JKW-KABAB-02-KHA-024

🚧 This website is under continued development. We appreciate your patience!

Previous Text Back to Volume PageNext Text

Wylie title
Location	mkhyen brtse'i bka' babs Volume 2, Text 24, Pages (Folios to )
Author	[[ | ]]
Less details More details
Tertön	འཇམ་དབྱངས་མཁྱེན་བརྩེའི་དབང་པོ་ ('jam dbyangs mkhyen brtse'i dbang po)
Citation	'jam dbyangs mkhyen brtse'i dbang po. '. In Rdzong sar 'jam dbyangs mkhyen brtse'i dbang po'i bka' babs, Vol. 2: 127-1. Dkar mdzes bod rigs rang skyong khul sde dge rdzong: Rdzong sar khams bye'i slob gling, 2013.
Genre	Revelations - gter ma
Karchag page	JKW-KABAB-Volume-02-KHA-Karchag

Tibetan Text

Wylie

[edit]

༄༅། །ལམ་དུས་ཀྱི་གོ་དོན་རག་རིམ་འགའ་ཞིག་ཕལ་སྐད་དུ་གོ་བདེར་བྲིས་པ་བཞུགས།། སཱ་དྷུ་པ་ཤྱ་ཧོ། བླ་མ་ལ་ཕྱག་འཚལ་ལོ། དཔལ་ཀྱེ་རྡོ་རྗེའི་གཞི་བསྙེན་སྐབས། སྤྱིར་བཀླགས་པས་ཀུན་ཤེས་སོགས་ལས་ལྟ་རྟོགས་ཀྱིས་གོ་དོན་ཅི་ཤེས་གལ་ཆེ་བ་ལས་ཡི་གེར་བྲི་ཚོད་མ་བྱུང་ཡང༌། མདོར་བསྡུས་གོ་དོན་གལ་ཆེ་བ་འདི་ལྟར་ངེས་པར་བྱ་སྟེ། ད་རེས་རྙེད་དཀའ་ཞིང་རྙེད་ན་དོན་ཆེན་པོ་དང་ལྡན་པའི་དལ་འབྱོར་གྱི་མི་ལུས་རིན་པོ་ཆེ་འདི་ལྟ་བུ་ཐོབ་ཀྱང༌། འཆི་ངེས་ཤིང་ནམ་འཆི་ཆ་མེད། ཤི་བའི་ཚེ་ཆོས་མ་གཏོགས་གང་གིས་ཀྱང་མི་ཕན། འཆི་ནས་འཁོར་བ་མཐོ་དམན་གར་སྐྱེས་ཀྱང་སྡུག་བསྔལ་ཁོ་ནའི་རང་བཞིན་ལས་མ་འདས་པས། ད་རེས་སྡུག་བསྔལ་ཅན་གྱི་འཁོར་བ་དེ་ལས་ཅི་ནས་ཀྱང་ཐར་བ་ཞིག་བྱ། དེ་ཡང་རང་གཅིག་པུ་ཐར་བས་མི་ཕན། སེམས་ཅན་ཐམས་ཅད་ཕ་མ་མ་བྱས་པ་གཅིག་ཀྱང་མེད་པས། རང་གཞན་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ཐོབ་པར་བྱ་དགོས་པས། ད་རེས་སངས་རྒྱས་འགྲུབ་པའི་རྒྱུ་ཡི་གཙོ་བོ་དཔལ་ཀྱེ་རྡོ་རྗེའི་བསྙེན་སྒྲུབ་ཟབ་མོ་བགྱི་སྙམ་པ་ཐུན་ཐམས་ཅད་ཀྱི་མགོར་ཡང་ཡང་བསམ་པ་གལ་ཆེ། དེ་ནས་སྐྱབས་སུ་འགྲོ་བའི་སྐབས། གནས་ཁང་དང་ས་ཕྱོགས་ཐམས་ཅད་བདེ་བ་ཅན་ལྟ་བུ་དག་པའི་ཞིང་ཁམས་སུ་གསལ་བཏབ། རང་གི་མདུན་དུ་དཔག་བསམ་གྱི་ལྗོན་ཤིང་ཡལ་ག་དང༌། ལོ་འདབ་དང༌། མེ་ཏོག་འབྲས་བུ་ཕུན་སུམ་ཚོགས་པ་དབུས་སུ་རྩ་བའི་བླ་མ་དང་ཀྱཻ་རྡོ་རྗེ་དབྱེར་མེད་པ་ལྷ་མོ་བརྒྱད་ཀྱིས་བསྐོར་བ། དེའི་རྒྱབ་ཏུ་ཆོས་དཀོན་མཆོག་གླེགས་བམ་བྲག་རི་བརྩེགས་པ་ལྟ་བུ་གསལ་བཏབ། དེ་ཡང་དབུས་ཀྱི་བླ་མ་དང་དབྱེར་མེད་པ་ནི་སངས་རྒྱས་དཀོན་མཆོག །རྒྱབ་ཀྱི་པུསྟི་ཆོས་དཀོན་མཆོག །འཁོར་གྱི་ལྷ་མོ་བརྒྱད་དགེ་འདུན་དཀོན་མཆོག་སྟེ། དཀོན་མཆོག་ཐམས་ཅད་འདུས་པའི་ངོ་བོ་ཡིན་སྙམ་དུ་མོས་པ་བྱ། དེའི་མདུན་དུ་རང་དང༌། རང་གི་ཕ་མ་གཉིས་ཀྱིས་ཐོག་དྲངས་པའི་སེམས་ཅན་ཐམས་ཅད་འཁོད་ནས་སངས་རྒྱས་མ་ཐོབ་བར་དུ་ཅི་མཛད་དཀོན་མཆོག་གསུམ་པོ་ཁྱེད་མཁྱེན་སྙམ་པའི་མོས་གུས་གསོལ་འདེབས་ཀྱི་ངང་ནས་སྐྱབས་འགྲོ་ཅི་ནུས་དང༌། མཐར་སྐྱབས་གསོལ་བྱས་པས། འཁོར་དགེ་འདུན་དཀོན་མཆོག་འོད་དཀར་པོར་ཞུ་ནས་རང་དང་སེམས་ཅན་ཐམས་ཅད་ཀྱི་སྤྱི་བོར་ཐིམ། ཆོས་འོད་དམར་པོར་ཞུ་ནས་མགྲིན་པར་ཐིམ། གཙོ་བོ་ཀྱཻ་རྡོ་རྗེ་འོད་སྔོན་པོར་ཞུ་ནས་སྙིང་གར་ཐིམ་པས་ལུས་ངག་ཡིད་གསུམ་དཀོན་མཆོག་གསུམ་གྱི་ངོ་བོར་བྱིན་གྱིས་བརླབས་སོང་སྙམ་པའི་མོས་པ་བྱ། སེམས་བསྐྱེད་སྐབས། སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པའི་ཆེད་དུ་བདག་གི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ལམ་དུས་ཀྱི་ཉམས་ལེན་བྱའོ། །སྙམས་པ་བྱ། རྡོར་སེམས་སྐབས། རང་གི་སྤྱི་བོར་རྡོར་སེམས་བསྒོམ་ཚུལ་སོགས་ངག་འདོན་ལྟར་ལ། བཟླས་པའི་སྐབས། རྡོར་སེམས་ཡབ་ཡུམ་གྱི་སྐུ་ལས་བདུད་རྩིའི་རྒྱུན་འོ་མའི་མདོག་ལྟ་བུ་དཔག་ཏུ་མེད་པ་བྱུང༌། རང་གི་ཚངས་བུག་ནས་ཞུགས། ལུས་ཀྱི་ནང་ཐམས་ཅད་གང༌། ནད་ཐམས་ཅད་རྣག་ཁྲག །གདོན་ཐམས་ཅད་སྲོག་ཆགས། སྡིག་སྒྲིབ་ཐམས་ཅད་དུད་ཁུ་དང་སོལ་ཁུའི་རྣམ་པར་སྐང་མཐིལ་གཉིས་དང༌། གཤང་ལམ་དང༌། ཆུ་ལམ་རྣམས་ནས་ཕྱིར་ཐོན་པས་རང་གི་རྒྱུད་ལ་སྔར་ཡོད་པའི་ནད་གདོན་སྡིག་སྒྲིབ་ཉེས་ལྟུང་ཐམས་ཅད་ལྷག་མེད་དུ་དག །དེ་ནས་ལུས་ཀྱི་ནང་ཐམས་ཅད་བདུད་རྩི་དཀར་པོས་ཤེལ་བུམ་འོ་མས་གང་བ་ལྟར་སྐྱ་མེར་གྱིས་ཁེངས་པས་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བྱིན་རླབས་ཐམས་ཅད་རང་གི་རྒྱུད་ལ་ཞུགས་པར་བསམས་ལ། དེ་ལྟ་བུའི་དམིགས་པ་ཡང་ནས་ཡང་དུ་མ་ཡེངས་པའི་ངང་ཡིག་བརྒྱ་བཟླ། ཚོགས་བསགས་སྐབས། རྡོར་སེམས་རང་ལ་ཐིམ་པའི་རྐྱེན་གྱིས་རང་སྐད་ཅིག་གིས་ཀྱེ་རྡོ་རྗེའི་སྐུར་གྱུར། དེའི་ཐུགས་ཀ་ནས་འོད་ཟེར་དམར་པོ་ལྕགས་ཀྱུ་ལྟ་བུ་འཕྲོས་པས་ཚོགས་ཞིང་མདུན་གྱི་ནམ་མཁར་སྤྱན་དྲངས། དེ་ནས་རང་གི་ལུས་གྲངས་མེད་པར་སྤྲུལ་ནས་ཕྱག་འཚལ། སྙིང་ག་ནས་ལྷ་མོ་བརྒྱད་སྤྲུལ་ནས་མཆོད་པ་ཕུལ། རྒྱུན་བཤགས་དང་སྡོམ་བཟུང་ལན་གསུམ་བྱས་པས་རང་གི་རྒྱུད་ལ་སྔར་ཐོབ་པའི་དམ་ཚིག་དང་སྡོམ་པ་ཐམས་ཅད་གོང་འཕེལ་དུ་བྱས་པར་བསམས། ཚད་མེད་བཞི་བསྒོམ་སྐབས། རང་གི་སྙིང་ག་ནས་འོད་ཟེར་སྔོན་པོའི་རྩེ་ལ་པུཀྐ་སཱི། དཀར་པོའི་རྩེ་ལ་རི་ཁྲོད་མ། དམར་པོའི་རྩེ་ལ་གདོལ་པ་མོ། འོད་སྣ་ལྔའི་རྩེ་ལ་གཡུང་མོ་རྣམས་འཕྲོས་པས། སེམས་ཅན་ཐམས་ཅད་ཚད་མེད་བཞིའི་ངོ་བོ་ལྷ་མོ་བཞིའི་གོ་འཕང་ལ་བཀོད་པར་བསམས། སྲུང་འཁོར་སྐབས། ཤཱུ་ནྱ་ཏའི་སྔགས་བརྗོད་པ་དང་མཉམ་དུ་ཆོས་ཐམས་ཅད་རང་གི་སེམས་སུ་ཐག་བཅད། སེམས་དེ་ཡང་སྒྱུ་མ་ལྟ་བུ་རང་བཞིན་མ་གྲུབ་ཅིང༌། བློ་ལས་འདས་པར་བསམས་ལ་དེའི་ངང་དུ་མཉམ་པར་བཞག །དེ་ནས་དེའི་ངང་ལས་སྣ་ཚོགས་རྡོ་རྗེའི་གུར་གཞུང་ལྟར་གསལ་གཏབ་པ་སྟེ། དེ་ཡང་དབྱིབས་ལྕགས་རྨོག་ཁ་སྦུབ་པ་ལྟ་བུ་བར་མཚམས་ནས་བསྐལ་པའི་རླུང་ཡང་མི་ཐར་བར་བསམ། དེའི་ནང་དུ་ཐུན་མོང་མ་ཡིན་པའི་སྲུང་འཁོར་འཁོར་ལོ་སེར་པོ་རྩིབས་བཅུ་པ་སིལ་སྙན་ཁ་སྦྱར་བ་ལྟ་བུའི་ནང་དུ་ཁྲོ་བོ་བཅུ་གཅིག་གཞུང་ལྟར་གསལ་གདབ། དབང་བསྐུར་རྒྱས་གདབ་པ་སོགས་གྲུབ་ནས། རང་ཉིད་གཙུག་ཏོར་འཁོར་ལོས་སྒྱུར་བར་གསལ་བའི་ཐུགས་ཀའི་ཧཱུྃ་ལས་འོད་ཟེར་འཕྲོས་པས་བ་སྤུའི་བུ་ག་ཐམས་ཅད་རྡོ་རྗེ་ཕྲ་མོ་དཔག་ཏུ་མེད་པས་གཏམས་པའི་མཐར། ཐུགས་ཀའི་ཧཱུྃ་དེ་རྡོ་རྗེ་སྔོན་པོ་རྩེ་ལྔ་པར་གྱུར་པའི་ལྟེ་བའི་ནང་དུ་རང་སེམས་ཀྱི་ངོ་བོ་ཡི་གེ་ཧཱུྃ་མཐིང་ག །ཧཱུྃ་དེའི་ཀླད་ཀོར་གྱི་ནང་དུ་རྩ་བའི་བླ་མ་མི་བསྐྱོད་པའི་རྣམ་པ་ཅན། གཞན་སྲུང་དགོས་གང་ཡོད་ཐམས་ཅད་ཧཱུྃ་གི་མཐའ་སྐོར་དུ་ཡོད་པ་གསལ་བཏབ་ནས་དེ་དངོས་ཡིན་སྙམ་པའི་མོས་པ་བྱ། ཧཱུྃ་ལན་གསུམ་བརྗོད་པའི་དང་པོའི་ཚེ་བསྲུང་བྱ་རྣམས་གསལ་བཏབ། གཉིས་པའི་ཚེ་འཁོར་ལོའི་རྩིབས་ལ་བར་ཆད་བྱེད་པའི་དགྲ་བགེགས་ཐམས་ཅད་བཀུག །གསུམ་པའི་ཚེ་འཁོར་ལོ་གཡོན་དུ་འཁོར་བས་བར་ཆད་ཐམས་ཅད་རྡུལ་དུ་བརླག་པར་བསམས་ལ་སྔགས་བཟླ། ༈ །དེ་ནས་དངོས་གཞི་ལ། གཞལ་ཡས་ཁང་བསྐྱེད་པ། རྒྱུ་རྡོ་རྗེ་འཛིན་པ་བསྐྱེད་པ། འབྲས་བུ་རྡོ་རྗེ་འཛིན་པ་བསྐྱེད་པ། ཡེ་ཤེས་པ་དགུག་གཞུག་སོགས་ངག་འདོན་ལྟར་གསལ་ཅི་ཐེབས་བྱ། ཡེ་ཤེས་པ་རང་ལ་ཐིམ་པའི་རྐྱེན་གྱིས་ལུས་དཀྱིལ་གསལ་གདབ། དེ་ཡང་བསྐྱེད་རིམ་གང་བསྒོམས་ཀྱང་རྣམ་པ་གསལ་བ་བར་སྣང་དུ་འཇའ་ཚོན་ཤར་བ་ལྟ་བུ། སྣང་བཞིན་དུ་སྟོང་པ། སྟོང་བཞིན་དུ་སྣང་བ། སྣང་སྟོང་ཟུང་འཇུག་རང་བབས་ཀྱིས་གསལ་ཅི་ཐེབས་བྱ། མཐར་གསལ་ཐེབས་སོང་སྙམ་པའི་དགའ་སྤྲོ་དང༌། མ་ཐེབས་སོང་སྙམ་པའི་དོགས་པ་སོགས་རེ་དོགས་གང་ཡང་མི་བྱ་བར། གསལ་ཐེབ་རུང་མ་ཐེབ་རུང་ལྷ་གང་གསལ་གདབ་པ་དེ་དངོས་ཡིན་སྙམ་པའི་མོས་པ་བརྟན་པོ་བྱ་བ་གལ་ཆེ། དེ་ནས་དབང་བླང་བའི་སྐབས། རང་གི་སྙིང་ག་ནས་འོད་ཟེར་འཕྲོས་པས་རྩ་བའི་བླ་མ་མི་བསྐྱོད་པའི་མདུན་དུ་དབང་རྫས་རྣམས་ཀྱང་དངོས་སུ་བཤམས་ཡོད་པའི་མོས་པ་བྱ། དབང་བླང་བའི་ཚེ་བླ་མའི་ཐུགས་ཀ་ནས་ལས་ཀྱི་རྡོ་རྗེ་ཧེ་རུ་ཀ་ཕྱག་གཉིས་པའི་རྣམ་པས་དབང་རྫས་རྣམས་གཏད། བླ་མས་དབང་གི་ཚིག་གསུང་ཞིང་དབང་བསྐུར་བས་དབང་དེ་དང་དེ་རྣམས་ཐོབ་སོང་སྙམ་པའི་མོས་པ་བརྟན་པོ་གལ་ཆེ། དེ་ནས་བདུད་རྩི་བྱིན་གྱིས་བརླབས་ལ་མྱོང་བས་མགྲིན་པའི་རྩ་ཁམས་བརྒྱུད་ལུས་ཀྱི་རྩ་ཐམས་ཅད་ལ་ཁྱབ་པས་ཟག་མེད་ཀྱི་བདེ་བ་སྐྱེས་པར་བསམ། རང་གི་སྙིང་ག་ནས་ལྷ་མོ་བརྒྱད་སྤྲོས་ནས། དཀར་མོ་རི་དྭགས་སོགས་ཀྱིས་རང་ཉིད་ལ་མཆོད། ཁྱོད་ནི་རྣལ་འབྱོར་མ་སོགས་ཀྱིས་བསྟོད་པར་བསམ། དག་པ་དྲན་པ་གཞུང་ལྟར་ལ། མདོར་བསྡུ་ན། རང་གིས་གསལ་བཏབ་པའི་དཀྱིལ་འཁོར་ཐམས་ཅད་སངས་རྒྱས་ཀྱི་ཡེ་ཤེས་གང་ལ་གང་འདུལ་དུ་ཤར་བ་ཡིན་སྙམ་པའི་མོས་པ་བྱ། བཟླས་པའི་སྐབས། ཕྲེང་བ་བྱིན་གྱིས་བརླབས་ནས། ཡུམ་གྱི་ཐུགས་ཀའི་ཨྃ་ཡིག་ལས་སྔགས་ཕྲེང་བོད་ཡིག་དབུ་ཅན་ཕྲེང་བ་ལྟ་བུ་ནར་གྱིས་བྱུང༌། ཡབ་ཀྱི་ཞལ་དུ་ཞུགས། ཡབ་ཀྱི་ཐུགས་ཀའི་ཧཱུྃ་ལ་ཐིམ། ཡང་ཧཱུྃ་ལས་སྔགས་ཕྲེང་སྔར་བཞིན་བྱུང༌། ཡབ་ཀྱི་གསང་གནས་ནས་ཡུམ་གྱི་གསང་གནས་སུ་ཞུགས། ཡུམ་གྱི་ཐུགས་ཀའི་ཨྃ་ལ་ཐིམ། ཡང་ཨྃ་ལས་སྔགས་ཕྲེང་སྔར་བཞིན་བྱུང་ནས་རྒྱུན་མི་འཆད་པར་འཁོར་བར་བསམས་ལ་བཟླ། ཡང་སྔགས་ཕྲེང་ལས་འོད་ཟེར་དཀར་པོ་འཕྲོས། ལུས་ཀྱི་ནང་ཐམས་ཅད་ནད་གདོན་སྡིག་སྒྲིབ་ཐམས་ཅད་ཞི་བར་བསམས་ལ་བཟླ། དེ་བཞིན་འོད་ཟེར་སེར་པོ་འཕྲོས་པས་ཚེ་བསོད་དཔལ་འབྱོར་ཤེས་རབ་ལ་སོགས་པ་རྒྱས་པར་བསམ། འོད་ཟེར་དམར་པོས་སྣོད་བཅུད་ཐམས་ཅད་དབང་དུ་བསྡུས། འོད་ཟེར་སྔོན་པོས་དགྲ་བགེགས་འབྱུང་པོ་ཐམས་ཅད་ཚར་བཅད། འོད་ཟེར་སྣ་ཚོགས་ཀྱིས་གང་འདོད་པའི་ལས་ཐམས་ཅད་འགྲུབ་པར་བསམས་ལ་བཟླ། ཡང་འོད་ཟེར་དཀར་པོ་ཕྱོགས་བཅུར་འཕྲོས་པའི་རྩེ་ལས་མཆོད་པའི་སྤྲིན་ཕུང་བསམ་གྱིས་མི་ཁྱབ་པ་འཕྲོས། སངས་རྒྱས་ཐམས་ཅད་ལ་མཉེས་པའི་མཆོད་པ་ཕུལ། དེ་དག་གི་བྱིན་རླབས་དང་དངོས་གྲུབ་ཐམས་ཅད་ཚུར་འདུས་རང་ལ་ཐིམ་པར་བསམ། ཡང་འོད་ཟེར་འཕྲོས། སེམས་ཅན་ཐམས་ཅད་ལ་ཕོག་པས་དེ་ཐམས་ཅད་ཀྱི་སྡིག་སྒྲིབ་བག་ཆགས་དང་བཅས་པ་བ་མོ་ལ་ཉི་མའི་ཟེར་གྱིས་ཕོག་པ་ལྟར་སངས་ཀྱིས་དག་པར་བསམས་ལ་བཟླ། ཡང་སྐབས་རེར། འཁོར་འདས་སྣོད་བཅུད་ཐམས་ཅད་དཔལ་ཀྱཻ་རྡོ་རྗེའི་དཀྱིལ་འཁོར་གྱི་ལྷ་ཚོགས་མེ་ལོང་ནང་དུ་གཟུགས་བརྙན་ཤར་བ་བཞིན་གསལ་བཏབ་ལ་བཟླ། སྐབས་རེར་རང་དང་སྣོད་བཅུད་ལྷར་གསལ་བ་སོགས་མདོར་ན་སྒྲ་སྐད་ཐམས་ཅད་དཔལ་ཀྱཻ་རྡོ་རྗེའི་སྔགས་ཀྱི་སྒྲ་འུར་དིར་གྱིས་སྒྲོག་པར་བསམས་ལ་བཟླ། སྐབས་རེར་རང་སེམས་གསལ་སྟོང་ཟུང་འཇུག་མ་བཅོས་པའི་ངང་དུ་ལྷོད་ཀྱིས་གློད་ལ་བཟླ། མདོར་ན་ཡིད་གཞན་ལ་མ་ཡེངས་པའི་ངང་ནས་བཟླས་པ་བྱ་བ་གལ་ཆེ། ཁ་ཟས་ཟ་བའི་ཚེ། ཨོཾ་ཨཱཿཧཱུྃ་གིས་བདུད་རྩིར་བྱིན་གྱིས་བརླབས་ལ་ལུས་དཀྱིལ་གྱི་ལྷ་ཚོགས་མཆོད་པའི་མོས་པས་བཟའ་བཏུང་བྱ། ནུབ་མོ་ཉལ་བའི་ཚེ། དཀྱིལ་འཁོར་རིམ་གྱིས་བསྡུས་ལ་སེམས་མ་བཅོས་པའི་ངང་དུ་གཉིད་དུ་འགྲོ་བར་བྱ། ནངས་པར་ལྡང་བའི་ཚེ། རང་སྐད་ཅིག་གིས་དཔལ་ཀྱཻ་རྡོ་རྗེ་གསལ་བའི་ངང་དུ་ལང༌། དེ་ནས་མདུན་གྱི་ནམ་མཁར་དབང་ལྷ་སྤྱན་དྲངས་ལ། བུམ་པའི་ཆུས་ཁྲུས་མཛད་པར་མོས་ལ། ཡིག་བརྒྱ་བཟླ་བཞིན་པས་བུམ་ཆུས་ཁ་བཤལ། དེ་ནས་སྐྱབས་འགྲོ་སོགས་ལ་རིམ་པར་འཇུག །དུས་དང་རྣམ་པ་ཐམས་ཅད་དུ་འཁོར་བ་ལ་ངེས་འབྱུང༌། བླ་མ་ལ་དད་པ། སེམས་ཅན་ལ་སྙིང་རྗེ། ནམ་འཆི་ཆ་མེད་རྣམས་བསམས་ནས། ཚེ་ཕྱི་མའི་དོན་ཁོ་ནར་ཉམས་ལེན་ལ་རྩེ་གཅིག་ཏུ་འབད་འཚལ། དེ་ལྟར་གང་དྲན་ཟིན་བྲིས་འདིས་ཀྱང་ལས་དང་པོ་པ་རྣམས་ལ་ཕན་ཐོག་པར་གྱུར་ཅིག །ཅེས་པའང་འཇམ་དབྱངས་མཁྱེན་བརྩེའི་དབང་པོས་སོ།། །།

[edit]

@#/__/lam dus kyi go don rag rim 'ga' zhig phal skad du go bder bris pa bzhugs//__sA d+hu pa sh+ya ho/__bla ma la phyag 'tshal lo/__dpal kye rdo rje'i gzhi bsnyen skabs/__spyir bklags pas kun shes sogs las lta rtogs kyis go don ci shes gal che ba las yi ger bri tshod ma byung yang*/__mdor bsdus go don gal che ba 'di ltar nges par bya ste/__da res rnyed dka' zhing rnyed na don chen po dang ldan pa'i dal 'byor gyi mi lus rin po che 'di lta bu thob kyang*/__'chi nges shing nam 'chi cha med/__shi ba'i tshe chos ma gtogs gang gis kyang mi phan/__'chi nas 'khor ba mtho dman gar skyes kyang sdug bsngal kho na'i rang bzhin las ma 'das pas/__da res sdug bsngal can gyi 'khor ba de las ci nas kyang thar ba zhig bya/__de yang rang gcig pu thar bas mi phan/__sems can thams cad pha ma ma byas pa gcig kyang med pas/__rang gzhan sems can thams cad sangs rgyas kyi go 'phang thob par bya dgos pas/__da res sangs rgyas 'grub pa'i rgyu yi gtso bo dpal kye rdo rje'i bsnyen sgrub zab mo bgyi snyam pa thun thams cad kyi mgor yang yang bsam pa gal che/__de nas skyabs su 'gro ba'i skabs/__gnas khang dang sa phyogs thams cad bde ba can lta bu dag pa'i zhing khams su gsal btab/__rang gi mdun du dpag bsam gyi ljon shing yal ga dang*/__lo 'dab dang*/__me tog 'bras bu phun sum tshogs pa dbus su rtsa ba'i bla ma dang kyai rdo rje dbyer med pa lha mo brgyad kyis bskor ba/__de'i rgyab tu chos dkon mchog glegs bam brag ri brtsegs pa lta bu gsal btab/__de yang dbus kyi bla ma dang dbyer med pa ni sangs rgyas dkon mchog__/rgyab kyi pusti chos dkon mchog__/'khor gyi lha mo brgyad dge 'dun dkon mchog ste/__dkon mchog thams cad 'dus pa'i ngo bo yin snyam du mos pa bya/__de'i mdun du rang dang*/__rang gi pha ma gnyis kyis thog drangs pa'i sems can thams cad 'khod nas sangs rgyas ma thob bar du ci mdzad dkon mchog gsum po khyed mkhyen snyam pa'i mos gus gsol 'debs kyi ngang nas skyabs 'gro ci nus dang*/__mthar skyabs gsol byas pas/__'khor dge 'dun dkon mchog 'od dkar por zhu nas rang dang sems can thams cad kyi spyi bor thim/__chos 'od dmar por zhu nas mgrin par thim/__gtso bo kyai rdo rje 'od sngon por zhu nas snying gar thim pas lus ngag yid gsum dkon mchog gsum gyi ngo bor byin gyis brlabs song snyam pa'i mos pa bya/__sems bskyed skabs/__sems can thams cad sangs rgyas kyi go 'phang la 'god pa'i ched du bdag gi sangs rgyas kyi go 'phang thob par bya/__de'i ched du lam dus kyi nyams len bya'o/__/snyams pa bya/__rdor sems skabs/__rang gi spyi bor rdor sems bsgom tshul sogs ngag 'don ltar la/__bzlas pa'i skabs/__rdor sems yab yum gyi sku las bdud rtsi'i rgyun 'o ma'i mdog lta bu dpag tu med pa byung*/__rang gi tshangs bug nas zhugs/__lus kyi nang thams cad gang*/__nad thams cad rnag khrag__/gdon thams cad srog chags/__sdig sgrib thams cad dud khu dang sol khu'i rnam par skang mthil gnyis dang*/__gshang lam dang*/__chu lam rnams nas phyir thon pas rang gi rgyud la sngar yod pa'i nad gdon sdig sgrib nyes ltung thams cad lhag med du dag__/de nas lus kyi nang thams cad bdud rtsi dkar pos shel bum 'o mas gang ba ltar skya mer gyis khengs pas rdo rje sems dpa'i sku gsung thugs kyi byin rlabs thams cad rang gi rgyud la zhugs par bsams la/__de lta bu'i dmigs pa yang nas yang du ma yengs pa'i ngang yig brgya bzla/__tshogs bsags skabs/__rdor sems rang la thim pa'i rkyen gyis rang skad cig gis kye rdo rje'i skur gyur/__de'i thugs ka nas 'od zer dmar po lcags kyu lta bu 'phros pas tshogs zhing mdun gyi nam mkhar spyan drangs/__de nas rang gi lus grangs med par sprul nas phyag 'tshal/__snying ga nas lha mo brgyad sprul nas mchod pa phul/__rgyun bshags dang sdom bzung lan gsum byas pas rang gi rgyud la sngar thob pa'i dam tshig dang sdom pa thams cad gong 'phel du byas par bsams/__tshad med bzhi bsgom skabs/__rang gi snying ga nas 'od zer sngon po'i rtse la puk+ka sI/__dkar po'i rtse la ri khrod ma/__dmar po'i rtse la gdol pa mo/__'od sna lnga'i rtse la g.yung mo rnams 'phros pas/__sems can thams cad tshad med bzhi'i ngo bo lha mo bzhi'i go 'phang la bkod par bsams/__srung 'khor skabs/__shU n+ya ta'i sngags brjod pa dang mnyam du chos thams cad rang gi sems su thag bcad/__sems de yang sgyu ma lta bu rang bzhin ma grub cing*/__blo las 'das par bsams la de'i ngang du mnyam par bzhag__/de nas de'i ngang las sna tshogs rdo rje'i gur gzhung ltar gsal gtab pa ste/__de yang dbyibs lcags rmog kha sbub pa lta bu bar mtshams nas bskal pa'i rlung yang mi thar bar bsam/__de'i nang du thun mong ma yin pa'i srung 'khor 'khor lo ser po rtsibs bcu pa sil snyan kha sbyar ba lta bu'i nang du khro bo bcu gcig gzhung ltar gsal gdab/__dbang bskur rgyas gdab pa sogs grub nas/__rang nyid gtsug tor 'khor los sgyur bar gsal ba'i thugs ka'i hU~M las 'od zer 'phros pas ba spu'i bu ga thams cad rdo rje phra mo dpag tu med pas gtams pa'i mthar/__thugs ka'i hU~M de rdo rje sngon po rtse lnga par gyur pa'i lte ba'i nang du rang sems kyi ngo bo yi ge hU~M mthing ga__/hU~M de'i klad kor gyi nang du rtsa ba'i bla ma mi bskyod pa'i rnam pa can/__gzhan srung dgos gang yod thams cad hU~M gi mtha' skor du yod pa gsal btab nas de dngos yin snyam pa'i mos pa bya/__hU~M lan gsum brjod pa'i dang po'i tshe bsrung bya rnams gsal btab/__gnyis pa'i tshe 'khor lo'i rtsibs la bar chad byed pa'i dgra bgegs thams cad bkug__/gsum pa'i tshe 'khor lo g.yon du 'khor bas bar chad thams cad rdul du brlag par bsams la sngags bzla/__!__/de nas dngos gzhi la/__gzhal yas khang bskyed pa/__rgyu rdo rje 'dzin pa bskyed pa/__'bras bu rdo rje 'dzin pa bskyed pa/__ye shes pa dgug gzhug sogs ngag 'don ltar gsal ci thebs bya/__ye shes pa rang la thim pa'i rkyen gyis lus dkyil gsal gdab/__de yang bskyed rim gang bsgoms kyang rnam pa gsal ba bar snang du 'ja' tshon shar ba lta bu/__snang bzhin du stong pa/__stong bzhin du snang ba/__snang stong zung 'jug rang babs kyis gsal ci thebs bya/__mthar gsal thebs song snyam pa'i dga' spro dang*/__ma thebs song snyam pa'i dogs pa sogs re dogs gang yang mi bya bar/__gsal theb rung ma theb rung lha gang gsal gdab pa de dngos yin snyam pa'i mos pa brtan po bya ba gal che/__de nas dbang blang ba'i skabs/__rang gi snying ga nas 'od zer 'phros pas rtsa ba'i bla ma mi bskyod pa'i mdun du dbang rdzas rnams kyang dngos su bshams yod pa'i mos pa bya/__dbang blang ba'i tshe bla ma'i thugs ka nas las kyi rdo rje he ru ka phyag gnyis pa'i rnam pas dbang rdzas rnams gtad/__bla mas dbang gi tshig gsung zhing dbang bskur bas dbang de dang de rnams thob song snyam pa'i mos pa brtan po gal che/__de nas bdud rtsi byin gyis brlabs la myong bas mgrin pa'i rtsa khams brgyud lus kyi rtsa thams cad la khyab pas zag med kyi bde ba skyes par bsam/__rang gi snying ga nas lha mo brgyad spros nas/__dkar mo ri dwags sogs kyis rang nyid la mchod/__khyod ni rnal 'byor ma sogs kyis bstod par bsam/__dag pa dran pa gzhung ltar la/__mdor bsdu na/__rang gis gsal btab pa'i dkyil 'khor thams cad sangs rgyas kyi ye shes gang la gang 'dul du shar ba yin snyam pa'i mos pa bya/__bzlas pa'i skabs/__phreng ba byin gyis brlabs nas/__yum gyi thugs ka'i a~M yig las sngags phreng bod yig dbu can phreng ba lta bu nar gyis byung*/__yab kyi zhal du zhugs/__yab kyi thugs ka'i hU~M la thim/__yang hU~M las sngags phreng sngar bzhin byung*/__yab kyi gsang gnas nas yum gyi gsang gnas su zhugs/__yum gyi thugs ka'i a~M la thim/__yang a~M las sngags phreng sngar bzhin byung nas rgyun mi 'chad par 'khor bar bsams la bzla/__yang sngags phreng las 'od zer dkar po 'phros/__lus kyi nang thams cad nad gdon sdig sgrib thams cad zhi bar bsams la bzla/__de bzhin 'od zer ser po 'phros pas tshe bsod dpal 'byor shes rab la sogs pa rgyas par bsam/__'od zer dmar pos snod bcud thams cad dbang du bsdus/__'od zer sngon pos dgra bgegs 'byung po thams cad tshar bcad/__'od zer sna tshogs kyis gang 'dod pa'i las thams cad 'grub par bsams la bzla/__yang 'od zer dkar po phyogs bcur 'phros pa'i rtse las mchod pa'i sprin phung bsam gyis mi khyab pa 'phros/__sangs rgyas thams cad la mnyes pa'i mchod pa phul/__de dag gi byin rlabs dang dngos grub thams cad tshur 'dus rang la thim par bsam/__yang 'od zer 'phros/__sems can thams cad la phog pas de thams cad kyi sdig sgrib bag chags dang bcas pa ba mo la nyi ma'i zer gyis phog pa ltar sangs kyis dag par bsams la bzla/__yang skabs rer/__'khor 'das snod bcud thams cad dpal kyai rdo rje'i dkyil 'khor gyi lha tshogs me long nang du gzugs brnyan shar ba bzhin gsal btab la bzla/__skabs rer rang dang snod bcud lhar gsal ba sogs mdor na sgra skad thams cad dpal kyai rdo rje'i sngags kyi sgra 'ur dir gyis sgrog par bsams la bzla/__skabs rer rang sems gsal stong zung 'jug ma bcos pa'i ngang du lhod kyis glod la bzla/__mdor na yid gzhan la ma yengs pa'i ngang nas bzlas pa bya ba gal che/__kha zas za ba'i tshe/__oM AHhU~M gis bdud rtsir byin gyis brlabs la lus dkyil gyi lha tshogs mchod pa'i mos pas bza' btung bya/__nub mo nyal ba'i tshe/__dkyil 'khor rim gyis bsdus la sems ma bcos pa'i ngang du gnyid du 'gro bar bya/__nangs par ldang ba'i tshe/__rang skad cig gis dpal kyai rdo rje gsal ba'i ngang du lang*/__de nas mdun gyi nam mkhar dbang lha spyan drangs la/__bum pa'i chus khrus mdzad par mos la/__yig brgya bzla bzhin pas bum chus kha bshal/__de nas skyabs 'gro sogs la rim par 'jug__/dus dang rnam pa thams cad du 'khor ba la nges 'byung*/__bla ma la dad pa/__sems can la snying rje/__nam 'chi cha med rnams bsams nas/__tshe phyi ma'i don kho nar nyams len la rtse gcig tu 'bad 'tshal/__de ltar gang dran zin bris 'dis kyang las dang po pa rnams la phan thog par gyur cig__/ces pa'ang 'jam dbyangs mkhyen brtse'i dbang pos so//__//