སྦྱིན། དེ་ལྟར་བྷནྡྷའི་བདུད་རྩི་གནས་བཞིར་བཞག་ཅིང་བརྡ་དོན་ངོ་སྤྲོད་པས། བྷནྡྷ་ཟླུམ་པོ་ལ་བརྟེན་པའི་དབང་བཞི་རྫོགས་པར་ཐོབ་པ་ཡིན་ནོ། །རྟེན་སིནྡྷཱུ་རའི་མེ་ལོང་དང་བརྟེན་པ་ལྷ་ཉིད་སྔགས་ཀྱི་གཟུགས་སུ་ཤར་བ་དང་བཅས་པ་གནས་བཞིར་བཞག་པས་སིནྡྷུ་རའི་མཎྜལ་ལ་བརྟེན་ནས་དབང་བཞི་ཡོངས་རྫོགས་སུ་བསྐུར་བའི་མོས་པ་མཛོད། ཧཱུྃ༔མེ་ལོང་ཟླུམ་པོ་ཆོས་སྐུ་དྲི་མ་མེད༔ དག་ཅིང་གསལ་ལ་རྙོག་པ་མེད་པར་དྭངས༔ གཟུགས་བརྙན་གསལ་ལ་ངོས་གཟུང་འཛིན་པ་བྲལ༔ སེམས་ཉིད་རྣམ་དག་གསལ་ལ་མ་འགགས་པ༔ གཟུང་འཛིན་མཚན་མའི་དངོས་པོའི་ཡུལ་ལས་འདས༔ བྱང་ཆུབ་སེམས་ཀྱི་ཆོ་འཕྲུལ་ཅིར་ཡང་ཤར༔ གསལ་སྟོང་མ་འགགས་དབྱིངས་ནས་གསལ་འགྲིབ་མེད༔ དབང་བཞི་ཡེ་ཤེས་རྫོགས་པའི་དབང་ཐོབ་ཤོག༔ ཐོད་ཕྲེང་རྩལ་བརྗོད་ཅིང་མེ་ལོང་གནས་བཞིར་བཞག་ལ་སིནྡྷཱུ་རས་ཐིག་ལེ་བྱ། དེ་ལྟར་སིནྡྷཱུ་རའི་མེ་ལོང་གནས་བཞིར་བཞག་ཅིང་ཐིག་ལེ་བཀོད་པ་དང་བརྡ་དོན་ངོ་སྤྲད་པས་མེ་ལོང་ཟླུམ་པོ་ལ་བརྟེན་པའི་དབང་བཞི་རྫོགས་པར་ཐོབ་པ་ཡིན་ནོ། །གཏོར་མ་རིན་ཆེན་འབར་བ་འདི་ཉིད་ཕྱི་ལྟར་རིན་པོ་ཆེའི་གཞལ་མེད་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། ནང་ལྟར་བླ་མ་རྩ་བ་གསུམ་གྱི་ལྷ་ཚོགས་བྱིན་ཐིབས་སེ་མངོན་སུམ་དུ་བཞུགས་པ་གནས་བཞིར་བཞག་པས་གཏོར་མ་ལ་བརྟེན་ནས་དབང་བཞི་ཡོངས་རྫོགས་སུ་བསྐུར་བའི་མོས་པ་མཛོད། ཧྲཱིཿ གཏོར་སྣོད་བྷནྡྷའི་གཞལ་ཡས་ཆོས་ཀྱི་དབྱིངས༔ གཏོར་མ་འདོད་ཡོན་རྣམ་ལྔ་ཡེ་ཤེས་ལྔ༔ གུ་རུའི་སྐུ་མཆོག་བདེ་ཆེན་འདུ་འབྲལ་མེད༔ རྣམ་དག་བདུད་རྩི་བླ་མ་མཆོད་པའི་རྫས༔ མ་མོ་མཁའ་འགྲོ་དབང་དུ་སྡུད་པ་དང་༔ ཕྲིན་ལས་རྣམ་བཞིས་འགྲོ་བ་འདུལ་སླད་དུ༔ སྤྲུལ་པ་མང་པོ་ལས་ལ་འགྱེད་པའི་ཕྱིར༔ དབང་བཞི་ཡེ་ཤེས་རྫོགས་པའི་དབང་ཐོབ་ཤོག༔ ཐོད་ཕྲེང་རྩལ་གྱི་སྔགས་བཟླ་བཞིན་གནས་བཞིར་བཞག་ཅིང་མཐར་གཏོར་ཟན་ཁམ་གཅིག་དངོས་གྲུབ་ཀྱི་བདུད་རྩིར་སྦྱིན། དེ་ལྟར་གཏོར་མ་རིན་ཆེན་འབར་བ་གནས་བཞིར་བཞག་ཅིང་དམ་རྫས་དངོས་གྲུབ་ཀྱི་ཚུལ་དུ་སྦྱིན་པ་དང་བརྡ་དོན་ངོ་སྤྲད་པས་གཏོར་མ་ཟླུམ་པོ་ལ་བརྟེན་པའི་དབང་བཞི་རྫོགས་པར་ཐོབ་པ་ཡིན་ནོ། །དབང་དོན་གྱི་ཡེ་ཤེས་བརྟན་པར་བྱ་བའི་སླད་དུ་གུ་རུའི་སྐུ་འབག་འདི་ཉིད་ཡེ་ཤེས་ཀྱི་སྐུར་དངོས་སུ་གསལ་བ་གནས་བཞིར་བཞག་པས་རིག་འཛིན་བླ་མའི་སྣང་བརྙན་ལ་བརྟེན་ནས་དབང་བཞི་ཡོངས་རྫོགས་སུ་བསྐུར་བའི་མོས་པ་མཛོད། ཨཱཿ ཆོས་སྐུ་སྐྱེ་མེད་ངང་ལས་མ་གཡོས་ཀྱང་༔ ལོངས་སྐུ་གསལ་ལ་མ་འདྲེས་གུ་རུའི་སྐུ༔ སྤྲུལ་སྐུ་སྣ་ཚོགས་ཐབས་ཀྱིས་སེམས་ཅན་འདུལ༔ སྐུ་གསུམ་ངང་གིས་མཉམ་ཞིང་མ་འདྲེས་གསལ༔ སྔོན་ཚེ་པདྨ་ཁྱེད་དང་སྨོན་ལམ་གཅིག༔ ད་ལྟ་བདག་ཀྱང་སློབ་མའི་སྟངས་བཟུང་ཞིང་༔ སྲོག་གི་ཕྱིར་ཡང་མི་གཏོང་བསྒྲུབ་ལགས་ན༔ ཡེ་ཤེས་དབང་ཆེན་རབ་འབྱམས་ཀུན་རྫོགས་ཤོག༔ ཐོད་ཕྲེང་རྩལ་བཟླ་ཞིང་སྐུ་འབག་གནས་བཞིར་གཞག །དེ་ལྟར་སྐུ་འབག་གནས་བཞིར་བཞག་ཅིང་བརྡ་དོན་ངོ་སྤྲད་པས། གུ་རུ་རིན་པོ་ཆེའི་སྐུ་འབག་ལ་བརྟེན་པའི་དབང་བཞི་རྫོགས་པར་ཐོབ་པ་ཡིན་ནོ། །དེ་ནས་མཐའ་རྟེན་ལྷ་སྐུ་ཕྱག་རྒྱའི་དབང་བསྐུར་བ་ལ། སློབ་དཔོན་དཀྱིལ་འཁོར་པ་དང་བཅས་པ་རྣམས་ཀྱི་སྐུ་ལས་རང་འདྲའི་ཡེ་ཤེས་ཀྱི་སྐུ་གཉིས་པ་བྱུང་། ཁྱེད་རང་རྣམས་ལ་ཐིམ་པས་རྒྱུད་བྱིན་གྱིས་བརླབས་པའི་མོས་པ་མཛོད། ཙཀླི་སོ་སོར་ཐོགས་ལ། ཧཱུྃ། སྣང་བ་མཐའ་ཡས་སྤྲུལ་པའི་སྐུ། །འཁོར་འདས་ཀུན་ལ་དབང་བསྒྱུར་བ། །སློབ་དཔོན་པདྨ་ཐོད་ཕྲེང་གི །དབང་བསྐུར་བྱིན་རླབས་སྩལ་དུ་གསོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་ཨ་བྷི་ཥིཉྩ་ཧཱུྃ། ཧཱུྃ། པདྨ་གེ་སར་སྡོང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །རིག་འཛིན་པདྨ་འབྱུང་གནས་ཀྱི། །དབང་བསྐུར་བྱིན་རླབས་སྩལ་དུ་གསོལ། །ཨོཾ་ཨཱཿཧཱུྃ་བཛྲ་གུ་རུ་པདྨ་ཛྙཱ་ན་ཨ་བྷི་ཥིཉྩ་ཧཱུྃ། ཧཱུྃ། བསིལ་བ་ཚལ་གྱི་དུར་ཁྲོད་དུ། །ཡོན་ཏན་སྣ་ཚོགས་དངོས་གྲུབ་བརྙེས། །དགེ་སློང་པདྨ་སཾ་བྷ་ཝའི། །དབང་བསྐུར་བྱིན་རླབས་སྩལ་དུ་གསོལ། །ཨོཾ་བཛྲ་གུ་རུ་པདྨ་སཾ་བྷ་ཝ་ཨ༴ ཧཱུྃ། རཱ་ག་ར་ཏིའི་གནས་མཆོག་ཏུ། །ཐམས་ཅད་མཁྱེན་པའི་དངོས་གྲུབ༴ མཁས་པ་བློ་ལྡན་མཆོག་སྲེད་ཀྱི། །དབང་བསྐུར༴ ཨོཾ་བཛྲ་གུ་རུ་ཛྙཱ་ན་པྲཛྙཱ་ཨ༴ ཧཱུྃ། དགའ་བ་ཚལ་གྱི་དུར་ཁྲོད་དུ། །ཁམས་གསུམ་དབང་སྡུད་དངོས་གྲུབ༴ ཟིལ་གནོན་པདྨ་རྒྱལ་པོ་ཡི། །དབང་བསྐུར༴ ཨོཾ་བཛྲ་གུ་རུ་པདྨ་རཱ་ཛ་ཨ༴ ཧཱུྃ། སོ་ས་གླིང་གི་དུར་ཁྲོད་དུ། །འགྲོ་བ་འདུལ་བའི་དངོས་གྲུབ་བརྙེས། །རྣལ་འབྱོར་ཉི་མ་འོད་ཟེར་གྱི། །དབང་བསྐུར༴ ཨོཾ་བཛྲ་གུ་རུ་སཱུཪྻ་སརྦ་དྷ་རྨ་ཨ༴ ཧཱུྃ། ཟ་ཧོར་རྒྱལ་པོའི་ཡུལ་དབུས་སུ། །བདུད་འདུལ་དྲག་པོའི༴ བཅོམ་ལྡན་ཤཱཀྱ་སེང་གེ་ཡི། །དབང་བསྐུར༴ ཨོཾ་བཛྲ་གུ་རུ་ཤཱཀྱ་སིདྷ་ཨ༴ ཧཱུྃ། མ་ག་དྷ་ཡི་གྲོང་ཁྱེར་དུ། །མུ་སྟེགས་འདུལ་བའི་དངོས༴ གཏུམ་ཆེན་སེང་གེ་སྒྲ་སྒྲོག་གི །དབང་བསྐུར༴ ཨོཾ་བཛྲ་གུ་རུ་སིདྷ་གཎྜེ་དྷརྨ་དྷཱ་ཏུ་ཨ༴ ཧཱུྃ། སྟག་ཚང་སེང་གེ་བསམ་འགྲུབ་ཏུ། །དྲེགས་པ་ཚར་གཅོད་དངོས་གྲུབ་བརྙེས། །འཆོལ་བ་རྡོ་རྗེ་གྲོ་ལོད་ཀྱི། །དབང་བསྐུར་བྱིན་རླབས་སྩལ་དུ་གསོལ། །ཨོཾ་བཛྲ་གུ་རུ་གྲོ་བོ་ལོད་ལོ་ཀ་སརྦ་ཨབྷི་ཥིཉྩ་ཧཱུྃ། དེ་ལྟར་བླ་མ་རྡོ་རྗེ་འཆང་གཙོ་འཁོར་དགུ་པོ་ཁྱེད་རང་རྣམས་ལ་ཐིམ་པའི་རྐྱེན་གྱིས་ཁྱེད་རང་རྣམས་སྐད་ཅིག་གིས་དཔལ་ཆེན་རྡོ་རྗེ་གྲོ་བོ་ལོད་ཀྱི་སྐུར་གྱུར་པ་ནི། སྐུ་མདོག་དམར་སྨུག་ཁྲོ་གཏུམ་བཟོད་པར་དཀའ་བའི་གཟི་བྱིན་ཅན། ཞལ་གཅིག་ཕྱག་གཉིས་རྡོ་རྗེ་དང་ཕུར་བུ་འཛིན་ཅིང་ཁྲོ་བོ་འཆོལ་པའི་ཆ་ལུགས་ཀྱིས་སྟག་ཆེན་གྲུས་མའི་སྟེང་ན་འགྱིང་བའི་ཡེ་ཤེས་ཀྱི་སྐུ་ནམ་མཁའ་གང་བར་གསལ་བ་ལས་ཁྲོ་བོའི་ཚོགས་དཔག་ཏུ་མེད་པ་སྤྲོས་ཏེ་གདོན་བགེགས་ཐམས་ཅད་ཚར་བཅད་པར་གྱུར་པའི་མོས་པ་དང་བཅས་ཏེ་ཅུང་ཟད་རེ་མཉམ་པར་འཇོག་མཛོད། དེ་ཉིད་བརྟན་པར་བྱ་བའི་སླད་དུ་སློབ་དཔོན་དཀྱིལ་འཁོར་པ་དང་བཅས་པས་མེ་ཏོག་གི་ཆར་འབེབས་ཤིང་ཤིས་པ་བརྗོད་པའི་ཚིགས་སུ་བཅད་པས་ཀྱང་མངའ་གསོལ་པའི་མོས་པ་མཛོད། །ཅེས་བརྡ་སྦྱར་ལ། ཤིས་བརྗོད་རྒྱས་བསྡུས་གང་རིགས་དང་བཅས་མེ་ཏོག་གི་ཆར་དབབ། རོལ་མོའི་སྒྲ་སྦྱར། མཇུག་དམ་ཚིག་ཁས་བླང་། གཏང་རག་གི་མཎྜལ། ལུས་ལོངས་སྤྱོད་དབུལ་བ། དགེ་བ་བསྔོ་བ་རྣམས་སྤྱི་ལྟར་བྱས་ལ་སློབ་མ་རྣམས་རང་གནས་སུ་གཏང་། གསུམ་པ་རྗེས་ནི། སློབ་དཔོན་གྱིས་ཚོགས་མཆོད་ནས་བརྩམས་ཏེ་ཤིས་བརྗོད་ཀྱི་བར་ལས་གཞུང་བཞིན་བྱའོ།། །།རྩ་གསུམ་ཀུན་འདུས་པདྨ་ཐོད་ཕྲེང་རྩལ། །དགྱེས་པའི་འཇུག་ངོགས་ལས་འོངས་སྨིན་བྱེད་ཀྱི། །བདུད་རྩིས་མཁའ་ཁྱབ་འགྲོ་བ་མ་ལུས་ཀུན། །འཆི་མེད་སྐུ་བཞིའི་ལང་ཚོ་རྒྱས་གྱུར་ཅིག། །ཅེས་པའང་མཚོ་སྐྱེས་བླ་མ་དགྱེས་པའི་འབངས་རྡོ་རྗེ་གཟི་བརྗིད་ཀྱིས་ཀུན་མཁྱེན་རྒྱལ་བའི་དབང་པོ་ཉིད་ཀྱི་རྡོ་རྗེའི་གསུང་ཇི་ལྟ་བ་ལ་མཚམས་སྦྱོར་བཀླགས་ཆོག་ཏུ་བཀོད་པ་སརྦ་དཱ་སུ་ཤྲི་ཡོ་བྷ་བནྟུ།། །།

[edit]

thugs sgrub yang snying kun 'dus kyi dbang chog pad+ma dgyes pa'i 'jug ngogs/ @#/__/thugs sgrub yang snying kun 'dus kyi dbang chog pad+ma dgyes pa'i 'jug ngogs zhes bya ba bzhugs so// oM swa sti sid+d+haM/__rtsa rlung thig le ye shes gnyug ma'i khams/__/rdo rje rnam bzhir smin mdzad mtsho skyes rjer/__/btud nas bla ma yang snying kun 'dus kyi/__/dbang chog pad+ma dgyes pa'i 'jug ngogs dbye/__/'di la gsum/__sbyor ba/__dngos gzhi/__rjes so/__/dang po ni/__gnas dben zhing yid dang mthun par stegs bu'i khar ras bris sam/__maN+Da lar lha grangs dang mthun pa'i tshom bu dgod/__de'i steng many+dzi'i khar bum pa bcud ldan dang /__thod pa bdud rtsis gang ba me long la sin+d+hura'i thig le dang rtsa sngags kyis mtshan pas kha dgab/__g.yas su gu ru'i sku 'bag__/me long gi steng ngam g.yon tu gtor ma rin chen 'bar ba/__mdun rgyab gang bder lha tsag__/gzhan yang sman raka__/nyer spyod/__tshogs kyi yo byad/__las bum/__sngon gtor sogs 'og tu dgos pa thams cad 'du bya'o/__/gnyis pa la gnyis/__slob dpon gyi bya ba dang /__slob ma la bya ba'o/__/dang po ni/__bdag mdun dbyer med kyi dgongs pas las gzhung bsrangs te bzlas pa ji ltar rigs pa dang /__bye brag tu/__bum pa dang b+hany+dza rang byung gi gzhal med khang chen por lha rnams dwangs pa'i mtsho la gza' skar shar ba bzhin lhag par gsal ba'i sku las byang sems bdud rtsi'i rgyun babs pas snod yongs su gang bar mos te bzlas pa dang /__sin+d+hu ra'i me long gi yig 'bru dang /__gu ru'i sku 'bag__/gtor ma rin chen 'bar ba rnams kyang bla ma rdo rje 'chang chen po'i ye shes kyi rang gzugs sku gsum rgya mtsho'i sprin phung 'phro bar bsams la bzlas pas byin gyis brlab/__las bum du rta mgrin gyi bskyed bzlas bya/__dbyangs gsal rten snying bzla zhing mchod bstod dang /__rig pa'i me tog dor bas bdag nyid 'jug cing /__slob ma gzhug par gsol ba gdab bo/__/gnyis pa ni/__slob ma rnams/__ji ltar bltams pa sogs kyis khrus bya/__las byang ltar bgegs gtor gtong /__srung 'khor bsgom/__mtshams sbyor ci rigs pa dang /__de la 'dir dus gsum sangs rgyas thams cad kyi sku gsung thugs ye shes rdo rje'i bdag nyid o rgyan gyi slob dpon chen po pad+ma saM b+ha bas 'khrul med rdo rje'i lung gis lan cig ma yin par bsngags shing /__'jam pa'i dbyangs mnga' bdag khri srong lde'u btsan gyi 'bras bu mthar phyin pa'i phrin las mi zad pa rgyan gyi 'khor lo'i rnam 'phrul du gdod nas grub pa/__gangs can gyi mgon po rgyal dbang thams cad mkhyen cing gzigs pa chen po ngag gi dbang phyug rdo rje thogs med rtsal gyi dag pa ye shes kyi snang ngor shar ba'i yang gsang rgya can gyi chos sde nyi shu rtsa lnga'i nang tshan/__rdo rje'i rgya can las byung ba'i zab mo bla ma'i thugs sgrub yang snying kun 'dus kyi dkyil 'khor du dbang bskur ba la/__slob dpon gyi bya ba rnams grub nas/__khyed rang rnams kyi ngo skal du gyur pa thog mar dkyil 'khor du 'jug pa'i phyir maN+Dal phul/__gsol ba 'debs pa 'di'i rjes zlos lan gsum mdzod/__hoH__rdo rje slob dpon dgongs su gsol/__/bdag cag bla ma rig 'dzin gyi/__/dkyil 'khor chen por 'jug lags na/_/thugs rje chen pos gzung du gsol/__/sngon chad dkyil 'khor 'dir ma zhugs pa'am bskyar nas zhugs pa'i mtshon byed du mig dar dmar po res gdong g.yogs pa'i mos pa mdzod/__oM tsak+Shu b+han+d+ha wA ra ma nA ya swA hA/__phyag rten gyi slad du mchog gi me tog kha dog lnga pa re'ang byin par mos mdzod/__A khaM bI ra hU~M/__rgyud sbyang ba'i slad du bla ma dang dkyil 'khor gyi gtso bo rdo rje thod phreng rtsal tha mi dad pa la rtsa gsum rgya mtsho'i tshogs kyis bskor ba mngon sum du bzhugs pa'i spyan sngar skyabs 'gro sems bskyed sdom pa gzung ba rnams tshul bzhin tu bgyi snyam pas 'di rnams kyi rjes zlos lan gsum mdzod/__na mo/__bla ma bde gshegs 'dus pa'i sogs las gzhung gi skyabs sems dang /__hoH__phyogs bcu dus bzhi'i rgyal ba sras bcas rnams/__/rang byung dkyil 'khor chen por lhun rdzogs pa'i/__/rigs 'dus bla ma rtsa gsum lha tshogs rnams/__/bdag la brtse bas gsan cing dgongs su gsol/__/bdag cag dus 'di nas bzung byang chub bar/__/bla med dkon mchog gsum la skyabs mchi zhing /__/byang chub sems mchog mi nyams gzung bar bgyi/__/rdo rje snying po'i rtsa ba rigs lnga po'i/_/dam tshig ma lus bdag gis gzung bar bgyi/__/lhun grub de bzhin rigs kyi dam tshig tu/__/skyabs gsum khrims gsum ma lus gzung bar bgyi/__/mi 'gyur rdo rje'i rigs kyi dam tshig tu/__/phyag rgya rnam gsum mi 'bral gzung bar bgyi/__/'dod 'byung rin chen rigs kyi dam tshig tu/__/sbyin pa rnam bzhi'i las la brtson par bya/__/skyon bral pad+ma'i rigs kyi dam tshig tu/__/dam chos ma lus yongs su gzung bar bya/__/sna tshogs las kyi rigs kyi dam tshig tu/__/sdom ldan mchod pa'i las la brtson par bya/__/khyad par lha sngags bde chen rdo rje gsum/__/bdag gi sgo gsum mnyam sbyor sgrub pa dang /__/shes dang mi spang dang du blang ba dang /__/bsgrub dang spyad par bya ba lnga lnga ste/__/nyi shu rtsa brgyad rtsa ba yan lag bcas/__/gsang sngags rdo rje snying po'i sdom pa kun/__/bdag gis ma lus yongs su gzung bar bya/__/de yis 'gro kun srid mtsho las bsgral te/__/bla med rdo rje 'chang gi sa thob shog__/de ni phyi ltar 'jug pa'o/__/nang 'jug gi slad du/__slob dpon gyis/__dzaHhU~M ba~M hoH__zhes brjod pas khyed rang rnams dkyil 'khor gyi nang du khrid/__shar sgor 'khod nas sku gsung thugs kyi phyag bgyid par mos te 'di'i rjes zlos mdzod/__hoH__zhi khro rab 'byams kun 'dus pa'i/__/mtshan brgyad bla ma'i dkyil 'khor la/__/lus ngag yid gsum gus phyag 'tshal/__/sku gsung thugs kyi byin gyis rlobs/__/zhes pas phyag byas nas/__dam la bzhag pa ni dam tshig bdud rtsi'i chu nan sbyin par bya ba yin te/__rdo rje theg pa'i dam tshig rnams/__/tshul bzhin bsrungs na dngos grub thob/__/ma bsrungs dmyal ba chen por skye/__/de phyir srog ltar gces par srungs/__/sa ma ya i dan na ra kan/__/zhes dam chu blud/__slar yang bdud rtsi sbyin la/__nang 'jug gi dngos gzhi ye shes dbab pa'i slad du/__khyed rang rnams lus gnad skyil krung drang por bsrang zhing bdud rtsi lce thog tu bzung /__ngag gnad steng 'og gi rlung kha sbyor du 'ching /__sems kyi gnad gzhan du ma yengs par dmigs pa 'di bzhin tu mdzod/__oM hrIHbadz+ra krod+ha ha ya gri ba hu lu hu lu hU~M phaT/__ces pas bgegs bsang /__swa b+hA was stong par sbyang /__stong pa'i ngang las khyed rang rnams skad cig gis pad+ma nyi zla'i steng du sems nyid kyi ngo bo hU~M mthing ga yongs su gyur pa las bla ma rdo rje 'chang sku mdog mthing gsal zhal gcig phyag gnyis spyan gsum pa khro 'dzum mtshan dpe'i gzi byin rab tu 'bar ba/__phyag g.yas rdo rje rtse lnga thugs kar gtod de 'dzin pa/__g.yon dril bu dkur brten pas yum mtsho rgyal dkar mo gri thod 'dzin pa dang mnyam par sbyor ba/__zhabs rdo rje'i skyil mo krung gis bzhugs shing dar dang rin po che dang rus pa'i rgyan gyis brgyan pa'i thugs kar rlung sems dbyer med kyi ngo bo rdo rje rnal 'byor ma dmar mo gri thod 'dzin cing bde ba'i gar stabs ling ling sgyur ba/__de'i thugs kar g.yung drung ris dmar po g.yon skor du 'khor ba'i dbus su ba~M/__yan lag bzhi la ha ri ni sas mtshan pa/__slob dpon gyis ya~M zhes brjod pas gzhir gnas kyi rlung g.yos shing drag tu bskul te smin mtshams kyi thad kar 'khor ba la yid gtad pas bde ba chen po'i nyams mchog tu 'bar ba'i 'od zer gyis ye shes sems dpa'i tshogs nam mkha' gang bar spyan drangs sib sib tu thim pas rgyud byin gyis brlabs pa'i mos pa mdzod/__hU~M:__bzhengs shig pad+ma 'byung gnas mkha' 'gro'i tshogs:__dgongs shig phyogs bcu dus gsum bde gshegs rnams:__rje btsun chen po pad+ma thod phreng rtsal:__rin 'dzin mkha' 'gro'i gnas nas gshegs su gsol:__dbu skra mdzes pa'i thor tshugs shigs se shig:__rin chen rgyan cha mang po si li li:__dur khrod rus pa'i rgyan cha khro lo lo:__sgra dang rol mo mang po 'u ru ru:__yi dam lha tshogs hU~M sgra di ri ri:__mkha' 'gro sde lnga gar byed shigs se shig:__ging chen dpa' bo'i bro brdung khrabs se khrab:__ma mo mkha' 'gro sprin ltar thibs se thib:__chos skyong sde brgyad las byed khyugs se khyug:__zhubs chen stong gi sgra skad si li li:__g.yas na pho rgyud thams cad sha ra ra:__g.yon na mo rgyud thams cad sha ra ra:__bar snang thams cad dar gdugs lhabs se lhab:__dri zhim spos kyi ngad ldang thu lu lu:__mkha' 'gro gsang ba'i brda skad di ri ri:__ging chen dpa' bo'i bshug glu kyu ru ru:__hU~M gi snang glu mang po di ri ri:__phaT kyi brda skad drag po sangs se sang :__bdag dang 'gro drug sems can thams cad la:__thugs rjes gzigs la gnas 'dir gshegs su gsol:__gnas 'dir thugs rjes dgongs te gshegs nas kyang :__bdag gis byang chub snying po ma thob bar:__bgegs dang log 'dren bar chad 'dul ba dang :__mchog dang thun mong dngos grub stsal du gsol:__'khor ba sdug bsngal gyi rgya mtsho las bsgral du gsol:__zhes bzhengs bskul dang thod phreng rtsal gyi dzapra bzla zhing spos rol bcas pas byin dbab/__rdo rje spyi bor bzhag nas/__tiSh+Tha badz+ra zhes brjod pas byin phab pa'i ye shes pa de nyid brtan par byas nas/__sems la bde gsal mi rtog pa'i nyams gang 'char ba'i bde ba sprul sku/__gsal ba longs sku/__mi rtog pa chos sku/__dbyer med ngo bo nyid kyi sku ste bla ma sku bzhi'i ye shes gdod nas rang chas su bzhugs pa ngo shes pas/__de nyid mtshon pa'i mtshan ma'i dkyil 'khor du me tog 'dor ba 'di'i rjes zlos mdzod/__hoH__/mtshan brgyad bla ma'i dkyil 'khor du/__/rin thang med pa'i me tog 'bul/__/tshe rabs sngon nas las kyi 'phro/__/gang sad de la 'bab par shog__/puSh+pe pU dza hoH__slar yang me tog de nyid slob dpon gyi phyag gis blangs te dbang rtags cod pan gyi tshul du spyi bor bcings pa'i mos pa mdzod/__kye ho sngon nas nyer bsgrubs pa'i/__/lhag pa'i lha yis legs bstsal ba'i/__/me tog phreng ba'i cod pan gyi/__/dbang bskur khyod la sbyin par bya/__/rdo rjes spyan dbye ba'i stangs ka dang bcas te/__hoH__ye shes lha tshogs mjal ba la/__/gegs byed ma rig mig dar 'di/__/bsal bas de ring yi dam lha/__/mngon sum mthong la spro dgas ltos/__/zhes pas ma rig pa'i ling tog dang mig dar lhan cig tu bsal bas/__thar pa chen po'i grong khyer gzhal med khang mtshan nyid thams cad yongs su rdzogs pa'i dbus su sna tshogs pad+ma 'dab ma brgyad pa'i lte bar bla ma rdo rje thod phreng rtsal yab yum/__'dab ma brgyad la sprul pa'i gu ru mtshan brgyad/__khyams la mkha' 'gro rigs lnga ging chen dang bcas pas mtshon te rtsa gsum rgya mtsho'i sprin phung 'phro ba'i rten dang brten par bcas pa'i dkyil 'khor pa rnams mngon sum du mjal ba'i mos pa mdzod/__des 'jug pa'i chos rnams song nas/__zhugs nas mngon par dbang bskur ba zhu ba'i slad du maN+Dal phul/__gsol ba 'debs pa 'di'i rjes zlos lan gsum mdzod/__kye/__dkyil 'khor rgya mtsho'i gtso khyod kyis/__/bdag cag bla ma'i dkyil 'khor du/__/rnam pa nyi shus byang chub pa'i/__/byin rlabs dbang bzhi bskur du gsol/__/ces gsol ba btab pas/__bla ma rdo rje thod phreng rtsal gyis phyag na rnam par rgyal ba'i bum pa gu ru yab yum gyi byang chub sems kyi chus gang ba thogs te gnas bzhir bzhag pas bum pa la brten nas dbang bzhi yongs rdzogs su bskur ba'i mos pa mdzod/__hU~M:__bum pa spros bral zlum po 'di:__phyi nang snod bcud lhun gyis grub:__skye med byang chub sems kyi chus:__sna tshogs ma rig dri ma 'khrud:__chos sku spros bral bde chen chus:__gzung 'dzin 'khor ba'i bag chags 'khrud:__rang byung ye shes sems nyid chus:__dug lnga rnam dag dbyings su 'khrud:__nyon mongs dug lnga'i bag chags sbyangs:__bum gsang shes rab ye shes kyi:__dbang bzhi ma lus yongs rdzogs shog:__oM AHhU~M badz+ra gu ru pad+ma thod phreng rtsal badz+ra sa ma ya dzaHsid+d+hi pha la hU~M AH__lan gsum brjod cing /__spyi mgrin snying ga lte ba rnams su bzhag mthar bum chu sbyin/__de ltar bum pa spyi bor bzhag pa bum dbang /__mgrin par bzhag pa gsang dbang /__snying gar bzhag pa sher dbang /__lte bar bzhag cing tshig gi sgo nas brda don ngo sprad pa dbang bzhi pa ste/__mdor na bum pa la brten pa'i dbang bzhi yongs su rdzogs par thob pa yin no/__/snod pad+ma b+hany+dzar bcud chos sman sbyar bya'i bdud rtsi dang bla ma yab yum snyoms par zhugs pa'i kun+da byang chub kyi sems ro gcig tu sbyar ba gnas bzhir bzhag cing sbyin te b+han+d+ha'i bdud rtsi la brten nas dbang bzhi yongs rdzogs su bskur ba'i mos pa mdzod/__hU~M:__thod pa zlum po chos nyid dbyings kyi ngang :__'chi med bdud rtsi'i chang gis rab tu bkang :__sha lnga bdud rtsi rigs lnga ye shes lnga:__nyon mongs bdud 'joms rigs lnga sku lngar bskyed:__gnyis med ngang du chos nyid rol par bskyed:__ma bcos rang byung bde chen byang chub sems:__chos nyid bdud rtsi rnam rtog bdud las rgyal:__dbang bzhi ye shes rdzogs pa'i dbang thob shog:__thod phreng rtsal kyi sngags dang bcas te gnas bzhir gzhag cing bdud rtsi sbyin/__de ltar b+han+d+ha'i bdud rtsi gnas bzhir bzhag cing brda don ngo sprod pas/__b+han+d+ha zlum po la brten pa'i dbang bzhi rdzogs par thob pa yin no/__/rten sin+d+hU ra'i me long dang brten pa lha nyid sngags kyi gzugs su shar ba dang bcas pa gnas bzhir bzhag pas sin+d+hu ra'i maN+Dal la brten nas dbang bzhi yongs rdzogs su bskur ba'i mos pa mdzod/__hU~M:me long zlum po chos sku dri ma med:__dag cing gsal la rnyog pa med par dwangs:__gzugs brnyan gsal la ngos gzung 'dzin pa bral:__sems nyid rnam dag gsal la ma 'gags pa:__gzung 'dzin mtshan ma'i dngos po'i yul las 'das:__byang chub sems kyi cho 'phrul cir yang shar:__gsal stong ma 'gags dbyings nas gsal 'grib med:__dbang bzhi ye shes rdzogs pa'i dbang thob shog:__thod phreng rtsal brjod cing me long gnas bzhir bzhag la sin+d+hU ras thig le bya/___de ltar sin+d+hU ra'i me long gnas bzhir bzhag cing thig le bkod pa dang brda don ngo sprad pas me long zlum po la brten pa'i dbang bzhi rdzogs par thob pa yin no/__/gtor ma rin chen 'bar ba 'di nyid phyi ltar rin po che'i gzhal med khang mtshan nyid thams cad yongs su rdzogs pa'i dbus su/__nang ltar bla ma rtsa ba gsum gyi lha tshogs byin thibs se mngon sum du bzhugs pa gnas bzhir bzhag pas gtor ma la brten nas dbang bzhi yongs rdzogs su bskur ba'i mos pa mdzod/__hrIH__gtor snod b+han+d+ha'i gzhal yas chos kyi dbyings:__gtor ma 'dod yon rnam lnga ye shes lnga:__gu ru'i sku mchog bde chen 'du 'bral med:__rnam dag bdud rtsi bla ma mchod pa'i rdzas:__ma mo mkha' 'gro dbang du sdud pa dang :__phrin las rnam bzhis 'gro ba 'dul slad du:__sprul pa mang po las la 'gyed pa'i phyir:__dbang bzhi ye shes rdzogs pa'i dbang thob shog:__thod phreng rtsal gyi sngags bzla bzhin gnas bzhir bzhag cing mthar gtor zan kham gcig dngos grub kyi bdud rtsir sbyin/__de ltar gtor ma rin chen 'bar ba gnas bzhir bzhag cing dam rdzas dngos grub kyi tshul du sbyin pa dang brda don ngo sprad pas gtor ma zlum po la brten pa'i dbang bzhi rdzogs par thob pa yin no/__/dbang don gyi ye shes brtan par bya ba'i slad du gu ru'i sku 'bag 'di nyid ye shes kyi skur dngos su gsal ba gnas bzhir bzhag pas rig 'dzin bla ma'i snang brnyan la brten nas dbang bzhi yongs rdzogs su bskur ba'i mos pa mdzod/__AH__chos sku skye med ngang las ma g.yos kyang :__longs sku gsal la ma 'dres gu ru'i sku:__sprul sku sna tshogs thabs kyis sems can 'dul:__sku gsum ngang gis mnyam zhing ma 'dres gsal:__sngon tshe pad+ma khyed dang smon lam gcig:__da lta bdag kyang slob ma'i stangs bzung zhing :__srog gi phyir yang mi gtong bsgrub lags na:__ye shes dbang chen rab 'byams kun rdzogs shog:__thod phreng rtsal bzla zhing sku 'bag gnas bzhir gzhag__/de ltar sku 'bag gnas bzhir bzhag cing brda don ngo sprad pas/__gu ru rin po che'i sku 'bag la brten pa'i dbang bzhi rdzogs par thob pa yin no/__/de nas mtha' rten lha sku phyag rgya'i dbang bskur ba la/__slob dpon dkyil 'khor pa dang bcas pa rnams kyi sku las rang 'dra'i ye shes kyi sku gnyis pa byung /__khyed rang rnams la thim pas rgyud byin gyis brlabs pa'i mos pa mdzod/__tsakli so sor thogs la/__hU~M/__snang ba mtha' yas sprul pa'i sku/__/'khor 'das kun la dbang bsgyur ba/__/slob dpon pad+ma thod phreng gi__/dbang bskur byin rlabs stsal du gsol/__/oM AHhU~M badz+ra gu ru pad+ma thod phreng rtsal a b+hi Shiny+tsa hU~M/__hU~M/__pad+ma ge sar sdong po la/__/ya mtshan mchog gi dngos grub brnyes/__/rig 'dzin pad+ma 'byung gnas kyi/__/dbang bskur byin rlabs stsal du gsol/_/oM AHhU~M badz+ra gu ru pad+ma dz+nyA na a b+hi Shiny+tsa hU~M/__hU~M/__bsil ba tshal gyi dur khrod du/__/yon tan sna tshogs dngos grub brnyes/__/dge slong pad+ma saM b+ha wa'i/__/dbang bskur byin rlabs stsal du gsol/__/oM badz+ra gu ru pad+ma saM b+ha wa a=__hU~M/__rA ga ra ti'i gnas mchog tu/__/thams cad mkhyen pa'i dngos grub=__mkhas pa blo ldan mchog sred kyi/_/dbang bskur=__oM badz+ra gu ru dz+nyA na pradz+nyA a=__hU~M/__dga' ba tshal gyi dur khrod du/__/khams gsum dbang sdud dngos grub=__zil gnon pad+ma rgyal po yi/__/dbang bskur=__oM badz+ra gu ru pad+ma rA dza a=__hU~M/__so sa gling gi dur khrod du/__/'gro ba 'dul ba'i dngos grub brnyes/__/rnal 'byor nyi ma 'od zer gyi/__/dbang bskur=__oM badz+ra gu ru sUR+Ya sarba d+ha rma a=__hU~M/__za hor rgyal po'i yul dbus su/__/bdud 'dul drag po'i=__bcom ldan shAkya seng ge yi/__/dbang bskur=__oM badz+ra gu ru shAkya sid+ha a=__hU~M/__ma ga d+ha yi grong khyer du/__/mu stegs 'dul ba'i dngos=__gtum chen seng ge sgra sgrog gi__/dbang bskur=__oM badz+ra gu ru sid+ha gaN+De d+harma d+hA tu a=__hU~M/__stag tshang seng ge bsam 'grub tu/__/dregs pa tshar gcod dngos grub brnyes/__/'chol ba rdo rje gro lod kyi/__/dbang bskur byin rlabs stsal du gsol/__/oM badz+ra gu ru gro bo lod lo ka sarba ab+hi Shiny+tsa hU~M/__de ltar bla ma rdo rje 'chang gtso 'khor dgu po khyed rang rnams la thim pa'i rkyen gyis khyed rang rnams skad cig gis dpal chen rdo rje gro bo lod kyi skur gyur pa ni/__sku mdog dmar smug khro gtum bzod par dka' ba'i gzi byin can/__zhal gcig phyag gnyis rdo rje dang phur bu 'dzin cing khro bo 'chol pa'i cha lugs kyis stag chen grus ma'i steng na 'gying ba'i ye shes kyi sku nam mkha' gang bar gsal ba las khro bo'i tshogs dpag tu med pa spros te gdon bgegs thams cad tshar bcad par gyur pa'i mos pa dang bcas te cung zad re mnyam par 'jog mdzod/__de nyid brtan par bya ba'i slad du slob dpon dkyil 'khor pa dang bcas pas me tog gi char 'bebs shing shis pa brjod pa'i tshigs su bcad pas kyang mnga' gsol pa'i mos pa mdzod/__/ces brda sbyar la/__shis brjod rgyas bsdus gang rigs dang bcas me tog gi char dbab/__rol mo'i sgra sbyar/__mjug dam tshig khas blang /__gtang rag gi maN+Dal/__lus longs spyod dbul ba/__dge ba bsngo ba rnams spyi ltar byas la slob ma rnams rang gnas su gtang /__gsum pa rjes ni/__slob dpon gyis tshogs mchod nas brtsams te shis brjod kyi bar las gzhung bzhin bya'o//__//rtsa gsum kun 'dus pad+ma thod phreng rtsal/__/dgyes pa'i 'jug ngogs las 'ongs smin byed kyi/__/bdud rtsis mkha' khyab 'gro ba ma lus kun/__/'chi med sku bzhi'i lang tsho rgyas gyur cig/__/ces pa'ang mtsho skyes bla ma dgyes pa'i 'bangs rdo rje gzi brjid kyis kun mkhyen rgyal ba'i dbang po nyid kyi rdo rje'i gsung ji lta ba la mtshams sbyor bklags chog tu bkod pa sarba dA su shri yo b+ha ban+tu//__//